Amharca Meal — Afrika Akademisi — Nebe' 78:1 – Nas 114:6

1. ከምን ነገር ይጠያየቃሉ?

2. ከታላቁ ዜና (ቁርኣን) ይጠያየቃሉ።

3. ስለዚያ እነርሱ በእርሱ ላይ ስለተለያዩበት (ስለተወዛገቡበት)::

4. ጉዳዩ እነርሱ እንደሚሉት አይደለም:: (ትክክለኛውን) ወደ ፊት ያውቃሉ::

5. ከዚያም ይከልከሉ፤ (ትክክለኛውን) ወደ ፊት ያውቃሉ።

6. ምድርን ምንጣፍ አላደርግንምን?

7. ጋራዎችንም ችካሎች (አላደረግንምን)?

8. ጥንዶች አድርገንም ፈጠርናችሁ።

9. እንቅልፋችሁንም እረፍት አደረግን።

10. ሌሊቱንም ልባስ አደረግን::

11. ቀኑንም ለኑሮ መስሪያ (ለጉዳይ መከወኛ) አደረግን።

12. ከበላያቸሁም ሰባት ብርቱዎችን (ሰማያት) ገነባን።

13. አንጸባራቂ ብርሃንንም አደርግንላችሁ።

14. ከአረገዙት ደመናዎችም የሚንቧቧ ውሃን አወረድን::

15.በእርሱ እህልንና ቅጠላ ቅጠልን፤ እናወጣ ዘንድ(አወረድን)።

16. የተቆላለፉ አትክልቶችንም ::

17. (በህዝቦች መካከልም) የመለያው ቀን የተወሰነ ጊዜ ነው።

18. (ይሀዉም) በቀንዱ በሚነፋበትና በቡድን በቡድን ሆናችሁም በምትመጡበት ቀን ነው።

19. ሰማይም በምትከፈትና ባለ ብዙ ደጃፎችም በምትሆንበት ቀን፤

20. ጋራዎችም በሚናዱበትና እንደ ሲሪብዶም በሚሆንበትም ቀን ነው።

21. ገሀነም (ለከሓዲያን) መጠባበቂያ ኬላ (ስፍራ) ናት::

22. ለህግ ተላላፊዎች መመላለሻ ስትሆን።

23. በውስጧ ብዙ ዘመናትን ነዋሪዎች ሲሆኑ፤

24. በውስጧ ቅዝቃዜንም መጠጠንም አይቀምሱም (አያገኙም)።

25. ሙቅ የፈላ ውሃንና እዥን እንጂ

26. ተመጣጣኝን ምንዳ ይመነዳሉ።

27. ምርመራ (እንዳለባቸው) ቅንጣት አይጠብቁም ነበርና።

28. በአናቅጻችንም ማስተባበልን አስተባበሉ።

29. ነገሩን ሁሉ የተፃፈ ሲሆን አጠቃለልነው።

30. «(የጃችሁን) ቅመሱም፤ ቅጣትን እንጂ ሌላን አንጨምርላችሁም» (ይባላሉም)።

31. ለጥንቅቆቹ (አላህን ለሚፈሩ) ስኬት አላቸው።

32. አትክልቶችና ወይኖችም፤

33. በእድሜ እኩያዎች የሆኑ ጡተ ጉችማዎችም፤

34. የተሞሉ ብርጭቆዎችም፤

35. በውስጧ ትርፍ ቃልንም፤ ማስዋሸትንም አይሰሙም::

36. ከጌታህ የሆነን ምንዳ፤ በቂ ስጦታን ተሰጡ::

37. የሰማያትና የምድር በመካከላቸዉም ላለው ሁሉ ጌታ ከሆነውና በጣም አዛኝ ከሆነው ተመነዱ፤ ከእርሱ ጋር መነጋገርን አይችሉም::

38. መልአኩ (ጅብሪል) እና ሌሎች መላዕክትም የተሰለፉ ሆነው በሚቆሙበት ቀን አረህማን ለእርሱ የፈቀደለትና ትክክለኛን ቃል ያለ ብቻ ቢሆን እንጂ መነጋገርን አይችሉም።

39. ያ! የእውነት ቀን ነው። የፈለገ ሰው ወደ ጌታው በመልካም ተግባር መመለስን ተግባሩ አድርጎ ይይዛል።

40. እኛ ቅርብ የሆነን ቅጣት አስጠነቀቅናችሁ። ሰዎች ሁሉ በሁለት እጆቻቸው ያስቀደሙትን በግልጽ የሚያይበትና ከሓዲያን ሁሉ «ዋ ምኞቴ! ምንነው አፈር በሆንኩ ባልተቀሰቀስኩኝ» የሚሉበት ቀን።

1. (ነፍስን (ሩህን)) በኃይል መንጫቂዎች በሆኑት፤

2. በቀስታ መምዘዝን መዛዦች በሆኑትም፤

3. መዋኘትንም ዋኚዎች በሆኑት፤

4. መቅደምንም ቀዳሚዎች በሆኑት፤

5. ጉዳይንም አስተናባሪዎች በሆኑት መላዕክት እምላለሁ (በእርግጥ ትቀሰቀሳላችሁ)።

6. (ይህም የሚሆነው) ተርገፍጋፊይቱ (ምድር) በምትርገፈገፍበት ቀን፤

7. ተከታይቱም በምትከተላት ቀን (ትቀሰቀሳላችሁ)።

8. በዚያ ቀን ልቦች ተሸባሪዎች ናቸው::

9. ዓይኖቻቸው ተዋራጆች (አቀርቃሪዎች) ናቸው።

10. «እኛ ወደ መጀመሪያይቱ ሁኔታ ተመላሾች ነን እንዴ?» ይላሉ።

11. የበሰበሱ አጥንቶች በሆንን ጊዜ እንደገና እንቀሰቀሳለን?

12. «እንዲያማ ከሆነ ያች የኪሳራ መመለስ ናታ!» ይላሉ።

13. እርሷን (እውን የምታደርጋት) አንዲት ጩኸት ብቻ ናት።

14. ወዲያውኑ በንቃት ላይ ናቸው።

15. (መልዕክተኛችን ሙሐመድ ሆይ!) የሙሳ ወሬ መጣልህን?

16. ጌታው በተቀደሰው ጡዋ ሸለቆ በጠራው ጊዜ፤

17. ወደ ፈርዖን ሂድ፤ ወሰን አልፏልና::

18. (እንዲህም) በለው: «እራስህን ለማጥራት ታስባለህን?

19. ጌታህንም ትፈራ ዘንድ መንገዱን ልመራህ፤ (ታስባለህን?)»

20. (ሙሳ ለፈርዖን) ታላቁንም ተዐምር አሳየው።

21. አስተባበለም፤ አመጸም፤

22. ከዚያ ለመጥፋት የሚተጋ ሆኖ ዞረ::

23. (ህዝቡን) ሰበሰበም ተጣራም።

24. እኔ «ታላቁ ጌታችሁ ነኝ» አለም።

25. አላህም በኋለኛይቱና በፊተኛይቱ ቃል ቅጣት ያዘው::

26. በዚህ ውስጥ አላህን ለሚፈሩ በእርግጥ ማስጠንቀቂያ አለበት።

27. በአፈጣጠር እናንተ ይበልጥ የበረታችሁ ናችሁን? ወይስ ሰማይ? (አላህ) ገነባት::

28. ከፍታዋን አጓነ አስተካከላትም።

29. ሌሊቷንም ሸፈነ፤ ቀኗንም ግልጽ አደረገ።

30. ምድርንም ከዚያ በኋላ ዘረጋት።

31. ውሃዋንና ግጦሿን ከእርሷ አወጣ::

32. ጋራዎችንም አደላደላቸው።

33. ለእናንተም ለእንስሶቻችሁም መጣቀሚያ ይሆን ዘንድ (ይሄን አደረገ)።

34. ታላቂቱም መዓት በመጣች ጊዜ፤

35. ሰው ሁሉ የሰራውን የሚያስታውስበት ቀን፤

36. ገሀነምም ለሚያይ ሰው በተገለጠች ጊዜ፤

37. የካደ ሰውማ፤

38. ቅርቢቱንም ሕይወት የመረጠ፤

39. በእርግጥ መኖሪያው ጀሀነም ናት።

40. በጌታው ፊት መቆምን የፈራና ነፍሱንም ከዝንባሌዋ የከለከለማ፤

41. በእርግጥ መኖሪያው ገነት ናት።

42. ስለሰዓቲቱም መነሻዋ መቼ እንደሆነ ይጠይቁሃል።

43. (ለመሆኑ አንተ ስለዚያች እለት) በመወሳቷ ምን ላይ አለህበትና?

44. የእርሷ ጉዳይ የሚመለሰው ወደ ጌታህ ብቻ ነው::

45. አንተ ያለብህ ለሚፈራት ሰው ሁሉ ስለ እርሷ (ከወዲሁ) ማስጠንቀቅ ነው።

46. እነርሱ የሚያይዋት ቀን የአንዲትን ቀን ምሽት ወይም ረፋዷን እንጂ ያልቆዩ ይመስላሉ::

1. ፊቱን አጨፈገገ፤ ዞረም፤

2. ዓይነስውሩ ወደ እርሱ ስለመጣ።

3. (መልዕክተኛችን ሙሐመድ ሆይ!) ምን ያሳውቅሃል? ምን አልባትም (ይህ አይነስውር ሰው ካንተ በሚሰማው ምክር ከኃጢአቶቹ) ሊጥራራ ይከጀላል::

4. ወይም ሊገሰጽና ግሳጼይቱም ልትጠቅመው ይከጀላል::

5. ያ! ከአላህ የተብቃቃውን ሰውማ፤

6. አንተ ለእርሱ ትዘጋጃለህ።

7. ባይጥራራ (ባያምን)፤ ባንተ ላይ ምንም የሌለብህ ስትሆን፤

8. ያ! እየገሰገሰ የመጣህ ሰውማ፤

9. እርሱ አላህን የሚፈራ ሲሆን፤

10. አንተ ከእርሱ ትዘናጋለህ::

11. ተከልከል፤ (ቁርኣን) ማስገንዘቢያ ነው::

12. የፈለገ ሰው ሁሉ (ቁርኣኑን) ያስታውሰዋል::

13. በተከበሩት ጹሑፎች ውስጥ ነው::

14. ከፍ በተደረገች፤ ንጹህም በተደረገች (ጹሑፍ ውስጥ ነው)።

15. በጸሐፊዎች መላዕክት እጆች (ንጹህ የተደረገ)::

16. የተከበሩና ታዛዦች በሆኑት ጸሐፊዎች (እጆች)፤

17. ሰው ተረገመ። ምን ከሓዲ አደረገው?

18. (ጌታው) ከምን ነገር ፈጠረው?

19. (አያስብምን?) ከፍትወት ጠብታ ፈጠረው፤ መጠነዉም::

20. ከዚያም (መውጫ) መንገዱን አገራው::

21. ከዚያም ገደለው:: እንዲቀበርም አደረገው፤

22. ከዚያ ማንሳቱን በፈለገ ጊዜ ያስነሳዋል::

23. በእውነት ያንን ጌታው ያዘዘውን ገና አልፈጸመም::

24. ሰው ወደ ምግቡ ይመልከት፤

25. እኛ ውሃን ማንቧቧትን ያንቧቧን መሆናችንን፤

26. ከዚያ ምድርን በደካማ ቡቃያ መሰንጠቅን የሰነጠቅን፤

27. በውስጧም እህልን ያበቀልን

28. ወይንም እርጥብ ሳርንም፤

29. የዘይት ወይራንም ዘንባባንም፤

30. ጭፍቆች አትክልቶችንም፤

31. ፍራፍሬንና፤ ገለባንም (ያበቀልን መሆናችንን ይመልከት)።

32. ለእናንተም ለእንሰሶቻችሁም መጠቀሚያ ይሆን ዘንድ (ይህን ሰራን)::

33. አደንቋሪይቱ (መከራ) በመጣች ጊዜ፤

34. ሰው ከወንድሙ በሚሸሽበት ቀን፤

35. ከእናቱም፤ ከአባቱም፤ (በሚሸሽበት ቀን)

36. ከሚስቱና ከልጁም፤ (በሚሸሽበት ቀን)

37. ከእነርሱ ለየሰው ሁሉ በዚያ ቀን ከሌላው የሚያብቃቃው ሁኔታ አለው::

38. ፊቶች በዚያ ቀን አብሪዎች፤

39. ሳቂዎችና ተደሳቾች ናቸው::

40. ፊቶች ደግሞ በዚያ ቀን በላያቸው ላይ ትብያ አለባቸው።

41. ጥቁረት ትሸፍናቸዋለች፤

42. እነዚያ እነርሱ በአላህ ከሓዲያን እና በትዕዛዙ ላይ አመጸኞቹ ናቸው።

1. ጸሐይ በተጠቀለለች ጊዜ፤

2. ከዋክብትም በረገፉ ጊዜ፤

3. ተራራዎች በተናዱ ጊዜ፤

4. የአስር ወር እርጉዝ ግመሎች ያለጠባቂ በተተው ጊዜ፤

5. አራዊቶችም በተሰበሰቡ ጊዜ፤

6. ባህሮችም በተቀጣጠሉ ጊዜ፤

7. ነፍሶች በተቆራኙ ጊዜ፤

8. ከነሕይወቷ የተቀበረችው ሴት ልጅም በተጠየቀች ጊዜ፤

9. በምን ወንጀል እንደተገደለች፤ በተጠየቀች ጊዜ፤

10. ጹሑፎችም በተዘረጉ ጊዜ፤

11. ሰማይም በተገሸለጠች ጊዜ፤

12. ገሀነምም በተነደደች ጊዜ፤

13 ገነትም በተቀረበች ጊዜ፤

14. ነፍስ (ሁሉ ከስራ) ያቀረበችውን ታውቃለች፤

15. (ሁኔታው ከሓዲያን እንደሚሉት አይደለም):: ተመላሾች በሆኑት (ከዋክብት) እምላለሁ::

16. አንዳንድ ጊዜ ሂያጆች በሌላ ጊዜ ገቢዎች በሆኑት

17. በሌሊቱም (ጨለማውን) በጠነሰሰ ጊዜ፤

18. በንጋትም (በብርሃን) በተነፈሰ ጊዜ እምላለሁ::

19. እርሱ (ቁርኣን) የተከበረው መልዕክተኛ ጅብሪል ቃል ነው።

20. የኃይል ባለቤት የሆነ፤ ከዙፋኑ ባለቤት ዘንድም ባለሟል የሆነ፤

21. በዚያ ስፍራ ትዕዛዙ ተሰሚ፤ ታማኝም የሆነው (መልዕክተኛ ቃል ነው)።

22. ነብያችሁም በፍጹም እብድ አይደለም።

23. በግልጹ አድማስ ላይ ሆኖ (ጅብሪልን) በእርግጥ አይቶታል።

24. እርሱም በሩቁ ወሬ ላይ ሰሳች (ንፉግ) አይደለም::

25. (ቁርኣን) የርጉም ሰይጣን ቃልም አይደለም::

26. ታዲያ (ይህንን በተመለከተ) ወዴት ትሄዳላቸሁ?

27. እርሱ የዓለማት መገሰጫ እንጂ ሌላ አይደለም::

28. ከናንተ መካከል ቀጥተኛ መሆንን ለፈለገ (ሁሉ መገሰጫ) ነው።

29. (ሰዎች ሆይ!) የዓለማት ጌታ የሆነው አላህ ካልሻ በስተቀር እናንተ አንድም ነገር አትሹም።

1. ሰማይ በተሰነጠቀች ጊዜ፤

2. ከዋክብትም ተበታትነው በወደቁ ጊዜ፤

3. ባህሮችም በተከፈቱና በተደባለቁ ጊዜ፤

4. መቃብሮችም በተገለባበጡና ሙታን በተነሱ ጊዜ፤

5. (ያኔ) ማንኛይቱም ነፍስ ያስቀደመችውንና ያዘገየችውን ታውቃለች።

6. አንተ ሰው ሆይ! በቸሩ ጌታህ ምን አታለለህ?

7. በዚያ በፈጠረህ፤ አካለ ሙሉም ባደረገህ፤ ባስተካከለህም፤

8. በማንኛውም (እርሱ) በፈለገው ቅርጽ በገጣጠመህ ጌታህ ምን አታለለህ?

9 (ሰዎች ሆይ!) ተከልከሉ፤ በእውነት በፍርዱ ቀን ታስተባብላላችሁ።

10. በእናንተ ላይ ጠባቂዎች ያሉባችሁ ስትሆኑ፤

11. የተከበሩ ጸሐፊዎች የሆኑ (ተጠባባቂዎች)፤

12. የምትሰሩትን (ሁሉ) ያውቃሉ፤

13. (እውነተኞቹ) ደጋጎች በእርግጥም በገነት ውስጥ ናቸው።

14.ከሓዲያንም በእርግጥ በገሀነም ውስጥ ናቸው::

15.በፍርዱ ቀን ይገቧታል::

16.እነርሱም (ምን ጊዜም) ከእርሷ ራቂዎች አይደሉም::

17. (መልዕክተኛችን ሙሐመድ ሆይ!) የፍርዱ ቀን ምን እንደሆነ ምን አሳወቀህ?

18. ከዚያም የፍርዱ ቀን ምን እንደሆነ ምን አሳወቅህ?

19. (እርሱ) ማንኛይቱም ነፍስ ለሌላይቱ ነፍስ ምንም ማድረግ የማትችልበት ቀን ነው:: ነገሩም ሁሉ በዚያ ቀን ለአላህ ብቻ ነው::

1. ለቀሻቢዎች ወዮላቸው፤

2. ለእነዚያ ከሰዎች ለመግዛት ባስሰፈሩ ጊዜ የሚያስሞሉ፤

3. እነርሱም (ለሰዎች) በሰፈሩ ወይም በመዘኑላቸው ጊዜ የሚያጎሉ (ለሆኑት)::

4. እነዚያ እነርሱ ተቀስቃሾች መሆናቸውን (በትክክል) አያውቁምን?

5. ለታላቁ ቀን፤

6. ሰዎች ሁሉ ለዓለማት ጌታ (ፍርድ) በሚቆሙበት ቀን (ተቀስቃሾች መሆናቸውን)::

7. በእውነት የከሓዲያን መዝገብ በእርግጥ በ"ሲጂን" ውስጥ ነው።

8. (መልዕክተኛችን ሙሐመድ ሆይ!) "ሲጂን" ምን እንደሆነ ምን አሳወቀህ?

9. የታተመ (የተጠናቀቀ) መጽሐፍ ነው።

10. ለአስተባባዮች (ሁሉ) በዚያ ቀን ወዮላቸው።

11. ለእነዚያ በፍርድ ቀን ለሚያስተባብሉት::

12. በእርሱም ወሰን አላፊ ኃጢአተኛ ሁሉ እንጂ ሌላ አያስተባብልም::

13. አናቅጻችን በእርሱ ላይ በተነበቡ ጊዜ እኒህ የመጀመሪያዎቹ ሰዎች ተረቶች ናቸው ይላል::

14. ይከልከሉ፤ ይልቁንም በልቦቻቸው ላይ ይሰሩት የነበሩት ኃጢአት ደገደገባቸው::

15. ይከልከሉ:: እነርሱ በዚያ ቀን ጌታቸውን ከማየት ተጋራጆች ናቸው::

16. ከዚያ እነርሱ በእርግጥ ገሀነም ገቢዎች ናቸው::

17. ከዚያ ይህ ያ በእርሱ ታስተባብሉበት የነበራችሁት ነው ይባላሉ::

18. የ(እውነተኞቹ) ደጋጎች መጽሐፍ በ"ዒሊዩን" ውስጥ ነው።

19. (መልዕክተኛችን ሙሐመድ ሆይ!) "ዒሊዩን"ም ምን እንደሆነ ምን አሳወቀህ?

20. የታተመ (የተጠናቀቀ) መጽሐፍ ነው።

21. (የአላህ) ባለሟሎቹ ይጠብቁታል (ይጣዱታል)።

22. (እውነተኞቹ) ደጋጎች በእርግጥም በገነት ውስጥ ናቸው።

23. በተዋቡ ዙፋኖች ላይ የተደገፉ ሆነው ይመለከታሉ።

24. ከፊቶቻቸው ላይ የድሎትን ውበት ትረዳለህ (ታውቃለህ)።

25. ተጣርቶ ከታተመ ወይን ጠጅ ይጠጣሉ::

26. መደምደሚያው ሚስክ ከሆነ (መጠጥ ይጠጣሉ)። ተሽቀዳዳሚዎች በዚህ ይሽቀዳደሙ።

27. መበረዣዉም ከተስኒም ነው።

28. (የአላህ) ባለሟሎቹ ከእርሷ የሚጠጡላት ምንጭ ናት።

29. እነዚያ (በአላህ ላይ) ያመጹት በእነዚያ (በአላህ) ባመኑት በእርግጥ ይስቁ ነበር።

30. በእነርሱም አጠገብ ባለፉ ጊዜ ይጠቋቆሙባቸው (ይጠቃቀሱባቸው) ነበር::

31. ወደ ቤተሰቦቻቸዉም በተመለሱ ጊዜ (በመሳለቃቸው) ተደሳቾች ሆነው ይመለሱ ነበር።

32. ባዩዋቸዉም ጊዜ፡- "እነዚህ በእርግጥ ተሳሳቾች ናቸው።" ይሉ ነበር።

33. በእነርሱ ላይ ተጠባባቂዎች ተደርገው ያልተላኩ ሲሆኑ::

34. ዛሬ (በትንሳኤ ቀን) ግን እነዚያ በትክክል በአላህ ያመኑት ሰዎች በከሓዲያን ላይ ይስቃሉ::

35. በተዋበ ዙፋን ላይ ሆነው የሚመለከቱ ሲሆኑ (ይስቃሉ)።

36. ከሓዲያን ይሰሩት የነበሩትን (ዋጋ) ተመነዱን? (ይላሉ)::

1. ሰማይ በተቀደደች (በተሰነጠቀች) ጊዜ፤

2. የጌታዋንም ትዕዛዝ በሰማች ጊዜ፤ (ልትሰማ) ተገባትም፤

3. ምድርም በተለጠጠች ጊዜ፤

4. በውስጧ ያለውንም ሁሉ በጣለችና ባዶ በሆነች ጊዜ፤

5. ለጌታዋም በሰማች ጊዜ፤ (ልትስማ) ተገባትም፤

6. አንተ ሰው ሆይ! አንተ ጌታህን በሞት እስከምትገናኝ ድረስ ልፋትን ለፊ ነህ። ተገናኚዉም ነህ።

7. ያ! መጽሐፉን በቀኝ እጅ የተሰጠውማ

8. በእርግጥ ቀላልን ምርመራ ይመረመራል።

9. ወደ ቤተሰቦቹም ተደሳች ሆኖ (በደስታ) ይመለሳል::

10. ያ ! መጽሐፉን በጀርባው በኩል የተሰጠው ግን

11. (ዋ! ጥፋቴ በማለት) ጥፋትን በእርግጥ ይጠራል::

12. የተጋጋመች እሳትንም ይገባል::

13. እርሱ በቤተሰቡ ውስጥ ተደሳች ነበርና፤

14. እርሱም ወደ አላህ እንደማይመለስ አሰበ።

15. አይደለም (ይመለሳል)፤ ጌታው በእርሱ (መመለስ) አዋቂ ነው።

16. ስለሆነም በወጋገኑ እምላለሁ።

17. በሌሊቱና በሰበሰበዉም ሁሉ፤

18. በጨረቃውም በሞላ ጊዜ (እምላለሁ)።

19. ከአንድ እርከን ወደ ሌላ እርከን ትሸጋገራላችሁ።

20. የማያምኑት ለእነርሱ ምን አላቸው ( ምን ሆነው ነው)?

21. በእነርሱ ላይ ቁርኣን በተነበበ ጊዜ የማይሰግዱትስ ለእነርሱ ምን አላቸውና ነው?

22. በእርግጥ እነዚያ የካዱት ያስተባብላሉ።

23. አላህ በልቦቻቸው የሚቋጥሩትን ሁሉ አዋቂ ነው::

24. (መልዕክተኛችን ሙሐመድ ሆይ!) በአሳማሚ ቅጣት አብስራቸው።

25.እነዚያ በአላህ አምነው መልካም ተግባራትን የሰሩት ሲቀሩ፤ ለእነርሱማ የማይቋረጥ ምንዳ አላቸው።

1. የህብረ ከዋክብት ባለቤት በሆነችው ሰማይ፤

2. በተቀጠረዉም ቀን፤

3. በመስካሪና በሚመሰከርበትም እምላለሁ::

4. የጉድቡ ባለቤቶች ተረገሙ::

5. የባለማገዶዋ እሳት ባለቤቶች።

6. እነርሱ በርሷ (አፋፍ) ላይ ተቀማጮች በሆኑ ጊዜ (ተረገሙ)።

7. እነርሱም በምዕመኖች ላይ ለሚሰሩት (ማሰቃየት) መስካሪዎች ናቸው።

8. ከእነርሱም በአሸናፊውና በምስጉኑ ጌታ ማመናቸውን እንጂ ሌላን ምንንም አልጠሉም::

9. ያ የሰማይና የምድር ንግስና ለእርሱ ብቻ የሆነውን (ነው ያመኑበት)። አላህም በነገሩ ሁሉ ላይ መስካሪ ነው (አዋቂ ነው)።

10. እነዚያ አማኞችና ምዕመናትን ያሰቃዩና ከዚያ ያልተጸጸቱ ሁሉ ለእነርሱ የገሀነም ቅጣት አለላቸው:: ለእነርሱም የመቃጠሉ ስቃይ አልላቸው::

11. እነዚያ በአላህ አምነው መልካም ስራዎችን የሰሩ ሁሉ ለእነርሱ ከስሮቻቸው ወንዞች የሚፈሱባቸው ገነቶች አሏቸው:: ይህ ታላቅ ስኬት ነው::

12. (መልዕክተኛችን ሙሐመድ ሆይ!) የጌታህ በኃይል መያዝ ብርቱ ነው።

13. እነሆ እርሱ መፍጠርን ይጀምራል፤ ይመልሳልም::

14. እርሱም ምህረቱ የበዛ ወዳድ ነው::

15. የላቀው የዙፋኑ ባለቤት ነው።

16. የሚሻውን ሁሉ ሰሪ (ፈፃሚ) ነው::

17. (መልዕክተኛችን ሙሐመድ ሆይ! የእነዚያ ነብያትን ያስተባበሉ) ሰራዊቶች ወሬ መጣልህን?

18. የፊርዓውንና የሰሙድ (ወሬ ደርሶሃልን)?

19. በእውነት እነዚያ (በአላህ) የካዱት (ሰዎች ሁሉ) እውነትን በማስተባበል ውስጥ ናቸው::

20. አላህም በዙሪያቸው (በዕውቀቱ) ከባቢ ነው::

21. ይልቁንም እርሱ የተከበረ ቁርኣን ነው::

22. የተጠበቀ በሆነ ሰሌዳ (ሎህ) ውስጥ ነው::

1. በሰማዩ እና ሌሊት በሚመጣውም እምላለሁ።

2. (መልዕክተኛችን ሙሐመድ ሆይ!) የሌሊት መጪው ምን እንደሆነ ምን አሳወቀህ?

3. ጨለማውን ሰንጣቂ ኮከብ ነው::

4. ነፍስ ሁሉ በእርሷ ላይ ጠባቂ ያለባት እንጂ ሌላ አይደለችም::

5. የሰው ልጅ ከምን እንደተፈጠረ ይመልከት፤

6. ከተስፈንጣሪ ውሃ (የዘር ፈሳሽ) ተፈጠረ::

7. ከጀርባና ከእርግብግቢቶች መካከል የሚወጣ ከሆነ የዘር ፈሳሽ ውሃ (ተፈጠረ)።

8. አላህ እርሱን በመመለሱ ላይ በእርግጥ ቻይ ነው::

9. ሚስጥሮች በሚገለጹበት ቀን፤

10. (ለሰው) ምንም ኃይልና ረዳት አይኖረዉም::

11. የመመለስ ባለቤት (ዝናባማ) በሆነችው ሰማይ እምላለሁ::

12. (በበቃይ) የመሰንጠቅ ባለቤት በሆነችው ምድርም እምላለሁ::

13. እርሱ (ቁርኣን)፤ (እውነትን ከውሸት) የሚለይ (የአላህ) ቃል ነው።

14. እርሱም ቀልድ አይደለም።

15. እነርሱ በእርግጥ ተንኮልን ያሴራሉ (ይሸርባሉ)::

16. እኔ ተንኮልንም እመልሳለሁ (አመክናለሁ)::

17. (መልዕክተኛችን ሙሐመድ ሆይ!) ከሓዲያንን ቀን ሰጣቸው:: ጥቂትን ጊዜ አቆያቸው (ታገሳቸው)::

1. (መልዕክተኛችን ሙሐመድ ሆይ!) የዚያን ከሁሉ በላይ የሆነውን ጌታህን ስም አጥራ (አሞግስ)።

2. ያ ሁሉን ነገር የፈጠረውንና ያስተካከለውን፤

3. ያን የወሰነውን ነገርንም ሁሉ ለተፈጠረለት የመራውን፤

4. ያም ግጦሽን ለምለም አርጎ ያወጣውን፤

5.(ከዚያ) ደረቅ ጥቁር ያደረገውንም (አምላክ ስም አሞግስ)፡፡

6. (መልዕክተኛችን ሙሐመድ ሆይ!) ቁርኣንን በእርግጥ እናስነብብሃለን፤ አትረሳምም፤

7. አላህ ከፈለገው ነገር በስተቀር፤ እናም እርሱ ግልጹንም የሚሸሽገውንም ሁሉ ያውቃልና፤

8. ለገሪቱም (ሕይወት እስላምን ትከተል ዘንድ) እናገራሃለን።

9. (ሰዎችንም) ገስፅ፤ ግሳፄይቱ ብትጠቅም።

10. (አላህን) የሚፈራ በእርግጥ ይገሰፃል።

11. መናጢዉም ይርቃታል::

12. ያ! ታላቂቱን እሳት የሚገባው፤

13. ከዚያም በእርሷ ውስጥ የማይሞትና ህያዉም የማይሆነው።

14. (አላህን ከማመፅ) የተጥራራ ሰው በእርግጥ ዳነ፤

15. የጌታውንም ስም ያወሳና የሰገደ::

16. ይልቁንም ቅርቢቱን ሕይወት ታስቀድማላችሁ፤

17. (ሰዎች ሆይ!) መጨረሻይቱ ሕይወት በላጭና፤ ዘወታሪ ሆና ሳለ።

18. ይህ በቀደምቶቹም መጻሕፍት ውስጥ ያለ ነው።

19. በኢብራሂምና በሙሳ መጽሐፍት ውስጥ የሰፈረ እውነታ ነው።

1. (መልዕክተኛችን ሙሐመድ ሆይ!) የሸፋኝቱ ትንሳኤ ወሬ መጣልህን?

2. በዚያ ቀን የከሓዲያን ፊቶች ተዋራጆች ናቸው::

3. ሰሪዎች ለፊዎች ናቸው::

4. የምታቃጥልን እሳት ይገባሉ::

5. በጣም ከፈላች ምንጭም ይጋታሉ::

6. ዶሪዕ ከሚባል (እሾሃማ) ዛፍ እንጂ ሌላ ምግብ የላቸዉም::

7. አካልን አያሰባ፤ ከረኃብም አያብቃቃ፤

8. (የአማንያን) ፊቶች በዚያ ቀን ተቀማጣዮች ናቸው::

9. በስራቸውም ተደሳቾች ናቸው::

10. በከፍተኛ ገነት ውስጥ ናቸው::

11. በውስጧ ውድቅን ነገር አይሰሙም::

12. በውስጧ ፈሳሾች ምንጮች አሉ::

13. በውስጧ ከፍ የተደረጉ አልጋዎች አሉ::

14. በተርታ የተኖሩ ኩባያዎችም፤

15. የተደረደሩ መከዳዎችም፤

16. የተነጠፉ ስጋጃዎችም (አሉ)::

17. (ከሓዲያን) ግመል እንዴት እንደተፈጠረች አይመለከቱምን?

18. ሰማይም እንዴት ከፍ እንደተደረገች!

19. ተራራዎችም እንዴት እንደ ተቸከሉ!

20. ምድርም እንዴት እንደተዘረጋች አይመለከቱምን?!

21. (መልዕክተኛችን ሙሐመድ ሆይ!) አስታውስም:: አንተ አስታዋሽ ብቻ ነህና::

22. በእነርሱ ላይ አስገዳጅ (ተሿሚ) አይደለህም፤

23. ግን ከእውነት የዞረና የካደ፤

24. አላህም ከባዱን ቅጣት ይቀጣዋል።

25. መመለሻቸው ወደ እኛ ብቻ ነው::

26. ምርመራቸዉም በእኛ ላይ ብቻ ነው::

1. በጎህ፤ እምላለሁ

2. በአስሩ ሌሊቶችም፤

3. በጥንዱም በነጠላዉም፤

4. በሌሊቱም በሚጓዝበት ጊዜ እምላለሁ።

5. በዚህ መሀላ ለባለ አእምሮ ታላቅ መሀላ የለበትምን?

6. ጌታህ በዓድ ህዝቦች ላይ እንዴት እንደሰራ አላወክምን?

7. በባለ ረዣዥሚቱ አዕማድ ኢረም ላይም፤

8. በዚያች ብጤዋ በአገሮች ውስጥ ያልተፈጠረ በሆነችው፤

9. በእነዚያ (በሸለቆዎች) ቋጥኝን የቦረቦሩ በሆኑት ሰሙድም፤

10. ባለ ችካሎች በሆነው ፈርዖንም፤

11. በእነዚያ በአገሮች ላይ ግፍ የሰሩ (በሆኑትም ላይ)፤

12. በእርሷም ውስጥ ጥፋትን ያበዙ በሆኑት (እንዴት እንደሰራ አታውቅምን?)

13. በእነርሱ ላይም ጌታህ የቅጣትን አለንጋ አወረደባቸው::

14. ጌታህ በመጠባበቂያ ላይ ነውና::

15. የሰው ልጅ ጌታው በሞከረው ጊዜ ባከበረውና ባጣቀመው ጊዜ ጌታየ አከበረኝ (አበለጠኝ) ይላል::

16. በሞከረውና በእርሱ ላይ ሲሳዩን ባጠበበበት (ጊዜ) እንዲሁ ጌታየ አሳነሰኝ ይላል::

17. በፍፁም! ይልቁንም የቲምን አታከብሩም፤

18. ድሃንም በማብላት ላይ አትበረታቱም፤

19. የውርስንም ገንዘብ የመሰብሰብን አበላል (ያለአግባብ) ትበላላችሁ፤

20. ገንዘብንም አብዝታችሁ (አለቅጥ) ትወዳላችሁ፤

21. (ሰዎች ሆይ! ተዉ):: ታቀቡ:: ምድር ደጋግማ በተንኮታኮተች ጊዜ፤

22. ጌታህ በመጣና መላዕክትም በሰልፍ በሰልፍ ሆነው በመጡ ጊዜ፤

23. ገሀነምም በዚያ ቀን በተመጣች ጊዜ በዚያ ቀን ሰው ሁሉ ጥፋቱን በትክክል ይገነዘባል። መገንዘቡ በየት በኩል (ይጥቀመው)?

24. "ወይ እኔ! ምነው በሕይወቴ (መልካምን ስራ) ባስቀደምኩ ኖሮ" ይላል።

25. በዚያ ቀንም የእርሱን አቀጣጥ የመሰለ አንድም አካል አይቀጣም።

26. የእርሱንም፤አሰተሳሰር አንድም አካል አያስርም::

27. (ለአመነች ነፍስም እንዲህ ትባላለች)፡- አንቺ በአላህ የረካሺው ነፍስ ሆይ!

28. (ከእርሱም) የወደድሽ፤ (እርሱ ዘንድም) የተወደደሽ ሆነሽ ወደ ጌታሽ ተመለሺ::

29. ከዉድ ባሮቼም ጋር ተቀላቀይ::

30. ወደ ገነቴም ግቢ ትባላለች::

1. በዚህ ሀገር (በመካ) እምላለሁ

2.(መልዕክተኛችን ሙሐመድ ሆይ!) አንተ በዚህ አገር ሰፋሪ ስትሆን።

3.በወላጂና በወለዳቸውም (በአደምና በዘሮቹ) ሁሉ (እምላለሁ)።

4. ሰውን ሁሉ በእርግጥ በልፋት ውስጥ ሆኖ ፈጠርነው::

5. በእርሱ ላይ አንድም አካል የማይችል መሆኑን ይጠረጥራልን?

6. "ብዙን ገንዘብ አጠፋሁ" ይላል፤

7. አንድም ያላየው መሆኑን ያስባልን?

8. ለእርሱ ሁለት አይኖችን አላደረግንለትንምን?

9. አንድ ምላስንና ሁለት ከንፈሮችንም፤

10.ሁለትን መንገዶችስ አልመራነዉምን?

11.ዐቀበቱን አልወጣም።

12.ዐቀበቱን መውጣት ምን እንደሆነ ምን አሳወቀህ?

13.ያ ጫንቃን መልቀቅ ነው። {1} ——— {1} ባሪያን ነጻ ማውጣት ማለት ነው

14. ወይም የረሀብ ባለቤት በሆነ ቀን (ረሀብተኛን) ማብላት፤

15. የዝምድና ባለቤት የሆነን የቲም፤

16.ወይም የአፈር ባለቤት የሆነን (ችግረኛ) ማብላት ነው።

17.ከዚያም ከእነዚያ በአላህ ካመኑትና በመታገስ ላይ አደራ ከተባባሉት ሰዎች ጋር መሆን ነው።

18. እነዚያ (ይህንን የፈጸሙ) የቀኝ ጓዶች ናቸው።

19. እነዚያ በአናቅጻችን የካዱ ሁሉ እነርሱ የግራ ጓዶች ናቸው።

20. ለእነርሱ የምትዘጋባቸው እሳትም አለች።

1. በጸሐይና በብርሀኗ፤ (እምላለሁ)

2. በጨረቃም ጸሐይን በተከተላት ጊዜ፤

3. በቀንም ጸሐይን በገለፃት ጊዜ፤

4. በሌሊቱም ጸሐይን በሸፈናት ጊዜ፤

5. በሰማይ እና በገነባትም፤

6. በምድር እና በዘረጋትም፤

7. በነፍስም ባስተካከላትም

8. አመጽዋንና ፍርሃቷንም ባሳወቃት (አምላክም በአላህ እምላለሁ)።

9. (ነፍስን) ከኃጢአት ያጠራ ሰው ሁሉ በእርግጥ ተሳካለት።

10. በኃጢአትም የሸፈናት ሰው ሁሉ በእውነት አፈረ (ከሰረ)::

11. ሰሙድ ወሰን በማለፍዋ ምክንያት አስተባበለች፤

12. ጠማማዋ በተነሳ ጊዜ።

13. ለእነርሱም የአላህ መልዕክተኛ (ሷሊህ)፡-የአላህን ግመልና የመጠጥ ተራዋን (ጠብቁላት) አላቸው::

14. እነርሱ አስተባበሉትም፤ ከዚያ ወጓት፤ በኃጢአታቸዉም ምክንያት ጌታቸው (ቅጣትን) በእነርሱ ላይ ደመደመባቸው፤ አስተካከላትም::

15. (የምታስተካክለውን) ፍፃሜዋንም አይፈራም።

1. በሌሊቱ (ጨለማውን) በሚሸፍነው ጊዜ፤ (እምላለሁ)

2. በቀኑም በተገለጸ ጊዜ፤

3. ወንድንና ሴትን በፈጠረዉም (አምላክ) እምላለሁ::

4. ስራችሁ በእርግጥ የተለያየ ነው።

5. ያ! የሰጠና ጌታውንም የፈራማ፤

6. በመልካሚቱ እምነትም ያረጋገጠ ሰው

7. ለገሪቱ እናገራዋለን።

8. ያ! የሰሰተ በራሱም የተብቃቃ፤

9. በመልካሚቱም ያስተባበለውማ

10. ለክፋት እናዘጋጀዋለን።

11. ገሀነም በወደቀ ጊዜ ያ! ገንዘቡ ከእርሱ ምንም አይጠቅመዉም።

12. ቅኑን መንገድ መግለጽ በእኛ ላይ አለብን።

13. መጨረሻይቱም መጀመሪያይቱም ዓለም የእኛው ነው።

14. የምትንቀለቀል እሳት አስጠነቀቅኳችሁ።

15. ከጠማማ በስተቀር የማይገባባትን

16. ያ ያስተባበለና ከትዕዛዝም የሸሸ እድለ ቢስ (ነው የሚገባባት)።

17. አላህን በጣም ፈሪ የሆነ በእርግጥ ይርቃታል::

18. ያ (ከወንጀል) የሚጥራራ ሲሆን ገንዘቡን የሚለግስ፤

19. ለአንድም ሰው በእርሱ ዘንድ ተመላሽ የሚሆን ውለታ ሳይኖርበት።

20. የታላቁን ጌታውን የአላህን ውዴታ በመፈለግ ብቻ (ይህንን የሰራ) ሲቀር።

21. እርሱማ ወደ ፊት (በሚሰጠው) በእርግጥ ይደሰታል።

በረፋዱም፤ (እምላለሁ)

2. በሌሊትም ጸጥ ባለ ጊዜ እምላለሁ::

3. (መልዕክተኛችን ሙሐመድ ሆይ!) ጌታህ አላሰናበተህም፤ አልጠላህምም::

የመጨረሻይቱ ዓለም ከመጀመሪያይቱም ይልቅ ላንተ በላጭ ናት::

ጌታህም ወደ ፊት ብዙ ስጦታ በእርግጥ ይሰጥሃል። ትደሰታለህም።

6. የቲም ሆነህ አላገኘህምና አላስጠጋህምን? (አስጠግቶሃል)::

7. የሳትክም ሆነህ አገኘህና መራህ::

8. ደሃም ሆነህ አገኘህና አከበረህ::

9. እናም የቲምን አትጨቁን::

10. ለማኝንም አትገላምጥ::

11. የጌታህንም ጸጋ ግለጽ::

1. (መልዕክተኛችን ሙሐመድ ሆይ!) ልብህን ላንተ አላሰፋንልህም?

2. ሸክምህንም አወረድንልህ?

3. ያንን ጀርባህን ያከበደውን (ሸክም)

4. መወሳትህንም ከፍ አላደረግንልህ?

5. እናም ከችግር ጋር በእርግጥ ምቾት አለ::

6. ከችግር ጋር በእርግጥ ምቾት አለ::

7. (የጀመርከውን ጥሩ ስራ) በጨረስክ ጊዜ ወደ ሌላ ጥሩ ስራ ቀጥል (አስከትል)።

8. ክጃሎትህንም ወደ ጌታህ ብቻ አድርግ።

1. በበለስና፤ በወይራ ዛፍ እምላለሁ፣

2. በሲና ተራራም፤

3. በዚህ በጸጥተኛው (ጸጥታ በነገሰበት) አገር መካም እምላለሁ።

4. በርግጥ ሰውን በጣም በአማረ አቋም ላይ ፈጠርነው::

5. ከዚያም (ከፊሉን) ከበታቾች ሁሉ በታች አድርገን መለስነው::

6. እነዚያ በአላህ ያመኑትና መልካም ተግባራት የሰሩት ሲቀሩ ለእነርሱማ የማይቋረጥ ምንዳ አለላቸው::

7. (የሰው ልጅ ሆይ) ታዲያ ከዚህ (እውነታ) በኋላ በፍርዱ ምን አስተባባይ አደረገህ?

8. አላህ ከፈራጆች ሁሉ ይበልጥ ፈራጅ አይደለምን?

1. (መልዕክተኛችን ሙሐመድ ሆይ!) በዚያ (ሁሉንም ነገር) በፈጠረ ጌታህ ስም (ጀምርና) አንብብ! {1} ——— {1} ይህ አንቀጽና ቀጥሎ ያሉት ከቁርአን መጀመሪያ የወረዱ አንቀጾች ናቸው። በኑር ተራራ ላይ በምገኘው የሂራእ ዋሻ ውስጥ ነቢዩ ሰ/ዐ/ወ/ ኸልዋ ወጥተው እያሉ ነው የወረደባቸው። (ቡኻሪና ሙስሊም፤ የወህይ አጀማመር ምእራፍ)

2. ሰውን ከረጋ ደም በፈጠረው (ጌታህ ስም)::

3. (መልዕክተኛችን ሙሐመድ ሆይ!) አንብብ! ጌታህም በጣም ቸር ነው::

4. ያ በብዕር ያስተማረ (ጌታ)፤

5. የሰውን ልጅ ያላወቀውን ሁሉ ያሳወቀ (ጌታ)::

6. በእውነቱ የሰው ልጅ ወሰንን ያልፋል::

7. ራሱን የተብቃቃ ሆኖ በማየቱ ምክንያት

8. መመለሻው ወደ ጌታህ ብቻ ነው::

9. ያንን የሚከለክለውን አየህን?

10. ባሪያን በሰገደ ጊዜ (የሚከለክለውን):

11. እስቲ ንገረኝ (ተከልካዩ ባሪያየ) በትክክል መንገድ ላይ ቢሆን፤

12. ወይም (ፈጣሪውን) በመፍራት ቢያዝ ምን እንደሚሆን አየህን?

13. እስቲ ንገረኝ (ከልካዩ) ቢያስተባብልና ከእምነት ቢሸሽ፤

14. አላህ የሚያይ መሆኑን አያውቅምን?

15. ይታቀብ፤ የማይከለከል ከሆነ አናቱን ይዘን አንጎትተዋለን::

16. ያቺን ውሸታምና ስህተተኛ የሆነችውን አናቱን::

17. ሸንጎውንም ይጥራ፤

18. እኛም ዘበኞቻችንን እንጠራለን::

19. በጭራሽ፤ (መልዕክተኛችን ሙሐመድ ሆይ!) ይህን ለሚል ከሓዲ አትታዘዘው፤ ስገድ፤ ወደ አላህም ተቃረብ። {1} ——— {1} እዚህ የንባብ ሱጁድ አለ። ይህ የመጨረሻ ሱጁድ ነው።

1. እኛ (ቁርኣንን) በመወሰኛይቱ ሌሊት ውስጥ አወረድነው።

2. (መልዕክተኛችን ሙሐመድ ሆይ!) የመወሰኛይቱ ሌሊት ምን እንደሆነች ምን አሳወቀህ?

3. የመወሰኛይቱ ሌሊት ከሺህ ወር የምትበልጥ ነች።

4. በእርሷ ውስጥ መላዕክትና ሩሕም (ጂብሪል) በጌታቸው ፈቃድ በሁሉም ጉዳዮች ይዘው ይወርዳሉ።

5. እርሷም ጎህ እስኪወጣ ድረስ ሰላም ነች።

1. ከመጽሐፍ ባለቤቶችና ከአጋሪዎች እነዚያ በአላህ የካዱት ሰዎች ግልጽ አስረጂ እስኪመጣላቸው ድረስ (ከነበሩበት አቋም) ተወጋጆች አልነበሩም::

2. (አስረጂውም) የተጥራሩ (መጽሐፎችን) የሚያነብ ከአላህ የሆነ መልዕክተኛ ነው።

3. በውስጧም ቀጥተኛ የሆኑ ጹሁፎች ያሉባት የሆነችን (አስረጂ)፤

4. እነዚያ መጽሐፉን የተሰጡ ሰዎችም ግልጽ አስረጂ ከመጣላቸው በኋላ እንጂ አልተለያዩም::

5. ሃይማኖትን ለአላህ ብቻ አጥሪዎችና ቀጥተኞች ሆነው አላህን ሊገዙት፤ ሶላትንም አስተካክለው ሊሰግዱ፤ ዘካንም በትክክል ሊሰጡ እንጂ ያልታዘዙ ሲሆን ተለያዩ:: የቀጥተኛይቱ ሃይማኖት ድንጋጌም ይሀው ነው።

6. ከመጽሐፉ ባለቤቶችና ከአጋሪዎች እነዚያ የካዱት በውስጧ ዘውታሪዎች በሚሆኑባት የገሀነም እሳት ውስጥ ናቸው:: እነዚያ ከፍጥረቱ ሁሉ መጥፎዎቹ እነርሱ ናቸው::

7. እነዚያ በትክክል አምነው በጎ ተግባራትንም የሰሩት እነዚያ ከፍጥረት ሁሉ በላጭ (ምርጦች) የሆኑት እነርሱ ናቸው።

8. ምንዳቸውም በስሮቻቸው ወንዞች የሚፈሱባቸው ከጌታቸው ዘንድ የሚቸሯቸው የመኖሪያ ገነቶች ናቸው። በውስጣቸው ለዘልዓለም ዘወታሪዎች ሲሆኑ ይገቡባቸዋል:: አላህ ከእነርሱ ስራቸውን ወደደላቸው:: እነርሱም ከእርሱ ምንዳውን ወደዱ:: ይህ እድል ጌታውን ለፈራ ሁሉ ነው::

1. (መልዕክተኛችን ሙሐመድ ሆይ!) ምድር በኃይል መንቀጥቀጧን በተንቀጠቀች ጊዜ፤

2. ምድርም ሸክሞቿን ባወጣች ጊዜ፤

3. ሰዉም "ምን ሆነች?" ባለ ጊዜ፤

4. በዚያ ቀን ወሬዎቿን ትናገራለች::

5. ጌታህ ለእርሷ አሳውቋታልና፤

6. በዚያ ቀን ሰዎች ሁሉ ስራዎቻቸውን እንዲያዩ ይደረጉ ዘንድ እንደየስራቸው የተበታተኑ ሆነው ከየመቃብራቸው ወደ መቆሚያው ስፍራ ይመለሳሉ::

7. የብናኝን ክብደት ያህል መልካም የሰራ ሰው ያገኘዋል::

8. የብናኝን ክብደት ያህል ክፋት የሰራ ሰውም ያገኘዋል::

1. እያለከለኩ ሩዋጮች በሆኑ (ፈረሶች)፤

2. ምድርን በሸሆናቸው እያጋጩ የእሳት ብልጭታን አውጪዎች በሆኑትም (ፈረሶች)፤

3. በማለዳ (በጧት) ወራሪዎች በሆኑትም ፈረሶች፤

4. በእርሱም አቧራን በቀሰቀሱት፤

5.በፈረሰኞቻቸው በኩል (የጠላት) ስብስብ መሀልን በተጋፈጡትም (ፈረሶች) እምላለሁ።

6. የሰው ልጅ ለጌታው ብርቱ ከሓዲ ነው::

7. እርሱም በዚያ ክህደቱ ላይ መስካሪ ነው::

8. እርሱም ገንዘብን በመውደድ ላይ በጣም ብርቱ ነው::

9. የሰው ልጅ በመቃብሮች ዉስጥ ያሉት ሙታን ሁሉ በተቀሰቀሱ ጊዜ ምን እንደሚከሰት አያውቅምን?

10. በልቦች ውስጥ ያለዉም ሁሉ በተገለጸ ጊዜ እንዴት እንደሚሆን አያውቅምን?

11. ጌታቸው በዚያ ቀን በእነርሱ ነገር በእርግጥ ውስጠ አዋቂ ነው::

1. ቆርቋሪይቱ (ጩኸት)፤

2. ቆርቋሪይቱ (ጩኸት) ምንድን ናት!

3. (መልዕክተኛችን ሙሐመድ ሆይ!) ቆርቋሪይቱ ምን እንደሆነች ምን አሳወቀህ?

4. ሰዎች እንደተበታተነ ቢራቢሮ (ኩብኩባ) የሚሆኑበት ቀን፤

5. ጋራዎችም እንደ ተነደፈ ሱፍ የሚሆኑበት (አስደንጋጭ ቀን) ናት።

6. በዚያ ዕለት ያ ሚዛኖቹ የከበዱለት ሰውማ

7. እርሱ ኑሮው በአሰደሳቿ ጀነት ውስጥ ይሆናል።

8. ያ ሚዛኖቹ የቀለሉበት ሰው ደግሞ

9. መኖሪያው ሃዊያህ (የምትባል የገሀነም እሳት) ናት።

10. (መልዕክተኛችን ሙሐመድ ሆይ!) እርሷ ምን እንደሆነች ምን አሳወቀህ?

11. (እርሷ) በጣም ተኳሳ እሳት ናት::

1. (በዚህች ዓለም ጸጋዎች) ብዛት መፎካከር (ጌታችሁን ከመገዛት) አዘናጋችሁ::

2. መቃብሮችን እስከጎበኛችሁ ድረስ:: (በዚሁ ላይ ቀጠላችሁ)።

3. ከዚህ ተግባራችሁ ተከልከሉ (ታቀቡ):: ወደፊት (ውጤቱን) ታውቃላችሁ፤

4. ከዚያም ከዚህ ተግባራችሁ ተከልከሉ። ወደ ፊትም ታውቃላችሁ፤

5. በእውነቱ (የሚጠብቃችሁን) በእርግጠኝነት ብታውቁ ኖሮ (ይህን ያክል ባልተዘናጋችሁ ነበር)።

6. ገሀነምን በእርግጥ ታያላችሁ::

7. ከዚያም እርግጠኛን ማየት ታዩዋታላችሁ፤

8. ከዚያም በድሎታችሁ ጉዳይ ሁሉ በዚያ ቀን ትጠየቃለችሁ::

1. በጊዜ እምላለሁ፤

2. ሰው ሁሉ በእርግጥ በኪሳራ ውስጥ ነው::

3. እነዚያ በአላህ በትክክል ያመኑትና መልካሞችን የሰሩ፤ በእውነትም ላይ አደራ የተባባሉ፤ በመታገስም ላይ አደራ የተባባሉ ብቻ ሲቀሩ::

1. ለሐሜተኛ፤ ለዘላፊ፤ (ለአሽሟጣጭ ሁሉ) ወዮለት::

2. ለዚያ ገንዘብን የሰበሰበና የቆጣጠረው (ያደለበዉም) ለሆነ ሁሉ፡፡

3. ገንዘቡ በዚህች ዓለም ዘውታሪ እንደሚያደርገው ያስባል።

4. በጭራሽ፤ አውዳሚና የምትፈጭ በሆነችው እሳት ውስጥ በእርግጥ ይጣላል።

5. (መልዕክተኛችን ሙሐመድ ሆይ!) የምትፈጨዋም ምን እንደሆነች ምን አሳወቀህ?

6. የተቀጣጠለችው የአላህ እሳት ናት::

7. ያቺ በልቦች ላይ እንኳን ሳይቀር የምትዘልቅ የሆነች::

8. እርሷ በእርግጥ በእነርሱ ላይ የተዘጋች ናት::

9. በተዘረጋች አዕማድ ውስጥ የተዘጋች ናት::

1. (መልዕክተኛችን ሙሐመድ ሆይ!) ጌታህ አላህ በዝሆኑ ባለቤቶች ላይ እንዴት እንደሰራ አላወቅክምን?

2. ተንኮላቸውን በጥፋት ውስጥ ከንቱ አላደረገምን?

3. በእነርሱ ላይ መንጎች የሆኑን ወፎችንም ላከ።

4. ከተጠበሰ ጭቃ የሆነን ጠጠር የምትወረውርባቸውን የሆነችን (አእዋፍ)

5. እና ቅጠሉ እንደ ተበላ አዝመራ አደረጋቸው

1. ቁረይሽን ለማላመድ (ባለ ዝሆኖቹን አጠፋ)::

2. የክረምትንና የበጋን ወራት ጉዞዎች ሊያላምዳቸው ይህንን ሰራ፤

3. ስለዚህም የዚህን ቤት (የካዕባን) ጌታ ብቻ ያምልኩ::

4. ያንን ከርኃብ ያበላቸውን፤ ከፍርሃትም ያዳናቸውን (ጌታ ብቻ ያምልኩ)::

1. (መልዕክተኛችን ሙሐመድ ሆይ!) ያንን በምርመራው ቀን የሚያስተባብለውን ሰው አየህን? (አወከውን?)

2. ይሀውም ያ የቲምን በኃይል የሚገፈትረው፤

3. ድሃን በማብላት ላይም የማያነሳሳው ነው።

4. ወዮላቸው ለሰጋጆች፤

5. ለእነዚያ እነርሱ ከስግደታቸው ዘንጊዎች ለሆኑት (ሰጋጆች)፤

6. ለእነዚያ እነርሱ ይዩልኝ ባዮች ለሆኑት፤

7. የዕቃ ትውስትንም ሰዎችን የሚከለክሉ ለሆኑት ሁሉ ወዮላቸው::

1. (መልዕክተኛችን ሙሐመድ ሆይ!) እኛ በጣም ብዙ በጎ ነገሮችን ሰጠንህ።

2. ስለዚህ ለጌታህ ብቻ ስገድ:: በስሙም ብቻ ሰዋ።

3. የሚጠላህ ሁሉ እርሱ በእርግጥ ዘሩ የተቆረጠው ነው።

1. (መልዕክተኛችን ሙሐመድ ሆይ!)- (ለካሓዲያን እንዲህ) በላቸው፡- እናንተ ከሓዲያን ሆይ!

2.ያንን የምትገዙትን (ጣዖት አሁን) አልገዛም::

3.እናንተም እኔ የምገዛውን (አምላክ አሁን) ተገዢዎች አይደላችሁም::

4. እኔም ያንን የተገዛችሁትን (ወደ ፊት) ተገዢ አይደለሁም::

5. እናንተም እኔ የምገዛውን (ወደ ፊት) ተገዢዎች አይደላችሁም::

6. እናንተ የራሳችሁ ሃይማኖት አላችሁ:: እኔም የራሴ ሃይማኖት አለኝ -በላቸው::

1. (መልዕክተኛችን ሙሐመድ ሆይ!) የአላህ እርዳታና (የመካ) መከፈት በመጣ ጊዜ፤

2. ሰዎችም ቡድን ቡድን እየሆኑ ወደ አላህ ሃይማኖት ሲገቡ ባየህ ጊዜ፤

3. ጌታህን ከማመስገን ጋር አጥራው። ምህረትንም ለምነው፤ እርሱ ጸጸትን በጣም ተቀባይ ነውና።

1. የአቡ ለሀብ ሁለት እጆች ከሰሩ፤ (ጠፉ)፤ እርሱም ጠፋ።

2.ገንዘቡም ያም ያፈራው ሁሉ ምንም አልጠቀመዉም

3.የመንቀልቀል ባለቤት የሆነችን እሳት በእርግጥ ይገባል::

4.ሚስቱም ትገባለች፤ እንጨት ተሸካሚዋ።

5.በአንገቷ ላይ የጭረት ገመድ ያለባት ስትሆን ትገባለች::

1. (መልዕክተኛችን ሙሐመድ ሆይ! እንዲህ) በል፡ -እርሱ አላህ አንድ ብቻ ነው::

2.አላህ የሁሉ ነገር መጠጊያ ነው::

3.አልወለደም፤ አልተወለደምም::

4. ለእርሱም አንድም ብጤ የለዉም።

1.(መልዕክተኛችን ሙሐመድ ሆይ! እንዲህ) በል፡ -በተፈልቃቂው ጎህ (በአል-ፈለቅ) ጌታ እጠበቃለሁ፤-

2.ከፈጠረው ፍጡር ሁሉ ክፋት::

3.ከሌሊትም ክፋት በጨለመ ጊዜ፤

4. በቋጠሮዎች ላይ ተፊዎች ከሆኑት ደጋሚ ሴቶችም ክፋት፤

5. ከምቀኛም ክፋት፤ በተመቀኘ ጊዜ (በአሏህ) -እጠበቃለሁ- በል::

1.(መልዕክተኛችን ሙሐመድ ሆይ! እንዲህ) በል፡ -የሰዎች ሁሉ ፈጣሪ በሆነው ጌታ እጠበቃለሁ፤

2.የሰዎች ሁሉ ንጉስ በሆነው ጌታ፤

3.የሰዎች ሁሉ አምላክ በሆነው ጌታ፤

4. ከዚያ ብቅ እልም ባይ ከሆነው ጎትጓች ክፋት፤

5. ከዚያ በሰዎች ልቦች ውስጥ የሚጎተጉት ከሆነው፤

6. ከጂንም ይሁን ከሰው ሰይጣን ክፋት (እጠበቃለሁ)።