Akanca (Aşanti) Meal — Harun İsmail — Mürselat 77:1 – Nas 114:6

Mede mframa a, εrebͻ toatoasoͻ,

Na εfa mframa a ano yε den.

Ne (Soro abͻfoͻ a, wͻde nsumunaeε no) hwete kͻ meamea,

Ne wͻn a wͻpaepae Nokorε ne nkontompo no mu,

Ne Abͻfoͻ a, wͻde Adiyisεm no berε Akͻmhyεfoͻ no,

De yε nyinasoͻ anaa kͻkͻbͻ no di nse sε:

Nokorԑ deԑ yɛahyԑ ho bᴐ no bɛsi.

Sε Nsoromma (nhyerεnee) pepa firi hͻ,

Na sε ͻsoro sunsuan asin-asini,

Na sε mmepͻ bubu gͻsͻͻ,

Na sε εberε a yɛahyε ama Asomafoͻ no duru hͻ a,

Yεde ahyε da bεn?

Yεde ahyε Aseni Da (anaa nokorε ne nkontompo mpaapaamu Da no).

Ԑdeεn na εbεkyerε wo sεdeε Aseni Da no (huu) siteε?

Saa Da no, due nka wͻn a wͻfaa (Owusͻreε Da) no sε atorͻsεm no.

Yɛansεe adikanfoͻ no (a wͻannye annie) no?

Saa ara na Yεbεma nkyirimma yi nso atoa wͻn soͻ.

Saa ara na Yεdeyε abͻneεfoͻ no.

Saa Da no, due nka wͻn a wͻfaa (Owusͻreε Da) no sε atorͻsεm no.

Yɛammͻ mo amfiri nsuo a yɛbu no animtia mu?

Ɛna Yεdehyεε bea bi a εhͻ dwoͻ (wͻ awodeε mu)?

Kͻpem εberε bi a yɛahyehyε ato hͻ?

Ɛna Yεtotoo no pεpεεpε. Hwε sεdeε yɛsi toto ntotoeε pa.

Saa Da no, due nka wͻn a wͻfaa (Owusͻreε Da) no sε atorͻsεm no.

Yεnyεε asaase no tenabea a εgye

Ateasefoͻ ne awufoͻ?

Ɛna Yεde mmepͻ atenten asisi soͻ, εna Yεma mo nsuo a εyε dε nom?

Saa Da no due nka wͻn a wͻfaa (Owusͻreε Da) no sε atorͻsεm no.

(Saa Da no, yεbεka akyerε wͻn sε): “Monkͻ deε mobuu no atorͻsεm no mu,

Monkͻ nwunu a, εwͻ nkorabata mmiεnsa no mu.

Ɛnyε nwunu, na εnyε mfasoͻ biara nso (mma wͻn) wͻ gyaframa no ho.

Nokorε sε, (saa gya no) turituri gyasrama a, εtesε abrosan,

Te sε nyoma nsikaa-nsikaa’’.

Saa Da no, due nka wͻn a wͻfaa (Owusͻreε Da) no sε atorͻsεm no .

Saa Da no, wͻntumi nkasa,

Na yεmma wͻn kwan na wͻapa kyεw.

Saa Da no, due nka wͻn a wͻfaa (Owusͻreε Da) no sε atorͻsεm no.

Mpaepae mu anaasε Aseni Da no nie, Yɛaboa mo ne tetefoͻ no nyinaa ano.

Enti sε mowͻ pͻ bi bͻ a, εneε momͻ ntia Me.

Saa Da no, due nka wͻn a wͻfaa (Owusͻreε Da) no sε atorͻsεm no.

Nokorε sε, Nyamesurofoͻ no wͻ nwunu mu, ne nsuo aniwa ho,

Ne nnuaba ahodoͻ a wͻn kͻn dͻ.

(Yεbεka akyerε wͻn sε): “Dwuma (pa) a modiiε no ho nti no, monfa anigyeε nnidi na monom".

Nokorε sε, saa ara na Yɛtua apapafoͻ no (dwumadi pa) no so ka.

Saa Da no, due nka wͻn a wͻfaa (Owusͻreε Da) no sε atorͻsεm no.

(Abͻneεfoͻ), monidi, na monye moani berε tiaa bi, nokorε sε, moyε abͻneεfoͻ.

Saa Da no, due nka wͻn a wͻfaa (Owusͻreε Da) no sε atorͻsεm no.

Sε yεkakyerε wͻn sε, momͻ momu ase (nsom Onyankopͻn) a, wͻmmͻ wͻn mu ase.

Saa Da no, due nka wͻn a wɔfaa (Owusͻreε Da) no sε atorͻsεm no.

Enti (Qur’aan yi mu nsεm) akyi asεm bεn bio na wͻbεgye adie?

Ɛfa εdeεn ho na wͻrebisa wͻn ho wͻn ho no?

Ɛfa Amanebͻ (anaasε Asεm) kεseε no ho asεm no anaa?

Ɛno na wͻregye ho akyinnyeε no?

Nokorε sε wͻbɛhunu.

Nokorε bio sε wͻbɛhunu.

Yεnfaa asaase nsεε hͻ ntrεε mu?

Ɛna Yɛayε mmepͻ te sε epie de atintim soͻ?

Ɛna Yɛabͻ mo mmienu mmienu (onini ne ͻbedeε).

Ɛna Yɛayε monna no ahomegyeε (berε paa)?

Ɛna Yɛayε anadwo (sε) akatasoͻ (ama mo)?

Ɛna Yɛayε adekyeε no (εberε a mode) hwehwε akͻnhoma?

Ɛna Yɛasi ͻsoro nson a εyε den papaapa wͻ mo apampamu?

Ɛna Yɛayε kanea a εhyerεn papaapa wͻ mu?

Ɛna Yɛsane nsuo firi mununkum no mu ma no bu soͻ?

Sεdeε Yεde bεma nnuaba ne mfudeε afifire,

Na turo mu nneεma nso bεka abͻmu yuu.

Nokorε sε Asɛnni Da no yε εberε a yɛahyε ato hͻ.

Ɛda a yεbεbͻ Totorobεnto no mu no, mobεba no akuo-akuo,

Na ͻsoro bebue na ayε apono,

Mmepͻ nso bɛtutu afiri hͻ na (asaase so) ayε sε kum-aforͻteε.

Nokorε sε, Amanehunu gya no tε baabi retwεn.

Ɛhͻ ne abͻneεfoͻ no nnkyi,

Wͻbεtena mu mfe tenten.

Wͻnya nwunu wͻ hͻ, na wͻnya anom deε biara nso nka nhwε,

Gyesε nsuo hyeε a aben papaapa ne ekuro mu nsuo (na wͻbεnom).

Akatua a εfata (wͻn) no no.

Nokorε sε, na wͻnsusu(wͻn dwumadi bͻne no ho) akontabuo no,

Wͻfaa Yεn Nsεm no atorͻsεm paa.

Biribiara nso yɛatwerε ato hͻ wͻ Nwoma mu.

Enti monka (mo dwumadi bͻne no so aba) nhwε, na Yεmfa hwee nka mo ho gyesε asotwee.

Nokorε sε, nkonimdie wͻ Nyame-surofoͻ no,

(Wͻbɛnya) Turo, ne bobe,

Ɛne mmabaawa a wͻbͻ tipεn,

Ne nkuruwa a yɛahyehyε no ma-ma.

Wͻnte nsεm hunu anaa nkontomposεm biara wͻ hͻ,

Akatua a efiri wo Wura Nyankopͻn hͻ, εyε akyεdeε a εsom bo.

Ͻsoro ne Asaase ne deε εwͻ mfinfii no Wura, Ahummͻborͻ Hene no, obiara nni hᴐ a (ɔbɛnya akokoᴐduro) sε ͻne no bεkasa.

Ɛda a Honhom no ne Soro abͻfoͻ no bεto santen no, obiara nkasa gyesε obi a Ahummͻborͻ Hene no ama no kwan, na ͻbεka asεm a εyε.

Saa Da no yε nokorε, enti obi a ͻpε no, ͻnfa ne Wura Nyankopͻn hͻ nyε ne nkyi.

Nokorε sε Yεrebͻ mo kͻkͻ fa asotwee a abεn no ho. Ɛda a onipa bɛhunu dwuma a ne nsa adi ato n’anim no, boniayεni no bεka sε: “Ɛkaa menkoa anka meyε mfuturo”.

Mede (Soro abͻfoͻ a wͻyi abͻneεfoͻ no nkwa wͻ) ahometeε soͻ,

Ne (Soro abͻfoͻ a wͻyi apapafoͻ no nkwa) wͻ anigyeε ne ahosεpε soͻ,

Ne (Soro abͻfoͻ a), wͻdware sε asudwarefoͻ de Nyankopͻn ahyεdeε no ba,

Na wͻyε ntεntεm sε akansifoͻ,

Na wͻtoto Nyankopͻn Ahyεdeε no di nse sε:

Ɛda a awosoͻ no bεwoso deε edikan,

Na deε εtͻso mmienu no bεtoa soͻ no,

Saa Da no, akoma bεbͻ binim (ama onipa ho awoso).

Ebinom ani bɛwu.

Wͻka sε: “Enti yεbεsan anyane aba nkwa tebea mu bio?

Aberε a (yawu) ayε nnompe a, ahunu?”

Wͻka sε: “Sε (Wusͻreε no yε nokorε ampa a), εneε na yεresan aba nkwa mu bio no bεyε brεguo (ama yεn Kaafirfoͻ no)“.

(Owusͻreε no) yε Nteamu baako pε.

Na deε wͻbɛhunu ara ne sε, wͻanyane afiri owuo mu na wͻn wͻ asaase soͻ.

Enti Mose ho asεm no abeduru wo hͻ?

Ɛberε a ne Wura Nyankopͻn frεε no wͻ Bonhwa kronkron Tuwa mu hͻ no.

Ɔka kyerεε no sε: “Kͻ Farao hͻ, na nokorε sε wate atua, ayε bͻne atra so “.

Na ka kyerε no sε: “Wopε sε woyε kronkron?

Na menkyerε wo kwan nkͻ wo Wura Nyankopͻn hͻ na nya Ne ho suro?”

Ɔde Nsεnkyerεnee akεseε no kyerεε no.

Nanso ᴐfaa no atorᴐsԑm, yεε asoͻden nso.

Afei ͻdanee n’akyi maae, bͻͻ mmͻden (sε ͻbεko atia Mose ne ne Nyankopͻn).

Ɔboaboaa ne nkorͻfoͻ ano paee mu (de too wͻn anim),

Ɔkaa sε: “Me ne mo wura kokuroko no “.

Enti Nyankopͻn de daakye ne seseei (wiase) asotwee no twee n’aso.

Nokorε sε, adesua wͻ woi mu de ma obi a osuro Nyankopͻn.

Enti (nnipa), mo mmͻeε na εyε den anaasε ͻsoro? Ɔno na Ɔbͻeε,

Pagyaa ne soro kͻ, siesieε, totoo no pεpεεpε,

Ɛna n’anadwo no nso Wayε no esum, εna Wama n’adekyeε nso nhyerεnee,

Ɛna εno akyiri no, Ɔde asaase sii hͻ sε kosua trεε mu,

Maa emu nsuo ne emu nwira puepueeε.

Ɛna Ɔde mmepͻ nso atintim so pintinn,

(Woi nom) yε akͻnhoma ma mo ne mo ayεmmoa.

Sε Mmusuo Da kεseε no ba a,

Saa Da no na onipa bεkae ne mmͻden a ͻbͻeε.

Amanehunu gya bεda adi pefee ama obi a ohunu.

Na obi a ͻtee atua dii bͻne,

Na (ᴐhwԑԑ mu) yii wiase asetena yi no,

Nokorε sε, Amanehunu gya no mu ne ne fie.

Na obi a ͻno deε osuroo sε ͻbɛgyina ne Wura Nyankopͻn anim, na osii ne kraa ho kwan frii honam apεdeε anaa honam akͻnͻdeε ho no,

(Saa nipa no) fie ne ͻsoro aheman no mu.

Wͻrebisa wo εberε no ho asεm sε, εberε bεn na ebesie?

(Ɛberε a εbesie no deε) deεn na wo (bɛtumi) aka fa ho?

Ne brε a εbesie no deε εwͻ wo Wura Nyankopͻn hͻ.

Na wo (Nkͻmhyεni) deε woyε kͻkͻbͻni ma obi a ɔsuro (saa Da no).

Ɛda a (wͻn a wͻnnye nnie no) bɛhunu (saa Da) no no, εbεyε wͻn sε anyumerε mu anaa anͻpa mu berε tiaa bi na wͻde tenaa (wiaseε).

(Nkͻmhyεni) anim sesaae, na ͻdanee ne ho.

Efirisε onifirani no baa ne hͻ,

Na εdeεn na εbεkyerε wo sε ebia (saa onifirani no) bεyε kronkron,

Anaasε ͻde afutuo no bεto n’adwene mu ama afutuo no ho aba no mfasoͻ?

Obi a ͻhwε ne ho sε ͻsom bo no,

Ɔno mmom na wotie no.

Sε wannyε kronkron a, εho asεm nna wo so.

Obi a wabͻ mmͻden aba wo hͻ,

Na osuro (Nyankopͻn no)

Ɔno mmom na wayi w’adwen afiri ne soͻ.

Daabi, εyε Afutusεm,

Enti obi a ͻpε no, ͻmfa ntu (ne ho) fo.

Ɛwͻ Animuonyam Nwoma (a εwͻ Nyankopͻn hͻ) no mu.

(Nwoma a) εkorͻn wͻ Animuonyam ne kronkron yε mu,

Wͻ (Soro abͻfoͻ) Atwerεfoͻ nsam,

(Atwerεfoͻ) Animuonyamfoͻ apapafoͻ no.

Due nka onipa. Sεdeε ne boniayε si teε

Ͻbͻͻ no fri adeε bεn mu?

Ɔbͻͻ no fri ahobae mu, εna Osiesiee no,

Afei Ɔyɛε ne kwan so dwoodwoo maa no.

Afei na Wasan ama no awu na Wasie no wͻ adakamena mu.

Na sε Ɔpε nso a na Wanyane no (afri owuo mu).

Daabi, nanso (onipa) nyε deε (Nyankopͻn) ahyε ( no sε ͻnyε).

Enti onipa nhwε n’aduane (ahyε ase),

Yɛhwie nsuo no ma ebuso paa,

Afei na Yɛama asaase no apaepae paa,

Na Yɛama nnuaba afifi wͻ so,

Ne bobe ne wira ne mfudeε ahodoͻ,

Ne nku dua ne akyiresua dua;

Ne Turo a yɛagye ho a nnua ateten ahyε mma,

Ne nnuaba ne wira a mmoa weε.

Ԑyԑ akᴐnhoma ma mo ne moayεmmoa.

Na sε nteamu denden no ba a,

Saa Da no onipa bɛdwane ne nua,

Ne ͻmaame ne ne papa,

Ne ne yere ne ne mma.

Saa Da no, wͻn mu nipa biara ani bεbere wͻ asεm a εfa ͻno ara ne ho a, obi deε mmfa ne ho.

Saa Da no, ebinom anim bεhyerεn,

Asere wͻ anigyeε mu,

Saa Da no, ebinom nso anim bεyε mfuturo,

Esum bεkata wͻn so, na animguaseε bεka wͻn,

Saa nkorͻfoͻ no ne (Kaafirfoͻ) boniayεfoͻ nnipa bͻnefoͻ no.

Sε yεbobͻ awia ma ne nhyerεne no firi hͻ na εyε tumm a,

Na sε Nsoromma tete hwe,

Na sε mmepͻ tutu fri hͻ,

Na sε yεto yoma bedeε a ͻnyem abosome du asaworam,

Na yεboa nkeka-boaa ano wͻ faako ,

Na sε ogya tͻ po mu na ehuru, anaasε eyiri ma no kabom yε ͻpo baako,

Na sε yεka akra ne (honam) bͻ mu,

Na yɛbisa abaayaa (akokoaa) a, yɛasie no animono so sε:

“Ɛdeεn bͻne na ͻyεeε a yɛkum no?”,

Na sε yɛbue (obiara adwuma a, odiiε ho) Nwoma no mu,

Na sε ͻsoro nkatanimu no yi na efiri ne tebea hͻ,

Na yεsͻ Amanehunu gya no ano,

Na yεde ͻsoro Aheman no bεn (agyidiefoͻ no) a,

(Ɛhͻ na) ͻkra biara bɛhunu (dwuma pa anaasε dwuma bͻne a) ͻde aba.

Mede Nsoromma a,

Epue na εnante kͻtͻ,

Ne anadwo, sε εde ne sum no ba (bεkata biribiara so),

Ne ahomakye, εberε a εbεhome ayi ne nhyerεnee no adie no di nse sε:

Nokorε, (Qur’aan) yε Ɔbͻfoͻ Nimuonyamfoͻ no asεm (a, Nyankopͻn de asomaa no).

(Ɔbͻfoͻ Gabriel) a ͻwͻ Tumi ne diberε wͻ Animuoyam Hene no anim no,

(Gabriel) a (Abofoͻ) yε sotie ma no, Nokwafoͻ no.

Enti mo yͻnko (Muhammad) mmͻͻ dam;

Ԑyε ampa sε, ohunuu (Gabriel) pefee wͻ wiem.

(Muhammad) nyε obi a ͻde Asumade no sie, bͻ ho ayεmuͻnyono.

(Qur’aan) nyε ͻbonsam a yabͻ no dua no asεm.

Na afei εhen na morekͻ yi?

Nokorε sε (Qur’aan) yε afutusεm ma amansan nyinaa,

(Titiriw) de ma mo mu obi a ͻpε sε onya kwankyerε.

Na εnnyε sεdeε mopε, na mmom sεdeε Onyankopͻn, Abͻdeε nyinaa Wura no pε (na εbεyε hͻ).

Sε ͻsoro mu sunsuan,

Na sε Nsoromma tete hwe na ɛtu pete a,

Na sε ͻpo yiri na ɛbu fa so a,

Na sε Adakamena so buebue a,

Ɛna ͻkra biara bɛhunu deε (ͻyε de too) n’anim ne deε εkaa akyire.

Onipa, εdeεn adeε paa na adaadaa wo wͻ wo Wura Adom Hene no ho?

(Wo Wura) no a Ɔbͻͻ wo, nwenee wo siesiee wo, totoo wo pεpεεpε-

De wo too mfonini biara a Ɔpε mu.

Aane, nanso monnye Atemmuo no nni.

Nokorε sε, (Soro abͻfoͻ) Awεnfoͻ ka mo ho.

Atwerεfoͻ Animuonyamfoͻ no,

Wͻnim deε moreyε (nyinaa).

Nokorε sε, apapafoͻ no bεwͻ anigyeε mu,

Nokorε nso sε, abͻneεfoͻ no bεkͻ Amanehunu gya no mu.

Wͻbεkͻ mu wͻ Akatua da no,

Na wͻmmfiri mu.

Ԑdeεn na εbεkyerε wo sεdeε Akatua da no si teε?

Bio, εdeεn na εbεkyerε wo sεdeε Akatua da no si teε?

Ɛyε Da a, ͻkra bi nni tumi a ͻde bεboa ͻkra bi wͻ biribi ho; na saa Da no tumi nyinaa wͻ Nyankopͻn.

Due nka asisiefoͻ no,

Wͻn a sε wͻrehyε (biribi te sε kookoo anaa aburoo anaa nkyene anaa εmoo) afri (obi hͻ a) wͻhyε ma εyε ma;

Na sε wͻrehyε anaasε wͻresusu (ama obi a) wͻte so (bͻ saa nipa no nyansa korͻno).

Enti saa nkorͻfoͻ no nnwen sε yεbɛnyane wͻn-

Ama Ɛda kεseε bi?

Ɛda a nnipa nyinaa bɛgyina Abͻdeε nyinaa Wura Nyankopͻn anim no?

Daabi, Abͻnefoͻ no Nwoma wͻ ‘Sijjinn’ mu.

Na εdeεn na εbεkyerε wo adeε a εyε ‘Sijjnn’ no?

Ɛyε Nwoma a yɛatwerε (fa abͻneεfoͻ no nnwuma ho).

Saa Da no, due nka wͻn a wͻfa (Nokorε no) sε atorͻsεm no,

Wͻn a wͻfa Akatua da no atorᴐsԑm no,

Na obiara nni hͻ a ᴐfa no atorᴐsԑm, gyesε mmaratoni, ͻbͻneεni.

Sε yεrekenkan Yεn Nsεm no kyerε no a, deε ͻka ne sε: “Tetefoͻ no anansesεm”.

Daabi, (Dwumadi bͻne a) wͻnsa aka no awe naakye wͻ wͻn akoma mu,

Daabi, saa Da no yεde ntwaremu bɛtware wͻn ne wͻn Wura Nyankopͻn ntεm.

Afei yεde wͻn bεkͻ Amanehunu gya no mu.

Afei yεbεka sε: “Woi na mofaa no atorͻsεm no “.

Aane, nokorε sε apapafoͻ no Nwoma wͻ ‘illiyyiin.

Na εdeεn na εbεkyerε wo deε εyε ‘Illiyyuun’ no?

Ɛyε (apapafoͻ no nnwuma a yɛatwerε) ho Nwoma,

(Soro Abͻfoͻ) a wͻbεn (Nyankopͻn) no di ho adanseε.

Nokorε sε, apapafoͻ no wͻ anigyeε mu-,

Wͻ Animuonyam Ahennwa so rehwε (deε εrekͻ soͻ).

Wohunu anigyeε no nhyerεnee wͻ wͻn anim.

Yεbεma wͻn nsa kronkron a yɛatua ano anom.

N'awieɛ no yε ‘Misk’. Woi so na wͻn a, wͻresi akan (wɔ nnepa ho no) nsi akan.

‘Tasniim’ na yεde bεfra (saa nsa no).

(‘Tasniim no) yε Asutire bi a wͻn a wͻbεn (Nyankopͻn) no bεnom mu (nsuo).

Nokorε sε na abͻneεfoͻ no sere wͻn a, wͻagye adie no.

Sε wᴐretwa mu (wͻ agyidiefoͻ no) ho a, (boniayεfoͻ no) bͻ wͻn ani kyerε wͻn ho wͻn ho (de di agyidiefoͻ no ho fεw).

Sε wͻsan kͻ wͻn nkorͻfoͻ no hͻ a, wͻsan kͻ no fεw die so.

Sε wͻhu (agyidiefoͻ) no a, asεm a wͻka ne sε: “Nokorε sε, saa nkorͻfoͻ yi ayera paa.”

Nanso yεnsomaa wͻn sε wͻmεhwε (agyidiefoͻ no) so.

Saa Da no deε, wͻn a wͻagye adie no bεsere wͻn a wͻannye annie no,

(Wͻtete) Animuonyam Ahennwa so rehwε (deε εrekͻ soͻ).

Enti boniayεfoͻ no nyaa deε na wͻreyε no so akatua pεpεεpε?

Sε ͻsoro sunsuan asin-asin,

Na ɔtie ne Wura Nyankopͻn ahyεdeε a, εyε n’asεde (sε ͻyε sotie de ma ne Wura Nyankopͻn ahyεdeε).

Na sε asaase no mu twe,

Na ɔyi deε εwͻ ne mu nyinaa firi adi, na εda mpan,

Na ɔtie ne Wura Nyankopͻn ahyεdeε a, εyε n’asεde (sε ͻyε sotie de ma ne Wura Nyankopͻn ahyεdeε).

Onipa dasani, bͻ mmͻden paa (di dwuma) a εkͻ wo Wura Nyankopͻn hͻ, na nokorε sε wobɛhyia no, (anaasε wobɛhyia wo dwumadie no so akatua, sε εyε papa anaasε bͻne).

(Saa Da no) obi a, yεde ne (Dwumadie ho) Nwoma bεma no wͻ ne nsa nifa mu no,

(Saa nipa no) bɛbu nkonta a εyε mmrε,

Na ͻbεdane ne ho akͻ n’abusuafoͻ hͻ wͻ anigyeε mu.

Na mmom obi a yεde ne Nwoma bεfa n’akyi ama no wͻ n’akyi no,

Ɔbɛsu afrε owuo,

Na ͻbεkͻ Ogya frama mu.

(Ԑberε a na ͻwͻ wiaseε no) na n’ani gye wͻ n’abusuafoͻ mu.

Nokorε sε na ͻdwen sε ͻnsan nkͻ (Nyankopͻn) hͻ bio.

Aane, nokorε sε na ne Wura Nyankopͻn hu no (abrε biara).

Mede tͻ-wia, anaasε εberε a awia akͻtͻ ama ewiem ayε kͻͻ no,

Ne Anadwo, ne adeε biara a anadwo ka no soͻ, anaasε εboa ano wͻ faako,

Ne εberε a bosome bɛnyini atwa kanko no di nse sε:

“Nokorε, mobεforo afri gyinabrε mu, akͻ gyinabrε mu (wͻ wiase ne Daakye),

Na afei εdeεn na εha wͻn a enti wͻnnye (Nokorε no) nnie,

Na sε yεrekenkan Qur’aan kyerε wͻn a wͻmmfa wͻn anim mmutu fͻm?

Aane, wͻn a wͻnnye nnie no fa no sε atorͻsεm.

Nyankopͻn deε Ɔnim deε wͻde suma.

Enti fa asotwee yaaya no ho anohoba no bͻ wͻn.

Na mmom wͻn a wͻagye (Nokorε no) adie na wͻdi dwuma pa no deε, wͻn wͻ akatua a enni awieε.

Mede ͻsoro a, ɛkuta Nsoromma akεseε,

Ne εda a yɛahyε ho bͻ no,

Ne ͻdanseni no, ne adeε a, ͻredi ho adanseε no di nse sε:

Due nka wͻn a wͻtuu Amena (de agyidiefoͻ guu mu hyee wͻn)-

Wͻ ogya tanaa a, yɛasͻ ano mu no.

Ɛberε a, na wͻkoto (ogya) no ho no,

Na wɔnom ara yɛ adansefoɔ wɔ neɛ na wɔredeyɛ agyidifoɔ no.

Ɛnyε hwee ho nti na wͻhyεε wͻn aniεyaa, na mmom sε wͻn agye Otumfoͻ, Ayeyie Wura Nyankopͻn no adi nti.

(Nyankopͻn) no a, ͻsoro ne Asaase so Ahennie yε Ne dea no. Onyankopͻn deε Odi biribiara ho adanseε.

Wͻn a wͻtan agyidiefoͻ mmarima ne agyidiefoͻ mmaa no ani, na wͻn ansakra wͻn adwene no, wͻbɛnya Amanehunu gya no mu asotwee, na wͻsan wͻ ͻhyeε asotwee.

Nokorε sε, wͻn a wͻagye adie, na wͻdii dwuma pa no, wͻbɛnya Ahemman a, nsubͻnten nenam aseε; na εno ne Nkonimdie kεseε no.

Nokorε sε, wo Wura Nyankopͻn buma (anaasε N’asotwee) mu yε den papaapa.

Nokorε sε, Ɔno na Ɔhyεε aseε bͻͻ adeε, εna Ɔbεsan de aba nkwa mu bio.

Ɔne Bͻnefakyε Hene, Ɔdͻ ne Ayεmyε Wura no,

(Ɔne) Animuonyam Ahennwa Hene no,

(Otumfoͻ a) Ɔyε deε Ɔpε.

(Ɔkͻmhyεni), asraafoͻ no ho asεm no abɛduru wo hͻ?

(Ɛyε) Farao ne Samuud (asraafoͻ no)?

Nanso wͻn a wͻnnye nnie no gu so po (Nokorε no).

Nyankopͻn firi wͻn akyi atwa ahyia.

Aane, εyε Qur’aan, Animuonyam (Nwoma) noa,

Ɛwͻ (Nyankopͻn) Apaawa (Lawuhul-Mah’fuuz) a, (Soro abͻfoͻ) bͻ ho ban no so.

Mede ͻsoro, ne anadwo-Srafoͻ no di nse.

Na εdeεn na εbεkyerε wo deε εyε Anadwo-Srafoͻ no?

Ɛyε Nsoromma a, εhyerεn papaapa.

Ɔkra biara nni hͻ a, ͻwεnfoͻ nni ne soͻ.

Enti onipa nhwε adeε a yεbͻͻ no firii mu.

Yεbͻͻ no frii nsuo a, epue ba mu.

Epue fri sisie ne mfem-padeε ntεm.

Ɛyε nokorε sε, Nyankopͻn wͻ tumi sε (onipa wu a) Ɔnyane no san ba nkwa mu bio.

Ɛda a, deε asuma biara bεda adie no,

(Saa Da no) onipa nni tumi anaa ͻboafoͻ biara.

Mede ͻsoro a, ɛdi nsutͻ ho akͻneaba,

Ne asaase a, ɛbue (ma nnͻbae ne nsuo puepue fri mu) no di nse sε:

Nokorε, saa (Qur’aan yi) yε Asεm a εda nokorε ne nkontompo adie;

Na εnyε fεw die.

Nokorε sε, (abͻneεfoͻ no) rebͻ pͻ (atia Muhammad),

Na Me (Nyankopͻn) nso Merebͻ pͻ.

Enti (Ɔkͻmhyεni), wodeε to wobo ase ma boniayεfoͻ no, na ma wͻn εberε kakra.

Bͻ wo Wura Nyankopͻn Kokuroko no abodin.

(Wo Wura) no a Ɔbͻͻ adeε, totoo biribiara pεpεεpε,

Na Ɔyε nhyehyεe san kyerε (nipa) kwan,

Na Ɔma nwira mono fifiri,

Na Ɔma no woɔ, na ɛdwan.

(Ɔkͻmhyεni), Yεbεkenkan (Qur’aan no) akyerε wo, na wo werε mfi,

Gye sε deԑ Nyankopͻn pε. Nokorε sε, Ɔno na Ɔnim deε εda adie ne deε asuma.

Na Yεbεyε no mmrε ama wo ama no ayε mmrε.

Enti tu (wͻn) fo, efrisε mfasoͻ wͻ afutuo no so.

Obi a ɔsuro Nyame no de bɛtu ne ho fo.

Na otibͻneni no deε ͻbεtwe ne ho afiri ho.

Ɔno na ͻbεkͻ egya kεseε no mu no.

Ɔnnwu wͻ mu, na ɔnya nkwa nso.

Nokorε sε, obi a ɔbɛdi ne ho nni anaasε ͻbεyε kronkron no adi nkonim,

Na Ͻbͻ ne Wura Nyankopͻn abodin, yԑ Sala (anaa ͻfrε Nyame).

Nanso mopε saa wiase asetena yi,

Aberε nso a Daakye deε no na εyε, εno nso na εwͻ hͻ daa.

Nokorε sε, saa (afutuo) yi wͻ tetefoͻ no Nsεmpa no mu;

Abraham ne Mose Nsεmpa Nwoma no.

Asεm kεseε a (nehuu) boro (nipa) soͻ no ho asεm no abɛduru wo hͻ?

Saa Da no, ebinom ani bɛwu,

Adwumaden, ͻberεhunu,

Wͻbεkͻ Ogya tanaa a, ano yε den paa mu,

Yεbεma wͻn anom nsuo wͻ Nsuohyeε abura mu.

Wͻnya aduane nni, na mmom gye sε (nkasεε dua nyononyono bi a yεfrε no) ‘Doariin’ (na wͻbεweε).

Ɛnyε wͻn honam yie, na εmmee wͻn nso.

Saa Da no ebinom nso anim bεyε frͻmfrͻm fεfεεfε.

Wͻn ani bεgye wͻn mmͻdemmͻ ho,

Wͻ Animuonyam Aheman no mu.

Wͻnte nsεm hunu biara wͻ hͻ.

Asutire a εretene bi wͻ mu.

Animuonyam ahennwa bi a yama soͻ nso wͻ mu,

Ne nhwehwε nkuruwaa a, esisi hͻ,

Ne mpikyi (anaasε atԑ anaa Kushin) a, yato no santen.

Ɛne kapεt papa a, εsesε hͻ.

Enti wͻnhunuu sεdeε yɛasi abͻ Yoma?

Ɛne ͻsoro sεdeε yɛasi apagya no?

Ɛne mmepͻ, sεdeε yɛasi de atintim hͻ pintinn?

Ɛne asaase sεdeε yɛasi atrε mu?

Enti tu (wͻn) fo, efirisε woyε obi a wotu (amanfoͻ) foͻ.

Wonyε obi a wohyε wͻn so,

Na mmom obi a, ͻbεdane n’akyi ama na wapo (nokorε) no,

Nyankopͻn de asotwee kεseε no bεtwe n’aso

Nokorε sε Yεn hͻ na wͻbεsan aba;

Nokorε bio nso sε wͻn akontabuo da Yεn so.

Mede Ahomakye,

Ne Anadwo du no;

Ne (abͻdeε a egu) mmienu-mmienu ne Nea Ɔda mu Fua no,

Ne εberε a anadwo bɛfiri hͻ akͻ, di nse.

Enti nsedie wͻ woi mu de ma mmadwemmafoͻ?

Wonhunuu sεdeε wo Wura Nyankopͻn de yεε Aadfoͻ?

(Kuro) Iramfoͻ no, adan atenten wuranom a,

Yεmmͻͻ wͻn sεso (anaasε yenni wͻn adan no sεso) wͻ asaase soͻ?

Ɛne Samuudfoͻ no a, na wͻdwa abotan mu wͻ bonhwa no mu hͻ (deyε wͻn atenaeε no)?

Ɛne Farao, Asraafoͻ dͻm Wura, anaa sε εpa Wura (a, na ͻbͻ nneduafoͻ wͻ εpa mu no)?

Wᴐn a wᴐdii nsεmͻnee wͻ asaase no so,

Enti maa bͻne dͻͻso pii wͻ soᴐ no,

Wo Wura Nyankopͻn hwiee asotwe abaa-twa guu wͻn so.

Nokorε sε, wo Wura Nyankopͻn tε hͻ rewεn.

Onipa deε sε ne Wura Nyankopͻn sͻ no hwε, hyε no animuonyam, na Ɔyε no adom bi a, ͻka (de tu ne ho) sε: “Me Wura Nyankopͻn ahyε me animuonyam".

Na mmom sε Ɔsͻ no hwε na Ɔma ne ho kyere no wͻ akͻnhoma ho (anaa sε Ɔma no hia no) a, ͻka sε: “Me Wura Nyankopͻn agu m’anim ase “.

Daabi (ԑnte saa), nanso monnfa obuo mma agyanka (anaa awisiaa),

Afei monnhyε sε wͻdidi a, wͻma ahiafoͻ bi die:

Afei modi awugyadeε adefodepε so.

Na modͻ sika ma no bro so;

Daabi, sε asaase bubu na εyε gͻsͻgͻsͻ,

Na wo Wura Nyankopͻn ba na Soro abͻfoͻ no to santen a,

Na saa Da no yεde Amanehunu gya no ba a, saa Da no onipa bεfa adwen anaasε ɔbɛtu ne ho fo, na deεn mfasoͻ na adwen anaa afutuo no bεyε ama no?

Ͻbεka sε: “Mehunuui a anka medii (dwuma pa) detoo m’anim maa me Daakye nkwa nna yi.

Saa Da no asotwee a (Nyankopͻn de bεtwe abͻneεfoͻ no aso no) obiara ntumi ntwe bi saa,

Na sεdeε Ɔbɛsi akyekyere (abͻneεfoͻ no wͻ nkͻnsͻnkͻnsͻn mu no), obiara ntumi nkyekyeree bi saa da.

(Yεbεka akyerε apapafoͻ no sε): “Ɔkra a w’akoma atͻ wo yamu,

San bra wo Wura Nyankopͻn hͻ, Wagye wo atom wonso wagye no atom.

Enti bεka Menkoa no ho,

Na wura Me Soro aheman no mu’’.

Mede saa (Maka) kuro yi di nse sε:

Wo (Ɔkͻmhyεni) wowͻ saa kuro yi mu ho kwan.

Mesan de agya ne deε ͻwoeε di nse sε:

Nokorε, Yεbͻͻ onipa wͻ nkodene, abenedie ne abεbrεsε mu.

Anaa sε n’adwene yε no sε, obiara nni ne so tumi?

Ɔka (de tu ne ho) sε: “Masεe sika pii’’.

Anaa sε n’adwen yε no sε, obi nnhu no anaa?

Yɛamma no ani mmienu,-

Ɛna kεterεma εna anofafa mmienu?

Ɛna Yɛkyerε no (papa ne bͻne) akwan tempͻn mmienu no?

Nanso ͻmmͻ ne ho mmͻden sε ͻbεfa mmepͻ kwan no so.

Ԑdeεn na εbεkyerε wo adeε a εyε mmepͻ kwan no?

(Ɛne sε) wobεma ͻdͻnkͻ faahodie;

Anaa sε wobεma ano duane wͻ ԑkͻm berε mu,

Fama awisiaa a ᴐyԑ busuani,

Anaa sԑ ohiani a wabᴐ fam (anaa ohiani buruburoo).

Na afei ͻbεka wͻn a, wɔagye (Nokorε no) adie no ho, na ͻde aboterε ne ntooboaseε no atu foͻ, na ͻde ahummͻborͻ no ho afutuo no nso atu foͻ.

Saa nkorͻfoͻ no ne Nifa so foͻ no.

Wͻn a wͻapo Yεn Nsεm no nso, wͻn ne Benkum so foͻ no.

Wͻn so na yεde Egya no bεkata atwa ahyia.

Mede Awia ne ne nhyerεnee,

Ne bosome, εberε a ɛbɛdi awia akyi,

Ne adekyeε, εberε a εbεda (awia) animuonyam no adi,

Ne adesaeε, εberε a εbεkata (abͻdeε) soͻ,

Ne ͻsoro ne Nea Osii (ͻsoro no), anaa adeε a yεde yεε ͻsoro no,

Ne Asaase ne Nea Ɔtrεε (asaase no) mu,

Ne (onipa) kraa, ne Nea Osiesiee no pεpεεpε,

Na Oyii deε εyε bͻne, ne deε εyε papa adi kyerεε (ͻkra) no, di nse sε:

Nokorε, obi a ͻbεyε ne kraa kronkron no adi nkonim.

Na nea ɔbɛtia ne kraa soͻ (anaa obegu ne kraa ho fii) no adi nkoguo.

Samuudfoͻ de wͻn atuateε poo (wͻn Nkͻmhyεni Soalihu).

Ɛberε a, wͻn mu tibͻneεni no sͻre tee atua,

Nyankopͻn Somafoͻ (Soalihu) ka kyerεε wͻn sε: “(Aboa no) yε Nyankopͻn yoma bedeε, enti moma no kwan na ͻnom nsuo (no bi).

Nanso wͻbuu no ᴐtorofo, na wͻkum (yoma bedeε) no. Enti wͻn Wura Nyankopͻn de wͻn bͻne sεee wͻn pasaa kataa wͻn so pεpεεpε.

Na Nyankopͻn deε Ɔnsuro (deε Ɔyε biara) akyire asεm.

Mede εberε a, adesaeε bεkata (biribiara) soɔ,

Ne εberε a adekyeε bεhyerεn,

Ne Nea Ɔbͻͻ onini ne ͻbedeε, anaa adeε a yεde bͻͻ onini ne ͻbedeε di nse sε:

“Nokorε, mo mmͻdemmͻ gu sonoko-sonoko”.

Enti obi a ͻbεyε ayεmyε, na ͻbɛsuro Nyankopͻn, (anaa ͻbεyε ahwεyie),

Na ͻbεgye papa no (anaa) deε εyε no adie no,

Yεbεma kwan pa no ayε mmerε ama no bͻkͻͻ.

Na mmom obi a ͻbεyε pεpεε ahwε ne ho sε ͻsom bo-

Na ͻbεpo papa no,

Yεbεma ahokyerε kwan no ayε bͻkͻͻ ama no de no akͻ ahokyerε mu.

Ɛberε a ͻsεeε bεba ne so no, n’agyapadeε no ho mma mfasoͻ mma no.

Ɛyε nokorε sε, Yεn na yεkyerε kwan,

Na εyε nokorε nso sε, Daakye no ne (saa wiase) a edi kan yi nyinaa yε Yεn dea.

Enti Meretu mo fo fa Ogya tanaa no ho.

Obi nnkͻ mu, gye sε otibͻneni no;

(Otibͻneni) no a, ͻpo (Nokorε) na ͻdane n’akyi dema.

Nyamesuroni no nso bεtwe ne ho afiri (ogya tanaa no) ho

(Nyamesuroni) no a, oyi ne sika (Nyame nti) de te ne (kraa) ho no,

Na ɛnni (n’adwene mu) sε (ͻde papa a ͻreyε no) rehwehwε adom akatua bi afiri obi hͻ.

Na mmom ͻde hwehwε ne Wura Nyankopͻn Kokuroko no hͻ animuonyam.

Na nokorε sε, n’ani bεgye (deε Nyankopͻn de bεma no no ho).

Mede Anͻpa-wia nhyerεnee no,

Ne εberε a Anadwo ayε dinn no di nse sε:

(Ɔkͻmhyεni), wo Wura Nyankopͻn mmpaa w’akyi, na N’ani nso nnyae wo ho gyeԑ.

Nokorε sε, Daakye no yε ma wo kyεn seesei.

Na wo Wura Nyankopͻn bεkyε wo akyεdeε a, w’ani bεgye ho.

Wanya wo sε na wo yε agyanka, εna Ɔmaa wo tenaberε?

Ɛna Ɔnyaa wo sε worehwehwε kwan tenenee no, εna Ɔkyerεε wo kwan?

Ɛna Onyaa wo sε ahia woͻ, εna Ɔmaa wonyaa wo ho?

Enti awisiaa deε εnhyε no so.

Na ͻsrεsrεfoͻ (anaa) obisafoͻ nso εnka n’anim (anaa) εmpamo no,

Na mmom wo Wura Nyankopͻn adom no na bͻ ho dawuro.

(Ɔkͻmhyεni), Yɛmmuee anaa Yεntrεε w’akoma mu mmaa wo?

Ɛna Yayi w’adesoa afri wo soͻ?

(Adesoa) no a na emu yε duru (ma wo) wͻ w’akyi no?

Ɛna Yama woso wͻ animuonyam mu?

Nokorε sε, ahokyerε akyi ahotͻ na εwͻ hͻ.

Nokorε sε, ahokyerε akyi ahotͻ na εwͻ hͻ.

Enti sε wowie (adwuma a yεde ahyε wo nsa no a) kͻ so bͻ mmͻden,

Na fa w’adwen ne wo werε nyinaa hyε wo Wura Nyankopͻn mu.

Mede Borͻdͻma ne Nkuu dua,

Ne bepͻ Sinai,

Ne saa ahotͻ Kuro yi (Maka) di nse sε:

Nokorε, Yabͻ onipa asi tebea papa paa so.

Afei Yεbεsan abrε no ase akͻ fam paa.

Gye sԑ wͻn a wͻagye adie na wͻdii dwuma pa no, wᴐn deε wͻn wͻ akatua (papa) a akwansideε biara nni ho anaa sε εtoͻ ntwa da.

Afei woi akyi εdeεn na εmma wonnye (Nyankopͻn) Atemmuo no nnie?

Enti εnnyε Nyankopͻn ne atemmufoͻ no mu Otemmufo?

Bͻ wo Wura Nyankopͻn a Ɔbͻͻ adeε no din na kenkan;

(Wo Wura Nyankopͻn a) Ɔbͻͻ onipa firii mogya a abͻ toa mu.

Kenkan na wo Wura Nyankopͻn ne Adom Hene no,

Ɔno na Ɔde twerεdua kyerε adeε,-

Kyerε onipa adeε a onnim.

Daabi, nokorε sε onipa te atua,

Efiri sε, ͻhwε ne ho sε ͻsombo.

Nokorε sε, wo Wura Nyankopͻn hͻ ne (onipa) nnkyi.

Wahunu obi a osi-

(Nyankopͻn) dͻnkͻ no kwan εberε a ɔrefrɛ Nyame?

Wahunu sε saa (nipa) no wͻ ͻkwan tenenee so?

Anaa sε ͻhyε (amanfoͻ) sε wͻnsuro Nyame nyε ahwεyie?

Wahunu sε obu (Nokorε) no sε atorͻsεm dane n’akyi dema?

Anaa sε onnim sε Nyankopͻn hunu (biribiara)?

Daabi, sε wannyae a, Yεbεsͻ ne moma puaa no mu;

Nkontomponi, debͻneεni moma puaa no.

Na ͻnfrε n’aboafoͻ.

Na Yεbεfrε (Amanehunu gya no mu Abͻfoͻ) Zabaaniya.

Daabi, (Nkͻmhyεni) entie no, na mmom wodeε fa w’anim butu fam na twe wo ho bεn (Onyankopͻn).

Nokorε sε, Yɛsianee (Qur’aan) wͻ Tumi anaasԑ Nhyehyεe Anadwo no mu.

Na εdeεn na εbεkyerε wo sεdeε Tumi anaa Nhyehyεe Anadwo no si teε?

Tumi anaa Nhyehyεe Anadwo no (mu nhyira) kyεn bosome apem.

Soro Abͻfoͻ ne Honhom no (Gabriel) siane (fri soro ba asaase so) wͻ (saa Anadwo no) mu wͻ wͻn Wura Nyankopͻn akwamma mu dema dwumadie biara.

(Saa Anadwo no yε) asomdwoeε nko ara kosi sε ahomakye bεba.

Wͻn a wapo nokorԑ a, wͻwͻ wͻn a yɛmaa wͻn Nyamesom ho Nwoma no mu, ne abosomsomfoͻ no na wͻnntwe wͻn ho mfri (neyεε bͻne ho) kͻpem sε, nyinasoͻ pefee no baa wͻn hͻ.

Ɔsomafoͻ a ɔfiri Nyankopͻn hͻ rekenkan Nwoma a emu nsεm korogyee (kyerε wͻn).

Emu na Nwoma (a mmara nsεm ne ntotoeε pa ne ahyεdeε a), edi mmu no wͻ.

Wͻn a yɛmaa wͻn Nyamesom ho Nwoma no na wͻn ntεm mpaapaee, kͻpem akyire yi a, nyinasoͻ ne nkyerεkyerε mu pefee no baa wͻn hͻ.

Yanhyε wͻn (sε wͻn nyε hwee) na mmom (deε yεhyεε wͻn) ne sε wͻnsom Nyankopͻn wͻ nokorε die mu, na wᴐnfa ᴐsom ma Ͻno nko ara wͻ anidie ne nokorε mu, na wͻnfrε Nyame wͻ ne brε mu, na wͻnyi Zaka; na εno ne ԑkwan a ԑkᴐ ͻsom a εtene no soᴐ.

Nokorε sε, wͻn a wͻpo nokorԑ no a wͻwͻ wͻn a yɛmaa wͻn Nyamesom ho Nwoma no mu, ne abosomsomfoͻ no bεkͻ Amanehunu gya mu. Wͻbεtena mu afe bͻͻ. Saa nkorͻfoͻ no ne abͻdeε bͻne no.

Nokorε sε, wͻn a wɔagye adie na wͻdi dwuma pa no, saa nkorͻfoͻ no ne abͻdeε papa no.

Wͻn akatua wͻ wͻn Wura Nyankopͻn hͻ; (εne) Aheman no a εwͻ hͻ daa a nsubͻnten nenam aseε no. Emu na wͻbεtena afe bͻͻ. Nyankopͻn agye wͻn atum, εna wͻn nso agye no atum. Saa akyεdeε (no) wͻ obi a osuro ne Wura Nyankopͻn.

Sε asaase woso ne nwosoeε no a,

Na asaase yi n’adesoa no firi adi a,

Na onipa ka sε: “Ɛdeεn na aba asaase soͻ a?”

Saa Da no asaase bεbͻ n’amaneε.

Efiri sε, wo Wura Nyankopͻn na ayi no adi na Wahyɛ noɔ,

Saa Da no nnipa bepue akuoakuo sononkosononko akͻhwε wͻn nwuma.

Obi a ɔbɛdi dwuma pa bi a emu duro ketekete te sε aboboaa a (onipa) ani ntumi nhunu no (saa nipa no) bɛhunu (n'adeε).

(Saa ara) nso na obi a, ɔbɛdi dwuma bͻne bi a emu duro ketekete te sε aboboaa a (onipa) ani ntumi nhunu no (ͻno nso) bɛhunu (n'adeε).

Mede (apͻnkͻ a wɔrekͻ sa) na wͻretu mmirika home tehyetehye no di nse,

Ne wͻn tͻte a (etia εboͻ so a), na ate gya no nso di nse.

Na wͻkͻto hyε (atamfoͻ no) so anͻpa tutuutu no di nse.

Na εma mfuturo tu kͻ wiem,

Na wͻbͻ wura (atamfoͻ no) dͻm no mu no di nse sε:

Nokorε onipa ayi ne Wura Nyankopͻn bonniayε;

Ԑyε nokorε sε, ͻno ara di ho adanseε saa;

Ԑyε nokorε nso sε onipa pε adepa paa ma no boro so.

Anaasε ɔnnim sε, sε adeε a εwͻ adaka-mena mu no firi adi a,

Na adeε a εwͻ (onipa) akoma mu nso da adi a,

Saa Da no ɛyɛ nokorε sε (onipa bɛhunu sε) wͻn Wura Nyankopͻn ne wͻn (dwuma a wͻdiiε no ho) amanebͻ Wura.

Dede ne Gyegyeegye (Da) no;

Ɛdeεn ne Dede ne Gyegyeegye (Da) no?

Ɛdeεn na εbεkyerε wo sεdeε dede ne Gyegyeegye (Da) no siteε?

(Ɛyε) Da a onipa bεyε sε akͻbͻnsͻ a, wabͻ asanteε.

Na mmepͻ nso bεyε sε aboa nwii a εrehu korͻ.

(Saa Da no) obi a yεbεsusu (ne papa a ͻyͻeε na) emu bεyε duro (akyεn ne bͻne) no,

Ɔbɛnya asetena pa.

Na mmom obi a ne (papa a ͻyͻeε) mu bεyε hare (akyεn ne bͻne) no,

‘Haawiya’ na εbεyε oni.

Na εdeεn na εbεkyerε wo sεdeε ‘Haawiya’ no siteε?

Ɛyε Ogya tanaa a, ano yε hye papaapa.

(Wiase ahonyadeε) dodoͻ ho apere-apereε asi mo aso.

(Mode no saa ara) kosi sε mobεkͻ akͻsra adakamena (anaasε mobɛwuo).

Daabi, sεdeε εteε biara no mobɛhunu.

Daabi bio, sεdeε εteε biara no mobɛhunu.

Daabi, sε anka monim no wͻ nimdeε pefee mu a,

Anka nokorε sε mobɛhunu Amanehunu gya no (wͻ wiase).

Ansa na moahunu no ani kann (wͻ Atemmuda)

Afei saa Da no yεbɛbisa mo adom akyεdeε (a yεde maa mo degyee moani wͻ wiase) no ho asεm.

(Nyankopͻn) de εberε no di nse sε:

Nokorε, onipa wͻ berεguo mu,

Gye sε wͻn a wͻagye adie na wͻdi dwuma pa no, na wͻde Nokorε no tu (amanfoͻ) foͻ, san de aboterε ne ntooboaseε no kasa kyerε (nnipa)

Due nka (onipa) biara a, odi nsekuro, yε wetεkyerε, ka nkyisεm.

Saa (nipa) no a, waboa sika ano agu hͻ na ͻkan (na ͻnnfa bi nnyε Nyame adwuma no),

Ɔdwen sε ne sika no bεma no atena ase afe bͻͻ.

Daabi da, ampa sε yεbεto no ama no akͻhwe Deε ebubu (biribiara) pasaa no mu.

Na εdeεn na εbεkyerε wo Deε ebubu (biribiara) pasaa no?

(Ɛyε) Onyankopͻn (abufuhyeε) gya bi a yasͻ ano paa-

A, epue wͻ (onipa) akoma mu.

Nokorε sε yεde (saa gya no) bεkata wͻn so atwa ahyia-

(Agu wͻn mpokyerε amantam wͻn) wͻ adum akεseε a εtrε bi mu.

(Ɔkͻmhyεni), wonhunuu sεdeε wo Wura (Nyankopͻn) de yεε Asonofoͻ no?

Wamma wͻn adwen (bͻne) no annyε kwa?

Ɛberε a Ɔsomaa nnomaa akuo-akuo baa wͻn so,

Maa wͻbεtotoo aboͻ a, yato a efri ‘Sijiil’ mu bobͻͻ wͻn.

Yεε wͻn pasaa sε wira a mmoa aweε.

Deε akokwa Quraishfoͻ no,

Deε akokwa wͻn a εne akwantuo a wͻtu no wͻ awͻ berε ne ahuhu berε mu no nti,

Wͻnsom Efie wei (Ka’ba) Wura.

(Nyankopͻn) no a, Ɔbͻ wͻn akͻnhoma fri ͻkͻm mu, na Ɔma wͻn akomatͻyamu firi ehuu mu no.

Wahunu nea ͻsom nkontompo som (anaa) ͻfa Atemmuo no atorᴐsԑm no?

Saa (nipa no) bi ne obi a, ͻpamo agyanka.

Na ͻnhyε (amanfoͻ) sε wͻdidi a wͻma ahiafoͻ no nso bi.

Enti due nka Nyamefrεfoͻ no.

Wͻn a, wͻbu wͻn ani gu wͻn Nyamefrε soͻ no;

Wͻn a wͻyε yεkyerε,

Na wͻsi mmoa ho kwan.

(Ɔkͻmhyεni), Yakyε wo akyεdeε a εdͻͻso.

Enti fa wo mpaebͻ ma wo Wura Nyankopͻn na bͻ okum afͻdeε.

Nokorε sε, obia ͻtan woͻ no, ͻno na ͻyε ͻkͻntεkorͻ a n’ase ahyeε.

(Ɔkɔmhyɛni), ka sɛ: “(Kaafirfoͻ) boniayεfoͻ,

Mennsom adeε a mosom.

Ɛna monso monnsom Nea mesom no.

Na εmma sε mεsom adeε a mosom,

Ɛna monso monnsom Nea mesom no,

Mosom wͻ mo, menso mesom wͻ me.

Sε Nyankopͻn mmoa ne Nkonimdie no ba a,

Wobɛhunu sε nnipa rewura Onyankopͻn som no mu akuo-akuo.

Enti bͻ wo Wura Nyankopͻn abodin na srε Ne hͻ bͻnefakyε, nokorε sε Ɔno na Ɔde bͻne kyε.

Abii Lahab nsa asopa, na ͻbεsopa.

N’ahonyadeε ne deε nensa aka biara ho mma mfasoͻ mma no.

Yεbεhye no wͻ Ogya a εwͻ ogyaframa no mu.

Ɔne ne yere no a, ͻsoa nnyentia no.

Ahoma a yawͻ no mmεsa na bɛgu ne kͻn mu.

(Ɔkͻmhyεni), ka sε: Ɔno Nyankopͻn Ɔyε Baako.

Onyankopͻn, Ɔno na Ɔde Ne ho (na abͻdeε nyinaa dane no).

Wannwo ba, na obi nso annwo no,

Na obiara nso ntesε Ɔno, anaa sε yεde no susu no.

Ka sɛ: Mehwehwɛ ntwitwagyeɛ firi ahomakye Wura no hɔ.

Ɛfa adeε a Wabͻ (biara) bͻne ho.

(Mesan hwehwε sε, ɔntwitwa nye me) wͻ esum mu bͻne mu, sε esum ba a;

(Mesan mesu frε no sε ɔntwitwa nye me) wͻ Nkabrekyerefoͻ a wͻbͻ apͻ tete ntasuo gu soͻ no bͻne mu;

(Mesu frε no bio sε, ɔntwitwa nye me) wͻ ahoͻyaafoͻ bͻne mu, sε wͻyε ahoͻyaa a.

Ka sε: “Mehwehwε ntwitwagyeε firi nnipa Wura ( Nyankopͻn ) no hͻ.

Nipa Hene hɔ.

Nnipa Nyankopͻn no,

(Sε, Ɔntwitwa ngye me) mfiri ͻbonsam daadaafoͻ a, (ͻdaadaa nnipa wie a) na watwe ne ho no bͻne mu.

Ɔbonsam a ͻdaadaa nnipa wͻ akoma mu no.

Ɛfiri Jinn (mmoatia) ne nnipa bonsam (nyinaa bͻne mu).