Gucaratça Meal — Rabîla el-Umerî — Kadr 97:1 – Nas 114:6

૧. અમે આ (કુરઆન) ને કદ્રની રાતમાં ઉતાર્યુ.

૨. અને તમને શું ખબર કે કદ્રની રાત શું છે?

૩. કદ્રની રાત એક હજાર મહીનાઓથી ઉત્તમ રાત છે.

૪. તે (રાતમાં) ફરિશ્તાઓ અને રૂહ (જિબ્રઇલ) પોતાના પાલનહારના આદેશથી દરેક કામ માટે ઉતરે છે.

૫. આ રાત્રિ સંપૂર્ણ સલામતી વાળી હોય છે અને ફજરના ઉદય સુધી (રહે છે).

૧. અહલે કિતાબ અને મુશરિક લોકો માંથી જેઓ કાફિર હતા, તેઓ (પોતાના કુફ્રથી) ત્યાં સુધી અળગા નહીં રહે, જ્યાં સુધી તેમની પાસે સ્પષ્ટ દલીલ ન આવી જાય.

૨. (અર્થાત) અલ્લાહ તરફથી એક રસૂલ, જે તેઓને પવિત્ર સહિફા પઢીને સંભળાવે છે.

૩. જેમાં સાચા અને ઠોસ આદેશો છે.

૪. અહલે કિતાબ પોતાની પાસે સ્પષ્ટ પુરાવા આવી ગયા પછી જ (વિવાદમાં પડી) જુદા જુદા થઇ ગયા.

૫. અને તેમને આદેશ તો એ જ આપવામાં આવ્યો હતો કે તેઓ અલ્લાહની ઈબાદત એવી રીતે કરે કે બંદગી તરફ એકત્રિત થઇ ફક્ત તેના માટે જ કરે, અને નમાઝને કાયમ કરે., તેમજ ઝકાત આપતા રહે. આ જ સાચો દીન છે.

૬. અહલે કિતાબ અને મુશરિક લોકો માંથી જે લોકોએ કુફ્ર કર્યું, તે સૌ જહન્નમની આગમાં જશે, જ્યાં તેઓ હંમેશા રહેશે. આ લોકો દરેક સર્જનીઓ માંથી દુષ્ટ સર્જન છે.

૭. જે લોકો ઇમાન લાવ્યા અને નેક અમલ કર્યા, આ જ લોકો શ્રેષ્ઠ સર્જન છે.

૮. તેમનો બદલો તેમના પાલનહાર પાસે હંમેશા રહેવાવાળી જન્નતો છે, જેની નીચે નહેરો વહી રહી છે. જેમાં તેઓ હંમેશા-હંમેશ રહેશે. અલ્લાહ તઆલા તેમનાથી ખુશ થયો અને તેઓ અલ્લાહથી ખુશ થયા. આ બધું તેના માટે છે, જે પોતાના પાલનહારથી ડરતો રહ્યો.

૧. જ્યારે જમીન પૂરેપૂરી હલાવી નાખવામાં આવશે.

૨. અને જમીન પોતાનો બોજ બહાર કાઢી ફેંકી દેશે.

૩. માનવી કહેવા લાગશે કે આને શું થઇ ગયુ છે?

૪. તે દિવસે જમીન પોતાની દરેક વાતોનું વર્ણન કરી દેશે.

૫. એટલા માટે કે તમારા પાલનહારે તેને આ જ આદેશ આપ્યો હશે.

૬. તે દિવસે લોકો અલગ-અલગ સમુહ બનીને (પાછા) ફરશે. જેથી તેમને તેમના કર્મ બતાવવામાં આવે.

૭. બસ! જેણે રજ બરાબર ભલાઇ કરી હશે, તે તેને જોઇ લેશે.

૮. અને જેણે રજ બરાબર બુરાઇ કરી હશે, તેપણ તેને જોઇ લેશે.

૧. કસમ છે, તે ઘોડાઓની જે દોડતી વખતે હાંફતા હોય.

૨. પછી તેમની જેઓ ટાપ મારીને અંગારા ઉડાવે છે.

૩. પછી વહેલી સવારે છાપા મારનારની કસમ!

૪. બસ! તે વખતે ધુળ ઉડાવે છે.

૫. પછી તે જ સ્થિતિમાં લશ્કરના ટોળામાં ઘુસી જાય છે.

૬. ખરેખર માનવી પોતાના પાલનહારનો ખુબ જ કૃતઘ્ની છે.

૭. અને નિ:સંદેહ તે સ્વયં તેના પર સાક્ષી છે.

૮. તે માલના મોંહમાં સખત પડ્યો છે.

૯. શું તે જાણતો નથી કે કબરોમાં જે (કંઇ) છે, જ્યારે તે કાઢી લેવામાં આવશે.

૧૦. અને હૃદયોની છુપી વાતો જાહેર કરવામાં આવશે.

૧૧. તો તે દિવસે તેમનો પાલનહાર તેમની સપૂર્ણ સ્થિતિથી વાકેફ હશે.

૧. ખટખટાવી નાખનાર.

૨. શું છે તે ખટખટાવી નાખનાર.

૩. તમને શું ખબર તે ખટખટાવી નાખનાર શું છે?

૪. જે દિવસે માનવી વિખરાયેલા પતંગિયાની માફક થઇ જશે.

૫. અને પર્વતો પિંજાયેલા રંગીન ઊન જેવા થઇ જશે.

૬. પછી જેનું ત્રાજવું ભારે હશે.

૭. તો તેઓ મનપસંદ જીવનમાં હશે.

૮. અને જેનું પલડું હલકું હશે.

૯. તેમનું ઠેકાણું હાવિયહ છે.

૧૦. તમને શું ખબર કે તે શું છે?

૧૧. ભડકે બળતી આગ (છે).

૧. વધુ પ્રાપ્તિની ઘેલછાએ તમને બેધ્યાન કરી દીધા છે.

૨. એટલે સુધી કે તમે કબર સુધી પહોંચી ગયા.

૩. કદાપિ નહીં, તમે નજીકમાં જાણી લેશો.

૪. કદાપિ નહીં, ફરી ટૂંક સમયમાં તમે જાણી લેશો.

૫. કદાપિ નહીં, જો તમે ખરેખર જાણી લેતા.

૬. યકીન રાખો તમે જહન્નમને જરૂર જોશો.

૭. અને તમે તેને વિશ્ર્વસનીય આંખથી જોઇ લેશો.

૮. ફરી તે દિવસે જરૂર તમને નેઅમતો બાબતે પુછતાછ કરવામાં આવશે.

૧. જમાનાની કસમ!

૨. ખરેખર માનવી નુકસાનમાં છે.

૩. સિવાય તે લોકોના, જેઓ ઇમાન લાવ્યા, અને સારા કાર્યો કર્યા અને (જેમણે) એકબીજાને સત્યનું સૂચન કર્યુ, અને એકબીજાને સબરની શિખામણ આપતા રહ્યા.

૧. વિનાશ છે, તે દરેક લોકો માટે જે લોકોની ખામીઓ કાઢે છે અને મહેણાં-ટોણાં મારે છે.

૨. જેણે ધન ભેગું કર્યું, અને ગણી-ગણીને રાખ્યું.

૩. તે સમજે છે કે તેનું ધન તેની પાસે હંમેશા રહેશે.

૪. કદાપિ નહીં, તેને જરૂર તોડીફોડી નાખનાર આગમાં નાખી દેવામાં આવશે.

૫. અને તમને શું ખબર કે તોડીફોડી નાખનાર આગ કેવી હશે?

૬. અલ્લાહ તઆલાએ ભડકાવેલી આગ હશે.

૭. જે હૃદયો પર ચઢતી જશે.

૮. તે તેમના ઉપર બધી બાજુથી બંધ કરેલી હશે.

૯. મોટા મોટા સ્તંભોમાં.(ઘેરાયેલા હશે)

૧. શું તમે જોયું નથી કે તમારા પાલનહારે હાથીવાળાઓ સાથે શું કર્યુ?

૨. શું તેણે તેમની યુક્તિને નિષ્ફળ નહતી કરી?

૩. અને તેમના ઉપર પક્ષીઓના ટોળે-ટોળા મોકલી દીધા.

૪. જે તેમના પર કાંકરીઓ જેવા પથ્થર ફેંકી રહ્યા હતા.

૫. બસ! તેમને ખાધેલા ભુસા જેવા કરી નાખ્યા.

૧. કારણકે કુરૈશના લોકો આદી હતા.

૨. (એટલે કે) તેમને શિયાળા અને ઉનાળામાં (વેપાર કરવા માટે) સફરથી ટેવાઇ ગયા હતા.

૩. બસ! તેમણે તે ઘરના માલિકની જ ઈબાદત કરવી જોઈએ.

૪. જેણે તેમને ભુખમરામાં ખવડાવ્યું, અને તેમને ભયથી બચાવી અમન અને શાંતિ આપી.

૧. શું તમે તે વ્યક્તિને જોયો, જે બદલાના દિવસને જુઠલાવે છે?

૨. તે તો છે, જે અનાથને ધક્કા મારે છે,

૩. અને ગરીબને ખવડાવવા માટે પ્રોત્સાહન પણ નથી આપતો.

૪. પછી એવા નમાઝીઓ માટે (પણ) વિનાશ છે.

૫. જેઓ પોતાની નમાઝથી ગાફેલ છે.

૬. જેઓ દેખાડો કરે છે,

૭. અને બીજાને સામાન્ય વસ્તુઓ આપવાનો પણ ઇન્કાર કરે છે.

૧. અમે તમને કૌષર આપ્યું છે.

૨. બસ! તમેં પોતાના પાલનહાર માટે નમાઝ પઢો અને કુરબાની કરો.

૩. ખરેખર તમારો શત્રુ જ વારસદાર વગરનો છે, અને બદનામ છે.

૧. તમે કહી દો કે હે કાફિરો!

૨. જેની તમે ઈબાદત કરો છો હું તેમની ઈબાદત નથી કરી શકતો.

૩. અને ન તો તમે તેની ઈબાદત કરવાવાળા છો, જેની હું ઈબાદત કરી રહ્યો છું.

૪. અને ન હું તેમની ઈબાદત કરવાવાળો છું, જેમની તમે અને તમારા (પૂર્વજો) ઈબાદત કરે છે.

૫. અને ન તો તમે ઈબાદત કરવાવાળા છો, જેની ઈબાદત હું કરી રહ્યો છું.

૬. તમારા માટે તમારો દીન છે અને મારા માટે મારો દીન છે.

૧. જ્યારે અલ્લાહની મદદ અને વિજય આવી ગયો.

૨. અને તમે જોયું કે લોકોનાં જૂથના જૂથ અલ્લાહના દીનમાં દાખલ થઇ રહ્યા છે.

૩. તમે પોતાના પાલનહારની પ્રશંસા “તસ્બીહ” સાથે કરો, અને તેનાથી માફી માંગતા રહો, નિ:શંક તે ખૂબ જ માફ કરવાવાળો છે. કરવાવાળો છે.

૧. અબૂ લહબના બન્ને હાથ બરબાદ થઇ જાય, અને તે (પોતે) પણ બરબાદ થઇ જાય.

૨. ન તો તેનું ધન તેના માટે કઈ કામ આવ્યું અને ન તો તેની કમાણી.

૩. તે નજીકમાં ભડકાવેલી આગમાં જશે.

૪. અને તેની પત્નિ પણ (જશે) જે લાકડીઓ ઉઠાવનારી છે,

૫. તેના ગળામાં કાથીનું દોરડું હશે.

૧. તમે કહી દો કે અલ્લાહ એક જ છે.

૨. અલ્લાહ બેનિયાઝ છે.

૩. ન તો તેની કોઈ સંતાન છે અને ન તો તે કોઈની સંતાન.

૪. અને તેના બરાબર કોઈ નથી.

૧. તમે કહી દો! કે હું સવારના પાલનહારની શરણમાં આવું છું.

૨. દરેક તે વસ્તુની બુરાઇથી જે તેણે પેદા કરી.

૩. અને અંધારી રાત્રિની બુરાઇથી, જ્યારે તેનું અંધારૂ ફેલાય જાય.

૪. અને ગાંઠ (લગાવીને) તેમાં ફુંકનારની બુરાઇથી (પણ).

૫. અને ઇર્ષા કરનારાઓની બુરાઇથી, જ્યારે તે ઇર્ષા કરે.

૧. તમે કહી દો! કે હું લોકોના પાલનહારની શરણમાં આવું છું.

૨. જે લોકોનો બાદશાહ છે.

૩. જે લોકોનો મઅબૂદ છે.

૪. તે વસ્વસો નાખનારની બુરાઈથી, હે (વસ્વસો નાખી) પાછળ હટી જાય છે.

૫. જે લોકોના દિલોમાં વસ્વસો નાખે છે.

૬. (પછી) તે જિન્નાતો માંથી હોય અથવા તો મનુષ્યો માંથી.