Kinyarvanda Meal — Ruanda Müslümanlar Cemiyeti — Cinn 72:1 – Nas 114:6

Vuga (yewe Muhamadi) uti “Nahishuriwe ko hari itsinda ry’amajini ryateze amatwi (Qur’an isomwa), nuko rikavuga riti “Mu by’ukuri twumvise Qur’an itangaje”,

“Iyobora iganisha ku kuri, nuko turayemera kandi ntituzigera tubangikanya Nyagasani wacu (Allah) n’icyo ari cyo cyose.”

“Kandi ko icyubahiro cy’ikirenga ari icya Nyagasani wacu, utarigeze umugore cyangwa umwana.”

“Kandi ko umunyabwenge buke muri twe (Shitani) yajyaga avuga ibidahwitse kuri Allah.”

“Kandi mu by’ukuri twakekaga ko abantu n’amajini badashobora guhimbira Allah ikinyoma.”

“Kandi mu by’ukuri mu bantu hari abagabo bajyaga biyambaza amajini y’igitsinagabo, ariko (ibyo) byongereraga (abo bantu) gukora ibyaha (ndetse n’ayo majini bikayongerera kwibona).”

“Kandi mu by’ukuri batekerezaga nk’uko mwatekerezaga ko Allah atazigera agira n’umwe azura.”

“Kandi twagerageje kugera mu kirere dusanga cyuzuye abarinzi bakomeye ndetse n’ibishirira.”

“Kandi mu by’ukuri twajyaga tuhagira ibyicaro kugira ngo twumvirize (ibivugirwa mu Ijuru), ariko ubu uwagerageza kumviriza yahura n’igishirira kimwubikiriye.”

“Kandi ntituzi niba hari ikibi giteganyirizwa abari ku isi, cyangwa niba Nyagasani wabo abashakira kuyoboka inzira igororotse.”

“Kandi ko muri twe hari abakora ibyiza n’abatameze batyo. Turi amatsinda afite imyizerere itandukanye.”

“Kandi twizeraga ko tudashobora kunanira Allah (aramutse ashaka kuduhana) ku isi, cyangwa ngo tube twagira aho tumuhungira.”

“Kandi ko mu by’ukuri ubwo twumvaga umuyoboro (Qur’an) twarawukurikiye. Kandi uwemeye Nyagasani we, ntatinya kugabanyirizwa (ibihembo bye) cyangwa ngo abe yatinya kongererwa (ibihano).”

“Kandi ko muri twe harimo abicishije bugufi (Abayisilamu) n’abatannye. Nyamara abicishije bugufi ni bo bagannye inzira igororotse.”

“Naho abatannye bazaba inkwi z’umuriro wa Jahanamu.”

“Kandi ko iyo (abahakanyi) baza kuyoboka inzira igororotse (bakayishikamamo), rwose twari kubaha amazi (imvura) menshi (kandi y’umugisha)”,

“Kugira ngo tuyabageragereshe. Kandi uzirengagiza urwibutso rwa Nyagasani we, azamuhanisha ibihano bigenda byiyongera.”

“Kandi ko imisigiti yose ari iya Allah (wenyine). Bityo, ntimukagire undi musaba mumubangikanyije na Allah.”

Kandi ubwo umugaragu wa Allah (Muhamadi) yahagurukaga amusaba (mu iswala), (amajini) yabaga amuzengurutse (kugira ngo yumve Intumwa isoma Qur’an).

Vuga (yewe Muhamadi) uti “Mu by’ukuri njye nsaba Nyagasani wanjye wenyine nta wundi mubangikanyije na We.”

Vuga (yewe Muhamadi) uti “Mu by’ukuri nta bubasha mfite bwo kuba nagira ikibi mbakorera, cyangwa ngo mbe nabayobora (mu nzira igororotse).”

Vuga uti “Mu by’ukuri nta n’umwe wandinda (ibihano bya) Allah (ndamutse mwigometseho), ndetse nta n’ahandi nabona ubuhungiro hatari kuri We.”

“(Umurimo wanjye nta wundi) usibye gusohoza (ukuri) n’ubutumwa biturutse kwa Allah. Ariko uzigomeka kuri Allah n’Intumwa ye, azahanishwa umuriro wa Jahanamu azabamo ubuziraherezo.”

Kugeza ubwo (ababangikanyamana) bazabona ibyo basezeranyijwe, ni bwo bazamenya ufite abatabazi b’abanyantege nke n’ufite bake.

Vuga (yewe Muhamadi) uti “Sinzi niba (ibihano) musezeranywa biri bugufi cyangwa niba Nyagasani wanjye azabiha igihe kirekire.”

Ni We (wenyine) mumenyi w’ibitagaragara kandi nta n’umwe ajya ahishurira ibye,

Uretse uwo yishimiye mu ntumwa ze, akamwoherereza abarinzi (abamalayika) bamugenda imbere n’inyuma.

(Ibyo Allah abikora) kugira ngo amenye ko (Intumwa) zasohoje neza ubutumwa bwa Nyagasani wazo. Kandi (ko Allah) azi neza ibyo zitunze ndetse azi byimazeyo umubare wa buri kintu.

Yewe uwiyoroshe (uvugwa aha ni Intumwa Muhamadi)!

Byuka (usenge) nijoro, uretse igice gito (cyaryo),

Kimwe cya kabiri cyaryo cyangwa igito kuri cyo,

Cyangwa wongereho gato. Unasome Qur’an neza (mu ijwi rituje kandi ryiza).

Mu by’ukuri tuzaguhishurira ijambo riremereye (ari ryo Qur’an ikubiyemo amategeko n’amabwiriza).

Mu by’ukuri iswala y’ijoro ni ingirakamaro (ku mutima) ndetse inatuma (umuntu atekereza ku magambo ya Allah, atuje).

Mu by’ukuri ku manywa uba uhugiye muri byinshi.

Kandi ujye wibuka izina rya Nyagasani wawe unamwiyegurire utizigama.

Nyagasani w’Uburasirazuba n’Uburengerazuba; nta yindi mana ikwiye gusengwa itari We. Bityo, mugire umurinzi (wawe).

Unihanganire ibyo (abo bahakanyi) bavuga, kandi unabitarure mu buryo bwiza.

Maze undekere abahinyura (amagambo yanjye); bahawe ingabire (yo kubaho mu buzima bwiza), unabarindirize igihe gito.

Rwose dufite iminyururu n’umuriro ugurumana (byo kuzabahanisha ku munsi w’imperuka),

N’ibyo kurya bizabaniga ndetse n’ibihano bibabaza.

Umunsi isi n’imisozi bizatigita, maze imisozi ikaba nk’ikirundo cy’umusenyi wanyanyagijwe.

Mu by’ukuri twaboherereje Intumwa (Muhamadi) ngo ibabere umuhamya nk’uko twoherereje Farawo Intumwa (Musa).

Ariko Farawo yigometse ku ntumwa (Musa), nuko turamufata tumuhanisha ibihano bikomeye.

Ni gute mwakwirinda ibihano kandi muhakana umunsi uzagira abana abasaza (kubera uko uzaba uteye ubwoba)?

Kuri uwo munsi ikirere kizasatagurika. Isezerano rye (Allah) rizasohora nta gushidikanya.

Mu by’ukuri ibi ni urwibutso. Bityo ushaka nayoboke inzira imuganisha kwa Nyagasani we.

Mu by’ukuri Nyagasani wawe azi ko wowe (Muhamadi) n’itsinda muri kumwe mubyuka mugasenga hafi bibiri bya gatatu by’ijoro, cyangwa icya kabiri cyaryo, cyangwa se icya gatatu cyaryo. Kandi Allah ni We ugena indeshyo y’ijoro n’amanywa. Azi ko mutari gushobora kugaragira ijoro ryose, bityo yabagiriye impuhwe (araborohereza). Ku bw’ibyo, mujye musoma ibiboroheye muri Qur’an. Azi ko muri mwe hazabamo abarwayi, abandi bakaba bari mu ngendo bashakisha ingabire za Allah, naho abandi bakazaba bari ku rugamba barwana mu nzira ya Allah. Bityo, mujye musoma ibiboroheye muri yo, muhozeho iswala, mutange amaturo, munagurize Allah inguzanyo nziza (mutanga kubera We). Kandi icyiza cyose mwiteganyirije imbere, muzagisanga kwa Allah ari cyiza kurushaho kandi gifite ibihembo bihebuje. Munasabe imbabazi Allah, kuko mu by’ukuri Allah ari Nyir’ukubabarira ibyaha, Nyirimpuhwe.

Yewe uwitwikiriye (uvugwa aha ni Intumwa Muhamadi)!

Haguruka uburire (ibiremwa),

Unahe ikuzo Nyagasani wawe.

Unasukure imyambaro yawe.

Unitarure ibigirwamana.

Ntukanatange (ikintu) ugamije indonke zitubutse.

Kandi ujye wihangana kubera Nyagasani wawe.

Ubwo impanda izavuzwa.

Uwo munsi uzaba ari umunsi ukomeye,

Uzaba utoroheye abahakanyi.

(Yewe Muhamadi) ndekera uwo naremye ari wenyine (uvugwa aha ni Al Walid bun al Mughirat),

Nkamuha imitungo itubutse,

N’urubyaro rumukikije,

Nkanamworohereza ubuzima.

Nyuma y’ibyo byose, akaba yifuza ko namwongera,

Oya! Mu by’ukuri yajyaga ahinyura amagambo yacu cyane.

Nzamunaniza muhanisha ibihano bikomeye.

Mu by’ukuri yaratekereje maze afata umwanzuro (wo gutuka Allah n’Intumwa ye ndetse na Qur’an),

Bityo, navumwe kubera umwanzuro yafashe!

Niyongere avumwe kubera umwanzuro yafashe!

Nuko (yubura amaso) areba (abari bamukikije),

Maze azinga umunya, akambya agahanga,

Nuko atera umugongo (ukuri), maze aribona.

Aravuga ati “Ibi (Muhamadi yigisha) nta kindi biri cyo uretse ko ari uburozi (akomora ku barozi bo hambere bakomeye)!”

“Ibi (Muhamadi yigisha) nta kindi biri cyo uretse ko ari amagambo y’umuntu!”

Nzamutwikira mu muriro.

N’iki cyakumenyesha uwo muriro?

Nta cyo ureka ndetse nta n’icyo usigaza,

Utwika imibiri ukanayishiririza.

Urinzwe (n’abamalayika) cumi n’icyenda.

Kandi nta bandi twagize abarinzi b’umuriro batari abamalayika. Ndetse twanashyizeho umubare wabo (cumi n’icyenda) kugira ngo tugerageze abahakanyi, no kugira ngo abahawe ibitabo bemere badashidikanya (ko Qur’an ari ukuri kuko ihuriye kuri uwo mubare wanditse mu bitabo byabo); ndetse no kugira ngo abemeramana barusheho kwemera, no kugira ngo abahawe igitabo n’abemeramana batagira ugushidikanya (ku byo bemeye), ndetse no kugira ngo abafite uburwayi (bw’uburyarya) mu mitima n’abahakanyi bavuge bati “Allah yari agamije iki mu gutanga uru rugero?” Uko ni ko Allah arekera mu buyobe uwo ashaka akanayobora uwo ashaka. Kandi nta wamenya ingabo za Nyagasani wawe utari We. Kandi uyu (muriro) nta kindi uri cyo usibye ko ari urwibutso ku bantu.

Oya si ko biri! Ndahiye ukwezi.

N’ijoro igihe ricyeye.

N’igitondo igihe gitangaje.

Mu by’ukuri uwo (muriro) ni kimwe mu (byago) bihambaye,

Ukaba n’umuburo ku bantu;

Ku wo ari we wese muri mwe ushaka kujya imbere (yiyegereza Nyagasani we) cyangwa gusubira inyuma (amwigomekaho).

Buri wese azafungirwa (mu muriro) bitewe n’ibibi yakoze.

Uretse abantu b’iburyo (b’abemera nyakuri),

Bazaba bari mu busitani (Ijuru), babazanya

Ku byerekeye inkozi z’ibibi, (maze bazibaze bati)

“Ni iki cyabateye kuba muri mu muriro?”

(Izo nkozi z’ibibi) zizavuga ziti “Ntitwari bamwe mu basenga,”

Nta n’ubwo twajyaga tugaburira abakene,

Kandi twajyaga tugirana ibiganiro n’abavuga ibidafite umumaro,

Ndetse twajyaga duhinyura umunsi w’ibihembo (imperuka).

Kugeza ubwo ukuri kudashidikanywaho (urupfu) kutugezeho.

Bityo, nta buvugizi bw’abavugizi buzagira icyo bubamarira.

None se ni iyihe mpamvu ituma (abahakanyi) batera umugongo urwibutso?

Bameze nk’indogobe z’agasozi ziruka (zifite ubwoba),

Zihunga intare!

Ahubwo buri wese muri bo aba ashaka ko yahishurirwa ibitabo birambuye (bishimangira ko Isilamu ari idini ry’ukuri).

Oya si ko biri! Ahubwo ntibatinya umunsi w’imperuka.

Oya si ko biri! Mu by’ukuri iyi (Qur’an) ni urwibutso.

Bityo, ushaka (ko imubera urwibutso) nayibuke (ayisoma, anatekereza ku nyigisho ziyikubiyemo).

Kandi ntibashobora kwibuka keretse Allah abishatse. Ni We ukwiriye gutinywa, ndetse ni na We utanga imbabazi.

Ndahiye umunsi w’izuka,

Nanarahiye umutima (w’umwemeramana) ugaya nyirawo (kubera guteshuka ku nzira igororotse).

Ese umuntu (w’umuhakanyi) akeka ko tutazakoranya amagufa ye (tumuzura)?

Ni byo! Dushoboye no kuringaniza imitwe y’intoki ze (imirongo iyiriho igasubira nk’uko yari imeze mbere).

Ahubwo umuntu (ahakana izuka) ashaka icyatuma akomeza kwibera mu bwangizi!

Abaza (akerensa) ati “Uwo munsi w’izuka uzaba ryari?”

(Uwo munsi uzaba) igihe amaso azakanaguzwa (kubera ubwoba),

N’ukwezi kukazima,

Ndetse izuba n’ukwezi bigahurizwa hamwe (kimwe kikinjira mu kindi).

Icyo gihe umuntu azavuga ati “Ni he ho guhungira?”

(Azabwirwa ati) “Oya! Nta ho guhungira hahari!”

Kuri uwo munsi, igarukiro rizaba ari kwa Nyagasani wawe (wenyine).

Kuri uwo munsi, umuntu azabwirwa ibyo yakoze mbere n’ibyo yaherutse (byaba ibyiza cyangwa ibibi).

Ahubwo umuntu azibera umuhamya w’ibyo yakoze (kuko ingingo z’umubiri we ari zo zizamushinja ibyo yakoze).

Kabone n’ubwo yatanga impamvu ze (agamije kwiregura).

(Yewe Muhamadi), ntukanyeganyeze ururimi rwawe kubera ubwira ngo (Qur’an) itagucika (ugira ngo uvuge ibyo uhishurirwa, ahubwo ujye utega amatwi wumve ibyo uba uhishurirwa na Malayika Jibrilu).

Mu by’ukuri ni twe tuzayikusanyiriza (mu gituza cyawe) kandi ni natwe tuzakwigisha kuyisoma (Qur’an),

Nituyigusomera (binyuze kuri Malayika wacu), ujye ukurikira isomwa ryayo.

Hanyuma ni twe (Allah) tuzayigusobanurira.

(Ibyo mukeka ko mutazazurwa mukanabazwa ibyo mwakoze) si ko biri; ahubwo mukunda ubuzima bwo ku isi butaramba,

Mukirengagiza imperuka.

Kuri uwo munsi, uburanga (bw’abemeramana) buzaba burabagirana,

Bureba Nyagasani wabwo.

Kuri uwo munsi kandi, uburanga (bw’abahakanyi) buzaba bwijimye,

Bibaza ko bagiye guhura n’ishyano.

Uramenye (utazarutisha isi imperuka, kuko) iyo (roho) igeze mu ngoto (igihe cyo gupfa),

Hanyuma hakavugwa ngo “Ni nde wamutabara (akamurinda urupfu)?”

Nuko (ugiye gupfa) akamenya ko igihe cyo gutandukana (gupfa) cyageze.

Maze (kubera ububabare bwo gukurwamo roho), ukuguru kwe kuzahuzwa n’ukundi.

Kuri uwo munsi, (wowe muntu ukuwemo roho) uzerekezwa kwa Nyagasani wawe.

Ariko (umuhakanyi) ntiyigeze yemera ndetse nta n’ubwo yigeze asali,

Ahubwo yahinyuye (Qur’an) maze ayitera umugongo,

Hanyuma akagenda yibona yerekeza mu muryango we,

Ufite akaga (yewe muntu w’umuhakanyi)! Kandi na none ufite akaga!

Nyamara ufite akaga (yewe muntu w’umuhakanyi)! Kandi ufite akaga!

Ese umuntu yibwira ko azarekwa gusa (atabajijwe ibyo yakoze ngo abihemberwe cyangwa ngo abihanirwe)?

Ese ntiyari intanga mu masohoro asohowe?

Hanyuma akaba urusoro rw’amaraso, maze Allah akamurema, akanamutunganya (akaba umuntu wuzuye)?

Maze akamuremamo ibitsina bibiri: gabo na gore,

Ese uwo (Allah ukora ibyo) si We ushoboye kuzura abapfuye?

Ese nta gihe kirekire cyabayeho umuntu ari ikintu kitazwi?

Mu by’ukuri twaremye umuntu mu ntanga zivanze (iz’umugabo n’iz’umugore) kugira ngo tumugerageze. (Ni yo mpamvu) twamuhaye kumva no kubona.

Mu by’ukuri twamweretse inzira; kugira ngo nabishaka ahitemo kwemera cyangwa guhakana (Nyagasani we).

Mu by’ukuri abahakanyi twabateguriye (kuzabahanisha) iminyururu, ingoyi ndetse n’umuriro ugurumana.

Mu by’ukuri abakiranutsi bazanywera mu kirahuri (cy’ikinyobwa kidasindisha) kivanze n’amazi ya Kafuur,

(Iyo Kafuur) ni isoko y’amazi (yo mu ijuru) abagaragu ba Allah bazanywaho, ikazajya ivubura amazi menshi (bakayerekeza aho bashaka),

(Abo bakiranutsi) ni abesa imihigo (yabo bahigiye Allah), bakanatinya umunsi ikibi cyawo kizakwira hose (umunsi w’imperuka),

Bakanaha amafunguro abakene, imfubyi n’imbohe, kabone n’iyo na bo baba bayakeneye,

(Bavuga bati) “Rwose, turabagaburira kubera gushaka kwishimirwa na Allah. Nta nyiturano cyangwa ishimwe tubashakaho.”

“Rwose dutinya umunsi ukomeye kandi uzaba urimo ingorane, uturutse kwa Nyagasani wacu, uzatuma (uburanga bw’abahakanyi) bwijima.”

Bityo, Allah azabarinda (abamwemeye) ibibi by’uwo munsi, kandi azabaha kurabagirana (mu buranga bwabo) ndetse n’ibyishimo.

Azanabagororera ijuru n’imyambaro y’ihariri kubera ko barangwaga no kwihangana,

Bazaba begamye ku bitanda bitatse, (kandi mu Ijuru) ntibazigera bahumva ubushyuhe bw’izuba cyangwa imbeho bikabije,

Kandi igicucu (cy’ibiti byo mu ijuru) kizaba kibegereye, ndetse n’imbuto zabyo zizabegerezwa.

Bazazengurutswamo amasahane ya Feza (ariho ibiribwa byiza) n’ibikombe bikozwe mu birahuri,

Ibirahuri bikoze muri Feza, byuzuye neza (bijyanye n’ibyifuzo bya buri wese).

Bazanahabwa ikirahuri (cy’ikinyobwa kidasindisha) kivanze na tangawizi,

Izavomwa mu isoko yitwa Salisabila.

Bazaba bazengurukwamo n’abana b’abahungu bahoraho (badasaza cyangwa ngo bapfe, babaha amafunguro), ubabonye wagira ngo ni inigi zishashagirana (Lu’ulu’u) zanyanyagijwe.

Kandi nunarebayo (mu Ijuru) uzabona ingabire (zitagereranywa) ndetse n’ubwami buhebuje.

Bazaba bambaye imyambaro y’icyatsi kibisi ikoze mu ihariri yorohereye n’iremereye. Bazanambikirwamo ibikomo bya Feza kandi Nyagasani wabo azabaha ikinyobwa gisukuye.

(Bazanabwirwa bati) “Mu by’ukuri ibi ni ibihembo byanyu, kandi umuhate wanyu warakiriwe.”

Mu by’ukuri (yewe Muhamadi) ni twe twaguhishuriye Qur’an mu byiciro,

Bityo, ihanganire itegeko rya Nyagasani wawe, kandi ntuzumvire umunyabyaha cyangwa umuhakanyi muri bo.

Kandi ujye usingiza izina rya Nyagasani wawe mu gitondo no ku gicamunsi,

Na nijoro umwubamire kandi unamusingize igihe kirekire mu ijoro.

Mu by’ukuri abo (bahakanyi) bakunda ubuzima bwo ku isi butaramba, bakirengagiza umunsi uremereye (w’ibihano).

Ni twe twabaremye dukomeza ingingo zabo. Kandi tubishatse twabasimbuza abandi bameze nka bo.

Mu by’ukuri iyi (mirongo ya Qur’an) ni urwibutso, bityo ushaka nayoboke inzira imuganisha kwa Nyagasani we.

Kandi nta cyo mwashaka (ngo mukigereho) keretse Allah abishatse. Mu by’ukuri Allah ni Umumenyi uhebuje, Nyirubugenge buhambaye.

Yinjiza mu mpuhwe ze uwo ashaka. Naho inkozi z’ibibi yaziteguriye ibihano bibabaza.

Ndahiye imiyaga yoherezwa ikurikiranye,

N’imiyaga y’inkubi,

N’imiyaga ikwirakwiza ibicu n’imvura,

N’(imirongo ya Qur’an) itandukanya ukuri n’ikinyoma,

N’abamalayika bazanira amahishurirwa (Intumwa za Allah),

Kugira ngo avaneho urwitwazo cyangwa kugira ngo aburire.

Mu by’ukuri ibyo musezeranywa bizasohora.

Igihe inyenyeri zizakurwaho (urumuri rwazo rukazima),

N’igihe ikirere kizasandazwa,

N’igihe imisozi izariturwa igatumuka nk’ivumbi,

N’igihe Intumwa zizakoranyirizwa hamwe ku gihe cyagenwe (kugira ngo zitange ubuhamya ku bo zatumweho),

Ni uwuhe munsi (ibyo byose) byarindirijwe?

Ni ku munsi w’urubanza (ubwo Allah azakiranura ibiremwa).

Ni iki cyakumenyesha umunsi w’urubanza icyo uzaba uri cyo?

Kuri uwo munsi (w’izuka), ibihano bikaze bizaba kuri ba bandi bahinyuraga (uwo munsi).

Ese ntitworetse abo hambere?

Nuko tukabakurikiza abo hanyuma?

Uko ni ko tugenza inkozi z’ibibi,

Kuri uwo munsi (w’izuka), ibihano bikaze bizaba kuri ba bandi bahinyuraga (uwo munsi).

Ese ntitwabaremye mu mazi aciriritse?

Nuko tukayashyira mu cyicaro gitekanye (nyababyeyi),

Kugeza igihe kizwi.

Nuko tukagena (imikurire y’umwana n’ivuka rye) kandi ni twe duhebuje mu kugena.

Kuri uwo munsi (w’izuka), ibihano bikaze bizaba kuri ba bandi bahinyuraga (uwo munsi).

Ese isi ntitwayigize ihuriro,

Ry’abazima (bayituyeho) n’abapfuye (bayishyinguwemo)?

Hanyuma tukanayishyiramo imisozi miremire, ndetse tukabaha n’amazi y’urubogobogo?

Kuri uwo munsi (w’izuka), ibihano bikaze bizaba kuri ba bandi bahinyuraga (uwo munsi).

(Abahakanyi bazabwirwa bati) “Ngaho nimujye aho mwajyaga muhinyura (mu muriro wa Jahanamu)!”

“Ngaho nimujye mu gicucu (cy’umwotsi wa Jahanamu) kigabanyijemo amashami atatu”,

“Nta bwugamo gitanga ndetse nta n’ubwo kirinda ikibatsi cy’umuriro”,

Mu by’ukuri (uwo muriro) utera ibishashi bingana n’inyubako nini,

(Ibyo bishashi) bimeze nk’ingamiya z’amagaju.

Kuri uwo munsi (w’izuka), ibihano bikaze bizaba kuri ba bandi bahinyuraga (uwo munsi).

Kuri uwo munsi, nta cyo bazaba bashobora kuvuga.

Nta n’uburenganzira bazahabwa bwo kugira urwitwazo batanga.

Kuri uwo munsi (w’izuka), ibihano bikaze bizaba kuri ba bandi bahinyuraga (uwo munsi).

Uwo uzaba ari umunsi w’urubanza, ubwo (mwe) n’abo hambere, tuzaba twabakoranyirije hamwe.

Niba hari amayeri mufite (yo guhunga ibihano byanjye), ngaho nimuyankorere.

Kuri uwo munsi (w’izuka), ibihano bikaze bizaba kuri ba bandi bahinyuraga (uwo munsi).

Mu by’ukuri abagandukira (Allah), (ku munsi w’imperuka) bazaba bari hagati y’ibicucu (by’ibiti byo mu ijuru) ndetse n’amasoko (atemba),

(Bazaba bahabwamo) n’imbuto (z’amoko anyuranye) bazajya bifuza;

(Bazabwirwa bati) “Nimurye, munywe kandi mugubwe neza kubera ibyo mwajyaga mukora.”

Mu by’ukuri uko ni ko tugororera abakoze neza.

Ibihano bikaze bizaba kuri ba bandi bahinyura (umunsi w’izuka).

(Yemwe bahakanyi) “Nimurye munishimishe by’igihe gito (mu buzima bwo ku isi), kuko rwose muri inkozi z’ibibi.”

Ibihano bikaze bizaba kuri ba bandi bahinyura (umunsi w’izuka).

N’iyo babwiwe bati “Nimwuname (musali)!” Ntabwo bunama (ngo basali).

Ibihano bikaze bizaba kuri ba bandi bahinyura (umunsi w’izuka).

None se nyuma y’iyi (Qur’an) ni ayahe magambo yandi bazemera?

Ni iki (abahakanyi b’abakurayishi) babazanyaho?

Ku nkuru ihambaye (Qur’an n’umunsi w’imperuka),

(Iyo nkuru) batavugaho rumwe (hagati y’abayemera n’abayihakana).

Oya! Rwose bidatinze bazamenya!

Oya nanone! Bidatinze bazamenya!

Ese isi ntitwayigize nk’isaso?

N’imisozi tukayigira nk’imambo?

Tukanabarema muri ibitsina byombi (gabo na gore)?

Kandi ibitotsi byanyu twabigize uburyo bw’ikiruhuko.

N’ijoro turigira nk’umwambaro (binyuze mu mwijima waryo).

N’amanywa tuyagira ayo gushakiramo imibereho.

Tunubaka hejuru yanyu (ibirere) birindwi bikomeye.

Ndetse (n’izuba) turigira itara rimurika cyane.

Tunamanura mu bicu amazi menshi yisuka,

Kugira ngo tuyamereshe impeke n’ibimera,

N’imirima y’ibiti by’inzitane.

Mu by’ukuri umunsi w’urubanza ufite igihe ntarengwa,

Umunsi impanda izavuzwa, maze mukaza muri amatsinda.

N’ikirere kizakingurwa maze gihinduke nk’amarembo,

N’imisozi izakurwa mu myanya yayo, imere nk’ibirorirori.

Mu by’ukuri umuriro wa Jahanamu urarekereje,

Ni wo garukiro ry’ibyigomeke,

Bizawubamo imyaka n’imyaniko.

(Ibyo byigomeke) ntibizawumvamo amafu cyangwa ikinyobwa,

Uretse amazi yatuye n’amashyira,

(Ibyo bikazaba) ari igihembo gikwiye (ibikorwa bibi bakoraga).

Kuko mu by’ukuri batajyaga bizera ibarura,

Ndetse banahinyuraga amagambo yacu cyane.

Kandi byose twarabibaruye mu nyandiko.

Ngaho nimusogongere (ingaruka z’ibikorwa byanyu bibi), kandi nta kindi tubongerera usibye ibihano.

Mu by’ukuri abagandukira Allah bazabona intsinzi (Ijuru);

Ubusitani n’imizabibu,

N’inkumi z’urungano (Huur-ul Ayn),

Ndetse n’ibirahuri byuzuye (ibinyobwa bidasindisha).

Nta magambo adafite umumaro cyangwa ikinyoma bazumviramo.

(Ibyo bizaba) ari ibihembo biturutse kwa Nyagasani wawe; impano ijyanye (n’ibikorwa byabo).

Nyagasani w’ibirere n’isi n’ibiri hagati yabyo, Nyirimpuhwe. (Ku munsi w’imperuka), nta bushobozi bwo kugira icyo bamuvugisha bazaba bafite (keretse abishatse).

Umunsi Roho (Malayika Jiburilu) n’abandi bamalayika bazahagarara ku mirongo, ntibazavuga keretse uwo (Allah) Nyirimpuhwe azabihera uburenganzira, kandi akavuga ibiri ukuri.

Uwo munsi ni ukuri (uzaza nta gushidikanya). Bityo, ubishaka yakwiteganyiriza kwa Nyagasani we aho azashyikira.

Mu by’ukuri twababuriye ibihano byegereje; umunsi umuntu azabona ibyo yakoze, naho umuhakanyi akazavuga ati “Iyaba nari mbaye igitaka.”

Ndahiye abamalayika bashikanuza (roho z’abahakanyi) n’ubukana buhambaye,

N’abamalayika bakuramo (roho z’abemeramana) bitonze,

N’abamalayika bogoga ikirere bihuta (batwaye izo roho),

N’abamalayika bihutana (ubutumwa babuzaniye Intumwa za Allah ku isi).

N’abamalayika bashyira mu bikorwa ibyo bategetswe.

Umunsi (impanda ya mbere izavuzwa), maze isi n’imisozi bigatigita bikabije (buri kiremwa kigapfa),

(Umutingito wa mbere) uzakurikirwa n’undi mutingito (maze buri kiremwa kizuke),

Uwo munsi imitima (ya bamwe) izaba ifite ubwoba n’agahinda,

Ndetse n’indoro yabo izaba yaciye bugufi (isuzuguritse).

Bazavuga bati “Ese mu by’ukuri tuzasubizwa mu buzima (bwacu bwo ku isi) twahozemo?”

“Ese n’iyo twaba twabaye amagufa ashangutse?”

Bazavuga bati “Uko kugaruka kwacu (ku isi twifuza) kwaba ari igihombo!”

Mu by’ukuri hazabaho indi mpanda izavuzwa rimwe gusa.

Icyo gihe bazisanga imusozi (bongeye kuba bazima nyuma yo gupfa).

Ese inkuru ya Musa yakugezeho?

Ubwo Nyagasani we yamuhamagaraga ari mu kibaya gitagatifu cya Tuwa (agira ati),

“Jya kwa Farawo kuko rwose yigometse.”

Umubwire uti “Ese ushobora kwiyeza (ukareka icyaha cy’ubuhakanyi, ukaba umwemeramana)?”

“Nkakuyobora kwa Nyagasani wawe kugira ngo umutinye?”

Nuko (Musa) amwereka igitangaza gihambaye.

Ariko (Farawo) yarahinyuye aranigomeka;

Maze atera umugongo akataza (ashishikariza abantu be kudakurikira Musa).

Nuko akoranya (abantu be), avuga mu ijwi riranguruye,

Agira ati “Ni njye nyagasani wanyu w’ikirenga.”

Bityo Allah amuhana by’intangarugero kubera icyaha cya nyuma (yakoze) n’icya mbere.[1] ——— [1] Icyaha cyo kuba Farawo yaravuze ko ari we Nyagasani w’ikirenga, nk’uko byavuzwe muri iki gice (Surat), umurongo wacyo wa 24. Naho icya mbere ni ukuba yarabwiye ibyegera bye ko atazi ko bafite indi mana itari we nk’uko byavuzwe mu gice (Surat) cya 28, umurongo wacyo wa 38.

Mu by’ukuri muri ibyo harimo isomo kuri buri wese utinya Allah.

Ese (yemwe bantu) iremwa ryanyu ni ryo rikomeye, cyangwa ikirere (Allah) yubatse (ni cyo gikomeye)?

Yazamuye igisenge cyacyo, maze aragitunganya.

Ijoro ryacyo arigira umwijima, amanywa yacyo arayakesha.

Nyuma y’ibyo arambura isi,

Ayisohoramo amazi yayo n’inzuri zayo,

Anashimangira imisozi,

Kugira ngo bibagirire akamaro, mwe n’amatungo yanyu.

Ariko igihe icyago gihambaye (umunsi w’imperuka) kizaza,

Umunsi umuntu azibuka ibyo yashyizemo umuhate,

Umuriro wa Jahanamu ukagaragarizwa (buri wese) ureba.

Ubwo wa wundi wigometse,

Agahitamo ubuzima bwo kuri iyi si (agakurikira ibibi aterwa n’irari rye),

Mu by’ukuri umuriro wa Jahanamu uzaba ubuturo (bwe).

Ariko wa wundi watinye kuzahagarara imbere ya Nyagasani we, akanabuza umutima we kurarikira ibibi,

Mu by’ukuri, ubusitani (Ijuru) buzaba ubuturo (bwe).

(Abahakanyi) barakubaza (yewe Muhamadi) ku bijyanye n’igihe imperuka izabera

Nta bumenyi ufite bwo kugira icyo uyivugaho,

Ubumenyi bwayo bwihariye Nyagasani wawe.

Ahubwo wowe (Muhamadi) nta kindi uri cyo uretse kuba uri umuburizi w’abatinya (umunsi w’imperuka).

Umunsi bazawubona, bazamera nk’aho babaye ku isi ikigoroba kimwe cyangwa igitondo kimwe.

(Intumwa Muhamadi) yazinze umunya inatera umugongo.

Ubwo umuntu utabona (Abdullah bin Umm-Maktum) yari aje ayisanga (igihe yigishaga bamwe mu bikomerezwa by’Abakurayishi).

Ese wabibwirwa n’iki? Wenda arashaka kwiyeza?

Cyangwa akakira urwibutso, hanyuma urwibutso rukamugirira akamaro?

Naho wa wundi wirata yumva ko adakeneye (kuyoboka),

Ni we witaho,

Kandi nta cyo wabazwa aramutse atiyejeje (ngo ave mu buhakanyi, kuko wowe icyo ushinzwe ari ugusohoza ubutumwa bwa Allah gusa).

Ariko wa wundi uje akugana yihuta,

Kandi akaba atinya (Allah n’ibihano bye),

Uramwirengagiza (ukita ku bandi),

Oya ntibikwiye! Mu by’ukuri (iyi Qur’an) ni urwibutso.

Bityo, ubishaka nayizirikane.

(Iri) mu nyandiko zirinzwe mu cyubahiro (Lawuhul Mahfudh),

Zubahitse kandi zejejwe,

Ziri mu maboko y’abanditsi (abamalayika bajyana ubutumwa ku bantu),

B’abanyacyubahiro kandi b’inyangamugayo.

Umuntu (w’umuhakanyi) navumwe! Mbega ukuntu ari umuhakanyi (w’indashima)!

Ese (Allah) yamuremye mu ki?

Yamuremye mu ntanga, arangije amugenera uko azabaho,

Nuko amworohereza inzira (y’imibereho ye).

Nyuma amugenera urupfu no gushyingurwa,

Kandi igihe azabishakira azamuzura.

Oya! Nyamara (umuntu) ntarakora ibyo yamutegetse.

Ngaho umuntu niyitegereze amafunguro ye;

Uko tumanura amazi (mu kirere) yisuka ari menshi,

Nuko tugasatura ubutaka uko bikwiye (kugira ngo amazi abashe kubwinjiramo n’imbuto zimere),

Maze tukabumezamo impeke,

N’imizabibu n’imboga,

N’imizeti n’imitende,

N’imirima igizwe n’ibiti by’inzitane,

N’imbuto n’ubwatsi,

Kugira ngo bibagirire akamaro, mwe n’amatungo yanyu.

Ariko ubwo urusaku ruziba amatwi (impanda y’imperuka) ruzaza,

Uwo munsi umuntu azahunga umuvandimwe we,

(Ahunge) nyina na se,

N’umugore we n’abana be,

Kuri uwo munsi, buri muntu azaba afite ibimuhangayikishije (bituma atita ku bandi).

Kuri uwo munsi, uburanga (bw’abemeramana) buzaba bwererana,

Bamwenyura, bishimiye inkuru nziza bahawe (y’Ijuru).

Naho uburanga (bw’abahakanyi) kuri uwo munsi buzaba bwuzuye umukungugu,

Bwarenzwe n’umwijima.

Abo ni bo bahakanyi b’inkozi z’ibibi.

Igihe izuba rizazingwazingwa (urumuri rwaryo rukazimira),

N’igihe inyenyeri zizijima,

N’igihe imisozi izakurwa mu myanya yayo,

N’igihe ingamiya zihaka zizarekwa (ntizitabweho),

N’igihe inyamaswa z’inkanzi zizakoranyirizwa hamwe,

N’igihe inyanja zizaka umuriro,

N’igihe roho zizasubizwa mu mibiri yazo (abeza bakajya ukwabo n’ababi bakajya ukwabo).

N’igihe umwana w’umukobwa wahambwe ari muzima azabazwa,[1] ——— [1] Mbere y’uko Intumwa y’Imana Muhamadi (Imana imuhe amahoro n’imigisha) ihabwa ubutumwa, Abarabu b’icyo gihe iyo babyaraga umwana w’umukobwa, bamuhambaga ari muzima kuko byabaga ari igisebo ku muryango ngo kuko babonaga nta cyo amaze! Ariko nyuma y’aho Intumwa y’Imana iziye, ibyo byaraciwe. Kuba ari we uzabazwa ni ibigaragaza uburemere bw’icyaha cy’uwamwishe uzaba agiye guhura n’urubanza rukomeye ku munsi w’ibarura.

Icyaha yakoze cyatumye yicwa,

N’igihe ibitabo (bikubiyemo ibikorwa byiza n’ibibi bya buri muntu) bizaramburwa (bigakwirakwizwa),

N’igihe ikirere kizakurwaho igishishwa cyacyo (inyenyeri zavuyeho),

N’igihe umuriro wa Jahanamu uzenyegezwa,

N’igihe Ijuru rizigizwa hafi,

Icyo gihe buri muntu azamenya ibyo yakoze.

Bityo, ndahiye inyenyeri zitagaragara ku manywa zikongera kugaragara nijoro,

Zigenda zihuta kandi zikanihisha,

Nanarahiye ijoro igihe riguye,

N’igitondo igihe gitangaje,

Mu by’ukuri (Qur’an) ni ijambo ryazanywe n’Intumwa yubahitse [(Malayika Jibrilu), (riturutse kwa Allah)],

(Iyo ntumwa) ifite imbaraga (n’urwego rwo hejuru) yahawe na nyiri Ar’shi[1] y’icyubahiro (Allah). ——— [1] Reba uko twasobanuye iri jambo muri Surat ul A’araf, aya ya 54.

Yumvirwa (n’abamalayika mu ijuru) kandi ikaba yizewe (kwa Allah).

Kandi (yemwe bahakanyi) mugenzi wanyu (Intumwa Muhamadi ibakomokamo) si umusazi.

Kandi rwose yamubonye (Malayika Jibrilu) ari mu kirere gikeye.

Kandi (Intumwa Muhamadi) ntigundira ibyo yahishuriwe (ngo ireke kubyigisha abantu).

Kandi (Qur’an) si ijambo rya Shitani wavumwe.

None se muragana he?

Mu by’ukuri iyi (Qur’an) nta kindi iri cyo usibye kuba ari urwibutso ku biremwa (byose).

Kuri wa wundi muri mwe ushaka gukurikira inzira igororotse.

Kandi nta cyo mwashaka (ngo kibe) keretse Allah, Nyagasani w’ibiremwa (byose) aramutse agishatse.

Igihe ikirere kizasatagurika,

N’igihe inyenyeri zizanyanyagira,

N’igihe inyanja zizuzura (amazi yazo akarenga inkombe),

N’igihe imva zizabirindurwa (zigakurwamo ibizirimo),

(Icyo gihe) umuntu azamenya ibyo yakoze mbere n’ibyo yigijeyo ngo azabe abikora (byaba ibyiza cyangwa ibibi).

Yewe muntu! N’iki cyaguteye kwirengagiza Nyagasani wawe, Nyirubutagatifu?

We wakuremye akagutunganya ndetse akanaguha imiterere igukwiye?

Yaragutunganyije aguha ishusho ashaka.

Oya! Nyamara muhakana umunsi w’ibihembo.

Ariko mu by’ukuri mufite ababagenzura (abamalayika babashinzwe),

Bubashywe kandi bandika (ibikorwa byanyu byiza n’ibibi),

Bazi ibyo mukora byose.

Mu by’ukuri abakora ibyiza bazaba mu munezero uhambaye (Ijuru);

Naho abangizi bazaba mu muriro ugurumana,

Bazawuhiramo ku munsi w’ibihembo,

Kandi ntibazigera bawuvamo.

None se ni iki kizakumenyesha umunsi w’ibihembo?

Nanone, ni iki kizakumenyesha umunsi w’ibihembo?

(Uzaba) ari umunsi umuntu atazagira icyo amarira undi, kandi kuri uwo munsi itegeko ryose rizaba ari irya Allah.

Ibihano bikomeye bizahanishwa abatuzuza ibipimo,

Ba bandi igihe bapimiwe n’abandi bantu, basaba kuzurizwa ibipimo,

Nyamara bo bapimira (abandi), bakabaha ibituzuye.

Ese bakeka ko batazazurwa (ngo babazwe),

Ku munsi uhambaye?

Umunsi abantu (bose) bazahagarara imbere ya Nyagasani w’ibiremwa?

Oya! Mu by’ukuri igitabo cy’inkozi z’ibibi (cyanditsemo ibikorwa byazo) gishyinguwe mu bubiko bwabugenewe bwitwa Sijiini.

None se ni iki cyakumenyesha Sijiini?

Ni igitabo cyanditse mu buryo bunoze kandi budasibama.

Uwo munsi ibihano bikaze bizaba kuri ba bandi bahinyura,

Ba bandi bahinyura umunsi w’ibihembo.

Kandi nta wundi uwuhakana usibye urengera (imbibi za Allah) w’umunyabyaha,

(Wa wundi) usomerwa amagambo yacu (yo muri Qur’an) akavuga ati “Ni inkuru z’abo hambere.”

Oya! Ahubwo ibyo bakoraga (ibyaha) byatwikiriye imitima yabo.

Oya! Mu by’ukuri kuri uwo munsi bazabuzwa kureba Nyagasani wabo.

Maze bahire mu muriro ugurumana.

Nuko babwirwe bati “Ibi ni byo mwajyaga muhinyura.”

Oya! Mu by’ukuri igitabo cy’abakora ibyiza (cyanditsemo ibikorwa byabo) gishyinguwe mu bubiko bwabugenewe bwitwa Iliyyuuna.

None se ni iki cyakumenyesha Iliyuna?

Ni igitabo cyanditse mu buryo bunoze kandi budasibama.

(Abamalayika) begereye Allah ni bo bazakibera abahamya.

Mu by’ukuri abakora ibyiza bazaba mu munezero uhambaye (Ijuru);

Bicaye ku bitanda byiza, bitegereza (ibyiza barimo, harimo no kureba uburanga bwa Nyagasani wabo).

Uzabona uburanga bwabo burabagirana kubera ibyishimo.

Bazahabwa ikinyobwa gipfundikiye,

Intama ya nyuma (y’icyo kinyobwa) izaba ifite impumuro y’umubavu wa Miski. Kubera ibyo rero, ngaho abarushanwa nibarushanwe.

(Icyo kinyobwa) kizaba kivanze na Tas’niim (amazi y’isoko ituruka mu iriba ryo mu ijuru)

Isoko izanyobwaho n’abazaba bari hafi (ya Allah).

Mu by’ukuri (ku isi) inkozi z’ibibi zajyaga ziseka abemeramana,

Bazinyuraho zikabaryanira inzara.

Zaba zisubiye mu miryango yazo, zikabagira urwenya.

N’iyo zababonaga, zaravugaga ziti “Mu by’ukuri bariya barayobye.”

Nyamara ntabwo (izo nkozi z’ibibi) zashinzwe kuba abagenzuzi (b’abemeramana).

Ariko uyu munsi, abemeramana ni bo bari buseke abahakanyi.

Bicaye ku bitanda byiza, bitegereza (ibyiza barimo, harimo no kureba uburanga bwa Nyagasani wabo).

Ese abahakanyi ntabwo bahembewe ibyo bajyaga bakora?

Igihe ikirere kizasandara (ku munsi w’imperuka),

Nuko kikumvira (itegeko rya) Nyagasani wacyo, kandi ibyo birakwiye (ko kimwumvira),

N’igihe isi izaringanizwa,

Maze igasohora ibiyirimo (abapfuye), igasigarira aho,

Nuko ikumvira (itegeko rya) Nyagasani wayo, kandi ibyo birakwiye (ko imwumvira),

Yewe muntu! Mu by’ukuri ukorana umuhate imirimo yawe ugana kwa Nyagasani wawe, kandi muzahura (ku munsi w’imperuka).

Bityo, uzahabwa igitabo cye (cy’ibikorwa bye) mu kuboko kw’iburyo,

Azabarurirwa mu buryo bworoshye,

Kandi azasubira mu bantu be (umuryango we wakoze neza ku isi, ndetse n’abagore azagororerwa bo mu ijuru) yishimye!

Naho uzahabwa igitabo cye (cy’ibikorwa bye, akacyakirira) inyuma y’umugongo,

Azisabira kurimbuka,

Kandi azahira mu muriro ugurumana.

Mu by’ukuri (mu buzima bwo ku isi) yabaga mu muryango we yishimye,

Mu by’ukuri yibwiraga ko atazagaruka (kwa Nyagasani we).

Nyamara si byo! Mu by’ukuri Nyagasani we yabaga amubona neza.

Bityo, ndahiye igicu gitukura cy’izuba rirenga,

N’ijoro n’ibyo ritwikira (byose),

N’ukwezi igihe kuzuye,

Ko rwose muzanyura mu byiciro bitandukanye (mu buzima bwa hano ku isi no ku munsi w’imperuka)

Ese babaye bate, kuki batemera?

Ndetse n’iyo basomewe Qur’an ntibajya bubama.

Ahubwo abahakanye bahinyura (Intumwa Muhamadi n’inyigisho ze).

Kandi Allah azi neza ibyo bahisha (mu mitima yabo).

Bityo, bagezeho inkuru y’ibihano bibabaza.

Uretse abemeye bakanakora ibikorwa byiza, bazagororerwa ibihembo bidashira (Ijuru).

Ndahiye ikirere gifite inyenyeri nini nyinshi (zimurika nijoro),

N’umunsi w’isezerano (umunsi w’imperuka),

N’umunsi w’ubuhamya (umunsi wa Idjuma) ndetse n’umunsi w’ikoraniro (umunsi wa Arafat).

Abantu bacukuriye abemeramana imyobo (yo kubatwikiramo) baravumwe,[1] ——— [1] Muri uyu murongo wa Qur’an haravugwamo amateka y’umwami witwa Dhu Nuwasi w’ahitwa Najirani, wategekaga abantu guhakana Imana, maze abanze akabacukurira imyobo ayicanamo umuriro akajya abajugunyamo ari bazima.

Ubwo bacanaga umuriro ugurumana cyane,

Ubwo babaga bawicaye impande,

Kandi babaga bashungereye ibyo bakoreraga abemeramana (babatwika).

Kandi nta kindi babahoraga usibye kuba baremeye Allah, Umunyacyubahiro uhebuje, Ushimwa cyane,

Ufite ubwami bw’ibirere n’isi! Kandi Allah ni Umuhamya wa buri kintu.

Mu by’ukuri abatoteje abemeramana n’abemeramanakazi (babakorera iyicarubozo), nyuma ntibicuze (kuri Allah), bazahanishwa ibihano by’umuriro wa Jahanamu, banahanishwe ibihano bitwika.

Mu by’ukuri abemeye bakanakora ibikorwa byiza, bazagororerwa ubusitani butembamo imigezi (Ijuru). Iyo ni yo ntsinzi ihebuje.

Mu by’ukuri ibihano bya Nyagasani wawe (yewe Muhamadi) birakaze.

Mu by’ukuri ni We waremye (ibiremwa bitari biriho) kandi ni na We uzabigarura (ku munsi w’imperuka).

Kandi ni We Ubabarira ibyaha, Umukunzi (w’abemeramana),

Nyiri Ar’shi[1], Nyirikuzo, ——— [1] Reba uko twasobanuye iri jambo muri Surat ul A’araf, Aya ya 54.

Ukora ibyo ashaka akanabinoza.

Ese wamenye inkuru z’ingabo?

Za Farawo n’iz’aba Thamudu?

Ahubwo abahakanye (bakomeje) guhinyura (ukuri).

Kandi Allah azi neza ibikorwa byabo byose (kandi azabibahanira).

Ahubwo iyi ni Qur’an yubahitse,

(Yanditse) ku rubaho rurinzwe (Lawuhul Mahfudh).

Ndahiye ikirere n’ikimurika nijoro;

Ni iki cyakumenyesha ikimurika nijoro?

Ni inyenyeri imurika cyane (irabagirana).

Nta muntu utagira umugenzuzi (abamalayika bashinzwe kugenzura ibikorwa bya muntu).

Ngaho umuntu niyitegereze icyo yaremwemo!

Yaremwe mu mazi ataruka (intanga),

Aturuka hagati y’umugongo n’imbavu (zo mu gituza)

Mu by’ukuri (Allah waremye uwo muntu mu ntanga) afite ubushobozi bwo kumuzura.

Umunsi amabanga azahishurwa,

Icyo gihe (umuntu) nta mbaraga azaba afite cyangwa ngo agire umutabara.

Ndahiye ikirere gitanga imvura igenda igaruka,

N’isi isaduka (kugira ngo ibiti n’ibimera bimere),

Mu by’ukuri iyi (Qur’an) ni imvugo itandukanya (ukuri n’ikinyoma),

Kandi ntabwo ari imvugo idafite umumaro.

Mu by’ukuri (abahinyura ukuri) bacura umugambi mubisha (wo kurwanya ubutumwa bw’ukuri),

Maze nanjye (Allah) nkaburizamo umugambi wabo.

Bityo, abo bahakanyi bahe igihe (yewe Muhamadi), ubarindirize gato (bazibonera ibizababaho).

Singiza izina rya Nyagasani wawe, Uwikirenga,

We waremye akanatunganya (buri kintu),

Akanakigenera (gahunda yacyo yose), hanyuma akayikiyoboramo,

Ni na We umeza ubwatsi mu nzuri,

Hanyuma akabwumisha bugahindura ibara.

Rwose (yewe Muhamadi) tuzakwigisha (gusoma Qur’an), bityo ntuzayibagirwa,

Keretse ibyo Allah azashaka (ko wibagirwa). Mu by’ukuri azi ibigaragara n’ibitagaragara.

Tuzanakorohereza inzira yo gukora ibyiza.

Bityo, ibutsa (abantu) igihe urwibutso rwabagirira akamaro,

Mu by’ukuri hazibuka wa wundi utinya (Allah),

Ariko inkozi y’ibibi izarugendera kure (urwibutso),

(Uwo) ni we uzajya mu muriro uhambaye (akawuhiramo),

Aho atazapfa (ngo aruhuke) cyangwa ngo agiriremo ubuzima (bwiza).

Mu by’ukuri wa wundi wiyejeje (akirinda ibyaha) yamaze kubona intsinzi

Akanasingiza izina rya Nyagasani we ndetse akanakora iswala.

Ariko mwe mwikundira ubuzima bwo kuri iyi si,

Nyamara ubwo ku mperuka ari bwo bwiza kurushaho ndetse buzanahoraho.

Mu by’ukuri ibi (mubwirwa) biri mu byanditswe byo hambere,

Inyandiko (zahishuriwe) Ibrahim na Musa.

Ese inkuru y’ikizatwikira (abantu ku munsi w’imperuka) yakugezeho?

Kuri uwo munsi, uburanga bwa bamwe buzaba busuzuguritse,

(Igihe bari ku isi) babaga bakora bashishikaye (basenga ibindi bitari Allah), (ariko ku mperuka) bazaba bananiwe (kandi bafite ikimwaro).

Bazajya mu muriro utwika (bawuhiremo);

Kandi bazanyweshwa ku isoko (y’amazi) yatuye,

Nta byo kurya bazaba bafite uretse ibyatsi birura kandi bifite amahwa,

(Ibyo byo kurya) ntibizigera bibabyibushya cyangwa ngo bibamare inzara.

Kuri uwo munsi kandi (ubundi) buranga buzaba bukeye;

Bwishimiye ibikorwa byabwo,

(Ba nyirabwo bazaba bari) mu Ijuru ry’ikirenga,

Aho batazumva amanjwe,

Hazaba harimo isoko itemba,

Hazaba harimo ibitanda byigiye hejuru,

N’ibikombe biteguwe (neza),

N’imisego itondetse ku mirongo (neza),

N’amatapi arambuye (biryoheye ijisho).

Ese ntibitegereza uko ingamiya zaremwe?

N’uburyo ikirere cyahanitswe?

N’uburyo imisozi yashimangiwe (mu butaka)?

N’uburyo isi yarambuwe?

Bityo, (yewe Muhamadi) bibutse kuko mu by’ukuri wowe uri uwibutsa,

Ntukabashyireho igitugu.

Ariko utera umugongo (urwibutso) akanahakana,

Allah azamuhanisha ibihano bihambaye.

Mu by’ukuri iwacu ni ho garukiro ryabo,

Hanyuma mu by’ukuri ni twe tuzabakorera ibarura

Ndahiye umuseke,

N’amajoro cumi (ya mbere y’ukwezi gutagatifu kwa Dhul-Hijja),

N’ikitari igiharwe ndetse n’igiharwe (mu biremwa byose bya Allah),

N’ijoro iyo rihita,

Ese muri izo (ndahiro) ntiharimo ibimenyetso bifatika ku muntu ufite ubwenge (bituma areka ibyaha n’ubuhakanyi)?

Ese (yewe Muhamadi) ntiwamenye uko Nyagasani wawe yagenje aba Adi?

(Abantu b’) Irama (bari barebare cyane), bafite n’inyubako ndende (zifite inkingi ndende),

Bo (abo ba Irama) ntihigeze haremwa abandi bameze nka bo mu yindi mijyi.

N’aba Thamudu bacongaga urutare mu bibaya (bakarukoramo inyubako)?

Na Farawo wari ufite imambo (yazirikagaho abantu abakorera iyicarubozo)?

Ba bandi bakoze ubugizi bwa nabi mu mijyi,

Maze bayikwizamo ubwangizi bukabije,

Nuko Nyagasani wawe abasukaho ibihano bibabaza,

Mu by’ukuri Nyagasani wawe yiteguye guhana (inkozi z’ibibi).

Iyo Nyagasani agerageje umuntu, akamwubahisha akanamuhundagazaho ingabire, aravuga ati “Nyagasani wanjye yanyubahishije.”

Nyamara yamugerageza akamugabanyiriza amafunguro, akavuga ati “Nyagasani wanjye yaransuzuguje!”

Oya! Ahubwo ntimugirira neza imfubyi,

Ndetse nta n’ubwo mubwirizanya kugaburira abakene!

Kandi murya imirage (y’abandi) mukayimara,

Ndetse mugakunda imitungo bikabije.

Oya! Umunsi isi izasandazwa (igacikamo ibice),

Nuko Nyagasani wawe akaza (guca imanza) ndetse n’abamalayika bari ku mirongo ikurikiranye,

Kandi uwo munsi umuriro wa Jahanamu uzazanwa. Kuri uwo munsi, umuntu azibuka, ariko se uko kwibuka kuzamumarira iki?

Azicuza avuga ati “Iyaba nari narateganyirije ubuzima bwanjye (nkora ibikorwa byiza)!

Kuri uwo munsi ibihano (Allah) azahanisha nta wundi ushobora kubihanisha.

Kandi azanaboha (abahakanyi) ukuboha kutashoborwa n’undi uwo ari we wese.

(Umwemeramana azabwirwa ati) “Yewe roho ituje!”

“Garuka kwa Nyagasani wawe umwishimiye na We akwishimiye!”

“Maze winjire mu bagaragu banjye (b’intungane)”,

“Uninjire mu Ijuru ryanjye!”

Ndahiye uyu mujyi (wa Maka),

Nawe (Ntumwa Muhamadi) utuye uyu mujyi,

N’umubyeyi (Adamu) n’abo yabyaye,

Mu by’ukuri twaremye umuntu (agomba kunyura) mu ngorane.

Ese akeka ko nta n’umwe wamushobora?

Aravuga ati “Nakoresheje umutungo mwinshi.”

Ese akeka ko nta n’umwe umubona?

Ese ntitwamuhaye amaso abiri,

Ndetse n’ururimi n’iminwa ibiri?

Tukanamwereka inzira ebyiri (iy’icyiza n’ikibi)?

Ariko ntiyigeze ashaka kunyura mu nzira igoranye (iganisha ku byiza n’intsinzi).

Ese ni iki cyakumenyesha iyo nzira igoranye?

(Ni) ukubohora umucakara,

Cyangwa gutanga amafunguro ku munsi w’amapfa,

(Ayo mafunguro ukayaha) imfubyi mufitanye isano rya bugufi,

Cyangwa umukene wambaye ubusa (ubayeho mu kaga).

Hanyuma akaba umwe mu bemeramana, bakanagirana inama zo kwihangana ndetse bakanagirana inama zo kugira impuhwe.

Abo ni abo mu kuboko kw’iburyo (mu Ijuru).

Naho abahakanye amagambo yacu, ni abo mu kuboko kw’ibumoso (mu muriro).

Bazaba bafungiranye mu muriro (badafite aho binjirira n’aho basohokera).

Ndahiye izuba n’urumuri rwaryo,

N’ukwezi igihe kurikurikiye,

N’amanywa igihe agaragaje urumuri (rw’izuba),

N’ijoro igihe riritwikiriye,

N’ikirere ndetse n’Uwagihanze,

N’isi n’Uwayirambuye,

Na roho n’uwayitunganyije;

Hanyuma akayigaragariza ikibi n’icyiza,

Mu by’ukuri uweza roho ye (akubaha Allah kandi agakora ibikorwa byiza) yaratsinze,

Kandi rwose uwatereranye roho ye ari mu gihombo,

Abantu ba Thamudu bahinyuye (Intumwa yabo) kubera kwigomeka,

Ubwo ubarusha ububi yahagurukanaga ibakwe (akajya kwica ingamiya y’imbyeyi),

Nuko Intumwa ya Allah (Swaleh) irababwira iti “Muramenye! Iyo ni ingamiya ya Allah (ntimuyigirire nabi), kandi ntimuyibuze gushoka!”

Ariko baramuhinyuye (ya ngamiya) barayica. Nuko Nyagasani wabo arabarimbura ku bw’icyaha cyabo, ndetse bose abarimbura mu buryo bureshya (baba abakuru n’abato, abakire n’abakene, ndetse n’abakomeye n’abaciriritse).

Kandi (Allah) ntatinya ingaruka zabyo.

Ndahiye ijoro igihe riguye,

N’amanywa igihe atangaje,

N’uwaremye ikigabo n’ikigore,

Mu by’ukuri ibikorwa byanyu biratandukanye,

Wa wundi utanga (amaturo) akanagandukira (Allah),

Kandi akizera icyiza (Ijuru),

Tuzamworohereza inzira y’ibyiza.

Ariko uzaba umunyabugugu, akirata yumva ko yishoboye,

Akanahinyura icyiza,

Tuzamworohereza inzira y’ibibi,

Kandi ubwo azaba arimbuka (ajyanywe mu muriro), umutungo we nta cyo uzamumarira.

Mu by’ukuri ukuyobora ni ukwacu.

Kandi mu by’ukuri ni natwe tugenga iby’imperuka n’ibibanza (iby’isi).

Bityo, mbaburiye umuriro ugurumana.

Nta we uzawinjiramo utari inkozi y’ibibi,

Wa wundi wahinyuye (ukuri) akanagutera umugongo.

Ariko ukora ibikorwa byiza, azawurindwa,

Wa wundi utanga umutungo we kugira ngo yiyeze,

Kandi ntashishikazwe no kwiturwa n’uwo yagiriye neza.

Ahubwo (akabikora agamije) gushaka kwishimirwa na Nyagasani we, Uwikirenga.

Kandi rwose azishima (ubwo azinjira mu Ijuru).

Ndahiye agasusuruko,

N’ijoro igihe ryijimye,

(Yewe Muhamadi), Nyagasani wawe ntiyagutereranye kandi nta n’ubwo yakwanze.

Kandi rwose ubuzima bw’imperuka ni bwo bwiza kuri wowe kurusha ububanza (ubw’isi).

Mu by’ukuri Nyagasani wawe azaguha kandi uzishima.

Ese ntiyagusanze uri imfubyi akaguha icumbi (abakwitaho)?

Akanagusanga udasobanukiwe (Qur’an n’amategeko yayo), nuko akakuyobora?

Akaba yaranagusanze uri umukene maze akagukungahaza (akaguha kunyurwa)?

Bityo, ntugahutaze imfubyi,

Ntukanakankamire uje asaba.

Kandi ingabire za Nyagasani wawe (yaguhaye), ujye uzigaragaza (umushimira).

Ese (yewe Muhamadi) ntitwakwaguriye igituza?

Tukagutura umutwaro (tukorohereza gusohoza ubutumwa),

Wari ukuremereye umugongo?

Tukanamenyekanisha izina ryawe?

Mu by’ukuri nyuma y’ingorane haza ibihe byiza.

Rwose, nyuma y’ingorane haza ibihe byiza.

Bityo nuhuguka, ujye ushishikara (mu kugaragira Allah).

Kandi (imigambi n’ibyiringiro byawe) ujye ubitura Nyagasani wawe (wenyine).

Ndahiye igiti cy’umutini n’icy’umuzeti,

N’umusozi wa Sinayi,

N’uyu mujyi utekanye (Maka),

Mu by’ukuri twaremye umuntu mu ishusho nziza,

Hanyuma tuzamushyira mu rwego rwo hasi cyane (ageze mu zabukuru atagishoboye kugira icyo yimarira).

Uretse babandi bemeye bakanakora ibikorwa byiza (n’iyo bageze mu zabukuru, hari ibikorwa byo kwiyegereza Imana bakomeza gukora); abo bazagororerwa ibihembo bidashira (Ijuru).

None se nyuma y’ibyo (yewe muntu), ni iki kigutera guhakana umunsi w’ibihembo?

Ese Allah si We Mucamanza usumba abandi?

Soma ku izina rya Nyagasani wawe waremye (ibiriho byose),

Yaremye umuntu mu rusoro rw’amaraso,

Soma! Kandi Nyagasani wawe ni Nyirubuntu uhebuje,

We wigishije (umuntu kwandika) akoresheje ikaramu,

Yigishije umuntu ibyo atari azi.

Oya! Mu by’ukuri umuntu ararengera (arahakana kandi agakora ibibi),

Iyo amaze kubona ko yihagije (kubera ibyo atunze).

Mu by’ukuri (umenye ko) kwa Nyagasani wawe ari ho garukiro.

Ese (yewe Muhamadi) wabonye wa wundi (Abu Jahl) ubuza

Umugaragu (wacu Muhamadi) kugaragira?

Ese (yabuza ate umugaragu wacu) aramutse ari mu nzira y’ukuri,

Cyangwa ari gukangurira (abantu) kugandukira Allah (mbwira icyaba iherezo ry’umubuza)?

Ngaho mbwira (Abu Jahl) aramutse ahinyura (ukuri) akanatera umugongo,

Ese ntabwo azi ko Allah abona (ibyo akora)?

Oya! Natarekera aho, tuzamufata uruhanga rwe turukururire mu muriro,

Uruhanga rubeshya, rw’urunyabyaha.

Ngaho nahamagare abambari be,

Natwe tuzahamagara abamalayika bacu barinda umuriro (kugira ngo bamukanire urumukwiye).

Oya! (Yewe Muhamadi), ntukamwumvire (Abu Jahali), ahubwo ujye wubama (usali) uniyegereze Allah

Mu by’ukuri (iyi Qur’an) ni Twe twayikumanuriye mu ijoro ry’igeno,

Ni iki cyakumenyesha ijoro ry’igeno?

Ijoro ry’igeno riruta amezi igihumbi (ibyiza bikozwe muri iryo joro birusha ibihembo ibikozwe mu gihe kingana n’amezi igihumbi)!

Abamalayika na Roho (Malayika Jibril) barimanukanamo babiherewe uburenganzira na Nyagasani wabo, kubera igeno (bazanye amategeko agenga) buri kintu cyose,

Iryo (joro ryose) riba ryuje amahoro (n’impuhwe za Allah ku bagaragu be) kugeza umuseke utambitse.

Ba bandi bahakanye bo mu bahawe igitabo ndetse n’ababangikanyamana, ntibashobora kureka ubuhakanyi (bwabo) kugeza bagezweho n’ikimenyetso kigaragara;

(Icyo kimenyetso ni) Intumwa (Muhamadi) iturutse kwa Allah, ibasomera inyandiko zejejwe (Qur’an).

Zikubiyemo inkuru n’amategeko bitunganye.

Kandi abahawe igitabo bacitsemo ibice nyuma y’uko bagezweho n’ikimenyetso kigaragara (kuko mbere y’uko Intumwa Muhamadi ihabwa ubutumwa, bose bayemeranyagaho kuko yari yarahanuwe mu bitabo byabo, ariko imaze kuza bamwe barayihakana).

Kandi (no mu bitabo byabo) nta kindi bari barategetswe kitari ukugaragira Allah, bakaba ari we biyegurira wenyine, bahozaho iswala, ndetse bakanatanga amaturo. Kandi iryo ni ryo dini ritunganye.

Mu by’ukuri abahakanye bo mu bahawe igitabo ndetse n’ababangikanyamana bazaba mu muriro wa Jahanamu ubuziraherezo; abo ni bo babi mu biremwa.

Naho abemeye bakanakora ibikorwa byiza; abo ni bo beza mu biremwa.

Ibihembo byabo kwa Nyagasani wabo bizaba Ijuru rihoraho, ritembamo imigezi; (iryo Juru) bazaribamo ubuziraherezo. Allah yarabishimiye na bo baramwishimira. Ibyo (bihembo) ni iby’utinya Nyagasani we.

Ubwo isi izatigiswa n’umutingito ukomeye,

Nuko isi igasohora imitwaro yayo (ibiyirimo),

Umuntu azavuga ati “Ese noneho (isi) yabaye iki?”

Uwo munsi (isi) izavuga inkuru zayo (z’ibyayibereyeho),

Kubera ko Nyagasani wawe azaba yayibitegetse.

Kuri uwo munsi, abantu bazasohoka (mu mva) batatanye kugira ngo berekwe ibikorwa byabo.

Icyo gihe uzaba yarakoze icyiza gifite uburemere bungana n’akantu gato cyane kurusha ibindi, azakibona (agihemberwe).

N’uzaba yarakoze ikibi gifite uburemere bungana n’akantu gato cyane kurusha ibindi, azakibona (agihanirwe).

Ndahiye amafarasi yiruka cyane avuza imirindi,

Akubita (ibinono) bigatarutsa ibishashi by’umuriro,

N’amafarasi agaba igitero mu rukerera,

Akanatumura umukungugu,

Akinjira hagati mu ngabo z’umwanzi.

Mu by’ukuri umuntu ni indashima kuri Nyagasani we,

Kandi rwose ibyo yabibera umuhamya,

Ndetse akunda imitungo bikabije.

Ese ntazi ko hari igihe abari mu mva bazazurwa?

N’ibiri mu bituza (by’abantu) bigashyirwa ahagaragara?

Mu by’ukuri uwo munsi Nyagasani wabo azaba azi neza ibyabo.

Ikizahonda (umunsi w’imperuka)!

Ikizahonda ni iki?

Ni iki kizakumenyesha ikizahonda?

Ni umunsi (w’imperuka), ubwo abantu bazamera nk’ibinyugunyugu binyanyagiye,

N’imisozi ikamera nk’amoya (akemurwa ku matungo) atumuka

Bityo, uwo umunzani we (w’ibikorwa byiza) uzaremera (bikaruta ibibi),

Azaba mu buzima bw’umunezero (Ijuru),

Ariko uwo umunzani we (w’ibikorwa byiza) uzaba utaremereye (bikarutwa n’ibibi),

Ubuturo bwe buzaba ari mu muriro witwa Hawiya.

Ni iki cyawukumenyesha (umuriro wa Hawiya)?

Ni umuriro ugurumana bikabije!

Mwarangajwe no gushaka kwigwizaho ubutunzi,

Kugeza ubwo mugeze mu mva,

Oya ntibikwiye! Bidatinze muzamenya (ko ubuzima bw’imperuka ari bwo bwiza kuri mwe).

Oya na none! Bidatinze muzamenya.

Oya! Iyo muza kugira ubumenyi budashidikanywaho (bw’ibijyanye n’iherezo ryo kurangazwa no kwigwizaho imitungo, ntimwari guhugira mu by’isi).

Mu by’ukuri muzabona umuriro wa Jahiim!

Rwose muzawibonera imbonankubone.

Kandi rwose, kuri uwo munsi muzabazwa ku ngabire (mwahawe muri ku isi).

Ndahiye igihe,

Mu by’ukuri umuntu ari mu gihombo,

Uretse abemeye bagakora ibikorwa byiza, bakagirana inama z’ukuri kandi bakanagirana inama zo kwihangana.

Ibihano bikomeye bizaba kuri buri wese unegura abandi, usebanya,

Urundanya imitungo agahora ayibara.

Yibwira ko umutungo we uzatuma abaho ubuziraherezo!

Oya! Mu by’ukuri azajugunywa mu muriro witwa Hutwama (ushwanyaguza).

Ni iki kizakumenyesha Hutwama?

Ni umuriro wa Allah wenyegejwe,

(Uwo muriro) uzajya uzamuka ugere ku mitima (y’abazaba bawurimo),

Mu by’ukuri bazaba bawufungiwemo,

(Baziritse) ku nkingi ndende (kugira ngo batawusohokamo).

Ese (yewe Muhamadi) ntiwamenye uko Nyagasani wawe yagize abagabye igitero bari ku nzovu (baje gusenya ingoro ya Al Kaabat iri i Maka)?

Ese umugambi wabo mubisha ntiyawuburijemo?

Nuko akaboherereza uruhuri rw’inyoni,

Zikabatera amabuye y’ibumba yacaniriwe,

Maze akabagira nk’ibyatsi byakanjakanjwe.

Kubera akamenyero k’Abakurayishi (mu mujyi wabo),

No kubera amasezerano yabo arebana n’ingendo (z’ubucuruzi) zo mu gihe cy’ubukonje no mu cy’impeshyi (batekanye),

Ngaho nibagaragire (Allah) Nyagasani nyir’iyi ngoro (Al Ka’abat),

(We) wabagaburiye mu gihe cy’amapfa, ndetse akanabaha umutekano mu gihe cy’ubwoba.

Ese wamenye uhinyura umunsi w’ibihembo?

Uwo ni wa wundi uhutaza imfubyi,

Ntanashishikarize (abandi) kugaburira abakene,

Bityo, ibihano bikomeye biri ku basenga,

Ba bandi birengagiza iswala zabo (ntibazikorere ku bihe byazo byagenwe)

Ba bandi bakora ibyiza bagamije kwiyerekana,

Kandi bakanga (gutiza) ibikoresho byo mu rugo (ababikeneye).

Mu by’ukuri (yewe Muhamadi) twaguhaye (ibyiza byinshi birimo) umugezi wo mu Ijuru witwa Kawthar.

Bityo, ujye usali unatange ibitambo kubera Nyagasani wawe.

Mu by’ukuri ukwanga ni we nyakamwe (ntazigera abona ibyiza haba ku isi ndetse no ku mperuka).

Vuga (yewe Muhamadi) uti “Yemwe bahakanyi!

Singaragira ibyo mugaragira,

Kandi namwe ntimugaragira uwo ngaragira.

Ndetse nanjye sinzigera ngaragira ibyo mugaragira,

Kandi namwe ntimuzigera mugaragira uwo ngaragira.

Mufite idini ryanyu, nanjye nkagira idini ryanjye.”

Igihe ubutabazi bwa Allah (kuri wowe Muhamadi) buzaza, ndetse n’intsinzi (yo kubohora umujyi wa Maka),

Nuko ukabona abantu binjira mu idini rya Allah ku bwinshi,

Uzasingize ikuzo rya Nyagasani wawe (aho uri hose), unamusabe imbabazi; kuko ari We Uwakira ukwicuza (kw’abagaragu be).

Amaboko yombi ya Abu Lahab[1] arakorama (kubera ko yayakoreshaga abangamira Intumwa y’Imana), ndetse na we ubwe azorame. ——— [1] Abu Lahab yari se wabo w’Intumwa Muhamadi, akaba yari umwe mu banzi bakomeye b’idini rya Isilamu, barwanyije bakanatoteza Intumwa Muhamadi.

Umutungo we n’urubyaro rwe nta cyo bizamumarira.

Azahira mu muriro ugurumana,

Ndetse n’umugore we watwaraga ibiti (by’amahwa yajyaga atega mu nzira Intumwa y’Imana yanyuragamo).

Mu ijosi rye (uwo mugore) hazaba hari umurunga wo mu muriro.

Vuga (yewe Muhamadi) uti “We ni Allah, umwe Rukumbi,”

Allah, Uwishingikirizwa,

Ntiyabyaye kandi ntiyanabyawe,

Ndetse nta na kimwe ahwanye na cyo.

Vuga (yewe Muhamadi) uti “Niragije (Allah), Nyagasani w’umuseke”,

“Ngo andinde inabi y’ibyo yaremye,”

“Anandinde ikibi cyo mu ijoro ryijimye igihe riguye,”

“Anandinde ikibi cy’abarozikazi bahuha ku mapfundo,”

“Ndetse anandinde inabi y’umunyeshyari igihe arigize.”

Vuga (yewe Muhamadi) uti “Niragije (Allah), Nyagasani w’abantu,”[1] ——— [1] (Abantu)

“Umwami w’abantu,”

“Imana y’abantu,”

“Ngo andinde ububi bwa (shitani) yoshya gukora ibibi, nyuma ikabireka (igihe umuntu yibutse Allah),”

“Yoshya imitima y’abantu gukora ibibi; ”

“Yaba (shitani) yo mu majini cyangwa mu bantu.”