Luhya Meal — Uluslararası İlim ve Kültür Cemiyeti — Fatiha 1:1 – Enam 6:165

(Enjaka) khulira lia Nyasaye, Omunji wetsimbabaasi, Owobukoosia muno.

Okhwitsomibwa khwoosi ni khwa Nyasaye, Omulesi webiloonje bioosi,

Omunji wetsimbabaasi, Owobukoosia muno,

Omwami wa Inyanga yomurungo.

Newesa wa khulamaanga, ne ninewesa wa khwenyangakhwo obukhoonyi.

Khulunjisie khunjila ingololofu,

Injila ya balia abawahelesia tsimbabaasi, ilali ya balia abasinyishilwa nohomba ya balia abakora tawe.

Alif, Lam, Mim.

Esho nishio Eshitabu shibulamwo obukanakani bwosibwosi, nishiobulunjifu khubalia abaria Nyasaye.

Balia abasuubilanga mufilalolekha, abaswaliyanga (iswala) khatsotso, ne barusinjia eshihanwa okhurula mumukabo kwa khubakabile.

Balia abasuubilanga khu kalia keshibwa khwiwe, nende kalia keshibwa imbeli wuwo, ne basuubilanga muno obulamu bwomwikulu.

Abo bali khubulunjifu okhurula khu Nyasaye wabu Omulesi, ne abo nibo balibura.

Toto balia abakhaya ni nashilalasa khubo, obekanyilisie nohomba olabekanyilisia tawe, shibalisuubila tawe.

Nyasaye yasuba khumioyo chiabu nende khutsimbulililo tsiabu, ne tsindolelo tsiabu tsilikhwo shiokhutsifunikha, mana bali nende eshinyasio eshikhongo.

Ne mubandu balio baboolanga mbu, “Khwasuubila mu Nyasaye nende Inyanga ya Indukho.” ne shibali abasuubili tawe.

Benyanga okhukatia Nyasaye nende Abasuubili, ne shibakatinjia halali abeene butswa, ne shibamanyilekho tawe.

Emioyo chiabu chilimwo obulwale, mana Nyasaye nabameta obulwale. Ne bali nende eshinyasio eshilulu khukalia ka bakaatinjia.

Ne nibaboolelwa mbu, "Mulakhole obwononi khushialo tawe." nabo baboola mbu, "Khubwatoto efwe nefwe khukaasinjia amakhuwa okhuba amalayi.”

Koo, toto bo nibo abononi, halali shibamanyile tawe.

Ne nibaboolelwa mbu, “Suubile shinga Abandu (Omurumwa nende abaloondi bebe) basuubila.” nibaboola mbu, “Khusuubile shinga abasilu basuubila?” Koo, toto bo nibo abasilu, halali shibamanyile tawe.

Ne nibabukana nende abasuubili, nibaboola mbu, “Khwasuubila.” Ne nibatong'a bo nende amashetani kabu, nibaboola mbu, “Toto efwe khuli ninenyu. Toto efwe khukholanga butswa omubayo."

Nyasaye yalababayila omubayo, ne yalabalekha mubukori bwabu nibayiyayiyanga mubuwofu.

Abo nibo bakula obukori khubulunjifu, mana inganga yabu niilanyola obukhala tawe, mana nibalaba abalunjifu tawe.

Ifwani yabu ili shinga ulia wahafia omulilo (okhurula khubandu bandi), ne olwakwosia obulafu khu efili mutsimbeka tsiaye, Nyasaye nabukula obulafu bwabu obo, ne nabalekha mufiilima, nibalalolanga shiosishiosi tawe.

Bekala amarwi, shibanyala okhusunga tawe, naabawofu; kho shibalikalukha (khubuluunjifu) tawe.

Nohomba shinga ifula ikhongo okhurula mwikulu, ilimwo efilima nende okhwatulukha khwelikulu, nende okhumiesukha, baretsanga tsinzala tsiabu mumarwi kaabu khulwa (okhuria) okhwatulukha khwelikulu okho, nibariire okhufwa. Ne Nyasaye yaterera muno abakhayi.

Okhumiesukha khwelikulu okho khubetsanga hambi muno okhuwofusia tsimoni tsiabu. Buli shinga libamiesulila, nibachenda. Ne nishibelimila, nibeema. Ne Nyasaye yenyanga, yakhabukule amarwi kabu nende tsimoni tsiabu. Toto Nyasaye nomunyali muno wa buli eshindu.

Enywe Abandu, laame Nyasaye wenyu Omulesi owabaloonga enywe nende balia abali imbeli wenyu; khomunyoole okhuria Nyasaye.

Owabakholela liloba okhuba obulili, nalo likulu okhuba eshitsafu, mana niyeshia amaatsi okhurula mwikulu mana nabamesilia khu amaatsi ako efiamo, fibe omukabo kwenyu. Kho, mulakholela Nyasaye efifwanani nimumanyile tawe.

Ne nimuli mubukanakani khukalia akakhweshilia omusumba wefu, mana rerekhwo isura ndala shinga eyo, mana lanje abaloli benyu, abalali Nyasaye tawe, toto nimuli abahabweene.

Ne nimulakhola murio tawe, ne shimulikhola tawe, kho rie omulilo kwetsikhwi tsiakwo ni abandu nende amachina, kwarecheshelwa Abakhayi.

Ne bila akomwikhoyo balia basuubila mana nibakhola amalayi mbu toto balinyoola emikunda chomwikulu, chia emialo chikhulukusinjia hasi wachio. Buli olwa balikabwa ebiamo okhurulamwo, baliboola mbu, “Kuno noomukabo kukhwahebwa imbeli." Ne balirererwa ebiamo ebo nibifwanane (nende bia khushialo). Ne balinyolamwo Abakhasi abatswenufu, ne balimenyamo tsinyanga tsioosi.

Toto Nyasaye shalolanga tsisoni okhuchelaasia tawe, kata nili isuna nende shili hekulu wayio. Kho balia basuubila, bamanyanga mbu toto obo ni obwatieli okhurula khu Nyasaye wabu Omulesi. Ne balia bakhaya, baboolanga mbu, “Nishina shia Nyasaye yenya khukhuchelasia khuno?" Akosilinjiakhwo (khukhuchelaasia okho) abaanji, ne alunjisilinjiakhwo abaanji. Ne shakosinjia khwako tawe halali balia abafunakanga amalako.

Balia abafunakanga amalakano ka Nyasaye nibamalile okhukaboya obulai, ne bakhalakanga aka Nyasaye yalomesia mbu kongaasibwe, ne bakholanga obwononi khushialo. Abo nibo abalalinyola obukhala tawe.

Mukananga murie Nyasaye, ne mwali abafuu mana nabalamusia, mana khandi alibafwisia, khandi alibalamusia, mana ewuwe niwo wamulikalusibwa?

Ye niye owabaloonjela ebili khushialo bioosi, mana naachoma khumakulu, nakalonga amakulu saba obulai muno, naye niye Omumanyi muno wa buli eshindu.

Ne olwa Nyasaye wuwo Omulesi yaboolela Abamalaika mbu, “Toto Esie nditsa okhura khushialo omwemelesi." Abamalaika nibaboola mbu, “Koo, olaramwo ulia ukholamwo obwononi ne natasiamwo amatsayi, ne efwe khukhutswenulanga khutsifumia tsitsio tsindayi, ne khukhuwetsanga oluyali!” Nyasaye naboola mbu, “Toto Esie emanyile kamulamanyile tawe.”

Niyechesia Adam amera (kebindu) koosi, mana nabira imbeli wa Abamalaika, naboola mbu, “Mboolele amera kebindu bino, toto nimuli abahabwene.”

Abalaika nibaboola mbu, “Subhanaka (obutswenufu bwoosi nobubwo). Khubula obumanyi bwosibwosi tawe halali kalia kokhumanyiyie. Toto newe Wobumanyi muno, Owamachesi muno.”

Nyasaye naboola mbu, “Ewe Adam! Baboolele amera kabio.” Olwa yababoolela amera kabio, Nyasaye naboola mbu, “Esie shindababoolela mbu toto ndamanya akefisile akali mwikulu nende khushialo, ne emanyile akamuretsanga habulafu nende akamwali nimufisile?”

Ne olwa khwaboolela Abamalaika mbu, “Rerere Adam obweni bwenyu hasi!” Kho, nibamurerera obweni hasi boosi okhuyiniakhwo Ibilisi, naloba, naachefuna mana naba mubakhayi.

Nikhuboola mbu, “Ewe Adam, menya nomukhaye wuwo mumukunda kwomwikulu, ne liemwo obwokholo bwoosi bwoosi obwamwenya, ne mulasita ahambi khumusala kuno tawe, mulaba mubalia bakholele obubii.”

Mana Shetani nabareresia nabarusia khukabalikhwo, mana nikhuboola mbu, “Yikhe hasi, ne mulaba abasuku abeene khubeene. Ne khushialo nikhwo weshimenyo shienyu shilaba nende omwikhoyo kwebise (bititi butswa).”

Adam nanyoola amakhuwa okhurula khu Nyasaye wuwe Omulesi, mana Nyasaye wuwe namuleshela tsimbi. Toto Ye ni Omunji wobulesheli, Owobukoosia muno.

Nikhuboola mbu, “Yishe okhurulamwo mwesi. Ne toto obulunjifu okhurula khwisie bulabetsela. Kho, abaloonda obulunjifu bwanje obo, shibaliba noburi, ne shibalibeelela tawe.

Ne balia abakhaya mana nibakatsula ebimanyisio biefu, abo nibo abaliba abandu bomumulilo, balimenyamwo tsinyanga tsioosi."

Enywe Abana ba Israili! Yitsulile tsimbabaasi tsianje tsiandabahelesia, ne khole shinga khwalakana, nasi ndilikhola shinga khwalakana, ne murie Esie butswa.

Ne suubile kalia akandeshia akonga omukhono akamulinako, ne mulaba abambeli okhukakhaya tawe, ne mulakusia ebimanyisio bianje khubukusi obutiti tawe, ne murie Esie butswa.

Ne mulasaasia obwatoto nende obubeyi tawe, ne mulafisa obwatoto nanyu nimumanyile tawe.

Ne swaliye khatsotso, ne rusie eshihanwa shia izakaa, ne iname halala nende benamanga.

Koo, mloomesinjia abandu okhukhola amalayi, nanyu abeene mwiyibilila, nanyu musomanga Eshitabu, shimurumushilanga obwongo tawe?

Ne khaabe obukhoonyi khulwokhwifwila nende khulwokhulaama, ne toto ako namakhongo muno halali khubalia abehotselefu.

Balia abasuubilanga mbu toto baliakana nende Nyasaye wabu Omulesi, ne mbu toto balikalukha ewuwe.

Enywe Abana ba Israili! Yitsulile tsimbabaasi tsianje etsia ndabahelesia, ne toto Esie ndabakholela obulai muno okhushilakho ebiloonje bindi bioosi.

Ne rie inyanga ya omundu alalikhoonya owundi liosiliosi tawe, ne shalisabila yesiyesi eshileshelo tawe, ne shiosishiosi shiokhununula sishilibukulwa okhurula khuye tawe, ne shibalihabinwa tawe.

Ne olwa khwabahonokosia okhurula khubandu ba Firauni, ababasandinjia eshinyasio eshibii muno, abasinzanga abaana benyu abasiani, ne nibalekha abakhana benyu. Ne mu kano kalimwo amatemo amakhongo okhurula khu Nyasaye wenyu Omulesi.

Ne (yitsulile) olwa khwabaarulila inyanza, ne nikhubahonokosia, ne nikhusishia mumatsi abandu ba Firauni, nanyu nimulolanga.

Ne (yitsulile) olwa khwalaka Musa efilo amakhumi kane (akhole amalaamo malondokhania kho khumuwe Itaurati). Mana nimukhola eshimosi (okhuba Nyasaye wenyu) inyuma wuwe, mana nimuba abakhola obubii.

Mana nikhubaleshela olunyuma lwa ako, kho munyoole okhupa orio.

Ne (yitsulile) olwa khwahelesia Musa Eshitabu (Itaurati) nende Ifurqani (yokhwawukhasia akatoto nende akalali katoto), kho munyole okhulunjikha.

Ne (yitsulile) olwa Musa yaboolela abandu bebe mbu, “Enywe Abandu banje! Toto enywe mwikholeele obubii khulwa okhukhola eshimosi (okhuba Nyasaye wenyu). Kho, sabe eshileshelo khumulonji wenyu, ne mwiyire abene (khukhwira ababii mwinywe). Obo nobulayi khwinywe khumulonji wenyu." Mana nabaleshela. Toto niye Omulesheli muno, Owobukoosia muno.

Ne (yitsulile) olwa mwaboolela Musa mbu, “Shikhulakhusuubila mukokhuboolelanga tawe okhula khulole Nyasaye netsimoni tsiefu.” Mana likulu nilibopa nanyu nimulolanga.

Mana nikhubalamusia okhurula mulifwa lienyu elo kho munyoole okhupa orio.

Mana nikhubahelesia eshinikha shia amaleesi, mana nikhubeshilia Manna nende Salwa (ebilibwa byomwikulu). Lie mubilayi biakhwabakabila. Ne shikhwabakholela obubii tawe, halali abeene nibo bekholelanga obubii.

Ne (yitsulile) olwa khwaboola mbu, "Injile mulitokho lino, mana liemwo shiamwenya mushikhoye, ne injile mumuliango kwalio nimwihotselesiye, ne boole mbu, 'Khuleshele tsimbi tsiefu', khulabaleshela tsimbi tsienyu, ne khulametela abakholi bamalayi."

Mana abakhola amabii nibakalukhasia likhuwa elilali liababoolelwa tawe, mana nikhwishia khubalia abakhola obubii eshinyasio eshikhongo okhurula mwikulu khulwa okhurula khwabu mumalako khwabarulanga.

Ne (yitsulile) olwa Musa yasaba Nyasaye amatsi khulwa abandu bebe, mana nikhumuboolela mbu, “Khupa indabushi yiyio khwichina.” Mana tsifututu ekhumi nende tsibili nitsirundukha, mana buli ikholo niimanya habundu wayo wokhunywa. Lie, ne nywe khumukabo kwa Nyasaye, ne mulakhola obwononi khushialo tawe.

Ne (yitsulile) olwa mwaboolela Musa mbu, “Shikhulesumilisia okhulia eshilibwa shilalasa tawe. Kho khusabile Nyasaye wuwo Omulesi akhurusilie bilia bimelanga mwiloba shinga eliani lialio, nende amaondo kalio, nende imele yalio, nende tsing’oli tsialio nende amapwoni kalio." (Nyasaye) naboola mbu, “Koo, mukalukhasinjia ebindu ebilayi bino khubindu bia hasi muno? Mana tsie mulitokho, eyo mulanyoolayo biamusabile.” Mana nibakhupwakho obuteshele nende obumanani, mana nibakhoyeshela liruma lia Nyasaye. Kano nilwokhubeela mbu bakhayanga ebimanyisio bia Nyasaye, ne beranga Abarumwa eshikhaya butswa. Ako ni khulwa okhukhaya khwabu nende khandi baburanga eshichelo.

Toto balia Abasuubila, nende balia Abayahudi nende Abakiristo, nende Abasabai, yesiyesi wasuubila mu Nyasaye nende inyanga ya Indukho, mana nakhola ebikhole ebilayi, balinyoola omurungo kwabu khu Nyasaye wabu Omulesi, ne shibaliba nende obuyendi nohomba okhubeelela tawe.

Ne (yitsulile) olwa khwabukula indakano ninanyu, mana nikhuchingula eshikulu hekulu wenyu (nikhubaboolela mbu), "Tile nende amaani amakhuwa kakhumuhele kano, ne itsulile amakhuwa kalimwo kho munyoole okhuria Nyasaye."

Mana nimukalukhana okhurula hawo, kho bukhayanga okhuba obulayi bwa Nyasaye kwinywe nende tsimbabaasi tsitsie, mwakhabeele mubalanyola obukhala tawe.

Ne toto mwamala okhumanya amakhuwa ka Abandu bakhaya okhuloonda amalako mwinywe kokhuria inyanga ya Isabato (ya jumamosi). Mana nikhubaboolela mbu, “Be amashene, abateshele."

Mana nikhukhola eshinyasio esho okhuba amekanyilisio khubalia bali khubise biabu nende abetsa inyuma wabu, mana nikhukhola okhuba amachelo khubalia baritsanga Nyasaye.

Ne (yitsulile) olwa Musa yaboolela abandu bebe mbu, “Toto Nyasaye abalomesinjia mbu musinze ing’ombe ikhasi.” Baboola mbu, “Koo, okhukholelanga omubayo?” Naboola mbu, “Ndiliinda khu Nyasaye ndalakhaba mubasilu tawe.”

Nibaboola mbu, “Khusabile khu Nyasaye wuwo Omulesi akhwinoosilie ni ing’ombe ili irie." Naboola mbu, “Toto Ye aboolanga mbu toto ni ing’ombe ilali ingofu nohomba indoro tawe, halali niya hakari awo. Kho, khole shingala mulomesibungwa."

Nibaboola mbu, “Khusabile Nyasaye wuwo Omulesi akhwinoosilie niyobukondo shina." Naboola mbu, “Ye toto aboolanga mbu ing’ombe eyo niya namabuyu, ne isangasinjia abachilola.”

Nibaboola mbu, "Khusabile Nyasaye wuwo Omulesi akhwinosilie ni ili irie. Shichila toto tsing'ombe tsikhufwananile, ne toto Nyasaye nachama khwitsa okhuba abalunjifu."

Naboola mbu, "Toto Ye aboolanga mbu shini ing’ombe yemilimo (yokhulima) tawe, nohomba shini yokhutsushilisilia amatsi khumimela tawe, obukondo bwayo nobutswenufu muno, bubulamwo amapalapala tawe.” Nibaboola mbu, “Laano toto wakharera amakhuwa aka habweene.” Ne mana kata shibalikho ahambi okhukhola endio (okhusinza) tawe (okhubera amayinje kabwe).

Ne (yitsulile) olwa mwera omundu mana nimukabukhanamwo khulwa ako (abandi baboola mbu ni lebe, naabandi babola mbu ni lebe). Ne Nyasaye niye Omurusia wa kalia akamwali nimufisile.

Ne nikhuboola mbu, “Mukhupe (omufu) nende ebuleka wosiwosi weying'ombe eyo.” Endio nilwa Nyasaye alamusinjia abafu, ne abamanyinjia ebimanyisio bibie kho munyoole okhwikhonyela obwongo.

Mana emioyo chienyu nichiba emiumu olunyuma lwa ako, nichiba shinga amachina nohomba emyumu muno. Ne toto mumachina kaliho kalia akarundukhangamwo emialo, ne toto akandimwo kaliho kaarukhanga nikarulamwo amaatsi, ne akandimwo kaliho akakwitsanga khulwa okhuria Nyasaye. Ne Nyasaye shang’ang’alilanga ehale nende akamukholanga tawe.

Koo, enywe musubilanga nimwikomba muno mbu balabasuubila, ne abandi mubo bawulilanga amakhuwa ka Nyasaye, mana bakakalukhanie nibakhakamanya obulayi, ebilali mukhukorwa tawe?

Ne nibabukana nende abasuubili, nibaboola mbu, “Khwasuubila (toto Muhammad yarumbulwa mubitabu biefu).” Ne nibatoong’a abeene khubeene, baboola mbu, ‘‘Mubaboolelanga aka Nyasaye yabeekulila enywe; kho babayingasie khuko ewa Nyasaye wabu Omulesi, shimwikhonyelanga obwongo tawe?”

Ne shibamanyile mbu toto Nyasaye yamanya akabafisanga nende akabaretsanga habulafu tawe?

Ne mubo balimwo abandu abalamanyire okhusoma nende okhwandika tawe, abandu balamanya Eshitabu (Itaurati), halali eshiwonya shobusilu, ne babula liosiliosi halali okhuparirisia butswa.

Kho, eshinyasio eshikhongo shilinyoola balia bahandikanga Eshitabu khumikhono chiabu, mana baboola mbu, “Shino shirula khu Nyasaye” khobanyoole okhukula khwako obukhala obututu bwokhushialo. Kho, bali nende eshinyasio eshikhongo khulwa kabahandikanga khumikhono chiabu (nibakatia mbu ni ka Nyasaye), ne bali nende eshinyasio eshikhongo khukabachumanga.

Ne baboola mbu, “Omulilo shikulikhutilakhwo halali tsinyanga tsinditi butswa.” Boola mbu, “Koo, Nyasaye yalakana ninanyu ario, kho shalikalukhania indache yiye tawe? Nohomba mukatilinjia Nyasaye amakhuwa kamukorerwe?"

Eeeh ni endio, ulia wakhola amabii, mana tsimbii tsiaye nitsimuterera, abo nibo abandu bomumulilo, balimenyamwo tsinyanga tsioosi.

Ne balia abasuubila, mana nibakhola amalayi, abo nibo abandu bomwikulu, balimenyamwo tsinyanga tsioosi.

Ne (yitsulile) olwa khwalakana indakano nende Abaana ba Israili mbu: Mulalaama shiosishiosi tawe halali Nyasaye. Ne mukholele abebusi amalayi, nende abekho, nende abaana abafwilwa, nende abamanani, ne muboolele abaandu amakhuwa amalayi. Ne mulaame khatsotso (iswala), ne muhane eshihanwa shia izakaa, mana nimukalukhana halali batiti mwinywe, nanyu mulekanga.

Ne (yitsulile) olwa khwalakana ninanyu indakano mbu shimulatatsia amatsayi kenyu tawe, ne shimulaloondana okhurula mutsingo tsienyu tawe. Mana nimufuchilila (ne nimukhaya okhukhola murio), nanyu muli abaloli khu ako.

Mana enywe mbabano mwirananga abeene, ne muloondanga abashenyu baandi okhurula mutsingo tsiabu, mukhonyananga khumabii nende obusuku. Ne nibamwitsila nibatililwe, nimubanunula, nikali mbu mwakanibwa elo. Ko! Musuubilanga mumakhuwa kandi mushitabu (shienyu) ne mukhaya akandi? Mana nimurungo shina khu ukhola ako mwinywe halali eshifimbwa murwe mubulamu bwokhushialo? Ne inyanga ya Indukho balikalusibwa khushinyasio eshilulu muno. Ne Nyasaye shiyang'ng'ala ehale nende akamukholanga tawe.

Abo nibo bakula obulamu bwokhushialo khu bwomwikulu. Mana shibalitutuyilibwa eshinyasio tawe, ne khandi shibalihabinwa tawe.

Ne toto khwahelesia Musa Eshitabu (Itaurati) mana nikhumulondiakhwo Abarumwa inyuma wuwe, ne nikhuhelesia Isa omwana wa Mariamu obwinoosio (ebifune) bwa habulafu, mana nikhumukhonya nende amaani ka roho (Omumalaika) omutakatifu (Jibril). Mana enywe olwa Abarumwa babetselanga nende akemioyo chienyu chilachamile tawe, nimufura emirwe. Kho omukanda mulala nimukukatsula, ne omukanda kundi nimukwira.

Ne baboola mbu, “Emioyo chiefu chiafuunikhwa.” Halali Nyasaye yabatsuba khubukhayi bwabu, ne ni matiti tsa akabasuubilanga.

Ne olwa Eshitabu shiabetsela okhurula khu Nyasaye eshifuchilisania nende kabali ninako, ne inyuma awo bali nibasabanga obukhonyi khobashile Abakhaya. Ne mana olwa kaboolela kalia akabamanya, nibakakhaya. Kho eshitsubo shia Nyasaye shili khubakhayi.

Neshibii muno shiabakusia emioyo chiabu khulwa shio - okhukhaya aka Nyasaye yeshia khulwa okhulola ishinda mbu Nyasaye yeshilinjia tsimbabaasi tsitsie ulia owayenya mubasumba bebe. Mana nibakhoyeshela liruma khuliruma, ne abakhayi baliba nende eshinyasio shiokhubatutuyia.

Ne nibaboolelwa mbu, “Suubile khu ka Nyasaye yeeshia" nibaboola mbu, “Efwe khusuubilanga khukakhweshilibwa.” Ne bakhayanga okhusuubila akali inyuma wuwe (Muhammad), ne ako nikali akatoto, akatinyisia akabali ninako. Boola mbu, “Ne khulwashina mweranga Abarumwa ba Nyasaye inyuma eyo toto nimuli Abasuubili?”

Ne toto Musa yabetsela nende ebifune bia habulafu mana nimukhola eshimwosi (okhuba nyasaye wenyu) inyuma wuwe mana nimuba abakholele obubii.

Ne (yitsulile) olwa khwabukula indakano yenyu, ne nikhuninia hekulu wenyu eshikulu. Bukule akakhwabahelesia nende amaani mana muwulile. Nibaboola mbu, “Khuwulile mana khulobele.” Mana nibanywesibwa mumioyo chiabu (okhulama) eshimwosi, khulwa okhukhaya khwabu. Boola mbu, “Nobubii buli burie buno bwobusuubili bwenyu bubalomesinjia toto nimuli abasuubili.”

Boola (ewe Muhammad) mbu, “Nikali mbu litala lia mwikulu elili ewa Nyasaye nelienyu sa mwenyene; ne shini lia abandu bandi tawe, mana khekombekhwo lifwa toto nimuli aba habweene.”

Ne shibalilikombakhwo (lifwa) tawe, khulwa okhubeela akabaranjilisia nende emikhono chiabu. Ne Nyasaye nomumanyi muno awa abamabii.

Ne toto olanyoola mbu bo nibo bayanza muno obulamu okhushilakho Abatsokaasi; yekombanga mulala wabu mbu yakhamenyibwe emiika iyelefu, ne kata kario elo shilinyala okhumurusia mushinyasio tawe. Ne Nyasaye nomuloli muno khukabakholanga.

Boola mbu, “Ulia yesiyesi uli omusuku wa Jibril, toto ye niye wayishia (Ikurani) khumwoyo kukwo khubuchami bwa Nyasaye, itinyisinjia kalia kaliho imbeli wayio, ne ni obulunjifu nende omwikhoyo khubasuubili.”

Ulia uba omusuku wa Nyasaye, nende Abamalaika bebe, nende Abarumwa bebe, nende Jibril nende Mikaili, toto awo Nyasaye nomusuku wa Abakhayi.

Ne toto khwakhwishilia ebifune bili habulafu, ne shibabikhayanga tawe halali balia abafunakanga amalako.

Koo, buli nibalaka indakano, ne omukanda mubo kuyisukuna? Ne abaanji mubo shibasuubilanga tawe.

Ne olwa yabetsela Omurumwa okhurula khu Nyasaye, utinyisia akabali ninako, omukanda mu balia bahebwa Eshitabu, kwasukuna Eshitabu shia Nyasaye inyuma wemikongo chiabu opara mbu shibamanyile tawe.

Mana nibaloonda kalia ka amashetani kasomaanga mutsinyanga tsia obwami bwa Suleiman. Ne Suleiman shiyakhaya Nyasaye tawe, halali amashetani niko kakhaya Nyasaye. Kechesinjia abandu obulosi, nende shilia shieshibwa khu Abamalaika babili balia abali mulitokho lia Babil – Harut nende Marut. Ne (Abamalaika abo) shibechesinjia yesiyesi tawe okhula bamuboolele mbu, “Efwe khubwatoto khuli amatemo, kho olamukhaya Nyasaye tawe.” Ne bekanga okhurula khubo babili kalia akabakabukhasilinjia hakari womusatsa nende omukhasi wuwe. Ne nabo shibaali nibanyala okhuwumisia yesiyesi khuko tawe halali khubuchami bwa Nyasaye. Ne bekanga akabawumisia, ne shikabakhoonya tawe. Ne toto bamala okhumanya mbu ulia ukakula, abula omukabo kwosikwosi ewa Nyasaye. Naamabii muno kalia akabakusia khuko emioyo chiabu, abaane bamanyangakhwo!

Ne babetsanga mbu basuubila mana baria, bakhanyoolele amalayi ewa Nyasaye, abaane bamanyangakhwo!

Enywe Abasuubila, mulaboole mbu “raa'ina (khwaye)" tawe, halali boole mbu “undhurna (khulenge)" mana muwulile. Ne abakhaya Nyasaye balinyoola eshinyasio eshilulu.

Balia abakhaya Nyasaye mubandu bahebwa Eshitabu, nende abalamanga efindi halala nende Nyasaye shibenyangakhwo mbu mwishilibwe obulayi bwosibwosi okhurula khu Nyasaye wenyu Omulesi tawe. Ne Nyasaye yaawulaanga okhuhelesia tsimbabaasi tsitsie owayenya. Ne Nyasaye niwa amalayi amanji.

Olunyaali lwosilwosi lwakhurusiaho nohomba lwakhwibilisia, khureranga olundi olulayi okhushilakhwo olo nohomba shinga olwo. Shiwamanya mbu toto Nyasaye noomunyali muno wa buli eshindu tawe?

Shomanyile mbu toto Nyasaye ali nende obwami bwomwikulu nende bwokhushialo tawe? Ne mubula omulindi nohomba omukhoonyi yesiyesi owulali Nyasaye tawe?

Nohomba mwenyanga okhureeba Omurumwa wenyu shingala Musa yareebwa inyuma awo? Ne ukalukhania okhukhaya Nyasaye habundu wobusuubili mu Nyasaye, oyo khubwatoto yamala okhukora injila yahabwene.

Ne bekomba muno abaanji mubandu ba Eshitabu okhubakalusia inyuma nimumalile okhusuubila mube abakhayi khulweyishinda okhurula mumioyo chiabu, obwatoto nibumalile okhuboolela. Kho enywe baleshele mana mulalingakhwo tawe okhuula shinga Nyasaye aletsa nende okhubusia khukhwe. Toto Nyasaye nomunyali muno wabuli eshindu.

Ne swaliye khatsotso, ne rusie eshihanwa shia Izakaa. Ne shosishosi shiamwiranjilisilia enywe abeene mumalayi, mulishinyoola ewa Nyasaye. Toto Nyasaye alolanga muno akamukholanga.

Ne baboola mbu, “Abulaho ulinjila mumukunda kwomwikulu owulali Omuyahudi nohomba Omukristo tawe." Obo nobwikombi bwabu butswa. Boola mbu, “Rere ebifune bienyu toto nimuli abahabwene."

Ni habwene, ulia walekhulila Nyasaye obweni bubwe mana nakhola amalayi, ali nende omurungo kukwe ewa Nyasaye wuwe Omulesi, ne balibula oburii khandi shibalibeelela tawe.

Abayahudi baboola mbu Abakristo babula shiosishiosi shiahabwene shokhwemakhwo tawe, ne Abakristo boosi nibaboola mbu Abayahudi babula shiosishiosi (idini) shiahabwene shiokhwemakhwo tawe, nabo basomanga Eshitabu. Ne endio nilwa baboola abakorwa, amakhuwa kafwanana nende akaabu ako. Kho, Nyasaye alikhalaka eshina hakari wabu inyanga ya Indukho khukabawukhanilanga.

Ni wina omubii muno okhushila ulia wikalila emisikiti chia Nyasaye mbu lilarumbulwamwo elira lilie tawe, mana narakhwo eshinani okhuchinyasia. Abo shibakhoyekhana okhwinjilamwo tawe halali nibarire. Abo balanyoola khushialo eshifimbwa murwe, ne mwikulu balinyoola eshinyasio eshikhongo.

Ne Ebukwe nende Mumbo niwa Nyasaye. Kho habundu wosiwosi wamulenga, eyo obweni bwa Nyasaye buliyo. Toto Nyasaye ni Owefinji muno, Omumanyi muno.

Ne baboola mbu, “Nyasaye yekholela omwana.” Nyasaye nomutswenufu ali ehale nende ako. Efili mwikulu nende mushialo neefifie, bioosi bihotselesinjia khulwa Ye.

Niye Omuloonji wachachia amakulu nende eshialo. Ne niyenya likhuwa, naaliboolela mbu, "Ba", nilibaa.

Ne abakorwa baboola mbu, “Shichila shina Nyasaye nalaboola ninafu nohomba eshimanyisio shikhwitsile?” Endio nilwa baboola balia abali imbeli wabu, amakhuwa shinga ako, emioyo chiabu chili nashilala. Toto efwe khwamala okhwinoosia ebimanyisio khulwa abandu basuubilanga muno.

Toto efwe khwakhuruma khubwatoto, obe wokhurera akomwikhoyo nende wokhwikanyilisia, ne mana sholarebwa abandu bomumulilo tawe.

Ne shibaliba obulayi ninanyu Abayahudi nende Abakiristo tawe, okhula muloonde emilukha chiabu. Boola mbu, “Toto obulunjifu bwa Nyasaye nibo obulunjifu." Ne noloonda obwikombi bwabu, obumanyi nibumalile okhukhulila, sholinyoola omukhoonyi yesiyesi nohomba omulindi ewa Nyasaye tawe.

Balia bakhwelesia Eshitabu (Taurat- Injil – Zaburi) bashisoomanga shingala shienyekhana, abo bashisuubilanga. Ne bashikhaya, abo nibo abalisikha.

Enywe Abaana ba Israili! Itsulile emikabo chianje khwenywe, ne toto Esie ndabakhola obulayi okhushila abandu boosi.

Ne rie inyanga ya omundu shalikhoonya owashie tawe, ne eshiokhununula sishilifuchililwa okhula khuye tawe, ne okhusabilwa shikhulimukhoonya tawe, ne mana shibalihabinwa tawe.

(Itsulila) olwa Nyasaye wuwo Omulesi yatema Ibrahim khumakhuwa, mana (Ibrahim) nakabura. Naboola mbu, “Esie toto ekhukholele obe omwimilisi wa Abandu.” Ibrahim naboola mbu, “Ne mulwibulo lwanje?” Naboola mbu, “Eeh, halali indakano yanje shiloolela abamabii tawe.”

Ne (yitsulile) olwa khwakhola Inzu ibe habundu wa abandu okhutsia, ne nikhuyikhola habundu womulembe. Ne khole habundu wa Ibrahim yemanga abe wokhulamilao iswala. Ne khwachelela Ibrahim nende Ismail, nikhubaboolela mbu, “Tswenule inzu yanje khulwa balia bachibotokhananga (batufanga) nende bekhalangamwo, nende benamangamwo nende basujudangamwo."

Ne (itsulile) olwa Ibrahim yaboola mbu, "Ee Nyasaye wanje Omulesi, khola litokho lino libe nomulembe, ne ohelesie abamenyamwo ebiamo, balia basuubilanga Nyasaye nende Inyanga ya Indukho.” Nyasaye naboola mbu, "Nende kata balia abakhayi bosi, nditsa okhubaha obwokholo butiti, mana ndilibasindikhakhwo eshinyasio shiomulilo, nawo ni habundu abii muno wokhukalukha."

Ne (itsulile) olwa Ibrahim yachingula tsisiro tsia Inzu nende Ismail, nibasaba mbu, "Ee Nyasaye wefu Omulesi, khufuchilile emilimo chiefu chino, toto ewe ni Omuwulili muno, Omumanyi muno.

Ewe Nyasaye wefu Omulesi! Khukhole khube abehotselefu khwiwe, ne mulwibulo lwefu babemwo abandu abehotselefu khwiwe. Ne khumanyie injila yemilukha chiefu, mana okhuleshele. Toto newe Omulesheli muno, Owobukoosia muno.

Ewe Nyasaye wefu Omulesi! Baawulile Omurumwa owurulana ninabo, abasomele tsinyali tsitsio ne abeechesie Eshitabu nende amachesi, mana abatswenule. Toto ewe newe Owaamani, Owamachesi muno."

Ne ni wina unyala okhwira ehale nende emilukha chia Ibrahim halali ulia wikhola omusilu! Ne toto efwe khwamwawula khushialo, ne toto ye mwikulu aliba mubaandu abalayi.

Ne (yitsulile) olwa Nyasaye wuwe Omulesi yamuboolela mbu, “Wilekhule (khulwa Nyasaye).” Naboola mbu, “Ndilekhulile Nyasaye Omulesi wefilonje fioosi.”

Ne Ibrahim nachelela elio Abaana bebe, nende Yakub (yesi nachera) mbu, “Enywe Abaana banje, toto Nyasaye yabalobolela idini ino, kho mulakhafwa tawe halali nimulali abehotselefu khuye (abasalamu).”

Nohomba enywe (Abayahudi nende Abakiristo) mwalio nimulola olwa lifwa liolela Yaqub? Olwa yaboolela abaana bebe mbu, “Ni wina wamulalaama inyuma wanje?” Nibaboola mbu, “Khwitsa okhulaama Nyasaye wuwo nende Nyasaye wa bapapa bobo balaamanga, Ibrahim nende Ismail nende Is’haq, Nyasaye mulala butswa. Ne efwe khwilekhulile khuye (khusilime).”

Echo neemikanda chiabura, chilinyoola omurungo kwachio, nanyu mwesi mulinyoola omurungo kwenyu, nanyu shimulirebwa akabakholanga tawe.

Ne (Abayahudi) baboola mbu, "Be Abayahudi nohomba Abakiristo; mulalunjikha." Boola (ewe Mohammad) mbu, “Tawe, khulondanga omulukha kwa Ibrahim owalekhana nende tsidini tsiobukori, ne shiyali mubatsokaasinjia Nyasaye tawe."

Boole mbu, “Khwasuubila Nyasaye nende kalia akeshibwa khwifwe nende khu Ibrahim, nende Ismail, nende Is’haq, nende Yaqub, nende Abaana ba Yaqub, nende keshibwa khu Musa, nende Isa, nende akeshibwa khu Abarumwa okhurula khu Nyasaye wabu Omulesi. Shikhukabukhasinjia yesiyesi hakari wabu tawe, nafu khuli abelekhule khuye (abasilima)."

Ne nibasuubila shinga mwasuubila murio, balaba toto balunjishe. Ne nibakalukhana, awo balaba bali mumayinje kaabu butswa. Kho Nyasaye yetsa okhukhulinda okhurulana nende obusuku bwabu. Ye niye Omuwulili muno, Omumanyi muno.

Obwisilamu nishio eshirone shia Nyasaye yabaronela. Ne ni wina omuroni omulayi muno okhushila Nyasaye? Ne efwe khumulamangasa Ye yenyene.

Boola mbu, "Muyingananga ninafu khumakhuwa ka Nyasaye, naye ni Nyasaye wefu Omulesi, khandi ni Nyasaye wenyu Omulesi. Nafu khuli nebikhole biefu nanywe muli nebikhole bienyu. Nafu Ye butswa niwakhukholelanga (amakhuwa kefu koosi).

Nohomba muboolanga mbu Ibrahim, nende Ismail, nende Is’haq, nende Yaqub, nende olwibulo lwa Yaqub, bali Abayahudi nohomba Abakiristo?" Boola mbu, “Nenywe mumanyile muno nohomba Nyasaye?" Ne ni wina omubii muno okhushilakhwo ulia ufisanga obuloli bwalinabwo okhurula khu Nyasaye! Ne shikali mbu Nyasaye shamanyile kamukholanga tawe.

Oko nomukanda kwamala okhubura. Kulinyoola omurungo kwako, nanyu mwesi mulinyoola omurungo kwenyu, nanyu shimulireebwa akabakholanga tawe.

Abasilu mubandu baliboola mbu, “Nishina shiabarusia khukibla (habundu wokhuhenga nooli muswala) shiabu shiabalikhwo?” Boola mbu, “Ebukwe nende Mumbo nitsia Nyasaye. Alunjisinjia owayenya khunjila ilunjifu.”

Ne endio nolwa khwabakhola enywe Abandu ba hakari, khomube abaloli khubandu, ne Omurumwa abe omuloli khwinywe. Ne shikhwakhola Kibla shienyu shiamwalikhwo halali khokhumanye ni wina uloonda Omurumwa, ne ni wina ukalukha inyuma khubisisilo bibie. Ne kali amatinyu halali khubalia ba Nyasaye yalunjisia. Ne Nyasaye shiyali ukosia obusubili bwenyu tawe. Toto Nyasaye khubandu ni wetsimbabaasi, wobukoosia muno.

Toto khulutsi okhukalukhana khwobweni bubwo mwikulu, kho khwitsa okhukhulenjia Kibla eshia omwoyo kukwo kuchamile. Kho, lenjia obweni bubwo ebuleka womusikiti kwa Oluyali (Makka). Ne wosiwosi wamuli, lenjie obweni bwenyu ebuleka wakwo. Ne toto balia bahebwa Eshitabu bamanyile mbu obo nobwatoto okhurula khu Nyasaye wabu Omulesi. Ne shibili mbu Nyasaye shamanyile kabakholanga tawe.

Ne niwitsila balia abahebwa Eshitabu nebifune bioosi, shibalaloonda Kibla shishio tawe. Nawe sholi uloonda Kibla shiabu tawe. Ne abeene khubeene shibakhaloonda Kibla shiowundi tawe. Ne niwitsukhana waloonda obwikombi bwa emioyo chiabu, obumanyi nibumalile okhukhulila, toto hawo olaba mubandu abamabii.

Balia abakhwahelesia Eshitabu bashimanya shinga bamanya Abana babu, ne toto omukanda mubo kufisanga obwatoto nabo nibamanyile.

Obwatoto nokhurula khu Nyasaye wuwo Omulesi. Kho, olakhatema waba mubakanakani tawe.

Ne buli omukanda kwali nende wakwahenganga (Kibla shiakwo). Kho, yirushile okhukhola amalayi. Wosiwosi wamuli, Nyasaye alabarera mwesi halala. Toto Nyasaye nomunyali muno wa buli eshindu.

Ne wosiwosi wotsia, lenjia obweni bubwo khu Omusikiti kwa Oluyali. Ne obo nibo obwatoto burulanga khu Nyasaye wuwo Omulesi. Ne shibili mbu Nyasaye shamanyile akamukholanga tawe.

Ne wosiwosi wotsia lenjia obweni bubwo khu Omusikiti kwa Oluyali. Ne wosiwosi wamuli, lenjie obweni bwenyu eyo wakuli (omusikiti oko); kho abandu bakhaywe okhuba nende eshifune khwinywe, halali balia ababii mubo. Kho, mulabaria tawe, halali murie esie, kho enyoole okhubetsusilia emikabo chianje, khomunyoole okhulunjikha.

Shingala efwe khwabarumila Omurumwa okhurula mwinywe, abasoomelanga tsinyaali tsiefu nabatswenula, ne abechesia Eshitabu nende amachesi, ne abechesinjia kalia akamwalali nimukamanyile tawe

Kho, nzitsulile, nditsa okhubetsulila. Ne khupile orio, ne mulandoba tawe.

Enywe Abasuubila, mwikhoonye khukhwisumilisia nende okhulaama iswala. Toto Nyasaye ali halala nende abesumilisinjia.

Ne mulaboola khubalia berwa nibali khunjila ya Nyasaye mbu nabafu tawe. Halali ni abalamu, ne enywe shimumanyile (elo) tawe.

Ne toto khwitsa okhubatema nende eshindu shitutu shia oburi, nende inzala, nende obulemefu bwa omwandu, nende abandu, nende efiamo, ne bila abesumilisinjia akomwikhoyo.

Balia banyoolungwa namasila, nibaboola mbu, “Toto efwe khuli aba Nyasaye, ne toto efwe ewuwe ne wakhulikalukha.”

Abo baliba nende tsikhabi okhurula khu Nyasaye wabu Omulesi nende tsimbabaasi. Ne abo nibo abalunjifu.

Toto (ebikulu bia) Swafa nende Marwa ni bilala khubilolelo bia Nyasaye. Kho, ulia utsia okhuhija khunzu ya Nyasaye, nohomba okhukhola hija inditi (umra), shinobubii khuye okhubibotokhana tawe. Ne ulia wikholela omwene amalayi, toto hao Nyasaye nomuunji wokhupa orio, ne ni Omumanyi muno.

Toto balia bafisanga akakhweshia - nako ni ebifune bili habulafu, nende obulunjiifu - nikhumalile okhukeenoosilia Abandu mushitabu, abo Nyasaye abatsubanga, ne buli Abatsubi babatsubanga.

Halali balia abasaba eshileshelo, mana nibakaasa mana nibeenosia, abo nditsa okhubaleshela. Ne Esie endi Omulesheli muno, Owobukoosia po.

Toto balia abakhaya mana nibafwa nibali abakhayi, abo bali nende eshitsubo shia Nyasaye, nende eshia Abamalaika nende eshia abandu boosi.

Balimenyamwo tsinyanga tsioosi, shibalitutuyilibwa eshinyasio ne shibalihebwa obwiyangu tawe.

Ne Nyasaye wenyu ni nyasaye mulala, abulao nyasaye owulali Ye tawe. Ne ni Owetsimbabaasi muno, Owobukoosia po.

Toto mukhuloonga amakulu nende eshialo, nende okhubotokhana khweshilo nende eshitere, nende amaaro kachendanga khunyanza nende ebilimwo obukhoonyi khubandu, nende amaatsi ka Nyasaye yeshinjia okhurula hekulu, mana nalamusia khu amatsi ako liloba olunyuma lwa okhufwa khwalio, mana nasalasiamwo buli imbia yetsisolo, nende okhukalukhana khwomuyeka nende amaleesi kalomesibungwa okhubura hakari welikulu nende eshialo, bilimwo ebilolelo khubandu bekhonyelanga obwongo.

Ne mubandu balimwo balia bakholanga ebifwanani bilali Nyasaye, babichama muno shinga bakhachama Nyasaye, ne balia abasuubila bayanza Nyasaye muno. Ne balia abakholi bamabii bamanyanga – olwa balilola eshinyasio - mbu amaani koosi ni ka Nyasaye, ne mbu Nyasaye ni weshinyasio eshilulu.

Olwa balia abalondungwakhwo baliikongola balia ababaloondangakhwo, ne eno nibamalile okhulola eshinyasio, hawo obulala bwabu bulikhalikha.

Ne balia abaloondanga baliboola mbu, “Khubetsanga nikhunyala okhukalukha, khwabakhaya shingala bakhukhayile.” Endio nilwa Nyasaye abechesinjia ebikhole biabu okhuba ametsulisio khubo. Ne shibalirula mumulilo tawe.

Enywe abandu, lie khubili mushialo ebiamwachamilwa, ebilayi. Ne mulaloonda amaseenelo ka Shetani tawe, toto ye ni omusuku wenyu owahabulafu.

Toto ye abalomesinjia okhukhola amabii, nende eshifwabi, nende okhuchishila Nyasaye akamulamanyile tawe.

Ne nibabilwa mbu, “Loonde aka Nyasaye yeshia.” Baboola mbu, “Tawe, efwe khuloondanga aka khwanyoola bapapa befu nibalikhwo.” Koo, kata nikali mbu bapapa babu shibali nibamanya eshindu tawe, nende nibalaali abalunjifu tawe?

Ne ifwani ya balia abakhaya ni shinga ulia wayulilanga ulawulila tawe, halali omwoyo butswa nende obuyoka. Ni abatimbe, abasilu, abawofu, mana kario shibekhonyelanga obwongo tawe.

Enywe abasuubila, lie khubindu ebilayi biakhubakabiile, ne khupile orio Nyasaye toto nimuba mbu niye butswa owamulaamanga.

Toto Ye yabakania okhulia ebifwile nibilasinzilwe tawe, nende amatsayi, nende inyama yeyimbitsi, nende eshiarumbulilwakho (ebise biokhushisinza) elilali elira lia Nyasaye tawe, habula ulia wunichilisibwa nende obutinyu obusiro, obulali okhwikomba nohomba okhubura eshichelo tawe. Awo ye abula tsimbii. Toto Nyasaye ni Omulesheli muno, Owetsimbabaasi muno.

Toto balia bafisanga ka Nyasaye yeshia akeshitabu, ne bakakusinjia ako khushiobukusi obutiti. Abo shibalitsanga mutsinda tsiabu tawe halali omulilo. Ne Nyasaye shalilomaloma ninabo inyanga ya Indukho, ne shalibatswenula tawe, ne baliba neshinyasio eshilulu.

Abo nibo bakula obukori khubulunjifu, ne eshinyasio khubulesheli. Koo, nibokhwisumilisia khufuana khurie mumulilo!

Endio nilwokhuba mbu Nyasaye yeshia Eshitabu khubwatoto. Ne toto balia bakabukhanamwo mushitabu bali khumayinje kali ehale muno nende obwatoto.

Obulayi shibuli mbu mulenjie obweni bwenyu elubeka webukwe nende mumbo tawe, halali obulayi ni ulia wasuubila khu Nyasaye, nende Inyanga ya Indukho, nende Abamalaika, nende Eshitabu, nende Abarumwa, mana narusia omwandu halala nende okhukuyanza, nahelesia Abeekho, nende Abafwilwa, nende Abamanani, nende Abananjira (bakhalishilwe), nende Abasabi, nende benya okhununulwa - mana naalumilila okhuswaliya, nende okhurusia eshihanwa shia Izakaa, nende balia bakholanga shinga balaka, nende befwilanga mubutinyu nende mubulwale nende efise fyeliyie. Abo nibo abahabwene, ne abo nibo abaria Nyasaye.

Enywe abasuubila, mwahandichirwa liikalo lia okhurunga imongo (kisasi) khubalia berirwe. Omulekhuule khumulekhuule, ne omusumba khumusumba, ne omukhasi khu mukhasi. Ne uleshelwa nende omwana wabu shiosishiosi, kho alondelele khubulayi, naye arunge obulayi. Okho nookhwanguyia okhurula khu Nyasaye wenyu Omulesi nende tsimbaabasi. Ne uruuma eshichelo olunyuma lwa ako, oyo ali nende eshinyasio eshilulu.

Ne muli nende obulamu obulayi mukhurungana imongo (kisasi) enywe abobwongo, khomunyoole okhuria (Nyasaye).

Mwalachilwa - mulala wenyu lifwa nilimuulila nalekha omwandu, alekhe obulache khubebusi nende khubekho munjila indayi. Lino lialachilwa khubalia abaria Nyasaye.

Ne ulia ubukalukhasia (obulache) namalile okhubuwulila, tsimbi tsia elio tsili khubalia babukalukhasinjia. Toto Nyasaye ni Omuwulili muno, Omumanyi po.

Ne ulia uririla omulachi okhukora, nohomba okhunyoola tsimbi, mana narera omulembe hakari wabu, shalaba nende tsimbi tawe. Toto Nyasaye niwobulesheli muno, Owobukoosia muno.

Enywe abasuubila, mwalachilwa okhufunga saumu shingala balia abali imbeli wenyu baandichilwa, kho munyoole okhuria Nyasaye.

Ni tsinyanga tsibalikha butswa. Ne ulia owuli omulwale mwinywe nohomba owuli khuluchendo, abalilile tsinyanga tsindi. Ne balia abanyala, barusie omurungo (fidia), balisie abamanani. Ne ulia ukhola obulayi omwenesa, obo ni obulayi khuye. Ne nimufunga saumu, noobulayi khwinywe nimuba mbu mumanya.

Omwesi kwa Ramadhani nimwo mwa Ikurani yeshibwa ibe obulunjifu khubandu, nende efifune fili habulafu okhurula khubulunjifu nende obwawukhasio (hakari wa obwatoto nende obubeyi). Kho, ulia mwinywe womwesi oko kumunyoola, afungemwo saumu. Ne uli omulwale nohomba uli khuluchendo, abalilile tsinyanga tsindi. Nyasaye abenyelanga obwangu, ne shabenyelanga obusiro tawe. Ne mumale tsinyanga tsibalwa etso, ne mwitsomie Nyasaye khu kayabalunjilisia, ne khomunyoole okhupa orio.

Ne Abasumba banje nibakhureba Esie, (baboolele mbu) Esie toto endi hambi. Engalusinjia amasayo komusabi niyasaba. Kho, baafuchilile Esie, ne basuubile Esie, khobanyoole okhulunjikha.

Mwafuchililwa eshilo shokhufunga saumu okhwinjililana nende abakhasi benyu. Bo ni eshifwalo shienyu, nanyu muli eshifwalo shiabu. Nyasaye yamanya mbu enywe toto mwebeyanga abeene, mana nabafuchilila okhusaba eshileshelo shienyu, mana namuleshela. Bulaano, baabaasie, ne konye shia Nyasaye yabahandichila. Ne lie, ne nywe okhula shingala mulola obulafu bwomumabwibwi okhurula khubumali bweshilo, mana mumalisie okhufunga saumu okhula eshilo. Ne mulabaabaasia nimuli mumusikiti nimukholanga itikafu tawe. Etso nitsinzakho tsia Nyasaye, mulasita hambi natsio tawe. Endio nilwa Nyasaye yeebalilanga efimanyisio fifie abandu; khobanyoole okhumuria.

Ne mulalia emiandu chienyu abeene khubeene mutsimbi tawe, nende okhuchiyila khubaami khomunyoole okhulia eshitonye mumiandu chiabandu mutsimbi, nanyu nimumanyile.

Bakhurebanga okhulondakhana nende emiesi emiyaakha, boola mbu, “Echio ni efichelo fiefise fia Abandu nende Haji.” Ne obulayi shinokhwinjila mutsinzu okhuburira namukongo watsio tawe. Halali obulayi ni ulia uria Nyasaye. Ne injile mutsinzu okhuburira mumiliango chiatsio. Ne rie Nyasaye khomunyoole okhubura.

Ne lwane khunjila ya Nyasaye balia babalwananga, ne mulabura eshichelo tawe. Toto, Nyasaye shiyachama balia babuririranga eshichelo tawe.

Ne beere wosiwosi wamubanyoola, ne balonde wosiwosi wababaloonda, ne inzoka ni imbi muno okhushila okhwira. Ne mulalwana ninabo mumusikiti kwoluyali tawe okhula bobachake okhubalwanilamwo. Ne nibachaka okhubalwanilamwo, mwesi balwane. Ne endio nilwakuli omurungo kwabakhayi.

Ne nibalekha, toto Nyasaye nomunji wobulesheli, owobukoosia muno.

Ne khupane nabo okhuula inzoka (shirki) ilabakhowo tawe, ne idini ibe ya Nyasaye butswa. Ne nibalekha, obusuku bulabao tawe halali khubalia bakholanga obubii.

Omwesi kwoluyali khumwesi kwoluyali, ne efindu fioluyali fiarebwakho imongo (kisasi). Kho, owubaseera nende emiero, mwesi museere shinga yabaseera. Ne rie Nyasaye, ne manye mbu Nyasaye ali halala nende abamuria.

Ne hane (emiandu) khunjila ya Nyasaye, ne muleyinjisia nemikhono chienyu mubusishi tawe. Ne khole amalayi, toto Nyasaye yachama abakholanga amalayi.

Ne malisie obulai okhukhola Hija nende Umra (Hija inditi) khulwa Nyasaye. Ne nimwikalilwa, rusie eshihanwa shia isolo shibabela eshiangu. Ne mulabeka emirwe chienyu tawe okhula eshihanwa eshio shiule habundu washio washikhoyele okhuba. Ne ulia uli omulwale mwinywe, nohomba ali nende obutsunu khumurwe kukwe, arunje khukhufunga saumu, nohomba okhurusia isadaka, nohomba eshisinzwa. Ne nimuba mumulembe, ulia yesiyesi weesangasia khulwokhukhola umra kho ahije, oyo asinze eshisinzwa shimubela eshiangu. Ne ulia ulanyoola tawe, afunge saumu tsinyanga tsitaru nali muhija nende tsinyanga saba nimwakhakalukha. Etso nitsinyanga ekhumi tsinaamba. Ako ni khu ulia owabandu baye shibali hambi nende omusikiti kwoluyali tawe. Ne rie Nyasaye, ne manye mbu toto Nyasaye ni omululu wokhuhana eshinyasio.

Hija ni emiesi emimanyishe. Kho, ulia wiilaka okhukholamwo hija, yaleenjilana noomukhayewe tawe, ne alaruma efichero tawe, ne alayingana mu hija tawe. Ne shiosishiosi shiamukhola mumalayi, Nyasaye ashimanyile. Ne chinje shiokhubakhonya khuluchendo. Ne shiokhukhonya khuluchendo eshilayi muno ni okhuria Nyasaye. Ne muurie Esie enywe Abandu bobwongo.

Bubulao obubii bwosibwosi hekulu wenyu tawe okhukhaba tsimbabaasi okhurula khu Nyasaye wenyu Omulesi. Kho, nimwakhayombokha okhurula Arafat, rumbulile Nyasaye abundu woluyali. Ne mumurumbule shingala yabalunjisia, ne mwali inyuma hawo mubandu bakora.

Mana muyombookhe okhurula wa Abandu boosi bayombokheranga. Ne sabe Nyasaye eshileshelo. Toto Nyasaye nomulesheli muno, Owobukoosia muno.

Ne nimwakhamala okhukhola emilukha chienyu, awo rumbule Nyasaye shingala mwarumbulanga basenywe nohomba okhurumbula okhunji muno. Ne mubandu baliwo baboolanga mbu, “Nyasaye wefu Omulesi, khwelesie amalayi khushialo” ne mwikulu (Akhera) babulayo omukabo kwosikwosi.

Ne mubo baliwo baboolanga mbu, “Nyasaye wefu Omulesi, khuelesie khushialo amalayi ne mwikulu okhuelesie amalayi, ne okhuliinde okhurulana nende eshinyaasio shiomulilo.

Abo bali nende omukabo khukabakholanga. Ne Nyasaye ni Omwangu wokhubala.

Ne rumbule Nyasaye mutsinyanga tsibalikha. Ne ukhola lwangu mutsinyanga tsibili (nakalukha), oyo habula tsimbi hekulu waye tawe. Ne ulia ushinda, yesi habula tsimbi hekulu waye tawe, khu ulia uria Nyasaye. Ne rie Nyasaye, ne manye mbu mulikhung’asibwa ewuwe.

Ne mubandu aliwo wamakhuwa kaye kakhusangasinjia mubulamu bwokhushialo. Naye akholanga Nyasaye okhuba omuloli khukali mumwoyo kukwe, naye noomukhongo muno woobusoolo.

Ne nashukhana yaatsia, nasalaana khushialo khaakhole obwononia, ne naanyasia emimela nende efilonje. Ne Nyasaye shiyachama obwononia tawe.

Ne naboolelwa mbu, “Ria Nyasaye” obukhongo bwaye bumutsuba okhukhola amabii. Kho, eshimuyela ni Jahanaam. Nao ni abundu ambii muno wookhuwulushila.

Ne mubandu aliwo wiikusinjia omwene khulwokhwenya obuchami bwa Nyasaye. Ne Nyasaye noomwihotselefu muno khubasumba bebe.

Enywe abasuubila, injile mubusalamu keelala. Ne mulaloonda amakulu kashetani tawe. Ye toto khwinywe noomusuku owahabulafu.

Ne nimurerekha olunyuma lwa efifune fia habulafu okhuboolela, manye mbu toto Nyasaye niwa Amaani, Owamachesi muno.

Koo, liliwo elindi liabalindanga halali Nyasaye okhubetsela mufiinikha fia amaleesi, nende Abamalaika, mana likhuwa likhalakwe. Ne ewa Nyasaye niwaamakhuwa koosi kalikalusibwa.

Reba abana ba Israili, ni efimanyisio finga fia habulafu fiakhwabarerera? Ne ukalukhasia tsimbabaasi tsia Nyasaye olunyuma lwa okhumwitsila, toto Nyasaye noomululu weshinyasio.

Abakhayi baronelwa obulamu bwokhushialo, ne batseshelelanga balia Abasuubila. Ne balia abaritsanga Nyasaye baliba hekulu wabu inyanga ya Indukho. Ne Nyasaye aheresinjia wayenya obulali nende eshichelo.

Abandu boosi bali omukanda mulala (khudini ya Adamu yetsa ninayo. Mana nibakabukhana), mana Nyasaye naruma Abarumwa abareranga akomwikhoyo khandi abeekanyilisinjia. Mana niyeshia halala ninabo Eshitabu khubwatoto khoshikhalake eshina hakari wabu mukalia akabawukhanamwo. Ne shibawukhana muko halali balia abahebwa Eshitabu olunyuma lwa efifune fia habulafu okhubetsela shichila ishinda hakari wabu. Mana Nyasaye nalunjisia balia basuubila khukalia akobwatoto akabawukhanamwo khumunwa kukwe. Ne Nyasaye alunjisinjia owayenya khunjila ingololofu.

Nohomba mparanga mbu mulinjila mwikulu, ne kashili okhuboolela shinga kolela balia abali inyuma wenyu? Banyoolwa nende obumanani nende amaraba, mana nibaresibwa muno, okhula Omurumwa nende balia abaasubila ninaye nibaboola mbu, “Obuhabini bwa Nyasaye nibuule lina?" Koo, manye mbu toto obuhabini bwa Nyasaye buli hambi.

Bakhurebanga mbu ni shiina shia barusia. Boola mbu, “Shiosishiosi shiamurusia mufilayi, ni shia abebusi, nende abeekho, nende abaana abafwilwa, nende abamanani nende balia bali khuluchendo (abananjila)." Ne shiosishiosi shiamukhola mumalayi, Nyasaye ashimanyile muno.

Mwandichirwa okhulwana liyie (khulwa idini), nalo liabasinya. Ne munyala okhusila eshindu, nashio neeshilayi khwinywe. Ne munyala okhuchama eshindu, nashio neeshibii khwinywe. Ne Nyasaye ni umanyile muno, nanyu shimumanyile tawe.

Bakhurebanga okhulondokhana nende omwesi kwoluyali, okhulwana liyie khulimwo? Boola mbu, “Okhulwana liyie mwo ni tsimbii tsikhongo, nende okhwikalila injila ya Nyasaye, nende okhukhaya Nyasaye, nende okhwikalila Abandu ehale nende omusikiti kwa oluyali oko, nende okhurusiamwo Abandu balimwo, nobwonooni obukhongo imbeli wa Nyasaye. Ne okhwikalila Abandu ehale nende dini yabu nobubii muno okhushila okhwira. Ne balitsililila okhubalwaana okhuula babarusie khudini yenyu, nikali mbu banyala. Ne ulia ulekha idini yaye mwinywe, mana afwe nali omukhayi, abo nibo befikhole fiabu fiabiya khushialo nende mwikulu. Ne abo nibo Abandu bomumulilo, balimenyamo tsinyanga tsioosi.

Toto balia basuubila nende balia bawuya mana nibalwaana khunjila ya Nyasaye, abo balindanga tsimbabaasi tsia Nyasaye. Ne Nyasaye Noomulesheli, Owobukoosia muno.

Bakhurebanga okhulondokhana nende amalwa nende (okhubaya) isimbi. Boola mbu, “Kabili ako kalimwo obubii obukhongo nende obulayi khubandu. Ne obubii bwako nobukhoongo muno okhushila obulayi bwako. Ne bakhurebanga mbu ni shina shia barusia, boola mbu, “Eshiburirire.” Endio nilwa Nyasaye amwinosilinjia tsinyaali tsitsie khomunyoole okhupara.

Khushialo nende mwikulu. Ne bakhureebanga okhulondokhana nende Abana abafwilwa, boola mbu, “Okhubakholela amalayi nobulayi. Ne nimwisaasia ninabo, bakhali abana benyu. Ne Nyasaye yamanya muno owobutobela nende omukholi wamalayi. Ne Nyasaye yenyanga, yakhabenjisiye mukalabasangasia (enywe) tawe. Toto Nyasaye niwa Amaani, Owamachesi muno.

Ne mulateshia Abakhasi balaamanga efindi halala nende Nyasaye tawe okhuula basuubile. Ne omusumba omukhasi omusuubili nomulayi okhushila omusumba omukhasi omulekhule ulaamanga efindi halala nende Nyasaye kata nabachamisia. Ne mulabakha abakhana benyu khubasatsa balaamanga efindi halala nende Nyasaye tawe okhula basuubile. Ne omusumba omusuubili nomulayi okhushila omusumba omulekhule ulaamanga efindi halala nende Nyasaye kata nabachamisia. Abo balanganga abandu okhutsia mumulilo, naye Nyasaye alanganga okhutsia mwikulu nende obulesheli khukhuchama khukhwe. Naye arereranga abandu habulafu tsinyaali tsitsie khobanyoole okhwitsulila.

Ne bakhurebanga okhulondokhana nende okhuswamila, boola mbu, “Obo nobusinyo. Kho, be ehale naabakhasi nibali mukhuswamila, ne mulaba ninabo tawe okhula shinga baba habalafu. Ne nibakhalafuya, khabenjilile shingala Nyasaye yabalomesia. Toto Nyasaye yachama abasabanga eshileshelo, ne yachama abetswenulanga.

Abakhasi benyu ni emikunda chienyu. Kho, tsie mumikunda chienyu shingala mwenya. Ne mwiranjilisilie abeene amalayi, ne murie Nyasaye. Ne manye mbu toto enywe mulibukana ninaye. Ne biila abasuubila akomwikhoyo.

Ne mulakhola Nyasaye okhuba eshifune mufitsubo fienyu tawe mbu khumukhaye okhukhola amalayi nende okhuria Nyasaye, nende okhukhola omulembe hakari wa Abandu. Ne Nyasaye niwokhuwulila muno, Omumanyi muno.

Nyasaye shababukulilanga obubii khufitsubo fienyu fiamulasuubilemwo tawe. Halali ababukulilanga obubii khu kemioyo chienyu chikhola. Ne Nyasaye noomulesheli muno, Omwihotselefu muno.

Khubalia betsubanga mbu balaba ehale nabakhasi babu, balinde emiesi chine. Ne nibakalukha, toto Nyasaye Nomulesheli muno, Owobukoosia muno.

Ne nibabusia okhubalekha, toto Nyasaye Nomuwulili muno, Omumanyi muno.

Ne Abakhasi baleshelwe beliinde okhula amaswamila kataru. Ne shibachamilwa okhufisa shia Nyasaye yaloonga mutsimbeleshelo tsiabu tawe kakhabanga mbu basuubila mu Nyasaye nende Inyanga ya Indukho. Ne abasatsa babu bakhoyeshele muno okhubakalusia nibenya okhukasia omuleembe, nabo abakhasi bali nende akabakhoyeshele okhuhebwa shinga kalia akali hekulu wabu bosi. Ne Abasatsa balikho hekulu wabu okhubashila, ne Nyasaye niwa Amaani, Owamachesi muno.

Okhulekha abakhasi (talaka) nikhabili. Mana awo ni okhwikhala khubulayi, nohomba okhulekhana khubulayi. Ne shimufuchililwa okhubukula shiosishiosi eshia mwahelesia Abakhasi benyu tawe, halali boosi babili nibaria mbu shibalanyala okhuliinda tsinzakho tsia Nyasaye tawe. Kho, nimuria mbu shibalaliinda tsinzakho tsia Nyasaye tawe, awo obutulani bubulao nikali mbu omukhasi alenunula. Etso nitsio tsinzakho tsia Nyasaye, kho mulatsiruma tawe. Ne balia abaruma tsinzakho tsia Nyasaye, abo nibo abamabii.

Ne namulekha okhulekha khwa khataru, shafuchililwa okhumukalusia tawe okhula ateshele omusatsa wundi. Ne omusatsa oyo namulekha, awo obubii bubulao nibenya okhukalukhanila, nibalola mbu balaliinda tsinzakho tsia Nyasaye. Ne tsino ni tsinzakho tsia Nyasaye etsia yenoosilinjia Abandu bamanya.

Ne nimulekha abakhasi mana bamale tsinyanga tsiabu tsiabalachilwa, bakalusie khubulayi nohomba baleshe khubulayi. Ne mulabakalusia okhubawumisia khubusuku tawe. Ne ulakhola ario, alaba yekholeele obubii omwene. Ne mulabukulila tsinyaali tsia Nyasaye okhuba omubayo tawe. Ne yitsulile omukabo kwa Nyasaye khwinywe, nende shiayabeshilia mushitabu, nende amachesi akaabachelelanga khuko. Ne rie Nyasaye, ne manye mbu toto Nyasaye ni omumanyi muno wabuli eshindu.

Ne olwa mulalekha abakhasi mana bamale induukho yabu, mulabekalila okhutekha khubatsa babu tawe nikali mbu banyolane khubulayi. Kano yekanyilisibwa khuko ulia owasuubila Nyasaye nende Inyanga ya Indukho, kano ni amalayi khwinywe khandi namalafu muno. Ne Nyasaye amanyile halali enywe shimumanyile tawe.

Ne abakhasi bebuule, banunie abana babu emika chibili emilaamba; khu ulia wenya okhumalisia okhununia. Ne samwana omwana arusie eshilibwa shia nyinamwana, nende omwana nende tsingubo mubulayi. Ne omundu shanichilisibungwa tawe halali khu shiobunyali bubwe. Ne mama alarebwa khubusandi shichila omwana wuwe tawe, nohomba papa alasandibwa shichila omwana wuwe tawe. Ne 'Omuchelami' yesi ali ario. Ne boosi babili nibenya okhuleshesia okhununia nibafuchilisaniye, awo obubii bubulao khubo. Ne nimwenya okhuhelesia abana benyu omukhasi wokhubanunia, hao shibulaba obubii khwinywe tawe nimurusia eshia mwalaka shingala mwanala. Ne rie Nyasaye, ne manye mbu Nyasaye alolanga muno koosi kamukholanga.

Ne balia mwinywe bafwisibungwa, nibalekha abakhasi, abakhasi abo bamenye emiesi chine, nende tsinyanga ekhumi. Ne nibamala tsinyanga tsiabu etso, obubii bubulao khwinywe nibekholela amakhuwa kabu khubulayi. Ne Nyasaye akamanyile koosi kamukholanga.

Ne obubii bubulao khwinywe okhuyila eshiselelo khukhumanyisia sa khubakhasi bali mukhulinda (Eda), nohomba mwafisasa nimusuubile mumioyo chienyu. Nyasaye amanyile mbu enywe mwitsa okhubetsulila, halali mulabalaka mubwifisi tawe, halali muboole amakhuwa amalayi, ne mulabateshia tawe okhuula bamale indukho yabu (eda). Ne manye mbu Nyasaye amanyile kali mumioyo chienyu, kho be meso ninaye. Ne manye mbu Nyasaye ni Omulesheli muno, Omwihotselefu muno.

Obubii bubulao khwinywe nimulekha Abakhasi bamushili okhuba ninabo nohomba bamushili okhubahelesia omurungo kwabu. Halali mubahelesie shiokhubahotselesia, uli nende obunyali shingala anyalilwa ne wobunyakhani shingala anyalilwa, eshihotselesio khubulayi, kano kalachilwa khubakholi bamalayi.

Ne nimubalekha nimushili okhuba ninabo, ne nimumalile okhubakasilia omurungo kwabu (ikhwe) kumanyishe, mana hao mubahelesie eshitonye shilala (inusu) shiomurungo kwamurechelesaniyie, halali abakhasi beene nibaleshela, nohomba omusatsa ulia uli nende obunyali bwobuteshiani – bwa nikkah – abe nabaleshele, ne okhuleshelana nikho khuretsanga omundu ahambi muno nende okhuria Nyasaye. Ne mulebilila okhukholelana obulayi hakari wenyu tawe. Toto Nyasaye alolanga muno kamukholanga.

Linde tsiswala; ne okhushila muno iswala ya hakari. Ne emele Nyasaye nimuluunjishe mubwihotselefu olwamuba nimulaamanga.

Ne nimuli muburii, laame nimuchendanga nohomba nimuninile. Ne olwa mulaba nende omulembe, itsulile Nyasaye shingala yabechesia akamwalali nimwamanya tawe.

Ne balia bafwisibungwa mwinywe nibalekha abakhasi, niindache khubakhasi babu abo okhunyola obukhonyi omwika omulamba nibalarusibwa mutsinzu tsiabu tawe. Ne abakhasi abo nibarula abeene, awo mubula obubii tawe khu kabekholele abeene khubulayi. Ne Nyasaye niwa Amaani, Owamachesi muno.

Ne abakhasi baleshelwe (nende talaka), bahebwe shokhubahotselesia khubulayi. Ako ni amalachilo khubalia abaria Nyasaye.

Ne endio nilwa Nyasaye abenoosilinjia tsinyaali tsitsie khomunyoole okhwikhonyela obwongo.

Shiwalola tawe balia barula mutsingo tsiabu nibali mutsiyelefu, nibaririle lifwa? Nyasaye nababoolela mbu, “Fwe!” mana nabalamusia. Toto Nyasaye niwemikabo khubandu, halali abandu abanji shiboopanga orio tawe.

Ne khupane khunjila ya Nyasaye, ne manye mbu toto Nyasaye ni Omuwulili muno, Omumanyi muno.

Ni wina witsa okhuhelesia Nyasaye likofi lilayi; kho amumetele okhumeta okhunji. Ne Nyasaye afumbanga khandi abambulanga. Ne ewuwe niwo wamulikalusibwa.

Shiwabalola Abandu abakhongo mubana ba Israili, Musa niyakharulao, olwa baboolela Omurumwa wabu mbu, “Khurererekhwo Omwami kho khukhupane khunjila ya Nyasaye.” Naboola mbu, “Koo, kalaba mbu nimulomesibwa okhupana, mulakhaya?” Nibaboola mbu, “Bilaba birie khulakhupana khunjila ya Nyasaye tawe, ne khulondelwe mutsingo tsiefu nende Abaana befu?” Halali olwa balachilwa okhupana, bakalukhana, halali batiti mubo. Ne Nyasaye yamanya muno abamabii.

Omurumwa wabu nababoolela mbu, “Toto Nyasaye abaawulile Taluti (Sauli) okhuba Omwami.” Nibaboola mbu, “Alaba arie Omwami wefu, ne efwe nifwe khukhoyeshele muno okhunyoola obwami okhushila ye, ne shiyahebwa omwandu omunji tawe!" Naboola mbu, “Nyasaye amalile okhubawulila ye, ne amumetele amachesi nende omubili. Ne Nyasaye ahelesinjia owayenya obwami bwaye. Ne Nyasaye ni Wefinji (Omuyinda), Owamachesi muno."

Ne Omurumwa wabu nababoolela mbu, “Ne toto eshimanyisio shiobwami bubwe ni okhubarerela lisanduku lilimwo obuhotselefu okhurula khu Nyasaye wenyu Omulesi. Ne lilimwo kalia aka abandu ba Musa balekha nende abandu ba Harun, Abamalaika balichinganga. Toto mukano bilimwo ebimanyisio khwinywe nimuli mbu mwasuubila."

Kho olwa Taluti yarula nende omukanda kweliyie, yaboola mbu, “Toto Nyasaye alabahelesia amatemo komwalo. Ne ulanywa mumwalo oko, shalaba ninasi tawe. Ne ulanywamo tawe, alaba ninasi, halali ulia witsa okhutaya neshikalabo shomukhono kukwe. Halali boosi banywamwo okhuyiniakhwo batiti mubo. Olwa yambukha omwalo ye nende balia basuubila halala ninaye, baboola mbu, “Lelo shikhulanyala Jaluti nende omukanda kukwe kweliyie tawe.” Ne balia bali nende obwatoto bwokhubukana nende Nyasaye, nibaboola mbu, “Emikanda chinga emititi chiashila emikanda emikhongo khubunyali bwa Nyasaye." Ne Nyasaye ali halala nende abefwilanga.

Ne olwabarula okhuchaka okhulwana nende Jaluti nende omukanda kukwe, baboola mbu, “Nyasaye wefu Omulesi, khuhelesie okhwifwila okhunji, ne otinyisie ebilenje biefu, ne okhukhoonye khushile Abandu Abakhayi."

Mana nibabashila khubunyali bwa Nyasaye, ne Dawudi niyeera Jaluti, mana Nyasaye nahelesia Dawudi obwami nende amachesi, mana namwechesia mu kayenya. Ne Nyasaye alabetsanga mbu shiyekalilanga Abandu khubaandi tawe, hawo eshialo shiakhabiyile. Halali Nyasaye niwemikabo khubilonje bioosi.

Tsino ni tsinyali tsia Nyasaye, khukhusomelanga khubwatoto. Ne toto ewe oli mu Abarumwa.

Abarumwa abo khwaninia abaandi okhushila abaandi mubo. Mubo balimwo aba Nyasaye yalomaloma ninabo, ne abandi nabaninia hekulu tsingasi. Ne nikhuhelesia Isa omwana wa Mariamu ebifune bili habulafu. Ne nikhumuramwo amaani ka roho omulafu. Ne Nyasaye yenyanga, shibakhopane balia abaali inyuma wabu ebifune bili habulafu nibiakhabetsela tawe; halali bakabukhanamwo. Mubo balimwo abasuubila, ne abandi mubo bakhaya. Ne Nyasaye yenyanga, shibakhopane tawe. Halali Nyasaye akholanga shingayenya.

Enywe abasuubila, rusie khubilia ebiakhubakabile, nishili okhuula inyanga yeyinganga okhubulao, nohomba obwitsa nohomba okhusabilwa. Ne abakhayi nibo abamabii.

Nyasaye, abulao nyasaye owulali Ye tawe, Omulamu, Owemelanga amakhuwa koosi buli lwoosi. Sharengetsanga nohomba shakonanga tawe. Nebibie bioosi yenyene bili mwikulu nende khushialo. Ni wina oyo unyala okhusabila imbeli wuwe, halali khukhusubula khukhwe! Amanyile kali imbeli wabu nende inyuma wabu. Nabo shibamanyile shiosishiosi mubumanyi bubwe tawe, halali khukalia kayenya omwene. Obunyali bubwe bwasalaana mwikulu nende khushialo, ne shashilungwa okhubilinda tawe. Naye ni Ye uli hekulu, Omukhongo muno.

Okhunichilisia khubulao mudini; obulunjifu bumalile okhwawukhana nende obukori. Kho ulia ukhaya Twaghut (Shetani) mana asuubile Nyasaye, oyo toto alaba atilile eshitililo shiamaani, eshilafunikha tawe. Ne Nyasaye niwokhuwulila muno, Omumanyi muno.

Nyasaye nomulindi wabalia abasuubila, abarusinjia mufiilima nende okhubenjisia mubulafu. Ne balia abakhaya, abalindi babu ni amashetani. Kabarusinjia mubulafu nikabenjisia mufiilima. Abo nibo Abandu bomumulilo, balimenyamwo tsinyanga tsioosi.

Shiwalola ulia wayingasia Ibrahim khu Nyasaye wuwe Omulesi tawe, shichila Nyasaye yamwelesia oburuchi (obwami). Olwa Ibrahim yaboola mbu, “Nyasaye wanje ni ulia uhananga obulamu mana khandi afwisia.” Naye naboola mbu, “Esie siesi ehananga obulamu khandi efwisinjia.” Ibrahim naboola mbu, "Nyasaye arusinjia eliuba okhurula ebukwe, nawe lirusiliekhwo mumbo.” Mana omukhayi oyo nakhaywa. Ne Nyasaye shalunjisinjia Abandu abamabii tawe.

Nohomba shinga ulia wabura khulukongo olwamala okhuba amakubili, mana naboola mbu, “Nyasaye alilamusia arie olukongo luno ngala lwamala okhufwa luri?” Mana Nyasaye namufwisia ye omwene khumiika imia ndala. Mana namulamusia, ne namureeba mbu, “Koo, wikhale ebise biyela birie nofwile?" Nakalusia mbu, “Awundi endi shinga wikhale inyanga ndala nohomba ebise sa munyanga.” Nyasaye namuboolela mbu, “Wekhala emiika imia ndala. Kho, lengakhwo eshilibwa shishio nende ebinywebwa bibio bishili okhubiya. Ne henga isishili yiyio. Ne kho khukhukhole eshimanyisio khubandu. Ne lenga ebikumba biayo bino, shingala khulabichingula mana khubifwale inyama." Mana olwa kamubera habulafu, yaboola mbu, “Emanyile mbu Nyasaye ni omunyali muno wabuli eshindu.”

Ne olwa Ibrahim yabola mbu, “Nyasaye wanje Omulesi, nzechesia shingala olilamusia abafuu.” Nyasaye namureba mbu, “Oshili okhusuubila?” Naboola mbu, “Ndasuubila, halali ndenya omwoyo kwanje kutinye.” Namuboolela mbu, “Bukula amayoni kane, ne okanasie ewuwo, mana okatonyetonye, ne ore buli khushikulu eshitonye sheliyoni, mana okalanje koosi, kalakhwitsila tsimbilo. Ne manya mbu toto Nyasaye ni Owamaani, Owamachesi muno."

Ifwani ya balia bahananga emiandu chiabu khunjila ya Nyasaye ili shinga inyuma ndala yarusia ebisuche saba, buli eshisuche shili nende tsinyuma imia. Ne Nyasaye ametelangakhwo wayenya. Ne Nyasaye Niwefinji (Omuyinda), Omumanyi muno.

Balia bahananga emiandu chiabu khunjila ya Nyasaye, mana nibalalondia khu shiabahanile esho okhuborola nohomba okhusinyisia tawe, bali nende omurungo kwabu khu Nyasaye wabu Omulesi, ne shibaliba noburi tawe ne shibalibeelela tawe.

Likhuwa lilayi, nende obulesheli ni ebilayi okhushila eshihanwa shia isadaka shilondibungwakhwo ebisinyisio. Ne Nyasaye niye winyala, Omwihotselefu muno (khubilonje bibie).

Enywe abasuubila, mulanyasia ebihanwa bienyu bia isadaka khukhuboorola nende khubisinyisio tawe. Shinga ulia uhananga omwandu kukwe okhulolosia abandu, ne shasuubilanga Nyasaye nende Inyanga ya Indukho tawe. Ifwani yiyie ili shinga olwanda lulikhwo olufu, mana nilukhupwa nende ifula yolucheka, niilulekha olukhaya, mana shibaliba nobunyali bwosibwosi khukabakhola tawe. Ne Nyasaye shalunjisinjia Abandu abakhayi tawe.

Ne ifwani ya balia bahananga omwandu kwabu khulwokhukoonya obuchami bwa Nyasaye nende okhuhelesia emioyo chiabu amaani, ili shinga omukunda kuli hekulu, mana ifula yolucheka nikwamwo, mana nikurusia ebiamo biakwo nibimeteshe khabili. Ne kata olucheka nilulakwamwo tawe, ifula inditisa yokhunyilila iyera. Ne Nyasaye alolanga muno kamukholanga.

Koo, aliwo mwinywe wenya okhuba nende omukunda kwetsitende, nende emizabibu, okuburangamwo emialo, ne anyolangamwo ebiamo bietsimbia tsioosi. Mana obukofu bumulile naye ali nende abana abatiti abateshele, mana omukunda oko kukhupwe nende imbumbuyeka yomulilo mana kukulasie. Endio nilwa Nyasaye abenoosilinjia ebimanyisio khomunyoole okhupara.

Enywe abasuubila, hane khubilayi biamunyoolele nende ebiakhubarusiliye mumikunda. Ne mulatsila ebibii mubio khomubihane ebo tawe; ne enywe beene shimunyala okhubibukula tawe, halali nimutimbile tsimoni. Ne manye mbu Nyasaye niwinyala, Owitsomibungwa muno.

Shetani abaretsangamwo oburi bwobumanani, ne abalomesinjia okhukhola efifwabi. Naye Nyasaye abalakanga eshileshelo nende emikabo chirula ewuwe. Ne Nyasaye ni wobuyinda obunji, Omumanyi muno.

Ahelesinjia amachesi owayenya. Ne uhelesibwa amachesi, toto aba ahelesibwe obulayi obunji. Ne shibetsulilanga tawe halali Abandu abamachesi.

Ne eshihanwa shiosishiosi shiamuyinia nohomba indache yiosiyiosi yamulaka okhuyinia, toto Nyasaye ashimanyile. Ne balia abakholi bamabii balibula balibahabina.

Ne nimulolosia ebihanwa bia isadaka, nobulayi. Ne nimufichisa mwahelesia abatakha mubwifisi, obo ni obulayi khwinywe; ne yetsa okhubarusiliaho tsimbi tsienyu tsindi. Ne Nyasaye amanyile muno koosi kamukholanga.

Okhulunjikha khwabu shikhuli khwiwe tawe, halali Nyasaye niulunjisinjia wayenya. Ne shiosishiosi shiamuhana khubulayi, neeshienyu abeene. Ne mulahana tawe halali khulwokhwenya obweni bwa Nyasaye. Ne shiosishiosi shiamuhana khubulayi, mulirungwa mubwitsufu, ne shimulikholelwa obubii tawe.

Bahelesibwe abatakha balia bekalilwa khunjila ya Nyasaye, abalanyala okhusamula khushialo okhukhaaba omukabo tawe. Ne ulamanyile aparanga mbu ni abayinda shichila okhwiyikalila khwabu okhusaba; olabamanya khubimanyisio biabu. Shibayuyushilanga okhusaba Abandu tawe. Ne amalayi kosikosi kamuyinia, toto Nyasaye akamanyile muno.

Balia bahananga omwandu kwabu eshilo nende eshitere, mubwifisi nende mubulafu; bali nende omurungo kwabu ewa Nyasaye wabu Omulesi. Ne shibaliba nende obuyendi, ne shibalibeela tawe.

Balia balitsanga riba (obukhala bulakwanile), shibalisinjila halali shinga asinjilanga utililwe nende emisebe. Ako nilwokhuba mbu baboola mbu, “Toto inganga ili shinga Riba.” Halali Nyasaye achamila inganga ne akaana riba. Kho, ulia wulilwa nende amachelo okhurula khu Nyasaye wuwe Omulesi, mana niyeyikalila, oyo akeke kali mukabura, ne amakhuwa kaye kali khu Nyasaye. Ne balia bakalushila riba, abo nibo abandu bomumulilo, balimenyamo tsinyanga tsioosi.

Nyasaye arusinjia muribaa tsimbabaasi, ne ametenga tsimbabaasi khubihanwa. Ne Nyasaye shiyachama buli omukhayi, owetsimbi tawe.

Toto balia abasuubila mana nibakhola amalayi, mana nibalama khatsotso mana nibarusia eshihanwa shia Izakaa, bali nende omurungo kwabu khu Nyasaye wabu Omulesi. Ne balibula obuyendi, ne shibalibelela tawe.

Enywe abasubila, rie Nyasaye, ne leshe Ribaa tsitonyele, toto nimuli abasuubili.

Ne nimulakhola murio tawe, manye mbu mwikasiliye liyie okhulwana nende Nyasaye nende Omurumwa wuwe. Ne nimusaba eshileshelo, bukule omurwe kwa omwandu kwenyu. Mulakholela abandu obubii tawe, nanyu mulakholelwa obubii tawe.

Ne nikali mbu ubanzungwa ali nende obutinyu, awo omubanzi alinde okhula anyoole obwangu. Ne nimukhola likofi okhuba eshihanwa shia isadaka, elo nililayi kwinywe nimuba mbu mumanya.

Ne rie inyanga yamulikalusibwa khu Nyasaye, mana buli shiamundu alirungwa akayakhola khubwitsufu. Nabo shibalikholelwa obubii tawe.

Enywe abasuubili, nimubanzana likofi okhuula ebise biarebwao, lihandiche. Kho, ahandiche omuhandichi hakari wenyu khubulunjifu, ne uhandika alakhaya okhuhandika tawe shingala Nyasaye yamwechesia. Kho, ahandiche, ne welikofi ubanzwa ahandichisye; ne arie Nyasaye wuwe Omulesi, ne alaleemia shiosishiosi mulio tawe. Ne ubanzwa nali omundu watangaala, nohomba omuteshele, nohomba shanyala okhuhandichisya omwene tawe, hawo omulindi wuwe ahandichisye mubulunjifu. Ne manyie abaloli babili beshisatsa mwinywe. Ne abasatsa babili nibalanyoolekhana tawe, abe omusatsa mulala nende abakhasi babili, khubalia bamuchamila okhuba abaloli; kho mulala wa abeshikhasi abo nakora, owundi oyo amwitsulisie. Ne abaloli balakhaya nibalangwa tawe. Ne mulakhaya okhuhandika likofi nilili lititi nohomba likhongo okhula ebise bialio tawe. Obo nibo obwatoto muno imbeli wa Nyasaye, ne ni habwene muno khubuloli, ne ni obulayi muno khomulaba nende obukanakani tawe. Habula niili inganga yo mukhono khu mukhono hakari wenyu, awo shinobubi kwinywe nimulahandika tawe; halali nimukusania, reo abaloli. Ne omuhandichi nohomba omuloli alarebwa mubutinyu tawe. Ne nimukhola murio, toto endio muba murulile mutsinzakho tsia Nyasaye. Ne rie Nyasaye, naye yetsa okhubamanyia. Ne Nyasaye ni Omumanyi muno wa buli eshindu.

Ne nimuli khuluchendo; ne shimunyoolele omuhandichi tawe, biyela okhuhana eshisingwa. Ne nimubikhanila eshindu abeene khubeene, ulia uheresibwe okhubikha, akalusie eshia owashie yamuhelesia, ne arie Nyasaye, Omulesi wuwe. Ne mulafisa obuloli tawe. Ne ulia ubufisa, oyo toto omwoyo kwaye kulaba kukholele tsimbii. Ne Nyasaye ni Omumanyi muno khukamukholanga.

Ebili mwikulu nende mushialo nibia Nyasaye bioosi. Ne nimura habulafu akali mumioyo chienyu nohomba nimukafisa, Nyasaye alibabalila khwako, mana aleshele owayenya ne ahelesie eshinyasio owayenya. Ne Nyasaye ni Omunyali muno wa buli eshindu.

Omurumwa yasuubila akeshibwa khuye okhurula khu Nyasaye wuwe Omulesi, nende Abasuubili. Boosi basuubila Nyasaye, nende Abamalaika bebe, nende Ebitabu bibie, nende Abarumwa bebe. Shikhukabukhasinjia hakari wa yesiyesi mubarumwa bebe tawe. Ne baboola mbu, “Khuwulile ne khufuchilile, khukhusaba obulesheli Nyasaye wefu Omulesi, ne ewuwo niwo wamakalushilo kali."

Nyasaye shanichilisinjia omundu yesiyesi tawe, halali khushichelo shianyalilwa. Obukhala bwa kayakhola nobubwe, ne okhusikha khwa kayakhola ni okhukhwe. “Nyasaye wefu Omulesi olakhubukulila obubii nikhwibilila nohomba nikhwisikirasia tawe. Nyasaye wefu Omulesi, olakhutukha emisiko shinga echawatukha balia abali imbeli wefu tawe. Nyasaye wefu Omulesi olakhutukha akakhulanyala tawe, ne okhubeele, ne okhuleshele, ne okhubeele tsimbabaasi. Newe omulindi wefu, kho khuhelesie obushili khushile omukanda kwa abakhayi."

Alif, Lam, Mim.

Nyasaye, abulao nyasaye wundi owulali Ye tawe. Ni Omulamu, Omwemelesi wa koosi tsinyanga tsioosi.

Yakhwishilia Eshitabu khubwatoto, eshyunga omukhono akali imbeli washio, ne yeeshia Itaurati nende Injili.

Inyuma awo, fibe obulunjifu khubandu, mana niyeeshia Ifurqani (eshia okhwawukhasia). Toto balia abakhaya efimanyisio fia Nyasaye, baliba nende eshinyasio eshilulu. Ne Nyasaye niwa amaani muno, wokhurunga likhobo.

Toto Nyasaye sishimwifisanga shiosishiosi tawe, shibe mushialo nohomba mwikulu.

Ye niye ubakasinjia mutsinda tsia banyinenywe shinga yenya. Abulao Nyasaye ulali Ye tawe. Ni Owamaani, Owamachesi muno.

Ye niye owakhwishilia Eshitabu shino, shilimwo tsinyaali tsili habulafu muno (muhkamat). Etsio nitsio eshisina shia Eshitabu shino. Ne etsindi (tsilimwo) shitsili habulafu tawe. Kho, balia ba emioyo chiabu chilimwo obukori baloondanga tsilia etsilali habulafu mutsio tawe; khulwokhukhaaba inzoka, nende okhukhaaba okhutsiinoosia obubii. Ne abulao umanyile okhwinoosia khwatsio halali Nyasaye tawe. Ne balia bali nende obumanyi obusiro, baboolanga mbu, "Khwatsisuubila, tsioosi tsirula khu Nyasaye wefu Omulesi." Ne shibetsulilanga kano tawe halali balia abamachesi.

(Nabo baboolanga mbu), ‘‘Nyasaye wefu Omulesi, olakosia emioyo chiefu nomalile okhukhulunjisia tawe, ne okhuwe tsimbabaasi tsirula ewuwo. Toto newe Omuwani muno.

Nyasaye wefu Omulesi, Ewe newe ulikhung’asia Abandu khuyinyanga yibula obukanakani mwo. Toto Nyasaye shafunakanga indakano tawe.”

Toto balia bakhaya, emiandu chiabu nohomba abana babu shifilibakhoonya shiosishiosi imbeli wa Nyasaye tawe. Ne abo nibo tsikhwi tsia Omulilo.

Shinga imero ya Abandu ba Firauni nende balia bali imbeli wabu, bakatsula efimanyisio fiefu, mana Nyasaye nabatiila khumabii kabu. Ne Nyasaye ni weshinyasio eshilulu.

Boolela Abakhayi mbu, “Hambi hano mulashilwa, ne mulakhung’asibwa murebwe mumulilo (Jahanam), ne awo ni abundu ambii muno wookhuwulushila.”

Toto mwali nende eshimanyisio mumikanda chibili chiabukanana (okhulwaana). Omukanda mulala nikulwananga khunjila ya Nyasaye, ne okundi kwa Abakhayi. (Abasuubila) nibabalolanga (Abakhayi) mbu naabanji muno okhushila bo okhuula khabili, khukhulola butswa khwetsimoni. Ne Nyasaye yonganga omukhono khubuhabini bubwe ulia owayenya. Toto mukano kalimwo ameeko khubandu betsimoni.

Abandu baronelwa okhuchama ebikombungwa shinga abakhasi, nende abana abasiani, nende amabunjikho ka idhahabu nende ifedha, nende tsifarasi nende emiruko, nende tsindalo. Oko ni omwikhoyo kwa obulamu bwokhushialo. Ne Nyasaye ali nende wokhukalukha andayi muno.

Boola mbu: Ebabolelekhwo amalayi okhushila ako? Khubaria Nyasaye bali nende emikunda chomwikulu ewa Nyasaye wabu Omulesi, echiburangamwo emialo. Balimenyamwo tsinyanga tsioosi, nende abakhaye abatswenulwa, ne bali nende obuchami bwa Nyasaye, ne Nyasaye alolanga muno Abasumba bebe.

Balia baboolanga mbu, 'Nyasaye wefu Omulesi, efwe khwasuubila, kho khuleshele ebionono biefu ne okhuliinde okhurulana nende eshinyasio shiomulilo.'

Abefwilanga, ababoolanga obwatoto, abehotselefu, abarusinjia eshihanwa nende basabanga eshileshelo mumabwibwi.

Nyasaye yarusia obuloli mbu abulao Nyasaye wundi ulali ye tawe, nende Abamalaika nende Abasomi, niye wemeele obwatoto, abulao Nyasaye wundi halaliye, Owamani, Owamachesi muno.

Toto idini imbeli wa Nyasaye ni yobwisilamu. Ne balia bahebwa Eshitabu shibakabukhanamwo tawe halali obumanyi nibwakhamala okhubetsela, nende shichila ishinda yali hakari wabu, Ne ukhaya ebimanyisio bia Nyasaye, ne toto Nyasaye ni Omwangu wokhubala.

Ne nibakhuyingasia, boola mbu, “Esie eleenjiye obweni bwanje khu Nyasaye, nende balia abanonda.’’ Ne boolela balia bahebwa Eshitabu nende timbiti mbu, “Musilime?” Kho, nibasilime, awo mana bamalile okhulunjikha. Ne nibakhaya, ewe olisa wokhusia oburume. Ne Nyasaye alolanga muno Abasumba bebe.

Toto balia bakhayanga ebimanyisio bia Nyasaye, mana nibera Abarumwa ebilali khunjila yobwatoto, ne nibera Abandu bachelelanga Abandu okhukhola amalayi, toto basuubisie eshinyasio eshilulu.

Abo nibo bebikhole biabu biabiya khushialo nende mwikulu, nabo shibalinyoola bokhubahabina tawe.

Sholola balia bahebwa elubeka lwa Eshitabu, balangungwa okhushitsila Eshitabu shia Nyasaye khushinyoole okhubabusilia eshina hakari wabu, ne omukanda mubo kwirukhanga nikushikhayile.

Endio nilwokhubeela baboola mbu, “Omulilo shikulikhutilakhwo tawe halali tsinyanga tsinditi butswa.” Mana nikabakatia mudini yabu amakhuwa akabeene bachikhanga.

Ne kaliba karie olwa khulibakhung’asia khulwa inyanga ibulamwo obukanakani, mana buli Omundu alirungwa shingala yakholanga, ne shibalikholelwa obubii tawe.

Boola mbu, “Ewe Nyasaye, mwene obwami bwoosi, ohelesinjia obwami wawenya, ne onulanga obwami owawenya, ne onininjia owawenya ne wishinjia owawenya, tsimbabaasi tsioosi tsili mumukhono kukwo, toto ewe oli omunyali muno wabuli eshindu.

Ewe winjisinjia eshilo mushitere, ne winjisinjia eshitere mushilo, ne orusinjia omulamu okhurulana khumufu, ne orusinjia omufuu okhurulana khu uli omulamu. Ne okabilanga wawenya okhubura eshichelo."

Abasuubili balakhola abakhayi okhuba abahelwa babu nibalekha abasuubili tawe. Ne ukhola ario, shaliba nende shiosishiosi imbeli wa Nyasaye tawe, halali nibili khulwa okhwilinda okhurulana nende obusuku bwabu. Ne Nyasaye abekanyilisilinjia ninaye. Ne ewa Nyasaye sa niwa amakalushilo.

Boola mbu, "Nimufisa kali mumioyo chienyu, nohomba nimukara habulafu, Nyasaye akamanyile, ne amanyile koosi kali mwikulu nende mushialo. Ne Nyasaye nomunyali muno wabuli eshindu."

Inyanga yabuli Omundu alinyoola koosi amalayi kayakhola nikarererwe imbeli wuwe, nende koosi amabii kayakhola. Omundu aliikomba okhuba ehale nende amabii kayakhola. Ne Nyasaye abekanyilisilinjia ninaye. Ne Nyasaye ni Omuholo khubasumba bebe.

Boola mbu, “Nimuli mbu mwayanza Nyasaye, nekhanonde esie, Nyasaye alabachama ne yetsa okhubaleshela tsimbii tsienyu, ne Nyasaye ni Omulesheli muno, Owobukoosia.”

Boola mbu, “Loonde aka Nyasaye nende Omurumwa.” Ne nibafutara, manya mbu toto Nyasaye shiyachama abakhayi tawe.

Toto Nyasaye yalobola Adam, nende Nuh, nende olwibulo lwa Ibrahim nende olwibulo lwa Imran okhushila Abandu boosi.

Ni abebulane abeene khubeene, ne Nyasaye ni Omuwulili muno, Omumanyi muno.

Olwa omukhaye wa Imran yaboola mbu, “Nyasaye wanje Omulesi, toto esie ekhulachile mumwoyo kwanje shili munda mwanje nishirula mbu shibe eshiishio sa. Kho, fuchilila okhurula khwisie. Toto ewe newe Omuwulili muno, Omumanyi muno.”

Mana shingala yebula, yaboola mbu, “Nyasaye wanje Omulesi, esie toto ndibule weshikhaana - ne Nyasaye amanyile muno shiayebula - ne weshisiaani shali shinga oweshikhaana tawe. Ne esie toto emukulishe mbu Mariamu. Ne toto esie emushinga khwiwe, nende olwibulo lulwe, obaliinde okhurulana nende Shetani owatsubwa."

Mana Nyasaye wuwe Omulesi namufuchilila okhufuchilila okhulayi, ne namukhusia okhukhusia okhulayi, ne Zakaria naba omuliindi wuwe. Buli olwa Zakaria yenjilanga mushikoro shiaye, yamunyoolanga nebiakhulia. Kho namureeba mbu, “Ewe Mariam, bino orusiye hena?” Mariamu naboola mbu, “Bino birula khu Nyasaye, toto Nyasaye akabilanga owayenya okhubura eshichelo.”

Awo Zakaria yasaba Nyasaye wuwe Omulesi, naboola mbu, “Nyasaye wanje Omulesi, umbe okhurula khwiwe olwibulo olulayi. Toto newe uwulilanga muno amasayo.”

Olwa yali niyemele nalamanga Mushikoro shishie, Malaika namulanga, “Toto Nyasaye akhusubisia mbu olebula Omwana ulangwa mbu Yahya, witsa okhutinyilisia likhuwa lirula khu Nyasaye, ne ni Omwaami Omushisila, Omunabii uli mubandu abalayi.”

Naboola mbu, “Nyasaye wanje Omulesi, ndakhanyoola endie omwana nemalile okhukofula endi, ne omukhaye wanje uno ni omukuumba?” Naboola mbu, “Nilwa kali kario, Nyasaye akholanga shiayenya.”

Naboola mbu, “Nyasaye wanje Omulesi, mbelesia eshimanyisio.” Naboola mbu, “Eshimanyisio shishio ne mbu sholalomaloma nende Abandu khutsinyanga tsitaru tawe halali okhuchela sa khwonyene. Ne orumbule Nyasaye wuwo Omulesi mubuunji, ne omutswenule ingoloobe nende mumabwibwi.”

Ne olwa Malaika yaboola mbu, “Ewe Mariam! Toto Nyasaye akhwawule mana nakhutswenula, ne nakhuwa oluyali okhushila abakhasi boosi bokhushialo.

Ewe Mariam, wihotselesilie Nyasaye wuwo Omulesi, ne osujudile Nyasaye wuwo ne winame (okhukhola rukuu) halala nende bamwinamilanga."

Kano ni amacheni akefisa akakhukhufimbulilanga, ne ewe shiwali ninabo tawe olwa basukunanga tsikalamu tsiabu mbu ni wina mubo witsa okhulela Mariamu, ne shiwali nabo olwabo baingananga tawe.

Olwa Malaika yaboola mbu, “Ewe Mariamu, toto Nyasaye akhwesinjia akomwikhoyo mbu olanyoola Omwana khulikhuwa lirula ewuwe, elira lilie ni Omubakhwa Isa omwana wa Mariamu (Yesu). Oweshiribwa khushialo nende mwikulu, ne ali mubarebwa hambi nende Nyasaye.

Naye alilomalomia abandu nashili indaana ilelwa nende nali omukhoongo, ne aliba mubandu abalayi."

Mariam naboola mbu, “Nyasaye wanje Omulesi, ndakhanyoola endie omwana ne omundu ashili okhundilakhwo?” Nyasaye naboola mbu, “Nilwa kali endio, Nyasaye alonganga shiayenya. Nabusia likhuwa, toto alibolelanga butswa mbu, 'Ba!' Niliba.

Ne (Nyasaye) yetsa okhumwechesia okhuhandika nende amachesi, nende Itaurati nende Injili.

Ne ni Omurumwa khubaana ba Israili, ababoolele mbu, 'Esie toto ebetseele nende eshimanyisio okhurula khu Nyasaye wenyu Omulesi, mbu enyala okhubalonjela okhurula khuliloba eshifwanani shieliyoni, mana efuremwo emiuya, ne libe liyoni khu bunyali bwa Nyasaye. Ne nditsa okhuhonia abawofu nende abamachele, ne ndalalamusia abafu khubunyali bwa Nyasaye. Ne ndalababoolela shiamulia nende shiamubikha mutsinzu tsienyu. Toto mukano shilimwo eshimanyisio khwinywe nimuli mbu mwasuubila.

Ne endinyisia kali inyuma wanje mu Taurati, ne ebasubule ebindu bindi biamwali nimwekalilwa, ne ebetsele nende ebimanyisio okhurula khu Nyasaye wenyu Omulesi, kho rie Nyasaye wenyu ne muloonde shiebaboolela.

Toto Nyasaye ni Omulesi wanje ne ni Omulesi wenyu, kho mumulaame, ino ni injila ingololofu.'"

Isa ngala yalola obukhayi nibuliho hakari wabu, yaboola mbu, “Ni wina omukhoonyi wanje khu Nyasaye?” Abechi bebe nibaboola mbu, “Efwe khuli abakhoonyibo khu Nyasaye, khusuubile Nyasaye, ne ba omuloli mbu efwe khuli Abasalamu.

Nyasaye wefu Omulesi, khusuubile akaweshia, ne khuloondele – injila - ya Omurumwa, kho khuhandiche halala nende abaloli."

Abakhayi nibatuta, naye Nyasaye napanga, ne Nyasaye niye Omupanji umalayo.

Olwa Nyasaye yaboola mbu, “Ewe Isa, esie nditsa okhukhubukula, ne nditsa okhukhukalusia ewanje, ne nditsa okhukhuliinda okhurulana nende Abakhayi abo, ne nditsa okhura balia bakhuloonda hekulu wabalia bakhukhaya okhula Inyanga ya Indukho. Ne amakalushilo kenyu kaliba khwisie, mana ndilibabusilia eshina mukalia kamwakabukhanangamwo.

Kho balia bakhaya, abo ndilibahelesia eshinyasio eshilulu mushialo nende mwikulu, ne shibalinyoola ababahabina tawe.

Ne balia basuubila mana nibakhola amalayi, (Nyasaye) alibarunga omurungo kwabu omulaamba, ne Nyasaye shiyachama abamabii tawe."

Kakhukhusomelanga kano ni ebimanyisio nende obwitsulisio obwa amachesi muno.

Toto okhuchelasibwa khwa Isa ewa Nyasaye khuli shinga okhuchelasibwa khwa Adam, yamulonga okhurula khwiloba mana namuboolela mbu, "Ba!" Mana naye naaba.

Buno ni obwatoto okhurula khu Nyasaye wuwo omulesi, kho olaba mubalia bakholanga tsinganakani tawe.

Ne ulia ulakhuyingasia mukano obumanyi buno nibumalile okhukhuulila, boola mbu, “Itse khulaange abana befu nende abana benyu, abakhasi befu nende abakhasi benyu, nende efwe abeene nende enywe abeene, mana khusabe mubwihotselefu nikhwenya eshilaamo shia Nyasaye shishile ababeyi.”

Toto kano niko amakhuwa katoto. Ne abulaho nyasaye wundi owulali Nyasaye tawe. Ne toto Nyasaye niye Owamaani, Owamachesi muno.

Ne nibafutara, manya mbu toto Nyasaye yamanya muno abonooni.

Boola mbu, “Enywe Abandu ba Eshitabu, itse khulikhuwa elia habwene hakari wefu ninenyu, mbu khulalaama yesiyesi owulali Nyasaye tawe, ne khulamutsokaasiakhwo nende shiosishiosi tawe, nekhulakholana efwe khwifwe okhuba eminyasaye emilesi chilali Nyasaye tawe.” Ne nibafutara, boole mbu, “Be abaloli mbu efwe khuli Abasalamu.”

Enywe Abandu ba Eshitabu, shichila shina muyingananga khu Ibrahim, ne Itaurati nende Injili shibieshibwa halali inyuma wuwe, shimwikhonyelanga obwongo tawe?

Lola nenywe bano mwayingana khumakhuwa ka mumanyile, ne shichila shina lano muyingananga khumakhuwa kamulamanyile tawe? Ne Nyasaye amanyile nanyu shimumanyile tawe.

Ibrahim shiyali omuyahudi nohomba omukiristo tawe. Halali yali omulunjifu, omwihotselefu, ne shiyali mubatsookasi tawe.

Abandu bakhoyeshele Ibrahim muno ni balia abamuloonda nende Omurumwa uno, nende Abasuubili. Ne Nyasaye niye Omuliindi wabasuubili.

Kuliwo omukanda mubandu ba Eshitabu kwekoombanga okhubakosia, ne shibakosinjia tawe halali bekosinjia abeene, nabo shibamanyile tawe.

Enywe Abandu ba Eshitabu, shichila shina mukhayanga ebimanyisio bia Nyasaye ne enywe toto mulolanga?

Enywe Abandu ba Eshitabu, shichila shina mufwalanga obwatoto obubeyi ne mufisanga obwatoto nimumanyile?

Ne omukanda mubandu bahebwa Eshitabu baboola mbu, “Suubile kalia keshilibwa Abasuubili okhuchaka khweshitere, ne mukakhaye okhuwa khweshitere, babe bario khobanyoole okhukalukha.

Ne mulasuubila yesiyesi tawe halali ulia waloonda idini yenyu." Boola mbu, “Toto obulunjifu ni obulunjifu bwa Nyasaye, omundu ahelesibwe shinga enywe mwahelesibwa nohomba babarebe imbeli wa Nyasaye wenyu Omulesi." Boola mbu, “Toto tsimbabaasi tsili mumikhono chia Nyasaye, yelesinjia owayenya, ne Nyasaye ni Wefinji (Omuyinda), Owamachesi.

Yawulanga owayenya okhumuhelesia tsimbabaasi tsitsie. Ne Nyasaye niye Owetsimbabaasi tsikhongo."

Ne mubandu ba Eshitabu aliwo ulia nomuchelekha okhukhubishila omwandu, akubikha ne alakhukalusilia. Ne mubo aliwo ulia nomuchelekha isende ndala, shakhukalusilia tawe halali nomwemeele muno okhumubanza. Kano nilwokhuba mbu baboola mbu, “Khubula ukhufunanibwa khulwa abakorwa okhusooma bano.” Ne bachishilanga Nyasaye obubeyi nibamanyile.

Shikali kario tawe, ulia ukhola shinga alachile, mana naria Nyasaye, toto Nyasaye yayanza abamuria.

Toto balia bakusiinjia indache ya Nyasaye nende ebitsubo biabu obukusi obutiti, abo shibalibakho nende obulayi bwosibwosi mwikulu tawe, ne Nyasaye shaliboola nabo tawe, ne shalibalingakhwo inyanga ya Indukho tawe, ne shalibatswenula tawe, ne balinyoola eshinyasio eshilulu.

Ne toto mubo kuliwo omukanda kwa balia bakalukhaninjia tsinimi tsiabu mukhusoma Eshitabu, khomupare mbu ako karula mushitabu, ne shikarula mushitabu tawe. Ne baboolanga mbu, "Kano karula khu Nyasaye" ne shikarula khu Nyasaye tawe, ne babeyelanga Nyasaye nabo nibamanyile.

Shikanyala okhuba mbu Nyasaye ahelesie omundu Eshitabu, nende amachesi nende oburumwa, mana (omundu oyo) aboolele Abandu mbu, “Munaame esie habundu wokhulaama Nyasaye" halali ababoolela mbu, "Be bokhulaama Nyasaye wenyu Omulesi webindu bioosi, shichila enywe mwechesinjia Eshitabu, ne shichila mushisomanga."

Ne shalabalomesia mbu mukhole Abamalaika nende Abanabi okhuba abanyasaye tawe. Koo, yakhabalomesia obukhayi nanyu nimumalile okhwilekhulila Nyasaye (Abasalamu)?

Ne (yitsulila) olwa Nyasaye yabukula indache ya Abanabii mbu, “Nemala okhubahelesia eshitabu nende amachesi, mana abetsele Omurumwa ufuchilisania nende kamuli nako, kalaba khwinywe mumusuubile mana mumukhoonye." Naboola mbu, “Koo, mufuchilile mana muchamile amalachilisio kanje khumakhuwa kano?" Nibaboola mbu, “Khuchamile.” Naboola mbu, “Mana be abaloli, nasi endi ninanyu halala mubaloli.”

Ne ulia ufutara olunyuma lwa ako, abo nibo abarumanga tsinzakho.

Koo, benyanga idini ilali ya Nyasaye tawe, ne buli shili mwikulu nende khushialo biamwilekhulila, bichame bikhaye, ne ewuwe butswa ni ewabalikalusibwa.

Boola mbu, “Khusuubile Nyasaye nende akeshibwa khu Ibrahim nende ka Musa yahelesibwa, nende Isa, nende Abarumwa okhurula khu Nyasaye wabu, Omulesi, shikhukabukhasinjiakhwo hakari wabu tawe, nafu khwilekhulile khuye.”

Ne ukhaaba idini ilali yobwisilamu tawe, shalichamilwa tawe, ne ye mwikulu aliba mubandu basikha.

Nyasaye anyala okhulunjisia arie Abandu bakhaya olunyuma lwa okhusuubila khwabu, ne mana nibaba abaloli mbu Omurumwa uno niwobwatoto, mana ebifune bia habulafu nibiboolela? Ne Nyasaye shalunjisinjia Abandu abamabii tawe.

Abo omurungo kwabu ni mbu bali nende eshilaamo shia Nyasaye, nende shia Abamalaika nende eshia abandu boosi.

Balimenyamwo tsinyanga tsioosi, shibalitutuyilibwa eshinyasio tawe, ne shibalihebwa obwiyangu tawe.

Halali balia basaba eshileshelo olunyuma lwa ako, mana nibaba abalayi, toto Nyasaye Niwobulesheli muno, Owetsimbabaasi.

Toto balia bakhaya nibamalile okhusuubila, mana nibameta okhukhaya, shibalileshelwa tawe, ne abo nibo abandu abakora.

Toto balia bakhaya mana nibafwa nibali abakhayi, shibalichamilwa tawe kata nibarusia idhahabu eshialo eshilaamba okhubanunula. Abo balinyoola eshinyasio eshilulu, ne shibaliba nende ababahabina tawe.

Ne shimulanyoola obulayi tawe okhula murusie khubilia biamwachama. Ne shiosishiosi shiamurusia, toto Nyasaye ashimanyile muno.

Buli eshilibwa shiali shiafuchililwa okhulibwa khu bana ba Israili halali shia Israili yeyikalila omwene Itaurati nishili okhwishibwa. Boola mbu, “Rere Itaurati mana muyisome toto nimuli mbu muboolanga obulaamba."

Ne balia bachishila Nyasaye obubeyi olunyuma lwa kano, abo nibo ababii.

Boola mbu: "Nyasaye aboolanga obwatoto, kho loonde emilukha chia Ibrahim omulunjifu, ne shiyali mubatsokasinjia Nyasaye tawe."

Toto inzu yokhuranga ya Abandu barererwao okhulamilamwo ni ilia ili Bakka, eyahebwa tsikhabi nende obulunjifu khubandu boosi.

Mukari omo bilimwo ebimanyisio bilolekha, ameemelo ka Ibrahim, ne winjilamwo aba nende omulembe. Ne neshilachilo shia Nyasaye khubandu okhuhija khu inzu eyo, khu ulia unyala oluchendo lwokhutsia eyo. Ne ulia ukhaya, Nyasaye toto shiyenya shiosishiosi khubandu tawe (nomuyinda.)

Boola mbu, "Enywe Abandu beshitabu, shichilanga shina nimukhaya ebimanyisio bia Nyasaye, ne Nyasaye nomuloli wa kamukholanga?"

Boola mbu, "Enywe Abandu beshitabu, mbushina mwikalilanga ulia usuubila injila ya Nyasaye nimuyikonyela obushiamu nanyu nimulola? Ne Nyasaye shang’ang’alanga ehale nende kamukholanga tawe."

Enywe Abasuubila, nimuloonda omukanda okhurula mubandu bahebwa Eshitabu, betsa okhubakalusia nimumalile okhusuubila mubukhayi.

Ne mulakhaya murie, ne musomelungwa tsinyaali tsia Nyasaye, ne Omurumwa ali hakari wenyu? Ne ulia utilana muno nende Nyasaye, oyo toto yamala okhulunjisibwa khu injila ingololofu.

Enywe Abasuubila, rie Nyasaye okhumuria khwatoto, ne mukhaletsa muafwa tawe halali nimuli Abasalamu.

Ne mutiilane muno khumukoye kwa Nyasaye mwesi halala, ne mulakabukhana tawe. Ne yitsulile tsimbabaasi tsia Nyasaye khwinywe, olwa mwali abasuku abeene khubeene, mana niyoongasia emioyo chienyu, ne khutsimbabaasi tsitsie nimuba abanaanda (beyinda ndala), ne mwali khulukuku lwa litukho lwomumulilo mana nabahonokosiamwo. Ne endio nilwa Nyasaye abenoosilinjia ebimanyisio bibie kho munyoole okhulunjikha.

Ne kube mwinywe omukanda kulanjililanga abandu okhukhola amalayi, okulomesinjia abandu okhukhola akakwanile ne nikubakania amabii. Ne abo nibo abalibura.

Ne mulaba shinga balia abakabukhana mana nibaburana obwatoto nibumalile okhuboolela tawe. Abo bali nende eshinyasio eshilulu.

Inyanga yobweni bulilaba tswe, ne obweni bundi bumaliye ti! Kho balia bobweni bwabu bulimaliya ti (baliboolelwa mbu), “Koo, mwakhaya nimumalile okhusuubila? Kho mana pile eshinyasio shinga mwakhayanga.”

Ne balia bobweni bwabu buliba nibulabile tswe, baliba mutsimbabaasi tsia Nyasaye, balimenyamo tsinyanga tsioosi.

Etso nitsinyaali tsia Nyasaye, khukhusomelanga khubwatoto, ne Nyasaye shiyenyanga okhukholela ebilonje obubii tawe.

Ne buli shiosi shili mwikulu nende mushialo nishia Nyasaye, ne ewa Nyasaye ne wamakhuwa koosi kalikalusibwa.

Enywe muli omukanda omulayi kwarusibwa khulwa abandu, shichila mulomesinjia amalayi ne mukaniinjia amabii, ne musuubilanga Nyasaye. Ne abandu ba Eshitabu basuubilanga, bwakhabeele obulayi khubo. Mubo balimwo abasuubili halali abanji babu nabakori.

Abasuku shibalabaumisia tawe halali okhubasinyisia butswa. Ne nibalwaana ninenyu, balabahelesia emikongo chiabu mana khandi shibalahabinwa tawe.

Bakhupwa nobuteshele wosiwosi wabanyolekhana, halali nibatila omukoye kwa Nyasaye nende omukoye kwabandu. Mana nibakhoyeshela liruma lia Nyasaye mana nibakhupwa nobutakha. Ako nilwokhuba mbu bakhayanga ebimanyisio bia Nyasaye, ne beranga Abarumwa khunjila ilali yatoto tawe. Ako nilwokhuba mbu shibatiilanga amalako tawe, ne barumanga tsinzakho tsia Nyasaye.

Boosi shibali nashilala tawe. Mubandu ba Eshitabu kulimwo omukanda kwa abandu beema obulayi, basomanga tsinyaali tsia Nyasaye eshilo nende eshitere, nabo khandi bamurereranga obweni hasi.

Basuubilanga Nyasaye nende Inyanga ya Indukho, ne balomesinjia okhukhola amalayi, ne bakaaninjia amabii, ne belushilanga okhukhola amakhuwa amalayi. Ne abo nibo abali mubakholi bamalayi.

Ne kabakhola mumalayi, shibaliimwa omurungo kwako tawe. Ne Nyasaye amanyile muno abamuria.

Toto balia abakhaya aka Nyasaye, omwandu kwabu nohomba abana babu shibilibakhoonya shiosishiosi imbeli wa Nyasaye tawe. Ne abo nibo abandu bomumulilo, balimenyamwo tsinyanga tsioosi.

Ifwani ya ebia barusinjia khubulamu bwokhushialo buno ili shinga omuyeka kuli nende omunyiri kwa ibarafu, mana nikunyoola omukunda kwa abandu bakholela obubii emioyo chiabu mana nikukunyasia. Ne Nyasaye shiyabakholela obubii tawe, halali abeene nibo bekholelanga obubii.

Enywe Abasuubila, abandu balali ninanyu mulabakhola okhuba abesikwa benyu tawe. Shibalalekha okhubakholela obubii tawe. Bayanza okhulola akamunyasia. Imalile okhumanyikha isila yabu khuminwa chiabu, ne kabafisanga mubilifu biabu ni amakhongo muno. Toto khumalile okhubenoosilia ebimanyisio nimuba toto nimwikhonyelanga obwongo.

Mana enywe mbabano mwabachama, nabo shibabachama tawe. Nanyu musuubilanga ebitabu (bia Nyasaye) bioosi. Ne nibabukanana ninanyu, nibaboola mbu, “Khwasuubila" ne nibaba bonyene, babalumilanga tsinzala khu isila. Boola mbu, “Fwe nende isila yenyu. Toto Nyasaye yamanya muno kali mubilifu.”

Nimunyoolwa nende obulayi bwosibwosi, nibubasinyisia bo. Ne nimunyoolwa nende obubii, nibabusangalila. Ne nimwisumilisia mana mumurie (Nyasaye), okhututa khwabu shikhulabakhola enywe shiosishiosi tawe. Toto Nyasaye yatererera koosi kabakholanga.

Ne olwa warula mumabwibwi nolekha abandu bobo, shichila okhupanga Abasuubili muliyie, ne Nyasaye awulilanga muno ne amanyile muno.

Olwa emikanda chibili mwinywe chienjilamwo oburi mbu betsa okhushilwa, ne Nyasaye niye omulindi wabu. Ne Abasuubili besikesa Nyasaye yenyene.

Ne toto Nyasaye yabahabina enywe mu Badiri nanyu nimuli abateshele. Kho rie Nyasaye kho munyoole okhupa orio.

Olwa waboolela Abasuubili mbu, ‘’Koo, shibibayela tawe nikali mbu Nyasaye wenyu alabakhoonya nende Abamalaika elfu tsitaru abeshibwa (okhurula mwikulu)?’’

Koo, nimwisumilisia mana murie Nyasaye, ne kata abasuku nibabetsela mapwoka, awo Nyasaye wenyu Omulesi alabakhoonya nende Abamalaika elfu tsirano abali neefimanyisio.

Ne Nyasaye shiyakhola kano halali bube obusangali khwinywe, ne emioyo chenyu chinyoole okhwihotselesia khuko, ne obukhoonyi shiburulanga awundi tawe halali khu Nyasaye Owoluyali, Owamani, Owamachesi muno.

Endio nilwokhuba atete ebuleka khubakhayi nohomba ababeelesie muno; khobanyoole okhukalukha inyuma nibalanyolele shiosishiosi tawe.

Ewe obula liosiliosi mukano. Nalabaleshela nohomba abahelesie eshinyasio, shichilabo toto ni abamabii.

Ne bioosi bili mwikulu nende mushialo ni bia Nyasaye, aleshelanga wayenya ne ahelesinjia wayenya eshinyasio, ne Nyasaye ni Omulesheli muno, Owetsimbabaasi muno.

Enywe Abasuubila, mulalia riba tawe nimumetelakhwo hekulu hekulu, ne murie Nyasaye khomunyoole okhubura.

Ne rie omulilo kwarecheshelwa abakhayi.

Ne wulile Nyasaye nende Omurumwa wuwe kho munyoole okhuhelesibwa tsimbabaasi.

Ne yilushile obulesheli bwa Nyasaye wenyu Omulesi, nende omukunda kwomwikulu (Jannah) kwobubambalifu bwako ni likulu nende eshialo, kwarecheshelwa abaria Nyasaye.

Balia barusinjia omwandu nibenyala nende nibali mubutinyu, nende beyikalilanga liruma nende baleshelanga Abandu. Ne Nyasaye yachama abakholi bamalayi.

Balia nibakhola ashifuolo nohomba nibekholela obubii, betsulila Nyasaye mana basabe eshileshelo khutsimbi tsiabu. Ne ni wina uleshelanga tsimbi ulali Nyasaye? Ne shibatsilililanga okhukhola akabakhola nabo nibamanyile tawe.

Abo omurungo kwabu ni obulesheli okhurula khu Nyasaye wabu Omulesi, nende emikunda chomwikulu chiburangamwo emialo, balimenyamwo tsinyanga tsioosi, ne ni omulayi muno omurungo kwa abakholi bamalayi.

Imbeli wenyu chiamala okhubura emilukha eminji. Kho chende khushialo mulole indukho ya balia abakatsula.

Khuno nookhwinoosilia abandu, nende obulunjifu nende amachelo khubalia baria Nyasaye.

Ne mulateshele tawe, ne mulabeelela tawe. Toto enywe nenywe ba hekulu nikali mbu toto muba Abasuubili.

Obubii nibubanyoola, manye mbu toto abandu bandi abo boosi banyoolwa nende obubii shinga obo. Ne etso nitsinyanga tsia khukalukhanilinjia abandu, kho Nyasaye amanye Abasuubili, ne abukule mwinywe aberwa khunjila yiyie. Ne Nyasaye shiyachama abamabii tawe.

Ne khandi Nyasaye yoosie balia abasuubila ne asukune ehale Abakhayi.

Koo, muparanga mbu mulenjilasa mumukunda kwomwikulu Nyasaye nashili okhumanya abakhalabani mwinywe nende okhumanya abokhwifwila?

Ne enywe mwekombanga lifwa nimushili okhubukana nalio. Kholaano mumalile okhulilola nanyu nimuhenganga.

Ne Mohammad shiyali halali Omurumwa butswa, toto Abarumwa babura imbeli wuwe. Koo, nafwa nohomba niyerwa, mulafutara mukalukhe inyuma? Ne ufutara yakalukha inyuma, oyo shakholakhwo shiosishiosi Nyasaye tawe, ne Nyasaye alarunga (obulayi) bamukhupilanga orio.

Ne omundu shiyakhafwasa tawe halali khubuchami bwa Nyasaye, shingala yahandichilwa. Ne owenya omurungo kwokhushialo, khwitsa okhumuwa khukwo. Ne owenya omurungo kwomwikulu, khwitsa okhumuwa khukwo. Ne khularunga (obulayi) balia bakhupanga orio.

Ne ni Abarumwa benga ba Abasuubili abaanji bakholanga shichila Nyasaye balwaana halala ninabo, ne shibakhola oburi khukabanyoola khunjila ya Nyasaye tawe, ne shibateshelekhana tawe, ne shibatofula tawe. Ne Nyasaye yachama abefwilanga.

Ne shikali amakhuwa kabu halali okhuboola sa mbu, ‘’Nyasaye wefu Omulesi, khuleshele ebionono biefu, nende okhubura eshichelo khwefu mumakhuwa kefu, ne tinyisia ebilenje biefu, ne okhuhabine khushile omukanda kwa Abakhayi."

Mana Nyasaye nabahelesia omurungo omulayi kwokhushialo nende omurungo omulayi kwomwikulu, ne Nyasaye yachama abakholanga amalayi.

Enywe abasuubila, nimuloonda khu balia abakhaya, betsa okhubakalusia inyuma, ne mwitsa okhuba mubasikha.

Halali Nyasaye niye omulindi wenyu, naye niye omukhoonyi omulayi muno.

Khwitsa okhura obuyendi obunji mumioyo chia abakhayi, shingala batsokasia Nyasaye nende abayalarumilakho eshifune tawe, ne wokhumenya wabu aliba mumulilo, ne ni wokhumenya ambii muno khubakholi ba amabii.

Ne Nyasaye yabakholela toto akayabalaka shingala mwabeeranga khubuchami bubwe, okhula shingala mwatoratora mana nimusoolana khulikhuwa elo, mana nimukhaya okhutila amalako olunyuma lwa Nyasaye okhubechesia eshiamwachama. Baliwo mwinywe abenyanga eshialo, ne baliwo mwinywe abenyanga mwikulu. Mana nabakabukhasia enywe ehale ninabo okhubatema. Naye toto yamala okhubaleshela enywe, ne Nyasaye niwetsimbabaasi muno khubasuubili.

Olwa mwelukhanga tsimbilo nimulawulila yesiyesi tawe, ne Omurumwa nabalanganga nali inyuma wenyu. Mana Nyasaye nabawa obusiro khubusiro, khomulabeelela khukababurire tawe nohomba khukabanyoolele tawe. Ne Nyasaye amanyile muno koosi kamukholanga.

Mana nabarerera obwihotselefu olunyuma lwa obutinyu obo, tsindolo tsiatila omukanda mulala mwinywe, ne omukanda kundi mwinywe emioyo chiabu chiabakanakania okhula baparira Nyasaye amaparo kalali katoto, amaparo keshisilu, nibaboola mbu, “Koo, mana khulikho nende shiosishiosi mulikhuwa lino?” Boola mbu, "Amakhuwa koosi nika Nyasaye." Bafisanga mumioyo chiabu kabalakhuboolelanga tawe. Baboolanga mbu, "Khubetsanga mbu khuli nende shiosishiosi mulikhuwa lino, sikhwakhererwe ano tawe." Boola mbu, “Kata mubetsanga mutsinzu tsienyu, abahandichilwa okhufwa bakharulile batsia habundu wabu wabahandichilwa okhufwila bafwilao.” Kano ni okhubeela Nyasaye ateme kali mubilifu bienyu, ne yosie kali mumioyo chienyu. Ne Nyasaye amanyile muno kali mubilifu.

Toto balia bakalukha inyuma inyanga yemikanda chibili chiabukanana, Shetani niye owabareresia khutsimbii tsiabakhola. Toto Nyasaye yamala okhubaleshela. Toto Nyasaye niwobulesheli muno, Omwihotselefu muno.

Enywe abasuubila, mulaba shinga balia bakhaya mana nibaboola khubashiabwe ngala basamula khushialo nohomba shingala batsia mwiye, “Babetsanga hano ninaafu, shibakhafwile tawe, ne shibakhererwe tawe." Kho Nyasaye akhole ako okhuba eshibeela mumioyo chiabu. Ne Nyasaye niye welesinjia obulamu, ne niye ufwisinjia. Ne Nyasaye alolanga muno kamukholanga.

Ne nimwirwa khunjila ya Nyasaye nohomba nimufwa, toto obulesheli nende tsimbabaasi tsirulanga khu Nyasaye tsishila kalia kabakhung’asinjia.

Ne nimufwa nohomba nimwirwa, ni ewa Nyasaye sa ni wamulikhung'asibwa.

Ne nikhulwa tsimbabaasi tsirulanga khu Nyasaye nitsio tsichila noba omwihotselefu khubo. Ne obetsanga omululu, womwoyo omumu, bakhakhwilushe. Khomana baleshele, ne obasabile eshileshelo, ne sanjilana ninabo mumakhuwa. Ne nomala wabusia, wisiche Nyasaye. Toto Nyasaye yachama Abandu bamwisikanga.

Ne Nyasaye nabahabina, abulao wakhabashila. Ne nabasukuna, ni wina wuundi ulaliye wakhabahabina? Ne Nyasaye butswa niwabasuubili besiche.

Ne shikanyalikhana khumurumwa yesiyesi okhukhoba tawe. Ne ulia ukhoba, alitsa nende shiayakhoba inyanga ya Indukho, mana buli omundu alirungwa kayakhola, nabo shibalikholelwa obubii tawe.

Koo! Ulia waloonda kachamisia Nyasaye ali shinga ulia wakhoyekhana liruma lia Nyasaye, ne eshimenyo shiaye nimumulilo? Ne awo ni habundu abii muno wokhukalukha.

Abo bali nende tsingasi tsikabukhane, ne Nyasaye alolanga muno akabakholanga.

Toto Nyasaye yakholela Abasuubili obulayi obukhongo, olwa yabarumila Omurumwa okhurula mubo, owubasomelanga tsinyaali tsitsie, ne owubatswenulanga, ne abechesinjia Eshitabu nende amachesi kata nikali mbu inyuma awo bali mubukori bwa habulafu.

Enywe olwakabanyoola amasila, amasila aka enywe mwabahelesia okhuula khabili shinga ako, muboola mbu, "Karulile hena kano?" Boola mbu, “Ako karulile khwinywe abeene.” Toto Nyasaye ni Omunyali muno wa buli eshindu.

Amasila kabanyoola olwa emikanda chibili chiabukanana (khuliyie) kali khubuchami bwa Nyasaye, kho anyoole okhumanya Abasuubili.

Ne kho anyoole okhumanya abeshikhabili, nibaboolelwa mbu, “Itse mulwaane khunjila ya Nyasaye nohomba muliinde.” Nibaboola mbu, “Khumanyanga mbu ni okhulwana, toto shikhwakhabalondelekhwo tawe.” Abo inyanga eyo bali ahambi muno nende obukhayi okhushila obusuubili, baboolanga neminwa chiabu kalali mumioyo chiabu tawe, ne Nyasaye amanyile muno akabafisanga.

Abo nibo baboolela Abana babu, ne abeene nibekhala, mbu, “Bakhuwulilanga, shibakhererwe tawe.” Boola mbu, “Kheyikalilekhwo lifwa okhubeetsela enywe, toto nimuli mbu muboolanga abwene.”

Mulakhaparakhwo mbu balia bererwe khunjila ya Nyasaye mbu ni abafu tawe. Halali bo ni abalamu, banyoolanga omukabo kwabu ewa Nyasaye wabu Omulesi.

Basangalilanga aka Nyasaye yabahelesia khu tsimbabaasi tsitsie, ne bekhoyelanga balia bashiri okhuba halala ninabo abali inyuma wabu, mbu shibalaba nobuyendi ne shibalabeelela tawe.

Bekhoyelanga obwokholo okhurula khu Nyasaye nende tsimbabaasi tsitsie. Ne toto Nyasaye shakosinjia omurungo kwa abasuubili tawe.

Balia bafuchilila Nyasaye nende Omurumwa wuwe, olwa bali nibanyolelwe nende tsinguma. Balia bakhola amalayi mubo mana nibaria, baliba nende omurungo omukhongo.

Balia baboolelwa nende Abandu mbu, “Abandu babakhung’anile, kho mubarie!” Ako nikabameta obusuubili, nibaboola mbu, “Nyasaye akhuyela, naye niye omulayi muno wokhwisikwa.”

Kho mana nibakalukha nende obwokholo nende tsimbabaasi tsia Nyasaye, libi liosiliosi shiliabanyolakhwo tawe, ne nibaloonda ka Nyasaye yachama. Ne Nyasaye niwa obulayi obukhongo.

Toto oyo ni Shetani arisinjia abetsa baye, kho mulamuria tawe, murie esie nikali mbu muli Abasuubili.

Ne balia belushilanga mubukhayi balakhuyendia tawe. Toto abo shibaliwumisia Nyasaye khushiosishiosi tawe. Nyasaye yenyanga mbu alababishilakhwo shiosishiosi mwikulu tawe. Ne baliba nende eshinyasio eshilulu.

Toto balia bakula obukhayi khubusuubili, shibalawumisia shiosishiosi Nyasaye tawe, ne bali nende eshinyasio eshilulu.

Abakhayi balakhaparakho mbu okhubahelesia ebise khwakhubahelesinjia khuno nobulayi khubo tawe. Toto khubametanga ebise khobamete tsimbii, ne baliba nende eshinyasio shia okhututuyia.

Nyasaye shiyali wokhulekha Abasuubili muka enywe mulikho ako tawe okhuula yawukhasie ababii nende abalayi. Ne Nyasaye shiyali wokhubechesia kefisa tawe halali Nyasaye yawulanga mubarumwa bebe wayenya. Kho, suubile Nyasaye nende Abarumwa bebe. Ne nimusuubila mana mwaria Nyasaye, mulaba nende omurungo omukhongo.

Ne balakhaparakhwo balia bemananga bia Nyasaye yabawa khu tsimbabaasi tsitsie mbu bali obulayi tawe. Shinendio tawe. Ebio ni obubii khubo. Baliboywa halala nende biabemananga inyanga ya Indukho. Ne obuchelami bwa bili mwikulu nende khushialo ni bwa Nyasaye. Ne Nyasaye amanyile muno akamukholanga.

Toto Nyasaye awulile likhuwa lia balia baboola mbu, “Nyasaye toto ni omumanani nafu khuli abayinda.” Khulahandika akababoola nende okhwira khwabu Abarumwa munjila ilali yatoto tawe. Ne khulibaboolela inyanga ya Indukho mbu, “Pile eshinyasio shiokhuyisia.

Kano nishichila akemikhono chenyu chiaranjilisia, ne mbu toto Nyasaye shali wokhukholela obubii abandu tawe."

Balia baboola mbu, “Nyasaye yakhulaka efwe mbu khulasuubila Omurumwa yesiyesi tawe okhuula akhurusilie eshihanwa (isolo) shisambwe nende omulilo.” Baboolele mbu, “Abarumwa babetsela nende ebifune bia habulafu nende akamurebanga kano. Kho shichila shina nimubera toto nimuba nimuboolanga obulaamba?”

Ne nibakhukatsula, bamala okhukatsulwa Abarumwa bandi imbeli wuwo, abetsa nende ebifune bilolekha nende Ebitabu bia amachesi, nende Eshitabu shiobulafu.

Buli omundu alipila lifwa. Ne toto mulihebwa omurungo kwenyu inyanga ya Indukho. Kho ulia ulisitibwa ehale nomulilo, mana yenjisibwe mumukunda kwomwikulu, oyo toto aliba aburire. Ne obulamu bwokhushialo shineshindu tawe halali okhwisangasia khwokhukatia sa.

Ne toto mwitsa okhutemwa mumiandu chienyu nende mwinywe abeene. Ne khandi toto mulawulila kabasinyisia amanji okhurulana nende Abandu bahebwa Eshitabu imbeli wenyu, nende Abatsokaasi. Ne ni mwifwila mana mwaria Nyasaye, toto ako ni amakhuwa amalayi muno kokhukhola.

Ne olwa Nyasaye yabukula indache isiro ya balia bahebwa Eshitabu mbu, “Toto mulashiinoosilia abandu, ne shimulashifisa tawe.” Halali bashisukuna inyuma wemikongo chiabu ne nibakula khushio obukusi obufwolwa, kho neshibi muno eshiabakula esho.

Olakhabaparirakhwo balia abasangalilanga akabakholele, ne bachamanga mbu balaywe khukabalakholele, olakhabaparirakhwo mbu balihonokokha ehale nende eshinyasio tawe. Ne baliba nende eshinyasio eshilulu.

Ne obwami bwomwikulu nende mushialo nibwa Nyasaye, ne Nyasaye nomunyali muno wabuli eshindu.

Toto mukhulongwa khwelikulu nende eshialo, nende okhukalukhana khweshilo nende eshitere, khulimo nende ebimanyisio khubandu ba amachesi.

Abetsulilanga Nyasaye nibeemele, nende nibekhaale nende nibakonele tsimbafu tsiabu. Ne baparanga muno khukhulongwa khwelikulu nende eshialo nibaboola mbu, “Nyasaye wefu Omulesi, siwalonga bino eshikhaya tawe. Obutswenufu nobubwo, kho khulinde okhurulana nende eshinyasio shiomulilo.

Nyasaye wefu Omulesi, toto ulia wora mumulilo olaba omuhele eshifimbwa murwe. Ne balia bakhola obubii shibaliba nabakhoonyi tawe.

Nyasaye wefu Omulesi, toto efwe khuwulile omulanji nalanganga khubusuubili mbu, 'Suubile Nyasaye wenyu Omulesi', mana nikhusuubila. Kho khuleshele tsimbi tsiefu nende ebionono biefu, ne okhufwisie halala nende Abandu abalayi.

Nyasaye wefu Omulesi, khuhelesie akawakhulaka khubarumwa boobo, ne olakhuhelesia eshifimbwa murwe inyanga ya Indukho tawe. Toto ewe shofunakanga indache tawe."

Nyasaye wabu Omulesi nafuchilila amasayo kabu, nakalusia mbu, “Toto esie shengosinjia emilimo chia omukholi yesiyesi mwinywe tawe, abe omusatsa nohomba omukhasi, enywe murulana abeene khubeene. Kho, balia bawuya nende balia baloondwa mumatala kabu, mana nibasandibwa khunjila yanje, mana nibalwana, mana niberwa, toto esie nditsa okhubaleshela ebionono biabu, ne toto nditsa okhubenjisia mumikunda chomwikulu chia emialo chiburangamwo. Oko niko omurungo okhurula khu Nyasaye. Ne ewa Nyasaye chiliyo emirungo emilayi muno."

Okhuyiyayiya khwabakhayi khushialo khulatema okhukhukatia tawe.

Okho ni okhwisangasia khutiti, mana eshimenyo shiabu shiliba mumulilo, ne ni abundu abii muno wokhuhulushila.

Halali balia baria Nyasaye wabu Omulesi balinyoola emikunda chomwikulu chiburangamwo emialo, balimenyamwo tsinyanga tsioosi. (Obo buliba) Obucheni bwokhubukanilwa okhurula khu Nyasaye. Ne ebili ewa Nyasaye ni ebilayi khubandu abalayi.

Toto mubandu bahebwa Eshitabu balimwo basuubilanga Nyasaye nende kalia keshibwa khwinywe nende kalia kabeshilibwa. Behotselesilinjia Nyasaye, ne shibakusinjia tsinyaali tsia Nyasaye khubukusi obufwoola tawe. Bali nende omurungo kwabu khu Nyasaye wabu Omulesi. Toto Nyasaye ni Omwangu wokhubalila ebilonje amakhuwa kabiakhola.

Enywe Abasuubila, mwisumilisie, ne mwifwile muno (khubasuku), ne mube meso, ne rie Nyasaye khomunyoole okhubura.

Enywe abandu, rie Nyasaye wenyu Omulesi, owabaloonga okhurula khumundu mulala. Ne naloonga okhurula khumundu oyo Omukhasi wuwe, mana natsukha okhurulana nende babili abo abasatsa nende abakhasi abaanji. Ne rie Nyasaye owamusabananga khuye, ne (mulinge) abekho. Toto Nyasaye ni Omulindi wenyu.

Ne helesie abana abafwilwa omwandu kwabu, ne mulakalukhasia eshibii khushilayi tawe. Ne mulalia omwandu kwabu halala nende omwandu kwenyu tawe. Toto koosi ako ni obwononi obukhongo.

Ne nimurire mbu shimulakhola obuleng’aafu khubana abafilwa tawe, (mana khandi rie okhukhaya okhukholela obuleng’aafu abakhasi), teshie abamuchamisiye mubakhasi; babilii, nohomba bataru, nohomba bane. Ne nimuria mbu shimunyala okhukhola obuleng’aafu tawe, teshie mulala butswa, nohomba balia bemikhono chienyu emisatsa chitilile. Eyo niyo injila ya hambi muno khwinywe ichila mube hale nende okhukhaya okhukhola obufuru.

Ne helesie abakhasi omurungo kwabu kuli mbu ni eshihanwa. Ne nibabahelesia eshindu mumurungo kwabu oko mubuchami bwabu, awo lie eshindu eshio mubusangafu, mumwikhoyo.

Ne mulahelesia abasilu omwandu kwenyu kwa Nyasaye amukholele okhuba injila yenyu yokhwikhonya tawe. Kho balisie mana bafwasie obulayi butswa, ne boole ninabo amakhuwa amalayi.

Ne teeme abana abafwilwa (nende saabwe) okhuula shinga boola olubaka lwokhuteshia. Ne nimubanyoola mbu nabachesi, bahelesie omwandu kwabu. Ne mulakulia mayuyukhana nohomba mayungubala tawe; mbu shichila betsa okhuba abandu abakhongo. Ne ulia uli omuyinda, yeyikalile okhulia omwandu oko. Ne omumanani alie khubulayi. Ne nimubahelesia omwandu kwabu, reo abaloli. Ne Nyasaye ayela okhuba omubali omulayi muno.

Abasatsa bali nende omukabo khushia abebusi baleshele nende abekho aba hambi. Ne abakhasi bosi bali nende omukabo khushia abebusi baleshele nende abekho aba hambi. Shibe shititi nohomba eshiinji, omukabo kwalachilwa.

Ne ebise biokhukaba, abekho nibabao, nende abafwilwa, nende abamanani, bahelesie khumwandu kwokhuchelama oko. Ne baboolele amakhuwa amalayi.

Ne barie balia (abali abemelisi okhukholela abana abafwila obubii mbu) kakhabanga bo balekha inyuma wabu olwibulo oluteshele, baluyendela. Kho mana bo barie Nyasaye ne baboole amakhuwa kali habwene.

Toto balia balitsanga omwandu kwa abana abafwilwa khububii; toto abo balitsanga mutsinda tsiabu omulilo, ne baliinjila mumulilo kwakhanga muno.

Nyasaye abachelelanga okhulondokhana nende abana benyu. Omukabo okwa omwana omusiani kulishinga omukabo kwa abana beshikhana babili. Ne abakhasi nibali abanji bababili, betsa okhunyoola tsitsulutsi tsibili mushia ufwile aleshele. Ne nali omwana omukhana mulala, awo omukabo kwaye ni inusu. Ne abebusi baye babili, buli mulala khubo anyoole isudusi ya shia aleshele, nikali mbu ali nende abana. Nali mbu abula abana ne abebusi baye babili nibo abamuchelama, awo mama wuwe alanyoola itsulutsi ndala. Ne nali nende abana babu, awo nyinamwana alanyoola isudusi. Kano nibamalile okhurusiamwo eshiayalaka nohomba likofi. Bapapa benyu nende abana benyu (bamwebula), enywe mukorerwe ni wina mubo owuli ahambi muno ninenyu khubukhoonyi. Esho ni eshilachilo okhurula khu Nyasaye. Toto Nyasaye ni Omumanyi muno, Owamachesi muno.

Ne omukabo kwenyu ni inusu khushiabakhasi benyu baleshele, nikali mbu babula omwana. Ne nibali nende omwana, awo omukabo kwenyu ni irobo khushiabaleshele, nibakhamala okhurusiamwo shiayalaka nohomba likofi. Ne abakhasi benyu balanyoola irobo khushiamuleshele nimulali nende omwana tawe. Ne nimuli nende omwana, betsa okhunyoola itsumuni khushiamuleshele, nibakhamala okhurusiamo shiamwalaka nohomba likofi. Ne nikali mbu omusatsa nohomba omukhasi uchelamungwa abula omwana nohomba abebusi, ne ali nende omwana wabu weshisatsa nohomba weshikhasi, awo buli shiamulala alanyoola isudusi. Ne nibali abanji okhushila awo, betsa okhukabana ithuluthi, nibakharusiamwo akayalaka nohomba likofi elilaumisia tawe. Kano ni amachelo karula khu Nyasaye. Ne Nyasaye ni Omumanyi muno, Omwihotselefu po.

Etso nitsinzakho tsia Nyasaye. Ne ulia uwulila Nyasaye nende Omurumwa wuwe, alamwinjisia mumikunda chomwikulu chiburangamwo emialo, balimenyamwo tsinyanga tsioosi. Ne okho nikho okhubura okhukhongo.

Ne ulia ulawulila Nyasaye nende Omurumwa wuwe tawe, mana naruuma tsinzakho tsiaye (Nyasaye), alimwinjisia mumulilo amenyemwo tsinyanga tsioosi, ne alinyoola eshinyasio shiokhututuyia.

Ne balia abakholanga eshifwolo mubakhasi benyu, barerereo abaloli bane mwinywe. Kho, nibakhola obuloli khubo, awo mubekalile mutsinzu tsiabu okhula shinga lifwa libabukula nohomba Nyasaye aberere injila yindi.

Ne babili mwinywe nibakhola (akeshifwolo) ako, mubasandie (mubahe eshinyasio). Ne nibekanila mana baba abalayi, awo lekhane ninabo. Toto Nyasaye ni Oweshileshelo muno, Owetsimbabaasi po.

Toto eshileshelo shifuchililwa nende Nyasaye ni shiabalia bakholanga amabii mubusilu, mana bekanile nibasaba eshileshelo mulwangu. Abo nibo ba Nyasaye afuchililanga okhusaba eshileshelo khwabu. Ne Nyasaye ni Omumanyi muno, Owamachesi po.

Ne babula eshileshelo balia bakholanga amabii, okhula mulala wabu niyolelwa nende lifwa, mana aboole mbu, “Toto esie lano ndikanile.” Nohomba balia bafwitsanga nibali abakhayi. Abo khwabakasilia eshinyasio eshilulu.

Enywe abasuubila, shimuchamilwa okhuchelama (okhukalusia) abakhasi nende amaani tawe. Ne mulabasandia mbu khomubukule khubia mwabahelesia tawe, halali nibakhola obubii bwa habulafu. Ne mwikhale ninabo khubulayi. Ne nikali mbu bamusinya, munyala okhukhaya eshindu ne Nyasaye aramwo tsikhabi tsinyinji.

Ne nimwenya okhukalukhasia omukhasi abundu womukhasi wundi, ne mulala khubo mwamuhelesia omwandu omunji, mulabukulakhwo khumwandu oko shiosishiosi tawe. Koo, mukubukulanga khubwononi nende obubii buli habulafu.

Ne mwakhakubukula murie nimumalile okhwinjilana enywe khwenywe, ne abakhasi abo babukula khwinywe indakano isiro?

Ne mulateshia abakhasi babasenywe bateshia tawe, halali khu kalia kamala okhubura. Toto esho ni eshifwolo, nende eshisinyo, nende injila imbii.

Mukanibwa okhuteshia banyinenywe, nende abana benyu beshikhana, nende abakhana benyu, nende basenje benyu, nende abakhana babu mama wenyu, nende omwana weshikhana womusiani wenyu, nende omwana weshikhana womukhana wenyu, nende bamama benyu babanunia, nende abakhana benyu khukhununa, nende bamama ba abakhasi benyu, nende abana beshikhana babakhasi benyu, abali hasi wobulindi bwenyu, abebulwa nende abakhasi benyu bamwamala okhubenjilila. Ne nimushili okhubenjilila, awo obubii bubulao khwinywe tawe. Ne mukanibwa khandi abakhasi babaana benyu abarula khutsingongofuma tsienyu. Nende okhuteshia halala abakhana bomunzu ndala halali khu kalia kamala okhubura. Toto Nyasaye niwobulesheli muno, Owetsimbabaasi po.

Nende abakhasi babasatsa, halali balia abali mumikhono chienyu chieshilunji (abarumwa). Ako niko amalako ka Nyasaye khwinywe. Ne musubulilwa balali abo, mukhaabe okhubateshia nende omwandu kwenyu okhubula okhukhola obwilaasi. Kho ngala muba ninabo khukhubateshia, bahelesie omurungo kwabu shingala kwahandikwa. Ne obubii bubulao khwinywe khushia murechelesaniakhwo nimumalile okhumala kalia kalachilwa. Toto Nyasaye ni Omumanyi muno, Owamachesi muno.

Ne ulanyala mwinywe okhunyoola omwandu kwokhuteshilia omukhasi omulekhule,omusuubili tawe, ateshie okhurula khubarumwa abasuubili, abali mumukhono kukwe omusatsa. Ne Nyasaye niye umanyile muno obusuubili bwabu, ne enywe murulana abene khubene. Kho mubateshie khumunwa kwa abandu babu, ne mubahelesie omurungo kwabu khubulayi; abakhasi abalayi balali abatamba nohomba abatseche tawe. Ne nibatekha mana bakhola eshifwolo, eshinyasio shiabu shilaba inusu yabakhasi abangwana (balali Abarumwa). Kano ni khu ulia uritsanga okhukhola eshifwolo shiobuyeyi. Ne nimwifwila, nobulayi kwinywe, ne Nyasaye niwokhuleshela muno, wetsimbabaasi po.

Nyasaye yenyanga okhubenoosilia nende okhubalunjisia khu tsinjila tsya balia bali imbeli wenyu, mana abaleshele, ne Nyasaye ni Omumanyi muno, Owamachesi po.

Ne Nyasaye yenyanga okhubaleshela, ne balia baloondanga obwikombi bwemioyo chiabu, benyanga mbu mwikote okhwikota okhukhongo.

Nyasaye yenyanga okhubaanguyisilia obusiro. Ne omundu yaloongwa omuteshele.

Enywe Abasuubili, mulalitsana emiandu chienyu khububii tawe, halali nili inganga mukhufuchilisania abeene khu beene. Ne muleyira tawe. Toto Nyasaye niwokhubabeela tsimbabaasi muno.

Ne ukhola ario khubusuku nende obubii, oyo khulimwinjisia mumulilo. Ne elo ni eliangu muno khu Nyasaye.

Ne nimulekhana nende amakhongo kamukanibungwa, khwitsa okhubaleshela ebionono bienyu ebititi, ne khulabenjisia habundu woluyali.

Ne mulekoomba shia Nyasaye yahelesia abandi mwinywe okhushila abandi tawe. Abasatsa bali nende omukabo khubiabachuma, ne abakhasi bosi bali nende omukabo khubiabachuma, ne sabe Nyasaye khumikabo chichie. Toto Nyasaye ni Omumanyi muno wa buli eshindu.

Ne buli shiamulala khwamurereraho abamuchelema mushia abebusi babili baleshele nende abekho. Ne balia bamuli nabo indakano, bahelesie omukabo kwabu. Toto Nyasaye ni Omuloli muno wabuli eshindu.

Abasatsa nibo abemeleli batoto babakhasi, khulwe emikabo chia Nyasaye yahelesia abandi mubo okhushila abandi, nende khumiandu chiabu chiabahana. Kho abakhasi abalayi, nibalia abawulilanga, abelindanga kata mubwifisi, shichila Nyasaye yalomesia mbu beliinde. Ne balia bamuritsanga okhukhaya okhubawulila, mubachelele, ne mubawuye khubulili, ne mubakhupe. Ne nibabawulila, mulabakhabila injila yokhubasinyisia eshikhayasa tawe. Toto Nyasaye niye owuli hekulu, ne niye omukhongo.

Ne nimuria mbu omulembe kubula hakari wabu (omusatsa nende omukhasi), awo rume omwauli okhurula namusatsa nende omwawuli wundi okhurula ebuleka wanamukhasi. Nibenya omulembe, Nyasaye alabachamila. Toto Nyasaye ni omumanyi muno, uli nende amacheni koosi.

Ne laame Nyasaye ne mulamusasiakhwo nende shiosishiosi tawe. Ne kholele abebusi benyu amalayi, nende abekho, nende abana abafwilwa, nende abamanani, nende omumenyanwa owa hambi, nende omumenyanwa owahale, nende owomumbafu, nende omuburinjila, nende abali mumikhono chienyu emisatsa. Toto Nyasaye shiyachama abandu abafuru abokhwilola tawe.

Balia bakholanga obwimani, ne balomesinjia abandu okhukhola obwimani, ne bafisanga amalayi ka Nyasaye yabahelesia. Ne khwarecheshela abakhayi eshinyasio shiokhututuyia.

Ne balia barusinjia omwandu kwabu khulwokhulolesia Abandu, ne shibasuubilanga Nyasaye nohomba inyanga ya Indukho tawe. Ne ulia wa Shetani aba omwitsa wuwe, aba ali nende omwitsa omubii muno.

Ne shina shiakhababelele eshibii basuubilanga Nyasaye nende inyanga ya Indukho, mana bahaane mufia Nyasaye abakabile? Ne Nyasaye abamanyile obulayi muno.

Toto Nyasaye shakholelanga obubii omundu yesiyesi kata khubusiro bweyindonyande ndala tawe. Ne nilili likhuwa lilayi, Nyasaye alimetanga. Ne ahananga omurungo omukhongo okhurula khuye.

Kho kaliba karie olwa khulirerera buli omukanda omuloli, mana khukhurere ewe okhuba omuloli khu bano?

Inyanga eyo, balia bakhaya mana nibalawulila Omurumwa tawe, balikomba mbu liloba liyelasibwe hekulu wabu. Ne shibalifisa Nyasaye likhuwa liosi liosi tawe.

Enywe abasuubila, mulasita ahambi nende iswala nimumeelele tawe, okhula mumanye shamuboolanga. Nende nimuli nende Janaba tawe, halali nimuli khuluchendo - okhula mwisinje. Ne nimuli abalwale, nohomba khuluchendo, nohomba mulala wenyu narula muchoo, nohomba nimwinjilane nende abakhasi benyu mana mukhaywe okhunyoola amatsi, awo mwikhonyele liloba lilayi; bashe obweni bwenyu nende emikhono chienyu. Toto Nyasaye ni Wokhubeela muno, Owobulesheli po.

Sholola balia abahebwa ebuleka mushitabu, bakulanga obukori, ne benyanga mbu enywe mwesi mukore injila.

Ne Nyasaye yamanya obulayi muno abasuku benyu. Ne Nyasaye ayela muno okhuba omulindi, ne Nyasaye ayela muno okhubahabina.

Mubayahudi balimwo bakalukhaninjia amakhuwa okhukarusia habundu wako, ne baboolanga mbu, “Khuwulile mana khukhayile. Ne wulila obularechelesia tawe.” Ne baboolanga mbu, “Raai’na” khulwokhukalukhania tsinimi tsiabu khobanyeke idini. Ne baboolanga mbu, “Khuwulile mana nikhufuchilila. Ne wulila, mana okhuhengekhwo" bwakhabele obulayi khubo nende habwene muno. Halali Nyasaye yabatsuba khulwobukhayi bwabu, kho shibasuubilanga tawe halali batiti sa mubo.

Enywe abahebwa Eshitabu, suubile mukalia akakhweshia kafuchilisaninjia nende akamulininako, nikhushili okhukalukhania obweni okhubura namukongo wabo, nohomba khubatsube shinga khwatsuba Abandu be Isabato (Jumamosi). Ne likhuwa lia Nyasaye okhula likholeshe.

Toto Nyasaye shaleshelanga okhutsokaasibwa tawe, ne aleshelanga akali hasi wa elo khu ulia wayenya. Ne ulia utsokaasia Nyasaye, toto awo yalaba achishile tsimbii tsikhongo muno.

Shololangakho balia bekholanga mbu nabatswenufu tawe? Halali Nyasaye atswenulanga owayenya. Ne shibalikholelwa obubii shinga oluusi lwa hakari wa olufwa lwa itende tawe.

Henga shinga bachishilanga Nyasaye obubeyi. Ne kano kayela okhuba eshionono shili habulafu.

Shololangakho balia bahebwa ebuleka weshitabu tawe? Basuubilanga mubifwanani nende Shetani! Ne baboolelanga abakhayi mbu, “Abo ni abalunjifu muno okhushila balia abasuubila.”

Abo nibo ba Nyasaye yatsuba. Ne wa Nyasaye atsuba, sholimunyoolela owokhumuhabina tawe.

Nohomba bali nende ebuleka mubwami? Awo shibakhawele abandu shiosishiosi kata nishili shinga akhatikho khabetsanga khulufwa lwa itende tawe.

Nohomba bakholelanga Abandu ishinda khulwa emikabo chia Nyasaye yabahelesia? Ne mana khwahelesia olwibulo lwa Ibrahim Eshitabu nende amachesi, ne nikhubahelesia oburuchi obukhongo.

Mana baliwo mubo abashisuubila, ne baliwo balia abashikhaya. Ne Jahanam ibayela okhuba omulilo kwokhubasamba.

Toto balia bakhaya ebimanyisio biefu khulibenjisia mumulilo. Olwa buli amakhoba kaabu kaliyitsanga, khulibakalusiliawo likhoba lindi kho bapile eshinyasio esho. Toto Nyasaye niwa amaani khandi Owamachesi muno.

Ne balia basuubila mana nibakhola amalayi, khulibenjisia mumikunda chomwikulu chiburangamwo emialo, balimenyamwo tsinyanga tsioosi. Omo baliba nende abakhasi abatswenulwa, ne khulibenjisia mubiinikha ebilayi muno.

Toto Nyasaye abalomesia mbu mukalusie obucheleshe khubeene bwo. Ne nimubusia eshiina hakari wa abandu, mubusie mubuleeng’afu. Toto ka Nyasaye abalakanga kano ni amalayi muno. Toto Nyasaye niye Omuwulili po, Omuloli muno.

Enywe abasuubila, wulile Nyasaye, ne wulile Omurumwa nende balia bail nende obwemeli mwinywe. Ne nimusolana khulikhuwa liosiliosi, mulikalusie khu Nyasaye nende khumurumwa toto nimuli mbu musuubilanga Nyasaye nende inyanga ya Indukho. Obo nibo obulayi, ne niko kali nende okhumalilikha okhulayi.

Shololanga balia beshemulanga mbu basuubila kalia keshibwa khwiwe nende kalia keshibwa inyuma wuwo? Benyanga okhuyasilibwa khunjila yobukori, ne balomesibwa okhukakhaya. Ne Shetani yenyanga okhubakoselia ehale.

Ne nibaboolelwa mbu, “Itse khu kalia ka Nyasaye yeshia, nende khumurumwa,” olalola abeshikhabili bakhuswekhakhwo mubuyingani.

Kho mana kalaba karie olwa amasila kalabanyoola khulwa kalia kemikhono chiabu chiaranjilisia? Awo mana balakhwitsila nibetsuba khu Nyasaye nibaboola mbu, “Shikhwenya tawe halali obulayi nende okhuwulilisania.”

Abo nibo ba Nyasaye yamanya kali mumioyo chiabu, kho lekhana ninabo, mana obahelesie amachelo, ne obaboolele amakhuwa katila emioyo chiabu.

Ne shikhwaruma Omurumwa yesiyesi tawe halali awulilwe khubuchami bwa Nyasaye. Ne balia bekholela obubii bakhwitsilanga, mana basabe Nyasaye eshileshelo, ne Omurumwa yabasabila eshileshelo, awo toto bakhanyoolele Nyasaye niwokhufuchilila eshileshelo po, ne niwetsimbabaasi muno.

Ne tawe, nditsuba khu Nyasaye wuwo Omulesi, mbu shibalasuubila tawe okhula bakhukhole ewe okhuba owubabusilia eshina khukalia kabakabukhanangamwo, mana bakhaye okhulola obusiro mumioyo chiabu khu kalia kobusiyie, mana belekhulile Nyasaye muno.

Ne khubalomesinjia mbu, “Mwiyire nohomba wuye mutsingo tsienyu,” shibakhakholele bario tawe halali batiti butswa mubo. Ne bakholanga akabachelelungwa khuko, bwakhabeele obulayi khubo nende okhubakhola babe nende obusubili bwa amaani muno.

Ne awo khwakhabahelesiyie omurungo omukhongo okhurula khwifwe.

Ne khwakhabalunjisiye khunjila ingololofu.

Ne ulia uwulila Nyasaye nende Omurumwa wuwe, abo bali halala nende balia ba Nyasaye yeshilia emikabo mubarumwa nende abobwatoto, nende abaloli, nende abandu abalayi. Ne nobulayi buli burie okhuba halala nende abandu abo!

Echo nemikabo chia Nyasaye. Ne Nyasaye ni Omumanyi uyela.

Enywe abasuubila, be meso! Ne rule mumukanda nohomba rule mwesi halala.

Ne toto aliwo mwinywe owitonyinjia butswa inyuma. Ne nimunyoolwa namasila, naaboola mbu: “Toto Nyasaye yakholeele obulayi, khulwa shembele halala ninabo eyo tawe.”

Ne nimunyoolwa nemikabo chia Nyasaye, naaboola mbu - bili shinga obuyanzi nibulali hakari wenyu ninaye tawe -, “Abayie, emanyanga emba halala ninabo, ndabura okhubura okhukhongo.”

Kho mana bakhupane khunjila ya Nyasaye balia bakusinjia obulamu bwokhushialo khu bwamwikulu (Akhera). Ne ukhupana khunjila ya Nyasaye mana yerwe nohomba ashile, khwitsa okhumurunga omurungo omukhongo.

Muli murie wamulakhupananga khunjila ya Nyasaye nende yabalia baranjilwe tawe? Abasatsa nabakhasi, nende abana ababoolanga mbu, “Nyasaye wefu Omulesi, khurusie mulukongo luno olwa abandu balwo ni ababii, ne okhurerele Omuliindi okhurula khwiwe, ne okhuhelesie Omuhabini urulanga khwiwe.”

Balia abasuubila bakhupananga khunjila ya Nyasaye. Ne balia abakhaya bakhupananga khunjila yobukori, kho lwane nende abetsa ba Shetani. Toto obututi bwa Shetani nobuteshele.

Shoololanga balia baboolelwa mbu, “Yikalile emikhono chienyu, ne tile iswala ne rusie eshihanwa shia Izakaa.” Ne olwa balomesibwa okhupana, awo omukanda kundi mubo nikuria abandu shinga okhuria Nyasaye, nohomba okhuria okhukhongo muno. Mana nibaboola mbu, “Nyasaye wefu Omulesi, shichila shina nokhunichilisia okhupana? Manyanga wakhakhusitiliyekhwo imbeli khubise bititi butswa endi.” Boola mbu, “Omwikhoyo kwa khushialo nimututu butswa, ne mwikulu ni indayi muno khu ulia uria Nyasaye. Ne shimulikholelwa obubii kata obutiti shinga oluusi lwa hakari wa olufwa lwa itende tawe."

Wosiwosi wamuba, lifwa lilibanyoola, kata nimuli mutsinzu tsiolukoba. Ne lilayi nilibanyoola, nibaboola mbu, “Lino lirula khu Nyasaye.” Ne libii nilibanyoola, nibaboola mbu, “Lino lirula khwiwe.” Boola mbu, “Koosi karulananga nende Nyasaye.” Ne bali nende shina abandu bano kata shibali hambi nende okhumanya amakhuwa tawe!

Lilayi likhuulile, lirulana nende Nyasaye. Ne libii likhunyoola, lirulana nende ewe omwene. Nafu khwakhuruma khubandu obe Omurumwa. Ne Nyasaye ni Omuloli uyela.

Ulia uwulila Omurumwa, aba awuliile Nyasaye. Ne ulia ukalukhana, efwe shikhwakhuruma mbu obe Omulindi wabu tawe.

Ne baboolanga mbu, “Khuloondele.” Halali nibarula khwiwe, omukanda mulala mubo kututanga eshilo kalia akakabukhane nende kooboolanga. Ne Nyasaye yandikanga koosi ako akabatutanga eshilo. Kho baleshe ehale, ne wisiche Nyasaye. Ne Nyasaye niye Omwisikwa owuyela.

Koo, shibaretsangakhwo mubwongo Ikurani ino tawe? Ne ibetsenga mbu yarula khu ulali Nyasaye tawe, bakhanyolelemwo obwawukhani obunji.

Ne likhuwa niliboolela liomulembe nohomba liokhurisia, balitangasia. Ne baliyilanga khumurumwa nende khubalia bali nende obwemeli mubo, balia abalikhabanga obulayi mubo bakhalimanyile. Ne chikhayanga okhuba emikabo chia Nyasaye khwinywe nende tsimbabaasi tsitsie, mwakhalondele muno Shetani halali batiti butswa.

Kho khupana khunjila ya Nyasaye, ne shonichilisibwa tawe halali ewe omwene butswa. Ne helesia Abasuubili omwoyo. Khaundi Nyasaye yetsa okhwikalila emielo chia Abakhayi. Ne Nyasaye niye Omululu muno wokhukhuyana, Omululu muno weshinyasio.

Ulia ukhoonya obukhonyi obulayi, ali nende omukabo kukwe mu ako. Ne ulia ukhoonya obukhonyi obubii, yesi ali nende omukabo kukwe mu ako. Ne Nyasaye ni wobunyali, nende omumanyi wabuli eshindu.

Ne nimushesibwa amashesio kosikosi, kalusie khu amakalusio amalayi komulembe kashilakhwo ako, nohomba kalusie sa ako ako. Toto Nyasaye ni omubali muno wabuli eshindu.

Nyasaye, abulaho nyasaye wundi ulali Ye tawe. Toto alibakhung'aasia inyanga ya Indukho; elo libula obukanakani tawe. Ne ni wina uboolanga obwatoto muno okhushila Nyasaye?

Mubeele murie okhuba emikanda chibili khumakhuwa aka beshikhabili, ne Nyasaye yabakabukhania shichila akabakhola? Koo, mwenyanga okhulunjisia ulia owa Nyasaye yakosia? Ne wa Nyasaye yamala okhukosia, oyo shonyala okhumunyolela injila tawe.

Bekombanga mbu enywe mwakhakhayile shingalabo bakhaya, kho mube nashilala. Kho mulakholakho abalina mubo tawe, okhula bawuye khulwa injila ya Nyasaye. Ne nibakhaya, awo mubatile ne mubere wosiwosi wamubanyoola. Ne mulakhola mubo abalina nohomba abakhonyi benyu tawe.

Halali balia abatilana nende abandu bamuli nabo indache hakari wenyu, nohomba babetselanga ne ebilifu biabu bili nende obusiro okhupana ninenyu, nohomba okhupana nende abandu babu. Ne Nyasaye yenyanga, yakhabasaasiyekhwo bakhupana ninanyu. Kho nibabaawukhakho bakhaye okhupana ni nanyu, mana bamurebe omulembe, awo Nyasaye shabahelesia injila yokhupana ninabo tawe.

Mulanyoola abandi benyanga mbu banyoole omulembe khwinywe nende kwa abandu babu, buli nibakalusibwa khumatemo, nibakwamwo muno. Ne nibalalekhana ninanyu tawe, mana barera omulembe mana bekalile emikhono chiabu, batile mana mubere wosiwosi wamubanyoola. Ne khu abo, khwabahelesia enywe ebifune bili habulafu.

Ne shibili khumusuubili okhwira Omusubili wundi tawe, halali khukhwitsukhana. Ne ulia wira Omusuubili khukhwitsukhana, akhoyele anunule omurumwa Omusuubili, ne arusie omurungo kuhelesibwe abandu bebe, halali abandu be babaleshere shibe eshihanwa. Ne naali mbu ni omundu wabasuku benyu, naye ni omusuubili, awo ni okhununula omurumwa omusubili. Ne naali owa abandu bamuli ninabo indakano, awo omurungo kuhelesibwe abandu baye, ne omurumwa Omusubili anunulwe. Ne ulanyoola tawe, afunge saumu emiesi chibili malondokhana, shichila ni okhusaba obuleshi khu Nyasaye, ne Nyasaye ni Omumanyi muno, Owamachesi muno.

Ne ulia wira Omusuubili katong’ane, omurungo kukwe ni omulilo, alimenyamwo tsinyanga tsioosi. Ne Nyasaye yamusinyishila ne yamutsuba, ne yamurecheshela eshinyasio eshikhongo.

Enywe abasuubila, nimurula mwatsia khunjila ya Nyasaye, nonelesie mube nobwatoto. Ne mulaboolela ulia ubashesinjia mbu, “Ewe sholi omusuubili tawe,” khulwokhwenya okhunyoola obulayi bwobulamu bwokhushialo shino. Ne ewa Nyasaye khuli nende omwandu omunji. Endio nilwa mwali enywe khale, mana Nyasaye nabahelesia emikabo. Kho nonelesie obulayi. Toto Nyasaye ali nende obumanyi khukamukholanga.

Abasuubili bekhalanga butswa nibabula eshifune, nende balia balwananga khunjila ya Nyasaye nomwandu kwabu nende emioyo chiabu, shibali nashilala tawe. Nyasaye yaninia hekulu tsingasi balia balwananga nomwandu kwabu nende emioyo chiabu okhushila balia bekhalanga butswa. Kata kario, Nyasaye yabalaka boosi eshimenyo eshilayi. Halali Nyasaye yaninia hekulu khumurungo omukhongo balia balwananga okhushila balia bekhalanga butswa.

Ni tsingasi tsia hekulu tsirulanga khuye, nende obulesheli nende tsimbabaasi. Ne Nyasaye ni omunji wobulesheli, Owetsimbabaasi po.

Toto balia aba Abamalaika babafwisinjia nibekholeele obubii nibababila mbu, “Mwali murie?” Nabo baliboola mbu, “Khwali khwasilwa khushialo.” Baliboolelwa mbu, “Koo, eshialo shia Nyasaye sishiali nobwiyangu bwokhuwuyamwo tawe?” Kho abo eshimenyo shiabu ni mumulilo (Jahanam), nawo ni habundu ambii muno wokhukaluka.

Halali balia abali abateshele mu basatsa, nende abakhasi nende abana, ababula obunyali bwokhuwuya ne khandi shibanyala okhulunjikha obulayi khunjila yokhuwuya tawe.

Abo Nyasaye awundi alibaleshela. Ne Nyasaye ni omunji Wokhubeela, Owobulesheli muno.

Ne ulia uwuya khuunjila ya Nyasaye, alanyoola tsimbeka tsinyinji muno tsiokhwilushila, tsiyangufu. Ne ularula munzu mumwe nawuya khulwa Nyasaye nende Omurumwa wuwe, mana lifwa limunyoole, oyo amalile okhutinyisia omurungo kukwe khu Nyasaye. Ne Nyasaye niye Omulesheli po, Owetsimbabaasi muno.

Ni nimuli khuluchendo khushialo, shinobubi khwinywe nimwimbikitia amalaamo (iswala) tawe, nimuriire mbu abakhayi betsa okhubasandia. Toto abakhayi ni abasuku bahabulafu.

Ne noli ninabo (muliye) mana obalaamie iswala, omukanda mulala mubo kweme halala ninawe, ne batile ebimanulwa biabu. Ne nibamala okhusujuda khwabu, bakalushe inyuma wenyu (balinde), ne omukanda kundi kwitse, okubeele nikushili okhulaama, mana kulaame halala ninawe, nabo babe meso ne batile ebimanulwa biabu (mukari mweiswala). Abakhayi benya mbu mung’ang’ale ehale nende ebimanulwa bienyu nende ebindu bienyu kho babenjilile mapwoka lulala butswa. Ne shinobubii tawe khwinywe nimuba nimulola obusiro okhurulana nende ifula, nohomba amalwale okhurusiayo ebimanulwa bienyu. Ne be meso. Toto Nyasaye yarecheshela abakhayi eshinyasio shiokhututuyia.

Ne nimumala okhulaama, itsulile Nyasaye meema, nende nimwikhaale nende nimukonele. Ne nimunyoola omulembe, lumilile okhulaama iswala. Toto okhulaama iswala khubasuubili ni eshilachilo shiarebwao khubise bienyekhaane.

Ne mulatofula okhulondelela abandu (abasuku benyu) abo tawe. Ne nimuba nimutsunungwa, kata boosi batsunungwa shingala mutsunugwa. Nanyu mulindanga ewa Nyasaye akabalalindanga tawe. Ne Nyasaye niye Omumanyi po, Owamachesi muno.

Toto efwe khwakhwishilia Eshitabu shino khubwatoto, kho onyoole okhubusilia abandu eshina shingala Nyasaye yakhwechesia. Ne olaba wokhukomelela abakhobi tawe.

Ne saba Nyasaye eshileshelo. Toto Nyasaye ni wobulesheli po, Owetsimbabaasi muno.

Ne olakomelela balia abakholelanga emioyo chiabu obubii tawe. Toto Nyasaye shiyachama omundu omukhobi, owetsimbi tawe.

Balolanga tsisoni shichila abandu, ne shibalolanga tsisoni shichila Nyasaye tawe. Naye Nyasaye ali halala ninabo (nabo nibakorerwe) olwa batutanga eshilo amakhuwa kayalachama. Ne Nyasaye yaterera muno akabakholanga ako.

Mbao nenywe bano mubakomelelanga khubulamu bwokhushialo khuno. Kho, ne ni wina ulibakomelela khu Nyasaye inyanga ya Indukho, nohomba ni wina uliba omwisikwa wabu?

Ne ulia ukhola obubii nohomba yekholela obubii, mana asabe Nyasaye eshileshelo, alanyoola Nyasaye nali Omulesheli po, Owetsimbabaasi muno.

Ne ulia ukhola amabii, aba akakholanga khulwa ye omwene. Ne Nyasaye niye Omumanyi po, Owamachesi muno.

Ne ulia ukhola libii lititi nohomba likhongo mana achishile omundu wundi, toto oyo aba achinjile likhuwa lia obuchishi nende tsimbii tsikhongo tsilolekha.

Ne chilakhayanga okhuba emikabo chia Nyasaye khwiwe nende obukoosia bubwe, omukanda mulala mubo kwakhasuubile muno okhukhukosia ewe, ne shibakosinjia tawe halali abeene, ne shibanyala okhukhukhola liosiliosi tawe. Ne Nyasaye yakhwishilia Eshitabu nende amachesi, ne nakhwechesia akawali nolamanyile tawe. Ne emikabo chia Nyasaye khwiwe ni eminji muno.

Obulayi bubula mumaanji kababolanga mubwifisi bwabu, halali ulia uloomesia okhuhana eshihanwa shia isadaka nohomba okhukhola amalayi, nohomba okhukasia amakhuwa hakari waabandu. Ne ulakhola kano khukhwenya obuchami bwa Nyasaye, khwitsa okhumuhelesia omurungo omukhongo.

Ne ulia ukhaya aka Omurumwa, obulunjifu nibumalile okhumubeela habulafu mana naloonda injila ilali yabasuubili tawe, khwitsa okhumushukhasia wa omwene yeshukhasia mana khumwinjisie mumulilo. Nawo ni habundu ambii muno wokhukaluka.

Toto Nyasaye shaleshelanga eshionono shiokhumutsokaasia (okhumusanga) ninaye nende shiosishiosi tawe, halali aleshelanga kali hasi wa elo, khu ulia owayenya. Ne utsokaasia Nyasaye, toto oyo aba akorere obukori obwa hale muno.

Shibalaamanga shiosishiosi tawe nibekhola okhulaama Nyasaye, halali eminyasaye chieshikhasi. Ne shibalaamanga halali shetani omukhayi.

Nyasaye yamutsuba, mana naye (shetani) naboola mbu, “Toto esie nditsa okhubukula omukanda mubandu bo babe ebuleka wanje.

Ne toto nditsa okhubakosia, nende okhubasubisia, nende okhubalomesia shingala ndenya, mana betsa okhuteta amarwi ketsisolo, ne nditsa okhubalomesia bakalukhanie obulonji bwa Nyasaye." Ne ukhola Shetani okhuba omulindi wuwe owulali Nyasaye tawe, awo aba asishile (atibile) okhusikha khwa habulafu.

(Shetani) abalakanga mana nabasubisia, ne shasubisinja liosiliosi tawe halali obubeyi.

Abo limenyo liabu nimumulilo kwa Jahanamu, ne shibalinyoola wabeelushila okhurulamwo tawe.

Ne balia abasuubila mana nibakhola ebikhole ebilayi, khwitsa okhubenjisia mumikunda chomwikulu, echiburangamwo emialo, ne balikhalamwo tsinyanga tsiosi. Eyo niyo indache ya Nyasaye yobwatoto. Ne ni wina wokhubola obwatoto muno okhushila Nyasaye?

Okhwinjila mwikulu shikhuli khulwa okhwikomba khwenyu butswa, nohomba okhwikomba khwa balia bahebwa Eshitabu tawe. Ukhola amabii, alirungwa khuko, ne shalinyoola omulindi nohomba omukhoonyi owulali Nyasaye tawe.

Ne ulia ukhola amalayi, omusatsa nohomba omukhasi, naye nali Omusuubili, abo balinjila mumukunda kwomwikulu, ne shibalikholelwakho obubii tawe kata shinga akhatikho khabetsanga khulufwa lwa itende.

Ne ni wina omulayi muno mudini okhushila ulia ulekhulila Nyasaye obweni bubwe, naye nali owamalayi, ne aloondanga emilukha chia Ibrahim, owali omusalamu owatoto. Ne Nyasaye yakhola Ibrahim okhuba omulina wuwe.

Ne biosi ni bia Nyasaye bili mwikulu nende mushialo. Ne Nyasaye niye owaterera ebindu bioosi pe.

Ne bakhurebanga okhulondokhana nende amakhuwa kabakhasi. Boola mbu, “Nyasaye yetsa okhubaboolela bulaano buri, nende kamusomelungwa mushitabu aka abana abafwilwa, nende abakhasi bamwalahelesinjia ebia balachilwa tawe, ne mwikombanga okhubateshia, nende balia abateshele mubana. Ne mbu mukholele abana abafwilwa obwatoto.” Ne kamukhola mumalayi, Nyasaye akamanyile muno.

Ne Omukhasi naria okhusukunwa, nohomba omusatsa wuwe okhukhaya okhumubukulamwo oluchendo, awo shinobubii abene okhukasia omulembe hakari wabu tawe, ne omulembe nomulayi. Ne emioyo chialonjelwamwo obwimani. Ne nimukhola amalayi mana mwaria Nyasaye, awo toto Nyasaye amanyile muno koosi kamukholanga.

Ne shimunyala okhukhola obuleng’aafu khubakhasi kata mukhole murie tawe. Kho mulayeshela ebuleka ndala tawe, mwalekha owundi oyo owamulachama tawe shinga ulia wachikhwe niyeleela. Ne nimukasia omulembe mana mwaria Nyasaye, toto Nyasaye ni Omunji wobulesheli, Owetsimbabaasi po.

Ne nibakabukhana, Nyasaye yetsa okhubahelesia buli shiamulala okhurula khumikabo chichie iminji. Ne Nyasaye ni Omuyinda, Owamachesi muno.

Ne ni bia Nyasaye bioosi ebili mwikulu nende mushialo. Ne toto khwachelela balia abahebwa Eshitabu imbeli wenyu, nende enywe mbu: "Rie Nyasaye." Ne nimukhaya, manye mbu toto ni bia Nyasaye bioosi bili mwikulu nende mushialo. Ne Nyasaye ni Owinyala, Owitsomibungwa muno.

Ne ni bia Nyasaye ebili mwikulu nende khushialo. Ne Nyasaye ayela okhuba Omulindi wabuli eshindu.

Niyenya, nabarusiao enywe abandu, ne arera abandu bandi (abayiakha). Ne Nyasaye ni Omunyali muno wa ako.

Ulia wenya omurungo kwa khushialo, ewa Nyasaye niwa kuli omurungo kwa khushialo nende mwikulu. Ne Nyasaye ni wokhuwulila po, nende wokhulola muno.

Enywe abasuubila, be abokhwemelela obwatoto, abarusia obuloli shichila Nyasaye, kata nikali mbu nikhwinywe abeene nohomba khubebusi benyu, nohomba abekho benyu. Ne naali omuyinda nohomba omumanani, Nyasaye niye ukhoyeshela muno hakari wabu, kho mulaloonda obwikombi mwalekha okhukhola obuleng’aafu tawe. Ne nimukorombania obuloli nohomba mwakhaya okhurusia obuloli, Nyasaye amanyile muno koosi kamukholanga.

Enywe abasuubila, suubile khu Nyasaye nende Omurumwa wuwe nende Eshitabu shiayeshelia Omurumwa wuwe, nende Eshitabu shiayeshia inyuma awo. Ne ulia ukhaya Nyasaye, nende Abamalaika bebe, nende ebitabu bibie, nende Abarumwa bebe nende inyanga ya Indukho, toto aba yamala okhukora okhukora khwa ehale.

Toto balia basuubila mana nibakhaya, mana nibasuubila mana nibakhaya, mana nibameta obukhayi, Nyasaye shiyali wokhubaleshela tawe, nohomba wokhubalunjisia injila tawe.

Yusilia liikhuwa abeshikhabili mbu toto bali nende eshinyasio eshilulu.

Balia abakholanga abakhayi okhuba abetsa babu ba mbusia ngonia, ne balekha Abasuubili. Koo, benyanga mbu banyoole oluyali khubo? Ne toto, oluyali lwoosi nilwa Nyasaye.

Naye yamala okhubeshilia mushitabu shino mbu nimuwulila tsinyali tsia Nyasaye nitsilobwa mana nitsikholelwa omubayo, mulekhala ninabo tawe okhula bachake imbakha yiindi. Nimwikhala ninabo mulaba shinga bo. Toto Nyasaye alikhung’aasia abeshikhabili nende abakhayi boosi halala mumulilo kwa Jahannam.

Balia abalindanga mbu munyoole amasila. Mana nimunyoola obushili burulanga wa Nyasaye, nibaboola mbu, “Shikhwabeele ninanyu?” Ne abakhayi nibashilile, bababoolela mbu, “Shikhwali halala ninanyu nikhubakhonyanga okhubekalila okhurulana nende Abasuubili?” Nyasaye alikhalaka eshina hakari wenyu inyanga ya Indukho. Ne Nyasaye shiyakhahelesia abakhayi injila yokhushila Abasuubili tawe.

Toto abeshikhabili bakaatinjia Nyasaye, ne khane bekatinjia abeene. Ne nibeema okhwenya okhulaama, bema nibatofule, belolosinjia khubandu. Ne shibetsulilanga Nyasaye tawe, halali hatiti.

Babeyabeyanga eyi khubasuubili nende eyi khubakhayi. Shibali eyi nohomba eyi tawe. Ne owa Nyasaye akosia, shiwakhamunyoolela injila tawe.

Enywe abasuubila, mulakhola abakhayi okhuba abalina benyu okhushila abasuubili tawe. Mwenyanga okhukhola Nyasaye abe nende eshifune shia habulafu khwinywe (mbu muli Abandu ababii)?

Toto abeshikhabili baliba mutsingasi tsia hasi muno mumulilo. Ne shoolibanyoolela wokhubahabina tawe.

Halali balia abasaba eshileshelo mana nibekaasia mana nibatilana muno nende Nyasaye, mana nibatswenula idini yabu shichila Nyasaye. Abo baliba halala nende Abasuubili. Ne Nyasaye alihelesia Abasuubili omurungo omukhongo.

Nyasaye shalabahelesia eshinyasio tawe nimukhupa orio mana musuubile. Ne Nyasaye niye ufuchililanga orio, ne niye omumanyi muno.

Nyasaye shiyachama (omundu) okhurusia amakhuwa kokhuboola obubii (khubandu) tawe, halali khu ulia ukholelwe obubii. Ne Nyasaye niye omuwulili po, omumanyi muno.

Nimulolosia amalayi nohomba nimukafisa, nohomba nimuleshela obubii (bwamukholelwe), toto Nyasaye nomulesheli muno, Omunyali muno.

Toto balia bakhayanga Nyasaye nende Abarumwa bebe, ne benyanga okhwawukhasia hakari wa Nyasaye nende Abarumwa bebe. Ne baboolanga mbu, "Khusuubile mubandi ne khukhaye abandi." Ne benyanga okhuloonda injila ya hakari awo (shini yeshisilamu nohomba shini yeshikhayi tawe).

Abo nibo Abakhayi batoto. Ne khwarecheshela abakhayi eshinyasio shiokhututuyia.

Ne balia basuubila Nyasaye nende Abarumwa bebe, mana nibalaawukhania yesiyesi mubo tawe, abo khulibahelesia omurungo kwabu. Ne Nyasaye ni Omulesheli po, Owetsimbabaasi muno.

Abandu bahebwa Eshitabu (Abayahudi nende Abakiristo) benyanga mbu obeeshelie Eshitabu okhurula mwikulu. Ne toto benya khu Musa amakhongo kashila kano. Olwababoola mbu, “Khulolosie Nyasaye mang’alang’ala” mana likulu nilibopa khububii bwabu. Mana nibakhola eshimosi (okhuba Nyasaye wabu) ebifune biefu biatoto nibimalile okhuboolela, mana nikhubaleshela ako. Ne nikhuhelesia Musa ebifune bili habulafu.

Ne nikhubachingulila olukulu hekulu wabu, khulwa okhukhola indakano ninabo (eyokhuloonda Itaurati), mana nikhubaboolela mbu, “Injile mumuliango muno (okwa Shamu) nimwiname.” Ne khandi nikhubaboolela mbu, “Mularuma olwakho lwa (okhukhaya okhuwa oluyali) inyanga ya Isabato (Jumamosi) tawe." Ne nikhubukula khubo indakano isiro muno.

Ne (khwabahelesia eshinyasio) khulwa okhufunaka khwabu indakano nende okhukhaya khwabu ebimanyisio bia Nyasaye, nende okhwira khwabu Abarumwa khunjila ilali yatoto tawe, nende okhuboola khwabu mbu, “Emioyo chiefu chiekalwa.” Ne shichekalwa tawe, halali Nyasaye yachiupakhwo eshimanyisio khulwa obukhayi bwabu. Kho shibasuubilanga tawe, halali hatiti butswa.

Ne khulwa obukhayi bwabu nende okhuchishila khwabu Mariam obubeyi obukhongo muno.

Ne khulwa okhuboola khwabu mbu, “Efwe khwera omubakhwa Isa Omwana wa Mariam, Omurumwa wa Nyasaye.” Ne shibamwira tawe nohomba shibamubamba tawe halali bakalukhanilibwa (omundu wundi bapara mbu niye Isa). Ne toto balia bakabukhana mumakhuwa kano bali mubukanakani. Ne babula obwatoto khulikhuwa elo, halali baloondanga butswa okhuparirisia. Ne toto shibamwira tawe.

Halali Nyasaye yamuninia ewuwe. Ne Nyasaye ni wa amaani, Owamachesi muno.

Ne abulao yesiyesi mubandu bahebwa Eshitabu (Abayahudi nende Abakiristo) halali toto basuubilanga Omurumwa Isa, lifwa nilishili okhuulila mulala wabu. (Ne bilibula obukhala okhusuubila ebise ebo). Naye Isa aliba inyanga ya Indukho urusia obuloli khubo.

Kho khulwa okhukhola obubii khwa Abayahudi, khwabakania ebindu ebilayi ebia bali nibachamilwa, nende khulwa okhwikalila khwabu okhunji (abandu) ehale nende injila ya Nyasaye.

Nende khulwa okhulia khwabu riba, ne bakanibwa okhuyilia. Nende okhulia khwabu emiandu chiabandu munjila imbii. Ne khwarecheshela abakhayi mubo eshinyasio eshilulu.

Halali balia abali nende obumanyi obusiro mubo, nende Abasuubili, basuubilaanga akaweshilibwa nende akeshibwa imbeli wuwo, nende balia balaamanga khatsotso iswala, nende abahaananga eshihanwa shia Izaka, nende basuubilanga Nyasaye nende inyanga ya Indukho. Abo khulibahelesia omurungo omukhongo.

Toto efwe khwakhurerera obufimbuli shingala khweshilia Nuhu nende Abarumwa bandi abamulondakhwo. Ne khwafimbulila Ibrahim, nende Ismail, nende Ishaq, nende Yaqub nende olwibulo lulwe. Nende Isa, nende Ayub, nende Yunus, nende Haruni, nende Suleiman, naye Dawud nikhumuhelesia Izaburi.

Nende Abarumwa abakhwakhukanila amakhuwa kabu khale, nende Abarumwa bakhulakhukanila amakhuwa kabu tawe. Ne Nyasaye nalomaloma nende Musa malomaloma.

Abarumwa abareeranga amakhuwa koomwikhoyo, nende bekanyilisinjia, kho abandu bakhaye okhuba nende eshifune olunyuma lwa okhwitsa khwa Abarumwa. Ne Nyasaye ni Owamani, Owamachesi muno.

Halali Nyasaye nomuloli khukayakhwishilia. Yakeeshia khubumanyi bubwe, ne Abamalaika boosi nabaloli. Ne Nyasaye ayela po okhuba omuloli.

Toto balia abakhayanga, mana nibekalila abandu injila ya Nyasaye, toto bamala okhukora obukori obwa ehale.

Toto balia abakhaya mana nibakhola obubii, Nyasaye shiyali ubaleshela nohomba ubalunjisia khunjila tawe.

Halali injila yomumulilo kwa Jahannam, omo balimenyamwo tsinyanga tsioosi. Ne ako ni amangu po khu Nyasaye.

Enywe Abandu, toto Omurumwa yamala okhubetsela khubwatoto okhurula khu Nyasaye wenyu Omulesi. Kho suubile, bulaba obulayi khwinywe. Ne nimukhaya, ne toto nibia Nyasaye ebili mwikulu nende mushialo. Ne Nyasaye nomumanyi po, Owamachesi muno.

Enywe Abandu ba Eshitabu, mulaburirisia eshichelo mudini yenyu tawe, ne mulaboola khu Nyasaye halali kobwatoto. Omubakhwa Isa Omwana wa Mariam ni Omurumwa wa Nyasaye, ne ni (eshilonje shialongwa khu) likhuwa lilie eliayayilila Mariam, ne ni omwoyo okhurula khuye. Kho suubile Nyasaye nende Abarumwa bebe. Ne mulaboola bataru tawe, leshe okhusuubila murio, bulaba obulayi khwinywe. Toto Nyasaye ni nyasaye mulala yenyene butswa. Obutswenufu nobubwe okhuba nomwana! Ni ebibie bioosi bili mwikulu nende khushialo. Ne Nyasaye ni Omulindi uyela.

Isa (Omubakhwa) shalilola obuteshele mumwoyo okhuba Omusumba wa Nyasaye tawe, nohomba Abamalaika abasitibwa ahambi (nende Nyasaye) tawe. Ne balia abalilola obuteshele mumwoyo okhuba abasumba ba Nyasaye, mana bakhole obufuuru, alibakhung’aasia boosi ewuwe.

Kho balia Abasuubila mana nibakhola ebikhole ebilayi, yetsa okhubahelesia omurungo kwabu, ne alibametela emikabo chichie. Ne balia balola obuteshele mana nibakhola obufuru, alibahelesia eshinyasio shiwumisinjia. Ne shibaliinyoolela omulina nohomba omukhonyi yesiyesi tawe ehale nende Nyasaye.

Enywe abandu, ebifune toto biboolele okhurula khu Nyasaye wenyu Omulesi, ne khwabeshilia obulafu bulolekha.

Kho balia Abasuubila Nyasaye mana nibatilana ninaye obulayi, abo alibenjisia mutsimbabaasi tsitsie nende emikabo. Ne alibalunjisia okhutsia ewuwe injila ingololofu.

Ne bakhureebanga, boola mbu, “Nyasaye abebaalilaanga amakhuwa ka Al-Kalala (omundu ufwa nabula omwana nohomba omwibusi). Kho, omundu nafwa ne abula omwana nohomba omwibusi, ni kali mbu ali nende omukhana wabu, awo omukhana oyo alanyoola inusu yomwandu kwa aleshele. Ne omundu oyo alachelama omwandu kwa omukhana wabu, nikali mbu omukhana wabu oyo abula omwana. Ne nibali abakhana babili, betsa okhunyoola tsitsulutsi tsibili mumwandu kwa aleshele. Ne nibali abana babu abeshisatsa nende abeshikhasi, awo omusatsa alanyoola emikabo chiabakhasi babili. Nyasaye abenosilinjia khomulakora tawe. Ne Nyasaye ni Omumanyi muno wa buli eshindu.

Enywe Abasuubila, khole shinga mwalakana. Musubulwa okhulia tsisolo tsiebilenje bine halali tsilia etsia musomelungwa (tsiamwakanibwa). Ne shimuchamilwa okhuyima nimuli mu Hija tawe. Toto Nyasaye abusinjia eshina shinga yenya.

Enywe Abasuubila, mulafunaka oluyali lwe ebimanyisio bie idini ya Nyasaye tawe, nohomba omwesi kwoluyali tawe, nohomba oluyali lwetsisolo tsiyilungwa Makka okhusinzwa, nohomba ebie tsisolo etso tsirebungwakho bio khwechesia mbu tsitsia Makka, nohomba oluyali lwa balia basuubilanga okhutsia khunzu yoluyali, okhukoonya tsimbabaasi tsia Nyasaye wabu Omulesi nende obuchami bubwe. Ne nimwakharula mu Hija yenyu, yime (nimwenya). Ne okhusila abandu shichila babekalila okhuula khumusikiti kwa oluyali, khulabakhola okhuba abafuru tawe. Ne khoonyane mubulayi nende okhuria Nyasaye, ne mulakhoonyana mutsimbi nende mubusuku tawe. Ne rie Nyasaye. Toto Nyasaye ni omululu weshinyasio.

Mwakanibwa okhulia isolo ifwile, nende amatsayi, nende inyama yeyimbitsi, nende shisinzilwe shilali okhubeela Nyasaye tawe, nende shifwile khulwokhwimika, nende shifwile khulwa okhupwa, nende shifwile khulwa okhukwa, nende shifwile khulwa okhufumurwa olwika, nende shie isolo yindi ilile shiafwa, halali nimunyoola okhushisinza nishishili okhufwa. Ne khandi mukanibwa okhulia eshisinzilwe khulwa okhukholela amasanamu emilukha. Ne ni amakayo khwinywe okhwenya okhumanya akefisile, khunjila yobufumu. Etso tsioosi nitsimbii. Olwalelo, abakhayi bafwile omwoyo mudini yenyu, kho mulabarie tawe, halali rie Esie. Olwalelo, emalile okhubakasilia idini yenyu obulayi muno, nende okhubetsusilia emikabo chianje, ne abachamile obusalamu okhuba idini yenyu. Ne ulia unichilisibwa (nende inzala) obulali okhwenya amabii tawe, (mana yalia ebiakanibwa bino) abula obubii tawe. Toto Nyasaye ni omunji wokhuleshela, omunji wetsimbabaasi.

Bakhurebanga mbu ni shina shia bafuchililwa. Boola mbu, "Mwachamilwa ebilayi bioosi, nende bilia biyimilwe nende tsisolo nende amayoni ebiamwechesia okhuyima. Mubiechesie aka Nyasaye yabechesia. Kho, lie eshia tsibatilile ne mubisomele elira lia Nyasaye. Ne rie Nyasaye. Toto Nyasaye ni Omwangu wokhubala.

Olwalelo, mufuchililwa ebilayi bioosi. Ne ebiakhulia bia balia bahebwa Eshitabu bifuchililwa khwinywe; ne ebilibwa bienyu bifuchililwa khubo. Ne mufuchililwa okhuteshia abakhasi abalayi mubasuubili nende abakhasi abalayi mubalia abahebwa Eshitabu, nimwakhabahelesia omurungo kwabu, mwaboya ninabo nikka, obulakhola ninabo obwilasi nohomba okhubabikha sa tawe. Ne ulia uloba okhusuubila, toto oyo ebikhole bibie biamala okhubiya; naye mwikulu aliba mubandu abasikha.

Enywe abasuubila, ni mwema khulwokhulaama iswala, wosie obweni bwenyu nende emikhono chienyu okhula mutsikhumbo, ne bakhe emirwe chienyu, ne wosie ebilenje bienyu okhula mutsikhong’oosi. Ne nimuli nende Janaba, mwisinje. Ne nimuli abalwale nohomba nimuli khuluchendo, nohomba mulala wenyu narula muchoo, nohomba nimwinjilaane nabakhasi mana mwakhaywa okhunyoola amaatsi, awo subilile okhwikhoonyela liloba lilafu. Bakhe obweni bwenyu nende emikhono chienyu. Nyasaye shiyachama okhubara mubunyakhani tawe, halali yenyanga okhubatswenula nende okhubahelesia emikabo chichie mubwitsufu, kho munyoole okhupa orio.

Ne yitsulile emikabo chia Nyasaye khwinywe, nende indakano yiye yayalakana ninanyu. Olwa mwaboola mbu, “Khuwulile mana khuloondele.” Ne rie Nyasaye. Toto Nyasaye yamanya muno akali mubilifu.

Enywe abasuubila, betsenje abemeleli bobwatoto khulwa Nyasaye, murusinjie obuloli buling’anile. Ne okhusilana nende abandu khulabakhola mwakhaya okhubakholela obuleng’aafu tawe. Khole obuleng’aafu. Okhukhola endio khusitinjia omundu hambi muno nende okhuria Nyasaye. Ne rie Nyasaye. Toto Nyasaye ali nende obumanyi muno khu koosi kamukholanga.

Nyasaye yalaka balia abasuubila mana nibakhola amalayi mbu balinyoola obulesheli nende omurungo omukhongo.

Ne balia bakhaya mana nibayingasia ebimanyisio biefu, abo nibo abandu bomumulilo.

Enywe abasuubila, yitsulile emikabo chia Nyasaye khwinywe, olwa Abandu basuubila muno okhuboosiakhwo emikhono chiabu, mana niyekalila emikhono chiabu echo okhuboolakhwo. Ne rie Nyasaye. Ne abasuubili besiche Nyasaye butswa.

Ne toto Nyasaye yabukula indache ya Abana ba Israili (abayahudi) ne nikhwemesia mubo abemilisi ekhumi nende babili. Mana Nyasaye naboola mbu, “Toto esie endi halala ninanyu, nimulaama esie mana murusie eshihanwa shia Izaka, mana musuubile Abarumwa banje nende okhubakhoonya, mana muhelesie Nyasaye likofi lilayi, toto ndalabaleshela amabii kenyu ne nditsa okhubenjisia mumikunda chomwikulu chiburangamwo emialo. Kho, ulia ulakhaya mwinywe nikhumalile okhukhola indakano ino, toto alaba akorere injila eya habwene.”

Mana khulwa okhufunaka indache khwabu, khwabatsuba, mana nikhukhola emioyo chiabu okhuba emiumu (echilawulilanga amalayi tawe). Bakalukhaninjia amakhuwa okhurula habundu wako, ne bebilila ebuleka mukalia akabetsulisibwa ninako. Ne olatsililila okhunyoola mubo amakhuwa kobukalakala, halali batitisa mubo. Kho baleshele, ne olekhane ninabo. Toto Nyasaye yachama abakholanga amalayi.

Nende balia baboola mbu, “Efwe khuli abanaswara (abakiristo).” Khwabuluka indakano yabu, halali nibebilila ebuleka khu kalia akabetsulisibwa ninako, mana nikhura hakari wabu obusuku nende okhusilana muno okhula inyanga ya Indukho. Ne Nyasaye alibaboolela akabakholanga.

Enywe Abandu beshitabu, Omurumwa wefu yamala okhubetsela, owubebaalilanga amanji mukalia akeshitabu akamwali nimwafisa, ne abaleshela amanji. Toto bumalile okhubeetsela obulafu okhurula khu Nyasaye, nende Eshitabu shinoosinjia habulafu.

Nyasaye alunjisinjia khushio balia baloondanga obuchami bubwe khutsinjila tsiomulembe, ne abarusinjia mufiilima okhubayila mubulafu khubunyali bubwe, ne abalunjisia okhutsia khunjila ingololofu.

Toto bamala okhukhaya balia baboola mbu, “Toto Nyasaye ni omubashe Isa Omwana wa Mariam.” Boola mbu, “Ni wina ulinyala shiosishiosi imbeli wa Nyasaye niyenya okhusishia Omubashe Omwana wa Mariam, nende nyinamwana, nende bioosi bili khushialo?” Ne obwami bwomwikulu nende khushialo nende ebili hakari wabio, nibwa Nyasaye, aloonganga shiayenya. Ne Nyasaye ni omunyali muno wa buli eshindu.

Ne Abayahudi nende Abakiristo baboola mbu, “Efwe khuli abana ba Nyasaye nende abahelwa bebe.” Boola mbu, “Ne shichila shina abahelesinjia eshinyasio khulwetsimbii tsienyu?” Halali, enywe mulisa abandu mubayaloonga; aleshelanga owayenya, ne ahelesinjia eshinyasio wayenya. Ne ni bwa Nyasaye obwami bwomwikulu nende khushialo nende bili hakari wabio. Ne ewuwe butswa niwokhukalukha.

Enywe Abandu beshitabu, toto Omurumwa wefu yamala okhubeetsela, abeenosilie ebise bia abarumwa bandi bawumao; mulakhetsa mwaboola mbu, “Omwikanyilisi nohomba owureranga akomwikhoyo shiyakhwitsila tawe.” Toto yabetsela owureranga akomwikhoyo nende omwikanyilisi. Ne Nyasaye ni Omunyali muno wabuli eshindu.

Ne olwa Musa yaboolela Abandu bebe mbu, “Enywe abandu banje, yitsulile emikabo chia Nyasaye khwinywe, olwa yakhola Abarumwa mwinywe, ne nabakhola enywe okhuba abaami, mana nabahelesia akayalahelesiakhwo yesiyesi mubiloonje bioosi tawe.

Enywe abandu banje, injile mumukunda kwoluyali okwa Nyasaye yabalachila, ne mulakalukha inyuma tawe; mwakalukhana okhuba abokhusikha."

Baboola mbu, “Ewe Musa, toto eyo abandu baliyo abamakhakha. Ne efwe shikhulenjilayo tawe okhuula baruleyo. Nibarulayo, toto efwe khulenjilayo."

Abandu babili mubalia abaria emikabo chia Nyasaye khubo baboola mbu, “Benjilile mumuliango kuno, nimumala okhubenjilila, awo toto enywe mulabashila. Ne mwisike Nyasaye, toto nimuli Abasuubili.”

Baboola mbu, “Ewe Musa, efwe butswa shikhulenjilamwo nibashilimwo tawe. Kho tsia ewe nende Nyasaye wuwo Omulesi mukhupane, efwe khuli hano khwikhaale.”

Musa naboola mbu, “Nyasaye wanje Omulesi, toto esie embula obunyali halali khwisie omwene nende khumusiani wefu. Kho kabukhasia hakari wefu nende Abandu ababii bano."

Nyasaye naboola mbu, “Mana toto bekalilwe omukunda oko khulwa emika amakhumi kane. Balayiyayiya eno nende eyi khushialo. Kho olabeelela shichila abandu abamabii tawe.”

Ne basoomele amakhuwa aka Abaana babili ba Adam khubwatoto. Olwa bahinia eshihanwa, nishifuchililwa shia mulala wabu, ne shiowundi nishilafuchililwa tawe. Naboola mbu, “Toto nditsa okhukhwira.” Namukalusia mbu, “Toto Nyasaye afuchililanga okhurula khubamuritsanga bonyene.

Niwitsa okhundakhwo omukhonokwo mbu unzira, esie shindalakhurakhwo omukhono kwanje okhukhwira tawe. Esie toto eritsanga Nyasaye, Omulesi webindu biosi.

Toto esie ndenya ochinge tsimbi tsianje nende tsimbi tsitsio; ne khulwa ako obe mubandu bomumulilo. Ne oko niko omurungo kwa abandu abamabii.”

Mana omwoyo kukwe nikumuyila okhwira omusiani wabu, mana namwira, mana naba mubandu bokhusikha.

Awo Nyasaye narera likhokho, nilichaka okhukwota mwiloba kholimwechesie shinga ayabila omulambo kwomusiani wabu. Naboola mbu, “Abayie! Ekhayilwe okhuba shinga likhokho lino, ndayabila omulambo kwomusiani wefu.” Mana naba mubandu bokhwiyitsulisia.

Eshichila ako, nikhuhandichila Abana ba Israili mbu, “Ulia ulera omundu eshikhaya bustwa omundu oyo nalerere omundu tawe, nohomba okhukhola obutobela khushialo, alaba shinga wirire abandu boosi. Ne ulia uwonokosia omundu, ali shinga uwonokosiye obandu boosi." Ne toto Abarumwa befu babeetsela nende ebifune bili habulafu. Mana abanji mubo olunyuma lwa ako nibaba abeyisasia.

Toto omurungo kwa balia bakhupananga nende Nyasaye nende Omurumwa wuwe, nende okhukhola obwononia khushialo; ni okhwirwa, nohomba okhubambwa, nohomba okhutetwa emikhono chiabu nende ebilenje buchikha, nohomba balondwe mushialo esho. Esho neshifimbwa murwe shiabu khushialo, ne mwikulu balinyoola eshinyasio eshikhongo.

Halali balia abasaba eshileshelo nimushili okhubatila. Ne manye mbu Nyasaye ni wobulesheli po, wetsimbabaasi muno.

Enywe abasuubila, rie Nyasaye ne konye injila yokhumuulilakhwo. Ne lwane shichila Injila yiyie khomunyoole okhubura.

Toto balia bakhaya, babetsanga nende bili mushialo bioosi nende ebindi shinga birio, kho babirusie, kho bakhaya okhunyoola eshinyasio inyanga ya Indukho, shibakhachamilwe tawe. Ne balinyoola eshinyasio shitsuninjia.

Balienya okhurula mumulilo, halali shibalirulamwo tawe, ne baliba neshinyasio shia tsinyanga tsioosi.

Ne omwifi omusatsa nende omwifi omukhasi, tete emikhono chiabu; oko kube omurungo kwa kalia kabakhola. Esho nisho eshinyasio shirula khu Nyasaye. Ne Nyasaye ni Owamani, Owamachesi muno.

Halali, ulia usaba eshileshelo namalile okhwonoona mana nakaasa, toto Nyasaye alamuleshela. Toto Nyasaye ni Omulesheli po, Owetsimbambaasi muno.

Koo, shomanyile mbu toto Nyasaye ali nende obwaami bwomwikulu nende khushialo tawe; ahelesinjia eshinyasio owayenya, ne aleshelanga owayenya? Ne Nyasaye ni Omunyali muno wabuli eshindu.

Ewe Omurumwa, balakhubelesia balia belushilanga obukhayi, mubalia baboolanga nende eminwa chiabu mbu, “Khusuubile,” ne emioyo chiabu nichishili okhusuubila. Nende mubayahudi betsanga okhuwulilisia po akoboola, khobaboole obubeyi, abetsanga okhukhuwulilisia po khulwa okhuusilia abandu bandi balanyala okhukhuulila tawe. Bakalukhaninjia amakhuwa okhurula habundu wako. Baboolanga mbu, “Nimuhebwa kano, mukatiile; ne nimulahebwa ko tawe, mwichunge.” Ne owa Nyasaye yenyela amatemo, shiwakhanyala okhumuwa shiosishiosi imbeli wa Nyasaye tawe. Abo nibo ba Nyasaye alenya okhwosia emioyo chiabu tawe. Bali nende eshifibwa murwe khushialo, ne mwikulu baliba nende eshinyasio eshikhongo.

Abawulilisinjia muno obubeyi, abalitsanga muno ebiakanibwa. Kho, nibakhwitsila, babusilie eshina hakari wabu nohomba olekhane ninabo. Ne nolekhana ninabo, bo shibalakhukhola shiosishiosi tawe. Ne nobabusilia eshina, babusilie khubuleng’aafu. Toto Nyasaye yachama abandu abaleng’aafu.

Ne bakhukholanga barie ewe okhuba ubabusilia eshina, nabo bali nende Itaurati, ilimwo amalako ka Nyasaye. Mana bakalukhananga olunyuma lwa ako. Ne abo shibali bokhusuubila tawe.

Toto khweshia Itaurati ilimwo obulunjifu nende obulafu. Eya bakhalachilanga Abayahudi eshina, Abarumwa abasuubila nende Abasirasoti, nende Abasomi; eshichila benyekha okhuliinda Eshitabu shia Nyasaye. Mana nibaba abaloli khu shio. Kho mularia Abandu tawe, halali rie esie. Ne mulakusia tsinyaali tsianje khubukusi obutiti tawe. Ne balia balabusinjia eshina okhwikhoonyela aka Nyasaye yeshia tawe, abo nibo abakhayi.

Ne omo khwabahandichila mbu: omundu khu mundu, imoni khu imoni, eliulu khuliulu, eshirwi khushirwi, elino khulino, ne ulia uwumisia owashie akholelwe imoongo (kisasi). Ne ulia uleshela, shilaba eshihanwa khuye. Kho balia balabusinjia eshina khuka Nyasaye yeshia tawe, abo nibo ababii.

Mana nikhubalondiakhwo Isa Omwana wa Mariam, okhutinyisia kalia kali imbeli wuwe, mu Taurati. Ne nikhumuhelesia Injili ilimwo obulunjifu nende obulafu, ifuchilisaninjia nende akaliwo mu Taurati, obulunjifu nende amachelo khubalia abaria Nyasaye.

Ne Abandu ba Injili babusie eshina okhulondokhana nende ka Nyasaye yeshiamwo (mu Injili). Ne balia balabusiinjia eshina khuka Nyasaye yeshia tawe, abo nibo abarulanga mumalako.

Ne khwakhwishilia Eshitabu khubwatoto, shifuchilisaninjia nende ebitabu biali imbeli washio, kho babusilie eshina khuka Nyasaye yeshia. Ne olaloonda obwikombi bwabu tawe, nolekha obwatoto bwakhwitsila. Ne buli mwinywe, khwabakholela amalako nende injila. Ne Nyasaye yenyanga, yakhabakholele okhuba omukanda mulala, halali kho abateme khu kalia akayabahelesia. Kho shilane khumalayi, ewa Nyasaye ni wamulikalukha mwesi. Ne alibaboolela akamwawukhanilangamwo.

Ne babusilie eshina khuka Nyasaye yeshia, ne olaloonda obwikombi bwabu tawe. Ne obe meso nabo, balakhukalukhania khu kalia ka Nyasaye yakhwishilia tawe. Ne nibakhaya, manya mbu toto Nyasaye yenyanga okhuboosilia eshinyasio khulwa tsimbii tsiabu tsindi. Ne toto Abandu abanji ni bokhurula mumalako.

Koo, benyanga okhubusilibwa eshina khweshiilima? Ne ni wina ubusinjia eshina obulayi muno okhushila Nyasaye, khubandu bali nende obusuubili bwatoto?

Enywe Abasuubili, mulakhola Abayahudi nende Abakristo okhuba abetsa ba mbusia ngonia tawe, abene khubene ni abetsa ba mbusia ngonia. Ne ubakhola okhuba abetsa ba mbusia ngonia, oyo aba ali halala ninabo. Toto Nyasaye shalunjisinjia Abandu ababii tawe.

Ne olalola balia bali nende obulwale mumioyo chiabu babelushilanga nibaboola mbu, “Efwe khuritsanga okhunyoolwa nomubotokhano.” Ne Nyasaye yetsa okhurera obushili nohomba likhuwa okhurula ewuwe. Ne batong’e nende akabafisa mumioyo chiabu nibeyitsulisijia.

Ne Abasuubili baliboola mbu, “Koo bano shinibo betsuba khulira lia Nyasaye, ebitsubo biabu ebiamani, mbu bo bali halala ninanyu?” Ebikhole biabu biabiyia mana nibaba mubandu abasikha.

Enywe abasuubila, owulalekha mwinywe idini yiyie, ahambi ano Nyasaye alarera Abandu abayachama nabo bamuchama, abehotselefu khubasuubili, abamani muno khubakhayi, balwananga khunjila ya Nyasaye, ne shibaritsanga obutulani bwomutuli yesiyesi tawe. Echo ni emikabo chia Nyasaye, ahelesinjia owayenya. Ne Nyasaye ni Owefinji, Omumanyi muno.

Toto omulina wenyu wa mbusia ngonia ni Nyasaye, nende Omurumwa wuwe, nende Abasuubila, abalamanga khatsotso iswala, abarusinjia eshihanwa shia Izaka nabo beenamanga nibarukuwa.

Ne ulakhola obulina bwa mbusia ngonia nende Nyasaye, nende Omurumwa wuwe, nende balia Abasuubila tawe, toto omukanda kwa Nyasaye nikwo kulashila.

Enywe abasuubila, mulakhola abalina ba mbusia ngonia balia abakholelanga eshicharo nende omubayo idini yenyu tawe, mubalia bahebwa Eshitabu imbeli wenyu nende Abakhayi. Ne rie Nyasaye nimuli mbu mwasuubila.

Ne nimulanga khu swala, bakhola eshicharo nende omubayo. Endio nilwo okhuba mbu ni Abandu balekhonyelanga obwongo tawe.

Boola mbu, “Enywe Abandu beshitabu, koo shimukhulolanga nende tsimbi mbu khulwokhuba khwasubila Nyasaye, nende kalia akakhweshilibwa, nende kalia akeshibwa khale, nende mbu abanji mwinywe muli ababii?"

Boola mbu, “Koo, ebaboolelekhwo ulia uli nende omurungo omubii muno imbeli wa Nyasaye? Ni balia aba Nyasaye yatsuba mana nabasinyishila, ne nakhola abandi mubo okhuba amashene nende tsimbitsi; mana nibalaama shetani. Abo nibo baliba nende habundu abii, ne nibo abakora muno ehale nende injila yatoto.

Ne (abeshikhabili) nibabetsela nibaboola mbu, “Khwasuubila.” Halali benjire nende obukhayi bwabu, ne barulile ninabo. Ne Nyasaye amanyile muno koosi akabafisanga.

Ne olalola abanji mubo belushilanga (okhukhola) tsimbii nende okhubura eshichelo, nende okhulia ebiakanwa. Toto ni amabii muno akabakholanga ako.

Shichila shina abasomesia nende abasomi babu shibabakaninjiakhwo amakhuwa kabu ketsimbii, nende okhulia ebiakanwa tawe? Toto ni amabii muno akabakholanga ako.

Ne Abayahudi baboola mbu, “Omukhono kwa Nyasaye kwefumba.” Emikhono chiabu nicho chiefumba. Ne batsubwa shichila akababoola ako. Halali emikhono chibili chia Nyasaye nemifumbule, ahaananga shingala yenya. Ne toto kalia akeshibwa khwiwe okhurula khu Nyasaye wuwo Omulesi, kalametela abanji mubo obukori nende obukhayi. Ne khwabarereraho obusuku nende isila hakari wabu okhula inyanga yeyindukho. Buli nibahafia omulilo kweliyie, Nyasaye akusuminjia. Ne bakholanga eshinani okhukhola obwononi khushialo. Ne Nyasaye shiyachama Abandu abonooni tawe.

Ne Abandu beshitabu basuubilanga mana baria Nyasaye, khwakhabaleshele tsimbii tsiabu, ne khwakhabenjisiye mumikunda chomwikulu chilimwo obwokholo.

Ne toto bemiinjia Itaurati nende Injili, nende akeshibwa khubo okhurula khu Nyasaye wabu Omulesi, bakhalile okhurula hekulu wabu nende hasi wamakulu kabu. Baliwo mubo batilanga injila indayi. Halali abanji mubo akabakholanga ni amabii muno.

Ewe Omurumwa, yusia akaweshilibwa okhurula khu Nyasaye wuwo Omulesi. Ne nolakhola tawe, olaba oshili okhusia oburume bubwe. Ne Nyasaye alakhulinda okhurulana nende (Obusuku bwa) Abandu. Toto Nyasaye shalunjisinjia abandu abakhayi tawe.

Boola mbu, “Enywe Abandu beshitabu, shimuli khushiosishiosi tawe okhuula mwemie Itaurati nende Injili obulayi, nende kalia akeshibwa khwinywe okhurula khu Nyasaye wenyu Omulesi. Ne toto kalia akeshibwa khwiwe okhurula khu Nyasaye wuwo Omulesi, kalametela abanji mubo obukori nende obukhayi. Kho olabeelelela abandu abakhayi tawe.

Toto balia basuubila, nende Abayahudi, nende masabii (abalaami betsing'ining'ini), nende Abakiristo, ulia mubo usuubila Nyasaye nende Inyanga yeyindukho mana nakhola ebikhole ebilayi, shibaliba nende oburi nohomba shibalibeelela tawe.

Toto khwabukula indache ya Abana ba Israili, mana nikhubarumila Abarumwa. Buli shinga Omurumwa yabetselaanga nende akemioyo chiabu chilenya tawe, nibakhaya omukanda mubo ne nibeera omukanda kundi.

Ne baparanga mbu amatemo shikalirulila tawe, mana nibawofula, nibeekala amarwi mana Nyasaye nabaleshela. Mana khandi nibawofula nibeekala amarwi abanji mubo. Ne Nyasaye alolanga muno akabakholanga.

Toto bamala okhukhaya balia ababoola mbu, "Toto Nyasaye ni Isa omubakhwa Omwana wa Mariam." Ne Omubakhwa yaboola mbu, "Enywe Abana ba Israili, laame Nyasaye Omulesi wanje nende Omulesi wenyu. Toto ulia utsokaasia Nyasaye, Nyasaye yamala okhumwima omukunda kwomwikulu ne eshimenyo shiaye ni mumulilo, ne ababii shibalinyoola ubakhoonya tawe.

Toto bamala okhukhaya balia baboola mbu, ‘‘Nyasaye ni mulala mubataru.’’ Ne abulao nyasaye halali nyasaye mulala. Ne nibalalekha akababoolanga ako tawe, toto abakhaya mubo balinyoola eshinyasio eshilulu.

Ne khulwa shina shibakhakalushile Nyasaye bamusaba obulesheli tawe? Ne Nyasaye ni Omunji wobulesheli, Omunji wetsimbabaasi.

Ne shiyali Omubakhwa Omwana wa Mariam halali Omurumwa butswa, bamala okhubura imbeli wuwe Abarumwa, ne mama wuwe ni owatoto. Balitsanga ebilibwa. Lola shingala khubeebalilanga tsinyaali, mana henga shingala bakalukhanibungwa (okhuloba obwatoto).

Boola mbu, “Mulamanga abalali Nyasaye, abalanyala okhubakholela liibi liosiliosi nohomba okhubakhoonya tawe?” Ne Nyasaye ni Omuwulili, Omumanyi muno.

Boola mbu, “Enywe Abandu beshitabu, mulaburirisia eshichelo mudini yenyu nibulali obwatoto tawe. Ne mulaloonda obwikombi bwabandu balia bamala okhukora okhurula khale tawe; mana nibakosia abanji, ne nibakora okhurula khunjila eya toto.”

Batsubwa balia abakhaya mubana ba Israili, khululimi lwa Dawud nende lwa Isa Omwana wa Mariam. Endio nilwokhuba mbu baloba okhutila amalako, ne mbu barumanga eshichelo.

Shibakananinjia amakhuwa amabii kabakholanga tawe. Ni amabii kafwana karie kabakholanga ako.

Olalola abanji mubo (Abayahudi) bakholanga obwitsa bwa mbusia ngonia nende Abakhayi. Ni amabii muno aka emioyo chiabu chiabaranjilisilia, ne khulwa ako Nyasaye yabasinyishila, ne baliba mushinyasio tsinyanga tsioosi.

Ne basuubilanga Nyasaye nende Omurumwa nende akeshibwa khuye, shibakhabakholele abo okhuba abetsa ba mbusia ngonia tawe. Habula abanji mubo ni bokhubura eshichelo.

Olanyoola Abasuku abakhongo muno khubalia abasuubila ni Abayahudi nende abatsokaasi. Ne toto olanyoola balia bali ahambi muno nende abasuubila ni balia baboolanga mbu, “Efwe khuli abakiristo.” Endio nilwokhuba mbu; mubo, balimwo Abasomi nende abaria Nyasaye, ne mbu toto bo shibakholanga obufuru tawe.

Ne nibawulila akeshibwa khumurumwa, olalola tsimoni tsiabu nitsipupuchilanga amasika, shichila obwatoto bwa bamanyile. Baboolanga mbu, “Nyasaye wefu omulesi; khusuubile, kho khuhandiche halala nende abaloli.

Ne khuli khurie khulasuubila Nyasaye, nende akakhwitsila kobwatoto, ne khusuubilanga mbu Nyasaye wefu Omulesi alakhwinjisia (mwikulu) halala nende Abandu abalayi.

Mana Nyasaye alibarunga khukalia akababoola, emikunda chomwikulu, echemialo chiburanga hasi wachio. Omo balikhalamwo tsinyanga tsioosi. Ne oko niko omurungo okwa balia bakholanga amalayi.

Ne balia abakhaya mana nibayingasia tsinyaali tsiefu, abo nibo abandu bomumulilo.

Enywe abasuubila, mulakania ebilayi ebia Nyasaye yabafuchilila tawe, ne mularuuma olwakho tawe. Toto Nyasaye shiyachama abandu barumanga olwakho tawe.

Ne lie khubilia bia Nyasaye yabakabila, ebiafuchililwa, ebilayi. Ne rie Nyasaye owa enywe musuubilanga.

Nyasaye shababukulilanga obubii khubitsubo bienyu biobusilu tawe, halali ababukulilanga obubii khubitsubo ebiamwetsuba nimwichomele obulayi. Kho, omurungo kwa eshitsubo esho, ni okhulisia abamanani ekhumi okhurula khubiakhulia bia mulisinjia abandu benyu, nohomba okhubafwala, nohomba okhulekhula omurumwa. Ne ulia ulanyoola ako tawe, afunge saumu tsinyanga tsitaru. Kuno niko omurungo kwebitsubo bienyu nimwitsuba. Ne linde ebitsubo bienyu obulayi. Endio nilwa Nyasaye abenoosilinjia tsinyaali tsitsie kho munyoole okhupa orio.

Enywe abasuubila, toto obumesi, nende isimbi, nende okhulaama ulali Nyasaye, nende okhulinga khwobulakusi, ni eshifwolo mumilimo cha Shetani. Kho be ehale nende ako, kho munyoole okhubura.

Toto Shetani yenyanga okhubarerera obusuku nende obusilani hakari wenyu shichila obumesi, nende isimbi. Ne yenyanga okhubekalila okhwitsulila Nyasaye nende okhulaama (iswala). Kho koo, enywe mwitsa okhukalekha?

Ne wulile Nyasaye ne wulile Omurumwa, ne be meso. Ne nimukhaya, manye mbu Omurumwa wefu akeke ni okhuusia bustwa oburumwa buli habulafu.

Shinobubii khubalia abasuubila mana nibakhola amalayi, khubilia ebiabalia, nibaria Nyasaye nibasuubila mana nibakhola amalayi, mana khandi nibaria Nyasaye, mana khandi nibasuubila, mana nibaria Nyasaye mana nibakhola amalayi. Ne Nyasaye yayanza abakholi bamalayi.

Enywe abasuubila, Nyasaye alabatema nende tsisolo tsindi tsiokhuyimwa, etsia emikhono chienyu nende amafumo kenyu kolangakhwo. Kho Nyasaye amanye mbu niwina owamuria kata nalamulolanga tawe. Kho ulia ularuma eshichelo olunyuma lwa (akamuboolelwa) kano, alanyoola eshinyasio shiokhuwumisia.

Enywe abasuubila, muleera ebiyimwa nimuli muhija nohomba umra tawe. Ne ulia mwinywe ulafira naasubile, omurungokwe kulaba okhusinza shinga eshayera esho, mutsisolo tsirukungwa shingala balabusia abaleng’aafu babili mwinywe. Isolo eyo iyilwe khu Ka’aba (isinzwe mana ikabilwe abatakha). Nohomba, arusie omurungo kwokhulisia abamanani, nohomba afunge saumu iyela eshichero esho; kho apile obubii bwelikhuwa elo. Nyasaye yamala okhuleshela akabura. Halali ulakalushila, Nyasaye alamuwa eshinyasio. Ne Nyasaye niye owa amaani, owurunganga imongo.

Ne mwafuchililwa ebiyimo biomunyanza, nende ebiakhulia biayo bibe omwikhoyo kwenyu, nende abali khuluchendo. Ne mukanibwa ebiyimo biokhulukongo ngala mulaba muhija nohomba mu-umra. Ne rie Nyasaye, ulia owa mulikhung’asibwa ewuwe.

Nyasaye yakhola Al-Kaaba okhuba inzu yoluyali, kho ibe eshiemelelo khubulamu bwa abandu, nende emiesi echioluyali, nende okhuyila emiruko Makka (khulwa okhusinzwa), nende okhuchiboya ebiuma, ako koosi ni khulwa okhukasia obulamu bwa abandu. Endio kho mumanye mbu, toto Nyasaye yamanya kali mwikulu nende mushialo. Ne toto Nyasaye khubuli eshindu ni Omumanyi muno.

Manye mbu toto Nyasaye ni Omululu weshinyasio, ne toto Nyasaye ni Omunji wobulesheli, owetsimbabaasi muno.

Ne shikali khumurumwa tawe halali okhusia butswa. Ne Nyasaye amanyile kamuretsanga habulafu nende akamufisanga.

Boola mbu, "Shibili nashilala ebibii nende ebilayi tawe, kata obunji bwebibii nibukhuchamisia. Kho rie Nyasaye enywe abamachesi, khomunyoole okhubura.

Enywe abasuubila, mulareeba amakhuwa aka nimuboolelwa, kalabasinyisia. Ne nimukareba Ikurani niyishiikhanga, mwitsa okhwinosilibwa. Nyasaye alesheele ako. Nyasaye ni Omunji wobulesheli, Omwihotselefu muno.

Abandu baliho abakareba imbeli wenyu, mana nibaba abokhukakhaya.

Nyasaye shiyarakhowo amakanio kosikosi khu Bahira (ingamia itetungwa eshirwi niyibule abana barano, wokhumalilikha nali weshisatsa), nohomba Saiba (ingamia ihebungwa abanyasaye omundu nahonokoshe mumatinyu), nohomba Wasila (ingamia ihebungwa abanyasaye omundu niyebule omwana wa ambeli weshikhasi nende ulondakho weshikhasi) nohomba Hami (ni ingamia isatsa ilaninungwakho tawe, nikali mbu yilusiye omwana womwana wayio), halali abakhayi bachishilanga Nyasaye obubeyi. Ne abanji mubo shibekhonyelanga obwongo tawe.

Ne nibaboolelwa mbu, “Itse khukalia ka Nyasaye yeshia, nende wo Omurumwa wuwe,” nibaboola mbu, “Kakhuyela kalia aka khwanyoola nako bapapa befu.” Koo, kata nikali mbu basaabwe shibali bamanya shiosishiosi tawe, ne shibali balunjikha tawe (balabalonda butswa)?

Enywe abasuubila, mwiliinde abene, Abakori shibalabawumisia nimumalile okhulunjikha tawe. Ewa Nyasaye ni wamulikalukha mwesi, ne alibaboolela akamwakholanga.

Enywe abasuubila, reo abaloli babili abaleng’afu mwinywe ebise biokhulaka (wasia), lifwa niliulila mulala wenyu; Nohomba abandi balali mwinywe tawe nimuli khuluchendo, mana amasila kelifwa nikaboolela. Mulabeekalila babili abo iswala niyakhawa, mana betsube khulira lia Nyasaye, nimuba nimuli nende inganakani (khu bulaame obo) mbu, “Shikhubukulekho shiosishiosi tawe, kata nali Omundu wefu. Ne shikhulafisa obuloli bwa Nyasaye tawe. Toto nikhukhola khurio, khulaba mubandu abamabii.”

Ne nibimanyikha mbu babili abo baboolele obubeyi, babili bandi mubalia abaliwo omufu nalaamanga wasia baleema mana bestube khulira lia Nyasaye mana baboole mbu, “Toto obuloli bwefu nibwahabwene muno okhushila obuloli bwabu, ne efwe shikhurumile eshichelo tawe, nikali kario khulaba mubandu ababii.”

Ako kalabakhola barusie obuloli bobwatoto nohomba kalabakhola barie ebitsubo okhurerwa, nibakhamala okhwitsuba khwabu. Ne rie Nyasaye mana muwulile. Ne Nyasaye shalunjisinjia abandu barumanga eshichelo tawe.

Yitsulile inyanga ya Nyasaye alikhung’asia Abarumwa, mana ababoolele mbu, “Ni shina shia bamukalusia?” Abarumwa baliboola mbu, “Khubula obumanyi tawe. Toto ewe newe wamanya muno amakhuwa kefisile.”

Ne olwa Nyasaye aliboola mbu, “Ewe Isa omwana wa Mariam, yitsulila emikabo chianje khwiwe, nende khu mama wuwo, olwa ndakhukhonya nende roho omulafu, nosunga nende abandu noshili omwana omutoro, nende mubukofu. Ne yitsulila olwa ndakhwechesia okhuhandika, mana nekhwa amachesi nende Itaurati nende Injili. Ne yitsulila olwa walonganga khuliloba amayoni khumunwa kwanje, mana nokaramwo emiuya nikaba amayoni khumunwa kwanje. Ne olwa wahoninjia abawofu nende abanachele khumunwa kwanje, ne olwa walamusinjia abafu khumunwa kwanje, ne olwa ndakhwikalila Abana ba Israili (okhukhukhola amabii), olwa wabeetsela nende ebifune biahabwene, mana abakhayi mubo nibaboola mbu, “Buno ni obulosi obwa habulafu."

Ne olwa ndafumbulila abechi bo mbu, “Suubile Esie nende Omurumwa wanje uno (Isa).” Mana nibaboola mbu, “Khusuubile, ne obe omuloli mbu toto efwe khuli abasilamu.”

Ne olwa abechi bo baboola mbu, “Ewe Isa omwana wa Mariam, Nyasaye wuwo Omulesi anyala okhukhwishilia efwe imesa ilikhwo eshiakhulia okhurula mwikulu?” Isa naboola mbu, “Rie Nyasaye nimuli Abasubili batoto.”

Baboola mbu, “Khwenya okhuliakhwo khushio, kho emioyo chiefu chihotselesie, ne khumanye mbu okhuboolele akatoto, mana khube mubaloli.”

Isa Omwana wa Mariam naboola mbu, “Ewe Nyasaye wefu Omulesi, khwishilie imesa ilikhwo eshiakhulia okhurula mwikulu, kho kube omwikhoyo, khu bokhuranga mwifwe nende bokhumalilikha, nende eshimanyisio okhurula khwiwe. Ne okhuwelesie omukabo; ne ewe, newe omukabi omulayi muno.”

Nyasaye naboola mbu, “Esie nditsa okhuyishia khwinywe, ne owulakhaya olunyuma lwa elo, nditsa okhumuhelesia eshinyasio shieshili okhuhelesiakhwo yesiyesi mubiloonje bioosi."

Ne olwa Nyasaye yaboola mbu, “Ewe Isa Omwana wa Mariam, newe waboolela abandu mbu, 'Khole esie nende mama wanje abanyasaye babili ehale nende Nyasaye?' Isa naboola mbu, “Obutswenufu nobubwo. Shikakhoyeela esie okhuboola elilali liatoto tawe. Nendi mbu ndaboola, wakhamanyile. Wamanya kali mushilifu shianje, nasi shemanyile kali mushilifu shishio tawe. Toto newe wamanya muno amakhuwa kefisile.

Shindababoolela liosiliosi tawe halali kalia kawaaloomesia mbu, 'Lame Nyasaye, Omulesi wanje nende Omulesi wenyu.' Ne ndali omuloli wabu olwa ndali mubo. Ne olwa wamalisilia ebise bianje, ewe noba omulindi wabu. Nawe oli Omuloli po wabuli eshindu.

Nekali mbu witsa okhubawa eshinyasio, ni abandu bao. Ne nobaleshela, toto ewe newe Owamani, Owamachesi muno.”

Nyasaye aliboola mbu, “Ino niyo inyanga eya ababoolanga obwatoto balikhoonywa nende obwatoto bwabu; baliba nende emikunda chiomwikulu chiburangamwo emialo; balimenyamwo tsinyanga tsioosi. Nyasaye abachamile, nabo bamuchamile. Okho nikhwo okhubura okhukhongo.

Ni obwa Nyasaye obwami bwomwikulu nende khushialo, nende ebili mubibili ebio. Naye ni Omunyali muno wa buli eshindu.

Oluyali lwoosi nilwa Nyasaye owalonga likulu nende eshialo, mana nakasia efilima nende obulafu. Mana abakhaya baleng’aasinjia Nyasaye wabu omulesi (nende filali Nyasaye tawe).

Ye niye owabalonga okhurula khwiloba, mana naraho ebise, (bia okhufwa khwa buli eshilonje). Ebise ebo biayaraho, Ye ni umanyile. Mana khandi enywe halala nende kano kosi, mukholanga obukanakani.

Ye niye Nyasaye, mwikulu nende mushialo. Yamanya akomukari kenyu nende akelwanyi kenyu, ne yamanya akamukholanga.

Ne eshifune shiosishiosi mufifune fia Nyasaye wabu Omulesi shishibetselanga tawe halali bo bashikhayangasa.

Bamala okhuloba obwatoto olwa bwabetsela. Kho, kalabetsela amakhuwa ka kalia akabakholelanga omubayo.

Shibalolangakhwo emikanda chinga echakhwasishia imbeli wabu, echiakhwali khwachiikhasia obulayi khushialo okhushila shingala khwabekhasia enywe tawe? Khwabeshilia ifula yokhutsililila, mana nikhukhola emialo okhubura hasi wabu. Mana nikhubasishia khutsimbi tsiabu, ne nikhurera mushilenje shiabu abandu bandi.

Ne khukhwishilinjia amahandiko khulukaratasi, mana bakatila khumikhono chiabu, toto abakhaya bakhaboolele mbu, “Kano shini shioosishioosi tawe halali ni obulosi buli habulafu.”

Ne baboolanga mbu; “Shichila shina naleshilibwa malaika?” Ne khwishinjia malaika (mana bakhaya), toto okhusikha khwabu khwakhabusibwe, ne shibakhahelesibwe ebise tawe.

Ne khumukholanga (ye Omurumwa) okhuba malaika, khwakhamukholele okhuba shinga omundu, ne khwakhabakanakaniliye shingala kano kabakanakaninjia.

Ne toto Abarumwa bali imbeli wuwo bakholelwa eshiyenyameno. Ne balia abakhola omubayo mubo, kalia akabakholelanga eshiyenyameno nikababotokhana.

Boola mbu, “Chende khushialo mana mulole indukho yabandu abayingani yali irie?”

Boola mbu; “Ni bia wina ebili mwikulu nende khushialo?” Boola mbu; “Ni bia Nyasaye.” Yelachilisia Omwene okhubakholela tsimbabaasi. Toto bwene alibakhung’asia khulwa inyanga yeyindukho, inyanga ibulamwo obukanakani tawe. Ne balia abereetsanga mukhusikha, shibasuubilanga tawe.

Ne nebibie bioosi ebiyenzelanga eshilo nende eshitere. Naye niye Omuwulili po, Omumanyi muno.

Boola mbu; “Ekhole owulali Nyasaye, Omulonji welikulu nende eshialo okhuba omulina wanje, ne Nyasaye alisinjia ne shalisibungwa tawe?” Boola mbu; “Toto esie ndalomesibwa mbu embe wokhuranga mubalia abelekhulila Nyasaye (abasilima). (Ne nembilwa mbu); “Olaba kata hatiti mubalia abatsokasinjia Nyasaye tawe.”

Boola mbu; “Esie eritsanga eshinyasio shie inyanga ikhongo, nikali mbu eloba Nyasaye wanje Omulesi.”

Ulia uliyinilibwayo eshinyasio esho inyanga eyo, toto (Nyasaye) aliba namuhelesiye tsimbabaasi. Ne okho nikho okhubura okhukhongo.

Ne Nyasaye nakhutila khububii, abulao yesiyesi owulali ye unyala okhubuyiniaho tawe. Ne nakhutila khubulayi (abulaho yesiyesi owulali ye, unyala okhubuyiniakhwo, Ye ni Omunyali muno wa buli eshindu.

Naye niye Omushili owuli hekulu wa abasumba bebe boosi. Naye niye Owamachesi muno, owuli nende amakhuwa koosi.

Boola - okhubareba mbu –, “Ni shindu shina, eshiobuloli bwashio ni obukali muno?” Mana oboole mbu; “Nyasaye. Niye Omuloli muno wa hakari wefu ninanyu. Ne esie ndafumbulilwa Ikurani ino kho ebekanyilisilie khuyo, nende buli yesi owa yololela. Koo, toto enywe muyinijia obuloli mbu baliho abanyasaye bandi halala nende Nyasaye?” Boola mbu, “Esie shenyala okhuyinia obuloli endio tawe.” Boola mbu, “Toto Ye ni nyasaye mulala butswa. Ne esie endi ehale muno nende ako akamutsokaasinjia.”

Balia abakhwahelesia Eshitabu bashimanya shingala bamanya abana babu. Ne balia abereetsanga mukhusikha, shibasuubilanga tawe.

Ne ni wina omubii muno okhushila ulia uchishilanga Nyasaye obubeyi, nohomba ulia uchayanga ebifune bibie? Toto abandu ababii shibalibura tawe.

Ne inyanga ya khulibakhuung’asia boosi mana khuboolele balia abatsokaasia mbu, “Bali hena abamwatsokaasinjia benyu nende Nyasaye, abamwelayilanga?”

Ne shibaliba nende eshifune shiosishiosi tawe, halali baliboola mbu; “Khwitsuba nende Nyasaye wefu Omulesi, efwe shikhwali abatsokaasinjia tawe.”

Henga shingala bebeya abeene, ne kalia akabachikhanga nikabakora.

Ne mubo, baliwo balia abakhuwulilisinjia, ne khwara efikalilo khumioyo chiabu khobalakamanya tawe, ne bali nende iwula mumarwi kabu. Ne nibalola ebimanyisio bioosi, shibabisubilanga tawe. Ne nibakhakhwitsila, nibakhuyingasia, abakhayi baboola mbu; “Kano shini eshindu tawe, halali ni tsingano tsia khale butswa.”

Ne bakaaninjia Abandu okhuloonda kano, ne boosi beretsanga ehale ninako. Nabo shibasasinjia tawe halali emioyo chiabu abeene, nabo shibamanyilekho tawe.

Ne ololangakhwo (inyanga yeyindukho) olwa baliemibwa khumulilo, baliboola mbu; “Abayie, khukalusibwakho khushialo, kho khwakhaya okhuyingasia ebimanyisio bia Nyasaye wefu Omulesi tawe, mana khwaba mubalia abasuubila.”

Halali kamalile okhubaloleshela kalia akabafisanga khale. Ne kata bakalusibungwa, bakhakalushile butswa okhukhola kalia akabakaanibwa. Ne toto abo ni ababeyi butswa.

Ne baboola mbu; “Bubulao obulamu bundi tawe halali obulamu bwefu bwokhushialo khuno, ne efwe shikhulilamusibwa tawe.”

Ne olalolangakhwo inyanga yeyindukho, olwa baliemibwa imbeli wa Nyasaye wabu Omulesi, mana baboolelwe mbu; “Koo, shini katoto kano?” Nabo baliboola mbu, “Ni endio, khwitsuba khulira lia Nyasaye wefu Omulesi (ni obwatoto).” Nyasaye aliboola mbu; “Kho laano pile eshinyasio shichila okhukhaya khwenyu khwamwakhayanga.”

Toto bamala okhusikha balia abakatsula likhuwa liokhubukana nende Nyasaye, okhuula shinga lifwa liabetsela mapwoka, mana nibaboola mbu; “Oh! Khwiyitsilisia kalia aka khwalabukulilamwo oluchendo tawe.” Ne balichinga emikuku chiabu khumikongo chiabu. Koo, ni amabii muno akabachinganga.

Ne obulamu bwokhushialo khuno shinishiosi shiosi tawe halali omubayo, nende amakhuwa kobusilu. Ne inzu yomwikulu ni indayi muno khubalia abaria Nyasaye. Koo, shimuparangakhwo tawe?

Toto khumanyile mbu akababoolanga kakhwetsanga eshibeela. Toto bo shibakhuyingasinjia ewe tawe, halali ababii abo bakhayanga ebifune bia Nyasaye [omwene alibarunga].

Ne toto Abarumwa be imbeli wuwo bayingasibwa, mana nibefwila khukabayingasibwa, ne basinyisibwa okhula shinga obuhabini bwefu bwaboolela. Ne abulao unyala okhukalukhasia amakhuwa ka Nyasaye. Ne toto amakhuwa kandi akabarumwa kamala okhukhwitsira.

Ne nikali okhwira ehale khwabu khuno ni likhuwa likhongo khwiwe, nonyala okhukoonya injila ya hasi mwiloba, nohomba ingasi wanina mwikulu wabarerera eshimanyisio (khola orio). Ne Nyasaye achamanga, yakhabakhung’asiye khubulunjifu. Kho olabakho butswa mubandu balamanyile tawe.

Abafuchililanga sa nibalia abawulilanga. Ne abafu, Nyasaye alibalamusia, mana ewuwe ni wabalikalusibwa.

Ne baboolanga mbu; “Shiyakheshilibwekhwo eshimanyisio okhurula khu Nyasaye wuwe Omulesi?” Boola mbu; “Toto Nyasaye ali nende obunyali bwokhwishia eshimanyisio.” Halali abanji mubo shibamanyile tawe.

Ne ibulao isolo khushialo nohomba liyoni lipurukhanga khu tsimba tsialio tsibili, halali ni emikanda shingala enywe. Ne shikhwalekha shiosishiosi erwanyi weshitabu shino tawe. Ne ewa Nyasaye wabu Omulesi niwo wabalikhung’asibwa.

Ne balia abayingana khubimanyisio biefu shibawulilanga tawe, shibasunganga tawe, bali mufilima. Nyasaye akosinjia owayeenya, ne owayenya, amuretsanga khunjila ingololofu.

Boola mbu; “Mulola murie nikali mbu eshinyasio shia Nyasaye shiboolela, nohomba eshinyasio shieyindukho shiboolele; ni wina owulali Nyasaye, wamulasaba obukhonyi, toto nimuli abandu aba habwene?”

Halali niye butswa wamulisaba, naye alibarusiliayo shiamumusabanga nachama. Ne mulibilila abamwamutsokasinjia ninaye.

Ne toto khwarumila emikanda chiakhuranjilila (Abarumwa) mana nikhubara khubuumu nende khubutinyu khobanyoole okhuba abehotselefu.

Khulwashina nibalehotselesia, olwa eshinyasio shiefu shiaboolela. Halali emioyo chiabu chioma, mana Shetani nabaronela akabakholanga.

Olwa beebilila akabetsulisibungwa khuko, khwabekulila emiliango chia buli eshindu, okhula shingala basangalila akabahelesibwa, khwababukula mapwoka, mana awo nibawesiakho omwoyo po.

Mana emisi chia abandu bakhola amabii nichitetwa (nibarula khushialo). Ne okhwitsomibwa khwoosi ni khwa Nyasaye Omulesi wa buli eshindu.

Boola mbu; “Mulola murie nikali mbu, Nyasaye abarusiakhwo tsimbulililo tsienyu, nende tsindolelo tsienyu, mana afunikhe emioyo chienyu; ni wina wundi owulali Nyasaye unyala okhubakalusilia ebio? Henga shingala khwinosinjia tsinyaali, mana nabo bakoyiakoyia.

Boola mbu; “Mulola murie nikali mbu, eshinyasio shia Nyasaye shibeetsela mapwoka, nohomba malola. Ni babu wina betsa okhusishibwa nibalali abandu bakhola obubii?”

Ne shikhurumanga Abarumwa tawe, halali okhurera omwikhoyo nende okhwikanyilisia. Kho balia abasuubila mana nibaba abalayi, shibaliba nende oburi ne shibalibeelela tawe.

Ne balia abayingasia tsinyaali tsiefu, eshinyasio shilibatilakhwo khulwa barulanga mumalako (ka Nyasaye).

Boola mbu; “Esie shebaboolelanga mbu endi nende ebiachi bia Nyasaye tawe (ebelesie shiosishiosi shia mwenya), nohomba mbu ndamanya akefisile tawe, nohomba shebaboolela mbu esie endi Malaika tawe. Esie shenondanga halali kalia kefimbulilwe.” Boola mbu; “Koo, omuwofu nende owetsimoni ulolanga bakhaba nashilala? Shimuparangakhwo tawe?”

Ne bekanyilisilie ninayo (Ikuran ino) balia abaritsanga mbu balikhung’asibwa ewa Nyasaye wabu omulesi, nibabula omukhonyi yesiyesi, nohomba owubasabila, (bekanyilisie orio) bakhaba bario banyoola okhuria (Nyasaye).

Ne walatafia balia balaamanga Nyasaye wabu Omulesi itsuli nende ingoloobe khulwa bo okhwenya obweni bubwe tawe. Okhubalilwa (amakhuwa) khwabu shikhuli khwiwe tawe, nohomba okhubalilwa khukhwo shikhuli khubo tawe. Nobatafia, olaba mubandu abamabii.

Ne endio nilwa khwabatema abeene khubeene khobaboole mbu; “Bano nibo ba Nyasaye yahelesia emikabo mwifwe?” Koo, Nyasaye shiyamanya abamukhupilanga orio?

Ne nibakhwitsila balia abasuubilanga tsinyaali tsiefu, baboolele mbu; “Omulembe kube ninenyu. Nyasaye wenyu Omulesi yelachila tsimbabaasi, mbu ulia ulakhola mwinywe amabii obulamanya mana asabe eshileshelo okhurula awo, mana akhole amalayi, toto ye ni Weshileshelo po, Owetsimbabaasi muno.

Ne endio nilwakhwinoosinjia tsinyaali, kho injila ya ababii imanyikhane.

Boola mbu; “Esie ndakanibwa okhulaama bilia bia mulaamanga, ebilali Nyasaye.” Boola mbu; “Shenondanga obwikombi bwenyu tawe, awo ndalaba engorere, ne shinditsa okhuba mubakololofu tawe.”

Boola mbu; “Esie endi nende eshifune shia habulafu okhurula khu Nyasaye wanje Omulesi, nanyu mufikhayile. Kho esie embula shiamuyuyukhanilanga esho tawe. Okhubusia eshina khuli sa khu Nyasaye, aboolanga akatoto. Niye Omubusia Omulayi weshina okhushira ababusinjia eshina boosi.”

Boola mbu; “Esie embetsanga nende kamuyuyukhanilanga ako, likhuwa elo liakhabusibwe hakari wanje ninenyu. Ne Nyasaye yamanya muno Abandu ababii.”

Ne Nyasaye ali nende tsifunguo tsia akefisile, abulawo wakamanya halali Ye. Ne yamanya akali khulukongo nende munyanza. Ne lisafu liosiliosi shilikwitsanga tawe, halali namanyile. Nohomba inyuma mufiilima fieliloba, ne sishikwitsanga eshiamatsimatsi, nohomba eshiumu, halali shili mushitabu eshiretsanga buli eshindu habulafu.

Naye niye owubafwisinjia ebise bieshilo (mundoolo) ne amanyile akamukholanga eshitere; mana khandi abalamusinjia mwo, kho ebise bienyu ebiarebwao biule. Ne ewuwe butswa ni wamakalushilo kwenyu, ne alibaboolela akamwakholanga.

Ye niye Omushili owuli hekulu wa abasumba bebe boosi. Abarumiranga (Abamalaika) ababikhanga (buli shiamukholanga). Okhula mulala wenyu niyolelwa nende lifwa, Abarumwa befu bamufwisinjia, nabo shibaleeminjia tawe.

Mana bakalusibwe khu Nyasaye Omwami wabu watoto. Koo, okhubusia eshina nookhukhwe. Ne Ye ni omwangu muno wokhubala (ebikhole bia ebiloonje).

Boola mbu; “Ni wina ubahonokosinjia mufiilima fiokhulukongo nende fiomunyanza? Mumusabanga mukhwihotselesia nende muburi nimuboola mbu; 'Toto nokhuhonokosia mu kano, khulaba mubalia bopanga orio ingali.'”

Boola mbu; “Nyasaye niubahonokosinjia mwako nende mubuli obutinyu, mana enywe khandi mumutsokasinjia.”

Boola mbu; “Ye niye unyala okhubarerera eshinyasio okhurulila hekulu wenyu, nohomba okhurulila hasi webilenje bienyu, nohomba abasalasie mube emikanda chilawulilisaninjia tawe, kho mulolesanie obufuru.” Henga shingala khwinoosinjia tsinyaali tsiefu khobanyoole okhumanya.

Ne abandu bobo bayiyingasia (Ikurani ino), nayo nili eyatoto. Boola mbu, “Esie shendi omulindi wenyu tawe.”

Buli likhuwa (mu Kurani) muno lili nende ebise bialio. Ne ahambi ano mwitsa okhumanya.

Ne nolola balia ababoolanga khutsinyali tsiefu nibatsifukula, obe ehale ninabo okhula shingala balachaka okhuboola amakhuwa kandi. Ne nikakhaba mbu Shetani akhwibilisia; niwitsulila, olekhala halala nende abandu ababii abo tawe.

Ne balia abaria Nyasaye babula elindi liosi liosi khubandu abo tawe, halali obwitsulisio mbu khobanyoole okhuria Nyasaye.

Ne lekha balia abakhola idini yabu okhuba emibayo nende eshindu shibulamwo oluchendo, ne obulamu bwokhushialo nibubakatia. Kho itsulisia khuyo mbu, omwoyo kuletsa kwasishibwa khukakwakhola tawe; nikubula omulindi nohomba wokhukusabila obulesheli, owulali Nyasaye tawe. Ne kata nikurunga shiosishiosi shiyela shirie, shikulichamilwa tawe. Abo nibo basishibwa khulwa kalia akabakhola. Abo balinyoola eshinywebwa shia amatsi kayile paa, nende eshinyasio shiwumisinjia, khulwa kalia akabakhayanga.

Boola mbu; “Koo, khulaame filia efilali Nyasaye tawe, efilanyala okhukhukhoonya shiosishiosi, nohomba okhukhukhola eshibi shiosishiosi tawe, ne khukalusibwe khufisisiro fiefu, Nyasaye namalile okhukhulunjisia, khube shinga ulia wa amashetani kakosia khushialo; ubeyabeyanga sa? Ali nende abetsa, bamulanganga khubulunjifu nibaboola mbu; “Itsa eno khwifwe.” Boola mbu; “Toto obulunjifu bwa Nyasaye nibo obulunjifu.” Ne khwalomesibwa mbu khwilekhulile Nyasaye Omulesi webilonje bioosi.”

Ne (khwaboolelwa mbu); “Laame khatsotso, ne rie Ye. Naye niye owamulikhung’asibwa ewuwe.”

Naye niye owaloonga likulu nende eshialo khubwatoto. Ne inyanga yaliboola mbu, “Ba” ni iba. Likhuwa lilie ni liatoto, ali nende obwami inyanga yokhufurwa mulwika. Omumanyi wa kefisile nende akali habulafu, naye niye Owamachesi muno, Omumanyi po wa koosi.

Ne (yitsulile) olwa Ibrahim yaboolela papa wuwe, Azar mbu, “Okholanga ebifwanani okhuba abanyasaye? Toto ekhulola ewe nende abandu bobo nimuli mubukori bulolekha.”

Ne endio nilo olwa khwechesia Ibrahim obwami bwomwikulu nende mushialo, kho abe mubalia abasuubila muno.

Ne olwa eshilo shiamulila, yalola ing’ining’ini, naboola mbu, “Ino niyo nyasaye wanje omulesi.” Ne olwa ing’ining’ini eyo yabura, niikhama; yaboola mbu: “Esie shindachama abanyasaye bakhamanga tawe.”

Ne olwa yalola omwesi nikurulanga, yaboola mbu; “Kuno niko nyasaye wanje Omulesi.” Ne olwa kwakhamuukha, yaboola mbu; “Nyasaye wanje Omulesi nalaalunjisia tawe, toto nditsa okhuba mubandu abakora.”

Ne olwa yalola eliuba nilirulanga, yaboola mbu; “Uno niye nyasaye wanje omulesi; uno niye omukhongo po.” Ne olwa liakhamuukha, yaboola mbu; “Enywe abandu banje, esie toto ebekongola nende ebiamutsokasinjia Nyasaye ebio.

Esie toto enjomiye obweni bwanje neelunjishe khu ulia waloonga likulu nende eshialo. Ne esie shendi mubatsokaasinjia Nyasaye tawe.”

Abandu bebe nibamufunania. Naboola mbu; “Mufunaninjia khu Nyasaye, naye yalunjisiye? Ne sheritsanga bilia ebiamutsokaasinjia ninaye tawe, halali Nyasaye wanje Omulesi nachama likhuwa liosiliosi (okhuba, nalo liba). Nyasaye wanje Omulesi yamanya obulayi buli eshindu. Koo, shimwitsulilanga tawe?”

Ne ndakharia endie abamutsokaasinjia abo, ne enywe shimuritsanga mbu mutsokaasinjia Nyasaye nende kalia kayalabeshilia eshifune tawe? Kho ni mukanda shina khuchibili chino (okwanje nende okwenyu), okukhoyeshele muno okhunyoola omulembe, toto nikali mbu mumanyile?

Balia abasuubila, ne nibalatsokasia obusuubili bwabu nende obubii tawe, abo bali nende omulembe kwatoto, ne abo nibo abalunjifu.

Ne bino nibo ebifune biefu ebia khwahelesia Ibrahim khu bandu bebe. Khuchingulanga hekulu tsingasi owakhwenya. Toto Nyasaye wuwo Omulesi ni Owamachesi, Omumanyi muno.

Ne nikhuhelesia (Ibrahim omwana ulangwa mbu) Ishaq nende Yaqub, boosi nikhubalunjisia. Ne Nuh khwamulunjisia khale. Ne khulwibulo lulwe nikhulunjisia Dawud nende Suleiman, nende Ayub, nende Yusuf, nende Musa nende Harun. Ne endio nilwa khurunganga Abandu abalayi.

Nende Zakaria, nende Yahya, nende Isa, nende Ilyasi, boosi bali mubandu abalayi.

Nende Ismail, nende Al-Yasaa (Elisha), nende Yunus, nende Luti. Boosi nikhubara hekulu wa abandu boosi.

Ne nikhulunjisia basabwe bandi, nende olwibulo lwabu lundi, nende abasiani babu bandi. Ne nikhubabukula nikhubawula, ne nikhubalunjisia khunjila ingololofu.

Obo nibo obulunjifu bwa Nyasaye, alunjisilinjia khubwo owayenya mubasumba bebe. Ne bamutsokaasinjia, kakhababiyile kalia akabakholanga.

Abo nibo abakhwahelesia Eshitabu, nende oburuchi nende oburumwa. Ne bano nibakakhaya kano, khwamala okhukarererao abandu abalakakhayanga tawe.

Abo nibo aba Nyasaye yalunjisia. Kho londa obulunjifu bwabu. Boola mbu; “Shebasabanga omurungo khu kano tawe. Kano ni ametsulisio butswa khubandu boosi.”

Ne shibahelesia Nyasaye eshiribwa shingala kenyekhananga tawe, olwa baboola mbu, “Nyasaye shiyeshia shiosishiosi khumundu tawe.” Boola mbu; “Ni wina weshia Eshitabu shia Musa yetsa nashio, obulafu nende obulunjifu khubandu, eshia mwakhola ebitonye ebitonye, mulolosinjia kamwenya, ne mufisanga amanji muno. Ne mwechesibwa akamwalali nimwamanya tawe, enywe nende bapapa benyu?” Boola mbu, “Ni Nyasaye.” Mana obaleshe mubukalakala bwabu nibabayanga.

Ne Eshitabu shino eshakhweshia, eshili netsikhabi tsinyinji, shifuchilisaninjia nende kalia akashiranjilila. Ne kho wikanyisilie nyina tsingongo nende abandu bali mumbeka mwayio. Ne balia abasuubila mubulamu bwomwikulu, bashisuubilanga. Ne bahenganga obulayi tsiswala tsiabu.

Ne ni wina omubii omukhongo muno, okhushila ulia uchishilanga Nyasaye obubeyi, nohomba ulia uboolanga mbu; “Endererwe obufimbuli” ne shaba afimbulilwe shiosishiosi tawe. Nende ulia uboolanga mbu; “Nditsa okhwishia shinga ka Nyasaye yeshia.” Ne nolilola ababii olwa baliba mumusando kwokhurula omwoyo, ne Abamalaika nibabalunjisiliyekhwo emikhono chiabu nibababoolela mbu; “Rusie emioyo chienyu. Olwalelo mularungwa eshinyasio sheshifimbwa murwe, khulwa kalia akamwaboolanga khu Nyasaye akalali katoto tawe, nende shingala mwakholelanga tsinyaali tsitsie obufuru (wakhabalutsi shingala berundanga).”

Ne toto mumalile okhukhwiitsila shiamulala mulala, shingala khwabaloonga olwokhuranga; ne mwalekha inyuma wenyu akakhwabahelesia. Ne shikhulolangakhwo ta ababasabila benyu abamwelayilanga mbu ni abasanji ba Nyasaye khwinywe. Kakhalishe muno hakari wenyu, ne kalia akamwelayilanga kabakorere.

Toto Nyasaye niye umesinjia olufwa nende inyuma (fiaba emimela). Arusinjia omulamu okhurula mumufu, ne arusinjia omufu mumulamu. Oyo niye Nyasaye. Kho niyena wamukalukhanibungwa.

Niye ushiesinjia obulafu bwa mumabwibwi, ne ni ukholanga eshilo okhuba shiokhuwulukha, nende eliuba nende omwesi okhuchenda khububasio. Esho nisho eshichelo shia Owamani, Omumanyi muno.

Naye niye owamukasilia tsing’ining’ini; kho tsimulunjisie mufiilima fiokhungongo nende fiomunyanza. Toto khwamala okhwinoosia tsinyaali khu abandu abamanya.

Naye niye owabaloonga okhurula khumundu mulala, ne aliwo habundu wokhwikhala nende habundu wookhuba khubise bititi sa. Toto khwinoosinjia tsinyaali tsino khubandu bamanyanga (akababoolelwa).

Naye niye wishinjia amatsi okhurula mwikulu, ne khuko nikhumesia emimela chia buli eshindu mana nikhukhola nibimela emimela chobukondo bwa amasafu, nikhurusiamwo tsinyuma tsichelekhaane. Ne mumitende, birulangamwo mumakoko kayio ebisuche biiname, nende emikunda chetsizabibu, nende Zeituni, nende rumana, akafwanana nende kalafwanana. Henge ebiamo biayio olwabiamaanga nende okhwenga khwabio. Toto khwako ebifune bilimwo khubandu basuubilanga.

Ne bakhola amajini okhuba abasanji ba Nyasaye, nikali mbu niye owabaloonga. Ne bamuchishilanga mbu ali nende abana abasatsa nende beshikhasi nibabula obumanyi. Nyasaye nomutswenufu ali ehale nende ako, ne ali hekulu okhushila kalia kabamuchikhangakhwo.

Owaloonga likulu nende eshialo, kanyalikhana karie ye okhuba nende omwana, naye abula omukhasi. Ne yaloonga buli eshindu. Naye ni omumanyi muno wabuli eshindu.

Oyo niye Nyasaye wenyu omulesi, abulao nyasaye halali Ye, omulonji wa buli eshindu kho mumulame. Naye ni omulindi wabuli eshindu.

Tsimoni shitsiakhamulola tawe, naye atsilolanga. Naye niye omwihotselefu owuli nende amakhuwa koosi.

Toto bimalile okhubeetsela ebifune ebikhongo muno okhurula khu Nyasaye wenyu Omulesi. Kho ulia ufungula tsimoni yalola, nikhululwe omwene, ne ulia ulalola tawe nikhululwe omwene. Nasi shendi omulindi wenyu tawe (endisa omwikanyilisi).

Ne endio nilwakhureranga tsimbia tsia tsinyaali, ne khobaboole mbu, “Okasomele (kano shikarula khu Nyasaye tawe)”, kho khukenoosilie abandu bamanya.

Londa kofimbulilungwa okhurula khu Nyasaye wuwo Omulesi. Abulao nyasaye ulamwa khubwatoto owulali Ye. Ne wire ehale nende abatsokaasinjia Nyasaye.

Ne Nyasaye yenyanga, shibakhabeele abamutsokasinjia tawe. Ne efwe shikhwakhukhola mbu obe omulenji wabu tawe. Nawe sholi omulindi wabu tawe.

Ne olanyeka balia ababalaamanga abalali Nyasaye tawe, baletsa banyeka Nyasaye khubufuru bwabu, nibalamanyile tawe. Endio nilwa khwaronela buli abandu ebikhole biabu. Mana ewa Nyasaye wabu Omulesi niwo wabalikalukha, naye alibaboolela akabakholanga.

Ne betsuba khu Nyasaye ebitsubo biabu bia amaani muno mbu; “Nibarererwa ebimanyisio, toto balabisuubila.” Boola mbu; “Toto ebimanyisio bili wa Nyasaye. Ne ni shina eshibamanyia mbu toto nibibetsera shibalabisuubila tawe?”

Ne khwitsa okhukalukhania emioyo chiabu, nende tsimoni tsiabu shingala bakhaya okhukasuubila olwokhuranga. Ne khulabalekha mutsimbii tsiabu nibabeyabeyanga.

Ne khubeshilinjia Abamalaika, mana abafu babalomalomia mana khubakhung’asilie buli eshindu imbeli wabu, shibakhasuubile tawe okhula Nyasaye achame. Halali abanji mubo bakorerwe.

Ne endio nilwa khwakholela buli Omurumwa okhuba nende abasuku, amashetani abandu, nende amajini; bafimbulilananga abene khubene amakhuwa amarone kobubeyi. Ne Nyasaye wuwo Omulesi yenyanga, shibakhakholele bario tawe. Kho baleshesa nende akabachikhanga.

Kho chiloonde ako emioyo chia balia balasuubilanga mubulamu bwomwikulu tawe, ne bakachame, ne khobanyoole okhukhola akabakholanga.

Koo, engonye owubusia eshina wundi ulali Nyasaye tawe? Naye niye owabeshilia Eshitabu, eshinoosinjia habulafu. Ne balia abakhwahelesia Eshitabu, bamanya mbu toto shieshibwa okhurula khu Nyasaye wuwo Omulesi khubwatoto. Kho olayiira waba mubalia bakanakananga tawe.

Toto liayela likhuwa lia Nyasaye wuwo Omulesi liobwatoto nende obuleng’afu. Abulao unyala okhukalukhania amakhuwa kaye. Naye niye Omuwulili po, Omumanyi muno.

Ne nowulila abaanji bali khushialo, betsa okhukhukosia ehale nende injila ya Nyasaye. Bo balondanga butswa amaparo kabu, ne shibakholanga liosiliosi tawe halali okhuchikha butswa.

Toto bwene Nyasaye wuwo Omulesi niye owamanya obulayi balia abakora ehale nende injila yiyie, naye khandi yamanya muno balia abalunjikha.

Kho lie filia firumbulilwekho elira lia Nyasaye, toto nimuli mbu musuubilanga tsinyali tsitsie.

Ne shichila shina mulalia khutsisolo tsilia tsirumbulilwekho elira lia Nyasaye tawe, ne yabenoosilia obulayi ebia yabakania, halali bilia ebiamunichilisibwakho. Ne abaanji toto bakosinjia Abandu mubwikombi bwabu obulaba nende obumanyi tawe. Toto Nyasaye wuwo Omulesi ni umanyile muno abarumanga tsinzakho.

Ne leshe okhukhola tsimbi tsia habulafu nende tsia mubwifisi. Toto balia bakholanga tsimbi balirungwa khukabakholanga.

Ne mulalia tsisolo tsilia tsilarumbulilwekhwo elira lia Nyasaye tawe, shichila toto okho nokhurula mumalako. Ne toto amashetani kafimbulilanga abetsa babu khobayingane ninanyu. Ne nimubawulila mwaloonda kababoolanga, toto mulaba mubalia abatsokaasinjia Nyasaye.

Koo, ulia wali omufu, mana nikhumulamusia, nikhumwechesia obulafu, achendelanga obulafu obo imbeli wa abandu, alaba nashilala nende ulia uli mufiilima, owulanyala okhurulamwo tawe? Endio nilwa abakhayi baronilungwa kalia akabakholanga.

Ne endio nilwa khwakhola buli olukongo okhuba nende ababii abakhongo balwo, kho bakholemwo obutobela bwokhututa. Ne shibatutilanga yesiyesi tawe halali abene, ne shibamanyanga tawe.

Ne ebifune nibiboolela, baboolanga mbu; “Shikhunyala okhusuubila tawe okhula khuhebwe shinga kalia akahebwa Abarumwa ba Nyasaye.” Nyasaye niye umanyanga habundu wa ara oburume bubwe. Bulinyoola balia abakhola amabii obututuyo obukhongo ewa Nyasaye, nende eshinyasio eshikhongo khulwa okhututa khwabu khwabatutanga.

Kho ulia owa Nyasaye yenya okhumulunjisia, yanguyinjia eshilifu shishie shibe nobwihotselefu (obusalamu). Ne ulia wa Nyasaye yenya okhukosia, akholanga eshilifu shiaye okhuba eshitiyifu, eshisiro shinga uninanga mwikulu khubutinyu. Endio nilwa Nyasaye aretsanga obufundu khubalia abalasuubilanga tawe.

Ne ino ni injila ya Nyasaye wuwo Omulesi, ingololofu. Toto khwamala okhwinoosilia tsinyaali tsiefu abandu betsulilanga.

Balinyoola tsinzu tsiomulembe okhurula khu Nyasaye wabu Omulesi. Naye niye omulindi wabu, khulwa kalia akabakholanga.

Ne inyanga ya alibakhung’asia boosi, “Enywe omukanda kwa majini, toto enywe mwabukula abalondi abanji okhurula mubandu.” Mana abetsa babu mubandu baliboola mbu, “Nyasaye wefu Omulesi, khwakhonyananga efwe ninabo mana khulile khubise biefu biawakhurererao.” Nyasaye aliboola mbu; “Mumulilo nimwo eshimenyo shienyu, mwitsa okhwikhalamwo tsinyanga tsioosi, halali shia Nyasaye achama. Toto Nyasaye wuwo Omulesi niye Owamachesi po, Omumanyi muno.

Ne endio nilwa khukholanga abandu ababii okhuyanzana abeene khubeene okhubeela kalia akabakholanga.

“Enywe omukanda kwa amajini, nende abandu, koo, shibabeetselakhwo Abarumwa okhurula mwinywe, babenoosilinjia tsinyaali tsianje, ne nibabekanyisilia omukhung’ano okwa inyanga yenyu ya lelo?” Baliboola mbu; “Khuli abaloli khwifwe abeene.” Ne obulamu bwokhushialo bwabakatia. Ne nibelolela abeene mbu toto bali abakhayi.

Endio nilwa okhuba mbu, Nyasaye wuwo Omulesi shiyali wokhusishia tsingongo khububii, abamenyi batsio nibakorerwe tawe.

Ne boosi bali khutsingasi tsiawukhane khukalia kabakholanga. Ne Nyasaye wuwo Omulesi shang’ang’alanga ehale khukabakholanga tawe.

Ne Nyasaye wuwo Omulesi niye Winyala, Owetsimbabaasi. Niyenya, nabawesiayo, ne arerao abandi baachamile abalali enywe tawe, shingala yabainia enywe okhurula mulwibulo olwa abandu bandi.

Ne toto kalia kamulakungwa kaliula, ne shimulinyala okhushila tawe.

Boola mbu; “Enywe abandu banje, khole akenyu mubunyali bwenyu, siesi ekholanga akanje. Ne mulitsa okhumanya mbu niwina uliba nende inzu indayi mubumalilishi. Toto ababii shibalibura tawe.

Ne bakholela Nyasaye ebuleka khumimela echia yaloonga, nende mumiruko, ne baboolanga mbu; “Ino niya Nyasaye,” khukhuboola khwabu butswa, “ne ino niya balia bakhutsokaasinjia Nyasaye ninabo.” Kho bilia ebisuubililwe abanyasaye babu, shibiulanga khu Nyasaye tawe, ne ebisuubililwe Nyasaye biulanga khubanyasaye babu. Ni amabii muno akababusinjia.

Ne khandi abanji mubatsokaasi abo baronelwa nende abasanji babu okhwira abana babu khulwa okhubasishia nende okhubanyasilia idini yabu. Ne Nyasaye achamanga, shibakhakholele bario tawe. Kho baleshe nende akabachikhanga ako.

Nabo baboolanga mbu; “Tsisolo tsino nende emimela chino ni omusilo. Shibanyala okhubilia tawe halali balia aba efwe khubachamiile”- khukhuboola khwabu butswa. Nende tsisolo tsiakanibwa okhuninwa khumikongo chiatsio. Nende tsisolo tsindi etsilarumbulilungwakho elira lia Nyasaye tawe. Bachishilanga Nyasaye obubeyi. Alibarunga akabakholanga ako.

Ne baboolanga mbu; “Ebia munda mwetsisolo tsino nibia abasatsa befu bonyene, ne abakhasi befu bakaanibwa.” Ne ni ili ifwile, babilia boosi halala. Nyasaye alibarunga khukababoolanga ako. Toto Ye ni Owamachesi po, Omumanyi muno.

Toto bamala okhusikha balia abera abana babu mubusilu nibabula obumanyi, mana nibakania bilia ebia Nyasaye wabu abakabile, khukhuchishilasa Nyasaye. Toto bo bakora, ne shibali abalunjifu tawe.

Naye niye waloonga emikunda chili nende emisala chilandanga – emilandula nende echilalandanga, nende mitende nende emimela chiebiamo bikabukhane, nende emizaituni, nende emikoma chifwanana nende chilafwanana. Lie ebiamo babio olwa bibulananga, ne inyanga yokhuchesa murusie eshihanwa shiabio. Ne mulekhonyela khukhusasia tawe. Toto Ye shiyachama abandu ba isasia tawe.

Ne mutsisolo yabakholela tsilia tsiokhuchinga emisiko, nende obulili. Lie khubilia bia Nyasaye abakabile, ne mulaloonda amaseenelo ka Shetani tawe. Toto ye ni omusuku wenyu owa habulafu.

Yabalonjela tsimbia munane etsia tsisolo (tsisatsa nende tsikhasi): Tsibili mumakondi nende tsibili mutsimbusi. Boola mbu; “Koo mwakanibwa koosi amasatsa kabili (kamakondi nende tsimbusi), nohomba amakhasi kabili (kamakondi nende tsimbusi), nohomba ebili munda mwa akeshikhasi koosi kabili? Mboolele khubumanyi, toto enywe nimuli mbu muboolanga habwene.”

Ne tsibili mutsingamia, nende tsibili mutsing’ombe. Boola mbu; Koo yakania tsimbia tsioosi tsisatsa nende tsikhasi, nohomba ebili mutsinda mwetsikhasi tsioosi? Nohomba mwaliho olwa Nyasaye wamuboolela kano? Kho ni wina omubii omukhongo muno okhushila ulia uchishila Nyasaye obubeyi, khulwo khukosia abandu nabula obumanyi? Toto Nyasaye shalunjisinjia abandu ababii tawe.

Boola mbu; “Esie shendolangakhwo mukandafimbulilwa eshindu shiakanibwa okhulibwa tawe, halali shibe nishifwile eshiene, (mutsisolo) nohomba amalasile, nohomba inyama yeyimbitsi, shichila obo ni obumali; nohomba shisinzilwe nishilarumbulilwekho elira lia Nyasaye tawe, halali ulia unichilisibwa, nalekombele nohomba okhubura eshichelo tawe.” Awo toto Nyasaye wuwo Omulesi niwokhuleshela muno, Owetsimbabaasi po.

Ne balia baloonda idini yeshiyahudi, khwabakania okhulia isolo yosiyosi yamatere kokhuyimila. Ne mutsing’ombe nende amakondi nende mutsimbusi, khwabakania amasinya kabio, halali kalia kabiachinga mumikongo nende munda mwabio, nohomba kalia katilana nende ebikumba. Khwabarunga khurio eshichila obukhayi bwabu. Ne toto efwe nefwe ababoolanga obwatoto.

Ne nibakhuyingasia, boola mbu; “Nyasaye wenyu Omulesi niwetsimbabaasi etsiaswana. Ne eshinyasio shishie sishikalilungwa khubandu ababii tawe.”

Abatsokaasi baliboola mbu; “Nyasaye yenyanga, efwe shikhwakhabeele abatsokaasi tawe, nohomba bapapa befu, ne shikhwakhakanile okhulia shiosishiosi tawe.” Endio butswa nilo olwa balia bali imbeli wabu bayingana okhula shingala bapila eshinyasio shiefu. Boola mbu; “Enywe muli nende obumanyi mukhurerere? Enywe muloondanga butswa amaparo kenyu, ne shimuboolanga halali obubeyi butswa.”

Boola mbu; “Nyasaye niye uli nende eshifune shiobwatoto muno. Ne yenyanga, yakhabalunjisiye mwesi.”

Boola mbu; “Rere abaloli benyu abetsa okhurusia obuloli mbu toto Nyasaye yakana kano.” Kho, nibarusia obuloli, olaba halala ninabo tawe. Ne olaloonda obwikombi bwa balia bakhaya ebimanyisio biefu tawe, ne shibasuubilanga mubulamu bomwikulu tawe, ne bachelasinjia Nyasaye wabu Omulesi nende abandi.

Boola mbu; “Itse ebasomele ebia Nyasaye wenyu Omulesi yakania. Nabio ni mbu; “Mulamutsokasia nende shiosishiosi tawe. Ne kholele abebusi benyu amalayi. Ne muleera abana benyu khulwa okhuria obutakha tawe, efwe khubawetsanga omukabo enywe ninabo. Ne mulasita ahambi nende amakhuwa keshifwolo tawe, akalolekhana nende akefisile. Ne mulera omundu wa Nyasaye yakana okhwira tawe, halali khubwatoto. Kano ni amachelo kaye khwinywe khomunyole okhwikhonyela obwongo.

Ne mulasita ahambi nende omwandu kwa omwana wafwilwa tawe, halali khunjila yobulayi muno; okhula yole omundu omukhongo. Ne mwitsusie eshichelo nende tsiratili khubuleng’afu. Efwe shikhunichilisinjia omundu halali khushia anyala. Ne nimuboola, boole khubuleng’afu kata nibali abekho benyu. Ne indache ya Nyasaye mukhole. Ako yabachelela khomunyoole okhwitsulila.

Ne toto ino niyo injila yanje ingololofu, kho muyiloonde, ne mulaloonda tsinjila tsindi tawe; tsiabarusia khunjila yiye. Kano yabachelela khomunyoole okhumuria."

Mana khandi khwahelesia Musa Eshitabu okhumwitsusilia (tsimbabaasi tsiefu) khu balia abakhola obulayi, ne mbu ni amebaalo ka buli eshindu nende obulunjifu nende tsimbabaasi, khobanyoole okhusuubila okhubukana nende Nyasaye wabu Omulesi.

Ne shino neshitabu eshiakhweshia, eshili nende tsikhabi. Kho shilonde, ne rie Nyasaye khomunyoole okhuhelesibwa tsimbabaasi.

Muletsa mwaboola mbu; “Toto amahanga kabili imbeli wefu keshilibwa Eshitabu, nafu shikhwali nende obumanyi khukabekanga tawe.”

Nohomba mwaboola mbu; “Efwe khwishilibungwa Eshitabu, khwakhabeele abalunjifu muno okhubashila bo." Kho, obwinoosi okhurula khu Nyasaye wenyu Omulesi bumalile okhuboolela, nende obulunjifu nende tsimbabaasi. Kho, niwina omubii muno okhushila ulia uyingasia ebimanyisio bia Nyasaye, mana niyera ehale ninabio? Khulirunga balia beretsanga ehale nende ebimanyisio biefu eshinyasio eshilulu, khulwa kalia akabeeretsanga ehale ninako.

Koo, liliwo elindi eliabalindanga ilali Abamalaika baboolele, nohomba Nyasaye wuwo Omulesi, nohomba biboolele ebimanyisio bia Nyasaye wuwo Omulesi? Inyanga yebimanyisio bindi bia Nyasaye wuwo Omulesi biliula, ebise ebio awo, okhusuubila khwa omundu shikhulimukhonya eshindu tawe, kakhabaanga shiyali niyasuubila imbeli awo, nohomba yakhola amalayi mubusuubili bubwe tawe. Boola mbu; “Linde, fwesi nafu khulindanga.”

Toto balia abakabula idini yabu, mana nibaba emikanda emikanda, obula ninabo olwikho lwosilwosi tawe. Toto amakhuwa kabu kali khu Nyasaye, mana alibaboolela kalia akabakholanga.

Ulia uliitsa nende lilayi, alirungwa amalayi okhula ekhumi shinga lio. Ne ulia uliitsa nende libii, alirungwa butswa libii shinga lio. Nabo shibalikholelwa obubii tawe.

Boola mbu; “Toto Nyasaye wanje Omulesi yaalunjisia khunjila ingololofu, idini ili habwene muno, ili mbu niyo injila ya Ibrahim owali omulunjifu. Ne shiyali mubalia abatsokaasinjia Nyasaye tawe.”

Boola mbu; “Toto amalamo (iswala) kanje, nende emilukha chia amalamo kanje, nende obulamu bwanje, nende okhufwa khwanje, ni khulwa Nyasaye, Omulesi webiloonje bioosi.

Abula omusanji yesiyesi, ne ako niko kandalomesibwa, nasi ni wokhuranga musalamu boosi.”

Boola mbu; "Koo engoonye Nyasaye omulesi wundi owulali Nyasaye tawe, naye niye Nyasaye Omulesi wabuli eshindu? Ne buli omundu yekholelanga omwene sa. Ne omundu shalichinga omusiko kwa owundi tawe. Mana okhukalukha khwenyu khuliba ewa Nyasaye wenyu Omulesi. Naye alibaboolela kalia akamwakabukhanilangakhwo."

Naye niye owabakhola abalindi bokhushialo, naachingula abandi mwinywe hekulu waabandi tsingasi tsia hekulu, kho abateme khu bilia ebia yabahelesia. Toto Nyasaye wuwo Omulesi ni Omwangu weshinyasio, naye toto Niwobulesheli po, Owetsimbabaasi muno.