Marathi Meal — Muhammed Şefî' Ensârî — Nebe' 78:1 – Nas 114:6

१. हे लोक कोणत्या गोष्टीची विचारपूस करीत आहेत?

२. त्या मोठ्या खबरीची?

३. ज्याबाबत हे अनेक मत (विचार) राखतात.

४. निश्चितपणे हे आताच जाणून घेतील.

५. पुन्हा निश्चितपणे त्यांना फार लवकर माहीत पडेल.

६. काय आम्ही जमिनीला बिछाईत नाही बनविले?

७. आणि पर्वतांना मेखा नाही बनविले?

८. आणि आम्ही तुम्हाला जोडी जोडीने निर्माण केले.

९. आणि आम्ही तुमच्या झोपेला तुमच्या आरामाचे कारण बनविले.

१०. आणि रात्रीला आम्ही पडदा (आवरण) बनविले.

११. आणि दिवसाला आम्ही रोजी प्राप्त करण्याचा समय बनविले.

१२. आणि तुमच्या वरती आम्ही सात मजबूत आकाश बनविले.

१३. आणि एक चकाकणारा तेजस्वी दीप निर्माण केला.

१४. आणि ढगांद्वारे आम्ही मुसळधार पर्जन्यवृष्टी केली.

१५. यासाठी की त्याद्वारे अन्न (धान्य) आणि वनस्पती उगवाव्यात.

१६. आणि घनदाट बागाही (उगवाव्या).

१७. निःसंशय, निर्णयाचा दिवस निर्धारीत आहे.

१८. ज्या दिवशी सूर (शंख) फुंकला जाईल, मग तुम्ही सर्व झुंडच्या झुंड बनून याल.

१९. आणि आकाश उघडले जाईल, तेव्हा त्यात दारेच दारे बनतील.

२०. आणि पर्वत चालविले जातील, तेव्हा ते पांढरी वाळू बनतील.

२१. निःसंशय, जहन्नम टपून बसली आहे.

२२. विद्रोही (उदंड) लोकांचे ठिकाण तेच आहे.

२३. त्यात ते युगानुयुगे (आणि शतके) पडून राहतील.

२४. ना कधी त्यात शीतलतेची गोडी चाखतील, ना पाण्याची.

२५. गरम (उकळते) पाणी आणि वाहत्या पू-खेरीज.

२६. (त्यांना) पूर्णपणे मोबदला मिळेल.

२७. त्यांना तर हिशोबाची आशाच नव्हती.

२८. ते निडरतेने आमच्या आयतींना खोटे ठरवित असत.

२९. आम्ही प्रत्येक गोष्ट लिहून सुरक्षित ठेवली आहे.

३०. आता तुम्ही (आपल्या कर्मांचा) स्वाद चाखा. आम्ही तुमच्या शिक्षेतच वाढकरीत राहू.

३१. निःसंशय, अल्लाहचे भय राखणाऱ्यांकरिता सफलता आहे.

३२. बागा आहेत आणि द्राक्षे आहेत.

३३. आणि नवयुवती कुमारिका समवयस्क स्त्रिया आहेत.

३४. आणि भरून वाहणारे मद्याचे प्याले आहेत.

३५. तिथे ना तर ते अश्लील गोष्टी ऐकतील आणि ना खोट्या गोष्टी ऐकतील.

३६. (त्यांना) तुमच्या पालनकर्त्यातर्फे (त्यांच्या सत्कर्मांचा) हा मोबदला मिळेल, जो फार मोठे बक्षीस असेल.

३७. (त्या) पालनकर्त्यातर्फे मिळेल, जो आकाशांचा आणि जमिनीचा, आणि जे काही त्यांच्या दरम्यान आहे, त्या सर्वांचा स्वामी व पालनकर्ता आहे, आणि मोठा दयावान आहे. कोणालाही त्याच्याशी बोलण्याचा अधिकार नसेल.

३८. ज्या दिवशी रुह (आत्मा) आणि फरिश्ते रांगा बांधून उभे असतील तेव्हा कोणी बोलू शकणार नाही, मात्र ज्याला अतिशय दयावान (रहमान) अनुमती देईल, आणि तो उचित गोष्ट तोंडातून काढील (बोलेल).

३९. हा दिवस सत्य आहे, आता ज्याची इच्छा असेल त्याने आपल्या पालनकर्त्याजवळ (सत्कर्मे करून) स्थान बनवावे.

४०. आम्ही तुम्हाला निकट भविष्यात घडून येणाऱ्या शिक्षा यातनेचे भय दाखविले (आणि सावध केले) ज्या दिवशी मनुष्य आपल्या हातांनी केलेल्या कमाई (कर्मा) ला पाहील आणि काफिर म्हणेल की, मी माती झालो असतो तर (बरे झाले असते)!

१. बुडून कठोरतापूर्वक खेचणाऱ्यांची शपथ.१ ——— (१) हे प्राण काढणाऱ्या फरिश्त्या ंचे वर्णन आहे. फरिश्ते काफिरांचे प्राण मोठ्या कठोरपणे काढतात आणि तेही शरीरात बुडून.

२. बंधन उकलून सोडविणाऱ्यांची शपथ.

३. आणि पोहणाऱ्या फिरणाऱ्यांची शपथ. १ ——— (१) फरिश्त्ये प्राण काढण्यासाठी माणसाच्या शरीरात असे पोहत फिरतात, जणू पाण्यात तळाशी जाणारा पाणबुड्या मोती काढण्यासाठी समुद्रात अगदी खोलवर पोहत फिरतो किंवा असा अर्थ की अतिशय वेगाने फरिश्ते अल्लाहचा आदेश घेऊन आकाशातून उतरतात कारण वेगवान घोड्यालाही ‘सबिअ’ म्हणतात.

४. मग धावत पुढे जाणाऱ्यांची शपथ!

५. मग कार्याची योजना करणाऱ्यांची शपथ!

६. ज्या दिवशी थरथर कांपणारी थरथर कांपेल,

७. त्यानंतर एक मागे येणारी (मागोमाग) येईल.

८. (अनेक) हृदय त्या दिवशी धडधड करतील.

९. ज्यांच्या नजरा खाली असतील.

१०. असे म्हणतात की, काय आम्हाला पहिल्यासारख्या अवस्थेकडे पुन्हा परतविले जाईल?

११. काय अशा वेळी की जेव्हा आम्ही अगदी जीर्णशीर्ण हाडे होऊन जाऊ?

१२. म्हणतात की मग तर हे परतणे नुकसानदायक आहे. (माहीत असले पाहिजे)

१३. की ती तर केवळ एक (भयानक) दरडावणी आहे.

१४. (जी दिली जाताच) ते एकदम मैदानात जमा होतील.

१५. काय, मूसा (अलैहिस्सलाम) चा वृत्तांत तुम्हास पोहचला आहे?

१६. जेव्हा त्यांना त्यांच्या पालनकर्त्याने तूवाच्या पवित्र मैदानात पुकारले.

१७. (की) तुम्ही फिरऔनजवळ जा, त्याने बंडखोरी (उदंडता) अंगीकारली आहे.

१८. त्याला सांगा की, काय तू स्वतःची दुरुस्ती आणि सुधारणा इच्छितो.

१९. आणि हे की मी तुला तुझ्या पालनकर्त्याचा मार्ग दाखवू यासाठी की तू (त्याचे) भय बाळगू लागावे.

२०. तेव्हा त्याला मोठी निशाणी दाखविली.

२१. तर त्याने खोटे ठरविले आणि अवज्ञा केली.

२२. मग पुन्हा परतला प्रयत्न करीत१ ——— (१) अर्थात त्याने ईमान आणि आदेशाचा केवळ इन्कारच केला नाही तर धरतीत उत्पात माजविण्याचा आणि हजरत मूसाशी सामना (विरोध) करण्याचा प्रयत्न करीत राहिला आणि जादूगारांना एकत्र करून मूसा (अलै.) यांच्याशी सामना करविला यासाठी की त्यांना खोटे ठरविले जाऊ शकावे.

२३. मग सर्वांना एकत्र करून उंच स्वरात ऐलान केले.

२४. म्हणाला, तुम्हा सर्वांचा पालनहार मीच आहे.

२५. तेव्हा (सर्वोच्च व सर्वश्रेष्ठ) अल्लाहने देखील त्याला आखिरत (मरणोत्तर जीवना) च्या आणि या जगाच्या शिक्षा - यातनेत घेरले.

२६. निःसंशय, यात त्या माणसाकरिता बोध आहे, जो भय राखील.

२७. काय तुम्हाला निर्माण करणे अधिक कठीण आहे किंवा आकाशाला? सर्वश्रेष्ठ अल्लाहने त्याला निर्माण केले.

२८. त्याची उंची वाढविली, मग त्याला यथायोग्य केले.

२९. आणि त्याच्या रात्रीला अंधकारपूर्ण बनविले आणि त्याच्या दिवसाला प्रकट केले.

३०. आणि त्यानंतर जमिनीला (समतल) बिछविले.

३१. त्यातून पाणी आणि चारा काढला.

३२. आणि पर्वतांना (मजबूत) रोवले.

३३. हे सर्व तुमच्या आणि तुमच्या जनावरांच्या फायद्यासाठी (आहे).

३४. तर जेव्हा ते मोठे संकट (कयामत) येईल.

३५. ज्या दिवशी मनुष्य आपल्या केलेल्या कर्मांची आठवण करील.

३६. आणि (प्रत्येक) पाहणाऱ्याच्या समोर जहन्नम उघडपणे आणली जाईल.

३७. तेव्हा, ज्या (माणसा) ने विद्रोह अंगीकारला (असेल).

३८. आणि ऐहिक जीवनाला प्राधान्य दिले (असेल).

३९. (त्याचे) ठिकाण जहन्नमच आहे.

४०. तथापि, जो मनुष्य आपल्या पालनकर्त्यासमोर उभे राहण्यापासून भीत राहिला असेल आणि आपल्या मनाला इच्छा-अभिलाषांपासून रोखले असेल.

४१. तर त्याचे ठिकाण जन्नतच आहे.

४२. लोक तुम्हाला कयामत केव्हा घडून येईल असे विचारतात.

४३. ते सांगण्याशी तुमचा काय संबंध?

४४. तिच्या ज्ञानाची अंतिम सीमा तर अल्लाहकडे आहे.

४५. तुम्ही तर फक्त तिच्याशी भयभीत राहणाऱ्यांना सावधान करणारे आहात.१ ——— (१) अर्थात तुमचे काम केवळ ‘इन्ज़ार’ (भय दाखविणे) आहे, परोक्ष (गैब) च्या वार्ता देणे नव्हे, ज्यात कयामतचे ज्ञान आहे जे अल्लाहने कोणालाही दिले नाही. ‘मनयख्‌शाहा’ अशासाठी म्हटले आहे की तंबी (चेतावणी) आणि धर्म-प्रचाराचा खरा लाभ त्यालाच मिळतो, ज्याच्या मनात अल्लाहचे भय असते, अन्यथा खबरदार करण्याचा आणि संदेश पोहचविण्याचा आदेश तर प्रत्येक माणसाकरिता आहे.

४६. ज्या दिवशी हे तिला (प्रत्यक्ष) पाहून घेतील तेव्हा असे वाटेल की केवळ दिवसाचा अंतिम भाग अथवा आरंभीचा भागच ते (या जगात) राहिलेत.

१. त्याने तोंड आंबट केले आणि तोंड फिरविले.

२. (केवळ अशासाठी) की त्याच्याजवळ एक आंधळा आला.

३. तुम्हाला काय माहीत, कदाचित तो सुधारला असता.

४. किंवा त्याने उपदेश ऐकला असता आणि त्याला उपदेश लाभदायक ठरला असता.

५. (परंतु) जो बेपर्वाईने वागतो.

६. त्याच्याकडे तर तुम्ही पुरेपूर लक्ष देत आहात.

७. वास्तविक त्याच्या न सुधारण्याने तुमची काहीच हानी नाही.

८. आणि जो मनुष्य तुमच्याजवळ धावत येतो.

९. आणि तो भीत (ही) आहे.

१०. तर त्याच्याशी तुम्ही उपेक्षावृत्ती दाखविता.

११. हे योग्य नाही.१ कुरआन तर बोध (दायक वस्तू) आहे. ——— (१) अर्थात अशा लोकांचा तर सन्मान वाढविला पाहिजे. त्यांच्याकडून तोंड फिरवून घेणे उचित नव्हे. ही आयत हे स्पष्ट करते की धर्म प्रचारासंदर्भात कोणाला विशेष लेखू नये, किंबहुना गरीब-श्रीमंत, मालक-नोकर, पुरुष-स्त्री, लहान-मोठा, राव-रंक सर्वांना एकसमान समजावे आणि सर्वांना एकत्र संबोधित करावे. मग अल्लाह ज्याला इच्छिल, आपल्या मार्गदर्शनाने उपकृत करेल.

१२. ज्याची इच्छा होईल (त्याने) यापासून बोध घ्यावा.

१३. (हा तर) आदर-सन्मान पूर्ण ग्रंथांमध्ये आहे.

१४. जे उच्चतम व पवित्र आणि स्वच्छ शुद्ध आहेत.

१५. अशा लिहिणाऱ्यांच्या हातात आहे.

१६. जे उच्च दर्जाचे पवित्र आहेत.

१७. अल्लाहची मार असो मानवावर, कसा कृतघ्न आहे.

१८. याला (अल्लाहने) कोणत्या वस्तूपासून निर्माण केले.

१९. (याला) एका वीर्यबिंदूपासून मग अनुमानावर राखले त्याला.

२०. मग त्याच्यासाठी मार्ग सोपा केला.

२१. मग त्याला मरण दिले आणि मग कबरीत गाडले.

२२. मग जेव्हा इच्छा होईल, त्याला जिवंत करील.

२३. मुळीच नाही. त्याने आतापर्यंत अल्लाहच्या आदेशाचे पालन केले नाही.

२४. माणसाने आपल्या भोजनावर नजर टाकली पाहिजे.

२५. की आम्ही भरपूर पाणी वर्षविले.

२६. मग जमिनीला चांगल्या प्रकारे फाडले.

२७. मग तिच्यातून अन्न (धान्य) उगविले.

२८. आणि द्राक्ष व भाजीपाला.

२९. आणि जैतून व खजूर.

३०. आणि घनदाट बागा.

३१. आणि मेवे व (गवत) चारा (देखील उगविला).

३२. तुमच्या वापराकरिता व फायद्याकरिता आणि तुमच्या चार पायांच्या जनावरांकरिता.

३३. मग जेव्हा कान बधीर करून टाकणारी (कयामत) येईल.

३४. त्या दिवशी माणूस पळ काढील आपल्या भावापासून.

३५. आणि आपल्या माता व पित्यापासून.

३६. आणि आपल्या पत्नी व आपल्या संततीपासून.

३७. त्यांच्यापैकी प्रत्येकाला त्या दिवशी अशी चिंता (लागून) राहील, जी त्याला (व्यस्त राखण्या) साठी पुरेशी असेल.

३८. त्या दिवशी अनेक चेहरे उज्वल असतील.

३९. (जे) हसत आणि आनंदित असतील.

४०. आणि बहुतेक चेहरे त्या दिवशी धुळीने माखलेले असतील.

४१. त्यांच्यावर काळिमा आच्छादित असेल.

४२. हे तेच इन्कारी, दुराचारी लोक असतील.

१. जेव्हा सूर्य गुंडाळून घेतला जाईल.

२. आणि जेव्हा तारे निस्तेज होतील.

३. आणि जेव्हा पर्वतांना चालविले जाईल.

४. आणि जेव्हा गर्भधारक सांडणींना सोडून दिले जाईल.

५. आणि जेव्हा हिंस्र पशूंना एकत्रित केले जाईल.

६. आणि जेव्हा समुद्र भडकाविले जातील.

७. आणि जेव्हा प्राणांना (शरीराशी) जोडले जाईल.

८. आणि जेव्हा जिवंत गाडल्या गेलेल्या मुलींना विचारले जाईल.

९. की कोणत्या अपराधापायी त्यांची हत्या केली गेली.

१०. आणि जेव्हा कर्म-लेख उघडले जातील.

११. आणि जेव्हा आकाशाची चामडी (आवरण) उतरविली जाईल.

१२. आणि जेव्हा जहन्नम भडकविली जाईल.

१३. आणि जेव्हा जन्नतला जवळ आणले जाईल.

१४. तेव्हा त्या दिवशी प्रत्येक मनुष्य जाणून घेईल, जे काही (सोबत) घेऊन आला असेल.

१५. मी शपथ घेतो मागे हटणाऱ्या,

१६. चालणाऱ्या फिरणाऱ्या, लपणाऱ्या ताऱ्यांची.

१७. आणि रात्रीची जेव्हा ती जाऊ लागेल.

१८. आणि सकाळची जेव्हा चकाकू लागेल.

१९. निःसंशय, हे एका सन्मानित संदेशवाहकाचे कथन आहे.

२०. जो मोठा शक्तिशाली आहे. अर्शचा स्वामी (अल्लाह) च्या ठायी उच्च दर्जाचा आहे.

२१. ज्याचे तेथे (आकाशांमध्ये) आज्ञापालन केले जाते, (तो) अमानतदार आहे.

२२. आणि तुमचा साथीदार वेडा नाही.

२३. त्याने त्या (फरिश्त्या) ला आकाशाच्या उघड्या किनाऱ्यावर पाहिलेही आहे.

२४. आणि हा परोक्षाच्या गोष्टी सांगण्यात कंजूसही नाही.

२५. आणि हा (कुरआन) धिःक्कारलेल्या सैतानाचे कथन नाही.

२६. मग तुम्ही कोठे जात आहात?

२७. हे तर समस्त विश्ववासीयांकरिता बोधपत्र आहे.

२८. (खासकरून त्याच्यासाठी,) जो तुमच्यपैकी सरळ मार्गावर चालू इच्छितो.

२९. आणि तुम्ही, सर्व विश्वांच्या पालनकर्त्या (अल्लाह) च्या (इच्छे) विना काहीच इच्छू शकत नाही.

१. जेव्हा आकाश विदीर्ण होईल.

२. आणि जेव्हा तारे झडतील (गळून पडतील)

३. आणि जेव्हा समुद्र वाहून जातील.

४. आणि जेव्हा कबरींना (फाडून) उखडून टाकले जाईल.

५. त्या वेळी प्रत्येक मनुष्य, त्याने जे काही पुढे पाठविले आणि मागे सोडले (अर्थात आपल्या पुढच्या मागच्या कर्मांना) जाणून घेईल.

६. हे मानवा! तुला आपल्या दयाळू पालनकर्त्याबाबत कोणत्या गोष्टीने बहकविले?१ ——— (१) अर्थात कोणत्या गोष्टीने तुला धोक्यात ठेवले की तू आपल्या पालनकर्त्या (अल्लाह) चा इन्कार केला, ज्याने तुला अस्तित्व प्रदान केले. तुला सुज्ञता प्रदान केली आणि तुझ्यासाठी जीवनोपयोगी साधनसामुग्री तयार केली.

७. ज्या (पालनकर्त्याने) तुला निर्माण केले, मग यथायोग्य केले, मग (सुयोग्यरित्या) व्यवस्थित घडविले.

८. ज्या रूपात इच्छिले तुला बनविले आणि तुला घडविले.

९. मुळीच नाही, किंबहुना तुम्ही तर शिक्षा आणि मोबदल्याच्या दिवसाला खोटे ठरविता.

१०. निःसंशय, तुमच्यावर रक्षक (पहारेकरी)

११. सन्मानित लिहिणारे नियुक्त आहेत.

१२. जे काही तुम्ही करता, ते जाणतात.

१३. निःसंशय, नेक - सदाचारी लोक (जन्नतचे ऐषआराम आणि) देणग्यांनी लाभान्वित असतील.

१४. आणि निश्चितच वाईट (दुराचारी) लोक जहन्नममध्ये असतील.

१५. मोबदल्याच्या दिवशी तिच्यात प्रवेश करतील.

१६. ते तिच्यातून कधीही गायब होऊ शकणार नाहीत.

१७. आणि तुम्हाला काही माहीतही आहे की मोबदल्याचा दिवस काय आहे?

१८. मी दुसऱ्यांदा (सांगतो की) तुम्हाला काय माहीत की मोबदल्याचा (आणि शिक्षेचा) दिवस काय आहे?

१९. (तो असा की) ज्या दिवशी कोणी मनुष्य, कोणा माणसाकरिता कसल्याही गोष्टीचा अधिकार बाळगणारा नसेल आणि समस्त आदेश त्या दिवशी अल्लाहचेच असतील.

१. मोठी वाईट अवस्था आहे माप-तोलमध्ये कमी करणाऱ्यांसाठी.

२. की जेव्हा लोकांकडून माप मोजून घेतात तेव्हा पुरेपूर मोजून घेतात.

३. आणि जेव्हा त्यांना माप मोजून किंवा तोल करून देतात, तेव्हा कमी देतात.

४. काय त्यांना आपल्या मृत्युनंतर जिवंत होऊन उठण्याबाबतचा विश्वास नाही.

५. त्या महान दिवसाकरिता.

६. ज्या दिवशी सर्व लोक, सर्व विश्वांच्या पालनकर्त्यासमोर उभे असतील.

७. निःसंशय, दुराचारी लोकांचा कर्म-लेख ‘सिज्जीन’ मध्ये आहे.

८. तुम्हाला काय माहीत ‘सिज्जीन’ काय आहे?

९. (हा तर) लिखित ग्रंथ आहे.

१०. त्या दिवशी खोटे उठविणाऱ्यांची मोठी दुर्दशा आहे.

११. जे मोबदला आणि शिक्षेच्या दिवसाला खोटे ठरवितात.

१२. याला फक्त तोच खोटे ठरवितो, जो मर्यादेचे उल्लंघन करणारा आणि अपराधी असतो.

१३. जेव्हा त्याच्यासमोर आमच्या आयती वाचल्या जातात तेव्हा तो म्हणतो की हे तर पूर्वीच्या लोकांचे किस्से आहेत.

१४. असे नाही, किंबहुना त्यांच्या मनावर त्यांच्या कर्मांमुळे गंज (चढलेला) आहे.

१५. एवढेच नाही. हे लोक त्या दिवशी आपल्या पालनकर्त्याच्या दर्शनापासून वंचित ठेवले जातील.

१६. मग या लोकांना निश्चितपणे जहन्नममध्ये फेकून दिले जाईल.

१७. मग त्यांना सांगितले जाईल की हेच आहे ते, ज्याला तुम्ही खोटे ठरवित राहिले.

१८. निःसंशय, सत्कर्मी लोकांचा कर्म-लेख ‘इल्लियीन’ मध्ये आहे.

१९. तुम्हाला काय माहीत की ‘इल्लियीन’ काय आहे?

२०. (तो तर) लिखित ग्रंथ आहे.

२१. अल्लाहचे निकटवर्ती (फरिश्ते) हजर असतात.

२२. निःसंशय, नेक सदाचारी लोक (मोठ्या) सुखा-समाधानात असतील.

२३. आसनांवर बसून पाहात असतील.

२४. तुम्ही त्यांच्या चेहऱ्यावरूनच (अल्लाहच्या) कृपा देणग्यांची प्रफुल्लता ओळखाल.

२५. या लोकांना शुद्ध निर्भेळ मद्य पाजले जाईल.

२६. ज्यावर कस्तुरीची मोहर लागली असेल. इच्छा करणाऱ्यांनी त्याचीच इच्छा केली पाहिजे.

२७. आणि त्यात ‘तस्नीम’चे मिश्रण असेल.

२८. (अर्थात) तो झरा, ज्याचे पाणी, अल्लाहचे सान्निध्य लाभलेले लोक पितील.

२९. निःसंशय, अपराधी लोक ईमान राखणाऱ्या लोकांची थट्टा उडवित असत.

३०. आणि त्यांच्या जवळून जाताना नेत्र कटाक्ष (व इशाऱ्याने) त्याचा अपमान करीत असत.

३१. आणि जेव्हा आपल्या लोकांकडे परत येत, तेव्हा थट्टा - मस्करी करीत असत.

३२. आणि जेव्हा त्यांना पाहत, तेव्हा असे म्हणत, निश्चितच हे लोक वाट चुकलेले आहेत.

३३. यांना, त्याच्यावर निरीक्षक बनवून तर नाही पाठविले गेले!

३४. तेव्हा आज ईमान राखणारे या इन्कारी लोकांवर हसतील.

३५. आसनांवर विराजमान होऊन पाहत असतील.

३६. की आता या इन्कार करणाऱ्यांनी, जसे कर्म ते करीत होते, त्याचा पुरेपूर मोबदला प्राप्त करून घेतला.

१. जेव्हा आकाश विदीर्ण होईल.

२. आणि आपल्या पालनकर्त्याचा आदेश कान लावून ऐकेल, आणि त्याला तसे करणे भाग आहे.

३. आणि जेव्हा जमिनीला (खेचून) पसरविले जाईल.

४. आणि तिच्यात जे आहे ते ओकून बाहेर काढील आणि अगदी खाली होईल.

५. आणि आपल्या पालनकर्त्याचा आदेश कान लावून ऐकेल आणि ती त्यास पात्र आहे.

६. हे मानवा! तू आपल्या पालनकर्त्याशी भेट होईपर्यंत हे प्रयत्न आणि सर्व कार्य आणि परिश्रम करून त्याची भेट घेणार आहेस.

७. तर त्या वेळी ज्या माणसाच्या उजव्या हातात कर्म-पत्र दिले जाईल.

८. त्याचा हिशोब मोठ्या सहजतेने घेतला जाईल.१ ——— (१) सहज सोपा हिशोब असा की, ईमान राखणाऱ्याचे कर्म-पत्र प्रस्तुत केले जाईल, त्याचे दोष (अपराध) देखील त्याच्यासमोर आणले जातील. मग अल्लाह आपल्या असीम दया-कृपेने त्याला माफ करील. हजरत आयशा (रजि.) फर्मावितात की पैगंबर सल्लल्लाहु अलैहि वसल्लम यांनी फर्माविले, ज्याचा हिशोब घेतला गेला तो नाश पावला. मी म्हटले, हे अल्लाहचे रसूल! अल्लाह माझे आपणावर बलिदान करो. काय अल्लाहने नाही फर्माविले की ज्याच्या उजव्या हाता कर्म-पत्र दिले गेले, त्याचा हिशोब सह सोपा होईल. (हजरत आयशा यांच्या मते या आयतीनुसार तर ईमान राखणाऱ्याचाही हिशोब घेतला जाईल, परंतु तो नाश पावणार नाही.) पैगंबरांनी स्पष्ट केले, ही तर पेशी (हजर होणे) आहे. अर्थात ईमान राखणाऱ्याशी हिशोबाचा (सक्त) व्यवहार होणार नाही. एक सर्वसाधारण पेशी असेल. ईमान राखणाऱ्यांना अल्लाहसमोर हजर केले जाईल, ज्याला सक्तीने विचारपूस होईल तो नाश पावेल. (सहीह बुखारी, तफसीर सूरह इन्शिकाक)

९. आणि तो आपल्या कुटुंबियांकडे आनंदित होऊन परत जाईल.

१०. परंतु ज्या माणसाचे कर्म-पत्र त्याच्या पाठीमागून दिले जाईल.

११. तेव्हा तो मृत्युला बोलावू लागेल.

१२. आणि भडकत्या जहन्नममध्ये दाखल होईल.

१३. हा मनुष्य आपल्या कुटुंबात (जगात) आनंदित होता.

१४. तो समजत होता की अल्लाहकडे परतून जाणारच नाही.

१५. हे कसे शक्य आहे, वास्तविक त्याचा पालनकर्ता त्याला चांगल्या प्रकारे पाहात होता.

१६. मला संध्याकाळच्या लालिमेची शपथ.

१७. आणि रात्रीची आणि तिने गोळा केलेल्या वस्तूंची शपथ.

१८. आणि पूर्ण चंद्राची शपथ.

१९. निःसंशय, तुम्ही एका अवस्थेतून दुसऱ्या अवस्थेत पोहोचाल.

२०. त्यांना झाले तरी काय की ईमान राखत नाहीत?

२१. आणि जेव्हा त्यांच्यासमोर कुरआन वाचले जाते, तेव्हा सजदा करीत नाहीत.

२२. किंबहुना त्यांनी कुप्र (इन्कार) केला, ते खोटे ठरवित आहेत.

२३. आणि हे जे काही मनात ठेवतात, अल्लाह ते चांगल्या प्रकारे जाणतो.

२४. तेव्हा तुम्ही त्यांना दुःखदायक शिक्षा यातनांची खूशखबर द्या.

२५. तथापि ईमान राखणाऱ्या नेक सदाचारी लोकांना अगणित आणि कधीही न संपणारा मोबदला प्रदान केला जाईल.

१. बुरुजांवाल्या आकाशाची शपथ.

२. वायदा केलेल्या दिवसाची शपथ!

३. हजर होणाऱ्या आणि हजर केल्या गेलेल्याची शपथ!

४. (की) खंदकवाल्यांचा सर्वनाश केला गेला.

५. ती एक आग होती इंधनाची.

६. जेव्हा ते लोक तिच्या जवळपास बसले होते.

७. आणि ईमानधारकांशी जे करीत होते, ते आपल्या समोर पाहात होते.

८. हे लोक त्या ईमानधारकांच्या अन्य एखाद्या अपराधाचा सूड घेत नव्हते, याखेरीज की त्यांनी वर्चस्वशाली, सर्व प्रशंसेस पात्र अशा अल्लाहवर ईमान राखले होते.

९. ज्याच्यासाठी आकाश आणि धरतीचे साम्राज्य व राज्यसत्ता आहे आणि प्रत्येक वस्तू सर्वश्रेष्ठ अल्लाहसमोर आहे.

१०. निःसंशय, ज्या लोकांनी ईमानधारक पुरुषांना व स्त्रियांना सताविले, मग माफीही मागितली नाही तर त्यांच्यासाठी जहन्नमची शिक्षा-यातना आहे आणि जळण्याची शिक्षा.

११. निःसंशय, ईमान कबूल करणाऱ्यांकरिता आणि सत्कर्म करणाऱ्यांकरिता त्या बागा आहे, ज्यांच्या खाली प्रवाह वाहत आहेत. हीच मोठी सफलता आहे.

१२. निःसंशय, तुमच्या पालनकर्त्याची पकड मोठी सक्त आहे.

१३. तोच पहिल्यांदा निर्माण करतो आणि तोच दुसऱ्यांदा जिवंत करील.

१४. तो मोठा माफ करणारा आणि खूप स्नेह-प्रेम करणारा आहे.

१५. अर्शचा स्वामी, अत्याधिक महानता राखणारा.

१६. जे इच्छिल ते करून टाकणारा आहे.

१७. काय तुम्हाला लष्करांची बातमीही मिळाली आहे?

१८. (अर्थात) फिरऔन आणि समूदची.

१९. खरे तर हे इन्कारी लोक खोटे ठरविण्याच्याच मागे लागले आहेत.

२०. आणि सर्वश्रेष्ठ अल्लाहनेही त्यांना सगळीकडून घेरले आहे.

२१. किंबहुना हा कुरआन मोठी शान वैभव (प्रशंसा) राखणारा आहे.

२२. ‘लोहे महफूज’मध्ये (लिहिलेला).

१. शपथ आहे आकाशाची आणि अंधारात प्रकट होणाऱ्याची.

२. तुम्हाला काय माहीत की तो रात्री प्रकट होणारा काय आहे.

३. तो एक तेजस्वी तारा आहे.

४. असा कोणीही नाही, ज्याच्यावर संरक्षक फरिश्ता (नियुक्त) नसेल.

५. माणसाने विचार केला पाहिजे की त्याला कोणत्या वस्तूपासून निर्माण केले गेले आहे.

६. त्याला एका उसळत्या पाण्यापासून निर्माण केले गेले आहे.

७. जे पाठ आणि छाती यांच्या दरम्यानी भागातून निघते.

८. निःसंशय, तो (अल्लाह) त्याला परत आणण्यावर निश्चितच सामर्थ्य राखणारा आहे.

९. ज्या दिवशी गुप्त रहस्यभेदांची जांच-पडताळ केली जाईल.

१०. तेव्हा त्याचा ना काही जोर चालेल आणि ना कोणी मदतकर्ता असेल.

११. पर्जन्यवृष्टी करणाऱ्या आकाशाची शपथ.

१२. आणि दुभंगणाऱ्या जमिनीची शपथ.

१३. निःसंशय, हा (कुरआन) काटेकोर फैसला करणारी भाषा आहे.

१४. ही हास्य-विनोदाची (आणि निरर्थक) गोष्ट नाही.

१५. तथापि इन्कारी लोक कट - कारस्थान करीत आहेत.

१६. आणि मी देखील एक डाव चालत आहे.

१७. तुम्ही या इन्कारी लोकांना सवड देऊन टाका, त्यांना काही दिवस मोकळीक द्या.

१. आपल्या अति उच्च पालनकर्त्याच्या नावाची पवित्रता वर्णन करा.

२. ज्याने निर्माण केले आणि सही सलामत बनविले.

३. आणि ज्याने (यथायोग्य) अनुमान केले आणि मग मार्गदर्शन केले.

४. आणि ज्याने ताजे गवत उगविले.

५. मग त्याने ते (सुकवून) काळा केर - कचरा करून टाकले.

६. आम्ही तुम्हाला शिकवू, मग तुम्ही विसरणार नाही.

७. परंतु जे काही अल्लाह इच्छिल. निःसंशय, तो उघड आणि लपलेले सर्व काही जाणतो.

८. आणि आम्ही तुमच्यासाठी सहजता निर्माण करू.

९. तेव्हा तुम्ही उपदेश करीत राहा जर उपदेश काही लाभ देईल.

१०. (अल्लाहचे) भय बाळगणारा तर बोध ग्रहण करील.

११. तथापि दुर्दैवी, यापासून दूर पळेल.

१२. जो मोठ्या भयंकर आगीत दाखल होईल.

१३. जिथे मग तो ना मरेल, ना जगेल, (किंबहुना मरणासन्न स्थितीतच पडून राहील).

१४. निःसंशय, त्याने सफलता प्राप्त केली, जो स्वच्छ शुद्ध झाला.

१५. आणि ज्याने आपल्या पालनकर्त्याचे नाम स्मरणात ठेवले, आणि नमाज पढत राहिला.

१६. परंतु तुम्ही तर ऐहिक जीवनालाच प्राधान्य देता.

१७. आणि आखिरत (मरणोत्तर जीवन) अतिशय उत्तम निरंतर टिकून राहणारी आहे.

१८. या गोष्टीचे वर्णन पूर्वी (अवतरित झालेल्या) ग्रंथातही आहे.

१९. (अर्थात) इब्राहीम आणि मूसा यांच्या ग्रंथात.

१. काय तुम्हालाही, झाकून टाकणाऱ्या (कयामत) ची वार्ता पोहचली आहे?

२. त्या दिवशी बहुतेक चेहरे अपमानित असतील.

३. (आणि) दुःखांनी पीडित कष्ट - यातनाग्रस्त असतील.

४. ते धगधगत्या आगीत जाऊन पडतील.

५. आणि अतिशय उष्ण झऱ्याचे पाणी त्यांना पाजले जाईल.

६. त्यांच्यासाठी काटेदार झाडांखेरीज आणखी काही खायला नसेल.

७. जे ना त्यांना धष्ट पुष्ट करील, ना त्यांची भूक मिटवील.

८. बहुतेक चेहरे त्या दिवशी प्रफुल्ल टवटवीत आणि (सुसंपन्न स्थितीत) असतील.

९. आपल्या कर्मांमुळे आनंदित असतील.

१०. उच्च (प्रतीच्या) जन्नतींमध्ये असतील.

११. जिथे कोणतीही असभ्य निरर्थक गोष्ट ऐकणार नाहीत.

१२. जिथे (शीतल) झरे वाहत असतील.

१३. (आणि) त्या (जन्नतीं) मध्ये उंच उंच आसने असतील.

१४. आणि प्याले ठेवलेले (असतील).

१५. आणि एका रांगेत लावलेले तक्के असतील.

१६. आणि मऊ मखमली गालिचे पसरलेले असतील.

१७. काय हे उंटाकडे नाही पाहत की त्यांना कशा प्रकारे निर्माण केले गेले आहे?

१८. आणि आकाशांना की कशा प्रकारे उंच केले गेले आहे.

१९. आणि पर्वतांकडे, की कशा प्रकारे गाडले गेले आहेत.

२०. आणि जमिनीकडे की कशा प्रकारे ती बिछविली गेली आहे.

२१. तर तुम्ही उपदेश करीत राहा (कारण) तुम्ही फक्त उपदेश करणारे आहात.

२२. तुम्ही काही यांच्यावर देखरेख ठेवणारे नाहीत.

२३. परंतु जो मनुष्य तोंड फिरवील आणि इन्कार करील.

२४. त्याला सर्वश्रेष्ठ अल्लाह फार मोठा अज़ाब (शिक्षा - यातना) देईल.

२५. निःसंशय, त्यांना तर आमच्याचकडे परतायचे आहे.

२६. निःसंशय, त्यांचा हिशोब घेण्याची जबाबदारी आमची आहे.

१. शपथ आहे प्रातःकाळची!

२. आणि दहा रात्रींची!

३. आणि सम आणि विषम संख्येची!

४. आणि रात्रीची जेव्हा ती निघू लागावी!

५. काय यात बुद्धिमानांसाठी पुरेशी शपथ आहे?

६. काय तुम्ही नाही पाहिले की तुमच्या पालनकर्त्याने आदच्या लोकांशी काय व्यवहार केला?

७. मोठमोठे खांब बनविणाऱ्या इरमशी.

८. ज्यांच्यासारखा (कोणताही जनसमूह) अन्य भूभागात निर्माण केला गेला नाही.

९. आणि समूदच्या लोकांशी, ज्यांनी दऱ्या-खोऱ्यात मोठमोठे पाषाण कोरले होते.

१०. आणि फिरऔनशी, जो मेखा बाळगणारा होता.

११. या सर्वांनी धरतीवर उपद्रव पसरविला होता.

१२. आणि खूप उत्पात (फसाद) माजविला होता.

१३. शेवटी तुमच्या पालनकर्त्याने या सर्वांवर अज़ाबचा आसूड बरसविला.

१४. निःसंशय, तुमचा पालनकर्ता लक्ष ठेवून आहे.

१५. माणसा (ची ही दशा आहे की) जेव्हा त्याचा पालनकर्ता त्याची परीक्षा घेतो, आणि त्याला मान प्रतिष्ठा व कृपा देणग्या प्रदान करतो तेव्हा तो म्हणू लागतो की माझ्या पालनकर्त्याने मला सन्मानित केले.

१६. आणि जेव्हा तो (अल्लाह) याची कसोटी घेतो, त्याची आजिविका तंग (कमी) करून टाकतो, तेव्हा तो म्हणू लागतो की माझ्या पालनकर्त्याने माझी अव्हेलना केली (आणि मला अपमानित केले).

१७. असे मुळीच नाही किंबहुना (खरी गोष्ट अशी) की तुम्ही लोक अनाथाचा मान-सन्मान राखत नाही.१ ——— (१) अर्थात अनाथाशी चांगले वर्तन राखत नाही, ज्यास तो पात्र आहे. पैगंबर सल्लल्लाहु अलैहि वसल्लम या संदर्भात फर्मावितात की ते घर सर्वांत उत्तम आहे, ज्यात अनाथाशी चांगला व्यवहार केला जात असेल आणि ते घर सर्वांत वाईट आहे, ज्यात अनाथाशी वाईट व्यवहार केला जात असेल. मग आपल्या बोटांकडे इशारा करून फर्माविले की मी आणि अनाथाचे पालनपोषण करणारा जन्नतमध्ये अशा प्रकारे सोबत राहू, जशी ही दोन बोटे मिळालेली आहेत. (अबू दाऊद, किताबुल अदब, बाबुन फी जम्मिल यतीमे)

१८. आणि गरिबांना जेवू घालण्याचे एकमेकांना प्रोत्साहन देत नाही.

१९. आणि (मेलेल्यांची) वारस संपत्ती गोळा करून खातात.

२०. आणि धन-संपत्तीशी जीवनापाड प्रेम राखता.

२१. निःसंशय, जमिनीला जेव्हा कुठून कुठून तिला अगदी सपाट केले जाईल.

२२. आणि तुमचा पालनकर्ता (स्वतः) प्रकट होईल आणि फरिश्ते रांगा बांधून (येतील).

२३. आणि ज्या दिवशी जहन्नमलाही आणले जाईल त्या दिवशी माणूस बोध ग्रहण करील. परंतु आता त्याच्या बोध ग्रहण करण्याचा काय लाभ?

२४. तो म्हणेल की मी आपल्या या जीवनाकरिता काही सत्कर्मे, पहिल्यापासून करून ठेवली असती तर फार बरे झाले असते.

२५. तर आज अल्लाहच्या शिक्षा - यातनेसारखी शिक्षा - यातना अन्य कोणाचीही नसेल.

२६. ना त्याच्या बंधनासारखे कोणाचे बंधन असेल.

२७. हे संतुष्ट आत्मा!

२८. तू आपल्या पालनकर्त्याकडे परत चल, अशा अवस्थेत की तू त्याच्याशी राजी, तो तुझ्याशी प्रसन्न.

२९. तेव्हा, माझ्या खास दासांमध्ये सामील हो.

३०. आणि माझ्या जन्नतमध्ये प्रवेश कर.

१. मी या शहराची शपथ घेतो.

२. आणि तुम्ही या शहरात वास्तव्य करता.

३. आणि (शपथ आहे) मानवी पिता आणि संततीची.

४. निःसंशय, आम्ही मानवाला (मोठ्या) कष्ट-यातनेत निर्माण केले.

५. काय मनुष्य असे समजतो की तो कोणाच्या नियंत्रणाखाली नाही?

६. सांगत (फिरतो) की मी तर भरपूर धन-संपत्ती खर्च करून टाकली.

७. काय, तो (असे) समजतो की कोणी त्याला पाहिलेच नाही?

८. काय, आम्ही त्याचे दोन डोळे नाही बनविले?

९. आणि एक जीभ व दोन ओठ (नाही बनविले?)

१०. आणि त्याला दोन्ही मार्ग दाखवून दिले.

११. तेव्हा, घाटीत प्रवेश करणे त्याला शक्य झाले नाही.

१२. तुम्हाला काय माहीत की तो घाटी मार्ग काय आहे?

१३. एखाद्याची मान (दास, दासी) मुक्त करणे.

१४. किंवा भुकेल्या दिवशी पोटभर जेवु घालणे.

१५. एखाद्या नातेवाईक अनाथाला.

१६. किंवा मातीस मिळालेल्या अतिशय गरीब माणसाला.

१७. मग त्या लोकांपैकी झाला असता, जे ईमान राखतात, आणि एकमेकांना धीर संयम व दया करुणा करण्याची ताकीद करतात.

१८. हेच लोक आहेत उजव्या बाजूचे.

१९. आणि ज्या लोकांनी आमच्या आयतींचा इन्कार केला, तेच लोक डाव्या हाताचे आहेत.

२०. हेच आगीच्या कोंडीत असतील जी चारी बाजूंनी घेरलेली असेल.

१. शपथ आहे सूर्याची आणि त्याच्या उन्हाची.

२. शपथ आहे चंद्राची जेव्हा त्याच्या मागे येईल.

३. शपथ आहे दिवसाची जेव्हा सूर्याला प्रकट करील.

४. शपथ आहे रात्रीची जेव्हा त्याला झाकून टाकील.

५. शपथ आहे आकाशाची आणि त्याला बनविण्याची.

६. शपथ आहे जमिनीची आणि तिला समतल करण्याची.

७. शपथ आहे प्राणा (आत्म्या) ची आणि त्याला योग्य बनविण्याची.

८. मग समज दिली त्याला दुराचाराची आणि त्यापासून अलिप्त राहण्याची.

९. ज्याने या (आत्म्या) ला स्वच्छ शुद्ध केले, तो सफल झाला.

१०. आणि ज्याने याला मातीत मिळवले तो असफल झाला.

११. समूद जनसमूहाने आपल्या विद्रोहामुळे खोटे ठरविले.

१२. जेव्हा त्यांच्यातला एक मोठा अभागी उठून उभा राहिला.

१३. त्यांना अल्लाहच्या पैगंबराने फर्माविले होते की सर्वश्रेष्ठ अल्लाहच्या सांडणीचे आणि तिच्या पिण्याच्या पाळीचे (रक्षण करा).

१४. त्या लोकांनी आपल्या पैगंबरांना खोटे जाणून त्या सांडणीला मारून टाकले. तेव्हा त्यांच्या पालनकर्त्याने त्यांच्या अपराधापायी त्यांना विनाशात टाकले आणि मग विनाशाला सार्वत्रिक केले आणि त्या संपूर्ण वस्तीला भुईसपाट करून टाकले.

१५. तो या प्रकोपाच्या परिणामापासून निर्भय आहे.

१. शपथ आहे रात्रीची जेव्हा ती पसरते.

२. आणि शपथ आहे दिवसाची जेव्हा तो प्रकाशमान होतो.

३. आणि शपथ आहे त्याची ज्याने नर व मादी निर्माण केले.

४. निःसंशय, तुमचे प्रयत्न वेगवेगळ्या प्रकारचे आहेत.

५. तर जो (अल्लाहच्या मार्गात) देत राहिला आणि भय बाळगत राहिला.

६. आणि भलाईपूर्ण गोष्टीचे सत्य-समर्थन करीत राहिला.

७. तर आम्हीही त्याला सहज सुलभता प्रदान करू.

८. परंतु ज्याने कंजूसी केली आणि बेपर्वाई दाखविली.

९. आणि सत्कर्माच्या गोष्टींना खोटे ठरविले.

१०. तर आम्हीही त्याच्यासाठी तंगी अडचणीची सामुग्री उपलब्ध करू.

११. त्याची धन-संपत्ती त्याला (तोंडघशी) पडतेवेळी काहीच उपयोगी पडणार नाही.

१२. निःसंशय, मार्ग दाखविण्याची जबाबदारी आमची आहे.

१३. आणि आमच्याच हाती आखिरत आणि ही दुनिया आहे.

१४. मी तर तुम्हाला अंगारे(निखारे) मारणाऱ्या आगीपासून भयभीत केले आहे.

१५. जिच्यात फक्त तोच कमनशिबी दाखल होईल.

१६. ज्याने खोटे ठरविले आणि (याचे अनुसरण करण्यापासून) तोंड फिरविले.

१७. आणि या (आगी) पासून असा मनुष्य दूर ठेवला जाईल, जो अल्लाहचे मोठे भय राखून वागणारा असेल.

१८. जो स्वच्छ शुद्धता (पाकी) प्राप्त करण्यासाठी आपले धन देतो.

१९. कोणाचा त्याच्यावर काही उपकार नाही की ज्याची फेड केली जात असावी.

२०. किंबहुना, केवळ आपल्या अतिउच्च व सर्वश्रेष्ठ पालनकर्त्याची प्रसन्नता प्राप्त करण्याकरिता.

२१. निःसंशय, तो (अल्लाह देखील) लवकरच राजी होईल.

१. शपथ आहे चाश्त (सूर्य वर आल्या) च्या वेळेची.

२. आणि शपथ आहे रात्रीची जेव्हा ती पसरते.

३. ना तर तुमच्या पालनकर्त्याने तुम्हाला (एकटे) सोडले आहे, आणि ना तो तुमच्याशी बेजार झाला आहे.

४. निःसंशय, तुमच्यासाठी आरंभापेक्षा शेवट अधिक चांगला आहे.

५. तुम्हाला तुमचा पालनकर्ता फार लवकरच (इनाम) देईल आणि तुम्ही राजी (व खूश) व्हाल.

६. काय त्याने तुम्हाला अनाथ जाणून आश्रय दिला नाही?

७. आणि तुम्हाला, मार्ग विसरलेले पाहून मार्ग दाखविला नाही?

८. आणि तुम्हाला निर्धन असलेले पाहून श्रीमंत बनविले नाही?

९. तेव्हा अनाथावर तुम्हीही सक्ती (कठोरता) करू नका.

१०. आणि ना याचना करणाऱ्याला दाटून दरडावून बोलू नका.

११. आणि आपल्या पालनकर्त्याच्या कृपा-देणग्यांचे वर्णन करीत राहा.

१. काय आम्ही तुमची छाती (हृदय) उघड केली नाही?

२. आणि तुमच्यावरून तुमचे ओझे उतरविले.

३. ज्याने तुमची पाठ मोडून टाकली होती.

४. आणि आम्ही तुमची चर्चा बुलंद केली.

५. तेव्हा निश्चितच कठीणतेसह सहजता आहे.

६. निःसंशय, कठीणतेसह सहजता आहे.

७. तर, जेव्हा तुम्ही कामकाज आटोपून मोकळे व्हाल, तर तेव्हा (उपासनेत) मग्न व्हा.

८. आणि आपल्या पालनकर्त्याकडे मन लावा.

१. शपथ आहे अंजीरची आणि जैतूनची.

२. आणि सनायीच्या तूर (पर्वता) ची.

३. आणि या शांतीपूर्ण शहराची.

४. निःसंशय, आम्ही मनावाला अति उत्तम स्वरूपात निर्माण केले.

५. मग त्याला खालच्या स्तरांपेक्षा खालच्या स्तराचा करून टाकले.

६. परंतु ज्या लोकांनी ईमान राखले आणि मग सत्कर्म करीत राहिले तर त्यांच्यासाठी असा चांगला मोबदला आहे जोकधी संपणार नाही.

७. मग तुम्हाला आता, मोबदल्याच्या दिवसाला खोटे ठरविण्यास कोणती गोष्ट प्रवृत्त करते?

८. काय सर्वश्रेष्ठ अल्लाह (सर्व) शासकांचा शासक नाही.

१. पठण करा आपल्या पालनकर्त्याच्या नावाने, ज्याने निर्माण केले.

२. ज्याने मानवाला रक्ताच्या लोथड्या (गोळ्या) पासून निर्माण केले.

३. तुम्ही पठण करीत राहा तुमचा पालनकर्ता मोठा कृपाशील आहे.

४. ज्याने लेखणीद्वारे (ज्ञान) शिकविले

५. ज्याने माणसाला ते शिकविले, जे तो जाणत नव्हता.

६. खरोखर मनुष्य तर स्वतःवर काबू ठेवत नाही.

७. अशासाठी की तो स्वतःला निश्चिंत (किंवा श्रीमंत) समजतो.

८. निःसंशय, तुमच्या पालनकर्त्याकडेच परत जायचे आहे.

९. (बरे) त्यालाही तुम्ही पाहिले, जो (एका दासाला) रोखतो.

१०. वास्तिवक तो दास नमाज अदा करतो.

११. आता तुम्हीच सांगा जर तो सन्मार्गावर असेल.

१२. किंवा अल्लाहचे भय राखून वागण्याचा आदेश देत असेल.

१३. बरे पाहा तर, जर हा खोटे ठरवित असेल आणि तोंड फिरवित असेल.

१४. काय हा हे नाही जाणत की सर्वश्रेष्ठ अल्लाह त्याला चांगल्या प्रकारे पाहात आहे.

१५. निश्चितच, जर त्याने आपले वाईट वर्तन सोडले नाही तर आम्ही त्याच्या माथ्यावरचे केस धरून त्याला फरफटत ओढू.

१६. असा माथा जो खोटा व गुन्हेगार आहे.

१७. त्याने आपल्या बैठकीतल्या लोकांना बोलावून घ्यावे.

१८. आम्हीही जहन्नमच्या रक्षकांना बोलावून घेऊ.

१९. खबरदार! त्याचे म्हणणे मुळीच मान्य करू नका आणि सजदा करा व (अल्लाहशी) निकट व्हा.

१. निःसंशय, आम्ही या (कुरआना) ला कद्र (बरकती) च्या रात्री अवतरित केले.

२. तुम्हाला काय माहीत की कद्रची रात्र काय आहे?

३. कद्रची रात्र एक हजार महिन्यांपेक्षा उत्तम आहे.

४. या रात्री (प्रत्येक कार्य पार पाडण्यास) आपल्या पालनकर्त्याच्या आदेशाने फरिश्ते आणि रुह (जिब्रील) अवतरित होतात.

५. ही रात्र पूर्णपणे सलामतीची असते आणि प्रातःकाळाचा उदय (पहाट) होईपर्यंत असते.

१. ग्रंथधारकंपैकी इन्कार करणारे आणि अनेकेश्वरवादी लोक आपल्या वर्तनापासून मागे हटणारे नव्हते, जोपर्यंत त्यांच्याजवळ उघड प्रमाण न यावे (आणि ते प्रमाण हे होते की).

२. सर्वश्रेष्ठ अल्लाहचा एक पैगंबर, जो पवित्र ग्रंथ वाचून दाखविल.

३. ज्यात उचित व स्पष्ट ईशआदेश असावेत.

४. ग्रंथधारक आपल्याजवळ स्पष्ट प्रमाण येऊन पोहचल्यानंतरच (मतभेदात पडून) विभाजित झाले.

५. वास्तविक त्यांना याखेरीज कोणताही आदेश दिला गेला नाही की त्यांनी फक्त अल्लाहचीच उपासना करावी, त्याच्याचकरिता दीन (धर्मा) ला विशुद्ध राखावे. (इब्राहीम) हनीफच्या दीन (धर्मा) वर आणि नमाजला कायम राखावे आणि जकात (कर्तव्य-दान) देत राहावे. हाच सरळ दीन (धर्म) आहे मुस्लिम संप्रदायाचा.

६. निःसंशय, जे लोक ग्रंथधारकांपैकी इन्कारी झाले. आणि अनेकेश्वरवादी, सर्वच्या सर्व जहन्नमच्या आगीत (जातील), ज्यात ते नेहमी (नेहमी) राहतील. हेच लोक सर्वांत वाईट निर्मिती होय.

७. निःसंशय, ज्या लोकांनी ईमान राखले आणि सत्कर्म केले, तर असे लोक (अल्लाहची) सर्वांत उत्तम निर्मिती होय.

८. यांचा मोबदला, त्यांच्या पालनकर्त्याजवळ निरंतर राहणाऱ्या जन्नती आहेत, ज्यांच्या खाली (थंड पाण्याचे) प्रवाह वाहत असतील, ज्यात ते सदैवकाळ राहतील. सर्वश्रेष्ठ अल्लाह त्यांच्याशी राजी झाला, आणि हे त्याच्याशी राजी झाले. हे (केवळ अशा माणसाकरिता आहे जो आपल्या पालनकर्त्याचे भय राखतो.१ ——— (१) अर्थात हा चांगला मोबदला आणि सुख - संपन्नता त्याच लोकांसाठी आहे जे या जगात अल्लाहचे भय बाळगून राहतात आणि या भयामुळे अल्लाहच्या अवज्ञेपासून दूर राहतात. जर प्रसंगी, मानवी निकडीमुळे अल्लाहची अवज्ञा झाली, तर त्वरित क्षमा याचना (तौबा) करतात आणि पुढे तसा अपराध न करण्याचा दृढसंकल्प करून आपले आचरण सुधारतात. येथपावेतो की त्यांच्या मृत्यु याच आज्ञापालनासह झाला, अवक्षेसह नव्हे. तात्पर्य, जो मनुष्य अल्लाहचे भय राखतो तो अवज्ञा करण्यावर दुराग्रह करीत नाही आणि ना त्यावर अटळ राहतो.

१. जेव्हा जमिनीला पूर्णपणे थरथर हलविले जाईल.

२. आणि ती आपल्यात असलेले सर्व ओझे बाहेर काढून फेकेल.

३. मनुष्य म्हणू लागेल की हिला झाले तरी काय?

४. त्या दिवशी जमीन आपला सर्व अहवाल सादर करील.

५. यासाठी की तुमच्या पालनकर्त्याने तिला तसा आदेश दिला असेल.

६. त्या दिवशी लोक वेगवेगळ्या जमाती बनून (परत) फिरतील यासाठी की त्यांना त्यांची कर्मे दाखविली जावीत.

७. तेव्हा, ज्याने कणाइतकेही सत्कर्म केले असेल, तो ते पाहील.

८. आणि ज्याने कणाइतकेही दुष्कर्म केले असेल, तो ते पाहील.

१. धापा टाकीत धावणाऱ्या घोड्यांची शपथ!

२. मग टाप मारून चिंगाऱ्या उडविणाऱ्यांची शपथ!

३. मग सकाळच्या वेळी हल्ला चढविणाऱ्यांची शपथ!

४. तर त्या वेळी धूळ उडवितात.

५. मग त्याचसोबत सैन्यांमध्ये घुसतात.

६. निःसंशय, मनुष्य आपल्या पालनकर्त्याशी मोठा कृतघ्न आहे.

७. आणि खात्रीने तो स्वतःही यावर साक्षी आहे.

८. आणि हा धनाच्या मोहातही मोठा सक्त (कठोर) आहे.

९. काय याला ती वेळ माहीत नाही जेव्हा कबरीमध्ये जे (काही) आहे, काढून घेतले जाईल.

१०. आणि मनातल्या गुप्त गोष्टींना उघड केले जाईल.

११. निःसंशय, यांचा पालनकर्ता त्या दिवशी यांच्या अवस्थेची पुरेपूर खबर राखणारा असेल.

१. खडखडविणारी.

२. काय आहे ती खडखडविणारी.

३. तुम्हाला काय माहीत की ती खडखडविणारी काय आहे?

४. ज्या दिवशी माणसे इतस्ततः विखुरलेल्या कीटक पतंगांप्रमाणे होतील.

५. आणि पर्वत, पिंजलेल्या रंगीत लोकरीसारखे होतील.

६. मग ज्याचे पारडे वजनात भारी असेल

७. तर तो ऐष-आरामाच्या जीवनात असेल.

८. आणि ज्याचे पारडे वजनात हलके असेल

९. तर त्याचे ठिकाण ‘हाविया’ आहे.

१०. आणि तुम्हाला काय माहीत की ती काय आहे.

११. ती खूप प्रखरतेने भडकत असलेली आग आहे.

१. जास्तीत जास्त मिळविण्याच्या मोहाने तुम्हाला गाफील करून टाकले.

२. येथेपर्यर्ंत की तुम्ही कब्रस्तानात जाऊन पोहोचले (दफन झाले).

३. मुळीच नाही, तुम्ही लवकरच जाणून घ्याल.

४. मुळीच नाही, तुम्हाला फार लवकर कळून येईल.

५. मुळीच नाही, जर तुम्ही खात्रीशीरपणे जाणून घ्याल.

६. तर निश्चितच तुम्ही जहन्नम जरूर पाहाल.

७. आणि तुम्ही तिला विश्वासाच्या डोळ्यांनी पाहाल.

८. मग त्या दिवशी तुम्हाला निश्चितपणे कृपा देणग्यांबाबत विचारले जाईल.

१. काळाची शपथ.

२. वस्तुत सारे मानव पूर्णतः घाट्यात आहेत.

३. मात्र त्या लोकांखेरीज, ज्यांनी ईमान राखले आणि सत्कर्म करीत राहिले आणि (ज्यांनी) आपसात सत्यावर कायम राहण्याची ताकीद केली आणि एकमेकांना धीर संयम राखण्याचा उपदेश केला.

१. मोठी वाईट अवस्था आहे अशा त्या प्रत्येक माणसाची जो व्यंग दोष शोधणारा, चहाडी करणारा असेल.

२. जो धन - दौलत एकत्र करतो आणि मोजून ठेवतो.

३. तो असे समजतो की त्याची धन - दौलत त्यांच्याजवळ सदा सर्वकाळ राहील.

४. मुळीच नाही. हा तर चुराडा करून टाकणाऱ्या आगीत फेकला जाईल.

५. आणि तुम्हाला काय माहीत की अशी आग काय असेल?

६. ती अल्लाहने पेटविलेली आग असेल.

७. जी हृदयांवर चढतच जाईल.

८. (ती आग) सगळीकडून बंदिस्त असेल.

९. आणि त्यांच्यावर मोठमोठ्या खांबांमध्ये.

१. काय तुम्ही नाही पाहिले की तुमच्या पालनकर्त्याने हत्तीवाल्यांशी कसा व्यवहार केला?

२. काय त्यांचा डाव असफल नाही केला?

३. आणि त्यांच्यावर पक्ष्यांच्या झुंडीवर झुंडी पाठविल्या

४. जे त्यांच्यावर माती आणि दगडांच्या खड्यांचा मारा करीत होते.

५. मग त्यांना खाऊन टाकलेल्या भूशा (चोथ्या) प्रमाणे करून टाकले.

१. कुरैशला आसक्ती मिळवून देण्याकरिता

२. (अर्थात) त्यांना सर्दी व गरमीच्या प्रवासाची सवय लावून देण्याकरिता

३. त्यांनी (कृतज्ञता म्हणून) या घराच्या (काबागृहाच्या) स्वामीची उपासना करीत राहिले पाहिजे.

४. ज्याने त्यांना भुकेल्या अवस्थेत खायला दिले आणि भय-दहशतीच्या अवस्थेत शांती (सुरक्षा) प्रदान केली.

१. काय तुम्ही (त्यालाही) पाहिले जो मोबदल्याच्या दिवसाला खोटे ठरवितो.

२. हाच तो होय, जो अनाथाला धक्के मारतो.

३. आणि गरीबाला जेवु घालण्यास प्रोत्साहन देत नाही.

४. त्या नमाजी लोकांकरिता ‘वैल’ (नामक जहन्नमची एक जागा) आहे.

५. जे आपल्या नमाजांपासून गाफील आहेत.

६. जे केवळ देखावा दाखवितात.

७. आणि वापरण्याची वस्तू रोखून धरतात.

१. निःसंशय, आम्ही तुम्हाला कौसर (आणि बरेच काही) प्रदान केले आहे.

२. तेव्हा, तुम्ही आपल्या पालनकर्त्यासाठी नमाज पढा आणि कुर्बानी करा.

३. निःसंशय, तुमचा शत्रूच बेवारशी आणि नाव-निशाण नसलेला आहे.

१. तुम्ही सांगून टाका की हे इन्कारी लोकांनो!

२. ना मी उपासना करतो त्याची, ज्याची तुम्ही उपासना करता.

३. ना तुम्ही उपासना करणारे आहात त्याची, ज्याची मी उपासना करतो.

४. आणि ना मी उपासना करेन त्याची, ज्याची तुम्ही उपासना करता.

५. आणि ना तुम्ही त्याची उपासना कराल, ज्याची मी उपासना करतो.

६. तुमच्यासाठी तुमचा दीन (धर्म) आहे आणि माझ्यासाठी माझा दीन (धर्म) आहे.

१. जेव्हा अल्लाहतर्फे मदत आणि विजय प्राप्त होईल.

२. आणि लोकांना तुम्ही अल्लाहच्या दीन (धर्मा) कडे समूहासमूहांनी येताना पाहाल.

३. तेव्हा आपल्या पालनकर्त्याची स्तुती प्रशंसेसह पवित्रता वर्णन करू लागा आणि त्याच्याजवळ क्षमा याचनेची प्रार्थना करीत राहा. निःसंशय, तो मोठा तौबा (क्षमा-याचना) कबूल करणारा आहे.

१. अबु लहबचे दोन्ही हात तुटले आणि तो (स्वतः) नष्ट झाला.

२. ना तर त्याची संपत्ती त्याच्या कामी आली आणि ना त्याची कमाई.

३. लवकरच तो भडकणाऱ्या आगीत जाऊन पडेल.

४. आणि त्याची पत्नीही (जाईल), जी लाकडे वाहून नेणारी आहे.

५. तिच्या गळ्यात खजुरीच्या सालीचा पीळ घातलेला दोरखंड असेल.

१. तुम्ही सांगा की तो अल्लाह एकमेव आहे.

२. अल्लाह निरपेक्ष आहे.

३. ना त्याच्यापासून कोणी जन्मास आला ना तो कोणापासून जन्मला.

४. आणि ना कोणी त्याचा समकक्ष आहे.

१. तुम्ही सांगा की मी प्रातःकाळच्या स्वामीच्या शरणात येतो.

२. त्या प्रत्येक वस्तूच्या उपद्रवापासून जी त्याने निर्माण केली आहे.

३. आणि अंधारमय रात्रीच्या उपद्रवापासून, जेव्हा तिचा अंधार पसरेल.

४. आणि गाठी (बांधून त्या) वर फुंकणारींच्या उपद्रवापासून (ही)

५. आणि ईर्ष्या करणाऱ्यांच्या उपद्रवापासूनही, जेव्हा ते ईर्ष्या करतील.

१. तुम्ही सांगा, मी लोकांच्या पालनकर्त्याच्या शरणात येतो.

२. लोकांच्या स्वामीच्या (आणि)

३. लोकांच्या उपास्या (अल्लाह) च्या (आश्रयात)

४. (मनात) कुविचार टाकणाऱ्या, मागे हटणाऱ्याच्या उपद्रवापासून.

५. जो लोकांच्या मनात वाईट विचार टाकतो.

६. (मग तो) जिन्नांपैकी असो किंवा माणसांपैकी.