Nepalce Meal — Nepal Ehl-i Hadîs Merkez Cemiyeti — Tekvir 81:1 – Nas 114:6

१) जब सूर्यलाई बेरिनेछ,

२) र ताराहरूले आफ्नो चमक गुमाउनेछन् ।

३) र जब पहाडहरू चलाइनेछन् ।

४) र जब १० महिने गर्भवती ऊँटनीहरू भगाइनेछिन् ।

५) र जब जंगली जनावरहरू एकत्रित गरिनेछन ।

६) र जब समुन्द्रहरू उत्तेजित गरिनेछन् ।

७) जब आत्माहरू (शरीरसँग) मिलाइनेछन् ।

८) र जब जिउँदै गाडिएको केटीसँग सोधिनेछ, ।

९) कि कुन पापको कारण उसलाई मारिएको थियो ।

१०) र जब कर्मपत्र खोलिनेछन् ।

११) र जब आकाशको छाला उघारिनेछ ।

१२) र जब नर्कको आगो प्रज्जवलित गरिनेछ ।

१३) र जब बहिश्त (स्वर्ग) नजिक ल्याइनेछ ।

१४) तब त्यसदिन हरेक व्यक्तिले थाहा पाउनेछ कि उसले के लिएर आएको छ ।

१५) म शपथ लिन्छु ती ताराहरूको जो पछि हटिहाल्छन् ।

१६) र जो घुम्ने र हराइहाल्ने छन् ।

१७) र रातको कसम, जब समाप्त हुनथाल्छ ।

१८) र प्रातःको कसम जब उदय हुनथाल्छ ।

१९) निश्चय नै यो एक आदरणीय सन्देशवाहकले ल्याएको वाणी हो ।

२०) जो शक्तिवाला छ, सिंहासनको मालिककहाँ जसको उच्च दर्जा छ ।

२१) जसको आदेश आकाशहरूमा मान्य हुन्छ र जो त्यहाँ विश्वसनीय छ ।

२२) र (मक्काबासीहरू !) तिम्रो साथी दिवाना होइनन् ।

२३) उनले यस (फरिश्ता) लाई (आकाशको) खुल्ला (पूर्वी) क्षितिजमा देखेका पनि छन् ।

२४) उनी परोक्षको कुरा बताउन कञ्जूस्याइँ पनि गर्दैनन् ।

२५) र यो कुरआन दुष्ट शैतानको कुरो होइन ।

२६) फेरि तिमी कता गइरहेका छौ ?

२७) यो त सम्पूर्ण संसारको लागि मार्गदर्शन हो ।

२८) खासगरी उसको लागि जो तिमीहरूमध्ये सोझो बाटोमा हिंड्न चाहोस् ।

२९) र तिमीले विश्वको पालनकर्ताले नचाहिकन केही पनि चाहन सक्दैनौ ।

१) जब आकाश क्षतविक्षत भइहाल्नेछ,

२) र जब ताराहरू झरिहाल्नेछन् ।

३) र जब समुन्द्र बगेर जानेछन् ।

४) र जब चिहानहरू उत्खनित हुनेछन् ।

५) तब हर व्यक्तिले थाहा पाउनेछ कि उसले अगाडि के पठाएको थियो र पछाडि के छोडेको थियो ?

६) हे मानव ! कुन कुराले तिमीलाई आफ्नो उदार पालनकर्ताको विषयमा भ्रममा पारेको छ ?

७) (त्यही नहो) जसले तिमीलाई सृष्टि गर्यो र फेरि (तिम्रा अङ्ग–प्रत्यङ्गहरूलाई) ठीक–ठीक पारी तिमीलाई सन्तुलित बनायो ।

८) र जुन रूपमा चाह्यो, तिमीलाई जोडेर तयार गर्यो ।

९) केही होइन, बरु तिमीले प्रतिफल दिइने दिनलाई झुठ्लाउँछौ ।

१०) जबकि तिमीमाथि निगरानी गर्नेहरू नियुक्त छन् ।

११) प्रतिष्ठित लेख्नेहरू नियुक्त छन् ।

१२) तिमीले जे गर्दछौ, (त्यसलाई) उनीहरू जान्दछन् ।

१३) निःसन्देह सत्कर्मी मानिसहरू स्वर्गका ऐशो आराम र अनुग्रहमा हुनेछन् ।

१४) र निःसंदेह दूराचारीहरू नर्कमा हुनेछन् ।

१५) (अर्थात्) प्रतिफलको दिन त्यसमा प्रवेश गर्नेछन् ।

१६) र त्यसबाट उम्केर जान सक्ने छैनन् ।

१७) र तिमीहरूलाई के थाहा कि प्रतिफलको दिन कस्तो छ ?

१८) म फेरि भन्छु तिमीलाई के थाहा कि प्रतिफलको दिन कस्तो छ ।

१९) जुन दिन कुनै व्यक्ति कसैको निम्ति कुनै कुराको अधिकारी हुनेछैन, र सबै आदेश त्यस दिन अल्लाहकै हुनेछ ।

१) नाप र तौलमा कमी गर्नेहरूको लागि ठूलो खराबी छ ।

२) जब मानिसहरूसित नापेर लिन्छन्, त पूरा–पूरा लिन्छन् ।

३) किन्तु जब उनीहरूलाई नापेर वा तौलेर दिन्छन् त घटाएर दिन्छन् ।

४) के यिनीहरूलाई थाहा छैन कि उनीहरू मरेपछि पक्कै जीवित पारी उठाइनेछन् ।

५) (अर्थात्) एउटा ठूलो दिनमा ।

६) जुन दिन सबै मानिसहरू पालनकर्ताको सामुन्ने उभिनेछन् ?

७) निःसन्देह दुराचारीहरूको किताब (कर्मपत्रहरू) ‘‘सिज्जीनमा’’ छ ।

८) र तिमीलाई के थाहा कि सिज्जीन के हो ?

९) यो त लेखिएको पंजिका (अभिलेख) हो ।

१०) त्यस दिन झूठा ठहराउनेहरूलाई ठूलो खराबी (धिक्कार) छ ।

११) जसले न्यायनिसाफको दिनलाई असत्य भन्दथे ।

१२) र त्यसलाई झूठो उनीहरूले मात्र ठहराउँछन्, जो सीमाअतिक्रमण गर्नेवाला अपराधी छन् ।

१३) जब उसलाई हाम्रा आयतहरू सुनाइन्छ त भन्दछ कि यो त पहिलेका मानिसहरूका कथाहरू हुन् ।

१४) यो होइन, अपितु जसले नराम्रो कर्महरू गर्दछन्, त्यसकारण उनका हृदयहरूमा खिया लागिसकेको हुन्छ ।

१५) निःसन्देह यिनीहरू त्यस दिन आफ्नो पालनकर्ताको दर्शनबाट वंचित हुनेछन् ।

१६) फेरि निःसन्देह यिनीहरू नर्कमा प्रवेश गर्नेछन् ।

१७) त्यसपछि (उनीसित) भनिनेछ कि यो त्यही कुरा हो, जसलाई तिमीहरूले असत्य ठान्थ्यौ ।

१८) निःसन्देह सुनिराख कि सत्कर्मीहरूको कर्मपात्र ‘‘इल्लीयीनमा’’ छन् ।

१९) र तिमीलाई के थाहा कि इल्लीयीन के हो ?

२०) त्यो त लेखिएको किताब हो ।

२१) सामीप्यप्राप्त फरिश्ताहरू त्यसको निरीक्षण गर्दछन् ।

२२) निःसन्देह भलादमीहरू ठूलो अनुग्रहमा हुनेछन् ।

२३) पलंगहरूमाथि हेरिराखेका मसहरीहरूबाट हेर्नेछन् ।

२४) उनीहरूको अनुहारबाटै तिमीलाई ती अनुग्रहहरूको ताजगी र आभाको बोध भइरहनेछ ।

२५) उनीहरूलाई शीलबन्दी विशुद्ध पेय पिलाइनेछ ।

२६) जसको शील कस्तुरी को हुनेछ । तसर्थ अनुकम्पा चाहनेले उसैलाई प्राप्त गर्नका लागि प्रतिस्पर्धा गर्नुपर्छ ।

२७) र यसमा तसनीम (स्वर्गको एउटा छहरा) को पनि मिश्रण हुनेछ ।

२८) त्यो एउटा झरना हो जसको पानी खास खास मानिसहरूले पिउनेछन् ।

२९) काफिरहरूले संसारमा मोमिनहरूको हाँसो गर्नेगर्दथे ।

३०) र उनीहरूको छेउबाट आवत जावतगर्दा त आँखाबाट संकेत गर्दथे ।

३१) र जब आफ्नो घरतिर फर्कन्थे त ठट्टा गर्नेगर्दथे ।

३२) र जब ती (मोमिनहरूलाई) देख्दथे त भन्दथे कि यिनीहरू पक्कै मार्गविचलित छन्,

३३) जबकि उनीहरूलाई यिनीहरूमाथि निरीक्षक बनाएर पठाइएको थिएन ।

३४) तसर्थ आज मोमिनहरूले ती काफिरहरूमाथि हाँसो गर्नेछन् ।

३५) मसनदहरूमाथि (बसी उनीहरूको अवस्था) देखिराखेका हुनेछन् ।

३६) अतः काफिरहरूलाई उनीहरूका कर्महरूको (पूरा–पूरा) प्रतिफल प्राप्त भइहाल्यो ।

१) जब आकाश छिया–छिया भएर चर्किनेछ ।

२) र आफ्नो पालनकर्ताको आदेशको पालना गर्नेछ र उसलाई पनि यही चाहियो ।

३) र जब धरतीलाई समतल पारिनेछ ।

४) र जे–जति त्यसमा छ, त्यसलाई बाहिर फ्याँकिदिनेछ र (बिल्कुलै) रित्तो भइहाल्नेछ ।

५) र आफ्नो पालकर्ताको आदेश पालना गर्नेछ । र उसलाई उचित पनि यही छ ।

६) हे मानिस ! तिमी आफ्नो पालनकर्तासित भेट्दासम्म प्रयास र अनेक काम गरेर उसित भेटने छौ ।

७) अनि जुन सुकैलाई उसको कर्मपत्र उसको दाहिने हातमा दिइनेछ ।

८) त ऊसित सरलताको साथ हिसाब लिइनेछ ।

९) र त्यो आफ्नो आफन्तहरूतिर खुशी भएर फर्कनेछ ।

१०) र त्यो व्यक्ति जसको कर्मपत्र उसको पिठ्युँको पछाडिबाट दिइनेछ ।

११) त त्यसले मृत्युलाई पुकार्ने छ ।

१२) र प्रज्वलित नर्कमा (दोजखमा) प्रवेश गर्नेछ ।

१३) त्यो मानिस आफ्नो आफन्तका मानिसहरूमा मग्न रहन्थ्यो ।

१४) र ठानी राख्थ्यो कि अल्लाहतिर फर्केर जानेछैन ।

१५) हो, किन होइन ? यद्यपि उसको पालनकर्ताले उसलाई हेरिराखेको थियो ।

१६) मलाई कसम छ डुब्ने बेलाको प्रकाशको (लालीको) ।

१७) र रात्रीको कसम र उसद्वारा एकत्रित गरिएका वस्तुहरूको कसम ।

१८) र चन्द्रको, जबकि त्यो पूर्ण भइहाल्छ ।

१९) कि तिमीले निश्चय नै एक अवस्थाबाट अर्को अवस्थासम्म पुग्नेछौ ।

२०) त उनीहरूलाई के भएको छ कि ईमान ल्याउँदैनन् ।

२१) र जब उनीहरूको अगाडि कुरआन पढिन्छ त ढोग (सज्दा) गर्दैनन् ।

२२) बरु काफिरहरूले झुठ्लाउँछन् ।

२३) यिनीहरूले आफ्नो हृदयमा जुन कुरा लुकाउँछन्, त्यसलाई अल्लाह राम्ररी जान्दछ ।

२४) तसर्थ उनीहरूलाई कष्टदायक यातनाको समाचार सुनाइदेऊ ।

२५) हो, ईमानवालाहरू र असल कर्म गर्नेहरूको निम्ति असीमित र नसकिने पुरस्कार छ ।

१) आकाशको कसम, जसमा तारामण्डल छ ।

२) र त्यस दिनको कसम जसको वाचा छ ।

३) उपस्थित हुनेवाला र उपस्थित गराइएकाहरूको कसम ।

४) कि खाल्टो (खन्नेहरू) नष्ट गरिए ।

५) त्यो एउटा आगो थियो (खाल्टोहरू) जसमा इन्धन (हालिएको थियो) ।

६) जबकि उनीहरू त्यसका वरिपरि बसेका थिए ।

७) र मुस्लिमहरूसँग जे गर्नेगरेका थिए त्यो आफ्नो सामु देखिरहेका थिए ।

८) यिनीहरूले ती मोमिनहरूसँग (कुनै अन्य अपराधको) बदला लिइरहेका थिएनन्, मात्र यसको लागि कि उनीहरू अल्लाहमाथि ईमान राख्दथे जो अत्यन्त अधिपत्यशाली र प्रशंसनीय छ ।

९) जसको निम्ति आकाशहरू र पृथ्वीहरूको सत्ता छ र अल्लाहको सामु हरेक वस्तु छ ।

१०) निःसंदेह ज–जसले ईमानवाला पुरुष र ईमानवाली स्त्रीहरूलाई दुःख दिए, अनि प्रायश्चित गरेनन्, त उनीहरूको निम्ति नर्कको यातना हुनेछ र पोलिने यातना पनि ।

११) निःसन्देह जसले ईमान ल्याए र असल कर्म गरिरहे उनीहरूको निम्ति बगैंचाहरू छन् जसमुनि नहरहरू बगिराखेका छन्, यही नै ठूलो सफलता हो ।

१२) निःसन्देह तिम्रो पालनकर्ताको पकड अत्यन्त कठोर छ ।

१३) उसैले पहिलो पटक सृष्टि गर्दछ र उसैले दोस्रो पटक (जीवित) गर्नेछ ।

१४) र त्यो ठूलो मुक्तिदाता र अत्यन्त प्रेम गर्नेवाला छ ।

१५) सिंहासनको स्वामी, महान गौरवशाली छ ।

१६) जे चाहान्छ गरिहाल्छ ।

१७) के तिमीलाई ती सेनाहरूको पनि समाचार पुगेको छ ।

१८) (अर्थात्) फिरऔन र समूदको ।

१९) केही होइन, काफिरहरू त (जानी जानी) असत्य कुरा ठहराउनुमा लागि रहेकाछन् ।

२०) र अल्लाहले पनि उनीहरूलाई सबैतिरबाट घेरामा हालिसकेको छ ।

२१) बरु यो कुरआन धेरै गौरवशाली छ ।

२२) लौहे महफूज (सुरक्षित फलाम पट्टीका) मा अंकित (छ) ।

१) कसम छ आकाश र रात्रीमा प्रकाशित हुनेवालाको ।

२) र तिमीलाई के थाहा कि रात्रीमा प्रकट हुनेवाला के हो ?

३) त्यो तारा हो, चम्किलो ।

४) कुनै व्यक्ति यस्तो छैन जसमाथि एउटा फरिश्ता निरीक्षक नियुक्त नहोस् ।

५) मनुष्यलाई आवश्यक छ कि देखोस् कि ऊ कुन तत्वबाट सृष्टि गरिएको छ ।

६) त्यो एउटा उचालिएको पानीबाट जन्मेको छ ।

७) जो पिठ्युँ र छातीको बीचबाट निस्कन्छ ।

८) निश्चय नै ऊ उसलाई फर्काइदिने (अर्थात् पुनः जीवित पारिदिने) कुरामा सामर्थवान छ ।

९) जुन दिन (मनमा) लुकाइएका कुराहरू जाँचिनेछन् ।

१०) त त्यसबेला मानिसको साथमा न त त्यसको शक्ति हुनेछ र न कोही सहायक ।

११) आकाशको कसम जसले वृष्टि गर्दछ ।

१२) र धरतीको कसम जुन च्यातिनेवाला (चर्किनेवाला) छ ।

१३) कि यो वाणी ‘‘कुरआन’’ सटीक फैसला गर्नेवाला वाणी हो ।

१४) त्यो कुनै ठट्टा होइन ।

१५) उनीहरू एउटा षड्यन्त्र गरिराखेका छन् ।

१६) र मैले पनि एउटा चाल चलिराखेको छु ।

१७) अतः तिमीले काफिरहरूलाई मोहलत देऊ, केही दिन उनलाई छाडिदेऊ ।

१) (हे पैगम्बर !) आफ्नो सर्वोच्च पालनकर्ताको नामको गुणगान गर ।

२) जसले (मानिसलाई) सृष्टि गर्यो अनि (त्यसका अङ्गहरूलाई) ठीक (क्रम र समानुपातमा) मिलायो ।

३) र जसले ठीक ठाक निर्धारित गर्यो, अनि मार्ग देखायो ।

४) र जसले वनस्पति उमार्यो ।

५) अनि त्यसलाई सुकाएर कालो रङ्गका ठुटाहरू बनाइदियो ।

६) हामीले तिमीलाई पढाइदिनेछौं, अनि तिमी बिर्सने छैनौ ।

७) तर जे अल्लाह चाहन्छ, ऊ प्रत्यक्ष र परोक्षलाई जान्दछ ।

८) हामीले तपाईको लागि सजिलो गरिदिनेछौं ।

९) अतः तपाईले उपदेश गर्दैगर्नुस्, यदि उपदेश लाभप्रद छ ।

१०) त्यसले उपदेश प्राप्त गरिहाल्छ, जसलाई भय हुनेछ ।

११) हो, दुर्भाग्यवाला त्यसबाट पन्छिनेछ ।

१२) जो ठूलो आगोमा पर्नेछ ।

१३) अनि त्यसमा न मर्नेछ र न बाँच्नेछ ।

१४) निःसन्देह त्यो सफल भइहाल्यो जसले आफूलाई शुद्ध पार्यो ।

१५) र आफ्नो पालनकर्ताको नामको स्मरण गर्यो र नमाज पढ्यो।

१६) तर तिमीहरूले त सांसारिक भौतिक जीवनलाई प्राथमिकता दिन्छौ ।

१७) जब कि आखिरत धेरै उत्तम र शेष रहनेवाला छ ।

१८) निःसन्देह यही कुरा पहिलाका किताबहरूमा पनि छ ।

१९) अर्थात ‘‘इब्राहीम’’ र ‘‘मूसाका’’ किताबहरूमा ।

१) के तिमीलाई पनि त्यस घेरीहाल्ने कियामतको समाचार पुगेको छ ?

२) त्यस दिन धेरै अनुहारहरू अपमानित हुनेछन् ।

३) कठिन परिश्रममा परेका, थाकिएका (थकित) हुनेछन् ।

४) उनी धपधपी बलेको आगोमा प्रवेश गर्नेछन् ।

५) उनीहरूलाई उम्लिराखेको स्रोतको तातो पानी पिलाइनेछ ।

६) उनीहरूको लागि काँडावाला रुख बाहेक अरु केही खानेकुरा हुनेछैन ।

७) जसले न मोटो गर्नेछ न भोक नै मेटाउनेछ ।

८) त्यसदिन कतिपय अनुहारहरू प्रफुल्लित र संतुष्ट हुनेछन् ।

९) आफ्नो प्रयासमा प्रसन्न ।

१०) उच्च र शानदार स्वर्गमा हुनेछन् ।

११) जसमा कुनै व्यर्थकुरा सुन्ने छैनन् ।

१२) त्यसमा झरनाहरू प्रवाहित हुनेछन् ।

१३) र अग्ला–अग्ला पलंगहरू हुनेछन् ।

१४) प्यालाहरू राम्ररी सजाएर राखिएका हुनेछन्) ।

१५) र क्रमैसित मसनदहरू (सिरानीहरू) सजाइएका हुनेछन् ।

१६) र मखमली ओच्छ्यानहरू ओछ्याइएका हुनेछन् ।

१७) के उनीहरूले ऊँटतिर देख्दैनन् कि तिनीहरू कुन तरिकाले पैदा गरिएका छन् ।

१८) र आकाशतिर के कस्तो उच्च गरिएको छ ?

१९) र पहाडतिर के कुन प्रकारले खडा गरिएको छ ?

२०) र धरतीतिर कि कसरी बिछाइएको छ ?

२१) तसर्थ तपाईले उपदेश दिने गर्नुस् किनकि तपाई मात्र उपदेश दिनेवाला हौ ।

२२) तपाई उनीहरूमाथि संरक्षक होइनौ ।

२३) हो, जो विमुख हुन्छ र कुफ्र गर्छ ।

२४) त अल्लाहले त्यसलाई ठूलो सजाय दिनेछ,

२५) निःसन्देह उनीहरूलाई हाम्रो पासमा फर्केर आउनुपर्नेछ ।

२६) अनि हामीले नै उनको हिसाब लिनेछौं ।

१) फज्र (उषाकाल) को कसम ।

२) र दश रातहरूको कसम ।

३) र जोड तथा बिजोड (सम–विसम) को कसम ।

४) र रातको कसम, जब यो जान थाल्छ ।

५) के यी कुराहरूको कसम बुद्धिमानीहरूको लागि पर्याप्त छन् ?

६) के तपाईले देख्नु भएन कि तपाईको पालनकर्ताले आदहरूसँग के गर्यो ?

७) स्तम्भजस्ता ‘‘इरम’’ लामो कदवालाको साथ ।

८) यी सम्पूर्ण सृष्टिमा यिनीहरूको सदृश कुनै समुदाय पैदा गरिएको थिएन् ।

९) र समूदहरूसँग (के गर्यो) जो बेसीमा ठूल ठूला ढुङ्गा काट्दथे ।

१०) र फिरऔनसँग जसले मेखहरू राख्दथ्यो ?

११) यिनीहरू सबैले देशहरूमा अटेरीपना गरिराखेका थिए ।

१२) र यहां धेरै उत्पातहरू मच्चाइराखेका थिए ।

१३) अन्ततः तिम्रो पालनकर्ताले उनीहरूमाथि यातनाको कोर्रा बर्सायो ।

१४) निःसन्देह तिम्रो पालनकर्ता हेरी घातमा छ ।

१५) तर मानिसको अवस्था यो छ कि जब उसको रबले (पालनकर्ताले) उसको परीक्षा गर्दछ र उसलाई प्रतिष्ठा र अनुग्रह प्रदान गर्दछ तब त्यसले भन्दछ कि मेरो पालनकर्ताले मलाई प्रतिष्ठित गर्यो ।

१६) र जब उसले उसको परीक्षा यसप्रकार गर्दछ कि उसको जीविका संकुचित गरिदिन्छ । तब उसले भन्दछ कि मेरो रबले मलाई अपमानित गर्यो ।

१७) यस्तो कदापि होइन, बरु तिमीहरूले नै अनाथको सम्मान गर्दैनौ ।

१८) र न गरिबलाई खुवाउनको लागि एक–अर्कालाई प्रोत्साहन गर्दछौ ।

१९) र मृतकको सारा माल समेटी खाइदिन्छौ ।

२०) र धनसित अत्यन्त प्रेम गर्दछौ ।

२१) तसर्थ धरतीलाई जब फुटालेर चुर्ण चुर्ण गरी एक समान गरिनेछ ।

२२) र तिम्रो पालनकर्ता स्वयं आउने छ र फरिश्ताहरू एक–एक गरी पंक्तिबद्ध भएर आउनेछन् ।

२३) र नर्कलाई त्यसदिन उपस्थित गराइनेछ, त्यसदिन मानिसले चेत्नेछ, तर त्यस दिन चेतेबाट पनि केही फाइदा हुनेछैन ।

२४) उसले भन्नेछ, काश (हाय !) मैले आफ्नो (यस) जिन्दगीको निम्ति केही अगाडि पठाएको भए ।

२५) अनि त्यसदिन अल्लाहको सजाय जस्तो यातना कसैको हुनेछैन ।

२६) र कोही छैन जसले उसको जस्तो जकडेर बाँध्न सकोस् ।

२७) र हे सन्तुष्ट आत्मा ।

२८) आफ्नो पालनकर्तातिर तिमी यस किसिमले फर्क कि तिमी ऊसित प्रसन्न र ऊ तिमीसित प्रसन्न ।

२९) अतः मेरा खास दासहरूमा शम्मिलित भइहाल ।

३०) र प्रवेश गर मेरो स्वर्गमा ।

१) हामीलाई यस नगर (मक्का) को कसम ।

२) र तपाई यसै नगरमा त बस्नुहुन्छ ।

३) र मानवीय बाबु र उसको सन्तानको कसम ।

४) निःसन्देह हामीले मानिसलाई धेरै दुःखमा पैदा गरेका छौं ।

५) के उसले यो ठान्दछ कि उसमाथि कसैको नियन्त्रण छैन ।

६) भन्दछ कि मैले धेरै माल सम्पत्ति खर्च गरिदिएँ ।

७) के उसलाई यो लाग्दछ कि कसैले उसलाई देखेन ।

८) के हामीले उसलाई दुईटा आँखा दिएनौं ।

९) र एउटा जिब्रो र दुईटा ओठ (दिएनौं) ?

१०) र उसलाई दुर्इटै मार्ग पनि देखायौं ।

११) त उसले त्यो घाटीमा पस्न सकेन,

१२) र तिमीलाई के थाहा कि त्यो घाटी के हो ?

१३) (कसैको) गर्दनलाई (दासत्वबाट) मुक्ति दिलाउनु ।

१४) वा भोकको दिन खाना खुवाउनु ।

१५) कुनै नातेदार अनाथलाई,

१६) वा धूलधूसरित (फकिर) भिक्षुलाई ।

१७) अनि ती मानिसहरूमा शम्मिलित हुन सक्थ्यौ जसले ईमान ल्याउँछन् र एक अर्कालाई धैर्य राख्न र दया गर्नुको निम्ति शिक्षा दिन्छन् ।

१८) यी मानिसहरू नै दायाँ हातवाला (स्वर्ग प्राप्त गर्नेवाला) हुन् ।

१९) र जसले हाम्रा आयतहरूलाई मानेनन् उनीहरू बायाँ हातवाला (नर्क प्राप्त गर्नेवाला) हुन् ।

२०) यिनीहरूमाथि नै आगो हुनेछ जो चारैतिरबाट घेरेको हुनेछ ।

१) सूर्यको कसम र त्यसको तापको ।

२) र चन्द्रको कसम, जब त्यसको पछाडि उदाउँछ ।

३) र दिनको कसम जब सूर्यलाई प्रकट गर्दछ ।

४) र रात्रीको कसम जब उसलाई लुकाउँछ ।

५) आकाश र त्यसलाई बनाउनेको कसम ।

६) कसम छ धरतीको, र त्यसलाई समथर बनाउनेको ।

७) कसम छ इन्द्रियहरूको र तिनलाई दुरुस्त बनाउने (काम) को ।

८) फेरि उसलाई व्यभिचार र त्यसबाट बाँचेर अलग रहनुको ज्ञान दियो ।

९) जसले (त्यस) इन्द्रियलाई शुद्ध राख्यो, त्यो सफल भयो ।

१०) र जसले त्यसलाई माटोमा मिलायो, त्यो असफल भयो ।

११) समूदले आफ्नो अटेरीपनको कारणले (संदेष्टालाई) झुठ्लायो ।

१२) जब उनीहरूमध्येबाट सबैभन्दा दुर्भाग्यशाली उभियो ।

१३) (तब) अल्लाहको रसूलले उसलाई भने, ‘‘सावधान अल्लाहको ऊँटनी र उसले पिउने पालोको रक्षा गर’’ ।

१४) तर उनीहरूले आफ्ना पैगम्बरलाई असत्य सम्झेर त्यस ऊँट्नीको कुर्कुच्चाको नसा काटिदिए्, तब अल्लाहले उनीहरूको पापको कारणले उनीहरूमाथि बर्बादी पठायो र फेरि सबैलाई नष्ट गरी त्यस बस्तीलाई बराबर गरिदियो ।

१५) उसलाई त्यसको विनाशकारी परिणामको कुनै भय छैन ।

१) रात्रीको कसम, जब ढाक्छ ।

२) र दिनको कसम, जब कि चम्किन्छ ।

३) र त्यस हस्तीको कसम, जसले पुरुष र स्त्रीको सृष्टि गर्यो ।

४) निःसंदेह तिम्रो प्रयास भिन्न–भिन्न छ ।

५) तसर्थ जसले (अल्लाहको मार्गमा धनमाल) दियो र डर मान्यो (आफ्नो पालनकर्ताको) ।

६) र राम्रो कुराको पुष्टि गर्दैगर्यो ।

७) त हामीले पनि उसलाई सजिलो बाटोको सुविधा प्रदान गर्नेछौं ।

८) तर जसले कञ्जूसी गर्यो र लापरवाही देखायो ।

९) र असल कुराको उपहास गर्यो ।

१०) त हामीले पनि उसलाई अभाव र कठिनाईका सामग्री प्रदान गर्नेछौं ।

११) त्यसको धनमाल, ऊ खाल्डोमा लड्दा उसको कुनै पनि काम आउने छैन ।

१२) निश्चय नै हाम्रो जिम्मा त मार्ग देखाउनु छ ।

१३) र वास्तवमा हाम्रै अधिकारमा छ परलोक र संसार ।

१४) मैले त तिमीलाई प्रज्वलित आगोबाट सावधान गराइदिएँ ।

१५) जसमा मात्र त्यही पर्नेछ जो साह्रै नै अभागी हुनेछ ।

१६) जसले झुठ्लायो र (उसको अनुशरणबाट) मुख फर्कायो ।

१७) र जो बडो संयमी हुनेछ, त्यसलाई त्यसबाट (नर्कबाट) टाडा राखिनेछ ।

१८) जसले आफ्नो सम्पत्ति दिएर आफूलाई शुद्ध बनाउँदछ ।

१९) र (यसकारण) दिंदैन कि उसमाथि कसैको उपकार छ । जसको सट्टामा कुनै किसिमको बदलाको आशा गरिएको हुन्छ ।

२०) बरु मात्र आफ्नो महान पालनकर्ताको अनुहारको (दर्शनको) लागि (माल खर्च गर्दछ) ।

२१) निःसंदेह त्यो (अल्लाह) शीघ्र नै राजी (प्रसन्न) भैहाल्नेछ ।

१) सूर्यको माथि भइहालने समय (चाश्त) को सौगन्ध ।

२) र कसम छ, रात्री को जब छाउँछ ।

३) तिम्रो पालनकर्ताले न त तिमीलाई छाडेको छ र न उदासीन भएको छ ।

४) निश्चितरूपले तिम्रो निम्ति पहिलोभन्दा परिणाम राम्रो हुनेछ ।

५) तिम्रो पालनकर्ताले शीघ्र नै तिमीलाई (पुरस्कार) प्रदान गर्नेछ त तिमी प्रसन्न भइहाल्नेछौ ।

६) के उसले तिमीलाई अनाथ पाएर शरण दिएन ?

७) र तिमीलाई मार्गविचलित पाएर सही बाटो देखाएन ?

८) र तिमीलाई कमजोर पाएर बलियो बनाएन ?

९) तसर्थ तिमीले पनि अनाथमाथि अत्याचार नगर्नु ।

१०) र माँग्नेवालालाई हप्काउने नगर्नु ।

११) र आफ्नो पालनकर्ताको अनुकम्पालाई वर्णन गर्दैगर्नु ।

१) के हामीले तिम्रो छाती खोलिदिएनौं ?

२) र तिमीमाथिबाट तिम्रो बोझ पनि हामीले उतारिदियौं ।

३) जसले तिम्रो कम्मर भाँचिराखेको थियो ।

४) र हामीले तिम्रो मर्यादा उच्च पार्यौं ।

५) निःसन्देह कठिनाइको साथमा सरलता पनि छ ।

६) निःसन्देह कष्टको साथ सजिलो (सरलता) छ ।

७) जब तिमीलाई फुर्सद हुन्छ, तब इबादत (पूजा)मा परिश्रम गर,

८) र आफ्नो पालनकर्तातिरै प्रवृत्त हुने गर ।

१) इंजीरको कसम र जैतूनको ।

२) र तूरे सीनीनको ।

३) र यस शान्तिपूर्ण शहरको (मक्काको) कसम ।

४) हामीले निःसन्देह मनुष्यलाई सर्वोत्तम आकारमा बनायौं ।

५) फेरि निकृष्टतम दशातिर फर्कायौं ।

६) तर ती मानिसहरू जसले ईमान ल्याए र जसले असल कर्म गरे, उनीहरूको लागि कहिल्यै समाप्त नहुने प्रतिफल छ ।

७) अनि (हे आदमको सन्तति !) तिमीले प्रतिफलको दिनलाई असत्य ठहराउँन कुन कुराले उत्प्रेरित गर्दछ ।

८) के अल्लाह सबै हाकिमहरूभन्दा ठूलो हाकिम होइन र ?

१) आफ्नो पालनकर्ताको नाम लिएर पढ, जसले सृष्टि गर्यो ।

२) जसले मानिसलाई रगतको थोपाबाट (डल्लाबाट) बनायो ।

३) तिमी पढ्दैगर तिम्रो पालनकर्ता बडो दयावान छ ।

४) जसले कलमको माध्यमबाट शिक्षा प्रदान गर्यो ।

५) जसले मानिसलाई त्यो ज्ञान प्रदान गर्यो, जुन ऊ जान्दैनथ्यो ।

६) तर मानिस उल्लंघनकारी भइहाल्दछ ।

७) यसकारण कि उसले आफूलाई आत्मनिर्भर देख्दछ ।

८) यसमा कुनै सन्देह छैन कि तिम्रो पालनकर्तातिर नै फर्किजानु पर्नेछ ।

९) के तिमीले त्यस व्यक्तिलाई देख्यौ ? जसले (अल्लाहको) सेवकलाई मनाही गर्दछ ।

१०) (अर्थात्) एक अल्लाहको भक्तलाई जबकि ऊ नमाज पढ्नथाल्छ ।

११) तिम्रो के विचार छ ? यदि त्यो सोझो सत्य मार्गमा छ भने ।

१२) वा संयमित रहनुको आदेश दिन्छ भने ।

१३) विचार गर त यदि त्यस (रोक्नेवाला)ले झूठ ठान्यो र मुख फर्काएको भए,

१४) त के उसले जानेन, कि अल्लाहले राम्ररी उसलाई देखिरहेको छ ।

१५) निःसंदेह यदि त्यसले मानेन भने हामीले उसलाई उसको टाउकोको (निधारको) कपाल समातेर घिसार्ने छौं ।

१६) यस्तो टाउको जो झूठो अपराधी छ ।

१७) यिनीहरू आफ्ना साथीहरूको परिषद्लाई बोलाऊन् ।

१८) हामीले पनि आफ्नो सजायका दूतहरूलाई बोलाउनेछौं ।

१९) खबरदार ! उसको भनाई कदापि नमान्नु र सजदा गर्नु र (अल्लाहको) निकटता प्राप्त गर्दैरहुन् ।

१) हामीले यस (कुरआन) लाई कद्रको रातमा अवतरित गर्यौं ।

२) र तिमीलाई के थाहा कि शबेकद्र (गौरवको रात्री) के हो ?

३) शबेकद्र एक हजार महीनाभन्दा राम्रो छ ।

४) यसमा रूहुल अमीन (जिब्राइल) र फरिश्ताहरू प्रत्येक काम सम्पन्न गर्नको लागि, आफ्नो पालनकर्ताको आदेशबाट अवतरित हुन्छन् ।

५) यो रात पूर्णतया शान्ति र भलाईको हो, उषाकालको उदय हुनेसम्म ।

१) अहले किताब र मुश्रिकहरू कुफ्रबाट (नास्तिकताबाट) अलग हुनेवाला छैनन् जबसम्म कि उनको पासमा स्पष्ट प्रमाण आउँदैन ।

२) अल्लाहको तर्फबाट एउटा रसूल जो पवित्र पृष्ठहरूलाई पढोस् ।

३) जसमा असल र ठीक आदेशहरू अंकित छन् ।

४) र किताबवालाहरू आफु समक्ष स्पष्ट प्रमाण आइसकेपछि विभाजित भएका छन् ।

५) उनीहरूलाई यही मात्र आदेश दिइएको थियो कि निष्ठापूर्वक अल्लाहको उपासना गरुन् र एकाग्र भएर उसैको लागि धर्मलाई शुद्ध राखुन । र निष्ठाको साथ नमाज पढुन् र जकात देउन् र यही नै सबैको साँचो धर्म हो ।

६) किताबवालाहरूमध्येबाट जो काफिर छन् र मुश्रिकहरू (बहुदेववादीहरू) सबै नर्कको आगोमा (पर्नेछन् र) तिनीहरू सधैं त्यसमा रहनेछन् । यी मानिसहरू सबै प्राणीभन्दा नराम्रा हुन् ।

७) र जसले ईमान ल्याए र असल कर्म गरिरहे, तिनीहरू सम्पूर्ण प्राणीहरूमा राम्रा हुन् ।

८) उनीहरूको बदला उनीहरूको पालनकर्ताकहाँ सधैं बास गर्ने बगैंचाहरू हुन्, जसमुनि नहरहरू बगिराखेका हुनेछन् । सधैं सधैं तिनमा रहनेछन् । अल्लाह उनीहरूसित खुशी भयो र उनीहरू उससित खुशी भए, यो प्रतिफल उसको निम्ति हो, जो आफ्नो पालनकर्तासित डराउँदछ ।

१) जब धरती पूर्णरूपले (भूकम्पबाट) प्रकम्पित गराइनेछ (हल्लाइनेछ)।

२) र पृथ्वीले आफ्नो (भित्रको) बोझ बाहिर निकालिदिनेछ ।

३) मानिसले भन्न थाल्छ कि यसलाई के भएको छ ?

४) त्यसदिन पृथ्वीले आफ्नो सबै कुराहरू वर्णन गर्नेछ ।

५) यसकारण कि तिम्रो पालनकर्ताले उसलाई आदेश पठाएको हुनेछ ।

६) त्यसदिन मानिसहरू समूह–समूह गरी फिर्ता आउनेछन् ताकि उनीलाई उनको कर्मपत्र देखाइदिइयोस् ।

७) अतः जसले अलिकति पनि नेकी (पुण्य) गरेको हुनेछ, उसले त्यसलाई देखिहाल्नेछ ।

८) र जसले अलिकति पनि नराम्रो काम गरेको हुनेछ, उसले त्यसलाई देखिहाल्नेछ ।

१) ती घोडाहरूको कसम जो तीव्र गतिले हाफ्दै दगुर्छन् ।

२) अनि ढुङ्गामा नालको ठक्करबाट झिल्काहरू निकाल्नेवालाहरूको कसम ।

३) अनि प्रातःको समय धावा बोल्नेहरूको कसम ।

४) अनि जो त्यस समयमा धूलकणहरू उडाउँदछन् ।

५) अनि त्यसबखत सेनाहरूभित्र पस्दछन् ।

६) निःसन्देह मानिस आफ्नो पालनकर्ताको बडो अकृतज्ञ छ ।

७) र निश्चय नै ऊ स्वयम् पनि यसको साक्षी छ ।

८) त्यो धनको मोहमा बडो दृढ छ ।

९) के त्यसले त्यस समयलाई जान्दैन जब चिहानमा जे छन्, उनीहरू बाहिर निकालिनेछन् ।

१०) र जुन (रहस्य) हृदयहरूमा छन्, ती प्रकट गरिनेछन् ।

११) निःसन्देह उनको पालनकर्ताले त्यसदिन उनको अवस्थासँग राम्ररी परिचित हुनेछ ।

१) (त्यो) खडखडाउने चर्को स्वर गर्नेवाला ।

२) खडखडाउने के हो ?

३) र तिमीलाई के थाहा कि त्यो खडखडाइदिने के हो ?

४) जुन दिन मानिसहरू यस्ता हुन्छन् जस्तो कि छरिएका भुसुनाहरू ।

५) र पहाडहरू धुनिएका रुङ्ग विरङ्गका ऊन, जस्ता हुनेछन् ।

६) फेरि जसका (कर्महरूको) वजन गरुङ्गो हुनेछ,

७) ऊ त इच्छित आरामको जिन्दगीमा हुनेछ ।

८) र जसको वजन हलुग्ङो हुनेछ,

९) उनीहरूको फर्केर जाने ठाउँ ‘‘हावियह’’ (गहिरो खाल्डो) हो ।

१०) र तिमीलाई के थाहा कि ‘‘हावियाह’’ के हो ?

११) (त्यो) प्रज्वलित आगो हो ।

१) तिमीलाई अधिक (सम्पत्तिको) इच्छाले असावधान गरिदिएको छ ।

२) यहाँसम्मकि तिमी कब्रस्तान (चिहानसम्म) पुगिहाल्यौ ।

३) होइन, तिमीलाई चाँडै थाहा भइहाल्नेछ ।

४) फेरि केही छैन, तिमीलाई शीघ्र नै थाहा भइहाल्छ ।

५) होइन तिमी यकिनको साथ थाहा पाउँछौ ।

६) त तिमीले अवश्य नै नर्क देख्नेछौ ।

७) अनि तिमीले यसलाई विश्वासको आँखाले देख्नेछौ ।

८) अनि निश्चय नै त्यस दिन तिमीसित (अल्लाहका) अनुकम्पहरूको बारेमा सोधपूछ हुनेछ ।

१) समय (युग) को कसम ।

२) वास्तवमा मानिसहरू पूरै घाटामा छन् ।

३) ती मानिसहरू बाहेक, जसले ईमान ल्याए र असल कर्म गरिरहे र (जसले) आपसमा सत्य कुराको आग्रह र एक अर्कालाई धैर्यको ताकेदा (उपदेश) गरिरहे ।

१) बर्बादी छ, त्यस्तो प्रत्येक मानिसको जो अर्काको अवगुण खोज्ने गर्दछ र चुकुली (चुगुली) गरिरहन्छ ।

२) जसले मालसम्पत्ति थुपार्दै जान्छ र त्यसलाई गन्दै राख्छ ।

३) उसले ठान्छ कि उसको सम्पत्ति उससँग सधैं (अमर) रहनेछ ।

४) कदापि होइन, यो त अवश्य टुक्रा–टुक्रा पारिदिने आगोमा फ्याँकिनेछ ।

५) र तिमीलाई के थाह कि यस्तो (आगो) हुतमह के हो ?

६) त्यो अल्लाहद्वारा प्रज्वलित आगो हो ।

७) जो छातीमाथि चढ्दै जानेछ ।

८) र (त्यो आगो) उनीमाथि,सबै दिशाबाट बन्द हुन्छ ।

९) ठूलाठूला स्तम्भहरूमा ।

१) के तिमीले देखेनौ कि तिम्रो पालनकर्ताले हातीवालाहरूसँग के गर्यो ?

२) के उसले उनीहरूको दुष्चक्रलाई व्यर्थ बनाइदिएन ?

३) र उनीहरूमाथि समूहका समूह पंक्षीहरू पठाइदियो ।

४) जो उनीहरूलाई माटो र पत्थरको डल्लाले हानिरहेका थिए ।

५) जसले उनीहरूलाई चपाइएको (खाएको) भुस जस्तो बनाइदिए ।

१) कुरैशलाई परिचित गर्नको लागि ।

२) उनीहरूलाई जाडो र गर्मीको समयमा यात्रासँग परिचित गराउनको लागि ।

३) अतः उनीहरूलाई आवश्यक छ कि यसै घरको प्रतिपालकको पूजा गरुन् ।

४) अतः जसले उनीहरूलाई भोकमा खाना खुवायो र डर र भयबाट अमन चैन प्रदान गर्यो ।

१) तिमीले त्यसलाई देख्यौ, जसले प्रतिफल (को दिनलाई) झुट्ठा ठहराउँदछ ।

२) उही त हो जसले अनाथहरूलाई धक्का दिन्छ ।

३) र निमुखाहरूलाई खुवाउने कुरामा प्रोत्साहित गर्दैन ।

४) अतः अफशोच छ ती नमाजीहरूलाई (र वैल नामक नर्कको ठाउँ) छ ।

५) जो आफ्नो नमाजप्रति असावधान छन् ।

६) जसले आडम्बरका काम गर्दछन् ।

७) र गर्नुपर्ने कुराहरूबाट रोक्छन् ।

१) निःसन्देह हामीले तिमीलाई ‘‘हौजे कौसर’’ (अनुकम्पाहरू) प्रदान गरेका छौं ।

२) अतः आफ्नो पालनकर्ताको लागि नमाज पढ्ने गर र उसको निम्ति कुर्बानी गर ।

३) निःसन्देह तिम्रो शत्रु नै लावारिस नाम–निशान बेगरको हुनेछ ।

१) (हे मुहम्मद सल्लल्लाहो अलैहे वसल्लम !) भनिदिनुस् कि हे काफिरहरू !

२) जसनलाई तिमीले पूज्दछौ, उनीहरूको म पूजा गर्दिनं ।

३) र जसको उपासना म गर्दछु, उसको तिमीले उपासना गर्दैनौ ।

४) र जसलाई तिमीले पूज्दछौ, तिनीहरुको म पूजा गर्नेवाला छैन।

५) र न तिमी उसको उपासना गर्नेवाला छौ, जसको कि म उपासना गर्दछु ।

६) तिमीहरूको निम्ति तिम्रो धर्म छ र मेरो निम्ति मेरो धर्म ।

१) जब अल्लाहको सहायता र विजय प्राप्त भइहालोस् ।

२) र तिमीले मानिसहरुको समूहमाथि समूह अल्लाहको दीन (धर्म) मा प्रवेश गरिराखेको देखिहाल्छौ ।

३) तब आफ्नो पालनकर्ताको प्रशंसाका साथ गुणगान गर र ऊसित क्षमायाचना गर । निश्चय नै ऊ क्षमायाचना स्वीकार गर्नेवाला छ ।

१) अबू लहबका दुवैहात भाँचिए र त्यो स्वयम् पनि नष्ट भइहाल्यो ।

२) नत उसको सम्पत्ति उसको काम आयो र न उसको कमाई ।

३) ऊ शीघ्र नै प्रज्वलित आगोमा पर्नेछ ।

४) र उसकी पत्नी पनि जानेछे जुन दाउरा बोक्नेवाली छे ।

५) उसको घाँटीमा खजूरबाट बनाइएको डोरी हुनेछ ।

१) तपाई भनिदिनुस् कि त्यो अल्लाह एक छ ।

२) अल्लाह निरपेक्ष छ ।

३) नत उसबाट कोही जन्मेको छ, न ऊ कसैबाट जन्मेको छ ।

४) र न कोही उसको समकक्ष छ ।

१) तपाई भन्नुस् कि म प्रातःकालको स्वामीको शरण माग्दछु ।

२) हरेक कुराको नराम्रो कार्यबाट, जुन उसले सृष्टि गरेको छ ।

३) र अँध्यारो रात्रीको अन्धकारबाट, जबकि त्यसको अँध्यारोले ढाँकिहाल्छ ।

४) र गाँठोमा फूँक मार्नेहरू (जादू) को नराम्रो कार्यबाट ।

५) र ईष्र्यालुको नराम्रो कार्यबाट पनि जबकि त्यसले डाह गर्दछ ।

१) तपाई भनिदिनुस् कि म मानिसहरूको पालनकर्ताको शरण माँग्दछु ।

२) मानिसहरूको स्वामीको ।

३) र मानिसहरूको उपास्यको (शरण) ।

४) खराब विचार हाल्ने र (उक्साएर) पछि हटिजानेबाट ।

५) जसले मानिसहरूको हृदयमा नराम्रो कर्मको संच्कार हाल्दछ ।

६) त्यो चाहे जिन्नहरूमध्येबाट होस् वा मानिसहरूमध्येबाट ।