Sinhalaca Meal — Rowad Tercüme Merkezi (Mâhir) — Gâşiye 88:1 – Nas 114:6

(විනාශය) ආවරණය කරන සිද්ධිය පිළිබඳ පුවත නුඹ වෙත පැමිණියේ ද?

එදින (ඇතැම් අයගේ) මුහුණු යටහත් පහත්ව අවමානයෙන් පවතී.

වෙහෙසව හා විඩාවට පත්ව පවතී.

ඇවිළෙන ගින්නට ඒවා පිවිස දැවෙනු ඇත.

(ඔවුන්) උණු දිය උල්පතින් පොවනු ලබනු ඇත.

ඔවුනට කටු සහිත ශාක මිස වෙනත් අහරක් නැත.

එය (ඔවුන් ව) පුෂ්ටිමත් නො කරයි. තවද කුසගින්න (නිවන්න)ට උපාකර නො වෙයි.

(ඇතැම්) මුහුණු සතුටින් පිරී පවතී.

ඒවායෙහි ශ්‍රමයන් පිළිබඳව තෘප්තියට පත් ව,

උසස් ස්වර්ග උයන්හි (පවතී.)

එහි පුහු වදන් ශ්‍රවණය නො කරයි.

එහි ගලා යන උල්පත් ඇත.

එහි උස් නිදියහන් ද ඇත.

(බීමට) තබන ලද ගුරුලේත්තු ද,

වියන ලද කොට්ට ද,

දිග හරින ලද බුමුතුරුණු ද ඇත.

ඔටුවා දෙස එය කෙසේ මවනු ලැබුවේ දැ? යි ඔවුහු නිරීක්ෂා කොට බැලිය යුතු නො වේ ද?

අහස දෙස එය කෙසේ ඔසවනු ලැබුවේ දැ? යි ද;

කඳු දෙස එය කෙසේ සවි කරනු ලැබුවේ දැ? යි ද;

මහපොළොව දෙස එය කෙසේ ව්‍යාප්ත කරනු ලැබුවේ දැ? යි ද (ඔවුහු නිරීක්ෂා කොට බැලිය යුතු නො වේ ද?)

එහෙයින් නුඹ සිහිපත් කරනු. නියත වශයෙන් ම නුඹ සිහිපත් කරන්නෙකු පමණි.

නුඹ ඔවුන් කෙරෙහි බලය දරන්නෙක් නො වන්නෙහි ය.

කවරෙකු පිටුපාමින් ප්‍රතික්ෂේප කළේ ද ඔහු කෙරෙහි පමණක් මිස.

සැබැවින් ම අල්ලාහ් (පිටුපාමින් ප්‍රතික්ෂේප කළ) ඔහුට අතිමහත් දඬුවමකින් දඬුවම් කරන්නේ ය.

සැබැවින් ම ඔවුන්ගේ නැවත පැමිණීම අප වෙත ය.

පසුව සැබැවින් ම ඔවුන් (කළ ක්‍රියාවන්)ගේ ගණනය අප මත ය.

අරුණෝදය මත ද දිවුරමින්.

දස රාත්‍රියන් මත ද දිවුරමින්.

ඉරට්ටේ හා ඔත්තේ මත ද දිවුරමින්.

රාත්‍රිය ගෙවී යන විට ඒ මත ද දිවුරමින්.

නුවණ ඇති අයට එහි (ප්‍රමාණවත්) දිවුරුමක් ඇත් ද?

ආද් ජනයා සමඟ නුඹගේ පරමාධිපති කවර අයුරින් කටයුතු කළේ දැ? යි නුඹ නො දුටුවෙහි ද?

(ඔවුන්) කුලුනුවලින් යුක්ත ඉරම් නගරවාසීන් ය.

ඒවා මෙන් කිසිවක් (වෙනත්) දේශයන්හි නිර්මාණය කරනු නො ලැබී ය.

නිම්නයන්හි ගල් පර්වත කැනූ සමූද් ජනයා සමඟත්;

රිටි සහිත ෆිර්අවුන් සමඟත් (නුඹගේ පරමාධිපති කවර අයුරින් කටයුතු කළේ දැ? යි නුඹ නො දුටුවෙහි ද?)

ඔවුහු දේශයන්හි සීමාව ඉක්මවා කටයුතු කළෝ ය.

ඔවුහු එහි කලහකම් අධික ලෙස සිදු කළෝ ය.

එහෙයින් නුඹගේ පරමාධිපති ඔවුන් මත දඬුවමේ කසය හෙළුවේ ය.

සැබැවින්ම නුඹගේ පරමාධිපති රැක බලා සිටින්නා ය.

එනමුත් මිනිසා වූ කලී, ඔහුගේ පරමාධිපති ඔහුව පරීක්ෂාවට ලක් කර, පසුව ඔහුට උපකාර කර ඔහුට දායාදයන් පිරිනැමූ කල්හි “මාගේ පරමාධිපති මට උපකාර කළේය” යැයි ඔහු පවසයි.

තවද ඔහුව පරීක්ෂාවට ලක් කර පසුව ඔහුගේ ජීවන සම්පත් ඔහුට සීමා කළ කල්හි එවිට ඔහු “මාගේ පරමාධිපති මට අවමන් කළේය” යැයි පවසයි.

නොඑසේය, නුඹලා අනාථයාට උපකාර නො කරන්නෙහු ය.

තවද නුඹලා දුගියාට ආහාර සැපයීමට දිරි නො ගන්වන්නෙහු ය.

තවද නුඹලා උරුමයන් (අයුතු ලෙස) මුළුමණින් ම අනුභව කරන්නෙහු ය.

එමෙන් ම අප්‍රමාණ ළැදියාවකින් ධනයට ඇලුම් කරන්නෙහු ය.

එසේ නො ව, මහපොළොව කැබලි කැබලි වශයෙන් සුනු විසුනු කරනු ලැබූ කල්හි,

තවද මලක්වරු පෙළින් පෙළට (පෙළ ගැසී) සිටියදී නුඹගේ පරමාධිපති පැමිණෙන්නේ ය.

තවද එදින නිරය ගෙන එනු ලැබේ. එදින මිනිසා සිහිපත් කරයි. එම සිහිපත් කිරීම ඔහුට කෙසේ (නම් ඵලක්) වන්නේ ද?

“අහෝ මම මාගේ ජීවිතය වෙනුවෙන් කල් ඇතිව (යහකම්) සිදු කරන්නට තිබුණා නො වේ” දැ? යි ඔහු පවසයි.

එදින ඔහුගේ දඬුවම මෙන් කිසිවෙක් දඬුවම් නො කරයි.

තවද ඔහුගේ බැඳීම මෙන් කිසිවෙක් (අපරාධකරුවන් ව) බැඳ නො තබයි.

“අහෝ සැනසුමට පත් ආත්මය!

නුඹ තෘප්තියට පත් වන්නෙකු ලෙස ද තෘප්තියට ලක් වූ අයෙකු ලෙස ද නුඹගේ පරමාධිපති වෙත හැරී යනු.

එවිට නුඹ මාගේ ගැත්තන් අතරට යනු.

තවද මාගේ ස්වර්ගයට පිවිසෙනු.

මෙම නගරය (මක්කාහ් ව) මත මම දිවුරමි.

නුඹ මෙම නගරයේ රැඳී සිටිය දී,

පියා හා ඔහු ජනිත කළ දෑ මත (දිවුරමි.)

සැබැවින්ම මිනිසා ව දැඩි දුෂ්කරතාවක අපි මැව්වෙමු.

ඔහු කෙරෙහි කිසිවෙකු බලය නො දරන්නේ ම යැයි ඔහු සිතන්නේ ද?

මම අධික වශයෙන් ධනය නාස්ති කළෙමි යැයි ඔහු පවසයි.

ඔහුව කිසිවෙක් නො දුටුවේ යැයි ඔහු සිතන්නේ ද?

අපි ඔහුට දෑස් ඇති නො කළෙමු ද?

දිව ද දෙතොල් ද (ඇති නො කළෙමු ද?)

තවද අපි ඔහුට (හොඳ නරක යන) මාවත් දෙක වෙත මඟ පෙන්වූයෙමු.

එනමුත් ඔහු අකබාව තරණය නො කළේ ය.

අකබාව යනු කුමක් දැ? යි නුඹව දැනුවත් කළේ කුමක් ද?

(එය) වහලෙකු නිදහස් කිරීම;

එසේ නැතහොත් සාගින්නෙන් යුත් දිනක ආහාර සැපයීම ය.

සමීපකම් ඇති අනාථ ඥාතියෙකුට;

එසේ නැතහොත් අසරණ වූ දුගියෙකුට (ආහාර සැපයීම ය.)

පසුව ඔහු විශ්වාස කර ඉවසීම පිළිබඳ එකිනෙකාට උපදෙස් දෙමින් කරුණා දයාව පිළිබඳව ද එකිනෙකාට උපදෙස් දුන් අය අතරින් කෙනෙකු බවට පත් විය.

ඔවුහු මය දකුණත පාර්ශවයින් වන්නෝ.

තවද අපගේ වදන් ප්‍රතික්ෂේප කළවුන් වන ඔවුහු මය වමත් පාර්ශවයින් වන්නෝ.

ඔවුන්හට මොළ වන ලද (නිරයේ) ගින්න ඇත.

හිරු හා එහි ප්‍රභාව මත දිවුරමින්.

එය පසුපසින් හඹා යන සඳු මත ද දිවුරමින්.

දහවල එය ඔප් නංවන විට එය මත ද දිවුරමින්.

රාත්‍රිය එය ආවරණය කරන විට එය මත ද දිවුරමින්.

අහස හා එය ගොඩ නැගූ අය මත ද දිවුරමින්.

පොළොව හා එය ව්‍යාප්ත කළ අය මත ද දිවුරමින්.

ආත්මය හා එය සැකසූ අය මත ද දිවුරමින්,

ඔහු එ(ම ආත්ම)යට එහි නපුර ද එහි ධාර්මිකතාව ද ප්‍රවේශ කළේ ය.

සැබැවින් ම කවරෙක් එ(ම ආත්ම)ය පවිත්ර කර ගත්තේ ද ඔහු ජය ලැබී ය.

තවද සැබැවින් ම කවරෙක් එය පාපයෙහි ගිල් වූයේ ද ඔහු පරාජයට පත් විය.

සමූද් ජනයා තම සීමා ඉක්මවා යමින් බොරු කළෝ ය.

ඔවුන්ගේ අභාග්‍යවන්තයා නැගී සිටි විට,

මෙය අල්ලාහ්ගේ ඔටු දෙනයි. තවද උගේ පැන් බොන ස්ථානයයි යැයි අල්ලාහ්ගේ දූතයා ඔවුනට පැවසුවේ ය.

එවිට ඔවුහු ඔහුව බොරු කළෝ ය. පසුව උගේ නහර කපා දැමුවෝ ය. එබැවින් ඔවුන්ගේ පරමාධිපති ඔවුන්ගේ පාපය හේතුවෙන් ඔවුන් මත වේදනාව පහළ කර සුනු විසුනු කළේ ය. එමෙන් ම ඔවුන්ව සමතලා කර දැමුවේ ය.

තවද එහි අවසානය ගැන ඔහු බියවන්නේ නැත.

රාත්‍රිය ආවරණය වන විට ඒ මත දිවුරමින්,

දහවල (දීප්තිය) හෙළි වන විට ඒ මත දිවුරමින්,

පිරිමියා හා ගැහැනිය මැවූ ඔහු මත ද දිවුරමින්,

නියත වශයෙන්ම නුඹලාගේ උත්සාහයන් විවිධ ය.

එහෙයින් කවරෙකු පරිත්‍යාග කර, බිය බැතිමත් වී,

යහපත් දෑ සත්‍ය කළ කෙනෙකු වූ කලී;

අපි ඔහුට පහසුව වෙත පහසුකම් සලසන්නෙමු.

තවද මසුරු වී, තමන් අවශ්‍යතාවන්ගෙන් තොර යැයි සිතා,

යහපත් දේ අසත්‍යය කළ කෙනෙකු වූ කලී;

අපි ඔහුට දුෂ්කරතාව වෙත පහසුකම් සලසන්නෙමු.

තවද ඔහු (නිරයට) ඇද වැටුණු විට ඔහුගේ ධනය ඔහුට ප්‍රයෝජනය ගෙන දෙන්නේ නැත.

නියත වශයෙන්ම යහමඟ ඇත්තේ අප වෙත ය.

තවද නියත වශයෙන්ම එලොව හා මෙලොව අප සතුව ය.

එහෙයින් මම නුඹලාට ඇවිළෙන ගින්න පිළිබඳ ව අනතුරු අඟවමි.

අභාග්‍යවන්තයා හැර වෙන කිසිවෙක් එහි පිවිස දැවෙන්නේ නැත.

ඔහු වනාහි බොරු කරමින් පිටුපෑවේ ය.

තවද බිය බැතිමත් අයව සැබැවින්ම අපි මතු මුදවා ගන්නෙමු.

ඔහු වනාහි තම ධනය පිරිනමා පිවිතුරු වූ අයෙකි.

කිසිවකුට හෝ ප්‍රතිලාභ වශයෙන් පිරිනැමෙන කිසිදු සම්පතක් ඔහු සතුව නැත.

උත්තරීතර තම පරමාධිපතිගේ තෘප්තිය අපේක්ෂාවෙන් මිස.

තවද ඔහු මතු තෘප්තියට පත් වනු ඇත.

පෙරවරු ව මත දිවුරමින්,

තවද රාත්‍රිය (දහවල) ආවරණය කරන විට, ඒ මත දිවුරමින්,

නුඹගේ පරමාධිපති නුඹව අතහැර දැමුවේ නැත. එමෙන් ම ඔහු අමනාප වූයේ ද නැත.

සැබැවින්ම, ආරම්භයට වඩා අවසානය නුඹට වඩාත් යහපත් ය.

තවද නුඹගේ පරමාධිපති නුඹට මතුවට පිරිනමනු ඇත. එවිට නුඹ තෘප්තියට පත් වනු ඇත.

ඔහු නුඹව අනාථයෙකු ලෙස දැක නුඹට රැකවරණය නො දුන්නේ ද?

තවද නුඹව අතරමං වූවෙකු ලෙස දැක පසුව ඔහු මඟ පෙන්වූයේ ය.

තවද ඔහු නුඹව අවශ්‍යතාව ඇත්තෙකු ලෙස දැක පසුව ඔහු ස්වයංපෝෂිත කළේ ය.

එහෙයින් අනාථයාට කටුක ලෙස නො සළකනු.

තවද අයදින්නා ව පලවා නො හරිනු.

තවද නුඹගේ පරමාධිපතිගේ ආශිර්වාදයන් ගැන නුඹ ප්‍රකාශ කරනු.

අපි නුඹගේ හදවත නුඹට පුළුල් නො කළෙමු ද?

තවද නුඹගේ බර අපි නුඹගෙන් ඉවත් කළෙමු.

(එය) නුඹේ පිට තළමින් තිබුණි.

තවද නුඹගේ කීර්තිය අපි නුඹ වෙනුවෙන් උසස් කළෙමු.

එබැවින් නියත වශයෙන් ම දුෂ්කරතාව සමඟ පහසුව ඇත.

සැබැවින් ම දුෂ්කාරතාව සමඟ පහසුව ඇත.

එබැවින්, නුඹ (නුඹගේ ලෞකික කටයුතු) අවසන් කළ විට (මතුලොව කටයුතු සඳහා) කැපවනු.

තවද නුඹගේ පරමාධිපති වෙත යොමු වනු.

අත්තික්කා හා ඔලිව් මත දිවුරමින්,

සිනායි කන්ද මත ද දිවුරමින්,

අභයදායී මෙම නගරය මත ද දිවුරමින්,

සැබැවින්ම අපි මිනිසා ව ඉතා අලංකාර හැඩයකින් මැව්වෙමු.

පසු ව පහත්වූවන්ගෙන් වඩා පහත් වු අයෙකු බවට අපි පත් කළෙමු.

විශ්වාස කොට යහකම් කළවුන් හැර. ඔවුනට අවසන් නො වන ප්‍රතිඵල ඇත.

ඉන් පසු ව විනිශ්චය බොරු යැයි නුඹට පැවසුවේ කුමක් ද?

විනිශ්චකරුවන්ගෙන් මහා විනිශ්චයකරු අල්ලාහ් නො වේ ද?

මැවූ නුඹගේ පරමාධිපතිගේ නාමයෙන් කියවනු.

ඔහු මිනිසා ලේ කැටියෙන් මැව්වේ ය.

නුඹ කියවනු. නුඹේ පරමාධිපති අති ගෞරවනීය ය.

ඔහු පන්හිඳෙන් (ලිවීමට) ඉගැන්වී ය.

මිනිසාට ඔහු නොදැන සිටි දෑ ඔහු ඉගැන්වී ය.

නොඑසේය, නියත වශයෙන්ම මිනිසා සීමාව ඉක්මවා යන්නේ ය.

තමන් ස්වාධීන යැයි ඔහු සිතන්නේ ය.

නියත වශයෙන් ම නැවත හැරී යාම නුඹගේ පරමාධිපති වෙත ය.

වළක්වන අය ව නුඹ දුටුවෙහිද?

ගැත්තා සලාතය ඉටු කරන විට (ඔහුව වළක්වන අය නුඹ දුටුවෙහිද?)

ඔහු යහමඟෙහි සිටන වග නුඹ දුටුවෙහි ද?

නැතහොත් බිය බැතිමත්භාවය පිළිබඳ අණ කර සිටින වග (නුඹ දුටුවෙහි ද?)

තවද ඔහු (සත්‍යය) බොරු කර පිටුපාන වග නුඹ දුටුවෙහි ද?

නියත වශයෙන් ම අල්ලාහ් දකියි යැයි ඔහු නොදැන සිටියේ ද?

නොඑසේය. ඔහු එයින් නොවැළකුණේ නම් අපි ඉදිරි නළල් කෙස් රොදින් (ඔහු ව) ඇදගෙන එන්නෙමු.

එනම් වැරදි කරමින් ද බොරුකරමින් ද සිටි (ඔහුගේ) නළල් කෙස් රොදිනි.

එබැවින් ඔහු ඔහුගේ කැඳවුම් කරුවන් කැඳවත්වා!

මතුවට අපි ද අපගේ (නිරයේ භාරකාර මලක්වරුන් වන) zසබානියාවරුන් කැඳවන්නෙමු.

නොඑසේ ය. නුඹ ඔහුට අවනත නොවනු. නුඹගේ (පරමාධිපතිට) සජදා කරනු. තවද ඔහුට සමීප වනු.

නියත වශයෙන් ම අපි එය බලගතු රාත්‍රියෙහි පහළ කළෙමු.

තවද බලගතු රාත්‍රිය කුමක් ද? යි නුඹව දැනුවත් කළේ කුමක් ද?

බලගතු රාත්‍රිය මාස දහසකට වඩා උතුම්ය.

මලක්වරු හා ආත්මය (ජිබ්රීල්) තම පරමාධිපතිගේ අනුමැතියෙන් සෑම කරුණක්ම ගෙන එහි පහළ වෙති.

ශාන්තියයි! එය අරුණෝදය උදා වන කාලය තෙක් පවතියි.

ධර්ම ග්‍රන්ථ සතු ජනයා හා ආදේශ තබන්නන් අතරින් වූ ප්‍රතික්ෂේප කළවුන් හා ආදේශ තබන්නන් තමන් වෙත පැහැදිලි සාධකය පැමිණෙන තෙක් (ප්‍රතික්ෂේප කිරීමෙන්) ඉවත්වන්නෝ නො වූහ.

එය පිවිතුරු කරන ලද ලේඛන කියවන අල්ලාහ්ගෙන් වූ පණිවිඩකරු ය.

එහි ඍජු නීති රීති ඇත.

තවද ධර්ම ග්‍රන්ථය පිරිනමනු ලැබූ ජනයා ඔවුනට පැහැදිලි සාධකය පැමිණීමෙන් පසුව මිස ඔවුහු වෙන්ව නො ගියෝ ය.

තවද පිවිතුරු දහම අල්ලාහ්ට පුද කරමින් ඔහුව නැමදීමටත් සලාතය ස්ථාපිත කිරීමටත් zසකාත් පිරිනැමීමටත් මිස ඔවුහු අණ කරනු නො ලැබුවෝ ය. තවද ඍජු දහම වනුයේ එයයි.

සැබැවින් ම පුස්තක ලත් ජනයා අතුරින් වූ ප්‍රතික්ෂේප කළවුන් හා ආදේශ තබන්නන් නිරා ගින්නෙහි ය. ඔවුහු එහි සදාතනිකයෝ වෙති. ඔවුන් මය මැවීම් අතරින් නපුරුම මැවීම වනුයේ.

සැබැවින් ම විශ්වාස කොට දැහැමි ක්‍රියාවන් කළවුන් වනාහි ඔවුහු මය මැවීම් අතරින් ශ්‍රේෂ්ඨම මැවීම වනුයේ.

ඔවුන්ගේ පරමාධිපති අබියස වූ ඔවුන්ගේ ප්‍රතිඵල වනුයේ පහළින් ගංගාවන් ගලා බස්නා අද්න් නම් ස්වර්ග උයන් ය. ඔවුහු එහි සදහට ම සදාතනිකයෝ වෙති. අල්ලාහ් ඔවුන්ව පිළිගත්තේ ය. ඔවුහු ද ඔහුව පිළිගත්තෝ ය. එය තම පරමාධිපතිට බිය වූ අයට ය.

මහපොළොව බලවත් කම්පනයෙන් කම්පනය කරනු ලැබූ විට,

මහපොළොව එහි ඇති බර බැහැර කළ විට,

තවද එයට කුමක් වී ඇත් දැ? යි මිනිසා පවසයි.

එදින එය එහි තොරතුරු පිළිබඳ දන්වා සිටියි.

සැබැවින් ම නුඹේ පරමාධිපති එයට දැනුම් දුන් බවට,

එදින තම ක්‍රියාවන් දැක ගනු පිණිස ජනයා කණ්ඩායම් වශයෙන් පිටත් ව පැමිණෙයි.

එහෙයින් කවරෙක් අණුවක් තරම් ප්‍රමාණයකින් යහපතක් කර ඇත්තේ ද ඔහු එය දැක ගනී.

කවරෙක් අණුවක් තරම් ප්‍රමාණයකින් අයහපතක් කර ඇත්තේද ඔහු එය දැක ගනී.

හති දමමින් වේගයෙන් දිව යන්නන් මත දිවුරමින්,

කුර ගැටීමෙන් ගිනි පුපුරු නංවන්නන් මත ද,

තවද අලුයමෙහි ආක්‍රමණය කරන්නන් මත ද (දිවුරමින්.)

එවිට එමඟින් උන් දූවිලි නංවති.

කණ්ඩායම් වශයෙන් (සතුරන්) මැදට පිවිසෙති.

නියත වශයෙන් ම මිනිසා තම පරමාධිපතිට ගුණමකු ය.

තවද ඇත්තෙන් ම ඔහු එයට සාක්ෂිකරුවෙක් වේ.

තවද ඇත්තෙන් ම ඔහු වස්තුවට දැඩි ලෙස ඇලුම් කරන්නෙක් වේ.

එහෙත් මිනීවළවල් තුළ ඇති දෑ පිට කරනු ලබන වග ඔහු නො දන්නේ ද?

තවද හදවත් තුළ ඇති දෑ හෙළි කරනු ලබන වග (ඔහු නො දන්නේ) ද?

නියත වශයෙන් ම එදින ඔවුන්ගේ පරමාධිපති ඔවුන් පිළිබඳව අභිඥානවන්ත ය.

කම්පනය ඇති කරන සිදු වීම.

කම්පනය ඇති කරන සිදු වීම කුමක් ද?

කම්පනය ඇති කරන සිදු වීම කුමක් දැ? යි නුඹට දැනුම් දුන්නේ කුමක් ද?

එදින මිනිසා විසිරී යන මේරුන් මෙන් වනු ඇත.

තවද කඳු පීරනු ලැබූ ලොම් මෙන් වනු ඇත.

තම (යහකම්හි) තුලාව බරින් වැඩි වූ අය නම්,

ඔහු තෘප්තිමත් ජීවිතයෙහි පසු වෙයි.

තවද තම (යහකම්හි) තුලාව බරින් සැහැල්ලු වී ගිය අය නම්,

ඔහුගේ වාසස්ථානය හාවියා වේ.

තවද එය කුමක් දැ? යි ඔබව දැනුවත් කළේ කුමක් ද?

(එය) දැඩි උෂ්ණයෙන් යුත් ගින්නකි.

තරඟ වදිමින් (වස්තුව) අධික ලෙස රැස් කිරීම (අල්ලාහ්ව සිහිපත් කිරීමෙන්) නුඹලාව වෙනතකට යොමු කර ඇත.

නුඹලා මිනීවළවල් හමු වන තුරු,

එසේ නොව, නුඹලා මතු දැන ගනු ඇත.

යළි එසේ නොව, නුඹලා මතු දැන ගනු ඇත.

එසේ නොව නුඹලා තිරසාර දැනුමින් දැන ගන්නෙහු නම්,

නුඹලා සැබැවින්ම නිරය දකිනු ඇත.

පසුව නුඹලා එය තිරසාර ලෙස දකිනු ඇත.

තවද එදින නුඹලා (භුක්ති වින්දා වූ) සැප සම්පත් පිළිබඳව විමසනු ලබනු ඇත.

කාලය මත දිවුරමින්.

සැබැවින්ම මිනිස් වර්ගයා අලාභයෙහි පසු වෙයි.

නමුත් (සත්‍යය) විශ්වාස කර, දැහැමි ක්‍රියාවන් ඉටු කර, තවද සත්‍ය පිළිබඳ එකිනෙකාට උපදෙස් දී, තවද ඉවසීම පිළිබඳව ද එකිනෙකාට උපදෙස් දුන් අය හැර.

දොස් නගමින් නින්දා බස් කියන, අපහාස කරමින් කේළාම් කියන සෑම කෙනෙකුට ම විනාශය අත් වේවා!

ඔහු ධනය රැස් කොට එය ගණන් කරමින් සිටි අයෙකි.

නියත වශයෙන් ම ඔහුගේ ධනය ඔහුව සදාකල් ජීවත් කරවනු ඇතැ යි ඔහු සිතනු ඇත.

එසේ නොව සැබැවින් ම ඔහු හුතමාවෙහි හෙළනු ලබයි.

හුතමාව යනු කුමක් දැ? යි නුඹව දැනුවත් කළේ කුමක් ද?

එය අවුළනු ලැබූ අල්ලාහ්ගේ ගින්න ය.

එය හදවත් වෙත ළඟා වෙයි.

සැබැවින්ම එය ඔවුන් වට කර ගන්නකි.

උස් කුලුනු තුළ (හිරකර).

නුඹගේ පරමාධිපති ඇත් සේනාව සමඟ කටයුතු කළේ කෙසේ දැ? යි නුඹ නුදුටුවෙහිද?

ඔවුන්ගේ කුමන්ත්‍රණය මුළා කිරීමක පත් නො කළේද?

තවද ඔහු ඔවුන් මත රංචු වශයෙන් කුරුල්ලන් එව්වේ ය.

උන් ඔවුන් මත පුලුස්සන ලද මැටි වලින් වූ ගල් හෙළුවේ ය.

එවිට ඔවුන්ව කා දමන ලද පිදුරු මෙන් ඔහු පත් කළේ ය.

කුරෙයිෂ්වරුන්හට හුරුපුරුදුකම් ඇති කිරීම වෙනුවෙන් ද,

ශීත හා ශ්‍රීෂ්ම ඍතුවන්හි (ව්‍යාපාර කටයුතු සඳහා) තවලමෙහි යෑමට ඔවුන්හට හුරුපුරුදුකම් ඇති කිරීම වෙනුවෙන් ද,

මෙම නිවසේ පරමාධිපතිට ඔවුන් නැමදුම් කරත්වා!

කුසගින්නෙන් (සිටි) ඔවුනට ආහාර පිරිනමා බියෙන් (සිටි) ඔවුනට ආරක්ෂාව පිරිනැමුවේ ඔහු ය.

විනිශ්චය දිනය බොරු කරන අය නුඹ දුටුවෙහි ද?

එනම් ඔහු කවරෙක්ද යත් අනාථයාව පලවා හරියි.

තවද දුප්පතාගේ ආහාරය (ලබා දීම) පිළිබඳව දිරි නො ගන්වයි.

එමෙන්ම සලාතය ඉටු කරන්නන්හට විනාශය අත් වේවා!

ඔවුහු කවරහු ද යත් ඔවුහු තමන්ගේ සලාතය පිළිබඳව සැලකිල්ලක් දක්වන්නෝ නො වූවෝ ය.

අන් අයට ප්‍රදර්ශනය කරන්නෝ වූවෝ ය.

නො වටිනා අල්ප වස්තූන් (පිරි නැමීම) පවා වළක්වන්නෝ වූවෝ ය.

නියත වශයෙන්ම අපි නුඹට අසීමිත සම්පත් පිරිනැමුවෙමු.

එබැවින් නුඹ නුඹගේ පරමාධිපතිට සලාතය ඉටු කර නුඹ සත්ත්ව කැපයක් දෙනු.

නියත වශයෙන්ම නුඹට දොස් පවරන්නා වන ඔහු මය පෙළපත නො මැත්තා.

(නබිවරය!) නුඹ පවසනු; අහෝ දේවත්වය ප්‍රතික්ෂේප කරන්නනි!

නුඹලා නමදින දෑ මම නො නමදිමි.

තවද නුඹලා ද මා නමදින දෑ නමදින්නෝ නො වන්නෙහු ය.

තවද නුඹලා නැමදූ දෑ මම නමදින්නෙක් නො වූයෙමි.

තවද මා නමදින දෑ නුඹලා ද නමදින්නෝ නො වූහ.

නුඹලාට නුඹලාගේ දහම ය. මට මාගේ දහම ය.

අල්ලාහ්ගේ උපකාරය හා (මක්කා) ජයග්‍රහණය පැමිණි විට ද,

තවද අල්ලාහ්ගේ දහමට ජනයා කණ්ඩායම් වශයෙන් පිවිසෙනු නුඹ දකින විට ද,

නුඹ නුඹගේ පරමාධිපතිගේ ප්‍රශංසාව තුළින් ඔහුව පිවිතුරු කරනු. තවද ඔහුගෙන් සමාව අයැද සිටිනු. නියත වශයෙන් ම ඔහු අතික්ෂමාශීලී ය.

අබූ ලහබ්ගේ දෑත් විනාශ වේවා! ඔහු ද විනාශ වේවා!

ඔහුගේ ධනය ද ඔහු ඉපැයූ දෑ ද ඔහුට ඵලක් ගෙන දුන්නේ නැත.

මතුවට ඔහු අග්නි ජාලාවෙන් යුත් නිරයට පිවිස දැවෙනු ඇත.

(ඔහු ද) දර උසුලන්නියක් වූ ඔහුගේ බිරිය ද (අග්නි ජාලාවෙන් යුත් නිරයට පිවිස දැවෙනු ඇත).

ඇයගේ ගෙලෙහි ඉඳි කෙඳිවලින් ඇඹරූ කඹයකි.

(නබිවරය!) නුඹ පවසනු. ඔහු එනම් අල්ලාහ් ඒකීය ය.

අල්ලාහ් ස්වාධීන ය.

ඔහු ජනිත නො කළේ ය. තවද ජනිත කරනු නො ලැබුවේ ය.

තවද ඔහුට සමාන කිසිවෙකු නැත.

(නබිවරය!) නුඹ පවසනු. අරුණෝදයේ පරමාධිපති වෙතින් මම ආරක්ෂාව පතමි.

ඔහු මැවූ දෑහි හානියෙන් ද,

තවද අඳුර විහිදුණු විට එහි හානියෙන් ද,

තවද ගැට මත පිඹින්නියන්ගේ හානියෙන් ද,

ඊර්ෂ්‍යා කරන්නා ඊර්ෂ්‍යා කළ විට එහි හානියෙන් ද (ආරක්ෂාව පතමි.)

(නබිවරය!) නුඹ පවසනු. මිනිසුන්ගේ පරමාධිපති වෙතින් මම ආරක්ෂාව පතමි.

(ඔහු) මිනිසුන්ගේ රජු ය.

(ඔහු) මිනිසුන්ගේ දෙවියා ය.

කිලිටි කුකුස් ඇති කරන්නාගේ හානියෙන් (ආරක්ෂාව පතමි.)

ඔහු මිනිසුන්ගේ සිත් තුළ කුතුහලයන් ඇති කරයි.

(මෙවන්නන්) ජින්නුන් හා මිනිසුන් අතර ද සිටිති.