Yorubaca Meal — Şeyh Ebû Rahîme Mikâîl — Adiyat 100:1 – Nas 114:6

Àyàfi àwọn tó gbàgbọ́ ní òdodo, tí wọ́n ṣe àwọn iṣẹ́ rere, tí wọ́n sọ àsọtẹ́lẹ̀ òdodo láààrin ara wọn, tí wọ́n sì tún sọ àsọtẹ́lẹ̀ sùúrù láààrin ara wọn.

Hümezeh 104:1

Ègbé ni fún gbogbo abúnilójú-ẹni, abúnilẹ́yìn-ẹni,

Hümezeh 104:2

ẹni tí ó kó dúkìá jọ, tí ó sì kà á lákàtúnkà (láì ná an fún ẹ̀sìn).

Hümezeh 104:3

Ó ń lérò pé dájúdájú dúkìá rẹ̀ yóò mú un ṣe gbére (nílé ayé).

Hümezeh 104:4

Rárá (kò rí bẹ́ẹ̀). Dájúdájú wọ́n máa kù ú lókò sínú Hutọmọh ni.

Hümezeh 104:5

Kí sì ni ó mú ọ mọ ohun tó ń jẹ́ Hutọmọh?

Hümezeh 104:6

(Òhun ni) Iná Allāhu tí wọ́n ń kò (tó ń jó geregere),

Hümezeh 104:7

èyí tí ó máa jó (ẹ̀dá) wọ inú ọkàn lọ.

Hümezeh 104:8

Dájúdájú wọ́n máa ti (àwọn ìlẹ̀kùn) Iná pa mọ́ wọn lórí pátápátá.

Hümezeh 104:9

(Wọ́n máa wà) láààrin àwọn òpó kìrìbìtì gíga (nínú Iná).

Fil 105:1

Ṣé o kò wòye sí bí Olúwa rẹ ti ṣe ọ̀rọ̀ ìjọ elérin ni?

Fil 105:2

Ṣé kò sọ ète wọn di òfo àti anù bí?

Fil 105:3

Ó sì rán àwọn ẹyẹ níkọ̀níkọ̀ sí wọn.

Fil 105:4

Wọ́n ń jù wọ́n ní òkúta amọ̀ (tó ti gbaná sára).

Fil 105:5

Ó sì sọ wọ́n di bíi pòpórò gbígbẹ tí ẹranko jẹ lájẹdàsílẹ̀.

Kureyş 106:1

(Ìkẹ́ ni láti ọ̀dọ̀ Allāhu) fún ìdílé Ƙuraeṣ láti wà papọ̀ nínú ààbò.

Kureyş 106:2

(Ìkẹ́ ni sẹ́ láti ọ̀dọ̀ Allāhu) fún wọn láti wà papọ̀ nínú ààbò lórí ìrìn-àjò ní ìgbà òtútù àti ní ìgbà ooru.

Kureyş 106:3

Nítorí náà, kí wọ́n jọ́sìn fún Olúwa Ilé (Ka‘bah) yìí.

Kureyş 106:4

Ẹni tí Ó fún wọn ní jíjẹ (ní àsìkò) ebi. Ó sì fi wọ́n lọ́kàn balẹ̀ nínú ìpáyà.

Mâûn 107:1

Sọ fún mi nípa ẹni tó ń pe Ọjọ́ Ẹ̀san ní irọ́!

Mâûn 107:2

Ìyẹn ni ẹni tó ń lé ọmọ-òrukàn dànù.

Mâûn 107:3

Kò sì níí gbìyànjú láti bọ́ mẹ̀kúnnù.

Ègbé ni fún àwọn (mùnááfìkí) tó ń kírun;[1] ——— 1. Pẹ̀lú ìrun wákàtí márààrún lójoojúmọ́ ní àsìkò rẹ̀, ó ti run gbogbo ẹ̀ṣẹ̀ wẹẹrẹ dànù. Ìrònúpìwàdà àti ìtọrọ-àforíjìn l’ó máa run àwọn ẹ̀ṣẹ̀ ńláńlá dànù.

Mâûn 107:5

àwọn tó ń gbàgbé láti kírun wọn ní àsìkò rẹ̀;

Mâûn 107:6

àwọn tó ń ṣe ṣekárími;

Mâûn 107:7

àti pé wọ́n ń hánnà ohun èlò (fún àwọn ènìyàn).

Kevser 108:1

Dájúdájú Àwa fún ọ ní ọ̀pọ̀lọ́pọ̀ oore.

Kevser 108:2

Nítorí náà, kírun fún Olúwa rẹ, kí o sì gúnran (fún Un).

Kevser 108:3

Dájúdájú, ẹni tó ń bínú rẹ, òun ni kò níí lẹ́yìn.

Kâfirun 109:1

Sọ pé: “Ẹ̀yin aláìgbàgbọ́,

Kâfirun 109:2

Èmi kò níí jọ́sìn fún ohun tí ẹ̀ ń jọ́sìn fún.

Kâfirun 109:3

Ẹ̀yin náà kò jọ́sìn fún Ẹni tí mò ń jọ́sìn fún.

Kâfirun 109:4

Èmi kò níí jọ́sìn fún ohun tí ẹ jọ́sìn fún sẹ́.

Kâfirun 109:5

Ẹ̀yin náà kò kú jọ́sìn fún Ẹni tí mò ń jọ́sìn fún.

Kâfirun 109:6

Tiyín ni ẹ̀sìn yín, tèmi sì ni ẹ̀sìn mi.”

Nasr 110:1

Nígbà tí àrànṣe Allāhu (lórí ọ̀tá ẹ̀sìn) àti ṣíṣí ìlú (Mọ́kkah) bá ṣẹlẹ̀,

Nasr 110:2

tí o sì rí àwọn ènìyàn tí wọ́n wọnú ẹ̀sìn Allāhu níjọníjọ,

Nasr 110:3

nítorí náà, ṣe àfọ̀mọ́ àti ẹyìn fún Olúwa rẹ. Kí o sì tọrọ àforíjìn lọ́dọ̀ Rẹ̀.[1] Dájúdájú Ó ń jẹ́ Olùgba-ìronúpìwàdà. ——— 1. Ẹ wo ìtọsẹ̀-ọ̀rọ̀ sūrah Gọ̄fir; 40:55.

Tebbet 111:1

Ọwọ́ Abu-Lahab méjèèjì ti ṣòfò. Òun náà sì ṣòfò.

Tebbet 111:2

Àwọn dúkìá rẹ̀ àti ohun tí ó ṣe níṣẹ́ (ìyẹn, àwọn ọmọ rẹ̀) kò sì níí rọ̀ ọ́ lọ́rọ̀ (níbi ìyà).

Tebbet 111:3

Ó sì máa wọ inú Iná eléjò fòfò.

Tebbet 111:4

Àti ìyàwó rẹ̀, aláàárù-igi-ìṣẹ́pẹ́ ẹlẹ́gùn-ún, (ó máa wọná).

Tebbet 111:5

Igbà-ọ̀pẹ pọ̀npọ̀nràn máa wà ní ọrùn rẹ̀ (nínú Iná).

İhlas 112:1

Sọ pé: “Òun ni Allāhu, Ọ̀kan ṣoṣo.

İhlas 112:2

Allāhu ni Aṣíwájú tí ẹ̀dá ní bùkátà sí níbi jíjọ́sìn fún Un àti títọrọ oore ní ọ̀dọ̀ Rẹ̀, tí Òun kò sì ní bùkátà sí wọn ní ọ̀nà kan kan.

İhlas 112:3

Kò bímọ. Wọn kò sì bí I.

İhlas 112:4

Kò sì sí ẹnì kan kan tí ó jọ Ọ́.”[1] ——— 1. Àwọn kan máa ń ké “Ƙul huwa-llāhu” mẹ́ta fún òkú mùsùlùmí. Nígbà mìíràn, wọ́n lè ké òdidi al-Ƙur’ān fún un. Ìwọ̀nyí kò tọ sunnah rárá. Sūrah al-Haṣr; 59:10 ti fún wa ní àdúà tó jẹmọ́ òkú àti alààyè.

Felak 113:1

Sọ pé: “Mo sá di Olúwa òwúrọ̀ kùtùkùtù

Felak 113:2

níbi aburú ohun tí Ó dá,[1] ——— 1. Allāhu ni Ẹlẹ́dàá gbogbo n̄ǹkan, ohun rere àti ohun burúkú.

Felak 113:3

àti níbi aburú òru nígbà tí ó bá ṣóòkùn,

Felak 113:4

àti níbi aburú àwọn (òpìdán) tó ń fẹnu fátẹ́gùn túẹ́túẹ́ sínú àwọn ońdè,

Felak 113:5

àti níbi aburú onílara nígbà tí ó bá ṣe ìlara.”

Nas 114:1

Sọ pé: “Mo sá di Olúwa àwọn ènìyàn,

Nas 114:2

Ọba àwọn ènìyàn,

Nas 114:3

Ọlọ́hun àwọn ènìyàn,[1] ——— 1. Ìtúmọ̀ “Ọlọ́hun àwọn ènìyàn” ni pé, Ẹni tí àwọn ènìyàn gbọ́dọ̀ máa jọ́sìn fún ní ọ̀nà òdodo, tí wọn kò sì gbọ́dọ̀ jọ́sìn fún ẹlòmíìràn lẹ́yìn Rẹ̀.

Nas 114:4

níbi aburú (aṣ-Ṣaetọ̄n) oníròyíròyí, olùsásẹ́yìn (fún ẹni tó bá ń dárúkọ Allāhu[1]). ——— 1. Ọ̀kan pàtàkì nínú àǹfààní àti oore tí ó wà nínú ath-thikār ṣíṣe ni pé, aṣ-Ṣaetọ̄n àti àwọn ọmọ ogun rẹ̀ yóò máa sá sẹ́yìn fún ẹni tí ó bá ń ṣe ath-thikār ní gbogbo ìgbà.

Nas 114:5

(aṣ-Ṣaetọ̄n ni) ẹni tí ó ń kó ròyíròyí sínú àwọn ọkàn ènìyàn.

Nas 114:6

(Ṣaetọ̄n náà) wà nínú àwọn àlùjànnú àti àwọn ènìyàn.”