Zuluca Meal — Âdil Ca'fer — Tekvir 81:1 – Nas 114:6

Mhla ilanga lifiphala;

Nezinkanyezi ziqathake;

Izintaba zinyomulwa;

Amakameli amithi anganakwa;

Izilwane zasendle zibuthaniswa;

Ulwandle lokhelwa;

Imiphefumulo [abantu] iyobuthaniswa ngononina;

Nentombazane eyangcwatshwa iphila ibuzwa [ukuthi],

Wabulawela liphi icala;

Imiqulu isatshalaliswa;

Isibhakabhaka sisuswa;

Isihogo sivuthiswa ubuhanguhangu;

IJana isondezwa,

Wonke umuntu uyokwazi akwenzile.

Akengifunge ngezinkanyezi ezifiphalayo,

Ezigijimayo ezishanelayo.

Nangobusuku uma memboza,

Nangokusa uma buqhakaza;

Nebala [iKurani] ingamazwi eSithunywa eSihloniphekile [uJibhirili].

Esinamandla, esisezingeni eliphezulu kuMnini weSihlalo [u Allah].

Siyahlonishwa belu sithembekile.

Umuntu wenu [uMuhamadi] akahlanyi,

Bheka ngoba wasibona [iSithunywa uJibhirili] okwalweni olubanzi.

Futhi akafihli lutho kokungabonwa.

Futhi akusiwona amazwi kaShayitani oqalekisiwe.

Ngakhoke niyaphi na?

Bheka ngoba iyiSikhumbuzo nje ezizweni zonke.

Kulowo kini olangezelela ukuba qotho.

Futhi angeke nafisa ngaphandle kwentando ka Allah iNkosi yezizwe zonke.

Mhla isibhakabhaka siqhekeka;

Nezinkanyezi ziqathaka,

Nolwandle lugeleziswa;

Namathuna avundululwa;

Umuntu uyokwazi lokho akwenzile nobekuyinkambiso yakhe.

Wena muntu [ongakholwa]! Yini ekudukisile ngeNkosi yakho eHloniphekile na?

Lena ekudalile yakubumba ngokulingana.

Nakuba abengakudala ube yinoma yiphi into ayifunayo.

Phinde! Empeleni niphika uKwehlulelwa.

Futhi nisingathwe izingqaphi,

Ezingabaqophi abaqotho;

Zikwazi konke enikwenzayo.

Labo abaqotho abenza okuhle bayongena entokomalweni.

Kuthi izephulamthetho zona zingene eMlilweni.

Ziyongena kuwo ngoSuku loKwahlulelwa.

Futhi abasoze baphuma kuwo.

Uthi uyazi nje ukuthi luyini uSuku lokwaHlulela na?

Uthi ngempela uyazi ukuthi luyini uSuku lokwaHlulelwa na?

Usuku lapho umuntu engezukusiza omunye ngalutho; futhi yonke into ngaloloSuku iyobe iphethwe ngu Allah.

Imbubhiso kumaqili.

Labo uma bekala ebantwini bafuna isikali esigcwele.

Kepha uma kuyibona abakalelayo bayabaqola.

Ingabe labo abazi yini ukuthi bayovuswa na?

NgoSuku olunzima.

Usuku lapho abantu bayoma phambi kweNkosi yezizwe.

Nakanjani! Incwadi [yezenzo] yeziphulamthetho iseSijini.

Uthi bewazi nje ukuthi iyini iSijini na?

Iyincwadi elotshiwe.

Imbubhiso iyoba kulabo abaphika iqiniso ngaloloSuku.

Labo abaphika uSuku lokwahlulelwa.

Futhi luphikwa kuphela isephulamthetho esiyihlongandleba.

Uma efundelwa imibiko yeThu, uthi: “izinganekwane zasendulo lezi”.

Qhabo; empeleni izinhliziyo zabo zimbozwe uqweqwe lwezenzo zabo.

Qha! Bayovinjelwa ukubona iNkosi yabo ngaloloSuku.

Bayobe sebengena eMlilweni.

Kuyobe sekuthiwa [kubo]: “Yikona ke lokhu ebenikuphika!”.

Phinde! Nebala incwadi yabaqotho ise-iLiyini.

Uthi bewazi nje ukuthi iyini i-iLiyini na?

Iyincwadi elotshiwe.

Ebonwa yilabo abasondele [ku Allah].

Labo abaqotho abenza okuhle bayongena entokomalweni.

Bahlale emibhedeni bebuka.

Ubona ngokuncincima kwentokomalo ebusweni babo.

Bayophuziswa esiphuzweni ebesimboziwe;

Esiqedelelwe ngeMisiki; yikonake lokho okumele bancintisanele kukho abancintisanayo.

Sithakwe [ngamanzi] eTasinimi.

Umthombo ophuza labo abasondele.

Labo abayizephulamthetho babekade behleka labo abakholwayo.

Uma bebebandlula babakloledele.

Uma [abangakholwa] bebuyela emizini yabo, babuyela bethakasile.

Uma [abangakholwa] bebabona [abakholwayo] bathi: “Laba balahlekile”.

Nakuba bengathunyelwanga [abangakholwa] ukubaqapha [abakholwayo].

Kepha namhlanje, abakholwayo bahleka abangakholwa.

Lapho behlezi emibhedeni bebuka.

Ingabe abangakholwa bawutholile yini umvuzo ofanele imisebenzi yabo na?

Mhla isibhakabhaka siqhekeka!

Siyothobela iNkosi yaso, sibe sifanele.

Namhla umhlaba wenetshwa undlalwe.

Ukhafule okusemathunjini awo ukushiye kanjalo.

Uyothobela iNkosi yawo, ube ufanele.

Muntu! Nebala ulibangise eNkosini yakho, nakanjani uyoyifumanisa.

Lowo oyinikwa incwadi yakhe ngesokudla,

Uyokwahlulelwa kalula.

Aye emndenini wakhe ethakasile.

Kepha lowo oyonikwa incwadi yakhe emuva komhlane wakhe,

Uyomemeza [elangazelela] imbubhiso.

Bese eyongena eMlilweni.

Bheka ngoba wayekade enethezekile nomndeni wakhe.

Ubecabanga ukuthi akasoze abuyela [ku Allah].

Phinde! iNkosi yakhe ibilokhu Imbhekile.

Ngakhoke Ngifunga ngemisebe yokushona kwelanga.

Nangobusuku nokubuthanayo.

Nangonyezi uma seluphelele.

Nakanjani niyobhekana nobunzima bulakanyana.

Pho, yingani bengakholwa na?

Noma befundelwa iKurani abakhothami.

Empeleni labo abangakholwa bayaphika.

Kepha u Allah ukwazi kahle lokho abakufihlayo.

Ngakhoke bathulele izindaba ezinhle zesijeziso esibuhlungu.

Ngaphandle kwalabo abakholwayo abenza okuhle, bona bayothola umvuzo ongenamkhawulo.

[Ngifunga] ngesibhakabhaka esinemizila yasemkhathini [yelanga nenyanga].

NangoSuku Oluthenjisiswe.

Nangofakazi nokufakaziswa ngakho.

Baqalekisiswe abambi bemisele.

Abokheli bomlilo onezithungelo ezinkulu.

Mhla behlezi bewethamele.

Bebukela lokho ababekwenza kubakholwayo.

Ayikho into ababebajezisela yona ngaphandle nje kokuthi bakholwa ku Allah uSomandla oDunyiswayo.

Lona onguMnini wamazulu nomhlaba, futhi u Allah uzibheke zonke izinto.

Nebala labo abahlukumeza abakholwayo besilisa nabesifazane baphinde bangaceli intethelelo, bayothola isijeziso seJahanamu futhi bayothola isijeziso soMlilo.

Kepha labo abakholwayo benze okuhle, bona bayothola izivande okugeleza ngaphansi kwazo imifula; iyonake leyo impumelelo enkulu.

Ngempela ukugxavula kweNkosi yakho kunzima.

Bheka ngoba nguYena owasungala [indalo ingelutho] nobuyiselayo [indalo esimeni sayo emuva kokufa].

Futhi Ungothethelelayo Onothando.

Umnakazi weSihlalo [sobukhosi] Ohloniphekile.

Wenza noma yini ayifunayo.

Ingabe lufikile kuwe udaba lwamabutho na?

AkaFiriwoninoTamudi?

Empeleleni laba abangakholwa bayaphika.

Kepha u Allah ubahaqile ngemuva.

Nebala iyiKurani ehloniphekile.

EsoQwembeni Oluvikelekile.

Ngifunga ngesibhakabhaka nangesifika kuhlwa.

Ungabe uyokwazi kanjani ukuthi siyini lesifika kuhlwa na?

Siyinkanyezi evuthayo.

Wonke umuntu unoqaphi omqaphile.

Ngakhoke umuntu [ophika ukuvuswa] makabheke ukuthi wadalwa ngani.

Wadalwa ngoketshezi oluphuma ngamandla [isidoda].

Oluphuma emhlane [kowesilisa] nasemabeleni [kowesimame].

Kepha Yena [u Allah] uyakwazi ukumbuyisela [esimeni sakuqala].

Ngosuku lapho ziyovivinywa izimfihlo.

Futhi [ongakholwa] akayikuba namandla noma umelekeleli.

Ngifunga ngesibhakabhaka esibuyisayo.

Nangomhlaba oqhekekayo.

Ngempela [iKurani]ingamazwi angumnqamula juqu.

Futhi awasiwona ihlaya.

Bheka ngoba bakha uzungu.

Futhi Nami ngakha uzungu.

Ngakhoke bayeke nje abangakholwa, Nami Ngibayekile okwesikhashana.

Dumisa Igama leNkosi yakho Engaphezulu.

Lena eyadala yabumba.

Futhi lena eyahlela yahola.

Lena eyenze amandlelo,

Iphinde iwenze ome ashe.

Sizokufundisa [iKurani], ngeke wayikhohlwa.

Ngaphandle kwalokho u Allah afuna ukukhohlwe; ngokuba Yena wazi okusobala nokusithele.

Futhi Sizokwenzela izinto zibe lula.

Ngakhoke xwayisa lapho isexwayiso sinomthelela khona.

Bheka ngoba lowo onokwesaba [u Allah] uzoxwayiseka.

Asishaye indiva lowo ongabusisekile.

Nguyena lona oyongena eMlilweni Omkhulu.

Futhi akayikufa kuwo noma aphile.

Nebala uphumelele lowo oziphathe kahle.

Wakhumbula iGama leNkosi yakhe wenza neSwala.

Empeleni [nina engakholwa] nikhethe impilo yomhlaba.

Nakuba eLizayo lingcono futhi lingunaphakade.

Konke lokhu kwakukhona nasemiqulwini yasendulo;

Imiqulu ka Ibhirahimu no Musa.

Ingabe usuzwile ngodaba loMqulekisi na?

NgaloloSuku ubuso [babantu] buyobe budangale.

Bukhandlekile bukhathele.

Bayongena eMlilweni ovuthayo.

Bayophuza emthonjeni ogxabhayo.

Abuyikuthola okunye ukudla, ngaphandle kwameva.

Akukhuluphalisi futhi akusuthisi.

Ubuso [babanye] ngaloloSuku buyobe buthakasile.

Bethokozile ngemisebenzi yawo.

BeseJana [esivandeni] ephakeme.

Abayikuzwa khona inkulumo eyize engasanga.

Kunemithombo egelezayo.

Kunemibhede ephakeme.

Nenkambi ezihleliwe.

Nemiqamelo ehlelekile.

Kanye namacanci kakhaphethi andlalwe ndawo yonke.

Ingabe abaliboni ikameli ukuba lidalwe kanjani na?

Nesibhakabhaka ukuba siphakanyiswe kanjani na?

Nezintaba ukuba zigxunyekwe kanjani na?

Nomhlaba ukuba undlalwe kanjani na?

Ngakhoke xwayisa, ngokuba ungumexwayisi nje kuphela.

Akuwona umsebenzi wakho ukubaphoqa.

Kepha lowo ofulathelayo [iqiniso] futhi engakholwa;

U Allah uyomujezisa ngesijeziso esinzima.

Nebala, bazobuyela [emuva kokufa] Kithi.

Futhi yithina esiyobahlulela.

Ngifunga ngentathakusa.

Nangobusuku obuyishumi.

Nangolokho okuhamba ngakubili nokuhamba ngakunye.

Nangobusuku uma buhlwa buhamba.

Ingabe konke lokufunga akwemenele lowo okhaliphile na?

Awubonga ukuthi iNkosi yakho yasenzani isizwe sakwa Adi na?

Ebekungesase Rama eyayinezakhiwo eziphakeme.

Lena okungakaze kwakhiwe efana nayo emhlabeni.

Kanye nesakwaTamudi lesi esaqhekeza amadwala [bakha imizi] Ehlanzeni.

Kanjalo noFiriwoni lona owezikhonkwane.

Labo ababe yiziphulamthetho emhlabeni,

Bandisa kuwo impambuko.

Kepha iNkosi yakho yabashaya ngoswazi lwesijeziso[1]. ——— [1] Abanye babhujiswa ngesiphepho, abanye ngokuzamazama komhlaba kwathi abanye bajeziswa ngokugwila.

Nebala iNkosi ihlala iqaphile njalo.

Uma umuntu evivinywa iNkosi yakhe ngokumupha nangokumcebisa, uthi: “iNkosi yami ingibusisile”.

Kuthi uma isimvivinya, ngokumswinya isondlo sakhe, athi: “iNkosi yami ingihlazile”.

Phinde! Empeleni aniziphathi kahle izintandane.

Futhi anigqugquzeli ekondleni abaswele.

Futhi nidla ifa niliphuphuthe.

Ninjalo nje nithanda umcebo ngokwendlulele.

Qha! Mhla umhlaba uzamazama umlibe.

INkosi yakho Iyokuza nezingelosi zime imigqa ngemigqa.

Kuthi neJahanamu ilethwe ngaloloSuku; ngaloloSuku wonke umuntu uzothoba; kambe kuyomsiza kanjani ukuthoba na?

Uyothi: “Ngifisa ukuba ngayilungiselela impilo yami”.

NgaloloSuku, akekho noyedwa oyoba nesijeziso esifana neSakhe,

Futhi akekho noyedwa oyobopha njengaYe.

Wena mphefumulo onethezekile!

Buyela eNkosi yakho weneme futhi uthokozelwe.

Ube kanye nezigqila Zami.

Ungene eJana Yami.

Ngifunga ngaloMuzi [waseMakha].

Uvunyelwe ukwenza okuthandayo kuloMuzi.

Ngifunga nangomzali nakuzalayo.

Nebala umuntu Simdalele ebunzimeni [bomhlaba].

Ingabe ucabanga ukuthi akekho noyedwa ongamnqoba na?

Abe ethi: “Ngichithe izimali eziningi”.

Ingabe ucabanga ukuthi akabonwa muntu na?

Ingani simuphe amehlo amabili.

Nolimi nezindebe ezimbili.

Sabe sesimkhanyisela zombili izindlela [eyokubi neyokuhle].

Kungani engayeqanga lenqinamba na?

Uthi bewazi nje ukuthi iyini lenqinamba na?

Ukukhulula isigqila.

Noma ukondla ngosuku lwendlala enkulu.

Intandane eyisihlobo,

Noma isichaka esentulayo.

Uyobeke [owenza okuhle] eseba kanye nalabo abakholwayo abalulekana ngokubekezela nangokuba nomusa.

Yibo kanye laba abayoba ngabakwesokudla.

Kuthi labo abangakholwa imibiko yeThu, babe ngabangakwesokunene.

Bayovalelwa eMlilweni.

Ngifunga ngelanga nemini yalo.

Nangenyanga lapho ililandela.

Nangemini lapho iqhakazisa ilanga [libalele].

Nangobusuku lapho bumboza ilanga [kuhlwa].

Nangesibhakabhaka okwakheka kwaso.

Nangomhlaba nokwendlaleka kwawo.

Nangomphefumulo nokudaleka kwawo.

Wawukhombisa ukuphambuka kwawo nobuqotho babo.

Uyophumelela loyo oyowugcina uhlanzekile [ngokuzithoba].

Kanti uyolahlekelwa loyo owungcolisayo [ngempambuko].

Waliphika iqiniso uTamudi ngokuphula kwabo umthetho.

Mhla lowo owonakele kubo bonke ebahlohla.

ISithunywa sika Allah [u Swalihi] sathi kubo: “Qaphelani, ikameli lika Allah namanzi alo!”.

Kepha abamukholwanga, baligenca balibulala; iNkosi yabo yababhubhisa bonke kwangasala muntu ngenxa yempambuko yabo.

Futhi akesabi [u Allah] impindiselo.

Ngifunga ngobusuku lapho buhlwa.

Nangemini lapho ibalele.

Nangokudalwa kwesilisa nesifazane.

Nebala imisebenzi yenu yehlukene.

Lowo ophanayo athobele u Allah,

Futhi akholelwe imbuyiselo enhle;

Sizomenzela kube lula [ukwenza okuhle].

Kepha lowo owungoqo oziqhayisayo,

Aphinde aphike imbuyiselo enhle.

Sizomenzela ubunzima [ukwena okubi] bube lula.

Futhi umcebo wakhe awuyikumsiza lapho esengena [eMlilweni].

Kuwumsebenzi wethu ukucacisa indlela eqondile.

Futhi [impilo] yakweLizayo nasemhlabeni iphethwe Yithi.

Ngakhoke nginixwayisa ngoMlilo ovutha amalangabi.

Kuyongena kuwo kuphela labo abonakele.

Lowo ophika iqiniso alishaye indiva.

Kepha lowo othobela u Allah uyohlengeka.

Lowo ophana ngomcebo wakhe ngoba ezihlanza.

Futhi ebe engalangezele ukunxephezelwa muntu ngokuhle akwenzayo.

Ngaphandle kokulangezelela Ubuso beNkosi yakhe Ephakeme.

Nakanjani uyothokoza.

Ngifunga ngemini.

Nangobusuku lapho sebuzinzile.

INkosi yakho ayikulahlanga futhi ayikudinelwe.

Nebala eLizayo ilona elingcono kuwe kunalomhlaba.

Futhi iNkosi yakho izokwabela uze wencame.

Ayikuthola yini [iNkosi yakho] uyintandane Yakuphephisa na?

Yaphinda yakuthola udukile yakuhola.

Belu yakuthola weswele yakucebisa.

Ngakhoke ungalokothi uyiphathe ngendluzula intandane.

Futhi ocelayo ungamkhakhabisi.

Futhi ukhulume ngezibusiso zeNkosi yakho [kuwe].

Asiyivulanga yini inhliziyo yakho na?

Futhi sakwethula umthalo wakho[1]. ——— [1] Uthethelelwe zonke izimpambuko zakhe ezandlula nezizayo.

Lezi ebesezikuphula umqolo.

Futhi saphakamisa udumo lwakho.

Nebala, kubo bonke ubunzima kunokunethezeka.

Nebala kubo bonke ubunzima kunokunethezeka.

Uma usuqedille [imisebenzi yempilo] zikhandle [ngokukhona].

Futhi ulangezelele iNkosi yakho.

Ngifunga ngekhiwane nomalovini.

Nangentaba yaseSinayi.

Nangalomuzi ophephile.

Nebala Sidale umuntu ngesakhiwe esihle.

Kepha samdixilela phansi ekujuleni.

Ngaphandle kwalabo abakholwayo benze okuhle, ngokuba bona bayothola umvuzo ongenamkhawulo.

Iyona yiphi into ezokwenza uphike ukholo emuva kwalokhu na?

Akuyena yini u Allah oNgomehluleli ovelele na?

Funda eGameni leNkosi yakho okuyiyona eyadala.

Yadala umuntu ngehlule.

Funda, belu iNkosi yakho iphana kakhulu.

Iyona lena eyafundisa ukubhala ngosiba.

Ifundise umuntu lokho angakwazi.

Qha! Nebala umuntu uba ihlongandlebe;

Mhla ezibona esecebile.

Kepha isiphetho siseNkosini yakho.

Uke wambona na, lowo ovimbayo,

Inceku lapho ikhuleka.

Wake wambona esendleni eqondile na?

Kumbeke egqugquzelela ukuzithoba ku Allah na?

Uke wambona lapho esephika iqiniso futhi elishaya indiva.

Ingabe ngempela akazi yini ukuthi u Allah Uyabona na?

Hiya! Uma engaphezi, sizomgxavula ngebunzi.

Ibunzi elinamanga eliphaphalazayo.

Ngakhoke makabize yithimba lakhe.

Nathi sizobiza AmaZabaniya [izingelosi zesijeziso].

Qha! Ungamlaleli, kepha ukhothame [ku Allah] ukhonze.

Nebala sayehlisa [iKurani] ngoBusuku beSinqumo.

Ingabe uyazi ukuthi buyini uBusuku beSinqumo na?

UBusuku beSinqumo bundlula izinyanga eziyinkulungwane.

Izingelosi kanye noRuhu [uJibhirili] ziyehla kubo [uBusuku] ngemvumo yeNkosi yazo ngalo lonke udaba [olunqunyiwe].

Bunokuthula kuze kuse.

Labo abangakholwa kwabeMibhalo kanye namaMushrikina [ababhanqi] abasoze bayeka [ukholo lwabo] kuze kuba kufika ubufakazi.

ISithunywa sika Allah esibafundela Imiqulu Ehlanzekile.

Iqukethe imibhalo enohlonze eqotho.

Laba abanikwa iMibhalo, bahlakazeka emuva kokuba sekufike kubo imibiko ecacile.

Futhi babekade beyalelwe ukuba bakhonze u Allah ngokuzinikela okumsulwa bengambhangqi nalutho, futhi baqikelele ukwenza iSwala nokukhipha iZaka; bheka ngoba iyona leyo inkolo eqotho [i-Isilamu].

Nebala, labo abangakholwa kwabeMibhalo namaMushirikina bayongena eMlilwe wase Jahanamu babhadle kuwo unaphakade; yiboke kanye labo abayindalo embi.

Kepha labo abakholwayo nabenza okulungileyo, yibona abayindalo enhle.

Umvuzo wabo oseNkosini yabo izivande zaseDeni okugeleza enzansi kwazo imifula, bayohlala kuzo unaphakade; u Allah uthokozile ngabo kanti nabo bathokozile ngo Allah. Lokho okumuntu owesaba iNkosi yakho.

Mhla umhlaba uzanyazanyiswa kanzima.

Lapho umhlaba uyokhafula imithwalo yabo [konke okungcwatshwe kuwo].

Umuntu lapho uyothi: “Ingabe ungenwe yini na?”

Ngalolosuku uyobe ukhipha zonke izindaba zawo.

Ngokuba iNkosi yakho izowembulela.

Ngalolosuku abantu bayophuma bathi chithisaka ukuze bakhonjiswe izenzo zabo.

Lowo owenze okuhle noma kukuncane kanjani, uyokubona.

Nalowo owenze okubi, noma kukuncane kanjani, uyokubona.

Ngifunga ngezigijimi ezihefuzelayo [amahhashi].

Eziqhantshisa izinhlansi [ngezinselo].

Ezihlasela entathakusa.

Zisuse izintuli.

Ziqhekeze ibutho maphakathi.

Impela, umuntu akabongi eNkosini yakhe.

Naye futhi ungufakazi kwalokho.

Nomcebo uwuthande kakhulu.

Ingabe akazi ngomhla kuyokhishwa okusemangcwabeni.

Kubekwe obala okusezifubeni.

Impela, iNkosi yabo iyobe yazi konke ngabo ngalolosuku.

Umethusi.

Uyini Umethusi

Futhi ingabe uyokwazi kanjani ukuthi uyini Umethusi.

uSuku lapho abantu bayoba njengamavemuvana athe chithisaka.

Izintaba zona ziyoba njeboya obuhlakazekile.

Lowo isikali sakhe [sezenzo] siyoba nesisindo;

Uyophila impilo ethokozisayo [eJana].

Kepha lowo isikali sakhe siyoba lula;

Uyongena eHawiya [eJahanamu].

Ingabe uyayazi ukuthi iyini na?

UMlilo ovutha amalangabi.

Ukuqongelela kuniphazamisile.

Kuze kube niyongena emathuneni.

Cha! Nizokwazi maduze nje.

Futhi cha! Nizokwazi maduze nje.

Qha! Ukube nje beninolwazi olungenakungabaza.

Nakanjani nizoyibona iJahanamu.

Futhi nizoyibona mathupha ningayingabazi.

Futhi nakanjani niyobuzwa, ngalolosuku ngentokomalo [yasemhlabeni].

Ngifunga ngesikhathi.

Impela wonke umuntu ulahlekelwe.

Ngaphandle kwalabo abakholwayo nabenza okulungileyo nabelulekana ngeqiniso nangokubekezela.

Imbubhiso kuyo yonke inhlebi.

Lena eqongelela umcebo iwubale.

Acabange ukuthi umcebo wakhe uzohlala naye unaphakade.

Phinde! Uzotshingelwa eHutwama.

Ingabe uyazi ukuthi iyini iHutwama na?

UMlilo ka Allah ovuthayo.

Oshisa ngisho izinhliziyo.

Bayovalelwa kuwo.

Ngezihonqo ezinde.

Awubonga yini ukuthi yabenzani iNkosi yakho laba abezindlovu na?

Akazange yini enze uzungu labo lwangaphumelela na?

Wabathumelela ngenkumbi yezinyoni.

Zibajikijela ngamagade aqinile.

Wabenza baba njengotshani obudliwe [imfuyo].

Ngenxa yenhlala yeza yamaKurayishi

Ukujwayela kwabo ukuthatha uhambo lwasebusika nasehlobo.

Ngakhoke mabakhonze iNkosi yaleNdlu [iKabha].

Lena ebondlayo lapho belambile futhi ibavikele lapho besaba.

Awumbonanga lowo ophika ukwaHlulelwa.

Nguye kanye lowo ohlukumeza izintandane.

Futhi akakukhuthazi ukondliwa kwabaswele.

Imbubhiso kulabo abenza iSwala,

Labo abangaqikeleli ukwenza iSwala yabo ngendlela.

Ababukisayo [uma benza iSwala]

Futhi bancintshana nangalokho okunanwayo[1]. ——— [1] Njengamanzi nosawoti nomlilo njalonjalo. Izinto okungancintshwana ngazo.

Nebala sikuphile iKhawutari [umfula oseJana].

Ngakhoke bhekisa iSwala nomhlatshelo eNkosini yakho.

Lowo okugxekayo nguyena empeleni onqanyukelwe ulibo.

Yithi: “Nina eningakholwa!”

Angikukhonzi lokhu nina enikukhonzayo.

Futhi nani anikukhonzi lokhu engikukhonzayo.

Futhi angisoze ngakukhonza lokhu nina enikukhonzayo.

Futhi nani anikukhonzi lokhu engikukhonzayo.

Nine nkolo yenu, nami nginenkolo yami.

Uma sekufike usizo luka Allah nokunqoba.

Lapho usubona abantu bengena eNkolweni ka-Allah ngobuningi,

Babaza udumo lweNkosi yakho uyicele nentethelelo, impela Yona iyathethelela.

Engathi zingabhubha izandla zika Abu-Lahabi naye futhi abhubhe.

Umcebo wakhe nenzuzo yakhe akumsizanga ngalutho.

Uyongena eMlilweni onamalangabi.

Kanti nomfazi wakhe uzobe ethwele izinkuni.

Emqaleni wakhe uyobe enegoda eliphothiwe.

Yithi: “U Allah Munye vo”

U Allah Ozimele.

Akazali futhi akazalwanga.

Futhi akekho noyedwa ongafaniswa naYe.

Yithi: “Ngizivikela ngeNkosi yokusa.

Ebubini balokho ekudalile.

Nasebubini bobusuku uma kuhlwa.

Nasebubini babafazi [abathakathayo] abakhafulela amafindo.

Nasebubini bonomona lapho eba nomona.

Yithi: “Ngizivikela ngeNkosi yabantu”

EnguMbusi wabantu

Ekhonzwa ngabantu.

Ebubini bomhlebeli onyamalalayo.

Lona ohlebela ezinhlizweni zabantu.

Lowo oyiJini nalowo ongumuntu.