Fulani Mokhtasar — Fatiha 1:1 – Maide 5:120

Ko innde Alla puɗɗorat-mi janngude Kur'aana o, mi wallinoo Mo mi barkinora e jantaade innde Makko. Basmala o na renndini inɗe Alla tati he inɗe Makko moƴƴe ɗe, ɗeen ngoni: 1- "Alla" woni: deweteeɗo e goonga, ko ndee ɓuri heeraade e inɗe Alla Toowɗo o, hay gooto innirtaake nde so wonaa Kanko Mbo senaande woodani. 2- "Arrahmaanu" woni: jooma yurmeende yaajnde. Kanko tigi woni Arrahmaanu. 3- "Arrahiimu": jooma yurmeende jokkunde yottiinde. O yurmoo mbo O welaa e tagoore Makko, goonɗinɓe e jeyaaɓe Makko na tawee heen.

Denndaangal nooneeji jettirɗi e sifaaji teddungal e timmal ko Kanko tan woodani alanaa tanaa Makko; sabu ko Kanko woni Joomiraawo tagɗo Pewjanoowo kala huunde. "aalamiin" keewal "aalam" woni kala ko wonaa Alla Toowɗo o.

Yettude Alla toowɗo o caggal yettude Mo e aaye jawtuɗo o.

Mawninde Alla Toowɗo o sabu wonde Ko Joma kala ko woni e ñalngu darnga, tawde fittaandu alaa ko joganii goɗɗo. te "ñalngu njoɓdi": ñalngu yoɓeede e hiiseede.

Ko Aan tan min keerinani dewe e ɗoftaare, min ndenndintaa Ma e tanaa Maaɗa, ko Aan tan min mballintoo e kala geɗe amen, moƴƴere fof woni ko e junngo Maa, alaa balloowo so wonaa Aan.

Tinndin min laawol pooccingol, ndewnaa min e maggol, tabitinaa min heen, Ɓeydanaa min peewal. "Laawol pooccingol" woni laawol laaɓtungol ngol ooñaaki, ngool woni Lislaam mbo Alla neliri Muhammad- jam e kisal Alla yo won e makko-

Laawol ɓeen jeyaaɓe Maa ɓe neeminir-ɗaa peewal; wano Annabaaɓe ɓe, e gooŋɗuɓe ɓe, e sahodinɓe ɓe, e moƴƴuɓe ɓe, kamɓe ngoni wondiiɓe moƴƴuɓe, wonaa laawol tikkanaaɓe annduɓe goonga te ɓe ndewaani ɗum, wano yahudu en, wonaa kadi laawol majjiraaɓe goonga mbo ɓe donki yiitude sabu yeebagol maɓɓe ɗaɓɓitde goonga haa yiita mo wano nasaara en.

{Alif} ko gootal e alkule udditiraaɗe yoga e cimooje Alkur'aan o, ko alkule ɗe ngalaa maanaa e jaati majje, si ɗe jantaama kanje tan wano (alif, ba, ta, ekn) kono eɗe njogii ñeeñal e nafoore; sabu alaa ko woni nder Kur'aan ko alal tinndinoore, na jeyaa e tinndinooje majje: joopaade ronkande oo Kur'aan gonirɗo e ɗee alkule ɗe ɓe nganndi eɓe ɗe kaala; ɗuum waɗi Kur'aana teddunde nde na heewi janteede ɓaawo majje, bano ɗum woniri e ndee simoore.

Oon Kur'aana tedduɗo sikke alaa e makko, wonaa e jippagol mo, wonaa e konngol e maanaa makko, ko nde haala Alla, feewnooka hulɓe ɓe faade e laawol jottinowol e Makko.

Ɓeen goonɗinooɓe mbirniindi, ɗuum woni kala ko anndirtaake co'irɗi te wirnii en, e ko Alla daali maa ko nelaaɗo maaki, wano ñalngu wattan, kamɓe tigi ñiiɓnata juulde wano Alla yamiri nde e sarɗiiji mayre, e jookli e baɗɗiiɗi e sunnaaji mayre, kamɓe ngoni rokkirooɓe e ko Alla yeɗi ɓe, e yaltinde ko waɗɗii, wano asakal, maa ko waɗɗaaki wano dokkal sadak; joortaade heen baraaji Alla, kamɓe ngoni gooŋɗinɓe wahyu mbo Alla jippini dow maa -Aan Annabi - jippinaaɗo kadi dow kala Annabaaɓe (jkw) adiiɓe ma, kamɓe gooŋɗinɓe - e yananeede - laakara e baraaji e lette gonɗe heen.

Ɓeen goonɗinooɓe mbirniindi, ɗuum woni kala ko anndirtaake co'irɗi te wirnii en, e ko Alla daali maa ko nelaaɗo maaki, wano ñalngu wattan, kamɓe tigi ñiiɓnata juulde wano Alla yamiri nde e sarɗiiji mayre, e jookli e baɗɗiiɗi e sunnaaji mayre, kamɓe ngoni rokkirooɓe e ko Alla yeɗi ɓe, e yaltinde ko waɗɗii, wano asakal, maa ko waɗɗaaki wano dokkal sadak; joortaade heen baraaji Alla, kamɓe ngoni gooŋɗinɓe wahyu mbo Alla jippini dow maa -Aan Annabi - jippinaaɗo kadi dow kala Annabaaɓe (jkw) adiiɓe ma, kamɓe gooŋɗinɓe - e yananeede - laakara e baraaji e lette gonɗe heen.

Ɓeen siforiiɓe ɗii sifaaji waawɓe jokkude laawol peewal, kamɓe ngoni daɗooɓe e aduna e laakara, ɓe keɓa ko ɓe njoortinoo ɓe ndaɗa e ko ɓe kulnoo.

Pellet ɓeen ɓe konngol Alla jojji e mum en caggal iimaan hoɓe ndooni e majjere mum en e canndalaagal mum en jeertinde ɓe e waasde jeertinde fof ina fota e nun en.

Sabu Alla muɓɓi ɓerɗe maɓɓe O uddidi ɗe e bonɗi majje, O muɓɓi nanɗe maɓɓe ɓe nanirtaa goonga no mbo foti jaɓireede ɗoftoree, O waɗi ommboode e ji'irɗe maɓɓe ɓe nji'ataa goonga o te embo feeñi, maa ɓe keɓ lette mawɗe to laakara.

Na woodi fedde e yimɓe sikkooɓe ko goonɗinɓe, ɓe kaala ɗum e ɗemɗe maɓɓe sabu hulande nguurndam e jawle maɓɓe, tawa eɓe cuuɗi keefeeru.

Ɓe cikkat e majjere mum en ɓe kodoto Alla e goonɗinɓe ɓe, e peññina goonɗingo ɓe cuuɗa keefeeru, tawa noon ko ko'e maɓɓe tan ɓe kodata, tawa ɓe tinaani ɗum, sabu Alla Toowɗo O Mbo anndi ko ɓuri suuɗaade, O humpiti goonɗinɓe ɓen sifaaji e ngonka ɓeen tigi.

Sabaabu mum ko ɓerɗe maɓɓe ɗe sikkitii, Alla ɓeydani ɓe sikkitaare, njoɓdi fof fawii ko golle mum, maa ɓe pawe lette muusɗe to ɓuri luggu e jayngol, sabu ko ɓe penani Alla e yimɓe ɓe, e yiddude ɓe ko Muhammadu (jkm) addi ko.

So ɓe kaɗaama bonnirde leydi ndi keefeeru e bakkatuuji e goɗɗi, ɓe caloo ɓe cikka ko kamɓe tigi ngoni moƴƴuɓe moƴƴinooɓe.

Tawa noon ko kamɓe tigi ngoni bonnooɓe, kono tan ɓe tinataa ɗuum, ɓe tinataa ko golle maɓɓe ɗe tigi ngoni bonnere.

Si ɓe njamiraama goonɗinde wano koreeji Muhammadu (jkm) ngoonɗinirnoo; ɓe nootora yeddugol e jalkitgol, ɓe mbi'a: mbela miɗen ngoonɗina wano goonɗinal ɗaayɓe ɓe?! tawa ko kamɓe tigi ngoni wemmbaaɓe. Kono tan eɓe majjaa ɗum.

So ɓe kawrii e ɓeen goonɗinɓe ɓe mbi'a: min njaɓii ko ngoonɗin-ɗon ko, ɓe mbi'a noon sabu hulde goonɗinɓe ɓe, si ɓe njahii ɓe njeewdii e hooreeɓe maɓɓe ɓee, ɓe teentinana ɓe tabital e jokkude ɓe, e wiide ɓe: ko onon min ngondi e laawol mon, kono tan miɗen peññinana goonɗinɓe ɓen jaɓde amen, min njala ɓe min njalkita.

Alla jalkita ɓe sabu ko ɓe njalkiti goonɗinɓe ɓe, ɗum wona njoɓdi golle maɓɓe, ɗuum waɗi O ñaawira ɓe he aduna wano juulɓe ɓe, kono to laakara O yoɓira ɓe keefeeru e naafikaagu maɓɓe, ko noon kadi O muñana ɓe haa ɓe ɓeydoo majjude e bewde, ɓe keddoo e wemmbaade e aande.

Ko ɓeen ngoni naafigeeɓe siforɓe ɗi sifaaji sabu ɓe lomtinirii keefeeru liimanee gal, njulaagu maɓɓe alaa tono; sabu ɓe mbaasii goonɗingol Alla, ɓe peewaano e goonga on.

Alla yerɗinirii ɓee naafigeeɓe yeruuji ɗiɗi: yeru jayngol, e yeru ndiyam, so tawii ko yerɗinde ɓe jayngol: ɓe nannde ko e oon kuɓɓuɗo jayngol ngam yaynaade, nde ngol jaawi o sikki ombo naftoro ooyre maggol kono tan ngol ñifi, ooyre nde majjiti, heddii tan ko nguleeki maggol, joom en keddii e niɓe e wemmbere hay huunde ɓe nji'ataa wonah feede e laawol.

Kamɓe ko fahɗuɓe ɓe nanataa njaɓataa goonga, muumɗuɓe ɓe kaalataa mo, wumɓe ɓe nji'ataa mbo, ɓe nduttotaako gaa majjere maɓɓe.

So tawii ko yerɗinde ɓe e ndiyam: ɓe nanndi ko e toɓo mawngo, e duule niɓɓune e digaali e maje, ɗi jippii dow yimɓe ɗeñƴere mawnde heɓi ɓe, ɓe ngoni e sukkude noppi maɓɓe, sabu sattude kartaali ɗi e hulgol maayde, Alla na humpitii heeferɓe ɓen O ronkantaa ɓe.

Jalbugol maje ɗe na ɗeɓa ɗoofde gite maɓɓe, kala nde majal yaynii ɓe njawta, so ngal yaynaaki ɓe keddoo e niɓɓere, ɓe njahataa, so Alla welano itta nanɗe e gite maɓɓe e kattanɗe Makko kuɓtidinɗe, ɓe ngontaa heɓtude ɗe, sabu ɗuurnaade ɓe goonga o. Kur'aan on waɗi toɓu ngo yeru, hito parñite wa'i no kaɗooje, ooyre maje ɗe wa'i no googna peeñanatɗo ɓe seeɗa kala, sukkude noppi ɗi wa'i no salaade ɓe goonga o, nanndal hakkunde naafigeeɓe e ɓee yerɗinaaɓe ɗoo woni waasde naftorde, yeru jayngol ngol: huɓɓuɓe ngol ɓee alaa ko naftorii heen sonaa niɓɓere e sumde, yeru ndiyam ɗam: alaa ko ɓe naftori e toɓo ngo sonaa kulol e ko digaali ɗi e maje ɗe ɓittini ɓe, ko nii naafigeeɓe ngoniri, alaa ko ɓe nji'ata e Lislaam sonaa satteende.

Onon yimɓe ndewee joomi mon Kanko tan, wonaa hay gooto goɗɗo, sabu ko Kanko tagi on O tagi leƴƴi gadiiɗi on, mbela joo ndaɗiron lette makko ɗoftaade jamirooje Makko ndeento-ɗon ɗi O haɗi.

Ko Kanko waɗi leydi ndi wonani on mbertu ndaɗɗudi, O waɗi dow mon asamaan o mahaaɗo e ñeeñal, Kanko tigi neeminiri on jippinde toɓo ngo, O fuɗni dow leydi ndi ɓiɓɓe leɗɗe ceertuɗe, ɗe ngoni njeɗu, taa mbaɗanee Alla renndidiiɓe e nanndidiiɓe tawa oɗon nganndi alaa fof tagoowo sonaa Alla, teddungal e mawngu woodanii Mbo.

Onon yimɓe ɓee so tawii oɗon cikkitii Kur'aan jippinaaɗo o dow jeyaaɗo Makko Muhammadu (jkw), Miɗen cappoo on nde ngaddoton simoore wootere nanndunde heen, hay so wonii ko ɓurnde raɓɓude heen, noddee kala mbo njiɗɗon e wallidiiɓe mon, so tawii oɗon ngoonɗi e ko nodditorto-ɗon ko.

So tawii on mbaɗaani ɗuum - te on mbaawantaa ɗum pooma- ndeento-ɗee jayngol kuɓɓirtengol yimɓe haanduɓe e lette, e nooneeji kaaƴe e ko ɓe ndewannoo e goɗɗi kadi, ngol jayngol Alla tigi heblani ngol heeferɓe ɓe.

Nde wonndoo ko heeferɓe kammbanaa ko yawti ko; Aan Annabiijo weltinir goonɗinɓe ɓe Alla, gollooɓe moƴƴi, aljannaaji ɗi caalli ndogata les kuɓeeje e leɗɗe majji, kala nde ɓe njeɗaa ñammineede ɓiɓɓe majje belɗe, ɓe mbi'a: ɗee nanndi ko e ɗeya ɗe njeɗano-ɗen ko adii, ɓe ndokkee ɗe tawa mbaadi e inɗe majje na nanndi eɗe aduna ɗe, haa ɓe mbaawa jaɓde ɗe, kono eɗe ceerti ñamri e meeɗam, to aljanna eɓe ndaña rewɓe laaɓɓe hisɓe e kala ayiibe ko miijetee e aduna, ɓe ngona e neema duumiiɗo mbo taƴataa, wano neema aduna taƴoowo o.

Anndu Alla ceniiɗo O aamataa addude yeruuji ɗi O welaa, O nanndinira ɓoŋngu -cufu- e ko ɓuri ngu mawnude maa ko jaasi ngu, yimɓe ɓee ko pecce ɗiɗi njiirata ɗum: goonɗinɓe e heeferɓe, so tawii ko goonɗinɓe ɓe eɓe njaɓa tawa eɓe nganndi ko ñeeñal woni e ngool nanndingol, so tawii ko heeferɓe ɓee, ɓe ngona e naamnitaade, ngam jalkitde, holko waɗi Alla Mo nanndinira e ɗee takooje koyɗe, wano ɓowɗi, e buubi, e jommbaalji, e ko wonaa ɗii, jaabawol mum iwde e Alla ko: ɗii yeruuji eɗi coomi peewal e tindinooje e humpitagol yimɓe ɓe, heewɓe heen Alla majjiniri ɓe ɗii yeruuji sabu salaade ɓe mijitaade ɗi, heewɓe heen kadi O feewni ɓe sabu teskitaade ɗi, alaa majjooɓe so wonaa haanduɓe heen, ɓeen ngoni saliiɓe ɗoftaade, wano naafigeeɓe ɓe.

Ɓeen firtooɓe aadi dewe Alla gooto O, e ɗoftaade Nulaaɗo Makko mbo nelaaɓe adiiɓe kaali fii mum, ɓee salotooɓe aadiiji Alla ɓe ngoni ko e taƴde ko Alla yamiri yo enɗam jokke, ɓe ngoni e goopi ngam saaktude bonannde, ɓee ngoni ustoraaɓe njeɗu aduna e laakara.

Onon heeferɓe geɗe mon na haawnii! holno njeddirton Alla, tawa oɗon ceedoo maandeeji baawal Makko e ko'e mon, on ngoodaano, O tagi on O wuurni on, O wara on kadi ɗiɗaɓol, O wuurtina on kadi ɗiɗaɓol, rewa heen O rutta on e Makko ngam O yoɓa on ko mbaɗno-ɗon ko.

Ko Alla tan tagani on kala ko woni e dow leydi ndi: caalli, e leɗɗe e ko wonaa ɗuum ko limotaako, onon oɗon naftoroo heen e dakmitaade ko O eeltani on, O tagi kadi asamaanji ɗi jeeɗiɗi kiɓindiiɗi, ganndal Makko na fiiltii kala huunde.

Alla Toowɗo O na filloo, O wii malaykaaɓe ɓe: Kanko maa O waɗ yimɓe lomtondirooɓe dow leydi ndi, ngam ɓe nguurnira ndi dewe Alla, malaykaaɓe ɓe naamnii joomii ɓe - naamnal laɓɓinagol - holko woni ñeeñal waɗude ɓiɓɓe-aadama lomtoo dow leydi, tawa eɓe mbonna ndi, ɓe ndufa ƴiiƴe e tooñe, ɓe mbii: minen ko min rewooɓe Ma tan, ko min sennooɓe yettooɓe Ma, miɗen teddina mawngu Maa e timmal Maa, min ceerataa heen, Alla jaabii ɓe naamnal maɓɓe: Miin Miɗo anndi ko on nganndaa e ñeeñe mawɗe ko ɓe tagiraa, e paandale lomtineede ɓe.

Ngam laɓɓinde teddeengal Baaba Aadama (jkm) Alla anndini mo inɗe geɗe ɗee fof, gila e muumintaaji e joorɗe e tagooje goɗɗe; konngi majje e maanaaji mum, rewi heen O holli ɗe malaykaaji, o wii: kaalanee Min inɗe majji so tawii oɗon ngoonɗi e ko kaaloton ko, wonde onon ɓuri teddude oo tagaaɗo.

Ɓe mbii - e jaɓde ustaare maɓɓe ɓe ndutti ɓural to Alla - miɗen cennu Maa min mawninii Maa Aan jooma amen gaa salaade ñaawoore e sariya Maa, minen alaa ko min nganndi sonaa ko njeɗɗaa min e ganndal, Ko Aan tigi anndi alaa ko wirnoto Maa, ñeeñɗuɗo baɗiroowo geɗe fof ɗo haani e kattanɗe e sariya Maa.

Oon tuma Alla Toowɗo O wii Aadam: anndin ɓe inɗe ɗeen geɗe, nde o anndini ɓe ɗe wano Joomiiko anndiniri mo, Alla wii malaykaaji ɗi: mbela mi haalanaano on: Miin Miɗo anndi ko suuɗii nder asamaanji e lesdi, Miɗo anndi ko ɓannginton e ko cuuɗoton.

Alla Mbo laɓɓina ko O yamiri yo malaykaaji ɗi cujjan Aadam ngam teddinde mo, ɓe njaawi ɓe cujji e ɗoftaare yamiroore Alla, so wonaa Ibilis gonnooɗo e jinneeji, o salii ko Alla yamiri mo sujjude, o mawnikinii dow Aadam, ndeen o wonti e heeferɓe yedduɓe Alla toowɗo O.

Min mbi'i: aan Aadama yaa hoɗoy aljanna aan e cuddiiɗo maa -Hawaa-, ñaamee toon e weltaare kala ɗo muuy-ɗon, kono taa ɓadee kii lekki ki Mi haɗi on ñaamde, si on ngoopii yamiroore njeyete-ɗon ko e tooñooɓe.

Seyɗaane seeraani e soklinde ɓe ŋarɗina, haa o liɓi ɓe e goopol, ɓe ñaami e kiin lekki ki ɓe kaɗanoo, njoɓdi maɓɓe wonndoo ko Alla yaltini ɓe aljanna, Alla wii ɓe kamɓe e seyɗaane o: njippoɗee dow lesdi, ngonon añondirɓe, tabiton toon mbeltoron e moƴƴi gonɗi heen haa kala nde happu mon yonti, darnga daroo.

Aadama jaɓi konngi ɗi Alla haalani mo, o du'ori ɗi, ɗiin ngoni haala Alla: (ɓe mbii joomiraawo amen min tooñii ko'e amen, so A accanaani min njurmo-Ɗaa min maa min njeye e bonnoraaɓe) Aaraf:23. Alla jaɓani mbo tuububuye makko, O accani mo, Joomiraawo ko keewɗo yaafaade jeyaaɓe Makko.

Min mbii ɓe: onon fof njippee aljanna pa'on to lesdi, so nelaaɓe Am ngaddii e mon peewal, kala dewɗo ngal o goonɗini nelaaɓe Am oon dee kulol alanaa mo ñande wattan, ɓe cunotaako e ko yawtiri ɓe to aduna.

So tawii ko ɓeen yedduɓe penni kaawese Amen, kamɓe ngoni yimɓe jayngol ñiiɓooɓe toon.

Onon ɓiɓɓe Isra'il - Annabi Yaakub -ciwtoree mojjereeji Alla ɗi O waɗani on njetton Mo, njokkon humnude aadi Am e mon, goonɗinde Mi e nulaaɓe Am, e gollirde sariyaaji Am ɗi, so on kumnii aadi Am e ko podan-Mi on ko, wano nguurndam mbelɗam e aduna, e njoɓdi moƴƴiri ñande darnga, kulon Mi Miin tan tawa on pirtataa aadi Am o.

Goonɗinee Kur'aana mbo njippin-Mi dow Muhammad (jkm) te ombo hawri e ko woni nder Tawreeta, ko adii nde ngootaagu Alla e annabaagu Muhammad (jkm) wayleede e mayre, ndeento-ɗee wonde adiiɓe yeddude, wotaa mbattitee aayeeje Am ɗe coggu pamaru, kulee tikkere e lette Am ɗe.

Taa njillindiree goonga - mbo Alla jippini dow nulaaɓe Mum- e penaale mon ɗe, wotaa cuuɗee goonga garɗo e defte mon ɗe cifiiɗe Muhammad (jkm) tawa oɗon mbo nganndi oɗon laaɓaa.

Tottiree juulde timminon dosɗe mayre e baɗɗiiɗi e sunnaaji mayre, njaltinee asakal jawle mon ɗe Alla resndi on, njankinanoɗee Alla hawtude e yankinaniiɓe Mo iwde e leñol Muhammadu (jkm).

Holko ɓuri bonde, si oɗon njamira woɓɓe yo ngoonɗu mbaɗa ko moƴƴi, oɗon njejjita ko'e mon, tawa oɗon njannga Tawreeta, oɗon nganndi ko woni heen e yamiroore rewde diine Alla ɗe, e jaɓande nulaaɓe Makko, mbela on mbaawaa naftorde hakkillaaji mon ɗi?!

Mballitoree muñal e juulde fii kala geɗe diine e aduna, ɓattinatnde on faade e Alla, O walla on O reena on O ittana on boneeji, nganndee juulde na saɗti na teddi si wonah e hulooɓe joomiraawo maɓɓe.

Sabu kamɓe ngoni yananaaɓe maa ɓe kawru e Joomiraawo ñande darnga, maa ɓe ndutto e Makko ngam O yoɓa ɓe golleeji maɓɓe.

Onon ɓiɓɓe Annabiijo Alla Yaakuub (Isra'il) ciftoree moƴƴere diine e aduna nde mbaɗan-Mi on, ciftoree wonde Mi ɓurnirii on annabaagal e laamu dow wondiiɓe mon e yonta.

Ndeentoro-ɗee lette ñalaande darnga rewde ko yamiraa e accude ko haɗaa, ndeen ñalaande fittaandu nafataa fittaandu hay huunde, ndu jaɓantaake tefande goɗɗo sonaa e yamiroore Alla, coodtiigu ko heewi fof jaɓetaake, ɓe ngalaa ballo ñande heen, so tawii tefoowo e coodtiigu ballo alah holno daɗirtee!

Onon ɓiɓɓe Isra'il ciftoree nde Min ndanndi on e boneeji yimɓe Fir'awna, ɓe pawii on kala lette, nde ɓe kirsi sukaaɓe mon worɓe haa mbaason heddaade, ɓe ngacca sukaaɓe mon rewɓe ngam ɓe ngollana ɓe, ɓe koyni on, ko jooma mon danndi on boneeji fir'awna e wallidiiɓe mum ngam humpitaade on, mbela joo njetton Mbo.

Ciftoree moƴƴere nde Min mbaɗani on, Min peccani on maayo ngo woni laawol njoorndi ndew-ɗon heen, Min ndanndi on, Min njooli fir'awna e wondiiɓe mum yeeso mon, oɗon ndaarda ɓe gite mon ŋaas.

Ciftoree e ɗiin moƴƴi ko Min podondirnoo e Muusaa jammaaji capanɗe nayi ngam jippinde heen Tawreeta wona fooyre (yaynannde) e peewal, alaa ko mbaɗɗon heen sonaa oɗon ndewa ngaari, baɗal mon ngal ko tooñe mawɗe.

Rewi heen Min ngaccani on ɓaawo nde tuub-ɗon, Min leɓtaani on mbela joo njettiron Alla rewde Mo e ɗoftaade Mo no haaniri.

Ciftoree e ɗii moƴƴi, nde Min ndokki Muusaa (jkm)deftere (Tawreeta) seerndoore hakkunde goonga e fenaande,e hakkunde peewal e majjere haa njiiton goonga jokkon mbo.

Ciftoree e ɗiin moƴƴi, nde Alla ñaawani on accude rewde ngaari ndi, nde Muusaa (jkm) wii on: on tooñii ko'e mon e rewde mon ngaari ndi, tuubee ndutto-ɗon e tagɗo on O, mbarondiron, ɗuum ɓuri e mon jokkude keefeeru caasnoowu jayngol, on mbaɗii ɗuum e ballal Alla, O accani on, sabu ko keewɗo yaafaade jurmotooɗo jeyaaɓe Makko.

Ciftoree nde baabiraaɓe mon ɓee kaaldi e Muusaa e cuusal, ɓe mbii: min ngoonɗintaa ma haa min jiira Alla gite amen ko laaɓi,ndeen jayngol cumowol ɓami on,ngol wari on oɗon ndaarondira.

Rewti heen Min immintini on ɓaawo maayde mon mbela njetton Alla sabu ko O moƴƴi e mon.

Na jeyaa e moƴƴi Amen dow mon, Min neldi duule ɗuwo-ɗon heen nguli naange nde majju-ɗon nde, Min njippini dow mon njuumri welndi, e colli juɗaaɗi, Min mbii on: ñaamee moƴƴi ɗi Min njeɗe on. Yeddugol maɓɓe alaa ko ustataa Min, kono ko ko'e maɓɓe ɓe tooñi, ɓe ustoraa baraaji lette ngoodana ɓe.

Ciftoree e neemaaji Alla dow mon,nde Min mbii on:naatee ndee saare (Baytil Mukaddas),ñaamee toon belɗi ceniiɗi e kala nokku ɗo mbela-ɗon, so oɗon naata damal ngal tugganon Alla tiiɗe,toro-ɗon Alla mbi'on: Joomi amen momtan min bakkatuuji amen;Min njaɓana on,maa Min ɓeydan moƴƴinɓe golle maɓɓe ɓee baraaji.

Ɓeen tooñɓe mbattiti konngol tanaa ngol ɓe mbi'anoo, ɓe naatiri ladgol, ɓe mbi*i: gabbel nder leebol sabu jalkitde yamiroore Alla toowɗo O; njoɓdi tooñooɓe ɓe ko Alla njippini dow maɓɓe lette sabu yaltugol maɓɓe keerol sariya e luutndaade yamiroore.

Ciftoree moƴƴi Alla dow mon nde majju-ɗon nde, wemmbere bonnde heɓi on, ndeen Muusaa (jkm) toranii on Joomiraawo O yarna on; Min njamiri mo fiyirde haayre nde sawru makko; nde o fiynoo nde tan gite ndiyam sappo e ɗiɗi puccitii tolnondir e limoore leññi mon ɗi, ndiyam suppitii heen, Min mbii on: ñaamee njaron e njeɗu ngu Alla addani on te on tampanaani ɗum, taa mbaɗee bonannde e leydi hee.

Ciftoree nde njeddu-ɗon moƴƴere Jooma mon,kaaɓ-ɗon mbii-ɗon Muusaa:min muñataa e ñaamdu wooturu,torano amen Jooma maa O yaltinana min ñaandu iwde e puɗi lesdi,gila e haako e kecciɗɗi mayri haa e buudi e gabbe e ñebbe e basalle mayri;Muusaa (jkm) wii e waasde weleede ɗaɓɓal mon: on mbattitat ko ɓuri jaasde ɗum ko okka-ɗon,oɗon keɓannoo ɗum ko aldaa e tampere-: njippee e ndi leydi faade e wooto e gure ɗe, maa on taw toon ko toriɗon ko,nde ɓe ndewi belaaɗe maɓɓe ɓe calii ko Alla suɓanii ɓe,ɓe keddodi e hoyre e baasal e ɓittere,ɓe nduttii e tikkire Alla; sabu salaade ɓe diine Makko,e yeddu- de ɓe aayeeji Makko,e tooñe ko ɓe mbannoo annabaaɓe Makko, ɗuum fof addi ɗum ko woopde ɓe Alla e ko ɓe njawtatno keeri Makko.

Ɓeen goonɗinɓe e ngol leñol, e ɓeen goonɗin ɓe e leññi jawtuɗi ko adii nuleede Muhammadu (jkm) gila e yahuudu en e nasaara en e Saa'iba en - ɓeen ngoni rewɓe e yoga e annabaaɓe ɓe keɓi goonɗinde Alla e ñalaande watindiine- ɓeen na njogii mbarjaari to Jooma maɓɓe, ɓe kulanaaka ñande wattan, ɓe cunotaako e ko yawtiri ɓe to aduna.

Ciftoree aadi tiiɗɗo mbo Min keɓi e mon,wano goonɗinde Alla e nulaaɓe Mum,Min ɓamti haayre nde dow mon ngam hulɓinde on e reentinde on woppude gollirde aadi o,Min njamiri on njogoron Tawreeta nde Alla jippini e mon e soobee e tiiɗnaare, ko aldaa e aamre,ndeenee ko woni e mayre tesko-ɗon nde;na waawi ndaɗon lette Alla.

Alaa ko mbaɗɗon sinaa oɗon njedda oɗon ngoopa ɓaawo nde aadi ƴettaa e mon, so wonaano ɓural ko Alla accani on, e jaɓde tuububuye mon, maa on ngon bonnoraaɓe sabu ngool salagol e ngool goopol.

On nganndii e yananeede kabaaru ɓeen ardiiɓe mon, nde ɓe ngoopiri awde (liɗɗi) ñande hoore-biir nde ɓe kaɗanoo awde e mayre, ɓe taarori ɗum e wertude saño ngo ado hoore-biir, ɓe njaltini liɗɗi ɗi ñande dewo, ɓee woopooɓe Alla waɗti ɓe baaɗi gañaaɗi woni lette maɓɓe sabu goopol maɓɓe.

Min mbaɗi ndee saare tooñooɓe woni maanditorde wonande ca'e taariiɗe nde, e aroyooɓe caggal maɓɓe; haa ɓe ndeentoo waɗde bano maɓɓe, Min mbaɗi ɗuum wona teskorde hulooɓe lette ɗe Alla fawata taccooɓe keeri Makko.

Ciftoree fillayeeji adiiɓe on, ko waɗnoo hakkunde maɓɓe e Muusaa (jkm), nde o haalani ɓe yamiroore Alla yo ɓe kirsu nagge e na'i ɗin, ɓe njaawaani jaɓde, ɓe mbii: mbela a yiɗ jalkitde min! Muusaa wii: miɗo moolii Alla nde mi jeyetee e fenanooɓe Alla, e jalkitooɓe yimɓe.

Ɓe mbii Muusaa: torano min joom maa haa O laɓɓinana min mbaadi nagge nge O yamiri min yo hirse, o wii ɓe: Alla dee wii: ko nagge nge wonaa ŋakewe (nayewe) nge wonaa ñalel, kono ko hakindiinge, njaawee mbaɗee yamiroore jooma mon.

Ɓe njokki jeddi e sanndolinde maɓɓe, ɓe mbii Muusaa (jkm): torano min joom maa haa O laɓɓinana min ngoobo (mbaadi) magge, Muusaa wii ɓe: Alla dee wii: ko nagge oole sanne, kala daarɗo nge weltoroo.

Ɓe ndoonii e sanndolinde, ɓe mbii: torano min jooma maa haa O ɓeyda laɓɓinande min sifaaji magge; sabu na'i baaɗi noon na keewi, min mbaawaani seerndude ɗi. Ɓe teentini wonde -si Alla jaɓii- maa ɓe njiitu nagge ɗaɓɓaange yo hirse nge.

Muusaa wii ɓe: Alla dey wii: ko nagge nge eeltanaaka goole ndema, wonaa kadi yarnude lesdi, ko nge hisnge e ustaare, nge alaa ngoobu sinaa oolu, ndeen noon ɓe mbii: jooni dey a addii sifa laaɓɗo tinndinoowo nagge nge tigi, ɓe kirsi nge ɓaawo nde ɓe ɗeɓi waasde hirsude nge sabu jeddi e sanndolinde.

Ciftoree nde mbar-ɗon gooto e mon, ngon-ɗon e tuumondirde, gooto kala na laɓɓina hoore mum na tuuma goɗɗo oon, oɗon pooɗondira, ko Alla tigi yaltinta ko cooɗanno-ɗon e warde mon oon mbo wi'aani waɗaani.

Min mbii ɓe: piyindiree baraaɗo o e nagge nge njamira-ɗon yo on kirsu; ndeen Alla ɗiftina mo Oanndina barɗo o! ɓe mbaɗi noon, o haali barɗo mo o. Nii no Alla ɗiftiniri oo maayɗo ko noon O ɗiftinirta maayɓe ñande darnga, O holla on maandeeji laɓɓinooji baawal Makko, na waawi kakkilanon ɗum ngoonɗino tigi Alla Toowɗo O.

Rewi heen ko ɓerɗe maɓɓe njoori ɓaawo oo waaju laaɓtuɗo e ɗee kaawase ɓannguɗe, haa ɓerɗe ɗe mba'i no kaaƴe, maa ɓuri ɗum yoorde; ɗe ngonko majje waylotaako pooma, kaaƴe noon na mbaylitoo, kaaƴe na woodi jaltinooje ndiyam, yimɓe e muumuntaaji naftora heen, no woodi kadi jowtotooɗe njana sabu hulde Alla, ɓerɗe mon ɗe mba'aani noon, Alla noon yeebotaako golle mon, Omo humpitii ɗe, O yoɓa on ɗe.

Mbela oɗon njoortii - onon goonɗinɓe ɓe - wonde Yahuud en maa ngoonɗin ɓe jaɓana on?! ɓaawo nde nganndu-ɗon goonga gonal e sanndolinde maɓɓe! goonga tigi, na woodnoo fedde e annduɓe maɓɓe nannooɓe haala Alla jippinaaka dow maɓɓe e Tawreeta; ɓe mbayla konngi e maanaaji mayre ɓaawo nde ɓe paami ɓe nganndi ɗi, tawa eɓe nganndi mawneeki bonannde maɓɓe.

Na jeyaa e lootondirɗi yahuud en e peeje maɓɓe bonɗe, yoga e maɓɓe so kawrii e goonɗinɓe ɓe mbi'a ɓe min jaɓii Annabi Muhammadu (jkm) e sellugol nelal Makko ko ɗuum tigi Tawreeta seedii, kono tan si ɓe njeewdii hakkunde mum en ɓe ngona e felondirde, sabu juulɓe ɓee na pawa e maɓɓe hujja ko ɓe njaɓi goonɗugol Annabaagu ngu.

Ɓee yahudeeɓe ɓe njokki ngol laawol ñiŋangol, na wayno ɓe nganndaa wonde Alla Mo anndi ko ɓe cuuɗata e ko ɓe peññinta e konngi e baɗe maɓɓe, maa O feññinan ɗum jeyaaɓe Makko O weeja ɓe.

Na woodi fedde e yahud en alaa ko ɓe nganndi e Tawreeta sonaa janngugol, ɓe nganndaa ko nde tinndini, alaa ko ɓe keɓi e mawɓe maɓɓe sonaa penaale, ɓe cikki ko ɗuum woni Tawreeta nde Alla jippini nde.

Halkaare e lette bonɗe na padi ɓeen winndooɓe deftere e juuɗe maɓɓe ɓe mbi'a - fenaande-: Ɗum ko to Alla iwri; ɓe coodtira goonga e rewde peewal coggu aduna hoyngu, wano jawdi e koongu, ko halkaare e lette muusɗe woodani ɓe sabu fenande Alla ko ɓe mbinndiri juuɗe maɓɓe, bone woodanii ɓe e jawdi e koongu ko ɓe paggitii heen.

Ɓe mbii - fenaande e mawnikinaare -: jayngol memataa min, min naatataa e maggol sonaa balɗe seeɗa, O wii - Aan Annabi - yo A wii ɓee yimɓe: mbela on keɓanii ɗum fodoore iwde e Alla? So tawii on keɓii ɗuum; Alla dey firtataa aadi, wolla ngon-ɗon ko e fenande Alla, oɗon kaala ko on nganndaa.

Wonaa no ɓee yimɓe cikkiri; Alla dey lettata ko kala baɗɗo bonannda keefeeru, bakkatuuji makko taarorii mo bannge fof, O yoɓira ɓe naatde jayngol, ɓe ñiiɓa toon pooma.

Ɓeen goonɗinɓe Alla e Nulaaɗo Makko, ɓe ngolli golle moƴƴe, baraaji maɓɓe to Alla ko naatde aljanna ɓe ñiiɓa toon pooma.

Ciftoree - onon ɓiɓɓe Isra'iil - aadi celluɗo mbo Min ɓami e mon, nde ngoottinton Alla, alaa mbo ndenndinton e Makko, moƴƴon e jiknaaɓe e jiidaaɓe e waayɗuɓe (yatiim en) e miskineeɓe e haajorɓe ballal, e nde kaalanton yimɓe ɓe haala moƴƴa, e yamirde ko moƴƴi e haɗirde ko boni, tawa on caɗtinaani, tottiron ñiiɓnon juulde no yamiraa nii haa timma, totton asakal ngal haanduɓe heen e ɓerɗe laaɓɗe, alaa ko mbaɗɗon sonaa luutndi-ɗon cali-ɗon timminde aadi o.

Ciftoree aadi tabitɗo mbo Min ɓami e mon nder Tawreeta, harminde rufondirde ƴiiƴe, e harminde goɗɗo yaltina goɗɗo galle, rewi heen on njaɓii aadi mbo Min ɓami e mon, te oɗon ceedii sellugol aadi o.

Rewi heen, oɗon luutndoo aadi o; oɗon mbarondira, oɗon njaltina sete e mon iwde e galleeji maɓɓe, oɗon mballinoo añɓe e waɗde tooñe, so añɓe ɓee ndahii ɓe ngaddii ɓe e mon ngonon e soodtude ɓe, ɗuum fof noon na harmi e mon, holno ngoonɗinirton yoga e Tawreeta: soodtugol dahaaɓe, njeddon kadi yoga e ko woni e mayre: reende pittaali e haɗde yaltinde yimɓe iwde e galleeji maɓɓe? Baɗoowo ɗuum alaa njuɓdi sonaa koyeera e nguurndam aduna, to laakara o fawetee ko lette ɓurɗe muusde, Alla noon yebotaako ko ngolloton, Kanko Omo humpitii ɗum, maa O yuɓu on ɗum.

Ko ɓeen ngoni soodirɓe laakara nguurndam aduna (ɓe cuɓii aduna) ɓurnude ko gasata dow ko heddotoo, ɓe koynantaake lette Laakara, ɓe ngalaa ballo ñande heen.

Goonga tigi, Min okkii Muusaa Tawreeta, Min ndewni heen nulaaɓe ɓaawo makko, noon kadi Min okkii Iisaa ɓii Maryam maandeeji ɓannguɗi laɓɓinooji goonɗude mo, wano wuurtinde maayɓe, e sellinde bempiloowo (mbo yi'ataa jamma) e ñawu daneyel, Min cemmbiniri mo Malayka Jibriil (jwm) mbela -onon ɓiɓɓe Isra'il- kala nde nulaaɗo Alla addi e mon ko yahdaani e belaaɗe mon calo-ɗon goonga o, mawnikino-ɗon ɓurno-ɗon nulaaɓe Alla ɓe, yoga heen njeddon ɓe woɓɓe heen mbaron ɓe.

Hujja Yahuud en waasde jokkude ɓe Mahammade (jkm) ko wiide ɓe: ɓerɗe amen ɗe ko muuraaɗe, ko kaalataa ko alaa ko naatata e majje, te ɗe paamataa ɗum, wonaa no ɓe cikkiri, accu tan Alla yaltinii ɓe yurmeende Makko sabu keefeeru maɓɓe, alaa ko ɓe ngoonɗini si wonaa seeɗa e ko Alla jippini.

Nde Alla addi e maɓɓe Kur'aan Teddunde nde, ende hawri e lasli celluɗi gonɗi e Tawreeta e Injjil, tawii ko adii jippagol mayre eɓe mbi'annoo: maa min poolu heeferɓe ɓe, min udditanee so annabi nulaama min ngoonɗina mo min ndewa mo, nde Kur'aan o e Muhammadu (jkm) ngari e maɓɓe, no ɓe nganndiri ɗum e goonga; ndeen ɓe njeddi, huɗoore Alla yo won e dow heeferɓe yedduɓe Alla e nulaaɗo Makko.

Bone wonii e ko ɓe coodiri ko'e maɓɓe (mbarjaari) ɓe njeddi ko Alla jippini ɓe penni Nullaɓe Makko, ɗum woni tooñe e ngañgu sabu jippineede Annabaagal e Kur'aana o dow Muhammadu (jkm), e sabaabu ko ɓe ngadii waylitde e Tawreeta. Lette koynooje ñande darnga na woodani ɓeen yedduɓe annabaagu Muhammadu (jkm).

So tawii Ɓee Yahuudɓe mbi'aama: goonɗinee goonga e peewal ko Alla jippini dow Nulaaɗo Makko, ɓe mbi'a: miɗen ngoonɗini ko jippinaa dow annabaaɓe amen, ɓe njedda ko jippinaa dow Muhammadu (jkm), tawa noon ko oo Kur'aan woni goonga jahduɗo e ko ɓe njogii ko, tawno ɓe ngoonɗinii ko jippinaa e maɓɓe maa ɓe ngoonɗin Kur'aana o. Wii ɓe -Aan annabi-: ko waɗi oɗon mbarannoo Annabaaɓe Alla ɓe so tawno oɗon ngoonɗini goonga garɗo e mon o?!

Goonga tigi Nulaaɗo mon Muusaa (Jkm) addanii on maandeeji laaɓɗi tinndinooji goonɗugol makko; ɓaawo ɗuum oɗon ndewa ngaari ndi caggal nde Muusaa yahi nootoyaade joomum, onon ko on tooñooɓe oɗon ndenndina Alla e goɗɗo, te ko Kanko tan haandi e reweede.

Ciftoree nde Min ɓami e mon aadi teentuɗo njokkon Muusaa kisal won e makko, e jaɓde ko o addi iwde e Alla, Min ɓamti dow mon fello ngo ngam hulɓinde on, Min mbii on: njogoree Tawreeta nde Min ngaddani on nde e soobee e tiiɗnaare, nanee njaɓon ɗofto-ɗon, si ɗuum alaa Min liɓa fello ngo dow mooɗon, mbii-ɗon: min nanirii noppi amen min ngoopiri golle amen, rewde ngaari ndi debbi e ɓerɗe maɓɓe sabu yeddugol maɓɓe. Yo a wii ɓe - Aan Annabi-: bone wonii e ɗum ko goonɗingol mon yamiri on keefeeru, so tawii oɗon ngoonɗini; sabu keefeeru yahdataa e goonɗinal goonga.

Aan Annabiijo, yo A wii ɓe: onon yahuud en so tawii oɗon njogii aljanna to laakara tawa alaa goɗɗo naatoowo toon tanaa mon; njiɗee maayde ɗaɓɓon nde; mbela keɓon ɗum ko yaawi, poofto-ɗon e tampere nguurndam aduna, so tawii oɗon ngoonɗini ndee noddoore mon.

Ɓe njiɗataa maayde pooma; sabu jeddi Alla ɗi ɓe ngardini e nguurndam maɓɓe, e fennude Nulaaɓe Makko, e waylude defte maɓɓe, Alla Mo humpitii tooñooɓe e maɓɓe, maa O yoɓu gooto kala e golle mum.

Maa a taw -Aan Annabiijo -Yahuud en ngoni ɓurɓe reerɗude e nguurndam,hay so ɗam wonii koyɗam,ɓuri reerɗude kadi ɓeen renndinɓe e Alla ɓe goonɗinaani ummital e hiiseede,hay so ɓe ngonii yimɓe deftere,gooto e maɓɓe na yiɗa wuurde duuɓi ujunere, o woɗɗataa lette Alla kala no nguurndam makko juutiri, Alla tigi Mo ƴellitii e golleeji maɓɓe,alaa ko suuɗantoo Mo heen,maa O yoɓ ɓe ɗe.

Wii - Aan Annabiijo - ɓeen Yuhuud en wiiɓe: "wonde Jibriil ko gaño amen e malaykaaɓe ɓe": Oon gañɗo Jibriin yo anndu ko e makko Kur'aan on jippori maa e yamiroore Alla, nde goonɗini defte Alla gadiiɗe ɗe; wano Tawreeta e Injiila, o woni tinndinoowo moƴƴere, beltiniroowo goonɗinɓe ko Alla resani ɓe e moƴƴereeji, gañɗo jooma ɗii sifaaji e golle oon jeyaa ko e majjuɓe.

Ɓeen añɓe Alla e nulaaɓe Mum, ɓe ngañi malaykaaɓe ɗiɗo ɓaditiiɓe Alla: Jibriil e Mika'iil; ko Alla woni gaño heeferɓe, te kala mbo Alla woni gaño mum o heɓii perte mawnde.

Goonga tigi, Min njippinii e Maa - Aan Annabiijo - maandeeji tinndinooji goonɗinal Maaɗa e annabaagal e wahyu ko ngaddu-ɗaa, no ɗum laaɓiri alaa jeddoowo ɗum sonaa yaltuɓe diine Alla o.

Na jeyaa e malkiseede Yahuud en, kala nde ɓe ɓami aadi - wano goonɗinde ko Tawreeta tinndini e annabaagal Muhammadu (jkm) - wooda e maɓɓe firtuɓe oon aadi, nganndee ko ɓuri heewde e ɓee Yahuudeeɓe goonɗintaa ko Alla jippini; sabu goonɗingol na ɗaɓɓi timminde aadi.

Nde Muhammadu (jkm) nelaaɗo iwde e Alla ari e maɓɓe, tawii sifa makko arii nder Tawreeta, sete e maɓɓe ɗuurnii ndeen tinndinoore, ɓe calii wondeede ɗum, ɓe mba'i no majjuɗo mbo waawataa naftorde goonga e peewal gonngal heen, o faaletaake (wondetaake) ɗum.

Nde ɓe ngoppi diine Alla o ɓe njokki penaale ɗe seyɗaneeji kaalata e laamu Annabiijo Alla Suleymaan kisal won e makko, ɗi cikki (numi) ko mbilewu o tabintiniri laamu makko, Suleymaan yeddiraani mbilewu - wano yahuud en cikkiri - kono seyɗaneeji kam njeddii nde ɓe ngonnoo e jannginde yimɓe ɓee mbilewu jippinanoongu dow malaykaaɓe ɗiɗo ɓe: Haaruut e Maaruut, to saare Baabel, Iraak, ngam humpitaade e ñoolde yimɓe ɓe, kala nde malaykaaɓe ɓe nganndini goɗɗo mbilewu ɓe ndeentina mo laɓɓinana mo: minen ko min humpittooɓe yimɓe ɓe, janngude ma mbilewu taa waɗe njeddaa, waɗi e maɓɓe njanngi mbelewu seerndoowu gorko e debbo mum, aawa ngañngu hakkunde maɓɓe, ɓeen mbileeɓe mbaawaa lorrude hay gooto sonaa e beleeɗe Alla, ɓe njannga ko lorrata ɓe tawa nafataa ɓe, ɓeen yahudeeɓe nganndii wonde kala mbo lomtini deftere Alla nde mbilewu o maletaake ñande laakara, bone woodanii ɓe e ko ɓe lomtini sariya Alla o mbilewu, so tawiino ɓe nganndi ɗum nafataa ɓe mbaɗataano ɗee golle bonɗe e majjere ɓanngunde.

Tawno yahuud en ngoonɗinii Alla e goonga, ɓe kuliri Mo rewde Mo, ɓe ngoppi woopde Mo; ndeen barke Alla ɓurata moƴƴande ɓe e ko ɓe ngoni ko, tawno eɓe nganndi ko nafata ɓe.

Alla Toowɗo O Mbo tinndina goonɗinɓe ɓee suɓaade konngi moƴƴi, O wii ɓe: onon goonɗinɓe taa mbi'ee konngol: {aynu min}; woni: aynu geɗe amen; sabu yahuud en na mbi'a noon Annabiijo (jkm) tawa ɓe paandii heen ko maanaa bonɗo, woni ɓurtere, Alla haɗi ngol konngol ngam sukkude ngal damal, O yamiri jeyaaɓe Makko ɓe yo mbi'at: {habba min}; woni: muñan min haa min paama ko kaalataa ko, ngol konngol na adda maanaa o tigi. Yedduɓe Alla ɓe lette muusɗe na ngoodani ɓe.

Yedduɓe ɓee - foti ko yimɓe deftere wolla ko renndinɓe e Alla - njiɗataa jooma mon jippinana on hay moƴƴere, foti ko seeɗa maa ko heewi, Alla e yurmeende Makko heerori waɗande annabaagu e wahyu e goonɗingol mbo O welaa e jeyaaɓe Makko, Kanko woni Joom ɓural mawngal, alaa ko tagaaɗo dañata sonaa iwa e Makko, ko e ɓural Makko O neliri Nulaaɗo o, O jippini deftere nde.

Alla Toowɗo O laɓɓini wonde kala nde itti ñaawoore Aaye nder Kur'aana, maa so O momtii wowlaandu aaye o haa yimɓe njejjiti mbo, ndeen O adda ko ɓuri nafoore, foti yaawii maa leelii, wolla ko nanndi e mum, ɗuum noon wonata ko e ganndal e ñeeñal Makko, Aan -Annabiijo- Aɗa anndi Alla Mbo hattani kala huunde, O waɗa ko O welaa, O ñaawa ko O yiɗi.

A anndii - Aan Annabiijo - wonde Alla woni Jooma asamanji e lesdi, Omo ñaawa ko O welaa, O yamira jeyaaɓe Makko ko O muuyi, O haɗa ɓe ko O welaaka, O lelna e sariya ko O welaa, O itta ko O welaa, on ngalaa ballo jogotooɗo geɗe mon sonaa Alla, wonaa kadi ballo deenoowo on gaa bone, ko Alla tan woni baawɗo kattanɗo ɗuum fof.

Onon goonɗinɓe on potaani naamnaade nelaaɗo mon o -naamnal salagol- wano yimɓe Muusaa naamnornoo annabi maɓɓe o ko yawti; ɓe mbii: {hollu min Alla ko laaɓi} [Nisaa"i: 153], kala lomtinirɗo goonɗingol keefeeru tawa o majjii laawol pooccingol ngol.

Ɓaawo goonɗingol mon, heewɓe e yahudeeɓe e nasaara en njiɗiino nawtude on e keefeeru wano ndewiranno-ɗon pankareeji, sabu ngañgu maɓɓe, ɗuum ɓe njelii ɓaawo nde ɓe laaɓaa wonde ko Annabiijo addi iwde e Alla ko goonga, ngaccee -onon goonɗinɓe- golleeji maɓɓe ɗi, ɗuurnee majjere maɓɓe e bone maɓɓe, haa ñaawoore Alla yana e maɓɓe, yamiroore e ñaawoore Alla arii, yedduɓe ɓe okkano suɓaade Lislaam maa ɓe njoɓa Jijya wolla hare- Alla Mbo hattani kala huunde, O ronkantaa ɓe.

Ñiiɓnee e timminde jookli juulde e baɗɗiiɗi e sunnaaji mayre, tottee asakal jawle mon faade e haanduɓe heen, kala golle moƴƴe ɗe mbaɗan-ɗon ko'e mon ado maayde mon, maa on keɓ mbarjaari joom mon ñande darnga, Alla noon Ko ji'oowo golle mon, O yoɓa gooto kala ko gollunoo.

Fedde e yahuud en e nasaara en mbii: Aljanna ko kamɓe keerori ɗum, yahuud en mbii: alaa naatoowo toon sonaa yay huudeejo, nasaara en mbii: alaa naatoowo toon sonaa nasaraajo, ɗuum woni yelaaji e miijooji maɓɓe bonɗi, yo A ruttu e maɓɓe mbi'aa -Aan Annabi -: ngaddee tinndinoore ko cikkoton ko, so tawii oɗon ngoonɗi e nodditoore mon nde.

Sellii wonde naatoowo Aljanna woni laaɓanɗo Alla faati e Makko, oon woni kadi moƴƴinirɗo dewe makko jokkude ko nulaaɗo addi, kala fedde nde o jeyaa ko oon woni naatoowo Aljanna, o heɓa mbarjaari joom mum, ɓe kulataa ko fadi ɓe laakara, ɓe cunotaako e ko yawtiri ɓe aduna. Ɓaawo garal annabiijo Muhammadu (jkm) ɗiin sifaaji ngoodaani sonaa e juulɓe.

Yahuud en mbii: nasaara en ngonaani e diine celluɗe, nasaara en mbii: yahuud en ngonaani e diine celluɗe, kamɓe fof noon eɓe njannga defte ɗe Alla jippini e maɓɓe, eɗe coomi yamiroore goonɗinde Annabaaɓe ɓe fof, golle maɓɓe nanndi, ɗum ko konngol ɓeen heeferɓe ɓe nganndaa; nde ɓe penni nulaaɓe ɓe e defte jippinaaɗe e maɓɓe fof, ɗuum waɗi maa Alla ñaaw hakkunde luuruɓe ɓe fof ñande darnga, e ñaawoore Makko nuunɗunde: alaa ko danndata sonaa goonɗingol kala ko Alla Toowɗo o jippini.

Alaa ɓurɗo bonde tooñe oon kaɗɗo yo innde Alla jante e juulirɗe Makko, o haɗi heen juulde e jantaade e janngude Kur'aana, o daranii yirbinde e bonnude ɗe, ɓeen yahooɓe e bonnude ɗe ɓe kaanaani naatde e juulirɗe Alla ɗe sonaa ɓe kulɓinee ɓerɗe maɓɓe ɗenƴoo; sabu keefeeru maɓɓe, eɓe keɓa koyeera e aduna, eɓe keɓa lette mawɗe to wattannde sabu ko ɓe kaɗi yimɓe ɓee juulirɗe Alla ɗe.

Ko Alla jeyi laamu fuɗnaange e hirnaange e hakkunde majji, O yamira jeyaaɓe Makko ko O muuyi, nganndee kala ɗo kuccit-ɗon oɗon tawa toon Alla Toowɗo O, yamirde on huccitde Baytil Magdas wolla Kaaba ka, maa so on ngoopii Kibla o, wolla huccitgol toon saɗanii on; taa ɗum ɓittin on; sabu banngeeji ɗi fof ko Alla ngoodani, Alla ko jaajɗo yurmeende e huynangol Makko na huufi tagoore nde, gannduɗo muuyaaɗe e golle maɓɓe.

Ɓe mbii (yahud en e nasaara en): Alla jogitiima ɓiɗɗo! senaande woodani Mo, Kanko Mbo yondinii gaa tagoore Makko, jogittooɗo ɓiɗɗo ko hatojinɗo heen, accu dey Kanko Mo senaande woodani jeyi kala ko woni e asamaanji e lesdi, tagooje ɗee fof ko jeyal Makko, ko ɗoftaniiɗe Mo, Ombo firlita ɗe no O muuyiri.

Alla -senaande woodani Mo- woni puɗɗuɗo asamanji e lesdi e kala ko woni e majji,nanndo mum meeɗaa wonde, so O ñaawii huunnde nde O muuyi O wi'ata tan ko: {won} nde wona no Alla muuyiri, alaa duttoowo yamiroore e ñaawoore Makko.

Ɓeen ɓe nganndaa - yimɓe deftere e heeferɓe saliiɓe goonga- mbii: ko waɗi Alla haaldataa e amen ko aldah heeda, maa O addana min maande heeriinde? wano ngol konngol leƴƴi jedduɗi nelaaɓe maɓɓe kaalnoo, hay so yontaaji e nokkeeli maɓɓe na ceerti, ɓerɗe maɓɓe nanndi, Min laɓɓinanii yimɓe yananaaɓe ɓe aayeeje goonga, ɓe cikkittaako.

Minen Min nelirii ma -Aan Annabiijo - diine goonga ɗe ngalaa sikke; mbeltiniraa goonɗinɓe ɓe aljanna, njeertiniraa yedduɓe ɓe jayngol, alaa ko waɗɗi maa sonaa yottinaandu laaɓndu, Alla ñamataa ma fii yimɓe jayngol (jahannama) ɓe goonɗinaani ma.

Alla Mbo haalda e Annabi Makko Hombo wasiyo Homo reentini e wiide mo:yahuud en mbeletaake ma wonaa kadi nasaara en haa nde ngoppu ɗaa Lislaam o,njokkaa ko ɓe ngoni e mum,so a waɗii ɗum maa gooto e jokkuɓe ma, ɓaawo nde goonga laaɓɗo aran maa, a heɓataa ballal e faabu Alla, ɗum jeyaa ko e ɓannginde hulɓinagol woppude goonga e jokkude yimɓe pankare.

Kur'aana tedduɗo o na haala fii fedde e yimɓe deftere, eɓe ngollira defte jippinaaɗe ɗe ɓe njogii, ɓe njokka ɗe no haaniri, eɓe tawa e majje maandeeji tinndinooji nuunɗugol Annabiijo Muhammadu (jkm), ɗuum waɗi ɓe njaawi goonɗinde mo, na woodi fedde wonnde dooniinde e keefeeru, ndeen ɓe bonnoraa.

Onon ɓiɓɓe Isra'iil, ciftoree ɓural Am -diine e aduna - ngal Mi waɗani on, ciftoree wonde Mi ɓurnirii on yimɓe yonta mon annabaagal e laamu.

Mbaɗee heedo reentaade hakkunde mon e lette ñande darnga; e jokkude yamirooje Alla e reentaade kaɗaaɗi Mum, sabu na ndeen ñalaande hay neɗɗo gooto naftaa goɗɗo hay huunde, ɓe njaɓantaake coodtiigu no foti fof, gooto no waawi fotde fof tefantaa ɓe, ɓe galaa ballo tanaa Alla.

Siftor nde Alla humpitii Ibrahiima (km) e ko O yamiri mo e ñaawooje e baɗɗiiɗi, o waɗi ɗe haa hiɓɓi, Alla wi'i annabi Makko Ibrahiim: Mi waɗat ma ñemmbeteeɗo yimɓe, eɓe nanndinoroo golle e jikkuuji maa, Ibrahiim wi'i: Aan jooma am waɗ noon e leñol am ardotooɓe ñemmbeteeɓe, Alla wi'i e jaabaade mo: tooñooɓe e leñol maa keɓataa fodoore Am waɗeede ardotooɓe diine.

Siftor nde Alla waɗi suudu teddundu ndu woni ruttorde yimɓe, ɓerɗe maɓɓe kaɓɓondiri e mayru, kala nde ɓe mbayri ndu ɓe nduttoo e mayru, O waɗi ndu hoolaare maɓɓe, ɓe tooñetaake nder mayru, O wi'i yimɓe ɓe: njogitoɗee haayre nde - nde Ibrahiima darotonoo e mum nde o mahannoo Kaaba ka- nokku juulde. Min tinndini Ibrahiima e ɓiɗɗo makko Ismaa'iil yo ɓe laɓɓin tuundi e sanamji suudu ndu ngam rewooɓe e taarotooɓe e ufnotooɓe (lismitiiɓe) e juulooɓe.

Siftor - Aan Annabiijo - nde Ibrahiima torotoo joom mum, o wi'i: Joom am waɗ Makka leydi hoolniindi, hay gooto tooñetaake toon, njeɗaa yimɓe mayri ɓiɓɓe lekɗe, ɗum wona njeɗu heeraniingu goonɗinɓe Ma e ñalaande wattan, Alla wi'i: kala jedduɗo e maɓɓe maa Mi weltinir mo njeɗu aduna o neemoo seeɗa, ɓaawo ɗuum to laakara Mi nawa mo e lette jayngol, ko e battane bonɗe o ruttotoo ñande darnga.

Siftor - Aan annabiijo - nde Ibrahiim e Ismaa'iil ngoni e ɓamtude ndaɗɗudi Kaaba ka, eɓe kaala - e yankinaare - Jooma amen jaɓan min golle amen, wano mahde nduu suudu, ko Aan woni jaɓoowo du'aaji amen, gannduɗo enniyaaji e golle amen.

Joomiraawo amen waɗ min ɗoftiiɓe yamiroore Maa, ɗigganɓe Ma, min ndenndintaa e Maa hay gooto, yo A waɗ leñol amen ɗoftiiɓe Ma, nganndinaa min no rewde Ma foti wonirde, njaafo-Ɗaa min bonɗi amen e ŋakkinde amen ɗoftaade Ma, ko Aan woni Jaafotooɗo jurmotooɗo jeyaaɓe Maa tuubooɓe.

Aan Joomiraawo amen waɗ e maɓɓe nulaaɗo iwde e ɓesngu Ismaa'iil, o janngina ɓe aayeeje ɗe njippin-Ɗaa e maɓɓe, o janngina ɓe Kur'aana e Sunna, o laɓɓina ɓe e sirku e ñiŋaaɗi; ko Aan tigi woni jooma semmbe pooloowo, Ñeeñɗuɗo e golle e ñaawooje Maa.

Alaa fof gaccoowo diine Ibrahiima (km), faade e diine goɗɗe, sonaa ɗaaynuɗo fittaandu mum, o acci goonga o fa'i e majjere, Min cuɓiima mo nelaaɗo e beldiijo ga aduna, to laakara o jeyee he ɓeen moƴƴuɓe tottirɓe ko Alla waɗɗini dow maɓɓe, ɓe keɓi tolnooji ɓurɗi toowde.

Alla suɓiima mo sabu ko o yaawi naatde e Lisaam, nde Jooma makko wi'i mo: laɓɓinan Am dewe, njankinano-ɗaa Kam e ɗoftaare, o jaabii Jooma makko: mi jebbiliima e Tagɗo jeyaaɓe yeɗi ɓe, pewjoowo geɗe maɓɓe.

Ibrahiima tinndini ɓiɓɓe makko ngol konngol: {mi jebbiliima e jooma binnde ɗe}, ko noon kadi Yaakuuba tinndiniri ɓiɓɓe makko; ɓe noddi ɓiɓɓe maɓɓe: Alla dey suɓaniima on diine Lislaam, nanngito-ɗee heen haa maayde tawa on heen, oɗon njaɓana Alla ko feeñi e ko suuɗii.

Mbela on tawaama nde maayde arani Yaakuub, nde o naamnii ɓiɓɓe mum ɓe: holko ndewoton ɓaawo maayde am? ɓe njaaborii mo: Min ndewata ko joomiraawo maa e joomiraawo baabiiɓe maa Ibrahiima e Ismaa'iila e Ishaaka, Deweteeɗo Gooto Mbo alaa denndidiijo, ko Kanko tan min jaɓani min ɗoftotoo.

Ngool ko leñol ɓennungol wano leññi gadiiɗi on ɗi, ko ngol faggitii moƴƴi maa bonɗi ngol heɓata, onon ne ko paggiti-ɗon keɓoton, on naamnetaake golle maɓɓe, ɓe naamnetaake golle mon, hay gooto fawetaake lette goɗɗo, nganndee gooto fof yoɓetee ko ko waɗnoo, taa golle yawtuɓe kaɗ on ndaarde golle mon, caggal yurmeende Alla alaa ko nafata goɗɗo sonaa golle makko.

Yahuud en mbi'i ngol leñol: ngonee yahuud en ndewon laawol peewal, nasaara en mbi'i: ngonee nasaara en ndewon laawol peewal. Jaabo ɓe - Aan Annabiijo - mbi'aa: nganndee minen min ndewata ko diine Ibrahiima peewɗe ɗe, o jeyaaka e renndinnooɓe Alla e goɗɗo.

Mbi'ee - onon goonɗinɓe - Yahudeeɓe e nasaara en joomen nduu noddaandu bonndu: min ngoonɗinii Alla e Kur'aan jippinaaɗo e amen, min ngoonɗinii ko jippinaa dow Ibrahiima e ɓiɓɓe makko Ismaa'iila e Ishaak e Yaakuuba, min ngoonɗinii Tawreeta nde Alla addani Muusaa, e Injiila nde Alla addani Iisaa, min ngoonɗini defte ɗe Alla addani Annabaaɓe fof, min ceerndataa hay gooto e maɓɓe, nganndee kamɓe fof minen ɓe ngoonɗini, ko ceniiɗo gooto O tan min njaɓani e yankinaare.

So Yahuud en e Nasaara en e heeferɓe woɓɓe ngoonɗinii wano goonɗinal mon ngal, tawa ɓe peewii e laawol pooccingol ngol Alla welaa, so ɓe caliima goonɗinde, ɓe penni Annabaaɓe fof wolla yoga e maɓɓe, ndeen ɓe ngoni ko e luutondiral e gañondiral, taa mettin - Aan Annabi - maa Alla danndu ma tooñe maɓɓe, O haɗan maa bone maɓɓe, O walle, Kanko woni nanoowo haalaaji mume en, gannduɗo enniyaaji e golle mum en.

Ndoono-ɗee e diine Alla ɗe O tagiri on peeñndi e cuuɗiindi mum, alaa diine ɓurɗe diine Alla ɗe, kanje jahdi e neesu, gaddooje moƴƴereeji, kaɗooje bonnere, mbi'ee: minen ko Alla Gooto O tan min ndewata, min ndenndintaa e Makko hay gooto.

Wii - Aan Annabiijo - mbela on njeddondirat e amen - onon yimɓe deftere - wonde ko onon ɓuri min haandude e Alla e diine Makko ɗe; sabu diine mon ɗe e deftere mon nde ngadii, ɗuum noon nafataa on, enen fof ko Alla woni jooma men, on naamnetaake golle amen, min naamnetaake golle mon, gooto kala ko golle makko yoɓetee, miɗen ndewa Alla ko laaɓi min ndenndintaa e Makko hay huunde.

Mbela on mbi'at - onon yimɓe deftere -: wonde Ibrahiima e Ismaa'iil e Ishaak e Yaakuub e Annabaaɓe iwɓe e ɓiɗɗo Yaakuub, ngonndoo ko e laawol Yahuudaagu e Nasaaraagu? Wii ɓe - Aan Annabiijo -: ko onon ɓuri anndude wolla Alla?! so tawii ɓe cikkii wonde ɓeen ngonndoo ko e laawol maɓɓe ndeen tawa ɓe pennii; sabu jibineede e maayde maɓɓe wonndoo ko ado jippaade Tawreeta e Injiila! Anndaama ko fenaande ɓe kaalta e Alla e Nulaaɗo Makko, ɓe cuuɗi goonga jippiiɗo dow maɓɓe, alaa ɓurɗo tooñe oon cuuɗɗo seedanfaagu, wano baɗal yimɓe deftere, Alla noon yeebotaako golle mon, maa O yoɓ on ɗe.

Ngool leñol yawtii ko adii on,engol heɓa golle ɗe ngol faggiti, onon ne oɗon keɓa golle ɗe paggiti-ɗon,on naamnetaake golle maɓɓe, kamɓe ne ɓe naamnetaake golle mon, alaa lettirteeɗo bakkaat mbo goɗɗo waɗi, alaa naftortooɗo golle goɗɗo,nganndee gooto kala yoɓetee ko ko waɗi.

Ɓen njofiɗuɓe faaɗa hakkil en ka alyahuuda, e nanndo maɓɓe ka naafiqiiɓe ɓen wi'oyay: E ko hoccintini juulɓe ɓen ga'e Qibla suudu almaqdisi ndun ndu ɓe fewtaynoo?! Jaabor-ɓe -An nulaaɗo- :Ko Allah gooto On heeranii laamu fuɗnaange e hiirnaange e baŋŋeejo goo ko wanaa ɗin,Himo fewtinira on mo O muuyi e jiyaaɓe Makko nokku kala ka O yiɗi, Kaŋko On Seniiɗo,Himo fewnira on O muuyi e jiyaaɓe Makko ɓen faade e laawol feewungol;ngol ooñaaki ngol ɓoylaaki.

Ko wano Men waɗirani on non Qibla mo Men suɓanii on; Men waɗiri on mofte suɓaaɗe nunɗuɗe,hakindiiɗe ndeer mofte ɗen fof, ka fiɓndeeji,ka dewe e ka gollodal; no laatoroyon ñalnde darngal seeditaŋtooɓe Nulaaɗo Allah on kon ko Alla yamirnoo on yottinnde e mofte mo'on,e no Nulaaɗo Muhammadu (yo O his) laatoroya seeditoytooɗo e mo'on wo'nde O yottinii kon ko O nulanoo e mo'on.Men waɗiraali kadi waylugol Qibla on mo fewtayno-ɗaa e mu'un;e maanaa bayt al maqdisi on, si wanaa no men anndira -anndal feeñugol yowondiragl e njoɓdi- on jaɓayɗo (yarlora) shari'a Allah On,o jebbilora mo,o jokka Nulaaɗo on, e [no men anndira] on muurtoowo e diine mu'un,o jokka mbeleeɗe makko, hara o jebbilortaa konko Allah Shar'inani.Gomɗii waylugol Qibla on ka arannde, laatino huunde mawnde si wanaa e dow ɓen ɓen Allah hawrinndini e gomɗinnde ɗum,e wo'nde kala ko O Shar'inani jiyaaɓe Makko ɓen ko ñeeñal yottiingal.Allah Laatoraali yeeboowo liimanaaku mo'on, ko e Makko juulde mon nden ado wayleede Qibla hewtata, pellet, Allah ko Hilnotooɗo yimɓe ɓen Yurmee ɓe,O Saɗtinaŋtaaɓe,O yeebataa sawaaba golleeji maɓɓe.

Gomɗii Men yi'ii - ko an yo Annabiijo- wayloragol yeeso maa ngon e ndaarɗe maa ɗen ka baŋŋe kammu, sabbitagol ette-ettennoo fii jipporagol wahyu on waylireede Qibla on ka yiɗu-ɗaa, ma Men Fewtinire e Qibla mo yiɗu-ɗaa welani maa - ko on woni suudu Allah hormorteendu ndun- o lomtoo baytul maqdisi on, fewtinir yeeso maa ngon baŋŋe suudu Allah hormorteendu ndun, kala ka ngonɗon - onon gomɗimɓe- fewtiree e baŋŋe mayru tuma juulo-ton. Pellet, ɓen Rokkaaɓe Deftere ɓen immorde e yahuuda e Nasaara en, hiɓe anndi wo'nde wayleede Qibla on ko goonga jipporɗo ka Tagɗo-ɓe On Kippu-ɗo fiyakuuji maɓɓe; tawde ɗum no tabiti ka deftere maɓɓe, Allah non Welsindoraali kon ko ɓen ɗuurniiɓe e goonga gollata, ko woni, Kaŋko Seniiɗo On Himo anndi ɗum, ma O yoɓiroyɓe ɗum.

Mi woondii si an -annabiijo on- a addidanii ɓen rokkaaɓe deftere nden immorde e alyahuuda e annasaare en,wondude e kala maande e burhaanu,wo'nde wayleede Qibla on ko goonga,a wonaali kadi fewtiroowo e qibla maɓɓe ɓaawa nde Allah yiltu-maa e ɗum,yoga e maɓɓe kadi fewtirtaa e qibla yoga;sabu fedde kala e maɓɓe hino heeferɗina ndeya. Pellet si a jokkii mbeleeɗe ɓee ɗoo ko faati e Qibla on e ko wanaa ɗum immorde e shari'aaji e ñaawooje ɓaawo nde anndal sellungal ngal sikke alaa e mu'un ari e maa;an dey ontuma a jeyaama e tooñirɓe selugol peewal ngal, jokka mbeleeɗe.Ko Annabiijo on(Yo O his)yeewtaa ɗoo kon,ko tinndingol kaanude jokkugol ɓe,sabu Allah daɗndii Annabiijo Makko on e ɗum,ko jeertinnde mofte makko ɗen si o feƴƴii.

Ɓen ɓe Men Rokki Defere nden immorde e annduɗuɓe Alyahuuda e Annasaara en,hiɓe nganndi wayleede Qibla on tawɗo ko gootel e maandeeji Annabaaku Muhammadu (yo O his) ka maɓɓe,wano ɓe nganndiri ɓiɗɓe maɓɓe ɓe faaytnaŋtaako ɓe.Ɗum haɗaali fedde goo e maɓɓe hino suuɗa goonga arɗo e mabɓe,haasidaagol immorde e pittaali maɓɓe, hiɓe waɗa ɗum e hoore hiɓe nganndi ko nde goonga.

Ko ɗum ɗoo woni goonga kan, wata laatodu -an Nulaaɗo- e ɓen sikkitiiɓe sellugol ɗum.

Ena woodani kala mofte, baŋŋe mo ɓe fewtata e mu'n, foti non ko ko memetee walla miijitee; wano luutondiral mofte ka huccitirde maɓɓe e kon ko Allah Shar'inani ɓe, ɗuuɗal yiilorɗe maɓɓe lorrataa so tawii ko yamaruree Allah e shari'a Makko, adondiree -onon gomɗimɓe- e huuwugol moƴƴereeji ɗi yamira-ɗon, Allah mooɓitiroyay on kala nokku mo laatoroyton ñalnde darngal; ngam O yoɓita on golle mo'on. Pellet, Allah ko hattanɗo e dow kala huunde, O Roŋkataa mooɓtude on yoɓa on.

Nokku kala mo yaltir-ɗaa e kala ka laati-ɗaa -an annabiijo-e jokkuɓe ma,faalaɗaa juulude,fewtir baŋŋe Juulirde Hormorde nden,sabu ɗum ko goonga wahyinaaɗo ummoraade Joomi maa. Allah Wonaali Welsindiiɗo e kon ko gollo-ton,ko woni,Himo ƴellitii e ɗum,O yoɓoyay on ɗum.

Nokku kala mo yaltir-ɗaa-an Annabiijo-faalaɗaa juulude,fewtir baŋŋe Juulirde Hormaande nden.Nokku kala mo ngonɗon-onon gomɗimɓe- fewtiniree geece mon ɗen baŋŋe mayru so on faalaamaa juulude;fii wata wonan yimɓe ɓen hujja mo ɓe hujjinorta e dow mo'on-so wanaa ɓen tooñuɓe e maɓɓe,ɓen ɗon heddoday e geddi mu'un,ɓe hujjinora e mo'on ko ɓe yiɗi e hujjaaji,wata non on huluɓe,hulee Joomi mo'on tan, golliron yamirooje Makko woɗɗito-ɗon haɗaaɗi Makko.Pellet,Allah Shar'inirii fewtugol Kaaba on ngam Timminirgol neemaaji Makko Ɗin e mo'on fii Ko O seerndi on e denndaangal mofte,e fii no O Fewnira on ka ɓuri teddude e Qibla yimɓe.

Ko wano non Men Neeminiri e mo'on neema goo; tawde Men Nulii e mo'on Nulaaɗo jeyaaɗo e mo'on, himo janngana on Aayeeje Amen, o laɓɓinira on kon ko o yamirta on immorde e ɓure e moƴƴere, e ko o haɗata on e mu'um immorde e ellaaji e añiniiɗi, himo janngina on Al Qura'aanaare nden e Sunna on, o janngina on kon ko on anndaano e fiyakuuji diine e dunyaaru mo'on.

Jaŋtoree Lam ɓerɗe mo'on e terɗe mo'on; Mi Annditira on Maŋtugol on Reena on, njoɓdi ndin ko e ndeer golle ɗen woni. Jaarnee Lam e neemaaji Am ɗi Mi Neemini e mo'on, wata on yeddira huutorgol ɗi ka harmi.

Ko onon yo gomɗimɓe, wallitoree muññaare e juulde, tuma rewoton Lam jebbilano-ɗon yamiroore Am. Pellet, Allah hino wonndi e muññiiɓe ɓen, O Walliray-ɓe hawrindineede e sawaaba.

Wata on wi'u-onon muumini en-fii ɓen wareteeɓe e laawol Allah:"Ko maayirɓe wano fof maayirta".Ko woni,ɓen ko wuurɓe ka Joomi maɓɓe, kono on so'ataa nguurdam maɓɓe;saɓu ko ɗam nguurdam heerii-ɗam, ɗam anndortaako si wanaa wahyu immorɗo ka Allah.

Ma Men jariba on nooneeji e musiibaaji; wano hulugol ayɓe mo'on, e heege sabu ŋakkireede ñaametee, e ɗoytagol jawle ɗen sabu waaseede ɗen maa saɗtugol heɗde ɗe, e ɗuytoral woŋkiiji ɗin sabu boneeji halkayɗi yimɓe ɓen, maa yanirgol shahiidi fii Allah, e ɗuytoral dimɗe leydi ndin, wewlin -an nulaaɗo- ɓen muññotooɓe ɗin musiibaaji sabu ko O Eltaniɓe aduna e laaxara.

Ɓen tawɓe si gootel e ɗin musiibaaji heɓiiɓe,ɓe wi'ira yarluyee e jebbilaare:Menen ko men jeyaaɓe Allah,Himo Waɗa e amen kon ko O muuyi,ko ka Makko kadi woni ruttorde amen ñalnde darngal,ko Kanko Woni Tagɗo men,O Teddiniri men neemaaji seertuɗi, ko ka Makko woni ruttorde amen e lannoode fiyaaku amen.

Ena woodani ɓen siforɓe ɗii sifaaji,maŋtoore immorde ka Allah,ndeer mbatu malaa'ika en toowungu,e yurmeende jippotoonde e maɓɓe.Ko ɓee ɗoo ngoni feewirɓe laawol goonga ngol.

Pelle Safaa e Marwa ɗen takko ka suudu Kaaba, ko jeyaaɗe e maandeeji shari'a ɓaŋnguɗo on. Kala on faandiiɗo suudu Kaaba ndun fii tottugol dewal hajju maa umara, ella woo fawaaki mo nde o wanngotoo hakkunde majji; tawa himo fiɓi ɗum ko fiyaaku majjiyaŋkooɓe jeyaa, gomɗii non Allah Ɓaŋnginii wonde ɗum ko e dewe hajju jeyaa. Kala on huuwuɗo yiɗaaɗi ɗin ka dewe hara himo laɓɓini; pellet Allah Jaarnay mo, O Jaɓana mo ɗum, O Yoɓa mo; tawde Kaŋko Allah Ko O Annduɗo ɓen huuwayɓe moƴƴere, haaniduɓe e baraaji.

Ɓen suuɗooɓe kon ko Men Jippini immorde e ɓaŋngannduyee tinndinɗo goona Annabiijo on e kon ko o addi, jeyaaɓe e Alyahuuda e Annasaara, ɓaawo nde Men Feññinani ɗum yimɓe ɓen ka defte maɓɓe; ɓen ɗon [suuɗooɓe], Allah Woɗɗintinay-ɓe e Yurmeende Makko, Malaa'ika en e Annabi en e yimɓe ɓen fof kadi huɗirayɓe woɗɗintineede e Yumeende Allah.

So wanaa ɓen ruttiiɓe e Allah, nimsuɓe ko suuɗirani ɗeen Aayeeje ɓaŋnguɗe, ɓe moƴƴini golleeji maɓɓe feeñuɗe e wirniiɗe, ɓe feññini kon ko ɓe suuɗunoo e goonga e peewal; ɓen ɗon, Mi Jaɓay ruttogol maɓɓe ngol ka ɗoftaare Am, tawde ko Miin woni Jaɓoowo tuubuubuye ɓen tuubayɓe e jeyaaɓe ɓen, Yurmeteeɗo ɓe.

Pellet, ɓen yedduɓe ɓe maayidi e keerefaaku ado ɓe yiltaade e mu'un, ena fawii ɓen ɗon kuddi Allah ndin raɗoreede e Yurmeende Makko nden, ena fawiiɓe kadi kuddi Malaa'ika en e yimɓe ɓen fof; raɗoreede e Yurmeende Allah woɗɗiŋtinee e Mu en.

Ko ɓe luttidooɓe e ndin kuddi, ɓe hayfinŋtaake leɓte ɗen hay ñallal gootal, ɓe nennŋtaake ñalnde darngal.

Reweteeɗo mon On e goonga -onon yo yimɓe- ko O gooto Bajjo ka Jaati Makko e Sifaaji Makko. Reweteeɗo e goona woo alaa tanaa Makko, ko Kaŋko woni Huuɓuɗo Yurmeende Yaajunde, Heerorɗo Yurmegol jeyaaɓe Mu'un; sabu O Neemiriiɓe neemaaji ɗi limtotaako.

Pellet hino e ndeer tagugol kammuuli ɗin e leydi ndin,e kon ko ngoni e majji immorde e kaawaseeji tagudu,e waylondiral jemma on e ñalorma on,e ɗen laaɗe dogooje e maaje ndiyam, roondiiɗe kon ko nafata yimɓe ɓen; immorde e ñaametee e koltu e ngeengu,e ko nannditata e kuntayɗi haajiiji maɓɓe, e kon ko Allah Jippiniri ka kammu immorde e ndiyam; O Wurnitiri ɗam leydi ndin kon ko fuɗata e mayri wano remuru e huɗo, e kon ko O saakti e mayri daabeeji wuuruɗi, e waylitorgol keneeli ɗin cenɗe kala, e duule eltiraaɗe hakkunde leydi e kammu. Pellet, ɗum ɗon fof ngonii daliluuji feeñuɗi e Goodal Allah Seniiɗo On, wonande ɓen haqqilooɓe hujjaaji, ɓe fahma daliluuji e ɓaŋngannduyeeji.

E hoore ɗen aayeeje ɓaŋnguɗe, [a taway] hino e yimɓe njogitotooɓe ko woori Allah deweteeɗi; hiɓe mbaɗa ɗin yerondirɗi Allah Toowuɗo On, ɓe njiɗiraɗi wano ɓe njiɗirta Allah. Kono ɓen gomɗimɓe hino ɓuri saɗtude giggol wonande Allah e dii ko ɓeya njiɗata deweteeɗi mu'un; sabu kamɓe [muumuni en] ɓe kafidataa e Allah hay e gooto, hiɓe njiɗa Mo ka welo-welo e ka wororde. Ɓeya kan, hiɓe njiɗa deweteeɗi maɓɓe ɗin ka welo-welo, ɓe yiltitoo e Allah si ɓe saɗtiraama. Hara ɓen tooñuɓe nganduno fiyaake maɓɓe on ka laakara e on shirku mo ɓe faggitorta bakkaatu, tuma ɓe nji'ata lepte ɗen; ɓe nganndayno Heerorɗo On doole ɗen fof ko Allah, e wonde ko O Saɗtuɗo leptugol on yeddoowo mo. Hara ɓe nji'ayno ɗum, ɓe kafidataano e Allah hay e gooto.

Tuma hooreeɓe jokkanooɓe ɓen pottitoytoo jokkunooɓe lo'uɓe ɓen; sabu ko ɓe nji'oyta kon kulaleeji ñalnde darngal e caɗeele mu'un, hara non sabuuji maɓɓe e pehe mu'un daɗirɗi fof taƴaama.

Ɓen jokkunooɓe lo'uɓe mbi'a: Hara nun men gasayno ruttaade ka aduna, men pottitora hooreeɓe amen ɓen wano ɓe pottitori men. Ko wano Allah Holliri ɓe non ɗen lepte mawɗe ka laakara, ko non O Hollirtaɓe battane jokkirgol hooreeɓe maɓɓe ɓen e hoore meere; ngam no ɓo nimsira ɓe sunoo. Ɓen ngonaali njaltooɓe e yiite ɗen poomaa.

Ko onon yo yimɓe! Ñaamee yoga e ko woni ka leydi immorde e hayawaanu e fuɗateeri e leɗɗe, kon ko heɓorta no dagori laaɓiri hara soɓaa. Wata on jokku ɗate seytaane ɗe o yollata on e mu'un, pellet ko o gaño mon feññinɗo ngayngu. Dagaŋtaako non haqqiloowo jokkugol gaño makko tiiɗnoriiɗo lorrude mo majjina mo!

Kaŋko [seytaane] o yamirtah on si wanaa ko bonnata immorde e bakkaatu e kala ko mawni e junuubi, e nde wowloton e hoore Allah -ka kaɓɓe e ka shari'aaji- ko aldaa e anndal iwrungal ka Allah maa nulaaɗo Makko on.

Si ɓee heeferɓe wi'anaama: "Jokkee kon ko Allah Jippini immorde e peewal e annoora", ɓe mbi'ray lunndagol: "Ko woni, men jokkay kon ko men tawri baabiraaɓe amen immorde e piɓe e finaa-tawaa. Hara ɓe jokkoay tun baabiraaɓe maɓɓe ɓen hay si tawiino ɓen laatanooki haqqilooɓe hay e huunde immorde e peewal e annoora, ɓe feewirtaa e on goonga mo Allah yarlanii ɓe?!

Misal ɓen heeferɓe e ko ɓe jokkata kon baabiraaɓe maɓɓe, ko wano on gaynaako ewnotooɗo nodda bahiimaaji mu'un, ɗi nana hito makko, kono fahmataa haala makko. Ɗin [keeferi] ko pahooji e nanugol goonga nanira nafitorgol ɗum, mbobooji ɗi ɗemɗe mu'un ɗi waawataa haalude goonga, humiɗuɗi e yi'ugol mo. Ko ɗum wani si tawii ɗi haqqilataa peewal ngal noddoton-ɓe e mu'un.

Ko onon yo ɓen gomɗimɓe Allah jokki nulaaɗo Makko on! Ñaamee imoorde e laaɓuɗi ɗi Allah Arsiki on O Daginani on, jaarniron Allah kene e gunndoo fii ko O Teddiniri on neemaaji. Hino jeyaa e jaarnugo Mo kaŋko Toowuɗo On, ɗoftagol yamiraaɗi Makko, woɗɗitoo haɗaaɗi Makko; si on wanii rewirayɓe Mo kaŋko tan e hoore goonga, hara on kafidaali Mo hay e huunde.

Anndee ko Allah Harmini e mo'on immorde e ñaametee, ko ko maayiri nii, e ƴiiƴam rufaaɗam iloojam, e teewu kose, e kon ko innde goo jaŋtaade e mu'un ka hirsugol ka wanaa innde Allah.Si neɗɗo o duñaama e ñaamugol huunde tuma o saɗtiraa, hara wanaa feƴƴintingol ko haani kon; haray bakkatu e lepte fawaaki mo.Pellet Allah Ya'fotooɗo kala tuuɓuɗo e jeyaaɓe Makko ɓen,Yurmeteeɗo ɓe.Hino jeyaa e Yurmeende Makko nden, tawde o yawtanii ya'fike kala on ñaamirɗo ko harmi fewndo duñiraa.

Ɓen Suuɗooɓe kon ko Allah Jippini ka Deftere e ko woni e mayre immorde e daliluuji selluɗi, e fii annabaaku Muhammadu (yo o his), wano alyahuuda e annasaara en gerdata; hiɓe soodira ngol suuɗugol maɓɓe ɗon cogguwel famɗungel; wano fii ardagol maa jaahu maa jawdi. Ɓen ɗon alaa e waɗude ka deedi maɓɓe ka haqiiqa, si wanaa kon leñtoyta ɓe ka yiite, Allah Yeewtoytaa ɓe ñalnde darngal ko ɓe yiɗi, ko woni, O yeewtoyayɓe ko bonaŋta ɓe, O Laɓɓinoytaaɓe O Maŋtoytaaɓe, hino woodani ɓe lepte muusuɗe.

Ɓen siforoɓe suuɗgol ganndal ngal yimɓe katonjiŋta,ko ɓen waɗtitiri majjere nden peewal sabu ko ɓe suuɗi kon goonga kan.Ɓe waɗtitiri lepte Alla ɗen ya'fuyee Makko on.Alaa fotuɗo muññorde ɓe huuwugol kon ko naadataɓe yiite.A sikkay ɓe haajaaka ko woni e magge imomorde e lepte;sabu ko ɓe muññii kon e magge.

Ko jaŋtaa koo e njoɓdi, ko fii suuɗugol maɓɓe ganndal ngal e peewal ngal, sabu tawde Alla Jippinirii Defte Makko ɗen goonga. Ɗum no haani ka ɓaŋnginee hara suuɗaaka. Ɓen non luutondirɓe e Defte Alla ɗen ɓe gomɗini yoga e yeddi yoga e majje, ɓe ngonii e senngo woɗɗiingo goonga kan.

Moƴƴere welyande Alla nden wonaali tan fewtugol ɓaŋnge fuɗnaange maa hiirnaange walla ko lunndii ɗum. Ko woni tun moƴƴere nden fof ko: e ɓen gomɗimɓe Alla ko Reweteeɗo Gooto, ɓe gomɗini ñalaande sakkitiinde, e denndaangal Maalaa'ika en, e denndaangal Defte jippiiɗe ɗen, e denndaangal Annabaaɓe ɓen ko aldaa e senndindiro; o nafqi kadi jawdi -e hoore himo yiɗindi rerɗi e mayri- joomiraaɓe ɓadondiral ɓen, e on wonduɗo mo ben mun maayi ado o hellifeede, e ɓen katonjinɓe, e on tuŋaraŋkeejo wayrondirɗo e yimɓe mun, e ɓen fewtiŋteeɓe ballal ɓe haanida e toragol yimɓe ɓen, e nafqugol jawdi fii rinɗingol daaɗe; e on ñiiɓnuɗo juulde timminirinde no Alla Yamiriri, o totti asakal waɗɗiiɗo on, e ɓen hunnayɓe aadondiral maɓɓe si ɓe haldidaama, e ɓen muññotooɓe baasal e saɗteende e nawnaare, e ɓen ɓe dogataa ka hare si nde tiiɗii. Ɓen siforiiɓe ɗii sifaaji, ko ɓen ngoni goongimɓe Alla ɓen ka gomɗinal maɓɓe e ka golleeji maɓɓe. Ko ɓen kadi ngoni gomɗuɓe ñeemtini kon ko Alla Yamiri ɓe, ɓe woɗɗitii ko ko O Haɗi ɓe.

Ko onon yo gomɗimɓe Alla jokkitii Nulaaɗo Makko on,farlaama e mo'on ko faati e ɓen warayɓe woɗɓe hoore tewaare e jaggitere.Ngam leptirgol waruɗo on bone makko on:dimo yo warire sabu dimo,jeyaaɗo wariree sabu jeyaaɗo, deyel kadi wariree sabu deyel.Si waraaɗo on ya'fike ado o timmude,maa waliiyu makko on ya'fanii mo,hino fawii ya'fiiɗo on jokkitagol waruɗo on ka tottirgol diya no moƴƴiri wanaa lorra e maŋti.No fawii kadi waruɗo on tottirgol diya on no moƴƴiri ko aldaa e saatinugol. Ngol ya'fagol ɗon jaɓa diya on ko hoynaneede immorde e Joomi mo'on, e yurmeende ɗee mofte.Kala on jaggituɗo e waruɗo on ɓaawo ya'fuyee on e jaɓugol diya on,no woodani mo lepte muusuɗe immorde ka Alla.

No woodani on e kon ko Alla shar'ini immorde e njottiigu, nguurdam wonande on; sabu daɗnugol ƴiiƴe mo'on, e duñugol jaggitiirgol hakkunde mo'on. Ko joomiraaɓe haqqilaaji ɓen tan gelotoo ɗum; ɓen gomɗuɓe Alla Toowuɗo On ɓe jebbilanii shari'a Makko On ɓe gollitiri Yamirooje Makko.

Farlaama e mo'on si maande maayde nden arii goɗɗo e mo'on, si tawii himo acci jawle nde o wasiyaŋtoo jibinɓe mo ɓen e ɓadondiraaɓe ɓen kon ko shari'a on happi -ɗum non wanaa yo fawu tataɓal jawdi ndin- Waɗugol ɗum ko hannduyee fellitanaaɗo gomɗuɓe ɓen (huli Alla). Ndee ñaawoore no woodunoo ado aayeeje ndonndi nden jippaade. Ko nde aayeeje ndoondi ɗen jippinoo ɗe ɓaŋngini ɓen ronooɓe maayɗo on e yeru ko ɓe ronata.

Kala on waylitirɗo wasiyee on ɓeydugol maa ustugol walla haɗugol ɓaawo nde o anndi fii makko, pellet bakkaatu ɗum on ko e ɓen waylituɓe fawii wanaa e wasiyanaaɗo on. Allah ko Nanoowo yeewtereeji jeyaaɓe Makko ɓen, Annduɗo golleeji maɓɓe ɗin. Huunde laawotaako Mo e fiyakuuje maɓɓe ɗin.

Kala anndirɗo jeyɗo wasiyee on ooñagol e goonga kan maa ɗawre ka wasiyee,o moƴƴiŋtiniri bonannd e wasiyiiɗo on annasiya,o moƴƴiŋtini hakkunde pooɗondirɓe ɓen ka wasiyee,bakkaatu fawaaki mo.Toode o yoɓete e ngol moƴƴiŋtingol.Pellet Alla ko Yawtanoowo kala tuubuɗo e jeyaaɓe Makko ɓen, Yurmotooɗo ɓe.

Ko onon yo gomɗimɓe Alla jokki Nulaaɗo Makko on, koorka kan farliraama e mo'on immorde e Joomi mo'on wano ka farliranoo e ɗeya mofte adinooɗe on, belajo'o laatoɗon gomɗuɓe, waɗiron hakkunde mo'on e lepte Makko ɗen heedoode sabu golleeji moƴƴi mawnuɗi wano koorka.

Koorka waɗɗii ka on kan, ko hoorugol ñalɗi seeɗaaji e nder hitaande nden. Kala e mo'on laatiiɗo nawnuɗo nawnaare saɗtaynde hooridugol e mu'un walla himo e jahal, no newnanaa taƴugol, o yoɓitoya yeru kon ko o taƴunoo e ñalaaɗe. No fawii ɓen haɗtanɓe koorka kan ñammingol si ɓe taƴii: ɗum ko ñammingol ɓiliiɗo ñalaade nde ɓe taƴi. Ko hoorgol ngol ɓuri moƴƴude taƴugol yoɓita ngol maa ñammina, si wonii hiɗon nganndi moƴƴere wonde e koorka kan. Ko ndee ñaawoore woni aranere nde Alla Waɗɗiniri koorka; ontuma mo no yiɗi hooray, mo no yiɗi kadi taƴay ñammina. Alla fawii koorka kan ɓaawo mu'un, O Farli ka e kala hellifaaɗo.

Lewru koorka ndun,ndu Alqur'aanaare nden fuɗɗii jippagol e mun ndun dow Annabiijo on (yo o his) ka jemma layla. Alla Jippiniriinde fewnirgol yimɓe ɓen.Ɓaŋngannduyeeji feeñuɗi no e mayre immorde e peewal,e serndugol hakkunde goonga e mehre. Kala on tawaaɗo lewru koorka hara himo ñiiɓi selli, yo o hooru no waɗɗii. Kala laatiiɗo no nawni maa no e jahal saɗtungal hooridude e mu'un, no newnanaa taƴugol. Si o taƴii le, no waɗɗii mo yoɓitugol ɗeen ñalaaɗe ɗe o taƴi. Alla no Faalanaa on e ko O Shar'inani on kon, Rewnugol on ɗatal newiingal hara wanaa saɗtungal. E fii yo no timminiron hoorugol ñalɗe lewru ndun fof, e no mawniniron Alla ɓaawo timmugol lewru koorka ndun e ñalnde iidi nden fii ko O Hawrindini on hoorugol, O Newnani on timmingol. Belajo'o, jaarnon Alla e peewal mon ngal gaa e kaa diina ka O Welanaa on.

Si jeyaaɓe Am ɓen lamndike ma (Annabiijo) fii Ɓadal Am e Jaabinol Am toraareeji maɓɓe,haray Min:Ko Mi Ɓadiiɗo ɓe,Annduɗo fiyakuuji maɓɓe,Nanoowo Toraaje maɓɓe.Ɓe katonjinaa e lonto maa toowugol hitooji maɓɓe. Miɗo Jaabina toraare nodduɗo si o tororii laaal. Yo ɓe jebbilano lam? e yamirooje Am ɗen,ɓe tabita e gomɗinal maɓɓe;sabu ko ɗum nafata ɓe ka jaabinaneede. Belajo'o ɓe jokkay ngol laawol feewungol ka fiyakuuji diina e aduna maɓɓe.

Laatinoke ka aranun,hino harmunoo nde goorko nde gorko immoto nder jemma koorka ado peeral ngal nde o ñaamata maa o yottoo e gennda makko.Ɗum momtaa, Allah Daginani on (yo gomɗimɓe) yottagol e genndiraaɓe mon ɓen ka jemmaaji koorka.Onon e genndiraaɓe mo'on ɓen, kala ko suruta wonannde oya,gooto e mo'on waawa wonde ɓaawo oya. Allah Anndiino wonde e jaŋfitotono waɗugol kon ko O Haɗi on,O Yurmaa on O Jaɓani on tuubuubuyee,O hoynani on. Jooni non, renndee e maɓɓe,ɗaɓɓon kon ko Alla Hoddirani on e jurriya. Ñaamon yaron jemma on fof, haa peeral fajiri ngal feeñirana on mutugol jemma on, refti timminiron koorka kan haɗitagol e firtayɗi ɗin; gila ka peeral haa ka mutal. Wata on renndu rewɓe mon ɓen hara hiɗon ufnii ka juulirɗe, sabu ɗum firtay koorka. Ɗee ñaawooje jaŋtaaje ɗoo, ko keeri Allah hakkunde haram e halal, wata on ɓaɗto ɗi fes! Sabu ko ɗi keeri Alla, heewii ka ɗi naɓra e haram. Ko sifa ɗee ñaawooje feeñuɗe woni ko Alla ɓaŋnginiraŋta yimɓe ɓen aayeeje Makko ɗen, belajo'o ɓe wona goonɗuɓe e huuwugol ko O Yamiri woɗɗitoo ko O Haɗi.

Wata yoga ƴettir jawle yoga e mo'on ko aldaa e laawol shari'a: wano wujjugol maa jattugol maa janfagol. Wata on pooɗondire e mayri ka ñaawooɓe ɓen fii no fedde goo ñaamira jawle yimɓe ɓen, jillondiron e bakkaatu on hara hiɗon nganndi wonde Alla Harminii ɗum. Ko bakkondingol e hoore no anndi ko harmi kon ɓuri kaanude, ɓuri muusude lepte.

Hiɓe naamno-maa (aan Nulaaɗo) fii darorɗe lebbi e waylitagol fiyakuuji majji. Wi'u: Hikma ɗum,ko waqaŋtinagol yimɓe ɓen,ɓe nganndira ɗum waktuuji dewe maɓɓe, wano:lebbi hajju,maa darorɗe koorka,maa timmugol hitaande fii asakal.Hiɓe nganndira ɗum kadi waktuuji ligge maɓɓe, wano: eɓɓugol lajal diya e ñamaale.Dewal ngal wonaali ardirgol cuuɗi ɗin ka ɓabbe=caggal majji tuma hormini-ɗon fii hajju maa 'Omra (wano woowirno-ɗon fewndo majjere).Si ko woni dewal ngal tigir: ko dewal on gomɗuɗo ka gunndoo e ka kene. Ko ardugol e dame cuuɗi mon ɗin non ɓuri nawanaade on; sabu Alla Fawaali on e ɗum ko no saɗtana on. Waɗee golle moƴƴe ɗen heeda hakkunde mon e lepte Alla ɗen, belajo'o, malire-ɗon heɓugol faale mo'on, daɗon kon ko hulu-ɗon.

Haɓee (fii ɓamtugol konngol Allah), ɓen haɓooɓe on immorde e heeferɓe sakkotooɓe on e diina Alla. Wata on yawtir keeri Alla ɗin warugol paykoy maa rewɓe walla nayeeɓe ekn. Pellet, Alla Yiɗaa ɓen jaggitooɓe yawta keeri Makko ɗi O Ñaawi ɗin.

Haɓeeɓe ɓe nokku kala ka tawɗon ɓe, yaltinonɓe e nokkuure nde ɓe yaltini on e mu'un; nden woni Makka. Ko fitna sakkagol gomɗinɗo on e diina makko naɓra e geddi ɓuri mawnude e dii haɓugol. Wata on ɗaɓɓitirɓe hare ka Misiide Hormaŋte -ka mawningol nde- haa ɓe ɗaɓɓitira on ɗon hare. Si ɗum waɗii, haɓeeɓe. Ko sugu ɗee lepte haɓugolɓe ka Misiide hormaŋte ɗoo woni njoɓdi heeferɓe ɓen.

Si ɓe haɗitike haɓugol on e yeddugol, haɗitee e ɗum. Pellet, Alla ko Haforanoowo kala tuubuɗo, O Jogitortaaɓe bakkatuuji yawtuɗi, Ko O huuɓuɗo-yurmeende, O yaawnirtaaɓe lepte.

Haɓee heeferaaɓe ɓen haa nokku ka laatortaaɓe shirku maa sakkagol yimɓe ɓen e laawol Alla, maaɗum geddi; fii no diina kan feeñirana Alla. Si ɓe haɗitike gejji e sakkagol diina Alla kan, tertee haɓugol ɓe; sabu non jaggitere alanaa si wanaa ɓen tooñirooɓe geddi e sakkagol diina Alla.

Lewru hormaŋteeru ndun ndu Alla Newinirani on horminagol totta 'Omra hitaande jeeɗiɗaɓere, ko mbattiigu lewru hormaŋteeru ndu shirkooɓe ɓen sakkinoo on e mu'un gaa e haram on hitaande jeegaɓere. Horminaaɗi ɗin (wano leydi hormaŋteeri ndin, e lewru hormaŋteeru ndun, e horminagol ngol), diya on siinee e majje hoore joggituɗo woo. Kala on jaggituɗo e mo'on fewndo majji, jaggitiree mo yeru jaggitannde makko nden, wata on yawtu keerol yerondirgol ngol. Pellet Alla Yiɗaa ɓen yawtayɓe keeri Makko ɗin. Hulee Alla reŋtoɗon yawtugol keeri Makko ɗin, anndon pellet Alla no Wondi e gomɗuɓe ɓen; O Wallirayɓe ballal e faabo.

Nafqee sakkoɗon jawdi fii ɗoftaare Alla (wano jihaadi ekn), wata on weddor ko'e mon ɗen faade e halakuyee; tertoɗon jihaadi e sakkagol fii laawol Alla, maa bugoron ko'e mo'on ɗen e ko wonata sabu halkaare mo'on. Moƴƴinee ka dewe mo'on e ka huuwondire mo'on e ka jikkuuji mo'on. Pellet Alla no Yiɗi moƴƴinooɓe ɓen e kala fifaaku. Himo Mawninanaɓe mbarjaari, O Hawrindina ɓe e peewal.

Tottiree hajju ngun e 'omra on no timmiri,ɗaɓɓoron welayee Alla Toowuɗo On.Si on haɗaama e fii timmingol(hajju ngun e 'omra on) ñawu maa gaño,fawike on hirsugol kon ko newii e kirse;wano gelooɗi maa na'i maa dammi,ngam yo daginitoron hormagol mo'on.Wate laɓe ko'e mon ɗen maa femmbon haa kirse ɗen yottoo nokku ka ɗe haanaa hirseede.Si no haɗaa ka hormaŋte,yo hirse ka haɗaa ɗon.Si haɗaaka non ka hormaŋte,yo hirse ɗon ñalnde boragol ngol haa ɓaawo e ñalɗi tashriiqi.On tawɗo e mo'on ko ñawɗo maa lorra no ka cukuli hoore makko,hon tenɗi eken o femmborii sabu on lorra,ella alanaa mo.No fawii mo tan sottoraade ɗum: hoorugol balɗe tati,maa ñammina ɓiliiɓe jeegoo e ɓiliiɓe hormaŋteeru ndun,maa hirsugol dammol sennditana waasuɓe hormaŋteeru ndun.Si on laataaki huluɓe,kala e mo'on dakmitorɗo tottirgol 'Omra on nder lebbi hajju ɗin,o dakmitori kon ko harmi e makko immorde e haɗaaɗi horminiiɗo haa o horminanii hajju nden hitaande;fawike mo hirsugol kon ko newanii mo immorde e: damol,maa o hawtida e jeegoo hirsugol ngelooba walla nagge.Si o haɗtanaali hirsugol ngol,yo o hooru balɗe tati ka hajju ton lomto mum,e hoore non o hooroyay balɗe jeeɗiɗi ka makko si o ruttike,ɗum hawra balɗe sappo timmuɗe. Ngol dakmitagol waɗɗinayngol kirse maa koorka (fii ɓe haɗtanaa kirse ɓen),wanaa fii jeyaaɓe ɓen ka Hormorde maa hoɗuɓe takko ɗon;sabu ɓen ɗon hatonjinaa e dakmitagol,tawde hiɓe ɓadii Hormorde nden,ɓe yonndinoray wanngagol ngol e dii dakmitorgol 'omra haa e hajju.Hulee Alla jokkon ko O Shar'ini, mawninon keeri Makko ɗin,anndon pellet Alla ko saɗtuɗo leptugol lunndiiɗo yamirooje Makko.

Lebbi hajju ɗin ko anndaaɗi, ko gila juldaandu haa timma sappo tafaske (donkin). Mo waɗɗinii hajju e hoore-mu'un ndeer ɗin lebbi o horminii e majji, haray renndugol e soccondiro harmii e makko. Tawde ɗum yaltinay hominiiɗo ka suudu hormaŋte e ɗoftaare Allah. Yeddondiral pooɗayngal e tikkere fof kadi no harmi e makko. Kala ko golluɗon e moƴƴere, Alla no Anndi ɗum, O Yoɓay on. Wallinoree hajju ngun yooɓagol ñaametee e njaram. Anndon non ko ɓuri moƴƴude e ko wallinortee ka fiyakuuji mo'on, ko kulol Alla. Hulee Lam ñemtinon Yamirooje Am, woɗɗitoɗon Haɗaaɗi Am, yo joomiraaɓe haqqille hisuɗe.

Bakkaatu fawaaki on nde ɗaɓɓirton ka hajju ton, arsike mon njulaaku dagiingu ekn. Si on iwtii 'Arafaat ɓaawo on daraade ton ñalnde jeenay-re nden, fewron Muzdalifa jemma sappo nden taaske, jaŋtoree innde Alla nden subbunhinagol e haylilugol e du'agol ka hormorde Muzdalifa. Jaŋtoron innde Alla kon ko O Fewniri on e diina Makko, e neweende hajjugol ka suudu Makko. Gomɗii on laatinoke ado ɗum, ko on welsindinooɓe e shari'a Makko.

Refti yahron 'Arafaat, hono yimɓe nyeemtinatnooɓe Annabi Ibraahiima ɓen gerdaynoo, hara wanaa hono no yimɓe majjere roŋkiraynoo daragol ɗon. Ɗaɓɓiron haforaneede immorde e Alla kon ko raɓɓindini ɗon e dewe Makko. Pellet Alla ko Haforanoowo kala tuubuɗo e jeyaaɓe Makko ɓen, Huuɓuɗo yurmeede ɓe.

Si on gaynii golle hajju ɗen, on joofinirii ɗum jaŋtoore innde Allah. Hebbinoree maŋtugol Mo, hono maŋtorton baabiraaɓe mo'on, walla ko ɓuri kon ko maŋtorayɗo baabiraaɓe mon ɓen; tawde neemaaji mon ɗin fof ko e Makko Seniiɗo Toowuɗo On iwri. Yimɓe ɓen no seedi, no e maɓɓe yedduɓe shirkuɓe, ɓen gomɗinaa si wanaa oo aduna, ɓen ɗon naamnotaako Joomi maɓɓe so wanaa cuɗinorɗi aduna; bano cellal e jawdi e ɓiɗɓe. Ɓe ngalaa non joɓdi e kon ko Alla Hebilani jeyaaɓe Makko gomɗuɓe ɓen ka laakara, sabu rerɗirgol ɓe aduna on ɗuuro laakara.

No e yimɓe ɓen gomɗimɓe Alla e ñalaande sakkitiinde, hiɓe toroo Joomi maɓɓe neemaaji aduna e golle moƴƴe Hiɓe toroo Mo kadi polgal ka aljanna, e daɗugol lepte yiite.

Ɓen torotooɓe moƴƴere aduna e laakara, no woodaniɓe geɓal-moƴƴal immorde e baraaji mawɗi, sabu kon ko faggitii golle moƴƴe ka aduna maɓɓe. Alla non ko Yaawuɗo hasbugol golle.

Jaŋtoree Innde Alla nden kabbirugol e haylilugol nder ɓalɗe seeɗaaje, ɗen ngoni: sappo e go'o, ɗiɗi e sappo e tati tafaske. On mo yaccini o yati Mina ɓaawo bugagol kaaƴe ɗen ka sappo e ɗiɗaɓere, no newii, kadi o alaa bakkaatu; tawde Alla no Hoynani mo ɗum. On mo neɓtini kadi haa ka sappo e tataɓere, no wenii, on kadi alaa bakkaatu; tawde o waɗii ko haani, o ñemtinii Annabiijo on mo jam e kisiyee woni e mun on. Ɗum ɗoo fof ko wanande on gomɗuɗo ka hajju makko o gerdiri no Alla Yamiriri. Huliree Alla ñemitiŋgol Yamirooje Makko woɗɗitoo Haɗaaɗi Makko. Pelliton wonde onon ko ka Makko Kaŋko tan woni ko ruttete ɗon, ngam O Yoɓita on golleeji mo'on.

Ko an Annbiijo, anndu no e yimɓe ɓen nafoqinɗo konngugol mun ka aduna ɗoo, yi'iraa-mo moƴƴo-konngol, sikkiraa ɗum ko o goongiyaŋke. Anndu non faandaare makko ko daɗndugol hoore-makko e jawdi makko. Hara non himo seediŋtina Alla (e hoore fenaande), kon ko woni e ɓernde makko immorde e gomɗinal maa moƴƴere, e hoore non ko o saɗtuɗo wennje e ngayngu juulɓe ɓen.

Si o huccii ma o seedii e ma'a, o yaccora ka leydi fii bonnirgol gejji, e bonnital gese, e warugol neemoraaɗi. Alla Yiɗaa bonnere ka leydi, O Yiɗaa kadi ɓen bonnooɓe.

Si on bonnoowo wi'anaama (nde mo wasiyee): "Hulu Alla reŋtoɗaa e Keeri Makko ɗin" mawnitaare nden haɗa mo artugol e goonga kan, o heddoo e bakkaatu on. Njoɓdi makko ndin yonii naatugol jahannama, nge bonii ñiiɓirde sumooɓe nge.

No e yimɓe ɓen: gomɗinɗo sooɗtiroowo woŋkii mun dewal Joomi makko, o tiiɗnoo ɗaɓɓere yaluyee Makko. Alla non ko Yaajuɗo yurmeede jeyaaɓe Makko ɓen, Hilnotooɗo ɓe.

Ko onon yo gomɗimɓe Alla e Nulaaɗo Makko on, naatiree e lislaamu mooɓgal (denndanngal), wata on accu huunde e makko; wano yimɓe defte gerdata: ɓe gomɗina yoga ɓe yedda yoga. Wata on jokku ɗate seytaane, on ko gaño mooɗon ɓaŋngu ɗo ngyangu.

Si on arii ooñaade e muurtude ɓaawo kon ko ari on e ɓaŋngannduyeeji feeñuɗi, nganndee pellet, Alla ko Fooluɗo e Qudra Mu'un, Ñeeñuɗo e Yiilugol Shari'aaji Makko. Ɗum non, hulee Mo mawninon Mo.

Ɓee jokkuɓe ɗate seytaane murtuɓe e laawol goonga,ɓe sabbitaaki si wanaa nde Allaahu Seniiɗo On Ardaŋtaɓe ñalnde darngal,e ndeer niɓe duule,fii no O Ñaawira hakkunde maɓɓe. Malaa'ika en kadi ngara ko ɓe kuuɓituɓe ɓaŋnge fof, ontuma non fiyaake Alla on gasinee e maɓɓe. Ko faade ka Alla Seniiɗo Bajjo On,woni ruttorde fiyakuuji tageefo ngon.

Nulaaɗo, naamnor geɗalɓe Israa'iila en feloore, wi'aa: ko laaɓi jelu Alla Ɓaŋnginani on aayeeje Makko tinndinooje goongugol Nulaaɓe ɓen, fennuɗon ɗe ɗuuri ɗon? Kala waɗtitirɗo neenma Alla On geddi e fennugol, ɓaawo nde on neema feeñani mo, pellet, Alla ko Saɗtuɗo leptugol yeddooɓe fenna ɓen.

Ɓen heeferɓe cuɗinanaama ɗam nguurdam aduna e ko woni e majjam, immorde e ko woni heen e dakamme yonn ngasawon. Hiɓe jalkita ɓen gomɗimɓe Alla e ñalaande sakkitiinde. Ɓen huluɓe Alla ɗoftii Yamirooje Makko, ɓe reŋtii e haɗaaɗi Makko; ɓe wonoyay dow heeferɓe ɓen ka laakara, tawde Alla Naadoyaɓe aljanna. Alla no Rokka on mo O Muuyi e jeyaaɓe Makko ɓen ko aldaa e hasboore.

Yimɓe ɓen laatino mofte goote fottuɗe e peewal ben maɓɓe Aadama, haa no seytaane majjiniriɓe non, ɓe luutondiri hakkunde gomɗinal e keeferaaku. Ko ɗum Alla Nuliri Nulaaɓe ɓen; wewlinirooɓe gomɗimɓe ɓen kon ko Alla Maraniɓe e Yurmeende Makko, jeertnirooɓe yedduɓe ɓen kon ko Alla Kammbirani ɓe e lepte muusuɗe. O Jippindini e Nulaaɓe ɓen Defte moftuɗe goona ka sikke jillaa e mu'un. Luutondiraali e Tawreetaare nden, si wanaa ɓen rokkaaɓe ganndal mayre: immorde e Alyahuuda en, ɓaawo kon ko ari ɓe e hujjaaji Alla, wonde ko nde goonga iwrunde ka Makko, ɓe haanaa yeddonirde e mayre. Alla Hawrindini muumuni en senndindirgol goonga e fenaande, immorde e duŋayee e muuyaande Makko. Alla No Fewnira on Mo O Muuyi e laawol feewungol focciingol; ngol woni laawol gomɗiɗal.

E on sikku, onon muumini en, on naatay aljanna hara on jarriboraaka sugu jarrabuyee yawtunooɓe on? Sabu ɓen meeɗuno saɗteende baasal e ñawu, ɓe dilliniraa kulol haa ɓe hawjiri ballal Alla ngal. Nulaaɗo on e gomɗindimɓe e makko ɓen mbi'i: "ko honnde tuma woni balla Alla ngal?". Hey, pellet ballal Alla ngal no ɓadii muumini en, fawiiɓe e Makko.

Wonndiɓɓe maa ɓen (an Annabiijo), ɓe ngaray naamnaade ma: hol ko ɓe gasata sakkaade e jawle maɓɓe seertuɗe, ko honto kadi ɗum waɗetee? Jaabo ɓe wi'aa: Si won ko sakkiɗon e moƴƴere (laaɓunde dagiinde), ko fii jibinɓe on, e ɓadondiraaɓe mo'on (no foddiraa non), e ɓen wonduɓe, e ɓen waasuɓe, e on seteejo woɗɗitiiɗo leydi mu'un e yimɓe mu'un. Si won ko huuwuɗon -onon muumini en- immorde e moƴƴere -ɗuuɗi famɗi- pellet Alla No Anndi ɗum, huunde suuɗotaako Mo, ma O Yoɓu on ɗum.

Hare nden farliraama e mo'on, onon muumini en; fii laawol diine Alla, kono ɗum ko ko woŋkii añi, sabu nde naɓay jawdi e pittaali. No tijjaa ka añoton huunde hara tigi on, ko nden ɓuri moƴƴande on, wano haɓugol fii Alla; mbarjaari mawndi no e mun wondude e foolugol ayɓe ɓamta koŋngol Allah. No tijjaa kadi ka njiɗoton huunde hara nden ko bone mon, wano salagol jihaadi; sabu ɗum ko maande hoppeede e foolireede ayɓe. Alla No Anndiri anndal timmungal, ko moƴƴi e ko boni fiyakuuji ɗin, onon non on nganndaa ɗum. Nootee noddaandu Makko; ko ɗon woni moƴƴere mon.

Hiɓe naamno maa, yo Annabiijo,fii ñaawoore haɓugol ndeer lebbi hormaŋte ɗin (donkin/Layyaaru, e jom-bente/haaram, e raajibi), jaabove maakaa: Hare e ɗin lebbi ko mawnu-ɗum añinaa ka Allah, kon ko ɓen shirkooɓe darotoo sakkoo laawol Alla ngol kadi no añinaa, e haɗugol gomɗimɓe ɓen ka Misiide hormorde, ko yaltiŋgol Misiide hormorde e mayre ɓuri mawnude ka Alla e dii haɓugol e lewru haaram ndun, shirku mo ɓe ngoni e mun on kadi no ɓuri hare ɗen mawnude. Ɓen shirkooɓe seerataa hiɓe tooñira on hare, onon muumini en, haa ɓe itta on e diina mo'on ɓe naɓra diina maɓɓe mehre, si ɓe haaɗtanaama e ɗum. Kala non murtuɗo yalti e diina mun, o maayidi e keeferaaku, gomɗii golle makko moƴƴe ɗen bonii, werde makko nden ka laakara, ko naatugol yiite, ñiiɓa ton poomaa.

Ɓen gomɗimɓe Alla e Nulaaɗo Makko ɗon, e ɓen feruɓe woɗɗitori yimɓe mu'un fii Alla e Nulaaɗo Makko on, ɓe haɓiri fii no Koŋngol Alla ngol ɓamtora; ɓen ɗon no tamƴinii Yurmeende Alla e Ya'fuyee Makko, Kaŋko Alla ko O Ya'fotooɗo junuubi jeyaaɓe Makko ɓen, Hilnotooɗo ɓe.

Wonndiiɓe maa ɓen no naamno-maa an Annabiijo, fii ñaawooje yarugol e soodugol yeeya sanngara (giya) -kon ko suddata haqiil-, ɓe naamno-maa kadi fii karte (kon ko mbuuɗi heɓorta ɓuro-ɓuro). Jaabo ɓe maakaa: "No en ɗin ɗiɗ ko ɗuuɗi e lorra e bonugol diina e aduna; wano wirnagol haqqille maa funsugol jawle, e ballondiral ngayngu e konnaangu. No e majji kadi nafawel tokosel; wano heɓugol mbuuɗi. Ko lorra e bakkaatu majji ɗin ɗiɗi ɓuri mawnude nafa majji. Kala non ko lorra mun ɓuri nafa mu'un, haqqillo pottito ɗum. Oo ɓaŋngannduyee immorɗo ka Alla ɗoo, ko hebilannde harmingol sanngara. Wonndiiɓe maa ɓen no naamno-maa an Annabiijo, yeru ko ɓe gasata nafqeedede e jawle maɓɓe? Jaabo ɓe maakaa: "Wiŋtee kon ko fawi e haajuuji mon ɗin". Ko ɗum adii jippaade, refti non Alla shar'ini asakal ɓaawo mu'un, o waɗɗingal e jawle keeriiɗe, e nisaabu hertiiɗo. Ko wano oo ɓaŋngannduyee feeñuɗo ɗoo Alla Ɓanginirta ñaawooje shari'a ɗen, belajo on miijitoto.

Ko jaŋtaa koo shar'iniraama ngam miijito-ɗon e ko nafata on aduna e laakara.Wondiiɓe maa ɓen no naamno-maa, an Annabiijo, fii toppitagol yatiimatu (wonduɗo), hol no ɓe gerdata? Hiɓe gasa jillindirde jawle maɓɓe ɗen ka nafaqqa, e koltu e wondiigu? Jaabo ɓe maakaa: "Ko moƴƴoragol e maɓɓe anngal jillondiral e jawle maɓɓe ɗen ɓuri mawnude mbarjaari ka Allah, ko ɗum kadi moƴƴani jawle maɓɓe ɗen; sabu ɗum reenay ɗe. Si on kafidii e maɓɓe non jawle e wondiigu ekn, huunde fawaaki on, tawde ko ɓe musiɗɓe mo'on ka diina; musiɗɓe non, ko mballondira. Alla no Anndi on ɓen bonnooɓe e moƴƴinooɓe immorde e ɓen toppitotooɓe wonduɓe. Si Mo Muuyunoo ɓiɗtinanngol on e ɓen yatimeeɓe, O Waɗayno. Si ko woni, Kaŋko Seniiɗo Tedduɗo On, O Hoynanii on wondigal mon e maɓɓe; sa bu Diina Makko ko e ɗum mahii. Alla Ko Fooluɗo Mo fooletaake, Ñeeñuɗo e Tageefo Makko ngon.

Wata on resu, onon muumini en, ɓen rewɓe shirkooɓe haa ɓe gomɗina Alla, ɓe naata e diina lislaamu. Pellete ko ko korɗo gomɗinɗo Alla e Nulaaɗo Makko on ɓuri moƴƴude debbo dimo rewoowo (lawru; towru); hay si ŋari e jawle makko haawnii on. Wata on resin rewɓe juulɓe ɓen worɓe shirkooɓe. Pellet ko maccuɗo gomɗiɗo Alla e Nulaaɗo ɓuri moƴƴude dimo shirkoowo, hay si o haawnii on. Ɓen shirkooɓe (worɓe e rewɓe), hino noddira konngol e kuugal faade e yiite. Alla No Noddira e golle moƴƴe naadayɗe aljaana, newinira ya'fuyee Makko On e Duŋayee Makko. Himo ɓaŋnginana yimɓe ɓen Aayeeje Makko ɗen, belajo'o ɓe taskitoo e majje ɓe gollata ɗe.

Wondiiɓe maa ɓen no naamno-maa, an Annabiijo, fii fiilordu, ɗam ƴiiƴam njaltoojam e rannga debbo e sahaaji keeriiɗi. Jaabo ɓe maakaa: Fiilordu, no nefinanii gorko e debbo. Woɗɗitee renndugol e rewɓe ɓen fewndo mun, wata on ɓadorɓe renndiigu haa ƴiiƴam ɗam taƴa, ɓe laɓɓiŋtinora lootngal. Si ɓe laaɓiŋtinorii lootngal ngal, renndiree e maɓɓe no Alla Daginiri non: laaɓuɓe rannga. Alla No Yiɗi ɓen hebbinorooɓe tuubugol e geddi, e ɓen faŋtinooɓe e laɓɓinagl.

Rewɓe mon ɓen ko sugu ngesa (joombuure) mon mban; hiɓe jibinana on ɓiɗɓe wano ngesa jonnirta dimɗe. Ngardee ngesa mon mban (farji on) nokku ka ka njiɗɗon e no njiɗirɗon, fotde ko ka farji. ngardinanee ko'e mon golle moƴƴe; wano renndirgol e debbo mu'un fii ɓaɗtagol Alla jortoo jurriiya moƴƴo. Kuliree Alla ñemtiŋgol Yamirooje Makko woɗɗitoo haɗaaɗi Makko, wano ko O Shari'nani on e rwɓe mo'on. Nganndon wonde on kawroyay e Makko ñalnde darngal, O Yoɓita on golle mo'on. Wewlin muumini en, an Annabiijo, neemaaji mawɓe tuma ɓe kawrata e Joomi maɓɓe, ɓe tina Yeeso Makko Teddungo.

Wata on waɗu ngoondooje mon ɗen hujja heedorɗo golle ɗiggere e kulol Alla e moƴƴingol hakkunde yimɓe ɓen. Ko woni tun, si on woondii fii woppugol teertoo ɗiggere, on waɗay tan kaffaara woondoore nden, jokkiton ɗiggere. Allah ko Nanoowo haalaaji mo'on, Annduɗo golleeji mo'on; O Yoɓitoyay on ɗum.

Alla Hasbirtaa on ɗen ngoondooje fuutorayɗe on; wano wi'ugol: "Wallaahi mi sali", maa "Wallaahi ko non woniri"; kaffaara fawaaki on e ɗum, o leptirtaake kadi ɗum. Kono non Alla Hasbiray on kon ko eɓɓan-ɗon e ɗen ngoondooje. Alla ko Haforoowo junuubi jeyaaɓe Makko, Muññiiɗo Mo Jogitortaako ɓe lepte.

No woodani ɓen woondooɓe renndidataa e suddiiɓe mu'un, habbitagol dumunne mo yawtaa lebbi nayi, gila ka ɓe woondiri; ɗum ko "liilaa'u" anndiraa. Si ɓe artii e renndugol rewɓe maɓɓe ɓen caggal nde ɓe huɗaade sabbitoo lebbi nayi e ko joli ɗum, pellet Alla Ko Haforanoowo ɓe Huuɓuɗo-yurmeende e kon ko yawtini; sabu O Shar'inirii kaffaara fii soktorgal nden woondoore.

Si ɓe faandorii tertagol renndiigu ngun ceergal, Pellet Alla ko Nanoowo haalaaji maɓɓe sugu ɗin yowitii e ceergal, Annduɗo fiyakuuji e paandale maɓɓe; O Yoɓoyay ɓe ɗum.

Seeraaɓe ɓen habbitaŋto ko'e maɓɓe, laaɓe tati: ɓe resetaake ndeer majje. Dagaŋtaako ɓe suuɗugol kon ko Alla Tagi e ndeer reŋngaaji maɓɓe; si ɓe laatike goonguɓe e gomɗinal Alla e ñalaande sakkitiinde. Ko moodiɓɓe maɓɓe ɓen ɓuri haandude ruttugol ɓe ka dumunne edda; si ɓe faandike moƴƴiŋtiŋgol kon ko ceergal ngal bonni hakkunde maɓɓe. No woodani rewɓe ɓen haqqeeji e wajibiiɗi, yeru kon ko woodani moobiɓɓe maɓɓe ɓen e ɗum, wano woowiraa non hakkunde yimɓe. No woodani worɓe ɓen: darja e hoore rewɓe ɓen; sabu ndeŋka e fiyaaku ceergal. Alla non ko Fooluɗo mo fooletaake, Ñeeñuɗo e Shari'a Makko.

Ceergal ngal jom galle jogorii seerude rij'a,=ruttaade ko noone ɗiɗi:ko nde o seerata o ruttitoo,refti o seera o ruttitoo;ɓaawo ɗin ɗiɗi,ko o suɓinaaɗo hakkunde jogitorgol debbo on no moƴƴiri,maa seerida mo e unde e huhaqqeeji makko ɗin tataɓal;no moƴƴiri.Dagaŋtaako moodiɓɓe ɓen,ƴettitugol seeɗa e teŋe rewɓe ɓen,si wanaa hara on debbo añirii moodi mun jikku makko maa tagoodi makko;ɓen resindirɓe ɗiɗo tamƴinora ngun ngaynu,wonde ɓe gasidataa hunnude haqqeeji maɓɓe ɗin,yo ɓe rutto ka musidal.Si musidal roŋkii,haray goopi woo fawaaki ɓe nde debbo on ɓoorotoo sahrti nde o jonnata zawju coggu ngol ɓooragol.Ɗen ko ñaawooje shari'aaji feññinɗi harmi e ko dagii;wata on yawtu-ɗi,kala on yawtuɗo keeri Alla ɗin,ko ɓen ngoni tooñooɓe ko'e mun,sabu faandaare halkitagol e tikkere Joomiiko.

Si o seerii debbo on tataɓal, on dagitaŋtaako mo e desal haa gorko goo resa mo dewgal sellungal, ɓe renndida e maggal. Si on gorko ɗiɗmo seerii mo maa o maayi e ngal dewgal, bakkaatu woo fawaaki debbo on nde o artira ka moodi makko arano on desal kesal; si ɓe yananaama (fellitii) ñiiɓnude keeri shari'aaji Allah ɗin. Alla No Ɓaŋnginana ɗin keeri shari'aaji, ɓen yimɓe ngannduɓe ñaawooje Makko e keeri Makko; tawde hiɓe naftora ɗi.

Si on seeri rewɓe ɓen, ɓe ɓadinii timmingol edda on, hiɗon gasa artude e maɓɓe no moƴƴiri, maa tertoron ɓe no moƴƴiri haa edda on timma. Wata on artirɓe fii loorugol ɓe jaggita ɓe; wano majjuɓe gerdiraynoo. Kala waɗuɗo ɗum, gomɗii o tooñirii hoore-makko hanndugol lepte. Wata on jogitor Aayeeje Alla ɗen jalnori. Annditee Neemaaji Alla Mawnuɗi e mo'on, wano Jippinaneede Al-Qur'aana e Sunna, Himo Annditina on ɗum fii yo on rerɗu wa'ajito-ɗon. Huliree Alla jokkugol Yamirooje Makko woɗɗitoo haɗaaɗi Makko. Nganndon pellet Alla No Anndi kala huunde. O Yoɓoyay on e ɗum.

Si on seerii rewɓe mon ɓen rij'a, edda maɓɓe on timmii, wata on haɗu-ɓe ontuma (yo waliyaaɓe maɓɓe), ruttagol ka moodiɓɓe maɓɓe ɓen desal kesal, si ɓe welondirii e ɗum kamɓe e ɓen moodiɓɓe maɓɓe. Nden ñaawoore no anndiŋtinee on laatiiɗo e mo'on no gomɗini Alla e Ñalannde Sakkitiinde. Ko ɗum ɓuri moƴƴannde on, ko ɗum kadi laɓɓiŋta on e teddungal. Ko Alla Anndi haqiiqa fiyakuuji ɗin e battane majji, onon on nganndaa ɗum.

Jibimɓe ɓen yo muynin ɓiɗɓe maɓɓe ɓen duuɓi ɗiɗi timmuɗi;ngon happo, ko wonannde on faandiiɗo timminde muyninngol ngol.No fawii baaba cukelel ngel, nafaqqa e koltu neene maggel; wano yimɓe woowiri ɗum ko lunndaaki sha'ria on,si tawii [neene on] ko seeraaɗo. Alla Fawaali jiyaaɗo tanaa ko o waawi e kuuɗe dewal.Dagaŋtaako gooto e jibinɓe ɓen ɗiɗo lorrindirgol sabu cukalel ngel; yeru ɗum no fawii ronoowo ngel on si baaba maayii acciraali ngel cukalel jawdi. Si neene e baaba faandike entugol boobo on ado duuɓi ɗiɗi timmude, bakkaatu fawaaki ɓe e ɗum; si ɓe diisondirii ɓe yarlondiri e mu'un, tawa ɗum lorrataa cellal ɓiɗɗo on. Si on faandike ɗaɓɓude muynonooɓe goo hara wanaa yumma, bakkaatu fawaaki on si on tottirii njoɓdi muyninoowo on no fottirɗon non, no moƴƴiri. Huliree Alla jokkugol Yamirooje Makko woɗɗitoo haɗaaɗi Makko. Nganndon pellet Alla No Reeni ko golloton kon; huunde suuɗotaako Mo e ɗum. O Yoɓoyay on kon ko ardinanɗon ko'e mo'on e golle.

Ɓen maayooɓe acca suddiiɓe ɓe ronndaaki, waɗɗike ɓen [suddiiɓe] habbagol ko'e maɓɓe lebbi nayi e balɗe sappo, ɓe heddoo ka cuuɗii, ɓe woɗɗitoo cuɗaari e desal. Si edda on timmii, bakkaatu fawaaki on (yo waliyuuɓe), e kon ko ɓe waɗaŋta ko'e maɓɓe -e hoore laawol shari'a; immorde e ɗin ɗi ɓe haɗanoo fewndo edda on. Alla No Anndi kon ko golloton, huunde e ko suuɗoton maa feeñinon wirnanaaki Mo. O Yoɓoyay on ɗum.

Bakkaatu fawaaki on nde ɓaƴƴiŋton faale mo'on ƴamde suddiiɓe ɓen fewndo eddinagol; wano wiide mo: si edda maa on timmii, humpitam. Bakkaatu fawaaki on e kon ko suuɗoton faale mo'on ƴamde ɓe si edda maɓɓe on timmii. Alla No Anndi on annditoyay fii maɓɓe, saɓu tiiɗugol mon yiɗugol ɓe, O Daginani on ngol ɓaƴƴingol. Reŋtee fodondirgol ƴamal fewndo edda; si wanaa kon ko dagorii ɓaƴƴingol. Wata on humu kadi dewgal fewndo edda. Nganndee pellet Alla No Anndi kon ko suuɗoton e pittaali mo'on; immorde e ko O Dagini maa ko O Harmini, reenee e Makko, wata on lunndo Yamiroore Makko. Nganndon pellet Alla ko Haforanoowo ɓen tuubooɓe e jeyaaɓe Makko, Muññiiɗo Mo yaawnantaako ɓe lepte.

Bakkaatu fawaaki on si on seerii suddiiɓe mon ɓen ado on renndidude e maɓɓe,maa ado on waɗɗinannde ɓe teŋe heeriiɗo.Si ɗum waɗii,teŋe woo alanaaɓe;ko seeɗa tan waɗɗii jonnugol ɓe ko ɓe dakmitora...?

Si on seerii suddiiɓe mon ɓen ado on renndidue, tawa on jaŋtanike ɓe teŋe; ko feccere on teŋe waɗɗii jonnugol ɓe, si wanaa hara ɓe ya'afi (si ɓe hellifaa), maa moodiɓɓe ɓen tigiri ya'afoo jonna teŋe ɗen fof. Ko ya'afondirgol haqqeeji mon ɗin ɓurata ɓaɗtinde on dewal e ɗoftaare Alla. Onon yimɓe, wata on yejjitu ɓural ngal hakkunde mo'on, maa ya'afondirgol haqqeeji. Pellet Alla No Reeni kon ko golloton, tiiɗnee e moƴƴere no dañiron mbarjaari Alla.

Reenee e julɗe ɗen tottironɗe no timmiri. Reeno-ɗon kadi e julde hakkundeere nden: nde woni Alaŋsaraa. Darano-ɗon Alla ka juulde mo'on, ko on ɗoftiiɓe toƴƴiniiɓe.

Si on hulii ayɓe maa ko nanndi heen, on kattanaali tottirgol julde nden no timminiri; juuliree teppindagol maa waɗɗagol, maa kala no waawir- ton. Si kulol ngol iwii e mo'on, jaŋtoree Innde Alla nden no O Anndiniri on; wano jaŋtorgol Mo ka juulde no timmiri. Jaŋtoron Mo kadi ko O Anndiniri on kon ko on nganndaano; imoorde e annoore e peewal.

Ɓen maayooɓe e mo'on ɓe acca suddiiɓe: hiɓe haani wasiyanaade ɓen suddiiɓe suudu e koltu ko ɓe dakmitora yeru hitaande timmunde; hara ronooɓe yamtiniraali ɓe ton doole. Si ɓe yaltanii ko'e maɓɓe ado hitaade nden timmude, bakkaatu fawaaki on fawaaki ɓe kadi kon ko ɓe cuɗinotoo. Alla ko Fooluɗo Mo fooletaake, Ñeeñuɗo e Qudra Mu'un s Shari'a Mu'un. Ko woni tun, firooɓe ɓen fottii wonde ñaawoore oo aaye momtiraama oo ka Alla Daali ɗon: ﴾Ɓen maayooɓe e mo'on ɓe acca suddiiɓe: yo ɓen habbiŋtin ko'e maɓɓe lebbi nayi e balɗe sappo﴿ [Al Baqarah: 234].

No woodani seeraaɓe ɓen: dakmitorgol koltu e jawdi ekn. Ɗum ko haqqee fii ceergal maɓɓe; no woowiraa non, tippude e alhaali (feere) moodibbo on. Ko hannduyee tabitanɗo hulooɓe Alla ɓen; ñemtina Yamirooje Makko, woɗɗitoo Haɗaaɗi Makko.

Ko wano ngal misal yawtungal Alla Ɓaŋnginiraŋta on, onon muumini en, Aayeeje Makko moftuɗe keeri Makko e ñaawooje Makko; belajo'o haqqilon gollitoron ɗen, dañon moƴƴere aduna e laakara.

E a humpitaaki, an Annabiijo, kabaaru ɓen njaltunooɓe e galleeji mu'un, kamɓe ko ɓe ɗuuɗuɓe; ka kulol maayde sabu albalaa'u? Ɓen ko jeyaaɓe e deŋte ɓiɗɓe Israa'iila. Allaahu On Daalani ɓe: "Maayee", ɓe maayi, refti O wuurnitiɓe, fii yo O Ɓaŋnginanɓe wonde fiyakuuji ɗin fof ko Kaŋko Seniiɗo Bajjo On Huuɓiti, ɓe waawanaa ko'e maɓɓe nafa maa lorra. Pellet Alla ko Jom Dokkal e Ɓural e dow yimɓe ɓen. Ko woni tun, ko ɓuri ɗuuɗude e yimɓe ɓen njaaranataa Alla e Neemaaji Makko ɗin.

Haɓee, onon muumini en, ayɓe Alla ɓen, ɓamton Diina Makko kan. Nganndon pellet Alla ko Nanoowo konngi mon, Annduɗo annuyeeji mon e golleeji mon. O Yoɓoyay on ɗum.

Ko hombo woni ñawliroowo jawdi mun ndin sakkorgol ndi fii laawol Alla; o waɗira ɗum anniye laaɓuɗo, fii no ɗum woŋtirana mo cowalle ɗuuɗuɗe? Alla No Ɓiɗtinia ka arsike e ka cella ekn, O Yaññira Ñeeñeal e Nunɗal Makko; e ɗin ɗon fof. Ko faade ka Makko Kaŋko Tan woni ruttorde mo'on ka laakara, O Yoɓita on golle mo'on.

E a humpitaaki, an Annabiijo, kabaaru ɓen teddunooɓe e ɓiɗɓe Israa'iia, ɓaawo jamaanu Muusa ngun (yo o his), tuma nde ɓe mbi'annoo Annabaajo maɓɓe on: "Ñiiɓna men lamɗo, men haɓida e makko fii laawol Alla ngol. Annabiijo on maakani ɓe: "Haawnaaki si hare nden farlaama e mo'on,roŋkon haɓude fii laawol Alla ngol". Ɓe jaabitorii namnal: "Hol ko haɗata men haɓugl fii laawol Alla ngol so tawii ɗum no waɗɗii? Men haɓiray heɓtugol ngenndi amen e ɓiɗɓe amen. Nde Alla Farlunoo hare nden e maɓɓe, ɓe huciti, ɓe firti ahadi ndin; si wanaa seeɗaaɓe e maɓɓe. Alla No Anndi tooñooɓe ɓen, ɗuurnotooɓe e Yamaruyee Makko, firtooɓe Ahdiiji Makko. O Yoɓitoyayɓe ɗum.

Annabaajo maɓɓe on wi'ani ɓe: "Gomɗii Alla Ñiiɓnanii on Taaluuta laamɗo mo'on, fii no haɓiroy e ley koŋngol makko". Hooreeɓe maɓɓe ɗuurnii ɗum, ɓe naɓti jaabii: "Hol no laamu laatoraŋta mo e hoore maen, ko menen ɓuri haandude mo e laamu; tawde non o jeyaaka e ɓiɗɓe Annabaaɓe, o yaajiraaka jawdi ko o wallitora laamu ngun? Annabiijo on maakani ɓe: "Ko Alla Suɓii mo e dow mo'on, O Ɓurnirii mo e mo'on ganndal e doole ɓanndu". Alla No Rokkira Laamu Makko Ngun on Mo O Muuyi; Ñeeñal e Yurmeende Makko, Alla ko Yaajuɗo ɓural Himo Rokka Mo O Muuyi, Annduɗo on ɓurɗo haandude e jeyaaɓe Makko ɓen.

Annabaajo maɓɓe maakani ɓe: "Nganndee Maande goongugol suɓeede mo laamɗo mo'on, ko nde Alla Artiraŋta on Arkawal (kankiran-wal) ngal ɓiɗɓe Israa'iila mawninnoo, kono ngal jattaa. Hara non ngal wondi e deeƴere, e ko heddinoo ko aalo Muusaa e aalo Haaruuna en acci; wano: tuuggordu ndun, e yoga e alluuje. Pellet Maandeeji ɓaŋŋnguɗi no e koo ko jaŋtaa; si on laatike gomɗimɓe haqqan.

Nde Taaluuta yaltidunoo e konu ngun, o maakani ɓe: "Alla Jarriboray on caangol, kala yarɗo e maggol o jeyaaka e ɗatal am, o haɓitadataa e am, mo yaraali e maggol ko on jeyaaɓe e ɗatal am, saatii haɓidude e am; si wanaa ɓen tuuɓoriiɓe juuɗe mun ɗen tuuɓannde, fii feere alaa". Konu ngun yari si wanaa seeɗaaɓe e maɓɓe; ɓen ɗon muññiri ɗoŋka kan. Nde Jaaluuta yawtunoo caangol ngol kaŋko e gomɗimɓe ɓen, yoga e konu makko ngun mbi'i: "Feere alanaa men hannde, haɓugol Jaaluuta e konu mu'un". Ontuma ɗon, ɓen fellituɓe hawroyay e Alla ñalnde darngal mbi'i: "Heewii ka fedde tokosere gomɗinde foolirta -Duŋayee e Balla Alla- fedde ɗuuɗunde e keeferaaɓe. Ballal ngal ko e liimanaaku fawii, wanaa ɗuuɗere. Pellet Alla No Wondi e ɓen jeyaaɓe Makko muññiiɓe; Himo Faaoraɓe ballal Makko.

Nde ɓe feeñunoo yeeso Jaaluuta e konu mun ngun, ɓe fewtuno Alla ɓe torii: "Joomi amen, Rufu muñal e ɓerɗe amen, Tabiŋtinaa teppe amen ɗen; fii wata men dogu ayɓe amen foola men, Faaboraa men Doole e Ballal Maa dow ɓee heeferɓe.

Ɓe fooliriɓe Duŋayee Alla: Daawuuda wari Jaaluuta ardiiɗo ɓeya on. Alla Rokki Mo Laamu e Annabaaku, O Anndini mo kon Ko O Muuyi e gannde, O Moftani mo gannde moƴƴuɗe aduna e laakara. Si wanaano suuna Alla On Duñiroowo bone yoga e yimɓe ɓen dow yoga, leydi ndin bonirayno bewre bonɓe. Kono Alla Ko Jom Ɓural e denndaangal tageefo ngon.

Ɗen ko Aayeeje Alla Ɓaŋnguɗe, Meɗen jaŋnga ɗe e dow maaɗa, an Annabiijo, wondude e Kumpital Goonga,e Ñaawooje Nunɗuɗe. Pellet ko a jeyaaɗo e Nulaaɓe ɓen.

Ɓee Nulaaɓe ɓe Men Jaŋtani maa, Men Ɓurdinii yoga maɓɓe e dow yoga; ka wahyu e ka jokkuɓe. No e maɓɓe yeewtiduɓe e Alla; wano Muusa (yo o his), O Ɓaŋti darjaaji woɗɓe e maɓɓe, wano Muhammadu (jom kisiyee); tawde e Nulaama e denndaagal yimɓe ɓen, o timminiraa Annabaaku, mofte makko ɗen ɓurnaa e heddiiɗe ɗen. Men Rokki Iisaa geɗali Mariyama ɓaŋngannduyeeji tinndinooji e Annabaaku makko; wano wuunitugol maayɓe e sellinnde bunɗoe ɗamaaɗo= wondudo e baras, Men Semmbiniri mo Jibriil ko wallitoo mo daranagol Yamirooje Alla Toowuɗo. Si Alla No Yiɗunoo, ɓen arnooɓe ɓaawo Nulaaɓe ɓen haɓataano ɓaawo ɓaŋngannduyeeji ɗin arde ɓe, si ko woni, ɓe luutondirii ɓe sennditii: woɗɓe gomɗini Alla, woɗɓe ɓen yeddi Mo. Si Alla No Yiɗunoo, ɓe haɓataano, ko woni tun, Alla No Waɗa ko O Yiɗi: O fewnira Yurmeende e Ɓural Makko ngal on Mo Muuyi e gominal, O Majjinira Nunɗal e Ñaañal Makko ngal on Mo O Muuyi.

Ko onon yo gomɗimɓe Alla njokki Nulaaɗo Makko on, sakkee e kon ko Men Arsiki on e jawle laaɓuɗe, ko adii ñalnde darngal nden hewtude; nde ñalnde, ngeyngu alaa ton; ko njoɓdi golle ndin nafata ton, wanaa kadi weldigal nafoyta ton si saɗtii, solnugol kadi alaa ton si wanaa on mo Alla Duŋanii. Ko heeferɓe ɓen woni yedduɓe ɓen Alla Toowɗo On.

Joomiraaɗo me'en reweteeɗo tanaa Allaahu on alaa, Wuurɗo nguurdam timmuɗam; ɗam maayde e ustaare alaa e mu'un. Ñiiɓuɗo Mo Hatoŋjinaa e gooto e tageefo Makko ngon. Ŋoŋre naŋgataano Mo wanaa fere ɗoyngol sabu timmude nguurdam e ñiiɓugol Makko. Ko Kaŋko tan woodani Laamagol kon ko woni ka kamuuli e ka leysi. Alaa tefoyoowo (solna) ka Makko si wanaa e Duŋayee Makko. Himo Anndi ko tageefo Makko ngon yawtini e ko ɓe saatii waɗde e fiyakuuji. Ɓe huuɓiraa anndude huunde e Anndal Makko -O Toowii- si wanaa kon ko O Muuyi Ƴeltinnde ɓe. Jullere Makko Nden: ka Joomiiko Tippata ɗon Huuɓitii kammuuli ɗin e leydi ndin; no ɗi yaajiri mawniri. Reenugol Nde nisaani saɗtanaa Mo; ko Kaŋko Woni Toowirɗo Jaati Mu'un e Qudra Mu'un e Haaɗtannde Mu'un, Mawnirɗo Laamateeri Mu'un.

Doolugol alaa e naatugol ka diina; tawde ko diina goona ɓaŋnguka. Doolindiro alaa fii naatugol e makka. Peewal ngal senndondirii e majjere nden: Kala yedduɗo ɗin deweteeɗi tanaa Allaahu On o reŋtii e majji, o gomɗini Alla Tan; haray o jogitike fiɓnde hoolaare nde ka diina, nden taƴataa haa ñalnde darngal. Alla Ko Nanoowo yeewtereeji jeyaaɓe Makko, Annduɗo golleeji maɓɓe; O Yoɓitoyay ɓe ɗum.

Alla Ko Giɗo gomɗimɓe ɓen: Himo Hawrindina ɓe Wallitooɓe, O Yaltinaɓe e niɓe keeferaaku e majjere faade e annoora gomɗinal e ganndal. Ɓeya yedduɓe, ko ɗuuɗa-bewre en woni weldiiɗi maɓɓe: ɗin cuɗinanɗi ɓe keeferaaku, ɗi yaltiniɓe e annoora gomɗinal e ganndal faade e niɓe keeferaaku e majjere. Ko ɓen ngoni yimɓe yiite, luttooɓe toon poomaa.

A tinii an Annabijo, on haawnitoriiɗo cuucal ɗuuɗa-bewre en:on wennjuɗo Ibraahiima (yo o his) e bajjinɗingol Alla rewa Mo? O wennjiri mo fii Alla Rokkii mo laamu ngu o bewri. Annabi Ibraahiima ɓaŋnginani mo Sifaaji Joomi makko Ɗin o maaki: "Ko Joomi am Woni Wuurnitoowo tageefo ngon O Wara". On bewɗo jaabori lunndagol: "Miin miɗo wurna wara; mi wara mo mi yiɗi, mi acca mo mi yiɗi. Ibraahiima rokki mo hujja goo tiiɗuɗo nde o maakani mo: "Joomi am mo mi rewta On No Addira naange ngen ɓaŋnge fuɗnaange, an addir nge ka hiirnaange".On ɗuuɗa-bewreejo mugaa o fooliraa hujjaaji doolnuɗi. Alla Fewnirtaa tooñooɓe bewɓe ɓen e laawol Makko Ngol.

Maa oya rewunooɗo e tufunnde yirbunde fukkiinde e dow kippoodi mayre, halkoriinde yimɓe mayre; nde woŋti wediinde. On gorko naamnorii kaawase: hol no Alla Wuurnitirta ndee tufunnde ɓaawo yirbugol mayre? Alla Wari mo duuɓi teemedere, refti O Wuurniti mo O Daalani mo: "No foti ko ñiiɓuɗaa e maayde"? O jaabii: "Mi ñiiɓii ñallal maa ko hewtaa ñallal". O Daalani mo: "Ko woni, a ñiiɓii duuɓi teemedere, ndaarii ñaametee e njaram ko accuno-ɗaa, ɗum waylaaki, ndaaraa kadi mbabba maa maaymba mban, fii Yo Men Waɗe Maande Ɓaŋnguɗo wondannde yimɓe, Tinndinoowo Kattal Alla e Wuurnitugol ɓe. Ndaaraa ƴi'e mbabba mban no seediri sennditori, hol No Men Ɓannindiri ɗum Men Jogindiri, refti Men Suddiraɗe teewu, ɗe ngarta e nguurdam. Nde o yi'i ɗum, goonga kan feeñani mo, o anndi Kattal Alla Ngal, o wi'i: "Miɗo anndi pellet Alla haaɗtanɗo kala huunde".

Jaŋto an Annabiijo, tuma nde Anb. Ibraahiima (yo o his) maakunoo: Joomi am, hollam no maayɓe ummitorta? O Daalani mo: A gomɗinaa ɗum? nde huunde ? Ibraahiima maaki: Aa'a, miɗo gomɗini. Ko woni, ko fii no ɓernde am nden deeƴira. Alla Yamiri mo: Naŋngu colli nayi, loppaaɗi taƴitaa kaa maa, refti waɗaa e hoore fello -e pelle kuuɓituɗe ma ɗen- kala geɓal e majji, refti noddaaɗi: ɗi ngardete e yaccaare; hara ko ɗi wuurnitaaɗi. Anndaa non an Ibraahiima, pellet Alla Ko Tedduɗo e Laamu Makko, Ñeeñuɗo e Fiyaaku Makko e Shari'a Makko e Tageefo Makko.

Sugu ɓen gomɗimɓe wiŋtirooɓe jawle maɓɓe ɗen e laawol Alla, no wa'i wano abbere fuɗnunde -e leydi moƴƴiri- gawƴe jeeɗiɗi, hara no e gawƴol kala gabbe teemeredere. Alla No Sowana baraaji on Mo O Muuyi e jayaaɓe Makko ɓen; O Yoɓitiraɓe ko aldaa e hasboore. Alla Ko Yaajuɗo ɓural e dokkal, Annduɗo ɓen haanduɓe e ɗum.

Ɓen wiŋtotooɓe jawle maɓɓe ɗen e welayee Alla e ɗoftaare Makko, refti ɓe jokkiŋtinaali ko ɓe nafki kon baji maa lorra ko no bonnitana ɓe ɗum; no woodani ɓe njoɓdi maɓɓe ndin ka Joomi maɓɓe, Kulol alanaa ɓe, ɓe wanaa kadi sunoytooɓe.

Ko koŋngol moƴƴol: naadayngol welo-welo ka ɓerɗe muumini en, e haforanal on bonnuɗo ɗum, ɓuri moƴƴude sadaqa jokkindiniraaɗo lorra wowlitugol. Alla Ko Galo e jeyaaɓe Makko ɓen, Muññiiɗo Mo yaawnortaa leptugol ɓe.

Ko onon yo gomɗimɓe Alla e Nulaaɗo Makko, wata o bonnititr barjaari sadaqaaji mon ɗin wajitugol lorra rokkaaɗo on.Sabu on ittiroowo sadaqa fii wajitugol yiinoo e yimɓe, ko o yedduɗo Alla e Ñalaande Darngal, yeddi neema e lepte maggal.On ɗon no wa'i wa fetere=haayre nde mbullaari woni e dow mum, toɓo heewngo ara nde; ɗam acca nde e ɓowru.Ko wano non kadi yiinitooɓe ɓen; baraaji sadaqaaji maɓɓe ɗin yehay, huunde heddotaako e majji. Alla Fewnataa heeferɓe ɓen e kon ko O Welaa O Toowi e ko nafatabe e golle e nafakeeji maɓɓe.

Sugu ɓen gomɗimɓe wiŋtorayɓe=tottiroobe jawle maɓɓe ɗen ɗaɓɓugol welayee Alla e tabital woŋkiiji maɓɓe ɗin; -ko aldaa e doolneede- no wa'i wano ngesa wonumba e falo toowungo: waabiliire heɓa mba, mba moƴƴiri cownalle ɗiɗi. Si waabiliire heɓaali mba, mba heɓa sore-sore. Ko wano non kadi sadaqaaji moƴƴinooɓe ɓen; Alla Jaɓirayɗi On Sowa baraaji majji, hay si tawii ɗi ɗuuɗaa. Alla Ko Reenuɗo huunde nde golloton, huunde e fiyakuuji moƴƴinooɓe ɓen maa yiinotooɓe ɓen. O Yoɓiray gooto kala ko haandi.

E goɗɗo e mo'on yeloto heɓugol naakoo mo tamarooje e inabuuje; hara canɗi no ila ley ton. Hara himo jogii ton noone kala e dimɗe, nayeegu heɓa mo e ɗum tawa non himo mari geɗalɓe lo'uɓe ɓe waawataa golle, nduluuru ndu yiite heɓa naakoo on ndu sunna fof. Ko kaŋko ɓuri hatonjinnde e ballal sabu nayeegu makko e lo'ere ɓiɗɓe makko?! Ko nii alhaali wiŋtiroowo jawdi mun ndin yiingo wa'iri; o tawoyay Alla ñalnde darngal o alaa baraaji fewndo ka o hatonjini e mu'un. Ko Wano nii Alla Ɓaŋnginiraŋta on kon ko nafata on aduna e laakara, belajo'o on miijitoto.

Ko onon yo gomɗimɓe Alla e Nulaaɗo Makko on: wiŋtee e jawle mon laaɓuɗe ɗen ɗe faggiti ɗon, e kon ko Men Yaltinani on ka leydi. Wata on jillindir ko soɓi kon e mayri wiŋto-ɗon; si wanaa hara on jaɓir ɗum munnagol e hoore hiɗon añi. Hol no yiɗiraŋton Alla kon ko o yiɗanaa ko'e mon? Nganndee pellet Alla Ko Galo e wiŋtaaje=nafaqeeji mo'on, Yettaaɗo e Jaati Makko e Golle Makko.

Seytaane no hulɓiira on baasal, ndurerɗina on e nguddam, ndu loowa on faggitagol bone e paŋkare. Alla No Foda on haforaneede junuubi, e yaajeende arsike. Alla Ko Jom-ɓural, Annduɗo fiyakuuji jeyaaɓe Makko ɓen.

Himo Rokka ganndal ngal e faltaare nden on mo O Muuyi e jeyaaɓe Makko. kala rokkaaɗo ɗum, haray o dañii moƴƴere heewunde. Wa'ajitortaa Aayeeje Alla ɗen si wanaa ɓen joomiraaɓe haqqillaaji timmuɗi pooynuɗi.

Kala ko wiŋtiɗon e wiŋtaari -ɗuuɗi famɗi- fii ɗaɓɓugol welayee Alla, maa ko takkuɗon e takke dewal Alla, pellet Himo Anndi ɗum fof. O Yeebataa huunde e ɗum, O Yoɓoyay on ko ɓuri mawnude e njoɓdi. Alanaa tooñooɓe jaggita kkeeri Alla ɗin faabotooɓe, ko duñana ɓe lepte ñalnde darngal.

Si on feññinii jawle sadaqaaji mon ɗin, ɗum no moƴƴi haa roŋki. Si on suuɗii ɗi on rokkii waasuɓe ɓen, ko ɗum ɓuri moƴƴude e feññingol ngol; tawde ko ɗon ɓaɗtii laaɓal ngal. Sutura e haforaneede no e sadaqaaji moƴƴinooɓe ɓen. Alla No Humpitii ko golloton, huunde e fiyakuuji mo'on suuɗaaki Mo.

Fawaaki ma an Annabiijo, peewal maɓɓe jaɓa goonga kan. Si ko woni, tinndingol e goonga no fawi maa, ko Alla Jogii Fewnugol Hawrindina e sawaaba, Himo Fewna on Mo O Muuyi. kala ko wiŋtiɗon on heɓtay nafa mun; Tawde non Alla Ko Alɗuɗo e ɗum. Wiŋtee laɓɓiniron fii Alla: Gomɗinɗo on wiŋtortaa si wanaa ɗaɓɓugol welayee Alla. Kala ko wiŋtiɗon -ɗuuɗi famɗi- on yoɓitirte ɗum mbarjaari timmundi, sabu Alla tooñataa hay e gooto.

Waɗanee ɗum, ɓen waasuɓe haɗitoriiɓe ɗaɓɓere jawdi sabu jihaadi, majjaaɗo ɓe no sikka ɓe alɗuɓe sabu nefinagol maɓɓe e toraare, kono ƴellitooɗo ɓe on no anndira ɓe maandeeji hatonjinal feeñuɗi e maɓɓe. No e ɗin maandeeji, tawde hiɓe serti e ɓeya waasuɓe, ɓe sukkiŋtaa toragol yimɓe ɓen. Kala ko wiŋtiɗon e jawdi ekn, pellet Alla No Anndi ɗum, O Yoɓiroyay on ɗum mbarjaari mawndi.

Ɓen wiŋtotooɓe jawle mun ɗen jemma e ñalorma, kene e gunndoo fii welayee Alla, ko aldaa e yiingo: no woodani ɓe njoɓdi ñalnde darngal immorde e Joomi maɓɓe, kulol alanaaɓe e on fiyaaku maɓɓe, suno kadi alanaaɓe e kon ko ɓe yawtini aduna; ɗum ko Ɓural e Neema Immorde e Alla.

Ɓen gollirooɓe riibaa,ɓe immoroytaa e genaale maɓɓe ñalnde darngal si wanaa sugu on mo seytaande memiri meŋki:o immora wa suƴƴitaaɗo. Ɗum non, ko tawde ɓe daginii ñaamugol ribaa,ɓe roŋki senndindirde hakkunde ribaa e kon ko Alla Dagini e ngeyngu,ɓe mbi'i: "Enee, ngeygu ngun no dagorii wano ribaa; ɗi fof majji ɗi adday tono e ɓeydaari jawdi". Alla Fenni ɓe O Bonni ngal eɓɓindiral maɓɓe ɗon,O Ɓaŋngini wonde Kaŋko Alla O Daginirii ngeygu ngun sabu nafoore mun nden,O Harminiri ribaa on sabu tooñee e ñaamirgol jawle yimɓe ɓen hoore mehre ko woni e mun kon. On mo wa'aju ari e mu'un immorde e Joomi Makko, yowitiingu e haɗugol ribaa,o haɗitii e ɗum;O Yawtanay mo koŋko o golliri ribaa on ado mun, fiyaake makko on ko faade Alla. Kala non fillitiiɗo o rutti e gollirgol ribaa on ɓaawo haɗoore nden yottoraade mo hujjaaji ɓaŋnguɗi, hara o haandii naatugol yiite o lutta e magge: ngol heddagol ko dagiŋtinooɓe ñaama ɓen ribaa, maa hara faandaare nden ko ɓooyugol luttude ɓe ton; sabu luttataa ka yiite si wanaa heerefɓe ɓen, yimɓe tawhiidi ɓen kan, ɓe heddotaako ton.

Allaahu On No Mehira jawle ribaa ɗen: ittugol barki kin e majje ekn, O Ɗuɗɗina jawle sadaqa ɗen O Mawninira ɗe cowalle mbarjaari. Moƴƴere nden yoɓiree sappo yeru mayre haa cowalle teemeɗɗe jeeɗiɗi e ko ɓuri, O Barkina kadi jawle wiŋtooɓe ɓen. Alla Yiɗaa kala keereero saɗta-hooreejo, dagiŋtinoowo haram, ñiiɓa e geddi.

Ɓen gomɗimɓe Alla e Nulaaɗo Makko ɓe jokki golle moƴƴe, ɓe tottiri julde nden no nde shar'iniraa non, ɓe jonni asakal jawle maɓɓe ɗen ɓen haannduɓe e mu'un: Pellet no woodani ɓe njoɓdi maɓɓe ndin ka Joomi maɓɓe, kulol woo alanaa ɓe ton, ɓe sunoytaako e fii naamaaji aduna.

Ko onon yo gomɗimɓe Alla e Nulaaɗo Makko on, hulee Alla, jokkol Yamirooje Makko, reenoɗon e Haɗaaɗi Makko, tertoɗon ƴamtugol koŋ ko heddii e ribaaji keɓorɗi jawle yimɓe; si on laatike gomɗimɓe Alla haqqan, tawde O Haɗii on e ribaa.

Si on waɗaali koŋ ko Yamiraɗon, nganndee pellet Alla e Nulaaɗo Makko Haɓay on. Si on tuubii on ruttorii ka Alla teertagol ribaa on, no woodani yeru koŋ ko ñawluɗon e ko'e jawle mon ɗen; on tooñirtaa gooto ɗaɓɓugol ɓeydaari e jawle mon ɗen, on tooñirtaake ustaneede e majje.

Si on mo ɗaɓɓirton yoɓugol ñamaande nden laatike jom-saɗteende, mo maraako yoɓira: neeɓnanee mo ƴamtugol haa o heɓa neweende yoɓitugol ñamaande makko nden. Ko nde sakkotoɗon -seeɗa maa yoga e nden ñamaande ɓuri moƴƴannde on, si on laatike annduɓe ɓural mun ngal ka Alla Toowu On.

Hulee ñalaande nde ruttete-ɗon e mu'un faade ka Alla, daro-ɗon Yeeso Makko, refti O Yoɓita woŋkii kala njoɓdi faggitaare makki -moƴƴere e bone- ɓe tooñiroytaake ton ustaneede baraaji maa ɓeydiraneede lepte sabu goopi maɓɓe.

Ko onon yo gomɗimɓe Alla e Nulaaɗo, si on ñawlondirii hakkunde mo'on haa e lajal happaangal, winndee nden ñamaande: yo winndiroowo winndir nunɗal e shari'a, wata on salo winndirde ngal nunnɗal wano Alla Annidiri mo non ka Deftere Makko. Yo Winndu kon ko jom ñamaande nden woni e hoore mu'un; fii no on [ñawlaaɗo] qirritora. Yo o hulu Alla, hara o ustaali huunde e ñamaande nden. Si on mo ñamaande woni e mun laatike ɗayɗo maa feetuɗo mo waawanaa hoore mu'un, maa hara o waawataa fitude sabu mboboyaagal maa ko nanndi; yo waliyuu makko on fitiraŋ mo nunɗal. Ɗaɓɓee seedeeɓe ɗiɗo worɓe hellifaaɓe nunɗuɓe: si ɓe laataaki worɓe ɗiɗo, seedinee gorko gooto e rewɓe ɗiɗo immorde e ɓen ɓe wela-ɗon diina e nunɗal mu'un; fii si gooto e rewɓe ɓen yejjitii, oya anndiŋtina mo. Wata seedeeɓe ɓen salo seedagol e ñamaande nden si ɓe noddaama fii mun, wata aamere haɗu on winndugol ñamaande nden -ɗuuɗi famɗi- haa e lajal mayre; ko winndugol ñamaande nden ɓuri nunɗude ka shari'a, ko ɗum kadi ɓurata niiɓnude seedeeyaagal ngal, ɓura ɓaɗtinnde e ittitugol sikke ñamaande nden (noone mayre e emmbere mayre). Si wanaa hara tokkugol ahadi ndin hakkunde mo'on ko e ngeyngu ngu yiilindirton; bakkaatu fawaaki on si on winndaali kon ko hatonjinaa e winndugol, ko woorugol pooɗondiral winndugol ngol shar'iniraa. Dagotaako lorrude winndoowo on e seedotooɓe ɓen, kamɓe kadi ɓe haanaa lorrirde kon ko ɓe ɗaɓɓiraa winndugol maa seedagol, si on lorrindirii fii ɗum, haray on yaltii e ɗoftaare Alla. Hulee Alla -onon muumini en- huuron Yamirooje Makko, woɗɗito-ɗon Haɗaaɗi Makko. Alla No Anndina on moƴƴere mon aduna e laakara, Alla Ko Annduɗo kala huunde.

Si on wonii e hoore laawol, on roŋkii heɓude winndoowo ñamaande nden, yonii ka on mo ñamaande woni e mun jonnata ñawlaaɗo on tiginnde jaɓotoonde haa o heɓa feere yoɓugol ñamaande nden. Si on hoolondirii hakkunde mon, waɗɗaaki on winndugol e seedingol maa tiginnde; ñamaande nden woŋtay jikke e hoore ñawliiɗo on, waɗɗiiɗo mo yoɓitude; no fawii mo hulude Alla e ɗen jikke, hara o bonnaali ɗe, si o bonni jikke ɗen, yo seedeejo on seedito; wata on ɗon haɗito e seedagol ngol; si o waɗii ɗum, haray o jeyaama e ɓen boonnoɓe. Alla No Anndi ko golloton kon, huunde suuɗaaki Mo, O Yoɓitoyay on golleeji mon.

Ko Alla Heeranii tageefo e laamu e yiilugol kala ko woni ka kammuuli e ka leydi. Si on feññin ko woni ka ɓerɗe mo'on maa suuɗu-ɗon ɗum, Alla No Anndi ɗum; O Hasbiray on ɗum, O Haforana ɓaawo mu'un -Ɓural e Yurmeende Makko- on Mo O Muuyi, O Leptira -Nunɗal e Ñeeñal Makko- on Mo O Muuyi. Alla Ko Haaɗtanɗo kala huunde.

Nulaaɗo Muhammadu ((Yo Alla Juulu e Makko O Hisna mo), gomɗinii kala Jippii e makko immorde e Joomi makko. Muumini en kadi wano non, ɓe fof maɓɓe ɓe gomɗinii Alla, e denndaangal Malaa'ikaaɓe Makko, e Defte Makko ɗen fof, e denndaangal Nulaaɓe Makko ɓe O Nuli. Ɓe hooliri gomɗinal maɓɓe: "Men serndataa hakkunde gooto e Nulaaɓe Makko ɓen". Ɓe mbi'i: "Men nanii Yamirooje Maa, men teertike Haɗaaɗi Maa, men ɗoftorike Ma jokkugol Yamirooje Maa, teertoo Haɗaaɗi Maa, meɗen toro Maa Haforanal Joomi amen, pellet ruttorde amen e kala fiyaaku ko ka Maaɗa, An Tan.

Alla Fawaa woŋkii e golle, si wanaa ko ki townata; sabu Diina Alla kan no newii wanaa ko saɗti fii. Kala faggitiiɗo moƴƴere, o yoɓete baraaji mun no timmiri. kala kadi faggitiiɗo bone, o yoɓete yeru mu'un, gooto fawtaŋtaako mo ɗum. Nulaaɗo on e gomɗimɓe ɓen mbi'i: "Joomi amen, wata A Leptir men ko men yejjiti maa men woopi e golle maa koŋngol. Joomi amen, Wata A Ronndu men teddeelo mo men townataa, wano Ronndir-Ɗaa ɓen ɓen Leptinor-Ɗaa tooñe mu'un ado amen; wano Alyahuuda en. Wata A Fawu men e Yamirooje maa Haɗooje ɗe men townataa, Yawtan men junuubi amen, Haforanaa en, Yurme-Raa men Ɓural Maa; Ko An Jeyi fiyaake amen Walloowo men, Wallu men e heeferɓe ɓen.

Alif, Laam, Miim: Ɗee ko kalfe taƴondirɗe, sugu majje yawtiino ka cortewol Baqarati. Hino joopaa e majje roŋkugol Aarabu en addude sugu ndee Al Qur'aanaare, fii kala hinde yowondiri e sugu ɗee kalfe fuɗɗoraaɗe cortewol ngol, ɗen kalfe ɗe ɓe yuɓɓirta haala maɓɓe.

Ko Alla Woni On Reweteeɗo e goonga alaa si wanaa kaŋko tun: Wuurɗo nguurdam timmu-ɗam ɗam maayde maa ustagol alaa e mu'un. Ñiiɓuɗo Daroro Jaati Mu'un, Yonndinorɗo denndaangal tagu Mu'un. Taguɗo kala ko tagaa, ɗin tagaaɗi yondinortaako mo e fiyakuuji majji.

O Jippinii e dow maaɗa an Muhammadu, ndee Qur'aanaare e hoore goonga. Ko nde goongunde ka kabaruuji, nunnɗunde ka ñaawooje, yahdunde e kon ko adinoonde immorde e Defte Alla; ɗe luutorndiraa hakkunde majje. O Jippini kadi Tawreeta e dow Muusaa, Linnjiila e dow Iisaa (yo ɓe his) ko adii Qur'aana jippaade e maaɗa. Ɗee Defte Alla fow ko fewnayɗe yimɓe ɓen moƴƴinanaɓe diina e aduna maɓɓe. O Jippini kadi Al Qur'aana senndinraynde hakkunde goonga e fenaande, peewal e majjere. Ɓen yedduɓe ɓen non Aayeeje Alla Jippinaaɗe e maaɗa ɗen, hino woodani ɓe lepte saɗtuɗe. Alla Ko Fooluɗo, Jom-yottagol kala fennuɗo Nulaaɓe Makko ɓen lunndii Yamirooje Makko ɗen.

O Jippinii e dow maaɗa an Muhammadu, ndee Qur'aanaare e hoore goonga. Ko nde goongunde ka kabaruuji, nunnɗunde ka ñaawooje, yahdunde e kon ko adinoonde immorde e Defte Alla; ɗe luutorndiraa hakkunde majje. O Jippini kadi Tawreeta e dow Muusaa, Linnjiila e dow Iisaa (yo ɓe his) ko adii Qur'aana jippaade e maaɗa. Ɗee Defte Alla fow ko fewnayɗe yimɓe ɓen moƴƴinanaɓe diina e aduna maɓɓe. O Jippini kadi Al Qur'aana senndinraynde hakkunde goonga e fenaande, peewal e majjere. Ɓen yedduɓe ɓen non Aayeeje Alla Jippinaaɗe e maaɗa ɗen, hino woodani ɓe lepte saɗtuɗe. Alla Ko Fooluɗo, Jom-yottagol kala fennuɗo Nulaaɓe Makko ɓen lunndii Yamirooje Makko ɗen.

Pellet, Alla, huunde suuɗotaako Mo ka leydi wanaa ka kammu.Gomɗii Anndal Makko huuɓitii huunde kala: ko feeñi e ko wirnii e mun.

Ko Kaŋko Woni Tagiroowo on mbaadiiji seertuɗi ka deedi yumma mon en no O Muuyiri: imoorde e gorel maa deyel.

Ko Kaŋko Woni Jippinɗo e maaɗa an Muhammadu, AlQur'aanaare nden, no e mayre aayeeje ɓaŋnginɗe tinndinol, jiɓi-li woo alaa e majje; ko ɗen woni ko ɓuri heewude e lasli Deftere nden, ko ɗen kadi woni ruttorɗe ɗen tuma luutondiraa. No e mayre kadi aayeeje goo soomuɗe maanaaje ɗuuɗuɗi; maanaa majje hino jilɓana yimɓe ɗuuɗuɓe. Ammaa non ɓen woni ka ɓerɗe mun ooñaare gaa e goonga, hiɓe sela ko ñeeññaa kon ɓe jokka ko jilɓi kon; hiɓe ɗaɓɓira ɗum jilɓugol majjina yimɓe ɓen, ɓe ɗaɓɓira ɗum kadi firtugol ɗe mbeleeɗe maɓɓe e ɗate maɓɓe bonɗe. Hay e gooto non anndaa maanaaji ɗee aayeeje e battane firo majje si wanaa Alla. Ɓen tutiiɓe non ka ganndal ɓe ɗiggini ngal, hiɓe wi'a: "Men gomɗinii AlQur'aanaare nden fow; sabu nde fow mayre ko ka Joomi amen nde iwri". Hiɓe firtira ko nanndi kon, kon ko ñeññaa e mayre. Waajitotaako si wanaa joomiraaɓe haqqilaaje hisuɗe ɗen.

Ɓee tutiiɓe e ganndal no wi'a: "Joomi amen wata ooñu ɓerɗe amen ɗen ga e goonnga ɓaawo A Fewnude men e makka, Daɗnu men kon ko heɓi ɓen ooñiiɓe e goonga, Yeɗaa men yurmeende yaajunde immorde ka Maaɗa Fewniraa men nde ɓerɗe amen, daɗndiraa men nde majjere, pellet An Joomi amen, ko An Woni Yeɗoowo Heewuɗo Dokke.

Joomi amen, pellet An ko A Mooɓitoyoowo denndaangal yimɓe ɓen ka Maaɗa fii hasbugol ɓe e ñalaande nde sikke alaa e mun. Ɗum ko maande aroore, feere mun alaa. Pellet An Joomi amen, A Lunndotaako fodoore nden.

Pellet ɓen yedduɓe Alla e Nulaaɓe Makko ɓen, jawle maɓɓe e ɓiɗɓe maɓɓe haɗataa ɓe lepte Alla ɗen aduna e laakara. Ɓen siforiiɓe ɗin sifaaji, ko huɓɓiniroyteeɓe jahannama ɓen ñalnde darngal.

Ɓee yedduɓe hino wa'i wa yimɓe Fir'awna e adinooɓe ɓe immorde e yeddunooɓe Alla ɓe fenni aayeeje Makko, O Leptiri ɓe sabu junubaaji maɓɓe ɗin, jawle e ɓiɗɓe maɓɓe nafaano ɓe. Alla ko Saɗtude leptugol ɓen yeddooɓe Mo, fenna aaYeeje Makko.

Maakan ɓen yedduɓe (an Nulaaɗo) no ɓe ɗuuɗiri diinaaji: "ar-ma ka muumini en foolata on, maaydon e keeferaaku, Alla Mooɓitoya on ka yiite jahannama". Nge bonii ndaɗɗudi mon.

Gomɗii laatanike on dalil e tasakuyee e ɗin feddeeji ɗiɗi fottudi fii haɓugol ñalnde "badri": fedde goo ko gomɗinde; ko nden woni fedde Nulaaɗo Alla on mo jam e kisiyee woni e mun e sahaaba en makko, hiɓe haɓira e laawol Alla fii no Konngol Alla ngol ɓamtora dow, konngol yedduɓe ɓen jippora ley. Ndeya fedde ko yeddunde; ko ɓen woni heeferɓe makka ɓen yaltunooɓe no yiinoo maŋtoo, muumini en hino yi'ira ɓen giiɗe gite, jaasuɓe yeeso maɓɓe ka haqiiqa. Alla Wallitii yiɗɓe Makko ɓen, Alla no no Semmbinira ballal Makko ngal On Mo O Muuyi. No e koo ko jaŋtaa ɗoo, waaju wonannde joomiraaɓe-haqqillaaji, fii yo ɓe anndu wonde ballal ngal ko fii muumini en; hay si ɓe ɗuuɗaa e limoore, e wonde fooleede nden ko fii yimɓe mehre ɓen; hay si ɓe ɗuuɗii e limoore.

Allaahu Toowuɗo On Hino Humpita wonde O Cuɗinanii yimɓe ɓen ka jarribagol ɓe, yiɗugol tuuyooji aduna: wano rewɓe, e ɓiɗɓe worɓe, e jawle heewuɗe tugindiraaɗe, immorde e kaŋŋe e kaalise, e remugol ka leydi; ɗum non ko dakamme nguurndam aduna, hino dakmitoree dumunna refti muta. Haanaa nde gomɗimɗo humondirta e ɗum, Alla, ko ka Makko Kaŋko tun ruttorde moƴƴunde woodi; ko nden woni Aljanna on mo yaajeendi mun fota kammu e leydi.

Maaku an Muhammadu: "E yo mi humpitu on ko ɓuri ɗin tuuyooji moƴƴude?". Hino woodani ɓen huluɓe Alla, ɓe ɗoftii Mo, ɓe haɗitii yeddugol Mo, Aljannaaji: hino ila senngo ley kuɓeeje e leɗɗe majji, canɗi; ko ɓe luttiŋteeɓe ton, ko aldaa e maayde maa mulugol, hino woodani ton rewɓe laɓɓinaaɓe jikku e tagudi e kala bone, hino woodani ɓe kadi yarluyee Alla on jippotooɗo e maɓɓe, O Tikkaŋtaaɓe poomaa. Alla ko Reŋtuɗo fiyakuuji jeyaaɓe Makko ɓen, hunnde e majji suuɗaaki, O Yoɓitiroyayɓe ɗum.

Ko yimɓe Aljanna ɓee wi'ata ka toragol maɓɓe Joomi maɓɓe: "Joomi amen, menen men gomɗinii Ma, e kon ko Jippinɗaa e Nulaaɓe maaɗa, men jokkii kadi shari Maaɗa; Haforan men kon ko men faggitii e junuubi, Woɗɗinaa men lepte yiite".

Ko ɓen woni muññiiɓe ɓen e kala golle ɗoftaare, e tertagol boneeji, e kala musiiba heɓoowo ɓe; ko ɓen woni goonguɓe e yeewtereeji mun e ka kuuɗe mun, ko ɓen kadi woni ɗoftoriiɓe Alla no timmiri. Ko ɓen woni nafqooɓe jawle mun e laawol Alla, insinotooɓe ka sakkitoode jemma; sabu ko du'agol e on saa'i ɓurata jaabagol, heŋtina=yeewna ɓernde nden e sokolaaji.

Alla Seedike wonde ko Kaŋko tun woni Reweteeɗo e goonga alaa si wanaa kaŋko, ɗum non, ko no O Ɓannginiri e aayeeje Makko moftuɗe tinndinɗe e Allaaku Makko, Malaa'ika en seeditii e ɗum, yimɓe ganndal kadi seeditori e ɗum ɓanngingol tawhiidi nodda e mun, ɓe seeditii ko ɓuri mawnude : nden woni bajjinɗingol Alla, e wonde ko O Daraniiɗo nunɗal ka tagu Makko e ka Shari'a Makko. Reweteeɗo alaa si wanaa kaŋko, On Fooluɗo mo gooto foolataa, Ñeeñuɗo ka tagu Mu'un e ka toppitagol Mu'un e ka Shari'a Mu'un.

Pellet diina jaɓaaka kan ka Alla, ko lislaamu on; ko ɗum ɗoworanagol Alla tun dewal, jebbiloranoo Mo jeyal, gomɗina Nulaaɓe ɓen denndaangal haa e timminiraaɗo ɓe on; Muhammadu (yo o his), e salagol kala ko wanaa shari'a Makko. Alyahuuda e Annasaara en luutondiraali e diina maɓɓe kan, ɓe seertiri dente e feddeeji, si wanaa ɓaawo nde hujja on ɓanngirannde ɓe anndal; ka ngañanaandi e ka rerɗangol aduna. Kala non yedduɗo aayeeje Alla ɗen jippinaaɗe e Nulaaɗo on, pellet Alla ko Yaawuɗo hasbugol kala on yedduɗo Mo, fenni Nulaaɓe Makko ɓen.

Si ɓe yeddindirii e ma an Nulaaɗo fii ndee Deftere jippinaande e maaɗa, jaabo ɓe maakaa: "Mi jebbilike min e kala jokkuɓe lam e gomɗimɓe Alla ɓen" maakanaa yimɓe defte e sirkooɓe ɓen an Nulaaɗo: "E on jebbilanike Alla Toowuɗo On, laɓɓinɗon jookugol kon ko mi addi?" Si ɓe jebbilanike Alla, ɓe jokkii shari'a maa on, gomɗii haray ɓe jokkii laawol peewal ngol.Si ɓe ɗuurnike non e lislaamu on, haray fawaaki ma si wanaa yottingol e maɓɓe kon ko nuliraɗaa, fiyaake maɓɓe ɗen, ko juuɗe Alla woni; ko Reŋtuɗo jeyaaɓe Makko ɓen,O Yoɓitoyay gooto kala e kuuɗe mun.

Pellet, ɓen yeddooɓe hujjaaji Alla ɗin ɗi O Jippini e maɓɓe, ɓe warira Annabaaɓe ɓen tooñe e jaggitere ko aldaa e goonga, ɓe wara ɓen yimɓe yamirooɓe nunɗal; yamirooɓe ko moƴƴi haɗa ko añinii, wewlinir ɓen heeferɓe warooɓe, lepte muusuɗe.

Ɓen siforɓe ɗin sifaaje, gomɗii golle maɓɓe bonii, ɓe nafitortaa ɗe aduna e laakara; sabu waasireede ɓe gomɗinal Alla, ɓe alaa faabotooɗo ɓe duñna ɓe lepte ɗen.

E a yi'aali, an Annabiijo, fiyaake alyahuuda ɓen ɓe Alla Okki geɓal e ganndal Tawreeta e kon ko nde tinndi e Annabaaku maa? Hiɓe noddee ruttagol e Deftere Alla Tawreeta nden no nde senndira hakkunde maɓɓe fii kon ko ɓe lurri e mu'un, refti fedde goo jeyaande e jannguɓe maɓɓe e hooreeɓe maɓɓe no ɗuurnoo huccana ñaawoore mayre; si tawii nde hawraa e mbeleeɗe maɓɓe. Haaniino ka tawata ɓe aaƴinoke jokkugol nde, nde ɓe laatotoo adotooɓe e ñaawitorgol nden.

Ngol runtagol e goonga kan ɗuurnoo ka, ko tawde ɓe laatinoke hiɓe nodditoo wonde yiite ngen meemataa ɓe ñalnde darngal si wanaa ɓelɗe seeɗa, refti non ɓe naata Aljanna. Ɗen sikke fefindiraaɗe ɗon fenaande e mehre hodiɓe, ɓe suusi Alla e diina Makko kan.

E ko hol no nimse maɓɓe wa'oyta? Ɗum wa'oyay ko ɓuri e bonde si Men Mooɓoyiiɓe fii hasbugol e Ñalaande nde sikke alaa e mun; nden woni ñalnde darngal. Woŋkii kala yoɓitee njoɓdi golle makki ko aldaa woo e tooñe ɗuytaneede moƴƴere mun maa ɓeydaneede bone mun.

Maaku yo Nulaaɗo, hara hiɗa maŋtora Joomi maaɗa mawninaa Mo: "Yaa An Laamɗo Jeyɗo laamu ngun fow ka aduna e ka laakara, Hiɗa Okka laamu ngun on Mo Muuyuɗaa e tagu Maa ngun, Ɓooraa ngu e on mo Muuyuɗaa, Hiɗa Teddina on mo Muuyuɗaa e maɓɓe, Hoyfinaa on mo Muuyuɗaa; Waɗiraa ɗum fow Ñeeñal e Nunɗal Maaɗa. Ko e Juuɗe Maaɗa An Tan, moƴƴere nden fow woni, ko An kadi woni Haaɗtanɗo kala huunde:

Hino jeyaa e kattanɗe Maaɗa, Naadugol ma jemma on nder ñalorma on; ñalorma on juutira ɗum. Naadaa kadi ñalorma on nder jemma on; jemma on juutira ɗum. E ko Yaltiŋtaa kon ko wuuri immorde e ko maayi; wano yaltingol gomɗinɗo immorde e keefeero, maa puɗi immorde e gabbe, e ko yaltiŋtaa maayuɗum immorde e ko wuuri; wano yaltugol keefero immorde gomɗinɗo, maa woofoonde immorde e gertogal. E ko Arsikataa on mo Muuyuɗaa arsike yaajuɗo, ko aldaa e hasboore maa limoore.

Wata on jogitor -onon muumini en, ɓee heeferaaɓe, yiɗɓe ɓe hiɗon wallabe e muuɗum, accon gomɗimɓe ɓen. Kala huuwuɗum, gomɗii o woɗɗondirii e Alla. Si wanaa nde huloton doole maɓɓe reŋtoron ɗum, haray ella alaa nde reŋtoɗon e bone maɓɓe, huuwondiron e maɓɓe no newori; hara hiɗon suuɗori ngayngu ngun hakkunde mon. Alla Hino Reŋtina on e Hoore Mun, hulee mo, wata on faggito ko O Tikkirana on. Ko faade ka Alla Kanko Tan woni ruttorde jeyaaɓe ɓen Ñalnde Darngal; fii yo O Yoɓu ɓe joɓdi kuuɗe maɓɓe.

Maaku an Annabiijo: "Si on suuɗo ko woni e ɓerɗe mon immorde e kon ko Alla Haɗi on; wano weldugol e heeferɓe ɓe, maa suuɗuɗon ɗum, kaŋko Alla Himo Anndi ɗum; hay e huunde suuɗaaki Mo. Himo Anndi kadi ko woni kon ka asamaanuuji e ka nder leydi. Alla ko Haaɗtanɗo kala huunde, O Roŋkaŋtaa hay e huunde.

Ñalnde Darngal, woŋkii kala taway golle makki kin immorde e moƴƴere; ɗum no ɓannaa ɗuytaaka, e kon ko ki golli immorde e bone; hiki yoloo sinno wonayno hakkunde makki e majje dummunne woɗɗuɗo. Hol no heɓirta on yela?! Alla No Reŋtina on e Hoore Mun, wata faggito bakkaatu ko O Tikkirana on. Alla ko Hilnotooɗo jeyaaɓe ɓen; ko ɗum waɗi si Mo Reŋtina ɓe Hulɓina ɓe.

Maaku an Nulaaɗo: "Si on laatike ko on yiɗuɓe Alla haqqan, jokkee kon ko mi addi; ko feeñi e ko wirnii e mun, dañon Giggol Alla, O Haforana on junubaaji mon". Alla ko Haforanoowo kala on tuubuɗo e jeyaaɓe Makko ɓen, Yurmeteeɗo ɓe.

Maaku an Nulaaɗo: "Ɗoftoree Alla e Nulaaɗo Makko on, ñemtinorgol yamirooje ɗen woɗɗitoo haɗaaɗi ɗin", si ɓe ɗuurnike ɗum, pellet, Allah yiɗaa heeferɓe lunndotooɓe yamirooje Makko ɗen kaŋko e Nulaaɗo Makko on.

Pellet, Alla Suɓike Aadama (yo o his), O Yamiri Malaa'ika en Makko ɓe sujjani mo, O Suɓii kadi Nuuhu, O Waɗi mo adaaɗo Nuleede e yimɓe leydi ndin, O Suɓii kadi yimɓe Ibraahiima ɓen, O Waɗi Annabaaku ngun heddiingu e jurriiya maɓɓe, O Suɓii kadi yimɓe Imraana ɓen; O Suɓori ɓee ɗoo kala O Ɓurni ɓe e yimɓe jamaanu maɓɓe.

Ɓee Annabaaɓe e jurriyaaji mun jaŋtaaɓe dow ɗoo, jokkunooɓe laawol mun, ko ɓe jurriiya yoga e maɓɓe iwde e yoga; ka bajjinɗingol Alla huuwa moƴƴuɗi, hiɓe ronindira teddule e ɓure. Alla ko Nanoowa jeewte jeyaaɓe Makko, Annduɗo kuuɗe maɓɓe; ko ɗum O Suɓoraŋta on mo O Muuyi e maɓɓe.

Jaŋto an Annbiijo, tuma nde debbo Imraana on yumma Maryama (yo ɓe his) wi'unoo: "Joomi an, min mi waɗɗinanii hoore-am nde mi waɗaŋta koo ko mi sowii ka reedu am fii heertinanaaɗum fii Maaɗa, rinɗinaaɗum e kala huunde; fii no ɗum kurkorano Maa kurkanoo Suudu Maa ndun, Jaɓanam ɗum, pellet, An ko A Nanoowo toraare am, Annduɗo annuyee am".

Nde o jibinnoo boobo on, o wi'i himo ngaŋtinoo -tawde o yelinoke nde boobo on laatotoo gorel: "Joomi an, min mi jibinii mo deyel". Ko Alla ɓuri Anndude ko o jibini kon, gorko mo o joortinoo on laataaki wano debbo mo o yeɗaa on; ka doole e ka tagudi. "Min non, mi innii mo Maryama, min mi moolnorii Ma mo kaŋko e jurriiya makko on, immorde e seytaane raɗaaɗo e Yurmeende Maa".

Alla Jaɓirani mo takke makko ɗen jaɓannde moƴƴunde, O Ne'iri mo needi moƴƴundi, O Waɗi e makko ɓernde moƴƴuɓe ɓen e jeyaaɓe Makko ɓen, O Halfini mo Jakairaa'u (yo o his). Tuma kala nde Jakariyaa'u tawunoo mo ka rewirde, o tawdayno mo e arsike laaɓuɗo newiiɗo, O lamdoo oo debbo: "Hey Maryam, ko hoŋto oo arsike maa iwri?". O jaaboo mo: "Oo arsike ko ka Alla iwri", pellet, Alla no Arsika on mo O Muuyi; arsike yaajuɗo, ko aldaa e hasboore.

Ko tuma nde Jakariraa'u tinunoo Arsike Alla On e Marayama geɗal Imraana, o tiniri ɗum no woowiraaka e ko Alla Arsika kon; O joortii nde Alla Arsikata mo ɓiɗɗo e alhaali (toowugol duuɓi e ndimaru debbo makko) mo o fewndodi, o maaki: "Joomi am, Yeɗam ɓiɗɗo laaɓuɗo, pellet, An ko A Nanoowo toraare on toriiɗo Mo, Jaabinanoowo Mo".

Malaai'ka en noddi mo fewndo ko o darinoo ka rewirde himo juula, ɓe wi'ani mo: "Alla no Wewlinire ɓiɗɗo wi'eteeɗo Yahyaa, no jeyaa e ko o sifiori: goongingol Konngol immorde ka Alla -ngol woni Iisaa ɓiɗɗo Maryama on-; tawde o tagiraama tagudi heeriindi e Yamiroore Alla. On ɓiɗɗo wonay koohoojo yimɓe mun ka ganndal e ka dewal, reenoowo hoore-mun e tuuyooji rewɓe, e ɓadaade ɓe, o laatoo kadi Annabaajo jeyaaɗo e moƴƴuɓe ɓen.

Nde malaa'ika en wewlinirnoo Jakariyaa'u [heɓugol] Yahyaa, o maaki: "Joomi an, hol no ɓiɗɗo laatoraŋta lam ɓaawo nde mi nawyi, debbo am on ko dimaro mo jibiŋtaa?". Alla Daali himo Jaaboo mo: "Ko wano Yahyaa tagiraa non e dow nayeegu maa e damaroyaagal debbo maa on, woni ko Alla Tagirta kon ko O Muuyi no woowiraaka; sabu Alla ko Haaɗtanɗo kala huunde, Himo Huuwira Ñeeñal e Anndal Makko, ko O Muuyi".

Jakariiyaa'u maaki: "Joomi am, Waɗanam maande nde anndira sowagol debbo am on immorde e am". Alla Daali: "Maande maa nden, ko: nde a waawataa yeewtidude e yimɓe ɓen ɓalɗe tati e jemmaaji mun; si wanaa e sappagol joopoo, hara non ella woo heɓaa ma. Hebbinor jaŋtagol Innde Alla, subbunhinano-ɗaa Mo ka sakkitoode nyalawma e ka arannde mayre".

Jaŋto an Nulaaɗo, tuma nde Malaa'ika en wi'annoo Maryama (yo ho his): "Pellet, Alla Suɓorike ma ko siforɗaa kon sifaaji yettiniiɗi, O Laɓɓin maa e ɗuytaare, O Suɓi maa e rewɓe winndere nden fewndo maa".

Hey Maryama, Juutin daragol ngol ka julde, sujjanaa Joomi maa, ruƴƴanaa Mo wondude e ruƴƴooɓe jeyaaɓe Makko moƴƴuɓe ɓen.

Ko jaŋtoo koo e kaaruuji Jakariyaa'u e Maryama (yo ɓe his); immorde e kabaruuji wirniiɗi, ɗi Men Wahyina e maaɗa an Nulaaɗo. A tawanooka e ɓen jannguɓe moƴƴuɓe nde ɓe wennjondiraynoo fii anndugol on jojjuɗo e ne'ugol Maryama, haa ɓe gerdi non "urba=kuraaje"; ɓe weddii karambi maɓɓe, karambol Jakariyaa'u ngol fooli (yo o his).

Jaŋto an Nulaaɗo, nde Malaa'ika en wi'unoo: "Hey Maryama, Alla no Wewlinire ɓiɗɗo mo alaa baaba, ko e Konngol Alla o tagirtee; Alla Daalanay mo: "Laato", o laatora Duŋayee Alla On ɓiɗɗo, innde on ɓiɗɗo ko: Meema-sella Iisaa geɗal Maryama, jogiiɗo teddungal mawngal aduna e laakara, jeyaaɗo kadi e ɓaɗtinaaɓe ɓen ka Alla Toowuɗo On".

Himo yeewtida e yimɓe ɓen ka penuyaagal makko ado o waawude haala, o yeewtida e maɓɓe kadi tuma on mawni o timmini sagatalaaku makko: o yeewta ɓe ko moƴƴaŋta ɓe diina e aduna, ko o jeyaaɗo kadi e moƴƴuɓe ɓen ka haala mun e ka kuuɗe mun.

Maryama wi'i no ŋalɗi no o dañirta ɓiɗɗo o resaaka: "Hol no ɓiɗɗo laatoraŋta lam, ɓanndiŋke ɓaɗtoraaki lam no dagori maa no harmiri?! Laamɗo On Daalani mo: "Ko wano Alla Tagiran maa non ɓiɗɗo mo alaa baaba, O Tagirta kon ko O Muuyi; no woowiraaka. Si O Faandike fiyaake, O Daalanay mo: "Laato", nde laatoo; hay huunde roŋkiŋtaa Mo".

Himo Anndina mo Deftere nden e peewal ngal ka konngol e ka kuugal, O Anndina mo kadi Tawreeta Jippinaande nden e Muusaa (yo o his), O Anndina mo kadi Linnjiila Jippinoyteende nden e makko.

O Waɗa mo kadi Nulaaɗo e ɓiɗɓe Israa'iila en, o maakana ɓe: "Min, ko mi Nulaaɗo Alla e mooɗon, gomɗii mi addanii on maande tinndinoonde e goongugol Annabaaku am, nden woni: wonnde miɗo mbaandinana on imorde e loopal, ko wa'i wa sonndu, mi wutta e mun woŋta sonndu e Duŋayee Alla, miɗo sellina kadi heɓaaɗo e mbumɗam o yi'a, e o ñawɗo ñawu ndiyam o heɓta ɓanndu makko ndun ko o hisuɗo, miɗo wuurnita kadi maayɓe. Ɗum ɗon fow ko e Duŋayee Alla. Miɗo humpita on kadi ko ñaamoton e ko maroton ka cuuɗi mo'on immorde e ñaametee. No e ɗii fiyakuuji jaŋtaaɗi, mawɗi ɗi neɗɗo haaɗtanaaka ɗoo, maande ɓannginnde wonnde ko mi Nulaaɗo Alla e mo'on, si on laatike faandiiɓe gomɗinal, goonginooɓe ɓanngannduyee.

Mi arii on kadi, miɗo goongina kon ko Jippinaa adii lam, immorde e Tawreeta. Mi arii on fii daginanngol on yoga e kon ko harmunoo e mon; ko hoynanngol on. Mi addani on hujja ɓannginɗo sellugol ko mi yeewti on. Hulee Alla ciinon Yamirooje Makko woɗɗitoɗon Haɗooje Makko, ɗoftoɗon lam e ko mi noddata on e mu'un.

Tawde ko Alla Woni Joomi am e Joomi mon, ko Kaŋko Tan hanndi e ɗofteede hulee, hulee Mo Kaŋko Tan. Ko ko mi yamiri on koo e rewugol Alla hula Mo, woni laawol focciingol ngol.

Tuma nde Iissa (jom kisiyee on) anndunoo e maɓɓe haɓɓitagol e keeferaaku ngun, o maakani ɓiɓɓe Israa'iila en: "Ko hommbo wallata lam noddugol e diina Alla kan?" Laaɓuɓe jokkuɓe mo ɓen wi'i: "Menen ko men wallooɓe e diina Alla kan, men gomɗinii Alla men jokkii ma, seedo an Iisaa, wonnde meɗen jebbilanii Alla e rewugol Mo ɗoftoo Mo".

Haawaariyaŋko en wi'i kadi: "Joomi amen, men gomɗinii kon ko Jippinɗaa immorde e Linnjiila, men jokkii kadi Iisaa (yo o his), waɗdu men e ɓen seediiɓe goonga, gomɗimɓe Ma e Nulaaɓe Maaɗa".

Yedduɓe ɓen e ɓiɗɓe Israa'iila fewji fii warugol Iisaa (yo o his), Alla Kadi Fewjani ɓe O Acci ɓe e majjere maɓɓe, O Nanndiŋtini Iisaa e gorko goo. Ko Alla Ɓuri Moƴƴude e fewjooɓe ɓen; tawde alaa ɓurɗo Mo tiiɗude e fewjanngol ayɓe Makko ɓen.

Alla Kadi Fewjani ɓe tuma nde O Daalannoo Iisaa (yo o his): "Hey Iisaa, Min ko Mi Ƴettitoowo ma hara a maayaa, Mi ɓamte ɓanndu ndun e ruuhu on ka Am, Mi Daɗnde soɓe yedduɓe ɓen Mi Woɗɗiŋtine ɓe, Mi Waɗa ɓen jokkuɓe ma ka diina goonga (no e ɓen, gomɗimɓe Muhammadu ɓen yo o his), e hoore ɓen yedduɓe ma haa Ñalnde Darngal, e dow teddungal. Refti ko faade ka Am Min Tun woni ruttorde mo'on Ñalnde Darngal, Mi Ñaawira hakkunde mo'on goonga, kon ko laatino-ɗon hiɗon luutondira e mu'un.

Ammaa non ɓen yedduɓe on goonga mi addan-ɗaa ɓe,Mi Lepta ɓen ɗon leptira ɓe muusuɗe ka aduna Warugol ɓe Hoyfina ɓe ekn,ka laakara kan,ko lepte yiite.Alanaaɓe faabotooɓe duñana ɓe lepte ɗen.

Ammaa ɓen gomɗimɓe ma e goonga mo addanɗaaɓe on, ɓe golle golle-moƴƴe: immorde e juulugol, jakka, hoora, e jokkere enɗam, ekn, pellet, Alla Yoɓiray ɓe baraaji golle maɓɓe ɗen no timmiri; huunde ɗuytetaako e mun. Ndee yeewtere fii jokkuɓe "Almasiihu" on ado Nuleede Muhammadu (on mo jam e kisiyee woni e mun on); mo Almasiihu on tigiri wewlini fii mun. Alla Yiɗaa tooñooɓe ɓen, no jeyaa ko ɓuri mawnude e tooñe, kafidugol e Alla Toowuɗo On, fenna Nulaaɓe Makko ɓen.

Koo ko men janngaŋta maa e kumpite Iisaa (yo o his), immorde e aayeeje ɓaŋnguɗe tinndinooje e sellugol kon ko Mi Jippini e Maaɗa; ko Jaŋtoore gomɗuɓe ɓen, Ñeññaande nde mehre alaa e mun.

Pellet tagudu Iisaa ndun (yo o his) ka Alla, no wa'i wa tagudu Aadama ndun e mbummbuldi; ko aldaa e Neene e Baaba, Alla Daalan mo tun: "Laato ɓanndiŋke!" o laatori no Alla Toowuɗo On Faandori non. Hol no ɓe aaƴorta wonnde ko o reweteeɗo e hoore hujja tagireede mo ko aldaa e Baaba, himɓe jannga kadi wonnde Aadama ko ɓanndiŋke; ɗum e wonnde o tagiraama ko aldaa e Neene e Baaba?!

Goonga ka sikke alaa e mu'un kan fii Iisaa (yo his), ko kan Jippinaa e maaɗa immorde e Joomi ma'a, wata a laatodu e sikkitiɓe murtuɓe ɓen; si ko woni, tabitu e goonga maa kan.

Kala wennjuɗo an nulaaɗo, immorde e Annasaara en, e fiyaake Iisaa, aaƴiiɗo wonnde on wanaa jeyaaɗo Alla; ɓaawo kon ko aru-maa e ganndal sellungal fii makko, maakaŋɓe: "Aree nodden ko tawdee, ɓiɗɓe amen e ɓiɗɓe mo'on, rewɓe amen e rewɓe mo'on, ko'e amen e ko'e mo'on, mooɓondiren en fow, refti ñaagoren Alla toraare nde O Jippiŋta kuddi Makko ndin e hoore fenooɓe ɓen e amen e mo'on".

Pellet koo ko jaŋtanaɗaa ɗoo fii Iisaa (yo o his), ko ɗum woni kumpital sellungal ngal fenaande e sikke jillaa e mun. Reweteeɗo e goonga alaa si wanaa Alla Tan, pellet, Alla ko Kaŋko Woni Fooluɗo e Laamu Makko, Ñeeñuɗo e Toppitagol fiyakuuji Tagu Makko.

Si ɓe ɗuurnike kon ko addu-ɗaa, ɓe jokkaali ma; ɗum ko bone maɓɓe, Alla non ko Annduɗo bonnooɓe ɓen ka leydi, O Yoɓitoyaɓe ɗum.

Maaku an Nulaaɗo: "Aree onon yimɓe Defte immorde e Alyahuuda e Annasaara, mooɓondiren e konngol gootol nunɗungol ngo foteten e mun : ko nde bajjinɗinaŋten Alla dewal ngal; hara en kafidaali Mo hay e gooto, no on foti woo e martaba, wata yoga e me'en kadi jogitor yoga, joomiraaɓe reweteeɓe ɗoftee ko woori Alla". Si ɓe huccitii e ndun noddaandu goonga e nunɗal, wi'anee ɓe onon Muumini en: "Seeditee wonnde menen men jebbilanike Alla ɗoftoragol Mo dewal".

Ko onon yo yimɓe Defte, e ko wennjaŋton fii diina Ibraahiima kan (yo o his)? Alyahuuda aaƴike wonnde Ibraahiima ko yahuudaajo, Annasaara kadi aaƴii wonnde ko annasaaraajo. Hiɗon anndi non wonde Alyahuuda e Annasaara feeñaali si wanaa ɓaawo nde faatii, e on haqqilataa fahmon mehre haala mo'on e faljere aaƴannde mo'on?!

Hey mon onon yimɓe Defte, on wennjii Annabiijo on mo jam e kisiyee woni e mun, e huunde nde anndal woodani on immorde e fiyaaku diina mo'on e ko Jippinaa e mo'on. E ko wennjaŋton e huunde nde anndal alanaa on e mu'un e fiyaake Ibraahiima e diina makko, kon ko alaa e Defte mo'on, wanaa kadi Annabaaɓe mo'on addi ɗum?! Alla No Anndi fiyakuuji ɗin e ko wirnii e majji, onon on anndaa.

Annabi ibraahiima laatanooki e diina Alyahuuda wanaa kadi diina Annasaara, si ko woni, o laatinoke ooñiiɗo e diina mehre, jebbilaniiɗo Alla bajjiɗini Mo, o laatanooki jeyaaɗo e kafidanooɓe Alla ɓen; wano shirkooɓe aarabeeɓe ɓen aaƴoraynoo wonnde ko e diina makko ɓe woni.

Ko ɓuri hanndude e yimɓe ɓen dammbitorgol Ibraahiima : ko ɓen jokkuɓe kon ko o addi e jamaanu makko, ko ɓuri hanndude e yimɓe ɓe ɗum kadi, ko oo Annabiijo Muhammadu (jom kisiyee), e ɓen gomɗimɓe mo e ɗee mofte. Alla ko Walloowo Reena gomɗimɓe Mo ɓen.

Fedde goo e yimɓe Defte ɓen no yeloo nde ɓe majjiŋta on e goonga ka Alla fewniri on e mun; onon Muumini en, kono ɓe majjiŋtaa si wanaa ko'e maɓɓe; sabu etagol ɓe majjingol Muumini en, ɓeydataa ɓe si wanaa majjere, kono ɓe anndaa ɓattane kuuɗe maɓɓe.

Hey mon yimɓe Defte, immorde e Alyahuuda e Annasaara, e ko yeddaŋton Aayeeje Alla Ɗe O Jippini e mooɗon; e kon ko Ɗe Tinndiŋta e Annabaaku Muhammadu on mo jam e kisiyee woni e mun, hara onon ko on seediiɓe goonga kan joopaa fii mun ka Defte mo'on?!

Ko onon yo yimɓe Defte, e ko jillaŋton kan goonga jippinaaka ka Defte mo'on e meh-re mon, hiɗon suuɗa kadi ko woni e Ɗen Defte immorde e goonga e peewal; wano sellugol Annabaaku Muhammadu on mo jam e kisiyee woni e mun, hara non hiɗon anndi goonga kan senndindiri ka e mehre nden senndindiri peewal e majjere?!

Fedde goo jeyaande e karamokooɓe Alyahuuda en wi'i: "Gomɗinee ka feññi ɗon, ndee Qur'aanaare Jippinaande e gomɗimɓe ɓen ka arannde ñallal, yeddon ɗum ka sakkitorde mayre; bela jo'o ɓe sikkitoray diina maɓɓe kan sabu yeddugol mon ngol ɓaawo nde gomɗinɗon, ɓe yiltitoo hiɓe wi'ia: ko kamɓe ɓuri men anndu Defte Alla Ɗen, ɓe yiltike e ɗum.

Ɓe wi'i kadi: "Wata on gomɗin jokkon si wanaa on jokkunooɗo diina mo'on". Maaku an Nulaaɗo: "Pellet, feewugol e goonga ngol, ko Peewal Alla ngal, wanaa kon ko wonɗon e mu'un e penaale". [Ko kulol fii] wata goɗɗo goo yeɗe e ɓural yeru ngal ngal yeɗaɗon, maa kulol wennjiroygol on ɗum ka Joomi mooɗon si on qirritike kon ko Jippinaa e maɓɓe. Maaku an Nulaaɗo: "Ɓural ngal ko Juuɗe Alla woni, Himoye Yeɗa ngal on Mo O Muuyi e jeyaaɓe Makko ɓen, ngal Ɓural heertinaa ki mofte ɗawa goɗɗe". Pellet, Alla ko Yaajuɗo Ɓural, Annduɗo on hannduɗo e Maggal.

Himo Hertinana Ɓural Makko ngal on Mo O Muuyi e Tagu Makko ngun: O Teddinira ontigi peewal e Annabaaku e noone e dokke. Alla ko Jom Ɓural Mawngal, ngal alaa hattoode.

No e yimɓe Defte ɓen, on mo halfiŋtaa jawdi ɗuuɗundi, on jonnitire ndi no timmiri; no e maɓɓe kadi, on mo halfiŋtaa jawdi seeɗa, on jonnitataa ma ndin si wanaa si dariɗaa ŋaŋŋanɗaa mo. Ɗum non, ko ɓe wi'irii sikke maɓɓe bonɗe: "Bakkaatu alanaa men e ñaamugol jawle Aarabeeɓe ɓen; sabu Alla Daginanii men ɗum", hiɓe taƴa nde fenaande takka e Alla hara hiɓe anndi fefindagol maɓɓe ngol.

Oo'o, huunde nde wanaa non aayordon nih, si ko woni, kala on hunnuɗo ahadi mu'un ndin e Alla: imoorde e gomɗingol Mo e Nulaaɓe Makko ɓen, o hunni ahadi makko ndin hakkunde makko e yimɓe ɓen o totti hoolaare, o huliri Alla jokkugol Yamirooje Makko woɗɗitoo Haɗaaɗi Makko; pellet, Alla no Yiɗi ɓen hulooɓe, O Yoɓitiroyayɓe ɗum ko ɓuri mawnude e mbarjaari.

Ɓen waɗtitirayɓe Wasiyee Alla -Mo O Wasiyoriɓe jokkugol kon ko O Jippini ka Deftere Makko O Nuliri ɗum Nulaaɓe Makko ɓen- e woondooje maɓɓe ɗe ɓe woondiri hunnugol ahadi Alla ndin; hiɓe waɗtitira ɗen woondooje e ngostiigu piiyon aduna famɗukoy, geɓal alaa ɓen e moƴƴere laakara, Alla Yeewtidoytaa e maɓɓe ko welata ɓe, O Ndaaroytaa ɓe ndaarɗe yurmeende Ñalnde Darngal, hino woodani ɓe lepte muusuɗe.

No e Alyahuuda en, ɓen waylirooɓe ɗemɗe maɓɓe ɗen jaŋtagol ko jeyaaka e Tawreetaare Jipporiinde nden ka Alla, fii no sikkiron ko Tawreeta ɓe woni e janngude, ɗum le jeyaaka e Tawreeta, si ko woni, ko penaale e fefinadaare maɓɓe e hoore Alla, hiɓe wi'a: "Ko men jaŋgata koo, ko ka Alla iwri", ɗum le wanaa ka Alla iwri, hiɓe taƴa penaale takka e Alla hara non hiɓe anndi penaale maɓɓe hoore Alla e Nulaaɓe Makko ɓen.

Haananaa neɗɗaŋke on nde Okkata mo Deftere Jipporiinde ka Makko, O Arsike on ganndal e fahmu, O Suɓora mo Annabaaku; refti on wi'ana yimɓe ɓen: "Laatee jeyaaɓe am ko woori Alla", si ko woni, yo o wi'u ɓe: "Laatee jannguɓe gollirooɓe ne'ira yimɓe ɓen, moƴƴia fiyakuuji maɓɓe; sabu ko jannginirton kon Deftere Jippinanaande yimɓe ɓe, e ko laatinoɗon hiɗon janngira hunnjoo fahma".

Haananaa mo kadi nde o yamirta on jogitorgol Malaa'ika en e Annabaaɓe ɓen reweteeɓe ko woori Alla. Hara daganto mo yamirgol on yeddugol Alla ɓaawo nde wonɗon jebbilaniiɓe mo?!

Jaŋto an Nulaaɗo, tuma nde Alla Nanngunoo ahadi teŋtinaandi ndin e Annabaaɓe ɓen, O Daalani ɓe: "Nami woo no mi Okkiri on Deftere nde mi Jippiŋta e mooɗon, e fahmu mo Mi Anndiŋta on, goɗɗo e mo'on yottii darja woo, refti Nulaaɗo ari on immorde e Am -on woni Muhammadu jom kisiyee-, goonginɗo nden Deftere e fahmu wonɗe ka mooɗon; ma on gomɗin ko o addi kon, wallitoɗon mo jokkon mo. E on qirritike ɗum onon Annabaaɓe, on ƴettii e ɗum ahadi Am Tiiɗundi ndin?". Ɓe jaabii: "Men qirritike ɗum". Alla Daali: "Seedanee ko'e mo'on e mofte mon, Min Miɗo Wondi e mo'on Jeyaaɗo e Seeditaniiɓe on".

Kala on ɗuurniiɗo ɓaawo ndin ahadi teŋtiniraandi seeditagol Alla e Nulaaɓe Makko ɓe; ko ɓen ɗon woni yaltuɓe e ɗoftaare Alla nden.

E ko woori Diina kan ka O Suɓanii jeyaaɓe Makko ɓen (Lislaamu on) woni ko ɓee yaltuɓe e ɗoftaare Alla nden ɗaɓɓata?! Hino woodani Mo jebbilaare kala tagu wongu ka kammuuli e ka leydi, e ɗoftaare -wano muumini en- maa waawneede -wano heeferɓe ɓen-, refti ko faade ka Makko Kaŋko Alla woni ruttorde tagu ngun denndaangal; Ñalnde Darngal fii hasbeede ñaawee.

Maaku an Nulaaɗo: "Men gomɗinii Alla Reweteeɗo, men ɗoftike Mo e kon ko O Yamiri men, men gomɗinii on wahyu jippinaaɗo e amen, e kon ko jippii e dow Ibraahiima e Ismaa'iila e Ishaaqa e Yaaquuba, e kon ko jippinaa e dow Annabaaɓe ɓen immorde e geɗalɓe Yaaquuba, e kon ko Muusaa e Iisaa e Annabaaɓe ɓen denndaangal okkaa immorde e Defte e Aayeeje Iwɗe ka Joomi maɓɓe. Men serndataa hakkunde maɓɓe gomɗingol yoga yedda yoga, menen ko men jebbilaniiɓe Alla Tan".

Kala ɗaɓɓuɗo diina goo ko woori Diina kan (diina lislaamu) ka Alla Welanaa mo; Alla Jaɓaŋtaa mo kan, on ɗon ka laakara, ko jeyaaɗo e hayruɓe naatooɓe yiite ɓen.

Hol no Alla Fewnirta yimɓe e gomɗingol Mo Kaŋko e Nulaaɗo Makko on; yedduɓe ɓaawo nde ɓe gomɗinnde Alla ɓe seeditoo wonnde kon ko Nulaaɗo Muhammadu jom kisiyee addi ko goonga, e wonnde ɓanngannduyeeji ɗin arii hiɗi goongina ɗum?! Alla Fewnataa e gomɗinal Makko ngal, ɓen yimɓe tooñooɓe suɓiiɓe majjere seli peewal.

Njoɓdi ɓen tooñooɓe suɓiiɓe mehre nden, ko no fawii ɓe kuddi Alla ndin e Malaa'ika en e yimɓe ɓe ɓe denndaangal; ɓen ko woɗɗinaaɓe raɗaaɓe e Yumeende Alla nden.

Ko ɓe luttooɓe ka yiite ɓe yaltataa, ɓe hayfinaŋtaake lepte magge, ɓe wonaali nennaŋteeɓe fii no ɓe tuubira ɓe ngaŋtinoo.

Si wanaa ɓen tuubuɓe ruttii ɓaawo keeferaaku maɓɓe e tooñe maɓɓe, ɓe moƴƴini golle maɓɓe ɗen; pellet, Alla ko Haforanoowo tuuboowo e jeyaaɓe Makko ɓen, Annduɗo ɓe.

Pellet, ɓen yedduɓe ɓaawo gomɗinal maɓɓe, ɓe duumii e keeferaaku haa ɓe maayi e mu'un, ɓe jaɓntaake tuubuubuyee tuma ɓe maayata; sabu haray laawike. Ko ɓen ɗon woni majjuɓe laawol foccingol jottinoowol ka Alla ngol.

Pellet, ɓen yedduɓe ɓe maayi e keeferaaku, hay gooto e maɓɓe jaɓaŋtaake emmbere leydi ndin tew kaŋŋe; hay si o soktorii ɗen kaŋŋe yaltugol ka yiite. Ɓen ɗon, hino woodani ɓe lepte muusuɗe, ɓe alaa wallooɓe Ñalnde Darngal ko no duñana ɓe lepte ɗen.

On heɓataa moƴƴere Onon juulbe e daraja haa nafqon ngalu mon mo faale mon woni e laawol Alla, kala ko nafqudon ko setta wolla ko heewi; Alla na anndi anniyaaji mon e golle mon, ma o yob gooto fof ko o golli ko.

Denndaangal e ñaameteeji laaɓuɗi ɗin laatino daginanaaɗi ɓiɗɓe Israa'iila ɓen, huunde harmaano ɓe e majji,si wanaa ko Yaaquuba harminannoo hoore-mun ado Jippineede Tawreeta, wanaa no Alyahuuda en aaƴorta wonnde kon ko harminanoo no wonno ka Tawreetaare. Maakan ɓee anAnnabiijo: "Addee Tawreetaare nden janngon nde si on laatike goonguɓe e kon ko nodditiɗon", ɓe mugaa ɓe addaani nde. Ɗum ko misal tinndinayngal e fefindaare Alyahuuda en e hoore Tawreetaare nden, wayla ko woni ko e nder hende.

Kala fefindiiɗo fenaande e dow Alla ɓaawo nde hujja on feeñude wonnde ko Annadabi Yaaquuba harminannoo hoore-mun kon wanaa Alla Harmini ɗum e makko; ɓen ɗon, ko ɓen woni tooñirɓe ko'e mun tertagol goonga ɓaawo nde hujja on feeñi.

Maaku an Annabiijo: Alla goongii e ko O humpiti kon gaay e Annabi Yaaquuba,(yo kisal won e mum) e kala ko O jippini O sari'ini. Jokkee diina Annabi Ibraahiima kan, gomɗii o woniino ooñiinooɗo gaa e diinaaji ɗin fow si wanaa diina Lislaamu, o meeɗaali kafidude( renndinde) Alla e goɗɗum goo abadan.

Pellet, aranndu e Suudu darnanaandu yimɓe ɓen denngaangal fii ka Alla Rewee, ko Suudu Alla hormaandu ndun Makka; ko ndu Suudu barkinaandu heewndu nafooje diina e aduna, hino e mayru peewal denndaangal Winndere nden.

No e nduu Suudu, Maandeeji ɓannginɗi ɓural e teddungal mayru; wano dewe hajju ɗen, e hayre ɓaleere nde Annabi Ibraahiima darinoo e mun fewndo e faandinoo ɓamtugol mahdi Kaaba ndin, no e majje kadi, wonnde kala naatuɗo e mayru, kulol ɓooroto e makko; o heɓataa lorra woo. No waɗɗanii Alla e dow yimɓe ɓen, faandorgol nduu suudu fii dewe hajju ɗen, wonannde on kattanɗo hewtugol e mayru. Kala yedduɗo farilla hajju on, pellet, Alla ko Yonndiniiɗo e geddo Yonndinii e denndaanga winndere nde.

Maaku an Nulaaɗo: "Hey mon yimɓe Defte, immorde e Alyahuuda e Annasaara en, e ko yeddanton Ɓanngannduyeeji tinndinooje goongugol Annabiijo on Muhammadu jom kisiyee; wano ɓanngannduyeeji ɗi Tawreeta e Linnjiila Addi?! Alla ko Ƴellitiiɗo e golle mon ɗee, Seediiɗo ɗe, O Yoɓitoyay on e ɗum.

Maaku an Nulaaɗo: "Hey mon yimɓe Defte; immorde e Alyahuuda e Annasaara, e ko falotoɗon e Diina Alla kan, on gomɗinɗo Mo e yimɓe ɓen? Hiɗon ɗaɓɓana Diina Alla kan ooñagol e goonga faade e mehre, ɗaɓɓanon yimɓe makka majjugol e goonga; hara ko on seediiɓe wonnde kaa Diina ko goonga tabiŋtinaaka e defte mo'on! Alla non Welsindaaki e kon ko huuwoton e e yeddugol Mo e faddagol laawol Makko. O Yoɓitoyay on e ɗum.

Ko onon yo gomɗimɓe Alla e Nulaaɗo Makko on, si on ɗoftike fedde e yimɓe Defte ɓen ummaade e Alyahuuda e Annasaara e ko ɓe wowlata, jaɓuɗon miijooji maɓɓe e ko ɓe aaƴotoo; ɓe ruttay on e keeferaaku ɓaawo gomɗinal mon, ɗum non, ko sabu haasidaaku maɓɓe e majjugol ɓe goonga kan.

E ko honno yeddirton Alla ɓaawo nde gomɗinɗon Mo, nde tawnoo hiɗon jogitii sabu ɓurɗo mawnude e ko tabitton ka gomɗinal?! Hiɗon jannganeede Aayeeje Alla ɗen, Nulaaɗo Makko on Muhammadu on mo jam e kisiyee woni e mun on no ɓannginana on ɗe, kala on jogitorɗo Deftere Alla nden e sunna Nulaaɗo Makko on; gomɗii Alla Fewnirii Mo faade e laawol foccii ngol, ngol oonyaaki.

Ko onon yogomɗimɓe Alla e Nulaaɗo Makko on, huliree Alla no O Haaniri non hulireede; ko ɗum woni ɗoftagol Yamirooje Makko ɗen woɗɗitoon haɗaaɗi Makko ɗin, jaarna Mo e Neemaaji Makko ɗin, jogitoɗon Diina Makko kan haa maayde nden ara on e hoore ɗum.

Jogitee onon Muumini en, Deftere nden e sunna on, wata on faggito ko senndata on. Annditee Neema Alla on e dow mooɗon tuma laatinoɗon anyandiruɓe ado lislaamu on, hara o warindira e famdude e sababuuji , O renndini ɓerɗe mon ɗen e lislaamu on, wontirɗon Ɓural Makko ngal siɗɗuɓe ka diina, yurmondirɓe wallindirooɓe. On laatinoke ko adii ɗum, ɓaɗtornooɓe naatugol yiite ngen fii keeferaaku mo'on; Alla Daɗndiri mon-nge sabu lislaamu on, O Fewniri on liimaanu. Ko wano Alla Ɓannginirani on nii ɗum ɗoo, O Ɓannginiraŋta on kon ko moƴƴinanta- on fiyakuuji mo'on aduna e laakara; fii yo on feewir e laawol peewal ngol, jokkon laawol foccii ngol ngol.

Yo laato e mo'on onon Muumini en, jamaa noddayɗo e kala moƴƴere nden Alla Yiɗi, ɓe yamira moƴƴere nde sari'a on tinndi e mu'un haqqille ɗen jaɓi, ɓe haɗa kadi ko añinii kon ko sari'a on haɗi haqqille ɗen ñiddini fii mun. Ɓen siforiiɓe ɗin sifaaji, ko ɓen woni yimɓe malaaɓe ɓen aduna e laakara.

Onon Muumini en, wata on laato wa yimɓe Defte ɓen sertuɓe ɓe wonti pelle e dente, ɓe luutondiri e diina maɓɓe kan ɓaawo nde Aayeeje ɓannguɗe ɗen ari e maɓɓe immorde ka Alla Toowuɗo On. Ɓen jaŋtaaɓe ɗon, no woodani ɓe lepte saɗtuɗe immorde ka Alla.

Ɗee lepte saɗtuɗe ɗoo heɓayɓe ñalnde darngal tuma geece yimɓe gomɗinal ɓen ranwoyta welo-welo e maloore, geece heeferɓe ɓen ɓawlira suno e aannde. Si ko ɓen ɓe geece mu'un ɓawli nden ñalnde mawnde, ɓe feliroyte wi'eede: "E on yeddu bajjinɗingol Alla ngol e Ahadi Makko ndin, ndi O Ahodi e mo'on wonnde on kafidataa Mo hay e huunde, jaɓuɗon ɗum qirritiɗon?! Awa meeɗee lepte Alla ɗen ɗe O Hebilani on sabu keeferaaku mo'on.

Si tawii ko ɓen ɓe geece mu'un rawni, werde maɓɓe nden ko neemaaji Aljanna, duumotooɓe ton poomaa; e neemaaji ɗi lannataa.

Ɗee ɗoo Aayeeje yowitiiɗe e Fodoore Alla e Kammbol Makko; Meɗen Janngirane ɗe an Annabiijo, e hoore goonga ka humpitugol, e ka nunɗugol ka ñaawooje. Alla wonaali Faandaniiɗo hay gooto e winndere nden tooñe, si ko woni, O Leptirtaa goɗɗo si wanaa ko o faggitii kon.

Ko Alla Toowuɗo On tan Woodani Laamateeri kala ko woni ka kammuuli e ka leydi, ko faade ka Makko woni ruttorde fiyaake kala tegeefo Makko; O Yoɓita kala maɓɓe emmbere ko o hanndi kon.

Onon mofte Muhammadu jom kisiyee on, on laatorii mofte ɓurɗe moƴƴude ɗe Alla Yaltinani yimɓe ɓen: sabu gomɗinal mon e golle mon, e tawi hiɗon yimɓe ɓen nafoore; hiɗon yamira moƴƴere nde sari'a on tinndini e mun haqqille ɗen jaɓi ɗum, hiɗon haɗa kadi ko añinii kon ko sari'a on haɗi haqqille ɗen ñiddini fii mun, hiɗon gomɗiniri kadi Alla gomɗinal feeñungal e golle mo'on. Hara nun yimɓe Defte ɓen gomɗinayno Muhammadu (yo o his), ɗum laatotono moƴƴere woannde ɓe aduna e laakara. Hino e yimɓe Defte ɓen non, gomɗimɓe -seeɗaaɓe- ko Muhammadu jom kisiyee on addi kon, kono ko ɓuri ɗuuɗude kon e maɓɓe ko yaltuɓe e Diina Alla kan e Sari'a Makko on.

No ngayngu maɓɓe foti e waade, ɓe lorrirtaa on ka diina mo'on maa e woŋkiiji mo'on -onon Muumini en-, si wanaa lorra ɗemɗe maɓɓe : wano tukkugol on e diina, maa jalkitugol on, ekn. Si ɓe haɓii on, ɓe dogay on ko ɓe foolaaɓe, ɓe walletaake e hoore mon abadan.

Koyeera e jaasere waɗaama e Alyahuuda en nokku kala ka ɓe tawaa, ɓe hisirtaa si wanaa kisal Alla ngal maa kisal yimɓe ɓen. Ɓe ruttodi e tikkere immorde ka Alla, ɓe huuɓiŋtiniraa waasere : ɗum le, ko sabu ko ɓe yeddi kon Aayeeje Alla ɗen, ɓe wari Annabaaɓe Makko ɓen e hoore tooñee, e ko tawi kon ɓe yeddii ɓe yawti keeri Alla ɗin.

Yimɓe Defte ɓen woaaali fotayɓe e fiyakuuji maɓɓe; si ko woni, no e maɓɓe fedde ñiiɓunde e Diina Alla kan : hiɓe jannga Aayeeje Alla ɗen e saa'iiji jemma ko ɓe juulooɓe; nden fedde woodano ado Nuleede Muhammadu on mo jam e kisiyee woni e mun, tawanooɓe e maɓɓe ɓen fow naatuna Islaam.

Hiɓe gomɗinira Alla e Ñalaande Sakkitiinde nden gomɗinal fellitungal, hiɓe yamira ko moƴƴi ɓe haɗa ko añinii, ɓe yawnoo e huuwugol moƴƴereeji fewndo ka dewe saatii; ɓen jeyaaɓe Alla siforɓe ɗin sifaaji, ko ɓen woni ɓe anniyeeji mun e golle mun moƴƴi.

Kala ko ɓe ɗon huuwi e moƴƴere; ɗuuɗi famɗi ɓe yeebantaake baraaji mun, ɓe ɗuytaŋtaake njoɓdi mun. Alla ko Annduɗo ɓen hulooɓe Mo woɗɗitoo Haɗaaɗi Makko ɗin, hay huunde suuɗaaki Mo e golle maɓɓe ɗen, O Yoɓitoyayɓe ɗum.

Pellet, ɓen yedduɓe Alla e Nulaaɗo Makko on, jawle maɓɓe ɗen e ɓiɗɓe maɓɓe ɓen duñaŋtaaɓe huunde e lepte Alla ɗen; si ko woni, ɗum ko lepte e mette ɓeydata ɓe. Ko ɓen ɗon woni yimɓe yiite ngen duumotooɓe e nder magge.

Sifa ko ɓee heeferaaɓe nafqata kon ka hoore leydi, e ko habbitotoo kon baraaji ɗum; no wa'i wa henndu tiiɗundu, ndun hawra e soñateeri yimɓe tooñirɓe ko'e mu'un geddi ekn, ndu bonna ndun remuru maɓɓe ndu ɓe jortornoo moƴƴere ɗuuɗunde. Ko wano ndun henndu bonnirta non soñateeri maɓɓe ndin ɓe roŋka nafitorde ndi, ko non kadi keeferaaku ngun bonnitirta baraaji golle maɓɓe ɗen ɗe ɓe jortorta. Alla non Tooñaali ɓe e ɗum, si ko woni, ko kamɓe tooñiri ko'e maɓɓe ɗen yeddugol Mo fenna Annabaaɓe Makko ɓen.

Ko onon yo gomɗimɓe Alla e Nulaaɗo Makko On, wata on jogito weldiiɓe gunndodeteeɓe ko woori gomɗimɓe ɓen; hara hiɗon ƴelliŋtina ɓen gunndooji mo'n, ɓen non raɓɓintinataako e ɗaɓɓugol lorra mo'on e bonugol fiyakuuji mo'on. Hiɓe yeloo nde lorra tiiɗuɗo yanata e mo'on. Gomɗii ngayngu ngun feeñirii ka ɗemɗe maɓɓe tukkugol on ka diina mo'on waddindira on weeɓita gunndooji mo'on. Ko ko ɓerɗe maɓɓe ɗen soomi kon e ngayngu ɓuri mawnude. Gomɗii Men Ɓannginanii on -onon muumini en-, ɗii burhaanuuji ɓannginɗi moƴƴere mon aduna e laakara, si on laatike haqqilooɓe e ko Joomi mo'on Jippini e dow mon.

Onon ɓee, yo gomɗimɓe, hiɗon yiɗi ɓee ɗaa, hiɗon jortori ɓe kadi meƴƴere, kamɓe non ɓe yiɗaa on, ɓe jortoraaki on kadi moƴƴere. Si ko woni, hiɓe ayri on; onon le hiɗon gomɗini Defte ɗen fow, haa e Defte maɓɓe ɗen, kamɓe non ɓe gomɗinaa Deftere Jippinaande nden e Annabaajo mon on. Si ɓe fottii e mon, ɓe wi'ana on: "Men goonginii", si ɓe weddodii, ɓe ŋatirana on kolli maɓɓe ngayngu gelondiral mon e teddungal lislaamu mon, kamɓe le, ko ɓe jaasuɓe. Maakaŋɓe an Annabiijo: "Heddodee e tikkere mon haa maayon". Pellet, Alla ko Annduɗo ko woni e ɓernde immorde e gomɗinal e keeferaaku, moƴƴere e bone.

Si on dañii moƴƴere faabeede e ayɓe ɓen, onon muumini en, maa ɓeydaari e jawdi maa ɓiɗɓe; ɓe sunura ɗum, Si on dañii musiiba fooleede maa ɗuytaare e jawle maa ɓiɗɓe, ɓe weltora ɗum ɓe jalkita on. Si on muññorii ɗoftagol Yamirooje Alla ɗen e hodduruyee Makko on, huluɗon Tikkere Makko nden e dow mon; pewje maɓɓe e bone maɓɓe hewtataa on. Pellet, Alla ko Annduɗo golle maɓɓe Huuɓituɗo pewje maɓɓe ɗen, O Ruttoyay ɓe ko ɓe sooyuɓe.

Janto an Annabiijo, tuma yaltunoɗaa bimmbi law Madiina fii haɓoygol sirkooɓe ɓen uhud, hiɗa joɗɗina gomɗimɓe ɓen e nokku haɓirde maɓɓe, ɓannginan-ɗaa gooto kala nokku mu'un. Alla ko Nanoowo haala-mon, Annduɗo golle-mon.

Jaŋtii an Annabiijo, ko heɓunoo feddeeji ɗiɗi jeyaaɗi e gomɗimɓe ɓen; immorde e Banii Salamah e Banii Haaritha, fewndo ɓe lo'unoo, ɓe huli yiltagol ka hare tuma nde naafiqi en ruttinoo. Ko Allah woni Walloowo ɓen ɗon sabu tabitugol ngol e hare nden firta ko ɓe himmirnoo yiltagol. Ko Alla Tan woni gomɗimɓe ɓen haani tuuginorde e fiyakuuji maɓɓe ɗin.

Gomɗii Alla Wallii on e dow sirkooɓe ɓen ka hare Badri, tawi ko on waawaaɓe; sabu famɗugol limoore e joga. Hulee Alla, belajo'o, on yettay Neemaaji Makko ɗin e dow mo'on.

Jaŋto an Annabiijo, tuma wi'annoɗaa gomɗimɓe ɓen ka hare Badri, hiɗa felliŋtinana ɓe ko ɓe nani e fii ɓeyditireede ko haɓa sirkooɓe ɓen: "Enee, yonaŋtaa on nde Alla Wallirta on Malaa'ikaaɓe guluuje tato jippiŋtiiɓe immorde ka Makko Kaŋko Seniiɗo On, ko wallitoo on e ndee hare?!".

Pellet [ko non woniri], ɗum yonay on. No woodani on wewlere Ballal Alla goo : si on muññike e hare nden, on hulii Alla, on ɓeydiraama woɗɓe goo ardooɓe yaccaare ko wallitoo on e ayɓe ɓen; ɗum fow si waɗii, haray Joomi mon Walliray on guluuje jowi Malaa'ika maandiraaɓe e mun kañum e pucci mun; maandeeji feeñuɗi.

Alla Waɗiraali ngal Ballal e ɓeydireede Malaa'ika si wanaa welo-welo wonannde on, e no ɓerɗe mon ɗeeƴira e ɗum. Si wanaa ɗum, ballal ngal tigiri newortaako ɗin sabuuji feeñuɗi ɗon tun, si ko woni, Ballal ngal tigiri ko ka Alla Iwrata, on Fooluɗo mo fooletaake, Ñeeñuɗo e Kuuɗe mun.

Ngal Ballal ngal ɓe walliraa ka hare Badri, Alla Faandorike ngal halkugol fedde e ɓen yedduɓe hare nden, O Hoyna fedde goo, O Tikkinira ɓe fooleede nden; ɓe ruttoroo koyeera e jaasera.

Tuma nde Nulaaɗo on huɗirnoo mawbe sirkooɓe ɓen halakuyee ɓaawo fooleede ɓe "Uhud", Alla Daalani mo: "Huunde alanaa ma e fiyaake maɓɓe on, ɗum ko juuɗe Alla woni, muñño haa ñalnde Alla Ñaawata hakkunde mo'on, maa O Hawrinndina ɓe e tuubugol silma, maa ɓe duumoo e keeferaaku O Leptira ɓe ɗum; pellet, kamɓe ko ɓe tooñooɓe hannduɓe e lepte".

Ko Alla Woodani Tagugol Toppitoo kala ko woni ka kammuuli e ka leydi. Himo Haforana junuubi on mo O Muuyi e jeyaaɓe Makko ɓen, e yurmeende Makko, O leptira on mo O Muuyi Nunɗal Makko. Alla ko Haforanoowo kala tuubuɗo e jeyaaɓe Makko ɓen, yurmotooɗo ɓe.

Ko onon yo gomɗimɓe Alla e Nulaaɗo Makko on, woɗɗitee e ribaa -cowalle sowaaɗi e hoore ko*e jawle mon nyamlirton kunwano majjunooɓe gerdaynoo. Hulee Alla, ɗoftoɗon Yamirooje Makko, woɗɗitoɗon haɗaaɗi Makko; belajo'o, on dañan ko ɗaɓɓoton kon e moƴƴere aduna e laakara.

Waɗee hakkunde mon e ngen yiite maranaange heeferɓe ɓen, daɗndal. Ɗum non, ko gollugol ko moƴƴi, tertoo ko harmi.

Ɗoftoree Alla e Nulaaɗo Makko on e jokkugol Yamiraaɗi ɗin, woɗɗitoo haɗaaɗi ɗin. Beajo'o, on dañan Yumeede aduna e laakara.

Yaccee adondiron e huuwugol moƴƴere, ɓaɗtora Alla noone kala e dewe, fii no dañiron haforanal mawngal immorde ka Alla, naaton Aljanna yaññiraaɗo yannji kammuuli ɗin e leydi ndin, Alla Hebilanii ɗum gomɗuɓe ɓen e jeyaaɓe Makko ɓen,

Gomɗuɓe ɓen: ko ɓen sakkorayɓe jawle maɓɓe ɗen e laawol Alla ; ka neweende e ka saɗteende, e ɓen haɗitotooɓe e yottagol tuma ɓe tikke ; tawa le hiɓe taaqanaa ɗum, e ɓen yawtanooɓe tooñuɓe ɓe. Alla no Yiɗi moƴƴinooɓe siforɓe ɓen ɗin sifaaji.

Ko ɓen woni, ɓen ɓe tawta si ɓe waɗii bakkaatu mawɗo, maa ɓe ɗuytirii maloore woŋkiiji maɓɓe ɗin faggitagol bakkaatu-mawɗi, ɓe janŋtoo Innde Alla Toowuɗo On, ɓe anndita kammbaa Makko on e Fodoore Makko nden, ɓe ɗaɓɓira Joomi maɓɓe on surrugol gunndooji e bakkatuuji maɓɓe, e daɗndugol ɓe nangitireede ɗum ; tawde alaa haforoowo junuubi si wanaa Alla Kaŋko Tan. Hara non ɓe deppitoraaki ñiiɓugol e junuubi ɗin, tawa hiɓe anndi ɗum, hiɓe anndi kadi Alla ko Haforoowo junuubi ɗin denndanngal.

Ɓen siforiiɓe ɗin sifaaji yettiniiɗi, e jikkuuji moƴƴi, mbarjaari maɓɓe ndin, ko nde Alla Surrata junubaaji maɓɓe, O Yawtana ɓe. Hino woodani ɓe ka laakara, Aljannaaji ɗi canɗi ilata senngo ley kuɓeeje mun, ñiiɓirooɓe ton poomaa. Moƴƴii njoɓdi ɓen gollirooɓe ɗoftaare Alla.

Nde Alla Jarribornoo gomɗimɓe ɓen kon ko heɓunoo ɓe ñalnde uhud, O Muññirtiniɓe Daalol Makko : "Gomɗii Sunnaaji Alla ɗin ka halkugol heeferɓe ɓen yawtii ado mon", O Waɗani gomɗimɓe ɓen battane moƴƴe ɓaawo jarribeede ɓe, [O Daali]: "Yehee ka leydi ndaaron taskoɗon hol no battane yeddunooɓe Alla e Nulaaɗo Makko on wa'i?", cuuɗi wirnike, laamu maɓɓe iwii.

Ndee Qur'aanaare Teddunde, ko Ɓannginaynde goonga Reŋtina e meere, fii yimɓe ɓen fow. Kadi, ko nde Tinndinaynde e peewal e yila gomɗimɓe ɓen ; tawde ko kamɓe nafitori peewal Mayre.

Wata on lo'ino onon muumini en, wata on sunor ko heɓi on ñande uhud ; ɗum haananaa on, ko on woni toowirɓe liimanaaku mo'on, toowirɓe kadi Ballal Alla ɓaawo nde jortorɗon Mo, si on laatike gomɗimɓe Alla e kon ko O Fodi jeyaamɓe Makko gomɗuɓe ɓen.

Si barme heɓii on, onon muumini en, maa wareede ñalnde uhud, gomɗii barme e wareede heɓiino heeferɓe ɓen sugu mun. Alla no Yiltindira ñalɗe ɗen hakkunde yimɓe ɓen : gomɗimɓe e heeferɓe ; no O Muuyiri -wallirde e foolneede-, O Waɗira ɗum Ñeeñal Makko. Ɗum non, ko fii no gomɗimɓe ɓen feeñira hakkunde naafiqi en, e no Alla Teddinira on Mo O Muuyi, sahinɗinegol fii Makko. Alla Yiɗaa tooñirooɓe ɓen ko'e mun accugol jihaadi fii Makko.

No e ɗin Hikmaaji [Alla], laɓɓinirgol gomɗimɓe ɓen e bakkaatu, sortaɓe e ɗate naafiqi en, e nde O Halkata heeferɓe ɓe O Momta fii maɓɓe.

Kaa on sikku, onon muumini en, wonnde on naatiay Aljanna on jarriboraaka muñal feññinay-ngal tiɗniiɓe mon e laawol Alla ngol tigiri e ɓen muññiiɓe e albalaa'u yanoowo e maɓɓe?

Gomɗii on laatike -muumini en- hiɗon yeloo hawrugol e heeferɓe ɓen fii sahidinon e laawol Alla ; wano musiɗɓe mo'on heɓunoo ɗum ñalnde badri, on yelike ɗum ado on hawrude e sabuuji maayde nden e saɗteende mayre. E hino non gomɗii on yi'ii yela mon on ñalnde uhud hiɗon ndaara.

Muhammdu wonaali si wanaa jeyaaɗo e ɓen Annabaaɗe adinooɓe mo ; faatiiɓe maa waraaɓe. E si on faatike maa o waraama, on murtay e diina mon kan selon jihaadi ?! Kala non murtuɗo e diina mun kan o lorrataa Alla hay huunde ; tawde ko Kaŋko Woni Tiiɗuɗo Fooluɗo. Murtuɗo ko hoore-mun lorrirta hayrere aduna e laakara. Arma ka Alla Yoɓitira jaarnooɓe Mo ɓen ko ɓuri moƴƴude e njoɓdi ; sabu tabitugol ɓe ngol ka Diina Makko e tiiɗnorgol fii laawol Makko.

Laatanaaki wonkii nde maayata si wanaa e hoddira Alla ; ɗum non ko nde lajal ngal Alla Winndani mo ngal timmi, ɗuytotaako ɓeydotaako ɗon. Kala on faandoriiɗo golle mon ɗen njoɓdi aduna, Men Okkay mo yeru ɗum, o heɓataa non geɓal ka laakara. Kala kadi faandoriiɗo golle mun ɗen mbarjaari laakara, Men Okkay njoɓdi mayre, arma Men Yoɓa ɓen jaarnooɓe Joomi maɓɓe njoɓdi mawndi.

Heewii e Annabaaɓe Alla haɓiduɓe wonndude e jamaaji maɓɓe ɗuuɗuɓe, ɓe lo'inanooki ka jihaadi fii kon ko heɓunooɓe immorde e wareede barminee fii laawol Alla ngol, ɓe lo'inanooki kadi e haɓugol ayɓe ɓen, ɓe jebbilanaaki ɓen ; si ko woni, ɓe muññi ɓe tabiti. Alla no Yiɗi muññotooɓe ɓen saɗteendeeji heɓotoonde nden fii laawol Makko.

Konngol ɓee muññiiɓe laatanooki tuma nde albalaa'u on jippinoo e maɓɓe, si wanaa ɓe wi'u: "Joomi amen, haforan men goopi amen, yawtanaa men keeri amen e fiyaake amen, ñiiɓinaa teppe amen e hawrugol e ayɓe amen, wallaa men e dow yimɓe yedduɓe Ma ɓen".

Alla Okkiriɓe marjaari aduna ndin wallirgol ɓe foolugol, O Okkiriɓe moƴƴere mbarjaari laakara ndin Weltanagol ɓe, e neeminireede ñiiɓugol ka Aljannaaji. Alla no Yiɗi moƴƴinooɓe ɓen ka dewe maɓɓe e ka gollodal maɓɓe.

Kon on yo gomɗimɓe Alla e Nulaaɗo Makko on, si on ɗoftike ɓen yedduɓe immorde e Alyahuuda e Annasaara e ɓen sirkooɓe ; e kon ko ɓe yamirta on e majjere, ɓe ruttay on ɓaawo gomɗinal mon e keeferaku mon aranu, woŋton hayruɓe aduna e laakara.

Ɓee heeferɓe wallataa on si on ɗoftike ɓe, si ko woni, ko Alla woni Walloowo on e ayɓe mo'on, ɗoftee Mo, ko Kaŋko woni Seniiɗo ɓurɗo moƴƴude e wallooɓe, o hatonjiŋtaa e gooto ɓaawo Makko.

Arma Men Bugoo e ɓerɗe ɓen yedduɓe, kulol tiiɗungol, haa tawa ɓe haɗtanaaka tabitugol ka hare ; ɗum non, ka sabu kafidugol maɓɓe ngol Alla e reweteeɗi maɓɓe ɗin ɗi Alla Jippinanaali ɓe e fii majji hujja. Jaaƴorde maɓɓe nden non ka laakara, ko ka yiite, nge bonii jaaƴorde ɓen tooñooɓe.

Gomɗii Alla Hunnanii on ko O Fodunoo on wallitagol on e ayɓe mo'on ñalnde uhud, tuma waraynoɗon ɓe e Duŋayee Alla, haa nde cooynaɗon lo'uɗon e tabitugol e ko Nulaaɗo on yamiri on e muuɗun; lurruɗon hakkunde heddagol e nokkeeli mon maa yahugol mooɓa dammi; yedduɗon Nulaaɗo on e ko o yamiri on heddagol ka nokkeeli mon no woniri woo. No e mon ɓen faalaaɓe dammi aduna ; ɓe yahunoo fii majji, no e mon kadi ɓen faalaaɓe mbarjaari laakara ; ko ɓen heddinoo ka yamiraa ɗon ɓe ɗoftii Nulaaɗo on. Refti non Alla Yiiliri on e maɓɓe haa ɓe fooli on ; no O Ndaarndora on, O Senndindira hakkunde gomɗinɗo muññii on e on lo'uɗo ooñii. Gomɗii Alla hoybina-nii on kon ko faggitiɗon e lunndagol yamiroore Nulaaɗo on. Alla ko Jom Ɓural Mawngal e dow gomɗimɓe ɓen ; tawde O Fewniriiɓe gomɗinal, O Yaafiimo ɓe goopi maɓɓe, O Yeɗiɓe mbarjaari tiɗnaare maɓɓe.

Jaŋtee onon muumini en, tuma nde dogaynoɗon woɗɗitoo ka leydi ñalnde uhud, ɓaawo nde waawaɗon sabu yeddugol Nulaaɗo on, gooto e mo'on alaano ndaarude oya. Nulaaɗo on no noddira on ɓaawo mon hakkunde sirkooɓe ɓen himo wi': "Aree e am jeyaaɓe Alla, Aree e am". Alla Yoɓitiri on e ɗum ɓiɗteende sabu kon ko ballal ngal fuutori on e ko wareede Nulaaɗo on saakitii kon e mon. O Jippiniri ɗum e mon fii wata on suno e ko ballal ngal fuuutorii on maa ko barme e maayireede heɓi on ɓaawo nde annduɗon Nulaaɗo on maayaali tawde ɗum ɓuɓɓinno ɓerɗe mo'on. Alla no ko Humpitiiɗo kala golle mo'on, hay huunde e fiyakuuji mo'on e golle mo'on suuɗaaki Mo.

Hooti Alla Jippinani on ɓaawo ɓiɗteende nden hoolaare e deeƴere, ɗum waɗi fedde goo e mo'on (ɓen woni hooliiɓe fodoore Alla nden), hino suddiree ŋoŋre sabu ko ɓerɗe maɓɓe ɗen ɓuuɓi kon deeƴi. Nde fedde kan, ɓe heɓaano hoolaare e ŋoŋre ; ko ɓen woni naafiqi en, himmirnooɓe tun no hisira, ɓen woni e annde e kulol, hiɓe sikka Alla sikke ɓonɗe : wonde O Faabotaako Nulaaɗo Makko on O Wallataa jeyaaɓe Makko ɓen ; wano yimɓe majjuɓe sikkiraynoo. Ɓen naafiqiiɓe no wi'ira majjere maɓɓe : "Men alaa miijo e fiii yaltugol ngol ka hare, si meɗen marunoo miijo men yaltataa". Jaabo ɓe maakanaaɓe an Nulaaɗo : "Fiyaake ɗen fow ko Alla woodani, ko Kaŋko woni ko Eɓɓata ko O Muuyi, O Ñaawira no O Yiɗiri, ko Kaŋko kadi Muuyi yaltugol mon ngol". Ɓee naafiqiiɓe non hino hulirani pittaali mu'un sikkitagol sikke bonɗe ko ɓe feññinaŋtaa ma, hiɓe wi'ia: "Hara nun meɗen joginoo miijo e fii ngol yaltugol, men waretanooke e ndee nokkuure". Maakanɓe jaaboɗaa an Annabiijo : "Hay si tawiino hiɗon ka cuuɗi mo'on ko on woɗɗitiiɓe hare nden e maayde nden, ɓen ɓe Alla Winndani maayde nden e mo'on yaltayno ka ɓe muuyanaa ɗon maayde". Alla no Muuyiraali ɗum si wanaa fii jarribagol kon ko woni ka ɓerɗe mo'on immorde e annuyeeje e faandaareeji, O senndindira gomɗimɓe e naafiqiiɓe. Alla ko Annduɗo kon ko woni e ɓerɗe jeyaaɓe Makko ɓen, huunde suuɗaaki Mo e ɗum.

Pellet, ɓen foolanooɓe e mo'on, onon wonndiiɓe Muhammadu (yo o his), ñalnde konu sirkooɓe ɓen fottidunoo e konu juulɓe ɓen, anndu ko seytaane fergitiniɓe e ɗum sabu yoga e ko ɓe faggitori e geddi. Gomɗii non Alla Yaafanike ɓe ; O Nanngitirtaaɓe ɗum sabu Ɓural e Yurmeende Makko, pellet, Alla ko Yaafaŋtooɗo tuuboowo, Muññiiɗo Mo Hawjirtaa leptugol.

Ko onon yo gomɗimɓe Alla e Nulaaɗo Makko on, wata on wa'u wa heereɓe ɓen ka naafiqiiɓe, hiɓe wi'ana siɗɓe maɓɓe ɓen : "Si ɓen setike ɗaɓɓere arsike, maa ɓe laatii haɓooɓe ; ɓe maayi maa ɓe waraa, hara nun hiɓe ka amen ɓe roŋki yaltude e hare nden, ɓe maayataano maa ɓe waree. Alla no Waɗii nden fiɓnde ɗon ka ɓerɗe maɓɓe fii no ɓe ɓeydora nimse e suno. Ko Alla Tan woni Wuurniroowo Wara e Muuyɗe Makko ; roŋkugol yahde ka hare haɗataa Muuyɗe Makko ɗen. Alla ko Reŋtuɗo kon ko golloton, huunde suuɗaaki Mo e ɗum, O Yoɓitoyay on ɗum.

Hay si tawii non on waraama e fii laawol diina Alla maa on maayii onon muumini en, ma Alla Haforan on haforanal mawngal, O Yurmee on yurmeende yaajunde immorde ka Makko ; ko ɗum ɓuri mooƴude oo aduna e ko mooɓetee e makko immorde e neemaaji lannoayɗi.

Noone woo no maayirɗon maa wariraɗon, pellet, ko faade ka Alla tan woni ruttorde mon nden on denndaangal.

Ko sabu yurmeende mawnde immornde ka Alla, woni ko jikku maaɗa on newori e wonndiiɓe maa ɓen an Annabiijo, si a laatino saɗta feere yoora ɓerndeejo, ɓe seedayno e maaɗa. Yaafoɓe e ko ɓe raɓɓindinii e maaɗa, toranoɗaa ɓe haforaneede, diisinoɗaa ɓe e kala ko hanndi e diisineede. Si a fiɓii annuyee e fiyaake ɓaawo diisinaade, gollu ɗum fawoɗaa e Alla, pellet, Alla no Yiɗi ɓen fawotooɓe e Makko, O Hawrindina ɓe O Semmbina ɓe.

Si Alla Wallirii on Ballal Makko ngal hay e gooto foolataa on ; hay si yimɓe leydi ndin hawrii e on, si O Acii ɗon kadi wallogol on alah caggal mum, ballal ko ko Kanko tano Jogitii. Ko e Alla woni ko gomɗimɓe ɓen haani tuuginaade ; wanaa e goɗɗo goo ko woori Mo.

Laatanaaki Annabaajo woo nde o hodata o ƴetta seeɗa e konhoyri ko wanaa kon ko Alla Hertinani mo. Kala non hoduɗo e mooɗon o ƴetti seeɗa e konhoyri ndin, o leptiroyte wirtere Ñalnde Darngal, o aroya himo ronndii kon ko o ƴetunoo yeeso tagoore nden ; hooti woŋkii kala jonnitee njoɓdi kon ko ki faggiti hara ko no timmiri, kamɓe ɓe tooñetaake ɓe ɓeydanee bakkaatu maa ɓe ɗuytanee moƴƴere maɓɓe.

On jokkuno welayee Alla on o gomɗini o golli golle moƴƴe, wa'ataa wa on yedduɗo Alla o golli golle bonɗe o ruttodi e tikkere mawnde immornde ka Alla kadi werde makko nden ko jahannama, nge bonii ruttorde e ñiiɓirde.

Kamɓe ko ɓe ɓurduɓe darja ka Alla aduna e laakara, Alla ko Reenuɗo kon ko ɓe gollata, hay e huunde suuɗaaki Mo e ɗum, O Yoɓitoyay kala e golle mun.

Gomɗii Alla Neeminii e muumini en O Moƴƴii e maɓɓe tuma nde O Imminnoo e maɓɓe nulaaɗo jeyaaɗo e maɓɓe, himo janngana ɓe Qur'aanaare nden, himo laɓɓina ɓe e sirku e jikkuuji bonɗi, himo anndina ɓe Qur'aana e sunna ; gomɗii ɓe laatinoke adu immineede oo Nulaaɗo, hiɓe e majjere feeñunde woɗɗitii peewal.

E ko tuma nde musiiba fooleede nden heɓunoo on onon muumini en ñande uhud, woɗɓe e mo'on waraa ; gomɗii le on heɓniino ayɓe mon ɓen cowalle mun immorde e waraaɓe dahaa ñalnde badri, wi'uɗon: "Hol no men heɓiri ɗum ko men gomɗimɓe, meɗen wonndi e Annabiijo Alla on?!" Maaku an Annabiijo: "Ko sabu pooɗondiral mon ngal yedda Nulaaɗo on heɓirɗon ɗum", pellet, Alla ko Haɗtanɗo kala huunde Himo Walla on Mo O Muuyi, O Hoyna on Mo O Muuyi.

Wareede barminee foolee ko heɓunoo on kon ñalnde uhud tuma nde fedde mon nden fottunoo e fedde sirkooɓe ɓen, ko e Duŋayee Alla e Koddoruyee Makko ; hikma fii no O gomɗimɓe ɓen feeñira.

E fii no naafiqi en feeñira, ɓen wi'ananooɓe : "Haɓiree fii laawol diina Alla ngol, maa duñiron ɓe sabu ɗuuɗingol juulɓe ɓen", ɓe wi'i: "Hara nun meɗen anndunoo ko fii hare men jokkayno on, si ko woni, men anndaali fii nde hare hakkunde mon e maɓɓe". Kamɓe non nden ñalnde, hari ko keeferaaku ngun ɓurunoo ɓaɗtaade ɓe e dii gomɗinal ngal : hiɓe wowlira kunndule maɓɓe kon ko alaa e ɓernde maɓɓe. Ko Alla Ɓuri Anndude kon ko ɓe wirnii e ɓerɗe maɓɓe, O Leptirayɓe ɗum.

Ko ɓe salii yahugol ka hare, ɓe wi'ani ɓaɗondiraaɓe maɓɓe barmunooɓe ɓen uhud: "Hara nun ɓe ɗoftino men ɓe roŋki yahude ka hare, ɓe waretanooke". Maakanɓe an Annabiijo: "Duñee pottinon ndee maayde e pittaali mo'on si nde arii e mo'on tawi kadi ko on goognuɓe e ko aaƴotoɗon wonnde si ɓe ɗoftino on ɓe waretanooke, e wiide kadi on daɗiraali maayde nden si wanaa salagol mon yahude ka jihaadi fii laawol diina Alla ngol.

Wata a sikku an Annabiijo, wonnde ɓen waraaɓe ka jihaadi fii laawol diina Alla ngol ko maayuɓe, ko woni, ko wuuruɓe nguurndam heeriiɗam ka Joomi maɓɓe, hiɓe e galle teddungal, hiɓe arsikee noone kala e neemaaji ɗi tawata ko Alla tan Anndi ɗi.

Hiɓe huuɓiri weltaare ko Alla Neeminiri ɓe e Ɓural Makko, hiɓe jortii nde musiɗɓe maɓɓe heddiiɓe ɓen ka aduna tawta ɓe ; wonnde si ɓen waraama ka jihaadi, ɓe dañay ɓural sifa maɓɓe, ɓe wonaa hulooɓe fiyaake laakara, ɓe wonaa kadi sunoytooɓe e kon ko faatiiɓe e geɓoy aduna.

Hiɓe weltora ndii mbarjaari mawndi ndi ɓe habbori Alla, e ɓeydaneede ndin mbarjaari mawndi. E wonnde pellet, Alla bonnataa njoɓdi gomɗimɓe Mo ɓen, si ko woni, O Hunnanay ɓe njoɓdi maɓɓe ndin no timmiri, O Ɓeydana ɓe ɗum.

Ɓen nootiiɓe noddaandu Alla e Nulaaɗo Makko on tuma nde ɓe noddanoo yahugol ka hare fii laawol diina Alla, ɓe hawroya e sirkooɓe ɓen ka hare "hamraa' al Asad" hikkiinde nden uhud, ɓaawo nde ɓe barmunoo ñalnde uhud ; ɓe saloraaki noddaandu Alla e Nulaaɗo Makko on sabu barme maɓɓe ɗen. Hino woodani ɓen moƴƴimɓe e maɓɓe golle, ɓe huli Alla ɓe ɗoftii Yamrooje Makko ɗen ɓe woɗɗitii Haɗaaɗi Makko ɗin ; njoɓdi mawndi immorde ka Alla, ndi woni Aljanna.

Ɓen ɓe yoga e sirkooɓe ɓen wi'annoo: "Pellet Qurayshi en e ɗowro Abuu Sufyaana mooɓondiranii on e ɗuuɗal fii haɓugol on mula fii mon, reŋtee e maɓɓe hulon ɓe". Kan haala hulineede ɓeydaali ɓe si wanaa goongingol Alla hooloo fodoore Makko nden, ɓe yalti haɓoygol hiɓe wi'a: "Alla Toowuɗo On yonii men, O yonii yonndinorteeɗo".

Ɓe ruttodi -ɓaawo nde ɓe iwi "hamraa' al Asad", e mbarjaari mawnundi immorde ka Alla, e ɓeydaneede darja, e hisineede e ayɓe maɓɓe ; bone wareede maa barmineede hewtaali ɓe, ɓe jokki yarluyee Alla on ; ɓe waɗɗinori ɗoftaare Alla haɗitoo yeddugol Mo. Alla ko Jom ɓural mawngal e jeyaaɓe Makko gomɗimɓe ɓen.

Anndee pellet, ko seytaane woni ko hulɓiŋta on: himo hulɓinira on wallondiraaɓe makko ɓen, wata on hulu ɓe sabu ɓe alaa feere e doole, hulee Alla Kaŋko tan, waɗɗitoɗon ɗoftagol Mo, si on laatike gomɗimɓe Mo haqqan.

Wata a suno an Nulaaɗo, e ɓen adondirooɓe e keeferaaku, ɓe murtira naafiqiyaagal maɓɓe, pellet, ɓen lorrirtaa Alla hay e huunde, si ko woni, ko pittaali maɓɓe ɗin lorrirta woɗɗitorgol ɓe ngol gay e gomɗingol Alla ɗoftoo Mo. Alla non, sabu woppugol maɓɓe ngol, O Yiɗaa Waɗannde geɓal neemineede ka laakara. Hino woodani ɓe lepte muusuɗe ka yiite.

Pellet, ɓen wattitirɓe keeferaaku ngun gomɗinal, ɓe lorrataa Alla hay e huunde, ko woni, ko pittaali maɓɓe ɗin ɓe lorrata. Hino woodani ɓe lepte muusuɗe ka laakara.

Wata ɓen yeddu Joomi mu'un ɓe salii sari Makko on, Ko Men Nennirani ɓe Men Juutini balɗe maɓɓe e hoore keeferaaku maɓɓe, wonnde ɗum ko moƴƴere maɓɓe ; wanaa no ɓe sikkiri non. Si ko woni, Men Nenniranay ɓe woni no ɓe ɓeydora geddi maɓɓe ɗin bakkaatu. Hino woodani ɓe lepte hoynayɗe.

Jeyaaka e Ñeeñal Alla ngal nde O Tertotoo on onon muumuni en e hoore kon ko wonɗon e mun immorde e ukkondiral e naafiqi en, haa O Senndindira on noone fow e jarrabuyee ; fii no gomɗinɗo laaɓuɗo on feeñira e naafiqiijo soɓuɗo on. ko woni ko, Alla Suɓoray Nulaaɓe Makko ɓen on Mo O Muuyi, O Ƴelliŋtina on yoga e ko wirnii ; wano O Ƴelliŋtiniri Annabiijo Makko on Muhammadu (jom kisiyee) fiyaake naafiqi en. Gomɗinee Alla e Nulaaɗo Makko on, si on gomɗinirii goonga on hulii Alla on ɗoftike Yamirooje Makko ɗen on woɗɗitike Haɗaaɗi Makko ɗin, haray no woodani on mbarjaari mawndi ka Alla.

Wata ɓen wuddirooɓe neema mo Alla Neeminiri ɓe e Ɓural Makko ngal sikku, wonnde ɗum ko moƴƴere wonannde ɓe, si ko woni, ɗum ko bone woannde ɓe ; tawde ɓe taariniroyte (ɓe meedinte) ka daaɗe maɓɓe kon ko ɓe wuddiraynoo, ɓe leptiree ɗum Ñalnde Darngal. Ko Alla Tan Woodani ndonndi kala ko woni kammuuli e ka leydi, ko Kaŋko Woni Wuuroowo Heddoo ɓaawo nde tagu ngun fow lanni. Alla ko Annduɗo golle mo'on, O Yoɓitiroyay on ɗum.

Gomɗii Allaahu on Nanii konngol Alyahuuda en ngol tuma ɓe wi'unoo: Alla ko baaso tawde Ɗaɓɓiri amen menen non meɗen alɗiri jawle amen. Arma Men win- nda ko ɓe fefindii kon e Joomi maɓɓe e kobe warata kon Annabaaɓ ɓen ko aldaa e goonga,Men Daalana ɓe:Meeɗee lepte sumrooje jaynge.

Ɗen lepte ɗon heɓirii on sabu ko faggitorɗon juuɗe mon e geddi onon Alyahuuda en, e wonnde pellet, Alla Wonaali Tooñoowo hay gooto e jeyaaɓe Makko ɓen.

Ko ɓen woni wi'uɓe no fena fefindoo: "Alla wasiyike men ka Defte Makko tippude e konnguɗi Annabaaɓe Makko, wonnde wata men gomɗin Nulaaɗo woo haa on addana men ko goonginta haala makko". Ɓe feniri e Alla dammbirgol Mo on wasiyee, happira ɓanngannduyeeji goonginayɗi Nulaaɓe ɓen e kon ko wi'i ; ko sabu ɗum Alla Yamirani Annabiijo Muhammadu on mo jam e kisiyee woni e mun on nde o maakanta ɓe: "Gomɗii Nulaaɓe goo adinooɓe lam addanii on ɓanngannduyeeji tinndinooji goongungol maɓɓe, e nde huunde nde immorde e ɓaɗtorɗum hara yiite iwrunge ka asamaanu no sunna ɗum, ko fii honɗum fennanɗon ɓe waruɗon ɓe, si on laatike goonguɓe ko wowloton?!".

Si ɓe fennii ma an Annabiijo, wata a suno, ɗum ko ko heeferɓe ɓen woowi ; gomɗii Nulaaɓe ɗuuɗuɓe fennanooma ado maa, ɓen ardu e Hujjaaji Ɓannguɗi, e Defte yowndirɗe e waajuuji, e Deftere fewniraynde ñaawooje mayre.

Woŋkii kala no woniri meeɗay haaɗeeki maayde nden, wata tagaaɗo hoditor oo aduna. Ñalnde Darngal, on yoɓitoyte njoɓdiiji kuuɗe mon ɗen no timmiri hara ɗuytaaki. Kala on Mo Woɗɗiŋtini e yiite ngen O Naadi mo Aljanna, gomɗii on ɗon dañii moƴƴere nde o jortinoo, o daɗii bone mo o hulunoo. Ɗam nguurdam aduna wonaali si wanaa dakammehun lannaykun, ko hodaaɗo tun humondirta e ɗum.

Ma on ndaarnde onon muumini en, ka jawle mon, tottirgol haqqeeji waɗɗiɗi ɗin e majje, e masiibooji ko heɓata ɗe, ma on ndaarnde kadi e pittaali mon ɗin, tottugol waɗɗiɗi diina kan e noone kala e jerrabuyee, ma on nanir kadi ɓen okkaaɓe Defte ɓen ado mon e ɓen sirkooɓe lorra ɗuuɗuka ; ka no lorrira on cukkoreede diina mon. Si on muññike e ɗin masiibooji e jarrabuyeeji, on hulii Alla, on gollirii yamirii on pottitike haɗaaɗi, pellet, anndee ɗum, ko jeyaaɗum e ko ɓuri moƴƴude e ko haanaa fellitaneede e fiyaake mo foolotirooɓe adondirta e mun.

Jaŋtii an Annabiijo, tuma nde Alla Ƴettunoo Ahadi fellitaandi ndin e karamokooɓe yimɓe Defte ɓen ka Alyahuuda e Annasaara en, wonnde: "Ma on ɓannginannde yimɓe ɓen Deftere Alla nden, wata on suuɗu peewal ko woni e mayre maa ko nde tinndinta e Annabaaku Muhammadu (jom kisiyee)". Kono haɗaali ɓe firti ahadi ndin ɓe suuɗi goonga kan ɓe feññini mehre nden, ɓe waɗtitiri Ahadi Allah ndin coggel fanɗungel! Bonii ngel coggel ngel ɓe waɗtitiri e Ahadi Alla ndin!

Wata a sikku an Annabiijo, wonnde ɓen weltorayɓe huunde bonde nde ɓe waɗi, hiɓe yiɗi nde yimɓe ɓen yettataɓe moƴƴere nde ɓe waɗaali. Wata a sikku ɓen ko daɗooɓe hisa e lepte ɗen, ko woni, werde maɓɓe nden ko jahannama, hino woodaniɓe ton lepte muusuɗe.

Ko Alla Bajjo on tan woodani laamu kammuuli ɗin e leydi ndin e kala ko woni e majji : tagugol toppitoo. Alla ko Hattanɗo kala huunde.

Pellet, no e woodingol kammuuli ɗin e leydi ndin e luutondirgol jemma e ñalorma ngol ɗi ɓurda juutude e raɓɓida ; Aayeeje Ɓannguɗe wonannde joomiraa- ɓe haqqille hisuɗe ɓen, ɗum no tinndina ɓe e Taguɗo winndere nden Hannduɗo on e reweede Kaŋko Tan.

Ko ɓen woni annditirooɓe Alla e kala fiyaake ; nde ɓe darii maa ɓe jooɗii maa nde ɓe lelori becce maɓɓe ɗen, hiɓe miijitora fii tagu kammuuli ɗin e leydi ndin ɓe wi'a: "Joomi amen, A Tagiraali nguu tagu mawngu meere, senayee woodanii Ma e ɗum, Ɗaɗndu men e lepte yiite, Waɗtidaa men e moƴƴuɓe ɓen, Reena men e boneeji".

Pellet, An Joomi amen, mo Naaduɗaa woo yiite e tagu Maa ngun, gomɗii haray A Hoynirii mo wirtere. Alanaa tooñooɓe ɓen walloowo daɗnda ɓe lepte yiite ngen Ñalnde Darngal.

Joomi amen, menen men nanii noddoowo on woni Annabiijo Maa on Muhammadu (yo o his), no nodda e gomɗingol o wi'a: "Gomɗinee Alla Joomi mo'on Bajjo", men gomɗini kon ko o noddi e mun, men jokki laawol makko ngol, Haforan men junuubi amen Surraa men, Yawtanaa men boneeji amen hara A Nanngiraali men ɗin, Ƴeeŋinndinaa men e moƴƴuɓe ɓen, Hawrinndinaa men e golle moƴƴe e accude golle bonɗe.

Joomi amen, Okku men kon ko Foduɗaa men e konngol Nulaaɓe Maa ɓen ; immorde e peewal e walleede ka aduna, wata A Wirtiroy men Ñalnde Darngal naatugol yiite. Pellet, An Joomi amen, ko A Tedduɗo Mo Lunndotaako Fodoore Mun.

Joomi maɓɓe Jaabini toraare maɓɓe nden : wonnde Min Mi Yeebataako njoɓdi golle mon ɗen ; ɗuuɗi famɗi, foti golluɗo on ko gorko maa ko o debbo. Ɓen feruɓe fii Laawol Alla ngol, heeferɓe ɓen yaltini ɓe e galleeji maɓɓe, ɓe heɓiri lorra fii ɗoftaare Joomi maɓɓe, ɓe haɓidaa fii Laawol Alla ngol ɓe wariraa fii no Konngol Alla ngol ɓamtora ; ko pellet Maa Mi Haforan ɓen goopi maɓɓe ɗin Ñalnde Darngal, e ko pellet maa Mi Yawtan ɓe, e ko pellet maa Mi Naaduɓe Aljannaaji ɗi canɗi ilata e kuɓeeji mun, ɗum ko mbarjaari immorde ka Alla, hino ka Alla njoɓdi moƴƴundi ndi yeru mun alaa.

Wata hode an Annabiijo, yiltondirgol heeferɓe ɓen e feewnitaade maɓɓe e yaajeende njulaagu maɓɓe ka leydi, wata alhaali maɓɓe takma sunaade.

Oo aduna, ko dakammehoy pamaroy koy duumotaako, hooti ɓaawo ɗum, ruttorde maɓɓe nden Ñalnde Darngal, ko jahannama, nge bonii ndaɗɗudi yiite fii maɓɓe!

Kono ɓen huluɓe Alla ɓe ɗoftii Yamirooje Makko ɗen ɓe woɗɗitii Haɗaaɗi Makko ɗin : hino woodani ɓen Aljannaaji ɗi canɗi dogata senngo ley kuɓeeje majji, ko ɓe duumotooɓe ton poomaa ; ɗum ko njoɓdi ndi ɓe hebilanaa immorde ka Alla Toowuɗo On. Ko ko Allaahu On Hebilani moƴƴuɓe ɓen e jeyaaɓe Makko ɓen ɓuri ko ɓen heeferɓe dogata ɓaawo mun e dakammehoy aduna.

Yimɓe Defte ɓen fotataa : no e maɓɓe fedde gomɗinde Alla e ko Jippinaa kon e mooɗon immorde e goonga e peewwal, hiɓe gomɗini kadi ko Jippinaa kon e maɓɓe ka Defte maɓɓe, ɓe senndindirtaa hakkunde Nulaaɓe Alla ɓen ; ko ɓe yaŋkinaniiɓe Alla rerɗuɓe e ko O Jogii kon, ɓe waɗtitirtaa Aayeeje Alla ɗen coggeloy e dakamme aduna pamaroy. Ɓen siforaaɓe ɗin sifaaji, hino woodani ɓe mbarjaari mawndi immorde ka Joomi maɓɓe. Pellet, Alla ko Yaawuɗo hasbugol golle ɗen, Yaawuɗo Yoɓitugol ɗen.

Ko onon yo gomɗimɓe Alla e Nulaaɗo Makko on, muññee e diina kan e kala masiboo yanoowo e mon ka aduna, fooliron heeferɓe ɓen muñal ; hara ɓe ɓuraali on muññaade, ñiiɓee tabiton e jihaadi fii laawol Alla ngol, hulon Alla ɗoftoɗon Yamirooje Makko ɗen woɗɗitoɗon Haɗaaɗi Makko ɗin, belajo'o, on dañay yela mon hisugol e yiite naata Aljanna.

Ko onon yo yimɓe, hulee Joomi mon, ko Kaŋko Woni Tagirɗo on e woŋkii wooti ; ko woni ben mon Aadama, O Tagi immorde e Aadama sonna makko Hawwaa' yumma on, O Saaki immorde e ɓen ɗiɗo nder leydi ndin yimɓe ɗuuɗuɓe ; worbe e rewɓe. Hulee Alla on Mo yoga mon tororta yoya tuma ontigi wi'ata : "Mi torike ma fii Alla waɗam huunde kaari". Hulee taƴugol enɗammaaje ɗen humindirɗe on. Pellet, Alla Laatike e dow mooɗon Deeno ; hay huunde e golle mon ɗen laawotaako Mo, O Moftayɗe fow O Yoɓita on ɗe.

Onon kaliifaaɓe, jonnitee alyatiimaaɓe ɓen jawle maɓɓe ɗen no timmiri si ɓe hellifaama, wata on waɗtitir haraamu on ko dagii ; ko ɗum woni ƴettugol jawle maɓɓe laaɓuɗe ɗen jillindiron e jawle mon ɗen, wata on huuwu ɗum ; pellet, huuwugol ɗum laatike bakkaatu mawɗo ka Alla.

Si on hulii roŋkugol nunɗude alyatiimaaɓe ɓen tammbitiɗon si on resii ɓe, wano hulugol wata on roŋku timminnde teŋe maɓɓe ɗen maa bonagol e maɓɓe, haray tertee ɓe reson ɓen laaɓuɓe e sonnaaɓe goo ko woori ɓe, si ɗon yiɗi on resay ɗiɗo maa tato maa nayo. Si on hulii nde roŋkoton nunɗude hakkunde maɓɓe, haray resee gooto maa dakmitoron ɓen ɓe jeyruɗon ñaame mooɗon ; tawde wonaa ko waɗɗanii kon ɓeya sonnaaɓe e haqqeeji waɗɗii ɓen ɗon. Ko jaŋtaa koo e oo Aaya fii fiyaake alyatiimaaɓe ɓen e yonndinorgol sonnaajo gooto maa dakmitora horɓe ɓen, ɓuri ɓaɗtaade on nde on ooño.

Jonnitiree rewɓe ɓen teŋe ɗen dokkal waɗɗingal. Si ɓe anniyoranike on woŋkiiji maɓɓe ɗin goɗɗum e ɗen teŋe ko aldaa e waawneede, haray ñaamee ɗum, no newanii on laaɓani on.

Onon fewjooɓe, wata on jonnu jawle ɗen on mo waawaa firlitaade fii majje, ɗen jawle, Alla Waɗiranii on ɗe dartorɗe nguurdam e fiyakuuji jeyaaɓe ɓen, ɓee ɗoo non hanndaa e kippugol reena jawle. Ñamminee e majje holtinon ɓe, wowlanon ɓe konngol moƴƴol, fodon ɓe no moƴƴiri wonnde on jonnitayɓe jawle maɓɓe ɗen si ɓe hellifaama.

Onon fewjooɓe, jarribee alyatiimaaɓe ɓen si ɓe hellifaama, jonnonɓe seeɗa e jawle maɓɓe ɗen ɓe haajitora, si ɓe haajitoriiɗe no haaniri, feeñanii on wonnde ɓe ƴoƴii ; haray jonnitee ɓe jawle maɓɓe ɗen no timmiri.Wata on ñaamir jawle maɓɓe ɗen fantingol ɓuri ko Alla Daginani on haajitorgol e majje, wata on yaccor ñaamugol ɗe fii wata ɓe hellife ɓe henndooɗe. Kala e mon tawɗo ko jogiiɗo jawdi, yo o haɗito ƴettugol jawdi alyatiima. Kala e mon kadi tawɗo ko waasiraaɗo jawdi, yo o haajitor yeru makko on. Si ɓe hellifaama on jonnitiiɓe jawle maɓɓe ɗen, seedinee e kon ko jonnitoton fii reenugol haqqeeji ɗin e fii wata on lurru. Alla Yonii Seediiɗo e ɗum, Hasboowo jeyaaɓe ɓen e golle maɓɓe.

Hino woodani worɓe ɓen : geɓal immorde e kon ko neene e baaba e ɓadiiɓe ngacci ko; wano banndi- raaɓe ɓen maa kaawu e bappa e baaba en mawɗo, si wonii ɓe faatike, ɗuuɗi famɗi e ko ɓe acci kon. Hino woodani kadi rewɓe ɓen : geɓal immorde e kon ko ɓen ɗon acci ; ɓe haanaa ɗawireede ɗum wano majjunooɓe ɗawiraynoo rewɓe e paykoy ka ndonndi. Ngal geɓal ko haqqee maɓɓe ɓannginaaɗo emmbere mun, ngal Alla Toowuɗo On Farli.

Si ɓen ɓe ronataa tawaama ka senndoore ; wano ɓadondiral en maa alyatiima en maa waasuɓe ɓen, okkoreeɓe e ndin jawdi ndi senndoton yeru ko waalanii woŋkii mon, ɓen ko hatonjimɓe e ɗum, wowlanon ɓe haala moƴƴuka.

Yo hulu ɓen ɓe tawata si ɓe maayii ɓe accii ɓaawo maɓɓe paykoy tokosoy lo'ukoy, ɓe hulanay koy yeebagol, yo ɓe hulu Alla e ɓen alyatimeeɓe ɓe ɓe halfinaa ɓe ɗala tooñugol ɓe fii no Alla Newinirana ɓe heɓugol ko moƴƴoo e fayɓe maɓɓe ɓen wano ɓe moƴƴori non e ɓeya fayɓe, yo ɓe moƴƴo e ɓen fayɓe ɓe yewta ɓe konngol sawaaba=peewngol, ɓe jonnita ɓe haqqeeji maɓɓe ɗin ka ndonndi, ɓe waasa haɗde ko*e mu*en moƴƴere tammbitagol ɓe ngol.

Pellet, ɓen ƴettooɓe jawle alyatiima en ɓe funsiraɗe(pirlitoo heen) tooñe e jaggitere, pellet ko ɓe woni naadude kon ka deedi maɓɓe ko yiite huɓɓaynge e maɓɓe, yiite ngen sunnoyayɓe Ñalnde Darngal.

Alla no aadani no yamirde on e fii ndonndi ɓiɗɓe mon ɓen, wonnde ndonndi ndin senndirte hakkunde maɓɓe wano nii : ɓiɗɗo gorko on heɓa geɓal rewɓe ɗiɗo. Si maayuɗo on accii ɓiɗɓe rewɓe tun, hino woodani rewɓe ɗiɗo ɓen haa ko ɓuri ɗon, tataɓe ɗiɗi e ko maayɗo on acci kon. Si tawii non ko jiwo gooto, hino woodani mo feccere ndonndi ndin. Hino woodani neene e baaba maayɗo on gooto kala e maɓɓe, jeegaɓal ko o acci kon ; si tawii himo jogii ɓiɗɗo (woni gorko maa jiwo), si o jogaaki non ɓiɗɗo o maraa kadi ronooɓe si wanaa ben makko e neene makko en, hino woodani neene makko tataɓal, ben makko ƴetta ko heddii kon e ndonndi ndin. Si maayɗo on no jogii neene-gootooɓe maa baaba-gootooɓe ɗiɗo maa ko ɓuri, ɓe laatii worɓe maa rewɓe, haray no woodani neene makko jeegaɓal farlaangal, ko heddii kon jonnee ben makko, neene-gootooɓe ɓen maa baaba-gootooɓe ɓen heɓataa hay huunde. Ndee senndoore ndondu, ko ɓaawo siinugol wasiyee mo maayɗo on wasiyinoo, sarti hara on wasiyee ɓurataa tataɓal jawdi makko ndin, e sarti kadi yoɓitugol ñamaale makko ɗen. Gomɗii Alla Waɗirii non senndugol ndonndi ndin, tawde on anndaa hakkunde e baabiraaɓe mon ɓen e ɓiɗɓe mon ɓen ko hombo e maɓɓe ɓuri ɓadoraade on nafa aduna e laakara ; maayɗo on hino sikka goɗɗo goo moƴƴere, o ƴetta jawdi makko ndin fow o hunoo on ɗon, maa o sikka ontigi ko boni, o ɗawa mo ndi, hino wona kadi liddu ɗum. Ko Alla Tun Anndi ko ɓuri moƴƴude e ɗum, hay huunde suuɗaaki Mo ; ko ɗum waɗi si O Senndiri ndonndi ndin no O Ɓannginiri non, O Waɗi ɗum farilla mo O Waɗɗini e jeyaaɓe Makko ɓen. Pellet, Alla Laatike Anndu mo huunde suuɗotaako Mo e moƴƴere jeyaaɓe Makko ɓen, Ñeeñuɗo e sari'a Makko on e toppitagol Makko ngol.

Hino woodani on onon resuɓe, feccere e ko rewɓe mon acci, si tawii ɓe jogaaki ɓiɗɗo woni gorko maa debbo, woni ko onon ɓe jibinani maa gorko goo Si tawii hiɓe jogii ɓiɗɗo woni gorko maa debbo, hino woodani on nayaɓal e kon ko ɓa acci e jawdi ; ko yo on senndane ɗum ɓaawo nde wasiyee maɓɓe on siineede ñamaale maɓɓe ɗen yoɓitee. Hino woodani kadi resaaɓe mon ɓen, nayaɓal e ko accuɗon kon, si tawii on jogaaki ɓiɗɗo -woni gorko maa debbo, woni ɓiɗɓe maɓɓe maa ɓiɗɓe gorko goo. Si tawii hiɗon jogii ɓiɗɗo -woni gorko maa debbo, hino woodani ɓe jeetataɓal e ko accuɗon kon ; ɓe senndaŋte ɗum ɓaawo nde wasiyee mon on siineede ñamaale mon ɗen yoɓitee. Si gorko maayii o jogitaaki mawɓe maa ɓiɗɗo, maa debbo si maayii o jogitaaki mawɓe maa ɓiɗɗo, kono hara on maayɗo hino jogitii neene-gooto gorko maa debbo ; hino woodani e ɓen neene-gootooɓe makko jeegaɓal farlaangal, si tawii non ɓen neene-gootooɓe makko worɓe maa rewɓe hino ɗuuɗi ; haray hino woodani ɓe denndaangal kafugol tataɓal farlaangal, rewɓe e worɓe maɓɓe fotay e maggal, ko woni tun, ɓe henndike geɓal maɓɓe ngal woo ɓaawo nde wasiyee maayɗo on siineede ñamaale makko ɗen yoɓitee, e sarti hara on wasiyee wonaa lorroowo ronooɓe ɓen ; wano wasiyorgol ko ɓuri tataɓal jawdi makko ndin. Ndee ñaawoore nde wonnde e oo Aaya, ko Yamiroore nde Alla Waɗɗini e mooɗon. Alla ko Annduɗo ko moƴƴani jeyaaɓe Makko ɓen aduna e laakara, Muññiiɗo Mo Hawjanaa lette yeddooɓe ɓen.

Ɗen Ñaawooje jaŋtaaɗe fii wonduɓe ɓen e woɗɓe goo, ko Sari'aaji Alla ɗi O Sar'ini e jeyaaɓe Makko ɓen fii yo ɓe gollitir. Kala on ɗoftiiɗo Alla e Nulaaɗo Makko on, o gollitiri Yamirooje Makko ɗen o woɗɗitii Haɗaaɗi Makko ɗin, Alla Naadoyay mo Aljannaaji ɗi canɗi ilata doga ley kuɓeeji mun, ko ɓe duumotooɓe nder majji poomaa. Ko ndin njoɓdi Joomiiko woni maloore mawnde nde sugu mun alaa.

Kala on yedduɗo Alla e Nulaaɗo Makko on, o roŋki huutorde Ñaawooje Makko ɗen maa o sikkitii ɗe, o jaggiti Keeri Makko ɗin, O Naadoyay mo yiite nge o ñiiɓata e muuɗum ; e kadi no woodani mo ton lept hoynooje.

Ɓen waɗooɓe paŋkare jeenugol e rewɓe mon ɓen, woni laaɓuɓe maa ko woori ɗum, seedinee e maɓɓe worɓe nayo juulɓe nunɗuɓe. Si ɓen seedike yi'ugol rewɓe ɓen no faggitoo paŋkare ɗen, haray waɗiree leptugol ɓe ngol jogitagol ngol ka cuuɗi haa maayde nden arana ɓe, maa Alla Waɗana ɓe laawol yawtirngol ko wanaa jogiteede nden ka cuuɗi. Refti Alla Ɓanngini yaltirngal maɓɓe ngal ɓaawo ɗum, O Sar'ini piyugol jiwo jeenuɗo mo jombaaka on sawru teemedere e raɗeede hitaande, rajmeede ware debbo jinuɗo jommbaaɗo on.

Ɓen worɓe ɗiɗo faggitiiɓe paŋkare jinaa ɗen, woni ko resɓe maa ko wonaa ɗum, leptireeɓe ɗemngal e junngo hoyniron ɓe ɗum. Si ɓe yiltike e on bone mo moƴƴini golle maɓɓe, haray ɗuurnee e lorrugol ɓe ; sabu tuuuɗo e junuubi no wa'i wa on mo faggitaaki ɗum. Pellet, Alla Laatike Jaɓoowo tuubuubuyee jeyaaɓe Makko ɓen Hinnotooɗo ɓe. Yonndinorgol ngol leptugol ɗon tun, ko aranun Farlanoo, refti ɗum Momtiraa piyugol mo jommbaa maa mo jommbaaka on raɗoo mo, woppa wara jomɓuɗo maa jommbaa.

Anndee ko Alla Jaɓanta tuubuubuyee, ko ɓen faggitorayɓe goopi e geddi e dow majjere maɓɓe bone ɗin geddi ; ko wano non kadi kala faggitorɗo goopi foti o tewi maa o tewaaki, hooti ɓe ruttiie Joomi maɓɓe ado maayde nden ; ɓen ɗon, Alla Jaɓanay ɓe tuubuubuyee, O Yawtana ɓe goopi maɓɓe. Alla Laatike Annduɗo fiyakuuji tagu Makko ngun, Ñeeñuɗo e Toppitagol Makko ngol Sar'ina.

Alla Jaɓataa tuubuubuyee ɓen duumotooɓe e geddi ɓe roŋka tuubude e majji haa ɗeɗɗere maayde nannga ɓe, ontuma gooto e maɓɓe wi'a : "Min mi tuubii jooni e ko mi faggitii kon e geddi. Alla Jaɓataa fahin, tuubuubuyee ɓen maayidooɓe e keeferaaku. Ɓen yeddooɓe duumo- tooɓe e geddi ɗon, e ɓen maayidooɓe e keeferaaku, Men Hebilanii ɓe fow lepte muusuɗe.

Ko onon yo gomɗimɓe Alla e Nulaaɓe Makko ɓen, dagaŋtaako on nde ronirton rewɓe baabiraaɓe mon e ɓadiiɓe mon wano jawdi ronirtee, maa etagol no resiraɓe maa no resinira ɓe on mo faalaɗon maa haɗon ɓe reseede. Dagaŋtaako on kadi jogitorgol resaaɓe mon ɓen ɓe añuɗon fii no lorriron ɓe haa ɓe jonnita on yoga e kon ko okkunoɗon ɓe e teŋe maa ko nanndi heen si wanaa hara ɓe faggiti paŋkare ɓannguɗo wano jinugol ; si ɓe huuwii ɗum, ina dagano on jogitorgol ɓe e ɓiɗtinana ɓe fii no ɓe soktitora kon ko okkunoɗon ɓe. Wonndiree e rewɓe mon ɓen no moƴƴiri, accon lorrugol ɓe, ɗuɗɗinon moƴƴagol e maɓɓe. Si on añiriiɓe fiyaake aduna, muññee ; sabu no jortaa nde Alla Waɗata e kon ko añuɗon moƴƴere ɗuuɗunde aduna e laakara.

Si on faandike onon resuɓe, seerugol rewɓe mon ɓen, waɗtitiron ɓe woɗɓe goo, ella alaa e ɗum. Si tawii non on jonnii on debbo mo eɓɓuɗon seerude jawl ɗuuɗuɗe fii teŋe makko, dagaŋtaako on ƴettugol e ɗum hay huunde ; ƴettugol ɗum ko jeyaaɗum e fefindaande e bakkaat ɓannguɗo.

Ko honno ƴettirton kon ko okkuɗon ɓe e teŋe ɓaawo nde yottindirɗon wirtondirɗon? Anndee fawñagol e ko ɓe jogitii kon ɓaawo ɗum, ko huunde ŋiñaande.be nanngii e mon Ahdi cattudo, oon woni daganaade mon rewbe be tawa ko e Sariya Alla e Konngol mum.

Wata on jommbu ɓen ɓe baabiraaɓe mon ɓen jommbunoo ; ɗum no harmi si wanaa kon ko feƴƴi ado islaamu on, on nanngitirtaaake ɗum. Ko ɓiɗɗo jommbata kon suddiiɗo ben mon, hino ŋiññaa ko tiiɗi, Alla no Tikkirana huuwuɗo ɗum, kadi ko laawol bonugol.

Alla Harminanii on resugol : Neeniraaɓe mon ɓen no ɓe foti waade ; wano neene neenemon maa pati mon ka neene maa pati mon ka baa, e ɓiɗɓe mon rewɓe ɓen no foti waade ; ɗum ko wano ɓiɗɓe ɓiɗɗo mon debbo maa taaniraaɓe mon rewɓe, e ɓiɗɓe jiwɓe ɓe ɓiɗɓe mon worɓe jibini maa ɓe ɓiɗɓe mon rewɓe jibini no ɓe foti waade, banndiraaɓe mon rewɓe, e yaayiraaɓe mon maa yaayiraaɓe baabiraaɓe mon, e neeniraaɓe mon ka dewol maa neeniraaɓe baabiraaɓe mon ka dewol no ɓe foti waade, e jiwɓe [banndiraawo mon] neene-gooto maa baaba-gooto e jiwɓe neene-gooto maa baaba-gooto mon e ɓiɗɓe ɓen ɗon no ɓe foti waade, e neeniraaɓe mon muynimɓe on, e banndiraaɓe mon rewɓe ka muynidal, e neeniraaɓe ɓeynguuli mon ; foti non on naatidii e maɓɓe suudu maa hara on naatidaali e maɓɓe suudu, e jiwɓe ɓeynguuli mon ɓe wanaa ɓiɗɓe mon reedu ne'eteeɓe ko heewi kon ka galle mon ; hay si tawii non ɓe ne'aaka ka galle yonii tawde on naatidii e neene maɓɓe en suudu, si tawii non on naatidaai e maɓɓe suudu haray bakkaatu alanaa on nde resoton ɓiɗɓe maɓɓe rewɓe ɓen, hino harmani on kadi resugol ɓeynguuli ɓiɗɓe mon ɓen iwɓe e keeci mon ; hay si tawii non ɓe naatidaali e suudu, ko wano non kadi ɓeynguuli ɓiɗɓe mon ɓen ka muynidal, harminanaama on kadi hawtindirgol hakkunde banndiraaɓe ɗiɗo hawtuɓe enɗam maa muynidal ; si wanaa kon ko yawtunoo fewndo majjere, Alla Yaafike ɗum, pellet, Alla Laatike Yaafotooɗo jeyaaɓe Makko tuubooɓe ɓen ruttoo e Makko, Hinnotooɗo ɓe. Tabitii kadi ka sunna, harmineede mooɓindirgol hakkunde debbo e yaayiraawo mun maa neenirawo makko ka dewol.

Harminanaama on kadi resugol : ɓen rewɓe jommbaaɓe ; si wanaa ɓen ɓe jeytirɗon ñaame mon ka konehoyri fii laawol Alla, hino daganii on renndugol e ɓen ɗon tuma ɓe laaɓiri fiilordu. Alla Farlii ɗum e dow mooɗon, O Daginani on ko wanaa ɓen rewɓe ɗon, nde ɗaɓɓirton laɓɓingol pittaali mon kon ko dagii hara wanaa faandagol jinaa. Kala mon dakmitorɗon e maɓɓe desal, jonnee mo teŋe makko ɗe Alla Waɗaniɓe ɗen farilla waɗɗiiɗo on, bakkaatu alanaa on e kon ko yarlondirton ɗuytugol maa ɓeyda teŋe waɗɗiiɗe ɗen ɓaawo ɗum happeede. Pellet, Alla Laatike Annduɗo tagu Makko ngun, huunde suuɗaaki Mo e maɓɓe, Ñeeñuɗo e Toppitagol Makko ngol e Sar'ia.

Kala e mon onon worɓe ɓen mo hattanaaka resugol rewɓe seŋiiɓe sabu baasal yaajireede, hino daganoo mo resugol ɓen ɓe o jeytiri ñaamo makko ngon ; si ɓen laatike gomɗimɓe. Ko Alla Ɓuri Anndude haqiiqa gomɗinal mon e ko wirnii e fiyaake mon, onon e ɓen rewɓe, hiɗon fota ka diina e ka neɗɗaaku, wata on towniŋtinano resugol ɓen. Resireeɓe duŋayee mawɓe maɓɓe ɓen, jonniron ɓe teŋe maɓɓe ɗen no haaniri ; si tawii ko ɓe laaɓuɓe hara wanaa feññinooɓe jinnduru mun wanaa kadi njaatotooɓe fii ko jeenida e maɓɓe. Si ɓe resaama, ɓe faggitike paŋkare jinaa, foccireeɓe feccere paatawol rinɗumɓe ɓen : ɗum woni paatawol cappanɗe jowi, ɓe rajmetaake, ko rinɗuɓe ɓen piyetee haa maaya si ɓe jinii ko ɓe resaaɓe. Kon ko jaŋtaa ɗon e dagagol resude horɓe gomɗimɓe laaɓuɓe, ko hoynangol on hulanɗo hoore-mun yanugol e jinaa, fii o maraa feere resugol rinɗuɓe ɓen, wonnde muññorgol desal horɓe ɓen ɓuri. Alla ko Haforanoowo kala tuubuɗo e jeyaaɓe Makko ɓen, Hinnotooɗo ɓe. No jeyaa e Hinnayee Makko on : Sar'inangol ɓe resugol horɓe ɓen tuma tawi feere alaa ko resira rinɗumɓe ɓe, fii hulugol jeeno.

Alla Seniiɗo On ko Faandorii Sar'ingol ɗee ñaawooje, ko Ɓannginanngol on doose Diina Makko kan, e kon ko moƴƴinanta on aduna e laakara, Himo Faadori ɗum kadi Fewnirgol on laawi Annabaaɓe ɓen ado mon : ka dagingol harmina e ka jikkuuji maɓɓe tedduuɗi, e fillayeeji maɓɓe yettiniiɗi ; fii yo on ñemtimɓe. Himo Faandii kadi ruttugol on e geddi adda on e ɗoftaare. Alla ko Annduɗo moƴƴere jeyaaɓe Makko ɓen, Ñeeñuɗo e Sari'aaji Makko e Toppitagol fiyakuuji maɓɓe.

Alla no faandi Jaɓangol on tuubuubuyee, O Yawtana on goopi mon, ɓen jokkuɓe mbeleendi mun hino faalaa nde woɗɗitoron e laawol feewungol ngol woɗɗitannde tiiɗunde.

Alla no Yiɗi Hayfinanngol on e ko O Sar'inani on kon, O Fawataa on ko on hattatah ; tawde Himo Anndi lo'ere neɗɗaŋke nden ka jikku e ka tagudi.

Ko onon yo gomɗimɓe Alla e Nulaaɗo Makko on, wata on yoga e mon ƴettir jawle yoga e hoore meh-re ; wano jattugol maa wujjugol maa ngeeynorgol ekn. Si wanaa hara ko jawle njulorɗe ɗe halduɓe welondiri e mun ; ɗen ɗon no dagoo ñaamugol duncitora. Wata yoga mon waru yoga, wata goɗɗo e mo'on kadi waru hoore-mun. Alla Laatike Hinnotooɗo on ; Harminɗo ƴiiƴe mon e jawle mon e teddule mon.

Kala on huuwuɗo ko o haɗaa kon, o ñaami jawle goɗɗo maa o jaggitiri ontigi warugol mo ekn e hoore tewaare, aray Alla Naada mo yiite sunnaynge mo lepte mo Ñalnde Darngal : ɗum ko ko newanii Alla ; sabu ko O Hattanɗo kala huunde.

Onon gomɗimɓe ɓen, si on waɗɗitike huuwugol bakkatuuji mawɗi ɗin ; wano kafidugol e Alla maa ƴagganngol jibimɓe ɗum maa ittugol woŋkii maa ñaamugol ribaa, Men Yawtanay on goopi mon tokoosi ɗin, Men Momtana on ɗi, Men Naada on e nokkuure teddunde ka Alla ; nden woni Aljanna.

Onon gomɗimɓe ɓen, wata on yelo ko Alla Ɓurniri kon yoga mon dow yoga, sabu ɗum adday tikkere e ngañaneendi. Haanaa ka rewɓe ɓen himmira kon ko Alla Hertinani worɓe ɓen, tawde kala maɓɓe e geɓal mun. Ɗaɓɓiree Alla ɓeydaare e Dokke Makko. Pellet, Alla ko Annduɗo kala huunde ; Himo Jonni kala ko hanndi kon e mun.

Wonannde kala e mooɗon Men Waɗanii ɗum heftuɓe ronooɓe kon ko jibimɓe ɓen e ɓadondiraaɓe ɓen acci e ndonndi. Ɓen ɓe fiɓodiɗon e mun woondooje mon ɗen e sabu moƴƴo : Jonnitee ɓen geɓal maɓɓe ngal ka donal. Pellet, Alla Laatike ko O Seediiɗo e kala huunde ; hino jeyaa e mun, Seeditagol Mo nga'al ahodal mon. Ronindirgol e hoore woondoore ko gila ka fuɗɗorde lislaamu fuɗɗii, ɗum momtaa ontuma.

Worɓe ɓen ko toppitotooɓe rewɓe ɓen, ɓe kippira ɓe sabu kon ko Alla Hertinani ɓe e Ɓural Makko, e sabu kon ko O Waɗɗini e maɓɓe nafqugol e rewɓe maɓɓe ɓen. Men rewɓe moƴƴuɓe : ko ɗoftotooɓe Joomi maɓɓe On, ɓe yaŋkinanoo moodiɓɓe maɓɓe ɓen, ɓe reenortooɓe ka moodiɓɓe maɓɓe ɓen wirnii peewal Alla. Ɓen rewɓe ɓe huloton dartagol moodi maɓɓe e konngol maa kuugal, fuɗɗoree wurtugol ɓe ngol -onon moodiɓɓe ɓen, anndiŋtingol ɓe fii Alla, si ɓe wurtaaki, feron ɓe ka mbalndi ; saloɗon yottagol e maɓɓe, si ɓe wurtaaki, piyon ɓe piggal ngal barmiŋtaa, si ɓe wurtike e ɗoftaare Alla nden, wata on jaggitir e maɓɓe tooñe maa feloore. Pellet, Alla Laatike Toowuɗo e kala huunde, Mawnuɗo e Jaati mun e Sifaaji mun, hulee Mo.

Si on hulii -onon ɓeynguureeji ɗin-, nde resindirɓe ɓen lurrata hakkunde maɓɓe haa hewta ngayngu, hary imminee gorko nunɗuɗo immorɗo e yimɓe gorko on, e gorko nunɗuɗo immorɗo e yimɓe debbo on ; fii no ɓe ñaawira hakkunde maɓɓe no haaniri -foti ɓe seeday maa ɓe wontida- e hoore non ko woŋtidugol ngol ɓuraa yiɗeede. Si ɓen ñaawooɓe ɗiɗo faandike moƴƴingol, Alla Hawrindinay ɓe fottindingol hakkunde resondirɓe ɓen. Pellet, huunde suuɗaaki Alla e jeyaaɓe Makko ɓen, ko O Annduɗo kala ɓerɗe maɓɓe soomi.

Rewee Alla Tun, hara on kafidaali e Makko goɗɗum goo. Moƴƴon e jibimɓe on ɓen ; teddinon ɓe ɗoftoɗon ɓe, moƴƴoɗon e joomiraaɓe ɓadondiral ɓen, e alyatimeeɓe ɓen, e waasuɓe ɓen, moƴƴoɗon e kawtalo jom-ɓadondiral, e kawtaljo woɗɗitiiɗo ka enɗam, moƴƴoɗon e wonndiiɗo on ka yahdu, moƴƴoɗon e seteejo tumaraŋkeejo, moƴƴoɗon e ɓen ɓe jeyruɗon ñaame mon. Pellet, Alla Yiɗaa on laatiiɗo ñaaƴoowo towniŋtiniiɗo e yimɓe ɓen, mantoowo hoore-mun hakkunde yimɓe.

Alla Yiɗaa ɓen haɗitotooɓe nafqugol kon ko O Waɗɗini e maɓɓe immorde e ko O Arsike ɓe, hiɓe yamira woɗɓe goo ko woori ɗum, hiɓe suuɗa kon ko Alla Okki ɓe e Ɓural Makko : immorde e jawdi e ganndal ekn, hiɓe suuɗa yimɓe ɓen goonga kan, ɓe holla mehre nden ; ɗum fow ko jikkuuji keeferaaku, gomɗii Alla Heblanii heeferɓe ɓen lepte hoynooje.

Men Hebilanii kadi lepte ɗen ɓen funsirooɓe jawle mun ɗen yiinorgol yimɓe ɓen e yetteede e maɓɓe, ɓen ɓe gomɗiŋtaa Alla, ɓe gomɗiŋtaa kadi Ñalnde Darngal ; Men Maranii ɓen lepte hoynooje, ko jokkugol ɓe seytaane ngol woni ko majjini ɓe, kala non mo seytaane laatanii wondiɗɗo ciŋkodaaɗo : haray o bonii wondiɗɗo!

E ko honɗum lorraaynoo ɓe si ɓe gomɗinno Alla e Ñalnde Darngal, ɓe nafqi e ɗen jawle maɓɓe ɗen e fii Alla ? Si ko woni, moƴƴere nden ko e ɗum woni. Alla non Laatike Annduɗo ɓe, huunde suuɗaaki Mo e fii maɓɓe, O Yoɓitoyay gooto kala e golle mun.

Pellet, Alla Toowuɗo On ko Nunɗuɗo Mo tooñirtaa jeyaaɓe Makko ɓen hay huunde, O Ɗuytataa moƴƴi maɓɓe ɗin yeru ñuungii, O Ɓeydirtaa kadi bonɗi maɓɓe hay e huunde. Si wonii ko moƴƴere fotaynde abbere-jarra, O Sowiraynde Ɓural Makko ngal, O Okka immorde ka Makko njoɓdi mawndi baraaji.

Ko honno woniroyta muraadu ndu Ñalnde Darngal tuma Men Addoyta Annabaajo immorde e kala mote mo no seeditoo e ko ɓe gollunoo, Men Addoye an Nulaaɗo, e mofte maa ɗen ko a seeditotooɗo ?

Nden Ñalnde Mawnde, ɓen yedduɓe Alla e Nulaaɗo Makko on yeloto hara nun ɓe woŋtayno leydi ɓe feppindinee e mayri, ɓe suuɗataa Alla hay huunde e ko ɓe gollaynoo ; tawde Alla Sokoyay ɗemɗe maɓɓe ɗen fii wata ɓe wowlu, O Duŋanoo (sakkita) tere maɓɓe ɗen ɗe seeditoo golle maɓɓe ɗen.

Ko onon yo gomɗimɓe Alla e Nulaaɗo Makko on, wata on juulu hara hiɗon siwri haa ɗiwton e ngon siwrugol anndon ko wowloton -ɗum ko ado sanngara harminireede pellital - Wata on juulu kadi ko on modduɓe janaaba, wata on naatir non kadi ka juulirɗe si wanaa hara on feƴƴay woni haa lootoɗon. Si on woni e nawnraare haɗaynde on huutorgol ndiyam, maa hara ko on setiiɓe, maa goɗɗo e mun yehi ɓaawo hoggo, maa hara on renndo e rewɓe ɓen ; roŋkuɗon ndiyam, faandoree taamoragol leydi laaɓundi : mowlon geece mon ɗen e juuɗe mon ɗen. Pellet, Alla Laatike Haforoowo palje mon, Yawtanoowo on.

E a anndaa, an Nulaaɗo, wonnde ɓee alyahuudaaɓe ɓe Alla Okkunoo geɓal e ganndal Tawreetaare nden, hiɓe waɗtitira peewal ngal majjere, hiɓe rerɗira majjingol on onon muumini en, e laawol foccii ngol ngol Nulaaɗo on addani on ; fii no jokkiron laawol maɓɓe ooñii ngol ngol ?!

Ko Alla Tedduɗo Mawɗo On Ɓuri Anndude ayɓe mon ɓen onon muumini en, O Humpitii on fii maɓɓe O Ɓannginni on ngayngu maɓɓe ngun. Alla yonii Giɗo Reenoowo on, Alla yonii Ballo Daɗndoowo mon pewje maɓɓe e lorra maɓɓe, O Wallay on e maɓɓe.

Hino e ɓeya alyahuudaaɓe yimɓe waylirooɓe Konngol Alla Jippiingo ngol, ɓe waylira ngol ko ngol jippiniraaka, hiɓe wi'ana Nulaaɗo on mo jam e kisiyee woni e mun on, tuma on yamiri ɓe fiyaake : "Men nanii haala maa kan, men yeddii yamiroore maa nden", hiɓe jalkitira wi'ugol : "Heɗito ko men wi'aŋte kon" ; hiɓe heɓɓitora haala maɓɓe "raa'inaa" kan, faandorgol wiide : "Heɗito men", si ko woni, ko ittugol yiila ɓe faandorii kon ko ɗemɗe maɓɓe wowlata ; ko huɗugol Nulaaɗo on (yo o his) ɓe faanddii, e yuwugol ka diina. Hara nun ɓe wi'ayno : "Men nanii haala maa kan, men ɗoftike yamiroore maa nden", ɓe wi'a: "Heɗito", hara ɓe wi'aali : "A nanataa", ɓe wi'a: "Heɗito men men gelloo haala maa", ɓe tertoo wi'ugol : "Aynu men" ; ko ɗum ɓuraynoo moƴƴande ɓe, ɓura kadi foccanaade ɓe ; sabu ko ɗon woni ne'anagol Nulaaɗo on (yo o his). Ko woni tun, Alla Huɗii ɓe, O Pottiniri ɓe e Yurmeende Makko nden sabu keeferaaku maɓɓe ngun, ɓe gomɗiŋtaa gomɗinal nafayngal.

Ko onon yo ɓeya okkanooɓe Defte imoorde e Alyahuuda e Annasaare, gomɗinee Nden nde Men Jippini e Muhammadu on mo jam e kisiyee woni e mun, Nden Deftere goonginnde Ɗen wonɗe ka mon immorde e Tawreeta e Linjiila, ado Men Mehude momta tere ɗen ka geece mon, Men Waɗtira ɗe wano ɓabbe mon ɗen, maa Men Woɗɗiŋtina ɓe e Yurmeende Alla nden wano Men Huɗirnoo yimɓe asewe ɓen : jaggitunooɓe waañugol ngol nden ñalnde haɗaande, Alla Wayliri ɓe Bahɗi, Fiyaake Alla on e Kattal Makko ngal Laatike Siineteeɗum.

Pellet, Alla Yawtantaa gooto e tagu Makku ngun kafidugol Mo e goɗɗum, Himo Yawtana on Mo O Muuyi geddi jaasuɗi sirku, Maa O Leptira ɗum nunɗal Makko ngal Mo O Muuyi e maɓɓe yeru bakkaatu ontigi on. Kala non kafiduɗo Alla e goɗɗum, gomɗii haray o fefindike bakkaatu mawɗo mo yawtantaake.

E a anndaa an Nulaaɗo, fiyaake ɓen laɓɓinooɓe ko'e mun e golle mun ? Ko woni, ko Alla Tun woni Laɓɓinoowo on Mo O Muuyi e jeyaaɓe Makko ɓen ; tawde ko Kaŋko Anndi ko soomii e ɓerɗe maɓɓe, ɓe ɗuytaŋtaake huunde e baraaji golle maɓɓe ; hay si fotii wa gaarahun tamaro.

Ndaarii Nulaaɗo, hol no ɓe fefindorta e Alla fenaande tuma ɓe laɓɓiŋta ko'e maɓɓe ! Ɗum ɗon yonii bakkaatu feeññiɗo majjere maɓɓe nden.

E hawnaali an Nulaaɗo, fiyaake Alyahuuda ɓen okkanooɓe geɓal e ganndal, hiɓe gomɗina ɗin reweteeɗi maɓɓe ko woori Alla, ɓe wi'ana yedduɓe ɓen : "Ko ɓen ɓuri wonndiiɓe Muhammadu (saw) ɓen feewude laawol ?!".

Ko ɓen wonnduɓe e nden fiɓnde bonnde woni ko Alla Woɗɗindini e yurmeende Makko nden, kala non mo Alla Huɗi, a heɓataa mo ballo.

Ɓe alaa geɓal immorde e laamu, hara nun e heɓayno ngal geɓal, ɓe okkataano goɗɗo ko fotata hufol tamaroore ngun laamu.

Si ko woni, ɓe faala haasagol Muhammadu (saw) e wonndiiɓe makko ɓen dow kon ko Alla Okki ɓe immorde e Annabaaku e Liimanaaku e Ñiiɓugol ka leydi. Ko ɓe haasaŋtoo ɓe ? Gomɗii Men Okkiino jurriya Ibraahiima on Deftere Jippinaande nden, e kon ko Men Wahyini e maɓɓe ko jeyaaka e Deftere nden, Men Okki ɓe laamu yaajungu !.

Hino e yimɓe Defte ɓen, on gomɗinɗo nden Jippinaande e Ibraahiima (yo o his) e Annabaaɓe jeyaaɓe e jurriya makko on, hino e maɓɓe kadi on ɗuurniiɗo e gomɗingol nde, ko non kadi ɓee ɗoo jogitori nden Jippinaande e Muhammadu (yo o his). Ko yiite ngen woni lepte kala yedduɗo e maɓɓe.

Pellet, ɓen yedduɓe Aayeeje Amen ɗen, aray ka Men Naadaɓe yiite Ñalnde Darngal nge huuɓita ɓe : tuma kala nge sunni guri maɓɓe ɗin, Men Waɗtitanay ɓe guri goɗɗi fii no lepte ɗen duumora e maɓɓe. Pellet, Alla Laatike Fooluɗo Mo fooletaake, Ñeeñuɗo e Toppitagol Mun e Ñaawoore Mun.

Ɓen gomɗimɓe Alla e Nulaaɗo Makko on ɓe golli golle moƴƴe, aray ka Men Naada ɓe Aljannaaji Ñalnde Darngal hino ila ley kuɓeeje majji canɗi, ko ɓe heddotooɓe ndeer ton poomaa, hino woodani ɓe ton ɓeynguuli laɓɓinaaɗi e kala tuundi, Men Naadoyay ɓe dowɗi duumiindi ndi wulaa-ɓuuɓaa.

Pellet, Alla hino Yamira on nde Yottinton kala halfinaɗon e hoolaare faade e jeyɓe nde, Himo Yamira on kadi nunɗugol tuma ñaawoton hakkunde yimɓe ɓen hara on ooñaaki e ñaawoore nden. Pellet, ko Alla Waajorta on kon e kala huunde laamaa. Pellet, Alla Laatike Nanoowo haalaaji mon, Reenuɗo golle mon.

Ko onon yo gomɗimɓe Alla e Nulaaɗo Makko on, ɗoftee Alla e Nulaaɗo Makko on, ciinon ko o yamiri e woɗɗitoɗon haɗaaɗi makko, ɗoftoɗon kadi joomiraaɓe mon yamiroore ɓen fotde ɓe yamiraali on yeddugol Alla. Si on luutondirii e huunde, ruttee ɗaɓɓugol ñaawoore mayre ka Deftere Alla e ka sunna Annabiijo Makko on (saw), si on laatike gomɗimɓe Alla e Ñalaande Sakkitiinde nden. Ko ɗum ɗon ɓuri moƴƴude e dii heddagol e lurral, ko ɗum kadi ɓuri labaneede on battane.

E a yi'aali an Nullaɗo, lunndagol naafiqiiɓe ɓen ka Alyahuuda en, ɓen nodditorayɓe fenaande wiide hiɓe gomɗini kon ko Jippinaa e ma'a e kon ko Jippinaa e Nulaaɓe ɓen ado maaɗa ? Hiɓe faandii ñawitoroygol lurre maɓɓe ɗen ko woori Saria Alla on, gomɗii non ɓe yamiraama yeddugol ɗum. Seytaane hino faandii woɗɗiŋtingol ɓe e goonga kan fii wata ɓe feewi e makka.

Si naafiqi en ɓee wi'anaama :" Aree faade e kon ko Alla Jippini ka Deftere Makko immorde e ñaawooje, e faade e Nulaaɗo on fii no o ñaawira hakkunde mo'on", a yi'ay ɓe an Nulaaɗo, hiɓe ɗuurnoo gaay e maaɗa ɓe ñaawitora ko woori maa e falaade falagoltimmungol.

Ko honno naafiqi en wa'oyta tuma musiiba on memiroyta ɓe sabu kon ko ɓe faggitii e bone, refti ɓe ara e maa an Nulaaɗo hiɓe ngantinoo woondira Alla : "Men faandoraaki ñaawitorgol ko woori Nulaaɗo on si wanaa moƴƴinngol e hawrindinngol hakkunde luutondirɓe ?!" Hara non ko e fenaande ɓe woni ; ko woni, moƴƴinngol, ko ñaawirgol Sari'a Alla on e jeeyaaɓe Makko ɓen.

Ko ɓen woni ɓe Alla Anndi ko e ɓerɗe maɓɓe soomi immorde e naafiqiyaagal e faandaare bonnde, terto ɓe an Nulaaɗo, ɗuurnoɗaa gaay maɓɓe, ɓannginanaaɓe Ñaawoore Alla nden, wowlanaaɓe konngol tiiɗungol yottotoongol e pittaali maɓɓe.

Men Nuliraali Nulaaɗo woo si wanaa fii yo o ɗofte e kon ko yamirta e Duŋayee Alla e hoddireede mbo . Hara nun tuma ɓe tooñunoo pittaali maɓɓe ɗin ɓe faggitii geddi, ɓe aruno ma an Nulaaɗo, ɓe qirritii ko ɓe faggitii kon, ɓe nimsi, ɓe tuubi, ɓe ɗaɓɓi ya'afuyee ka Alla, ɗaɓɓanɗaa ɓe ya'afuyee ; ɓe tawayno Alla ko jaɓoowo tuubuubuyee, Hinnotooɗo ɓe.

Wonaa no naafiqi en aaƴori non. Hooti Alla Woondirii Jaati Makko kin, wonnde ɓe gomɗiŋtaa gomɗinal sellungal fotde ɓe ñaawitoraali ka Nulaaɗo on fewndo nguurdam makko ɗam, ɓe ñaawitora sari'a makko on ɓaawo faatagol makko ; tuma kala nde lurral yani hakkunde maɓɓe, refti kadi ɓe weltora ñaawoore Nulaaɗo on, hara ɓe ɓiɗtoraaki nde maa ɓe sikkitaaki, ɓe jebbilora nde hattirde e jebbilagol ko wirnii e ko feenyi.

Hara nun Men Farluno e maɓɓe nde yoga maɓɓe warata yoga, maa yaltugol e galleeji maɓɓe ɗin ; ko seeɗaaɓe e maɓɓe waɗaynoo ɗum. Yo ɓe yettude Alla tawnoo O Fawaali ɓe ko ɓe townataa. Sinno ɓe waɗuno ko ɓe yamiraa e ɗoftagol Alla, ɗum laatotono moƴƴere, e ko ɓurata tiiɗude e tabital liimanaaku, Men Yeɗayno ɓe kadi baraaji mawɗi, Men Fewnira ɓe laawol Alla ngol e Aljanna Makko on :

Hara nun Men Farluno e maɓɓe nde yoga maɓɓe warata yoga, maa yaltugol e galleeji maɓɓe ɗin ; ko seeɗaaɓe e maɓɓe waɗaynoo ɗum. Yo ɓe yettude Alla tawnoo O Fawaali ɓe ko ɓe townataa. Sinno ɓe waɗuno ko ɓe yamiraa e ɗoftagol Alla, ɗum laatotono moƴƴere, e ko ɓurata tiiɗude e tabital liimanaaku, Men Yeɗayno ɓe kadi baraaji mawɗi, Men Fewnira ɓe laawol Alla ngol e Aljanna Makko on.

Hara nun Men Farluno e maɓɓe nde yoga maɓɓe warata yoga, maa yaltugol e galleeji maɓɓe ɗin ; ko seeɗaaɓe e maɓɓe waɗaynoo ɗum. Yo ɓe yettude Alla tawnoo O Fawaali ɓe ko ɓe townataa. Sinno ɓe waɗuno ko ɓe yamiraa e ɗoftagol Alla, ɗum laatotono moƴƴere, e ko ɓurata tiiɗude e tabital liimanaaku, Men Yeɗayno ɓe kadi baraaji mawɗi, Men Fewnira ɓe laawol Alla ngol e Aljanna Makko on.

Kala on ɗoftiiɗo Alla e Nulaaɗo on : on ɗon wonndoyay e ɓen ɓe Alla Neeminiri naatugol Aljanna immorde e Annabaaɓe, e goonguɓe e ko Nulaaɓe ɓen addi kon ɓe gollitiri ɗum, e sahodinɓe fii laawol diina Alla, e moƴƴuɓe moƴƴini golle-mun. Ɓen ɗon moƴƴii wonndiiɓe ka Aljanna !

Ndin mbarjaari jaŋtaandi ɗon ko Ɓural ngal Alla Hertinani jeyaaɓe Makko ɓen, Alla Yonii Annduɗo fiyakuuji mon, O Yoɓitoyay kala e golle mun !

Ko onon yo gomɗimɓe Alla e Nulaaɗo Makko on, ƴettee reŋtorɗi mon ɗin jogitoɗon ko daɗitoron e ayɓe ɓen si hare yanii, yaltiron e maɓɓe konu konu, maa yaltiron on denndaangal ; no gasiraŋta on woo mettinirangol ayɓe mon ɓen.

Hino e mo'on onon juulɓe ɓen, yimɓe nennotooɓe yahugol haɓa ayɓe mon ɓen sabu kulol reedu, ɓe nenna kadi woɓɓe goo ; ɓen le ko naafiqi en. Si on waraama maa on foolaama, goɗɗo e maɓɓe weltora wi'ugol: "Gomɗii Alla Moƴƴike e am, mi tawdaaka e maɓɓe sakko musiiba heɓida lam e maɓɓe".

Si tawii le Ɓural foolugol maa heɓugol honateeri heɓii onon juulɓe ɓen immorde ka Alla, on nenniiɗo e jihaadi ndin wowliray wa si tawiino giggol laatanooki hakkunde mon e makko : "Ee jalla am sinno mi laatoduno e maɓɓe ka hare, mi heɓii Ɓural ngal ɓe heɓi !".

Yo gomɗimɓe ɓen haɓu fii Alla no Konngol Alla ngol ɓamtora, ɓen goonguɓe soodirooɓe nguur-aduna fii laakara. Kala on haɓidaaɗo fii laawol Alla ngol no ɓamtora o sahodini, maa o fooli gaño on, arma Alla Okka mo njoɓdi mawndi ; ko ndin woni Aljanna e Welayee Alla.

E haɗi on onon muumini en, waɗugol jihaadi fii ɓamtugol Konngol Alla ngol ? e fii faabagol lo*inaa- ɓe ɓen ka worɓe, e ka rewɓe, e ka fayɓe ; ɓen ɓe no toroo Alla ɓe wi'a : "Joomi amen, Yaltin men Makka tawde yimɓe ton ɓen tooñirii sirku e jaggitu- gol e jeyaaɓe Alla ɓen, Waɗanaa Men immorde ka Maaɗa on toppitotooɗo men, wallitoo men e duñu- gol lorra kan".

Gomɗimɓe ɓen hino haɓidee fii ɓamtugol Konngol Alla ngol, heeferɓe ɓen hino haɓidee fii reweteeɗi maɓɓe ɗin. Haɓee weldiiɓe seytaane ɓen: pellet, si on haɓidii e maɓɓe, ma on foolu ɓe ; tawde pewje seytaane ɗen laatike lo'uɗe, ɗe loratah fawiiɓe e Alla ɓen.

E a anndaa an Nulaaɗo, fii yoga e sahaabaaɓe maa lamndiiɓe yo jihaadi farle e maɓɓe, ɓe wi'anaa ado jihaadi ndin farleede : "Nantee juuɗe mon ɗen e jihaadi, ñiiɓnon julde, jonnon asakal", nde ɓe ferunoo Madiina, lislaamu on heɓi doole, jihaadi ndin farlaa ; ɗum tedditiri ɓe, ɓe waɗti hulirde yim- ɓe ɓen wano ɓe hulirta non Alla, maa ko ɓuri ngol kulol tiiɗude, ɓe wi'i : "Joomi amen, ko Farlanɗaa hare e dow amen ? Hanno Nennanaa men haa men dakmitora aduna ? Maakan ɓe an Nulaaɗo: "Dakamme aduna ko juuti woo lannay, ko laakara ɓuri moƴƴannde on hulɗo Alla Toowuɗo On ; tawde ko ton neema duumotoo, on ɗuytaŋtaake golle mon moƴƴe yeru hufol tamaroore".

Kala ka wonɗon maayde nden hewtitoto on si lajal ngal timmii, hay si on laatike e kuɓeeje mahaaɗe ka woɗɗitii nokku hare nden. Si goɗɗum e welo-welo heɓii naafiqi en ɓee ; wano ɓiɗɗo maa arsike yaajuɗo, ɓe wi'ay: Ɗum ɗoo ko immorde ka Alla", si saɗteende heɓiriiɓe ka jawdi ma ka ɓiɗɓe ; ɓe kiitinoroo Annabiijo on ɓe wi'a: "Ndee saɗteende ko sabu maa", maakan ɓee an Nulaaɗo : "Moƴƴere nden e bone on fow ko Ñaawoore Alla e hoddiro Makko". E ko nanngi ɓee ɓe ɓattotaako faamude haala-maa?!

Kala ko heɓu maa an ɓiɗɗo Aadama, woni arsikeede ɓiɗɗo maa jawdi ; ɗum ko Ɓural Alla e dow maaɗa, kala kadi ko heɓu maa e bone ka jawdi maa ka ɓiɗɓe ; ɗum ko sabu ko woŋkii maa kin faggitii e geddi. Gomɗii Men Imminirii ma an Annabiijo, faade e yimɓe ɓen, a Nulaaɗo immorde ka Alla, fii yottingol Nulal Makko ngal. Alla Yonii Seede e goongungol maa ngol ka yottingol.

Kala ɗoftiiɗo Nulaaɗo on e ko o yamirta kon, o woɗɗitii e ko haɗata kon ; gomɗii haray on ɗon ɗoftike Yamaruyee Alla on. Kala kadi ɗuurniiɗo ma an Nulaaɗo, wata ɗum sunine, tawde Men Nuliraali ma reenoowo golle maɓɓe, ko woni, ko Menen Hasbata ontigi e golle makko ɗen.

Naafiqi en no wi'ane : "Men ɗoftoto ma", si ɓe yaltii ka maa, fedde goo e maɓɓe suuɗitoto fewja ko lunndii kon ko ɓe feññinan ma. Alla non no Anndi kon ko ɓe fewjata, O Yoɓitoyay ɓe nden fewjoore maɓɓe, wata ɗum aanine ; ɓe lorataa ma hay huunde. Hoolor Alla fawoɗa e Makko, Alla Yonii Hoolorteeɗo.

Ko haɗata ɓee janngugol taskitora Alqur'aana haa fellitana ɓe wonnde lurre alaa e mayre ?! Haa goonga maa kan feeñanaɓe kadi. Hara nun ndee Qur'aanaare ko nokku goo iwri ko wonaa ka Alla, ɓe tawayno e mare cokko-cakka e lurre heewuɗe ka ñaawooje mayre.

Si fiyaake hoolaare, maa weltaare juulɓe ɓen arii e ɓee naafiqiiɓe, walla hara ko kulol juulɓe ɓen maa sunaare maɓɓe, ɓe saakitay ɗum. Sinno ɓe ruttuno on fiyaake e Nulaaɗo on (saw), maa e fewjooɓe fii maɓɓe ɓen; ɓen taskotooɓe ɓulnito maɓɓe fotngol gelloreede ko ɓe haani waɗde e fii saakitugol maa suuɗa fiyaake on. Si wanaano Ɓural Alla ngal e dow mooɗon -onon muumini en- e Yurmeende Makko nde O Ɗaɗndiri on jarrabuyee naafiqi en ; on jokkayno seytaane si wanaa seeɗaaɓe e mon.

Habu an Nulaaɗo, fii laawol Alla ngol no ɓamtora, a lamndetaake fii heddiiɓe ɓen ; tawde a fawaaka ka hare si wanaa hoore-ma. Rerɗin gomɗimɓe ɓen e hare nden, arma Alla nde Duñirta hare mon nden doole heeferɓe ɓen. Ko Alla ɓuri Tiiɗude doole, ko Kaŋko ɓuri Tiiɗude lepte.

Kala on etiiɗo e moƴƴere o heɓay geɓal e mayre, kala kadi on etiiɗo e bone o heɓay geɓal e makko. Alla Laatike Seeditiiɗo e kala kuuɗe neɗɗaŋke ɗen, O Yoɓitoyay ɓe ɗum, kala e mon wonɗa sabu jam o barjee jam, kala wonɗa sabu bone heba bone.

Si goɗɗo hiwrike on hiwritee mo ko ɓuri hiwraandu makko ndun, maa rutton sugu hiwraandu makko ndun, ko ruttugol ko ɓuri moƴƴude kon ɓurnaa. Pellet, Alla Laatike Reenuɗo kala golle mon ɗen, O Yoɓitoyay kala e golle mun.

Alla, reweteeɗo e goonga alaa si wanaa Kaŋko, ma O Mooɓitoy on fow Ñalnde Darnga nde sikke alaa e mun ; fii no O Yoɓitira on golle mon. Alla Ɓurɗo Alla goongude e yeewtere.

Ko waɗi on onon gomɗimɓe ɓen feddeeji ɗiɗi e fii ɓee naafiqiiɓe : fedde goo hino wi'a waree ɓe sabu keeferaaku maɓɓe, fedde goo wi'a accireeɓe sabu gomɗiɗal maɓɓe ngal ! On haanaano luutondirde fii maɓɓe. Alla Ruttiriiɓe e keeferaaku sabu golle maɓɓe ɗen. E on faala fewnude on mo Alla Majjini laawol goonga ngol ?! Kala on mo Alla Majjini, a heɓaŋtaa mo fewnoowo.

Naafiqi en no yeloo sinno on yeddayno kon ko Jippinaa e mooɗon wano ɓe yeddiri non, laatoɗon fotooɓe e ngol yeddugol. Wata on jogito immorde e maɓɓe yiɗɓe haa ɓe fera e laawol Alla ngol immo- immorde galle sirku faade ka leydi lislaamu fii felliŋtingol liimanaaku maɓɓe. Si ɓe ɗuurnike gaay ɗum, nanngee ɓe waron ɓe nokku kala ka tawɗon ɓe. Wata on jogito e maɓɓe giɗo, wanaa kadi ko wallindiron e ayɓe mooɗon.

Si wanaa ɓen ɓe hino jokkoo e maɓɓe faade yimɓe ɓe ahodiɗon tertagol hare, maaɗum ɓe arii on hara ɓerɗe maɓɓe ɗen hino faaɗani haɓugol on, maa haɓugol yimɓe maɓɓe ɓen. Si Alla Haajuno, O Warayno ɓe e mooɗon, ɓe haɓa on. Wata on haɓu ɓe maa dahon. Si ɓe pottitike on, ɓe haɓaali on, ɓe arii e mon fii moƴƴintingol, haray dey Alla Waɗanaali on e dow maɓɓe laawol haɓugol ɓe maa dahugol ɓe.

Onon gomɗimɓe ɓen, arma nde tawoton fedde goo e naafiqi en no feññinana on gomɗinal fii no ɓe faabinora on, ɓe feññinana yimɓe maɓɓe ɓen keeferaaku ngun tuma ɓe ruttii e maɓɓe fii no ɓen kadi faabora ɓe. Tuma kala non nde ɓe ruttitaa e yeddugol Alla ngol sirkana Mo, ɓe ugginite e mun ko tiiɗi. Ɓen non si haɗitaaki haɓugol on, ɓe ari e mun fii moƴƴiŋtingol, ɓe haɗi juuɗe maɓɓe ɗen meemugol on ; haray nanngee ɓe waron ɓe nokku kala ka tawɗon ɓe. Ɓen siforiiɓe ɗii sifaaji, Men Waɗanii on e nannugol ɓe ngol wara hujja ɓannguɗo ; sabu pewje maɓɓe ɓonɗe ɗen.

Haananaa gomɗinɗo nde warata gomɗinɗo si wanaa hara ko e faljere. Kala warɗo gomɗinɗo e hoore faljere, hara kaffaara rinɗingol daande gomɗinɗo waɗɗike mo, hino fawii yimɓe ronooɓe warɗo on diya (njoɓdi woŋkii) jonneteeɗo ronooɓe waraaɗo on : si wanaa hara ɓen yaafi on diya. Si waraaɗo on ko e yimɓe haɓideteeɓe mon jeyaa hara ko o gomɗinɗo, waɗɗoto waruɗo on rinɗingol daande gomɗinɗo, diya fawaaki mo. Si tawii non waraaɗo o wanaa gomɗinɗo, kono non ahadi tertagol hare no hakkunde mon, haray fawoto yimɓe ronooɓe waruɗo on diya jonneteeɗo ronooɓe waraaɗo on, hino fawii waruɗo on rinɗingol daande gomɗinɗo fii kaffaara kuuɗe makko ɗen. Si o heɓaali ko o rinɗina, maa o roŋkii feere mun, haray ko : yo o hooru lebbi ɗiɗi jokkondirɗi fii no Alla Tuubirana mo. Alla Laatike Annduɗo golle jeyaaɓe Makko ɓen, Ñeeñuɗo e Sari'a Makko on.

Kala warɗo gomɗinɗo e hoore tewaare, haray njoɓdi makko ndin ko naatugol Jahannama, ko o luttoowo e nder magge ; Alla Tikkanii mo, O Raɗike mo e Yurmeende Makko, O Hebilanii mo lepte mawɗe sabu faggitagol mo ɗii junuubi mawɗi.

Ko onon yo gomɗimɓe Alla e Nulaaɗo Makko on, si on fokitanii jihaadi, tabitinee fii ɓen ɓe haɓidoton, wata on wi'an on feññinanɗo on lislaamu mu'un : "Wanaa a gomɗinɗo, ko hulangol jawdi maa ndin e woŋkii maa kin fawu maa ɗum", waron mo fii ɗaɓɓere konhoyri ; dakamme aduna, ko ka Alla non konhoyri ɗuuɗundi woni ; ko ndin kadi ɓuri moƴƴude e konhoyri. Ko wano on suuɗuɗo gomɗinal mun e yimɓe mun ɓen wa'unoɗon ko adii, Alla Moƴƴorii e mon lislaamu on O Ɗaɗndi ƴiiƴe mon. Taskee. Pellet, huunde e golle mon ɗen suuɗaaki Alla, O Yoɓitoyay on e ɗum.

Ɓen gomɗimɓe roŋkuɓe yahude jihaadi fii laawol Alla ngol, hara wanaa joomiraaɓe ngaŋto ɓen hono nawnuɓe, maa wumɓe), fotataa e ɓen tiiɗnorɓe ka jihaadi ton jawle maɓɓe ɗen e woŋkiiji maɓɓe ɗin. Alla Ɓurnirii tiiɗnoriiɓe jawle mun ɗen e woŋkiiji mun ɗin, dow ɓen roŋkuɓe yahude jihaadi, darja. Kala maɓɓe hino fodaa moƴƴere ko o hanndi kon, Alla non Ɓurnirii tiiɗniiɓe ɓen e dow jooɗiiɓe ɓen, mbarjaari mawndi.

Ɗum ko darjaaji fawondirayɗi, wonndude e haforaneede junuubi, e Yurmegol ɓe. Alla Laatike Haforanoowo jeyaaɓe Mun ɓen, Hinnotooɗo ɓe.

Pellet, ɓen ɓe Malaa'ika warata , hara kamɓe ko ɓe tooñirɓe pittaali maɓɓe ɗin salagol ferude yaha e leydi lislaamu, Malaa'ika en hino fela ɓe wi'a tuma woŋkiiji maɓɓe yaltata : "Ko e honɗum wonunoɗon e mun ?!, ko senndi on e sirkooɓe ɓen ?!" Ɓe jaabi- tora ngaŋtinagol wi'a :"Men laatinoke lo'inaaɓe ɓe alaa fiira e feere". Malaa'ika en wi'ana ɓe : "Hari leydi Alla ndin yaajaa haa ka roŋkon yaltude fii no daɗidiron e diina mon koyraa ?! Ɓen ɗon roŋku ɓe feraana, werde maɓɓe nden ko Jahannama, nge bonii ruttorde e ñiiɓirde.

Hino ittintinaa e on kammbaa, ɓen lo'inaaɓe jogitiiɓe nganto ka worɓe, e ka rewɓe e ka fayɓe ; ɓen ɓe alaa doole pottingol tooñe ɗen e maɓɓe maa hara ɓe alaa feere ɓoortagol ɗen tooñe. Ɓen ɗon, arma Alla nde yawtirana ɓe yurmeende Makko, Alla Laatike yawtanoowo jeyaaɓe Makko tuubooɓe ɓen.

Hino ittintinaa e on kammbaa, ɓen lo'inaaɓe jogitiiɓe nganto ka worɓe, e ka rewɓe e ka fayɓe ; ɓen ɓe alaa doole pottingol tooñe ɗen e maɓɓe maa hara ɓe alaa feere ɓoortagol ɗen tooñe. Ɓen ɗon, arma Alla nde yawtirana ɓe yurmeende Makko, Alla Laatike yawtanoowo jeyaaɓe Makko tuubooɓe ɓen.

Kala on feruɗo iwi e leydi keeferaaku faade e leydi lislaamu fii ɗaɓɓugol Welayee Alla, o heɓoyay e leydi ndi o feri e mun ndin waylorde e leydi ndi wonah ndi o acci ndi, o danay ko ɓuri leydi ndi o o heɓay ton teddungal, e arsike yaajuɗo. Kala kadi yaltuɗo e suudu mu'un ko o feruɗo faade e Alla e Nulaaɗo Makko on, hooti maayde nden hewtitii mo ado o hewtoyde ka ferirde makko, gomɗii mbarjaari makko ndin tabitii ka Alla. Alla Laatike hafranoowo tuubuɗo e jayaaɓe Makko ɓen, Hinnotooɗo ɓe.

Si on ɗatniima , ka leydi on ngalah bakkaat e ustude juulde nde darɗe nay njuulon nde darɗe ɗiɗe, tawde on kuli nde huunde añaande yana- ta e mon ummorde e heefereeɓem, heefereeɓe ina ngañi mon gañgol ɓanngungol, tabiti e sunna dagaade ustde juulde e ɗatngal e saanga hoolaare.

Si a tawdaama e maɓɓe ka konu hare, an Nulaaɗo, a faandike juulnugol ɓe, senndu konu ngu pecce ɗiɗi : feccere goo juulida e maaɗa ɓe jogitoo jogaaji maɓɓe ɗin ka julde, ndeya feccere ayna ɓe, si feccere aranere nden juulidii e imaamu on darnde, yo ɓe timminan hoore-maɓɓe julde nden, si ɓe juulii, yo ɓe darto ɓaawo mooɗon ɓe fewta ayɓe ɓen, ndeya feccere ɗiɗaɓere reenaynoode nde juulaali kadi ara, ɓe juulida e imaamu on darnde, si imaamu on salminii, ɓe timmiŋtinoo julde maɓɓe nden ɓe jogitoroo jogaaji maɓɓe ɗin fii ayɓe ɓen. Heeferɓe ɓen yelinoke sinno on welsindotono e ɗii jogaaji mon e doŋle mon tuma juuloton, ɓe yana e mooɗon yanannde wootere, ɓe juha on e welsindaare mon. Bakkaatu fawaaki on si tawii lorra toɓo maa nawnaare heɓii on ekn, nde walliŋton jogaaji mon ɗin, ko woni tun, reŋtoree e ayɓe mon ɓen no newori woo. Pellet, Alla Hebilanii heeferɓe ɓen lepte hoynooje.

Si on timminii julde nden, onon gomɗimɓe ɓen, jaŋtoree Innde Alla nden subbunhinagol, e hamdinagol e haylilugol foti on dari, maa hara on juuɗi maa ko e hoore becce mon. Si kulol ngol iwii e mo'on on deeƴii, haray ñiɓnee julde nden no timmiri wonndude e waɗɗiiɗi mayre. Pellet, julde nden laatike ko farlaande e gomɗimɓe ɓen waqiŋtinaande ; dagotaako neɓnirgol nde si wanaa gaŋto, si tawii non ko e ɗanngal, haray hiwo dagoo hawtitugol renndinde e ustude.

Wata on lo'iŋkino onon muumini en, maajaasikino- ɗon e nder ɗaɓɓitugol heeferɓe ayɓe mon ɓen. Si on laatike hiɗon muusee e ko heɓata on e barme maa wareede, kamɓe kadi hiɓe muusiree wano muusirteɗon, wata ɓe ɓuru on muññaare ; sabu onon hiɗon jortii immorde e Alla mbarjaari e ballal kon ko ɓe jortaaki. Pellet, Alla Laatike Annduɗo fiyakuuji jeyaaɓe Makko ɓen, Ñeeñuɗo e Toppitagol Makko ngol Sari'aaji Makko ɗin.

Menen men Jippinii e maaɗa an Nulaaɗo, ndee Qur'aanaare wonndude e goonga fii yo a ñaawir hakkunde yimɓe ɓen kala fiyaaku maɓɓe kon ko Alla Hollu maa. Wata a wonan janfotooɓe ɓen wennjanoowo ɓe.

Ɗaɓɓir Alla yaafuyee e haforaneede. Pellet, Alla Laatike Haforanoowo kala tuubanɗo Mo e jeyaaɓe Makko ɓen, Hinnotooɗo ɓe.

Wota a wennjondire fii on neɗɗo fantinoowo janfa, suuɗa janfa mun. Pellet, Alla Yiɗaa ɓen fenooɓe heewɓe janfa e bakkaat.

Hiɓe suuɗoo yimɓe ɓen hersa maa kulol tuma ɓe yeddata kono ɓe suuɗotaako Alla, Kaŋko le Himo Wonndi e maɓɓe Huuɓiti ɓe tuma ɓe fewjata kon ko O Welaaka e konngol; wano hiwawande bakkondinɗo e tooñugol mo wi'aa-waɗaa. Alla Laatike Huɓindiiɗo kon ko ɓe gollata kene e gunndoo, huunde suuɗaaki Mo e ɗum, O Yoɓitoyay ɓe golle maɓɓe ɗen.

Hey mon yo ɓe'e himmirɓe fiyaake ɓen faggatooɓe bone, on wennjii fii maɓɓe ka nguurda aduna fii laɓɓinngol ɓe, daɗnaɓe ñaaweede. E ko hommbo non wennjanoyta ɓe Alla Ñalnde Darngal tuma fiyaaku maɓɓe anndaa fii mun, kaa ko hommbo laatantooɓe fawtiiɗo nden Ñalnde ?! Sikke alaa wonnde gooto hattanaaka ɗum.

Kala golluɗo ko boni maa o tooñiri hoore makko geddi, hooti o ɗaɓɓiri Alla haforaneede, o qirritii bone on, o nimsi, o taway Alla ko Haforoowo bone makko on, Hinnotooɗo mo poomaa.

Kala faggitiiɗo bone ; ɗuuɗi famɗi, pellet, lepte mun ɗen ko e makko tun yanata. Alla Laatike Annduɗo golle jeyaaɓe ɓen, Ñeeñuɗo e Toppitagol Sari'a Makko on.

Kala kadi faggitorɗo faljere goopol maa bakkadin-tewaare hooti o tooñiri ɗum goɗɗo goo daɗndiiɗo e on bone, gomɗii haray o ronnditike fenaande tiiɗunde e bakkaatu ɓannguɗo.

Si wanaano Ɓural Alla ngal e dow maaɗa an Nulaaɗo, pellet, fedde goo e ɓee janfatooɓe ko'e mum en himmirayno majjingol ma gaay e goonga kan roŋkaa ñaawirde nunɗal. Tgi rigi on, ɓe alaa e majjinnde si wanaa pittaali maɓɓe ɗin ; sabu lepte golle maɓɓe ɗen ko e maɓɓe yiltotoo. Alla Jippinii Qur'aana e sunna haa e maaɗa, O Anndinii ma peewal O Ndayginan maa ko a anndaano. Ɓural Alla ngal e dow maaɗa (Annabaaku ngun e ndeenka) laatike mawnu-ɗum.

Moƴƴere alaa e ko heewi e haala maɓɓe kaɓe gun- ndata hakkunde yimɓe ɓen, si wanaa kan haala yamirayka ittugol sadaka, maa moƴƴere nde diina kan tinndini e mun maa moƴƴiŋtingol hakkunde pooɗondirɓe. Kala huuwirɗo ɗum ɗaɓɓugol welayee Alla on, arma Men Okka mo baraaji mawndi.

Kala lunndiiɗo Nulaaɗo on e kon ko o addi ɓaawo nde peewal ngal feeñannde mo, o jokki laawol goo ko wanaa laawol gomɗimɓe ɓen, Men Acciday mo e ko o suɓii kon o majjira sawaaba on sabu ɗuurnagol goonga kan, Men Naadoya mo yiite Jahannama, nge bonii ruttorde !

Pellet, Alla Yawtaŋtaa kafidugol Mo e goɗɗum, O Naaday sirkoowo on yiite, Himo Yawtana ko jaasi ɗum e geddi wonannde on Mo O Muuyiri Ɓural e Yurmeende Makko. Kala o kafiduɗo e Alla goɗɗo goo, gomɗii on ɗon ooñorike e goonga kan ooñannde woɗɗiinde ; tawde o fotnii Taguɗo On e tagaaɗo on.

KO Ɓen sirkooɓe rewata, ɓe rewida ɗum e Alla, si wanaa sanamuuji rewɗiniraaɗi inɗe rewɓe ; wano Laata, e 'Uzzaa, ɗi lorrataa ɗi nafataa. Ɓe alaa e rewude ka haqiiqa, si wanaa seytaniiru yaltundu e ɗoftaare Alla ; tawde ko ndun yamiri ɓe rewugol sanamu.

Ko ɗum si Alla Woɗɗiniri ndu e Yurmeende Makko nden, ndun seytaaniiru huɗanii Joomi mayru ndu wi'i: "Ma mi jogitoyo e jeyaaɓe Maa ɓen geɓal anndangal, ngal mi majjinoyta e goonga kan.

Ma mi faloɓe gaay e laawol focciingol ngol, ma mi yelinyɓe yela fenaande ko no cuɗinana ɓe majjere nden, ma mi yamiroyɓe taygol noppi neemoraaɗi ɗin fii harmingol ko Alla Dagini kon e majji, ma mi yamiroyɓe waylugol tagu Alla ngun". Kala on jogitorɗo seytaane giɗo, gomɗii haray on ɗon sooyii sooyannde ɓanngunde.

Seytaande no foda ɓe penaale, himo yelina ɓe mehre, o alaa e yelinnde ɓe si wanaa mehre.

Ɓen jokkuɓe ɗate seytaane ɗen e kon ko mbo fida- taɓe, ñiiɓirde maɓɓe nden ko ka yiite Jahannama, ɓe heɓataa gaay e magge moolorde.

Ɓen gomɗimɓe Alla ɓe golli golle moƴƴe, aray nde Men Naada ɓe Aljannaaji ɗi ila senngo ley kuɓeeje majji canɗi : ko ɓe duumiŋteeɓe nder ton poomaa. Ɗum ko fodoore immorde ka Alla. Fodoore Alla nden non ko nde goongaare, O Lunndotaako fodoore. Alaa ɓurɗo Alla goongude e konngol.

Daɗugol ngol laatoraaki sabu yelaaji mon ɗin onon juulɓe ɓen maa sabu yelaaji yimɓe Defte ɓen. Si ko woni, ɗum ko golle ɗen jokki. Kala on golluɗo e mooɗon golle bonɗe o yoɓete ɗum Ñalnde Darngal, o heɓanoytaake ko woori Alla giɗo ɓaɗnoowo nafa wanaa ballo duñanoowo lorra.

Kala on golluɗo immorde e golle moƴƴe, foti ko gorko maaɗum debbo, hara kaŋko ko o gomɗinɗo Alla Toowuɗo On, ɓen ɗon moftuɓe gomɗinal e golle, ɓe naatoyay Aljanna, ɓe ɗuytanoytaake e moƴƴi maɓɓe ɗin ko fotata e gurun tamaro.

Alla ɓurɗo moƴƴude diina haa hewta on jebbilaniiɗo Alla kene e gunndoo o laɓɓini anuyee makko, o moƴƴini golle makko ɗen, o jokki diina Annabi Ibraahiima kan, iwdi diina Muhammadu (yo o his), ooñiiɗo gaay e sirku e keeferaaku faade e tawhiidi e gomɗinal. Alla Suɓike Ibraahiima Annabiijo Makko (yo o his), O Yiɗiri mo giggol timmungol e nder tagu Makko ngun denndaangal.

Ko Alla Tan Woodani kala ko woni ka kammuuli e ka leydi. Alla Laatike Huɓindoriiɗo Anndal e Kattal e Toppitagol kala huunde e tagu Makko ngun.

Hiɓe lamndo maa an Nulaaɗo, fii rewɓe ɓen e ko waɗɗii fee maɓɓe e dow maɓɓe, maaku: "Alla no Ɓannginannde on lamndal mon ngal, O Ɓanngina- na on kon ko janngetee e dow mooɗon ka Quraana fii ɓen alyatiimaaɓe rewɓe ɓe tammbitiɗon, ɓen ɓe on jonnataa kon ko Alla Farlani ɓe immorde e teŋe e ndonndi, on rerɗataa fii resugol ɓe hiɗon salora kadi goɗɗo goo resira ɓe miilegol jawle maɓe, himo Ɓannginana on kadi kon ko waɗɗii on e ɓen lo'iaaɓe jolta duuɓi'en fii no jonnitiron ɓe haqqee maɓɓe on ka ndonndi, O Haɗa on ñaamugol jawle maɓɓe ɗen, himo Ɓannginana on kadi wonnde no waɗɗii on daranagol alyatiimaaɓe ɓen nunɗal. Kala ko huuwuɗon e moƴƴere fii alyatiima en e woɗɓe goo, pellet, Alla no Anndi ɗum, O Yoɓitoyay on ɗum.

Si debbo hulirii moodi mun ɓurnitaare e ɗuurnaare, bakkaatu fawaaki ɓe kamɓe ɗiɗo bakkaat nde ɓe moƴƴiŋtinira sulhu debbo on jippitotoo e haqqeeji makko goo wano nafaqqa maa mbalndi. Ko sulhu on ɓuri moƴƴannde ɓe cergal ngal, pittaali ɗin anndiraama nguddam, ɗi heewaa jippitaade e haqqee majji, haani ka resindirɓe ɓen ñawndata ngun ñawu ɗon e maɓɓe, ɓe elta pittaali maɓɓe ɗin e muññondiral e moƴƴinngol. Si on moƴƴinii on hulii Alla ; on ɗoftike Yamruyeeji Makko ɗin o woɗɗitike Haɗaaɗi Makko ɗin, pellet, Alla Laatike Humpitiiɗo ko golloton, huunde suuɗaaki Mo, O Yoɓitoyay on ɗum.

Onon worɓe ɓen on waawataa nunɗirde mbaadi timmundi hakkunde rewɓe mon ɓen, hay si on rerɗii e ɗum ; ɗum ko sabu on maraa feere-mun, wata tun on ooño kala ooñannde e on mo on yiɗaa, tertoron mo wa yowaaɗo mo alaa moodi ko toppitoo mo. Si on moƴƴinii hakkunde mon on muññondirii hakkunde resindirɓe, on hulii Alla, pellet, Alla Laatike Haforoowo Hinnotooɗo on.

Si resandirɓe ceertarii ceergal wollo ɓoorgu Alla yondina gooto e mum en fof e ɓural Makko jaacngal Alla seeraani wonde ko jaacɗo ɓural e yurmeende jom ñeeñal e yiilde fiyakuuji e hoddirde.

Ko Alla Tun Woodani denndaangal ko woni ka kammuuli e ka leydi e laamagol ko woni hakkunde majji. Gomɗii Men Ahodii e yimɓe Defte ɓen, Men Ahodi kadi e mooɗon, wonnde : "Hulee Alla, ɗoftoɗon Yamirooje Makko reŋtoɗon e Haɗaaɗi Makko !". Si on firtii ahadi ndin, haray on lorree hoore-mon, Alla kan ko Galo Yonndinorɗo dewe mon, ko Kaŋko Jey kala ko woni ka kammuuli e ka leydi, ko O Yonndiniiɗo e kala tagu Makko ngun, ko O Yettiniiɗo e kala Sifaaji Makko e Kuuɗe Makko.

Ko Alla Tun Heeranii jeygol kala ko woni ka kammuuli e ka leydi, Hannduɗo ɗofteede. Alla Yonii Fawtotooɗo Toppitoo kala fiyaake tagu Makko ngun.

Si Mo Yiɗi, O Lannay fii mon, onon yo yimɓe, O Adda woɗɓe goo ko ɗoftotooɓe Mo ɓe yeddataa Mo. Alla Laatike Hattanɗo ɗum.

Kala e mon tawɗo ko mbarjaari aduna ndin tun faalaa, yo o anndu Alla No Jogii mbarjaari aduna e laakara, yo o ɗaɓɓu ɗin ɗiɗi immorde ka Makko. Alla Laatike Naatike Nanoowo jeewte mon, Reenuɗo golle mon, O Yoɓitoyay on e ɗum.

Ko onon yo gomɗimɓe Alla e Nulaaɗo, ñiiɓee e nunɗal, seedoɗon goonga, hay si tawii non ko e hoore-mon, maa e hoore jibimɓe on ɓen maa ɓadondiraaɓe mon ɓen. Wata ngalu maa baasal goɗɗo sakko on e seedagol ngol, tawde ko Alla Ɓuri Hanndude on baaso maaɗum galo. Wata on jokku mbeleeɗe ɗen ka seedagol haa ooñoɗon gaay e goonga kan. Si on waylii seedagol ngol on seedorike noone goo, maa on ɗuurnike e seedagol ngol ; haray pellet, Alla Laatike Humpitiiɗo ko golloton kon.

Ko ono yo gomɗimɓe Alla, holle hiɗon gomɗini Alla e Nulaaɗo Makko on, e Qur'aanaare Jippiinde nden e Nulaaɗo Makko on, e Defte Jippinaaɗe ɗen e ɓeya Nulaaɗo adinooɓe mo. Kala yedduɗo Alla, e Malaa'ikaaɓe Makko ɓen, e Defte Makko ɗen, e Nulaaɓe Makko ɓen e Ñalande Darngal ; gomɗii haray o woɗɗondirii e laawol focciingol ngol.

Pellet, ɓen yiltitotooɓe tuma kala e keeferaaku ɓaawo nde ɓe gomɗinnoo, refti ɓe maayde e ngun keeferaaku ; Alla Laatoraali Yawtanoowo ɓe junuubi wanaa kadi O Fewnoowo ɓe e laawol focciingol.

An Nulaaɗo, welinir naafiqiiɓe ɓen, wonnde no woodani ɓe immorde ka Alla, lepte muusuɗe Ñalnde Darngal.

Ɗen lepte maɓɓe, ko tawde ɓe jogitike heeferɓe ɓen yiɗɓe wallondirteeɓe ko wanaa gomɗimɓe ɓen, ɗum maɓɓe no haawnii ! E ɓe ɗaɓɓiray ɓe cemmbe e doole ko ɓe ɓamtora ?! Pellet, cemmbe e doole fow ko Alla Heeranii.

Gomɗii Alla Jippinii e mooɗon onon muumini en, e ndee Qur'aanaare Teddunde wonnde : "Si on nanii Aayeeje Alla ɗen no yeddee jalkitee e jonnde, haray ko yo on immo ɗon haa nde ɓen ɗon fuɗɗitoyii yewtere goo nde wanaa yeddugol jalkita Aayeeje Alla ɗen, si on jooɗodii non e maɓɓe fewndo ka yeddta jalkita ɗon Aayeeje ɗen, haray on nanndii e maɓɓe e lunndagol Yamiroore Alla nden ; tawde on jaɓaali immagol e jonnde maɓɓe nden. Pellet, Alla ko Mooɓoyoowo naafiqiiɓe ɓen e heeferɓe ɓen fow ka yiite Jahannama Ñalnde Darngal.

Ɓen habbittooɓe on bone maa moƴƴere, si on dañii polgal on heɓii konuheyri, ɓe wi'ana on : "E men wonndaano e mo'on, men tawdaa ko tawdaa ko tawdaɗon ?! Fii no ɓe heɓira geɓal, si heeferɓe ɓen heɓii geɓal, ɓe wi'ana ɓe : "E men toppitanooki on, men etii no fooliron men reeni on gomɗimɓe ɓen ?! Alla Ko Ñaawoyoowo hakkunde mo'on fow Ñalnde Darngal ; O Naada gomɗimɓe ɓen Aljanna, O Naada naafiqii ɓe ɓen ka ndenka ɓurka joltude ka nder yiite, Alla Waɗirantaa Heefer- ɓe ɓen Ɓural Makko ngal hujja e gomɗimɓe ɓen Ñalnde Darngal, si ko woni, O Waɗanay gomɗimɓe ɓen battane moƴƴe.

Pellet, naafiqiiɓe ɓen hino janforo Alla hollirde islaam e suuɗde keefeeru, Kanko kadi O Yoɓitiray ɓe janfa maɓɓe sabu O reeni ƴiiƴe mum en wondude ko O anndi ko keefeeru mum en, O heblana ɓe lepte sattuɗe ka Laakara.Si ɓe immanike julde nden, ɓe immoray ngaameelo, ɓe jantotaako wondude e añde juulde nde woni faandaare mum en tan ko yeengo e mawnineede, ɓe cellintah ngam Alla, ɓe njantataaka Alla si wonah setta si ɓe haynii gomɗimɓe ɓen.

Ɓen naafiqiiɓe no denngi-denndinan e weemre hakkunde ɗon, ɓe wonndaa e gomɗimɓe ɓen ɓe wonndaa e heeferɓe ɓen. Kala on mo Alla Majjini, a heɓantaa mo an Nulaaɗo, laawol no o feewira.

Ko onon yo gomɗimɓe Alla e Nulaaɗo Makko on, wata on jogitor heeferɓe ɓen weldiiɓe suɓaaɓe e hoore gomɗimɓe. E on faalira ngal kuugal mon nde waɗanton Alla e dow mooɗon hujja ɓannguɗo mo hanndirayɗon lepte ?!

Pellet, Alla Waɗoyay naafiqiiɓe ɓen ka ɓuri joltude ɗon e ndenka yiite Ñalnde Darngal, a heɓantaa ɓe non ballo duñanoowo ɓe ɗen lepte !

Si wanaa ɓen tuubuɓe ruttii e Alla iwde e naafige, ɓe moƴƴini golle maɓɓe, ɓe jogitii ahadi Alla ndin ɓe laɓɓinani Alla golle maɓɓe ɗen. Ɓen siforoɓe ɗin sifaaji, ɓe wonndii e gomɗimɓe ɓen aduan e laakara. Arma Alla Yeɗa gomɗimɓe ɓen njoɓdi mawndi.

Alla Haajaaka e leptugol on si on jaarnii Mo on gomɗinii Mo, si O Leptiray on ko junuubi mon ɗin. Si on moƴƴinii golle, on yettii Mo on gomɗinii Mo kene e gunndoo, alaa ko O Leptira on. Alla Laatike Jaarnoowo kala yettuɗo Neemaaji Makko ɗin, Annduɗo gomɗinal tagu Makko ngun, O Yoɓitoyay kala e golle mun ɗen.

Alla yiɗaa feññinirgol bone on konngol, Himo Añi ɗum Kammbani ɗum, kono on tooñaaɗo, hino daganoo mo feññinirgol bone on konngol fii wullita- gol ko o tooñaa kon o yottoo, ko si o muññike non ɓuri moƴƴude. Alla Laatike Nanoowo konnguɗi mon, Annduɗo Annuyeeji mon, reŋtee e wowlugol ko boni maa faandorgol ɗum.

Si on feññinirii konngol maa kuugal kala moƴƴere, maa on suuɗii nde maa on yaafanike on bonnuɗo e mo'on ; pellet, Alla Laatike Yaafotooɗo Hattanɗo, yo yaafagol ngol wonu jikku mon, belajo'o, Alla Yawtanay on.

Pellet, ɓen wonuɓe yeddude Alla e Nulaaɓe Makko ɓen, hiɓe faalaa nde ɓe senndata hakkunde Alla e Nulaaɓe Makko ɓen ; nde ɓe gomɗiŋta Mo ɓe yedda Nulaaɓe ɓen, hiɓe wi'a : "Meɗen gomɗina yoga e Nulaaɓe ɓen men yedda yoga maɓɓe", hiɓe faalaa nde ɓe jogitorta hakkunde ngol yeddugol maɓɓe gomɗina ɗon, laawol daɗndatngol ɓe.

Ɓen ɗon jokkuɓe ngol laawol, ko kamɓe woni heeferɓe ɓen tigiri ; tawde mo yeddii Nulaaɓe ɓen maa yoga emaɓɓe, haray o yeddii Alla e Nulaaɓe Makko ɓen. Men Hebilanii heeferɓe ɓen lepte hoy- nooje Ñalnde Darngal ; ɗum le ko fii ɓe townitanike gomɗingol Alla e Nulaaɓe Makko ɓen.

Ɓen gomɗimɓe Alla ɓe bajjinɗini Mo, ɓe kafidaali goɗɗo goo, ɓe goongini Nulaaɓe Makko ɓen den- ndaangal, ɓe senndaali hakkunde gooto e maɓɓe wano heeferɓe ɓen gerdiri ; ɓen ɗon, arma Alla Okka ɓe njoɓdi Mawndi e ngal gomɗinal maɓɓe e golle maɓɓe moƴƴe. Alla Laatike Yaafotooɗo kala tuubuɗo e jeyaaɓe Makko ɓen, Hinnotooɗo ɓe.

Alyahuuda no lamndo maa an Nulaaɗo, nde jippin- taa e dow maɓɓe Deftere immorde ka kammu won ɓe lamndornoo Muusaa. Ɗum ko maande e goon-ngugol maaɗa, wata a mawnin fii ɗum e maɓɓe, gomɗii adinooɓe ɓe lamndinoke Muusaa ko ɓuri ɗum mawnude ; ɓe lamndino mo nde o hollata ɓe Alla e kene pettan. Lepte ɗen faɗɗini ɓe, hooti Alla Wuurni ɓe, ɓe rewi ngaari ndin ko woori Alla ɓaawo nde Aayeeje Ɓannguɗe ɗen ari e maɓɓe tinndingol gootaagu Alla ngun. Hooti Men Yawtani ɓe Men Okki Muusaa hujja ɓannguɗo e yimɓe makko ɓen.

Men Ɓamtiri senngo dow maɓɓe fello ngon sabu ahadi maɓɓe ndin no ɓe hunnira ndin, Men Wi'ani ɓe ɓaawo ɗum : "Naatiree Bayt al Maqdisi on ko on naayiiɓe", ɓe hucci ɓe naati, Men Wi'ani ɓe : "Wata on jaggitir ñalnde asewe nden yunngugol", haɗaali ɓe jaggiti ɓe yunngi, Men Nanngi e maɓɓe ahadi tiiɗundi, ɓe firti ahadi ndin.

Men Raɗori ɓe e Yurmeende Amen nden sabu ko ɓe firti kon ahadi maɓɓe ndin, e ko ɓe yeddi kon Aayeeje Alla ɗen, e ko ɓe suusi kon warude Annabaaɓe ɓen e ko ɓe wi'ani ko Muhammadu (yo o his) : "Ɓerɗe amen ɗen ko sokiiɗe, ɗe fahmataa ko wowlataa", tawi non ɓe fenay, si ko woni, Alla Notii e ɓerɗe maɓɓe ɗen, ɗe nafitortaa moƴƴere ɓe gomɗintaa si wanaa seeɗa, ɗum le nafataa ɓe.

Men Huɗiri ɓe kadi sabu keeferaaku maɓɓe ngun, e ko ɓe tukkiri kon Maryama (yo o his) jeeno fenannde mawnde.

Men Huɗiri ɓe mantorgol ɓe fenaande wi'a : Menen men warii Almasiihu on, Iisaa ɓiɗɗo Maryama, Nulaaɗo Alla on". Ɓe warano mo non, men fempaano mo wano ɓe nodditorta ɗum, si ko woni, ko gorko mo Alla Nanndini e Iisaa ɓe wari ɓe fempi, ɓe sikki ɓe warii Iisaa. Ɓen nodditii ɓe warugol Iisaa ka Alyahuudaaɓe e ɓen Annasaaraaɓe jonnituɓe Iisaa Alyahuuda en, ɓe fow ɓe wonii sikkitaare fii makko, ɓe alaa anndal e fii makko, ko sikke tun ɓe jokki, sikke ɗen non duncataa hay huunde e goo-nga kan. Ɓe waraali Iisaa, ɓe fempaali mo pellet.

Si ko woni, Alla Daɗnduno mo bone maɓɓe on, O Ɓatiri mo faade ka Makko. Alla Laatike Fooluɗo e Laamateeri Mun, Ñeeñuɗo e Toppitagol Mun Ñaa- wooje e Sari'aaji Makko.

Alaa hay e gooto e yimɓe Defte ɓen, si wanaa o gomɗonay Iisaa (yo o his) tuma o jippoytoo ado maayde makko nden ka jamaanu sakkitoru. Ñalnde Darngal non, Iisaa wonoyay seeditotooɗo e golle maɓɓe ɗen ; hakkunde ko hawri e ko lunndii sari'a on.

Ko sabu tooñe Alyahuuda ɗen, Men toŋirani ɓe yoga e ñaameteeji laaɓuɗi daganinooɗi ɓe, Men Harminani ɓe kala jom feɗaandu, Men Harminani ɓe ka na'i e ka dammi ; ɓellere majji on si wanaa kon ko roondii ɗum ɓabbe majji on, kadi ko sabu sakkagol ɓe ko'e maɓɓe sakkoo woɗɓe goo e laawol Alla ngol haa ɗum woni jikku maɓɓe.

E sabu gollugol ɓe e ribaa on ɓaawo nde Alla Haɗi ɓe e ɗum, e sabu ñaamugol ɓe jawle yimɓe ɓen ko aldaa e goonga. Men Hebilanii yedduɓe ɓen e maɓɓe lepte muusuɗe.

Kono ɓen Alyahuudaaɓe tutiiɓe e ganndal, e ɓen gomɗimɓe, hiɓe goongina nden Al Qur'aanaare nden Alla Jippini e maaɗa, an Nulaaɗo, e ɗen Defte Jippinaaɗe e Nulaaɓe adinooɓe ma ; wano Tawreeta e Linjiila, hiɓe ñiiɓna julde nden, ɓe totta zakka on, ɓe goongina wonnde Alla ko Bajjo Mo kafidetaake, ɓe goongina fii Darngal ; ɓen ɗon, arma Men Okka ɓe njoɓdi mawndi.

Menen Men Wahyinii e maaɗa an Nulaaɗo, wano Men Wahyinirnoo e Annabaaɓe ɓen ado maaɗa, wanaa e maa ɗum fuɗɗori. Men Wahyiri- no faade Nuuhu, Men Wahyini kadi faade e ɓen Annabaaɓe arnooɓe caggal Makko, Men Wahyini faade e Ibraahiima, e ɓiɗɓe makko ɓen ɗiɗo : Ismaa'iila e Ishaaqa, e faade e Yaaquuba ɓiɗɗo Ishaaqa, e Asbaati'en (ɓen woni jeyanooɓe e leƴƴi banii-israa'iila'en ɗin sappo e ɗiɗi ka ɓiɗɓe Yaaquuba jom-kisiee). Men Okki Daawuuda Deftere Jabuura nden.

Nulaaɓe Amen goo, Men Qissanike ma fii maɓɓe ka Qu'raana, woɗɓe goo, Men Qissanaaki ma fii maɓɓe ; Men Acciri ɗum hikma. Alla Yewtidii e Muusaa ka Annabaaku -ko aldaa e heedo- yewtere haqiiqa hawrannde Seniiɗo On, teddungal wonan- nde Muusa.

Men Nuliriiɓe wewlinirgol mbarjaari teddundi immorde ka Alla, e jertingol yeddooɓe ɓen hulɓinira ɓe lepte muusuɗe fii wata hujja laatano yimɓe ɓen e hoore Alla ɓaawo nde O Nuli Nulaaɓe ɓen. Alla Laatike Fooluɗo e Laamu Makko, Ñeeñuɗo e Ñaawoore Makko.

Si Alyahuuda'en yeddii ma, pellet, Alla Kan no Goongini kon ko O Jippini e maaɗa immorde e Al Qur'aana, an Nulaaɗo. O JippiniI e mayre Anndal Makko ngal O Faandii Ƴelliŋtinnde Jeyaaɓe Makko ɓen, e kon ko O Yiɗi O Yarlii, maa O kon ko O Añi O Salii. Malaa'ikaaɓe ɓen no seeditoo wonndude e Seedee Alla On goongude kon ko addu-ɗaa. Alla non Yonii Seedee.

Pellet, ɓen yedduɓe Annabaaku maaɗa, ɓe palii yimɓe ɓen gaay e lislaamu on, gomɗii ɓe majjirii goonga kan majjere woɗɗude.

Pellet, ɓen yedduɓe Alla e Nulaaɗo Makko on, ɓe tooñiri pittaali maɓɓe ɗin heddagol e keeferaaku, Alla Wonaali Yawtanoowo ɓe faale maɓɓe hedda- gol e keeferaaku, wanaa nde O Fewnata ɓe faade e laawol daɗirngol lepte Makko ɗen.

Si wanaa ngol laawol naadayngol Jahannama, ko ɓe luttinteeɓe ton poomaa. Ɗum ɗon laatike newanii ɗum Alla, hay huunde O Ronkataa.

Ko onon yo yimɓe ! Gomɗii Nulaaɗo Muhammadu (jom-kisiyee) addanii on peewal e diina goonga immorde ka Alla Toowuɗo On, gomɗinee kon ko o addani on heɓon moƴƴere aduna e laakara. Si on yeddii Alla, anndde pellet, Ko O Yonndiniiɗo e gomɗinal mon, keeferaaku mon lorrataa Mo, Ko Kanko Woodani laamu kala ko woni ka kammuuli e ka leydi e ko woni hakkunde majji. Alla Laatike Anndu on hannduɗo e peewal O Newinana mo ngal, O Majjina on mo haanduɗo e maggal, Ñeeñu- ɗo e Daalol Makko e Golle Makko e Sari'a Makko e Kattal Makko.

Maaku an Nulaaɗo, wi'anaa Annasaara'en yimɓe Linjiila : "Wata on fantin ka diina mon, wata on wowlu e hoore Alla fii Annabi Iisaa si wanaa goonaga kan. Pellet, Mema-sella Iisaa ɓiɗɗo Maryama on, ko Nulaaɗo Alla mo O Nuliri goonga, O Tagirii mo Daalol Makko ngol O Nuliri Jibriilu (yo o his) faade e Maryam, ngol woni : Laato, O Laatii. Ɗum ko wuttaandu ndu Alla Nuliri Jibriilu yo wuttu. Awa gomɗinee Alla e Nulaaɓe Makko ɓen dennda-ngal hara on senndaali ɓe, wata on wi'u : "Reweteeɗi ɗin ko tati", haɗitee gaay e kan haala fenaande ; ko ɗum ɓuri moƴƴannde on aduna e laakara. Anndee pellet, Alla ko Reweteeɗo Gooto, Seniiɗo gaay e kafideede e ɓiɗɗo ! Ko O Galo. Ko Kanko Woodani laamateeri kammuuli ɗin e leydi ndin e ko woni e majji. Alla Yonii Hoolorɗo.

Mema-sella ɓiɗɗo Maryama on salataa o haɗitaaki nde o laatotoo jeyaaɗo Alla, wanaa Malaa'ikaaɓe ɓe Ɓaɗtinani mo ɓen. Honno jogitorton Iisaa rewe- teeɗo ?! Ko honno sirkooɓe ɓen kadi jogitorta Malaa'ikaaɓe ɓen reweteeɗi ?! Kala non nefinanii- ɗo rewugol Alla ngol, o townitanii ɗum, pellet, Alla Mooɓitoyay ɓe denndaangal faade ka Makko Ñalnde Darngal, O Yoɓita kala e ko hanndi kon.

Si tawii ko ɓen gomɗimɓe Alla e Nulaaɓe Makko ɓen, ɓe golli golle moƴƴe e hoore no sari'a on yami- yamriri non, arma O Okka ɓe baraaji golle maɓɓe ɗen O Ɓeydana ɓe immorde e Ɓural Makko ngal. Ɓeya townitiiɓe e rewugol Mo ɗoftoo Mo, O Leptay ɓe lepte muusuɗe, ɓe heɓoytaa gaanin Alla, giɗo nafoowo ɓe, wanaa ballo duñanoowo ɓe lorra.

Ko onon yo yimɓe ! Gomɗii hujja arii e mooɗon immorde ka Joomi mon ; on le ko Muhammadu (jom kisiyee), Men Jippinii e mooɗon ndaygu ɓanngu ngu ; ngun woni ndee Al Qur'aanaare.

Si tawii ko ɓen gomɗimɓe Alla ɓe jogitii Alquraana Jippinaande nden e Annabaajo maɓɓe on, arma Alla Yumee ɓe, O Naada ɓe Aljanna, O Ɓeydana ɓe njoɓdi e darja, O Fewnira ɓe laawol focciingol ; ngol woni laawol Aljanna ngol.

Hiɓe faltino maa an Nulaaɗo fii rona-jala -ko on woni maayɗo mo accaa baaba e ɓiɗɗo- Maaku : "Alla no Ɓannginannde on ñaawoore mun : si goɗɗo maayii o accaali baaba e ɓiɗɗo, hara himo mari banndiraawo debbo neene gooto maa baaba gooto, hino woodani on banndiraawo makko geɓal feccere jawdi ndin- gorko neene gootoojo maayɗo on maa baaba gootoojo makko ronata si owondaa e ronoowo-. Si banndiraaɓe rewɓe maayɗo on laatike ɗiɗo maa ko ɓuri, ɓe roniday tataɓe ɗiɗi. Si neene gootooɓe maa baaba gootooɓe maayɗo on jillii worɓe e rewɓe, gorko on ronay geɓal rewɓe ɗiɗo. Alla no Ɓannginannde on ñaawoore rona-jala e woɗɓe goo ka ndonndi, fii wata fii mun majjitor on. Alla Laatike Annduɗo kala huunde".

Ko onon yo gomɗimɓe, timminee kala piɓe ahadiiji hakkunde mon e Taguɗo on e hakkunde e tagaaɓe ɓen. Gomɗii Alla Daginanirii on yurmeende Makko, neemoraaɗi mummunte ɗin (gelooɗi, na'i e dammi) si wanaa kon ko janngante ɗon fii harmugol mun, wano O Harminira on waañugol fewndo hormaniɗon hajju maa 'umra. Pellet, Alla no Ñaawira harmingol dagina Ñeeñal Makko, alaa añoowo ɗum maa ɗuurnoo.

Ko onon yo gomɗimɓe, wata on dagintin Sari'aaji Alla Harmini ɗin, haɗitee e rentinaaɗi ɗin ka hormagol: wano ɓornagol ko ño'aa, haɗitoɗon kadi e harminaaɗi ɗin ka hormagol: wano waañugol, wata on dagintin hare e lebbi hormaŋte ɗin ; ɗin woni: sabbordu doŋkin, e jombeŋte e raajibi. Wata on dagintin neldaaɗi ɗin ka horom immorde e neemoraaɗi hirseteeɗi ton ɗin, maa sakkoɗon fii hewtugol ton. Wata on dagintin kadi ɗin maandinaaɗi fii neldaari, wata on dagintin sakkagol faandotooɓe Suudu Alla Hormaŋte ndun ; hiɓe ɗaɓɓa tono ngeygu e welayee Alla. Si on dagintinnike e hajju ngun maa 'umra on, on yaltii e horminagol ngol, haray waañee kala ko yiɗuɗon. Wata ngayngu yimɓe naadu on e sakkagol ɓe gaay e Juulirde Hormaŋte nden nde ronkoton nunɗude e maɓɓe. Wallindiree onon muumini'en, e huuwugol ko yamiraɗon, acca ko haɗaɗon. Hulee Alla ɗoftoɗon Mo, reŋtoɗon e haɗaaɗi Makko ɗin. Pellet, Alla ko Saɗtuɗo leptugol yeddoowo Mo, ndeentee e lepte Makko ɗen.

Alla Harminanii on ko : maayi jiibi e kulle ɗen, e ƴiiƴam rufaaɗam, e teewu kose, e kon ewnoraa hirsugol ko wanaa Innde Alla, e ɗeɗɗii kon maayi, e luuaa=lukkangol kol maayi, e unii(yanngol) kol maayi, juraa(juwangol) kol maayi, e ko kulle ɗen ñaami(conngi) -si wanaa kon ko hewtitiɗon hirsuɗon ado maayde ; ɗum ɗon no dagii, O Harminanii on kadi ko hirsanaa sanamu, e nde ɗaɓɓoton senndirgol payanɗe mon ɗun ko kaaje maa laane na winnda e mum(waɗ) woto (waɗ) refi golle ko ɗeen mbipi ko, gollugol ɗum ko ko harmi e mon te ko yaltugol e ɗoftaare Alla. Hannde heeferɓe ɓen taƴike nde murtoton yalton e diina Lislaamu kan, wata on huluɓe, hulee Lam Min. Hannde Mi Timminanii on diina mon Lislaamu kan, Mi Timminii e dow mooɗon Neemaaji Am feeñuɗi e wirniiɗi, Mi Suɓanike on Islaamu on diina ; Mi Jaɓataa diina goo ko woori Lislaamu. Kala ɓittoriiɗo heege o ñaami ko maayi hara wanaa o ooñoriiɗo bakkaatu, haray bakkaatu woo fawaaki mo. Pellet, Alla Ko Haforoowo, Hinnotooɗo.

Sahaaba'en no lamndo maa an Nullaɗo, ko hon-ɗum daginanaaɓe ñaamugol ? Maaku : "Daginanaama laaɓuɗi ɗin, e anndinɗon immorde e barmianyɗi eltaaɗi joman cellaaje wano dawaaɗi maa buutooji ɗin e joman en jagge hono liwe ɗi eltoton fii waañugo ko Alla Anndini on. Ñaamee e kon ko ɗi nannganta on ka waañugol hay si ɗi warii ɗum, jantoɗon Innde Alla e dow majji. Hulee Alla ɗoftoɗon Mo, accon haɗaaɗi Makko ɗin. Pellet, Alla Laatike Yaawuɗo hasboore.

Hannde Alla Daginanii on laaɓuɗi ɗin, e ñaamugol kirse yimɓe Defte ɓen, O Daginani ɓe kirse mon ɗen, O Daginani on resugol saŋiiɓe gomɗimɓe ɓen, e saŋiiɓe okkaaɓe Defte ɓen ado mooɗon si on jonnii ɓe teŋe maɓɓe ɗen, wonon saŋiiɓe e faahisaaku(pankare) e njaatagol jeena. Kala on yedduɗo Sari'a Alla on, gomɗii hara golle makko ɗen bonirii ŋakkugol gomɗinal, on ɗon Ñalnde Darngal, ko jeyaaɗo e hayruɓe lutooɓe ka yiite ɓen.

Ko onon yo gomɗimɓe, Si on immanike juulugol, hara non hiɗon wonndi e tayre tokosere, ko yo o salligo looton geece mon ɗen e juuɗe ɗen haa ka coɓɓuli, maswon ko'e mon ɗen, looton koyɗe mon ɗen haa ka kolɓule. Si on laatike janabante, ko lootagol lonngal, si tawii non on nawnu waqtu on pooɗike, maa hara hiɗon e hoore laawol, maa hara on huntu haaju ɓaawo hoggo, maa rennduɗon e rewɓe ɓen on heɓaali ndiyam ko laɓɓinoron, faandoree leydi ndin taamagol, mashon geece mon ɗen e juuɗe ɗen. Alla Faandanaaki on ɓitteende e Ñaawooje Makko ɗen, O Sar'inanii on lonto salligi si ndiyam heɓaaki ; no O Timminirana on Neemaaji Makko ɗin e dow mooɗon, belajo'o, on yettay Neemaaji Alla ɗin e dow mooɗon, hara on yeddaali ɗi.

Annditee Neema Alla on e dow mooɗon nde O Fewniri on Lislaamu, annditon kadi Ahadi Makko ndi O Ahodunoo e mooɗon tuma wi'unoɗon on haldidii e Annabiijo on (yo o his) nanugol ɗoftoo : "Men nanii konngol maa ngol men ɗoftike yamiroore maa nden". Hule Alla ɗoftoɗon Yamirooje Makko ɗen -wano Ahadiiji Makko ɗin- woɗɗitoɗon haɗaaɗi Makko ɗin. Pellet, Alla ko Annduɗo ko woni ka ɓerɗe, huunde suuɗaaki Mo e ɗum.

Ko onon yo gomɗimɓe Alla e Nulaaɗo Makko on, wonee ñiiɓuɓe e haqqeeji Alla ɗin dow mooɗon ɗaɓɓiron ɗum welayee Makko, seeditoron nunɗal. Wata ngayngu mon e yimɓe duñon e ronkugol nunɗude ; nunɗal no ɗaɓɓaa e giɗo e gaño, nunɗee e kala maɓɓe, ko nunɗal ngal ɓuri ɓaɗtaade e kulol Alla ngol, tooñe ɗen kan ko doolugol ɓaɗii. Hulee Alla, ɗofoton Yamirooje Makko ɗen rentoɗon e haɗaaɗi Makko ɗin. Pellet, Alla ko Humpitiiɗo ko golloton kon, huunde e golle suuɗaaki Mo, O Yoɓitoyay on e ɗum.

Alla Mo Lunndotaako ahdi On Fodii gomɗimɓe Alla e Nulaaɗo Makko on ɓe golli golle moƴƴe, wonnde no woodani ɓe haforal e njoɓdi mawndi.

Ɓen yedduɓe Alla ɓe fenni Aayeeje Makko ɗen, ɓen ɗon, ko ɓe yimɓe yiite naatirooɓe nge sagu geddi maɓɓe e fennugol maɓɓe ngol, ñiiɓooɓe ton.

Ko onon yo gomɗimɓe Alla, jantoree ɓerɗe mon ɗen e ɗemɗe mon ɗen kon ko Alla Neemini e dow mooɗon immorde e hoolaare, e hulɓingol ayɓe mon tuma nde ɓe faandinoo re'irgol on juuɗe maɓɓe ɗen ɓe gayna fii mon, Alla Suri ɓe on O Daɗndi on bone maɓɓe. Hule Alla ɗoftoɗon Yamirooje Makko ɗen woɗɗitoɗon Haɗaaɗi Makko ɗin. Ko e Alla Tun woni ko gomɗimɓe ɓen haani tuuginaade e fiyakuuji diina e aduna.

Gomɗii Alla Ahodii e ɓiɗɓe Israa'iila ɓen ko arata kon ley ɗoo, O Immini e maɓɓe hooreeɓe sappo e ɗiɗo, Alla Daalani banii Israa'iila'en : "Min Miɗo Wonndiri e mooɗon ballal : si on ñiiɓnii julde nden no haaniri, on jonnii zakka on, on goonginii Nulaaɓe Am ɓen denndaangal, on teddinii ɓe, on wallitike ɓe, on nafqirii e moƴƴere, on huuwii ɗum ɗon fow, ma Mi Heefan on bakkaatuuji mon cewɗi ɗin, ma Mi Naadoy on Ñalnde Darngal Aljannaaji ɗi canɗi ilata ley kuɓeeje majji. Kala non e mon yedduɗo ndii ahadi, gomɗii haray on woɗɗitike laawol fotondindirgol ngol tewaare.

Ko sabu firtugol maɓɓe ahadi ndin Men Huɗiri ɓe, Men Waɗti ɓerɗe maɓɓe ɗen yooruɗe ɗe nafitortaa moƴƴere e waaju : hiɓe waylita konngol ngol gaay e nokku maggol ɓe waɗta gonngol goo, ɓe firta ngol mbeleeɗe maɓɓe, ɓe acci gollugol kon ko ɓe annditinanoo e mun. A seerataa an Nulaaɗo, hiɗa hunca e maɓɓe janfagol Alla e jeyaaɓe makko gomɗimɓe ɓen, si wanaa seeɗaaɓe e maɓɓe hunnuɓe ahadi mun. Yaafano ɓe, laɓɓinanaa ɓe ; pellet, ɗum ɗon ko e moƴƴere jeyaa, Alla non no Yiɗi moƴƴinooɓe ɓen.

Ko wano Men Ahondirnoo non e Alyahuuda'en Men Ahondiri kadi e ɓen laɓɓinirɓe ko'e mun e fii jokkugol Iisaa (yo o his), ɓe acci gollugol kon ko ɓe waajoranoo, wano Alyahuuda'en adinooɓe ɓe gerdunoo. Men Werlii hakkunde maɓɓe ngayngu e konnaagu tiiɗungu haa Ñalnde Darngal, ɓe lutti e haɓidugol yeddondira. Arma Alla Humpita ɓe kon ko ɓe gollaynoo, O Yoɓita ɓe ɗum.

Ko onon Alyahuuda yimɓe Deftere Tawreeta, e Annasaara'en yimɓe Linjiila, gomɗii Nulaaɗo Amen on Muhammadu (yo o his) arii e mooɗon himo ɓannginana on ko ɗuuɗi e kon ko suuɗaynoɗon ka Deftere Jippinaande e mo'on, Himo Yaafoo gaay e ko ɗuuɗi e ɗum. Gomɗii Al Qur'aanaare nden ardiranii on Deftere Jippinaande imoorde ka Alla, ko nde Annoora jalbinorɗo, e Deftere ɓanngianay- nde kala haajuuji yimɓe ɓen ka fiyakuuji diiina e aduna.

Alla no Fewnira ndee Deftere, on jokkuɗo Welayee Makko on ka goɗinal e ka golle moƴƴe faade e laawi hisinanyɗi lepte Alla ɗen, O Yaltina ɓe e niɓe keeferaaku e geddi faade e Annoora gomɗinal e ɗoftaare e Duŋayee Makko, O Fewnira ɓe faade e laawol Islaamu focciingol.

Gomɗii Annasaara'en yeddii, ɓen wi'uɓe : "Allaahu on ko Meme-sella Iisaa ɓiɗɗo Marayama on". Maaku an Nulaaɗo : "Ko hommbo hattani haɗugol Alla hakugol Mema-sella Iisaa ɓiɗɗo Maryama on, e yumma makko, e kala ko woni ka leydi, si O Faandike halkude ɗum fow?!" Si gooto hattantaa ɗum, haray hollii wonnde reweteeɗo tanaa Allaahu alaa, e wonnde : Iisaa ɓiɗɗo Maryama on, e yumma makko, e denndaangal tagu ngun, ko tagu Alla. Ko Alla Woodani Laamu kammuuli ɗin e leydi ndin, e Laamagol ko woni hakkunde majji. Himo Taga ko O Muuyi, wano : Tagugol Iisaa (yo o his), on jeyaaɗo Makko e Nulaaɗo Makko. Alla ko Hattanɗo kala huunde.

Alyahuuda e Annasaara'en fow nodditorii wonnde ɓiɗɓe Alla e yiɗɓe Makko. Maaku an Nulaaɗo, jaaboɗaa ɓe : "Awa ko fii honɗum Alla Leptirta on junuubi mon ɗi faggitiɗon ?!" Sinno hara ko on yiɗɓe Makko wano aaƴoriɗon, ko honɗum O Leptirani on wareede ka aduna, naadee yiite ka laakara ; tawde non O Leptataa Mo O Yiɗi. Ko woni goonga, onon ko on ɓanndinke wano kala ɓanndinke, kala moƴƴinɗo e mo'on O Yoɓira Aljanna, kala bonnuɗo O Leptira mo yiite. Alla no Haforana Ɓural Makko ngal on Mo O Muuyi, O Leptira Nunɗal Makko ngal on Mo O Muuyi. Ko Alla Tun Woodani Laamu kammuuli ɗin, e leydi ndin, e Laamagol ko woni hakkunde majji. Ko Faade Ka Makko woni ruttorde nden.

Ko onon yo Alyahuuda e Annasaara, yimɓe Defte, gomɗii Nulaaɗo Amen on Muhaamadu (yo o his) arii e mon ɓaawo taƴontinnde immorde e Nulaaɓe, e sattude hatonjingol e Nulaaɗo ; fii wata on nganti- noyo wi'on : "Araali men Nulaaɗo welwlinoowo, jertinoowo". Gomɗii non Muhammadu (yo o his) arii e mo'on ko o weltinoowo, jertinoowo. Alla ko Hattanɗo kala hunnde ; wano hattangol Imminnde Nulaaɓe, Timminira ɓe Muhammadu on mo jam e kisiyee woni e mu'un.

Janto an Nulaaɗo, tuma nde Muusaa wi'annoo yimɓe makko ɓiɗɓe Israa'iila ɓen : "Ko onon yo yimɓe, annditiree ɓerɗe mon e ɗemɗe mon Neemaaji Alla ɗin e dow mooɗon tuma nde O Waɗunoo e mooɗon Annabaaɓe noddooɓe e peewal, O Waɗi on laamɓe ɓaawo nde laatinoɗon dahaaɓe, O Okki on Neemaaji ɗi O Okkaali gooto e tagoore jamaanu mo'on.

Muusaa maakani ɓe : "Ko onon yo yimɓe, naatee ka leydi laɓɓinaandi (Bayt al Maqdisi e ko huuɓiti ɗum) ndi Alla Fodi on naatugol haɓida e heeferɓe ɓen ton, wata on hoyfinkino yeeso bewɓe ɓen sakko ruttoɗon ko on hayruɓe aduna e laakara".

Yimɓe makko ɓen wi'ani mi : "Ko an yo Muusaa, hino e ndin leydi laɓɓinaandi yimɓe dunndereyan- kooɓe, tiiɗuɓe, ɗum haɗay men naatugol e mayri, men naatataa ton fodde hiɓe ton ; tawde men alaa feere e cemmbe haɓugol ɓe, si ɓe yaltii e mayri, pellet, ko men naatooɓe".

Worɓe ɗiɗo e wonndiiɓe Muusaa jeyaaɓe e hulɓe Alla, ɓe Alla Neeminiri ɗoftagol Mo wi'i -hiɓe rerɗina yimɓe Muusaa ɓen ɗoftagol mo : "Naatiranee ɓee dunndarankooɓe ka damal Madiina, si on duñii damal ngal, pellet, on naatiray Duŋayee Alla, fooliron ɓe dillere mon nden e dow gomɗinal e tiɗnaare. Ko e Alla fawotoɗon si on laatike gomɗimɓe, tawde gomɗinal no waɗɗina hoolorgol Seniiɗo On".

Yimɓe Muusaa ɓen wi'ani Muusaa e sattere noppi : "Menen men naatataa e saare nden fodde dunndarankooɓe ɓen no ton. Yahu an Muusaa e Joomi maaɗa haɓon dunndarankooɓe ɓe. Menen kan men iwtaa e oo nokku amen fii haɓidugol e mooɗon".

Muusaa maakani Joomi makko : "Joomi am, mi jeytanaa gooto si wanaa hoore-am e neene-gooto am on Haaruuna. Senndindir hakkunde amen e ɓen yimɓe yaltuɓe e ɗoftaare maaɗa".

Alla Daalani Annabiijo Makko on Muusaa : "Pellet, Alla Harminii e ɓiɗɓe Israa'iila ɓen, naatugol ndii leydi laɓɓinaandi, dumunna duuɓi cappanɗe nayi, e nder on dumunna, ɓe luttay e majjugol ka jeeree- nde ton. Wata a suno, an Muusaa, e ɓen yimɓe yaltuɓe e ɗoftaare Alla, sabu geddi maɓɓe ɗin e junubaaji maɓɓe ɗin lepti ɓe.

Fillano ɓee Alyahuudaaɓe haasidinooɓe toonyoobe, an Nulaaɗo, kumpite ɓiɗɓe-Aadama ɓen ɗiɗo : ɓen woni Qaabiila e Haabiila, e hoore goonga ; tuma nde ɓe ɓaɗtornoo ɓaɗtordi faade e Alla Seniiɗo On, Allaahu On Jaɓano Haabiila, tawde ko o gomɗuɗo, O Jaɓanaali Qaabiila, tawde o jeyaaka e gomɗumɓe ɓen, Qaabiila salorii ko Haabiila Jaɓiranaa kon sabu haasidi, o wi'i : "Ma mi ware an Haabiila", Haabiila jaabii : "Anndu ko gomɗuɓe huluɓe Alla be siini ko O yamiri be acci ko O hadi ko ɓen Alla Jaɓanta".

Si a fontirii junngo maa ngon e am fii yo a waram, min mi yoɓitirtaa ma sugu ɗen kuuɗe maa ɓonɗe. Si ko woni, min miɗo hula Alla Jeyɗo Tageefo ngon.

O yeewtiri mo hulɓingol : "Min mi faala nde ruttodataa e bakkaatu warugol lam e tooñe e hoore bakkaatuuji maa adinooɗi, laatodaa e yimɓe yiite ngen Ñalnde Darngal. Ko ɗum ɗon woni njoɓdi jaggitooɓe ɓen, min non mi yiɗaa ruttodaade e bakkaatu warugol ma, sakko mi jeydee e maɓɓe.

Wonkii Qaabiila kin cuɗani mo warugol neene-gooto makko on Haabiila e hoore tooñe, o wattiniri sabu ɗum ɗon jeyaaɗo e hayruɓe aduna e laakara.

Alla neli jeyyal hongal iirta leydi yeesa maggal ngam ngal ubba jeyyal maayngal haa ngal anndina mbo hono o suurirta fure musiɗɗo mum; barɗo siɗɗo mum o wii: woy heegam mbela mi ronki wadde no ngal jeyyal waɗi nih mi ubba siɗɗo am o, o suuri mbo o jeyaa e nimsuɓe.

Ko sabu ko Qaabiila wariri kon neene-gooto makko on Men Anndiniri ɓiɗɓe Israa'iia ɓen wonnde : "Kala warɗo wonkii ko aldaa e yottoranagol wonkii goo maa hara ko bonnirki ka leydi keeferaaru, haray o wa'ii wa warɗu yimɓe ɓen fow ; tawde o senndandi- ndiraali hakkunde daɗndiiɗo e bonnuɗo. Kala kadi haɗitiiɗo wargol wonkii ki Alla Harmini wargol e hoore tewaare, haray o wa'ii wa wuurnuɗo yimɓe ɓen fow ; tawde ɗum ɗon hisiay fow". Gomɗii Nulaaɓe Amen ɓen addanii ɓe ɓiɗɓe Israa'iila ɓen hujjaaji ɓannguɗi, kono haɗaali ɗuuɗuɓe e maɓɓe fantini e yawtugol Keeri Alla ɗin, ɓe faggitii geddi e lunndagol Nulaaɓe ɓen.

Ɓen haɓooɓe Alla e Nulaaɗo Makko on, ɓe bonnira jaggitere warugol e jaɓugol jawle e sakkagol ka ɗate, battane maɓɓe wonaali si wanaa ko yo ɓe ware tun, maa ɓe wariree dummbeede, maa taƴugol senngo ñaamo ngon ka juuɗe maɓɓe e ka koyɗe maɓɓe luutindra, si ontigi fillitike, senngo nano ngon ka juuɗe e ka koyɗe kadi taƴee, maa ɓe riiwee e leydi ndin. Ɗen lepte maɓɓe, wonanii ɓe wirtere aduna, hino woodani ɓe kadi laakara lepte mawɗe.

Si wanaa ɓen tuubuɓe e maɓɓe ko adii on heɓude feere maɓɓe, onon joomiraaɓe fiyaake ɓen. Anndee pellet, Alla ko Haforanoowo ɓe si ɓe tuubii, Hinnotoɗo ɓe, Firta leptugol ɓe.

Ko onon yo gomɗimɓe Alla, hulee Alla ɗoftoɗon Yamirooje Makko ɗen woɗɗitoɗon Haɗaaɗi Makko ɗin, ɗaɓɓiron Mo jokkorgal tuma ɗofɗotoɗon Mo, tiiɗnoɗo haɓugol heeferɓe ɓen fii welyayee Alla ; bela jo'o, on dañan ko ɗaɓɓoton, daɗon ko huluɗon.

Pellet, ɓen yedduɓe Alla e Nulaaɓe Makko ɓen, sinno gooto kala e maɓɓe hoddiranano laamagol kala ko woni ka leydi e yeru mun wonndude e ɗum, ɓe ardini ɗum fii soktirgol pittaali maɓɓe ɗin immorde e lepte Alla ɗen Ñalnde Darngal, ɓe jaɓantaake ngal soktorgal. Hino woodani ɓe lepte muusuɗe.

Hiɓe faalaa yaltude ka yiite ɓaawo nde ɓe naatno e magge, no ɗum neworaŋta ɓe?! Ɓe yaltataa e magge. Hino woodani ɓe lepte duumiiɗe.

Ngujjo gorko e ngujjo debbo : taƴiree juugo ñaamo kala maɓɓe -onon ñaawooɓe ɓen, njoɓdi ko ɓe faggitii kon, ɗum ko lepte immorde ka Alla fii hulɓinngol reŋtina heddii ɓe ɓen. Alla ko Fooluɗo Mo fooletaake, Ñeeñuɗo e Sari'a Makko on.

Kala on tuubuɗo e nguyka kan, o moƴƴini golle makko ɗen, pellet, Alla Jaɓanay mo tuubuubbuyee ; tawde Alla ko Haforoowo junuubi jeyaaɓe makko ɓen, Hinnotooɗo ɓe. Ko woni tun, O Yawtirantaa ɓe taƴugol juuɗe ngol fii ɓe tuubii si tawi ɗum hewtoyii ñaawooɓe ɓen.

Gomɗii a anndii an Muhammadu, wonnde ko Alla Woodani Laamu kammuuli ɗin e leydi ndin, Himo Waɗa ko O Muuyi e majji, O Leptira nunɗal Makko ngal on Mo O Muuyi, O Haforana ɓural Makko ngal on Mo O Muuyi. Pellet, Alla ko Hattanɗo kala huunde.

Ko an yo Nulaaɗo, wata ɓen yaccotooɓe e golle keeferaaku sunine, wata ɓen alyahuudaaɓe kadi heɗitantooɓe fenannde jaɓa nde sunine, ñemmbi- nooɓe hooreeɓe maɓɓe ; ɓen ɓe tawata ɓe araali ma fii ɗuurnagol ma : hiɓe waylita Konngol Alla ngol ka Tawreeta naɓira faale maɓɓe, hiɓe wi'ana ñemmbinooɓe ɓe : "Si ñaawoore Muhammadu nden yaadii e faale mon ɗen ƴettee nden, si nde luundike ɗe non rentee e mayre". Kala mo Alla Faalaa Majjinnde e yimɓe ɓen, an Nulaaɗo on a heɓantaa mo duñanoowo mo nden majjere sakko o feewa e laawol goonga. Ɓen siforɓe ɗin sifaaji alyahuuda e naafiiqi'en, ko ɓen woni ɓe Alla Faalaaka Laɓinnde ɓerɗe mu'un e keeferaaku. Hino woodani ɓe koyeera e hersa ka aduna, hino woodani ɓe lepte mawɗe ka laakara, ɗen woni yiite ngen.

Ɓee alyahuudaaɓe, ko heewuɓe heɗitanagol fenaande, heewuɓe ñaamugol jawle harmuɗe (wano ribaa). Si ɓe arii maa an Nulaaɗo fii ñaawito- reede, ñaawu hakkunde maɓɓe si ɗa yiɗi, maa terto-ɗaa ; ko an anndi ko ɓuran maa woo. Fii non a jaɓaali ñaawude hakkunde maɓɓe, ɓe hattanaaka lorrude ma hay e huunde. Si a ñaaway hakkunde maɓɓe, ñaawir nunɗal, fii kala ko ɓe ayruɓe tooñuɓe. Pellet, Alla no Yiɗi nunɗooɓe ɓen ka ñaawoore, hay si tawii non ñaawidooɓe ɓen hino ayri e ñaawoowo on.

Fii ɓee no haawnii ! Kamɓe ko ɓe yedduɓe ma, kono hiɓe ñaawinore tamƴinagol heɓude e nden ñaawoore ko yaadi e mbeleeɗe maɓɓe, hino ka maɓɓe ton kadi Tawreetaare nde ɓe aaƴotoo gomɗinnde, Ñaawoore Alla nden hino e mayre, refti ɓe ɗuurnoo ñaawoore maa nden si nde yaadaali e mbeleeɗe maɓɓe ɗen : ɓe hawtindiri hakkunde gomɗingol ko woni ka Deftere maɓɓe kon e ɗuur-nagol ñaawoore maa nden. Golle ɓee ɗen wonaali golle gomɗinɗo, wanaa ɓe gomɗimɓe ma e kon ko addu-ɗaa.

Menen Men Jippinii Tawreeta e Annabi Muusaa, tinndinoore Peewal e Annoora ndayginorɗo no e mayre, Annabaaɓe ɓiɗɓe Israa'ila ɓen jebbiliiɓe hino ñaawira nde, e ɓen karamokooɓe ne'irooɓe yimɓe ɓen kon ko Alla Reenini ɓe ka Deftere Makko, O Waɗi Hoolnii ɓe e mayre reenay ɓe nde e wayleede waɗtitee, seeditanii ɓe nde ko nde goonga. Onon alyahuuda, wata on hulu yimɓe ɓen, hulee Lam Min. Wata on nanngir coggeloy pamaroy fii haɗitagol ñaawirde ko Alla Jippini kon. Kala mo ñaawiraali kon ko Alla Jippini, maa o suɓii goɗɗum goo ko woori ɗum, maa o fotindini ɗum e goɗɗum goo, ko ɓen ɗon woni heeferɓe ɓen tigiri.

Men Farlii e alyahuuda ka Tawreetaare : wonnde kala ittuɗo wonkii e hoore tewaare ko yo o ware, kala ɓoruɗo yiitere e hoore tewaare ko yo yiitere makko ɓore, kala heluɗo kinal e hoore tewaare ko yo kinal makko ɓore, kala taƴuɗo nowru e hoore tewaare ko yo nowru makko ɓore, kala heluɗo ñiire e hoore tewaare ko yo ñiire makko hele, Men Farli kadi e maɓɓe : wonnde barme ɗen ko yottondiray ɗum. Kala non yaafiiɗo bonnuɗo ɗum, haray yaafuyee makko on wonanii mo kaffaara junuubi. Kala mo ñaawiraali ko Alla Jippini kon ka ñaawoore yottondiral e ko ɗeya ñaawooje, haray ko on ɗon woni yawtuɗo keeri Alla ɗin.

Men Jokkintini e batteeji ɓiɗɓe Israa'iila ɓen Iisaa geɗal Maryama on gomɗinɗo kon ko woni ka Tawreeta, ñaawitori ɗum. Men Okki mo Linjiila yowondirnde e Peewal, goonginnde kon ko adii nde immorde e Tawreeta -si wanaa seeɗa e kon ko "nuskaa" (momtaa) e ñaawooje mayre Men Waɗi Linjiila on wallitornde peewal, e gufo faggitagol ko harmi.

Yo Annasaara'en gomɗin kon ko Alla Jippini ka Linjiila ɓe ñaawitora kon ko nde addi e goonga ado Muhammadu (yo o his) Nuleede e maɓɓe. Kala mo ñaawiraali kon ko Alla Jippini, ko ɓen ɗon woni yaltuɓe e ɗoftaare Alla acci goonga oonyi e mehre.

Men Jippinii e maaɗa an Nulaaɗo, Al Qur'aana e hoore goonga wonnde ko ka Alla nde iwri, ko nde goonginnde kon ko adiinde e Defte Jippinaaɗe, ƴellitiinde e majje ; ko nde hawri e majje woo ko goonga, ko nde luutondiri e majje woo ko meere. Ñaawir hakkunde yimɓe ɓen kon ko Alla Jippini e maaɗa ka Deftere, wata a jokku mbeleeɗe maɓɓe ɗen, tertoɗaa goonga kan. Gomɗii Men Waɗanii mofte kala Saria ñaawitorɗo e Laawol feewnditirgol Sinno Alla Yiɗuno moftugol Sari'aaji ɗin O Waɗay- no, kono O tertorii ɗum fii jarriagol on. Adondiree e huuwugol moƴƴi ɗin tertoo haɗaaɗi ɗin. Ko faade ka Alla woni ruttorde mon nden Ñalnde Darngal, O Humpitoya on kon ko luutondirayno-ɗon e muuɗum, O Yoɓita on njoɓdi golle mon.

Ñaawir hakkunde maɓɓe an Nulaaɗo, kon ko Alla Jippini e maaɗa, wata a jokku mbeleeɗe maɓɓe ɗen, rento ɓe nde majjinte gaay e yoga e ko Alla Jippini e maaɗa, ɓe raɓɓintaako fii ɗum. Si ɓe ɗuurnike e jaɓugol ñaawitireede kon ko Alla Jippini e maaɗa, anndu ko Alla Faalaa nde O Leptirta ɓe aduna ɗoo sabu yoga e junuubi maɓɓe, O Leptira- ya ɓe laakara sabu junuubi maɓɓe ɗin fow. Pellet, ko heewi e yimɓe ɓen ko yaltuɓe e ɗoftaare Alla.

E ɓe ɗuurnoto ñaawoore maa nden ɓe ɗaɓɓa ñaawoore yimɓe majjuɓe rewooɓe sanamu ɓen ?! Alaa ɓurɗo Alla moƴƴude ñaawoore wonannde yimɓe yananaaɓe ɓen ɓe haqqila e kon ko Alla Jippini e Nulaaɓe Makko ɓen, hara wanaa yimɓe majjuɓe ɓen jokkooɓe mbeleeɗe salotooɓe kala ko lunndii mbeleeɗe maɓɓe.

Ko onon yo gomɗimɓe Alla e Nulaaɗo Makko on, wata waɗu Alyahuuda e Annasaara yiɗɓe weldiiɓe, Alyahuuda ko yimɓe mun weldidata, Annasaara kadi wano non ; ɓe fow ko ɓe ayɓe mo'on. Kala e mo'on welduɗo e maɓɓe, haray o jeyaama e maɓɓe. Pellet, Alla Fewnataa yimɓe tooñooɓe ɓen sabu ko ɓe weldidi kon e heeferɓe ɓen.

A yi'a an Nulaaɗo, naafiqiiɓe lo'uɓe liimanaaku ɓen, hiɓe yaccoo weldidugol e Alyahuuda e Annasaara, ɓe ngantinora ɗum wi'ugol : "Men hulu wata ɓee yiilo e amen, ɓe henndoo leydi ndin". Ar ma Alla Waɗana Nulaaɗo on e gomɗimɓe ɓen yiiloode nden, maa O Adda fiyaake immorde ka Makko ko no daɗnda on nde Alyahuuda e yiɗɓe maɓɓe yanude e mo'on, ɓen welduɓe e maɓɓe wattina ninsuɓe e naafiqiyaagal ngal ɓe suuɗi e ɓerɗe maɓɓe.

Gomɗimɓe ɓen no wi'a haawaaɓe fiyaake ɓee naafiqiiɓe : "E ko ɓee ɗoo wonndirnooɓe hattirde woondooje maɓɓe : wonnde hiɓe wonnde e mo'on -onon gomɗimɓe ɓen- ka weldigal e ka wallindiral ?! Golle maɓɓe ɗen bonii, ɓe wattini sooyuɓe sabu lepte ko ɓe hebilanaa.

Ko onon yo gomɗimɓe, kala on murtuɗo yalti e diina mun, o yehi e keeferaaku, arma Alla Adda yimɓe goo ɓe O Yiɗi kamɓe kadi ɓe Yiɗi Mo, yurmeteeɓe gomɗimɓe ɓen, sattuɓe e heeferɓe ɓen, hiɓe tiɗnora jawle maɓɓe e pittaali maɓɓe ɗin ɓamtugol Konngol Alla ngol, ɓe hulataa feloore feloowo ɓe ; tawde ko Welayee Alla on ɓe ardinii e dii welayee tagu ngun. Ɗum ko Ɓural ngal Alla Okkata on Mo O Muuyi e jeyaaɓe Makko ɓen, Alla ko Yaajuɗo Ɓural e Moƴƴere, Annduɗo on hatojin- ɗo e Ɓural Makko O yeɗa mo ngal, e on mo hanndaa e maggal O Ɗala mo.

Anndee Alyahuuda e Annasaare e heeferɓe heddiiɓe ɓen wanaa weldiiɓe mo'on, weldiiɗo mon e ballo mon on ko Alla e Nulaaɗo Makko on, e gomɗimɓe ɓen ñiiɓnooɓe julde, ɓe totta zakka, ɓe yankinanoo Alla.

Kala welduɗo e Alla e Nulaaɗo Makko on e gomɗimɓe ɓen, ko jeyaaɗo e fedde Alla nden, fedde Alla nden non, ko ɓen woni fooluɓe ɓen ; tawde Alla ko Walloowo ɓe.

Ko onon yo gomɗimɓe, wata on jogitor ɓen jalkitoo- ɓe diina mon, ɓe waɗta ka jalnori immorde e ɓen okkaaɓe Defte ado mon ka Alyahuuda e Annasara e sirkooɓe ɓen. Hulee Alla rentoɗon Haɗaaɗi Makko ɗin si on laatike gomɗimɓe Mo e ko O Jippini kon e mon.

Ko wano non ɓe jalkitirta on ɓe waɗta on jalnori si on noddinanii julde nden ɓaɗtorgol Alla : ko waɗi ɗum, ko tawde ko ɓe yimɓe ɓe haqqiltaa fii Alla e Sari'a Makko Mo O Sar'ini e jeyaaɓe Makko ɓen.

Maaku an Nulaaɗo, wi'anaa ɓen yimɓe Defte jalkitooɓe : "Enee, on aybiniray men fii tun men gomɗinii Alla e kon ko Jipinaa e amen, e kon ko Jippinanonoo ado amen, e wonnde pellet, ko ɓuri ɗuuɗude e mooɗon ko yaltuɓe e ɗoftaare Alla ?! Ko aybinton men, ɗum ko manoore wonannde men, wanaa ŋiñoore.

Maaku an Nulaaɗo : "Enee, on accay mi humpita on ɓurɓe hannde e aybineede, ɓurɓe saɗtude lepte? Ko ɓen ɓe Alla Huɗunoo mawɓe mun, O Waɗti ɓe baaɗi e kose, O Waɗi e maɓɓe rewooɓe sanamu ɓewinayɗum. Ko ɓen ɗon ɓuri bonnde nokkuure Ñalnde Darngal, ɓuri majjude kadi laawol focciingol ngol.

Si ɓe arii e mo'on onon gomɗimɓe ɓen, naafiqiiɓe ɓen e maɓɓe feññinana on gomɗinal, hara non ɓe naatidu e keeferaaku ngun, ɓe yaltidi kadi e maggu Ko Alla Ɓuri Anndude kon ko ɓe suuɗi e keeeferu tuma ɓe feññinanta on liimanaaku, O Yoɓitoyay ɓe ɗum.

A yi'a an Nulaaɗo, ko ɗuuɗi e Alyahuuda e naafiqe-en, no adondira e faggitagol geddi ; wano fenaande e jaggitere, e ñaamugol jawle hiɓe no harmiri. Ɗen golle maɓɓe bonii.

Ko hanno ɓen rewooɓe maɓɓe e annduɓe maɓɓe yaccoo haɗugol ɓe konngol fenannde e ñaamugol jawle yimɓe e hoore meere ? Bonii kon ko ɓen rewooɓe maɓɓe e annduɓe maɓɓe ɗon ronkaynoo haɗude ɓe.

Alyahuuda'en wi'i : nde tampere e hokkere yani e mum en "Junngo Alla ngon ko ñobbaango e okku- gol moƴƴere, o tottaani amen ko o jogii ko,! Faamee, juuɗe maɓɓe ɗen ñobbaama e ɗum, ɓe huɗiraama ngol konngol maɓɓe. Si ko woni, Juuɗe Seniiɗo On ɗiɗi ko fontaniiɗe dokkal e moƴƴere, Himo Faggira no O Muuyiri, alaa haɗoowo Mo maa yamiroo Mo. Kon ko Jippinaa e maaɗa an Nulaaɗo, ɓeydataa Alyahuuda'en si wanaa yawtugol Keeri ɗin ; tawde ko ɓe yimɓe haasidi. Men Bugike hakkunde maɓɓe ngayngu e konnaagu ; wano ɓe huɓɓirnoo yiite fii hare, Alla Saakiti ɓe, O Lo'ini ɓe. Ɓe seeraali hiɓe yaha bonna e leydi ndin, fewjana Lislaamu on ko boni. Alla non Yiɗaa bonnooɓe.

Sinno Alyahuuda e Annasaara gomɗinno kon ko Muhammadu (jom-kisiyee on) addi, ɓe huli Alla ɓe rentii e geddi ɗin, Men Heefanayno ɓe geddi maɓɓe ɗin no ɗi foti e waade, Men Naadayno ɓe kadi Aljannaaji Neema, ɓe neeminora Neema ɗi taƴondirtaa.

Sinno Alyahuuda gollitirno ko woni eTawreeta, Annasaare kadi gollitiri Linjiila, ɓe fow ɓe gollitiri nde Al Qur'aanaare Jippinaande e maɓɓe, pellet, arsike maɓɓe on neworayno toɓo e puɗi. No e yimɓe Defte ɓen non hakindiiɗo tabiti e goonga, ko ɗuuɗi e maɓɓe bonii ko gollata sabu waaseede liimanaaku.

Ko an yo Nulaaɗo, yottin no timmiri kon ko Jippinaa e maaɗa immorde ka Joomi maa, hara a suuɗaali hay e huude. Si a suuɗii goɗɗum e mun, haray a yottinaali Nulal Joomi maa ngal (Nulaaɗo on -saw- non yottinno ko ɓe Yamiraa kon, kala aaƴiiɗo ko lunndii ɗum ɗon, haray o mawninii fenaande e Alla). Alla non ko Daɗndoowo ma e yimɓe ɓen gila hannde, ɓe hattantaa bonagol e maa, ko yottingol tun fawi maa. Alla Fewnataa heeferɓe ɓen.

Maaku an Nulaaɗo, onon Alayahuuda e Annasaara on wonataa e diina jaɓaaka fodde on golliraali ko woni kon ka Tawreeta e ka Linjiila, golliron kadi ndee Al Qur'aanaare Jippinaande e mooɗon nde liimanaaku mon timmirtaa si wanaa gomɗingol nde. Ko maa tun ko Jippinaa kon e maaɗa immorde ka Joomi maaɗa ɓeyda ko ɗuuɗi e yimɓe Defte ɓen bewre e keeferaaku ; sabu haasidaaku. Wata a suno fii ɓee heeferɓe, gomɗimɓe jokkuɓe ma ɓen yonii ma.

Pellet, ɓen gomɗimɓe, e Alyahuudaaɓe ɓen, e ɓen rewooɓe koode,ɓen ko fedde jokkunooɓe e Anna- baaɓe eAnnasaara'en, kala gomɗinɗo e maɓɓe Alla, e Ñalaande Sakkitiinde nden, o golli golle-moƴƴe : haray kulol alaa ɓen ɗon, wanaa kamɓe kadi sunoytoo ko feƴƴi ɓe e aduna.

Gomɗii Men Nanngi ahadi ɓiɗɓe Israa'iila ɓen nanugol-jaɓa, Mi neli e mum en Nelaaɓe ngam ɓe njottina ɓe sariya Alla, ɓe firti ndi, ɓe jokki mbeleeɗe maɓɓe, ɓe ɗuurnii ko Nulaaɓe maɓɓe addani ɓe : ɓe fenni woɗɓe ɓe wari woɗɓe.

Ɓe sikki wonnde firtugol ahadi e hoolaare maɓɓe ndin e fennude wara Annabaaɓe ɓen, lorrataa ɓe, ɓe heɓi ko ɓe sikkaano, ɓe wumi e goonga kan, ɓe fahɗi e nanugol jaɓa goonga. Hooti Alla Jaɓani ɓe tuubuubuyee. Hooti ɓe wumi e goonga kan ɓe mbobiɗi e nanugol ka ; ɗuuɗi ɓe e maɓɓe waɗi ɗum. Alla non ko Reenuɗo ko ɓe gollata kon, huunde suuɗaaki Mo e ɗum, O Yoɓitoyay ɓe ɗum.

Gomɗii yeddii ɓen Annasaarankooɓe wi'uɓe won- de : "Alla ko on woni Mema-sella geɗal Maryam on" ; tawde ɓe dammbirii Allankaaku ngun ko woori Alla, hara non Meme-sella geɗal Maryam on maa- kanno ɓe :"Ko onon yo ɓiɗɓe Israa'iila, rewee Alla Tun, ko Kanko woni Joomi am e Joomi mon, en fow ko en jeyaaɓe Makko. Mo kafidii Alla e goɗɗum, pellet, Alla Haɗay o naatugol Aljanna poomaa, ñiiɓirde makko nden kadi ko ka yiite, o maraa ballo ka Alla ton, wanaa le kadi daɗndoowo lepte ɗen".

Gomɗii ɓen yeddii ɓen wi'uɓe : "Alla ko tato : Baaba on, e ɓiɗɗo on e ruuhu laɓɓinaaɗo on". Alla Senike Mawnii e ko ɓe wowlata, O Wonaali allaaji ! Si ko woni, ko O Reweteeɗo Gooto Mo Alaa kafidiiɗo. Si ɓe haɗitaaki e ngol konngol hulɓiniingol, pellet, lepte muusuɗe heɓay ɓe.

E ɓe tuubataa e ngol konngol maɓɓe ɓe ruttoo ka Alla, ɓe ɗaɓɓira Mo Haforaneede kon ko ɓe kafidi Mo e goɗɗum?! Alla ko Haforanoowo kala tuubuɗo hay si tawii ko keeferaaku o faggitii, Hinootooɗo gomɗimɓe ɓen.

Mema-sella Iisaa geɗal Marayama wonaali si wanaa jeyaaɗo e Nulaaɓe, o maayiray no ɓen maayirta. Neene Makko Maryama (yo ɓe hisidu) ko heewuɗo goongude goongina, kamɓe ɗiɗo ɓe ñaamayno ñaametee tuma kala ɓe hatonjini e mun, ko honno ñaamoowo laatorta reweteeɗo?! Ndaaru an Nulaaɗo taskoɗaa : honno Men Ɓannginiranta ɓe Aayeeje tinndinooje e Gootaaku ngun, tinndina kadi meerente ko ɓe woni e mun tuma ɓe dammba- ta allankaaku ngun ko woori Seniiɗo On, ɗum ha- ɗaali ɓe majjintingol Aayeeje ɗen. Refti ndaaraa : ko honno ferlisiraa e goonga kan ɗum e wonnde ɗee Aayeeje ɓannginii Gootaaku Alla ngun.

Maaku an Nulaaɗo e fii ko ɓe rewata kon ko wonaa Alla : "Enee, on reway ko wonaa Alla, kon ko nafa- taa on, lorrataa on?!" Alla non Gaynoowo ɗum. Ko Kanko Alla tun woni Nanoowo haalaaji mon, Annduɗo kuuɗe mon, huunde suuɗaaki Mo e ɗum, O Yoɓitoyay on ɗum.

Maakan Annasara'en an Nulaaɗo : "Wata on feƴƴintin e kon ko yamiraɗon jokkugol goonga, wata on feƴintin mawningol ɓen ɓe yamiraɗon mawninnde -wano Annabaaɓe ɓen- haa waɗtonɓe reweteeɓe ; wano gerduɗon e fii Iisaa ɓiɗɗo Maryama on, jokkituɗon adinooɓe on e majjere nde ɓe majjinno yimɓe ɗuuɗɓe, ɓe majji laawol goonga ngol.

Alla Seniiɗo On Hino Humpita wonnde O Huɗiino yedduɓe ɓen e ɓiɗɓe Israa'iila ɓen e nden Deftere nde O Jippini e Daawuuda -woni Jabuura- e Deftere nde o Jippini nden e Iisaa ɓiɗɗo Maryama on -woni Linjiila- Ndin kuddi non, ko sabu ko ɓe faggitii kon e geddi, e ko ɓe jaggiti kon keeri Alla ɗin.

Ɓe haɗindirtaano e faggitagol bone, toode yedduɓe e maɓɓe ɓen feññinayno geddi mun ɗin ; tawde alaa haɗoowo ɓe. Bonii kon ko ɓe gollaynoo e nden salaare haɗugol bone!

Hiɗa yi'a an Nulaaɗo, ko ɗuuɗi e ɓee Alyahuud en heeferɓe, hino welda e heeferɓe ɓen, ɓe aña maa ɓe añide e bajjinooɓe Alla ɓen. Bonii kon ko ɓe ardini e weldugol e yedduɓe ɓen, tawde ɗum no waɗa haa Alla Tikkana ɓe, O Naada ɓe yiite nge ɓe luttoyta e mun poomaa.

Hara ɓee Alyahuudaaɓe si gomɗinno Alla tigi, ɓe gomɗini Annabaajo Makko on, ɓe jogittanooko sirkooɓe ɓen weldiiɓe ɓe acca gomɗimɓe ɓen ; tawde ɓe haɗaama weldidugol e ɓeya. Kono ɗuuɗuɓe e Alyahuuda'en ɓee, ko yaltuɓe e ɗoftaare Alla.

A taway an Nulaaɗo, ko ɓuri yimɓe ɓen tiiɗude añugol gomɗimɓe ma ɓen gomɗini kon ko addu-ɗaa, ko Alyahuuda ; tawde ko ɓe yimɓe haasidi e ngayngu e townitaare e rewugol sanamu, e ɓen sirkanooɓe Alla. A taway kadi ko ɓuri ɓe ɓaɗtaade yiɗugol gomɗimɓe ma ɓen gomɗini kon ko addu-ɗaa, ko ɓen wi'uɓe : kamɓe ko ɓe Annasaara ; tawde no e maɓɓe annduɓe e rewooɓe, e wonnde ko ɓe yankiniiɓe ɓe townitaaki ; sabu townitaare nden haɗay goonga hewtude ka ɓernde.

Ɓee ɗoo -wano Al-Najashi e wonndiiɓe mun, ɓerɗe maɓɓe no newii, tawde hiɓe fesa tuma ɓe nani kon ko Jippinaa ko Qur'aanaare, e sabu ko ɓe anndi kon goonga kan ka Iisaa (yo o his) addi, hiɓe wi'a: "Joomi amen, men gomɗinii kon ko Jippin Ɗaa e Nulaaɗo Maa on Muhammadu (jom-kisiyee), Winndidu men e mofte Muhammadu ɗen Ñalnde Darngal, men wona hujja e yimɓe ɓen.

E ko haɗata men gomɗinde Alla e kon ko O Jippini immorde e goonga ka Muhammadu (jom-kisiyee) ardi ?! Menen non ko men jortiiɓe naatidugol aljanna wondudeAnnabaaɓe ɓen e laaɓuɓe ɓen ɗoftii Alla Aljanna.

Alla Yoɓitiri ɓe gomɗinal maɓɓe ngal Aljannaaji ɗi canɗi ilata senngo ley majji, ko ɓe duumotooɓe ton poomaa. Ɗum ɗon ko njoɓdi moƴƴimɓe ɓen sabu ko ɓe jokki goonga kon.

Ɓen yedduɓe Alla e Nulaaɗo Makko on, ɓe fenni Aayeeje Alla ɗen ɗe O Jippini e Nulaaɓe Makko ɓen, ɓen ɗon ko luttooɓe ka Yiite Jahiimi, ɓe yaltintaake toon haa pooma.

Ko onon yo gomɗimɓe, wata harmin ñaameteeji e njaramji e dewle ɗe Alla Daginani on ; harminiron ɗum ruuɗagol, wata on jaggitu kadi Keeri Alla ɗin. Pellet, Alla Yiɗaa ɓen yawtooɓe keeri Makko ɗin, Himo Tikkana ɓen.

Ñaamee immorde e kon ko Alla Arsiki on dagiiɗi laaɓuɗi, hara wanaa kon ko harmi soɓi. Hulon Alla ɗoftoɗon Yamirooje Makko woɗɗitoɗon Haɗaaɗi makko, Ko On Woni mo gomɗinɗon, gomɗingol Mo ngol hino waɗɗina on hulugol Mo.

Alla Ñaawirtaa on, onon gomɗimɓe ɓen, kon ko faljoton e goondooje mon, konon himo Nanngira on kon ko eɓɓanton fiɓon ɗum ka ɓerɗe mon. Himo Momtirana on kon ko woondirɗon gootel e piiji tati : ko ñammingol tampuɓe sappo immorde e ñaametee yimɓe leydi mon, gooto kala feccere "saa'u", maa ko ɓen yimɓe holtinirtee, maa rinɗingol daande gomɗinɗo. Si mo kaffaara woondoore nden on heɓaali gootel e ɗin ɗon tati, yo soktor hoorugol balɗe tati. Koo ko jantaa ɗon, ko kaffaara goondooje mon ɗen, onon gomɗimɓe ɓen, tuma tawi on woondirii Alla. Reenee goondooje mon ɗen accon woondirgol Alla fenaande maa ɗuɗɗingol woondirde Alla, maa woondira Alla ronka hunnude. Ko wano Alla Ɓannginirani on non kaffaara woondoore nden, O Ɓannginiranta on haram e halal, belajo'o, on yettay Alla tawde O Anndinii on ko on anndaano.

Ko onon yo gomɗimɓe, anndee ko siwrinta kon naɓa hakkil, e fijindaaru karte ndun, e nden hayre nde sirkooɓe ɓen hirsata takko mun fii mawningol nde rewa nde, e payaloy koy ɓe gollitirta ndaaro fow ko bone mo seytaane suɗini, woɗɗitee e ɗum, belajo'o, on malete aduna naatoyon Aljanna ka laakara.

Anndee ko seytaane faandii e cuɗinirgol beere nden e karte ɗen, ko liɓugol ngayngu e konnaahu hakkunde mon, o sakkoo=falagol on gaay e jantagol Alla e gaay e julde nden. Hara onon ɓee gomɗimɓe on haɗitoto e ɗin añiniiɗi? Sikke alaa ko ɗum ɓuri moƴƴannde on, rentee.

Ɗoftee Alla, ɗoftoɗon Nulaaɗo on e kon ko Sari'a on yamiri, woɗɗitoɗon e ko o haɗi, rentoɗon lunndagol. Si on ɗuurnike ɗum, anndee pellet, ko fawii Nulaaɗo Amen on, ko yottingol ɓanngina kon ko Alla Yamiri mo yottingol, gomɗii le o yottini. Si on feewii on feewanii hoore-mo'on, si on bonnii ko hoore-mon fawii.

Bakkaatu fawaaki ɓen gomɗimɓe Alla ɓe golli golli golle-moƴƴe ɓaɗtorgol Alla e kon ko ɓe yarunoo e beere ado nde harmineede ; si ɓe woɗɗitike harmuɗi ɗin, ɓe huli tikkere Alla nden, ɓe gomɗini Mo, ɓe golli golle-mocce, refti ɓe ɓeydorii kulol Alla wa si tawii hara hiɓe reeni Mo. Alla no Yiɗi ɓen rewirayɓe Mo wa si tawii hiɓe reeni Mo ; tawde ko ɗum duñata gomɗimɓe ɓen gollugol ko moƴƴi duumoo e mun.

Ko onon yo gomɗimɓe, maa Alla Jarribora on huunde e ko soggoton ka waañugol hara hiɗon horminii, hiɗon nanngiri tokoosi mun ɗin juuɗe mon ɗen, nanngiron njani mun ɗin gaawe mon ɗen ; fii no Alla Anndira on huloowo Mo e birnal hattinɗo gomɗinnde Alla e Anndal Makko, o haɗitora mbaroodi ndin hulugol Alla Reenuɗo kala huunde. Kala yawtuɗo keeri ɗin, o waañi ko o horminaniiɗo hajju maa 'umra, haray no woodani mo lepte muusuɗe Ñalnde Darngal ; tawde o waɗii ko Alla Haɗi.

Ko onon yo gomɗimɓe, wata on waru mbaroodi hara ko on horminaniiɓe hajju maa 'umra. Kala warɗo ndi e mooɗon ko o tewiiɗo, haray fawike mo njoɓdi yeru kon ko o wari e mbaroodi gelooɗi maa na'i maa dammi, ñaawa ɗum worɓe ɗiɗo nunɗuɓe e juulɓe ɓen, kon ko ɓe ñaawi gollitiree wano neldaari ndin e kirse nuleteeɗe ɗen ka hormorde Makka, maa yeru ɗum e ñaametee jonneteeɗo tampuɓe ton ɓen -gooto kala feccere "saa'u", maa hoorugol ñalaande kala yoɓitirgol feccere "saa'u" nden ka ñaametee. Ɗum ɗon fow ko no warɗo mbaroodi ndin meeɗira battane kuuɗe makko ɗen. Alla Yaafike kon ko feƴƴi e warugol mbaroodi wano harminiraa non ɓaawo ɗum. Kala non fillitiiɗo ɗum, Alla Yottoto e makko O Lepta mo. Alla ko Fooluɗo Hattanɗo yottagol e yeddoowo Mo si O Muuyii, alaa ko haɗata Mo e ɗum.

Daginanaama on yunngugol+raddugol kulle maayo ɗen, kala ko heɓotoo ka bahru -wuuri maayi- ko dakamme moo'on woni on ñiiɓu maa hara on yooɓi e setewu. Harminanaama on waañugol ka njorndi (leydi) fodde hiɗon hormanii hajju maa 'umra. Hulee Alla, KO ka Makko woni ko mooɓoyteɗon Ñalnde Darngal, O Yoɓitoya on golle mon.

Alla Waɗii Kaaba on : Suudu Hormante wonannde yimɓe ɓen, maslaha maɓɓe diina no huntee ɗon ; immorde e julde e hajju e 'umra, e maslaha aduna ; immorde e hoolaare nden ka haram e moƴƴere ko addetee ton. O Waɗi kadi lebbi hormante ɗin ñiiɓirɗi wonannde ɓe, e neldaari ndin e ŋanneteeɗi=meedinaadi addee ɗin ka haram. Kon ko Alla Neemini e mon, ko fii yo on anndu wonnde Alla no Anndi kon ko woni ka kammuuli e ke leydi, e wonnde Alla no Anndi kala huunde ; tawde ko O Sar'ini kon ko fii ɓaɗnanngol on nafa duña lorra ado ɗum hewtude on, ɗum no tinndina wonnde himo Anndi ko moƴƴani Jeyaaɓe ɓen.

Anndee, onon ɓee yimɓe, wonnde pellet, Alla ko Saɗtuɗo leptugol yeddoowo Mo, Haforanoowo on tuubanoowo Mo, Hinnotooɗo.

Fawaaki Nulaaɗo on si wanaa yottingol kon ko o Nulaa, wanaa kanko fawii fewnugol yimɓe ɓen, ɗum ɗon ko Juuɗe Alla tun woni. Alla no Anndi ko feññinton e kon ko suuɗoton immorde e peewal maa majjere, O Yoɓitoyay on ɗum.

Maaku, an Nulaaɗo : "ko soɓi kon e ko laaɓi kon fotataa, hay si tawii non hawnii ma ɗuuɗugol ko soɓi kon, tawde ngol ɗuuɗugol hollaa ɓural mun". Hulee Alla, onon joomiraaɓe haqqilaaji, tertoɗon ko soɓi jokkon ko laaɓi, belajo'o, on maliroyte Aljanna.

Ko onon gomɗimɓe ! wata on lamndo Nulaaɗo mon on fii piiji ɗi alaa e haaju mon ka diina mon, tawa non si ɗin feññinanaama on mettay on ko ɗi saɗtiri kon. Si on lamndino fii majji fewndo Qur'aanaare nden Jippotoo e Nulaaɗo on, ɗi feññinante on, ɗum ko ko newanii Alla. Gomɗii Alla Yawtanii gaay e piiji ɗi Qur'aana deƴƴi fii mun, wata on lamndo fii majji, si tawii le on lamndike fii majji, O Jippinay e mon Ñaawooje majji.

Gomɗii yimɓe adinooɓe on lamndinoke fii majji, nde ɓe fawanoo ñaawooje majji, ɓe wonti yedduɓe.

Alla Daginii neemoraaɗi ɗin, O Harminaali kon ko sirkooɓe ɓen harminanta ko'e-maɓɓe fii sanamuuji maɓɓe ɗin immorde e jelaaɗi ɗi ɓe taƴata noppi mun tuma ɗi rimi adadu=limoore heeriiɗo, e ɗin ɗi ɓe aacitiranta sanamuuji maɓɓe ɗin tuma ɗi toowi e duuɓi, e ɗin jokkinrayɗi rimugol deyoy, wanaa kalaldi-wa, kono heeferɓe ɓen aaƴike fenaande e hoore Alla wonnde ɗin no harmi, ko ɓuri ɗuuɗuɓe e ɓen yedduɓe, senndindiraa goonga e meere wanaa kadi ko harmi e dagii.

Si ɓee fefindotooɓe fenaande e hoore Alla wi'anaama : "Aree e ko Alla Jippini kon ka Qur'aanaare, e suuna Nulaaɗo Makko on (yo o his), fii no anndiron haram e halal, ɓe wi'ay : "Yonii men kon ko men tawri mawɓe amen ɓen immorde e piɓe e golle", honno ɗum yonirta ɓe nde tawnoo mawɓe maɓɓe ɓen anndaano hay e huunde, ɓe feewataano kadi e goonga kan?! Ko ɓurɗo ɓe majjere tun jokkata ɓee majjuɓe.

Ko onon yo gomɗimɓe ! Hino fawii on pittaali mon ɗin : waɗɗitoreeɗi gollugol ko moƴƴani ɗi. Majjere yimɓe ɓen lorrataa on si onn feewii onon ; feewiron yamirgol moƴƴere haɗa ŋoñere. Ko faade ka Alla tun woni ruttorde mon nden Ñalnde Darngal on denndaangal ; O Habra on kon ko gollaynoɗon aduna, O Yoɓita on ɗum.

Ko onon yo gomɗimɓe ! Si maayde nden ɓaɗtike goɗɗo e mon, maande mayre heɓii mo, yo o seedintin wasiyee makko on nunɗuɓe ɗiɗo juulɓe maa worɓe ɗiɗo heereɓe -si on heɓaali juulɓe, si on setike maayde nden yanii e mon ton. Si on sikkitike seedeeyaagal maɓɓe ngal, darnee ɓe baawo julde woo, ɓe woondira Alla : ɓe yeeyirtaa geɓal maɓɓe ngal coggu, hay si tawii ko siɗɗo maɓɓe, e wonnde suuɗataa seedee Alla, e wonnde si ɓe waɗii ɗum, haray ɓe jeyaama e bakkondimɓe ɓen.

Si feeñii ɓaawoo woondoore nden wonnde ɓe fenu, haray yo ɗiɗo woondu maa seeditoo ƴetta darnde maɓɓe nden, jeyaaɓe e yimɓe maayɗo on, ɓe wonndira Alla wonnde : "Pellet, ko seedee amen on e fenannde maɓɓe nden ɓuri jojjude e dii seedee maɓɓe on ; men seeditaaki fenaande, menen si men waɗii ɗum, haray ko men jeyaaɓe e tooñuɓe yawti keeri Alla ɗin".

Ko jantaa ko'o e wonndoore seedeeɓe ɓen ɗiɗo ɓaawo julde nden, tuma nde woondoore maɓɓe nden sikkitaa, e ruttugol seedee maɓɓe on, ko ɗum ɓuri ɓaɗtaade nde ɓe addata seedee e hoore nden ɗon ; wata ɓe waylu woondoore nden maa ɓe janfoo e mayre, ko ɗum kadi ɓuri ɓaɗtaade nde ɓe hulata yo woondoore ndonndi nden ruttetee ɓaawo woondoore maɓɓe nden, ɓe seeditoo ko lunndii seedee maɓɓe on ɓe wirtoo. Hulee Alla accon fenannde e janfa ka woondooje e ka seedagol, nanon jaɓon ko waajaɗon. Alla fewnataa ɓen yaltuɓe e ɗoftaare.

Jantee onon ɓee yimɓe, Ñalnde Darngal, tuma Alla Mooɓoyta denndaangal Nulaaɓe ɓen, O Daalana ɓe : "Ko honɗum mofte mon ɗen jaabinoo on ?" Ɓe maaka : "Anndal alanaa men, pellet, anndal ngal ko An Joomi amen woodani. Pellet An, ko An tun woni Annduɗo ko wirnii".

Janto tuma nde Alla Daalannoo Iisaa (yo o his) : "Ko an yo Iisaa geɗal Maryama, annditii Neema An on e dow maaɗa tuma nde Mi Tagu maa e ɓaawo baaba, annditaa kadi Neema e yumma maa (yo o his) tuma nde Mi Suɓinoo mo e rewɓe jamaanu makko, annditaa ko Mi Neeminir maa e Semmbinirgol ma Jibriili (yo o his), hiɗa yeewta yimɓe ɓen -hari ko penu- noddaa ɓe e Alla, yeewtaa ɓe kadi ko a ƴaƴƴurma fii yottingol ko Nulaɗaa e maɓɓe, Mi Neeminir maa kadi Anndinngol ma binndol, Mi Anndin ma Tawreeta Jippinannde nden e Muusaa (yo o his), e LinjiilaJippinannde nden e Maaɗa, Mi Anndin maa gunndooji Sari'a on e hikmaaji mun, Mi Neeminir maa kadi tawde a mbaadirayno loopal sugu sonndu, hooti wuttaa e mun wonta sonndu, e tawde kadi a ñawndano jibindinaaɗo e mbumɗam, ñawndaa kadi ɗamaaɗo o sella, hiɗa wuurnita kadi maayɓe toroɗaa yo Alla Wuurnu ɓe, ɗum ɗon fow ko e Duŋayee An, Mi Neeminir maa kadi daɗugol ɓiɗɓe Israa'iila ɓen tuma ɓe himmirnoo warugol ma, nde addanoɗaa ɓe hujjaaji ɓannguɗi ɗin, kono heeferɓe ɓen e maɓɓe yeddi ɗin, ɓe wi'i : "Koo ko Iisa addi ɗoo wonaali si wanaa mbilewu ɓanngu ngu".

Janto wonnde kadi Mi Neeminirii ma ɓen laaɓamɓe ma, tuma nde Wahyinnoo e maɓɓe wonnde : "Gomɗinee lam Min e Nulaaɗoo An on", ɓe jebbilanii ɗum ɓe jaabii : "Men gomɗinii, seedito -An Joomi amen- wonnde pellet, ko men jebbilanii ɓe ma".

Janto kadi tuma nde laaɓamɓe [ma] ɓen wi'unoo : "Hara si a torike Joomi maa o waaway jippinannde men kooliwal immorde ka kammu"? Annabi Iisaa jaabii ɓe nde ɓe hulata Alla ɓe acca sugu ɗen lamde, tawde ɗum no addana ɓe fitna, o maakani ɓe : "Fawee e Joomi mon ka ɗaɓɓugol arsike, si on laatike gomɗimɓe".

Ɓe wi'ani Iisaa : "Men faala ñaamugol e ngal kooliwal, ɓerɗe amen ɗen deeƴira Qudra Alla on, men annda ko a Nulaaɗo Makko, men anndira kadi pellital, wonnde a goonganii men e kon ko adduɗaa immorde ka Alla, men wona seeditotooɓe e maggal".

Iisaa jaabii ɓe, o torii Alla o maaki : "Joomi amen, Jippinan men kooli- wal ñaametee, men waɗa ñalaande jippagol maggal on juldeere fii mawningol Ma, ɗum wonana men maande e ɓanngannduyee Gootaagu Maa ngun e goongugol kon ko mi Nuliraa. Arsikaa men arsike balloowo min rewugol Ma, ko An Joomi amen, woni moƴƴo Arsikoowo".

Alla Jaabini toraare Annabi Iisaa nden, O Daali : "Min, ko Mi Jippinoowo ngal kooliwal ngal lamndiɗon fii mun. Kono non, kala yedduɗo e mooɗon ɓaawo ngal jippaade, haray wata ontigi felu si wonahhoore-mun, sabu Mi leptiray mo lepte tiiɗuɗe ɗe Mi leptirtaa goɗɗo goo ; tawde ontigi seeditike maande nden, o yeddiri lunndagol. Alla Laatini fodoore nden, O Jippinani ɓe ngal.

Janto kadi tuma nde Alla Daalanoyta Iisaa geɗal Maryama on Ñalnde Darngal : "Ko an yo Iisaa ɓiɗɗo Maryama, e a wi'anii yimɓe ɓen : "Waɗtee lam min e neene am reweteeɓe ɗiɗo ko woori Alla?" Iisaa Jaabora laɓɓingol Joomi makko : "Haananaa lam nde mi wowlana ɓe si wanaa goonga, si muuyano mi wowli ɗum, haray pellet, hiɗa Annadi ɗum, tawde huunde suuɗaaki Ma, hiɗa Anndi ko suuɗii kon ka wonkii am, Min mi anndaa ko woni e wonkii Maa. Pellet, ko An tun woni Annduɗo kala feeñi e ko wirnii".

Iisaa maakani Joomi makko : "Mi wowlanaali ɓee yimɓe si wanaa ko Yamirɗaa lam kon wowlugol ; woni bajjinɗinirgol Ma dewal. Mi wonuno ƴellitiiɗo e kon ko ɓe wowlata yeru ko mi heddodunoo e maɓɓe kon. Ɓaawo nde Ƴettitunoɗaa Mi hakkunde maɓɓe Ɓamtuɗaa lam ka kammu miɗo wuuri, A Laatino An Joomi, ko An woni Reenoowo golle maɓɓe ɗen. An ko A Seeditiiɗo kala huunde, huunde e ko mi wowlani ɓe kon suuɗaaki Ma, e kon ko ɓe wowlunoo ɓaawo am.

Si A Leptii ɓe -An Joomi, pellet, kamɓe ko ɓe jeyaaɓe Maaɗa, hiɗa Waɗa ɓe ko Muuyuɗaa. Si A Yawtanii ɓen gomɗimɓe e maɓɓe, alaa haɗoowo ma e ɗum. Pellet, An, ko A Fooluɗo mo fooletaake, Ñeeñuɗo e Toppitagol Maa.

Allaahu On Daalana Annabi Iisaa : "Ndee ko ñalaande nde goonguɓe nafitorta goonga maɓɓe kan : hino woodani ɓe Aljannaaji ɗi canɗi ilata senngo ley kuɓeeje e tutateeriiji majji, ko ɓe duumotooɓe ton poomaa, ɓe maayataa ton". Alla Welaama ɓe O Tikkantaa ɓe abadaa, kamɓe kadi ɓe weltorii mbarjaari maɓɓe neema ñiiɓuɗo on. Ko ndin njoɓdi e welayee ɗon woni polgal mawngal ngal, polgal goo ɓurataa ɗon.

Ko Alla tun woodani laamu kammuuli ɗin e leydi ndin, ko Kanko Tagi ɗin ɗiɗi O Toppitiiɗi, hino woodani mo kadi laamu kala ko woni e majji. Kanko ko O Hattanɗo kala huunde.