Fulani Mokhtasar — Enam 6:1 – Hud 11:123

Siforgol timmal wellitungal, e mantoorere moƴƴuɗi toowuɗi e hoore giggol, ɗum ko Alla tabitani ; On Taguɗo kammuuli ɗin e leydi ndin, O Tagi jemma e ñalorma hiɗi lomtondira, O Tagiri jemma on niwre, ñalorma on annoora. Wondude e ɗum fof, ɓen yedduɓe hino fonna Mo e goɗɗum goo, ɓe kafida Mo e ɗum.

Ko Kanko Seniiɗo On woni Tagirɗo on loopal gila O Tagi baaba mon Aadama, refti O Happani gooto kala e mon lajal ka aduna ɗoo, O Happi kadi lajal goo ngal O Heerori Anndugol ; ɗum ummital mon Ñalnde Darngal, refti onon hiɗon sikkitoo Kattal Alla Seniiɗo on e ngal Ummital.

Ko Kanko Seniiɗo On woni Reweteeɗo e goonga On ka kammuuli e ka leydi, huunde suuɗaaki Mo. Himo Anndi ko suuɗonton e kuuɗe e konnguɗi, himo Anndi kadi ko feññinton e mum, O Yoɓitoyay on ɗum.

Hujja woo arata ɓee sirkooɓe, immorde ka Joomi maɓɓe, si wanaa ɓe ɗuurnoto mo. Hujjaaji ɓannguɗi arii e maɓɓe fii bajjinɗingol Alla, Aayeeje mun ari e maɓɓe goongini Nulaaɓe Alla ɓen, kono ɗum haɗaali ɓe ɗuurnagol gaay e majje.

Nde kamɓe ɓe ɗuurnoto ɗin hujjaaji ɓannguɗi, gomɗii ɓe ɗuurninoke ko ɓuri ɗum ɓanngude. Ɓe fenniino Qur'aanaare nde Muhammadu (jom kisiyee on) ardi, ɓe anndoyay non Ñalnde Darngal, wonnde ko ɓe jalkitata kon, ko ɗum woni goonga kan.

E ɓee heeferɓe yi'aali ko Alla Halki kon gire tooñooɓe ɓen?! Alla Halkiino gire tooñooɓe ɗuuɗuɓe ado maɓɓe, gire ɗe O Okkunoo doole ka hoore leydi ɗe O Okkaali ɓee heeferɓe, O Jippini e dow maɓɓe toɓo jokkondirngo, O Ilini canɗi senngo ley koɗooli maɓɓe, kono ɓe yeddi Alla ; Alla Halkiri ɓe ɗin geddi maɓɓe, O Tagi woɗɓe goo ɓaawo maɓɓe.

Sinno Men Jippinno e maaɗa an Nulaaɗo, Deftere winndaande e ɗeri, ɓe yi'i nde ɓe tentiniri juuɗe maɓɓe ɗen wonnde ko Deftere, ɓe gomɗintaano nde ; toode ɓe wi'ayno : "Koo ko adduɗaa wonaali si wanaa mbilehu ɓanngu ngu, men gomɗintaa ɗum".

Heeferɓe ɓen wi'i : "Sinno Alla Jippindinno e Muhammadu Malaa'ikaajo yeewtoowo men, on seeditoo wonnde ko o Nulaaɗo, men gomɗinanyno". Hara nun Men Jippinno on Makaa'ikaajo no ɓe lamndori non, Men Halkayno ɓe si ɓe gomɗinaali, ɓe nannitantaake fii tuubugol ontuma.

Sinno Men Waɗuno Nulaaɗo on Malaa'ikaajo, Men Waɗirayno mo mbaadi gorko fii no ɓe nanira mo ɓe yiida e makko ; tawde ɗum ɗon gasidataa e Malaa'ikaajo. Sinno kadi Men Waɗuno mo mbaadi gorko, fiyaake makko on jilɓanayno ɓe.

Si ɓee jalkitirii lamndagol nde Malaa'ikaajo Jippotoo takkoda e maaɗa, gomɗii mofte goo jalkitiino Nulaaɓe mu'un ado maaɗa, lepte ɗen ɗe jalkitaynoo jippii huuɓiti ɓe.

Maaku an Nulaaɗo, wi'anaa ɓee fennooɓe jalkita : "Yehee ka leydi, refti taskoɗon ko honno battane fennunooɓe Nulaaɓe Alla ɓen waɗtiniri". Lepte ɗen jippino huuɓiti ɓe e hoore doole e neema ko ɓe jogitinoo.

Maakamɓe an Nulaaɗo : "Ko hommbo woodani laamu kammuuli ɗin e leydi ndin e laamagol ko woni hakkunde majji?" Maaku : "Laamagol ɗum fow Ko Alla woodani!" O Waɗɗinii e hoore-Makko yurmegol jeyaaɓe Makko ɓen, O Hawjataa leptugol ɓe haa O Ñalnde darngal, O Mooɓita ɓe denndaangal ; nde ñalaande nde sikke alaa e mu'un. Ɓen hayruɓe pittaali mu'un yeddugol Alla, ɓe gomɗinirtaa daɗndugol pittaali maɓɓe ɗin hayrere.

Ko Kanko Alla tun woodani laamagol kala huunde, kon ko deeƴi nder jemma e ñalorma. Ko Kanko kadi woni Nanoowo haala maɓɓe, Anduɗo kuuɗe maɓɓe, O Yoɓitoyay ɓe ɗum.

Maaku an Nulaaɗo, wi'anaa sirkooɓe ɓen : "E haqqil jaɓay nde mi jogitotoo ko woori Alla giɗo walloowo lam?!" Ko Kanko woni Taguɗo kammuuli ɗin e leydi e waaseede, ko Kanko kadi woni Arsikoowo jeyaaɓe Makko ɓen, gooto e jeyaaɓe Makko ɓen arsiktaa Mo ; ko O Galo yeeso maɓɓe, kamɓe non hiɓe waasi yeeso Makko. Maaku an Nulaaɗo : "Min, Joomi am Seniiɗo On Yamirii lam nde Mi wonata arano e jebbilanii ɓe mo e ɗee ɗoo mofte, O Haɗi lam nde mi jeyetee e ɓen kafidooɓe Mo".

Maaku an Nulaaɗo : "Min miɗo huli si mi yeddii Alla, nde mi faggitotoo sirku mo O Harmini e am, maa woɗɗitagol liimanaaku ngun e dewe ɗen ; O leptiram mi lepte mawɗe Ñalnde Darngal.

Kala woɗɗinaaɗo lepte ɗen Ñalnde Darngal, haray gomɗii on malirii Yurmeende Alla nden, ko ngol daɗugol ɗen lepte woni malal ɓanngu ngal ngal.

Si Alla Meminii ma jarrabuyee -an ɓiɗɗo Aadama, ittoowo mo alaa si wanaa Alla. Si O Meminii ma kadi moƴƴere, alaa haɗoowo ma nde. Ko Kanko woni Hattanɗo kala huunde.

Ko Kanko woni Fooluɗo e hoore jeyaaɓe Makko ɓen, hay e gooto foolataa Mo, fow ko yankinaniiɓe Mo Kanko Seniiɗo On ; Ko Kanko woni Ñeeño ka Sari'a Makko, Humpitiiɗo Mo huunde suuɗaaki ɗum.

Maaku an Nulaaɗo, wi'anaa sirkooɓe fenna ɓen : "E ko honɗum ɓuri mawnude seedee goongugol am?" Maaku : "Ko Alla Ɓuri Mawnude seedee e goongugol am, ko O Seediiɗo hakkunde am e mo'on, himo Anndi ko mi anndani on e ko salotoɗon ɗum. Alla Wahyinii ndee Qur'aanaare e am fii no mi rentinira on nde onon e kala mo nde hewti ka yimɓe e ka jinna". Onon ɓee sirkooɓe, on gomɗinay wonnde Alla no wonndi e reweteeɗi goo? Maaku an Nulaaɗo : "Min mi seeditotaako nden fenaande mon, tawde Alla ko Bajjo Mo alaa kafidooɗo". Min non ko mi danɗndiiɗo kala ko kafidoton e Makko.

Ɓen Alyahuudaaɓe ɓe Men Okki Tawreeta, e ɓen Annasaaraaɓe ɓe Men Okki Linjiila, hiɓe anndiri Annabiijo on Muhammadu (yo o his), wano ɓe anndiri ɓiɗɓe maɓɓe ɓen. Ɓen hayruɓe pittaali mun ɗin naatugol Yiite, kamɓe ɓen gomɗinta.

Alaa ɓurɗo tooñude haa hewta on dammbirɗo Alla kafidiiɗo o rewidi ɗum e Makko, maa o fenni Aayeeje Makko Jippinaaɗe e Nulaaɓe Makko ɓen. Pellet, ɓen siforiiɓe ɗum ɗon, ɓe maletaake abadaa si ɓe tuubaalii.

Janto Ñalnde Darngal, tuma Men Mooɓoyta ɓe denndaangal, refti Men Felira ɓen kafidunooɓe Alla e goɗɗum goo : "Honto ɓen kafidiiɓe mo'on ɓe aaƴoraynoɗon fenaande?"

Refti tonto maɓɓe ngon wonaali ɓaawo jarrabuyee on si wanaa nde ɓe daɗndii e reweteeɗi maɓɓe ɗin, ɓe wi' hiɓe fena : "Men woondirii Alla Joomi amen! Men meeɗaali kafidude Ma ka aduna, ko gomɗimɓe bajjinɗimɓe Ma men laatinoo".

Ndaarii an Muhammadu, ko honno ɓee feniri e ko'e-maɓɓe, ɓe riiwi sirku on e maɓɓe. Ko honto woni kon ko ɓe fefindoraynoo nguurdam maɓɓe sirkangol Alla ?!

Hino sirkooɓe ɓen heɗitotooɓe ma an Nulaaɗo, tuma janngataa Al Qur'aana, kono ɓe nafitortaa ɗum ; tawde Men Waɗii ka ɓerɗe maɓɓe kippoodi fii wata ɓe faamu nde, sabu salaare e ɗuurnagol maɓɓe ngol. Men Waɗi kadi noppi maɓɓe ɗin faaɗuɗi gaay e nana-jaɓa. Kala no ɓe yi'iri Hujjaaji ɓannguɗi, ɓe gomɗinirtaa ɗum. Haa si ɓe arii ma hiɓe wennjidira e maaɗa meere maɓɓe dow goonga kan, ɓe wi'a : "Ko adduɗaa kon wonaali si wanaa eggaaɗum e defte adinooɓe".

kamɓe hiɓe haɗa yiɓe ɓen gomɗingol Nulaaɗo on, ɓe woɗɗitoo mo kadi ; ɓe accataa woɗɓe goo nafitora mo, kamɓe kadi ɓe nafitortaa mo. Ɓe alaa e halkirde kuuɗe maɓɓe ɗee, si wanaa pittaali maɓɓe ɗin, kono ɓe so'aa anndude wonnde ɗum ko halkaare maɓɓe.

Sinno a tinu an Nulaaɗo, tuma nde ɓe weeɓitetee ka Yiite Ñalnde Darngal, ɓe wi'a ko ɓe suniiɓe : "Ee jalla amen nde men ruttetee aduna, hara men fennataa Aayeeje Alla ɗen, men wontida e gomɗimɓe ɓen Alla", a tinayno kaawise bone alhaalimaɓɓe.

Ko ɓe wi'i kon wonnde si ɓe ruttaama ɓe gomɗinay, wanaa non woniri! Si ko woni, sinno ɓe ruttita aduna, ɓe artay e kon ko ɓe haɗanoo e mun immorde e keeferaaku e sirkugol, pellet, kamɓe ɓe fenay woni e kan haala maɓɓe.

Ɓee sirkooɓe wi'i : "Nguurndam woo alaa si wanaa nguurndam amen aduna, men wonaa kadi immintinteeɓe fii ñaawoore".

Sinno a tinu an Nulaaɗo, tuma ɓen yedduɓe ummital hino darnaa yeeso Joomi maɓɓe, a tinay kawakke bone maɓɓe tuma Alla Daalanta ɓe : "Ngal ummital ngal fennuɗon ɗoo laataaki goonga?! Ɓe wi'a : "Men woondirii Joomi amen Taguɗo men On, ɗum ko goonga", O Daalana ɓe ontuma : "Meeɗiree lepte ɗen sabu kon ko yeddirnoɗon ndee Ñalaande".

Gomɗii hayrii ɓen fennuɓe ummital Ñalnde Darngal, ɓe yeddi daroyagol yeeso All. Haa non si Darngal ngal ardirii ɓe juhal, ɓe wi'a : "Ee nimse amen e kon ko ɓe raɓɓindininoo e banngal Alla, mi yeddi Mo mi ronki hebilanaade Darngal ngal", hara hiɓe ronndorii bakkatuuji maɓɓe ɗin ka ɓabbe maɓɓe. Faamee wonnde bonii ko ɓe ronndii kon e bakkatuuji.

Nguurndam aduna ɗam wonanaali ɓen ɓe golliraali welayee Alla on, si wanaa fijindaaru e mbeleeɗe. Galle laakara ɗen kan, ko ɗen ɓuri moƴƴannde hulooɓe Alla ɓen gomɗina Mo ɗoftoo Mo, ɓe haɗitoo e yeddugol Mo e sirkangol Mo. E on haqqiltaa onon ɓee sirkooɓe?! Gomɗinon gollon ko moƴƴi.

Menen Meɗen Anndi wonnde an Nulaaɗo, ko ɓe fennata maa kon no sunine. Anndu kamɓe ɓe alaa ma e fennude ka pittaali maɓɓe ; tawde hiɓe hooli maa, kono ko ɓe tooñooɓe ɗuurnotooɓe yamiroore maa ka feeñi, hara non hiɓe gomɗini ɗum ka pittaali maɓɓe.

Wata a sikku wonnde ko an tun fennaa, Nulaaɓe adinooɓe ma kadi fennanooma, yimɓe maɓɓe ɓen lorri ɓe ; ɓe muññii e laawol Alla ngol haa Alla Walli ɓe. Alla non waɗtitoowo ko Alla Winndi kon e ballal, O Fodi ɗum Nulaaɓe Makko ɓen. Gomɗii kumpite Nulaaɓe adinooɓe ma ɓen e ko ɓe tampidi e yimɓe maɓɓe haa Alla Walli ɓe, arii ma an Nulaaɗo.

Si saɗtii e maa an Nulaaɗo, koo ko ɓe fennata maa ɓe ɗuurno e kon ko adduɗaa, si a haɗtanii ɗaɓɓugol yonde ka leydi maa ƴeeŋirgal ka kammu addanaaɓe Hujja goo ; hara waɗu ɗum. Sinno Alla Muuyuno, O Mooɓayno ɓe e hoore peewal maa ngal, kono O Muuyiraali ɗum Hikma Makko. Ko saɗti woo, wata a jeye e majjuɓe ɗum ɓen.

Anndu ko jaaɓoto maa, ko ɓen nanooɓe faama haala maa. Heeferɓe ɓen kan, ɓerɗe maɓɓe ɗen maayii. Maayɓe ɓen, Alla Immintinoyay ɓe Ñalnde Darngal, refti ko ka Makko Kanko tun woni ruttorde maaɓe, O Yoɓita ɓe golle maɓɓe.

Sirkooɓe ɓen wi'i : "Ko hanno aya Jippinee e Muhammadu goongina mo?" Maaku an Nulaaɗo :"Pellet, Alla no Haɗtani Jippingol Aaya no O Faaliraa, kono ɗuuɗiɓe e ɓee sirkooɓe anndaa wonnde ɗum ko e Hikma Alla jokki, wanaa ko ɓe lamndotoo ɗum. Hara O Jippin Aaya ɓe salii Mo gomɗinnde, O Halkay ɓe.

Alaa e kullun riɓay kun ka leydi, wanaa sonndu wiirayndu ka kammu, si wanaa mofte yeruuje mo'on ka tagu e ka arsike onon ɓiɗɓe Aadama. Men Accaali huunde ka Alluwal reenaangal. Refti ko faade ka Joomi maɓɓe woni mooɓorde maɓɓe Ñalnde Darngal, fii no Ñaawira hakkunde maɓɓe, O Yoɓita gooto kala golle mun.

Ɓen fennuɓe Aayeeje Amen ɗen, hino wa'i wa faaɗuɓe noppi, maaɗum mumɓe ; kamɓe hiɓe e niɓe, ko honno ɓe feewirta?! On mo Alla Muuyi majjinde O majjinay mo, on Mo O Muuyi kadi fewnude O fewniray mo laawol foccii ngol ngol.

Maaku an Nulaaɗo, wi'anaa sirkooɓe ɓen : "Humpitee lam : si lepte Alla fodanadon ɗen arii on maa Darngal ngal arii on ; e ko goɗɗum goo ko woori Alla noddoton ko huncana on wororde nden, si on laatike goonguɓe e nodditoragol reweteeɗi nafooji duña lorra?!"

Ko woni goona, on noddoytaa ontuma si wanaa Alla Taguɗo on On, O Ittana on wororde nden e lorra kan, ko Kanko woni kattanɗo ɗum. Reweteeɗi mon ɗin ɗi kafidaynoɗon e Alla, on accirayɗi anndugol ɗi nafataa ɗi lorrataa.

Gomɗii Men Nulii e mofte ado maa an Nulaaɗo, ɓe fenni ɓen ɓe ɗuurnii e ko ɓe addi kon. Men Leptiri ɓe ko muusi -wano baasal e ñabbuuli fii no ɓe yankinanora Joomi maɓɓe.

Ko hanno nde saɗteende Amen arnoo ɓe, ɓe yankinanoo Alla fii yo O Huncan ɓe ɗum? Kono ɓe waɗaali ɗum, si ko woni, ko ɓerɗe maɓɓe ɗen yoori, seytaane cuɗinani ɓe kon ko ɓe faggitotonoo e geddi, ɓe lutti e ɗum.

Nde ɓe tertinoo kon ko ɓe waajoranoo baasal e ñabbeeli, ɓe ronki gollirde Yamirooje Alla ɗen, Men Udditianno ɓe dame arsike ɗen, Men Sellini ɓe e nabbeeli ɗin. Kono fantini weltorgol ɗum haa ɓe dulli, lepte Amen ɗen nanngiri ɓe juhal, e jaka kamɓe ko ɓe taƴiiɓe.

Heddiiɗo on e heeferɓe ɓen taƴaa yewnaa, ɓe halkaa ɓe denndaangal, Nulaaɓe ɓen Alla ɓen foolnaa. Yettoore nden heeranii Alla tun -Jeyɗo Winndere nden- e kon ko O Halki ɓe O Foolini yiɗɓe Makko ɓen.

Maakan ɓee sirkooɓe an Nulaaɗo : "Humpitee lam! Si Alla ƴettitii nanɗe mon ɗen e giiɗe mon ɗen, O notii e ɓerɗe mon ɗen, ko reweteeɗi honɗi artiranta on ɗum? Tasko an Nulaaɗo, no Men Ɓannginiranta ɓe Hujjaaji ɗin e noone kala, hooti kamɓe ɓe ɗuurnoo ɗi!

Maakamɓe an Nulaaɗo : "Humpitee lam, si lepte Alla ɗen ardirii on juhal maa e kene, pellet, ɗen lepte nanngataa si wanaa ɓen tooñitorɓe yeddugol Alla fenna Nulaaɓe ɓen".

Men Nuliraali Nulaaɓe Amen ɓen si wanaa wewlingol yimɓe gomɗinal e ɗoftaare ɓen, rentina yimɓe yeddooɓe ɓen e lepte amen ɗen : kala gomɗinɗo Nulaaɓe ɓen o moƴƴini golle, haray kulol alanaa ɓen ɗon laakara, wanaa kamɓe kadi woni sonoytooɓe ton.

Ɓen fennuɓe Aayeeje Amen ɗen, lepte ɗen memirayɓe sabu yaltugol maɓɓe e ɗoftaare Alla nden.

Maakan ɓee sirrkooɓe an Nulaaɗo : "Mi wi'ataa on : miɗo jogii ngaluuji Alla ɗin -wano arsike- sakko ɓe waɗa ko mi yiɗi, mi wi'ataa on kadi : miɗo anndi ko wirnii e wahyu, mi wi'ataa on men : wonnde ko mi malaa'ikaajo, min ko mi Nulaaɗo Alla, mi jokkataa si wanaa ko wahyinaa kon e am". Maakan ɓe an Nulaaɗo : "Hara keefeero no fota e gomɗinɗo? E on haqqiltaa miijitoɗon e ɗee Aayeeje, onon ɓee sirkooɓe?".

Hulɓinir ndee Al Qur'aanaare -an Nulaaɗo, ɓen hulooɓe nde ɓe mooɓindiroytee ka Joomi maɓɓe Ñalnde Darngal, hara giɗo nafoowo e tefoowo huncoowo lorra alanaa ɓe si wanaa Alla, belajo'o, ɓe hulay Alla ɓe jokka Yamirooje Makko ɓe rentoo e Haɗaaɗi Makko ; ko ɓen woni nafitorayɓe Al Qur'aana.

Wata a raɗo e jonnde maa nden -an Nulaaɗo, waasuɓe juulɓe duumoriiɓe e dewal Alla ɓen bimmbi e kiikiiɗe, hiɓe ɗaɓɓa yarluyee Alla, wata a raɗo ɓe ɓaɗnitaa sirkooɓe ɓen. Huunde e hasboore ɓee waasuɓe fawaaki ma, ɗum ko e Juuɗe Alla woni, wanaa huunde kadi e hasboore maa nden fawii ɓe. Si a raɗi ke ɓe, pellet, haray a jeyaama e yewtuɓe keeri Alla ɗin.

Ko wano non Men Jarribornoo yoga maɓɓe yoga, Men Ɓurnindiri hakkunde maɓɓe, fii yo heeferɓe alɗuɓe ɓen wi'an waasuɓe gomɗimɓe ɓen : "E ko ɓee waasuɓe woni ko Alla Ɓurniri peewal mun hakkunde amen?! Si gomɗinal laatino moƴƴere ɓe adotanooko men e mayre, ko menen adiiɓe". E Alla wonaali ɓurɗo Anndude yettooɓe Neemaaji Makko ɗin, O Fewnira ɓe gomɗinal ngal? Ɓurɗo kadi Anndude yedduɓe Mo ɓen, O Jaasinira ɓe ɗum?! Ko non woniri, ko Alla Ɓuri Anndude ɓe.

Si arii e maa an Nulaaɗo, ɓen gomɗinayɓe Aayeeje Amen ɗen ɓe goonina maa, teddinir ɓe ruttugol ɓe salminaango ngon, wewliniraaɓe yurmeende Alla yaajunde nden ; gomɗii Alla Waɗɗinirii e Makko yurmeende nden teddungal. Kala e mo'on faggitoriiɗo geddi e hoore majjere, hooti o tuubi ɓaawo ɗum o moƴƴini golle, pellet, Alla ko Haforanoowo mo, Alla ko Haforanoowo ɓen tuubayɓe e jeyaaɓe Makko ɓen, Hinnotooɗo ɓe.

Ko wano nii Men Fensitirta Aayeeje ɗen e yimɓe meerente ɓen, fii no Men Feññinira laawol bomɓe ɓen ; no ngol rentoree e mu'un.

Maaku an Nulaaɗo : "Min Alla Haɗii lam rewugol ɓen ɓe rewoton gaanin Alla". Maaku kadi : "Mi jokkataa beleeɗe mon ɗen e rewugol gaanin Alla : si mi waɗii ɗum, haray mi jeyaama e majjuɓe laawol goonga ɓen". Ɗum non ko kala jokkuɗo beleeɗe ko aldaa e hujja immorde ka Alla.

Maakan ɓee sirkooɓe an Nulaaɗo : "Min miɗo e ɓanngannduyee immorɗo e Joomi am, ko jillaa beleeɗe, kono on fennii ɗum. Min non mi alaa kon ko hawjirton e lepte maa maandeeji ɗi ɗaɓɓoton ; ɗum ko Juuɗe Alla woni. Ñaawoore nden e ko ɗaɓɓoton kon fow ko Alla Heeranii : Himo Filloo goonga O Ñaawira ka, ko Kanko Seniiɗo On ɓuri moƴƴude fensitugol e senndindirgol goonga e meere".

Maakamɓe an Nulaaɗo : "Sinno ko juuɗe am ko hawjirɗon kon e lepte wonnoo, mi jippinayno ɗe e mo'on, ontuma non fiyaaku on gasa hakkunde am e mon". Ko Alla ɓuri Anndude tooñooɓe ɓen, Anndi kadi nde O leptata ɓe.

Ko ka Alla tun woni cottirɗe wirniiɗi ɗin, anndaa ɗum si wanaa Kanko. Himo Anndi kala tagu wongu ka njorndi immorde e kulle e puɗi ekn, himo Anndi kadi kala ko woni ka maayo immorde e kulle e puɗi. Kaakol yanataa e nokku si wanaa hara himo Anndi fii maggol, abbere alaa suuɗiinde ka leydi, maa keccum maa yooruɗum, si wanaa fii mun no winndaa e deftere feeñunde ; nden woni Allawal reenaangal ngal.

Ko Alla woni Ƴettitoowo pittaali mon ɗin tuma ɗaanotoɗon, ko Kanko kadi Anndi ko faggitiɗon e golle nder ñalorma on. Hooti O Immintina on e ñalorma on ɓaawo nde O Ɗanninnoo on fii no toppitoron golle mon. Si lajal mon ngal timmii, ontuma Mooɓitoyay on ka Makko Ñalnde Darngal, hooti O Yeetitoo on kon ko gollaynoɗon ka aduna, O Yoɓita on ɗum.

Ko Kanko Alla woni Fooluɗo e jeyaaɓe Makko ɓen, Foolirɗo hannduyee Seniiɗo On. Himo Nulira e mo'on malaa'ikaaɓe tedduɓe, ɓe lima golle mon haa laje mon ɗen timma, ɓe ƴettita on, kamɓe ko ɓe hunnooɓe ko ɓe yamiraa.

Hooti ɓen ƴettitanooɓe ruttitee ka Alla, jeyɗo ɓe on e hoore goonga fii yo O Yoɓituɓe golle maɓɓe. Ko Kanko woodani ñaawoore nunɗunde nden e maɓɓe, ko Kanko kadi ɓuri yaawude ñaawugol golle mon ɗen.

Maakan ɓee sirkooɓe an Nulaaɗo : "Ko hommbo daɗndata on niɓe njorndi e maayo?" Hiɗon noddira Mo yankinaare ka kene e ka gunndoo : "Si Joomi amen daɗndii men halkagol, ma men jeye e ɓen yettooɓe Neemaaji Makko ɗin e dow amen, wonnde men rewtaa ko woori Mo".

Maakan ɓe an Nulaaɗo : "Ko Alla woni Daɗndoowo on e ɗum, O Hisina on e kala ngoƴo. Refti onon hiɗon kafida Mo e goɗɗum goo tuma weltiɗon, hara tooñitagol ɓuray na ɗen kuuɗe mon?!".

Maakan ɓe an Nulaaɗo : "Ko Alla woni Hattanɗo nulugol e mo'on lepte ardiranayɗe on dow -wano kaaƴe maa haacaango ekn, maa ardira on senndo ley -wano dillere leydi maa bappitagol, maa Jillindira hakkunde mon, kala mo'on jokka beleeɗe, watton wartindirde". Taskii an Nulaaɗo, no Men Yiltindiranta ɓe Aayeeje ɗen Men Ɓannginiraɗe fii no ɓe faamira kon ko adduɗaa.

Yimɓe maa ɓen fennii ndee Al Qur'aanaare, hara non ko nde goonga immorde ka Alla. Maakan ɓe an Nulaaɗo : "Mi wonaali fawtiiɗo on, min ko mi jertinoowo on tun e lepte tiiɗuɗe".

Kala kumpital no mari ñiiɓirde mun e timmoode mun : wano ruttorde mon e battane mon. Arma anndon ɗum tuma immintinaɗon Ñalnde Darngal.

An Nulaaɗo, si a yi'ii sirkooɓe ɓen no wowla e Aayeeje Amen ɗen jalkita, haray woɗɗito ɓe haa ɓe naatana yeewtere goo. Si seytaane yejjitinii ma haa a jooɗodii e maɓɓe, hooti anndituɗaa, hara immo ɗon kisan, wata a jooɗido e jaggitooɓe ɓen.

Fawaaki gomɗuɓe huli Alla ɓen rentii e haɗaaɗi Makko ɗin, hay huunde e ñaawoore tooñuɓe ɓen. Ko fawii ɓe, ko haɗugol ɓe e faggitagol bone, belajo'o,ɓe hulay Alla, ɓe rentoo e haɗaaɗi Makko ɗin.

An Nulaaɗo, terto ɓee sirkooɓe waɗtirɓe diina mun kan jalnori e mbeleeɗe, nguurndam aduna ɗam kadi hodi ɓe. Waajor yimɓe ɓen an Annabaajo on, ndee Qur'aanaare, fii wata wonkii jebbilinire halkaare sabu ko ki faggitii kon e bakkaatu. Alanaa ki gaanin Alla giɗo walloowo wanaa kadi tefanooɗo ɓe lepte laakara ɗen ; hay si tawii non ki sottorii kala sottorgal, ki jaɓantaake ɗum. Ko ɓen ɗon woni jebbiliniraaɓe halkaare, sabu kon ko ɓe faggitii e geddi. Hino woodani ɓe Ñalnde Darngal, njaram wulɗam e lepte muusuɗe, sabu ko ɓe yeddi kon.

Maakan ɓee sirkooɓe an Nulaaɗo : "E men reway gaanin Alla sanamuuji ɗi nafataa men kadi ɗi lorrataa men, men murta gaay e gomɗinal ngal ɓaawo nde Alla fewnude men, men wona wa on seytaane majjini, o tertodi mo e weemugol, hara on no jogii wondiiɓe feewuɓe ɓe no noddira mo goonga, kono o saloo nootagol ndun noddaandu maɓɓe? Maakan ɓe : "Pellet, peewal Alla ngal, ko ngal woni peewal goonga. Alla yamirii men jebbilanagol Mo Kanko Seniiɗo On, men bajjinɗinira Mo, men rewa Mo, ko Kanko woni Joomiiko Winndere nden.

O yamirii men kadi ñiiɓnugol julde nden no haaniri, e hulugol Mo ñemtina yamiraaɗi Makko rentoo e haɗaaɗi Makko. Ko Kano woni On Mo jeyaaɓe ɓen mooɓoytee ka Mun Ñalnde Darngal no O yoɓitira ɓe njoɓdi golle maɓɓe.

Ko Kanko Seniiɗo On woni tagirɗo kammuuli ɗin e leydi ndin goonga. Ñalnde Alla Daalanoyta huunde nden : "Laato!" : nde laatoo. Tuma O Daaloyta Ñalnde Darngal : "Immee!", ɓe immoo. Daalol Makko ngol ko laatoray ngol goonga. Ko Kanko Seniiɗo On tun laamu woodani Ñalnde Darngal tuma Asraafiilu wuttoyta ɗimmun ka alaadu. Ko O Annduɗo ko wirnii e ko feeñi. Ko O Ñeeñuɗo e tagu Makko ngun e toppitagol Mo ngol, Humpitiiɗo kala huunde.

Janto an Nulaaɗo, tuma nde Ibraahiimaa (yo o his) maakannoo ben makko Aazara sirkaynooɗo : "Enee Baaba ! E a jogitoto sanamuuji reweteeɗi maa gaanin Alla?!" Pellet, min miɗo yi'e an e yimɓe maa rewooɓe sanamu ɓen, e nde rmajjere ɓanngunde!" Ko Seniiɗo On tun hanndi e reweede, ko heddii kon fow ko meere.

Ko wano Men holliri mo non majjere ben makko e yimɓe mun, Men hollirta mo laamu kammuuli ɗin e leydi ndin ; fii yo o dallinor ngun laamu yaajungu ɗon e wootinɗingol Alla holla hanndugol Mo e reweede, e fii yo o jeye e yananaaɓe ɓen wonnde Alla ko Bajjo Mo kafidetaake, e wonnde ko O Hattanɗo kala huunde.

Nde jemma on niɓɓitunoo e makko, o tini hoodere, o maaki : "Ndee ɗoo ko joomi am!" Nde hoodere nden muti, o maaki : "Mi yiɗaa ko mutata kon ; tawde Reweteeɗo e goonga on mutataa".

Nde o tinunoo lewru ndun ƴellitike, o maaki : "Nduu ɗoo ko joomi am!" Ɓaawo ndu mutude, o maaki : "Pellet, si Joomi am fewnaali lam no mi bajjinɗinira Mo mi rewa Mo, ma mi jeye e yimɓe woɗɗitiiɓe ɓen e diina goona".

Nde o tinunoo naange ngen no ƴellitii, o maaki : "Ko ƴellitii koo, ko joomi am! ko ɗum ɗoo ɓuri mawnude dii hoodere nden e lewru ndun" Tuma nge mutunoo, o maaki : "Ko onon yo yimɓe am, min ko mi daɗndiiɗo e kon ko kafidoton e Alla".

Min dey mi laɓɓinanii diina am kan O Taguɗo kammuuli ɗin e leydi ndin ; ooñiiɗo ɗuurnii e sirku faade e tawhiidi, mi jeyaaka e ɓen kafidooɓe e Alla".

Yimɓe makko sirkooɓe ɓen wennji mo e tawhiidi, ɓe hulɓiniri mo sanamuuji maɓɓe ɗin ; o maakani ɓe : "E on wennjay lam fii tawhiidi, gomɗii le Joomi am fewnii lam? Min non mi hulataa sanamuuji mon ɗin, tawde ɗi nafataa lam ɗi lorrataa lam si wanaa nde Alla Muuyi. Alla no Anndi kala huunde ka leydi e ka kammu. E on waajitotaako onon yimɓe am? yalton e keeferaaku e sirku, gomɗinon Alla tun?!

Ko honno mi hulirta kon ko rewoton gaanin Alla immorde e sanamuuji, onon duu on hulaali kafidugol Alla ko O Tagi kon e hoore on alanaa ɗum dalil?! Ko honde e feddeeji ɗin ɗiɗi : fedde tawhiidi e fedde sirkooɓe ɓen ɓuri hanndude e deeƴere? Si ɗon anndi jokkee ɗum, sikke alaa wonnde ko fedde gomɗimɓe ɓen ɓuri hanndude e ɗum.

Ɓen gomɗimɓe Alla ɓe jokki sari'a Makko on, hara ɓe jillaali e gomɗinal maɓɓe ngal sirku, hino woodani hoolaare kamɓa tan, ko kamɓe Joomi maɓɓe fewniri laawol peewal.

On hujja arɗo ka Daalol Allah : (Ko honnde e feddeeji ɗin ɗiɗi ɓuri hanndude e deeƴere?) mo Ibraahiima foolirnoo yimɓe mun ɓen, ko hujja Amen mo Men Yeɗi mo e dow yimɓe makko ɓen. Meɗen Ɓamtira darja on mo Men Muuyi e jeyaaɓe Amen ɓen aduna e laakara. Pellet, Joomi maaɗa an Nulaaɗo, ko Ñeeño e tagu Makko ngun e toppitagol Mo ngol, Annduɗo jeyaaɓe Makko ɓen.

Men Arsiki Ibraahiima ɓiɗɗo wi'eteeɗo Ishaaqa e taaniraawo wi'eteeɗo Yaaquuba, Men Fewni ɓe ɗiɗo kala e laawol focciingol. Men Fewni Nuuhu ado maɓɓe, Men Fewni e jurriiya Nuuhu on Daawuuda e ɓiɗɗo makko on Sulaymaana, e Ayyuuba e Yuusufa e Muusa e neene-gooto makko on Haaruuna (yo ɓe his). Ko wano Men Yoɓitiri nii ɓee Annbaaɓe e moƴƴere maɓɓe nden, Men Yoɓitirta kala moƴƴinooɓe.

Men Fewni kadi Zakariyaa e Yahyaa e Iisaa ɓiɗɗo Maryama on e Ilyaasa (yo ɓe his). Ɓen Annabaaɓe ɗon kala ko jeyaaɓe e moƴƴuɓe ɓe Alla Suɓii Waɗi Nulaaɓe.

Men Fewni kadi Ismaa'iila e Alyasa'a e Luutu, ɓen Annabaaɓe ɗon fow wonndude e Annabiijo Muhammadu (yo o his), Men Ɓurnii ɓe e Winndere nden.

Men Fewni kadi ɓen ɓe Men Muuyi e baabiraaɓe maɓɓe, e yoga e ɓiɗɓe maɓɓe, e yoga e musiɗɓe maɓɓe. Men Suɓii ɓe, Men Fewni ɓe e laawol focciingol ; ngol woni laawol tawhiidi.

Ngal peewal ngal ɓe hawrondiri, ko Alla Hawrindini ɓe e maggal ; himo Fewna on Mo O Muuyi e jeyaaɓe Makko ɓen. Sinno ɓe kafiduno e Alla goɗɗum goo, golle maɓɓe ɗen bonayno ; tawde sirku bonnay golle moƴƴe.

Ko ɓen Annabaaɓe ɗon woni ɓe men Okki Defte, e Ñenƴal, e Annabaaku. Si yimɓe maa ɓen yeddii ko Men Addani ɓe kon e ɗin tati, gomɗii Men Hebilanii ɗi yimɓe goo ɓe laataaki yeddooɓe ɗi ; ɓen ko gomɗimɓe jaɓooɓe ɗi, ko ɓen woni feruɓe ɓen e yimɓe madiina ɓen jokkirɓe ɓe moƴƴere haa Ñalnde njoɓdi diina.

Ɓe Annabaaɓe jantodaaɓe e baabiraaɓe mun e ɓiɗɓe mun e musiɗɓe mun, ko ɓen woni feewirɓe goonga : jokkito ɓe ñemtinaa ɓe. Maakan yimɓe maa ɓen an Nulaaɗo : "Mi ɗaɓɓiraa on yottingol ndee Qur'aanaare njoɓdi", Qur'aanaare nden wonaali si wanaa waaju Winndere nden ; immorde e yimɓe e jinna, fii ko fewna ɓe e laawol goonga.

Sirkooɓe ɓen mawniniraali Alla no O haani mawninireede non tuma nde ɓe wi'annoo Annabiijo Makko on Muhammadu (yo o his) : "Alla Jippinaali e dow neɗɗanke hay huunde e wayhu". Maakan ɓe an Nulaaɗo : "Awa ko hommbo Jippini Tawreeta e Muusaa, ko nde annoora e ɗoworde yimɓe makko ɓen? Alyahuuda no waɗa nde e ɗeri, ɓe feññina e majje ko yaadi mbeleeɗe maɓɓe, ɓe suuɗa ko lunndii ɗe ; wano fii sifaaji Muhammadu (yo o his). On anndinaama on ɓee Aarabeeɓe -e ndee Qur'aanaare, ko on anndaano onon, wanaa baabiraaɓe mo'on ko adii. Maakan ɓe an Nulaaɗo : "Ko Alla Jippini ɗen". Refti tertoɗaa ɓe e majjere maɓɓe haa maayde ara e mum en.

Ndee Qur'aanaare, ko Deftere nde Men Jippini e maaɗa an Annabiijo : ko nde barkinnde, goonginnde kon ko adiinde e Defte Jippinaaɗe, fii yo a jertinir nde yimɓe Makka ɓen e denndaangal yimɓe fuɗnaange e hiirnaange ; no ɓe feewira. Ɓen gomɗimɓe saare laakara nden, hiɓe gomɗini ndee Qur'aanaare, hiɓe gollitira ko woni e mayre, hiɓe reenoo kadi e julde maɓɓe nde tottirgol nde no haaniri.

Alaa ɓurɗo tooñude wa on fefindiiɗo fenaande e hoore Alla o wi'i : "Alla Jippinaali e neɗɗanke hay huunde", maa fena o wi'a : "Alla Wahyinii e makko", hara Alla Wahyinaali e makko hay huunde, maa o wi'a : "Mi jippinay sugu kon ko Alla Jippini ka Qur'aana". Sinno a tinayno an Nuaaɗo, tuma nde paɗɗe maayde nanngata ɓen tooñooɓe, hara Malaai'kaaɓe ɓen hino fontiri juuɗe maɓɓe ɗen piyugol lepta, hiɓe wi'ana ɓe ontuma : "Yaltinee pittaali mon ɗin, ko meɗen soorata ɗi. Hannde on yoɓete lepte hoynooje on sabu kon ko haalaynoɗon e hoore Alla ko aldaa e goonga : nodditiɗon Annabaaku e wahyineede e jippingol sugu ko Alla Jippini kon, e sabu ko townitaniɗon kon gomɗingol Aayeeje Makko ɗen. Sinno a tinuno ɗum, a tinayno ko hulɓinii.

Ɓe wi'anoyta Ñande Ummital : "Gomɗii on ardirii Men hannde gooto-gooto, on heddoraa jawdi e laamu -wano Men Fuɗɗorinoo on ka arannde laawol ko on holuɓe ɗi fow. On accii kon ko Men Jeynunoo on aduna. Men Yiidaali e mon kadi non hannde, reweteeɗi mon ɗi aaƴotonoɗon wonnde ko ɗi kafiduɓe e Alla ka hanndugol e dewal. Gomɗii tawƴondiral waɗii hakkunde mo'on : kadi kon ko aaƴotonoɗon e tefaneede maa wonnde ko ɗi kafiduɗi e Alla fow majjitorii on.

Pellet, ko Alla tun woni feccuɗo abbere nden O yaltini puɗi e mayre, O fecci kadi kundin=aalundere on O yaltini e makko leggal tamaro : himo yaltina wuuruɗum e ko maayi -tawde himo yaltina neɗɗanke e kala kulle ɗen immorde e heɗɗere, himo yaltina kadi maayuɗum e ko wuuri -tawde himo yaltina heɗɗere immorde e neɗɗo maa woofoonde immorde e gertogal. O mo'on waɗuɗo ɗum, ko Alla : Taguɗo on onon kadi. E ko honno wonaɗon fefindoreede gaay e goonga, onon ɓee sirkooɓe, e hoore ko seediɗon e goongo golle lobbe ɗe taguɗo On?!

Ko Kanko Seniiɗo On woni feccuɗo annoora subaka on immorde e niɓe jemma ɗen, ko Kanko kadi woni waɗuɗo jemma on deeƴirde yimɓe ɓen ; fii no ɓe fowtora ronkere ñalorma. O waɗi kadi naange ngen e lewru ndun dogirayɗe limoore hoddiraande. Ko jantaa koo, ko hoddiroore On Fooluɗo mo fooletaake, Annduɗo ko moƴƴani tagu Makko ngun.

Ko Kanko Seniiɗo On, woni waɗanɗo on onon ɓiɗɓe Aadama, koode ɗen ka kammu, fii no fewnitoron ɗe ka setagol mon ; si on majjii laawi ɗin ka njorndi e ka maayo. Gomɗii Men fensitii Aayeeje ɗen tinndinɗe Kattal Amen ngal, fii yimɓe taskitotooɓe ɗum, ɓe nafitora.

Ko Kanko Seniiɗo On woni tagirɗo on wonkii wooti, kin woni ben mon Aadama : O fuɗɗori on tagugl ben mon e loopal, refti O tagi on immorde e makko, O tagani on ka ñiiɓon -woni rangaaji neeniraaɓe mon ɓen, e marorde -woni keeci baabiraaɓe mon ɓen. Gomɗii Men Ɓannginii Aayeeje ɗen wonannde yimɓe faamooɓe Daalol Alla ngol.

Ko Kanko Seniiɗo On woni Jippinɗo ndiyam immorde ka kammu, Men fuɗiniri ɗam kala noone e puɗi, Men yaltini e ɗin puɗi, ndemri e leɗɗe kecce, Meɗen yaltinira ɗum gabbe fawondirɗe wanobutaali ɗin. Hino ka piindi tamarooje ɗen kadi dukke baɗtiiɗe dariiɗo e jooɗiiɗo. Men yaltini kadi gese immorde e inabu, Men yaltini leɗɗe neɓɓan e rummaana, nannduɗe kaaki sertuɗe dimɗe. Ndaaree onon ɓee yimɓe, faade e dimɗe majje no wa'ata ka aranun, e no ɗe wa'ata si ɗe ɓenndii. Pellet, hino ɗum ɗoo mooɗon, dalilaaji feññinɗi Kattal Alla ngal, ɗum non ko wonannde yimɓe gomɗinooɓe Alla : ko ɓe gelotoo nafitora ɗii dalilaaji.

Sirkooɓe ɓen waɗii jinnaaji ɗin kafidiiɗi Alla ka dewal, gomɗii le ko Alla tagi ɓe, wanaa goɗɗo goo tagi ɓe. Ko Kanko ɓuri hanndude e reweede. Ɓe waɗani Mo ɓiɗɓe worɓe -wano Alyahuuda wowliri fii 'Uzayru, Annasaara wowli fii Iisaa, e ɓiɗɓe rewɓe -wano sirkooɓe ɓen wowliri fii Malaa'ikaaɓe ɓen. O Laaɓi O Woɗɗondirii e kon ko yimɓe meere sifotoo.

Ko Kanko Seniiɗo On woni taguɗo kammuuli ɗin e leydi ndin. Ko honno ɓiɗɗo laatoranta Mo o alaa ɓeyngu?! Ko Kanko tagi kala huunde, Ko O Annduɗo kadi kala huunde.

On mon Siforɗo ɗin sifaaji, ko Joomi mon! Reweteeɗo goo alanaa on ko woori Mo, ko Kanko Woodini kala huunde. Rewee Kanko tun, ko Kanko hanndi e dewal. Ko O reenuɗo kala huunde.

Giiɗe ɗen humɓindotaako Mo, Kanko Seniiɗo On himo Humɓindoo giiɗe ɗen. Ko O Newaniiɗo jeyaaɓe Makko moƴƴuɓe ɓen, Humpitiiɗo ɓe.

Gomɗii hujjaaji ɓannguɗi arii on onon yimɓe ɓen, immorde ka Joomi mon : kala jaɓuɗo ɗi o taskii, o nafitoray, kala kadi wumnaaɗo e majji, o salii taskaade ɗi, lorra mun ko e makko yanata. Min mi wonaali reenoowo on, lima golle mon. Min ko mi Nulaaɗo immorde ka Joomi am, ko Kanko woni Reenoowo on.

Ko wano Men mbaainiri non hujjaaji e Kattane Alla ngal, Men Ferlisirta Aayeeje fodoore e kammbaa e waaju. Arma sirkooɓe ɓen wi'a : "Ɗum wanaa wahyu, ko ko jannguɗaa e yimɓe Defte ɓen ado maa". E fii yo Men Ɓannginan yimɓe ɓen goonga kan, Men Ferlisana gomɗimɓe ɓen e mofte Muhammadu (yo o his) Aayeeje ɗen, ko ɓen jaɓata goonga.

An Nulaaɗo, jokku kon ko Joomi maa Wahyini e maa. Ko Kanko Seniiɗo woni reweteeɗo e goonga. Wata a sokolir heeferɓe ɓen, Alla kippay fii maɓɓe.

Sinno Alla Muuyuno, ɓe kafidataano Mo e gooto! Men Waɗaali ma an Nulaaɗo, reenoowo golle maɓɓe ; a wonaali kadi a fawtiiɗo ɓe, an ko a Nulaaɗo, ko yottingol tun fawi maa.

Onon gomɗimɓe ɓen, wata on yennu dey sanamuuji ɗi sirkooɓe ɓen rewata ɗin kafida e Alla, sakko ɓe yennira Alla yottagol, hara ko sabu majjeede Seniiɗo On. Ko wano Men Cuɗirani non ɓee ɗoo ndee majjere maɓɓe, Men Cuɗiranta kala mofte golle maɓɓe ɗen ; boni moƴƴi, ɓe huuway ko Men Cuɗinani ɓe kon. Refti ko ka Joomi maɓɓe woni ruttoorde maɓɓe nden Ñalnde Darngal ; O Humpita ɓe kon ko ɓe gollaynoo aduna, O Yoɓita ɓe ɗum.

Sirkooɓe ɓen woondirii hattirde woondoore maɓɓe wonnde : si Muhammadu addaniiɓe Aaya mo ɓe suɓii, maa ɓe gomɗin mo. Maakan ɓe an Nulaaɗo : "Aayeeje ɗen wanaa e juuɗe am woni, sakko mi jippina ɗen. Si ko woni, ko ko Alla ɗe woni, himo Jippina ɗe tuma O Muuyi". Ko honɗum anndini on, onon gomɗimɓe ɓen, wonnde si ɗee Aayeeje ardirii no ɓe lamndori non, ɓe gomɗintaa? Pellet, ɓe heddoto e salaare maɓɓe nden ; tawde ɓe faalaako feewugol.

Meɗen Walitira ɓerɗe maɓɓe e giiɗe maɓɓe e heedde hakkunde maɓɓe e peewal ngal, wano Men Gerdunoo ɓe e gomɗingol Qur'aanaare nden ka laawol aranol, sabu ko ɓe yeddunoo kon ; Men Acca ɓe e majjere maɓɓe e salanagol Joomi maɓɓe, ko ɓe weemuɓe.

Sinno Men Jaabino ɓe, Men Jippinani ɓe Malaa'ika, ɓe yi'i ɓen, maayɓe ɓen kadi yeewtidi e maɓɓe, ɓen humpita ɓe ko goonga adduɗaa, Men Mooɓani ɓe kadi kala huunde nde ɓe lamndii ; ɓe laatotanooko gomɗinooɓe kon ko adduɗaa, si wanaa nde Alla Muuyani ɓe peewal. Kono ko ɓuri ɗuuɗude e maɓɓe hino majjaa ɗum, ɓe fewtataa ka Alla, haa O no O hawriɓe e peewal.

Ko wano Men Jarribor maa nii ɓee ayɓe sirkooɓe, Men Jarribornoo kala Annabaajo ado maa : Men Waɗani gooto kala e maɓɓe ayɓe yimɓe murtuɓe e ayɓe jinna murtuɗi ; yoga maɓɓe no sowonsina yoga, ɓe cuɗindirana hodo. Sinno Alla Muuyuno, ɓe waɗataano ɗum, O Muuyu tun fii jarribagol ɓe, tertodu ɓe e ko ɓe fenindotoo meere e keeferaaku, wata a haaje e ɗum.

E fii yo wuuro ɓerɗe ɓen ɓe gomɗinaa laakara heɗito kon ko ɓe sowonsindirta, ɓe jaɓana ɗum wonkiiji maɓɓe, ɓe weltora ɗum, ɓe faggitoo kon ko ɓe faggitotoo e geddi=goopi e bakkaatu.

An Nulaaɗo, maakan ɓee sirkooɓe : "Haqqil no jaɓa nde mi ɗaɓɓata ko woori Alla ñaawoowo hakkunde am e mon?" Ko Alla woni Jippinɗo e mooɗon Alqur'aana fensitunde kala huunde. Alyahuuda ɓe Men Okki ɓen Tawreeta, e Annasaara ɓe Men Okki ɓen Linjiila, hiɓe anndi wonnde Alqur'aana ko Jippiniraande e maaɗa e hoore goonga, sabu ɓe hawrii e ɗum ka Defte maɓɓe. Wata a jeye e sikkitotooɓe e ko Men Wahyini kon e maaɗa.

Alqur'aana timmirii goongugol ka yeewtere e ka kumpite. Alaa wattitoowo konnguɗi Makko ɗin. Ko Kanko woni Nanoowo haalaaji jeyaaɓe Makko ɓen, Annduɗo ɓe ; huunde suuɗaaki Mo e ɗum. O Yoɓitoyay kala etiiɗo wattitugol konnguɗi Makko ɗin.

Hara hoddira haa ɗoftiɗaa ko ɓuri ɗuuɗude e yimɓe leydi ɓen, ɓe majjinte an Nulaaɗo, e diina Alla kan : Alla Hoddirii nde goonga kan heddodata e seeɗaaɓe ɓen, yimɓe ɗuuɗue ɓen jokkaa si wanaa sikke, kala nde ɓe sikki reweteeɗi maɓɓe ɗin ɓannay ɓe e Alla, ɓe fena e ɗum.

Pellet, ko Joomi maa an Nulaaɗo, ɓuri Anndude yimɓe majjuɓe ɓen laawol Makko ngol, ko Kandi ɓuri Anndude feewuɓe ɓen e maggol ; hay huunde suuɗaaki Mo e ɗum.

Onon yimɓe ɓen, ñaamee kon ko Innde Alla jantaa e mun ka hirsugol, si on laatike gomɗimɓe Aayeejee Makko ɗen.

E ko haɗata on onon gomɗimɓe ɓen, ñaamugol kon ko Innde Alla jantaa e mun? Gomɗii le O Ɓannginanii on ko O Harmini kon e mon, hino waɗɗii on tertagol ɗum ; si wanaa ko ɓitteende wanni mon dum,sabu ɓitteende no dagintina haɗaaɗi. Pellet, ko ɓuri ɗuuɗude e sirkooɓe ɓen hino jokkira reweteeɗi maɓɓe ɗin sabu majjere nden : ɓe dagintina ko Alla Harmini e maɓɓe, ɓe harmina kadi ko Alla Daginani ɓe. Pellet, ko Joomi maaɗa an Nulaaɗo, ɓuri Anndude ɓen jaggitooɓe keeri Alla ɗin, O Yoɓitoyay ɓe ɗum.

On ɓee yimɓe, tertee faggitagol bakkaatu kene e gunndoo. Pellet, ɓen faggitorayɓe bakkaatu kene e gunndoo, Alla Yoɓoyay ɓe kon ko ɓe faggitii e majji.

Onon juulɓe ɓen, wata on ñaamu kon ko Innde Alla jantaaka e mun, pellet, ñaamugol ɗum ɗon ko yaltugol e ɗoftaare Alla. E pellet, seytaaneeji ɗin no sowinsinirde e weldiiɓe maɓɓe ɓen jiɓi-liɓi no ɓe wennjira on e ñaamugol jiibe. Si onon juulɓe ɓen on ɗoftike ɓe non e ko ɓe wowlata fii dagintinngol jiibe, haray pellet, on laatodii e maɓɓe sirkooɓe.

Hara on laatinooɗo maayɗo -sabu keeferaaku e majjere e geddi- ado Alla Fewnude mo, Men Wuurnitiri mo gomɗinal e ganndal e ɗoftaare, on no fota e wonɗo e niɓe keeferaaku e majjere e geddi ; mo hattanaa yaltude e ɗum? Ko wano ɓee sirkooɓe ɗoo cuɗiniranaa non sirkugol ñaama jiibe wennja e hoore meere, heeferɓe ɓen kadi cuɗirinanaa kon ko ɓe woni yeddude ; fi no ɓe yoɓitiree ɗum lepte muusuɗe Ñalnde Darngal.

Ko wano ko laatino emawbe sirkooɓe Makka ɓen sakkoraynoo non e laawol Alla ngol, Men Waɗiri e kala hoɗo mawɓe fewjooɓe ko boni ; ɓe sakkoo Nulaaɓe ɓen e kala jokkuɗo ɓe, ɓe nodda e laawol seytaane. Kono le, pewje maɓɓe ɗen ko e maɓɓe yiltotoo, kono ɓe so'aa anndude ɗum, sabu rewde belaade ɓe e majjere maɓɓe.

Si Aaya arii e mawɓe heeferɓe ɓen, ɓe wi'a : "Men gomɗintaa fodde Alla okkaali men sugu ko O okki kon Annabaaɓe ɓen e Nulaaɓe ɓen". Alla Jaabii ɓe wonnde ko Kanko ɓuri Anndude hannduɗo e Nuleede ; o hertinira mo Annabaaku. Aray ka koyeera e lepte tiiɗuɗe heɓa ɓee bonɓe, sabu ko ɓe townitanii goonga kon e pewje maɓɓe bonɗe ɗen.

Kala mo Alla Faandii fewnude, O Yaññiray ɓernde makko nden jaɓugol Lislaamu. Kala kadi mo O Faandii Majjinnde, O Waɗay ɓenrde makko faaɗunde fii jaɓungol goonga ; o salora jaɓugol goonga kan wano o ronkirta ŋabbagol yaha ka kammu. Ko wano non Alla Waɗirta lepte ɗen e hoore ɓen ɓe gomɗintaa.

Ko kaa diina ɗoo woni ko Men Suɓani maa an Nulaaɗo, ko laawol Alla foccii ngol. Gomɗii Men Ɓannginii Aayeeje ɗen, yimɓe waajitotooɓe ɓen.

Hino woodani ɓe galle ɗe ɓe hisata e majje kala bone -ɗen woni Aljanna- Ko Alla woni Giɗo maɓɓe Walloowo ɓe ; sabu kon ko ɓe laatinoo hiɓe golla e moƴƴereeji.

Janto an Nulaaɗo, Ñalnde Alla Mooɓindiroyta yoora-ko'e ɓen ka yimɓe e ka jinna, refti O Daala : "Ko onon yo dental Jinna, gomɗii on ɗuɗɗinorii majjingol yimɓe ɓen sakkooɓe e laawol Alla ngol". Yimɓe jokkunooɓe ɗi ɓen jaaboo Joomi maɓɓe : "Joomi amen, yoga e amen dakmitorii yoga : jinna dakmitorii neɗɗo, neɗɗo on kadi dakmitorii jinna haa men yottike ngal caatal ngal saatinanɗaa men Ñalnde Darngal". Alla Daala : "Ko Yiite ngen wonu ñiiɓirde mon, ko on luttintiiɓe ton, si wanaa kon ko Alla Muuyi e emmbere dumunna hakkunde immineede ɓe ka genaale haa nde ɓe fokkitinoyee Jahannama ; ko ɗum ɗon woni ko Alla Ittintini e luttugol maɓɓe ngol ka Yiite". Pellet, Joomi maaɗa an Nulaaɗo, ko Ñeeñuɗo e eɓɓoore mun e toppitagol mun, Annduɗo jeyaaɓe Makko ɓen hannduɗo e maɓɓe e lepte ɗen.

Ko wano Men Wurtinoo jinnaaji ɗin non e yimɓe goo fii no ɗi majjinira ɓe, Men Wurtirta kala tooñuɗo woɗɗitii e moƴƴere ; njoɓdi maɓɓe ko ɓe faggitotonoo kon e geddi.

Men Wi'anoya ɓe Ñalnde Darngal : "Ko onon yo dental jinna e yimɓe, e araali on Nulaaɓe jeyaaɓe e mo'on, ɓe no janngana on ko Alla Jippini e maɓɓe kon, ɓe rentina on hawrugol e ndee Ñalaande mo'on Darngal ɗoo?" Ɓe wi'a : "Ko non woniri, men qirritike hannde e hoore ko'e amen wonnde Nulaaɓe Maa ɓen yottinno e amen, kono men fenni ɓe, men fenni kadi ndee ɗoo Ñalaande". Nguurndam aduna ɗam hodiri ɓe cuɗaari e neemaaji lannooji ; ɓe qirritii e hoore ko'e maɓɓe wonnde ɓe laatino yedduɓe Alla e Nulaaɓe Makko ɓen ka aduna. Ngol qirritagol non nafoytaa ɓe nden Ñalnde ; tawde laawike.

Ngon nganto Nulugol Nulaaɓe e yimɓe e jinna, ko fii wata gooto leptire bone, tawa non noddaandu Nulaaɗo yottaaki mo. Men Leptaali mofte si wanaa ɓaawo nde Men Immini Nulaaɗo e maɓɓe.

Hino woodani gooto kala e maɓɓe darjaaji yeru golle maɓɓe ɗen : heewuɗo bone fotataa e famɗuɗo ɗum, jokkuɗo kadi fotataa e jokkaaɗo, ko non kadi woni njoɓdi golluɓe moƴƴere ɓen fotataa e heddiiɓe ɓen. Jooomi maa wonaali Welsindiiɗo e kon ko ɓe gollata ; himo Ƴellitii e ɗum, huunde e mun suuɗaaki Mo, O Yoɓitoyay ɓe golle maɓɓe ɗen.

Ko Joomi maaɗa an Nulaaɗo, woni Galo Yonndiniiɗo e jeyaaɓe Makko ɓen ; O Hatonjinaa e maɓɓe wanaa e dewe maɓɓe, ko ɓe yeddata kadi lorrataa Mo. E hoore ɗum, ko O Jom-Yurmeende. Si Mo Yiɗi, O Halkay on onon ɓee yeddooɓe, O Adda gomɗinooɓe Mo goo ɓe no ɗoftoo Mo ɓaawo mo'on ; wano O Tagirnoo on immorde yimɓe goo adinooɓe on.

Pellet, kon ko fodaɗon onon ɓee heeferɓe, immorde e ummital e mooɓiteede e hasbeede e lepteede, ko aray ɗum. On wonaali fuutotooɓe Joomi mo'on, O Nanngay on O Lepta.

Maaku an Nulaaɗo : "Ko onon yo yimɓe am, wonee e laawol mon, e majjere mon e keeferaaku mon, min on mi ngantinike mi hollii on hujjaaji ɓannguɗi, haaju am alaa e ko yeddoton, min non ko e goonga kan mi heddotoo e mun. On anndoyay ko hommbo maletee aduna o daña galle laakara". Pellet, sirkooɓe ɓen malataa aduna e laakara ; hay fii ɓe dakmitike aduna.

Sirkooɓe ɓen waɗani Alla e ko O Tagi kon geɓal ; immorde e gese e neemoraaɗi, ɓe aaƴii wonnde ko Alla jeyi ɗum, geɓal goo ko fii sanamuuji maɓɓe ɗin. Ko ɓe hertinani kon kafidiiɗi maɓɓe ɗin hewtataa ɓe Alla Sar'inani ɓen -wano waasuɓe ɓen e miskimɓe ɓen- Kono non ko ɓe hertinani kon Alla ɗum ɗon hewtay sanamuuji maɓɓe ɗin. Anndee senndoore maɓɓe nden bonii!

Ko wano seytaane cuɗirani non sirkooɓe ɓen ndee ñaawoore bonnde, ko non kadi o cuɗirani sirkooɓe ɓen warugol ɓiɗɓe maɓɓe ɓen ka hulugol baasal ; ɗum non ko no ɓe halkira ɓe woni on ittu hoore mo Alla Harmini, e fii no ɓe jiiɓitira diina maɓɓe kan. Sinno Alla Muuyuno, ɓe waɗataano ɗum, kono O Muuyirii Ñenñal Makko. Terto ɓee sirkooɓe an Nulaaɗo, e ko ɓe fefindotoo penaale e hoore Alla, ɗum lorrataa ma, accidu ɓe e Alla.

Sirkooɓe ɓen wi'i : "Ɗii ɗoo ko neemoraaɗi e gese haɗaaɗi : ñaamataa e majji si wanaa on mo ɓe yiɗi -e wi'i maɓɓe- E neemoraaɗi goo harminaaɗi ɓabbe mu'un : ɗi waɗɗetaake ɗi rondintaake, e neemoraaɗi goo ɗi ɓe jantotaako Innde tuma ɓe hirsata ɗi, ko innde sanamuuji maɓɓe ɗin ɓe wowlata. Ɓe huuwiri ɗum fow fenugol e hoore Alla wonnde ɗum ko e Makko iwri ; Alla Yoɓoyay ɓe non lepte, sabu kon ko ɓe fefindotonoo e Makko.

Ɓe wi'i kadi : "Ko woni kon e deedi ɗii neemoraaɗi, ko daginanaaɗum worɓe amen ɓen, harmani rewɓe amen". Si ɗi rimii ko woni ka deedi majji hawri ko ko maayi jiibi, worɓe maɓɓe e rewɓe fow kafay ɗum. Alla Yoɓoyay ɓe e ngol konngol maɓɓe ko ɓe hanndi kon. Kanko ko O Ñeeñuɗo e sari'a Makko on e toppitagol tagu Makko ngun, Annduɗo ɓe.

Gomɗii halkike ɓen warirɓe ɓiɗɓe mun ɓen faaɗere haqqil e majjere maɓɓe, ɓe harminiri ko Alla Arsiki ɓe kon e neemoraaɗi fefindagol fenaande e hoore Alla. Gomɗii ɓe woɗɗike laawol focciingol ngol, ɓe wonaano feewuɓe e maggol.

Ko Alla Seniiɗo On woni taguɗo naakooji waɗaaɗi bente e ɗe waɗaaka bente, ko Kanko kadi Tagi leɗɗe tamaro ɗen, e remuruuji sertuɗi dimɗe serti noone e dakamme, O Tagi kadi leɗɗe nebban ɗen, e rummaanaaje nannduɗe kaaki seruɗe dakamme. Ñaamee immorde e dimɗe majje si ɗe rimii, yaltinon zakka mon on ñande soñaa. Wata on fantin ñaamugol wintoo=nafqugol, Alla Yiɗaa ɓen fantinooɓe e ɗin ɗiɗi e ko woori ɗin, himo Añi ɗum. Ko Kanko Taguɗo ɗi On Dagina ɗi jeyaaɓe Makko ɓen, alanaa sirkooɓe ɓen harmingol ɗum.

Ko Kanko woni Taganɗo on e neemoraaɗi ɗin ronndotooɗi -wano gelooɗi ɗin- e ɗi ronndotaako -wano dammi ɗin- Ñaamee e kon ko Alla Arsiki on e ɗin ɗi O Daginani on. Wata on jokku taaɓaŋlle seytaane ɗen e dagintingol ko Alla Harmini, harmina ko O Dagini -wano srikooɓe ɓen gerdiri- Pellet, seytaane ko gaño mon ɓannginanɗo on onon ngayngu ; tawde himo yiɗi nde yeddoton Alla.

O Taganii on nooneeji jeetatai : no e baali ɗin noone ɗiɗi : gorel e deyel, no ka be'i kadi ɗiɗi. Maakan ɓee sirkooɓe : "Hara Alla ko gori ɗin ɗiɗi Harmini fii ɗi woni kon gori?" Si ɓe jaaborii : eyyo, maakan ɓe : "Ko harminanton deyi ɗin? Hara ko fii ko ɗi deyi?" Si ɓe jaaborii : eyyo, maakan ɓe : "Awa ko harminanɗon gori ɗin? Kaa ko ko tawi kon renngaaji deyi ɗin ɗiɗi wonii e majji?" Si ɓe jaaborii : eyoo, maakan ɓe : "E ko senndindiranton hakkunde ɗin ɗi renngaaji ɗin woni e mun, harminon gori majji ɗin e wonnde, wonnde kadi harminon deyi majji ɗin? Humpitiee lam onon ɓee sirkooɓe, ganndal ngal tippuɗon e mun, si on laatike goongu ɓe e ko aaƴiɗon wonnde harmugol ɗum ko ka Alla iwri.

Ko heddii kon e nooneeji jeetati ɗin, ko : gorel e deyel ka gelooɗi, gorel e deyel ka na'i. Maakan ɓee sirkooɓe : "Hara Alla Harminir ɗi fii ko ɗi gori maa deyi, kaa ko fii ko renngaaji ɗin woni kon e majji, kaa on tawano -onon ɓee sirkooɓe, e aaƴere mon- fewndo Alla Wasiyinoo on harmingol ko harminɗon kon e ɗii neemoraaɗi?!" Alaa ɓurɗo tooñude haa fota wa on fefindiiɗo fenaande takki e Alla, o dammba e Makko harmingol ko O Harminaa ; fii tun no o majjinira yimɓe ɓen e laawol focciingol ngol ko aldaa e ganndal. Pellet, Alla Fewnataa yimɓe tooñooɓe fefindotooɓe fenaande ɓen e hoore Alla.

Maaku an Nulaaɗo : "Mi yi'aali e ko Alla Wahyini kon e am, huunde harminaande, si wanaa ko maayi jiibi, maa hara ko ƴiiƴam sankotooɗam, maa teewu kose -sabu ɗum ko soɓe- maa ko hirsiraa ɓaawo Innde Alla -wano hirsanooɓe sanamuuji mun. Kala on ɓittoriiɗo ñaamugol ɗin harminaaɗi, hara wanaa o yawtuɗo keeri, haray bakkaatu fawaaki mo e ɗum, tawde pellet, Joomi maaɗa an Nulaaɗo, ko Haforanoowo ɓittiiɗo ñaami ɗum, Hinnotooɗo ɓe.

Men Harmini e Alyahuuda kala ko jogitii peɗaali ; wano gelooɗi e ndawwe. Men Harmini kadi e maɓɓe ɓelle na'i e dammi, si wanaa kon ko ɓabbe majji ronndii, maa ko woni e deedi majji, maa ko jillondiri e ƴi'e ; wano ... Men Yoɓirii ɓe ɗum tooñe maɓɓe ɗen. Pellet, ko Men Goonguɓe e kumpite Amen.

Si ɓe fennii ma an Nulaaɗo, e kon ko adduɗaa immorde ka Joomi maa, rerɗinir ɓe wiide : "Joomi mon ko Jom-Yurmeende yaajunde ; Himo Yurmiree on nennangol on lepte ɗen. Rentiniraaɓe kadi wiide : "Pellet, lepte Makko ɗen ruttetaake gaay e feggitotooɓe geddi ɓen".

Arma sirkooɓe ɓen dallinora koddoruyee Alla on e sirkangol Mo ngol : "Sinno Alla Muuyuno, menen e baabiraaɓe amen ɓen men sirkantaano Mo. Si All Muuyuno, men harmintaano hay e huunde e hoore-amen". Ko wano non tigirigi ɓen adinooɓe ɓe gifenniraynoo Nulaaɓe mu'un ɓe wi'a : "Sinno Alla Muuyuno, men fennataano ɓe", ɓe lutti e ngol fennugol haa ɓe meeɗi lepte Amen ɗen. Nulaaɗo, maakan ɓee sirkooɓe : "Hara hiɗon jogii tuuginorde tinndoore wonnde Alla no Weltori sirku mo'on? e ko dagintinton ko O Harminani on, harminon ko O Daginani on? Ngol jillindirgol mon ɗon yonii ko holla wonnde Alla Weltoraa on. Pellet, onon on jokkaa si wanaa sikke, pellet, sikke ɗen duncataa e goonga kan hay e huunde, onon on wonaali si wanaa fenooɓe".

Maakan ɓee sirkooɓe : "Si tawii on maraa hujja si wanaa oo hujja cadunam ɗoo, haray anndee pellet, hino woodani All hujja yonoowo mo taƴondirtaa yeeso ngatooji mon, bonnayɗi jiɓi-liɓiiji mon. Sinno Alla Muuyuno, O Fewnanyno on onon ɓee sirkooɓe fow".

Maakan ɓee sirkooɓe harminooɓe ko Alla Dagini ɓe baka ɗum e Alla : "Addee seedeeɓe mon ɓen, ɓe seeditoo wonnde Alla Harminii ɗii piiji ɗi harminɗon". Si ɓe seeditorii ko aldaa e ganndal, wata a goongimɓe e ɗum, an Nulaaɗo ; tawde ko seeditagol fenaande non. Wata jokku mbeleeɗe ɓen fennuɓe Aayeeje Amen ɗen tuma ɓe harminnoo ko Alla Daginani ɓe, wata a jokku ɓen ɓe gomɗintaa laakara, kamɓe hiɓe sirkana Joomi maɓɓe. Ko honno sugu ɓen ɗon jokkirtee?!

An Nulaaɗo, Maakan yimɓe ɓen : "Aree mi janngana on ko Alla Harmini e mon : ko nde kafidoton e Makko huunde nde O Tagi, e nde jagganton jibimɓe on ɓe tawta no waɗɗii on moƴƴagol e maɓɓe, e nde waroton ɓiɗɓe mon ɓen kulol baasal -wano yimɓe majjuɓe gerdiraynoo- Ko Mene Arsikata on onon e maɓɓe, O Harmini kadi nde ɓaɗtotoɗon pankare ɗen ko feeñi e majje e ko wirnii, e warugol wonkii ki Alla Harmini warugol si wanaa hara ko e goonga -wano jeenugol ɓaawo caŋiido maa murtugol yalta Lisalaamu. Ko ɗum mooɗon woni ko O Wasiyii on ; belajo'o, on haqqilay yamirooje Alla ɗen e haɗaaɗi Makko ɗin.

O Harminii e ɓaɗtotoɗon jawdi Alyatiima -on mo ben mun maayi ado o hellifeede- si wanaa hara ko ko nafata maa nafa jawdi ndin, ɗum non ko haa o hellifee. O Harminii e mooɗon kadi ɗuytugol betirɗe ɗen e manndikirɗe ɗen, O Waɗɗini e mooɗon nunɗugol ka sooda yeeya. Men fawaa wonkii si wanaa emmbere makki ; kala ko feere mun alaa e ɓeydagol maa ɗuytoo ka etugol e ko wanaa, ɗum nanngitirtaake. O Harminii kadi e mooɗon nde wowloton ko wanaa sawaaba jinngana musiɗɗo mun maa weldiiɗo. O Harmini e mooɗon kadi firtugol Ahadi Alla ndin waɗɗiindi hunnude. Ko jantaa ɗoo kon, ko Alla Yamiri on ; belajo'o, on annditay fii battane fiyaake mon.

O Harmnii kadi e mooɗon jokkugol juri majjere, O Waɗɗini e mooɗon jokkugol laawol Alla focciingol ngol. Tawde juri majjere ɗen sennday woɗɗintina e laawol goonga ngol. Ko jokkugol laawol Alla focciingol ngol woni ko Alla Wasiyii on ; balajo'o, on hulay Mo jokkon Yamiraaɗi Makko rentoɗon e Haɗaaɗi Makko.

Refti ɓaawo humpitugol ko yawti kon, Men Humpita wonnde Men Okkuno Muusaa tawreeta timmirnde neema, njoɓdi golle makko moƴƴe, tawi ko nde fensitunde kala huunde e diina, tinndinnde goonga e yurmeende ; belajo'o, ɓe gomɗinay hawroygol e Joomi maɓɓe Ñalnde Darngal, ɓe heɓilora golle moƴƴe.

Ndee ɗoo Alqur'aanaare, ko Deftere nde Men Jippini heewunde barki ; sabu ko nde yowondiri kon e nafooreeji diina e aduna - Jokkee ko Jippinaa kon e mayre, rentoɗon lunndagol nde ; balajo'o, on yurmete.

Fii wata onon sirkooɓe Aarabeeɓe ɓen wi'oy : "Alla ko Jippini tawreeta e Linjiila, ko e Alyahuuda e Annasaara, adinooɓe men. O Jippinanaali men Deftere, men waawaa janngude kadi Defte maɓɓe ɗen, tawde wanaa e haala amen".

Fii kadi wata on wi'oy : "Sinno Alla Jippinno Deftere e amen, wano O Jippiniri e Alyahuuda e Annasaara'en, pellet, men laatotono ɓurɓe ɓen ɗon feewude". Gomɗii le Deftere nde Alla arii on, jippinaande haa e Annabiijo mon on Muhammadu (yo o his), e haala mon ; ɗum ko hujja ɓannguɗo, e tinndinayɗum laawol goonga, e yurmeende mofte ɗen. Wata on ngantinor meere. Alaa ɓurɗo tooñude haa hewta on fennuɗo Aayeeje Alla ɗen o ɗuurnii ɗe. Arma Men leptira ɓen ɗuurnotooɓe Aayeeje Amen ɗen lepte tiiɗuɗe, naatugol Yiite Jahannama, njoɓdi ɗuurnagol ɓe Aayeeje ɗen.

Ɓee fennooɓe habbitaaki si wanaa nde Malaa'ikaajo waroowo on, o ɓoora wonkiiji maɓɓe ɗin aduna, maa nde Joomi maɓɓe Arata Ñaawugol hakkunde maɓɓe laakara, maa nde yoga e maandeeji Joomi maa tinndinɗinayɗi Darngal arata. Ñalnde non yoga e maandeeji Joomi maa ari -wano fuɗirgol naange ngen mutal- gomɗinal keefeero nafoytaa, gomɗinal gomɗinɗo kadi nafoytaa si o gollaano moƴƴere ado nden ñalnde. Nulaaɗo, maakan ɓee sirkooɓe : "Habbitee gootun e ɗin piiji, menen doo meɗen habbitii".

Pellet, ɓen waɗuɓe diina kan pecce-pecce, immorde e Alyahuuda e Annasaara ; tawde ɓe ƴettii yoga e makka ɓe tertii yoga, an Nulaaɗo, a jeyaaka e maɓɓe e huunde, ko o daɗndiiɗo e nde majjere maɓɓe. A fawaaka e maɓɓe si wanaa yottingol, fiyaake maɓɓe ko faade ka Alla. Refti O Humpitoyay ɓe Ñalnde Darngal, ko ɓe laatinoo hiɓe golla aduna, O Yoɓita ɓe ɗum.

Kala gomɗinɗo arduɗo moƴƴere Ñalnde Darngal, All Sowiranay mo moƴƴi sappo ; kala kadi arduɗo e bone, o leptirtaake si wanaa yeru makko. Kamɓe ɓe tooñoytaake Ñalnde Darangal ; ɓe tooñiroytaake ɗuytagol moƴƴere, wanaa kadi ɓeydaneede bonɗi.

Nulaaɗo, maakan ɓee sirkooɓe : "Min, Joomi am Fewnirii lam laawol focciingol ; ngol woni laawol diina ñiiɓuka e moƴƴere aduna e laakara, kan woni diina Ibraahiima, ooññoriiɗo e diina goonga, mo jeyanooka e sirkooɓe ɓen".

Maaku an Nulaaɗo : "Pellet, julde am nden, e kirse am ɗen ko Alla woodani, wanaa goɗɗum goo, nguurndam am ɗam e maayde am nden kadi fow ko Alla Jeyɗo Tagoore nden tun woodani, goɗɗo goo alaa geɓal e ɗum".

Kanko Seniiɗo On O Alaa kafidiiɗo, reweteeɗo e goonga alaa ko woori Mo. Ko oo tawhiidi ɗoo Alla Yamiri lam, ko mi arano e jebbilanii ɓe Mo e ɗee mofte.

Nulaaɗo, maakan ɓee sirkooɓe : "E ko tanaa Alla mi ɗaɓɓata reweteeɗo, ko Kanko Seniiɗo On woni Jeyɗo kala huunde?! Ko Kanko woni reweteeɗo e goonga on. Wonkii woo ronnditotaako bone wonkii goo. Refti ko faade ka Joomi mon woni ruttorde mon Ñalnde Darngal,O Humpita on ko laatinoɗon hiɗon luutondira e muuɗum aduna e fii diina.

Ko Alla woni Waɗuɗo on lontotooɓe adinooɓe on ka leydi, O Ɓamtiri yoga mon ka tagu e ka arsike ekn senngo dow yoga, darjaaji ; fii yo O Ndaarndo on e kon ko O Okki on. Pellet, Joomi maaɗa an Nulaaɗo, ko yaawuɗo lepte, Kanko kadi ko O Haforanoowo tuubuɗo e jeyaaɓe Makko ɓen, Hinnotooɗo ɓe.

Yeewtere sugu mun yawtii ka arannde cortewol Baqarah.

Alqur'aanaare Teddunde nden, ko Deftere Jippinaande e maaɗa -an Nulaaɗo- Wata ɓitteende fii mayre wonu ka ɓernde maa ; Alla Jippiniriinde e maaɗa fii jertinirgol nde yimɓe ɓen, ñiiɓiniraande hujja, e fii yo a waajornde gomɗimɓe ɓen ; ko ɓen nafitorta waaju.

Jokkee onon ɓee yimɓe, Deftere nde Joomi mon Jippini e mooɗon e sunna Annabiijo mon on, wata on jokku mbeleeɗe ɓen ɓe sikkoton ko weldiiɓe mo'on -immorde e seytaaneeji maa ruuɗinkiniiɓe- Kono fanɗii ko waajitotoɗon ; tawde si on waajitino, on ɓurnataano goɗɗum goo e goonga kan, on jokkayno ko Nulaaɗo mon on addani on kon, gollitiron ɗum, hawkon ko lunndii ɗum.

Ɗuuɗi e ca'e ɗe Men halkiri lepte Amen! Ɓaawo nde ɓe haɓɓitii e keeferaaku maɓɓe, Men Jppini lepte Amen ɗen e maɓɓe fewndo ka ɓe welsindii jemma maa ñalorma, ɓe waawaano yiltude ɗen e maɓɓe, reweteeɗi maɓɓe ɗin kadi nafaano ɓe e ɗum.

Ɓaawo lepte ɗen arii e maɓɓe, ɓe waɗaano si wanaa qirritagol e ko'e maɓɓe, wonnde ɓe tooñirno yeddugol Alla.

Ma Men Lamnditoyo Ñalnde Darngal, mofte ɗe Men Nulunoo ɗen e mun Nulaaɓe fii ko ɓe jaabitinoo Nulaaɓe ɓen, Ma Men Lamnditoyo kadi Nulaaɓe ɓen si ɓe yottinnno Nule ɗen e si tawii ɓe mofte maɓɓe ɗen jaabitino ɓe.

Ma Men Fillanoyor tagu ngun fow golle maɓɓe ɗen aduna, e hoore ganndal Amen ; tawde gomɗii Meɗen Anndunoo ɗum, huunde e mun wirnaaki Men, Men wonaano kadi welsindiiɓe e kala waqtu.

Manndake ɗen Ñalnde Darngal, ko e nunɗal ɗe manndikirtee wanaa tooñe. kala mo manndake mun moƴƴi ɗen teddi ɓuri bonɗi ɗin, ko ɓen ɗon woni maloyteeɓe ɓen.

Kala mo manndake mon moƴƴi ɗen foygitii ɓuri bonɗi makko ɗin, ko ɓen ɗon woni sooyinirɓe pittaali mun ɗin halkagol Ñalnde Darngal, sabu ko ɓe yeddaynoo Aayeeje Alla ɗen.

Gomɗii Men Newinanii on -onon ɓiɗɓe Aadama ɓen- ka leydi. Men Waɗani on nguuree e mayri. Tawi ko yettugol Alla tun habboraɗon, kono fanɗii ko yettoton.

Gomɗii Men Tagii baaba mon Aadama, hooti Men Mbaadiniri mo ko ɓuri moƴƴude e mbaadi, hooti Men Yamiri Mala'ik'en sujjirangol mo teddungal, ɓe ɗoftii ɓe sujji, si wanaa Ibliisa, o salora sujjungol towonitaare.

Alla Feliri mo Daalugol :"Ko honɗum haɗu-maa sujjangol Aadama nde Mi Yamir-maa?" Ibliisa jaabii Joomi mun : "Ko tawde miɗo ɓuri mo : A Tagii lam immorde e Yiite, A Tagii mo kanko immorde e loopal ; ko Yiite non ɓuri loopal teddude".

Alla Daalani mo : "Jippo ka Aljana ton, haananaama nde townitotoɗaa ton ; sabu ko galle laaɓuɓe non. A daganaakima wonnde ton, an Ibliisaa, ko a jeyaaɗo e jaasuɓe ɓen, hay si tawii non a sikkee hiɗa teddi ɓuri Aadama".

Ibliisa wi'i : "Joomi, Nennitanam haa ñalnde ɓe immintintee, fii no bewinira kala mo mi waawi bewinnde e yimɓe ɓen".

Alla Daalani mo: "An Ibliisa, ko a jeyaaɗo e nennitanteeɓe Muuyanaaɓe maayde ñalnde allaadu ndun wuttetee ka arannde ; maaydaa e tagu ngun fow, heddoo Alla tun".

Ibliisa wi'i : "Sabu ko majjinirɗaa lam kon ronnkugol sujjannde Aadama, ma mi jooɗanor ɓiɗɓe Aadama ɓen ka laawol Maa focciingol ; fii no mi murtinira ɓe, wano Majjinirɗaa lam e sujjangol baaba maɓɓe Aadama.

Refti mi ardiranoyay ɓe nokku fow : mi ruuɗina ɓe laakara, mi rerɗina ɓe aduna, mi bugoo jiɓi-liɓi e maɓɓe, mi cuɗana ɓe tuuyo. A tawataa An Joomi, ko ɓuri heewude e maɓɓe no yetta Maa ; sabu ko ɓe ɗoftotoo lam kon e yeddugol".

Alla Daalani mo : "Yaltu ka Aljanna -yo Ibliisa-, ko a ŋiñaaɗo raɗaaɗo e yurmeende Alla. Ko ma Mi hebbiniroye Jahannama Ñalnde Darngal, e kala ɗoftiiɗo ma o yeddi Lam e maɓɓe".

Alla Daalani Aadama : "Ko an yo Aadama, hoɗu an e ɓeyngu maa Hawwa' ka Aljanna, ñaamon kala laaɓuɗi ko yiɗu-ɗon ton ; wata tun on ñaamu ngal ɗoo leggal (ngal Alla Toɗɗaninoo ɓe) ; sabu si on ñaamii e maggal ɓaawo Mi haɗude on, on laatoto e yawtuɓe keeri Alla ɗin".

Ibliisa yeewti ɓe konngol newiingol ; fii yo o feññinan ɓe ko suuɗaa e maɓɓe e awraaji maɓɓe, o wi'ani ɓe : "Joomi mon haɗiraali ñaamugol e ngal leggal, si wanaa fii wata on wonu Malaa'ika maa wonon duumotooɓe ka Aljanna".

O woondani ɓe Alla : "Min ko mi laaɓanooɓe on -an Aadama e Hawwaa".

O jippiniri fii maɓɓe hodugol ɓe janfoo. Nde ɓe ñaamunoo e leggal ngal, awraaji maɓɓe ɗin feeñi ɓe, ɓe waɗti surritorde kaaki Aljanna ɗin. Joomi maɓɓe noddi ɓe : "E Mi haɗaano on ñaamugol e ngal leggal, Mi wi'ani on wonnde : Pellet, seytaane ko gaño mon ɓannguɗo?!".

Aadama e Hawwaa wi'idi : "Joomi amen, men tooñirii ko'e amen faggitagol ko Haɗuɗaa men e ñaamugol ngal leggal, si A haforanaali men junuubi amen yurmeɗaa men, pellet, men jeydete e sooyuɓe aduna e laakara ɓen".

Alla Daalani Aadama e Hawwaa e Ibliisa : "Jippee ka leydi, yoga e mon wonoyay ayɓe yoga. Hino woodani on ka leydi ton nokku ñiiɓirɗo haa saa'i anndaaɗo, e dakmitagol ton haa e lajal innaangal".

Alla Daalani Aadama e Hawwaa e Jurriyaaji maɓɓe ɗin : "Ko ka leydi ton wuuroton yeru ko Alla Hoddirani on kon, ko e mayri kadi maayoton surre-ɗon, ko e ɗen genaale kadi immintinte-ɗon".

Ko onon yo ɓiɗɓe Aadama! Gomɗii Men Waɗanii on conci surrirɗi awraaji mon, e conci cuɗinorɗi hakkunde yimɓe, e conci kulol -ɗin woni ɗoftagol Alla woɗɗitoo haɗaaɗi Makko- ɓuri moƴƴude e dii conci ɓorneteeɗi ɗin. Ko jantaa ɗoo kon, ko jeyaaɗum e Aayeeje Alla tinndiɗe Kattal Makko. Belajo'o, on waajitoto e neemaaji Makko ɗin, yetton Mo.

Ko onon yo ɓiɗɓe Aadama! Wata seytaane hodir on cuɗirangol on tertagol ɓoornaade conci surrayɗi awraaji mon maa tertagol conci kulol. Gomɗii o hodiriino baabiraaɓe mon ɓen ñaamugol leggal haa ɓe ɗum woni sabu ɓe yaltinaa ka Aljanna, awraaji maɓɓe ɗin feeñi. Pellet, seytaane e gorol mun, hino reeni on e nokku ka on reenaa ɓe ; on haanii rentaade e maɓɓe. Menen Men waɗii seytaaneeji ɗin weldiiɗi ɓen ɓe gomɗintaa Alla. Gomɗinooɓe golla moƴƴu ɓen kan, o heɓantaa ɓe laawol.

Si sirkooɓe ɓen faggitike pankare -wano wanngagol ka Kaaba ko ɓe ɓoorii ɓe ekn- ɓe ngantinoray wonnde ɓe tawru ɗum baabiraaɓe maɓɓe ɓen, e wonnde ko Alla yamiri ɓe ɗum. Jaabo ɓe an Muhammadu : "Pellet, Alla yamirtaa pankare, ko hono noddirton ɗum e Makko? E onon ɓee sirkooɓe, on wowlay fefindoɗon fenaande e hoore Alla ko on anndaa?!"

An Muhammadu, maakan ɓee sirkooɓe : "Joomi am ko nunɗal Yamiri, wanaa pankare e ŋiñere. O Yamirii nde laɓɓinanton Mo dewe ɗen fow ; teŋtinii tuma juuloton, e nde tororto Mo laɓɓinangol Mo dewal ngal. Ko wano O Tagiri on non ka arannde O Rutirta on wuurɓe e laawol goo. Hattanɗo Tagugol on ko Hattanɗo Fuɗɗitorgol on ummital".

Gomɗii Alla Waɗii yimɓe ɓen feddeeji ɗiɗi : fedde goo O fewni, ndeya fedde O waɗɗini majjere nden e maɓɓe. Tawde ɓe jogitorii seytaaneeji ɗin waliyaaɓe gaanin Alla, kamɓe hiɓe sikka ko ɓe feewuɓe e laawol focciingol ngol.

Ko onon yo ɓiɗɓe Aadama, ɓornee ko surrata awraaji mon, cuɗinoron conci laaɓuɗi tuma kala juuloton wanngoɗon. Ñaamee yaron ko yiɗuɗon e laaɓuɗi ɗi Alla Daginani on, wata on fantin e ɗum. Pellet, Kanko O yiɗaa fantinooɓe ɓurnita ɓen.

Maaku an Nulaaɗo, jaaboɗaa ɓee sirkooɓe harminooɓe kon ko Alla Dagini immorde e conci e laaɓuɗi ɗin ka ñaameteeji ekn : "Ko hommbo harminani on conci mon cuɗinorɗi ɗin? E laaɓuɗi ɗin ka ñaametee e ka njaram e kala ko Alla Arsiki on?" Maaku : "Ɗin laaɓuɗi ko gomɗimɓe ɓen woodani aduna, hay si woɗɓe goo hawtiiɗi e maɓɓe, kono ko ɗi heerantooɗi ɓe Ñalnde Darngal, keefeero kafidoytaa e maɓɓe ; tawde ɓen no harminanna Aljanna". Ko woni nii Men Fensitirta Aayeeje ɗen, wonannde yimɓe andooɓe nafitora.

Maakan ɓee sirkooɓe harminooɓe ko Alla Dagini : "Anndee ko Alla Harmini e jeyaaɓe ɓen : ko pankare -ko feeñi e majje e ko suuɗii-, e kala geddi, e jaggitirgol e yimɓe ɓen hoore tooñe, e nde sirkanton Alla e huunde nde o alanaa ɗum hujja, e wowlugol e Inɗe Alla ɗen e Sifaaji e sariyaaji Makko ɗin ko aldaa e ganndal".

Hino woodani kala fedde e yiirde lajal happaangal. Si lajal maɓɓe ngal arii, ɓe nennitantaake ko foti e fanɗude, ɓe ardinantaake kadi.

Ko onon yo ɓiɗɓe Aadama! Si Nulaaɓe jeyaaɓe e mo'on arii on immorde e Am, hiɓe janngana on Defte ɗe Mi Jippini e maɓɓe, haray ɗoftee ɓe, jokkon ko ɓe addi kon. Ɓen Huloyay ɓe Alla ɓe moƴƴina golle maɓɓe, kulol alanaa ɓe Ñalnde Darngal, wanaa kamɓe kadi sunoytoo fii ko feƴƴiriɓe e aduna.

Ɓen yedduɓe non ɓe fenni Aayeeje Amen ɗen, ɓe salii ɗe gomɗinnde, ɓe townitanii ɗe ɓe salii gollitirde ko Nulaaɓe maɓɓe addani ɓe, ko ɓen woni yimɓe Yiite ɓen, kamɓe ko ɓe luttooɓe e magge poomaa.

Alaa ɓurɗo tooñude wa on fefindiiɗo fenaande baki e Alla, maa o fenni Aayeeje Makko ɗen. Ɓen siforiiɓe ɗin sifaaji, ɓe heɓay geɓal maɓɓe ngal aduna ngal ɓe winndanaa ka Alluwal reenaangal ; haa si Malaa'ikaajo waroowo on arii ɓe fii ƴettitugol pittaali maɓɓe ɗin, ɓe felira ɓe wi'angol ɓe : "Ko honto ɗin ɗi rewaynoɗon gaanin Alla woni?!" Noddee ɗi fii ko faaboo on. Sirkooɓe ɓen jaaboo : "Ɗin reweteeɗi majjirii men". Ɓe seeditoo e ko'e maɓɓe, wonnde ɓe laatino yedduɓe. Kono ngol seeditagol yananee ko hujja tun wonata e maɓɓe, wanaa fii si nafay ɓe.

Malaa'ikaaɓe ɓen wi'ana ɓe : "Naatee onon sirkooɓe ɓen on denndaandal e moftaaji, gomɗii adinooɓe on e keeferaaku e majjere immorde e jinna e yimɓe yawtii ka nder Yiite". Tuma kala nde mofte naati ton, ɗe huɗa banndam majje adiiɗe naatugol. Haa si ɓe tawtindirii nder ton ɓe fow maɓɓe, sakkitiiɓe maɓɓe naatugol ɓen wi'ana adiiɓe maɓɓe ɓen : "Joomi amen! Ko ɓee mawɓe majjini men e laawol peewal ngol, leptirɓe cowanɗe ko ɓe cuɗirani men kon majjere nden". Alla Daalana ɓe : "Hino woodani fedde kala e mo'on geɓal sowre e lepte ɗen, ko woni tun, on anndaa ɗum".

Mawɓe maɓɓe jokkanooɓe ɓen wi'ana jokkunooɓe ɓen : "Alanaa on -onon ɓee jokkuɓe men- ɓural e dow amen, ngal hoynirante ɗon lepte ɗen, ko golle mon ɗe faggitiɗon ɗen ndaaretee, nganto alanaa on e jokkugol meere, meeɗiree lepte ɗen no men meeɗiri ɗe, sabu kon ko faggitiɗon e geddi".

Pellet, ɓen fennuɓe Aayeeje Amen ɓannguɗe ɗen, e mawnintinaniiɗe dotaade be pibtii kala moyyere, dame kammuuli ɗin udditantaake golle maɓɓe ɗen sabu keeferaaku maɓɓe ngun, wanaa kadi pittaali maɓɓe ɗin si ɓe maayii, ɓe naatataa kadi Aljanna haa ngelooba -no mawniri- naata e wuddere meselal, ɗum le gasataa. Ko sifa ndii njoɓdi Men yoɓata bakkondimɓe ɓen.

Hino woodani ɓee fennooɓe townitoo ka Jahannama ton, ndaɗɗudi hibe wertandi, hino e senndo dow maɓɓe kadi kippoodi Yiite. Ko wano ndii njoɓdi Men yoɓata yawtirɓe keeri Alla ɗin yeddugl ɗuurnoo.

Ɓen gomɗimɓe Joomi maɓɓe ɓe golli golle moƴƴe - Alla fawaa wonkii ko ki waawataa- Ko ɓen ɗon woni yimɓe Aljanna : kamɓe ko ɓe duumotooɓe ton poomaa.

Hino jeyaa e neemaaji maɓɓe ɗin ka Aljanna, tawde Alla ɓooray e ɓerɗe maɓɓe ɗen konnaagu, O ilina canɗi ɗin senngo ley maɓɓe, ɓe qirritoo neema Alla on ɓe wi'a : "Men yettii Alla fewnuɗo men e golle moƴƴe ɗe men dañiri oo martaba, men feewataano si wanaa Alla fewni men. Gomɗii Nulaaɓe Joomi amen ɓen addii goonga ka sikke alaa e mu'un, ɓe goongi ka fodoore e ka kammbaa". Ɓe noddoyee, si ko woni : "On ɗon mooɗon Aljanna mo Nulaaɓe mon ɓen humpitunoo on aduna, Alla yeɗirii on mo, sabu ko laatinoɗon hiɗon golla e moƴƴuɗi yamiraaɗi, te ko yeesa Alla tan faalanadon heen".

Ñiiɓuɓe Aljanna ɓen noddi ñiiɓuɓe Yiite ɓen, si ko woni : "Menen men tawii ko Joomi amen fodi men kon Aljanna ko goonga ; men naatii Aljanna. Hara onon kadi heeferɓe ɓen on tawii ko Joomi mon fodi on kon Yiite ko goonga?" Heeferɓe ɓen wi'a : "Eyyo, men tawii Yiite nge Alla fodi men ngen ko goonga". Noddoowo nodda hakkunde maɓɓe nde Alla huɗata tooñooɓe ɓen ; tawde ɓe udditanaama dame yurmeende Alla nden ɓe ɗuurnii ka aduna.

Ɓen tooñooɓe, ko ɓen woni sakkotonooɓe gaay e laawol Alla ngol, ɓe etoo no woɗɓe goo ɗuurnora ngo, ɓe ɗaɓɓa laawol goonga ngol ooñorde ka yimɓe selira, kamɓe kadi ko ɓe yedduɓe laakara, be hebanaaki laakara.

Heedo no hakkunde ɗii feddeeji ɗiɗi -yimɓe Aljanna e yimɓe Yiite- : tulde toowunde no wi'aa : "al A'raaf". Worɓe kadi hino e nden tulde, moƴƴi maɓɓe e bonɗi maɓɓe no fota, ɓen no annditira yimɓe Aljanna ɓen maandeeji maɓɓe -wano jalɓugol geece-, hiɓe annditira kadi yimɓe Yiite ngen maandeeji maɓɓe -wano niɓɓitugol-. Ɓen worɓe ɗon nodda yimɓe Aljanna ɓen teddinirgol ɓe wi'ugol : "Kisiyee woni e mon". Yimɓe Aljanna ɓen non naataali taho, kono hiɓe tamƴinii naatirgol yurmeende Alla nden.

Si giiɗe yimɓe tulde La'raafi ɓen fewtiniraama e yimɓe Yiite ɓen, ɓe tinii lepte tiiɗuɗe ko ɓen woni e mun, ɓe toroo Alla ɓe wi'a : "Joomi amen! Wata a waɗtidu men e tooñirɓe yeddugol sirkana Maa".

Yimɓe La'raafi ɓen noddi yimɓe Yiite ɓen, hiɓe anndira ɓen maandeeji maɓɓe niɓɓitugol geece, ɓe wi'ana ɓen : "Nafaali on mooɓugol on jawle e worɓe, nafaali on kadi ɗuurnagol goonga kan townitoo!".

Alla felira heeferɓe ɓen wi'angol ɓe : "E ko ɓee ɗoo woondirnoɗon wonnde Alla memintaa ɓe yurmeende Makko nden?!" O Daalani gomɗimɓe ɓen : "Onon naatee Aljanna! Kulol alanaa on, wanaa onon kadi woni sonoytooɓe e fii ko feƴƴi e neemaaji aduna.

Yimɓe Yiite ɓen noddi yimɓe Aljanna ɓen ɗaɓɓirgol ɓen wi'a: "Yuppanee men ndiyam -yo yimɓe Aljanna-, maa kon ko Alla arsiki on e ñaametee". Yimɓe Aljanna ɓen jaaboo : "Pellet, Alla harminii ɗin ɗiɗi e heeferɓe ɓen, men waawaa faaborde on ko Alla harmini e mon".

Ko ɓen heeferɓe woni jogitoriiɓe diina mun kan jalnori e fijindaaru, nguurndam aduna e cuɗaari mun hodi ɓe. Ñalnde Darngal non, Alla yejjitiray ɓe O accida ɓe e lepte, wano ɓe yejjitirnoo hawrugol e ndee Ñalaande Darngal, ɓe salii hebilanaade nden, e sabu ko ɓe yeddaynoo kon Aayeeje Alla ɗen e hoore hiɓe anndi ko ɗe goonga.

Gomɗii Men addanii ɓe ndee Qur'aanaare Jippinaande e Muhammadu (jom-kisiyee), Men fensiti nde e dow anndal Amen, ko nde fewnaynde gomɗimɓe ɓen e laawol goonga, e yurmeende maɓɓe ko nde yowondiri e moƴƴere aduna e laakara.

Heeferɓe ɓen habbaaki si wanaa battane lepte muusuɗe ɗe ɓe humpitaa fii mun laatotoo laakara. Ñalnde ɗum hewti, ko gomɗimɓe ɓen humpitaa fii mun kon e mbarjaari kadi hewti, ɓen yejjitunooɓe Alqur'aana ka aduna wi'oyay : "Gomɗii Nulaaɓe Joomi amen ɓen ardii e goonga, sikke alaa ko immori ka Alla. Hara nun men heɓayno tefanooɓe men ka Alla fii lepte ɗen, maa men ruttee aduna fii no men gollira golle moƴƴe daɗndayɗe men lepte". Gomɗii ɓee heeferɓe hayrinii wonkiiji maɓɓe yollugol ɗi halkaare sabu yeddugol maɓɓe, kon kon ɓe rewaynoo gaanin Alla kadi wirnike majjirii ɓe, ɗum nafaali ɓe.

Pellet, Joomi mon onon ɓee yimɓe, ko Alla Taguɗo kammuuli ɗin e leydi ndin e nder balɗe jeegoo, refti O Toowi O Fotondiri Kanko Seniiɗo on ka hoore Arsi no en anndiraa. Himo hippira niwre jemma nden ndaygu ñalorma ngun, O hippira non ndaygu ñalorma ngun niwre jemma nden ; ɗin ɗiɗi kala no ɗaɓɓindira yaccagol. O Tagi kadi naange ngen e kammu ngun, O Tagi koode ɗen. Faamee, ko Alla tun tagu ngun heeranii, ko hommbo tagata ko woori Mo?! Ko Kanko tun yamiroore nden woodani, Siforiiɗo Mawngu e Timmugol, Jeyɗo Winndere nden.

Onon ɓee gomɗimɓe, noddiree Joomi mon yankinaare e gunndoo, laɓɓinanon Mo toraare nden ko jillaa e yiingo maa kadidugol Mo goɗɗum goo ka toraare. Pellet, Kanko O Yiɗaa ɓen yawtooɓe keeri Makko ɗin ka du'agol ; wano kafidugol Mo goɗɗum goo ka du'aa, golle sirkooɓe ɓen, ko ɗum ɓuri mawnude e yawtugol keeri Makko ɗin.

Wata on bonnir ka leydi faggitagol geddi ɓaawo nde Alla Moƴƴiniri ndi immingol Nulaaɓe (yo ɓe his), e hebbinirgol ndi ɗoftagol Mo Kanko tun. Tororee Mo Kanko tun hulugol lepte Makko ɗen tamƴinoo moƴƴere Makko nden. Pellet, yumeende Joomi maa nden no ɓadii moƴƴimɓe ɓen, ngonee e maɓɓe.

Ko Alla Seniiɗo on woni Nuloowo keneeli ɗin weltinirrgol toɓo, haa si keneeli tedduɗi ɗin ronndike duulere nden e leydi yuurundi, Men Jippina ndiyam e mayri, Men Yaltinira ɗam ndiyam kala dimɗe. Ko wano non Men Yaltiniroyta maayɓe ɓen ka genaale maɓɓe ko ɓe wuuruɓe. Belajo'o, onon ɓee yimɓe, on waajitoto e Kattal Alla ngal, e wonnde ko O Hattanɗo wuurnitugol maayɓe.

Leydi moƴƴiri ndin, puɗi mayri no yaltira duŋayee Alla, ko non kadi gomɗinɗo jaɓirta waaju o nafitora, o huuwa golle moƴƴe ; leydi yoorundi boni ndin, ndi yaltinirtaa puɗi si wanaa saɗteende nde moƴƴere alaa e mu'un, ko non kadi keefeero on o nafitortaa waaju, ko ɗum haɗata mo gollude moƴƴere nafaynde mo. Ko wano nii Men Ɓannginirta Aayeeje ɗen fii tabintinangol yimɓe yettooɓe Neemaaji Alla ɗin goonga kan, ɓe ɗoftoo Mo, ɓe yeddataa Mo.

Gomɗii Men Nulii Nuuhu faade e yimɓe makko ɓen fii wootinɗingol Alla, tertoo rewugol sanamu, o maakani ɓe : "Ko onon yo yimɓe am, rewee Alla tun, reweteeɗo e goonga alanaa on si wanaa Kanko. Min miɗo hulani on -onon ɓee yimɓe am- lepte Ñalannde mawnde, si on haɓɓitike e keeferaaku ngun".

Hooreeɓe mbatu yimɓe makko ɓen wi'ani mo : "Menen meɗen yi'e -an Nuuhu- hiɗa woɗɗitii sawaaba".

Nuuhu maakani hooreeɓe mbatu yimɓe makko ɓen : "Wanaa mi majjuɗo wano aaƴorayɗon ; si ko woni, min ko mi Nulaaɗo Alla e mooɗon, Jeyɗo lam Jeyi on denndaangal".

Miɗo yottina e mon Nule Joomi am, ko moƴƴere ɗoftagol Alla daña mbarjaari makko tun mi yiɗani on, e rentinirgol on faggitagol haɗaaɗi Makko fii daɗugol lepte, miɗo anndi non ka Alla Seniiɗo On ko on anndaa onon.

E haawnu on nde tawi wahyu on e waaju ngun ardii on immorde ka Joomi mon e ɗemngal gorko jeyaaɗo e mo'on?! Hara le ko hakkunde mon o mawni, o anndiraaka fenaande e majjere. O arii on himo jertina on e lepte Alla ɗen si on fennii on yeddii, o nodda on e hulugol Alla ɗoftoo Mo woɗɗitoo haɗaaɗi Makko, belajo'o, O Yurmee on si on gomɗinii Mo.

Yimɓe makko ɓen fenni mo, ɓe gomɗinaali mo. O Huɗi ɓe, Men daɗndi mo kanko e gomɗimɓe wonndunooɓe e makko ɓen yoolagol, Men halkiri ɓen fennuɓe Aayeeje Amen ɗen yoolagol ngol. Pellet, ɓerɗe maɓɓe ɗen ko wumnooɗe e goonga.

Men Nulii e leñol Aadinkooɓe ɓen jeyaaɗo e maɓɓe, on woni Huudi (yo o his), o maaki : "Ko onon yo yimɓe am, rewee Alla tun, reweteeɗo e goonga alanaa on ko wonaa Kanko. E on hulataa Mo ɗoftoɗon Mo woɗɗitoɗon haɗaaɗi Makko fii no daɗiron lepte Makko?!"

Hooreeɓe mbatu ɓen yedduɓe Alla e Nulaaɗo Makko on ka yimɓe makko wi'i : "Menen meɗen anndi wonnde an Huudi, ko a ɗayɗo faaɗa haqqil tuma noddataa e rewugol Alla tertoo sanamu, meɗen felliti kadi wonnde ko a jeyaaɗo e fenooɓe ɓen e ko wi'ata kon ko a Nulaaɗo".

Huudi jaabitii yimɓe mun ɓen o maakani ɓe : "Ko onon yo yimɓe am, ɗayre e faaɗere haqqillo woo alaa e am, si ko woni, min ko mi Nulaaɗo immorde ka Jeyɗo Winndere nden".

Miɗo yottina e mo'on Sari'a mo Alla Nuli lam yottingol, min non ko mi laaɓanoowo on reedu, hoolniiɗo.

E haawnu on fii waaju arii on immorde ka Joomi mon e dow gorko jeyaaɗo e mo'on, mo jeyaaka e Malaa'ika maa jinna, fii yo o jertin on?! Annditee Joomi mon yetton Mo e neemaaji Makko ɗin ka hoore leydi, e ko O waɗiri on kon lontiiɓe yimɓe Nuuhu halkanooɓe ɓen fii ko ɓe yeddiri kon, yetton Alla ko O ɓeydiri on ceembe e doole, jantoɗon neemaaji Alla ɗin belajo'o, on malete.

Yimɓe makko ɓen wi'ani mo : "E a aru men -an Huudi, fii no men rewira Alla tun, men acca kon ko baabiraaɓe amen ɓen rewaynoo?! Awa addanii men kon ko foduɗaa men e lepte si tawii ko a jeyaaɗo e goonguɓe e ko nodditotoɗaa".

Huud jaaɓitii ɓe o maaki : "Gomɗii lepte Alla ɗen e tikkere Makko nden yanay e mo'on. E on wennjay lam fii sanamuuji ɗi innuɗon reweteeɗi mon onon e baabiraaɓe mo'on, ɗi Alla Jippinanaali hujja wonnde ko ɗi reweteeɗi?! Awa faditee lepte ɗe lanndiɗon, min ko fadodiiɗo e mo'on yanugol majje".

Men daɗndiri Huudi (yo o his) e gomɗimɓe wonndunooɓe ɓen e makko yurmeende Amen, Men halki ɓen fennuɓe Aayeeje Amen ɗen, ɓe wonaano gomɗimɓe, ɓe jojjiri lepte ɗen sabu fennugol maɓɓe ngol.

Gomɗii Men Nulii e leñol Samuuda ngol siɗɗo maɓɓe on Saalihu, himo nodda ɓe e wowtinɗingol Alla rewa Mo, o maakani ɓe : "Ko onon yo yimɓe am, rewee Alla tun, alanaa on reweteeɗo e goonga si wanaa Kanko. Gomɗii maande ɓanngunde arii on immorde ka Joomi mon, on woni mbaa ngelooba yaltaymba e fetere, hertinanaamba waqtu yarde, onon kadi ñaamon e ñalaande anndaande. Ɗum non, tertee ma ñaama ka leydi Alla, on fawtaaki mba hay e hunde. Wata on memir mba bone sakko lepte muusuɗe yanata e mo'on".

Annditee neema Alla on tuma nde O lontini on Aadinkooɓe ɓen, O weerni on ka leydi hiɗon dakmitoo ɓaawo nde Aadinkooɓe ɓen halkiranoo sabu yeddugol maɓɓe fenna. Hiɗon maha e ndantaaji leydi ndin kuɓeeje, taƴon pelle ɗen waɗon cuuɗi. Annditee neemaaji Alla ɗin e mooɗon fii no yettiron Mo, selon ɓurnitugol bonnude ka leydi, accon yeddugol Alla.

Hooreeɓe mbatu townitiiɓe ɓen e yimaɓe makko ɓen wi'ani gomɗimɓe lo'inaaɓe maɓɓe ɓen : "Onon ɓee gomɗimɓe, hiɗon anndi wonnde Saalihu ko Nulaaɗo Alla haqqan?" Ɓen gomɗimɓe jaabitii : "Menen ko men gomɗimɓe ko Saalihu Nulidaa e mun kon, jaɓuɓe sari'a makko".

Ɓen townitiiɓe e yimɓe makko ɓen wi'i : "Menen, kon ko gomɗinɗon -onon muumini'en, ko men yedduɓe ɗum, men gomɗintaa ɗum, men gollirtaa sari'a mun kadi".

Ɓe borii ngelooba mban mba ɓe haɗanoo memirgol bone, ɓe townitanii ɗoftagol Alla, ɓe wi'i hiɓe jalkitoo ko Saalihu kammbannoo ɓe : "Ko an yo Saalihu, addan men kon ko foduɗaa men e lepte muusuɗe, si tawii ko a jeyaaɗo tigiri e Nulaaɓe ɓen".

Lepte ɗe heeferaaɓe ɓen hawjirnoo ɗen ari ɓe, dillaango tiiɗungo nanngi ɓe, ɓe waɗtini jicciiɓe ugginii ka leydi, hay gooto e maɓɓe daɗaali halkaare nden.

Saalihu (yo o his) ɗuurnii e yimɓe makko ɓen ɓaawo nde o taƴii jaɓul maɓɓe, o maakani ɓe : "Ko onon yo yimɓe am, gomɗii mi yottinii Nulal Joomi am ngal e mon mi laaɓanii on kadi reedu, ko woni tun, on yiɗaa laaɓanooɓe on reedu ɓen".

Janto kadi Luuti, tuma nde o maakirannoo yimɓe makko ɓen feloore : "E on aray pankare -nde gorko yiidata e gorko-?! Kon ko fuɗɗiɗon onon, hay gooto adaaki on faggitagol ɗum!"

Onon hiɗon itta tuuyo mon ɗin e worɓe ɓen accon rewɓe ɓen! Ɗen kuuɗe mon yiidaa e hakkil yaadaa e diina. Si ko woni, ko on yawtuɓe keeri Alla ɗin.

Jaabawol yimɓe makko ɓen e pankare makke on ko ɗuurnagol wi'a : "Yaltinee Luuti e yimɓe mun ɓen ka hoɗo mo'on ; kamɓe ko ɓe laɓɓintinotooɓe e kuuɗe amen, ɓe haanaa heddodude e amen".

Men hisindini mo e yimɓe makko ɓen tuma Men yamirnoo ɓe yaltirgol hoɗo ngo lepte ɗen yanata e mun ngon jemma, si wanaa debbo makko on ; o heddoduno e yimɓe leptaaɓe ɓen.

Men saaƴini toɓo tiiɗungo e maɓɓe, tuma Men weddinoo ɓe kaaƴe loope, Men wayliti hoɗo ngon, Men waɗtiri dow on ley. Teskee an Nulaaɗo, honno battane yimɓe Luuti bomɓe ɓen laatornoo? Ɗen battane ko halkaare e koyeera wonnoo.

Men Nulii kadi faade e leñol Madyana ngol, siɗɗo maɓɓe on Su'aybu (yo o hsi), o maakani ɓe : "Ko onon yo yimɓe am, rewee Alla tun. Hannduɗo e reweede alanaa on si wanaa Kanko. Gomɗii ɓanngannduyee arii on immorde ka Alla, wonnde ko mi goonguɗo. Ɗum non, tottiree haqqeeji yimɓe ɓen timminirangol ɓe etirɗe ɗen e manndakke ɗen, wata on ɗuytiran ɓe "sil'a" maɓɓe on fii ko aybi, maa janfoɗon ɓe e ɗum. Wata on bonnir ka leydi keeferaaku e geddi ɓaawo ndi moƴƴinireede immineede Annabaaɓe adinooɓe. Ko ɗum mooɗon ɓuri moƴƴannde on si on laatike gomɗimɓe".

Wata on jooɗo e kala laawol, hiɗon kammbana feƴƴooɓe ngol, jaɓon jawle maɓɓe, sakkoɗon ɓe e laawol peewal, hiɗon ɗaɓɓana laawol Alla ngol kadi ooñaare fii wata yimɓe ɓen jokku ngol. Annditee neema Alla on e mo'on yetton Mo ; o laatinoke seeɗaaɓe O ɗuɗɗini on. Taskee honno battane bonnooɓe ɓen ado mon laatornoo, ɗum ko halkaare e jirbugol wonnoo.

Si tawii fedde e mooɗon gomɗinii kon ko mi addi immorde ka Joomi am, fedde goo gomɗinaali ɗum, haray hadditee onon ɓee fennooɓe, kon ko Alla senndirta hakkunde mon. Ko Kanko ɓuri moƴƴude e ñaawooɓe sennda ɓen.

Hooreeɓe mbatu townitiiɓe ɓen e yimɓe Su'aybu men ɓen wi'i : "Ko maa men yaltinndine an Su'aybu -e ndee saare amen- e ɓen goongimɓe ma, maa ruttoɗon e diina amen kan". -Su'aybu jaabitiiɓe ɓe : "E men jokkay diina mon hay meɗen añiri ka tawde ko ka diina meere?!".

Gomɗii haray men bakii fenannde e hoore Alla si men fiɓii piɓe mon sirku e keeferaaku ɓaawo nde Alla hisini men e ɗum. Haananaa men nde men ruttoo e diina mon meere kan si wanaa nde Alla Joomi muuyi. Joomi amen huuɓitirii kala huunde Anndal, huunde suuɗaaki Mo. Ko e Alla woni ko men fawii fii ko ñiiɓina men e laawol focciingol daɗnda men laawol Yiite. Joomi amen, ñaawir hakkunde e yimɓe amen heeferɓe ɓen goonga, wallitoɗaa jom-goonga kan e hoore tooñuɗo on, ko An Joomi amen ɓuri moƴƴude e ñaawooɓe ɓen.

Hooreeɓe mbatu yedduɓe ɓen e yimɓe makko ɓen saliiɓe Tawhiidi ɓen wi'i no rentina e diina Su'aybu : "Pellet, si on naatii e diina Su'aybu kan -onon yimɓe amen- on selii diina mon e diina mawɓe mo'on, haray on wonii halkiiɓe".

Dillaango tiiɗungo nanngi ɓe, ɓe waɗtini halkaaɓe ka koɗooli maɓɓe, jicciiɓe ugginii, maayuɓe ɓutti e galle maɓɓe.

Ɓen fennunooɓe Su'aybu, ɓe halkino ɓe denndaangal, ɓe waɗtini a sikkay ɓe meeɗaa ñiiɓude e hoɗo maɓɓe. Ɓen fennunooɓe Su'aybu, ɓe laatino kamɓe woni hayruɓe ; tawde ɓe hayruno wonikiiji maɓɓe e piiji maɓɓe, wonaa gomɗimɓe ɓen wonunoo ko hayri wano ɓee heeferɓe fenooɓe aaƴornoo.

Annabaajo maɓɓe on Su'aybu (yo o his) ɗuurnii ɓe tuma nde ɓe halkinoo, o maakani ɓe : "Ko onon yimɓe am, gomɗii le mi yottinii Nule Joomi am ɗen e mooɗon, mi laabanii on reedu on jaɓaali. E ko honno mi sunorta e yimɓe yedduɓe Alla haɓɓitii e ɗum?!".

Men nulaali e saare woo Annabaajo Alla, yimɓe mayre ɓen fenni mo ɓe yeddi, si wanaa Men nanngitirii ɓe saɗteende baasal e ñabbuuli jortagol nde ɓe yankinantoo Alla ɓe tertoo keeferaaku e townitaare. Ɗum non ko jertingol Quraysiyankooɓe ɓen e kala yedduɗo fenni e mofte ɗen.

Refti men waɗtitiri nokku bone on moƴƴere e hoolaare, haa ɓe ɗuuɗi e adadu, jawle maɓɓe ɓeydii, ɓe wi'i : "Kala bone e moƴƴere ko heɓi men, ɗum ko woowaaɗum, heɓiino maamiraaɓe amen". Ɓe anndaa non wonnde ko heɓi ɓe kon e lepte ko fii no ɓe waajitora, ko heɓi kon kadi e neema ko fii no ɓe ɗoftora. Men nanngiri ɓe lepte ɗen e juhal, hari kamɓe ɓe so'aa anndude ɓe habbanooki ɗum.

Sinno yimɓe ɗee ca'e ɗe Men immini e mun Nulaaɓe goonginno Nulaaɓe maɓɓe ɓe huli Joomi maɓɓe, Men udditanayno ɓe dame moƴƴereeji ɗen senngo kala. Kono ɓe goonginaali ɓe gomɗaali, ɓe fennu Nulaaɓe maɓɓe ɓen, Men nanngiri ɓe lepte ɗen e juhal sabu kon ko ɓe faggitotonoo e bakkaatu.

Hara yimɓe ɗee ca'e fennuɓe hooli nde lepte Amen ɗen arataa ɓe jemma hara ko hiɓe yooli e ɗoyngol e fooftr mabɓe deeyre mu*en?

Kaa hara yimɓe ca'e ɓen hooli nde lepte Amen ɗen arata e mu*en arwannde ñalorma, hara hiɓe welsindii sokoliri aduna maɓɓe?

Ndaaree happu mo Alla okki ɓee, O neeminiri ɓe doole e yaajireede arsike fii ndaarndagol ɓe ; hara ɓee fennooɓe yimɓe ɗen ca'e hooli pewje Alla ɗen cuuɗiiɗe? Ko yimɓe halkiiɓe ɓen tun hoolotoo pewje Alla ɗen, naafiiqiiɓe ɓen kan, hiɓe huli pewje Makko ɗen, ɓe haawnortaa ko Alla neemiri ɓe kon, ɓe qirritoto ɗum, ɓe yetta Mo.

E laaɓanaali ɓen lontiiɓe ka leydi ɓaawo maamiraaɓe maɓɓe halkireede junuubi mu'un, ɓe ronki taskaade ko heɓunoo ɓen ɗon, haa ɓe duumii e golle maɓɓe, laaɓanaali ɓee ɗoo wonnde si Alla haajuno O meminirayno ɓe sabu junuubi maɓɓe ɗin wano O woowiri? O nota kadi ka ɓerɓe maɓɓe hara ɓe waajitotaako.

Ɗen ca'e jantaaɗe -woni ca'e yimɓe Nuuhu e Huudi e Saalihu e Luuti e Su'aybu- Meɗen humpita maa fii maɓɓe -an Nulaaɗo- e fii ko ɓe fennaynoo e no ɓe halkiranoo ; no ɗum wonira tasakuyee e waajitorɗum ɓen taskotooɓe waajitoo. Gomɗii Nulaaɓe ɗen ca'e addanii yimɓe maɓɓe ɓen hujjaaji ɓannginɗi goonga maɓɓe kan, kono ɓe laatanooki gomɗinooɓe ɓen Nulaaɓe sabu ko Alla anndunoo wonnde ko ɓe fennooɓe. Ko wano Alla notirnoo uddiri non ɓerɗe ɓen yimɓe ca'e fennuɓe Nulaaɓe mu'un, O notirta udda ɓernɗe yedduɓe Muhammadu (jom kisiyee) ɓen, ɓe feewataa e gomɗinal.

Men tawdaali ko ɓuri ɗuuɗude e mofte ɗe Men immini e mun Nulaaɓe ko hunnooɓe ahadi maɓɓe e Alla, Men tawaali ɓe ɗoftii ɓe Mo ; ko Men tawi, ko wonnde ɓurɓe ɗuuɗude e maɓɓe ko yaltuɗum e ɗoftaare Alla.

Refti Men Nuli ɓaawo ɓeya Nulaaɓe, Muusaa (yo o his) e Maandeeji Amen tinndinooji goonga makko kan haa e Fir'awna e yimɓe mu'un, tawi alaa ko ɓe waɗa si wanaa yeddugol ɗin Maandeeji. Tasko -an Nulaaɗo, honno battane Fir'awna e yimɓe mu'un wa'unoo ; Alla halkirno ɓe yoolagol, O jokkitiniri ɓe kuddi Aduna e Laakara.

Nde Alla imminnoo Muusaa e Fir'awna, o arno o maakani mo : "Ko an yo Fir'awna, min ko mi Nulaaɗo immorde ka Tagu On yiiloowo kala fiyaaku mu*en".

Muusaa maaki : "Nde tawnoo ko mi Nulaaɗo Makko, miɗo hanndi e nde mi dammbataa e Makko si wanaa goonga. Gomɗii mi addanii on hujja tinndinoowo goonga am immorde ka Joomi am. Accidam e ɓiɗɓe Israa'iila ɓen koɓe wonno ko e daheede lepte".

Fir'awna wi'ani Muusaa : "Si tawii a ardii e Maande wano aaƴorɗaa non, haray addu nde si a laatike goonguɗo e noddaandu maa".

Muusaa bugii tuggordu makko ndun, ndu wonti mboddi mawnundi feeñanndi tawaaɓe ɓen.

O yaltiniri junngo makko ngon ka senngo dolokke e teleren ka ɓernde maa ley ɗon, ngo yalti ranewo pen, ɗum no feeñana ndaarooɓe ɓen.

Hooreeɓe mbatu ngun nde yi'unoo waylagolngii bollii e junngo makko ngon no rawi, ɓe wi'i : "Muusaa laataaki si wanaa mbileejo annduɗo mbilewu".

Ko o faandori ɗee golle makko, ko yaltinngol on ka leydi mo'on Misra. Hooti Fir'awna diisinii ɓe fii Muusaa (yo o his) o wi'ani ɓe : "Ko waajotoɗon mi fii oo?"

Ɓe wi'ani Fir'awna : "Nennan Muusaa e musiɗɗo makko on Haaruuna, imminaa e ca'e Misra ɗen mooɓooɓe ton mblie".

Ɓen imminaaɓe mooɓugol mbileeɓe ɓen ka ca'e addane kala mbileejo annduɗo fii mbilewu.

Fir'awna immini mooɓayɓe mblie ɓen, nde mbileeɓe ɓen arunoo Fir'awna ɓe lanndino mo : si ɓe heɓay njoɓdi tuma ɓe fooliri Muusaa bliewu maɓɓe ngun?

Fir'awna jaaborii ɓe : "Eyyo, on heɓay njoɓdi, kadi on jeyete e ɓaɗtinaaɓe am ɓen".

Mbileeɓe ɓen wi'irani Muusaa townitaare e hoolaare : "Suɓo -an Muusaa- si a yiɗu adaade bugagol, maa si adoto mene bugaade".

Muusaa jaaɓorii ɓe hoolagol ballal Joomi makko : "Bugee onon taho ɓoggi mon e tuggorɗi mon". Nde ɓe buginoo ɗin, ɓe mbilɗii gite yimɓe ɓen, ɓe hulɓini ɓe, ɓe addi mbilewu mawnungu yeeso yimɓe ɓen.

Alla wahyini e Annabiijo Makko on Muusaa (yo o his) mo O yeewtidi on si ko woni : "Bugo tuggordu maa ndun yo Muusaa, o bugii ndu, ndu wonti mboddi, ndin waɗti moɗude ɓoggi e tuggorɗi ɗibe huutirtono ngam waylude goongo, haa be sikka ko dulle jahooje;

Goonga ko Muusaa addi kon ɓanngi, ko mbileeɓe ɓen gollaynoo kon feeñi boni.

Ɓe foolaa, Muusaa fooliɓe ɗon, ɓe rutttii ko ɓe jaasuɓe.

Mbileeɓe ɓen nde yi'uno kattal Alla ngal e Maandeeji ɓannguɗi ɗin, ɓe suuyi kisan ɓe sujjani Mo Kanko Seniiɗo On.

Mbileeɓe ɓen wi'i : "Men gomɗinii Jeyɗo Winndere nden".

Jeyɗo Muusaa e Haaruuna (yo ɓe his), ko Kanko hanndi e Reweede e dii reweteeɗi aaƴaaɗi.

Fir'awna wi'ani ɓe no kammba fii ɓe gomɗinii Allaahu On tun : "On goongin Muusaa ado mi duŋinanaade on? Pellet, ngal gomɗinal mon ko Muusaa addi koo, ko janfa mo eɓɓanoɗon onon e Muusaa no yaltiniron yimɓe saare nden e mayre, aray non anndon ko mi huuwata on -onon ɓee mbileeɓe-.

Ma mi taƴa e gooto en mon kala junngo mun ñaamo ngon e koyngal nanal ngal, maa mi luutindra ɗum, refti ma mi yowa on ka jullere tamaro leptugol on hulɓina kala ƴeewooɓe o alhaali.

Mbileeɓe ɓen jaaɓitii kammbaa Fir'awna on : "Menen, ko faade ka Joomi amen tun woni ruttorde amen, men haajaaka e kammbaaji maa".

A añiraali men non -an Fir'awna- si wanaa ko men goonginiri kon Maandeeji Joomi amen ɗin, tuma ɗi ardi men e jurol muusaa. Si ɗum ko bone leptoowo men haray meɗen wakkilii. Refti ɓe fewti Alla ɓe torii : Joomi amen! Yuppu muñal e amen no men tabitira e goonga, ƴettitaa men juullɓe jebbilanii ɓe Ma ɗoftii ɓe Nulaaɗo Maa on.

Hooreeɓe mbatu yimɓe Fir'awna ngun hirjini mo e Muusaa'en ɓe wi'i : "An Fir'awna, a accay Muusaa e yimɓe mun ɓen haa ɓe saakita bone e leydi ndin, o acce an e reweteeɗi maa ɗin, o nodda e rewugol Alla tun?!" Fir'awna wi'i : "Ma men waru ɓiɗɓe Israa'iila worɓe ɓen men accita rewɓe ɓen ɓen fii kurkagol. Menen non, pellet, ko men foolooɓe e dow maɓɓe".

Muusaa wasiyii yimɓe makko ɓen o maakani ɓe : "Ko onon yo yimɓe am, ɗaɓɓiree Alla tun ballal fii duñugol lorra maa pooɗugol nafa e mo'on, muññoɗon jarrabuyeeji mon. Pellet, leydi ndin ko Alla tun heeranii, wanaa Fir'awna maa goɗɗo goo fewjata e mayri. Ko Alla lioltindirta ɗum hakkunde yimɓe ɓen. Ko woni tun, battane moƴƴe ɗen ka leydi, ko gomɗuɓe ɗoftii Alla ɓen woodani".

Yimɓe Muusaa ɓen wi'iani mo : "Ko an yo Muusaa, men lorriranooma waraneede ɓiɗɓe worɓe e juuɗe Fir'awna e heddude rewbe ado a arde men e ɓaawo ɗum". Muusaa laaɓani ɓe reedu himo weltinira ɓe ballal, o maaki : "Hino jortaa ka Joomi mon halkata gaño mon on Fir'awna e yimɓe mun, O lontina on ka leydi ɓaawa maɓɓe, O ndaara ko golloton ɓaawo ɗum ; si on yettay Mo kaa on yedday".

Gomɗii Men leptirii yimɓe Fir'awna ɓen kokke e ɗuytagol dimɗe ; belajo'o, ɓe waajitoray ɓe ruttoo e Alla.

Si remuru ndun moƴƴiri yimɓe Fir'awna ɓen coggeelii ɗin fanɗii, ɓe wi'a:"Ɗum ko ko men hanndi e mun";si musiiba kokke e ñabbuuli ekn memii ɓe, ce kiitinora Muusaa e wonnduɓe e makko ɓen.Anndee non wonnde,ɗum fow ko e koddoruyee Alla Seniiɗo On woni, kamɓe e Muusaa ɓealah feere e ɗum si wanaa ko Muusaa huɗunoo ɓe kon, kono ɗuuɗuɓe e yimɓe ɓen anndaa, ɓe dammbira ɗum ko woori Alla.

Yimɓe Fir'awna ɓen wi'ani Muusaa (yo o his) : canndalaagal gaa goonga"Kala woo Aaya mo addan ɗaa ɓen, maa kala hujja mi ñiiɓnan ɗaa men fii bonnude ko amen ko, e goondinde ko addudaa ko, men wonaali gomɗinooɓe ma".

Men wurti e maɓɓe ndiyam ɗuuɗuɗam fii leptugol ɓe e ko ɓe fenni kon, gese maɓɓe e dimɗe mu'un yoolii, Men wurti kadi kanu e maɓɓe ɗi ñaami coñal maɓɓe, Men wurti kadi karan e maɓɓe ɗi bonna remuru lorra yimɓe wano teŋɗi, Men wurti kadi totiiji e maɓɓe ɗi hebbini miranji maɓɓe ɗi bonni ñaameteeji maɓɓe ɗi bonni ɗoyngol maɓɓe, Men wurti kadi ƴiiƴam e maɓɓe ɗam wayli ndi'e maɓɓe e canɗi maɓɓe ɗin ƴiiƴam, Men wurtiri ɗum ɗon fow e maɓɓe Aayeeje ɓannguɗe jokkondiri, kono ɗum haɗaali townitanagol gomɗinde Amma goongina Muusaa e ko o addi on, ɓe laatii yimɓe yeddooɓe ɓe jaɓaali feewude.

Tuma nde lepte ɗen memunooɓe, ɓe fewti kisan ka Muusaa (yo o his), ɓe wi'ani mo : "Ko an yo Muusaa, torano men Joomi maa sabu ko O hertiniran maa kon Annabaaku, e kon ko O ahodi e maaɗa ittugol lepte kala tuubuɗo nde O ittanta men ɗee lepte. Si a ittanii men ɗum, ma men gomɗine, men accide kadi e ɓiɗɓe Israa'iila ɓen.

Nde Men ittannoo ɓe lepte ɗen haa e dumunna happaaɗo ado ɓe halkireede yoolagol, jaka yoo kamɓe hiɓe firta ahadi maɓɓe gomɗingol accita ɓiɗɓe Israa'iila ɓen, ɓe duumii e keeferaaku maɓɓe, ɓe salii accidude ɓiɗɓe Israa'iila ɓen e Muusaa (yo o his).

Nde lajal happanoo ngal fii halkugol ɓe hewti, Men yottorii ɓe lepte yoolagol ka maayo sabu ko fenni kon Aayeeje Amen ɗen, ɓe ɗuurnii dalilaaji majje goongunɗi ko sikke alaa e mu'un.

Men ronini ɓiɗɓe Israa'iila ɓen ɓe Fir'awna e yimɓe mun ɓen lo'ineede fuɗnaange leydi ndin e hiirnaange mayri -ɗum leydi Saami ndin faandaa-, ndin leydi ndi Alla barkiniri moƴƴugol gese e dimɗe. Nulaaɗo, Konngol Joomi maa moƴƴol ngol timmii; ko ngol jantaa ka Daalol Alla : ﴾ ﴿وَنُرِيدُ أَنْ نَمُنَّ عَلَى الَّذِينَ اسْتُضْعِفُوا فِي الأَرْضِ وَنَجْعَلَهُمْ أَئِمَّةً وَنَجْعَلَهُمُ الْوَارِثِينَ﴾ [القصص: ٥]، Alla roniniri ɓe leydi ndin sabu muñal maɓɓe ngal e lorra Fir'awna'en. Men yirbini ko Fir'awna e yimɓe mun gollaynoo ka gese e ka cuuɗi, e kon ko ɓe didaynoo e kuɓeeje.

Men taƴintini ɓiɗɓe Israa'iila ɓen bahru on tuma nde Muusaa tappirnoo mo tuggordu makko ngun no seekii, ɓe rewi ka yimɓe ñiiɓuɓe e rewugol sanamuuji mu'un ko woori Alla, Biɗɓe Israa'iila ɓen wi'ani Muusaa (yo o his) : "Ko an yo Muusaa, waɗan men sanamuuru ko men rewa wano ɓee ɗoo jogori non sanamuuji reweteeɗi ko woori Alla". Muusaa maakani ɓe : "Ko onon yo yimɓe am, pellet, ko on yimɓe majjuɓe ko waɗɗii on kon e mawningol Alla bajjinɗina Mo, woɗɗitoo sirkangol Mo rewa Mo Kanko tun".

Pellet, ɓee ñiiɓuɓe e rewugol ɗoo sanamu, ko e halkaare ɓe woni e rewude ko woori Alla, kadi denndaangal ko ɓe gollaynoo kon e ɗoftaare ko meere ; tawde ɓe kafidii ɗum e Alla.

Muusaa maakani yimɓe mun ɓen : "Ko onon yo yimɓe am, ko honno mi ɗaɓɓiranta on ko woori Alla reweteeɗo, gomɗii on seedike Aayeeje Makko ɗen, ko Kanko Seniiɗo On woni ɓurnuɗo on e Winndere jamaanu mo'on O daɗndi on halkaare, O lontini on ka leydi?!".

Annditee onon ɓiɗɓe Israa'iila ɓen, tuma nde Men daɗndunoo on bone Fir'awna e yimɓe mun ɓen, hiɓe meeɗinaynoo on lepte bonɗe : ɓe hirsa ɓiɗɓe mon worɓe ɓen ɓe heddina rewɓe mon fii kurkagol. No e ɗum mooɗon jarrabuyee mawɗo immorde ka Joomi mon, hannduɗum e yettugol Mo.

Alla haldidi e Nulaaɗo Makko on Muusaa fii yeewtidugol e makko jemmaaji cappanɗe tati, refti Alla timminiri ɗe sappo, ɗe hawri jemmaaji cappanɗe nayi. Muusaa maakani neene-gooto makko on Haaruna tuma o fokkitunoo tintodude e Joomi makko : "Ko an yo Haaruuna, lonto lam ka yimɓe am, moƴƴinaa fiyaake maɓɓe on, hara a jokkaali laawol bonnooɓe ɓen, wota a wollu woobbe".

Nde Muusaa arunoo ka haldigal Joomi makko ka jemmaaji cappanɗe nayi timmata ɗon, Joomi makko yewti mo yamaruyee e kaɗal ekn, wonkii makko kin wulɗaa yi'ugol Joomi makko, o lamndii Mo yi'ugol Mo, Alla Seniiɗo On jaabii mo : "A yi'ataa lam aduna ; tawde a alanaa kattal mun, kono ndaaru fello ngon, si Mi feeñanii ngo, ngo heddike e nokku maggo, aray ka yi'aa lam, si ngo ɗiggu ngo fotondiri e leydi ndin, haray a yi'ataa lam aduna". Nde Alla feeñannoo fello ngon, O waɗi ngo ɗiggu ngo fotondiri e leydi ndin, Muusaa yani kisan faɗɗaa. Nde o ɗiwtunoo, o maaki : "Senayee woodani Ma Joomi! Mi tuubanii Ma lamndagol yi'ude Ma aduan, min non ko mi arano e gomɗimɓe ɓen ka yimɓe am".

Alla Daalani Muusaa : "Ko an yo Muusaa, Min Mi suɓorike e yimɓe ɓen Nule am ɗen, Mi ɓurnir-maa yewtidugol e Am ko aldaa e heedoode. Awa jaɓu ko Mi jonnu maa kon e ngal teddungal, laatodaa e yettooɓe Alla ɓen".

Men winndani Muusaa ka alluuje kala ko ɓiɗɓe Israa'iila ɓen hatonjinta e diina e aduna maɓɓe, waaju e fensitannde ñaawooje. Jogitor ndee Tawreetaare -an Muusaa- tiiɗnaare e soobee, yamiraa yimɓe maa ɓen jogitagol ko ɓuri moƴƴude kon e mayre ; wano gollirgol yamiraaɗi ɗin no haaniri, muññoo yaafoo. Arma Mi holla on waɗtannde lunndiiɓe Lam yalti e ɗoftaare Am nden, Mi holla on weerde maɓɓe nden ka halkaare.

Mi suray e ɓen townitaniiɓe rewugol Alla salii goonga gaay e taskagol Aayeeje Am ɗen ka tatteeji e ka wonkiiji, e gaay e faamugol Deftere Am nden. Hay si ɓe yi'ii kala Aaya ɓe goongintaa Mo ; tawde ɓe ɗuurnoray Mo ayrugol e Alla e Nulaaɗo Makko on, si ɓe yi'ii laawil goonga ngol ɓe jokkataa ngol, si ɓe yi'ii non laawol bewre e majjere ngol ɓe jokka ngol ɗon. Kon ko heɓi ɓe, ko tawde ɓe fennii Aayeeje Alla ɗen tinndinɗe goongugol Nulaaɓe Makko ɓen, kono ɓe welsindii e majje.

Ɓen fennuɓe Aayeeje Amen tinndinɗe goongugol Nulaaɓe Amen ɓen,ɓe fenni kadi hawrugol e Ñalaande Darngal, golle maɓɓe ɗoftaare ɗen poɓii, ɓe faɗiroyay baraaji majje ko ɗe ŋakkiri kon sarti gomɗinal, ɓe yoɓitoytaake kadi Ñalnde Darngal si wanaa kon ko ɓe gollaynoo e yeddugol Alla kafida e Makko, njoɓdi mun ko heddagol Yiite.

Yimɓe Muusaa ɓen jogitii ɓaawo makko cuɗaari maɓɓe ndin ngaari ɓanndinke ndi alaa fittaandu marndi hito. E ɓe anndaali wonnde ndin ngaari yewtidataa e maɓɓe ndi fewnataa ɓe e laawol, kadi ndi pooɗantaa ɓe nafa ndi duñantaa ɓe lorra? Ɓe jogitike ndi reweteeendi, ɓe laatii tooñuɓe wonkooji mun.

Nde ɓe ninsunoo, ɓe anndi wonnde pellet ɓe majjii laawol focciingol ngol tuma nde ɓe jogitorinoo ngaari ndin rewideteendi e Alla, ɓe wi'i : "Si Joomi amen yurmaaka men, O haforani men rewugol ngaari ndin, pellet, men laatoday e ɓen hayruɓe aduna e laakara".

Nde Muusaa ruttinoo e yimɓe makko ɓen ko o tikkuɗanɗo ɓe sunii ko o tawdi ɓe e mun e rewugol ngaari ndin, o maaki : "Oo alhaali mo lontiɗon lam e mun bonii yo yimɓe am ; tawde ɗum adday halkaare e ɓiɗteende. E on hawju habbagol lam haa tawa on reway ndii ngaari?" O weddii alluuje ɗen hakkee ko o tikki, o nanngi hoore neene-gooto makko Haaruuna himo pooɗira e makko fela mo ko o tawdi ɓe e mun. Haaruuna ngantinii maaki : "Ko an yo ɓiɗɗo neene am, ɓee yimɓe sikkii ko mi lo'uɗo ɓe jaasini lam, ɓe eɓɓi warugol lam. Wata a feliram ko weltinta ayɓe am, wata a waɗtidam kadi e tooñooɓe ɓen sabu tikkere maa nden".

Muusaa torii Jooma mun : "Joomi am, haforanam min e neene-gooto am on haaruuna, naadaa men ka yurmeende Maa. Ko An Joomi amen woni ɓurɗo yurmeede e yurmeteeɓe ɓen".

Pellet, ɓe waɗtuɓe ngaari ndin reweteendi maɓɓe, arma ka tikkere heɓa ɓe immorde ka Joomi maɓɓe, e jaasde ka nguurndam aduna sabu ko ɓe tikkiniri kon Joomi maɓɓe. Ko wano non Men yoɓirta fefindotooɓe fenaande ɓen baka e Alla.

Ɓen golluɓe boneeji sirkangol Alla faggitoo geddi, refti ɓe tuubani Alla ɓe gomɗini Mo, ɓe haɗitii e ɗin geddi, pellet, Joomi maaɗa an Nulaaɗo, ɓaawo ngol tuubugol e sirku faade e liimanaaku, iwa e geddi yaha e ɗoftaare, ko O haforanoowo ɓe, hinnotooɗo ɓe.

Nde tikkere nden deeƴunoo e Muusaa (yo o his), o ɗaɓɓiti alluuje ɗen weddanooɗe ɗen. Tawi hiɗe yowondiri e peewal e yurmeende wonannde ɓen hulooɓe Joomi mun.

Muusaa suɓii worɓe cappanɗe jeeɗiɗo e yimɓe makko ɓen ko ngatinoo e Joomi maɓɓe fii ko ɗayɓe maɓɓe ɓen rewi kon ngaari ndin, Alla haldidi e maɓɓe happu e nokku. Nde ɓe hewtunoo ɗon, ɓe suusi Alla haa ɓe lamndii nde Muusaa hollata ɓe Alla, ko ɗon dillaango nanngi ɓe, ɓe halkii. Muusaa fewti Joomi mako o maaki : "Joomi am, sinno A muuyiino halkude ɓe waɗtidaa lam e maɓɓe ado hannde, A waɗayno ɗum. E A halkiray men ko ɗayɓe amen huuwi? Kon ko ɓee yimɓe am rewi ndii ngaari, ko jarrabuyee mo majjinirtaa on Mo muuyu-Ɗaa, fewnaa Mo muuyu-Ɗaa. Ko An woni giɗo heftuɗo men, haforan men junuubi amen, yurme-Ɗaa men. Ko An woni ɓurɗo moƴƴude e haforooɓe junuubi, yaafoo bakkaatu.

Waɗtidu men e ɓen ɓe teddinir-Ɗaa naama ka aduna ɗoo ɓe golli golle moƴƴe, e ɓen jeyaaɓe Maa moƴƴuɓe ɓe fodu-Ɗaa Aljanna ka laakara. Menen men tuubii men ruttike e Maaɗa. Alla Daali : "Lepte Am ɗen, Mi mo Mi muuyi e ɓen halkitotooɓe. Yurmeende Am nden kan, nde huuɓitii kala huunde aduna ; kala tageefo ngo heɓaali yurmeende Alla. Arma Mi winndana nde laakara ɓen hulooɓe Alla, e ɓen tottooɓe asakal jawle maɓɓe, e ɓen gomɗinooɓe Aayeeje Amen ɗen".

Ɓen jokkayɓe Muhammadu (jom-kisiyee), on Annabaajo humammbinneejo mo winndatataa janngataa, ko yeru ko Joomi makko wahayini e makko woo. Ko on woni mo ɓe tawata innde mun e sifaaji mun e ko Jippinaa e makko kon hino winndaa fii mun ka Tawreetaare Muusaa (yo o his), e ka Linnjiilaare Iisaa (yo o his). Himo yamira ɓe moƴƴere, o haɗa ɓe ko boni ŋari e hakkillaaji celluɗi e neesu kisɗo, himo daginana ɓe laaɓuɗi dagiiɗi ɗin e ñaama-yara resa, o harminana ɓe soɓuɗi ɗin e majji, o ittana ɓe teddeelo ngo ɓe ronnditinoo ; wano waɗɗagol warde kala warɗo hoore, foti o tewi maa o tewaaki. Ɓen gomɗimɓe mo e ɓiɗɓe Israa'iila ɓen e woɗɓe goo, ɓe jokkiri Alqur'aanaa Jippinaande nden e makko annoora fewnaynde ; ɓen, ko kamɓe woni malaaɓe ɓen.

Maaku an Nulaaɗo : "Ko onon yo yimɓe, min ko mi Nulaaɗo Alla e mooɗon on denndaangal, aarabe mo'on e ajami mo'on, On Allaaj o Mo laamateeri kammuuli ɗin e leydi woodani Kano tun, reweteeɗo e goonga alaa si wanaa Kanko Seniiɗo On. Himo wuurna wara. Gomɗinee Alla -onon ɓee yimɓe-, gomɗinon Muhammadu (yo o his), Nulaaɗo Makko Annabaajo mo winndataa janngataa, ko o addi kon ko wahyu immorde ka Joomi makko. On gomɗinɗo Alla, o gomɗini ko Jippinaa kon e makko e ko Jippinaa kon e Annabaaɓe adiiɓe mo. Jokkee mo e ko o addi kon immorde ka Joomi makko, belajo'o, on feeway fii moƴƴere aduna e laakara.

Hino e yimɓe Muusaa ɓen, yimɓe feewirɓe diina kan, hiɓe tinndina yimɓe ɓen e ɗum, ɓe ñaawira nunɗal ɓe tooñataa.

Men senndiri ɓiɗɓe Israa'iila ɓen gori sappo e ɗiɗi. Men wahayini e Muusaa tuma nde yimɓe makko ɓen ɗaɓɓirnoo mo yaretee ɗam faade ka Alla wonnde : "Piyir tuggordu maa ndun -an Muusaa- hayre nden". O waɗi ɗum, ɓulli sappo e ɗiɗi suppitii e mayre emmbere gori ɗin sappo e ɗiɗi.Gomɗii gorol kala e maɓɓe anndii yarirde mun nden. Men ɗowdinirani ɓe duule jokkayɗe ɓe kala ka ɓe fewri, Men Jippini e maɓɓe njaram welirɗam wa njuuri, e teewu colum. Men Daalani ɓe : "Ñaamee e laaɓuɗi-dagiiɗi ɗi Men arsiki on". Ɓe ustaani min hay huunde e tooñge e yeddude neema e waasde hoddirde, kono ko wonkiiji maɓɓe ɗin ɓe tooñiraynoo lunndagol Alla e jolnude ko*e mum en jolirde halkaare.

Janto an Nulaaɗo, tuma nde Alla Daalannoo ɓiɗɓe Israa'iila ɓen : "Naatee Bayt al Maqdisi, ñaamon e dimɗe nden saare nokku kala ka yiɗuɗon e tuma kala nde yiɗuɗon, wi'on : Joomi amen, tellinan min goopi amen, naatiron damal ngal ko on suuyuɓe yankinanii Joomi mon ; si on waɗii ɗum, Men yawtanay on junubaaji mon. Aray kadi Men ɓeydana moƴƴimɓe ɓen moƴƴere aduna e laakara".

Tooñuɓe ɓen e maɓɓe wayliri konngol ngol ɓe yamiranoo ngol, ɓe wi'i : "abbere no woowiraa", ɓe gaa e toraade yaafeede,be wayli gollal ngal ɓe ɗaɓɓiraa kon toragol haforaneede, ɓe waɗti naatirde ɓabbe maɓɓe ɗoo yo ɓe yankinaaa turi ko*e mum eno. men Jippini lepte e dow maɓɓe immorde ka kammu, sabu tooñe maɓɓe ɗen.

Lanndor ɓee Alyahuudaaɓe -an Nulaaɗo-, anndintingol ɓe ko Alla leptirnoo mawɓe maɓɓe fii fillayee nden saare wonnoonde ka sera maayo, tuma nde ɓen jaggitaynoo keeri Alla ɗin ɓe yunnga ñalnde asewe ɓaawo nde ɓe haɗaa e ɗum, tuma nde Alla jarribori ɓe arugol liƴƴi ɗin hummba ka ndiyam ñalnde aseweere nden, ɗeya ñalaaɗe heddiiɗe ɗi arataa ɓe ; Alla jarribori ɓe ɗum sabu yaltugol ɓe e ɗoftaare Makko faggitoo geddi, ɓe waɗti janfaade jasa gayɗe ko liƴƴi ɗin yolloo ñalnde aseweere nden, ɓe aranoya ɗi ñalnde alatiire nden ɓe ñaama.

Jantii -an Nulaaɗo-, tuma nde haɗaynoɗaa jamaa jeyanooɗo e maɓɓe gaayi e pankarere, na reentinabe duum, jamaa goo wi'ani ɓen : "Ko honɗum waajantoɗon yimɓe, Allaahu ko halkoowo ɓe aduna ko ɓe faggitori kon geddi, maa O letoya ɓe Ñalnde Darngal lepte sattuɗe?" Waajotooɓe ɓen wi'i : "Ko men waajoranta ɓe, ko ittangol Alla nganto ko O yamiri men yamirgol moƴƴere haɗa ŋiñere hara O nanngitiraali men tertagol ɗum, e belajo'o, ɓe nafitora waaju ngun, ɓe ɓooroo e geddi".

Nde waajanooɓe ɓen ɗuurnii e ko ɓe waajaa kon, Men daɗndi ɓen haɗaynooɓe e bone on lepte, Men nanngiri ɓen tooñirɓe jaggitugol yunngude ka aseweere lepte saɗtuɗe sabu yaltugol maɓɓe e ɗoftaare Alla haɓɓitoo e geddi.

Nde ɓe yawtirnoo keeri Alla ɗin townitaare, ɓe salii waajitagol, Men wi'ani : "Onon ɓee yedduuɓe, laatee baaɗi jaasinaaɗi ; ɓe wonti baaɗi. Ɓe wontiri no min yiɗiri , tawde fiyaaku amen Men wi'anta huunde nde si Men haajani, ko laato : nde laatoo".

Janto -an Nulaaɗo-, nde Alla anndinoo wonnde ma O Nulu e ɓee Alyahuudaaɓe on hoynoowo ɓe ka nguurndam aduna haa Ñalnde Darngal. Pellet, Joomi maaɗa -an Nulaaɗo-, ko yacciiɗo leptugol yeddoowo Mo, toode Himo yaccina leptugol ontigi gila aduna, pellet kadi, ko O haforoowo junuubi tuubooɓe e jeyaaɓe makko ɓen, Hinnotooɗo ɓe.

Men senndiri ɓe ka leydi Men waɗti ɓe feddeeji. Hino e maɓɓe : hino emaɓɓe moƴƴuɓe daraniiɓe haqqeeji Alla ɗin e haqqeeji jeyaaɓe Makko ɓen, hino e maɓɓe kadi raɓɓindiniiɓe, woɗɓe e maɓɓe fantini e geddi. Men jarribori ɓe neweende e saɗteende, jortagol nde ɓe tertotoo ko ɓe woni e mun.

Bomɓe lontii ɓe, ɓe roni Tawreetaare nden mawɓe maɓɓe, hiɓe jannga nde kono ɓe gollirtaa, ɓe ƴettira ngeenaari dakammehoy aduna fii waylugol Deftere nden Alla, ñaawira goɗɗum goo, ɓe yelanoo ko'e-maɓɓe nde Alla haforanta ɓe junuubi maɓɓe. Si dakammehoy aduna arii e maɓɓe ɓe jaɓa ɗum. E Alla ƴettidaali e maɓɓe ahadi wonnde ɓe wowlataa e Alla si wanaa goonga?! Ɓe saloraali gollirde Deftere nden fii majjere, ko e anndal maɓɓe tigiri, tawde ɓe janngii nden e gollirii. Awa ko junuubi maɓɓe ɗin ɓuri tiiɗude, ko laakara kadi e neemaaji mun duumiiɗi ɓuri moƴƴannde ɓen hulooɓe Alla e diini dakammehoy aduna lannay-koy. E ɓee kan haqqiltaa ko Alla marani kon hulooɓe Mo ɓen laakara?!

Ɓen jogitotooɓe Deftere nden, ɓe gollira nde, ɓe ñiiɓinira julde nden reenagol e waqtuuji mayre e sartiiji mayre e waɗɗiiɗi mayre e sunnaaji mayre, pellet, Alla yoɓoy ɓe njoɓdi golle maɓɓe ɗen, Alla wanaa yeeboowo njoɓdi moƴƴinooɓe golle.

Janto an Muhammadu, tuma nde Men ɓorunoo fello ngol ɓe ɓamti ngo senngo dow ɓiɗɓe Israa'iila ɓen ɓaawo ɓe salaade Tawreeta. Fello ngon wonti wa duulere e ko'e maɓɓe, ɓe yananaa wonnde ngo yanay e maɓɓe. Ɓe wi'anaa : "Jogitoree ko Men okki on kon tiiɗnaare e pellital, jantoɗon ñaawooje mayre ɗe Alla sar'inani on ; belajo'o, on huliray ɗum Alla".

Janto kadi an Muhammadu, tuma nde Joomi maa yaltinnoo e keeci ɓiɗɓe Aadama ɓen jurriiyaaji maɓɓe ɗin, O seedintini ɓe wonnde mo bajjo taguɗo ɓe jeyɗo ɓe, O Daalani ɓe : "Wanaa Min woni Joomi mon?" Ɓe jaabii : "Ko non woni, ko An woni Joomi amen". O Daali : "Ko Men ƴettidani ndii ahadi e mo'on, ko fii wata on yeddoy Ñalnde Darngal, wi'oyon : "On anndaano ɗum".

Maa hujjinoroyon wiide : ko baabiraaɓe mon ɓen sirkannoo Alla, onon on ñentin ɓe tun e ɗum, wi'oyon : "Joomi amen, e A nanngitiray men ko baabiraaɓe amen bonni?" Sikkon on alaa feloore e ñentingol baabiraaɓe mon.

Ko wano Men ɓannginiri Aayeeje ɗen e fii mofte fennooɓe ɓen, Men ɓannginiranta ɗe ɓee ɗoo ; jortagol nde ɓe yaltata e sirku ɓe ruttotoo e bajjinɗingol Alla rewa Mo Kanko tun.

Janngan ɓiɗɓe Israa'iila ɓe -an Nulaaɗo-, kabaaru gorko mo Men okkunoo Aayeeje Amen ɗen, o janngi ɗe o faami, kono o gollitiraali ɗe, seytaane jokki mo, o laatodii e majjuɓe halkaaɓe ɓen.

Sinne Men muuyuno, Men waɗayno o nafitora ɗen Aayeeje Men ɓamtira mo ɗe gollitirgol ɗe, ko woni tun, o suɓike dakammehoy aduna, o jokki mbeleeɗe makko. Sugu makko e tiiɗude rerɗangol aduan, si sifa rawaandu lahayndu tuma kala ; foti ndu ronndi maa hara ndu ronndaaki. Ko ɗum woni misal yimɓe fennooɓe Aayeeje Amen ɗen. Fillano ɓe qissaaji ɗin -an Nulaaɗo- ; belajo'o, ɓe miijitoto ɓe yalta e majjere e fennugol.

Alaa ko ɓuri bonne misal ɓen yimɓe fennuɓe Aayeeje Amen ɗen, ko ɗum woni ko ɓe tooñirnoo wonkiiji maɓɓe ɗin sabu naatnudedi nokkuuji halkitagol.

Kala mo Alla fewni e laawol focciingol, ko on woni feewoowo on ; kala kadi mo O woɗɗintini e ngol laawol, ko ɓen woni hayrimɓe ko'e-mun e ɓeynguureeji mun Ñalnde Darngal, anndee ko ɗum woni hayrere ɓanngude nden.

Gomɗii Men taganii Jahannama ko ɗuuɗi e jinna e yimɓe ; tawde Meɗen anndi ko ɓe gollooɓe golle yimɓe Yiite. Hiɓe mari ɓerɗe, ɓe faamirtaa ɗe ko nafata ɓe maa lorra ɓe. Hiɓe mari gite, ɓe yi'irtaa ɗe Aayeeje Alla ɗen e maɓɓe e ka jookli sakko ɓe taskitoo. Hiɓe mari kadi noppi, ɓe nanirtaa ɗi Aayeeje Alla ɗen sakko ɓe taskoo ɗe. Ɓen siforɓe ɗin sifaaji, hiɓe wa' wa neemoraaɗi ɗin e faaɗude haqqil, toode ko kamɓe ɓuri neemoraaɗi ɗin majjere. Ko ɓe woni welsindiiɓe e gomɗingol Alla e Ñalaande sakkitiinde.

Ko Alla -Seniiɗo On- tun heeranii inɗe ɓurɗe moƴƴude ɗen tinndinooje e Mawngu e Timmal Makko. Tororee Mo ɗen kala ko faalaɗon mantiron Mo ɗe, tertoɗon ɓen ooñiiɓe e ɗen inɗe ; ɓe jonni ɗe ko woori Alla, maa ɓe riiwi ɗe maa ɓe wayli ɗe : arma ɓe yoɓitiroyee nden ooñaare maɓɓe, lepte muusuɗe.

Hino e ɓen ɓe Men tagi, mofte feewirayɗe goonaga, noddira woɗɓe goo e ɗum, ɓe ñaawitora kan goonga e hoore nunɗal.

Ɓen fennuɓe Aayeeje Amen ɗen, ɓe salii gomɗingol, Men udditanɓe dame arsike haa ɓe lutta e majjere, refti Men meminoya ɓe lepte juhde.

Miɗo nennana ɓe lepte ɗen haa ɓe sikka ɓe daɗii, ɓe duumora non e fennugol yedda haa lepte ɗen sowondirana ɓe. Pellet, pewje Am ɗen ko tiiɗuɗe. Miɗo holla ɓe moƴƴere, hara non ko koyeera Mi faandanii ɓe.

E ɓee fennooɓe Aayeeje Alla ɗen e Nulaaɗo Makko on miijitaaki? Ɓe annda wonnde Muhammadu (jom-kisiyee) aldaa e jinna : ko o Nulaaɗo Alla jertinirgol e lepte Alla no ɓanngiri.

E ɓee ndaaraali taskoo laamu Alla ngun ka kammuuli e ka leydi, ɓe ndaara ko woni hakkunde majji e ko O tagi immorde e kulle e puɗi, ɓe ndaara laje maɓɓe ɗen haawnaaki hara ɗe timmii, ɓe tuuba ado laawaade? Si ɓee gomɗinaali Alqur'aana, ko deftere honnde ɓe gomɗinta?!

kala mo Alla hoyniri majjere, haray fewnoowo mo alaa. Alla non no acca ɓe e majjere maɓɓe nden hiɓe bumam-bumannoo weema be feewatah e huunde.

Ɓee fennooɓe no lanndo maa : "Ko honnde tuma darngal darotoo?" Maakamɓe an Muhammadu : "Mi anndaa ɗum goɗɗo goo kadi anndaa ɗum, ko Alla tun anndi ɗum. Alaa feññinoowo waqtu maggal on si wanaa Kanko, ɗum no suuɗanii yimɓe kammu e leydi fow. Ngal arataa on si wanaa e juhal. Hiɓe lanndo maa fii darngal a sikkay ko a huɓindiiɗo e anndugol ɗum. Maakan ɓee, an Muhammadu : "Faamee, anndal daragol darngal ko Alla tun heeranii". Kono ko ɓuri ɗuuɗude e yimɓe ɓen anndaa ɗum.

Maaku -an Muhammadu- : "Mi waawanaa pooɗande hoore-am nafa, wanaa kadi pottingol bone e am, si wanaa ko Alla muuyi. Mi anndaa ɓuri ko Alla anndini lam kon, mi anndii ko wirnii, sinno miɗo anndunoo ko wirnii, miɗo waɗayno feere no mi pooɗira moƴƴere e am, mi duña bone e am. Kono mi wonaali si wanaa Nulaaɗo Alla, miɗo jertina e lepte Makko muusuɗe, mi wewlina e mbarjaari Makko ndin ɓen yimɓe gonɗinooɓe lam Nulal immorde ka Alla Seniiɗo On, ɓe goongina ko addumi ko".

Ko Kanko woni taguɗo on -worɓe e rewɓe- immorde e wonkii wooti, kin woni Aadama (yo o his), O tagi immorde e Aadama genndo makko on Hawaa, fii yo ɓe woowondiri o deeƴa e debbo on. Tuma nde gorko e renndi e genndo mun, o sowii sowannde hoyfunde ka arannde, o duumoda e ndun reedu ko juuti. Si ndu teddoyii e makko, gorko on e gennda mu'un toroda Alla Joomi maɓɓe : "Pellet, Joomi amen, si A yeɗii men ɓiɗɗo timmuɗo taguɗi, ma men jeyde e yettooɓe neemaaji Maa ɗin".

Nde Alla jaabinnoo toraare maɓɓe nden, O yeɗi ɓe ɓiɗɗo yottiiɗo no ɓe yelornoo non, ɓe waɗtIdani Alla kafidiiɓe e kon ko O yeɗi, ɓe waɗi ɓiɗɗo maɓɓe on rewi ko woori Alla, ɓe inni mo : jeyaaɗo haaris. Alla non toowii senike e kala sirku, ko Kanko woni hertorɗo jeygol e reweede.

E ɓe waɗay ɗii sanamuuji e goɗɗi goo kafidaaɗi Alla ka dewal, e hoore hiɓe anndi ɗin tagataa hay e huunde ko ɗi hanndira reweede, kannji tigi ko ɗi tagaaɗi. ko hoono ɓe kafidirta ɗin e Alla?!

Ɗin reweteeɗi maɓɓe waawanaa ɓe ballal, ɗi waawantaa hay ko'e majji, ko honno ɗi wallirta rewayɗo ɗi?!

Si onon ɓee sirkooɓe on noddii ɗii sanamuuji reweteeɗi mon ko wanaa Alla, ɗi jaabotaako on ɗi jokkataa on. Hino fotana ɗi ter, ko noddoton ɗi maa ko deƴƴanton ɗi ; tawde wanaa ɗi haqqilayɗi, nanayɗi maa wowla.

pellet, ɗin ɗi noddoton onon ɓee sirkooɓe, rewon ɗi accon Alla, ko tagaaɗi Alla, jeyaaɗi Makko, ko yeruuɗi mon e ɗum ; ɗum e wonnde hiɗon ɓuri ɗi alhaali ; tawde ko on wuuruɓe wowlooɓe jinnda ñana yi'a, kamnnji non ɗi alaa ɗum. Awa noddee ɗi ndaaron si ɗi jaaboto on, si tawii on laatike goonguɓe.

Hara ɗii sanamuuji mon hino mari : koyɗe ko ɗi yahra huntugol haaju mon? Kaa hiɗi mari juuɗe ko ɗi duñirana bone on e doole? Kaa hiɗi mari gite ko ɗi yi'ira kon ko suuɗii on sakko ɗi humpita on? Kaa hiɗi mari noppi ko ɗi nanira kon ko laawii on sakko ɗi hewtinano on ɗum? Si tawii hiɗi ƴellitii e ɗum ɗon fow, ko honno rewirton ɗi fii pooɗugol nafa maa pottingol lorra?! Maakan ɓee sirkooɓe -an Nulaaɗo- : "Noddee ɗii ɗi kafiduɗon e Alla, refti fewjanon lam, wata on nennitanam".

Pellet, ko heftoowo am on wallal lam ko Alla On reenata lam, mi jortaaki ko woori Mo, mi hulaa huunde e sanamuuji mon ɗin. Ko Kanko woni Jippinɗo e am Alqur'aanaa peewal yimɓe ɓen, ko Kanko kadi woni heftoowo moƴƴuɓe ɓen e jeyaaɓe Makko ɓen.

Ɗin sanamuuji ɗi noddoton onon ɓee sirkooɓe, ɗi hattanaa e wallugol on, wanaa kadi ko'e majji ɗi wallata. Ɗi gaynataa haaju, ko honno ɗi noddirton ɗi gaanin Alla?!

Si on noddii sanamuuji mon ɗin onon ɓee sirkooɓe faade e peewal, ɗi nanataa noddaandu mon. A yi'ay ɗi hiɗi fewtini gite majji feeraaɗe e maaɗa, koɗi joordi diyi'ataa. Ɓen sirkooɓe moƴƴinanyno sanamuuji nanndina e neɗɗo maa kulle, ɓe waɗanaɗi juɗe e koyɗe e gite, kono hara ɗi alaa wonkii ko ɗi memminora.

Ƴettu -an Nulaaɗo- e yimɓe ɓen yaafuyee, hara a fawaali ɓe ko ɓe gaynataa, sabu ɗum doginay ɓe, yamiraa kala konngol moƴƴol e kuugal moƴƴal ɗuurno-ɗaa e majjuɓe ɓen, wata a yottorɓe majjere maɓɓe, mo lorrii ma wata a lorru mo, mo ɗawii ma kadi wata a ɗawu mo.

Si a so'ii -an Nulaaɗo- wonnde seytaane sowonsinii ma e waɗugol moƴƴere, moolor Alla, daɗninoraa mo. Sabu ko Kanko woni nanoowo ko wowlataa, annduɗo fii maaɗa, ma O reene e seytaane.

Pellet, ɓen hulooɓe Alla, si sowonsinoore heɓii ɓe immorde e seytaane haa ɓe faggike junuubi ; ɓe annditay mawngu Alla ngun e lepte Makko, ɓe tuuba kisan e junuubi : tawde kamɓe ɓe feewi e laawol goonga, ɓe haɗitike e bone.

Siɓɓe seytaane ɓen ka bonɓe e ka heeferɓe seerataa hino pooɗiree seytaane e majjere e junuubi. Seytaaneeji ɗin raɓɓintinataako e bewingol majjina, bonɓe ɓen ka yimɓe kadi jokkay haɗugol ɓe ɗowtaade e gollude ko bone.

An Nulaaɗo, si addanii ɓe Aaya, ɓe fenna mo ɓe ɗuurno, si a addanaali ɓe non Aaya, ɓe wi'a : "Ko haɗnoo sincaa Aaya?" Maakan ɓe -an Nulaaɗo : "Alanaa lam sincugol Aaya, mi jokkaa si wanaa ko Joomi am wahyini kon e am. Ndee Alqur'aanaare nde mi janngannta on ko hujjaaji ɓannguɗi immorde ka Joomi mon, e peewal e yurmeende gomɗimɓe ɓen e jeyaaɓe Makko ɓen. Heddiiɓe ɓen, ko majjuɓe hayruɓe".

Si tawii Alqur'aana no janngeede, heɗitanne nde, wata on wowlu maa sokoliron goɗɗum goo ; belajo'o, Alla yurmete on.

Janto annditaa Joomi maaɗa -an Nulaaɗo- ka yankinaare e ka kulol, hakindinaa hito ma ngon ka noddugol Mo hakkunde jemma e ñalorma. Wata a laatodo e welsindiiɓe jantagol Alla ɓen.

Pellet, ɓen Malaa'ikaae wonɓe ka Joomi maaɗa -an Nulaaɗo-, ɓe townitantaako rewugol Mo Kanko Seniiɗo On, ko Kanko woniko ɓe subbunhinantoo, ɓe laɓɓina Mo jemma e ñalorma, ko Kanko tun woni ko ɓe sujjanta.

Wonndiiɓe maa ɓen -an Nulaaɗo- no lanndo maa fii honateeriji ɗin, hol no ɓe senndirta ɗi? ko hommbo kadi senndata ɗi? Maakan ɓee jaabo-ɗaa ɓe -an Nulaaɗo- : "Honateeriiji ɗin ko Alla e Nulaaɗo Makko on jeyi, ñaawooje mun no senndirtee ko Alla e Nulaaɗo Makko on kadi woodani, ko jebbilagol fawii on". Hulee Alla onon muumini'en, moƴƴintinon hakkundeji mon e hoore giggol e jokkondiral e jikku moƴƴo e yaafondiral. Ɗoftoɗon Alla e Nulaaɗo Makko on si on laatike gomɗimɓe haqqan ; sabu ko gomɗinal duñata e ɗoftaare woɗɗinina e geddi. Ngal lanndal maɓɓe ko ɓaawo hare badri nden waɗi.

Pellet, gomɗimɓe ɓen tigiri, ko ɓen ɓe tawata si Alla Seniiɗo On jantaama fii mun, ɓerɗe maɓɓe ɗen hulay ; ɗe fewtida e ɓalli maɓɓe ɗin faade e ɗoftaare. Si tawii kadi Aayeeje Alla ɗen janngaama e maɓɓe, ɓe taskoo ɗe ɓe ɓeydoo gomɗinal. Ko e Joomi maɓɓe tun kadi woni ko ɓe fawotoo fii nafooreeji maɓɓe e duñogol bone e maɓɓe.

Ɓen duumotooɓe e tottugol julde nden no timmiri e waqtuuji mayre, e kon ko Men arsiki ɓe hiɓe yaltina haqqeeji mun waɗɗiiɗi nafqa.

Ɓen siforɓe ɗin sifaaji, ko kamɓe woni gomɗimɓe ɓen ka goonga ; tawde ɓe naɓidii jikku liimanaaku e lislaamu feeñuɗo : njoɓdi maɓɓe ndin ko darjaaji mawɗi ka Joomi maɓɓe, e haforaneede junuubi e arsike tedduɗo ; ɗum woni ko Alla marani ɓe e neemaaji.

Ko wano Alla Seniiɗo On jabirnoo e mon geɓal e konhoyri ndin ɓaawo luutondiral mon ngal ka senndugol, O waɗi ɗum haa e Makko e Nulaaɗo Makko on (yo o his), ko wano non Joomi maa -an Nulaaɗo yamirmaa e wahyu Jippiiɗo e maaɗa yaltugol Madiina fii hawroygol e sirkooɓe ɓen, ɗum e wonnde fedde goo e gomɗimɓe ɓen no añunoo ɗum.

Hiɓe wennje -an Nulaaɗo- kamɓe ndee fedde gomɗimɓe, fii haɓidugol e sirkooɓe ɓen ɓaawo nde ɗum ɓanngani ɓe wonnde waɗay ; a sikkay ko ɓe wonaaɓe soggeede e maayde hara hiɓe ndaara ɗum, hakkee ko ɓe añi yahugol hare ; tawde ɓe heblanaaki nde keblagol.

Jantee -Onon ɓee gomɗimɓe wennjooɓe- tuma nde Alla fodunoo on wonnde poolgal ngal wonanay on e gootel e feddeeji sirkooɓe ɓen, hakkunde "iiru" e jawle maɓɓe jaɓiton fow, maa "nafiiru" foolon ɓe e hare, tawi non ko yiɗuɗon onon ko foolugol "iiru'en" fii hiɓe welani on fii, Alla non hino yiɗi goonginirgol goonga kan yamirgol on hare nden ; haɓon sirkooɓe ɓen, dahon ko ɗuuɗi e maɓɓe haa doole lislaamu ɗen ɓannga.

Fii yo Alla goonginir goonga kan feññingol lislaamu e yimɓe mun, e ɗin seedeeji ɗi O feññinta e googugol mo, e fii yo O bonne meere nden hay si tawii sirkooɓe ɓen yiɗaa ɗum.

Jantee ñalnde badri tuma nde faabinornoɗon Alla e fii ayɓe mon ɓen O jaabinani on wonnde : ko O ɓeydiroowo on -onon gomɗimɓe ɓen- ujunere e Malaa'ika ko wallitoo on, jokkondirooɓe".

Alla waɗiraali ɓeydirgol on Malaa'ikaaɓe ɓen si wanaa weltingol on -onon gomɗimɓe ɓen- wonnde ko O walloowo on e ayɓe mon, e fii no ɓerɗe deeƴira ngal ballal. Anndon non foolugol wanaa ɗuuɗere konu jokki, foolugol ko ka Alla Seniiɗo On iwrata. Pellet, Alla ko Fooluɗo mo gooto foolataa e laamu Makko, Ñeeñuɗo e Sari'a Makko e Toppitagol Makko.

Jantee -onon ɓee gomɗimɓe- tuma nde Alla hippunoo ŋoŋre e mooɗon hoolaare ɓaawo kulol ko heɓunoo on fii ayɓe mon, Himo Jippinana ndiyam ka kammu fii laɓɓinirgol on tayreeji mon, O ittana on sowonsinoore seytaane, O tabintinira ɗum ɓerɗe mon ɗen no ɓalli mon ɗin tabitiroya ka hare O tabintina kadi teppe ɗen ka njaareendi hara ɗe mortaaki.

Tuma nde Joomi maa -an Annabiijo- wahyinaynoo e Malaa'ikaaɓe ɓeydiraaɓe gomɗimɓe ɓen badri : "Min Miɗo wonndi e mo'on -Malaa'ika'en- : semmbinee tun gomɗimɓe ɓen ka hare. Arma Mi bugoo kulol tiiɗungol e ɓerɗe heeferɓe ɓen. Tappee -onon ɓee gomɗimɓe- daaɗe heeferɓe ɓen no ɓe maayira, tappon e maɓɓe kala ka fontotoo ñobboo e maɓɓe haa ɓe yana ngam be horo habde e mon.

Kon ko heɓi heeferaaɓe ɓen e wareede piyiree e seraaji fow, ka tawde ɓe lunndike Alla e Nulaaɗo Makko on, ɓe jokkaa ko ɓe yamiraa, ɓe seli ko ɓe haɗaa. "Kala non lunndiiɗo Alla e Nulaaɗo Makko on, haray pellet, Alla ko saɗtuɗo leptirgol wareede dahee aduna, e naadeede Yitte laakara".

Ɗen lepte mon jantaaɗe -onon lunndiiɓe Alla e Nulaaɗo Makko on- ; meeɗee ɗe aduna, ka laakara kadi, no woodani on lepte Yiite si on maayii e keeferaaku.

Ko onon yo gomɗimɓe Alla e Nulaaɗo Makko on, si on hawrii e sirkooɓe ɓen ka hare hiɓe mooɓii ɓadii on, ko saɗti woo wata on dogu ɓe, huccinanon ɓe ɓabbe on laawoɗon. Ko yo on tabitu yeeso maɓɓe, muññoɗon, tawde Alla no wonndi e mooɗon.

Kala huccintinanɗo ɓe ɓabbal mun dogugol hare nden nde ñalnde, hara wanaa heɓɓitantooɗo hare nden maa etoo no ukkora e fedde juulɓe ɓen fii faabagol ; gomɗii haray on ɗon ruttodii e tikkere immorde ka Alla, jaaƴorde makko nden laakara ko Jahannama nge bonii ruttorde!

On wariraano sirkooɓe ɓen -onon gomɗimɓe ɓen- ñalnde badri doole mon : si ko woni, ko Alla wariri ɓe wallitagol on. A feranooki -an Annabiijo- sirkooɓe ɓen tuma ferinoɗaa ɓe : si ko woni, ko Alla woni ko ferii ɓe, e fii yo O jarribor gomɗimɓe ɓen foolugol ayɓe maɓɓe e hoore ko ɓe fanɗi e limoore, no ɓe yettira Mo. Pellet, Alla ko Nanoowo du'aaji mon e halaji mon, Annduɗo golle e ko moƴƴani on.

Koo ko jantaa e wareede sirkooɓe ɓen, e fereede ɓe tuma nde ɓe foolanoo ɓe dogii, e neeminirgol gomɗimɓe ɓen foolude ayɓe maɓɓe ; ko ka Alla iwri, Alla non ko lo'inoowo pewje heeferɓe fewjanooɓe lislaamu ɓen.

Si on sirkooɓe ɓen on ɗaɓɓii uddital nde Alla liɓata lepte Makko ɗen e tooñooɓe jaggita ɓen, gomɗii haray nden ɗaɓɓannde mon heɓii on, O Jippini e mon lepte mon e tasakuyee gomɗuɓe ɓen. Si on haɗitike on e ɗaɓɓugol ɗum, haray ko ɗum ɓuri moƴƴannde on, tawde haawnaaki ka O nennanta on. Si on fillitike ɗaɓɓugol ɗum e haɓidugol e gomɗimɓe ɓen, Men fillitoto leptugol on, e hoore non fedde mon nden duncantaa on hay e huunde, hay si nde ɗuuɗii yeeso gomɗimɓe ɓen.Tawde pellet, Alla no wonndi e gomɗimɓe ɓen, mo Alla walli fooletaake.

Ko onon yo gomɗimɓe Alla e Nulaaɗo Makko on, ɗoftee Alla e Nulaaɗo Makko on, wata on ɗuurnor mo lunndagol yamirooje makko hara hiɗon nanude Aayeeje Alla ɗen.

Wata -oonon ɓee gomɗimɓe- on wa'u wa naafiqiiɓe e sirkooɓe wi'aynooɓe tuma nani Aayeeje Alla ɗen : "Men nanirii noppi amen ko janngaa kon e Alqur'aana", tawi ɓe alaa nanirde taskagol waajitoo ; sakko ɓe nafitora ko ɓe nani.

Pellet, ko ɓuri bonnde e ko ruuɗayɗi leydi ndin ka Alla, ko faaɗuɓe ɓe nanataa ɓen goonga jaɓa, mbobiɗuɓe ɓe wowlataa, ɓe haaqqiltaa ɓen yamirooje Alla e haɗaaɗi Makko ɗin.

Sinno Alla annduno e ɓee sirkooɓe fenooɓe moƴƴere, O naninayno ɓe nde ɓe nafitora, kono tawno O anndiino moƴƴere alaa e maɓɓe. Hay si O naninno ɓe non -nde moƴƴere-, ɓe huccitayno e gomɗinal ngal hara ko ɓe ɗuurnii ɓe.

Ko onon yo gomɗimɓe Alla e Nulaaɗo Makko on, nootoree Alla e Nulaaɗo Makko on jebbilanagol yamirooje maɓɓe woɗɗitoo haɗaaɗi maɓɓe si ɓe noddii on fii ko wuurnata on e goonga, anndon pellet, Alla ko haɗtanɗo kala huunde, Himo haɗtanni heedugol hakkunde mon e goonga kan si on arii salaade ka, awa yaccee e makka, felliton wonnde ko ka Alla tun woni ko mooɓoyteɗon Ñalnde Darngal, O yoɓitoya on njɓdi golle mon ɗen aduna.

Reenee -onon ɓee gomɗimɓe- e lepte ɗe heɓataa yedduɓe e mon ɓen tun. Anndon pellet, Alla ko saɗtuɗo leptugol yeddoowo Mo, rentee e yeddugol mo.

Annditee -onon ɓee gomɗimɓe-, tuma wonunoɗon seeɗaaɓe Makka, yimɓe ton ɓen no lo'ina on, hiɗon hula nde ayɓe mon wippotoo on. Alla baki on O weerni on Madiina, O semmbiniri on wallugol on e ayɓe mon ka hare badri, O arsiki on immorde e laaɓuɗi; wano konhoyri ndin belajo'o, on yettay neemaaji Alla ɗin, O ɓeydana on, accon yeddugol sakko O teetadɗi e mon o O lepta on.

Ko onon yom gomɗimɓe Alla e Nulaaɗo Makko on, wata on janfor Alla e Nulaaɗo Makko on selugol ɗoftagol ɓe woɗɗitoo haɗaaɗi maɓɓe, janfoɗon koolaaje mon ɗen ka diina e ko wonaa, hara hiɗon anndi ɗum ko janfitagol ; laatoɗon ɗaynitiiɓe.

Anndee -onon ɓee gomɗimɓe-, wonnde pellet, jawle mon ɗen e ɓiɗɓe mon ɓen ko jarrabuyee Alla fii ndaarndagol on, ɗin hino ara sakkaade on e gollangol laakara, ɗi naɓa on kadi e janfa. Anndon non pellet, no ka Alla njoɓdi mawndi ; wata on yeebir ndin njoɓdi reenirgol jawle e ɓiɗɓe mon janfa Sabu mum en.

Ko onon yo gomɗimɓe Alla e Nulaaɗo Makko on, Anndee pellet, si on hulii Alla on ɗoftike Mo on rentike e haɗaaɗi Makko ɗin, O waɗanay on ko senndindiron goonga e meere hara ɗin jilɓanataa on, O heefana on bakkaatuuji mon O haforana on junuubi mon. Alla ko Jom-Ɓural mawngal, hino jeyaa e maggal, Aljanna mo O marani gomɗuɓe ɓen e jeyaaɓe Makko ɓen.

Janntii -an Nulaaɗo-, tuma nde sirkooɓe ɓen fewjanayno maa fii yo ɓe soke maa ɓe ware maa ɓe raɗo maa ka laydi maa. Hiɓe fewjana maa, Alla bonna fewjoore maɓɓe nden. Ko Alla ɓuri moƴƴude e fewjooɓe ɓen.

Si Aayeeje Amen ɗen janngaama e maɓɓe, ɓe wi'ira townitaare : "Gomɗii men naniino sugu ɗum, sinno men yiɗuno men wowlayno sifa ndee Alqur'aanare, ndee nde men nani ɗoo wonaali si wanaa penaale adinoobe ; men gomɗintaa nde".

Jantii kadi -an Nulaaɗo-, tuma sirkooɓe ɓen wi'unoo : "Yaa Alla, si tawii ko Muhammadu addi kon ko goonga, haray saaƴin e amen kaaƴe immorde ka kammu ko halka men, maa addanaa men lepte muusuɗe". Ɓe wowliri ɗum fantingol yeddude.

Alla siforaali leptoowo mofte maa ɗe -no ɓe foti waade- hara -an Muhammadu- hiɗa hakkunde maɓɓe. Alla siforaali kadi leptoowo ɓe, hara kamɓe hiɓe insinaade Alla junuubi maɓɓe ɗin.

Ko honɗum haɗata ɓe lepteede, ɓe faggitike ko leptatat ɓe, ɓe haɗii yimɓe ɓen wanngagol juula ka Juulirde hormante? Ɓee sirkooɓe wonali heftuɓe Alla, heftuɓe Alla ɓen ko hulooɓe Mo ɓen, kono ko ɓuri ɗuuɗude e maɓɓe anndaa ɗum.

Julde ɓee sirkooɓe ka Suudu hormante wonaali, si wanaa wuuɗugol e poocagol=pobbugol : "Meeɗiree lepte wareede dahee ñalnde badri -onon ɓee sirkooɓe-sabu kon ko yeddiraynoɗon Alla, fennon Nulaaɗo Makko on".

Pellet, ɓen yedduɓe Alla no nafqira jawle maɓɓe ɗen fii sakkagol yimɓe ɓen gaay e laawol diina Alla ngol. Maa ɓe nafqu ɗe e hoore faandaare maɓɓe nden laatotaako, refti ɓe ninsa ɗum, refti ɓe fooliree polgal gomɗimɓe ɓen. Ɓen yedduɓe Alla non, ko ka Jahannama ɓe soggoytee Ñalnde Darngal, ɓe naata nge ɓe lutta e magge.

Ɓen heeferɓe nafqirayɓe jawle mun ɗen sakkagol e laawol Alla ngol soggiroyte ka Yiite Jahannama; fii no Alla senndindira hakkunde heeferɓe soɓuɓe ɓen e gomɗimɓe laaɓuɓe ɓen, O waɗa soɓuɓe ɓen yoga maɓɓe dow yoga hiɓe fawondiri, O waɗta ɗum fow ka Yiite Jahannama. Ko ɓen ɗon woni hayruɓe ɓen; tawde ɓe sooyinii ko'e maɓɓe e yimɓe maɓɓe Ñalnde Darngal.

Maakan ɓee yedduɓe Alla e Nulaaɗo Makko e ɓee yimɓe maa -an Nullaɗo- : si e haɗitike e yeddugol Alla e Nulaaɗo Makko on, sakkoo gomɗimɓe ɓen e laawol Alla ngol; Alla haforanay ɓe ko yawti e junubaaji maɓɓe, islaamu on ko non o yaafoto ko feƴƴi. Si ɓe fillitike non yeddugol, haray gomɗii sunna Alla on yawtii e edinooɓe ɓen wonnde si ɓe fennii ɓe duumike e yeddugol, Alla yaccoray leptugol ɓe.

Onon ɓee gomɗimɓe, haɓee ayɓe mon heeferɓe ɓen haa ɗon ka tawata sirku e sakkoagol juulɓe ɓen e siina Alla kan laatotaako, diina kan e ɗoftaare nden fow laatanoo Alla Mo alaa kafidiiɗo On tun. Si heeferɓe ɓen haɗitike e ko ɓe haɗaa kon e sirku maa sakkagol e laawol Alla ngol; haray selee ɓe, sabu Alla ko ƴellitiiɗo e golle maɓɓe, huunde suuɗaaki Mo e ɗum.

Si ɓe huccii ɓe salike ko ɓe haɗaa kon e sakkagol e laawol Alla ngol, haray fellitee -onon gomɗimɓe ɓen- wonnde Alla ko Giɗo mon. O yooɗii wonnde Giɗo, O yooɗii wonnde Ballo. Mo O walli woo foolay.

Anndee -onon ɓee gomɗimɓe-wonnde kala huunde nde honuɗon e heeferɓe ɓen ka jihaadi, haray ko senndugol nde pecce joyaɓe jowi : joyaɓe nay na fecce eyahuɓe jihaadi ɓen, joyoɓal heddingal ngal na senndee pecce jowi : peccal goo fii Alla e Nulaa- ɗo Makko on waɗanee jawle bayti juulɓe ɓen, ge-ɓal goo fii joomiraaɓe ɓadondiral Annabiijo on (yo o his) ka gorol Haasimiyanke e ɓiɗɓe Muttalibi, geɓal goo fii wonɗuɓe ɓen, geɓal goo fii waasuɓe ɓen e miskinaaɓe ɓen, geɓal goo fii seteeɓe (ɗanniibɓe)° lelliraaɓe njooɓe ɓen, si on laatike gomɗimɓe Alla e kon Men Jippini e jeyaaɗo Amen on Muhammadu (yo o his), Ñalnde Badri : senndunde goonga e fenaande, fewndo Alla wallirnoo on foowlugol ayɓe ɓen. Alla ko hattanɗo wallugol on hattanɗo kala hunnde.

Annditee tuma wonunoɗon ka baŋŋe ɓaɗtoriiɗe ka Madiina, sirkooɓe ɓen hino baŋŋe woɗɗitiiɗe takko Makka, tawi waɗɗiiɓe ɓen no nokku ley mon ko heedi to fonngo maayo boɗeejo. Sinno on saato- ndirno e ɓee sirkooɓe fii fottugol badri, on lurran Kono Seniiɗo On fottindinii on Ñalnde badri e hoore on haldaa; fii yo O laatin fiyaaku waɗaynooɗo -ɗum woni polgal gomɗimɓe ɓen, jaasin heeferɓe ɓen, ɓamta diina Makko kan hoyna sirku-; fii yo maay e maɓɓe kala maayuɗo ɓaawo imminde hujja polgal e dow makko e gomɗimɓe ɓen e hoore fanɗugol maɓɓe ɓanngannde mo, wuuroowo wuura e ɓanngannduyee mo Alla feññinanta mo.heddan- taako hay gooto hujja e dow Alla. Alla ko nanoowo fow, Annduɗo golle maɓɓe, huunde suuɗaaki Mo e ɗum, O yoɓitoyay ɓe ɗum.

Annditu -an Nulaaɗo- no jeyaa e ko Alla neeminir-maa an e gomɗimɓe ɓen, tuma nde O hollayno maa sirkooɓe ɓen ka ɗoyngol maaɗa ko ɓe fanɗuɓe, hollitu-ɗaa ɗum gomɗimɓe ɓen, ɓe weltori ɓe ɓurti suusude. Sinno Alla holluno ɓee sirkooɓe ka ɗoyngol maaɗa ko ɓe ɗuuɗuɓe, cuucal wondiiɓe maa ɓen lo'ayno ɓe hola hare nden. Kono Alla hisini on e ɗum O daɗni on fooleede. Alla fanɗini ɓe e giiɗe Nulaaɗo on (yo o his). Pellet, Kanko ko O annduɗo ko woni e ɓerɗe ɗen e wonkiiji ɗin.

Annditee -onon ɓee gomɗimɓe-, tuma nde Alla hollaynoo on sirkooɓe ɓen, nde fottunoɗon e maɓɓe, O suusini on haɓidugol e maɓɓe, Himo fanɗina on e gite maɓɓe fii no ɓe haɓidira e mon hara ɓe yiltitaaki, fii no Alla ñaawira fiyaaku laatinooɗo golleteeɗo; golliree yottorgol sirkooɓe ɓen wareede e daheede, neeminira gomɗimɓe ɓen poolal ayɓe. Ko faade ka Alla tun woni ruttorde fiyakuuji ɗin, O yoɓita bonnuɗo e bonnere mun, moƴƴinɗo e moƴƴere mun.

Ko onon yo ɓen gomɗimɓe Alla e Nulaaɗo Makko on, si on hawrii e fedde heeferɓe ɓen, tabitee wata on dogu, jantoɗon Alla ko ɗuuɗi, ko Kanko woni haɗtanɗo e wallugol on hoore-maɓɓe; belajo'o, on heɓay ko yeliɗon, daɗon ko huluɗon.

Ɗoftee Alla e Nulaaɗo Makko on ka golle e ka haala e denndaangal fiyakuuji mon. Wata on luutondir e miijo; sabu ɗum lo'inay on hulon nawa doole mon. Muññee si on fottii e ayɓe ɓen, pellet, Alla no wonndiri e muññiiɓe ɓen ballal e poolal. Kala non mo Alla wonndi e mun, ko onɗon foolata.

Wata on wa'u wa ɓen sirkooɓe yaltirnooɓe Makka townitaare e yiinagol yimɓe, hiɓe faddo yimbe e diina Alla kan ɓe haɗa naatugol e makka. Alla non ko huɓindiiɗo ko ɓe gollata, huunde e golle maɓɓe suuɗaaki Mo, O yoɓitoyay ɓe ɗum.

Annditee kadi -onon ɓee gomɗimɓe- wonnde no jeyaa e ko Alla neeminiri on, tuma nde seytaane cuɗannoo sirkooɓe ɓen golle maɓɓe, osuusniɓe cuyni=suusni ɓe haɓidugol e juulɓe ɓen o wi'ani ɓe : "Fooloowo on alaa hannde, min ko mi kawtal mon walloowo on e ayɓe mon". Nde feddeeji ɗiɗi fottii tiinde e taasannde : fedde gomɗimɓe ɓen hiɓe wonndi e Malaa'ika ko walla ɓe, e fedde sirkooɓe ɓen hiɓe wonndi e seytaane hoynoowo ɓe; seytaane hucciti laawii o wi'ani sirkooɓe ɓen : "Min ko mi daɗndiiɗo e mon, min miɗo sutii Malaa'ikaaɓe arɓe faabagol gomɗimɓe ɓen, min mi hulii wata Alla halkan. Alla ko saɗtuɗo lepte, gooto haɗtanaa ronndagol lepte makko ɗen".

Annditee kadi tuma nde naafiqiiɓe ɓen e lo'uɓe iimaanu ɓen wi'aynoo: "Ɓee juulɓe hodirii fodugol foolirde ayɓe ɓen e hoore fanɗugol limoore maɓɓe ɗuuɗugol limoore ayɓe maɓɓe". Ɓe anndaali non wonnde kala fawiiɗo e Alla o hoolii fodoore Makko, haray pellet, Alla ko walloowo mo, no o lo'iri woo. Alla ko Fooluɗo mo fooletaake, Ñeeñuɗo e fotde Makko e Sari'a Makko.

Sinno a seedatono -an Nulaaɗo- ɓee yedduɓe Alla e Nulaaɗo makko on tuma Malaa'ikaaɓe ɓen tamata pittaali maɓɓe ɗin, ɓe piya geece maɓɓe tuma ɓe fewti, ɓe piya kadi ɓabbe maɓɓe tuma ɓe hucciti fii laawagol, ɓe wi'orana ɓe:"Meeɗee -onon ɓee heeferɓe- lepte sunnooje ɗen". Sinno a seedina ɗum, a seedatona fiyaaku mawɗo.

Ɗen lepte muusuɗe tuma tamude pittaali mon -onon ɓee heeferɓee-, e lepte sunnooje ɗen ka genaale mon e ka laakara, ko sabu ko juuɗe mon ɗen faggitii kon aduna. Alla non wanaali tooñoowo yimɓe ɓen, ko nunɗal O ñaawirta hakkunde maɓɓe, tawde ko O Ñeeño Nunɗuɗo.

Ɗen lepte yanuɗe e ɓen heeferaaɓe, wanaa kamɓe tun heeranii, ɗum ko sunna Alla e yeddunooɓe yawtuɓe e jamaanu e waktu; wano woowiigu yimɓe Fir'awna e mofte adinooɓe, nde ɓe yeddunoo Alla Seniiɗo on, Alla nanngitirno ɓe junuubi mabbe ɗin nanngannde Fooluɗo Haɗtanɗo, O Jippini lepte ɗen e maɓɓe. Pellet, Alla ko Tiiɗuɗo mo gooto foolataa, Saɗtuɗo leptugol yeddoowo Mo.

Ɗen lepte tiiɗuɗe, ko tawde Alla si neeminirii yimɓe neema, O ɓoorataa mo e maɓɓe haa ɓe waylira wonkiiji maɓɓe ɗin ɓe iwa e laaɓal immorde e gomɗinal e peewal e yettugol neema faade bone immorde e yeddugol Alla e neemaaji Makko ɗin. E wonnde pellet, Alla ko Nanoowo haalaaji jeyaaɓe Makko ɓen, Annduɗo kuuɗe maɓɓe, huunde suuɗaaki mo e ɗum.

Fiyaaku ɓee ɗoo heeferɓe, no wa'i fiyaaku ɓeya yeddunooɓe Alla wano yimɓe Fir'awna ɓen e ɗen mofte adinooɓe fennuuɓooɓe Aayeeje Joomi maɓɓe. Alla halkiri ko ɓe faggitori kon geddi. Alla hakiri yimɓe Fir'awna ɓen yoolagol ka maaya. Kala e yimɓe Fir'awna ɓen e mofte adinooɓe ɓen ɓe laatino tooñooɓe sabu yeddugol maɓɓe Alla sirkana Mo. Ɓe waɗɗinani ko'e-maɓɓe lepte Seniiɗo On, O liɓi ɗe e maɓɓe.

Ko ɓuri bonnde e ko ruugata kon ko hoore leydi, ko ɓen yedduɓe Alla e Nulaaɗo Makko on. Kamɓe ɓe gomɗintaa hay si Aaya kala arii e maɓɓe; ɓe heddoto e keeferaaku. Gomɗii laawi peewal ɗin bonirii ɓe -immorde e haqqil e nanɗe e giiɗe.

Ko ɓen ɓe ƴettidataa ahadi -wano Banu Qurayza en refti ɓe firta ahadi maɓɓe ndin e kala laawol, hara kamɓe ɓe hulataa Alla. Ɓe hunnataa ahadi.

Si a hawrii ɓee firtooɓe ahadi ka hare -an Nulaaɗo-, haray yagginir ɓe haa woɗɓe goo nana ɗum. Belajo'o, ɓe taskitoto fiyaaku yagginaaɓe ɓen, ɓe hula haɓidugol e maaɗa e hollirde anyɓe e dow.

Si a hulii -an Nulaaɗo- nde yimɓe ɓe ahodu-ɗaa firtata ahadi, anndin ɓe bugitagol ahadi maɓɓe ndin haa foton e anndugol ɗum, wata a juhir ɓe ko adi anndingol ɗum; tawde ɗum ko e janfa jeyaa, Alla non yiɗaa janfotooɓe ɓen, rento an e janfa.

Wata ɓen heeferɓe sikku wonnde ɓe laawike lepte Alla ɗen. Pellet, ɓe laawaaki ɗe, ɓe hawray e majje.

Hebiloranee ɓe -onon gomɗimɓe ɓen- kala ko hattanɗon e hebilugol; wano ndagaaje werlaade, hebilanon ɓe kadi pucci mon humaaɗi ɗin fii laawol Alla, hulɓiniron ɗum ayɓe Alla e ayɓe mon heeferɓe ɓen ɓe no habbitoo(tommboo) on e yiiloode jamaanu, hulɓiniron ɗum kadi yimɓe goo ɓe onon on anndaa kono Alla kan hino anndi ɓe anndi ko mi soomi e wonkiiji maɓɓe. Kala woo ko nafquɗon e laawol Alla ngol -ɗuuɗi fanɗi- Alla lontinanay on ɗum aduna, O okka on baraaji mun laakara. Yaccee e nafqugol fii laawol Makko ngol.

Si ɓe liiƴanike sulhu(beldal) ngun ɓe firtii haɓugol ma, haray an kadi Nulaaɗo- liiƴano ngu, ahodaa e maɓɓe fawoɗaa e Alla hooloɗaa Mo, O hoynataa ma. Pellet, Kanko ko O nanoowo haalaaji maɓɓe, annduɗo annuyeeji maɓɓe e kuuɗe maɓɓe.

Si ɓe faandorike liiƴanagol sulfu on acca hare nden janagol ma -an Nulaɗo-, anndu pellet, Alla yonii ma e janfa maɓɓe kan. Ko Kanko woni semmbinirɗo ma ballal Makko ngal, O semmbinir maa kadi wallitagol gomɗimɓe ferɓe ɓen e Ansaaru'en.

O woowindiri hakkunde ɓerɗe gomɗimɓe ɓen ɓe O wallir maa e mun. Sinno a nafquno ko woni ka leydi kon e jawle fow fii no ɓerɗe maɓɓe woowondira, a waawataano ɗum. Ko woni tun ko Alla tan woni woowindirɗo ɓe. Pellet, Kanko ko O Fooluɗo e laamu Makko Mo fooletaake, Ñeeñuɗo e kattal mun e toppitagol Mun e sari'a Mun.

Ko an yo Annabiijo, Alla yonii ma bone ayɓe maa ɓen, O yonii kadi gomɗimɓe wonduɓe e maa ɓen. Hoolo Alla fawoɗaa e Makko.

Ko an yo Annabaajo, suusin gomɗimɓe ɓen e hare, softinaa ɓe e ɗum. Si on e mooɗon -onon gomɗim-ɓe ɓen- noogayo muññiiɓe haɓidugol e heeferɓe ɓen, ɓe foolay teemeɗɗe ɗiɗo heeferɓe; si no e mooɗon kadi teemeedere muññiiɓe, ɓe foolay ujunere e heeferɓe ɓen; tawde heeferɓe ɓen ko yimɓe ɓe faamataa sunna Alla on e wallitagol waliyaaɓe Makko ɓen raɗoo ayɓe Makko ɓen, ɓe faltotaako kadi ko faanda ko e hare, kamɓe ɓe haɓay tun fii toowde e aduna.

Jooni non Alla hoynanii on -onon gomɗimɓe ɓen- ko O anndi kon lo'ere mon nden, O waɗɗini e gooto mon kala tabitugol yeeso heeferɓe diɗo ɓen diini sappo e maɓɓe. Si no e mooɗon teemedere muññiiɓe haɓidugol e heeferɓe ɓen, ɓe foolay teemeɗɗe ɗiɗo; si no e mooɗon ujunere muññiiɓe, ɓe foolay ujunnaaje ɗiɗi heeferɓe e duŋayee Alla. Alla no wonndi e muññiiɓe gomɗimɓe ɓen.

Haananaa Annabiijo nde laatantoo mo dahaaɓe e heeferɓe haɓidaɓe makko ɓen haa o ɗuɗɗina warugol ɓe; fii no ɓe hulira ɓe firta haɓugol mo. Hiɗon faalaa -onon gomɗimɓe ɓen- jogitoragol dahaaɓe ɓen badri soktorɗum(nanngugol coottiigu) Alla non no faalanaa on laakara e kon ko ɓamtirton diina kan. Alla ko Fooluɗo e Jaati Mun e Sifaaji Mun e jeyal Mun, gooto foolataa mo, Ñeeño e kattal(kattane) Mun e sari'a Mun.

Si wanaano binndoodi aditiindi immorde ka Alla, wonnde O daginanii on konhoyri ndin (ganngal)° ngal ndin e soktirgol=soottugol dahaaɓe ɓen, lepte tiiɗuɗe memirayn on sabu kon ko ƴettirɗon konhoyri ndin e soktirgol dahaaɓe ɓen ado wahayu on Jippaade immorde ka Alla daginana on ɗum.

Ñaamee -onon gomɗimɓe ɓen- e kon honuɗon e heeferɓe ɓen, hino daganii on. Hulon Alla ɗoftoɗon Mo rentoɗon haɗaaki Makko. Pellet, Alla ko haforanoowo jeyaaɓe Makko gomɗimɓe ɓen, Hinnotooɗo ɓe.

Ko an yo Annabiijo, maakan dahaaɓe mon ɓen badri : "Si Alla no anndi moƴƴere e ɓerɗe mon ɗen, O okkay on ko ɓuri moƴƴude e ko jaɓiranaɗon kon fii soktagol. On sunotaako fii kon ko jaɓanaɗon, O haforana on kadi junuubi mon. Alla ko haforanoowo tuubuɗo e jeyaaɓe Makko ɓen, hinnotooɗo ɓe". Ko non tigiri fodoore Alla nden laatornoo e Abbaas bappa Nulaaɗo on (yo o his) e woɗɓe goo silmunooɓe=jebbalinoobe.

Si ɓe faandike non ɗaynugolma -an Muhammadu- e ko feeñi e konnguɗi maɓɓe, gomɗii ɓe janfikeno Alla ko adii; O wallu maa e maɓɓe, woɗɓe e maɓɓe waraa woɗɓe goo dahaa. Yo ɓe habbito sugu(yeru) mun si ɓe fillitike. Alla ko Annduɗo tagu Makko ngun, Ñeeñuɗo e toppitagol Makko ngol.

Pellet, ɓen gomɗimɓe Alla, ɓe goongini Nulaaɗo Makko on, ɓe gollitiri saria Makko on, ɓe feri leydi keeferaaku faade e leydi lislaamu, maa e nokku ka ɓe waawata rewude Alla, ɓe tiiɗnorii funsugol jawle maɓɓe ɗen e wonkiiji maɓɓe ɗin fii ɓamtugol konngol Alla ngol, e ɓen weernu ɓe ɓe ka cuuɗi mun ɓe wallitii ɓe; ɓe ɗon yoga feruɓe e ɓen wallitiiɓe ɓe weerni ɓe, yoga maɓɓe ko weldirɓe wallugol yoga. Ɓen non gomɗimɓe Alla kono ɓe feraali, alanaa on -onon gomɗimɓe ɓen- wallugol ɓe hiwa ɓe haa ɓe fera fii Alla. Si heeferɓe ɓen arii tooñugol ɓe, ɓe ɗaɓɓirii on ballal, haray no fawii on wallugol ɓe e ayɓe ɓen, si wanaa hara ko e yimɓe ɓe ahadi woni hakkunde mon e maɓɓe. Alla ko reenuɗo ko golloton kon, huunde suuɗaaki Mo e golle mon, O yoɓitoyay on e ɗen.

Ɓen non yedduɓe Alla, ko keeferaaku ngun hawti ɓe, yoga maɓɓe no walla yoga, gomɗimɓe ɓen wallindirtaa e maɓɓe. Si on wallindiraali e gomɗim- ɓe ɓen ayron e yedduɓe ɓen, wonanay gomɗimɓe ɓen fitina tawde ɓe heɓaali ko walla ɓe e yiɗɓe maɓɓe ɓen ka diina, wona kadi bone mawɗo ka leydi e sakkagol laawol Alla ngol.

Ɓen gomɗimɓe Alla ɓe feri fii laawol Makko, e ɓen weernu feruɓe ɓen ɓe walli ɓe; ko ɓen ɗon woni gomɗimɓe goomna ɓen: njoɓdi maɓɓe ndin ka Alla ko haforaneede junuubi, e arsike immorde ka Mokko; ɗum woni Aljanna.

Ɓen non gomɗimɓe Alla ɓaawo adinooɓe ɓen naatude lislaamu e ɓen ferunoo e ansaaru'n, ɓe feri ɓe tiiɗnorii no konngol Alla ɓamtora konngol yedduɓe ɓen yana; ɓen ɗon ko jeyaaɓe e mon -onon gomɗimɓe ɓen-m hiɗon fota e haqqee e geɓe. Joomiraaɓe enɗammaji ɓen ka ñaawoore Alla, yoga maɓɓe no ɓuri yoga hanndude e ndonndi diini ronindirgol gomɗinal e fergu wano ɗum woodirnoo ko adii. Pellet, Alla ko Annduɗo kala huunde. Hay e huunde suuɗaaki Mo, Himo Anndi ko moƴƴani jeyaaɓe Makko ɓen, O sar'inana ɓe ɗum.

Ndee ɗoo ko danndannde immorde e Alla e Nulaaɗo Makko on, e feññinannde lannugol ahadi mon ndin -onon juulɓe ɓen- e sirkooɓe ɓen ka suriire Aarabu.

Yahee -onon ɓee sirkooɓe- ka leydi dumunna lebbi nayi ko on hisuɓe, kisal e hoolaare alanaa on ɓaawo ɗum. Felliton wonnde pellet, on laawotaako lepte Alla ɗen si on duumike e yeddugol Mo, felliton kadi pellet, Alla ko jaasiniroowo heeferɓe ɓen wareede dahee aduna, naadoyee Yiite Ñalnde Darngal; ɗum no mofti kadi kala firtuɗo ahadi. Ammaa non mo ahadi mon waqintinaa -hay si no ɓuri lebbi nayi-, o timminante dumunna makko on.

E ewnaango immorde ka Alla e Nulaaɗo Makko on, haa e yimɓe ɓen fow, ñalaande boragol nden, wonnde : Alla seniiɗo On ko daɗndiiɗo(hisdo) e sirkooɓe ɓen, Nulaaɗo Makko on kadi ko daɗndiiɗo e maɓɓe. Si on tuubii -onon sirkooɓe ɓen-, on yaltii e sirku, ko ɗum ɓuri moƴƴannde on. Si on ɗuurnike non e tuubugol, haray fellitee wonnde on laawotaako Alla on laawotaako kadi lepte Makko ɗen. An Nulaaɗo, humpitir ɓen yedduɓe huunde saɗtaynde e maɓɓe, ɗum woni lepte muusuɗe no habbii ɓe.

Si wanaa ɓen sirkooɓe ɓe ahoduɗon, ɓe hunni ahadi maɓɓe ndin, ɓe ɗuytaali huunde e mayri : timminiranee ɓe hunnugol ahadi maɓɓe ndin haa dumunna on timma. Pellet, Alla no yiɗi gomɗumɓe ɗoftotooɓe Mo ɓen hunna ahadi, ɓe woɗɗitoo haɗaaɗi Makko; wano janfa.

Si lebbi hormante ɗin ɗi foduɗon ayɓe mon ɓen kisal timmii, haray waree sirkooɓe ɓen kala ka hawruɗon e maɓɓe : huɓindoɗon ɓe e nokkuuji maɓɓe sakkoɗon(tommboɗon) ɓe e ɗate maɓɓe. Si ɓe tuuba- nii Alla e sirku, ɓe niiɓinii julde ɓe yaltinii asakal; haray ɓe wontii musiɗ ɓe mo'on ka diina, accee warugol ɓe. Pellet, Alla ko Haforanoo- wo kala tuubuɗo e jeyaaɓe Makko ɓen, Hinnotooɗo ɓe.

Si gooto e sirkooɓe ɓen daɓɓirii ma -an Nulaaɗo- faabo, haray wallir mo ɗum haa o nana Alqur'aana, refti yottinoyaa mo e nokku ka o hisata. Tawde heeferɓe ko yimɓe ɓe anndaa haqiiqa kaa diina, hino hasii non ka ɓe feewa si ɓe nanii ɗum e janngin Alqur'aana on.

Haanaa nde laatanoo sirkooɓe ɓen ahadi ka Alla e hoolaare ka Nulaaɗo Makko on, si wanaa ahadi ɓen sirkooɓe ɓen ahodunoɗon -onon juulɓe ɓen- ka Juulirde hormanteere e nanondiral Hudaybiyya Fodde hiɓe ñiiɓni ndin ahadi hakkunde mon, onon kadi niiɓnii ndin hara on firtaali. Pellet, Alla no yiɗi jeyaaɓe Makko gomɗuɓe ɗoftotooɓe Mo ɓen woɗɗitoo haɗaaɗi Makko.

Ko honno ahadi e hoolaare woniranta ɓe ko ɓe ayɓe mon? Si ɓe foolii on ɓe aynitataa e mooɗon Alla wanaa enɗam wanaa kadi ahadi, hiɓe leptiraynoo on lepte bonɗe! Hiɓe weltinire konngol labaangol, kono ɓerɗe ɗen saloo ɗum; ɓe ronka hunnude ko ɓe wowli, kadi ko ɓuri ɗuuɗude e maɓɓe ko yaltuɓe e ɗoftaare sabu firtude Aadi.

Ɓe waɗtitirii Aayeeje Alla ɗen coggu fanɗungu ko ɓe huntira tuuyo e mbeleeɗe maɓɓe aduna, ɓe sakkii ko'e maɓɓe e jokkugol goonga ɓe ɗuurnii ɗum, ɓe sakkii woɗɓe kadi e goonga kan. Pellet, kamɓe ko ɓe gollaynoo kon na bonii.

Ɓe aynitataa Alla e gomɗinɗo, wanaa enɗam wanaa kadi ahadi; tawde ko ɓe jaggitooɓe, yawtuɓe keeri Alla ɗin.

Si ɓe tuubanii Alla ɓe yaltii e keeferaaku, ɓe ñiiɓii e julde, ɓe jonnii asakal jawle maɓɓe ɗen -haray ɓe wonii juulɓe siɗɓe mo'on ka diina; on fotii e ɗi fow, dagantaako on haɓugol ɓe, tawde lislaamu on hiwii(reenii) ƴiiƴe maɓɓe e jawle e teddule maɓɓe ɗen fow. Meɗen ɓannginana Aayeeje ɗen yimɓe annduɓe, ko ɓen nafitorta ɗe ɓe nafa woɗɓe goo.

Si ɓee sirkooɓe firtii ahadi mon ndin e fii tertagol hare nder dumunna happaaɗo, ɓe aybini diina mon kan, haray haɓee hooreeɓe keeferaaku ɓen -tawde ahadi daɗndayndi ƴiiƴe maɓɓe alanaa ɓe -haɓiree ɓe jortagol nde ɓe haɗitoo e keeferaaku, firta ahadi maɓɓe hoyfina fii diina mon.

Ko haɗata on -onon gomɗimɓe ɓen- haɓude yimɓe firtuɓe ahadi mun, ɓe mooɓondiri Darun Nadwah fii yaltinngol Nulaaɗo on (yo his) Makka, ko kamɓe kadi adii on ɗaɓɓitude fi hare fewndo ɓe wallitinii Bakrin wallodiiɓe Quraysi e dow Khuza'a wallodiiɓe Nulaaɗo on? E on hulayɓe haa ronkon ɓe haɓude?! Ko Alla Seniiɗo On ɓuri hanndude Mo huloton si on laatike gomɗimɓe haqqan.

Haɓee sirkooɓe ɓen -onon ɓee gomɗimɓe-, onon si on haɓii ɓe, Alla leptiray ɓe juuɗe mon ɗen waron ɓe, O hoynira ɓe fooleede dahee, O walla on e dow maɓɓe, O daɗnda ɓerɗe yimɓe gomɗimɓe ɓe tawanooka ka hare, ko yani ko e anyɓe maɓɓe e warngo e dahngo e wallude juulɓe e dow mum en.

O woɗɗinira tikkere e ɓerɓe jeyaaɓe Makko gomɗimɓe ɓen poolal maɓɓe ngal. Alla no jaɓana tuubugol on Mo O muuyi e ɓen ɗuurnotooɓe si ɓe tuubii; wano ɗum feƴƴirnoo e yimɓe Makka ñalnde uddital ngal. Alla ko Annduɗo goonga tuubuɗo e maɓɓe, Ñeeñuɗo e tagu Makko e toppitagol Mo e sari'a Makko.

E on sikku -onon ɓee gomɗimɓe- nde Alla accata jarribagol on?! Jarrabuyee ko jeyaaɗum e sunnaaji Makko. O jarriboto on haa O Anndira anndal feeñanay ngal jeyaaɓe ɓen, tiiɗnoriiɓe fii Alla ɓen e mooɗon, ɓen ɓe tawata ɓe jogitaaki gaanin Alla e Nulaaɗo Makko on e gomɗimɓe ɓen weldiiɓe ka heeferɓe. Alla ko Humpitiiɗo ko golloton, hunnde suuɗaaki Mo e ɗum, O yoɓitoyay on golle mon.

Haananaa sirkooɓe ɓen nde ɓe wuurnitira Juulirɗe Alla ɗen dewal e ɗoftaare, hara ko ɓe seeditaniiɓe wonikiiji maɓɓe ɗin keeferaaku. Ɓen ɗon golle maɓɓe ɗen boniri ŋakkugol sarti jaɓeede; on woni gomɗinal. Kamɓe Ñalnde Darngal, ko ɓe naatoyoo- ɓeYiite, luttinee e magge poomaa, si wanaa ɓen tuubuɓe e maɓɓe yamti e sirku ado maayude.

Anndee ko hanndi e wuurnitugol Juulirɗe Alla ɗen : ko on gomɗinɗo Alla tun, hara o kafidaali Mo e goɗɗo, o gomɗini Ñalnde Darngal, O ñiiɓini julde nden, o jonni asakal jawdi makko ndin, hara kadi o hulaali goɗum goo si wanaa Alla Seniiɗo On. Ko ɓen ɗon tijjanaa laatodugol e feewuɓe ɓen. Sirkooɓe ɓen kan, hiɓe woɗɗondiri e ɗuum.

E on waɗay -onon ɓee sirkooɓe- daraniiɓe yarnugol hajjunkeeɓe ɓen e wuurnitooɓe Juulirde hormanteere nden yerondiraaɓe e on gomɗinɗo Alla, o kafidaali Mo e goɗɗum, o gomɗini Ñalnde Darngal, o tiiɗnorii jawdi makko no Konngol Alla ɓamtora, konngol heeferɓe ɓen yana. En on fonnay ɓen ɗon e ɓural ka Alla?! Ɓen ɗon fotataa ka Alla few. Alla non fewnataa tooñirooɓe sirkuɓe ɓen, hay si ɓe huuwii moƴƴere; wano yarnugol hajjooɓe.

Ɓen renndinɓe gomɗingol Alla, e ferugol yaha e leydi lislaamu e tiiɗnorgol fii laawol Alla ngol jawle maɓɓe ɗen e wonkiiji maɓɓe ɗin, hino ɓuri mawnu- de darja ka Alla. Ɓen siforiiɓe ɗin sifaaji, ko ɓen woni maliraaɓe Aljanna.

Alla Joomi maɓɓe no habra ɓe ko welata ɓe immorde e yurmeende Makko, e yarluyee Makko hara O tikkantaa ɓe abadaa, e naadeede Alajannaaji ɗi neemaaji duumiiɗi woodani ɓe nder majji.

Ko ɓe duumotooɓe e ɗin Aljannaaji poomaa, ɗum ko njoɓdi golle maɓɓe moƴƴe ɗen aduna. Pellet, njoɓdi mawndi no ka Alla, wonannde kala ɗoftiiɗo Mo, woɗɗitii haɗaaɗi Makko laɓɓinani Mo diina mun.

Ko onon yo gomɗimɓe Alla e Nulaaɗo Makko on, wota on jogitor baabiraaɓe mon ɓen e musiɗɓe mon ɓen weldiiɓe wallondiraaɓe e hoore gomɗimɓe ɓen; si ɓe suɓike keeferaaku e dow liimanaaku. Kala e mo'on wallondirɗo e maɓɓe, haray o yeddii Alla o tooñiri hoore-makko faggitagol halkaare.

Maaku an Nuaaɗo: "Si tawii ko baabiraaɓe mon ɓen -onon gomɗimɓe ɓen-, e ɓiɗɓe mon ɓen, e musiɗɓe mon ɓen, e resondiraaɓe mon ɓen, e bolondaa mon on, e jawle mon ɗe faggitaniɗon, e ngeygu(njulaagu) ngu faalaɗon sottugol hulaɗon yeebagol, e koaɗanɗe mon ɗe welaɗon ñiiɓugol e mun -si tawii ko ɗin ɗo fow ɓurani on Alla, e Nulaaɗo Makko on e tiiɗnagol fii Makko, haray habbee nde Alla jippinanta on lepte. Alla non fewnataa yaltuɓe e ɗoftaare Alla ɓen e gollugol ko welta Mo.

Gomɗii Alla faabike on -onon gomɗimɓe ɓen- e hoore ayɓe mon sirkooɓe ɓen e hareeji ɗuuɗuɗi, ɗum e wonnde hiɗon fanɗi hiɗon lo'i -tawde on fawino e Alla, etiɗon kadi on haawnoraaki ɗuuɗal mon, wanaa ɗuuɗal mon wonunoo sabu poolgal mon. Ammaa non poolgol nde Hunayni, nde ɗuuɗal mon hawnunoo on, wi'uɗon : "Men foolirtaake fanɗere hannde", kono ngal ɗuuɗal mon duncanaano on hay huunde, ayɓe mon ɓen fooli on, leydi ndin faaɗirani on wa si ndi yaajaa, refti huccuɗon doguɗon ayɓe ɓen.

Reftti ɓaawo nde doguɗon ayɓe ɓen, Alla Jippini deeƴere e Nulaaɗo Makko on, O Jippini nde kadi e gomɗimɓe ɓen, ɓe tabiti e hare nden. O Jippini konu Malaa'ika ngu on yi'aali, O leptiri heeferɓe ɓen wareede, dahee jaɓaneede jawle. Ko ɗum woni lepte ɓee heeferɓe fennuɓe Nulaaɓe mun, ɗuurniiɓe ko ɓen addi.

Refti kala tuubuɗo e keeferaaku maa majjere mun ɓaawo ɗen lepte, pellet, Alla jaɓanay mo tuubuubuuyee. Alla ko Haforanoowo kala tuubuɗo e jeyaaɓe Makko ɓen, Hinnotooɗo ɓe.

Ko onon yo gomɗimɓe Alla e Nulaaɗo Makko on, ɓe jokki saria Makko on! Anndee sirkooɓe ɓen ko soɓirɓe keeferaaku e tooñe e jikkuuji maɓɓe bonɗi : wata ɓe naatu ka Juulirde hormanteere Makka -hay si tawii ko hajjugol maa fii 'umra- ɓaawo ndee hiitaande maɓɓe jeenaɓere fergu ɗoo. Si on hulii -onon gomɗimɓe ɓen- baasal, sabu ko ɓe addanat- noo on kon ñaametee ɓe yeeya on piiji sertuɗi, arma ka Alla alɗinora on ɓural Makko ngal, si O haajii. Pellet, Alla ko Annduɗo fiyaaku mon, Ñeeñuɗo e ko O toppitantoo on.

Haɓee -onon gomɗimɓe ɓen-, ɓen heeferɓe ɓe gomɗinaa Alla e Ñalaande Darngal, ɓe woɗɗitotaa- ko kon ko Alla e Nulaaɗo Makko on harmini -wano ñaamugol jiiba ngirji e sanngare e ribaa-, ɓe jebbilanta- ko kadi sari'a Alla on, jeyaaɓe e Alyahuuda e Annasaara, haa ɓe jonnira sagalle on juuɗe maɓɓe ɗen, ko ɓe jaasuɓe.

Alyahuuda e Annasaara fow ko sirkooɓe : Alayahuuda sirkiri wi'ugol Uzayru ko ɓiɗɗo Alla, Annasaara kadi sirkiri wi'ugol Almasiihu ko ɓiɗɗo Alla. Ɗum ko konngol ngol ɓe fefindori kunndule maɓɓe ko aldaa e dalil. Hiɓe nanndinora ngol konngol sirkooɓe adinooɓe ɓen wi'aynooɓe : "Malaa'ikaaɓe ɓen ko ɓiɗɓe Alla rewɓe"! Alla non Senike e ɗum. Alla halkuɓe. Ko honno ɓe waylirta goonga ɓe naɓaa e meere?!

Alyahuuda waɗii jannguɓe maɓɓe e Annasaara kadi waɗi ruuɗiiɓe maɓɓe ɓen reweteeɓe ko wonaa Alla ɓen no dagintinana ɓe ko Alla harmini, ɓe harmina- naɓe ko Alla dagini. Annasaara en waɗtidi Almasiihu Iisaa geɗal Maryama on reweteeɗo wonndude e Alla. Ɓe fow maɓɓe ɓe yamiranooka si wanaa rewugol Mo Kanko tun, hara ɓe sirkanaali Mo hay e huunde, ko Kanko Seniiɗo On tun woni reweteeɗo; reweteeɗo e goonga alaa si wanaa Kanko. Senayee woodanii Mo e kon ko sirkooɓe ɓen e woɗɓe goo waɗanta Mo.

Ɓee heeferɓe e wonɓe e diinaaji goo, hino faandorii fefindagol maɓɓe fenna ko Muhammadu (jom-kisiyee) addi kon, gaynugol fii lislaamu, ɓe bonna kala hujja ɓannginɗo tawhiidi e kon ko Nulaaɗo on addi. Alla non no saloo si wanaa nde O timmiŋta diina Makko kan, O ɓamta ka e ɗiya diinaaji, hay si heeferɓe ɓen faalaaka ɗum, Alla waɗay ɗum. Si Alla faandanike huunde, faandaare goɗɗo goo bonay e hoore-mayre.

Ko Kanko Alla Seniiɗo On woni Nulirɗo Nulaaɗo Makko on Muhammadu (yo o his), Alqur'aanaare nden peewal yimɓe ɓen, e diina goonga woni diina lislaamu, fii yo o ɓamtirka hujjaaji e ñaawooje e hoore kala diina, hay si sirkooɓe ɓen añii ɗum.

Ko onon yo gomɗimɓe golliri sari'a Alla, anndee ko ɗuuɗi e jannguɓe Alyahuuda ɓen, e ruuɗiiɓe Annasaara ɓen, hino jaɓira jawle yimɓe ɓen ko aldaa laawol sari'a; hiɓe jaɓira ɗe ngeenaari ekn. Hiɓe sakkoo=faloo kadi yimɓe ɓen naatugol ka diina Alla. Ɓen ɓe no mooɓa kaŋŋe e kaalise hara ɓe tottataa asakal majje, humpitu ɓe -an Nulaaɗo- huunde saɗtaynde e maɓɓe Ñalnde Darngal, ɗum woni lepte muusuɗe.

Ñalnde Darngal, jawle ɗe ɓe mooɓunoo huɓɓinirte Yiite Jahannama, si ɗum wulii tiiɗii, sunniree geece maɓɓe, e becce maɓɓe e ɓebbe maɓɓe: ɓe wi'anee : ko ɗum ɗoo woni jawle mon ɗe mooɓunoɗon, saliɗon jonnugol asakal mun, meeɗee non lepte kon ko mooɓaynoɗon on jonnataa asakal mun, e batte mum.

Tabitii limoore lebbi ɗin ka ñaawoore Alla, ko lebbi sappo e ɗiɗi, wano Alla tabintinir ɗum ka Alluwal reenaangal fewndo O tagunoo kammuuli ɗin e leydi ndin. Hino e ɗin lebbi sappo e ɗiɗi, nayi harmuɗi hare e mun, ko ɗin woni : sabbordu donkin, jom-bente (woni jokkondirɗi), nayaɓuru ndu ko feereeru, ndun woni raajibi : ko ɗum woni diina focciika kan. Wata on tooñir wonkiiji mon ɗin e ɗin lebbi hormanteeji waɗugol hare e majji. Haɓiree sirkooɓe ɓen denndanngal wano ɓe ɓe woni haɓirde on denndaangal. Anndon pellet, Alla no wonndi e gomɗuɓe ɗoftotooɓe yamirooje Makko woɗɗitoo haɗaaɗi Makko. Kala wonduɗo e Alla, haray fooloowo Mo alaa.

Anndee neeɓnugol lebbi hormanteeji ɗin haa e lebbi goo waɗtitira ɗi ɗin -wano aarabeeɓe ɓen huuwiraynoo fewndo majjere- ko ɓeydagol e keeferaaku. Seytaane hino majjinira ɗin yedduɓe Alla ɓen nde o fewjannoo ɓe nden fewjoore bonnde : hiɓe dagintinira lewru hormanteeru dun hitaande, ɓe waɗtitira ndu lewru goo, ɓe heddina ndu e ko ndu harminiri kon hitaande, fii no ɓe hawritoya e limoore lebbi Alla hormanteeji ɗin, ɓe lunndoo ñaawoore Makko nden. Seytaane cuɗinanii ɓe ɗen golle bonɗe, ɓe jokki ɗum. Alla non fewnataa heeferɓe luttooɓe e keeferaaku mun.

Ko onon yo gomɗimɓe Alla e Nulaaɗo Makko on, ɓe gollitiri sari'a Makko on, ko haɗi on si on noddaama e jihaadi fii Alla ka haɓugol ayɓe mon ɓen, hiɗon teddintinoo, heddoɗon ka cuuɗi?! E on wela nguurndam aduna e dakamme mun lannayɗum e diini neemaaji laakara duumotooɗi?! Dakamme aduan on wonaali yeeso laakara si wanaa ko jaasi. Ko honno haqqilloowo suɓorta ko lannata e hoore ko heddotoo, maa ko jaasi e hoore ko mawni?!

Si on yaltaali -onon ɓee gomɗimɓe-, yahon jihaadi fii Alla, haɓon ayɓe ɓen, Alla leptiray on koyeera ekn, O waɗtitira on yimɓe ɗoftotooɓe Mo tuma ɓe noddaa e jihaadi. On lorritaa Mo huunde e ko lun- ndotoɗon yamirooje Makko; tawde Himo yonndinii e mon, onon non hiɗon hatonjini e Makko. Alla ko haɗtanɗo kala huunde, hay huunde ronkintaa Mo, Himo haɗtani wallugol diina Makko kan e Annabaajo Makko on gaanin mon.

Si onon -ɓee gomɗimɓe- on wallaali Nulaaɗo Alla on (yo o his), nootoɗon noddaandu makko ndun ka jihaadi fii laawol Alla, gomɗii haray Alla walliino mo fewndo on tawdanooka e makko; tuma nde sirkooɓe ɓen yaltindinnoo mo e Abuubakr (yo Alla wele mo), ɓe wondaano e tataɓo, tuma nde ɓe wonunoo ka fammeere hiɓe huli heeferɓe ɓen wota yi'uɓe, tuma nde Nulaaɗo Alla on (yo o his) maakanaynoo Abuubakr fii ɗuytangol mo kulol tawde sirkooɓe ɓen hewtitike ɓe : "Wata a suno, pellet, Alla no wondi e meeɗe, O wallay'en". Alla Jippini deeƴere e ɓernde Nulaaɗo Makko on, O Jippini kadi konu ngu on yi'aano -ngun woni Malaa'ika ko faaboo on, On waɗi konngol sirkooɓe ɓen lesɗungol, Konngol Alla (lislaamu) ngol woni toowungol. Alla ko Fooluɗo e Jaati Mun e Laamu mun, gooto foolataa Mo, Ñeeñuɗo e Toppitagol Makko e Qudra Makko e Sari'a Makko.

Yehiree -onon gomɗimɓe ɓen- ka jihaadi ka neweende maa ka saɗteende, foti ko on sukaaɓe maa nayeeɓe, tiiɗnoron jawle mon e wonkiiji mon. Ko ngol yaltugol tiiɗnora jawle e wonki ɗon ɓuri wonande on e nafa aduan e laakara diini humondiro e kisal jawle maa wonkii, si on laatike annduɓe ɗum, rerdee e mum.

Sinno ko noddirayno ɗon ɓen duŋiniiɓe ma e (sakkintiniiɓe-ma)naafiqiiɓe ɓen laatino konhoyri e setewu newiingu,ɓe jokketeno an Annabiijo; ko woni tun,saɗteende yahdu ndun woɗɗanii ɓe, waɗi haa ɓe tulti. Aray ka ɓe woondirane Alla tuma lamnditiɗaa ɓe, ɓe wi'a : "Si men haɗtanno yaltugol jihaadi, men yaltidayno e mo'on".Hiɓe halkira ko'e maɓɓe faggitagol lepte Alla nden salaare maɓɓe e woondugol fenaande. Alla no anndi pellet, ko ɓe fenuɓe e ko ɓe nodditotoo e goondooje maɓɓe kadi.

Alla yaafike ma, an Nulaaɗo, e etaare maa duŋagol ɓe tultude. E ko duŋorani ɗaa ɓe ɗum ado a ɓanngannde ma goonguɓe ɓen e nganto mun, anndaa fenuɓe ɓen e ɗum, ontuma non duŋano ɗaa goonguɓe ɓen e maɓɓe, salano ɗaa fenooɓe ɓen?

Wonaa e jikku ɓen gomɗinirɓe Alla gomɗinal goonga e Ñalnde Darngal, nde ɓe ɗaɓɓira maa an Nulaaɗo, duŋayee tultugol(luutndaade) jihaadi fii laawol Alla jawle maɓɓe ɗen e wonkiiji maɓɓe ɗin. Alla no anndi gomɗuɓe ɓen e jeyaaɓe Makko ɓen ɓe duŋinotaak(sakkintinataako) ma si wanaa hara ɓe heɓu nganto haɗayngo ɓe yaltidugol e maaɗa.

Ko ɗaɓɓirayɓe ma -an Nulaaɗo- duŋayee tultugol ka jihaadi fii laawol Alla, ko ɓen naafiqiiɓe ɓe gomɗintaa Alla e Ñalnde darngal, sikke heɓi ɓe e ɓerɗe maɓɓe fii diina Alla kan. Kamɓe e sikke maɓɓe ɗen hiɓe weema ɓe ronka yiitude goonga kan.

Sinno ko ɓe goonguɓe e ko ɓe nodditotoo wonnde hiɓe faalaa yaltidugol e maaɗa ka jihaadi fii laawol Alla, ɓe hebilanayno ɗum heblaare. Ko woni tun, Alla añii yaltidugol ɓe e maaɗaa; O aamini ɓe fii yaltugol haa ɓe suɓii jooɗagol ka cuuɗi maɓɓe.

Hino moƴƴani on ka ɓen naafiqiiɓe ronka yaltidude e mooɗon, tawde si ɓe yaltuno, ɓe ɓeydataano on si wanaa bone e jiiɓitugol on. Ɓe yaccorayno kadi liɓugol jiɓdu hakkunde mon no sertiron. Hino e mooɗon, onon gomɗimɓe ɓen, heɗotooɗo ko ɓen paale ɗe ɓe saakitata, ɓe hooloo ɗe ɓe saakita, lurre naata hakkunde mon. Alla non ko annduɗo naafiqiiɓe tooñooɓe ɓen jilɓooɓe liɓa sikke hakkunde gomɗimɓe ɓen.

Gomɗii ɓee naafiqiiɓe etike bonnirgol hakkunde gomɗimɓe ɓen senndugol ɓe ado hare nden Tabuuka, ɓe huutoran-maa, an Nulaaɗo, noone kala e hiila (peeje), fii no battina e maa e fellital jihaadi ngal haa ballal Alla ngal ari e maaɗa, Alla teddini diina Makko kan O hoyni ayɓe makka ɓen. Ɓe añi ɗum, tawde hiɓe yelinoo nde meere nden foolata goonga kan.

Hino e naafiqi'en, ngantinorayɗo wi'ugol : "Nulaaɗo, duŋano lam tultugol ka jihaadi, wata a fawan yaltidugol e maaɗa haa mi faggitora junibi sabu fitina rewɓe ayɓe Ruum ɓen si mi hawrii e maɓɓe." Anndee ko e fitina ɓurɗo on mo ɓe aaƴotoo ɗon ɓe yani e mun, on woni fitina naafiqaaku e fitina tultugol ngol. Pellet, Ñalnde Darngal, Jahannama fiiltoto heeferɓe ɓen, gooto e maɓɓe fuutoytaako nge, ɓe heɓoytaa kadi laaworde magge.

Si neema arii heɓude ma an Nulaaɗo, immorde ka Alla, waltinoowo ma -wano ballal maa konhoyri-, ɗum metta ɓe, ɓe sunoo. Si musiiba -saɗtireede maa foolireede ayɓe heɓii ma-, ɓee naafiqiiɓe wi'a : Banni men nanngunoo hoore-amen, men reenii fewndo men tultunoo ka hare, gomɗimɓe ɓen kan yehi, hawroyi e wareede dahee; reftiɓe ɓee naafiqiiɓe ruttii ka ɓeynguueeji mun hiɓe weltora hisugol.

An Nulaaɗo, maakan ɓee naafiqiiɓe : "Memataa men si wanaa kon ko winndani men. Ko Kanko Seniiɗo On woni Giɗo heftuɗo men. Menen ko e Makko woni ko men fawi fiyakuuji amen. Ko e Makko tun gomɗimɓe ɓen fawota fiyakuuji maɓɓe, tawde O yonay ɓe, O moƴƴii faworteeɗo.

An Nulaao, maakan ɓe : Hara hiɗon habbitori men si wanaa nde ballal arata men maa sahodinde?! Menen kadi meɗen faditii nde lepte Alla ɗen jippotoo e mon, immorde ka Makko, ɗe halka on maa O leptira on e juuɗe amen, men wara on men daha, si O duŋanike men warugol on. Habbitee battane amen ɗen! Menen kadi meɗen faditii battane mon ɗen.

An Nulaaɗo, maakan ɓe : Funsiree(tottire) jawle mon ɗen yiɗi mon maa e añugol mon : on jaɓantaake kon ko nafqoton e majje, sabu keeferaaku mon ngun e yaltugol mon ngol e ɗoftaare Alla.

Haɗaali ɓe wintaaje maɓɓe ɗen jaɓeede, si wanaa piiji tati : ko ɓe yeddiri kon Alla e Nulaaɗo Makko on, e aamere maɓɓe nden ka julde, e ko ɓe wintortaako jawle maɓɓe ɗen kon yiɗugol ko añugolɓe wintorta. Tawde kamɓe ɓe jortaaki e julde maɓɓe e wintagol maɓɓe ngol mbarjaari.

An Nulaaɗo, wata jawle naafiqiiɓe ɓen e ɓiɗɓe maɓɓe haawne! Battane jawle maɓɓe e ɓiɗɓe maɓɓe ko bone. Alla waɗiroya ɗe lepte e hoore-maɓɓe, O jippina musiiba majje e maɓɓe haa O ƴettita ɓe e hoore keeferaaku maɓɓe, ɓe leptiroyee luttugol ka koose Yiite.

Naafiqiiɓe ɓen hino woondirana on onon gomɗimɓe ɓen, e hoore fenaande wonnde: kamɓe hiɓe jeyaa e mooɗon; ɓe jeyaaka non e mooɗon ka gunddoo, hay si ɓe feññianiion ɗum. Ko woni kamɓe ko ɓe yimɓe huluɓe wata kon ko heɓunoo sirkooɓe immorde e wareede dahee yanu e maɓɓe, waɗi si ɓe feññina lislaamu.

Sinno ɓee naafiqiiɓe heɓayno doñorgal ka reenira pittaali maɓɓe ɗin, maa pammeeje pelle ɗen ka ɓe suuɗoo maa pulirka mo ɓe sorata e mun, ɓe yahrayno ɗon ɓe naata e mun hara ko ɓe yacciiɓe.

Hino e naafiqiiɓe ɓen, on aybinoowo ma an Nulaaɗo, ka senndoore maa sadakaaji ɗin, tuma ɓe roni heɓude geɓal e majji : si a yeɗii ɓe geɓal e majji, ɓe weltora; si a yeɗaali ɓen non e majji, jaka yoo kamɓe hiɓe feññina tikkere.

Sinno ɓee naafixiiɓe aybinooɓe ma e senndoore sadaka nden weltorayno ko Alla farlani ɓe kon, e kon ko Nulaaɗo Makko on okki ɓe e ɗum, ɓe wi'a: "Alla yonii men. Arma Alla okkora men e ɓural Makko ngal ko O muuyi, Nulaaɗo Makko on kadi okkora men e kon ko Alla yeɗi mo. Menen ko faade ka Alla tun woni ko men rerɗiri yeɗeede e ɓural Makko". Ko si ɓe waɗuno ɗum ɓurunoo moƴƴannde ɓe e dii aybingl ma.

Anndee zakkaaji waɗɗiiɗi ɗin, ko fii waasuɓe ɓen.Ko ɓen woni jogiteeɓe mecce maa golle, kono hara njoɓdi maɓɓe yonataa ɓe. E miskiinaaɓe ɓen ɓe fow anndi fii mun. E ɓen :gollanooɓe mooɓugol zakka on e duŋayee Imaamu on, e ɓen heeferɓe woowtinirteeɓe Lislaamu, maa ɓen lo'uɓe liimanaaku fii no ɓe ɓeydora gomɗinal maa duñiraygol ɓe ɗum bone. Himo jonnee kadi : ɓen maccuɓe ko ɓe rinɗiniree, e ɓen ñawliiɓe ko duncitora hara wanaa tottirgol jawtungol keerol, maa bonnere -si ɓe heɓaali ko ɓe yoɓira. Himo jonnee kadi : ɓen heɓilantooɓe jihaadi fii ɓamtugol laawol Alla, e on seteejo mo njooɓa lelliri. Hertinangol ɓee ɗoo zakka on ko farilla immorde ka Alla. Alla ko Annduɗo ko moƴƴani jeyaaɓe Makko ɓen, Ñeeñuɗo e toppitagol Mo ngol e Sari'a Makko on.

Hino e naafiqi'en, lorrirayɓe Nulaaɗo Alla on (yo o his) konngol, tuma ɓe seeditii yaafuyee makko on, ɓe wi'a : "O heɗitoto kala haala, o senndindirtaa hakkunde goonga e fenaande". -Maakan ɓe an Nulaaɗo : Nulaaɗo Alla on heɗotaako si wanaa moƴƴere,himo goongini Alla, o goongini kumpite gomɗimɓe goonga ɓen, himo yurmee ɓe kadi. Pellet, Nulal makko ngal ko yurmeende wonannde ɓen gomɗimɓe mo. Ɓen non lorrayɓe Nulaaɗo Alla on kala noone, hino woodani ɓen lepte muusuɗe.

Naafiqiiɓe ɓen hino woondirana on -onon gomɗimɓe ɓen- Alla, wonnde ɓe wowlaali huunde ko lorrata Annabiijo on (yo o his);ɗum le ko fii no ɓe weltira on. Ko Alla non e Nulaaɗo Makko on ɓuri hanndude e weltinireede gomɗinal e golle moƴƴe, si ɓe laatike gomɗimɓe goonga tigi.

E ɓee naafiqiiɓe anndaa wonnde ko ɓe lunndoriiɓe Alla e Nulaaɗo Makko on ɗee kuuɗe maɓɓe, e wonnde kala lunndiiɗo ɓe, o naatoyay Yiite Jahanna Ñalnde Darngal, ko o luttoowo e magge poomaa? Awa ko ɗum woni koyeera e jaasree mawnde.

Naafiqiiɓe ɓen hino huli nde Alla Jippinta e Nulaaɗo Makko on cortewol ƴellintinayngol gomɗimɓe ɓen kon ko ɓe suuɗi e ɓerɗe maɓɓe immorde e keeferaku. Maaku an Nulaaɗo : "Onon neefige en, luttee e jalkitugol yuwa diina kan. Alla ko yaltiniroowo kon ko huluɗon fii mun Jippinirgol cortewol maa humpitirgol ɗum Nulaaɗo Makko on".

Mi woondii si an Nulaaɗo, a lanndike ɓee naafiqiiɓe, fii kon ko ɓe yuwiri diina kan ɓe yenni gomɗimɓe ɓen ɓaawo nde Alla humpitu-maa ɗum, ɓe wi'ay: "Hari ko e samakal men wonunoo, wanaa soobee." Maakan ɓe an Nulaaɗo : "E ko Alla, e Aayeeje Makko ɗen e Nulaaɗo Makko on laatiɗon hiɗon jalkita?

Wata on ngantinor ɗii ngantooji penaale: gomɗii on feññinirii keeferaaku jalkitugol ngol ɓaawo nde laatinoɗon suuɗuɓe ɗum. Si Men yawtiranay fedde e mooɗon ko ɓe tertori kon naafiqiyaagal e tuubugol laɓɓinana Alla, Men leptiray fedde mon goo ko ɓe haɓɓitorii kon e naafiqaaku ɓe ronki tuubude e mun.

Naafiqiiɓe ɓen, worɓe e rewɓe maɓɓe, ko hawtuɓe fiyaaku naafiqiyaagal. Ko ɓe lunndiiɓe gomɗimɓe ɓen. Hiɓe yamira ŋiñere, ɓe haɗa moƴƴere, ɓe wuddira jawle maɓɓe ɗen ɓe saloo wintagol(nafku-gol) e fii laawol Alla. Ɓe yejjitirii Alla nde ɓe ɗoftotoo Mo, Alla kadi tertori ɓe ronkude fewnude ɓe. Pellet, naafiqiiɓe ɓen, ko kamɓe woni yaltuɓe e ɗoftaare Alla nden e laawol goonga ngol, ɓe wona e yeddugol Mo faloo laawol majjere.

Alla fodii naafiqiiɓe ɓen e heeferaaɓe ɓen ɓe tuu-baali de naatnata ɓe Yiite Jahannama ka ɓe duumotoo e magge poomaa. Nge yonii ɓe lepte. Alla woɗɗiniiɓe e yurmeende Makko, hino woodani ɓe lepte duumiiɗe.

Onon naafiqi'en, keeferaaku mon ngun e jalkitgol mon ngol hino wa'i wano mofte fennooɓe adinooɓe on ɓen : ɓen hino ɓurunoo on tiiɗude doole, ɓe ɓuri on jawle e ɓiɗɓe. Ɓe dakmitori geɓal maɓɓe ngal ɓe winndanaa ngal e dakamme aduna e tuuyooji mun, wano dakmitorɗon onon kadi e geɓal mon ngal sugu ɗeya mofte fennooɓe yawtuɓe no dakmitornoo, jumpuɗon e penaale yuwirɗon e Nulaaɗo on wano ɓen jumpirnoo e penaale e yuwugol Nulaaɓe maɓɓe. Ɓen siforɓe ɗin sifaaji ŋiñaaɗi, ko ɓen woni ɓe golle mun poɓiri bonugol majje ka Alla sabu keeferaaku, ko ɓen woni hayruɓe ɓen yolli=njolnii wonikiiji mun e halkaare.

E kabaaru mofte fennunooɓe ɓen e lepte liɓanooɗe e maɓɓe araali ɓee naafiqiiɓe : Yimɓe Nuuhu ɓen, e yimɓe Huudi ɓen, e yimɓe Saalihu ɓen, e yimɓe Ibraahiima ɓen, e wonndiiɓe Madyana ɓen, e koɗanɗe yimɓe Luuti ɓen? Nulaaɓe maɓɓe ɓen addanno ɓe hujjaaji ɓannguɗi laaɓi. Alla wonaali tooñoowo ɓe; tawde Nulaaɓe maɓɓe ɓen jertinno ɓe, si ko woni ko wonkiiji maɓɓe ɗin woni ko ɓe tooñiraynoo yeddugol Alla fenna Nulaaɓe Makko ɓen.

Gomɗimɓe worɓɓe ɓen e gomɗimɓe rewɓe ɓen yoga maɓɓe ko wallirooɓe yoga fii gomɗinal ko hawti ɓe. Hiɓe yamira moƴƴere, nden woni kala ko Alla yiɗi e ɗoftaare Makko wano tawhiidi e julde, hiɓe haɗa kadi bone, ɗum woni kala ko tikkinta Alla immorde e geddi wano keeferaaku maa ribaa, hiɓe ñiiɓinira julde nden no timmiri, ɓe ɗoftoo Alla e Nulaaɗo Makko on. Ɓen siforiiɓe ɗin sifaaji yettiniiɗi, arma Alla naada ɓe e yurmeende Makko. Pellet, Alla ko Fooluɗo Mo fooletaake, Ñeeñuɗo e tagu Mun e toppitagol Mun e sari'a Mun.

Alla fodii gomɗimɓe worɓe ɓen e gomɗimɓe rewɓe ɓen naadugol Ñalnde Darngal Aljannaaji ɗi canɗi ilata senngo ley kuɓeeje majji, ko ɓe duumotooɓe ndr majji poomaa, ɓe maayataa ton, ɓe sertataa e neema. O fodii ɓe kadi naadugol e kuɓeeje moƴƴuɗe ka nder Aljannaaji duumal, e yarluyee on mo Alla jippinoyta e maɓɓe on ɓurɗo ɗum fow mawnude. Ko jantaa koo, ko ɗum woni malal mawnungal, ngal eɓɓondirtaa e malal woo.

Ko an yo Nulaaɗo, tiiɗnor haɓirgol heeferɓe ɓen silaama, tiiɗnoraa kadi haɓirgol naafiqiiɓe ɓen konngol e hujja; saɗtinanaa ɓe kala maɓɓe, tawde ko ɗum ɓe foddi. Ñiiɓirde maɓɓe nden Ñalnde Darngal ko ka Jahannama, nge bonii ruttorde maɓɓe.

Naafiqiiɓe ɓen hino woondira Alla fenaande : wonnde ɓe wowlaali ko yottii maa kon e yennoore e aybineede diina ma immorde e maɓɓe.Gomɗii le ɓe wowlii kon ko yotti maa fii maɓɓe ko no heefrɗina ɓe.Ɓe feññini keeferaaku ngun ɓaawo nde ɓe gomɗinnoo.Ɓe himmiri koɓe heɓaali e warugol Annabiijo on (yoo his).Ɓe añiraali huunde si wanaa ko añinaaki:nden woni ko Alla moƴƴorii e maɓɓe kon alɗinirgol ɓe konohoyri ndin ndi O neemini e Annabiijo Makko on.Si ɓe tuubanii Alla ɓe yaltii e naafiqaaku,ɗum wonanay ɓe moƴƴere e dii heddagol e mun.Si ɓe huccanii non tuubangol Alla ngol,O leptiray ɓe lepte muusuɗe warugol dahe e aduna e lepte muusuuɗe ka Yiite laakara. Giɗo woo alaaa ɓe mo no solnana ɓe daɗnde ɓe e lepte ɗen, wanaa kadi ballo duñanoowo ɓe ɗen lepte.

Hino e naafiqiiɓe ɓen ahoduɓe e Alla wonnde : "Si tawii tun Alla okkii men e ɓural Makko ngal, ma men sakko e hatonjimɓe ɓen, men laatoo jeyaaɓe e moƴƴuɓe moƴƴini golle ɓen.

Nde Alla Seniiɗo On okkunoo ɓe e ɓural Makko ngal, ɓe ronki hunnude ahadi maɓɓe ndi ɓe ahodunoo e Alla ndin. Ko ɓe waɗi, ko salorgol jawle maɓɓe ɗen ɓe ronki sakkaade huunde e majje, ɓe hucciti ko ɓe ɗuurniiɓe e gomɗinal.

Alla waɗi battane maɓɓe ɗen naafiqaaku tabitayngu ka ɓerɗe maɓɓe haa Ñalnde Darngal. Ɗum ko lepte maɓɓe sabu ko ɓe lunndii ahadi Alla ndin kon e fenaande maɓɓe nden.

E ɓee naafiqiiɓe anndaa wonnde Alla no anndi ko ɓe suuɗata kon e pewje e hodaka jonɗe maɓɓe, e wonnde pellet, Seniiɗo on ko annduɗo wirniiɗi ɗin? Huunde suuɗaaki Mo e kuuɗe maɓɓe ɗen, O yoɓitoyay ɓe ɗum.

Ɓen aybinooɓe gattooɓe jeyaaɓe e gomɗimɓe ɓen nde ɓen funsata sadakaaji hawruɗi, ɓen ɓe heɓataa ko itta si wanaa seeɗa e yeru maɓɓe on. Ɓe jalkita ɓen ɓe wi'a : "Ko sadakaaji mon nafata?!", Alla jalkitiriiɓe njoɓdi jalkitugol ɓe gomɗimɓe ɓen. Hino woodani ɓe lepte muusuɗe.

An Nulaaɗo, ɗaɓɓan ɓe haforaneede, maa hara a ɗaɓɓanaali ɓe ɗum. Hay si a ɗaɓɓanii ɓe ɗum laaɓi cappanɗe jeeɗiɗi, ɗum e ɗuuɗude, hewtataa e ko Alla haforanta ɓe kon; tawde kamɓe ɓe yeddii Alla e Nulaaɗo Makko on. Alla hawrindintaa e goonga, ɓen yaltirɓe tewaare e faandaare e ɗoftaare makko nden.

Naafiqiiɓe tultunooɓe hare Tabuuka nden weltorii jooɗagol maɓɓe ngol ronka yahude ka jihaadi fii laawol Alla ɓe lunndii Nulaaɗo Alla on. Ɓe añi haɓirgol jawle maɓɓe ɗen e wonkiiji maɓɓe ɗin fii laawol Alla ngol wano gomɗimɓe ɓen tiiɗnori, ɓe wi'irani naafiqiiɓe yiɗɓe maɓɓe ɗen aamingol ɓe : "Wata on yatu e nguleendi ndin." Hare Tabuuka nden hawri e fewndo nguleendi. An Nulaaɗo, maakan ɓe : "Ko Yiite Jahannama ngen habbii nge naafiqiiɓe ɓen ɓuri tiiɗude nguleendi diii nguleendi ndin ndi ɓe dogata." - Sinno ɓe annduno -

Yo ɓee naafiqiiɓe tultuɓe jihaadi jalu seeɗaa ka nguurndam maɓɓe aduna lannoo-jam, ɓe wulloya ko ɗuuɗi e nguurndam maɓɓe laakara heddotoo-ɗam; njoɓdi kon ko ɓe laatinoo hiɓe faggitoo e keeferaaku e geddi aduna.

Si Alla ruttitii ma, an Annabiijo, faade e fedde jeyaande e ɓee naafiqiiɓe tabituɓe e naafiqaaku, ɓe ɗaɓɓir-maa duŋayee yaltidugol e maaɗa e hare goo, maakan ɓe : "On yaltidataa e am, onon naafiqi'en, e hare fii laawol Alla poomaa, ɗum ko lepte mon e rentorɗum bone waɗoowo tuma wonduɗen. Onon on welanooma jooɗagol tulta hare Tabuuka nden, awa jooɗodee e ɓen newnanaaɓe tultugol immorde e nawnuɓe e rewɓe e fayɓe".

An Nulaaɗo, wata a juulu e maayɗo woo e naafiqiiɓe ɓen poomaa, wata a daro e hoore qabru makko du'anagol haforaneede. Ɗum le ko tawde ɓe yeddii Alla e Nulaaɗo Makko on ɓe maayi ko ɓe yaltuɓe e ɗoftaare Alla. Kala laatorɗo non, o juuletaake o du'antaake kadi.

An Nulaaɗo, wata jawle e ɓiɗɓe naafiqiiɓe ɓen haawne! Anndu ko Alla faandii, ko nde O leptirta ɓe ɗe ka nguurndam aduna kon ko ɓe naɓata e sonnjaa(tapereeji), e nde wonkiiji maɓɓe ɗin yaltata e ɓalli maɓɓe ɗin hara ko ɓe yedduɓe.

Si Alla Jippinii Cortewol=simoore e Annabiijo Makko on Muhammadu (yo o his), yowondirgol e yamiroore gomɗinal Alla tiiɗnora jihaadi ndin fii laawol Makko ngol, joomiraaɓe jawle ɓen e maɓɓe duŋinoto ma tultugol, ɓe wia : "Accu men tultida(lunndo) e jomen nganto ɓen wano lo'uɓe ɓe sellaani.

Ɓee naafiqiiɓe welanaama wonkiiji maɓɓe ɗin koyeera e jaasere, tuma nde ɓe suɓinoo tultidugol e joomiraaɓe nganto ɓen. Alla noti e ɓerɗe maɓɓe ɗen sabu keeferaaku e naafiqaaku maɓɓe ngun, kamɓe ɓe anndaa nafa maɓɓe.

Ammaa Nulaaɗo on e gomɗimɓe wonnduɓe e makko ɓen, ɓe tultaano ka jihaadi fii laawol Alla wano ɓee ɗoo. Kamɓe ɓe tiiɗnorno e laawol Alla ngol jawle maɓɓe ɗen e wonkiiji maɓɓe ɗin. Njoɓdi maɓɓe ndin ka Alla woni nafooreeji aduna, wano ballal e konhoyri. Ɓe heɓi kadi nafooreeji laakara, wano naatugol Aljanna, e maleede e daɗugol ko huli.

Alla heblanii ɓe Aljannaaji ɗi canɗi ilata senngo ley kuɓeeje maɓɓe, ko ɓe duumotooɓe ton poomaa, ɓe heɓataa ko lannata ton. Ko ndin njoɓdi woni malal mawngal ngal yeru mun alaa.

Jeyaaɓe e yimɓe buruure Madiina ɓen e takko ɗon on ari hino ngantinoo e Nulaaɗo Alla on (yo o his), fii yo o newnan ɓe tultugol e jihaadi ndin. Yimɓe goo kadi tulti, ɓen ɗon kan hay duŋinanooki yaltugol ngol; tawde ɓe gomɗinaa Annabiijo on e fodoore Alla nden. Aray ka lepte muusuɗe hawra e ɓen sabu keeferaaku maɓɓe ngun.

Bakkaatu fawaaki rewɓe ɓen, e fayɓe ɓen, e nawnuɓe ɓen, e ronkituɓe ɓen, e wumiɗuɓe ɓen e waasuɓe ɓenɓe heɓataa ko wintoo e jawdi ɓen fii ɓe tultii ka jihaadi. Tawde nganto maɓɓe ngon ko jaɓaango, si ɓe laɓɓinanii Alla e Nulaaɗo Makko on ɓe golliri sari'a Makko. Laawol feloore alanaa moƴƴimɓe ɓen e ɓen joomiraaɓe nganto'en. Alla ko Haforowo junuubi moƴƴimɓe ɓen, Hinnotooɗo ɓe.

Bakkaatu alanaa kadi ɓen tultuɓe yahdugol e maaɗa ɓe aru-maa, an Nulaaɗo, hiɓe ɗaɓɓire waɗɗingol ɓe daabeeji, maakanɗaa ɓe : "Mi heɓaali ko mi waɗɗina on e daabe." Ɓe huccita ɓe acce hara gite maɓɓe no yuppa gomɗi suno fii ɓe heɓanaali ko'e maɓɓe maa ɓe heɓire ko ɓe wintoo.

Nde Alla ɓannginnoo wonnde laawol leptirngol alanah joomiraaɓe ngnto ɓen, O jantino ɓen fodduɓe e lepte, O Daali : "Anndu ko laawol leptirngol e nanngitirngol woodani, ko ɓen ɗaɓɓirooɓe ma, an Nulaaɗo, duŋayee fii tultulgol ka jihaadi, hara kamɓe ko ɓe hattamɓe ɗum sabu woodde hebilorɗe mun.Ɓe welanaama ko'e maɓɓe ɗen koyeera e jaasere, tuma nde ɓe heddodinoo e tultulɓe ɓen ka cuuɗi. Alla notii e ɓerɗe maɓɓe ɗen, ɗe battinortaa waaju. Kamɓe non, sabu nden notannnde, ɓe anndaa ka moƴƴere maɓɓe woni, sakko ɓe suɓoo nde. Ɓe anndaa kadi bone maɓɓe, sakko ɓe woɗɗitoo mo.

Naafiqiiɓe tultunooɓe ɓen ka jihaadi no ngantinora ngantooje lo'uɗe, tuma ɓe ruttitii e jihaadi ndin. Alla no tinndinira Annabaajo Makko on e gomɗimɓe ɓen jaabagol ɓe wonnde : "Wata on ngantinore penaale. Men goongintaa on e ko habroton men. Gomɗii Alla anndinii men goɗɗum e ko woni e pittaali mon. Arma Alla e Nulaaɗo Makko on yi'a si on tuubay, Alla jaɓana on tuubuubuyee, maa hara on luttay e naafiqaaku mon? Refti rutteɗon faade ka Alla On annduɗo kala huunde, O habra on kon ko laatinoɗon hiɗon golla, O yoɓita on ɗum. Awa yaccanee tuubugol ngol gollon golle-moƴƴe.

Ɓee lunndiiɓe, hiɓe fawii ka ɓe woondirana on Alla, onon gomɗimɓe ɓen, si on ruttitike e maɓɓe, fii fellintinangol on ngantooje maɓɓe mehreɗe ɗin, fii tun wata on feluɓe. Tertoreeɓe tertagol tikkere, taccon ɓe. Pellet, koɓe soɓirɓe nder. Jaaƴorde maɓɓe nden nde ɓe ñiiɓoyta on e mun, njobdi faggitanɗe maɓɓe ɗen immorde e naafiqaaku e bakkaatu, ko Jahannama.

Ɓee naafiqiiɓe tultuɓe hino woondirana on, onon ɓee gomɗimɓe, fii yo on wele ɓe, jaɓanon ɓe ngato. Wata on wele ɓe. Si on welaama ɓe, gomɗii on lunndike taguɗo On. Tawde Kanko O weletaake yimɓe yaltirɓe e ɗoftaare Makko nden keeferaaku e naafiqaaku. reentee, onon ɓee juulɓe, nde weleteɗon ko Alla welaaka.

Yimɓe ledde ɓen, si ɓe yeddii ɓe naafoqinii, ɗum wonay ko ɓuri tiiɗude e keeferaaku woɗɓe goo jeyaaɓe e yimɓe saare. Ko naafiqaaku maɓɓe ngun kadi ɓuri mawnde, ko kamɓe kadi hannde e majjeede diina, ɓe ɓuri hanndude nde ɓe anndataa farillaaji e sunnaaji e doɓtanɗe ñaawooje ɗe Alla jippini e Nulaaɗo Makko on; tawde ko ɓe faaɗuɓe, ñaaɗuɓe, fanɗuɓe jillondiral.Alla ko Annduɗo fiyakuujimaɓɓe, hunnde suuɗaaki Mo e majji. Ñeeñuɗo e toppitagol Makko e sari'a Makko.

Hino jeyaa e yimɓe ladde naafiqiiɓe ɓen, on fiɓuɗo wonnde ko o wintotoo kon e jawle fii laawol Alla ngol, ko sooyo, sikkugol wonnde o heɓataa baraaji mun si o wintike, e wonnde o leptirtaake accugol ɗum. e ɗum, himo wintora yiingo e rentaade, o habbitoo nde bone yanata e mon onon gomɗimɓe ɓen, fii no o ɓoortoda e mooɗon. Ko woni tun, Alla waɗii yela maɓɓe bonɗo on nde jamaanu yiilotoo e gomɗimɓe ɓen yanu e maɓɓe kamɓe. Alla ko Nanoowo koɓe haalata, Annduɗo ko ɓe suuɗata.

Hino jeyaa kadi e yimɓe ladde ɓen, on goomɗinɓe Alla, o gomɗina Ñalnde Darngal, o waɗa ko o wintotoo(nafqata) kon e jawle fii laawol Alla ngol, ɓaɗtorɗum ka Alla, e jokkorgal du'aa Nulaaɗo on mo jam e kisiyee woni e mun e insinaneede. Anndee pellet, ko o wintii kon fii laawol Alla e doomugol du'aa Nulaaɗo on, fow ko ɓaɗorɗi ka Alla. O tawoyay mbarjaari mun ndin ka Alla ko naatugol Aljanna wonndude e Yurmeende Alla yaajunde moftunde haforal Makko e Aljannaaji Makko. Pellet, Alla ko Haforanoowo kala tuubuɗo e jeyaaɓe Makko ɓen, Hinnotooɗo ɓe.

Ɓen yaccinooɓe adii e gomɗinal, immorde e feruɓe ɓen acciti galleeji mun e leyɗe mun fii Alla, e ɓen weernuɓe wallunooɓe Annabiijo Makko on(yo o his), e ɓen jokkitirɓe ɓen ɗon feruɓe e weernuɓe adinooɓe e gomɗinal no moƴƴiri, fiɓnde e konngol e kuugal, Alla welaama ɓe, O jaɓaniiɓe ɗoftaare maɓɓe nden, kamɓe kadi ɓe welaama Mo ko O yeɗiri ɓe kon mbarjaari Makko mawndi ndin. O Maranii ɓe Aljannaaji ɗi canɗi ilata senngo ley kuɓeeje majji, ko ɓe duumotooɓe nder ton poomaa. Ko ndin njoɓdi ɗon woni malal mawnungal ngal.

Hino e ɓen wonɓe sera saare Madiina nden, jeyaaɓe e yimɓe ladde ɓen, naafiqiiɓe, hino e yimɓe Madiina ɓen kadi naafiqiiɓe ñiiɓuɓe tabiti e naafiqaaku. An Nulaaɗo, a anndaa ɓen, ko Alla woni ko anndi ɓe. Meɗen fawii leptugol ɓe laaɓi ɗiɗi : laawol ka aduna, ɗum wona huncugol naafiqaaku maɓɓe wara ɓe daha, laawol ngola woni ka laakara, gila ga lepte qabri, refti ɓe ruttoyee Ñalnde Darngal faade e lepte mawɗe ka koose Yiite.

Hino e yimɓe Madiina ɓen, woɗɓe goo luultindnoo- ɓe ka hare ko aldaa e nganto, ɓe qirritii wonnde ɓe alaano nganto, e wonnde ɓe addaana ngantiooji penaale. Ɓe jilli golle maɓɓe moƴƴe ɗen e dewal Alla ngal, nagnnito e sari'a Makko on, e tiiɗnorgol jihaadi fii laawol Makko ngol, golle bonɗe. Hiɓe tijjii nde Alla jaɓanta ɓe tuubuubuyee, O yawtana ɓe. Pellet, Alla ko Haforanoowo kala tuubuɗo e jeyaaɓe Makko ɓen, Hinnotooɗo ɓe.

Ƴettu, an Nulaaɗo, e jawle maɓɓe ɗen zakka, laɓɓiniraaɓe mo e tuundi gedde e bakkaatu, lootiranaa ɓe ɗum moƴƴi maɓɓe. Du'anoɗaa ɓe ɓaawo a ƴettude ɗum. Pellet, du'aa maa on ko yurmeende e deeƴere wonannde ɓe. Alla ko Nanoowo du'aa maa on, Annduɗo golle maɓɓe e annuyeeji maɓɓe.

Yo ɓee tultulɓe ka jihaadi e ɓen tuubanooɓe Alla anndu, wonnde Alla jaɓanay jeyaaɓe Makko ɓen ruttotooɓe e Makko tuubuubuyee, e wonnde O jaɓay sadakkuuji ɗine hoore ko O yondiniiɗo e majji, O yoɓa sakkiiɗo on e sadaka makko on, e wonnde Kanko Seniiɗo on, ko O Jaɓanoowo kala tuubuɗo e jeyaaɓe Makko ɓen, Hinnotooɗo ɓe.

An Nulaaɗo, maakan ɓee lutndiunooɓe ka jihaadi e ɓen tuubuɓe ruttitii e junuubi mun : "Heɓɓitanee lor ko faatarii mon ko mon, laɓɓinanon Alla golle mon, gollon ko welata Mo. Arma Alla e Nulaaɗo Makko on e gomɗimɓe ɓen yi'a golle mon ɗen. Aray ka ruttiteɗon Ñalnde darngal ka Joomi mon On annduɗo kala huunde, himo anndi ko suuɗoton e ko feññinton.O humpitoyay on ko gollaynoɗon aduna, O yoɓita on ɗum".

Hino e tultunooɓe hare Tabuuka nden, yimɓe goo ɓe alaano nganto. Ɓen ɗon ko nennanaaɓe e muyɗe Alla e hikma Makko, O ñaawiray fii maɓɓe no O Muuyiri : immaa O lepta ɓe si ɓe tuubanaali Mo, maa O jaɓana ɓe tuubuubuyee si ɓe tuubii. Alla ko Annduɗo hannduɓe e lepte Makko ɗen, e ɓen hannduɓe e yaafuyee Makko. Ñeeñuɗo e sariya Makko e toppitagol Makko. Ɓen lunndinoo- ɓe ɓaawo nganto ko : Maraarah ibn ar-Rabi’, Ka’b ibn Maalik e Hilaal ibn `Umayyah.

Hino jeyaa e naafiqiiɓe ɓen kadi, ɓen diidirɓe juulirde ko woori ɗoftaare Alla. Toode ko lorriɗum juulɓe ɓen, e feññinirɗum keeferaaku nde ɓe semmbina naafiqi'en, e senndindirgol hakkunde gomɗimɓe ɓen, e hebilorɗum on haɓuɗo Alla e Nulaaɗo Makko ɗon ko adii diidugol juulirde nden. Pellet, ɓee naafiqiiɓe woondiranay on wonnde : "Men faandoraaki si wanaa moƴƴagol e juulɓe ɓen!" Alla no seeditoo wonnde ko ɓe fenooɓe e kon ko ɓe nodditorta.

Sifa ndee juulirde ɗoo, an Nulaaɗo, wata a nooto noddaandu naafi'en fii juulugol e mayre. Tawde ko juulirde Qubaa` nden didiranoonde ka arannde e kulol Alla, ɓuri hanndude nde juulataa e mun diini ndee mahiraande keeferaaku. Hino ka juulirde Qubaa`, worɓe yiɗuɓe nde ɓe laɓɓinorta tayreeji e sobeeji ɗin ndiyam, ɓe laɓɓinora geddi ɗin tuubugol insinoo. Alla no yiɗi laɓɓtooɓe ɓen e tayre, e soɓe e junuubi.

Hara on didirɗo maadi mun ndin kulol Alla, e ñemtingol yamaruyee Makko, woɗɗitoo haɗaaɗi Makko, e yarluyee Alla e hebbinorgol golle ɗoftaare, fotay e on didirɗo juulirde mun nden seerndugol juulɓe ɓen, semmbina naafiqiiɓe ɓen, senndindra hakkunde gomɗimɓe ɓen?! Ɓen ɗiɗo fotataa limoore. Arano on, didannde makko ndin, ko tiiɗundi, fotondirndi, o hulaa ka ndi yirbii. Oya kan, didannde makko nden no wa'i wa diiduɗo sera ngayka yirbuka, nde yirba nde yana, o yirbida e didannde makko nden ka Yiite Jahannama. Alla hawrindintaa yimɓe tooñirooɓe keeferaaku e naafiqaaku ɓen ekn e peewal.

Nde njuulirde maɓɓe nde ɓe mahi, nde seerata ko nde lorra sikke e naafiqaaku tutaangu ka ɓerɗe maɓɓe haa ɗen ɓerɗe taƴira maayde maa wariree- de kaafa. Alla ko Annduɗp golle jeyaaɓe Makko ɓen, Ñeeñuɗo e ko O ñaawata kon immorde e njoɓdi golle moƴƴe maa bonɗe.

Pellet, Alla Seniiɗo on sooditirii e gomɗimɓe ɓen wonkiiji maɓɓe ɗin, ɗum e wonnde ko Kanko jeyi, coggu Aljanna. Hiɓe haɓira fii no Konngol Alla ngol ɓamtora, ɓe wara heeferɓe ɓen, ɓen kadi wara ɓe. Alla fodii nden fodoore goonga ka Tawreeta, Deftere Muusaa nden, e ka Linjiila, Deftere Iisaa nden (yo ɓe his), e ka Alqur'aanaare, Deftere Muhammadu nden (yo o his). Alaa hunnuɗo ahdi mun ɓuri Alla Seniiɗo On. Wewliree, onon muumini'en, ngeygu mon ngu yeeyoduɗon ngun e Alla. Gomɗii on dañii geɓal mawnungal. Ko ngun njeeygu woni malal mawnungal ngal.

Ɓen dañuɓe ndin njoɓdi, ko ɓen tertiiɓe kon tikkinta Alla, ɓe jokki kon ko O welaa O yiɗi, jebbilorayɓe yankinanagol Alla, ɓe tiiɗnii e ɗoftaare Makko. Ɓen yettooɓe Joomi maɓɓe e fyaaku kala, hoorooɓee, juulooɓe, yamirooɓe ko Alla e Nulaaɗo Makko yamiridi, haɗooɓe ko Alla e Nulaaɗo Makko on haɗidi, reenoriiɓe jokkugol yamiraaje Alla ɗen, woɗɗitoo haɗaaɗi Makko ɗin. An Nulaaɗo, humpitu ɓee gomɗimɓe siforiiɓe ɗii sifaaji, ko welwlinta ɓe aduna e laakara.

Haananaa Annabiijo on wanaa kadi gomɗimɓe ɓen nde ɓe ɗaɓɓanta sirkooɓ ɓen yaafuyee, hay si tawii non ko enɗamɓe maɓɓe, ɓaawo nde feeñani ɓe wonnde ɓen ko yimɓe Yiite, ko ɓe maayidi kon e sirku.

Ko Ibraahiima ɗaɓɓirannoo ben mun kon yaafuyee wonaa si wanaa fii ko fodoore nde o fodondirnoo e makko, jortagol yo o silmu. Nde ɓanngannoo Ibraahiima wonnde ben makko ko gaño Alla, tawde laaɓal reedu nafataa mo, maa hara o anndirii wahayu on wonnde on maayiday e keeferaaku, o hisnii e mum, insinangol mo ngol ko e makko tun iwrunoo, ɗum wanaa lunndagol ñaawoore Alla wahayinaande e makko. Pellet, Ibraahiima (yo o his), ko ɗuuɗuɗo yankinanagol Alla, ɗuuɗuɗo laaɓal reedu e yawtangol yimɓe makko tooñooɓe ɓen.

Alla wonah ñawoowo yimɓe e majjere ɓaawo nde O hawriniɓe e peewal, haa O ɓannginana ɓe harmuɗi haanaaɗi renteede ɗin. Si tawii non ɓe arii e faggitagol ɗin harmuɗi ɓannginaaɗi, O ñaawitiray ɓe majjere. Pellet, Alla ko Annduɗo kala huunde, huunde suuɗaaki Mo. Gomɗii O Anndinii on ko on anndaano.

Pellet, ko Alla woodani laamu kammuuli ɗin e leydi ndin. Kafidiiɗo alanaa Mo e ɗum. Huunde suuɗaaki Mo e ɗin ɗiɗi. Himo wuurna ko O yiɗi wuurnugol, O wara ko O yiɗi warugol. Alanaa on, onon yimɓe ɓen, ko woori Alla, immorde e giɗo firlittooɗo e fiyakuuji mon, wanaa ballo duñanoowo on bone, wallitoo on e ayɓe mo'on.

Gomɗii Alla jaɓanii Annabiijo Makko on Muhammadu (yo o his) tuubuubuyee, tuma nde O sakkitnoo naafiqiiɓe ɓen tultugol ka hare tabuuka. o jaɓani kadi feruɓe ɓen, e walluɓe-weerni ɓen ɓe tultaano tuubuubuyee, ɓen jokkunooɓe Annabiijo on ka hare Tabuuka, fewndo nguleendi, e anngal njooɓa e tiiɗere ayɓe. Fewndo ka ɓerɗe woɗɓe e maɓɓe eɓɓunoo himmirde tertagol hare nden, sabu ko nde tiiɗi kon. Refti Alla hawrindini ɓe e tabital yaha ka hare, O jaɓani ɓe tuubuubuyee. Pellet, Kanko Seniiɗo On, ko O yaafotooɗo ɓe, Hinnotooɗo ɓe. Hino jeyaa e ko O yurmertee ɓe, hawrindingol ɓe e tuubugol jaɓanee.

Gomɗii Alla jaɓanii tatooɓe ɓen tuubuubuyee, ɓen woni : Ka’b ibn Maalik, Maraarah ibn ar-Rabii’ e Hilaal ibn `Umayyah, ɓen leelnanooɓe jaɓaneede tuubuubuyee maɓɓe, ɓaawo nde ɓe lunndinoo yaltidugol e Nulaaɗo Alla on (yo o his) Tabuuka. Annabiijo on yamiri taƴagol ɓe, ɓe sunii ko ɓe aani fii ɗum haa leydi ndin yaajude faaɗani ɓe, ɓerɗe maɓɓe ɗen ɓittorii nden taƴeede, ɓe felliti wonnde moorgal woo alanaa ɓe si wanaa faade ka Alla tun. Alla yurmooɓe hawrindingol ɓe e tuubuubuuyee, refti O jaɓani ɓe tuubuubuyee. Pellet, ko Kanko woni jaɓanoowo jeyaaɓe Makko ɓen tuubuubuyee, Hinnotooɗo ɓe.

Ko onon yo gomɗimɓe Alla e Nulaaɗo Makko on, ɓe gollitiri sari'a Makko on! Huliree Alla ɗoftagol yamirooje Makko, woɗɗitoo haɗaaɗi Makko, laatodon e goonguɓe liimanaaku ɓe ka konngol e ka kuugal. Ko goonga kan tun daɗndata on.

Haananaa yimɓe Madiina ɓen, wanaa kadi ɓen wonɓe takko maɓɓe immorde e hoɗuɓe ladde ɓen, nde ɓe luttitata ɓaawo Nulaaɗo on (yo o his) si o yaltanii hoore-makko jihaadi. Haananaa ɓe kadi nde ɓe ɓurnata ko'e maɓɓe e Nulaaɗo on. Ko waɗɗii ɓe, ko nde ɓe funsira wonkiiji maɓɓe diini habbitagol nde Nulaaɗo on hikkotoo yeeso. Ɗum le, ko tawde ɗonka heɓataa ɓe, wanaa ronkere, wanaa kadi heege fii laawol Alla ngol, ɓe tippataa e nokku mo heeferɓe ɓen tikkiranta ɓe, ɓe hawrataa e gaño warugol maa dahugol, konhoyri maa poolal, si wanaa Alla winndiranay ɓe ɗum gollal moƴƴal ngal O jaɓanta ɓe. Pellet, Alla yeeɓataako njoɓdi moƴƴinooɓe ɓen, si ko woni, O timminayɓe ɗum no timmiri, O ɓeydanaɓe hoore ɗon.

Ɓe funsirtaa(tottirtah) jawdi, ɗuuɗi fanɗi, ɓe lummbataa caatngol, si wana ɓe winndantekon ko ɓe funsi e ko ɓe setii, fii yo Alla warjo ɓe. O yeɗoya ɓe ka laakara njoɓdi ɓurndi mawnude ko ɓe gollaynoo kon.

Haananaa gomɗimɓe nde yalta hare ɓe fow maɓɓe wata ayɓe ɓen gaynuɓe. Ko haɗno fedde e maɓɓe yaltana jihaadi ndin, fedde goo heddoo ko ɗowta Nulaaɗo on (yo o his), ɓe faaminoo e diina kan kon ko ɓe nanirta Nulaaɗo on immorde e Alqur'aana e ñaawooje sari'a, ɓe jertinoya ɗum yimɓe maɓɓe ɓen si ɓe ruttike e maɓɓe, jortagol nde ɓen rentotoo e lepte Alla ɗen, ɓe ɗoftoo yamirooje makko ɗen, ɓe woɗɗitoo haɗaaɗi Makko ɗin. Ɗee Aayeeje ko fii coggal ngal Nulaaɗo on imminaynoo ka seraari,(koninkooɓe) suɓanoo ngal fedde e maɓɓe.

Allaahu on yamirii gomɗimɓe ɓen haɓugol heeferɓe ɓen sabu koɓe sabimbinta kon bonande e gomɗimɓe ɓen tawde hiɓe ɓadondiri. O yamiri ɓe kadi feññingol doole e tiiɗere fii hulɓingol ɓeya sabu bone maɓɓe. Alla ko wonndirɗo e gomɗumɓe ɓen ballal e faabo Makko.

Si Alla jippinii cortewol e Nulaaɗo Makko on Muhammadu (yo o his), hino e naafiqiiɓe ɓen on lanndorayɗo jalkitugol o wi'a : "Ko hommbo e mooɗon woni ko ngol cortewol jippiingol e Muhammadu ɓeydi gomɗinal?" Ammaa ɓen gomɗimɓe Alla ɓe goongini Nulaaɗo Makko on, gomɗii jippagol ngol cortewol ɓeydii ɓe gomɗinal e hoore gomɗinal maɓɓe adinoo ngal, e hoore ko ɓe weltoriiɓe ko wahyu on jippini kon tawde nafa maɓɓe aduna e laakara no e mun.

Ammaa non naafiqiiɓe ɓen, ko Alqur'aana jippoda-ta kon e ñaawooje maa fillayee, ɗum ko ñawu e soɓe ɓeydata ɓe sabu ko ɓe fenni ko jippini kon. Ñawu ɓerɗe maɓɓe ɗen ɓeydora jippagol Alkuran tawde tuma kala goɗɗum jippii, ɓe wullitoto ɗum, ɓe maayidiri non e keeferaaku.

E ɓee naafiqiiɓe yi'aali ɓe waajitora ko Alla jarribori ɓe kon huncugol fiyaaku maɓɓe wirta naafiqaaku maɓɓe hitaande kala laawol maa laaɓi ɗiɗi? Refti hoore ko ɓe anndi kon ɗum ko Alla waɗi, ɓe tuubatantaa Mo e keeferaaku maɓɓe ngun, wanaa kamɓe kadi woni ɓoorotooɓe e naafiqaaku maɓɓe, wanaa kadi ɓe waajitorayɓe kon ko yani e maɓɓe ɓe anndi ɗum ko immorde ka Alla!

Si tawii Alla jippinii cortewol e Nulaaɗo Makko on (yo o his),jantiingol fiyaakuuji naafiquiiɓe ɓen, woɗɓe e maɓɓe ndaara woɗɓe,ɓe wi'a : "Hara goɗɗo no renti on?" Si goɗɗo yi'aali ɓe,ɓe hibbito e jonnde nden. Anndee Alla surii ɓerɗe maɓɓe ɗen gaay e peewal e moƴƴere,O hoyniiɓe tawde ko ɓe yimɓe ɓe faamataa.

Gomɗii arii e mooɗon, onon Aarabu'en, Nulaaɗo jeyaaɗo e mooɗon. Ko Aarabeejo wano mon. Hino saɗta e makko ko saɗtata e mooɗon, tiiɗuɗo rerɗugol fewnugol on toppitoo fii mon. Kanko ko o heeroranɗo gomɗimɓe ɓen neweende e yurmee- ɗuuɗuɗi.

Si ɓe huccii ma ɓe gomɗinaali ma, maakan ɓe an Nulaaɗo: "Alla on Mo reweteeɗo nafaa woo alaa si wanaa Kanko on yonii lam. Ko e Makko mi fawii. Ko Kanko woni Seniiɗo Jeyɗo Arsi mawnuɗo on".

Alif, laam, raa : nanndo ɗee Aayeeje jantanoowo fii mun ka fuɗɗorde cortewol Albaqarah. Ɗee Aayeeje janngeteeɗe e ngol cortewol, ko Ayeeje Alqur'aanaare ñeñaande ɗigginaande yowondirnde e ñeeñal e ñaawooje.

Kere woodu ko haawni yimɓe ɓen fii Men Jippinii wahayu on e gorko jeyaaɗo e maɓɓe, mo Men yamiri rentingol ɓe e lepte Alla ɗen? An Nulaaɗo, wewlinir ɓen gomɗimɓe Alla kon ko welata ɓe, wonnde hino woodaniɓe nokku toowuɗo ka Joomi maɓɓe Seniiɗo on : ɗum ko njoɓdi kon ko ɓe ardini e golle moƴƴuɗe. Heeferɓe ɓen wi'i: "Oo gorko adduɗo ɗee Aayeeje, ko mbileejo mo mbileyaagal mun feeñi".

Pellet, ko woni Joomi mon, onon ɓee haawiiɓe, ko Alla on taguɗo kammuuli ɗin no ɗi mawniri, e leydi ndin no ndi yaajiri nder balɗe jeegoo. Refti O toowi O fotondiri ka Arsi. Ko honno haaworton ko O Nulata gorko jeyaaɗo e mooɗon? Ko Kanko tun woni hoddiroowo toppitoo laamu Makko yaajungu ngu. Alaa hay gooto tefoowo ka Makko e huunde si wanaa e duŋayee welanee ɗum tefoowo on. Ko on mo'on siforɗo ɗin sifaaji woni Alla Joomi mooɗon. Laɓɓinanee Mo Kanko tun dewal ngal. E on waajitortaa ɗii ɓanngannduyeeji e hujjaaji tinndinɗi gootaaku Makko? Kala waajitorɗo ko ɓuri fanɗude, o annday ɗum o gomɗina.

Ko ka Makko tun woni ruttorde mon nden Ñalnde Darngal, fii yo O yoɓitu on golle mon ɗen. Ko fodoore Alla goongunde nde O fodi yimɓe ɓen nde lunndotaako. Ko O hattanɗo e ɗum. Himo fuɗɗora tagu ngun ko aldah e yeru ngadiiɗo, refti O ruttita ngu ɓaawo maayde nden fii yo kanko Seniiɗo on O yoɓira ɓen gomɗimɓe Alla ɓe golli golle moƴƴe nunɗal, O ɗuytatah e moƴƴi maɓɓe O ɓeydataa kadi e bonɗi maɓɓe. Ɓen yedduɓe non Alla e Nulaaɗo Makko on, hino woodani ɓe njaram wulɗam, taƴayɗam teege(kaake reedu) maɓɓe, hino woodani ɓe kadi lepte muusuɗe sabu ko ɓe yeddi Alla e Nulaaɗo Makko on.

Ko kanko woni waɗuɗo naange ngen jalbaynge saakita ndaygu, O waɗi kadi lewru ndun nurɗundu jalbinorndu, O eɓɓani yaadu mayru ndun jipporɗe mayru ɗen noogay e jeetati, jipporde kala ko emmbere ko ndu dogata kon ñalorma e jemma. Ɗum ko fii yo onon ɓee yimɓe, yo on anndir naange ngen adadu ñalaaɗe ɗen, anndiron lewru ndun limoore lebbi ɗin e kitaale ɗen. Alla tagiraali kammuuli ɗin e leydi ndin e kala ko woni hakkunde majji si wanaa e goonga, fii yo O feññinan yimɓe ɓen kattane Makko e Mawngu Makko. Himo ɓannginira ɗee Aayeeje hujjaaji tinndinayɗi gootaaku Makko wonannde yimɓe anndooɓe tinndinoore ɗum.

Hino e waylondiral jemma e ñalorma ngal e dow yimɓe ɓen, e niwre e ndaygu ko jokkondirta e ɗum, e juutugol goɗɗum e majji ɗuma ɗum raɓɓiɗa, e ɗin tagaaɗi wonɗi ka kammuuli e ka leydi, ko maandeeji tinndinɗi kattane Alla ngal wonannde yimɓe hulooɓe Alla, ɓe ɗoftoo yamirooje Makko ɓe woɗɗitoo haɗaaɗi Makko.

Pellet, heeferɓe ɓen ɓe tamƴinaaki hawroygol e Alla sakko ɓe hula Mo maa ɓe daminoo e mum, ɓe weltorii nguurndam aduna ɗam lannoojam diini nguurndam laakara heddotooɗ am, ɓe deeƴiniri wonkiiji maɓɓe ɗam weltaara, e ɓen tawɓe hino ɗuurnii e Aayeeje Alla ɗen ɓe jalnora tinndinooje Majje.

Ɓen siforiiɓe ɗin sifaaji, jaaƴorde maɓɓe nden ko Yiite ngen, sabu kon ɓe faggitinoo e keeferaaku e fennugol Ñalaande Darngal.

Pellet, ɓen gomɗimɓe Alla ɓe golli golli golle moƴƴe, Alla hawrinayɓe e peewal gollugol golle moƴƴe welooje Alla, sabu gomɗinal maɓɓe ngal. Refti Ñalnde Darngal o naadoyay ɓe ka Aljannaaji neema duumotooɗi, hara canɗi no ila senngo ley maɓɓe.

Toraare maɓɓe nden ka Aljanna, ko subunhinagol Alla mawningol Mo.No Alla e malaa'ika'en hiwrorta ɓe, kamɓe kadi hiwrondira hakkunde maɓɓe, ko : "Salaam (kisal). Timmoode toraare maɓɓe nden ko mantugol Alla, jeyɗo tagoore nden fow.

Sinno Alla yaccinayno jaabinangol yimɓe ɓen ko ɓe torantoo ko'e maɓɓe e ɓiɗɓe maɓɓe e jawle maɓɓe ɗen bone tuma ɓe tikki, wano O jaabiniranta ɓe toraaje maɓɓe moƴƴere, ɓe halkotono. ko woni tun, Alla hino nennanaɓe, O acca ɓen ɓe jortoraaki hawroygol e Makko waasireede hulugol lepte maa jortagol mbarjaari, O acca ɓe e weemugol sikkitoo fii Ñalaande Darngal.

Si lorra ñawnu maa alhaali bonɗo memii noɗɗanke fantinɗo, o noddira Men yankinaare hara himo waalorii senngo makko, maa hara himo jooɗii, maa hara himo darii. O noddira Men jortagol nde lorra makko kan iwata. Tuma nde Men jaabii mo toraare makko nden, Men ittani mo ngun ñawu yanungu e makko, o heɓaano ko o waɗa si wanaa yawtirgol wa si tawii o noddaano Men e huncangol mo on lorra makka. Ko wano oo ɗuurniiɗo ɗoo suɗiranaa non majjere makko nden, yawtuɓe keeri Alla ɓen kadi cuɗiranaa keeferaaku maɓɓe ngu ɓe laatinoo e mun, ɓe accatah ngun.

Gomɗii Men halkiino mofte adinooɓe on, onon ɓee sirkooɓe, fii ko ɓe yeddirnoo Nulaaɓe Alla ɓen, ɓe faggitii geddi. Nulaaɓe Maɓɓe ɓen ɓe Men Nuli e maɓɓe addani ɓe hujjaaji ɓannguɗi, tinndinɗi goonga ko ɓe addi kon immorde e Joomi maɓɓe. Ɓe wonaano gomɗinooɓe, tawde ɓe heblanaaki liimanaku. Alla jaasini ɓe, O ronkiɓe hawrindirde e peewal. Ko wano Men yoɓitirnoo ɗen mofte tooñuɓe, Men yoɓitirta nanndo mon'en e kala jamaanu e nokku.

Refti Men waɗti on, onon ɓee yimɓe, lontotooɓe ɗen gire fennooɓe ɗe Men halkunoo, fii no Men ndaarira honno gollirton : Hara on gollay moƴƴere yoɓeɗon nde, kaa on gollay bone mo leptirte ɗon?

Si Aayeeje Amen Alqur'aana ɓannguɗe tinndinɗe ngootaaku Alla ɗen no janngeede, ɓen yedduɓe ummital ɓe tamƴinaaki mbarjaari, ɓe hulaa kadi lepte wi'a : "An Muhammadu, addu Alqur'aanaare goo hara wanaa ndee yowondirnde ɗoo e yennu- de rewugol sanamu" maa ɗum "waɗtitiraa nde momtugol yoga mayre, maa momtugol nde haa heddoo ko yaadata e mbeleeɗe amen ɗen". Maakan ɓe an Nulaaɗo : "Sellataa ka mi waɗtita nde min, mi gaynataa ɗum, wanaa non feere addu- gol wonnde goo. Ko Alla tun waɗtitirta goɗɗum e mayre no O haajiri. Min on mi jokkaa si wanaa ko Alla wahayini kon e am. Min miɗo huli, si mi yeddirii Alla waɗugol faale mon, heɓugol lepte ñalaande mawnde, nden woni Ñalnde Darngal".

Maaku an Nulaaɗo : "Sinno Alla muuyuno wata mi janngu ndee Qur'aanaare e dow mooɗon, mi janngantaano on, mi yottintaano on nde kadi. Si Alla no muuyunoo kadi, mi jannginirtaano on Alqur'aana ɗemngal am. Gomɗii mi ñiiɓiino hakkunde mon dumunna juutuɗo -woni duuɓi cappanɗe nayi, mi janngataa mi winndataa. Mi lamdaaki wonugol heɓugol Annabaaku, mi ɗaɓɓaali ɗum kadi. E on haqqiltaa anndon wonnde ko mi addi kon ko ka Alla iwri, wanaa e am?

Alaa ɓurɗo tooñude haa hewta on fefindiiɗo fenaande fawi e Alla. Ko honno mi wostortoo Alqur'aanaare nden fefindagol e Makko fiyaaku on, yawtirɓe keeri Alla ɗin fefindagol e Makko ɗen maletaake.

Sirkooɓe ɓen hino rewa reweteeɗi aaƴaaɗi gaanin Alla, ɗi nafatah ɗi lorratah. Reweteeɗo e goonga on, o nafay o lorra tuma nde o muuyi. Hiɓe wi'a e ɗin reweteeɗi maɓɓe : "Ko ɗii tefanoyta men ka Alla fii wata O leptir men junuubi amen ɗin". Maakan ɓee, an Nulaaɗo : "E on humpitay Alla Annduɗo on wonnde himo mari kafidiiɗi? Kanko le O alaa kafiɗiiɗi ka kammuuli wanaa ka leydi. O senike O laaɓi gaay e ko sirkooɓe ɓen wowlata e meere e fenaande.

Yimɓe ɓen laatanooki si wanaa mofte goote, gomɗinɗe jogondiri, kono ɓe lurri : woɗɓe e maɓɓe heddodii e gomɗinal, woɗɓe goo yeddi. Sinno wanaa ko yawti kon e ñaawoore Alla nden wonnde ñaawetaake hakkunde maɓɓe e kon ko ɓe lurri e mun ka aduna, ɗum ko laakara ñaawoytee, si wo-naana nih ko aduna ɗum ñaawetenoo, feewuɗo on ɓannga e majjuɗo on.

Sirkooɓe ɓen hino wi'a : "Ko haɗnoo Aaya jippinee e Muhammadu immorde ka Joomi makko, tinndinoowo himo goongi? Maakan ɓe an Nulaaɗo: Jippagol Aayeeje ɗen, ko wirniiɗum heeranii ɗum Anndal Alla. Habbitee ko lamdiɗon e Aayeeje, miɗo habbodii ɗe e mo'on".

Si Men meeɗinirii sirkooɓe ɓen neema toɓo e amo ɓaawo nde hokkere e ɓiɗtteende heɓiɓe, jaka yoo hiɓe jalkita fenna Aayeeje Amen ɗen. An Nulaaɗo, maakan ɓenn sirkooɓe : "Ko Alla ɓuri yaccaade fewjoore, ɓuri yaawude kadi nanngugol on lepta". Pellet, Malaa'ikaaɓe winndooɓe ɓen hino winndude ko fewjoton kon, huunde e munlaawa- taako ɓe, ko honno ɗum laaworta taguɗo ɓe on? Alla yoɓitoyay on e pewje mon ɗen.

Ko Alla woni On doginoowo on, onon ɓee yimɓe, ka njorndi, e hoore koyɗe mon maa e hoore daabeeji mon. Ko kanko kadi woni doginoowo on ka maayo e nder laaɗe mon. Haa si on wonii ka laaɗe maayo, ɗe doginira ɓe henndu laaɓundu, waɗɗiiɓe ɓen weltora ndun henndu laaɓundu. E nder nden weltaare maɓɓe, hanndu nduluuru (duleendu bippooru ara e maɓɓe, molloode mollooɗe(bempejje) ara e maɓɓe iwrabanngeeji ɗi fow, ɓe fellita wonnde kamɓe ɓe halkoto woni, ontuma ɓe toroo Alla tun, ɓe kafidataa Mo e goɗɗum goo, ɓe wi'a :"Si tawii tun A daɗndii men e ɗee jaribaaji ɗoo, pellet, men laatodat e yettooɓe Ma ɓe e dow ko neeminɗaa kon e amen".

Nde Alla jaabinoo ɓe toraare maɓɓe nden, O daɗ- ndiɓe ɗen taƴaale, e jaka yoo kamɓe hiɓe bonnira ka leydi faggitagol keeferaaku, e geddi e bakkaatu. Finee faamon, onon ɓee yimɓe, wonnde battane bewre mon bonnde nden, ko e hoore mon yantata. Bewre mon lorrataa Alla. Ɗum ko ko dakmitoron e ɗam nguurndam aduna lannoo-jam, refti ko ka Amen woni ruttorde mon Ñalnde Darngal, Men yeetitoo on ko geraynoɗon e geddi, Men yoɓita on ɗum.

Anndee misal aduna nguurndam aduna ɗam ɗam dakmitorton ko lannata heña, ko wano toɓo jillondiroowo e puɗi leydi ndin, gabbe e dimɗe e huɗo ko yimɓe e neemoraaɗi ñaamata. Haa si leydi ndin ƴettii mbaadi mun njalɓundi ndin, ndi labinorii ko ndi fuɗini kon e nooji puɗi, yimɓe mayri ndin jikka wonnde ko ɓe hattamɓe soñugol tetta ko ndi fuɗini kon, ñaawoore Amen halko ɗum ara e mayri, Men waɗtina ndi soñiraandi wa si tawnii ndi ɗuuɗiraani leɗɗe e puɗi ado mun. Ko wano no Men ɓannginirani on fiyaaku aduna on e yaawugol lannugol makko, Men ɓannginirta ɓanngannduyeeji e hujjaaji ɓen miijitooɓe taskoo.

Alla nodda yimɓe ɓen denndaangal faade Aljanna Makko on, on woni galle kisal (daaru salaam). Ko ɗon yimɓe ɓen hisata e masiboo e annde, ɓe hisa kadi e maayde. Alla no fewnira on Mo o muuyi e jeyaaɓe Makko ɓen faade e diina lisalaamu hewtinayka e galle kisal ɗen.

Hino woodani ɓen moƴƴinirɓe golle ɗe Alla wajimbini e maɓɓe immorde dewe, e accugol ko O harmini e maɓɓe immorde e geddi, mbarjaari moƴƴundi : ndin woni Aljanna. Hino woodani ɓe kadi ɓeydaari e ɗum, ndin woni yi'ugol yeeso Alla ngon. Nduggu hippataa geece maɓɓe ɗen, wanaa kadi jaasere maa koyeera suddata ɗen. Ko ɓen siforiiɓe ɗin sifaaji moƴƴingol woni yimɓe Aljanna ɓen, kamɓe ko ɓe duumotooɓe ton.

Ɓen golluɓe golle bonɗe ɗen immorde keeferaaku e geddi, hino woodani ɓe njoɓdi yeru bone moɓe golli on immorde e lepte Alla ɗen laakara. Jaasere e koyeera hino hippa geece maɓɓe ɗen, ɓe alaa daɗndoowo ɓe e lepte Alla ɗen si O jippiniiɗe e maɓɓe. A sikkay geece maɓɓe ɗen ko niwre jem- ma niɓɓutuɗo suddiraa hakke ko ɗe ɗuuɗiri curki yiite ngen. Ɓen siforiiɓe ɗin sifaaji, ko kamɓe woni yimɓe Yiite ngen, kamɓe ko ɓe luttooɓe ton.

Janto an Nulaaɗo, Ñalnde Darngal, tuma nde Men mooɓindiroyta tagu ngun fow, refti Men wi'ana ɓen sirkannooɓe Alla aduna : "Onon sirkooɓe ɓen, luttee ka nokku mon, onon e reweteeɗi mon ɗin ɗi rewaynoɗon aduna gaanin Alla." Men senndinra hakkunde rewooɓe ɓen e reweteeɓe ɓen. Ontuma reweteeɓe ɓen daɗndoo e rewooɓe ɓen, ɓe wi'a : "Wanaa menen rewaynoɗon aduna fes!".

Ɗoo, rewetenooɓe maɓɓe ko woori Alla ɓen daɗndoto e maɓɓe, ɓe wi'a : "Alla ko seedee -O yonii ɗum - wonnde menen, men weltoranooki ko rewaynoɗon men, men yamiraa on ɗum kadi, alaa no men so'ira dewe mon.

Ko e nden nokkuure mawnde woni ko wonkii kala jarribortee ko ki ardini e golle ka nguurndam aduna Sirkooɓe ɓen ruttitee ka Jeyɗo ɓe e goonga on, On woni Alla fawtiiɗo hasbugol ɓe. Ko ɓe fefindinoo kon e sanamuuji tefanayɗi ɓe majjira ɓe.

An Nulaaɗo, maakan ɓee sirkanooɓe Alla : "Ko hommbo woni arsikiroowo on immorde ka kammu jippinana on toɓo? Ko hommbo kadi woni arsikoo- wo on immorde ka leydi e kon fuɗata e mayri, ko hommbo hebbinirta ndi oogirɗe? Ko hommbo kadi woni yaltinoowo ko wuuri e nder ko maayi, wano heɗɗere ko yaltata e kullun, maa woofoonde e colum? Ko hommbo kadi woni toppitiiɗo fiyaaku kammu ngun e leydi ndin e kala ko woni e majji immmorde e tagaaɗi? Ɓe jaaboto wonnde waɗuɗo ɗum on fow ko : "Alla". Awa maakan ɓe : "E on anndah ɗum, huliron Alla ɗoftagol yamirooje Makko ɗen, woɗɗitoo haɗaaɗi Makko ɗin?".

Ko on ɗon mooɗon, onon ɓee yimɓe, waɗuɗo ɗum ɗon on fow, ko Alla goonga on taguɗo on, toppitii fiyaaku mon. Ko honɗum arata ɓaawo nde goonga kan feeñi si wanaa majjere e yeebaare? Ko honto haqqille mon yaari seli kaa goonga feeñuka?

Ko wano Allankaaku ngun tabitinirani Alla on non e goonga, konngol Joomi maa ngol an Nulaaɗo, hoddiraangol waɗɗorii e ɓen yaltirɓe e goonga ɓen sattere hoore, wonnde pellet, ɓe gomɗintah.

An Nulaaɗo, maakan ɓee sirkooɓe : "Hara no e kafidiiɓe mon ɓen ɓe rewoton gaanin Alla on mo no fuɗɗa tagu mo alah yeru adiido refti o ruttita ngu ɓaawo maayde?" Maakan ɓe : "Alla kan no fuɗɗira tagu ngun no woowiraaka refti O immintina ngu ɓaawo maayde maggu. Ko honno fefindira ɗon, onon ɓee sirkooɓe, ittaɗon e goona faade e meere?

Maakan ɓe an Nulaaɗo : "Hara no e kafidiiɓe mon ɓen ɓe rewoton gaanin Alla on mo no fewna e goonga?" Maakan ɓe : "Ko Alla tun woni fewnoowo e goonga. Hara ko on fewniroowo yimɓe ɓen e goonga, o nodda ɓe e mu'un ɓuri hanndude jok- keede, kaa ko reweteeɗi mon ɗe feewantah hoore mun ɗin si wanaa tuma goɗɗo fewni ɗi? Ko heɓi on sifa no ñaawirton meere nii, tuma aaƴotoɗon won- nde ko ɗi kafidiiɗi Alla? Alla toowirii toowannde mawnde e ngol konngol mon.

Ko ɓuri ɗuuɗude e sirkooɓe ɓen jokkah si wanaa ko ɓe alaa ganndal mun, ko sikku-sakka tun ɓe jokki. Pellet le sikke ɗen wonataa nokku pellital, ɗe duncatah yeeso maggal kadi. Pellet, Alla ko Annduɗoko ɓe huuwata kon. Huunde suuɗaaki mo e kuuɗe maɓɓe, O yoɓitoyay ɓe ɗum.

Sellatah ko ndee Alqur'aanaare fefindee, nde dammbee e ko woori Alla, tawde ko nde ronkinnde yimɓe ɓen addugol yeru mayre. Si ko woni, ko nde goonginnde kon ko jippinaa ado mayre, e ɓanngin- nde e tonnga e mayre immorde e ñaawooje. Sikke woo alah e mayre wonnde ko nde Jipporiinde jey- Jeyɗo tagoore nden, On Mo Senayee woodani.

Kaa ɓee sirkooɓe wi'ay : "Muhammadu (jom-kisiyee on) fefindani ndee Alqur'aanaare hoore makko, o dammbi nde e Alla?" Maakan ɓe an Nulaaɗo, jaaboraa ɓe : "Si tawii hara ko min fefindanii nde hoore-am, e hoore ko mi ɓanndinke yeruujo mon, onon kadi addee cortewol yeru mayre, noddon kala mo haɗtanɗon ko wallitoo on, si on laatike goonguɓe e nodditorɗon wonnde Alqur'aana ko fefindaa nde fenaande. On hatta- noytaa ɗum. Si on ronkii le waɗugol ɗum, ko onon wi'aa laaɓa ɗemɗe'en, haray hollii ndee Alkuraana ko Jippiniraande ka Alla.

Ɓe jaabitaaki. Toode ɓe yaccoro fennugol Alkurana nden ado ɓe faamude nde ɓe teskoo, e ado ɓe heɓude ko nde jertini kon e lepte. Ɗum non ɓaɗtike arde. Ko wano ɓen fenniri non mofte adinooɓe ɓen fennirnoo, Alla jippini lepte ɗen e maɓɓe. Tasko, an Nulaaɗo, ko honno battane ɗee mofte fennooɓe wa'unoo. Gomɗii Alla halkiiɓe.

Hino e sirkooɓe ɓen gomɗinoyoowo Alqur'aana ado maayde mun, hino e maɓɓe kadi on mo gomɗinirtah nde salaare e townitaare haa o maaya e ɗum. Ko Jommi maa, an Nulaaɗo, ɓuri anndude haɓɓitiiɓe ɓen e keeferaaku mun. O Yoɓitoyay ɓe njoɓdi keeferaaku maɓɓe.

Si ɓee yimɓe maa fennii ma an Nulaaɗo, wi'an ɓe : "Hino woodani lam njoɓdi golle am, ko min heeranii baraaji golle am. Hino woodani on njoɓdi golle mon, ko onon heerori lepte golle mon. Onon ko on daɗndii ɓe e lepte ko mi gollata, min kadi ko mi daɗndiiɗo lepte ko golloton".

Hino e sirkooɓe ɓen, ɓen heɗotooɓe ma an Nulaaɗo -tuma janngataa Alqur'aana ɓe heɗora fii wata ɓe jaɓu. E ko an hattani nannungol faaɗuɗnoppi? Ko non adi woni a waawiroytaa fewnude ɓen faaɗu ɓe e nanugol goonga, ɓe haqqiltah.

Hino e sirkooɓe ɓen, on ndaaroowo ma an Nulaaɗo, o ndaartaama giiɗe nder kono giiɗe mak- ko feeñuɗe ɗen o ndaardat ma. E ko an waawata yi'innde on mo gite mun ɓoraa? Pellet a waawatah ɗum. Ko wano non kadi a waawataa fewnugol waasuɗe giiɗe-ɓernde.

Pellet Alla Senike e tooñugol jeyaaɓe Makko ɓen. Kanko O tooñataa yeru abbere jarra. Si ko woni, ko kamɓe woni tooñirde ko'e maɓɓe ɗen naɓugol ɗe e halkaare, sabu ko ɓe haɓɓitii kon e meere e townitaare.

Ñalnde Alla mooɓoyta yimɓe ɓen ka Darngal fii hasbugol ɓe, wa'anay ɓe wa si ɓe ñiiɓaano ka nguurndam maɓɓe aduna e cuɗaaji maɓɓe, si wanaa saa'a gooto pet e ñalorma, hara yoga maɓɓe no anndita yoga, hooti ngol anndindirgol taƴa hakkunde maɓɓe hakkee ko ɓe yi'i kon e fiyaaku laakara no tiiɗi. Gomɗii ɓen fennuɓe kawral Joomi maɓɓe ngal Ñalnde Darngal ɓe sooyii, ɓe gomɗinaano immital ka aduna sakko ɓe hisa e sooyugol(perte).

Si Men hollii ma an Nulaaɗo, yoga e kon ko Men fodi ɓe e lepte ado a maayde maa nden, maa ɗum Men ƴettitu maa ado ɗum, fow e mun, ko ka Amen woni ruttorde maɓɓe nden Ñalnde Darngal. Refti Alla ko ƴellitiiɗo e kon ko ɓe gollata, huunde suuɗaaki Mo e ɗum. O yoɓitoyay ɓe njoɓdi golle maɓɓe ɗen.

Hino woodani kala mofte yawtunooɗe ɗen Nulaaɗo imminaaɗo e maɓɓe. Si tawii ko o nulaa kon yotti- yottike ɓe, ɓe fennii mo, ñaawirte hakkunde maɓɓe nuɗal. Alla daɗnira mo ɓural Makko ngal, O halkira ɓe nunɗal Makko ngal. Kamɓe ɓe toonyetaake huunde e njoɓdi kuuɗe maɓɓe ɗen.

Ɓee heeferɓe no wi''ra townitagol e ɓiicagol (dikkagol): "Ko honnde tuma woni kon ko foduɗon men e lepte, si on laatike goonguɓe e kon nodditaɗon?"

Maakan ɓe an Nulaaɗo : "Mi waawanah hoore-am pooɗugol lorra mo lorlira maa duñugol ɗum e am, wanaa kadi nafa mo mi nafitorta. Ko honno mi nafirta goɗɗo goo maa mi lorra mo? Si wanaa hara ko muuyi ɗum. Ko honno mi anndirta wirniiɗi ɗin? Hino woodani mofte kala ɗe Alla kammbirani halakuyee, dumunna happaaɗo fii halkaare maɓɓe nden, gooto anndaa ɗum si wanaa Alla. Si happu maɓɓe halkaare ngun hewtii, ɓe nennitantaake ɗum waqtu woo, ɓe ardinantaake kadi".

An Nulaaɗo, maakan ɓee hawjirɓe lepte : "Habree lam, si lepte Alla ɗen ardii on e waqtu kala jemma maa ñalorma, ko honɗum woni ko hawjiranton ɗee lepte?"

E ko ɓaawo nde lepte ɗen ɗe fodaɗon yani e mon gomɗinton, nokku ka gomɗinal nafatah wonkii ki gomɗinaano ado ɗum? E ko jooni non gomɗinton, gomɗii on laatinoke hawjirnooɓe lepte ɗen ado hannde fennugol ɗe?

Refti ɓaawo nde ɓe naadaa ka lepte, ɓe ɗaɓɓi yaltineede ton, ɓe wi'anee : "Meeɗee lepte luttude ɗen laakara. Hara on yoɓete si wanaa kon ko gol- laynoɗon e keeferaaku e geddi?"

Ɓee sirkooɓe no habrino maa an Nulaaɗo : "Hara ɗee lepte ɗe men fodaa ko goonga?" Maakan ɓe : "Eyyo, mi woondirii Alla ko ɗe goonga. On wonaali laawotooɓe e majje".

Sinno tabintanno kala sirkanoowo Alla denndaa- ngal ko woni leydi immorde e jawle hittuɗe, ɓe waɗirayno ɗum sottorɗum e lepte Alla ɗen tuma ɓe newnanaa. Sirkooɓe ɓen suuɗi ninse keeferaaku maɓɓe ngun nde ɓe yi'unoo lepte tiiɗuɗe ɗen Ñalnde Darangal. Alla ñaawira hakkunde maɓɓe nunɗal, kamɓe ɓe tooñetaake, ko golle maɓɓe ɗen ɓe yoɓetee.

Anndee ko Alla tun woodani laamateeri ko woni ka kammuuli e ka leydi. Anndee pellet, fodoore Alla nden leptugol heeferɓe ɓen ko laatotoonde sikke alaa e mayre. Kono ko ɓuri ɗuuɗude e yimɓe ɓen anndaa ɗum, ɓe wona e sikktitagol.

Kanko Seniiɗo On, Himo wuurnita ko maayi, O wara ko wuuri; ko faade ka Makko kanko tun woni ruttorde mon nden Ñalnde Darangal, On yoɓita on njoɓdi golle mon.

Ko onon yo yimɓe, gomɗii Alqur'aana arii mooɗon, hinde wonndi e waaju, e rerɗinayɗi, e hulɓinayɗi. Ko nde lekki ñabbuuli ɓerɗe ɗin immorde e ñawu sikku-sakka, ko nde fewnaynde e laawol goonga. Hinde wonndani gomɗimɓe ɓen yurmeende, ko kamɓe nafitorta nde.

An Nulaaɗo, maakan yimɓe ɓen : "Ko mi addani on ko e ndee Alqur'aanaare, ko ɓural Alla e doww mooɗon, e yurmeende Makko. Ko ngal ɓural Alla ɗon e yurmeende Makko jippiniragol on ndee Alqur'aanaare, woni mantorton, wanaa goɗɗum goo. Ko Muhammadu (jom kisiyee) on addani ɓe immorde ka Joomi makko ɓuri moƴƴude e ko ɓe mooɓata e piiji aduna lannooji".

An Nulaaɗo, maakan ɓee sirkooɓe : "Humpitee lam fii kon ko Alla neeminiri on jippinangol on arsike, waɗuɗon ɗum beleeɗe mon, harmiɗon yoga mun, daginɗon yoga. -Maakan ɓe : Ko Alla duŋanii on dagingol kon ko dagintinɗon, e harmingol kon ko harmintinɗon? Kaa ko e Alla fefindotoɗon penaale?"

Ko honɗum woni tamƴinaare ɓen fefindotooɓe fenaande e hoore Alla, Ñalnde Darngal? Hiɓe sik- ka O haforanay ɓe? Ɗum gasataa. Pellet, Alla ko Jom ɓural e dow yimɓe ɓen, tawde O nennanay ɓe lepte ɗen. Kono ko ɓuri ɗuuɗude e maɓɓe ko yed- duɓe neemaaji Alla ɗin e dow mun, ɓe yettatah ɗi.

An Nulaaɗo, a wonatah e fiyaaku woo, a janngataa kadi e Alqur'aana, on gollataa -onon gomɗimɓe ɓen- e gollal si wanah Men wonay annduɓe fii mon, Meɗen nana on tuma wonoton e ngal gollal. Wirnotaako gaay e Anndal Joomi maa ngal fotde jarra ka kammu maa ka leydi, wanaa ko ɓuri ɗum fanɗude, wanaa ko ɓuri ɗum mawnude si wanaa ɗum maandinaa e deftere ɓanngunde, nde acca- taa fanɗi mawni, si wanaa nde moftay ɗum.

Anndee yimɓe Alla ɓen, kulol alanaa ɓe e saatanii ɓe e fiyakuuji Darngal, wanaa kamɓe woni ko sunoytoo fii ko faatori ɓe e geɓoy aduna.

Ɓen yimɓe Alla, ko ɓen woni sifornooɓe gomɗingol Alla e Nulaaɗo Makko on (yo o his), ɓe laatorii hulirooɓe Alla ñentingol yamirooje Makko, woɗɗitoo haɗaaɗi Makko.

Hino woodani ɓe ka aduna ɗoo immorde ka Joomi maɓɓe, ko welata ɓe, woni yi*annde moƴƴere maa manoore yimɓe ɓen e dow maɓɓe. Hino woodani ɓe welo-welo immorde e malaa'ika'en tuma ɓen ƴettitata pittaali maɓɓe ɗin, e ɓaawo ɓe maayude, e fewndo immital. Alaa ko waɗtitata ko Alla fodi ɓe kon. Ko ndin njoɓdi woni maloore mawnde nden, tawde ɓe heɓay e mayri ko ɓe ɗaɓɓunoo, ɗum woni daɗugol ko hulaa.

Wata sunine an Nulaaɗo, ko ɓee tukkooɓe diina maa wi'ata. Pellet, teddungal ngal e poolal ngal fow ko Alla woodani. Huunde ronkintaa Mo. Ko kanko woni Nanoowo konnguɗi maɓɓe ɗin, Annduɗo kuuɗe maɓɓe ɗen. O yoɓitoyay ɓe ɗum.

Anndee ko Alla tun heeranii laamateeri ɓen wonɓe ka kammuuli e ɓen wonɓe ka leydi. E ko honɗum ɓen sirkooɓ rewooɓe gaanin Alla jokkata e kafidiiɓe? Ko woni ko,Ɓe jokkah , si wanaa sikke, ɓe wonaali si wanaa fenooɓe e ngol dammbugol maɓɓe kafidiiɓe ɓen e Alla. Alla Toowii gaay e konngol maɓɓe ngol toowannde mawnde.

Ko Kanko tun waɗani on, onon yimɓe ɓen, jemma on, fii yo on deeƴu e makko battane kala dillannde e ronkere. O waɗani on kadi ñalorma on ndaynginorɗo fii yo on yaccor e makko kala nguuree mon. Pellet, wonii e ɗum dalilaaji ɓannguɗi, wonannde yimɓe nanooɓe waajitoo jaɓa.

Fedde e sirkooɓe ɓen wi'i : "Alla jogitike malaykaaji en ɓiɗɓe rewɓe". Alla Senike gaay e konngol maɓɓe. Kanko ko Galo yonndiniiɗo gaay e tagu Makko ngun fow. Hino woodani Mo laamateeri kala ko woni ka kammuuli e ka leydi. Onon ɓee sirkoo- ɓe, alanaa on hujja woo e ngol konngol mon. E on wowlay bakon e Alla konngol mawnungol dam-mbon e Makko ɓiɗɗo, hara on anndah haqiiqa ɗum?

An Nulaaɗo, maakan ɓe : "Pellet, ɓen fefindotoɓe fenaande e hoore Alla ɓe dammba e Makko ɓiɗɗo, ɓe heɓataa ko ɓe ɗaɓɓata kon, ɓe daɗatah e kon ko ɓe huli".

Wata ɓe ñaaƴor ko ɓe dakmitorta kon aduna e neemaaji mun, ɗum ko dakamme seeɗaa lannay- ɗe. Refti ko ka Amen woni ruttorde maɓɓe nden Ñalnde Darngal, refti Men meeɗina ɓe lepte tiiɗuɗe ɗen sabu ko ɓe yeddiri Alla kon ɓe fenni Nulaaɓe Makko ɓen.

An Nulaaɗo, qissano ɓee sirkooɓe fennooɓe, kabaaru Annabu Nuuhu, tuma nde o maakannoo yimɓe makko ɓen : "Ko onon yo yimɓe, si tawii ñiiɓugol am ngol hakkunde mon mawnii e mon, ko waajorta on Aayeeje Alla ɗen kadi sattii e mon, on fiɓii warugol lam, ko e Alla tun woni tuugii mi e bonnugol pewje mon. Fellitee e fiyaaku mon, fiɓon warugol lam, noddon reweteeɗi mon ɗin ko wallitoo on e ɗum, refti fewjoore maɓɓe nden wonantaa sirru suuɗiiɗo. Ɓaawo nden eɓɓoore mon warugol lam, fewjanee lam ko eɓɓuɗon kon, wata on nennitan-am nennitanam ko ɓuri e fanɗude.

Si tawii on ɗuurnike e noddaandu am ndun, gomɗii hiɗon anndi mi ɗaɓɓiraa on njoɓdi ko mi yottiniri nulal am ngal kon. Njoɓdi am ndin wonaali si wanaa ka Alla, foti on gomɗin Mo maa hara on yeddu Mo. Alla yamirii lam nde mi laatodto e jebbiloranii ɓe Mo dewal e golle moƴƴe ɓen.

Yimɓe makko ɓen fenni mo, ɓe goonginaali mo. Men daɗndi mo kanko e gomɗimɓe wonndunooɓe e makko ka laana. Men waɗtiniɓe lonto adinooɓe ɓe, Men halkiri ɓen fennu ɓe Aayeeje e hujjaaji ɗi o addi ɗin haacaango. Tesko an Nulaaɗo, ko honno battane yimɓe ɓe Nuuhu jertinooɓe waɗi, ɓe gomɗinaano.

Refti ɓaawo dumunna, Men immini ɓaawo Nuuhu Nulaaɓe faade e yimɓe mun. Nulaaɓe mofte maɓ- ɓe ɗen addani ɓe Aayeeje e ɓanngannduyeeji. Kono ɓe alaano muuyaande gomɗingol sabu ko ɓe haɓɓitino kon e fennugol Nulaaɓe ɓen. Alla noti e ɓerɗe maɓɓe ɗen. Ko sugu ndee notannde nde Men noti e jokkunooɓe Nulaaɓe yawtunooɓe ɓen, Men notirta e ɓerɗe heeferɓe yawtuɓe keeri Alla ɓen e kala nokku e jamaanu.

Refti ɓaawo dumunna, Men immini ɓaawo ɓee ɗoo Nulaaɓe, Muusaa e neene-gooto makko on Haaruuna haa e Fir'awna laamɗo Misra on e hooreeɓe dental yimɓe makko ɓen. Men immindini ɓe e Aayeeje tinndinooje e goongugol maɓɓe. Ɓe mawnintinanii gomɗingol ko o addi kon, ɓe woni yimɓe bomɓe, sabu ko ɓe yeddiri kon Alla ɓe fenni Nulaaɓe Makko ɓen.

Nde diina kan ka Muusaa e Haaruuna (yo ɓe his) arunoo e Fir'awna e hooreeɓe mbatu makko ngun, ɓe wi'ani ɗen Aayeeje tindinooje e goongugol ko Muusaa addi kon : "Ɗum ko mbilewu feenyungu, wonaa goonga".

Muusaa maakinrani ɓe feloore : "E on wi'anay goonga kan tuma ka ari e mon : ɗum ko mbilewu? Wanaa non, ɗum wanah mbilewu, min miɗo anndi wonnde mbileejo maletaake abadaa. Ko honno mi jokkirta ɗum?"

Yimɓe Fir'awna ɓen jaabii Muusaa (yo o his), ɓe wi'i : "E a addiran men nguu mbilewu fii yo a suru men gaay e ko men tawri kon baabiraaɓe amen ɓen e diina, laamu ngun wonana maa an e neene-gooto maa on? Menen men wonaali qirrantooɓe on ɗiɗo -an Muusaa e Haaruuna- wonnde ko on Nulaaɓe imminaaɓe e amen".

Fir'awna wi'ani yimɓe makko ɓen : "Addanee lam kala mbileejo humpitiiɗo fii mbilewu, ɗigginɗo ɗum".

Nde ɓe addannoo Fir'awna mbileeɓe ɓen, Muusaa maakirani ɓe hoolagol o foolayɓe : "Bugee, onon mbileeɓe ɓen, kon ko bugotoɗon".

Tuma nde ɓe buginoo ko ɓe jogii kon e mbilewu, Muusa maakani ɓe : "Ko feññinɗon kon ko mbilewu, pellet, Alla wattinay kuuɗe mon ɗen meere ɗe alaa batte. Onon e mbilewu mon ngun ko on bonnooɓe ka leydi. Alla moƴƴintah golle bonnoowo".

Alla no tabintinay goonga kan, O ñiiɓinira ka Konnguɗi Makko hoddiraaɗi ɗin, e kala ko konngu-ɗi Makko sari'a ɗin yowondiri e hujjaaji, hay ɗum mettii heeferɓe bomɓe ɓen ka yimɓe Fir'awna.

Yimɓe ɓen haɓɓitii e ɗuurngol ngol, goonginaano Muusaa (yo o his), e hoore ko o addi kon fow e Aayeeje ɓannguɗe, wonndude e hujjaaji feeñuɗi, si wanaa sukaaɓe jeyaaɓe e yimɓe makko ɓen ka ɓiɗɓe ɓiɗɓe Isr'aa'iila, sabu kulol Fir'awna e hooreeɓe mbatu makko ngun, wata ɓe yiltir ɓe e gomɗinal maɓɓe ngal meeɗingol ɓe lepte si ɓe anndoyii fii maɓɓe. Pellet, Fir'awna ko townitinoo- ɗo e yimɓe Misra ɓen, pellet, ko e yawtuɓe keeri ɓen ka keeferaaku, wara, lepta ɓiɗɓe Israa'iila ɓen o jeyaa.

Muusaa maakani yimɓe makko ɓen : Ko onon yo yimɓe, si on laatike gomɗinirɓe Alla gomɗinal goonga, haray ko e Alla tun tuuginorton, si on laatike jebbiliiɓe. fawagol e Alla ngol duñanay on bone, pooɗana on moƴƴere.

Ɓe jaabii Annabi Muusaa ɓe wi'i : "Ko e Alla tun woni ko Men fawii. Joomi amen, wata a okku tooñooɓe ɓen doole e hoore amen, sakko ɓe fitinira men gaay e diina amen lepte, e wareede e murtineede.

Ɓoortindiraa men yumeende Maa nden, An Joomi amen, e yimɓe Fir'awana yedduɓe ɓen. Gomɗii ɓe maccinɗinii men, ɓe lorriri men lepte e wareede.

Men wayahini faade Muusaa e neene-gooto makko on Haaruuna (yo ɓe his), wonnde: suɓee jogitanoɗon yimɓe mon cuuɗi rewirɗi Alla tun, waɗtiron cuuɗi mon ɗin huccita ka qibla (Bayt al Maqdisi), tottiron julde nden no timmiri. An Muusaa, humpitiraa gomɗimɓe ɓen ko welata ɓe, immorde e ballal Alla ngal wonannde ɓe, e halkugol ayɓe maɓɓe ɓen, lontina ɓe ka leydi.

Annabi Muusaa maaki: Joomi amen, A okkii Fir'awna e tedduɓe mbatu yimɓe makko ɓen cuɗaari aduna, A okkii ɓe kadi jawle e ɗam nguurndam aduna, kono ɓe yettaali Ma e kon okku-Ɗaa ɓe. Ko ɓe waɗi, ɓe wallitor ɗen jawle fii majjingol gaay e laawol Maa ngol. Joomi amen, mehu jawle maɓɓe ɗen bonnaa fii majje, waɗaa ɓerɗe maɓɓe ɗen yooruɗe, hara ɓe gomɗintaa si wanaa tuma ɓe yi'i lepte muusuɗe ɗen, fewndo ka gomɗinal maɓɓe nafataa ɓe.

Allaahu on daali: Gomɗii toraare mon nden, an Muusaa e Haaruuna, e hoore Fir'awna e mbatu yimɓe makko ɓen. Tabitee tun e diina mon, wata on ooñor jokkugol laawol majjuɓe ɓen ɓe anndaa laawol goonga ngol.

Men newinani ɓiɗɓe Israa'iila ɓen lummbugol maayo noon ɓaawo nde Men udditi mo haa ɓe taƴitiri mo kisal. Fir'awna e konu mun ngun hewti- tori ɓe tooñe e jaggitere, haa nde baharu on uddi- tanii mo, o fuɗɗii yoolagol, o taƴii daɗugol, on wi'i: Mi gomɗinii wonnde alaa reweteeɗo e goonga si wanaa on Mo ɓiɗɓe Israa'iila ɓen gomɗini, min ko jeyaaɗo e jebbiloranii ɓe Alla ɓen dewal.

E ko jooni non gomɗintaa ɓaawo nde taƴiɗaa nguurdam? Gomɗii le a yeddiino Alla an Fir'awna, ado jippagol lepte yeddugol ngol, e falaagol yimɓe ɓen laawol Makko, jeyda-ɗaa e bonnooɓe ɓen sabu majjingol hoore-maa, majjina tanaa maa.

Hannde, Men yaltinte an Fir'awana ka baharu, Men waɗe e nokku toowuɗo ka leydi; fii arooɓe ɓaawo maa ɓen waajitore. Pellet, ko ɗuuɗi e yimɓe ɓen gaay e hujjaaji Amen ɗin e dalilaaji kattal Amen ɗin ko welsindiiɓe, ɓe miijitortaa ɗe.

Gomɗii Men weernii ɓiɗɓe Israa'iila ɓen weerde yettiniinde, e nokkuure teddunde ka leydi saami barkinaandi, Men arsiki ɓe kadi laaɓuɗi dagiiɗi. Ɓe lurraali e fiyaaku diina maɓɓe haa nde Alqur'aana ari e maɓɓe ko nde goonginnde kon ko ɓe janngi ka Tawreeta fii Muhammadu (yo o his). Nde ɓe fennunoo ɗum, leyɗe maɓɓe ɗen jaɓitaa. Pellet, Joomi maaɗa an Nulaaɗo, ñaawoyay hakkunde maɓɓe Ñalnde Darngal, e kon ko ɓe lurraynoo e muuɗum, O yoɓita goonguɗo e fenuɗo e maɓɓe on kala ko hanndi.

An Nulaaɗo, si a wonii e sikkitaare maa ette-ette e Qur'aanaare nde Men jippini nden e maaɗa lanndo ɓen gomɗimɓe ka alyahuuda, janngooɓe Tawreeta ɓen, e annasaara'en, janngooɓe Linjiila ɓen. Ma ɓe humpite wonnde ko jippinaa e maa kon ko goonga, tawde ɓe hawray ka ɗum joopaa fii mun ka defte maɓɓe. Gomɗii goonga ka sikke alaa e mu'un arii e maaɗa, immorde ka Joomi maa, wata a jeye e sikkitotooɓe ɓen.

Wata a jeye e ɓen fennuɓe hujjaaji Alla ɗin e dalil- laaji Makko ɗin, laatoraa ɗum jeyaaɗo e sooyuɓe ɓen ɓe sooyirɓe naɓugol wonkiiji mun ɗin e halkaare sabu geddi maɓɓe ɗin. Ndee jertinannde fow ko fii ɓanngingol bone sikkitaare e fennugol, si wanah ɗum kan, Annabiijo on ko daɗndaa-ɗo e ɗum.

Pellet, ɓen ɓe ñaawoore Alla nden tabitaniɓe ayay e keeferaaku tabiti e muuɗum, sabu ko ɓe haɓɓitii kon e ɗum, ɓe gomɗintaa abadaa.

Hay si kala Aaya sariya maa winndereyanke arii ɓe, haa ɓe yi'a lepte muusuɗe ɗen, ɓe gomɗina fewndo gomɗinal nafataa ɓe.

Meeɗaali ka hoɗo ngo Men Nuli e mun Nulaaɓe Amen ɓen gomɗinta gomɗinal nafayngal ɓaawo yi'ugol lepte ɗen, gomɗinal maɓɓe nafa ontuma si wanaa yimɓe Yuunusa ɓen: nde ɓe gomɗinnoo gomɗinal goonga, Men huncanno ɓe lepte koyeera e jaasere ɗen ka nguurndam aduna, Men dakmiti ɓe haa e saanga timmugol laje maɓɓe ɗen.

Sinno Joomi maa an Nulaaɗo muuyuno, denndaa- ngal wonɓe ka leydi ɓen gomɗianayno, ko woni tun O muuyiraali ɗum hikma. Himo majjinira on Mo muuyi nunɗal Makko, O fewnira on Mo O muuyi ɓural Makko. A hattantah waawnunde yimɓe ɓen fii no ɓe laatora gomɗimɓe, tawde ɗum ko juuɗe Alla tun woni.

Haananaa wonki nde ki gomɗinana hoore-makki si wanaa nde Alla duŋii, gomɗinal ko e muuyɗe Alla heɓorta. Wata a naɓu wonkii maa e maɓɓe fii ninse. Alla hino waɗa lepte ɗen e koyeera on e hoore ɓen ɓe anndataa hujjaaji Makko ɗin e yamirooje Makko ɗin e haɗaaɗi Makko ɗin.

An Nulaaɗo, maakan sirkooɓe lanndotooɓe ma ɓen: taskee ko honɗum woni ka kammuuli e ka leydi, immorde e maandeeji tinndinooji gootaaku Alla e mbaawka Makko. Jippingol Aayeeje ɗen e hujjaaji ɗin e Nulaaɓe ɓen nafata yimɓe ɓe hebilanaaki gomɗinal, tawde hiɓe haɓɓitoo e keeferaaku.

Hara ɓee fennooɓe hino habbitii si wanah yeru peƴƴi ɗi Alla liɓunoo e mofte fennuɓe yawtuɓe ɓen? An Nulaaɗo, maakan ɓe: habbitee lepte Alla ɗen, min miɗo wonndi e mo'on jeyaaɗo e habbitiiɓe fodoore Joomi am nden.

Refti Men jippina lepte ɗen e maɓɓe, Men daɗnda Nulaaɓe Amen ɓen, men daɗndida e maɓɓe kadi ɓen gomɗimɓe. Huunde ko yanata e mofte maɓɓe ɗen hewtataa ɓe. Ko woni Men daɗndiri non ɓen Nulaaɓe e gomɗimɓe wonnduɓe e maɓɓe, Men daɗndirta Nulaaɗo Alla on e gomɗimɓe wonnduɓe e makko ɓen danndal jojjungal tabiti e Amen.

Maaku an Nulaaɗo: ko onon yimɓe, si on wonii e sikkitaare e diina am kan ka mi noddata on e muuɗum; woni diina tawhiidi, min on kan ko mi fellituɗo bonugol diina mon, mi jokkataa kan. Mi rewataa ɗin ɗin rewoton gaanin Alla. Ko mi rewata ko Alla On waroowo on, O yamirii lam nde mi laatotoo e laɓɓinamɓe Alla diina ɓen.

O yamirii lam kadi nde mi ñiiɓata e diina goonga kan, mi tabitira e makka ooñagol e kala diina lunndiika, O haɗi lam nde mi wonata jeyaaɗo e sirkanooɓe ɓen.

Wata a noddu an Nulaaɗo, gaanin Alla, immorde e sanamuuji e ko wanaa, kon ko alah nafa sakko nafe, wanaa kadi lorra sakko lorre. Si a rewii ɗi, an dey haray ontuma a jeyaama e tooñooɓe ɓen jag-gitooɓe haqqee Alla e haqqeeji mun.

Si Alla meminirii ma -an Nulaaɗo- jarrabuyee, a ɗaɓɓii huncaneede ɗum, alaa huncanoowo ma ɗum si wanaa Kanko Seniiɗo on. Si O faandike e maaɗa yaajeende, hay gooto haɗataa ɓural Makko ngal. Himo meminira ɓural Makko ngal on Mo Muuyi e jeyaaɓe Makko ɓen, alah baawnoowo Mo. Ko Kanko woni Haforanoowo kala tuubuɗo e jeyaaɓe Makko ɓen, Hinnotooɗo ɓe.

Maaku an Nulaaɗo : Ko onon yo yimɓe, gomɗii Alqur'aana arii e mon, jippiniraande Joomi mon. Kala feewuɗo o gomɗini nde, nafa mun ko e makko yiltotoo; tawde Alla ko yonndiniiɗo gaay e dewe jeyaaɓe Makko ɓen. Kala kadi majjuɗo, haray battane majjere makko nden ko e makko tun defotoo. Alla lorrortah geddi jeyaaɓe Makko ɓen. Min non wonaa mi fawaaɗo reenugol golle mon, sakko mi hasba on e majje.

An Nulaaɗo, jokku kon ko Joomi maa woni wahayinnde e maaɗa, gollitiraa, muñño-ɗaa e lorra yimɓe maa lunndiiɓe ma ɓen e tuma yottingol ko yamira-ɗaa kon. Duumo e ɗum ɗoo haa Alla ñaawira fii maɓɓe hikma Makko on wallitagol ma e maɓɓe ka aduna, e leptugol ɓe ka laakara si ɓe maayi e keeferaaku.

Alif, Laam, Raa: Yewtere fii sugu ɗee karfe yawtiino ka cortewol Baqarah. Deftere Alqur'aana nden ko ɗigginaande Aayeeje mun ka njuɓɓudi e ka maanaa. A hawrataa e ella maa ko ɗuytal e mayre. Refti ɗen ɓannginiraa janntagol harmi e ko dagii, yamira haɗa, foda kammba, fillaayeeji ekn. Ko nde immorde ka Ñeeñuɗo e toppitagol Mun e saria Mun, Humpitiiɗo fiyakuuji jeyaaɓe Makko ɓen e kon ko moƴƴani ɓe.

Coomdi ɗee Aayeeje jippinaaɗe e Muhammadu (yo o his) : Ko haɗugol jeyaaɓe ɓen nde ɓe rewida- ta goɗɗum goo e Alla. Min on, wonannde on onon ɓee yimɓe, ko mi hulɓiniroowo on e lepte Alla ɗen si on yeddii Mo, e wewliniroowo on mbarjaari Makko ndin si on gomɗinii Mo, on gollitirii sari'a Makko on.

Onon ɓee yimɓe, ɗaɓɓiree Joomi mon haforaneede junuubi, ruttoron e Makko ninsugol e kon ko fantinɗon e Makko. O dakmitiray on ka nguurndam aduna dakamme labaaɗo haa e waqtu lannugol laje mon happaaɗe ɗen, O jonna kala jom ɓural ka ɗoftaare e ka golle, njoɓdi ɓural Makko ngal no timmiri hara ɗuytaaki. Si on ɗuurnike gomɗingol ko mi addi kon immorde ka Joomi am, haray min mi hulanii on lepte ñalaande kulol sattunde, nden woni Ñalaande Darngal.

Ko ka Alla tun woni ruttorde mon nden Ñalnde Darngal, onon ɓee yiimɓe, Kanko Seniiɗo On, ko O hattanɗo kala huunde, huunde ronkintaa Mo, wanaa wuurnugol on maa wuurnita on hasba on ɓaawo maayde mon.

Anndee ɓee sirkooɓe hino sowa ɓerɗe maɓɓe ɗen fii suuɗugol ko woni e majje kon e sikkitoragol Alla sabu ko ɓe majjaa Mo. Anndee tuma ɓe suumirta ko'e maɓɓe ɗen comci maɓɓe ɗin, Alla no anndi ko ɓe suuɗata e ko ɓe feññinta. Pellet ko O annduɗo ko ɓerɗe maɓɓe ɗen suuɗata.

Alaa e tagaangel ruugayngel ka hoore leydi, no ngel foti e waade, si wanaa Alla no fawtorii arsike maggel ɓural Makko ngal. Kanko Seniiɗo on Himo anndi ñiiɓirde maggel ka leydi, Himo anndi kadi nokku ka ngel maayata. Ruugayɗi ɗin fow e arsike majji on, e nokku ñiiɓirde majji on e ka ɗi maayata ɗon, hino e Deftere ɓanngunde; nden woni Alluwal Reenaanagl ngal.

Ko Kanko Seniiɗo On tagi kammuuli ɗin e leydi ndin no ɗi mawniri. O tagi kon ko woni e majji nder balɗe jeegoo, hari arsi Makko kin ado ɗin ɗiɗi tageede no ka hoore ndiyam. O tagiri on onon ɓee yimɓe, fii ndaarndagol on ko hommbo e mo'on ɓurata moƴƴinnde gollal welayngal Alla, O annda ko hommbo ɓurata bonude gollal tikkinayngal Mo, O yoɓita kala ko haandi kon. Pellet an Nulaaɗo, si a wi'anii ɓe: Onon ɓee yimɓe, ko on immintinoyteeɓe ɓaawo maayde fii ñaawoore, maa ɓen yedduɓe Alla e immital wi'ane: Ndee Alqur'aanaare nde janngataa wonaali si wanaa mbilewu ɓanngungu, ko nde meere feeñunde ɓanngunde meere-mun.

Pellet si Men nennitanii sirkooɓe ɓen ko ɓe haandi kon e lepte ka nguurndam adun haa e dumunna lintaaɗo, maa ɓe wi'ir hawjere e jalkitugol ɗum: Ko honɗum tonngi lepte ɗen e amen? Anndee lepte ɗen ɗe hannduɗon, hiɗe happaa ka Alla. Ñalnde ɗe arat e maɓɓe, ɓe heɓatah fes suroowo ɓe e majje, ko maa ɗe yana e maɓɓe. Lepte ɗen ɗe hawjirnoo jalkitugol na fiiltiiɓe.

Si tawii Men yeɗii neɗɗanke on neema immorde ka Amen; wano neema cellal e ngalu, refti men ɓoori ɗin neemaaji e makko, pellet kanko ko o heewuɗo taƴaade e yurmeende Alla, mawnuɗo yeddugol neemaaji Makko. O yejjita ɗi si Alla ɓoorii ɗi e Makko.

Si tawii Men meminirii mo arsike e cellal, ɓaawo baasal e ñawu ko heɓunoo mo, ko maa o wi'oy: Bone on iwii e am, lorra kan yehii. O ronka yettude Alla e ɗum. On ɗon ko heewuɗo weltaare, ɗuuɗuɗo ñaañagol e yimɓe ɓen ko Alla neemini kon e makko.

Si wanaa ɓen muññiiɓe e waawneede, e tottugol dewe ɗen, ɓe muññii e faggagol goopi, ɓe golli golle moƴƴe. Hino woodani ɓen ɗon alhaali goo, tawde taƴaare heɓataaɓe, wanah yeddugol neema Alla, wanaa kadi ñaaƴagol e yimɓe. Ɓen siforiiɓe ɗin sifaaji, hino woodani ɓe immorde ka Joomi maɓɓe, haforaneede junuubi, hino woodani ɓe kadi njoɓdi mawnundi ka laakara.

Belajo'o an Nulaaɗo, sabu ko hawruɗaa kon e keeferaaku maɓɓe e sattere feere maɓɓe e Aayee-je ɗeɓe lanndii ɗen, haawnaaki accaa yottingol yoga e ko Alla yamiru maa kon, fii ko ɗum sattanta ɓe gllugol kon, e ko ɓernde maa nden ɓiɗtorta kon yottingol ɗum, fii wata ɓe wi'oy: Ko haɗno ngalu jippinee e makko ko o yonndinora? maa Malaa'ikaajo arda e makko ko goongina mo? Wata a accu yottingol yoga e ko wahayinaa e maaɗa fii ɗum. Aan a wonaali si wanaa jertinoowo ko Alla yamiru-maa yottingol kon. Fawaaki ma addugol ko ɓe lanndotoo e Aayeeje. Alla ko reenuɗo kala huunde.

Kaa hara sirkooɓe ɓen wi'ay: Muhammadu fefindi Alqur'aana, hara wanaa nde wayahu immorde ka Alla? Maakiran ɓe an Nulaaɗo teeragol: Addee Corteeji(cimooje) sappo yeru ndee Alqur'aanaare, cincaande, hara on hatonjina e ko goonngina ɗi sifa Alqur'aana nde aaƴiɗon nden ko fefindaande, noddon kala mo haɗtanɗon ko wallitoron e ɗum, si on laatike goonguɓe e nodditagol wonnde Alqur'aana ko fefindaande.

Si ɓe addaali ko lanndiɗon ɓe kon -tawde ɓe hatta- naani ɗum-, haray onon ɓee gomɗimɓe, anndiree pellital wonnde Alqur'aana ko Alla jippininde e ganndal Makko dow Nulaaɗo Makko on, wanah nde fefindaande. Anndon kadi alah rewe- teeɗo e goonga si wanaa Alla. Hara onon ko on jebbilora- niiɓe Mo e ɗii hujjaaji taƴoral ɗoo?

Kala on tawɗo ko o faandorii golle makko ɗen ko nguurnadam aduna e cuɗaari majjam lannoojam, wanah laakara on faandori ɗe, Men hunnanay ɓe baraaji golle maɓɓe ɗen aduna, Men yeɗaɓe cellal, e hoolaare, e yaajireede arsike ko aldaa e ɗuytaneede huunde e baraaji golle maɓɓe ɗin.

Ɓen siforiiɓe nden faandaare ŋiñaande, alanaaɓe e baraaji Ñalnde Darngal, si wanah naadeede Yiite. Baraaji golle maɓɓe ɗen sooya, golle maɓɓe ɗen wona meere; tawde ɗe ardiniranooka gomɗinal, wanaa faandaare sellunde. Ɓe faandoranooki golle maɓɓe ɗen fii Alla e galle laakara ɗen.

Fototah Annabiijo Muhammadu (yo o his) hino wondi e burhaanu immorde ka Joomi makko, hino jokkiti mo seediiɗo immorde ka Joomi makko, on woni Jibriilu. Hino seedanoo mo kadi e Annabaaku makko ngun ko adii, Tawreeta jippinanoonde nden e Muusaa (yo o his), nden ɗoworde yimɓe yurmeende maɓɓe. Kanko e ɓen gomɗimɓe wonnduɓe e makko ɓe fotatah e ɓen heeferɓe yooliiɓe e majjere; tawde ɓeya kan hino gomɗini Alqur'aana e Muhammadu on mo nde jippinaa e muuɗum. Kala yedduɗo mo e ɗiya diinaaji, haray ko Yiite ngen woni fodoore makko nden Ñalnde Darngal. Wata a laato an Nulaaɗo, e sikkitagol Alqur'aana e kon ko ɓe fadaa. Pellet ɗum ko goonga ka sikke alah e mu'un, ko woni tun, ko ɓuri ɗuuɗude e yimɓe ɓen gomɗintaa, e hoore kon ko ɗuɗɗinaa e dalilaaji ɓannguɗi.

Alah ɓurɗo tooñude haa hewta on fefindiiɗo fenaande e hoore Alla, o dammbira Mo sirku maa ɓiɗɗo. Ɓen faggitotooɓe ɗen penaale e hoore Alla, ɓe weeɓitoyte ka Joomi maɓɓe Ñalnde Darangal, fii yo O lanndito ɓe golle maɓɓe ɗen. Malaa'ikaaɓe e Nulaaɓe seedinooɓe ɓen wi'a: "Ko ɓee ɗoo woni fenunooɓe baKki e Alla ɓen, ɓe dammbi e Makko sirku e ɗiɓɓo. Hey, kuddi Alla ndin wonii e ɓen tooñirɓe ko'e mun fenugol e Alla.

Ɓen sakkotooɓe yimɓe ɓen gaay e laawol Ala focciingol ngol, hiɓe ɗaɓɓana ngol ooñaare gaay e foccagol ngol fii wata gooto jokku ngol. Kamɓe kadi hiɓe yedda immital ɓaawo maayde.

Ɓen siforiiɓe ɗin sifaaji, ɓe laatanooki hattanɓe laa- wagol lepte Alla ɗen ka leydi si ɗe jippike e maɓɓe. Alanaaɓe kadi yiɗɓe wallondirteeɓe gaanin Alla ko duñana ɓe Makko ɗen. Lepte ɗen sowoyte ɓe Ñal- Ñalnde Darngal sabu ko ɓe woɗɗitori ɓe laatanoo-ki woɗɗintini woɗɓe goo e laawol Alla ngol. Ɓe laa- tanooki hattanɓe nanooɓe jaɓa goonga e peewal, ɓewa wonaano kadi yi'ooɓe taskoo Aayeeje Alla ɗen ka Winndere, tawde ko ɓe lunndorinooɓe goonga kan ko tiiɗi.

Ko ɓen siforiiɓe ɗin sifaaji woni sooyimɓe ko'e mun naadugol ɗe e halkaare sabu ko ɓe kafidi(renndini) kon e Alla. Kon ko ɓe luurunoo e kafideteeɗi e tefooji majjiri ɓe.

Sikke alaa wonnde ɓen ɗon Ñalnde Darngal, ko kamɓe ɓuroyta sooyude, tawde ɓe waɗtitirii liimanaaku ngun keeferaaku, laakara on aduna, yurmeende nden lepte.

Ɓen gomɗimɓe Alla e Nulaaɗo Makko on, ɓe golli golle moƴƴe, ɓe yankinanni Alla, ko ɓen woni yimɓe Aljanna ɓen, kamɓe koɓe duumotooɓe ton poomaa.

Misal feddeji ɗiɗi ɗin ka heefereɓe e ka gomɗimɓe: ko wano bunɗo mo yi'ataa, e faaɗuɗo mo nanataa, ɗum ko misal heeferɓe ɓen ɓe nanatah jaɓa goonga, ɓe yi'atah ɓe taskoo ko nafata ɓe. Misal goo ko nanoowo e yi'oowo, ko ɓen woni misal fedde gomɗimɓe ɓen hawtuɓe nanugol yi'a. E nee, ɗin feddeeji ɗiɗi no fata sifa e fiyaaku? Ɓe fotatah. E on waajitotaako e kon ko ɓe fotatah?

Gomɗii Men Nulii Nuuhu e yimɓe makko ɓen, o maakani ɓe: ko onon yo yimɓe, min komi jertinoowo on e lepte Alla, ɓannginanɗo on komi Nulaa kon e mooɗon.

Miɗo nodda on e rewugol Alla tun, hara on rewaali si wanaa Kanko. Min miɗo hulani on lepte ñalaande muusunde.

Mbatu tedduɓe e hooreeɓe yedduɓe ɓen ka yimɓe makko wi'i: Men noototaako noddaandu maa; tawde a hanndaa e huunde, an ko a ɓanndinke sifa amen, e tawde kadi men yi'aali ɓen jokkuɓe ma si wanaa jaasuɓe amen e ko feeñani men e giiɗe, tawde kadi on ɓeydoraa teddungal e jawdi e jaahu ko men jokkira on. Worin meɗen sikki on fenooɓe e ko noddoton e mun.

Nuuhu maakani ɓe: Ko onon yo yimɓe am, yeetee lam si tawii miɗo e ɓanngannduyee immorde ka Joomi am ko seeditoo e goonga am; waɗɗina on googingol lam, O yeɗii lam yurmeende Annabaaku e Nuleede immorde ka Makko, ɗum wirniraa e mon majjeede mon ɗum, e men waawnay on e gomɗingol nde naada e ɓerɗe mon? Men hattanaaka ɗum. Ko Alla tun hawrindinta e gomɗinal.

Ko onon yo yimɓe am, mi ɗaɓɓirah on njoɓdi e yottingol Nulal ngal, njoɓdi am ndin ko Alla fawtii. Minmi raɗotaako waasuɓe gomɗimɓe ɓen e jonnde am fii on ɗaɓɓirii lam ɗum. Kamɓe ko ɓe hawrayoo- ɓe e Joomi maɓɓe Ñalnde Darngal, O yoɓita ɓe njoɓdi gomɗinal maɓɓe. Ko woni tun, min miɗo yi'ii on yimɓe ɓe faamataa haqiiqa noddaandu am ndun, tawde hiɗon ɗaɓɓira lam raɗagol lo'uɓe gomɗimɓe ɓen.

Ko onon yo yimɓe am, ko hommbo duñanoyta lam lepte Alla ɗen si mi raɗorike ɓee gomɗimɓe tooñe ko aldaa e bakkaatu? E on waajitotaako, etoɗon huuwude ko nafata on?

Mi wi'antaa on, onon ɓee yimɓe am, miɗo mari ngaluuji Alla ɗi arsike Makko on woni e mun, fii ko mi jonna on si on gomɗinii. Mi wi'atah on kadi: miɗo anndi ko wirinii, mi wi'ataa on kadi: ko mi mayko. Si ko woni, min ko mi ɓanndinke sifa mon. Mi wi'atah waasuɓe ɓen ɓe gite mon yawitii haa fanɗinɗon fii maɓɓe: Alla yeɗataa ɓe hawrineede maa peewal. Ko Alla ɓuri anndude annuyeeji maɓɓe e fiyakuuji maɓe. Min ontuma si mi waɗii ɗum, haray mi jeyaama e tooñuɓe jojjuuɓe e lepte Alla ɓen.

Ɓe wi'i: ƴaggugol e townitagol an Nuuhu, gomɗii a wenjondirii e amen, a ɗuɗɗinii wenjondiral ngal e amen. Addan men kon ko fodu-ɗaa men e lepte, si a laatke jeyaaɗo e goonguɓe e ko nodditto-ɗaa ko.

Nuuhu maakani ɓe: Min mi addantah on lepte, ko Alla addanta on ɗum -si O muuyii- on wonaali hattanayɓe laawagol lepte Alla ɗen si O faandike leptugol on.

Laaɓalam reedu e waaju am nafataa on, si tawii Alla no faandii majjingol on e laawol focciingol ngol, o woɗɗina on e peewal ngal sabu ƴaggere mon nden. Ko Kanko woni Joomi mon, ko Kanko anndi fii mon: Himo majjina on si O muuyii, ko ka Makko tun woni ruttorde mon Ñalnde Darngal, O yoɓita on njoɓdi golle mon.

Ko yimɓe Nuuhu ɓen yeddiri kon, ko sabu ko ɓe aaƴƴii kon wonnde Alla o fefidni diina ka o addi kan o fawi e Alla. Maakan ɓe an Nulaaɗo: "Si mi fefindi nde, ko min tun lepte bonnere am nden fawii, mi fawtotaako huunde e bakkaatu bonnere fennugol mon ngol. Min ko daɗndiiɗo e ɗum.

Alla wahayini e Nuuhu wonnde: Gomɗintah e yimɓe maa ɓen an Nuuhu, si wanaa ɓen gomɗin- nooɓe ko adii. Wata a sunor yo Nuuhu, e ko ɓe gollaynoo e fennugol jalkita on dumunna juutuɗo.

Moƴƴinir laana kan e dankata Amen, e yamiroore Amen tinndingol ma no moƴƴiniraa ka. Wata a yewtidoy e Am ɗaɓɓirgol Lam nennangol tooñirɓe wonkiiji mun ɗin keeferaaku. Pellet, ko ɓe yooliroy- teeɓe Ilam Tuufaan on -feere mun alaa-; ɗum ko lepte maɓɓe ko ɓe haɓɓitii kon e keeferaaku.

Nuuhu waɗi yamiroore Joomi mun, o woni e lesugol laana kan. Tuma kala nde dental hoorewal yimɓe makko ɓen rewi ɗon, ɓe jalkita mo ko o lesirta laana kan ka leydi ndi alah ndiyam e canɗi. Nde jalkitugol ngol filli-fillini, o maaki: Ko onon yo dental hooreeɓe, si on jalkitii men ka men lesata kaa laana ɗoo, menen kadi men jalkitoyay on majjere mon nden tuma nde yooloyteɗon.

Aray nde anndon ko hommbo lepte aduna hoynayɗe aroyta e muuɗum, lepte duumiiɗe jippoyoo e makko Ñalnde Darngal.

Annabi Nuuhu gayni lesude laana kan ka Alla yamiri mo lesugol, haa nde yamiroore Amen halkugol ɓe ngol ari, ndiyaɗam ka huɓɓinirde maɓɓe bireedi fatii, fii no ɓe anndira haacaango ngon, Men daalani Nuuhu: Ronndo ka laana e kala nooneeji ɗiɗi immorde e kulle leydi ɗen resindirayɗi, ronndoɗaa kadi ɓeynguure maa nden -si wanaa ɓen ɓe ñaawoore yoolagol ngol aditii e mun; tawde ɓe daɗataa- ronndoɗaa kadi ɓen gomɗinɓe e yimɓe maaɗa ɓen. Gomɗinaano mo si wanaa seeɗaaɓe nii, e hoore ko dumunna ñiiɓugol e maɓɓe ngol juutiri mo kon fow, himo nodda ɓe e gomɗingol Alla.

Nuuhu maakani gomɗimɓe mo ɓen e yimɓe makko ɓen: Waɗɗoree ka laana. ko Innde Alla ka dogirta, ko Innde Makko ka teerata. Pellet, Joomi am ko Haforoowo junuubi kala tuubuɗo e jeyaaɓe Makko ɓen, Hinnotooɗo ɓe. Hino jeyaa e ko O yumertee gomɗimɓe ɓen, ko O daɗndiri ɓe kon halkagol.

Laana kan no dogina yimɓe e kala ko woni e makka e nder mollooɗe mawnuɗe waaɗe wa pelle. Sabu yurmeende baaba nden, Nuuhu noddi ɓiɗɗo makko yeddunooɗo on, hari on selindii e ben-mun e yimɓe mun: Ko an yo ɓinngel am, waɗɗida e amen ka laana fii yo a daɗu yoolagol, wata a wonndu e yedduɓe ɓen haa halkide-ɗaa e maɓɓe yoolagol.

Ɓinngel Nuuhu ngel wi'i: Mi ƴawoyay e fello toowungo fii no mi daɗira ndiyam ɗam. Nuuhu maakani ɓinngel makko ngel: Alah ko daɗndata lepte Alla ɗen yoolirgol Tuufaan si wanaa Alla yurmirteeɗo yurmeende Makko nden on Mo O muuyi. Mollooɗe ɗen heedini hakkunde Nuuhu e ɓiɗɗo makko yedduɗo on, on laatodii e yooliraaɓe haacango ngon keeferaaku maɓɓe ngun.

Alla daalani leydi ndin ɓaawo tuufaana on gasude: Ko an yo leydi, moɗu ndiyam maa tuufaana ɗam. O daalani kadi kammu ngu: Ko an yo kammu, ɗoofu, wata a saaƴin ndiyam. Ndiyam ɗam ɗuytii haa leydi ndin yoori, Alla halki yedduɓe ɓen. Laana kan daroyii ka dow fello juudiiy. Wi'a: Goɗɗal e halakuyee woodanii yimɓe yawtirɓe keeri Alla ɗin keeferaaku.

Annabi Nuuhu noddi Joomi makko himo faabinoo Mo, o maaki: Joomi am, pellet ɓiɗɗo am on ko e ɓeynguure am nde foduɗaa lam nden jeyaa, pellet fodoore Maa nden ko goonga nde tultatah. Ko An ɓuri nunɗude ñaawooɓe ɓen, ɓuri ɓe anndude.

Alla daalani Nuuhu: Ko an yo Nuuhu, pellet ɓiɗɗo maa mo tori-ɗaa Lam daɗndugol on, o jeyaaka e ɓeynguure maa nde Mi fodu maa nden; tawde ko o keefeero. Pellet ndee toraare maa yo Nuuhu, ko gollal ngal moƴƴah, ngal yaadah e jogitiiɗo martaba maaɗa. Wata a toro Lam ko a alanaa ɗum ganndal. Min Miɗo rentina maa nde jeyete-ɗaa e majjuɓe ɓen, haa toro-ɗaa Lam ko lunndii ganndal Am e hikma Am.

Annabi Nuuhu maaki: Joomi am, miɗo moolora Maa, daɗndinora Maa nde mi lanndoto Maa ko mi alanaa ɗum ganndal. Si wanah A hafranam goopol am ngol, yurme-Ɗaa mi yurmeende Maa nden, mi jeyete e ɓen hayruɓe laakara.

Alla daalani Nuuhu (yo o his): Ko an yo Nuuhu, jippor e laana kan ka leydi wonndude e kisal e hoolaare, e neemaaji ɗuuɗuɗi hoore-maaɗa immorde ka Alla -e hoore jurriiyaaji ɓen gomɗimɓe wonndunooɓe e maaɗa ka laana aroyooɓe ɓaawo maaɗa. Mofte goo e ɓiɗɓe maɓɓe yedduɓe ɓen, aray Men dakmita ɓe e ɗam nguurndam aduna, Men newinana ɓe ko ɓe wuurira; refti memoya ɓe ka laakara immorde e Amen, lepte muusuɗe.

Qissa Nuuhu on ko jeyaaɗo e kumpite wirniiɗe. An Nulaaɗo, a anndaano ɗe an, yimɓe maa ɓen kadi anndaano ɗe ado oo wahayu mo Men wahayini e maaɗa. Muññor lorra yimɓe maa ɓen e ko ɓe fennata kon, wano Annabi Nuuhu muññornoo. Pellet ballal ngal e poolal ngal, wonanii ɗoftotooɓe yamirooje Alla ɗen ɓe woɗɗitoo haɗaaɗi Makko ɗin.

Men Nuli kadi faade e Aadinkooɓe ɓen, musiɗɗo maɓɓe on Huudi (yo o his). O maakani ɓe: Ko onon yo yimɓe, rewee Alla tun, wata on kafidu Mo e gooto. Reweteeɗo e goonga alanah on ko woori Mo. On wonaali e ngol nodditagol mon wonnde himo mari kafidiiɗo, si wanaa ko on fenooɓe.

Ko onon yo yimɓe am, mi ɗaɓɓiraa on njoɓdi e ko mi yottinta e mon kon, mi noddira on ɗum immorde ka Joomi am. Njoɓdi am wonaali si wanah ka Alla taguɗo lam on. E on haqqiltah ɗum? Nootoɗon noddaandu am ndun?

Ko onon yo yimɓe am, ɗaɓɓiree Alla haforanal, refti tuubanon Mo junuubi mon ɗin, ɓuri mawnude e majji ko sirku. O yoɓitiray on ɗum jippingol toɓo ɗuuɗungo, O ɓeyda on teddungal e hoore teddungal mon ngal ɗuuɗireede ɓiɗɓe e jawle. Wata on ɗuurno e ko mi noddata on kon, laatoron ngol ɗuurngal mon ɗon bomɓe e yedduɓe Alla fennuɓe ko mi addi kon.

Yimɓe makko ɓen wi'i: "Ko an yo Huudu, a adda-ranaali men hujja ɓannguɗo fii no men gomɗinire. Men wonaali kadi accitirooɓe reweteeɗi amen ɗin fii konngol maa ko aldah hujja. Men wonaali gomɗi- nooɓe ma e kon ko noddataa e mun wonnde ko a Nulaaɗo.

Men wi'atah si wanaa yoga e reweteeɗi amen ɗin meminirii ma bone feetere, tawde hiɗa haɗude men e rewugol ɗi. Huudu maaki: "Min miɗo seedina Alla -seeditee onon kadi- wonnde min, ko mi daɗndiiɗo e rewugol reweteɗi mon ɗin gaanin Alla. Fewjanee lam onon e reweteeɗi mon ɗi aaƴotoɗon ɗin wonde ɗi memirii lam feetere, refti wata on nennitanam.

Men wi'atah si wanaa yoga e reweteeɗi amen ɗin meminirii ma bone feetere, tawde hiɗa haɗude men e rewugol ɗi. Huudu maaki: "Min miɗo seedina Alla -seeditee onon kadi- wonnde min, ko mi daɗndiiɗo e rewugol reweteɗi mon ɗin gaanin Alla. Fewjanee lam onon e reweteeɗi mon ɗi aaƴotoɗon ɗin wonnde ɗi memirii lam feetere, refti wata on nennitanam.

Min mi fawike e Alla tun, Mo mi yowi fiyaake am e Mun. Ko Kanko woni Joomi am e Joomi mon. Alaa e ruugayngel ka hoore leydi, si wanaa ko yannkiniingel senngo Laamu Makko ngun. Himo firlita ɗum no O muuyiri. Pellet, Joomi am ko e goonga e nunɗal woni: O wurtatah on e hoore-am; tawde ko e goonga mi woni, onon kan hiɗon e meere.

Si on ɗuurnike on huccitii e ko mi addi kon, haray fawaaki lam si wanaa yottingol e mooɗon. Gomɗii non mi yottinanii on kala Alla Nulimmi kon O yamiri- mi yottingol. Hujja on ñiiɓii e mon, aray nde Joomi am halkata on, O adda yimɓe goo ko lontoo on. On lorrirtaa Alla ngol fennugol ɗuurnoo mon mawni fanɗi; tawde ko O yondiniiɗo e jeyaaɓe Makko ɓen. Pellet, Joomi am ko reenuɗo kala huunde, ko Kanko reenata lam e bone mo fewjanton lam on.

Tuma nde yamiroore Amen halkugol ɓe ngol arno, Men hisiniri Huudu e ɓen gomɗimɓe wonnduɓe e makko yurmeende Amen. Men hisini ɓe e lepte tiiɗuɗe ɗe Men leptirnoo yimɓe makko yedduɓe ɓen.

Ɓen Aadinkooɓe, ɓe yedduno Aayeeje Alla Joomi maɓɓe on, ɓe yeddi Nulaaɗo maɓɓe on Huudu, ɓe ɗoftii yamiroore kala townitaniiɗo goonga, bewɗo mo jaɓataa goonga.

Ɓe jokkintinaa ka nguurndam aduna ɗoo, jaasere e kuddi Alla. Ko wano non Ñalnde Darngal, ko ɓe woɗɗintinoyteeɓe e yurmeende Alla, sabu ko ɓe yeddi Mo kon. Anndee Alla woɗɗintinii ɓe e kala moƴƴere, O ɓaɗnirii ɓe e kala bone.

Men Nulii kadi e Samuuda'en, musiɗɗo maɓɓe on Saalih, on maaki: Ko onon yo yimɓe am, rewee Alla tun. Reweteeɗo hannduɗo e dewal alanah on ko woori Mo. Ko Kanko woni taguɗo on immorde e mbullaari leydi ndin tagugol ben mon Aadama e mayri, O waɗi on wuurnoo ɓe ndi. Ɗaɓɓiree Mo haforanal, refti tuubiron ka Makko ɗoftagol tertoo geddi. Pellet, Joomi am ko ɓadiiɗo kala laɓɓinanɗo Mo dewal, jaabotooɗo kala toriiɗo Mo.

Yimɓe makko ɓen wi'ani mo: Ko an yo Saalihu, gomɗii a woniino hakkunde amen yaakoraaɗo ado nduu noddaandu maa. Hari meɗen sikku maa haqqilɗo laaɓa-reedu diisondirteeɗo. E a haɗay men an Saalih, rewugol ko baabiraaɓe amen rewaynoo? Menen non, men wonii e sikke e kon ko noddataa men e muuɗum fii rewugol Alla tun, ɗum waɗii meɗen tuumire bakugol fenaande e Alla.

Saalihu jaabii yimɓe makko ɓen o maaki: Ko onon yo yimɓe! Yeetee lam si mi woni e hujja ɓannguɗo ɓannguɗo immorde ka Joomi am, O okkii lam yur- meende Annabaaku immorde ka Makko, ko hombo daɗndata lam e lepte Makko ɗen si tawii mi yeddirii Mo ronnkude yottingol ko O Nuli lam kon e mon? On ɓeydatah lam si wanah majjere e woɗɗitagol welu Makko.

Ko onon yo yimɓe am, mbaa ɗoo ko ngelooba Alla maande goongugol am. Accee mba ñaama ka leydi Alla. Wata on memir-mba bone, sakko lepte ɓaɗiide heɓa on fewndo sodoton mba.

Ɓe sodi mba ka fantingol fennude. Saalihu maaka-niɓe: Dakmitoree nguurdam ka leyɗe mon yeru balɗe tati gila sodu-ɗon mba, refti lepte Alla ɗen aray e mon. Arugol ɗen lepte ko fodoore nde fenne- taake, si ko woni, ko nde fodoore goonga.

Nde yamiroore Amen halkugol ɓe ngol arunoo, Men daɗndiri Saalihu e ɓen gomɗimɓe wonnduɓe e makko -yurmeende immorde ka Amen-, Men dandi- riɓe koyeera e jaasere nden ñalnde. Pellet, Joomi maa, an Nulaaɗo, ko Kanko woni Doolnuɗo, Fooluɗo Mo fooletaake. Ko ɗum waɗi O halki mofte fennooɓe ɓen.

Haacaango tiiɗngo ngon halki Samuuda'en ɓe maayiri tiiɗere maggo. Ɓe waɗtini yanirɓe geece mun, leydi ndin notii e geece maɓɓe.

A sikkay ɓe meeɗaano ñiiɓude e ndin leydi maɓɓe hiɓe neeminora nguuree e yaajireede. Anndee pellet Samuuda'en yedduno Alla Joomi maɓɓe on, haa jooni ko ɓe woɗɗintinaaɓe e yurmeende Alla.

Gomɗii Malaa'ikaaɓe ɓen ardanii Ibraahiima e mbaadi worɓe, hiɓe wewlinira mo kanko e ɓeyngu makko Ishaaqa refi Yaaquube. Maalaa'ikaaɓe ɓen wi'i: "Kisal e mon". Ibraahiima ruttii jaabii: "Kisal e mon". O yaccii o addani ɓe ngaari juɗaandi fii ko ɓe nafoo, sikkude mo ko ɓe worɓe.

Nde Ibraahiima yi'unoo juuɗe maɓɓe ɗen alaa hewtude ngaari ndin, o anndi ɓe ñaamatah ndi, o faytinii ɗum e maɓɓe, o soomi e makko kulol maɓ- ɓe. Nde Malaa'ikaaɓe ɓen yi'unoo o hulii ɓe, ɓe wi'ani mo: Wata a hulu men, ko Alla Nuli men e yimɓe Luuti ɓen fii leptugol ɓe.

Tawi suddiiɗo Ibraahiima on "Saarah" hino darii, Men humpiti mo ko welata mo, ɗum woni jibingol Ishaaqa, Ishaaqa kadi jibinoya Yaaquuba. O jali, o weltorii ko o nani kon.

Yumma Saarah wi'i -ɓaawo nde Malaa'ika'en welti- nirnoo mo kon ko haawnii-: Ko honno mi jibinirta e hoore ko mi yummiraawo taƴiiɗo ɓiɗɗo, e hino gor-ko am on kadi nawyii? Pellet ngol jibingol biɗɗo e oo fiyaaku, ko huunde haawniinde, wanaa woowaande.

Malaai'ka'en wi'ani Saarah ɓaawo nde o haawnii welo-welo ngon: E a haawete muyɗe Alla e kattal Makko ngal? Sugu maa hulanaaka nde hooloto wonnde Alla ko hattanɗo sugu ɗum. Yurmeende Alla e barkiiji Makko ɗin wonii e mon, onon yimɓe suudu Ibraahiima ɓen. Pellet Alla ko Yettiniiɗo e sifaaji Makko e golle Makko, Jom- Teddungal toowungal.

Nde kulol hoɓɓe ɓen iwunoo e Annabi Ibraahiima, ɓaawo nde o anndude ɓe ñaamatah ko ɓe Malaaka enwelo-welo jibingol Ishaaqa refti Yaaquuba ngol ari e makko, o wattini himo wennjida e Nulaaɓe Amen ɓen fii yimɓe Luuti ɓen, fii no ɓe tonngiranee lepte ɗen, belajo'o ɓe daɗnda Luuti e yimɓe makko ɓen.

Pellet, Ibraahiima ko muññiiɗo, yiɗuɗo nennude lebte, ɗuuɗuɗo yankinangol Joomi mun, ɗuuɗuɗo du'agol, tuubanoowo Mo.

Makaai'kaaɓe ɓen wi'i: Ko an yo Ibraahiima, ɗuurno e ngol wennjondirgol fii yimɓe Luuti ɓen. Gomɗii yamiroore Joomi maa nden e liɓugol lepte ɗen e maɓɓe arii, e pellet, yimɓe Luuti ɓen, lepte mawɗe aray e maɓɓe, wennjugol maa du'agol ruttatah ɗe.

Nde Malaa'ikaaɓe ɓen arunoo ka Luuti e mbaadi worɓe, ardu maɓɓe ndun sunini mo, o ɓiɗtori fon-ndo makko ngon hulangol yimɓe makko yanayɓe e worɓe ɓen itta tuuyo acca ɗon rewɓe ɓen, o maaki: Ndee ɗoo ko ñalaande saɗtunde, sikkugol mo ɓe foolay mo e hoɓɓe makko ɓen.

Yimɓe Luuti ɓen ari e makko hiɓe yaccanoo huuwugol pankare e hoɓɓe makko ɓen. Ado ɗum non, hari ko ɓe ittaynooɓe tuuyo e worɓe ɓen ɓe acca rewɓe ɓen. Luutu maakani ɓe himo ngantinoo yeeso hoɓɓe makko ɓen: Ɓee ɗoo ko jiwɓe am jeyaaɓe e rewɓe mon, resee ɓe; ko kamɓe ɓuri laaɓannde on diini faahishaaku ngun. Hulee Alla, wata on hersinam e hoɓɓe am. Hara gorko alaa e mon, onon yimɓe am, haqqiloowo haɗa on e ɗee kuuɗe ñidduɗe?

Yimɓe makko ɓen wi'ani mo: "Pellet hiɗa anndi, an Luuti, wonnde haaju alanah men e jiwɓe maa ɓen wanaa kadi rewɓe yimɓe maa ɓen, men alah tuuyo ɗum. Pellet hiɗa anndi ko men faalaa. Ko worɓe tun men faalaa.

Luutu maakani ɓe: Sinno miɗo marunoo doole ko mi duñira on, maa gorol daɗndayngol lam, mi sakkoo on e hoɓɓe am ɓen.

Malaa'ikaaɓe ɓen wi'ani Luutu (yo o his): Ko an yo Luutu, pellet ko men Nulaaɓe Alla. Yimɓe maa ɓen hewtirtaa-ma bone. Yaltinir ɓeynguure maa nden e ngoo hoɗo jemma teɗɗam. Wata gooto e mo'on yeƴƴitor caggal mum, si wanaa ɓeyngu maa lunndotooɗo ɗum; ko fii heɓay mo ko yanata yimɓe maa ɓen kon e lepte. Anndon fodoore maɓɓe halkeede nden ko subaka, nden le ko fodoore ɓadiinde.

Nde yamiroore Amen halkugol yimɓe Luutu ɓen arunoo, Men waɗtiri dow saare maɓɓe nden ley mayre e hoore maɓɓe. Men saaƴini e maɓɓe kaaƴe iwruɗe e loope joorɗe fawondire.

Ɗe kaaƴe no maandiniraa ka Joomi maaɗa maande heeriinde. Ɗen kaaƴe wonaali woɗɗuɗe e tooñooɓe qurayshi ɓen e woɗɓe goo. Ɗen no hebilii tuma kala Alla hoddiri jippingol ɗe e maɓɓe, ɗe jippoo.

Men Nulii kadi e Madyana'en musiɗɗo makko on Shu'aybu, o m maaki: Ko onon yo yimɓe am, rewee Alla tun. Reweteeɗo haanduɗo e dewal alanaa on ko woori Mo. Wata on ɗuytu ɓetu ngun e manndake ɗen tuma etanton yimɓe ɓen. Min on miɗo yi'i on e yaajraaɓe arsike e neema. Wata on waɗtitir neema Alla on e mooɗon geddi. Min non miɗo hulani on lepte ñalaande fiiltotoonde kala gooto e mo'on, on heɓataa ka dogiri wanaa ka faaboɗon.

Ko onon yo yimɓe am, hunniree ɓetu ngun e manndake ɗen nunɗal tuma etanton woɗɓe goo. Wata on ɗuytiran yimɓe ɓen huunde e haqqeeji maɓɓe ɗin hodo e janfa, wata on bonnir ka leydi warugol e geddi ko wonaa ɗum.

Ko keddiide Alla ɗe O accani on ɗen e kon ko daganii on ɓaawo jonnitirgol yimɓe ɓen haqqeeji maɓɓe ɗin, ɓuri wondannde on e nafa diini ɓeydaari heɓorayndi ndin ɗuytugol ɓetu maa bonnugol ka leydi. Si on laatike gomɗimɓe ka goonga. Si on laatike gomɗimɓe, yarlitoree ɗen kedde Alla ɗon. Min on mi wonaali reenoowo on e golle mon, sakko mi hasba on e majje. Reenoowo on e ɗum, ko O annduɗo ko suuɗii e ko .

Yimɓe Shu'aybu ɓen wi'ani mo: Ko an yo Shuaybu! E ko julde maa nde juulataa nden fii Alla yamir-maa nde men accata rewugol ko baabiraaɓe amen ɓen rewaynoo kon e sanamu, maa nde men accata waɗugol e jawle amen ɗen ko men yiɗi, men ɓeydira ɗen no men yiɗiri? Pellet an ko a muññiiɗo feewuɗo. An oo haqqilɗo ñeeño no men anndirno-maa ado nduu noddaandu maa, ko heɓu-maa?

Shu'aybu maakani yimɓe makko ɓen: Ko onon yo yimɓe am, yeetee lam: si tawii ko e ɓanngannduyee immorde ka Joomi am won-mi, O arsikii lam immorde ka Makko arsike dagiiɗo, wano Annabaaku ngun?... Mi faandaaki haɗugol on huunde, mi lunndoo on e waɗugol nde. Mi faandaaki e noddaandu am ndun si wanaa moƴƴingol bajjinnde Joomi mon ɗoftoo Mo yeru ko waaw-mi. Hawrinneede am e ɗum ko ka Alla Seniiɗo On. Ko e Makko tun mi fawi denndaangal fiyakuuji am, ko ka Makko kadi woni ruttorde am.

Ko onon yo yimɓe am, wata ngayngu am defu on e fennugol ko mi addi kon, tawde miɗo huli wata lepte heɓu on sugu ɗen heɓunooɗe yimɓe Nuuhu ɓen maa yimɓe Huudi ɓen maa yimɓe Saalih ɓen. Yimɓe Luuti ɓen kan wonaali woɗɗiiɓe on e jamaa-nu maa e nokku. Hiɗon anndi tigi ko heɓunooɓe kon, Waajitee.

Ɗaɓɓiree Joomi mon haforanal, refti tuubanon Mo junuubi mon. Pellet Joomi am ko Hinnotooɗo tuu- booɓe ɓen, tiiɗuɗo yiɗude tuuboobanooɓe Mo ɓen.

Yimɓe Shu'aybu ɓen wi'ani mo: Men alah faamude ko ɗuuɗi e ko addu-ɗaa kon; menen meɗen yi'e hakkunde amen lo'uɗo sabu ko heɓu-maa e gite kon. Si wanaano tawde gorol maa ngol e diina amen woni, men fiɗirteno kaaƴe haa maayaa. An a wonaali tedduɗo e amen sakko men ronka warde ma. Ko men accir-maa, ko teddungal gorol maa ngol.

Shu'aybu maakani yimɓe makko ɓen: Ko onon yo yimɓe am, e ko gorol am ngol ɓuri teddude e mo'on diini Alla? On waɗtirii Alla ɓaawo mon hawkaaɗo tuma salinoɗon gomɗinnde Annabaajo Makko on Mo O Nuli e mooɗon? Pellet Joomi am ko huɓindii- ɗo ko golloton kon. Huunde suuɗaaki Mo e kuuɗe mon. O yoɓitiray on ɗum aduna ɗoo halkaare, ka laakara too lepte.

Ko onon yo yimɓe am, gollee ko hattanɗon e laa- wol ngol faaliraɗon. Min kadi mi golla ko mi gaynata e no mi gaynirta. Aray nde anndoton ko hommbo e meeɗen lepte hoynooje arata e mu'un, e ko hombo e meeɗen woni fenoowo e ko nodditotoo kon. Habbitee ñaawoore Alla nden! Min kadi miɗo wonndi e mo'on habbitiiɗo.

Nde yamiroore Amen halkugol yimɓe Shu'aybu ɓen arunoo, Men daɗndiri Shu'aybu e ɓen gomɗimɓe wonnduɓe e makko yurmeende Amen. Haacaango tiiɗungo nanngi ɓen tooñuɓe e yimɓe makko ɓen ɓe halkii, ɓe yaniri geece maɓɓe ɗen, ɗe notii(takki) e leydi ndin.

A wi'ay ɓe ñiiɓaano ɗon. Anndee Madayana'en woɗɗiniraama e yurmeende Alla nden yanugol tikkere Makko nden e maɓɓe, wano Samuuda'en woɗɗiniranoo e mayre yanugol tikkere Makko nden e maɓɓe.

Gomɗii Men Nulirii Muusaa Aayeeje Amen tinndinɗe bajjinɗingol Alla, e hujjaaji Amen ɓannguɗi tinnɗinɗi e goongugol ko o addi kon.

Men Nuli mo haa e Fir'awna e dental yimɓe makko ɓen. Ngal dental jokki yamiroore Fir'awna e yeddu- gol Alla. Yamiroore Fir'awna non wonaali hawrunde e sawaaba haa ka nde jokkee.

Fir'awna ardoyto yimɓe makko ɓen Ñalnde Darngal haa o naatida e maɓɓe ka Yiite. Nge bonii jolirde ka o jolnata ɓe.

Alla jokkiniɓe kuddi e ɗam nguurndam aduna, o woɗɗindini ɓe e yurmeende Makko nden halkugol ɓe yoola. O jokkiniɓe ɗum kadi Ñalnde Darngal. Ndin kuddi e lepte ko heɓi ɓe aduna e laakara ɗon bonii.

Ko jantaa koo e ngol cortewol(simoore), immorde e kumpite ca'e, Meɗen humpite ɗum an Nulaaɗo: no e majje ñiiɓuɗe heddii, hino e majje muncaaɗe mulaa fii mun(hay batte heddaaki).

Men tooñiraali ɓe kon ko heɓiɓe e halkaare. Siko woni, ko kamɓe tooñiri ko'e maɓɓe ɗen halkaare yeddugol maɓɓe Alla. Ɗin reweteeɗi maɓɓe ɗi ɓe rewaynoo gaanin Alla duncanaali ɓe huunde e lepte Alla ɗen, tuma nde yamiroore Joomi maa nden -an Nulaaɗo- arunoo fii halkugol ɓe. Ɗin reweteeɗi maɓɓe ɓeydaali ɓe si wanaa hayrugol e halkagol.

Ko wano nii nangal ittude asli ngal Joomi maa O nanngirta ca'e fennooɓe ɓe e kala jamaanu e nok-ku. Pellet nanngal Makko ngal ko muusungal saɗtungal.

Pellet wonii e nanngal Alla ngal e ɗen ca'e tooñuɗe, tasakuyee e waaju wonannde on hulɗo lepte Ñalnde Darngal. Nden ñalnde nde Alla mooɓoyta yimɓe ɓen fii hasbugol ɓe; nden ko ñalaande seedoyteende wonande yimɓe mooɓoyteeɓe ɓen.

Men neɓnataa nden ñalaande seedoyteende, si wanah haa e lajal ganndangal limoore.

Ñalnde nden ñalaande arata, wonkii woo wowlataa fii dallinagol maa defugol si wanaa e duŋayee Makko. Yimɓe ɓen nden ñalnde ko noone ɗiɗi: malkisaaɗo naatoowo Yiite, e malaaɗo naatoowo Aljanna.

Si ɓe malkisiraaɓe keeferaagu ɓen e bonnere golle, ɓe naatoyay ka Yiite, ɓe towniroya hitooji maɓɓe nder ton hiikaango e ookaango; hakkee ko ɓe sonjorta lewlewndu magge.

Ko ɓe luttooɓe nder magge poomaa. Ɓe yaltataa ton fotde kammuuli ɗin e leydi ndin hino duumii, si wanaa ɓen ɓe Alla muuyu yaltingol e yedduɓe bajjimɓe Mo ɓen. Pellet Joomi maa an Nulaaɗo, ko waɗoowo kala ko O faandii. Alah doolnoowo Mo.

Si tawii non ko malaaɓe ɓen ɓe Alla ardinani maloore sabu gomɗinal maɓɓe e golle maɓɓe moƴƴe, ko ka Aljanna woni ko ɓe duumintee poomaa, fotde kammuuli ɗin e leydi ndin hino duumii, si wanah si Joomi maa muuyu naadugol gomɗimɓe yeddaynooɓe ɓen Yiite ado naadeede Aljanna. Pellet neema Alla on e yimɓe Aljanna ɓen wanaa ko taƴondiranta ɓe.

Wata a wonu, an Nulaaɗo, e sikke fii bonugol ko ɓee sirkooɓe rewata. Ɓe ala dalil sari'a wanaa dalil haqqil ko sellinanta ɓe ɗum. Ko defi ɓe e rewugol ko woori Alla, ko ñemmbugol baabiraaɓe maɓɓe ɓen. Menen non, Men hunniranay ɓe geɓal maɓɓe ngal ka lepte ko aldaa e ɗuytugol.

Gomɗii Men okkii Muusaa Tawreeta, yimɓe ɓen luutondiri e mayre: woɗɓe e maɓɓe gomɗini ɓe, woɗɓe goo yeddi. Si wanaano ñaawoore Alla ardinoonde wonnde O yaccintah lepte ɗen, ko O nennitoowo ɗe haa Ñalnde Darngal e hikma Makko, pellet, ɗe yanayno e maɓɓe ka aduna yeru maɓɓe. Pellet heeferɓe yahuudaaɓe ɓen e sirkooɓe ɓen wonii e sikke sikkitiiɗo Alqur'aana.

Wonaali kala e ɓee jantaaɓe luutondirɓe, si wanaa Joomi maa an Nulaaɗo, hunnanany ɓe njoɓdi kuuɗe maɓɓe ɗen: ko moƴƴi kon yoɓiree ko moƴƴi, ko boni kon yoɓiree ko boni. Pellet Alla ko humpitiiɗo ko ɓe gollata kon. Huunde suuɗaaki Mo e golle maɓɓe ɗen.

Duumor ñiiɓude e laawol focciingol ngol an Nulaaɗo, wano Alla yamir-maa non.golla yamirooje Makko, woɗɗito-ɗaa haɗaaɗi Makko. Yo ɓen tuubuɓe e gomɗimɓe wonnduɓe e maaɗa kadi ñiiɓu. Wata on yawtu keeri ɗin faggitagol goopi. Pellet ko O reenuɗo ko golloton kon. Huunde suuɗaaki Mo e golle mon ɗen. O yoɓitoyay on e ɗum.

Wata on ooñor e heeferɓe tooñuɓe ɓen yiɗugol e weldugol haa Yiite ngen memira on sabu ɗum. Alanah on gaaini Alla weldiiɓe daɗndooɓe on e magge. Refti on heɓoytaa ko walla on.

Ñinnu julde nden an Nulaaɗo, no moƴƴiri ka seraaji ɗiɗi ñalorma; ɗin woni: bimmbi e kiikiiɗe. Ñinniraande kadi saa'iiji jemma. Pellet golle moƴƴe ɗen hino monta junuubi tokoosi ɗin. Ko jantaa koo, ko waaju wonannde ɓen waajitotooɓe, e tasakuyee ɓen taskotooɓe.

Muñño e kon ko yamiraɗaa ñiiɓude e focciingol ngol e ko wonaa ɗum, e tertagol ka haɗa-ɗaa e bewugl e ooñorgol ka tooñuɓe ɓen. Pellet Alla bonnataa njoɓdi moƴƴinooɓe ɓen. Ko woni, O jaɓanay ɓe ko ɓuri moƴƴude e ko ɓe golli kon, O yoɓitira ɓe njoɓdi maɓɓe ndin ko ɓuri moƴƴude e ko ɓe gollaynoo kon.

Ko haɗnoo wona e gire leptanooɓe adiiɓe on ɓen, immorde e joomiraaɓe ɓural e moƴƴere, ɓe no haɗa ɗen gire e keeferaaku e bonnirgol geddi ka leydi! Heɓanooki e ɓen heddinooɓe, si wanaa seeɗaaɓe e ɓen e maɓɓe ɓe no haɗa e bonnugol. Men daɗndiɓe tuma Men halkunoo yimɓe maɓɓe tooñuɓe ɓen. Yimɓe maɓɓe tooñuɓe ɓen jokki e ko ɓe neeminaa kon e mun, ɓe laatii tooñirɓe jokkugol ɗum.

Joomi maa an Muhammadu, siforaali halkiroowo yimɓe saare, si tawii yimɓe mayre ko moƴƴinooɓe ka leydi. Ko O halkirta ɓe, ko si yimɓe mayre wonii bonnirooɓe keeferaaku e tooñe e geddi.

Sinno Joomi maa an Nulaaɗo muuyuno waɗugol yimɓe ɓen mofte goote e hoore-goonga, Owaɗat. Ko woni tun, O muuyaali ɗum. Ɓe seeratah hiɓe luutondira sabu jokkugol mbeleeɗe e bewre.

Si wanaa ɓen ɓe Joomi maa yurmiri hawrineede e peewal. Ɓen ɗon, ɓe luutondirtaa e fii bajjinɗingol Mo ngol. Ko sabu ngol luutondiro O tagiri ɓe: hino e maɓɓe malkisaaɗo e malaaɗo. Konngol Joomi maa an Nulaaɗo -ngol O ñaawunoo ngol ka sakkital- jojjirii hebbinirgol Jahannama kala jokkuɗo seytaane, immorde e jinna e yimɓe.

Kala e kabaruuji ɗin Men fillani maa an Nulaaɗo, immorde e kabaruuji Nulaaɓe adinooɓe ma ɓen, ko fii no Men tabintinra ɗi fonndo maa ngon e hoore-goonga, ɓe tiiɗina ɗum. Aranii ma e ngol cortewol goonga mo sikke alah e mu'un, e waaju fii heeferɓe ɓen, e janntoore wonannde gomɗimɓe ɓen nafitorayɓe waaju.

An Nulaaɗo, maakan ɓen ɓe gomɗinaa Alla ɓe bajjinaa Mo: Golliree noone mo'on e ɗuurnagol gaayi e goonga kan faloo ka. Menen kadi, men gollira noone amen e tabitugol e ɗum, nodda e ɗum, muññoo e mun.

Habbitee kadi ko yanata kon e mon. Menen ko men habbitiiɓe ɗum.

Ko Alla tun heeranii anndugol ko wirnii kon ka kammuuli e ka leydi. Huunde e ɗum suuɗaaki Mo. Ko ka Makko Kanko tun woni ko fiyaaku on fow ruttetee Ñalnde Darngal. Awa rewu Mo an Nulaaɗo, Kanko tun, fawo-ɗaa e Makko e fiyaaku maa kala. Joomi maa wonaali welsindiiɗo e kon ko golloton. Himo anndi ɗum, O yoɓitoyay kala e mon ko golli kon.