Luganda Meal — Afrika Kalkınma Vakfı — Fatiha 1:1 – Enam 6:165

Ku lw’Erinnya lya Allah (Katonda) Omusaasizi Oweekisa ekingi ekibuna buli kitonde, Omusaasizi Oweekisa eky'enjawulo ekyeyawulidde Abamukkiriza bokka

Amatendo gonna (amajjuvu) ga Allah Omulezi W’ebitonde.

Nnannyini kusaasira okungi ennyo asaasira ebitonde Bye.

Nnannyini buyinza Yekka ku Lunaku lw'okusasula (Olunaku lw'Enkomerero).

Ggwe Wekka Ggwe tusinza era Ggwe Wekka Ggwe tusaba okutuyamba.

Tulunngamye mu kkubo eggolokofu.

Ekkubo ly’abo be wagabira ebyengera, abatali abo be wasunguwalira era abatali abo abaabula.

Alif Laam Miim.

Ekitabo ekyo (Kulaani) tekiriimu kubuusabuusa wabula bulunngamu eri abo abatya Katonda.

Abo abakkiriza ebitalabikako ne bayimirizaawo esswala, era ne bawaayo mw'ebyo byetubagabirira.

Era b’ebo abakkiriza ebyakussibwako n'ebyo ebyassibwa ku Babaka abaakusooka, era nga bakakasa Olunaku lw'Enkomerero.

Abo be bali ku bulunngamu okuva eri Omulezi Waabwe (Allah), era abo be b'okwesiima .

Mazima abo abatakkiriza (Bubaka obwassibwa ku Nnabbi Muhammadi) kyenkanankana gyebali, obatiisizza oba tobatiisizza si ba kukkiriza.

Allah yazibikira emitima gyabwe n’okuwulira kwabwe, era ne ku maaso gaabwe kuliko ekibikka, era balina ebibonerezo ebinene.

Era mu bantu mulimu abagamba nti tukkiriza Allah n'Olunaku lw'Enkomerero, ate nga si Bakkiriza.

Bakwenyakwenya Allah n'Abakkiriza so nga bakwenyakwenya myoyo gyabwe nga tebamanyi.

mu mitima gyabwe mulimu obulwade, ne Allah n'abongera obulwadde, era balina ebibonerezo ebirumya olw'ebyo bye baalimbanga.

Bwe bagambibwa nti temwonoona mu nsi, bagamba nti: mazima ddala ffe tuli abalongoosa.

So nga mazima ddala bo be boonoonyi naye tebakitegeera.

Era bwe baba bagambiddwa nti mukkirize nga abantu (abalala) bwe bakkiriza, baddamu (mungeri yokukakkanya) nti: tukkirize nga ababuyabuya bwe bakkiriza?! Abange mazima ddala bo be babuyabuya naye tebamanyi.

Bwe basisinkana Abakkiriza bagamba nti tukkirizza, naye bwe baddayo nga beeyawudde n'abakulembeze baabwe bagamba nti mazima ddala ffe tuli wamu nammwe. Mazima ffe okuba na bali tuba tuli mu ku bakongoola na kubasekerera.

Allah naye abasasula kyebakola Abakkiriza mu kubajeeja era n'abongerayo mu bubuze bwabwe nga basamaaliridde babulubuuta.

Abonno beebo abaagula obubuze mu bulunngamu. Okusuubula kwabwe tekwakola magoba, era tebaali baakulunngama.

Ekifaananyi kyabwe (abannanfuusi) bafaanana nga omuntu akumye omuliro, bwe gumala okwaka era ne gumulisa ebimwetoolodde, olwo Allah n'aggyawo ekitangaala kyabwe n'abaleka mu nzikiza, nga tebakyalaba.

Abantu abo bakiggala, bakassiru, era bamuzibe, tebayinza kudda (ku kkubo ggolokofu).

Ekifaananyi kyabwe ekyamazzi balinga abantu abali mu nkuba etonnya ng'erimu e kizikiza ekikutte nga mulimu n'okubwatuka kw'eggulu, n'okumyansa kw'obumyanso, ne nebatuuka okussa ennwe zaabwe mu matu gaabwe olw'okutya okubwatuka nga batya okufa. Nebatamanya nti Allah yeetoolodde abawakanya amateeka Ge.

Obumyanso olw'amaanyi gaabwo bubulako katono okuziba amaaso gaabwe. Buli lwe bubamulisiza nga batambula mu nkuba, ate bwe buzikira ne bukoma nga bayimirira olw'obutalaba gye balaga, era singa Allah aba ayagadde yaalibaggyeko okuwulira kwabwe, n'okulaba kwabwe. Mazima Allah Muyinza ku buli kintu.

Abange mmwe abantu musinze Omulezi Wammwe eyabatonda n'atonda n'abo abaabakulembera mulyoke mumutye mu ngeri eyannamaddala.

(Omulezi wammwe) Oyo eyabakolera ensi nga mwaliiro (eteredde) era n'abakolera eggulu nga kasolya, era n'assa amazzi (enkuba) okuva waggulu mu bire n'ameza nayo e bibala nga byakulya byammwe. Kale nno Allah (Katonda) temumuteekangako e bintu e birala, ate nga mumanyi nti Yye Yekka y'ateekwa okusinzibwa.

Era bwe muba mubuusabuusa mu bye twassa ku muddu Waffe (Nnabbi Muhammadi) okusaasira kwa Allah n'emirembe bimubeereko), kale muleeteeyo essuula emu efaananako nga Kulaani, muyite abajulizi bammwe be mulowooza nti bayinza okubayamba awatali Allah, bwe muba nga muli baamazima.

Bwe muba nga temukikoze era nga temugenda kusobola kukikola; kale mutye Omuliro era mugwewale (kubanga) enku zaagwo bantu n'amayinja, gwategekerwa abawakanya Allah n'Amateeka Ge.

Era sanyusa abo Abakkiriza ne bakola emirimu emirungi nti mazima ddala bajja kufuna Ejjana ezikulukutiramu emigga. buli lwe banaaweebwanga ekibala kyonna mu Jjana bajja kugambanga nti ekyo kyatuweebwako dda (nga tuli ku nsi), binaabaweebwanga nga mundabika bifaanana na biri eby'okunsi naye nga mu buwoomi byanjawulo era baliweebwa abali mu Jjana abakyala abaatukuzibwa, (nabwekityo abakyala balifuna mu Jjana abaami abaatukuzibwa) era baakugibeeramu lubeerera.

Mazima Katonda takwatibwa nsonyi kukuba kyakulabirako kyonna newakubadde nga kyansiri n'ekintu ekirala ekigisingako. Wabula bo Abakkiriza bamanyira ddala nti ago ge mazima agaava eri Omulezi waabwe, kyokka ab'agaana okukkiriza bagamba nti Katonda yagenderera ki mu ky'okulabirako kino!. N'olw'ekyo aleka bangi ne babula olw'ekyokulabirako kino so nga ate alunngamya nakyo bangi. Era b'abuza nakyobe boonoonefu abatakkiriza Allah n'Omubaka we Muhammadi- okusaasira kwa Allah n'emirembe bimubeereko-.

Abo abamenya Endagaano ya Allah oluvannyuma lw'okugikakasa, ne bakutula ebyo Allah bye yalagira okuyunga, era ne boonoona mu nsi, abonno be b'okufaafaaganirwa.

Muwakanya mutya Allah (era ne mutamukkiriza) nga mwali bafu temwaliwo n'abawa obulamu, ate oluvannyuma alibatta, ate oluvannyuma alibazuukiza era nga gy'ali gye mugenda okudda!.

Oyo Allah (y'Oyo eyabatondera byonna ebiri mu nsi, bwe yamaliriza n'alyoka azzaako eggulu, n'alikola nga lya myaliiro musanvu era kubuli kimu mumanyi.

Jjukira ggwe Muhammadi, Omulezi Wo bwe yagamba Bamalayika nti mazima nngenda kuteeka mu nsi omusigire, ne bagamba nti, ogenda okugissaamu (omuntu) anaagyonooneramu n'ayiwa n'omusaayi, nga ate ffe tukutendereza era nga tukugulumiza! (Allah) yaddamu n’abagamba nti Nze mmanyi ebyo bye mutamanyi.

Allah (Katonda) N'ayigiriza Adamu amannya g'ebintu byonna oluvanyuma n'abiraga Bamalayika n'abagamba nti; mumbuulire amannya g'ebintu bino bwe mubeera nga mwogera mazima (nti mmwe musaanira okuba abasigire bange ku nsi).

Ne bagamba nga batendereza nti; Oli wanjawulo era wasukkuluma (Allah) ffe tetulina kyetumanyi okuggyako ekyo ky'oba otuyigirizza. Mazima Ggwe Muyitirivu w'okumanya era Omuyitirivu W'amagezi.

Allah n'agamba nti; owange Adamu, babuulire amannya gaabyo. Bwe yamaliriza okubattottolera amannya gaabyo, Allah kwe kubagamba nti: Ssaabagambye nti mazima nze mmanyi ebikusike mu nsi ne mu ggulu, era nga mmanyi bye mwolesa n'ebyo bye mukweka?!

Era jjukira we twagambira Bamalayika nti; muvunnamire Adamu. bonna ne bavunnama okuggyako Ibuliisu (Sitaani) yagaana ne yeekuluntaza n'ebeera mu bawakanya Allah.

Ne tugamba nti: Owange ggwe Adamu beera mu Jjana ggwe ne mukyala wo era mulye mwegazaanyize wonna we mwagala naye temusembereranga omuti guno ne mubeera mu balyazaamaanyi.

Sitaani n'abaseereza okuva mu Jjana era n'abaggya mu birungi bye baalimu. Ne tubagamba nti mukke mu nsi nga buli omu mulabe eri munne, era ku nsi gye mujja okubeeranga n'okweyagalira okutuusa ebbanga eggere.

Adamu bwe yamala n'afuna ebigambo ebyokwenenya okuva eri Omulezi We ne yeenenya era Allah n'amusonyiwa n'akkiriza okwenenya kwe. Mazima Yye (Allah) y'akkiriza okwenenya, era Musaasizi.

Ne tugamba nti, kale mwenna mugifulume (Ejjana) era mukkirire mu nsi, buli lwonna obulunngamu lwe bunaabajjiranga okuva Gyendi, abo abaligoberera okulunngamya kwange tebaliba na kutya era tebagenda kunakuwala.

Naye abo abaligaana okukkiriza Allah n'Ababaka Be ne balimbisa Ebigambo Byaffe be b'okuba mu Muliro obugenderevu.

Abange abaana ba Yisirayiri, mujjukire ebyengera Byange bye nnabagabira (mu byebaze). Era mutuukirize Endagaano Yange (ey'okunzikiriza n'okugondera Amateeka Gange), nja kutuukiriza endagaano yammwe (ey'okubayingiza Ejjana). Era Nze Nzekka gwe muba mutya.

Era mukkirize ebyo bye nnassa (ku Nnabbi Muhammadi) nga bikakasa ebyo bye mulina (Tawulaati) era temuba abasaale mu kubiwakanya. Era temutundanga Ebigambo Byange omuwendo omutono (olw’emigaso gy'ensi), era mutye Nze Nzekka.

Temutabulanga amazima n'ebitali bituufu, ne mukweka amazima nga mumanyi.

Muyimirizeewo esswala, mutoole Zzaka, era mukutame n'abo abakutama.

Abaffe mulagira mutya abantu okukola obulungi ne mwerabira emyoyo gyammwe, so nga ate mmwe musoma ekitabo (Tawulaati), abange temutegeera?!

Mweyambise obugumiikiriza n'okusaala, wabula yo esswala ekaluubirira nnyo abantu, okuggyako abo abagondera Katonda.

Abo abakakasa nti baakusisinkana Omulezi Waabwe Katonda , era Gy'ali gye bagenda okudda.

Abange abaana ba Yisirayiri, mujjukire ebyengera Byange bye nnabagabira ne mbasukkulumya ku bantu abalala bonna (olw'okubaggyamu Bannabbi abangi n'ebirala).

Era mutye Olunaku omuntu lw'ataligasa muntu mulala mu kintu kyonna, era lw'atalikkirizibwa kuwolereza wadde okuwa ennunuzi, era abantu abo tebalitaasibwa.

Era mujjukire lwe twabawonya abantu ba Falaawo abaabatuusangako ebibonyoobonyo ebikakali, nga basanjaga abaana bammwe ab'obulenzi ne balekawo ab'obuwala. Ekikolwa ekyo kyalimu ekigezo kinene nnyo ekyava eri Mukama Wammwe (Katonda).

Era mujjukire lwe twabakubira ekkubo mu nnyanja ne tubawonya, ate ne tuzikiriza abantu ba Falaawo nga nammwe mulaba.

Era mujjukire lwe twalagaanyisa Musa ebiro amakumiana (40) (tulyoke tumuwe Ekitabo Tawulaati) wabula kye mwakola kwe kweteerawo ennyana (ne mugisinza) oluvannyuma lwa Musa okuvaawo, ne mubeera abalyazaamaanyi.

Oluvannyuma lw'ebyo twabasonyiwa nga kisuubirwa nti ob'olyawo muneebaza.

Era mujjukire we twaweera Musa Ekitabo (Tawulaati), ekyawula wakati w'obutuufu n'obukyamu mulyoke mulunngame.

Era mujjukire Musa, we yagambira abantu be nti: Bantu bange, mazima mweryazaamanyizza mwekka olw'okusinza ennyana. N'olw’ekyo mwenenyeze Omutonzi Wammwe. Mu kutuukiriza ekyo muttinngane. Ekyo kye kirungi gyemuli ew'Omutonzi Wa mmwe. Bwe mwakola ekyo Katonda kwe kubasonyiwa, mazima ddala Yye, Yakkiriza okwenenya era Omusaasizi.

Era mujjukire we mwagambira Musa nti; Musa, tetujja kukkiriza by'ogamba okuggyako nga Allah tumulabidde ddala Yennyini mu lwatu (amangu ago) okubwatuka okwamaanyi ne kubajjira (ne mufa) nga mutangaaliridde.

Oluvannyuma lw'okufa kwa mmwe ne tubazuukiza, mulyoke mwebaze.

Era twabasiikiriza n'ebire, ne tubassiza emmere eyitibwa Manna n'enva eziyitibwa Saluwa (enkwale) (Ne tubagamba nti) mulye ku birungi mu bintu bye twabagabirira. Naye (abajeemu mu bo) tebaatulyazaamaanya, wabula beeryazaamaanya bokka.

Era mujjukire we twabagambira nti muyingire ekibuga kino, nga muli mu kyo, mulye wonna we mwagala nga mwegazaanya, era muyingire omulyango gwakyo nga muvunnamye nga mugamba nti, twetonze (tusaba otuggyeko ebisobyo byaffe), tulyoke tubasonyiwe ebisobyo byammwe. Era tujja kwongeza abakozi b'ebirungi.

Abaajeema (mu bo) baakyusa ekigambo ekyabalagirwa (ne boogeramu kirala). Ne tussa kw'abo abaajeema ekibonerezo ekyava waggulu olw'ebyo (ebyobujeemu) bye baakolanga .

Era mujjukire ekiseera Musa we yasabira Katonda, awe abantu be amazzi, ne tumugamba nti kuba omuggo gwo ku jjinja. (Bwe yagukubako) mwafukumukamu ensulo kkuminabbiri. Buli kika (kya Bayisirayiri) ne kimanya obunywero bwakyo. (Katonda n'abagamba nti) Mulye, munywe mu bigabwa bya Allah, temwewaggulanga mu nsi ne mubeera aboonoonyi.

Era mujjukkire we mwagamba Musa nti, tetujja kugumiikiriza mmere ya kika kimu kyokka. Tusabire Omuleziwo (Katonda) atumereze e bimera okuva mu ttaka nga; enkoolimbo, kyukamba, katungulukyumu, ddengu n'obutungulu. (Musa) kwe kugamba nti muwanyisa ebyawansi mu kifo ky'ebirungi. Mugende awantu wonna awasobola okulimwa olwo nno munaafuna ebyo bye musabye. Nebakakasibwako obuswavu n'obunaku, era ne bakakatwako obusungu bwa Katonda. Ekyo nno lwakuba baali bawakanya ebigambo bya Katonda, era nga batta ba Nnabbi awatali nsonga ntuufu. Baakola ebyo byonna olw'obujeemu ne baba nga baasukka ensalo z'Amateeka ga Katonda.

Mazima abo abakkiriza (Nnabbi Muhammadi) n'abo abaali ku ddiini y'ekiyudaaya, (ku mulembe gwayo), n'abo abaali ku Ddiini y’ekinaswara (ku mulembe gwayo), ne ba Sswabi-ina (Abo abataasinza masanamu nga Nnbbi Muhammadi tannatumwa), yenna akkiriza Allah n'Olunaku lw'Enkomerero era n'akola emirimu emirungi, abo nno balina empeera yaabwe eri Omulezi Waabwe era tewaliba kutya ku bo era tebagenda kunakuwala.

Era mujjukire (mmwe abaana baYisrayiri) we twabakozesa Endagaano. Ne tuwanika waggulu wa mmwe olusozi (ne tubagamba nti) mukwate n'amaanyi ebyo bye tubawadde (Tawulaati). Era mujjukire ebyo ebiri mu yo mulyoke mubeere abatya Katonda.

Oluvannyuma ne mubikuba amabega, singa tekyali kyengera kya Allah kye yabawa n'okusaasira Kwe mwandibadde mu bafaafaaganiddwa.

Mazima mwamanya (ekyafaayo) ky'abo abamu mu mmwe abaasukka ensalo ne bavuba ku lunaku Olwomukaaga. Ne tubagamba nti: Mufuuke enkobe, mubeere abanyoomebwa.

Ne tukifuula ekyokulabula eri abo abaaliwo n'abo abalijja oluvannyuma. Era netukifuula ekyokubuulirira eri abo abatya Katonda.

Era mujjukire Musa awo we yagambira abantu be nti; mazima Allah abalagira musale ente. Ne baddamu nti: Otufuula kyakujeeja bujeeja. Musa n'addamu nti: Nsaba Allah antaase okubeera mu bantu abatategeera.

Ne bagamba nti; tubuulize Mukama Wo atunnyonnyole ente eyo ya ngeri ki? Musa n'agamba nti; mazima (Allah) agamba nti; ente eyo eteekwa okuba nga si nkadde, ate nga si nto nnyo, eri wakati w'enkadde n'ento. Era muteekwa okukola ekyo kye mulagiddwa.

(Abayudaaya) ne bagamba nti; tubuulize Mukama Wo atunnyonnyole (ente eyo) ya langi ki? N'agamba nti; (Katonda) agamba nti ente eyo ya langi eyakyenvu ng’ennyikidde bulungi nnyo, nga esanyusa abalabi.

(Abayudaaya) ne bagamba nti; tubuulize Mukama Wo atunnyonnyole nte ki eyo? Mazima ente zonna ze zimu gye tuli. Era mazima ffe Katonda bwan'aba ayagadde, tujja kulungama.

(Musa) n'agamba nti: (Katonda) agamba nti; erina kubeera nte etenyoomebwa, nga si nnimi era nga tefukirira nnimiro, nga nnamu bulungi, eteriimu bbala ddala lyonna. Nebagamba nti; kaakati otulaze amazima. Olwo ne balyoka basala ente, naye kaabula kata baleme okukikola.

Era mujjukire lwe mwatta omuntu, olwonno ne mwerumiriza okuttibwa kwe. So nga ate Allah yali Waakuggyayo ebyo bye mwali mukisizza.

Ne tugamba nti; mumukubeko ebimu ku bitundu by'ente. Bw'atyo Allah bw'alizuukiza abafu, era bulijjo abalaga obubonero Bwe (obulaga obuyinza Bwe) mulyoke mutegeere.

Oluvannyuma lw'ebyo emitima gyammwe gyakakanyala negifaananako enjazi oba okusingawo mu bukakanyavu; anti enjazi ezimu zifukumukamu emigga, ne mubaamu ezeeyasaamu ne zivaamu amazzi, n'ezimu ku zo zikka olwokutya Allah. Era Allah tagayaalirira bye mukola.

Abaffe (Abakkiriza) mwagala (Abayudaaya) okuba nga bakkiriza Eddiini yammwe, so nga ekiwayi ekimu mu bo bawulira Ebigambo bya Allah oluvannyuma ne babikyusa nga bamaze okubitegeera. Kino nga bakikola mu bugenderevu.

(Abayudaaya) bwe baasisinkananga Abakkiriza nga bagamba nti tukkirizza. Kyokka nga bwe baba bokka na bokka, abamu bagamba bannaabwe nti muyinza mutya okubabuulira ebyo Allah bye yababikkulira ate nga bajja kubasingisa nabyo omusango ewa Mukama Wammwe (Katonda), abaffe temutegeera.

Abaffe tebamanyi nti mazima Allah amanyi ebyo bye bakisa n'ebyo bye boolesa.

Era mu bo (Abayudaaya) mulimu abatasobola kusoma na kuwandiika, nga tebasobola kumanya biri mu kitabo (Taulaati). Wabula babeera ku kwagala kwa mitima gyabwe. Era tebalina kye baliko, okuggyako bateebereza buteebereza.

Kaakubajjuutuka abo abawandiika ekitabo n'emikono gyabwe, bwe bamala ne bagamba nti kino kivudde eri Allah, nga kye bagenderera kuwaanyisaamu (byanfuna bya nsi) eby'omuwendo ogwawansi. Zibasanze olw'ebyo emikono gyabwe bye gyawandiika, era zibasanze olw'ebyo bye bapakasa.

Era (Abayudaaya) baagamba nti: Omuliro tegugenda kututuukako okuggyako nnaku mbale. Bagambe nti: Abaffe mwakola endagaano ne Allah, Allah alyoke abe nga tagenda kugyawukanako? Oba mwogera ku Allah bye mutamanyi?

Nedda nedda, (ekituufu kiri nti) omuntu bw'akola ekibi, ekyonoono kye ne kimumalawo; abantu abo baakuyingira Omuliro era nga baakugutuulamu olubeerera.

Ate bo abakkiriza ne bakola emirimu emirungi; abo be b'okuyingira Ennyumba ey'emirembe; era baakugituulamu olubeerera.

Era mujjukire awo we twakozeseza abaana ba Yisirayiri endagaano nti; temusinzanga ekintu kyonna okuggyako Allah. Bo abazadde ababiri, n'abooluganda olw'okumpi, ne bamulekwa n'abanaku mubayisenga bulungi. Era mwogerenga bulungi n'abantu. Era muteekwa okuyimirizaawo esswala, mutoole ne Zzaka. Wabula (mu kifo ky'okukola ebyo) mwakyuka, okuggyako batono mu mmwe ng'ate mu kukola ekyo mwali muva ku ndagaano.

Era mujjukire lwe twabakozesa Endagaano nti: Temuuyiwenga musaayi gwammwe, era temwegobaganyenga mu mayumba. Endagaano mwagikkiriza, era nga mmwe mwennyini ekyo mukiwaako obujulizi.

Wabula ate mmwe mwennyini muttinngana era nga mugobaganya abamu ku mmwe mu mayumba gaabwe. Muyamba abamu ku bannammwe mu ngeri emenya amateeka, era mu ngeri y'obulumbaganyi. So nga ate abawambe bwe baba babajjidde mubanunula n'okuwaayo ennunuzi, awamu n'okuba nga eky'okubagobaganya mu mayumba gaabwe kyaziyizibwa. Abaffe mu Kitabo mukkirizaamu bitundu bimu ne muwakanya ebitundu ebirala? Kiki kye musuubira okuba empeera y'omu mu mmwe akola ekikolwa ekyo, okuggyako okuswazibwa mu bulamu obw'ensi ng'ate ne ku Lunaku lw'Enkomerero bagenda kuzzibwa eri ebibonerezo ebisinga okuba ebikakali. Allah tagayaalirira ebyo bye mukola.

Abo nno beebo abaawaanyisa obulamu bw'enkomerero ne batwalamu obw'ensi, tebagenda kukendeerezebwa ku bibonerezo wadde okutaasibwa.

Mazima twawa Musa ekitabo (Tawulaati) oluvannyuma lwe ne tumugoberezaako Ababaka. Era netuwa Yisa mutabani wa Mariamu obubonero obw'olwatu ne tumuwagira ne Mwoyo Mutukuvu (Malayika Jibuliiru). Abaffe, buli lwonna Omubaka (wa Katonda) lw'abajjira n'ebyo bye mutayagala olwo nga mwekuluntaza! Abamu (ku Babaka) mubalimbisa ate abalala ne mubatta.

Ne bagamba nti emitima gyaffe mizibikivu. Wabula Allah yabakolimira. Kalenno bakkiriza kitono nnyo.

Ekitabo (Kulaani) okuva ewa Allah bwe kyabajjira nga kikakasa bye baalina, ate nga mu kusooka baali basaba Katonda abataase ku batakkiriza (abe nga abatumira Nnabbi gwe baali balindirira). Wabula bwe yabajjira oyo gwe baali bamanyi, baamuwakanya. Ekikolimo kya Allah kibeere ku batakkiriza.

Kibi nnyo ekyo kye baawaanyisaamu emyoyo gyabwe olw'obutakkiriza ebyo Allah bye yassa nga kiva ku nsaalwa okuba nti Allah assa Ekyengera Kye (Obwannabbi) kw'oyo gw'aba ayagadde mu baddu Be. Ekyo kyabatuusa ku kusunguwalirwa Allah, nga kweyongera ku kusunguwalirwa okulala. Abatakkiriza balina ebibonerezo ebibakkakkanya.

Bwe baba bagambiddwa nti mukkirize ebyo Allah bye yassa, bagamba nti: tukkiriza ebyo ebyassibwa ku ffe, ate ne bawakanya ekitali byo (ekyajja oluvannyuma). so nga (Kulaani) ge mazima agakakasa ebyo bye balina. Bagambe (ggwe Nnabbi Muhammadi) nti: Lwaki mu kusooka mwattanga Bannabbi ba Allah, bwe muba nga ddala muli Bakkiriza!

Mazima Musa yajja gyemuli n'obunnyonnnyofu wabula ate bwe yavaawo okugenda (okunona amateeka) ne mweteerawo ennyana ne mugisinza. Mu kikolwa ekyo mwali balyazaamaanyi.

Era mujjukire lwe twabakozesa Endagaano, era ne tuwanika olusozi waggulu wammwe. Ne tubagamba nti: bye tubawadde mubikwate n'amaanyi era muwulire. Baayanukula ne bagamba nti, tuwulidde ne tujeema. Emitima gyabwe gyabbinkira mu kusinza ennyana olw'obutakkiriza bwabwe. Bagambe nti kibi nnyo enzikiriza yammwe ky'ebalagira bwe muba nga ddala muli Bakkiriza.

Bagambe nti: Ennyumba ey'enkomerero bw'eba nga yeeyawulidde mmwe mwekka ewa Allah so si abantu abalala bonna, kale mwegombe okufa bwe muba nga mwogera mazima.

Lubeerera tebagenda kukwegomba (okufa) okusinziira kw'ebyo bye baakola. Allah amanyi nnyo abalyazaamaanyi.

Era ddala ojja kubasanga nga be basinga abantu bonna okululunkanira obulamu. Era be basinga okubwagalala okusinga ku abo abagatta ebintu ebirala ku Katonda nga n'omu ku bo yeegomba okuwangaala emyaka lukumi, so nga eky'okuwangaala ebbanga eddene tekimuwonya bibonerezo. Allah alaba bulungi bye bakola byonna.

Bagambe nti omuntu awalana Jibuliiru, (ateekwa amanye nti) mazima yye (Jibuliiru) yakuleetera Kulaani n'agissa ku mutima gwo nga asinziira ku Kiragiro kya Allah, nga ekakasa Ebitabo ebyagikulembera era nga kyakulunngamya na kusanyusa eri Abakkiriza.

Omuntu abeera omulabe wa Allah ne Bamalayika Be, ne Ababaka Be, ne Jibuliiru ne Mikayiri, mazima ddala Allah Mulabe eri abatakkiriza.

Mazima twassa gy'oli obubonero obweyolefu, era tewali babuwakanya okuggyako aboonoonefu.

Abaffe buli lwonna (Abayudaaya) lwe baakola endagaano, ekibinja mu bo kijaawukanako? Wabula (ekyo bakikola (kubanga) abasinga obungi mu bo tebakkiriza.

Era Omubaka (Nnabbi Muhammadi ) bwe yajja gyebali okuva eri Allah nga akakasa ebyo bye baali balina, ekiwayi ekimu mw'abo abaaweebwa Ekitabo (Tawulaati), baasuula ebbali Ekitabo kya Allah nga balinga abatamanyi.

Ne bagoberera ebyo Sitaane bye zaayogeranga (eby'eddogo) ku mulembe gw'obufuzi bwa Sulayimaani (nga babalowoozesa nti Sulayimaani lye yakozesanga), so nga Sulaiman tajeemeranga Katonda (alyoke akozese eddogo) wabula Sitaane ze zaajeemera Katonda nga ziyigiriza abantu eddogo n'ebyo ebyassibwa ku Bamalayika ababiri e Babilooni, Haaruuta ne Maaruuta. Te baayigirizanga mu ntu yenna okutuusa nga bamaze okumugamba nti: "Mazima ffe tuli kigezo tojeemera Allah". Ne bayiga ku Bamalayika abo kye basobola okwawula nakyo wakati w'omuntu ne mukyala we. Naye baali tebayinza kukosa n'eddogo eryo omuntu yenna okuggyako nga Allah asazeewo. Ne bayiga ebibakosa kyokka nga tebibayamba. Mazima baakitegeera bulungi nti awaanyisa eddogo mu Bigambo bya Allah ku Nkomerero talinaayo mugabo gwonna. Kibi nnyo kye baawaanyisaamu emyoyo gyabwe singa baali bamanyi (tebaalikikoze).

Wabula singa mazima bo bakkiriza Allah era ne bamutya, baalifunye empeera ennungi okuva eri Allah singa baali bamanyi.

Abange mmwe Abakkiriza, temukozesanga ekigambo Raa'ina (nga mwogera ne Nnabbi Muhammadi) wabula mugambenga nti: "Undhurnaa". Era mubeerenga bawulize. Bo abo abajeemu balina ebibonerezo ebirumya.

Abo abatakkiriza Allah n'Omubaka We mu baaweebwa Ekitabo, n'abo abagatta ku Katonda ebintu ebirala, tebaagalira ddala kalungi konna okuba nga kassibwa gyemuli okuva eri Omulezi Wammwe. So nga Allah assa okusaasira Kwe n'akwawulira oyo gw'aba ayagadde. Era Allah Ye Nnannyini byengera ebingi.

Buli Aaya yonna gye tusangulawo oba gye tukwerabiza, tuleetamu egisingako oba egifaanana. Abaffe tomanyi nti mazima ddala Allah Muyinza ku buli kintu?

Abaffe, tomanyi nti mazima ddala obufuzi bw'eggulu (omusanvu) n'ensi bwa Allah, era nga temulinaayo mukuumi yenna wadde omutaasa atali Yye.

Wabula mulabika mwagala kubuuza Mubaka Wammwe nga Musa bwe yabuuzibwa olubereberye. Omuntu awaanyisa obutakkiriza mu Bukkiriza aba abuze okuva ku kkubo eryawakati.

Bangi mu bantu abaaweebwa Ekitabo baagala babakyuse oluvannyuma lw'Okukkiriza kwammwe babafuule abatakkiriza olw'ensaalwa eri mu mitima gyabwe oluvannyuma lw'amazima okubeeyoleka. Kale (mmwe Abasiraamu) musonyiwe era muleke (abo abaaweebwa Ekitabo) okutuusa Allah lw'anaaleeta Ekiragiro Kye, mazima Allah Muyinza ku buli kintu.

Era muyimirizeewo esswala, mutoole ne Zzaka. Na buli kalungi konna ke mwekolera mugenda kukasanga ewa Allah. Mazima Allah alaba mu bujjuvu bye mukola.

Era baagamba (nga bakubagana empawa) mpaawo agenda kuyingira Jjana okuggyako abaali mu ddiini y'Abayudaaya oba ey'Abanaswara. Okwo nno kwe kwegomba kwabwe. Bagambe (ggwe Nnabbi Muhammadi) nti, muleete obujulizi bwammwe bwe muba nga mwogera mazima.

Wabula ekituufu kiri nti omuntu eyeewaayo n'ayolekeza ekyenyi kye eri Allah, era nga alongoosa, waakufuna empeera ye ew'Omutonzi We. Abantu abo tebagenda kufuna kutya wadde okunakuwala.

Abayudaaya baagamba nti Abanaswara tebalina kye baliko, n'Abanaswara ne bagamba nti: Abayudaaya tebalina kye baliko, so nga ate bonna basoma Ekitabo. Bwekityo n'abatamanyi kusoma nabo baayogera ekigambo ekifaananako ekya bali. Allah aliramula wakati waabwe ku Lunaku lw’Enkomerero ku ebyo bye baalinga baawukanamu.

Ani mulyazaamaanyi okusinga oyo aziyiza okwogera ku Linnya lya Allah mu mizikiti Gye, ng'afuba okugyonoona. Abo tebasaana kugiyingira wabula nga bali mu kutya. Balina obuswavu mu nsi, nga ne ku Lunaku lw'Enkomerero bagenda kufuna ebibonerezo ebikakali.

Obuvanjuba n'obugwanjuba bwa Allah, kale yonna gyemuba mwolekedde nga musaala eyo y'eri obwolekero bwa Allah, mazima Allah Mugazi mu ngeri zonna era Mumanyi nnyo.

Baagamba nti Allah alina omwana. Allah ali wala nnyo n'ekyo. Wabula ebiri mu ggulu ne mu nsi byonna (bitonde Bye) era bimugondera.

Ye Mutandisi W'eggulu n'ensi. Bw'aba asazeewo ensonga yonna agamba bugambi nti: "Ba" ne kiba.

Abo abatalina kye bamanyi baagamba nti: Singa Allah ayogera naffe butereevu, oba ne tuwebwa Ekyamagero. Ekigambo ekyo n'abo abaabasooka baakyogera emitima gyabwe gyafaanagana, (mukitegeere nti) mazima twannyonnyola obujulizi eri abantu abakakasa.

Mazima Ffe twakutuma n'amazima nga oli musanyusa era omutiisa era togenda kubuuzibwa ku bantu ba mu Muliro.

Abayudaaya wadde Abanaswara tebagenda kukusiima okuggyako nga ogoberedde enzikiriza yaabwe. Bagambe nti mazima okulunngamya kwa Allah kwe kulunngama okwannamaddsla. (Ndayira) Singa onoogoberera bye baagala oluvannyuma lw'okumanya okukujjidde, togenda kufuna waamukwano wadde omutaasa abanaakutaasa ku Allah.

Abo be twawa Ekitabo bakisoma mu butuufu bw'okukisoma, abo bakikkiriza, naye abanaakiwakanya beebo ab'okufaafaaganirwa.

Abange abaana ba Yisirayiri, mujjukire ebyengera Byange bye nnabagabira era mazima Nze nnabasukkulumya ku bantu abalala bonna (ab'okumulembe gwammwe olw'okubaggyamu Bannabbi abangi).

Era mutye n'Olunaku omuntu lw'ataligasa muntu munne mu kintu kyonna, n'ennunuzi y'omuntu lw'eterikkirizibwa, wadde okuwolereza tekulimugasa, era nga tebagenda kutaasibwa.

Jjukira ekiseera Katonda lwe yagezesa Ibraahiimu n'ebiragiro (Ibraahiimu) n'abituukiriza, (Katonda) n'amugamba nti mazima nja kukufuula omukulembeze w'abantu. (Ibraahiimu) n'agamba nti; nsaba ne mu zzadde lyange muveemu abakulembeze. (Katonda) n'amugamba nti Endagaano Yange tetwaliramu balyazaamaanyi.

Era jjukira ekiseera we twafuulira Ennyumba (Kaaba) okuba nga bwe buddo bw'abantu era ekifo eky'eddembe, era ne tubalagira nti; ekifo Ibraahiimu mwe yayimirira mukifuule awasaalirwa. Era twalaamira Ibraahiimu ne Ismail nti Ennyumba Yange mugitukulizanga abagyetooloola n'abagituulamu eitkaafu, n'abo abakutama abavunnama.

Era Jjukira ekiseera awo Ibraahiimu we yagambira nti: Ayi Mukama Katonda Wange ekibuga kino kifuule kya ddembe era ogabirire abantu baamu ebibala, oyo anakkirizanga Allah n'Olunaku lw'Enkomerero. N'agamba nti: N'oyo atakkiriza (ηŋenda kumugabiriranga mmusanyuse akaseera katono oluvannyuma ηŋenda kumukulubbya eri Ebibonerezo by'Omuliro. Era buddo bubi ddala.

Era jjukira ekiseera Ibraahiimu ne Ismail we baasitulira omusingi gw'Ennyumba (Kaaba) nga bagamba nti: Ayi Mukama Katonda Waffe, kkiriza omulimu gwaffe guno, mazima Ggwe Oli Muwulizi era Omumanyi.

Ayi Mukama (Katonda) Omulezi Waffe, tufuule ffembi abeewaayo Gy'oli (ne bakugondera) era ne mu zzadde lyaffe oggyemu abalyewaayo Gy'oli (ne bakugondera), era otulage (otumanyise) emikolo gyaffe egy'okusinza bwe tugituukirizaamu (omuli egya Hijja n'emirala). Era tusonyiwe, mazima Ggwe Oli Musonyiyi Omusaasizi.

Ayi Mukama Katonda Omulezi Waffe era batumemu Omubaka ng'ava mu bo nga abasomera Ebigambo Byo era nga abayigiriza Ekitabo n'ebintu ebyamagezi era abatukuze. Mazima Ggwe Waamaanyi Omukenkufu.

Tewali yaalyegombye okuva ku Ddiini ya Ibraahiimu okuggyako oyo eyeesiriwaza yekka. Ate nga (Ibraahiimu) mazima twamuwa ekifo eky'enkizo mu nsi era mazima ddala yye ku Lunaku lw'Enkomerero waakubeera mu balongoofu.

Era jjukira ekiseera Omulezi We (Katonda) we yamugambira nti: Jeemulukuka (siramuka). (Ibraahiimu) n'agamba nti; njeemulukukidde Katonda Omulezi W'ebitonde.

Era Ibraahiimu (ekigambo ky'okwewaayo) yakiraamira abaana be, ne Yakuubu naye bwe yakiraamira ababe nti: Baana bange mazima ddala Allah yabasiimira Eddiini, kale nno okufa tekubatuukangako okuggyako nga muli Basiraamu.

Abaffe mmwe (Abayudaaya) mwaliwo mu kaseera awo Yakuubu bwe yali anaatera okufa, n'agamba abaana be nti; kiki kye mulisinza oluvannyuma lwange? Ne bagamba nti; tugenda kusinza Katonda Wo era Katonda Wa bakadde bo, Ibraahiimu ne Ismail ne Isihaaka, Katonda Omu Yekka era nga tugenda kumujeemulukukira.

Ogwo omulembe gwayita, gulina bye gwapakasa, ate nammwe mulina ebyammwe bye mupakasizza. Era temugenda kubuuzibwa kw'ebyo bye baali bakola.

Era (Abayudaaya n'Abanaswara) baagamba nti; mubeere Bayudaaya oba Banaswara lwemunaaluηηama. Bagambe (ggwe Nnabbi Muhammadi) nti: Wabula tugoberera Ddiini ya Ibraahiimu eragira okusinza Katonda omu Yekka, era (Ibraahiimu) tabangako mu bagatta kintu kirala ku Katonda

(Mmwe Abasiraamu) mugambe nti: Tukkiriza Allah, n'ebyassibwa gyetuli, n'ebyassibwa ku Ibrahiimu, ne Ismail, ne Isihaaka, ne Yakuubu n'eri bazzukulu baabwe. N'ebyo ebyaweebwa Musa ne Yisa na byonna ebyaweebwa Bannabbi abalala nga biva eri Mukama Katonda Omulezi Waabwe era tetubaawulayawulamu era nga naffe twewaddeyo Gy'ali (tuli bajeemulukufu Gy'ali).

Bwe banakkiririza okufaanana nga kwemwakkiriza, olwo ban'aba baluηηamye. Naye bwe banaava ku nzikiriza eyo, mazima ddala bbo bajja kubeera mu kuwalaaza mpaka (na kwawukana) nayenno Allah ajja kubakukolerako abakumalire. Era Ye (Katonda) y'Awulira ennyo, era y'Amanyi ennyo.

(Mwenyweze) ku Ddiini ya Allah. Ate ani alina Eddiini ennungi okusinga eya Allah, era naffe Gwe tusinza.

Bagambe (ggwe Nnabbi Muhammadi) nti: Mutukaayanya ku bikwata ku Allah, ate nga Ye Mulabirizi Waffe era ye Mulabirizi Wammwe, era naffe tulina emirimu gyaffe nammwe mulina emirimu gyammwe, wabula ate ffe tumwawula mu kumusinza.

Oba mugamba nti; mazima Ibraahiimu ne Ismail ne Isihaaka ne Yakuubu ne bazzukulu baabwe baali Bayudaaya oba Banaswara. Bagambe (ggwe Nnabbi Muhammadi) nti abaffe mmwe musinga okumanya, oba Allah? Ani mulyazaamaanyi okusinga oyo akweka obujulizi bw'alina obuva eri Allah? Allah ebyo bye mukola tabigayaaliridde.

Omulembe ogwo gwayita, gulina bye gwapakasa nammwe mulina bye mupakasizza. Era temugenda kubuuzibwa kw'ebyo bye baakolanga.

Ababuyabuya mu bantu bajja kugamba nti kiki ekyabaggya ku bwolekero bwabwe (Baitul-makdis) bwe baaliko, bagambe nti obuvanjuba n'obugwanjuba bwonna bwa Allah. Aluŋŋamya gw'aba ayagadde eri ekkubo eggolokofu.

Bwetutyo twabafuula (mmwe) ekibiina ekyenkamu (eky'enkizo), mube nga mmwe muwa obujulizi ku bantu, nga ate mmwe Omubaka (Nnabbi Muhammadi) y'abawaako obujulizi. Tetwateekawo bwolekero (Kibula) Bwe wasooka okwolekera okuggyako lwa kwagala kulaba abagoberezi b'Omubaka abannamaddala obutafaanana n'abo abakyukira ku bisinziiro byabwe. Wabula kino kyali kinene nnyo okuggyako kw'abo Allah be yaluŋŋamya. Era Allah tayinza kwonoona Bukkiriza bwammwe. Mazima Allah alumirirwa abantu era Musaasizi nnyo ku bo.

Tulaba nga okyusa ekyenyi kyo nga otunula ku ggulu (ggwe Muhammadi nga olinda Obubaka ku nsonga y'obwolekero (Ekibula). Kalenno tujja kukwolekeza obwolekero bw'oyagala. Kale yolekeza ekyenyi kyo ku luuyi oluliko Omuzikiti ogw'emizizo. Na buli wonna we mubeeranga muteekeddwa okwolekeza ebyenyi byammwe oluuyi olwo. Mu mazima abo abaaweebwa Ekitabo bakimanyidde ddala nti bino ge mazima okuva eri Katonda Waabwe. Ate nga Allah talagajjala ku bye mukola.

Ndayira abo abaaweebwa Ekitabo ne bw'obaleetera obujulizi obufaanana butya tebagenda kugoberera bwolekero bwo, era naawe togenda kugoberera bwolekero bwabwe. So nga n'abamu mu bo si baakugoberera bwolekero bwa balala. Kale nno singa onoogoberera okwagala kwabwe oluvannyuma lw'okumanya kw'ofunye, mazima ddala ggwe ojja kuba ogenze mu luse lw'abantu abalyazaamaanyi.

Abo be twawa Ekitabo bakimanyi bulungi nga bwe bamanyi abaana baabwe. Wabula ekibinja mu bo bakwekera ddala amazima ate nga bamanyi.

Gano ge mazima okuva eri Katonda Wo. Ddala Tobeereranga n'omulundi n'ogumu mu abo ababuusabuusa.

Buli bantu balina oludda lweboolekera. Kale (mmwe Abakkiriza) muvuganye mu kukola ebirungi. Yonna gye muliba mwenna, Allah agenda kubaleeta. Mazima Allah Muyinza ku buli kintu kyonna.

Na buli wonna w'onoogendanga yolekeza obwanga bwo oluuyi oluliko omuzikiti ogw'emizizo. Era ddala gano ge mazima okuva eri Katonda Wo. Allah si mugayaavu ku bye mukola.

Na buli wonna w'onoobanga ogenze yolekeza ekyenyi kyo oluuyi oluliko omuzikiti ogw'emizizo. Na buli wonna we munaabeeranga mwolekezenga ebyenyi byammwe oluuyi olwo, waleme kubaawo nsonga yonna bantu gye beekwasa okuggyako abo abalyazaamaanyi mu bo. Temubatya, nze (Katonda) Gwe muba mutya. Olwonno mbajjulize ebyengera Byange, nammwe kibabeerere ensonga y'okulunngama.

Kino kiri nga bwe twabatumira Omubaka ngr ava mu mmwe n'abeera nga abasomera Ebigambo Byaffe, era nga abatukuza, era nga abayigiriza Ekitabo n'abayigiriza ne Ssunnah, era n'abayigiriza n'ebintu ebirala bye mwali temumanyi.

Kale nno munjogerako mboogereko. Era munneebaze, temugaananga okunneebaza.

Abange mmwe Abakkiriza, mweyambise obugumiikiriza n'okusaala olw'okubanga mazima Allah ali wamu n'abagumiikiriza.

Era temwogeranga kw'abo abattibwa mu kkubo lya Allah mbu bafu. Wabula eky'amazima baba balamu naye mmwe mutategeera (bulamu bwabwe).

Era ndayira mazima ddala tujja kubagezesa, n'ekintu nga mwe muli okutya, enjala, okukendeera kw'ebyenfuna n'okufa kw'abantu, n'okukendeera kw'ebibala. Wabula sanyusa abagumiikiriza.

Abo obuzibu be buba butuuseeko ne bagamba nti: Mazima ffe tuli ba Allah (y'atufuga) era ddala ffe Gy'ali gye tujja okudda.

Abo nno balina okusaasirwa okuva eri Mukama Katonda Waabwe, era abo be baluŋŋamu.

Mazima akasozi Swafa n'akasozi Maruwa bubalibwa mu bubonero bwa Allah. Kale nno omuntu aba azze okulambula Ennyumba (Kaaba) oba ng'azze kukola mikolo gya Umura talina musango kudduka wakati w'obusozi bwombiriri. N'omuntu akola obulungi bwonna mu ngeri ya kyeyagalire , (mumanye nti) Allah yeebaza (asiima), Mumanyi nnyo.

Mazima abo abakweka ebyo bye twassa mu bujulizi n'obulunngamu oluvannyuma nga tumaze okubinnyonnyola abantu mu Kitabo (kyabwe). Abo nno Allah abakolimira n'abakolimi bonna ne babakolimira.

Okuggyako abo abeenenya ne balongoosa, nebannyonnyola ebyo (bye baakweka). Abonno nzikiriza okwenenya kwabwe kuba Nze Muyitirivu E'okukkiriza okweneenya era Nze Musaasizi ennyo.

Mazima abo abaawakanya ne bafiira ku butakkiriza; Abo baliko Ekikolimo kya Allah ne Bamalayika n'abantu bonna.

(Abantu abo) Balibeera mu Kikolimo obugenderevu, era ebibonerezo tebigenda kubakendeerezebwako, era tebagenda kulindirizibwa (kubonerezebwa).

Mazima Katonda Wammwe ali Katonda omu, tewali asinzibwa - mu butuufu- mulala yenna okuggyako Yye, Ye Nnannyini kisa ekingi Omusaasizi.

Mazima mu kutonda eggulu (ery'emiko omusanvu) n'ensi, n'okukyukakyuka kw'ekiro n'emisana, n'amaato agatambulira ku nnyanja nga geetisse ebintu ebigasa abantu, n'amazzi Allah g'assa okuva waggulu, n'alamusa nago ensi oluvannyuma lw'okuba nga efudde, n'asasaanya mu nsi buli kiramu, ne mu kukyusa empewo n'ebire, ebyateekebwa wakati w'eggulu n'ensi, bubonero (obulaga okubaawo kwa Katonda n'obuyinza bwe) eri abantu abategeera.

Naye mu bantu mulimu abaleka Allah, ne basinza ebintu ebirala, ne babyagala nga bwe baaliyagadde Allah. So nga bo Abakkiriza baagala nnyo Allah Waabwe (Omu) (nga okwagala kwabwe kuli ku Yye Yekka). Singa abagatta ebintu ebirala ku Allah baali basobola okulaba ebibonerezo lwe birituuka, baalibadde bamanya nti amaanyi gonna ga Allah era nga bwe baalibadde bamanya nti ddala Allah Muyitirivu wa kubonereza.

Mu kiseera abaagobererwa we balyegaanira abaabagobereranga era ne balaba ku bibonerezo, n'ensonga ezaabagattanga ne zikutukawo.

Abaagobereranga baligamba nti: singa tubadde tulina (obusobozi) okudda omulundi omulala ku nsi naffe ne tubeegaana nga bwe batwegaanye. Bw'atyo Allah alibalaga emirimu gyabwe nga kwejjusa gyebali era tebalifuluma kuva mu Muliro.

Abange mmwe abantu, mulye kw'ebyo ebiri mu nsi ebyakkirizibwa ebirungi, era temugobereranga amakubo ga Sitaane anti yo mulabe wammwe wa lwatu.

Mazima Sitaane abalagira kukola bibi, na bya bugwenyufu, n'okwogera ku Allah ebyo bye mutamanyi.

Bwe baba nga bagambiddwa nti: Mugoberere ebyo Allah bye yassa (ku Nnabbi Muhammadi) baddamu nga bagamba nti: ffe tugoberera byetwasangako bakadde baffe. Abaffe ne bwebabanga bakadde baabwe baalinga tebategeera kintu kyonna era nga tebaali baluŋŋamu?

Ekifaananyi ky'abantu abo abatakkiriza (n'oyo abakoowoola okujja eri Obukkiriza) kiringa omulunzi akoowoola ensolo ze ezitawulira zijje gy'ali ne ky'aziyitira, wabula kukoma ku kuwulira okuyita n'okukoowoolwa. (Abatakkiriza abo) Bakiggala, bakasiru, bamuzibe, bo tebategeera n'akatono.

Abange mmwe Abakkiriza, mulye ku birungi mu ebyo byet twabagabirira era mwebaze Allah bwe muba nga ddala Yye, Yekka Gwe musinza.

Mazima ddala (Katonda) yabagaana okulya ekifudde kyokka, n'omusaayi , n'ennyama y'embizzi, na buli kyonna ekisaliddwa nga kyogereddwako ekintu ekirala ekitali Allah. Wabula omuntu abeera mu buzibu nga si lwa bujeemu, era n'atasukka kyetaago kye, oyo nno talina musango (bw'aba aliddeko). Mazima Allah Musonyiyi, Musaasizi.

Mazima abo abakweka ebyo Allah bye yassa mu Kitabo ne babiwaanyisaamu omuwendo omutono, abo nno buli kye balya guba muliro mu mbuto zaabwe era Allah tagenda kwogera nabo ku Lunaku lw'Enkomerero era tagenda ku batukuza. Erabagenda kussibwako ebibonerezo ebirumya.

Abo nno beebo abaawaanyisa obubuze mu bulunngamu, n'okubonerezebwa mu kifo ky'okusonyiyibwa. Baliggya wa obuvumu obugumira Omuliro.

Ekyo kye kiriva kiba bwekityo kubanga Allah yassa Ekitabo lwa mazima. Naye nno mazima abo abatakkaanya ku biri mu Kitabo ddala bali mu kwawukana okuli ewala ennyo n'ekituufu.

Obulungi obubalibwa eri Allah, tebwemalidde mu kwolekera kwammwe ebuvanjuba oba ebugwanjuba, wabula obulungi ye muntu okukkiriza Allah n'Olunaku lw’Enkomerero, ne Bamalayika n'Ekitabo (Kulaani) ne Bannabi bonna, n'omuntu okuba nga awaayo ebyobugagga bwe (mu kkubo lya Katonda) awamu n'okuba nga abyagala, nga abiwa ab'oluganda olw'okumpi ne bamulekwa n'abanaku n'abatambuze abalemereddwa mu ŋŋendo zaabwe, n'abasabirizi n'abaagala okwenunula okuva mu buwambe. Era n'ayimirizaawo Esswala, n'atoola ne Zzaka mu by'obugagga bwe. N'abo abatuukiriza endagaano zaabwe bwe baba nga balagaanyisizza, n'abagumiikiriza mu buzibu, obubenje ne mu biseera by'entalo. Abo nno be baamazima, era abo be batya Katonda.

Abange mmwe Abakkiriza, mulaalikiddwako okuwoolera eggwanga ku nsonga y'abattibwa nga ekibonerezo ky'oyo aba atemudde kumutta; omwana wa boobwe attibwa olw'okutta omwana wa boobwe, n'omuddu attibwa olw'okutta muddu munne, n'omukazi attibwa ku lwokutta mukazi munne. Asse, bannannyini mufu bwe baba bamusonyiye muganda waabwe ekintu kyonna, ababanja bateekwa okubanja mu ngeri ennungi, n'abasasula basasule mu ngeri y'emu. Okwo kwe kuwewula n'okusaasira, ebyava eri Katonda Wammwe. Oluvannyuma (lw'okusasula) oyo alumba n'atta eyasonyiyiddwa waakufuna ekibonerezo ekirumya.

Mulina mu kuwoolera eggwanga (okuwa abatemu ekibonerezo ky'okufa) obulamu, abange mmwe abalina amagezi, oba olyawo munaatya Katonda.

Mulaalikiddwako singa (kirabika nti) omu ku mmwe atuuse okufa n'aba nga aleseewo emmaali, ateekwa okulaamira bazadde be bombi n'abooluganda lwe olw'okumpi nga akikola mu ngeri ennungi. Ekyo kikakafu ku batya Katonda.

Wabula omuntu akyusa ekiraamo, nga amaze okukiwulira; mazima ddala ekibi ky'okukikyusa kiri kw'abo abakikyusa kubanga Allah Muwulizi nnyo, era Mumanyi nnyo.

Naye omuntu bwe yeekengera mu mulaami okwekubiira oba okukola ekikyamu (okwekubiira), ye nalongoosa wakati waabwe (abalaamirwa) oyo tayina musango, Mazima Allah Musonyiyi, Musaasizi.

Abange mmwe Abakkiriza, mulaalikiddwa okusiiba nga bwe kwalaalikibwa kw'abo abaabakulembera mulyoke mutye Katonda.

Musiiba ennaku mbale bubazi, naye oyo an'abeeranga omulwadde mu mmwe, oba ng'ali mu lugendo, (akkirizibwa obutasiiba) ennaku ezo (ze yalyamu) azisiibe mu nnaku endala. Bo abo abasiiba nga bazitoowererwa (bayinza obutasiiba) ne bawa engassi nga baliisa abanaku. Bulijjo omuntu bw'akola ekirungi ekisinga kw'ekyo ky'alagiddwa okukola, kye kirungi gy'ali. Wabula singa musiiba kye kisinga obulungi gyemuli bwe muba nga mumanyi.

(Ekiseera ekibalaalikiddwako okusiiba gwe) mwezi gwa Lamanzaane, Kulaani mwe yakkira. Nga (Kulaani) kulunngamya eri abantu. Era nga mulimu obujulizi obunnyonnyola obulunngamu era nga mulimu okulaga okwawula wakati w'amazima n'obulimba. N'olw'ekyo omuntu abeeranga atuuse ku mwezi gwa Lamanzaane ateekwa okugusiiba. Naye oyo asangibwa nga mulwadde, oba nga ali ku lugendo ennaku ezo azibale azisiibe mu kiseera ekirala. Bulijjo Allah abaagaliza bwangu so si kubakaluubiriza. Kale nno mujjuze ennaku z'omwezi ogwo era mutendereze allah olw'okubaluŋŋamya, olwo mubeere abeebaza.

Abaddu bange bwe baba bakumbuuzizzaako bagambe nti mazima ndi kumpi, nnyanukula okusaba kw'omusabi bw'abeera nga ansabye. Wabula bateekwa okunngondera era banzikirize balyoke batuuke ku bulungamu.

Mukkirizibbwa mu kiro ky'okusiiba okukiika eri bakyala bammwe, abakyala abo byambalo byammwe nga nammwe bwe muli ebyambalo byabwe. Allah amanyi nti mazima ddala mmwe mubadde mwebbirira, (Katonda) kwekukkiriza okwenenya kwammwe era n'abasonyiwa. Kaakati mugende gyebali era mukole ekyo Allah kye yabakkiriza. Mulye era munywe okutuusiza ddala ewuzi enjeru (nga ky'ekitangaala) bwe kinaabeeyolekera okuva mu wuzi enzirugavu (nga y'enzikiza) nga okwo kwe kusala kw'emmambya. Olwo nno musiibe okutuusa obudde okuziba. Temukiikanga gye bali nga mutudde Itikaafu mu mizikiti. Ezo z'ensalosalo za Allah, temuzisembereranga. Bw'atyo nno Allah bw'annyonnyola Amateeka Ge eri abantu balyoke bamutye.

Temulyanga emmaali yammwe wakati wammwe mu ngeri enkyamu, ne mutuuka n'okugitwala eri abalamuzi musobole okulya ekitundu ku bintu by'abantu mu bwonoonyi, ate nga mumanyi.

Bakubuuza (ggwe Nnabbi Muhammadi) (ku mboneekerera y'omwezi) ku nkyukakyuka y'omwezi, bagambe nti ebyo kulaga biseera eri abantu na kumanyirako biseera bya Hijja. Obutuukirivu si kuyingira mayumba gammwe nga muyita waggulu, wabula obutuukirivu ye muntu okutya Katonda. Era amayumba mugayite mu miryango gyago , era mutye Allah musobole okubeera mu b'okwesiima.

Mulwane mu kkubo lya Allah nga mulwanyisa abo ababalwanyisa. Wabula temulumbagananga , mazima Allah tayagala balumbaganyi.

Era mubatte wonna we mubanga mubagwikirizza, era mubaggye mu bifo ebyo bye baabaggyamu kubanga bulijjo obutakkiriza (n'okukyusa omuntu okumuggya mu Busiraamu) kibi nnyo okusinga okutta. Temubalwanyisizanga mu muzikiti ogw'emizizo okutuusa nga babalwanyisirizzaamu, bwe baba babalwanyisizza mubatte; empeera y'abatakkiriza bw'etyo bw'ebeera.

Bwe baba beekomyeko mazima Allah Musonyiyi, Musaasizi.

Mubalwanyise okutuusa lwe wataabeewo butakkiriza n'emisanvu gyonna, olwo nno okusinzibwa kwonna kube kwa Allah Yekka. Naye bwe baba beekomyeko olwo nno tewasaanye kubaawo bulumbaganyi okuggyako ku balyazaamaanyi.

Omwezi ogw'emizizo gwawaanyisibwamu n'omwezi ogw'emizizo. Omuntu atyoboola ebifo eby'emizizo aweebwa ekibonerezo ekigya mu kikolwa ky'aba akoze. Kale nno omuntu abalumbaganye mumwolekeze obwanga nga bw'aba azze. Mutye Allah era mumanye nti mazima ddala Allah ali wamu n'abamutya.

Era muweeyo mu Kkubo lya Allah naye temwesuulanga mmwe mwennyini mu kuzikirira, era mulongoose, kubanga mazima ddala Allah ayagala abalongoosa.

Mukole Hijja ne Umra mu bujjuvu ku lwa Allah, naye bwe mulemesebwanga, buli muntu ateekwa okusala ekisolo ekiweebwayo ky'aba asobola, wabula temumwanga mitwe gyammwe okutuusa ekisolo ekiweebwayo nga kituuse mu kifo kyakyo. Naye oyo anaabeeranga omulwadde mu mmwe oba ng'alina ekizibu ekirala ku mutwe gwe oyo ateekeddwa okutoola omutango gw'okusiiba oba okuwaayo saddaaka oba okusala ekisolo. Naye bwe munaabeerangaj mu mirembe, oyo yenna anaakozesanga omukisa gw'okukulembeza Umra ku Hijja ateekeddwa okuwaayo ekirabo ky'aba asobodde, naye oyo atakirina ateekeddwa okusiiba ennaku ssatu nga akyali mu Hijja n'endala musanvu (azisiibe) nga azzeeyo, eryo nno ly'ekkumi (10) erijjudde. Ebyo biba bityo kw'oyo amaka ge nga tegali wali muzikiti ogw'emizizo (Makkah). Mutye Allah, era mumanye nti mazima ddala Allah alina Ebibonerezo ebikakali.

Hijja erina emyezi egimanyiddwa, kale nno omuntu eyeekakasangako nti mu myezi egyo ajja kukoleramu Hijja, teyeedibaganga, era tayonoonanga, bw'atyo tawakana ng'ali mu mikolo gya Hijja. Buli kirungi kyonna kye mukola Allah akimanyi. Era muteekeddwa okwesibirira entanda. Naye entanda esinga obulungi kwe kutya Katonda. Kale nno muntye abange mmwe abalina amagezi agasengejja.

Temulina kibi bwe muba nga munonyezza ku byengera bya Katonda Wammwe, bwe muvanga mu Arafa mutendereze Allah mu kifo eky'emizizo (Muzidalifah). Era mumutendereze, anti yabaluŋŋamya newaakubadde nga mu kusooka mwali mu babuze.

Oluvannyuma mukuluumulukuke mweyiwe awo abantu we beeyiwanga era mwegayirire Allah okubasonyiwa, mazima Allah Musonyiyi, Musaasizi.

Bwe mumaliriza emikolo gyammwe (egya Hijja), mw'ogerenga ku Katonda nga bwe mwogera ku bakadde ba mmwe, sinakindi n'okusingawo. Mu bantu mulimu abasaba nga bagamba nti; Mukama Katonda Waffe tuwe ebirungi by'ensi kyokka nga talina mugabo gwonna ku Nkomerero.

Ate mu bo mulimu abasaba nga bagamba nti; Mukama Katonda Waffe tuwe obulungi ku nsi, ne ku Nkomerero otuwe obulungi, otuwonye ebibonerezo byOmuliro.

Abo nno be balina omugabo omunene olw'ebyo bye baakola, era Allah Mwangu nnyo mu kubala.

Mutendereze Allah mu nnaku ezebbalirirwe, omuntu anaayanguwanga n'avaayo mu nnaku bbiri talina musango. N'oyo alinda n'amalayo (ennaku ssatu) talina musango. Ekyo ky'oyo atya Allah. Mutye Allah era mumanye nti mugenda kukuŋŋanyizibwa mudde Gy'ali.

Mu bantu mulimu omuntu nga ebigambo bye bikusanyusa mu bulamu obw'ensi era nga ajuliza Allah kw'ekyo ekiri mu mutima gwe, so nga ye mulabe asingira ddala (eri Obusiraamu n'Abasiraamu).

Bw'ava awo assa amaanyi mu kusaasanya obwonoonefu mu nsi, era n'azikiriza ebirime n'ebisolo, so nga ate Allah tayagala bwonoonefu.

(Omuntu oyo y'omu) bwe bamugamba nti tya Allah, asunguwala ne yeekuluntaza olw'okwonoona kw'alina. Omuliro Jahannama gwe gumusobola. Ekyo nno kifo kibi nnyo.

Era mu bantu mulimu atunda omwoyo gwe nga anoonya okusiima kwa ssh; Katonda musaasizi nnyo eri abaddu Be.

Abange mmwe Abakkiriza, muyingire mu Busiraamu muggweeremu. Temugobereranga makubo ga Sitaane, mazima yye mulabe wa mmwe owoolwatu.

Bwe munaaseerera oluvannyuma lw'okujjirwa obunnyonnyofu, mumanye nti Allah wa buyinza, mukenkufu.

Tebalina kye balinda, okuggyako balinda Allah okubajjira nga ali mu bisiikirize by'ebire ne Bamalayika bajje ekigambo kiggwe. So nga ate (ebyo we biribeererawo) ebintu by'ensi byonna biriba bikomye), era eri Allah ensonga zonna gye zijja okuzzibwa.

Buuza abaana ba Yisirayiri nti, obubonero obunnyonnyofu bumeka bwe nnabawa? Bungi. Naye nno omuntu akyusa ekyengera kya Allah nga amaze okukifuna, mazima ddala Allah Ebibonerezo Bye byamaanyi.

Abatakkiriza bawundirwa obulamu bw'e Nsi, era bajeeja Abakkiriza; wabula abatya Katonda bagenda kubabeera waggulu ku lunaku lw’e Nkomerero. Katonda agabira gw'aba ayagadde awatali kubalirira.

Abantu baali ku Ddiini emu (ey'okukkiriza Allah Yekka) (naye olw'ensonga emu oba endala ne baawukana) Allah kwe kutuma Bannabbi nga balanga essanyu (eri abo abakkiriza nebakola emirimu emirungi) era nga batiisa (ebibonerezo ebirituuka ku bajeemu). Allah n'abassaako ekitabo namazima alyoke alamule wakati w'abantu mw'ebyo bye baayawukanamu. Naye tebaayawukana mu kyo (Ekitabo) okuggyako abo bennyini abaakiweebwa, ng'obunnyonnyofu bumaze okubatuukako, Allah kwe kulunngamya abo abakkiriza ku lw'Ekisa Kye eri amazima ge baayawukanamu. Bulijjo Allah aluŋŋamya gw'aba ayagadde eri ekkubo eggolokofu.

Nandiki musuubira okuyingira Ejjana nga temutuukiddwako ebiringa ebyo ebyatuuka ku baabakulembera! Baatuukibwako ebizibu n'okubonaabona, era ne bayuuguumizibwa okutuusa Omubaka ne Abakkiriza abaali awamu naye ne bagamba nti Allah atutaasa ddi? Naye, okutaasa kwa Allah kuli kumpi.

Bakubuuza biki bye baba bawaayo. Bagambe nti buli kyonna kye muwaayo mu birungi kiweebwa abazadde ababiri, abooluganda, bamulekwa, abeetaavu n'abatambuze. Era (mukimanye) nti buli kalungi konna ke mukola mazima ddala Allah akamanyi.

Mulaalikiddwako okulwana (mu Kkubo lya Allah) awamu n'okuba nga temwandikyagadde. Naye, muyinza obutayagala kintu nga ate kye kirungi gyemuli, nga bwe muyinza okwagala ekintu naye nga kibi gyemuli; anti Allah amanyi ate nga mmwe temumanyi.

Bakubuuza ku kulamula kw'okulwana mu mwezi ogw'emizizo. Bagambe nti okugulwaniramu kibi kinene,wabula okuziyiza abantu okukola emirimu gya Allah n'okumujeemera n'okuziyiza abantu okutuuka ku Muzikiti Ogw'emizizo n'okugobaganya abantu baamu, bye bisinga obubi mu maaso ga Allah. Kubanga (bulijjo) obutakkiriza bubi nnyo okusinga okutta.

Mazima ddala abo Abakkiriza era abaasenguka ne balwana mu Kkubo lya Allah; abo nno be basuubira okusaasira kwa Allah. Era Allah Musonyiyi, Musaasizi.

Bakubuuza ebikwata ku mwenge ne zzaala, bagambe nti mu by'ombiriri mulimu ekibi kinene, nga bwe mulimu emigaso eri abantu. Naye ekibi kyabyo kye kinene okusinga emigaso egibirimu. Ate era bakubuuza nti baweeyo kigero ki mu mmaali zaabwe, bagambe nti mugabenga ekyo ekiba kifisse ku byetaago byammwe. Bw'atyo nno Allah bw'abannyonnyola Amateeka Ge mulyoke mufumiitirize.

(Musobole okutegeera) ebibagasa mu bulamu buno obw'okunsi n'obw'Enkomerero. Era bakubuuza ku bikwata ku bamulekwa, bagambe nti okubalongooseza emmaali yaabwe ky'ekisinga obulungi, naye singa mugigatta n'eyammwe anti baganda bammwe, era Allah amanyi oyo alongoosa kw'oyo afiiriza. Singa Allah yayagala yandibakaluubirizza. Mazima Allah Waamaanyi Mukenkufu.

Temuwasanga abagatta ku Allah ebisinzibwa ebirala okutuusa lwe bakkiriza. Mazima omuzaana Omukkiriza ye mulungi okusinga oyo agatta ku Allah ebisinzibwa ebirala k'abeere nga abeewunyisizza. Era temufumbizanga bawala bammwe eri abo abagatta ku Allah ebintu ebirala okutuusa lwe basiramuka. Omuddu Omukkiriza ye mulungi okusinga oyo agatta ku Allah ebintu ebirala newaakubadde nga abeewuunyisizza. Abo bakoowoola abantu nga babazza eri Omuliro, so nga ate Allah abakoowoola kubazza eri Jjana n'ekisonyiwo okusinziira ku kwagala Kwe, era annyonnyola abantu Ebigambo Bye balyoke beebuulirire.

Era bakubuuza ebikwata ku kusuulumba, bagambe nti kyo kikosa, kale nno mwesambe abakyala nga bali mu kusuulumba, era temubasemberera okutuusa lwe batukula, olwo nno bwe beetukuza mugende gye bali nga muyita mu kkubo eryo Allah lye yabalagira. Mazima ddala bulijjo Allah ayagala abeenenya era nga bw'ayagala abeetukuza.

Bakyala ba mmwe nnimiro zammwe n'olw'ekyo mugende mu nnimiro zammwe nga muyita wonna wemuba mwagadde era bulijjo mutegekere emyoyo gyammwe (nga mukola emirimu emirungi) era mutye Allah mumanye nti mazima ddala mugenda kumusisinkana, era sanyusa Abakkiriza.

Temufuulanga okulayira erinnya lya Allah ekyekwaso nemutuuka obuteeyisa bulungi n'obutatya Allah ne mutuuka n'obutasobola kulongoosa wakati w'abantu. Bulijjo Allah awulira era Mumanyi nnyo.

Allah tabavunaana mu kulayira kwammwe okw'olusaago, wabula abavunaana ebyo emitima gyammwe bye gigenderedde ne bigikakasa, bulijjo Allah Musonyiyi Waakisa.

Abo ababa balayidde nti tebagenda kuddayo kulabagana na bakyala baabwe baweebwa ebbanga lya emyezi ena, bwe baddira bakyala baabwe mu myezi egyo mazima ddala Allah Musonyiyi Musaasizi.

Naye bwe baba bamaliridde okuta bakyala baabwe, mazima ddala Allah awulira, amanyi nnyo.

Abakyala abaweereddwa talaka bateekeddwa okulindirira ebbanga lya nsuulumba ssatu era tebakkirizibwa kukweka ekyo Allah ky'aba atonze mu nnabaana waabwe bwe baba ddala nga bakkiriza Allah n'Olunaku lw’Enkomerero, era mu kiseera ekyo babbaabwe be basaanira okubuzza okubaddira. Ekyo nno bwe baba nga bagenderera kulongoosa. Abakyala abo bateekeddwa okuweebwanga ekyo nabo kyekbateekeddwa okuwaayo mu ngeri ennungi. Kyo abasajja be basinga eddaala. Anti Allah y'asingako okuba ow'obuyinza era nga b'wasinga okuba Owaamagezi.

Okuta omukyala (nga omwami aweebwa omukisa okumuddira) kubaawo emirundi ebiri. Mu kiseera ekyo omwami ayinza okusalawo okusigaza mukyala we mu mwoyo mulungi, oba okumuta mu ngeri ennungi. Era temukkirizibwa kuggya ku bakyala bammwe (be mutadde) kintu kyonna kw'ebyo bye mwabawa okuggyako nga beekengedde obutatuukiriza Mateeka ga Allah mu bufumbo. Kati bwe muba nga mutidde (mmwe abatabaganya) nti abafumbo bombi tebajja kusobola kutuukiriza Mateeka ga Allah mu bufumbo, tebalina musango gwonna mu kutwala ekyo omukyala ky'aba yeenunula nakyo. Ago ge Mateeka ga Allah temugasukkanga. Abo bonna abamenya Amateeka ga Allah; abo nno be balyazaamaanyi.

Naye omusajja bwaba atadde mukyalawe (talaka ey'okusatu) aba takyakkirizibwa kumuddira mu bufumbo oluvanyuma lwa taraka eyo okutuusa nga amaze okufumbirwa omusajja omulala. Omusajja oyo omulala bw'aba amutadde tewaba musango okuddinngana (N'oli eyasooka okumuta emirundi esatu) kasita basuubira nti bombi banaatuukiriza amateeka g'obufumbo. Ago nno ge Mateeka ga Allah agannyonnyola abantu abategeera.

Bwe muba mutadde abakyala (etali ttalaka esembayo) ebbanga lye balina okutuula ne lisemberera okuggwaako mubasigaze n'ekigendererwa ky'okubayisa obulungi oba mwawukane nabo mu ngeri ennungi kyokka temubasigazanga nga mugenderera okubacunya n'okubakolako obulumbaganyi. Omuntu akola ekyo aba yeryazaamaanyizza yekka. Temufuula Amateeka ga Allah ag'olusaago. Mujjukire ekyengera kya Allah kye yabawa n'ebyo bye yabassiza mu Kulaani ne mu njigiriza (ya Nnabbi Muhammadi). Mutye Allah mumanye nti amanyi buli kintu kyonna.

Bwe muba nga mutadde abakyala ebbanga lyabwe lyebatuula nga tebannafumbirwa (Idda) ne liggwaako temubagaananga okudda eri babbaabwe bwe baba bakkirizigannyiza mu ngeri ennungi. Etteeka eryo libuulirwa oyo yenna akkiriza Allah n'Olunaku lw'Enkomerero. Ekyo nno kye kisinga okuba ekyensa n'obutukuvu gyemuli. Allah y'asinga okumanya (ekirimu omugaso gyemuli) naye mmwe temumanyi.

Abazadde (abakyala) balina okuyonsa abaana baabwe emyaka ebiri egijjudde, eri abo ababa baagadde okuyonsa okujjuvu. Kikakata ku bataata b'abaana okubalabirira n'okubambaza mu ngeri esaana, omuntu taakakibwenga ky'atasobola. N'omukyala taayisibwenga bubi olw'omwana gw'ayonsa. Wadde kitaawe w'omwana naye tasaanidde kuyisibwa bubi olw'omwanawe. N'oyo aba asikidde taata wa baana ayisibwa mu ngeri y'emu. Bwe baba nga bakkiriziganyizza bombi okuggya omwana ku mabeere nga bayise mu kuteesa olwo tewaba musango gwonna. Bwe muba mwagadde omukyala omulala okubayonseza omwana temulina musango gwonna kasita muba nga muwaddeyo ebyo bye mukkiriziganyizzaako mu ngeri ennungi. Mutye Allah, era mumanye nti mazima Allah alaba byonna bye mukola.

Ate abo ababa bafudde mu mmwe ne baleka abakyala, abakyala abo bateekwa okwekuuma nga tebannaddamu kufumbirwa ebbanga lya myezi ena n'ennaku kkumi. Ebbanga eryo nga liweddeko, temulina musango mw'ekyo kye baba bakoze mu by'okwewunda (n'okukkiriza abaagala okubawoowa) mu ngeri y'ekintukiramu (etemenya mateeka ga Busiraamu). Allah Mumanyi nnyo ku bye mukola.

Era temulina musango olw'ekyo kye muba mwogedde mu kugereesa nga temwatudde nga mugenderera okwogereza abakyala (abo) oba kyemuba mukisizza mu mitima gyammwe. Allah amanyi nti mujja kwogera nabo (ku nsonga y'okubawasa) naye temubalagaanyisanga mu kyama mu ngeri ya kukukuta, okuggyako nga mubagamba ebigambo ebirungi. Temwetantalanga kukola ndagaano ya bufumbo n'abakyala abo (abali mu Idda) okutuusa ebbanga (lya Idda) nga liweddeko. Era musaana mumanye nti mazima Allah amanyi ebiri mu myoyo gyammwe. Mubyegendereze awamu n'ekyo mumanye nti Muyitirivu waa kusonyiwa era Waakisa kingi.

Temulina musango singa muta bakyala bammwe nga temunneegatta nabo wadde nga temunnabagerekera Mahare. Naye muteekwa okubasibirira. Omugagga asibirira ekigya mu mbeera ye n’omufunampola asibirira ekimugyamu. Okusibirira kubeera mu ngeri ya buntu bulamu. Ekyo kikakafu ku bakozi b'obulungi.

Wabula bwe muba nga mubatadde nga temunnaba kwegatta nabo naye nga mwabagerekera Amahare, mubawe kitundu ky'ago ge mwagereka, okuggyako nga abakyala abo bagasonyiye oba nga asonyiye oyo alina obuyinza okusiba endagaano y'obufumbo (omusajja). Naye bwe muba nga musonyiye, ekyo kye kisinga okuba okumpi n'okutya Allah. Temwerabiranga ebirungi ebibadde wakati wammwe. Mazima Allah alaba ebyo byonna bye mukola.

Mwekuume nnyo ku Sswala zonna (ettaano) naddala esswala ey'enkizo; muyimirire mu maaso ga Allah nga muli bagonvu.

Wabula bwe muba nga mutidde (omulabe) musaale nga mutambula oba nga mwebagadde. Naye okutya bwe kuba kuvuddewo mutendereze Allah (nga musaala) nga bwe yabayigiriza ebyo bye mwali temumanyi.

N'abo abatuukwako okufa mu mmwe ne baleka abakyala, kibakakatako okulaamira bakyala baabwe okulabirirwa omwaka mulamba awatali kubagobaganya mu mayumba g'aba bbaabwe. Wabula bwe bagavaamu kyeyagalire olwo nno muba temulina musango gwonna mw'ekyo kye baba bakoze nga bo mu ngeri ennungi. Bulijjo Allah Waamaanyi, ate nga agoba nsonga.

(Mu ngeri y'emu) n'abakyala ababa baweereddwa Talaka (bateereddwa) bateekeddwa okusibirirwa mu ngeri ennungi okusinziira ku kimanyiddwa. Ekyo kikakafu kw'abo abatya Allah.

Bw'atyo nno Allah bw'abannyonnyola Ebigambo Bye mulyoke mutegeere.

Tolaba abo abadduka mu mayumba gaabwe nga baali nkumi na nkumi nga batya okufa, Allah n'abagamba nti kale mufe, oluvannyuma n'abazuukiza. Mazima Allah agabirira abantu, naye abantu abasinga obungi tebeebaza.

Mulwane mu Kkubo lya Allah era mumanye nti mazima ddala Allah awulira nnyo era Muyitirivu wa kumanya.

Ani oyo awola Allah okuwola okulungi alyoke abe nga akumukubisizaamu ennyongeza nnyingi. Era Allah afunza era n'agaziya (enfuna y’omuntu) so nga era Gy'ali gye mulizzibwa.

Tolaba abakungu mu baana ba Yisirayiri abaaliwo oluvannyuma lwa Musa lwe baatuuka okugamba Nnabbi waabwe nti tuteerewo Kabaka (atukulembere) tusobole okulwana mu Kkubo lya Allah. (Nnabbi) n'abagamba nti ‘kye mugamba nti singa mulaalikiddwako okulwana nga muli ne Kabaka oyo temuugaane kulwana?’ Ne bagamba nti ‘Ate lwaki tetulwana mu Kkubo lya Allah nga twagobaganyizibwa dda ffe n’abaana baffe okuva mu nsi yaffe? Wabula bwe baalaalikibwako okulwana baakyuka okuva ku bigambo byabwe okuggyako abatono mu bo. Wabula nga bulijjo Allah amanyi abalyazaamaanyi.

Nabbi waabwe kwe kubaanukula nti mazima Allah ataddewo Twaluuta (Saulo) okuba Kabaka wammwe. Bo kwe kugamba nti ayinza atya okuba Kabaka waffe so nga ffe tusaanira obwakabaka okumusinga, ate nga teyaweebwa bugazi bwa byabugagga. (Nnabbi waabwe) n'abagamba nti Allah gw'abalondedde era n'amwongera obugazi mu kumanya ne mu mubiri. Era Allah awa obufuzi Bwe oyo gw'aba ayagadde. Era Allah Mugazi era Mumanyi.

Nnabbi waabwe n'abagamba nti mazima akabonero akakakasa obw’akabaka bwe kwe kuba nti essanduuke ebajjira nga erimu obutebenkevu okuva eri Mukama Katonda Wammwe. Era nga mulimu ebyasigalawo kw'ebyo abantu ba Musa () n’abantu ba Haaruuna () bye baaleka (Essanduuko eyo) ejja kuba nga esituddwa Bamalayika. Mazima ekyo nno ddala kirimu akabonero gyemuli, bwe muba ddala nga muli Bakkiriza.

Twaluuta bwe. yafuluma n’eggye yabagamba nti (okugenda tugenda naye mukimanye) Mazima ddala Allah ajja kubagezesa na mugga. Oyo yenna anaagunywako ajja kuba takyali waamuggye lyange. Naye oyo ataalozeeko oyo nno ye wange ddala, mpozzi omuntu asobola okusenayo olusena lumu n'ebibatu bye. Bonna baaganywa okuggyako abatono mu bo. Bwe yamala okugusomoka wamu n'Abakkiriza abaali naye, ne bagamba nti olwaleero luno tetuyinza kusobola Jaaluuta (Goliyaasi) n'eggye lye. Bo abaakakasa nti bagenda kusisinkana Allah kwe kugamba nti bimeka ebibiina ebitono ku lw'obuyinza bwa Allah ebiwangula ebibiina eby'abantu abangi, era bulijjo Allah abeera wamu n'abagumiikiriza.

Bwebaayolekaganya obwanga eri Jaaluuta n'eggye lye ne bagamba nti, Ayi Katonda Waffe, tuyiweeko obugumiikiriza onyweze ebigere byaffe, era otutaase ku bantu abatakkiriza nti okusinzibwa Kukwo Wekka.

Ne baabawangula olw'Obuyinza bwa Allah . Dauda n'atta Jaaluuta era Allah n'amuwa obufuzi n'okutegeera okwenjawulo era era n'amuyigiriza ebimu kw'ebyo bye yayagala amanye. Singa tekyali nti Allah aggyawo abantu nga akozesa abamu ne bannaabwe, nsi yandyonoonese. Naye mazima ddala Allah ebitonde Bye abigabirira ebyengera.

Ebyo nno Bigambo bya Allah tubikusomera na mazima, era mazima ddala ggwe (Nnabbi Muhammadi) oli mu luse lw'Abatume.

Abo Ababaka betubagambye ko twasukkulumya abamu ku bannaabwe, abamu ku bbo Katonda yayogera nabo, n'abalala n'abasukkulumya mu madaala. Isa mutabani wa Mariam twamuwa obukakafu era netumuwagira ne mwoyo mutukuvu (Jiburilu), Singa Katonda yayagala abaaliwo oluvanyuma te baalirwanaganye oluvannyuma lw'obunnyonnyofu okubatuukako naye baayawukana, abamu mu bbo bakkiriza ate abalala nebagaana okukkiriza, era singa Katonda yayagala tebandirwanaganye, wabula mazima Katonda akola ekyo ky'aba ayagadde.

Abange mmwe abakkiriza muweeyo kw'ebyo byetwabagabira, nga olunaku okutaliba kutunda wadde omukwano oba okuwolereza terunatuuka, naye Abatakkiriza Katonda n'Ababaka be bebalyazaamaanyi (olw'obutagondera mateeka g’a Katonda).

Katonda yekka, y'asinzibwa mu butuufu tewali ateekwa kusinzibwa okuggyako ye, Omulamu obulamu obw'olubeerera Eyeeyimirizaawo yekka awatali kwetaaga buyambi bwonna, takwatibwa kusumagira wadde otulo, bibye byonna ebiri mu Ggulu ne mu Nsi, tewali agenda kwetantala kuwolereza (munne) ewa Katonda okuggyako nga amukkirizza, amanyi ebyo ebiri mumaaso gaabwe n'emabega waabwe ate bbo tebalina kintu kyonna kye bamanyi ku by'amanyi okuggyako ky'aba ayagadde, entebe ye ngazi okumalayo eGgulu n'e Nsi, so nga ate e Ggulu n'e Nsi okubikuuma byombi tekimukaluubirira. Era ye yam'asinga okuba owa waggulu, ow'ekitiibwa ekisuffu.

Tewali kuwaliriza bantu kuyingira mu Ddiini anti obulunngamu bweyolese okuva ku bubuze, oyo yenna awakanya Sitane n'akkiriza Katonda aba yeekutte ku muguwa omugumu ogutakutuka, bulijjo Katonda awulira nnyo amanyi nnyo.

Katonda yemweyimirize w'abakkiriza, abaggya mu bizikiza n'abazza eri ekitangaala, bbo abatakkiriza, Sitane z'enneeyimirize zaabwe zibaggya mu kitangaala n'ebazza mu nzikiza, abo be bantu b'omu muliro b'akugutuulamu olubeerera.

Tolaba oyo eyakaayana ne Ibrahim ku bw'omu bwa Katonda we, olw'okuba nno bambi Katonda yamuwa obufuzi (ekyamuletera okwekuluntaza), Ibrahim bweyamugamba nti Katonda wange yooyo awa obulamu era n'atta, ye naddamu nti nze mpa obulamu era nenzita, Ibrahim n'agamba nti mazima Katonda aggya enjuba ebuvanjuba kale ggwe giggye ebugwanjuba. Awo nno omuw'akanyi oyo n'atangaalirira anti bulijjo Katonda talunngamya bantu balyazaamaamya.

Oba wamanyaako afaanana n'oyo eyayita ku kyalo ng'obusolya bwakyo bwagwa n'agamba nti bannyini kyo Katonda agenda kubalamusa atya nga baafa dda! Katonda n'amutta okumala emyaka kikumi oluvannyuma n'amuzuukiza n'amugamba nti omaze bbanga ki nga ofudde? N'amuddamu nti maze olunaku lumu oba ekitundu kyalwo, n'amugamba nti nedda omaze emyaka kikumi, Ggwe tolaba emmere yo n'ebyokunywa byo tebyonoonese!!! Ate tunula ku ndogoyi yo (eweddeko ennyama neeba magumba meerere), nga ekigendererwa tukufuule eky'okulabirako eri abantu. Tunuulira olabe amagumba g'e ndogoyi yo nga bwetugagatta olwo nno netugambaza ennyama, bweyamala okulaba nga bwegutyo bweguli n'agamba nti kaakano nkitegedde Katonda asobola okukola buli kintu.

Jjukira ekiseera Ibrahim weyagambira nti, Ayi Katonda wange ndaga engeri gy'olizuukizaamu abafu, Katonda n'agamba nti tokkirizanga! Ibrahim n'agamba nti nakkiriza naye nkisaba omutima gwange gutebenkere, Katonda n'amugamba nti kwata ebinyonyi bina obikunngaanye obitemeteme omale oteeke ku buli lusozi ekitundu, oluvannyuma obikoowoole bijja kujja gy'oli mubwangu, era kitegeere nti mazima Allah nantakubwa ku mukono ate mugoba nsonga.

Abo, abawaayo ebimu ku bintu byabwe mu kkubo lya Katonda, bafaananako omuntu asiga empeke emu emera n'eweeka ebirimba musanvu nga buli kirimba kiriko empeke kikumi, bulijjo Katonda ayongeza ebigabwabye eri oyo gw'aba ayagadde, anti bulijjo Katonda mugazi mu mbeera ze zonna ate nga muyitirivu wa kumanya.

Abo abawaayo e mmaali yaabwe mu kkubo lya Katonda ate kyebawaddeyo nebatakigoberezaako kulaalaasa oba ebinyiiza, abo bagenda kufuna e mpeera yaabwe ewa Katonda waabwe, era tebagenda kuba nakutya kwonna mu maaso ga Katonda era nga tebagenda kunakuwala.

Ekigambo aky'obuntu bulamu n'okusonyiwa ky'ekirungi okusinga Saddaaka egoberezebwako ebigambo ebikosa, bulijjo Katonda si mwetaavu (era) wakisa kingi.

Abange mmwe Abakkiriza temwonoonanga saddaaka zammwe n'okulalaasa n’okunakuwaza ebinyiiza gamba nga omuntu awaayo emmaali ye olw'abantu okumulaba naye nga takkiriza Katonda n'olunaku lw’enkomerero, omuntu oyo alinga olwazi oluliko ettaka namuttikwa w'enkuba n'alutonnyako n'aluleka nga lukalu, nabwekityo abantu abakola ku lwabandabe byonna byebakola bifuumuuka nebaba nga tebalisobola kufuna mpeera yonna (mumaaso g’a Katonda) mw'ebyo bye baakola bw'atyo nno Katonda talunngamya bantu bajeemu.

Ate ekifaananyi ky'abo abawaayo emmaali yaabwe olw'okunoonya okusiima kwa Katonda n'okusinziira ku kukkiriza kw'emitima gyabwe Katonda okwa namaddala, kiringa ennimiro eri ku ttaka ejjimu eriri ku katunnumba neetonnyebwamu namuttikwa wenkuba n'emeza ebibala byayo ebyekubisaamu emirundi ebiri nebweba tetonnyeddwako namutikwa wa nkuba waakiri olufuuyirize. Bulijjo Katonda alabira ddala byonna bye mukola.

Abaffe omu ku mmwe yandyagadde okubeera n'ennimiro ey'emitende n'emizabbibu nga emigga gikulukutira wansi waayo ng'alina mu yo buli kika ky'ebibala, obukadde nebumutuukako ate nga alina abaana abakyali abato, kibuyaga nga alimu n'omuliro n'agikuba n'eggya n'eggwawo, bw'atyo nno Katonda bw'abannyonyola ebigambo ebigasa musobole okufumiitiriza.

Abange mmwe abakkiriza muweeyo ku birungi byemuba mukoze ne kw'ebyo bye tubaggyira wansi mu ttaka, temulondangamu ebibi mu bbyo mube nga byemuwaayo, so singa biba biweereddwa mmwe temwandibitutte okuggyako nga muzibiridde (nemumala gabitwala) era musaana mukimanye nti mazima Katonda Mugagga talina bwetaavu eri kintu kyonna era y'atenderezebwa.

Sitaane ebatiisa okwavuwala bwe munasaddaaka n'ebalagira okukola ebibi so nga Katonda abalagaanyisa kisonyiwo okuva gy'ali nakubawa birungi, bulijjo Katonda mugazi nnyo mubyagaba mumanyi nnyo.

Katonda awa okutegeera ensonga, oyo gw'aba ayagadde era oyo aba aweereddwa okutegeera ensonga aba aweereddwa ebirungi ebiyitirivu. Tewali bayinza kwegasa nakino okuggyako abalina amagezi agakola ennyo.

(Muteekwa mukimanye nti ) temulina kyonna kye muwaayo oba naziri yonna gye mwetema mazima Katonda abimanyi. Abalyazaamaanyi nebatatuukiriza kyebateekwa kukola, tebagenda kufuna abataasa ku Katonda.

Saddaaka bwemuziwa mu lwatu zibeera nsuffu obulungi naye ate bwe muba muzikisizza (nemuziwa abaavu) mukyama kyekisinga obulungi gyemuli, era ekyo kibasangulako ebibi byammwe, bulijjo Katonda amanyi nnyo byemukola.

(Ebyo ebyogeddwa waggulu bimala okumatiza omuntu) Ssi ggwe ovunaanyizibwa ku kulunngama kwabwe, wabula Katonda alunngamya oyo gw'aba ayagadde, buli kirungi kyemuwaayo kigasa mmwe, (nga abakkiriza) ate temuwaayo okuggyako okunoonya okusiima kwa Katonda, na buli kirungi kyonna kyemuwaayo kigenda kubasasulwa mu bujjuvu era temugenda kulyazaamaanyizibwa.

(Saddaaka ziweebwa) abaavu abo abeemalira mu kuweereza mu kkubo lya Katonda nga tebasobola kutambula mu Nsi nga banoonya Riziki. Olw'ensa zaabwe, atamanyi alowooza nti bagagga olw'ensa zebalina osobola okubamanya olwobubonero bwabwe, anti tebabeeba Bantu nga basaba, (n’olwekyo abalina baweeyo) anti buli kalungi konna kemuwaayo Katonda akamanyi.

Abo abawaayo e mmaali yaabwe ekiro n'emisana, mu kyama ne mu lwatu, bagenda kufuna empeera yaabwe ewa Katonda waabwe, tebagenda kutuukibwako kutya era tebagenda kunakuwala.

Abo abalya Ribba (emaali ey'okuwola okw’okwongeramu) ku lunaku lw'okuzuukira tebagenda kuyimuka mu ntaana wabula nga bayimuka ng'oyo aba akubiddwa Sitaane n'agwa eddalu, ekyo nno lwakuba bagamba nti okusubula ne Ribba tebirina njawulo (anti byonn'a kuwanyisiganya byamaguzi na kufuna magoba) ate nga mazima Katonda yakkiriza okusuubula, ate yo Ribba n'agiziza. Kale nno oyo atuukwako okubuulirira okuva eri Katonda n'ava ku Ribba ebyo byeyakola mukusooka tebimuvunaanwa, n'ensonga ze zisigadde wa Katonda we, naye oyo anaddayo eri Ribba, abo nno, be bantu b'omu muliro ba kugubeeramu obugenderevu.

Katonda asaanyaawo Ribba kyokka naayaza emmaali etoolwamu Saddaaka, Katonda tayagala mujeemu yenna awalaaza empaka (alemera ku Ribba aba agugubidde ku kibi n'okujeemera Katonda).

Mazima abo abakkiriza era nebakola emirimu emirungi nebayimirizaawo e Sswala nebatoola Zzaka bagenda kufuna empeera yaabwe ewa Katonda waabwe tebagenda kutuukwako kutya era tebagenda kunakuwala.

Abange mmwe abakkiriza mutye Katonda era muleke kyonna ekya Ribba ekyasigalayo bwe muba nga ddala muli bakkiriza.

Bwemutaakikole mumanye nti Katonda n'omubakawe babalangiriddeko olutalo naye bwe muba mwenenyezza sente zammwe (Capital) zemwassaamu muziggyeeyo, mukino mube nga temufiiriza wadde okufiirizibwa.

Abanjibwa bwaba nga mwavu asaanidde alindirizibwe okutuusa lwanabeera nga ali mu mbeera mwasobolera okusasula, (naye mmwe ababanja) singa muba musonyiye bemubanja kyekirungi gyemuli singa mumanyi.

Mutye olunaku lwe muliddizibwa ewa Katonda oluvannyuma buli muntu asasulwe ebyo byeyakola era tebagenda kulyazamaanyizibwa.

Abange mmwe abakkiriza bwe muba muwolaganye ebbanja lyonna nga liriko ekiseera ekigere mu liwandiikenga, omuwandiisi ateekeddwa okuwandiika endagaano wakati wa mmwe mubwenkanya, omuwandiisi tasaanye kugaana kuwandiika nga Katonda bweyayigiriza, (omuwandiisi) ateekwa awandiike, gwebabanja y'ateekwa okwogera ebiwandiikwa mu ndagaano era mu kukola kino ateekeddwa okutya Katonda mukamaawe, tasaanye kulekayo kintu kyonna kikwata ku bbanja eryo, gwebabanja bw'aba wantegeera nnafu oba nga mwana muto oba nga tasobola kuba nti yaayogera ebiwandiikibwa mu ndagaano olw'obutasobola obuli ku mubiri gwe, amulabirira y'ateekwa okwogera ebiwandiikibwa mu ndagaano nga akikola mu bwesimbu. (Nga mukola endagaano eno) muteekengawo abajulizi babiri nga basajja mu mmwe, bwebataba basajja babiri, kale abe omusajja omu n'abakyala babiri nga mubalonda mw'abo bemulabye nga basaanira okuba abajulizi, olw'okutya omu okwerabira, munne n'abeeranga amujjukiza, abajulizi tebagaananga okujja bwe baba nga bayitiddwa temwekaanyanga okuwandiika ebbanja kalibe ttono oba ddene, muwandiike nga mulaga ekiseera kyalyo wekiggwerayo, okuwandiika ebbanja mu ngeri eyo kiragira ddala obwenkanya obuli mu mateeka ga Katonda, era kyekisinga okuyamba obujulizi obutabula mu ngeri y'emu kyekisinga okubayamba obutabaawo kubuusabuusa (nti ebbanja lyali lye nkanawa oba lyakusasula ddi) okuggyako nga kubadde kugulana okw'ekiggwerawo kwemukolaganamu mu nkola eyabulijjo mw'ekyo tumulina musango bwe muba nga temukoze ndagaano, era ne bwemuba nga mugulaanye musseewo abajulizi (mukimanye) omuwandiisi wendagaano n'omujulizi tebasaanye kuyisibwa bubi, naye nemumala mukikola kiba kikolwa kya bugyemu okuva mu mmwe, bulijjo muteekeddwa okutya Katonda era Katonda bulijjo abayigiriza ebyo ebirimu emigaso gyammwe anti Katonda amanyi buli kintu.

Bwe muba nga mutambula olugendo ne mutafuna muwandiisi olwo nno omusingo gukwatibwe naye bwe muba nga mwesigannganye nemutawandiika ndagaano oba okukwata omusingo oyo eyateekebwamu obwesige ateekwa okutuukiriza obwesigwa obwo era ateekeddwa okutya mukama omulabirizi we (bwemutwalibwa nga okuba abajulizi) temukwekanga obujulizi, oyo yenna abukweka omutima gwe guba gukoze ekibi bulijjo Katonda amanyi byonna byemukola.

Ebiri mu Ggulu omusanvu ne mu Nsi byonna bya Katonda, kamwolese oba mukweke ebiri mu mitima gyammwe Katonda agenda kubibabalira, olwo nno asonyiwe oyo gw'aliba ayagadde era abonereze oyo gw'aliba ayagadde anti Katonda muyinza wabuli kintu.

Omubaka yakkiriza n'akakasa ebyo ebyassibwa kuye nga biva ewa mukama omulabiriziwe Katonda we n'abakkiriza bwebatyo nebakakasa, buli omu ku bbo yakkiriza Katonda ne ba Malayika be n'ebitabo bye n'ababakabe era nebagamba nti tetwawula wakati wa babakabe era nebagamba nti tuwulidde netugonda, Ayi Mukama Katonda waffe tukusaba ekisonyiwo era gy'oli y'eri obuddo.

Katonda tawaliriza muntu okuggyako obusobozi bwe webukoma, buli mwoyo gugenda kusasulwa ebirungi byegwakola era nga bwegugenda okuvunaanwa olw'ebibi byegwetikka. Ayi Mukama omulabirizi waffe totuvunaana byetukoze mukwerabira oba mu bu'tanwa, Ayi Mukama omulabirizi waffe totutikka obuzito nga bwewatikka abo abaatukulembera, Ayi Mukama omulabirizi waffe totulagira kukola byetutasobola, tuggyeko ebibi otusonyiwe otusaasire, Ggwe mukuumi waffe tutaase ku bantu Abaakaafuwala.

Alif Laam Miim.

Katonda Y'oyo tewali kisinzibwa mu butuufu okuggyako ye, omulamu, (atendebwa n'obulamu obujjuvu obwolubeerera) eyeeyimirizaawo yekka era ayimirizaawo buli kintu kyonna.

Yassa gy'oli ggwe (Nabbi Muhammad) ekitabo (Kur’ani) nga kijulira amazima g'ebyo e byakikulembera era ye yassa Taurat ne Enjiri.

Oluberyeberye lwa Kur’ani nga kyakulungamya eri abantu, era yassa ebyawula wakati wa mazima n'obulimba, mazima abo abawakanya ebigambo bya Katonda byeyassa balina ebibonerezo ebiyitirivu, Katonda ye nn'atameggwa, nannyini kwesasuza.

Katonda tewali kintu kyonna kimwekweka mu Nsi wadde mu Ggulu.

Katonda y'oyo abatondera ku bifaananyi byammwe mu nnabaana nga bw'aba ayagadde. tewali kisinzibwa kyonna mu mazima, okuggyako Ye. nn'atameggwa, mugoba nsonga.

Ye, Y'oyo eyakussaako (Muhammad) ekitabo (Kur’ani) mu kkyo mulimu Aaya enyinyonnyofu zo gwemusingi gw' ekitabo (Kur’ani). Ate endala (Aaya) sisuubirwamu amakulu ag'engeri ez'enjawulo (Amatuufu n'agatali matuufu) (nga okuzitegeera kwesigamye ku bitundu bya Aya ezo'musingi gwa Kur’ani) Naye abalina obubuze mu mitima gyabwe (olwebigendererwa byabwe ebibi bo) balondamu Aya eziwa amakulu agafaanagana nga tebeesigamye ku Aya zinannyini musingi gwa Kur’ani, nga ekigendererwa kyabwe kubuza bantu n'olwokwagala okuziggya ku makulu gaazo amatuufu, so nga tewali amanyi makulu gaazo amatuufu okuggyako Katonda, nga abakenkufu mu kumanya bagamba nti tukkiriza Kur’ani, byonna ebigirimu byava wa Mukama omulabirizi waffe era nga tewali ategeera bigirimu okuggyako ba nannyini magezi amasukkulumu.

(Era bagamba nti) Ayi Mukama omulabirizi waffe towabya mitima gyaffe ku bulungamu oluvannyuma lw'okutulunngamya, anti mazima, ggwe mugabi wa byonna.

Ayi Mukama omulabirizi waffe tukkiriza era nga tukakasa nti ggwe ojja okukunnganya abantu ku lunaku olutaliiko kubuusabuusa, anti mazima Katonda tayawukana kundagaano gye yalagaanyisa.

Mazima abo abaakaafuwala emmaali yaabwe n’abaana baabwe tebigenda kubagasa n'akamu oba okubataasa ku bibonerezo bya Katonda era abo bennyini z'eziriba enku z'omuliro (ku lunaku olwo).

Embeera yaabwe mukulimbisa ebigambo bya Katonda efaanana ey’abantu ba farawo n'abaakulembera, Abantu ba Firaawo abaalimbisa ebigambo bya Katonda, Katonda n'ababonererezaawo olw'ebyonoono byabwe, anti Katonda muyitirivu wa kubonereza.

(Ggwe Nabbi), gamba abo abaakaafuwala nti mujja kuwangulwa era mukunganyizibwe mu muliro Jahannama, nabwo bwe buddo obubi ennyo.

Mazima mwalina eky'okulabirako ekyenkukunala mu bibinja ebibiri ebyasisinkana (ku lutalo lw'e Badri) ekibinja ekimu (ekya Nabbi () ne banne) nga kirwana kutaasa Ddiini ya Katonda, nga n'ekibinja ekirala kya baakaafiiri. Abakafiiri baalaba abakkiriza mu muwendo nga babakubisaamu emirundi ebiri mu kulaba kw'eriiso, anti Katonda awagira n'okutaasa kwe oyo gw'aba ayagadde, mazima mw'ekyo mulimu ekyokuyiga eri ba nannyini kulaba okutuufu.

Abantu baawundirwa okwagala ennyo ebyegombebwa nga be bakyala n'abaana ne ntuumu za zzaabu ne ffeeza ne mbalaasi (ennambe) ezinyirira n'ebisolo ebyawaka n'amasamba ebyo byonna bya kweyagala bya bulamu bwa Nsi, so nga Katonda alina obuddo obusinga obulungi.

Bagambe nti mbategeeze ekirungi okusinga ebyo. Abatya Katonda baategekerwa ewa Katonda waabwe e Jjana nga emigga gikulukutira wansi waayo, ba kugibeeramu obugenderevu era baweebwe n'abakyala abatukuvu era baakufuna okusiima kwa Katonda, bulijjo Katonda alaba abaddu be.

(Abaddu aboogerwako) beebo abagamba nti; Ayi Mukama omulabirizi waffe mazima ffe tukkirizza n'olw'kyo tukusaba otusonyiwe ebibi byaffe otwesambise ebibonerezo by’omuliro.

(Era beebo) abagumiikiriza ne babeera abakkiriza abaamazima era abagonvu era abasaddaaka era nga beegayirira Katonda amatumbi budde.

Katonda yakakasa nti ddala tewali kisinzibwa (mu butuufu) okuggyako ye neba Malayika ne bannyini kumanya nabo bakakasa ekyo, era nga bulijjo nga yayimiriddewi n'obwenkanya, tewali kisinzibwa okuggyako ye nantameggebwa mugobansonga.

Mazima obusiraamu y'e Ddiini entuufu ewa Katonda era abaaweebwa e kitabo (Taurat n'e njiili) tebayawukana okuggyako luvannyuma lwakufuna okumanyisibwa okuva eri Katonda kulw'okwekolera ensalwa bokka nabokka n'omuntu yenna anaawakanya ebigambo bya Katonda mazima Katonda ayanguwa nnyo okubabala.

Bwebaba bakukaayanyizza, ggwe gamba nti neewaddeyo nzenna ewa Katonda nabuli yenna angoberera ekyo kyakola, era ogambe abo abaaweebwa ekitabo naabo abatalina kitabo (ba mushirikiina) nti nammwe mwewaddeyo bwe beelangirira nti basiramuse olwonno baba balunngamye, bwebatakola batyo, anti ggwe kyoteekwa okukola kubatusaako bubaka era bulijjo Katonda alaba abaddu be (nebyebakola).

Mazima abawakanya ebigambo bya Katonda era ne batta ba Nabbi mubukyamu era ne batta abo abalagira abantu okukola obwenkanya, basanyuse (mu kubakiina) nti bagenda kufuna ebibonerezo ebiruma.

Abo beebo emirimu gyabwe gyafaafaagana ku Nsi ne ku Nkomerero era tebagenda kufuna babataasa.

Tolaba abo abaaweebwa omugabo mu kumanya ekitabo kyabwe nga bayitibwa okudda eri ekitabo kya Katonda kiramule wakati waabwe, ate ekitundu ku bbo ne kikyuka. Mukukola ekyo nebaba nga bbo bakyesamba .

Ekyo nno lwakuba nti bagamba nti omuliro tegugenda kutwokya okuggyako nnaku mbale bubazi, ebigambo byebaagunja nebibagayaaza mu ddiini yaabwe.

Guliba gutya bwetulibakunganya ku lunaku olutaliimu kubuusabuusa! buli muntu n’asasulwa kyeyakola era tebagenda kulyamaanizibwa (ba kusasulwa kye baakola).

(Nabbi Muhammad) gamba nti; Ayi mukama Katonda, omufuzi w'obufuzi bwonna, owa obufuzi oyo gw’oba oyagadde era n’obuggya (n'obusikandula) kw’oyo gw’oba oyagadde, ositula oyo gw’oba oyagadde n’okakkanya oyo gwoba oyagadde. Obulungi bwonna buli mu mukono gwo anti ggwe muyinza ku buli kintu.

Oyingiza ekiro mu misana, nga bwoyingiza emisana mu kiro. Era ogpgya ekiramu mu kifu, nga bwoggya ekifu mu kiramu era ogabirulira oyo yenna gw'oba oyagadde awatali kubalirira.

Abakkiriza tebafuulanga abatakkiriza ab'emikwano nebalekawo abakkiriza. Omuntu akola bw'atyo talina kintu kyonna ewa Katonda, okuggyako nga mubeekengedde nti bayinza okubatusaako akabi (olwo nno musobola okukolagana ku ngulu) Katonda abalabula mmwe abakkiriza mumwegendereze, anti ewa Katonda y'eri obuddo.

Gamba ggwe (Nabbi Muhammad () nti nebwemukweka l ebiri mu bifuba byammwe oba ne mubyolesa, Katonda abimanya era amanyi ebiri mu Ggulu n’ebiri mu Nsi. Bulijjo Katonda muyinza wa buli kintu.

Ku lunaku buli muntu lwalisanga buli kyonna kyeyakola mu birungi nga kiteekeddwa, era nabuli kibi kyonna kyeyakola nga kiteekeddwa, alyegomba nti singa wakati we n’ekibi ekyo waliwo ebbanga ddene, Katonda abalabula mmwe abakkiriza okumwegendereza, era Katonda mukwata mpola eri abamusinza.

Gamba abantu (ggwe Muhammad () nti bwe muba mwagala Katonda, kale nno mungoberere Katonda ajja kubaagala era abasonyiwe ebyonoono byammwe, bulijjo Katonda musonyoyi musaasizi.

Gamba nti mugondere Katonda n'omubaka wabula bwemutakikola mazima Katonda tayagala bakaafiiri.

Mazima Katonda yawa enkizo Adam ne Nuhu n’abo mu nyumba ya Ibrahim n’abo mu nyumba ya Imran ku bantu abalala.

Nga bazukkulu, abamu bava mu bannabwe, bulijjo Katonda awulira mumanyi nnyo.

Jjukira mukyala wa Imran bweyagamba nti Ayi Mukama omulabirizi wange mazima nze nneeyamye ku lulwo ekiri mu lubuto lwange kibe ekiwebwayo gy'oli era nkusaba okkirize ekiwebwayo kyange, anti mazima ddala ggwe ggwe awulira omumanyi ennyo.

(Maama wa Mariam) bweyazaala omwana oyo yagamba nti ayi mukama omulabirizi wange muzadde nga muwala, wabula Katonda ye yali asinga okutegeera kyeyali azadde, omusajja talinga mukazi era mazima nze mutuumye erinnya Mariam era mazima nze mukwasa ggwe ne zzadde lye omwesambise obubi bwa Sitaane eyagobwa mu kusaasira kwo.

Mukama omulabirizi we yamwanukula olwanukula olwa namaddala era n'amukuza enkuza ennungi era naamukwasa Zakariya abe omukuza, buli Zakariya lwe yayingiranga mu kifo Mariam weyatuulanga olw'okusinza ng’amusanga alina ebyokulya. N'agamba nti: owange Mariam bino obifuna kuva wa, n'amuddamu nti byo biva wa Katonda, mazima Katonda agabirira oyo gw'ayagadde awatali kubalirira.

Awo nno Zakaria yasaba Mukama omulabirizi we nga agamba nti Ayi mukama omulabirizi wange ngabira okuva gy'oli ezzadde eddungi anti mazima ggwe owulira okusaba kw'omusabi.

Ba kyebaava Malayika bamukowoola bweyali ng’ayimiridde mu ssinzizo ng'asaba ne bamugamba nti mazima Katonda akuwa amawulire amalungi (ag'omwana) Yahaya, anajja ng’akakasa amazima g’ekigambo okuva eri Katonda era nga wa kitiibwa owensa era Nabbi ali mu luse lwa balongoofu.

Zakariya n'agamba nti: Mukama wange nnaafuna ntya omwana nga nkaddiye bwenti, era nga ne mukyala wange mugumba! (Malayika) n'agamba nti bw'atyo Allah akola kyaba ayagadde.

N'agamba nti Ayi Mukama omulabirizi wange mpa akabonero. (Malayika) n'agamba akabonero ko kwekuba nti toyogera n’abantu okumala ennaku ssatu okuggyako ng’okozesa kulaza. Era jjukira Katonda wo era otendereze akawungeezi ne kumanya.

Era jjukira ba Malayika webaagambira Mariam nti mazima Katonda akulonze n'akutukuza n'akwawula ku Bakyala abalala bonna.

Owange Mariam wanvuya okuyimirira eri Mukama omulabirizi wo ovunname era okutame ku maviivi awamu n'abakutami.

Ebyo by’ebimu ku bigambo ebyekusifu byetukumanyisizza (Ggwe Muhammad) mu bubaka era tewali nabo web’akasukira e kalamu zaabwe ku mazzi ngabanoonya okumanya nti ani ku bbo an'akuza Mariam, era tewali nabo bwe baali bakaayagana (ku nsonga eyo).

Era jjukira ekiseera ba Malayika webaagambira Mariam nti; mazima Katonda akuwa amawulire agessanyu ag’ekigambo ekiva gy'ali (ekyokuzaala omwana) ngerinnya lye ye Masiihi Isa mutabani wa Mariam aliba ow'ekitiibwa ku Nsi ne ku Nkomerero era nga w’amw'abo abasembezebwa ewa Katonda.

Era agenda kwogera n'abantu nga ali mu kibaya ne mukusajjakula era wa mu luse lwabalongofu.

(Mariam) n'agamba nti Mukama wange naafuna ntya omwana nga tewali muntu yali ankutteko (Malayika) n'agamba nti bwekityo (bwekijja akuba) Allah atonda nga bw'aba ayagadde bwasalawo ekintu mazima akigamba bugambi nti ba ne kiba.

Era (Katonda) ajja kumuyigiriza okuwandiika n’okuteeba ekituufu ne Taurat ne njili.

Era agenda kubeera mubaka eri abaana ba Yisrayiri (ng’abagamba nti) mazima nze mbajjidde n’akabonero okuva eri Mukama Katonda wa mmwe nja kubabumbira ekintu ekifaanana nga ekinyonyi okuva mu bumba, nja kukifuuwamu omukka kibeere ekinyonyi ku lw'obuyinza bwa Katonda, era njakuwonya abempoma n’abebigenge, nzuukize n'abafu (byonna) kulw'obuyinza bwa Katonda, era nja kubategeeza bwemulina okulya nebyemutereka mu mayumba gammwe, mazima ddala mw’ebyo (ebimenyeddwa) mulimu akabonero gyemuli bwe muba nga muli bakkiriza.

Era mbajjidde nga nkakasa amazima g’ebyo ebyakulembera ebyajjira mu Taurat. Era mbakkirize ebimu kw’ebyo ebyali byabagaanibwa, era mbajjidde n’akabonero okuva eri mukama Katonda wa mmwe n'olw’ekyo mutye Katonda era munngondere.

Mazima Katonda ye Mukama wange era Mukama wa mmwe kale mumusinze yekka. (Okukola) ekyo ly'ekkubo eggolokofu.

Naye Isa bweyamala okulaba obutakkiriza Katonda bwabwe n'agamba nti; b'ani abanannyamba ku mulimu gwa Katonda, Abayigirizwa nebagamba nti ffe bataasa ba Katonda, tukkiriza Katonda. Naawe julira nti mazima ffe twewaddeyo ewa Katonda.

Ayi Mukama Katonda waffe tukkirizza ebyo byewassa era netugoberera omubaka, kale tuwandiike mu bajulizi.

(Abayudaaya) baasala enkwe ne Katonda n’abasasula enkwe zaabwe anti bulijjo Katonda mulungi mukusasula n'okuddiza abasala enkwe.

Jjukira ekiseera Katonda weyagambira nti; Owange ggwe Isa nze nngenda okukwata kuggyewo nga oli mulamu, era ngenda kusitula nkuleete gyendi era nkutukuze kw'abo abaawakanya, abo abakugoberera ngenda kubassa waggulu w'abo abawakanya okutuusa ku lunaku lw’e Nkomerero oluvannyuma gyendi mwenna gyemugenda okudda, olwo ndyoke mbalamule mw'ebyo byemwayawukanangamu.

Bbo Abaawakanya nngenda kubabonereza n’ebibonerezo ebikakali ku Nsi ne ku Nkomerero, era tebagenda kufuna baakubataasa.

Naye bbo, abo Abakkiriza nebakola emirimu emirungi (Katonda) agenda kubajjuliza empeera zaabwe, anti bulijjo Katonda tayagala balyazaamanyi.

Ebyo tubikusomera Ggwe (Nabbi Muhammad) nga byamububonero n’okubuulirira okwamagezi ( okwanwezebwe).

Mazima entondebwa ya Isa ewa Katonda efaanana n'entondebwa ya Adam, yamutonda nga amuggya mu ttaka oluvannyuma n'amugamba nti beera n’aba omuntu.

Ago nno geemazima agava eri Mukama Katondawo, kale tobeeranga mu babuusabuusa.

N'omuntu yenna akuwakanya kukino, oluvannyuma lwa mazima agakujjidde ggwe gamba nti mujje tuyite abaana baffe n'abaana ba mmwe, bakyala baffe ne bakyala ba mmwe, naffe fennyini nammwe olwo nno tusabe ekikolimo kya Katonda kituuke ku balimba.

Mazima bino (ebyogeddwa) g’emazima (ku bikwata ku nsonga y’okuzaalibwa kwa Isa), tewali katonda mulala yenna ateekeddwa okusinzibwa okuggyako Katonda omu yekka, era bulijjo Katonda ye nn'atameggwa mugoba nsonga.

Bwebava ku mazima gano mazima Katonda amanyi aboonoonyi nabyonna ebibakwatako.

(Ggwe Nabbi Muhammad) gamba nti abange mmwe abaaweebwa ekitabo mujje twegatte ku kigambo ekigatta wakati waffe nammwe, nakyo kwekuba nga tetusinza okuggyako Katonda, era tuleme ku mugattako kintu kyonna, era tube nga tetufuula abamu muffe ebyokusinza netuleka Katonda. Ekyo bwebakivaako, mmwe mubagambe nti (mmwe) mujulire nti mazima ffe tuli Basiramu tukkiririza mu bw'omu bwa Katonda.

Abange mmwe abaaweebwa ekitabo lwaki mukaayana ku bikwata ku Ibrahim so nga Taurat n'e njili tebyajja okuggyako oluvannyumalwe. Abaffe temutegeera.

(Mwewunyisa) okuba nga mmwe mwennyini mwakaayana ku kyemulinako okumanya, ate kati lwaki mukaayana ku kintu kyemutalinaako kumanya! so nga Katonda amanyi ate mmwe nga temumanyi.

Ibrahim tabeerangako Mu yudaaya wadde Omunaswara wabula yali eyava ku nzikiriza zonna nga Musraamu, era tabeerangako mu bagatta ku Katonda bintu birala.

Mazima omuntu asinga okuba okumpi ne Ibrahim, b'ebo abaamugoberera, noono Nabbi n’abo Abakkiriza, bulijjo Katonda abeera munne wabakkiriza.

Ekibinja ekimu ku bantu abaaweebwa ekitabo bandyagadde okubabuza, (mu kukola ekyo) tebalina gwebabuza okuggyako myoyo gyabwe naye tebamanyi.

Abange mmwe abaaweebwa ekitabo lwaki muwakanya ebigambo bya Katonda ate nga ddala nammwe mukakasa nti g’emazima!

Abange mmwe abaaweebwa ekitabo lwaki amazima mugatabikamu obulimba! nemukweka amazima nga nammwe mumanyidde ddala (ekituufu).

Ekibinja ekimu mu bantu abaaweebwa ekitabo baagamba nti mukkirize ebyassibwa kw'abo abakkiriza kuntadikwa y'obudde bw'emisana ate mubiwakanye olweggulo oba oly'awo banaagivaako.

Era temukakasa okuggyako oyo agoberera Eddiini yammwe, Ggwe Nabbi Muhammad () gamba nti: mazima obulunngamu obwannamaddala bulunngamu bwa Katonda, abaffe ekibakozesa ekyo lwakuba nti temwagala muntu mulala yenna kuweebwa ekiringa kyemwaweebwa (obwa Nabbi)! oba lwakutya nti bayinza okugifuula ensonga gye babawangula nayo mumaaso ga Katonda (Ggwe Nabbi Muhammad () gamba nti mazima ebirungi biri mu mikono gya Katonda, abiwa oyo gw'aba ayagadde, anti bulijjo Katonda mugazi nnyo era mumanyi mu buli kintu.

Ayawula gw'aba ayagadde mu mmwe n'amuwa okusaasira kwe era Katonda ye nannyini birungi ebingi.

Ne mu bantu abaaweebwa ekitabo mulimu, omuntu singa oba omwesize ku mmaali ennyingi nga atuukiriza n'agikuddiza, ate mu bbo mulimu omuntu singa oba omwesize ku dinar emu (busente obutono) nga tatuukiriza ku kuddiza, okuggyako nga omwewuubyeko, ekyo nno lwakuba bbo bagamba nti tetufuna musango nga tulyazaamanyizza abatali basomi (abatali abaweebwa ebitabo) ne baba nga boogera ku Katonda obulimba nga nabo bamanyi ekituufu.

Wabula (omuntu asaanira okweyita omwagalwa wa Katonda yandibadde) oyo atuukiriza byeyalagaanyisa era n'atya Katonda. Mazima ddala bulijjo Katonda ayagala abamutya.

Mazima ddala abo abatunda endagaano ya Katonda n'ebirayiro byabwe ku muwendo omutono, tebalina mugabo ku lunaku lw’e Nkomerero, era Katonda tagenda kwogera nabo era tagenda kubatunulako ku lunaku lw’e Nkomerero era nga bwatagenda kubatukuza era bagenda kutuukwako ebibonerezo ebirumya.

Era mazima mu bbo mulimu ekibinja ky'abantu abakyusakyusa ekitabo ne nnimi zaabwe, babalowoozese nti bya mu kitabo, so nga sibyamu. Era nebagamba nti byo byava wa Katonda so nga tebivanga wa Katonda, nebaba nga boogedde ku Katonda ebyobulimba naye nga nabo bamanyi amazima.

Tekigwanira muntu yenna okuba nga Allah amuwa ekitabo n’okumanya ensonga, n'obwa Nabbi, ate n'agamba Abantu nti mubeere baddu bange (munsinze) muve ku Katonda. (kyeyandibagambye kyandibadde nti:) Naye mubeere abasinza Katonda okusinziira ku kuba nti mmwe mubadde muyigiriza abantu abalala ekitabo, era n'olw'okuba nti mubadde mukisoma (n'olw'ekyo mumanyi ekituufu eky'okukola).

Era tabalagira kufuula ba Malayika ne ba Nabbi ba Katonda, abaffe ekyo kijja okuvamuye okuba nti abalagira ebyobuwakanyi oluvannyuma lw'okuba Abasiraamu.

Jjukira Katonda bweyakozesa ba Nabbi endagaano nti, lwonna lwembawanga ekitabo n’okumanya ensonga, oluvannyuma omubaka (Nabbi Muhammad () n'abajjira nga ava gyendi) ng’akakasa ebyo byemulina, nti ddala mugenda kumukkiriza, era mugenda kumutaasa. Katonda n'agamba nti mukkirizza, era munaatukiriza endagaano yange eno enzito? nebagamba (ba Nabbi) nti tukkirizza. Katonda n'agamba nti mujulire era nange ndi wamu nammwe mu bajulizi.

Oyo yenna aliyawukana kw'ekyo abo nno be bonoonyi.

Abaffe abo (abonoonyi) banoonya etali Ddiini ya Katonda (Busiramu?) ate nga kululwe byewaayo (nebisiramuka) byonna ebiri mu Ggulu omusanvu ne Nsi kyeyagalire ne mu kukakibwa, era nga gy'ali gyebijja okuzzibwa.

Ggwe Nabbi Muhammad () gamba nti tukkiriza Katonda netukkiriza n'ebyo ebyassibwa gyetuli n'ebyo ebyassibwa ku Ibrahim ne Ismail, ne Is-hak ne Ya'akub ne ku bazzukulube, n'ebyo ebyaweebwa Musa ne Isa n'ebyo byonna ebyassibwa ku ba Nabbi okuva ewa Katonda waabwe, tetulina Nabbi yenna gwetusosola naffe twewaddeyo (mu Busiramu) eri Katonda waffe.

Oyo yenna anoonya Eddiini etali Busiramu tegenda kukkirizibwa okuva gy'ali, era nga ye ku lunaku lw’e Nkomerero agenda kubeera mubafaafaganirwa.

Katonda ayinza atya okulunmgamya abantu abaawakanya (obubaka bwa Nabbi Muhammad () oluvannyuma lw'okukkiriza kwabwe nebawa n'obujulizi nti omubaka (Muhammad ()) w’amazima era nga n'obujulizi obukakasa obwa Nabbi bwe bwa bajjira, mazima Katonda talunngamya bantu balyazaamaanya.

Abo nno okusasulwa kwabwe kuli nti mazima Katonda yabassaako ekikolimo ne ba Malayika n’abantu bonna.

(Abantu abo) Baakubeera mu muliro obugenderevu, tebagenda kukendeerezebwa ku bibonerezo ng'era bwebatagenda kulindirizibwa (kubonerezebwa).

Okuggyako abo abeenenya oluvannyuma lwokukafuwala kwabwe era nebalongoosa, anti bulijjo Katonda musonyiyi nnyo era musaasizi.

Mazima abo abaawakanya Allah oluvannyuma lw'okukkiriza kwabwe, oluvannyuma nebeeyongera okuwakanya okutuusa lwe balaba okufa, okwenenya kwabwe tekugenda kukkirizibwa olw'okuyita kw'ekiseera kyakwo , era abo be babuze abannamaddala.

Mazima abo abaawakanya Katonda nebafiira ku buwakanyi tewali n'omu ku bbo agenda kukkirizibwa kwenunula nebwaliba aleese zaabu ajjuza e Nsi, abo nno balina ebibonerezo ebirumya ennyo ate tebagenda kufuna mutaasa yenna.

Temugenda kufuna mpeera y'abakozi b’obulungi mpaka nga muwaddeyo kw'ebyo byemwagala, buli kintu kyonna kyemuwayo mazima ddala Katonda akimanyi.

Ebyokulya byonna byali bikkirizibwa eri abaana ba Yisrayiri okuggyako ebyo Yisrayiru (Ya'akuubu) byeyeeziyiza nga Taurat tennaba kussibwa, bagambe nti muleete Taurat mugisome bwe muba nga mwogera mazima.

Oyo yenna anaatemerera Katonda ebigambo ebyobulimba oluvannyuma lw'ekyo, abo nno be beebalyazaamaanyi.

Gamba nti Katonda yayogera mazima, kale mugoberere Eddiini ya Ibrahim, nga takkiriza kusinza kintu kirala wadde okuba mw'abo abagatta ku Katonda ekintu ekirala.

Mazima ddala ennyumba eyasooka okuterwawo abantu (olw'okusinza Katonda) y'eyo eri e Bakka (Makka) y’amikisa era nga kya kulunngamya eri abantu bonna.

Mulimu mu yo obubonero obwenkukunala, ng’emikolo gya Hijja ne Umra egikolebwako n'ekifo kya Ibrahim. Oyo yenna agiyingira abeera mirembe, era Katonda alaalise ku bantu okulambula e nnyumba eyo kw'oyo aba asobodde ebyetaagisa okutuuka gy'eri, naye omuntu awakanya (obukakafu bwa Hijja) mazima ddala Katonda talina kyeyeeguya ku bantu.

Gamba (ggwe Nabbi Muhammad) nti abange mmwe abaaweebwa ekitabo lwaki muwakanya ebigambo bya Katonda! era bulijjo byemukola Katonda abiraba.

Gamba (ggwe Nabbi Muhammad) nti abange mmwe abaaweebwa ekitabo lwaki muziyiza abantu okukwata ekkubo lya Katonda! nemuba nga akkiriza ekikolwakye mukitwala kuba nti kyabubuze, so nga mmwe mwennyini mumanyi ekituufu, Katonda tayinza kuba nga tafaayo kubyemukola.

Abange Mmwe Abakkiriza bwemunaagondera ekibinja mw'abo abaaweebwa ekitabo bajja kubazza mu buwakanyi oluvannyuma lw'okuba nga mubadde bakkiriza.

Muyinza mutya okuwakanya Katonda nga ate musomerwa ebigambo bya Katonda era nga omubaka we ali mu mmwe, oyo yenna eyeekwata ku Katonda aba alubngamiziddwa eri ekkubo eggolokofu.

Abange mmwe Abakkiriza mutye Katonda mubutuufu bw'okumutya era temufanga okuggyako nga muli Basiramu.

Mwekwate ku muguwa gwa Katonda mwenna, temwawukananga era mujjukire ekyengera kya Katonda kyeyabawa bwemwali nga muwalaggana n'atabaganya wakati w'emitima gyammwe olw'ekyengerakye, nemukeesa nga muli baaluganda, mwali mutuuse ku mugo gw'ekinnya ky'omuliro n'agubatasaako, bw'atyo nno Katonda bw'abannyonyola ebigambo bye mube nga mulunngama.

Wateekeddwa okuba mu mmwe ekibiina (Nga abakirimu) bakubiriza Abantu okudda eri obulungi era nga bakubiriza Abantu okuyisa obulungi era nga babaziyiza okweyisa obubi era abo be b'okwesiima (ku lunaku lw’e Nkomerero nebawona ebibonerezo bya Katonda).

Temubeera nga abo abeetemamu nebaawukana oluvannyuma lw'obunnyonnyofu okubajjira, n’abo nno balina ebibonerezo ebyamaanyi.

Ku lunaku ebyenyi lwebiritemagana ebirala nebisiiwuuka bbo abo abalisiwuuka ebyenyi byabwe (baligambibwa nti ekibatuusizza kw'ekyo lwakuba nti) mwawakanya Katonda oluvannyuma lw'okuba nti mwali bakkiriza, n'olw'ekyo mukombe ku bukaawu bwebibonerezo olw'ebyo byemwawakanyanga.

Bbo abo ebiritemagana ebyenyi byabwe baakubeera mu kusaasira kwa Katonda (jjana) bbo baakubeeramu obugenderevu.

Ebyo bigambo bya Katonda tubikusomera mu butuufu bwabyo, Katonda tayagaliza bitonde kulyazamanyizibwa.

Era bya Katonda ebiri mu Ggulu omusanvu n'ebiri mu Nsi era eri Katonda ebintu byonna gyebizzibwa.

Mmwe kibiina ekisinga obulungi ekyaweebwa Abantu, mukubiriza okukola empisa nemuziyiza okukola ebibi, era nga mukkiriza Katonda. Singa abaaweebwa ekitabo bakkiriza kyandibadde kirungi gyebali, (naye) abamu ku bbo bakkiriza nga n’abasinga obungi bajeemu.

Tebayinza kubatuusaako buzibu, okuggyako ebinyiizo ebitonotono, naye bwebaba balwanaganye nammwe babakuba amabega ne badduka ate era nga tebataasibwa.

B'ateekebwako okunyomebwa wonna webaba bali okuggyako nga balina obukuumi bwa Katonda n'obwa Basiramu (nebaweebwa omukisa gw'okuwangalira mu Nsi ya Basiramu nga bali wansi wa mateeka g’Obusiraamu,) nebateekebwako obusungu bwa Katonda, nebassibwako okuswazibwa ekyo nno lwakuba nti baali bawakanya ebigambo bya Katonda nebatta ne ba Nabbi mu ngeri etali ntuufu, ekyonno (baakikola nga) olw'obujeemu bwabwe era nga baali babuuka ensalo za mateeka (ga Katonda).

Bonna tebali kimu, Mu Bantu ab'aweebwa ekitabo mulimu ekibinja ekitereevu, abasoma ebigambo bya Katonda, mu biseera by'ekiro era nga bavunnama.

Bakkiriza Katonda n’olunaku lw’e Nkomerero nebakubiriza Abantu okweyisa obulungi, nebabakomako kukweyisa obubi era nga banguwa mu kukola ebirungi era abo ba mu luse lwa balongoofu.

Buli kirungi kyonna kyebakola tekiribalyazaamanyizibwa. Katonda amanyidde ddala ebifa ku bamutya.

Mazima abo abaawakanya Katonda emmaali yaabwe n'abaana baabwe tebigenda kubayamba ewa Katonda n'akamu, era abo be bantu b’omumuliro bbo b'akugubeeramu obugenderevu.

Byebawaayo mu bulamu buno obw'e Nsi bifaanagana nga kibuyaga alimu omuzira eyakuba ebirime bya bantu abeeryazaamaanya n'abizikiriza, Katonda te yabalyazaamaanya naye bbo bennyini be beryazaamaanya.

Abange mmwe abakkiriza, abatali ba mu mmwe temubafuulanga ab'emikwano ab'omunda, tebayinza kulekayo kubaagaliza kabi, bulijjo babaagaliza ekyo ekibazitoowereza. Obukyayi bulabika ku mimwa gyabwe (ku nnimi zaabwe) so nga byebakweka mu bifuba byabwe byebisinga obunene, mazima tubannyonnyodde ebigambo bwe muba nga mukozesa amagezi gammwe (bibamale okutegeera ekituufu).

(Buno bwe bujulizi obulaga ensobi gyemukola) Anti mmwe mubaagala sso nga bbo tebabaagala, era mmwe mukkiriza ebitabo byonna! Bwe babasisinkana bagamba nti tukkiriza naye ate bwebava wemuli babalumira ennwe olw'obusungu, gamba (ggwe Muhammad) nti mufe n’obusungu bwa mmwe. mazima Katonda amanyidde ddala ebiri mu bifuba.

Bwemufuna ekirungi kyonna kibanakuwaza, naye bwemutuukibwako akabi konna kabasanyusa, naye singa mugumiikiriza nemutya Katonda enkwe zaabwe tezigenda kubatuusaako kabi konna, anti mazima Katonda byonna byebakola abyetoolodde.

Era jjukira (Ggwe Nabbi Muhammad) bwewakeera n’oleka ab'omumaka go n’ogenda otegekere abakkiriza ebifo mwebanaalwanira, bulijjo Katonda awulira era amanyi byonna.

Jjukira ebibiina ebibiri mu mmwe lwebyayagala okufotookerera, Katonda yeeyali omukuumi wa byombi, bulijjo abakkiriza bateekwa kwesiga Katonda.

Mazima Katonda yabataasa e Badr so nga ate mwali banafu, n'olw'ekyo mutye Katonda mulyoke mube abeebaza.

Jjukira wewagambira abakkiriza nti tekibamala Katonda wa mmwe okubadduukirira naabassiza ba Malayika enkumi ssatu.

Wewaawo, bwemunagumiikiriza nemutya Katonda, ne babajjira mu bwangu obwo, ajja kubadduukirira ne ba Malayika enkumi ttaano abalambe nga balina obubonero obw'enkukunala.

Ekyo Katonda teyakibawa wabula lwakubasanyusa, era emitima gyammwe gibe nga ginywera nakyo, naye nga bulijjo okutaasa tekuva okuggyako ewa Katonda n'atawangulwa mugoba nsonga.

(Ekyo Katonda yakikola) abe nga aggyawo ekitundu ekimu ekya batakkiriza oba abanakuwaze (Bawangulwe) baddeyo nga baswavu.⁰

Okusalawo ekigambo kyonna tekuli gy'oli (ggwe Muhammadi), okutuusa Katonda lwanaabaddiramu oba okubabonereza, anti mazima bbo balyazaamaanyi.

Byonna ebiri mu Ggulu omusanvu ne mu Nsi bya Katonda. Asonyiwa gw'aba ayagadde n'abonereza gw'aba ayagadde, bulijjo Katonda musonyiyi musaasizi.

Abange Abakkiriza temulyanga Riba ennyongeza ekubisibwamu, era mutye Katonda kibawe okwesiima ku lunaku lw’e Nkomerero.

Era mutye omuliro ogwo ogwateekerwateekerwa Abatakkiriza Allah n'e Ddiini ye.

Era mugondere Katonda n'omubaka olwo nno musaasirwe.

Era mweyune eri okusonyiwa kwa Katonda wa mmwe, n'e jjana eyo obugazi bwayo obwenkana eGgulu omusanvu n'e Nsi, yateekerwateekerwa abatya Katonda.

Abo abawaayo mu kkubo lya Katonda, mu biseera ebyessanyu n'e by'obuzibu, era abatasiba busungu, n'abasonyiwa abantu. bulijjo Katonda ayagala abalongoosa.

N'abo bwebaba bakoze ekivve kyonna oba nebaba nga beeryazaamaanyizza (mu ngeri endala) bajjukira Katonda nebasaba okusonyiyibwa ebyonoono byabwe ate ani yandisonyiye ebyonoono okuggyako Katonda! era nebatalemera kw’ebyo byebaakola ate nga nabo bamanyi.

Abo empeera yaabwe kisonyiwo okuva ewa Mukama Katonda waabwe n'e jjana ezikulukutiramu emigga wansi waazo, nga bagenda kuzibeeramu bugenderevu, nga eriba mpera nnungi eri abo abakola emirimu emirongoofu.

Bwebityo ebintu bwebibadde bitambula oluberyeberye lwa mmwe, kale mutambule mu Nsi mutunule, mujja kulaba engeri enkomerero y'abalimbisa bw'eba.

(Kur'an eno) kwe kunnyonnyola okuweereddwa eri Abantu era bulunngamu era kwe kubuulirira eri abatya Katonda.

Temuterebukanga era temunakuwalanga, ng’ate mmwe muli ku ngulu kavuna muba nga muli bakkiriza abannamaddala.

Bwe muba mutuukiddwako obuvune (mu lutalo lwe Uhudi) nabali abatakkiriza baatuukwako obuvune ng’obwo (mu lutalo lwe Badri) nabwekityo bulijjo ennaku tuzikyusakyusa wakati wa bantu (olumu lw’ono, olundi lwa mulala) olwo nno Katonda ayawule abakkiriza, mu ngeri yeemu aggye mu mmwe abafiira mu kulwanirira Eddiini era bulijjo Katonda tayagala balyazaamaanyi.

Era Katonda alyoke asengejje ayawulemu abo Abakkiriza, era azikirize Abatakkiriza.

Oba mulowooza nti muyinza okuyingira e jjana nga Katonda tannaba kwawula abo abaalwana mu kkubo lye mu mmwe, era n'ayawula na bagumiikiriza.

mazima Mwalinga mwegomba okufa nga temunnaba ku kusisinkana (Mu lutalo lw'e Uhud). Naye mazima mukulabye nga mutunula nkaliriza.

Muhammad tali okuggyako okuba nti Mubaka mazima bamukulembera ababaka, kaakano bw'aba afudde oba n'attibwa olwo nga mukyukira ku bisinziiro byammwe (nemuva mu Busiraamu). Oyo yenna anaakyukira ku bisinziirobye talina kabi konna kaatuusa ku Katonda, era Katonda ajja kusasula abo abeebaza.

Era tewali muntu yenna afa okuggyako nga Katonda yakkirizza, ekyo nga kiwandiike ekyagererwa ekiseera kyakyo, oyo yenna ayagala empera z’e Nsi tuzimuwa mu yo, n’oyo ayagala empeera z’e Nkomerero tulizimuwa ku nkomerero, era tujja kusasula abeebaza.

Ba Nabbi bangi, ebibinja bya bagoberezi baabwe bingi byabanga nabo mu kulwana, tebaaterebukanga olw'ebizibu ebyabatuukangako mu kulwana mu kkubo lya Katonda tebanafuwa wadde okwewaayo eri omulabe bulijjo Katonda ayagala abagumiikiriza.

Ekigambo kyabwe tekyali, okuggyako okugamba nti Ayi Mukama omulabirizi waffe tusonyiwe ebyonoono byaffe, era otusonyiwe bwetuba tususse ekkomo mu nsonga zaffe, era nyweza ebigere byaffe, era tutaase ku kibiina ky'abatakkiriza.

Katonda n’abawa empeera z’okunsi, era n'empeera ezisinga okuba ennungi ku lunaku lw’e Nkomerero, era bulijjo Katonda ayagala abalongoosa.

Abange mmwe Abakkiriza bwemunaagondera abo Abatakkiriza bajja kubazzaayo ekyennyumannyuma mukyuke okuva mu bukkiriza, mubeere abasaliddwa.

Wabula Katonda yemukuumi wa mmwe era bulijjo yaasinga abataasa bonna

Tujja kussa ensisi ku mitima gy’abo abatakkiriza kulw’okugatta kwabwe ku Katonda ebintu ebirala ebyo byatassaako bukakafu. Era omuliro bwebuddo bwabwe, era bulijjo obuddo bw’abalyazaamaanyi buba bubi.

Mazima Katonda yatuukiriza gyemuli endagaanoye bwemwatuuka okubatirimbula olw'okukkirizakwe, mpozzi bwemwatiitiira ne mukaayanagana nga temukyakkaanya ku nsonga, ne mujeema (nemuva ku kasozi) bwemwalaba nti kyemwagala (ekyokuwangula omulabe) kyali kituukirira, mu mmwe mwalimu abaagala eby'okufuna bye Nsi, nga bwemwalimu abaagala e Nkomerero, oluvannyuma Katonda yakyusa obwali obuwanguzi bwa mmwe ku bbo (nebaba nga beebawangula) alyoke abe nga abagezesa mazima yabasonyiwa, bulijjo Katonda abakkiriza abagonnomolako ebirungi.

Jjukira ekiseera wemwayambukira olusozi, olwonno nga temukyatunula ku muntu yenna. Nga Omubaka ali mabega wammwe abakowoola, awo nno Katonda kwekubasasula okweraliikirira ng'ayongeza ku kukweraliikirira mube nga temunakuwala olw'ebyo ebyabasuba, wadde olw'ebyo ebizibu ebyabatuukako Katonda amanyidde ddala byonna byemukola.

Ate oluvannyuma lw'okweraliikirira Katonda yassa kummwe akalembereza k'okwebakamu okwakwata abamu ku mmwe, ate abalala batiirira nnyo obulamu bwabwe nga balowooleza Katonda ebitali bituufu endowooza ya Jahiliyyah, nga bagamba nti tukyalina obusobozi mu nsonga eno? Gamba nti ebintu byonna biri mu mikono gya Katonda, (Abantu abo) bakweka mu mitima gyabwe bye batakulaga era nga bagamba nti singa tubadde tulina okusalawo ku nsonga eno ekintu kyonna, tetwandittiddwa wano, Bagambe nti nebwemwandibadde mu mayumba gammwe ab'awandiikwako okufa bandigudde mu bifo ebyabawandiikibwako okufiiramu, olwonno Katonda alyoke agezese ebiri mu bifuba byammwe, era asengejje ebiri mu mitima gyammwe, bulijjo Katonda amanyi ebiri mu bifuba.

Mazima abo abadduka mu mmwe ku lunaku enjuuyi ebbiri lwe zaasisinkana, mazima Sitane yeeyabaseereza olw'ebimu kw’ebyo byebaakola era mazima Katonda yabasonyiwa anti mazima ddala Katonda musonyiyi w’akisa.

Abange mmwe abakkiriza temubeera ng’abo abaawakanya Katonda ne Nabbi we nebagamba baganda baabwe bwebaabanga batambudde mu Nsi, oba nga babadde abalwana olutalo nti singa baasigala wano naffe tebandifudde wadde okuttibwa, (baafuna endowooza eyo) Katonda alyoke akifuule ekyokwejjusa mu mitima gyabwe naye nga bulijjo Katonda y’awa obulamu era yatta era buli kyonna kyemukola Katonda akiraba.

Singa muttibwa nga muli mukulwana mu kkubo lya Katonda, oba nemufa (enfa eyaabulijjo, mu ngeri zombi) okusonyiwa okuva eri Katonda n’okusaasira by’ebirungi okusinga ebyo byebakunganya.

(Kyekimu) okuba nti mufudde oba muttiddwa ewa Katonda yekka gye mulikunganyizibwa.

Kulwokusaasira kwa Katonda wabagondera (Ggwe Muhammad) naye singa wali waboggo omukakanyavu w'omutima bandikudduseeko, kale basonyiwe, obeegayiririre (ewa Katonda) era obebuuzengako mu nsonga zonna wabula bw'obanga omaliridde (n’osalawo eky'okukola) olwo nno weekwase Katonda, mazima Katonda ayagala abamwekwasa.

Katonda bwabataasa teri ayinza kubawangula naye singa aba abaabulidde ani oyo ayinza okubataasa atali ye, ku Allah Abakkiriza kwebaba beesigamira.

Tekisoboka ku Nabbi yenna okuba nga yezibika ekintu kyonna ku munyago naye omuntu yenna bwe yeezibika ku minyago, ku lunaku lwamayimirira wakuleeta kye yeezibika oluvannyuma buli muntu agenda kusasulwa mu bujjuvu ekyo kyeyakola, era bbo tebaliryamaanyizibwa.

Abaffe, oyo agoberera okusiima kwa Katonda ayinza okufaanana n'oyo avuddeyo n’okusunguwalirwa Katonda! nga n’obuddo bwe muliro Jahannama ate nga buddo bubi nnyo ddala!

Abantu abo bakubeera mu madaala ga njawulo ewa Katonda, anti era bulijjo Katonda alabira ddala byebakola.

Mazima Katonda yawa Abakkiriza ekyengera bwe yabatumamu omubaka nga ava mu bbo, nga abasomera ebigambo bye, era nga abatukuza era nga abayigiriza ekitabo (Kur’ani) n’ebigambo ebyamagezi (Hadith) newaakubadde nga mu kusooka baali mu bubuze obweyolefu.

Lwaki bwemwatuukwako obuzibu (mu Uhudi) nga ate bbo mwabatusaako obuzibu obwenkana obwo emirundi ebiri (mu Badr) mwagamba nti ate lwaki kizze bwekityo, bagambe (ggwe Nabbi Muhammad ekyo kivudde ku mmwe mwennyini mazima Katonda bulijjo muyinza wa buli kintu.

N’ekyo ekyabatuukako ku lunaku ebibinja ebibiri lwe byasisinkana kyaliwo ku lwa kukkiriza kwa Katonda, era abe nga ayawula abakkiriza ab'amazima.

Mu ngeri y'emu ayawule abo abannaanfunsi era baagambibwa nti mujje mulwane mu kkubo lya Katonda, oba waakiri mujje twetaase tusindiikirize omulabe nebaddamu nti, singa tubadde tukakasa nti waliyo okulwana twaligenze nammwe, bbo ku lunaku olwo baali kumpi nnyo n’obutakkiriza okusinga okubeera n’obukkiriza, boogera nemimwa gyabwe ebitali mu mitima gyabwe, ate nga bulijjo Katonda amanyi nnyo byebakweka.

Abo (Abannaanfuusi) abagamba baganda baabwe (abaagenda mu lutalo) bbo nebasigala nga b'etuulidde eka nti singa baatuwuliriza tebandittiddwa. Bagambe (Ggwe Muhammadi) nti kale mweggyeko okufa bwe muba nga muli b'amazima mu byemwogera.

Tosuubiranga nti abo abattirwa mu kulwana mu kkubo lya Katonda nti bafu, nedda wabula balamu, era nga bagabirirwa ewa Mukama Katonda waabwe.

Nga bajaganya olw’ebyo Katonda byabawadde mubigabwa bye, era nga basanyusa bannaabwe bebaleka ku Nsi nti tebalina kutya kwonna, era nga tebatagenda kunakuwala.

Nga basanyuka olw'ebyengera, n’ebirungi ebingi ebivudde ewa Katonda, era mazima ddala Katonda bulijjo tayonoonona mpeera z’abakkiriza.

Abo abaayanukula (okukowoola kwa) Katonda n'Omubaka (ne bakkiriza okuddayo okulwana) oluvannyuma lw'okutuukibwako obulumi bw'olutalo, abeeyisa obulungi mu bbo ne batya Katonda bagenda kufuna empeera nnyingi.

Abo abantu (Abagatta Katonda n'ebintu ebirala) bebaagamba nti mazima (Abantu bemwalwanye nabo) babeekobaanidde (babeekungidde) baagala kubaddamu nvuunula bibya musaanye mubeegendereze (ekintu ekyandibaleetedde okutya) naye ate kyabongera bukkiriza, era nebagamba nti Katonda atumala era yemukuumi asinga obulungi.

(Omulabe yabadduka awatali kulwana kwonna) ate nebadda ewaboobwe nga bafunye ebyengera okuva ewa Katonda n'obulungi obungi awatali kutuukwako kabi konna, (mukukola ebyo byonna) era baagoberera ebibasiimisa Katonda, anti bulijjo Katonda alina obulungi bungi.

(Eyali ababuzaabuza obutagenda kulwana) mazima ddala oyo ye Sitane bulijjo abatiisa mikwano gye, kale nno temubatya wabula mutye nze bwe muba muli bakkiriza abannamaddala.

Era tebakunakuwaza abo abanguwa okuyingira obuwakanyi, mazima bbo tebayinza kutuusa ku Katonda kabi konna, Katonda ayagala aleme kuteerawo mugabo gwonna ku lunaku lw’e Nkomerero era balina ebibonerezo ebyamaanyi.

Mazima abo abaawaanyisa obutakkiriza n'obukkiriza tebagenda kutuusa kabi ku Katonda mu kintu kyonna, era balina ebibonerezo ebirumya.

Era abo abatakkiriza Katonda n'Omubaka we tebalowooza nti mazima ffe okubalindiriza kirungi gyebali, mazima tubalindiriza b’eyongere okukola ebibi, era baakufuna ebibonerezo ebinyomesa.

Katonda teyali w'akuleka bakkiriza kw’ekyo kyemuliko okutuusa ng'amaze okwawula ababi mu balungi, era Katonda teyali waakubalaga ebyo ebitalabika, naye mazima ddala Katonda alonda mu babaka be oyo gw'aba ayagadde, kale mukkirize Katonda n'ababakabe, ate singa mukkiriza nemutya (Katonda) mujja kufuna empeera enzito.

Abo abaakodowalira ebyo Katonda bye yabawa mu bigabwa bye, tebasuubira nti ekyo kirungi gyebali, wabula kkyo kibi gyebali ku lunaku lw’e Nkomerero bagenda kwambikwa mu bulago ebyo byebaakodowaliranga, bya Katonda ebiri mu Ggulu omusanvu ne mu Nsi era bulijjo Katonda amanyi mu bujjuvu byonna byemukola.

Mazima Katonda awulidde ekigambo ky'abo abagamba nti mazima Katonda mwavu era nga ffe bagagga. Tujja kuwandiika ebyo byeboogera nga bwetujja okuwandiika okutta kwabwe ba Nabbi awatali nsonga, era tugambe nti muloze ku bibonerezo ebyokya.

(Ebyo ebibonerezo bya kubatuukako) olw'ebibi bye mwakola, era mazima ddala Katonda talyazaamaanya baddu be.

Era beebo abagamba nti mazima Katonda yatulaamira okuba nga tetukkiriza mubaka yenna okuggyako nga atuleetedde Saddaaka omuliro negugyokya, bagambe (Ggwe Nabbi Muhammadi) mazima ababaka bangi abaabajjira n'obubonero oluberyeberye lwange nga baleese n'ebyo byemugamba, lwaki ate mwabatta bwe muba nga muli b'amazima mukino kyemugamba.

(Ggwe Muhammad tobafaako) bwe bakulimbisa ababaka bangi abaakulembera abaalimbisibwa, baaleeta obujulizi obw'enkukunala n'ebiwandiiko n'ebitabo ebijjudde ekitangaala.

Buli muntu yenna wa kukuloza ku kufa, era mazima ddala mugenda kusasulwa mu bujjuvu empeera zammwe ku lunaku lw’e Nkomerero oyo yenna alyesambisibwa omuliro n'ayingizibwa e Jjana aliba yeesiimye, tebuli obulamu bw'e Nsi wabula kintu ekigayaaza.

Ndayira ddala mazima mujja kugezesebwa nnyo mu mmaali zammwe ne mubulamu bwammwe, era mujja kutuusibwako ebitasanyusa bingi okuva mw'abo ab'aweebwa ekitabo oluberyeberye lwammwe, n'okuva mw'abo abagatta ku Katonda ebintu ebirala, naye singa mugumiikiriza ne mutya Katonda mazima ekyo ky'ekimu ku bintu eby'obumalirivu.

Era jjukira ekiseera Katonda weyakozesa endagaano abo abaweebwa ekitabo nti ndayira muteekeddwa okukinnyonnyola abantu era temugenda kukikweka wabula (endagaano) baagisuula emabega waabwe ne bagiwanyisaamu eby’okufuna ebitono, bibi nnyo byebawaanyisa.

Tosuubiriranga abo abasanyuka olw'ebyo bye bakoze (ebibi) era nga baagala okutenderezebwa olw'ebyo byebaba tebakoze (ebirungi), tobasuubiranga nti bagenda kuwona ebibonerezo, era bagenda kufuna ebibonerezo ebirumya.

Obufuzi bwe Ggulu ne Nsi bwa Katonda yekka, era Katonda muyinza ku buli kintu kyonna.

Mazima mu kutonda e Ggulu omusanvu n'e Nsi n'okwawukana kw'ekiro n'e misana ddala bubonero eri abo abalina amagezi amalamu.

Abo abatendereza Katonda nga bayimiridde era nga batudde, ne kumbiriizi zaabwe nga bagalamidde, nebafumiitiriza mu ngeri e Ggulu omusanvu n'e Nsi gye byatondebwamu, ne bagamba nti Ayi Mukama Katonda waffe ebintu bino tewabitonda mu bukyamu, wasukkuluma ku bintu byonna, n’olw'ekyo tukusaba otukingirize ebibonerezo byomuliro.

Ayi mukama Katonda waffe, mazima ggwe omuntu gw'oliyingiza omuliro oliba omukkakkanyizza. Abalyazaamaanya tebagenda kufuna babataasa bonna.

Ayi Mukama Katonda waffe tuwulidde omukoowooze ayita Abantu okujja eri obukkiriza nga agamba nti mukkirize Mukama Katonda wa mmwe, naffe netukkiriza, Ayi Mukama Katonda waffe tukusaba otusonyiwe ebibi byaffe, otusanguleko ebyonoono byaffe, otuuse okututta nga tuli mu luse lwa baddubo abalongoofu.

Ayi Mukama omulabirizi waffe tukusaba otuwe byewatusuubiza nga biyita ku babaka bo, totufuulanga abanyomebwa ku lunaku lw’e nkomerero, mazima ddala ggwe toyawukana ku ndagaano.

Mukama omulabirizi waabwe Allah kwe kubaanukula nti, siyinza kwonoona mulimu omu ku mmwe gw'aba akoze kaabe musajja oba mukazi, mwenna muli kyekimu (anti muli basiraamu). Abonno abaasenguka nebagobaganyizibwa mu mayumba gaabwe, nebabonyabonyezebwa ku lwange, ne balwanagana n'omulabe kulwange, ne balwanagana n’omulabe ne battibwa ndayira nja kubaggyirako ddala ebibi byabwe era ddala nja kubayingiriza e Jjana ezikulukutiramu wansi waazo emigga, eyonno nga mpeera okuva ewa Katonda, era mazima Katonda alina empeera ennungi.

Abatakkiriza Katonda n'Omubakawe okwegiriisiza mu Nsi tekikuyigulanga ttama.

Ebyo byebalimu byakweyagala kutono, oluvannyuma obuddo bwaabwe muliro Jahannama, era kya kweyalira kibi.

Naye mazima abo abatya mukama Katonda waabwe baakufuna e Jjana ezikulukutira wansi waazo emigga, baakuzibeeramu obugenderevu nga mpeera eyabategekerwa okuva ewa Katonda. Ebiri ewa Katonda byebirungi eri abaddu abalongoofu.

Mazima ddala mu Bantu ab'aweebwa ekitabo mulimu abantu abakkiriza Katonda nebakkiriza ebyassibwa gyemuli, n’ebyassibwa gyebali, bagondera Katonda ebigambo bya Katonda tebabitundamu muwendo mutono, abo balina okufuna empeera yaabwe ewa Mukama omulabirizi waabwe, mazima Katonda mwangu wa kubala.

Abange mmwe abakkiriza mugumiikirize (wabula mukimanye nti n’omulabe gwe mulwana naye agumiikiriza) n’olw'ekyo muvuganye naye mu kugumiikiriza (mulabe nga mumuwangula nemw'ekyo kibasobozese okuwangula olutalo) era munywere nga muli mu lutalo era mutye Katonda mulyoke mubeere abalyesiima ku lunaku lw’e Nkomerero.

Abange mmwe abantu mutye Mukama Katonda wa mmwe oyo eyabatonda nga abaggya mu muntu omu, (Adam) ate n’atonda nga aggya mu ye mukyalawe (Haawa) ate mu bombi n'aggyamu abasajja n’abakazi bangi, era mutye Katonda oyo gwe musabanngana ku lulwe, era mutye enganda (muzikuume temuzikutula), mazima Katonda buli kiseera abalondoola.

(Bwe mukitegeera nti Allah abalondoola) Bamulekwa mubawe emmaali yaabwe, ennungi temugiwaanyisangamu embi, era emmaali yaabwe temugiryanga nga mugigatta mu yammwe, mazima ddala okukola ekyo kibi kinene.

Bwe mutyanga obutakola bwenkanya eri bamulekwa (Abawala bemwasigaza okulabirira temubawasa) olwonno muli baddembe okuwasa abakyala abalala abo ababa babasanyusizza oba babiri, oba basatu, oba bana, wabula bwemutyanga obutakola bwenkanya, olwonno omu, oba oyo omuzaana yenna gwemuba mulina mu mikono gyammwe, ekyo kye kisemberedde obuteekubira.

Kikakafu muwe Abakyala Amahare gaabwe, naye bwebaba nga babasonyiye ekintu kyonna ku go mu mwoyo omulungi, mukirye nga kinyuvu kisemeekerera.

Abatanneetuuka mu ntegeera temubawanga emmaali yammwe, eyo Katonda gye yabateerawo nga y'ebayimirizaawo, era mubawenga mu yo gyebeetaaga ku byokulya mubambazenga, era mubagambe ebigambo ebirungi.

Era mugezese ba mulekwa bwebatuuka mu myaka egiwasa (oba egifumbirwa) bwe mubalengeramu obusobozi (bwo kulabirira ebyabwe) olwonno mubawe emmaali yaabwe. (Mu kiseera wemubeerera nga mugibakuumira) temugiryanga mu ngeri ey’okudiibuuda, era n’okugirya eggwewo mangu nga tebannakula. Oyo anaabanga omugagga asaana yesseemu ensa (agyesonyiwe) ate oyo anaabanga omwavu alyengako mu ngeri y’akintu kiramu. Bwe mutuusanga okubawa emmaali yaabwe muleetengawo abajulizi, kimala okubeera nti Katonda ye mubazi.

Abaana ab’obulenzi balina omugabo gwebafuna mw'ebyo bakadde baabwe bombi byebalese, n’aboluganda (byebaba balese), n'abaana ab'obuwala balina omugabo mw'ebyo bakadde baabwe bombi n'aboluganda byebaba balese, kabibe bitono bitya oba bingi bitya, (buli omu afuna) omugabo omugereke.

Ab’oluganda ab'okumpi ne bamulekwa n’abanaku bwebajja nga emmaali y’omufu egabwa mubagabirenga ko, era mubagambe ebigambo ebirungi.

(Abakuza) basaanidde okutya nti singa baba balese emabega waabwe abaana abato, nga baalibeeraliikirizza, bateekwa okutya Katonda, era boogere ebigambo ebituufu.

Mazima abo abalya emmaali y’abamulekwa mu ngeri enkyamu, mazima mu mbuto zaabwe balya muliro mwereere, era bagenda kuyingira omuliro oguyitibwa Saer.

Katonda abakalaatira ku baana ba mmwe, nga omwana omulenzi afuna emigabo gya bawala babiri, bwebaba nga baana bawala babiri n'okusukkawo basikira bibiri bya kusatu (2/3) by’emmaali omufu gyaba alese, bw'aba muwala omu afuna kimu kya kubiri (1/2) olwonno bazadde b’omufu buli omu kubbo n'afuna kimu kya mukaaga (1/6) ku mmaali gy'aba alese bw'aba nga aleseewo omwana ow’obulenzi, bw'aba nga talina mwana wabulenzi, abazadde bombiriri nebamusikira maamawe aba atwala kimu kya kusatu (1/3), bw'aba aleseewo bagandabe olwo maamawe afuna kimu kya mukaaga (1/6), ebyo byonna bikolebwa oluvannyuma lw'okutuukiriza ekiraamo kye yalaama oba ebbanja, bazadde ba mmwe n’abaana ba mmwe temumanyi ani kubonna asinga okuba ow’omugaso gyemuli, lino tteeka kakafu okuva ewa Katonda anti bulijjo mazima ddala Katonda amanyi nnyo ate nga buli kintu akikola kusinziira ku nsonga.

(Mmwe Abasajja) mufuna kimu kya kubiri (1/2) mw'ebyo bakyala ba mmwe byebaba balese bwebaba nga bafudde tebalese mwana (oba abazzukulu,) bwebaba balese omwana, olwo nno mufuna kimu kyakuna (1/4) mw'ebyo byebaba balese, (nga bino bikolebwa (oluvannyuma lwe kiraamo kyebaba balaamye oba ebbanja. Nabo abakyala bafuna kimu kya kuna (1/4) kw'ebyo byemuba mulese bwe mubanga temulina mwana gwemulese. Bwe muba mulina omwana olwonno bafuna kimu kya munaana (1/8) kw'ebyo byemuba mulese, (Bino bikolebwa) oluvannyuma lw'okutuukiriza ekiraamo kyemuba mulaamye oba ebbanja, omusajja bw'aba asikirwa oba omukyala nga ( Kalaala) talese baana wadde bazadde, naye nga alina mugandawe oba mwannyina mu maamawe (gwalese) buli omu ku bombi afuna kimu kya mukaaga (1/6) bwebaba nga basukkawo olwo bonna beegattira mu kimu kya kusatu (1/3), (kino kikolebwa) oluvannyuma lw'okutuukiriza ekiraamo ky'aba yalaama oba ebbanja, ekitaliimu kunyigiriza (eri abasika be) bino byonna nga kiraamo gyemuli okuva eri Katonda wa mmwe, era bulijjo Katonda amanyi nnyo waakisa.

Ebyo nsalosalo z'amateeka ga Katonda, omuntu yenna agondera Katonda n’omubakawe alimuyingiza e Jjana ezikulukutiramu wansi waayo emigga, bakuzibeeramu obugenderevu, era okwo kwe kwesiima okusukkulumu.

N’oyo ajeemera Katonda n'Omubakawe, n'asukka emsalosalo z'amateekage agenda ku muyingiza omuliro ogw'amaanyi ennyo, nga wakugubeeramu obugenderevu, era wa kufuna ebibonerezo ebinyoomesa.

N'abo mu bakyala ba mmwe abakola obwenzi mubanoonyeze abajulizi bana (4) nga bava mu mmwe, bwebabawaako obujulizi olwonno abakyala abo mubasibire mu mayumba okutuusa okufa lwekulibatuukako, oba Katonda n'abateerawo ekkubo eddala.

N'abo bombi mu mmwe ababa bakikoze mubabonerezenga, naye bwebeenenya nebalongoosa mubaleke, mazima Katonda akkiriza nnyo okwenenya musaasizi nnyo.

Mazima okwenenya okukkirizibwa ewa Katonda (kwe yekakasaako okukukkiriza) kwe kwabantu abo abakola ebibi mu butamanya oluvannyuma nebeenenya mangu ddala abonno Katonda akkiriza okwenenya kwabwe, anti bulijjo Katonda amanyi nnyo era agoba nsonga.

Okwenenya tekukkirizibwa mw'abo abakola ebibi okutuusa omu ku bbo obulumi bw'okufa lwe bumusemberera awo n'agamba nti kaakati nenenyezza, wadde abo abafa nga bagaanye okukkiriza, abo (bonna) twabategekera ebibonerezo ebirumya.

Abange mmwe abakkiriza temukkirizibwa kusikira bakyala lwampaka, era temubanyigirizanga mube nga mutwala ebimu kwebyo byemwabawa, mpozzi nga bakoze obwenzi obweyolefu, (bwekiba ssi ekyo) mukolagane nabo mu ngeri ennungi, bwe muba temukyabaagala, muyinza okutamwa ekintu ate Katonda n'akissaamu ebirungi bingi.

Singa mwagadde okuwanyisa omukyala mu kifo ky"omukyala omulala, omu ku bbo nga mwamuwa e mmaali empitirivu, temuggyangako kintu kyonna, okugitwala kuba bulimba era kyonoono kyeyolefu!!

Ate mugitwala mutya nga buli omu ku mmwe yamala dda okutuuka eri munne! (Abakyala abo) nebaggya ku mmwe endagaano ennywevu.

Temuwawasanga abakyala ba kitammwe bebaawasako, okuggyako ebyo byemwakola emabega (nga temunnamanya tteeka lino) mazima ekikolwa ekyo kya buwemu, ekisunguwaza Katonda, era kkubo bbi.

Temukkirizibwa okuwasa ba nnyammwe, ne bawala ba mmwe ne bannyina mmwe, neba senga mmwe, ne baganda ba bamaama ba mmwe, ne bawala ba baganda ba mmwe, ne bawala ba bannyinammwe, ne ba Maama ba mmwe abo abaabayonsa, nebannyinammwe bemwayonka ku bbeere erimu, ne ba nnazaala ba mmwe n’abaana abajja ne bannyabwe abo ababa bakulidde mu maka gammwe, nga bazaalibwa bakyala ba mmwe abo bemwegatta nabo, bwe muba temwegattangako nabo, temulina mutawaana, era temukkirizibwa baka batabani ba mmwe abo abava ku migongo gyammwe (abava mu ntunbwe zammwe), era temukkirizibwa kugatta wakati wa bakyala ab’oluganda okuggyako ebyo byemwakola edda emabega, anti bulijjo Katonda musonyiyi musaasizi.

Era temukkirizibwa kuwasa bakyala bafumbo okuggyako (abazaana) abo bemuba mufunye mu mikono gyammwe mu ngeri yo bufuge, tteeka lya Katonda lye yabalaalikako. Mukkirizibbwa okuwasa abatali abo, nga mukozesa emmaali yammwe. Mubafune mu bufumbo obutukuvu so ssi mu bwenzi, kye muba mwesanyusizza nabo, mubawe Amahare gaabwe, kiraalike. Temulina kibi kw'ekyo kyemuba mukkaanyizzaako oluvannyuma lw’okugereka Amahare. Mazima ddala Katonda bulijjo mumanyi nnyo ate agoba nsonga.

N'oyo aba talina mu mmwe busobozi okuba nga awasa abaana baboobwe abakkiriza (Abasiraamu), awase mw'abo emikono gyammwe begyafuna nga eminyago mu bazaana ba mmwe abakkiriza, Katonda amanyidde ddala obukkiriza bwa mmwe, mwenna abamu bava mu bannaabwe. Wabula mubawase kasita bakama baabwe bakkiriza era mubawe Amahare gaabwe okusinziira ku kimanyiddwa wemuwangaalira, bateekeddwa okuba abensa nga si bamalaaya wadde ab'eteerawo baganzi baabwe, bwebaba bafumbiddwa ate nebakola obwenzi, mubasseeko kitundu kya kibonerezo, ekiweebwa abakyala abaana b'aboobwe. Ekyo nno (ekyokubawasa) ky'oyo aba atidde mu mmwe okugwa mu kibi ky'obwenzi, naye singa muba musobodde okugumiikiriza ekyo kyekisinga obulungi gyemuli, era bulijjo Katonda musonyiyi, musaasizi.

Katonda ayagala abannyonnyole era abalunngamye eri enkola y’abo abaabakulembera, era akkirize okwenenya kwa mmwe. Bulijjo Katonda mumanyi nnyo ate agoba nsonga.

Era Katonda ayagala akkirize okwenenya kwa mmwe, ate bbo abagoberera okwagala gyabwe baagala muwuguke oluwuguka olunene ennyo.

Katonda ayagala kubawewulirako, anti omuntu yatondebwa nga munafu.

Abange mmwe abakkiriza, temulyanga emmaali yammwe wakati wa mmwe mu bukyamu, okuggyako nga kubadde kusuubulagana nga kusinziira ku kukkaanya wakati wa mmwe, era temwetemulanga. Mazima Katonda bulijjo musaasizi ku mmwe.

Omuntu akola ekintu ekyo mu bulumbaganyi n’obulyazaamaanyi, kyaddaaki tugenda kumuyingiza omuliro, era ekyo ku Katonda kigenda kuba kyangu.

Bwemwewala ebyonoono ebyannaggomola bye mugaanibwa, tujja kubasangulako ebibi ebitonotono era tubayingize mu kifo ekirungi.

Temwegombanga ebyo Katonda byeyasukkulumya nabyo abamu mu mmwe ku balala, Abasajja balina omugabo mw’ebyo byebaba bakoze, nga n’abakyala bwebalina omugabo mw'ebyo byebaba bakoze, era bulijjo musabe Katonda abawe ku birungibye, mazima Katonda mumanyi wa buli kintu.

Nabuli omu twamuteerawo abasika abasikira ebyo abazadde ababiri n’aboluganda byebaba balese, n’abo bebyakakatako ebirayiro byammwe (ab'omukago), kale mubawe omugabo gwabwe, mazima ddala Katonda mujulizi ku buli kintu.

Abasajja be balabirira Abakyala olw'enkizo Katonda gye yasukkulumya abamu ku bannaabwe, ne ku lw'emmaali Abasajja gye basasaanya, kale nno abakyala abalongoofu baba bawulize ku lwa Katonda, b'ekuumira ba bbaabwe. Kw'ekyo Katonda kye yabakuumisa. Bbo abo bemutya okuba nga bajeema mubabuulirire era mubasenguke mu buliri, era mubakubemu. Bwebaba babagondedde temulina kye mubavunaana, mazima Katonda waawaggulu nnyo wa kitiibwa.

Bwe muba nga mutidde enjawukana wakati wa bafumbo ababiri, muweerezeeyo omutabaganya okuva ku ludda lw'omwami n’omutabaganya omulala okuva ku ludda lw'omukyala, bwebaba nga bombi bagenderera kulongoosa, Katonda ajja kukwanaganya wakati waabwe bombi. Mazima Katonda bulijjo amanyi nnyo ategeera buli kyonna ekikwata ku baddube.

Era musinze Katonda awatali ku mugattako kintu kyonna, n’abazadde ababiri mubayise bulungi, bwekityo n’aboluganda, ne bamulekwa n’abanaku ne muliraanwa ow’okumpi, ne muliraanwa ow'ewala, ne munno ow'okulusegere n'omutambuze ali mu bwetaavu, n’abo emikono gyammwe begyafuna ng’eminyago, mazima Katonda tayagala muntu yeekuluntaza omwewulize.

Abo beebo abakodowala nebalagira na bantu abalala okuba abakodo, nebakweka Katonda byeyabawa mu birungibye. Era Abatakkiriza Katonda twabategekera ebibonerezo ebinyomesa.

(Era ebyo by'ebibonerezo) by'abo abawaayo emmaali yaabwe ku lwa bantu okubalaba, era nga tebakkiriza ِAllah wadde olunaku lw’e Nkomerero. Omuntu yenna Sitaane gw'abera nga ye munne, abeera wa mukwano mubi.

Kiki ekyandibatuseeko singa bakkiriza Katonda n’olunaku lw’e Nkomerero, ne bagaba kw'ebyo Katonda bye yabagabira. Anti bulijjo Katonda amanyi ebibakwatako.

Mazima Katonda talyazaamaanya wadde ekigero ky'akasekerezi, bwekiba kirungi akibazaamu anti bulijjo awa okuva gyali empeera ensukkulumu.

Guliba gutya bwe tulireeta mu buli kibiina omujulizi, ggwe netukuleeta ng’omujulizi kw'abo.

Ku lunaku olwo Abatakkiriza Katonda nebajeemera Omubaka balyegomba singa ettaka libamira, era tebalisobola kukweka Katonda kigambo kyonna.

Abange mmwe Abakkiriza temusembereranga e Sswala nga mutamidde,(okutuusa lwe gubaggwako) ne muba nga mutegeera bye mwogera (era temusembereranga e sswala) nga mulina Janaba okuggyako ayita obuyisi mu Muzigiti okutuusa nga munaabye, bwe muba abalwadde, oba nga muli mu lugendo, oba omu ku mmwe ng’avudde mu kumala ekyetaago (ekyobutonde) oba nga mwegasse n'abakyala, ne mutafuna mazzi, olwonno mwetukuze nga mukozesa ettaka ettukuvu, musiige ebyenyi byammwe n’ebibatu byammwe, mazima Katonda bulijjo addiramu era asonyiwa.

Tolaba abo abaaweebwa omugabo mu kitabo, baasalawo okutwala obubuze era nebaagala nammwe mubulwe ekkubo.

Bulijjo Katonda amanyi nnyo ebikwata ku balabe ba mmwe, Katonda amala okuba nga ye mukuumi, era Katonda amala okuba nga ye mutaasa.

Mu Bayudaaya, mulimu abakyusa ebigambo ne babiggya mu bifo byabyo, nebaba nga bagamba nti tuwulidde era tujeemye. Wulira naye Katonda aleme kukuwuliza, era siriwala. Nga bakyusakyusa ebigambo n'ennimi zaabwe, n'oikuvvoola mu Ddiini. Singa bagamba nti tuwulidde era tugonze wulira era tugumiikirizemu, kyandibadde kirungi nnyo gyebali era nga kituufu, wabula Katonda yabakolimira olw'obutakkiriza bwabwe, tebakkiriza okuggyako kitono nnyo.

Abange mmwe abaaweebwa ekitabo mukkirize ebyo byetwassa nga bikakasa ebyo byemulina, nga tetunnaba kukyusa byenyi netubizza emabega, oba netubakolimira nga bwetwakolimira abantu b’olunaku lwomukaaga. Ekigambo kya Katonda bulijjo kiteekwa okutuukirira.

Mazima Katonda tasonyiwa kumugattako kintu kirala asonyiwa ebirala ebiri wansi w'ekyo kw'oyo gw'aba ayagadde, oyo yenna agatta ku Katonda ekinti ekirala, mazima aba agunjizzaawo ekibi kinene nnyo.

Tolaba abo abeetukuza! ekituufu kiri nti Katonda atukuza oyo gw'aba ayagadde, era tebagenda kulyazaamaanyizibwa wadde akawuzi akasangibwa kunsigo y'entede.

Laba engeri gye batemerera Katonda obulimba, ekyo kimala bumazi okuba nti kibi eky'olwatu.

Tolaba abo abaaweebwa omugabo mu kitabo, bakkiririza mu buli kisinzibwa ekitali Katonda era nebakkiririza mu Sitane, era nga bagamba abatakkiriza Katonda nti, abo ekkubo lyabwe ly’erisinga erya bakkiriza okuba ettuufu.

Abo nno beebo Katonda beyakolimira, ate nga oyo yenna Katonda gw'akolimira, toyinza kumufunira mutaasa yenna.

Nandiki balina omugabo gwonna mu bufuzi! bwekiba bwekityo tebandiwadde muntu yenna kantu konna nebwekandibadde kenkana akatuli k’omulamwa gwe ntende.

Oba bakwatibwa ensalwa abantu olw'ebyengera Katonda byeyabawa (ategeeza Nabbi Muhammad n’abamukkiriza) mazima twawa aboolulyo lwa Nabbi Ibrahim ekitabo n’ebigambo ebyamagezi era netubawa obufuzi obugazi.

(Ne mw'abo abaaweebwa omugabo mu kitabo) mulimu abakkiriza obubaka bwa Nabbi Muhammad, ate mulimu abaziyiza abantu okubukkiriza, kimala okuba nga Jahannama gwemuliro ogugenda okubookya.

Mazima abo abaawakanya ebigambo byaffe, ddala tujja kubayingiza omuliro, buli lwe galisiriira amaliba g’emibiri gyabwe, nga tubassaako amaliba amalala, balyoke bakombe ku bibonerezo. Mazima Katonda bulijjo n'antakubwa ku mukono mugoba nsonga.

Ate bbo Abakkiriza nebakola emirimu emirungi, tujja kubayingiza mu Jjana emigga gikulukutira wansi waazo, nga baakubeeramu lubeerera, balina mu zzo Abakyala abatukuvu era tugenda kubakkiriza batuule mu bisiikirize ebisaakaativu.

Mazima Katonda abalagira okutuukiriza obuvunaanyizibwa eri bannyini bwo (abo bemuteekwa okubukolera), era bwe mutuula mu nsonga wakati w’abantu mubalamule mu bwenkanya, mazima Katonda kisuffu ky'abakalaatira, mazima Katonda bulijjo awulira ate alaba.

Abange mmwe Abakkiriza mugondere Katonda mugondere n’omubaka n’abakulembeze mu mmwe, bwe mufuna obutakkaanya ku nsonga yonna mugizze eri Katonda n’omubaka, bwe muba mukkiriza Katonda n'olunaku lw’e Nkomerero ekyo kyekirungi era kyekivaamu ebibala ebirungi.

Tolaba abo abagamba nti bakkiriza ebyassibwa gy'oli, n’ebyassibwa oluberyeberye lwo, baagala okuba nga beramuza ebintu ebikyamu ebitali mu mateeka g’a Katonda, so nga baalagirwa okubiwakanya, era bulijjo Sitane ayagala ababuze olubula olusuffu.

Bwebaba bagambiddwa nti mujje eri ebyo Katonda byeyassa, era mujje eri omubaka, olaba abannaanfuusi nga bakwewala olwewala.

Butya nga batuukiddwako omuteeru gwonna olw'ebyo bye baakola, olwonno nebakujjira nga balayira Katonda nti, ekigendererwa kyaffe tekyabadde kirala kyonna okuggyako okulongoosa n'okutereeza.

Abo nno beebo, Katonda baamanyi ebiri mu mitima gyabwe, n'olw'ekyo baawukaneko era obabuulirire, era obagambe ekigambo ekiggumivu ekinaabatuuka ku mitima.

Tewali Mubaka yenna gwe twatuma okuggyako nga ateekwa kugonderwa kulw'obuyinza bwa Katonda, kale singa bbo awo webaalyazaamaanyira emyoyo gyabwe bajja gy'oli, nebeegayirira Katonda n’omubaka naabasabira ekisonyiwo ewa Katonda, baalisanze Katonda nga akkiriza okwenenya era nga wa kisa.

Ndayidde Mukama Katonda wo tebayinza kubeera bakkiriza abannamaddala okuggyako nga ggwe gwebasalawo okubalamula mu buli kintu kyebaba bakaayaganyeko, ate nebatasigaza mu mitima gyabwe kunyolwa ku ngeri gy'oba osazeewo era nebakkiriza olukkiriza olulambulukufu.

Singa mazima ddala ffe twalaalika ku bbo nti mwette, oba muve mu mayumba gammwe tebandikikoze okuggyako batono ku bbo, singa baakola ebyo ebibabuulirwa kyandibadde kirungi gyebali, era kyekyalisinze okubanywereza ku bukkiriza.

Olwo nno twandibawadde okuva gyetuli empeera ensukkulumu.

Era twalibalungamizza mu kkubo eggolokofu.

Abantu abagondera Katonda n’omubaka, abo nno beebokubeera awamu naabo Katonda beyawa ebyengera mu ba Nabbi n’abakakasa mazima, n'abafiira mu ntalo z'e Ddiini n'abalongoofu. Abo balungi nnyo okuba nga be bantu b'obeera nabo.

Obulungi obwo bwonna buva wa Katonda, kimala bumazi okuba nti Katonda amanyi byonna.

Abange mmwe Abakkiriza mubagalire eby'okulwanyisa byammwe, mutambulire mu bibinja, oba mutambulire wamu mwenna.

Mazima mummwe mulimu abeegenyagenya (abasooba), nga singa mutuukwako obuzibu mu lutalo bagamba nti Katonda yannyambye okuba nti ssaabadde nabo mu lutalo.

Naye ate singa muba mugonnomoddwako ebirungi okuva ewa Katonda, ajja kugamba nga walinga awatabangawo nkolagana wakati wa mmwe naye nti ye nga ndabye, singa nabadde nabo nenganyulwa oluganyulwa olunene.

Bateekeddwa okulwana mu kkubo lya Katonda abo abalekawo obulamu obw'e Nsi nebatwala obw'e Nkomerero, oyo yenna alwanirira eDdiini ya Katonda n'amala attibwa, oba n'awangula, tugenda kumuwa empeera ensukkulumu.

Ngeriki bwe mutalwana mu kutaasa Ddiini ya Katonda, n'okutaasa abanyigirizibwa mu basajja n'abakyala n'abaana, abo abalaajana: nti ayi Mukama omulabirizi waffe tuggye mu Nsi eno, abatuuze baayo abalyazaamaanya abanyigiriza bannaabwe, otuteerewo okuva gy'oli omukuumi era otuteerewo okuva gy'oli omutaasa.

Abo abakkiriza, balwana mu kuweereza mu kkubo lya Katonda, bbo abatakkiriza balwana mu kuweereza mu kubo ly'obubuze n'obwonoonefu, kale mulwanyise banne ba Sitane, anti bulijjo enkwe za Sitane nafu ddala.

Tolaba abo abaagambwa nti mulekere awo okulwana, era muyimirizeewo e Sswala, era mutoole e Zakka, naye ate bwe baalagirwa okulwana, wagenda okulaba ng’abamu mu bbo batya abantu, nga balinga abatya Katonda. Si nakindi n’okusingawo, nebagamba nti ayi Mukama Katonda waffe lwaki otulaaliseeko okulwana, singa otulindirizzaako okumala akaseera katono, gamba Ggwe (Nabbi Muhammad) nti eby'okweyagala kw'e Nsi byabutaliimu, era enkomerero yennungi eri atya Katonda, era nga temugenda kulyazamanyizibwa wadde akabubi k'esigo y'e ntende.

Wonna wemuba muli okufa kugenda kubatuukako, newaakubadde nga muli mu mizimbo eminywevu (bankers), abantu abamu bwe batuukwako ekirungi bagamba nti ekyo kivudde wa Katonda, so nga bwe batuukwako ekibi bagamba nti kino kivudde ku ggwe, Gamba (Ggwe Muhammadi) byonna biva wa Katonda, abantu abo bali kumpi babe nga tebategeera kintu kyonna.

Buli kirungi ekikutuukako kiva wa Katonda, ate buli kibi ekikutuukako kiva ku ggwe kennyini, era twakutuma eri abantu nga oli Mubaka, bulijjo kimala okuba nga Katonda yemujulizi.

Omuntu yenna agondera Omubaka mazima aba agondedde Katonda, n’omuntu ayawukana ku kumugondera tetukutumanga (Ggwe Muhammadi) kubera kalondoozi ku bbo.

(Bwe babeera w'oli) bagamba nti bawulize gy'oli, naye bwebava w'oli ekitundu ku bbo nebasula nga basala entotto okwawukana ku bye bayogedde, era Katonda awandiika entotto zonna zebasula bakola, baveeko wekwate ku Katonda, bulijjo kimala okuba nga Katonda ye mukuumi.

Abaffe, tebekkenneenya Kur’ani, singa yali teyava wa Katonda bandigisanzeemu okukontana kungi.

Bwebajjirwa e kigambo e ky'emirembe oba e ky'entiisa bakiraalaasa, so singa bakizza eri Omubaka oba abakulembeze (abo abakwatibwako ensonga) mu bbo, bandikitegedde abo abalina obusobozi bw'okukenenula amakulu gaayo, singa tebyali birungi Katonda by'abawa n’okusaasira kwe mwandigoberedde Sitaane okuggyako abatono mu mmwe.

Kale nno lwana ng’oweereza mu kkubo lya Katonda, towalirizibwa (kutwala muntu yenna ku lutalo) okuggyako mwoyo gwo. Bbo Abakkiriza bakubirize (okulwana) olwo nno Katonda abe nga akomya akabi k'abo abaakaafuwala, bulijjo Katonda y’asinga amaanyi era y’asinga okubonereza.

Omuntu akolerera munne afune e kirungi naye afunako omugabo, n’omuntu akolerera munne atuukweko e kibi atukwako e kibi ky'ekyo. Bulijjo Katonda yennyini muyinza ku buli kintu.

Bwe muba nga mulamusiddwa n'ekiramuso kyonna mwanukule nga n'ekiramuso ekisingako ku kkyo obulungi, oba mwanukuze n'ekyo kyennyini kye babalamusizza nakyo, bulijjo Katonda asobolera ddala okubala buli kintu.

Katonda omutuufu ateekeddwa okusinzibwa ali omu tewali kintu kyonna kisaana kusinzibwa okuggyako ye, mazima ddala agenda kubakunngaanya ku lunaku lw’e Nkomerero tewatali kulubuusabuusaamu, ate bulijjo ani ayogera amazima okusinga Katonda!

Lwaki mwetemyemu mu bannaanfusi ebibinja bibiri (mubalinako e ndaba ya mirundi ebiri), so nga Katonda olw'ebyo bye bakola yabavuunika (nebadda mu bukafiiri) kaakati mmwe mwagala kulunngamya oyo Katonda gwe yabuza oyo yenna Katonda gw'abuza tosobola kumufunira kkubo erimutuusa ku kulunngama.

Beegomba nnyo okuba nga mukaafuwala (muwakanya Katonda ne bye yassaako) nga bwe baakaafuwala, olwo nno mufaanagane, temuggya mu bbo ab'emikwano beppo nga basenguse mu kkubo lya Katonda, naye bwe batakikola mubakwate, mubatte wonna wemubagwikiriza, temuggya mu bbo wa mukwano yenna wadde omutaasa.

Okuggyako abo ababa baddukidde eri abantu bemulina nabo endagaano (eyobutatabaalagana), oba abo abajja gyemuli nga bawulira bubi okubalwanyisa, oba okulwanyisa abantu baabwe, singa Katonda yayagala yandibabawendulidde nebabalwanyisa. Bweba nga babeesambye nebatabalwanyisa, era nebalangirira emirembe gyemuli, nammwe Katonda kasekeso konna kubalwanyisa (mu buli ngeri yonna tabakkiriza kubalwanyisa).

Ate mujja kusanga abalala nga bbo baagala babe mirembe nammwe, mu kiseera ky'ekimu babe mirembe n'abantu baabwe, buli wonna webaddizibwa eri obukafiiri (obutakkiriza Katonda) babubbinkiramu. Bwebaba tebabavuddeeko era nebalangirira e mirembe ku mmwe, nebaziyiza e mikono gyabwe kummwe, (abo) mubakwate era mubatte wonna wemubagwikiriza, era twabawa olukusa olujjuvu kw'abo okubakolako.

Omukkiriza yenna tekimugwanira kutta mukkiriza yenna, okuggyako mu butanwa. Oyo yenna atta omukkiriza mu butanwa ateekwa okuta omuddu omukkiriza, nga ateekwa n'okusasula olufuubanja eri abantu b'omufu okuggyako nga bamusonyiye, singa abadde wa mu bantu bemulina nabo obulabe nga ate ye Mukkiriza, olwo omussi ateekwa okuta omuddu Omukkiriza, naye singa abadde wa mu bantu bemulina nabo endagaano yobutatabaalagana olufubanja luteekwa okuweebwa eri abantu be okwo nga ogasseeko okuta omuddu Omukkiriza, omuntu aba tasobodde kufuna lufuubanja lw'awaayo ateekwa okusiiba emyezi ebiri nga gigoberegana, ebyo bikolebwa kulw'okusaba Katonda ekisonyiwo. Bulijjo Katonda mumanyi nnyo mugoba nsonga.

Omuntu atta Omukkiriza mu bugenderevu empeera ye muliro Jahannama, wakugubeeramu lubeerera, era Katonda yamusunguwalira, n'amukolimira, era n'amutegekera ebibonerezo ebiyitirivu.

Abange mmwe abakkiriza bwe muba nga mutambudde mu kuweereza mu kkubo lya Katonda, mwetegerezenga, omuntu bwabatooleranga ssalaamu temumugamba nti toli mukkiriza, nga mululunkanira eby'okufuna by'e Nsi (bwegiba minyago) ewa Katonda weewali eminyago emingi, ebyo byemwagala okukola so nno nga nammwe olubereberye bwemutyo bwe mwali, Katonda nabagonnomolako e kyengera (kyo bukkiriza) n'olw'ekyo muteekwa okwetegereza, anti mazima Katonda bulijjo amanyi nnyo bye mukola.

Abatagenda ku lutalo mu bakkiriza nga tebalina kisonyiyisa tebayinza kwenkana n'abo abalwana mu kkubo lya Katonda nga bawaayo emmaali yaabwe n’obulamu bwabwe, Katonda yasukkulumya eddaala abalwana mu kkubo lye nga bakozesa emmaali yaabwe n’obulamu bwabwe ku batagenda mu lutalo. Nabuli bamu Katonda yabalagaanyisa okubasasula e birungi. Naye Katonda yasukkulumya abalwana mu kkubolye ku batagenze mu lutalo, nga agenda kubasasula empeera ensuffu.

Ebyo byonna nga kuliba kusitulwa madaala nakusonyiwa nakusaasira ebiriva eri Katonda, bulijjo Katonda musonyiyi nnyo musaasizi.

Mazima abo ba Malayika be batuusaako okufa nga balyazaamaanya emyoyo gyabwe, ba Malayika babagamba nti mubadde muli kuki, bbo nebaddamu nti tubadde tunyigirizibwa mu Nsi (ba Malayika) nebagamba nti abaffe e Nsi ya Katonda teyali ngazi nemusengukako, abo nno obuddo bwabwe muliro Jahannama era nga buddo bubi ddala.

Okuggyako abo abanyigirizibwa mu basajja n'abakazi n'abaana abatalina busobozi, era nga tebamanyi kkubo lye bakwata.

Abo nno mazima Katonda abasonyiwa, bulijjo Katonda alekera era musonyiyi nnyo.

Oyo yenna asenguka mu kkubo lya Katonda afuna mu Nsi obw'ekyusizo (ebifo bingi eby'okubudamamu) n'obulamu obulungi), omuntu aleka amaka ge naasenguka ku lwa Katonda n'Omubaka we naye n'afa (nga tannatuuka) empeera ye eba emaze okukakata ewa Katonda, Katonda bulijjo musonyiyi musaasizi.

Bwe mubanga mutambudde mu Nsi, si kibi okuba nga musala ku Sswala kavuna mwekengera nga abo Abatakiriza Katonda bayinza okubatuusaako akabi, anti bulijjo Abakkiriza Katonda balabe ba mmwe ab'olwatu.

Ggwe (Nabbi Muhammad) bw'obanga mu lutalo n’abakkiriza, n'obakulembera mu kusaala, ekibinja ekimu ku bbo kiyimiriranga n'awe musaale, era nga babagalidde eby'okulwanyisa byabwe, bwe bamala okuvunnama bagende bayimirire emabega wa mmwe ate ekibinja ekirala abatannasaala bajje babe nga basaala n'awe, bateekeddwa okuba obulindaala nga babagalidde eby'okulwanyisa byabwe, abo Abatakkiriza Katonda bandyagadde singa mugayaalirira eby'okulwanyisa byammwe n'ebintu byammwe, nebabagwako ekiyiifuyiifu tewali kibi ku mmwe bwe muba nga mulina obuzibu olw'enkuba oba nga mubadde balwadde okuba nga mussa wansi eby'okulwanyisa byammwe naye era mubeere bulindaala, mazima Katonda yategekera Abatakkiriza ebibonerezo ebinyomesa.

Bwemumaliriza e Sswala, mutendereze Katonda mu kuyimirira ne mu kutuula ne mu kugalamira, ate bwemuba mu mirembe musaale e Sswala mu ngeri eyaabulijjo. Mazima e Sswala yalaalikibwa ku Bakkiriza nga esaalibwa mu biseera ebigere.

Temunafuwa nga mu kulondoola omulabe, bwe muba nga mulumwa mazima nabo balumwa nga bwe mulumwa, ate nga mmwe musuubira ewa Katonda bbo kye batasuubira, bulijjo Katonda amanyi nnyo era mugoba nsonga.

Mazima ffe twassa gy'oli ekitabo lw'amazima, obe nga olamula wakati w’abantu nga okozesa ebyo Katonda bye yakuwa, era towolerezanga abakumpanya.

Era weegayirire Katonda okukusonyiwa, mazima Katonda musonyiyi nnyo musaasizi nnyo.

Towakanira abo abeelyazaamanya, bulijjo Katonda tayagala muntu mukumpanya omukozi w'ebibi.

Beekweka abantu kyokka nebateekweka Katonda, so nga bulijjo aba nabo awo webasula nga abayiiya ebigambo by'atayagala, ate nga bulijjo Katonda yetoolodde bye bakola.

Abaffe mmwe beebo ababawakanira mu bulamu obwensi kati ani aliboogerera ewa Katonda ku lunaku lw'okuzuukira! oba ani alibeera omweyimirize waabwe!

Omuntu akola ekibi oba neyeryazaamanya kyokka neyeegayirira Katonda okumusonyiwa, asanga Katonda nga musonyiyi nnyo musaasizi nnyo.

Omuntu akola ekibi aba akyekoledde, bulijjo Katonda mumanyi nnyo agoba nsonga.

Ate omuntu akola ekisobyo, oba ekyonoono ate n'akitemerera atakikoze, mazima aba yeetisse ekikolwa eky'obulimba era nga kibi eky'olwatu.

Singa si kisa kya Katonda n'okusaasirakwe by'akulinako, (Ggwe Muhammad) ekibiina mu bbo ky'aliyagadde okukubuza, byonna bye bakola beebuza bokka, tebayinza kukutuusako kabi konna Katonda yakussaako ekitabo (Kur’ani) n’ebigambo ebya magezi (Hadith) era nga yakumanyisa n'ebyo byewali tomanyi era bulijjo e birungi bya Katonda byakuwa bingi nnyo.

Obufubo bwabwe obusinga obungi temuli kalungi, okuggyako oyo alagira abantu okusaddaaka oba obuntu bulamu oba okutabaganya wakati w’abantu, omuntu akola ebyo nga anoonya kusiima kwa Katonda tugenda kumuwa empeera ensukkulumu.

N'omuntu ayawukana ku Mubaka oluvannyuma lwo bulunngamu okumweyoleka, n'akwata ekkubo eritali lya bakkiriza tumulekera ekyo ky'aba asazeewo, era tugenda kumukasuka mu muliro Jahannama, obwo nno buddo bubi ddala.

Mazima Katonda tasonyiwa ku mugattako kintu, so nga asonyiwa ekiri wansi w'ekyo eri oyo gw'aba ayagadde, oyo yenna agatta ku Katonda ekintu aba abuze olubula olw'ewala ennyo.

Byonna byebasinza ebitali ye masanamu gebaatuuma amannya ag’ekikazi, era ddala tebainza okuggyako Sitane eyeewaggula.

Katonda yagikolimira era n'egamba nti nkulayirira nja kutwala ekitundu ekiwera mu baddubo.

Ndayira njakubabuliza ddala, era ndayira nja kubawanga ebisuubizo ebyobulimba, era ndayira nja kubalagirira ddala bawummule amatu g’ebisolo ebirundibwa era ndayira nja kubalagirira nga ddala bakyuse entonda ya Katonda. N’omuntu afuula Sitane mukwanogwe n'aleka Katonda mazima aba afaafaganiddwa olufaafaganirwa olw'olwatu.

(Sitane) abalagaanyisa n'abawa n’ebisuubizo ebyo bulimba, Sitane byonna by'abalagaanyisa tebiri okuggyako bya butaliimu.

(Abagoberera Sitane) abo obuddo bwa bwe muliro Jahannama, era nga tebagenda kufuna buddukiro kuguwona.

N'abo abakkiriza nebakola emirimu emirongoofu tujja kubayingiza e jjana nga emigga jikulukutira mu zzo, baakuzibeeramu obugenderevu, eyo nga ndagaano ey’amazima Katonda gy'abawadde, ate ani asinga Katonda okwogera ebigambo eby’amazima.

(Okuyingira e Jjana) tekigenda kusinziira ku kwagala kwa mmwe oba abaaweebwa e kitabo kye baagala, (enkola eri nti) omuntu akola ekibi kiri musasulwa, era nga oggyeko Katonda talifuna mukuumi yenna wadde omutaasa.

N’omuntu akola emirimu emirongoofu k'abe musajja oba mukazi nga mukkiriza, abo nno baakuyingira e Jjana, era tebagenda kulyazaamaanyizibwa wadde mu kantu akatono.

Ani asinga e Ddiini e nnungi okusinga oyo aba yeewadde ewa Katonda, era nga mukozi wa birungi, era n'agoberera e nkola ya Ibrahim e yobutakkiririza mu bisinzibwa byonna ebitali Katonda omu, era nga Katonda yafuula Ibrahim mukwano gwe owenjawulo.

Era bya Katonda byonna ebiri mu Ggulu omusanvu ne Nsi, era bulijjo Katonda amanyi ekifa ku buli kintu.

Bakubuuza ku nsonga za bakyala, bagambe nti Katonda ajja kubaanukula ebikwata ku bakyala, era nga bw'ajja okubategeeza ebibasomerwa mu kitabo (Kur’ani) ku nsonga za bamulekwa abakyala, abo bemutawa ekyo ekiteekwa okubaweebwa (Amahare), ate nemwagala okubawasa era abategeeza ebikwata ku baana abato abateesobola, era nga bw'ajja okubategeeza nti muteekwa okukola ku nsonga z’a bamulekwa mu bwesimbu, era mukimanye nti e kirungi kyonna kye mukola Katonda akimanyidde ddala.

Omukyala bwe yekengera mu bba okumwematira, oba okumusuulawo, si kibi ku bombi okukola ekiyinza okubatabaganya era (bulijjo) okutegeeragana kwekusinga obulungi. Naye omuntu bulijjo yatonderwa ku mulugube, naye singa mulongoosezza nemutya Katonda, bulijjo Katonda bye mukola abimanyi nnyo.

Wabula temugenda kusobola kukola bwenkanya wakati wa bakyala (obuli 100%) ne bwe muba nga kye mwandi yagadde, wabula temubasuulira ngawo ddala, omukyala nemumuleka nga alengejja nga omuwanike, naye singa mutegeeraganye, era nemutya Katonda, mazima bulijjo Katonda musonyiyi nnyo musaasizi.

Naye (omwami n'omukyala abafumbo) singa baawukana buli omu Katonda ajja kumumalira ebyetaagobye nga ajja mu bigabwabye e bingi, bulijjo Katonda mugazi nnyo mu buli kimu era agoba nsonga.

Byonna ebiri mu Ggulu omusanvu n'ebiri mu Nsi bya Katonda, era mazima twalaamira abo abaaweebwa ekitabo olubereberye lwa mmwe, nammwe netubalaamira nti mutye Katonda, wabula bwemugyema mazima ddala bya Katonda ebyo ebiri mu Ggulu omusanvu n'ebiri mu Nsi. Era bulijjo Katonda talina kye yeetaaga era atenderezebwa.

Era bya Katonda ebyo ebiri mu Ggulu omusanvu n'ebyo ebiri mu Nsi. Era kimala Katonda okubeera eyeesigamirwa.

(Okukakasa ekyo) singa aba ayagadde asobola okubaggyawo abange mmwe abantu n'aleeta abalala, bulijjo Katonda kw'ekyo musobozi.

Omuntu ayagala empeera y’oku Nsi, Katonda yaafuga empeera y’oku Nsi n'eyoku Nkomerero bulijjo Katonda awulira era alaba nnyo.

Abange mmwe abakkiriza mubeere abanywerera ku bwenkanya, abajulira ku lwa Katonda, ensonga nebw'eba ekwata ku mmwe mwennyini, oba abazadde bombi, n'aboluganda olw'okumpi (aweebwako obujulizi) kaabe mugagga oba mwavu bombi bantu ba Katonda okusinga okuba nti ba mmwe, kale nno temugoberera okwagala kwa mmwe nemutakola bwenkanya. bwe munaakyusa amazima oba nemugaana okuwa obujulizi, mazima ddala Katonda bulijjo amanyidde ddala bye mukola.

Abange mmwe abakkiriza mukkirize Allah n’Omubakawe, n’ekitabo kyeyassa ku Mubakawe, era n’ekitabo kyeyassa olubereberye, oyo yenna atakkiriza Allah ne ba Malayika be n'ebitabo bye n’ababaka be n’olunaku lw’e Nkomerero aba abuze olubula oluyitirivu.

Mazima abo abakkiriza, ate nebawakanya, ate nebakkiriza, oluvannyuma nebawakanya, ate nebeeyongerera ddala obuwakanyi, Katonda si wakubasonyiwa wadde okubalunngamya eri ekkubo e ggolokofu.

Sanyusa abannaanfuusi nga obategeeza nti balina ebibonerezo ebirumya.

(Abannaanfuusi) abo abafuula abatakkiriza mikwano gyabwe, nebaleka abakkiriza, abaffe baba babanonyaako kitiibwa! Mazima bulijjo ebitiibwa byonna bya Katonda.

Nga ate mazima (Katonda) yassaako mu kitabo nti bwe muwuliranga ebigambo bya Katonda nga biwakanyizibwa, era nga bijolongwa (bijeejebwa) temutuulanga wamu n'abo abakola ekyo okutuusa lwebadda ku mboozi endala, (ate nga mazima ddala bulijjo kimanyiddwa nti) mazima Katonda agenda kukunngaanya abatakkiriza n’abannaanfuusi bonna abayingize omuliro Jahannama.

(Era Abannaanfuusi) beebo bulijjo abalindirira ekintu ekinaatuuka ku mmwe, bwemufuna obuwanguzi okuva ewa Katonda bagamba nti abaffe tetwabadde nammwe, ate abatakkiriza bwebaba nga balina omugabo gwonna gwe bafunye (ng'obuwanguzi) bagamba nti tetwabayambye netubataasa ku bakkiriza, wabula Katonda agenda kulamula wakati wa mmwe ku lunaku lw’e Nkomerero, ate nga Katonda tagenda kuwa Batakkiriza kkubo lye bayinza kuwanguliramu Bakkiriza.

Mazima Abannaanfuusi bakwenyakwenya Katonda, kale naye abakwenyakwenya, era bwebayimirira okusaala bayimirira nga bagayaavu, nga bagenderera kulaga bantu era tebatendereza Katonda okuggyako katono nnyo.

Ba nampa wengwa (wakati wa Bakkiriza n'abatakkiriza) nga tebayinza kubalibwa ku bali oba ku bano, bulijjo omuntu Katonda gw'abuza tayinza kumufunira kkubo. (limutuusa eri obulunngamu).

Abange mmwe abakkiriza temufuula nga abatakkiriza mikwano gyammwe nfiira bulago nemuleka abakkiriza, abaffe mwagala muteekowo eri Allah obujulizi obubalumika obweyolefu.

Mazima Abannaanfuusi bagenda kubeera ku mwaliiro ogusemberayo ddala wansi mu muliro, ate nga togenda kubafunira mutaasa yenna.

Okuggyako abo abeenenya, nebalongoosa, nebekwata ku Katonda, nga n'emirimu gyabwe bagikola kulwa Katonda yekka, abo nno bagenda kuba wamu n’abakkiriza. Ate nga Katonda abakkiriza agenda kubawa empeera ensukkulumu.

Singa mwebaza Katonda, era nemukkiriza, ate olwo Katonda aliba ababonerereza lwaki! ate nga bulijjo Katonda mwebaza era mumanyi nnyo.

Allah tayagala kwatuukiriza kigambo kibi (ku muntu) okuggyako oyo aba alangiddwa obwereere, bulijjo Allah awulira era amanyi nnyo.

Bwe mwolesa ekirungi, oba ne mukikweka, oba ne musonyiwa abayisizza obubi, mazima bulijjo Allah alekera, Muyinza nnyo.

Mazima abo abajeemera Allah n’Ababaka Be, ne bagezaako okwawula wakati wa Allah n’Ababaka Be, era ne bagamba nti tukkirizaako abamu abalala tetubakkiriza, ne baagala okuteekawo ekkubo wakati w'ebyo ebibiri, (babe nga mwebatambulira).

Abo nno be batakkiriza abannamaddala. Era nga abatakkiriza twabategekera ebibonerezo ebinyoomesa.

Ate abo abakkiriza Allah n'Ababaka Be ne batayawula wakati w’omu kubo, abo nno Allah agenda kubawa empeera yaabwe, bulijjo Allah Musonyiyi Waakisa nnyo.

Abaaweebwa Ekitabo bakusaba okuba nga obassiza Ekitabo okuva mu ggulu, ate nga mazima kye baasaba Musa kyali kinene okusinga ekyo, bwe baagamba nti tulage Allah mu bweyolefu. Olw'okweyisa kwabwe okubi laddu yabakuba (ate oluvanyuma Allah yabaddiza obulamu), ate ne beeteerawo ennyana ne bagisinza, so nga obunnyonyofu bwali bwabajjira dda, ekyo nno nakyo twakisonyiwa, so nga ate twali twawa Musa obujulizi obwenkukunala (obukakasa obwannabbi bwe).

Ne tusitulira waggulu waabwe olusozi, bwe bataagoberera, Ndagaano gye twabakozesa nti baali bateekwa okugoberera (enjigiriza ya Tawulaati) ne tubagamba nti muyingire omulyango gw’ekibuga (Bait Makdis) nga muvunnamye (kye bataakola) era twabalagira obutavuba ku lunaku Olw'omukaaga (Ekiragiro kye baamenya) era twabakozesa Endagaano enzito.

Ekyabatuusa kw'ebyo kwe kuba nti baamenya endagaano zaabwe, n’okuwakanya Amateeka ga Allah, n’okutta kwabwe Bannabbi ekitaali kituufu, era n'olwokugamba kwabwe nti, emitima gyaffe mizibikivu, ekituufu kiri nti Allah yagibikka olw'obukaafiiri bwabwe, tebayinza kukkiriza okuggyako ekitono ennyo.

Era ne ku lw'obutakkiriza bwabwe, n’okutemerera Mariamu ekigambo ekinene.

Era ne kulw'ekigambo kyabwe bwe baagamba nti: Mmazima ffe twatta Masiya Yisa Mutabani wa Mariamu Omubaka wa Allah, so nga tebaamutta, wadde okumukomerera ku musaalaba, wabula kyabalabikira nga abasse yye, naye mazima ddala abaayawukana mu nsonga eno bali mu kubuusabuusa ku bigikwatako, tebalina bukakafu ku yo wabula okugoberera okuteebereza, naye nga ddala tebaamutta.

Wabula Allah yamusitula n’amutwala Gy'ali, era bulijjo Allah Ye Nnantameggwa Mugobansonga.

Mazima tewali n’omu mw'abo abaaweebwa Ekitabo okuggyako nga agenda kumukkiriza nga tannafa, nga ne ku Lunaku lw’Enkomerero agenda kubawaako obujulizi.

Olw'okweyisa obubi kwa Abayudaaya, twaziza ku bo ebirungi ebyali bibakkiriziddwa, n'olwokwekiika kwabwe mu Kkubo lya Allah.

Ne kulw'okutwalanga kwabwe Riba, so nga baagigaanibwa, ne ku lw'okulya kwabwe emmaali y’abantu mu bukyamu, era twateekerateekera abatakkiriza mu bo ebibonerezo ebirumya.

Wabula abamanyi ba kakensa mu bo n’Abakkiriza ebyassibwa gy'oli, n'ebyassibwa olubereberye lwo, era abayimirizaawo esswala, nebawaayo ne zzaka, era Abakkiriza Allah n’Olunaku lw'Enkomerero, abo nno tugenda kubawa mpeera ensukkulumu.

Mazima ffe twakuwa ggwe (Nnabbi Muhammadi) Obubaka nga bwe twawa Nuuhu Obubaka, ne Bannabbi bangi oluvanyuma lwe, era twawa Ibraahiimu Obubaka ne Ismail ne Isihaaka ne Ya'kuubu ne bazzukulu be, ne Yisa ne Ayyuubu ne Yunusu ne Haaruuna ne Sulaiman, ne Dauda ne tumuwa Zabbuli.

Waiiwo Ababaka abamu be twakunyumiza edda ate nga Ababaka abalala tetwabakunyumiza, era mazima Allah yayogera ne Musa olwogera (nga tewali Mubaka wakati waabwe).

Ababaka abo bonna bajjanga nga bawa amawulire agasanyusa, nga n'abandi bawa amawulire agalabula, abantu baleme kuba na byekwaso ku Allah kasita yamala okubatumira Ababaka. Bulijjo Allah Ye Nnantakubwakumukono Mugobansonga.

(Ekyo kimala abantu okuba nga naawe bakukkiriza naye Abayudaaya n’ababafaanana bwe baba nga tebakukkirizza) kasita Allah akakasa nti (Ekitabo) ekyassibwa ku ggwe kyassibwa ku lwa kumanya kwa Allah n’okusalawo Kwe ne Bamalayika ekyo kyennyini kyebbakakasa, naye nga bulijjo Allah yeemalirira okuwa obujulizi n’okukakasa ekintu kyonna.

Mazima abo abaawakanya ne bassa emisanvu mu Kkubo lya Allah, ddala baabula olubula oluyitirivu.

Mazima abo abaawakanya era nebeeyisa obubi, Allah talibasonyiwa wadde okubalunngamya mu Kkubo.

Mpozzi ekkubo erigenda mu Muliro Jahannama gwe balibeeramu obugenderevu, era bulijjo ekyo ku Allah kyangu nnyo.

Abange mmwe abantu, Omubaka yabajjira nga aleeta amazima okuva ewa Mukama Omulabirizi Wammwe, kale mukkirize, ky'ekirungi gyemuli, naye bwe munaawakanya mazima ddala ebiri mu ggulu omusanvu ne nsi bya Allah, bulijjo Allah Mumanyi nnyo agoba nsonga.

Abange mmwe abaaweebwa Ekitabo, temusukkanga ekyetaagisa, nga mutuukiriza eddiini yammwe, era temwogeranga ku Allah okuggyako amazima, mazima ddala Masiya Yisa mutabani wa Mariamu Mubaka wa Allah, era Kigambo Kye, kye yawa Mariamu, era mwoyo ogwava Gy'ali. Kale temugambanga nti basatu, ekyo mukikomye, ky'ekirungi gyemuli, mazima ddala omusinzibwa ali Katonda Omu, yayawukana (tasaana) kuba na mwana, bibye byonna ebiri mu ggulu omusanvu n'ebiri mu nsi , bulijjo kimala okuba nti Allah y’ayimiriddeko ensonga ya buli kintu.

Masiya tayinza wekuluntaza butayagala kuba muddu wa Allah, wadde Bamalayika abali kumwanjo nabo tebayinza butakyagala, oyo yenna atayagala kuyitibwa muddu wa Allah ne yeekuluntaza, (Allah) ajja kubazuukiza bonna abazze Gy'ali ku Lunaku lw'Enkomerero.

Kale nno abo abakkiriza ne bakola emirimu emirungi, Allah ajja kubasasula empeera y’emirimu gyabwe mu bujjuvu, ate abongere n’ebirungi ebirala ebiva Gy'ali, naye abo abawakanya ne bawaganyala, abo alibabonereza n'ebibonerezo ebirumya ennyo, ate tebalifunayo atali Allah nga mukwano gwabwe wadde nga mutaasa.

Abange mmwe abantu mazima obubonero obwenkukunala bwabajjira, era nga twassa gyemuli ekitangaala ekyeyolefu (Kulaani).

Bo abakkiriza Allah ne benywereza ku Yye, abo nno agenda kubayingiza (Ejjana) nga kusaasira okuva Gy'ali (era alibawa) ebigabwa (ebirala), era abalunngamyenga eri ekkubo eribatuusa Gy'ali, nga kkubo ggolokofu.

Bakubuuza (ggwe Nnabbi Muhammadi) ku muntu afa n'ataleka bazadde oba abaana wabula nga alese baganda be, gamba nti: Allah ajja kubannyonnyola ebikwata ku kusikira omuntu oyo, omuntu bw'afa nga talina mwana, naye nga alina mwannyina, oyo afuna kimukyakubiri kw'ebyo by'aba alese, era naye asikira mwannyina singa (Mwannyina afa) nga talese mwana, bannyina bwebaba babiri bafuna bibiribyakusatu kw'ebyo byaba alese, bwebaba baganda be nga basajja na bakazi, omusajja afuna omugabo gwa bakazi babiri, Allah abannyonnyola (Amateeka Ge) mube nga temubula, bulijjo Allah Mumanyi Wa buli kintu.

Abange mmwe Abakkiriza mutuukirizenga endagaano, mukkirizibwa okulya ennyama y’ebisolo ebiriibwa byonna okuggyako ebinaabasomerwa, ate nga temukkirizibwa kuyigga nga muli mu mizizo gya (Hijja oba Umurah) mazima Allah asalawo ky'aba ayagadde.

Abange mmwe abakkiriza temufuulanga Halaali ebyo Allah byeyabalambikira nti biri Haraamu, era nga bwe mutaasanye kukyusa myezi gya mizizo ne mugifuula egyokulwaniramu, era temwekiikanga mu kkubo ly'ebirabo ebiba bireetebwa e Makkah wadde ensolo ennambe nga za birabo, wadde abantu abagenda okulambula Ennyumba ey’emizizo, ababa bagenda okunoonya obulungi n’okusiima okuva ewa Katonda Waabwe, naye bwe muba musumulukuse okuva mu mizizo gya (Hijja ne Umurah) olwonno muyiggenga. Olwokuba nti abantu baabaziyiza okutuuka ku muzikiti ogw’emizizo, tekibatuusanga okubayisa obubi, era muyambaganenga ku kukola obulungi n’okutya Katonda, so temuyambagananga ku kukola ebibi n’obulumbaganyi, era mutye Allah, mazima Allah Muyitirivu Wa bibonerezo.

Kifuuliddwa kya muzizo kummwe okulya ennyamanfu n’omusaayi (Kaffecce) n'ennyama y’embizzi n’ekyo ekiba kyogereddwakoerinnya eritali lya Allah nga kisalibwa, n’ekifudde olw’okukubwa, n’ekifudde olwokugwa, n’ekitomeddwa kinnaakyo, n’ekiriiriddwako ensolo enkambwe, okuggyako kye muba mwanguyidde ne mukisala, era muziyiziddwa okulya ennyama y’ebisolo ebiba bisaliddwa olwokubiwongera atali Katonda Omu ateekwa okusinzibwa, era muziyiziddwa okweraguza nga mukozesa obusaale. Okukola ekimu kw'ebyo, buba bujeemu, olwaleero abo abaakaafuwala tebakyalina ssuubi kubalemesa Ddiini yammwe, kale temubatya, mutye Nze. Olwaleero mbajjulizza Eddiini yammwe, era ne mbajjuliza ebyengera Byange, era ne mbasiimira Obusiraamu okuba nga y'eddiini (yammwe) kale nno omuntu eyeesanga mu buzibu obw'enjala, so si lwa kugenderera kumenya tteeka (naamala alya ku bigaaniddwa), mazima Allah Musonyiyi Waakisa.

Bakubuuza ggwe (Nnabbi Muhammadi) ebibakkirizibwa (okulya), gamba nti mukkirizibwa okulya ebirungi, era (mukkirizibwa) n’okulya ebyo ebikwatiddwa ebiyigga bye mutendese ne muyigiririza ddala okusinziira nga Allah bwe yabayigiriza, bwe kiba bwekityo mulye kw'ebyo bye bibakwatira, era mubyogerereko Erinnya lya Allah (nga mubisindika okugenda okukwata ensolo) era mutye Allah, anti mazima Allah mwangu wa kubala.

Olwaleero mukkirizibwa okulya e birungi, nga era n'ennyama esaliddwa abaaweebwa Ekitabo bw'ekkiriziddwa gyemuli, n'ennyama yammwe ekkiriziddwa gye bali, era mukkirizibwa okuwasa ab'ensa mu bakyala abakkiriza nga bwemukkiriziddwa abakyala ab'ensa mw'abo abaaweebwa Ekitabo olubereberye lwammwe, kavuna mubawa Amahare gaabwe nga mubawasa mu bufumbo obutukuvu, so si mu bwenzi wadde okuba nti mubatwala nga bakyala bammwe ab'ebbali, n'omuntu atakolera ku mateeka ga Bukkiriza emirimu gye giba gimufudde, era nga ku Lunaku lw’Enkomerero agenda kubeera mu bafaafaaganiddwa.

Abange mmwe abakkiriza, bwe muba mugenda okusaala muteekeddwa okunaaba ebyenyi byammwe, n’emikono gyammwe okutuusa mu nkokola, era musiige ku mitwe gyammwe, munaabe n’ebigere byammwe okutuuka ku bukongovvule, bwe muba nga mulina Janaba muteekeddwa okunaaba naye bwe mubanga abalwadde, oba nga muli ku lugendo, oba omu ku mmwe nga avudde mu kumala ekyetaago eky'obutonde, oba ne mukwata ku bakyala (mumbera ezo zonna) nemutafuna mazzi, kale nno, mutayammame, nga mukozesa ettaka eddungi, (ekyo mukikola) nga musiiga ku byenyi byammwe n’emikono gyammwe, Allah tayagalangako kubateerawo bukalubo bwonna, naye ayagala kubatukuza era abajjulize ekyengera kye musobole okubeera nga mwebaza.

Era mujjukire ekyengera kya Allah kye yabawa ne Endagaano Ye gye yabakozesa bwe mwagamba nti tuwulidde era tugonze. Era mutye Allah, anti mazima Allah amanyidde ddala ebyo ebiri mu bifuba.

Abange mmwe abakkiriza mubeere beesimbu ku lwa Allah, nga muwa obujulizi mu bwenkanya, abantu okuba abalabe bammwe, tekibawugulanga ne mutakola mazima, bulijjo mukole obwenkanya, ekyo ky'ekiri okumpi n'okutya Allah, era mutye Allah, mazima Allah amanyidde ddala bye mukola.

Allah yalagaanyisa abo abakkiriza nebakola emirimu emirungi, nti balina ekisonyiwo nempeera ensukkulumu.

N'abo abaawakanya ne balimbisa Ebigambo Byaffe, abo be bantu b'Omuliro.

Abange mmwe abakkiriza mujjukire ekyengera kya Allah kye yabawa, abantu abamu bwe baayagala okugolola emikono gyabwe (babalwanyise), n'aziyiza emikono gyabwe ku mmwe, era bulijjo mutye Allah, Allah Yekka Abakkiriza Gwe bateekeddwa okwesiga.

Mazima Allah yakozesa abaana ba Yisirayiri Endagaano, era ne tuggya mu bo abakulembeze kkuminababiri, Allah n'agamba nti mazima nja kuba wamu nammwe, bwe munaayimirizaawo esswala, ne mutoola zzaka, ne mukkiriza Ababaka Bange, era ne mubawagira, era ne muwola Allah oluwola olulungi, nja kubasonyiwa ebyonoono byammwe, mbayingirize ddala Ejjana ezikulukutiramu emigga, naye oyo yenna aliwalanya mu mmwe oluvannyuma lw'ekyo, aliba abuze okuva ku kkubo ettuufu.

Olw'okumenya kwabwe Endagaano twabakolimira, emitima gyabwe ne tugifuula emikakanyavu ne baba nga bakyusa ebigambo okubiggya ku makulu gaabyo amatuufu, ne basuula ekitundu kinene kw'ebyo ebyabayigirizibwa, bulijjo ojja kugwanga ku nkwe zaabwe okuggyako abatono mu bo, kale basonyiwe era olekere, anti bulijjo mazima Allah ayagala abakozi b’obulungi.

Era abamu kw'abo abeeyita Abanaswara twabakozesa Endagaano, era nabo baasuula ekitundu kinene kw'ebyo ebyabayigirizibwa, ne tussa wakati waabwe obulabe n’obukyayi okutuusa Olunaku lw’Enkomerero, olwo nno Allah alyoke abategeeze byonna bye baakolanga.

Abange mmwe abaaweebwa Ekitabo, mazima Omubaka Waffe yabajjira abategeeze bingi bye mwali mukweka mu Kitabo, mu ngeri y'emu asonyiwe bingi, mazima ekitangaala kyabajjira n’Ekitabo ekyeyolefu okuva eri Allah.

Allah alunngamya nakyo mu kkubo ery'emirembe oyo aba agoberedde okusiima Kwe, era naabaggya mu bizikiza nga abazza eri ekitangaala ku lw'okwagala Kwe, era n'abalunngamya ku Kkubo eggolokofu.

Mazima baafuuka abawakanyi abo abaagamba nti ddala Masiya mutabani wa Mariamu ye Katonda, gamba (Ggwe Muhammadi) nti ani ayinza okukolawo ekintu kyonna singa Allah aba asazeewo okuzikiriza Masiya mutabani wa Mariamu ne maama we, n’abantu bonna abali ku nsi, obufuzi bw'eggulu n'ensi na byonna ebiri wakati wa byombi, bwa Allah, atonda ky'aba ayagadde, era Allah bulijjo Muyinza Wa buli kintu.

Era Abayudaaya n'Abakulisitaayo baagamba nti ffe tuli baana ba Katonda era mikwano Gye, bagambe nti ate lwaki alibabonereza olw'ebyonoono byammwe, ekituufu kiri nti mmwe muli bantu ng'abalala be yatonda, asonyiwa gw'aba ayagadde, era n'abonereza gw'aba ayagadde, era obufuzi bw'eggulu (omusanvu) n'ensi na byonna ebiri wakati wa byombi bya Allah, ate nga Gy'ali y'eri obuddo.

Abange mmwe abaaweebwa Ekitabo, mazima Omubaka Waffe abajjidde nga abayigiriza oluvannyuma lw'okuyitawo akaseera nga tewali Mubaka, muleme kugamba nti tetwajjirwa atuwa mawulire ga ssanyu ag’Ejjana oba okututiisa Omuliro, ekituufu kiri nti yabajjira oyo abawa amawulire ag'essanyu, era nga abatiisa n’Omuliro . Bulijjo Allah Muyinza ku buli kintu.

Era mujjukire Musa bwe yagamba abantu be nti abange, bantu bange, mujjukire ekyengera Allah kye yabawa bwe yabassaamu ba Nnabbi (abangi), era mmwe n'abawa obuyinza era n'abawa ebintu by'ataawa muntu mulala yenna mu bitonde.

Abange bantu bange (mulwane) muyingire ensi entukuvu eyo Allah gye yabalagaanyisa, temukyukanga ne mukubayo amabega (ne mudduka) ne mufuuka abafaafaaganiddwa.

Ne bagamba nti owange Musa mazima ensi eyo, erimu abantu bakirimaanyi, era mazima tetuyinza kuyingira mpozzi nga bagifulumye, bwe bagifuluma olwo ffe nga tuyingira.

Abasajja babiri mw'abo abatya allah, nga era Allah yabawa ekyengera ky'Obukkiriza ne bagamba nti: Mubalumbe nga muyita ku mulyango omunene, bwe muyingira mazima ddala mujja kuwangula, naye Allah Yekka Gwe muba mwekwatako, bwe muba nga muli Bakkiriza.

Ne bagamba nti owange Musa, mazima ffe tetujja kukiyingira ebbanga lye banaamala nga bakyakirimu, ggwe ne Katonda Wo mugende mulwane ffe tusigadde wano.

(Musa) n'agamba nti: Ayi Mukama Omulabirizi Wange, mazima nze sifuga okuggyako omwoyo gwange ne muganda wange, lamula wakati waffe ne wakati w’abantu aboonoonyi.

Allah (n’alamula) wakati waabwe n'agamba nti: Ekyokuyingira kibagaaniddwa okumala emyaka ana, gye baamala nga babulubuutira mu nsi, n’olwekyo tewennyamira olw'abantu abajeemu.

Era basomere mu bulambulukufu ebikwata ku baana ba Adamu ababiri bwe baawaayo Saddaaka, ey’omu nekkirizibwa, ate ey’omulala n’etakkirizibwa, kwe kugamba nti nja kukuttira ddala (ye oli) n'agamba nti mazima ddala Allah akkiriza mirimu gy'abo bokka abamutya.

(Naye) bw'onongalulira omukono gwo onzite, nze sigenda kukugalulira mukono gwange kukutta, mazima nze ntya Allah Omulabirizi W’ebitonde.

Mazima nze njagala ogende n’ekibi kyange n’ekikyo (singa onzita), olwo nno obeere mu bantu b'omu Muliro, era nga bulijjo eyo y'empeera y’abantu abeeyisa obubi.

Omwoyo gwe (omubi) ne gumusalirawo okutta muganda we, era n'amutta n'abeera mu baafaafaaganirwa.

Olwonno Allah n’asindika Nnamuŋŋoona eyajja nga asima ettaka olwonno amulage engeri gy'anaaziikamu omulambo gwa muganda we, n'agamba nti mbadde ki nze? nnemeddwa okukola nga nnamuŋŋoona bwakoze, mbe nga nziika omulambo gwa muganda wange, awo n'atandika okubeera mu bejjusa.

Okusinziira ku ekyo twassa Etteeka ku baana ba Yisirayiri nti mazima oyo atta omuntu atatemudde muntu, oba atakoze bwonoonefu mu nsi, mazima ddala aba nga asse abantu bonna, ate ataasa obulamu bw'omuntu omu aba ng'ataasizza obulamu bw'abantu bonna, (ebyo Abayudaaya baalibadde babitegeera) anti mazima Ababaka Baffe baabaleetera Amateeka amannyonnyofu, naye ate oluvannyuma lw'ekyo mazima bangi ku bo baasigala beeyisa bubi mu nsi.

Mazima ddala empeera y’abo abalwanyisa Allah n’Omubaka We nebasaasaanya obwonoonefu mu nsi, (ekibonerezo kyabwe) kuttibwa, kukomererwa ku musaalaba, oba emikono n'amagulu gaabwe kutemwako mu ngeri y’okuwaanyisibwa (nga bwe bamutemako omukono ogwa dddyo, okugulu bamutemako kwa kkono) oba bawaŋŋangusibwe okuva mu nsi yaabwe, ekyo nno nga kubakkakkanya kuno ku nsi era nga ne ku Lunaku lw'Enkomerero bagenda kutuusibwako ebibonerezo ebikakali.

Okuggyako abo abeenenya nga temunnabakwata, era mumanye nti mazima ddala Allah Musonyiyi nnyo Omusaasizi.

Abange mmwe abakkiriza mutye Allah era munoonye ekkubo erituuka Gy'ali, era munyiikire nnyo mu kuweereza mu Kkubo Lye, ekiribayamba okubeera mu balituuka ku buwanguzi (ku Lunaku lw’Enkomerero).

Mazima abo abaawakanya singa mazima byonna ebiri mu nsi n’ebiringa byo nga obitadde wamu ne baagala okwenunula nabyo okuwona Ebibonerezo by’Olunaku lw’Enkomerero, tebyandikkiriziddwa okuva gyebali, era baakussibwako ebibonerezo e birumya ennyo.

Balyagala okufuluma Omuliro naye tebaligufuluma, bagenda kutuukibwako ebibonerezo eby'olubeerera.

Omubbi omusajja n'omubbi omukazi mubatemeko emikono gyabwe bombi, nga mpeera (kibonerezo) yeekyo kyebakoze, era nga kyakulabirako ekyassibwawo Allah ekikanga abalala, bulijjo Allah ye Nnantakubwakumukono Mugobansonga.

Oyo yenna eyeenenya oluvannyuma lw'okweyisa kwe obubi n'alongoosa, mazima Allah akkiriza okwenenya kwe, anti bulijjo mazima Allah Musonyiyi Musaasizi.

Tomanyi nti mazima ddala obufuzi bw'eggulu (omusanvu) n'e nsi bwa Allah, abonereza gw'aba ayagadde ate n'asonyiwa gw'aba ayagadde, bulijjo Allah Muyinza ku buli kintu kyonna.

Owange ggwe Omubaka, tebakunakuwazanga abo abavuganya mu kuwakanya(obwannabbi bwo), mu abo aboogera n'emimwa gyabwe nti tukkirizza so nga emitima gyabwe tegikkiriza. Ne mu Bayudaaya abakkiriza ebigambo by'obulimba, era abawuliriza kulw'abantu abalala ababa tebazze mu nkuŋŋaana zo ne bakyusa e bigambo okubiggya mu bifo byabyo nga bagamba (bannaabwe nti), bwe muweebwa kino mukitwale, bwekitabaweebwa mwekeke, naye Allah gw'aba ayagadde okugezesa toyinza kumuyamba mu kintu kyonna ewa Allah, abo beebo Allah b'ataayagala kutukuza mitima gyabwe, obuswavu buli ku bo kuno ku nsi, era ne ku Lunaku lw’Enkomerero bagenda kussibwako ebibonerezo ebikambwe.

Bawuliriza ebigambo eby'obulimba, balya emmaali gye bafuna mu makubo aga haraamu, singa bajja gy'oli (ggwe Muhammadi) lamula wakati waabwe oba baveeko, bwoba obavuddeko tebagenda kukutuusaako kabi, naye bw'obanga osazeewo okubalamula, lamula wakati waabwe n'obwenkanya, anti bulijjo Allah ayagala abakola obwenkanya.

Naye lwaki basalawo ggwe obalamule, nga ate balina Tawulaati erimu okulamula kwa Allah, ate oluvannyuma ne bagikuba amabega, abo si bakkiriza (n'akatono).

Mazima ffe twassa Tawulaati nga erimu obuluŋŋamu n'ekitangaala, Bannabbi ba Abayudaaya era nti beewaayo eri Katonda, nga gye bakozesa okulamula Abayudaaya, nga ne bannaddiini n'abakugu mu ddiini nga gye balamuza olw'obwesigwa obwabakwasibwa nga buva mu Kitabo kya Allah babe nga bakuuma Tawulaati, era ku ekyo baali bajulizi kale nno temutyanga abantu, mutye Nze, Ebigambo Byange temubiwanyisangamu omuwendo omutono, era oyo yenna atalamuza ebyo Allah bye yassa, abo nno be bakaafiiri abannamaddala.

Era (mu Tawulaati eyo) twabalaalikako nti mazima omuntu attibwa olw'okutta omuntu, n’eriiso liggyibwamu olw’okuggyamu eriiso, nennyindo esalwako olw'okusala ennyindo y'omulala, n'okutu kusalwako olw'okusala okutu kw'omuntu, n'erinnyo balikuulamu olw'okukuula erinnyo ly'omuntu, n'ebiwundu bisasulwa. Wabula omuntu akisonyiwa kimubeerera ensonga y'okumusonyiwa ebibi bye. Era bulijjo omuntu yenna atalamuza Allah bye yassa abo nno be bantu abeeyisa obubi.

Mu buwufu bwabwe (Abayudaaya) twagoberezaako Yisa Mutabani wa Mariamu nga akakasa ebyo ebyamukulembera ebiri mu Tawulaati, era yajja nga buluŋŋamu, era eky'okubuulirira eri abo abatya Katonda.

Kale nno abantu b'Enjiri bateekeddwa okulamuza ebyo Allah bye yassa mu yo, omuntu yenna atalamuza ebyo Allah bye yassa abo nno be boonoonyi.

Era twassa gy'oli (ggwe Muhammadi) Ekitabo, mu bulambulukufu nga kikakasa Ebitabo byonna e byakikulembera era nga kye kibisukkulumye. Kale lamula wakati waabwe nga okozesa ebyo Allah bye yassa naye togezaako okugoberera okwagala kwabwe obe nga oleka amazima agakujjidde, buli bamu mu mmwe twabawa amateeka n'enkola. Singa Allah yayagala yaalibafudde ekibiina kimu naye yayagala okubgezesa olw'ebyo bye yabawa, kale nno muvuganye mu kukola ebirungi. Eri Allah we wali obuddo bwammwe mwenna, gy'alibategeereza ebyo bye mwayawukanangamu.

Era lamula wakati waabwe nga okozesa ebyo Allah bye yassa, togobereranga okwagala kwabwe era beegendereze baleme kukuggya ku bimu ku ebyo Allah bye yassa gy'oli, bwe baba bakoze ekikontana n'ekyo, manya nti mazima Allah ayagala okubavunaana olw'ebimu ku byonoono byabwe, wabula bulijjo abantu abasinga obungi boonoonyi.

Ennamula y’ebiseera by'obutamanya gye baagala okukozesa! Ani ayinza okuwa okulamula okulungi okusinga okwo okuva ewa Allah eri abo abakozesa amagezi gaabwe mu butuufu!.

Abange mmwe abakkiriza temufuulanga Abayudaaya n'Abakulisitaayo mikwano gyammwe egy'omunda, anti abamu ba nfa nfe b’abalala. Oyo yenna abafuula mikwano gye mu mmwe, mazima yye aba afuuse waamubo, anti mazima Allah taluŋŋamya bantu balyazaamaanyi.

Ojja kulaba abo abalina obulwadde mu mitima gyabwe nga babeeyunira nga bagamba nti (ekitukozesa kino) tutya okuba nga tutuukibwako ekitutuusaako obuzibu, naye lumu Allah alireeta obuwanguzi oba ekintu kyonna okuva Gy'ali, balikeesa enkya nga bejjusa olw'ebyo bye baakweka mu mitima gyabwe.

Ate bo abakkiriza baligamba nti abo be baalayira Allah nga bakakasa ebirayiro byabwe, bwe baagamba nti mazima ddala bo bali wamu nammwe, bye baakola byonna byabasala, olwo nno ne baba nga bafaafaaganiddwa.

Abange mmwe abakkiriza oyo yenna anaava mu Ddiini ye akimanye nti Allah alireeta abantu (abalala) b'ayagala nga nabo bamwagala, abakkakkamu mu maaso ga Abakkiriza, nga baakitiibwa mu maaso ga Abakaafiiri, nga beewaayo mu kuweereza mu Kkubo lya Allah, era nga tebatya kunenya kwa munenyi yenna, ebyo birungi bya Allah abiwa gw'aba ayagadde, bulijjo Allah Mugazi mu buli kintu, Mumanyi nnyo.

Mazima Mukwano Gwammwe Owoomunda Ye Allah, n’Omubaka We n'abo abakkiriza, abo abayimirizaawo esswala ne batoola zzaka, era nga bakutama ku maviivi (ne basaala).

Oyo yenna asalawo mukwano gwe ow’omunda okuba Allah n'Omubaka We, n'abo abakkiriza, bulijjo ekibiina kya Allah ky'ekyabawanguzi.

Abange abakkiriza temukwananga abo abaafuula Eddiini yammwe eky'olusaago era ekyokuzannyisa mu abo abaaweebwa Ekitabo olubereberye lwa mmwe n’abakaafiiri ne mubafuula banywanyi aboomunda. Bulijjo mutye Allah bwe muba nga muli Bakkiriza.

(Mmwe) bwemukoowoola abantu okujja okusaala bakitwala nga kya kusaaga era nga kya muzannyo, bakola batyo lwakuba nti ddala bo bantu abatategeera.

Gamba nti: Abange mmwe abaaweebwa Ekitabo, abaffe waliwo ensonga lwaki mutunyiigira okuggyako olw'okuba nti tukkiriza Allah n'ebyo ebyassibwa gyetuli, n'ebyo ebyassibwa olubereberye era ne olw'okuba nti abasinga mu mmwe boonoonyi.

Gamba nti: Abaffe mbategeeze oyo alifuna empeera esinga okuba embi ewa Allah? Be bantu Allah be yakolimira n'abasunguwalira, abamu ku bo n'abafuula enkobe n'embizzi n’abamu ne basinza Sitaane, abo nno be balina ekifo ekisinga obubi era be basinga okubula okuva ku Kkubo ettuufu.

Bwe bajja gyemuli bagamba nti tukkirizza naye mazima bayingira n’obukaafiiri era ne bafuluma nabwo, Allah amanyi nnyo byonna bye bakweka.

Ogenda n'olaba nga bangi mu bo banguyirira nnyo okukola ekibi n'obulumbaganyi n’okulya kwabwe ebya Haraamu, kibi nnyo kye bakola.

Waakiri singa bannaddiini n'abakugu mu kumanya eddiini babakomako ku bigambo ebibi n’okulya emmaali eya Haraamu, kibi nnyo kye bakola.

Abayudaaya baagamba nti: Omukono gwa Katonda mukolige, emikono gyabwe gye gyakoligibwa, ne bakolimirwa olw'ebyo bye baayogera, ekituufu kiri nti Emikono Gye gyombiriri myanjulukufu agaba nga bw'ayagala, ebyo ebyassibwa gy'oli okuva ewa Mukama Katonda Wo bijja kwongerera ddala bangi mu bo obubuze n'obukaafiiri, era twassa wakati waabwe obulabe n'obukyayi okutuusa ku Lunaku lw'Enkomerero, buli lwonna lwe bakoleeza omuliro gw’olutalo nga Allah aguzikiza, era basaasaanya mu nsi obwonoonefu, naye bulijjo Allah tayagala boonoonyi.

So singa ddala abaaweebwa Ekitabo bakkiriza ne batya Allah twandibasonyiye ebyonoono byabwe, era twandibayingizza Ejjana ey’ebyengera.

Era mazima singa bo bayimirizaawo Tawulaati ne Enjiri na byonna ebyassibwa gye bali okuva ewa Katonda Waabwe, bandiridde okuva waggulu waabwe ne wansi w'ebigere byabwe, mu bo mulimu abantu abeesimbu naye abangi mu bo bye bakola bibi.

Owange ggwe Omubaka, tuusa gyebali ebyo ebyassibwa gy'oli okuva ewa Katonda Wo, bw'otookikole ojja kuba totuukirizza Bubaka Bwe (totya) Allah ajja kukukuuma ku bantu, mazima Allah taluŋŋamya kibiina kya bakaafiiri.

Gamba nti: Temulina kyemuliko okuggyako nga muyimirizzaawo Tawulaati ne Enjiri na byonna ebyassibwa gyemuli okuva ewa Mukama Omulabirizi Wammwe. Ebyo ebyassibwa gy'oli okuva ewa Mukama Omulabirizi Wo bijja kwongera bangi mu bo obubuze n'obukaafiiri, tonakuwala olw'abantu abakaafiiri.

Mazima abo abakkiriza, n'Abayudaaya ne ba Swabi-uuna (be bantu abataasinza bintu bitali Allah omu so nga ate tebaalina ddiini yava mu ggulu yonna gye baaliko) n'Abakulisitaayo, oyo yenna eyakkiriza Allah n'Olunaku lw’Enkomerero n'akola emirimu emirungi (abo) tebalina kutya era tebagenda kunakuwala.

Twakozesa abaana ba Yisirayiri Endagaano era ne tubatumira Ababaka wabula buli Omubaka lwe yabajjiranga n’ebyo emyoyo gyabwe bye gitayagala nga ekitundu bakirimbisa nga ate abalala babatta.

Baalowooza nti ekyo tekijja kuvaako mutawaana, naye ne bafuuka bamuzibe era bakiggala, oluvannyuma Allah yakkiriza okwenenya kwabwe, ate bangi mu bo baddamu ne bafuuka bamuzibe era bakiggala, Allah bulijjo alaba bye bakola.

Mazima baawakanya abo abaagamba nti ddala Katonda ye Masiya mutabani wa Mariamu, nga ate Masiya yagamba nti abange abaana ba Yisirayiri musinze Katonda Mukama Wange era nga Ye Mukama Wammwe, mazima ddala oyo agatta ku Katonda ekintu ekirala Katonda yamuziyizaako okuyingira Ejjana, nga obuddo bwe Muliro. Era abalyazaamaanyi tebagenda kuba na mutaasa yenna.

Mazima baawakanya abo abagamba nti mazima ddala Allah y'omu ku basatu (abakola Katonda omu) ekituufu kiri nti tewali musinzibwa yenna okuggyako Katonda Omu era bwe bateekomeko ku bye boogera, abo abatakkiriza bajja kutuukwako Ebibonerezo ebirumya.

Abaffe, tebayinza kwenenyeza Allah ne bamusaba okubasonyiwa. Ate nga bulijjo Allah Musonyiyi Musaasizi.

Masiya mutabani wa Mariamu tagea mu kiti kirala kyonna okuggyako okuba nti Mubaka wa Allah era nga ddala Ababaka bangi baamukulembera, ne Maama we yali mukazi Mukkiriza ow'amazima bombi baalyanga emmere, tunula olabe engeri gye tubannyonnyolamu ebigambo ate tunula olabe engeri gye bawugulwa.

Gamba (Ggwe Nnabbi Muhammadi) nti: Abaffe musinza ebintu ebitali Allah, ebitayinza kubatuusaako kabi konna wadde ekirungi, ate nga Allah Yye bulijjo awulira era amanyi nnyo.

Gamba (Ggwe Nnabbi Muhammadi) nti: Abange mmwe abaaweebwa Ekitabo temusukkanga ekigero ekyetaagisa nga mukola mu ddiini yammwe eby'obutaliimu, era temugobereranga okwagala kw’abantu, abaasooka abaabula era ne babuza n’abantu bangi, era ne babulira ddala okuva ku kkubo eggolokofu.

Abaakaafuwala mu baana ba Yisirayiri baakolimirwa ku lulimi lwa Dauda ne Yisa Mutabani wa Mariamu, ekyo nno kyava ku kujeema kwabw,e era nga bulijjo baasukkanga era balina okukoma.

Tebeekomangako ku mize gye baakolanga, kibi ddala ekyo kye baakolanga.

Olaba bangi mu bo nga bafuula abakaafiiri mikwano gyabwe egy'omunda, kibi nnyo emyoyo gyabwe kye gyabasalirawo ekyatuusa Allah okubasunguwalira era nga baakutuula bugenderevu mu bibonerezo.

Singa baali bakkiriza Allah ne Nnabbi n’ebyassibwa gy'ali tebandibafudde mikwano gyabwe egy'omunda, naye bangi mu bo boonoonyi.

Ojja kukirabira ddala nti abasinga okuba ab'obulabe eri abo abakkiriza be Bayudaaya n'abo abagatta ku Allah ebintu ebirala era ojja kukirabira ddala nti abasinga okuba ab'omukwano ogw'okumpi eri abo abakkiriza beebo abagamba nti mazima ffe tuli Bakulisitaayo, ekyo nno lwakuba nti mazima ddala mu bo mulimu abayivu mu by'eddiini, na Basosolodooti era n'olwokuba nti bo tebeekuluntaza.

Bwe baba bawulidde ebyassibwa ku Mubaka, olaba amaaso gaabwe nga gakulukusa amaziga olw'amazima ge baba bategedde ne bagamba nti: Ayi Mukama Katonda Waffe tukkirizza tuwandiike mu bajulizi.

Tuyinza tutya obutakkiriza Allah ku mazima gano agamaze okutujjira! Ate nga era tuyaayaanira okuba nga Mukama Omukuumi Waffe atuyingiza Ejjana awamu n'abantu abalongoofu.

Bw'atyo Allah n'abasasula ku lw'ebyo bye baayogera (n'abayingiza) Ejjana ezikulukutiramu emigga, mwe balibeera olubeerera era eyo y'empeera y’abakozi b’obulungi.

N'abo abaawakanya ne balimbisa Ebigambo Byaffe, abo be bantu b'Omuliro.

Abange mmwe abakkiriza temuzizanga ebirungi ebyo Allah bye yabakkiriza, mu ngeri y'emu temusukkanga ensalo z'ebyo Allah bye yabagaana, bulijjo mazima Allah tayagala basukka nsalo (z’Amateeka Ge).

Era mulye kw'ebyo Allah bye yabagabirira, mw'ebyo ebyakkirizibwa ate nga birungi, era mutye Allah oyo mmwe Gwe mukkiriza.

Allah tabavunaana olw'ebirayiro byammwe byemulayira mu butali bugenderevu, naye abavunaana lw'ebyo bye muba mukakasizza. (E kirayiro omuntu ky'alayira nga akakasa bw'akimenya), omutango gwakyo kuliisa abanaku kkumi nga baliisibwa emmere gyemuliisa abantu abo mu daala eryo mu makkati, (mu kitundu kyammwe) oba okubambaza, oba okuta omuddu. Omuntu aba tafunye ekimu ku ebyo ateekwa okusiiba ennaku ssatu. Ogwo nno gwe mutango gw’ebirayiro byammwe bye munaalayiranga, mwegendereze nnyo okulayira kwammwe. Bwatyo Allah bw'abannyonnyola Ebigambo Bye, musobole okubeera abeebaza.

Abange mmwe abakkiriza, mazima ddala omwenge ne zzaala, n'amasanamu n’okweraguza, n’obusaale bibi bya mu bikolwa bya Sitaane, muteekwa okubyewala kibayambe okuba mu balituuka ku buwanguzi (ku Lunaku lw’Enkomerero).

Mazima ddala Sitaane eyagala okussa wakati wammwe obulabe n’obukyayi nga eyita mu mwenge ne zzaala, era ebawugule ku kutendereza Allah n’okusaala, abaffe ebikolwa e byo munaabireka?

Era mugondere Allah, mugondere n’Omubaka mwewalire ddala e bikolwa ebibi, bwemutakola mutyo olwo nno mumanye nti mazima ddala Omubaka Waffe ky'ateekwa okukola, ky'ekyokutuusa Obubaka mu lwatu.

Abo abakkiriza ne bakola e mirimu emirungi tebavunaanwa ku lw'ebyo bye baalya oba bye baanywa edda, kasita batya Allah ne bakkiriza, ne bakola emirimu emirungi ate ne batya Allah ne bakkiriza ate ne batya Allah era ne beeyisa bulungi, bulijjo Allah ayagala abeeyisa obulungi.

Abange mmwe abakkiriza (bwe munaabeeranga mu mikolo gya Hijja ne Umura) Allah ajja kubagezesa n’ensonga y’okuyigga ebisolo nga bibali kumpi nnyo mubikwata n’emikono gyammwe, era nga mubifumita n'amafumu gammwe olwo nno Allah alyoke ayoleke oyo amutya mu mmwe, awamu n’okuba nti tamulabako. Naye oyo yenna anaamenya Etteeka lino oluvanyuma lw’okumanya bino agenda kutuusibwako ebibonerezo ebirumya ennyo.

Abange mmwe abakkiriza temuyigganga, nga muli mu mizizo gya Hijja oba Umrah, oyo yenna mu mmwe atta e kisolo kyo muttale nga agenderedde, ateekwa okuwa omutango, nga awaayo mu nsolo e zirundibwa e yenkana neeri gyeyasse, (nga ekyo okukituukako), kisalibwawo abantu babiri abeesimbu mu mmwe, ekyo nga kirabo e kiteekwa okutuusibwa ku Kaaba. Bwekitaba ekyo, ateekwa okuwa omutango gwokuliisa abanaku, oba okusiiba e nnaku ezenkana omutango ogwo, ebyo byonna biri bwebityo alyoke abe nga akomba ku bukaawu bwekikolwa kye yetantala. Byo e byakulembera Katonda yabisonyiwa, naye oyo addamu Katonda agenda kumubonereza, bulijjo Allah nantakubwa ku mukono asobola okubonereza oyo gw'aba asazeewo okubonereza.

Mukkirizibwa okuvuba n'okulya e biva mu nnyanja ku lw'okuyimirizaawo obulamu bwammwe, n'obwabatambuze, naye mugaaniddwa okuyigga ku lukalu ebbanga lye mumala nga muli mu mizizo gya Hijja ne Umura, bulijjo mutye Allah Oyo nga Gy'ali gye mulikunganyizibwa.

Allah yassaawo Kaaba Ennyumba ey'emizizo nga y’eyimiriddeko entambuza y’ebintu byonna ebikwata ku bantu era n'ateekawo emyezi egy'emizizo n’ebisolo ebitonebwa, n'ebisolo ebirekebwa nga birambiddwa ebyo byonna bibayambe okumanya nti mazima ddala Allah amanyi ebyo byonna ebiri mu ggulu omusanvu n'ebiri mu nsi, era nti mazima ddala Allah bulijjo amanyidde ddala ebikwata ku buli kintu.

Muteekeddwa okumanya nti mazima Allah Muyitirivu Wa Bibonerezo era nga ddala bulijjo Allah Musonyiyi Musaasizi.

Omubaka talina kyavunaanwa, okuggyako okubatuusaako Obubaka, era bulijjo Allah amanyi bye mukola mulwatu ne bye mukweka.

Gamba (ggwe Nnabbi Muhammadi nti:) e kibi n'ekirungi tebyenkanankana newaakubadde nga oluusi obungi bw'ekibi bukusikiriza, kale mutye Allah abange mmwe abalina amagezi agakola obulungi mulyoke mube mu balituuka ku buwanguzi (ku Lunaku lw'Enkomerero).

Abange mmwe abakkiriza temubuuzanga ebikwata ku bintu, nga singa bibategeezeddwa byandibasuula mu buzibu olw'obuzito bwabyo , anti singa mubibuuza nga Kulaani ekyakka bijja kubategeezebwa (ate bibakaluubirire), so nga Allah teyabisiinyaako, anti bulijjo Allah Musonyiyi Musaasizi.

Mazima abantu b'ebibiina ebyabakulembera baabibuuzanga ate oluvannyuma byabakaafuwaza.

Allah si Ye yateekawo (eby'okulondobamu ebisolo ebimu ebirundibwa n’ebiweebwa amasanamu) nga okusalako okutu kw’ensolo bw'eba ezadde enzaalo eziwera, wadde eyo gyebaawulako nga ya lubaale, wadde eky'okwevuma ensolo ezaala enkazi zokka, wadde eky'okwekwasa seddume w'eŋŋamiya ezaazisizza eŋŋamiya ennyingi. Naye mazima ddala abo abaakaafuwala (mu kuwanuuza kwabwe okwo), batemerera Allah, wabula bulijjo bangi mu bo tebategeera.

Bwe baba bagambiddwa nti mujje eri e byo Allah bye yassa, era mujje eri Omubaka, bagamba nti bye twasangako bakadde baffe bitumala (abaffe bagamba batyo) wadde nga bakadde baabwe baali tebamanyi kintu kyonna era nga tebayinza kuluŋŋama.

Abange mmwe abakkiriza mwefeeko. Oyo eyabula tayinza kubatuusaako kabi kasita muluŋŋama, ewa Allah y'eri obuddo bwa mmwe mwenna, olwo nno alyoke abategeeze byonna bye mwali mukola.

Abange mmwe abakkiriza, omu ku mmwe bw'awuliranga nti ayinza okuba nga asemberedde okufa, mussengawo abajulizi babiri abeesimbu mu mmwe nga akola ekiraamo, oba abalala babiri abatali Basiraamu singa wabaawo obwetaavu nga Abasiraamu tebafunise. Bwe mubanga mu lugendo ne mutuukibwako ekizibu ky'okufa (abajulizi ababiri) mubatuuza oluvannyuma lw’esswala ne balayira mu Linnya lya Allah, ekyo mukituukako bwe muba nga mufunye okubuusabuusa (era bateekeddwa okugamba nti:) tetugenda kukkiriza kukyusa kiraamo kino olw'ekintu kyonna, newaakubadde nga gwe tuwaako obujulizi wa luganda lwaffe olw'okumpi, era tetugenda kukweka bujulizi bwa Allah anti bwe tukikola tubeera mu boonoonyi.

Bwekizuulwa nti abajulizi beekobaanye ne bakola ekibi ku nsonga y’obujulizi (nebalimba), olwo mangu ddala musseewo abalala babiri badde mu kifo kyabwe bombi, nga baggyibwa mu bantu bali ababiri mwe baggyibwa, ne balayira Allah (era nebagamba nti) obujulizi bwaffe bwa maanyi okusinga obwa bali ababiri era tetugenderedde kubaweebuula anti bwe tukola ekyo, tuba tugudde mu luse lw'abalyazaamaa nyi.

Okukola ekyo, kye kisinga obulungi ku kuyamba okuba nga bawa obujulizi mu butuufu bwa bwo, oba batye e birayiro (byabwe) okugobwa oluvanyuma lw'okulayira kwabwe, mutye Allah era muwulire, bulijjo Allah taluŋŋamya bantu bajeemu.

Mujjukire Olunaku Allah lw'alikuŋŋaanya Ababaka n'agamba nti: Kiki kye mwayanukulwa? Baligamba nti: Tetumanyi bye baagamba anti mazima bulijjo Ggwe omanyidde ddala ebikusike.

Era mufumiitirize Allah bw'aligamba nti owange Yisa mutabani wa Mariamu, jjukira ebyengera Byange bye nnakuwa ne bye nnawa Maama wo, bwe nnakuwagira ne Mwoyo Mutukuvu n'oyogera n’abantu ng’okyali mu kibaya, ne bwe wasajjakula, era jjukira bwe nnakuyigiriza okuwandiika n’okukozesa amagezi ne Tawulaati ne Enjiri, era jjukira bwe wasobola okubumba mu ttaka ekibumbe ky'ekinyonyi ku lw’okukkiriza Kwange, n’okifuuwamu ne kiba ekinyonyi kyennyini ku lw'okukkiriza Kwange, era n’osobola okuwonya bamuzibe n’abolukeke, byonna lwa kukkiriza Kwange, era jjukira bwe wasabiranga abafu ne bazuukira olw'okukkiriza Kwange, era jjukira bwe nnakuwonya abaana ba Yisirayiri bwe wabajjira n’obunnyonnyofu, abaakaafuwala mu bo ne bagamba nti bino by'aleese si kirala okuggyako eddogo eryeyolefu.

Era jjukira bwe nnatumira abayigirizwabo nti munzikirize n’Omubaka Wange ne bagamba nti tukkirizza, era naawe julira okakase nti mazima ddala tuli Basiraamu.

Era jjukira abayigirizwa bwe baagamba Yisa mutabani wa Mariamu nti abaffe Katonda Wo asobola okutussiza ekijjulo okuva mu ggulu, n'agamba nti mutye Katonda bwe muba nga ddala muli bakkiriza.

Ne bagamba nti: Twagala tukiryeko, era emitima gyaffe gitebenkere, era tumanye nti weewaawo by'otugamba byonna bya mazima, era naffe tufuuke abajulizi ku ekyo.

Yisa mutabani wa Mariamu n'agamba nti: Ayi Mukama Omulabirizi Waffe, tussize ekijjulo okuva mu ggulu, kibe embaga gyetuli eri abaliwo muffe n’abalijja oluvannyuma, era nga bujulizi okuva Gy'oli, era tukusaba otugabirire. Ggwe Mugabi asinga.

Allah n'agamba nti mazima Nze nja kukibassiza naye oyo yenna anaakaafuwala oluvannyuma lw’okujja kwakyo, mazima ddala ŋŋenda kumubonereza olubonereza lwe ssigenda kubonereza muntu mulala yenna.

Era jjukira Allah bwe yagamba nti: Owange Yisa Mutabani wa Mariamu, ggwe wagamba abantu nti nze ne Mmange ffembi mutufuule abasinzibwa, muve ku Allah? Aliddamu nti: Mukama Omulabirizi Wange Oli Wayawukana, siyinza kwetantala kwogera kitali kyange, mu butuufu, bwe mba nnakyogera mazima wakimanya, anti omanyi byonna ebiri mu nze atenga nze simanyi biri mu Ggwe, anti mazima ddala Ggwe omanyi ebyekusifu.

Ssaabagamba okuggyako kye wandagira, eky’okubategeeza nti: Musinze Allah Mukama Omulabirizi Wange era nga Ye Mukama Omulabirizi Wammwe, era nnali mujulizi ku byonna bye baakolanga ebbanga lye nnamala nga ndi nabo, naye bwe wantwala, Ggwe wasigala omanyi byonna bye bakola. Anti bulijjo Ggwe osobola okumanya ebikwata ku buli kintu.

Bwoba wa kubabonereza, mazima bo baddu bo, naye bw'obasonyiwa, mazima ddala ggwe nantakubwa ku mukono mugoba nsonga.

(Ku lunaku olwo) Allah agenda kugamba nti, luno lunaku abaayogera amazima, amazima gaabwe lwe gagenda okubagasa, balina Ejjana ezikulukutiramu emigga, bagenda kuzibeeramu olubeerera, Allah yabasiima nabo ne beeyanza, okwo nno kwe kwesiima okusukkulumu.

Obufuzi bw'eggulu omusanvu n'ensi n'ebirimu bwa Allah, era bulijjo Allah Musobozi Wa buli kintu.

Ebitendo byonna ebirungi bya Allah Oyo eyatonda e ggulu omusanvu n'ensi n’assaawo ebizikiza n'ekitangaala, wabula abo abaajeemera Mukama Omulabirizi Waabwe bava ku mazima.

Yye yooyo (Allah) eyabatonda nga abaggya mu ttaka, oluvannyuma n'asalawo buli omu mu mmwe ebbanga ly'anaawangaala, ate n'assaawo ebbanga eddala eggere erimanyiddwa Yye Yekka, ensi lw'erikoma. Ate oluvannyuma mmwe mubuusabuusa.

Era Yye, Ye Katonda mu ggulu omusanvu n'ensi, amanyi bye mukola mu kyama ne bye mukola mu lwatu, era amanyi byonna bye mukola.

Anti tewali kabonero mu bubonero bwa Mukama Omulabirizi Waabwe kabajjira okuggyako nga bakaawukanako.

Mazima baalimbisa amazima bwe gaabajjira, naye luliba lumu ebigambo ebituufu ebikwata kw'ebyo bye baajeejanga biribajjira.

Abaffe tebalaba emirembe emeka agyaliwo olubereberye lwabwe gye twazikiriza! Twabawa okwegazaanyiza mu nsi, okusinga ku ngeri gye twawa mmwe okwegazaanyizaamu, ne tubawa egggulu okuba nga libafukirira enkuba mu bungi, ne tussaawo emigga nga gikulukutira wansi waabwe, naye era ne tubazikiriza olw'ebibi byabwe ne tuleeta oluvannyuma lwabwe omulembe gw'abantu abalala.

Singa twassa ku ggwe Ekitabo ekikoleddwa mu mpapula ne bakikwatako n’emikono gyabwe, abo abaawakanya bandigambye nti, bino temuli okuggyako ddogo lyennyini.

Era ne bagamba nti singa wassiddwa ku ye Malayika atukakasa amazima ge, naye singa twassa Malayika ensonga yandiggweredde awo era ne batalindirizibwa.

Era singa twasalawo okuweereza Malayika twandimuweerezza nga muntu, era e kibatabula kyandibadde kibatabula.

Ababaka bangi baajeejebwa nga tonnatumwa, abo abaabajeeja ne baatuukwako ebibonerezo by'okujeeja kwabwe.

Gamba nti: Mutambule mu nsi olwo nno mulabe e enkomerero y’abaalimbisa bwe yali.

Gamba nti, by'ani ebyo ebiri mu ggulu omusanvu n'ensi (bw'omala) gamba nti bya Allah, yeekakasaako okusaasira era nga agenda kubakuŋŋaanyiza ddala ku Lunaku lw'Enkomerero, tekiriimu kubuusabuusa, (wabula) abo abafaafaaganirwa emyoyo gyabwe tebagenda kukkiriza.

Era bibye (Allah) byonna ebibeerawo ekiro n’emisana, anti bulijjo Yye, y'awulira era amanyi ennyo.

Gamba nti: ndeke Allah neeteerewo e kintu e kirala kyonna e kitali yye! nga ye mukwano gwange ow’omunda, nga ate yye (Allah) yeeyatonda e ggulu omusanvu ne nsi, era yye, yaaliisa ng’ate talisiibwa gamba nti, mazima nze nalagirwa okuba omusaale mwabo abeewaayo era tobeeranga mu bagatta Katonda n'ebintu e birala.

Gamba ggwe nt: Mazima nze ntya singa mba njeemedde Mukama Omulabirizi Wange (okutuukibwako) ebibonerezo by'olunaku oluzibu.

Omuntu alibyesambisibwa ku lunaku olwo, mazima (Katonda) aliba amusaasidde era obwo bwe buwanguzi obweyolefu.

Singa Allah akutuusaako akabi tewali ayinza kukakuwonya okuggyako Yye, naye bw'aba akuwadde ebirungi Yye Ye Muyinza wa buli kintu.

Era Yye, Ye Nnantalemwa, alina mu mikono gye e nsonga z’abaddu bonna, anti Yye Ye Mugobansonga amanyi buli kimu.

Gamba nti: Kintu ki ekisinga obukulu okuba nga bwe bujulizi? Gamba nti: Allah, Ye Mujulizi wakati wange nammwe, era nnaweebwa Kulaani eno nga Bubaka mbe nga mbatiisa nayo n’abo b'erituukako abatali mmwe, ate mmwe muyinza okuleeta obujulizi nti ku Allah kweyongerako bakatonda abalala? Gamba nti: Mazima ddala Yye Allah ali Omu, era mazima ddala nneesambye ebyo bye mugattiriza (ku Katonda).

Abo be twawa Ekitabo bamutegeera (Nnabbi Muhammadi) nga bwe bategeera abaana baabwe. Bo abaadibaga emyoyo gyabwe (ne batategeera ntegeera ntuufu) abo nno bo tebakkiriza (by'obagamba).

Ani mulyazaamaanyi okusinga oyo atemerera Allah nga ddala amanyi nti alimba! oba n’alimbisa Ebigambo bya Allah. Anti mazima abalyazaamaanyi tebagenda kwesiima.

Ku lunaku lwe tulibakuŋŋaanya bonna era ne tugamba abo abaagatta ku Allah ebintu ebirala nti: bakatonda bammwe abo be mwagambanga bali wa?

Awo nno bwe balimala okugwa mu kizibu (olw'okubuuzibwa ekibuuzo ekyo) tebaliba na kya kukola okuggyako okwegaana ne bagamba nti: Tulayira Allah Mukama Omulabirizi Waffe tetubangako mu bagatta ku Katonda bintu birala.

Laba e ngeri gye beerimbamu ne bibaggwaako ebyo bye baagunjangawo.

Era mu bo mulimu abawuliriza byoyogera, naye nga ku mitima gyabwe twassaako ekibikka ne batasobola kubitegeera n’amatu gaabwe ne tuteekamu envumbo, ne bwe balaba ekyamagero kyonna tebakikkiriza, ne batuusa okujja gy'oli nga bakuwakanya abo abaagana okukkiriza ne bagamba nti (byonna byayigiriza) tebirina kye biri okuggyako okuba nti nfumo z’abedda.

Nga bo bagaana abantu okujja eri Nnabbi, era nga nabo bennyini bamwesamba, (mw'ekyo) tebazikiriza okuggyako emyoyo gyabwe naye tebakitegeera.

Singa olisobola okubalaba bwe baliyimirizibwa ku Muliro, olwo nno ne bagamba nti: nga zitusanze singa tuzzibwayo (ku nsi) ne tutalimbisa Bigambo bya Mukama Omulabirizi Waffe olwo nno tube mu Bakkiriza.

Olwo nno biriba byeyolese gye bali e byo bye baakwekanga mu kusooka, ne bwe baaliziddwayo baalizzeemu okukola ekyabagaanibwa, era bo baliba balimba (mu byonna bye baliba boogera).

Era baagamba nti tewali bulamu bulala, okuggyako buno bwe tuwangaala obw'okunsi, era tetugenda kuzuukizibwa.

Waalisaanye olabe, embeera gye balibeeramu nga bayimiriziddwa mu maaso ga Mukama Omulabirizi Waabwe, n’abagamba nti kino kye mulaba si mazima? Bagenda kugamba nti bwe gutyo bwe guli ayi Mukama Omulabirizi Waffe. Alibagamba nti: kale nno mukombe ku bukaawu bw'ebibonerezo olw'ebyo bye mwawakanyanga.

Mazima baafaafaaganirwa abo abaalimbisa okusisinkana Allah, Olunaku lw'Enkomerero lwe lulibatuukako ekibwatukira baligamba nti nga tulabye olw'ebyo bye twayonoona mu nsi, olwo nno nga beetisse ebibi byabwe ku migongo gyabwe abange bibi ddala bye bakola.

Obulamu bwe nsi tebuli okugyako muzannyo na kusanyuka, naye mazima ddala Ennyumba ey'Enkomerero y'esinga obulungi eri abo abatya Allah , abaffe temutegeera.

Mazima tumanyi nti ddala bye boogera bikunyiiza, mazima ddala bo tebakulimbisa naye mazima ddala abslyazaamaanyi Ebigambo bya Allah bye bawakanya.

Mazima Ababaka bangi olubereberye lwo baalimbisibwa ne bagumiikiriza kw'ebyo bye baalimbisibwa, era ne bayisibwa bubi okutuusa okutaasa Kwaffe lwe kwabajjira. Tewali akyusa Bigambo bya Allah. Mazima ebimu ku bigambo ebikwata ku Babaka byakujjira.

Eky'okukwawukanako bwe kiba nga kikuyitiriddeko, kale nno bw'oba nga osobodde okufuna omukwesese mu ttaka oba amadaala agakutwala waggulu obeere ng’obaleetera ekyamagero kyonna (kola ekyo, naye nga tekirina makulu kubanga) singa Allah yayagala yaalibagattidde ku bulunŋŋamu, kale (Nnabbi Muhammadi) tobeeranga mu batategeera.

Abo abawulira okuwulira okutuufu, mazima bajja kwanukula okukoowoola (kwo), so abafu Allah agenda kubazuukiza era Gy'ali gye balizzibwa.

(Abagatta ku Allah e bintu ebirala) bagamba nti singa assiddwako ekyamagero kyonna okuva ewa Mukama Omulabirizi O, bagambe nti mazima Allah asobola okussa ekyamagero kyonna ,naye abasinga obungi tebamanyi.

Tewali kintu kyonna kitambula ku nsi nga kiramu ka kibe kinyonyi ekibuuka n'ebiwawaatiro byakyo okuggyako nabyo bibalibwa mu bika by'ebitonde nga mmwe, tewali kintu kyonna kye twaleka okuggyako nga twakiwandiika ku Lubaawo lukuumibwa obutiribiro Lauh Mahfuudh):(Eggwandisizo lya Katonda) oluvannyuma eri Mukama Omulabirizi Waabwe gye bagenda okukuŋŋŋaanyirizibwa.

Abo bonna abaalimbisa Ebigambo Byaffe bakiggala era bakasiru bali mu bizikiza. Omuntu Allah gw'aba ayagadde abule amubuza, ate gw'aba ayagadde okuluŋŋamya amusobozesa okuluŋŋama eri ekkubo eggolokofu.

Bagambe ggwe (Nnabbi Muhammadi) nti: Mulaba mutya singa Ebibonerezo bya Allah biba bibajjidde oba Olunaku lw'Enkomerero nga lwe lubajjidde, (mu mbeera eyo muyinza) okulaajanira atali Allah bwe muba nga mwogera mazima.

Ekituufu kiri nti Yye Yekka Gwe mulaajanira n'abaggyirawo ekyo kye mumumulaajanidde bw'aba nga ayagadde ne mwerabira n'okwerabira ebyo bye mubadde mumugattako.

Mazima twatuma Ababaka eri abantu b'emirembe egyakukulembera ne tubagezesa n'ebizibu by'obwavu n’obubenje balyoke beetowaze (basinze Katonda omu).

Kale nno singa ebizibu bwe byabajjira beetowaliza (Katonda, kyandibayambye) naye emyoyo gyabwe gyeyongera kuwaganyala. Sitane n'abawundira ebyo bye baali bakola.

Bwe baaleka ebyo bye baabuulirirwa twabaggulirawo emiryango gya buli kintu mu byenfuna, okutuusiza ddala lwe baayitiriza okweyagalira mw'ebyo bye twabawa, ne tubabonereza mbagirawo ne batuuka n’okuba nti tebalina kantu konna.

Katonda yabazikiriza okutuusiza ddala ku asembayo mw'abo abeeyisa obubi, bulijjo okutenderezebwa kwonna kwa Mukama Omulabirizi W'ebitonde byonna.

Bagambe (ggwe Nnabbi Muhammadi nti:) Mulaba mutya singa Allah abafuula bakiggala era ba muzibe, n'ateeka envumbo ku mitima gyammwe, ani asinzibwa atali Allah ayinza okubibaddiza? Laba engeri gye tunnyonnyolamu obubonero ate bo ne babuvaako.

Gamba nti: Mmwe mulaba nti singa Ebibonerezo bya Allah bibatuukako ekibwatukira, oba ne bijja nga mutegedde, waliwo abayinza okubonerezebwa abalala okuggyako abo abeeyisa obubi?

Bulijjo tetutuma Babaka okuggyako nga basanyusa abakozi b’obulungi era nga bwe batiisa abakozi b’ebibi. Oyo yenna akkiriza n’akola emirimu emirungi abo tebalina kutya, era tebagenda kunakuwala.

Ate abo abaalimbisa Ebigambo Byaffe, ebibonerezo bigenda kubatuukako ol'webyo bye baakola.

Gamba ggwe (Nnabbi Muhammad nti) sibagamba nti nze nnina amawanika ga Allah, wadde okubagamba nti mmanyi ebyekusifu, nga bwe siyinza kubagamba nti mazima nze ndi Malayika, tewali kye ngoberera okuggyako Obubaka obutumwa gyendi. Gamba nti muzibe n'oyo alaba? Temufumiitiriza?

Tiisa nayo (Kulaani) abo abatya okuzuukizibwa ne bazzibwa eri Mukama Omulabirizi Waabwe, nga oggyeko Yye, tebalina waamukwano nfanfe wadde omuwolereza. Olwo nno balyoke babeere mu batya Katonda.

Togobanga abo abasinza Mukama Omulabirizi Waabwe enkya n'eggulo nga bakikola ku lulwe, ebibavunaanibwa tewali na kimu kikubanjibwa, nga naawe ebikuvunaanibwa bwe watalli kye babanjibwa, olyoke obagobaganye, ekijja okukuteeka mu balyazaamaanyi.

Mu ngeri y'emu abantu twabagezesa nga tukozesa bannaabwe abamu ne batuuka okugamba nti abo mu ffe fenna Allah be yasalawo okugonnomolako ekyengera (eky'Obukkiriza), (naye okutuuka okwogera e kyo tebamanyi nti) bulijjo Allah amanyi nnyo ebikwata ku bantu abeebaza.

Abo abakkiriza Ebigambo Byaffe bwe baba bazze gy'oli, gamba nti: Emirembe gibeere ku mmwe, Mukama Omulabirizi Wammwe yeekakasaako okusaasira, ne kiba nti oyo yenna mu mmwe akola ekibi mu butamanya oluvannyuma lwakyo ne yeenenya, era n’akola e mirimu emirungi, mazima bulijjo Allah Musonyiyi Musaasizi.

Bwetutyo bwe tunnyonnyola Ebigambo (Byaffe) kisobozese ekkubo ly'aboonoonyi okweyoleka.

Gamba nti: Mazima nze nnagaanibwa okusinza ebyo bye musaba ne muleka Allah Omu, gamba nti: Sijja kugoberera kwagala kwammwe, anti bwe nnaakikola nja kuba mbuze, era sijja kubeera mu baluŋŋamu.

Gamba nti: mazima nze ndi ku mazima agava ewa Mukama Omulabirizi Wange, naye nga mmwe mugalimbisa, kye mwagala kijje amangu (e ky'ebibonerezo) tekiri mu mikono gyange, okusalawo tekuli wantu wonna okuggyako ewa Allah , byonna byayogera mazima, era bulijjo y'asinga abalamuzi bonna.

Singa nze nnina kye mwagala kijje mangu (kyandizze) ensonga wakati wange nammwe n'eggwa, era bulijjo Allah amanyi nnyo abalyazaamanyi.

Era Allah Yekka y'alina ebisumuluzo by'ebyama ebikusike, tewali abimanyi okuggyako Yye, era amanyi ebiri ku lukalu ne mu nnyanja, era tewali kikoola kigwa okuggyako nga akimanya, era tewali mpeke eri mu bizikiza by'ettaka wadde ekibisi oba ekikalu kyonna okuggyako nga kiwandiike mu kitabo e kitottola buli kintu.

Era Yye y'Oyo abeebassa ekiro era amanyi bye muba mwakoze emisana, ate oluvannyuma abazuukusa ekyo kisobozese buli kitonde okumalayo ebbanga eryakigererwa. Oluvannyuma Gy'ali y'eri obuddo bwammwe, olwo nno alyoke abategeeze byonna bye mwakolanga.

Era Yye y'alina obuyinza obwenkomeredde ku baddu Be, era abassaako Bamalayika abakuumi, okutuusa omu ku mmwe bw'aba atuuse okufa, ababaka baffe bamuggyamu obulamu, era bulijjo tebalagajjala.

Oluvanyuma ne bazzibwa ewa Allah Mukama Waabwe owannamaddala.Mukimanye nti obuyinza bwonna bubwe, era nga bulijjo mwangu mu kubala okusinga ababazi bonna.

Gamba nti: Ani ayinza okubataasa ku nzikiza yo'lukalu n’enizikiza y'enyanja, ne muba nga mumusaba olw'okulaga obugonvu mu lwatu ne mu kyama ne mutuuka n'okugamba nti singa (gwe tusaba) atuwonya obuzibu buno tujja kubeerera ddala mu beebaza.

Gamba nti Allah y'ajja okubibawonya, na mu buli kizibu kyonna. Ekyo bwe kiggwa ate ne mugatta ku Katonda ebintu ebirala.

Gamba nti Yye (Allah) y'asobola okubasindikira ekibonerezo kyonna, nga kiva waggulu ne wansi w'ebigere byammwe, n’abafuula ebibinja ebyenjawulo n’akombesa abamu mu mmwe ku bukaawu bwa bannaabwe. Weetegereze engeri gye tunnyonnyolamu ebigambo balyoke babe nga bategeera.

(Kulaani) abantu bo baagirimbisa, ate nga ddala ya mazima meereere, bagambe nti n’olwekyo si nze mbasalirawo.

Buli kintu kibaako ekiseera kyakyo, (n'Enkomerero bw'erituuka) mugenda kumanyira ddala.

Era bw'olabanga abo abajereegerera Ebigambo Byaffe, baviire, okutuusa lwe banaayingira mu mboozi endala, singa Sitaane akwerabiza (n'obeerawo) wonna w'ojjuukirira togenda mu maaso n'otuula n’abantu abalyazaamaanyi.

Era abo abatya Allah tebavunaanyizibwa ku kintu kyonna kikwata ku bantu abo abawakanyi, wabula okubuulirira ob'olyawo balyoke ne batya Katonda.

Vva kw'abo abaafuula eddiini yaabwe ekintu eky'omuzannyo era ekyekinyumu, obulamu bw'ensi ne bubagayaaza, naye buulirira nga okozesa Kulaani omwoyo guleme kuzikirizibwa olw'ebyo bye gwakola, tegulina waamukwano nga oggyeko Allah, wadde omuwolereza, ne bweguliwaayo ennunuzi efaanana etya, tegenda kukkirizibwa kuva gye guli, abo nno be baazikirizibwa olw'ebyo bye baakola, baliweebwa ebyokunywa eby’olweje, era balissibwako ebibonerezo ebirumya ennyo olw’ebyo bye baawakanyanga.

Gamba nti: Tuleke Allah ate tusinze ebyo ebitatugasa era ebitayinza kututuusaako kabi, era tutambule okudda ekyennyumannyuma oluvannyuma lwa Allah okutuluŋŋamya! tufaanane nga oyo Sitaane gwe zibuza mu nsi, n’asoberwa n'aba mu masaŋŋanzira so nga alina mikwano gye abamuyita okujja eri obuluŋŋamu, (nga bagamba nti) jangu eno.(ekyo bwekiba nga tekisobola kwemalirira) gamba nti mazima okuluŋŋamya okuva ewa Allah, kwe kuluŋŋamya kwokka, era twalagirwa okwewaayo eri Mukama Omulabirizi W’ebitonde.

(Era twalagirwa nti) muyimirizeewo esswala era mutye Katonda era Yye y'Oyo nga Gy'ali gye mulikuŋŋaanyirizibwa.

Era Allah Y'oyo, eyatonda eggulu omusanvu n'ensi nga by'ebyo byennyini, era obufuzi buliba Bubwe Olunaku eŋŋombe lw'erifuuyibwa. Omumanyi W’ebyekusifu n'ebirabikako, era Yye ye Mugobansonga, Omumanyi ennyo.

Era jjukira Ibraahiimu bwe yagamba kitaawe Aazara nti: amasanamu g'ofuula Katonda! Mazima nze nkulaba n’abantu bo nga muli mu bubuze obweyolefu.

Mu ngeri y’emu twalaga Ibraahiimu ebiri mu bwengula ne mu nsi (ne'ngeri n'amateeka kwe bitambulira) alyoke abeere mu baddu abannyikivu mu Bukkiriza.

Ekiro bwe kyamubikka, yalaba emmunyeenye kye yava agamba nti oyo ye Mukama Omulabirizi waynge, emmunyeenye bwe yabula (Ibraahiimu) n'agamba nti nze ssaagala bakatonda babulawo.

Bwe yalaba omwezi nga gwetadde n'agamba nti oyo ye Mukama Omulabirizi Wange, omwezi bwe gwabula (Ibraahiimu) n'agamba nti Mukama Omulabirizi Wange bw'atannuŋŋamye nja kubeerera ddala mu bantu ababuze.

Ate nno bwe yalaba enjuba nga evuddeyo n'agamba nti: ono ye Mukama Omulabirizi Wange, ono ye munene ddala, (enjuba) bwe yagwa n'agamba nti abange abantu bange ebyo bye mukola eby'okugatta ku Katonda ebintu ebirala nze sibiriimu.

Mazima nze njolekezza ekyenyi kyange eri Oyo eyatonda eggulu omusanvu n'ensi, nga njawukanira ddala ku nsinza zonna. Siri wa mu bagatta Katonda na bintu birala.

Abantu be ne bamuwakanya n'agamba nti mumpakanya ku Allah nga ate mazima yannuŋŋamya, era nga sitya ebyo bye mumugattako (okuba nga bintusaako akabi), okuggyako nga Mukama Omulabirizi Wange alina ky'akkirizza, Mukama Omulabirizi Wange yeetooloola buli kintu mu kumanya, naye temwebuulirira?

Nyinza ntya okutya ebyo bye mugatta ku Allah, nga ate mmwe temutya kugatta ku Allah bintu birala by'atabassizangako bujulizi. Ku bibinja byombi (ffe nammwe) kiri wa ekisaanidde okulowooza nti kiri mirembe bwe muba nga mumanyi?

(Ekituufu kiri nti) abo abakkiriza ne batatabula Bukkiriza bwabwe wamu na bulyazaamaanyi (Shiriki) , abo nno be balina emirembe era abo be baluŋŋamu.

Obwo bwe bujulizi Bwaffe bwe twawa Ibraahiimu akozese ku bantu be (ekyamussa mu kifo eky'enkizo), bulijjo tusitula amadaala g’oyo gwe tuba twagadde, anti mazima ddala Mukama Omulabirizi Wo agoba nsonga Mumanyi nnyo.

Era (Ibraahiimu) twamugabira Isihaaka ne Ya'akuubu, bombi twabaluŋŋamya nga n’okusooka twaluŋŋamya Nuuhu, ne mu zaadde lye twaluŋŋamya Dauda ne Sulayimaani ne Ayuubu ne Yusufu ne Musa ne Haaruuna, nabwekityo nno bwe tusasula abalongoofu.

Ne Zakariyya ne Yahaya ne Yisa ne Eliyaasa, oluvannyuma buli omu kw'abo wa mu bakozi b’emirimu emirungi.

Ne Ismail ne Iliyasa-a ne Yunusu ne Luutu, buli omu ku bo twamusukkulumya ku bantu abalala.

Era (twaluŋŋamya abantu abalala) nga bava mu bakadde b'abo ne bazzukulu baabwe ne baganda baabwe, era ne tubafuula ab'enjawulo, era ne tubaluŋŋamya ku kkubo eggolokofu.

Okwo kwe kuluŋŋamya kwa Allah, aluŋŋamya na kwo oyo gw'aba ayagadde mu baddu Be, naye singa baagatta ekintu e kirala kyonna ku Katonda, bandiyonoonekeddwa ebyo bye baali bakola.

Abo beebo be twawa ekitabo n’obufuzi n’obwannabbi, kati bano bwe baba nga bawakanya ebintu e byo, mazima twabikwasa abantu abatagenda kubiwakanya.

Abo beebo Allah be yaluŋŋamya, obuluŋŋamu bwabwe oteekeddwa okubugoberera, ogambe nti, (kyenkola) sikibasabirako mpeera kyenkola, si kirala okuggyako okuba nti kujjukiza eri abantu bonna.

(Wabula Abayudaaya) tebaawa Allah kitiibwa kimusaanira, bwe baagamba nti Allah tassanga ku muntu yenna kintu kyonna.Gamba (ggwe Nnabbi Muhammadi) nti: Ani yassa Ekitabo ekyo Musa kye yajja nakyo nga kitangaala era kyakuluŋŋamya bantu (mmwe) kye mwafuula empapula ze mulaga abantu, ate ne mukweka bingi so nga ate mwamanyisibwa bye mwali temumanyi, mmwe ne bakadde bammwe. Bagambe nti Allah ye yassa Ekitabo ekyo, olwo nno obaleke mu bubuze bwabwe nga bazannya.

Kulaani eno Kitabo twakissa nga kyamukisa, nga kikakasa ebyo ebyakulembera, era okikozese nga otiisa abantu b’omu (Makkah), Maama w'ebibuga, n'abantu b'omubitundu ebikyetoolodde. Bo abo abakkiriza Olunaku lw’Enkomerero bakkiriza Ekitabo kino, Ŋ gera bulijjo e sswala zaabwe bazikuuma butiribiri.

Ani eyeeyisa obubi okusinga oyo ayogera ku Allah ebigambo eby'obulimba, oba n'agamba nti nnaweebwa Obubaka so nga taweebwanga Bubaka bwonna, era ani mubi okusinga oyo agamba nti nja kuleeta ebigambo ebifaanana n'ebyo Allah bye yassa! Naye n’omala olaba ekiseera abeeyisa obubi bwe babeera mu bulumi bw'okufa nga Bamalayika bagolodde emikono gyabwe (nga bwe bagamba nti,) muggyemu emyoyo gyammwe, olwaleero luno mugenda kusasulwa ebibonerezo ebinyoomesa olw'ebyo bye mwayogeranga ku Allah eby'obutaliimu, e kyabatuusa okwekuza ne muva ku Bigambo Bye.

Mutujjidde omu omu, nga bwe twabatonda mu kusooka, byonna bye twabawa mubirese mabega wa mmwe, era tulaba bwe muzze temuleese bawolereza ba mmwe, abo be mwawozanga, nti mazima bo ne Katonda bakolera wamu ku mmwe, e nkolagana ekutuseewo wakati wammwe ne bababulako abo be mwali mulowooza nti balibawolereza.

Mazima Allah y’ayasa empeke n’omuwula (ameza ebimera) aggya ekiramu mu kifu era y'aggya ekifu mu kiramu, oyo nno ye Katonda Wammwe. Ate muwugulwa mutya?

(Era Yye y'Oyo) ayasa n’ayawula obudde ne bufuuka emisana, ekiro n'akifuula ekiwummulo enjuba n’omwezi nga byombi bitambula nga bigoberera enkola gye yabiteerawo, okwo kwe kusalawo kwa Nnantakubwakumukono Mugobansonga ku mukono Omumanyi ennyo.

Era Yye y'Oyo eyabateerawo emmunyeenye mube nga muluŋŋama nazo nga muli mu bizikiza, by’olukalu n'ebizikiza by’ennnyanja. Mazima tunnyonnyodde Ebigambo olunnyonnyola olumala eri abantu abamanyi.

Era Yye y'Oyo eyabakola nga abaggya mu muntu omu, nga musinziira mu nnabaana wa bamaama bammwe, era nga musinziira mu migongo gya bataata, tunnyonnyodde Ebigambo (olunnyonnyola olumala) eri abantu abategeera.

Era Yye y'Oyo atonnyesa amazzi (enkuba) okuva waggulu, ne tumeza nago ebimera bya buli kintu, ne tuggya mu byo ebya kiragala, nga tuggya mu byo empeke ezeeweese ku zinnaazo, ne mu mitende ne mubaamu egirina ebirimba ebireebeeta, n’ennimiro ez’emizabibu n’emizeyituuni n'enkomamawanga, ebifaanagana n'ebitafaanagana. Tunuulira ebibala bya byo bwe biba bissizza n'okwengera kwabyo, mazima ddala mu ebyo mulimu obubonero eri abantu abakkiriza.

Bateeka ku Allah abayambi abava mu Majinni so nga ye yabatonda, wabula ate ne bamupaatiikako abaana ab’obulenzi n’abobuwala ekitalina we kiva, Allah asukkulumye era yeesambye ebyo bye bamutemerera.

(Yye Allah) ye Mutandisi W’eggulu n’ensi nga tewali kye yalabirako, ayinza atya okubeera n’omwana ate nga talina mukyala! Era nga Ye yatonda buli kintu era nga Yye (Allah) ku buli kintu Mumanyi.

Oyo nno ye Allah Omulabirizi Wammwe, tewali kintu kyonna kisinzibwa mu butuufu okuggyako Yye Yekka, Omutonzi Wa buli kintu, kale nno Gwe muba musinza, era bulijjo y’alina obuyinza ku buli kintu.

Amaaso tegasobola kumulaba, so nga ate Yye agalaba n’amalayo ebintu byonna, anti Ye Katonda alina obusobozi bw’okumanya buli kintu atalina kiyinza kumwekweka.

Mazima obujulizi bubajjidde nga buva ewa Mukama Omulabirizi Wammwe, omuntu anaalaba anaaba yeeyambye yekka, ate oyo anaaziba amaaso akabi k’ekyo kadda ku ye. Nze siri anaabalondooola.

Bwetutyo nno bwe tunnyonnyola Ebigambo, batuuke n’okugamba nti (Muhammadi) wasoma (ku Bayudaaya okutuuka okumanya bino byonna) era tube nga tubinnyonnyola eri abantu abamanyi.

(Ggwe Muhammadi ky’oba okola) goberera ebyo ebyassibwa gy'oli nga biva ewa Mukama Omulabirizi Wo, tewali kintu kyonna kirina kusinzibwa okuggyako Yye era weesambe abagatta e bintu ebirala ku Allah.

Singa Allah yayagala tebandimugasseeko bintu birala, era tetukussangawo obe kalondoozi ku bo, era ggwe toyinza kuba avunaanyizibwa ku nsonga zaabwe.

Era temuvumanga ebyo bye basaba ebitali Allah, mu kwesasuza bajja kuvuma Allah bayitewo olw'obutamanyabwabwe. Bwetutyo nno buli bantu twabawa okulaba ebyabwe nga bye bisinga obulungi, oluvannyuma ewa Mukama Omulabirizi Waabwe y'eri obuddo bwa bwe, olwo nno abategeeze byonna bye baakolanga.

Era balayira Allah ne bakkaatiriza ebirayiro byabwe, ne bagamba nti singa bajjirwa e kyamagero kyonna baalikikkirizza. Bagambe nti: Ebyamagero byonna bya Allah, naye mumanyira ku ki oba ekyamagero bwe kinajja tebajja kukkiriza.

Tugenda kukyusa e mitima gyabwe n'okulaba kwabwe nga nabo bwe batakkiriza (kulaani) mu kusooka era tubaleke mu bubuze bwabwe nga basobeddwa.

Era mazima singa Ffe twasindika gyebali Bamalayika (okuva mu ggulu) era ne tusobozesa abafu okwogera nabo, era ne twanja mu maaso gaabwe buli kintu nga bakirabako, tekyalibasobozesezza kukkiriza okuggyako olw’okwagala kwa Allah, naye abasinga obungi mu bo tebategeera.

(Nga bwe tukugezesa ggwe Nnabbi Muhammadi n’oba n’abalabe mu batakkiriza) bwekityo buli Nnabbi twamuteekako omulabe nga ali mu bantu ne mu majinni, abamu batumira bannaabwe ebigambo ebiwoomu, naye nga bibi olw'ekigendererwa ky'okugayaaza, naye singa Mukama Omulabirizi Wo yayagala tebandikikoze kale nno baleke n'ebyo bye bagunjaawo.

Era emitima gy'abo abatakkiriza Lunaku lwa Nkomerero gibe nga gibiwuliriza, era babisiime era bagende mu maaso n’okukola ebyo bye bakola.

Nyinza ntya okuleka Allah ne nfuna omulala ansalirawo! Nga ate Yye Ye yassa gye muli Ekitabo (Kulaani) nga kinnyonnyola buli kimu, abo nno be twawa Ekitabo (Tawulaati ne Enjiri) bamanyidde ddala nti kyassibwa okuva ewa Mukama Omulabirizi Wo, nga kyonna mazima meereere, kale nno tobeeranga mu babuusabuusa.

E kigambo kya Mukama Omulabirizi Wo kituukiridde nga kyonna mazima na bwenkanya, tewali asobola kukyusa Bigambo Bye era bulijjo Yye awulira era amanyi nnyo.

Singa onoogondera abantu abasinga obungi mu nsi bajja kukubuza bakuggye ku kkubo lya Allah (byonna bye bakola temuli) okuggyako okuba nti bateebereza, kye bakola tekiri okuggyako kuteeba buteebi.

Mazima Mukama Omulabirizi Wo y'asinga okumanya oyo eyabula n'ava ku Kkubo Lye, era nga bw'ali nti y'asinga okutegeera ebikwata ku baluŋŋama.

Kale nno mulye kw'ebyo ebiba byogereddwako Erinnya lya Allah, bwe muba nga Ebigambo Bye mubikkiriza

Ate muyinza mutya obutalya kw'ebyo ebyogereddwako Erinnya lya Allah nga mazima yabannyonnyola ebyo bye yaziza kummwe, mpozzi ekyo kye muba mukoze olw'obuwaze, naye ate mazima ddala abantu bangi babuza (abalala) nga bagoberera okwagala kwabwe okutaliimu kwesigama ku kumanya, mazima bulijjo Mukama Omulabirizi Wo amanyi nnyo ebikwata ku basukka ensalo Ze.

Muve ku bibi eby'omulwatu ne by'omukyama, mazima ddala abo abakola ebibi bajja kusasulwa ku lw'ebyo bye baakolanga.

Temulyanga kw'ebyo ebitayogereddwako Linnya lya Allah, mazima ddala okukola ekyo bwonoonyi bwennyini, era ddala Sitaane ziwa mikwano gyazo ebigambo babawakanye nabyo, singa mubagondera, nammwe olwo muba mu bagatta ku Katonda ebintu ebirala.

Omuntu eyali omufu ne tumuwa obulamu, ne tumuwa ekitangaala ky'akozesa nga atambula mu bantu, ayinza okufaanana ng’oyo ali mu bizikiza byatasobola kufulumamu. Nabwekityo abakaafiiri balaba nga bye bakola nga bye bisinga obulungi.

Nabwekityo twassa mu buli kitundu abakulira abajeemu baamu, babe nga bakolerera okusaasaanya obukyamu mu kyo, bye bakola tebituusa kabi okugyyako ku bo bennyini naye tebamanyi.

Obujulizi obwenkukunala bwe bubajjira bagamba nti: Tetujja kukkiriza okutuusa nga tuweereddwa ng'ebyo ebyaweebwa Ababaka ba Allah, (ekituufu kiri nti) Allah amanyidde ddala w'assa Obubaka Bwe, abo aboonoona bajja kutuukibwako okunyoomebwa mu maaso ga Allah n’ebibonerezo ebikakali, lw'okusaasaanya kwabwe ebikyamu.

Omuntu Allah gw'aba ayagadde okuluŋŋamya ayanjuluza ekifuba kye eri Obusiraamu, ate oyo gw'aba ayagadde okubuza afunza ekifuba kye n'atuuka okuba nga tawulira bulungi n’afaananako oyo agenda waggulu mu bwengula. Allah bw'atyo bw'assa ekibonerezo kw'abo abatakkiriza.

Lino ly'ekkubo lya Mukama Omulabirizi Wo wo eggolokofu, mazima ebigambo tubinnyonnyodde eri abo abasobola okwebuulirira.

Bagenda kufuna ennyumba ey'emirembe ewa Mukama Omulabirizi Waabwe, era Yye ye Mutaasa Waabwe olw'ebyo bye baakolanga.

(Ggwe Nabbi Muhammad) lowooza olunaku Katonda lwalikungwanya (abakaafiiri) bonna, (abagambe nti) abange mmwe amajinni mwabuza abantu bangi nnyo, mikwano gya majinni mu bantu ne bagamba nti ayi Mukama Omulabirizi Waffe ffenna twesanyusizanga wamu ne tutuuka ku kiseera kyaffe kye watugerera okuba ku nsi, Katonda n'abagamba nti: Omuliro bwe buddo bwammwe, muli baakugubeeramu bugenderevu okuggyako oyo ebbanga ly'aliba ayagadde, anti mazima Mukama Omulabirizi Wo Mugobansonga Mumanyi nnyo.

Bwetutyo bulijjo abeeyisa obubi tubafuula mikwano gya bannaabwe bwe bafaanana olw'ebyo bye bakola.

Abange mmwe amajinni n'abantu Ababaka tebaabajjira nga bava mu mmwe nga babategeeza Ebigambo byange era ne babatiisa, okutuuka ku lunaku lwammwe luno, baligamba nti twewaako obujulizi (nti byonna baabitugamba, naye ekyabaleetera okubula) obulamu bw'ensi bwabagayaaza, olwo nno ne baba nga beekakasizzaako ddala nti baali bakaafiiri.

Ekyo nno eky'okutuma Ababaka) kyaliwo lwakuba nti Mukama Omulabirizi Wo yali tayinza kuzirikiza bantu ba kitundu kyonna olw'okweyisa obubi nga abantu baamu tebamaze kumanyisibwa (Mateeka Ge).

Buli omu ku bo alina amadaala okusinziira ku bye yakola Mukama Katonda Omulabirizi Wo tayinza kumala galeka ebyo bye bakola.

Mukama Omulabirizi Wo talina kye yeetaaga, Ye Nnannyini kusaasira. Bw'aba ayagadde asobola okubaggyawo n'abasikiza abo b'aba ayagadde oluvannyuma lwammwe, nga nammwe bwe yabassaawo nga abagya mu zzadde ly’abantu abalala.

Mazima ebyo bye mulagaanyisibwa bya kutuukirira ate mmwe temugenda kusobola kubiremesa.

Gamba (Ggwe Nnabbi Muhammadi) nti: Abange abantu bange mubeere ku nkola yammwe, nange, nkole ebyange, kyaddaaki mulimanya obuddo obw'enkomerero ennungi bw'ani, mazima ddala bulijjo abeeyisa obubi tebagenda kutuuka ku buwanguzi.

Ne bateerawo Katonda omugabo mu birime ne mu bisolo, mu kujweteka kwabwe ne bagamba nti, guno omugabo gwlŋŋa Katonda, naguno gwa ba katonda baffe abalala, oguba ogwa ba katonda baabwe tegutuuka w’a Katonda, ate oguba ogwa Katonda, gwo gutuuka ku bakatonda baabwe abalala, ennamula yaabwe mbi.

Mu ngeri yeemu, abagatta ku Katonda e bintu e birala, bakatonda baabwe baabalaga nti kirungi okutta abaana baabwe, ne babatuusa okukola ekivve (eky'okutta omuntu ) nga bababuza, era babe nga babuzaabuza eddiini yaabwe, singa Katonda yayagala tebandikikoze kale baleke n'ebyo bye bagunja.

Era abagatta ku Katonda ebintu ebirala bagamba nti: Bino ebisolo n’ebirime bya muzizo tebikkirizibwa kuliibwa okuggyako oyo gwe tuba twagadde, ate ne baba n’ebisolo bye baziza okwebagala, ate nebaba n’ebisolo ebirala bye batayogererako linnya lya Katonda ( nga bagenda okubisala) byonna nga bigambo bigunje ku Allah, ajja kubasasula ebyo bye baali bagunja.

Era (abagatta ku Katonda e bintu e birala) baagamba nti amawako g’ebisolo gakkirizibwa kuliibwa basajja bokka mu ffe, era tegakkirizibwa bakyala baffe, naye (amawako ago) bwegavaamu nga gafudde olwo bonna bakkiziribwa okubirya. Katonda ajja kubasasula olw'okutetenkanya kwabwe okwo, anti mazima Katonda Mukama Wo Mugobansonga, Mumanyi nnyo.

Mazima baafaafaaganirwa abo abatta abaana baabwe mu busiru olw'obutamanya, era mu ngeri y'okutemerera Allah ne baziza ebyo Allah bye yabagabira, mazima baabula era tebaali baluŋŋamu.

Era Yye (Katonda) y'Oyo eyateekawo amalimiro agabalira ku ttaka n'ago agatabalira ku ttaka, n’emitende n'ebimera (ebirala) nga okuwooma kwabyo kwawukamu, n'e mizayituuni n’enkomamawanga ebifaanagana mu ndabika yaabyo ate nga obuwoomu bwabyo bwawukamu, mulye ku bibala byabyo bwe biba nga bibaze ate muggyemu n'omutemwa gwabyo (ogwa Zzaka) olunaku lwe mubikungula, wabula temusukkanga ekigero kyabyo (mu nkozesa ne mu kutoola zzaka), anti Allah tayagala basukka kigero.

Era (Katonda yateekawo) mu bisolo ebyetikka n’ebirala nga biggyibwako eby'okwaliira, mulye kw'ebyo Allah bye yabagabira so temugoberera buwufu bwa Sitaane, anti mazima yye gye muli mulabe wa lulango.

Ebisolo ebirundibwa (Katonda bye yatukkiriza okulya) e mitindo gyabyo giri munaana, ebiri mu ndiga, n’ebiri mu mbuzi, bagambe (ggwe Nnabbi Muhammadi) nti: Ensajja z’ombiriri Katonda ze yaziza ku mmwe, oba enkazi, oba amawako gaazo zombiriri, mumbuulire nga musinziira ku kumanya bwe muba nga bye mwogera bya mazima.

Ne mu ŋŋamiya emitindo ebiri, ne mu nte emitindo ebiri, bagambe (ggwe Nnabbi Muhammadi) nti: Ensajja z’ombiriri ze yaziza oba enkazi, oba amawako ga zombiriri, abaffe mwaliwo nga Allah akibalagira! olwo ani eyeeyisa obubi okusinga oyo agunja ku Allah obulimba, atuuke okubuza abantu awatali kumanya, bulijjo allah taluŋŋamya bantu beeyisa bubi.

Gamba ggwe (Nnabbi Muhammadi) nti: Mu bubaka obwampebwa temuli kiri Haraamu kw'oyo aba ayagadde okukirya, be ppo nga ebadde nnyamanfu oba omusaayi ogwa kaffecce, oba ennyama y'embizzi, mazima ekikolwa eky’okulya ebintu ebyo kivve, oba (mu biri Haraamu) y'ensolo esalibwa mu bujeemu nga eyogereddwaako erinnya eritali lya Allah. Wabula omuntu aba alemereddwa nga takikola lwa jjoogo wadde okumenya Amateeka ga Katonda, mazima Mukama Omulabirizi Wo Musonyiyi era Musaasizi.

Era twaziza ku Bayudaaya buli kisolo ekirina enjala, ate nga ente n'embuzi, twaziza ku bo amasavu gaazo okuggyako ag'okumugongo oba ebyenda oba agali mu nnyama ey'okuggumba, ekyo twabasasula nakyo lwabubuze bwabwe, mazima Ffe buli lwe twogera kiba ky'ekyo.

Bwe bakulimbisa gamba nti: Mukama Omulabirizi Wammwe Okusaasira Kwe kugazi, kyokka ate Ebibonerezo Bye tebiyinza kuwonebwa bantu boonoonyi.

Abo abagatta ebintu ebirala ku Katonda bajja kugamba nti singa Allah yayagala ffe ne bakadde baffe tetwandigasse kintu kirala ku Katonda, era tewali kintu kye twandifudde Haraamu, bwebatyo n'abaakulembera bwe baalimbisa okutuusa lwe baakomba ku bukaawu bw'e bibonerezo Byaffe. Gamba nti: Abaffe (mwogera ebyo) nga mulina kye musinziirako! Kale mukitulage, tewali kye mugoberera okugyako okulowoolereza era kye mukola si kirala okuggyako okuteebereza.

Gamba (Ggwe Muhammadi) nti: Obujulizi obumatiza bwa Allah. Kale nno singa yayagala mwenna yaalibaluŋŋamizza.

Gamba (Ggwe Muhammadi) nti: Muleete abajulizi bammwe abo abajulira nti mazima Allah yaziza ekintu gundi, bwe bajulira ne bakikakasa ggwe toba nabo, era togoberera n'omulundi n'ogumu okwagala kw'abo abalimbisa Ebigambo Byaffe, n'abo abatakkiriza Lunaku lwa Nkomerero, era nga bo bagatta ebintu ebirala ku Katonda Waabwe.

Gamba nti mujje mbasomere ebyo Katonda Wammwe bye yafuula eby'omuzizo kummwe, temumugattangako ekintu kyonna, abazadde ababiri bateekeddwa okuyisibwa obulungi, temuttanga abaana bammwe olw’okutya obwavu, Ffe tugabirira mmwe nabo, era temusembereranga eby'obuwemu eby'olwatu mu byo n’ebyekwese, temuttanga omuntu oyo Allah gwe yaziza okuggyako nga waliwo ensonga entuufu. Ebyo nno (Katonda) yabibakalaatira kibayambe mube abategeera.

Era temusembereranga emmaali ya bamulekwa okuggyako mu ngeri esinga okuba nnungi okutuusa omwana oyo nga akuze mu birowoozo, era mutuukirize ebipimo n'ebigero mu bwesimbu, omuntu tetumulaalikako okuggyako ekyo ky'asobola, era bwe muba nga mwogera mulage amazima aweebwako obujulizi ne bw'aba waaluganda, era mu ngeri ey'enjawulo mutuukirize obweyamo bwammwe bwe mwawa Allah. Ebyo nno Katonda yabibakalaatira kibayambe okujjukira (mwekube mu kifuba).

Era mazima ddala lino ly'ekkubo Lyange eggolokofu, kale nno lye muba mukwata, temugobereranga obukubo obulala ne kibakyusa okuva ku Kkubo Lye, ebyo nno yabibakalaatira mmwe mulyoke mube abamutya.

Era (mukimanye) nti twawa Musa Ekitabo nga kujjuuliriza eri oyo akola obulungi era nga kittottola buli kintu, era nga buluŋŋamu na kusaasira, kibasobozese okukkiriza nti bagenda kusisinkana Mukama Omulabirizi Waabwe.

Na kino Ekitabo (Kulaani) twakissa nga kya mukisa kale nno mukigoberere era mutye Katonda olwo nno musaasirwe.

Muleme kugamba nti: Bwo Obubaka bwaweebwa ebibinja bya mirundi ebiri ebyatukulembera ate nga twali tetufaayo ku bye basoma.

Oba muleme kugamba nti: Singa mazima ddala twassibwako Ekitabo twandibadde baluŋŋamu okusinga bali. Mazima obunnyonnyofu okuva ewa Mukama Omulabirizi Wammwe n'obuluŋŋamu n’okusaasira byabajjira, kaakati ani eyeeyisa obubi okusinga oyo alimbisa e Ebigambo bya Allah n'abiwugukako? Abo abawuguka okuva ku Bigambo Byaffe tujja kubasasula nga tubatuusaako Ebibonerezo ebikakali olw'okuwuguka kwe baakolanga.

Abaffe balina kye balindirira mpozzi Bamalayika okubajjira, oba Mukama Omulabirizi Wo ajje, oba obumu ku bubonero bwa Mukama Omulabirizi Wo bujje, (wabula) olunaku, obumu ku bubonero bwa Mukama Omulabirizi Wo lwe bulijja, omuntu tagenda kuganyulwa mu kukkiriza kwe kasita aliba nga mu kusooka teyali Mukkiriza oba obukkiriza bwe nga tebwamuyamba kukola birungi. Gamba (ggwe Muhammadi) nti: Mulindirire mazima naffe tulindiridde.

Mazima ddala abo abatemaatema mu ddiini yaabwe, ne bafuuka biwayi tolina kakwate nabo ku kintu kyonna, mazima ensonga zaabwe ziri wa Allah (y'agenda okubalamula), olwo nno alyoke abategeeze ebyo bye baakolanga.

Omuntu alijja nga akoze ekirungi kimu, alifuna empeera yaakyo emirundi kkumi, ate oyo alijja nga akoze ekibi, tagenda kusasulwa okuggyako ekyenkana n'ekyo kye yakola, era nga bulijjo, nabo tebagenda kulyazaamaanyizibwa.

Gamba nti: Mazima nze Mukama Omulabirizi Wange yannuŋŋamya ku kkubo eggolokofu, nga Ddiini ennambulukufu, Eddiini ya Ibraahiimu, eyali omwesimbu mu nzikiriza, era tabangako mu bagatta ku Katonda kintu kirala.

Gamba (Ggwe Muhammadi) nti: Mazima okusaala kwange, n’okusaddaaka kwange ebisolo, n’obulamu bwange, n’okufa kwange, byonna biri eri Mukama Omulabirizi W’ebitonde.

Tewali kimugattibwako, bwentyo nno bwe nnalagirwa, era nze musaale mu beewaayo ewa Katonda.

Gamba Ggwe (Nnabbi Muhammadi) nti: Abaffe nnyinza okuleka Allah ne nfuula ekintu ekirala kyonna okuba nga ye mulabirizi wange, so nga ate Yye ye Mulabirizi wa buli kintu, tewali kibi muntu ky'akola okuggyako nga kidda gy'ali, era tewali muntu yeetikka kibi kya mulala. Oluvannyuma eri Mukama Omulabirizi Wammwe y'eri obuddo bwammwe abalamule mu ebyo bye mwali mwawukanamu.

Era Yye y'Oyo eyabateekawo nga mujja musikira obuvunaanyizibwa ku nsi, era n'asitula abamu kummwe mu madaala, olwo nno abagezesenga mu ebyo bye yabawa, mazima Mukama Omulabirizi Wo mwangu wa kubonereza, era mazima ddala Yye Musonyiyi nnyo Musaasizi.