Luhya Meal — Uluslararası İlim ve Kültür Cemiyeti — Duhan 44:1 – Mürselat 77:50

Ha, Mim.

Nditsuba khushitabu shinoosinjia.

Toto efwe khwashishia mushilo shietsikhabi, toto efwe khuli abekanyilisi.

Toto eshilo esho buli likhuwa eliamachesi linoosibungwa.

Likhuwa lirula khwifwe, toto efwe nefwe Abaruma.

Tsimbabaasi okhurula khu Nyasaye wuwo Omulesi, toto Ye ni Omuwulili po, Omumanyi muno.

Nyasaye Omulesi welikulu nende eshialo, nende bioosi bili hakari wabio, toto nimuli mbu mwasuubila noobwatoto.

Abulaho Nyasaye wundi halali Ye tawe, alamusinjia ne afwisinjia. Nyasaye wenyu Omulesi khandi owabasenywe beyimbeli.

Halali bo bali mutsinganakani, babayanga sa.

Kho linda inyanga yelikulu liakharusie omwosi kulolekha.

Kulifunikha Abandu, shino ni eshinyasio eshilulu.

"Nyasaye wefu Omulesi, khuyiniliekhwo eshinyasio, toto efwe khulasuubila."

Okhwitsulila khwabu khubakhoonya shina bulano, ne toto Omurumwa Omwinoosia yamala okhubeetsela.

Mana nibamuhelesia omukongo, nibaboola mbu: “Uno yechesibwa, naye ni Omulalu.”

Toto efwe khwitsa okhuyiniaho eshinyasio hatiti, ne toto enywe mulakalukha shinga mwali.

Inyanga yakhulikhupa eshikhupo eshikhongo, toto efwe khulibarunga imongo.

Ne toto efwe khwakholela Abandu ba Firauni amatemo imbeli wabu, ne yaboolela Omurumwa woluyali.

Naboola mbu: “Mumbe (akeekhoyeshele), Abasumba ba Nyasaye, toto esie endi Omurumwa omwisikwa khwinywe.

Ne mulakholela Nyasaye obufuru tawe. Toto esie ndalabarerera ebifune biyela.

Ne esie ndiliinda khu Nyasaye wanje Omulesi khandi Nyasaye wenyu Omulesi mulandasa amachina tawe.

Ne nimulasuubila tawe, be ehale ninasi.”

Nasaba Nyasaye wuwe Omulesi mbu: “Toto bano ni Abandu abamabii.”

Mana Nyasaye naboola mbu: “Rula nende Abasumba banje eshilo. Toto enywe mulalondwakhwo.

Ne oleshe inyanza endio ngayilekhaane. Toto abo ni omukanda kweliyie kwitsa okhusishibwa.”

Ne balekha emikunda chinga nende tsisebele?

Nende emimela nende obwami bwoluyali.

Nende obwokholo bwabasangalilanga.

Endio nilwa kali, mana nikhuhelesia ako Abandu bandi.

Ne likulu nohomba eshialo shibialila khulwa bo tawe, ne shibahebwa ebise tawe.

Ne toto khwahabina Abana ba Israili okhurulana nende eshinyasio shiokhubatutuyia.

Okhurulana nende Firauni, toto ye yali Omufuru mubalia babura eshichelo.

Ne toto khwabalobola khumachesi kefu, okhushila ebilonje bindi bioosi.

Ne nikhubahelesia ebimanyisio biefu, amatemo kalolekha.

Toto bano baboolanga mbu:

“Khubulaho okhufwa khundi tawe halali okhufwa khweimbeli sa, ne efwe shikhulilamusibwa tawe.

Mana lamusiekhwo basefwe nikali mbu muboolanga habwene.”

Koo, abo naabalayi muno nohomba Abandu ba Tuba’ nende balia baliho imbeli wabu bakhwasishia? Toto abo bali abamabii.

Ne efwe shikhwaloonga likulu nende bioosi bilimwo khumubayo tawe.

Shikhwabiloonga tawe halali khubwatoto, ne abaanji mubo shibamanyile tawe.

Toto inyanga yokhubusia eshina ni ebise biabu biabarererwaho boosi.

Inyanga yomwitsa omukhoonyi shalikhoonya owashie nende shiosishiosi tawe, ne shibalihabinwa tawe.

Halali ulia owa Nyasaye alihelesia tsimbabaasi. Toto ye niwa Amaani, Owobukoosia muno.

Toto omusaala kwa Zaqum.

Ni eshiakhulia shia owetsimbi.

Shinga amafura kasalulusibwe karabachilanga munda.

Shinga okhurabachila khwa amatsi kayile pa.

Baliboolelwa mbu: “Mumutile mana mumusukune hakari womulilo kwa Jahim.

Mana muyombole khumurwe kukwe eshinyasio shia amaatsi karabachilanga.

Pila.. toto (mbu newe welolanga), newe Omwami, Woluyali?

Toto kano niko kamwakanakanangakhwo.'”

Toto abaria Nyasaye baliba habundu womulembe.

Mumikunda chomwikulu nende mutsisebele.

Balifwala tsingubo tsinderere tsinyangu tsia hariri..nende tsisiro .. nibahengana.

Endio nilwo lwakaliba, ne khulibabashila mahurul-ain (abakhana bomwikulu).

Bali laangamwo ebiamo bietsimbia tsioosi nibekhaale nomulembe.

Omo shibalipilamwo lifwa tawe, halali okhufwa khwokhuranga. Ne Nyasaye alibalinda okhurulana nende eshinyasio shia Jahim.

Tsino nitsimbabaasi okhurula khu Nyasaye wuwo Omulesi, okho nikho okhubura okhukhongo.

Ne efwe khwaikhola (Ikurani) okhuba inyangu khululimi lulwo kho banyoole okhwitsulila.

Kho liinda, bosi toto baliindanga butswa.

Ha, Mim.

Okhwishibwa khweshitabu shino khurula khu Nyasaye Owaamani, Owamachesi muno.

Toto khulikulu nende khushialo biliwo ebimanyisio khubalia basuubila.

Nende mukhuloongwa khwenyu, nende tsisolo tsiayaswaania, ebimanyisio bilimwo khubandu basuubilanga muno.

Ne okhubusania khweshilo nende eshitere nende omukabo kwa Nyasaye yeshinjia okhurula hekulu, mana nalamusia khukwo eshialo okhurula mulifwa liashio, nende okhubotokhana khwomuyeka, ebimanyisio bilimwo khubandu bekhonyelanga obwongo.

Tsino ni tsinyaali tsia Nyasaye khukhusomelanga khubwatoto, ne makhuwa shina kabanyala okhusuubila nikalali ka Nyasaye nende ebimanyisio bibie tawe?

Eshinyasio eshikhongo shilinyoola buli omubeyi po, wetsimbi muno.

Awulilanga tsinyaali tsia Nyasaye nitsisomwa khulwa ye, niyekhulumamia khukalia kayakaywa, niyelola opara mbu shaatsiwulilekhwo tawe. Kho musuubisie eshinyasio eshilulu.

Ne namanya eshindu shiosishiosi mutsinyaali tsiefu nashikhonga okhuba omubayo. Abandu abo nibo baliba nende eshinyasio shiokhututuyibwa.

Inyuma wabu ni Jahannam, kabakhola shikalibakhoonya shiosishiosi tawe, nohomba balia babakhola okhuba abalindi, ne baliba neshinyasio eshikhongo.

Buno ni obulunjifu, ne balia bakhaya ebimanyisio bia Nyasaye wabu Omulesi balinyoola eshinyasio eshilulu eshibii.

Nyasaye niye wakhola inyanza ibarumushile kho ebininwa bichendemwo khubunyali bubwe, ne kho mukhaabemwo omukabo kukwe, kho munyoole okhupa orio.

Niye wakhola bibarumushile ebili mwikulu nende mushialo bioosi okhurula khuye. Toto mu ako bilimwo ebimanyisio khubandu baparanga.

Boolela abasuubila mbu baleshele balia abalasuubilanga tsinyanga tsia Nyasaye tawe, kho anyoole okhubarunga Abandu khukabakholanga.

Ulia ukhola amalayi, yekholelanga omwene, ne ukhola amabii kali khuye, mana mulikalusibwa ewa Nyasaye wenyu Omulesi.

Ne toto khwahelesia Abana ba Israili Eshitabu, nende amalako nende oburumwa, mana nikhubakaba emikabo emilayi, ne nikhubakholela obulayi muno okhushila Abandu boosi.

Mana nikhubahelesia amalako kalolekha kali habulafu, ne shibawukhana tawe halali nibakhanyoola obumanyi, khulwe ishinda yali hakari wabu. Toto Nyasaye wuwo Omulesi alibusia eshina hakari wabu inyanga yeyindukho khukabawukhananga.

Mana nikhukhura ewe khunjila ya amakhuwa kano, kho iloondekhwo, ne olaloonda obwikombi bwa balia balamaanyile tawe.

Abo shibalikhukhonyakhwo shiosishiosi imbeli wa Nyasaye tawe, ne toto abonooni ni abetsa abeene khubeene, ne Nyasaye ni Omwitsa wa balia bamuria.

Bino ni ebimanyisio bia Abandu okhulolelakhwo, nende obulunjifu nende tsimbabaasi khubandu basubilanga nobwatoto.

Nohomba abakholi betsimbii baparanga mbu khwakhabakhole shinga balia abasuubila mana nibakhola amalayi, nashilala okhumenya khwabu nende okhufwa khwabu? Ni obubii buli burie bwababusinjia.

Ne Nyasaye yaloonga likulu nende eshialo khubwatoto, ne khobuli Omundu arungwe khukayakhola, nabo shibalikholelwa obubii tawe.

Koo, walolakhwo ulia wakhola obwikombi bubwe okhuba nyasaye wuwe mana Nyasaye namukosia, kata nali nende obumanyi, mana naasuba khumarwi keke nende khumwoyo kukwe, ne nara khutsimoni tsitsie shiokhutsisuba kho owakhamulunjisia ni wina nalali Nyasaye tawe, shimwitsulilangakhwo?

Ne baboola mbu: “Buno ni obulamu bwokhushialo, khufwitsanga ne khumenyanga, ne shibulaho shikhusishia tawe halali tsinyanga.” Ne babula obumanyi bwako, halali baparanga butswa.

Ne nibasomelwa tsinyaali tsiefu tsia habulafu, babula eshifune halali baboola mbu: “Lamusiekhwo bapapa befu nikali mbu muboolanga akatoto.”

Boola mbu: “Nyasaye niye ubalamusinjia khandi niye ulibafwisia, mana alibakhung’asia inyanga yeyindukho ibulamwo obukanakani tawe, halali Abandu abanji shibamanyile tawe."

Ne obwaami bwomwikulu nende khushialo nibwa Nyasaye, ne inyanga yeyindukho olwa yiliula, abonooni bakhasikhe.

Ne olilola buli omukanda nikusikame hasi, buli omukanda kulilangwa okhutsia okhusoma eshitabu shiakwo. Lelo mularungwa kamwakholanga.

Eshitabu shiefu shino shiboolanga khwinywe khubwatoto, toto efwe khwahandikanga akamwakholanga.

Ne balia basuubila mana nibakhola amalayi, Nyasaye wabu Omulesi alibenjisia mutsimbabaasi tsitsie. Okho nikho okhubura khwa habulafu.

Ne balia bakhaya baliboolelwa mbu: “Shimwasomelungwakho tsinyaali tsianje mana nimuba nende obufuru mumioyo chienyu, mana nimuba Abandu ababii?"

Ne olwa liboolwa mbu: "Toto indache ya Nyasaye niyahabwene, ne inyanga yeindukho ibula tsinganakani", nanyu muboola mbu: "Khukorerwe indukho eyo. Khuparirisinjiakhwo butswa, ne khubula obusubili bwatoto.”

Mana obubii bwabakhola bwakhabaloleshele, ne kalibolela kalia akabakholelanga omubayo.

Baliboolelwa mbu: “Olwalelo khubebilila shingala enywe mwebilila omukhung’ano kweyinyanga yenyu ino. Eshimenyo shienyu nimumulilo, ne mubula babahabina.

Khulwo khuba enywe mwakholelanga tsinyaali tsia Nyasaye omubayo mana obulamu bwokhushialo nibubakatilisia.” Kholeelo shibalirusibwamwo tawe nohomba shibalileshelwa tawe.

Kho okhwitsomibwa nikhwa Nyasaye Omulesi we likulu, Omulesi weshialo, Omulesi webilonjo bioosi.

Ne obukhongo ni obubwe butswa yenyene, mwikulu nende khushialo, naye ni owa Amaani, Omuchesi muno.

Ha, Mim.

Okhwishibwa khweshitabu khurula khu Nyasaye owa Amaani, Omuchesi muno.

Shikhwaloonga likulu nende eshialo nende bioosi bili hakari wabio halali khubwatoto nende ebise biarebwaho. Ne balia bakhaya shibabukulanga oluchendo mukabekanyilisibungwa tawe.

Boola mbu: “Mulolangakhwo biamulamanga bilali Nyasaye, munzechesie ni shina shabialonga shili khushialo, nohomba bali nende obulala khu walonga likulu, mundererekhwo eshitabu eshialiho imbeli wa shino, nohomba eshimanyisio shiosishiosi shiobumanyi nikali mbu muboolanga obwatoto?”

Ni omukori omukhongo uli arie ushilakhwo ulamaanga abalali Nyasaye tawe, abalalibafuchilila okhula inyanga yeyindukho tawe, nabo kata bakorerwe obusabi bwabu obo.

Ne olwa Abandu balikhung’asibwa, baliba abasuku khubo, ne balikaana okhulamwa khwabu okho.

Ne nibasomelwa tsinyaali tsiefu etsili habulafu, abakhayi baboolanga nibakhalola obwatoto mbu: “Buno ni obulosi bwa habulafu.”

Nohomba baboolanga mbu: “Yekasiliasa omwene”, boola mbu: “Nikali mbu ndekasilia omwene, enywe shimulikhoonyakhwo shosishosi imbeli wa Nyasaye tawe. Ye amanyile muno kamutiabukhanga. Ye niye omuloli hakari wanje ninenyu, naye ni Omunji wobulesheli, Owetsimbabasi muno.”

Boola mbu: “Esie shendi omwishemuli (wokhwibukhasa) mubarumwa tawe, ne engorwa ngala ndilikholwa nohomba enywe. Enondanga butswa kefimbulilungwa nende Nyasaye. Ne shendi shiosishiosi tawe halali omwikanyilisi wa habulafu.”

Boola mbu: “Mulola murie nikali mbu kano karula khu Nyasaye, mana mukakhaye, mana abeho omuloli okhurula mubaana ba Israili khukali shinga kano, mana nasuubila, nanyu mukhaye?” Toto Nyasaye shalunjisinjia betsimbi tawe.

Ne abakhayi baboolela abasuubila mbu: “Kano kabetsanga mbu namalayi, shibakhakhuranjilile efwe tawe.” Ne olwabakhaya okhulunjikha khuko, baboola mbu: “Buno ni obubeyi bwa khale.”

Ne imbeli wuwe shaliho eshitabu shia Musa, shiobulunjifu nende tsimbabaasi, ne shino ni eshitabu shitinyisia, shiolulimi olwarabu kho shikanyilisie abetsimbi ne shisuubisie abakholi bamalayi.

Toto balia baboola mbu: “Nyasaye wefu Omulesi ni Allah (Nyasaye)”, mana nibaba abalunjifu, shibaliba nobuyendi tawe ne shibalibeelela tawe.

Abo nibo Abandu bomwikulu, balimenyamwo tsinyanga tsioosi, omurungo khukabakholanga.

Khwalomesia omundu akholele abebusi bebe babili amalayi. Nyinamwana yamuchinga munda khukhusanda ne namwibula khukhunyakhana. Okhumuchinga munda nende okhumuleshesia okhununa ni emiesi amakhumi kataru. Okhula ngala yola omundu omukhongo mana niyola emika amakhumi kane, naboola mbu: “Nyasaye wanje Omulesi, nyalila enyoole okhupa orio khumikabo chichio chiawambelesia nende khubebusi banje, ne ekhole amalayi kakhuchamisia, ne ungasilie olwibulo lwanje, esie toto ndikanile khwiwe, ne esie toto endi mubasalamu.”

Abo nibo bakhulifuchilila ebikhole biabu biabakholanga, ne khulibaleshela tsimbii tsiabu, ne baliba mubandu bomwikulu. (Ino ni) Indache yatoto yabalakungwa.

Ne ulia wekhanila abebusi bebe babili, nababoolela mbu: “Murisinjia mbu ndililamusibwa, ne lwabura olwibulo olunji neshili okhubaho”, ne abebusi abo basabanga obukhoonyi khu Nyasaye nibaboola mbu: “Abaane ewe suubila, toto indache ya Nyasaye niyatoto”, naye aboola mbu: “Ni shina shino? Tsikhali butswa tsingano tsia abakhale.”

Abo nibo bamakhuwa kabu kabusibwa mubandu babura imbeli wabu Mumajini nende Abandu. Toto abo banyoola okhusikha.

Ne boosi baliba nende ebichelo biawukhane khukabakhola, kho abarunje ebikhole biabu mubwitsufu, nabo shibalikholelwa obubii tawe.

Ne inyanga yabakhayi balirerwa mumulilo, baliboolelwa mbu: “Mwamala okhubukula ebilayi bienyu khubulamu bwokhushialo, mana nimubwikhoyela, kho lelo luno mularungwa eshinyasio shietsisoni khulwa okhukhola obufuru khwenyu khushialo khunjila ilali yatoto tawe, nende khulwa amabii kenyu kamwakholanga.”

Ne itsulila omusiani wababu A’d, olwa yekanyilisia abandu be khumatulo koluyeshe, ne toto abekanyilisi abanji babura imbeli nende inyuma wuwe, nibaboola mbu: “Mulalaama shiosishiosi tawe halali Nyasaye. Esie toto ebaririranga eshinyasio shieinyanga ikhongo.”

Baboola mbu: “Okhwitsile okhukhura ehale nende (amalamo ka) abanyasaye befu? Khakhurererakhwo kokhulakanga ako noli mubalia baboolanga obwatoto.”

Yaboola mbu: “Toto obumanyi bweinyanga eyo buli khu Nyasaye, ne eboosilinjia butswa kendumilwe ninako, halali esie ebalolanga mbu muli abandu bakholanga obusilu.”

Mana olwa bashilola (shinga) lileesi niliitsilanga amatwoma kabu, baboola mbu: “Lileesi lino nilia okhukhukwisilia ifula?” Khane nikalali kario tawe, halali kano nikamwerushilanga, omuyeka kulimwo eshinyasio eshilulu.

Kusishia buli eshindu khubunyali bwa Nyasaye wakwo Omulesi, mana nibiba mbu shishikhalolekhana tawe halali tsinzu tsiabu butswa. Endio nelwakhurunganga Abandu betsimbi.

Ne toto khwabamenyiamwo obulayi, shibili shinga khwabamenyia enywe tawe, mana nikhubahelesia tsimbulililo nende tsindolelo nende emioyo, mana amarwi kabu nohomba tsimoni tsiabu nohomba emioyo chiabu shibiabakhonyakhwo shiosishiosi tawe shichila bo bakhayanga ebimanyisio bia Nyasaye mana ebiabakholelanga omubayo nibibaterera.

Ne toto khwasishia tsingongo tsisubilana ninanyu, nekhwatsirumila ebimanyisio bakhaba bario banyoola okhukalukha.

Mana nibalabahabinakhwo balia ababalamanga abalali Nyasaye tawe. Halali babakorakhwo, ne obo nibwo obubeyi bwa bachikhanga.

Ne olwa khwachomia omukanda kwa majini okhwitsa khwiwe okhuwulilisia Ikurani. Olwa bayuwulila, baboola mbu: “Ulilisie.” Olwa yamalwa okhusoomwa, bakalushila abaashiabwe okhubekanyilisia.

Baboola: “Enywe abashiefwe, toto efwe khuwulile eshitabu shiarumwa inyuma wa Musa shifuchilisania nende kalia kaliho imbeli wuwe, ne shilunjisinjia khubwatoto nende khunjila ingololofu.

Enywe Abandu befu, fuchilile omulanji wa Nyasaye, ne mumusuubile (Nyasaye), alabaleshela tsimbi tsienyu, ne alabekalila eshinyasio eshilulu.

Ne ulafuchilila omulanji wa Nyasaye tawe, shalishila khushialo tawe ne shaliba nende abalimuliinda imbeli wuwe tawe. Abo bali mubukori obwa habulafu.”

Koo, shibalolanga mbu toto Nyasaye owalonga likulu nende eshialo, ne shiyachong’a khulwa okhubilonga tawe, mbu ni omunyali muno wokhulamusia abafu? Nendio. Ye toto nomunyali muno wabuli eshindu.

Ne inyanga yabakhayi balirerwa khumulilo, mana bareebwe mbu: “Kano shikali katoto?” Baliboola mbu: “Ni toto khwitsuba khu Nyasaye wefu Omulesi.” Baliboolelwa mbu: “Mana pile eshinyasio khulwa okhukhaya khwenyu khwamwakhayanga.”

Kho wifwile shinga befwila Abarumwa bokhwifwila okhukhongo muno, ne olabayungubanilia tawe. Toto inyanga yabalilola kabalakungwa, baliba shinga shibamenyakhwo khushialo halali lisaa lilala butswa mushitere. Ngako kaboolele. Kho, shibasishibungwa tawe halali Abandu ababii.

Balia bakhaya mana nibekalila injila ya Nyasaye, alikosia (alinyasia) ebikhole biabu.

Ne balia basuubila, mana nibakhola amalayi, mana nibasuubila khukeshibwa khu Mohammad, nako ni obwatoto okhurula khu Nyasaye wabu Omulesi, alabaleshela tsimbi tsiabu, ne alabakaasilia obulamu bwabu.

Ako nilwokhuba mbu abakhayi baloonda obukori, ne balia abasuubila baloonda obwatoto okhurula khu Nyasaye wabu Omulesi. Endio nilwa Nyasaye achelasilinjia Abandu ifwani yabu.

Ne nimubukana nende abakhayi, khuye amakosi kabu okhula shinga mubatosia, mubaboye emikoye. Okhula hawo munyala okhubalekhula khubulayi, nohomba benunule, okhula shinga liyie liwa. Ne endio, Nyasaye yenyanga yakhabashilile omwene, halali yenya okhubatema abeene khubeene. Ne balia berwa khunjila ya Nyasaye, shalikosia (shalinyasia) ebikhole biabu tawe.

Alabalunjisia, ne alabakaasilia obulamu bwabu.

Ne alabenjisia mumukunda kwomwikulu kwa yabamanyia.

Enywe Abasuubila, nimuhabina Nyasaye, yesi alabahabina, ne alatinyia amakulu kenyu.

Ne balia bakhaya, khubo ni okhutiba, ne alikosia (alinyasia) ebikhole biabu.

Endio nilwokhuba mbu basila aka Nyasaye yeshia mana nanyasia ebikhole biabu.

Shibachendakhwo khushialo balola indukho ya balia bali imbeli wabu tawe? Nyasaye yabasishia, ne abakhayi bano, balikholelwa shinga endio.

Endio nilwokhubeela Nyasaye nomuliindi wabasuubili, ne toto abakhayi babula omuliindi.

Toto Nyasaye alinjisia Abasuubila mana nibakhola amalayi mumikunda chomwikulu chiburangamwo emialo. Ne balia bakhaya, bekhoyanga nibalia shinga ebiayo biliitsanga, ne mumulilo nishio eshimenyo shiabu.

Ne tsingongo tsinga tsiali na amaani amanji okhushila olukongo lulwo luno lwakhutafia, khwabasishia, ne abulaho wabahabina tawe.

Koo, ulia uli nende obulafu okhurula khu Nyasaye wuwe Omulesi, yakhaba shinga ulia wakaasilibwa amabii keke akalole mbu naamalayi, mana nibaloonda eshihonya shyabu?

Ifwani yomukunda kwomwikulu kwarecheshelwa abaria Nyasaye, emialo chilimwo chia amatsi kabulamwo obutukhulu, nende emialo chia amabeele kalaboyanga tawe, nende emialo chia amalwa keshiuya khubanywi, nende emialo chiobuushi obulafu tswe, ne balimwo nende tsimbia tsioosi tsiebiamo, nende obulesheli okhurula khu Nyasaye wabu Omulesi, bakhaba shinga balia baliba mumulilo tsinyanga tsioosi, nibanywesibwa amatsi kayile pa, nikateta amala kabu?

Ne mubo baliwo bakhurechelesinjia, mana nibarula woli, bareebanga balia bahebwa obumanyi mbu: “Ni shina shiayakhaboola bulaano?" Abo nibo ba Nyasaye yekala emioyo chiabu, mana nibaloonda eshihonya shie emioyo chiabu.

Ne balia balunjikha, yabameta obulunjifu mana nabanyalila okhumuria.

Kho balikho nende shiabalindanga halali ni indukho ilibapwoka. Ne toto ebimanyisio biayo biamala okhwitsa. Ne indukho eyo niyiliboolela, okhwitsulila khwabu khulibakhonya shina?

Ne manya mbu abulaho ukhoyeshele okhulaamwa khubwatoto halali Nyasaye. Ne saba eshileshelo khulwa tsimbi tsitsio, nende khulwa abasuubili beshisatsa nende abasuubili abeshikhasi. Ne Nyasaye amanyire kamukholanga wamutsire eshitere nende kamukholanga eshiro nimwakhakalukha wamumenyanga.

Ne Abasuubili baboolanga mbu: “Shichila shina nileshibwa isura?” Ne niyishibwa isura yelilako mana khwarumbulamwo okhupana, olalola balia bemioyo chiabu chilimwo obulwale bakhuhenganga shinga ulia womwoyo kukwe kurula nafwitsanga, halali nobulayi khubo.

Okhutila amalako ka Nyasaye nende (okhusunga) amakhuwa amalayi. Ne likhuwa nilimalile okhusuubilwa (lilako lieliye), babetsanga bobwatoto khu Nyasaye, bwakhabere obulayi khubo.

Ne muparanga nimuhelesia Nyasaye omukongo mbu mulakhola obwonooni khushialo nende okhwira olwikho?

Abo nibo ba Nyasaye yaheresia eshilamo, mana nabekasia amarwi, mana nawofusia tsimoni tsiabu.

Ne shibaparangakhwo Ikurani ino tawe, nohomba emioyo chiabu chilikhwo amakafuli kachio.

Toto balia bakalukha inyuma nibakhamala okhumanya obulunjifu, Shetani yabarechekha khuburono bwa khushialo ne nabakatia mbu baliba nobulamu oburambi.

Ako nikhulwokhuba mbu baboolela balia balenyanga okhuwulila aka Nyasaye yeshia tawe mbu: “Khwitsa okhubawulila mumakhuwa kandi”, ne Nyasaye amanyile akefisile mumioyo chiabu.

Ne kaliba karie olwa Abamalaika balibafwisia, nibaboopa obweni bwabu nende emikongo chiabu?

Ako nilwokhuba mbu balooonda kasinyisia Nyasaye ne nibakhaya kamusangasia, mana nakwisia ebikhole biabu.

Nohomba baparanga balia abali nobulwale mumioyo chiabu mbu Nyasaye shalira habulafu obusuku bwabu tawe?

Ne khwenyanga, khwakhakhwechesiye bo, ne wakhabamanyile khubimanyisio biabu. Ne toto olabamanya butswa khukhulomaloma khwabu. Ne Nyasaye yamanya muno ebikhole bienyu.

Ne toto khulabatema okhula khumanye abalwani khunjila ya Nyasaye mwinywe, nende abesumilisi, ne khulabatema mumakhuwa kenyu.

Toto balia bakhaya mana nibekalila injila ya Nyasaye, mana nibayingania Omurumwa, obulunjifu nibumalile okhubabela habulafu, shibalikholakho Nyasaye eshindu shiosishiosi tawe, ne alikwisia ebikhole biabu.

Enywe abasuubila, tiile amalako ka Nyasaye nende Omurumwa, ne mulanyasia ebikhole bienyu tawe.

Toto balia bakhaya mana nibekalila injila ya Nyasaye mana nibafwa nibali abakhayi, Nyasaye shalibaleshela tawe.

Kho mulatendeya mwasaba omulembe tawe, ne enywe nenywe balashila, ne Nyasaye ali ninanyu, ne shalabeema omurungo kwebikhole bienyu tawe.

Toto obulamu bwokhushialo nomubayo nende amakhuwa kabulamwo obukhala, ne nimusuubila mana mwaria Nyasaye, alabahelesia omurungo kwenyu, ne shalabareeba emiandu chienyu tawe.

Nabareba echo (emiandu chienywe), mana abatilile, muleemana, ne alarusia obusuku bwenyu habulafu.

Enywe mbabano mulangungwa muhane khunjila ya Nyasaye, ne mwinywe balimwo bemananga. Ne wimana, yemananga khububii bumutsila omwene. Ne Nyasaye nomuyinda, nanyu muli abatakha. Ne nimukhaya, Nyasaye alarera Abandu bandi balali enywe tawe, mana shibaliba shinga enywe tawe.

Toto efwe khwakhwikulila obushili bwa habulafu.

Kho Nyasaye akhuleshele ebionoono bibio biaranjilila nende biamalilikha, ne akhwitsusilie emikabo chichie, ne akhulunjisie khunjila ingololofu.

Ne akhuhabine obuhabini bwa amaani.

Niye weshia obuyeenzefu mumioyo chia abasuubili; kho anyoole okhubameeta obusuubili hekulu wobusuubili bwabu. Ne omukaanda kwabalwani beliyie kwomwikulu nende kwokhushialo ni kwa Nyasaye, ne Nyasaye niye Omumanyi po, Owamachesi muno.

Kho yenjisie Abasuubili abasatsa naabakhasi mumikunda chiomwikulu chiburangamwo emialo, balimenyamwo tsinyanga tsiosi, mana abaleshele tsimbi tsiabu, ne okho imbeli wa Nyasaye nikho okhubura okhukhongo.

Ne abahelesie eshinyasio abeshikhabili abasatsa naabakhasi, nende abatsokaasinjia Nyasaye abasatsa nabakhasi, abapariranga Nyasaye amaparo amabii. Kuliboolela omukalukhano omubii, ne Nyasaye yabasinyishila, mana nabatsuba, ne nabarecheshela omulilo kwa Jahannam, ne ni amakalushilo amabii muno.

Ne abalwani beliyie bo mwikulu nende bomushialo ni ba Nyasaye, ne Nyasaye ni wa amaani, Owamachesi muno.

Toto efwe khwakhuruma obe Omuloli, Omuboli wa amakhuwa koomwikhoyo, Omwikanyilisi.

Kho musuubile Nyasaye nende Omurumwa wuwe, ne mumukhoonye, ne mumuwe eshiribwa, ne mwitsomie Nyasaye itsuli nende ingolobe.

Toto balia bakhunganga omukhono toto bonganga Nyasaye omukhono. Omukhono kwa Nyasaye kuli hekulu wemikhono chiabu. Ne ulia ufunakanga indakano, afunaka khulwo okhuumisia omwoyo kukwe. Ne ulia ukhola kalia akayalaka Nyasaye, (Nyasaye) alamuhelesia omurungo omukhongo.

Ababeduwi (abamenyi bomumasokholio) batong’a inyuma balakhuboolela mbu: “Omwandu kwefu nende Abandu befu bakhutiyisiye, kho khusabile eshileshelo.” Baboolanga netsinimi tsiabu akalali mumioyo chiabu tawe. Boola mbu: “Ni wina unyala okhumukhoonya imbeli wa Nyasaye niyenya okhubaha eshinyasio nohomba niyenya okhubaha amalayi, nohomba niyenya okhubaha amabii? Ne Nyasaye amanyile muno kamukholanga.

Halali mwapara mbu Omurumwa nende Abasuubili shibalakalushila Abandu babu tawe, mana nikasangasia emioyo chienyu. Mana nimupara amaparo amabii muno, mana nimuba Abandu basikha.”

Ne ulia ulasuubila Nyasaye nende Omurumwa wuwe tawe, toto efwe khwarecheshela abakhayi omulilo omululu.

Ne obwami bwo mwikulu nende mushialo ni bwa Nyasaye, aleshelanga wayenya, ne asandia wayenya, ne Nyasaye ni Omunji wobulesheli, Omukoosia muno.

Abatonga inyuma baliboola mbu: “Nimutsia okhubukula omwandu kweliyie (ghanima), leshe khutsie ninanyu." Benyanga okhukalukhania amakhuwa ka Nyasaye. Boola mbu: “Shimulakhulondakhwo tawe, endio nilwa Nyasaye yamala okhuboola imbeli awo.” Kho balaboola mbu: “Enywe muli neshikhalikhali ninafu”, halali shibali bamanya tawe halali hatiti.

Boolela batong’anga inyuma mubamenyi bomumasokholio (Ababeduwi) mbu: “Mwitsa okhulangwa mutsie khubandu ba amaani po, mukhupane ninabo nohomba balonde amalako. Ne nimuwulila mwaloonda, Nyasaye alabarunga omurungo omulayi. Ne nimukhaya shinga mwakhaya imbeli awo, Nyasaye alabaha eshinyasio eshilulu.”

Omuwofu shafunanibwa tawe, nohomba omulema shafunanibwa tawe, nohomba omulwale shafunanibwa tawe. Ne uloonda ka Nyasaye nende Omurumwa wuwe, Nyasaye alamwinjisia mumikunda chomwikulu chiburangamwo emialo hasi wachio. Ne ukhaya, alamuhelesia eshinyasio eshilulu.

Toto Nyasaye yachamila Abasuubili olwa bakhuunga omukhono hasi womusaala. Mana Nyasaye namanya kali mumioyo chiabu, mana nabeshilia obuyeenzefu, ne naabarunga obushili bwa hambi.

Nende omwandu omunji kweliyie kwabalabukula, ne Nyasaye niwaamani, Owamachesi muno.

Nyasaye yabalaka okhunyoola omwandu omunji kweliyie, mana abaranjilisiye kuno mbeli, mana niyekalila emikhono chiabandu okhuboolakhwo, ne shibe eshimanyisio khubasuubili, ne abalunjisie khunjila ingololofu.

Ne okundi (yetsa okhubahelesia) kwamushili okhunyoola tawe, Nyasaye yamala okhukutereera. Ne Nyasaye ni Omunyali muno wabuli eshindu.

Ne abakhayi balwananga ninanyu, bakhelushe nibakalukha inyuma, mana shibakhanyoolele owubalinda nohomba ubahabina tawe.

(Eyo niyo) Imelo ya Nyasaye eyabura khale, ne sholinyoola mu imelo ya Nyasaye obukalukhani tawe.

Ye niye wekalila emikhono chiabu okhuboolakhwo, ne emikhono chienyu okhuboolakhwo, mulitokho lia Makka, niyakhamala okhubaha enywe obushili khubo. Ne Nyasaye alolanga po kamukholanga.

Abo nibo bakhaya, mana nibabekalila okhwinjila mumusikiti kwoluyali, ne nibekalila eebiayo biokhusinzwa okhuula habundu wabio. Ne babulanga okhuba abasatsa abasuubili nende abakhasi abasuubili, abamulamanyile tawe, mwakhalwanile ninabo, mana mwenjila mububii okhurulana ninabo nimulamanyile tawe. Kho Nyasaye yenjisie owayenya mutsimbabaasi tsitsie. Ne bakabukhananga, toto khwakhahelesie abakhayi mubo eshinyasio eshilulu.

Olwa abakhayi bara mumioyo chiabu oburuma, oburuma bwobusilu, mana Nyasaye niyeeshia obuyeenzefu khumurumwa wuwe nende khubasuubili. Ne nabalomesia likhuwa liokhumuria, ne toto nibo bali balikhoyeshele nende beenelio, ne Nyasaye yamanya muno buli eshindu.

Ne toto Nyasaye yakhola amaloro komurumwa wuwe okhuba katoto. Toto mulenjila mumusikiti kwoluyali Nyasaye nachama – mumulembe, nimubechele emirwe chienyu nohomba nimututuyie liswi. Shimularia tawe. Mana yamanya kamulamanya tawe, mana nabaha imbeli wa kano obushili bwa hambi.

Niye waruma Omurumwa wuwe khubulunjifu nende idini yatoto, kho ayihelesie obushili khutsidini tsioosi. Ne Nyasaye niye Omuloli uyela.

Muhammad ni Omurumwa wa Nyasaye. Ne balia bali halala ninaye, bali nende amaani khubakhayi, ne babeelanilanga tsimbabaasi abeene khubeene. Olabalola nibeenama (rukuu), nibara hasi obweni po nibakoonya emikabo nende obuchami okhurula khu Nyasaye. Ebimanyisio biabu bili khubweni bwabu, okhurulana nende okhura hasi obweni bwabu (nibasujuda). Endio nilwa ili ifwani yabu mutawurati. Ne ifwani yabu mu injili, bali shinga omumela kwarusia imbandu yakwo, mana niikuyelesia amaani, mana nikunera, nikwema obulayi namasafu kakwo, mana nikusangasia abalima, kho asinyisie khukwo abakhayi. Nyasaye yalaka balia abasuubila mana nibakhola amalayi mubo, obulesheli nende omurungo omukhongo.

Enywe Abasuubila, mularanjilila imbeli wa Nyasaye nende Omurumwa wuwe tawe, ne rie Nyasaye. Toto Nyasaye ni Omuwulili muno, Omumanyi muno.

Enywe Abasuubili, mulalomaloma khumioyo chiehekulu okhushila Omurumwa tawe, ne mulasunga naye noluyoka shinga okhulomaloma khwenyu abeene khubeene tawe; ebikhole bienyu bietsa biabiya nimukorerwe.

Toto balia beshinjia emioyo chiabu hasi nibalomaloma nomurumwa, abo nibo ba Nyasaye yoosia emioyo chiabu khulwa okhumuria. Bali nende eshileshelo nende omurungo omukhongo.

Toto balia bakhukhuumanga noli munzu, abanji babu shibekhonyelanga obwongo tawe.

Ne besumilisinjia okhula shinga orula, bwakhabeele obulayi khubo. Ne Nyasaye nomulesheli, Owetsimbabaasi muno.

Enywe Abasuubili, owetsimbi nabeetsela nende likhuwa, muliliinjemwo obulai, muletsa mwaumisia abandu mukhukorwa tawe, mana mwetsa mweyitsulisia khukamukholele.

Ne manye mbu Omurumwa wa Nyasaye ali mwinywe. Abaloondanga enywe mumakhuwa amanji, mwakhanyakhane. Halali Nyasaye yabakhola okhuchama obusuubili, mana naaburona mumioyo chienyu, ne nakhola obukhayi nende obukori nende obufuru okhubasinya. Abo nibo abakololofu.

Emikabo okhurula khu Nyasaye nende obwokholo. Ne Nyasaye ni Omumanyi po, Owamachesi muno.

Ne emikanda chibili chabasuubili nichikhupana, khole omulembe hakari wachio. Ne mulala muchio nikuranga okwashie, kulwaane okhuula kukalushe khumalako ka Nyasaye. Ne nikukalukha hasi, rere omulembe hakari wachio khubwatoto, ne muchiyaale khubuleeng’afu. Toto Nyasaye yachama abakholanga obuleeng’afu.

Toto Abasuubili ni abaananda, kho rere omulembe hakari wa abana benyu. Ne rie Nyasaye kho munyole okhuhelesibwa tsimbabaasi.

Enywe Abasuubila, abasatsa balalechelesia abatsa bashiabwe tawe, banyala okhuba abalayi okhubashila. Nohomba abakhasi balalechelesia abashiabwe tawe, banyala okhuba abalayi okhubashila. Ne mulanyekana tawe, ne mulalaangana amera kokhutsalasania tawe. Eliira liibi muno nokhurula mumalako ka Nyasaye nimumalilenje okhusuubila. Ne balia balekanila tawe, abo nibo ababii.

Enywe abasuubila, mwire ehale muno nende okhuparirisia. Toto okhuparirisia khundi ni ebionooni. Ne mulanonelesania tawe, ne mulamoonyana tawe. Koo, omundu yakhachama okhulia inyama yomulambo kwomusiani wabu ufwile? Shimunyala okhuchama elo tawe. Ne rie Nyasaye. Toto Nyasaye nomunji wobulesheli, Owobukoosia po.

Enywe abandu, toto efwe khwabaloonga okhurula khumusatsa nomukhasi, ne nikhubakhola amahaanga nende tsimbia, khomunyoole okhumanyana. Toto owoluyali muno mwinywe imbeli wa Nyasaye ni ulia owamuria (Nyasaye) muno. Toto Nyasaye niye Omumanyi muno, Mwene amakhuwa koosi.

Abandu bomumasookholio baboola mbu: “Khwasuubila.” Bola mbu: “Mushili okhusuubila, halali boole mbu ‘khwinjile mubwisilamu’, khulwa obusubili bushili okhwinjila mumioyo chienyu tawe. Ne nimuwulila ka Nyasaye nende Omurumwa wuwe, shalabalemilia shiosishiosi mubikhole bienyu tawe. Toto Nyasaye nomulesheli po, wobukoosia muno."

Toto Abasuubili nibalia basuubila Nyasaye nende Omurumwa wuwe, mana nibalaba netsinganakani tawe, mana nibakhalabana khunjila ya Nyasaye khumiandu chiabu nende emioyo chiabu. Abo nibo abobwatoto.

Boola mbu: “Koo, mwechesinjia Nyasaye idini yenyu, ne Nyasaye yamanya bioosi bili mwikulu nende mushialo. Ne Nyasaye nomumanyi muno wabuli eshindu?”

Bakhuminanga mbu benjila mubusalamu. Boola mbu: “Mulaamina khulwokhwinjila khwenyu mubusalamu tawe, halali Nyasaye niye wabenyela amalayi, nabalunjisia khubusuubili nimuli mbu muli abobwatoto.”

Toto Nyasaye yamanya akefisa mwikulu nende mushialo, ne Nyasaye alolanga muno kamukholanga.

Qaaf. Nditsuba khukurani yoluyali.

Bawukanga mbu Omwikanyilisi yabeetsela okhurula mubo! Abakhayi nibaboola mbu: “Po, kano nikokhuchenyia.

Mbu nikhulifwa mana khube liloba, okhukalukha okho khuli ehale (shikhunyalikhana tawe).”

Toto khwamanya shiosishiosi shilemukha khusialo mubo, ne khuli nende eshitabo eshibikhanga koosi.

Halali bakhaya obwatoto olwabwabeetsela, mana abo bali mubukoyanu.

Shibalolangakhwo likulu hekulu wabu, shingala khwaliumbakha mana nikhulirona, shililikhwo nolwafwa tawe?

Ne liloba khwalikwaalasia mana nikhuliramwo tsingulu, mana nikhumesiakhwo buli imbia yemimela emilayi.

Kho shibe eshilolelo nende eshitsulisio khu buli omusumba ukalukha khu Nyasaye.

Ne khweshia amaatsi ketsikhabi okhurula mwikulu, nikhukamesilia emikunda nende imele ichesungwa.

Nende emitende emirambi chilikhwo ebibuli (chiebulana mubunji).

Omukabo khubasumba banje, mana nikhulamusia khuko eshialo shiali nishifwile, ne ni endio nilwa Abandu balilamusibwa.

Bakhaya imbeli wabu Abandu ba Nuhu, nende Abandu ba Rasi nende ba Thamud.

Nende ba Aa’d, nende ba Firauni nende Abana babu Luti.

Nende abamenyi ba Aikat (bomumasokholio), nende Abandu ba Tubaa, boosi bakhaya Abarumwa mana kabekanyilisibwa nikabanyoola.

Ne muparanga khwachong’a olwa khwabaloonga olwo khuranga? Halali bo bali nobukoyani khukhuloongwa okhuyiakha.

Ne toto khwaloonga Omundu, ne khwamanya shimubeyibeyinjia mumwoyo kukwe, nafu khuli ahambi muno khuye okhushila omusi kwo mwikosi we.

Olwa Abamalaika babili balibukana, owundi niyekhala omukhono omulunji ne owundi omukaata.

Shiyakhaboola liosiliosi tawe halali hali nende omulenji werechekha obulayi muno (owuhandikanga).

Ne tsisaalila tsiokhurula omwoyo tsiliitsa khubwatoto. Ako niko kawerukhanga.

Ne olwika lulifurwamwo, eyo niyo inyaanga yokhunyola amabii kalakwa.

Ne buli Omundu aliitsa nali nende Omuliindi nende Omuloli.

Aboolelwe mbu: “Toto ewe wali wang’ang’ala ehale nende kano, mana khukhuyiniyekhwo shiakhwikalilanga okhulola, kho okhulola khukhwo nyanga yino nokhulayi muno.”

Ne owashie aliboola mbu: “Wendi ninaye uno amalile okhurechekhwa.”

(Nyasaye aboole): “Sukune mumulilo buli omukhayi po, omwandakanyu.

Owikalilanga amalayi, wabura eshichelo, owobukanakani.

Ulia watsokaasia Nyasaye nende abanyasaye baandi, kho mumusukune mushinyasio eshilulu.”

Owashe aliboola mbu: “Nyasaye wefu Omulesi, esie shindamukosia tawe halali ye yali mubukori obwa ehale.”

Nyasaye aliboola mbu: “Mulasolana imbeli wanje tawe, ndamala okhubarumila amekanyilisio.

Liumaho likalukhanibungwa imbeli wanje tawe, ne esie shekholelanga Abasumba banje obubii tawe.”

Inyanga yakhulireba (omuliro kwa) Jahannam mbu: “Witsuule?” Nayo ilikalusia mbu: “Abaandi baliwo umete?”

Ne omukunda kwomwikulu (Janna) kulisitibwa hambi khu baria Nyasaye.

Kano niko kamulakungwa khu ulia ukalukha muno khu Nyasaye mana niyelinda po.

Ulia waria Nyasaye khukefisile, mana niyetsa nende omwoyo omulunjifu.

"Injilemwo nomulembe, ino ni inyanga yokhumenya obulaliwa tawe.”

Balinyoolamwo shiosishiosi shiabeenya, ne khuli nende ebindi ebinji.

Ne ni tsingongo tsinga tsiakhwasishia imbeli wabu, bali nende amaani okhushila bano! Mana nibayiya khushialo muno, koo banyolakhwo wabelushila?

Toto mu ako, shilimwo eshitsulisio khu ulia uli nomwoyo nohomba owareka eshirwi naye naaliho obulai (nalolanga).

Ne toto khwaloonga likulu nende eshialo nende bioosi bilimwo khutsinyanga tsisasaba, ne shikhwanyoola obuchonyi bwosibwosi tawe.

Kho, wisumilisie khukababoolanga, ne mutswenule Nyasaye wuwo Omulesi khutsifumia tsitsie tsindayi eliuba nilishili okhurula nende nilishili okhukwa.

Ne mutswenule khandi eshilo nende niwakhamala okhumurerera obweni hasi (okhusujuda).

Ne rechelesia inyanga yomulaanji alilanga okhurulila habundu ahambi.

Inyanga yabaliwulila oluyoka lwomulango kwa toto. Eyo niyo inyanga yokhurula (mubilindwa).

Toto efwe nefwe balamusinjia khandi bafwisinjia, ne ewefu niwa amakalushilo.

Inyanga yeshialo shiliatikha barula lwangu lwangu. Okhukhung’asibwa okho khuliba okhwangu khwifwe.

Efwe khumanyile muno kababoolanga, ne ewe shobarukanga na amaani tawe. Kho wikhoonyele Ikuran okhwitsulisia balia abaria ambii akalakwa (okhurulila inyanga yeyindukho).

Nditsuba khumuyeka (imbumbuyeka) kusalaasinjia,

Nende kuchinganga emikuku,

Nende kuwutsanga khubwangu,

Okukabaanga shinga kulomesibwe.

Toto kamulakungwa nikahabwene.

Ne toto Inyanga yomurungo ilibaho.

Nditsuba khulikulu lili nende tsinjila,

Toto enywe muli mumakhuwa kawukhaane.

Ukalukhanibwa okhurula khubwatoto akalukhanibwa.

Abachishi balisishibwa.

Balia bakoyanila mubusilu.

Barebanga mbu: “Ni lina inyanga yomurungo?”

Inyanga eyo balinyoola eshinyasio shiomulilo.

“Pile eshinyasio shienyu shino eshamwayungubalilanga.”

Toto balia baria Nyasaye baliba mumikunda chomwikulu nende tsisebele.

Ne balibukula ka Nyasaye abahele, toto imbeli awo abo bali abakholi bamalayi.

Bakonanga hatiti eshilo.

Ne eshilo nishitsia okhushia, balamanga nibasaba eshileshelo.

Ne mumiandu chiabu omukabo kwa abasabi nende balasabanga kwalimwo.

Ne khushialo biliwo ebimanyisio khubasuubila toto.

Nende khumibili chienyu. Koo, shimulolangakhwo tawe?

Ne mwikulu kuliyo omukabo kwenyu, nende kamulakungwa.

Kho, nditsuba khu Nyasaye Omulesi welikulu nende eshialo, mbu toto kano nikahabwene shinga enywe muboolanga.

Koo, lwakhuulilakhwo olukano lwa abacheni ba Ibrahim boluyali?

Olwa benjila ewuwe nibaboola mbu: “Mulembe.” Naye nabakalusia mbu: “Mulembe muno Abandu bengorerwe.”

Natsia khubandu be, niyetsa nende eshimosi shianera.

Nabasitilia hambi eshiakhulia, nabareba mbu: “Shimulitsanga tawe?”

Naba noburi khubo, nibamuboolela mbu: “Olaria tawe.” Ne nibamubolera komwikhoyo koomusiani wobumanyi po.

Nilwa omukhasi wuwe yabachoma, nawuka, niyepama obweni, naboola mbu: “Esie omushiele mana omukumba ndakhebula endie?”

Nibaboola mbu: “Endio nilwa kali, nilwa Nyasaye wuwo Omulesi aboolele. Toto niye Owamachesi muno, Omumanyi po.”

Naboola mbu: “Murumilwe shina enywe Abarumwa?”

Nibabola mbu: “Toto efwe khurumilwe khubandu abetsimbi.

Khubalasile amachina keliloba.

Karebwakhwo eshimanyisio okhurula ewa Nyasaye wuwo Omulesi khulwa balia babura eshichelo.”

Kho khwarusiamwo Abasuubili balimwo.

Ne shikhwanyoolamwo halali inzu ndala yonyene yabasalamu.

Ne nikhulekhamwo eshimanyisio khubalia baritsanga eshinyasio eshilulu.

Ne khulukano lwa Musa, olwa khwamuruma khu Firauni nende ebifune bia habulafu.

Nakhola obufuru khumaani keke naboola mbu: “Oli omulosi nohomba omulalu.”

Ne nikhumutila nende omukanda kukwe kwabalwani, nikhubasukuna munyanza naye nali ufunaanibwa.

Ne (okhusishibwa khwa) Abandu ba A’ad, olwa khwabarumila omuyeka omukumba.

Shikwalekha shiosishiosi shiakwaburakhwo tawe, halali nikushikhola shinga eshindu shionoonibwe obubii muno.

Ne Abandu ba Thamudi, olwa baboolelwa mbu: “Mwikhoye khubise bititi.”

Ne nibakhaya okhulonda amalako ka Nyasaye wabu Omulesi, mana likulu nilibakhupa nabo nibalolanga.

Mana shibanyala okhwema tawe, ne shibanyala okhwihabina tawe.

Ne Abandu ba Nuhu imbeli eyo. Toto bali Abandu baruuma eshichelo.

Ne likulu khwaliumbakha khumaani, ne toto efwe khuli nobunyali obushila ako.

Ne liloba khwaliala, ne khuli abaali abalayi balibarie efwe!

Ne mubuli eshindu khwaloonga eshisaatsa neshikhasi kho munyoole okhwitsulila.

Kho ilushile ewa Nyasaye. Toto esie endi omwikanyilisi wenyu owa habulafu okhurulana ninaye.

Ne mulakholela Nyasaye nyasaye wundi tawe. Toto esie endi omwikanyilisi wahabulafu okhurulana ninaye.

Ne endio, shiyabetsela Omurumwa yesiyesi balia bali imbeli wabu tawe halali baboola mbu: “Oyo ni Omulosi nohomba Omulalu.”

Ne koo, baboolanila kano? Halali bo ni Abandu baruma muno eshichelo.

Mana lekhana ninabo, nawe sholafunaanibwa tawe.

Ne itsulisia. Toto ametsulisio kakhoonyanga Abasuubili.

Ne shindaloonga Amajini nende Abandu tawe halali khulwa baalame esie.

Shebenyakhwo omukabo tawe, ne shindenya bandisie tawe.

Toto Nyasaye niye Omukabi muno, Owamani amanji muno.

Ne toto balia abamabii, bali nende tsimbi tsiabu shinga tsimbi tsia abaashiabwe, kho balaayungubasia tawe.

Kho eshinyasio eshikhongo shili khubalia bakhaya okhurulana nende inyanga yabu yabalakwa.

Nditsuba khulukulu lwa Tur (olwa Nyasaye yalomalomiliakho omurumwa Musa).

Nende khushitabu shiahandikwa.

Khuliseelo liabambulwa.

Nende khunzu yombakhwa (ya abamalaika balamilangamwo mwikulu).

Nende khushitsafu shiachingulwa (likulu lili eshitsafu shie eshialo).

Nende khunyanza yetsula (omulilo).

Toto eshinyasio shia Nyasaye wuwo Omulesi shilibaho (khubakhayi).

Abulaho ulishiikalila tawe.

Inyanga yelikulu lilirenga okhurenga khwene.

Ne efikulu lwa filikhulukha nifichenda okhuchenda khwa toto.

Eshinyasio eshikhongo inyanga eyo shiliba khubayingani.

Balia babayanga mumakhuwa kobusilu.

Inyanga yabaliluumwa mumulilo okhulumwa okhutinyu.

Baliboolelwa mbu: “Kuno nikwo omulilo kwa mwaingananga.

Koo, buno ni obulosi nohomba shimulolangasa tawe?

Injilemwo, mwisumirisie nohomba mukhaye okhwisumirisia, ninashilalasa khwinywe. Toto enywe murungungwa sa kamwakholanga."

Toto balia baria Nyasaye baliba mumikunda chomwikulu nende mubwokholo.

Nibasangalila khuka Nyasaye wabu Omulesi abahele, ne Nyasaye wabu Omulesi alibahonokosia okhurulana nende eshinyasio shiomulilo.

“Lie, ne nywe mumwikhoyo khukalia kamwakholanga.”

Ne baliyeekha khubifumbi bwioluyali, bilondokhane khulunyaali, ne khulibabashila abakhana bomwikulu (Hurul ain).

Ne balia basuubila mana olwibulo lwabu nilubaloondakhwo khukhusuubila, khulibabukanania, ne shikhulibalemilia khubikhole biabu shiosishiosi tawe. Buli Omundu alitililwa khushiayakhola.

Ne khulibametela buli imbia yebiamo nende yeyinyama shingala benya.

Balihelesaniamwo efikombe fia okhung’inang’ina filimwo eshinywebwa shibulamwo eshifwabi nohomba tsimbii tawe.

Ne Abakholi babu balibabotokhananga, bang’inang’ina opara mbu bo nebisole bifunikhwe obulai mufikombe fyokhung’inang’ina.

Ne balihengana nibareebananga.

Baliboola mbu: “Toto efwe khwali khale nabandu befu nikhwaria muno.

Mana Nyasaye nakhukhonya, nakhuhonia okhurulana nende eshinyasio shiomulilo omululu.

Toto efwe khwamulamanga (khushialo) Ye yenyene butswa. Toto ye niye Omulayi muno, wetsimbabasi muno.”

Kho yitsulisia, ne khumikabo chia Nyasaye wuwo sholi Omulosi nohomba Omulalu tawe.

Nohomba baboolanga mbu: “Uno ni omukaasia wamashairi, wakhulindanga lifwa limuulile.”

Boola mbu: “Yiisiriesa lifwa, toto esie siesi endi halala ninanyu mukhulindilisia kalibanyola okhurulana nende eshinyasio shia Nyasaye.”

Nohomba amaparo kabu niko kabarumanga kario, nohomba bo ni Abandu abafuru butswa?

Nohomba baboolanga mbu: “Wakasia kano (Ikurani)”, halali bo shibasuubilangasa tawe!

Mana barerekhwo amakhuwa shinga kano, nikali mbu baboolanga akatoto.

Nohomba shibaalongwakhwo nende shiosishiosi tawe, nohomba bo nibo baloonganga (kata nibelonga abeene)?

Koo! Nibo baloonga likulu nende eshialo? Halali babula obulaamba tawe.

Nohomba bali nende libishilo lia Nyasaye wuwo Omulesi, nohomba nibo abemeli ba buli eshindu?

Nohomba bali netsingasi tsiokhurechelesiliakhwo? Mana omurechelesi wabu oyo arerekhwo ebifune bilolekha.

Nohomba Nyasaye ali nabakhana nanyu muli nabasiani?

Nohomba obarebanga bakhurunge, nabo balolanga obusiro muno okhurunga omurungo oko?

Nohomba bamanyile akefisa mana bakahandikanga?

Nohomba benyanga okhukhukholela ebifwanga? Halali balia bakhaya nibo abalakholelwa ebifwanga.

Nohomba bali nende nyasaye wundi owulali Nyasaye tawe? Nyasaye nomutswenufu ehale nende bia bamutsokasinjia ninabio.

Ne nibalolanga lileesi lieshinyasio nilikwa okhurula hekulu, bakhaboolele mbu ni amalesi kachingane.

Kho baleshe butswa okhuula olwa balibukaana nende inyanga yabu yabalisishilibwamo.

Inyanga ya ebifwanga biabu shibikhabakhoonye shiosishiosi tawe, ne shibalihabinwa tawe.

Ne toto balia abakhola amabii, balinyoola eshinyasio shindi shilali shino tawe. Ne abaanji mubo shibamanyile tawe.

Ne linda okhubusia omuse khwa Nyasaye wuwo Omulesi. Toto ewe oli mutsimoni tsiefu, ne mutswenule khulwokhumwitsomia Nyasaye wuwo Omulesi olwa oba niwema.

Ne eshilo khandi omutswenule nende olwa tsing’ining’ini tsitsia.

Nditsuba khu ing’ining’ini olwa ikhamuukhanga.

Owashienywe uno shiyakora nohomba shiyakhola kano mukhwitsukhanila tawe.

Ne shaboolanga khubwikombi bubwe tawe.

Halali ni obufimbuli bwafimbulilungwa butswa.

Yechesibwa nende Owamaani amanji.

Owalongwa okhulongwa okhulayi mana nakololokha.

Naye ali ebuleka wa hekulu muno wekulu lia hasi.

Mana nasuta ehambi nende omurumwa, ne nameta khandi okhusuta ehambi.

Naba shinga oburambi bwa akari wetsimbeka tsibili tsiatsiyingo tsibiri nohomba ahambi muno.

Mana namufimbulila Omusumba wuwe kalia akayafimbula.

Omwoyo shikwaboola obubeyi khukakwalola tawe.

Koo, mumuyingasinjia khukayalola?

Mana toto (Omurumwa) yamulolakhwo (Jibril) khandi.

Mushisina shio musaala (mkunazi) kwokhumalilikha muno (omusala kuno kuli mwikulu lia msafu).

Ahambi nende omusaala oko, kuliwo omukunda kwomwikulu kwamenywamwo.

Olwa kwafimbwa omusaala oko (khubunyali bwa Nyasaye) nende shiakufiimba (shilamanyishe mbu ni shina halali Nyasaye butswa niumanile).

Tsimoni shitsiesundukha tawe nohomba shitsiabura eshichelo tawe.

Toto yalola khubimanyisio ebikhongo bia Nyasaye wuwe Omulesi.

Koo, mwalolakhwo Laata nende Uzza?

Nende Manata, owundi wakhataru?

Koo, nenywe muli nabasiani Naye ali nabakhaana?

Toto okho ni okhukaba okhubi muno.

Ako namerasa kamwakulikha enywe nende basenywe, Nyasaye shiyeshiakhwo shiosishiosi khumeera ako tawe. Balondangasa amaparo nende shie mioyo chiabu chienya. Ne toto obulunjifu bwabetsela okhurula khu Nyasaye wabu Omulesi.

Mbu Omundu anyoolanga shia yekombanga?

Nyasaye sa niye mwene mwikulu nende eshialo.

Ne ni Abamalaika benga bali mwikulu, abokhusabila khwabu shikhulikhoonya yesiyesi tawe, halali khuwa Nyasaye achamile mana namufuchilila?

Toto balia balasuubilanga mwikulu tawe balanganga Abamalaika amera keshikhasi.

Ne babula shibamanyile khu ako tawe, balondanga butswa amaparo. Ne toto okhuparirisia shikhukhoonyanga shiosishiosi imbeli wobwatoto tawe.

Lekhana nende ulia uhelesia omukongo ametsulisio kefu, ne shiyenya shosishosi tawe halali obulamu bwokhushialo.

Awo niwo obumanyi bwabo bulira. Toto Nyasaye wuwo Omulesi niye umanyile muno ulia wakora ehale nende injila ye, naye amanyile muno ulia walunjikha.

Ne nibia Nyasaye bioosi bili mwikulu nende mushialo, kho abarunge betsimbi khukabakholanga ne abakhola amalayi abarunge obulayi.

Balia beikalilanga okhukhola ebionono ebikhongo nende akeshifwabi, halali orwonono orutiti titi. Toto Nyasaye wuwo Omulesi obulesheli bwe nobubambalifu. Ye abamanyile muno, olwa yabaloonga okhurula khuliloba, nende ngamwali mutsinda tsia banyinenywe. Kho muleelole abatswenufu tawe. Ye amanyile muno owamuria.

Koo! Walolakhwo ulia ufutariranga (ulobanga obwisilamu nibwakhamulila)?

Nayinia shitutu mana niyemana.

Koo, akhali nende obumanyi khu kefisile, mana akalolanga?

Nohomba shiyabolelwakhwo khukali mubitabu bia Musa.

Nende Ibrahim wosia indache?

Mbu Omundu shalichinga tsimbi tsiowashie tawe?

Ne Omundu shalinyoola halali kalia kayakhola.

Ne toto ebikhole bibie bililolekha.

Mana alirungwa omurungo kukwe kwoosi nikwitsule.

Ne toto khu Nyasaye wuwo Omulesi niwo akaliweela.

Ne toto niye ureranga okhutsekha nende okhulila.

Naye toto niye owufwisinjia nende ulamusinjia.

Ne toto ye niye waloonga eshisatsa nende eshikhasi.

Okhurulana nende imwo yolwibulo nimitswa.

Netoto mbu kali khuye okhulamusibwa khandi.

Ne toto niye uyindiasinjia nende ukholanga ebindu okhuhela.

Ne toto niye Nyasaye Omulesi wetsing’ining’ini tsia Shiira (Ing’ining’ini ya abakhayi balaamanga).

Ne toto niye wasishia A’ad beimbeli.

Nende Tsamudi shibalekhwa tawe.

Nende Abandu ba Nuhu abaliho imbeli. Toto bali ababii muno abatsimbi po.

Nende tsingongo (tsia abandu ba Luti), yatsichingula hekulu mana natsilakasia mafumama.

Nitsifuunikhwa nende biatsifuunikha.

Mana ni emikabo shina chia Nyasaye wuwo Omulesi chiokanakananga?

Uno ni omwikanyilisi, mubekanyilisi beyimbeli.

Inyanga yeyindukho ili hambi.

Owumao wakhaibuula owulali Nyasaye.

Ne amakhuwa kano (Ikurani) nikamuukanga (mbu karula wa Nyasaye)?

Ne mutsekhanga, ne shimulilanga tawe?

Nanyu muli mubukoyani?

Kho re obweni bwenyu hasi khulwa Nyasaye, ne mumulaame.

Indukho ili hambi okhwitsa, ne omwesi kwabukhamwo (tsinyanga tsia Omurumwa Muhammad).

Ne nibalola eshimanyisio shiosishiosi bashifutarira nibaboola mbu: “Buno nobulosi butsilililanga.”

Ne baingasia, ne nibaloonda eshihonya shiabu, ne buli likhuwa liemekhwa.

Ne toto kamala okhuboolela amakhuwa kalimwo okhwalaba.

Amachesi kafung’anile, halali amekanyilisio shikakhoonya eshindu khubo tawe.

Mana lekhana ninabo (nibalobere okhulunjikha). Inyanga yalilaanga omulaanji khushindu shilamanyishe tawe.

Tsimoni tsiabwe tsilihenga hasi. Balirula mubilindwa opara mbu nitsisiche tsisaalanibwe.

Nibelushila Omulaanji oyo, ne Abakhayi baliboola mbu: “Inyanga ino ni indinyu.”

Abandu ba Nuhu bakhaya bo nibashili, nibayingasia Omusumba wefu, nibamuboolela mbu nomulalu mana nibamwalabila.

Mana nasaba Nyasaye wuwe Omulesi, naboola mbu: “Toto esie ekhailwe, kho habina.”

Mana nikhwikula emiliango chomwikulu khu maatsi kayombokhanga.

Ne nikhufutula liloba nikhukhola emialo (emichela), amaatsi nikabukanana (kamwikulu nende kamwiloba) khulikhuwa liali nilibusibwe (okhusishibwa abandu ba Nuhu mumaatsi).

Ne nikhubachinga khushietsimbao nende emisumari (Isafina).

Shiatsitsanga khubwemeresi bwefu, okhuba ni omurungo khu balia abakhaya ka Nyasaye.

Ne toto bwene khwachikhola okhuba eshimanyisio. Ne koo, aliwo witsulila?

Kho eshinyasio shianje shiali shirie, nende okhwikanyilisia khwanje?

Ne toto efwe khwakhola Ikurani ibe inyangu khubwitsulisio, ne koo aliwo witsulila?

Babu A’di bakhaya, kho eshinyasio shianje shiali shirie nende okhwikanyilisia khwanje?

Toto efwe khwabarumila omuyeka kweyimbumbuyeka khutsinyanga tsimbi tsilondokhaane.

Nikusiula Abandu opara mbu nebisichiri biemisala chisiulilwe.

Mana eshinyasio shianje shiali shirie nende amekanyilisio kanje?

Ne toto efwe khwakhola Ikurani ibe inyangu khubwitsulisio. Ne koo, aliwo witsulila?

Abandu ba Thamudi bayingasia Abekanyilisi.

Nibaboola mbu: “Khuloonde omundu namundu urula mwifwe. Efwe mana khuba khulaba mubukori bwa habulafu.

Niye butswa yenyene okhurula mwifwe wamakanyiliso keshela? Halali uno nomubeyi omukhongo, omufuru.”

Nibamanye mutsuli niwina omubeeyi omukhongo, omufuru.

Toto efwe khwitsa okhubarumila ingamia ikhasi khulwa okhubatema, mana bahenge butswa ne wifwile.

Ne baboolele mbu amatsi kalakabwa hakari wabu (nende ingamia) mana inyanga yabu yokhunywa amatsi ne iyaga yindi ye ingamia.

Mana nibalaanga omundu wabu, niyetsa mana nayisinza.

Kho eshinyasio shianje shiali shirie nende okhwikanyilisia khwanje?

Toto efwe khwabarumila olwang’a lulala lwonyene, nibaba shinga ebitiisi biokhumbashila olukaka.

Ne toto efwe khwakhola Ikurani okhuba inyangu khubwitsulisio, ne koo aliwo witsulila?

Abandu ba Luti bayingasia Abekanyilisi.

Toto efwe khwabarumila eshifulumutu shiamachina, halali abaloondi ba Luti, khwabahabina mumabwibwi.

Tsimbabaasi okhurula khwifwe. Endio nilwa khurunganga ulia ukhupanga orio muno.

Ne toto ye yabekanyilisilia eshinyasio shiefu, halali bo bali netsinganakani khumekanyilisio ako.

Ne toto benya mbu abahelesie abacheni be, mana nikhubawofusia tsimoni tsiabu, nikhubaboolela mbu: “Pile eshinyasio shianje nende amekanyilisio.”

Ne toto shiabeeshela eshinyasio shitsililila mumabwibi.

Kho mana pile eshinyasio shianje nende amekanyilisio.

Ne toto khwakhola Ikurani okhuba inyangu khubwitsulisio, ne koo aliwo witsulila?

Ne toto Abekanyilisi betsela Abandu ba Firauni.

Bakhaya ebimanyisio biefu bioosi pe, mana nikhubatila omutilo kwa Wamaani, Wobunyali po.

Ne Abakhayi benyu bali nende amaani okhushila abo baranjilila, nohomba kahandikwa mubitabu mbu enywe mubule okhufunaanibwa tawe?

Nohomba baboolanga mbu: “Efwe khuli abaanji khulishila butswa.”

Abanji abo balashilwa ne balakalukha inyuma tsimbilo.

Halali inyanga yeyindukho niyabalakwa. Ne indukho ni isiro muno mana khandi indulu pa.

Toto Abetsimbi bali mubukori nende mubulalu.

Inyanga yabalikhwesurulwa mafumama khubweni bwabu nibasukunwa mumulilo, baliboolelwa mbu: “Pile omutilo kwomulilo kwa Saqar.”

Toto efwe buli eshindu khwashiloonga khushichelo shiabura inyuma.

Ne likhuwa liefu nililala butswa, shinga okhulimba nende okhulimbula tsimoni.

Ne toto khwasishia abashienywe, kho alikho mwinywe witsulilanga?

Ne koosi kabakhola kali mubitabu.

Ne liosiliosi lititi nende likhonga liahandikwa.

Toto balia baria Nyasaye baliba mumikunda chomwikulu nende emialo.

Mushikhalo shiatoto, ewa Omwami, Omunyali muno.

Owetsimbabaasi tsinyinji.

Yechesia Ikurani.

Yaloonga Omundu.

Namwechesia okhwinoosia.

Eliuba nende Omwesi bichendanga khubise (Nyasaye yabiraho kho abandu bamanye khubio ebise, tsinyanga, amawichi nende emyaka).

Ne emilandula nende emisaala binamilanga Nyasaye.

Ne yachingula likulu (nalikhola okhuba eshitsafu shye eshialo) ne naraho eshichelo.

Kho mulatutuyia eshichelo tawe.

Ne muchele habwene, ne mulaleemia eshichelo tawe.

Ne eshialo yashiraho khulwa ebiloonje.

Shilimwo ebiamo nende emitende chili nende ebibuli.

Nende imele yamakhoba nende amasafu ka raihan (kawunyanga obulayi).

Kho emikabo shina chia Nyasaye wenyu Omulesi chiamukhayanga?

Yaloonga Omundu okhurula khwiloba shinga liokhuloonjela tsinyungu.

Ne naloonga Al-Jan (papa wa amajini) okhurula khumulilo kubula omwosi.

Kho emikabo shina chia Nyasaye wenyu Omulesi chiamukhayanga?

Nyasaye Omulesi we ebukwe tsibili nende we mumbo tsibili.

Kho emikabo shina chia Nyasaye wenyu Omulesi chiamukhayanga?

Yalekhulila tsinyanza tsibili tsibukananga.

Hakari watsio shiliho eshikalilo tsilasasania tawe.

Kho emikabo shina chia Nyasaye wenyu Omulesi chiamukhayanga?

Mutsinyaanza etso ebisole (lulu) birulangamwo nende ebiendo (marjan).

Kho emikabo shina chia Nyasaye wenyu Omulesi chiamukhayanga?

Ne bioosi ni ebibie bichendanga khumaatsi shinga efikulu.

Kho emikabo shina chia Nyasaye wenyu Omulesi chiamukhayanga?

Bioosi bili khushialo biliwa.

Ne bulitong’a obweni bwa Nyasaye wuwo Omulesi Woluyali nende Obuhani.

Kho emikabo shina chia Nyasaye wenyu Omulesi chiamukhayanga?

Bioosi bili mwikulu nende mushialo bisabanga Nyasaye, buli ebise atsililisinjia amakhuwa.

Kho emikabo shina chia Nyasaye wenyu Omulesi chiamukhayanga?

Khulibabalila kamwakholanga mana khubarunje, enywe ebilonje bibili (amajini nende abandu).

Kho emikabo shina chia Nyasaye wenyu Omulesi chiamukhayanga?

Enywe Amajini nende Abandu, nimunyala okhunyeleela elwanyi welikulu nende eshialo, nakhanyeleele. Shimunyala okhunyeleela tawe okhurusiakho murumushire amaani katoto (ne mulanyola hena amani ako).

Kho emikabo shina chia Nyasaye wenyu Omulesi chiamukhayanga?

Mularumilwa tsinzesele tsiomulilo nende ebichuma bisaalululwe, mana shimulahonokokha tawe.

Kho emikabo shina chia Nyasaye wenyu Omulesi chiamukhayanga?

Olwelikulu liliatikha mana libe eliakhanyu shinga amafura kasalululwe.

Kho emikabo shina chia Nyasaye wenyu Omulesi chiamukhayanga?

Inyanga eyo abulao ulireebwa tsimbi tsitsie tawe, omundu nohomba lijini.

Kho emikabo shina chia Nyasaye wenyu Omulesi chiamukhayanga?

Abetsimbi balimanyikhana khubimanyisio biabu, nibatilwa khulwotosi nende ebisisilo.

Kho emikabo shina chia Nyasaye wenyu Omulesi chiamukhayanga?

Ino niyo Jahannamu ya ababii bayingasinjia.

Bakhabotokhanengemwo nende mumatsi kamwo akayia paa.

Kho emikabo shina chia Nyasaye wenyu Omulesi chiamukhayanga?

Ne ulia waria okhwemibwa imbeli wa Nyasaye wuwe Omulesi aliba nemikunda chibili.

Kho emikabo shina chia Nyasaye wenyu Omulesi chiamukhayanga?

Emikunda chilimwo emisaala chiamasaka amarakalafu.

Kho emikabo shina chia Nyasaye wenyu Omulesi chiamukhayanga?

Tsisebele tsilimwo tsibili tsikhulukusinjia.

Kho emikabo shina chia Nyasaye wenyu Omulesi chiamukhayanga?

Mumikunda echo bilimwo ebiamo bioosi bibili bibili.

Kho emikabo shina chia Nyasaye wenyu Omulesi chiamukhayanga?

Baliyekha khubulili obwa amarungeti kabwo kakwalaala, ne ebiamo biemikunda echo bilieleela ahambi.

Kho emikabo shina chia Nyasaye wenyu Omulesi chiamukhayanga?

Ne mukari omo abakhasi balimwo beliinda, shibatilwakhwo nende omundu nohomba lijini tawe.

Kho emikabo shina chia Nyasaye wenyu Omulesi chiamukhayanga?

Opara mbu bo ni lichina lia yaqut nende ebisole ebilafu (marjan).

Kho emikabo shina chia Nyasaye wenyu Omulesi chiamukhayanga?

Koo, omurungo kwobulayi kwakhakhaya okhuba obulayi?

Kho emikabo shina chia Nyasaye wenyu Omulesi chiamukhayanga?

Ne okhushilakhwo hao chilimwo emikunda chindi chibili.

Kho emikabo shina chia Nyasaye wenyu Omulesi chiamukhayanga?

Chiamasafu kelima ti.

Kho emikabo shina chia Nyasaye wenyu Omulesi chiamukhayanga?

Tsilimwo tsisebele tsibili tsielima.

Kho emikabo shina chia Nyasaye wenyu Omulesi chiamukhayanga?

Ebiamo bilimwo, mitende nende rumana.

Kho emikabo shina chia Nyasaye wenyu Omulesi chiamukhayanga?

Mukari omo balimwo abakhasi abalayi abawulili.

Kho emikabo shina chia Nyasaye wenyu Omulesi chiamukhayanga?

Abakhasi abalayi betsimoni tsikhongo, balarulanga munzu tawe.

Kho emikabo shina chia Nyasaye wenyu Omulesi chiamukhayanga?

Shibatilwakhwo nomundu nohomba lijini tawe.

Kho emikabo shina chia Nyasaye wenyu Omulesi chiamukhayanga?

Baliyekha khubifumbi bioluyali biobukondo bwamasafu nende emikeka chianabwa obulayi.

Kho emikabo shina chia Nyasaye wenyu Omulesi chiamukhayanga?

Ni lietsikhabi elira lia Nyasaye wuwo Omulesi, Woluyali nende Obuhani.

Olwa eshikhole shilikholekha (olweyindukho iliula).

Abulaho uliyingasia okhwikholekha khwashio tawe.

Shiishinjia (okhwinjisia abakhayi mumuliro) shinininjia (okhuninia abakhola amalai mwikulu).

Olwa eshialo shilirenjibwa obutinyu.

Ne olwefikulu filisiebwa busiebwa.

Fiaba shinga olufu lutumukha.

Nanyu muliba tsimbia tsitaru.

Abandu bomukhono omulunji. Koo, ni babu wina abo Abandu bomukhono omulunji?

Ne Abandu bomukhono omukaata. Koo, nibabu wina abo bomukhono omukaata?

Ne beyimbeli baliba imbeli.

Abo nibo bali hambi muno (nende Nyasaye).

Mumikunda chiomwikulu chobwokholo.

Omukabo omukhongo mubaali imbeli.

Nende mutiti mubeyinyuma.

Baliba khubifumbi biaronwa.

Baliyiekhakhwo nibalengane.

Balikhalabanilwa nende Abasiani bolusoolili lulawa tawe.

Nibachinjile bikombe nende tsibinika nende tsigilasi, tsilimwo ebinywebwa okhurula musebele ingwalafu.

Shibilibatsunia omurwe nohomba shibilibamesia tawe.

Nende ebiamo biabayanza.

Nende inyama yeliyoni shingala bekombanga.

Nende Abakhasi bomwikulu abalahenganga abalali abasatsa babu tawe, abetsimoni tsindayi.

Bali shinga ebisole bialiindwa obulai.

Omurungo khukabakholanga.

Shibaliwulilamwo keshifwabi nohomba ketsimbi tawe.

Halali amakhuwa komulembe konyene.

Ne Abandu bomukhono musatsa, nishina shilinyoola Abandu bomukhono musatsa?

Baliba khumisaala chibulaho amawa.

Nende ebikoko biloondane.

Nende eshiinikha eshikhongo.

Nende amaatsi kakhulukusia.

Nende ebiamo ebinji.

Shibiwetsanga nohomba shibikalilungwa tawe.

Nende obulili bwachingulwa ekulu.

Toto efwe khwabaloonga abakhasi bomwikulu (hurul ain) okhulonga khwa toto obuyia.

Mana nikhubakhola abashisila.

Bachamana nende Abasatsa babu abayelana ninabo.

Khulwa Abandu bomukhono musatsa.

Omukabo omukhongo khubaali imbeli.

Ne omukabo omukhongo khubaali inyuma.

Abandu bomukhono mukhasi. Koo, ni shina shilinyoola Abandu bomukhono mukhasi?

Baliba mumuyeka kwomulilo nende amatsi kayia pa.

Nende eshinikha shiomwosi omumali ti.

Shishili shiokhunyoolamwo obunyifu nohombo obwihotselefu tawe.

Toto abo bali, khale awo bamenyanga, shinga benya mubwokholo.

Ne baali nibakhaila khubionoono ebikhongo.

Ne baboolanga mbu: “Nikhumala khwafwa mana khwaba liloba nende ebikumba, mbu toto efwe khulilamusibwa?

Nohomba bapapa befu bakhale?”

Boola mbu: “Toto balia abeyimbeli nende beinyuma.

Toto balikhuung’aasibwa khulwa ebise bieyinyanga yarechekhwa yamanyikha.

Khandi toto enywe abakori abakhayi.

Mulilia toto khumusala kwa zaqqum.

Mulikwitsusia mutsinda tsienyu.

Ne mana mulinywa amaatsi kayile pa!

Ne mulikanywa shinga ingamia inywetsanga nili nende obuloo.

Obo nobucheni bwokhubukaniIwa bwabu inyanga yomurungo."

Nefwe khwabaloonga enywe, shichilanga shina nimulasuubila tawe?

Koo, mulolangakhwo amatsi kolwibulo kamwitikhanga?

Koo nenywe mukaloonganga nohomba nefwe abaloonji?

Efwe khwabarecheshela lifwa, nafu shikhushilungwa tawe.

Okhukalukhania abaandi balali enywe, ne khubalonje enywe ebilonje biamulamanyile tawe.

Ne toto mwamala okhumanya okhulongwa khwa ambeli, neshina shichilanga nimuletsulila tawe?

Ne mulolangakhwo emimela chiamuraakanga?

Nenywe muchimesinjia nohomba nefwe khuchimesinjia?

Ne khwenyanga, khwakhachikholele chiakhaya okhurakhwo shiosishiosi tawe, mwatong’a nimung’ang’alile.

Nemuboola mbu: “Toto efwe khusandibungwa khushakhurusinjia.

Halali efwe khwimilwe.”

Koo, mulolangakhwo amaatsi kamunywetsanga?

Ni enywe mukeshinjia okhurula mumaleesi nohomba nefwe bakeshiinjia?

Khwenyanga, khwakhakakholele keyichumbi, nikakhabanga mbu simuupanga orio tawe?

Mulolangakhwo omulilo kwamwashinjia?

Nenywe mwaloonga omusaala kwakwo nohomba nefwe baloonga?

Efwe khwakukhola okhuba eshitsulisio nende kwokhukhoonya balia bali mushitsimi.

Kho litswenule elira lia Nyasaye wuwo Omulonji, Omukhongo.

Ne toto nditsuba khubise bietsing’ining’ini tsikwitsanga.

Ne toto shino neshitsubo eshikhongo, mumanyangakhwo toto.

Toto eyo ni Ikurani yoluyali.

Mushitabu shialindwa.

Shashitilangakhwo tawe halali Omutswenufu.

Sheshibwa okhurula khu Nyasaye Omulesi webiloonje bioosi.

Ne kano namakhuwa kamulekanga?

Amwakhopele orio khumukabo kwenyu (kwa abahele) nanyu mwikhola mbu muyingananga?

Kaliba karie olwa omwoyo kuliuula khulukamukamu (mwikolomero)?

Ne enywe ebise ebo muhenganga.

Ne efwe khuli ahambi muno ninanyu, nanyu shimukhulolanga tawe.

Ne enywe nikakhabanga mbu shimulirungwa tawe.

Kalusiekhwo omwoyo oko nikali mbu muboolanga obwatoto.

Ne naliba mubalia basutibwa hambi nende Nyasaye.

Kuliba omwikhoyo nende ebiokhuunya obulai, nende emikunda chomwikulu chobwokholo.

Ne naliba mubandu bomukhono omusatsa.

Ni omulembe khwiwe owuli Mubandu bomukhono musatsa.

Ne naliba Mubayingani Abakori.

Obucheni bwokhubukaniIwa bubwe buliba amaatsi kayile pa!

Nende okhwinjisibwa mumulilo kwa Jahim.

Toto buno nibo obwatoto bwokhwisikwa.

Kho litswenule elira lia Nyasaye wuwo Omulesi, Woluyali.

Bitswenulanga Nyasaye bili mwikulu nende mushialo, naye niye Owamaani, Owamachesi muno.

Nobubwe obwami bwo mwikulu nende khushialo. Niwelesinjia obulamu, khandi niye ufwisinjia, naye ni omunyali muno wa buli eshindu.

Ye niye wokhuranga na niye wokhumalilikha, naye niye owahabulafu nende owulalolekha, naye niye Omumanyi muno wabuli eshindu.

Niye waloonga likulu nende eshialo khutsinyanga sita, mana nachingukha ekulu weshisaala shioluyali, yamanya shinjilanga mwiloba nende shirulangamwo, nende shikholomokhanga okhurula mwikulu nende bininanga hekulu, naye ali ninanyu wosiwosi wamuli. Ne Nyasaye alolanga muno kamukholanga.

Obwami bwo mwikulu nende khushialo nobubwe, ne ewa Nyasaye ni wamakhuwa koosi kakalusibwa.

Yenjisinjia eshilo mushitere, ne yenjisinjia eshitere mushilo, naye niye umanyile muno kali mubilifu.

Suubile khu Nyasaye nende Omurumwa wuwe, ne murusie khubia Nyasaye yamukhola okhuba abalindi. Kho, balia basuubila mwinywe, mana nibarusia (emiandu), baliba nende omurungo omukhongo.

Ne muli murie mulasuubilanga khu Nyasaye tawe ne Omurumwa abalaanganga mbu musuubile khu Nyasaye wenyu Omulesi, naye toto yamala okhubukula indache yenyu, toto nimuli abasuubili?

Ye niye wishilinjia omusumba wuwe tsinyaali tsinoosinjia, kho tsibarusie mubiilima nitsibeenjisia mubulafu, ne toto Nyasaye khwinywe ni Omwihotselefu, Owobukoosia muno.

Muli murie mularusinjia (emiandu mwachiila) khunjila ya Nyasaye, ne nibia Nyasaye bioosi bili khushialo nende mwikulu? Shibali nashilala tawe owayiinia mwinywe nikhushili okhwikula Makka, mana nalwaana. Abo bali nende omurungo omukhongo okhushila balia bayinia Makka niyikulwe, mana nibalwana. Ne boosi Nyasaye yabalaka amalayi. Ne Nyasaye amanyile koosi pe kamukholanga.

Ni wina wuhelesia Nyasaye likofi lilayi, ne amurunge omurungo kumeteshe, ne anyoole omurungo kwobuhaani muno?

Inyanga yolilola abasuubili abasatsa nabakhasi, obulafu bwabu buli imbeli wabu, nende omukhono kwabu omusaatsa, omwikhoyo kwenyu lelo neemikunda chomwikulu chiburangamwo emialo, mulikhalamwo tsinyanga tsioosi. Okho nikho okhubura okhukhongo.

Inyanga ya abeshikhabili abeshisatsa nende abeshikhasi baliboolela abasuubili mbu: “Mukhuliinde khunyoole okhubukulakhwo mubulafu bwenyu.” Lisisi lili nende omuliango lilirebwa hakari wabu: mukari wakwo tsilibamwo tsimbabaasi, na elwanyi wakwo okhurulila elubeka eyo shiliba eshinyasio.

Balibalaanga nibababoolela mbu: “Abayiee shikhwali ninanyu?” Balibaboolela mbu: “Nabweene, halali enywe mwechemela abeene nimwirechekha okhulinda (amasila kakhunyole efwe), nimukanakana, ne obwikombi bwa emioyo chienyu nibumukatia, okhula shingala likhuwa lia Nyasaye lietsa, mana Omubeyi wulia nababeya okhukhaya okhuloonda Nyasaye.

Kho, inyanga yino sishilabukulwa shiosishiosi khwinywe shokhubanunula tawe, nohomba khu balia abakhaya. Eshimenyo shienyu ni mumulilo, nimwamukhoyeshele. Ne ni habundu abii muno wokhukalukha.”

Ne koo, ebise bishili okhula khubasuubila emioyo chiabu chiihotselesie khulwokhwitsulila Nyasaye nende khulwa amakhuwa ka toto keshibwa? Ne balaba ta shinga balia abahebwa Eshitabu bali imbile wabu, ne nibaba nende ebise ebirambi, emioyo chiabu nichiba emiumilanu, ne abaanji babu nibokhurula mumalako.

Manye mbu Nyasaye alamusinjia liloba nilimalilenje okhufwa. Toto khubenoosiliye ebimanyisio biefu khomunyoole okhwikhonyela obwongo.

Toto balia abaininjia muno eshihanwa shia Izakaa abasatsa nabakhasi, mana bahelesie Nyasaye likofi lilayi, balimetelwakhwo amakhabi, ne balinyoola omurungo kwobuhani omulayi muno.

Ne balia basuubila Nyasaye nende Abarumwa bebe, abo nibo abobwatoto, nende abaloli imbeli wa Nyasaye wabu Omulesi. Abo balinyoola omurongo kwabu nende obulafu bwabu. Ne balia bakhaya, mana nibaingasia ebimanyisio biefu, abo nibo Abandu bomumulilo kwa Jahim.

Manye mbu obulamu bwokhushialo nomubayo, nende amakhuwa kabulamwo obukhala, nende okhwirona, nende okhwilaya abeene khubeene, nende okhushilana okhukhaba emiandu eminji nende Abana. Bili shinga ifula yemimela chiayio chiasangasia abalimi, mana chitse chiume chikalukhane ochilole nichili namabuyu, mana chibe amasakaria. Ne mwikulu shiliyo eshinyasio eshikhongo, nende obulesheli nende okhufuchililwa okhurula khu Nyasaye. Ne obulamu bwokhushialo shini shiosishiosi tawe halali omwikhoyo kwobubeyi.

Ilushile eshileshelo shia Nyasaye wenyu Omulesi nende omukunda kwomwikulu, oburakalafu bwakwo buli shinga oburakalafu bwelikulu nende eshialo, kwarecheshelwa Abasuubila Nyasaye nende Abarumwa bebe. Etso nitso tsimbabaasi tsia Nyasaye ahelesinjia owayenya. Ne Nyasaye ali netsimbabaasi tsinyinji.

Ne amasila kosikosi shimwakhanyoola khushialo nohomba mwinywe abeene halali khwamala okhukaandika mushitabu nikhushiili okhukaloonga. Toto ako khu Nyasaye ni amangu.

Khomukhaye okhubeelela khushiamulanyolele, ne mukhaye okhwilola khushiabahelesiye. Ne Nyasaye shiyachama buli omufuru wilolanga tawe.

Balia bemananga, ne balomesinjia Abandu okhuba abeemani. Ne ulia ufutara, amanye mbu toto Nyasaye niye Omuyinda, Owitsomibungwa muno.

Ne toto khwaruma Abarumwa befu nende ebimanyisio binoosinjia, ne nikhubeshilia eshitabu nende eshichelo kho Abandu beeme khubwatoto, ne nikhwishia eshichuma shili namaani amanji nende obukhoonyi khubandu, kho Nyasaye amanye ni wina umuhabina nende Abarumwa bebe khumakhuwa kefisile. Toto Nyasaye niwa Amaani, Omushili muno.

Ne toto khwaruma Nuhu nende Ibrahim, mana nikhura mulwibulo lwabu oburumwa nende Eshitabu, mana baliwo abasuubila mubo, ne abaanji mubo barulanga mumalako.

Mana nikhubalondiakhwo Abarumwa abaanji inyuma wabu, ne nikhulondiakho Isa (Yesu) Omwana wa Mariam, ne nikhumuwa Injili, ne nikhura mumioyo chia abaloondi bebe eshisa nende tsimbabaasi. Nabwo “obusirasoti” abeene nibo babuchachia sa. Sikhwabalachila elo tawe, halali okhukonya tsimbabaasi tsia Nyasaye. Halali shibaalondanga kenyekhana tawe. Mana balia basuubila mubo khwabawa omurungo kwabu, ne abanji mubo nibokhurula mumalako.

Enywe abasuubila, rie Nyasaye, ne suubile Omurumwa wuwe. Yetsa okhubahelesia emikabo chibili mutsimbabaasi tsie, ne alabahelesia obulafu bwokhuchendela, ne alabaleshela. Naye Nyasaye ni Omulesheli muno, Omunji wetsimbabaasi.

Kho Abandu ba Eshitabu bamanye mbu babula obunyali khutsimbabaasi tsia Nyasaye tawe, ne mbu tsimbabaasi tsioosi tsili mumukhono kwa Nyasaye. Ahelesinjia owayenya. Ne Nyasaye niwetsimbabaasi tsinyinji.

Toto Nyasaye awulile amakhuwa komukhasi urebananga ninawe okhulondokhana nende Omusatsa wuwe, ne alilila Nyasaye wuwe, ne Nyasaye awulilanga amakalusanio kenyu. Toto Nyasaye ni Omuwulili muno, Omuloli po.

Balia bachelasinjia Abakhasi babu nende banyinabwe mwinywe, abo shini banyinabwe tawe. Banyinabwe ni balia ababeebula. Ne toto abo baboolanga likhuwa libii muno khandi liobubeyi. Ne toto Nyasaye niwokhubeela muno, Omulesheli po.

Ne balia bachelasinjia Abakhasi babu nende banyinabwe mana nibakalukha inyuma (okhukhola) akababoolele (mbu shabalikhola ta), banunule Omurumwa nibashili okhutilanakhwo (omusatsa nende omukhasi). Endio nilwa mwikanyilisibwa khu (makhuwa) ako. Ne Nyasaye ni Omumanyi muno khukoosi kamukholanga.

Ne ulanyoola omurumwa wokhununula tawe, afunge saumu emiesi chibili chilondane nibashili okhutilanakhwo. Ne ulanyalilwa ako tawe, alisie abamanani amakhumi kasaasaba. Endio kho musuubile khu Nyasaye nende Omurumwa wuwe. Ne etso nitso tsinzakho tsia Nyasaye, ne Abakhayi balinyoola eshinyasio eshilulu.

Ne toto balia bayingasinjia Nyasaye nende Omurumwa wuwe, balinyoola eshifimbwa murwe shinga balia baranjilila, ne toto khwamala okhubeeshilia ebimanyisio bilolekha, ne abakhayi bakhanyoole eshinyasio shiokhututuyia.

Inyanga ya Nyasaye yakhabalamusie boosi pe mana ababoolele koosi kabakhola, Nyasaye yakabikha, nabo bakebilila, ne Nyasaye nomuloli muno wabuli eshindu.

Shololangakhwo mbu Nyasaye yamanya bioosi bili mwikulu nende mushialo, shikhwakhaba okhwimoonya khwa Abandu bataru tawe halali Nyasaye niwokhune khubo, nohomba khwabane halali Ye (Nyasaye) ni wakharano khubo, nohomba babe batiti khubo nohomba abanji khu abo halali ali ninabo wosiwosi wa bali, mana alibaboolela kabakholanga inyanga yeyindukho. Toto Nyasaye nomumanyi muno wabuli eshindu.

Shololangakhwo balia bakanibwa okhwimoonyelesia, mana nibakalushila kabakanibwa, ne bemoonyelesinjia khumakhuwa katsimbii nende obusuku, nende okhuruma tsinzakho nende okhuloba okhutiila amalako komurumwa. Ne nibakhwitsila, shibakhushesinjia shingala Nyasaye wuwo akhushesinjia tawe, ne baboolanga mumioyo chiabu mbu: “Sichila shina Nyasaye nalakhwelesia eshinyasio khukakhuboolanga kano tawe?” Mana omulilo kwa Jahanam kulibayela, balinjilamwo! Ne awo ni habundu abii muno wokhukalukha.

Enywe abasuubila, nimwimoonyelesia, mleemoonyelesia khutsimbi nende okhuruma tsinzakho nende okhuloba okhutiila amalako komurumwa tawe. Ne mwimoonyelesie khumalayi nende okhuria Nyasaye, ne rie Nyasaye owamulikhung’asibwa imbeli wuwe.

Toto okhwimoonyelesia khurulanga khu Shetani, kho asinyisie Abasuubili. Halali shanyala okhubawumisia tawe halali khubunyali bwa Nyasaye. Ne Nyasaye butswa niwa abasuubili besiche.

Enywe Abasuubili, nimuboolelwa habundu wookhwikhala mbu: “Site mukasie obwiyangu”, site mukaasie obwiyangu, Nyasaye alabahelesia obwiyangu. Ne nimuboolelwa mbu: “Rule mutsie mumiero”, rule. Nyasaye achingulanga ekulu tsingasi balia basuubila mwinywe nende balia abahebwa obumanyi, mubichelo biawukhane, ne Nyasaye amanyile muno kamukholanga.

Enywe Abasuubili, nimumumoonyelia Omurumwa, ranjilisie eshihanwa nimushili okhumumoonyelia khwenyu okho. Endio nibo obulayi khwinywe nende obutswenufu muno. Ne nimulanyoola shokhurusia tawe, toto bwene Nyasaye ni Omulesheli muno, Owetsimbabaasi po.

Muritsanga okhuyinia ebihanwa imbeli wokhumonyelia khwenyu okho? Ne nimulakhola murio tawe, mana Nyasaye afuchilile okhwikanila khwenyu, lumilile okhulaama (iswala), ne yinie eshihanwa shia izakaa, ne rie Nyasaye nende Omurumwa wuwe, ne Nyasaye ni Omumanyi muno khukamukholanga.

Shololanga ta balia bakhola obulina nende Abandu ba Nyasaye yasinyishila? Shibali mwinywe tawe khandi shibali mubo (abayahudi) tawe. Ne betsubanga khububeyi nibamanyile.

Nyasaye yabarecheshela eshinyasio eshilulu. Toto kabakholanga ni amabii muno.

Bakhola ebitsubo biabu okhuba ingabo, mana nibekalila injila ya Nyasaye, kho bali neshinyasio shiokhututuyibwa.

Emiandu nende Abana babu shibilibakhoonya shiosishiosi imbeli wa Nyasaye tawe. Abo nabandu bomumulilo, balimenyamwo tsinyanga tsioosi.

Inyanga ya Nyasaye alibalamusia boosi, ne balimwitsubila shinga bamwitsubilanga enywe, ne baparanga mbu bali abwene. Koo, toto abo nibo ababeyi.

Shetani yabeekhalamwo mana nabeebilisia ametsulisio ka Nyasaye. Oko niko omukanda kwa Shetani. Koo, toto omukanda kwa Shetani niko kwasikha.

Toto balia bekalilanga amakhuwa ka Nyasaye nende Omurumwa wuwe, abo baliba neshifimbwa murwe shimalayo.

Nyasaye yabusia mbu: “Toto nisie ulishila, nende abarumwa banje.” Toto Nyasaye Niwa amaani, Woluyali.

Shiwakhanyoola Abandu basuubila Nyasaye nende inyanga imalilishi, nibayanzanga po balia abaloba Nyasaye nende Omurumwa wuwe tawe, kata nibakhaba basaabwe, nohomba Abana baabu, nohomba Abasiani babu, nohomba Abakhasi babu. Abo Nyasaye yara mumioyo chiabu obusuubili, ne nabahelesia amaani khu roho okhurula khuye. Ne alibenjisia mumikunda chomwikulu chiburangamwo emialo, balimenyamwo tsinyanga tsioosi. Nyasaye yabafuchilila, nabo nibamufuchilila. Abo nibo bomukanda kwa Nyasaye. Koo, toto bwene omukanda kwa Nyasaye niko kulishila.

Bitswenulanga Nyasaye bioosi bili Mwikulu nende bili Mushialo. Naye Niwamani, Owamachesi muno.

Niye warusia Abakhaya abokhurula mu balia bahebwa Eshitabu okhurula Mutsinzu tsiabu, ebise biokhurusibwa khwabo khwaambeli. Shimwaparakhwo mbu banyala okhurula tawe, nabo nibapara mbu tsingoba tsiabu tsilabekalila ehale nende Nyasaye. Halali Nyasaye yabetsela munjila yabalamanyile tawe, ne nara obuyendi obukhongo mumioyo chiabu, banyasinjia tsinzu tsiabu khumikhono chiabu, nende emikhono chiabasuubili, kho paremwo enywe abetsimoni.

Ne kalaba mbu Nyasaye shiyabahandichila okhurula tawe, yakhabahelesiye eshinyasio khushialo, ne inyanga imalilishi bakhabe nende eshinyasio shio mumulilo.

Ako nilwokhubeela mbu bomela omirwe amakhuwa ka Nyasaye nende Omurumwa wuwe. Ne ulia wumila Nyasaye omurwe, toto Nyasaye niweshinyasio eshilulu.

Omusala kwosikwosi kwamwarema, nohomba kwamwalekha nikwemele khushisina shiakwo, nikhumunwa kwa Nyasaye, ne kho afimbie omurwe abarulanga mumalako.

Ne omwandu kwa Nyasaye yahelesia Omurumwa wuwe okhurula khubo, shimwakulwanila okhwikhonyela tsifarasi nohomba tsingamia tawe. Halali Nyasaye ahelesinjia Abarumwa bebe obunyali khu yesiyesi wayenya. Ne Nyasaye nomunyali muno wabuli eshindu.

Ne omwandu kwa Nyasaye yahelesia Omurumwa wuwe okhurula khubandu betsingongo, nikwa Nyasaye nende Omurumwa, nende Abeekho, nende Abafwilwa, nende Abamanani nende bananjila, kho kukhaye okhubotokhanila sa mubayinda mwinywe. Ne shia Omurumwa abahelesia, shibukule. Ne shiabakaya, shileshe. Ne rie Nyasaye. Toto Nyasaye niweshinyasio eshilulu.

Nikwa Abamanani abawuyi abaloondwa mutsinzu tsiabu nibanulwa omwandu kwabu, bakhabanga amalayi okhurula khu Nyasaye nende obuchami, ne bahabinanga Nyasaye nende Omurumwa wuwe. Abo nibo abatieli.

Ne balia bali namatala nende obusuubili imbeli wabu, bayanza balia babeetsela, ne shibali nobwimani mumioyo chiabu tawe khushabahelesibwa, ne beyimanga kata nibali mbu bo nibakhoyeshele. Ne ulia wiikaliwa obwimani bwomwoyo kukwe, abo nibo ababura.

Ne balia betsa inyuma wabu baboolanga mbu: “Nyasaye wefu Omulesi, khuleshele efwe nende Abana befu abakhuranjilila mubusuubili, ne olara mumioyo chiefu ishinda khubalia basuubila tawe. Nyasaye wefu Omulesi, toto oli Omwihotselefu, Owetsimbabaasi muno.”

Shololangakhwo abeshikhabili baboolelanga abashiabwe abakhaya ka Nyasaye abokhurula mubandu bahebwa Eshitabu mbu: “Nimurusibwa, toto khularula halala ninanyu. Ne shikhularia (yesiyesi ukhukayira efwe okhurula ninenyu) tawe. Ne nimukhuywa, toto khulabahabina.” Ne Nyasaye aininjia obuloli mbu toto bo bakatinjia.

Nibarusibwa, shibalarula halala ninabo tawe. Ne nibakhuywa, shibalabahabina tawe. Ne nibatema okhubahabina, toto balabelukha muno mana shibalahabinwa tawe.

Toto enywe muli eshirisio eshikhongo mumioyo chiabu okhushila Nyasaye. Ako ni khulwa okhuba mbu bo ni Abandu balamanyile shiosishiosi tawe.

Shibalakhuyananga ninanyu boosi halala tawe, halali mutsingongo tsietsingoba nohomba inyuma wamasiisi. Emielo chiabu abeene khubeene ni emisiro. Opara mbu bali halala, ne emioyo chiabu chiakabukhanamwo. Ako ni khulwokhuba mbu abo ni Abandu balekhonyelanga obwongo tawe.

Bali shinga balia bali imbeli wabu hatiti, banyola obubii bwa amakhuwa kabu, ne balinyoola eshinyasio eshilulu.

Shinga Shetani olwayaboolela Omundu mbu: “Khaya ka Nyasaye”, ne olwa yakhaya, (Shetani) yaboola mbu: “Esie toto endi ehale ninawe, esie toto ndaria Nyasaye Omulesi webilonje bioosi.”

Ne niiba indukho yabu babili mbu toto bo balimumulilo tsinyanga tsioosi, ne oko niko omurungo kwa Abamabii.

Enywe abasuubila, rie Nyasaye, ne buli shia mundu ahenge nishina shiayekasilia khulwa mutsuli. Ne rie Nyasaye. Toto Nyasaye nomumanyi po khukamukholanga.

Ne mulaba shinga balia bebilila Nyasaye mana nabakhola nibeyibilila abeene tawe. Abo nibo abarulanga mumalako.

Shibayelana tawe Abandu bomulilo nende Abandu bomwikulu. Abandu bomwikulu nibo abalibura.

Khuleshinjiakho Ikurani ino khushikulu, wakhashilutsi nishiriire muno nishiatikhana khulwokhuria Nyasaye. Ne endio nilwa khuchelasilinjia Abandu bakhaba bario banyoola okhupara.

Ye niye Nyasaye, abulao nyasaye wundi ulali Ye tawe. Omumanyi wakefisa nende kalolekha, naye ni Omunji wetsimbabaasi, Omukoosia muno.

Ye niye Nyasaye, abulao nyasaye wundi ulali Ye tawe. Omwaami, Woluyali, Womulembe, Omureri Womulembe, Uchesinjia amakhuwake omwene, Owaamani, Ukholanga liayenya, Omukhongo, obutswenufu ni bwa Nyasaye, ali ehale nende akabamusanjinjia.

Ye niye Nyasaye Omuloonji, Omukaasi, Uretsangakhwo obukoondo, ali nende ameera amalayi muno. Bimutswenulanga bioosi bili mwikulu nende mushialo, naye niye Woluyali, Owamachesi muno.

Enywe Abasuubila, mulakhola Abasuku banje nende Abasuku benyu okhuba abeetsa tawe, mwabachama tawe, ne toto bamala okhukhaya obwatoto bwamwitsila. Bekalilanga Omurumwa nende enywe okhusuubila khu Nyasaye wenyu Omulesi, olwa murulanga khulwa okhulwaana khunjila yanje, nende okhukhaaba obuchami bwanje. Mukholanga nabo obwitsa mubwifisi, nasi emanyile muno kamukholanga mubwifisi nende mubwang’ang’u. Ne ukhola ario mwinywe, toto aba yamala okhukora injila ya habwene.

Nibetsukhana babashila, nibaba Abasuku benyu, ne balaboosiakhwo emikhono chiabu nende tsinimi tsiabu khububii, ne bekombanga mbu mube abakhayi.

Abeekho benyu nohomba Abana benyu shibilibakhoonya shiosishiosi tawe. Inyanga yeyindukho alibakabukhasia hakari wenyu ninabo, ne Nyasaye alolanga muno kamukholanga.

Toto enywe muli nende eshilolelo eshilayi muno khu Ibrahim nende balia abali ninaye. Olwa baboolela Abandu babu mbu: “Toto efwe khuli ehale muno ninanyu nende biamulaamanga bilali Nyasaye tawe, khubakhayile, ne obusuku nende ishinda biloleshe hakari wefu ninanyu okhuula shinga mulisuubila khu Nyasaye mulala”, halali amakhuwa ka Ibrahim yaboolela samwana mbu: “Toto nditsa okhukhusabila eshileshelo. Ne shendi nobunyali bwosibwosi khu Nyasaye tawe." Nyasaye wefu Omulesi, newe butswa wakhwisichile, ne ni ewuwo butswa wakhuliinjile, ne ni ewuwo butswa wakhulikalukha.

Nyasaye wefu Omulesi, olakhukholela amatemo okhurula khubakhayi tawe, ne khuleshele ebionoono biefu, Nyasaye wefu Omulesi. Toto ewe newe Owamaani, Omuchesi muno.”

Toto muli neeshilolelo eshilayi muno mubo, khu ulia wikoombanga okhulolana nende Nyasaye nende inyanga imalilishi. Ne ulia ukhaya, toto Nyasaye niye Omuyinda, Owitsomibuungwa muno.

Yakhaba ario Nyasaye yara obuyanzi hakari wenyu nende abasuku benyu. Ne Nyasaye nomunyali muno, ne Nyasaye ni Omulesheli po, Owobukoosia muno.

Nyasaye shabakaaninjia balia balabalwaninjia khudini, ne shibabarusia mutsinzu tsienyu mbu mubakholele amalayi tawe, nende okhubakholela obuleng’aafu. Toto Nyasaye yayanza balia bakholaanga obuleng’aafu.

Ne toto abakaninjia okhukhola obwitsa bwa mbusia ngonia nende balia babalwaninjia khudini, mana nibabarusia mutsinzu tsienyu, mana nibakhoonya okhulondwa khwenyu, okhubakhola abalina benyu ba mbusia ngonia. Ne balia balabakhola okhuba abetsa babu ba mbusia ngonia, abo nibo abetsimbii.

Enywe abasuubila, Abakhasi Abasubili abawuyi nibabeetsela, mubaree khumareebo, Nyasaye niye umanyile muno obusuubili bwabu. Nimunyoola mbu nabasuubili, mulabakalusia mubakhayi tawe. Bo shibakwaanila Abasaatsa abo tawe, ne abasatsa abo shibakwanile ninabo tawe, ne mukalusilie abasatsa abo shiabarunga (ikhwe), shinobubii enywe okhubateshia tawe nibili mbu mubahelesia omurungo kwabu. Ne mulakhayira okhuteshia abakhasi benyu bahandachila mubukhayi tawe. Ne reebe shiamwarunga, nabo bareebe shiabarunga. Ako niko amalako ka Nyasaye abusia hakari wenyu. Ne Nyasaye ni Omumanyi muno, Owamachesi po.

Ne Omukhasi yesiyesi mwinywe niyakhakalushila abakhayi, mana nimulwana nende abakhayi, nimunyoola omwandu kweliyie, muhelesie balia babakhasi babu babalekha, omwandu kuyelana nende okwabarunga, ne murie Nyasaye wamusuubilanga.

Ewe Omurumwa, Abakhasi abasuubili nibakhwitsila nibakhulaka mbu shibalatsokaasia shiosishiosi nende Nyasaye tawe, ne shibaleeba tawe, nohomba shibalayeya tawe, nohomba shibaleera Abana babu tawe, nohomba shibalarera akokhuchikha akarulana hakari wemikhono nende ebilenje biabu tawe, nohomba shibalakhaya amalako koko akamubulayi tawe, lakana ninabo, ne obasabile eshileshelo khu Nyasaye. Toto Nyasaye Nomulesheli muno, Wobukoosia po.

Enywe Abasuubila, mulakhola obulina nende balia ba Nyasaye yasinyishila tawe. Bamala okhuwesia omwoyo khumakhuwa komwikulu, shinga abakhayi bawesia omwoyo khubandu bomubilindwa.

Bitswenulanga Nyasaye bioosi bili mwikulu nende mushialo, naye niye Woluyali, Owamachesi muno.

Enywe Abasuubili, shichila shina muboolanga akamulakhola tawe?

Ni eshisinyo eshikhongo imbeli wa Nyasaye okhuboola kamulakhola.

Toto bwene Nyasaye yayanza balia abalwananga khunjila yiyie khulunyaali shinga lisisi liatilana.

Ne olwa Musa yaboolela Abandu bebe mbu: “Enywe Abandu banje, shichila shina musinyisinjia, ne toto mwamanya mbu esie endi Omurumwa wa Nyasaye khwinywe?” Ne olwa barula khunjila, Nyasaye nakosia emioyo chiabu. Ne Nyasaye shalunjisinjia Abandu abakori tawe.

Yitsulila olwa Isa (Yesu), Omwana wa Mariam yaboola mbu: “Enywe Abana ba Israeli, esie endi Omurumwa wa Nyasaye khwinywe, efuchilila obwatoto bwendi nabo okhurula mutaurati, nende okhubahelesia akomwikhoyo kookhwitsa Omurumwa unondakhwo ulangwa mbu Ahmad." Olwa yabeetsela nende ebifune bia habulafu, baboola mbu: “Buno nobulosi bulolekha.”

Ne wina wetsimbi muno, okhushilakhwo ulia uchishila Nyasaye obubeyi, naye alangungwa mubusalamu? Ne Nyasaye shalunjisinjia Abandu ababii tawe.

Benyanga okhusumia obulafu bwa Nyasaye neeminwa chiabu, ne Nyasaye alatinyia obulafu bubwe kata abakhayi nibalachama tawe.

Niye owaruma Omurumwa wuwe nende obulunjifu nende idini ya toto kho achihelesie obushili khu tsidini tsindi, kata Abatsokaasi nibalachama tawe.

Enywe Abasuubili, koo, ebamanyiekhwo inganga yitsa okhubahonia okhurulana nende eshinyasio eshilulu?

Musubilenje Nyasaye nende Omurumwa wuwe, ne mukhalabanenje khunjila ya Nyasaye khumiandu chienyu nende emioyo chienyu. Ako ni amalayi khwinywe nikaba mbu mwakhamanya.

Alabaleshela ebionoono bienyu, ne alabenjisia mumikunda chomwikulu chiburanga emialo hasi wachio, nende eshimenyo eshilayi mumikunda chia Eden. Okho nikhwo okhubura okhukhongo.

Ne eshindi shibachamisia: obukhoonyi okhurula khu Nyasaye nende obushili buli hambi, ne bila Abasuubili akomwikhoyo.

Enywe Abasubili, be abahabini ba Nyasaye, shinga Isa (Yesu) yareeba abechi bebe mbu: “Ni wina omuhabini wanje khu Nyasaye?” Abechi bebe nibaboola mbu: “ Efwe khuli abahabini ba Nyasaye.” Mana nikusuubila omukanda mulala mubana ba Israil, ne omukanda kundi nikukhaya. Kho, nikhukhoonya kulia okwasuubila khubasuku bakwo, mana nibaba abashili.

Bitswenulanga Nyasaye, ebili mwikulu nende mushialo, Omwami, Woluyali, Owamaani, Owamachesi muno.

Ye niye waruma Omurumwa mubandu bakorwa okhusooma nende okhuhandika, abasoomele tsinyaali tsitsie, ne abatswenule, ne abechesie Eshitabu nende amachesi, kata nibaali inyuma awo mubukori bulolekha.

Ne abandi bashili okhuliimaana ninabo, naye niye Owamaani, Omuchesi po.

Etso nitsimbabaasi tsia Nyasaye, ahelesinjia owa yenya. Ne Nyasaye niwetsimbabaasi tsinyinji.

Abahebwa Eshitabu shia Itaurati mana nibalashiloonda tawe, bali shinga isishili ichinjile ebitabu. Ifwani imbii muno ni Abandu bakhaya amakhuwa ka Nyasaye. Ne Nyasaye shalunjisinjia Abandu ababii tawe.

Bola mbu: “Enywe Abayahudi, nimuparanga mbu enywe muli abahelwa ba Nyasaye okhushila Abandu boosi, mwikoombe liifwa nikali mbu muboolanga obwatoto.”

Ne shibanyala okhwikomba liifwa tawe khulwa akemikhono chiabu chiaranjilisia okhukhola. Ne Nyasaye yamanya muno ababii.

Bola mbu: “Toto liifwa liamwilukhanga elo, lilibanyoola, mana mulikalusibwa khumumanyi wa kefisa nende kalolokhanga, ne alibaboolela koosi kamwakholanga.”

Enywe Abasuubili, nikulangwa omulaango kwa amalaamo inyanga ya chirano, ilushile okhwitsulila Nyasaye, ne leshe inganga. Endio nobulayi khwinywe nikali mbu mumanyile.

Ne amalaamo nikakhamalwa, saalaane khushialo, ne koonye khumikabo chia Nyasaye, ne mwitsulile Nyasaye muno, mwakhaba murio mwanyoola okhubura.

Ne nibalola inganga nohomba amakhuwa kabula obukhala, bakelushila, ne bakhulekha niwemele. Boola mbu: “Akali ewa Nyasaye ni amalayi muno okhushila amakhuwa kabula obukhala nende inganga, ne Nyasaye niye Omukabi omulayi okhushila boosi bakabanga.”

Abeshikhabili nibakhwitsila nibaboola mbu: “Toto efwe khusuubila mbu ewe oli Omurumwa wa Nyasaye”, ne Nyasaye amanyile mbu toto ewe oli Omurumwa wuwe, ne Nyasaye ayininjia obuloli mbu toto abeshikhabili nababeyi.

Bakhola ebitsubo biabu okhuba ingabo, mana nibekalila injila ya Nyasaye. Ni amabii muno akabakholanga.

Ako nikhulwokhuba mbu basuubila mana khandi nibakhaya, mana Nyasaye naasuba emioyo chiabu, mana bo shibamanyile tawe.

Ne nobalola, emibili chiabu chikhuchamisia. Ne nibaboola, orechelesia amakhuwa kabu, opara mbu ni emisala chiyeshibwe. Baparanga mbu buli oluyoka lwosilwosi lupwa luli khubo. Abo nibo Abasuku, ba meso ninabo. Nyasaye yabatsuba. Bakosibuungwa barie?

Ne nibaboolelwa mbu: “Itse Omurumwa abasabile eshileshelo”, bayuyia emirwe chiabu, ne obalola nibashukhana nibakhola obufuru.

Ninashilala khubo, nobasabila eshileshelo nohomba nolekha, Nyasaye shiyakhabaleshela tawe. Toto Nyasaye shalunjisinjia abonooni tawe.

Nibo baboolonga mbu: “Mulahelesie emikabo balia abali halala nomurumwa tawe, okhula bamwilushe.” Ne Nyasaye ni Mwene ebiachi biomwikulu nende mushialo. Halali abeshikhabili shibamanyile tawe.

Baboolanga mbu: “Nikhukalukha Madina, toto abamaani balaloondamwo abateshele.” Ne amaani ni ka Nyasaye nende Omurumwa wuwe, nende Abasuubili. Halali Abeshikhabili shibamanyile tawe.

Enywe Abasuubili, omwandu nende Abana benyu bilachila mwebilila okhumurumbula Nyasaye tawe. Ne yesiyesi ukhola ario, aba ali mubatiba.

Ne rusie eshihanwa mumiandu chiakhwabahelesia, liifwa nilishili okhuulila mulala wenyu, mana aboole mbu: “Abaayiee Nyasaye wanje Omulesi, nolametakhwo tsinyanga atiti, ndarusia muno eshihanwa, mana ndaba mubandu abalayi.”

Ne Nyasaye shanyala okhumeta Omundu ebise liifwa lilie niliakhoola tawe. Ne Nyasaye nomumanyi muno khukamukholanga.

Bitswenulanga Nyasaye bioosi bili mwikulu nende mushialo, obwami nobuubwe nende oluyali, naye ni Omunyali muno wa buli eshindu.

Ye niye Owabaloonga, ne mwinywe balimwo Abakhayi khandi mwinywe balimwo Abasuubili. Ne Nyasaye alolanga muno kamukholanga.

Yalonga likuli nende eshialo khubwatoto mana nabahelesia obukoondo, ne nakhola obukondo bwenyu obo okhuba obulayi muno. Ne ewuwe niwo wamulikalukha.

Yamanya ebili mwikulu nende mushialo, ne yamanya kamukholanga mubwifisi nende mubwang’ang’u. Ne Nyasaye nomumanyi muno khukali mubilifu.

Shikabetselakhwo amacheni kabakhayi abaali imbeli wenyu tawe, bapila obubii bwa amakhuwa kabu, mana baliba nende eshinyasio eshilulu.

Endio nilwokhubeela mbu Abarumwa babu babetselanga nende obwatoto bwa habulafu mana nibamiena mbu: “Omundusa akhuluunjisie efwe!” Mana nibakhaya, nibafutara, mana Nyasaye nalabateba tawe. Ne Nyasaye nomuyinda witsomibungwa muno.

Abakhayi bapara mbu shibalilamusibwa tawe. Boola mbu: “Shinendio tawe! Nditsuba khu Nyasaye wanje Omulesi mbu toto mulilamusibwa mana toto muliboolelwa kamwakhola. Ne ako khu Nyasaye ni amangu.”

Kho suubile Nyasaye nende Omurumwa wuwe, nende obulafu bwa khweshia. Ne Nyasaye nomumanyi po khukamukholanga.

Inyanga lwa alibakhung’asia khu inyanga yomukhung’aano, eyo niyo inyanga yokhukhobana. Ne ulia usuubila Nyasaye mana akhole amalayi, alamuleshela tsimbi tsitsie, ne alimwinjisia mumikunda chomwikulu chiburangamwo emialo, balimenyamwo tsinyanga tsioosi. Okho nikho okhubura okhukhongo.

Ne balia bakhaya mana nibayingasia ebimanyisio biefu, abo nibo Abandu bomumulilo, balimenyamwo tsinyanga tsioosi, ne ni habundu abii muno wokhukalukha.

Ne amasila kosikosi shiketsanga tawe halali khumunwa kwa Nyasaye. Ne usuubila khu Nyasaye, alunjisia omwoyo kukwe. Ne Nyasaye ni Omumanyi muno wabuli eshindu.

Ne loonde amakhuwa ka Nyasaye nende Omurumwa. Ne nimuloba, toto eshili khumurumwa wefu ni okhusia butswa oburume obuli habulafu.

Naye ni Nyasaye, abulaho nyasaye wundi owulali Ye tawe, ne Abasuubili besiche butswa Nyasaye.

Enywe Abasuubila, toto mubakhasi benyu nende abana benyu balimwo abasuku benyu, kho be meso ninabo. Ne nimubeela ne mwakhaya okhura mumakani, ne mwaleshela, toto bwene Nyasaye ni Omulesheli po, Owobukoosia muno.

Toto emiandu chienyu nende abaana benyu namatemo. Ne Nyasaye ali nende omurungo omukhongo.

Kho rie Nyasaye shinga munyalilwa, ne muwulile mana muloonde (amalako), ne rusie eshihanwa, nobulayi khumioyo chienyu. Ne ulia uhonokosibwa ehale nende obwimani bwa omwoyo kukwe, abo nibo Ababura.

Nimuhelesia Nyasaye likofi lilayi, alabametelakhwo, ne alabaleshela ebionono, ne Nyasaye ni Omunji wokhupa orio, Omwihotselefu.

Owamanya akefisile nende akali habulafu, Owamaani, Owamachesi muno.

Ewe Omurumwa, nimulekha Abakhasi, mubaleshe nebekhale eda yabu, ne mubale tsinyanga tsia eda, ne rie Nyasaye Omulesi wenyu. Mulabarusia mutsinzu tsiabu tawe, nohomba balarulamwo tawe, halali nibakhola eshifwabi shilolekha. Ne etso ni tsinzakho tsia Nyasaye, ne uruuma tsinzakho tsia Nyasaye, obwatoto aba yekholele obubii. Shomanyile tawe, awundi Nyasaye anyala okhurera likhuwa lindi olunyuma lwa kano.

Ne nibakhamala eda yabu, mubakalushile mumenye ninabo khubulayi, nohomba mubaleshe nomulembe. Ne mulaanje abaloli abesikwa mwinywe, ne mukhole obuloli khulwa Nyasaye. Endio nilwa mulachilwa khu balia basuubila Nyasaye nende inyanga imalilishi. Ne uria Nyasaye, alamukholela injila yokhurula mumatinyu.

Ne alamuhelesia omukabo kukwe munjila ya alamanyile tawe. Ne wisika Nyasaye, Nyasaye alamuyela. Toto Nyasaye yosinjia amalako keke, yamala okhura khubuli eshindu eshichelo.

Ne balia bema okhuswamila mubakhasi benyu, nimukanakana, awo eda yabu ilaba emiesi chitaru, nende balia abalaaswamilakhwo tawe. Ne balia abali inda, eda yabu iwa mukhwibula khwabu. Ne uria Nyasaye, amwanguyisilinjia amakhuwa keke.

Ako niko amalako ka Nyasaye yamwishilia. Ne ulia uria Nyasaye, alaleshelwa ebionono bibie, ne alamuhelesia omurungo omukhongo.

Mubamenyie mutsinzu tsiamumenyangamwo, ne mulabasandia khomubakholele obutinyu tawe. Ne nibali nobusiro (tsinda), mubahelesie obukhoonyi okhula shingala beboolola (bebula). Ne nibabanunilia Abana benyu, mubahelesie omurungo kwabu, ne mumenyane khubulayi. Ne nimulola obusiro, Omukhasi wundi amununilie.

Wobunyali arusie okhulondokhana nobunyali bubwe, ne ulanyalilwa tawe arusie khu shia Nyasaye amuheele. Nyasaye shanichilisinjia Omundu tawe halali khushia amuheelesiye. Nyasaye alarera obwangu olunyuma lwa obusiro.

Ne tsingongo tsinga tsiafunaka amalako ka Nyasaye watsio Omulesi nende Abarumwa bebe, mana nikhutsikhola okhukalusia amarebo khubikhole biatsio, ne nikhutsihelesia eshinyasio eshilulu?

Mana nitsipila obubii bwamakhuwa katsio, ne indukho yamakhuwa katsio niba okhusikha.

Nyasaye yabarecheshela eshinyasio eshilulu, kho rie Nyasaye enywe Abamachesi abasuubila. Toto Nyasaye yabeshilia ametsulisio.

Omurumwa ubasoomelanga tsinyaali tsia Nyasaye tsinoosinjia, kho arusie balia abasuubila mana nibakhola amalayi okhurula mubilima abayile mubulafu. Ne usuubila khu Nyasaye mana nakhola amalayi, alamwinjisia mumikunda chomwikulu chiburangamwo emialo, balimenyamwo tsinyanga tsioosi. Toto Nyasaye alaba amuhelesiyie omukabo omulayi muno.

Nyasaye niye owaloonga amakulu saba, nende liloba khushichelo esho, amalako ke kekhanga hakari wabio, kho mumanye mbu toto Nyasaye ni Omunyali muno wabuli eshindu, ne toto Nyasaye yatereera buli eshindu khubumanyi bubwe.

Ewe Omurumwa! Mbushina nokaana eshia Nyasaye yakhufuchilila? Okhaabanga okhuchamisia Abakhaye bobo. Ne Nyasaye ni Omulesheli po, Wetsimbabasi muno.

Toto Nyasaye yamala okhubarereraho injila yokhurimbulula ebitsubo bienyu, ne Nyasaye ni Omwami wenyu, naye ni Omumanyi muno, Owamachesi po.

Ne olwa Omurumwa yaboolela mulala khubakhaye be likhuwa mubwifisi, mana omukhaye oyo shingala yalirusia habulafu, ne Nyasaye namanyia Omurumwa, yamubila akandi ne nawulelela akandi. Olwa yamuboolela ario, omukhaye oyo naboola mbu: “Wina ukhuboolele kano?” Omurumwa naboola mbu: “Omumanyi uli nende amakhuwa koosi niye umboolele.”

Nimulasaba eshileshelo khu Nyasaye tawe, enywe babili emioyo chienyu chilenjila mubwonooni. Ne nimukhonyana khulwo okhukholela Omurumwa amabii, mumanye mbu toto Nyasaye niye omuhabini wuwe, nende Jibril, nende abasuubili abakholi bamalayi, ne okhumeta khwako Abamalaika balamukhoonya.

Nabalekha, Nyasaye wuwe Omulesi anyala okhumukalukhasirya Abakhaye bandi habundu wenyu, Abalayi okhushila enywe, Abehotselefu, Abasuubili, Abarechelefu, Abekanili, Abalaami, Abakholi bamalayi, nashikoko nende abakhaana bashili okhutekhakhwo.

Enywe Abasuubila, mwihonokosie enywe abeene nende Abandu benyu okhurulana nomulilo kwetsikhwi tsiakwo ni Abandu nende amachina. Abemeresi bakwo ni Abamalaika abalulu aba amaani. Shibakhayanga okhukhola lia Nyasaye ababoolele tawe, ne bakholanga liabalomesibwe.

Enywe Abakhayi, mulayinia ebichila olwa lelo tawe. Toto murungungwa sa kamwakholanga.

Enywe Abasuubila, sabe eshileshelo khu Nyasaye eshileshelo shia toto. Nyasaye wenyu alabaleshela tsimbi tsienyu, ne alabenjisia mumikunda chomwikulu chiburangamwo emialo, inyanga ya Nyasaye alalifimbia omurwe ta Omurumwa wuwe nende Abasuubili bali halala naye. Obulafu bwabu buliba imbeli wabu, nende elubeka womukhono musatsa, baliboola mbu: “Nyasaye wefu Omulesi, khwitsusilie obulafu bwefu, ne okhuleshele ebionono biefu. Toto ewe oli Omunyali muno wabuli eshindu."

Ewe Omurumwa, lwaana abakhayi nende abeshikhabili, ne obe omumilanu khubo, ne eshimenyo shiabu ni mumulilo, ne ni habundu abii muno wokhukaluka.

Nyasaye yachelasilia Abandu abakhayi, omukhasi wa Nuhu nende Omukhasi wa Luti, bali mumikhono chia abasumba befu babili, abakholi bamalayi, mana nibabakhoba, halali okhukhoba okho nikhulabakhoonya shiosishiosi tawe, nibaboolelwa mbu: “Injile mumulilo halala nende abenjila.”

Ne Nyasaye yachelasilia balia abasuubila, Omukhasi wa Firauni, olwa yaboola mbu: “Nyasaye wanje Omulesi nyumbashila inzu ewuwo mumukunda kwomwikulu, ne uhabine okhurulana nende Firauni nende ebikhole bibie, ne uhabine okhurulana nende abandu abonooni.”

Nende Mariam Omukhana wa Imran, welinda omubili kukwe, ne nikhumufuramwo okhurulana nende roho wefu, nafuchilila amakhuwa ka Nyasaye wuwe Omulesi, mana naba mubehotselesinjia (khulwa Nyasaye).

Niwoluyali ulia wobwaami bwoosi buli mumukhono kukwe, naye ni Omunyali muno wabuli eshindu.

Owaloonga lifwa nende obulamu khulwa okhubateema mbu ni wina mwinywe ukhola amalayi muno, naye niye Owaamaani muno, Omunji wobulesheli.

Niye owalonga amakulu saba keyichikhane. Shiwakhalolakhwo mubuloonji bwa Omunji Wetsimbabaasi obwawukhani tawe. Kho kalusiakhwo tsimoni! Olalolakhwo obuleemefu bwosibwosi?

Mana khandi kalusia tsimoni tsitsio olwakhabili, tsilakhukalushila omwene nitsibeelele, natsio nitsichoonyele.

Ne toto bwene khwarona likulu lieshialo elia hambi nende tsitaa, ne nikhutsikhola okhuba eshikhupo khumashetani, ne khwabarecheshela eshinyasio shiomulilo kwakhanga muno.

Ne balia bakhaya okhuloonda ka Nyasaye wabu Omulesi, balinyoola eshinyasio shia Jahannam, ne ni abundu ambii muno wookhuweera.

Olwa balisukunwamwo, balikuwulila nikuwoola ne nikupupuchila.

Kukhaaba okhukhalikhamwo khulwoburuma. Buli olwa Omukanda kusukunwamwo, abemeresi bakwo babareeba mbu: “Omwikanyilisi shiyabetselakhwo tawe?”

Baliboola mbu: “Ata, toto bwene abekanyilisi bakhwitsila ne nikhubaingasia, ne nikhuboola mbu: “Nyasaye shiyeshiakhwo shiosishiosi tawe, enywe amukhali butswa mubukori obukhongo.”

Ne baliboola mbu: “Khubetsanga bokhuwulila nohomba bamachesi, shikhwakhabere mubandu bomulilo tawe.”

Kho mana balifuchilila tsimbi tsiabu, kho mana babe ale muno abandu bomumulilo.

Toto bwene balia baria Nyasaye wabu Omulesi mukabalalolanga tawe, bali nende obulesheli nende omurungo omukhongo.

Ne lomalome amakhuwa kenywe mumwoyo kwa asi nohomba mumwoyo kwa ekulu, toto Ye amanyile muno akali mubilifu.

Yakhakhaywa okhumanya owaloonga, naye niye omumanyi wamakhuwa kefisile, mwene amakhuwa koosi?

Niye owabakholela liloba okhuba eliangu khubukhala bwenyu. Kho chendekhwo mutsimbeka tsialio tsioosi, ne lie khumiandu chichie. Ne ewuwe niwamulilamusibwa okhutsia.

Mparanga mbu muli nomulembe okhurulana nende ulia uli hekulu mbu shanyala okhubayibisia muliloba nalio nilirenga tawe?

Nohomba mparanga mbu muli nomulembe okhurulana nende ulia uli hekulu, mbu shanyala okhubarumila omuyeka kweyimbumbuyeka kwetsimbaale tawe? Ne mulimanya butswa mbu amekanyilisio kanje kali karie.

Ne toto bwene bamala okhukatsula balia bali imbeli wabu, kho mana okhusinyikha khwanje khwali khurie?

Nohomba shibalolangakhwo amayoni hekulu wabu shingala kabambulanga tsimbaya nende kafumbanga halala tawe? Shakatilililanga tawe halali Omunji Wetsimbabaasi. Toto bwene Ye ni Omuloli muno wabuli eshindu.

Ne ni wina oyo unyala okhuba omukanda kwenyu kwabalwani kwokhubahabina owulali Omuunji wetsimbabaasi tawe? Toto bwene abakhayi shibali khushiosishiosi tawe halali mukhukatania.

Nohomba niwina oyo unyala okhubahelesia omuhandu, Ye niyekalila omuhandu kukwe? Halali abo bahandila sa khubufuru nende okhwira ehale.

Koo, ulia uchendanga niyetukumula nabushila khubweni bwe, nomulunjifu muno nohomba ulia uchendanga shiluunji khunjila ingololofu?

Boola mbu: “Ye niwabaloonga olwambeli, nabahelesia tsimbulililo nende tsindolelo, nende emioyo. Ne oriomuno yenyu ni inditi muno.”

Boola mbu: “Ye niye wabasaalasia khushialo, na ewuwe niwa mulikhung’asibwa.”

Ne baboolanga mbu: “Ni liina kamulakanga kano, nikali mbu muboolanga obwatoto?”

Boola mbu: “Obumanyi bwe inyanga eyo buli khu Nyasaye, nasi shendi halali omwikanyilisi wa habulafu.”

Olwa balilola kabalakwa nikakhoola, obweni bwa abakhayi bulisinyikha, ne baliboolelwa mbu: “Kano niko kamwasabaanga muno.”

Boola mbu: “Mulola murie Nyasaye niyasishia halala nende bali ninasi, nohomba nakhubeela tsimbabaasi, ni wina ulilinda abakhayi okhurulana nende eshinyasio eshilulu?”

Boola mbu: “Ye niye Omunji wetsimbabaasi, khwamusuubila, ne niye wakhwesika. Ne mulimanya ni wina uli mubukori bulolekha.”

Boola mbu: “Mulola murie amaatsi kenyu nikakhama, ni wina ulabarerera amaatsi kakhulukusinjia?”

Nun. Nditsuba khulukalamu nende kabahandikanga.

Ewe khumikabo chia Nyasaye wuwo Omulesi sholi omulalu tawe.

Ne toto bwene oli nomurungo omukhongo kulaliwa tawe.

Ne toto bwene oli nende ebima ebilayi muno.

Hambi ano olalola, nabo bosi nibalole.

Ni wina mwinywe womurwe omubii.

Toto Nyasaye wuwo Omulesi niye umanyile muno ulia wakora okhurula khunjila yiyie, ne amanyile muno abali khubulunjifu.

Olaloonda abakatsulanga tawe.

Bekombanga mbu olaba omuteshere (khudini yiyio) kho nabo bakhutoratosilie (amakhuwa kabo).

Ne olaloonda buli ulia witsubanga muno, owulekungwa tawe.

Ulekanga muno abandu, uyiyayiyanga natswatswania.

Omwikalili muno wamalayi, urumanga tsinzakho, owetsimbi po.

Womwoyo omwangaranu, owe ikholo isiro.

Khulwokhubeela ali nende emiandu nende Abana.

Nibasomelwa tsinyaali tsiefu nibaboola mbu: “Etso nitsingano tsiabakhale.”

Khulamurakhwo eshimanyisio khuliulu lilie.

Ne toto bwene khulabatema shinga khwatema Abandu bomukunda, olwa betsuba mbu: “Toto khulauna okhukuchesa obulachweya.”

Ne nibalaboola mbu “Nyasaye nachama” tawe.

Awo, eshikhole shiamaraba, okhurula khu Nyasaye wuwo Omulesi nishikholekha khumukunda oko nabo nibali mutsindoolo.

Nikuba shinga eshiilima eshikhongo.

Nibalaangana mumabwibwi nibushiele.

Mbu: “Tsie itsuli mumukunda kwenyu nimuli toto mbu mutsitsanga okhuchesa.”

Ne nibarula nibasungana mubwimoonyo.

“Alakhabenjirirakhwomwo (mumukunda) omumanani yesiyesi inyanga yino tawe.”

Ne nibatsia nibasuubile muno nibeelolanga mbu bali noobunyali.

Olwa bakulola, baboola mbu: “Toto bwene khukorere.

Halali efwe khwimilwe.”

Omulayi muno mubo naboola mbu: “Shebaboolelekhwo tawe mbu, khulwa shina mulatswenula Nyasaye tawe?”

Nibaboola mbu: “Obutswenufu nibwa Nyasaye wefu Omulesi. Toto efwe khuli abonooni.”

Nibakalukhana abeene khubeene okhufunanania.

Nibaboola mbu: “Abaane efwe! Khuburire eshichelo.

Awundi Nyasaye wefu Omulesi alakhukalukhasiria amalayi okhushila kano. Toto efwe khukalushila Nyasaye wefu Omulesi.”

Endio nilwa eshinyasio shili. Ne eshinyasio sheyindukho neshikhongo muno, bamanyangakhwo bayie!

Toto bwene balia abaria Nyasaye wabu baliba nende emikunda chomwikulu chobwokholo ewa Nyasaye wabu Omulesi.

Ne, khwakhakhola abasalamu shinga aboononi?

Mukhabeele murie? Mubusinjia murie?

Nohomba muli neshitabu shiamusomangamwo?

Mbu mulanyoolamwo akamwayanza?

Nohomba muli neebiitsubo khwifwe, ebiliboosia khu inyanga yeyindukho, mbu toto bwene mulinyoola koosi pe kamubusinjia?

Barebe mbu: “Ni wina mubo Omwimilisi wa kano?”

Nohomba bali nende abasaanji? Mana barere abasaanji babu abo nikali mbu baboolanga akatoto.

Inyanga lwomuluku (kwa Nyasaye) kulifunulwa, ne balilangwa okhurerera Nyasaye obwenu bwabu hasi (okhusujuda), ne shibalinyalilwa tawe.

Tsimoni tsiabu tsilihenga hasi, tsisoni tsilibalia muno, toto bwene balaangungwa okhurerera Nyasaye obweni bwabu hasi (nibali khushialo) nibali abalamu muno.

Kho ndeshela balia bakatsulanga likhuwa lino, khulabasitia khushinyasio kalahakalaha munjila yabalamanyile tawe.

Ne ndalabahelesia ebise. Toto amaraba kanje ni amasiro.

Nohomba obasabanga omurungo, nabo bakhayungwa eshichelo esho khulwa neeshisiro?

Nohoma bali nende kefisa kabahandikanga?

Kho linda okhula shinga Nyasaye wuwo Omulesi yetsa okhubusia eshina, ne olaba ta shinga omundu weyimonye (omurumwa Yunus) tawe, olwa yalaanga nafwinyiikhe.

Tsikhayanga okhumuulila tsimbabaasi okhurula khu Nyasaye wuwe Omulesi, yakhasalilwe khulukuku nafunanibwa.

Halali Nyasaye wuwe Omulesi namwawula, mana namukhola okhuba mubandu abalayi.

Ne abakhayi bali hambi muno okhukhureresia khu tsimoni tsiabu, olwa bawulila ametsulisio ka Nyasaye. Ne baboolanga mbu: “Toto bwene ye ni omulalu.”

Ne amakhuwa kano (Ikurani) shikali halali ni ametsulisio khubiloonje bioosi.

Eliatoto (lilirurila).

Ne eliatoto (lilirurila) elo ni shina?

Ne nishina shikhumanyia eliatoto elo?

Abandu ba Tsamudi nende A’ad bakatsula amasila karenjinjia omwoyo.

Mana Abandu ba Tsamudi basishibwa nende amasila amakali.

Ne Abandu ba A’ad basishibwa nomuyeka kweyimbumbuyeka.

Okwayabarumila khubilo saba nende tsinyanga munane tsilondokhana, olola Abandu nibalambalile shinga emisala chia mitende emikhaya.

Kho ololangakhwo yesiyesi mubo watong’a?

Ne Firauni niyetsa nende abali imbeli wuwe, nende tsingongo tsiakalukhanibwa hasi niba hekulu, okhurulana nende tsimbi tsiabu.

Nibakhaya okhuloonda Omurumwa wa Nyasaye wabu Omulesi, ne mana nabakhamara obutinyu muno.

Toto olwa amaatsi ketsula, khwabachinga Muliaro.

Khulwokhukhola ako kabe eshitsulisio khwinywe, ne shikawulile eshirwi shiokhuwulila.

Olwa olwika lulifurwamwo okhufurwa khulala.

Ne eshialo nende efikulu olwa bilichingwa, mana biswakwe okhuswakwa khulala.

Inyanga eyo niyo olwe indukho ilirulila.

Ne likulu lilirandukha, nalio inyanga eyo liliba liteshele.

Ne Abamalaika baliba khundulo khwalio, ne munane mubo balichinga eshifumbi shiobwami shia Omulesi wuwo hekulu wabu.

Inyanga eyo mulirebwa habulafu mwesi, ne shibulaho shiosishiosi shiliifisa mwinywe.

Kho ulia ulihebwa eshitabu shishie nomukhono omuluunji, aliboola mbu: “Itse musomekhwo eshitabu shianjie.

Toto bwene ndali ndamanya ndilinyola okhurebwa ebikhole bianje.”

Kho aliba mubulamu buchamisia.

Mumukunda kwomwikulu kwa hekulu.

Ebiamo biakwo bili ahambi.

“Lie mana munywe mubusangafu okhurulana nende kamwaranjilisia mutsinyanga tsiabura (khushialo).”

Ne ulia ulihebwa eshitabo shishie nomukhono omukhasi, aliboola mbu: “Manyanga ekhaya okhuhebwa eshitabu shianje.

Mana kata ekhayanga okhumanya shinga ndilirebwa ebikhole bianje.

Aaah bayee liakhaberesa lifwa elala (ndakhaya okhulamusibwa).

Emiandu chianje shichiakhoonya shiosishiosi tawe.

Obwami bwanje buuwerekhwo!”

Mumubukule mana mumuboye.

Mana mumusukune mumulilo.

Mana mumuboyokanie nomunyororo kweshichelo shiemikhono amakhumi saba.

Toto bwene shiyali yasuubila Nyasaye woluyali tawe.

Ne shiyatinyisinjia okhulisia abamanani tawe.

Mana lwalelo ano abula Omulina.

Nohomba eshiakhulia halali ghislin (amafila).

Shibashiliitsanga tawe halali Abandu betsimbi.

Ne nditsuba khubia mulolanga.

Nende khubia mulalolanga tawe.

Toto bwene namakhuwa ka Omurumwa Owoluyali.

Ne shinamakhuwa ka omwimbi wa mashairi tawe. Obusubili bwenyu nibutiti po.

Nohomba shinamakhuwa komufumu tawe. Okhwitsulila khwenyu nokhutiti muno.

Keshibwa okhurula khu Nyasaye Omulesi webiloonje bioosi.

Ne akhuchishilanga amakhuwa kandi.

Toto khwakhamutilile nende omukhono omulunji.

Mana khwakhamukhalache omusi omukhongo kwomwoyo.

Ne awumao yesiyesi mwinywe wakhakhwikaliile.

Ne ako ni amachelo khubaria Nyasaye.

Ne toto bwene khwamanya mbu mwinywe balimwo abakhayi.

Ne toto bwene abakhayi baliyitsulisia.

Ne toto nobwatoto bubulamwo tsinganakani.

Kho mana tswenula elira lia Nyasaye wuwo Woluyali.

Omureebi yereeba okhulondokhana nende eshinyasio eshiakharulile.

Khubakhayi alibulaho ulishiikalila.

Okhurula khu Nyasaye Omwene hekulu tsiachelekhana.

Abamalaika nende Roho baninanga nibatsia ewuwe khunyanga ya eshichelo shiayo ni emika tsiyelefu amakhumi karano.

Kho wisumilisie okhwisumilisia okhulayi.

Toto abo bayilolanga mbu ili ehale.

Nafu khuyilolanga mbu ili ahambi.

Inyanga yelikulu liliba shinga eshichuma shisalululwe.

Ne tsingulu tsiliba shinga obwoya bwelikondi.

Ne omulina shalireeba omulina wuwe tawe.

Balilolesibwa balolane. Omwononi yakhekombe okhwinunula okhurulana nende eshinyasio shieyinyanga eyo khulwokhuyinia Abana be.

Nende omukhaye wuwe, nende Omusiani wabu.

Nende abeekho baye abamukhonyanga.

Nende bioosi bili mushialo, mana elo limuhonokosie.

Shikali kario tawe! Toto oko ni omulilo omululu.

Kunyibululanga muno lisero lyomurwe.

Kulilaanga buli wafutara mana natsia.

Wabunjelesinjia omwandu naakubiikha.

Toto Omundu yaloongwa nokhuyungubala.

Nanyoolwa namasila, yetswulikania.

Ne nanyoolwa na amalayi, yemana po.

Okhuiniakhwo abalamanga (iswala).

Balia bakholelanga eshinani amalaamo kabu (iswala) obulachweya tawe.

Nende balia bomumwandu kwabu kulimwo omukabo omulobole.

Khu usaba nende khu uritsanga okhusaba.

Nende balia basuubilanga inyanga yomurungo.

Nende balia baritsanga muno eshinyasio shia Nyasaye wabu Omulesi.

Toto eshinyasio shia Nyasaye wabu Omulesi sishili shawakhasuubila okhuhonokokhamwo tawe.

Nende balia abalindanga ebiekenyi biabu.

Okhuyiniakhwo khubakhaye baabu, nohomba balia babaruka bali mumikhono chiabu emisatsa. Toto abo shibafunanibwa tawe.

Ne balia abokhwenya kalali kano tawe. Abo nibo babura eshichelo.

Nende balia balindanga obulayi obwisikwa nende indakano yabu.

Nende balia bemanga shilunji khubuloli bwabu.

Nende balia balindanga iswala yabu.

Abo nibo balihelesibwa oluyali nende amalayi mumikunda chomwikulu.

Bali barie abakhayi, abakhwitsilanga mubunji nibakhunga’nga’lilakhwo butswa.

Emikanda nemikanda, na mukhono musatsa nende namukhono mukhasi.

Koo, buli yesiyesi yekombanga mbu alinjila mumukunda kwomwikulu kwobwokholo?

Shikali kario tawe! Toto efwe khwabalonga okhurulana nende eshiabamanyile.

Nditsuba khu Nyasaye, Omulesi webukwe nende mumbo, toto efwe khuli nobunyali.

Bwokhukalukhasia abalayi bashilakhwo abo, nafu shikhwakhashilwa tawe.

Kho baleshe mubukalakala nende emibayo chiabu, okhula lwabalinyoolana nende inyanga yabalakwa.

Inyanga yabakharule mubilindwa tsimbiro opara mbu belukhanga okhutsia khumasanamu.

Obweni bwabu bulihenga hasi, tsisoni tsilibafumbeela. Eyo niyo inyanga yabalakungwa.

Toto efwe khwaruma Nuhu khubandu bebe mbu: “Wikanyilisilie abandubo, eshinyasio eshilulu nishishili okhuboolela.”

Naboola mbu: “Enywe Abandu baanje, toto esie endi Omwikanyilisi wenyu wahabulafu.

Mbu mumulaame Nyasaye, ne mumurie, ne muwulile esie.

Alabaleshela tsimbi tsienyu, ne alabameta tsinyanga okhula indukho yenyu. Toto indukho ya Nyasaye niyuula, yibetsanga yulile. Abaane nimwakhamanyilekhwo!”

Naboola mbu: “Nyasaye wanje Omulesi, esie enaanjile Abandu banje eshilo nende eshitere.

Habula omulaango kwanje shikwabametela shiosishiosi tawe halali okhwilukha.

Ne toto buli olwa ndabalanganga mbu khonyoole okhubaleshela, bara tsinzala tsiabu mumarwi kabu, nibefunikha muno tsingubo tsiabu, nibekhulumamia, nibooma emirwe obutinyu muno.

Mana khandi toto nebalanga mubwang’aang’u.

Mana khandi nebakhuumila obutinyu, mana khandi nebalaanga mubwifisi muno.

Ne nebaboolela mbu: 'Sabe Nyasaye wenyu Omulesi eshileshelo, toto Ye ni Omunji wokhuleshela.

Alabarerera ifula ikwe nilondokhana.

Ne alabahelesia Omwandu nende abana, ne alabahelesia emikunda nende emialo.

Muli murie wamulahetsanga Nyasaye eshiriibwa tawe?

Ne toto yabaloonga likhabi khwikhabi.

Shimulolanga shingala Nyasaye yalonga amakulu saba nikalondokhaane tawe?

Ne nakhola omwesi okhubamwo obulafu, ne nakhola eliuba okhuba itaa.

Ne Nyasaye yabamesia khwiloba shinga emimela.

Khandi alibakalusiamwo, ne khandi alibarusiamwo mwesi burusia.

Ne Nyasaye yabakholela eshialo okhuba shinga omukeka.

Khomunyoole okhucheendamwo khutsinjila tsimbambalifu.’”

Nuhu naboola mbu: “Nyasaye wanje Omulesi, toto bo baakhayile nibaloonda ulia owa omwandu kukwe nende omwana wuwe shibiamumetelakhwo shiosishiosi tawe halali okhusikha.

Ne nibakhola ebifwanga ebikhongo.

Ne nibaboola mbu: ‘Mlakhalekhakhwo abanyasaye benyu tawe. Ne mlakhalekhakhwo Wada, nohomba Suwa, nohomba Yaghutsa, nohomba Ya’uka nohomba Nasra tawe.’

Ne toto bo bamala okhukosia abaanji, ne olametela balia abetsimbi tawe halali obukori.”

Okhurulana nende tsimbi tsiabu berwa namatsi, mana nibenjisibwa mumulilo, ne shibanyoola ababahabina owulali Nyasaye tawe.

Ne Nuhu naboola mbu: “Nyasaye wanje Omulesi, olalekhakhwo khushialo abamenyakhwo yesiyesi mubakhayi tawe.

Toto Ewe nobalekhakhwo, balakosia Abasumba bobo, ne shibalebula tawe halali abonooni abakhayi po.

Nyasaye wanje Omulesi, ndeshela esie nende abebusi banje, nende ulia wenjila munzu yanje Omusuubili, nende balia boosi abasubila abasatsa nende abakhasi. Ne olameta abonooni shiosishiosi tawe halali okhusikha.”

Boola mbu: “Enyoolele obufimbuli mbu toto omukanda mulala kwa Majini kwarechelesia, nikuboola mbu: ‘Efwe toto bwene khuwulile Ikurani yokhuchenyia po!

Ilunjisinjia khubulunjifu, mana khuyisuubile, ne shikhulisaasia Nyasaye wefu Omulesi nende shiosishiosi tawe.

Ne toto bwene Nyasaye wefu Omulesi niwoluyali olukhongo, shiyekholela omukhasi nohomba omwana tawe.

Ne khubwatoto abasilu mwifwe baboolanga khu Nyasaye obubeyi obunji muno.

Ne efwe toto khwaparanga mbu Abandu nende Amajini shibanyala okhuboola obubeyi khu Nyasaye tawe.

Ne toto bwene Abasatsa okhurula mubandu, bakhabanga okhwilinda khubasatsa beshijini, mana nibabameta obusiro obunji.

Ne toto abo baparanga shingala muparanga mbu, Nyasaye shaliruma yesiyesi tawe.

Ne toto khwatila khulikulu, nikhunyoola lietsula abalindi abalulu, nende tsing’ining’ini tsiomulilo.

Ne toto bwene khwekhalangamwo nikhurechelesia. Ne ulatsia okhurechelesia bulaano, alabukana nende tsing’ining’ini tsiomulilo omululu.

Ne toto efwe shikhumanyile tawe nibenyelwa amabii abali khushialo, nohomba Nyasaye wabu Omulesi yabenyela obulunjifu.

Ne toto bwene mwifwe balimwo abakholi bamalayi, ne abaandi balimwo balali bario tawe. Toto khuli emikanda chikabukhane.

Ne toto efwe khwamanya mbu shikhunyala okhushila Nyasaye khushialo tawe, ne shikhunyala khwerukha khwamushila tawe.

Ne toto efwe olwa khawulila obulunjifu, khwabusuubila. Ne usuubila mu Nyasaye wuwe Omulesi, sharitsanga okhwibilwa nohomba obusilo obunji tawe.

Ne toto mwifwe balimwo Abasalamu nende abalekha katoto. Ne balia basilima, abo nibo baloonda obulunjifu.

Ne balia balekha obwatoto, baliba tsikhwi tsia omulilo kwa Jahannam.

Ne balunjikhanga khunjila yatoto, khwakhabanywesie amaatsi amaanji.

Kho khubateme khuko. Ne ulia uhelesia ametsulisio ka Nyasaye wuwe Omulesi omukongo, alanyoola eshinyasio eshilulu.'”

Ne toto emisikiti ni chia Nyasaye, kho mulalaama halala nende Nyasaye shiosishiosi tawe.

Ne toto olwa Omusumba wa Nyasaye yasinjila namulaama, (amajini) ako kali hambi muno okhumufwinya!

Boola mbu: “Toto esie enamanga sa Nyasaye wanje Omulesi, ne shemutsokaasinjiakhwo nende yesiyesi tawe.”

Boola mbu: “Esie embula obunyali bwokhubawumisia nohomba okhubalunjisia tawe.”

Boola mbu: “Toto abulaho yesiyesi unyala okhuuninda okhurulana nende eshinyasio shia Nyasaye tawe, ne shindilinyoola wandakhelushila tawe halali khuye."

Halali okhusia (amakhuwa) okhurula khu Nyasaye nende oburume bubwe. Ne uloba okhutiila ka Nyasaye nende Omurumwa wuwe, toto alinyoola Omulilo kwa Jahannam, alimenyamwo tsinyanga tsioosi.

Okhula olwa balilola kabalakungwa, balimanya mbu ni wina omuteshele muno mubukhoonyi nende omuleemu muno khushichelo.

Boola mbu: “Esie engorwa kamulakungwa kano mbu kali ahambi nohomba Nyasaye wanje Omulesi alakasitia ehale.”

Omumanyi wakefisile, ne shafunulilanga yesiyesi akefisa keke tawe.

Halali ulia wayachamila Mubarumwa. Ne toto oyo amwelesinjia abalindi imbeli wuwe nende inyuma wuwe.

Kho anyoole okhumanya mbu toto bosia oburume bwa Nyasaye wabu Omulesi, naye yaterera obulayi akabali ninako, ne yamanya obubasio bwa buli eshindu.

Ewe Owifimbile!

Bukha mushilo shioosi, halali hatiti butswa!

Eshitonye shiashio nohomba oleemiekhwo hatiti.

Nohomba ometekhwo, ne osoome Ikurani mushiroonyo.

Toto efwe khwitsa okhukwishilia likhuwa lisiro.

Toto okhubukha eshilo, omwoyo kukwalalanga muno, ne amakhuwa kashio kabetsanga amalunjifu muno.

Ne toto bwene ewe obetsanga nende okhubotokhana okhunji mushitere.

Kho lirumbule elira lia Nyasaye wuwo Omulesi, ne irushila elala khuye.

Nyasaye Omulesi webukwe nende mumbo, abulaho nyasaye wundi owulali Ye tawe, khomukhole Omwisikwa wuwo.

Ne wifwile khukababoolanga, ne bawuyekhwo mubulayi.

Ne ndeshela abaingani abali mubwokholo, ne obahelesie obwiyangu butiti.

Toto bwene efwe khuli nende tsirimba tsisiro nende omulilo omululu.

Nende eshilibwa shirekamanga mumworokoro nende eshinyasio eshilulu.

Inyanga lwa eshialo shilirenga nende tsingulu tsiosi, ne tsingulu tsilibulungukha shinga olufu.

Toto efwe khwabarumila Omurumwa abe Omuloli khwinywe, shingala khwarumila Firauni omurumwa.

Halali Firauni naalatila amalako ka Omurumwa oyo tawe, mana nikhumutila okhutila khweshinyasio.

Ne shingala mukhayanga, muliba murie inyanga ya abana balimela tsimbutsi?

Awo likulu liliatikha! Ne awo kayalachisilia kaliikholekha.

Toto bwene kano ni ametsulisio. Kho, owenya, atiile injila ya Nyasaye wuwe Omulesi.

Toto Nyasaye wuwo Omulesi yamanya mbu ewe wemanga nolaama ahambi eshilo shioosi, nohomba eshitonye shiashio nohomba mukhuwa khwashio, nende omukanda kulia kuli halala ninawe. Ne Nyasaye niye ureranga eshilo neshitere. Yamanya mbu shimunyala okhumanya okhushibala obulai tawe, mana nabaleshela tsimbi tsienu. Kho soome shiamunyalilwa mukurani. Yamanya mbu mwinywe balimwo abalwale, ne abandi basamulanga khushialo nibakhaaba khutsimbabaasi tsia Nyasaye. Nabo abandi bakhupananga khunjila ya Nyasaye. Kho soome shiamunyalilwa mushio, mana mulaame iswala obulachweya, ne muhane eshihanwa, ne muhelesie Nyasaye likofi lilayi. Ne lilayi liosiliosi liamwiranjilisilia abeene, mulilinyoola ewa Nyasaye nilili lilayi khandi lia omurungo omukhongo muno. Ne sabe Nyasaye eshileshelo. Toto Nyasaye ni Omunji wokhuleshela, Owetsimbabaasi muno.

Ewe Owifumbesiye mutsingubo.

Bukha mana wikanyilisie!

Ne witsoomie Nyasaye wuwo Omulesi.

Ne olafie tsingubo tsitsio.

Ne owuuye keshifwolo.

Ne olarusia nosuubile okhwenya eshinji tawe.

Ne wisumilisie khulwa Nyasaye wuwo Omulesi.

Mana olwa olwika lulifurwamwo.

Kho inyanga eyo iliba inyanga indinyu muno.

Khubakhayi shiiliba inyangu tawe.

Ndekha nende wandaloonga sienyene.

Mana nemuhelesia emiandu eminji.

Nende abaana balolekha.

Ne nemukasilia amakhuwa obulayi muno.

Mana khandi yekombanga mbu emumeete.

Shikali kario tawe! Toto ye yakholelanga eshileka muno amakhuwa kefu (Ikurani).

Nditsa okhumuha eshinyasio shialanyala okhwisumilisia tawe.

Toto ye yapara mana napanga shinga atuta.

Mana nasishibwa okhurulana shingala yapanga okhututa.

Khandi mana nasishibwa okhurulana shingala yapanga okhututa.

Mana naheenga.

Mana nakhunia obweni, nasinyikha.

Mana niyechesia obwatoto omukongo, mana nakhola obufuru.

Naboola mbu: “Bino shine shindu tawe halali obulosi bwainibwa khubandu bandi.

Kano shini shiosishiosi tawe halali namakhuwa kabandu sa.”

Ndakhamwinjisie mumulilo omululu kwa Saqar.

Ne ni shina shilikhumanyia omulilo kwa Saqar oko?

Shikutonyinjia inyama, ne shikulekhanga tawe.

Kumamulanga liselo liomubili.

Kulikhwo nende (Abamalaika) ekhumi nende tisa.

Ne shikhwakhola abalindi bomulilo halali ni Abamalaika, ne shikhwakhola isaabu yabu eyo halali okhubeyiabeyia Abakhayi, kho babe nobulaamba balia bahebwa Eshitabu, ne Abasuubila bamete obusuubili. Ne balaba nokhukanakana balia bahebwa Eshitabu nende Abasuubila tawe. Ne khobaboole balia bali nobulwale mumioyo chiabu nende Abakhayi mbu: “Nyasaye yenyanga shina, okhurulana nende okhuchelasia khuno?” Endio nilwa Nyasaye akosinjia owayenyele, nalunjisia owayenya. Ne awumao umanyile omukanda kweliyie kwa Nyasaye wuwo Omulesi halali Ye omwene. Ne kano shini shiosishiosi tawe halali ni ameetsulisio khubandu.

Tawe, nditsuba khumwesi.

Nende khushilo nishiwa.

Nende khumabwibwi olwa bushietsanga.

Toto omulilo oko nimulala khumakhuwa amakhongo muno.

Nende amekanyilisio khubandu.

Kho ulia wenya mwinywe, aranjilile nohomba amalilishe.

Buli omundu alitiilwa khulwa amakhuwa kayakhola.

Halali Abandu bomukhono omusatsa.

Baliba mumikunda chiomwikulu nibarebananga.

Amakhuwa ka Abandu betsimbii.

“Ni shina shiachila nimwinjila mumulilo kwa Saqar?”

Baliboola mbu: “Efwe shikhwali mubaswaliyanga tawe.

Ne shikhwalisinjia abamanani tawe.

Ne khwali nikhweibila halala nende balia beyibila mutsimbi.

Ne khwali khwakatsulanga inyanga yomurungo.

Okhula shinga liikhuwa liatoto (lifwa) liakhuulila.”

Kho okhusabila khwomusabi shikhulibakhoonya shiosishiosi tawe.

Mana bali barieena abahelesinjia omukongo ameetsulisio kano?

Opara mbu bo nitsisishili tsisundusibwe.

Tsilukhanga italanyi.

Mbu buli omundu mubo yenyanga ahebwe eshitabu shishie okhurula mwikulu.

Shikali kario tawe! Halali shibaritsanga aka Mwikulu tawe.

Shikali kario tawe! Toto kano ni ametsulisio.

Kho, ulia wenya, yetsulile.

Ne shibakhetsulila tawe okhuula Nyasaye achame. Ye niukhoyeshele okhuribwa, khandi ni Wobulesheli muno.

Nditsuba khuinyanga yeyinduukho.

Ne nditsuba khumwoyo kwa okhwifunaania.

Koo, omundu aparanga mbu shikhulikhung’asia halala ebikumba bibie tawe?

Khulwa shina! Efwe khunyala okhura habwene tsinyali tsia tsinzala tsitsie.

Habula omundu yenyanga sa okhutsililila okhukhola amabii khutsinyanga tsili imbeli waye.

Arebanga mbu: “Iliba lina inyanga yeyindukho?”

Mana olwa imoni iling’ang’aala.

Ne olwa omwesi kulitilana.

Ne olwa eliuba nende omwesi bilihambasibwa.

Inyanga eyo Omundu aliboola mbu: “Amelushilo kali yena?”

Tawe! Wokhwilushila wosiwosi abulaho tawe!

Inyanga eyo ewa Nyasaye wuwo Omulesi niiliba habundu wokhutong’ao.

Inyanga eyo omundu aliboolelwa kayaranjilisia nende kayamalilishia.

Halali buli omundu yemanyile omwene muno.

Kata narusia ebichila ebiinji.

Olabuyungubasilia (obufimbuli bwa Nyasaye) olulimi lulwo tawe, khulwokhubusooma lwangu lwangu tawe.

Toto kali khwifwe okhubukhuung’asia (mushilifu shishio) halala nende okhukhukhola obusome.

Kho nikhwakhabusooma, londelela okhusooma khwabuo.

Mana kali khwifwe okhubwinoosia (khwiwe).

Shikali kario tawe! Halali enywe mwayanza obulamu bwokhushialo.

Ne mulekhanga obulamu bwomwikulu.

Obweni inyanga eyo bulimesamesa.

Buliheenga Nyasaye wabwo Omulesi.

Ne obweni bundi inyanga eyo bulisinyikha po.

Bulimanya mbu buulilwe nende shifunakanga olukongofuma.

Shikali kario tawe! Olwa omwoyo kuliula khushikumba shielikosi.

Mana kareebwe mbu: “Ni wina umusilikha?”

Ne omwene namanya mbu toto bwene okho nikho okhufwa.

Ne olwa emiluku chilitilana halala okundi khukundi.

Inyanga eyo niyo yebindu bioosi biliyilwa ewa Nyasaye wuwo Omulesi.

Mana shiyafuchilila (aka Nyasaye), nohomba shiyaswaliya tawe.

Halali yakatsula mana nafutara.

Mana natsia khubandu baye niyesunga.

Oh abaane koo ewe! Oh abaane koo ewe!

Mana khandi oh abaane koo ewe! Oh abaane koo ewe!

Koo, omundu aparanga mbu anyala okhulekhwa butswa eshikhaya?

Koo, shiyali indonyande yamatsi kolwibulo kamitsungwa tawe?

Mana naba amalika, mana Nyasaye namuloonga namukaasia obulayi muno.

Mana nakhola okhurulanamwo tsimbia tsibili: abasatsa nende abakhasi.

Kho koo, oyo shali omunyali muno wokhulamusia abafu tawe?

Toto biabura ebise ebirambi khumundu, olwa yaali naalali eshindu shirumbulwa tawe.

Toto efwe khwaloonga Omundu okhurulana nende imwo yobulamu, yesasania, (yomusatsa nende omukhasi) khulwokhumutema, kho nikhumukholaye okhuwulila muno, nende okhulola po.

Toto efwe khwamulunjisia kunjira ilunjifu, niyenya asubire Nyasaye mana abe wokhupa orio, nohomba alonde khunjira ya obukhayi (alobe injira ya Nyasaye).

Toto efwe khwarecheshela Abakhayi eminyororo, nende tsirimba nende omulilo omululu.

Toto Abandu abalayi balinywa eshinywebwa shiasasibwamwo ‘kafura’.

Ne Isebele ya Abandu ba Nyasaye balinywamwo, bali ikhola ikhulukusie mubunji.

Bakholanga kabalaka, ne baritsanga inyanga yobusiro bwayio buliswana.

Ne balisinjia eshilibwa shia abene bashiyanza Abamanani, nende Abafwilwa nende Ababoye.

“Toto efwe khubalisinjia khulwokhwenya obweni bwa Nyasaye, shikhubenyakhwo omurungo nohomba orio muno tawe.

Toto efwe khuritsaanga okhurulana khu Nyasaye wefu Omulesi, inyanga yobutinyu nende Omusando.”

Kho mana Nyasaye alibashinga okhurulana nende obusiro bwe inyanga eyo, ne alibakhola okhulolekha obulayi po, khandi abasangafu.

Ne alibarunga omukunda kwomwikulu nende tsingubo tsieshironyo, khulwa okhwifwila khwabu.

Omo baliyekha khubisaala bioluyali, shibalilolamwo omubasu omululu nohomba omunyiri omululu tawe.

Ne ebiinikha biliba ahambi ninabo, ne ebiamo biamwo bilieletsanga muno.

Ne balitendelwa khubindu bie ifedha nende bikombe bia tsigilasi.

Tsihilasi tsia ifedha inzwenufu shinga shiwoo, tsiachelwa khushichelo.

Ne omo balinywesibwamwo eshinywebwa shasasibwamwo itangawizi.

Eyo isebele iliyo ilangwa mbu Salsabil.

Ne balibetsela luno nende lulia okhubatenda abasiani bashili ababukha. Nobalola, olapara mbu bo ni tsisole tsing'enang'ena tsiomunyanza tsiasaalasibwa.

Ne nolenga eyo, olalola obwokholo nende obwaami obukhongo.

Hekulu wabu tsiliba tsingubo tsia Hariri (tsingwalafu) tsiobukondo bwamasafu, ne balifwala emikasa chieyifedha, ne Nyasaye wabu Omulesi alibanywesia eshinywebwa eshilafu muno.

(Alibaboolela mbu) “Toto kuno nikwo omurungo kwenyu, ne okhukhalabana khwenyu khufuchililwe.”

Toto efwe khwakhwishilia Ikurani indutu, indutu.

Kho linda okhula shingala Nyasaye wuwo Omulesi alabusia eshina, ne olaulila yesiyesi mubo owetsimbi nohomba omukhayi tawe.

Ne itsulila elira lia Nyasaye wuwo Omulesi nibushia nende nibwila.

Ne mushilo murerere obweni hasi, ne mutswenule oluwono olurambi lweshilo.

Toto Abandu bano bachama obulamu bwokhushialo, ne balekhanga inyuma wabu inyanga isiro.

Efwe khwabaloonga, ne nikhubaramwo amaani, ne nikhwenya, khunyala okhukalukhasia abandi bali shingabo.

Toto bwene kano ni ametsulisio. Kho, owenya, atiile injila itsia ewa Nyasaye wuwe Omulesi.

Ne shimwakhenya tawe okhula Nyasaye achame. Toto bwene Nyasaye niye Omumanyi muno, Owamachesi po.

Yenjisinjia owayenya mutsimbabasi tsitsie, ne abamabii yabarecheshela eshinyasio eshilulu.

Nditsuba khuchirumungwa kaala!

Nende chiwutsanga obutinyu.

Nende chimitsanga ifula isalana!

Nende abamalaika bekhanga okhwaukhasia amalayi nende amabii.

Nende abamalaika bekhanga nende obufimbuli.

Bube khubo eshichila nohomba amekanyilisio.

Toto bwene kamulakungwa kaliba!

Olwa tsing’ining’ini tsilisumibwa.

Ne olwa likulu liliatisibwa.

Ne olwa efikulu filipurusibwa.

Ne olwa Abarumwa balikhung'asibwa kubise bilala.

Khulwa inyanga shina eyo yasutibwa imbeli?

Khulwa inyanga yokhwaukhania.

Ne shina shikhumanyia inyanga yokhwaukhania?

Eshinyasio eshikhongo inyanga eyo shiliba khubakatsulanga.

Shikhwasishia abaranjilila?

Mana nikhubalondiakhwo abeinyuma?

Endio nilwakhukholanga Abandu ababii.

Eshinyasio eshikhongo inyanga eyo shiliba khubakhayi.

Shikhwabaloonga okhurulana nende amatsi kalekungwa?

Mana nikhukara habundu ayenzefu alayi.

Okhula ebise bimanyishe.

Mana nikhuraho ebise, ne nifwe abamanya ebise bikhoyeshele.

Eshinyasio eshikhongo inyanga eyo shiliba khubakatsulanga.

Shikhwakhola liloba libe liokhukhung’asia tawe?

Abalamu nende abafu?

Ne nikhuramwo efikulu efirambi (fiokhutinyisia liloba), ne nukhubanywesia amatsi amalayi.

Eshinyasio eshikhongo inyanga eyo shiliba khubakatsulanga.

Tsie khushinyasio shiamwakatsulanga.

Tsie mushinikha (shiomwosi) shiamarafi kataru.

Sishirera eshinikha shiosishiosi tawe, ne sishikhonya shiosishiosi okhurulana nende omulilo tawe.

Omulilo oko kusukunanga tsinzesele shinga tsinzu tsikhongo.

Shinga tsingamia tsia namabuyu.

Eshinyasio eshikhongo inyanga eyo shiliba khubakatsulanga.

Ino ni inyanga yabalaliboola shiosishiosi tawe.

Nohomba shibalifuchililwa okhurusia eshichila tawe.

Eshinyasio eshikhongo inyanga eyo shiliba khubakatsulanga.

Ino niyo inyanga yobwawukhani, khubakhung’asiye nende abeyimbeli.

Kho, nimuli nende liokhututa, nakhatutekho.

Eshinyasio eshikhongo inyanga eyo shiliba khubakatsulanga.

Toto abaria Nyasaye baliba mubiinikha nende tsisebele.

Nende ebiamo mubuli biabenyanga muno.

Lie, ne munywe mumwikhoyo khukalia kamwakholanga.

Toto endio nilwakhurunganga abakholi bamalayi.

Eshinyasio eshikhongo inyanga eyo shiliba khubakatsulanga.

Lie, ne mwikhoye hatiti. Toto enywe muli abamabii muno.

Eshinyasio eshikhongo inyanga eyo shiliba khubakatsulanga.

Ne nibabolerwa mbu: “Inamile Nyasaye”, shibenamanga tawe.

Eshinyasio eshikhonga inyanga eyo shiliba khubakatsulanga.

Mana nimakhuwa shina olunyuma lwa kano akabalasuubila?