Magindanao Meal — Rowad Tercüme Merkezi — Fatiha 1:1 – Enam 6:165

Ebpunan ku matya su ingalan nu Allahu Taala a malimu (sa dunya) a sangat i kalimu nin (sa gay a mawli).

Su langun nu bantugan (Alhamdulillah) na lekanin bu a Allahu Taala a pedtiyakap kanu sakalyan alam.

Malimu a sangat i kalimu nin.

Sekanin bu i datu kanu kawma nu gay a mawli.

Seka bu (Allah) i pedsimban endu seka bu (Allah) i bangeniyan nami sa tabang.

Tutulu kami (Allah) sa kanu lalan a matidtu.

Lalan nu silan antu a inikalimu nengka (manga palityala), di kena su lalan nu silan antu a nalipungetan nengka, endu kena su silan antu a nangatading (manga Yahudi endu Nasrani).

Alif-Laam-Meem (su Allah bu i mataw kanu ma’na nin).

Su entuba a kitab (Qur’an) na dala kanduwa-duwa nin, nakadalem sa lekanin su tutulu kanu manga taw a magilek sa lekanin (Allah).

Su silan antu a manga taw na balityalan (bangimbenalen) nilan su dala mailay nu mata nilan, (surga, naraka) endu ipedtindeg nilan su sambayang endu su ini-rizki nami kanilan na penggastun nilan.

Endu su silan a manga taw a balityalan (bangimbenalen) nilan su nganin a nakatulun sa leka (Muhammad), endu su nganin a nakatulun a nawna pan sa leka, endu su gay a mawli na baginugutan nilan sa talutup (di gapinda kanu atay nilan).

Silan antu a manga taw a nakambetad kanu tutulu ebpun kanu Kadenan nilan, endu silan ba i manga taw a naka-untung (sa dunya-akhirat).

Saben-sabenal su silan a manga mig-kafir na magidsan pan i panging-gileken silan ataw ka dili, na di bun mangimbenal (kanu langun a napananggit nengka ebpun kanu Allah).

Tinutupan nu Allah su manga pusung nilan endu su manga kapegkakineg nilan endu inumbalan nu Allah su kapegka-ilay nilan sa sapeng, sa kanilan den su siksa a sangat a masla.

Endu su kaped kanu manga taw na pedtalu sa nalityala (nangimbenal) kami sa Allah endu sa gay a mawli, sa ula-ula a di kena silan bamalityala (bangimbenal).

Ibagakala nilan su Allah endu su manga namalityala (nangimbenal), na dala gapagakalan nilan ya tabya na su manga ginawa nilan, sa ula-ula a di nilan egkagedam.

Nakadalem kanu manga pamusungan (nu manga munafiq) i sakit (kamunafiq), na inumanan nu Allah sa kanilan i namba a sakit, endu kanilan su siksa a masakit sabap kanu nganin a kaaden nilan a kapendalbut nilan.

Endu amayka pedtalun kanilan: da kanu baminasa kanu kalupan, na ya nilan kadtalu: sekami i pakagkapiya.

Tanudan! Ka saben-sabenal a silan a manga taw i baminasa, ugayd na di nilan egkagedam.

Endu amayka pedtalun kanilan: palityala (pangimbenal) kanu sa mana su kinapalityala (kinapangimbenal) nu manga taw, ya nilan kadtalu: enduken ka pakapalityala (pakapangimbenal) kami sa mamba sa manga taw a dala ugangen nin, (di mataw), Tanudan! silan i dala ungangen nin, ugayd na dili nilan katawan.

Endu amayka madsumbak nilan su manga namalityala (namangimbenal), ya nilan kadtalu: nalityala (nangimbenal) kami, endu amayka makalu silan kanu manga egkanga-unutan nilan na ya nilan kadtalu: saben-sabenal na sekami na tagapeda nu, saben-sabenal na bagungaten (pedsudyan) nami bu silan.

Su Allah i bagungat kanilan endu papendaya kanilan, kanu katadingan nilan sa manduwa-duwa silan.

Silan a manga taw na inisambi nilan su katadingan sa tutulu, na dala silan maka-untung kanu dagangan nilan, endu dala maaden silan sa matutulu.

Upaman nilan na mana bun silan minyag sa apuy, guna su nasalindawan nin su nganin a embala-bala sa kanilan na ini-awa nu Allah su sigay nin, sya den silan matagu kanu malibuteng sa di den silan maka-ilay.

Manga bisu, maw, pisek silan (kanu bantang) na silan na di makambalingan (kanu bantang).

Ataw ka ya upaman nu entu a manga taw na dadtem ebpun sa langit a nadalem lun i malibuteng endu palti endu kilat, ibetad nilan su manga lima nilan sya kanu manga tangila nilan (endu di nilan makineg) sabap kanu kilat, kagilekan sa kapatay, endu su Allah na balibet kanu manga kafir (sinumupak).

Paydu bu gayd i di kaped-sayab nu kilat kanu kapeg-kailay nilan, uman kalinawagan silan nu kilat na lumalakaw menem silan, amayka nalibutengan silan na makatindeg menem silan, umana bu ka pigkahanda nu Allah i maawa su kakineg nilan, kailay nilan, sabena-sabenal na su Allah na egkagaga nin i langun nu enggaga-isa.

Hay! Sekanu a manga taw, simba nu su Kadenan nu a minaden sa lekanu, endu kanu manga taw a nangawna sa lekanu, malemu-lemu sa lekanu i kagilek nu sa lekanin a Allah.

Su Allah i minaluy sa lekanu kanu lupa a nakabelat endu su langit a pimbalay nin endu pinatulun nin sa lekanu su ulan a ebpun sa langit na pinambuat nin i manga unga sa rizki sa lekanu, na da kanu mangumbal sa manga salepeng nu Allah a pedsimban sa ula-ula a sekanu na katawan nu.

Endu amayka ya nu kaaden i penduwa-duwa kanu (Arab, Yahudi, Nasrani) kanu nganin a initulun nami (a Qur’an) kanu ulipen nami (Muhammad) na enggay kanu sa satiman bu a surah a pagidsan nin, endu tawag nu su manga tabangay nu a salakaw kanu Allah amayka ya nu kaaden i bantang kanu.

Amayka di nu manggalebek endu di nu den a benal manggalebek na ikagilek nu su apuy a ibalaleg lun na manga taw endu manga watu (barahala) nilan, inipagadil kanu manga kafir.

Panudtul ka (pakalilini ka) (Muhammad) kanu silan a manga taw a namalityala (namangimbenal) endu minggalebek silan sa manga mapya i saben-sabenal na aden kanilan i manga surga a pedtuga (pelagilay) sa kababan nin i manga lawas a ig, uman silan rizkiyan sa manga unga na kayu na ya nilan madtalu na man bun ba su nawna antu a nakawma sa lekitanu, initalingguma kanilan su rizki a makadsusulagida, endu aden kanilan lu sa surga i manga kaluma a suti, endu silan a manga taw kanu surga na taman sa taman (dayun sa dayun).

Saben-sabenal su Allah na di nin ikaya i kapangupama nin sa upaman, apiya pan mana bu tagenek, u di na labi lawan pan lun su manga namalityala (namangimbenal) na katawan nilan su Haqq (bantang) na ebpun kanu Allah, su manga kafir menem na ya nilan kadtalu: ngin i kahanda nu Allah sa namba a upaman? Sa pakatadin sa madakel a pakatutulu bun sa madakel, na dala gatadin ya tabya na su manga taw a faasiq (baladusa).

A su silan antu a manga taw a binaluba nilan (da nilan tumana) su pasad sa Allah sa ulyan na kinapalut nin endu pedtebpeden nilan su nganin a inisugu nu Allah i kapadsumpat lun (su kadsusuled) endu baminasa silan kanu kalupan sa entu ba silan a manga taw a nangalugi.

Panun i kapeg-kafir nu sa kanu Allah sa ula-ula ya nu kaaden na manga minatay kanu, na inuyag kanu nin (sya sa dunya) mawli na imatayan kanu nin, mawli na uyagen kanu menem (kanu kabangkit sa dunya), mawli na lu kanu langun sa lekanin (Allah) makambalingan.

Sekanin (Allah) i minaden sa lekanu kanu nganin a dalem nu lupa sa langun, mawli na migkahanda lu sa langit, binaluy nin menem su pitu lapis a langit, sekanin (Allah) kanu langun nu enggaga-isa na katawanin.

Kanu kutika antu a pidtalu nu Kadenan nengka (Muhammad) kanu manga malaikat i saben-sabenal na saki na mangaden ako sya sa lupa sa khalifah (bangsa manusya), ya pidtalu nu manga malaikat: enduken ka bangaden ka pan sa manusya a endupang bu sya sa lupa endu mapatuga silan sa lugu? Sa ula-ula a sekami (malaikat) na pedtasbih kami a pebpugi sa leka endu pedsutin nami seka, ya pidtalu (nu Allah): saben-sabenal na saki i labi a mataw kanu nganin a di nu katawan.

Pinamandu (nu Allah) si Adam sa manga ingalan sa langun nin mawli na ini-adul (ini-ayag) menem kanu manga malaikat na pidtalu nin, panudtul nu sa laki su manga ngala nilan, amayka ya nu kaaden i bantang.

Ya nadtalu nu manga malaikat: mahasuti ka a Kadenan nami dala katawan nami ya tabya na su inipamandu nengka sa lekami, saben-sabenal na seka i Kadenan nami a mapulu a maungangen.

Pidtalu (nu Allah): Hay Adam! Pamanudtul ka kanilan su manga ngalan nilan, guna mapanudtul nu Adam kanilan i manga ngalan nilan na pidtalu (nu Allah): di kena ba pidtalu ku sa lekanu i saben-sabenal na saki i labi a mataw kanu dala pan mailay na mata sa langit endu lupa, endu katawan ku pan su langun na ipebpayag nu endu su nganin a ya nu kaaden na ibagena nu.

Endu pidtalu nami kanu manga malaikat: sugyudi nu si Adam, na sinemugyud su langun a malaikat ya tabiya a da sugyud na su Iblis, mibpalaw endu mimamasela, endu nabaluy sekanin a kaped kanu manga kafir.

Endu pidtalu nami (Allah): Hay Adam! endu su kaluma nin i tana kanu den sya sa surga, pangankan kanu sa endaw i kyug nu, di nu pedsikeni i nya ba a kayu, ka mabaluy kanu sa makuyug kanu manga taw a manga dupang.

Sinasat silan duwa nu Shaytan, inapas nin sa makalyu silan duwa sa surga, endu pidtalu nami: embaba kanu lu sa lupa, a mamagukag kanu bu. Aden bun kadtakena nu lu sa lupa endu kagkakalilinyan nu sa taman sa di kanu makaganat sa dunya.

Na tinalima ni Adam su mga bityala ebpun kanu pedtiyakap sa lekanin (Allah) saben-sabenal na sekanin (Allah) na banawbat a sangat a malimu (sa gay a mawli).

Endu pidtalu nami: embaba kanu ebpun sa sulga, na amayka makawma su tutulu ku sa lekanu na entayn i taw a unutan nin su tutulu ku na da gilek nin sa ka-naraka endu di malidu i ginawa nin kanu kaganat nin (kapatay nin).

Endu su silan a manga taw a mig-kafir endu pinandalbut nilan su manga tanda nami (manga ayatan) na silan su manga taw a kigkuwan kanu naraka, silan kanu entuba na dayun sa dayun (taman sa taman).

Sa kanu tupu nu manga Israel na tademi nu su limu ku a inikalimu ku sa lekanu endu tuman nu su pasad nu, ka tumanen ku su pasad ku sa lekanu, endu saki (Allah) i pangandam nu.

Endu palityalay nu (pangimbenal nu) su nganin a initulun ku a (Qur’an) a nakaayun kanu kitab a Taurat, na da kanu enggula sa sekanu bun i mawna a sumupak, endu di nu pebpasa su manga tanda ku (manga ayatan) sa paydu a alaga endu saki (Allah) i ikagilek nu.

Endu di nu lumapisi su bantang sa kalbut (batal) endu di nu ibpagena su bantang sa ula-ula a sekanu na egkangatawan nu.

Endu itindeg nu su sambayang endu itunay nu su zakat endu ruku’ kanu salta kanu manga taw a bameruku’.

Ngintu ka ipedsugu nu kanu manga taw su kanggalebek sa mapya na belipatanan nu su manga ginawa nu, inunta na pembatyan nu bun su kitab, ngintu ka di nu gapamikil?

Patabang kanu sa kakwa nu kanu kahanda nu, edsabar kanu endu edsambayang kanu, duwa ka biyas anan a sangat i kawgat nin, ya tabiya na siya kanu manga magilek.

Silan antu a manga taw a ga-antap nilan i saben-sabenal na silan na mapangadap nilan su pedtiyakap kanilan (Allah), endu saben-sabenal na silan na lu bun silan sa lekanin (Allah) makambalingan.

Sekanu a manga tupu na Israel, tademi nu su limu ku a inikalimu ku sa lekanu, endu saben-sabenal na saki na inilabi ku sekanu kanu manga taw kanu timpu nu.

Endu ikagilek nu su gay a di kabalasan nu isa a ginawa su isa a ginawa sa enggaga-isa (di makadtatabanga) endu di matalima lun su ka-safa'at endu di maka-pangawn su manga tamuk endu di den silan kadtabangan.

Endu kanu kutika a linepas nami sekanu kanu manga tagapeda ni Fir’awn, a ipa-penggugunanam nilan sa lekanu su sangat i kawag nin a siksa, sa banumbalin nilan su manga wata nu a manga mama endu papegkayan nilan su manga wata nu a manga babay, su entu a egkanggula nu na batalwan a masla intu a ebpun kanu pedtiyakap sa lekanu (Allah).

Endu su kutika a pinadsisi nami sa lekanu su lagat, na linepas nami sekanu endu inegeled nami su manga tagapeda ni Fir’awn sa ula-ula a gailay (gambamatan) nu.

Endu kanu kutika a pibpasadan nami si Musa sa patpulu ka magabi, mawli na ya nu sinimba na sapi kanu ulyan nin, sa ula-ula a sekanu na nakalalim (nakadsalimbut).

Mawli na linasam nami pa mun sekanu kanu ulyan nu entuba ka endu malemu-lemu sa lekanu i kadsukur nu.

Endu kanu kutika a kina-enggay nami kani Musa sa kitab (Taurat) endu Furqaan (mapadsenggaya sa mapya endu mawag), ka endu malemu-lemu sa lekanu su katutulu.

Endu kanu kutika a pidtalu nu Musa kanu manga kawm in: Hay! kawm ku, saben-sabenal na sekanu na nadsalimbut nu su manga ginawa nu sabap kanu kina simba nu sa sapi, na edtawbat kanu ku Kadenan nu (Alllah) sa imatayi nu su manga ginawa nu ka entuba i makagkapiya sa lekanu, ka tawbaten kanu nin (Allah), saben-sabenal sa lekanin na sekanin i banawbat a sangat a malimu.

Endu kanu kutika a pidtalu nu: Hay Musa! Di kami den a benal balityala (bangimbenal) sa leka, taman a di nami mailay su Allah sa mapayag, na sinayab kanu na kilat, sa ula-ula a sekanu na gailay (gambamatan) nu.

Mawli na pinambwat nami sekanu kanu ulyan nu kinapatay nu, ka endu malemu-lemu sa lekanu i kadsukur.

Endu pinasilungan nami sekanu sa gabun endu inetulun nami sa lekanu i panginginumen a mamis endu papanuk a manawt, na kan kanu ebpun kanu manga mapya a nganin a inirizki nami sa lekanu, endu di kena kami nilan pidsalimbut, ugayd na ya nilan kaaden kanu manga ginawa nilan na pedsalimbuten nilan.

Endu pidtalu nami: ludep kanu sa niya ba a dalpa (Baytal Muqaddas) na kan kanu sa mapya sa endaw i taman a kalinyan nu, ludep kanu sa bengawan sa sugyud kanu, sa ya nu edtalu na ampun kami, ka ampunen nami su kabaradusan nu, endu edsisinggumanan nami (sa pahala) su manga taw a bangapiyanan.

Na sinalin nu manga taw a nanalimbut su kadtalu, sa salakaw kanu pidtalu kanilan, na initulun nami sa kanu silan a nanalimbut su siksa a ebpun sa langit sabap sa kanu nganin a kaaden nilan a kapedsupak.

Endu kanu kutika a pinangenyan ni Musa (lu sa Allah) su kawm nin sa ig, na ya nami pidtalu (Allah): ibetay nengka i tungked nengka san sa manga watu, na sinumumpit i sapulo endu duwa a buwal, saben-sabenal na natawan na uman isa (ataw ka lumpukan) i baginuman nin, kan kanu endu inum kanu ebpun kanu rizki nu Allah, endu da kanu belalakaw siya kanu lupa sa makabinasa kanu.

Endu kanu kutika a pidtalu nu kani Musa: Hay! Musa, di kami den a benal makatigkel sa pegken a isa timan bu, na pangeni kami kanu pedtyakap sa leka (Allah) sa pambuwaten nin sa lekami i makebpun kanu nganin a babagetun nengka sa lupa a embalangan nu pegken a kakamun endu paninu, ya pidtalu (nu Musa): ngintu ka pedsambiyan nu su mapya sa di kena ged mapya!? Embaba kanu lu sa apiya ngin a dalpa (Misr) ka saben-sabenal na lekanu su nganin a bangenin nu, endu ya nilan nadsalengkat na su kalusakan endu kamiskin endu lipunget nu Allah, su namba na sabap sa saben-sabenal a kaaden nilan a kapegkafir kanu manga tanda (ayatan) nu Allah, endu bamunun nilan su manga nabi sa di paka dayt (wagib) endu su namba na sabap kanu nganin a kinasupak nilan endu kaaden nilan a kabanibaba.

Saben-sabenal na su silan a bamalityala (bamangimbenal) endu su silan a Yahudi endu Nasrani endu su lumpukan nu manga tagapeda nu kaped kanu manga nabi a nalityala (nangimbenal) sa Allah endu gay a mawli endu minggalebek sa mapya na aden sa kanilan i balas lu kanu pedtiyakap kanilan (Allah), endu da gilek nilan, endu da lidu na ginawa nilan.

Endu kanu kutika a kinamalan nami su pasad nu (sa simba nu su Allah) endu inipulu nami sa lekanu su palaw (palaw na Tur), kamali nu su nganin a inenggay nami sa lekanu endu tademi nu su nganin a nakadalem lun, ka malemu-lemu sa lekanu i kagilek nu (sa Allah).

Mawli na tinaligkudan nu kanu ulyan nu entuba (su kapasadan), na u di kena bu su kalbihan nu Allah sa lekanu endu limu nin na dili ebplis na maaden kanu sa kuyug kanu manga nalugi.

Endu saben-sabenal a natawan nu su silan a tinalasak nilan su gay nu saptu (bangwa sa seda sa gay na saptu), na ya nami pidtalu sa kanilan: embaluy kanu a ubal a namakalusak (kahanda nu Allah na nabaluy silan a ubal).

Na binaluy nami a pangagi kanilan, endu kanu makatundug sa kanilan, endu indawan kanu manga magilek sa Allah.

Endu kanu kutika a pidtalu ni Musa kanu kawm in: saben-sabenal na su Allah na pedsugun kanu nin sa sumbali kanu sa sapi, ya nilan pidtalu: nginan pendama-ngiyasen kami nengka? Ya nin (Musa) pidtalu: belindung aku sa Allah sa maaden aku sa kaped kanu manga untengaw (ignuranti).

Ya nilan pidtalu: pangeni kami nengka kanu pedtiyakap sa leka (Allah) sa ipayag nin sa lekami u ngin sekanin (sapi), ya nin pidtalu: saben-sabenal na ya nin pidtalu (Allah) na sekanin su sapi a di kena ged matuwa endu di kena bun ged manguda, uged na nasasangan kanu pageletan nu namba, na enggalebek nu su nganin a ipedsugu sa lekanu.

Ya nilan pidtalu: ipangeni kami nengka kanu pedtiyakap sa leka (Allah) sa ipayag nin sa lekami u ngin i warna nin (sapi), ya nin pidtalu: saben-sabenal na ya nin pidtalu (Allah) na sekanin su sapi a binaning ged a mapedes i warna nin a makapakalilini nin su manga bemedtulik lun.

Ya nilan pidtalu: pangeni kami nengka kanu pedtiyakap sa leka (Allah) sa ipayag nin sa lekami u ngin sekanin (sapi), saben-sabenal na su manga sapi na makandadalagida sa lekami, na saben-sabenal na amayka magkahanda nu Allah na di den ebplis na matutulu kami.

Ya nin pidtalu (Musa): saben-sabenal na pidtalu nu Allah sekanin a sapi na di kena ibangangawid endu di kena ibamubu sa lupa, da tila nin endu da simbul na warna nin, ya nilan nadtalu: saguna na initingguma nengka su bantang, na sinumbali nilan (su sapi), sa ula-ula a malu-malu di nilan manggalebek.

Endu kanu kutika a minimatay kanu sa isa a ginawa, na inidsesendela nu su entuba, endu su Allah na palyu nin su nganin a kaaden nu a ibagena nu.

Na pidtalu nami (Allah): betay nu sekanin (su inimatayan nilan) sa sabad sa lekanin (sapi a inipasumbali sa kanilan), ka uyagen nu Allahu endu makapailay nin sa lekanu su manga tanda nin, na malemu-lemu sa lekanu i kapamikir nu.

Mawli na migkategas su manga pamusungan nu kanu ulyan nu namba na mana sekanin watu ataw ka minuna pan sa watu, saben-sabenal na kaped kanu watu i pembusisi ebpun sa lekanin su manga lawas na ig, endu saben-sabenal na kaped lun i pembubutekad na belyu ebpun lun i ig, endu saben-sabenal na kaped lun i gaulug sabap sa gilek sa Allah, endu da kanu Allah i makadtalipenda nin su nganin a penggalebeken nu.

Ngintu ka gapanganganay nu i makapalityala (makapangimbenal) pan silan sa lekanu (su manga Yahudi), endu saben-sabenal na sabad kanilan na gakineg nilan su kadtalu nu Allah, mawli na pasibayn nilan su entuba kanu ulyan nu kina sabut nilan lun sa ula-ula a silan na katawan nilan.

Endu amayka madsumbak nilan (Yahudi) su silan a namalityala (namangimbenal) na ya nilan kadtalu: nalityala (nangimbenal) kami, endu amayka menem ka mangabulig silan (Yahudi), ya nilan madtalu: ngintu ka ipembitiyala nu pan silan kanu inenggay nu Allah sa lekanu (Taurat) ka endu mabaluy nilan a tindeg lu kanu pedtyakap (Allah) sa lekanu, ngintu di nu gapamikir?

Ataw ka di nilan (Yahudi) katawan i saben-sabenal na su Allah na katawan nin su nganin a ibagena nilan endu nganin a ipebpayag nilan?

Endu kaped kanilan i di mataw semulat endu di maka batya, di nilan katawan i kitab (a Taurat) ya tabiya na antapan endu dala kanilan ya tabiya na kapangantap.

Na bawgan sa naraka i makwa nu silan a ibanulat nilan su kitab sa ukit nu manga lima nilan, mawli na ya nilan edtalun: su nyaba na nakebpun kanu Allah, ka endu nilan mabpasa sa alaga a paydu, na bawgan sa naraka silan sabap kanu nganin a inisulat nu manga lima nilan, endu bawgan sa naraka silan sabap kanu nganin a gapantyali nilan.

Endu ya nilan kadtalu: di tanu man a benal makanaraka ya tabiya na paydu bu a manga gay, edtalu ka (Muhammad) ngintu nangaden kanu sa pasad lu sa Allah? Na di den a benal balengkasen (binasan) nu Allah su pasad, ataw ka pedtetebwan nu su Allah sa nganin a i di nu katawan?

Di kena maytu kanu antapan nilan, ka entayn i enggalebek sa mawag endu nalibet den sekanin nu mawag nin, na entuba i manga kigkwan sa naraka, sa silan lu ba na dayun sa dayun.

Endu su silan a nalityala (nangimbenal) endu minggalebek sa manga mapya na entuba su manga kigkwan sa surga, sa silan lu ba na dayun sa dayun.

Endu kanu kutika a kinapamaluli nami sa pasad kanu tupu nu Israel sa di kanu sumimba ya tabya na kanu Allah endu su duwa a lukes nu na ebpyapyanan, endu su pagali, endu su manga ilu, endu su manga miskinan endu ya nu edtalu kanu manga taw na mapya, endu itindeg nu su sambayang, endu itunay nu su zakat, mawli na tinaligkudanan nu, ya tabiya na paydu bu sa lekanu (mibpalituman), sa ula-ula a sekanu na banaligkud (sa kapasadan).

Endu kinamalan nami su pasad nu (tupu nu Israel) sa di kanu embunu-bunu endu di palyun (bugon) nu sabad sa lekanu su sabad kanu dalpa nilan, mawli na minayun kanu sa ula-ula a sekanu na gadsaksyan nu.

Mawli na sekanu na pembunun nu sabad sa lekanu su sabad, endu babelyun (pembugon) nu su lumpukan a ebpun sa lekanu kanu dalpa nin, papedtusan nu sa kanilan su kadusan endu kapamagukag, endu amayka matingguma kanu nilan sa manga byag na bangunen nu silan sa ula-ula a sekanin (kabagawn) na iniharam sa lekanu i kabugaw sa kanilan, ngintu balityalan (bangimbenalen) nu su sabad kanu kitab na pegkafiran nu su sabad!? Na dala balas nu entayn i enggalebek sa namba sa lekanu ya tabya na kalusakan sa dunya, endu sa gay a mawli na lu silan papembalinganen kanu sangat i kapasang a siksa, endu kena su Allah i pakalimpang kanu nganin a penggalebeken nu.

Entuba i manga taw a tinumu nilan i uyag- uyag sa dunya kumin kanu gay a mawli, na di papegkapegkagen sa kanilan su siksa sa ula- ula a silan na di den kadtabangan.

Endu saben-sabenal na inanggay nami kani Musa su kitab (Taurat) endu pinatundug nami kanu ulyan nin i manga sinugu endu inenggay nami kani Eisa a wata ni Maryam su manga tanda endu binagel nami sekanin sa ukit ni Jibril, na ngintu ka uman makawma sa lekanu su sinugu a di kalilinyan nu manga ginawa nu na mimamasla kanu, su kaped a sinugu na papendalbuten nu, endu su kaped menem na bamunun nu.

Ya nilan kadtalu: su pamusungan nami anya na di makasabut, di kena bun (tig nu Allah), ugayd na namulkan silan nu Allah sabap kanu kapedsupak nilan, na paydu ged i pangimbenalen nilan.

Endu engguna matingguma silan nu kitab (Qur’an) a ebpun sa Allah a nagayun kanu nganin a lu sa kanilan (kitab a Taurat), endu ya nilan kaaden kanu nauna (a da pan makawma su Qur’an) na ya nilan kadtalu na katabanan tanu su silan a manga kafir, na engguna nilan kasabuti na migkafir silan, na su mulka nu Allah na salta kanu manga kafir.

Ngin den a kawag i nganin a nakasambi nilan kanu manga ginawa nilan sa pegkafir silan kanu nganin a initulun nu Allah sa kapedsupak kanu initulun nu Allah (a kanabi endu Qur’an) a kalbihan kanu entayn i migkahanda kanu manga ulipen nin, na gadayt kanilan su lipunget (nu Allah) a namaguntul, endu kanu manga kafir su siksa a bamelusak.

Endu amayka edtalun kanilan (Yahudi) i palityala (pangimbenal) kanu nganin a initulun nu Allah, ya nilan kadtalu: ya nami bu palityalan (pangimbenalen) na su initulun sa lekami endu pegkafir silan kanu salakaw lun, sa ula-ula a sekanin i bantang a nagayun kanu nganin a lu kanilan (Taurat), edtalu ka (Muhammad): na ngintu ka bamunun nu su manga nabi nu Allah kanu nauna amayka ya nu kaaden i baginugut (bangimbenal)?

Saben-sabenal a initingguma sa lekanu ni Musa i manga tanda, mawli na sinimba nu su sapi sa ulyan nin (kinaganat nin), sa ula-ula a sekanu na manga salimbuten.

Endu kanu kutika a kinamalan nami su pasad nu (a kapadtyunut kanu Musa) endu inipulu nami sa lekanu su palaw a Tur, sa kamali nu su inenggay sa lekanu sa mabagel endu pakikineg nu, ya nilan kadtalu: pinakikineg nami endu sinemupak kami endu pinasenep kanu manga pusung nilan i kasimba sa sapi sabap kanu kapegkafir nilan, edtalu ka i ngin den a kawag su nganin a ipedsugu sa lekanu nu kabalityala (kabangimbenal) nu, amayka ya nu kaaden i bamalityala (bangimbenal).

Edtalu ka (Muhammad): amayka ya nin kaaden i silan i kigkuwan sa gay a mawli sa da makaludep lun a salakaw sa lekanu kanu manga taw, na panganganay nu su kapatay amayka ya nu kaaden i manga bantang.

Endu di nilan den a benal mapanganganay su entuba (kapatay) sa dayun sa dayun sabap kanu nganin a nanggalebek nilan, endu su Allah bu i labi a mataw kanu manga salimbuten.

Endu di den ebplis na melay nengka (Muhammad) kanilan i subla a lilini ebpun kanu manga taw sa uyag-uyag, endu kanu manga namedsakutu, ya kyug nu isa sa kanilan na makapagumul sa sangibu lagun, a kena sekanin makapatangka sa lekanin kanu siksa i kababagumul sa lekanin, endu su Allah na gailay nin su nganin a penggalebeken nilan.

Edtalu ka (Muhạmmad) kanu entayn i egkuntla (sumatru) kanu Jibril na saben-sabenal na sekanin i nakadtapik (sa Qur’an) kanu pusung nengka sabap kanu sugut nu Allah, a nagayun (su Qur’an) kanu nganin lu sa kanilan (Taurat-Injil) endu tutulu, endu pakagkapiya kanu ginawa nu manga bamalityala (bangimbenal).

Entain i egkuntla (sumatru) kanu Allah endu kanu manga malaikat nin endu kanu manga sugu nin endu kani Jibril endu kani Mikail, na saben-sabenal na su Allah na kuntla (satru) nu manga kafir.

Endu saben-sabenal na initulun nami sa leka (Muhammad) su manga tanda a manga mapayag, endu dala egkafir lun ya tabya na su manga namelyu kanu agama nu Allah.

Uman silan ebpasad sa pasad na baluban nu sabad sa kanilan, ugaid na ya kadakelan sa kanilan na di balityala (bangimbenal).

Endu guna makawma sa kanilan su sinugu ebpun kanu Allah a nagayun bun kanu Taurat na initulak ku sabad kanilan a aden kitab nin (Yahudi) su kitab nu Allah na tinaligkuidan nilan sa mana nilan di katawan.

Endu inunutan nilan (Yahudi) su nganin a banalun nu manga shaytan kanu kinandatu nu Sulayman, endu da egkafir su Sulayman ugayd na su manga shaytan na migkafir, ibamandu nilan su sih'r (kapamungkayd), endu su nakatulun kanu duwa a malaikat lu sa Babil sa (Iraq) si Harut endu si Marut, su duwa malaikat na di kena silan bamandu sa sih'r (kapamungkayd) sa isa kataw taman a di nilan madtalu i sekami na bamatalu, na da kanu pegkafir, na bangagyan nilan sa kanilan duwa su nganin a kapabpitas kanu tiwalay (manga pasemu), endu kena silan pakagked sabap kanu entu sa isa kataw ya tabya (a manggula) na kahanda nu Allah, endu bangagyan nilan su nganin a pakabinasa sa kanilan endu di pakagkapya sa kanilan, natawan nilan i taw a mamasa sa namba a ilmu na da den mapya nin lu sa akhirat, (nagugul tanan su galebek in) endu ngin den i kawag, umana bu ka ya nilan kaaden na katawan nilan.

Umana bu ka saben-sabenal na silan na nalityala (nangimbenal) silan endu nagilekan silan (sa Allah) na su balas a lu ganat sa Allah na sangat i kapya nin umana bu ya nilan kaaden i katawan nilan.

Hay! sekanu a bamalityala (bangimbenal) di nu pedtalwa kanu Rasulullah i raa-ena (tyakapi kami) endu ya nu edtalu na angapi kami, endu pakikineg kanu, endu aden kanu manga kafir i siksa a sangat a masakit.

Di kalilinyan nu silan a migkafir a ebpun kanu manga taw nu kitab (Yahudi endu Nasrani) endu su manga namedsakutu i makatulun sa lekanu su mapya a ebpun kanu pedtyakap sa lekanu (Allah), endu su Allah i pedtentu kanu limu nin kanu magkahanda nin, sekanin a Allah i kigkuwan kanu kalbihan a masla.

Su nganin a ibagawa nami kanu ayat ataw ka babelipatanan nami na ipedtingguma nami i labi a mapya kumin sa lekanin ataw ka makaupama lun, ngintu di nengka katawan i saben-sabenal na su Allah kanu langun u enggaga-isa na egkagaga nin.

Ngintu di nengka katawan i saben-sabenal na su Allah na sekanin i kigkuwan kanu pitu lapis a langit endu lupa, endu dala sa lekanu i salakaw kanu Allah a pedtuganul endu pedtabang?

Ngintu ya nu galinyan na kaidsan nu su sinugu sa lekanu!? sa mana kina idsa kanu Musa kanu nawna, endu entayn i ya nin lamigen na su kagkafir kanu kapalityala (kapangimbenal) na entuba i taw a natading kanu lalan a matidtu.

Ya gapanganganay nu satru nu agama Islam na makambalingan kanu sa kanu ulyan nu kinapalityala (kinapangimbenal) nu sa manga kafir sa kadengki intu a nakabpun sa kanu manga ginawa nilan sa ulyan nu nganin a napayag sa kanilan su bantang, na ampun nu endu pasagadi nu silan, taman sa itingguma nu Allah kanilan su atulan nin (siksa), saben-sabenal na su Allah kanu langun a enggaga-isa na egkagaga nin.

Endu itindeg nu su sambayang endu inggay nu su zakat endu su nganin a ipedtatangguna nu kanu manga ginawa nu a mapya na matun nu lu sa Allah, saben-sabenal na su Allah kanu nganin a penggalebeken nu na pakailay.

Endu ya nilan (Yahudi endu Nasrani) pidtalu na di den a benal makaludep sa surga ya tabya na Yahudi ataw ka manga Nasrani, entuba na gapanganganay nilan, edtalu ka (Muhammad): inggay nu i tindeg nu amayka ya nu kaaden i manga bantang kanu.

Di kena maytu kanu antapan nilan ka entayn i sinemangkup kanu Allah sa ula-ula a mibpya-pya, na lekanin su balas nin lu sa kanu pedtyakap sa lekanin (Allah) endu dala gilek sa kanilan endu dala lidu na ginawa sa kanilan.

Endu ya pidtalu nu manga Yahudi i kena su manga Nasrani i bantang (sa agama), endu ya pidtalu nu manga Nasrani na kena su manga Yahudi i bantang (sa agama), sa pembatyan nilan su kitab (nilan), maytu bun ba i kadtalu nu silan antu a (manga pasasakutu) a dili manga mataw sa makaupama kanu kadtalu nilan (Yahudi endu Nasrani), na su Allah bu i makakukum sa kanilan lu sa gay a mawli kanu nganin a kaaden nilan a di nilan bamagayunan.

Endu entayn i labi a salimbuten kumin kanu entayn i sinemapal kanu manga masgit a tademan lu ba su ngala nu Allah endu pagatulen nin i kageba nin lun, entuba a manga taw na di egkadayt sa kanilan i kaludep (sa masjid) ya tabya na manga magilek, aden kanilan sa dunya i kalusakan endu aden kanilan sa gay a mawli i siksa a masla.

Endu kanu Allah i sebangan endu sedepan, apiya endaw kanu semangul na makasangul kanu sa Allah endu langkap (su limu nin) endu labi a mataw (gatagu sa ginawa nilan endu galebekan nilan).

Endu ya nilan pidtalu (manga Yahudi endu Nasrani): su Allah na nangaden sa wata, mahasuti su Allah, ugayd na lekanin su nganin a nadalem kanu pitu lapis a langit endu lupa, su langun sa lekanin na baginugut.

Midtebu kanu manga langit endu lupa, endu amayka bagukul sa galebekan na ya nin bu pedtalun kanu entuba: aden ka na maaden sekanin.

Endu ya pidtalu nu manga taw a di manga mataw: umana bu ka di tanu imbityala nu Allah ataw ka ka-enggan tanu nin sa ayat, maytu bun ba i kadtalu nu manga taw a nawna sa kanilan sa mana su kadtalu nilan, mindadalagida i pamusungan nilan, saben-sabenal na ini-payag nami su manga ayatan kanu manga taw ka endu matagu sa ginawa nilan.

Saben-sabenal na sekami na sinugu nami seka (Muhammad) sa bantang (Islam) a makapakalilini ka endu makapanginggilek ka, endu di ka kaidsan kanu manga taw a kigkuwan kanu naraka.

Endu di ka den a benal kalilinyan nu manga Yahudi endu su manga Nasrani, taman a di nengka unutan su agama nilan, edtalu ka (Muhammad) i saben-sabenal na su tutulu nu Allah na entuba i tidtu a tutulu, amayka unutan nengka silan kanu kyug nilan sa ulyan nu kinauma nu ilmu sa leka, na dala den makwa nengka ebpun sa Allah a temuganul endu dala pan temabang sa leka.

Su silan a inenggan nami silan sa kitab a pembatyan nilan sa tidtu a kapembatya lun, endu entayn i pegkafir lun na silan i nangalugi.

Hay sekanu a manga tupu nu Israel! Tademi nu su limu ku a inikalimu ku sa lekanu, endu saben-sabenal na saki na inilabi ku sekanu kumin kanu sakalyan alam.

Endu ikagilek nu su gay (gay a kagkukum) a dili kabalasan nu isa a ginawa su isa a ginawa sa enggaga-isa endu dili matalima ebpun sa lekanin su kapamangun endu di makangguna sa lekanin su shafa'at endu di den silan kadtabangan.

Endu kanu kutika a binatalu si Ibrahim nu pedtyakap sa lekanin (Allah) sa manga kadtalu na sinampulna nin su entuba (manga batalu), (tig nu Allah): saben-sabenal na saki i pembaluy sa leka kanu manga taw sa gaunutan, ya nin (Ibrahim) pidtalu: endu ebpun kanu mawli a taw ku? Ya nin (Allah) pidtalu: di masampay su pasad ku nu manga salimbuten.

Endu kanu kutika a binaluy nami su walay nu Allah (Baytullahil Haram) sa pembabalinganan nu manga taw endu katatanan, endu pamaluy kanu sa kanu nadtindegan ni Ibrahim sa gadsambayangan, endu inepangalintabun nami kani Ibrahim endu Ismail i kasuti nilan duwa kanu walay ku (Baytullahil Haram) kanu bamelibet sa ka'bah (bamedtawaf) endu su bamedtana, endu su bameruku’ a pedsugyud.

Endu kanu kutika a pidtalu nu Ibrahim: Kadenan ku baluy ka i nya ba a dalpa sa lilintad endu rizki ka su manga taw nin kanu manga unga nu kayu, su entayn i malityala (mangimbenal) sa Allah endu gay a mawli, ya nin pidtalu (Allah): endu entayn i migkafir na pagkakalilinin sekanin sa paydu, mawli na idasek ku sekanin sa siksa sa apuy, endu ngin den a kawag bagulyan.

Endu kanu kutika a ipebpulu ni Ibrahim su manga tumetegkes (manga tumideng kanu walay nu Allah (Ka'bah) silan kani Ismail, (ya nilan pidtalu): Hay Kadenan nami! Talima ka sa lekami, saben-sabenal na seka i labi a pakakineg endu labi a mataw.

Hay Kadenan nami! Baluy kami duwa a sumangkup sa leka endu su manga mawli a taw sa sumangkup sa leka endu ipailay nengka sa lekami su langun na ukitan nami endu tawbat kami nengka, saben -sabenal na seka i labi a banawbat a labi a malimu.

Hay Kadenan nami! Pambwati ka silan sa sinugu a ebpun sa kanilan sa mabatya nin sa kanilan su manga ayatan nengka, a makapamandu nin sa kanilan su kitab endu su katulangedan endu makasuti sa kanilan, saben-sabenal na seka i labi a mapulu a labi a matulanged.

Endu entayn i kabensyan nin su agama ni Ibrahim na ya tabiya na sinalimbut nin i ginawa nin, endu saben-sabenal na pinamili nami sekanin sya sa dunya, endu saben-sabenal na sekanin sa gay a mawli na dala ka-ebplis nin na maped kanu manga mapya.

Kanu kutika pidtalu sa lekanin nu pedtyakap sa lekanin (Allah) i sangkup ka (Ibrahim), ya nin pidtalu: sinumangkup aku kanu pedtyakap kanu sakalyan alam.

Pinanutuman sa entuba ni lbrahim su manga wata nin endu si Ya'kub: Hay wata ku! Saben-sabenal na su Allahu na pinamili nin sa lekanu su agama (Islam), na di kanu den a benal matay ya tabiya na ula-ula a sekanu na manga Muslim kanu.

Ataw ka ya nu kaaden na natabu kanu (nailay nu) su kinapatay nu Ya'kub, kanu kutika a pidtalu nin kanu manga wata nin: ngin i simban nu kanu ulyan ku? Ya nilan pidtalu: ya nami simban na su Kadenan nengka endu Kadenan nu manga kalukesan nengka Ibrahim endu si lsmail endu si Ishaq a Kadenan a isa nin bu, sa ula-ula a sekami sa lekanin na manga Muslim.

Entuba a manga taw na naypus den sa kanilan su galebek nilan, lekanin su nganin a galebekan nin, endu lekanu su nganin a galebekan nu, endu di kanu kaidsan kanu nganin a kaaden nilan a penggalebeken nilan.

Endu ya nilan pidtalu (Yahudi endu Nasrani): aden nu su manga ginawa nu sa Yahudi ataw ka Nasrani ka matutulu kanu, edtalu ka (Muhammad): Di! Su agama nu Ibrahim na matidtu endu di kena kaped kanu manga balasakutu.

Edtalu nu (manga mu'min) i nalityala (nangimbenal) kami sa Allah endu kanu nganin a initulun sa lekami endu kanu nganin a initulun kanu Ibrahim endu Ismail endu Ishaq endu Ya'kub endu kanu manga katupwan nilan endu kanu nganin a initingguma kanu Musa endu Eisa endu kanu nganin a initingguma kanu manga nabi ebpun kanu pedtyakap (Allah) kanilan, di nami ipembida i isa kanilan, sa ula-ula a sekami sa lekanin na sinumangkup.

Na amayka nalityala (nangimbenal) silan sa mana su pinalityalan (pinangimbenalan) nu na saben-sabenal na natutulu silan, endu amayka tinaligkudan nilan na silan man a nan na umpalak, na di den ebplis na padtamanen sa leka nu Allah (su kabanikut nilan), endu sekanin i labi a pakakineg a labi a mataw.

Su agama nu Allah (Islam) na entayn i labi a mapya kumin kanu Allah i agama, sa ula-ula a sekami sa lekanin na bamedsimba.

Edtalu ka (Muhammad): ngintu ipebpalawa kami nu pan sa Allah sa ula-ula a sekanin i pedtyakap sa lekami (Allah) endu pedtyakap sa lekanu (Allah), lekami su manga galebekan nami na lekanu i manga galebekan nu, sa ula-ula a sekami sa lekanin na bamagikhlas.

Ataw ka ya nu pedtalun na si Ibrahim endu si Ismail endu si Ishaq endu si Ya'kub endu su manga katupwan nilan na ya nin kaaden na Yahudi ataw ka Nasrani, edtalu ka (Muhammad): ngintu silan i labi a mataw ataw ka su Allah!? Endu entayn i labi i salimbuten kanu entayn i ipagena nin su nadsaksyan nin (a natawan nin) a ebpun kanu Allah, endu dala kanu Allah i kapegkalimpang kanu nganin a penggalebeken nu.

Su entuba a maginged (umat) na namedsagad kanu nawna sa lekanu, kanilan su nganin a nanggalebek nilan, endu lekanu su nganin a nanggalebek nu, endu di makaidsa sa lekanu su nganin a kaaden nilan a penggalebeken nilan.

Di ebplis na edtalun nu manga da sabutin ebpun kanu manga taw (Yahudi) u ngin i napadtaligkud sa kanilan sa kanu qiblat nilan (Baytul Maqdis) a ya nilan kaaden na pedsangulan nilan? Edtalu ka (Muhammad): kanu Allah su sebangan endu sedepan, tutulun nin entayn i magkahanda nin sa kanu lalan a matidtu.

Endu metu bun a binaluy nami sekanu a maginged (umat) a labi a mapya ka endu kanu maaden a manga saksi kanu manga taw, endu maaden su sinugu sa lekanu sa saksi, endu da nami baluya su qiblat a pedsangulan nengka ya tabya na endu nami katawan u entayn i bagunut kanu sinugu kanu entayn i semulang sa lekanin endu apya ya nin kaaden (i kapebpalin sa qiblat) na masela ya tabya na su silan a tinutulu nu Allah, endu kena ya kaaden nu Allah i dadagen nin su palityala (kabangimbenal) nu, saben-sabenal na su Allah kanu manga taw na labi a penggagaw a labi a malimu.

Saben-sabenal na gailay nami su kapedtingada nengka (Muhammad) sa langit na di ebplis na pasangulen nami seka sa qiblat a galinyan nengka, na isangul nengka den su beneng nengka sa kanu Masjidil Haram endu apiya endaw kanu maaden na isangul nu su manga beneng nu kanu qiblat endu saben-sabenal na su silan a naenggan sa kitab, na di ebplis na katawan nilan i saben-sabenal na sekanin i benal a nakebpun kanu pedtyakap kanilan (Allah) endu dala sa Allah i limpangan nin i penggalebeken nilan.

Endu apiya inenggay nengka kanu silan a natingguma na kitab (Yahudi endu Nasrani) i langun na tanda na di nilan unutan i qiblat nengka endu kena nengka bagunutan su qiblat nilan endu dala kanu sabad sa kanilan i kaunut kanu qiblat nu sabad, endu amayka unutan nengka i kyug nu manga ginawa nilan sa ulyan na kinauma sa leka na kataw, saben-sabenal na seka metun na nakuyug kanu manga taw a manga salimbuten.

Su silan a inenggay nami sa kanilan su kitab (Yahudi endu Nasrani), na katawan nilan su entuba sa mana kataw nilan kanu manga wata nilan, endu saben-sabenal na su lumpukan sa kanilan na ibagena nilan su bantang sa ula-ula a katawan nilan.

Su bantang na ebpun kanu pedtyakap sa leka (Allah), na di ka den a benal bagadena su ginawa nengka sa makuyug kanu manga taw a penduwa-duwa.

Endu uman i maginged (umat) na aden sa kanılan i pedsangulan, na egkuya-kuya kanu sa manga mapya, apiya endaw kanu maaden na limuden kanu nu Allah langun, saben-sabenal na su Allah kanu langun na enggaga-isa na labi a pakagaga.

Endu apiya endaw ka nakalyu na isangul nengka i beneng nengka sa Masjidil Haram (sa kadsambayang), endu saben-sabenal na su entuba na di ebplis na bantang a ebpun kanu pedtyakap sa leka (Allah) endu dala sa Allah i kapegkalimpang kanu nganin a penggalebeken nu.

Endu apiya endaw ka nakalyu na isangul nengka i beneng nengka sa Masjidil Haram (sa kadsambayang) endu apiya endaw kanu na isangul nu i manga beneng nu sa Masjidil Haram, ka endu di maaden sa lekanu kanu manga taw i tindeg ya tabiya na su manga namedsalimbut ebpun sa kanilan, na di nu ipegkagilek silan endu saki nu i ikagilek, ka endu masampulna ku i limu ku sa lekanu endu malemu-lemu i katutulu nu.

Sa mana kinapapayt nami sa lekanu sa sugu a ebpun sa lekanu a pembatya sa lekanu sa kanu manga tanda (ayatan) nami, endu pedsuti sa lekanu endu bamandu sa lekanu sa kitab endu ungangen, endu ibamandu nin sa lekanu su nganin a kaaden nu a di nu katawan.

Na tademi aku nu ka tademan ku sekanu, endu edsukuri aku nu endu da kanu pegkafir.

Hay sekanu a manga bamalityala (bamangimbenal)! Patabang kanu (sa Allah) sa ukit na katigkel endu kadsambayang, saben-sabenal na su Allah na salta kanu manga matigkel.

Endu di nu pedtalu kanu entayn i nabunu sa lalan sa Allah i manga minatay ka manga bibyag, ugayd na di nu egkagedam.

Endu di ebplis na batalun nami sekanu sa enggaga-isa a kanggilek endu kanggutem endu kagkulang nu manga tamuk endu kapatay endu kagkulang nu manga unga (nu manga pamulan), endu pakalilini ka (Muhammad) su manga matigkel.

Su silan (matigkel) a amayka masugat silan na bataluan, ya nilan kadtalu: saben-sabenal na sekami na kanu Allah, endu saben-sabenal na sekami na lu sa lekanin (Allah) pembalingan.

Entuba silan na salta sa kanilan i manga sagyahatra (salawat) a ebpun kanu pedtyakap sa kanilan (Allah) endu limu, endu entuba silan i manga natutulu.

Saben-sabenal na su Safa' endu su Marwah (dua a palaw masiken sa Ka'bah) na kaped kanu manga tanda nu Allah, na entayn migkagi sa baytallah ataw ka nag-umrah na dala dusa nin i kalakaw (kad-say) nin sa pageletan nilan duwa (palaw) endu entayn i edtetebu sa mapya, na saben-sabenal na su Allah na masukur endu labi a mataw.

Saben-sabenal na su silan a ibagena nilan su nganin a initulun nami a manga mapayag, endu tutulu sa ulyan na kinapayag nami lun kanu manga taw sya sa kitab, entuba silan i gamulkan nu Allah endu gamulkan silan nu manga pakamulka (malaikat, nabi, endu manga taw).

Ya tabiya na su silan a manga namedtawbat endu nagumbaya endu inipayag nilan (su nganin a inepagena nilan), na entuba silan i tawbaten ku endu saki (Allah) i labi a banawbat a labi a malimu.

Saben-sabenal na su silan a migkafir endu minatay silan a manga kafir na salta kanilan su mulka nu Allah endu su manga malaikat endu su langun nu manga taw.

Dayun sa dayun silan kanu entuba sa di pakapegkagen sa kanilan su siksa endu di silan papendayan (sa gay a mawli).

Endu su Kadenan nu na Kadenan a isa bu (Allah) da kadenan ya tabiya sekanin a malimu (kanu langun nu kaaden nin) a labi a malimu (kanu manga naginugut sa lekanin sa gay a mawli).

Saben-sabenal sya kanu kinapamaluy kanu manga langit endu lupa, endu su kambida nu magabi endu malamag endu su bagedan a balalaguy sa lagat kanu nganin a pakangguna kanu manga taw endu su nganin a pinatuga nu Allah a ebpun sa langit a ig, na inuyag nin sabap lun su lupa kanu ulyan nu kinapatay nin, endu pinambuwad nin kanu lupa i uman i melanap- lanap endu su kapebpalin-palin nu sambel endu su gabun a inipapayt kanu pageltan nu langit endu lupa, na manga tanda intu kanu maginged (umat) a pakapamikil.

Endu kaped kanu manga taw na bangaden silan sa salakaw kanu Allah a manga pagidsan nin, galilinyan nilan su entuba sa mana lilini nilan kanu Allah, endu su silan a namalityala (namangimbenal) na labi i lilini nilan kanu Allah, umana bu ka mailay nu manga salimbuten su gay a kailay nilan kanu siksa sa saben-sabenal na su bagel na kanu Allah langun, endu saben-sabenal na su Allah na mapedes i kasiksa.

Kanu kutika (lu sa gay a mawli) a kabpukas nu silan a inunutan kanu silan a minunut, na mailay nilan su siksa, endu natebped sa kanilan i manga sabapan (na kalipwas nilan).

Endu ya pidtalu nu manga namangunut: umana bu ka saben-sabenal na aden sa lekitanu i kambalingan na lemipwas tanu sa kanilan, sa mana kinalipwas nilan sa lekitanu, manan ba i kapailay nu Allah kanu manga galebekan nilan, sa sendit nilan den, endu da sa kanilan i kalyu sa naraka.

Hay sekanu a manga taw! Kan kanu kanu nganin sya kanu lupa sa halal a mapya, endu di nu bagunuti i manga sangkad nu manga shaytan, saben-sabenal na su shaytan na satru nu a mapayag.

Ya nin bu ipdsugu sa lekanu na mawag endu maledsik endu nu kapanebu-tebuwan su Allah sa di nu katawan.

Endu amayka edtalun sa kanilan i unuti nu su nganin a initulun nu Allah, ya nilan pidtalu: ugayd na ya nami bu unutan na su nganin a nalayaman nami kanu manga kalukesan nami, kena ba ya kaaden nu manga kalukesan nilan a dala gapamikil nilan a enggaga-isa endu di pamakatuntul.

Endu ya upaman nu silan a manga kafir na mana su bananawag sa kanu nganin a di pakakineg ya tabya na su kabangenggat endu kabanawag, bisu a maw a pisek, na silan na di pamakapamikil.

Hay sekanu a manga namalityala (namangimbenal): kan kanu ebpun kanu manga mapya a nganin a inirizki nami sa lekanu endu edsukur kanu sa kanu Allah amayka ya nu kaaden i sekanin i padsimban nu.

Ya nin bu iniharam sa lekanu na su minatay (ayam a da masumbali) endu lugu endu sapu na kembut endu su nganin a sinumbali sa salakaw sa Allah, endu entayn i nakasendud a di kena pedsalimbut endu di kena bagukag na dala dusa nin (amayka kuman), saben-sabenal na su Allah na bangampun a malimu.

Saben-sabenal na su silan a ibagena nilan su nganin a initulun nu Allah a ebpun kanu kitab endu bamasan nilan (su ayatan) sabap lun sa alaga a paydu, entuba silan na dala gakan nilan sya kanu manga tiyan nilan ya tabiya na apuy endu di imbityala silan nu Allah sa gay a mawli endu di nin silan sutin, endu kanilan i siksa a malipedes.

Entuba silan na inilabi nilan i katadingan sa tutulu, endu siksa sa ampun, na ngin den a katigkel i kanilan sa apuy.

Su namba (balas nu kinapagena sa ilmu) na sabap sa saben-sabenal na su Allah na initulun nin su kitab sa bantang, endu saben-sabenal na su silan a mimbida-bida kanu kitab, na di ebplis na sya sa kanu kaumpalak a mawatan (sa bantang).

Di kena mapya i kasangul nu kanu manga beneng nu tampal sa sebangan endu sedepan, ugayd na ya mapya na su entayn i nalityala (nangimbenal) sa Allah endu gay a mawli endu malaikat endu kitab endu su manga nabi, endu su inenggay nin i tamuk nin sa kyug nin sa kanu manga pagali nin endu su manga ilu endu su manga miskinan endu su wata na lalan (su natangen sa lalan sabap sa kadadalay) endu su manga bamangeni endu su manga ganga-aun, endu midsambayang endu minenggay sa zakat endu tinumuman sa pasad nilan amayka mibpasad silan endu su manga matigkel kanu kadadalay nilan endu kanu kutika nu kadalu, entuba silan i namembantangan, endu entuba silan a manga magilek sa Allah.

Sekanu a manga bamaginugut inibpalyugat sa lekanu i qisaas (kapakayd kanu minunu sa pinakaydan nin kanu binunu nin) sya kanu manga pinamunu, su daludaya na daludaya, endu su ulipen sa ulipen, su babay sa babay, na entayn i inampun sa lekanin nu suled nin na unutan i makagkapya (di mabunu) endu itapenay sa lekanin sa mapya (kasalan), entuba na kinapagkapegkag a ganat kanu pedtyakap sa lekanu (Allah) endu limu, na entayn i temalasak (edtibaba) kanu ulyan nu entuba na lekanin su siksa a masakit.

Endu lekanu sya kanu qisaas i uyag-uyag, hay sekanu a aden manga akal nin, ka malemu-lemu sa lekanu i kagilek nu (sa Allah).

Iniwagib sa lekanu i amayka nakawma kanu isa sa lekanu su kapatay, i amayka aden natagak nin a mapya (tamuk) i kapanutuma sa duwa a mimbata endu su manga pagali sa mapya, bantang kanu manga magilek (sa Allah).

Na entayn i sumambi sa lekanin (su tutuma) sa ulyan nu nganin a nakineg nin, na su dusa nin na kanu manga nanambi bu sa lekanin (kanu tutuma), saben-sabenal na su Allah i labi a pakakineg a mataw.

Na entayn i nagilekan sa kanu nanutuma sa makadsulamig ataw ka makandusa, na inumbayan nin sa pageletan nilan na dala dusa nin, saben-sabenal na su Allah na labi a mangampun a malimu.

Hay sekanu a manga namalityala (namangimbenal)! Iniwagib sa lekanu su kabpuwasa (Ramadhan), sa mana kinawagib kanu silan a nawna sa lekanu, ka endu malemu-lemu sa lekanu i kagilek nu (sa Allah).

Manga gay a gambilang-bilang, na entayn i ya nin kaaden sa lekanu i pendalu, ataw ka sa lakawan, bilangenin i da nin kabpuwasay, ka ebpuwasan nin sa manga gay a kaped endu nya kanu manga pakagaga sa lekanin (kabpuwasa) na kasalan a kapakan sa manga miskinan, na entayn i edtebu sa mapya na entuba i labi a mapya sa lekanin, endu su kabpuwasa nu na labi a mapya sa lekanu, amayka ya nu kaaden i katawan nu.

Ulan-ulan nu Ramadhan i initulun lu ba su Qur’an a tutulu sa kanu manga taw endu manga mapayag (a manga tanda) kanu tutulu, endu papedsenggaya (sa bantang endu sulak), na entayn i makadsaksi sa lekanu kanu ulan-ulan (a kinaludep nu Ramadhan) na ebpuwasan nin su entuba, endu entayn i pendalu ataw ka sa lakawan na ebpuwasan nin sa manga gay a kaped, ya kalinyan nu Allah sa lekanu na malemu, endu di nin kalinyan sa lekanu i malegen, ka endu nu matalutup su bilangan nu kapebpuwasa kanu ulan-ulan (Ramadhan) endu madsela-sela nu su Allah kanu nganin a initulu nin sa lekanu, endu malemu-malemu sa lekanu i kadsukur nu.

Endu amayka idsan ka (Muhammad) nu manga ulipen ku makapantag sa laki, na saben-sabenal na saki na masiken, pedsawalen ku su pangeni nu bangeni amayka nangeni sa laki, na taliman nilan i manga kasuguwan ku endu malityala (mangimbenal) silan sa laki ka malemu-lemu sa kanilan i katidtu nilan.

Pinamakay sa lekanu sa magabi (nu Ramadhan) i kambalagyuma sa kanu manga kaluma nu, silan i manga balegkas nu endu sekanu i balegkas nilan, natawan nu Allah i saben-sabenal na sekanu na ya nu kaaden na bagakalan nu i manga ginawa nu na tinawbat endu inampun kanu nin (Allah), na saguna na imbalagyuma nu silan endu pangeni nu su nganin a inipambagi nin sa lekanu (mawli a taw), endu kan kanu endu inum kanu taman sa di egkapayag sa lekanu su kintel a maputi ebpun kanu kintel a maytem pagyal (a tidtu), mawli na sampulna nu su puwasa nu taman sa magabi (kasedep nu senang) endu di nu ipembalagyuma silan sa sekanu na pedtangen sya sa masgit, entuba i manga dulunan nu Allah, na di nu semikeni, manan ba ikapayag nu Allah sa kanu manga tanda nin kanu manga taw, ka malemu-lemu sa sa kanilan i kagilek.

Endu di nu keman su manga tamuk nu sa pamageletan nu sa mawag endu di nu ipedsisimenga entuba lu sa kukuman, endu makan nu kaped sa lekanu su tamuk nu manga taw sa kabaldusan endu sekanu na katawan nu.

Ibagidsa nilan sa leka (Muhammad) su ulan-ulan, edtalu ka i manga waktu nu manga taw endu kagkagi endu di kena ya mapya i katingguma nu kanu manga walay sa semungu sa taligkudan ugayd na ya mapya na su magilek (sa kanu Allah) endu ludep kanu sa manga walay lu kanu manga bengawan nin endu ikagilek nu su Allah, ka malemu-lemu sa lekanu i kauntung.

Endu embunuwa kanu sa lalan sa Allah kanu silan a pembunuwa sa lekanu endu da kanu banibaba, saben-sabenal na su Allah na di nin kalinyan i manga matibaba.

Endu bunu nu silan sa apya endaw nu kasampenan silan, endu palyu nu silan kanu pinalyuan nilan sa lekanu (Makkah), endu kabanangkada na labi a mapasang kumin sa kapamunu, na di nu silan ipembunuwa lu sa Masjidil Haram taman sa di kanu nilan ipembunuwa lu ba, na amayka imbunuwa kanu nilan na bunu nu silan ka manan ba i balas nu manga kafir.

Na amayka minenda silan na saben-sabenal na su Allah i labi a bangampun a malimu.

Endu imbunuwa nu silan taman sa dala den maaden a sakutu endu maaden su agama (Islam) a kanu Allah amayka minenda silan na dala ukag ya tabiya na kanu manga salimbuten.

Su ulan-ulan a inipagaga sa lekanu nu Allah i kaludep sa haram (Makkah) na sambi nu ulan-ulan a pinelen kanu lu ba nu manga pasasakutu, endu su manga iniharam lu ba i kambunuwa na aden lun i qisaas (kapaked kanu namungked sa nganin a pinaked nin kanu nagkedan), na anteyn i edtibaba sa lekanu na edtibabay nu sa mana kinadtibaba nilan sa lekanu endu ikagilek nu su Allah endu tuntayi nu i saben-sabenal na su Allah na salta kanu manga magilek (sa Allah).

Endu embaranggya kanu sa lalan sa Allah, endu di nu ipedtagu kanu manga lima nu i makabinasa, na ebpya-pya kanu, ka saben-sabenal na su Allah na galinyan nin i manga bamangapyanan.

Endu sampulna nu su kapegkagi endu kabag-umrah sa kanu Allah, na amayka napelen kanu (kanu kapedsampulna lun), na su nganin a malemu (sa lekanu) kanu panunumbalin, endu di nu temabungawi su manga ulu nu taman sa di mawma su ukul nin (kapedsumbali), na entayn i yanin kaaden sa lekanu i pendalu ataw ka aden sa lekanin i simuket kanu ulu nin, na ebpyansa sekanin sa kabpwasa ataw ka kapanadeqah ataw ka kapanumbali, na amayka nakadtakena kanu na entayn i mag-umrah sa ulan-ulan na kapegkagi na su nganin a malemu a panunumbalin, na entayn i di makatun (sa panunumbalin) na kabpuwasa sa telu gay sya kanu kapegkagi, na pitu timan amayka makauli kanu, na su entuba na sapulu gay a sampulna, su entuba na kanu entayn i da maaden su pamilya nin sa Haram, endu ikagilek nu su Allah endu tuntayi nu i su Allah na mapedes i kasiksa.

Su kapegkagi na manga ulan-ulan a talanged, na entayn i pibpalyugatan nin (su ginawa nin) sya sa lekanin (manga ulan-ulan) su kapegkagi na da kapembalagyuma endu da kapedsupak endu da kapendalampawya sa kanu kapegkagi endu su nganin a penggalebeken nu na katawan nu Allah endu embalutu kanu, na ya mapya a lutu na gilek (sa Allah) endu ikagilek aku (Allah) nu sekanu a aden manga akal nin.

Dala sa lekanu i dusa sa kabanganganay sa kanu kalbihan ebpun kanu pedtyakap sa lekanu (Allah), na amayka midsalingganat kanu ebpun sa Arafah na tademi nu su Allah lu sa tanda nu Haram (Muzdalifah), endu tademi nu sekanin sa mana su initutulu nin sa lekanu endu amayka ya nu kaaden kanu nawna na di ebplis na kaped kanu kanu manga tading.

Mawli na edsalingganati nu su pidsalingganatan nu manga taw, endu pangeni kanu sa ampun kanu Allah, ka saben-sabenal na su Allah na labi a mangampun a malimu.

Na amayka napasad nu su manga galebek nu na tademi nu su Allah sa mana su katadem nu sa manga lukes nu, ataw ka minuna pan a tadem, na ped kanu manga taw i pedtalu: Hay pedtyakap sa lekami (Allah)! inggay nengka sa lekami sya sa dunya, na dala sa lekanin lu sa gay a mawli i umun.

Endu kaped sa kanilan i ya nin pedtalu: Hay pedtyakap sa lekami (Allah)! Enggay kami sya sa dunya sa mapya endu sa gay a mawli sa mapya endu lepas kami nengka kanu siksa nu apuy.

Entuba na kanilan i umun ebpun kanu nganin a napantyali nilan endu su Allah na labi a mangagan i kagkwinta.

Endu tademi nu su Allah kanu gay a gambilang-bilang (lu sa Mina), na entayn i bamagayas sa duwa gay na dala dusa nin endu entayn i enggagawli (sa telu gay) na dala dusa nin kanu entayn i nagilekan, endu ikagilek nu su Allah endu tuntayi nu i saben-sabenal na lu kanu sa lekanin mabulig.

Endu kaped sa kanu manga taw (munafiq) i kalinyan nengka i kadtalu nin sa uyag-uyag sa dunya, endu pedsaksyan nin kanu Allah su nganin a dalem na pamusungan nin, na silan na labi a malat i kapagukag.

Endu amayka makataligkud (sa leka Muhammad) na lumakaw sya kanu kalupan sa endu makapaminasakan lun endu mabinasa nin i pinamumula endu manga pipis (binatang), na su Allah na di nin kalinyan i kabinasan.

Endu amayka edtalun sa lekanin i ikagilek nengka su Allah na makwa sekanin nu kamamasela sa makandusa, na nasasangan sa lekanin i pegkalaw-kalaw (a apuy), endu di ebplis na mawag a kadtakenan.

Endu kaped kanu manga taw i ebpasan nin su ginawa nin sa kabanganganay kanu lilini nu Allah endu su Allah na malimu kanu manga ulipen.

Hay sekanu a manga bamalityala (bamangimbenal)! Ludep kanu sa Islam sa langun, endu di nu munuti su manga sangkad nu Shaytan, saben-sabenal na sekanin sa lekanu na satru a mapayag.

Na amayka makiding (matading) kanu sa ulyan nu kinawma nu manga tanda (Qur’an) sa lekanu na tuntayi nu ka saben-sabenal na su Allah na mapulu a mawngangen.

Ngintu bangangapa silan? Ya tabya na itingguma nu Allah sa kanilan i masilung a ebpun sa dadtem endu su malaikat, endu naukul su ganggula, endu lu bun sa Allah pakambalingan su manga enggaga-isa.

Idsa nengka (Muhammad) kanu tupu nu Israel u pila i naka-enggay nami kanilan a tanda a mapayag? Endu entayn i sambyan nin su limu nu Allah kanu ulyan nu nganin a kinawma nin sa lekanin, na saben-sabenal na su Allah na mapasang i kasiksa.

Pinagkapya kanu silan a namegkafir su uyag-uyag sa dunya endu pedsudyan nilan su manga namalityala (namangimbenal), endu su silan a manga inikagilek nilan (su Allah), kanu pulu nilan su gay a mawli endu su Allah i berizki kanu entayn i magkahanda nin sa dala lun i kapegkwinta.

Ya kaaden nu manga taw na lumpukan a isa na inipapayt nu Allah su manga nabi sa mapakalilini (mamanudtul) endu mapakagilek, endu inipadtapik nin (Allah) sa kanilan i kitab a bantang ka endu silan makakukum sya kanu nganin a naumpalakan nilan, endu dala mimbida-bida sa kanu kitab ya tabya na su silan a inenggan sa entuba sa kanu ulyan nu kinawma nu manga tanda sa kanilan, sa dengki i kanu pamageletan nilan, na tinitulu nu Allah su silan a namalityala (namangimbenal) kanu nganin a pimbida-bidan nilan ebpun kanu bantang sa kahanda nin, endu su Allah i pedtutulu sa entayn i magkahanda nin sa lalan a matidtu.

Ataw ka na-antap nu i makaludep kanu sa surga sa di makatingguma sa lekanu i mana su kanilan antu a nawna sa lekanu, a nadakenan silan na mapasang endu dalu endu lininug silan taman sa madtalu nu sinugu (rasul) endu su silan a manga bamalityala (bamangimbenal) a ped in: kanu i tabang nu Allah? Saben-sabenal na su tabang nu Allah na masupeg.

Ibagidsa nilan sa leka (Muhammad) u ngin i embaranggyan nilan? Edtalu ka: su nganin a embaranggyan nu ebpun sa mapya na kanu duwa a mimbata (lukes nu), endu manga pagali nu endu manga ilu, endu manga miskinan, endu su natalay (wata sa lalan), endu nganin a penggalebeken nu a mapya na saben-sabenal su Allah i labi a mataw lun.

Inibpalyugat sa lekanu i kambunuwa (jihad) sa apya pn gabensyan nu, endu aden antu na su gabensyan nu a enggaga-isa na entu bun ba i mapya sa lekanu, endu aden antu na su galinyan nu a enggagai-sa na entuba i mawag sa lekanu, endu su Allah i mataw na sekanu na di nu katawan.

Ibagidsa nilan sa leka (Muhammad) su manga ulan-ulan a haram i kambunuwa lun, edtalu ka (Muhammad) i kambunuwa kanu entuba (Muharram- Rajab- Zul-Qa'dah- Zul-Hijjah) na masla (kabaladusan), endu su kasangkada sa kanu lalan nu Allah endu su kagkafir lun, endu su kapalyu kanu manga taw sa Masjidil Haram na muna i kasla nin (a kabaladusan) sa Allah, endu su kasakutu na ya masla sa kabunu, endu di nilan pindan i kabunu nilan sa lekanu taman sa di kanu nilan makapalyu kanu agama nu amayka magaga nilan, endu entayn i lumyu kanu agama nin sa lekanu na matay sa kafir sekanin, na entuba silan i nabinasa i manga galebek nilan sya sa dunya endu sa gay a mawli, endu entuba silan i kigkuwan kanu apuy sa silan kanu entuba na dayun sa dayun.

Saben-sabenal na su silan a manga bamalityala (bamangimbenal), endu su silan a namembakwit endu nameng-jihad sa lalan sa Allah, na silan i pakapanganganay kanu limu nu Allah endu su Allah i labi a bangampun a malimu.

Ibagidsa nilan sa leka (Muhammad) su makalangut endu kandalemet, edtalu ka i nadalem lun i dusa a masla endu manga pakangguna kanu manga taw, endu su kadusan nin na ya masla kumin kanu kapantag nin, endu ibagidsa nilan sa leka u ngin i ipambaranggya nilan, edtalu ka i kapamelasam, manan ba i kapebpayag nu Allah sa lekanu kanu manga ayatan nin ka endu malemu-lemu sa lekanu i kapamikir nu-

Sya kanu dunya endu gay a mawli, endu ibagidsa nilan sa leka i makapantag sa kanu manga ilu, edtalu ka i kapagungaya sa kanilan i mapya, endu amayka edsimbula nu silan na pagali nu bun silan, endu su Allah i mataw kanu pembinasa kanu bagumabaya, endu umana ka pigkahanda bu nu Allah na makambuku sa lekanu, saben-sabenal na su Allah na labi a mapulu a mataw.

Endu di nu bangaluma su manga babay a bamedsakutu taman sa di silan malityala (mangimbenal), endu di ebplis na su ulipen a babay a balityala (bangimbenal) na labi a mapya sa babay a banakutu apiya kalini-lini sa lekanu, endu di nu mapagkaluma i manga mama banakutu, taman sa di malityala (mangimbenal), endu su ulipen a mama a balityala na labi a mapya sa mama a banakutu, apiya kalini-lini sa lekanu, entuba silan na bangenggat sa kanarakan, endu su Allah na bangenggat sa kasurgan endu ampun sa sugut nin, endu ipebpayag nin su manga tanda nin kanu manga taw ka endu malemu-lemu sa kanilan i kagkalendem nilan (sa Allah).

Endu ibagidsa nilan sa leka (Muhammad) su babay a hayd (lugu na babay a belyu uman sawlan), edtalu ka i entuba na simuket, tangkay nu su manga babay kanu timpu na kabelyu na lugu nin sa uman sawlan, endu di nu pedsikeni silan taman sa di silan masuti, amayka masuti silan na tingguma nu silan sa kanu suguwan nu Allah sa lekanu, saben-sabenal na su Allah na kalilinyan nin su taw a balatawbat endu balasuti.

Su manga kaluma nu na pamamulanan nu na tingguma nu su pamamulanan nu sa endaw i kyug nu, endu iuna nu kanu manga ginawa nu (su mapya), endu ikagilek nu su Allah, endu tuntayi nu i sekanu na mabalatemu nu sekanin, endu pakalilini ka su manga bamalityala (bamangimbenal).

Endu di nu mamaluya su kadsapa (sa Allah) sa makasapal sa lekanu sa kapamyapya nu, endu kagilek nu (sa Allah), endu kapagkapya nu sa pageletan nu manga taw, endu su Allah i labi a pakakineg a mataw.

Di kanu kwintan nu Allah kanu kinadsapa nu (a kena tangga), ugayd na kwintan kanu nin kanu nganin a nakaganat kanu pamusungan nu, endu su Allah i labi a bangampun a malimu.

Kanu silan (a manga mama) a pedsapa sa di kambalagyuma kanu manga kaluma nilan, i kapangangapa sa pat ulan, na amayka edsunud silan, na saben-sabenal na su Allah na labi a bangampun a malimu.

Endu amayka midtakena sa kanilan i kambelag, na saben-sabenal na su Allah i labi a pakakineg a mataw.

Endu su manga babay a nabelag, na ibagangapa nilan su manga ginawa nilan sa makatelu mahayd (makalyu sa kanilan su lugu a galayaman a belyu uman sawlan), endu di kapakayan sa kanilan i kapagena nilan sa kanu nganin a binaluy nu Allah kanu dalem na manga wawatan nilan amayka ya nilan kaaden i balityala (bangimbenal) silan sa Allah endu gay a mawli, endu su manga kaluma nilan bun i labi a egkawagib a makasuli sa kanilan amayka pegkyug silan sa kapagumbaya, endu kanilan (nga babay) i kawagib, sa mana su kinawagib kanilan sa mapya, endu aden kanilan (manga mama) i ebpangkatan (a mapulu) kanu manga babay, endu su Allah i labi a mapulu a mawngangen.

Su kambelag na makaduwa, katinggamu sa mapya ataw ka kambelag sa mapya, endu di mapakay sa lekanu (a mama) i kumwa kanu sa kanu nganin a nakasunggud nu a enggaga-isa, ya tabya na kagilekan silan duwa (edtiwalay) sa di nilan makapatindeg su atulan nu Allah, na amayka inikagilek nu i di nilan makapatindeg su atulan nu Allah na dala dusa nilan duwa sya kanu nganin a katendan kanu sunggudan nin (imbalingan nin su sunggudan nin) entuba i dulunan nu Allah na di nu temalasaka, endu entayn i temalasak sa dulunan nu Allah na entuba silan i manga salimbuten.

Na amayka binelag nin sekanin (sa ikatelu) na di mapakay sa lekanin sa kanu ulyan taman sa di makagkaluma (su babay) sa kaluma a salakaw sa lekanin (su nawna a kaluma), na amayka binelag sekanin (nu nawli a mama a nakapangaluma sa lekanin) na dala dusa nilan duwa sa edsulya (embalingana) silan (kanu nawna a kaluma nin), amayka naantap nilan duwa i makatindeg nilan duwa su dulunan nu Allah endu entuba su dulunan nu Allah a ipebpayag nin kanu lumpukan a pamakataw (pamakatuntay).

Endu amayka belagen nu su manga kaluma nu sa nasampay nilan su tedtab (iddah), na (pamili kanu) suli nu silan sa mapya ataw ka pa belagen nu silan sa mapya, endu di nu sumuli silan sa kabinasan a ipamungkayd nu, endu entayn i enggalebek sa entuba na saben-sabenal na sinalimbut nin i ginawa nin, endu di nu bagadena su tanda nu Allah sa damangyas, endu tademi nu su limu nu Allah sa lekanu, endu su nganin a initulun nin sa lekanu a kitab endu ungangen a ibangindaw nin sa lekanu, endu ikagilek nu su Allah, endu tuntayi nu ka saben-sabenal na su Allah kanu langun nu enggaga-isa na mataw.

Endu amayka nabelag nu su manga babay (sa mababa sa telu ka belagan) sa nasampay nilan su tedtab (iddah) nilan, na di nu mungena silan sa kagkaluma nilan kanu manga kaluma nilan, amayka namagayun silan kanu pageletan nilan sa mapya, entuba na indawan sa kanu entayn i ya nin kaaden sa lekanu i balityala (bangimbenal) sa Allah endu gay a mawli, na entuba i labi a malimpyu sa lekanu endu labi a suti sa lekanu, endu su Allah i pakataw na sekanu na di nu katawan.

Endu su manga ina a papedsusu kanu manga wata nilan sa duwa lagun a sampulna, kanu entayn i nakagkahanda sa masampulna nin i kapapedsusu, endu (wagib kanu lukes a mama) i kambaranggyan nin silan (su manga ina a nabelag a papedsusu sa wata), endu kapambalegkas sa kanilan sa mapya, da ebpalyugati i ginawa ya tabya na su magaga nin, di egkaydan su ina sabap kanu wata nin, endu di egkaydan su ama sabap kanu wata nin, endu palyugat kanu bangiwalis i upama nu entuba, amayka nakagkahanda silan duwa sa kapa-enda (kanu wata sumusu) sa pinagayunan nilan duwa, endu pinagumpungan na dala dusa nilan duwa, endu amayka ya nu nagkahanda i kapasusu nu kanu manga wata nu (sa kaped) na dala bun dusa nu amayka inenggay nu su nganin a inenggay (inibayad) nu sa mapya, endu ikagilek nu su Allah, endu tuntayi nu i saben-sabenal na su Allah kanu nganin a penggalebeken nu na pakailay.

Endu su silan a pebpatay ebpun sa lekanu (a manga mama) endu natagak nilan i manga kaluma, na ipangangapa nilan i manga ginawa nilan sa pat ulan endu sapulu gay, na amayka masampay nilan su timpu nilan na dala dusa nu (manga ina ama ataw ka pedtyakap kanilan) sya kanu nganin a pinggalebek nilan sa kanu manga ginawa nilan a mapya (kapapangaluma), endu su Allah kanu nganin a penggalebeken nu na mataw.

Endu dala dusa nu sya kanu nganin a kapanindil nu sa kapanganakan kanu manga babay (dalem na iddah ataw ka timpu a di mapakay pangaluman) ataw ka inipagena nu kanu manga ginawa nu, natawan nu Allah i saben-sabenal na sekanu na katademan nu su silan (a manga babay), ugayd na di nu silan ipebpasada sa masulen ya tabiya na kadtalu a mapya, endu di nu pedtinggapasi i kapalut kanu kawing taman a di mawma nu kitab su timpu nin (iddah ataw ka lumpakan), endu tuntayi nu i saben-sabenal na su Allah na katawan nin i sya kanu manga ginawa nu, na abungi nu i entuba endu tuntayi nu i saben-sabenal na su Allah na labi a bangampun a matigkel.

Dala dusa nu amayka binelag nu su manga babay sa dala nu pan makambalagyuma silan, ataw ka dala nu pan makanggay sa kanilan su sunggudan, endu pagkakalini nu silan (manga tamuken) sa kanu tamuk a kasasangan lun endu gasimpitan sa kasasangan lun, sa kalilini a mapya, bantang sa kanu manga bangapyanan

Endu amayka binelag nu silan kanu unan nu kambalagyuma nu sa kanilan sa saben-sabenal na naka-enggay nu sa kanilan su sunggudan, na sabad kanu nganin a nakaenggay nu, ya tabya na lemasam silan ataw ka lemasam su sya sa lima nin su kinapalut sa kawing (babay), endu su kalasam nu i labi a masiken sa gilek (sa Allah), endu di nu lumipatani i kadsakaw-sakaw kanu pageletan nu, endu saben-sabenal na su Allah kanu nganin a penggalebeken nu na pakailay.

Palihala nu su manga sambayang, endu su sambayang a Asr, endu tindeg kanu sanget kanu Allah sa balityala/gagilekan.

Na amayka gagilekan kanu na lakaw kanu ataw ka egkuda kanu, amayka nakatana kanu den na tademi nu su Allah sa mana inipamandu nin sa lekanu su nganin a kaaden nu a di nu katawan.

Endu su silan a bamebpatay ebpun sa lekanu sa egkatagak nilan i manga kaluma na pangalintabun kanu manga kaluma nilan sa makagkakalini sa salagun salakaw sa kababelyu, na amayka linumyu silan na dala dusa nu sya kanu nganin a pinggula nilan kanu manga ginawa nilan a mapya, endu su Allah i labi a mapulu a mataw (nyaba a ayatan napasad na ayat antu a ayatul Meeraath, endu su pat ulan endu sapulu gay).

Endu kanu manga binelag i kapegkakalini a mapya, bantang kanu manga magilek (sa Allah).

Manan ba i kapebpayag nu Allah sa lekanu sa kanu manga tanda nin, malemu-lemu sa lekanu i kapagitung nu.

Ngintu di nengka katawan (Muhammad) su silan a linemyu kanu manga walay nilan a ngibwan, sa abung kanu kapatay, na pidtalu sa kanilan nu Allah i ebpatay kanu mawli na uyagen nin silan, saben-sabenal na su Allah i kigkwan sa kalbihan/kapyanan kanu manga taw, ugayd na kadakelan sa kanu manga taw na di silan pedsukur.

Endu embunuwa kanu sa lalan sa Allah endu tuntayi nu i saben-sabenal na su Allah na labi a pakakineg a mataw.

Entayn i pautangen nin su Allah sa utang a mapya na takepen nin i entuba sa lekanin sa madakel a katakep endu su Allah i pegkegkem endu pebpalad, endu lu sa lekanin kanu pembalingan.

Ngintu di nengka katawan (Muhammad) su manga egkangaunutan ebpun kanu tupu nu Israel sa ulyan nu Musa, kanu timpu a pidtalu nilan kanu nabi nilan i pambuwati kami sa egkaunutan sa kambunuwa nami sa lalan sa Allah, ya nin pidtalu: ngintu inipangalu-kalu nu i amayka ibpalyugat sa lekanu i kambunuwa na di kanu embunuwa!? Ya nilan pidtalu: dala sa lekami i di kami embunuwa sa lalan sa Allah, sa saben-sabenal na pinalyu kami sa manga walay nami endu manga wata nami, na engguna ibpalyugat sa kanilan su kambunuwa na tinaligkudanan nilan ya tabya na paydu sa kanilan, endu su Allah i labi a mataw kanu manga salimbuten.

Endu ya pidtalu sa kanilan nu nabi nilan: saben-sabenal na su Allah na pinambuwat nin sa lekanu si Talut a gaunutan, ya nilan pidtalu: panun i kaaden sa lekanin nu kadatu sa ula-ula a sekami i labi a dayt a endatu kumin sa lekanin, endu dala enggi sa malwag a tamuk (madakel)? Ya nin pidtalu: saben-sabenal na su Allah i namili sa lekanin sa lekanu endu inumanan nin sekanin sa madakel a ilmu endu lawas (a mabagel), endu su Allah i minenggay sa kadatu kanu entayn i magkahanda nin, endu su Allah i labi a mawlad (i limu nin) a mataw.

Endu pidtalu sa kanilan nu nabi nilan: saben-sabenal na ya tanda na kadatu nin na katingguma sa lekanu nu Tabut sa kalilintad, ebpun kanu pedtyakap sa lekanu (Allah), endu su nangadsama ebpun kanu nganin a naganatan nu tupu ni Musa endu tupu ni Harun a pananggiten nu malaikat, saben-sabenal na sya kanu entuba i tanda sa lekanu amayka ya nu kaaden i bamalityala (bamangimbenal).

Engguna ipengganat ni Talut su manga tantara (sundalu) nin na pidtalu nin: saben-sabenal na su Allah i pembatalu sa lekanu sa lawas na ig, na entayn i minum lun na di kena kuyug salaki, endu su entayn i di minum lun na silan i kuyug sa laki, ya tabiya na entayn i makup sa saka akupan sya kanu lima nin, na mininum silan lun ya tabiya na paydu kanilan, na engguna nilan matepas su entuba sa sekanin endu su silan a manga namalityala (namangimbenal) sa lekanin na ya nilan pidtalu: dala bagel tanu saguna a gay kanu Jalut endu kanu manga tantara (sundalu) nin, ya pidtalu nu silan a nangantap sa saben-sabenal na silan na mabalatemu nilan su Allah: pila ebpun kanu lumpukan a paydu i tinumaban sa lumpukan a madakel sa kahanda nu Allah, endu su Allah na salta kanu manga matigkel.

Endu engguna nilan edsangula si Jalut endu su manga tantara (sundalu) nin, na ya nilan pidtalu: Kadenan nami! Penu kami sa katigkel, endu pakatimamel ka su manga ay nami, endu tabangi kami kanu lumpukan a manga kafir.

Tinabanan nilan (manga bamaginugut) silan (a manga kafir) sa kahanda nu Allah endu binunu ni Daud si Jalut, endu inenggan sekanin nu Allah sa kadatu endu kawngangen endu pinakatawan nin sa lekanin ebpun kanu nganin a egkagkahanda nin, endu di kena bu su pangalaw nu Allah sa kanu manga taw sa su sabad kanilan kanu sabad, na di ebplis na mabinasa su kalupan ugayd na su Allah i kigkuwan sa kalbihan sa kanu sakalian alam.

Su entuba na manga tanda nu Allah, pembatyan nami sa leka (Muhammad) sa bantang, endu saben-sabenal na seka na di ebplis na luyug ka kanu manga sinugu.

Su silan a manga sinugu na inilabi nami su sabad kanilan kanu sabad, ebpun kanilan i inimbityalay nu Allah, endu inipulu nin su sabad kanilan sa manga ebpangkatan, endu inenggay nami kani Eisa a wata mama ni Maryam i manga tanda, endu pimbagelan nami sekanin (Eisa) sabap kani Jibril, umana bu ka migkahanda su Allah na da makambubunuwa su silan sa ulyan nilan, kanu ulyan nu nganin a kinawma kanilan nu manga tanda, ugayd na mimbida-bida silan, na ebpun kanilan su entayn i nalityala (nangimbenal) endu ebpun kanilan su entayn i migkafir, umana bu ka migkahanda su Allah na di silan makambubunuwa ugayd na su Allah na penggulan nin i nganin a kagkahanda nin.

Hay sekanu a namalityala (namangimbenal)! Imbaranggya nu su nganin a inirizki nami sa lekanu sa unan a kapegkatingguma nu gay a da pendagang endu da kabpakat endu da kadtatabanga, endu su manga kafir na silan i manga salimbuten.

Su Allah, da wagib a pedsimban, ya tabiya na sekanin, a uyag- uyag a baninindeg sa ginawa nin, di sekanin egkakwa na tulatud endu katulug, lekanin su nganin a sya kanu manga langit endu su nganin a sya kanu kalupan, endu entayn i makadtabang lu sa lekanín (a Allah) ya tabya na su sugut nin, katawan nin su nganin a sya sa kasangulan nilan endu su nganin a sya kanu taligkudan nilan, endu da nilan katawi su enggaga-isa (a ilmu nu Allah) ya tabya na su nganin a pigkahanda nin, endu malapat nu Kursi nin su manga langit endu lupa, endu di kalegenan su Allah sa kapedtuldu nin sa kanilan duwa, endu sekanin i labi a mapulu a masla.

Da ipedtegela sya kanu agama (Islam), saben-sabenal na napayag i tidtu kanu nakasibay, na entayn i egkafir kanu Tagut (pedsimban ataw ka banaligan sa ginawa a salakaw kanu Allah) endu malityala (mangimbenal) sa Allah na nakakapet sa malanut a di magetas, endu su Allah i labi a pakakineg a mataw.

Su Allah i pedtabang kanu silan a bamalityala (bamangimbenal), a babelyun nin silan ebpun sa kalibutengan sa malinawag, endu su silan a namegkafir na ya pedtabang sa kanilan na manga Tagut (pedsimban ataw ka banaligan sa ginawa a salakaw kanu Allah) a babelyun nin silan ebpun sa malinawag sa malibuteng, silan i kigkuwan sa apuy, silan sya kanu entuba na dayun sa dayun.

Ngintu da nengka katawi (Muhammad) su mibpalawa kani Ibrahim kanu Kadenan nin, inenggan sekanin nu Allah sa kadatu, kanu kutika a ya pidtalu ni Ibrahim: su Kadenan ku na banguyag endu bangimatay, ya nin pidtalu (Namrud): saki na banguyag endu bangimatay, ya pidtalu ni Ibrahim: na saben-sabenal na su Allah na papedsebangen nin su senang sa kanu sebangan, na pasebang ka sa sedepan, na napenek silan sa tinabanan su migkafir, endu su Allah na di nin tutulun su lumpukan nu manga salimbuten.

Ataw ka mana si (Uzair) a nasagadan nin i dalpa a nawlug i manga atepin (nageba a dala taw nin a nakalundub), ya nin pidtalu: panun i kauyag sa lekanin (dalpa) nu Allah kanu ulyan nu kinapatay nin (kinageba nin)? Na inimatayan sekanin nu Allah sa naka magatus lagun, mawli na pinambuwat nin sekanin, pidtalu nin (Allah): nakapila i kina lalayun nengka? Ya nin nadtalu: nalalayun aku sa nakasagay ataw ka sabad sa gay, pidtalu nin (Allah): ugayd na nalalayun ka sa nakamagatus lagun, na ilay ka su pegken nengka endu su baginumen nengka ka dala edsalin, endu ilay ka su kuda nengka, endu di ebplis na baluyen nami seka a tanda sa kanu manga taw, endu ilay ka su tulan (nu kuda) u panun i kapapamagulita nami lun, mawli na bawsan nami su entuba sa sapu, na engguna mapayag sa lekanin, na ya nin pidtalu: katawan ku i saben-sabenal na su Allah kanu langun nu enggaga-isa na pakagaga.

Endu kanu kutika a pidtalu ni Ibrahim: Kadenan ku ipailay nengka sa laki u panun i kauyag nengka sa kanu manga namamatay, ya nin (Alllah) pidtalu: ngintu di ka balityala (bangimbenal)? Ya nin (Ibrahim) pidtalu: bangimbenal aku, ugayd na endu pedtakena su pamusungan ku, ya nin (Allah) pidtalu: kwa ka sa pat timan a papanuk sa baluy ka sa matimu sa leka, mawli na baluy ka kanu uman i palaw ebpun kanilan su satebped, mawli na enggat ka silan, ka mawma ka nilan sa malengkas a kablakaw, endu tuntayi ka su Allah i labi a mapulu a mawngangen.

Inupaman su silan antu a pembaranggyan nilan i manga tamuk nilan sa lalan sa Allah na mana satiman a lagas a minetu sa pitu sapak, uman isa ka sapak na magatus ka unud, endu su Allah na takepen nin kanu entayn i magkahanda nin, endu su Allah na labi a mawlad (i limu nin) a mataw.

Su silan antu a pembaranggyan nilan i manga tamuk nilan sa lalan sa Allah, mawli na di nilan tundugan su nganin a nakambaranggya nilan sa kapamanula endu makagkayd, kanilan i balas nilan lu sa pedtyakap kanilan (Allah), endu da gilek nilan, endu da sa kanilan i malidu i ginawa nilan.

Su kadtalu a mananaw endu kaampun na labi a mapya kumin kanu sadaqah a pedtundugan sekanin sa makagkayd, endu su Allah i labi a kawasa a mamelasam.

Hay sekanu a manga namalityala (namangimbenal)! Di nu pembinasa su manga sadaqah nu sa kapamanula endu makagkayd, sa mana su pembaranggyan nin i tamuk nin sa mata nu manga taw, endu di balityala (bangimbenal) sa Allah endu sa gay a mawli, na ya nin upaman na lakungan a aden budta nin na nasugat sekanin na ulan (na da nasama lun a budta), na natagak nin i sekanin sa mategas a matilak, da magaga nilan a enggaga-isa ebpun kanu nganin a pinggalebek nilan, endu su Allah na di nin tutulun su lumpukan a manga kafir.

Endu ya upaman nu silan a pembaranggyan nilan i manga tamuk nilan sa lilini sa kasuwat nu Allah, endu ipembagel sa kanu manga ginawa nilan, na mana su benday sa bukulud a nasugat sekanin na ulan, na natakep su unga nin, na u di gasugat na ulan na nasasangan den, endu su Allah kanu nganin a penggalebeken nu na pakailay.

Ngintu ya kyug nu isa sa lekanu na maaden sa lekanin i pamumulan a kayu kulma endu manga anggul a belagilay sa kababanin i manga lawas a ig, aden sa lekanin sya kanu entuba i langun na manga unga, na nasugat sekanin na kinagkatwa, endu aden sa lekanin i manga mawli a taw a manga lubay, na nasugat sekanin (pamulan) na lipules a aden lun i apuy na nangatutung, manan ba i kapebpayag nu Allah sa lekanu sa kanu manga tanda nin ka endu malemu-lemu sa lekanu i kapamikir nu.

Hay sekanu a bamalityala (bamangimbenal)! Embaranggya kanu ebpun kanu manga mapya a napantyali nu, endu ebpun kanu nganin a babagetun nami sa lekanu ebpun sa lupa, endu di nu egkahanda su mawag ebpun kanu entuba sa embaranggyan nu, endu di kena sekanu i pakakwa lun, ya tabya na ebpipidengan nu su entuba, endu tuntayi nu i saben-sabenal na su Allah na labi a kawasa a kapedta-pedta.

Su Shaytan na banginggileken kanu nin sa kapegkanasisita (kasimpit na gatamanan) endu pedsugun kanu nin sa kasingit, endu su Allah na pebpasadan kanu nin sa ampun a ebpun sa lekanin endu kalbihan (kapyanan), endu su Allah na labi a mawlad (i limu) a mataw (kanu gatamanan nu manga ulipen nin).

Ibagenggay nin su ungangen kanu entayn i magkahanda nin, endu entayn i naenggan sa ungangen na saben-sabenal na naenggan sa mapya a madakel, endu dala makagkalendem ya tabya na su manga aden akal nin.

Endu su nganin a nakambaranggya nu ebpun kanu baranggya, ataw ka nakadsamaya nu ebpun kanu samaya na saben-sabenal na su Allah na katawan nin su entuba, endu dala kanu manga salimbuten i manga makadtabang.

Amayka ipayag nu su manga sadaqah nu na mapya bun sekanin endu amayka ipagena nu endu inggay nu kanu manga pakanasisita na labi a mapya sa lekanu, endu pakapunas sa lekanu kanu manga dusa nu, endu su Allah kanu nganin a penggalebeken nu na katawan nin.

Da sa leka (Muhammad) i katutulu sa kanilan, ugayd na su Allah i pedtutulu sa entayn i kagkahanda nin, endu su nganin a pembaranggyan nu a mapya, na kanu manga ginawa nu, endu da pembaranggyan nu ya tabya na panunugat sa kanu Allah, endu su nganin a pembaranggyan nu a mapya na ipedtapenay sa lekanu (i balas nin), sa ula-ula a di kanu madsalimbut.

Kanu manga pakanasisita a nangaungen sa kambunuwa sa lalan sa Allah, di silan pakagaga belalakaw kanu lupa sa maantap silan nu di manga mataw sa manga kawasa sabap sa katigkel, katawan nengka silan kanu manga tanda nilan a di silan mamangeni sa kanu manga taw sa tegel, endu su nganin a ipembaranggya nu a mapya, na saben-sabenal na su Allah kanu entuba na mataw.

Su silan a pembaranggya sa manga tamuk nilan sa magabi endu malamag sa masulen endu mapayag na kanilan i balas nilan kanu pedtyakap kanilan (Allah), endu da gilek nilan endu da sa kanilan i kapegkalidu na ginawa.

Su silan a pegkan sa iseg (riba) na di silan makatindeg ya tabiya na mana su katindeg nu inansukan na Shaytan, su entuba na kagina saben-sabenal na silan na ya nilan pedtalun na ya bu man kapendagang na mana kababagisega, endu pinamakay nu Allah su kabpasay endu iniharam nin i kababagisega, na entayn i nawma sekanin na indawan a ebpun kanu pedtyakap sa lekanin (Allah) na minenda, na lekanin su nganin a nawna endu su galebekan nin na lu sa Allah, endu entayn i midsaluman na silan i kigkwan kanu apuy sa silan sya kanu entuba na dayun sa dayun.

Pembinasan nu Allah su kababagisega endu babagetun nin su manga sadaqah, endu su Allah na di nin kalinyan su langun nu kafir a baladusa.

Saben-sabenal na su silan a namalityala (namangimbenal) endu minggalebek sa manga mapya, endu inetindeg nilan su sambayang endu inenggay nilan su zakat, kanilan i balas nilan kanu pedtyakap kanilan (Allah), endu da gilek sa kanilan endu da sa kanilan i kapegkalidu na ginawa.

Hay sekanu a namalityala (namangimbenal)! Ikagilek nu su Allah, endu itagak nu su nganin a nasama a kababagisega amayka ya nu kaaden na bamalityala (bamangimbenal).

Na amayka di nu enggulan na tuntayi nu su kabunu a ebpun kanu Allah endu su sinugu nin, endu amayka edtawbat kanu na lekanu su manga ulu nu manga tamuk nu, sa di kanu makadsalimbut, endu di kanu madsalimbut.

Endu amayka ya nin kaaden i aden lun i kamalegenan (su minutang) na kapangangapa sa kalemwan, endu su kapedsadaqah nu i labi a mapya sa lekanu amayka ya nu kaaden i katawan nu.

Endu ikagilek nu su gay a ka-uli nu sa Allah, mawli na itapenay kanu umani isa a ginawa su nganin a nanggalebek nin, sa di silan madsalimbut.

Hay sekanu a manga bamalityala (bamangimbenal), amayka mamagutanga kanu sa utang lu kanu ukul a pinggungalanan na isulat nu su entuba, endu isulat nu pasusulat sa pageletan nu sa bantang, endu di ebpalapalaw su pasusulat sa kasulat nin sa mana su nganin a pinakatawan sa lekanin nu Allah, endu ya edtalu (kanu kapasadan) na su minutang, endu ikagilek nin su Allah a pedtiyakap sa lekanin, endu di nin kulangan su entuba sa enggaga-isa, na amayka ya kaaden nu minutang i di mataw sumulat, ataw ka malubay ataw ka di makagaga sekanin muntul (males), na ya edtalu na su egkasaligan sa lekanin sa bantang endu padsaksi kanu sa duwa kataw ebpun kanu manga mama nu, na amayka di egkaaden i duwa kataw a mama, na sakataw a mama endu duwa kataw a babay ebpun kanu entayn i egkasuwatan nu kanu manga saksi, sa kalimban su isa kanilan duwa, na makapatadem nu isa sa kanilan duwa su isa, endu di ebpalaw su manga saksi amayka tinawag silan, endu da kanu pembungasen sa kasulat nu sa kanu entuba sa manawt ataw ka matiwalu kanu timpu nin, entuba i bantang kanu Allah endu matidtu kanu kapedsaksi, endu masiken a di nu kanduwa-duwa (kapangantap), ya tabiya na maaden sa kapendagang a sagugunay a papedtalyungen nu kanu pageletan nu, na dala sa lekanu i dusa sa di nu makasulat su entuba, endu padsaksi kanu amayka ebpasaya kanu, endu di egkaydan su pasusulat endu saksi, endu amayka enggulan nu na saben-sabenal a ikalyu nu sa inugut sa Kadenan nu, endu ikagilek nu su Allah ka pamandun kanu nin endu su Allah kanu langun nu enggaga-isa na mataw.

Endu amayka ya nu kaaden i sa lakawan a da egkatun nu a pasusulat na sanda a egkasagedan (nu inutangan), na amayka egkasaligan nu sabad sa lekanu su sabad na itunay nu nasaligan su salig sa lekanin, endu ikagilek nin su Allah a pedtiyakap sa lekanin, endu di nu magema su kadsaksi ka entayn i ipagema nin su entuba na saben-sabenal sa lekanin na mindusa su pamusungan nin, endu su Allah kanu nganin a penggalebeken nu na mataw.

Kanu Allah su nganin a sya kanu manga langit endu nganin a sya kanu lupa, endu amayka ipayag nu su nganin a sya kanu manga ginawa nu ataw ka isulen nu su entuba na kwintan sa lekanu su entuba nu Allah, na ampunen nin su entayn i magkahanda nin, endu siksan nin su entayn i magkahanda nin, endu su Allah kanu langun nu enggaga-isa na pakagaga.

Nalityala (nangimbenal) su sinugu (Muhammad) kanu nganin a initulun sa lekanin a ebpun kanu pedtiyakap sa lekanin (Allah), endu su manga bamalityala (bamangimbenal), umani isa na nalityala (nangimbenal) sa Allah endu sa manga malaikat nin endu su manga kitab nin endu su manga sinugu nin, di nami papembidayan su pageletan nu isa ebpun kanu manga sinugu nin, endu pidtalu nilan i nakineg nami endu naginugut kami, ampun kami pedtiyakap sa lekami (Allah), endu sa leka i pedtamanan.

Da ibpalyugat nu Allah kanu ginawa ya tabya na magaga nin, lekanin su nganin a mapya a napantiyali nin, endu lekanin su nganin a mawag a napantyali nin, pedtiyakap sa lekami (Allah) di kami sumiksa amayka nalimpangan nami, ataw ka nalimban kami, pedtyakap sa lekami (Allah) dika mapapananggit sa lekami i mapasang sa mana su inipapananggit nengka kanu silan a nawna sa lekami, pedtyakap sa lekami (Allah) di kami mapadtapik sa nganin a da ipenggaga nami lun, endu lasam kami nengka endu ampun kami nengka endu ikalimu kami nengka, seka i pedtuganul sa lekami na tabangi kami kanu lumpukan a manga kafir.

Alif-Laam-Meem (su Allah i labi mataw kanu ma’na nin).

Su Allah, da Kadenan ya tabya na sekanin a bibiyag a baninindeg (Allah).

Initulun nin sa leka (Muhammad) su kitab (Qur’an) sa bantang a paka-ayun kanu nganin a lu sa lekanin (Taurat), endu initulun su Taurat endu Injil.

Nawna a tutulu sa kanu manga taw, endu initulun nin su Furqan (papedsenggaya sa bantang endu mawag), su silan a migkafir kanu manga tanda nu Allah na kanilan i siksa a malipedes, endu su Allah na labi a mapulu a kigkwan sa kasuli.

Saben-sabenal na su Allah na da makapagena sa lekanin a enggaisa sya sa lupa endu sya sa langit.

Sekanin (Allah) i papebpalas sa lekanu sya kanu manga wawatan (nu manga ina) sa panun i egkahandan nin, da kadenan ya tabya sekanin a labi a mapulu a mataw.

Sekanin i napatulun sa leka (Muhammad) sa kitab (Qur’an) a ebpun lun i manga tanda a manga mapayag a silan i punswan nu kitab, endu su kaped na makadsusulagida, na makapantag kanu silan a sya kanu manga pamusungan nilan i kadsulamig (ebpun kanu bantang) na ya nilan unutan na su nganin a nakadsulagida ebpun lun sa lilini sa batalwan, endu lilini sa kanu kapasangul kanu ma'na a di mapayag sa lekanin, endu dala mataw sa sangul nin (ma'na) nya tabiya na su Allah, endu su manga balibisan sya sa kanu kinagkataw na ya nilan madtalu: nalityala (nangimbenal) kami sa lekanin, sa langun nin na ebpun kanu pedtyakap kanilan (Allah), endu da makagkalendem ya tabya na su aden manga akal nin.

Pedtyakap sa lekami (Allah) di ka mapasibay su manga pamusungan nami sa ulyan nu kinatutulu nengka sa lekami, endu inggay nengka sa lekami ebpun sa leka i limu, saben-sabenal na seka i bangenggay.

Pedtyakap sa lekami (Allah) saben-sabenal na seka i pedtimu kanu manga taw kanu gay a da kapenduwa-duwa lun, saben-sabenal na su Allah na di nin supaken i pasad nin.

Saben-sabenal na su silan a migkafir na di makangguna sa kanilan i manga tamuk nilan endu manga wata nilan sa kanu Allah sa enggaga-isa, endu entuba silan i laleg kanu apuy.

Mana su galebek nu pamilya ni Fir’awn endu su silan a nawna kanilan, pinandalbut nilan su manga tanda nami na siniksa silan nu Allah sabap kanu manga kadusan nilan, endu su Allah na malipedes i siksa.

Edtalu ka (Muhammad) kanu silan a namegkafir i di ebplis na tabanan kanu endu limuden kanu sa naraka, endu sangat a mawag a pegkalebenan.

Saben-sabenal na naaden sa lekanu i tanda kanu duwa a lumpukan a mimbalatemwa (mimbunuwa sa Badr), su isa a lumpukan na pembunuwa sa lalan sa Allah, endu su salakaw a kafir (a lumpukan), sa egkailay nilan (nu manga bamalityala) silan sa takep kanilan sa kailay nu mata, endu su Allah na ipedsukel nin su tabang nin sa kanu entayn i magkahanda nin, saben-sabenal na sya kanu entuba i ibaratan kanu manga kigkwan sa manga kapegkailay.

Pibpalasan sa kanu manga taw i kakyug sa kalilini sa manga babay endu manga wata endu manga tamuk a madakel a bulawan endu pilak endu kuda a malayam endu manga binatang endu pamulanan, su entuba na kapegkakalini sa uyag-uyag sa dunya, endu su Allah na aden sa lekanin i mapya a egkaulyan.

Edtalu ka (Muhammad) u ngintu panudtulen ku sa lekanu i labi a mapya kumin kanu entuba? Kanu silan a inikagilek nilan su pedtyakap kanilan (Allah) i manga surga belagilay sa kababan nin i manga lawas na ig sa dayun sa dayun silan sya kanu entuba, endu manga kaluma a suti endu lilini a ebpun sa Allah endu su Allah na pakailay kanu manga ulipen.

Su silan a nya nilan kadtalu: pedtyakap sa lekami (Allah), saben-sabenal na sekami na nalityala (nangimbenal) kami na ampun ka sa lekami su manga dusa nami endu dalindingi kami nengka kanu siksa sa naraka.

Manga masabar, endu manga bantang, endu manga bamaginugut endu manga bamembaranggya, endu manga babagampun sa kulimpusan nu magabi.

Pidsaksyan nu Allah i saben-sabenal na sekanin na da kadenan ya tabya sekanin, endu su malaikat, endu su manga bala-ilmu a baninindeg sa bantang, da kadenan ya tabya na sekanin a labi a mapulu a mawngangen.

Saben-sabenal na su agama kanu Allah na Islam, endu da embida-bida su silan a inenggan sa kitab ya tabya na ulyan nu nganin a kinawma sa kanilan nu ilmu sa katipwan sa pageletan nilan, endu entayn i egkafir sa kanu manga tanda nu Allah na saben-sabenal na su Allah na mangagan i kwinta.

Na amayka ibpalawa ka nilan (Muhammad) na edtalu ka: inisangkup ku su beneng ku sa Allah endu su entayn i minunut sa laki, endu edtalu ka kanu silan a inenggan sa kitab endu su kena manga sabut i ngintu sinemangkup kanu? na amayka sinemangkup silan na sabenal-sabenal a natutulu silan, endu amayka tinemaligkud silan na ya bu palyugat sa leka na kapedsampay, endu su Allah na labi a pakailay kanu manga ulipen.

Saben-sabenal na su silan a bamegkafir kanu manga tanda nu Allah endu bamunun nilan su manga nabi sa kena bantang endu pembunun nilan su silan a bamedsugu sa bantang ebpun kanu manga taw, na panudtul ka (Muhammad) sa kanilan i siksa a masakit.

Entuba silan i nabinasa i manga galebekan nilan sya sa dunya endu gay a mawli endu da sa kanilan i makadtabang.

Ngintu da nengka mailay su silan a inenggan sa umun ebpun kanu kitab, inenggat silan lu sa kanu kitab nu Allah (Taurat) ka endu makaatul kanu pageletan nilan, mawli na tinemaligkud su lumpukan ebpun kanilan sa ula-ula a silan na namembalawag.

Su entuba na sabap sa saben-sabenal na silan na nya nilan pidtalu: di kami a benal makumbil nu naraka ya tabya na manga gay a mambilang-bilang, endu nasimpang silan sa kanu agama nilan sa kanu nganin a kaaden nu antapan nilan.

Na panun u amayka limuden nami silan kanu gay a da ka-ebplis nin lu ba, endu makatapenay kanu uman i ginawa su nganin a napantyali nin, na silan na di madsalimbut.

Edtalu ka (Muhammad): Hay Kadenan ku a kigwan sa kadatu! Ibagenggay nengka su kadatu kanu entayn i kagkahanda nengka, endu ibagawa nengka su kadatu ebpun kanu entayn i kagkahanda nengka, sya kanu lima nengka i makagkapya, endu papegkapulun nengka su entayn i kagkahanda nengka, endu ibelusak nengka su entayn i kagkahanda nengka, saben-sabenal na seka kanu langun nu enggaga-isa na pakagaga.

Ibeludep nengka su magabi kanu malamag endu Ibeludep nengka su malamag kanu magabi endu ibelyu nengka su bibyag ebpun kanu minatay, endu ibelyu nengka su minatay ebpun kanu bibyag endu berizkiyan nengka su entayn i kagkahanda nengka sa di kagkwinta.

Di baluyn nu manga bamalityala (bamangimbenal) su manga kafir sa manga tagapeda a salakaw kanu manga bamalityala (bamangimbenal) endu entayn i enggalebek sa kanu namba dala sa kanu Allah (katalima kanu manga galebek nin) sya kanu enggaga-isa ya tabya na kagilekan kanu sa kanilan sa gilek endu pebpagingaten kanu nu Allah sa ginawa nin endu lu sa Allah i pedtamanan.

Edtalu ka (Muhammad): amayka ipagena nu su nganin a sya kanu pamusungan nu ataw ka ipebpayag nu su entuba na katawan su entuba nu Allah, endu katawan nin su nganin a sya kanu langit endu su nganin a sya sa lupa endu su Allah kanu langun nu enggaga-isa na pakagaga.

Su gay a mapaluli nu uman i ginawa su nganin a nanggalebek nin a mapya sa sugat, endu su nganin a nanggalebek nin a mawag, ya nin mapanganganay na umana bu ka saben-sabenal na su pageletan nin (ginawa) endu su pageletan nin (mawag) na timpu a mawget, endu pebpagingaten kanu nu Allah sa ginawa nin, endu su Allah na labi a malimu kanu manga ulipen.

Edtalu ka (Muhammad): amayka ya nu kaaden i egkalilinyan nu su Allah na unuti aku nu, ka kalilinyan kanu nu Allah endu ampunen nin sa lekanu su manga dusa nu, endu su Allah na labi a bangampun a malimu.

Edtalu ka (Muhammad): paginuguti nu su Allah endu su sinugu, na amayka tinaligkudan nilan na saben-sabenal na su Allah na di nin kalinyan su manga kafir.

Sabenal-sabenal na su Allah na pinamili nin si Adam endu Nuh endu su pamilya ni Ibrahim endu pamilya ni Imran kanu sakalyan alam.

Tupu nu sabad sa kanilan kanu sabad endu su Allah i labi a pakakineg a mataw.

Kanu kutika a pidtalu nu kaluma ni Imran: pedtyakap sa laki (Allah) saben-sabenal na saki na nakadsamaya aku sa leka su nganin a sya kanu tiyan ku sa daludaya, na talima ka sa laki, saben-sabenal na seka i labi a pakakineg a mataw.

Engguna embata sekanin (kaluma ni Imran) na pidtalu nin: pedtyakap sa laki (Allah), saben-sabenal na saki na inimbata ku sekanin sa babay, endu su Allah i labi a mataw kanu nganin a nambata nin endu su mama na di kena mana babay, endu saben-sabenal na saki na binedtwan ku sekanin sa Maryam, endu saben-sabenal na saki na ibelindung ku sekanin sa leka endu su mawli a taw nin kanu manga shaytan a binugaw.

Na tinalima sekanin nu pedtiyakap sa lekanin (Allah) sa kinatalima a mapya endu pinapangengetu nin sekanin sa kinapangengetu a mapya, endu ya nakatiyakap sa lekanin na si Zakariya, uman kakapen sekanin ni Zakariya sa masgit na egkatun nin sa lekanin i rizki, pidtalu nin (Zakariya): Hay Maryam! Endaw nakasungu i nya ba? Ya nin nadtalu: sekanin na ebpun kanu Allah, saben-sabenal na su Allah na berizkiyan nin su entayn i magkahanda nin sa da kwinta nin.

Lu ba nangeni su Zakariya sa kanu pedtiyakap sa lekanin (Allah), nya nin pidtalu: pedtiyakap sa laki, ienggay nengka sa laki ebpun sa leka i mawli a taw a mapya, saben-sabenal na seka na labi a pakakineg kanu pangeni (dua).

Na tinawag sekanin nu malaikat sa sekanin na pedtindeg sa kanu masgit, saben-sabenal na su Allah na papegkakalinin ka nin sabap kani Yahya a paka-ayun kanu katigan a ebpun sa Allah endu pangahulu endu bagungen (sa lilini sa babay) endu nabi a ebpun kanu manga mapya a taw.

Ya nin pidtalu (Zakariya): pedtiyakap sa laki (Allah) panun i kaaden sa laki na wata a mama sa saben-sabenal na nagaws aku na katuwa endu su kaluma ku na bayas? Ya nin pidtalu: manan ba su Allah i kanggalebek nin sa nganin a kagkahanda nin.

Ya nin pidtalu (Zakariya): pedtyakap sa laki (Allah), umbali aku sa tanda, ya nin pidtalu (Allah): ya nengka tanda na di nengka imbityala su manga taw sa telu gay ya tabya na sinyas endu tademi ka su pedtyakap sa leka sa madakel endu tasbih ka sa malulem endu mapita.

Endu kanu kutika a pidtalu nu malaikat: Hay Maryam! Saben-sabenal na su Allah na pinamili ka nin, endu sinuti ka nin endu pinamili ka nin kanu manga babay nu sakalyan alam.

Hay Maryam! paginuguti ka su pedtyakap sa leka (Allah), endu sugyud ka endu ruku ka salta kanu manga bameruku’.

Su entuba na kaped kanu manga tudtulan a gaib (di gailay) a ibewahi nami sekanin sa leka (Muhammad) endu da ka maaden sa kanilan kanu timpu a bagukagan nilan u entayn i makatuganul kani Maryam endu da ka maaden sa kanilan kanu timpu a kabamagukag nilan.

Kanu kutika a ya pidtalu nu malaikat: Hay Maryam! Saben-sabenal na su Allah na pakalilinin ka nin sabap kanu katigan a ebpun sa lekanin a yanin ngala na si Eisa a wata a mama ni Maryam a masela (i pangkatan nin) sa dunya endu gay a mawli endu kaped kanu manga taw a masiken (sa Allah).

Endu imbityala nin (Eisa) su manga taw sa pebpuyut endu sa katuwa endu kaped skanin kanu manga mapya a taw.

Nya nin pidtalu (Maryam): pedtyakap sa laki (Allah), panun i kaaden sa laki na wata sa da ku makumbil na taw? Ya nin pidtalu (malaikat): manan ba su Allah kanu kabamaluy nin kanu nganin a kagkahanda nin, amayka enggalebeken nin su galebekan na ya nin bu edtalun sa lekanin na maaden ka, na maaden.

Endu ipamandu nin sa lekanin su kitab endu su ungangen endu su Taurat endu Injil.

Endu sugu kanu manga tupu nu lsrael, sa saben-sabenal na saki na initingguma ku sa lekanu su tanda a ebpun sa kanu pedtyakap sa lekanu (Allah), saben-sabenal na saki na baluyn ku sa lekanu su lupa sa mana palas na papanuk, na yupen ku lu ba na maaden sa papanuk sa sugut nu Allah, endu pakolyan ku su lakap endu su putik endu bibyagen ku su minatay sa sugut nu Allah endu panudtulen ku sa lekanu su nganin a pegkanen nu endu su nganin a ipedtagu nu sa kanu manga walay nu, saben-sabenal na sya kanu entuba i tanda sa lekanu amayka nya nu kaaden i bamalityala (bamangimbenal).

Endu pakaayun kanu nganin a sya sa laki a kitab a Taurat endu pamaken ku sa lekanu su kaped a iniharam sa lekanu endu initingguma ku sa lekanu i tanda a ebpun kanu pedtyakap sa lekanu (Allah) na ikagilek nu su Allah endu paginuguti aku nu.

Saben-sabenal na su Allah i pedtyakap sa laki endu pedtyakap sa lekanu na simba nu sekanin, namba i lalan a matidtu.

Engguna magedam ni Eisa sa kanilan i kapegkafir, ya nin nadtalu: entayn i mamakadbang sa laki lu sa Allah? Ya pidtalu nu manga mapya nu lumpukan nin: sekami i mamakadtabang sa Allah, nalityala (nangimbenal) kami sa Allah endu edsaksi ka (Eisa) sa saben-sabenal na sekami na namedsangkup.

Pedtyakap sa lekami (Allah), nalityala (nangimbenal) kami kanu nganin a initulun nengka endu mibpatyunut kami kanu sinugu (Eisa), na baluy kami nengka a kaped kanu manga saksi.

Endu nagakal silan (sa kaimatay kanu Eisa) endu pinandaya silan nu Allah (sa katadingan) endu su Allah i labi a mapya kanu bamagakal.

Kanu kutika pidtalu nu Allah: Hay Eisa! Saben-sabenal na saki i bagimatay sa leka endu pebpulu sa leka sya sa laki endu pedsuti sa leka ebpun kanu silan a namegkafir endu bamaluy sa kanu silan a namebpatyunut sa leka sa pulu nu silan a namegkafir endu taman sa gay a mawli, mawli na sya laki i egkambalinganan nu, na atulen ku su pageletan nu sya kanu nganin a kaaden nu lu ba a pembida-bida.

Makapantag kanu silan a namegkafir na siksan ku silan sa siksa a malipedes sya sa dunya endu lu sa gay a mawli endu da sa kanilan i makadtabang.

Endu makapantag kanu silan a namalityala (namangimbenal) endu minggalebek sa manga mapya na itapenay nin sa kanilan su manga balas nilan, endu su Allah na di nin kalinyan su manga salimbuten.

Entuba na binatya namisekanin sa leka (Muhammad) ebpun kanu manga tanda endu patadem a matigel.

Saben-sabenal na ya pagidsan ni Eisa sa kanu Allah na mana upama ni Adam, binaluy nin sekanin ebpun sa budta, mawli na pidtalu nin sa lekanin i maaden ka na naaden.

Su bantang na ebpun kanu pedtyakap sa leka (Allah), na da ka bu maaden sa kaped kanu manga bagalang-alang.

Na entayn i ebpalawa sa leka sa ulyan nu nganin a kinawma na ilmu sa leka, na edtalu ka (Muhammad): sya kanu ka enggaten tanu su manga wata nami endu manga wata nu endu manga kaluma nami endu manga kaluma nu endu su manga ginawa nami endu manga ginawa nu, mawli na mangeni tanu (sa Allah) na baluyn tanu su mulka nu Allah sa kanu manga budtuden.

Saben-sabenal na su namba na di ebplis na sekanin i manga tudtulan a bantang, endu da kadenan ya tabiya na su Allah endu saben-sabenal na sekanin a Allah na di ebplis na sekanin i labi a mapulu a mawngangen.

Na amayka tinaligkudanan nilan, na saben-sabenal na su Allah na labi a mataw kanu manga baminasakan.

Edtalu ka (Muhammad): Hay manga taw nu kitab (Yahudi endu Nasrani)! sya kanu sa katigan a pagidsan sa pageletan nami endu su pageletan nu, sa di tanu semimba ya tabya na su Allah endu di tanu semakutu sa lekanin sa enggaga-isa endu di baluyn nu sabad sa lekitanu su sabad sa manga kadenan a salakaw kanu Allah, na amayka tinaligkudanan nilan na edtalu nu: edsaksi kanu sa saben-sabenal na sekami na namedsangkup (kanu Allah).

Hay manga taw nu kitab! Ngintu ka pebpalawa kanu sa kani Ibrahim, sa ula-ula a da makatulun su Taurat endu su Injil ya tabya na ulyanan nin, ngintu di nu egkapagitung!?

Hay sekanu a manga taw na kitab! Inibpalawa nu (su Nabi Muhammad) sya kanu nganin a aden ilmu nu lun na ngintu ka inibpalawa nu sya kanu nganin a da ilmu nu lun? Endu saben-sabenal na su Allah na katawan nin na sekanu na di nu katawan.

Da maaden si Ibrahim sa Yahudi endu Nasrani, ugayd na ya nin kaaden na matidtu a sinemangkup (sa Allah) endu da maaden sa kaped kanu manga bamedsakutu.

Saben-sabenal na ya labi a masiken kanu manga taw kani Ibrahim na di ebplis na su silan a mibpatyunut sa lekanin endu su namba a nabi endu su silan a namalityala (namangimbenal) endu su Allah i egkaendudan nu manga bamalityala (bamangimbenal).

Napanganganay nu lumpukan kanu manga taw nu kitab i umana bu ka tadingen kanu nilan na da matading nilan ya tabya na su manga ginawa nilan sa ula-ula a di nilan egkagedam.

Hay sekanu a manga taw nu kitab (Yahudi endu Nasrani)! Ngintu ka pegkafir kanu sa kanu manga tanda nu Allah sa ula-ula a sekanu na egkadsaksyan nu.

Hay Sekanu a manga taw nu kitab (Yahudi endu Nasrani)! Ngintu ka pembawsan nu su bantang sa sulak endu ibagena nu su bantang sa ula-ula a sekanu na katawan nu.

Endu pidtalu nu lumpukan ebpun kanu taw nu kitab (Yahudi endu Narani): palityala (pangimbenal) kanu sa kanu initulun kanu silan a manga namalityala (namangimbenal) sa paganayan nu malamag endu egkafir kanu sya kanu mawli nu malamag, ka endu malemu-lemu sa kanilan i kambalingan nilan (egkafir).

Endu di kanu balityala (bangimbenal) ya tabya na kanu entayn i minunut kanu agama nu, edtalu ka (Muhammad): saben-sabenal na su tutulu na tutulu nu Allah a maka-enggay sa kanu isa sa mana su nganin a inenggay sa lekanu, ataw ka ibpalawa kanu nilan sa kanu pedtyakap sa lekanu (Allah), edtalu ka (Muhammad): saben-sabenal na su kalbihan na lu sa Allah, inggay nin su entuba sa entayn i egkagkahanda nin endu su Allah na labi a makalag (i limu nin) a mataw.

Pedtantun nin su limu nin sa entayn i egkagkahanda nin endu su Allah i kigkwan sa kalbihan a masla.

Endu kaped kanu manga taw nu kitab (Yahudi endu Nasrani) i entayn i saligan nengka sa tamuk a madakel i itunay nin sa leka, endu kaped sa kanilan i entayn i saligan nengka sekanin sa isa ka dinar (kulta na kaped a Arab) na di nin itunay i entuba sa leka ya tabya na lalayun ka sa lekanin edtindeg (ebpapalumanan mangetuk), su entuba na kagina saben-sabenal sa kanilan na pidtalu nilan i da sa lekitanu sya kanu di kena sabut (arab) i ukit, endu pedtalun nilan sa kanu Allah i kabudtud sa ula-ula a katawan nilan.

Di kena maytu (kanu antapan nilan) ka entayn i timuman sa pasad nin endu nagilekan, na saben-sabenal na su Allah na kalilinyan nin su manga magilek.

Saben-sabenal na su silan a inidsambi nilan su pasad nilan sa Allah endu su manga sapa nilan sa alaga a paydu, na entuba silan i da umun nin sa gay a mawli endu di imbityala silan nu Allah endu di nin edtulikan silan sa gay a kambwat nu namamatay, endu di nin sutin silan endu kanilan i siksa a masakit.

Endu saben-sabenal na kaped sa kanilan i di ebplis na lumpukan a papedsulaken nilan su manga dila nilan sa kanu kitab (Taurat), ka endu nu maantap sekanin sa kaped kanu kitab, sa di kena sekanin ebpun sa kitab, endu ya nilan pedtalun: sekanin antu na ebpun kanu Allah, sa di kena sekanin ebpun kanu Allah, endu ya nilan pedtalun kanu Allah na kalbutan sa ula-ula a katawan nilan.

Di maaden kanu taw i enggan sekanin nu Allah sa kitab endu atulan endu kanabi mawli na edtalun nin sa kanu manga taw: aden nu (su manga ginawa nu) sa manga ulipen ku a salakaw kanu Allah, ugayd na aden nu (su manga ginawa nu) sa manga mataw kanu nganin a kaaden nu a ibamandu nu sa kitab endu su nganin a kaaden nu a bangagyan nu.

Endu di kanu nin sugun sa baluyn nu su manga malaikat endu su manga nabi sa manga kadenan, ngintu pedsugun kanu nin sa kagkafir sa ulyan nu kutika a sekanu a namedsangkup?

Endu kanu kutika a kinamalan nu Allah su pasad nu manga Nabi sa apya inggay ku sa lekanu su kitab endu ungangen, mawli na nakawma sa lekanu su sinugu (Muhammad) sa nagayun kanu nganin nan sa lekanu (a kitab) na di ebplis na malityala (mangimbenal) kanu, endu tabangan nu sekanin, ya nin (Allah) pidtalu: ngintu minayun kanu endu kinamalan nu sa mabagel? Ya nilan pidtalu: minayun kami, ya nin (Allah) pidtalu: na edsaksi kanu sa ula-ula a saki na salta sa lekanu kanu manga saksi.

Na entayn I timaligkud kanu ulyan nu entuba na entuba silan i manga nakalyu (sa inugut).

Ngintu ka salakaw sa kanu Agama nu Allah i egkalinyan nilan? Na sinemangkup sa lekanin su entayn i sya sa manga langit endu lupa sa inugut endu kepegkabensi, endu lu kanu sa lekanin pembalingan.

Edtalu ka (Muhammad): nalityala (nangimbenal) kami sa kanu Allah endu su nganin a initulun nin sa lekami endu su nganin a initulun kanu Ibrahim endu kanu Ismail endu kanu Ishaq endu kanu Ya'kub endu kanu mawli a taw (ni Ya’kub) endu kanu nganin a inenggay kani Musa endu kani Eisa endu kanu manga nabi a ebpun kanu pedtyakap kanilan (Allah), sa di nami ipembida su pageletan nu isa ebpun kanilan endu sekami sa lekanin (a Allah) na namedsangkup.

Endu entayn i magagama sa salakaw kanu Islam na di den a benal matalima sa lekanin endu sekanin lu sa gay a mawli na kaped kanu manga nalapis.

Panun i katutulu nu Allah sa kanu lumpukan a namegkafir sa ulyan nu kinapalityala (kinapangimbenal) nilan endu pidsaksyan nilan su sinugu (Muhammad) na bantang endu natingguma silan a manga tanda, endu su Allah na di nin tutulun su lumpukan a manga salimbuten.

Entuba silan na ya nilan balas na saben-sabenal na kanilan su mulka nu Allah endu manga malaikat endu manga taw sa langun.

Tatap silan lu ba sa di papegkapegkagan silan sa siksa endu di silan papedsengkan.

Ya tabya na su silan a namedtawbat kanu ulyan nu entuba, endu nagumbaya silan, na saben-sabenal na su Allah na labi a bangampun a malimu.

Saben-sabenal na su silan a namegkafir kanu ulyan nu kabalityala (kabangimbenal) nilan, mawli na midsisingguman silan sa kapegkafir, na di den a benal matalima i tawbat nilan endu entuba silan i nangatading.

Saben-sabenal na su silan a namegkafir endu namamatay silan sa manga kafir na di den a benal matalima ebpun kanu isa sa kanilan i lupa a napenu na bulawan sa apya ipangon nilan su entuba, entuba silan na kanilan i siksa a masakit endu da sa kanilan i mamakadtabang.

Di nu den a benal masampay i kamapyanan taman a di nu embaranggyan su nganin a kalilinyan nu, endu su nganin a pembaranggyan nu a enggaga-isa, na saben-sabenal na su Allah kanu entuba na mataw.

Langun na pegken na gapakay kanu tupu nu Israel, ya tabya na su nganin a iniharam nu Israel kanu ginawa nin, sa kanu unan nu kinatulun su Taurat, edtalu ka (Muhammad): itingguma nu su Taurat ka batya nu amayka ya nu kaaden na manga bantang.

Entayn i edtetebwan nin su Allah sa kalbut sa ulyan nu entuba, na entuba silan i manga salimbuten.

Edtalu ka (Muhammad): benal su Allah, na ebpatyunut kanu sa kanu Agama nu Ibrahim a bantang endu di kena nin ya kaaden i kaped kanu manga balasakutu.

Saben-sabenal na ya paganay a walay a inibetad kanu manga taw na su lu sa Makkah a barakat endu tutulu kanu sakalyan alam.

Sya kanu entuba i manga tanda a mapayag a pidtindegan nu Ibrahim, endu entayn i lemudep lun na ya nin kaaden na makatatana endu kanu Allah kanu manga taw i kapegkagi sa kanu walay nu Allah sa entayn i pakagaga lun sa lalan, endu entayn i migkafir na saben-sabenal na su Allah na kawasa sa kanu sakalyan alam.

Edtalu ka (Muhammad): Hay manga taw nu kitab (Yahudi endu Nasrani)! Ngintu ka pegkafir kanu sa kanu manga tanda nu Allah, endu su Allah na saksi kanu nganin a penggalebeken nu.

Edtalu ka (Muhammad): Hay manga taw nu kitab (Yahudi endu Nasrani)! Ngintu ka pedsangkan nu su lalan nu Allah kanu entayn i nalityala (nangimbenal) sa gapanganganay nu sa kanilan i kapegkabigkug sa ula-ula a sekanu na manga saksi, endu kena kalimpang su Allah kanu nganin a penggalebeken nu.

Hay sekanu a namalityala (namangimbenal)! Amayka paginugutan nu su lumpukan nu silan a inenggan sa kitab (Yahudi endu Nasrani) na pambalinganen kanu nilan kanu ulyan nu kabalityala (kabangimbenal) nu sa ka-kafir.

Endu panun i kapegkafir nu sa sekanu na pembatyan sa lekanu su manga tanda nu Allah, endu sya sa lekanu su sinugu nin, endu entayn i kamalan nin su Allah (kitab nin) na saben-sabenal na tinutulu sa lalan a matidtu.

Hay sekanu a namalityala (namangimbenal)! Ikagilek nu su Allah sa tidtu a gilek sa lekanin, endu di kanu den a benal matay ya tabya na sekanu na namedsangkup.

Endu kamali nu su Agama nu Allah sa langun endu da kanu pebpitas-pitas endu tademi nu su limu nu Allah sa lekanu kanu kutika a ya nu kaaden na di kanu bamagayun, na pinapapamagayun nin su pageltan nu manga pamusungan nu, na nabaluy kanu sabap kanu limu nin sa edsusuled, endu su kaaden nu a sya kanu sa kanu bibil nu kalut sa apuy, na linepas kanu nin ebpun lu ba, manan ba i kapabpayag nu Allah sa lekanu kanu manga tanda nin, ka endu malemu-lemu sa lekanu i katutulu nu.

Endu aden kanu ebpun sa lekanu su lumpukan a bangenggat silan sa mapya endu ipedsugu nilan su mapya endu ipedsapal nilan su mawag endu entuba silan i namakataban.

Endu di nu bagadena (su manga ginawa nu) sa mana su silan a mimbida-bida kanu ulyan nu nganin a kinawma sa lekanu nu manga tanda, endu entuba silan i kanilan i siksa a masla.

Kanu gay a pegkaputi su manga beneng endu pegkaytem su manga beneng, na makapantag kanu silan a migkaytem i manga beneng nilan, ngintu migkafir kanu sa kanu ulyan nu kabalityala (kabangimbenal) nu? Na tepengi nu i siksa sabap sa kanu nganin a kaaden nu kapegkafir.

Endu makapantag kanu silan a migkaputi i manga beneng nilan na sya kanu limu nu Allah, sa silan lu ba na dayun sa dayun.

Su entuba na manga tanda nu Allah a pembatyan nami sa leka (Muhammad) sa bantang endu kena su Allah galini sa kapedsalimbut kanu sakalyan alam.

Endu kanu Allah su nganin a sya kanu manga langit endu su nganin a sya kanu lupa endu lu kanu Allah makambalingan su manga galebekan.

Ya nu kaaden na mapya a lumpukan a pinambwat kanu manga taw, ipedsugu nu su mapya endu ipedsapal nu su mawag endu balityala (bangimbenal) kanu sa Allah, endu umana bu ka nalityala (nangimbenal) su taw nu kitab (Yahudi endu Nasrani) na ya nin kaaden na mapya sa kanilan, kaped sa kanilan na bamalityala (bamangimbenal), endu kadakelan kanilan na nakaliyu (sa inugut sa Allah).

Di kanu nilan a benal kagkaydan ya tabya na kapanapulung (ganat kanu manga dila nilan) endu amayka imbunuwa kanu nilan na italigkud nilan sa lekanu su manga bigkugung nilan (malalaguy silan), mawli na da edtabang sa kanilan.

Nakalibet sa kanilan su kapegkalusak apiya endaw silan kasampenan, ya tabya na sabap kanu Agama nu Allah endu kanu agama nu manga taw, endu nadsalengkat nilan su lipunget a ebpun kanu Allah endu nakalibet sa kanilan i kapegkanasisita, sabap sa saben-sabenal na su entuba na su kaaden nilan a pegkafir silan sa kanu manga tanda nu Allah endu bamunun nilan su manga nabi sa di kena bantang, su entuba na sabap kanu nganin a kinasupak nilan endu kaaden nilan a banalasak (sa tedtaban nu Allah a ininggay nin sa kanilan).

Di kena silan mamagidsan, kaped sa kanu taw nu kitab (Yahudi endu Nasrani) i lumpukan a matidtu a pembatyan nilan i manga tanda nu Allah sa tilenduan nu magabi sa ula-ula a bamedsugyud silan.

Balityala (bangimbenal) silan sa Allah endu gay a mawli endu ipedsugu nilan su mapya endu ipedsapal nilan su mawag endu pegkuya silan sya kanu manga mapya endu entuba silan i kaped kanu manga mapya a taw.

Endu su nganin a penggulan nilan a mapya, na di pandayan sa kanilan su entuba (balas nin) endu su Allah na labi a mataw kanu manga magilek.

Saben-sabenal na su silan a namegkafir na di den a benal makangguna sa kanilan su manga tamuk nilan endu su manga wata nilan kanu Allah sa enggaga-isa endu entuba silan i kigkwan sa kanu apuy, silan lu ba na lalayun.

Ya upaman nu nganin a pimbaranggyan nilan sya sa uyag-uyag sa dunya na mana bun sambel a matenggaw ged a nakasugat sa kanu bangangawidan nu lumpukan a sinalimbut nilan su manga ginawa nilan, na nabinasa nin (nu sambel su bangangawidan), endu di kena silan sinalimbut nu Allah, ugayd na su manga ginawa nilan i sinalimbut nilan.

Hay sekanu a namalityala (namangimbenal): di nu pembaluya a manga tagapeda su salakaw sa lekanu ka di kanu nilan palampasen sa kabinasan endu ya nilan madsingani na su nganin a makagkayd sa lekanu, saben-sabenal na napayag su lipunget kanu manga ngali nilan endu su nganin a ibagena nu manga laleb nilan i labi a masla, saben-sabenal na inipayag nami sa lekanu su manga tanda amayka ya nu kaaden i bamagitung.

Hay sekanu! Nan kanu den menem (manga bamalityala), kalilinyan nu silan endu di kanu nilan kalilinyan endu balityalan nu su kitab sa langun nin, endu amayka madsumbak kanu nilan na ya nilan edtalun: nalityala (nangimbenal) kami, endu amayka nalipus kanu nilan na inebut nilan su manga pundu nu kemel nilan sa kapegkalipunget, edtalu ka (Muhammad): matay kanu sa lipunget nu, saben-sabenal na su Allah na labi a mataw kanu dalem nu manga laleb.

Amayka masugat kanu na mapya na mawag kanilan endu amayka masugat kanu na mawag na egkagalaw silan sabap lu ba, endu amayka edsabar kanu endu enggilek kanu na di kanu kagkaydan nu kapamungkayd nilan sa enggaga-isa, saben-sabenal na su Allah kanu nganin a penggalebeken nilan na langkap.

Endu kanu kutika a mibpanay ka (Muhammad) ebpun kanu pamilya nengka sa pegkadtagan nengka su manga bamalityala (bamangimbenal) sa kanu manga gambetad sa kapembunwa (sa Uhud), endu su Allah na labi a pakakineg a mataw.

Kanu kutika a initagu sa ginawa nu duwa ka lumpukan a ebpun sa lekanu i kadadsang nilan, endu su Allah i pedtuganul sa kanilan duwa, endu kanu Allah pedsalig su manga bamalityala (bamangimbenal).

Endu saben-sabenal na tinabangan kanu nu Allah lu sa Bad'r sa sekanu na egkangaumis, na ikagilek nu su Allah ka endu malemu-lemu sa lekanu i kadsukur nu.

Kanu kutika a pedtalun nengka (Muhammad) kanu manga bamalityala (bamangimbenal): ngintu di pakatalutup sa lekanu su kapegkadtag sa lekanu nu pedtyakap sa lekanu (Allah) a telu ngibu a malaikat a pinatulun!?

Di kena! Ka amayka edsabar kanu endu enggilek kanu, endu matingguma kanu nilan sa sagugunay nilan a namba su kapegkadtag sa lekanu nu pedtyakap sa lekanu (Allah) sa lima ngibu a malaikat a balatanda.

Endu da baluya nu Allah sekanin, ya tabya na ikalilini nu endu makadtakena su manga pamusungan nu sabap lun, endu da tabang ya tabya na ebpun kanu Allah a mapulu a mawngangen.

Ka endu nin matebped su kaped kanu silan a namegkafir ataw ka ilusak nin silan na muli silan a namakanama.

Da sa leka (Muhammad) i enggaga-isa ataw ka tawbaten nin silan, ataw ka siksan nin silan, na saben-sabenal na silan i namedsalimbut.

Endu kanu Allah su nganin a sya sa kanu manga langit endu su nganin a sya sa kanu lupa, ampunen nin kanu entayn i egkagkahanda nin endu siksan nin kanu entayn i egkagkahanda nin endu su Allah i labi a bangampun a malimu.

Hay sekanu a namalityala (namangimbenal)! Da kanu pegkan sa iseg a takep temakep endu ikagilek nu su Allah ka endu malemu-lemu sa lekanu i kataban nu.

Endu ikagilek nu su apuy a inidtatalama kanu manga kafir.

Endu paginuguti nu su Allah endu su sinugu ka endu malemu-lemu sa lekanu i kakalimu sa lekanu.

Endu egkuya kanu sa kanu ampun a ebpun kanu pedtyakap sa lekanu (Allah) endu su surga a balawagan nin na manga langit endu lupa, inidtatalama kanu manga magilek.

A pembaranggya silan sa malwag endu masenget endu bamangukem sa lipunget endu bangampun kanu manga taw, endu su Allah na kalinyan nin su manga bangapyanan.

Endu silan a amayka nakanggalebek sa malat ataw ka nadsalimbut nilan su ginawa nilan na tinademan nilan su Allah na mapa-ampun silan sa manga dusa nilan, endu entayn i bangampun sa manga dusa ya tabya na su Allah? Endu da nilan ipamamantag su nganin a nanggalebek nilan (a mawag) sa ula-ula a silan na katawan.

Entuba silan na ya nilan balas na ampun a ebpun kanu pedtyakap kanilan endu manga surga a belagilay sa kababan nin su manga lawas na ig sa lalayun silan lu ba, endu ngin den a limu i balas nu manga minggalebek.

Saben-sabenal na sinemagad kanu nawna sa lekanu i manga ukit na endadalakaw kanu sa kanu lupa, na ilay nu u panun i kaaden nu kulimpusan nu manga papendalbut.

Namba (su Qur’an), a pebpayag kanu manga taw, endu tutulu endu indawan kanu manga magilek.

Endu da kanu pendudulunu endu da kanu belidu (sa ginawa) sa ula-ula a sekanu i manga mapulu amayka ya nu kaaden i bamalityala (bangimbenal).

Amayka masugat kanu na pali, na saben-sabenal na masugat su lumpukan na pali sa upaman nin, endu entuba su manga gay a papedsasalyun nami sekanin kanu pageletan nu manga taw ka endu katawan nu Allah su silan a namalityala (namangimbenal), endu baluyn nin ebpun sa lekanu i manga saksi, endu su Allah na di nin kalinyan su manga salimbuten.

Endu malimpyu nu Allah su silan a manga namalityala (namangimbenal), endu mabinasa nin su manga kafir.

Ngintu naantap nu i makaludep kanu sa surga sa da kasabuti nu Allah entayn silan a namedtantu ebpun sa lekanu ka endu nin katawan su manga masabar?

Endu saben-sabenal na ya nu kaaden na egkapanganganay nu i kapatay kanu unan nu kapegkadsumbak nu sa lekanin, na saben-sabenal na nailay nu sekanin sa ula-ula a pedtulikan nu.

Endu di kena si Muhammad ya tabya na sinugu, saben-sabenal na sinemagad kanu unan nin i manga sinugu, na ngintu amayka matay ataw ka nabunu na embalingan kanu sa kakafir? Na entayn i embalingan sa kakafir na di nin den a benal kagkaydan su Allah sa enggaga-isa endu balasan nu Allah su manga balasukur.

Endu di kena ya kaaden nu ginawa i matay ya tabya na sugut nu Allah kanu talanged a timpu, endu entayn i kalinyan nin i balas sa dunya na inggay nami sa lekanin i entuba endu entayn i kalinyan nin i balas sa gay a mawli na inggay nami sa lekanin i entuba, endu balasan nami su manga balasukur.

Endu pila kanu nabi (ebpun kanu manga nabi) sa binunu salta sa lekanin su manga tagapeda a madakel, na da silan malunu sa kanu nganin a nakasugat sa kanilan sa lalan sa Allah endu da silan egkalubay endu da silan pangalimbaban endu su Allah na kalinyan nin i manga balasabar.

Endu di kena ya kaaden nu kadtalu nilan ya tabya na pidtalu nilan: pedtyakap sa lekami (Allah) ampun ka sa lekami su manga dusa nami endu su kinatalasak nami (sa tedtaban) sya kanu galebekan nami endu ibuladtek nengka su manga ay nami endu tabangi kami nengka kanu lumpukan a manga kafir.

Na ininggay sa kanilan nu Allah su balas sa dunya endu mapya a balas lu sa gay a mawli endu su Allah na egkalinyan nin su manga bangapyanan.

Hay sekanu a namalityala (namangimbenal)! Amayka paginugutan nu su silan a namegkafir na pambalinganen kanu nilan sa kakafir nu, na makagkelid kanu sa manga lugi.

Ugayd na su Allah i pedtabang sa lekanu endu sekanin i labi a mapya kanu bamedtabang.

Endu ibetad nami kanu manga pusung nu silan a namegkafir i gilek sabap sa kanu nganin a kinasakutu nilan kanu Allah, a dala itulun nu Allah lun tindeg, endu ya nilan kadtakenan na apuy endu ngin den a kawag a egkagkalebenan nu manga salimbuten.

Endu saben-sabenal na tinuman sa lekanu nu Allah su pasad nin, kanu kutika a bamunun nu silan sa sugut nin, taman sa amayka nakadadsang kanu endu pinamagukagan nu su galebekan endu sinemupak kanu sa kanu ulyan nu nganin a kinapailay nin sa lekanu sa kanu nganin a egkalinyan nu, kaped sa lekanu i entayn i egkalini sa dunya, endu kaped sa lekanu i entayn i egkalini sa gay a mawli, mawli na pinasibay kanu nu Allah sa kanilan, ka endu kanu nin egkabatalu, endu saben-sabenal na linasam kanu nin, endu su Allah i kigkwan sa kalbihan sa kanu manga namalityala (namangimbenal).

Kanu kutika a kinapamanik nu endu di nu bagilayn su isa, sa su sinugu na pedtawagen kanu nin sya sa ulyan nu, na binalasan kanu nu Allah sa lidu (na ginawa) ka endu di kanu kalimengan kanu sinemagad sa lekanu endu kanu nakabatalu sa lekanu, endu saben-sabenal na su Allah i labi a mataw sa kanu nganin a penggalebeken nu.

Mawli na initulun nin sa lekanu sa ulyan nu kinalidu (na ginawa) i kinatana a kapegkatulatud a pakasapeng kanu lumpukan ebpun sa lekanu, endu lumpukan a saben-sabenal na natagu nilan sa ginawa su manga ginawa nilan, sa egkaantap nilan su Allah sa di kena bantang, sa antapan nu manga untengaw, pedtalun nilan (manga munafiq): ngintu aden lekitanu a kapegkailay kanu enggaga-isa? Edtalu ka (Muhammad): saben-sabenal na su kapegkailay sa langun nin na kanu Allah, ibagena nilan sa kanu manga ginawa nilan su di nilan ipebpayag sa leka, pedtalun nilan: umana bu ka ya nin kaaden i aden kapegkailay tanu kanu enggaga-isa na di tanu mabunu sya ba, edtalu ka (Muhammad): apya ya nu pan kaaden i sya kanu sa kanu manga walay nu na mabunu su silan a bagi nilan i mabunu sa kanu manga igan nilan, ka endu mabatalu nu Allah su nganin a sya kanu manga laleb nu, endu makapadsenggaya nin su nganin a sya kanu manga pamusungan nu, endu su Allah i labi a mataw kanu aden sa kanu manga laleb.

Saben-sabenal na su silan a tinaligkudan kanu nilan sa kanu gay a kinadsumbak nu duwa a lumpukan na su nakapalaguy na sinasat bu silan nu Shaytan sabap kanu nganin a nanggalebek nilan endu saben-sabenal na linasam nu Allah silan, saben-sabenal na su Allah na labi a bangampun a matigkel.

Hay sekanu a namalityala (namangimbenal)! Di kanu maaden sa mana su silan a namegkafir, endu pedtalun nilan kanu manga pagali nilan: amayka linemalakaw silan sya kanu lupa, ataw ka ya nilan kaaden i pembunuwa, sa umana bu ka ya nilan kaaden na sya silan lekami na di silan matay endu di silan mabunu, ka endu mabaluy nu Allah su entuba sa sendit sya kanu manga pusung nilan, endu su Allah i banguyag endu bangimatay, endu su Allah kanu nganin a penggalebeken nu na pakailay.

Endu amayka nabunu kanu sa lalan sa Allah ataw ka minatay kanu, na di ebplis su ampun a ebpun kanu Allah endu su limu na labi a mapya kumin kanu nganin a belimuden nilan.

Endu amayka minatay kanu ataw ka nabunu kanu na di ebplis na lu sa Allah kanu limuden.

Na sabap kanu nganin a limu a ebpun kanu Allah i kinapangalemek nengka sa kanilan endu umana bu ya nengka kaaden i matangel a mategas i pamusungan na di ebplis na mawa silan ebpun kanu embala-bala sa leka, na lasam ka silan endu ipangeni nengka silan sa ampun endu ipagedaya nengka silan kanu galebekan, na amayka tinaman ka na salig ka sa kanu Allah, saben-sabenal na su Allah na egkalinyan nin su manga namedsalig (sa Allah).

Amayka tabangan kanu nu Allah na da makataban sa lekanu endu amayka ibaba kanu nin na entayn san i makadtabang sa lekanu kanu ulyan nin, endu kanu Allah semalig su manga bamalityala (bamangimbenal).

Endu di kena ya kaaden nu nabi i di edtinidtwan endu entayn di edtinidtwan na mapananggit nin su nganin a da nin edtinidtuy sa gay a mawli, mawli na itapenay kanu umani ginawa su nganin a nanggalebek nin, sa ula-ula a silan na di madsalimbut.

Ngintu su entayn i mibpatyunut sa kanu kasuwat nu Allah na mana su entayn i nakadsalengkat sa lipunget nu Allah? Ya nin kadtakenan na su naraka endu ngin den a kawag a pedtamanan.

Silan na adn manga pangkatanin kanu Allah endu su Allah na pakailay sa kanu nganin a penggalebeken nilan.

Saben-sabenal na inikalimu nu Allah su manga namalityala (namangimbenal) kanu kutika a pinambuwat nin sya sa kanilan i sinugu a ebpun kanu manga ginawa nilan a pembatyan nin sa kanilan su manga tanda nin endu pedsutin nin silan, endu bamandun nin silan sa kitab endu ungangen, sa apya ya nilan kaaden kanu nawna i di ebplis na sya sa katadingan a mapayag.

Ngintu kanu kutika a nasugat kanu na mawag (sa Uhud) na nasugat nu mambu su kuntra sa naka-duwa (sa Bad’r), pidtalu nu: endaw (nakasungu i nakasugat sa lekami) ba nan? Edtalu ka (Muhammad): sekanin na ebpun kanu manga ginawa nu, saben-sabenal na su Allah kanu uman i enggagaisa na pakagaga.

Endu su nganin a nakasugat sa lekanu sa kanu gay a kinadsumbak nu duwa a lumpukan, na sugut nu Allah ka endu nin katawan su manga bamalityala (bamangimbenal).

Endu nin katawan su silan a manga namagigiling (mimunafiq), endu pidtalu sa kanilan: sya kanu ka embunuwa kanu sa lalan sa Allah, ataw ka depensa nu (su manga ginawa nu), ya nilan pidtalu: umana bu ka katawan nami i pembunuwa na di ebplis na ebpatyunutan nami sekanu, silan (a manga munafiq) kanu kapegkafir kanu entuba a timpu na labi a masiken kumin sa kapalityala (kapangimbenal), pedtalu silan sabap kanu manga ngali nilan i di kena sya kanu manga pamusungan nilan, endu su Allah i labi a mataw kanu nganin a ibagena nilan.

Su silan a pidtalu nilan sa kanu manga suled nilan a nangasugat: umana bu ka pinaginugutan kami nilan na di silan mabunu, edtalu ka (Muhammad): na alawi nu i manga ginawa nu sa kapatay amayka ya nu kaaden i manga bantang.

Di nu bagantapa su silan a nabunu sa lalan sa Allah sa namamatay, ugayd na manga bibyag kanu pedtyakap sa kanilan (Allah), silan na bamerizkiyan-

Nangagalaw kanu nganin a inenggay sa kanilan nu Allah a ebpun kanu kalbihan nin endu banganganay silan sabap kanu silan a da nilan magos silan kanu ulyan nilan, sa da gilek sa kanilan endu di silan egkangalimeng.

Egkangalini silan sabap kanu limu a ebpun kanu Allah endu kalbihan endu saben-sabenal na su Allah na di nin dadagen i balas nu bamalityala (bamangimbenal).

Silan a sinawal nilan su Allah endu su sinugu sa kanu ulyan nu nganin a nakasugat sa kanilan a pali, kanu silan a nangapyanan endu namenggilek i balas a masla.

Su silan a pidtalwan nu manga taw: saben-sabenal na su manga taw (kuntra) na linimud nilan sa lekanu su bagel nilan na ikagilek nu silan, na naumanan silan na palityala (kabangimbenal), endu pidtalu nilan: nasasangan den sa lekami su Allah endu ngin den a kapya a egkasaligan.

Na mimbalingan silan sabap sa limu endu kalbihan a ebpun kanu Allah, da silan masugat na mawag endu inunutan nilan su kasuwatan nu Allah, endu su Allah i kigkwan sa kalbihan a masla.

Entuba silan bu a Shaytan, papegkagilek sa kanu manga tagapeda nin na di nu ipegkagilek silan, endu saki i ikagilek nu amayka ya nu kaaden na bamalityala (bamangimbenal).

Di makagkalimeng sa leka su silan a bamegkuya sa kapegkafir, saben-sabenal na di nilan kagkaydan su Allah sa enggaga-isa, ya kyug nu Allah na di nin baluyn sa kanilan i umun lu sa gay a mawli, endu kanilan i siksa a masla.

Saben-sabenal su silan a inisambi nilan su kapegkafir sa kabalityala (kabangimbenal) na di nilan den a benal kagkaydan su Allah sa enggaga-isa, endu kanilan i siksa a masakit.

Di antapen nu silan a namegkafir i su binatya nami sa kanilan na makagkapya sa kanu manga ginawa nilan, pembatyan nami bu sa kanilan ka endu silan egkadsisinggumanan na dusa, endu kanilan i siksa a mamelusak.

Di kena ya kaaden nu Allah i tagaken nin su manga bamalityala (bamangimbenal) sa kanu nganin a kaaden nu (kapedsimbul kanu manga munafiq), taman sa makasenggay su malat kanu mapya, endu di kena ya kaaden nu Allah i ipasandeng nin sa lekanu su di gailay ugayd na su Allah na bamilin nin kanu manga sinugu nin i kagkahanda nin, na palityala (pangimbenal) kanu sa kanu Allah endu kanu manga sinugu nin, endu amayka malityala (mangimbenal) kanu endu enggilek kanu na lekanu i balas a masla.

Endu di antapen nu silan a ipedsingit nilan su nganin a inenggay sa kanilan nu Allah a ebpun kanu kalbihan nin a mapya sa kanilan, ugayd na sekanin na mawag sa kanilan, papegkukungen silan sa kanu nganin a inidsingit nilan ba entu sa gay a mawli, endu kanu Allah i kawarisan sa kanu manga langit endu lupa, endu su Allah kanu nganin a penggalebeken nu na mataw.

Saben-sabenal na nakineg nu Allah su kadtalu nu silan a namedtalu (Yahudi): saben-sabenal na su Allah na pakanasisita endu sekami i manga kawasa, isulat nami su nganin a pidtalu nilan endu su kabamunu nilan sa manga nabi sa di kena bantang, endu edtalun nami i tukawi nu su siksa a pakatutung.

Su entuba na sabap kanu nganin a pinggalebek nu manga lima nu, endu saben-sabenal na su Allah na di kena salimbuten kanu manga ulipen nin.

Silan a ya nilan kadtalu: saben-sabenal na su Allah na pinamitwan kami nin sa di kami malityala (mangimbenal) kanu sinugu taman sa di nin madtapik sa lekami i ipedsiken (Qurban) a pegkanen sekanin na apuy, edtalu ka (Muhammad): saben-sabenal na nadtapik sa lekanu nu manga sinugu a nawna sa laki i manga tanda, endu su kadtalu nu, ngintu ka pinamunu nu silan amayka ya nu kaaden i manga bantang?

Na amayka pinambudtud ka (Muhammad) nilan na pinambudtud bun su manga sinugu a nawna sa leka a nadtapik nilan i manga tanda endu kitab (na indawan) endu kitab a masigay (banutulu sa atulan a mapya).

Uman i ginawa na makatepeng sa kapatay endu ya bu kapedtapenay sa lekanu kanu manga balas nu na sa gay a mawli, na entayn i nakatangka sa apuy, endu iludep sa surga na saben-sabenal na nakataban, endu da uyag-uyag sa dunya ya tabya na kapegkakalini a makabimban.

Di ebplis na mabatalu kanu sya kanu manga tamuk nu endu manga ginawa nu, endu di ebplis na makineg nu ebpun kanu silan a inenggan sa kitab a nawna sa lekanu endu ebpun sa kanu silan a namedsakutu i lingasa a madakel, endu amayka edsabar kanu endu enggilek kanu na saben-sabenal na entuba i kapedtimamel sa kanu manga galebekan.

Endu kanu kutika a kinamalan nu Allah su pasad nu silan a inenggan sa kitab (Yahudi endu Nasrani) i di ebplis na makapayag nu intuba sa kanu manga taw, endu di nu makapagena i entuba, na inipagena nilan sa kanu bala nu manga bigkugung nilan endu inidsambi nilan sa alaga a paydu, na ngin den a kawag nu nganin a ipedsambi nilan.

Di ka mangantap (Muhammad) su silan a egkangagalaw sabap kanu nganin a pinggula nilan (a mawag) endu ya nilan egkalinyan na mapamedta silan sa kanu nganin a da nilan manggalebek, na di ka mangantap silan sa makalepas ebpun kanu siksa, endu kanilan i siksa a masakit.

Endu su Allah i kigkuwan sa manga langit endu lupa, endu su Allah kanu langun nu enggagaisa na pakagaga.

Saben-sabenal na sya kanu kinapamaluy sa kanu manga langit endu lupa endu kapedsukelya nu magabi endu malamag i di ebplis na manga tanda kanu manga bala-akal.

Su silan a pedtademan nilan su Allah sa bamedtindeg endu bamangayan, endu kanu kapedtakilid nilan endu bamikilen nilan su kinapamaluy kanu manga langit endu lupa, pedtyakap sa lekami (Allah) da nengka baluya i nya ba sa damangyas, mahasuti ka, na lepas kami kanu siksa nu apuy.

Pedtyakap sa lekami (Allah), saben-sabenal na seka na entayn i iludep nengka sa naraka na saben-benal na inilusak nengka endu da kanu manga kafir i mamakadtabang.

Pedtyakap sa lekami (Allah), saben-sabenal na sekami na nakineg nami i bananawag a banawag sa kabalityala (kabangimbenal), sa palityala (pangimbenal) kanu sa kanu pedtyakap sa lekanu, na nalityala (nangimbenal) kami, pedtyakap sa lekami (Allah) na ampun ka sa lekami su manga dusa nami endu punas ka sa lekami su manga mawag nami endu imatayi kami nengka salta kanu manga mapya a taw.

Pedtyakap sa lekami (Allah), inggay nengka sa lekami su nganin a inibpasad nengka sa lekami kanu manga sinugu nengka endu di kami nengka ibelusak sa gay a mawli, saben-sabenal na seka na di nengka baluban su pasad.

Na tinalima sa kanilan nu pedtyakap sa kanilan (Allah): saben-sabenal na saki (Allah) na di ku pandayan su mga galebek nu - mama ataw ka babay, su sabad sa lekanu na ebpun kanu sabad, na su silan a namembakwit endu pinamugaw kanu manga dalpa nilan, endu sinikut silan sya kanu lalan sa laki endu mimbunuwa silan endu nabunu silan, na di ebplis na punasen ku sa kanilan su manga mawag nilan endu di ebplis na paludepen ku silan kanu manga surga a belagilay sa kababan nin i manga lawas na ig, sa balas a ebpun kanu Allah, endu su Allah na aden sa lekanin i mapya a balas.

Di ka (Muhammad) mabimban nu kapebpalin-palin nu manga kafir sa manga dalpa.

Kapegkakalini a paydu, mawli na ya nilan kadtamanan na su naraka endu ngin den a kawag a bagiganan.

Ugayd na su silan a inikagilek nilan su pedtyakap kanilan (Allah) na kanilan i manga surga a belagilay kanu kababan nin i manga lawas na ig sa tatap silan lu ba, sa inidtatalama ebpun kanu Allah, endu su nganin a lu sa Allah na labi a mapya kanu manga taw a mapya.

Endu saben-sabenal na kaped kanu manga taw nu kitab (Yahudi endu Nasrani) i balityala (bangimbenal) kanu Allah endu su nganin a initulun sa lekanu endu su nganin a initulun sa kanilan sa magilek silan sa Allah, di nilan ipedsambi su manga tanda nu Allah sa alaga a paydu, entuba na kanilan i balas ebpun kanu pedtyakap kanilan (Allah), saben-sabenal na su Allah na labi a malangkas i kagkwinta.

Hay sekanu a namalityala (namangimbenal)! Edsabar kanu endu edsasabara kanu, endu tatap nu (su jihad) endu ikagilek nu su Allah, ka endu malemu-lemu sa lekanu i kataban nu.

Hay sekanu a manga taw! Ikagilek nu su pedtyakap sa lekanu (Allah) a nangaden sa lekanu a ebpun sa isa ka ginawa (Adam) endu inaden nin ebpun lun i kaluma nin (Hawwa) endu mimbwad ebpun sa kanilan i manga mama a madakel endu manga babay, endu ikagilek nu su Allah a sekanin i ipebpapangenya nu, endu su kadsusuled (sa matebped), saben-sabenal na su Allah na ya nin kaaden sa lekanu banuliman.

Endu inggay nu kanu manga ilu su manga tamuk nilan, endu di nu pedsambi sa mawag su mapya nin, endu di nu pegkan su manga tamuk nilan lu kanu manga tamuk nu, saben-sabenal na entuba na dusa a masla.

Endu amayka egkagilekan kanu sa di kanu makambantangan kanu manga ilu na pangaluma nu su nganin a mapya sa lekanu ebpun kanu manga babay sa duwa, ataw ka telu ataw ka pat, amayka egkagilekan kanu sa di kanu makambantangan na isa bu ataw ka su gamilikan nu manga kawanan nu (manga ulipen), entuba i labi a masiken a di nu kadsulamig.

Endu inggay nu kanu manga babay i sunggudan nilan sa palyugat, na amayka nangapyanan sa lekanu sa enggaga-isa ebpun lun su isa a ginawa na kan kanu lun sa belemeden a penggugunanamen.

Di nu ibagenggay sa kanu manga untengaw su manga tamuk nilan a binaluy nu Allah sa lekanu sa ipedtuganul, endu rizki nu silan lu ba endu pambalegkas nu silan, endu edtaluy nu silan sa kadtalu a mananaw.

Endu batalu nu su manga ilu taman sa amayka masampay nilan i kapegkaluma (kabaligan silan), na amayka natusan nu sa kanilan i ungangen na inggay nu sa kanilan su manga tamuk nilan, endu di nu pegkan i tamuk nilan sa pendaletan ataw ka sambut sa kanu kagkasela nilan (kabalig nilan) endu entayn i ya nin kaaden i kawasa na tumigkel (di mapabayad sa kinatyakap nin sa manga ilu), endu entayn i ya nin kaaden i egkasimpitan na kuman sa nangasasangan, na amayka maka-enggay nu sa kanilan su manga tamuk nilan na padsaksi kanu sa kanilan, endu nasasangan den su Allah a saksi.

Kanu manga mama i umun lu kanu nganin a natagak nu duwa a mimbata endu su manga pagali (a masiken), endu kanu manga babay i umun lu kanu nganin a natagak nu duwa a mimbata endu su manga pagali (a masiken), ebpun kanu nganin a paydu lun ataw ka madakel, su umun a palyugat.

Endu amayka tinumalabuk kanu kapembad (sa tamuk) su manga pagali endu manga ilu endu pamakanasisita (a da kanilan a umun), na enggay nu silan ebpun lun, endu edtalu nu sa kanilan i kadtalu a mapya (mananaw).

Endu enggilek su silan a umana bu ka katagak nilan kanu ulyan nilan i manga mawli a taw a manga lubay, na ipangandam nilan silan, na ikagilek nilan su Allah, endu edtalu silan sa kadtalu a matidtu.

Saben-sabenal na su silan a pegkan sa tamuk nu manga ilu sa kapedsalimbut, na ya nilan bu pegkanen sya kanu manga tyan nilan na apuy, endu makaludep silan sa naraka.

Inepangalintabun sa lekanu nu Allah sya kanu manga wata nu, kanu mama i upaman a umun nu duwa a babay, na amayka ya nilan kaaden i manga babay a labi a madakel kumin sa duwa na kanilan i duwa kanu telu (2/3) kanu nganin a natagak nin, endu amayka ya nin kaaden isa kataw a babay na lekanin i tenga, endu kanu duwa a lukes nin i uman isa na isa kanu nem (1/6) ebpun kanu nganin a natagak nin amayka aden sa lekanin i wata a mama, na amayka da maaden sa lekanin i wata endu ya pakapangiwalis na su duwa a lukes nin na kani ina nin i isa kanu telu (1/3), na amayka aden sa lekanin i manga suled na kani ina nin i isa kanu nem (1/6), ebpun kanu ulyan nu inepangalintabun sekanin ataw ka bayadan (utang), su manga lukes nu endu su manga wata nu na di nu katawan u entayn i masupeg sa lekanu a makangguna, palyugat a ebpun sa kanu Allah, saben-sabenal na su Allah na ya nin kaaden na labi a mataw a mawngangen.

Endu lekanu (manga kaluma a mama) su tenga (1/2) kanu nganin a natagak nu manga kaluma nu amayka da maaden sa kanilan i wata, na amayka aden sa kanilan i wata na lekanu i isa kanu pat (1/4) ebpun kanu nganin a natagak nilan, kanu ulyan nu tutuma a inepangalintabun nilan sekanin ataw ka bayadan (utang), endu kanilan (manga kaluma a babay) i isa kanu pat (1/4) ebpun sa kanu nganin a natagak nu amayka da maaden sa lekanu i wata, na amayka aden sa lekanu i wata na kanilan i isa kanu walu (1/8) ebpun kanu nganin a natagak nu, kanu ulyan nu tutuma a inepangalintabun nu sekanin ataw ka bayadan (utang), endu amayka ya nin kaaden i mama a bangiwalisan sa da wata nin da lukes nin, ataw ka babay a aden sa lekanin i suled (a mama ataw ka babay), na uman isa ebpun sa kanilan duwa na isa kanu nem (1/6), na amayka ya nilan kaaden i labi a madakel kumin kanu entuba na silan na mamakadtumpuk sya kanu isa kanu telu (1/3), kanu ulyan nu tutuma a inepangalintabun sekanin ataw ka bayadan (utang), sa di makagkayd, tutuma a ebpun sa Allah, endu su Allah na labi a mataw a matigkel.

Entuba i manga dulunan nu Allah, endu entayn i malityala (mangimbenal) sa kanu Allah endu sa kanu sinugu nin na paludepen nin sekanin sa manga surga belagilay sa kababan nin i manga lawas na ig a tatap silan lu ba, endu entuba i taban a masla.

Endu entayn i supaken nin su Allah endu su sinugu nin endu talapasen nin su manga dulunan nin, na iludep nin sekanin sa naraka sa tatap sekanin lu ba, endu aden sa lekanin i siksa a belusak.

Endu su silan a bamenggalebek sa maledsik ebpun kanu manga babay nu, na padsaksi kanu sa kanilan sa pat kataw ebpun lekanu (manga mama a Muslim a kasaligan), na amayka midsaksi silan na ligken nu silan sya kanu manga walay taman sa kapatay nilan, ataw ka mamaluy su Allah sa kanilan sa ukit (mansukh i nya ba a ayatan).

Endu su duwa (a mama) a minggalebek sa maledsik ebpun sa lekanu na pakapasangi nu silan, na amayka midtawbat silan duwa endu nagumbaya silan duwa na pandaya nu silan duwa, saben-sabenal na su Allah na labi a banawbat a malimu.

Ya bu man kadtawbat sa Allah na kanu silan a penggalebek sa malat sa di nilan katawan, mawli na edtawbat silan sa masiken (mangagan), na entuba silan i tawbaten nu Allah, endu ya kaaden nu Allah na labi a mataw a mawngangen.

Endu da tawbat nu silan a penggalebek sa manga malat taman sa nawma su isa sa kanilan nu kapatay na midtalu sa: saben-sabenal na saki na midtawbat aku saguna, endu da bun kanu silan a bamebpatay sa manga kafir, entuba na inipagadil nami sa kanilan i siksa a masakit.

Hay sekanu a namalityala (namangimbenal)! Di kena halal sa lekanu i pangiwalisan nu su manga babay sa bensi, endu di nu lemigkena silan sa embaba silan kanu kaped kanu nganin a inenggay nu sa kanilan, ya tabya na makanggula silan sa maledsik a mapayag, endu ipagubida nu silan sa mapya, na amayka kabensyan nu silan na kalu-kalu su kapegkabensi nu kanu enggaga-isa na baluyn lu ba nu Allah i mapya a madakel.

Endu amayka egkalini kanu sa kadsambi sa kaluma kanu nambetadan nu kaluma endu nakanggay nu sa isa sa kanilan i masela a tamuk (su sunggudan nilan), na da kanu kemwa lun sa enggaga-isa, ngintu pegkwa kanu lun sa kataksilan endu kadusan a mapayag!?

Endu panun i kapegkwa nu lun sa ula-ula a saben-sabenal na nalayaman nu sabad sa lekanu su sabad, endu nakamalan nilan sa lekanu su pasad a mabagel.

Endu di nu bangaluma su napangaluma nu manga ama nu ebpun kanu manga babay ya tabya na su nganin a nawna (da pan agama), saben-sabenal sa lekanin na ya nin kaaden na maledsik endu kalipu-lipunget endu mawag a ukit.

Iniharam sa lekanu (a manga mama) su manga ina nu endu su manga wata nu a manga babay endu su manga suled nu a manga babay endu su manga babu nu (suled na ama) endu su manga babu nu (suled na ina) endu su manga pakiwatan a babay (sa suled a mama) endu su manga pakiwatan a babay (sa suled a babay) endu su manga ina nu sa kinapasusu sa lekanu endu su manga suled nu sa kinasusu endu su manga panugangan nu (a manga babay) endu su manga patalidwan nu a sya kanu tyakap nu ebpun kanu manga kaluma nu a nakambalagyuma nu silan, na amayka da kanu maaden sa nakambalagyuma nu silan na kena mawag sa lekanu endu su manga kaluma nu manga wata nu a minukit sa manga taldas nu endu su kapanduwaya nu sa kanu pageletan nu duwa a edsuled, ya tabya na su nganin a saben-sabenal na nawna (timpu a dala pan su Islam), saben-sabenal na su Allah na ya nin kaaden na labi a bangampun a malimu.

Endu su manga kaluman a manga babay ebpun kanu manga babay, ya tabya na egkamilikan nu manga kawanan nu (ulipen), palyugat nu Allah sa lekanu, endu inihalal sa lekanu su nganin kanu bala nu entuba i kapangeni nu sabap kanu manga tamuk nu sa kalimpyu nu (kanu manga ginawa nu) sa kena ipedzina, na su nganin a nagkakalinyan nu su entuba sa ebpun sa kanilan na ienggay nu sa kanilan su manga sunggudan nilan sa palyugat, endu da dusa nu sya kanu nganin a pinagayunan nu sekanin ebpun kanu ulyan nu kinabpalyugat, saben-sabenal na su Allah na ya nin kaaden na labi a mataw a mawngangen.

Endu entayn i di makagaga ebpun sa lekanu sa kapaydu nu tamuk sa kapangaluma nin sa manga kaluman a bamalityala (bamangimbenal), na ebpun kanu nganin a egkamilikan nu manga kawanan nu (manga ulipen nu) ebpun kanu manga laga nu a bamalityala (bamangimbenal), endu su Allah i mataw kanu palityala (kabangimbenal) nu, su sabad sa lekanu na ebpun sa kanu sabad, pangaluma nu silan sa sugut nu manga lukes nilan endu itunay nu sa kanilan su manga sunggudan nilan sa mapya, sa limpyu, di kena i pedzina endu di kena bangaden sa tagapeda sa kapedzina sa masulen, na amayka nagkaluma silan na amayka mingguledsik silan nan a masala silan sa sabad sa kanu nganin a kasalan nu manga daludaya sa kapapegkapasang, su entuba na kanu entayn nagilekan sa kapengguledsik ebpun sa lekanu, endu su kadsabar nu na labi a mapya sa lekanu, endu su Allah na labi a bangampun a malimu.

Ya kalinyan nu Allah na makapayag nin sa lekanu endu matutulu kanu nin sa kanu manga lalan nu silan a nangawna sa lekanu, endu matawbat kanu nin, endu su Allah na labi a mataw a mawngangen.

Endu su Allah na ya nin kalinyan na matawbat kanu nin, endu ya kalinyan nu silan a pebpatyunut sa kanu kyug na ginawa na makadsulamig kanu sa kadsulamig a masela.

Ya kalinyan nu Allah na papegkapegkagan kanu nin, endu binaluy su manusya sa malubay.

Hay sekanu a namalityala (namangimbenal)! Di nu pegkan su manga tamuk nu sa pageletan nu sa mawag, ya tabya na maaden sa kapendagang sa bagayunan nu, endu di nu pembunuwa su manga ginawa nu, saben-sabenal na su Allah na ya nin kaaden sa lekanu na labi a malimu.

Endu entayn i enggalebek sa entuba sa kabagukag endu kapedsalimbut na di ebplis na paludepen nami sekanin sa apuy, endu ya kaaden nu entuba sa kanu Allah na malemu.

Amayka edsanggilan nu i manga dusa a masela a ipedsapal sa lekanu na punasen nami sa lekanu su manga mawag nu endu paludepen nami sekanu sa kaludepan a mapulu (surga).

Endu di nu manganganay su nganin a kinalabi nu Allah sabap sa lekanin su sabad sa lekanu kanu sabad, kanu manga mama i umun ebpun kanu nganin a pinggalebek nilan endu kanu manga babay i umun ebpun kanu nganin a pinggalebek nilan, endu pangeni kanu sa kanu Allah ebpun kanu kalbihan nin, saben-sabenal na su Allah na ya nin kaaden kanu langun nu enggaga-isa na labi a mataw.

Endu kanu uman isa na binaluy nami i nangasama kanu nganin a natagak nu duwa a lukes endu su manga pagali endu su silan a napalutan nu manga kawanan nu (namakadtabanga), na inggay nu sa kanilan su umun nilan, saben-sabenal na su Allah na ya nin kaaden kanu langun nu enggaga-isa na saksi.

Su manga mama i pedtyakap kanu manga babay sabap kanu nganin a inilabi nu Allah su sabad sa kanilan kanu sabad, endu sabap kanu nganin a nambaranggya nilan kanu manga tamuk nilan, na su manga mapya a manga babay endu su bamaginugut endu su bamalihala (sa kanu manga ginawa nilan u da su manga kaluma nilan) sabap kanu nganin a tutulu nu Allah, endu su silan a manga babay a bangandamen nu i kasulang nilan (sa kanu manga kaluma nilan) na pangindaw nu silan, endu pitas nu silan sya sa kanu manga bagiganan endu betay nu silan (sa di pembaneg), na amayka pinaginugutan kanu nilan na da kanu den bangilay sa kanilan sa ukit, saben-sabenal na su Allah na ya nin kaaden na labi a mapulu a masla.

Endu amayka inandam nu i kaumpalak sa pageletan nilan duwa na papeyt kanu sa bangangatulan ebpun sa pamilya nin (mama) endu bangangatulan ebpun sa pamilya nin (babay), amayka ya nilan egkalinyan duwa i kapagumbaya na tutulun nu Allah su pageltan nilan duwa, saben-sabenal na su Allah na ya nin kaaden na labi a mataw a sabut.

Endu simba nu su Allah, endu di kanu semakutu sa lekanin sa enggaga-isa endu su duwa a lukes na pepyanan endu su manga pagali endu su manga ilu endu su manga miskinan endu su manga pagubay a pagali endu su pagubay a di kena pagali endu su manga tagapeda a pakandalayama endu su wata na lalan (natangen sa lalan sabap sa ka da na tamuk) endu su nganin a egkamilikan nu manga kawanan nu (manga ulipen nu), saben-sabenal na su Allah na di nin kalinyan su entayn a ya nin kaaden na masandag a bemamasla.

Su silan a bamedsingit endu ipedsugu nilan su kadsingit endu ibamagena nilan su nganin a inenggay sa kanilan nu Allah ebpun kanu kalbihan nin, endu inipagadil nami kanu manga kafir i siksa a bamelusak.

Endu su silan a pembaranggyan nilan su manga tamuk nilan sa ibabamagilay-ilay sa kanu manga taw endu di silan bamalityala (bamangimbenal) sa Allah endu sa gay a mawli, endu entayn i maaden su shaytan sa lekanin a tagapeda, na mawag a benal a tagapeda.

Endu ngin i makagkayd sa kanilan umana bu ka nalityala (nangimbenal) silan sa Allah endu sa gay a mawli endu sa kinambaranggya nilan ebpun kanu nganin a inirizki sa kanilan nu Allah, endu ya kaaden nu Allah sa kanilan na mataw.

Saben-sabenal na su Allah na di edsalimbut sa (apya) mana tepung, endu su amayka maaden sekanin (a mana tepung) sa mapya na takepen nin sekanin endu inggay nin ebpun sa lekanin i balas a masla.

Na panun u amayka itingguma nami (lu sa gay a mawli) ebpun kanu uman i lumpukan i saksi (su manga nabi nilan), endu itingguma nami seka (Muhammad) sa kanilan a saksi.

Kanu entuba a gay na kalinyan nu silan a namegkafir endu sinungkang nilan su sinugu, sa umana bu ka makapapagidsan silan kanu lupa, endu di nilan makapagena sa kanu Allah i bityala.

Hay sekanu a namalityala (namangimbenal)! Di nu pedsikeni su sambayang sa sekanu na egkangalangut taman sa katawan nu i pedtalun nu endu su Junub (linemyu su ig na lawas sa pedtibaban) ya tabya na pedtepas bu sa kanu lalan (masjid) taman sa makabpaygu kanu, endu amayka ya nu kaaden i pendalu ataw ka sa lakawan, ataw ka nakawma su isa ebpun sa lekanu sa kapegka-angay sa ig, ataw ka inimbalagyuma nu su manga kaluma nu, na da egkatun nu a ig, na usal kanu sa budta a suti (tayammum), na isapu nu sa kanu manga beneng nu endu sa kanu manga lima nu, saben-sabenal na su Allah na nya nin kaaden na labi a mamelasam a mangampun.

Ngintu da nengka mailay su silan a inenggan sa umun kanu kitab (Yahud)? Inisambi nilan i katadingan endu ya nilan egkalinyan na makasulak kanu sa lalan.

Endu su Allah i labi a mataw kanu manga satru nu, endu nasasangan den su Allah tagampil endu nasasangan den su Allah a makadtabang.

Kaped kanu silan a mga Yahudi i banalinen nilan su kadtalu (sya sa Taurat) kanu manga nambetadan nin, endu ya nilan pedtalun: nakineg nami endu sinupak nami, endu pakikineg ka di kena nakineg nengka, endu sabuti kami sabap kanu kabigkug nu manga dila nilan endu kabanila-tila sa kanu agama, endu umana bu ka ya nilan nadtalu: nakineg nami endu pinaginugutan nami endu pakikineg ka endu ilay kami na di ebplis na ya nin kaaden na labi a mapya sa kanilan endu labi a matidtu, ugayd na namulkan silan nu Allah sabap sa kanu kinagkafir nilan, na di bamalityala (bamangimbenal) silan ya tabya na paydu.

Hay sekanu a inenggan sa kitab (Yahudi endu Nasrani): palityala (pangimbenal) kanu sa kanu nganin a initulun nami (Qur’an) a paka-ayun kanu nganin a nan sa lekanu, sa kanu unan u kapunas nami kanu manga beneng (nu), na palengin nami sekanin sa kanu manga taligkudan nin, ataw ka kamulkan nami silan sa mana su kinamulka nami kanu kigkwan sa saptu, endu ya kaaden nu kasuguan nu Allah na manggula.

Saben-sabenal na su Allah na di nin bagampunen su kasakutu sa lekanin, endu bagampunen nin su salakaw kanu entuba sa kanu entayn i magkahanda nin, endu entayn i semakutu sa kanu Allah na saben-sabenal na nakapangaden sa kadusan a masla.

Ngintu da nengka katawi su silan a belimpyun nilan su manga ginawa nilan? Ugayd na su Allah na belimpyun nin su entayn i kagkahanda nin, endu di silan madsalimbut sa apya paydu.

Ilay ka (Muhammad) u panun i kabanatebu-tebu nilan sa Allah sa kalbutan, endu nasasangan den su entuba sa dusa a mapayag.

Ngintu da nengka mailay (Muhammad) su silan a inenggan sa umun ebpun kanu kitab, bamalityala (bamangimbenal) silan kanu manga balahala, endu ya nilan pedtalun sa kanu silan a namegkafir na silan i labi a nangatutulu kumin kanu silan a namalityala (namangimbenal) i lalan.

Entuba su silan (Yahudi) na namulkan nu Allah, endu entayn i namulkan nu Allah na di ka den a benal makatun sa lekanin sa makadtabang.

Da sa kanilan i umun ebpun kanu kadatu, na kagina ka maytu na di nilan enggan su manga taw sa apya mana tepung.

Ataw ka pendengkin nilan su manga taw sa kanu nganin a inenggay sa kanilan nu Allah ebpun kanu kalbihan nin? na saben-sabenal na inenggay nami kanu pamilya ni Ibrahim su kitab endu su ungangen, endu inenggay nami sa kanilan i kadatu a masla.

Na kaped sa kanilan i nalityala (nangimbenal) sa lekanin, endu kaped sa kanilan i tinemaligkud sa lekanin, endu nasasangan den su naraka a pegkalaw-kalaw (sa kanu namegkafir).

Saben-sabenal na su namegkafir kanu manga tanda nami, na di ebplis na iludep nami silan sa apuy, uman magepul su manga lanitan nilan na sambyan nami silan sa lanitan a salakaw lun ka endu nilan kananaman su siksa, saben-sabenal na su Allah na ya nin kaaden na labi a mapulu a mawngangen.

Endu saben-sabenal na su silan a namalityala (namangimbenal) endu minggalebek sa manga mapya, na di ebplis na paludepen nami silan kanu manga surga a belagilay sa kababan nin i manga lawas na ig sa tatap silan lu ba, aden sa kanilan lu ba i manga kaluma a manga suti, endu paludepen nami silan kanu silung a malebung.

Saben-sabenal na su Allah na ipedsugu nin sa lekanu i makatunay nu su manga salig sa kanu kigkwan lun, endu amayka atulen nu su pageletan nu manga taw na ya nu i-atul na su bantang, saben-sabenal na su Allah na mapya ged i ibangindaw nin ba entu sa lekanu, saben-sabenal na su Allah na ya nin kaaden na labi a pakakineg a pakilay.

Hay sekanu a namalityala (namangimbenal)! Paginuguti nu su Allah endu paginuguti nu su sinugu endu su egkaunutan ebpun sa lekanu, na amayka namakambabangkyanga kanu sa enggaga-isa na imbalingan nu sekanin lu sa kanu Allah (Qur’an) endu kanu sinugu (Hadith), amayka ya nu kaaden i bamalityala (bamangimbenal) kanu sa Allah endu gay a mawli, entuba i mapya endu labi a mapya a egkambalinganan.

Ngintu da nengka mailay (Muhammad) su silan a bamagigiling sa saben-sabenal na namalityala (namangimbenal) silan kanu nganin a initulun sa leka endu kanu nganin a initulun kanu nawna sa leka, egkalini silan sa mamakapamagatula silan lu sa kanu salakaw sa atulan nu Allah, endu saben-sabenal na sinugu silan sa kagkafir nilan lu ba, endu ya kyug nu Shaytan na matading kanu nin sa katading a mawatan.

Endu amayka edtalun sa kanilan: sya kanu sa kanu nganin a initulun nu Allah endu kanu sinugu, na mailay nengka su manga munafiq a elenen ka nilan sa kapebpelen.

Na panun u amayka masugat silan na tyuba sabap kanu nganin a pinggalebek nu manga lima nilan, mawli na nakawma silan sa leka (Muhammad) sa edsasapa silan sa Allah sa da nagkahanda nilan ya tabya na kapamyapya endu tutulu.

Entuba silan na katawan nu Allah su nganin a sya kanu manga pusung nilan, na pandaya ka silan endu indaw ka silan endu edtalu ka sa kanilan sya kanu manga ginawa nilan i kadtalu a mabagel.

Endu da kinasugu nami sa sinugu ya tabya na endu kapaginugutan sa sugut nu Allah, umana bu ka saben-sabenal sa kanilan kanu kutika a kinadsalimbut nilan sa kanu manga ginawa nilan ka tiningguma ka (Muhammad) nilan, na nangeni silan sa ampun kanu Allah endu inipangeni silan sa ampun nu sinugu, na matun nilan su Allah a labi a banawbat a malimu.

Na di kena, idsapa ku kanu pedtyakap sa leka (Allah) i di silan malityala (mangimbenal) taman sa di ka nilan makapangangatulan (Muhammad) sya kanu nganin a di nilan bamagayunan mawli na di nilan egkatun kanu manga ginawa nilan kambida ebpun kanu nganin a kinaatul nengka, endu semangkup silan sa kasangkup.

Endu umana bu ka saben-sabenal sa lekami na inibpalyugat nami sa kanilan i bunu nu su manga ginawa nu ataw ka lyu kanu ebpun sa kanu manga dalpa nu na di nilan enggulan i entuba ya tabiya na paydu sa kanilan, endu umana bu ka saben-sabenal na pinggalebek nilan su nganin a inepangindaw sa kanilan na entu na di ebplis na ya nin kaaden na mapya sa kanilan, endu kailutan su kagkabagel.

Endu kagina ka maytu di ebplis na enggan nami silan ebpun sa lekami sa balas a masla.

Endu tutulun nami silan sa lalan a matidtu.

Endu entayn i maginugut sa kanu Allah endu kanu sinugu, na entuba silan i kaped kanu inekalimu nu Allah silan ebpun kanu manga nabi endu kanu bamangimbenal, endu kanu nangashahid endu mapya i entuba silan a tagapeda.

Su entuba a limu na ebpun sa kanu Allah endu nasasangan den su Allah a makataw.

Hay sekanu a bamalityala (bamangimbenal)! Kamali nu i kaabung nu (sya kanu kambunuwa) endu lyu kanu sa lumpuk-lumpuk ataw ka lyu kanu sa isa ka lumpukan.

Endu saben-sabenal na kaped sa lekanu na pendudulumbat (sa kapengganat) na amayka masugat kanu na bataluan na ya nin madtalu: saben-sabenal na inikalimu aku nu Allah kagina da aku maaden sa kaped sa kanilan a shahid.

Endu amayka masugat kanu na limu nu Allah na di ebplis na madtalu nin: mana da maaden sa pageletan nu endu sa lekanin i lilini, umana bu ka ya ku kaaden i kaped sa kanilan na makataban aku sa kataban.

Na embunuwa sa lalan sa Allah su silan a pebpasan nilan su uyag-uyag sa dunya sa gay a mawli endu su entayn i pembunuwa sa lalan sa Allah na mabunu (mashahid) ataw ka makataban na di ebplis na inggay nami sa lekanin su balas a masla.

Endu ngin i lekanu? Ka di kanu pembunuwa sa lalan sa Allah endu su bamangumisen a manga mama endu manga babay endu su manga wata a ya nilan pedtalun: pedtyakap sa lekami (Allah), palyu kami sa kanu nya a dalpa a salimbuten i manga taw nin, endu baluy ka sa lekami ebpun sa leka i kaunutan a makadtabang, endu baluy ka sa lekami ebpun sa leka i makadtabang.

Su silan a bamalityala (bamangimbenal), pembunuwa silan sa lalan sa Allah, endu su silan a namegkafir pembunuwa silan sa lalan sa kanu balahala, na imbunuwa nu su kangaunutan nu manga Shaytan, saben-sabenal na su antangan nu Shaytan na ya nin kaaden na malubay.

Ngintu da nengka katawi (Muhammad) su silan a pidtalu sa kanilan: ungen nu su manga lima nu, (da kanu pan pembunuwa), endu itindeg nu su sambayang endu itapenay nu su zakat, na engguna su inibpalyugat sa kanilan su kambunuwa na su lumpukan sa kanilan na ipegkagilek nilan su manga taw sa mana gilek nilan sa Allah ataw ka labi lun pan, endu pidtalu nilan: pedtyakap sa lekami (Allah) enduken ka inibpalyugat nengka sa lekami i kambunuwa, umana bu ka pinaiseg kami nengka sa timpu a masiken, edtalu ka (Muhammad): kapegkakalini sa dunya na paydu, endu su gay a mawli na labi a mapya kanu entayn i minggilek, endu di kanu madsalimbut sa apya paydu.

Apya endaw kanu maaden na magos kanu nu kapatay, apya ya nu kaaden i sya kanu pan sa mansyun a midtawan-tawan, endu amayka masugat silan na mapya na madtalu nilan: nya na ebpun sa kanu Allah, endu amayka masugat silan na mawag na ya nilan madtalu: nya na ebpun sa leka (Muhammad), edtalu ka (Muhammad) i su langun na ebpun sa Allah, na ngin silan a lumpukan a mana su di silan makasabut sa kadtalu.

Su nganin a nakasugat sa leka a mapya na ebpun sa kanu Allah, endu su nganin a nakasugat sa leka a malat na ebpun sa kanu ginawa nengka, endu inipapayt nami seka (Muhammad) kanu manga taw sa kapedsugu, endu nasasangan den su Allah a saksi.

Entayn i maginugut sa kanu sinugu (Muhammad) na saben-sabenal na pinaginugutan nin su Allah, endu entayn i temaligkud na da nami seka (Muhammad) ipapayt sa kanilan sa kapedtuganul (sa kanilan).

Endu ya nilan kadtalu: kapaginugut, na amayka nakalyu silan sa leka, na sambyan nu lumpukan sa kanilan sa salakaw kanu pedtalun nengka (sambiyan nilan su kadtalu nu Rasulullah), endu su Allah na ipedsulat nin su nganin a pedsalinen nilan, na pandaya ka silan (Muhammad) endu salig ka sa Allah, endu nasasangan den su Allah a egkasaligan.

Ngintu di nilan banulimanen su Qur’an? Umana bu ka ya nin kaaden i ganat sa salakaw sa kanu Allah na matun nilan lu ba i kambida-bida a madakel.

Endu amayka mawma silan na galebekan a kadtakena ataw ka makagilek, na ipayapat nilan i entuba, apya imbalingan nilan kanu sinugu endu kanu manga kigkwan kanu galebekan, na katawan i entuba nu silan a bamangandut lun ebpun sa kanilan, endu di kena su kalbihan nu Allah sa lekanu endu limu nin na di ebplis na ebpatyunutan nu su Shaytan, ya tabya na paydu.

Na embunuwa ka (Muhammad) sa lalan sa Allah, da egkabpalyugatan ya tabya na ginawa nengka, endu ipakalilini nengka sa kanu bamalityala (bamangimbenal), kalu-kalu sa kanu Allah i ungangen nin su mawag nu silan a namegkafir, endu su Allah na labi a mabagel endu labi a mapedes i siksa.

Entayn i tumabang sa tabang a mapya na maaden sa lekanin i umun lun, endu entayn i tumabang sa tabang a malat na maaden sa lekanin i umun lun, endu ya kaaden nu Allahu kanu langun na enggaga-isa na bamarihala.

Endu amayka pidsela-sela kanu sa kadsela-sela, na edsela-sela kanu sa labi a mapya lun, ataw ka imbalingan nu i entuba, saben-sabenal na su Allah na ya nin kaaden kanu langun na enggaga-isa na makwinta.

Su Allah, da kadenan ya tabya na sekanin, di ebplis na buligen kanu nin sa gay a mawli a dala kanduwa-duwa lun, endu entayn i labi a bantang kumin kanu Allah a bityala?

Na ngin sa lekanu sya kanu manga munafiq ka naduwa lumpuk kanu, endu su Allah i papembalingan sa kanilan (sa kakafiri) sabap kanu nganin a pinggalebek nilan, ngintu ya nu kyug na matutulu nu su entayn a tinadin nu Allah, na entayn i tadingen nu Allah na di den a benal makatun sa lekanin sa lalan.

Ya nilan kyug na umana bu ka egkafir kanu sa mana kinagkafir nilan na maaden kanu sa pagidsan, na di kanu bamaluy ebpun sa kanilan sa madtanggapeda taman sa di silan embakwit sya sa lalan sa Allah, na amayka nanaligkud silan na kwa nu silan endu bunu nu silan sa kanu natunan nu sa kanilan, endu di kanu bamaluy ebpun sa kanilan sa makadtabanga.

Ya tabya na su silan a pamakawma lu sa kanu lumpukan sa pageletan nu endu pageletan nilan i kapasadan ataw ka natingguma kanu nilan sa magaget kanu manga pamusungan nilan i kambunuwa nilan sa lekanu, ataw ka kambunuwa nilan kanu lumpukan nilan, umana bu ka migkahanda su Allah na di ebplis na patabanan kanu nin sa kanilan na makambunuwa kanu nilan, na amayka tagaken kanu nilan na di kanu nilan den makambunuwa endu ipayag nilan sa lekanu i sagyahatra, na da den baluya nu Allah sa lekanu kanilan i ukit.

Di ebplis na matun nu su manga kaped sa ya nilan kyug na makapatana kanu nilan endu makapatana nilan su lumpukan nilan, uman nilan imbalingan sa bataluan (sa kakafir) na i imbalingan silan lu ba, na amayka di kanu nilan tantangan sa ipayag nilan sa lekanu i sagyahatra endu ungenen nilan su manga lima nilan, na kwa nu silan endu bunu nu silan sa endaw nu silan natun, endu entuba binaluy nami sa lekanu sa kanilan i tindeg a mapayag.

Endu da maaden kanu balityala (bangimbenal) i bunun nin su balityala (bangimbenal) ya tabya na limban, endu entayn i makapatay sa balityala (bangimbenal) sa limban na kabamangun sa ulipen a balityala (bangimbenal) endu kaenggay sa kasalan kanu bangiwaris lun, ya tabya na idsadaqah nilan, na amayka ya nin kaaden i ebpun kanu lumpukan a satru nu sa sekanin na balityala (bangimbenal) na kabamangun sa ulipen a balityaya (bangimbenal), endu amayka ya nin kaaden na ganat kanu lumpukan a pageletan nu endu pageletan nilan i kapasadan na kaenggay sa kasalan kanu bangiwaris lun endu kabamangun sa ulipen a balityala (bangimbenal), na entayn i di makatun na kabpwasa sa duwa ulan a pedtutundug sa tawbat a ebpun sa Allah, endu ya kaaden nu Allah na labi a mataw a mawngangen.

Endu entayn i makabunu sa balityala (bangimbenal) sa pidtibaba na ya nin balas na naraka sa tatap lu ba endu nalipungetan nu Allah sekanin endu namulkan nin sekanin endu pinagadilan nin sekanin sa siksa a masla.

Hay sekanu a bamalityala (bamangimbenal)! Amayka belalakaw kanu sya sa lalan sa Allah na pangamad kanu, di nu pedtalu kanu entayn i minayag sa lekanu sa sela-sela i di kena ka balityala (bangimbenal) sa pagkyug kanu sa kapegkakalini sa uyag-uyag sa dunya, na kanu Allah i egkangakwa a madakel, na manan ba i kaaden nu paganay, na inikalimu kanu nu Allah na pangamad kanu, saben-sabenal na su Allah na ya nin kaaden kanu nganin a penggalebeken nu na sabut.

Di makapagidsan su namagagayan (namangintelen) ebpun kanu manga namalityala (namangimbenal) sa da sa kanilan pakagkayd, endu su namen-jihad sa lalan sa kanu Allah sa manga tamuk nilan endu manga ginawa nilan, inilabi nu Allah su namen-jihad sa manga tamuk nilan endu manga ginawa nilan kanu bamagagayan (namangintelen) sa pangkatan, endu su langun na pibpasadan nu Allah sa mapya endu inilabi nu Allah su namen-jihad sa kanu namagagayan (namangintelen) sa balas a masla.

Sa manga pangkatan a ebpun sa lekanin endu ampun endu limu endu ya kaaden nu Allah na labi a bangampun a malimu.

Saben-sabenal na su silan a pinangimatayan nu malaikat a sinalimbut nilan su manga ginawa nilan, ya nilan nadtalu (malaikat): ngin i kaaden nu? Madtalu nilan: ya nami kaaden na egkangaumis sya kanu kalupan, pidtalu nilan: ngintu da maaden su lupa nu Allah sa mawlad sa makambakwit kanu lun? Entuba su kadtakenan nilan na Naraka, na mawag den a kadtamanan.

Ya tabya na su manga malubay a ebpun kanu manga mama endu manga babay endu manga wata a di pakagaga bagakal endu di egkatutulu silan sa lalan.

Na entuba basi lasamen nu Allah silan, endu ya kaaden nu Allah na labi a malasam a mangampun.

Endu entayn i embakwit sa lalan sa Allah na matun nin sya sa kanu kalupan i kagkapulu endu rizki (a madakel) endu kadaludaya, endu entayn i linemyu sa walay nin sa bakwit sa lalan sa Allah endu sinugu nin mawli na nasot sekanin nu kapatay, na saben-sabenal na nakambetad i balas nin kanu Allah, endu ya kaaden nu Allah na labi a bangampun a malimu.

Endu amayka belalakaw kanu sya kanu kalupan na da sa lekanu i dusa sa kapakapaydu (kakasar) nu kanu sa sambayang amayka bangandam kanu sa mafitnah kanu nu silan a namegkafir, saben-sabenal na su manga kafir na nya nilan kaaden sa lekanu na satru a mapayag.

Endu amayka ya nengka kaaden i kaped sa kanilan (Muhammad) na initindeg nengka sa kanilan (pinagimaman nengka) na temindeg su lumpukan sa kanilan salta sa leka endu kwan nilan su manga matalam nilan, na amayka simugyud silan na maaden silan kanu taligkudan nu, endu temingguma su lumpukan a salakaw a da makadsambayang ka edsambayang silan salta sa leka, endu kwan nilan su abung nilan endu manga matalam nilan, ya kyug nu silan a namegkafir na umana bu ka makadtalipenda nu su manga matalam nu endu su manga kasangkapan nu, na pamungkaydanan kanu nilan sa kabamungkayd a makaisa, endu da sa lekanu i dusa amayka naaden sa lekanu i pakasikut a ulan, ataw ka naaden kanu sa bamendalu i makabetad nu i manga matalam nu, endu kamali nu su abung nu, saben-sabenal na su Allah na inipagadil nin sa kanu manga kafir i siksa a bamelusak.

Na amayka nakatunay nu su sambayang na tademi nu su Allah sa kadtindeg endu kaayan endu kabagiga nu, na amayka nakatana kanu na itindeg nu su sambayang, saben-sabenal na su sambayang na ya nin kaaden kanu bamalityala (bamangimbenal) na talanged a kutika.

Da kanu mapakalubay sya kanu kabanganganay kanu lumpukan (satru), amayka egkaaden kanu sa egkasakitan kanu, na saben-sabenal na silan na egkasakitan silan sa mana kapegkasakit sa lekanu, endu pakapanganganay kanu sa Allah sa di nilan egkapanganganay, endu ya kaaden nu Allah na labi a mataw a mawngangen.

Saben-sabenal na sekami na initulun nami sa leka (Muhammad) su kitab sa bantang ka endu nengka maatul su manga taw sa kanu nganin a pinakatawan nu Allah sa leka, endu di ka maaden sa kanu di egkangasaligan sa makadsabek.

Endu pangeni ka sa ampun sa kanu Allah, saben-sabenal na su Allah na ya nin kaaden na labi a bangampun a malimu.

Endu di ka ipebpalawa su silan a pendulatan nilan i manga ginawa nilan, saben-sabenal na su Allah na di nin kalinyan su entayn i ya nin kaaden na labi a banulat a baladusa.

Bagena silan kanu manga taw, endu di silan bagena kanu Allah, sa ula-ula a sekanin na salta sa kanilan, kanu kutika a ibagena nilan su nganin a di kalinyan a kadtalu, endu ya kaaden nu Allah kanu nganin a penggalebeken nilan na langkap.

Hay sekanu! A pibpelwan nu i makapantag sa kanilan sya sa kanu uyag-uyag sa dunya, na entayn i ebpelwa sa Allah makapantag kanilan sa gay a mawli ataw ka entayn i maaden sa kanilan sa kasaligan?

Endu entayn i enggalebek sa mawag ataw ka sumalimbut kanu ginawa nin, mawli na mapa-ampun kanu Allah na matun nin su Allah a labi a bangampun a malimu.

Endu entayn i makapantyali sa kadusan, na mapantyali nin i entuba sa ginawa nin, endu ya kaaden nu Allah na labi a mataw a mawngangen.

Endu entayn i makapantyali sa kalimbanan ataw ka kadusan, mawli na inisendit nin i entuba sa kanu malimpyu, na saben-sabenal na nakapamawa sa kalbutan endu kadusan a mapayag.

Umana bu ka di kena su kalbihan nu Allah sa leka (Muhammad) endu limu nin na pigkahanda nu lumpukan sa kanilan i tadingen ka nilan endu da egkatading nilan ya tabya na su manga ginawa nilan endu di ka nilan kagkaydan sa enggaga-isa, endu initulun nu Allah sa leka su kitab (Qur’an) endu ungangen (Sunnah) endu pinakatawan nin sa leka su nganin a da ka maaden sa katawan nengka, endu ya kaaden nu kalbihan nu Allah sa leka (Muhammad) na masla.

Da mapya sya kanu madakel kanu kabagedunga nilan, ya tabya na entayn i sinemugu sa kadsadaqah ataw ka mapya, ataw ka kapagkapya sa kanu pageletan nu manga taw endu entayn enggalebek sa kanu entuba sa kabanganganay sa lilini nu Allah (ikhlas), na di ebplis na enggan nami sekanin sa balas a masla.

Endu entayn i ipagelena nin su sinugu (Muhammad) kanu ulyan nu nganin a kabpapayag sa lekanin nu tutulu, endu ebpatyunut sa salakaw kanu lalan nu bamalityala (bamangimbenal), na taligkudan nami sekanin kanu nganin a tinaligkudanan nin endu iludep nami sekanin sa Naraka, endu mawag den a egkadtamanan.

Saben-sabenal na su Allah na di nin ampunen su kasakutu sa lekanin endu ampunen nin su nganin a salakaw lun kanu entayn i egkagkahanda nin, endu entayn i pedsakutu sa Allah na saben-sabenal na natading sa kinatading a mawatan.

Da silan pangeni-ngeni sa salakaw sa lekanin ya tabya na sa kanu manga babay endu da silan pangeni-ngeni ya tabya na kanu Shaytan a takebel.

Namulkan sekanin nu Allah endu pidtalu nin (Iblis): di ebplis na mumbal aku ebpun kanu manga ulipen nengka sa umun a natatalanged.

Endu di ebplis na tadingen ku silan endu papanganganayn ku silan endu sugun ku silan na pamutuken nilan su manga tangila nu manga binatang, endu sugun ku silan na salinen nilan su binaluy nu Allah, endu entayn i baluyn nin su Shaytan a tampil a salakaw sa kanu Allah, na saben-sabenal na nalapis sa kinalapis a mapayag.

Ebpasadan nin silan endu papanganganayn nin silan, endu da ipebpasad sa kanilan nu Shaytan na makasimpang.

Entuba silan na kagkalbenan nilan na naraka endu da matun nilan lu ba kalipwasan.

Endu su silan a bamalityala (bamangimbenal) endu minggalebek silan sa manga mapya na di ebplis na paludepen nami silan kanu manga surga belagilay kanu kababan nin i manga lawas na ig sa tatap silan lu ba sa dayun sa dayun, su pasad nu Allah na benal endu entayn i labi a bantang kumin kanu Allah i kadtalu?

Di kena su kabanganganay nu endu kabanganganay nu manga taw nu kitab (Yahudi endu Nasrani), entayn i enggalebek sa malat na balasan lu ba, endu di makatun sa lekanin sa salakaw sa Allah a madtagampil endu makadtabang.

Endu entayn i enggalebek sa kanu manga mapya a mama ataw ka babay sa sekanin na balityala (bangimbenal), na entuba silan i makaludep sa surga endu di silan madsalimbut apya paydu.

Endu entayn i labi a mapya i agama kanu entayn i inisangkup nin i benengin kanu Allah sa ula-ula a mibpyapya endu pibpatyunutan nin su agama nu Ibrahim a andang, endu binaluy nu Allah si Ibrahim a egkasuwatan.

Endu kanu Allah i nganin a sya kanu manga langit endu nganin a sya kanu lupa, endu ya kaaden nu Allah kanu langun nu enggaga-isa na langkap.

Endu bagidsan ka nilan (Muhammad) makapantag kanu manga babay, edtalu ka: su Allah i pebpayag sa lekanu makapantag sa kanilan, endu su nganin a pembatyan sa lekanu sya kanu kitab, makapantag kanu manga ilu a di nu ibagenggay su nganin a wagib kanilan sa kyugan nu mangaluma silan, endu su manga malubay a manga wata endu su kapatidtu nu sa kanu manga ilu sa bantang, endu su nganin a penggalebeken nu a mapya, na saben-sabenal na su Allah na ya nin kaaden na lu ba na labi a mataw.

Endu amayka su babay a nagilekan kanu kaluma nin sa katamages ataw ka kabanaligkud, na da dusa nilan duwa sa kapagkapya kanu pageletan nilan duwa sa kapagkapya, endu su kapagkapya na labi a mapya, endu inilamugay sa kanu manga ginawa i kasingit, endu amayka mangapyanan kanu endu enggilek kanu na saben-sabenal na su Allah na ya nin kaaden kanu nganin a penggalebeken nu na sabut.

Endu di nu den a benal magaga i makambantang kanu pageletan nu manga babay (manga kaluma) apya pinagapas nu, na di kanu edsulamig sa talutup a kapedsulamig sa matagak nu sekanin sa mana gantung, endu amayka mangapyanan kanu endu enggilek kanu na saben-sabenal na su Allah na ya nin kaaden na labi a bangampun a malimu.

Endu amayka makambelag silan duwa na pambalagunan nu Allah i uman isa sa kanilan duwa ebpun kanu kalbihan nin endu ya kaaden nu Allah na labi a mawlad a mawngangen.

Endu kanu Allah su nganin a sya sa kanu manga langit endu nganin a sya sa kanu lupa, endu saben-sabenal na pinamitwan nami su silan a inenggan sa kitab (Yahudi endu Nasrani) kanu unan nu endu sekanu, sa ikagilek nu su Allah, endu amayka egkafir kanu na saben-sabenal na kanu Allah su nganin a sya kanu manga langit endu nganin a sya kanu lupa, endu ya kaaden nu Allah na labi a kawasa a bamedtan.

Endu kanu Allah su nganin a sya sa kanu manga langit endu nganin a sya sa kanu lupa endu nasasangan den su Allah a egkasaligan.

Amayka egkahandan nin na iawa kanu nin hay sekanu a manga taw endu temingguma sekanin sa manga salakaw, endu ya kaaden nu Allah kanu entuba na pakagaga.

Entayn i ya nin kaaden i pegkyug sa balas sa dunya na lu kanu Allah i balas sa dunya endu gay a mawli, endu ya kaaden nu Allah na labi a pakakineg a pakailay.

Hay sekanu a namalityala (namangimbenal)! Aden kanu sa manga tidtu sa bantang, sa saksi sa kanu Allah apya kanu manga ginawa nu ataw ka sa kanu duwa a mimbata endu sa kanu manga pagali, amayka maaden sekanin sa kawasa ataw ka pakanasisita na su Allah i labi a mataw kanilan duwa, na di nu pebpatyunuti su kyug na ginawa sa kanu di nu kambantangan, endu amayka semulak kanu ataw ka temaligkud kanu na saben-sabenal na su Allah na ya nin kaaden kanu nganin a penggalebeken nu na sabut.

Hay sekanu a namalityala (namangimbenal)! Palityala (pangimbenal) kanu sa kanu Allah endu sa kanu sinugu nin endu sa kanu kitab a initulun nin kanu sinugu nin (Muhammad) endu sa kanu kitab a initulun nin kanu nawna, endu entayn i egkafir sa kanu Allah endu sa kanu malaikat nin endu sa kanu manga kitab nin endu sa kanu gay a mawli na saben-sabenal na natading sekanin sa kinatading a mawatan.

Saben-sabenal na su silan a namalityala (namangimbenal) mawli na namegkafir silan mawli na nalityala (nangimbenal) silan mawli na namegkafir silan, mawli na nawmanan silan na kakafir, na da maaden su Allah sa maampun nin sa kanilan endu matutulu nin silan sa lalan.

Panudtul ka (Muhammad) kanu manga munafiq i saben-sabenal sa kanilan su siksa a masakit.

Su silan a bagumbalen nilan su manga kafir sa manga tagampil a salakaw kanu manga bamalityala (bamangimbenal), ngintu pakapanganganay silan sa kanilan sa kagkapulu!? Na saben-sabenal na su kagpulu na kanu Allah langun.

Endu saben-sabenal na initulun nin sa lekanu sya kanu kitab (Qur’an) i amayka makineg nu su manga tanda nu Allah na egkafiran i entuba endu pagungaten i entuba, na da kanu mayan salta sa kanilan, taman sa lemudep silan sya kanu bityala sa salakaw lun, saben-sabenal na sekanu kagina ka maytu na pagidsan nilan, saben-sabenal na su Allah na belimud sa kanu manga munafiq endu manga kafir sa naraka langun.

Su silan a ya nilan bagangapan sa lekanu na amayka aden sa lekanu i tabang a ebpun sa Allah, na ya nilan madtalu: da kami maaden sa kaped nu? Endu amayka ya nin kaaden i kanu manga kafir i umun, ya nilan madtalu: kenaba nambaya-bayan nami sekanu endu pinalihala nami sekanu ebpun kanu namalityala (namangimbenal)? Na su Allah i matul sa pageletan nu sa gay a mawli, endu di den a benal baluyn nu Allah kanu manga kafir kanu manga bamalityala (bangimbenal) i ukit.

Saben-sabenal na su manga munafiq na bagungaten nilan su Allah sa ula-ula a sekanin i bagungat kanilan, endu amayka itindeg nilan su sambayang na itindeg nilan sa egkangapok, ebpamagilay-ilay silan kanu manga taw endu di nilan pedtademan su Allah ya tabya na paydu.

Pedtalidumpaw silan kanu pageletan nu entuba, di kena silan luy endu kena bun silan luy, endu entayn i tadingen nu Allah na di den a benal makatun sa lekanin sa ukit.

Hay sekanu a manga bamalityala (bamangimbenal)! Di nu pembaluy su manga kafir sa manga tagampil a salakaw kanu bamalityala (bamangimbenal), ngintu ya nu kyug na mumbal kanu sa kanu Allah sa tindeg a mapayag!?

Saben-sabenal na su manga munafiq na sya tampal sa sangat i kababa nin kanu naraka endu di ka den a benal makatun sa kanilan sa makadtabang.

Ya tabya na su silan a namedtawbat endu namagumbaya endu namangamal sa kanu Allah endu namapadtiman sa agama nilan kanu Allah, na entuba i salta kanu namalityala (namangimbenal) endu di ebplis na enggan nu Allah su bamalityala (bamangimbenal) sa pahala a masla.

Di enggulan nu Allah i kasiksa sa lekanu amayka midsukur kanu endu namalityala (namangimbenal) kanu endu ya kaaden nu Allah na balasukur a mataw.

Di kalinyan nu Allah i kapayag sa mawag a kadtalu, ya tabya na entayn i sinalimbut, endu ya kaaden nu Allah na labi a pakakineg a mataw.

Amayka ipayag nu i mapya, ataw ka isulen nu i entuba ataw ka lemasam kanu sa mawag, na saben-sabenal na su Allah na ya nin kaaden na labi a mamelasam a pakagaga.

Saben-sabenal na su silan a namegkafir kanu Allah endu kanu manga sinugu nin, endu ya nilan kyug na makapabpitas nilan su Allah endu su sinugu nin, endu ya nilan pedtalun: bamalityala (bamangimbenal) kami kanu sabad endu bamegkafir kami kanu sabad, endu ya nilan kyug na makapamaluy silan kanu pageletan nu entuba sa ukit.

Entuba silan i manga kafir a tidtu, endu inidtatalama nami kanu manga kafir i siksa a bamelusak.

Endu su silan a namalityala (namangimbenal) sa kanu Allah endu sa kanu manga sinugu nin, endu da nilan pambibidaya su pageletan nu isa sa kanilan, na entuba silan na di ebplis na inggay nin sa kanilan su manga balas nilan, endu ya kaaden nu Allah na labi a bangampun a malimu.

Bangeni sa leka (Muhammad) su manga taw nu kitab (Yahudi) sa patulunan nengka silan sa kitab a ebpun sa langit, na saben-sabenal na pinangenyan nilan si Musa sa labi a masla kumin sa entuba, na ya nilan pidtalu: ipailay nengka sa lekami su Allah sa mapayag, na sinayab silan a kilat sabap sa kanu kasalimbut nilan, mawli na minumbal silan sa sapi sa kanu ulyan nu kinawma sa kanilan nu manga tanda na linasam nami su entuba endu inenggay nami kani Musa i tindeg a mapayag.

Endu inipulu nami sa pulu nilan i palaw sabap kanu pasad nilan, endu pidtalu nami sa kanilan: ludep kanu sa kanu bengawan sa bamedsugyud, endu pidtalu nami sa kanilan: di ka nu pedtalasak sya sa gay na saptu endu kinamalan nami sa kanilan i pasad a mabagel.

Na sabap kanu nganin kinabaluba nilan sa kanu pasad nilan endu kapegkafir nilan kanu manga tanda nu Allah endu kabamunu nilan sa kanu manga nabi sa di kena bantang nin endu kadtalu nilan sa su manga pusung nami na nadapengan, kena ka tinumbukan nu Allah i entuba sabap kanu kapegkafir nilan, na di silan bamalityala (bamangimbenal) ya tabya na paydu.

Endu sabap sa kanu kapegkafir nilan endu sa kanu kapedsendit nilan sa kani Maryam (sa mawag) sa kabanetebu-tebu a masla.

Endu su kadtalu nilan sa saben-sabenal na sekami na binunu nami si Eisa a wata mama ni Maryam a sinugu nu Allah, endu da nilan sekanin mabunu endu da nilan sekanin makasampayat, ugayd na inisulagid sekanin sa kanilan, endu saben-sabenal na su silan a mimbida-bida silan lu ba na sya den kanu kapenduwa-duwa lu ba, da sa kanilan lu ba i kataw ya tabya na kapebpatyunut sa antapan endu da nilan sekanin mabunu sa sampulna.

Ugayd na inipulu sekanin nu Allah lu sa lekanin, endu ya kaaden nu Allah na labi a mapulu a mawngangen.

Endu da kanu manga taw nu kitab ya tabya na malityala (mangimbenal) sekanin sa lekanin sa unan nu kinapatay nin, endu sa gay a mawli na egkaaden sekanin sa kanilan sa saksi.

Na sabap sa kasalimbut nu silan a mingguyahud na linyus nami silan sa manga mapya a pinamakay sa kanilan, endu sabap sa kanu kapebpelen nilan sa kanu lalan nu Allah sa madakel.

Endu sabap kanu kapegkwa nilan sa iseg, endu saben-sabenal na inisapal sa kanilan i entuba, endu kapegkan nilan sa kanu manga tamuk nu manga taw sa mawag, na pinagadilan nami su manga kafir sa kanilan i siksa a masakit.

Ugayd na su manga mategkes i ilmu sa kanilan endu su bamalityala (bamangimbenal) na bamalityala silan sa kanu nganin a initulun sa leka (Muhammad) endu su nganin a initulun kanu unan nengka, endu su bamedtindeg sa sambayang endu su bamangenggay sa zakat endu su bamalityla (bamangimbenal) sa kanu Allah endu sa kanu gay a mawli, entuba silan na di ebplis na enggan nami silan sa balas a masla.

Saben-sabenal na sekami na iniwahi nami sa leka (Muhammad) sa mana su nganin a kinawahi nami kani Nuh endu kanu manga nabi a nawli sa lekanin, endu iniwahi nami kani Ibrahim endu Ismail endu Ishaq endu Ya'qub endu kanu manga mawli a-taw (12 a wata nu Ya'qub) endu kani Eisa endu Ayyub endu Yunus endu Harun endu Sulayman, endu inenggay nami kani Daud i Zabur (kitab).

Endu manga sinugu a pinanudtul nami silan sa leka (Muhammad) a nangawna, endu manga sinugu a da nami panudtula silan sa leka, endu inimbityala nu Allah su Musa sa kapembityala.

Manga sinugu a papegkakalini endu bamanginggilek, ka endu di maaden kanu manga taw kanu Allah i tindeg sa ulyan nu manga sinugu, endu ya kaaden nu Allah na labi a mapulu a mawngangen.

Ugayd na su Allah i pedsaksi kanu nganin a initulun nin sa leka a initulun nin i entuba sa kataw nin, endu su manga malaikat na bamedsaksi endu nasasangan den su Allah a saksi.

Saben-sabenal na su silan a namegkafir endu namelen sa lalan nu Allah, na saben-sabenal na natading silan sa kinatading a mawatan.

Saben-sabenal sa kanilan a namegkafir endu namedsalimbut, na di maaden su Allah sa ampunen nin sa kanilan endu di den matutulu silan sa kanu lalan.

Ya tabya na lalan sa Naraka, sa tatap silan lu ba taman sa taman, endu ya kaaden nu entuba kanu Allah na malemu.

Hay sekanu a manga taw! Saben-sabenal na nakawma sa lekanu su sinugu sa bantang a ebpun kanu pedtyakap sa lekanu (Allah), na palityala (pangimbenal) kanu, ka labi a mapya sa lekanu, endu amayka egkafir kanu, na saben-sabenal na kanu Allah su nganin a sya sa kanu manga langit endu lupa, endu ya kaaden nu Allah na mataw a mawngangen.

Hay manga taw nu kitab (Nasrani)! Di kanu pendadalampas sya kanu agama nu, endu da kanu pedtalu sa kanu Allah ya tabya na bantang, su bamenas a si Eisa a wata mama ni Maryam na sinugu nu Allah endu su kadtalu nin a inisampay nin i entuba lu kanu Maryam, endu si Jibril a ebpun sa lekanin (minyup kanu Maryam), na pamalityala (pamangimbenal) kanu sa kanu Allah endu kanu manga sinugu nin, endu di nu pedtalu: telu (trinity), sugati nu ka labi a mapya sa lekanu, ka su Allah na Kadenan a isa bu, mahasuti sekanin (lepas sekanin) sa maaden sa lekanin i wata, lekanin su nganin a sya kanu manga langit endu su nganin a sya kanu lupa, endu nasasangan den su Allah a egkasaligan.

Di den a benal mangendi-kendi su bamenas (Eisa) a maaden sekanin sa ulipen nu Allah endu su manga malaikat a mangasupeg, endu entayn i mangendi-kendi sa kasimba sa lekanin endu emamasla na limuden nin silan lu sa lekanin langun.

Na makapantag kanu silan a namalityala (namangimbenal) silan endu namenggalebek sa manga mapya na itunay nin sa kanilan su manga balas nilan endu edsisinggumanan nin silan sa kanu kalbihan nin, endu makapantag sa kanu silan a nangendi-kendi endu mimamasla silan na siksan nin silan sa siksa a masakit endu di silan makatun sa kanilan sa salakaw sa kanu Allah a madtagampil endu makadtabang.

Hay sekanu a manga taw! Saben-sabenal na nawma kanu na tanda a ebpun kanu pedtyakap sa lekanu (Allah), endu initulun nami sa lekanu i sigay (Qur’an) a mapayag.

Na makapantag kanu silan a namalityala (namangimbenal) sa kanu Allah endu pinangamalan nilan su entuba (Qur’an) na di ebplis na paludepen nin silan sa kanu limu a ebpun sa lekanin endu kalbihan, endu tutulun nin silan sa lekanin sa kanu lalan a matidtu.

Ibagidsa nilan sa leka (Muhammad), edtalu ka: su Allah i semawal sa lekanu sya kanu kalalah, su taw a minatay a da sa lekanin i wata endu aden sa lekanin i suled a babay, na lekanin i sabad (1/2) kanu nganin a natagak nin, endu sekanin na kapangiwarisan nin sekanin amayka da maaden sa lekanin i wata, na amayka ya nilan kaaden i duwa a babay na kanilan duwa na duwa kanu telu bad (2/3) kanu nganin a natagak nin, na amayka ya nilan kaaden i edsusuled a manga mama endu manga babay na kanu isa a mama i upaman nu umun nu dwa a babay, ipebpayag nu Allah sa lekanu ka endu di kanu matading, endu su Allah kanu langun nu enggaga-isa na labi a mataw.

Hay sekanu anan a manga bamalityala (bamangimbenal)! Kanu Allah na tuman nu su pasad nu (pasad sa Allah endu manusya a mapya) inihalal sa lekanu su manga binatang, ya bu tinabya na su pembatyan sa lekanu (inipayag a haram), di mapakay sa lekanu i kapanganup sa sekanu na nag-ihram kanu (timpu na hajj ataw ka umrah) su Allah na pegkukuman nin i kahanda nin.

Hay sekanu anan a manga bamamaginugut! Di nu tumalpas i manga kumpas nu Allah endu su manga ulan-ulan a pinadtakena nu Allah (Muharram, Rajjab, Dhul Qa'idah, Dhul Hijjah) endu su manga hadyi, endu su pinambalig sa tanda (binatang a ipedtatalma) endu su manga taw a belambas sa Baitullah a bagapas sa limu nu Kadenan nilan endu kasuwatan nu Kadenan, na amayka napukas su ihram (napasad) na panganup kanu den, na da kanu mapapananggit sa kanu lipunget nu taw sa kinasapal nilan sa lekanu (sa di kanu pabpaludepan) kanu Masjidil Haram sa kadtibaba nu silan endu edtatabangay kanu sa mapya endu gilek, na da kanu edtatabangay sa kadusan endu kapamagukag endu ikagilek nu su Allah ka sekanin na mapasang i siksa nin.

Hinaram sa lekanu i dala masumbali endu lugu endu su sapu nu gembut endu su di kena ngala nu Allah i inisumbali lun endu su minatay a pinikel endu su minatay sa betay endu su nalilid endu su sinidung endu su inimatayan na kaped nin (sinidung a kaped nin) ya tabya nasumbali nu pan, endu su sinumbali a inipakasla sa barahala (panunumbalin sa kasakutu) endu su kapagalamat u manga jahil, ka langun entuba na maledsik, saguna a gay na tinebpekan silan a manga kafir kanu agama nu, na di nu ipegkagilek silan, ka saki i ikagilek nu, nya ba a gay na sinampulna ku sa lekanu su agama nu endu tinalutup ku sa lekanu su limu ku endu pinakalilinyan ku sa lekanu su Islam a mapagagama nu, su naka-sendud a gagutem sa di kena nin pidtibaba i kinasendud nin (pinamakay i makakan sa paydu bu sa kanu iniharam endu di mabinasa su badan nin) su Allah i mangampun a malimu.

Ipagidsa nilan sa leka (Muhammad) u ngin i inihalal sa kanilan (sya kanu manga pegken), edtalu ka sa kanilan i inihalal sa lekanu su manga mapya endu su nakwa manganup nu a napamandu nu, sa ipamandu nu kanu asu nu su pinakatawan nu Allah sa lekanu, na kan nu su nakwa nin sa lekanu endu labit nu i ngala nu Allah sa kapaganat nu lun endu ikagilek nu su Allah ka sekanin na mangagan i kakukum nin.

Saguna a gay na inihalal sa lekanu su manga mapya endu su panunumbali nu manga (Yahudi endu Nasrani) na halal sa lekanu endu su lekanu na halal bun sa kanilan endu su manga babay a Hur (mapya) a manga mu'minaat endu su di kena ulipen a manga babay nu manga Yahudi endu Nasrani (inisugut sa kanilan su kapangaluma lun) a nawna sa lekanu (kanu nangawna a timpu) amayka nakanggay nu sa kanilan su sunggudan (mah’r) a tidtu a pangaluman, di kena ipedzina nu bu endu di kena pembaluyn a papanukayan, na entayn i egkafir sa uliyan na kina pangimbenal na saben-sabenal a nagugul i galebek in endu lu sa akhirat na nalugi.

Hay sekanu anan a manga bamamaginugut! Amayka edsambayang kanu na gagasi nu su manga beneng nu endu su manga lima nu taman sa duwa a siku endu sapway nu su manga ulu nu sa ig endu su ay nu taman sa tangila na ay endu amayka na-junub kanu (aden linumyu sa kanu bengawan nu) na ebpaygu kanu, amayka pendalu kanu ataw ka pelalakaw kanu ataw ka minudu kanu ataw ka sinumbaka nu su kaluma nu, na dala egkatun nu a ig na edtayammum kanu sa lupa a suti, na sapway nu i manga beneng nu endu su manga lima nu, di kena ya kyug nu Allah i baluyn nin sa lekanu i kapasangan kanu, ugayd na kyugan nin na makadsuti kanu endu matalutup nin su limo nin sa lekanu, ka endu malemu-lemu sa lekanu i makadsukur kanu.

Tademi nu su limu nu Allah sa lekanu endu su pasad nin a inibpasad nin sa lekanu a pidtalu nu: nakineg nami endu naginugut kami, endu ikagilek nami su Allah ka sekanin na katawan nin i dalem nu mga pamusungan.

Hay sekanu anan a manga bamaginugut! Pangaden kanu sa kadtindeg sa Allah sa kadsaksi sa bantang endu da kanu enggula sa di kanu edtidtu sabap sa gilek nu sa lipunget na taw sa lekanu (di makambantang sa kadtalu ataw ka galebekan), embantang kanu ka namba i masiken kanu gilek endu ikagilek nu su Allah ka sekanin na katawan nin i langun na penggalebeken nu.

Pibpasadan nu Allah su manga bamaginugut endu minggalebek sa manga mapya, kanilan su ampun endu balas a masla.

Endu su manga taw a migkafir endu pinandalbut nilan su manga ayatan nami, na silan i kigkwan sa apuy sa naraka.

Hay sekanu anan a manga bamaginugut! Tademi nu su limu nu Allah sa lekanu, kanu kutika a nagkahanda nu manga taw i betalan kanu nilan sa kanu manga lima nilan na dala patalusa nu Allah su lima nilan sa leka endu ikagilek nu su Allah ka sekanin i pedsaligan nu manga bamamaginugut.

Endu saben-sabenal a minumbal su Allah sa pasad kanu manga tupu nu Israel endu pinambwat nami sa kanilan i sapulu endu duwa a kasaligan endu pidtalu nu Allah i salta aku sa lekanu amayka itindeg nu su sambayang endu inggay nu su zakat endu mangimbenal kanu sa manga sinugu ku endu pa-utang nu su Allah sa utang a mapya, na punasen ku sa lekanu su manga mawag endu paludepen ku sekanu kanu manga surga a pelagilay sa kababan na manga lawas na ig, na su egkafir sa lekanu sa ulyan na entuba na saben-sabenal a natading sa bantang a lalan.

Sabap kanu kinabaluba nilan sa kanu pasad nilan na namulkan nami silan endu binaluy nami su manga atay nilan a midtegas, banambyan nilan su kalima (kadtalu nu Allah) kanu nabetadan nin endu tinagak nilan su untung nilan kanu pinatademan sa kanilan (manga limu) endu di mapinda i kilay nengka sa kanu kadarwakan nilan, ya tabya na paydu bu sa kanilan (i di pendarwaka) na pasagadi ka silan (Muhammad) endu tigkeli ka silan, ka su Allah na kalilinyan nin su manga taw a pebpyapya.

Endu su kaped a midtalu sa sekami na Nasrani kami na kinwa nami i pasad nilan, na mawli na tinagak nilan su untung nilan a pinatademan sa kanilan (lu sa Injil), na pina-ukit nami sa kanilan i kapamagukag endu ka endidilipungeta taman sa gay a mawli endu di ebplis na inggay nu Allah sa kanilan i balas nu langun na pinggula nilan.

Hay sekanu a manga (Yahudi endu Nasrani)! Saben-sabenal a nakawma sa lekanu su sinugu nami (Muhammad) ipebpayag nin sa lekanu i madakel a ibagena nu san sa kitab (di nilan ibamamantag) endu bagampunen nu Allah i madakel, saben-sabenal a nakawma sa lekanu ebpun sa Allah i sigay (Muhammad) endu kitab a mapayag (Qur’an)

Ipedtutulu nu Allah kanu tumuntul sa kasuwatan nin su manga lalan a sagyahatra (matidtu) endu palyun nin silan kanu malibuteng, lu nin pabpawangen sa sigay sa kahanda nin endu tutulun nin silan lu kanu lalan a matidtu.

Saben-sabenal a kafir su manga taw a pidtalu nilan i Allah na si Eisa a wata ni Maryam edtalu ka (Muhammad): entayn i maka-milik (makagaga sumapal sa Allah) kanu kahanda nu Allah amayka yanin kyug i binasan nin si Eisa a wata ni Maryam endu su ina nin, endu su taw na lupa langun endu kanu Allah i dalem nu manga langit endu lupa endu su pageletan nin pambaluyin nin i magkahanda nin, endu su Allah na su engagaisa na kagaga nin.

Pidtalu nu manga Yahudi endu manga Nasrani: sekami i manga wata nu Allah endu kalilinyan nin, edtalu ka (Muhammad): ngintu ka pedsiksan kanu nin sabap sa manga kadusan nu (amayka benal kanu), ugayd na sekanu na manusya a kuyug kanu binaluy nin, ampunen nin i magkahanda nin endu siksan nin i magkahanda nin, endu kanu Allah su manga langit endu su lupa endu su pageletan nin endu lu sa lekanin i kadsunudan.

Hay sekanu a aden kitab nin (Yahudi endu Nasrani)! Saben-sabenal a nakawma sa lekanu i sinugu nami (Muhammad) a ipebpayag nin sa lekanu su timpu a napinda pan su manga sinugu (dala nakatulun a wahii) ka endu di madtalu i dala makawma sa lekanu a papegkalilini (kanu surga) endu papegkagilek (kanu naraka) ka saben-sabenal a nakawma sa lekanu i papegkalilini endu papegkagilek endu su Allah na kagaga nin su enggagaisa.

Endu labit ka (Muhammad) su kinadtalu nu Musa kanu kawm nin sa tademi nu su limu nu Allah sa lekanu a binaluy nin sa lekanu i manga nabi endu binaluy kanu nin a manga datu (kanu ulyan na kina-ulipen sa kanilan ni Fir'awn) endu inenggan kanu nin sa manga mapya a dala nin makanggay sa isa bu kanu taw na dunya.

(Tig nu Musa): hay sekanu a manga taw ku, ludep kanu sa dalpa a suti (Palestine) a ini-umun nu Allah sa lekanu endu da kanu magalang-alang sa taligkudan nu (di kanu matu sa kambunwa) ka ya nu kabpawangan na kalugyan.

Tig ilan: Musa aden anan manga taw a manga tegas gayd endu di kami a benal lumudep taman sa di silan makalyu, na amayka pakalyu den silan na Iumudep kami den.

Pidtalu nu duwa kataw a mama (silan si Yusha endu si Kalab) a kagilekan silan sa Allah a inikalimu nu Allah silan, ludepi nu den silan san sa bengawan ka amayka makaludep kanu den na sekanu i tumalaw (makataban) endu salig kanu sa Allah amayka benal a manga bamamaginugut kanu.

Pidtalu nilan: Hay Musa! Di kami a benal lumudep sa san pamun silan, luka den (Musa) endu su kadenan nengka, ka embunuwa kanu den lu, ka sya kami den ba mamagagayan.

Tig nu Musa: Kadenan ku saki na dala kamilikan ku ya tabya na ginawa ku endu su suled ku, na padsenggaya kami kanu manga taw a Faasiq. (linumyu sa palityala sa Allah)

Tig nu Allah: haram kanilan su (Baital Muqaddas) sa pat-pulu lagun, sa ma-anteng anteng silan sa lupa, na di ka belidu i ginawa nengka kanu manga taw a Faasiq.

Batya ka (Muhammad) sa kanilan a (manga Yahudi) su tudtulan kanu duwa kataw a wata nu Adam (Qaabil endu Haabil) sa bantang,migqurban silan na tinalima lu sa Allah su isa, (kani Haabil) endu dala matalima su isa (kani Qaabil), tig nu (Qaabil): imatayan ku seka, tig nu (Haabil): ya man taliman lu sa Allah na su nakabpun kanu manga taw a magilek.

(Tig nu Haabil): amayka batalen nengka i lima nengka ka imatayan aku nengka na di ku batalen i lima ku sa imatayan ku seka, ka saki na kagilekan aku sa Allah a pedtyakap kanu sakalyan alam.

Saki na ya ku kyug na kabpulwan nengka i dusa ku endu su dusa nengka a salakaw sa nan, na mabaluy ka a taw na apuy (sa naraka) endu namba i balas nu manga taw a dupang.

Sinekat nu ginawa nin sa ka-imatay nin kanu suled nin, na inimatayan nin- nabaluy a kuyug kanu nangalugi.

Pinambwat nu Allah i duwa timan a uwak, sa ipailay nin kani (Qaabil) u panun i pakaydan sa bangkay nu suled nin, (nangayat so uwak ka inilebeng nin su suled nin a minatay) ya nadtalu (Qaabil) na duwan-duwan ku den ka apiya su uwak na daku den ka atuy, ka napayangas ku su bangkay nu suled ku, na nabaluy sa nakadsendit.

Sabap kanu entu na ini-fardu nami kanu tupu nu Israel sa entayn i makapatay sa nyawa a da minatay nin a nyawa (su inimatayan na) atawka (dala) pakabinasa nin sya kanu dalpa na timbang a binunu nin i langun a taw sa dunya, su minuyag kanu sakataw a taw na timbang a inuyag nin i langun na taw, endu saben-sabenal a nakawma sa kanilan i manga sinugu nami sa manga mapayag, mawli na madakel sa kanilan sa ulyan antu i namaka-sagad i kawag a galebekan sya kanu dalpa.

Banal a ya bu ibalas kanu taw a bagatu sa Allah endu su sinugu nin na endu penggalebek sya sa dalpa sa pakabinasa na imatayan ataw ka palepan (pabpalepan) ataw ka tebpedan i manga lima nilan endu ay nilan sa pambidayan ataw ka iyawa (pa-awan) kanu dalpa, ka kanilan i kayayan sa dunya endu aden pan sa kanilan lu sa akhirat i siksa a masla.

Ya tabya na su mid-tawbat sa unan a dala nu pan silan madsangul, tuntayi nu su Allah na bangampun a malimu

Hay sekanu a manga bamalityala (bamangimbenal)! Ikagilek nu su Allah endu pagapas nu i lalan a kasupeg nu sa Allah, endu en-jihad kanu sa lalan sa Allah ka malemu lemu sa lekanu i maka-untung kanu.

Benal su manga kafir na u mana bu ka kanilan i langun a nakadalem kanu lupa endu matakep pan sa lekanin (takepen i dalem na lupa) samaka pangon nin sa ginawa nin sa kanu siksa nin sa gay a mawli, na dibun den matalima sa kanilan endu kanilan i siksa a masakit.

Myug silan lumyu sa apuy na naraka, na dala sa kanilan i makalyu endu kanilan i siksa a dala kadtaman nin.

Su nanegkaw (a mama) endu su nanegkaw (a babay) na tebped nu i lima nilan, a balas nu pinggalebek nilan a siksa ebpun sa Allah, endu su Allah na mapulu a mataw mapambetad.

Na entayni taw a midtawbat sa ulyan a kadupang nin a nagumbaya, na su Allah na tawbaten nin, ka su Allah na bangampun a malimu.

Ngintu dala nengka katawi i su Allah na kamilikan nin (pakagkyug-kyug) su langit endu lupa, siksa nin i magkahanda nin, endu ampunen nin i magkahanda nin, endu su Allah na kanu enggagaisa na kagaga nin.

Hay seka a sinugu (Muhammad)! Di makalidu sa ginawa nengka su manga taw a ya nilan bamamagayasan i kagkafir, sa pidtalu nilan i nangimbenal kami sa ngali bu, dala pangimbenal su atay nilan endu kaped kanu manga Yahudi na makikineg sa kalbut, makikineg sa kaped a manga taw a dala makawma sa leka (dala kanilan makambityala) sinambyan nilan su manga kadtalu sya kanu pinambetadan nu Allah lun, na edtalun nilan u inggay ni (Muhammad) i mamba na kwa nu (mana su kitab a pinanambyan nilan) amayka salakaw kanu inumbal nami na ingati nu ka makwa nu, na su taw a egkahandan nu Allah i katading nin, na dala magaga nin sa makatulak nin su kahanda nu Allah, silan a manga taw na dala kyug su Allah sa masuti manga atay nilan, aden sa kanilan sya sa dunya i kayayan endu sa kanilan pan lu sa akhirat i siksa a masla.

Manuliman sa kalbut (ipayapat nilan su kalbutan) kuman gayd sa haram, amayka nakawma silan sa leka (Muhammad) na kukum ka silan ataw ka di nengka kukumen silan endu amayka di nengka silan kukumen na di ka nilan kagkaydan apya paydu, na u kinukum nengka silan na kukum ka sa bantang, saben-sabenal su Allah na kalilinyan nin su manga bantang.

Endu panun i kapa-pegkukum nilan sa leka sa lu bun sa kanilan i Taurat a nadalem lun su kukuman nu Allah, mawli na sumibay silan sa ulyan a kapambwat nengka sa kukuman endu di kena silan bangimbenal.

Benal a initulun nami su Taurat, nakadalem lun i tutulo endu sigay, ibangukum nu manga nabi andang a manga Muslim kanu manga Yahudi endu su manga mawngangen (inikukum nilan bun) endu su manga ulama sabap sa inisugu sa kanilan i katyakap (kanu Taurat) sa di kawmanan endu kakulangan su kitab nu Allah endu silan i manga saksi a pedtyakap, na dinu bangandama su kangaunutan (sa kakukum nu kanu kitab nu Allah), saki (Allah) i ikagilek nu, na di nu ipedsambi i manga ayatan ku sa paydu a alaga endu su taw a di nin ikukum su initulun nu Allah na silan a manga taw a manga kafir,

Endu ini-fardu nami sa kanilan i napas na napas bun i bayad nin endu su mata na mata bun endu ngilung na ngilung bun endu tangila na tangila bun endu ngipen na ngipen bun endu su pali na pali bun, na su di den kumisas (qisaas) ka id-sadaqah nin den (di den tumuntut sa kawagib) na napunas den su dusa (nu nangungkayd) entayn i taw a di nin ikukum su initulu nu Allah na silan i manga taw a manga dupang.

Endu pinatundug nami sa kanu (Taurat) si Eisa a wata ni Maryam sa nagayun bun sa kanu nawman nin (a Taurat) endu inenggay nami so Injil (kani Eisa) a tutulu na endu sigay endu nagayun kanu nawma nin a Taurat endu tutulu endu indawan kanu magilek sa Allah.

Endu ikukum nu kigkuwan sa Injil su initulu nu Allah ka su taw a di nin ikukum su initulu nu Allah na silan i manga taw a nakalyu sa kapalityala (kapangimbenal) sa Allah.

Endu initulun nami sa leka (Muhammad) su kitab sa Haqq (Qur’an) a nagayun kanu nawna lun a kitab (Taurat endu Injil), endu pedsaksi sa benal su nawna lun, na ikukum nengka su initulu nu Allah, na di ka unuti i kyug na ginawa nilan sa kanu nakawma sa leka Haqq, uman isa tumpuk sa lekanu na aden kitab nin a mapayag, endu u pigkahanda nu Allah bu i binaluy kanu nin sa isa bu (i agama nin) na magaga nin ugayd na pembatalun kanu nin sa kanu inenggay nin sa lekanu, na pamagayasi nu i manga mapya, ka lu kanu bun tanan makambalingan sa Allah, endu patuntayan nin su nganin-nganin a di nu bamagayunan.

Endu ikukum nengka (Muhammad) sa kanilan su initulun nu Allah sa leka, na dika unuti i kyug na ginawa nilan endu ingati ka i ma-fitnah sa kanilan sa kanu kaped a initulun nu Allah sa leka, na amayka minenda silan na tuntay ka i ya kahanda nu Allah na tyuban nin silan kanu kaped a kadusan nilan endu madakel sa taw i nakalyu sa inugut sa Allah.

Ngintu ka ya nilan kyugan i kukumen nu jahil, na dala mapya a kukuman a salakaw sa kukuman nu Allah kanu manga taw a nangimbenal.

Hay sekanu anan a manga bamamaginugut (babay endu mama)! Di nu pembaluya su Yahudi endu su Nasrani a ipegkalimwa nu-idtabangay nu ka su Yahudi na Yahudi bun i tabangan nin, su Nasrani na maytu bun, su edtabangay kanilan sa lekanu na kuyug den sa kanilan, su Allah na di nin tutulun i manga taw a manga kafir.

Mailay nengka su aden dalu na manga atay nilan (Munafiq) a mamagayas lu sa Yahudi (ibpakat nilan), edtalun nilan i kagilekan kami sa masugat kami na mapasang (edtalwan silan u manga Muslim), na di ebplis na itingguma nu Allah i tabang nin (kakwa kanu Makkah) kanu sinugu nin ataw ka kahanda ebpun sa Allah (tumaban su Muslim) namabaluy silan (munafiq) kanu ipagena nilan kanu ginawa nilan i makadsendit.

Endu pidtalu nu manga bamamaginugut i silan banan su manga taw (a munafiq) midsapa silan sa mabagel sa Allah sa silan na kuyug sa lekanu, nagugul i manga galebek nilan, na nabaluy silan a nangalapis.

Hay! sekanu anan a manga bamamaginugut (babay endu mama)! Entayn sa lekanu i murtad kanu agama nin (taligkudan nin su inisugu nu Allah) na di ebplis i kapambwat nu Allah sa manga taw (isambi nu Allah) a kalilinyan nin (su Allah) endu kalilinyan nu Allah, a mababa i palangayan nin sa mga bamamaginugut, mategas amayka su manga kafir i mawma nilan, en-jihad silan sa lalan sa Allah endu di nilan ikagilek su bamulgis (kapaminasan nu baminasa), entuba i limu nu Allah a inggay nin kanu magkahanda nin endu su Allah na mawlad i limu nin a mataw.

Saben-sabenal na ya bu man masupeg (edsabek) sa lekanu na su Allah endu su sinugu nin endu su manga bamamaginugut a pedtunay sa sambayang endu zakat endu silan na pe-ruku’.

Endu su taw a sumupeg (mapadsabek) sa Allah endu su sinugu nin endu su manga bamamaginugut na saben-sabenal a kanu manga taw a dadsag sa Allah na silan i tumalaw sa satru.

Hay sekanu anan a manga bamamaginugut (babay endu mama)! Di nu bamaluya a kaunutan (igkalimwa) su manga taw a binaluy nilan i agama nilan sa bagungaten endu dalmetan, endu su manga taw a inenggan sa kitab (Yahudi endu Nasrani) a nawna sa lekanu endu su manga kafir (a kawnutan) endu ikagilek nu su Allah amayka benal a bamamaginugut kanu.

Endu amayka initawag nu su kadsambayang na nagungat silan endu mindalmet silan, silan a manga taw na dala manga akal nin (dala ungangen nin).

Edtalu ka (Muhammad): sekanu a aden kitab nin (Yahudi endu Nasrani) di kami nu galipungetan ya tabya na nangimbenal kami sa Allah endu su initulun nin sa lekami endu su initulun a nawna, na ya madakel sa kanilan na Faasiq.

Edtalu ka (Muhammad): panudtulen ku sa lekanu su minuna pan i kawag nin kanu lipunget u sa lekami? Su siksa na lu sa Allah kanu (manga taw) a namulkan nin, endu nalipungetan nin na binaluy nin a manga ubal endu manga babuy endu su sinumimba sa salakaw sa Allah na entuba i nakasagad i kawag nin i kandalpanin (sa gay a mawli) endu natading sa bantang a lalan.

Endu makawma silan sa lekanu na edtalu silan sa bangimbenal kami, na saben-sabenal a nakaludep silan sa ka-kafir, na lumyu silan sa kafir bun su atay nilan, su Allah na katawan nin i langun na ibagena nilan.

Endu mailay nengka i kadakelan sa kanilan (Yahudi) na ya nilan pamagayasan i kadusan endu kapagukag endu kakan sa haram, na ngin den i kawag nin i kanilan a pinggalebek.

Entuba ka pedsapalan silan nu manga mawngangen (kigkuwan sa kamal) endu su manga ulama sa kapedtalu nilan sa kadusan (kalbutan) endu su kapegkan nilan sa haram, ngin den i kawag nin i kanilan a pebpulungan.

Endu pidtalu nu manga Yahudi, lima nu Allah na di ma-uka (naiketan sa di den makanggay sa limu), su manga lima nilan (a manga Yahudi) i naka-iket sa di ma-uka endu namulkan silan kanu pidtalu nilan, kena! ka su lima nu Allahu na na-uka, pembaranggyan nin su limu nin kanu kyugan nin, endu (su manga Yahudi) na pedsising-guman silan sa madakel (a kapedsupak) kanu initulun sa leka (Muhammad) (a Qur’an) ebpun sa Kadenan nengka na pendupangen nilan endu pigkafiran nilan, na inibetad nami kanu manga pageletan nilan i kapamagukag endu kandidilipungetaya taman sa kabangkit sa dunya, uman silan tumutud sa apuy na kambunuwa (mumbal sa ukit a kambunu-bunu) na ipa-padeng nu Allah endu (bamikal) penggalebek silan sa kanu dalpa sa kabinasan, su Allah na di nin kalinyan i pamakabinasa.

Upama mana bu ka su aden kitab nin (Yahudi endu Nasrani) ka nangimbenal sa Allah na pinunas nami sa kanilan i kadusan nilan, endu nakapaludep nami silan kanu surga a na’eem.

Endu u mana bu ka initindeg nilan su Taurat endu endu su Injil endu su initulun sa kanilan ebpun sa Kadenan nilan na magidsan i pulu-kababan nilan na kasungwan na rizki nilan, kaped bu kanilan i nangimbenal, endu ya madakel sa kanilan i ngin den i kawag a penggalebeken nin

Hay seka a sinugu (Muhammad)! Isampay nengka su initulun sa leka ebpun sa Kadenan nengka endu amayka di nengka enggulan na dala nengka makasampay i sugwan sa leka, endu su Allah igkuntra sa leka kanu manga taw (a darwaka) su Allah na di nin tutulun su manga kafir.

Edtalu ka (Muhammad): Hay sekanu a aden kitab nin (Yahudi endu Nasrani)! Apya paydu, taman sa di nu patindegen su kukuman nu Taurat endu su Injil endu su initulun sa lekanu (Qur’an) ebpun kanu Kadenan nu, na kawmanan su kadakelan sa kanilan sa kadupangan endu kag-kafir nilan (kanu kinatulun nu Qur’an) na di ka lumidu i ginawa nengka (Muhammad) kanu manga taw a manga kafir.

Benal su manga taw a namalityala (nangimbenal) endu su manga Yahudi endu su sa tumpuk kanu Yahudi endu su Nasrani, entayn i mangimbenal sa kanilan sa Allah endu gay a mawli endu minggalebek sa mapya na dala gilek nilan endu di malidu i ginawa nilan.

Saben-sabenal i mibpasad kami kanu tupu nu Israel, endu pinasugwan nami silan sa manga sinugu, na uman makawma sa kanilan i sinugu sa di kalilinyan na ginawa nilan na su kaped (kanilan) na pinandalbut nilan endu su kaped na pamunun nilan.

Endu ya nilan kataw na di maka-fitnah sa kanilan su siksa, napisek silan sa bantang endu nabisu silan sa bantang mawli na tinawbat nu Allah silan, mawli menem na mibpisekan silan endu mimbisu i kadakelan sa kanilan, su Allah na gailay nin i nganin a penggalebeken nilan.

Saben-sabenal a kafir su midtalu sa su Allah na si Eisa a wata ni Maryam endu pidtalu ni Eisa kanu manga tupu nu Israel i simba nu su Allah a Kadenan ku a Kadenan nu, su taw a sumakutu sa Allah na hinaram sa lekanin i surga endu ya nin kandalpan su apuy, endu dala kanu manga kafir i makadtabang sa kanilan.

Saben-sabenal a kafir su taw antu a midtalu sa su Allah na ika-telu sa kanu telu (a kadenan) na dala Allah ya tabya na isa nin bu (su Allah bu) endu amayka di silan menda sa kadtalu nilan, na di ebplis sa kanilan a manga kafir i magedam nilan i siksa a sangat i kasakit nin.

Ngintu ka di silan edtawbat lu sa Allah endu mangeni silan sa ampun, endu su Allah na bangampun a malimu.

Dala kanu Eisa a wata ni Maryam ya tabya na sinugu, na saben-sabenal a naypus den i nawna sa lekanin a manga sinugu, endu si ina nin (Maryam) na bantang, a ya nilan bun pegken na pegken nu na manga taw (su Allah na dili kuman) ilayka (Muhammad) panun i kapebpayag nami sa kanilan sa manga ayat, na mawli na ilay ka panun i kapandalbut nilan lun.

Edtalu ka sa kanilan i nginan ka pedsimba kanu sa salakaw sa Allah a dala makagkayd nin makagkapya nin sa lekanu, su Allah na sekanin na pakakineg a mataw.

Edtalu ka (Muhammad): Hay sekanu anan a aden kitab nin (Nasrani) da kanu papedsagad sa kabpagagama nu sa dala kawagib nin endu dinu bagunuti i kyug nu manga taw (Yahudi) a saben-sabenal a natading a nawna sa lekanu endu tinumading pan silan sa madakel a taw, na endu natading silan kanu bantang a agama.

Namulkan su manga kafir a kaped kanu manga tupu nu Israel, sa lu nakambwat sa dila nu Daud endu su Eisa a wata ni Maryam, entu na sabap sa kina-supak nilan endu pidtibaban nilan su ini-sapal sa kanilan.

Ya nilan ka aden na di nilan ipedsasapalay i ungkir a pinggalebek nilan, na ngin den a kawag i kanilan a pebpulungan.

Mailay nengka i madakel sa kanilan (Yahudi) i ya nilan unutan su manga taw a kafir, na ngin den a kawag i inidtatangguna nilan sa ginawa nilan (inuna nilan a kasiksan sa gay a mawli) su lipunget nu Allah sa kanilan endu lu sa siksa a dayun sa dayun sa kanilan.

Endu u mana bu ka bangimbenal silan sa Allah endu su nabi endu su initulun nu Allah kanu nabi nin na di nilan umbalen a kaunutan i kafir, ugayd na ya madakel sa kanilan i manga faasiq (nakalyu sa inugut sa Allah).

Mapaluli nengka (Muhammad) i mapasang kanu taw i kapagukag nin kanu manga palityala su manga Yahudi endu su manga mushrik endu mapaluli nengka bun menem i masupeg i limu nin kanu manga palityala su manga taw a pidtalu nilan i sekami na Nasrani kami, kagina aden sa kanilan i manga ulama nilan (pari) endu manga barasimba endu silan na di pemamasla.

Amayka pakikinegen nilan su initulun kanu sinugu (Muhammad) na milay nengka su manga mata nilan a bagigis sa lu (bagulyang) sa kanu kinatuntay nilan kanu bantang ya nilan madtalu, kadenan nami na bangimbenal kami, ikuyug kami nengka kanu manga taw a midsaksi.

Panun pan i di nami kapangimbenal sa Allah sa nakawma sa lekami i mapayag (Qur’an) endu kalilinyan nami sa paludepen kami nin (sa surga) sa kaped kami kanu manga taw a manga mapya (saliheen).

Binalasan silan nu Allah sa kanu entu a pidtalu nilan sa paludepen silan sa surga a pilagilay sa kababan nin i manga lawas na ig, dayun sa dayun silan lu ba, namba su balas nu manga taw a manga mapya.

Endu silan a manga kafir endu pinandalbut nilan su manga ayatan nami, na silan i kigkwan kanu apuy sa naraka.

Hay sekanu anan a manga bamamaginugut (babay-mama)! Di nu ipedsapal su manga mapya a ini-halal nu Allah sa lekanu endu di kanu pedsupak, su Allah na benal a di nin kalilinyan su manga taw a pedsupak.

Kan kanu sa inenggay nu Allah sa lekanu a halal a mapya, endu ika-gilek nu su Allah amayka bangimbenal kanu.

Di kanu siksan nu Allah kanu kinadsapa nu sa di kena pidtibaba ugayd na siksan kanu nin kanu kinadsapa nu sa pidtibaba (amayka di matuman), ya nin kaffarah (makapanambi nin) na mapakan sa sapulu ka taw a miskinan sa kangasasangan sa mana su ipapegkan sa kanu pamilya, ataw ka pambanggalan silan, ataw ka mapandaludaya sa ulipen (mangon sa ulipen), entayn i di makagaga (apya endaw sa nalabit anan) na ebpwasa sa telu gay, namba i kaffarah na sapa sa pidtibaba endu tyakapi nu su sapa ka namba i kapebpayag nu Allah kanu manga ayat nin ka malemu-lemu sa lekanu i kadsukur nu.

Hay sekanu anan a manga bamamaginugut (babay endu mama)! Saben-sabenal su makalangut (langun a embalangan a makabinasa sa akal) endu su kandalmet endu su panunumbalin sya kanu kasakutu (ansaab) endu su kabpagalamat na maledsik a galebekan ebpun kanu Shaytan, pananggilay nu ka di ebplis na makauntung kanu.

Saben-sabenal a ya kyug nu Shaytan na makabetad nin sa lekanu su kapamagukag endu kandi- dilipungataya sa namba pakalangut anan endu kapendalmet anan endu kasapalan kanu sa tadem nu sa Allah endu kadsambayang, na ngintu sekanu na menda kanu den?

Endu paginuguti nu su Allah endu paginuguti nu su sinugu nin, endu edsanggilay nu (pangabung kanu) amayka di nu taliman na sabuti nu i ya bu kanu sinugu nami na kapapedsampay a mapayag.

Dala dusa nu manga bamamaginugut endu minggalebek sa manga mapya a minatay sa naka-inum sa maka-langut sa dala pan makatulun su ayatan (Qur’an), amayka ini-kagilek nin i sakutu (dala enggalebek sa sakutu) endu nangimbenal silan endu minggalebek silan sa manga mapya, mawli na nagilekan sa kanu haram, endu pangimbenal kanu endu ebpya-pya kanu, su Allah na kalilinyan nin su pebpya-pya.

Hay sekanu anan a manga bamamaginugut (babay endu mama)! Batalun kanu nu Allah sa enggagaisa sa kanu banganupen nu a makwa kumawa (mawma na lima) sa lima nu bun endu dili (sumiken su manga binatang sa timpu na ihram silan) ka endu katawan nu Allah su magilek sa lekanin sa gayb (apya di gailay su Allah), na entayn idtibaba sa ulyan (manganup sa naka-ihram pun) na lekanin i siksa a masakit.

Hay sekanu anan a manga bamamaginugut (babay endu mama)! Da kanu manganup sa kanu banganupen sa dalem na ihram kanu (hajj-umrah), su nakapatay sa lekanu (sa binatang) sa pidtibaba, yanin balas na makasambi sa mana bun su minatay nin i sawalu a unta, kukumen nu bantang sa lekanu (duwa kataw a mama) a hadiya intu sa Ka'bah ataw ka (pananggiten sa Ka'bah) kaffarah sa kapakan sa miskinan (sapulu kataw a miskinan) ataw ka ebpuwasa sekanin, ka endu nin mananam i balas u galebek nin (kawgat u pinggula nin) inampun nu Allah su nawna (su nakanggalebek sa dala pan makasapal) susulamanan (ulyan a kinaharam lun) na sulyan nu Allah sekanin, endu su Allah i mapulu a pedsuli.

Inihalal sa lekanu i kapanganup (kapedtugis) sya sa lagat endu seda nin a kawyagan nu endu su palalakaw, endu iniharam sa lekanu i kapanganup sa kapulwan sa taman a dalem kanu na ihram (hajj-umrah) endu ikagilek nu su Allah ka lu kanu bun baguli sa lekanin.

Endu binaluy nu Allah su Ka'bah a Baytal Haram a makadalinding sa kanu taw (makapalilintad kanu ginawa) endu su manga ulan-ulan (su pat timan a ulan-ulan a haram) endu su manga hadyi (panunumbalin sa kanu ka hajj) endu su aden tanda nin, ka endu nu katawan su Allah na katawan nin i dalem nu manga langit endu lupa, su Allah na langun a enggaga-isa na katawan nin.

Sabuti nu su Allah na mapasang i siksa nin, na endu su Allah na bangampun a malimu.

Dala kanu sinugu (Muhammad) ya tabya na kapanampay endu su Allah na katawan nin su ipebpayag nu endu su ipedsulen nu.

Edtalu ka (Muhammad): di makapagidsan su mawag kanu mapya, apya pan ngin i kadakel a mawag (a kalilinyan), ikagilek nu su Allah a sekanu a aden pamikiran nin ka malemu-lemu sa lekanu i makauntung kanu.

Hay sekanu anan a manga bamamaginugut (babay endu mama)! Da kanu bagidsa kanu enggagaisa, amayka edtalun sa lekanu na di mapya i ginawa nu endu ibagidsa nu sa timpu na kapedtulun nu Qur’an, ka ipebpayag bun sa lekanu, inampun nu Allah su namba endu su Allah i bangampun a malimu.

Saben-sabenal na minidsa su manga taw a nawna pan sa lekanu mawli na pig-kafiran nilan.

Da baluya nu Allah su Baheera endu su Saibah endu su Wasilah endu su Haam (langun a namba na unta ataw a makalagid lun, pinandaya a manga binatang, sa sumbalin u manga Arab sa dala pan makawma sa kanilan su Islam, sa ipeg-kanduli nilan kanu manga barahala nilan) ugayd su manga kafir na pedtetebwan nilan su Allah sa kalbut endu madakel sa kanilan i di mawngangen.

Endu amayka pidtalu sa kanilan i sya kanu sa initulu nu Allah endu su sinugu nin, ya nilan pidtalu na nasasangan den sa lekamii nawman nami sa manga kalukesan nami, apya pan su manga kalukesan nilan na di manga mataw sa apya paydu endu di paka-tuntul (sa bantang).

Hay sekanu anan a manga bamamaginugut (babay endu mama)! Tyakapi nu i ginawa nu ka di kanu kagkaydan nu midtadingan amayka nakatuntul kanu, ka lu sa Allah i kaulyan nu tanan, na balasan kanu nin kanu balas nu pinggalebek nu.

Hay sekanu anan a manga bamamaginugut (babay endu mama)! Su makadsaksi sa lekanu amayka nakawma kanu isa sa lekanu su tanda (masiken den) nu kapatay, su kapanutuma nu (pebpatay) na duwa kataw a bantang sa lekanu (duwa kataw a mama i makadsaksi a Muslim) ataw ka duwa kataw a di kena Muslim (amayka nasisista gayd i saksi), amayka sya kanu natabwan sa kapelalakaw sa lupa ka nawma kanu na kapatay na tanganen silan duwa (su midsaksi) sa ulyan a sambayang, na idsapa nilan sa Allah, na amayka penduwa-duwa kanu na (pandaya nu amayka edsapa silan duwa) sa (edtalun nilan) i di nami ebpasan sa alaga a paydu sa apya suled nami pan (i pakawaris) endu di nami ipagena i kadsaksi nami sa Allah, ka sekami i makuyug kanu manga baradusa.

Amayka nakendutan (nailayan) silan duwa sa pendusa (pendalbut) na duwa kataw menem i pad-sapan a tampal kanu minatay (manga pagali nu minatay) sa ya nilan idsapa sa Allah na kanilan a sapa a benal sa kanilan (antu a malbut a manga saksi) endu di kena kami midtibaba (di kena kami pedsupak sa Allah) ka sekami i makuyug kanu manga kafir (amayka endalbut kami).

(Tig nu Allah): nya ba i lalan a kadsaksi nu di kena Muslim, ataw ka kagilekan silan sa di matalima i sapa nilan (dala den malityaya sa kanilan) sa ulyan a sapa nilan, ikagilek nu su Allah endu pakikineg nu, su Allah na di nin tutulun i manga taw a faasiq.

Su gay a buligen nu Allah su manga sinugu nin, edtalun nu Allah sa kanilan: ngin i initalima sa lekanu (nu manga taw a sinuguwan sa lekanu)? Ya nilan madtalu: di nami katawan, seka a Kadenan nami i mataw sa gayb.

Labit ka (Muhammad) su kinadtalu nu Allah kani Eisa a wata ni Maryam sa tademi ka su limu ku sa leka endu si ina nengka su kutika binagel ku seka kani Jibril, ipembityalay nengka i manga taw sa pebpuyut ka endu masla ka den, endu pinakatawan ku sa leka su kitab endu su kawngangen endu su Taurat endu su Injil, endu bagumbalan nengka i lupa (malumiket) sa papanuk i palas nin sabap kanu kahanda ku na bagyupen nengka na gabaluy a papanuk sa kahanda ku, endu egkagamutan nengka i dala mata nin (pegkapya) endu putik sa kahanda ku endu pakapambwat nengka i minatay (gauyag) sa kahanda nu Allah endu inalawang ku su tupu nu Israel sa di ka nilan kagkaydan (kanu kinapamagayun nilan sa kapembunu kanu Eisa) sa kinawma nengka sa kanilan sa manga mapayag (a manga tanda nu Allah) na ya pidtalu nu manga kafir sa kanilan: dala inan (katagan nin) ya tabya na sih’r a mapayag (pangalintaw ataw ka kategelan).

Endu inipanggiginawa ku kanu manga Hawariyyun (manga namalitiyaya kanu Eisa): pangimbenal aku nu endu su sinugu ku (Eisa), na ya nilan pidtalu: nangimbenal kami endu saksi kami sa sinumangkup kami.

Endu pidtalu nu manga Hawariyyun (manga namalityaya kanu Eisa): Hay Eisa a wata ni Maryam! Ngintu magaga nu Kadenan nengka i patulunan kami nu Allah sa pegken ebpun sa langit, tig nu Eisa: ikagilek nu su Allah amayka benal a bamamaginugut kanu.

Ya nilan pidtalu: pegkyug kami sa lu kami ba kuman ka endu makadtakena su atay nami endu katawan nami i benal ka (Eisa) endu makuyug kami kanu manga midsaksi.

Ya pidtalu nu Eisa a wata ni Maryam: Huu Kadenan nami! Patulun ka sa lekami ebpun sa langit i bangenin nilan a mabaluy sa lekami a gay a pakaslan nami endu su nawna sa lekami endu su mawli sa lekami su gay a katulun endu tanda ebpun sa leka endu rizki kami ka seka i mapya a pe-rizki.

Tig nu Allah: itulun ku sa lekanu i bangenin nu, su egkafir sa lekanu sa ulyan na katulun nin na saki i sumiksa sa lekanin sa siksa a di ku isiksa kanu isa a taw na dunya.

Endu labit ka (Muhammad) su kinadtalu nu Allah kanu Eisa a wata ni Maryam: ngintu pidtalu nengka (Eisa) kanu manga taw i baluy aku nu endu si ina a kadenan a duwa a salakaw sa Allah? Ya nadtalu nu (Eisa): mahasuti ka, dala salaki i madtalu ku i dala kawagib nin, u nadtalu ku intu na katawan nengka ka seka i mataw kanu dalem nu ginawa ku na di ku katawan i dalem nu ginawa nengka, ka seka i mataw kanu langun a gayb.

Da pidtalu ku sa kanilan ya tabya na su inisugu nengka salaki a simba nu su Allah a Kadenan ku a Kadenan nu endu kadsaksyan ku sa taman lu aku pan sa kanilan, na guna ako nengka pegkwaya na seka den i bantay sa kanilan endu seka i pedsaksi kanu langun a enggagaisa.

Upama pedsiksan nengka silan na ulipen nengka silan, u bagampunen nengka silan na seka i mapulu a mataw.

Tig nu Allah: namba su gay (gay a mawli) a makambarapantag kanu dili malbut su di nilan kalbut, sa kanilan i surga a pilagilay sa kababanin su ig a dala den kalyu nilan taman sa taman, nasuwatan nu Allah silan endu nasuwatan nilan su Allah, entuba i untung a masla a badtugan.

Kanu Allah su manga langit endu su lupa endu su dalem nin, endu kagaga nin i langun enggagaisa.

Pugin su Allah a binaluy nin su manga langit endu lupa endu binaluy nin i manga malibuteng endu malinawag, mawli na su manga kafir na sinumibay silan kanu Kadenan nilan

Su Allah i minaluy sa lekanu sa nakabpun sa lupa, mawli na minumbal sa ajal (datamanan) a kapatay, endu ajal a kambwat nu lu sa lekanin (gay a mawli), mawli na sekanu na magalang-alang kanu. (penduwa-duwa kanu sa gay a mawli)

Sekanin a Allah i (dayt a simban) lu sa langit endu sya sa lupa, katawan nin i masulen endu mapayag endu katawan nin i bamantyali nu penggalebeken nu.

Endu dala makawma sa kanilan a ayatan ebpun kanu manga ayatan nu Allah, ya tabya na silan na embalawagan nilan.

Saben-sabenal a pinandalbut nilan su Haqq (Qur’an endu su Muhammad) guna makawma sa kanilan na di ebplis na makawma bun sa kanilan i tudtulan nu bagungaten nilan.

Ngintu dala nilan katawi i madakel i bininasa nami (manga dalpa na endu manga taw) a nauna pan kanilan a manga taw sa pinadtakena silan sa dalpa sa di kena mana bu kinapadtakena sa lekanu, endu pinaulanan nami silan sa manga mapya a midtundug-tundug, na endu binaluy nami i manga pulangi a pelagilay sa kababan nilan, na bininasa nami bun silan sabap sa kanu manga kadusan nilan na pinambuat nami sa ulyan nilan i manga taw a nangauli kanilan.

Endu apya initulun nami sa leka (Muhammad) i kitab sa kaltas den (naka-sulat sa kaltas) na ami nilan kanu manga lima nilan, ya edtalun nu manga kafir na dala bun inan ka sih’r a mapayag (pangalintaw endu manga kategelan).

Endu pidtalu nilan: u namba ka nakatulun sa lekanin i malaikat (ka endu nin maddtalu i benal ka Muhammad) na u pinatulun nami i malaikat na sagugunay i kabinasa nilan sa di makasundul na dala ilayan sa kanilan.

Upama binaluy nami i nabi a malaikat na makapabpalas nami bun sa mama endu makapadasimbul nami menem kanu manusya endu malaikat.

Endu saben-sabenal na pinagungat bun i manga sinugu a nawna sa leka na nakadadsang bun kanu namagungat i lalaw na kabpagungat nilan.

Edtalu ka (Muhammad): lakaw kanu sa kanu lupa mawli na edsusuliman nu u panun i ulyan (a nanggula) na napandalbut.

Edtalu ka (Muhammad): entayn i kigkwan kanu dalem nu manga langit endu lupa, edtalu ka i kanu Allah, andang sa lekanin i limu, buligen kanu nin sa gay a mawli sa dala kabplis nin, su manga taw a linugi nilan i ginawa nilan na silan i dili mangimbenal.

Endu lu sa lekanin a Allah i pedtelnan nu kanu dalam nu magabi endu su malamag endu sekanin i pakakineg a mataw.

Edtalu ka (Muhammad): ngintu ka salakaw pan sa Allah i baluyan ku a simban ku, su Allah i minumbal sa manga langit endu lupa, sekanin i papegkan, endu di kena (sekanin) papegkanen? Edtalu ka (Muhammad): sinugu aku sa mabaluy aku a paganay a sinumangkup (sa Allah) endu di ka (enggula) sa makuyug ka kanu manga taw a manga sinumakutu.

Edtalu ka (Muhammad): kagilekan aku amayka sangkan ku su Kadenan ku, sa kanu siksa kanu gay a masla (gay a mawli).

Su taw a dala makasugat sa lekanin i siksa na ini kalimu nu Allah, endu entuba i badtugan a mapayag.

Na amayka inipawma kanu nu Allah sa makagkayd, na dala maka-awa lun ya tabya na sekanin, na amayka ipawma kanin sa mapya, na sekanin i pakagaga kanu enggaga-isa.

Endu sekanin a (Allah) i pakakumpen a muna kanu ulipen nin endu sekanin i bangukum a mataw.

Edtalu ka (Muhammad): entayn i masla i (makangguna nin) a kapedsaksi? Edtalu ka su Allah i saksi kanu pageltan ku endu sekanu, endu ini-wahi nin salaki su Qur’an ka endu ku makapakagilek sa lekanu endu su nawman u Qur’an, ngintu ka pedsaksyan nu i aden tagapeda nu Allah a manga barahala? Edtalu ka (Muhammad): di aku edsaksi, edtalu ka: isa timan bu i Allah endu saki (Muhammad) na nalepas aku sa kanu langun a ipedsakutu.

Su manga taw a aden kitab nin (Yahudi endu Nasrani) na katawan nilan (su Muhammad na sinugu ka nalabit bun kanu Taurat) sa mana bun su kataw nilan sa kanu manga wata nilan (mapayag a benal) su manga taw a linugi nilan su ginawa nilan na di bangimbenal.

Dala nakalawan sa kadupang nin su (taw) edtetebwan nin su Allah sa kalbut, ataw ka pinan-dalbut nin su manga ayatan na di den makauntung su manga kafir.

Endu su gay a buligen nami silan tanan (lu sa gay a mawli) mawli na edtalun nami kanu manga named-sakutu sa endaw su manga kadenan nu entuba i tagapeda nu Allah a pedsimban nu?

Mawli na da bun nataganin su kinasakutu nilan (kinasimba sa salakaw sa Allah) ya nilan madtalu sa kinabpalaw a midsapa silan: Kadenan nami di kena kami manga mushrik (dala kami makasakutu).

Ilay ka (Muhammad) i kinapandalbut nilan sa ginawa nilan endu natading sa kanilan su langun a ipedtatabu nilan (barahala).

Endu kaped sa kanilan (Yahudi endu Nasrani) na makikineg sa leka (kanu Qur’an) na binaluy nami kanu manga atay nilan i pakadapeng sa kasabut nilan endu sya kanu manga tangila nilan i ka bisu endu apya mailay nilan i langun a ayat na di nilan pangimbenalen, taman sa amayka makawma silan sa leka na ibpalawa ka nilan, ya edtalun nu manga kafir na dala bun inan (katagan nin) ya tabya na inipanguli su manga taw a nangawna.

Endu silan na ipedsapal nilan kanu manga taw (sa di palityalan su Muhammad) endu pedtangkan sa kanilan, na dala gabinasa nilan ya tabya na ginawa nilan sa di nilan penggedamen.

Upama mailay nengka bu (Muhammad) su kapatindeg sa kanilan lu sa naraka apuy na ya nilan madtalu na nya ba ka makambalingan tanu (lu sa dunya) na di tanu den pandalbuten su manga ayatan nu Kadenan tanu endu makuyug tanu kanu manga bamamaginugut.

Kena! Ka napayag sa kanilan su ibpagena nilan a nawna, endu apya makambalingan silan (sa dunya) na ebpalumanan nilan bun su inisapal sa kanilan endu silan i manga taw a malbut.

Endu pidtalu nilan i dala sa lekitanu (su akhirat) ya tabya na kapaguyag (sa dunya) endu dala sa lekitanu i kambwat sa ulyan a kapatay tanu.

Endu u mana bu ka mailay nengka (Muhammad) su kapatindeg sa kanilan (sa kasangulan) u Kadenan nilan sa edtalun nu Allah: di kena benal i nya ba? (kambwat sa ulyan a kapatay), ya nilan madtalu: benal man huu Kadenan nami, tig nu Allah: na nanami nu den su siksa, sabap sa kapegkafir nu. (kapedsupak kanu Muhammad endu su Qur’an).

Saben-sabenal a nalapis su napandalbut sa ka-adap (kadsangula) sa Allah, taman sa amayka nakawma kanilan su gay a mawli sa natekaw (su kapatay) ya nilan madtalu na duwan-duwan tanu ka nakasagad i galebek tanu (mawag) sa dunya endu silan na pananggiten nilan i manga dusa nilan kanu bigkugung nilan, ngin den i kawag i manga kadusan nilan.

Endu dala man sa kauyag sa dunya ya tabya na kapendadalmet kadsimpang, na su akhirat na ya labi a mapya kanu manga taw a magilek sa Allah, na ngintu ka di kanu mapakawngangen.

Katawan nami (Muhammad) i makalidu sa ginawa nengka su pedtalun nilan na di ka nilan bun pandalbutan ka natawan nilan i benal ka (sabap sa nalabit ka kanu kitab nilan) ugayd na su manga kafir na pedsupaken nilan su ayatan nu Allah.

Endu saben-sabenal a pinandalbut nilan su manga sinugu a nawna sa leka, na midsabar silan kanu kinapandalbut sa kanilan endu sinakit i ginawa nilan taman sa nakawma sa kanilan su tabang nami, endu dala makasambi (dala mapalin) sa manga kadtalu nu Allah endu makawma bun sa leka su tudtulan kanu manga sinugu (a nawna sa leka).

Upama migkasla den (mawgat) gayd sa leka (Muhammad) su di nilan kapedtalima sa agama na upama makagaga ka na pangilay ka sa kapeswan nengka sa lupa ataw ka panikan sa langit (enggula ka den) ka endu nengka kapananggitan silan sa ayatan, u mana bu ka pigkahanda bu nu Allah na (magaga nin) limuden silan sa tutulu, na enda ka enggula sa mana su manga jahileen (da sabut nin, ka seka na makasabut ka).

Benal a yabu tumalima (kanu kadtalu nengka) na su manga taw a banuliman endu su namamatay na pambwaten nu Allah silan, mawli na lu bun tanan makambalingan sa Allah.

Endu pidtalu nilan: u namba ka nakatulun sa leka (Muhammad) i ayat (tanda) ebpun sa Kadenan nengka (mamakagayp a tanda), edtalu ka (Muhammad): su Allah na magaga nin i makapatulun nin i ayat nin (mamakagayp a tanda), ugayd na ya madakel sa kanilan i dili manga mataw.

Endu da pelalakaw sya sa lupa endu da papanuk a belayug sa papak nin ya tabya na lumpukan a binaluy nu Allah a pagidsan nu bun, dala enggagaisa a di kena san bun sa kitab, (dala nalipatanan nu Allah) mawli na lu kanu bun muli sa Kadenan nu.

Endu su napandalbut kanu manga ayatan nami na bisu a maw, sya silan sa malibuteng (matagu), su Allah i pegkahanda sa tadingen nin endu sekanin bun i pegkahanda sa entayn i baluy nin a makatuntul sa lalan a matidtu.

Edtalu ka (Muhammad): panudtul nu sa laki u nakawma sa lekanu i siksa nu Allah ataw ka nakawma sa lekanu i gay a mawli, na ngintu salakaw sa Allah i pangenyan nu amayka sekanu na pedtalu sa bantang.

Kena! Ka su Allah bun i bangenyan nu, na iyawa nin sa lekanu su bangenyan nu (a salakaw) sa lekanin amayka magkahanda nin endu kalimpangan nu su manga barahala nu a ipedsakutu nu.

Endu saben-sabenal a minapayt kami kanu mga lumpukan a nawna sa leka (sa manga sinugu) na pinakapasangan nami silan sa kamasengetan endu makagkayd ka endu malemu-lemu sa kanilan i kapangalimbaban nilan.

Upama na mana bu ka kinawma na tyuba kanu manga tamuk nilan ka nangumpaya (na entuba i kagkapya nilan) ugayd na midtegas i manga atay nilan endu pinakapiya nu Shaytan sa kanilan su penggalebeken nilan a supak.

Guna nilan pedtagaka su inindawan sa kanilan na binukatan nami sa kanilan i bengawan na enggagaisa (makapya sa ginawa) taman sa nalilini den silan kanu inenggay kanilan, na bininasa nami sa natekaw, na natebped bu lawa su inam nilan sa kanu mapya.

Bininasa nami su nangawna (supak) endu su pakatundug kanu manga taw a manga kafir (amayka egkafir) endu su pugi na kanu Allah a Kadenan nu manga dunya.

Edtalu ka (Muhammad): panudtul nu upama ka kwan u Allah su kakineg nu endu su kailay nu, endu tutupan nin i manga atay nu na entayn i kadenan a salakaw sa Allah i menggay menem sa lekanu? Ilayka (Muhammad) u panun ba i kapebpayag nami kanu manga ayatan nu Allah, mawli na sumibay silan.

Edtalu ka (Muhammad): panudtul nu upama ka nakawma sa lekanu i siksa nu Allah sa makatekaw (kanu magabi) ataw ka mapayag (malmag) na dala mabinasa ya tabya na su manga taw a manga kafir.

Endu dala sa kinasugu nami kanu manga sinugu ya tabya na papegkalilini endu papegkagilek (surga endu naraka sa mapanudtul nilan), su nangimbenal endu nagumbaya na dala gilek nilan (kanu kapatay) endu di malidu i ginawa nilan.

Endu su napandalbut kanu manga ayatan nami na magedam nilan i siksa sabap kanu kabpelyu nilan sa atulan nu agama Islam.

Edtalu ka (Muhammad): di ku madtalu sa lekanu i sya sa laki i manga masulen nu Allah (kakawasa nu Allah) endu di ku katawan i gayb endu di ku madtalu sa lekanu i malaikat aku, dala bagunutan ku ya tabiya na ipebpayag sa laki, edtalu ka (Muhammad): di makapagidsan i pisek endu su pakailay, ngintu ka di kanu makapamikir?

Endu pakatawi ka su ini-wahi sa lekanu nu Allah lu kanu manga taw a bangandam sa mabulig silan lu kanu Kadenan nilan, sa dala makatuldu sa kanilan a salakaw sa Allah endu dala makadtabang sa kanilan, ka malemu-lemu sa kanilan i ikagilek nilan su Allah.

Endu di ka pembugawa (Muhammad) su manga taw a pedsangulan nilan su Kadenan nilan sa magabi sa malamag sa kyug nilan kanu Allah ka di kena nengka kalidwan silan sa apiya paidu, ka u bugon nengka silan na makuyug ka sa kanu manga taw a dupang.

Nan den ba i kinabatalu nami inibatalu nami su ped kanu kaped nin ka endu madtalu nu (manga kafir) i silan besen (manga mu'min) i inikalimu nu Allah sa lekitanu, na enduken di kena ba su Allah i mataw kanu manga taw a barasukur?

Endu amayka makawma sa leka su manga taw a bangimbenal kanu manga ayatan nami na ya ka edtalu: nanget sa lekanu i sagyahatra, nakadanden sa kanu Kadenan nu i limu, su minggalebek sa mawag a di nin katawan (sa mawag intu) mawli na midtawbat sa ulyan endu nagumbaya na su Allah na bangampun a malimu.

Endu namba i kapebpayag nami sa kanu ayat, (manga tanda) ka endu mapayag sa leka su ukit u mujrimun (manga taw a darwaka, talibunu, sumakutu).

Edtalu ka (Muhammad): sinapalan aku sa simban ku su pedsimban nu a salakaw sa Allah, edtalu ka: di ku unutan i kyug nu ka u maytu ba (sa munut aku) na natading aku, endu dala aku den makuyug kanu manga taw a namakatuntul.

Edtalu ka (Muhammad): aden mapayag a tindeg ku ebpun kanu Kadenan ku a pinandalbut nu, dala sa laki su kakukum ku kanu bamagayasan nu (a galebekan a kadusan) ka dala kukuman ya tabya na kanu Allah a kumukum sa haqq, endu su Allah i mapya gayd a kumukum sa haqq endu baatil.

Edtalu ka (Muhammad): u mana bu ka sya sa laki i (kyug ataw ka kapegkagaga) sa kanu bamagayasan nu a siksa (na inggay ku den sa lekanu su siksa) ka endu makukum den i pageletan tanu (kanu kapebpapalawa), endu su Allah bu i mataw kanu manga kafir.

Lu sa Allah su gunsi nu gayb (langun a di katawan nu manusya) dala mataw lun ya tabya na Sekanin endu katawan nin i dalem nu kapuluwan (nakabetad sa lupa) endu lagat endu dala galubpug a lawn a kayu a di kena nin katawan na endu dala lagas kanu malibuteng a lupa endu dala maylaw endu dala magangu ya tabya na sya bun tanan sa kitab a mapayag.

Endu sekanin a (Allah) i papedtulug sa lekanu sa magabi, endu katawan nin i langun na nanggalebek nu kanu malmag, mawli na pambwaten kanu nin (pinagadam kanu) ka endu kaukitan na isa su ukul nin, mawli na lu sa lekanin i kambalingan nu,mawli na balasan kanu nin sa lalaw na penggalebeken nu.

Endu sekanin (Allah) i mapulu kanu manga ulipen, bagelin kapegkagaga (di kalawanan su bagelin), endu pedsugwan kanu (nu Allah) sa ped-tuganul sa lekanu (malaikat) taman sa amayka nakawma kanu isa sa lekanu i kapatay na imatayan silan u manga sinugu (malaikat) endu silan na di nilan kalawanan su inukul (di sumubra kanu sinugwan sa kanilan).

Mawli na imbalingan silan lu sa Allah a pedtuldu sa kanilan sa bantang, lekanin (Allah) i kukuman endu mangagan gayd i kagkwinta nin.

Edtalu ka (Muhammad): entayn i lumepas sa lekanu kanu kalibutengan (makabinasa) sya sa lupa endu lagat? Na mangeni kanu sa lekanin sa mapayag-masulen endu gilek sa lekanin, (madtalu nu) amayka malpas kami kanu mapasang na makuyug kami sa manga barasukur.

Edtalu ka (Muhammad): su Allah i palepas sa lekanu endu langun a lidu na ginawa, mawli na sekanu na padsakutu kanu pan.

Edtalu ka (Muhammad): su Allah na magaga nin i pambwatan kanu nin sa siksa ebpun sa pulu, ataw ka ebpun sa kababan na ay nu, ataw ka di ka nu nin panggugudan (papamagukagen kanu nin) endu (magaga nin) i patepengan nin kanu kaped i kapasang a kaped nin, ilay ka (Muhammad) su kapebpayag nami kanu manga ayatan, ka malemu-lemu sa kanilan i makasabut silan.

Endu pinandalbut su (Muhammad) nu manga kawm nengka inunta na Haqq, edtalu ka sa kanilan: di kena inisalig sa laki i manggula nu.

Upama man i enggaga-isa na aden waktu nin (langun na inaden na aden tamanan) endu di ebplis na katawan nu bu.

Amayka nailay nengka (Muhammad) i pembityala silan sa kadusan sya kanu manga ayatan nami (Qur’an) na da ka mamung sa kanilan taman sa masalin pan i bityala nilan, amayka pelimpangen ka nu Shaytan na da ka den mayan (sumimbul sa kanilan) sa ulyan a kinatadem nengka lun lu kanu manga kafir.

Endu da kanu magilek sa Allah (pamaginugut) i kabayadan silan nu manga kafir sa apya paydu, ugayd na pangindawn silan ka basi kagilekan silan sa Allah.

Endu pasagadi ka (Muhammad) i taw a binaluy nilan su agama nilan a dalmetan endu ipegkakalilini bu endu inilabi nilan su kawyag sa dunya sa akhirat endu ipangindaw nengka su (Qur’an), su kapegkabinasa nu taw na sabap kanu galebek nin, (umana bu ka pagitungen bu nu taw) na dala makatuldu sa lekanin a salakaw sa Allah endu dala makadtabang lun endu apiya ngin pan i kapangawn nin na di matalima u mana bu ka aden ipangawn nin, silan a manga taw i tinumalima sa kabinasa sabap kanu pinggalebek nilan, aden paginumen nilan a sangat i kayaw nin endu siksa a mapasang sabap kanu kapeg-kafir nilan.

Edtalu ka (Muhammad): di kami sumimba sa salakaw sa Allah ka di pakangguna endu di pakagkayd endu makambalingan kami sa naypusan (kapedsimba sa salakaw kanu Allah) sa ulyan a tinutulu kami nu Allah, ka maytu ba sa taw antu a sinasat na manga Shaytan sya sa lupa, na anteng-anteng aden manga pakat nin a bagenggat sa lekanin, (edtalu su manga pakat nin antu): sya ka sa tutulu, edtalu ka (Muhammad): su agama nu Allah na entuba i tutulu, endu sinugu kami sa sangkupan nami su Kadenan nu (pedtyakap) sa dunya.

Endu itunay nu i sambayang endu ikagilek nu su Allah endu sekanin a Allah i kabuligan (kawlyan tanu).

Endu sekanin i minaluy kanu manga langit endu lupa sa bantang endu gay a kadtalu nin (gay a mawli) sa pangaden ka na maaden, kadtalu nin a haqq endu lekanin i kadatu kanu gay a yupen su sanggakala, a mataw sa mapayag- masulen endu sekanin i bangukum a mataw sa manawt-matiwalu.

Endu labit ka (Muhammad) su kinadtalu nu Ibrahim kani ama nin (Azar): nginan ka bangumbal ka sa manga barahala a manga kadenan? Egkailay ku seka endu su taw nengka a natading sa mapayag.

Endu ipabpagilay nami kani Ibrahim su kapegkamilik sya kanu manga langit endu lupa endu maaden (si Ibrahim) sa da den kenduwa-duwa nin.

Guna kalibutengi nu magabi (si Ibrahim) na nailay nin i bitun a matinang, yanin pidtalu: namba i kadenan ku, guna pedsedep na yanin pidtalu na: di aku myug sa pedsedep a kadenan.

Guna nin mailay i ulan-ulan a pedsebang, tig in: namba i kadenan ku, guna manem pedsedep na yanin nadtalu na: u di aku tutulun nu kadenan ku na makuyug aku den kanu manga taw a tading.

Guna nin mailay i senang a pedsebang na tigin na: namba i kadenan ku ka nan i masla, guna menem pedsedep na ya nin pidtalu na: sekanu a manga taw, na saki na lepas ako kanu ipedsakutu nu.

Benal a saki na inisangul ku i biyas ku kanu minumbal kanu manga langit endu lupa, sya aku lamig kanu haqq endu di kena aku kuyug kanu manga mushrik.

Endu inibpalawan nu manga taw nin, tig in: ngintu ka ipebpalawa aku nu sa Allah na tinutulu aku nin endu di ku ikagilek su pedsimban nu a salakaw kanu Kadenan ku (dala manggula ku) ya tabya na kahanda nu Kadenan ku a Kadenan nu enggaga-isa, langkap i kataw nin kanu langun nu enggaga-isa, ngintu ka di kanu maindaw (di kanu makatadem)?

Endu panun i kagilek ku kanu manga barahala nu (di pakagkayd) na di kanu kagilekan sa sekanu na sinumakutu kanu sa Allah a dala initulun nin a tindeg nu a tindegan nu, na endaw sa duwa anan a lumpukan i wagib a makatana (palityayan) amayka katawan nu bu.

Su manga bamamaginugut (babay endu mama) a dala nilan simbuli su kabpangimbenal nilan sa sakutu na silan ba i manga taw a kanilan i katana endu silan i manga taw a natutulu.

Entuba i tindeg nami a inenggay kanu Ibrahim kanu manga kawm nin, ipulu nami i pangkatan nu magkahanda nami, su kadenan nengka i mangukum a mataw.

Endu inenggay nami sa kani Ishaq endu si Ya'kub, uman isa na tinutulu nami endu si Nuh a nawna na tinutulu nami endu su kaped kanu mawli a taw nin, sila Daud endu si Sulayman endu si Ayub endu si Yusuf endu si Musa endu si Harun na mamba i kabalas nami kanu manga taw a manga mapya.

Endu si Zakariya endu si Yahya endu si Eisa endu si Ilyas, langun nilan na kuyug kanu manga mapya.

Endu si Ismail endu si Yasa'e endu si Yunus endu si Lut endu langun nilan na inilabi nami kanu taw na dunya sa timpu nilan.

Endu ginanat sa kalukesan nilan endu mawli a taw nilan endu manga suled nilan endu pinamili nami silan endu tinutulu nami silan sa lalan a matidtu.

Entuba i tutulu nu Allah, i tutulu nin kanu magkahanda nin sya kanu manga ulipen nin, amayka sinumakutu bu silan na nagugul den sa kanilan su penggalebeken nilan.

Entuba na inenggan nami silan sa kitab endu hukuman endu kanabi na amayka pagkafiran nu manga taw nengka (Muhammad) na aden bun sinaligan nami lun a manga taw a di nilan egkafiran (i langun a kitab).

Silan a manga taw a tinutulu nu Allah na su tutulu sa kanilan i tuntul ka, edtalu ka: di kena aku papedsukay sa lekanu sa sabap sa (Qur’an) ka saben-sabenal a indawan sa taw nu dunya.

Endu su manga Yahudi na dala nilan kilala su Allah sa benal a kakilala ka pidtalu nilan i dala pinatulunan nu Allah a manusya apya isa kataw, edtalu ka (Muhammad): entayn i napatulun kanu kitab (amayka mamba i kanilan) a napananggit nu Musa a sigay endu tutulu sa manga manusya, sa sya nu i pembetad sa manga kalatas, ipebpayag nu i kaped, na ya madakel na ibagena nilan, endu pinakatawan sa lekanu su di nu katawan endu su di katawan nu manga lukes nu, edtalu ka (Muhammad): su Allah (i napatulun lun) mawli na pasagadi ka silan kanu bityala nilan a dala guna nin.

Endu nambun su kitab a initulun nami sa leka (Muhammad) a barakat, a nagayun bun kanu nawna lun a kitab endu kapakatawan nengka kanu manga taw (san pegkalben) sa ina nu dalpa (su Makkah) endu su embala-bala lun, na su bangimbenal sa akhirat na bangimbenalen nilan su Qur’an endu silan na pedtuldun nilan su sambayang nilan.

Endu dala nakalawan sa kadupang nu taw a edtetebwan nin su Allah sa kalbut ataw ka pidtalu nin i aden nakatulun sa laki inunta na dala nakatulun sa lekanin apya paydu, endu su midtalu sa itulun ku bun i mamba sa initulun nu Allah, endu u mailay nengka bu (Muhammad) su kadsakratal mawt nu manga kafir (tidtu a masakit) endu su manga malaikat a balatan nilan su lima nilan a penggansing kanu nyawa nilan ka saguna a gay na balasan kanu sa siksa a di maganggen sabap kanu kadtalu nu sa Allah a kalbutan, endu ya nu kaaden na su manga ayatan nin na pimamasla nu (dala nu talima sa pinandalbut nu).

Endu saben-sabenal a nakawma kanu sa lekami sa isa kataw-sakataw (da kakawasan nin, da kaped nin) mana bun su kinabaluy nami sa lekanu paganay a tinaligkudan nu (sinupak nu) su nganin-nganin a inenggay nami sa lekanu, na dala gailay nami sa lekanu a makadtabang sa lekanu, kanu tindeg nu a manga barahala a makadtabang sa lekanu, saben-sabenal a nagesa den (nalupit den) endu natading sa lekanu su manga barahala nu.

Saben-sabenal su Allah i papembutakad sa lagas magidsan su utan ataw ka kayu, pabpelyu nin su bibyag ebpun sa minatay endu su minatay ebpun sa bibyag, sekanin su Allah na panun i kapedtatabu nu?

Endu papembuwaten nin i mapita endu binaluy nin i magabi a kapedtelen endu su senang ulan-ulan a bagitungan (tanud kanu manga gay) entu na atulan nu Allah a mapulu a mataw.

Endu sekanin (Allah) i minaluy sa lekanu sa manga bitun a makatuntul kanu (kanu kalalakaw) sa kalibutengan nu kapulwan endu lagat, saben-sabenal a inipayag nami su manga ayat (su Qur’an) kanu manga taw ka endu nilan katawan.

Endu sekanin (Allah) i napambuwat sa lekanu sa ebpun sa sawalu a napas (Adam) na makadtakena kanu (sya sa ludep a tiyan ni ina nu) sya pan sa dunya, makawli kanu bun kanu kubur nu, saben-sabenal a inipayag nami su manga ayat kanu manga taw ka endu nilan katuntayan.

Endu sekanin i napatulun sa ig ebpun sa langit, na (sya sa lupa) na pinalyu nami kanu ig i langun na enggaga-isa, na pinalyu nami lun i gadung sa lu nami pabpalyun i lagas a midtatalapis endu san sa kayu-kulma kanu daliday nin i pusu nin a masupeg sa lupa endu manga pamulan endu manga inab endu zaitun endu Rummaan a mamagidsan i kaped, na dala pamagidsan su kaped, ilay nu su unga nin amayka minunga endu migkalutu, langun na entuba na manga tanda a kapegkagaga nu Allah kanu manga taw a bangimbenal.

Endu inumbalan nilan su Allah sa tagapeda a jin a binaluy nilan (a pedsimban nilan) endu pidtebwan nilan su (Allah) sa manga mama endu manga babay (wata nu kadenan), mahasuti su Allah kanu langun nu ipedsakutu nilan.

Inidtebu nin (Allah) i manga langit endu lupa, panun i kapapembata sa lekanin a Allah na dala kaluma nin endu binaluy nin i langun nu engaga-isa endu katawan nin i langun na enggaga-isa.

Sekanin a Allah a Kadenan nu, dala kadenan a salakaw sa lekanin, binaluy nin i langun a enggaga-isa, na simba nu, endu sekanin (Allah) kanu langun a enggaga-isa na pedtuganulen nin.

Sekanin (Allah) na di magaws na pamikilan, sekanin a Allah i pakagaws sa pamikilan endu sekanin i malasam (matigkel) a mataw sa mapayag-masulen.

Saben-sabenal a nakawma sa lekanu i manga kataw (sabut) ebpun sa Kadenan nu, su taw a migkataw (enggalebeken nin su kataw nin) na kanu ginawa nin, endu su mibpisekan (minggalebek sa manga malat) na kanu ginawa nin bun, endu dala sa laki i katuldu ku sa lekanu.

Endu mamba i kapebpayag nami (kanu ayatan) ka endu nilan madtalu i pinangagyan nengka (Muhammad i manga tudtulan u nanga-una a tupu) endu nengka makapayag kanu manga taw ka endu nilan katawan.

Unuti ka (Muhammad) i wahi sa leka ebpun sa Kadenan nengka a dala kadenan a wagib a pedsimban, ya tabya na su Allah endu embalawagi ka su manga mushrik.

Upama pigkahandan nu Allah na di silan makasakutu, endu dala nami seka baluya (Muhammad) a tumuldu sa kanilan endu dala sa leka i makasalig silan sa leka sa manggula nilan.

Di nu embabalibay su pedsimba sa salakaw sa Allah (ka sumuli silan) na embabaliban nilan su Allah sa lipunget sa dala sabut nilan, mamba pinakapya nami sa uman isa kanu galebek nin, mawli na lu silan kanu kadenan nilan makawli, na inggay nu (Allah) sa kanilan i lalaw nu penggalebeken nilan.

Endu midsapa silan sa Allah sa mabagel a kinadsapa sa amayka makawma sa kanilan i ayat na pangimbenalen nilan, edtalu ka (Muhammad): su manga ayat na lu sa Allah, endu ngin i kataw nu (a manga Muslim) mangimbenal silan (kafir) amayka nakawma (su ayatan)? Di bun silan mangimbenal.

Endu pegkelid keliden nami i manga atay nilan endu kailay nilan sa mana bun su dala nilan kapangimbenal paganay endu pasagadan tanu silan kanu kadarwakan nilan sa ma-anteng- anteng.

(Tig nu Allah): apya initulun nami sa kanilan i malaikat, endu apya inipambityala nami sa kanilan i minatay endu apya binulig nami kanilan i langun a enggaga-isa a makabagel kanu rasul, na di bun silan mangimbenal ya tabya na kahanda nu Allah, ugayd na ya madakel sa kanilan i manga jahil (di mataw).

Endu mamba i kinabaluy nami sa uman isa a nabi na aden Shaytan a manusya endu jin, sa pedtalwan nu sabad sa kanilan su sabad sa pibpalasan a kadtalu a makadulat, endu u pig- kahanda nu Kadenan nengka na di nilan manggula, pasagadi ka silan (Muhammad) endu su ipedtetebu nilan.

Endu mapanuliman u manga taw a di bangimbenal sa gay a mawli su kadtalu nilan endu kaswatan nilan endu kapamikalan nilan bun su manga galebek nilan a manga kadusan.

(Edtalu ka Muhammad): panun i kapangilay ku sa kukuman a salakaw sa Allah, na sekanin i napatulun sa lekanu sa kitab (Qur’an) a midtinatad? Endu su manga taw a inenggan nami sa kitab (Taurat endu Injil), na katawan nilan su (Qur’an) a nakatulun ebpun sa Kadenan nengka a benal su nakadalem lun, na da ka bu enggula sa makuyug ka kanu manga pendarwaka.

Endu napasad su kalima (kadtalu) nu Kadenan nengka a benal a bantang, dala makasambi sa kalima (kadtalu) nu Kadenan nengka, ka sekanin na pakakineg a mataw.

Endu amayka unutan nengka su madakel (a taw) kanu lupa, na tadingen ka nilan kanu agama nu Allah, ka dala pagunutan nilan ya tabya na antapan endu dala kanilan (i penggula) ya tabya na kapendalbut.

Saben-sabenal su Kadenan nengka i mataw sa kanu gatading kanu agama nin, endu sekanin bun i mataw sa natutulu.

Endu kan kanu kanu sinumbali a nalabit lun su ngala nu Allah amayka bangimbenalen nu su manga ayatan nin.

Endu dala sa lekanu i di nu kanen su nalabit nu lun i ngala nu Allah, endu pidtinatadin sa lekanu su iniharam nin sa lekanu, ya tabya na nakasendud kanu (nakadadtel) endu madakel i pedtading (sa lekanu) sabap sa kyug nin a dala sabut nin, saben-sabenal kanu Kadenan nengka na sekanin bu i mataw kanu manga taw a manga matibaba.

Endu itagak nu i mapayag-masulen a kadusan, su manga taw a penggalebek sa kadusan na di ebplis i kapembalas sa kanilan kanu pamantyali nilan (pang- galebeken nilan).

Endu di nu pegkana i da malabit lun su ngala nu Allah ka saben-sabenal a maledsik endu su manga shaytan na pedtalun nilan kanu kangaunutan nilan (pakat nu shaytan a manusya) ka endu kanu makabpapalawa, na (amayka) unutan nu silan na kuyug kanu bun a manga mushrik.

(Ini-upama su kafir) sa minatay a inuyag nami (amayka nangimbenal kanu Allah), binaluy nami sa lekanin i sigay (Qur’an) a ipalalakaw nin (ipangenggat nin) kanu taw a natagu sa malibuteng a di den pakalyu, mamba i kinapabpalas kanu manga kafir sa kapya na kilay nilan kanu penggalebeken nilan (mana silan natagu sa malibuteng).

Endu mamba i kinabaluy nami kanu uman i dalpa na aden lun i kanga-unutan a manga darwaka, ka endu makapagitung sa kabinasan, na dala mabinasa nilan ya tabya na ginawa nilan, ugayd na di nilan egkagedam.

Endu amayka nakawma sa kanilan i ayat na ya nilan pidtalu na di kami a benal mangimbenal taman sa di kami kanggan sa mana su inenggay kanu manga sinugu, su Allah i mataw sa enggan nin sa ka-rasul, di ebplis na masugat su manga darwaka a kalusak lu sa Allah endu siksa a mapasang sabap sa kawagan nu itungan nilan.

Su taw a kyugan nu Allah sa matutulu nin na pakakalagen (bukatan) su laleb nin sa Islam endu su kyugan nin sa matading na baluyn nin su laleb nin sa magaget a masimpit sa mana su bamusug sa langit a dala egkagaga nin, mamba i kapembaluy nu Allah sa maledsik kanu manga taw a di mangimbenal.

Endu namba su lalan nu agama nu Kadenan nengka a matidtu (Islam), saben-sabenal na inipayag nami su manga ayatan kanu manga taw ka endu silan makatadem.

Sa kanilan i dalpa a suti (surga) lu sa kadenan nilan, endu su Allah i pedtuldu sa kanilan sabap kanu penggalebeken nilan a mapya.

Endu su gay a buligen nu Allah (jin endu manusya) silan langun (tig nu Allah): sekanu a manga jin- pinakadakel nu i manusya a tinading nu sa mapya gayd i palas nin sa mapayag, endu pidtalu menem u kangaunutan nilan a manusya: huu Kadenan nami! Pigkakalinyan nu kaped sa lekami su sabad, (saguna) nasampay nami su ukul nami a inukul nengka sa lekami, tig nu Allah: su apuy i katindegan nu a di kanu makalyu ya tabya na kahanda nu Allah, su Kadenan nengka i mapambetad a mataw.

Mamba i kapadtatagapeda nami kanu manga kafir kanu sabad sa kanilan sabap kanu pamantyalin (pinggalebek) nilan a kadusan.

Hay sekanu a manga jin endu manusya! Da ba makawma sa lekanu i manga sinugu ebpun sa lekanu sa panudtulen nin sa lekanu i manga ayat ku endu pakagilekan kanu nin sa kawma nu kanu gay nu ba nya? Ya nilan madtalu: pedsaksyan nami i ginawa nami (dupang), endu nasimpang silan nu kabpaguyag sa dunya endu pidsaksyan nilan i ginawa nilan sa silan na manga kafir.

Mamba su Allah na di nin binasan i taw na dalpa sa kadupangan nu taw nin sa dala mawma na kataw (da silan mawma na lslam).

Endu uman isa na aden pangkatan nin (a makadayt) kanu manga galebek nilan endu dala kanu Kadenan nengka i limpangan nin su penggalebeken nilan.

Endu su Kadenan nengka i kawasa a kigkwan sa limu, u yanin magkahanda i iyawa kanu nin endu sumambi sa ulyan nu (na magaga nin) sa apiya ngin i kahanda nin, mana bun su kinapambwat nin sa lekanu ebpun sa mawli a taw a kaped.

Saben-sabenal kanu inibpasad sa lekanu a (siksa) na makawma endu dala sa lekanu i makalipus lun.

Edtalu ka (Muhammad): sekanu a manga taw, enggalebek kanu sa lalan (lalan a kasugwan nu Kadenan) ka saki na penggalebek aku (sa lalan sa Allah) na katawan nu u entayn i mapya i kandalpan nin (sa gay a mawli) ka di makauntung su manga kafir.

(Su taw a pedsakutu) na binaluy nilan kanu Allah su kaped a binaluy bun nu Allah a pamulan endu binatang i umun (bagumunan nilan su Allah kanu inaden nin), edtalun nilan nan na kanu Allah sa kalbut nilan endu nan i kanu barahala nilan, na di pakasampay sa Allah, endu su kanu Allah na paka- sampay kanu barahala nilan, na ngin den a kawagan a kukuman i kanilan.

Endu saka maytu bun a pinagkapya na Shaytan kanu madakel kanu mushrik i ka-imatay sa wata nilan, ka endu mabinasa silan endu di nilan magugud su agama nilan, na u pigkahanda bu nu Allah na di nilan manggula, na pasagadi ka silan endu su ipedtetebu nilan.

Endu kadtalu nilan sa nya binatang endu pamulan na patanan, dala makakan lun ya tabya na su pegkyugan tanu sa kalbut nilan endu nya manem i di mapakay a gikudan, endu di nilan labiten i ngala nu Allah sa kasumbali lun, ipedtebu nilan intu (sa Allah), di ebplis i kabalas sa kanilan kanu kapedtetebu nilan sa Allah.

Endu pidtalu (nu manga taw a ped-sakutu): dalem nu tyan nu nya a binatang na lekitanu a manga mama haram kanu manga babay tanu, na amayka minatay (sa kinagemaw nin) na sa kanilan tanan babay-mama, di ebplis i kabalas sa kanilan kanu kadtalu nilan, su Allah i mapandayt a mataw.

Saben-sabenal a nalapis su inimatayan nin i manga wata nilan sa dala ungangen nin dala kataw nin endu iniharam nilan su inirizki nu Allah sa kanilan, ipedtebu nilan sa Allah, na saben-sabenal a natading silan endu dala silan matutulu.

Su Allah i napambwat sa manga pamulan a pedtindeg endu belanag endu su kayu kulma endu su manga kapasadan a mimbida-bida i nanam nin endu su zaitun endu su rummaan a mamagidsan endu aden bun di mamagidsan, kan kanu kanu unga nin amayka minunga endu inggay nu su haqq nin (zakat) kanu gay a kapagagani nu lun, na da kanu magudal, su Allah na di nin kalinyan su magudal.

Endu kaped kanu manga binatang i palulanan nu endu bagikamen nu i upis nin (bagumbalen a igan ataw ka kaped pan) kan kanu kanu inirizki nu Allah, na di nu munuti su manga sangkad nu Shaytan ka saben-sabenal sa lekanu su Shaytan na satru a mapayag.

(Binaluy nu Allah) su walu timan, duwa timan i kambing a malendu i bumbul nin (babay-mama) endu duwa timan i mababa i ikug nin, edtalu ka sa kanilan (Muhammad): ngintu duwa a mama i ini-haram ataw ka duwa a babay i ini-haram (inisapal i kakan lun) ataw ka nakamung i kagingay nu duwa a babay? Edtalu nu sa laki kanu natawan nu amayka benal kanu.

Endu unta a duwa timan (babay-mama) endu sapi a duwa timan, edtalu ka (Muhammad):i ngintu su duwa a mama i haram ataw ka duwa a babay i haram, ataw a nakamung su kagingay nu duwa a babay (babay a sapi ataw ka unta) ataw ka ngintu nadsaksyan nu i kinadtutuma nu Allah sa lekanu sa namba? Dala nakasagad i kadupang nin kanu taw a pidtetebwan nin su Allah sa kalbutan ka endu nin matading su manga taw a dala kataw nin, su Allah na di nin tutulun su manga kafir.

Edtalu ka (Muhammad): dala natun ku sya kanu inisugu sa laki a haram kanu pegken a pegkenen nu, ya tabya na su minatay (binatang) endu su lugu a tinemuga endu su sapu na babuy, ka saben-sabenal a maledsik ataw ka kadusan, entayn menem i nakasendud sa di kena nin pidtibaba ataw ka di kena nin ipendupang (mapakay a keman kanu -haram sa paydu bu) ns saben-sabenal su Allah na mangampun a malimu.

Endu ini-haram nami kanu (Yahudi) i langun na aden kanuku nin (dala mupak) endu sya sa sapi endu kambing na ini-haram nami sa kanilan su kasebudan nin ya tabya na sya sa bigkugung ataw ka su inukap ataw ka su dinumeket sa tulan, entu na inibalas nami sa kanilan sabap kanu kadupang nilan, endu benal su langun na pedtalun nami (sa leka Muhammad).

Na amayka pandalbuten ka nilan na edtalu ka: su Kadenan nengka i kigkwan sa limu a mawlad endu di ma-alaw su tyuba nu Allah kanu taw a manga kafir.

Pedtalun nu manga mushrik u pigkahanda bu nu Allah na di tanu makasakutu endu su manga kalukesan tanu, endu di tanu ma-haram i apya ngin, mamba ikinapandalbut nu nangawna sa kanilan (ipebpalawa nilan su manga sinugu sa kalbutan) taman sa nananaman nilan i tyuba nami, edtalu ka: ngintu aden tindeg nilan? na pambwaten nilan ka dala padtuntulan nu ya tabya na antapan endu dala sa lekanu ya tabya na kalang-kalangan a kalbutan.

Edtalu ka (Muhammad): su Allah i kigkwan sa tindeg (a mapya) na u pegkahandan nin bu na natutulu kanu langun.

Edtalu ka (Muhammad): pambwat nu i saksi nu a makadsaksi sa saben-sabenal su Allah na ini-haram nin sa lekanu i namba, amayka silan i edsaksi na da ka mamung edsaksi sa kanilan (da ka edsaksi sa kanilan) endu di ka bagunuti su kyug nu ginawa nilan sa pinandalbut nilan su manga ayatan nami endu di silan bangimbenal sa gay a mawli endu silan na inilagid nilan su Allah kanu kadenan nilan.

Edtalu ka (Muhammad): sya kanu ka batyan ku sa lekanu i iniharam nu Kadenan nu sa lekanu , (nya ba i inisapal) da kanu sumakutu apya paydu endu ebpyampyani nu i duwa lukes nu, endu di nu pangi-mataya i manga wata nu sa gilek sa kamiskinan ka sekami i pe-rizki sa lekanu endu silan endu di nu pedsupegi su manga mawag mapayag-masulen, endu di nu pembunu su taw a ini-haram nu Allah (i kabunu lun) ya tabya na bantang, entu bu i ibangindaw sa lekanu ka malemu-lemu sa lekanu ikapagungangen nu.

Endu di nu pedsupegi i tamuk nu yateem (ilu) ya tabya na kagkapya nin taman sa mabalig endu patidtu nu i kapagasad nu endu kadtimbanga nu sa bantang, di nami ibpalyugat sa taw i dinin magaga ya tabya na magaga nin, endu amayka edtalu kanu na embantang kanu sa apiya pagali nu (ikawagiban) endu tuman nu i pasad nu sa Allah ka entuba i patadem (indawan) sa lekanu, ka malemu-lemu sa lekanu i makatadem kanu.

Endu namba i lalan sa laki a matidtu, na unuti nu na da kanu bagunut sa manga lalan (a salakaw sa agama nu Kadenan) ka makabpapalak kanu sa agama nu Allah, namba i patadem (indawan) sa lekanu, ka malemu-lemu sa lekanu i kagilekan kanu.

Mawli na inenggay nami kanu Musa i kitab a sampulna i kapya nin endu minayag kanu langun nu engaga-isa endu tutulu endu limu, ka malemu-lemu i ka-adap nilan sa Kadenan nilan sa mangimbenal silan.

Endu nan su kitab (Qur’an) initulun nami sa leka (Muhammad) a barakat na unuti nu endu ikagilek nu (su Allah) ka malemu i kakalimu sa lekanu.

(Initulun nami su Qur’an kanu manga Arab) ka endu di nilan madtalu i ya bu tinulunan sa kitab na duwa a lumpukan (Yahudi endu Nasrani) a nawna sa lekami, na saben-sabenal (sekami a manga Arab) su kabatya sa kitab nilan sa basa nilan na di nami katawan.

Endu di nu madtalu i nya ba ka nakatulun bu sa lekitanu i kitab na sekitanu pan i mawna i katutulun nin sa kanilan, na nakawma sa lekanu i mapayag (Qur’an) ebpun sa Allah a tutulu endu limu, na dala nakalawan i kadupang nin kanu (taw) a napandalbut kanu manga ayatan nu Allah endu sinamungkilap (sinumibay) na di ebplis na balasan nami su namedsungkilap kanu manga ayatan nami sa sagad i kawag nin a siksa sabap kanu kinasungkilap nilan.

Dala kapagangapan nilan (manga kafir) ya tabya na makawma sa kanilan i malaikat a bagimatay sa kanilan, ataw ka ya makawma i tyuba nu Allah ataw ka makawma sa kanilan su kaped kanu manga tanda nu Kadenan nengka, su gay a kawma nu kaped kanu manga tanda nu Kadenan nengka (kasebang nu senang sa sedepan) na di makambarapantag kanu taw su pangimbenal nin (su tawbat nin) sa dala pangimbenal muna sa dala pan mawma i namba a gay, ataw ka palanan bu a bangimbenal na dala galebek nin a mapya, edtalu ka (Muhammad) sa kanilan i pagangapa kanu den ka bagangapa kami bun (su Allah).

Saben-sabenal su manga a taw a kaped bu i kinwa nilan sa agama nilan (sabad na balityalan, sabad na pedsupaken) na naaden silan a tumpuk-tumpuk, na di kena ka kuyug sa kanilan (Muhammad) apya paydu, ya bu mataw sa kanilan su Allah, mawli na balasan nami silan kanu lalaw nu penggalebeken nilan.

Endu su minggalebek sa isa timan a mapya na sapulu i balas nin (a mapya), su mawag menem a isa timan na isa timan bu i balas nin endu di silan dupangen ataw ka di silan madsalimbut.

Edtalu ka (Muhammad): tinutulu aku nu Kadenan ku sa lalan a matidtu, agama a dala bigkug nin, agama nu Ibrahim a bantang, matidtu endu dala makuyug kanu manga mushrik.

Edtalu ka (Muhammad): su sambayang ku endu su panunumbalin ku endu su kawyag ku endu kapatay ku, na kanu Allah a Kadenan nu manga dunya.

Dala kaduwa nin (su Allah) endu namba i inisugu sa laki endu saki i mawna a nag-Islam.

Edtalu ka (Muhammad): ngintu aden pan salakaw kanu Allah a Kadenan ku-sa sekanin i Kadenan nu langun u enggaga-isa? Endu dala penggalebeken nu isa a di kena lekanin bun (i pahala ataw ka siksa nin), endu di mandusa nu isa su dusa na kaped nin, mawli na lu bun kanu Kadenan nu i kambalinganan nu, na patuntayan nin sa lekanu langun su pembibidayan nu.

Endu sekanin a Allah i minaluy sa lekanu a namakasukeli (kanu nawna sa lekanu) sya sa lupa endu inipulu nin su kaped sa lekanu sa pangkatan, ka pembatalun kanu nin kanu inenggay nin sa lekanu, su Kadenan nengka i malangkas i siksa nin endu bangampun a malimu.