Oromoca Meal — Gali Ababor — Nebe' 78:1 – Nas 114:6

[Warri hin amanin] maal irraa wal gaaggaafatan?

Oduu guddaa irraa [wal gaafatu)

Isa isaan isa keessatti wal dhaban [irraayi].

Haa dhowwamanu! fuula dura beekuuf jiru.

Ammas haa dhowwamanu! fuula dura beekuuf jiru.

Sila Nuti dachii firaasha hin goonee?

Gaarreenis shikaaloowwan [hin goonee]?

Cimdiis goonee isin uumne.

Hirriba keessan boqonnaa goone.

Halkan uffata goone.

Guyyaas yeroo jireenyaa (keessa hojjatan) goone.

Gubbaa keessanitti [samii] jajjaboo torba ijaarre.

Ifaa boba'aas uumne.

Duumessa irraas bishaan dhangala'aa baay'ee buufne.

Isaan fuduraafi marga baasuuf jecha [buufne].

Ashaakiltii damee wal keessa seensifattes.

Guyyaan fooyamaa yeroo beellamamaa ta'e.

[Guyyaan sun] guyyaa Garriin (xurumbaan) afuufamee isinis garee gareen dhuftanuudha.

[Guyyaa] samiinillee banamtee hulaalee taatuudha.

Gaarreenis deemsifamtee siribii (siribduu) taate.

Dhugumatti jahannam keellaa taateetti.

Warra daangaa dabraniif iddoo deebiiti.

Yeroo dheeraaf ishee keessa turu.

Ishee keessatti qabbanas ta'ee dhugaatii hin dhandhamanu.

Bishaan akkaan danfaafi malaa malee [dhugaatii biraa hin argatanu].

Mindaa wal madaalu [mindeeffaman].

Isaan qormaata hin sodaatanu turan.

Keeyyattoota keenyas kijibsiisuu kijibsiisan.

Wanta cufaayyuu haala barreeffameen walitti qabne.

“Dhandhamaa; azaaba malees isiniif hin daballu” [isaaniin jedhama].

Warra Rabbiin sodaataniif milkiitu jira.

Ashaakiltiifi inabatu [jira].

Dubartoota harma guntuttuu hiriyaa ta'antu [jiru].

Geeba (xoofoo) guutamtuu.

Achi keessatti dubbii badaafi wal kijibsiisuu hin dhaga'anu.

Mindaa Gooftaa kee irraa ta’e kennaa ga’aa [mindeeffaman].

Gooftaa samii, dachiifi waan gidduu isaanii jiru, mararfataa kan ta'e [irraa mindeeffaman]. Isaa wajjin dubbachuu hin danda'anu.

Guyyaa Jibriiliifi Maleykonni haala hiriiraniin dhaabbatan nama Rabbiin eeyyameefi dhugaa dubbate malee hin haasawanu.

Sun guyyaa [dhufaatiin isaa] haqaati. Namni fedhe [hojii gaarii hojjachuun] gara Gooftaa isaatti deebii tolfata.

Nuti adabbii dhihoo tahe isin sodaachifne. kan guyyaa namni waan harki lamaan isaa dabarfatte argu, kan kaafirri jedhu "yaa hawwii kiyya! odoon biyyee ta’ee maal qaba".

[Maleykaa lubbuu kaafiraa] humnaan buttuunin (kakadha).

[Kan lubbuu mu’uminaa] luqqisuu suuta luqqiftuunis.

[Kan ajaja Rabbii geessuuf] adeemuu demaniinis.

Maleykota] dorgommii wal dorgomaniinis.

(Kan) ajaja Rabbii gara dachii geessaniininis (nan kakadha).

Guyyaa sochootuun [afuuffiin xurumbaa nama] sochooftu;

Hordoftuutu (afuuffii biraatu) ishee hordofa.

Onneewwan guyyaa san rifattuudha.

Ijji ishee salphattuudha.

Ni jedhu: "sila nuti dhugumatti haala jireenya duriitti ni deebifamnaa?

Sila erga lafee dhumte taanee moo?

Yoo akkas ta'e sun deebii hoongooti" jedhan.

Isheen iyya (afuuffii) tokko qofa.

Yeroma san isaan gubbaa dachii irratti ta'u.

Sila haasofni waa’ee Muusaa sitti dhufee?

Yeroo Gooftaan isaa laga qulqulleffamaa "Xuwaa" jedhamu keessatti isatti lallabe.

Gara Fir'awn deemi; inni daangaa darbee jira.

Jedhiin: "sila gara (shirkii irraa) qulqulleffachuutti fedha qabdaa?

Akka sodaattuuf gara Gooftaa keetii si qajeelchutti (fedha qabdaa)."

[Muusan] mallattoo guddaa isa (Fir'awniin) agarsiise.

Inni (Fir’awn) sobsiisee faallesse.

Ergasii ariifataa gara gale.

Sana booda walitti qabee lallabe:

“Ani gooftaa keessan isa ol aanaadha” jedhe.

Sana booda Rabbiin adabbii [badii] boodaatiifi jalqabaatiifis isa qabe.

Dugumatti, kana keessa nama Rabbiin sodaatuuf gorsatu jira.

Sila uumaa keessantu irra jabaata moo samii dha? Inni (Rabbiin) ishee ni ijaare.

Ijaarsa ishee ol fuudhee, ishee wal qixxeesse.

Halkan ishee dukkaneessee guyyaa ishee ibse.

Dachii sana booda sirreesse.

Ishee irraa bishaan isheetiifi biqiltuu ishee ni baase.

Gaarreenis dachii irra ni dhaabe.

Isiniifi beelladoota keessan qanansiisuuf [kana godhe].

Yeroo balaan guddoon (Qiyaamaan) dhufte,

Guyyaa namni waan hojjate hunda yaadatu,

(Guyyaa) ibiddi jahannam namuma arguuf mul'atte,

Namni daangaa dabree,

Jireenya addunyaa kanaa filate,

Dhugumatti, jahannam teesson isaa.

Namni Gooftaa isaa dura dhaabbachuu sodaatee, lubbuu isaa waan isheen hawwitu irraa dhorge,

Dhugumatti, jannanni bakka qubannaa isaati.

[Yaa Muhammad SAW!] Qiyaamaa irraa, yoom argamtii ishee si gaafatu.

Ati beekumsa ishee irraa maal keessa jirta?

Beekumsi ishee kan dhumaa garuma Gooftaa keetiiti.

Ati akeekkachiisaa nama ishee sodaatuuti.

Isaan guyyaa ishee argan akka waan isaan galgala tokko yookiin ganama tokko malee (addunyaa irra) hin turin itti fakkaata.

Fuula guuree gara gale.

Sababa jaamaan isatti dhufeef.

Maaltu si beeksise? Qulqullaa’uun isaa ni kajeelama.

Yookiin gorfameeti gorsi isa fayyaddi.

Nama duroome immoo,

Ati [akka amananuuf jecha] gara isaa gara galta.

Haala qulqullaa'uu dhiisuun isaa homaa sirra hin jirreen.

Nama fiigaa sitti dhufe immoo,

Kan Rabbiin sodaatu ta’ee,

Ati isa irraa dagatta.

Dhorgami! Isheen gorsa.

Nama fedhetu isa (Qur'aana) yaadata.

Galmeewwan kabajamtuu keessa jira.

Ol fuudhamtuu, qulqulleeffamtuu (keessa jira).

Harka barressitootaa (maleykotaa) jira.

Kabajamoo, ajajamtoota (harka jira).

Namni abaarame! Sila maaltu isa kafarsiise?

(Rabbiin) waan akkamii irraa isa uume? (hin xiinxaluu?)

Bishaan saalaa irraa isa uumeeti, ergasii isa sirreesse.

Ergasii karaa (inni ittiin dhalatu) isaaf laaffise.

Ergasii isa ajjeeseti isa awwaalchise.

Ergasii yeroo fedhe isa kaasa.

Dhugumatti, (namni) waan Rabbiin isa ajaje ammallee hin raawwanne.

Namni gara nyaata isaa haa ilaalu.

Nuti bishaan buusiinsa baay’inaan buufne.

Ergasii dachii dhodhoosiinsa dhodhoofne.

Achumaan Ishee keessatti firii magarsine.

Inabaafi margas,

Zeytunaafi muka timiraas,

Ashaakiltiilee muka baay’atanis,

Fuduraafi kaloo [akka nuti uumne haa ilaalu].

Isiniifi beylada keessanis qanansiisuuf.

Yeroo gurra duuchituun (Qiyaamaan) dhufte,

Guyyaa namni obboleessa isaa irraa dheessu,

Haadha isaatiifi abbaa isaa irraas,

Niitii isaatiifi ijoollee isaa irraas (baqatu san dhufti).

Nama Isaan irraa ta’e hundaaf guyyaa sana dhimma isa duroomsutu jira.

Fuulli gariin guyyaa san ni ifti.

Kolfituu, gammadduudha.

Fuulli gariin immoo guyyaa san dhukkeetu (quttootu) irra jira.

Gurraachinni ishee haguuga.

Isaan sun warra Rabbitti kafaranii, balleessa hojjataniidha.

Yeroo aduun maramte,

Yeroo urjiin harcaate,

Yeroo gaarreen bakkaa oofamte,

Yeroo gaalli rimaan baatii kudhanii dhiifamte (tiksitee malee hafte),

Yeroo bineensonni bosonaa walitti qabamte,

Yeroo galaanni qabsiifamte (akka ibiddaatti boba'an),

Yeroo lubbuuleen hundi qindeeffamte.

Yeroo durbi jirtuun awwaalamte gaafatamte,

Balleessa kamiif akka ajjeefamte;

Yeroo galmeen (hojii) raabsamte,

Yeroo samiin buqqifamtee maramte,

Yeroo ibiddi qabsiifamte,

Yeroo jannanni dhiheeffamte,

Lubbuun waan dalagatte beekteetti.

(Urjiiwwan) guyyaa badanii halkan mul'ataniinin kakadha.

(Urjiiwwan) yaa’aa seenaa ta’aniinin (kakadha).

Halkaniinis yeroo inni dukkanaa’en (kakadha),

Bariittillee yeroo inni hafuura baafate (ife) (kakadha),

Inni (Qur'aanni) kun jecha Ergamaa kabajamaati {1} ——— {1} Qur'aanni kuni jecha Rbbiiti jibriil fuudhee nabi muhammaditti geessuudha.

(Ergamaa) abbaa humnaa ta'e, kan Gooftaa Arshii biratti iddoo jabaa qabu.

Bakka sanatti ajajni isaa fudhatamaafi amanamaa kan ta'e.

Saahibni keessan (Muhammad SAW!) maraataa miti.

Dhugumatti, inni moggaa ol aanaa (samii) ifa galaa (gara Bahaa) keessatti isa argee jira.

Inni (Nabiyyiin) beekumsa fagoo irratti don'aa miti (hin dhoksu).

Inni (Qur'aanni) jecha sheeyxaana darbamaa miti.

Mee eessuma deemtu?

Inni aalama hundaaf gorsa malee hintaane.

Nama isin irraa qajeeluma fedheef (gorsa ta'a).

Yoo Rabbiin aalama hundaa fedhe malee isin homaa hin feetanu.

Yeroo samiin dhodhoote,

Yeroo urjiiwwan harcaate,,

Yeroo galaanonni walitti makaman,

Yeroo qabroonni gara gaggalfamtee du’aa ishee keessa jiru ol baafte,

(Yeroo san) lubbuun hundi waan dabarfatte (hojjattee)fi baada aansite ni beekti.

Ati Yaa nama! Gooftaa kee kan Arjaa ta'etti (amanuu irraa) maaltu si dage?

Isa si uumee, ergasii si guutee, si sirreesse,

Boca fedhe keessatti walitti si qabe (sanarraa maaltu si gowwoomse)?

Dhorgamaa! Dhugumatti, guyyaa murtii ni sobsiiftu.

Isin irra to’attootatu jiru.

Kabajamoo, barreessitoota kan ta’an.

Waan isin dalagdan ni beeku.

Dhugumatti, warri toltuu hojjatan qananii keessa jiraatu

Warri hamtuu hojjatan immoo ibidda keessa jiraatu.

Guyyaa murtii ishee seenu.

Isaan ishee irraa hin fagaatanu.

Sila guyyaan murtii maal akka ta'e maaltu si beeksise?

Ergasii guyyaan murtii maal akka ta'e maaltu si beeksise?

(Inni) guyyaa lubbuun takka lubbuu biraatiif homaa gochuu hin dandeenye. Guyyaa san wanti (hundi) kan Rabbiiti.

Salaabiiwwaniif (warra safara hir’isuuf) badiin haa ta’u!

Isaan yeroo namoota irraa safaratan guuchisiifatan,

Kan Yeroo namootaaf safaran yookiin miizaanan immoo hir’isan.

Sila isaan sun kaafamuu isaanii hin yaadanii?

Guyyaa guddaadhaaf.

Guyyaa namni Gooftaa aalamaatiif dhaabbatu.

Dhugumatti, galmeen badii hojjattootaa Sijjiin keessa ta'a.

"Sijjiin" maal akka ta'e maaltu si beeksise?

Kitaaba barreeffamaadha (dalagaa yakkamtootaatu irratti barreeffama).

Kijibsiiftotaaf Guyyaa san badiin mirkanaa’e.

Isaan guyyaa murtii sobsiisaniif.

Daangaa darbitoota dilaawoo cufa ta’e malee namni isa kijibsiisu hin jiru.

Yeroo keeyyattoonni Keenya isaan irratti qara'amte "ogbarruu warra duriiti" jedha.

Haa dhorgamanu! Dhugumatti wanti isaan hojjataa turan onnee isaanii haguuge.

Haadhoorgamanii! Isaan guyyaa san Gooftaa isaanii irraa haguugamoodha.

Ergasii isaan ibidda seenoodha.

Ergasii "inni kun isa isin sobsiisaa turtan" jedhama.

Dhugumatti, galmeen toltuu hojjattootaa Illiyyiin keessatti ta'aadha.

"Illiyyiin" maal akka ta'e maaltu si beeksise?

Kitaaba barreeffamaadha (hojii warra Rabbitti amaneetu irratti barreeffame).

Warra Rabbitti dhiheeffamantu isa arga.

Dhugumatti, toltuu hojjattoonni qananiilee keessa jiraatu.

Sireewwan irra (taa'anii) ilaalu.

Fuula isaanii keessatti ifina qananii ni beekta.

Farsoo qadaadamaa irraa obaafamu.

Dhumti isaa miskiidha; sana keessatti warri wal dorgoman wal haa dorgoman.

Makaan isaas ‘Tasniim’ irraayi.

(Tasniim) laga warri Rabbitti dhiheeffaman dhuganiidha.

Dhugumatti, isaan dilaawan isaan amananitti kolfaa turan.

Yeroo isaan bira dabran wal akeeku.

Yeroo gara maatii isaanii deebi'an gammadaa deebi’u.

Yeroo isaan argan "dhugumatti, isaan kun jallattoota" jedhu.

Haala to'attoota ta'anii isaan irratti hin ergaminiin.

Har’a (guyyaa kaafamiinsaa) isaan amanantu kaafirootatti kolfa.

Sireewwan irra (ta'anii) ilaalu.

"Sila kaafiroonni waan dalagaa turan mindeffamaniiruu?” [jedhu].

Yeroo samiin dhodhoote

(Yeroo isheen ajaja) Gooftaa ishee dhaggeeffatte; (wanti kana godhu waan itti argameef) dhugaa qabdi.

Yeroo dachiin diriirfamte,

Waan ishee keessa jiru darbitee, duwwaa taate,

(Yeroo isheen ajaja) Gooftaa ishee dhaggeeffatte; (wanti kana godhu waan itti argameef) dhugaa qabdi.

Ati Yaa nama! Ati gara Rabbii keetii (dhaqqabuuf) hojiin laffa'aadha laffa'iinsa, isa qunnamaadhasi.

Namni kitaaba isaa mirga isaatiin kenname;

Qormaata salphaa qoramuuf jira.

Gammadaa gara maatii isaa deebi’a.

Namni kitaaba isaa dugdaisaa duubaan kenname immoo;

Badii yaamuuf jira (Yaa badii tiyya jedhee).

Ibidda boba’aa seena.

Inni maatii isaa keessatti gammadaa ture.

Inni (gama Rabbii) hindeebi’uu yaade.

Lakki! (ni deebi’a) Gooftaan isaa isa argaadha.

Miti! Diimina galgalaattin kakadha.

Halkaniifi waan inni walitti qabeenis (nan kakadha).

Ji'attis yeroo inni guuteenin (kakadha).

Isin sadarkaa tokko irraa gara sadarkaa biraatti ceetu.

Maaltu isaaniif jiraayi hin amanne?

Yeroo Qur'aanni isaan irratti qara'amu hinsujuudan. {1} ——— {1} as sujuuda qaraatii qur'aanaattu jira.

Dhugumaatti, warri kafaran ni sobsiisu.

Rabbiin beekaa waan isaan (onnee isaanii keessatti) walitti qabaniiti.

Adaba laalessaadhaan isaan gammachiisi.

Isaan amananii gaggaarii hojjatan malee isaaniif mindaa hin cinnetu jira.

Samii abbaa orbitii urjiitiin (nan kakadha).

Guyyaa beellamamaanis,

Ragaa ba'aafi warra ragaan itti ba'amuunis (nan kakadhaa),

Warri handaqa abaaraman.

(Warri) ibidda boba’aa.

Yeroo isaan ishee irra taa'an,

Isaan waan mu'imintootatti hojjatan irratti hirmaattota.

Rabbii injifataa, faarfamaatti amanuu malee homaa isaan irraa hinjibbine.

(Rabbiin) Isa mootummaan samiifi dachii Isaaf ta'eedha. Rabbiin waan hunda irratti ragaadha.

Isaan mu'imintoota dhiiraafi dubartootaa rakkisanii ergasii gara Rabbii isaanii kan hin deebi'in (hin tawbatin) isaaniif adabbii jahannamtu jira; ammas isaaniif adabbii gubaatu jira.

Isaan amananii gaggaarii hojjatan, isaaniif ashaakiltiiwwan laggeen jala ishee yaatutu jira. Sun milkii guddaadha.

Qabaan Gooftaa keetii haalaan cimaadha.

Inni Isumatu [uumama] jalqaba; (du'a boodas) ni deebisa.

Inni akkaan araaramaa, akkaan jaalataadha

(Inni) abbaa Arshiiti; guddaadha.

Waan fedhe akkaan hojjataadha.

Sila oduun waraanaa si ga'eeraa?

(Waraana) Fir'awniifi Samuud.

Dhugumatti, isaan kafaran kijibsiisuu keessa jiru.

Rabbiin immoo duuba isaanii irraan marsaadha.

Dhugumatti, inni Qur'aana guddaadha.

Luuhii tiikfamaa keessa jira.

Samiifi (urjii) halkan dhufaa ta’eenin (kakadha).

(Urjii) halkan dhufaa ta’e maaltu si beeksise?

(Inni) urjii ifti isaa dukkana uraa ta’eedha.

Lubbuun hundi tiksaan ishee irra jiraatu malee hin hafu.

Namni maal irraa akka uumame haa ilaalu.

Bishaan utaalaa irraa uumame.

Jidduu dugdaatiifi qomaatii kan ba’u.

Inni isa deebisuu irratti danda’aadha.

Guyyaa iccitiiwwan ifa ba'an.

(Gaafas) humnas ta’ee tumsaan isaaf hin jiru.

Samii abbaa deddeebiitiinin (kakadha).

Dachii dhodhootuunin (kakadha).

Inni (Qur'aanni) jecha adda baasaadha.

Inni qoosaa miti.

Dhugumatti, isaan shira shiru.

Anis shiran baasa.

Kaafirootaaf yeroo kenni. Ammas xinnoo yeroo kenniif.

Maqaa Gooftaa kee olaanaa ta'ee qulqulleessi.

Isa (waan hunda) uumee guute.

Isa murteessee qajeelche.

Isa marga baase,

Goggogaa gurraacha isa taasise.

Si qaraasisuuf jirraa hin dagattu.

Waan Rabbiin fedhe malee Inni mul’ataafi dhokataas ni beeka.

Nuti karaa laaftuu taateef si laaffifna.

Yoo yaadachiisni fayyadde yaadachiisi.

Namni Rabbiin sodaatu gorfamuuf jira.

Hoonga'aan ishee irraa fagaata.

Inni ibidda guddoo seenu.

Ergasii ishee keessatti hin du'u; hin jiraatus.

Dhugumatti, namni of qulqulleeffate milkaa’e.

Maqaa Gooftaa isaa dubbatee kan salaate.

Inumaa isin jiruu addunyaa filattu.

Odoo Aakhiraan caaltuufi haftuu taatee jirtuu [addunyaa filattu].

Kun barreeffamoota duraanii keessa jira.

Barreeffamoota Ibraahiimifi Muusaa [keessa jira].

Sila oduun haguugduu (Qiyaamaa) sitti dhufeeraa?

Fuulleen (gariin) guyyaa san xiqqaattuudha.

Hojjattuu ifaajjuudha.

Ibidda gubduu seenti.

Burqituu danfituu irraa obaafamti.

Adaamii malee nyaanni isaaniif hin jiru.

Hin gabbisu; beela irraas hin duroomsu.

Fuulleen gariin guyyaa san qananiituudha.

Dalagaa ishee jaalattuudha.

Jannata ol fuudhamtuu keessa jiraatti.

Ishee keessatti waca hin dhaga'anu.

Ishee keessa burqituu yaatutu jirti.

Ishee keessa sireewwan ol fuudhamtuutu jirti.

Kubbaayyaawwan kaa’amtuutu jirti.

Boraatiiwwan tarree galfamantu (isaaniif jira).

Afaawwan diriirfamanis (isaaniif jirti).

Sila gara gaalaa akkamitti akka uumamte hin ilaalanuu?

Gara samii akkamitti akka ol fuudhamte (hin ilaalanuu)?

Gara gaarreenis akkamitti akka dhaabamte (hin ilaalanuu)?

Gara dachiis akkamitti akka diriirfamte (hin ilaalanuu)?

Yaadachiisi; ati yaadachiisaa qofa.

Isaan irratti dirqisiisaa hin taane.

Nama gara galee kafare malee,

Rabbiin adabbii guddaa isa adaba.

Deebiin isaanii garuma Keenya.

Ergasii qormaanni isaanii Nurra jira.

Bariinin (kakadha).

Halkan kurnaniinis,

Cimdiifi qarattis;

Halkanittis; yeroo inni deeme.

Sila sana keessa abbootii sammuutiif kakuun quubsaan hin jiruu? (ni jira)!

Sila akkam akka Gooftaan kee Aaditti hojjate hin arginee?

Iramiin warra dhedheerootti,

Ishee fakkiin ishee biyyoota keessatti hin uumamin san.

Samuudittis warra laga (Hijri) keessatti dhagaa uran (mana irraa tolfatan).

Fir'awniinis abbaa shikaalaatti;

Isaan biyyoota keessatti daangaa dabran.

Kan ishee keessatti badii baay'isan.

Gooftaan kee akaakuu adabbii isaan irratti buuse.

Gooftaan kee keellatti tahaadha.

Ammoo Namni yeroo gooftaan isaa isa qorate, isa kabajee, isa qanansiise nijedha “Gooftaan kiyya na kabaje”.

Yeroo inni hiree isaa itti xiqqeessee isa qorate immoo “Gooftaan kiyya na xiqqeesse” jedha.

Haa dhorgamu! Dhugumatti, isin yatiima hin kabajjan.

Hiyyeessa nyaachisuu irrattis hin kakaaftan.

Qabeenya dhaalaa, nyaata [halaalaafi haraama] walitti qabate nyaattu.

Jaalala baay’ee qabeenya jaalattu.

Dhorgamaa! Yeroo dachiin waliin dhawamiinsa jabaa waliin dhawamte.

(Yeroo) Gooftaan kee dhufee maleykonnis hiriira hiriiran [dhufan].

Guyyaa san jahannamis ni fidama Guyyaa san namni ni yaadata Yaadannoon (guyyaa sanii) maal isaaf godha ree?

Ni jedha: "odoon jiruu kiyyaaf dabarfadheen hawwa."

Guyyaa san adabbii Isaa eenyunuu hin adabu.

Hidhaa Isaas eenyunuu hin hidhu.

“Ati Yaa lubbuu tasgabbooftuu!

Gara Gooftaa keetii deebi'i Jaallatuu, jaallatamtuu tahaadhaa .

Gabroota kiyya keessas seeni.

Jannata kiyyas seeni” (jedhamti)

Miti Biyya (Makkaa) kanaanin kakadha.

Ati biyyia kana qubataadha.

Abbaafi waan inni dhaleenis (nan kakadha).

Dhugumatti, Nuti nama cinqii[] keessatti uumne.

Sila inni tokkolleen isa irratti hin danda'uu yaadaa?

“Qabeenya guddaan balleesse" jedha.

Sila inni tokkolleen isa hin arguu yaadaa?

Sila Nuti ija lama isaaf hin taasifnee?

Arrabaafi hidhii lameenis;

Karaa lama (gaariifi badaa) isaaf ibsine.

Sila maaliif tulluu hin dabrine?

Tulluttiin maal akka taate maaltu si beeksise?

(Inni) Gabra bilisoomsuudha.

Yookiin guyyaa beelaa keessa nyaachisuudha.

Yatiima fira ta’an;

Yookiin hiyyeessa harkaan lafa qabate (deege).

Ergasii warra amananii, obsa waliif dhaamaniifi rahmata waliif dhaaman irraa maaliif hin taane?

Isaan sun warra mirgaati.

Isaan keeyyattoota keenyatti kafaran immoo isaan warra bitaati.

Isaan irratti ibiddi cufamtuudha.

Aduufi ifa isheetiinin (kakadha).

Ji’aanis; yeroo inni ishee hordofe.

Guyyaanis yeroo inni ishee (aduu) mul’ise;

Halkaniinis yeroo inni ishee haguuge;

Samiifi kan ishee ijaareenis;

Dachiifi kan ishee diriirseenis;

Lubbuufi kan ishee uumeenis;

Kan jall’ina isheefi qajeeluma ishee ishee barsiise.

Namni ishee qulqulleesse dhugumatti milkaa’e.

Namni ishee xureesses dhugaatti hoonga’e.

Samuud daangaa dabruu isheetiin kijibsiifte.

Yeroo irra jallaan ishee ka’u (kijibsiifte).

Ergamaan Rabbiis isaaniin “gaala Rabbiitiifi dhugaatii ishee (eeggadhaa)” jedhe.

Isa kijibsiisanii, ishee waraanan, Rabbiin isaanii Sababa badii isaanii isaan balleessee, ishee wal qixxeesse.

Haaloo ishee hin sodaatu.

Halkaniin (nan kakadha); yeroo (inni) haguuge.

Guyyaanis yeroo inni mul'ate;

Isa kormaafi dhalaa uumeenis;

Dhugumatti, dalagaan keessan adda adda (wal dhaba).

Ammoo Namni kennatee Rabbiin sodaate,

Islaamummaas dhugoomse,

(Karaa) laaftuuf isa laaffisuuf jirra.

Ammoo Nama don’oomee of ga’e,

Islaamummaa sobsiise,

(Karaa) jabduuf isa laaffisuuf jirra.

Yeroo inni (ibiddatti) kufu qabeenyi isaa isa hin fayyadu.

Karaa qajeelaa ifa galchuun (mul'isuun) Nurra jira.

Aakhiraafi addunyaan keenya.

Ibidda qabsiifamaa ta'e isin sodaachise.

Hoonga’aa malee ishee hin seenu.

Kan sobsiisee gara gale (malee).

Namni Rabbiin sodaatu immoo ishee irraa fageeffamuuf jira.

Kan qabeenya isaa qulqulleeffachuuf kennu.

Haala isa bira nama tokkoof galanni galfamu hin jirreen (kan kennatu).

Fuula Gooftaa isaa ol aanaa ta'e barbaachaaf malee (hin kennu).

Dhugumatti, inni fuulduratti jaalachuuf jira.

Waareenin (kakadha).

Halkaniinis yeroo inni callise.

Gooftaan kee si hin dhiifne; si hin jibbines.

Aakhiraatu addunyaa irra siif caala.

Dhugumatti, Rabbiin kee fuula dura (kenna guddaa) siif kenna; ni jaallattas.

Sila yatiima ta’uu si argee si hin hirkifnee?

Dogoggoraas ta’uu si argee si qajeelche.

Hiyyeessas taatee si argee si duroomse.

Yatiima hin hacuucin.

Kadhataas hin xixin.

Ni'imaa (qananii) Gooftaa keetiis odeessi.

Sila Nuti qoma kee siif hin bal'ifnee?

Ba’aa (badii) kee sirraa buufne.

Isa dugda keetti ulfaate (sirraa buufne).

Maqaa keetis siif ol kaafne.

Rakkinaa wajjin laafinatu jira.

Dhugumatti, rakkina wajjin laafinatu jira.

Yeroo (dalagaa wahii) raawwatte xaari (ta biraa ittifufi).

Gara Gooftaa keetii qofa kajeeli.

Tiiniifi Zaytuuniiniin (kakadha).

Gaara (Tulluu) xuuri Siiniinaatiinis.

Biyya nagaa kanaanis (nin kakadha).

Dhugumatti, Nuti nama dhaabbii irra gaarii ta'e keessatti isa uumne.

Ergasii bakka warra jalaa hundarra gadi aanaa ta'etti isa deebifne.

Isaan amananii gaggaarii dalagan malee isaaniif mindaa addaan hin cinnetu jira.

Kana booda maaltu galata [guyyaa Qiyaamaa] si kijibsiisisa (kijibsiisutti si kaase)?

Sila Rabbiin irra murteessaa murteessitootaa hin taanee?

Maqaa Gooftaa keetii Isa (waan hunda) uumeetiin dubbisi.{1} ——— {1} Aayatoowwan tuni dura waan qur'aanarraa nabi muhammad s.a.w. irratti buufameeti.

(Isa) nama dhiiga ititaa irraa uume.

Haala Gooftaan kee hunda irra arjaa ta’een qara'i.

Isa qalamaan (barreessuu) barsiise sani.

Nama, waan inni hin beekne barsiise.

Dhugumatti, namni daangaa dabra.

Sababa duroomuu of arguutiin.

Deebiin garuma Gooftaa keetiiti.

Sila isa dhorgu san argitee?

Gabricha yeroo inni salaatu (kan dhorgu argitee)?

Yoo inni qajeeluma irra jiraate hoo mee naaf himi!

Yookiin immoo sodaa Rabbiitti yoo ajaje hoo?

Yoo inni (Abuu Jahal) kijibsiisee irraa gara gale hoo mee naaf himi?

Sila inni Rabbiin niargaa hin beekuu?

Haa dhorgamu; yoo inni (Abuu Jahal) dhorgamuu baate, sammuu qabna.

Sammuu sobduu, dogoggortuu taate (qabna).

Garee isaa haa waammatu.

Nutis waardiyyaa keenya waammachuuf jirra.

Dhorgami! Isaan hin ajajamin, Sujuudis, gara Rabbiittis dhihaadhu.{1} ——— {1} Asitti sujuuda qaraatii qur'aanaattu bu'ama. kun sujuuda xumuraati.

Dhugumatti, Nuti halkan sadarkaa qabdu keessa isa (Qur'aana) buufne.

Halkan sadarkaa qabdu maal akka taate maaltu si beeksise?

Halkan sadarkaa qabdu ji'a kumarra caalti.

Maleykonniifi Jibriil ishee keessa eeyyama Gooftaa isaaniitiin waayee hundaan bu'u.

Isheen hanga baha fajriitti nagaadha.

Warri abbootii kitaabaafi mushrikoota irraa kafaran jallina isaanii kan gadidhiisan hintaane hanga ragaan isaanitti dhufetti.

(Ragichis) ergamaa Rabbi irraa ta’e kan kitaabota qulqulleeffame dubbisu.

Ishee keessa barreeffamoota sirriitu jira.

Isaan kitaaba kennaman adda hinfacaane eega ragaan ifaan isaanitti dhufue booda malee.

Rabbiin qofa gabbaruu, qajeelanii amantii Isa qofaaf qulqulleessuu, salaata dhaabuufi zakaa kennuutti malee homaa hin ajajamne. Kun amantii qajeelaadha.

Warri abbootii kitaabaafi mushrikoota irraa kafaran ibidda jahannam keessatti hafoo ta’anii jiraatu. Warri sun isaanumatu irra hamtuu uumamaati.

Isaan amananiifi gaggaarii hojjatan, isaan sun isaanumatu irra caalaa uumamaati.

Mindaan isaanii Gooftaa isaanii biratti jannata qubsumaa, kan jala ishee laggeen yaatu, zalaalam ishee keessa jiraatu. Rabbiin isaan irraa jaalateera; isaanis Isa irraa jaalataniiru. Kun nama Gooftaa isaa sodaatuuf qofa ta’a.

Yeroo dachiin sochii ishee sosochoote,

(yeroo) dachiin ba'aa ishee baafte,

Namni "sila isheen maal taate?" jedhe,

Guyyaa san (dachiin) oduu ishee ni odeessiti.

[Kunis] Waan Gooftaan kee isheetti beeksisa godheef.

Guyyaa san namoonni hojii isaanii agarsiifamuuf jecha garee gareen (bakka dhaabbii irraa) deebi’u.

Namni (hanga) madaala atomii toltuu dalage isuma arga.

Namni (hanga) madaala atomii hamtuu dalages isuma arga.

(Faradoo jihaadaa) harganaa guluftuunin (kakadha),

(Isaan yeroo gulufan kottee isaaniitiin) ibidda qabsiisaniin,

(Isaan) bariidhaan (diina irratti) weerara adeemsisanitti;

Isaan dhukkee ol kaasanitti;

Isaan (weeraraan) gamtaa diinaa walakkeessaniin [kakadha].

Dhugumatti, namni (hedduun) Gooftaa isaa mormaadha.

Inni kana irratti ragaadha.

Inni (namni) qabeenya jaalachuutti cimaadha.

Sila inni yeroo wanti qabroota keessa jiran hundi baafaman sana hin beekuu?

Yeroo wanti qomoota keessa jiran (hundi) ifa baafaman (hin beekuu?)

Dhugumatti, Gooftan isaanii guyyaa san isaan beekaadha.

Qalbii rukuttuun (Qiyaamaan).

Qalbii rukuttuun maali?

Qalbii rukuttuun maal akka taate maaltu si beeksise?

Guyyaa namni akka billaacha faffacaafamee ta’u.

(Guyyaa) gaarreen akka jirbii iddamee (qaasasame) ta'u.

Namni madaalli (hojii) isaa ulfaatte,

Inni jireenya jaalatamtuu keessa ta'a.

Namni madaalli (hojii) isaa salphatte immoo,

Qubannoonni isaa “Haawiyaa”dha.

Isheen (Haawiyaan) maal akka taate maaltu si beeksise?

(Isheen) ibidda gubduudha.

(Qabeenya) Baay’ifachuun (ibaadaa irraa) isin jaataneesse (shaagale).

Hanga awwaala dhaqxanitti (duutanitti).

Dhorgamaa! Fuula dura beekuuf jirtu.

Ergasiis dhorgamaa! Fuula dura beekuuf jirtu.

Dhugumatti, odoo beekumsa mirkanaa’aa beektanii (hin shaagalamtanu ture).

Dhugumatti ibidda ni argitu.

Ergasii argaa mirkanaa’aa arguuf jirtu.

Ergasii guyyaa san qananiilee irraa gaafatamuuf jirtu.

Yeroonin kakadha.

Dhugumatti, namni hunduu hoongoo keessa jira.

Isaan amanan, gaggaarii dalagan, haqa walii dhaamaniifi obsa walii dhaaman malee (warri hafan hoongoo guddaa keessa jiru).

Hamattuufi arrabsituu hundaaf badiin mirkanaa’e.

Isa qabeenya walitti qabee lakkaa'e.

Qabeenyi isaa isa hambisaa yaada.

Haa dhorgamu! [Ibidda] caccabsituu keessatti darbamuuf jira.

Caccabsituun maal akka taate maaltu si beeksise?

(Isheen) ibidda Rabbii kan qabsiifamtuudha.

Ishee onneewwan irratti (laalaan ishee) mul’attuudha.

Dhugumatti, isheen isaan irratti cufamtuudha.

Utubaalee diriirfamaa keessatti (itti cufama).

Sila Gooftan kee Abbootii Arbaa irratti akkam akka dalage hin arginee?

Sila shira isaanii dhabama hin goonee? (godheera).

Simbira garee gareedhaan isaanitti erge.

Dhagaalee xuubii (suphee gubamte) irraa taate isaan darbatti.

Akka alalaa (okaa) nyaatamee isaan taasise.

Qurayshota barsiisuuf,

Fe’annaa gannaafi bonaa isaan barsiisuuf jecha (warra arbaa balleesse).

Gooftaa mana kanaa haa gabbaranu.

Isa beela irraa isaan nyachiseefi sodaa irraa isaan tasgabbeesse.

Isa qormaata sobsiisu argitee?

Sun isa yatiima humnaan deebisu.

Hiyyeessa nyaachisuu irrattis (namoota) hin kakaasu.

Warra salaataniif badiin mirkanaa’e.

Isaan sun warra salaata isaanii irraa dagatoo tahan.

Isaan warra (dalagaa namatti) agarsiifatan.

Isaan meeshaa ergisaa dhorgataniif (badiin mirkanaa’e).

Nuti dhugumatti, tola guddaa siif kennineerra. {1} ——— {1} kowsar laga jannatarraa tahe kan nabiif kennamuudhas jedhame.

Gooftaa keetiif sagadii isaaf qali.

Dhugumatti, kan si jibbu isuma kan qaccee cite (kheyrii hunda irraa cite).

Jedhi: "isin yaa warra Rabbitti kafartan!

Ani waan isin gabbartan hin gabbaru.

Isinis waan ani gabbaru kan gabbartan hin taane.

Anis waan isin gabbartan (fuula duras) kan gabbaruu miti.

Isinis waan ani gabbaru (fuula duras) kan gabbartanii miti.

Isiniif amantiin keessan jira; anaafis amantiin kiyya jira."

Yeroo tumsi Rabbiitiifi banamiinsi (Makkaa) dhufe,

Namootas garee gareedhaan diinii Rabbii keessa kan seenan argite,

Gooftaa kee faarsuu wajjin qulqulleessi; araarama isa kadhadhu, inni akkaan tawbaa qeebalaa tahe.

Harki Abuu Lahab lamaan badde [Innis] bade.

Qabeenyi isaatiifi wanti inni hores isa hin fayyanne.

Ibidda abbaa bobayaa (belbelaa) taate seenuuf jira.

Niitiin isaas baadhattuu qoraanii taatee (seenti).

Morma ishee keessa haada quncee temiraa irraa ta'etu jira.

Jedhi: "Inni Allaah (gabbaramaa dhugaa) tokkicha. {1} ——— {1} sadarkaa suuraa tanaa keessatti hadiisa abiisaiid alkhudrii kan bukaariin odeesse keessatti Nabiin s.a.w. "Rabbii lubbuun tiyya harka isaa keessa jirtuun kakadhee isiin 1/3 tokko sadaffaa qur'aanaatti qixxaatti" jedhe.

Allaahn hirkoo waa hundaati.

Hin dhalle hin dhalannes.

Hiriyaan tokkoos isaaf hin taane.”

Jedhi: "Gooftaa bariittin maganfadha.

Hamtuu waan Inni uumee irraa,

Hamtuu dukkanaa yeroo dukkanaa’e irraas,

Hamtuu (dubartii sihrii) guduunfaalee keessatti tuftu irraas,

Hamtuu haasidii yeroo inni hassadu (waanyu) irraas (Rabbittin maganfadha).”

Jedhi: "Gooftaa namaattin maganfadha.

Mootii namaatti,

Gabbaramaa namaatti,

Hamtuu hasaassii (sheyxaana) dhokatuufi mul’atuu irraa,

Isa qomoota namaa keessa waswaasu irraa,

Jinniifi nama irraa kan ta’e (irraan maganfadha).”