Svahilice Meal — Rowad Tercüme Merkezi — Al-Shams 91:1 – Al-Nas 114:6

Ninaapa kwa jua na mwangaza wake!

Na kwa mwezi unapolifuatia!

Na kwa mchana unapolidhihirisha!

Na kwa usiku unapolifunika!

Na kwa mbingu na kwa aliyeijenga!

Na kwa ardhi na kwa aliyeitandaza!

Na kwa nafsi na kwa aliyeitengeneza!

Kisha akaifahamisha uovu wake na wema wake.

Hakika amefanikiwa aliyeitakasa.

Na hakika amehasiri aliyeiviza.

Kina Thamudi walikadhibisha kwa sababu ya upotovu wao.

Aliposimama mwovu wao mkubwa.

Hapo Mtume wa Mwenyezi Mungu alipowaambia: Huyu ni ngamia wa Mwenyezi Mungu, mwacheni anywe maji fungu lake.

Lakini walimkadhibisha na wakamchinja ngamia, kwa hivyo Mola wao Mlezi aliwaangamiza kwa sababu ya dhambi zao na akawafuta kabisa.

Wala Yeye haogopi matokeo yake.

Ninaapa kwa usiku unapofunika!

Na mchana unapodhihiri!

Na kwa aliyeumba dume na jike!

Hakika juhudi zenu bila ya shaka ni mbali mbali.

Ama mwenye kutoa na akamcha Mungu.

Na akalisadiki lililo jema.

Tutamrahisishia yawe mepesi.

Na ama mwenye kufanya ubakhili, na asiwe na haja ya wenzake.

Na akakanusha lililo jema.

Tutamrahisishia yawe mazito!

Na mali yake itamfaa nini atakapokuwa anadidimia?

Hakika ni juu yetu kuonyesha uongofu.

Na hakika ni yetu Sisi Akhera na dunia.

Basi nakuonyeni kutokana na Moto unaowaka vikali.

Hatauingia ila mwovu kabisa!

Anayekadhibisha na akageuka na kwenda zake.

Na mcha Mungu ataepushwa nao.

Ambaye hutoa mali yake kwa ajili ya kujitakasa.

Na wala si kwa kuwa yupo yeyote aliyemfanyia hisani ndiyo anamlipa.

Ila ni kutaka uso wa Mola wake Mlezi aliye juu kabisa.

Naye atakujaridhia!

Ninaapa kwa wakati wa kabla ya adhuhuri!

Na kwa usiku unapotanda!

Mola wako Mlezi hakukuacha, wala hakukasirika nawe.

Na bila ya shaka wakati ujao utakuwa bora kwako kuliko uliotangulia.

Na Mola wako Mlezi atakupa mpaka uridhike.

Kwani hakukukuta yatima, akakupa makazi?

Na akakukuta umepotea, akakuongoa?

Akakukuta mhitaji akakutosheleza?

Basi yatima usimwonee!

Na anayeomba au kuuliza usimkaripie!

Na neema za Mola wako Mlezi zisimulie.

Hatukukunjulia kifua chako?

Na tukakuondolea mzigo wako.

Uliovunja mgongo wako?

Na tukakunyanyulia utajo wako?

Basi kwa hakika pamoja na uzito upo wepesi.

Hakika pamoja na uzito upo wepesi.

Na ukipata faragha, fanya juhudi.

Na Mola wako Mlezi ndio mshughulikie.

Ninaapa kwa tini na zaituni!

Na kwa Mlima wa Sinai!

Na kwa Mji huu wenye amani mno!

Bila ya shaka tumemuumba mtu kwa umbo lilio bora kabisa.

Kisha tukamrudisha kuwa chini kuliko walio chini!

Isipokuwa wale walioamini na wakatenda mema, hao watapata ujira usiokwisha.

Basi ni kipi baadaye kitakachokukukadhibishia malipo?

Kwani Mwenyezi Mungu si muadilifu zaidi kuliko wote wanaohukumu?

Soma kwa jina la Mola wako Mlezi aliyeumba.

Amemuumba binaadamu kwa tone la damu.

Soma! Na Mola wako Mlezi ni Karimu kushinda wote!

Ambaye amefundisha kwa kalamu.

Kamfundisha mtu aliyokuwa hayajui.

Kwani! Hakika mtu bila ya shaka huwa jeuri.

Akijiona katajirika.

Hakika kwa Mola wako Mlezi ndio marejeo.

Umemuona yule anayemkataza.

Mja anaposali?

Umeona kama yeye yuko juu ya uongofu?

Au anaamrisha ucha Mungu?

Umeona kama yeye akikanusha na anarudi nyuma?

Hajui ya kwamba Mwenyezi Mungu anaona?

Kwani! Kama haachi, tutamkokota kwa shungi la nywele!

Shungi la uongo, lenye makosa!

Basi na awaite wenzake!

Nasi tutawaita Mazabania!

Hasha! Usimtii! Nawe sujudu na ujongee!

Hakika Sisi tumeiteremsha Qur-ani katika Laylatul Qadri (Usiku wa Cheo Kitukufu).

Na nini kitachokujulisha nini Laylatul Qadri?

Laylatul Qadri ni bora kuliko miezi elfu.

Huteremka Malaika na Roho katika usiku huo kwa idhini ya Mola wao Mlezi kwa kila jambo.

Amani usiku huo mpaka mapambazuko ya alfajiri.

Hawakuwa waliokufuru miongoni mwa Watu wa Kitabu na washirikina waache waliyo nayo mpaka iwajie bayana.

Yaani Mtume aliyetoka kwa Mwenyezi Mungu anayewasomea kurasa zilizotakasika.

Ndani yake mna maandiko yaliyonyooka.

Wala hawakufarikiana waliopewa Kitabu ila baada ya kuwajia hiyo bayana.

Nao hawakuamrishwa kitu ila wamuabudu Mwenyezi Mungu kwa kumtakasia Dini, wawe waongofu, na washike Sala, na watoe Zaka. Na hiyo ndiyo Dini madhubuti.

Hakika waliokufuru miongoni mwa Watu wa Kitabu na washirikina wataingia katika Moto wa Jahannamu wadumu milele humo. Hao ndio viumbe waovu kabisa.

Hakika walioamini na wakatenda mema, hao ndio bora wa viumbe.

Malipo yao kwa Mola wao Mlezi ni Bustani za mbinguni za daima, zipitazo mito kati yake. Wakae humo milele. Mwenyezi Mungu yu radhi nao, na wao wa radhi naye. Hayo ni kwa anayemwogopa Mola wake Mlezi.

Itakapotetemeshwa ardhi kwa mtetemeko wake!

Na itakapotoa ardhi mizigo yake!

Na mtu akasema: "Ina nini?"

Siku hiyo itahadithia habari zake.

Kwa sababu Mola wake Mlezi ameifunulia!

Siku hiyo watu watatoka kwa mfarakano wakaonyweshwe vitendo vyao!

Basi anayetenda chembe ya wema, atauona!

Na anayetenda chembe ya uovu, atauona!

Ninaapa kwa farasi waendao mbio wakipumua.

Na wakitoa moto kwa kupiga kwato zao chini.

Wakishambulia wakati wa asubuhi.

Huku wakitimua vumbi.

Na wakijitoma kati ya kundi.

Hakika mwanadamu ni mtovu wa fadhila kwa Mola wake Mlezi!

Na hakika yeye mwenyewe bila ya shaka ni shahidi wa hayo!

Naye hakika bila ya shaka ana nguvu za kupenda mali!

Kwani hajui watakapofufuliwa waliomo makaburini?

Na yakakusanywa yaliyomo vifuani?

Hakika Mola wao Mlezi siku hiyo bila ya shaka atakuwa na habari zao wote!

Inayogonga!

Ni nini inayogonga?

Na ni nini kitachokujulisha ni nini inayogonga?

Siku ambayo watu watakuwa kama nondo waliotawanywa;

Na milima itakuwa kama sufu zilizochambuliwa!

Basi yule ambaye mizani yake itakuwa nzito.

Huyo atakuwa katika maisha ya kupendeza.

Na yule ambaye mizani zake zitakuwa hafifu.

Huyo maskani yake yatakuwa Moto wa Hawiya!

Na ni nini kitachokujulisha ni nini hiyo?

Ni Moto mkali!

Kumekushughulisheni kutafuta wingi.

Mpaka mkaja makaburini!

Sivyo hivyo! Mtakujajua!

Tena sivyo hivyo! Mtakujajua!

Sivyo hivyo! Lau mngelijua kwa elimu ya yakini.

Basi bila ya shaka mtaiona Jahiimu!

Tena, bila ya shaka, mtaiona kwa jicho la yakini.

Tena bila ya shaka mtaulizwa siku hiyo juu ya neema zote.

Ninaapa kwa Zama!

Hakika binadamu bila ya shaka yuko katika hasara.

Ila wale walioamini, na wakatenda mema, na wakausiana kwa haki, na wakausiana kusubiri.

Ole wake kila anayewakejeli watu kwa ishara na maneno.

Aliyekusanya mali na kuihesabu.

Anadhani ya kuwa mali yake itambakisha milele!

Hasha! Hakika atavurumishwa katika Hutwama.

Na ni nini kitakachokujulisha ni nini Hutwama?

Ni Moto wa Mwenyezi Mungu uliowashwa.

Ambao unapanda nyoyoni.

Hakika huo utafungwa sawasawa nao wako ndani yake.

Kwenye nguzo zilizonyooshwa.

Kwani hukuona jinsi Mola wako Mlezi alivyowafanya wale wenye tembo?

Kwani hakufanya vitimbi vyao kuharibika?

Na akawatumia ndege makundi kwa makundi.

Wakiwatupia mawe ya udongo wa Motoni.

Akawafanya kama majani yaliyoliwa!

Kwa walivyozoea Maqureshi.

Kuzoea kwao safari za siku za baridi na siku za joto.

Basi na wamuabudu Mola Mlezi wa Nyumba hii.

Ambaye anawalisha kutokana na njaa, na anawalinda kutokana na hofu.

Je, umemwona anayekadhibisha Malipo?

Basi huyo ndiye anayemsukuma yatima.

Wala hahimizi kumlisha masikini.

Basi, ole wao wanaoswali.

Ambao wanapuuza Swala zao.

Ambao wanajionyesha.

Na wanazuia msaada.

Hakika tumekupa Al-Kawthar (heri nyingi).

Basi swali na uchinje kwa ajili ya Mola wako Mlezi.

Hakika anayekuchukia ndiye aliye mpungufu mno.

Sema: Enyi makafiri!

Siabudu mnachokiabudu;

Wala nyinyi hamuabudu ninayemuabudu.

Wala sitaabudu mnachoabudu.

Wala nyinyi hamuabudu ninayemuabudu.

Nyinyi mna dini yenu, nami nina Dini yangu.

Itakapokuja nusura ya Mwenyezi Mungu na ushindi.

Na ukaona watu wanaingia katika Dini ya Mwenyezi Mungu kwa makundi.

Basi zitakase sifa za Mola wako Mlezi, na umwombe msamaha. Hakika Yeye ndiye anayepokea toba mno.

Imeangamia mikono ya Abu Lahab, na yeye pia ameangamia.

Haitamfaa mali yake, wala alivyovichuma.

Atauingia Moto wenye mwako mkali.

Na mkewe, mchukuzi mkubwa wa kuni.

Shingoni mwake iko kamba iliyosokotwa sawasawa.

Sema: Yeye Mwenyezi Mungu ni wa Pekee.

Mwenyezi Mungu ndiye Mkusudiwa.

Hakuzaa wala hakuzaliwa.

Wala hana anayelingana naye hata mmoja.

Sema: Ninajikinga kwa Mola Mlezi wa mapambazuko.

Kutokana na uovu wa alivyoviumba.

Na kutokana na uovu wa giza la usiku liingiapo.

Na kutokana na uovu wa wanaopuliza mafundoni.

Na kutokana na uovu wa mwenye husuda anapohusudu.

Sema: Ninajikinga kwa Mola Mlezi wa watu.

Mfalme wa watu.

Mungu wa watu.

Kutokana na uovu wa Shetani mtia wasiwasi, ajifichaye mno (Al-Khannaas).

Anayetia wasiwasi katika vifua vya watu.

Kutokana na majini na watu.