Yao Meal — Muhammed b. Abdülhamîd Silika — İnşirah 94:1 – Nas 114:6

Ana nganitunsapangulila (mmwe Muhammadi ﷺ) chidali chenu (pakumpa utume)?

Ni tuntuusile nsigo wenu (wausito wa kalungusye ka utenga, pakun’jepepachisya kalungusye kakwe),

Awula (nsigo wakwe) wawalumbisye n'gongo wenu?

Ni tunnyakuliile kusaalidwa kwenu?

Basi chisimu pakuli kunonopa pana kwepepala.

Chisimu pakuli kunonopa pana kwepepala.

Sano pati mmalisyisye (masengo genu), basi limbichilani (kutenda ibada).

Soni kwa Ambuje ŵenu pe (Allah) basi sachililani (ukoto Wakwe).

Nguulumbila nkuju ni nzaituni.

Ni litumbi lya Sinai.

Kwisa soni awu nsinda (wa Maaka) wantunjelele.

Chisimu pamasile patun'gumbile mundu mu kagumbidwe kambone nnope.

Kaneka nitukum'busyaaga kuŵa jwapasi kwapunda ŵapasi wosope (pa uchekulu wakulepela nao kutenda yambone).

Ikaŵeje ŵandu ŵaakulupilile ni kutendaga yambone (ali ŵachilimbanganile), basi akwete kupata ŵanganyao malipilo gangamala.

Ana panyuma (pa kuimanya yele) nichichi chikuntendekasya kanila ya malipilo (ga pa Kiyama)?

Ana Allah nganaŵa Nkwiilanya chenene (magambo) kwapunda akwiilanya wosope?!

Soomani mu lina lya Ambuje ŵenu (Allah) ŵaagumbile.

Agumbile mundu kuumila mu chipande chamyasi jekamatane.

Soomani! Soni Ambuje ŵenu ni Ŵantuka kusyene.

Aŵala ŵaajiganyisye (kulemba) ni chakulembela.

An'jiganyisye mundu yaŵalekaga ngaimanya.

Yakuona! Chisimu mundu akuŵaga jwakusumba mpika (pa kulikwesya).

Ligongo lyakuliona kusichila.

Chisimu kwa Ambuje ŵenu pe (Allah) ni kwakuujila.

Ana mum'bweni ajula jwaakuŵa nkunkaanya,

Kapolo (jwa Allah) ndema jajukusaka kuswali?

Ana nkuyiona uli najuŵaga (Muhammadi ﷺ) juli pachongoko?

Kapena jukulamula ya woga (wakun'jogopa Allah)?

Nambi nkuyiona uli naŵaga (Abujahalio) akukanila ni kusyulula?

Ana ngaakumanyilila yanti Allah akwaona (yaakutenda)?

Ngwamba! Chisimu naga ngaakuleka, chiitwawuta umbo syapewuwo (pakwaponya ku Moto).

Liwuwo lyakwe lyaunami soni lyakulemwa.

Basi ŵaaŵilanje ŵandu ŵakwe (kuti ankamuchisye).

Nowe chitwaŵilanje Azabaniya (asilikali ŵa ku Moto).

Ngwamba! Mmwe ngasimunkunda jwalakwejo, nambo nsujuduji (kuswali) ni n’diŵandichisyeje (kwa Allah).

Chisimu Uwwe tujitulwisye jalakwe (Qur'aniji) m’Chilo Chakuchimbichika.

Ana ni chichi champaka chimmanyisye ya Chilo Chakuchimbichika?

Chilo Chakuchimbichikachi chiŵele chambone nnope kupunda myesi jakwana sausande (1000).[1] ——— (97:1) Myesi sausande ikwana yaka 83 ni myesi 4.

Achimalaika akasatulukaga pamo ni Nsimu (Jibulilu) mu Chele (Chilochi) kwa lisosa lya M’mbuje gwao, kwisa kulondesya chindu chilichose (pakuchiŵika mu mpango wakwe).[2] ——— (97:2) “Mu chele (chilochi) chikasaŵichidwaga m’mangwakwe chindu chilichose chalunda lwakusokoka.” (44:4) Ichindu yalunda lwakusokoka yakwe mpela: kupagwa kwa ŵandu kwisa soni iwumbe yakulekanganalekangana, kuwa kwao, kupedwa malisiki, kupedwa makungu ni ine yosope yakwapata achiiwumbe mu chaka chosope chachikwika, mpela muŵapanjiile Allah kalakala.

Ntunjelele-tunjelelepe! Chele Chilocho, mpaka kumasikusiku.[3] ——— (97:3) Akusimulila Ȃishah رضي الله عنهم yanti: Ntenga jwa Allah ﷺ jwatite: “N’jisosejesoseje Lailatul Qadr mu ilo ya chiŵalanjilo changakomboleka gaŵa ni 2 ni ngasigala kakusigala (mpela ilo ya 21, 23, 25, 27 ni 29), mu ilo likumi yambesi yamwesi wa Ramadhan.” (Swahîh Al-Bukhârî, Hadith No. 1913.

Ŵandu achimakafili kutandila achinsyene chitabu (Ayuda ni Akilisito) kwisa soni ŵakuwanganya (Allah ni isanamu), nganaŵa alekangene (ni ukafili wao) kwikanila ndema ja chayichilile chilosyo chakuonechela palangulangu.

(Jwali) Ntenga (Muhammadi ﷺ) jwakuumila kwa Allah jwaakusooma (Qur’an jajili mu) ikalakala yakuswejesyedwa.

Mwalakwemo mwana malamusi gagoloka.

Chisimu Allah akupeleka chanasa kwa Ntume (Muhammadi ﷺ), nombe nao soni Achimalaika (akum’bombelaga chanasa Ntumejo ﷺ). E jenumanja ŵankulupilile! Mum’bombelani chanasa jwalakwe ni kum’bombela soni ntendele.

Ni nganalamulidwa ikaŵeje yanti an'galagatileje Allah mwakunswejechesya dini Jakwe pakupendechela ku Uujika Wakwe (nikutalikangana nayo isanamu), nikuti ajimicheje Swala mwakolosya ni kutolaga Zaka, soni jalakwejo ni dini jagoloka.

Chisimu ŵandu ŵaakanile (dini ja Usilamu); kutandila achinsyene chitabu (Ayuda ni Akilisito) kwisa soni ŵakuwanganya (Allah ni isanamu), chakaŵe m’moto wa Jahannama, chakaŵe ŵandamo mwalakwemo. Ŵanganyao ni iŵumbe yakusakala nnope.[1] ——— (98:1) Nnole chilaaki cha Ȃya ja (3:85), nambo soni Ȃya ja (4:47) ni chilaaki chakwe.

Chisimu ŵandu ŵaakulupilile nikutendaga yambone, ŵanganyao ni iwumbe yambone nnope.

Malipilo gao kwa Ambuje ŵao chigakaŵe Matimbe Gandamo gasikujilima cha pasi pakwe sulo. Chakaŵe ŵandamo mwalakwemo kwa yaka ni yaka. Allah tachanonyela (pakwapochela masengo gao gambone), nombe nao tachinonyelwa Najo (pamalipilo gataachaapa). Yalakweyo ni yamundu jwatan'jogope M'mbujeegwe (Allah).

Pandema jalichitenganyika litaka nichisikinya chakwe chamachili.

Ni kwisa koposya litaka misigo jakwe jausito (ichindu yayaliji nkati mwakwe, mpela malilo ni mitapo jambiya).

Ni kwisa kuŵecheta mundu (mwawoga soni mwakusimonga kuti): “Litite uli (litaka, ana Kiyama jiyiche?)”

Lyele lisikulyo (litaka) lichiŵecheta abali syakwe syosope (sya indu yayatendekwele pachanya pakwe yambone kapena yakusakala).

Ligongo lyanti Ambuje ŵenu tachililamula lyalakwelyo (kuti liŵechete).

Lyele lisikulyo ŵandu tachipwilingana ali m'mikutula jakulekangana-lekangana kuti akaalosye masengo gao.

Basi jwatapanganye chambone chausito wanti chisawu lunyilili, tachija kuchiona.

Nombe soni jwatapanganye chakusakala chausito wanti chisawu lunyilili, tachija kuchiona.

Ngusilumbila hachi syasikuwutuka sili nkupumasika.

Ni syasikoposya moto mu ikotwa mwakwe (pakuwutuka m’maganga).

Ni syasikwagungumuchila amagongo kumasikusiku.

Nikututumya palakwepo luwundu lwejinji.

Nikulijinjilila palakwepo likuga (lya amagongo).

Chisimu mundu kwa Ambujegwe (Allah) juŵele jwakanila (ukoto waakumpa).

Soni chisimu jwalakwe jukuŵichila umboni pa yalakweyo (kupitila mu itendo yakwe).

Soni chisimu jwalakwe pakuchinonyela chipanje juŵele jwakupelenganya nnope.

Ana ngajukumanyilila pandema jaichikoposyedwa yaili m’malembe?

Nikwisa kwilochesya papaswela yaili m’mitima?

Chisimu lyele lisikulyo M’mbuje gwao (Allah) tachamanya abali syosope (syakwamba yaŵapanganyaga ŵanganyao).

Chagunda ntima (Kiyama).

Ana chagunda ntima nichichi?

Ana ni chichi champaka chimmanyisye ya chagunda ntima?

Lyele ni lisiku (lya Kiyama) lyachachiŵa ŵandu (sakalaalii!) mpela mapuluputwa gakusapalala.

Nombe matumbi gachiŵa (nkuwululuka) mpela litonji lyetyosye mbele.

Sano mundu jwachiukasitope n'diingo wakwe (wa yambone, nikwepepala yakusakala).[1] ——— (101:1) Nnole Ȃya ja (7:8) ni chilaaki chakwe.

Basi jwalakwejo takaŵe mu ndamo jakusengwasya.

Nambo mundu jwachiukajepepale n'dingo wakwe (wa yambone, ni kusitopa yakusakala).

Basi liuto lyakwe ni ku Hawiya.

Ana ni chichi champaka chimmanyisye ya jele (Hawiya)?

Wele ni Moto Wakoocha nnope.

Kumpele chipaka kusonganganya (ya duniya mwampikisano kuleka ganisya ya Akhera).

Mpaka nkwikanila kwaula ku malembe (n'di m'bwile).

Ngwamba! Chinchiika kumanyilila.

Soni ngwamba! Chinchiika kumanyilila.

Ngwamba! Ingaŵe mwamanyililaga umanyilisi usyesyene (nga nganin'jijilikaga ni ya duniya).

Chisimu chene chinkauone Moto Waukali.

Soni chinkauone kusyene ni liso lyakusimichisya.

Soni lyele lisikulyo tinkawusyidwe kusyene ya chindimba (chaŵampele pa duniya).[1] ——— (102:1) Akusimulila Abȗ Hurairah رضى الله عنه yanti: Ntenga jwa Allahﷺjwakopweche muusi winewakwe kapena chilo chinechakwe. Jujile sayi! Jwaweni Abu Bakr ni ‘Umar y, ni jwatite: “Ana chinkopwesye chichi m’majumba mwenu ajino ndaŵijino?” Ŵanganyao ŵatite: “Jitukopwesye sala mmwe Ntenga jwa Allah.” Jwalakwe ni jwatite: “None jwakwe, ngunnumbila Ajula jwawuli ntima wangu mu nkono mwakwe! Chingopwesye chichocho chachinkopwesye jenumanja. Ŵigulani.” Basi ŵanganyao ni ŵaŵigwile pamo ni jwalakwe ni ŵajile kwika kwa mundu jumpepe mwa Anŝâr, nambo nganansimana panyumba pakwe (ŵagambile kwasimana ŵankwakwepe). Sano ŵammasyeto paŵam’bweni Ntumejoﷺŵatite: “Kalibu, twapochele.” Ntenga jwa Allahﷺni ŵaawusyisye kuti: “Chenono ali kwapi?” Ŵammasyeto ŵatite: “Apite kukutusosela mesi.” Kupita kandaŵi panandi; jwakopochele Anŝâr jula, ni jwannolite Ntenga jwa Allahﷺkwisa soni achimijakwe ŵaŵili ŵala, ni jwatite: “Lumbili losope lwene alapikwe Allah! Pangali jwaapochele achalendo ŵakuchimbichika nnope lelo kumbunda une.” Kaneka jwajile kujigala chikole chatende, mwalakwemo mwaliji mwana tende jwam’bisi, jwine jwan’jiwu panandi, kwisa soni jwine jwan’jiwu nnope, ni jwakalibuchisye ŵanganyao. Kaneka jwajigele chipula (kuti ŵasikitile ŵanganyao ngondolo). Ntenga jwa Allahﷺnijwatite: “Mbolembole! Nkasikita ngondolo jakujikamaga nkaka.” Basi mundu jula ni jwasikite ngondolo, (nikulinganya yakulya kuumila mu nyama jakwe). Achalendo ŵala ni ŵalile nyama jangondolojo pampepe ni tende jula, kaneka nikumwela mesi. Ndema jaŵajikwite ni kumala njota, Ntenga jwa Allah ﷺ jwatite pakwasalila Abu Bakr ni ‘Umar y: “Ngunnumbila Ajula jwawuli ntima wangu mu nkono mwakwe! Tinchiwusyidwa ya achi chindimbachi lisiku lya Kiyama. Sala jinkopwesye m’majumba mwenu, ni nganim’buja, mpaka chimpatile achi chindimbachi.” (Swahîh Muslim, Hadith No. 2038).

Ngujilumbila ndaŵi.

Chisimu chene mundu ali nchasiko (ni kupelelwa).

Ikaŵeje aŵala ŵaakulupilile ni kutendaga yambone, ni kulimbisyanaga ya (kuya ichindu) yakuona, ni kulimbisyanaga soni yakupilila.

Ipotesi ni yakwe jwalijose jwakwasogoda ni kwachembulusya ŵandu mwakwamumunya.

Ajula jwaachisonganganyisye chipanje nikuchiŵalanjilaga (ndema ni katema).

Akuganichisya kuti chipanje chakwecho chichintendekasye kuŵa jwandamo!

Ngwamba! Chisimu chene takaponyedwe ku Hutwama.

Ana ni chichi champaka chimmanyisye ya Hutwama?

Wele ni Moto wa Allah wachikolelele (wakuteketulanya chilichose chakuponyedwamo).

Awula wachiuŵa nkukwelela ku mitima.

Chisimu walakweo uchaunichila ni kwaakutika ŵanganyao (kwakusoŵa pakopochela).

(Chachiŵa) m’makongwa getandaliche chanchilewu (mwanti ngasakombola kupuluputa).

Ana nganinyyiona yaŵatite Ambuje ŵenu (Allah) pakwajonanga achinsyene ndembo (ŵaŵayikaga kugumula Likaaba)?

Ana nganagatenda malindi gao kuŵa gakusokonechela?

Ni ŵatumichisye ŵanganyao ijuni mikutula-mikutula.

Yaliji nkwaasoma ni maganga gelongo lyejoche (ni moto wa ku Jahannama).

Niŵatesile kuŵa mpela masapi gagalilidwe (ni inyama ni kulukulidwa).[1] ——— (105:1) Aji Suraji jikusimulila abali ja asilikali ŵaŵakwesile ndembo wa kuugumula Likaaba ku Maaka. Yeleyi yatendekwe chaka chajwapali Ntume Muhammadi ﷺ. Abrahah Al-Ashram ŵaliji nkulolela upande wa ku Yemen m’malo mwa nchimwene jwa ku Ethiopia (ligongo Yemene gele moŵago jaliji upande umpepe wa uchimwene wa ku Ethiopia). Abrahah jwaganisyisye yakutaŵa nyumba ku Swan‘a (nsinda wekulungwa wa Yemen) jakulandana ni Likaaba lya ku Maaka, ni kwaŵilanga ŵandu kuti ajawuleje kwalakweko kukutenda Hija m’malo mwa ku Likaaba lya ku Maaka. Yeleyi jwatendelaga kuti agalawusye malonda ni yambone ine yayatendekwelaga ku Maaka kuti sano ikatendekweleje ku Yemen. Jwalakwe jwasipeleche nganisyo syakwesi kwa nchimwene jwa ku Ethiopia, basi jwalakwe ni jwasijitichisye. Kaneka nyumba jila jataŵidwe, ni ŵajipele lina lyakuti: Al-Qullais, ni paliji pangali chalichi chakulandana nacho pa jele ndemajo. Kaneka mundu jwa lukosyo lya Quraish jwakutyochela ku Maaka jwachiweni chalichi chila, ni champikasyisye ntima, kaneka ni jwasakachisyemo, ni kupakasya soni matope mmapupa mwakwe, ni jwapite kumangwakwe. Abrahah Al-Ashram pajwayiweni yalakweyo, jwalepele kuukamula ntima wakwe, ni jwakusenye asilikali kuti akawupute ngondo nsinda wa Maaka, ni kuja kugumula Likaaba. Jwalakwe jwakwete mu ŵele asilikalio, ndembo syakwana likumi kwisa sitatu. Mwa syalakwesyo, japali ndembo jekulungwa nnope jajaŵilanjikwaga kuti Mah’mȗd. Ŵele asilikaliŵa ŵaŵigwile wa ku Maaka. Pangali lukosyo lulilose lwa ŵarabu lwalwalimbanaga nao pakwakanya kuti akajawula ku Maakako, ikaŵeje ŵaluwulagaga, mpaka ŵajile kuŵandichila ku Maaka. Sano kwele ni kwapali kuŵechetana sikati ja Abrahah ni nchimwene jwa pa Maaka (Abdul Muttwalib, angangagwe Ntume ﷺ). Mbesi jakwe ŵapikanganene yanti: Abrahah awusye ngamiya sya Abdul Muttwalib sya ŵajigele, ni aganisye Abrahao asyene yachatende nalyo Likaaba. Abdul Muttwalib ŵalamwile ŵandu ŵakwe yakusama mu nsindamo, ni kuja kwela m’matumbi pampepe ni achimmasyeto ŵao kwisa soni ŵanache, kogopela ita kwapata nao ipotesi yampaka yapate asilikali ŵayiche kukuwuputa ngondo nsinda wa Maaka. Kaneka asilikali ŵala ŵalungeme ku Maaka mpaka ŵayiche pa chiŵata chakuŵilanjikwa Muhassir. Sano asilikali ali nkuŵandichila kuujinjila nsinda wa Maaka, ali pa chilikati pa chiŵatacho, ajile sayi; ŵagambile kuiona ijuni yayaliji nkwikangana mikutula-mikutula, yayaliji nkwaponya tumagaga twakulilapo kupunda songolo sya nkuya. Nganikan’gwilaga kagangako nsilikali jwalijose ikaŵeje kapwelembwesulaga chilu chakwe ni chakatikagakatikaga. Basi ŵanganyao ni ŵajonasiche kwakogoya. Sano Abrahah Al-Ashram ni ŵatilaga mwanja wa kumangwao aku chilu chao chinankukatika panandipanandi, mpaka ŵajile kwika ku Yemen. Paŵagambile kwasalila ŵandu yayatendekwe ku Maaka, basi papopo nombenao ŵawile. Aku ni kupunda kwa Allah kwa ŵapele ŵandu ŵa pa Maaka, nambo soni chikulupusyo cha kujikulupusya nyumba Jakwe ja Likaaba. (Nnole mu Tafsîr ja Ibn Kathîr, pa jele Suraji).

(Ŵajonasile achinsyene ndembo) kuti ajendelechele Makuraishi.

Panyendele jao jamaulendo ga chuku (kuja ku Yemeni) ni chawu (kuja ku Shami kumalonda mwantunjelele).

Basi an'galagatileje M'mbuje jwa aji Nyumba (ja Likaaba).

Ajula jwaŵapele yakulya ligongo lyasala, ni kwaŵambasya ku woga.

Ana mum'bweni ajula jwaakukanila ya malipilo (ga pa Kiyama)?

Basi jwele ni ajula jwaakuntutanga mwanache jwawina.[1] ——— (107:1) Akusimulila Sahl bin Sa‘d رضى الله عنه yanti: Ntenga jwa Allah ﷺ jwatite: “Une ni nkuchengeta mwanache jwawina, tuchiŵa ku Mbepo mpela ayi iŵiliyi.” Jwagundenye yala iŵili; chilanjililo ni chaasikati. (Swahîh Al- Bukhârî, Hadith No. 5659).

Soni jwangachisya yagaliisya masikini.[2] ——— (107:2) Akusimulila Abȗ Hurairah رضى الله عنه yanti: Ntume ﷺ jwatite: “Mundu jwaakulichengeta liwuli, kwisa soni masikini, ali nti chisawu jwakumenyana ngondo petala lya Allah, kapena jwaakwima chilo kuswali, muusi ni kutaŵaga swaumu.” (Swahîh Al-Bukhârî, Hadith No. 5038).

Basi ipotesi niyao ŵandu ŵakuswaliji.

Aŵala ŵanya ŵaakuŵa ali nkusikwanjila swala syao.

Aŵala ŵanya ŵaakuŵa ali nkutenda ndola.

Ni akuŵa soni ali nkukanya yaakamuchisya (pannango, mpela liŵago, chipula, lituli ni yine).

Chisimu Uwwe tumpele (mmwe Muhammadi ﷺ) Kauthara (lusulo lwa ku Mbepo).[1] ——— (108:1) Akusimulila Anas رضى الله عنه yanti: Pandema jajwakwesyedwe Ntume ﷺ ku mawunde (chilo cha Al-Mi‘râj, pajwawusilepo) jwatite: “Naaluyiche lusulo (ku Mbepo), munjengwe syakwe sinasiŵili mwaliji mwantaŵe matenti ga ngalekale syansiimbo. Basi natite (pakum’busya Jibulilu): ‘Ana chelechi nichichi E mmwe Jibulilu?’ Jwalakwe jwatite: ‘Jalakweji ni Al-Kauthar.” (Swahîh Al-Bukhârî, Hadith No. 4680).

Basi mwaswalilani Ambuje ŵenu (Allah) nikusikita (inyama yakur’bani yakupelechela mbepesi Kukwakwe ngaŵaga kwa akumasoka).

Chisimu jwaakum'benga mmwejo ni jwali jwakatika (upile wakwe ni kusalidwa kwakwe).

Jilani: “E jenumanja achimakafili!”

“Ngangalagatila chinkuchigalagatila (kunneka Allah).”

“Nombe ŵanganyammwe nganim'ba mun'galagatile (Allah) jwangun'galagatila (kutendaga n'di mu ukafili pemo).”

“Nombe une soni nganimba nachigalagatile cham'bele n'di nkuchigalagatila ŵanganyammwe.”

“Nombe ŵanganyammwe nganim'ba mun'galagatile (Allah) jwangun'galagatila (kutendaga n'di mu ukafili pemo).”

“Jenumanja nkwete dini jenu (jagalagatila isanamu) une none ngwete dini jangu (jakun’galagatila Allah).”

Ndema jachiyiche chikulupusyo cha Allah ni kuwugula (Maaka kuŵa m’makono mwa Asilamu).

Ni kwaona mmwejo ŵandu ali nkwinjila mu dini ja Allah mikutula-mikutula.

Basi (jele ndemajo) luswejesyani lumbili lwa Ambuje ŵenu, ni kwaŵenda chikululuko. Chisimu Ŵalakweo aŵele Ŵakupochela nnope toba.

Gajonasiche makono ganagaŵili ga Abu Lahabi, nombe nao ajonasiche.[1] ——— (111:1) Akusimulila Ibn Abbâs رضى الله عنه yanti: Ndema jajatulwiche aji Ȃyaji: “Ni mwatetelani ŵalukosyo lwenu ŵali ŵakuŵandichila.” (26:214). Jwakopweche Ntenga jwa Allahﷺmpakana jwajile kwela petumbi lya As-Swafa, ni jwagumisile kuti: “Yâ Swabâhâh (kundaŵi kwangune)!” Ŵandu ŵawusyisye kuti: “Nduni jwele?” Basi niŵasongangene kukwakwe. Jwalakwe jwatite: “Ana nkuiona uli naga ndili nansalile kuti, asilikali ŵakwele pa mahachi akukopochela kuumila awu upande wetumbi, mpaka mungulupile?” Ŵanganyao ŵatite: “Nganitumpikaneje n’di nkutusalila yaunami.” Jwalakwe jwatite: “Une ni nkuntetela jwenu jwakuonechela, jwakuntetela ya ilagasyo yayikwisa munyumamu (naga nnyosye utenga wangu).” Abȗ Lahab ŵatite: “Chonasiko nichenu! Ana ayi niyantusonganganyichisye?” Kaneka Abȗ Lahab niŵatyosile pamalopo. Basi ni jatulwiche Sȗrat Al-Masad “Gajonasiche makono ganagaŵili ga Abu Lahabi, nombe nao ajonasiche.” (111:1). (Swahîh Al-Bukhârî, Hadith No. 4687).

Ngaija kwakamuchisya ipanje yao atamuno yaŵapanganyisye (mpela ŵanache ŵaŵaŵeleche).

Takajinjile ku Moto waukwete malamba (gakulapuka).

Niŵankwao ŵakwe ŵaŵaliji nkutwichila sasu (syamiŵa nikuntejelaga Muhammadi ﷺ mwakupita).

Nnukosi mwao (ŵele ŵakongweo) chimukaŵe mwana litondolo lyamiŵamiŵa (lyakwalagachisya nalyo).

Jilani: “Jwalakwe ni Allah Jumpepe.”[1] ——— (112:1) Akusimulila Mu‘âdh bin Jabal رضى الله عنه yanti: Une jwangwesyisye Ntume ﷺ munyuma pa mbunda jakuŵilanjikwa ‘Ufair, basi ni jwambusyisye kuti: “E mmwe Mu‘âdh! Ana nkumanyilila yakuŵajilwa achikapolo kuntendela Allah, ni yakuŵajilwa Allah kwatendela achikapolo Ŵakwe?” Une natite: “Allah ni Ntenga Jwakwe ni ŵaakumanyilila chenene.” Jwalakwe jwatite: “Yakuŵajilwa achikapolo kuntendela Allah ni yanti; an’galagatileje Jwele Jikape mwangali kum’bwanganya ni chindu chine. Sano yakuŵajilwa Allah kwatendela achikapolo Ŵakwe ni yanti; Jwalakwe ngaŵa nkwaapa ilagasyo ŵanganam’bwanganya Jwalakwe ni chindu chine.” Une natite: “E mmwe Ntenga jwa Allah! Ana uli ngaaseengwaasye ŵandu ni jele abali jamboneji?” Jwalakwe jwatite: “Nkaja kwaaseengwaasya najo atakwika mwaajegamiile (pajele abalijo nikuleka kupanganya masengo gambone).” (Swahîh Al-Bukhârî, Hadith No. 2701).

“Allah pe ni jwakun'jegama.”

“Nganaŵeleka soni nganaŵelechedwa.”

“Soni nganakola jwakulanda najo ata jumo.”[2] ——— (112:1-4) Akusimulila Abȗ Sa‘îd Al-Khudurî رضى الله عنه yanti: Mundu jwinejwakwe ŵampikene jwine ali nkusooma: {Jilani: “Jwalakwe ni Allah Jumpepe.”} Mundujo ŵaliji nkujiwilisyawilisya Surajo. Pakwachele, (mundu nkupikana jula) jwapite kwa Ntume ﷺ kuja kunsalila yalakweyo, kuŵa nti chisawu jwalakwejo ŵayionaga ngakwanila (yagambaga kusooma Sura jimpepe pejo). Ntume ﷺ ni jwatite: “Ngunnumbila Ajula jwauli ntima wangu mu nkono Mwakwe! Chisimu jalakwe (Surajo) jikulandana ni chipande chimpepe mu ipande itatu ya Qur’an.” (Swahîh Al-Bukhârî, Hadith No. 4726).

Jilani: “Ngulijuya mwa M’mbuje jwa kumasikusiku.”

“Ku yakusakala yaŵaigumbile.”

“Ni ku yakusakala yachilo ndema jachikwinjila chipi.”

“Ni ku yakusakala ya (asaŵi) ŵaakupepela mu iwundo (pakuloga).”

“Ni ku yakusakala ya jwalitima ndema jajukutenda litima.”

Jilani: “Ngulijuya mwa M'mbuje jwa ŵandu.”

“Nchimwene jwa ŵandu.”[1] ——— (114:1) Pa kaŵechete ka Allah kanti: “Nchimwene jwa ŵandu.” Akusimulila Abȗ Hurairah رضى الله عنه yanti: Nampikene Ntenga jwa Allahﷺjuchitiji: “Allah tachiliwumbata litaka, ni kugaŵiliga mawunde ni nkono Wakwe wan’dyo, kaneka ni tachiti: ‘Une ni Nchimwene. Ali kwapi achaiŵenye ŵa pa chilambo?” (Swahîh Al-Bukhârî, Hadith No. 5434).

“Nnungu jwa ŵandu.”

“Ku yakusakala ya nkusongona (pakuunyenjelela ntima yakusakala), jwakuujiilila ni kuliisisa (naga nsyene ntimao juli junkolasile Allah).”

“Ajula jwaakusongonaga m’mitima mwa ŵandu.”

“Jwakuumila m’majini ni mu ŵandu.”[2] ——— (114:2) Akusimuli Ȃishah رضي الله عنهم yanti: “Ndema jajwaliji nkwawula kuugona Ntenga jwa Allah ﷺ, jwakangalaga kusooma Sȗrat Al-Ikhlâs, Sȗrat Al-Falaq ni Sȗrat An-Nâs, ni kupepelela m’magasa mwakwe, ni kulipukuta nago kungope kwakwe, ni iŵalo ya pachilu pakwe yampaka gayichile magasa gakwe. Sano katema kajwatandite kupacha ulwele, jwaliji nkuunjiisya une kuti nantendeleje yalakweyo.” (Swahîh Al-Bukhârî, Hadith No. 5416).