Zuluca Meal — Âdil Ca'fer — Fatiha 1:1 – Enam 6:165

Egameni lika Allah[1], Onomusa Onesihawu. ——— [1] Igama elithi “Allah” lisho uMdali okhonzwayo ngolwimi lwesi-Arabhu. Liyigama elikhethekile impela ngoba kuzo zonke izinto ezikhonzwayo ngaphandle kwaKhe, akukho neyodwa yazo ebizwa ngaleligama. Okunye okukhethekile ngaleligama ukuthi alinabo ubuningi, ngalokho ligcizelela UBUNYE bukaMdali.

Udumo lonke ngoluka Allah, iNkosi[1] yendalo yonke. ——— [1] Igama elisetshanzisiwe kwiKurani elithi “Rabb”. Akukho ncazelo encamashi engachaza leligama. Empeleni lichaza lowo onguMlawuli nonguMdali nonguMnakekeli nonguMondli wendalo yonke noKhonzwayo.

Onomusa Onesihawu.

UMbusi woSuku lokwahlulelwa[1]. ——— [1] Lolu usuku lapho yonke indalo ka-Allah iyobe imi phambi kwaKhe ukuziphendulela ngezenzo zayo emhlabeni mayelana nokugcina intando yaKhe, u-Allah uyobe esehlulela umuntu ngamunye amnike imivuzo yezenzo zakhe ngobulungiswa. Akekho omunye oyoba namandla okwenza noma yini ngaloluSuku ngaphandle kwemvumo ka-Allah. Ababe bengamakhosi emhlabeni nalabo ababephethe umbuso, bayoba ngaphansi kombuso ka-Allah ngalolo suku futhi akekho oyosiza omunye.

Sikhonza Wena kuphela, futhi sicela usizo kuWe kuphela.

Siholele endleleni eqondile.

Indlela yalabo obabusisile[1], kungabi eyalabo abehlelwe ulaka[2] noma abadukileyo[3]. ——— [1] Ababusisiwe; yilabo abakholelwa ku-Allah, nasebunyeni baKhe futhi benze intando yaKhe emhlabeni, balandele izimfundiso nemiyalo yeZithunywa zikaAllah. Bheka (S4:69). [2] Yilabo abanolwazi lwalokho okufunwa ngu-Allah nokungukona okumthokozisayo. Kepha nakuba benalo ulwazi, balushaya indiva balandele izinkanuko zabo bangazilandeli izimfundiso nezinkambiso zolwazi lokuthobela intando ka-Allah. Ngenxa yalokhu kweyisa bazidonsela ulaka luka-Allah. [3] Yilabo abafuna ukujabulisa u-Allah, kepha abazihluphi ngokuthola ulwazi oluqinisekisa ukuthi kumele bakwenze kanjani lokho ngendlela okuyiyona ebekwe ngu-Allah. Ngenxa yokungabani nolwazi, bafana nabantu abahamba ebumnyameni benhlanhlatha. Yingakho nje bengabadukileyo.

Alif-Lam-Mim.[1] ——— [1] Laba ongwaqa bolwimi lesi Arabhu abaziwayo, bebodwa ngaphandle konkamisa abasho lutho. Labongwaqa kuvulwe ngabo izahluko ezahlukene kwiKurani ezi-28. Emva kokulandelela indlela lab’ ongwaqa abahleleke ngayo kwiKurani, kuvela ukuthi umsebenzi wabo ukugcizelela ukuthi leKurani yembulelwe kuMuhamadi  ngolwimi lwesi-Arabhu olwaziwayo. Phela u Allah angeke athumela iNcwadi kusintu ukuba bayilandele bese kuba khona lapho engaziwa ukuthi ithini.

LeNcwadi akunakungabaza kuyo; iwumhlahlandlela kulabo abathobela u-Allah.

Labo abakholelwa kulokho okungabonwayo[1] nabenza iSwala[2] ngokufanele futhi babelana ngalokho esibahlinzeke ngakho. ——— [1] Lokho okungabonwa kuyizigaba ezahlukahlukene, ezifaka phakathi: (a) lokho okwenzekile osekwandlula; (b) nalokho okusazokwenzeka; (c) nalokho okungabonwa ngamehlo enyama, nokwenzeka kwenye indawo lapho umuntu engaboni khona. Ngakho-ke lowo othobela u Allah, ukholelwa ku Allah nakuba engamboni ngamehlo enyama kanjalo nokunye okuyingxenye yezimfundiso zenkolo. [2] Ukwenza iSwala ngokufanele kusho: (a) ukuqikelela ukuthandaza kahlanu njalo ngosuku ngezikhathi ezibekiwe; (b) nokuqikelela ukwenza iSwala, ngendlela eyafundiswa iSithunywa sika Allah  ngokulandela imithetho nemigomo yakhona. iSithunywa sika Allah  sathi: “Yenzani iSwala ngendlela eningibone mina ngiyenza ngayo.” [al-Bukgari, 604].

Labo abakholelwa kulokho okwembulelwe kuwe [Sithunywa] kanye nakulokho okwembulelwa ngaphambi kwakho, futhi banesiqiniseko ngelizayo.

Yibona-ke labo abalandela umhlahlandlela ovela eNkosini yabo futhi yibo kanye abayophumelela.

Impela labo abangakholwa kuyefana nje kubo, uyabexwayisa noma awubexwayisi, abakholwa.

U-Allah uvale izinhliziyo zabo nezindlebe zabo, kanti nasemehlweni abo kunesisithezo; futhi bayothola isijeziso esinzima.

Futhi kunabantu abathi: “Siyakholelwa ku-Allah nasoSukwini lokuGcina”; kepha bebe bengakholwa nhlobo[1]. ——— [1] Laba bangabazenzisi noma amaphixiphixi, abaziveza njengama Musilimu kepha empeleni befukamele inzondo nokungakholwa ezinhlizweni zabo. Bakwenza lokhu ngoba behlose: (a) ukususa uthuthuva emphakathini wamaMusilimu, ngenxa yenzondo abanayo; (b) nokuzivikela nokuzuza kokuhle okwenzeka emphakathini wamaMusilimu.

Bakhohlisa u-Allah nalabo abakholwayo; kepha empeleni bazikhohlisa bona uqobo kodwa ababoni.

Ezinhlizweni zabo kunesifo[1], futhi u-Allah uyabandisela sona; kunjalo nje bayothola isijeziso esibuhlungu ngenxa yokuba namanga. ——— [1] Lesi sifo ubuphixiphixi nokuzenzisa nenzondo esezinhlizweni zabo okubhekiswe kwabakholwayo.

Uma kuthiwa kubo: “Ningenzi ukonakala ezweni.” Bathi: “Thina singabalungisi nje!”.

Bheka! Yibona kanye abenza ukonakala kepha ababoni.

Uma kuthiwa kubo: “Kholwani njengalokhu abantu bekholwa.” Bathi: “Sikholwe njengalokhu iziwula zikholwa na?” Bheka! Yibona kanye iziwula kepha abazi.

Uma behlangene nalabo abakholwayo, bathi: “Nathi siyakholwa”. Kuthi lapho sebengasese noShayitani babo bathi: “Impela thina sikanye nani, besimane sibhuqa nje!”.

U-Allah uyababhuqa nabo aphinde abayekebenhlanhlatha ekudukeni kwabo.

Labo bathenge ukuduka ngokukhanya; kepha uhwebo lwabo alubanga nanzuzo, benjalo nje abekho endleleni eqondile.

Bafana nalowo ophemba umlilo, kuthi lapho usukhanyise indawo emzungezile; u-Allah abephuce ukukhanya kwabo abashiye ebumnyameni bengaboni[1]. ——— [1] Umlilo uneziphawulo ezimbili eziqavile; ukushisa okungqongqisayo nokukhanya. Kanjalo ne-Isilamu, iqiniso layo liyawashisa liwangqongqise amanga bese licacisa izinto ngobunjalo bazo zibe sobala kukhanye kuthi bha. Labo-ke abaphemba umlilo (abangena ku-Isilamu) ngenhloso yokuthola imfudumalo nokukhanya (inzuzo yasemhlabeni) kepha bengazimisele ukumelana nokushisa (iqiniso le-Isilamu) bangoMunafiki (amaphixiphixi), abaveza okunye bebe befukamele okunye. Ngakho-ke, ngenxa yobuphixiphixi babo u-Allah ubaphuce amandla okubona iqiniso, basala benhlanhlatha ebumnyameni bobuphixiphixi babo.

Bayizithulu, bayizimungulu, bayizimpumputhe yingakho-nje bengezukuguquka.

Kumbe bafana (nalabo abanethwa) yimvula evela emafini, enobumnyama nokuduma nombani; bavala izindlebe zabo ngeminwe yabo lapho liduma – besaba ukufa[1]; futhi u-Allah wazi kahle ngalabo abangakholwa. ——— [1] Lapha u-Allah ufanisa i-Islamu nemvula eningi engenazikhukhula; yona uma ina endaweni ayikhethi phela emasini, kunalokho inela wonke umuntu; kanjalo ne-Isilamu ingeka wonke-wonke. Futhi amanzi emvula aletha ukuphila emhlabeni nemvundiso kumile ukudla okudliwa ngabantu nezilwane iphinde ikhuculule imfucuza. Kanjalo ne-Isilamu, iwumthombo wempilo kusintu sonkana ngoba iletha ukuphila ngokubakhulula ebugqileni bezinto zomhlaba nazo eziyindalo kaAllah. Iphinde futhi ikhuculule izinkanuko nezimpambuko zenhliziyo nomzimba eziphambene nentando ka-Allah. Kepha labo abanethwa yimvula (abangena ku-Isilamu) bengakukhathalele ukubaluleka kwemvula, balibala ukugxila ekuphazimeni kombani nokuduma kwezulu (iqiniso le-Isilamu elibashayisa ngonembeza) bese bevala izindlebe (balishaye indiva) bangamaphixiphixi).

Umbani uthi awubahlwithe ukubona kwabo; kuthi lapho ubakhanyisela bahambe kuwo, kuthi lapho sekumnyama bame; ukube u-Allah ubethanda ubengabaphuca ukuzwa kwabo nokubona kwabo; impela u-Allah ulawula izinto zonke.

Bantu, khonzani iNkosi yenu lena enidalile nina kanye nalabo abanandulelayo ukuze nibengabamthobelayo u-Allah.

Lena enindlalele umhlaba yaniphakamisela isibhakabhaka; futhi yehlisa amanzi emafini yakhiqiza ngawo izilimo enizidlayo; ngakho-ke musani ukubhangqau- Allah nezimbangi nibenazi kahle.

Uma nikwengabaza lokho esikwembulele kusigqila seThu [uMuhamadi]; qambani isahluko esifana nakho futhi nimeme abazonifakazela ngaphandle kuka-Allah uma niqinisile[1]. ——— [1] Lena inselelo u-Allah ayiphonsela labo abanokungabaza ngokuthi iKurani iyiZwi lika-Allahelembulelwe, nabacabanga ukuthi uMuhamadi  wazibhalela yona yena ngokwakhe. Uma ngempela kunjalo angeke kwabanzima kubo ukukhiqiza incwajana efanayo; kanti-ke ukwehluleka kwabo kufakazela ukuthi iKurani ivela ku-Allah, lokho ngokwakho kuphinde kufakazele ukuthi nembala uMuhamadi  uyisithunywa sika Allah sangempela.

Kepha uma nehluleka, futhi nibe ningasoze nakhona; zivikeleni emlilweni ozithungelo zawo ngabantu namatshe, olungiselelwe abangakholwa.

Futhi halalisela labo abakholwayo abenza okulungileyo, ngokuthi bayothola izivande okugeleza imifula ngaphansi kwazo; kuyothi njalo uma belethelwa izithelo zakhona ukuze badle, bathi: “yikho kanye nje lokhu ebesikudla phambilini!” – phela balethelwe zona nje zithi azifane; futhi bayoba namakhosikazi amsulwa[1] kuzo, baphinde bahlale kuzo unaphakade. ——— [1] Amsulwa kukho konke ukugcola komzimba kwasemhlabeni, ngaso sonke isikhathi, futhi awakaze athintwe muntu, aphelele.!

Impela u-Allah akanqeni ukwenza noma yimuphi umzekelo kungaba umiyane noma okukhulu kunawo; labo abakholwayo bona bayazi ukuthi kuliqiniso elivela eNkosini yabo, kanti labo abangakholwa bavele bathi: “ingabe uhloseni u-Allah ngalomzekelo na?” – udukisa ngawo abaningi, aphinde aholengawo abaningi; kepha udukisa ngawo kuphela amahlongandlebe.

Labo abephula isibophezelo sika-Allah[1] emuva kokuba sesiqinisekisiwe, baphinde bahlakaze lokho u-Allah ayalele ukuba kugcinwe kuhlangene[2] futhi bone ezweni; labo bangabalahlekelwe. ——— [1] Okuyisona sibophezelo esikhulu kunazo zonke: ukukhonza u-Allah Yena Yedwa nokungambhangqi nalutho kanye nokuthobela intando yaKhe nokumkhonza ngendlela yeZithunywa zaKhe. [2] Ezinye zezinto u-Allah ayalele ukuba zigcinwe zihlangene, ubundlelwano obuhle nozalo noma umndeni, njengoba iSithunywa sika-Allah صلى الله عليه وسلم sathi: “alKatwi’ (lowo onqamula ubuhlobo nozalo lakhe) angeke angene eJana (ezulwini). [Sahih Al-Bukhari, umql. 8, had. 13]

Anikholelwa kanjani ku-Allah, nibe nanifile wanipha ukuphila, futhi uyonenza ukuba nife, aphinde anivuse futhi, bese nibuyela kuYe.

Phela nguYena onidalele konke okusemhlabeni, wabe esephendukela ezulwini, walenza amazulu ayisikhombisa, futhi wazi konke.

Kwathi lapho iNkosi yakho yithi ezingelosini: “ngizodala izizukulwane emhlabeni!”; zathi: “ingabe uzodala kuwo labo abazokona kuwo bachithe negazi; kulapho thina sikudumisa futhi sikungcwelisa”; wathi [u-Allah]: “impela Mina ngazi lokho eningakwazi”.

Wafundisa u Adamu amagama ezinto zonke, wabe esezithula ezingelosini, wathi: “Ngitsheleni amagama azo zonke lezinto uma nineqiniso!”

Zathi: “Ungcwele Wena; asinalwazi ngaphandle kwalokho Wena osifundise kona, impela nguWe Owaziyo Okhaliphile”.

Wathi [u-Allah]: “Adamu, batshele amagama azo!”; kuthe esezitshelile amagama azo, wathi [u-Allah]: “anginitshelanga yini ukuthi ngazi okungabonwayo emazulwini nasemhlabeni, futhi ngazi enikuveza obala nalokho enikufihlayo na?”.

Kwathi lapho sithi ezingelosini: “khothamelani u-Adamu”; zakhothama, ngaphandle kuka Ibhilisi[1], wanqaba wazigqaja, waba ngomunyewabangakholwa. ——— [1] Lona nguyena ongumholi wosathane bonke emhlabeni ovela esizweni samaJini (S, 18:50), akasiyo ingelosi nhlobo. Emva kwalesi senzo sakhe waphenduka isitha esiqavile kuzalo luka-Adamu lonkana (isintu). AmaJini, indalo ka-Allah ayidala ngomlilo (S, 7:12), ayakhona ukusibona, kepha thina sintu asikhoni (S, 7:27).

Futhi sathi: “Adamu, hlala nomkakho esivandeni, nidle ngokunethezeka kuso lapho enithanda khona, kepha ningalinge nisondele kulomuthi, funa nibe ngabaphambukile”.

Kepha uShayitani wabakhubekisa bobabili ngaso; wabakhipha esimeni ababekuso; Sathi: “phumani abanye benu bayoba izitha kwabanye, futhi niyohlala emhlabeni ninethezeke kuze kufike isikhathi”.

U-Adamu wathola amazwi[1] avela eNkosini yakhe, yamthethelela; impela Yona inguMthetheleli Onomusa. ——— [1] Lana ngamazwi okushweleza u-Allah awembulela ku-Adamu ukuba ashweleze ngawo ngokuphula kwabo umyalelo ka-Allah mayelana nomuthi wasesivandeni. Lamazwi iKurani iyawabalula, bheka (S, 7:23).

Sathi: “Phumani niphele nonke kuso; kuyothi uma kufika kini imiyalelo yaMi, labo abayolandela imiyalelo yaMi, abayukusaba futhi abasoze bakhathazeka”.

Futhi laba abangakholwa, nabaphika imibiko yeThu, yibona labo abayongena emlilweni babhandle kuwo unaphakade.

Sizwe sakwa Isirayeli, khumbulani isibusiso saMi lesi enganibusisa ngaso, futhi nifeze isibophezelo saMi, nami ngizofeza isibophezelo senu, futhi nesabe Mina kuphela.

Futhi nikholelwe kulokho engikwembulele okufakazela lokho eninakho[1]; futhi ningabi abokuqala abangakholelwa kukho; futhi ningathengisi imibiko yaMi ngeze; futhi nithobele Mina kuphela. ——— [1] Izimfundiso zeZithunywa zika-Allah ezathunyelwa esizweni sakwa Isirayeli kanjalo neziNcwadi ezathunyelwa nazo, okubalwa kuzo iTora - eyembulelwa kuMusa hhayi iTalmudi, kanye ne-Injili eyembulelwa u-Isa hhayi iBhayibheli neZaburi eyembulelwa kuDawudi hhayi Amahubo; umongo womlayezo nengqikithi yemibiko ifana ncamashi nomlayezo ofike neSithunywa uMuhamadi  nemibiko yeKurani. Phela izincwadi ezifike neZithunywa zimthombomunye kanjalo nenkolo elandelwa iZithunywa zika-Allah nebezimemela izizwe zazo kuyo iyona i-Isilamu; okungukuzinikela ngokuphelele ekukhonzeni u-Allah kuphela nokungambhangqi nalutho.

Futhi ningaxubi iqiniso namanga noma nigodle iqiniso nibe nilazi.

Futhi yenzani iSwala ngokufanele nikhiphe neZakati, futhi nikhothame naba khothamayo.

Niyalela abantu ngokulunga kepha nizikhohlwe nina uqobo, nibe niyifunda iNcwadi; kungani ningaqondi na?

Futhi celani usizo ngokubekezela nangeSwala, yona inzima impela, ngaphandle kulabo abazithobayo.

Labo abanesiqiniseko sokuthi bayohlangana neNkosi yabo, nokuthi bayobuyela kuYo.

Sizwe sakwa Isirayeli, khumbulani isibusiso saMi lesi enganibusisa ngaso nokuthi nganiqoka endalweni yonke.

Futhi sabani usuku lapho umuntu eyobe engenasizo lwalutho komunye; futhi akukho shwele oyokwamukelwa noma inhlawulo eyothathwa kuye; futhi abayikusizwa muntu.

Futhi nikhumbule mhla sinihlenga esizweni sikaFirawuni esabe sinihlukumeza kanzima, sibulala amadodana enu siyeke abesimame[1] benu; kukho konke lokho kwakunesivivinyo esikhululu esivela eNkosini yenu. ——— [1] Ukuze babenze izigqila zabo.

Nikhumbule futhi mhla siniqhekezela ulwandle sanihlenga, kepha sasiminzisa isizwe sikaFirawuni nibhekile.

Futhi nikhumbule mhla sinqumela uMusa umhlangano wobusuku obungamashumi amane; kuthe lapho engekho nina nakukhonza ithole seniphambukile.

Kepha sanithethelela emuva kwalokho ukuze nibonge.

Futhi nikhumbule ukuthi sanika uMusa iNcwadi nomhlahlandlela ukuze nibe sendleni eqondile.

Nikhumbule futhi mhla uMusa ethi kubantu bakhe: “Bakwethu, impela niphambukile ngokukhonza kwenu ithole, ngakho-ke, celani intethelelo kuMdali wenu; zibulaleni[1] nina ngokwenu; lokho kuyoncomeka ngani kuMdali wenu bese enithethelela; impela Yena unguMthetheleli Onesihawu”. ——— [1] Labo kubo ababengabagqugquzeli ekukhonzeni ithole, nabangalalelanga iSithunywa uHaruni umfowabo kaMusa okwathi lapho ebakhuza ebakhalima, kwaba zinhlanga zimuka nomoya.

Futhi nikhumbule mhla nithi kuMusa: “Musa, asisoze sakukholwa, kuze kube sizibonela thina u-Allah mathupha”; nabe senishaywa umbani nibhekile.

Saphinda sanivusa emuva kokufa kwenu ukuze nibonge.

Futhi sanisibekela ngamafu sanehlisela imana nesaliwa [izigwaca] – “dlanini kulokho okuhlanzekile esinabele kona” – futhi abasilayanga Thina, kepha bazilaya bona uqobo.

Futhi khumbulani mhla sithi: “ngenani kulomuzi nidle kuwo lapho enithanda khona ngokunethezeka, futhi ningene esangweni nikhotheme, nithi: ‘intethelelo’, siyobe-ke sesinithethelela izimpambuko zenu, futhi sandisele labo abenza okuhle.”

Kepha labo abaphambukile bawaguqula amazwi basho okungewona ashiwo kubo; ngakho-ke sehlisela kulabo abaphambukile isijeziso esivela phezulu, ngenxa yobuhlongandlebe babo.

Futhi kwathi lapho uMusa ecelela abantu bakhe amanzi sathi: “shaya idwala ngenduku yakho”; kwagobhoza kulo imithombo eyishumi nambili; bonke abantu bebazi lapho okumele baphuze khona, – “dlanini futhi niphuze kulokho u-Allah anabele kona; futhi ningalokhu nenza ukonakala ezweni”.

Khumbulani futhi mhla nithi: “Musa, ngeke siyibekezelele inhlobo eyodwa yokudla, ngakho-ke sicelele eNkosini yakho ukuba isikhiphele lokho okumila emhlabeni:imifino yawo namakhukhumba awo nogaligi wawo nembumba yawo kanye neswelo lawo”. Wathi [uMusa]: “Ingabe nincamela lokho okusezingeni eliphansi kunalokho okuyikona okungcono na?; yanini kumuzi namuphi, impela lapho niyokuthola lokho enikucelile”; - bathweswa ukuhlazeka nenhlupheko futhi bazilethela ulaka luka- Allah; lokho kungenxa yokuthi babengakholelwa kwimibiko ka-Allah futhi babebulala abeMbulelwa ngokungemthetho; lokho kungenxa yokuthi babeyisa nokuthi bayizephulamthetho.

Impela labo abakholwayo, nalabo abangamaJuda[1] nama Nasara[2] kanye nama Sabiya[3]; yilowo nalowo kubo okholelwa ku-Allah nasoSukwini lokuGcina futhi enza okulungileyo; bayothola umvuzo wabo eNkosini yabo futhi abayukusaba noma babe lusizi[4]. ——— [1] Yilabo abaqhakambisa ukulandela imithetho yeSithunywa uMusa owabe ethunyelwe esizweni sakwa Israyeli, esesaziwa ngokuthi amaJuda ngenxa yokuthi ubukhosi babo bokugcina babaziwa ngobukaJuda. [2] Yilabo abaqhakambisa ukulandela iSithunywa u-Isa waseNasarina, naye owayethunyelwe esizweni sakwa Isriayeli emva kwaMusa. Baziwa manje njengemaKrestu jikelele, okuligama lesiGiriki elichaza “ogcotshiweyo”. Abokuqala ukusebenzisa leligama ukuchaza abalandeli baka-IsaabaGiriki base Antiyokiya. [3] Abantu basendulo ababehlala eMusal ezweni lase Iraki, baziwa njengesizwe saMakhaladini. Babengasiwona amaJuda noma amaNasara ngokwenkolo. Inkolo yabo kubikwa ukuthi yayigxile kakhulu ezinkanyezini. [4] Lombiko uchaza ukuthi, noma ngabe ubani olandela noma yiphi inkolo; ukuze aphumelele kumele akholelwe ku-Allah nasoSukwini lokwahlulelwa bese enze okulungileyo emhlabeni ngokuthobela intandoka-Allah ngendlela ye-Isilamu okuyiyona kuphela indlela nenkolo eyamukelekile ku-Allah. Bheka (3:85).

Khumbulani futhi mhla senza isibophezelo nani, saqongisa intaba iTuri phezu kwenu: “thathani lokhu esininika kona ngokuzimisela futhi nikukhumbule lokho ekuqukethe(iTora) ukuze nibe ngabamthobelayo u-Allah”.

Kepha anibanga nandaba emuva kwalokho; ukube bekungewona umusa ka-Allah nesihawu saKhe, ngabe naba ngabalahlekelwe.

Futhi nanibazi kahle labo kini abephula umthetho ngeSabatha; sase sithi kubo: “Yibani izinkawu ezidicilelekile”.

Sakwenza lokho kwaba isifundo kulabo ababekhona nakulabo abalandelayo futhi kwaba iseluleko kulabo abamthobelayo u-Allah.

Nikhumbule futhi mhla uMusa ethi esizweni sakhe: “Impela u-Allah uniyalela ukuba nihlabe inkomo.” Bathi: “Ingabe uhlekisa ngathi na?” Wathi: “Ngizivikela ngo-Allah ekubeni isiwula”.

Bathi: “Sicelele eNkosini yakho isicacisele ukuthi enjani na?” Wathi: “Ithi, inkomo engendala futhi nengencane ephakathi kwalokho nje; yenzani-ke eniyalelwe kona”.

Bathi: “Sicelele eNkosini yakho isicacisele ukuthi imbala muni na?” Wathi: “Ithi, inkomo ephuzi, embala ogqamile, encomekayo kwabayibonayo”.

Bathi: “Sicelele eNkosini yakho isicacisele ukuthi enjani na, lokhu phela izinkomo ziyefana kithi; impela uma u-Allah ethanda sizocaciseleka”.

Wathi: “Ithi, inkomo engaqeqeshelwe ukulima noma ukunisela amasimu, imsulwa ayinasici”; bathi: “manje usukhuluma iqiniso”; base beyihlaba yize babemadolonzima.

Khumbulani futhi mhla nibulele umuntu naphikisana nodwangaye; futhi u-Allah uyokuveza obala lokho ebenikufihlile.

Sabe sesithi: “mshayeni [umufi] ngesitho sayo [inkomo]”; u-Allah ubavusa kanjalo abafileyo futhi unikhombisa izibonakaliso zaKhe ukuze niqondisise.

Kepha emuva kwalokho izinhliziyo zenu zaba lukhuni okwamatshe noma ngokwendlulele kakhulu; phela amatshe kunalawo okugeleza kuwo imifula, kube nalawo aqhekekayo kugobhoze amanzi kuwo futhi kubenalawo agingqikayo ngenxa yokwesaba u-Allah; futhi u-Allah akaphuthelwa yilutho kulokho enikwenzayo.

Ingabe ninethemba lokuthi bayonikholwa, bheka ngoba kunabanye babo ababelalela amazwi ka-Allah bese beyawahlanekezela ngamabomu emuva kokuba sebewaqondile.

Uma behlangana nalabo abakholwayo bathi: “nathi siyakholwa”; kepha uma sebebodwa ngasese bathi: “ingabe nibatshelelani ngalokho u-Allah anambulela kona, funa banimangelele ngakho eNkosini yenu; kungani ningacabangi na?

Ingabe abazi yini ukuthi u-Allah ukwazi konke abakufihlayo nabakuveza obala.

Futhi kubo kunalabo abangafundile, abangazazi izimfundiso zeNcwadi ngaphandle kwezifiso nje (abanazo) futhibayaziqagelela nje.

Bayobhubha labo abaloba incwadi ngezandla zabo bese bethi: “lena ivela ku Allah”, ukuze bathole ngayo inzuzo eyize; bayobhubha ngenxa yalokho okulotshwe izandla zabo futhi bayobhubha ngenxa yalokho abakuzuzayo.

Futhi bathi: “umlilo uyosishisa nje izinsukwana ezimbalwa”; yithi: “Ingabe ninesivumelwano enasenza no-Allah na; phela u-Allah akasoze asiphula isivumelwano saKhe; kumbe nje nikhuluma into eningayazi ngo- Allah!”.

Impela, lowo owenza okubi aze ahaqwe izimpambuko zakhe; labo bayongena eMlilweni, babhadle kuwo unaphakade.

Kanti labo abakholwayo futhi abenza okulungileyo bayongena eJanna, bahlale kuyo unaphakade.

Khumbulani mhla senza isivumelwano nesizwe sakwa Isirayeli (esithi):“ningakhonzi lutho ngaphandle kuka Allah, futhi niphathe kahle abazali nezihlobo nezintandane kanye nabampofu, futhi nikhulume amazwi amahle kubantu, nenze iSwala ngokufanele nikhiphe neZakati”; kepha anibanganandaba nakushaya indiva lokho ngaphandle nje kwedlanzana lenu.

Nikhumbule futhi ukuthi senza isivumelwano nani: “Ningabulalani futhi ningaxoshani emizini yenu”, navuma naba ngofakazi.

Kepha kwaba yinina laba, senibulalana nodwa nikhipha abanye benu emizini yabo futhi nibahlanganela ngokungemthetho nibahlukumeza; uma beza kini njengeziboshwa niyabahlawulisa, yize naningavunyelwe ukubakhipha. Ingabe nikholelwa kwingxenye yeNcwadi niphinde ningakholelwa kwenye na; kuyobayini umvuzo waloyo owenza lokho kini ngaphandle kokuthelwa ngehlazo emhlabeni, bese ngoSuku lokwahlulela uyofakwa esijezisweni esinzima kakhulu; phela u-Allah akaphuthelwa yilutho kulokho enikwenzayo.

Labo, yibo kanye abakhethe impilo yasemhlabeni kune yakwelizayo; ngakho-ke abayikuxegiselwa isijeziso futhi akekho oyobasiza.

Futhi sanika uMusa iNcwadi, salandelisa ngezinye iZithunywa emuva kwakhe; futhi sanika no-Isa indodana kaMariyamu izibonakaliso saphinde samsekela ngoRuhulukudusi [uJibhirili]. Ingabe njalo nje uma kufika kini iSithunywa nalokho eningakufuni niyazigqaja; ezinye niyaziphikisa kuthi ezinye nizibulale.

Futhi bathi: “izinhliziyo zethu zilukhuni”; empeleni u-Allah ubaqalekisile ngenxa yokungakholwa kwabo, yingakho nje beyingcosana abakholwayo.

Kuthe uma sekufika kubo iNcwadi [iKurani] evela ku-Allah ifakazela lokho abanako [iTora] – kanti naphambilini babezithembise ukunqoba labo abangakholwa[1] – kephakuthe uma sekufika lokho abakwaziyo, bakuphika; ngakho- ke isiqalekiso sika-Allah sikulabo abangakholwa. ——— [1] AmaJuda aseMadina ayengomakhelwane nama Arabhu ngaphambi kokufika kweSithunywa uMuhamadi . Ama-Arabhu ngalesosikhathi ayekhonza izithixo kuyiwona abusa iMadina. AmaJuda ayehlala esabisa amaArabhu ngokuthi kulotshiwe eNcwadini yawo (iTora) ukuthi kuzofika iSithunywa sika-Allah e-Arabhiya, ngaphansi kobuholi baso bayowanqoba ama-Arabhu wonkana. Kepha kuthe sesifika lesi Sithunywa esinguMuhamadi, bamphika.

Kubi lokhu abazikhethele kona, ukuba bangakholelwa kulokho u-Allah akwembulelwe benziwa yinzondo yokuthi u-Allah wembulele kwamthandayo ezigqileni zaKhe ngomusa waKhe; ngakho-ke baziletha ulaka phezu kolaka, futhi abangakholwa bayothola isijeziso esihlazayo.

Uma kuthiwa kubo: “kholelwani kulokho u-Allah akwembulele”, bathi: “sikholelwa kulokhu okwembulelwe kithi” – abakholelwa kokunye ngale kwakho, nakuba kuyiqiniso elifakazela lokho abanakho – yithi: “pho kungani nanibulala iZithunywa zika-Allah endulo uma ngempela beningabakholwayo na?”.

Futhi noMusa wafika kini nezibonakaliso; kepha nina nakhonza ithole mhla engekho naba ngabaphambukile.

Nikhumbule futhi mhla senza isivumelwano nani, saqongisa intaba iTuri phezu kwenu (Sathi): “yamukelani lokho esiniyalela kona ngokuzimisela, futhi nilalele”; bathi: “siyezwa kepha asilaleli”. Lwagxila uthando lwethole ezinhliziyweni zabo ngenxa yokungakholwa kwabo. Yithi: “Kwaze kwakubi loku enikuyalelwa ukholo lwenu uma ngempela ningabakholwayo.

Yithi: “Uma ikhaya lakwelizayo ku-Allah kungelenu kuphela ngaphandle kwabanye abantu, langazelelani-ke ukufa uma niqinisile!”

Abasoze bakulangazelela nhlobo (ukufa) ngenxa yezenzo zabo; futhi u-Allah ubazi kahle abaphambukile.

Futhi uzobafumanisa kuyibona abalangazelela ukuphila kunabo bonke abantu ngishonalabo ababhangqayo imbala; omunye wabo ufisa engathi engaphila inkulungwane yeminyaka nakuba ukuphila isikhathi eside kungeke kwamhlenga esijezisweni; futhi u-Allah ukubona konke abakwenzayo.

Yithi (Sithunywa): “Lowo oyisitha sikaJibhirili – impela nguye olethe [iKur’ani] enhliziyweni yakho ngemvumo ka-Allah, ifakazela lokhu okwembulelwe ngaphambi kwayo futhi iwumhlahlandlela nomethuli wezindaba ezinhle kulabo abakholwayo.

Lowo oyisitha sika-Allah nezingelosi zaKhe neZithunywa zaKhe noJibhirili noMikhala – impela u-Allah uyisitha salabo abangakholwa.

Futhi sembulele kuwe (Sithunywa) imibiko ecacile; kanti futhi amahlongandlebe kuphela angakholelwa kuyo.

Njalo nje uma benza isivumelwano, kunalabo kubo abavele bangasigcini; empeleni iningi labo alikholwa.

Futhi kuthe uma kufika kubo iSithunywa [uMuhamadi] esivela ku-Allah sifakazela lokho abavele benakho; kunalabo kwabanikwa iNcwadi abavele bayifulathela iNcwadi ka-Allah bashaya ngathi abazi.

Balandela lokho okwakufundwa Oshayitane ngesikhathi sikaSulayimani; futhi uSulayimani akabanga ongakholwa kepha Oshayitane bona baba abangakholwa; babefundisa abantu ukuthakatha kanye nalokho okwembulelwa kuzingelosi ezimbili uHaruta noMaruta eBhabhili; babengafundisi muntu bengakasho ukuthi: “Thina siyisivivinyo, ngakho-ke ungabi ongakholwa”; bafunda kuzo ukuhlukanisa indoda nomkayo (isichitho) – futhi angeke bakhona ukulimaza muntu ngakho ngaphandle kwemvumo ka-Allah – bafundalokho okubalimazayo nokungabasizi; futhi bebazi ukuthi loyo okhetha ubuthakathi akayikuba nasabelo kwelizayo; kwaze kwakubi lokho abazikhethele kona, ukube nje bebazi.

Ukube nje babekholwa bathobela u-Allah, bebezothola umvuzo omuhle ku-Allah; ukube nje bebazi.

Nina enikholwayo, ningathi [kuSithunywa] “Ra-ina”[1] [sinake] kepha anibothi: ‘sibheke’ bese niyalalela; futhi abangakholwa bayothola isijeziso esibuhlungu. ——— [1] Leligama ngesiHeberu lithi alifane negama lenhlamba. amaJuda eMadina ayethi uma ekhuluma neSithunywa alisebenzise behlose ukumeyisa nokumthuka. Ngakhoke u-Allah ubanqabele abakholwayo ukuba balisebenzise leligama ukuze bangafani nabenzi bokubi.

Abangakholwa kulabo beMibhalo[1] nalabo ababhangqayo abanifiseli ukuba nibe nokuhle okuvela eNkosini yenu; u-Allah upha umusa waKhe lowo amthandayo, futhi u-Allah unezibusiso eziyinala. ——— [1] Leli igama kuqondiswe ngalo kumaJuda azibiza ngabalandeli baka Musa (uMose) nama Nasara azibiza ngabalandeli baka Isa (uJesu). Imibhalo okukhulunywa ngayo la, yimibhalo ye Tora ne Injili ezambulelwa kuMusa no Isa ngokulandelana. Yilamaqembu amabili iKurani ebhekisa kubona ngokuthi abeMibhalo.

Noma imuphi umbiko esiwuchithayo noma esiwusulayo, siletha omunye ongcono[1] noma ofana nawo[2]; awazi yini ukuthi u-Allah ulawula izinto zonke. ——— [1] Njengokuzila ukudla izinsukwana onyakeni ngenyanga kaMuharamu (inyanga yokuqala onyakeni we-Islam), u Allah wakusula waletha umthetho wokuba ukuzila kube ngenyanga yeRamadani enemivuzo engcono kunokuzila izinsukwana. [2] Njengalapho u-Allah eyalele amaMusilimu ukuba abhekise ibombo ngasemzini wase Makha lapho bethandaza emva kokuba phambilini babeyalelwe ukuba babheke ngasemzini waseMakadisi (eJerusalema); imivuzo iyefana.

Ingabe ubungazi yini ukuthi umbuso wamazulu nomhlaba ungoka Allah; futhi akekho ongumnakekeli nomsizi wenu ngaphandle kuka-Allah.

Kumbe nifuna ukuhlohla iSithunywa senu imibuzo njengalokhu uMusa ahlohlwa imibuzo phambilini na; futhi lowo oncamela ukungakholwa kunokukholwa impela udukelwe indlela eqondile.

Baningi kwabe Mibhalo abafisa ukuba banganibuyisela ekubeni ngabangakholwa emuva kokuba senikholwa, ngenxa nje yomona abanawo emuva kokuba selibacacele iqiniso; nokho, xolelani nindlulise kuze kube u-Allah uletha umyalelo waKhe; impela u-Allah akehlulwa yilutho.

Futhi yenzani iSwala ngokufanele nikhiphe neZakati; futhi konke okuhle enikwenzayo niyokufica kukhona ku-Allah; impela u-Allah ukubona konke enikwenzayo.

Futhi [abeMibhalo] bathi: “Akekho oyongenaeJana ngaphandle kwalabo abangaMajuda noma amaNasara” – lokho izifiso zabo nje; yithi [Sithunywa]: “Lethani ubufakazi benu uma ngempela niqinisile!”

Nebala, lowo ozinikela ngokuphelele ku-Allah aphinde enze okulungileyo, uyothola umvuzo wakhe eNkosini yakhe; futhi abayikwesaba noma bakhathazeke[1]. ——— [1] Lapho beshiya lomhlaba abayikusaba ukufa futhi abayikuba lusizi ngabakushiye emhlabeni.

Futhi amaJuda athi: “amaNasara adukile”, kanjalo namaNasara athi: “amaJuda adukile” – kephabonke bafunda iMibhalo; basho kanjalo nalabo abangenalwazi besho ncamashi okufana nabakushoyo; u-Allah uyokwahlulela phakathi kwabo ngoSuku lokwahlulela ngalokho abaphikisana ngakho.

Ingabe ukhona yini ophambuke ukwendlula lowo ovimbela ukuba emaMasijidika- Allah kubizwe kuwo iGama laKhe, aphinde azikhandle ekuwacekeleni phansi; labo bangena kuwo benovalo; bazohlazeka lapha emhlabeni, futhi nakwelizayo bazothola isijeziso esinzima.

Futhi ingeka-Allah impumalanga nentshonalanga, ngakhoke noma yikuphi lapho nibheka khona, uBuso buka- Allah bukhona; impela u-Allah ungoBanzi Owaziyo.

Futhi bathi: “ u-Allah unendodana”; ungcwele Yena; empeleni konke okusemazulwini nasemhlabeni kungokwaKhe[1], konke kuthobela Yena. ——— [1] Konke okukhona emhlabeni nasezulwini konke kuyindalo ka-Allah, ngakhoke akadingi ukuba nangane noma umfazi. Futhi indalo yaKhe angeke yafaniswa naYe.

UnguMsunguli[1] wamazulu nomhlaba; uma esenqume ukwenza into, umane athi kuyo: “yenzeka”, bese yenzeka. ——— [1] Ukusungula: ukudala into ebikade ingekho noma engathathelwanga kokukhona. Lokhu kufakazela ukuthi u-Allah wadala indalo yaKhe ngaphandle kokuyithathela kokunye, ngisho nomuntu imbala. Ngakhoke akumangazi uma u-Allah edala umuntu ngaphandle kwabazali bobabili noma oyedwa. Empeleni kukhombisa amandla nobukhulu baKhe.

Futhi labo abangazi bathi: “Kungani u-Allah engakhulumi nathi mathupha noma kufike kithi isibonakaliso na”; basho kanjalo nalabo ababandulelayo okufana ncamashi nabakushoyo, izinhliziyo zabo ziyefana; nebala sibacacisele imibiko abantu abanesiqiniseko.

Impela sikuthumele wena [Sithunywa] neqiniso ukuze ube umethuli wezindaba ezinhle nomexwayisi; futhi awusoze wabuzwa ngalabo abayongena emlilweni.

Futhi amaJuda namaNasara abasoze bathokoza ngawe kuze kube ulandela inkolo yabo; yithi: “indlela ka-Allah iyona ndlela eqondile”; uma nje uke walandela izinkanuko zabo emuva kolwazi osunalo, akekho oyokuhlenga ku-Allah noma akusize.

Labo esabanika iNcwadi bayifunda ngendlela efanele, labo bangabakholelwa kuyo; kepha labo abangakholelwa kuyo, labo bangabalahlekelwe.

Sizwe sakwa Isirayeli, khumbulani izibusiso zaMi lezi enganibusisa ngazo nokuthi nganiqoka endalweni yonke.

Futhi sabani uSuku lapho umuntu engeke asize omunye ngalutho futhi kungekho nhlawulo eyokwamukelwa kuye noma ukushweleza okuyoba usizo; futhi akekho oyobasiza.

Futhi khumbula mhla u-Ibhirahimu evivinywa iNkosi yakhe ngemiyalelo ethile, wayifeza; yathi: “ngizokwenza umholi weSintu”, wathi: “nakuzalo lwami”; yathi: “Isithembiso saMi asibandakanyi abaphambukayo”.

Futhi senza Indlu [iKabha] yaba yisizinda[1] sesintu, nendawo ephephile; ngakhoke khulekani endaweni ka-Ibhirahimu. Futhi sayalela u-Ibhirahimu no-Isima’ili [sathi]: “Hlanzani Indlu yaMi, niyihlanzele labo abazungezayo, nabazinzile kanye nalabo abakhothamayo abawa ngobuso”. ——— [1] Indawo evakashelwa ngabantu ngokuphindelela.

Futhi khumbula mhla u-Ibhirahimu ethi: “Nkosi yami, yenza lendawo kube umuzi ophephile futhi wondle abazohlala kuwo ngezivuno (izilimo nezithelo) ezahlukene, labo kubo abakholelwa ku- Allah nasoSukwini lokuGcina”; wathi: “Nongakholwa, ngizomjabulisa nje kancane, bese ngimtshinga esijezisweni somlilo; okuyisiphetho esibi.

Khumbula futhi mhla u-Ibhirahimu ephakamisa izinsika zeNdlu [iKabha] beno- Isima’ili [bathi]: “Nkosi yethu yamukela kithi, impela Wena Ungozwayo Owaziyo.”

“Nkosi yethu senze sibengama Musilimu azinikela kuWe, kanjalo nakuzalo lwethu lwenze lube isizwe esingama Musilimu esizinikela kuWe; futhi sikhombise izinkambiso zethu [zeHaji] uphinde usithethelele; impela Wena unguMthetheleli Onesihawu.

“Nkosi yethu thumela kubo iSithunywa[1] esidabuka kubo esizobalandisa ngemibiko yaKho nesizobafundisa iNcwadi neNkambiso futhi sibahlambulule; impela Wena unguSomandla Okhaliphile. ——— [1] U Allah wawuphendula lomkhuleko ngokuthumela iSithunywa sakhe uMuhamadi  oyisizukulwane sika-Ibhirahimu. Akamthumelanga nje kuphela esizweni saseMakha, kepha ezizweni zomhlaba jikelele.

Ngubani nje ongadikila inkolo ka-Ibhirahimu[1] ngaphandle kwalowo ozihlambalazayo; impela samqoka emhlabeni, futhi ungomunye wabaqotho nakwelizayo. ——— [1] Phela inkolo ka-Ibhirahimu ukukholelwa kuBunye buka-Allah nokuzinikela ngokuphephelele entandweni yaKhe. Bheka S3:67.

Kwathi mhla iNkosi yakhe yithi kuye: “zinikele”; wathi: “Ngiyazinikela eNkosini yendalo yonke”.

U-Ibhirahimu wabe eseluleka izinganezakhe ngakho [ukuzinikela ku-Allah], kanjalo no Yakubu [wathi]: “Bantwana bami, impela u-Allah unikhethele inkolo, ngakho-ke ningalinge nife ningewona amaMusilimu”.

Kumbe nanikhona mhla ukufa kufika kuYakubu, lapho ethi kubantwana bakhe: “Niyokhonza bani mhla ngingasekho na?, bathi: “Siyokhonza obekhonzwa nguwe kanye nokhokho bakho o-Ibhirahimu no-Isimai’ili no- Isihaki; okhonzwa eyedwa vo, futhi thina singamaMusilimu azinikele kuYe”.

Lezo izizwe esezandlula, ziyothola umvuzo wemisebenzi yazo kanjalo nani niyothola umvuzo wemisebenzi yenu futhi anisoze nabuzwa ngalokho ababekwenza.

Futhi bathi: “Yibani amaJuda noma amaNasara ukuze nibe sendleleni eqondile”; yithi [Sithunywa]: “Empeleni [silandela] inkolo ka-Ibhirahimu owayengazibandakanyi nezinkolo ezibhedayo, futhi engeyena obabhangqayo”.

Anibothi: “Thina sikholelwa ku- Allah nakulokho okwembulelwe kithi nokwembulelwa ku- Ibhirahimu no-Isima’ili no- Isihaki noYakubu nezizukulwane kanye nakulokho okwembulelwa kuMusa no-Isa kanye nakulokho okwanikwa ezinye iZithunywa kuvela eNkosini yazo; asicwasi muntu kuzo; futhi thina singamaMusilimu azinikele kuYe”.

Uma bengakholelwa kulokho enikholelwa kukho, nakanjani bayoba sendleleni eqondile; kepha uma bekushaya indiva, impela bayoba sempambukweni; futhi u-Allah uzokuvikela kubo, phela YenaUngozwayo Owaziyo.

Bambelelani enkolweni ka- Allah; futhi ngubani nje onenkolo engcono kuneka-Allah na; futhi thina sikhonza Yena.

Yithi [Sithunywa]: “ Nilokhu niqophisana nathi mayelana no-Allah, kube kunguYe iNkosi yethu neNkosi yenu, futhi nathi sinemisebenzi yethu kanjalo nani ninemisebenzi yenu; futhi sithembekile kuYe”.

Kumbe nithi u-Ibhirahimu no- Isima’ili no-Isihaki no-Yakubu nezizukulwane bebengamaJuda noma amaNasara na? yithi: “Ingabe yinina enaziyo kangcono noma ngu-Allah na?; futhi ingabe ubani ophambuke ukwedlula lowo ofihla ubufakazi anabo obuvela ku-Allah; futhi u-Allah akaphuthelwa yilokho enikwenzayo.

Lezo izizwe esezandlula, ziyothola umvuzo wemisebenzi yazo kanjalo nani niyothola umvuzo wemisebenzi yenu futhi anisoze nabuzwa ngalokho ababekwenza.

Iziwula zabantu ziyothi: “Bagudluzwe yini kwibombo laboleli ababebheka kulo na?; yithi: “Impumalanga nentshonalanga ngeka Allah, uholela amthandayo endleleni eqondile.”

Futhi ngokunjalo sanenza naba isizwe sekhethelo ukuze nifakaze ngesintu, futhi ukuze neSithunywa sifakaze ngani. Futhi saqoka leKibila [ibombo] lena ebenibheka kuyo ukuze sazi kahle labo abalandela iSithunywa kulabo abaphambuka; nakuba bekunzima, kodwa bekungenjalo kulabo abaholwa ngu-Allah; futhi u-Allah akasoze ayishabalalisa imivuzo yokholo lwenu; impela u-Allah unoBubele neSihawu kubantu.

Impela sikuqaphele ukuqalaza kwakho ubuka phezulu; ngakho- ke nakanjani sizokubhekisa kuleyoKibila ozoyithokozela; ngakho-ke bheka ngaseMasjidi Haramu, noma ngabe nikuphi anibobheka ngakuyo; futhi nembala labo abanikwa iNcwadi bayazi ukuthi lokhu kuyiqiniso elivela eNkosini yabo; futhi u-Allah akaphuthelwa yilokho abakwenzayo.

Futhi labo abanikwa iNcwadi uma ungabanika bonke ubufakazi abasoze bayilandela iKibila yakho, kanjalo nawe awusoze wayilandela iKibila yabo, kanti futhi abanye babo abasoze bayilandela iKibila yabanye; uma nje ukewalandela izinkanuko zabo emuva kolwazi osunalo, impela uyokuba ngophambukile.

Labo esabanika iNcwadi bamazi kahle [uMuhamadi] njengoba bazi izingane zabo, futhi impela kunabanye phakathi kwabo abafihla iqiniso ngamabomu[1]. ——— [1] Isimo seSithunywa uMuhamadi  nezimpawu zakhe, zazilotshiwe kwiTora ne-Injili.

Iqiniso livela eNkosini yakho, ngakho-ke ungabi ngongabazayo.

Yilowo nalowo unalapho ebheka ngakhona; ngakho-ke ncintisanani ekwenzeni okuhle; noma ngabe nikuphi u-Allah uyonibuthanisa nonke; impela u-Allah ulawula izinto zonke.

Noma ikuphi lapho oyakhona, bheka ngaseMasjidi Haramu; futhi impela kuyiqiniso elivela eNkosini yakho; futhi u-Allah akaphuthelwa yilokho enikwenzayo.

Futhi noma ikuphi lapho oyakhona, bheka ngaseMasijidi Haramu; kanjalo noma nikuphi bhekani ngakhona; ukuze phela abantu banganisoli, ngaphandle nje kwalabo abaphambukile kubo; ngakho-ke ningabesabi kepha nesabe Mina; ukuze ngizophelelisa isibusiso saMi kini hleze nani nibe sendleleni eqondile.

Njengoba sathumela iSithunywa [uMuhamadi] esidabuka kini sinifundela imibiko yeThu, nesinihlambululayo nesinifundisa iNcwadi nezinkambiso siphinde sinifundise lokho ebeningakwazi.

Ngakho-ke ngikhumbuleni[1], naMi ngizonikhumbula futhi ningibonge ningabi nokungangibongi. ——— [1] Ukhumbula u Allah ku Isilamu: (i) ukumdumisa ngomlomo ngalokho okumfanele, ngokwemfundiso yeSithunywa saKhe; (ii) ukuthobela nokuqhakambisa intando yaKhe nokungcina imiyalelo nezeluleko zaKhe lapha emhlabeni; (iii) ukuhlala unonembeza owazisa ubukhulu baKhe namandla aKhe nanokuthi akukho okufihlakele ngaphambi kwaKhe.

Nina enikholwayo, celani usizo ngokubekezela[1] nangeSwala; impela u-Allah unalabo ababekezelayo. ——— [1] Ukubekezela ku Islamu, igama elibanzi elengamele izincazelo ezijulile ezifaka: (i) ukungaxhamazeli nokungatatazeli nokungajahi imiphumela, 68:48; (ii) ukungathatheki noma ukuhluthukelwa, 30:60; (iii) ukubambelela eqinisweni kumnyama kubomvu, 3:186 ne 31:17; (iv) ukuqinisela nokuphikelela ngaphansi kwezimo ezinzima, 52:48.

Futhi ningathi bafile labo ababulawe endleleni ka-Allah; empeleni bayaphila, kepha nina anazi.

Futhi sizonivivinya kancane njengokwesaba, nangendlala, nokuncishelwa yingcebo nabantu nesivuno (izilimo nezithelo); futhi halalisela labo ababekezelayo.

Labo okuthi uma behlelwe umshophi bathi: “Impela singabaka Allah futhi siyobuyela kuYe”.

Labo bayonganyelwa izilokotho nomusa ovela eNkosini yabo, futhi basendleleni eqondile.

Impela iSwafa neMariwa zingezinye zezimpawu zika- Allah; ngakho-ke lowo owenza iHaji eNdlini (iKabha) noma i-Umra akanacala lapho ezungeza phakathi kwazo; futhi lowo owenza okuhle ngokwakhe, impela u-Allah Ungobongayo Owaziyo.

Impela labo abagodla ubufakazi esibembulele kanye nomhlahlandlela, emuva kokuba sesikucacisele abantu eNcwadini; labo u-Allah uyobaqalekisa kanjalo nalabo abaqalekisayo bayobaqalekisa.

Ngaphandle kwalabo abazisolayo futhi balungise futhi bacacise; yibo-ke labo engiyobathethelela, futhi nginguMthetheleli Onesihawu.

Impela labo abangakholwa baze bafe bengakholwa; labo bayothola isiqalekiso sika- Allah nesezingelosi nesabantu bonkana.

Bayobhadla kuso unaphakade, futhi angeke baxegiselwe isijeziso noma banikezwe elinye ithuba.

Futhi iNkosi okumele niyikhonze iyodwa vo; akukho okunye okumele kukhonzwe ngaphandle kwaYo, Enomusa Enesihawu.

Impela ekudalweni kwamazulu nomhlaba nasekuguqukeni kobusuku nemini nakumkhumbi ontanta olwandle uthwele lokho okuwusizo kubantu, kanye nasemanzini u-Allah awehlisa emafini avuselele ngawo umhlaba obusufile, futhi wasabalalisa kuwo zonke izinhlobo zezilwane, nasekuvunguzeni kwemimoya nakwifu elilenga phakathi komkhathi nomhlaba; kunobufakazi kulabo bantu abaqondayo.

Futhi kunabantu abaziqokele izikhonzwa esikhundleni sika- Allah, abazithanda ngothando olufanele u-Allah; kepha labo abakholwayo bona bathanda u-Allah kakhulu; ukube nje labo abaphambukile bebengabona mhla beyobona isijeziso nokuthi amandla onke angaka-Allah nanokuthi u-Allah ujezisana kanzima.

Mhla labo ababelandelwa bezihlubuka kulabo ababelandela lapho sebebona isijeziso, futhi kuyogqabuka igoda phakathi kwabo.

Futhi labo ababengabalandeli bayothi: “Uma nje singathola elinye ithuba lokubuyela emumva, sizobahlubuka njengoba nabo besihlubukile”; u-Allah uyakubakhombisa kanjalo imisebenzi yabo, badangale, futhi abasoze baphuma emlilweni.

Sintu, dlanini kulokho okusemhlabeni okuvunyelwe nokuhlanzekile futhi ningalandeli ezinyathelweni zikaShayitani, impela uyisitha senu esiqavile.

Kuphela nje uniyalela ngokubi nokuyichilo nokuthi nikhulume izinto eningazazi ngo-Allah.

Futhi uma betshelwa ukuthi: “Landelani lokho okwembulelwe ngu-Allah!”; bathi: “Empeleni, silandela lokhu esathola okhokho bethu bekwenza” – nakuba okhokho babo babengaqondi lutho futhi bengekho endleni eqondile.

Futhi isimo salabo abangakholwa, sifana nalowo (ongumelusi) omemeza lokho okungezwa lutho ngaphandle komsindo wokubizwa nokumenyezwa; bayizimumu, bayizimungulu, bayizimpumputhe yingakho nje bengaqondisisi.

Nina enikholwayo, dlanini okuhlanzekile kulokho esinabele kona bese nibonga u-Allah uma ngempela kunguYena yedwa enimkhonzayo.

Okuyikona aninqabele kona: ingcuba, negazi, nenyama yengulube, okungahlatshelwanga u-Allah; kepha lowo ophoqwa yisimo engenanhloso yokuphula umthetho noma ukuphambuka, akanacala; impela u-Allah Ungumthetheleli Onesihawu.

Impela labo abagodla lokho u-Allah akwembulele eNcwadini baphinde bathengise ngakho ngenzuzo eyize; labo yibo abadla umlilo eziswini zabo futhi u-Allah angeke abakhulumise ngoSuku lokwahlulela futhi angeke abahlanze, futhi siyoba buhlungu isijeziso sabo.

Yibona labo abakhethe ukuduka kunokhanya, nesijeziso kunentethelelo; baze bazimisela bo ngomlilo.

Lokho kungenxa yokuthi u-Allah wembulela iNcwadi ngeqiniso, kanti labo abaphikisanayo mayelana neNcwadi, banhlanhlathela kude le.

Ukwenza okuhle akupheleli kuphela ekutheni nibheke ngasempumalanga nasetshonalanga [kuSwala]; kepha owenza okuhle, yilowo okholelwa ku-Allah nasoSukwini lokuGcina naseZingelosini naseNcwadini nakuZithunywa futhi aphe ingcebo – nakuba eyithanda – izihlobo nezintandane nabaswele nezihambi neziphanzi nasekukhululeni izigqila, futhi enze iSwala ngokufanele akhiphe neZakati; nalabo abafeza isethembiso abasithembisile nalabo ababekezelayo enhluphekweni nasekuguleni nasempini; labo yibona abaneqiniso futhi labo yibona abamthobelayo u-Allah[1]. ——— [1] Lokhu kugcizela ukuthi i-Isilamu akuyona inkolo nje, kepha iyindlela yokuphila ephelele eyengamele yonke imikhakha yempilo. Yingakho nje yinoma yisiphi isenzo esisemthethweni umuntu asenzayo ukuthokozisa u-Allah, sisaseyikona ukumkhonza u-Allah.

Nina enikholwayo, niyalelwe ukuba nigcine umthetho wempindiselo mayelana nababulewe; ozimele ngozimele, isigqila ngesigqila owesimame ngowesimame[1]; kepha lowo oxolelwayo ngumnewabo ngokuba akhiphe okuthile; akamlandelele kahle futhi naye akhokhe ngesihle; lokho isihe nesihawu esivela eNkosini yenu; ngakho-ke lowo oyophula umthetho[2] emuva kwalokho uyothola isijeziso esibuhlungu. ——— [1] Lokhu kuchaza ukuthi uma umbulali ebulele umuntu ngamabomu, ngokomthetho wempindiselo kufanele kubulawe yena umbulali uqobo, kungaba isigqila noma umfazi noma indoda, ngakhoke akuvumelekile ukuba kubulawe omunye umuntu esikhundleni sakhe. [2] Ngokubulala umbulali emuva kokuba esemxolele futhi wamukela nenhlawulo.

Futhi nithola ukuphila ekugcineni umthethweni wempindiselo nina enikhaliphile ukuze nithobele u-Allah[1]. ——— [1] Ukusebenza kwalomthetho kuqinisekisa ukuncipha kokubulala ngenhloso nokuhleliwe impilo ihlonishwe baphile abantu ezweni.

Niyalelwe ukuba nibe nesiyalelofa, lapho omunye wenu eficwa wukufa; nabele abazali nezihlobo ngesihle; uma kukhona okuhle akushiyayo [ifa]; kuphoqelekile kulabo abamthobelayo u-Allah.

Lowo osiguqulayo [isiyalelofa] emuva kokuba esesizwile, icala liyoba nalabo abasiguqulile; impela u-Allah Ungozwayo Owaziyo.

Lowo owesabela ukuthi umabifa wenze iphutha noma uphambukile [ekwabeni ifa kusiyalelofa] wabe yena eselungisa phakathi kwabo [umabifa nezindlalifa] akanacala; impela u-Allah uNgumthetheleli Onesihawu.

Nina enikholwayo, ninqunyelwe ukuba nizile [ukudla] njengoba nalabo abanandulelayo banqunyelwa nabo, ukuze nibe ngabamthobelayo u-Allah.

Izinsuku nje ezimbalwa; kepha lowo kini ogulayo noma osohambeni, inani lelo useyolikhokha ezinsukwini ezinye; futhi labo abakhonayo ukuzila [kanzima][1] kufanele bakhiphe ifidiya (inhlawulo) bondle umuntu ontulayo [ngosuku]; kanti- ke lowo owengeza okuhle okungaphoqelekile, kuyosiza yena; futhi ukuba nizile yikona okungcono kini, ukube nje niyazi. ——— [1] Lokhu kufaka phakathi owesimame ozethwele, nomuntu osegugile, nophethwe ukugula okungalapheki, njalonjalo; bonke laba banawo amandla okuzila kepha kungaphansi kwezimo ezinzima ezingahle zibhebhethekise ukugula kwabo noma kubeke engcupheni impilo yomnungu esiswini.

Inyanga yeRamadani lena okwembulelwa kuyo iKurani ukuze ibe umhlahlandlela kusintu sonkana kanjalo nobufakazi bendlela eqondile nokuhlukanisa[1]; ngakho-ke lowo kini oyificayo lenyanga makayizile; kepha lowo ogulayo noma osohambeni, inani lelo useyolikhokha ezinsukwini ezinye; u-Allah ufuna ukunenzela kube lula futhi akafuni ukunithwesa ubunzima; ngakho-ke qedelelani izinsuku futhi nibabaze ubukhulu buka- Allah ngalokho aniholele kukho ukuze nibe ngababongayo. ——— [1] Ihlungo, yilokho okuhlukaniswa ngakho phakathi kokuhle nokubi.

Uma izigqila zami zikubuza [Sithunywa] ngaMi; impela Mina ngiseduze, ngiyayiphendula imikhuleko yokhulekayo lapho ekhuleka kiMi; ngakho-ke mazilalele Mina futhi zikholelwe kiMi ukuze zibe ngabalungileyo.

Nivunyelwe ukuba niye ocansini nabafazi benu ngobusuku bokuzila; bayizembatho zenu futhi nani niyizembatho zabo; u-Allah ubazi kahle ukuthi benizikhohlisa nina qobokepha wanithethelela wanixolela; ngakho-ke manje yanini nabo ocansini nilangazelele lokho u-Allah anabele kona; futhi dlanini niphuze kuze kuntwele ukusa kudede ubumnyama entathakusa bese niqhubeka njalo nokuzila kuze kuhlwe; futhi ningalinge niye ocansini nabesifazane uma nizinze eMasijidi; leyo imikhawulo ka-Allah, ngakhoke ningalinge nisondele kuyo; ubacacisela kanjalo u-Allah abantu imibiko yaKhe ukuze bamthobele.

Futhi ningadli ingcebo yenu phakathi kwenu ngokungemthetho niphinde futhi nimangalelane ngayo kubahluleli ngenhloso yokudla ingxenye yengcebo yabantu ngobuqili nibe nazi.

Bayakubuza mayelana nezigaba zenyanga; yithi: “Ziyindlela abantu abazi ngazo izikhathi[1] neHaji”; futhi akuyona into enhle ukungena endlini ngemumva; kepha ukulunga ukuthobela u-Allah; ngakho-ke ngenani ezindlini ngeminyango yazo; futhi nithobele u-Allah ukuze niphumelele. ——— [1] Ukusebenzisa izigaba zenyanga yindlela endala yesintu sonkana ukubala izinsuku. Yingakho nangolwimi lwesiZulu izinsuku ezi-30 kuthiwa inyanga. Izigaba zenyanga zimahlandla mbili, elokuqala izinsuku ezi-15 lapho inyanga ihluma khona, elisibili izinsuku ezi-15 sesibili lapho imbatha khona.

Futhi yilwani endleleni ka- Allah nalabo abalwa nanifuthi ningephuli umthetho[1]; impela u-Allah akazithandi izephulamthetho. ——— [1] i-Isilamu akuyona nje inkolo yamasiko athize kuphela. Kepha iyindlela yokuphila ephelele emithetho yayo ingamele yonke iminxa yempilo, kanjalo nezempi. Njengokuthi amaMusilimu awavunyelwe (i) ukuhlasela ngaphambi kokuba banike izitha zabo isexwayiso sezinsuku ezintathu ngaphambi kokuhlasela (ii) ukugadla kulabo abengeyona ingxeye yebutho noma impi (iii) ukucekela phansi amasimu nemizi noma imfuyo (iv) ukunyukubeza izidumbu zamabutho awile (v) ukuhlasela izingane nesimame kanye namaxhegu namaxhegukazi; lena eminye yemithetho okungamelwe yephule empini.

Futhi babulaleni noma yikuphi lapho enibathola khona niphinde nibaxoshe lapho abanixosha khona; kanti ukungakholwa kunzima kunokubulawa; kepha ningalwi nabo eMasijidi Haramu kuze kube yibona abalwa nani [kuqala] kuyo; uma belwa nani, nina babulaleni; unjalo-ke umvuzo wabangakholwa.

Kepha uma bepheza; impela u-Allah unguMthetheleli Onesihawu.

Yilwani nabo kuze kuphele ukungakholwa futhi inkolo yonke ibe ngeka-Allah kuphela; kepha uma bepheza, kuyohlaselwa abaphambukile kuphela.

Inyanga ehlonishwayo ngenyanga ehlonishwayo; nomthetho wempindiselo uyasebenza kulokho okuhlonishwayo; ngako-ke lowo onihlaselayo ziphindiseleni kuye ngokufanayo; futhi nithobele u-Allah nihlale nazi ukuthi u-Allah unalabo abamthobelayo.

Futhi nikelani endleleni ka-Allah ningazifaki embujisweni ngezenu izandla futhi nenze okulungileyo; impela u-Allah uyabathanda abenza okulungileyo.

Futhi yenzelani u-Allah iHaji ne-Umra ngokuphelele; kepha uma nivimbekile endleleni [nangakwazi ukufika eHaramu], hlabani noma yisiphi isilwane somhlatshelo esitholakalayo; futhi ningawagundi amakhanda enu isilwane somhlatshelo singakafiki endaweni yaso; kepha uma kukhonakini ogulayo noma onokulimala okuthize ekhanda [okudinga ukuba aligunde], kumele ahlawule ngokuzila noma ngokondla [abaswele] noma ngomhlatshelo; uma seniphephile [ukuqhubeka nohambo], lowo owenza i-Umra ngaphambi kweHaji, makahlabe noma yisiphi isilwane somhlatshelo esitholakalayo; lowo ongenaso kumele azile insuku ezintathu ngesikhathi esasekuyo iHaji neziyisikhombisa lapho senibuyele ekhaya, lokho ishumi eliphelele [lezinsuku]; lokhu kubhekiswe kulowo umndeni wakhe ungezona izakhamuzi zaseMasijidi Haramu [eMakha]; futhi thobelani u-Allah futhi nazi ukuthi u-Allah ujezisana kanzima.

iHaji ingezinyanga ezaziwayo; ngakhoke lowo owenza kuzo iHaji akumele ukuba aye ocansini noma aphule umthetho noma aqophisane [nabanye] uma nje esasekuyo iHaji; futhi konke okuhle enikwenzayo u-Allah uyakwazi; futhi niphathe umphako, impela umphako ongcono ukuthobela u-Allah; ngakho-ke ngithobeleni nina enikhaliphile.

Aninacala uma nizithungathela [ngokuhweba] izibusiso ezivela eNkosini yenu; uma senibuya e-Arafati, dumisani u-Allah eMash’ari Haramu [eMuzidalifa], nimdumise njengoba anihola njengoba benivele nidukile ngaphambilini.

Bese niya lapho abantu beya khona, futhi nicele intethelelo ku-Allah; impela u-Allah unguMthetheleli Onesihawu.

Uma seniziphothulile zonke izinkambiso zenu, khumbulani- ke u-Allah njengalokhu naniye nikhumbule okhokho benu noma ngokwendlulele; futhi kunabantu abathi: “Nkosi yethu, siphe emhlabeni” – kepha abanasabelo kwelizayo.

Futhi kunalabo kubo abathi: “Nkosi yethu, siphe okuhle emhlabeni nokuhle nakwelizayo, futhi usivikele esijezisweni soMlilo”.

Labo bayothola umvuzo wemisebenzi yabo; futhi u-Allah wehlulela ngokushesha[1]. ——— [1] Lombiko uphemdula umbuzo ongahle ufike emqondweni, wokuthi njengoba indalo ka-Allah ingaka nje, ingabe kuyomthatha isikhathi esingakanani. Phela u-Allah unguSomandla uyophothula ngokukhulu ukushesha ukwahlulela indalo yaKhe kwelizayo.

Futhi khumbulani u-Allah ezinsukwini ezimbalwa [zeHajikuDulhija]; lowo oshesha ahambe ezunsukwini ezimbili akanacala kanti futhi nalowo osalayo akanacala; uma nje bethobela u-Allah; futhi mthobeleni u-Allah futhi nihlale nazi ukuthi niyakubuyela kuYe.

Futhi kunalowo ebantwini okuhlaba umxhwele ngenkulumo yakhe kwezimayelana nempilo yasemhlabeni aphinde afunge ngo-Allah ngokusenhlizweni yakhe; kube empeleni uthanda ukuphikisana kakhulu.

Uma esesukile [kuwe] ulibala ukwenza ukonakala ezweni ngokuzikhandla aphinde acekele phansi amasimu nemfuyo; u-Allah akakuthandi ukonakala.

Uma kuthiwa kuye: “thobela u-Allah”, ugqabhi lwakhe lumenza aphikelele empambukweni; ngakho-ke iJahanamu imenele, futhi yaze yayindawo embi impela yokuhlala.

Futhi kubantu kunalowo ozinikela ngokuphelele elangazelela ukuthokozisa u-Allah; futhi u-Allah unesihe ezigqileni zaKhe.

Nina enikholwayo, ngenani ngokuphelele ku-Isilamu, futhi ningalandeli emabandeni kaShayitani; impela uyisitha senu esiqavile.

Uma niphambuka emuva kokuba senithole ubufakazi obucacile, yazini ukuthi u-Allah unguSomandla Okhaliphile.

Kumbe [abangafuni ukukholwa] balindele ukuba u-Allah afike kubo engungwe ngamafu kanye nezingelosi; lapho luyophuthwa okokugcina udaba; futhi zonke izinto ziyobuyela ku-Allah.

Buza isizwe sakwa Isirayeli, kukaningi sibalethela imibiko ecacile; futhi lowo oguqula isibusiso sika-Allah (imibiko) emuva kokuba esesitholile, impela u-Allah ujezisana kanzima.

Impilo yomhlaba yenziwe yaheha kulabo abangakholwa futhi babukisa ngalabo abakholwayo; kepha labo abathobela u-Allah bayophakama kunabo ngoSuku lokwahlulela; futhi u-Allah wabela amthandayo ngokungenamkhawulo.

Abantu babelandela inkolo eyodwa[1], u-Allah wabe esethumela iZithunywa zizokwethula izindaba ezinhle futhi zixwayise; waphinde wathumela nazo incwadi eneqiniso ukuze yehlulele abantu kulokho abaphikisana ngakho; futhi labo abaphikisana ngayo yilabo abanikwa yona – ngenxa yenzondo phakathi kwabo emuva kokuba sebethole ubufakazi; ngakho-ke u-Allah ngentando yakhe, uholela eqinisweni labo abakholwayo kulokho ababephikisana ngakho; phela u-Allah uholela amthandayo endleleni eqondile. ——— [1] u-Ibin Abhasi  ulandisa uthi: “Phakathi kuka Adamu no Nuhu kunezizukulwana eziyishumi, bonke babephila ngendlela eyodwa yeqiniso, kwabe sekuqubuka ingxabano [ngenxa yokuthi abanye base beqale ukukhonza izithixo]; u-Allah wathumela iZithunywa ukuze zizothula izindaba ezinhle kanye nezixwayiso. [Al-Haakim, mq.2, kh.546-547]

Ingabe nicabanga ukuthi niyongena eJana ningaka hlangabezani nokwehlela labo abanandulelayo na?; behlaselwa ubuphuya nezifo futhi bazinyaziswa [uvalo lwezitha] saze sathi isiThunywa kanye nabakholwayo naye: “Luyofika nini usizo luka Allah na?”; bheka, usizo luka Allah luseduze.

Bayakubuza ukuthi yikuphi abangaphana ngakho, yithi: “Konke okuhle eniphana ngakho, makunikwe abazali nezihlobo nezintandane nabaswele kanye nomhambi; futhi konke okuhle enikwenzayo u-Allah uyakwazi.

Niphoqelekile ukuba nilwe [empini] yize nenqena; futhi kuyenzeka ukuthi nenqene into kodwa kube iyona enilungele noma nithande into kodwa ibe inganilungele; u-Allah uyazi kepha nina anazi.

Bakubuza ngokulwa eNyangeni ehlonishwayo, yithi: “Ukulwa kuyo kuyimpambuko enkulu, kepha enkulu kunaleyo ku-Allah, ukuvimba [abantu] ekulandeleni indlela ka-Allah [i-Isilamu] nokungakholelwa kuYe kanye nokuvimba [abantu] ekungeneni e-Masijidi Haramu nokuxosha kuyo izakhamuzi zakhona; futhi ukungakholwa kuyimpambuko enkulu kunokubulala; futhi angeke bayeke ukulwa nani kuze kube bayanikhipha okholweni lwenu uma bekhona; futhi loyo kini oyoshiya ukholo lwakhe [abe yimbuka], afe engakholwa, izenzo zabo [ezinhle] ziyoshabalala emhlabeni nakwelizayo, futhi bayongena eMlilweni babhadle kuwo unaphakade.

Impela laba abakholwayo nalabo abafudukayo kanye nabalwa endleleni ka-Allah; labo bangabalangazelela umusa ka-Allah; futhi u-Allah Uyathethelela Unesihawu.

Bakubuza ngalokho okudakayo nango kugembula; yithi: “Zombili lezinto, zinempambuko enkulu kanjalo nalokho okuwusizo kubantu, kepha impambuko yazo yendlula lokho okunosizo kuzo; futhi bayakubuza ukuthi yikuphi abangaphana ngakho, yithi: “kulokho okusele”; unihlalusela kanjalo-ke u-Allah imibiko ukuze nicabangisise.

Emhlabeni nakwelizayo; bayakubuza futhi ngezintandane[1], yithi: “Ukuzinakekela kuyinto enhle, futhi uma nihlala kanye nazo zingabafowenu”; futhi u-Allah uyamazi ohlose ukonakala nohlose okuhle; uma u-Allah ethanda anganenzela kubenzima; impela u-Allah Unamandla Ukhaliphile. ——— [1] Intandane ingane yomfana noma yentombazane engakathombi esishonelwe uyise, noma ingaba naye unina; nesiZulu siyasho ukuthi intandane enhle ngumakhothwa ngunina.

Ningabashadi abesimame ababhangqa abalingani no- Allah kuze kube bayakholwa; futhi owesimame okholwayo ungcono kunowesimame obhangqayo noma enganithathekisa; futhi ningaganiseli abesilisa abhangqa abalingani no-Allah kuze kube bayakholwa, futhi owesilisa okholwayo ungcono kunowesilisa obhangqayo noma enganithathekisa; labo [ababhangqayo] bamemela emlilweni, kepha u-Allah umemela eJana nasentethelweni ngemvumo yaKhe; futhi uhlalusela abantu imibiko yaKhe ukuze bathathe isifundo.

Futhi bayakubuza ngokuba kwabesifazane esikhathini, yithi: “Kuwukungcola, ngakho-ke ningahlangani nabesifazane [ngokocansi] uma besesikhathini kuze kube bayahlanzeka; uma sebehlanzekile, seningaya- ke kubo ngendlela u-Allah aniyalele ngayo; impela u-Allah uyabathanda labo abacela intethelelo nalabo abazihlanzayo.

Abafazi benu bangamasimu[1] enu, ngakho-ke ngenani emasimini enu ngendlela enifisa ngayo; futhi nizilungisele ikusasa [kokwenza okuhle]; futhi nesabe u-Allah futhi nihlale nazi ukuthi niyohlangana naYe; futhi yethula izindaba ezinhle kulabo abakholwayo. ——— [1] Bayinsimu nje, yingoba abesilisa bafike batshale imbewu yabo kubo abesimame njengomlimi etshala imbewu ensimini yakhe, bese lembewu iyakhula ngaphakathi kwakhe owesimame kuthiwe ukhulelwe, kanjalo netshalwe ngumlimi ensimini iyakhula ikhulelele ensimini. Ngakho-ke akunankinga ukuthi ungene ngakuphi ensimini inqobo nje uma imbewu uyitshale endaweni efanele.

Futhi ningenzi igama lika- Allah ezifungweni zenu njengesu lokugwema ukwenza okulungile nokuthobela u-Allah nokuphemba ukubuyisana phakathi kwabantu; futhi u-Allah Ungozwayo Owaziyo.

Angeke anijezise u-Allah ngalokho eningakuhlosile ngezifungo zenu; kodwa uzonijezisa kuphela ngalokho okuhloswe izinhliziyo zenu; futhi u-Allah Uyathethelela Unobubele.

Bavunyelwe ukuba balinde izinyanga ezine kuphela labo abaduba abafazi babo [ukuthatha isinqumo esingujuqu]; uma bebuyela [kubafazi babo], impela u-Allah Uyathethelela Unesihawu.

Uma bezimisele ngokuhlukanisa; impela u-Allah Ungozwayo Owaziyo.

Labo abasebehlukene namadoda abo, kumele balinde [bengagani] baze baye esikhathini kathathu; futhi abavunyelwe ukufihla lokho u-Allah akudalile eziswini zabo [uma bezithwele] uma ngempela bekholelwa ku-Allah nasoSukwini lokugcina; futhi abayeni babo banelungelo lokubuyelana nabo kuleso simo uma nje behlose ukubuyisana; futhi nabo abesifazane kufanele bathwathwe ngendlela lena elindelekile kubo [ekuphatheni abayeni babo] ngesihle; kepha amadoda anezinga elithe ukuphakama kubo; futhi u-Allah unguSomandla Okhaliphile.

Ukuhlukanisa kungamahlandla amabili; ngakho-ke buyelanani kahle noma nihlukane ngesihle; futhi anivunyelwe ukuthatha utho kulokho enabanika kona [mhla nilobola], ngaphandle uma bobabili [abashadile] besaba ukuthi angeke bakwazi ukugcina imithetho ka- Allah; uma-ke nani nesaba ukuthi angeke bakwazi ukugcina imithetho ka-Allah, bobabili abanacala ngalokho owesimame akukhokhayo ukuzikhulula [emshadweni]; leyo imithetho ka-Allah ningalinge niyiphule; futhi labo abaphula imithetho ka-Allah bangabaphambukile.

Uma indoda isihlukanisile [okwesithathu] nomkayo ayivunyelwe ukubuyelana naye kuze kube ugana enye indoda; futhi uma isihlukanisile nomkayo abanacala [emuva kokuba esegane enye indoda bahlukana] uma bebuyelana inqobo nje uma benesiqinisekiso sokuthi bayokhona ukungcina imithetho ka-Allah; leyo imithetho ka-Allah uyicacisela abantu abanolwazi.

Uma senihlukanisile nabafazi kwaze kwafika lapho sebezophothula isikhathi sabo [sokulinda], buyelanani nabo kahle noma nibakhulule kahle; futhi ningabuyelani nabo ngenhloso yokubahlukumeza funa niphule umthetho; futhi lowo owenza lokho, impela ungophambukile; futhi ningenzi inhlekisa ngemibiko ka-Allah; futhi nikhumbule izibusiso zika-Allah kini kanye neNcwadi nomhlahlandlela akwembulela kini ukuze aniluleke ngakho; thobelani- ke u-Allah futhi nihlale nazi ukuthi u-Allah wazi zonke izinto.

Uma senihlukanisile nabafazi baze baphothula isikhathi sabo [sokulinda], ningabavimbeli [nina banakekeli babo] ukuba bashade [kabusha]nabayeni babo uma sebevumelene kahle phakathi kwabo ningabanqandi ekuganeni abayeni babo [abekade behlukanise nabo]; lokho kwelulekwa ngakho lowo okholelwa ku-Allah nasoSukwini lokuGcina; lokho yikona okumsulwa nokuhlanzekile kini, ngokuba u-Allah uyazi kepha nina anazi.

Omame bangancelisa izingane zabo iminyaka emibili ephelele uma befuna ukuncelisa ngokugcwele; futhi uyise wengane kumele abondle futhi abahlinzeke ngezimpahla zokugqoka ngokwamkelekile [onina bezingane zabo abahlukanisile besancelisa]; umuntu akathweswa okungaphezu kwamandla akhe; unina wengane makangahlukunyezwa ngengane yakhe kanjalo noyise wengane makangahlukunyenzwa ngengane yakhe[1]; futhi nendlalifa [uma seyikhulile] kumele yenze okufanayo [obekwenziwa uyise ekunakekeleni unina]; kepha uma bobabili [abazali] befuna ngokuvumelana nango kubonisana ukukhipha ingane ebeleni, abanacala; futhi uma nifuna ukuba izingane zenu zinceliswe ngabanye [ngaphandle konina] aninacala inqobo nje uma nikhokha lokho enikukhokhayo ngokwamkelekile; futhi thobelani u-Allah futhi nazi ukuthi ukubona konke enikwenzayo. ——— [1] Kuwumkhuba ondlangile lapho indoda ihlukanise nomnkayo benezingane, izingane ziphenduka izikhali abazisebenzisa ukuzwisana ubuhlungu. Ikakhulu uma umshado uphele ngengxabano.

Labo kini abashonayo bashiye abafazi, kumele [abafazi] balinde (bazile) izinyanga ezine nezinsuku eziyishumi; uma sebesiphothulile isikhathi sabo [sokulinda], aniyukuthweswa cala [nina banakekeli babo] ngalokho okwamkelekile abekwenzayo; futhi u-Allah ukwazi konke enikwenzayo.

Aninacala kulokho enigigiyela ngakho ekuceleni umshado kwabesimame [abangesenabo abayeni] noma nikugcine ezinhlizweni zenu; u-Allah ubazi ukuthi niyokhuluma ngabo, kodwa ningabonani nabo ngasese kuphela nje ningakhuluma okwamkelekile; futhi ningenzi izibophezelo zefindo lomshado kuze kube siyaphela isikhathi esinqunyelwe [sokulinda]; futhi yazini ukuthi u-Allah ukwazi konke okungaphakathi kini, ngakho-ke msabeni; futhi yazini ukuthi u-Allah Uyathethelela Unobubele.

Aninacala uma nihlukanisa nabafazi eningakabathinti [ngokocansi] neningakabanqumeli ilobolo labo; baxoshiseni ngalokho okwamkelekile, ocebile ngokusemandleni akhe nompofu naye ngokusemandleni akhe, [lokhu] kuphoqelekile kwabenza okulungileyo.

Futhi uma nihlukanisa nabo ningakabathinti [ngokocansi] kodwa senibanqumele ilobolo labo; banikeni-ke isigamu salokho ebesenikunqumile, ngaphandle-ke uma [abesifazane] bengenankinga noma lowo ifindo lomshado lisesandleni sakhe engenankinga [bangalithathi ilobolo]; kanti-ke ukwendlulisa [ngokungalithathi ilobolo] yikona okuzonisondeza ekuthobeleni u-Allah; futhi ningakhohlwa ukuba nesihe phakathi kwenu; impela u-Allah ukubona konke enikwenzayo.

Qikelelani ukwenza wonke amaSwala [ngesikhathi], ikakhulu lena emaphakathi; futhi nime ngesizotha ngaphambi kuka-Allah.

Uma nesaba [ingozi lapho nenza iSwala], yenzeni nihamba noma nigibele; kepha uma seniphephile, mkhumbuleni-ke u-Allah njengoba anifundisa lokho ebikade ningakwazi.

Labo kini abashonayo bashiye abafelokazi, mabashiye isiyalelofa sesondlo sonyaka owodwa kubafelokazi babo bengakhishwa [lapho abahlala khona]; kepha uma beziphumela [ungakapheli unyaka] aninacala [nina banakekeli babo] ngalokho abakwenzayo okwamkelekile; futhi u-Allah unguSomandla Okhaliphile.

Futhi labo abahlukanisile namadoda abo kumele baxoshiswe ngalokho okwamkelekile; lokhu kuphoqelekile kulabo abamthobelayo u-Allah.

U-Allah unicacisela kanjalo imibiko yaKhe ukuze niqonde.

Awubabonanga labo abaphuma emizini yabo beyizinkulungwane bebalekela ukufa, u-Allah wathi kubo: “Yifani”, wabe esebavusa; impela u-Allah unomusa kubantu, kodwa iningi labantu alibongi.

Yilwani endleni ka-Allah futhi yazini ukuthi impela u-Allah Ungozwayo Owaziyo.

Ubani ozoboleka[1] u-Allah imboleko enhle ukuze amphindaphindele yona kaningi; futhi u-Allah nguYena othathayo nophanayo futhi niyobuyela kuYe. ——— [1] Ukuboleka u-Allah kusho ukunikela nangabe ngani ekuthuthukiseni nasekuqhakambiseni intando ka-Allah nendlela yaKhe emhlabeni.

Awuzibonangayini izikhulu zesizwe sakwa Isirayeli emuva kwesikhathi sikaMusalapho zithi kuMembulelwa wabo: “Siqokele inkosi ukuze silwe endleleni ka-Allah”; wathi [kubo]: “Kungenzeka yini uma seniyalelwe ukuba nilwe bese ningalwi?”; bathi: “Singavinjwa yini ukuba singalwi sibe sesixoshwe nasemizini yethu nasezinganeni zethu”; kepha kwathi lapho sebeyalelwe ukuba balwe babaleka, ngaphandle kwedlanzana kubo; futhi u-Allah ubazi kahle abaphambukile.

UMembulelwa wabo wathi kubo: “Impela u-Allah uniqokele uTwaluti ukuba abe inkosi yenu”; bathi: “Angasibusa kanjani, kube kuyithina esifanele ukubusa kunaye futhi akanjingile”; wathi: “Impela u-Allah uqoke yena kunani futhi wamengezela ulwazi nomzimba [oqatha]”; futhi u-Allah upha ubukhosi baKhe lowo amthandayo; futhi u-Allah Ungophanayo Owaziyo.

Futhi uMembulelwa wabo wathi kubo: “Impela uphawu lobukhosi bakhe ukuthi kufike kini ibhokisi elinokuthula livela eNkosini yenu futhi liyobe liqukethe izinsalela zalokho okwashiywa umndeni kaMusa nomndeni kaHaruna lilethwa yizingelosi; impela kulokho kunophawu lwenu uma ningabakholwayo.

Kwathi lapho uTwaluti esephuma namabutho, wathi: “U-Allah uzonivivinya ngomfula, oyophuza kuwo akekho nami futhi lowo ongeke awunambithe – ngaphandle kwalowo akukhe ngesandla – yena unami; kepha baphuza kuwo ngaphandle nje kwedlanzana labo; kuthe lapho sebewelile yena nalabo abakholwayokanye naye, bathi: “Asinawo amandla okubhekana noJaluta namabutho akhe”; kepha labo ababenesiqiseko sokuthi bayohlangana no-Allah bathi: “Kukaningi iqembu elincane linqoba iqembu elikhulu, ngemvumo ka-Allah; futhi u-Allah ukunalabo ababekezelelayo”.

Kuthe lapho sebebhekene noJaluta namabutho akhe, bathi: “Nkosi yethu siphe amandla okubekezela usiqinise idolo futhi usilekelele sinqobe abantu abangakholwa.

Babanqoba ngemvumo ka- Allah, uDawudi wabulala uJaluta, u-Allah wamupha ubukhosi nokukhalipha futhi wamfundisa lokho akuthandayo; futhi ukube u-Allah akakubekanga ukuthi abantu bazivikele kwabanye ngabanye, umhlaba ubuyokonakala; kodwa u-Allah unomusa kwindalo yonke.

Leyo imibiko ka-Allah sikulandisa ngayo [wena Muhamadi] ngeqiniso; futhi impela wena ungomunye weZithunywa.

Lezo iZithunywa, ezinye sizibusisile ukundlula ezinye, kuzo kunalezo u-Allah akhuluma nazo mathupha futhi waphakamisa izinga lezinye; futhi sahlinzeka u-Isa indodana kaMariyamu ngobufakazi saphinde samsekela ngoRuhulikudusi (uJibhirili); ukube u-Allah ubefuna, labo abeza emuva kwazo ngabe abaphikisananga emuva kokuba sebethole ubufakazi; kepha baphikisana, kunalabo kubo abakholwa kwathi abanye bona bangakholwa; futhi ukube u-Allah ubefuna ngabe abaphikisananga, kepha u-Allah wenza akufunayo.

Nina enikholwayo, anibophana kulokho esinabele kona ngaphambi kokuba kufike usuku lapho okungezikuba khona hwebo noma ubungani noma ushwele; futhi abangakholwa bangaba phambukile.

U-Allah, akukho okufanele kukhonzwe ngaphandle kwaKhe, Ungophilayo OnguMnakekeli; akazeli futhi akalali; konke okusemazulwini nasemhlabeni kungokwaKhe; ngubani nje oyoshweleza ngaphambi kwaKhe ngaphandle kwemvumo yaKhe na; wazi konke okuphambi kwabo manje [emhlabeni] nokubalandelayo [kweLizayo], futhi abasoze baqonda lutho ngolwazi lwaKhe ngaphandle kwalokho akuvumelayo. isiGqiki saKhe sengamele amazulu nomhlaba futhi akumkhathazi ukuwaqapha, ngokuba uPhakeme Mkhulu.

Akunampoqo okholweni, ngokuba iqiniso lisobala kunamanga. Lowo ongakholelwa kuTwaguti kepha akholwe ku Allah, ubambelele ensinkeni eqinile engasoze yephuka. Futhi Uzwa konke Wazi konke.

U Allah ungumngani walabo abakholwayo, ubakhiphe ebumnyameni wabafaka ekukhanyeni kepha labo abangakholwa abangani babo oTwaguti babakhipha ekukhanyeni babafake ebumnyameni. Laboke bayobhadla eMlilweni bahlale kuwo unaphakade.

Awumbonanga [we Muhamadi] lowo owayephikisana no Ibhirahimu ngeNkosi yakhe, emuva kokuba u Allah emnike ubukhosi. Lapho ethi u Ibhirahimu kuye: “Inkosi yami ipha impilo futhi iyona eletha ukufa.” Wathi: “Nami ngipha impilo futhi ngilethe nokufa” Wabe esethi u Ibhirahimu: “U Allah ukhipha ilanga empumalanga, wenake likhiphe entshonalanga.” Lowo ongakholwa waswela amazwi ngokuba u Allah akabakhanyiseli labo abaphambukile.

Noma [awumbonanga] lona owandlula emzini owawubhujisiwe, wathi: “Ingabe uyovusa kanjani u Allah ngemuva kokubhujiswa kwawo na?” U Allah wamenza wafa iminyaka eyikhulu, wabe esemvusa, [u Allah wambuza] Wathi; “Uhlale isikhathi esingakanani [lapha] na?” [waphendula] wathi: “Usuku noma ingxenye yalo” Wathi: “Eqinisweni uhlale iminyaka eyikhulu, bheka ukudla kwakho nophuzo lwakho akonakele, bheka futhi imbongolo yakho, futhi Sizokwenza isibonakaliso kubantu. Bheka amathambo [embongolo] ukuthi sizowahlanganisa kanjani bese siwembathisa inyama.” Kwathi lapho sekumcacele wathi: “Sengiyazi ukuthi u Allah unamandla phezu kwezinto zonke.”

Khumbula mhla u Ibhirahimu ethi: “Nkosi yami ngibonise ukuthi abafileyo ubavusa kanjani.” Wathi: “Awukholwa na?” Waphendula wathi: “Ngiyakholwa impela, ukuthi nje ngifuna ukudelisa inhliziyo yami” Wathi: “Fuya izinyoni ezine zize zikujwayele [bese uyazinquma] uthathe izicu zayo uzusabalalise ezintabeni, bese uyazibiza [ngamagama azo] ziyoza zigijima kuwe; wazi ukuthi u Allah unguSomandla Okhaliphile”.

Labo abanikela ngengcebo yabo endleleni ka Allah, bafaniswa, nohlamvu [olutshaliwe] olumila lukhiphe izikwebu eziyikhombisa, isikwebu ngasinye sinenhlavu eziyikhulu; u Allah wandisela lowo amthandayo, futhi u Allah Unakekela konke Wazi konke.

Labo abanikela ngengcebo yabo endleni ka Allah, bengalandelisi iminikelo yabo ngokushwabula nokuhlambalaza; bayothola umvuzo wabo eNkosini yabo, bengenakusaba futhi benganasizi.

Amazwi amahle nentethelelo, angcono kunomnikelo olandelwa ukuhlambalaza. Futhi u Allah Akadingi lutho, Unobubele.

Nina enikholwayo, ningashabalalisi iminikelo yenu ngokushwabula nangokuhlambalaza, njengalowo onikela ngengcebo yakhe ukuziqhakambisa ebantwini futhi engakholwa ku Allah naso Sukwini lokuGcina; ufaniswa nedwala elishelelayo elinothuli, lapho kufika imvula ligezeka lingabi nalutho, [kanjalo] abayikuthola lutho [kwelizayo] ngabakwenze [emhlabeni], futhi u Allah akaholi abantu abangakholwa.

Labo abanikela ngengcebo yabo ukuthokozisa u Allah nokuziqinisa; bafaniswa nesivande esiseqhulwini, kuthi uma sithole imvula sikhiqize izithelo zaso ngokuphindwe kabili, kuthi uma singatholi imvula, kube umkhemezelo ofika kuso. U Allah ukubona konke enikwenzayo.

Ingabe omunye wenu uyafisa yini ukuba nesivande esinezihlahla zamasundu nomvini, esigeleza imifula simkhiqizela zonke izinhlobo zezithelo. Abe useyaguga enezingane ezisencane, kuthi kunjalo [isivande] sihlaselwe isishingishane esinomlilo sishe singqongqe. U Allah unicacisela kanjalo imibiko ukuze nicabangisise.

Nina enikholwayo nikelani ngalokho okuhlanzekile enikusebenzele nakulokho esinikhiqizele kona emhlabeni. Ningathathi imfucuza niphane ngayo, into nani eniyithatha nivale amehlo; futhi nazi ukuthi u Allah Akadingi lutho Uyadunyiswa.

uShayitani unithembisa inhlupheko futhi uniyalele ngokubi, kepha u Allah unithembisa intethelelo Yakhe nesihe; ngokuba u Allah Wengamele konke Wazi konke.

Upha ukukhalipha kulowo amthandayo, lowo ophiwe ukukhalipha uphiwe okuhle okuchichimayo; kanti yilabo abakhaliphile abaqaphelayo.

Konke eninikela ngakho nezifungo enizenzayo u Allah uyakwazi. Futhi labo abaphambukile abayikusizwa muntu.

Uma ninikela eshashalazini, kuhle, kepha uma niyihla [iminikelo] kungcono. [u Allah] uyozisula izimpambuko zenu, futhi u Allah unolwazi lwakho konke enikwenzayo.

Akukho emandleni akho [Muhamadi] ukubaholela endleni eqondile, kepha u Allah uholela endleni eqondile lowo amthandayo. Futhi konke okuhle eninikela kuyonisiza; ninikele ngoba nilangazelele ukuthokozisa u Allah. Futhi konke eninikele ngakho, niyakubuyiselwa kona ngokugcwele.

[Nikelelani] labo abaxinwe umsebenzi ka Allah, abakhoni ukuzisebenzela; ongabazi ucabanga ukuthi bacebile ngenxa yokuzithiba kwabo, ubabona ngezimpawu zabo abahambi becela abantu. U Allah ukwazi konke okuhle eninikela ngakho.

Labo abanikela ebusuku nasemini, ngasese nasesindlangalaleni, bayothola imivuzo yabo eNkosini yabo futhi ngeke babe nokwesaba noma bakhathazeke.

Labo abadla imali yenzalo, bayovuka emathuneni [kweLizayo] okumuntu ohlanyiswe uShayitani; yingoba bathi: “Ukuhweba kuyena nje nokuzalisa imali” Kepha u Allah uvumele ukuhweba wachitha ukuzalisa imali. Lowoke oyothola isaluleko esivela eNkosini yakhe bese eyapheza, uzogcina inzuzo leyo anayo, futhi udaba lwakhe luku Allah. Kepha lowo oqhubekayo, uyobhadla eMlilweni ahlale khona unaphakade.

U Allah akayibusisi imali yenzalo, kepha Wandisa iminikelo. Futhi u Allah akamthandi wonke umuntu ongakholwa ophambukile.

Ngempela laba abakholwayo benze okuhle futhi baqikelela ukwenza iSwala bakhiphe neZakati, bayothola umvuzo wabo eNkosini yabo bengenakusaba bengenasizi.

Nina enikholwayo, thibelani u Allah niyeke izinsalela zemali yenzalo uma ngempela ningabakholwayo.

Uma ningakwenzi lokho; lindelani impi evela ku Allah neSithunywa saKhe. Kepha uma nicela intethelelo, thathani ingqikithi yemali yenu [konikweledayo] ngokugcwele ningakhwabanisi.

Uma [onikweledayo] empofu, muphe isikhathi esanele kuze uyakhona, kepha uma ninikela yikona okungcono, ukube nje benazi.

Nesabe loloSuku lapho niyobuyela kulo ku Allah; bese wonke umuntu ethola umvuzo wemisebenzi yakhe ngale kokungebulungiswa kubo.

Nina enikholwayo, uma nikweledisana ngesikhathi esibekiwe, silobeni phansi [isikweleti]; umlobi phakathi kwenu makalobe ngobulungiswa; futhi angenqabi umlobi ukuloba njengoba u Allah wamfundisa; makalobe bese kuthi lowo okweletayo abizele esabe u Allah angakhwabanisi lutho kuso. Uma lowo okweletayo eyisiwula noma ebuthakathaka noma engakhoni ukubizela, umnakekeli makube nguyena obizelayo ngobulungiswa. Kubekhona ofakazi besilisa ababili kini, uma bengekho abesilisa ababili, makube indoda nabesifazane ababili enigculisekila ngabo ukuba ngofakazi; uma omunye [wesimame] enza iphutha lona omunye uzomkhumbuza. Ofakazi akumele banqabe lapho bebizwa. Ninganqeni ukusiloba sincane sikhulu [isikweleti] ngesikhathi esibekiwe. Ngokuba lokho kuwubulungiswa ku Allah nokufakaza okuqotho nokwenza ukuba kungabikhona ukungabazana. Ngaphandleke uma nithengiselana bukhoma phakathi kwenu akunacala uma ningakulobanga. Kepha nibize ofakazi lapho nithengiselana. Umlobi nofakazi bamangahlushwa. Uma nikwenza lokho niyobe senephule umthetho. Nithobele u Allah, uyakunifundisa u Allah; ngokuba u Allah Wazi zonke izinto.

Uma nisohambeni, kungekho mlobi, makube nesibambiso esibanjiswayo. Uma kukhona enibambisene kona, lowo obanjisiwe makakubuyisele lokho abanjiswe kona athobele u-Allah iNkosi yakhe. Futhi ningabugodli ubufakazi; lowo obugodlayo impela inhliziyo yakhe iphambukile; belu u-Allah uyakwazi enikwenzayo.

Konke okusemazulwini nasemhlabeni kungokuka Allah; noma ningakuveza obala lokho okungaphathi kwenu noma nikufihle[1], u-Allah uzonihlulela ngakho; bese ethethelela amthandayo futhi ajezise amthandayo; phela u-Allah akehlulwa yilutho. ——— [1] Lezi izimpambuko zenhliziyo ezifana nezondo, ukundlinza, amagqubu, ukuzigqaja nokuzazisa nobuphixiphixi, njalonjalo... konke kuyojeziswa uMdali.

IsiThunywa sikholelwe kulokho okwembulele kuso kuvela eNkosini yaso, kanjalo nabakholwayo. Bonke bakholelwa ku Allah nezingelosi Zakhe nezincwadi zakhe neziThunywa Zakhe, [Bathi]: “Asicwasi muntu kuziThunywa zakhe” Futhi bathi: “Sizwile futhi siyazithoba, Nkosi yethu sithethelele, siyakubuyela kuWe”.

Awukho umphefumulo u Allah awuthwesa ngaphezu kwamandla awo. Uyohlomula [ngokuhle] okwenzile futhi uyojeziswa [ngokubi] okwenzile. “Nkosi yethu ungasijezisi uma sikhohliwe noma sisephutheni, Nkosi yethu ungasithwesi isibophezelo esinzima njengoba wasithwesa labo abasandulelayo. Nkosi yethu ungasithwesi lokho okungaphezu kwamandla ethu, usixolele, usithethelele, usihawukele. Uyisiphephelo sethu ngakhoke siphe ukunqaba labo abangakholwa.

AliLamMim.

U Allah, akekho onokukhonzwa ngaphandle kwaKhe, unguSimakade unguMnakekeli wezinto zonke.

Wembulele kuwe [Muhamadi] iNcwadi [iKurani] ngeqiniso, ifakazela lezo ezandulelayo, futhi Wembulela iTora ne Ininjili.

Endulo ukuze zibe umhlahlandlela wesintu futhi Wembulela ne Furukani. Ngempela labo abangakholwa yimibiko Yethu bayothola isijeziso esinzima, ngokuba u Allah uSomandla oziphindiselelayo.

Ngempela akukho okufihlekile ku Allah, emhlabeni nasezulwini.

Nguye lo onibumbe ngendlela athanda ngayo ezibelethweni zonyoko, ngakhoke, akekho onokukhonzwa ngaphandle kwaKhe onguSomandla Okhaliphile.

Nguye [u Allah] owembulele kuwe [Muhamadi] iNcwadi equkethe izambulo ezicacile okuyizona ingqikithi yeNcwadi, kanti ezinye ziyindida; kepha laba abanokuphambuka ezinhliziyweni zabo balandela lezi eziyindida ukuze baqale uthuthuva noma bazame ukuzihumusha. Empeleni akekho owazi incazelo yazo ngaphandle kuka Allah nalabo abolwazi olunzulu, abathi: “Siyakholwa kukho, konke kuvela eNkosini Yethu”. Labo abakhaliphile yibona kuphela abaqaphelayo.

Nkosi yethu sicela ungaphambukisi izinhlizo zethu emuva kokuba ususihlengile, futhi siphe umusa wakho ngokuba Wena Ungophayo.

Nkosi yethu, ngempela Nguwe oyobuthanisa isintu ngoSuku olungengatshwazwe, ngokuba u Allah akasephuli isithembiso.

Ngempela labo abangakholwa, ingcebo yabo nezingane zabo aziyikubasiza ngalutho ku Allah futhi yibona kanye labo abayoba izithungelo zoMlilo [wase Jahanamu].

Njengoba kwawumkhuba wesizwe sika Firawuna kanye nalabo ababandulelayo, abakholwanga imibiko Zethu, u Allah wabajezisa ngezimpambuko zabo, futhi u Allah unesijeziso esinzima.

Yithi kulabo abangakholwa: “Nizonqotshwa bese nibuthelwa eJahanamu, okiyindawo embi impela”.

Futhi beninesibonakaliso mhla kutholana phezulu amabutho amabili; ibutho elilodwa belilwela endleleni ka Allah kanti elinye belingakholwa [liyiningi], kepha libabona [abebutho elikholwayo] belingana nabo ngenani emehlweni abo [yize babeyidlanzana]. Kanjalo u Allah wesekela abathandayo ngosizo lwaKhe. Ngempela lokho kuyisifundo kwabaqondayo.

Ukuthanda abafazi, nezingane nezindodla zomcebo wegolide nesiliva namahhashi ekhethelo nemfuyo kanye nezitshalo, kwenziwe kwalangazeleka kubantu; konke lokhu izinto zokuncebeleka emhlabeni, bheka, u Allah unendawo enhle okuyobuyelwa kuyo.

Yithi: “Akenginitshele ngokungcono kunalokho; labo abathobela iNkosi yabo, ibalungiselele izivande okugeleza kuzo imifula, bayohlala kuzo unaphakade, kanye nabafazi abamsulwa nentokomalo ka Allah[1], futhi u Allah uziqaphile izinceku Zakhe. ——— [1] Intokomalo ka Allah, kusho ukuthokoza kuka Allah ngalabo abayongena eJana, yisona sigaba esiphezulu sokuhlonishwa nokuklonyeliswa kwabathobela u Allah emhlabeni baphile ngokwentando yaKhe.

Lezi ezithi, “Nkosi yethu ngempela sikholiwe ngakhoke sithethelele futhi usihlenge esijezisweni soMlilo.

Bayabekezela, baqotho, bayazithoba, bayanikela futhi bacela intethelelo [ngokukhuleka] entathakusa.

U Allah nezingelosi kanye nosolwazi, bayafakaza ukuthi akekho okumele akhonzwe ngaphandle kwaKhe, futhi Nguyena omise ubulungiswa. Ngakhoke akekho okumele akhonzwe ngaphandle kwaKhe uSomandla Okhaliphile.

I-Isilamu iyona kuphela inkolo eyamukelekile ku Allah. Kanti labo abanikwa iNcwadi, baqala ukuphikisana emuva kokuba ulwazi sebelutholile ngenxa yenzondo phakathi kwabo, futhi kulowo ophika izambulo zika Allah, u Allah uyashesha uma ehlulela.

Uma beqophisana nawe [Muhamadi] yithi: “Ngizinikele ngokuphelele mina nalabo abangilandelayo ku Allah”. Futhi yithi kulaba abanikwa iNcwadi: “Ingabe niyazinikela na?” Uma bezinikela bayoba sendleleni eqondile, kepha uma behlehla nyovana, umsebenzi wakho [Muhamadi] ukundlulisa umlayezo. Futhi u Allah uziqaphile izinceku Zakhe.

Labo abaphika izambulo zika Allah babulale nezithunywa ngokungemthetho baphinde babulale abantu abagqugquzela ubulungiswa, bazise ngesijeziso esibuhlungu.

Yiboke labo izenzo zabo [ezinhle] ziyakushabalala emhlabeni nakwelizayo futhi akekho oyobasiza.

Awubabonanga na, labo abanikwa ulwazi lweNcwadi, uma bebizwa ukuba basebenzise iNcwadi ka Allah ukwahlulela phakathi kwabo, abanye babo bavele bahlehle nyovana badikile.

Bakwenza lokhu ngoba bethi: “Umlilo [weJahanamu] uyosishisa izinsukwana nje!” Amanga abawaqambayo abadukisile enkolweni yabo.

Kuyobanjani mhla sibabuthanisa ngoSuku olungengatshazwe, lapho wonke umuntu uyovuziswa ngezenzo zakhe futhi abasoze baqilwa.

Yithi: “Allah, Mnini wobukhosi, upha ubukhosi kulowo omthandayo futhi ubuphuce lowo omthandayo, futhi uphakamisa lowo omthandayo futhi udicilela phansi lowo omthandayo; konke okuhle kuseZandleni zaKho, ngokuba Wena unamandla phezu kwezinto zonke.

Ungenisa ubusuku emini ungenise imini ebusuku futhi ukhipha into ephilayo kwefile uphinde ukhiphe efile kwephilayo[1], futhi wondla lowo omthandayo ngokungemkhawulo. ——— [1] U Allah udala umuntu ophilayo ngesidoda esifile futhi nguYena odale isidoda esifile emuntwini ophilayo.

Labo abakholwayo akumele babe nabangani abangakholwa kunalabo abakholwayo. Lowo owenza lokho [ukuba nongani ongakholwa ebe eyikholwa], u Allah akahlanganise lutho naye, kuphela nje uma kuliqhinga eniziphephisa ngalo kubo; u Allah unixwayisa Ngaye futhi isiphetho siku Allah.

Yithi: “Noma ningakufihla noma nikuveze obala okusezifubeni zenu, u Allah uyakwazi. Futhi Wazi okusema-zulwini nasemhlabeni, ngokuba u Allah unamandla phezu kwezinto zonke.

NgaloloSuku wonke umuntu uyothola konke okuhle akwenzile kukhona, kanjalo nokubi, uyofisa engathi kungaba khona ibanga elide phakathi kwakhe nakho [okubi]. Bheka u Allah unixwayisa Ngaye ngokuba unesihe kusintu.

Yithi: “Uma nimthanda ngempela u Allah, ngilandeleni; u Allah uyonithanda futhi anithethelele izimpambuko zenu, ngokuba u Allah Uyathethelela Unesihawu.

Yithi: “Thobelani u Allah neSithunywa”, kepha uma bekukushaya indiva, bheka u Allah akabathandi abangakholwa.

Ngempela u Allah waqoka u Adamu noNuhu nomndeni ka Ibhirahimu nomndeni ka Imurani ezizweni zonke.

Isizukulwane ngesizukulwane, ebezifana, futhi u Allah Uzwa konke Wazi konke.

Lapho umka Imurani ethi: “Nkosi yami nginikela kuwe lokhu okusesiswini sami ngokugcwele, ngicela ukwamukele kimi, ngokuba Wena Uzwa konke Wazi konke”[1]. ——— [1] Umfazi ka Imurani wabe esemudala mhla ekhulelwa, wajabula, wathatha isifungo sokuba umntwana ayomzala uyakumenza isisebenzi sasendlini sokukhonza iMakadisi, njengendlela yokubonga kuMdali.

Kwathi lapho esembelethile wathi: “Nkosi ngizale intombi - bheka u Allah wazi kahle ngakubelethile ngokuba insizwa ayifani nentombi – ngimethe igama elithi‘Mariyamu’ futhi ngicela umkhusele yena nozalo lwakhe ku Shayitani (uSathane) oqalekisiwe”.

Inkosi yakhe yamamukela kahle yamkhulisa kahle waqoka uZakariya ukuba amnakekele. Kwakuthi njalo uma u Zakariya eyombona elawini athole ukudla. Wathi [uZakariya]: “We Mariyamu ukutholaphi lokhu na?” [waphendula u Mariyamu] wathi: “Kuvela ku Allah, bheka u Allah wondla amthanadayo ngokungemkhawulo.

Yilaphoke u Zakariya wacela eNkosini yakhe, wathi: “Nkosi yami ngiphe kuwe uzalo oluqotho ngokuba Wena uyizwa yonke imithandazo”.

Kwathi lapho emile ethandaza elawini, zamumemeza izingelosi zathi: “u Allah ukubikela izindaba ezinhle [ngendodana] uYahiya, oyofakaza ngeZwi lika Allah abe ohloniphekile futhi ozithibile abe iSithunywa esilungileyo.

Wathi [uZakariya]: “Nkosi yami ngizoyithola kanjani indodana na, ngibe ngigugile kanti nomkami uyinyumba?” Yathi [ingelosi]: “U Allah ukwenza kanjalo akuthandayo”.

Wathi [uZakariya]: “Nkosi yami ngibonise uphawu” Yathi: “Uphawu lakho, angeke ukhone ukukhuluma nabantu ngaphandle kokukhomba izinsuku ezintathu. Futhi khumbula iNkosi yakho kakhulu futhi uyidumise emini nasekuseni”.

Futhi khumbula lapho izingelosi zithi: “ Mariyamu, ngempela u Allah ukuqokile futhi wakuhlanza wakuqoka phezu kwabafazi bezizwe zonke”.

“Mariyamu, thobela iNkosi yakho uwe ngobuso [ukhuleke] futhi ukhothame nabakhothamayo.

Lezo izindaba zasendulo sizembulele kuwe. Bheka bewungekho lapho bephonsa izilobi zabo ukuthola ukuthi ubani ofanele ukunakekela uMariyamu futhi bewungekho lapho bephikisana.

Khumbula ukuthi izingelosi zathi: “Mariyamu, ngempela u Allah ukuhalelisa ngeZwi elivela Kuye ogama lalo ngu MasihiIsa ka Mariyamu, uyakuba ohloniphekile emhlabeni nakweLizayo futhi uyakuba kwabakhethekile.

Uyakukhuluma nabantu ewuswana nalapho esekhulile futhi uyakuba omunye wabenzi bokuhle”.

Wathi [uMariyamu]: “Ngiyomthola kanjani umntwana kube kungenamuntu ongithintile na?” Yathi: “Kanjalo u Allah udala akuthandayo; uma esenqume ukudala into umane athi: ‘daleka’ bese iyadaleka.

Futhi uyakumfundisa iNcwadi noBuhlakani kanye neTora ne Ininjili.

Futhi uyakuba isiThunywa kusizwe sama Isirayeli, uyofika athi: “Ngize nesibonakaliso esivela eNkosini yenu; ngempela ngiyakwazi ukubumba ngodaka isiqu senyoni bese ngiyasiphefumulela bese siba inyoni ephilayo ngemvumo ka Allah, futhi ngilapha izimpumputhe nezinkubela ngiphinde ngivuse abafileyo ngemvumo ka Allah. Futhi ngiya-kunazisa ngalokho enikudlayo nenikubeke emizini yenu. Ngempela lokhu konke kuwubufakazi kini uma ningabakholwayo.

Futhi ngizogcwalisa imithetho yeTora okuyi yona engandulelayo, futhi ngizonixegisela kokunye ebeninqatshelwe kona. Kanti futhi ngize nobufakazi obuvela eNkosini yenu, ngakhoke mthobeleni u Allah futhi ningilalele.

Ngempela u Allah uyiNkosi yami neyenu, ngakhoke mkhonzeni ngokuba belu iyona lena indlela eqondile.

Kuthe lapho u Isa ebona ukungakholwa kwabo wathi: “Ubani ozimisele ukungisiza emsebenzini ka Allah na? Amahawariya athi: “Yithina esingabasizi baka Allah, siyakholelwa ku Allah futhi yiba ufakazi ukuthi singamaMusilimu.

“Nkosi yethu siyakholelwa kulokho okwembulele futhi silandela isiThunywa [u Isa] ngakhoke silobe kanye nalabo abafakazayo.”

Babe sebakha uzungu[1], kepha u Allah naye walwakha, bheka ngoba u Allah ulwakha ngobuchule. ——— [1] Lolu kwabe kuwuzungu lokubulala u Isa ka Mariyamu isiThunywa sika Allah.

Mhla ethi: “Isa ngizokususa emhlabeni ngikunyusele Kimi futhi ngizokuhlenga kulabo abangakholwa, kanti futhi ngiyakubeka labo abakulandela phezu kwalabo abangakholwa kuze kube uSuku lokwaHlulelwa[1]. Niyobeke senibuyela Kimi ukuze ngehlulele phakathi kwenu kulokho ebiniphikisana ngakho.” ——— [1] Lesi sambulo siwubufakazi ekutheni u Isa ka Mariyamu akafanga yingakho esazophinde abuye emhlabeni ukuze azophila impilo yakhe njengawo wonke umuntu kuze kube uyashona.

Kuyokuthi labo abangakholwa ngibajezise isijeziso esinzima emhlabeni nakweLizayo futhi akekho oyabasiza.

Kanti labo abakholwayo futhi benze okuhle uyobaklomelisa imivuzo yabo ngokugcwele, futhi u Allah akabathandi abaphambukileyo.

Konke lokhu esikulandisa kona, kuwubufakazi nesiKhumbuzo esikhaliphile.

Bheka ngoba isimo sika Isa ku Allah siyefana nesimo sika Adamu ngokuba wamdala [u Adamu]ngomhlabathi wabe esethi kuye: ‘Iba khona’ wabakhona[1]. ——— [1] Ukudalwa kuka Isa ka Mariyamu akumangazi ukundlula ukudalwa kuka Adamu. Bheka ngoba Adamu wadalwa ngaphandle kuka mama no baba, kepha u Isa wazalwa ngaphandle nje kuka baba, kuthi isintu sonke sona sadalwa kumama nobaba.

Lokhuke iqiniso elivela eNkosini yakho ngakhoke ungabi ongabazayo.

Kanti-ke uma kukhona ophikisana nawe kulokhu emuva kolwazi osunalo Yithi: “Wozani simeme izingane zethu nezenu nabafazi bethu nabenu nathi ziqu zethu kanye nani, bese sikhulekela isiqalekiso sika Allah sibe kulabo abaqamba amanga”.

Ngempela lezindaba ziyiqiniso, futhi akekho ofanele ukukhonzwa ngaphandle kuka Allah, kanti u Allah nguyena uSomandla Onokukhalipha konke.

Kepha uma bedikila; u Allah ubazi kahle labo abangamahlongandlebe.

Yithi [Muhamadi]: “Nina abeMibhalo wozani sibe izwi linye esivumelana ngalo phakathi kwethu nani, elithi, ‘singakhonzi lutho ngaphandle kuka Allah futhi singambhanqi nalutho futhi singakhonzani sisodwa ngapha- ndle kuka Allah.” Kepha uma bedikila, anibothi: “Sifakazeleni ke ukuthi yithina amaMusilimu”

Nina abeMibhalo! kungani niphikisana mayelana no Ibhirahimu nakuba iTora ne Ininjili kwembulelwa emuva kwakhe, aniqondi na?

Yini kanye laba eniphikisana kulokho enikwaziyo; yinganike seniphikisana ngalokho eningakwazi na? Bheka u Allah uyazi kepha nina anazi.

U Ibhirahimu wayengelona iJuda noma uMnasarina, kepha ubeyiMusilimu elimsulwa futhi engesona isikhonzi zithixo.

Eqinisweni, abantu abasondelene no Ibhirahimu abalandeli bakhe kanye nalesiSithunywa [uMuhamadi] nalabo abakholwayo, futhi u Allah ungumngani wabakholwayo.

Kunoquqaba kulabo beMibhalo elilangazelela ukuba linidukise. Empeleni bazidukisa bona uqobo kepha abazi.

Nina beMibhalo! kungani niphika izambulo zika Allah kepha nibe ningofakazi na?

Nina beMibhalo! kungani nixuba iqiniso ngamanga futhi nigodle iqiniso nibe nilazi na?

Futhi kunoquqaba kulabo beMibhalo oluthi: “Kholwani kulokho okwembulelwe kulabo abakholwayo emini, kepha nikuchithe lapho seliyoshona hleze babuye.”

“Futhi ningakholwa muntu ngaphandle kwalowo olandela inkolo yenu... – Yithi: ‘indlela eqondile ileyo engeka Allah kuphela’ – funa abanye baphiwe lokho enaphiwa kona bese benimangalela eNkosini yenu.” Yithi: “Umusa useZandleni zika Allah uwupha lowo amthandayo ngokuba u Allah wengamele izinto zonke wazi konke.

Wabela umusa Wakhe lowo amthandayo, ngokuba u Allah unomusa oyinala.

Futhi kulabo beMibhalo kunalabo uma umbambise izindodla zomcebo uyakubuyisela wona, kepha kunalabo uma umbambisa idinari elilodwa akalibuyisi ngaphandle kokuba umlandelele. Lokhu yingoba bathi: “Asinamsebenzi nalabo abangafundile” futhi bakhuluma amanga ngo Allah ngabomu.

Empeleni lowo ogcina isithembiso sakhe futhi azithobe ku Allah; bheka ngoba u Allah uyabathanda labo abazithobayo.

Labo abephula isivumelwano no Allah kanye nezifungo zabo ngenxa yenzuzo engatheni, abayikuba nasabelo kweLizayo, bheka ngoba no Allah akayikukhuluma nabo noma ababuke ngosuku lokwaHlulela futhi akayikuba-thethelela, kanti nesijeziso sabo sibuhlungu.

Futhi kunalabo kubo abahlanekezela imiyalelo yeMibhalo ngemilomo yabo ukuze nicabange ukuthi [lokhu abakushoyo] kuyingxenye yeMibhalo kepha kube kungeyona ingxenye yeMibhalo. Baqamba amanga aluhlaza ngo Allah ngabomu.

Akwenzeki ukuthi umuntu u Allah amuphe iNcwadi ne Hikima [izimfundiso] futhi amenze isithunywa, bese athi kubantu: ‘Khonzani mina ngaphandle kuka Allah’. Kunalokho uthi kubona; ‘Yibani abeluleki abaqotho kulokho enikufundisa abantu nakulokho enikufundayo’.

Futhi akaniyaleli ukuba nikhonze izingelosi kumbe izithunywa. Anganiyalela kanjani ngokungakholwa nibe seningamakholwa.

Khumbula ukuthi u Allah wenza isivumelwano nezithunywa zonke, wathi: ‘kuleziNcwadi nobuhlakani enginiphe bona, uma kufika isithunywa esifakazela lokhu eninakho, niyokho-lelwa kuso futhi nisilekelele’ wabe esethi [u Allah]: “Ingabe niyavuma futhi nenza isibophezelo nami kulokho na? Zathi [izithunywa]: “Siyavuma”. Wabe esathi [u Allah]: “Yibani ofakazi ngokuba ngikufakazi kanye nani!”

Lowo ongeke akugcine lokho uyakuba ngophambukileyo.

Ingabe bafuna enye indlela ngaphadle kwendlela ka Allah na? Bheka ngoba konke okusemazulwini nasemhlabeni kuthobela yena kuthanda kungathandi, kanti futhi bayobuyela kuye [u Allah].

Yithi: “Sikholwa ku Allah nakulokho ekwembulelwa kithi kanjalo nokwembulelwa ku Ibhirahimu no Isima’ili no Isihaki no Yakubu kanye nama Asibati, futhi nakulokho okwaphiwa uMusa no Isa nezinye iziThunywa kuvela eNkosini yabo – asicwasu muntu kubo- futhi sizinikele kuYe [u Allah].

Lowo oyokhetha enye indlela yokuphila ngaphandle kwe Isilamu, ayisoze yamukelwa ngaye, futhi kweLizayo uyakuba ngolahlekelwe.

U Allah angabahlenga kanjani na? abantu abaphika ukholo emuva kokukholwa kwabo baphinde bafakaza ukuthi isiThunywa singeseqiniso bathola nobufakazi.! U Allah akabahlengi abantu abaziphambukisayo.

Laboke isijeziso sabo kuyakuba isiqalekiso sika Allah neZingelosi nesintu sonkana.

Bayobhadla kuso [isiqalekiso]; kanti abasoze baxegiselwa isijeziso futhi abayikunikwa elinye ithuba.

Ngaphandle nje kwalabo abacela intethelelo emuva kwalokho benze nokulingile; belu u Allah ungu-Mthetheleli Onesihawu.

Kepha labo abaphika ukholo emuva kokukholwa kwabo futhi bagxile ekungakholweni kwabo; abasoze bathethe-lelwa futhi yibona kanye abadukileyo.

Laba abangakholwa baze bafe bengakholwa; noma bengahlawula ngomhlaba ogcwele igolide, awusoze wamkelwa. Yibo kanye laba abayothola isijeziso esibuhlungu futhi akekho obasiza.

Anisoze nakuzuza ukulunga kuze kube ninikela ngalokho okuyigugu. Futhi noma ikuphi eninikela ngakho u Allah uyakwazi.

Konke ukudla kwakuvumelekile kusizwe sama Isirayeli ngale kwalokho u Isirayeli[1] azithiba yena ngokwakhe ngaphambi kokuba kufike iTora. Yithi: “Lethani iTora niyifunde uma ngempela niqinisile”. ——— [1] U Isirayeli lona, nguYakubu ka Isihaki ka Ibhirahimu, okunguyena ubaba mkhulu wazo zonke izizwana eziyi – 12 zamaJuda.

Emuva kwalokho, labo abayoqamba amanga ngo Allah, yibona kanye abaphambukile.

Yithi: “u Allah ukhuluma iqiniso! Ngakhoke landelani inkolo ka Ibhirahimu emsulwa futhi wayengeyena okhonza izithixo!”

Indlu yokuqala nqa eyamiselwa isintu, yilena eseBhaka [eMakha] njengesibusiso nenkokhelo ezizweni.

Kunezinkomba ezicacile khona; isizinza sika Ibhirahimu. Futhi lowo ongena kuyo uphephile; u Allah uphoqelele isintu ukuba siyokwenza iHaji kuleNdlu kulowo onamandla okuya kuyo, kepha loyo ophika ukholo u Allah uzimele akadingi lutho ezizweni.

Yithi: “Nina beMibhalo! Kungani na niphika imibiko yaka Allah nakuba u Allah ekuqaphe konke enikwenzayo?”

Yithi: “Nina beMibhalo! Kungani nivimba endleni ka Allah labo abakholwayo nibafunela impambuko nakuba ningofakazi; futhi akusikho ukuthi u Allah akakuqaphile enikwenzayo”.

Nina enikholwayo! Uma nike nalinga ukulalela abanye balabo abanikwa iMibhalo, bayonenza abangakholwa emuva kokholo lwenu.

Ningaphenduka kanjani abangakholwa na, nibe nifundelwa imibiko yaka Allah kanti neSithunywa Sakhe sinani. Lowo oyobambelela ku Allah, ungoholelwe endleleni eqondile.

Nina enikholwayo! Thobelani u Allah kokufanele futhi niqikele ukuba nife ningamaMusilimu.

Bambelelani nonke entanjeni[1] ka Allah ningahlakazeki, futhi nikhumbule isibusiso sika Allah kini mhla niyizitha wenza izinhliziyo zenu zabuyisana, naphenduka abozalo ngesibusiso Sakhe, nakuba nanikade senisencupheni yewa lomlilo, Wanihlenga kuwo. Kanjalo u Allah unicacisela izibonakaliso Zakhe funa nibe abaqondileyo. ——— [1] Intambo ka Allah imiyalelo Yakhe yonke kanye nezimfundiso zeSithunywa Sakhe, bese kuthi ukubambelela kuyo, ukuyithobela ngokuphelele.

Makube khona kini yithimba elizobizela kokuhle, ligqugquzele ukulunga futhi lexwayise ngokubi; yiboke labo abayophumelela.

Futhi ningabi njengalabo abahlakazeka futhi baphikisana ngemuva kokufika kwezambulo kubo; yiboke labo abayothola isijeziso esinzima.

Ngosuku lapho ubuso buyoba mhlophe obunye bube mnyama. Laboke ubuso babo buyoba mnyama, bayobuzwa: “Ingabe naphika ukholo emuva kokholo lwenu, yizwanike isijeziso sokungakholwa kwenu”.

Kuthi labo ubuso babo buyoba mhlophe babe semseni[1] ka Allah bahlale khona unaphakade. ——— [1] Umusa ka Allah okukhulunywa ngawo la, iJana. Kadeni iSithunywa sika Allah sakubeka kwacaca ukuthi: “Akekho oyongena eJana [ezulwini] ngezenzo zakhe” Bathi: “Ngisho nawe Sithunywa sika Allah!” Wathi: “Ngisho nami impela, ngaphandleke uma u Allah engithela ngomusa Wakhe”. [Bhuhari no Musilimu]. Ngakhoke iMusilimu ngezenzo zalo lisuke lizincengela umusa ka Allah.

Lezoke izambulo zika Allah esikufundela zona ngeqiniso, futhi u Allah akayifuni icindezelo ezizweni.

Konke okusemazulwini nasemhlabeni kungokuka Allah, futhi zonke izinto ziyobuyela Kuye.

Niyisizwe esikhethekile esimiselwe ukusiza abantu ngokugqugquzela ukulunga[1] nangokuxwayisa ngokubi[2] futhi nikholelwe ku Allah. Uma abeMibhalo bengakholwa nje kuyokuba kuhle kubo; kunalabo kubo abakholwayo kepha iningi liyiziphulamthetho. ——— [1] Ilokho i-Isilamu ekuncomayo nekuqhakambisayo. Kuthi okungokokuqala ohlwini lezenzo zokulunga ukuqhakambisa iTawuhidi, uBunye buka Allah, njengoMdali, noMphathi noMlawuli wakho konke, okunguyena yedwa vo okumele akhonzwe. [2] Ilokho i-Isilamu ekuhlabayo nekugxekayo. Kuthi iShiriki, ukubhanqa u Allah nezimbangi, kube isenzo esibi kunazo zonke. Bheka ngoba lowo ozibandakanya neShiriki uhlambalaza igama lika Allah ngokumfanisa nendalo Yakhe, akukho ukweyisa okwendlula lokhu!

Abasoze banilimaza ngalutho ngaphandle kokuhlambalaza, futhi uma benilwisa bayonibalekela, bheka ngoba abayikusizwa muntu.

Lokhu bathweswe isigcwagcwa kuyo yonke indawo la betholakala khona, ngaphandle uma bevikelwe isivumelwano esivela ku Allah noma abantu; futhi bazizuzele intukuthelo evela ku Allah, futhi bethweswa inhlupheko. Konke lokhu kungenxa yendelelo yabo nokwephula imithetho.

Kepha abafani bonke, kwabeMibhalo kunabantu abaqotho, bahaya imibiko zika Allah maphakathi nobusuku lapho bekhuleka bewa phansi ngobuso.

Bakholelwa ku Allah noSuku lokuGcina baphinde bagqugquzele ukulunga bavimbe okubi, bebe bayancintisana ekwenzeni okuhle. Labo bangabalungileyo.

Konke okuhle abakwenzayo akusoze kwaba yize, ngokuba u Allah ubazi kahle abazithobayo.

Kanti laba abangakholwa, ingcebo yabo nezingane zabo aziyikubasiza ngalutho ku Allah; futhi yibo labo abayobhadla eMlilweni, bahlale kuwo unaphakade.

Lokho abanikele ngakho lapha emhlabeni, kufaniswa nezitshalo zabantu abazihlukumeze bona uqobo ezicekelwe phansi isivunguvungu esinamakhaza anzima. Belu u Allah akabahlukumezanga, kepha ibona uqobo abazihlukumezile[1]. ——— [1] Ingxenye yemibandela ka Allah ukuze amukele isenzo esihle, ukuthi umenzi wesenzo leso akholelwe ku Allah ngendlela efanele nakuSithunywa Sakhe sokugcina ngokuphelele. Ngakhoke uma umenzi akasilona ikholwa langempela izenzo zakhe ezinhle emhlabeni aziyukumzuzela lutho kweLizayo. Ngalokho u Allah akamonanga ngalutho kepha kuyena ozonile ngokukhetha impambuko.

Nina enikholwayo! Ningabi nabangani kulabo abangekho ngakini, ngokuba bayazikhandla ekuniletheni okubi futhi banifisela ubunzima. Ubutha babo sebuvelile ngemilomo yabo kanti okufihlwe yizifuba zabo kubi kakhulu. Sinicacisele imibiko uma nje niqondisisa.

Belu yini kanye laba niyabathanda kepha bona abanithandi nibe nikholelwa eNcwadini[1] yonke. Kuthi lapho benani bathi: “Siyakholwa” kepha uma sebebodwa, bathukuthele bazilume iminwe ngenxa yenu. Yithi: “Yifani ngentukuthelo yenu!”; u Allah ukwazi kahle okusezifubeni. ——— [1] Labo abangakholwa inzondo yabo ebhekiswe kwabakholwayo ayinciphanga yize bazi ukuthi abakholwayo bakholelwa kuyo yonke iMibhalo evela ku Allah.

Uma okuhle kunenzekela, kubaphatha kabi, kepha uma nehlelwa okubi bayathokoza ngakho. Ngakhoke uma nibekezela futhi nithobele u Allah, uzunge lwabo alusoze lwanithinta nakancane; ngokuba u Allah ukuhaqe konke abakwenzayo.

Khumbula mhla uphuma emzini wakho uyokhombisa abakholwayo izizinza zabo empini[1]; u Allah Uzwa konke Wazi konke. ——— [1] Lena kwakuyimpi yesibili enkulu e-uHudi, phakathi kwamaMusilimu nabangakholwa baseMakha, ababehlome beyizingovolo ukuze baziphindiselele ukunqotshwa kwabo empini yaseBadari.

Lapho amabutho amabili kini efuna ukubaleka, u Allah waba uMhlengi wabo; labo abakholwayo mabathembele ku Allah.

Bheka ngoba u Allah wanisiza empini yaseBadari[1] nibe naniyincosana; ngakhoke thobelani u Allah ukuze nikhombise ukubonga. ——— [1] Lena kwakuyimpi yokuqala enkulu phakathi kwama Musilimu nabangakholwa baseMakha. Kwaba ewumnqamula juqu, bheka ngoba amabutho amaMusilimu ayenga-314, kuthi amabutho abangakholwa wona evile enkulungwaneni (1000).

Khumbula lapho uthi kwabakholwayo: “Angeke kwanela, ukuba Inkosi yenu inandisele ngebutho leZingelosi ezivela phezulu eziyizinkulungwane ezintathu na?”

Nakanjani! Umake nibekezela futhi nithobele u Allah – beze kini begijima; iNkosi yenu izonandelisa ngebutho leZingelosi ezinophawu eziyizinkulu-ngwane ezinhlanu.

U Allah ukwenze lokho ukuba kube yizindaba ezinhle kini nanokuba izinhliziyo zenu zithokoze ngakho; kanti usizo luvela kuphela ku Allah uSomandla Okhaliphile.

Konke lokhu ukuze aqothe abanye balabo abangakholwa noma abahlazise babuyele emuva bedicelelekile.

Ayikho into ongayenza uma u Allah ebathethelela noma ebajezisa, belu baphambukile.

Konke okusemazulwini nasemhlabeni kungokuka Allah; uthethelela lowo amthandayo, ajezise lowo amthandayo; u Allah Uyathethelela Unomusa.

Nina enikholwayo! Ningadli inzalo ngokuphinda phindiwe, futhi nesabe u Allah ukuze niphumelele.

Nesabe uMlilo olungiselwe labo abangakholwa.

Nilalele u Allah neSithunywa Sakhe ukuze nibusiswe.

Futhi niphuthumele entethelweni yeNkosi yenu kanye neJana, ubanzi bayo bungangamazulu nomhlaba, ilungiselwe abamthobelayo u Allah.

Labo abananelana enaleni nasebunzimeni futhi bazithibe lapho bethukuthele, baxolele abantu; u Allah uyabathanda abenzi bokuhle.

Nalabo uma benze ichilo noma benze lokho okubalulazayo; bakhumbule u Allah, bese becela intethelelo yezimpambuko zabo; - akekho othethelela izimpambuko ngaphandle kuka Allah - futhi bengaphindeli kulokho abakwenzile ngabomu.

Laboke umvuzo wabo kuyoba intethelelo yeNkosi yabo nezivande okugobhoza ngaphansi kwazo imifula, bahlale kuzo unaphakade; waze wamuhle umvuzo wabazikhandlayo.

Kantike sezadlula izibonelo phambi kwenu; ngakoke, zulani emhlabeni nibone ukuthi saba njani isiphetho salabo abaphika iqiniso.

Lokhu kuyincaciselo kubantu nenkanyiselo nenkuthazo kwabamthobelayo u Allah.

Ningapheli amandla futhi ningabi lusizi, ngokuba kuyogcina nina uma nje ningabakholwayo.

Uma nilamala noma nifa, kanjalo nabanye abantu bathola okufanayo; lezo phela izinsuku u Allah aziguquguqukisa phakathi kwabantu, ukuze uAllah aveze labo abakholwayo futhi aqoke kini amaShuhhada[1]; u Allah akabathandi labo abaphambukayo. ——— [1] Amaqhawe afela empini.

U Allah ufuna ukuvivinya labo abakholwayo, ashabalalise labo abangamaphixiphixi.

Ingabe nicabanga ukuthi niyongena eJana ebe u Allah engakabavivinyi labo abazi-khandlayo kini nalabo ababekezelayo na?.

Kadeni nanikulangezelela ukufa ngaphambi kokuba nihlangabezane nakho; nakubona nqo, nibhekile.

UMuhamadi wayekade eyiSithunywa nje kuphela, kanti futhi kuneZithunywa ezimendulelayo. Ingabe uma esekhotheme noma ebulewe niya-kuphindela emuva na? Lowo oyobuyela emuva, akasoze alimaza u Allah ngalutho; u Allah uyoklomelisa ababongayo.

Akekho umuntu ofayo ngaphandle kwentando ka Allah ngesikhathi esiqunyiwe. Lowo ofuna inzuzo yomhlaba Sizomnika[1] kuyo nalowo ofuna inzuzo yakweLizayo Sizomnika kuyo futhi Siyobaklomelisa ababongayo. ——— [1] U Allah lapha usebenzise ubuningi bobukhosi obukhombisa ubukhulu bakhe, hhayi inani.

Kukaningi iSithunywa siya empini nebutho elikhulu; abaphendukanga amavaka ngenxa yabebebhekene nakho endleleni ka Allah futhi abaphelanga amandla kanti futhi abavumanga ukunqotshwa; u Allah uyabathanda ababekezelayo.

Ababekusho nje kuphela ukuthi: “Nkosi yethu sithethelele izimpambuko zethu nokunhlanhlatha kwethu futhi usuqinise usisize kubantu abangakholwa”.

U Allah wabe esebapha umvuzo wasemhlabeni kanye nongcono wakweLizayo; u Allah uyabathanda abenzi bokuhle.

Nina enikholwayo! Uma nike nalalela labo abangakholwa bayonibuyisela emuva, nibe ngabalahlekelwe.

Kepha u Allah unguMhlengi wenu futhi unguMsizi ongcono.

Sizofaka ukwesaba ezinhlizweni zalabo abangakholwa ngenxa yokubhanqa kwabo u Allah ngaphandle kobufakazi abembulele; indawo yabo uMlilo, yaze yayimbi indawo yabaphambukile.

Ngempela u Allah wasigcina isethembiso Sakhe ngenkathi lapho nibaqotha ngemvumo yaKhe, kwaba yinina enahluleka naphikisa nodwa nangalalela, emuva kokunibonisa lokhu enikuthandayo; kunalabo kini abathanda izinto zomhlaba kanti abanye balangazelele eLizayo[1]. Wanisusa kubo ukuze anivivinye; nembala wanithethelela, ngokuba u Allah unomusa kulabo abakholwayo. ——— [1] Kungesikhathi sempi yase Uhud.

Nathi lapho nibaleka ninganendaba namuntu, neSithunywa sinimemeza emuva kwenu, wanithela ngosizi phezu kosizi ukuze ningakhathazeki ngalokho okuniphunyukile noma lokho okunehlele; u Allah ukwazi konke enikwenzayo.

Wase esenehlisela emuva kosizi ukuthula okuzelisayo okwengamela abathile benu, abanye bebezicabangela bona kuphela bendlinzela u Allah ngokungelona iqiniso imidlinzo yobuwula; bethi: “kukhona yini esingakwenza na?”. Yithi: “yonke into iphethwe ngu Allah”; bafihle ezinhlizweni zabo lokho abangeke bakuvezela kona, bathi: “ukube nje bekuya ngathi ngabe asizange sifele la”. Yithi: “noma ngabe benisezindlini zenu, labo ababekelwe ukufa bebezophuma baye lapho abawele khona. Ngokuba u Allah ufuna ukuvivinya lokhu okusezifubeni zenu futhi ahlanze lokhu okusezinhlizweni zenu, bheka ngoba u Allah ukwazi kahle okuqukethwe izifuba.

Labo benu ababaleka ngosuku kutholane phezulu khona amaqembu amabili, balingwa nguShayitani ngenxa yokunye kwalokho abakwenza; kepha u Allah ubaxolele ngokuba u Allah Uyathethelela Unobubele.

Nina enikholwayo ningabi njengalabo abangakholwa, labo okuthi uma abanewabo bethatha uhambo noma beya empini bathi kubo: “ukube nje bebe nathi ngabe abafanga noma babulawe”; u Allah ukwenze lokho kwaba usizi ezinhlizweni zabo. Bheka ngoba u Allah nguYena onika impilo noletha ukufa futhi u Allah Ukubheke konke abakwenzayo.

Uma nibulewe endleni ka Allah noma nife, nizothola intethelelo ka Allah nomusa ongcono kunalokho eniphembayo.

Uma nifa noma nibulawa niyobuyela ku Allah.

Ngenxa yomusa ka Allah ube nesineke nabo; ukube ubunonya nenhliziyo elikhuni bebezobaleka eduze nawe; ngakhoke baxolele ubacelele intethelelo futhi ubonisane nabo ngezinto, uma usuthathe isinqumo thembela ku Allah, ngokuba u Allah uyabathanda abathembela kuYe.

Uma u Allah enisiza akekho oyoninqoba, kepha uma enilahla ubani oyonisiza ngaphandle kwaKhe; labo abakholwayo mabathembele ku Allah.

Isithunywa asisoze sakhwabanisa; loyo okhwabanisayo uyofika nalokho akukwabanisa ngoSuku lokwaHlulela; lapho wonke umuntu uyozuziswa ngakho konke akwenzile futhi abasoze baqilwa.

Ingabe uyefana na, lowo olandela intando ka Allah nalowo ozilethela ulaka luka Allah nesizinda sakhe kuyokuba iJahanamu, saze sasibi isiphetho.

Bayizigaba ku Allah, futhi u Allah ukubona konke abakwenzayo.

Wababusisa u Allah abakholwayo mhla ethumela kubo iSithunywa esidabuka kubo, sibafundela imibiko Yakhe, sibahlambulula futhi sibafundisa iNcwadi neHikima nakuba phambi kwalokho babe sekudukeni okucacile.

Kuthe lapho nehlelwa umshophi[1], nibe nani kade nenza okufanayo ngokuphindwe kabili; nathi: “kwenzeke kanjani na?” yithi: “Kungenxa yenu”; u Allah unamandla okwenza yonke into. ——— [1] Empini yase Uhudi amaMuslimu alahlakelwa amabutho anga-70 awa empini. Phambili empini yaseBadari amaMusilimu ahaqa inani eliphindiwe, bawisa amabutho esitha anga-70 bathwala iziboshwa zempi ezi-70.

Lokho okwanehlela ngosuku kutholane phezulu khona amaqembu amabili, kwakungemvumo ka Allah nokuthi Azi abakholwayo.

Futhi ukuze Azi abazenzisi; okwathiwa kubona: “wozani nilwe endleleni ka Allah noma nivikele” Bathi: “Ngabe sihamba nani ukube nje besikwazi ukulwa.” Ngalolo suku basondelene nokungakholwa ukudlula ukusondelana kwabo nokukholwa. Bakhuluma ngemilomo yabo lokho okungekho ezinhlizweni zabo, futhi u Allah Ukwazi kahle abakufihlile.

Labo abathi behleli kubanewabo: “ukube basilalela, ngabe abazange babulawe”. Yithi: “Zivikelenike ekufeni uma ngempela niqinisile.”

Ungacabangi ukuthi labo ababulawe endleleni ka Allah bafile; empeleni bayaphila eNkosini yabo bayondliwa.

Bayathokoza ngalokho u Allah abaphe kona ngomusa Wakhe futhi bayothokozela labo ababashiye bephila ngemuva ukuthi abayikuba nokwesaba noma usizi.

Bayothokozela izibusiso zika Allah nomusa nanokuthi u Allah akawucekeli phansi umvuzo wabakholwayo.

Labo abathobele u Allah neSithunywa nakuba benamanxeba[1]; labo kubo abenza okuhle futhi bazithobe bayothola umvuzo omkhulu. ——— [1] Emva kwempi yase uHudi amaMusilimu yize ayelimele, alandela izithende zezitha bezixosha nokuqinisekisa ukuthi zibuyele emuva azibuyi ukuzogasela.

Labo, uma abantu bethi kubo: “Ngempela abantu banihlangenyele, ngakhoke besabeni” kepha banda ngokholo, bathi: “u Allah usenele thina futhi unguMhlengi ongcono.

Bazizuzela izibusiso zika Allah nomusa, abehlelwangwa okubi balandela intando ka Allah, futhi u Allah unomusa omkhulu.

Lokho nje bekunguShayitani esabisa abangane bakhe, ngakhoke ningabesabi nesabe Mina uma ngempela ningabakholwayo.

Bangakukhathazi labo abagxile ekuphikeni ukholo ngokuba abasoze bamenzakalisa u Allah; u Allah ufuna ukungabaniki sabelo kweLizayo futhi bayothola isijeziso esinzima.

Ngempela labo abakhetha ukungakholwa kunokukholwa abasoze bamenza lutho u Allah futhi bayothola isijeziso esibuhlungu.

Futhi labo abangakholwa mabangacabangi ukuthi ukuba yeka Kwethu kuyinto enhle kubo; empeleni Siyabayeka ukuze zande izimpambuko zabo futhi bayothola isijeziso esihlazayo.

U Allah angeke ayekele abakholwayo bekulesi simo enikuso kuze kube Uveza lowo ongcolile komsulwa; futhi u Allah angeke anitshengisa okunabonwa, kunalokho uqoka amthandayo kuZithunywa zaKhe. Ngakhoke kholwani ku Allah neZithunywa zaKhe; uma nikholwa futhi nizithoba niyothola umvuzo omkhulu.

Labo abancishana ngalokho u Allah abaphe kona ngomusa waKhe mabangacangi ukuthi kuyinto enhle kubo, empeleni kuyinto embi kubo, bheka ngoba bayogaxwa ngalokho abancishana nagakho ngoSuku lokwaHlulela. Ifa lamazulu nomhlaba lingelika Allah futhi u Allah ukwazi konke enikwenzayo.

U Allah uyizwile inkulumo yalabo abathi: “ u Allah uyisichaka kanti thina ziyizinjinga!” Sizokuqopha lokho abakushoyo nokubulala kwabo iZithunywa ngokungemthetho bese Sithi: “Yizwani isijeziso soMlilo!”

Lokho ngungenxa yezenzo zenu, belu u Allah akasiye umcindezeli encekwini.

Labo abathi: “u Allah wasithembisa ukuthi singakholwa iSithunywa singakasiletheli umhlatshelo odliwa umlilo”. Yithi: “Zafika kini iZithunywa phambi kwami nezibonakaliso kanye nalokhu enikushoyo, kunganike nazibulala uma nineqiniso na?”

Uma bengakukholwa, neZithunywa phambi kwakho abazikholwanga nakuba zafika nezibonakaliso neMibhalo neNcwadi ecacisayo.

Wonke umphefumulo uyokuzwa ukufa; nakanjani niyoklonyeliswa imivuzo yenu ngoSuku lokwaHlulela. Lowo oyosindiswa eMlilweni angeniswe eJana uyoba ophumelele, kanti impilo yomhlaba iyinjabulo yenkohliso.

Nizolingwa ngengcebo yenu nangani uqobo, futhi nizozwa amagama amabi kulabo abanikwa iMibhalo ngaphambi kwenu nakulabo abakhonza izithixo. Kepha uma nibekezela nithobele u Allah, ngokuba lokho kungokunye kwezinto ezigcizelelwe.

Khumbula futhi mhla u Allah enza isibophezelo nalabo abanikwa iMibhalo (Wathi): “Nizoyicacisela abantu futhi ningayigodli!” Kepha basishaya indiva basithengisa ngenani eliyize, kwaze kwakubi abakuhwebayo[1]. ——— [1] Abefundisi bamaJuda namaNasirini babephula imithetho yeMibhalo (iTora ne Ininjili) bayihle ukujabulisa labo abakhokhelayo.

Ungacabangi ukuthi bayosinda esijezisweni labo abajabulela lokho abaphiwe kona bathande nokunconywa ngalokho abangakwenzanga, bayothola isijeziso esibuhlungu.

Ubukhosi bamazulu nomhlaba bungobuka Allah, futhi u Allah unamandla phezu kwezinto zonke.

Ngempela, ekudalweni kwamazulu nomhlaba nasekudedelaneni kobusuku nemini kunezibonakaliso kulabo abakhaliphile.

Labo abakhumbula u Allah bemile behleli noma becambalele ngohlangothi baphinde bajule ekudalweni kwamazulu nomhlaba (bathi): “Nkosi yethu awukudalanga lokhu ngeze, mawungcweliswe, sihlenge esijezisweni soMlilo.

“Ngokuba Nkosi yethu, lowo oyomufaka eMlilweni uyobe umhlaze okwangempela futhi akekho oyosiza abaphambukileyo.”

“Nkosi yethu, ngempela sizwe isimemezi simemela kukholo, sithi, ‘kholwani eNkosini yenu’, sakholwa. Nkosi yethu, ngakhoke sixolele izimpambuko zethu usithethelele amacala ethu usithathe kanye nalabo abalungileyo.”

Nkosi yethu, usiphe lokho owasithembisa kona eZithunyweni zaKho futhi ungasihlazi ngoSuku lokwaHlulelwa, ngokuba Wena awusephuli isethembiso.

Yabaphendula iNkosi yabo (yathi): Mina angicikeli phansi izenzo zanoma ngubani kini, kungaba indoda noma umfazi, niyefana nje; kuthi labo abenza iHijira bakhishwa emizini yabo baphinde bathwala kanzima endleleni Yami balwa babulawa, Ngizobathethelela izimpambuko zabo bese Ngibafaka ezivandeni okugeleza ngaphansi kwazo imifula; umvuzo ovela ku Allah, bheka ngoba u Allah unomvuzo ongunqa phambili.

Ukwehla nokwenyuka kwalabo abangakholwa ezindaweni makungakukhathazi.

Ukujabula okuncane nje, kepha bayophelela eJahanamu, laze lalibi icansi.

Kepha labo abathobela iNkosi yabo, bayothola izivande okugeleza ngaphansi kwazo imifula bahlale kuzo unaphakade, isizinzo esivela ku Allah futhi lokho okuku Allah yikona okungcono kubalungileyo.

Kulabo abanikwa iMibhalo, kunalabo abakholwa ku Allah nakulokho okwembulelwa kini nokwembulelwa kubo ngokumesaba u Allah, abathengisi imibiko yaka Allah ngenani eliyize. Laboke bayothola imivuzo yabo eNkosini yabo; u Allah uyashesha lapho ehlulela.

Nina Enikholwayo! Bekezelani nizimelele, nizimisele futhi nizithobe ku Allah ukuze niphumelele.

Sintu! Thobelani iNkosi yenu okuyiyona eyanidala ngomuntu oyedwa. Wadala ngaye umkakhe wabe esesabalalisa ngabo bobabili isilisa nesifazane; thobelani u Allah lona enibuzana ngaYe niqikelele ubuhlobo nozalo, bheka ngoba u Allah uhlezi eniqaphile.

Nikani izintandane umcebo wazo futhi ningaphambanisi omuhle ngomubi, futhi ningagwinyeli umcebo wabo kowenu, ngokuba lokho kuyichilo elikhulu.

Uma nesaba ukungenzi ubulungiswa ngezintandane, shadani noma ubani owesimame enivunyelwe ukubashada; ababili, abathathu kuya kubane. Kepha uma nesaba ukungenzi ubulungiswa, shadani oyedwa noma amabibi; yikhona lokho okungcono ekutheni ningaphambuki.

Ninikeze abafazi amalobolo abo ngokomthetho. Kepha uma benipha kuwo okuthile ngentando yabo, dlanini ngokukhululeka nangokunethezeka.

Futhi ninganiki iziwula[1] umcebo wazo, lona u Allah owenza waba isisekelo kini; kepha nibondle futhi nibagqokise kuwo, nikhulume kahle nazo. ——— [1] Lana ‘Isiwula’ sisho umuntu ongenalo ikhono elihle lophatha noma elokusebenzisa nokonga umcebo ngendlela enenzuzo.

Zivivinyeni izintandane kuze kube zifika esigabeni sokushada. Uma nibona ukukhalipha kuzo, zinikeni umcebo wazo, futhi ningawudli ngokuwuxhaphaza nokuwuqeda masinyane zingakakhuli. Ngakhoke lowo ocebile makazithibe kuthi lowo ophuyile adle ngokufanele. Akuthi lapho senibanikeza umcebo wabo nibe nofakazi. U Allah wanele njengoMehluleli.

Abesilisa banesabelo kulokho okushiywe abazali noma izihlobo, kanti nabesimame banesabelo kulokho okushiywe abazali noma izihlobo, noma kungaba idlanzane noma inala. Isabelo esibekiwe.

Uma izihlobo nezintandane nezichaka zikhona lapho kuhlukaniswa ifa, bapheni kulo nikhulume kahle nabo.

Labo abazoshiya emuva kwabo izingane ezibuthaka abazisabelayo; mabathobele u Allah futhi bakhulume iqiniso.

Labo ababhubhudla umcebo wezintandane ngokungemthetho, bazidlela umlilo eziswini zabo futhi bayongena eMlilweni.

U Allah uyaniyala ngezingane zenu; owesilisa uthola isabelo esiphindwe kabili kunowesifazane. Uma kungabesifazane (bodwa) abendlulele kwababili bazothola izigamu ezimbili kwezintathu, kepha uma eyedwa owesimame uzothola isigamu esisodwa kwezimbili. Abazali bakhe (umufi) ngamunye bazothola isigamu esisodwa kweziyisithupha kulokho akushiyile uma enezingane. Uma engenazo izingane ifa lakhe lasa kubazali bakhe, unina uthola isigamu esisodwa kwezintathu. Kepha uma enabanewabo, unina uthola isigamu esisodwa kweziyisithupha. Emuva kwesabelofa ayalele ngaso (umufi) noma isikweletu. Abazali benu nezingane zenu anazi ukuthi ubani owusizo kakhulu kini. Isibophezelo esivela ku Allah. Ngempela u Allah Wazi konke Ukhaliphile.

Nina nizothola isigamu esisodwa kwezimbili kokushiwe amakhosikazi enu uma engenazo izingane; uma enezingane nizothola isigamu esisodwa kwezine kwabakushiyile, emuva kwesabelofa ayalele ngaso noma isikweletu. Kuthi wona (amakhosikazi enu) azothola isigamu esisodwa kwezine kwenikushiyile uma ningenazingane; uma ninezingane azothola isigamu esisodwa kwenikushiyile, emuva kwesabelofa eniyalele ngaso noma isikweletu. Uma owesilisa noma owesifazane eshiya ifa ebe engenabazali noma izingane kepha enomnewabo noba udadewabo, umuntu ngamunye kubo bobabili uzothola isigamu esisodwa kweziyisithupha; umake bengaphezu kwalokho bazocezulelana isigamu esisodwa kwezintathu. Emuva kwesabelofa okuyalelwe ngaso noma isikweletu. Umyalelo ovela ku Allah. U Allah Wazi konke Unesihawu.

Leyoke imithetho ka Allah; lowo olalela u Allah neSithunywa saKhe, uyomfaka ezivandeni okugeleza ngaphansi kwazo imifula bahlale kuzo unaphakade. Iyonake leyo impumelelo enkulu.

Lowo ongalaleli u Allah neSithunywa saKhe aphule nemithetho yaKhe, uyomufaka eMlilweni abhadle kuwo unaphakade futhi uyothola isijeziso esihlazayo.

Lowo ophingayo kubafazi benu, tholani kini abane abangafakazisa ngabo kulokho. Uma befakaza, bagwebeni ezindlini baze baficwe ukufa noma u Allah abenzele ndlela thize.

Labo ababili [umfazi nendoda abangashadile] kini abaphingayo bajeziseni. Kepha uma bezisola benze ukulunga bayekeleni, ngokuba u Allah Uyathethelela Unesihawu.

Intethelelo ka Allah ikulabo abenza okubi ngokungazi kepha bazisole masinyane; yiboke labo u Allah abathethelelayo, futhi u Allah Wazi konke Ukhaliphile.

Abayikuyithola intethelelo labo abenza ukuphambuka, omunye wabo aze aficwe ukufa, athi: “Ngiyazisola manje!” kanye nalabo abashona bengakholwa. Yiboke labo Esibalungiselele isijeziso esinzima.

Nina enikholwayo anivunyelwe ukuthatha abafazi njengefa ngenkani noma ukubavimbela ukuhamba nokunye kwalokhu enibanike kona, ngaphandle uma benze amanyala asobala. Niphilisane nabo kahle; uma ningabathatndi, kungenzeka ukuba ningayithandi into kepha ayifake izibusiso eziningi.

Uma nifuna ukuthatha omunye umfazi esikhundleni somunye, nibe kade ninike omunye wabo izindodla [zamalobolo]; ningalokothi nithathe utho kuzo; ingabe nikuthatha ngokungemthetho nangempa- mbuko esobala na?

Futhi nizithatha kanjani, nibe kade nisondelene futhi bathatha isibophezelo esiqinile kini.

Ningashadi abafazi ababeshade noyihlo, ngaphandle kwalokho okwendlula; ngokuba kuyichilo namanyala nento embi.

Ninqatshelwe [ukushada] onyoko namadodakazi enu nodadewenu nobabekazi benu nodadewabo bonyoko namadodakazi abafoweni namadodakazi odadewenu nonyoko abanincelisa nodadewenu enancela nabo nomamezala benu namadodakazi abafazi benu enendlale nabo – kepha uma ningendlalanga nabo aninacala – nababafazi bamadodana enu azalwa yinina nokubhanqa izelamani, ngaphandle kwalokho okwendlula. Nebala u Allah Uyathethelela Unesihawu.

Futhi ninqatshelwe ukushada abafazi abaganile ngaphandleke kwezigqila ezingamabibi enu. Nivunyelwe ukushada abanye ngomcebo wenu nokuzyithiba nokungaphingi. Labo eningcebeleke nabo, banikeni ilobolo laboelibekiwe; akunankingake kulokho enivumelana ngakho emuva kwelobolo. U Allah Wazi konke Ukhaliphile.

Lowo ongenawo amandla okushada abafazi abakholwayo abakhululekile, bangashada izigqila zamantombazane ezingaphansi kwenu ezikholwayo; u Allah Owazi kangcono ngokholo lwenu; niyimbumba. Ngakhoke washadeni ngemvumo yemindeni yawo futhi niwanike amalobo azo ngokomthetho; azithibe angaphingi futhi angabi nawo amashende. Uma eseganile, wabe esenza ichilo, uyokujeziswa ngesigamu salokho okujeziswa abafazi abakhululekile abaganile. Lokho okwalowo kini owesaba ubunzima; kepha ukuba nibekezele yikona okungcono; futhi u Allah Ungumthetheleli Onesihawu.

U Allah ufuna ukunicacisela nokunitshengisa izinkambo zalabo abanandulelayo futhi anithethelele, ngokuba u Allah Wazi konke Ukhaliphile.

Belu u Allah ufuna ukunithethelela, kanti laba abalandela izinkanuko bafuna ukuba niphambuke impambuko enkulu.

U Allah ufuna ukunenzela lula; bheka ngoba ubuntu wadalwa ebuthaka.

Nina enikholwayo! Ningadli umcebo wenu phakathi kwenu ngokungemthetho. Ngaphandleke uma kuwuhwebo ngokuvumelana. Futhi ningabulalani, ngokuba u Allah Unesihe kini.

Kepha ozokwenza lokho ngokungalaleli nangobuhlongandlebe, siyomfaka eMlilweni; futhi lokho kuyinto elula ku Allah.

Uma nizithiba ezimpambukweni ezinkulu eninqatshelwe zona; Sizonithethelela izimpambuko zenu siphinde Sinifake Endaweni Ehloniphekile [iJana].

Ningabolangazelele lokho u Allah abusise abanye benu ngakho kwabanye. Ngokuba amadoda anesabelo kulokho akuzuzile, kanjalo nabafazi banesabelo kulokho abakuzuzile. Nebala u Allah unolwazi ngayo yonke into.

Wonke umuntu simenzele izindlalifa kulokho okushiywa abazali nezihlobo. Laboke enibathembisile, bapheni isabelo sabo. Nebala u Allah Ungufakazi kuyo yonke into.

Amadoda angabanakekeli babafazi ngalokho u Allah aqoke ngakho abanye phezu kwabanye nangalokho abakuchithayo emcebeni wabo. Labo bafazi abaqotho abahloniphayo abanakekela izinto lapho [indoda] ingekho, ngendlela ka Allah, [baphatheni kahle]. Kanti labo enexwaya ukushinga kwabo, belulekeni nibadube ekundlaleni noma nibashaye[1]. Kepha uma benihlonipha ningabasuseli uchuku. U Allah uhlezi Ephezulu Emkhulu. ——— [1] Ukushaya umfazi akusho ukumgandaya nokubhokloza, kepha ukumthintathinta emzimbeni angasali nesibazi. Kantike akuvumelekanga ukubeka umuntu isandla ebusweni nangoba ubani, ngisho izingane imbala.

Uma nesaba ukwehlukana phakathi kwabo [abashadile], thumelani umeluleki wakwabo ndoda nomeluleki wakwabo mfazi; uma befuna [abaluleki] ubuyiswano [phakathi kwabashadile] u Allah uzobapha amandla. Nebala u Allah Wazi konke Uqaphe konke.

Khonzani u Allah ningamubhanqi nalutho; futhi niphathe abazali ngesihle, nezihlobo, nezintandane, nabachakile, nomakhelwane oseduze, nomakhelwane obuqama, nalowo oba seduze[1], nomhambi kanye nalabo abasezandleni zenu [izigqila]. Ngokuba u Allah akamthandi lowo ozigqajayo nochomayo. ——— [1] Yilowo osendelana nawe ngandlela thize; kungaba umngani noma umfazi noma ozakweni emsebenzini noma ohambeni, njalonjalo.

Labo abancintshanayo futhi bagqugquzele abantu ngokuncintshana baphinde bafihle lokho u Allah abaphe kona[1] ngomusa waKhe. Silungisele labo abangakholwa isijeziso esihlazayo. ——— [1] Bazifihla izibusiso zika Allah ngokuphika ukuthi u Allah obaphe zona. Kunalokho bazindondonya isifuba lapho beqosha ukuthi ukuhlakanipha kwabo okubalethe lokho abanakho.

Nalabo abanikela ngomcebo wabo ukuzibonakalisa ebantwini futhi bengakholwa ku Allah nasoSukwini lokuGcina. Kantike lowo omngani wakhe nguShayitani, waze wamubi umngani.

Bavinjwe yini ukuba bakholwe ku Allah nasoSukwini lokuGcina banikele kulokho u Allah ababele kona. Futhi u Allah Wazi konke ngabo.

U Allah akaqili ngisho uhlamvu oluncane, uma kuyisenzo sihle Uyasiphindaphinda Aphe umvuzo omkhulu ovela kuYe.

Kuyobanjani mhla Siletha ufakazi kuzo zonke izizwe na? Silethe wena njengofakazi ngalaba.

Ngalolosuku labo abangakholwa futhi bangalalelanga iSithunywa, bayofisa engathi umhlaba ungabagwinya futhi ayikho inkulumo abazoyifihlela u Allah.

Nina enikholwayo! Ningasondeli kuSwala nidakiwe kuze kube niyakwazi enikukhulumayo noma uma nikusimo seJanaba – ngaphandle kwaloyo ongumhambi – kuze kube niyageza. Kepha uma nigula noma nisohambeni noma omunye wenu ebuya ukuyozikhulula noma benikade nilele nabafazi, nangatholi amanzi; yenzani iTayamumu ngothuli oluhlanzekile, nisule ubuso nezandla zenu; impela u-Allah Uyaxolela Uyathethelela.

Awubabonanga na, ukuthi labo abanikwa isabelo seNcwadi baqoka ukuphambuka futhi balangazelela ukuthi nani niphambuke endleleni eqondile.

U Allah Uzazi kahle izitha zenu; futhi u Allah wenele njengoMvikeli futhi wenele njengoMhlengi.

Kulabo abangamaJuda kunalabo abahlanakezela incazelo yamazwi kekushoyo, futhi bathi: “Siyezwa futhi asilalele, ulalele ungalalelwa futhi usinake!” bephendula ulimi lwabo futhi begxeka inkolo. Ukube nje bathi: “siyezwa futhi silalele, ulalele futhi usiphe isikhathi” bekuyobangcono kubo futhi kube qotho; kepha u Allah ubaqalekisile ngenxa yokungakholwa kwabo, ngakhoke bayidlanzana abakholwayo.

Nina enanikwa iMibhalo! Kholwani kulokho Esikwembulele kufakazisa lokho eninakho, ngaphambi kokuba sinisuse ubuso sibubhekise emuva noma sibaqalekise njengoba saqalekisa labo beSabatha. Umyalelo ka Allah nakanjani uyenzeka.

Ngempela u Allah akakuthetheleli ukuba abhanqwe notho, kepha ngale kwalokho uthethelela noma yini. Lowo obhanqa u Allah, nebala wenze ichilo elikhulu.

Awubabonga na, labo abazitusayo; empeleni u Allah otusa amthandayo futhi abayikuqilwa ngisho insila imbala.

Bheka nje ukuthi bamqambela kanjani amanga u Allah; kwenele ukuba impambuko esobala.

Awubabonanga na, labo abanikwa isabelo seNcwadi, bakholwa kulokho okukhonzwa ngaphandle kuka Allah, kuthi kulabo abangakholwa bathi: “Laba basendleleni eqondile ukundlula labo abakholwayo.”

Yiboke labo u Allah abaqalekisile; kanti lowo oqalekiswe ngu Allah awusoze wamtholela umsizi.

Kumbe banesabelo ebukhosini; bebengeke baphe muntu ngisho indumba.

Kumbe badlela abantu umona kulokho u Allah abaphe kona ngomusa waKhe. Nebala, Sanika Uzalo luka Ibhirahimu iNcwadi neHikima [izinkambiso zokugcina imiyalelo ka Allah], Sabanika ubukhosi obukhulu[1]. ——— [1] U Allah walubusisa kakhulu uzalo luka Ibhirahimu, iZithunywa eziningi ezathunyelwa kumaJuda ziwuzalo lwakhe kanti neSithunywa esathunyelwa kusintu sonkana uMuhamadi siwuzalo lwakhe. Amakhosi aqavile anjengo Dawudi nendodana yakhe uSulayimani, banguzalo luka Ibhirahimu. Yingakho wazeduma ngelokuthi unguBaba weZithunywa.

Kunalabo kubo [kumaJuda] abakholwakuye [uMuhamadi] kanti futhi kunalabo abaxwayisa ngaye; uMlilo weJahanamu wanele.

Labo abangakholwa kwimibiko Yethu Sizobafaka eMlilweni, kuyothi njalo lapho izikhumba zabo sezivuthiwe, Sibahlinzeke ngezinye ukuze basizwe isijeziso. Nebala u Allah unguSomandla Okhaliphile.

Labo abakholwayo benze nokuhle, bona Sizobangenisa eZivandeni okugeleza ngaphansi kwazo imifula, bahlale khona unaphakade. Bayothola kuzo abafazi abamsulwa futhi Sizobafaka emthunzini obanzi.

U Allah uniyalela ukuba nibuyisele izimfanelo kunonina, futhi lapho nahlulela phakathi kwabantu nehlulele ngobulungiswa; kwaze kwakuhle lokho u Allah aniyalela kona; nebala u Allah Ungozwa konke Obona konke.

Nina enikholwayo! Lalelani u Allah nilalele neSithunywa nalabo benu abaphethe; uma niphikisana ngokuthize kwethuleni ku Allah neSithunywa uma nikholwa ku Allah noSuku lokuGcina; yikona lokho okungcono nesiphetho esingcono.

Awubabonanga labo abaqhakambisa ukuthi bakholwa kulokho okwembulelwe kuwe nalokho okwembulelwa ngaphambi kwakho, bafuna ukusebenzisa umthetho woTwakuti [okuhlonishwa ukwendlula u Allah], nakuba beyalelwe ukuba bangakholwa kubo [oTwakuti]; futhi noShayitwani ufuna ukuba balahleke kakhulu.

Uma betshelwa ukuthi: “wozani kulokho [umthetho] u Allah akwembulele nakuSithunywa”, ubona ngamaphixiphixi eseziqhelelanisa kude nawe.

Kuyobanjani uma behlelwa umshophi ngenxa yezenzo zabo, bese beza kuwe befunga ngo Allah [bethi]: “Besingahlose lutho ngaphandle nje kokuhle neqiniso.

Labo u Allah Ukwazi kahle okusezinhlizweni zabo; ngakhoke ziqhelelanise nabo ubeluleke, ubatshele kwezikabhoqo amagama ahlabayo.

Sonke iSithunywa sisithumele ukuba silalelwe ngemvumo ka Allah. Ukube lapho bephambukile beza kuwe bacela intethelelo ku Allah neSithunywa sabacelela intethelelo, bebezofumanisa u Allah Ethethelela Enesihawu.

Qha, ngeNkosi yakho abasoze bakholwa kuze kube bakuthathe njengomehluleli kwabaphikisana ngakho phakathi kwabo, bese bengabi nankinga kulokho okunqumile bakwamukele ngokuphelele.

Ukube sabayalela [ukuthi]: “Bulalanani” noma “Phumani niphele emizini yenu” Bebengeke bakwenze lokho ngaphandle kwedlanzana kubo. Ukube nje benze lokho abayalelwe kona, bekuyobangcono kubo futhi bekuyobaqinisa kakhulu.

Futhi beSizobanika umvuzo omkhulu ovela kithi.

Siphinde Sibaholele endleleni eqondile.

Lowo olalela u Allah neSithunywa, uyokuba nalabo u Allah ababusisile, iZithunywa nabaQinisile namaQhawe empi kanye nabenzi bokuhle; kuyoba kuhle ukuba nalabo.

Lokho isibusiso esivela ku Allah futhi u Allah wanele ngokwazi konke.

Nina enikholwayo! Hlomani, nigasele ngamaviyo noma ngebutho eliphelele.

Kunalabo kini abadembeselayo; uma nehlelwa umshophi, uthi: “u Allah ungibusisile ngokungabi khona nabo”.

Kanti uma nehlelwe umusa ka Allah, kuba ngathi akukaze kube khona ukuzwana phakathi kwenu naye uma esethi: “Ngaze ngafisa ukuba benginabo bengizohlabana kakhulu”.

Labo abakhetha impilo yomhlaba kuneLizayo mabalwele u Allah; lowo olwela u Allah, bese eyabulawa noma anqobe Sizomnikeza umvuzo omkhulu.

Yini ngani ningalweli u Allah nakuba kunamadoda nabafazi nezingane ababuthaka, abathi: “Nkosi yethu sikhiphe kulendawo obantu bayo bangabahlukumezi futhi usiqokele ngokwakho umvikeli nomhlengi.

Labo abakholwayo balwela u Allah, kuthi labo abangakholwa balwele oTwakuti [labo abahlonishwa ukundlula u Allah]; ngakhoke yilwani nabangani baka Shayitani. Nebala iqhinga lika Shayitani libuthaka.

Awubabonanga na, labo okwathiwa kubo: “zibambeni ngempi, niqikelele ukwenza iSwala nikhiphe neZaka” Kwathi lapho sebebizelwe empini, uquqaba oluthile kubo lwasaba abantu okuka Allah noma ngokwendlulele; bathi: “Nkosi yethu kungani usibophezele empini, uma nje ungasihlehlisela kancane”. Yithi: “Ukuncebeleka komhlaba kuncane kanti eLizayo yilona elingcono kulabo abathobela u Allah futhi aniyukuqilwa ngisho intambo ephuma endumbini yesundu.

Kuphi nakuphi la nikhona ukufa kuyonifica ngisho noma nisezinqolobaneni ezivikeliwe. Uma benzekelwe okuhle bathi: “lokhu kuvela ku Allah” Kepha uma behlelwe umshophi bathi: “lokhu ngungenxa yakho”. Yithi: “Konke kuvela ku Allah”. Yini ngalabantu abayindi sanhlobo inkulumo.

Konke okuhle okukwehlele kuvela ku Allah, kuthi umshophi okwehlelayo ungenxa yakho. Sikuthumele njengeSithunywa kusintu; u Allah ungufakazi owanele.

Lowo olalela iSithunywa empeleni ulalela u Allah; kanti lowo oshaya indiva, aSikuthumelanga kubo njengomvikeli.

Futhi bathi: “Siyalalela” Kepha uma bephuma kuwe, uquqaba oluthile kubo ebusuku luhlanekezela okushilo. U Allah uyakuloba lokho abakukhuluma ebusuku; ngakhoke ziqhelelanise nabo uthembele ku Allah, kwanele ukuthembela ku Allah.

Ingabe abajuli yini ngeKurani, bheka ngoba ukube beyivela komunye ngaphandle kuka Allah bebezofumanisa kuyo ukuphikisana okukhulu.

Uma kufika kubo udaba olumayelana nezokuphepha noma ingozi, bavele balusakaze. Ukube balwethula kuSithunywa nalabo abaphethe kubo, bebezoliqondisisa kahle labo abaluhlaziyayo kubo. Ukube bekungewona umusa ka Allah phezu kwenu nesihe saKhe, benizolandela uShayitani ngaphandle kwedlanzana nje.

Lwela u Allah, ngeke wethweswe ngale kwakho uqobo futhi gqugquzela abakholwayo; hleze u Allah aqande ufuqufuqu lwalabo abangakholwa, futhi u Allah unamandla anzima futhi uphindisela kabuhlungu.

Lowo okhulumela omunye kokuhle uyothola naye isabelo sakho, kepha lowo okhulumela omunye kokubi uzothola naye ingcabha. Futhi u Allah unamandla phezu kwakho konke.

Uma nibingelelwa ngokubingelelwa, phendulani ngokwengeziwe noma okufanayo. Nebala yonke into u Allah uzoyipha umvuzo wayo.

U Allah, akekho omunye okumele akhonzwe ngaphandle kwaKhe; nakanjani uyonibuthanisa ngoSuku lokwaHlulelwa olungengatshwazwe; ingabe ubani okhuluma iqiniso ukudlula u Allah na?

Kungani niba ngamaqembu amabili niphikisana ngamaphixiphixi na, futhi kungu Allah obabuyisele [kukungakholwa] ngenxa yemisebenzi yabo; ingabe nifuna ukuqondisa lowo u Allah amphambukisile na; lowo u Allah amphambukisile awusoze wamtholela indlela eqondile.

Bafisa ukuba ningakholwa njengoba nabo bengakholwa ukuze nifane; ngakhoke ningabi nabangani kubo kuze bafudukela endleleni ka Allah; kepha uma benqaba, bathatheni nibabulale lapho enibathola khona, futhi ningabi nabangani kubo noma umsizi.

Ngaphandle kwalabo abakhosela esizweni okunezibopho phakathi kwenu noma abeze kini izinhliziyo zabo zenqena ukuba balwe nani noma balwe nesizwe sabo; ukube u Allah ubethanda ubezobapha amandla ngaphezu kwenu balwe nani. Uma beniyeka bengalwi nani benze uxolo; u Allah akaniphanga ilungelo kubo.

Nizothola abanye abafuna ukuphepha kini nokuphepha esizweni sabo, kuthi njalo uma bebuyise kungakholwa bavele bagxile kukho. Ngakhoke uma benganiyeki noma benze uxolo noma bazibambe ekulweni, bathatheni nibabulale lapho enibathola khona. Yiboke labo u Allah aniphe ubufakazi obuqanda ikhanda ngabo.

Akumele okholwayo abulale okholwayo ngaphandleke uma kube yiphutha. Lowo obulale okholwayo ngephutha makakhulule isigqila esikholwayo akhokhe nenhlawulo emndenini wakhe [umufi] ngaphandle uma benikela ngayo. Uma [umufi] engowasesizweni esiyisitha kini kepha yena engokholwayo, makakhulule isigqila esikholwayo; uma [umufi] engowasesizweni okunezibophezelo phakathi kwenu naso, makakhokhe inhlawulo emndenini wakhe [umufi] akhulule nesigqila esikholwayo. Lowoke ongenalutho, makazile izinyanga ezimbili zilandelana ukucela intethelelo ku Allah; u Allah Wazi konke Unobuhlakani.

Lowo obulala okholwayo ngabomu, isijeziso sakhe iJahanamu uyobhadla kuyo unaphakade futhi u Allah uyomthukuthelela amqalekise belu umlungiselele isijeziso esinzima.

Nina enikholwayo! Uma nihamba endleleni ka Allah [empini], qinisekisani; ningathi kulabo abanibingelela ngesalami, “Awuyena okholwayo” ngoba nilangazelele izinto zempilo yasemhlabeni, ngokuba u Allah unomcebo omningi. Kadeni nani beninjalo [ningakholwa] u Allah wanibusisa ngakhoke qinisekisani. Nebala u Allah Ukuqaphe konke enikwenzayo.

Abafani labo abakholwayo abasalela emuva bengenabunzima nalabo abalwela u Allah ngomcebo wabo nangeziqu zabo uqobo. Labo abalwa ngomcebo wabo nangeziqu zabo uqobo, u Allah ubabeke phezulu ngesigaba kunalabo abasalela ngemuva [ngenxa yobunzima]. Kepha bonke u Allah ubathembise iHusna [iJana]. Futhi u Allah wengezele labo abalwayo umvuzo omkhulu kunalabo abasalele emuva [ngenxa yobunzima].

Izigaba ezivela kuYe [u Allah] nentethelelo nomusa, ngokuba u Allah Uyathethelela Unesihawu.

Labo izingelosi ezibathatha umphefumulo bephambukile, zithi: “Benikuphi na?” [baphendule] bathi: “Besicindezelekile emhlabeni”, zithi: “Ubungekho banzi yini umhlaba ka Allah ukuze nifuduke kuwo na?”. Yiboke labo abayophelela eJahanamu; yaze sasibi isiphetho.

Ngaphandle kwalawo madoda nabafazi nezingane abangenawo amandla [okwenza iHijira] futhi bengayazi indlela.

Yiboke labo u Allah azobaxolela, ngokuba u Allah Uyaxolela Uyathethelela.

Lowo owenzela u Allah iHijira, uyothola indawo iningi emhlabeni nokukhululeka. Kanti lowo ophuma emzini wakhe enza iHijira ebheke ku Allah neSithunywa saKhe bese eficwa wukufa, umvuzo wakhe usukhona ku Allah, ngokuba u Allah Uyathethelela Unesihawu.

Uma nihamba emhlabeni, aninacala uma ninqamula iSwala [Kasru] uma nesaba ukuthi abangakholwa bazonihlasela. Ngokuba abangakholwa bayohlala beyizitha zenu ezisobala.

Uma [Wena Muhamadi] ukanye nabo ubahola kuSwala ingxenye yabo bayime nawe ihlome ngezikhali zabo; uma sebenze isajida mababuyele emuva kwenu, kuthi enye ingxenye ize yenze iSwala nawe baqhaphele bahlome ngezikhali zabo. Labo abangakholwa bafisa ukuthi nibeke phansi izikhali zenu nezinto zenu ukuze bagadle kube kanye. Futhi aninacala ekubekeni izikhali zenu phansi uma nixinwe yimvula noma nigula, kepha nihlale niqhaphele. Nebala u Allah ulungiselele abangakholwa isijeziso esihlazayo.

Uma seniyiphothulile iSwala, khumbulanike u Allah nimile nihlezi noma nicambalele. Uma seniphelile yenzani iSwala ngendlela, ngokuba iSwala ibophezelwe kwabakholwayo ngezikhathi ezibekiwe.

Ningabi amagwala ekulandeleni izithende zesitha, uma nisezinhlungwini nabo basezinhlungwini njengani; kepha nina nilangazelela ku Allah lokhu abangakulangazeleli.

Nebala sambulele kuwe [Muhamadi] iNcwadi ngeqiniso ukuze wehlulele phakathi kwabantu ngalokho okukhombiswe ngu Allah; ngakhoke ungabi ummeli wabakhohlisi.

Ucele intethelo ku Allah, ngokuba u Allah Uyathethelela Unesihawu.

Futhi ungabaphikeli labo abazikhohlisayo, ngokuba u Allah akamthandi lowo ongumkhohlisi ophambukile.

Bafihlela abantu kepha abamfihleli u Allah nakuba enabo lapho bekhuluma angakuthandi ebusuku; bheka ngoba u Allah Ukuhaqe konke abakwenzayo.

Kepha yinina futhi enibaphikelayo lapha empilweni yasemhlabeni; ubani ozobaphikela ku Allah ngoSuku lokwaHlulelwa noma ozoba ummeli wabo.

Lowo owenza okubi noma aphambuke, bese ecela intethelelo ku Allah, uyakufumanisa u Allah Ethethelela Enesihawu.

Kanti lowo owenza ichilo uzilaya yena uqobo. Nebala u Allah Wazi konke Ukhaliphile.

Lowo ophambukayo noma enze ichilo bese esulela ngalo omsulwa; ngempela uzethwesa amanga nechilo elisobala.

Ukube bekungewona umusa ka Allah kuwe [Muhamadi] bebezozama abanye babo ukukuphambukisa, kepha baziphambukisa bona uqobo futhi alukho olubi abangakwenza kona. U Allah wambulele kuwe [Muhamadi] iNcwadi [iKurani] ne Hikima futhi wakufundisa lokho obungakwazi. Umusa ka Allah kuwe [Muhamadi] muningi.

Akukho okuhle ngezigungu zabo zangasese, ngaphandle kwaloyo oyalela ngokunikela noma ukwenza okuhle noma ukubuyisana phakathi kwabantu. Lowo owenza lokho elangazelele ukujabulisa u Allah, Sizomnika umvuzo omkhulu.

Lowo ophikisana neSithunywa emuva kokucacelwa iqiniso aphinde alandele indlela okungeyona eyabakholwayo; Sizomyekela kanjalo futhi Simfake eJahanamu, okuyisiphetho esibi.

Ngempela u Allah akakuthetheleli ukuba abhanqwe notho, kepha ngale kwalokho uthethelela noma yini. Lowo obhanqa u Allah uphambukele kude impela.

Empeleni [abangakholwa] bakhonza ngaphandle kwaKhe [U Allah] isifazane futhi bakhoza nje uShayitani oyihlongandlebe.

Uqalekisiwe ngu Allah. Wathi: “Ngizothatha isabelo esanele ezincekwini zakho”.

Ngizobadukisa ngibathe amathemba ayize futhi ngibayalele ukuba basike amadlebe emfuyo ngiphinde ngibayalele ukuba baguqule indalo ka Allah. Lowo owenza uShayitani umngani ngaphandle kuka Allah ulahlekelwe ngempela.

Ubapha amathemba ayize; futhi akabathembisi lutho ngaphandle nje kwenkohliso.

Yiboke labo abayophelela eJahanamu futhi akukho lapho abayophephela khona.

Labo abakholwayo benze okuhle Sizobangenisa eZivandeni okugeleza ngaphansi kwazo imifula bahlale kuzo unaphakade; isethembiso sika Allah siyiqiniso; ubani okhuluma iqiniso ukundlula u Allah na?

Akusizo izifiso zenu nezifiso zabeMibhalo; lowo owenza okubi uyojeziswa ngakho futhi akekho mhlengi noma umsizi ayomthola ngaphandle kuka Allah.

Kuthi lowo owenza okuhle, owesilisa noma owesifazane ebe engokholwayo, yiboke labo abayongena eJana futhi abayikuqilwa ngisho intambo yendumba yesundu.

Ubani ongcono kunalowo onikelwa ngobuso bakhe ku Allah enze okuhle futhi elandela inkolo ka Ibhirahimu emsulwa; u Allah wathatha u Ibhirahimu njengomngani.

Konke okusemazulwini nasemhlabeni kungokuka Allah futhi Uyengamele yonke into.

Bafuna ubacacisele ngabafazi. Yithi: “u Allah uzonicacisela ngabo nalokho enifundelwa kona eNcwadini ngezintandane zabafazi eningaziniki lokho okubafanele [kumalobolo] belu nifuna ukubashada kanye nezingane ezisencane nanokuthi niphathe izintandane ngobulungiswa. Konke enikwenzayo okuhle u Allah Uyakwazi.

Uma owesimame esola ukungaphathwa kahle noma ukunganakwa ngumyeni wakhe; akunacala lapho kubo ukuba babuyisane ngandlela thize, belu ukubuyisana yikona okungcono nakuba imiphefumulo ingcwele umhawu. Uma nenza okuhle nizithoba naku Allah, nebala u Allah ukuqaphe konke enikwenzayo.

Futhi anisoze nakhona ukwenza ubulungiswa phakathi kwabafazi [ngothando] noma nizama kanjani; ngakhoke ninganamatheli koyedwa nishiye omunye elenga. Uma nenza okuhle futhi nizithobe ku Allah, u Allah Uyathethelela Unesihawu.

Uma behlukana, u Allah uzobabela bonke emcebeni wakhe, ngokuba u Allah Uyaphana Ukhaliphile.

Konke okusemazulwini nasemhlabeni kungokuka Allah. Nebala Sayalela labo ebeMibhalo ngaphambi kwenu kanye nani ukuthi nithobele u Allah. Kepha ningakholwa, konke okusemazulwini nasemhlabeni kungokuka Allah, futhi u Allah Uzimele Uyadunyiswa.

Futhi konke okusemhlabeni nasemazulwini kungokuka Allah; u Allah wanele njengoMhlengi.

Uma ethanda anganisusa nonke bantu alethe abanye, futhi u Allah unawo amandla okwenza lokho.

Lowo ofuna umvuzo wasemhlabeni, u Allah unomvuzo wasemhlabeni nakweLizayo, futhi u Allah Uzwakonke Ubona konke.

Nina enikholwayo! Melani ubulungiswa lapho nifakaza nenzela u Allah, noma ngabe bukhomba nina uqobo noma abazali noma izihlobo; uma enjingile noma echakile, u Allah nguYena onelungelo kubo bobabili. Ngakhoke ningalandeli izinkanuko ekutheni ningenzi ubulungiswa. Uma nihlanekezela [ubufakazi] noma nenqabe [ukubuthula]; u Allah ukuqaphile konke enikwenzayo.

Nina enikholwayo! Kholwani ku Allah neSithunywa saKhe nakuleNcwadi ayambulela kuSithunywa saKhe naleyo ayambulela ngaphambili. Lowo ongakholwa ku Allah nezingelosi neziNcwadi zaKhe neZithunywa zaKhe noSuku lokuGcina ulahlekele ekudeni ngempela.

Labo abakholwayo bese bephika ukholo baphinde bakholwe bese beyaluphika baze bagxile kungakholwa; u Allah angeke abathethelele noma abaholele endleleni eqondile.

Yethula izindaba ezinhle kumaphixiphixi ukuthi bazothola isijeziso esibuhlungu.

Yibona laba abathatha abangakholwa njengabangani ngale kwabakholwayo; ingabe bafuna ukuhlonipheka kubo na, bheka ngoba ukuhlonipheka konke kungoka Allah.

Nebala wembulela kini eNcwadini ukuthi uma nizwa imibiko zika Allah ziphikwa noma kuhlekiswa, ningahlali nabo kuze bakhuluma ngolunye udaba; ngokuba niyofana nabo. U Allah uzobuthanisa eJahanamu bonke abangamaphixiphixi nabangakholwa.

Labo [amaphixiphixi] abahlala beniqhaphile, uma nithola ukunqoba [impi] okuvela ku Allah, bathi: “Ingathi besinani nje”; uma abangakholwa behlabene ngokuthize [empini] bathi [kubo]: “Asizange yini sinigculise [ngombimbi lwethu] sanivikela kubakholwayo [empini] na?; u Allah uyokwehlulela phakathi kwabo ngSuku lokwaHlulela; futhi akasoze u Allah anikeza abangakholwa ithuba lokugxeka abakholwayo.

Amaphixiphixi azama ukukhohlisa u Allah, kanti ukuphindisele kubo ukhohlisa kwabo[1]; uma benza iSwala bayenza ngokukuzihudula, empeleni bayabukisa nje ebantwini futhi abazikhumbuzi ngo Allah ngaphandle nje kokwenza okuncane. ——— [1] Ngokubayekela ukuba babe kanye namaMusilimu lapha emhlabeni, bayomangala kweLizayo lapho sebebuthelwe ndawonye nabangakholwa ngokuzenza kwabo amaqili lapha emhlabeni, bethi bangamaMusilimu nakuba bengewona.

Abazazi ukuthi bayiliphi, abekho ngala futhi abekho ngale[1]; lowo u Allah amdukisile awusoze wamtholela indlela eqondile. ——— [1] Bangamalulwane uqobo, wona othi uwabona ungazi ukuthi igundane noma inyoni.

Nina enikholwayo! Ningathathi abangakholwa njengabangani ngale kwabakholwayo; ingabe nifuna ukuzidonsela amanzi ngomsele ku Allah na[1]? ——— [1] Ngokulandela ezithendeni zamaphixiphixi ezenza abangakholwa abangani babo, funa nijeze njengoba bajeza.

Nebala, amaphixiphixi ayongena ekujuleni koMlilo futhi awusoze wawatholela umsizi.

Ngaphandle kwalabo abacela intethelelelo benze okuhle babambelele ku Allah futhi bazikhandlele u Allah ngokholo lwabo; yiboke labo abayoba kanye nabakholwayo; u Allah uzopha abakholwayo umvuzo omkhulu.

U Allah anganijeziselani uma nibonga futhi nikholwa na?; u Allah Uyakucusa ukubonga Wazi konke.

U Allah akakuthandi ukukhuluma kusakazwe izinto ezimbi, ngaphandleke kwaloyo ophathwe kabi, ngokuba u Allah Uzwa konke Ubona konke.

Uma niveza obala okuhle [enikwenzayo] noma nikufihle noma nixolele okubi [okwenziwe kini]; Nebala u Allah Uyaxolela Ungusomandla[1]. ——— [1] Ukuxolela akusho ubuthaka noma ubugwala. U Allah uyaxolela nakuba anawo amandla okuziphindiselele nokujezisa labo abaphambana nemithetho Yakhe.

Labo abangakholwa ku Allah neZithunywa zaKhe futhi bafune ukwehlukanisa phakathi kuka Allah neZithunywa zaKhe, bathi: “Sikholwa kubanye futhi asikholwa kubanye”, bafune ukuthatha lokho njengendlela eqondile.

Yibonake labo abangakholwa ngempela, futhi Silungiselele abangakholwa isijeziso esihlazayo.

Kuthi labo abakholwa ku Allah neZithunywa futhi bengahlukanisi phakathi kwabo; yibonake labo esizobanika imivuzo yabo; u Allah Uyathethelela Unesihawu.

AbeMibhalo bakucela ukuba ubehlisele incwadi emkhathini. Bacela uMusa okukhulu kunalokho, bathi: “Sikhombise uAllah mathupha”, bashaywa umbani ngokuphambuka kwabo. Baphinda bakhonza ithole emuva kokuba izibonakaliso ezicacile zifikile kubo, kepha sabaxolela kulokho. Sanika uMusa isibonakaliso esicacile.

Saqongisa intaba phezu kwabo ngesibophezelo sabo, Sathi kubo: “Ngenani emasangweni nikhotheme” futhi Sathi kubo: “Ningaphuli umthetho ngeSabatha”. Senza isibophezelo esiqinile nabo.

Ngenxa yokwephula kwabo isibophezelo nokuphika kwabo izibonakaliso zika Allah nokubulala kwabo iZithunywa ngokungemthetho namagama abo ‘izinhliziyo zethu zilukhuni’, empeleni u Allah uzigubezele ngenxa yokungakholwa kwabo; ngakhoke bayidlanzana abakholwayo.

Nangenxa yokungakholwa kwabo namagama abo ngoMariyamu angamanga aluhlaza cwe.

Nangamagama abo, ‘Simbulele uMasihi, u Isa ka Mariyamu iSithunywa sika Allah’. Abambulalanga futhi abambethelanga, kepha balethelwa ofanayo. Futhi labo abaphikisana ngaye banokungabaza okukhulu; abanalwazi ngaye ngaphandle nje kokuqagela; abambulalanga ngempela.

U Allah wamphakamisela kuYe ngokuba u Allah unguSomandla Okhaliphile.

Labo abeMibhalo bazokholwa nguye [u Isa] ngaphambi kokufa kwakhe[1]. Kuthi ngoSuku lokwaHlulela abe ufakazi kubo. ——— [1] iSithunywa u Isa ka Mariyamu njengoba aphakanyiselwa phezulu u Allah akazange afe njengawo wonke umuntu. Ngenxa yalokho uzobuya azophila impilo yakhe afe njengabanye abantu, ngoba umthetho ka Allah ukuthi wonke umuntu kufanele akuzwe ukufa.

Ngenxa yokuphambuka kwalabo abangamaJuda nokuvimbela kakhulu abanye endleleni ka Allah, sabavimbela lokho okumsulwa ebekade bevunyelwe kona.

Nangokuthatha kwabo inzalo nakuba benqatshelwe yona, nokudla kwabo umcebo wabantu ngokungemthetho; futhi silungiselele labo abangakholwa kubo isijeziso esinzima.

Kepha labo kubo abanolwazi olunzulu nabakholwayo, abaqikelela ukwenza iSwala, abakhipha iZakati nabakholwa ku Allah nasoSukwini lokuGcina bayakholwa kulokho okwembulelwe kuwe nokwembulelwe ngaphambili.

Nebala, Sambulele kuwe [Muhamadi] njengoba Sambulela ku Nuhu nezinye iZithunywa emuva kwakhe. Sambulela ku Ibhirahimu, no Isima’ili no Isihaki no Yakubu Nezizukulwane no Isa no Ayubhu no Yunusi no Haruni no Sulayimani; Sanika uDawudi iZabhuri.

Ezinye zeZithunywa Sikulandisile ngazo kanti ezinye asikulandisanga ngazo, futhi uAllah Wakhuluma noMusa mathupha.

Izithunywa ezingabethuli bezindaba ezinhle nabaxwayisi, ukuze abantu bangagxeki u Allah emuva okufika kweZithunywa; u Allah unguSomandla Okhaliphile.

Kepha u Allah ungufakazi kwalokho akwembulele kuwe [Muhamadi], ukwembulele ngolwazi lwaKhe, kanti futhi nezingelosi zingofakazi; kepha u Allah wanele njengofakazi.

Labo abangakholwa bavimbe abanye endleleni ka Allah, balahlekile kakhulu.

Labo abangakholwa abaphambukile, u Allah angeke abathethelele noma abaholele endleleni eqondile.

Ngaphandle kwendlela yaseJahanamu abayobhadla kuyo unaphakade; lokho kuyinto elule ku Allah.

Sintu! iSithunywa sifikile kini neqiniso elivela eNkosini yenu; ngakhoke kholwani, yikona okungcono, kepha uma ningakholwa, konke okusemazulwini nasemhlabeni kungokuka Allah; u Allah Wazi konke Ukhaliphile.

Nina beMibhalo musani ukweqa imikhawulo enkolweni yenu, futhi khulumani iqiniso kuphela ngo Allah. UMasihi, u Isa ka Mariyamu iSithunywa sika Allah neZwi laKhe alifaka kuMariyamu nomoya ovela kuYe; ngakhoke kholwani ku Allah nezithunywa zaKhe, futhi ningathi: “Bathathu”, uma nikuyeka, yikona okungcono; u Allah uyena yedwa okumele akhonzwe; makangcweliswe ekubeni nengane; konke okusemazulwini nasemhlabeni kungokwakhe, futhi u Allah wanele njengoMhlengi.

Umasihi akasoze anqaba ukuba yinceku ka Allah, kanjalo nezingelosi ezisondele. Labo abanqabayo ekumkhonzeni bazigqaje uyobabuthanisa bonke kuYe.

Labo abakholwayo benze okuhle, uyobapha imivuzo yabo ngokugcwele aphinde abengezele ngomusa waKhe. Kepha labo abanqabayo nabazigqajayo uyobajezisa ngesijeziso esibuhlungu futhi abayikuthola mhlengi nomsizi ngaphandle kuka Allah.

Sintu! Bufikile kini ubufakazi obuvela eNkosini yenu, futhi Sathumela kini ukukhanya okuthe bha.

Labo abakholwa ku Allah babambelele kuYe, uyobafaka emseni waKhe nasesibusisweni futhi abaholele kuYe ngendlela eqondile.

Bafuna ukwazi kuwe [Muhamadi], yithi: “u Allah uzonazisa ngeKhalala”. Uma umuntu eshona engenangane kepha enodadewabo, uyothola isigamu esisodwa kwezimbili kwakushiyile [ifa]. Naye futhi uyoba indlalifa yakhe [udadewabo] uma engenazo izingane. Uma bebabili odadewabo, bazothola izigamu ezimbili kwezintathu kwakushiyile. Kepha uma bengomnewabo abesilisa nabesifazane, owesilisa uthola okuphindwe kabili kokutholwa owesimame. U Allah uyanicacisela ukuze ningaphambuki; u Allah Wazi ngazo zonke izinto.

Nina enikholwayo! Gcinani izibophezelo. Nivunyelwe ukudla zonke izilwane ngaphandle kwalezi enitshelwe ngazo. Futhi anivunyelwe ukuzingela izinyamazane lapho niku iHiramu (uma uyokwenza i Umra noma iHaji). Belu u Allah ubeka umthetho awuthandayo.

Nina enikholwayo! Ningaphuli umthetho mayelana nezimiso zika Allah noma izinyanga ezihlonishwayo [Dhul-Ka’da, Dhul-Hija, Muharamu, Rajabu] noma izilwane zomhlatshelo nalezo ezinezimpawu noma nalabo abaze ngokuthula eMakha belangezelele izibusiso zeNkosi yabo nokuyithokozisa. Kepha uma seningekho ku Ihiramu, seningazingela. Futhi inzondo yalabo abanivimba ekutheni ningene eMasijidi Haramu bayinganenzi ukuba ningabi nobulungiswa. Ngakhoke lekelanani ekwenzeni okuhle nokuthobela intando ka Allah. Ningalekelelani ekuphambukeni nasekuphuleni umthetho. Nithobele u Allah, ngokuba u Allah ujezisana kanzima.

Nenqatshelwe ukudla ingcuba, negazi, nenyama yengulube neyesilwane ezihlatshelwe abanye ngaphandle kuka Allah neyaleso esibulawe ngokubhongwane neyaleso esigqenyiwe neyaleso esisakazwe phansi safa neyaleso esibhokodwe esinye safa neyaleso esidliwe izilwane sasendle – ngaphandle uma nisithole (sisaphila) nasihlaba – neyaleso esihlatshelwe izithixo, futhi nenqatshelwe ukuqagela enabelwe kona ngemicibisholo; ngokuba konke lokhu (eninqatshelwe kona) kuyimpambuko. Namhlanje laba abangakholwa abasenalo ithemba lokuthi niyoke nishiye inkolo yenu; ngakhoke ningabesabi kepha nesabe Mina. Namhlanje ngiyiphelelisile inkolo yenu ngagcwalisela izibusiso zaMi kini, futhi nganikhethela i-Isilamu njengendlela yenu yokuphila. Kepha lowo ophoqwa yindlala (ukudla okunqatshelwe) ebe engenanhloso yokuphula umthetho (akanacala), bheka ngoba u Allah uyathethelela unesihawu.

Bayakubuza ukuthi yikuphi abanganqatshelwe kona, yithi: “Aninqatshelwe konke lokhu okuhlanzekile kanye nalokho okuzingelwa yizilwane ezizingelayo enizifundusile kulokho enikufundiswe ngu Allah; ngakhoke dlanini kulokho ezinibambele kona niphakamise igama lika Allah kukho, futhi nithobele u Allah; nebala u Allah wehlulela ngokushesha.

Namhlanje aninqatshelwe okuhlanzekile, futhi nokudla kwabeMibhalo anenqatshelwe kona futhi nabo abanqatshelwe ukudla kwenu. Futhi aninqatshelwe ukushada abesimame abaqotho abakholwayo, kanye nabesimame abaqotho kwabeMibhalo uma nje senibanikeze ilobolo labo, futhi nani niziphethe kahle ningenzi ukukhohlakala futhi ningenabo omakhapheni (enijola nabo). Lowo ophika ukholo, izenzo zakhe (ezinhle) ziyoshabalala zonke futhi uyoba ngolahlekelwe kweLizayo.

Nina enikholwayo! Uma niyokwenza iSwala, gezani ubuso benu nezandla zenu kufika ezindololwaneni, nisule amakhanda enu ngezandla ezimanzi kanjalo nezinyawo zenu kufika emaqakaleni. Kepha uma nikujanaba kumele nigeze umzimba wonke. Uma nigula noma nisohambeni noma nibuya endlini encane noma beniye ocansini nabafazi benu, kepha ningawatholi amanzi [okwenza iwudu noma ugeza umzimba wonke], yenzani itayamumi ngothuli oluhlanzekile, nisule ubuso nezandla zenu ngalo. U Allah akaqonde ukunithwesa ubunzima kepha ufuna ukunihlanza futhi aphelelise izibusiso zaKhe kini ukuze nikhombise ukubonga.

Futhi nikhumbule izibusiso zika Allah kini nesibophezelo saKhe lesi anibophezela ngaso, mhla nithi, ‘siyezwa futhi sizolalela’. Thobelanike u Allah, ngokuba u Allah ukwazi njengoba kunjalo okusezifubeni.

Nina enikholwayo! Gcinani imiyalelo ka Allah, nifakazele ubulungiswa. Inzondo yabantu thizeni mayinganiholeli ekutheni ningenzi ubulungiswa; ngakhoke yenzani ubulungiswa ngokuba yikona okusondelene nokuthobela intando ka Allah, futhi nithobele u Allah; nebala u Allah unolwazi lwakho konke enikwenzayo.

U Allah uthembise labo abakholwayo benza nokuhle ukuthi bayothola intethelelo nomvuzo omkhulu.

Labo abangakholwa futhi bephika imibiko yeThu, yibo kanye abayongena eMlilweni.

Nina enikholwayo! Khumbulani umusa ka Allah kini mhla abantu befuna ukunihlasela kepha u Allah wabanqanda wanihlenga; thobelani u Allah futhi abakholwayo kumele bathembele ku Allah.

Nebala u Allah wenza isibophezelo nesizwe sika- Isirayeli futhi saqoka kuso abelusi abayishumi nambili, u Allah wathi: “Nginani, uma niqekelela ukwenza iSwala, nikhiphe neZakati, nikholwe kuZithunywa zaMi nizihloniphe futhi niboleke u Allah imboleko enhle, ngiyokwesula amacala enu ngiphinde nginingenise ezivandeni okugeleza ngenzansi kwazo imifula. Kepha lowo kini ozophika ukholo emuva kwalokho uyobe usedukelwe indlela eqondile.

Ngenxa yokwephula kwabi izibophezelo, sabaqalekisa senza lukhuni izinhliziyo zabo. Bheka ngoba baguqula izwi endaweni yalo[1] baphinde bakhohlwe lokhu abede bekhunjuzwa kona. Futhi uyohlala njalo uhlangabezana nokungathembeki kubo ngaphandle nje kwedlanzana. Ngakhoke baxolele wendlulise; nebala u Allah uyabathanda abenza okuhle. ——— [1] Ukuguqula amazwi ka Allah kukabili, (i) ngokuguquka indlela alotshwe noma ashicilelwe ngayo, noma (ii) ngokuhlanekenzela umqondo nomlayezo wamazwi.

Futhi senza isibophezelo nalabo abathi: “SingamaNasarina”, kepha bakhohlwa yilokhu abede bekhunjuzwa kona. Ngakhoke satshala ubutha nezondo phakathi kwabo kuyoze kube uSuku lokwaHlulela. Futhi maduzane u Allah uyobazisa ngalokho ababekwenza.

Nina beMibhalo! Nebala iSithunywa sethu sesifikile kini ukuze sinihlalusele okuningi kulokho ebenikufihla eNcwadini futhi kuningi esizokuyeka; bheka ngoba ukukhanya neNcwadi ecacisayo sekufikile kini.

U Allah uholela ngayo labo abalandela intando yaKhe izindlela zokuthula futhi ubakhipha ebumnyameni abase ekukhanyeni ngemvumo yaKhe aphinde abaholele endleleni eqondile.

Ngempela abasakholwa labo abathi u Allah unguMasihi u-Isa indodana ka Mariyamu. Yithi: “uma u Allah efuna ukubhubhisa uMasihi indodana ka Mariyamu nonina kanye nabo bonke abasemhlabeni, ubani oyokhona ukunqanda u Allah na?”. Ubukhosi bamazulu nomhlaba nokumaphakathi bungobuka Allah, udala akuthandayo ngokuba unguMenzi wezinto zonke.

AmaYahudi namaNasara athi, ‘singabantwana baka Allah nabathandiweyo baKhe’. Yithi: “Kungani pho enijezisa ngamacala enu na? Empeleni ningabantu kwabanye abadalile, u Allah uthethelela amthandayo ajezise amthandayo. Ubukhosi bamazulu nomhlaba nokumaphakathi bungobuka Allah futhi isiphetho sikuYe”.

Nina beMibhalo! Nebala iSithunywa seThu sifikile kini sinicacisela [iqiniso] emuva kwesikhathi eside kungekho sithunywa, ukuze ningathi ‘akukho methuli wezindaba ezinhle noma umexwayisi owafika kithi’; nakhoke usefikile kini umethuli wezindaba ezinhle nomexwayisi, bheka ngoba u Allah ungumenzi wezinto zonke.

Khumbula lapho uMusa ethi kubantu bakhe: “Khumbulani izibusiso zika Allah kini bakwethu, mhla eqoka kini iZithunywa, wanenza amakhosi waphinde wanipha lokho angakaze akuphe abanye ezizweni…

“Ngenanike bakwethu kulomhlaba ongcwele u Allah anibekele wona futhi ningabi amavaka funa nibe ngabalahlekelwayo”.

Bathi: “WeMusa! Kunezikhondlakhondla kuwo, ngakhoke asisoze sangena kuwo kuze kube ziyaphuma kuwo, uma ziphuma siyobe sesiyangena”.

Amadoda amabili ayenokwesaba u Allah, abusiswa ngu Allah, athi: “Ngenani nezicabha, kuyothi uma seningenile nakanjani niyonqoba, futhi nethembele ku Allah uma ningabakholwayo”.

Bathi: “WeMusa! Asisoze sangene uma besasekuwo, ngakhoke ungahamba wena neNkosi yakho niyolwa, thina siyobe sila sihleli”.

Wathi [uMusa]: “Nkosi yami, ayikho into engayenza, sekuyimi nomnewethu, ngakhoke sehlukanise nabantu abayiziphulamthetho”.

Wathi [u Allah]: “Sebenqatshelwe wona [umhlaba ongcwele] iminyaka engamashumi amane bempumpa emhlabeni, ngakhoke ungabazweli abantu abayiziphulamthetho”.

Futhi balandise indaba yamadodana amabili ka Adamu [uKabilinoHabili], mhla benikela ngeminikelo, wamukelwa koyedwa [uHabili] wenqatshwa komunye [uKabili], owathi, ‘ngizokubalala nakanjani’. Wathi: “u Allah wamukela kulabo abathobela intando yaKhe”.

“Umake wena uzolula isandla sakho kimi ukuze ungibulale, mina angeke ngalula esami kuwe ukuze ngikubulale, ngokuba ngesaba u Allah iNkosi yezizwe”.

Ngifuna kube nguwena othwala icala ukuze ube omunye abayongena eMlilweni, phela yiwo lowo umvuzo wabaphambuki.

Kepha umphefumulo wamhehela ukuba abulale umfo wakhe, wabe useyambulala, ngalokho waba omunye wabalahlekelwe.

U Allah wabe esethumela igwababa ukuba liqhwande umhlabathi ukuze limbonise ukuthi asingcwabe kanjani isidumbu somnewabo. Wathi: “Maye! Ngihlulwa ukufana naleligwababa ekufihleni isidumbu somnewethu”, wabe esezisola.

Ngenxa yalokho, sanquma kusizwe sika-Isirayeli ukuthi lowo obulala omunye umuntu engabulala muntu noma engenzanga mpambuko emhlabeni, kufana nokuthi ubulele isintu sonke kanti ugcina umuntu ephila kufana nokuthi ugcine isintu sonke siphila. Nebala iZithunywa zethu zafika kubo nobufakazi obucacile, kepha iningi labo laqhubeka nokuphula umthetho emhlabeni emuva kwalokho.

Isijeziso salabo abalwisa u Allah neSithunywa saKhe baphinde benze izimpambuko emhlabeni, ukuba nje, babulawe noma babethelwe noma banqanyulwe izandla nemilenze ngokuphambana noma bayiswe ekudingisweni emhlabeni; lokho kuyoba ukubahlaza lapha emhlabeni, kuthi kweLizayo bathole isijeziso esinzima.

Ngaphandle kwalabo abazisolayo ngaphambi kokuba nibabambe; nihlale nazi ukuthi u Allah unguMthetheleli Onesihawu.

Nina enikholwayo! Thobelani intando ka Allah, nizikhandle ekusondelaneni naYe futhi nilwe endleni yaKhe ukuze niphumelele.

Nebala labo abangakholwa, uma bebenakaho konke okukhona emhlabeni kuphindwe kabili, ukuze bazihlawule ngakho ekugwemeni isijeziso sangoSuku lokwaHlulela; akusoze kwamukelwa kubo futhi bayothola isijeziso esibuhlungu.

Bafuna ukuphuma eMlilweni, nakuba bengeke bakwazi ukuphuma kuwo, bheka ngoba bayothola isijeziso esingenqamuki.

Isebi nesebikazi, gencani izandla zabo njengomphumela wabakwenzile nesijeziso esivela ku Allah, futhi u Allah Unamandla Ukhaliphile.

Kepha lowo ozisolayo emuva kwezimpambuko zakhe aziqondise, u Allah uyomthethelela, ngokuba u Allah Uyathethelela Unesihawu.

Ubungazi yini ukuthi umbuso wezulu nomhlaba ungoka Allah, ngakhoke angajezisa amfunayo athethelele amfunayo, futhi u Allah unguMenzi wezinto zonke.

Sithunywa! Mabangakukhathazi labo abazikhandla ngokungakholwa, kulabo abathi ‘Siyakholwa’ ngemilomo yabo kepha izinhliziyo zabo zibe zingakholwa nakulabo abangamaJuda; balela amanga belalela abanye abantu abangezanga kuwe. Bahlanekezela inkulumo [ka Allah] kulokhu ekuchazayo, bathi: “Uma ninikwa lena [incazelo] yithatheni kepha ninganikwa le xwayani”. Kantike uma u Allah efuna ukudukisa umuntu ayikho into ongamenzela yona ku Allah. Yibo kanye labo u Allah angafunanga ukubahlanza izinhliziyo zabo; ngakhoke bayohlazeka lapha emhlabeni baphinde bathole isijeziso esinzima kweLizayo.

Balalela amanga futhi badla umcebo onqatshelwe. Uma beza ukuze uzokwehlulela phakathi kwabo yehlulela noma ubayekele. Futhi uma ubayekela abasoze bakwenza lutho olubi, kepha uma wehlulela, yehlulela phakathi kwabo ngobulungiswa, ngokuba u Allah ubathanda impela abenza ubulungiswa.

Bakwenza kanjani umehluleli [phakathi kwabo] na, bebe beneTora equkethe izahlulelo zika Allah, baphinde bakushaye indiva [isahlulelo sakho] emuva kwalokho. Labo abasibona impela abakholwayo.

Impela sayiletha iTora iqukethe ukuhola nokukhanya; zazihlulela ngayo iZithunywa - ezazithobela u Allah – labo ababengamaJuda, zenza kanjalo iziNzululwazi eziqotho kanye naBafundisi ababethweswe ukuba bavikele iNcwadi ka Allah nokuthi babe ngofakazi. Ngakhoke ningesabi abantu kepha nesabe Mina futhi ningathengisi imibiko yami ngeze; bheka ngoba labo abangahluleli ngalokho u Allah akwembulile yibo kanye labo abangakholwa.

Sababekela umthetho othi, impilo ngempilo, iso ngeso, ikhala ngekhala, indlebe ngendlebe, izinyo ngezinyo kanye nempindiselo kulowo olinyaziwe. Kantike lowo odedela ilungelo lakhe lokuphindisela, lokho kuyomesulela amacala akhe [ku Allah]; belu labo abangahluleli ngalokho okwembulelwe ngu Allah yibo kanye labo abaphambukile.

Sabe sesilandelisa ezithendeni zazo [iZithunywa] ngo Isa indodana kaMariyamu efakazela lokho akuficile kuqukethwe iTora, sabe sesimunika i-Ininjili eyabe iqukethe ukuholwa nokukhanya futhi ifakazela lokhu obekuqukethwe iTora ngaphambilini yaphinde yaba ngumkhokheli nomeluleki kulabo abathobela u Allah.

Ngakhoke labo abathunyelwa i-Ininjili bamahlulele ngalokho u Allah akwembulele kuyo, bheka ngoba labo abangahluleli ngalokho okwembulelwe ngu Allah, yibo kanye izephula mthetho.

Kantike sembulele kuwe [Muhamadi] iNcwadi [iKurani] ngeqiniso ifakazela iNcwadi engaphambi kwayo futhi iyiqinisekisa. Ngakhoke yehlulela phakathi kwabo ngalokho okwembulwe ngu Allah, ungalandeli izinkanuko zabo ushiye lokho okuyiqiniso okulethwe kuwe. Kanti nonke, isizwe ngasizwe sinebekele umhlahlandlela nenkambiso. Uma u Allah ubefuna ebenganenza isizwe esisodwa, kepha ufuna ukunivivinya kulokho anabele kona. Ngakhoke ncintisanani ekwenzeni okuhle, ngokuba niyobuyela nonke ku Allah bese enazisa ngalokho ebeniphikisana ngakho.

Yehlulelake phakathi kwabo ngalokho okwembulwe ngu Allah, ungalandela izinkanuko zabo futhi ubaqhaphele bangakulingi kokunye u Allah akwembulele kuwe. Uma bukushaya indiva, yazike ukuthi u Allah ufuna ukubajezisa ngezinye zezimpambuko zabo; belu iningi labantu liyizephula mthetho.

Ingabe bafuna umthetho weJahiliya [ophambene neIsilamu] na; ingabe ubani onomthetho ongcono kunoka Allah kulabo abangenakungabaza na?

Nina enikholwayo! Ningenzi amaJuda namaNasarina abangani, ngokuba bangabangani bebodwa. Lowoke kini oyobenza abangani uyobe usengakubo. Ngempela u Allah akabaholeli endleleni eqondile abantu abaphambukayo.

Uyobona labo abanesifo ezinhlizweni zabo bejahele ukuzibandakanya nabo [amaJuda namaNasarina] bethi: “Sesaba ukuthi izinto zizosiphendukela”, khona maduze u Allah uzoletha ukunqoba noma okunye okuvela kuYe, bese bezisola ngalokho ebekuyikona abakufihlile ngaphakathi.

Labo abakholwayo bayobe sebethi: “Ingabe yibona kanye laba abafunga bagomela ngo Allah ukuthi bakanye nani na?”. Bheka ngoba imisebenzi yabo iyoshabalala babe ngabalahlekelwe.

Nina enikholwayo! Lowo oyohlubuka ukholo lwakhe kini, u Allah uyoletha abanye abantu abayomthanda futhi naYe abathande, bayozehlisa kwabanye abakholwayo, baziqinise kulabo abangakholwa, baphake impi endleleni ka Allah futhi bebe bengesabi kugxekwa muntu. Lowo umusa ka Allah awunika loyo amthandayo, ngokuba u Alla Ungongamele Onolwazi.

Umngani wenu makube u Allah neSithunywa saKhe nalabo abakholwayo abaqikelela ukwenza iSwala bakhiphe neZaka bebe bekhothama.

Bheka ngoba lowo owenza u Allah neSithunywa saKhe kanye nalabo abakholwayo abangane bakhe, iqembu lika Allah lihlala linqoba.

Nina enikholwayo! Ningabenzi abangani benu labo abathatha ukholo lwenu njengohleko nomdlalo kulabo abanikwa iNcwadi ngaphambi kwenu nalabo abangakholwa; futhi nithobele u Allah uma ngempela ningabakholwayo.

Kuthi lapho uma nenza isimemezelo seSwala, bona basenze inhlekisa nomdlalo, lokho kungoba bengabantu abangaphusile.

Yithi: “Nina beMibhalo, ingabe nisigxeka ngoba nje sikholwa ku Allah nakulokho asembulele kona nakulokho okwembulelwa ngaphambili, nanokuthi phela niyiziphulamthetho”.

Yithi: “Ake nginazise ngokunomvuzo omubi kunalokho [ukusigxeka] ku Allah. Lowo oqalekiswe ngu Allah wathukuthelela wenza abanye babo izinkawu nezingulube futhi bakhonza izikhonzwa zeze, yibo kanye labo abayothola indawo embi futhi badukile endleleni eqondile.

Uma befika kini bathi siyakholwa, kepha empeleni bangene nokungakholwa baphinda baphuma nakho, futhi u Allah ukwazi kahle lokho abakugodlile.

Iningi labo ulibona lingongqa phambili ekuphambukeni, ekuphuleni imithetho nasekudleni umcebo onqatshelwe; kwaze kwakubi lokhu abakwenzayo.

Kungani amaRabayi namaHabari abo engabanqandi kulokukhuluma kwabo impambuko nokudla umcebo onqatshelwe; impela yimbi lento abayenzayo.

Futhi amaJuda athi: “Isandla sika Allah siboshiwe (ungungoqo)”, empeleni ezabo izandla eziboshiwe futhi baqalekisiwe ngalokho abakushoyo. Izandla zaKhe (u Allah) zivulekile, uphana ngokuthanda kwaKhe. Kantike lokhu okwembulelwe kuwe kuvela eNkosini yakho, iningi labo kubandisela ukuphambuka nokungakholwa[1]. Futhi sifake phakathi kwabo ubutha nenzondo kuze kube uSuku lokwaHlulelwa. Njalonje uma benza imizamo yokususa impi u Allah uyayinqanda. Futhi bayazikhandla ekwenzeni impambuko emhlabeni. ——— [1] Lokhu kungenxa yenzondo amaJuda anayo nokubukela phansi ezinye izizwe nabanye abantu.

Uma nje laba eMibhalo bakholwa baphinde bathobela intando ka Allah, besizosula amacala abo bese sibafaka ezivandeni zentokomalo.

Ukuba nje balandela imiyalelo yeTora ne-Ininjili kanye nakho konke okwembulelwa kubo kuvela eNkosini yabo, isondlo sabo besizoqhamuka ngaphezulu nangaphansi kwabo. Belu bakhona abantu kubo abaqotho, kepha baningi labo kubo abenza okubi.

Sithunywa! Sabalalisa lokhu okwembulelwe kuwe kuvela eNkosini yakho, uma ungenzi njalo uyobe ungawusabalalisanga umlayezo wayo. Bheka ngoba u Allah uyokuvikela ebantwini, futhi u Allah akabahlengi abantu abangakholwa.

Yithi: “Nina beMibhalo! Aniyilutho kuze kube nilandela imiyalelo yeTora ne-Ininjili nakho konke okwembulelwe kini kuvela eNkosini yenu”. Kantike lokhu okwembulelwe kuwe kuvela eNkosini yakho, iningi labo kubandisela ukuphambuka nokungakholwa. Ngakhoke ungazikhathazi ngabantu abangakholwa.

Nembala labo abakholwayo nalabo abangamaJuda nalabo abangamaSabiya kanye nalabo abangamaNasarina, lowo ozokholwa ku Allah noSuku lokuGcina futhi enze okuhle, abayikuba nokusaba noma babe lusizi.

Ngempela senza isibophezelo nesizwe sika Isirayeli saphinde sathumele kubo iZithunywa. Kwakuthi njalo uma kufika kubo iSithunywa nalokho abangakuthandi, ezinye babeziphika kuthi ezinye bazibulale.

Babecabanga ukuthi akuyikuba namthelela, base beqhubeka nobumpumputhe kanye nobumumu babo [bokushaya iqiniso indiva], kepha u Allah wabathethelela. Laphinda (emuva kwalokho) laqhubeka futhi iningi labo nobumpumputhe kanye nobumumu babo. U Allah ukuqhaphe konke abakwenzayo.

Nebala abakholwa labo abathi, uMasihi indodana kaMariyamu ingu Allah. Bheka ngoba uMasishi wathi: “Sizwe sika-Isirayeli khonzani u Allah iNkosi yami neyenu, ngokuba lowo obhanqa u Allah, iJana uyinqatshelwe ngu Allah futhi uyophelela eMlilweni, kanti labo abaphambukile akekho oyobahlenga”.

Futhi abakholwa labo abathi u Allah ungomunye wabathathu. Bheka ngoba akekho ofanelwe ukukhonzwa ngaphandle koyedwa vo. Umake bengaphezi kulokhu abakushoyo, labo abangakholwa kubo bayothola isijeziso esibuhlungu.

Kungani bangazisoli ku Allah bacele intethelelo kuYe na, bheka ngoba u Allah Ungumthetheleli Onesihawu.

UMasihi indodana ka Mariyamu uyiSithunywa nje, ziningi iZithunywa ezafika ngaphambi kwakhe futhi unina wayeqotho, kanti bobabili babedla ukudla. Awubheke nje ukuthi sibacacisela kanjani imibiko bese uyabhekea ukuthi banhlanhlanthela kuphi.

Yithi: “Nikhonza kanjani ngaphandle kuka Allah lokho okungeke kwanilimaza noma kunisize ngalutho na, bheka ngoba u Allah nguyena Ozwa konke Owazi konke”.

Yithi: “Nina beMibhalo, musani ukweqa imikhawulo enkolweni yenu ngokungeqiniso, futhi ningalandeli izinkanuko zabantu abaduka ngaphambilini baphinde badukisa iningi, baduka endleleni eqondile.

Baqelikiswa labo abangakholwa esizweni sakwa-Isirayeli olimini luka Dawudi no-Isa ka Mariyamu, lokho kungenxa yokuthi babeyisa futhi bephula imithetho.

Babenganqandani lapho benza okuphambukile, kwaze kwakubi lokho ababekwenza.

Uyobona iningi labo lizibandakanya nalabo abangakholwa, yaze yayimbi into abazithwese yona, ngokuba bazilethela ulaka luka Allah futhi bayojeziswa unaphakade.

Ukube babekholelwa ku Allah neSithunywa nakulokho okwembulelwe kuso, bebengeke babenze (abangakholwa) abangani, kepha iningi labo liyiziphula mthetho.

Uyofumanisa amaJuda namaMushiriki (labo ababhanqa u Allah) kuyibona abantu abazonda abakholwayo kakhulu. Kepha uyofumanisa labo abathi, ‘SingamaNasarina’ kuyibona abasondelene nabathanda abakholwayo. Lokho yingoba kubo kunabafundisi namaRahibana kanti futhi abazigqaji.

Uma bezwa lokho okwembulelwe kuSithunywa [uMuhamadi], uzobona amehlo abo ekhihla izinyembezi ngenxa yeqiniso abalibonayo, bese bethi: “Nkosi yethu, siyakholwa ngakhoke sibhale kanye nalabo abafakazayo”.

Futhi ikuphi okungasivimba na, ukuba singakholwa ku Allah nalokho okuyiqiniso okufika kithi futhi sinethemba lokhuthi iNkosi yethu iyosingenisa kanye nabantu abaqotho.

U Allah wabe esebahlomulisa ngalokho abakusho izivande okugeleza enzansi kwazo imifula bayohlala kuzo unaphakade, yiwoke lowo umvuzo wabenzi bokuhle.

Kuthi labo abangakholwa abaphika imibiko yeThu, bona bayongena eMlilweni.

Nina enikholwayo! Ningazinqabeli lokho okumsulwa u Allah anivumele kona futhi ningeqi umthetho ngokuba u Allah akabathandi labo abeqa umthetho.

Futhi nidle kulokho u Allah anabele kona okuvunyelwe nokumsulwa; nithobele u Allah lona enikholelwa kuYe.

U Allah akayikunibeka icala ngalokho okuyimbudane kuzifungo zenu, kepha uyonibeka icala ngalokho enihlosile ngezifungo. Inhlawulo yaso [kophula isifungo] ukupha ukudla ishumi labantu abampofu, ukudla okuyikona okujwayekile kubantu bakini noma ukubapha izimpahla zokugqoka noma ukukhulula isigqila; kepha lowo ongenakho, makazile izinsuku ezintathu. Yiyoke leyo inhlawulo yezifungo zenu [kulabo abaziphulayo] uma niziphula. Ngakhoke fezani izifungo zenu; u Allah unicacisela kanjalo imibiko zaKhe ukuze nibonge.

Nina enikholwayo! Nebala konke okudakayo nokugembula nokuhlabela izithixo nokuqagela ngemicibisholo kuwukungcola kwemisebenzi kaShayitani, ngakhoke kugwemeni ukuze niphumelele.

UShayitani ufuna nje ukwakha ngokudakayo nangokugembula ubutha nezondo phakathi kwenu aphinde anivimbe ekukhumbuleni u Allah nokwenza iSwala; ingabe niyopheza na?

Futhi lalelani u Allah nilalele neSithunywa niqhaphele, kepha uma nidikila, yazini ukuthi umsebenzi weSithunywa seThu ukudlulisa umlayezo ocacile.

Abanacala labo abakholwayo abenza okuhle kulokho abakudlile [kokudakayo ngaphambilini] uma nje bebeqhubeka nokuthobela u Allah bakholwe benze okuhle baphinde bathobele u Allah bakholwe baphinde bathobele u Allah benze okuhle ngokuba u Allah uyabathanda abenzi bokuhle.

Nina enikholwayo! Nebala u Allah uyonivivinya ngokunye kwalokho enikuzingelayo ngezandla zenu nangemikhonto yenu; ukuze u Allah azi kahle labo abemesabayo nangasese. Lowo-ke ozophula umthetho emuva kwalokho uyothola isijeziso esibuhlungu.

Nina enikholwayo! Ningabulali silwane esizingelwayo uma nikwi-Ihiramu [ye Umura noma iHaji]. Lowo oyosibulala kini ngenhloso, kumele asikhokhe ngesihlatshwayo [ikameli, inkomo, imbuzi, imvu] esilingana naso, esiyohlonzwa abantu ababili kini abaqotho, okumele siyohlatshelwa eKabha [eMakha]. Noma engahlawula ngokondla abampofu [baseMakha], noma azile izinsuku ezilingene abantu abampofu [obekumele abondle], ukuze phela avune izithelo zemsebenzi yakhe. Kepha lokho okwenzeka kudala u Allah ukuxolele. Kantike lowo ozophinda akwenze u Allah uzomjezisa ngokuba u Allah unguSomandla Ojezisanayo.

Nivunyelwe ukuba nidobe izilwane zasolwandle futhi ningazitika nina kanye nezihambi ngokuzidla; kepha ninqatshelwe ukuzingela ezasendle uma nisase ku-Ihiramu. Ngakhoke thobelani u Allah lona eniyobuthaniswa kuYe.

U Allah wenze iKabha okuyindlu ehloniphekile nezinyanga ezihlonishwayo [Dhul-Ka’da, Dhul-Hija, Muharamu, Rajabu] nezilwane zomhlatshelo nalezo ezinezimpawu ukuba zibe yisisekelo ebantwini; lokho ukuze nazi ukuthi u Allah wazi konke okusemazulwini nasemhlabeni nokuthi ngempela u Allah Wazi konke.

Yazini ukuthi u Allah ujezisana kanzima nokuthi futhi Uyathethelela Unesihawu.

Umsebenzi weSithunywa ukudlulisa umlayezo kuphela. U Allah ukwazi kahle konke enikuveza obala nalokho enikugodlayo.

Yithi: “Okungcolile nokumsulwa akusoze kwafana noma ngabe ubuningi bokungcola kukumangaza; ngakhoke thobelani u Allah nina enikhaliphile ukuze niphumelele.

Nina enikholwayo, ningabuzi ngezinto okuyothi uma senicaciselwa ngazo ziniphathe kabi; uma nibuze ngazo lapho kwembulelwa iKurani niyocaciselwa, u Allah uziyekile, futhi u Allah Uyathethelela Unobubele.

Abantu abanandulelayo babuza ngazo, kepha bagcina ngokuba abangakholwa ngenxa yazo.

U Allah akazange abeke iBhahira noma iSayibha noma iWaswila noma iHamu, kepha labo abangakholwa baqambela u Allah amanga, futhi baningi kubo abangaphusile.

Uma kuthiwa kubo: “Wozani kulokho u Allah akwembulele nakuSithunywa” Bathi: “Kusanele lokhu esukuthole kwenziwa obabamkhulu bethu”; nakuba oyisemkhulu babengazi lutho futhi bengekho endleleni eqondile.

Nina enikholwayo, zinakeni nina uqobo; lowo odukile akasoze anenza okubi uma nje nisendleleni eqondile; futhi niyobuyela nonke ku Allah bese enazisa ngakho konke ebenikwenza.

Nina enikholwayo, uma omunye wenu efikelwa ukufa efuna ukwaba ifa, makube nofakazi phakathi kwenu, kube amadoda amabili athembekile kini [enikholwayo] noma amabili avela kwabanye [abangakholwa]; lokhu kwenziwa uma nifikelwa umshophi wokufa nisendleleni. Uma ninokwengabaza, laba ababili kumele nibamise emuva kweSwala, bese befunga ngo Allah ukuthi: ‘angeke neze sathengisa ngaso [isifungo] noma kungaba kusihlobo imbala futhi angeke sagodla ubufakazi buka Allah, funa sibe yiziphula mthetho’.

Kepha uma kufunyaniswa ukuba laba ababili abathembekile [nakuba sebefungile]; indawo yabo iyothathwa ababili abasondelene nomufi, nabo bafunge ngo Allah ukuthi: ‘ubufakazi bethu buneqiniso ukundlula ubufakazi babo futhi angeke saphula umthetho, funa sibe ngabaphambukile.

Lokho kuqinisekisa ukuthi bethule ubufakazi ngendlela efanele nokuthi besabe ukuthi kungahle kuchithwe ukufungwa kwabo emuva kokuba kwethuliwe kunikwe abanye. Ngakhoke thobelani u Allah nilalele ngokuba u Allah akabaholi abantu abaphula umthetho.

NgoSuku lapho u Allah eyobuthanisa khona iZithunywa, uyothi: “Namukelwa kanjani na?” Ziyothi: “Thina asazi lutho, nguWena kuphela oWazi okungabonwayo”.

U Allah uyothi ku Isa indodana ka Mariyamu: “Khumbula izibusiso zaMi kuwe nakunyoko, mhla ngikusekela ngoRuhu-ul-Kudusi [uJibhira- ili]. Ubukhuluma nabantu usasewuswana nalapho usumdala. Khumbula futhi ukuthi ngakufundisa ukubhala nobuhlakani neTora ne-Ininjili; wawubumba isiqu senyoni ngomhlabathi ngemvumo yaMi, usiphefumulele sibe inyoni ephilayo ngemvumo yaMi; ulapha impumputhe nalabo abanokufa besikhumba ngemvumo yaMi; uphinde futhi uvuse abafileyo ngemvumo yaMi. Ngakuvikela kusizwe sika-Isirayeli mhla ubalethelela izibonakaliso, bathi labo ababengakholwa kubo: “lobu ubuthakathi uqobo”.

Futhi ukukhumbule ukuthi ngembulela kumaHawariya [abalandeli baka Isa] ukuthi: “Kholelwani ku kiMi nakuSithunywa Sami!”, Bathi: “Siyakholwa ngakhoke yiba ufakazi ukuthi sesingamaMusilimu”.

Khumbula mhla amaHawariya ethi: “Isa ndodana ka Mariyamu, ingabe iyakhona yini iNkosi yakho ukuba isehlisele itafula elivela ezulwini na?”. Wathi: “Thobelani u Allah uma ngempela ningabakholwayo”.

Bathi: “Sifuna nje ukudla kulo nokuthi-ke izinhliziyo zethu zaneliseke futhi sibe nesiqiniseko sokuthi ngempela usitshela iqiniso, belu siyofakaza ngalo.”

U Isa indodana kaMariyamu wathi: “Allah, Nkosi yethu, ssehlisele itafula elivela ezulwini eliyoba idili kwabokuqala nabokugcina kiithi nophawu oluvela kuWe; futhi usondle ngokuba nguWe uMondli ongcono”.

U Allah wathi: “Ngizonehlisela lona, kepha lowo kini oyophika ukholo emuva kwalokho, ngiyomujezisa isijeziso engingakaze ngijezise namunye ngaso ezizweni.

Khumbula mhla u Allah eyothi: “We Isa ndodana kaMariyamu, ingabe nguwe yini lona owatshela abantu ukuthi, ‘khonzani mina nomama wami ngaphandle kuka Allah’,”. Uyothi: “Mawungcweliswe, anginalo igunya lokusho okungelona iqiniso; ukube ngakusho ngabe uyakwazi, ngokuba ukwazi konke okukimi kepha mina angikwazi lokho okukuWe; nebala wazi konke okungabonwayo.

Ngabatshela nje lokho owangiyalela kona, ukuthi, ‘khonzani u Allah iNkosi yami nani’, futhi bengiwufakazi lapho ngisasenabo, kwathi usungithathile, kwaba nguwena obaqhaphile ngokuba Wena ubheke zonke izinto.

Uma ubajezisa bayizinceku zakho, kanti uma ubathethelela, nebala unguSomandla oKhaliphile.

U Allah uyothi: “Lolu uSuku lapho abaneqiso bayozuza ngokuba kwabo neqiniso, bayothola izivande okugeleza ngaphansi kwazo imifula, bahlale kuzo unaphakade. U Allah uthokozile ngabo futhi nabo bathokozile ngaYe. Iyonake leyo impumelelo enkulu.

Umbuso wamazulu nomhlaba nokuphakathi kwakho ungoka Allah, futhi unguMenzi wezinto zonke.

Udumo lungoluka Allah, lona owadala amazulu nomhlaba waphinde wadala ubumnyama nokukhanya; kepha labo abangakholwa benzela iNkosi yabo abalingani.

Nguyena futhi onidalile nina ngomhlabathi wabe eseninqumela isikhathi enizosiphila, futhi isikhathi esibekiwe [sokwahlulelwa] saziwa nguYe. Kepha nina nisangabaza.

Futhi ungu Allah emazulwini nasemhlabeni, wazi enikugodlayo nalokho enikubeka obala futhi wazi konke enikwenzayo.

Zonke izibonakaliso ezifika kubo [abangakholwa] zivela eNkosini yabo bazishaya indiva.

Nebala bayaliphika iqiniso uma lifika kubo; kantike maduze nje bayozwa ngemivuzo yalokho ababehlekisa ngakho.

Ingabe ababoni ukuthi ziningi izizwe ezingaphambi kwabo esazibhubhisa esabe siziphe emhlabeni lokhu esinganiphanga kona. Sathumela imvula eningi kubo [uzamcolo], sagelezisa imifula ngaphansi kwabo [izikhukhula], kwabe sesiyababhubhisa njalo ngenxa yezimpambuko zabo. Sabeke sesiletha isizwe esinye emuva kwabo.

Ukube sehlisela kuwe [Muhamadi] imibhalo esiqeshaneni, basithinte ngezandla zabo; laba abangakholwa bebezothi, ‘lokhu ubuthakathi uqobo’.

Futhi bathi: “Kungani kungalethwanga ingelosi naye na?”. Ukube saletha ingelosi, bekuyokuba umnqamula juqu futhi bebengeke banikwe ithuba.

Futhi ukube senza iSithunywa kwaba ingelosi, besisosenza indoda [engumuntu] futhi besikwengeza kulokudideka abavele sebenakho[1]. ——— [1] Ukungakholwa kuSithunywa uMuhamadi  kubangelwe ukungahlaziyi kwabo ubufakazi obukhona obukhombisa ukuthi uyiSithunywa seqiniso. Kunalokho bavike ngezizathu ezingathi shu nezingenzi mqondo. Ngakhoke ukufika kwengelosi njengesithunywa akuyikwenza mehluko ekukholweni kwabo, kunalokho bayoqhubeka nokudideka kwabo okubavimbe ekukholweni kuSithunywa  kwasekuqaleni. Bheka ngoba ukufuna kwabo ingelosi akusikho ukuthi bafuna ukukholwa kepha kungenxa yokweyisa nokuzama ukwenza inhlekisa ngeSithunywa sika Allah.

Nebala kwahlekiswa ngeZithunywa ekwandulelayo; kepha labo ababezithathela phansi [iZithunywa] bahaqwa yilokho abahlekisa ngakho [isijeziso ababexwayiswa ngaso].

Yithi: “Zulani emhlabeni, nizibonele ukuthi saba njani isiphetho salabo abaphika iqiniso”.

Yithi: “Kungokukabani lokhu okusemazulwini nasemhlabeni na?”. Yithi: “Kungokuka Allah!”. Uziqokele ukuba nomusa – nakanjani uyonibuthanisa ngoSuku loKwahlulela olungengatshazwe. Labo abazilahlekisele yilabo abangakholwa.

Futhi konke okuzinzayo ebusuku nasemini kungokwaKhe, futhi Uzwa konke Wazi konke.

Yithi: “ngingamthatha kanjani na omunye njengomhlengi wami ngaphandle kuka Allah onguMsunguli wamazulu nomhlaba futhi nguYena owondlayo ongondliwa?”. Yithi: “Ngiyalelwe ukuba ngibe owokuqala oba yiMusilimu”, futhi ungabi omunye wababhanqa u Allah.

Yithi: “Ngesaba isijeziso soSuku olukhulu uma ngephule imithetho yeNkosi yami”.

Lowo oyohlengwa kuso ngaloloSuku uyobe [u Allah] emenzele umusa, futhi iyona leyo impumelelo ecacile.

Uma u Allah ekwehlisela ubunzima akekho oyobususa ngaphandle kwaKhe, nakanjalo uma ekwehlisela okuhle, ngokuba Yena ungumenzi wezinto zonke.

Futhi nguYena onguMlawuli phezu kwezinceku zaKhe; futhi Ungokhaliphile Owazi konke.

Yithi: “Iyona yiphi into ewubufakazi obuqanda ikhanda na?”. Yithi: “Ngu Allah, nguYena ufakazi phakathi kwami nani. Futhi ngembulelwe leKurani ukuze nginikhalime ngayo kanye nalabo eyofinyelela kubo. Ingabe nifakazela ukuthi u Allah unezinye izikhonza na?”. Yithi: “Angikufakazeli lokho”. Yithi: “Nguyena yedwa vo okumele akhonzwe futhi mina angihlangene nalokho enikubhanqayo”.

Labo esabanika iNcwadi bamazi [uMuhamadi] njengoba bazi izingane zabo. Labo abazilahlekisele, yilabo abangakholwa.

Ngubani ophambuke kunalowo oqamba amanga ngo Allah noma ophika imibiko zaKhe na? Nebala [u Allah] akabaphumelelisi abaphambukile.

Futhi ngosuku lapho esiyobabuthanisa khona bonke, siyothi kulabo ababhanqayo: “Ziphi lezimbangi zenu ebenikade nizihlonzile na?”

Kepha bayovika nje ngokuthi: “Siyafunga Nkosi yethu asikaze sikubhanqe.”

Bheka ukuthi baziqambela kanjani amanga; futhi kubadukele lokhu ababekade beziqokele kona.

Kunalabo kubo [kwabangakholwa] abakulalelayo [lapho ufunda iKurani], kepha simboze izinhliziyo zabo ukuba ziyiqonde kanti nasezindlebeni zabo kunobuthulu. Yingakho nje uma befika kuwe bephikisana nawe, bathi labo abangakholwa: “Lokhu nje izinganekwane zasendulo”.

Futhi banqanda abanye [abantu] kuyo [iKurani], kanti nabo bayaqelisa kuyo. Belu bazibhubhisa bona uqobo, kepha ababoni.

Ukube ubungabona lapho sebemiswe emlilweni, sebethi: “Sifisa engabe singabuyiselwa emuva [emhlabeni], singabe sisaphika imibiko yeNkosi yethu kepha sibe ngabakholwayo”.

Empeleni sekusobala lokho ababekufihlile phambilini. Futhi uma bebengabuyiselwa emuva bebezobuyela kulokho ababenqatshelwe kona, ngokuba banamanga.

Bathi: “Impilo yethu isemhlabeni nje kuphela, asisoze savuswa”.

Ukube ubungabona lapho sebemiswe ngaphambi kweNkosi yabo; iyothi: “Ingabe lokhu akusilona iqiniso na?”. Bayothi: “Kunjalo Nkosi yethu ilona”. Iyothi: “Ngakhoke zizweleni isijeziso ngenxa yokungakholwa”.

Nebala balahlekelwe labo abathatha ukuhlangana no Allah njengamanga; kuze kube yilapho beficwa iSikhathi bengazelele, bayothi: “Saze salahlekelwa ngalokho esibe nobudedengu kukho”. Futhi bayothwala amacala abo emihlane yabo, kwaze kwakubi lokhu abekwethwele.

Impilo yalomhlaba iwumdlalo nokuchitha isikhathi; kepha umuzi wakwelizayo yiwona ongcono kulabo abathobela u Allah. Ingabe abaqondi na?

Nebala, siyazi ukuthi kukuphatha kabi lokhu abakushoyo; empeleleni abaphikisi wena kunalokho bangabaphambukile abaphika imibiko zika Allah.

Belu iZithunywa ezikwandulelayo zaphikiswa, kepha zabekezela kulokho ezazikuphikiswa futhi zathweswa kanzima kwaze kwafika usizo lweThu. Futhi akekho oyoguqula izinqumo zika Allah. Kantike izindaba zeZithunywa usuzitholile.

Uma ukuphika kwabo kunzima kuwe; thungatha imbobo emhlabeni noma isitebhisi esiya ezulwini uma ukhona, ukuze ubalethele isibonakaliso. Ukube u Allah ubethanda wayezobaqoqela bonke endleni eqondile, ngakhoke ungabi ngomunye wabayiziwula.

Labo abezwayo yibona kuphela abayokwamukela [lokho okufundisayo]; futhi labo abafile u Allah uyobavusa bese bebuyela kuYe.

Futhi bathi: “Kungani engehliselwanga isibonakaliso esivela eNkosini yakhe na?”. Yithi: “Nebala u Allah uyakwazi ukwehlisela kuye isibonakaliso, kepha iningi labo alazi”.

Zonke izilwane ezihamba emhlabeni nezinyo ezindiza ngezimpiko zazo, ziyizizwe njengani. Futhi akukho esingakuqophanga eNcwadini [uQwembe Oluvikelwe]. Belu bayobuyela eNkosini yabo.

Labo abaphika imibiko zeThu bayizithulu nezimungulu banhanhlatha ebumnyameni. Bheka ngoba u Allah udukisa amthandayo aphinde amthandayo endleleni eqondile.

Yithi: “Akenisho, uma ningafikelwa isijeziso sika Allah noma nifikelwe iSikhathi [sokububha komhlaba], ingabe niyokhuleka kwabanye ngaphandle kuka Allah na, uma ngempela ninqiniso”.

Empeleni niyokhuleka kuYe kuphela, bese enitakula – uma ethanda - kulokho enikhuleke ngakho, nikukhohlwe-ke lokhu ebenikubhanqa.

Nebala sathumela ezizweni iZithunywa ngaphambi kwakho, sabe sesibavivinya ngobuphuya nezifo ukuze bazithobe.

Kwakumele nje bazithobe [labo abangakholwa] mhla kufika isivivinyo seThu; kepha izinhliziyo zabo zaba lukhuni noShayitani wabenza bakubona kuhle lokhu ababekwenza.

Kwathi lapho sebekhohlwe yilokho ababeyalelwe kona, sabavulela iminyango yazo zonke izinto, baze bazigqaja ngalokho abanikwe kona, sabe sesibajezisa bengazelele, baphithana.

Babhujiswa labo bantu ababephambukile; uDumo lungoluka Allah iNkosi yezizwe zonke.

Yithi: “Akenisho, uma u Allah enganiphuca ukuzwa kwenu nokubona kwenu aphinde amboze izinhliziyo zenu, ngubani kulaba abakhonzwayo abayokhona ukunibuyisela kona ngaphandle kuka Allah na?”. Awubheke nje ukuthi sibahlaziyela kanjani ubufakazi kepha bona bakushaya indiva.

Yithi: “Akenisho, uma nifikelwa isijeziso sika Allah ningazelele noma mathupha, ingabe ubani oyobhujiswa ngaphandle kwalabo abaphambukile na?”

Sithumele iZithunywa ukuba zethule izindaba ezinhle ziphinde zixwayise. Ngakhoke lowo okholwayo futhi enze okuhle, akayikusaba futhi akayikuba lusizi.

Kepha labo abaphika izimbulo zethu, bayotholwa isijeziso ngenxa yokuphula kwabo umthetho.

Yithi: “Angisho kini ukuthi nginemicebo ka Allah noma ngazi lokho okungabonwayo futhi angisho kini ukuthi ngiyingelosi, kuphela nje ngilandela lokho okwembulelwa kimi”. Yithi: “Ingabe impumputhe iyefana nobonayo na, kungani ningacabangisisi na?”

Yexwayisa ngayo [iKurani] labo abesaba ukuba bayovuselwa eNkosini yabo hleze bathobele u Allah, bheka ngoba ngaphandle kwaKhe abanamhlengi noma umkhulumeli.

Futhi ungabaxoshi labo abakhuleka eNkosini yabo ekuseni nantambama befuna ukuyithokozisa. Akusiwo umsebenzi wakho ukubahlulela futhi akusiwo umsebenzi wabo ukwehlulela, funa ubaxoshe bese uba ngomunye wabaphambukile.

Sibavivinya kanjalo abanye babo ngabanye ukuze bathi: “u Allah angabusa laba ngaphakathi kwethu na?”[1]. Ingabe akusiyena yini u Allah obazi kangcono ababongayo na? ——— [1] Lawa ngamagama ayeshiwo yiziqonga zombuso nezikhulu, lapho zibona laba ababethathwa njengabafokazana nezichaka kuyibona abamukela i-Isilamu ngobuningi. Bakusho lokho bezigqaja beqonde ukuthi, ukube le-Isilamu bekuyinto enhle lemfuxuza yabantu bekungeke kube iyona ebusiswa ngayo. Lokhu kukhombisa ngokusobala ukuthi ubugwili nezikhundla eziphezulu azikuqisekisi ukuthi umuntu uyolibona iqiniso. Ngakhoke kuwubuwula ukucabanga ukuthi izigwili neziqonga zemibuso yizona ezikhaliphile kunabanye ekuboneni iqiniso le-Isilamu.

Uma labo abakholelwa kuzambulo zethu beza kuwe, Yithi: “Ukuthula makube kini; iNkosi yenu iziqokele umusa, owukuthi uma umuntu enza okubi ngenxa yokungazi bese ezisola emuva kwalokho enze okuhle, nakanjani u Allah Ungothethelelayo Onesihawu”.

Sizicacisa kanjalo imibiko ukuze icace bha indlela yezigilamkhuba.

Yithi: “Nginqatshelwe ukukhonza lokhu enikhonzayo ngaphandle kuka Allah”. Yithi: “Angilandeli izinkanuko zenu, funa ngiduke ngibe ngolahlekile”.

Yithi: “Nginobufakazi obuvela eNkosini yami kepha nina niyabuphika; anginakho lokhu enikujahile. Phela izinqumo zithathwa ngu Allah kuphela, unilandisa iqiniso futhi unguMehluleli ongungothi”.

Yithi: “Ukube benginakho lokhu enikujahile, bekuyoba umaqamula juqu phakathi kwami nani, futhi u Allah ubazi kahle labo abaphambukile”.

Nguyena [u Allah] ophethe izikhiye zakulokho okungabonwayo, akekho ozaziyo ngaphandle kwaKhe. Wazi konke okusemhlabeni nasezilwandle. Ngisho icembe uma liwa esihlahleni uyalazi; konke okuwuhlamvu olusebumnyameni [emathunjini] omhlaba nokuthambile nokomile kuqoshiwe eNcwadini ecacile [uQwembe Oluqashiwe].

Nguyena [u Allah] othatha imiphefumulo yenu ebusuku [uma nilala] futhi wazi lokho ebenikwenza emini, ube esenivusa emini ukuze niqede isikhathi esibekiwe [sempilo], emuva kalokho niyobe senibuyela kuYe, bese enilandisa ngalokho ebinikwenza.

Futhi unguMlawuli phezu kwezinceku zaKhe; uthumela izinqaphi [izingelosi] kini, kuthi lapho ukufuka sekufika komunye wenu, izithunywa [izingelosi] zeThu zithathe umphefumulo wakhe futhi azinabo ubudedengu.

Bayobe sebebuyiselwa ku Allah uMhlengi wabo weqiniso; nebala ukwehlulela kungokwakhe futhi wehlulela ngokushesha.

Yithi: “Ngubani oyonihlenga ebumnyameni basemhlabeni nasolwandle uma nikhuleka kuye ngokuzilahla buthule, [nithi]: “Uma nje ungasihlenga kulokhu siyoba ngababongayo”.

Yithi: “Ngu Allah oyihlenga kukho [ubumnyama] nakubo bonke obunye ubunzima, kepha yinina futhi enimbhanqayo.

Yithi: “Uyakwazi ukuletha isijeziso kini, ngaphezu kwenu nangaphansi kwemilenze yenu, noma avele anihlakaze nibe ngamaqembu bese nilwa nodwa”. Awubheke nje ukuthi sibahlaziyela kanjani imibiko ukuze baqondisise.

Kepha isizwe sakho sayiphika [iKurani] nakuba iyiqiniso. Yithi: “Angisiyena umqaphi wenu”.

Lonke udaba lunesiphetho, kungekudala niyokwazi.

Uma ubona labo abakhuluma kabi imibiko yeThu, suka kubo kuze kube bakhuluma ngolunye udaba. Uma kwenzeka uShayitani ekwenza ukhohlwe, wase wakhumbula emuva kwalokho ungabe usahlala nabantu abaphambukile[1]. ——— [1] Lesisambulo sichaza ngokusobala ukuthi labo abahlanekezela izincazelo zezambulo zika Allah nalabo abahlekisa ngazo akumele iMusilimu lihlale nabo lizibandakanye kuleyonkulumo noma ngabe unenhloso yokuqophisana nabo.

Labo abathobela u Allah abayikuthwesa nakancane icala labo [abaphambukile], kepha ukuba babakhumbuze hleze nabo bazothobela u Allah.

Bayeke labo abathatha ukholo lwabo njengomdlalo nento yokuchitha isikhathi futhi badidekiswa impilo yasemhlabeni. Kunalokho yeluleka ngayo [iKurani] funa umuntu awele embujisweni ngenxa yezenzo zakhe; futhi akekho oyomhlenga noma amshwelezele ngaphandle kuka Allah, noma angaletha yonke inhlengo, angeke yamukelwe kuye. Yibona kanye labo abawele embujisweni nganxa yezenzo zabo. Bayothola isiphuzo esibilayo nesijeziso esibuhlungu ngenxa yokungakholwa kwabo.

Yithi: “Singakukhonza kanjani lokho okungasisizi nokungeke kwasilimaza ngaphandle kuka Allah na, funa sibuyele nyovana emuva kokuba u Allah esihlengile, njengalowo ophicwe nguShayitani emhlabeni waba okhungathekile, belu unabangani abamubizela endleleni eqondile [bethi]: “yiza kithi”. Yithi: “Ukuholwa ngu Allah yikona kuholwa kwangempela, futhi siyalelwe ukuba sizinikele eNkosini yezizwe zonke”.

Nokuthi nenze iSwala ngokuqikelela futhi nimuthobele [u Allah], ngokuba nguYena eniyovuselwa kuYe.

Futhi nguYe [u Allah] odale amazulu nomhlaba ngeqiniso, futhi mhlazane ethi: ‘yenzeka” kuvele kwenzeka ngokuba iZwi laKhe liyiqiniso. Futhi umbuso woSuku lapho kuyoshaywa khona icilongo bungobaKhe, wazi okungabonwa nokubonwayo, ungoKhaliphile Unolwazi lwakho konke.

Futhi khumbula lapho u Ibhirahimu ethi kuyise u-Azaru: “Ingabe uthatha izithixo njengezikhonzwa na, nebala nginibona wena nabantu bakho nisekudukeni okusobala”.

Kanjalo sambonisa u-Ibhirahimu umbuso wamazulu nomhlaba ukuze abe omunye wabanesiqinseko.

Kwathi lapho ehlwelwa ebusuku wabona inkanyezi wathi: “lena iNkosi yami”, kepha kwathi lapho ishabalala wathi: “Angizithandi izinto ezishabalalayo”.

Kwathi futhi lapho ebona inyanga iphuma wathi: “Lena iNKosi yami”, kepha kwathi lapho ishabalala wathi: “Uma iNkosi yami ingangiholeli endleleni eqondile ngizoba omunye wabadukile”.

Kuthe lapho esebona ilanga liphuma wathi: “Lena iNkosi yami, lena inkulu”, kepha kwathi malishone wathi: “Bakwethu, mina angihlangene nalokho enikubhanqayo”.

Ngibhekise ubuso bami ngobumsulwa kulowo owasungula amazulu nomhlaba futhi angisiye omunye walaba ababhanqayo.

Isizwe sakhe saphikisana naye, wathi: “Ningiphikisa ngo Allah kube kunguYena ongiholile, futhi angekwesabi lokhu enikubhanqa naYe [u Allah], ngaphandle uma iNkosi yami kukhona ekufuna kwenzeke, ngokuba iNkosi yami yengamele yonke into ngolwazi, kungani ningayaleki na?”

Ngingangekwesaba kanjani lokhu enikubhanqile nibe nina ningesabi ukuthi nibhanqa u Allah ngalokho anganinikanga bufakazi ngakho. Yilona liphi iqembu eliphephile kulana amabili [abakholwayo nababhanqayo] uma ninolwazi.

Labo abakholwayo futhi bengadungi ukholo lwabo ngempambuko; yibo kanye-ke labo abayophepha futhi yibona abasendleleni eqondile.

Yibo-ke lobo ubufakazi esabunika u-Ibhirahimu ukubhekana nabantu bakubo. Futhi senyusa amazinga alabo esibathandayo, bheka ngoba iNkosi yakho Ikhaliphile Yazi konke.

Samupha [u Ibhirahimu] u Isihaki no Yakubhu, bonke sabaholela endleleni eqondile. Kanjalo no Nuhu ngaphambilini samuholela endleleni eqondile. Kanti u Dawuda, uSulayimani, u Ayubu, u Yusufu, uMusa kanye no Haruna bawuzalo lwakhe [u Nuhu]. Sibahlomulisa kanjalo abenzi bokuhle.

Kanjalo [saholela endleleni eqondile] u Zakariya no Yahiya no Isa no Iliyasi, bonke babeqotho.

Nakanjalo [saholela endleleni eqondile] u Isima’ili no Aliyasa’i no Yunusi no Luti, bonke sibaqokile ezizweni.

Nabanye koyise babo nozalo lwabo kanye nabafowabo sabaqoka sase sibaholela endleleni eqondile.

Yikona lokho ukuhola kuka Allah, uhola ngakho amthandayo ezincekwini zaKhe. Ukube babhanqa u Allah, yayiyoshabalala imisebenzi [emihle] yabo.

Yibo ke labo esabanika iMibhalo neMiyalelo noButhunywa; umake laba bengakukholwa lokhu, sesivele sesilungiselele abanye ngakho abangeke bakuphika lokhu.

Yibona futhi laba [iZithunywa] u Allah abaholele endleleni eqondile, ngakhoke hamba endleleni yabo. Uthi: “Angifuni mvuzo kini [ngokunindlulisela iKurani]; kuphela nje, iyisikhumbuzo ezizweni zonke.

Abamhloniphanga u Allah ngendlela okumele bamhloniphe ngayo, mhla bethi: “U Allah akembulelanga lutho kumuntu”. Yithi: “Ngubani owembulela iNcwadi lena eyafika noMusa iwukukhanya nenkokhelo kubantu, nayenza iziqeshana, naveza ingxenye yayo kepha nagodla okuningi. Futhi nafundiswa izinto ebeningazazi nina noyihlo mkhulu”. Yithi: “Ngu Allah”, bese ubayeka kanjalo bendlala ekudukeni kwabo.

Lenake iNcwadi [iKurani] esiyambulele, ibusisekile ifakazela leyo eyandulelayo futhi ukuze ukhalime abantu base Umulikura [iMakha] kanye nalabo abayakhele. Futhi labo abakholwayo bayakholelelwa kuyo [iKurani] futhi bayaqikelela ukwenza iSwala ngesikhathi.

Ingabe ukhona yini ophambuke ukudlula lowo oqambela u Allah amanga noma athi: “Ngembulelwe” kube kungekho lutho olwembulelwe kuye, nalowo othi: “Ngizokwembulela okufanayo nalokho okwembulelwe ngu Allah”. Ukube ubungabona labo abaphambukile bejuqwa iminjunju yokufa, ngala, izingelosi [zokufa] zivule izandla zazo [zithi]: “Khiphani imiphefumulo yenu, namhlanje nizojeziswa ngesijeziso esihlazisayo ngenxa yalokho enanikusho ngo Allah kungeqiniso futhi nanizigqaja ngezambulo zaKhe”.

Nize kithi [manje] ngamunye njengoba sanidala kwasekuqaleni, nakushiya emuva kwenu konke lokhu esasinikunike kona, futhi asiziboni izikhulumeli zenu lezi ebenithembe ukuthi zingabalingani [ku Allah]. Nebala buphelile ubuhlobo phakathi kwenu futhi nalahlekelwa yilokhu ebenikuthembile[1]. ——— [1] Lokhu ubufakazi obuqanda ikhanda ukuthi labo abakholelwa ekutheni kunabantu okuyibona abakhulumela ku Allah, kwabaphilayo noma kwabashona, imbudane engenabufakazi neze elingenasisekelo. Wonke uyakhona ukubhekisa noma yini ku Allah lapha emhlabeni futhi ngoSuku lokwaHlulela akekho oyomela omunye ngemisebenzi yakhe, yilelo xoxo nexoxo liyozigxumela. Uma umuntu eseshonile usuke esebhekene nemivuzo yemisebenzi yakhe ayenze esaphila akanaso isikhathi sokucelela noma ukukhulumela abanye.

Nebala, u Allah nguyena oqhekeza uhlamvu lwenhlwanyelo nendumba yesundu. Udala okuphilayo kulokho okufile, adale okufile kulokho okuphilayo. Ngu Allah owenza konke lokho, ngakhoke nikushaya kanjani indivana?

[u Allah] Uletha ukusa [ekuseni] futhi wenze ubusuku baba isikhathi sozinzo, kwathi ilanga nenyanga wakwenza kwahamba ngesikhathi esibekiwe. Lokho kuhlelwe nguSomandla Owazi konke.

Futhi [u Allah] nguYena onenzele izinkanyezi ukuze nizisebenzise ukunihola ebumnyameni basemhlabeni nasezilwandle. Nebala sizicacise kahle izibonakaliso labo abanolwazi.

Futhi nguYe onidale ngomphefumulo owodwa [ka Adamu], wanenzela indawo lapho niyohlala khona [esinyeni sika mame] nalapho niyolondolozwa khona [emqolo wesilisa]. Nebala sizicacisile izibonokaliso kulabo abaqondasisayo.

Kuphinde kube nguYe [u Allah] onehlisela imvula, sabe sesikhiqiza ngayo izitshalo zezinhlobo zonke, esikhiqiza kuzo uhlaza esikhiqiza kulo izinhlavu eziyisixha; nesixha esilengela eduze kwimpova yesundu, nezivande zemivini kanjalo nomhlwathi nehanadi okufanayo [nagamacembe] nokungafani [ngezithelo]. Bhekani ezithelweni zaloluhlaza lapho sezithela nalapho sezivuthwa. Nebala kulokho kunezibonakaliso kubantu abakholwayo.

Futhi [abangakholwa] baqokele u Allah abalingani bamaJini nakuba kunguYena [u Allah] obadalile. Baphinda bamsisela ngamadodana namadodakazi bengenalwazi[1]. Ungcwele Yena futhi Uphakeme kulokho abakuphawulayo. ——— [1] AmaJuda athi iSithunywa u Uzayiri indodana ka Allah, kwathi amaNasarina wona athi, u Isa indodana ka Allah. Abanye bona bathi izingelosi ngamadodakazi ka Allah, okufaka phakathi lenkolelo kaNomkhobolwane. Bonke labantu abanabo nobu bodwa ubufakazi obuvela ku Allah ngalokho abakuphawulayo.

[u Allah] Ungumsunguli wamazulu nomhlaba; angaba kanjani nengane ebengenaye umfazi na?. Futhi udale yonke into futhi uyazi yonke.

Nguyenake loyo u Allah iNkosi yenu, akekho ofanelwe ukukhonzwa ngaphandle kwakhe, unguMdali wezinto zonke, ngakhoke mkhonzeni, futhi unguMnakekeli wezinto zonke.

Akabonwa ngamehlo kepha uyawabona, futhi Unobuchule Wazi ngakho konke.

Nebala zifikile kini izimvulamehlo zivela eNkosini yenu. Lowoke oyovula amehlo uzisiza yena uqobo, futhi lowo ozozenza impumputhe uzilamaza yena uqobo. Belu angiqokwanga ukuba ngumuqhaphi wenu.

Sizicacisa kanjalo imibiko, baze bathi [abangakholwa]: “uzifundele”, empeleni sizicacisela labo bantu abanolwazi.

[Muhamadi] Landela lokho okwembulelwe kuwe kuvela eNkosini yakho – akekho ofanelwe ukukhonzwa ngaphandle kwaYo – futhi ungazibandakanyi nalabo ababhanqayo.

Ukube u Allah bekathanda bebengeke bambhanqe; belu asikuqokanga ukuba ingqaphi yabo [abangakholwa], futhi awusiyena umnakekeli wabo.

Futhi ningabobathuka labo abakhonza okunye ngaphandle kuka Allah, funa bathuke u Allah ngenzondo nokungabi nalwazi. Bheka ngoba senza sonke isizwe saboma izenzo zabo kuyinto enhle, futhi bayobuyela ku eNkosini yabo ibazise ngalokho ababekwkenza.

Bafunga ngo Allah bagomela ukuthi uma kufika kubo isibonakaliso bayosikholwa nakanjani. Yithi: “Izibonakaliso ziku Allah, futhi nazingani, uma zifika bangahle bengakholwa?”.

Futhi siguqule izinhliziyo zabo nokubona kwabo, njengoba bengafunanga ukukholwa kuyo [iKurani] zibekwa nje, sabashiya benhlanhlatha ekuphambukeni kwabo bengaboni.

Ukube sabalethela izingelosi noma abafile bakhulume nabo [mathupha] noma sibalethele yonke into phambu kwabo, angeke bakholwe ngaphandle uma u Allah ethanda, kepha iningi labo alinalwazi.

Kanjalo senzela zonke iZithunywa izitha zoShayitani babantu nabamaJini abalekelelanayo ekubekeni amagama akhangayo adukisayo. Kepha uma u Allah ethanda bebengeke bakwenze, ngakhoke bayeke kanjalo namanga abawaqambayo.

Labo abangakholwa yibona abayowalalela [amagama akhangayo adukisayo] futhi bayowamukela bese benza lokho abayokwenza.

[Yithi] “Ngingamqoka kanjani omunye ngaphandle kuka Allah ukuba abe umehluleli na, kube kunguYena [u Allah] onembulele iNcwadi ecacisa konke”. Futhi labo esabanika iNcwadi bayazi ukuthi ize neqiniso ivela eNkosini yabo. Ngakhoke ungabi ngonokungabaza.

Izwi [iKurani] leNkosi yakho lineqiniso eliphelele [kwelikushoyo] nobulungiswa obuphelele [kwimiyalelo], akekho oyophinde aguqule amaZwi aKhe [u Allah], futhi Ungozwayo Owaziyo.

Uma uzolalela iningi lalabo abasemhlabeni bayokuphambukisa endleleni ka Allah, ngokuba balandela imindlizo nje futhi baqamba amanga.

Nebala, iNkosi yakho ibazi kahle labo abadukayo endleleni yaYo futhi ibazi kahle nalabo abasendleleni eqondile.

Dlanini kulokho okubizwe kukho igama lika Allah uma ngempela nokholwa kuzambulo zaKhe.

Yini ngani ningadli kulokho okubizelwe kukho igama lika Allah, belu unicacisele lokho aninqabele kona ngaphandle uma niphoqwa yindlala. Nebala iningi labantu liyaduka ngenxa yezinkanuko zabo bengazi. INkosi yakho ibazi kahle labo abayiziphula mthetho.

Yekelani amanyala asobala nawangasese, nebala labo abenza amanyala bayojeza ngalokho abakwenzayo [okubi].

Futhi ningadli kulokho okungabizelwana igama lika Allah ngokuba kuyimpambuko. Futhi Oshayitani bayacobelelana nozwakwabo ukuze baqophisane nani; uma nike nabalalela niyoba ngamaMushiriku [ababhangqi].

Lowo obekade efile sabe sesimupha impilo samnika nokukhanya ahamba ngakho phakathi kwabantu, ingabe uyefana yini nalowo osebunyameni angasoze aphuma kubo. Kanjalo, laba abangakholwa kwenziwe kwakuhle kubo lokhu abakwenzayo.

Nakanjalo senza kwabakhona kuzo zonke izizwe izikhulu zezigilamkhuba zakhona ukuze kube ezakha amasu; empeleni bazakhela bona amasu kepha ababoni.

Uma kufika kubo isibonakaliso bathi: “Angeke neze sakholwa kuze kube sinikwa lokho okwanikwa iZithunywa zika Allah”. U Allah nguYena owazi kangcono ngazomqokela umbiko waKhe. Labo abayiziphula mthetho bayodicilileka ku Allah bathole nesijeziso esinzima ngenxa yamaqhinga abawenzayo.

Lowo u Allah afuna ukumholela endleleni eqondile, uvula inhliziyo yakhe ukwamukela i-Isilamu, kuthi lowo afuna ukumdukisa wenza inhliziyo yakhe icinane yenqene [ukwamukela iqiniso], ongathi wenyekela emkhathini; uyobajezisa kanjalo-ke u Allah labo abangakholwa.

Lena indlela eqondile yeNkosi yakho; nebala sibacacisele imibiko labo abanokuqonda.

Bayongena Emzini Wokuthula [iJana] eNkosini yabo, futhi iyoba umhlengi wabo ngenxa yalokho ababekwenza.

Futhi ngoSuku lapho siyobabuthanisa bonke [abantu], [siyothi]: “Nina maJini nezwe kwakuningi ebantwini [nibadukisa]!. Abangani babo kubantu bayothi: “Nkosi yethu sizuzisene kwaze kwafika isikhathi osibekele sona”. Uyothi [u Allah]: “Niyohlala eMlilweni unaphakhade ngaphandle kwalokho okuthandwa ngu Allah”. Nebala iNkosi yakho iKhaliphile iYazi.

Futhi kanjalo, sibabhanqa bodwa labo abaphambukile ngenxa yezenzo zabo.

Nina maJini nabantu, azizange zifike yini iZithunywa ezivela ngaphathi kwenu zinilandisa ngezambulo zaMi futhi zinixwayisa ngokufika kwenu kuloluSuku na?. Bayothi: “Nembala, singofakazi kithina uqobo”; - kepha bayengwa impilo yasemhlabeni –bazifakazela bona uqobo ukuthi bebengakholwa.

Lokho, yingoba iNkosi yakho ayiyibhubhisi indawo ngenxa yempambuko abantu bakhona bengazi bengazelele.

Bonke [abantu] banezigaba ngokwezenzo zabo, futhi akusikho ukuthi iNkosi yakho ayikunakile lokho abakwenzayo.

Futhi iNkosi yakho iZimele Inomusa; uma ithanda inganishabalalisa nonke bese iletha emuva kwenu indalo ayithandayo, njengoba nani anikhipha ozalweni lwabanye abantu.

Nebala lokho enithenjiswe kona kuzofika, futhi ngeke naphunyuka.

Yithi: “Bantu bakithi, yenzani enikwenzayo lapho nikhona nami ngizokwenza engikwenzayo,; maduzane nje nizokwazi ukuthi nguba oyophetha ngokuphumelela eJana, belu abaphambukile abasoze baphumelele.

Futhi babele u Allah kulokho akudalile kuzitshalo nemfuyo, bathi – ngokusho kwabo: “Lokhu kungokuka Allah, kuthi lokhu kube ngokweZikhonzwa zethu”. Lokhu okwabelwe iZikhonzwa zabo akulokothi kuye ku Allah, kepha lokhu okwabelwe u Allah kuyaya kuZikhonzwa zabo. Yaze yayimbi indlela abathatha ngazo izinqumo.

Kanjalo futhi iZikhonzwa zabo zibayenge ngokubulala abantwana babo[1], bebadukisa futhi bebadungela inkolo yabo. Uma u Allah bekathanda bebengeke bakwenze, ngakhoke bayeke nalokho abakwenzayo. ——— [1] Njengosiko lokugingiswa kwewele okwakukholelwa ukuthi liletha amashwa. Kanye nomkhuba wokuhulula isisu osundlangile esikhathini samanje.

Futhi bathi: “Lezi zilwane [ezifuywayo] nezitshalo kunqatshelwe, akekho okumele azidle ngaphandle kwalowo othandwa yithi” – ngokusho kwabo; lezilwane kunqatshelwe ukuba zigitshelwe, kuthi ezinye azibizelwa iGama lika Allah [uma zihlatshwa] njengenye yezindlela zokumqambela amanga [u Allah]. Uzobanika [u Allah] umvuzo wabo ngalamanga abawaqambayo.

Baphinde bathi: “Konke okusesiswini zalezilwane kudliwa abesilisa kuphela [uma kuzalwa kuphila] futhi kunqatshelwe kubafazi bethu”. Kepha uma [kuzalwa] kuyincuba badla bonke[1]. Uzobanika [u Allah] umvuzo wabo ngabakushoyo, ngokuba Yena Ungokhaliphile Onolwazi. ——— [1] Lokhu kufaka phakathi umkhuba wokuhlonza izitho zesilwane esihlatshiwe ngokuthi lesi esezalukazi lesi esamakhehla lesi esabafana noma lesi asidliwa ngozibanibani nozi banibani. Konke akunasisekelo nobufakazi obuphathekayo, kepha imikhuba nje esuselwa kuzinkolelo zezasendulo. Kanjalo nenkolelo yokuthi abantubesibongo esithize abayidli inyama yesilwane esithize. Phela akekho onelungelo lokunqabela lokhu u Allah akuvumele.

Nebala balahlekelwe labo ababulala abantwana babo ngobuphukuphuku nobuwula baphinde futhi bazinqabele lokho u Allah ababele kona, belu beqambela u Allah amanga. Ngempela badukile futhi abekho endleleni eqondile.

Nguyena [u Allah] odale izivande eziphanyekiwe [njengomvini] nezingaphanyekwanga namasundu nohlaza olunezithelo ezahlukene [ngokunambitheka], nemihlwathi namahanadi afanayo [ngokubukeka] futhi ebe engafani [ngokunambitheka]. Dlanini kuzithelo zaso uma sesithelile futhi nikhiphe ilungelo laso [iZaka yezitshalo] mhla sesivunwa, ningaxhaphazi, ngokuba [u Allah] akabathandi abaxhaphazayo.

[Wadala] futhi nasezilwaneni ezifuywayo lezo ezikhona ukuthwala imithwalo kanye nalezo ezingakhoni ukuthwala imithwalo [okusetshenziswa izikhumba zazo kuphela]. Ngakhoke dlanini kulokho u Allah anabele kona futhi ningalandeli ezinyathweleni zika Shayitani, ngokuba uyisitha senu esiqavile.

[Wadala izilwane ezifuywayo] zaba izinhlobo eziyisishagalombili; ezimbili ezimvini [iduna nensikazi] ezimbili ezimbuzini [iduna nensikazi]. Yithi [Muhamadi]: “Ingabe unqabele amaduna amabili noma izinsikazi ezimbili noma lokho okuseziswini zezinsikazi ezimbili na? Ngaziseni ngokufakazelwa ulwazi uma ngempela nineqiniso”.

Futhi ezimbili kumakameli [iduna nensikazi] nezimbili ezinkomeni [iduna nensikazi]; Yithi [Muhamadi]: “Ingabe unqabele amaduna amabili noma izinsikazi ezimbili noma lokho okuseziswini zezinsikazi ezimbili. Noma mhlawumbe nanikhona mhla u Allah eniyalela ngalokhu na?” Ingabe ukhona yini ophambuke ukudlula lowo oqambela u Allah amanga, ukudukisa abantu engenalwazi. Nebala, u Allah akabahlengi abantu abaphambukayo.

Yithi [Muhamadi]: “Angitholi kulokhu okwembulelwe kimi okunqatshelwe ukuba umuntu akudle, ngaphandle uma kuyincuba noma igazi eligelezayo [ububende] noma inyama yengulube – ngokuba kuwukungcola – noma lokho okuyimpambuko okuhlatshelwe abanye ngaphandle kuka Allah. Kepha lowo ophoqwa yisimo engahlosile ukuba yihlongandlebe noma isaphulamthetho, bheka ngoba iNkosi yakho Ingumthetheleli Onesihawu”.

Labo abangamaJuda sabanqabela yonke into enezinyawo ezihlangene [njengekameli nedada], saphinde sabanqabela enkomeni nasezimvini [nezimbuzi] amanoni azo, ngaphandle kwalawo anamathele emhlane wazo noma emathunjini noma ahlangene nethambo. Lokho, besibajezisa ngenxa yobuhlongandlebe babo futhi siqinisile ngempela.

Uma bekuphikisa, yithi: “iNKosi yenu inesihawu esiyinala futhi akekho oyonqanda isijeziso saYo kubantu abayizigilamkhuba”.

Bazothi laba ababhangqayo: “Uma u Allah ubethanda ngabe asibhangqanga thina noba obabamkhulu bethu futhi ngabe asinqabelanga lutho. Labo ababanduleyo baphika kanjalo kwaze bathola isijeziso seThu. Yithi: “Ingabe ninolwazi yini, nisikhiphele lona, empeleni nilandela imidlinzo nje futhi niqamba amanga nje”.

Yithi: “Ubufakazi buka Allah bungumnqamula- juqu, futhi ukube ubethanda ubezobaholela endleleni eqondile bonke.

Yithi: “Lethani ofakazi benu labo abafakaza ukuthi u Allah wenqabele lokhu”. Uma befakaza, ungafakazi nabo futhi ungalandeli izinkanuko zalabo abaphika imibiko yeThu nalabo abangakholelwa kweLizayo futhi bebe benzela iNkosi yabo abalingani.

Yithi: “Wozani nginilandise ngalokho iNkosi yenu eninqabele kona; ukuba ningayibhangqi nalutho futhi niphathe kahle abazali, ningabulali abantwana benu nesaba indlala – Thina sizonondla nina kanye nabo, ningazisondezi namachilo esidlangalaleni nangasese, ningakhiphi umphefumulo lona u Allah awenze igugu ngokungemthetho; yikona lokho Eniyalele ngakho ukuze niqondisise”.

Futhi ningasondeli kumcebo wentandane ngaphandle uma ufuna ukwenza okuhle ize iyakhula. Futhi ngobulungiswa nigcwalise izikali – u Allah akamethwesi umuntu umthwalo ongaphezu kwamandla akhe. Futhi uma nikhuluma [nethula ubufakazi], yibani nobulungiswa noma kungaba isihlobo, futhi nigcine isibophezelo sika Allah; yikona lokho Eniyalela ngakho ukuze nilalele.

Nanokuthi lena indlela yaMi eqondile yilandeleni, ningalandeli izindlela ezizoqhekeza niduke endleleni yaYo [iNkosi yenu]; yikona lokho Eniyalela ngakho ukuze nithobele u Allah.

Futhi sanika uMusa iNcwadi ephelelisa lokho okuhle ebekwenza iphinde ichaze yonke into futhi iwumhlahlandlela nomusa, ukuze bakholwe ukuthi bayohlangana neNkosi yabo.

Lena iNcwadi ebusisekile esiyehlisele, ngakhoke yilandeleni futhi nithobele u Allah ukuze nithole umusa.

Funa nithi [nina eningakholwa]: “iNcwadi yehliselwa kulamaqembu amabili [amaJuda namaNasarina] asandulelayo futhi besingazihluphi ngokufunda ngabo”.

Noma nithi: “Ukube yehliselwa kithi iNcwadi, besizoqonda ukudlula bona”. Nebala ubufakazi obuvela eNkosini yenu bufikile kini kanye nomhlahlandlela nomusa. Ingawe ukhona ophambuke ukudlula lowo ophika izibonkaliso zika Allah aphinde azibalekele. Sizobajezisa kabuhlungu labo ababalekela izibonakaliso zika Allah ngaenxa yokubaleka kwabo.

Ingabe balinde ukuba izingelosi zifike kubo noma kufike iNkosi yakho noma ezinye zezibonakaliso zeNkosi yakho na? Ngosuku lapho okuyofika ezinye zezibonakaliso zeNkosi yakho, ukholo lomuntu angeke lumsize ngalutho uma ubekade engakholwa ngaphambilini noma enze okuhle okholweni lwakhe. Yithi: “Lindani nathi silindile”.

Nebala, labo abahlakaza inkolo yabo babe ngamaqembu, akukho lutho oluhlanganise nabo, udaba lwabo luku Allah futhi uyobazisa ngalokho abakwenzayo.

Lowo owenza okuhle, uyothola umvuzo walokho ophindwe kashumi, kuthi lowo owenza okubi ajeziswe kuphela ngokulingene lokho futhi abayikukwenziwa isisulu.

Yithi: “Nebala iNkosi yami ingiholele endleleni eqondile, inkolo eyisisekelo, inkolo kaIbhirahimu omsulwa futhi wayengeyena umbhangqi.

Yithi: “iSwala yami nezinkambiso zami nempilo yami nokufa kwami [konke] kungokuka Allah, iNkosi yezizwe zonke”.

Akanamlingani; yilokho engiyalelwe kona futhi ngiwokuqala ukuba yiMusilimu [ozinikela entandweni ka Allah].

Yithi: “Ngingamthatha kanjani omunye njengenkosi ngaphandle kuka Allah kube kunguYena iNkosi yezinto zonke. Futhi konke umuntu akwenzayo kuwumthwalo wakhe, belu akekho oyothwalela omunye umthwalo wakhe. Futhi niyobuyela eNkosini yenu bese inazisa ngakho konke lokhu ebeniphikisana ngakho.

Nguyena [u Allah] onenze izizukulwane ezilamanayo emhlabeni, waphakamisa izinga labanye phezu kwelabanye izigaba ukuze anivivinye kulokho aniphe kona. Nebala iNkosi yakho ijezisana ngokushesha injalo nje Iyathethelela Inesihawu.