Zuluca Meal — Âdil Ca'fer — A'raf 7:1 – Nahl 16:128

Alif Lam Mim Swad.

INcwadi esayehlisela kuwe ukuze wexwayise ngayo futhi ibe yisikhumbuzo kulabo abakholwayo, ngakhoke mawungabi nokwenqena enhlizweni yakho.

Landelani lokho okwehliselwe kini kuvela eNkosini yenu, futhi ningalandeli ngaphandle kwaYo [iNkosi yenu] abanye abangani.

Futhi ziningi izizwe esazibhubhisa, isijeziso seThu safika kubo ebusuku noma emini bethathe isihlwathi.

Awukho omunye umkhuleko ababewusho mhla kufika isijeziso seThu, ngaphandle kokuthi bathi: “Nebala siphambukile”.

Nakanjani siyobabuza labo okwathunyelwa kubo [iZithunywa] futhi sizozibuza neZithunywa imbala.

Futhi siyobalandisa ngolwazi [konke abakwenzayo], phela akusikho ukuthi besingekho.

Futhi iSikali [sezenzo] siyiqiniso ngaloloSuku; lowo isikali sakhe siyoba nesisindo, yibo labo abayophumelela.

Kuthi lowo isikali sakhe siyoba lula, yibo labo abazilahlekelisele ngenxa yokuphambana nezambulo zethu.

Nebala sanibeka emhlabeni sanenzela kuwo impilo, kepha kuncane enikubongayo.

Futhi sanidala sanibumba sase sithi ezingelosini: “Iwani ngobuso nikhothamele u Adamu”; zakhothama ngaphandle kuka Ibhilisi akakhothamanga nabanye[1]. ——— [1] U Ibhilisi wayengeyona ingelosi kepha uyiJini elavunyelwa ngu Allah ukuba lihlale nezingelosi (Bheka, 18:50 ). Ngakhoke izinkolelo zokuthi u Ibhililsi wayeyingelosi eyaxoshwa ngenxa yokuthi yazima ukuzenza uMdali, yadala impukane ithi izama ukudala inyosi; lena imbudane uqobo.

Wathi [u Allah]: “Uvinjwayini ukukhothama lapho ngikuyalela na?”. Wathi [u Ibhilisi]: “Mina ngingcono kunaye [u Adamu], ngokuba mina ungidale ngomlilo kulapho yena umdale ngothuli”.

Wathi [u Allah]: “Hamba la, awunalo igunya lokuzigqaja lapha; phuma, futhi uyoba ngongenasithunzi.

Wathi: [u Ibhilisi] “Ngiphe impilo ende kuze kube uSuku lokuVuswa”.

Wathi [u Allah]: “Nakanjani ungomunye walaba abanikwe impilo ende”.

Wathi [u Ibhilisi]: “Njengoba usungudukisile, ngizobavimba [uzalo luka Adamu] ukuba babe sendleleni yaYho eqondile”.

Futhi ngiyohlasela ngaphambili, ngemuva, ngakwesokudla nangakwesokunxele kwabo; futhi uyofumanisa iningi labo lingabongi.

Wathi [u Allah]: “Phuma kuyo [iJana], uhlazekile uqalekisiwe. Nebala lowo kubo oyokulandela, ngiyogcwalisa iJahanamu ngani nonke”.

Adamu, hlala wena nomkakho eJana, nidle kuyo lapho enithanda khona, kepha ningasondeli kulesihlahla funa nibe ngabaphambukile.

UShayitani wabe esebahlebela ukuze abavezele lokho ababefihlelwe kona ngezitho zabo zangasese, wathi: “iNkosi yenu ininqabela nje lesihlahla ngoba nobabili [uma nidla kuso] niyoba ngamakhosi noma niphile unaphakade”

Wafunga kubo bobabili ukuthi ungumeluleki kubo bobabili.

Kanti wabe ebakhohlisa bobabili. Kwathi lapho bobabili sebedlile esihlahleni izitho zabo zangasese zavela obala, baphuthuma bebhinca amacembe aseJana. Kusenjalo, yabamemeza bobabili iNKosi yabo [yathi]: “Benginganinqabela yini leso sihlahla futhi benginganitshelanga yini ukuthi uShayitani uyisitha soqobo kini nobabili na?”

Bathi bobabili [u Adamu noHawa]: “Nkosi yethu, siphambukile sazigwaza ngowethu, kepha uma ungasithetheleli ube nomusa kithi, nakanjani siyoba ngabalahlekelwe”.

Wathi [u Allah]: “Hambani nehle, abanye benu bayoba izitha kwabanye, futhi niyakuhlala emhlabeni ninethezeke okwesikhashana”.

Wathi [u Allah]: “Niyophila khona [emhlabeni] niphinde nife khona bese nikhishwa khona [emathuneni mhla nivuswa].

Bantwana baka Adamu, nebala sinehlisele izembatho efihla ingasese lenu niphinde nivunule ngazo. Kepha izembatho zeTakuwa [zokuthobela u Allah][1] yizona ezingcono. Lokho kungezinye zezibonakaliso zika Allah, hleze niqondisise. ——— [1] Izenzo zomuntu yizona zembatho empeleni umuntu aziwa ngazo naduma ngazo ezweni sakhile. Kadeni isaga sasho ukuthi ingwe idla ngamabala. iMusilimu lona lidla ngokuthobela imiyalelo ka Allah empilweni yalo ngenhloso yokuthokozisa uSomandla, yiwonake lamabala iMusilimu elidla ngawo kuMdali walo.

Bantwana baka Adamu, uShayitani makanganilingi njengoba akhipha abazali benu eJana wabahlubulisa izimpahla zabo efuna ukubabonisa ingasese labo. Nebala yena nohlobo lwakhe bayanibona lapho nina ningababoni. Belu senze amaShayatini abangani balabo abangakholwa.

Futhi uma benze ichilo bathi: “Sathola obaba bethu bekwenza[1] futhi no Allah usiyalele ngakho”. Yithi: “u Allah akayaleli ngamanyala; ingabe nibhixa u Allah ngeningakwazi nani na?” ——— [1] Labo abangazimisele ngokwamukela iqiniso, bahlala bevika ngokuthi abafuni ukushiya amasiko obaba mkhulu babo noma lawo masiko kungamanyala ayichilo esintwini; njengokuhambaze, nokuphinga okusekudlangile ngenxa yokuqinisa kwabo amakhanda ngamalobolo amba eqolo, belu njalo bevika ngokuthi usiko lobaba mkhulu.

Yithi: “iNkosi yami iyalela ngobulungiswa; futhi bhekisani amabombo kuwo wonke amaMasajidi nikhuleke kuYe [u Allah] ngokholo olumsulwa. Futhi njengoba anisungula [wanidala] ekuqaleni niyobuyela kuleso simo [emuva kokunivusa ekufeni].

Kunalabo abaholela endleleni eqondile kanti futhi kunalabo abadelwa ukuduka; kungoba benza amaShayatini izithenjwa zabo[1] ngaphandle kuka Allah, bebe becabanga ukuthi basendleleni eqondile. ——— [1] Lokhu kwenza amaShayatini izithenjwa, kufaka phakathi ukukhonza amadlozi okungukukhonza amaJini angosomathuba aphezu komshikashika wokudukisa isintu.

Bantwana baka Adamu, yibani bahle lapho niya noma kuyiphi iMasijidi, futhi nidle niphuze kepha ningamoshi, ngokuba Yena [u Allah] akabathandi labo abamoshayo.

Yithi [Muhamadi]: “Ngubani lona onqabela ubuhle buka Allah lobu ahlinzeke ngabo izinceku zaKhe kanye nesondlo esihlanzekile azabele sona na?”. Yithi: “Bungobalabo abakholwayo empilweni yasemhlabeni kanti kuyoba ngobabo kuphela ngoSuku lokwaHlulela”. Siyicacisa kanjalo imibiko kubantu abanolwazi.

Yithi [Muhamadi]: “Empeleni iNkosi yami inqabele amachilo esidlangalaleni nangasese, nokuphambuka nokuhlukumeza [abanye] ngokungemthetho, nokubhangqa u Allah nalokho angabuphanga ubufakazi ngakho, nokuthi nikhulume ngo Allah lokho eningakwazi nani”.

Futhi zonke izizwe zinesikhathi [sokufa] ezibekelwe sona, uma sesifika isikhathi sabo angeke baphile ngisho umzuzu owodwa futhi ngeke bafe kusasele umzuzu owodwa.

Bantwana baka Adamu, kuyohlala kufika kini iZithunywa ezivela kini zinilandisa ngeMibiko yaMi; ngakhoke labo abayothobela u Allah baphinde benze okuhle, abayikwesaba futhi abayikuba lusizi.

Futhi labo abaphika iMibiko yeThu baphinde bazigqaje ngayo; yibo kanye labo abayongena eMlilweni babhandle kuwo unaphakade.

Ingabe ubani ophambuke ukudlula lowo oqambela u Allah amanga aluhlaza noma ophika iMibiko yaKhe na? Labo bayothola isabelo sabo ababhalelwe sona, kuze lapho kufika izithunywa [izingelosi] zeThu zithatha imiphefumulo yabo, zithi: “Kuphi lokhu ebenikhuleka kukho ngaphandle kuka Allah na?”. Bayothi: “Kusilahlekele”. Bheka ngoba bayozifakazela bona uqobo ukuthi babengakholwa.

Uyothi [u Allah]: “Ngenani eMlilweni kanye nezinye izizwe ezinandulelayo zamajini nabantu”. Kuyothi njalo uma singena [emlilweni] isizwe siqalekise esinguzakwabo [lesi esingene kuqala] zize zilakanyelane kuwo [uMlilo], lesi esokugcina [okungabalandeli] siyothi kulesi esokuqala [okungabaholi nezikhulu]: “Nkosi yethu, laba basidukusile ngakhoke baphe isijeziso somlilo esiphindaphindiwe. Uyothi [u Allah]: “Wonke umuntu unesakhe esiphindiwe, into nje anazi”.

Siyothi esokuqala [okungabaholi] kwesokugcina [okungabalandeli]: “Cha, aningcono ngalutho kithi, ngakhoke sizweni isijeziso ngenxa yemisebenzi yenu”.

Nebala, labo abaphika iMibiko yethu baphinde bazigqaje ngayo, angeke bavulelwe iminyango yezulu futhi angeke bangene eJana kuze kube kungena ikameli embotsheni yenalidi; sizijezisa kanjalo izigilamkhuba.

EJahanamu bayondlalelwa icansi [lomlilo] kuthi ngaphezulu bambozwe umthunzi [welangabi]; sibajezisa kanjalo abaphambukayo.

Kuthi labo abakholwayo baphinde benze okuhle – asimthwezi umuntu umthwalo ongaphezu kwakhe – yibona labo abayongena eJana, bahlale khona unaphakade.

Futhi siyisusa konke okungamagqubu [umona, imidlinzo, njll.] ezinhlizweni zabo, imifula iyobe igeleza ngenzansi kwabo. Bayothi: “Udumo lungoluka Allah, Lona osiholele kulokhu nakuba besingeke siholeleke ukube u Allah akasiholanga. Nebala zafika iZithunywa zeNkosi yethu neqiniso”. Bayobe sebemenyezelwa ukuthi: “Leyo Jana [enikuyo] niyinikwe ngenxa yezenzo zenu”.

Laba abaseJana bayomemeza labo abaseJahanamu, bathi: “Nebala sikuthole kuyiqinso lokhu iNkosi yethu ebesithembiso kona, ingabe nina nikuthole kuyiqino yini lokhu iNkosi yenu ebenithembise kona na?”. Bayothi: “Yebo kunjalo”. Isimemezi siyomemeza phakathi kwabo sithi: “Isiqalekiso sika Allah masibe kulabo abaphambukile”.

Labo ababevimbela [abanye] endleleni ka Allah baphinde balangazelele ukube ibe nokugwemba, [bakwenza konke lokhu] abakholwa kweLizayo.

Phakathi kwabo [abaseJana naseJahanamu] kunomthangala, [kulomthangala] i-A’arafu kunamadoda abazi bonke [abantu, baseJana neJahanamu] ngezimpawu zabo. Bayobiza abaseJana [bathi]: “Ukuthula makube kini” - abangena kuyo [iJana] nakuba beyiangazelela.

Uma amehlo abo ebhekiswa ngakwabaseJahanamu, bathi: “Nkosi yethu ungasenzi sibe kanye nabantu abaphambukile”.

Labo abakumthangala i-A’arafu bayobiza amadoda abayowabona ngezimpawu zabo, bathi: “Konke lokhu ebenikuqoqa nalokhu ebenizigqaja ngakho akunisizanga ngalutho”.

Ingabe yibona yini laba [abangene eJana] enafunga nagomela ukuthi u Allah akasoze abe nomusa kubo na?. [Kuyothiwa kulabo abasemthangaleni]: “Ngenani eJana, aniyukwesaba futhi aniyikuba lusizi”.

AbaseJahanamu bayobiza abaseJana, [bathi]: “Akenisinanele amanzi noma kulokho u Allah anabele kona”. [Bayothi]: “u Allah ukunqabele kokubili kulabo abangakholwa”.

Labo abathathe ukholo lwabo njengento yokuchitha isikhathi nomdlalo, baphinde bayengwa impilo yomhlaba. Namhlanje Siyabalibala njengoba nabo balibala lomhlangano waloluSuku lwabo, futhi nangenxa yokuchitha iMibiko yethu.

Futhi Sabalethela iNcwadi esayicacisa ngolwazi, ukuze ibe umhlanhlandlela nomusa kubantu abakholwayo.

Ingabe balinde ukuba kwenzeke na? Ngosuku lapho kuyokwenzeka khona, bayothi labo abakushaya indiva phambilini: “Nebala, zafika iZithunywa zeNkosi yethu neqiniso. Ingabe bakhona abangasikhulumela basishwelezele noma nje sibuyele emuva ukuze ngokwahlukile kulokho ebesikwenza na?” Empeleni bazilahlekelisele bona uqobo baphinde balahlekelwa yilokho ababeziqambele kona [ngezikhonzwa zabo].

Nebala iNkosi yenu ngu Allah, lona owadala amazulu nomhlaba ezinsukwini eziyisithupha wabe esephakamela eSihlalweni. Umboza imini ngobusuku ngokulandelana okusheshayo; futhi [wadala] ilanga nenyanga nezinkanyezi, konke kulawula nguYe. Bheka ngoba ukudala nokulawula kungokwaKhe. Ubusisekile u Allah iNkosi yezizwe zonke.

Khulekani eNkosini yenu ngokuzithoba buthule, ngokuba ayibathandi labo abayiziphulamthetho.

Futhi ningenzi ukuphambuka emhlabeni emuva kokuba usulungisiwe. Belu nikhuleke kuYo [iNkosi yenu] ngokwesaba nangethemba; ngokuba umusa ka Allah useduze nalabo abenza okuhle.

Futhi nguYena oletha umoya njengebika lezindaba ezinhle wandulela umusa [imvula] waKhe, uthwele ifu elisindayo [lemvula] esiletha ngalo amanzi endaweni efile [ngenxa yesomiso], sibe sesehlisela amanzi kuyo sikhiqize ngawo [amanzi] zonke izinhlobo zezithelo. Siyobavusa kanjalo abafileyo; hleze nizoqondisisa.

Futhi indawo enhle, izitshalo zayo ziyakhula ngemvumo yeNkosi yayo [indawo], kepha kwembi [indawo] ziphuma kanzima. Siyicacisa kanjalo iMibiko kubantu ababongayo

Nebala, sathumela uNuhu kubantu bakhe, wathi: “Bakwethu, khonzani u Allah, ngokuba akekho ofanelwe ukuba nimkhonze ngaphande kwaKhe. Impela nginesabela isijeziso soSuku olunzima”.

Izikhulu kubantu bakubo zathi: “Imbala sikubona usekudukeni okusobala”.

Wathi [uNuhu]: Bakwethu angidukile mina, kepha ngiyiSithunywa esivela eNkosini yezizwe zonke”.

Nginethulela iMibiko yeNkosi yami futhi ngiyaneluleka, nginjalo nje ngazi ngo Allah lokho eningakwazi.

Kumbe, nimangazwa ukuthi isikhumbuzo esivela eNkosini yenu sifika nendoda engomunye wenu ukuze inexwayise, ukuze nani nithobele uAllah funa nithole umusa.

Bamuphika njengonamanga; kepha Samhlenga yena nalabo ayekanye nabo emkhunjini, sabe sesigwilisa labo abaphika iMibiko yeThu; impela babengabantu abayizimpumputhe.

Nasesizweni sakwa Adi Sabathumela umfowabo uHudi, owathi: “Bakwethu, khonzani u Allah ngokuba akekho ofanelwe ukuba nimkhonze ngaphandle kwaKhe; kungani ningamthobeli u Allah na?”

Izikhulu lezi ezingakholwa kubantu bakubo zathi: “Sikubona unobuphukuphuku futhi sicabanga ukuthi uqamba amanga”.

Wathi: “Bakwethu, anginabuphukuphuku kepha ngiyiSithunywa esivela eNkosini yezizwe zonke”.

Nginethulela iMibiko yeNkosi yami futhi ngingumeluleki othembekile kini.

Kumbe, nimangazwa ukuthi isikhumbuzo esivela eNkosini yenu sifika nendoda engomunye wenu ukuze inexwayise. Khumbulani mhla enibeka njengesizukulwane emuva kwabantu bakaNuhu, waphinde wanandisela ngesakhiwo somzimba; ngakhoke khumbulani izibusiso zika Allah hleze niphumelele.

Zathi [izikhulu]: “Ingabe uze kithi ukuba sikhonze u Allah Yena yedwa vo, siyeke lokho obekukhonzwa ngobabamkhulu bethu na? Ungasilethela lokhu ode usithembisa kona uma uqinisile.

Wathi: “Nebala senehlelwe isijeziso nentukuthelo okuvela eNkosini yenu. Niphikana nami ngamagama eniziqambele wona nina ngokwenu kanye noyihlomkhulu, lawa u Allah engambulelanga bufakazi ngawo. Ngakhoke lindani, nami ngilindile kanye nani”.

Sabe sesimhlenga yena nalabo ababekanye naye ngomusa weThu, sanqamula ulibo lwalabo abaphika iMibiko yethu futhi babengebona abakholwayo.

Nasesizweni sakwa Tamudi Sabathumela umfowabo uSwalihi, owathi: “Bakwethu, khonzani u Allah ngokuba akekho ofanelwe ukuba nimkhonze ngaphandle kwaKhe. Nebala zifikile kini izibonakaliso ezivela eNkosini yenu; [bhekhani nje] nali ikameli lika Allah eliyisibonakaliso kini, ngakhoke liyekeleni lidle emhlabeni ka Allah ningalenzi okubi funa nishaywe isijeziso esibuhlungu”.

Nikhumbule mhla enibeka njengesizukulwane emuva kwabantu bakwa Adi futhi wanenzela kwaba lula ukwakha emhlabeni; nikwazi ukwakha izithabathaba emaqeleni awo futhi benibaza izindlu ezintabeni; ngakhoke khumbulani izibusiso zika Allah futhi ningabi abonayo emhlabeni.

Izikhulu lezi ezizigqajayo kubantu bakubo, zathi kulaba abakholwa kulabo ababethathelwa phansi: “Ingabe ninesiqiniseko sokuthi uSwalihi uthunywe iNkosi yakhe na?” Bathi [abakholwayo]: “Thina siyakholelwa kulokho athunywe nakho.”

Laba abazigqajayo bathi: “Thinake asikholelwa kulokho enikholelwa kukho”.

Base sebelihlaba ikameli baphula umyalelo weNkosi yabo, baphinda bathi: “We Swalihi, silethele phela lokhu obukade usithembisa kona uma ngempela ungomunye weZithunywa”.

Bashaywa ukuzamazama okunzima balala uyaca emzini wabo bequlusile.

Wabashiya kanjalo, wathi: “Bakwethu, nebala nginethulele uMbiko weNkosi yami ngaphinde nganeluleka kepha nina, anibethandi abaluleki”.

Futhi noLuti samthumela. Khumbula mhla ethi kubantu bakubo: “Nenza amanyala? akekho noyedwa owake wawenza ngaphambi kwenu ezizweni zonke”.

“Bheka ngoba nikhanuka abesilisa niyeke abesifazane; empeleni ningabantu abayiziphula mthetho”.

Impendulo yabantu bakubo kwaba nje ukuthi bathi: “Bakhipheni endaweni yenu, ngokuba bangabantu abazenza abamsulwa”.

Sabe sesimhlenga yena [uLuti] nomndeni wakhe ngaphandle komkakhe yena owaba kanye nababhubha.

Sehlisela phezu kwabo imvula [yesijeziso]. Ngakhoke bheka isiphetho sezigilamkhuba.

Nasesizweni saseMadiyana, sathumela umfowabo uShu’ayibu, wathi: “Bakwethu, khonzani u Allah ngokuba akekho ofanele ukuba nimkhonze ngaphandle kwaKhe. Nebala bufikile kini ubufakazi obuvela eNkosini yenu; ngakhoke gcwalisani izikali ngokufanele futhi ningaqoli abantu impahla yabo bese ningenzi ukuphambuka emhlabeni emuva kokuba usulungusiwe; yikona lokho okungcono kini uma ningabakholwayo”.

“Futhi ningalokhu nihlala kuzo izindlela nisabisa futhi nivimba endleleni ka Allah labo abakholelwa kuYe futhi ningafuni ukuyibona igwembile. Nikhumbule mhla niyidlanzana [u Allah] wanandisa futhi nibheke ukuthi sabanjani isiphetho sabaphambukayo”.

“Futhi uma kukhona abakholelwa kulokho engithunywe nakho, nalabo abangakholwa; bekezelani kuze kube u Allah uyehlulela phakathi kwethu, phela nguYena uMehluleli ovelele”.

Izikhulu lezi ezizigqajayo zathi: “We Shu’ayibu, sixosha wena nalaba okholwa nabo endaweni yethu okukanye nibuyele enkolweni yethu”. Wathi: “Ngisho noma singafuni na?”

“Siyobe sesiqambele u Allah amanga aluhlaza uma sibuyela enkolweni emuva kokuba u Allah esihlengile kuyo. Cha, angeke sibuyele kuyo ngaphandle-ke uma u Allah ethanda, bheka ngoba iNkosi yethu yengamele yonke into ngolwazi. Sesithembele ku Allah. Nkosi yethu, yehlulela ngeqiniso phakathi kwethu nabantu bakithi, ngokuba Wena ungumehluleli ovelele”.

Izikhulu lezi ezingakholwa kubantu bakubo zathi: “Uma nje nike nalandela uShu’ayibu, nakanjani niyolahlekelwa”.

Bashaywa ukuzamazama okunzima balala uyaca emzini wabo bequlusile.

Labo abaphikisa uSha’ayibu kwaba ngathi abakaze bahlale khona. Labo abaphika uSha’ayibu yibona kanye abalahlekelwa.

Washiya kanjalo, wathi: “Bakwethu, ngempela nginethulele iMibiko yeNkosi yammi ngaphinda nganeluleka, ngingabazwela kanjanike abantu abangakholwa na?”

Futhi njalo nje uma sithumela iSithunywa endaweni sasijezisa bantu bakhona ngenhlupheko nangezifo, ukuze bazithobe.

Emuva kwalokho siguqule okubi ngokuhle baze bande, bese bethi: “Obabamkhulu nabo behlelwa ubunzima nobumnandi”. Kuthi kusenjalo sibajezise bengazelele futhi benganakile[1]. ——— [1] Izibhicongo nezinhlekelele zemvelo, ezinye zezindlela uMdali u Allah avusa ngazo isintu ekuphambukweni kwaso nentando yaKhe. Kepha labo abangazihluphi ngokuthobela uMdali, bathatha lezigameko njengenhlala yenza namahlala khona, baqhubele nempilo kuze kube kufika isikhathi lapho bejeziswa khona benganakile.

Ukuba nje abantu bendawo bakholwa baphinde bazithiba, sasizobavulela izibusiso ezivela ezulwini nasemhlabeni, kepha bpna baphika, sabe-ke sesibajezisa ngemisebenzi yabo.

Ingabe abantu bendawo bazizwa bephephile yini esijezisweni seThu esingabafikela ebusuku belele na?

Noma abantu bendawo bazizwa bephephile yini esijezisweni seThu esingabafikela emini bezidlalela na?

Ingabe bazizwa bephephile ekuhleleni kuka Allah na?. Empeleni abantu abalahlekelwe [abadukile] abazizwa bephephile ekuhleleni kuka Allah.

Laba abazuza umhlaba emuva kwabanikazi bawo, uthi abakaboni yini ukuthi ukube besithanda besizobajezisa ngenxa yezimpambuko zabo na, siphinde simboze izinhliziyo zabo ngenxa yalokho bengasezwa.

Lezo izizwe esikulandisa ngazo ngezindaba zazo. Nebala iZithunywa zabo zafika kubo nobufakazi, kepha abazange bakholelwe kulokho abebevele sebekuphikile phambilini. U Allah uzimboza kanjalo izinhliziyo zabangakholwa.

Futhi asibafumanisanga abaningi kubo benokuzimisela, kunalokho sifumanise iningi kubo liyiziphula mthetho.

Sabe sesithumela emuva kwazo [izizwe zasendulo] uMusa neMibiko yeThu kuFirawuni nezikhulu zakhe, kepha baphambana nayo. Bhekake ukuthi sinjani isiphetho sabenza ukuphambuka.

Wathi uMusa: “Fir’awoni, ngempela ngiyiSithunywa esivela eNkosini yezizwe zonke”.

Kumele nakanjani ngingakhulumi ngo Allah ngaphandle kwalokho okuyiqiniso. Ngize kini nobufakazi obuvela eNkosini yenu, ngakhoke dedelela kimi isizwe sakwa Isirayeli.

Wathi [uFir’awoni]: “Uma ukuthi uze nesibonakaliso silethe phela uma uneqiniso”.

Wabe [uMusa] esejikijela phansi induku yakhe, makhathaleni yaba inyoka uqobo lwayo.

Waphinde wakhipha isandla sakhe, saba mhlophe qwa kulabo ababethamele.

Izikhulu zesiswe sikaFira’woni zathi: “Lona isanusi esingungoti impela”.

“Ufuna ukunikhipha ezweni lenu, ngakhoke nithi akwenziwe njani na?”

Bathi: “Ake uthi ukumlindisa benomfowabo bese uthumela izigijimi kuzo zonke izindawo”.

“Zikulethele zonke izanusi ezingongoti”.

Zafika izanusi ku Fir’awoni zathi: “Kumele sithole umvuzo uma kuba yithina esinqobayo”.

Wathi [uFir’awuni]: “Nakanjani futhi niyoba zithenjwa”.

Zathi [izanusi]: “We Musa, ungaphonsa noma kube yithina esiphonsayo”.

Wathi [uMusa]: “Jikijelani nina”. Kwathi lapho bejikijela bathakatha amehlo abantu babathusa futhi beza nelumbo elinzima.

Sembulela kuMusa ukuba aphonse induku yakhe. Kwabe isigwinya konke lokhu ababeqamba ngakho amanga.

Laqhakamba iqiniso kwashabalala konke lokho ababekwenza.

Banqotshwa khona lapho, babuyele emumva behlazekile.

Izanusi zona zawa phansi ngobuso zakhothama.

Zathi: “Siyakholelwa eNkosini yezizwe zonke”.

INKosi kaMusa noHaruna.

Wathi uFir’awuni: “Nikholelwa kuyo ngaphambi kokuba mina nginiphe imvumo na? Nebala leli isu enilakhile endaweni ukuze nikhiphe kuyo abantu bakhona. Nizokwazi kahle”.

“Ngizonqamula izingalo zenu nemilenze yenu ngokuphambana bese nginiphanyeka nonke”.

Zathi [izanusi]: “Nebala siyobuyela eNkosini yethu”.

Usijezisa nje ngoba sikholwe izibonakaliso zeNkosi yethu nxa zifika kithi. Nkosi yethu siphe ukubekezela usithathe emhlabeni singamaMusilimu.

Izikhulu zesizwe sika Fir’awuni zathi: “Ushiya uMusa nesizwe sakhe benze impambuko ezweni baphinde bashiye wena nezikhonzwa zakho na?” Wathi [uFir’awuni]: “Sizobulala amadodana abo siyeke abafazi babo bephila, bheka ngoba yithina esibaphethe”.

Wathi uMusa esizweni sakhe: “Celani usizo ku Allah futhi nibekezele, ngokuba izwe ngelika Allah ulipha lowo amthandayo ezigqileni zaKhe futhi kuyogcina labo abazithibayo”.

Sathi [isizwe sika Musa]: “Sihlukumezekile ngaphambi kokuba ufike nasemuva kokuba usufikile”. Wathi [uMusa]: “Kungekudala iNkosi yenu iyosibhubhisa isitha senu bese ibeka nina ezweni ukuze abheke ukuthi niyoziphatha kanjani”.

Nebala Samjezisa uFir’awuni ngesomiso nangokuncipha kwezithelo ukuze balalele.

Kepha kwakuthi uma behlelwa okuhle bathi: “okwethu lokhu”. Kuthi uma behlelwa okubi, bagxeke uMusa nalabo ayenabo ngokubalethele amabhadi. Bheka ngoba amabhadi abo aku Allah, kepha iningi labo alazi.

Futhi bathi: “Noma zingaba ngaki izibonakaliso oziletha kithi uzosithakatha ngazo, asisoze sakukholwa”.

Sathumela kubo izikhukhula nesikhonyane nezintwala namasele negazi njengezibonakaliso ezicacisiwe; kepha bazigqaja futhi babengabantu abayiziphula mthetho.

Futhi kwakuthi lapho sebehlelwe isijeziso bathi: “Musa sikhulekele eNkosini yakho ngalokho ekuthembise kona, uma ungasisusela isijeziso siyokukholwa futhi sidedele kuwe isizwe sakwa Isirayeli”.

Kepha uma sesibasusele isijeziso isikhathi esithize ababekelwe sona, kuba yibona kanye abephula izithembiso.

Ngakhoke sabajezisa ngokubagwilisa olwandle ngenxa yokuthi baphika izibonakaliso zeThu futhi bazishaya indiva.

Sabe sesinika labo bantu ababecindezelwe [isizwe sakwa Isirayeli] impumalanga nentshonalanga yezwe [indawo yaseShamu], lena phela esiyibusisile. Lafezeka- ke Izwi Elihle leNkosi yakho[1] kusizwe sakwa Isirayeli ngenxa yokubekezela kwabo. Futhi sabhubhisa konke lokho okwakhiwa uFir’awuni nesizwe sakhe kanye nezakhiwo zabo eziphakeme[2]. ——— [1] Bheka iSura 28:5. [2] Lokhu kukhomba ukuthi izinsalela zempilo yasendulo ezweni laseMisiri (eGibhithe) kanjalo nezakhiwo ezifana namaPhilamide akusizona ezesikhathi sikaFir’awuni lona owayephila ngesikhathi seSithunywa uMusa, ngoba konke okwangaleso sikhathi kwabhubha unomphela.

Futhi sawelisa isizwe sakwa Isirayeli ulwandle, bazithela phezu kwabantu ababezinze ezithixhweni zabo, bathi [abakwa Isirayeli]: “Musa, senzele nathi isikhonzwa njengoba nabo benezikhonzwa”. Wathi [uMusa]: “Ngempela nina niyiziwula”.

Ngempela lokho laba abagxile kukho kuyimbubhiso uqobo futhi kuwumbhedo konke lokhu aabkwenzayo.

Wathi [uMusa]: “Nginganifunela kanjano omunye eningamukhonza ngaphandle kuka Allah na, belu nguYena oniqokile ezizweni”.

Futhi khumbulani mhla sinitakula kuFir’awuni enijezisa kabuhlungu, ebulala amadodana enu futhi eyeka abafazi benu. Futhi kukho konke lokho bekunesivivinyo esinzima esivela eNkosini yenu.

Futhi sabekela uMusa ubusuku obungamashuni amathathu saphinda sathasisela ngobuyishumi[1], kwase kuthi isikhathi seNkosi yakhe ayebekelwe sona [ukukhuluma neNkosi yakhe] saba ubusuku obungamashumi amane. Wabe uMusa esethi kumnewabo uHaruna: “Thatha isikhundla sami ebantwini bami wenze okulungile futhi ungalandeli indlela yabaphambukayo”. ——— [1] Osolwazi beTafisir njengoMujahidi noMasuruku bathi ubusuku obu-30 kwakungobenyanga ka Dul Ka’ada [inyanga ye-11] kuthi obuyishumi bube obenyanga ka Dul Hija [inyanga yokungcina ye-12].

Kwathi uMusa esefikile endaweni yeThu esimbekele yona, yakhuluma naye iNkosi yakhe, wabe [uMusa] esethi: “Nkosi yami, ngeze ngikwazi ukukubona”. Yathi: “Awusoze ungibone, kodwa ungabheka entabeni, uma ilokhu isazimelele endaweni yayo uzongibona”. Kwathi lapho iNkosi yakhe iziveza entabeni, yayilothisa yaphushuka, uMusa yena waquleka. Kwathi lapho ephaphama wathi: “Mawungcweliswe, ngiyazisola kuWe futhi ngingowokuqala kwabakholwayo”.

Wathi [u Allah]: “Musa, ngempela ngikuqokile ebantwini ngoMbiko waMi neZwi laMi, ngakhoke thatha lokho engikupha kona bese uba obongayo:.

Samlobela eziqwembeni izaluleko nencazelo yayo yonke into; [Sathi kuye]: “ngakhoke zithathe [iziqwembe] ngokuzimisela futhi uyalele abantu bakho bazikhandle ngalokho okuhle [imiyalelo] kuzo, ngokuba ngiyonikhombisa indawo yeziphulamthetho [uMlilo].

Ngiyobaqhelelanisa neMibiko yaMi labo abazigqajayo ngokungemthetho; okuthi uma bebona zonke izibonakaliso bengazikholwa. Uma bebona indlela yokulunga abahambi ngayo, kepha uma bebona indlela yokuphambuka bahamba ngayo. Lokho yingoba baphika iMibiko yeThu futhi belokhu beyishaya indiva.

Futhi labo abaphika iMibiko yeThu nokuHlangana kweLizayo, izenzo zishabalele. Ingabe abavuziswanga ngaphandle kwalokho ababekwenza na?

Futhi abantu bakaMusa emuva kokuba esengekho, bakhanda isiqu sethole elalibhonga. Ingabe ababoni yini ukuthi alikwazi ukukhuluma nabo futhi alibaholeli ndawo na? Balikhanda [ithole] baphambuka.

Kwathi sebezisola futhi babona ukuthi bebedukile bathi: “Uma iNkosi yethu ingabi nomusa kithi futhi isithethelele, nakanjani siyoba ngabalahlekelwe”.

Kuthe lapho uMusa ebuyela kubantu bakhe ecasukile ethukuthele, wathi: “Kwaze kwakubi lokho enikwenzile ngikhekho. Neqe umyalelo weNkosi yenu na?”. Wabe esejikijela phansi iziqwembe wagxavula ikhanda lomnewabo emdonsela kuye, wathi [uHaruna]: “Mtakama, ngempela abantu bangithathele phansi futhi bacishe bangibulala, ngakho ungahlekisi ngami ezitheni futhi ungangibandakanyi nabantu abaphambukile”.

Wathi [uMusa]: “Nkosi yami sithethelele mina nomfowethu futhi usifake emseni waKho, ngokuba Wena unomusa ondlula bonke abonumusa”.

Nebala, labo abakhonza ithole bayotholwa ulaka lweNkosi yabo nehlazo empilweni yasemhlabeni; sibahlomulisa kanjalo abaqamba amanga.

Futhi labo abenza izimpambuko bese bezisola emuva kwazo baphinde bakholwe, impela iNkosi yakho emuva kwazo [izimpambuko] inguMthetheleli Onesihawu.

Kwathi lapho sekudambile ukuthukuthela kuMusa, wathatha iziqwembe, okwakulotshwe kuzo umhlahlandlela nomusa kulabo abesaba iNkosi yabo.

Futhi uMusa wakhetha amadoda angamashumi ayisikhombisa esizweni sakhe ukuba baye endaweni yeThu esasibabekele yona [ukukhuluma nathi]. Kwathi lapho [amadoda] eseshaywe ukuzamazama okunzima, wathi [uMusa]: “Nkosi yami, ukube ubuthanda ngabe ubabhubhisile kanye nami kwasekuqaleni; kungani usibhubhisa ngokwenziwe iziphukuphuku ngaphakathi kwethu na? Empeleni [lokhu] kuyisivivinyo odukisa ngaso obathandayo uphinde uhole ngaso obathandayo. Nebala unguMhlengi wethu, ngakhoke sithethelele ube nomusa kithi ngokuba Wena ungothethelela ukwendlula bonke”.

“Futhi sabele lokho okuhle kulomhlaba nakwelizayo ngokuba siyazisola kuWe”. Wathi [u Allah]: “Isijeziso saMi ngijezisa ngaso engimthandayo kanti futhi umusa waMi uhaqe yonke into, ngizowabela [umusa waMi] labo abazithibayo futhi bakhiphe neZaka baphinde bakholelwe eMibikweni yeThu”.

Labo abalandela iSithunywa uMjutshwa ongakwazi ukuloba abamthola kubo kulotshiwe ngaye kwiTora naku Ininjili, ukuba uyobayalela ngokulungile abanqande kokuphambukile futhi abavumele kulokho okumsulwa kepha abanqabele kulokho okungcolile [okungahlanzekile nokuyichilo]. Aphinde abethule umthwalo namajoka ababewathwele [imithetho enzima ababe bekelwe yona phambilini]. Ngakhoke labo abakholelwa kuye, bamhloniphe, bamsekele baphinde balandele ukukhanya lokhu okulethwe naye, yibona kanye labo abaphumelele.

Yithi [Muhamadi]: “Sintu, kunina nonke ngiyiSithunywa sika Allah. Lona umbuso wamazulu nomhlaba ungowaKhe, futhi akekho ofanelwe ukukhonzwa ngaphandle kwakhe, nguYena oletha impilo aphinde ayithathe. Ngakhoke kholelwani ku Allah neSithunywa saKhe, uMjutshwa ongakwazi ukuloba – naye okholelwa ku Allah naMazwi aKhe – nimlandele ukuze nibe sendleleni eqondile”.

Futhi esizweni sika Musa kunabantu abalandela iqiniso futhi benza ubulungiswa ngalo.

Sabaqembula izizwana eziyishumi nambili ngokozalo ngokwamadodana kaYakubu. Futhi sembulela kuMusa mhlazane isizwe sakhe simcela amanzi, [Sathi]: “Shaya idwalangenduku yakho”; kwagobhoza iziphethu eziyishumi nambili, sonke isizwana besazi lapho kumele siphuze khona. Saphinde futhi sabenzela umthunzi ngamafu sabehlisela imana nezigwaci. [Sathi]: “Dlanini kulokho esinabele kona”. Futhi abasilimazanga Thina kepha bazilamaza bona uqobo.

Futhi khumbula mhla kuthiwa kubo [abakwa Isirayeli]: “Hlalani kulendawo nidle kuyo lapho nithanda khona. Bese nithi ‘Hitwa’ [ukwesula], ningene esangweni nikhotheme, siyobe sesinithethelela izimpambuko zenu, siphinde sandisele labo abayenza okuhle”.

Kepha labo abaphambukile kubo baguqula amazwi ngalawo abayalelwanga wona. Ngakhoke sabe sesehlisela kubo isijeziso esivela phezulu ngenxa yokuphambuka kwabo.

Futhi babuze [abakwa Isirayeli] ngendawo eyabe ingasolwande, mhlazane bephula umthetho ngeSabatha, bheka ngoba kwakuthi ngeSabatha izinhlazi zitheleke kubo ubuthaphuthaphu kepha mhla kungesilona iSabatha azibikhona ngakubo. Sabavivinya kanjalo ngenxa yokuphambana kwabo nemiyalelo.

Lapho abanye babo babethi: “Kungani nilokhu nikhalimana nabantu u Allah vele azobabhubhisa noma abajezise ngesijeziso esinzima”. Bathi [abakhalimayo]: “Ukuzakhela izaba eNkosini yenu nokuthi-ke hleze bazithibe”.

Kwathi-ke lapho sebekulibele lokhu abalulekwe ngakho; sahlenga labo ababenqanda okubi, sajezisa labo abaphambukile ngesijeziso esinzima ngenxa yokwephula kwabo umthetho.

Kwathi lapho sebephule umthetho mayelana nalokho abanqatshelwe kona, Sathi: “Yibani izinkawu ezihlazekile”.

Khumbula futhi mhla iNkosi yakho imemezela ukuthi iyohlala ithumela kubo kuze kube uSuku lokwaHlulela, labo abayobajezisa kanzima. Bheka ngoba iNkosi yakho iyashesha ukujezisa kanti futhi ingeThethelelayo Enesihawu.

Futhi sabahlakaza baba izizwe emhlabeni. Kunalabo kubo abaqotho, kanti futhi kunalabo kubo abangenjalo. Futhi sasibavivinya ngokubi nangokuhle hleze babuye nganeno [bapheze].

Base belandelwa isizukulwane esabelwa iNcwadi [iTora], esabe sithatha izinto zalomhlaba ongelutho bethi: “Siyothethelelwa”, kepha uma kufika kubo ezinye izinto [zomhlaba] ezifana nezasekuqaleni baphinde bazithathe. Abazange yini bathathiswe isibopho seNcwadi [iTora] ukuba bangakhulumi ngo Allah ngaphandle kweqiniso futhi bafunde ekuqukethe. Belu umuzi wakwelizayo [iJana] yiwona ongcono kulabo abazithibayo; ingabe aninakuqonda na?

Kantike labo ababambelela eNcwadini futhi beqikelela ukwenza iSwala, Thina asisoze sawuchitha umvuzo walabo abenza ukulunga.

Futhi khumbula mhla siqongisa intaba phezu kwabo njengomthunzi. Babecabanga ukuthi izowela phezu kwabo. [Sathi]: “Thathani ngokuzimisela lokhu esininike kona ukuze nibe ngabathobela u Allah”.

Khumbula futhi lapho iNkosi yakho ithatha emhlane wabantwana baka Adamu izizukulwane zabo wabe wase esezifakazisa kuzo uqobo [yathi]: “Ingabe angisiyona iNkosi yenu na?” zathi: “Nembala, siyafakaza”. Funa ngoSuku lokwaHlulela nithi: “Besingakwazi lokhu”.

Noma funa nithi: “Obabamkhulu bethu phambilini ababhangqa [u Allah nezikhonzwa], thina siyisizukulwane esifike emuva kwabo, ngakhoke usibhubhisa ngenxa yokwenziwe abaphambukile.

Siyicacisa kanjalo iMibiko hleze nabo babuyele nganeno [endleni eqondile].

Balandisele ngendaba yalowo esamupha ulwazi lweMibiko yethu, kepha yena walushaya indiva, wabe eselandelwa uShayitani waba odukileyo.

Ukube besithanda, besizomphakamisa ngalo, kepha yena wagxila kwezomhlaba walandela izinkanuko zakhe. Ufansiswa nenja, yona uma uyithwesa umthalo ikhipha ulimi noma usuwususile iqhubeka njalo ikhipha ulimi. Lowo- ke isifaniso salowo othatha iMibiko yethu njengamanga. Balandisele ngezindaba hleze bazocabangisisa.

Saze sasibi isifaniso salabo abathatha iMibiko yeThu njengamanga futhi abazilulaza bona uqobo.

Lowo u Allah amholayo usendleleni eqondile, kepha labo abadukisayo yibona kanye abalahlekelwe.

Nebala, baningi esabadalela iJahanamu kumaJini nabantu, ngokuba banezinhliziyo abangaqondi ngazo namehlo abangaboni ngawo nezindlebe abangezwa ngazo. Labo bafana nezilwane; empeleni baduke ukuzendlula. Yibona kanye labo abangenandaba.

U Allah unamaGama amahle, ngakhoke khulekani kuYe ngawo, futhi nibayeke labo abalandela okungelona iqiniso ngamaGama aKhe, bayojeziswa ngalokho abakwenzayo.

Futhi kulabo esibadalile, kunabantu abalandela iqiniso futhi benza ngalo ubulungiswa.

Futhi labo abathatha iMibiko yeThu njengamanga, sizobabamba lapho benganake khona.

Futhi ngizobapha isikhathi, bheka ngoba isu Lami liboshelwe.

Abazange bacabangisise na? Umuntu wabo lo akahlanyi [uMuhamadi]. Empeleni akasilutho ngaphandle nje kokuba umxwayisi ngokusobala.

Ingabe ababhekanga yini embusweni wamazulu nomhlaba nalokho u Allah akudalile, nokuthi hleze isikhathi sabo [sokufa] sesisondele. Yimuphike umbiko abayowukholwa emuva kwalona na?

Lowo u Allah amdukisile akekho oyomhola, bheka ngoba ubashiye benhlanhlatha ekuphambukweni kwabo.

Bayakubuza ngeSikhathi [sokwaHlulela] ukuthi siyofika nini. Yithi: “Saziwa iNkosi yami kuphela futhi akekho oyisiletha ngesikhathi saso ngaphandle kwaKhe. Siyabasinda abasemazulwini nasemhlabeni [ngenxa yokwesaba]; siyofika kini ningazelele”. Wabuza wena engathi nawe usha amashushu ngaso, yithi: “U Allah kuphela owaziyo ngaso, kepha iningi lenu alazi”.

Yithi: “Angikwazi ukuzizuzisa ngalutho noma ngizilimaze ngalutho ngaphandle kwemvumo ka Allah. Ukube bengazi okungabonwayo bengizozandisela okuhle futhi bekungekho okubi obekungangehlela; kepha empeleni ngingumxwayisi nomethuli wezindaba ezinhle kubantu abakholwayo”.

NguYena [u Allah] onidale ngomuntu oyedwa waphinde wadala ngaye umfazi wakhe ukuze anethezeke naye. Kuthe lapho esemengamele [baya ocansini], wathwala umthwalo olula [wakhulelwa] walokhu etetemuka nawo. Kepha kuthe lapho esesindwa, bakhuleka bobabili ku Allah iNKosi yabo [bathi]; “Uma usipha umntwana oqotho siyoba ngababongayo”.

Kuthe lapho esebaphe umntwana oqotho, bambhanqa nezimbangi kulokho abaphe kona. U Allah uphakeme kulokho abakubhanqayo.

Ingabe babhanqa lokho okungakwazi ukudala lutho, belu nabo badaliwe.

Futhi [izimbangi] azikhoni ukubasiza ngalutho futhi nazo azikhoni ukuzisiza zona uqobo.

Uma nibabizela endleleni eqondile abanilandeli; kuyefana nje kini, niyababiza noma nizithulele.

Nebala labo enikhuleka kubo ngaphandle kuka Allah, izigqila ezifana nani; khulekanike kubo baniphendule uma niqinisile.

Ingabe [laba enikhuleka kubo] banemilenze abahamba ngayo na? Noma izandla ababamba ngazo na? Noma amehlo ababona ngawo na? Noma izindlebe abezwa ngazo na? Ithi: “Khulekani kuzikhonzwa zenu, bese ningakhela uzungu ningapholisi maseko”.

Nebala umhlengi wami ngu Allah, lona owehlisele iNcwadi [iKurani] futhi uhlenga labo abaqotho.

Futhi labo enikhuleka kubo ngaphandle kuka Allah, abakwazi ukunisiza futhi abakwazi ukusiza bona uqobo.

Uma nibabizela endleleni eqondile abalaleli, futhi uzobabona bekubhekile kepha ababoni.

Qoka uxolo, uyalele ngokuhle futhi uziqhelelanise neziwula.

Uma ufikelwa ukuhluthuleka okuvela kuShayitani, zivikele ngo Allah ngokuba Yena Ungozwayo Owaziyo.

Ngempela labo abathobela intando ka Allah, uma behlaselwe isilingo esivela kuShayitani, bayazithiba baqaphele.

Kepha abafowabo [bakaShayitani], babafaka ngokujulile ekuphambukeni futhi abaphezi.

Uma ungabaletheli isibonakaliso bathi: “Kungani ungazenzeli ngokwakho na?”. Yithi: “Ngilandela kuphela lokho okwembulelwe kimi kuvela eNkosini yami; lokhu ubufakazi obuvela eNkosini yenu, nokuholwa okuqondile nomusa kubantu abakholwayo”.

Uma iKurani ifundwa, yilaleleni futhi nithule du, ukuze nithole umusa.

Futhi khumbula iNkosi yakho ngaphakathi kuwe ekuseni nantambama ngokuzithoba futhi buthule ungabangi umsindo futhi ungabi omunye wabangenandaba.

Nebala, labo abaseNkosini yakho abazigqaji ekuyikhonzeni futhi bayayidumisa bayikhothamele bawe ngobuso.

Bayakubuza ngezimpango zempi; yithi: “Izimpango zempi ngezika Allah neSithunywa, ngakhoke thobelani intando ka Allah futhi nihlale ninokubiyisana phakathi kwenu niphinde nilalele u Allah neSithunywa saKhe uma ngempela ningabakholwayo”.

Okuyibona abakholwayo, yilabo uma kukhulunywa ngo Allah izinhliziyo zabo zigcwala ingebe, kuthi lapho belandiswa ngeMibiko yaKhe ibandisele ukholo futhi bathembela eNkosini.

Yibona laba abaqikelela ukwenza iSwala futhi benanelana kulokho esibabele kona.

Labo, yibona kanye abakholwayo ngempela. Enkosini yabo bayothola izigaba [eJana] nentethelelo nesondlo esiyinala.

Njengoba iNkosi yakho yakukhipha endlini yakho ngeqiniso, kunquqaba lwabakholwayo olwenqenayo.

Luqophisana nawe ngeqiniso nakuba selicacile, okungathi basiwa ekufeni bebhekile.

Khumbula lapho u Allah enithembisa niyothola linye lamaqembu amabili [inqola yohwebo noma ibutho lempi], nakuba nina nanifisa ukuthola leyo engezikuba nobunzima [inqola yohwebo]. Kepha u Allah wayefuna ukuqhakambisa iqiniso ngaMazwi aKhe nokubhubhisa lao abangakholwa.

Ukuze aqinise iqiniso futhi achite amawuwa nakuba izigilamkhuba zingakuthandi lokho.

Khumbulani mhla nicela usizo eNkosini yenu, yaniphendula [yathi]: “Ngizonixhasa ngenkulungwane yezingelosi zilandelana”.

U Allah wakwenza lokho ukuze kube yintokozo nezinhliziyo zenu zithole ukuthula. Usizo Luvela kuphela ku Allah, ngokuba u Allah Ungusomandla Okhaliphile.

Khumbulani mhla enilethela isithongwana ukuniduduza, wanehlisela namanzi emvula ukuze anihlanze ngawo aphinde asuse kini nokungcola kukaShayitani nokuthi ahlanganise izinhliziyo zenu aqinise ngawo izinyawo [lapho ezizonyathela khona].

INkosi yakho yabe isiyambulela izingelosi [yathi]: “Nginani, ngakhoke qinisani idolo labo abakholwayo. Ngozofaka ukwesaba ezinhlizweni zalabo abangakholwa, ngakhoke gencani izintamo [zabo] neminwe yabo yonke”.

Lokho kungenxa yokuthi baphambane no Allah neSithunywa saKhe. Kantike lowo ophambana no Allah neSithunywa saKhe; u Allah ujezisana kanzima.

Ngakhoke kuzweni lokho ngokuba abangakholwa bayothola iSijeziso soMlilo.

Nina enikholwayo! Uma nitholana phezulu [empini] nalabo abangakholwa ningabaleki.

Ngokuba lowo oyababalekela ngaleso sikhathi - ngaphandleke kwalowo obaleka akha isu lokulwa noma lowo obuyela emuva ebuthweni - uyobe uzilethela ulaka luka Allah futhi uyohlala eJahanamu okuyindawo embi.

Akunina enibabulele, kepha u Allah nguYena obabulele, futhi akusiwena owaphonsa mhlazana uphonsa kepha ngu Allah owaphonsa, ukuze avivinye abakholwayo isivivinyo esihle. Nebala u Allah Ungozwayo Owaziyo.

Konke lokhu yingoba u Allah ulenze lwabuthaka itulo labangakholwa.

Uma nifuna ukunqoba, sekufikile kini ukunqoba. Futhi uma nipheza, yikona okungcono kini. Kepha niphikelela naThi sizophikelela [ngokunijezisa] futhi ibandla lenu angeke lanisiza ngalutho noma lingaba liningi. Futhi u Allah ukanye nabakholwayo.

Nina enikholwayo! Lalelani u Allah neSithunywa saKhe futhi ningambalekeli [u Allah] nibe nizwa kahle.

Ningafani nalabo abathi: “Sizwile kepha bebe bengezwa”.

Nebala, isidalwa okiyisona esibi ku Allah, yilowo oyisimumu oyisithuli, labo abangenakuqonda.

Ukube u Allah kukhona okuhle abekwazi ngabo, ubezobenza bezwe, kepha uma ubenze bezwa bebe zofulathela bashaye indiva.

Nina enikholwayo, sabelani ku Allah neSithunywa saKhe lapho benibizela kulokho okuniphilisayo [ngokulalela nokuthobela imiyalelo]. Futhi yazini ukuthi u Allah uyakhona ukungena phakathi komuntu nenhliziyo yakhe [ngokumncitsha amandla okwenza okuhle emuva kokuba ebesenqabile zibekwa], niphinde futhi nazi ukuthi niyobuthelwa kuYe [u Allah].

Futhi qaphelani leso sijeziso esingeke sagadla kuphela kulabo abaphambukile kini, futhi yazini ukuthi u Allah ujezisana kanzima.

Nikhumbule mhla niyidlanzana nithathwa njengabengeluthi emhlabeni nesaba ukuthi abantu bayoninaphaza, kepha Yena [u Allah] waniphephisa, wanisekela ngosizo lwaKhe waphinde wanondla ngalokho okumsulwa ukuze nibonge.

Nina enikholwayo, ningabi abangathembekile ku Allah neSithunywa funa niphule izithembiso zenu [ngamabomu] nibe nazi.

Futhi nihlale nazi ukuthi umcebo wenu nezingane zenu kuyisilingo, futhi nazi ukuthi u Allah unomvuzo omkhulu.

Nina enikholwayo, uma nithibela u Allah uyonipha ubuhlakani bokuhlukanisa [okubi kokuhle] aphinde futhi anesulele izimpambuko zenu anithethelele, phela u Allah unomusa omkhulu.

Khumbula mhla labo abangakholwa bakha uzungu ngawe ukuba bakubophe noma bakubulale noma bakudingise. Balakha uzungu lwabo, no Allah walwakha olwakhe, bheka ngoba u Allah wakha uzungu ngobuchule.

Uma befundelwa imibiko yeThu, bathi: “Sesizwile, futhi uma sifuna singakusho nathi okufana nalokhu, phela lokhu izinganekwane nje zasendulo”.

Khumbula lapho bethi [abangakholwa baseMakha]: “Allah, uma ngempela iqiniso elivela kuwe, sithele ngemvula yamatshe noma usilethele isijeziso esibuhlungu”.

U Allah angeke abajezise uma nje wena usasekhona maphakathi kwabo futhi u Allah angeke abajezise uma besacela intethelelo.

Yini lena abanayo engenza ukuba u Allah angabajezisi, kube yibona abavimba abantu ukuya eMasijidi Haramu futhi benjalo nje abasibona abangani baKhe. Ngokuba abangani bakhe yilabo abazithobayo, kepha iningi labo alazi.

Futhi umthandazo wabo eNdlini [eMasijidi Haramu] ukukewula nokushaya izandla. Ngakhoke zizweleni isijeziso ngenxa yalokho ebeningakukholwa.

Nebala, labo abangakholwa bachitha umcebo wabo ekubeni yisihibe endleleni ka Allah. Bayolokhu bewuchitha kepha uyoba unombangela wokuzisola kwabo bese beyanqotshwa. Futhi labo abangakholwa bayobuthaniswa eJahanamu [eMlilweni].

Ukuze u Allah ahlunge ukungcola kokuhlanzekile, bese ebeka ukungcola ndawonye akulakanyise konke bese ekufaka eJahanamu.

Yithi kulabo abangakholwa, uma bepheza bayothethelelwa lokhu okwendlule, kepha uma bephikelela, okwenzeka kwabasendulo kuyaziwa.

Futhi yilwa nabo kuze kuphele ukubhanqa [u Allah nezikhonzwa] futhi inkolo yonke ibe ngeka Allah. Uma bepheza, u Allah uyakubona lokhu abakwenzayo.

Kepha bekushaya indiva, yazini ukuthi u Allah unguMhlengi wenu, futhi unguMhlengi omuhle noMsizi omuhle.

Yazini ukuthi kulokhu enikuphange empini, isingxenye eyodwa kwezinhlanu ingeka Allah neSithunywa nezihlobo nezintandane nabampofu nezihambi, uma ngempela nikholelwa ku Allah nakulokho esakwambulela esigqileni seThu ngosuku lomhlahlandlela, usuku lapho kwakutholane phezulu amaqembu amabili. Futhi u Allah unamandla okwenza izinto zonke.

Mhla nina ninganeno kwasehlanzeni bona bengaphesheya, undwendwe lona lwalungenzansi kwenu. Ukube navumelana ukuhlangana ngesikhathi esithize, beningeke nasigcina leso sikhathi, kepha u Allah ubefuna ukufeza into obekumele yenzeke, ukuze abhubhe lowo obhubhayo esebutholile ubufakazi nalowo ozophila aphile esenobufakazi. Futhi u Allah uNgozwayo Owaziyo.

Khumbula ukuthi u Allah wakubonisa bona ephusheni beyidlanzana, phela ukube wakubonisa bona bebaningi, beniyophela amandla futhi benizophikisana ngaloludaba, kepha u Allah ubefuna ukufeza into obekumele yenzeke, ngokuba Yena uyasazi isimo sezinhliziyo.

Khumbula futhi ukuthi wanibonisa bona beyidlanzana emehlweni enu mhla nihlangana, wanenza nani nayidlanzana emehlweni abo, ukuze phela u Allah afeze lokho obekumele kwenzeke. Futhi zonke izinto ziyobuyela ku Allah.

Nina enikholwayo, uma nitholana phezulu neqembu, zimelelani futhi nikhumbule u Allah kakhulu ukuze niphumelele.

Futhi nilalele u Allah neSithunywa saKhe, ningaphikisani, funa nibe buthaka niphelelwe umdlandla wenu. Nibekezele, ngokuba u Allah unalabo ababekezelayo.

Futhi ningabi njengalaba abaphuma emizini yabo bezindondonya izifuba, bebukisa ebantwini futhi beyisihibe endleleni ka Allah. U Allah ukuhaqe konke abakwenzayo.

Khumbula futhi ukuthi uShayitani wabakhangisela izenzo zabo wathi: “Akukho muntu oyoninqoba namhlanje futhi mina ngiyonivikela”. Kepha kwathi esetholana phezulu amaqembu amabili, wateta izithende emhlane wathi: “Angihlanganise lutho nani, ngokuba ngibona lokhu nina eningakuboni futhi ngiyamesaba u Allah, ngokuba u Allah ujezisana kanzima”.

Khumbula lapho amaphixiphixi nalabo abanokufa ezinhlizweni zabo, bethi: “Impela laba ibadukisie inkolo yabo”. Kepha lowo othembela ku Allah, nebala u Allah uSomandla Okhaliphile.

Futhi ukube ubungabona lapho izingelosi zithatha imiphefumulo yalabo abangakholwa, zishaya ubuso babo nemihlane yabo zithi: “yizwani isijeziso somlilo”.

Lokho ngungenxa yemisebenzi yezandla zenu nokuthi futhi u Allah akasihlukumezi isigqila.

Njengalokhu okwenzeka kusizwe sikaFir’awoni nalabo ababandulelayo. Abakholwanga kuMibiko ka Allah, wabe u Allah esebajezisa ngezimpambuko zabo. Bheka ngoba u Allah Unamandla ujezisana kanzima.

Lokho yingoba u Allah akasoze asiguqula isibusiso abusise ngaso isizwe esithize kube yibona abaguqukayo ngokwabo, nanokuthi futhi u Allah Ungozwayo Owaziyo.

Njengoba bekuwumkhuba wesizwe sikaFir’awoni kanye nalabo ababandulelayo, abakholwanga yiMibiko yeThu, sabe sesibhubhisa ngenxa yezimpambuko zabo sacwilisa abantu bakaFir’awuni futhi bonke babephambukile.

Nebala, isidalwa okiyisona esibi ku Allah, yilabo abangakholwa abangasoze bakholwa.

Yilabo owenza isivumelwano nabo kepha bona basephule isivumelwano sabo ngaso sonke isikhathi, futhi bengenakho ukuthobela u Allah.

Uma utholana nabo empini, benze isilo sengubo kuze kwazi labo ababeshiye emuva ukuze nabo bafunde isifundo.

Futhi uma usola ukungathembeki esizweni esithize [eninesivumelwano naso], bazise ngokufanayo, ngokuba uAllah akawathandi amaqili.

Laba abangakholwa mabangacabangi ukuthi sebephunyukile, ngokuba abasoze baphunyuka.

Zilungiseleleni ukubhekana nabo [abangakholwa] lokho enikukhonayo emandleni[1] nasekugibeleni injomane enisabisa ngayo isitha sika Allah nesitha senu. Futhi ezinye ngaphandle kwabo anibazi, kepha u Allah uyabazi. Futhi konke enikuchitha endleleni ka Allah niyobuyiselwa kona ningaqilwa lutho. ——— [1] Ngamandla kuchazwa konke lokhu okudingakalayo empini, njengokuziqeqesha kwebutho, izikhali nokusebenzisa ngobuchule. Lokhu kufakazelwa amazwi eSithunywa mhla esho ukuthi “amandla ukuciba ngomcibisholo”. Lokhu kusho ukuthi amaMusilimu kumele ehlale esesimeni esigculisayo ukuzivikela ezitheni zabo ukuze angaphenduki izisulu zezitha. Kumele izitha zicabange kaningi ngaphambi kokunquma ukubahlasela.

Uma behlongoza ukubeka phansi izikhali, nani yenzani kanjalo bese nithembela ku Allah, ngokuba Ungobanayo Owaziyo.

Uma befuna ukukuqila, u Allah ukwanele. Phela nguYena lona owakusekela ngosizo lwaKhe nangabakholwayo.

Wahlanganisa izinhliziyo zabo; uma ubangachitha konke okusemhlabeni ubungeke wazihlanganisa izinhliziyo zabo, kepha u Allah wabahlanganisa ngokuba Yena unguSomandla Okhaliphile.

Sithunywa, u Allah ukwanele kanye nalabo abakholwayo abakulandelayo.

Sithunywa, gqugquzela abakholwayo ngokuya empini. Uma kunabangamashumi amabili azimelele kini, bayonqoba amakhulu amabili Kuthi uma beyikhulu, bayonqoba inkulungwane yalabo abangakholwa ngokuba bangabantu abangenakuqonda.

Manje u Allah unenzele lula futhi uyazi ukuthi kunalabo ababuthaka kini. Ngakhoke uma kunabayikhulu elizimelele kini, bayonqoba amakhulu amabili. Kuthi uma beyinkulungwane, bayonqoba abayizinkulungwane ezimbili ngemvumo ka Allah, futhi u Allah ukanye nalabo ababekezelayo.

Akumele iSithunywa sibe nezithunjwa zempi kuze uqotha imbokodo ezweni. Nifuna izinto zomhlaba kulapho u Allah ufuna eLizayo, futhi u Allah unguSomandla Okhaliphile.

Ukube bekungesiso isinqumo ebesikade savela ku Allah, benizotholwa isijeziso esinzima kulokho enakuthatha [kuzithunjwa uku zikhululwe].

Ngakhoke dlanini okuvunyelwe nokusulwa kulokho enikuphangile empini, nithobele u Allah. Nebala u Allah ungoThethelelayo Onesihe.

Sithunywa, yithi kulabo abasezandleni zenu abayiziboshwa: “Ukube bekukhona okuhle okusezinhlizweni zenu u Allah akwaziyo, ubezonipha okungcono kunalokho okuthathwe kini futhi anithethelele, ngokuba u Allah ungoThethelelayo Onesihe.

Uma behlose ukukukhohlisa, sebeke bazama ukukhohlisa u Allah phambilini, kepha wabathola, ngokuba u Allah ungoWaziyo Okhaliphile.

Nebala labo abakholwayo abafuduka [ngeHijira] futhi bazabalaza endleleni ka Allah ngomcebo wabo nabo uqobo, kanye nalabo abakhoselisa balekelela, bonke labo bangabangani omunye komunye. Kepha labo abakholwayo kodwa abangazange bafuduke, aninakuzibandakanya nabo ngalutho baze bafuduke. Uma befuna usizo kini mayelana nenkolo, basizeni, ngaphandle uma kuphambene nabantu okunesivumelwano phakathi kwenu nabo. Futhi u Allah ukubona konke enikwenzayo.

Futhi labo abangakholwa bangabangani omunye komunye. Uma ningakwenike lokhu [ukuzibandakanya nabakholwayo abaqotho nokuziqhelelanisa nabangakholwa], kuyoba nothuthuva ezweni nempambuko enkulu.

Futhi labo abakholwayo bafuduka bazabalaza endleleni ka Allah kanye nalabo abakhoselisa balekelela, yibona kanye laba abangabakholwayo ngokweqiniso, bayothola intethelelo nesondlo esihle.

Kanti nalabo abakholwa mveni bafuduka bazabalaza kanye nani, labo bamunye nani. Futhi ngokunqunywe ngu Allah, abozalo yibona okumele babe yizindlalifa zabanye bozalo. Ngempela u Allah wazi yonke into.

[Lesi] isimemezelo sokuziqhelelanisa kuka Allah neSithunywa saKhe kulabo abakhonza izithixo enenze isivumelwano nabo.

Nakhoke [nina enikhonza izithixo], hambani ngokukhululeka ezweni izinyanga ezine, futhi nihlale nazi ukuthi anisoze namphunyuka u Allah nokuthi futhi u Allah uyobahlaza labo abangakholwa.

Futhi nesimemezelo esivela ku Allah neSithunywa saKhe sibhekiswe kusintu ngosuku lomkhosi we-Idi yomhlatshelo, esithi: “u Allah neSithunywa saKhe abahlanganise lutho nalabo abakhonza izithixo”. Uma [nina enikhonza izithixo] nizisola nicela intethelelo, yikona okungcono kini, kepha uma nishaya indiva, hlalani nazi ukuthi anisoze naphunyuka ku Allah. Futhi yazisa labo abangakholwa ukuthi bayohloma isijeziso esibuhlungu.

Ngaphandle kwalabo abakhonza izithixo eninesivumelwano nabo futhi abangazange baniqile ngalutho noma basekele abanye ekulweni nani; sigcineni isivumelwano nabo kuze kuphele isikhathi saso. Nebala uAllah uyabathanda labo abamthobelayo.

Uma seziphelile izinyanga ezihlonishwayo [iMuharamu, uRajabhu, Dul-Ka’ada, Dul-Hija], bulalani labo abakhonza izithixo yonke indawo lapho enibathola khona, nibabambe, nibavimbezele futhi nibacuthele kuyo yonke indawo. Kepha uma bezisola futhi benze iswala bakhiphe nezakati, badedeleni, ngokuba u Allah Ungumthetheleli Onesihawu.

Futhi uma omunye walabo abakhonza izithixo ekucela ukuba umvikele, mvikele ukuze akhone ukuzwa Izwi lika Allah [iKurani], bese umfinyelelisa lapho ayophepha khona. Lokho yingoba bangabantu abangazi.

Labo abakhonza izithixo bangaba kanjani nesivumelwano ku Allah neSithunywa saKhe na? Ngaphandleke kwalabo enenza nabo isivumelwano eMasijidi Haramu [eHudayibiya]. Uma besalokhu bethembekile kini, nani thembekani kubo, ngokuba u Allah uyabathanda labo abamthobelayo.

Bangaba kanjani nesivumelwano, ngoba uma bengaba namandla phezu kwenu, abayikuba nandaba

Bathengise ngezambulo zika Allah ngenani eliyize, baba futhi yizihibe endleni ka Allah. Kwaze kwakubi impela lokhu abakwenzayo.

Uma kufika kwabakholwayo, abamkhathaleli u Allah nesivumelwano, ngokuba labo bayiziphula-mthetho uqobo.

Kepha uma bezisola, becela intethlelo, baqikelele ukwenza iswala baphinde bakhiphe nezakati, sebengabanewenu okholweni. Futhi siyabacacisela imibiko labo bantu abanolwazi.

Uma bephula izifungo zabo emveni kwesivumelwano sabo, baphinde futhi bagxeke ukholo lwenu, bulalani abaholi bokungakholwa, ngoba abazifezi izifungo zabo, ukuze bapheze.

Ningahlala kanjani ningalwi nalabo bantu abangazifezi izifungo zabo futhi ababezimisele ukudingisa iSithunywa futhi kube kuyibona abanisukele kuqala. Ingabe niyabesaba na? Ngu Allah kuphela okumele nimesabe uma ngempela ningabakholwayo.

Yilwani nabo ukuze phela u Allah abajezise ngezandla zenu futhi abahlaze aphinde anisize nibanqobe futhi alaphe asindise izinhliziyo zabantu abakholwayo.

Aphinde futhi asuse inzondo ezinhlizweni zabo [abakholwayo] futhi u Allah uthethelela amthandayo. Belu u Allah Ungowaziyo Okhaliphile.

Ingabe benicabanga ukuthi nizoyekwa nje [ningavivinywa], ekubeni u Allah engakabazi [ngokubahlonza] labo abazikhandlayo kini futhi abangazange babe nezithenjwa ngaphandle kuka Allah neSithunywa saKhe kanye nabakholwayo, futhi u Allah unolwazi ngakho konke enikwenzayo.

Labo ababhanqayo akumele banakekele amaMasijidi ka Allah besavuma ukuthi abakholwa. Yibo kanye labo izenzo ziyoshabalala futhi bayohlala unaphakade eMlilweni.

Okumele kube yibona abanakekela amaMasijidi ka Allah, yilowo okholelwa ku Allah nasokukwini lokuGcina futhi aqikelele ukwenza iSwala akhiphe neZakati futhi angasabi lutho ngaphande kuka Allah. Yibona-ke labo okunethemba lokuthi bayohlengeka.

Labo [abangakholwa] abaphuzisa abenza iHajibaphinde banakekele iMasijidi Haramu, ingabe nibafanisa nalowo okholelwa ku Allah nasoSukwini lokuGcina aphinde alwele indlela ka Allah na? Abalingani ku Allah, belu u Allah akabaholi abantu abaphambukayo.

Labo abakholwayo, abafuduka futhi balwele indlela ka Allah ngomcebo wabo nangezimpilo zabo, yibona abanezigaba eziphakeme ku Allah futhi yibo labo abayophumelela.

INkosi yabo ibahalelisela ngomusa ovela kuYo nentokozo nezivande, abayothola kuzo ukunethezeka okungapheli.

Bayohlala kuzo [izivande] unomphela onaphakade. Nebala u Allah unomvuzo omkhulu.

Nina enikholwayo, ningenzi abazali benu nabanewenu abangani, uma bethande ukungakholwa kunokukholwa, ngokuba labo abayobenza abangani kini, bayoba ngabaphambukile.

Yithi: “Uma abazali benu nezingane zenu nabanewenu nabafazi benu nemindeni yenu nemicebo yenu eniyicongelele nohwebu enisaba ukuwa kwalo nemizi enithokozayo ngayo, nikuthanda ukudlula u Allah neSithunywa saKhe nokulwela indlela yaKhe, lindani aze u Allah alethe umyalelo waKhe. Futhi u Allah akabaholi abantu abayizephula mthetho.

Nebala, u Allah wanisiza ezindaweni eziningi, nangosuku lwaseHunayini, mhla niyengwa ubuningi benu obungazange bunisize ngalutho, kwabancane indawo, nabaleka nibuyela emuva.

U Allah wabe esehlisa uzinzo lwaKhe kuSithunywa saKhe nakubakholwayo, wehlisela amabutho eningawabonanga, wajezisa labo abangakholwa; lokho, yiwona umvuzo wabangakholwa.

Kepha u Allah uthethelela amthandayo emuva kwalokho, ngokuba u Allah Ungumthetheleli Onesihawu.

Nina enikholwayo, nebala labo abakhonza izikhonzwa [izithixo] bangcolile, ngakho-ke bangaphinde basondele eMasijidi Haramu emuva kwalonyaka. Uma nesaba ubuphuya, u Allah nguYena oyonicebisa ngomusa waKhe uma ethanda. Ngokuba u Allah Ungowaziyo Okhaliphile.

Phakani impi kulabo abangakholelwa ku Allah nasoSukwini lokuGcina baphinde bangakunqabeli lokho okunqatshelwe ngu Allah neSithunywa saKhe futhi bengalandeli inkolo yeqiniso kulabo abanikwa iMibhalo, baze bakhokhe iJiziya [intela] ngezandla zabo, behlazekile.

Futhi amaJuda athi u-Uzayiri indodana ka Allah, namaNasarina nawo athi uMasihi indodana ka Allah. Lokho inkulumo nje abayishoyo ngemilomo yabo. Balingisela okwakushiwo yilabo abangakholwa phambilini. U Allah makababhubhise; badukiswe kanjani na?

Benze Abafundisi babo nezindela zabo kanye noMasihi ka Mariyamu izikhonzwa ngaphandle kuka, nakuba babeyalelwe ukuba bakhonze u Allah kuphela, ngokuba akekho ofanelwe wukukhonza ngaphandle kwaKhe; makangcweliswe kulo abakubhanqayo.

Bafuna ukushabalalisa ukukhanya kuka Allah ngemilomo yabo, kepha u Allah uyaphikelela ekupheleliseni ukukhanya kwaKhe ngisho bengathandi labo abangakholwa.

NguYena belu, owathumela iSithunywa saKhe nokuhola kanye nenkambiso [inkolo] yeqiniso ukuze iqhakambe ngaphezu kwazo zonke izinkolo ngisho abakhonzi bezithixo bengathandi.

Nina enikholwayo, iningi labafundisi nezindela zidla umcebo wabantu ngokungemthetho, futhi bayizihibe endleleni ka Allah. Futhi labo abawola igolide nesiliva nje, bengalichithi endleleni ka Allah, bahalalisele ngesijeziso esibuhlungu;

Ngosuku lapho ziyoshisiswa [igolide nesiliva] emlilweni waseJahanamu, bese iziphongo zabo nezinhlangothi zabo kanye nemihlane yabo kushiswe ngakho [igolide nesiliva elishisayo]. [kuyothiwa kubo]; “Yikona-ke lokhu ebenikade niziwolela kona, ngakhoke yizwani lokho ebenikuwola”.

Nebala, inani lezinyanga [zonyaka] ku Allah ziyishumi nambili eNcwadini ka Allah kusukela ngosuku adala amazulu nomhlaba, kuzo [lezinyanga] kunezine ezihloniphekile [iMuharamu, uRajabhu, Dul- Ka’ada, Dul-Hija]. Iyona leyo inkolo eqondile, ngakhoke ningalokothi niphambuke kuzo [lezinyanga ezine]. Yilwani nabo bonke abakhonzi bezithixo njengoba nabo belwa nani nonke, futhi nihlale nazi ukuthi u Allah unalabo abamthobelayo.

Ngempela ukuhlehlisa izinyanga [zonyaka] kuyisengezo phezu kokungakholwa, labo abangakholwa abaduke ngaso. Abayihloniphi kulonyaka, kuthi komunye unyaka bayihloniphe ukuze bahambisane nenani [lezinyanga] u Allah abeke ukuba lihlonishwe, ngaleyo ndlela bavumela lokho u Allah akunqabele. Bahlotshiselwe izenzo zabo ezimbi. Futhi u Allah akabaholi abantu abangakholwa.

Nina enikholwayo, yini ngani uma kuthiwa kini: “phumani niye empini”, nihudula izinyawo. Ingabe seninqome impilo yasemhlabeni kuneyakweLizayo na? Bheka ngoba izinto zempilo yasemhlabeni ziwubala kwelizayo.

Uma ningaphumi ukuya empini, u [Allah] uyonijezisa kabuhlungu aphinde aqoke abanye abantu esikhundleni senu, futhi anisoze namlimaza nagalutho, kwazise u Allah unamandla okwenza izinto zonke.

Uma ningamsizi [uMuhamadi iSithunywa], u Allah wamsiza mhla exoshwa yilabo abangakholwa bebabili, besemgedeni, wathi omunye wabo: “ungakhathazeki, u Allah unathi”. U Allah wabe esehlisela kuye [uMuhamadi] uzinzo lwaKhe wamsekela ngebutho eningalibonanga, wadicilela phansi izwi lalabo abangakholwa, kwazise Izwi lika Allah yilona elisesicongweni. U Allah Ungusomandla Okhaliphile.

Hambani empini kulula kunzima futhi nilwe ngomcebo wenu nangani uqobo endleleni ka Allah, ngokuba lokho yikona okungcono kini, ukuba niyazi.

Ukube izimpango zempi bezitholakala kalula eduze futhi nohambo lulula, bebezokulandela [abazenzisi] kepha ibanga libe lide kubo. Bazofunga ngo Allah [bathi]: “Ukube besikhona, besizophuma nani”. Bazibhubhisa bona uqobo, futhi u Allah uyazi ukuthi baqamba amanga.

U Allah ukuxolele, kungani ubavumela [ukusala] na? Mekumele uhlunge labo abaneqiniso uzokwazi labo abanamanga.

Labo abakholelwa ku Allah nasoSukwini lokuGcina abasoze bakucela imvumo yokuba balwe ngomcebo wabo nabo uqobo. U Allah uyabazi abamthobelayo.

Labo okuyibona kuphela abakucela imvumo, yilabo abangakholelwa ku Allah nasoSukwini lokuGcina futhi abanongabazane ezinhlizweni zabo, yilokhu begidagida ekungabazeni kwabo

Uma babezimisele ukuphuma nani, babezozilungiselela, kepha u Allah akathandanga ukubathumela, ngakhoke wabavimbela, kwathiwa [kubazenzisi]: “salani nabasalayo”.

Ukube baphuma nani, bebezondisela uthuthuva futhi bangene phakathi kwenu bezama ukwakha ukuthuthuva, futhi kunalabo abalalelayo phakathi kwenu. U Allah uyabazi abaphambukile.

Bake bazama ukwakha uthuthuva phambilini, bakuhlanekezelela izinto, kwaze kafika iqiniso nesinqumo sika Allah sanqoba nakuba babengathokozile.

Futhi kunalowo kubo othi: “ngivumele [ngisale] ungangifaki esilingweni”. Empeleni bawele kuso isilingo. Futhi iJahanamu iyobahaqa labo abangakholwa.

Uma wehlelwa okuhle, kubaphatha kabi. Kepha uma wehlelwa umshophi, bathi: “Nebala sasithatha isinqumo sethu [sokusala] phambilini”, bafulathele bajabulile.

Yithi: “Akukho okuyosehlela ngaphandle kwalokho u Allah asibekele kona, kwazise nguYena uMhlengi wethu. Ngakhoke labo abakholwayo mabathembele ku Allah.

Yithi: “Ingabe nilindele kithi okukodwa okuhle kokubili [ukunqoba noma ukuwa empini] na? Belu nathi silindele ngani ukuba u Allah anishaye ngesijeziso esivela kuYe noma ngezandla zethu. Ngakhoke, qhubekani nokulinda, nathi silindile kanye nani.

Yithi: “Nikelani ngokuthanda noma ngenkani, akusoze kwamukelwa kini, ngoba nina ningabantu abayizephula- mthetho”.

Akukho okuvimbele ukuba iminikelo yabo yamukelwe ngaphandle kokuthi abakholelwanga ku Allah neSithunywa saKhe futhi baya kuSwala ngobuvila [behudula izinyawo] benjalo nje banikela bengafuni.

Ngakhoke ungakhangwa imicebo yabo nezingane zabo. Ngokuba u Allah ufuna ukubajezisa ngayo [imicebo nezingane] empilweni yasemhlabeni nokuthi bafe bengakholwa.

Bayafunga [abazenzisi] ngo Allah ukuthi ngempela bangakini, ekubeni bengekho ngakini. Empeleni bangabantu abangamavaka.

Uma bebengathola inqaba yokukhusela noma imigede [ezintabeni] noma imihume [emathunjini omhalaba], bebezobalekela kuwo begijima okwehhashi elingathanjisiwe.

Kunalabo kubo abakugxekayo mayelana [nokwabiwa] kweminikelo; uma kukhona abakunikiwe kuyo, bayajabula. Kepha uma benganikwanga lutho kuyo, yibo labaya sebediniwe.

Ukube bavele bajabula ngalokho u Allah abaphe kona neSithunywa saKhe, base bathi: “u Allah usenele, kungekudala u Allah uyosinika emseni waKhe kanjalo neSithunywa [kulokho u Allah amphe kona], nebala silangazelele ku Allah.

Iminikelo [yeZakati] ingeyalabo abampofu nabaswele nabaqoqi bayo nabanxenxwayo nasekukhululeni izigqila [zamaMusilimu] nabacwile ezikweletini nakwezempi nesihambi; kuyimpoqo evela ku Allah, futhi u Allah Ungowaziyo Okhaliphile.

Kunalabo kubo [abazenzisi] abahlukumeza iSithunywa ngokuthi bathi: “ungulalela- zonke”. Yithi: “Ungolalela okuhle kini, ukholelwa ku Allah futhi uyabakholwa abakholwayo futhi ungumusa kulabo abakholwayo kini”. Laboke abahlukumeza iSithunywa sika Allah, bayothola isijeziso esibuhlungu.

Bafunga ngo Allah kini ukuze banijabulise nje, ekubeni kumele bajabulise u-Allah neSithunywa saKhe, uma ngempela bengabakholwayo.

Bebengazi yini ukuthi, lowo ophambana no Allah neSithunywa saKhe, uyothola umlilo waseJahanamu abhadle kuwo unaphakade; lokho ukuhlazwa okukhulu.

Abazenzisi bahlalela ovalweni ukuthi [langalimbe] kuyofika iSura [isahluko seKurani] ezokwazisa ngalokho okusezinhlizweni zabo. Yithi: “Qhubekani nokubhuqa, ngoba u Allah uyokubeka obala lokhu enikwesabayo”.

Futhi uma ubabuza, nakannjani bayothi: “Besimane sintela sizidlalela”. Yithi: “Nintela ngo Allah nezambulo zaKhe kanye neSithunywa saKhe na?”

Ningalokhu nenza izaba, seniphenduke abangakholwa emuva kokholo lwenu. Uma sithethelela uquqaba oluthile kini, sijezisa olunye uquqaba ngoba beyiziphula-mthetho.

Abazenzisi besilisa nabesimame bangabangani bebodwa. Bayalelana ngokubi banqandane kokuhle futhi bangongoqo; bakhohlwe u Allah, naYe babenza njalo. Abazenzisi, bangabaphambuki impela.

U Allah uthembise abazenzisi besilisa nabesimame nalabo abangakholwa, umlilo waseJahanamu abayobhadla kuwo unaphakade, uyobanela. U Allah uyobaqalekisa futhi bayothola isijeziso esinganqamuki.

Njengalabo abanandulelayo, babenamandla ukudlula nina futhi benomcebo nezingane eziningi. Bancebeleka ngesabelo sabo [emhlabeni], nani nancebeleka ngesabelo senu njengalokhu bancebeleka abanandulelayo ngesabelo sabo, futhi nalibala ukuntela njengalabo ababentela. Labo, izenzo zabo ziyakushabalala, emhlabeni nakwelizayo, futhi labo, yibona kanye abalahlekelwe.

Ingabe abazitholanga yini izindaba zalabo ababandulelayo, isizwe sikaNuhu no Adi noTamudu no Ibhirahimu nabantu baseMadiyani nemizi egubudelwe [isizwe sika Luti]. IZithunywa zabo zafika kubo nezibonakaliso; u Allah akabahlukumezanga kepha yibona uqobo abazihlukumeza.

Abakholwayo besilisa nabesimame, abanye bangabangani kubanye. Bayalela okuhle, banqande okubi, baqikelele ukwenza iSwala bakhiphe neZakati baphinde balalele u Allah neSithunywa saKhe. Labo, u Allah uyokuba nomusa kubo. Nebala u Allah Ungusomandla Okhaliphile.

U Allah uthembise abakholwayo besilisa nabesimame izivande okugeleza imifula ezanzi kwazo, bayohlala kuzo unophakade kanye nemizi emihle ezivandeni zase Adani. Kepha ukuthokoza kuka Allah yikona okukhulu [kunazo zonke izinto], futhi lokho iyona mpumelelo enkulu.

Sithunywa, yilwa nabangakhola kanye nabazenzisi ungabazweli. Futhi bayophelela eJahanamu, okuyisiphetho esibi.

Bafunga ngo Allah ukuthi abashongo lutho, ekubeni besho amazwi okungakholwa, baba abangakholwa emuva kokuba bese bengene ku Isilamu, futhi base benqume lokho abazange bakhone ukukufeza. Babengagxeki lutho ngaphandle nje kokuthi u Allah ubacebisile ngomusa waKhe kanye neSithunywa saKhe. Uma bezisola becela intethelelo, yikona okungcono kubo, kepha uma beshaya indiva, u Allah uyobajezisa kabuhlungu emhlabeni nakwelizayo, futhi akukho muntu emhlabeni oyobahlenga noma abasize.

Futhi kunalabo kubo [abazenzisi], abathembisa u Allah, [bethi]: “Uma nje engasipha emseni waKhe, sizonikela futhi siyoba ngabaqotho”.

Kepha kuthe lapho esebaphile emseni waKhe, wancitshana ngakho futhi bashaya indiva bengagqizi qakala.

Wabe [u Allah] esezinzisa ukuzenzisa ezinhlizweni zabo kuze kuyofika uSuku lokwaHlulela ngenxa yokuphula kwabo isithembiso sabo abasenza no Allah bamthembisa sona, nanokuthi futhi babeqamba amanga.

Ingabe bebengazi yini ukuthi ngempela u Allah uyazazi izimfihlo zabo nezinkulumo zabo esithe, nanokuthi u Allah ukwazi konke okungabonwa.

Labo abagxeka labo abakholwayo abanikelayo mayelana neminikelo kanye nalabo abangenalutho [lokunikela] ngaphandle kwezithukuthuku zabo, bese behlekisa ngabo. U Allah uyohlekisa ngabo futhi bayothola isijeziso esibuhlungu.

Bacelele intethelelo noma ungabaceleli, noma ungabacelela intethelelo amahlandla angamashumi ayisikhombisa, u Allah akasoze abaxolela. Lokho kungenxa yokuthi abakholelwanga ku Allah neSithunywa saKhe. Futhi u Allah akabaholi abantu abayiziphula-mthetho.

Labo abashiywe ngemuva bajabulile ngokusalela kwabo emuva kweSithunywa sika Allah futhi bebengafuni ukuyolwa endleni ka Allah ngemicebo yabo nabo uqobo. Bathi: “ningayi ekushiseni”. Yithi: “Umlilo waseJahanamu ushisa kakhulu”, ukube nje bebenokuqonda.

Ngakhoke mabahleke kancane bakhale kakhulu, lona umvuzo walokho ababekwenza.

Uma u Allah ekubuyisela eqenjini elithize kubo [abazenzisi], bese bekucela imvumo yokuphuma [nawe], ubothi: “Anisoze neze naphuma nami futhi anisoze nalwa nesitha kanye nami. Ngoba nina nijabulile ngokusala kwasekuqaleni, ngakhoke salani nabasalayo”.

Ungalinge uthandazele muntu oshonile kubo futhi ungami nasengcwabeni lakhe, ngokuba bona abakholelwanga ku Allah neSithunywa saKhe futhi bafe beyiziphula- mthetho.

Ngakhoke ungakhangwa imicebo yabo nezingane zabo. Ngokuba u Allah ufuna ukubajezisa ngayo [imicebo nezingane] empilweni yasemhlabeni nokuthi bafe bengakholwa.

Kuthi lapho kwembulwa iSura [isahluko seKurani], ethi: “Kholwelani ku Allah futhi niye empini kanye neSithunywa saKhe”. Labo abame kahle kubo [abazenzisi] yibona abakucela imvumo [yokusala], bethi: “Siyeke sibe kanye nabasalayo”.

Bajabulele ukuba nabasalayo, izinhliziyo zabo zivaliwe, ngakhoke abanakuqonda.

Kepha iSithunywa nalabo abakholwayo kanye naso, balilwe ngemicebo yabo nangabo uqobo. Yibo labo abayothola okuhle futhi yibo labo abayophumelela.

U Allah ubalungiselele izivande okugeleza imifula ezansi kwazo bayohlala kuzo unaphakade. Leyo, impumelelo enkulu.

Bafika labo abazolandula kwabasephandleni ukuze bathole imvumo [yokusala], kepha bahlala labo ababengakholelwa ku Allah neSithunywa saKhe. Labo abangakholwa kubo, bayotholwa isijeziso esibuhlungu.

Abanacala [uma besala] labo ababuthaka nabagulayo nalabo abangenakho abangakusebenzisa [empini], uma nje beneqiniso ku Allah neSithunywa saKhe. Labo abenza okuhle, akukho ndlela yokubagxeka. Futhi u Allah Ungumthetheleli Onesihawu.

Futhi [abanacala] labo abeza kuwe [Muhamadi] ukuba ubagibeze, kepha uthi: “Anginakho enganigibeza kukho”, babuyela emuva amehlo abo egeleza izinyembezi, bedumele ukuthi abanalutho abangalusebenzisa [empini].

Abagxekwayo yilabo abakucela imvumo [yokusala] ekubeni benjingile. Bathokozela ukuba nabasalayo, u Allah wabe esevala izinhliziyo zabo, yingakho nje bengenalwazi.

Benza izaba kini uma senibuyile kubo. Yithi: “Ningenzi izaba, asisoze sanikholwa ngoba u Allah usesitshelile ngani, futhi u Allah uyayibona imisebenzi yenu, kanjalo neSithunywa saKhe. Futhi niyobuyela koWazi okungabonwa nokubonwayo ukuze anazise ngalokho ebenikwenza.

Bayofunga ngo Allah kini lapho nibuyela kubo ukuze nibayekele; ngakhoke bayekeleni ngoba bangcolile futhi isiphetho sabo iJahanamu ngenxa yalokho abakwenzayo.

Bayafunga kini ukuze nithokoze ngabo. Uma-ke nina nithokoza ngabo, u Allah Yena akathokozi ngabantu abayizephula-mthetho.

Abahlala emaphandleni yibona abanokungakholwa nokuzenzisa okukhulu futhi bavame ukuba bengayazi imiyalelo u Allah ayembulele kuSithunywa saKhe. U Allah Ungowaziyo Okhaliphile.

Futhi kulabo abahlala emaphandleni, kunalowo othatha lokhu anikela ngakho [endleleni ka Allah] njengokumosha futhi uhlale elindele ukuba nehlelwe umshophi. Umshophi omubi mawehlele bona. u Allah Ungozwayo Owaziyo.

Kulabo abahlala emaphandleni, kunalowo okholelwa ku Allah nasoSukwini lokuGcina futhi athathe lokho akuchithayo [endleleni ka Allah] njengendlela yokuzisondeza ku Allah nokukhulekelwa iSithunywa. Nebala kuyobasondeza, ngokuba u Allah uzobafaka emseni waKhe. Ngempela u Allah Ungumthetheleli Onesihawu.

Labo ababe ngabokuqala [ukwamukela i-Isilamu] kuMuhajirina nama Aniswari kanye nalabo ababalandela ezinyathelweni zabo ngokuhle, u Allah uyathokoza ngabo futhi nabo bayothokoza ngaYe. U Allah ubalungiselele izivande okugeleza imifula ngezansi kwazo, bayohlala kuzo unaphakade. Leyo, iyona impumelelo enkulu.

Futhi kulabo abahlala emaphandleni enakhelene nabo, kunabazenzisi, kanjalo nakuzakhamizi zaseMadina. Bagxili ngxi ekuzenziseni, wena [Muhamadi] awubazi, kepha Thina siyabazi. Sizobajezisa kabili bese bebuyela esijezisweni esinzima.

Abanye babo bazivumile izimpambuko zabo, bahlanise izenzo ezinhle nezinye ezimbi, hleze u Allah abathethelele, ngoba u Allah Ungothethelelayo Onesihawu.

Thatha kumcebo wabo umnikelo [iZakati] ozobahlanza uphinde ubakhuculule ngawo futhi ubakhulekele, ngokuba umkhuleko wakho uwuzinzo kubo. U Allah Ungozwayo Owaziyo.

Ingabe bebengazi yini ukuthi u Allah uyakwamukela ukuzisola kwezigqila zaKhe aphinde futhi athathe neminikelo, nokuthi u Allah Ungothethelelayo Onesihawu.

Yithi: “Yenzani imisebenzi [emihle], ngokuba u Allah neSithunywa saKhe kanye nabakholwayo bayibhekile imisebenzi yenu, futhi niyobuyela koWazi okungabinwa nokubonwayo ukuze anazise ngebenikwenza.

Abanye balindele isiqumo sika Allah, uzobajezisa noma abathethelele. U Allah Ungowaziyo Okhaliphile.

Futhi labo abenze iMasijidi indawo yokulimaza neyokungakholwa nendlela yokukwakha uqhekeko phakathi kwabakholwayo nendawo yokucutha labo abake balwa no Allah neSithunywa saKhe ngaphambilini. Futhi bayofunga, bathi: “Besingahlosanga lutho ngaphandle kokuhle”, kepha u Allah ungufakazi ukuthi baqamba amanga aluhlaza.

Ungalinge ume kuyo [uthandaze], ngokuba iMasijidi ozisekelo zayo ukuthobela u Allah zibekwa ngosukulokuqala, iyona okufanele ume kuyo [uthandaze]. Kuyo kunamadoda athanda ukuzihlanza, futhi u Allah uyabathanda labo abazihlanzayo.

Ingabe ubani ongcono, lowo owakha isakhiwo sakhe phezu kokuzithoba nokuthokoza okuvela ku Allah, noma lowo owakhe isakhiwo sakhe onqenqemeni lewa elikhumuzelayo, elivoshoka naye limfake emlilweni waseJahanamu. Futhi u Allah akabaholi abantu abaphambukayo.

Lesakhiwo sabo siyohlala siyisihlafava songabazane ezinhlizweni zabo, ngaphandle- ke uma izinhliziyo zabo zima nsi [ngokufa]. U Allah Ungowaziyo Okhaliphile.

Nebala, u Allah uthenge kwabakholwayo iziqu zabo uqobo nemicebo yabo, ngokuthi bayothola iJana. Kumele balwe endleleni ka Allah, babulale balulawe. Isithembiso seqiniso kwiTora ne Ininjili kanye neKurani. Ingabe ukhona ongcina isithembiso sakhe ukudlula u Allah na? Ngakhoke thokozani ngohwebo lwenu lolu enihwebe ngalo, ngokuba lokho yikona okuyimpumelelo enkulu.

[abakholwayo okuthengwe kubo], abazisolayo bacele intethelelo, abakhonzayo, abadumisayo, abaphumayo [beya empini ka Allah], abakhothamayo nabawa phansi ngobuso [kuSwala], abayalela ngokuhle, abanqanda okubi nabangayiphuli imithetho ka Allah. Thula-ke izindaba ezinhle kulabo abakholwayo.

Akumele iSithunywa nalabo abakholwayo bacelele abakhonzi bezithixo [abashonile] intethelelo, noma bengaba izihlobo, emuva kokuba sekubacacele ukuthi bayongena eMlilweni.

Futhi ukucelelela kuka Ibhirahimu uyise intethelelo, kwakungenxa yesithembiso ayemthembise sona. Kepha kwathi sekumcacele ukuthi uyise uyisitha sika Allah, wamhlubuka. Nebala u Ibhirahimu wayekhuleka enobubele.

Futhi u Allah akasoze abadukise abantu emuva kokuba ebaholile engakacaciseli lokho okumele bakugweme. Ngempela u Allah Ungowazi zonke izinto.

Nebala, umbuso wamazulu nomhlaba ungoka Allah, nguYena oletha impilo nokufa. Futhi akekho oyonihlenga noma anisize ngaphandle kuka Allah.

Impela, u Allah wasithethelela iSithunywa noMuhajirina nama Aniswari, labo phela abasilandela ngesikhathi sobunzima, emuva kokuba izinhliziyo zabanye kubo zacisha zaphambuka, waphinda wabathethelela, ngokuba Yena [u Allah] uyabazwela uyabahawukela.

Kanye nalabo abathathu [abakholwayo] abasalela emuva [wabathethelela]; labo abancishelwa umhlaba yize ubazi kanjalo nezinhliziyo zabo zathwala kanzima. Baba nesiqinisekiso sokuthi akukho lapho abangakhosela khona uma bebalekela u Allah ngaphandle kokuthi babuyele kuYe. Wabe esebathethelela ukuze bakhone ukuzisola bacele intethelelo. Impela u Allah nguYena Othethelelayo Onesihawu.

Nina enikholwayo, thobelani u Allah, futhi nibe kanye nalabo abaneqiniso.

Izakhamuzi nezaseMadina nalabo abangamaqaba [iziqhaza] abakhelene nabo, abakubanele ukuba basasela emuva bayeke iSithunywa nokuthi bazikhathalela bona kunaso. Lokho kungenxa yokuthi kukho konke ukoma nokukhathala nendlala ababhekana nakho endleleni ka Allah, nalapho abahamba khona kunyanye abangakholwa nokugadla abakugadlayo esitheni, balotshelwa ngakho isenzo esihle. Nebala u Allah akawucekeli phansi umvuzo walabo abenza okuhle.

Futhi ngakho konke okuncane nokukhulu abakuchithayo nangawonke amahlanze abandlulayo, bayalotshelwa [isenzo esihle], ukuze u Allah abahlomulise ngokuhle kulokho ababekwenza.

Futhi akumele baphume bonke abakholwayo baye empini. Kumele kube neviyo elizophuma liye empini kuzo zonke izizwe ukuze lifunde liqondisise inkolo, kuthi uma bebuyela kubantu bakubo, babaxwayise ukuze baqaphele [imiyalelo ka Allah].

Nina enikholwayo, yilwani nalabo abangakholwa enakhelene nabo, niqinise isandla kubo, futhi nihlale nazi ukuthi u Allah unalabo abamthobelayo.

Kuthi njalo uma kwembulelwa isahluko, kunalabo kubo abathi: “Ngubani kini okholo lwakhe lwandiswe yilokhu na?”. Labo abakholwayo, sibandisela ukholo lwabo futhi bayathokoza.

Kepha labo abanesifo [ungabazane] ezinhlizweni zabo, bona sibandisela ukungcola kulokho vele abanakho futhi bafa bengabangakholwa.

Ingabe ababoni yini ukuthi bahlale bevivinywa minyaka yonke kabili noma kathathu, kepha bona abaphezi futhi abazithibi.

Futhi kuthi njalo nje uma kwembulelwa isahluko [seKurani], babukana bodwa; ingabe ukhona yini onibonayo, bese beyahamba. U Allah uziphambukisile izinhliziyo zabo, ngokuba bangabantu abangafuni ukuqonda.

Nebala sifikile kini iSithunywa esidabuka kini, okunzima kuso ukunibona nisebunzimeni nesinikhathelele nesinobubele nesihawu kulabo abakholwayo.

Kepha uma bekushaya indiva [we Muhamad], yithi: “Ungenele u Allah, akekho ofanelwe ukukhonzwa ngaphandle kwaKhe, ngethembele kuYe, futhi unguMnikazi weSihlalo Esikhulu”.

Alif Lam Ra; Lena imibiko yeNcwadi [iKurani] ekhaliphile.

Ingabe abantu bayamangala yini ukuthi sembulele endodeni evela kubo ukuba: “Xwayisa isintu wethule nezindaba ezinhle kulabo abakholwayo, ukuthi balindelwe umvuzo wabo eNkosini yabo”. Kepha laba abangakholwa bathi: “Nebala, lona umlumbi ngempela”.

Nebala, iNkosi yenu ngu Allah, lona owadala amazulu nomhlaba ezinsukwini eziyisithupha, wabe esenyukela eSihlalweni. NguYena ohlela izinto, futhi akekho oyokhulumela omunye ngaphandle uma esethole imvumo yaKhe [u Allah]. Nguyenake loYo u Allah iNkosi yenu, ngakhoke khonzani Yena. Kungani ningalaleli na?

Nonke niyobuyela kuYe, belu isithembiso sika Allah siyiqiniso. NguYena owaqala indalo futhi uyophinda ayivuse [emuva kokufa kwayo] ukuze ahlomulise ngobulungiswa labo abakholwayo abenza okuhle. Kuthi labo abangakholwa bayophuza amanzi agxabhayo futhi bathole nesijeziso esibuhlungu ngenxa yokungakholwa kwabo.

Nguyena [u Allah] owenza ilanga laba yisibani futhi wenza nenyanga yaba ukukhanya wayibekela nemizila ukuze nikwazi inani leminyaka nokubala. Konke lokhu u Allah ukudale ngeqiniso. Ucacisa izibonakaliso kubantu abanolwazi.

Nebala, ekuphambaneni kobusuku nemini nakukho konke lokhu u Allah akudalile emazulwini nasemhlabeni kunezibonakaliso kubantu abanokumesaba u Allah.

Nebala labo abangathembi ukuthi bayohlangana naThi, futhi benela ngempilo yasemhlabeni banethezeka ngayo kanye nalabo abangenandaba nezibonakaliso zeThu.

Yibo kanye-ke labo abayophephela eMlilweni ngenxa yemisebanzi yabo.

Nebala laba abakholwayo benze nokuhle, iNkosi yabo iyobahola ngokholo lwabo. Kuyogeleza imifula enzansi kwabo ezivandeni zentokomalo.

Umkhuleko wabo kuzo [izivande] uyobe uthi “Mawungcweliswe Wena Allah”, kanti bayo bengilelani ngokuthi “Salamu” [ukuthula], kuthi isiphetho somkhuleko wabo sithi: “udumo lonke ngoluka Allah iNkosi yezizwe zonke”.

Ukube u Allah ubeshesha ukuletha okubi kubantu, njengokushesha kwabo ekufuneni okuhle, bebezobhujiswa. Ngakhoke siyabayeka benhlanhlatha empambukweni yabo, labo abakholelwa ukuthi bayohlangana naThi.

Futhi uma umuntu evelelwe umshophi, ukhuleka kithi elele ngohlangothi noma ehlezi noma emile. Kepha uma Sesimtakulile ebunzimeni bakhe, ushaya engathi akakaze akhuleke kithi esibikela ngobunzima obumvelele. Zikhangiselwe kanjalo phela izephulamthetho lokhu ezikwenzayo.

Nebala Sazibhubhisa izizwe ezinandulelayo mhlazane ziphambuka, futhi iZithunywa zabo zafika kubo nezibonakaliso kepha bona lutho ukukholwa. Sibajezisa kanjalo-ke abantu abayizigilamkhuba.

Sabeke sesilandelanisa ngani emhlabeni emuva kwabo, ukuze sibone ukuthi nina nizokwenzani.

Uma befundelwa imibiko yeThu ecacile, bathi labo abangakholelwa ekuhlanganeni naThi: “Letha enye iKurani ngaphandle kwalena noma ulethe enye esikhundleni sayo”. Yithi: “Angikhoni ukuletha enye esikhundleni sayo ngokwami, ngokuba ngilandela kuphela lokho okwembulelwa kimi[1], futhi ngesaba isijeziso soSuku Olukhulu uma ngizophambana nemiyalelo yeNkosi yami. ——— [1] Lombiko ukhombisa ngokusobala ukuthi iSithunywa uMuhamadi  akayena umsunguli weIsilamu futhi akasiyena umlobi weKurani. Uzoqhaphela ukuthi abasunguli bamaqembu namabandla, bahlale beyiguqula imithetho sisekelo zamabandla noma amaqembu abo ukuze phela bahehe abalandeli. Kepha lapha siyabona ukuthi iSithunywa uMuhamad  akakugqizi qakala ukuheha izihlwele nabalandeli, okumhluphayo nakuyalelwe kona ukuba ethule umbiko lo athunywe wona unjengoba unjalo.

Yithi: “Uma u Allah ethanda bengingeke nginifundele yona [iKurani] futhi bengingeke nganazisa ngayo. Ngihlale nani isikhathi eside ngaphambi kokufika kwayo [iKurani]. Kungani ningaqondi na?”

Ingabe ukhona yini ophambuke ukudlula lowo oqambela u Allah amanga noma ophika imibiko yaKhe na? Impela izigilamkhuba azisoze zaphumelela nhlobo.

Futhi bakhonza ngaphandle kuka Allah lokho okungeke kwabalimaza ngalutho noma kubasize ngalutho, baphinde bathi: “Laba yibona abayosikhulumela ku Allah”. Yithi: “ingabe nifuna ukwazisa u Allah ngalokho angakwazi emazulwini noma emhlabeni na? Makangcweliswe futhi uphakeme kulokho abakubhangqayo”.

Futhi abantu babesokholweni olulodwa, kepha baphikisana. Ukube bekungekona ukuthi izwi elivela ku Allah seliphumile [lokunika isikhathi], ngabe sehlulelwe kulokho abaphikisana ngakho.

Futhi bathi [abangakholwa]: “Ake alethelwe isibonakaliso esivela eNkosini yakhe”. Yithi: “Nebala okungabonwa kungokuka Allah kuphela, ngakho-ke lindani, ngokuba nami ngilinde kanye nani”.

Kuthi lapho uma sizwise abantu umusa emuva kokuba behlelwe ubunzima, gqithi sebenesu mayelana nezibokaliso zeThu. Yithi: “ U Allah wakha isu ngokushesha impela”. Belu izithunywa [izingelosi] zeThu ziyaliloba isu enilakhayo.

NguYena onenza nikwazi ukuhamba emhlabeni nasolwandle, kuthi lapho uma sesigibelile emkhunjini, wahamba nabo ngomoya omuhle bejabule. Makhathaleni kufike umoya oyishingishane futhi benganyelwe amagagasi nhlangothi zonke, baqinisekiseke ukuthi bahaqiwe, yilapho-ke bekhuleka ku Allah ngokholo olumsulwa [bethi]: “uma nje ungasihlenga kulokhu, impela siyoba ngababongayo”.

Kepha kuthi uma esebahlengile, yibona kanye futhi abaphambuka ngokungemthetho emhlabeni. Sintu, ukuphambuka kwenu kulimaza nina uqobo; niyonethezeka empilweni yasemhlabeni bese nonke nibuyela kithi, siyobe-ke sesinazisa ngalokho ebenikwenza.

Impilo yasemhlabeni ifana namanzi esiwehlisa phezulu bese ehlangana nezitshalo zomhlaba ezidliwa ngabantu nezilwane, kuze kube umhlaba uyaqhakaza uba muhle; abantu basemhlabeni baze baqinisekiseke ukuthi bayozitika kuwo. Kepha umyalelo weThu ufike kuwo [umhlaba] ebusuku noma emini uwushaqe kube ngathi bekungenalutho zolo lokhu. Sizicacisa kanjalo izibonakaliso zeThu kubantu abahlaziyayo.

Futhi u Allah ubizela eMzini wokuthula [iJana], futhi uholela amthandayo endleleni eqondile.

Labo abenza okuhle [ngokuthobela intando ka Allah] bayothola umvuzo omuhle [iJana] nokwengeziwe [ukubona u Allah mathupha], futhi ubuso babo abuyikuthelwa uthuli noma ihlazo. Labo bayongena eJana bahlale khona unaphakade.

Bese labo abenza izimpambuko, impambuko ngayinye iyojezisa ngokufana nayo futhi bayothelwa ihlazo. Akekho oyobavikela ku Allah; ubuso babo kuyoba ngathi bumbozwe ngeziqephu zobusuku obumnyama bhuqe. Labo bayongena eMlilweni bahlale kuwo unaphakade.

Futhi mhla sibabuthanisa bonke ndawonye, siyothi kulabo ababhanqayo hlalani ezindaweni zenu nina nezikhonzwa zenu. Siyobe sesibahlukanisa, bese izikhonzwa zabo zithi: “phinde beningakhonzi thina nhlobo”.

U Allah ungufakazi owanele phakathi kwethu nani, ukuthi thina besingazi lutho ngokukhonza kwenu.

Yilapho-ke wonke umuntu eyoveza lokhu abekwenza phambilini, bayobe sebebuyiselwa ku Allah uMhlenga wabo weqiniso futhi konke lokhu ababeqamba ngakho amanga kuyobalahlekela.

Yithi: “Ubani lona onilethela isabelo senu sivela ezulwini [imvula] nasemhlabeni, noma lona okunguyena ongumikazi wokuzwa nokubona, nalowo okhipha okuphila kokufile aphinde akhiphe okufile kokuphilayo, nalowo ohlela izinto na?”. Bayothi: “u Allah”, ngakhoke yithi: “phezani-ke [ukubhanqa izikhonzwa no Allah]”.

Nguyena-ke loyo u Allah iNkosi yenu yeqiniso; pho-ke ikuphi okukhona emuva kweqiniso ngaphandle kokuduka na? Ingabe nidukela kuphi na?

Kanjalo, Izwi leNkosi yakho liyiqiniso mayelana nalabo abangamahlongandlebe ukuthi angeke bakholwe.

Yithi: “Ingabe ukhona kuzikhonzwa zenu okwazi ukususa phansi indalo ayidale aphinde futhi ayivuse [emuva kokufa] na?” Yithi: “u Allah uyisusa phansi indalo ayidale aphinde futhi ayivuse; ingabe nihlanhlathela kuphi na?”.

Yithi: “Ingabe ukhona kuzikhonzwa zenu oholela eqinisweni na?”. Yithi: “u Allah uyaholela eqinisweni; ingabe- ke lowo oholela eqinisweni nguyena okumele alandelwe noma lowo ongakwazi ukuhola ngaphandleke uma eholwa kwayena? Yini ngani nahlulela kanjani na?

Iningi labo lilandela imidlinzo nje kuphela; bheka ngoba imidlinzo ayisizi ngalutho ekutholeni iqiniso. Nebala u Allah ukwazi kahle abakwenzayo.

Le Kurani ayisoze yaqanjwa muntu ngaphandle kuka Allah. Empeleni yembulelwe ukufakazela lokho okuyandulelayo futhi nokucacisa iNcwadi [yona iKurani] engenalo ungabazane, ivela eNkosini yezizwe zonke.

Ingabe bathi: ‘nguyena [uMuhamadi] oziqambele yona [iKuranai]’. Yithi: “Lethani phela isahluko esisodwa esifana nayo [iKurani] futhi nimeme eningakhona ukubamema [bazonilekelela] ngaphandle kuka Allah uma ngempela niqinisile”.

Empeleni baphika into abangenalwazi ngayo futhi bekungaka kwenzeki lokho kubo. Kanjalo nalabo ababandulelayo baphika; ngakhoke bheka ukuthi saba njani isiphetho salabo abaphambukayo.

Futhi kunalabo kubo abakholelwayo kuyo [iKurani] bese kuba nalabo abangakholelwa kuyo. Kepha iNkosi yakho ibazi kahle labo abayizephula mthetho.

Uma bekusola [wena Muhamadi] ngamanga, yithi: “nginemisebenzi yami nani futhi ninemisebenzi yenu. Nina anihlangene nokwenziwa yimi, nami angihlangene nenikwenzayo”.

Futhi kunalabo kubo [abangakholwa] abakulalelayo; kaze wena [Muhamadi] uyakwazi yini ukwenza izimumu zikwazi ukuzwa nakuba zingenangqondo.

Futhi kunalabo kubo abakubukayo; kaze wena [Muhamadi] uyakwazi yini ukuhola izimpumputhe nakuba zingaboni.

Nebala u Allah akabacindezeli ngalutho abantu, kepha abantu bazicindezela bona uqobo.

Futhi ngoSuku lapho ayobabuthanisa khona, kuyoba ngathi bahlale nje isikhashana sosuku bezama ukwazana. Impela balahlekelwe laba abaphika ukuhlangana no Allah futhi abekho endleleni eqondile.

Singakukhombisa lokhu esibathembise kona noma sikuthathe emhlabeni [ushone], bayobuyela kithi futhi u Allah ukuqhaphe konke abakwenzayo.

Futhi sonke isizwe sineSithunywa saso. Ngakho-ke uma sekufike iSithunywa sabo, bayohlulelwa ngobulungiswa ngaphandle kokuqilwa.

Bathi: “siyofika nini lesithembiso uma ngempela niqinisile”.

Yithi: “Akukho kulimala nokuzisiza engizilawulela kona mina mathupha ngaphandle kwalokho okuthandwa ngu Allah. Sonke isizwe sinesikhathi [sokuphila] esibekelwe sona; uma sesifikile isikhathi sabo, abayikusiphutha noma basihambele phambili nakancane [abayikuphunyuka].

Yithi: “Akenisho, uma isijeziso saKhe sifika kini ebusuku noma emini, yini lena ekuso, izigilamkhuba eziyijahe kangaka na?”

Ingabe kuyothi uma sesifikile [isijeziso] kube yini nisikholwa na? Nisikholwa manje nakuba benikade nisijahe nakangaka na?

Kuyobe sekuthiwa kulabo abaphambukile: “zizweleni isijeziso saphakade, akukho enijeziselwa kona ngaphandle kwemisebenzi yenu.”

Futhi bafuna ukwazi kuwe [Muhamadi] ukuthi, ingabe [isijeziso] siyiqiniso yini. Yithi: “Nebala, siyiqiniso, ngiyifunge inkosi yami; futhi anisoze naphunyuka.”

Ukube wonke umuntu ophambukile bekungokwakhe konke okusemhlabeni, ubezozihlawulela ngakho. Futhi bayofihla ukuzisola mhla bebona isijeziso, bayobeke sebehlulelwa ngobulungiswa futhi ngaphandle kokuqilwa.

Impela konke okusemazulwini nasemhlabeni kungokuka Allah. Impela isithembiso sika Allah siyiqiniso kepha iningi labo alazi.

NguYena [u Allah] oletha impilo noletha ukufa futhi niyobuyela kuYe.

Sintu, nebala iseluleko esivela eNkosini yenu sifikile kini, kanye nekhambi lalokho okusezifubeni nokuholwa nomusa kulabo abakholwayo.

Yithi: “Umusa ka Allah nesihawu saKhe, yilokho okumele bathokoze ngakho ngokuba kungcono kunakho konke lokhu abakuphembayo”.

Yithi: “Niyakubona lokhu u Allah anilethele kona okuyisondlo, kepha nina nenza okunye kwavumeleka okunye nakunqabela”. Yithi: “Ingabe ngu Allah onigunyazile yini noma nimane nje niqambela u Allah amanga na?”

Ingabe bacangani ngoSuku lokwaHlulela labo abaqambela u Allah amanga na? Nebala u Allah unesihe kubantu kepha iningi labo alibongi.

Noma isiphi isimo okuso nalapho uma ufunda iKurani nakukho konke enikwenzayo, sihlale sinani lapho nigxile kukho. Akukho phela okweqa iNkosi yakho emhlabeni nasemazulwini noma kungaba kuncane kulingane nohlavana noma okuncane okudlula lokho noma okukhulu, konke kuqoshwe eNcwadini [yezenzo] ecacile.

Impela abangani baka Allah abanakwesaba futhi abanalo usizi.

Yilabo abakholwayo futhi abahlala bezithiba [ngokugcina imiyalelo ka Allah nangokuziqhelelanisa nokunqatshelwe].

Bayothola izindaba ezinhle empilweni yasemhlabeni kanjalo nakwelizayo. Amazwi ka Allah awaguquki nhlobo. Lokho yikona impela ukuphumelela okukhulu.

Futhi makungakukhathazi abakushoyo, ngokuba ukunqoba konke kungokuka Allah, futhi Ungozwayo Owaziyo.

Nebala bonke abasemazulini nabasemhlabeni bangabaka Allah. Futhi labo abakhonza izikhonza ngaphandle kuka Allah yini lena abayilandelayo na?. Empeleni balandela imidlinzo nje futhi baqamba amanga.

NguYena owenze ubusuku ukuze niphumule kubo futhi wenza imini yakhanya. Impela kulokho kunezibonakaliso kubantu abazwayo.

Bathi: “U Allah unendodana”, makangcweliswe, Yena uzimele, konke okusemazulwini nasemhlabeni kukngokwaKhe. Aninabo ubufakazi ngalokhu; ingabe-ke nikhuluma ngo Allah lokho eningenalwazi ngakho na?

Labo abaqambela u Allah amanga abaphumeleli.

Bayocebeleka emhlabeni bese bebuyela kithi bese sibazwisa isijeziso esinzima ngenxa yokungakholwa kwabo.

Balandise ngendaba kaNuhu mhla ethi kubantu bakhe: “Bantu bakithi, uma ukuhlala kwami nokunikhumbuza kwami ngezibonakaliso zika Allah kunzima kini, mina-ke ngithembele ku Allah. Ngakho- ke hlelani uzungu lwenu, nina nezikhonzwa zenu, lucace lube sobala, bese niyaqeda ngami futhi ningangiphi ithuba nakancane”.

Kepha uma ningalaleli; benginganicelanga nzuzo nhlobo, ngokuba inzuzo yami u Allah kuphela futhi ngiyalelwe ukuba ngibe iMusilimu [ozinikela entandweni ka Allah].

Bamphika bamthatha njengonamanga; sabe sesimhlenga yena [uNuhu] nalabo ababe kanye naye sabafaka emkhunjini. Futhi sabenza izindlalifa sabacwilisa labo abaphika izibonakaliso zethu. Bheka nje ukuthi saba njani isiphetho salabo abaxwayiswa.

Sabe sesithumela emuva kwakhe [uNuhu] ezinye izithunywa ezizweni zabo. Zafika-ke kubo nezibonakaliso zeThu, kepha nabo babe ngazimisele ukukholwa yilokho abakuphika phambilini. Sizivala kanjalo izinhliziyo zalabo abayizephula mthetho.

Sathumela uMusa noHaruna emuva kwabo ukuba baye nezibonakaliso zeThu kuFirawuni nezikhulu zakhe. Kepha bazigqaja futhi babe bengabantu abayizephula mthetho.

Kwathi lapho uma iqiniso elivela kithi lifika kubo, bathi: “Impela lokho ilumbo uqobo”.

Wathi uMusa: “Nisho nje ngeqiniso uma lifika kini?! Ingabe ilumbo leli yini, kwazise abelumbi abaphumeleli.

Bathi: “uze la ukusisusa kulokho esafica obabamkhulu bethu bekwenza, funa nina nobabili nithole ubukhosi emhlabeni, futhi nje asinikholwa nobabili”.

Wabe esethi uFirawuni: “Ngiletheleni bonke abalumbi abangongoti”.

Kwathi lapho befika abelumbi, uMusa wathi kubo: “Phonsani lokhu enikuphonsayo”.

Kuthe lapho sebephonsile, wathi uMusa: “Lokhu enizenakho ilumbo, u Allah nakanjani uzokushabalalisa ngokuba u Allah akazivuni izenzo zeziphambuki.

U Allah uzoliqinisekisa iqiniso ngamazwi aKhe ngisho izephula mthetho zingathandi.

Abazange bamkholwe uMusa ngaphandle kwentsha yesizwe sakhe nakuba yayisaba ukuthi uFirawuni nezikhulu zakhe bangahle babejezise. Nebala uFirawuni wayezigqaja emhlabeni futhi wayeyisiphula mthetho.

U Musa wathi: “Bantu bakithi, uma nikholelwa ku Allah, thembelani ku Allah uma ngempela ningamaMusilimu”.

Bona bathi: “Sithembele ku Allah, Nkosi yethu ungasenzi isisulu sabantu abaphambukile”.

“Futhi usihlenge ngomusa waKho kubantu abangakholwa”.

Sembulela kuMusa nomfowabo ukuthi: “Yakhelani isizwe senu imizi eMisiri [eGibhithe], nenze imizi yenu ibheke iKibhila [eMakadisi] futhi nenzisise iswala, wethule izindaba ezinhle kulabo abakholwayo”.

Futhi uMusa wathi: “Nkosi yethu, impela uphe uFirawuni nezikhulu zakhe ubukhazikhazi nengcebo kulempilo yasemhlabeni, Nkosi yethu ukuze baphambuke endleleni yaKho. Nkosi yethu, bhubhisa ingcebo yabo wenze izinhliziyo zabo zibe lukhuni ukuze bangakholwa kuze kube babona isijeziso esibuhlungu”.

Wathi [u Allah]: “Umkhuleko wenu uphenduliwe. Ngakhoke zimelelani [okholweni lwenu] futhi ningalandeli indlela yalabo abangazi.

Sawelisa isizwe sakwa Isirayeli ulwandle; kepha uFirawuni nebutho lakhe babalandela begcwele inzondo nobutha. Kwathi lapho esecwila [emanzini] wathi: “Ngiyakholwa ukuthi akekho ofanele ukukhonzwa ngaphandle kwaloyo isizwe sika Isirayeli esikholelwa kuYe futhi nami ngiyazinikela [ngiba iMusilimu].

Yikhona [ukholwa] manje na? Bheka ngoba phambilini beweyisa futhi ubongomunye ababenza impambuko.

Ngakhoke namhlanje sizowuhlenga umzimba wakho ukuze ube yisibonelo kulabo abeza emuva kwakho, ngokuba iningi labantu lizishaya indiva izibonakaliso zeThu.

Futhi sabeka isizwe sika Isirayeli endaweni enhle impela saphinde sababela isondlo esihlanzekile esimsulwa. Kepha baqala ukuphikisana mhla bethola ulwazi [okwakumele libenze imbumba]. Nebala iNkosi yakho iyokwahlulela phakathi kwabo ngoSuku lokwaHlulela kulokho ababephikisana ngakho.

Uma unokungabaza ngalokho esikwembulele kuwe [Muhamadi], buza labo ababefunda iMibhalo ngaphambi kwakho [amaJuda namaNasarina]. Nebala iqiniso elivela eNkosini yakho leli elifike kuwe, ngakhoke ungabi omunye walabo abanongabazane.

Futhi ungabi omunye walabo abaphike izibonakaliso zeThu, funa ube omunye wabalahlekelwayo.

Impela labo Izwi leNkosi yakho eliwele kubo, abasoze bakholwa.

Noma kungafika zonke izibonakaliso kubo [angeke bakholwe], kuze kube bayasibona isijeziso esibuhlungu.

Asikho isizwe esakholwa [lapho sibona isijeziso] ukholo lawaso lwasisiza, ngaphandle kwesizwe sika Yunusi. Kwathi lapho bekholwa, sasisusa isijeziso esihlazayo empilweni yasemhlabeni futhi sabapha intokomalo kwaze kwafika isikhathi esibekiwe [sokufa].

Uma iNkosi yakho beyithanda, bebezokholwa bonke abasehlabeni ngothi lwabo. Ingabeke wena uzokhona yini ukuphoqa abantu ukuba babe abakholwayo na?

Akekho umuntu ongakholwa ngaphandle kwemvumo ka Allah, futhi ubekele labo abangenakuqonda isijeziso.

Yithi [kulabo abangakholwa]: “Bhekani ukuthi kunani emazulwini nasemhlabeni”. Kepha izibonakaliso nezixwayiso azisho lutho kubantu abangakholwa.

Ingabe balindele izinsuku ezifana nalezo ezandlula ngaphambilini na? Yithi: “Lindanike ngokuba nami ngilindile kanye nani”.

Futhi siyobe sesihlenga izithunywa zeThu kanya nalabo abakholwayo, belu kuyisibopho kithi ukuhlenga abakholwayo.

Yithi: “Sintu, uma ninokwengabaza ngenkolo yami, bhekani ngoba angisoze ngakukhonza lokhu enikukhonzayo ngaphandle kuka Allah, kepha ngikhonza u Allah lona okunguYena othatha imiphefumulo yenu; futhi ngiyalele ukuba ngibe okholwayo.

Futhi uzimelele [Muhamadi] ngozimisela enkolweni emsulwa futhi ungabi omunye walabo ababhanqayo.

Futhi ungakhonzi ngaphandle kuka Allah lokho okungeke kwakusiza ngalutho noma kukulimaze. Uma uke wakwenza lokho, impela uyoba omunye wabaphambukile.

Uma u Allah ekulethela ubunzima akekho oyobususa ngaphande kwaKhe, futhi uma ekuhlosele okuhle, akekho ongavimba umusa waKhe. Uwunika amthandayo ezigqileni zaKhe, futhi Ungothethelelayo Onesihawu.

Yithi: “Sintu, nebala lifikile kini iqiniso livela eNkosini yenu. Ngakhoke lowo ozolandela iqiniso uzisiza yena, kanti lowo ophambukayo uzilaya yena, futhi mina angiyena umqhaphi wenu”.

Landela lokho okwembulelwe kuwe futhi ubekezele kube kube u Allah uyehlulela, futhi nguYena umehluleli woqobo.

Ali Lam Ra; lena iNcwadi omubiko yayo ihlelwe ngobuchule yaphinda yahlalusiswa ngoKhaliphile Onolwazi.

Ukuze ningakhonzi lutho ngaphandle kuka Allah. Nebala nima ngivela kuYe [u Allah] ngingumexwayisi nomethuli wezindaba ezinhle kini.

Futhi celani intethelelo eNkosini yenu niphinde nizisole kuYo, ngokuba iyonithokozisa ngokuhle kuze kufike isikhathi esibekiwe futhi uyonika bonke labo abafanelwe umvuzo wabo. Kepha uma ninganendaba, impela nginisabela isijeziso ngoSuku oLukhulu.

Niyobuyela ku Allah futhi Yena akehlulwa yilutho.

Bheka ngoba bagebisa amakhanda ukuze bamcashele [u Allah]; kepha nakuba bezimboza ngezembatho zabo [u Allah] uyakwazi lokho abakufihlayo nalokho abakubeke obala, ngokuba impela uNgokwazi konke okusezinhlizweni.

Yonke indalo esemhlabeni yondliwa ngu Allah futhi nguYena owazi lapho ihlala khona nalapho eyophelela khona, konke lokho kulotshiwe eNcwadini Ecacile [Oqwembeni Olulondoziwe].

Futhi nguYena odale amazulu nomhlaba ezinsukwini eziyisithupha, futhi kadeni Isihlalo saKhe sasiphezu kwamanzi, ukuze phela aninivivinye ukuthi ngubani kini oyokwenza okufanele. Futhi uma [wena Muhamadi] uthi: “Impela nizovuswa emveni kokufa”. Laba abangakholwa nakanjani bayothi: “Nebala, lokhu ilumbo uqobo”.

Kanti futhi uma silibazisa isijeziso sabo okwesikhashana, bayothi [laba abangakholwa]: “Sibanjwe yini na?”. Bheka ngoba mhla sifika kubo asisoze sasuswa kubo, belu lokhu ababehlekisa ngakho kuyobahaqa.

Futhi uma sizwisa umuntu izibusiso ezivela kithi bese simuhlwitha zona; impela uvele alahle ithemba angabongi.

Kepha uma simuzwisa ubumnandi emuva kobunzima obumehlele, uvele athi: “imishophi ayisekho kimi”. Impela uyatshakada azigqaje.

Ngale kwalabo ababekezelayo bazimelele futhi banze okuhle; yibo kanye labo abayothola intethelelo nomvuzo omkhulu.

Hleze ufuna ukushiya okunye kwalokho okwembulelwe kuwe noma kukuphatha kabi ukuthi bathi: “Kungani engehliselwanga umcebo noma ke aphelekezelwe ingelosi”. Wena [Muhamadi] ungumexwayisi nje kuphela, futhi u Allah owengamele zonke izinto.

Noma kokunye bathi: “Uziqambele yona [iKurani]”. Yithi: “Khiqizani izehluko eziyishumi ezifana nayo [iKurani]eziqanjiwe futhi nimeme nalabo enikhona ukubamema [ukuba banilekelele] ngaphandle kuka Allah, uma ngempela nineqiniso”.

Uma behluleka ukuniphendela [ngalenselelo], yazinike ukuthi [le Kurani] yembulelwe iqukethe ulwazi luka Allah nokuthi akekho ofanelwe ukukhonzwa ngaphandle kwaKhe, yibanike amaMusilimu.

Lowo ofuna impilo yomhlaba nobukhazikhazi bayo, siyobakhokela imivuzo yemisebenzi yabo kuyo [impilo yomhlaba] futhi abasoze baqilwa lutho kuyo.

Yibo kanye labo abangenalutho kwelizayo ngaphandle koMlilo. Futhi konke [okuhle] abakwenzile [emhlabeni] kuyoshabalala kanti nemisebenzi yabo abayenzile iyobayize.

Lowo onobufakazi obuvela eNkosini yakhe futhi bulandelwe ufakazi ovela kuYo kanti naphambilini [yafakaza] iNcwadi ka Musa eyabe ingumhlahlandlela nomusa. Laboke yibona abakholela kuyo [iKurani], kanti lowo ongakholelwa kuyo kulabo abezinye izinkolo, uyophelela eMlilweni. Ngakho- ke [Muhamadi] ungayingabazi ngokuba iyiqiniso elivela eNkosini yakho, kepha iningi labantu abakholwa.

Ingabe ukhona yini ophambuke ukudlula lowo oqambela u Allah amanga na? Labo bayokwethulwa eNkosini yabo futhi ofakazi bayothi: “Yibo kanye laba abaqambele iNkosi yabo amanga”. Bheka ngoba isiqalekiso sika Allah sikulabo abaphambukile.

Labo abayizihibe endleleni ka Allah futhi bafuna ukuyigwembisa benjalo nje abakholelwa kwelizayo.

Laboke abasoze baphunyuka lapha emhlabeni futhi abekho abayoba abahlengi babo ngaphandle kuka Allah. Isijeziso sabo siyophindaphindwa. Ngokuba behluleka ukulalela futhi babengaboni.

Yibona kanye labo abazilahlekisele baphinde balahlekelwa yilokhu ababekuqambile ngamanga.

Akunakungabaza ukuthi nakanjani kwelizayo bayoba ngabalahlekelwe kakhulu.

Nebala labo abakholwayo babuye benze okuhle futhi abazinikelayo eNkosini yabo; yibona kanye abayongena eJana bahlale kuyo unaphakade.

Umzekelo walezinhlangothi ezimbili [abakholwayo nabangakholwa], bafana nempumputhe eyisithuli [eqhathaniswa] nalowo obonayo ozwayo. Ingabe bayafana na? Ngakhoke lalelani.

Impela samthumela uNuhu esizweni sakhe [wathi]: “Nebala ngingumxwayisi ocacisayo kini”.

“Ningakhonzi lutho ngaphandle kuka Allah. Ngokuba ngempela nginisabela isijeziso soSuku ulobuhlungu”.

Kepha izikhulu, lezi ezingakholwa esizweni sakhe zathi: “Sikubona nje ungumuntu ofana nathi futhi sikubona ulandelwa yilabo abayibotho kithi abayiziphukuphuku. Futhi asiboni ningcono kunathi kunalokho sicabanga ukuthi ningabaqambi manga.

Wathi [uNuhu]: “Bakwethu, bhekani, uma nginobufakazi obuvela eNkosini yami yaphinde yangipha umusa ovela kuyo, kepha nina ningaboni, singakhona yini ukuphoqa ngenkani uma nina ningafuni na?

Bakwethu, angifuni mcebo kini, umvuzo wami uku Allah kuphela. Futhi angeke ngabaxosha labo abakholwayo ngokuba bayohlangana neNkosi yabo, kepha nginibona ningabantu abayiziwula.

Bakwethu, ubani oyongisiza ku Allah uma ngibaxosha na? Ngakhoke qondisisani.

Futhi angisho kini ukuthi nginemicebo ka Allah noma ngazi lokhu okungabonwayo, futhi angisho ukuthi ngiyingelosi. Futhi kulabo amehlo enu ababukela phansi angisho ukuthi u Allah akasoze abanika lutho oluhle, ngokuba ngu Allah owazi kahle lokho okungaphakathi kubo. Funa ngibe omunye wabaphambukile.

Bathi: “We Nuhu, usuqophisane nathi kwanela, ngakho-ke letha lokho obulokhu usixwayisa ngakho uma ngempela ungoneqiniso.

Wathi [uNuhu]: “u Allah kuphela oyokuletha uma ethanda futhi angeke naphunyuka nhlobo”.

Uma u Allah efuna ukunidukisa, izeluleko zami aziyikunisiza ngalutho noma ngingazama ukuneluleka. Belu uyiNkosi yenu futhi niyobuyela kuYe.

Ingabe bathi uziqambele yona [iKurani] na? Yithi: “Uma ngiziqambele yona, icala lami liyothwala yimina futhi ngimsulwa kumacala nina eniwenzile.

Futhi kwembulelwe kuNuhu ukuthi: “Akekho osoyokholwa esizweni sakho ngale kwalabo abevele sebekholwa, ngakho- ke ungazikhathazi ngalokho abakwenzayo”.

Yakha umkhumbi sikubhekile futhi sizokwembulela. Futhi ungangikhulumisi mayelana nalabo abaphambukile ngokuba impela bayominziswa.

Wabe esewakha umkhumbi, futhi kwakuthi lapho izikhulu esizweni sakhe sindlula ngakuye zivane zihlekise ngaye. Wathi “Nihlekisa ngathi nje, nathi sizohlekisa ngani njengoba nihlekisa ngathi”.

Maduze nje, bazokwazi ukuthi ubani oyothola isijeziso esizonhlaza aphinde ehlelwe isijeziso esingunaphakade.

Kwathi lapho sekufike umyalelo weThu, kwagobhoza amanzi eziko, Sathi [kuNuhu]: “Gibeza kuwo [umkhumbi] kuzo zonke izinhlobo [zezilwane] iduna nensikazi, nomndeni wakho – ngaphandle kwalowo osenqunyelwe – kanye nalabo abakholwayo. Belu kwakuquqaba nje olwalukholwa kanye naye [uNuhu].

Wabe esethi [uNuhu]: “Gibelani kuwo [emkhunjini] egameni lika Allah lapho uhamba nalapho uma. Nebala iNkosi yami iNgothethelayo Onesihawu.

Wahamba [umkhumbi] nabo emagagasini angangezintaba, uNuhu wamemeza indodana yakhe eyayikade ime yodwa [wathi]: “Ndodana, gibela kanye nathi ungabi nabangakholwa”.

Yathi: “Ngizokhosela entabeni ezongivikela emanzini”. Wathi [uNuhu]: “Namhlanje akekho umvikeli emyalelweni ka Allah ngaphandleke kwaloyo amenzele umusa”. Igagasi labe selingena phakathi kwabo, waba omunye abacwilile.

Kwase kuthiwa: “Mhlaba gwinya amanzi akho nawe sibhakabhaka wagodle”, amanzi abe eseyancipha wafezeka umyalelo, [umkhumbi wona] waqongela entabeni iJudi. Kwase kuthiwa: “Mababhubhe abantu abaphambukayo”.

UNuhu wabe esekhuleka eNkosini yakhe, wathi: “Nkosi yami, indodana yami iyingxenye yomndeni wami, kanti isithembiso sakho siyiqiniso futhi Wena unguMehluleli oyingweti.

Wathi [u Allah]: “We Nuhu, akayona ingxenye yomndeni wakho ngokuba izenzo zakhe azilungile. Ngakho-ke ungaphinde ungicele lokho ongenalwazi ngakho, impela ngiyakuxwayisa funa ube omunye weziwula.

Wathi [uNuhu]:”Nkosi yami ngizivikela ngawe ekutheni ngikucele lokho engingenalwazi ngakho. Uma ungangithetheleli futhi ube nomusa kimi ngiyokuba omunye wabalahlekelwe.

Kwathiwa: “Nuhu yehlwa ngokuthula okuvela kithi kanye nezibusiso kuwe nezizwe ezikanye nawe. Kanti futhi ezinye izizwe sizozijabulisa okwesikhashana bese befumana isijeziso esibuhlungu esivela kithi”.

Lezo izindaba obungazazi esizambulele kuwe. Ubangazazi wena nesizwe sakho ngaphambi kwalokhu. Ngakho-ke bekezela, nebala kuyogcina labo abathobela intando ka Allah.

Nasesizweni sakwa Adi [Sathumela] umfowabo uHudi, wathi: “Bantu bakithi, khonzani u Allah ngokuba akekho omunye okufanele nimkhonze ngaphandle kwaKhe, empeleni niqamba amanga”.

Bantu bakithi, angifuni mvuzo ngalokhu, ngokuba umvuzo wami ukuLowo ongidalile, ingabe aniqondi na?

Bantu bakithi, celani intethelelo eNkosini yenu bese nizisola kuYo. Iyobe isinehlisela imvula eyinala futhi inandisele amandla enu kulawo eninawo, futhi ningakushayi indiva [lokhu engikushoyo] nibe izigilamkhuba.

Bathi: “We Hudi, awusilethelanga bufakazi futhi ngeke sayeka izikhonzwa zethu ngento eshiwo nguwe sinjalo nje asikukholwa”.

Esikushoyo nje ukuthi ezinye zezikhonzwa zethu zikuphambanise ikhanda. Wathi [uHudi]: “U Allah ungufakazi nani futhi ningofakazi ukuthi mina angihlangene nalokho enikubhanqayo...;

Ngaphandle kwaKhe. Ngakhoke ngakheleni nonke uzungu futhi ningangiphi intuba.

Impela mina ngithembeleku Allah iNkosi yami nani. Phela akukho sidalwa esingalawulwa nguYe. Nebala iNkosi yami isendleleni eqondile.

Kepha uma nikushaya indiva, mina sengikwendlulisele kini lokho ebengithunywe nakhokini. Futhi iNkosi yami ingababeka abanye emuva kwenu futhi ningasoze nayilimaza ngalutho, impela iNkosi yami iyiqhaphe yonke into.

Kwathi lapho umyalelo weThu [wembubhiso]usufika, sahlenga uHudi nalabo ayekholwa nabo ngomusa weThu futhi sabahlenga nasesijezisweni esinzima.

Yisonake leso isizwe sika Adi; saphika izibonakaliso zeNkosi yabo saphinde sangalalela izithunywa zayo salandela umyalelo wawowonke undlovu kayiphikiswa isaliwa kutshelwa.

Balandelwa ngesiqalekiso kulomhlaba kanye nakwelizayo. Impela isizwe sakwa Adi abakholwanga eNkosini yabo. Makabhubhe-ke uAdi isizwe sikaHudi.

Futhi sathumela esizweni sakwaTamudi umfowabo uSwalihi, wathi: “Bantu bakithi khonzani u Allah [kuphela] ngokuba akekho omunye okumele nimukhonze ngaphandle kwaKhe. Nguyena belu owanidala ngomhlaba wase enibeka ukuba nihlale kuwo, ngakhoke mceleni intethelelo nizisole kuYe, nebala iNkosi yami Iseduze Iyaphendula [imikhuleko].

Bathi: “We Salihi, impela besinethemba [lobuholi] ngawe ngaphambi kwalokhu; usinqabela ukuba sikhonze lokho obekukhonzwa okhokho bethu na? Impela sinongabazane ngalokhu osimemela kukho, asithembi.

Wathi [uSwalihi]: “Bantu bakithi, ake nibhekisise, uma nginobufakazi obuvela eNkosini yami futhi yangipha nomusa ovela kuYo, ngubanike oyongisiza ku Allah uma ngephula umyalelo waKhe na? Niyovele ningandisele ukulahlekelwa”.

Bantu bakwethu, leli ikameli lika Allah eliyisibonakaliso kini, ngakhoke liyekeleni lizindlele emhlabeni kaAllah ningalenzi lutho olubi, funa nitholwe isijeziso esiseduze.

Kepha balihlaba [balibulala], wabe [uSwalihi] esethi: “Nethezekani nje emziniwenu izinsuku ezintathu, lesoke isithembiso esingemanga”.

Kwathi-ke lapho kufika umyalelo weThu [wembubhiso], sahlenga ngomusa weThu uSwalihi kanye nalabo ababekholwa naye ehlazweni lalosuku. Impela iNkosi yakho iNgonamandla inguSomandla.

Umsindo omkhulu wahlasela labo abaphambukile, kwasa bedindilizile emzini yabo bebheke phansi [befile].

Kwaba ngathi abakaze bahle khona. Bheka ngoba isizwe sakwaTamudi asikholwanga eNkosini yaso, masibhubheke isizwe sakwaTamudi.

Futhi zafika impela izithunywa [izingelosi] zeThu ku Ibhirahimu nezindaba ezinhle, zathi: “Salamu [ukuthula]”. Wathi [naye ephendula]: “Salamu [ukuthula]”. Akupholanga maseko wabe eseletha inyama yethole elosiwe.

Kepha kwathi lapho eqaphela ukuthi izandla zabo aziyithinti [inyama], wabaxwaya wazithuka enokubesaba. Bathi: “Ungesabi, ngokuba thina sithunyelwe esizweni sika Luti”.

Umkakhe owabe emile, wahleka samethulela izindaba ezinhle ngo Isihaki, yena oyoba noYakubu.

Wathi [umka Ibhirahimu]: “Maye, ngizozala ngingumxhilibe wesalukazi kanti futhi nomyeni wami lo umxhalaba wexhegu, impela lesi yisimanga.

Zathi: “Umangazwa umyalelo ka Allah na? Umusa ka Allah nezibusiso zaKhe makube kini bantu bomuzi. Nebala Yena [u Allah] ungoDunyiswayo Ohloniphekile.

Kwathi lapho selehlile ixhala ku Ibhirahimu kwafika nezindaba ezinhle kuye, wabe esebhunga naThi mayelana nesizwe sika Luti.

Impela u Ibhirahimu unobubele unesizotha uyazithoba [eNkosini yakhe].

We Ibhirahimu, kushiye phansi lokhu, ngokuba umyalelo weNkosi yakho usufikile, futhi nakanjani siyobathola isijeziso esingejikiswe.

Kwathi lapho izithunywa [izingelosi] zeThu sezifikile ku Luti akathokozanga ngazo futhi akakhululekanga ngazo, wabe esethi: “Leli usuku olunzima”.

Abantu bakubo beza kuye begijima, kanti phambilini bebenza imikhuba. Wathi [uLuti]: “Bantu bakithi, lawa amadodakazi ami, yiwona ahlanzekile kini, ngakhoke thobelani u Allah futhi ningangihlazi ezivakashini zami, akusekho yeyodwa nje indoda eqotho kini na?”

Bathi:”Wazi kahle ukuthi asinasidingo kumadodakazi akho belu ukwazi kahle lokho esikufunayo”.

Wathi: “Ngifisa ngabe benginamandla okubhekana nani noma nje insika eqinile [umndeni]”.

Zathi: “We Luti, thina sizithunywa zeNkosi yakho abasoze bakwenza lutho. Phuma wena nomndeni wakho ebusuku, kungabikho noyedwa kini obheka emuva, ngaphandle nje komkakho ngokuba yena uyokwehlela yilokho okuyobehlela. Isikhathi sabo esibekiwe kusekuseni. Ekuseni sekuseduze.

Kwathi lapho umyalelo weThu ufika, sathatha ingaphezulu lendawo salisa ngaphansi saletha kuyo imvula yamatshe obumba elandelana.

Ayebekisiwe eNkosini yakho, futhi awekho ekudeni nalabo abaphambukile.

Futhi sathumela uShu’ayibu eMadiyana, wathi: “Bantu bakithi, khonzani u Allah [kuphela] ngokuba akekho okumele nimkhonze ngaphandle kwaKhe. Futhi ninganciphisi isikali nesisindo. Impela nginibona nisebuhleni kanti futhi nginesabela isijeziso soSuku oluhaqayo”.

Bantu bakithi, gcwalisani isikali nesisindo ngobulungiswa futhi ningaqili abantu izinto zabo futhi ningahambi nenza impambuko emhlabeni.

Izinsalela zika Allah [okusalayo] yiko okungcono kini uma ningabakholwayo, futhi-ke mina angiyena oniqaphile.

Bathi: “We Shu’ayibu, yilomthandazo wakho okuyalela ukuba usinqabele ukuba sikhonze lokho obekukhonzwa obabamkhulu nokuthi senze esikuthandayo ngemicebo yethu na?”

Wathi: “Bantu bakithi, nibona kanjani uma ukuthi nginobufakazi obuvela eNkosini yami yaphinda futhi yangabela isondlo esihle. Mina angihlosile ukuphambana nani kulokho engininqabela kona. Empeleni engikuhlosile izinguquko ezinhle ngokusemandleni. Amandla ami ngiyophiwa ngu Allah, ngithembele kuYe futhi ngizinikele kuYe”.

Bantu bakithi, ukuzonda mina makunganiholeli ekutheni nehlelwe okufana nalokho okwehlela isizwe sikaNuhu noma esikaHudi noma esikaSwalihi, kantike, esikaLuti asikho ekudeni nani.

Futhi celani intethelelo eNkosini yenu bese nizisola kuYo. Impela iNkosi yami inesihawu inothando.

Bathi: “We Shu’ayibu, kuningi esingakuqondi kulokho okushoyo futhi sikubona ubuthaka phakathi kwethu, ukube nje bekungekho ngenxa yomndeni wakho ngabe kade sakukhanda ngamatshe, futhi awuhloniphekile kangako kithi”.

Wathi: “Bantu bakithi, umndeni wami uhlonipheke kini ukudlula uAllah naze namufulathela ngomhlane pho? Impela iNkosi yami ikuhaqe konke enikwenzayo”.

Bantu bakithi, yenzani enikwenzayo nami ngiyenza, maduzane nje niyokwazi ukuthi ngubani oyothola isijeziso esiyomhlaza nalowo oyixoki. Futhi lindelani nami ngilindele.

Kwathi-ke lapho kufika umyalelo weThu [wembubhiso], sahlenga ngomusa weThu uShu’ayibu kanye nalabo ababekholwa naye, umsindo omkhulu wahlasela labo abaphambukile, kwasa bedindilizile emzini yabo bebheke phansi [befile].

Kwaba ngathi abakaze bahle khona, masibhubheke isizwe sakwa Madiyana njengoba kwabhubha esakwaTamudi.

Futhi sathumela uMusa ngezibonakaliso zeThu nobufakazi obusobala.

Ukuba aye kuFirawuni nezikhulu zakhe; kepha bona balandela umyalelo kaFirawuni. Bheka ngoba umyalelo kaFirawuni awunabuqotho.

Uyobe ehola phambili abantu bakhe ngoSuku lokwahlulela, abafake emlilweni; yaze yayimbi indawo okungenwa kuyo.

Balandeliswa ngesiqalekiso lapha emhlabeni futhi nakwelizayo; kwaze kwakubi lokho okulandelanayo.

Lezo izindaba zezindawo esikulandisa zona, ezinye zazo zisabonakala kuthi ezinye sezashabalala.

Futhi asibonanga ngalutho kepha yibona abazona uqobo; kanti izikhonzwa zabo abakhuleka kuzo ngaphandle kuka Allah azibasizanga ngalutho mzukwana kufika umyalelo [wembubhiso] weNkosi yakho, kunalokho zabandisela imbubhiso.

Sinjaloke isijeziso seNkosi yakho, uma ijezisa abantu bendawo abaphambukile, impela isijeziso saYo sibuhlungu sinzima.

Nebala kulokho kunesifundo kulowo osaba isijeziso sakwelizayo. Lelo uSuku okuyobuthana khona abantu futhi lelo uSuku oluyobonwa.

Futhi siludondisela isikhathi esibekiwe.

Mhla lufika, akukho muntu oyokhuluma ngaphandle kwemvume yaKhe [u Allah]. Phakathi kwabo kunalabo abangeke baphumelele futhi kunalabo abayophumelela.

Labo-ke abangayi kuphumelela bayongena emlilweni lapho bayobubula [kanzima] futhi baphefumule kanzima.

Bayobhadla kuwo uma nje lokhu amazulu nomhlaba esekhona, ngaphandle kwalokho okuthandwa iNkosi yakho[1]. Bheka ngoba iNkosi yakho yenza intando yaYo. ——— [1] njengokukhipha abakholwayo abangene eMlilweni ngenxa yempambuko zabo ezindlule izenzo zabo ezinhle.

Futhi labo abayophumelela, bayongena eJana bahlale kuyo unaphakade uma nje lokhu amazulu nomhlaba esekhona, ngaphandle kwalokho okuthandwa iNkosi yakho – izibusiso ezingenamkhawulo.

Ngakhoke ungabi nongabazane ngalokho abakukhonzayo laba, ngokuba bakhonza njengoba abokhokho babo babekhonza phambilini. Kantike siyobanika isabelo ngokugcwele singancishisiwe.

Futhi sanika uMusa iNcwadi [iTora], kepha kwaba nokuphikisana ngayo. Ukube bekungesikho ngenxa yezwi [isinqumo] saphambilini elivela eNkosini yakho ngabe kwahlulelwe phakathi kwabo. Futhi banokungabaza okukhulu ngayo [iKurani].

Futhi bonke [labo abaphikisanayo] iNkosi yakho iyobapha umvuzo wezenzo zabo ngokuphelele, ngokuba Yona ikwazi kahle konke abakwenzayo.

Ngakhoke bambelela endleleni eqondile njengoba uyalelwe, [wena] nalabo ababuye kanye nawe [ngokukholwa ku Allah] futhi ningaphuli imithetho, ngokuba Yona [iNkosi yakho] ikubona konke enikwenzayo.

Futhi ningathatheki ngalabo abaphambukile, funa nitholwe umlilo futhi akukho basizi eniyobathola ngaphandle kuka Allah, manjalo ningasizakali.

Yenza iswala ezinhlangothini zombili zosuku [ekuseni nantambama] kanjalo nangezinkathi zakusihlwa. Impela izenzo ezinhle ziyazishabalalisa ezimbi. Lokho isikhumbuzo kulabo abakhumbulayo.

Futhi bekezela [uzimelele], ngokuba u Allah akawuchithi umvuzo walabo abenza okuhle.

Ukube nje kwabakhona abantu abanokuqonda ezizweni ezinandulelayo ababeyobanqanda ekuphambukeni, [kepha phinde] – ngaphandle kwedlanzana kulabo esabahlenga kubo. Laba abaphambukile balandela lokho abacebe ngakho futhi babeyigilamkhuba.

Futhi iNkosi yakho ayikaze yabhubhisa indawo [yabantu] ngokungebulungiswa uma abantu bakhona bengabaqotho.

Ukube iNkosi yakho beyithanda, beyobenza abantu babe sokholweni olulodwa. Kepha abantu bayohlala benemibono ephikisanayo [abanye abakholwa abanye bayakholwa].

Ngaphandle kwalabo iNkosi yakho ebe nomusa kubo, futhi ubadalele kona lokho [ukubavivinya ngokuhlukana kwemibono]. Kantike liyofezeka Izwi [isinqumo] leNkosi yakho elithi: “Ngiyogcwalisa iJahanamu ngamaJini nangabantu ndawonye”.

Konke lokhu esikulandisa kona ngezindaba zeZithunywa, ukukupha isibindi. Futhi kukho konke lokhu uthole iqiniso nokwelulekwa kanye nesikhumbuzo kubakholwayo.

Futhi kulabo abangakholwa yithi: “Yenzani enikwenzayo nathi senza esikwenzayo”.

Futhi nilinde nathi silindile.

Konke okungabonwayo emazulwini nasemhlabeni kungokuka Allah futhi yonke into iyobuyela kuye, ngakhoke khonzani Yena futhi nethembele kuYe. Belu akusikho ukuthi iNkosi yakho ayikunakile enikwenzayo.

Alif Lam Ra; lena imibiko yeNcwadi ecacile.

Nebala siyembulele iyiKurani yesi-Arabhu ukuze niqonde.

Sikulandisela izindaba ezinhle lapho sikwembulela leKurani nakuba ngaphambi kwayo ubungomunye wabangazi.

Khumbula mhla ethi uYusufu kuyise: “Ngiphuphe izinkanyezi eziyishumi nomuvo kanye nelanga nenyanga, ngikuphuphe konke kungikhothamela”.

Wathi [uyise]: “Ungabatsheli abafowenu ngephupho lakho, funa bakwakhele uzungu, phela uShayitani uyisitha somuntu esicacile”.

Kanjaloke iNkosi yakho izokuqoka futhi ikufundise incazelo yamaphupho iphinde iphelelelise isibusiso saYo kuwe nasemndenini kaYakubu, njengoba asiphelelisa koyihlomkhulu ababili phambilini u Ibhirahimu no Isihaki. Nebala iNkosi yakho Inolwazi Ikhaliphile.

Impela [endabeni] kaYusufu nabafowabo kunezifundo kulabo ababuzayo.

Mhlazane bethi: “Nebala uYusufu nomnewabo bathandwa ukudlula thina kubaba wethu yize thina sibaningi, impela ubaba wethu usephutheni elisobala”.

Bulalani uYusufu noma nimdingisele kude le ukuze ubaba wenu abheke nina, bese emuva nibe ngabantu abenza okulungile.

Omunye wabo wathi: “Cha, ningambulali uYusufu kepha mfakeni ekujuleni komthombo, uyobe esecoshwa abanye bezihambi uma ukuthi nizimisele ukukwenza.

Bathi: “Baba wethu, kungani ungasithembi ngoYusufu sibe impela simkhathalele na?.

Mdedele ahambe nathi kusasa azijabulise adlale futhi impela siyobe thina simqaphile

Wathi: “Nebala kuyangikhathaza ukuba nihambe naye futhi ngiyesaba ukuthi angahle adliwe impungushe ningamnakile”.

Bathi: “Uma engadliwe impungushe sibe sibaningi kangaka, impela siyobe singamavaka”.

Kwathi lapho sebehambe naye, bavumelana ukuthi bayomfaka ekujuleni komthombo; sembulela kuye ukuthi [langalimbe] uyobatshela ngalesenzo sabo bengazelele.

Bafika kubaba wabo ebusuku bekhala.

Bathi: “Baba wethu, sihambile siyoncintisana sashiya uYusufu ezimpahleni zethu, wabe esedliwa impungushe. Futhi vele ngeke usikholwe noma kuthiwa siqinisile”.

Futhi babhixa ingubo yakhe ngegazi mbumbulu. Wathi [uYakubu]: “Empeleni niyengwe imiphefumulo ngokuthile. Kepha ukubekezela ikona okuhle futhi u Allah nguYena okucelwa kuYe usizo ngalokho enikubabulayo”.

Zafika izihambi zathumela lowo obakhela amanzi, wehlisa ithunga [emthonjeni] wathi: “Lezi izindaba ezinhle, umfana lo”. Base bemfihla okwempahla ethengiswayo. Kepha u Allah ukwazi konke abakwenzayo.

Base bemthengisa ngenani elingatheni ubala nje lwamaDirihamu futhi babengenandaba naye.

Lona owaseMisiri [eGibhithe] owamthenga wathi kumkakhe: “Mphathe kahle, hleze abe usizo kithi noma simenze ingane yethu”. Sambeka kanjalo uYusuf emhlabeni ukuze simfundise ukuchaza amaphupho. Futhi u Allah ulwengamele udaba lwakhe kepha iningi labantu alazi.

Kuthe esekhulile, samnika ubuhlakani nolwazi, phela sibahlomulisa kanjalo labo abenza okuhle.

Lowo owesimame ayehla emzini wakhe wamncenga ukuba alale naye wavala iminyango wathi: “woza la”. Wathi [uYusufu]: “U Allah angivikele – impela umnumzane wami ungiphethe kahle, impela abaphambukayo abasoze baphumelele”.

Impela [owesimame] wayemlangazelele, kanjalo naye ukube nje akabonanga izimpawu zeNkosi yakhe. Ngalokho saqhelisa kuye ububi namanyala, ngokuba wayengomunye wezigqila zeThu ezikhethekile.

Bagijimela emnyango, owesimame wadabula izimpahla zakhe [uYusufu] ngemuva bazithela phezu komyeni wakhe emnyango. Wathi [owesimame]: “Yini umvuzo walowo obefuna ukwenza okubi ngomndeni wakho uma kungesikho ukuba aboshwe noma ajeziswe kabuhlungu”.

Wathi [uYusufu]: “Nguyena obengincenga ukulala nami”. Kwaba nofakazi wasemndenini wakhe [owesimame] owathi: “Uma izembatho zakhe [uYusufu] zidabuke ngaphambili, kuyinkomba yokuthi owesimame uqinisile nokuthi yena [uYusufu] unamanga”.

Kanti uma izembatho zakhe [uYusufu] zidabuke ngemuva, kuyinkomba yokuthi owesimame unamanga, nokuthi yena [uYusufu] uqinisile.

Kwathi lapho [usokhaya] ebona izembatho zakhe [uYusufu] zidatshulwe ngemuva wathi: “Nebala lokhu ngamanye amaqhinga enu bafazi, impela amaqhinga makhulu”.

[Wathi usokhaya]: “Yusufu kwendlulise lokhu, kuthi wena [mfazi] cela intethelelo yempambuko yakho impela usephutheni”.

Abafazi bendawo bathi: “Umfazi wesikhulu uncenga umfana wakhe ukulala naye, okusho ukuthi impela uthando luyachichima. Belu simbona esephutheni elisobala”.

Kuthe lapho [umfazi wesikhulu] ezwa ngozunge lwabo [abafazi bendawo], wabamema wabalungiselela idili wabe esebanika umfazi ngamunye umkhephe [ummese] wathi [kuYusufi]: “Phuma bakubone”. Kuthe bembona bambabaza bazisika izandla bathi: “u Allah makangcweiswe, akusiyena umuntu phela lona, ingelosi ehloniphekile uqobo”.

Wathi [umfazi wesikhulu]: “Yikonake lokhu ebeningisola ningigxeka ngakho, impela ngizamile ukumncenga ukulala naye kepha wenqaba. Kodwake uma engakwenzi lokhu engimyalela kona uyobhadla ejele futhi akuyikuba yinto yalutho”.

Wathi [uYusufu]: “Nkosi yami, ijele yilona engilithandayo kunalokho abangibizela kukho. Uma ungaluqhelisi uzungu lwabo kimi, ngiyolingeka ngabo ngibe omunye weziwula”.

INkosi yakhe yamphendula, yaqhelisa uzungu lwabo kuye, phela Ungozwayo Owaziyo.

Emuva kokubona ubufakazi [bobumsulwa bukaYusufi], babona kungcono bamfake ejele undendende.

Wangena namabhungu amabili ejele, omunye walo wathi: “Ngiphuphe ngivova utshwala”. Lona omuunye wathi: “Mina ngiphuphe ngithwele isinkwa ekhanda sidliwa izinyoni”. [base ethi womabili]: “Ake usilandise ngencazelo yawo, impela sikubona ungumuntu oqotho”.

Wathi: “Kuyothi kungakafiki ukudla eniphakelwa kona, ngiyobe senginilandisile ngencazelo yawo ngaphambi kokuthi kufike kini. Phela lokhu ngokunye engikufundiswe iNkosi yami. Bheka ngoba ngayishiya phansi inkolo yabantu abangakholelwa ku Allah futhi benjalo nje baphikha uSuku lokuGcina”.

Ngabeke sengilandela inkolo yokhokho bami u Ibhirahimu no Isihaki noYakubu. Impela sasingenalo igunya lokubhanqa u Allah nanoma yini. Lokho isibusiso sika Allah kithi nakusintu kepha iningi labantu alibongi.

Balingani bami ejele, ingabe izikhonzwa ezahlukahlukene zingcono kuno Allah Oyedwa Ongumlawuli na?

Lokho enikukhonzayo ngaphandle kwakhe amagama nje eniziqambele wona nina nokhokho benu angenabufakazi u Allah abumbulele. Ukwahlulela [nombuso] kungokuka Allah kuphela. Uyalele ukuba ningakhonzi lutho ngaphandle kwaKhe. Leyo- ke iyona nkolo eqondile kepha iningi labantu abazi.

Balingani bami ejele, omunye wenu uyothelela inkosi yakhe [ebusayo] utshwala, kuthi omunye wenu yena uyophanyekwa abethelwe izinyoni zidle ekhanda lakhe. Udaba lolu ebenibuza ngalo seluphothuliwe.

Wabe esethi kulona ayenethemba lokhuthi uyosinda [ekufeni]: “Ungibalule enkosini yakho”, kepha uShayitani wamlibazisa wakhohlwa ukumbalula enkosini yakhe. Ngakhoke [uYusufu] wahlala futhi ejele iminyakana.

Yathi inkosi [ngelinye ilanga]: “Ngiphuphe izinkomo eziyisikhombisa ezinonile zidliwa ezinye eziyisikhombisa ezizacile, ngabona nezikwebu eziluhlaza nezinye ezomile; zikhulu, ngiboniseni ngephupho lami uma nikwazi ukuchaza amaphupho”.

Bathi: “Imbudane yephupho, asikwazike thina ukuchaza imbudane yamaphupho”.

Lona omunye wababili [ababeboshiwe] owasinda [ekufeni] wakhumbula mveni wathi: “Mina nginganilandisa ngencazelo yalo, ngakhoke thumani mina [kuYusufu]”.

Yusufu, wena oneqiniso sichazele ngezinkomo eziyisikhombisa ezinonile ezidliwa ezinye eziyisikhombisa ezizacile, ukuze ngibuyele emuva kubantu hleze babe nolwazi.

Wathi [uYusufu]: “Nizolima iminyaka eyisikhombisa ilandelana bese kuthi konke enikuvunile nikuyeke esikwebini sakho ngaphandle kwalokho okuncane okumele nikudle”.

Emuva kwalokho kuyofika iminyaka eyisikhombisa enzima [isomiso] iyodla konke lokhu enikuvunile phambilini [abantu bayokuqeda] ngaphandle kwalokho okuncane enikulondolozile.

Emuva kalokhoke kuyofika unyaka abantu bayothola inala kuwo inala lemvula futhi bayobe bevova [izitshalo ezikhanywayo ukwenza iziphuzo].

Inkosi yathi: “Mletheni kimi [uYusufu belu]”. Kuthe lapho isigijimi sifika kuye wathi: “buyela enkosini yakho, uyibuze ukuthi kwakwenzenjani ngabafazi abazisika izandla. Impela inkosi yami yazi kahle ngamaqhinga abo”.

Yathi [inkosi]: “Kwakwenzenjani mhla nincenga uYusufu ukuba alale nani na?” Bathi [abafazi]: “u Allah makagcweliswe, akukho okubi esimazela kona”. Umfazi wesikhulu wathi: “Manje iqiniso selivele obala, yimina engangimncenga ukulala naye futhi ubeqinisile”.

[uYusufu wathi] “Lokho, ukuze azi [isikhulu] ukuthi angizange ngingathembeki kuye lapho engekho, nokuthi u Allah akaliphumelelisi iqhinga labangathembekile”.

Futhi angizenzi msulwa ngokuba umphefumulo unokuyalela ngokubi ngaphandle kwalowo iNkosi yami ebe nomusa kuye. Nebala iNkosi yami Iyathethelela Inesihawu.

Inkosi yathi: “Mletheni kimi ngizoziqokela yena”. Kuthe lapho esekhuluma naye [uYusufu] yathi: “Kusukela namhlanje ungohloniphekile nothembekile kithi”.

Wathi: “Ngiphe isikhundla sokuphatha iziqolobane zomhlaba ngokuba ngiyanakekela futhi nginolwazi”.

Sambeka kanjalo uYusufu emhlabeni [waseMisiri] wakha lapho ethanda khona. Ngomusa wethu sibusisa esimthandayo futhi asiwuchithi umvuzo walabo abenza okuhle.

Kanti futhi umvuzo wakwelizayo yiwona ongcono kulabo abakholwayo futhi abathobela intando ka Allah.

Abafowabo bakaYusufu bafika [eMisiri] bangena ekhona, wababona [ukuthi abafowabo] kepha bona babengamboni [ukuthi uYusufu].

Kuthe lapho esebalungiselele umgodla wabo wathi: “Nibongilethela umfowenu enizalwana naye nguyihlo; bhekani ngoba ngininika isikali esigcwele futhi ngiziphatha kahle izivakashi”.

Uma ningangiletheli yena, akukho engiyokunikalela kona futhi ningasasondeli [ningasabuyi].

Bathi: “Sizoncenga uyise ngaye futhi sizokwenza impela”.

Wathi kuzinceku zakhe: “Shuthekani imali yabo kumithwalo yabo, ukuze bayibone lapho befika emndenini wabo hleze babuye”.

Kuthe lapho sebebuyele kuyise wabo bathi: “Baba wethu, sesinqatshelwe ukuba sikalelwe ngakhoke dedela umfowethu ahambe nathi sizokwazi ukukala [ukudla] futhi sizomvikela”.

Wathi: “Nifuna nginithembe ngaye njengoba nganithemba ngomfowabo phambilini, u Allah kuphela ongumvikeli ongcono futhi unomusa kunabo bonke abanomusa”.

Bathe uma bevula imithwalo yabo bathola imali yabo ibuyiselwe kubo, bathi: “Baba wethu, yikuphi esikufunayo [okudlula lokhu], nansi imali yethu ibuyiselwe kithi, sizokhona ukutholela umndeni wethu ukudla sivikele nomfowethu siphinde sithole isikali sekameli esengeziwe, leso isikali esilula”.

Wathi [uYakubu]: “Angisoze ngamadedela ahambe nani kuze kuba ningipha isiqiniseko ngo Allah ukuthi niyombuyisa kimi ngaphandleke uma kwenzeka okungaphezu kwamandla enu”. Kuthe lapho sebemunikeze isiqiniseko sabo wathi: “u Allah ungufakazi kulokho enikushoyo”.

Wathi: “Bantwana bami, ningangeni ngesango elilodwa kepha ningene ngamasango ehlukene, futhi ayikho into enginganisiza ngayo ku Allah, ngokuba isinqumo ngesika Allah, ngithembele kuYe futhi abathembayo kumele bathembele kuYe”.

Kuthe lapho sebengenile ngokomyalelo kayise wabo – akukho lutho abengabasiza ngakho ku Allah, kwakumane kuyisifiso emphefumulweni kaYakubu ayefuna ukusifeza. Futhi impela unolwazi ngalokho esimufundise kona kepha iningi labantu alazi.

Kuthe lapho bengena kuYusufu wamanga umfowabo wathi [emhlebela]: “Ngingumfowenu, ngakhoke ungazikhathazi ngalokho abakwenza”.

Kwathi esebalungisele imigodla yabo, washutheka isitsha kumthwalo kamfowabo maqede kwamemeza isimemezi [sathi]: “Nina benqola ningamasela”.

Baphenduka bathi: “nilahlekelwe yini na?”

Bathi: “Silahlekelwe isitsha senkosi futhi oyosiletha uzothola umthwalo wekameli [wokudla] futhi ngiyakuqinisekisa lokho”.

Bathi: “Siyafunga ngo Allah, niyazi ukuthi asizanga ukuzokona ezweni futhi asikaze sibe amasela”.

Bathi: “Kuyoba yini isijeziso sakhe [lowo oyisela] uma [kuvela] ukuthi ninamanga?”

Bathi: “Isijeziso salowo [isitsha] esitholakala kumthwalo wakhe kuyoba nguyena siqu sakhe, thina sizijezisa kanjalo iziphambuki”.

Waqala ngemithwalo yabo [ephenya] ngaphambi kokamfowabo maqede wasikhipha kumthwalo kamfowabo. Samcebisa kanjalo uYusufu, ubengeke akhone ukuthatha umfowabo ngokwenkambiso yenkosi ngaphandle uma ethanda [enye indlela]. Siphakamisa izigaba zalabo esibathandayo, futhi ngaphezu kwalowo onolwazi kunomunye owazi kangcono.

Bathi: “Uma ebile, phambilini umfowabo naye weba”. uYusufu wakugcina ngaphakathi wangabavezela, wathi: “Nina okwenu kubi ngokwendlulele], futhi u Allah ukwazi kahle enikuphawulayo”.

Bathi: “Mhlonishwa, unobaba oyixhegu ogugile, ngakhoke thatha omunye wethu endaweni yakhe, impela sikubona ungomunye wabenza okuhle”.

Wathi: “u Allah asivikele ukuba sithathe omunye ngaphandle kwalowo esithole kuye impahla yethu, funa sibe ngabaphambukile”.

Kuthe lapho sebelahle ithemba ngaye, babhunga ngasese, wathi okunguyena omdala kubo: “Anisazi yini ukuthi ubaba wenu wenze isibopho nani ngo Allah futhi naphambilini lokhu enakwenza kuYusufu, ngakhoke mina angisasuki kulendawo kuze ubaba wami uyangivumela [ukubuyela ekhaya] noma u Allah kube nguYena ongehlulelayo futhi unguMehluleli oyigcweti”.

Nina buyelani kubaba wenu nifike nithi: “Baba wethu, indodana yakho yebile futhi sifakaze ngalokho esikwaziyo futhi besingeke sikwazi ukuvikela okungabonwayo”.

Ungabuza nabantu bendawo lapho ebesikhona nabenqola lena esifike ngayo, impela siqinisile.

Wathi [uYakubu]: “Empeleni niyengwe imiphefumulo ngokuthile. Kepha ukubekezela ikona okuhle. Kungekudala u Allah uzobaletha kimi bonke. Nebala Yena Ungowaziyo Okhaliphile”.

Wabashiya kanjalo wathi: “Hawu kodwa ngoYusufu”. Amehlo akhe [izinhlavu lezi ezimnyama]aze aba mhlophe ngenxa yosizi; futhi wayehlala edangele.

Athi [amadodana akhe]: “Uzolokhu uqhubeka ukhumbula uYusufu uze ugule kanzima noma ubhubhe imbala, simfunge u Allah”.

Wathi: “Ukudabuka kwami nosizi lwami ngilubalisela u Allah kuphela futhi ngazi ngo Allah lokho nina eningakwazi”.

Madodana ami, hambani niyothungatha uYusufu nomfowabo futhi ningalahli ithemba ngomusa ka Allah, ngokuba abekho abalahla ithemba ngomusa ka Allah ngaphandle kwabantu abangakholwa.

Kuthe lapho bengena kuye [uYusufu] bathi: “Sikhulu, thina nomndeni wethu sihlaselwe yisomiso futhi siphethe nemali nje engatheni [besicela nje] usikalele futhi usinikelele, impela u Allah uyabahlomulisa labo abanikelayo”.

Wathi: “Nisakwazi nje enakwenza kuYusufu umfowenu mhla nisaseyiziwula na?”

Bathi: “Ingabe wena unguYusufu na?” Wathi: “Nginguyena uYusufu futhi lona umfowethu, u Allah usubusisile, ngokuba lowo othobela u Allah futhi abekezele, u Allah akawuchithi umvuzo walabo abenza okuhle”.

Bathi: “Impela u Allah uqoke wena kunathi futhi besisephutheni, simfunge u Allah”.

Wathi: “Namhlanje angeke nisagxekwa, u Allah uzonithethelela ngokuba unomusa kunabo bonke abanomusa”.

Hambani nesembatho sami lesi, nifike nisiphonse ebusweni bukababa ukubona, uzophinde akwazi ukubona futhi nibuye lapha kimi nemindeni yenu yonke”.

Kuthe lapho inqola isinqamula izinkalo, uyise wabo wathi: “Nginukelwa iphunga likaYusufu ukube nje beningathathisi owesiphukuphuku”.

Bathi: “Simfunge u Allah, usubuyele kulokuhema kwakho kwakudala”.

Kuthe lapho umthuli wezindaba ezinhle efika wasiphonsela [isembatho] ebusweni bakhe [uYakubu] wakwazi ukubona. Wathi: “Anginitshelanga ukuthi ngazi ngo Allah nina lokhu eningakwazi na?”

Bathi: “Baba wethu sicelele intethelelo ngezimpambuko zethu, impela besisephutheni”

Wathi: “Maduzane nje ngizonicelela intethelelo eNkosini yami, nebala Yona Ingumthetheleli Onesihawu”.

Kuthe lapho bengena kuYusufu wabanga abazali bakhe, wathi: “Ngenani eMisiri – ngentando ka Allah – niphephile”

Wabeka abazali bakhe esihlalweni, bonke bamkhothamela. Wathi [uYusufu]: “Baba wami, lenake incazelo yephupho lami laphambilini, u Allah ulifezile. Futhi wangibusisa mhla engikhipha ejele waphinde waletha nina enisusa emaphandleni emuva kokuba uShayitani efake isihlava phakathi kwami nabafowethu. Impela iNkosi yami inesineke kulowo emthandayo; nebala Ingowaziyo Okhaliphile”.

Nkosi yami ungiphe ubukhosi waphinde wangifundisa ukuchaza amaphupho; Mdali wamazulu nomhlaba unguMhlengi wami emhlabeni nakwelizayo, ngenze ngife ngisase-yiMusilimu futhi ungihlanganise nalabo abaqotho.

Lokho izindaba zokungabonwayo esizambulele kuwe. Ubungekho nabo mhla bevumelana ngodaba lwabo lapho bakha uzungu.

Futhi iningi labantu alisibo abakholwayo noma ungazama kangakanani.

Futhi awubaceli mvuzo ngakho [ukubabonisa indlela], kuphela nje yisikhumbuzo sezizwe zonke.

Ziningi izibonakaliso [izinkomba] emazulwini nasemhlabeni abazindlulayo kepha bazishaye indiva.

Futhi iningi labo likholelwa ku Allah libe limbhangqa.

Ingabe bazibona bephephile yini esijezisweni sika Allah esihaqa uwonke wonke noma ekufikeni koSuku lokugcina bengazelele futhi benganakile na?.

Yithi: “Lena indlela yami, ngimemela ku Allah ngolwazi [oluqinisekisiwe] mina nalabo abangilandelayo – makangcweliswe u Allah- angisiye omunye wababhangqi”.

Futhi sathumela [njengeZithunywa] amadoda kuphela ngaphambi kwakho ebesiwembulela edabuka khona ezindaweni zabantu. Ingabe abawuhambi yini umhlaba ukuze babone ukuthi saba njani isiphetho salabo ababandulelayo. Futhi umuzi wakwelizayo yiwona ongcono kulabo abathobela u Allah, ngakhoke kungani ningaqondisisi na?

Kuze kwathi lapho iZithunywa ziqala ukulahlekelwa yithemba seziqinisekile ukuthi zithathwa njengabanamanga, lwafika usizo leThu kwasindiswa esibathandayo, futhi akekho ongavimba isijeziso seThu kubantu abayizigila mkhuba.

Impela kunesifundo emilandweni yabo kulabo abakhaliphile. Phela [iKurani] ayisilo udaba olungaqanjiwe nje, kepha ifakazela lokho okungaphambi kwayo futhi icacisa yonke into futhi iholela endleleni eqondile futhi iwumusa kubantu abakholwayo.

Alif Lam Mim Ra; lena imibiko yeNcwadi [iKurani]. Nalokhu okwembulelwe kuwe [Muhamadi] kuvela eNkosini yakho kuyiqiniso kepha iningi labantu alikholwa.

Ngu Allah lona ophakamise amazulu ngaphandle kwezinsika ezinibonayo, wabe esenyukela eSihlalweni. Futhi wajuba ilanga nenyanga, konke kuyahamba [kuzungeza] kuyoze kushaye isikhathi esibekiwe. Uhlela izinto aphinde ahlalusise imibiko ukuze nibe nesiqiniseko sokuthi niyohlangana neNkosi yenu.

Futhi Nguye ondlale umhlaba wafaka kuwo izikhonkwane [izintaba] nemifula. Futhi kuzo zonke izithelo uzenze amabhangqa. Umboza imini ngobusuku. Impela kulokho kunezibonakaliso kubantu abacabanga bahlaziye.

Nasemhlabeni kunezingxenye ezakhelene ezinezivande zomvini nezinye izitshalo namasundu ayizixhomo nazimele, konke kunisela ngamanzi awodwa [imvula eyodwa], kepha senze ezinye zangcono kunezinye. Nebala, kulokho kunezibonakaliso kubantu abaqondisisayo.

Uma umangala, okuyikona okumangazayo inkulumo yamo [ethi]: “Kuyothi lapho sesiyinhlabathi bese sidalwa kabusha na?” Yibona kanye labo abangakholelwa eNkosini yabo, futhi yibona kanye abo abayogaxwa amasongo ezintanyeni zabo, futhi yibona kanye labo abayongena eMlilweni babhadle kuwo unaphakade.

Makuphuthuma ngokubi ngaphambi kokuhle nakuba ziningi izijeziso esezandlula ngaphambi kwabo. Impela iNkosi yakho iyabathethelela abantu izimpambuko zabo, futhi injalo nje iNkosi yakho ijezisana kanzima.

Labo abangakholwa bathi: “Kungani engehliselwanga isibonakaliso esivela eNkosini yakhe na?” Phela wena [Muhamadi] ungumexwayisi nje kuphela kanti futhi sonke isizwe sinomholi.

U Allah uyakwazi lokho okwethwelwe owesifazane [esiswini] nalokho isisu esikunciphisayo nalokho esikwengezayo. Futhi yonke into kuYe ibekelwe umkhawulo.

UnguMazi wokusesithe nalokho okusobala, futhi ungoMkhulu Ophakeme.

Kuyefana uma omunye wenu ekhulumela buthule noma ekhulumela phezulu noma lowo owenza izinto ngokufihla ebusuku noma lowo ozenza esindlangalaleni emini kwabha.

Unezingelosi zaKhe [ezijutshwe kumuntu zisina zidedelana] ngaphambili nangemuva zimqaphile [umuntu] ngokuyalelwa ngu Allah. Impela u Allah akasoze aguqula isimo sabantu kuze kube yibona uqobo abasiguqulayo. Uma u Allah efuna ukubhubhisa abantu abathize akukho okuyomvimba futhi akekho ngaphandle kwaKhe oyobahlenga.

NguYena lona onikhombisa umbani onilethela ukwesaba kanye nethemba [lemvula] aphinde okhanda ifu elisindayo.

Futhi ukuduma kwezulu kubabaza udumo luka Allah kanjalo nezingelosi ngenxa yokumesaba. Uphinde athumele umphezulu abhubhise ngawo noma ngubani amfunayo ngenkathi bona besaphikisana ngo Allah, futhi uhlasela kanzima.

NguYena kuphela okumele kukhulekwe kuYe ngokweqiniso ngokuba laba abakhuleka kubo ngaphandle kwaKhe abakwazi ukubaphendula ngalutho; okufana nalowo olulela izandla zakhe emanzini ukuze awalethe emlonyeni wakhe kepha lutho ukufika. Futhi umkhuleko walabo abangakholwa uyize.

Konke okusemazulwini nasemhlabeni kukhothamela u Allah kuthanda kungathandi, nezithunzi zakho imbala ekuseni nantambama.

Yithi: “Ngubani iNkosi yamazulu nomhlaba?” Yithi: “u Allah”. Yithi: “Ingabe niziqokele izikhonzwa ngaphandle kwaKhe ezingeke zanizuzisa noma zinilimaze na?”. Yithi: “Ingabe oyimpumputhe nobonayo bayafana yini noma ubumnyama nokukhanya kuyafana na?”. Noma baqokele u Allah abalingani abadale indalo efana neyaKhe base bedidwa ukufana kwendalo. Yithi: “u Allah nguYena uMdali wezinto zonke futhi Munye Ungumlawuli”.

Wehlisa amanzi emvula, kugeleze imifula ngokuyilingene, kuthi izikhukhula zona zithwale igwebu elikhukhumalayo. Futhi nakulokho enikushisa [njengegolide] ngomlilo ukuze nikhiqize kukho ubucwebe noma eminye imikhiqizo, kuphuma igwebu elifanayo. Uwubeka kanjalo u Allah umzekelo weqiniso namanga. Igwebuke lona liyohamba lishabalale, bese kuthi lokho okuyikona okuwusizo ebantwini kusale [kuzinze] emhlabeni. Uyibeka kanjaloke u Allah imizekelo.

Labo abalalela iNkosi yabo bayothola iJana. Kanti labo abangayilalelanga, ukube bebenakho konke okukhona emhlabeni kuphindwe kabili bayozama ukukhokha ngakho inhlawulo [yokuba bakhishwe eMlilweni]. Labo bayokwehlulelwa kanzima futhi bayophelela eJahanamu okuyindawo embi impela.

Lowo owaziyo ukuthi kuyiqiniso lokho okwembulelwe kuwe kuvela eNkosini yakho, ingabe uyafana nalowo oyimpumputhe [ongaliboni iqiniso] na? Impela yilabo abanokuqonda kuphela abalalelayo.

Bangalabo abagcina isivumelwano sika Allah futhi bangasiphuli isibopho.

Bangalabo abakugcina kuhlangene lokho u Allah ayalele ukuba kugcine kuhlangene bayayisa neNkosi yabo nokwehlulelwa kanzima.

Nalabo ababekezelayo belangazelele uBuso beNkosi yabo [ngokuyithokozisa] benze neswala [umthandazo] baphane ngalokho esibabele kona, ngasese nasesidlangalaleni futhi baphindisele okubi ngokuhle. Yibona-ke labo abayoba nesiphetho esihle.

Izivande zokunethezeka abayongena kuzo, [bona] kanye nalabo abaqotho kubazali babo nabalingani babo nozalo labo. Nezingelosi ziyoza kubo zingena ngayo yonke iminyango.

[zithi]: “Ukuthula makube kini ngokubekezela kwenu, saze sasihle isiphetho”.

Labo-ke abaphula isivumelwano sika Allah emuva kokusibopha bahlakaze nalokho u Allah ayalele ukuba kugcinwe kuhlangene baphinde babhebhethele impambuko emhlabeni; yibona labo abayothola isiqalekiso nesiphetho esinzima.

U Allah wabela amfunayo isondlo ngenala noma amswinye. Bayajabula ngempilo yasemhlabeni nakuba impilo yasemhlabeni iyize kwelizayo.

Laba abangakholwa bathi: “Kungani engehliselwanga isibonakaliso esivela eNkosini yaKhe na?”. Yithi: “u Allah udukisa amfunayo ahole lowo ozinikelayo”.

Labo abakholwayo ozinhliziyo zabo zithotshwa ukukhumbula u Allah. Belu izinhliziyo zithotshwa ukukhumbula u Allah.

Kantike labo abakholwayo benze okuhle bayothola injabulo nendawo enhle abayobuyela kuyo [iJana].

Kanjalo, sikuthumele [Muhamadi] esizweni okwandlula izizwe eziningi ngaphambi kwazo, ukuze ubalandise ngalokho okwembulelwe kuwe nakuba bengakholwa koNomusa[1] [u Allah]. Yithi: “uyiNkosi yami, akekho ofanelwe ukukhonzwa ngaphandle kwaKhe, ngithembe kuYe futhi ngiyobuyela kuYe”. ——— [1] Phela babecabanga ukuthi igama lesinye isikhonzwa abangasazi kungakho babelixwaya leligama lika Allah ‘Onomusa’.

Ukuba kwakukhona iKurani okududulwa ngayo izintaba noma kuqhekezwe ngayo umhlaba noma kukhulunyiswe ngayo abafile [bekuyoba yilena]. Kepha zonke izinto zilawulwa ngu Allah. Akukabacaceli yini laba abakholwayo ukuthi u Allah uma efuna angahola bonke abantu. Futhike, labo abangakholwa bayohlala njalo behlelwa imishophi noma yehle buduze nomuzi wabo size sifezeke isithembiso sika Allah. Nebala u Allah akasephuli isithembiso.

Nebala, iZithunywa ezikwandulelayo zenziwa inhlekisa. Kepha ngathi ukubayekela laba abangakholwa, makhathaleni ngabajezisa, bheka nje ukuthi saba njani isijeziso.

Ingabe lowo owengamele wonke umuntu nakwenzayo [akuyena ofanele akhonzwe] na?. Kepha babhangqa u Allah nezikhonzwa. Yithi [Muhamadi]: “Zigaguleni ngamagama. Kumbe nazisa u Allah ngalokho ebengakwazi [izikhonzwa] emhlabeni noma niyasho nje into engenabufakazi”. Empeleni laba abangakholwa benzelwe kwangathi buhle lobuqili babo, bavinjwa-ke endleleni [eqondile]. Futhi lowo u Allah amdukisile akekho oyomhola.

Bayojezisa [lapha] emhlabeni, belu isijeziso sakwelizayo sinzima futhi akekho oyobavikela ku Allah.

Ukulanda ngesivande esithenjiswe labo abathobela u Allah; kugeleza imifula enzasi kwazo; izithelo zakhona azinamkhawulo kanjalo nemithunzi yakhona. Leso yisiphetho salabo abathobela u Allah kanti leso sabangakholwa uMlilo.

Labo esabanika iNcwadi bayathokoza ngalokho okwembulelwe kuwe [Muhamadi], kanti labo bombimbi bayakuphika okunye okuqukethwe yiyo [iKurani]. Yithi: “Mina ngiyalelwe ukuba ngikhone u Allah kuphela ngingambhangqi nalutho, ngimemela [abantu] kuYe futhi ngiyobuyela kuYe”.

Kanjalo siyembulele [iKurani] njengomthetho-sisekelo ngolwimi lwesi Arabhu. Uma uzolandela izinkanuko zabo emuva kokuba usuthole ulwazi, akekho oyokuhlenga noma akuvikele ku Allah.

Nebala sazithumela iZithunywa ngaphambi kwakho sabaqokela amakhosikazi nezingane. Asikho iSithunywa esingenza isimangaliso ngaphandle kwemvumo ka Allah. Sonke isikhathi esibekiwe silotshiwe.

U Allah usula aphinde agcine akuthandayo futhi uneNcwadingqangi.

Singakubonisa okunye kwalokho esibathembise kona noma sikuthathe emhlabeni. Wena okwakho ukudlulisa umlayezo kuthi okweThu ukwehlulela.

Ingabe ababoni yini ukuthi silokhu siza siwudla kancane umhlaba ezinhlangothini zawo[1] na?. U Allah uthatha isinqumo, akekho ongasiguqula futhi wehlulela ngokushesha. ——— [1] Ngokusabalala kwe Isilamu nokwanda kwamaMusilimu emhlabeni.

Impela laba ababandulelayo [abangakholwa] balakha uzungu [ngeZithunywa zabo]. Kepha ukuhlela konke kungokuka Allah. Wazi konke omuntu akwenzayo. Futhi laba abangakholwa bayokwazi maduze nje ukuthi ubani oyoba nesiphetho esinzima.

Laba abangakholwayo bathi awusiso [wena Muhamadi] iSithunywa. Yithi: “u Allah wenele njengofakazi phakathi kwami, kanjalo nalowo onolwazi lweNcwadi [iTora noma i-Ininjili].

Alif Lam Ra; Lena iNcwadi esiyembulele kuwe [Muhamadi] ukuze ngemvumo ka Allah ukhiphe abantu ebumnyameni ubase ekukhanyeni – endleleni yalowo onguSomandla Odunyiswayo.

u Allah lona okungokwaKhe konke okusemazulwini nasemhlabeni. Laba abangakholwa bayongena eMlilweni okuyisijeziso sika Allah esinzima.

Labo abathanda impilo yalomhlaba kunale yakwelizayo nabavimba [abanye] endleni ka Allah abayifuna igwembile. Labo balahlakile bayanhlanhlatha.

Yileso naleso Sithunywa esasithumela sabe sikhuluma ulwimi lwabantu baso ukuze phela sibahlalusele. Ngu Allah ke odukisa amthandayo aphinde ahole amthandayo. Futhi unguSomandla Okhaliphile.

Sathumela uMusa nezibonakaliso zeThu [Sathi]: “Khipha isizwe sakho ebumnyameni usise ekukhanyeni uphinde ubakhumbuze ngezinsuku [zezibusiso nezijeziso] zika Allah. Impela kulokho kunezibonakaliso kulowo nalowo obekezelayo nobongayo”.

Khumbula mhla ethi uMusa esizweni sakhe: “Khumbulani izibusiso zika Allah kini mhla enihlenga kubantu bakaFirawuni ababenijezisa kabuhlungu, bebulala uyaca izingane zenu zabafana bayeke abesimame benu. Konke lokho bekuyisivivinyo esinzima esivela eNkosini yenu”.

Namhla iNkosi yenu imemezela ukuthi: “Uma nibonga ngizonandisela kepha uma ningabongi, impela isijeziso saMi sinzima”.

Wathi futhi uMusa: “Uma nina ningakholwa nabo bonke abasemhlabeni, bheka ngoba u Allah Ungozimele Odunyiswayo”.

Azizange zifike kini yini izindaba zalabo abanandulelayo, isizwe sika Nuhu nesakwa Adi noTamudi nalabo abeza emuva kwabo – akekho obaziyo ngaphandle kuka Allah. IZithunywa zabo zafika kubo nezibonakaliso, babeka izandla emlonyeni yabo bathi: “Asikholelwa kulokhu enithunywe nakho futhi sinokungabaza ngalokhu enisimemela kukho, siyangabaza”.

Zathi iZithunywa zabo: “Ingabe ninokungabaza ngo Allah uMdali wamazulu nomhlaba, unibizela ukuba anithethelele izimpambuko zenu futhi anidondise kuze kufike isikhathi esinqunyiwe na?”. Bathi: “Nina aniyilutho ngaphandle nje kwabantu abafana nathi, nifuna nje ukusivimba kulokho obekukhonzwa okhokho bethu, ngakhoke siletheleni ubufakazi obucacile”.

Zathi kubo iZithunywa zabo: “Impela singabantu njengani kepha u Allah uqoka amthandayo ezigqileni zaKhe. Futhi angeke sanilethela ubufakazi ngaphandle kwemvuo ka Allah. Labo abakholwayo kumele bathembele ku Allah”.

Singavinjwa yini singathembeli ku Allah kube kunguYena osiholile ezindleleni zethu. Futhi sizokubekezelela lokhu enisicindezela ngakho. Abathembayo kumele bathembele ku Allah”.

Laba abangakholwa bathi kuZithunywa zabo: “Sizonixosha endaweni yethu kungenjalo kumele nibuyele enkolweni yethu”. U Allah wabe esembulela kubo ukuthi: “Sizobabhubhisa abenzi bokubi”.

Siyobe sesibeka njengezakhamuzi emhlabeni emuva kwabo. Lokho kutholwa yilowo osaba mhla eyoma phambi kwaMi osaba nesijeziso saMi.

Zase [iZithunywa] zicela usizo ku Allah wabhubha wonke lowo obengundlovu kayiphikiswa oyisaliwakutshelwa.

Ngaphambili ulindelwe iJahanamu futhi uyophuziswa amanzi anezinsila.

Uyozama ukuwaphuza kepha lutho ukugwinyeka. Ukufa kuyomfikela ndawo zonke kepha akayikufa. Futhi uyobe elindwe yisijeziso esinzima ngaphambili.

Umzekelo walabo abangakholwa eNkosini yabo; izenzo zabo zifana nomlotha olupheshulwa kanzima umoya ngosuku olunesiphepho. Angeke bazuze lutho ngezenzo zabo [ezinhle]. Lokho ukuduka okujulile.

Awubonanga ukuthi u Allah udale amazulu nomhlaba ngeqiniso. Uma ethanda enganishabalalisa nonke bese eletha indalo etsha.

Lokho akukho nzima ku Allah.

Bonke bayoma ngaphambi kuka Allah, bese labo ababeyizichaka bayothi kulabo ababezigqaja [bengabaholi]: “Thina besilandela nina, ngakhoke kukhona yini nokuncane eningasiza ngakho esijezisweni sika Allah na?”. Bayothi: “Ukube u Allah nathi wasihola, besizonihola nani, kuyefana nje kithi, siyakhathazeka noma siyabekezela asinakho ukuphunyula”.

Lapho sekwahlulelwa uShaytani uyothi: “Nebala u Allah unithembise isithembiso seqiniso kepha mina nginithembisile ngangasifeza. Kepha bengingenawo amandla ngaphezu kwenu ngaphandle nje kokuthi bengininxenxa bese niyangilalela. Ngakhoke ningasoli mina kepha nizisole nina uqobo, ngokuba angeke ngikhone ukunisiza nani angeke nikhone ukungisiza. Impela ngiyakuphika ukubhangqa kwenu kaphambilini. Nebala labo abaphambukile bayothola isijeziso esibuhlungu”.

Labo abakholwayo benza nokuhle bayongeniswa ezivandeni okugeleza ezansi kwazo imifula, bayohlala kuzo unaphakade ngemvumo yeNkosi yabo. Bayobingelelana kuzo ngeSalamu [ukuthula].

Awubonanga yini ukuthi u Allah uwafanise kanjani amazwi amahle [obunye baKhe] nesihlahla esihle ozimpande zaso zijulile zinzile futhi side sile phezulu.

Sikhiqiza izithelo zaso ngaso sonke isikhathi ngemvumo yeNkosi yaso. Bheka ngoba u Allah wenzela abantu imizekelo ukuze belu baqondisise.

Kuthi amazwi amabi [okubhangqa u Allah nezikhonzwa] wona afaniswa nesihlahla esibi esisiphukile phansi esingazinzile.

Labo abakhowayo u Allah uyobaqinisa ngamazwi aqinile [obunye baKhe] empilweni yasemhlabeni neyakwelizayo. Futhi u Allah uyabadukisa abaphumbukileyo. Belu u Allah wenza akuthandayo.

Awubabonanga yini laba abaphindisele isibusiso sika Allah ngokungakholwa bafaka isizwe sabo emzini wembubhiso.

EJahanamu abayongena kuyo, okuyindawo embi impela.

Baqokele u Allah izimbangi ukuze badukise abanye endleleni yaKhe. Yithi: “Nethezekani [okwamanje], ngokuba impela uMlilo yilapho eniyophelela khona”.

Tshela kuzigqila zaMi lezi ezikholwayo ukuba zenze iswala futhi zinikele ngalokho esiziphe kona, ngasese nasesidlangalaleni. Ngaphambi kokuba kufike uSuku lapho okuyobe kungekho khona uhwebo noma ubungani.

U Allah nguYena lona owadala amazulu nomhlaba wehlisa namanzi phezulu, akhiqize ngawo izithelo eziyisondlo kini. Wanijubela umkhumbi ukuba unithwale olwandle ngomyalelo waKhe, waphinda wanijubela imifula.

Futhi wanijubela ilanga nenyanga ngokungaphezi. Wanijubela ubusuku nemini.

Futhi wanipha kukho konke enimcele kona. Uma ningabala izibusiso zika Allah anisoze naziqeda. Nebala umuntu akanabulungiswa akabongi.

Khumbula mhla u Ibhirahimu ethi: “Nkosi yami, yenza lomuzi ube ngophephile, bese uqhelisa mina nozalo lwami ekutheni sikhonze izithixo”.

Nkosi yami, impela [izithixo] zidukise inqwaba yabantu. Lowoke oyolandela mina uyobe ukanye nami kuthi lowo ongangilaleli – impela Wena Ungothethelelayo Onesihawu.

Nkosi yethu, ngakhele uzalo lwami ehlanzeni elingenazitshalo, eMzini waKho Ohloniphekile – Nkosi yethu – ukuze benze iswala. Ngakhoke yenza izinhliziyo zesintu zilangazelele ngakubo ubondle nangezithelo hleze babe ngababongayo.

Nkosi yethu, ngempela Wena wazi lokho esikufihlayo nalokho esibeka obala. Futhi akukho lutho okungakucashela emhlabeni nasezulwini.

Udumo lungoluka Allah, lona owangipha ngigugile u Isima’ili no Isihaki, impela iNkosi yami Ingeyizwayo imikhuleko.

Nkosi yami, ngenze ngibe ngowenza iswala kanye nozalo lwami. Nkosi yethu yamukela umkhuleko.

Nkosi yethu, ngithethelele mina nabazali bami kanye nabakholwayo ngoSuku lokwahlulelwa.

Ungacabangi ukuthi u Allah akakunakile lokho okwenziwa ngaba ngenabulungiswa; empeleni u Allah ubadondela uSuku lapho kuyohlahla kulo amehlo.

Bayosheshisa amakhanda ebheke phezulu lokhu behlahle amehlo, izinhliziyo zabo belu zingamagobongo [zingaqondi lutho].

Xwayisa isintu ngosuku lapho beyofikelwa isijeziso, bese labo abaphambukile bathi: “Nkosi yethu, siphe nje isikhathi esincane ukuze samukele isimemo saKho silandele neZithunywa”. [Kuyothiwa kubo]: “Anizange yini nifunge phambilini ukuthi anisoze nasuswa [emhlabeni niye kwelizayo] na?”.

Futhi benihlala ezindaweni zalabo ababenza okubi, kwanicacela ukuthi senzani kubo saphinde sanenzela izibonelo.

Nabo bakha uzungu lwabo kepha u Allah wayelazi uzungu lwabo. Futhi uzungu lwabo alusoze lwagudluza ngisho izintaba.

Ngakhoke ungacabangi ukuthi u Allah uyophula isithembiso saKhe kuZithunywa zaKhe. Impela u Allah unguSomandla Oziphindiselelayo.

NgoSuku lapho umhlaba uyoguqulwa ungasabi umhlaba kanjalo namazulu. Bese [bonke] bame ngaphambi kuka Allah Oyedwa Ongumlawuli wezinto zonke.

Ngalolosuku uyobona izigilamkhuba ziboshwe [izandla nezinyawo emqaleni] ngamasongo ensimbi.

Izembatho zabo zenziwe ngetiyela nobuso babo buyohaqwa uMlilo.

[Konke lokhu] Ukuze u Allah azuzise wonke umuntu ngemisebenzi yakhe. Nebala u Allah wehlulela ngokushesha.

Lona [iKurani] umlayezo obhekiswe kusintu ukuze baxwayiswe ngawo nokuthi bazi ukuthi nguYena [u Allah] kuphela vo okumele akhonzwe nokuthi labo abakhaliphile bathole isifundo.

Alif Lam Ra, lena imibiko yeNcwadi [ezandulelayo] neKurani ecacile.

Labo abangakholwa bayofisa ukuba babengamaMusilimu.

Bayeke nje badle bazijabulise beyengwa izifiso ngokuba kungekudala bayokwazi.

Zonke izindawo esazibhubhisa zazinesikhathi esilotshiwe esaziwayo.

[Phela] asikho isizwe engasihambela phambili isikhathi saso esibekiwe [sokuphila] noma sisiphuthe.

Futhi bathi: “Wena lona owembulelwe Isikhumbuzo [iKurani], impela uyahlanya”.

Silethele phela izingelosi uma ngempela uqinisile.

Izingelosi siziletha kuphela ngeqiniso futhi abayikunikwa ithuba.

Nembala, yithina esambulela Isikhumbuzo [iKurani] futhi yithina esiyoyivikela.

Sathumela [iZithunywa] ngaphambi kwakho [Muhamadi] ezizweni zasendulo.

Kwakuthi njalo lapho kufika iSithunywa kubo benze ngaso inhlekisa.

Sizokufaka [ukungakholwa] kanjaloke ezinhlizweni zezigilamkhuba.

Abayikholwa [iKurani] nakuba sesandlula isibonelo salabo basendulo.

Noma singabavulela umnyango phezulu ezulwini bakhone njalo ukunyuka ngawo;

Bayothi: “Impela amehlo ethu adakwe okuthile, empeleni siloyiwe”.

Nembala sibeke imizila ezulwini sabe sesilihlobisela labo ababukayo [ngezinkanyezi].

Salivikela kuwo wonke uShayitani oqalekisiwe.

Ngaphandleke kwalowo ozama ukulalela kepha alandelwe ilangabi elikhanyayo.

Nomhlaba sawendlala safaka kuwo izikhonkwane [izintaba], samilisa kuwo yonke into ekalekayo [inani layo].

Sanifakela kuwo isondlo senu nina kanye nalabo abangondliwa yini.

Futhi ayikho into esingayigcinanga kithi, kepha siyehlisa ngesilinganiso esaziwayo [esibekiwe].

Futhi sithumela imimoya evundisayo bese sehlisa amanzi ezulwini esiniphuzisa wona nakuba nina ningeke nakwazi ukuwaqongelela niwagcine.

Yithina futhi esiletha impilo nokufa belu yithina esiyohlala sikhona.

Siyabazi labo asebandlula [emhlabeni] ngaphakathi kwenu nalabo abalandelayo.

Nebala iNkosi yakho iyobabuthanisa bonke, impela Yona Ikhaliphile Iyazi.

Sadala umuntu ngodongo olumnyama olunukayo.

Ngaphambilini sadala ijini ngomlilo oshisayo.

Khumbula mhla iNkosi yakho ithi ezingelosini: “Ngizodala umuntu ngobumba olomile olumnyama olunukayo”.

Kuyothi uma sengimbumbile ngaphefumulela kuye uMphefumulo wami, niyobeke nina senimkhothamela.

Zonke izingelosi zakhothama ngothi lwazo.

Ngaphandle kuka Ibilisi, benqaba ukukhothama nabakhothamayo.

Wathi [u Allah]: “We Ibilisi, yini inkinga yakho ungakhothami nje nabakhothamayo na?”

Wathi: “Angeke ngakhothamela umuntu omdale ngobumba olomile olumnyama olunukayo”.

Wathi [u Allah]: “Phuma kuso [isivande] ngokuba uqalekisiwe”.

Futhi isiqalekiso siyoba nawe kuze kufike uSuku lokwahlulela.

Wathi [u Ibilisi]: “Nkosi yami, ngiphe impilo ende kuze kufike usuku lokuvuswa”.

Wathi [u Allah]: “Nebala, usunikiwe impilo ende”.

Kuze kufike isikhathi esinqunyiwe.

Wathi [u Ibilisi]: “Nkosi yami, ngenxa yokungidukisa kwaKho, ngizobayenga emhlabeni ngibadukise bonke”.

Ngaphandle kwezigqila zaKho ezikhethekile ngaphakathi kwabo.

Wathi [u Allah]: “Lena indlela eqondile eza Kimi”

Impela izigqila zaMi awuzukuba namandla phezu kwazo, ngaphandle kwalabo abakulandelayo abadukile.

Futhi nebala, iJahanamu yilapho beyophelela khona bonke.

Ineminyago eyisikhombisa, umnyango nomnyango unesabelo owabekelwe sona kubo.

Nebala labo abathobela u Allah bayongena ezivandeni nasemithonjeni.

[Kuyothiwa kubo]: “Ngenani kuyo [iJana] ngokuthula niphephile”.

Futhi siyosusa konke okuyinzondo namagqubu ezinhlizweni zabo, [bayophila njengezelamani behlezi emibhedeni bebhekene [ubuso ngobuso].

Abayikukhathala nhlobo kuzo [izivande], futhi abayikukhishwa neze kuzo.

Yazisa izigqila zaMi ukuthi Ngingothethelelayo Onesihawu.

Nokuthi isijeziso saMi isijeziso esibuhlungu.

Balandise futhi ngezihambeli zika Ibhirahimu.

Mhla zingena kuye zathi: “Ukuthula”. Wathi yena: “Nembala siyanenqena”.

Zathi: “Ungesabi ngokuba sizokuthulela izindaba ezinhle ngendodana enolwazi”.

Wathi: “Nizongilethela izindaba ezinhle nakuba sengizigugele nje, empeleni yiziphi lezindaba ezinhle enizilethile na?”

Zathi: “Sikulethele izindaba ezinhle ngeqiniso ngakhoke ungabi omunye walabo abalahla ithemba”.

Wathi: “Ubani nje ongalahla ithemba emuseni weNkosi yakhe ngaphandle kwalabo abadukile na?”

Wathi: “Yini udaba lwenu nina Zithunywa na?”

Bathi: “Thina sithunyelwe kubantu abayizigilamkhuba”.

Ngaphandle komndeni ka Luti, bona siyobahlenga bonke.

Ngaphandle komkakhe, ngokuba sinqume ukuthi uyokuba omunye abasala emuva.

Kuthe lapho iZithunywa zifika emndenini ka Luti,

Wathi: “Impela ningabantu abangaziwa”.

Zathi: “Empeleni size kuwe mayelana nalokho abakungabazayo”.

Futhi size kuwe ngeqiniso belu siqinisile.

Ngakhoke hamba nomndeni wakho ebusuku, ubalandele ngemuva kungabikho noyedwa kini obheka emuva niye lapho eniyalelwe khona.

Futhi sembulela kuye [uLuti] lolo daba, ukuthi laba bayobhujiswa bonke ngothi lwabo entathakusa.

Abantu bendawo beza bajabulile.

Wathi [uLuti]: “Nebala laba izivakashi zami ngakhoke ningangiphoxi”.

Nithobele u Allah, ningangihlazi.

Bathi: “Kadeni besingakunqabelanga yini ekuletheni abantu bezizwe na?”.

Wathi: “Nawa abadodakazi ami uma ngempela nizimisele ngokukwenza [lokhu]”.

Ngempilo yakho [Muhamadi] impela; nembala banhlanhlatha ekudukeni kwabo.

Babe sebehlaselwa umsindo ekuseni kusa.

Sathatha ingaphezulu lendawo salisa ngaphansi saletha kuyo imvula yamatshe obumba.

Impela kulokho kunezifundo kulabo abajulayo bahlaziye.

Futhi [lendawo] isendleleni eqondile [okudlulwa kuyo].

Impela kulokho kunesifundo kulabo abakholwayo.

Nesizwe samahlathi saphambuka.

Saziphindisela kubo futhi zombili [lezindawo] zisendleleni esobala.

Futhi abantu base Hijiri baziphika iZithunywa.

Sabalethela izibokaliso zeThu, kepha bona bazishaya indiva.

Babebaza izintaba bakhe izindlu bephephile.

Base behlaselwa umsindo entathakusa.

Konke lokhu ababekwenza akubasizanga ngalutho.

Futhi sadala amazulu nomhlaba nokumaphakathi ngeqiniso. Impela iSikhathi [sokwahlulela] siyofika nakanjani. Ngakhoke xolela wendlulise ngesihle.

Nembala iNkosi yakho inguMdali Owaziyo.

Futhi sikunike okuyisikhombisa [imibiko] okuphindaphindwayo kanye neKurani Enkulu.

Ngakhoke ungakulangezeleli lokho esibajabulise ngakho abanye babo [abangakholwa] futhi ungabi lusizi ngabo bese uzithoba kulabo abakholwayo.

Futhi uthi: “Nebala mina ngingumexwayisi ocacisayo”.

Njengalokhu esakwehlisela labo abahlukanisayo.

Labo ababenza iKurani izigamu.

Nakanjani siyobabuza bonke, ngiyifunge iNkosi yakho.

Ngakho konke lokhu ababekwenza.

Ngakhoke sabalalisa lokhu oyalelwe kona uziqhelelanise nabakhonzi zithixo.

Impela Thina sikwanele ekubhekaneni nalabo abenza inhlekisa.

Labo ababhangqa ezinye izikhonzwa no Allah; maduze nje bayokwazi.

Futhi siyazi ukuthi kuyakukhubaza emoyeni lokhu abakushoyo.

Ngakhoke babaza udomu lweNkosi yakho ube ngomunye wabakhothama bawe ngobuso [abenza iswala].

Ukhonze iNkosi yakho uze uyofa.

Umyalelo ka Allah uyeza, ngakhoke ningawujahi. Ungcwele futhi uPhakeme kunalokho abakubhangqayo.

Uthumela izingelosi noRuhu [uJibhirili] ngomyalelo waKhe kulowo amthandayo ezingqileni zaKhe [othi]: “Xwayisani [abantu] ukuthi akekho ofanelwe ukukhonzwa ngaphandle kwaMi, ngakhoke ngithobeleni”.

Udale amazulu nomhlaba ngeqiniso; Uphakeme kunalokho abakubhangqayo.

Udale umuntu ngesidoda, kepha sekunguye lo osengumqophisi oqavile.

Kanjalo nemfuyo wayidala. Kuyo nithola imfudumalo [ngezikhumba zazo] nizuze nokunye belu niyadla nakuyo.

Futhi kuyo nithola ubuhle lapho nizibuyisa ntambama nalapho nizikhipha ekuseni.

Futhi inithwalela imithwalo yenu iyise ezindaweni ebeniyofika kuzo kanzima. Impela iNkosi yenu Inesihe Inesihawu.

Namahhashi nezinkonkoni nezimbongolo wazidala ukuze nizigibele nokuthi nithole nobuhle kuzo. Futhi uyodala lokhu eningakwazi.

Kuku Allah ukucacisa indlela eqondile, belu kunenye egwembile. Uma u Allah ethanda anganiholela nonke endleleni eqondile.

NguYena lona owehlisa amanzi emvula; niphuza kuwo aphinde ahlumise izihlahla enidlisa kuzo imfuyo yenu.

Unikhulisela ngawo [amanzi emvula] izitshalo zama olivi namasundi nemivini nayo yonke inhlobo yezithelo. Impela kukho konke lokho kunesibonakaliso kulabo abahlaziyayo.

Wanijubela ubusuku nemini nelanga nenyanga, kanjalo nezinkanyezi zijutshiwe ngomyalelo waKhe. Impela kulokho kunezibonakaliso kulabo abaqondayo.

Waphinde wanijubela konke lokhu akudalile emhlabeni okumubala ihlukene. Impela kulokho kunesibonakaliso kulabo bantu abaxwayisekayo.

Futhi nguYena lona onijubele ulwandle ukuba nidle kulo inyama ethambile nokuthi nikhiphe kulo ubucwebe enibugqokayo. Futhi uzobona umkhumbi uhamba udabula kulo. [walijuba] futhi ukuze nizifunele ezibusisweni zaKhe hleze nibonge.

Wagxumeka izikhonkwane [izintaba] emhlabeni ukuze ungazamazami nani, kanjalo nemifula nezindlela ukuze ningaduki.

Wadala nezimpawu [zokulayela indlela emini] futhi basenzisa izinkanyezi ukuthola indlela [ebusuku].

Ingabe lowo odalayo uyefana nalowo ongadali na? Kungani ningaqondi na?

Futhi uma ningabala izibusiso zika Allah anisoze naziqeda. Impela u Allah Ungumthetheleli Onesihawu.

U Allah ukwazi konke lokho enikufihlayo nakonke lokho enikuveza obala.

Futhi laba ababakhonzayo ngaphandle kuka Allah abadali lutho kunalokho badaliwe bona uqobo.

Bafile abaphili nhlobo futhi abazi nokuthi bayovuswa nini.

Lowo okumele nimkhonze uyedwa vo. Kepha labo abangakholela kwelizayo izinhliziyo zabo ziyaphika futhi bayazigqaja.

Akungatshazwa ukuthi u Allah ukwazi konke abakufihlile nakho konke ababeka obala. Impela [u Allah] akabathandi labo abazigqajayo.

Uma kuthiwa kubo: “Yini lokhu okwembulelwe yiNkosi yenu na?” Bathi: “Izinganekwane nje!”

Bayothwala-ke imithwalo [yempambuko] yabo ngokugcwele ngoSuku lokwahlulela neyalabo abekade bebadukisa ngaphandle kolwazi.

Labo ababandulelayo nabo bakha uzungu kepha u Allah wabhidliza izinsika zesakhiwo sabo, lwabe uphala lwawela phezu kwabo. Futhi isijeziso sabafikela ngalapho ababenganake ngakhona.

Kuthi ngoSuku lokuhlulela, [u Allah] uyobahlaza bese ethi: “Ziphi lezimbangi zami lezi ebeniphambuka ngenxa yazo na?”. Laba abanikwa ulwazi bayothi: “Nebala ihlazo nesijeziso namhlanje siyokwehlela labo abangakholwa”.

Labo okuyothi mhla izingelosi zithatha imiphefumulo yabo bengabaphambukile. Bayozinikela [bathi]: “Asikaze senze lutho olubi”. Phinde! Impela u Allah uyakwazi lokho ababekwenza.

[Kuyothiwa kubo]: “Ngakhoke ngenani eJahanamu nihlale kuyo unaphakade. Yaze yayimbi indawo yabazigqajayo.

Kuyobe sekuthiwa kulabo abathobela u Allah: “Yini lena eyembulelwe yiNkosi yenu na”. Bayothi: “Okuhle”. Labo abenza okuhle lapha emhlabeni bayothola okuhle. Futhi umuzi wakwelizayo ungcono; waze wamuhle umuzi walabo abathobela u Allah.

Izivande zokuhlala abayongena kuzo, okugeleza imifula ezansi kwazo, bayothola kuzo konke abakufunayo. Ubahlomulisa kanjalo u Allah labo abamthobelayo.

Labo okuthi lapho izingelosi zithatha imiphefumulo yabo babe bemsulwa. Zithi kubo: “Ukuthula makube kini, ngenani eJana ngenxa yezenzo zenu”.

Ingabe balinde ukuba kufike kubo izingelosi noma umyalelo [wembubhiso] weNkosi yakho na? Belu labo ababandulelayo benza nabo kanjalo. Kepha u Allah akabahlukumezanga kepha babezihlukumeza bona uqobo.

Ngakhoke behlelwa imiphumela emibi yalokho ababekwenza baphinde bahaqwa yilokho ababehlekisa ngakho.

Laba abangqayo bathi: “Ukube u Allah ubefuna, thina nokhokho bethu ngabe asizange sikhonze lutho ngaphandle kwaKhe futhi ngabe asiqabelanga lutho ngaphandle kwaKhe”. Benza kanjalo nalabo ababandulelayo. Ingebe kukhona okunye iSithunywa esingakwenza ngaphandle nje kokudlulisa umlayezo ocacile na?.

Nebala kuzo zonke izizwe sathumela iSithunywa ukuba sithi: “Khonzani u Allah bese niziqhelelanisa nezikhonzwa zamanga”. Kwaba nalabo kubo u Allah abahola kepha abanye banelwa ukuduka. Ngakhoke hambani emhlabeni nibone ukuthi saba njani isiphetho sabaphika iqiniso.

Uma umnkanka ukuba baholelwe [endleni eqondile], u Allah akamholi lowo ofuna ukuduka, futhi abekho abayobasiza.

Bathatha izifungo ezinzima ngo Allah, ukuthi, u Allah akasoze abavusa abafileyo. Nakanjani! Phela yisithembiso saKhe seqiniso kepha iningi labantu alazi.

Ukuze abacacisele ngalokho ababephikisana ngakho nokuthi laba abangakholwa bazi ukuthi babenamanga.

Izwi esilishoyo uma kunento esifunayo, sivane Sithi: “Yenzeka”, bese kuyenzeka.

Futhi labo abafudukela ukuthokozisa u Allah emuva kokuba behlukunyeziwe, sizobabeka endaweni enhle emhlabeni kanti futhi umvuzo wakwelizayo mkhulu, ukube nje bebazi.

Labo ababekezalayo bethembele eNkosini yabo.

Futhi sathumela amadoda kuphela ngaphambi kwakho [Muhamadi] ebesambulela kuwo. Ngakhoke buzani labo abanolwazi uma ningazi.

Sawathumela nezibonakaliso neZincwadi. Sembulela kuwe [Muhamadi] Isikhumbuzi [iKurani] ukuze uhlalusele isintu lokho abembulelwe kona hlele bajule bacabangisise.

Ingabe labo abakha amasu amabi, bazibona bephephile yini ekutheni u Allah abagwinyise ngomhlaba noma bafikelwe isijeziso ngalapho bengazelele khona...

Noma sibahlasele lapho bematasa na? Bheka ngoba abasoze baphunyula.

Noma sibahlasele lapho besaba; impela iNkosi yabo Inobubele Inesihawu.

Ingabe abayiboni yonke into edalwe ngu Allah, amthunzi azo aya le kwesokudla nale kwesobunxele ekhothamela u Allah ngokuzithoba.

Futhi konke okusemazulwini nazo zonke izilwane ezisemhlabeni kanye nezingelosi ngokungazigqaji.

Zesaba iNkosi yabo engaphezu kwabo futhi zenza njengoba ziyalelwe.

U Allah uthi: “Ningabi nezikhonzwa ezimbili [ngesikhathi esisodwa], ngokuba okumele nimkhonze uyedwa vo, ngakhoke sabani Mina kuphela”.

Futhi konke okusemazulwini nasemhlabeni kungokwaKhe nakho konke ukuthotshelwa ngokugcwele kungokwaKhe. Ingabe ukhona omunye enimthobelayo ngaphandle kuka Allah na?

Zonke izibusiso eninazo zivela ku Allah, futhi uma nehlelwa umshophi nizilahla kuYe.

Kepha kuthi uma esenisusele umshophi, abanye benu babhangqa iNkosi yabo nezikhonzwa.

Bese bengesakubongi lokho esibaphe kona. Ngakhoke nethezekani, kepha nizokwazi maduze nje.

Futhi babela lokho abangakwazi isabelo kulokho esibabele kona. Ngimfunge u Allah, niyobuzwa ngakhu enikuqambayo.

Baqokela u Allah amadodakazi – makangcwelise! Kepha bona baziqokela abakuthandayo.

Omunye wabo uma ehalaliselwa ngendodakazi, ubuso bakhe buyagqungqa bube mnyama bhuqe wadangala.

Useyozifihla ebantwini ngenxa yento embi aziswe ngayo. Ayigcine, angene ehlazweni noma ayishutheke emhlabathini [ayingcwabe iphila]. Yaze yayimbi indlela abahlulela ngayo.

Labo abangakholelwa oSukwini lokuGcina banomzekelo omubi kepha u Allah unomzekelo ophakeme futhi uNgusomandla Okhaliphile.

Uma u Allah engajezisa abantu ngenxa yezimpambuko zabo, akayikushiya sidalwa phezu kwawo [komhlaba]. Kepha ubadondisela isikhathi esibekiwe; uma sesifikile isikhathi sabo, abayikusiphutha noma basihambele phambili nangomzuzu [abayikuphunyuka].

Baqokela u Allah lokho bona abangakuthandi baphinde bakhulume amanga ngemilomo yabo ukuthi bayoba nesiphetho esihle. Impela, nakanjani bayothola uMlilo futhi bayoshiywa kanjalo.

Ngifunga ngo Allah, nebala sathumela [iZithunywa] ezizweni ezikwandulelayo; kepha uShayitani wabayenga ngezenzo zabo [ezimbi]. Ungumesekeli wabo namhlanje [lapha emhlabeni], kepha bayothola isijeziso esibuhlungu kwelizayo.

Futhi siyembulele kuwe [Muhamadi] iNcwadi [iKurani] ukuze ubahlalusele lokho abaphikisana ngakho, nokuthi ibe umhlahlandlela nomusa kubantu abakholwayo.

U Allah wehlisa amanzi emvula, avuselele ngawo umhlaba emuva kokuba ubusufile [womile]. Impela kulokho kunesibonakaliso kubantu abalalelayo.

Nasemfuyweni ninesifundo imbala. Siniphuzisa kulokho okuphuma eziswini zayo phakathi kobulongwe negazi, ubisi olumsulwa olwehla esiphundu kwabaluphuzayo.

Nasethelweni zesundu nomvini, nikhanda okumponjwana nokudla okumnandi. Impela kulokho kunesibonakaliso kubantu abaqondayo.

Futhi iNkosi yakho yayalela izinyosi yathi: “Yakhani izindlu ezintabeni nasezihlahleni nasezakhiweni eziphakeme [abantu] abazakhayo”.

Bese nidla kuzo zonke izithelo, nihambe ngezindlela zeNkosi yenu enijutshelwe zona. Eziswini zazo [izinyosi] kuphuma isiphuzo esimibala ihlukahlukene, siqukethe ikhambi elilapha isintu. Impela kulokho kunesibonkaliso kubantu abahlaziyayo.

Futhi u Allah unidalile, kuphinde kube nguYena othatha imiphefulo yenu. Kunalabo kini ababuyiselwa emuva eminyakeni emibi [yokuguga], aze aphenduke ongazi lutho nhlobo emuva kokuba ebenolwazi. Nebala u Allah Umgowaziyo Onamandla.

Futhi u Allah ubusise abanye ukudlula abanye ngesabelo[1]. Kantike labo ababusisiwe abasoze banika isabelo sabo kuzigqila zabo ukuze balingane ngokwesabelo[2]. Ingabeke baphika isibusiso sika Allah na? ——— [1] Ngalokho kunezinjinga nazichaka, nabaholi nabaholwa, njalonjalo. [2] Ngakhoke kuyamangaza ukuthi labo ababhangqa u Allah nezimbangi abanayo inkinga yokwenza u Allah umlingani wezigqila zaKhe. Ngokwenza ukuthi indalo ka Allah inamandla okulawula indalo nokwenzeka kuyo, nakuba indalo yonke ingeka Allah. Kepha bona kulokho okungokwabo abafune mlingani noma imbangi. Isimanga impela!

Nguyena u Allah onidalele abalingani benu enihlobo lunye [abantu]. Wanidalela kubalingani benu izingane nabazukulu waphinde wanondla ngalokho okumsulwa. Ngakhoke; ingabe bakholelwa kumsangano baphike izibusiso zika Allah na?

Futhi bakhonza ngaphandle kuka Allah lokho okungena sondlo sabo emazulwini nasemhlabeni sanhlobo bebe bengasoze.

Ngakhoke ningalokhu nifanisa u Allah nemifanekiso. Impela u Allah uyazi kepha nina anazi.

U Allah wenze umzekelo wesigqila esiphethwe esingenamandla okwenza utho, nalowo esimabele isabelo esihle [ocebile] impela esivela kithi, ukwazi ukuthitha kuso [isabelo] ngasese nasesidlangalaleni. Ingabe bayafana na? Udomu lonke lungoluka Allah, kepha iningi labo alazi.

U Allah uphinde wenza umzekelo wamadoda amabili, enye yawo iyisimumu ayikwazi kwenza utho iwumthwalo kumnakekeli wayo, noma yikuphi la eyithumela khona ayibuyi nalutho okuhle. Ingabe iyafana yini naleyo eyalela ngobulungiswa futhi esendleleni eqondile na?

Futhi konke okungabonwayo emazulwini nasemhlabeni kungo kuka Allah. Kantike udaba lokufika kweSikhathi [sokwahlulela] lunjengokucwayiza kweso noma luseduze kunalokho. Nebala u Allah ukwazi ukwenza noma yini.

U Allah unikhiphe eziswini zonyoko ningazi lutho, wanipha ukuzwa nokubona kanye nezinhliziyo, ukuze nibonge.

Ingabe abaziboni yini izinyoni zintanta emkhathini na? Phela akekho ozibambile ngaphandle kuka Allah. Impela kulokho kunezibonakaliso [ubufakazi] kubantu abakholwayo.

Futhi u Allah unenzele indawo yokuhlala ezindlini zenu, waphinde wanikhandela izindlu ngezikhumba zezilwane ezilula ukuzithwala lapho nihamba nalapho nizinza. Kwase kuthi ngovolo nangoboya bekameli nembuzi, wanidalela impahla yasendlini nentokomalo kuze kufike isikhathi [esibekiwe].

U Allah uphinde wanenzela imithunzi kulokho akudalile wanenzela imigede ezintabeni kanye nezimpahla zokugqoka ezinivikela ekushiseni [kwelanga] nezinivikela ezimpini zenu. Uziphelelise kanjalo izibusiso zaKhe kini ukuze nibe ngamaMusilimu [nizikele].

Kantike uma bekushaya indiva, umsebenzi wakho ukudlulisa umlayezo ocacile nje kuphela.

Bayazazi izibusiso zika Allah bese beziphika, futhi iningi labo alikholwa.

Futhi mhla zivusa kuzo zonke izizwe ufakazi [iSithunywa sabo]; labo abangakholwa abayikunikwa imvumo [yokuzincengela] futhi abayikunikwa shwele.

Kuyothi lapho labo abaphambukile bebona isijeziso, angeke baxegiselwe sona futhi abayikudondiswa.

Kuyothi lapho labo abakhonza izikhonzwa bebona izikhonzwa zabo bathi: “Nkosi yethu, yizo kanye lezi izikhonzwa ebesizikhonza ngaphandle kwaKho”. Bayophendulwa ngelithi: “Impela ninamanga”.

Ngalolosuku bayozinikela ku Allah, baphinde balahlekelwe yilokho ababeqamba ngakho amanga [izikhonzwa].

Labo abangakholwa baphinde babe yizihibe [kubanye] endleleni ka Allah, siyobandisela isijeziso phezu kwesijeziso ngenxa yalokho ababekona.

Futhi mhla simisa kuzo zonke izizwe ufakazi ovela kubo oyokaza ngabo. Nawe siyokuletha njengofakazi oyofakaza ngalaba. Futhi sikwembulele iNcwadi ecacisa zonke izinto ephinde ibe wumhlahlandlela nomusa nendaba enhle kulabo abangamaMusilimu.

Nebala, u Allah uyalela ngobulungiswa nesihle nokupha izihlobo bese enqabela amanyala nempambuko nokuhlukumeza. Uyaneluleka kuze nilalele.

Nigcine isivumelwano sika Allah lapho nenze isivumelwano, ningaphuli izifungo emuva kokuba beseziboshiwe nibe futhi kade nenze isiqiniseko ngo Allah. Impela u Allah ukwazi konke enikwenzayo.

Ningabi njengalowo wesimame owakhuthulula umphotho wakhe wawuhlakaza emuva kokuba ewuphothe waqina. Ngokuba nenze izifungo indlela yokuqilana phakathi kwenu ngenxa yokuthi esinye isizwe sande kunesinye. U Allah uyanivivinya nje kuphela ngakho [ukugcina izivumelwano]. Futhi uyocacisela ngoSuku lokwahlulela konke lokhu eniphikisana ngakho.

Ukube u Allah ubefuna, ubeyonenza nibe sokholweni olulodwa; kepha udukisa amfunayo ahole amfunayo. Futhi nakanjani niyobuzwa ngakho konke enikwenzayo.

Ningenzi izifungo zenu indlela yokuqilana phakathi kwenu, funa niphambuke emuva kokuba beniqotho, nithole isijeziso [emhlabeni] ngenxa yokuba nibe yizihibe endleni ka Allah. Bese niyothola isijeziso esinzima [kwelizayo].

Ningathengisi isivumelwano sika Allah ngenani eliyize. Impela lokhu okuku Allah yikona okungcono kini ukube nje benazi.

Lokhu eninakho kuyophela [kushabalale], kepha lokhu okuku Allah kuyohlala kukhona [unaphakade]. Futhi siyobapha umvuzo wabo ophelele labo ababekezelayo ngalokho okuhle abakwenzayo.

Lowo wesilisa nalowo wesifazane owenza okuhle ebe engokholwayo sizomphilisa impilo enhle [emhlabeni], siphinde simuphe umvuzo wakhe ophelele ngalokho okuhle akwenzayo.

Uma ufunda iKurani, cela ukuvikeleka ngo Allah kuShayitani oqalekisiwe.

Impela yena [uShayitani] akanawo umthelela kulabo abakholwayo abathembela eNkosini yabo.

Umathelela wakhe ukulabo abamulandelayo abamubhangqayo [no Allah].

Uma sifaka isambulo endaweni yesinye isambulo, u Allah ukwazi kahle lokho akwebulele. Bathi: “Wena uzuqambele”. Kepha iningi labo alazi.

Yithi: “ilethwa nguRuhu- ul-kudusi [uJibhirili] ivela eNkosini yakho ngeqiniso, ukuze aqinise labo abakholwayo nokuthi ibe umhlahlandlela nezindaba ezinhle kulabo abangamaMusilimu”.

Futhi siyazi ukuthi bathi: “Uyifundiswa [iKurani] umuntu]”. Ulwimi lwalona abamusolayo olwezizwe, kepha lolu ulwimi lwesi-Arabhu oluvuthiwe.

Nebala, laba abangakholwa yimibiko ka Allah, u Allah angeke abahole futhi bayothola isijeziso esibuhlungu.

Labo abangakholwa yimibiko ka Allah yibona kuphela abaqamba amanga. Yobona kanye labo abaqambi manga.

Lowo ophika u Allah emuva kokuba ekholelwe kuYe, nenhliziyo yakhe yakuthakasela ukungakholwa, bayokwehlelwa intukuthelo ka Allah baphinde bathole isijeziso esinzima. Ngaphandle kwalowo ophoqiwe [ukuba angakholwa] kepha inhliziyo yakhe igcwele ukholo.

Lokho kungenxa yokuthi bathande impilo yasemhlabeni kuneyakwelizayo nokuthi futhi u Allah akabaholi abantu abangakholwa.

Yibonake labo u Allah avale izinhliziyo zabo nokuzwa kwabo nokubona kwabo. Futhi yibo kanye labo abangenandaba.

Kuyiqiniso ukuthi impela kwelizayo bayoba ngabalahlekelwe.

Futhi iNkosi yakho kulabo abafuduka emuva kokuba behlukunyeziwe base belwa [endleleni ka Allah] babekezela – impela iNkosi yakho kubo – emuva kwalokho Ingumthetheleli Onesihawu.

Ngosuku lapho wonke umuntu uyofika ezama ukuzikhulumela [ngezenzo zakhe] bese wonke umuntu uyothola umvuzo ophelele wezenzo zakhe, futhi angeke bengenzelwa ubulungiswa.

U Allah wenze umzekelo [wabantu] bomuzi owabe uphephile unokuthula, ukudla kufika kuwo ubuthaphuthaphu kuvela ndawo zonke. Kepha abazange bazibonge izibusiso zika Allah; wabeke u Allah esebahaqa ngendlala nokwesaba ngenxa yalokho ababekwenza.

Safika impela iSithunywa kubo kepha basiphikisa. Ngakhoke behlelwa isijeziso bengabaphambukile.

Dlanini okuvunyelwe okumsula kulokho u Allah anabele kona bese nibonga izibusiso zika Allah uma kunguYena [ngempela] enimkhonzayo.

Okuyikona aninqabele kona, ingcuba negazi nenyama yengulube nalokho okuhlatshelwe okunye ngaphandle kuka Allah. Kepha lowo ophoqelekile ongaphuli umthetho ngabomu noma eqise; impela u Allah Ungumthetheleli Onesihawu.

Ningawasho amanga ashiwo imilomo yenu athi: “Lokhu kuvunyelwe [kube kunqatshelwe], lokhu kunqatshelwe [kube kuvunyelwe]”, niqambela u Allah amanga. Nebala labo abaqambela u Allah amanga abasoze baphumelela.

Ukunethezeka nje kwesikhashana [emhlabeni], kepha kwelizayo bayothola isijeziso esibuhlungu.

Nakulaba abangamaJuda sabanqabela lokho esikulandisele kona phambilini. Futhi akusiyithi esingenzanga ubulungiswa kubo, kepha yibona abangenzanga ubulungiswa kubo uqobo.

Futhi iNkosi yakho kulabo abenza okubi bengazi bese bezisola [bacele intethelelo] emuva kwalokho baphinde balungise [amaphutha] – impela iNkosi yakho kubo – emuva kwalokho Ingumthetheleli Onesihawu.

Nebala u Ibhirahimu wabe engumholi ozithobile ku Allah encike eBumnyeni baKhe futhi wayengeyena omunye wababhangqa izikhonzwa.

Ezibonga nezibusiso zaKhe [u Allah]. Wamqoka wamholela endleleni eqondile.

Samupha okuhle emhlabeni, kanti nakwelizayo ungomunye wabaqotho.

Sabe sembulela kuwe ukuthi: “Landela inkolo ka Ibhirahimu encike ebunyeni buka Allah, futhi wayengeyena omunye wababhangqa izikhonzwa.

uMgqibelo [iSabatha] wabekelwa kuphela labo ababephikisana ngawo. Futhi impela iNkosi yakho iyokwehlulela phakathi kwabo ngalokho abaphikisana ngakho ngoSuku lokwahlulela.

Memela endleleni yeNkosi yakho [i Isilamu] ngokukhalipha nangokweluleka okuhle futhi ubonisane nabo ngendlela enhle. Nebala iNkosi yakho iYona ebazi kahle labo abadukelwe yindlela yaKhe futhi iYona futhi ebazi kahle labo abaholiwe.

Uma nijezisa, jezisani nani ngokulingene lokho enonwe ngakho. Kepha uma nibekezela, yikona okungcono kulabo ababekezelayo.

Bekezela, futhi ukubekezela kwakho kuvela ku Allah. Ungazikhathazi ngabo futhi ungaphatheki kabi ngamasu abawakhayo.

Ngokuba impela u Allah unalabo abamthobelayo nalabo abenza okuhle.