Zuluca Meal — Âdil Ca'fer — İsra' 17:1 – Neml 27:93

Makangcweliswe lona owathatha ngokuhlwa isigqila saKhe, esisusa eMasijidi Haramu esisa eMasijidi Akisa lena esabusisa indawo eyakhele, ukuze simbonise ezinye zezibonakaliso zeThu. Impela Yena [u Allah] Ungozwayo Obonayo.

Sanika uMusa iNcwadi [iTora] sayenza umhlahlandlela wesizwe sakwa Isirayeli, [eyayiqukethe ukuthi]: “Ningabi nomunye enithembela kuye ngaphandle kwaMi”

Nina esanithwala kanye noNuhu. Impela wabe eyisigqila esasinokubonga.

Sasinqumela isizwe sakwa Isirayeli eNcwadini ukuthi: “Nizokona kabili emhlabeni bese nizigqaja kakhulu”.

Kuyothi lapho uma sekufike isikhathi sokona kokuqala kulokhu okubili, siyothumela kini izigqila zeThu ezinamandla kakhulu zizulazula phakathi kwemizi [zibhubhisa]. Isithembiso esiyokwenzeka.

Siyobeke sesinipha ithuba lokuphindisela izinduku kubo siphinde siniphe umcebo nezingane sinenze nibe baningi.

Uma nenza okuhle, nizenzela nina uqobo nakanjalo uma nenza okubi. Kuyothi lapho sekufika isikathi sokwesibili, bazonihlaza niswabe ebusweni benu baphinde bangene eMasijidi [Akisa] njengoba bangena kwasekuqaleni futhi bayobhubhisa konke okuyokuba ngaphansi kwabo.

Hleze iNkosi yenu inihawukele. Kepha uma nibuyela [empembukweni] naThi sizobuya [sinijezise]. Futhi senze iJahanamu yaba ijele lalabo abangakholwa.

Impela leKurani iholela kulokho okuqotho iphinde yethule izindaba ezinhle kulabo abakholwayo abenza okuhle, ukuthi bayothola umvuzo omkhulu.

Nokuthi labo abangakholwa kwelizayo bona sibalungiselele isijeziso esibuhlungu.

Futhi umuntu ukhulekela okubi kanjengoba ekhulekela okuhle. Umuntu belu uhlala ejahile.

Futhi senza ubusuku nemini izibonakaliso ezimbili. Senza isibonakaliso sobusuku saba mnyama kwathi esemini sasenza sakhanya ukuze nikwazi ukuthungatha izibusiso ezivela eNkosini yenu nokuthi nikwazi ukwazi inani leminyaka nokubala. Futhi yonke into siyicacisisile.

Wonke umuntu simhlanise nemisebenzi yakhe [emihle nemibi] emqaleni wakhe, kuyothi ngoSuku lokwahlulela simkhiphele incwadi [eqophe yonke into ayenzile] ayoyithola ivuliwe indlaliwe.

Funda incwadi yakho! Namhlanje, wena uqobo wanele njengomehluleli kuwe.

Lowo ohamba endleleni eqondile uzisiza yena uqobo, nalowo owenza impambuko uzilaya yena uqobo. Futhi akekho oyothwala umthwalo womunye. Futhi asikaze sijezise singakathumeli iSithunywa.

Uma sifuna ukubhubhisa [isizwe] bendawo ethize, siyalela izikhulu zakhona [ukuba zizinikele ku Allah], kepha zona lapho ziphule imithetho; ngakhoke befanelwa isinqumo [sembumbiso], bese siyababhubhisa bashabalale.

Ziningi izizwe esazibhubhisa ezilama uNuhu. Futhi iNkosi yakho yanele ukwazi nokubona izimpambuko zezigqila zaYo.

Lowo olangezelela impilo yalomhlaba, sizomnika kuyo lokho esikuthandayo kulowo esimthandayo bese simenza angene eJahanamu egxekiwe eqalekisiwe.

Kepha lowo olangezelela impilo yakwelizayo aphinde azikhandle ekuyizuzeni ebe eyiMusilimu; yibona kanye labo ukuzkhandla kwabo okuyobongwa.

Bonke sibayabapha kuzipho zika Allah, laba [bempilo yomhlaba] nalaba [bempilo yakwelizayo] futhi izipho zeNkosi yakho azinqatshelwe.

Bheka ukuthi sibaphe kanjani abanye ukudlula abanye [emhlabeni]. Kepha kwelizayo kunezigaba ezinkulu kanjalo nezibusiso.

Ungabhangqi u Allah nesinye isikhonzwa, funa ube ogxekwayo nodixilelwe.

Futhi iNkosi yakho yanquma ukuba ningakhonzi lutho ngaphandle kwaYo bese niphatha kahle abazali. Uma omunye wabo egugela kuwe noma bobabili, ungalinge uthi “nxa” kubo futhi ungabathethisi, ukhulume nabo ngesihle.

Uzithobe kubo bobabili ngokubahawukela bese uthi: “Nkosi yami yiba nomusa kubo bobabili njengoba bangikhulisa ngisemncane”.

iNkosi yenu ikwazi kahle okungaphakathi kini. Uma niqotho, impela Yona iyabathethelela labo abazinikelayo.

Nikeza isihlobo ilungelo laso nompofu nesihambi kepha ungaxhaphazi.

Impela labo abaxhaphazayo bangabafowabo bakaShayitani, bheka ngoba uShayitani akakholelwa eNkosini yakhe.

Uma wehluleka ukubanika ngoba nawe ulindele umusa ka Allah owulangezelele; bazise ngamazwi amnene.

Ungabopheli isandla sakho emqaleni [ukubophela inja nogodo] futhi ungasindlali sonke funa uphenduke ogxekwayo noswele.

Impela iNkosi yakho yabela emfunayo isondlo ngenala noma imswinye. Nebala Yona ngezigqila zaYo Inolwazi Iyabona.

Ningabulali izingane zenu ngenxa yokwesaba ubuphuya; yithina esizozondla kanye nani futhi; impela ukuzibulala kuyimpambuko enkulu.

Futhi ningasondeli ekuphingeni; impela kungamanyala nendlela embi.

Futhi ningawukhiphi umphefumulo u Allah awenqabele ngokungemthetho. Lowo obulewe ngokungenabulungiswa, sinikeze umnakekeli wakhe amandla, ngakhoke makandluli imikhawulo ekubulaleni, impela usekelwe [ngokomthetho].

Ningasondeli kumcebo wentandane ngaphandle uma kungendlela ekahle, kuze kube bayakhula. Futhi nigcine isivumelwano. Ngokuba impela isivumelwano kuyobuzwa ngaso.

Nigcwalise isikali lapho nikala futhi nikale isisindo ngesikali esingenazinkinga. Lokho yikona okungcono nokunesiphetho esihle.

Futhi ungakhulumi lokho ongenalwazi ngakho. Nebala, ukuzwa nokubona nenhliziyo, konke lokho kuyobuzwa ngakho.

Ungahambi emhlabeni ngokuzigqaja, impela awusoze wawuqhekeza umhlaba nomake ulingane nezintaba ngobude.

Konke lokho [okubaluliwe ngaphezulu] ububi bakho abuthandeki eNkosini yakho.

Lokho okunye kobuhlakani iNkosi yakho ebembulele kuwe [Muhamadi]. Ungabhangqi u Allah nezinye izikhonzwa ngokuba uyotshingwa eJahanamu ugxekiwe uqalekisiwe.

Ingabe u Allah uniqokele amadodana kepha Yena waziqokela amadodakazi na? Impela nikhulume amagama anzima.

Futhi kuleKurani sicacisile ukuze balalele, kepha lokho kubabalekisa kakhulu.

Yithi: “Ukube [u Allah] bekanezinye izikhonzwa njengoba nisho, ngabe [kade] zafuna indlela yokufinyelela kuMnikazi weSihlalo”.

Makangcweliswe futhi uphakeme kakhulu kunalokho abakushoyo.

Ubatshazwa ngamazulu ayisikhombisa nomhlaba nakho konke okuqukethwe yiwo. Futhi ayikho into engalubabazi udumo lwakhe, kepha nina anikuqondi ukubabazakwazo. Impela Yena Unobubele Ungumthetheleli.

Uma ufunda iKurani sibeka isisithezo esimbozayo phakathi kwakho nalabo abangakholelwa kwelizayo.

Simboze izinhliziyo zabo ukuze bangaqondi nasezindlebeni zabo kunobuthulu. Futhi uma ubalula iNkosi yakho Yona yodwa kwiKurani, bashaya bachite bebaleka.

Thina sikwazi kahle lokho abakulalelayo lapho bekulalele nezinkulumo zabo zangasese, lapho abangenabulungiswa bethi: “Impela nilandela indoda eloyiwe”.

Bheka ukuthi bakufanisa nani, badukile futhi abasoze bayithola indlela eqondile.

Futhi bathi: “Ingabe impela lapho sesingamathambo nezicucu siphinde sivuswe kabusha na?!

Yithi: “Yibani amatshe noma insimbi”.

Noma iyiphi indalo eniyibona inkulu ezinqondweni zenu. Bayothi: “Ubani oyosivusa na?” Yithi: “Lona owanidala kwasekuqaleni ningelutho”. Bayokunikinela amakhanda abo bese bathi: “Kuyokwenzeka nini?”. Yithi: “Hleze sekuseduze”.

Ngosuku lapho eyonibiza, niyophendula ngokumdumisa futhi niyocabanga ukuthi nahlala isikhashana nje [emhlabeni].

Yithi kuzigqila zaMi lezi ezikhuluma amagama amagama amahle: “uShayitani utshala ubutha phakathi kwabo; impela uShayitani uyohlala eyisitha esisobala kumuntu”.

iNkosi yenu inazi kahle. Uma ithanda inganihawukela noma uma ithanda inganijezisa. Futhi asikuthumelanga kubo ukuthi ube umnakekeli.

Futhi iNkosi yakho ibazi kahle bonke abasemazulwini nasemhlabeni. Sapha ezinye iZithunywa ukudlula ezinye; sanika uDawudi iZabhuri.

Yithi: “Bizani labo enibaqokile ngaphandle kwaKhe [u Allah]; abanawo amandla okususa ubunzima kini noma babuqhelise”.

Labo ababakhonzayo, nabo bafuna indlela engabasondeza eNkosini yabo futhi balangezelela umusa waYo futhi basa nesijeziso saYo. Impela isijeziso seNkosi yakho siyasabeka.

Futhi ayikho indawo [yabangakholwa] esingeke sayibhubhisa lingakafiki uSuku lokwahlulela noma sijzise kanzima. Lokho kulotshiwe eNcwadini [uQwembe]

Akukho okusivimbile ekuletheni izibonakaliso ngaphandle nje kokuthi laba basendulo baziphike. Saninika isizwe sakwaTamudi ikameli njengesibonakaliso kepha balihlukumeza. Futhi siletha izibonakaliso ukuthusa [ngazo izigqila].

Khumbula [we Muhamadi] mhla sithi kuwe: “Impela iNkosi yakho ibengamele bonke abantu”. Futhi senza iphupho leli esakubonisa lona laba isivivinyo kusintu kanjalo nesihlahla esiqalekisiwe esibalulwe kwiKurani. Siyabathusa, kepha akubandiseli lutho ngaphandle nje bagxile ekuphuleni umthetho kakhulu.

Khumbula Sithi kuzingelosi: “Khothamelani u Adamu, zabe seziyakhothama ngaphandle kuka Ibhilisi, [yena] wathi: Ngingamkhothamela kanjani lona omdale ngebumba na?”

Wathi [belu u Ibhilisi]: “Uyambona lona omqokile kunami, uma ungipha impilo ende kuze kufike uSuku lokwahlulela, nebala ngiyodukisa uzalo lwakhe ngaphandlenje kwedlanzana.

Wathi [ u Allah]: “Hamba, lowo kubo oyokulandela, impela iJahanamu iyoba umvuzo wabo, umvuzo owenele ophelele.

Yenga ozokhona ukumyenga ngezwi lakho futhi ubavuthele [ibutho] lakho eligibele izinjomane nelihamba ngezinyawo, uzibandakanye nabo kumcebo wabo nezingane zabo uphinde ubenzele izithembiso. Kepha uShayitani akabathembisi lutho ngaphandle kwenkohliso.

Impela izigqila zaMi, awusoze waba nomthelela kuzo. Futhi iNkosi yakho yanele njengoMnakekeli.

Iyona iNKosi yenu lena enihambisela umkhumbi olwandle ukuze nizithungathele ebusisweni zaKhe. Impela Yena Unesihawu kini.

Uma nehlelwa ubunzima olwandle, bayalahleka labo enibakhonzayo ngaphandle kwaKhe [u Allah]. Kuthi lapho esenihlengele ogwini, nivane nijike. Vele umuntu akabongi.

Ingabe nizibona niphephile yini ekutheni anigqibe khona eceleni nogu noma anithumele ngesiphepho, kungekhoke nozoninakekela anihlenge.

Noma nizibona niphephile ekutheni anibuyisele futhi phakathi bese enithumela ngezivunguvungu zomoya anicwilise ngenxa yokungabongi kwenu. Futhi kube kungekho oyosilandelela ngani ngenxa yalokho.

Nebala sibaqokile abantwana baka Adamu [isintu sonkana] sabathwala ezweni nasolwandle sabondla futhi ngalokho okumsulwa [okuhlanzekile] saphinde sababusisa kakhulu ukudlula okuningi esikudalile.

Khumbula usuku lapho siyobiza khona bonke abantu nomholi wabo. Lowoke oyonikwa iNcwadi yakhe kwesokudla; yilabo abayoyifunda iNcwadi yabo futhi akukho nokunca okungebona ubulungiswa okuyokwenziwa kubo.

Futhi lowo obekade engaboni lapha emhlabeni, kanjalo nakwelizayo uyobe eyimpumputhe eduke kakhulu.

Bacishe bakulinga impela ngalokho esikwembulele kuwe [Muhamadi], ukuze usiqambele amanga ngokunye. Ukube kwabanjalo, bebezokwenza umngani wabo omkhulu.

Ukube asizange sikuqinise, ucishe walingeka kubo kancane nje.

Ukube kwabanjalo, besizokuzwisa impilo enzima nokufa okunzima, futhi kube kungekho oyokusiza abhekane nathi.

Bacishe bakucika emhlabeni ukuze bakuxoshe kuwo [eMakha]; uma kunjalo, bazohlala nje isikhashana emuva kwakho [bese bejeziswa].

Lelo usiko lwalabo esabathumela kuZithunywa zeThu ngaphambili kwakho; futhi awusoze wathola nguquko osikweni lweThu.

Yenza iswala kusuka lapho liwa ilanga [emini bebade] kuze kuhlwe [iDuhuri, i-Asari, iMagiribi ne Isha] udonse lapho ufunda iKurani ngeFajari, ngokuba iKurani efundwa ngeFajari ithanyelwe [izingelosi].

Nasebusuku uvuke uyifunde [iKurani] ukuzithasisela, kulindeke ukuba iNkosi yakho ikubeke ezingeni elincomekayo.

Yithi: “Nkosi yami ngingenise [kokuhle] ukungena kweqiniso futhi ungikhiphe [kokubi] ukuphuma kweqiniso bese ungipha ubufakazi obuyongilekelela obuvela kuWe”.

Yithi futhi: “Selifikile iqiniso ashabalala amanga, impela amanga ayohlala eshabalala”.

Futhi sembulele kwiKurani lokho okulaphayo nomusa kulabo abakholwayo, kepha laba abangenzi ubulungiswa akubandiseli lutho ngaphandle kokulahlekelwa.

Uma umuntu simbusisa [ngotho], uyajika azigqaje. Kuthi uma esehlelwe inkinga alahle ithemba.

Yithi: “Wonke umuntu wenza ngendlela yakhe, kepha iNkosi yakho iYona eyazi kahle ukuthi ubani osendleleni eqondile”.

Bakubuza ngomphefumulo, Yithi: “Umphefumulo indaba yeNkosi yami, futhi nina lutho olwazini ngaphandle nje kokuncane”.

Uma sifuna, singakuthatha lokhu esikwembulele kuwe [Muhamadi], futh akekho oyomthola ukuba abhekane naThi akulekelele.

Ngaphandle uma kuwumusa ovela eNkosini yakho, nebala izibusiso zaYo zinkulu kuwe [Muhamadi].

Yithi: “Noma bonke abantu namajini bengahlangana ukuba bakhiqize okufana naleKurani; abasoze bakhona ukukukhiqiza efana nayo noma bengalekelelana”.

Nebala sibahlalusele abantu kuleKurani ngayo yonke imizekelo, kepha iningi labantu liqome ukungakholwa.

Futhi bathi: “Asisoze sakukholwa kuze kube usiqhekezela umhlaba kuqhume umthombo wamanzi”.

Noma ube nesivande samasundu nesomvini, bese ugelezisa imifula phakathi kwazo igobhoze.

Noma usehlisele isibhakabhaka njengoba bewusho usiphahlaze izicucu noma ulethe u Allah nezingelosi sizibonele mathupha!

Noma ube nendlu yegolide noma wenyukele phezulu ezulwini futhi asisoze sakukholwa ukuthi unyukile kuze kube usehlisela incwadi siyifunde. Yithi: “Mayingcweliswe iNkosi yami, angisilutho ngaphandle nje komuntu oyiSithunywa”.

Futhi akukho okuvimba abantu ukuba bakholwe uma ukukhanya kufika kubo, ngaphandle kokuthi bathi: “U Allah uthumela umuntu njengeSithunywa?”

Yithi: “Ukube kwakukhona izingelosi emhlabeni zihamba ngokunethezeka, besizozehlisela ezulwini isithunywa esiyingelosi”.

Yithi: “U Allah wanele ukuba ufakazi phakathi kwami nani, impela Yena Unolwazi Uyabona mayelana nezigqila zaKhe”.

Futhi lowo u Allah amholile, usendleleni eqondile. Nalowo amdukisile, awusoze wabatholela abanye abahlengi ngaphandle kuka Allah. NgoSuku lokwahlulela siyobabuthanisa bahudulwe ngobuso beyizimpumputhe beyizimumu beyizithuli, bayophelela eJahanamu. Njalonje uma usulotha [uMlilo waseJahanamu] sengeza ilangabi.

Lokhu, umvuzo wabo ngoba baphika izibonakaliso zeThu bathi: “Lapho sesingamathambo nezicucu, ingabe ngempela siyophinde sivuswe kabusha na?”

Ababonanga yini ukuthi nebala u Allah lona owadala amazulu nomhlaba unamandla okudala okunye okufana nawo. Futhi wababekela isikathi [sokuphila] esingengatshazwe, kepha abaphambukile bavane baqoma ukungakholwa.

Yithi: “Ukube beniphethe imicebo yomusa weNkosi yami; beniyongoqa ngenxa yokwesaba ukondla; vele umuntu ungungoqo.

Futhi sanika uMusa izibonakaliso eziyisishagalombili. Ngakhoke buza isizwe sakwa Isirayeli ngomhla efika kubo, wathi kuye uFirawuni: “Ngicabanga ukuthi wena Musa uloyiwe”.

Wathi: “Wazi kahle ukuthi akekho olethe zonke lezinto ngaphandle kweNkosi yamazulu nomahlaba njengezibonakaliso. Futhi nami ngicabanga ukuthi wena Firawuni uzobhujiswa”.

Wabe esefuna ukukhinyabeza emhlabeni [ukuze bahambe] kepha sabacwilisa bonke yena nalabo ababenaye.

Sase sithi esizweni sakwa Isirayeli emuva kwakhe [uFirawuni]: “Hlalani emhlabeni, kuyothi uma sekifika isikhathi sakwelizayo siyoniletha nonke.

Siyembulele ngeqiniso [iKurani] futhi yehla ngeqiniso. Futhi sikuthume [wena Muhamadi] ukuba ube umethuli wezindaba ezinhle nomxwayisi.

NeKurani siyenze yaba umnqamulajuqu [phakathi kweqiniso namanga] ukuze uyifundele abantu ngesineke [ungajahile] futhi sayembulela kancane kancane.

Yithi: “Kholelwani kuyo noma ningakholelwa; impela labo abanikwa ulwazi ngaphambili uma befundelwa [yona] bawa phansi ngobuso bakhothame”.

Bese bathi: “Mayingcweliswe iNkosi yethu, nebala isithembiso seNkosi yethu siyenzeka”.

Bawa ngobuso phansi bekhala futhi ibandisela ukuzithoba nokugxila.

Yithi: “Bizani u Allah noma nibize u Rahimani [Onomusa], noma yiliphi enilibizayo, phela unaMagama Amahle. Futhi ungaphakamisi izwi lapho ukhuleka futhi ungahlebeli, wenze nje okumaphakathi kwalokho”.

Yithi: “Udumo lungoluka Allah, Lona ongaziqokelanga ngane futhi ongenamlingani eBukhosini nongenamnakekeli odinga ukumhlenga ehlazweni, ngakhoke mphakamise umdumise kakhulu”.

Lonke udumo lungoluka Allah, Lona owembulela iNcwadi esigqileni saKhe futhi akayenzanga yaba indida.

Uyenze yaqonda, ukuze [isigqila saKhe] sixwayise ngesijeziso esinzima esivela kuYe siphinde sethule izindaba ezimnandi kulabo abakholwayo abenza izenzo ezinhle ukuthi bayothola umvuzo omuhle [iJana].

Bayohlala kuwo unaphakade.

Siphinde sixwayise labo abathi u Allah uziqokele ingane.

Abanalo ulwazi ngaYe [u Allah] bona nokhokho babo. Anzima [impela] amazwi aphuma emlonyeni yabo, impela bahubha aluhlaza.

Hleze uyazikhandla uzikhathaza emuva kokuba bengafuni ukukholela kulamazwi [eKurani].

Impela senze lokhu okuphezu komhlaba kwaba umhlobiso wawo ukuze sibavivinye ukuthi ubani kubo oyokwenza izenzo ezinhle.

Futhi siyokwenza konke lokhu okungaphezu kwawo kube wumhlabathi ongamili lutho.

Ingabe ucabanga ukuthi abantu basemgedeni noqwembe yibona ababesimangaliso ezibonakalisweni zeThu na?

Mhla amabhungu eyokhosela emgedeni, athi: “Nkosi yethu siphe umusa ovela kuWe futhi usenzele izinto zethu zibe nobuqotho”.

Savala izindlebe zabo iminyaka eminingi besemgedeni.

Sase siyabavusa ukuze sazi ukuthi iliphi iqembu kwambili elibale kahle isikhathi abasihlala.

Thina sikulandisela indaba yabo ngeqiniso. Nebala babengamabhungu ayekholelwa eNkosini yabo futhi sabandisela ukukhanya.

Saqinisa izinhliziyo zabo mhla bema bathi: “iNkosi yethu, iNkosi yamazulu nomhlaba, asisoze sakhonza nasinye isikhonzwa ngaphandle kwaYo; phela siyobe sesikhulume iphuta impela.

Abantu bakithi laba, baziqokele izikhonzwa ngaphandle kwaYo [iNkosi yethu]; mabalethe phela ubufakazi obusobala obuzifakazelayo [lezikhonzwa]. Kumbe ukhona ophambuke kunalowo oqambela u Allah amanga na?

Lapho niziqhelelanisa nabo kanye nalokho abakukhonzayo ngaphandle kuka Allah, hambani niyokhosela emgedeni; iNkosi yenu iyonipha emseni waYo iphinde inilungisele lokho eningaphila ngakho.

Ububona ngelanga lapho liphuma likekela liya ngakwesokudla lomgede wabo nalapho liyoshona libashiya ngakwesobunxele kulapho babesendaweni evulekile kuwo [umgede]. Lokho ezinye zezibonakaliso zika Allah. Lowo u Allah amholayo, usendleleni eqondile kepha lowo amdukisile awusoze wamtholela umhlengi oyomkhalima.

Ubuzocabanga ukuthi babhekile [abalele] kulapho bebelele. Futhi sasibaphendulela ngakwesokudla nangakwesobunxele, kanti nenja yabo yayindlale imilenze yayo yangaphambili emnyango. Uma ubungababona ubuyobalekela udle phansi ngejubane ugcwele ukubesaba.

Sabeke sesibavusa ukuze babuzane bodwa. Wathi omunye wabo: “Nihlale isikhathi esingakanani na?”. Bathi: “Sihlale usuku noma ingxenye yosuku”. Bathi: “iNkosi yenu iYona eyazi kahle ngesikhathi enisihlalile, ngakhoke thumelani omunye wenu ngalemali yenu aye edolobhini asibhekele ukuthi ikuphi ukudla okumsulwa bese enilethela eningakudla kukho, abe nesineke [nomthengisi] angatsheli muntu noyedwa ngani”.

Ngokuba uma benganibona bayonikhanda ngamatshe noma banibuyisele enkolweni yabo bese ningaphinde niphumelele unaphakade.

Kanjalo sabenza batholakala ukuze [abantu] bazi ukuthi isithembiso sika Allah siyiqiniso nokuthi iSikhathi [sokwahlulela] akunakungabaza ngaso. Mhla bephikisana ngendaba yabo, bathi: “Yakhani isakhiwo phezu kwabo [emgedeni], iNkosi eyazi kahle ngabo”. Bathi labo ababenamandla okunquma odabeni lwabo: “Sizokwakha iMasijidi pheze kwabo”.

Bayothi: “Bebethathu bebane ngenja yabo”. Abanye bayothi: “Babehlanu beyisithuba ngenja yabo”, beqagela. Abanye bayothi: “Babeyisikhombisa beyishagalombili ngenja yabo”. Yithi: “iNKosi yami iyazi kahle ngenani labo, futhi akekho abalaziyo ngaphandle nje kwedlanzana”. Ngakhoke ungalokhu uphikisana ngabo ngaphandle uma kokuphikisana okusobala futhi ungabuzi muntu ngabo [abomgede] kubo [abeMibhalo].

Futhi ungabothi ngento: “Nebala ngizoyenza kusasa”.

Ngaphandle kokuthi: “Uma u Allah evuma”. Futhi ukhumbule iNkosi yakho uma ukhohlwa, bese uthi: “Hleze iNkosi yami ingiholele kokucacile kunalokhu ngokuhola”.

Bahlala emgedeni wabo iminyaka engamakhulu amathathu base bengeza neyisishagalolunye.

Yithi: “U Allah wazi kahle ngesikhathi abasihlala, phela okungabonwayo emazulwini nasemhlabeni kungokwaKhe. Yeka ukubona kwaKhe nokuzwa kwaKhe [okungenamhawulo]. Futhi abanaye omunye uMhlengi ngaphandle kwaKhe kanjalo akanaye noyedwa umlingani ekunqumeni kwaKhe”.

Balandisele lokho okwembulelwe kuwe [Muhamadi] eNcwadni yeNkosi yakho. Akekho ongaguqula Amazwi aKhe futhi awuso wathola esinye isiphephelo ngaphandle kwaKe.

Zibandakanye nalabo abakhuleka eNkosini yabo ekuseni nakusihlwa belangezelele Ubuso baYo. Ungabuki abanye ngaphandle kwabo ngokulangazelela ubukhazikhazi bempilo yasemhlabeni. Futhi ungamlaleli lowo esenze inhliziyo yakhe yangaba nendaba nokusikhumbula waphinde walandela izinkanuko zakhe futhi indaba yakhe kwaba ukuduka nje.

Yithi: “Iqiniso livela eNkosini yenu; ngakhoke othandawo makakholwe futhi othandayo angakholwa”. Impela abaphambukile sibalungiselele uMlilo abayohaqwa imithangala yawo. Uma becela amanzi, bayonikwa amanzi afana namafutha abilayo ashisa ubuso. Saze sasibi isiphuzo futhi yaze yayimbi indawo yokuhlala.

Nebala labo abakholwayo futhi benze nokuhle, impela Thina asiwuchithi umvuzo walowo owenza izenzo ezinhle.

Labo bayothola izivande zaphakade okugeleza ezansi kwazo imifula, bayohlotshiswa kuzo ngamabhengela egolide baphinde bembathe izembatho eziluhlaza zesiliki ecolisekile nengugqinsi. Kuzo bayohlala baqhiyame emibhedeni. Waze wamuhle umvuzo futhi yaze yayinhle indawo yokuhlala.

Benzele umzekelo wamadoda amabili, enye yawo, sayinika izivande ezimbili zomvini sazizungeza ngamasundu kwathi phakathi kwazo zombili zafaka ezinye izitshalo.

Zombili lezivande zazithela izithelo zazo zingagodli lutho sanhlobo. Sagelezisa umfula phakathi kwazo zombili.

Futhi wanezinye izithelo, wabe esethi kuzakwabo ekhuluma ebhekise kuye: “Mina nginomcebo nezingane eziningi kunawe”.

Wangena esivandeni sakhe kulapho esephambukile wathi: “Angicabangi ukuthi lokhu kuyoke kubhubha impela”.

Futhi angicabangi ukuthi iSikhathi [sokwahlulelwa] siyoke sifike. Kantike uma ngizobuyela eNkosini yami ngiyothola okungcono esikhundleni sakho.

Uzakwabo wathi, naye ekhuluma ebhekise kuye: “Ingabe awukholelwa kulowo owakudala ngomhlabathi kanjalo nangesidoda wabe esekwenza indoda na?”

Kepha Yena ungu Allah iNkosi yami futhi angibhangqi lutho neNkosi yami.

Ngabe uthe uma ungena esivandeni sakho wathi: “Kwenzela ngentando ka Allah, awekho amandla okwenza okuhle ngaphandle kuka Allah”, nakuba ungibona mina nginomcebo nezingane ezincane kunawe.

Mhlawumbe kungekudala iNkosiyami iyongipha okungcono kunesivande sakho aphinde asithumele ngesijeziso esivela ezulwini, siphenduke inhlabathi eshelelayo.

Noma amanzi aso azike ungasakwazi ukuwathola.

Izithelo zakhe zahaqwa [isijeziso esashaqa konke]. Wachaya izandla ebalisa ngakho akuchitha kuso [isivande], kulapho sona siwe phansi nemipheme yaso. Wathi: “Hawu, ngifisa ukuba angizange ngibhangqe lutho neNkosi yami”.

Futhi kwakungekho qembu ebelingamsiza ngaphandle kuka Allah, kwayena akakwazanga ukuzisiza.

Kulaphoke ukulawula kuka Allah Oyiqiniso. NguYena onomuvuzo ongcono nonesiphetho esingcono [kwabakholelwa kuYe].

Futhi benzele umzekelo wempilo yasemhlabeni, njengamanzi emvula esiwehlisayo bese ehlangana nezitshalo zomhlaba [zibe luhlaza]. Ziyobe seziyoma zipheshulwa imimoya. U Allah akehlulwa yilutho.

Umcebo nezingane ziwubukhazikhazi bempilo yasemhlabeni. Kanti ke izenzo ezinhle yizona ezinomvuzo ongcono eNkosini yakho nesifiso esingcono.

Ngosuku lapho siyosiphula khona izintaba uyobona umhlaba unqunu [ungesitshalo ungenasakhiwo] futhi siyobabuthanisa bonke ngothi lwabo akukho noyedwa esiyomshiya.

Bayoma phambi kweNkosi yakho imigqa ngemigqa. [Bese yithi]: “Nize kithi njengoba sanidala okokuqala. Empeleni bekade niqhakambisa ukuthi asisoze sanibekela isikhathi sokuhlangana.

Iyobe isiyabekwa incwadi [isiqhophi sezenzo]. Uyobona ngezigilamkhuba sezigcwele itwetwe ngekuqukethe bese bathi: “Kwaze kwaphela ngathi, yini indaba ngalencwadi ayishiyi lutho okuncane nokukhulu ikuqukethe konke”. Bayothola konke abakwenzile kukhona futhi iNkosi yakho ayikaze yenze okungebulungiswa nakoyedwa nje.

Futhi khumbula mhla sithi kuzingelosi: “Khothamelani u Adamu niwe ngobuso”. Zakhothama zawa ngobuso ngaphandle kuka Ibhilisi owabe eyijini owaqoma ukungawuthobeli umyalelo weNkosi yakhe. Ingabe nenza yena kanye nabalandeli bakhe abahlengi ngaphandle kwaMi kulapho bona beyizitha kini na? Kwaze kwakubi lokho abaphambukile abakuqokile.

Angizange ngibabonise ukudalwa kwamazulu nomhlaba nokudalwa kwabo uqobo [babengekho] futhi angisoze ngaqoka abadukisi ukuba babe ngabalekeleli.

Futhi balandise ngoSuku lapho eyothi [u Allah]: “Bizanike abalingani baMi laba phela ebenibaqhakambisa”. Bayobe sebeyababiza kepha bangabaphenduli futhi sifaka phakathi kwabo [eJahanamu] indawo yembubhiso.

Izigilamkhuba ziyobona uMlilo; ziqiniseke ukuthi ziyongena kuwo futhi akukho la abangawubalekela khona.

Impela sibacacisele abantu kule Kurani ngayo yonke imizekelo. Kepha umuntu uthanda ukuqophisana ukudla zonke izinto [ezidaliwe].

Ayikho into evimba abantu ukuba bakholwe lapho kufika kubo ukukhanya nokuthi bacele intethelelo eNkosini yabo ngaphandle kokuthi behlelwe okwehlela abasendulo noma behlelwe isijeziso bekhekile.

Futhi sithumela iZithunywa ukuba zibe abethuli bezindaba ezinhle nabexwayisi nje kuphela. Labo abangakholwa baphikisa besebenzisa umbhedo bezama ukushabalalisa ngawo iqiniso. Belu bathatha izibonakaliso zeThu nalokho abaxwayise ngakho njengehlaya.

Ngubani ophambuke ukudla lowo owelulekwa ngemibiko yeNkosi yakhe kepha yena ayishaye indiva, akhohlwe nayimisebenzi yezandla zakhe. Impela sifake isisithezo ezinhlizweni ekutheni bayiqonde [iKurani], nasezindlebeni zabo bayizimumu. Noma ungababizela endleleni eqondile abasoze bayilandela nhlobo.

Futhi iNkosi yakho Ingumthetheleli Onesihawu, ukube nje ubenganijezisa ngakho konke enikwenzayo, impela beyoshesha anijezise. Kepha [abaphambukile] banesikhathi ababekelwe sona abasoze baphunyuka kuso.

Lezo imizi [izindawo], abantu bakhona sababhubhisa lapho benza ukuphambuka futhi sabeka isikhathi sokubabhubhisa.

Futhi khumbula mhla uMusa ethi kunceku yakhe: “Angeke ngiphumule kuze kube ngifika lapho kuhlangana khona izilwandle ezimbili noma ngihambe ibanga elide”.

Kuthe lapho bobabili befika lapho kuhlangana khona izilwandle ezimbili bakhohlwa inhlanzi yabo, yona eyavele yangena olwandle kwaqhekeka indlela yayo.

Kuthe sebendlulile [kuleyondawo] wathi [uMusa] kunceku yakhe: [Ake usiphe idlamini [isidlo sasemini] yethu, impela uhambo lwethu lolu lusikhathazile”.

Yathi: “Uyakhumbula ngenkathi siphula edwaleni, ngikhohliwe ukukwazisa ngenhlanzi futhi nguShayitani kuphela ongenze ngiyikhohlwe ukuyibalula. Ingene olwandle kwavuleka indlela yayo ngesimanga.

Wathi: “Yilokho ebesikufuna”. Babuyela emuva lapho abahambe khona.

Bazithela phezu kwesigqila sezinye izigqila zeThu esasinika umusa ovela kithi saphinde sasifundisa ulwazi luvela kithi.

Wathi uMusa: “Ngingahamba nawe yini ukuze ungifundise okunye kwalokho ofundiswe kona okuholela eqinisweni na?”

Sathi [isigqila sika Allah]: “Impela angeke wena ukhone ukungibekezelela”.

Belu ungakubekezelela kanjani lokho ongenalwazi lwakho na?

Wathi [uMusa]: “Uzongifumanisa - ngemvumo ka Allah – ngingobekezelayo futhi angeke ngephule umyalelo wakho”.

Sathi [isigqila sika Allah]: “Uma uzohamba nami, ungangibuzi ngalutho kuze kube yimi engiphawulayo ngakho”.

Bahambake bobabili baze bayogibela emkhunjini, sawubhoboza. Wathi [uMusa]: “Uyawubhoboza ukuze ucwilise abakuwo na? Impela wenze into embi”.

Sathi: “Angishongo yini ukuthi impela angeke wena ukhone ukungibekezelela”.

Wathi: “Ungangijezisi ngosebengikukhohliwe futhi ungangenzeli izinto zami zibe nzima”.

Bahambake bobabili baze bahlangana nomfana, sambulala. Wathi [uMusa]: “Ubulala umphefumulo omsulwa ongabulalanga muntu? Impela wenze into eshaqisayo.

Sathi: “ Angishongo yini kuwe ukuthi impela angeke wena ukhone ukungibekezelela”.

Wathi: “Uma ngiphinde ngakubuza noma yini emuva kwalokhu ungabe usahamba nami, impela sekuphele wona amazaba lapha kimi”.

Baqhubeka bahamba bobabili baze bazithela phezu komuzi. Base becela ukudla kubantu bakhona kepha benqaba ukubamukela njengezihambi. Base bethola kuwo [lomuzi] uthango obeselutshekile lufuna ukuwa, saluvusa salumisa. Wathi [uMusa]: “Uma uthanda ungabakhokhisa ngalo inzuzo”.

Sathi [isigqila sika Allah]: “Yikhona ke la mina nawe esihlukana khona. Ngizokwazisa ngencazelo yakho konke lokhu ohluleke ukukubekezelela”.

Mayelana nomkhumbi, ubungowezichaka ezazisebenza olwandle, bengifuna ukuwufaka isici ngamabomu, ngokuba ngaphambi kwabo bekunenkosi ehlwitha imikhumbi [engenacisi] ngodli.

Mayelana nomfana, abazali bakhe bebengabakholwayo sase sisaba ukuthi uyobahlukumeza [lapho esemdala] ngokungezwa nokungakholwa.

Besifuna ukuthi iNkosi yabo ibaphe ongcono esikhundle sakhe noyobaphatha kahle.

Mayelana nothango, belungelezintandane zabafana ababili khona emzini, kanti ngaphansi kwalo bekunomcebo wabo bobabili futhi abazali babo babeqotho, ngakhoke iNkosi yakho beyifuna ukuba bakhule babe badala bese bekhipha memba umcebo wabo; isihawu esivela eNkosini yakho. Angikwenzanga ngokwentando yami. Leyo iyona incazelo yakho konke lokhu ongakhonanga ukukubekezelela.

Futhi bakubuza ngo Dulikarinani [umpondombili]. Yithi: “Ngizonilandisa ngendaba yakhe”.

Impela sambeka emhlabeni samnika indlela yokufinyelela kuyo yonke into [ulwazi lokuyenza].

Wabe eselandela enye yezindlela.

Waze wafika entshonalanga, walithola lishonela esiyalweni esimnyama, wathola kunabantu lapho [entshonalanga]. Sathi: “We Dulikarinani, ungabajezisa noma ube nesihle kubo”.

Wathi: “Lowo ophambukile sizomjezisa bese ebuyela eNkosini yakhe iphinde imjezise isijeziso esishaqisayo”.

Kuthi lowo okholwayo owenza nezenzo eziqotho, uyothola umvuzo weJana, futhi siyokhuluma kahle naye.

Waphinda walendela enye yezindlela.

Waze wafika empumalanga, walithola liphumela phezu kwabantu esingezange sibenzele isisithezo esibavikela kulo.

Belu besinayo yonke imininingwane ngakwenzayo.

Waphinda walandela enye yezindlela.

Waze wafika phakathi kwezintaba ezimbili ezazihonqile, wathola emuva kwazo zombili kunabantu abangaqondi lwimi [olunye].

Bathi: “Dulikarinani, impela isizwe sakwa Ya’ajuju nakwaMa’ajuju benza umonakalo ezweni. Kunganjani sikukhokhele ukuba usakhele uthango phakathi kwethu nabo.

Wathi: “Lokhu engikunikwe iNkosi yami kungcono, ngakhoke ngisizeni ningilethe abantu abanamandla ukuze ngakhe phakathi kwenu nabo uthango.

Ngipheni ingqukuqa yensimbi. Kuthe lapho esezivale zombili izinhlangothi zentaba [ngezisimbi], wathi: “Vuthelani [...basani umlilo ushise izinsimbi]”. Kuthe lapho eselenze lawumlilo luvutha [uthango], wathi: “Ngiletheleni ithusi ngiligalele ngaphezu kwalo [uthango lovuthayo].

Abazange bakhone [abakwaYa’ajuju nakwaMa’ajuju] ukuleqa [uthango] futhi abakhonanga ulibhoboza imbobo.

Wathi: “Lona umusa ovela ku Allah. Kepha uma sekufike isethembiso seNkosi yami uyolenza [uthango] lube uthuli. Ngokuba isithembiso seNkosi yami siyiqiniso.

Ngalolosuku siyobadedela abanye babo balakanyelane nabanye. Kuyothi lapho sekushaywa icilongo [okwesibili] sibabuthanise bonke ndawonye.

NgaloloSuku siyovezela obala iJahanamu kulabo abangakholwa.

Labo amehlo abo ayemboziwe engayiboni imibiko yaMi futhi bengakwazi ukuzwa lutho.

Ingabe laba abangakholwa bacabanga ukuthi bangenza izingqila zaMi abahlengi [babo] ngaphandle kwaMi na? Impela iJahanamu siyilungiselele labo abangakholwa ukuba bahlale kuyo.

Yithi: “Kunganjani nginitshele ngalabo ozenzo zabo azinanzuzo”.

Yilabo imisebenzi yabo empilweni yasemhlabeni yayisekudukeni kulapho bona becabanga ukuthi benza kahle.

Labo, yibona kanye abangayikholwanga imibiko yeNkosi yabo nokuthi bayohlangana naYo. Ngakhoke imivuzo yezenzo zabo yashabalala nangoSuku lokwahlulela asikuba nandaba nabo.

Labo umvuzo wabo iJahanamu ngenxa yokungakholwa kwabo nokwenza imibiko yaMi neZithunywa zaMi inhlekisa.

Nebala labo abakholwayo baphinde benze izenzo eziqotho, bayothola izivande zeFiridosi njengendawo yokuhlala.

Bayohlala kuzo unaphakade, abayikufuna ukususwa kuzo.

Yithi: “Ukube ulwandle beluwuketshezi lokuloba Amazwi eNkosi yami; beluphela ulwandle engakapheli Amazwi eNkosi yami, noma singaletha olunye [ulwandle] ukugcwalisela”.

Yithi: “Mina ngingumuntu nje kuphela, kwembulelwe kimi ukuthi lowo okumele nimkhonze uyedwa vo kuphela. Ngakhoke lowo ofisa ukuhlangana neNkosi yakhe makenze izenzo eziqotho [ezinhle] angabhangqi noyedwa ekukhonzeni iNkosi yakhe”.

Kaf-Hha-Ya-’Ayin-Swad.

Lokho ukulandisa ngomusa weNkosi yakho esigqileni saYo uZakariya.

Mhla ekhuleka eNkosini yakhe ngasese.

Wathi: “Nkosi yami, amathambo ami asebuthaka nekhanda lami seliqhakazile futhi angikaze ngibuye neze lapho ngikhuleka kuWe Nkosi yami”.

Nebala ngesaba izihlobo emuva kokuba ngingasekho kunjalo nje umkami akazele, ngakhoke ngiphe umsizi ovela kuWe”.

Oyoba indlalifa yami neyomndeni kaYakubu, futhi Nkosi yami, umenze athandeke.

Zakariya, impela sikuhalalisela ngomfana ogama lakhe kuzoba ngu Yahiya, akekho esike samqamba lona phambilini.

Wathi:”Nkosi yami, ngizomthola kanjani umfana ebe umfazi wami eyinumba kulapho nami ngizigugele ngingumxhiliba na?”

Yathi [ingelosi]: “Isho njalo iNkosi yakho, yathi: kulula kimi [ukudala umfana], belu ngakudala nawe phambilini ube wawukade ungelutho”.

Wathi [uZakariya]: “Nkosi yami, ngiphe uphawu”. Yathi: “Yathi uphawu lwakho ukuthi ungakwazi ukukhulumisa abantu izinsuku ezintathu”.

Waphuma egunjini lokuthandaza waya ebandleni lakhe, wabayalela ukuba badumise ekusenu nakusihlwa.

Yahiya, thatha iNcwadi [iTora] ngokuzimisela futhi samunika ukuqonda esasemncane.

Samupha futhi ububele obuvela kithi kanye nobumsulwa, futhi wayemthobela u Allah.

Futhi wayehlonipha abazali bakhe engewona umdlwembe oweyisayo.

Ukuthula makube kuye ngosuku azalwa ngalo nangosuku afa ngalo nangosuku ayovuswa ngalo [ekufeni] aphile.

Landisa [wena Muhamadi] lapha eNcwadini [iKurani] ngoMariyamu, mhla eqhela ngasemndenini wakhe wayohlala endaweni engasempumalanga.

Wazibekela isisithezo ezisitha kubo [abantu bakubo]. Sabe sesithumela kuye ingelosi yeThu [uJibhirili] eyathatha isimo somuntu oqotho phambi kwakhe.

Wathi [uMariyamu]: “Ngizivikela ngoNomusa kuwe uma ngempela umthobela u Allah”.

Yathi [ingelosi]: “Ngiyisithunywa nje seNkosi yakho, esithunywe ukukulethela umfana omsulwa”.

Wathi: “Ngingamthola kanjani umfana ngingakaze ngithintwe muntu [wesilisa] futhi ngingakaze ngibe unondindwa”.

Yathi: “Isho kanjalo iNkosi yakho: kulula kiMi, futhi siyomenza isibonakaliso ebantwini nomusa ovela kithi. Futhi yinto vele esinqunyiwe.

Wamthwala [ekhulelwe] waya naye endaweni esekudeni eqhelile.

Wahlaselwa umhelo ehleli ngaphansi kwesihlahla samasundu, wathi: “Ngifisa ukube ngafa kudala ngaphambi kwalokhu ngakhohlwa ngangaziwa nhlobo”.

Wammemeza [umfana wakhe] ngenzansi kwakhe wathi: “Ungakhathazeki ngokuba iNkosi yakho wenze umfundlana ezansi kwakho”.

Nyakazisela ngakuwe isiqu sesihlahla sizokuwisela amasundu amasha avunwe ngaleso sikhathi.

Yidla uphuze uthokoze. Uma ubona noma yimuphi umuntu, ubothi: “Ngizibophezele ku Allah ukuba ngizile, ngakhoke akukho muntu engiyomkhulumisa namhlanje”.

Wafika naye [umfana wakhe] kubantu bakubo emphethe. Bathi: “We Mariyamu, impela ufike nento eyinsumansumane”.

Dadewabo ka Haruna, uyihlo wayengeyena umuntu omubi futhi nonyoko wayengeyena unondindwa.

Wavele wabakhomba kuye [umfana wakhe]. Bathi: “Sizokhuluma kanjani noswana olusembelekweni na?”

Wathi [umfana kaMariyamu]: “Mina ngiyisigqila sika Allah, unginike iNcwadi wangenza iSithunywa”.

Futhi wangenza ngaba obusisekile noma yikuphi langikhona, wangiyalela ngeswala nezakati uma nje lokhu ngisaphila.

Futhi wangenza ngaba ohlonipha umama wami, akazange angenze umdlwembe ongezwa.

Ukuthula makube kimi ngosuku lapho ngizalwa nangosuku lapho ngifa nangosuku lapho ngivuswa ngiphile.

Loyo ngu Isa indodana ka Mariyamu. Amazwi eqiniso leli abalingabazayo.

Akumfaneli u Allah ukuba abe nengane; makangcweliswe. Uma efuna ukwenza noma yini, uvane kuyo: “Yenzeka”, bese iyenzeka.

Nebala u Allah iNkosi yami neNkosi yenu, ngakhoke mkhonzeni, iyona lena indlela eqondile.

Aphikisana wodwa amaqembu, imbubhiso ikulabo abangakholelwa ekubuthaneni koSuku olukhulu.

Yeka abayokubona nabayokuzwa ngosuku abayofika ngalo kithi. Kepha labo abangakholwa basekudukeni okusobala namhlanje.

Baxwayise ngosuku lokuzisola lapho okuyokwehlulelwa khona. Kulapho bona abanendaba futhi abakholwa.

Nembala yithina esiyoba yizindlalifa zomhlaba nakho konke okukuwo futhi bonke bayobuyela kithi.

Futhi landisa ngo Ibhirahimu eNcwadini [iKurani]. Impela wayeneqiniso eyiSithunywa.

Mhla ethi kuyise: “Baba wami othandekayo, kungani ukhonza lokho okungezwa nokungaboni okungakusizi ngalutho”.

Baba wami othandekayo, impela senginolwazi olungakafiki kuwe, ngakhoke landela mina ngikuholele endleleni eqondile.

Baba wami othandekayo ungamkhonzi uShayitani ngokuba uShayitani weyisa wangamlalela Onomusa [uAllah].

Baba wami othandekayo, impela ngisaba ukuthi uyothola isijeziso esivela koNomusa bese uphenduka umlandeli ka Shayitani.

Wathi [uyise]: “Awunandaba nezikhonzwa zami na, we Ibhirahimu?” Uma ungaphezi ngizokukhanda ngamatshe mina uqobo futhi awungiyeke [ungangikhulumisi]isikhathi eside.

Wathi [u Ibhirahimu]: “Ukuthula makube kuwe. Ngizokucelela intethelelo eNkosini yami ngokuba yona inesihawu kimi”.

Futhi ngizonishiya nina kanye nalokho enikukhonzayo ngaphandle kuka Allah, bese ngikhuleka eNkosini yami, hleze ngingehluleki lapho sengikhulekile eNkosini yami.

Kuthe lapho esebahlubukile kanye nalokho ababekukhonza ngaphandle kuka Allah, samupha u Isihaki noYakubu. Bobabili sabenza iZithunywa.

Sabapha nabo emseni weThu sabenzela ukutuswa kweqiniso okungapheli.

Landisa futhi ngoMusa eNcwadini [iKurani]. Impela wayekhethekile futhi wabe eyiSithunywa esinguMembulelwa.

Sammemeza ngasohlangothini lwesokudla lwentaba iTuri, samsondeza sakhuluma naye.

Samupha emseni weThu umfowabo uHaruna owaba yiSithunywa.

Landisa futhi ngo Isima’ili eNcwadini [iKurani]. Impela wayesigcina isithembiso futhi wabe eyiSithunywa esinguMembulelwa.

Wayehlala najlo eluleka umndeni wakhe ngeswala nezakati futhi wayethandeka eNkosini yakhe.

Landisa futhi ngo Idirisi eNcwadini [iKurani]. Impela wayeneqiniso futhi eyiSithunywa.

Futhi samnyukisela esikhundleni esiphezulu.

Yibona ke labo u Allah ababusisile eZithunyweni nakuzalo luka Adamu nakulabo esabathwala kanye noNuhu nakuzalo luka Ibhirahimu nakulabo esabahola sabakhetha. Uma befundelwa imibiko yoNomusa, bawa phansi ngobuso bakhothame futhi bekhala.

Kepha balandelwa emuva kwabo yisizukulwane esasingenandaba neswala futhi silandela izinkanuko. Siyohlangabezana nokubi [eJahanamu].

Ngaphandle kwalowo ozisolayo akholwe bese enza izenzo ezinhle, yilaboke abayongena eJana futhi akukho noncane okungebona ubulungiswa okuyokwenziwa kubo.

Izivande zaphakade lezi Onomusa azithembise izigqila zaKhe zingazibonanga. Impela isithembiso saKhe nakanjani siyofika.

Abayikuzwa kuzo umbhedo ngaphandle nje kokuthi “ukuthula” [bebingelelana]. Bayothola ukudla kwabo kuzo ekuseni nakusihlwa.

Iyonake leyo iJana esiyoyenza ifa lalabo abangithobelayo kuzigqila zaMi.

[Yithi wena Jibhirili kuMuhamadi]: “Asehlingaphandle komyayelo kaAllah. Konke okungaphambi kwethu [okuzayo] nokusemuva kwethu [okwendlule] nokumaphakathi kwalokho kungokuka Allah. Futhi iNkosi yakho ayikhohlwa”.

UyiNkosi yamazulu nomhlaba nokumaphakathi kwakho. Ngakhoke khonzani Yena nibambelele ekukhonzeni Yena [Yedwa]. Ingabe ukhona yini omunye omaziyo ofana naYe na?

Umuntu uthi: “Ingabe uma sengifile ngiyophinde ngivuswe ngiphile na?”

Ingabe umuntu akasakhumbuli yini ukuthi samdala phambilini ebengelutho.

Ngiyifunge iNkosi yakho, siyobabuthanisa bonke kanye noShayitani ndawonye bese sibaletha baphahle iJahanamu beguqile.

Emuva kwalokho siyobe sesihlunga kuwo wonke amaqembu [aphambukile] lowo obeyisa u Allah kakhulu.

Futhi esibazikahle labo abanelwe ukungena kuyo [iJahanamu].

Futhi akekho kini nonke ongeke angena kuyo. Leso isinqumo seNkosi yakho esingeguqulwe.

Siyobahlenga labo abathobela uAllah kuthi labo abaphambukile sibayeke kanjalo phakathi kuyo beguqile.

Uma befundelwa imibiko yeThu ecacile, laba abangakholwa bathi kulabo abakholwayo: “Yilona liphi iqembu kwamabili [thina nani] elinemizi engcono nenkundla [yokuhlangana] engcono [ngobuningi] na?”

Ziningi izizwe ngaphambi kwabo esazibhubhisa, ababenempahla yasendlini enhle futhi bebukeka kahle.

Yithi: “Lowo odukile, Onomusa uyomengezela isikhathi, kuze kube yilapho bebona lokho abathenjiswe kona. Isijeziso noma iSikhathi [sokwahlulelwa]. Bayokwazike [ngalowo mzuzu] ukuthi ubani kahle empeleni ononendawo yokuhlala embi nonebutho elingatheni.

Labo abasendleleni eqondile u Allah uyobengezela ukuqonda. Futhi izenzo ezinhle yizona ezingcono eNkosini yakho ngomvuzo nangesiphetho.

Uyambona lona ongakholwa imibiko yeThu kepha athi: “Ngizophiwa umcebo nezingane”.

Ingabe wazi ikusasa [elingabonwa] noma wenze isivemelwano Allah na?

Phinde! Sizokuqopha lokhu akushoyo bese simengezela isijeziso ngaphezulu.

Futhi yithina esiyosala nalokhu akushoyo [umcebo nezingane zakhe] bese eza kithi eyedwa qwaba.

Baqoka izikhonzwa ngaphandle kuka Allah ukuze zibe usizo kubo.

Phinde! Ziyokuphika ukukhonzwa yibo [emhlabeni] bese ziba izitha kubo.

Ubonile yini ukuthi sithumele oShayitani kulabo abangakholwa belokhu bebakuthazisisa [ekwenzeni okubi].

Ungabajahi. Impela silokhu siyababalela nje.

Mhla siyobuthanisela koNomusa labo abathobela u Allah njengezicukuthwane.

Siqhubele izigilamkhuba eJahanamu beshaya ngobhadu bonyiwe.

Abakwazi ukushweleza ngaphandle kwalowo owenze isivumelwano no Allah.

Futhi bathi Onomusa unengane.

Impela nenze into eshaqisayo.

Kangangokuthi amazulu acishe asakazela aqhephuka ngakho kanjalo nomhlaba ucishe waqhekeka nezintaba zadilika.

Ngokuthi nje nithi Onomusa unengane.

Akadingi Onomusa ukaba abe nengane.

Ngokuba konke okusemazulwini nasemhlabeni kuyofika kuNomusa njengezigqila.

Impela ubazi bonke futhi ubabale bonke.

Futhi bonke bayofika kuYe ngoSuku lokwahlulela ngamunye vo.

Nebala labo abakholwayo benze nezenzo ezinhle, Onomusa uyobenzela uthando.

Impela siyenze lula [iKurani] ngolwimi lwakho ukuze wethule ngayo izindaba ezinhle kwabakholwayo uphinde uxwayise ngayo abantu abathanda ukuphikisa kakhulu.

Futhi ziningi izizwe ezibandelelayo esazibhubhisa. Ingabe ukhona noyedwa wabo ombonayo noma uzwe nje umsinjwana wabo na?

Taha.

Asiyembulelanga iKurani kuwe [Muhamadi] ukuze uthole ubunzima.

Ngaphandle nje kokuthi ibe isikhumbuzo kulowo owesabayo [u Allah].

Yehle kancane kancane ivela kulowo odale umhlaba namazulu aphakeme.

Onomusa wenyukela eSihlalweni.

Konke okusemazulwini nasemhlabeni nokumaphakathi kwawo nokungaphansi komhlaba kungokuka Allah.

Noma ungakhulumela phezulu, nembala u Allah wazi okuyimfihlo nokusithele.

U Allah akekho omunye ofanele akhonzwe ngaphandle kwaKhe, unaMagama amahle.

Ingabe usuyitholile indaba kaMusa na?

Mhla ebona umlilo wathi kumndeni wakhe: “Hlalani la, ngibona umlilo hleze nginiphathele isikhuni esivuthayo noma ngithole ongangilayela indlela emlilweni”.

Kuthe lapho efika kuwo wamenyezwa; “We Musa”.

Nebala Yimina Lona iNkosi yakho. Ngakhoke khumula izimbadada zakho ngokuba usesigodini saseTuwa esihlanzekile.

Futhi sengikuhlonzile ngakhoke lalela lokho okwembulwayo.

Impela Yimina lona u Allah, akekho okufanele akhonzwe ngaphandle kwaMi. Ngakhoke khonza Mina [kuphela] wenze neswala ukuze ungikhumbule.

Nembala iSikhathi [sokwahlulela] siyeza, ngithi angingasigaguli ukuze wonke umphefumulo uzuziswe ngalokho okwenzile.

Ngakhoke akungabi bikho muntu ongakholwa yiso nolandela izinkanuko ozokugudlula [ekukholweni] kuso, funa ubhubhe.

Yini lokhu okusesandleni sakho sokudla we Musa?

Wathi: “Induku yami, ngidondoloza ngayo ngiphinde ngephulele imfuyo yami amagatsha ngayo kantike ziningi ezinye izinto engisiza ngazo”.

Wathi [u Allah]: “Ijikijele phansi we Musa”.

Wayijikijela phansi, maqede yaba inyoka ihuhuluza.

Wathi: “Ithathe ungesabi, sizoyibuyisela esimeni sayo sasekuqaleni”.

Futhi faka isandla sakho ohlangothini lwakho [ngaphansi kwengalo], sizophuma sesimhlophe okungekona okokugula; isibonakaliso nje esinye.

Ukuze sikubonise ezinye zezibonakaliso zeThu ezinkulu.

Hamba uye kuFirawuni ngokuba impela usephule umthetho.

Wathi [uMusa]: “Nkosi yami ngivulele inhliziyo yami”.

Wenze izinto zami zibe lula.

Uqaqe lelifindo elisolwimini lwami.

Ukuze bayiqondisise inkulumo yami.

Ungiqokele isekela elivela emndenini wami.

uHaruna umnewethu.

Ngimise ngaye isibindi.

Futhi umbandakanye odabeni lwami.

Ukuze sikubabaze kakhulu.

Futhi sikukhumbule kakhulu.

Nembala wena uhlezi usibona.

Wathi [u Allah]: “Usukunikiwe lokhu okucelile we Musa”.

Sesiphinde sakubusisa futhi.

Khumbula mhla siyalela unyoko lokho okwayalelwa.

Ukuthi: “Mfake ebhokisini ulitshingele emfuleni. Umfula uyomkhafulela osebeni, athathwe yisitha saMi naye [uFirawuni]”. Futhi ngakuthela ngothando oluvela kiMi nokuthi wakhuliswa ngaphambi kwaMehlo Ami.

Mhla udadewenu ehamba [eya kuFirawuni] wathi: “Kunganjani nginitshengise ongakhona ukumnakekela na?”. Sakubuyisela kunyoko ukuze athokoze angakhathazeki. Futhi wabulala umuntu, sakuhlenga osizini saphinde sakuvivinya ngezivivinyo eziningi. Wabe usuhlala esizweni saseMadiyana iminyaka wase usufikela lapho onqunyelwe ukuba ube khona we Musa.

Ngase ngizikhethela wena.

Hambake wena nomfowenu nezibonakaliso zami ningaphezi ukungikhumbula.

Hambani nobabili niye kuFirawuni, impela usephule umthetho ngokwedlulele.

Nobabili nikhulume naye amazwi amnene hleze alalele noma esabe [u Allah].

Bobabili bathi: “Nkosi yethu, impela sesaba ukuthi uyosijezisa noma adaze inkani”.

Wathi [u Allah]: “Ningesabi ngokuba Mina nginani nobabili, ngilalele futhi ngiyabona”.

Iyani kuye nobabili nifike nithi: “Thina siyiZithunywa zeNkosi yakho. Ngakhoke dedela isizwe sakwa Isirayelikithi futhi ungasijezisi. Futhi size nesibonakaliso esivela eNkosini yakho. Ukuthula makube kulowo olandelela indlela yeqiniso”.

Nembala kwembulelwe kithi ukuthi isijeziso siyotholwa yilowo ongakholwa aphinde anganaki.

Wathi [uFirawuni]: “Ubani iNkosi yenu nobabili na, we Musa?”.

Wathi: “iNkosi yethu yilena eyepha yonke into umlingani wayo wase eyihola [kulokho ekudingayo]”.

Wathi: “Pho kwakuyini inkinga yezizwe zasendulo”.

Wathi: “iNkosi yami enolwazi ngabo lulotshiwe eNcwadini, phela iNkosi yami ayilenzi iphutha futhi ayikhohlwa”.

Lena eyenze umhlaba waba wandlaleka wanidabulela kuwo izindlela. Waphinda wehlisa amanzi emvula wanikhiqizela ngawo izitshalo ezahlukene ngambili.

Dlanini nidlise nemfuyo yenu. Impela kulokho kunezibonakaliso kulabo abanogebhezi olubhandlile.

Sinidale ngawo [ngenhlabathi umhlaba] futhi siyonibuyisela kuwo [mhla ningcwatshwa] siphinde sinikhiphe kuwo futhi okwesibili [mhla sinivuswa].

Sambonisa [uFirawuni] izibonakaliso zeThu zonke kepha wangakholwa futhi wenqaba.

Wathi [uFirawuni]: “We Musa, ingabe uze kithi ukuze usikhiphe endaweni yethu ngobuthakathi bakho na?”

Ngakhoke nathi sizokuhlangabeza ngomlingo ofanayo. Beka-ke isikhathi sokuhlangana phakathi kwethu esisosigcina thina nawe, indawo ephakathi nendawo.

Wathi [uMusa]: “Isikhathi senu sokuhlangana, usuku lwemvunulo futhi kumele abantu bathuniswe emini yasekuseni”.

Kepha uFirawuni wakushaya indiva [umlayezo ka Musa]. Wamane wahlanganisa itulo lakhe weza.

Wathi kubo uMusa: “Qaphelani, ningalinge niqambele u Allah amanga funa anibhubhise ngesijeziso. Futhi akazuzi lutho lowo oqamba amanga.

Baphikisana bodwa ngodaba lwabo futhi babhunga ngasese.

Bathi: “Nembala, laba bobabili abalumbi; bafuna ukunikhipha endaweni yenu ngemilingo yabo baphinde baniphuce usiko lwenu olusezingeni.

Ngakhoke, hlanganisani isu lenu bese nima imigqa. Uyohlabana namhlanje lowo oyodla ubhedu.

Bathi: “Musa, ungajikijela noma kube yithi esijikijela kuqala”.

Wathi: “Cha jikijelani nina”. Kwaba usebona izintambo zabo nezinduku zabo ongathi ziyahamba ngenxa yomlingo wabo.

Wazizwa uMusa engenwa itwetwe.

Sathi: “Ungesabi ngokuba nguwena oyodla ubhedu [ozonqoba]”.

Jikijela lokho okusesandleni sakho sokudla, kuyogwinya konke lokhu abakwenzile. Phela lokhu abakwkenzile itulo nje lomlumbi; futhi akukho lapho umlumbi aphumelela khona.

Abalumbi bawa ngobuso bekhothama, bathi: “Siyakholelwa eNkosini kaHaruni noMusa”.

Wathi [uFirawuni]: “Nimkholwa kanjani ngingakaniphi imvumo na? Okusho ukuthi nguyena impela ubongoza wenu onifundise umlingo. Ngizonigenca izandla nemilenze ngokuphambana bese nginibethelela eziqwini zamasundu; niyokwazi-ke ukuthi ngubani phakathi kwethu onesijeziso esinzima nesiyohlala sikhona”.

Bathi [abalumbi]: “Asisoze sakhetha wena kuna lezibonakaliso ezifike kithi naloyo osidalile. Yehlulela okwehlulelayo; phela wehlulela kuphela empilweni yasemhlabeni”.

Thina sikholelwe eNkosini yethu ukuze isithethelele izimpambuko zethu kanye nalokho kwemilingo osiphoqelele kukho. Futhi u Allah nguyena ongcono noyohlala ekhona.

Nebala, loyo oyofika eNkosini yakhe enecala [lokungakholwa]; uyothola iJahanamu, akayikufa kuyo noma aphile.

Kepha loyo oyofika kuYo engokholwayo enze nezenzo ezinhle; labo bayothola izigaba eziphezulu.

Izivande zaphakade okugeleza ezansi kwazo imifula, bahlale kuzo unaphakade. Lowo umvuzo walowo oziphathe kahle.

Futhi sembulela kuMusa ukuthi: “Hamba nezigqila zami ubasheyele indlela eyomile olwandle, ungesabi ukuficwa [uFirawuni] futhi ungabi novalo [lokuminza].

uFirawuni nebutho lakhe babalandela, kepha bambozwa amanzi lawo amamboza.

uFirawuni wabadukisa abantu bakhe, futhi akabaholelanga endleleni eqondile.

Sizwe sakwa Isirayeli, nebala sanihlenga esitheni senu futhi sanibekela isikhathi sokuhlangana ngasohlangothi lwesokudla entabeni iTuri. Futhi sanehlisela imana nezigwaca.

Dlanini kokumsulwa [okuhlanzekile] esinabele kona futhi ningabe seniphula imithetho kukho, funa nehlelwe ulaka lwaMi. Kantike lowo owehlelwa ulaka lwaMi, impela usuke esebhubhile.

Futhi impela Ngingothethelelayo kulowo ozisolayo bese ekholwa enze izenzo ezinhle azimelele endleleni eqondile.

Musa, yini lena ekwenze usheshe ufike ngaphambi kwabantu bakho na?

Wathi: “Labo basezithendeni zami; ngisheshe ukufika kuWe Nkosi yami ukuze uthokoze”.

Wathi [u Allah]: “Impela sibalingile abantu bakho emuva kokuba usuhambile futhi uSamiri ubadukisile”.

Wabuyela ebantwini bakhe uMusa ecasukile elusizi. Wathi: [Bantu bakithi, ingabe iNkosi yenu ayizange yini inithembise isithembiso esihle na? Ingabe sibe side isikhathi kini [nadineka] noma nifune ukuba nehlelwe ulaka oluvela eNkosini yenu, kungakho ningasigcinanga isivumelwano sami na?

Bathi: “Asisiphulanga isivumelwano sakho ngokwethu. Kepha sithweswe imigodla bobucwebe babantu [bakaFirawuni] sayintshinga [emlilweni]. Kanjalo noSamiri waphonsela phakathi [ayekuphethe]”.

Wabakhiqizela umzimba wethole owawubhongisa okwenkomo, base bethi: “Nguye lona okumele nimkhonza nina noMusa kepha wakhohlwa”.

Ingabe ababoni yini ukuthi alikwazi ukubaphendula futhi alikwazi ukubalimaza noma ukubazuzisa ngalutho.

Futhi uHaruni wayekade ethe kubo phambilini: “Bantu bakithi, niyalingwa ngalo [ithole]. Impela iNkosi yenu ngoNomusa. Ngakhoke landelani mina futhi nilalele imiyalelo yami”.

Bathi: “Siyolokhu sihleli kulo silindile kuze uyabuya kithi uMusa”.

Wathi [uMusa]: “Haruni, lapho ubabona beduka, yini ekuvimbile...?”

Ekutheni ungilandele, ingabe nawe wephule umyalelo wami na?

Wathi [uHaruni]: “Mtakamama, musa ungidonsa ngetshebe yami nangekhanda lami. Ngisabe ukuthi uzothi: - uhlakaze isizwe sakwa Isirayeli futhi wangawagcina amazwi ami”.

Wathi [uMusa]: “Yini ngawe weSamiri?”

Wathi: “Ngibone abangakubonanga, ngase ngicaphuna ezinyathelweni zeSithunywa ngakuthela [ebucwebeni obebushiswa]. Ungiyenge kanjalo umphefumulo wami”.

Wathi [uMusa]: “Hamba, ngokuba empilweni yakho kuyomele uthi – ‘ningangithinti’ – futhi unesikhathi sakho ongeke waphuthiswa sona [kwelizayo]. Futhi buka lesi sikhonzwa sakho obuzinze kuso, sizosishisa bese sisifaza emanzini”.

Impela okunguyena enimele nimkhonze ngu Allah kuphela, Lona okungafanele kukhonzwe okunye ngaphandle kwaKhe. Ulwazi lwaKhe lwengamele yonke into.

Sikulandisela kanjalo izindaba zalokho osekwandlula. Futhi sikuphe isikhumbuzo esivela kithi [iKurani].

Lowo oyishaya indiva, uyothwala icala ngoSuku lokwahlulela.

Uyohlala kuso [isijeziso] unaphakade. Waze wamubi umthwalo wabo ngoSuku lokwahlulela.

Ngosuku lapho kuyoshaywa icilongo; siyobuthanisa abanamacala ngalolo suku beluhlaza [isibhakabhaka].

Bayokhulumela phansi phakathi kwabo [bathi]: “Nihlale [izinsuku] eziyishumi kuphela”.

Thina sikwazi kahle lokho abakushoyo lapho ethi lowo ongathi ukhaliphile kubo: “Cha, nihlale nje usuku kuphela”.

Futhi bakubuza ngezintaba. Yithi: “iNkosi yami iyoziphushula zibe impuqumpuqu”.

Uyowushiya [umhlaba] uyithafa eliyisicaba elibushelelezi.

Angeke ubone kugwemba noma ukuba magwici kuwo.

Ngalolo suku bayolandela isigijimi esingenakugwemba. Futhi amazwi ayomthulela Onomusa, ngeke uzwe lutho ngaphandle nje kokuhlebezela.

Ngalolo suku akukho kushweleza okuyoba usizo, ngaphandle okwalowo oyovunyelwa Onomusa aphinde akuthakasele ukuba akhulume.

Wazi konke okungaphambi kwabo [okuzayo] nokusemuva kwabo [okwendlule], kepha bona abasoze bazi konke ngaYe.

Ubuso nobuso buyomthobela Ophilayo Ongumnakekeli. Futhi lowo oyobe ethwele impambuko [ukungakholwa] akasoze aphumelela.

Futhi lowo owenza izenze ezinhle ebe engokholwayo, akayikuwesaba okungekona ubulungiswa noma ukuncishiselwa [umvuzo].

Siyembulele kanjalo iyiKurani yesi Arabhu sacacisa kuyo ezinye zezijeziso, hlele bapheze noma ibakhumbuze ngandlela thize.

Makaphakanyiswe uAllah, iNkosi yeQiniso. Ungajahi ukufunda iKurani kungaphothulwa ukuyembulela kuwe [Muhamadi]. Futhi yithi:”Nkosi yami ngandisele ulwazi”.

Impela senza isivumelwano no Adamu phambilini. Kepha wakhohlwa futhi asimtholanga enokuzimisela.

Khumbula mhla sithi kuzingelosi: “Khothamelani u Adamu niwe ngobuso; zakhothama ngaphandle kuka Ibilisi, yena wala”.

Sathi: “Adamu, nebala lona isitha sakho nomkakho; makanganikhiphi-ke eJana funa nisokole”.

Ngokuba awusoze walamba noma uhambaze kuyo.

Futhi awusoze wonywa noma ushiswe yilanga kuyo.

uShayitani wamhlebela wathi: “Adamu, kunganjani ngikukhombise isihlahla saphakade nobukhosi obungapheli na?”

Badla kuso [isihlahla] babanqunu, baqala ukuzimboza ngamacembe aseJana. U Adamu wawuphula umyalelo weNkosi yakhe waphambuka.

Emuva kwalokho yamqoka iNkosi yakhe yamthethelela yamholela endleleni eqondile.

Wathi [u Allah]: “Yehlani kuyo nonke; abanye benu bayoba izitha kwabanye. Ngakhoke uma kufika kini ukukhanya okuvela kiMi; lowo oyolandela ukukhanya kwaMi angeke aduka futhi angeke abe nesiphetho esibi.

Kepha lowo ofulathela isikhumbuzo saMi; uyoba nempilo enzima. Futhi siyomvusa ngoSuku lokwahlulela eyimpumputhe.

Uyothi: “Kungani ungivuse ngingaboni na, ngibe bengibona [phambilini] na?”

Uyothi [u Allah]: “Kanjalo yafika kuwe imibiko yeThu kepha wayingayinaka. Kanjalo-ke nawe namhlanje awuyikunakwa”.

Simjezisa kanjalo lowo ophula umthetho ebe engakholwa imibiko yeNkosi yakhe. Futhi isijeziso sakwelizayo sinzima futhi sihlala sikhona.

Ingabe ababonanga yini ukuthi maningi kanjani abezinye izizwe abahamba ezindaweni zabo esababhubhisa ngaphambi kwabo. Impela kulokho kunezibonakaliso kulabo abakhaliphile.

Ukube bekungesiso isinqumo esibekiwe esivela eNkosini yakho [sokudondisa isijeziso] nesikhathi esibekiwe, besizobehlela [isijeziso besasemhlabeni].

Ngakho-ke kubekezelele lokho abakushoyo ubabaze udumo lweNkosi yakho ngaphambi kokuphuma kwelanga nangaphambi kokuba lishone. Nangezikhathi zakusihlwa, mbabaze. Nasemaphethelweni emini hleze uthokoze.

Futhi amehlo mawangalangezeleli lokho esikwabele labo abafana nabo [abangakholwa], okungubukhazikhazi bempilo yasemhlabeni ukuze sibavivinye ngakho. Futhi isabelo seNkosi yakho singcono futhi sihlala sikhona.

Yalela umndeni wakho ngeswala ubambelele kuyo. Asikuceli sondlo; yithina esikondlayo. Futhi isiphetho esalabo abathobela u Allah.

Bathi: “Kungani engasiletheli isibonakaliso esivela eNkosi yakhe na?” Abuzange yini bufike kubo ubufakazi obabuqukethwe iMibhalo yasendulo na?

Ukube sababhubhisa ngesijeziso ngaphambi kwaso [iSithunywa], bebezothi: “Nkosi yethu, okungenani ngabe uthumele iSithunywa kithi ukuze silandele imibiko yaKho anduba siphoxeke noma sihlazeke”.

Yithi: “Bonke balindele, ngakhoke nani lindani, kungekudala niyokwazi ukuthi ngobani abasendleleni eqondile nalabala abasekukhanyeni”.

Ukuhlulelwa kwabantu sekusondele kulapho bona benganakile bengenandaba.

Konke okuvela eNkosini yabo okuyimvuselelo yesikhumbuzo, bakulalela bedlala.

Izinhliziyo zabo zinganakile. Futhi labo abaphambukile babhunga ngasese [bathi]: “Lona ngumuntu ofana nje nani. Pho niya kanjani kumlimgo nibe nibhekile na?”

Wathi: “iNkosi yami ikwazikonke okushiwoyo ezulwini nasemhlabeni. Nguyena Ongozwayo Owaziyo”.

Kepha bathi: “ [iKurani] imbudane nje yamaphupho; empeleni [uMuhamadi] uziqambele yona kokunye uyimbongi [eqamba izinkondlo]. Makasilethele isibonakaliso njengoba kwenza iZithunywa zaphambilini”.

Ezinye zezizwe ezingakholwanga ngaphambi kwabo, sazibhubhisa. Ingabe bona bazokholwa na?

Futhi sathumela ngaphambi kwakho amadoda [ayiZithunywa] ebesembulela kuwo. Ngakhoke buzani labo abanolwazi uma ningazi.

Futhi asibenzanga izidumbu nje ezingadli ukudla futhi abaphilanga ubaphakade.

Futhi sasigcina isithembiso sabo sabahlenga nalabo esibathandayo sabhubhisa labo abephula umthetho.

Nebala sinilethele iNcwadi enodumo lwenu, kungani ningaqondi na?

Ziningi izizwe ezaziphambukile esazibhubhisa sazishabalalisa. Sadala abanye abantu emuva kwazo.

Kuthe lapho bebona isijeziso seThu esinzima, bateta izithende emhlane [babaleka].

Ningabaleki, buyelani kulokho ebeninetheze kukho nasemizini yenu ukuze nibuzwe.

Bathi: “Kuphelile ngathi! impela singabaphambukile”.

Lokhu kwaba ukukhala kwabo saze sabenza okwesivuno bedindilizile befile.

Futhi asidalanga izulu nomhlaba nokumaphakathi ngoba sidlala.

Ukube besifuna ukuchitha isizungu [ngokuba nengane noma umfazi] besiyomqoka kithi uqobo, kepha asisoze sakwenza.

Sijikijela amanga ngeqiniso liwahlakaze avane ashabalala. Futhi niyothola isijeziso ngenxa yalokho enikushoyo.

Bonke abasemazulwini nasemhlabeni bangabaka Allah. Futhi labo abakuYe abazigqaji ekumkhonzeni futhi abadineki.

Bambabaza ubusuku nemini abakhathali.

Ingabe baziqokele izikhonzwa zasemhlabeni ezikwazi ukuvusa abafileyo na?

Ukube kwakukhona ezinye izikhonzwa ezulwini nasemhlabeni ngaphandle kuka Allah, kwakuyoxubana ubendle impela. Makangcweliswe u Allah iNkosi yeSihlalo kulokho amakushoyo.

Akabuzwa ngalokho akwenzayo, kepha bona bayobuzwa.

Ingabe baqoke izikhonzwa ngaphandle kwaKhe [u Allah] na? Yithi: “Lethani ubufakazi benu. Nali ulwazi ngalabo abanami [iKurani] nolwazi ngalabo abangandulelayo [iziNcwadi zaphambilini]. Empeleni abaningi kubo abalazi iqiniso, yingakho nje beshaya indiva.

Asikho iSithunywa esasithumela ngaphambi kwakho esingembulelanga kuso ukuthi: “Akekho okumele akhonze ngaphandle kwaMi, ngakhoke khonzani Mina [ngedwa]”.

Futhi bathi, Onomusa unengane. Makangcweliswe! Empeleni yizigqila ezihloniphekile [izingelosi].

Azikhulumi engakaziphi imvumo. Futhi zenza ngokomyalelo waKhe.

Wazi konke okungaphambi kwazo [okuzayo] nokusemuva kwazo [okwendlule]. Futhi aziyukushwelezela muntu ngaphandle kwalowo amvumele. Futhi ngenxa yokumesaba zihlala zithukile.

Uma omunye wazo engathi: “Yimina okumele ningikhonze ngaphandle kwaKhe [u Allah]”. Loyo siyomjezisa ngeJahanamu. Sibajezisa kanjalo abaphambukayo.

Ingabe laba abangakholwa ababonanga yini ukuthi amazulu nomhlaba kwakuhlangene, sakuhlukanisa. Futhi senza yonke into yaphila ngamanzi. Abakholwa ngani na?

Sagxumeka izikhonkwane [izintaba] emhlabeni ukuze ungazamazami nabo. Saphinde safaka izindlela ezibanzi ukuze baholeleke.

Senza isibhakabhaka uphahla oluqinile. Kepha bona abazinakile izibonakaliso zaso.

Futhi nguYena lona owadala ubusuku nemini nelanga nenyanga. Konke kuhamba emzileni [wayo].

Akekho umuntu esamunika impilo yaphakade ngaphambi kwakho. Ngakhoke, uma wena [Muhamadi] uzofa; ingabe bona bazophila unaphakade na?

Wonke umphefumulo uyowunambitha ukufa. Futhi siyonivivinya ngokubi nangokuhle bese niphindiselwa kithi.

Labo abangakholwa uma bekubona bakwenza inhlekisa [bathi]: “Ingabe nguyena lona okhuluma ngezikhonzwa zenu na?”. Kulapho bona bengakholwa okukhulunywa ngoNomusa.

Umuntu udalwe enokujaha. Sizonibonisa izibonakaliso zeThu, ngakhoke ningajahi.

Futhi bathi: “Siyofika nini lesi sithembiso uma ngempela niqinisile”.

Ukube labo abangakholwa bebazi ngesikhathi lapho bengeke bakwazi ukuvikela ubuso babo nemihlane yabo eMlilweni futhi bengeke basizakala.

Empeleni siyofika bengazelele, sibasanganise. Belu ngeke bakwazi ukusibusela emuva futhi abayikunikwa thuba.

Nebala iZithunywa ezingaphambi kwakho zenziwa inhlekisa. Kepha labo ababehlekisa ngabo bahaqwa yilokho ababehlekisa ngakho.

Yithi: “Ngubani oyonivikela koNomusa ebusuku nasemini na?” Empeleni abanendaba ngokushiwo iNkosi yabo.

Mhlawumbe banezikhonzwa ezizobavikela ngaphandle kweThu. Kepha abakwazi ukuzisiza bona uqobo futhi akekho oyabavikela kithi.

Siphe laba nokhokho babo ukunethezeka isikhathi eside. Ingabe ababoni yini ukuthi silokhu siza siwudla kancane umhlaba ezinhlangothini zawo na? Ingabe bayonqoba na?

Yithi: “Nginisabisa ngalokho okwembulelwe”. Futhi isimumu asisoze sakwazi ukuzwa isimemezelo lapho sixwayiswa.

Uma betholwa isabelo nje esincane sesijeziso seNkosi yakho, bathi: “Kuphelile ngathi, impela siphambukile”.

Siyobeka izikali zobulungiswa ngoSuku lokwahlulela. Akukho mphefumulo oyokwenziwa okungebulungiswa nakancane nje. Noma kungaba into elingana nesisindo sohlamvu oluncane, siyokuletha. Futhi Thina sanele njengaba Hluleli.

Futhi sanika uMusa noHaruni umhlahlandlela [iTora] nokukhanya kanye nesikhumbuzo kulabo abathobela u Allah.

Labo abesaba iNkosi yabo bengayibonanga futhi besaba neSikhathi [sokwahlulela].

Futhi lesi isikhumbuzo esibusisekile esisambulele. Ingabe niyosiphika na?

Sanika u Ibhirahimu ukukhalipha kwakhe phambilini futhi besazi ngaye.

Mhla ethi kuyise nakubantu bakubo: “Yini lezithixo enilokhu nizinze kuzo na?”.

Bathi: “Sathola okhokho bethu bezikhonza”.

Wathi: “Impela nina nokhokho benu benisephutheni elisobala”.

Bathi: “Ingabe usilethele iqiniso noma nje uyadlala?”

Wathi: “Empeleni iNkosi yenu, iNkosi yamazulu nomhlaba lena eyawadala futhi ngingomunye wabafakazela lokho”.

Ngimfunge u Allah, ngizokwakhela izithixo zenu itulo lapho senihambile ningekho.

Wazenza izicucu zonke ngaphandle kwesikhulu kunazo zonke ukuze mabuyele kuso.

Bathi: “Ubani owenze lokhu kuzikhonzwa zethu, impela akanabulungiswa”.

Bathi: “Sizwe lelibhungu okuthiwa ngu Ibhirahimu likhuluma ngazo”.

Bathi: “Mletheni phambi kwabantu ukuze babe ngofakazi”.

Bathi: “Ibhirahimu, ingabe nguwe owenze lokhu kuzikhonzwa zethu na?”

Wathi: “Empeleni yilesi esikhulu esikwenzile; ngakhoke buzani sona uma zikwazi ukukhuluma”.

Bathi ukuzidla bahlaziya base bethi: “Nebala yinina eniphambukile”.

Kepha babuyela enkanini yabo [bathi]: “Wazi kahle ukuthi lezinto azikwazi ukukhuluma”.

Wathi: “Nikukhonza kanjani ngaphandle kuka Allah lokho okungakwazi ukunizuzisa utho futhi kungakwazi nokunilimaza na?”.

Hhayi suka! Kungani pho nilokhu nikhonza okunye ngaphandle kuka Allah; anisile yini emakhanda na?

Bathi: “Mshiseni, nilekelele izikhonzwa zenu uma ngempela nizimisele”.

Sathi: “Mlilo phola ungamlimazi u Ibhirahuimu”.

Babefuna ukuqeda ngaye kepha sabenza kwaba yibona abalahlekelwayo.

Yena [u Ibhirahimu] noLuti sabahlengela ezweni [laseShamu] leli esalibusisela izizwe zonke.

Sabe sesimupha u Isihaki samengezelango Yakubu. Bobabili sabenza baba qotho.

Saphinde sabenza abaholi ababehola ngokomyalelo weThu sembulela futhi kubo ukuba benze izenzo ezinhle neswala nokunika izakati futhi babekhonza Thina.

uLuti naye samunika ubuhlakani nolwazi saphinde samhlenga endaweni [yaseSodoma] lapho ababenza khona amanyala. Nembala babengabantu abagcolile abayiziphula mthetho.

Samfaka emseni weThu, impela wayengowabanye abaqotho [abenzibokuhle][1]. ——— [1] Lombiko uyichitha uyihlakaze enye yezinkolelo ezidumile engumbhedo nomsangano namanga aluhlaza cwe. Lena ehlongoza ukuthi iSithunywa uLuti emuva kokuhlenga ngu Allah, yena namadokazi akhe bahlala emgedeni, kwase kuthi amadodakazi akhe amakhela itulo lokuya naye ocansini. Kulombiko u Allah uyakugcizelela ukuthi wabe eyisigqila esiqotho. Okusho ukuthi wayenza futhi alandele imiyalelo ka Allah. Ukukholwa yilembudane kuwukudicilela nokuthunaza isithunzi seSithunywa sika Allah esihloniphekile, okuyicala elibomvu. Ngoba ukuweyisa iSithunywa esisodwa sika Allah, kuwukweyisa zonke iZithunywa zika Allah. Ngamanye amagama umuntu okholwa yilensambatheka uchaza ukuthi iZithunywa zika Allah azinasimilo.

Khumbula futhi mhla uNuhu ekhuleka phambilini. Sawuphendula umkhuleko wakhe, naye samhlenga kanye nomndeni wakhe osizini olunzima.

Saphinde samsiza kubantu, laba abathatha imibiko yeThu njengamanga. Impela, babengabantu abonakele. Ngakhoke, sabaminzisa bonke ngothi lwabo.

Khumbula futhi uDawudi noSulayimani mhla behlulela odabeni lwezitshalo okwafohlela kuzo izimvu zabantu [ebusuku zingalusiwe]. Futhi Besikhona ekwahluleleni kwabo.

Senza uSulayimani kwaba nguye oluqondayo. Kepha bobabili [yena noyise] sabapha ubuhlakani [ubuthunywa] nolwazi. Futhi sajubela uDawudi izintaba nezinye zidumisa naye; futhi yithina ebesikwenza [lokho].

Saphinde samfundisa ukwenza izembatho zokuzivikela ukuze zinivikele ezimpini zenu. Akenibongeke.

Futhi sanika uSulayimani umoya oyisivunguvungu ohamba ngomyalelo wakhe uye ezweni esafaka kulo izibusiso. Futhi besazi ngayo yonke into.

Futhi bekuno Shayitani ababemtshuzela [olwandle] baphinde benze eminye imisebenzi. Futhi besibaqaphile.

Khumbula futhi u Ayubu mhla ekhuleka eNkosini yakhe [ethi]: “Ngehlelwe ubunzima futhi Wena unomusa ukudlula bonke abanomusa”.

Sawuphendula umkhuleko wakhe, sabususa ubunzima ayenabo, samnika umndeni wakhe usuphindwe kabili njengomusa ovela kithi nesikhumbuzo kulabo abakhonzayo.

Khumbula futhi u Isimai’ili no Idirisi noDulikifili; bonke babengababekezelayo.

Sabafaka emseni weThu. Impela babengabaqotho.

Khumbula futhi uDun-nuni mhla ehamba ecasukile, wacaba ukuthi asisoze samthola. Wakhuleka emajukujukwini obumnyama wathi: “Akekho okufanele akhonzwe ngaphandle kwaKho. Ungcwele, impela ngiphambukile”.

Sawuphendula umkhuleko wakhe samhlenga osizini. Futhi sibahlenga kanjalo abakholwayo.

Khumbula futhi uZakariya, mhla ekhuleka eNkosini yakhe [ethi]: “Nkosi yami, ungangiyeki ngingedwa [ngingenandlalifa] ube Wena ungongcono kulabo abayizindlalifa”.

Sawuphendula umkhuleko wakhe, samupha uYahiya samlungisela umkakhe. Impela babehlala njalo beziphuthuma izinto ezinhle baphinde bakhuleke kithi ngokulangezelela nangokwesaba. Futhi babezithoba benesizotho kithi.

Khumbula futhi nalowo owavikela ubuntombi bakhe. Saphefumulela kuye ngomoya weThu. Samenza yena nendodana yakhe isibonakaliso kundalo yonke.

Iyonake lena inkolo yenu – inkolo eyodwa; futhi Mina ngiyiNkosi yenu ngakhoke ngikhonzeni.

Kepha bahlakazeka phakathi kwabo, kodwa bonke bayobuyela kithi.

Lowo owenza izenzo ezinhle ebe engokholwayo; izithukuthuku zakhe angeke zicekelwe phansi; futhi Thina sizilobile.

Kunqatshelwe kunasiphi isizwe esasibhubhisa ukuba babuyele emuva [emhlabeni].

Kuze kube mhla kuvulelwa abakwa Ya’juju noMa’juju, lapho beyophuma kuzo zonke izindunduma begijima.

Siyosondela isethembiso seqiniso [uSuku lokwahlulela]; amehlo alabo abangakholwa ayobe endwazile [bethi]: “Kwaze kwaphela ngathi, impela besingenendaba ngalolu suku, eqinisweni besiphambukile”.

Nina kanye nalokho enikukhonzayo ngaphandle kuka Allah niyoba izithungelo zaseJahanamu imbala, niyongena kuyo.

Ukube laba bebeyizikhonzwa ezifanelwe ukukhonzwa ngabe bebengeke bangene kuyo; futhi bonke bayobhadla kuyo unaphakade.

Bayobephefumulela phezulu [okomuntu onephika] kuyo kepha bengezwa.

Impela labo abavele sebenqunyelwe kithi iJana ngaphambilini; labo-ke bayoqheliselwa kude nayo [iJahanamu].

Abayikuzwa ngisho umsindo wayo [iJahanamu]. Futhi bayohlala unaphakade lapho abayothala konke abakufisayo.

Ukwesaba Okukhulu angeke kubakhathaze. Futhi izingelosi ziyobahlangabeza [zithi]: “Yilona lolo uSuku lwenu enanithenjiswe lona”.

Mhla siyosonga izulu njengokusongwa kwemibhalo esemiqulwini. Njengeba sayisungala indalo okokuqala siyophinda siyivuse. Kuyibophezelo kithi; impela siyokwenza.

Futhi saloba eziNcwadini zasendulo emuva kokuloba Oqwembeni, ukuthi, izwe ifa eliyotholwa yizigqila zaMi eziqotho.

Nebala lokhu [okuqukethwe iKurani] kwanele kubantu abakhonzayo.

Futhi sikuthumele njengemusa kundalo yonke.

Yithi: “Impela, kwembulelwe kimi ukuthi, okumele nimkhonze uyedwa nje vo; ngakhoke nani zinikeleni ke [nibe amaMusilimu]”.

Kepha uma bekushaya indiva, yithi: “Nginazisile ngokwanele. Futhi nami angazi ukuthi sekuseduze kumbe kusasekude lokhu enithenjiswe kona”.

Nebala nguYena [u Allah] owazi inkulumo esobala esidlangalaleni futhi wazi nalokho enikufihlayo [ngasese].

Futhi mina angazi ukuthi [ukudondiswa kwesijeziso] hleze kube yisivivinyo kini nokuthi nincebeleke okwesikhashana.

Wathi [uMuhamadi]: “Nkosi yami yehlulela ngeqiniso! Futhi iNkosi yethu Onomusa, iYona eyosinceda ngalokho abakushoyo”.

Nina bantu, thobelani iNkosi yenu, ngokuba ukuzamazama ngeSikhathi [sokwahlela] into enzima impela.

Mhla lapho niyobona umame oncelisayo ekhohlwa [uswana] aluncelisayo nozethwele uyozalela khona lapho. Futhi uyobona abantu engathi badakiwe kulapho bengadakiwe kepha isijeziso sika Allah sinzima.

Futhi kunalabo bantu abaphikisa ngo Allah bengenalwazi futhi ebe elandela wonke uShayitane oyihlongandlebe.

Unqunyelwe ukuthi lowo oyomlandela, uzomdukisa aphinde amholele esijezisweni somlilo.

Nina bantu, uma ninokungabaza ngokuvuswa [kwelizayo emuva kokofa]; bhekani ngoba sanidala ngobumba kwaba yisidoda kwaba ihlulu kwaba umbungu ophelele nongaphelele ukuze sinicacisele; futhi sigcina esikuthandayo ezibelethweni kuze kufike isikhathi esibekiwe; bese sinikhipha niyizingane, bese niyakhula nibe badala. Phakathi kwenu kunalabo abafayo [besebasha] kuthi abanye baze baguge baphenduke izintothoviyane ezingasazi lutho. Futhi uzobona umhlaba womile, kuthi lapho sesehlisele amanzi [emvula] kuwo uvele uqhakaze wande uphinde ukhiqhize lonke uhlobo oluhle lwezitshalo.

Lokho ngungenxa yokuthi u Allah uyiQiniso nokuthi nguYena ovusa abafileyo nongehlulwa yilutho.

Nokuthi iSikhathi [sokwahlulela] siyeza, akunakungabaza ngaso; nanokuthi u Allah uyobavusa labo abasemathuneni.

Phakathi kwabantu kunalowo ophikisana ngo Allah engenalwazi noma incazelo noma incwadi ecacisayo.

Uvele abheke le [ezigqaja], ukuze adukise [abantu] endleleni ka Allah [i-isilamu]. Uyothola ukuhlazeka lapha emhlabeni, kuthi ngoSuku lokwahlulela simzwise isijeziso somlilo.

Lokho, kungenxa yemisebenzi yezandla zakho nokuthi u Allah akasoze enze okungebulungiswa esigqileni.

Phakathi kwabantu, kunalowo okhonza u Allah enongabazane. Uma kumhambela kahle uyaqhubeka [ngokukhonza u Allah]. Kepha uma ehlelwa ubunzima uyajika [abe yimbuka]; akazuzanga lutho emhlabeni nakwelizayo. Lokho ukulahlekelwa okusobala.

Ukhonza ngaphandle kuka Allah lokho okungeke kwamlimaza [uma engakulaleli] futhi okungeke kwamzuzisa [uma ekulalela]. Lokho ukuduka okujulile.

Ukhonza lowo ubungozi bakhe buseduze kunosizo kwakhe. Waze wamubi umsizi nomhlanganyeli bo.

Nebala labo abakholwayo abenza nezenzo ezinhle u Allah uyobangenisa ezivandeni okugeleza ezansikwazo imifula. Impela u Allah wenza akufunayo.

Lowo ocabanga ukuthi u Allah akasoze amsiza [uMuhammadi] emhlabeni nakwelizayo; makabophele intambo ophahleni azikhunge ngalo bese ebheka-ke ukuthi lomzamo wakhe uyoyiqeda yini lenzondo anayo na?

Futhi sayembulela kanjalo [iKurani] iyimibiko ecacile nokuthi u Allah uhola amfunayo.

Impela labo abakholwayo, nalabo abangamaJuda[1], namaNasarina[2] namaSabiya[3] kanye noMajusi[4] nalabo ababhangqayo[5]; u Allah uyokwahlulela phakathi kwabo ngoSuku lokuKwahlulela. Phela u Allah uyiqhaphe yonke into impela. ——— [1] Bheka [1:62]. [2] Bheka [1:62]. [3] Bheka [1:62]. [4] Yilabo inkolo yabo incike kakhulu ekukhonzeni umlilo. [5] Kufaka phakathi labo abakhonza izithixo, amadlozi, abanye abantu abaphilayo, izilwane, imifanekiso, njalo njalo.

Awuboni yini ukuthi bonke abasemazulwini nasemhlabeni kanye nelanga nenyanga nezinkanyezi nezintaba nezihlahla nezilwane neningi labantu, konke kuwa ngobuso kukhothamela u Allah. Kanti futhi baningi abafanelwe isijeziso. Futhi lowo u Allah amhlazile akekho oyombuyisa isithunzi. Impela u Allah wenza akufunayo.

Laba ababili abaphikisanayo baphikisana ngeNkosi yabo. Labo abangakholwa bayosikelwa izembatho emlilweni, bathelwe ngamanzi ashisayo ekhanda.

Kuyoncibikaliswa ngawo lokho okuseziswini zabo kanjalo nezikhumba.

Futhi [bayoshaywa] ngezando zensimbi.

Kuyothi njalo uma befuna ukuphuma kuwo [umlilo] ngenxa yosizi; bayobuyiselwa kuwo [kuthiwe]: “Yizwani-ke isijeziso somlilo”.

Labo abakholwayo benze nezenzo ezinhle, impela u Allah uyobafaka ezivandeni okugeleza enzansi kwazo imifula, bayohlotshiswa kuzo ngeziqhizo zegolide nangamalulu, futhi izembatho zabo kuzo kuyoba isilika [emnene].

Futhi bayoholelwa emazwini amahle baphinde baholelwe endleleni encomekayo [i-Isilamu].

Impela labo abangakholwa nabayisihibe endleleni ka Allah naseMasijidiHaramu, lena esayenzela isintu ngokulinganayo, kungaba ozonzile kuyo noma oyisihambi. Futhi lowo ohlosa ukwenza kuyo [iMasijidiHaramu] impambuko ngokungebulungiswa siyomzwisa isijeziso esibuhlungu.

Khumbula futhi mhla sikhombisa u Ibhirahimu indawo yeNdlu [iKaba], [sathi kuye]: “Ungabhangqi lutho naMi. Futhi uhlanze iNdlu yami, [uyihlanzele] labo abayizungezayo nalabo abathandazayo [bemile, bekhotheme bewa nangobuso].

Memezela ngeHaji kusintu sonkana. Bayoza kuwe ngezinyawo nangamakameli bewagibele; beza ngazo zonke izindlela eziqhamuka ekudeni.

Ukuze bazibonele lokho okuyinsizakalo kubo baphinde babalule igama lika Allah ezinsukwini ezaziwayo ngalokho ababele kona ezilwaneni zemfuyo [ezizohlatshwa]. Ngakhoke, dlanini kuzo niphe nalowo abaphuyile [abadla imbuya ngothi].

Bese beqedelela ukususa izinsila zabo [ngokuqeda zonke izinkambiso ezisele], bagcine nezibopho zabo bese benza iTawafu [ukuzungeza] yeNdlu ekhululiwe [iKaba].

Lokho, nalowo ohlonipha izinkambiso zika Allah ezihloniphekile, yikona okongcono kuye eNkosini yakhe. Futhi nivunyelwe izilwane ezidliwayo ngaphandle kwalezi enilandiswe ngaso[1]. Ngakhoke ziqhelelaniseni nokungcola kwezithixo niphinde niziqhelelanise namanga. ——— [1] Bheka [5:3].

Nibe msulwa ku Allah ningambhangqi nalutho. Futhi lowo obhangqa u Allah, kungathi uwe emkhathini wahlwithwa yinyoni noma wahamba nomoya wamusa endaweni esekudeni[1]. ——— [1] Lokhu kungenxa yokuthi akanayo injongo ngqangi empilweni, ufana nomuntu osemkhathini ongazi ukuthi ubuyaphi nokuthi uyaphi. Ngenxa yalokho nesimo akuso uphenduka isisulu kalula nje sayo yonke imikhuhlane nemimoya ahlangebezana nayo emhlabeni, osiphetho sayo siyafa; ukumnhlanhlathisa nokumdukisa kude le neqiniso.

Lokho, nalowo ohlonipha Izimpawu zika Allah, impela kusuka ekuthobeni kwezinhliziyo.

Ninezinsizakalo kuzo [izilwane zomhlatshelo] kuze kufike isikhathi esibekiwe emuva kwalokho ziyohlatshwa eNdlini ekhululiwe.

Futhi zonke izizwe [zabakholwayo zaphambilini] sababekela izinkambiso [zokuhlaba] ukuze babalule igama lika Allah kulokho ababele kona ezilwaneni ezidliwayo. Belu okumele nimkhonze uyedwa vo, ngakhoke zinikeleni kuYe. Futhi thula izindaba ezimnandi kulabo abazithobayo.

Laba okuthi uma kuphathwa igama lika Allah, izinhliziyo zabo zigcwala ukwesaba futhi banga babekezelayo kulokho okubehlelayo baphinde benze neswala nakulokho esibabele kona bayanikela.

Amakameli anonile nawo siwenze aba ezinye zezimpawu zika Allah, ninokuhle kuzo. Ngakhoke phimisani igama lika Allah kuwo lapho limile [nilihlaba]. Uma seliwile ngohlangothi, dlanini kuwo niphe ohluphekayo ongaceli nocelayo. Sinijubele wona kanjalo ukuze nibonge.

Inyama yawo ayisoze yafika ku Allah kanjalo negazi lawo kepha iTakuwa [ukuthobela intando ka Allah nokuzinikela kuYe] evela kini efika kuye. Unijubele wona kanjalo ukuze niqhakambise ubukhulu buka Allah ngalokho aniholele kukho. Futhi yethula izindaba ezinhle kulabo abenza okuhle.

Impela u Allah uyabavikela labo abakholwayo; ngokuba u Allah akamthandi impela wonke lowo oyiqili ongabongi.

Labo abahlaselwa ngokungebulungiswa bavunyelwe [ukuba baziphindiselele], futhi impela u Allah unamandla okubasiza [abakholwayo bengalwanga].

Labo abakhishwa emizini yabo ngokungemthetho, ngenxa nje yokuthi bathi: “u Allah iNkosi yethu”. Ukube u Allah akavikelanga abanye abantu ngabanye, ngabe kade abhindlizwa amaTempeli nama Sonto nama Sinagogi nama Masijidi okuphathwa igama lika Allah kakhukulu. Futhi u Allah nakanjani uyomsiza lowo omsizayo [ngokuvikela intando]. Impela u Allah Ungumninimandla onguSomandla.

Labo uma sibamisa emhlabeni baqikelele ukwenza iswala bakhiphe nezakati bagqugquzele okuhle banqande okubi. Futhi isiphetho zezinto [zonke] ngesika Allah.

Uma bekuphika, kanjalo nalabo ababandulelayo baphika; isizwe sikaNuhu no Adi kanye noTamudi.

Nesizwe sika Ibhirahimu nesika Luti.

Nabantu base Madiyana. No Musa waphikwa; ngabayeka okwesikhashana laba abangakholwa ngase ngibajezisa. Bheka nje ukuthi saba njani isijeziso saMi.

Ziningi izizwe esazibhubhisa mhla ziphambuka; zawa bhu phansi nophahla lwazo. Futhi miningi nemithombo eyekelelwe nezinqaba eziphakeme.

Ingabe abahambanga yini ezweni babe nezinhliziyo abaqonda ngazo noma izindlebe abezwa ngazo. Empeleni, akuwona amehlo angaboni, kepha yizinhliziyo lezi ezisezifubeni okuzona ezingaboni.

Futhi bakujaha ngesijeziso; bheka ngoba u Allah akasoze asiphula isethembiso saKhe. Futhi usuku olulodwa eNkosini yakho lulingana neninyaka eyinkulungwane kulokhu enikubalayo[1]. ——— [1] ukubalwa kweminyaka……..

Futhi ziningi izizwe esazipha isikhathi nakuba zaziphambukile. Sabe sesizijezisa belu isiphetho sikiMi.

Yithi: “Sintu, impela ngingumexwayisi ocacile kini”.

Ngakhoke, labo abakholwayo baphinde benze okulungileyo, bayothola intethelelo nesondlo esihle.

Kuthi labo abazikhandla ukuphikisana nemibiko yeThu, yibona kanye abayongena emlilweni.

Futhi yileso naleso Sithunywa noMembulelwa [uMphorofeti] esamthumela ngaphambilini kwakho [Muhamadi]; kwakhuthi lapho uma efunda, uShayitani azame ukwengeza ekufundeni kwaso. Kepha u Allah uyakwesula lokho okwengezwa uShayitane bese ehlunga ngobuchule imibiko yaKhe. U Allah Unolwazi Ukhaliphile.

Ukuze enze lokho okwengezwe uShayitani kube isivivinyo kulabo abanokufa [ukuzenzisa] ezinhliziyweni zabo nalabo ozinhliziyo zabo zilukhuni.

Nokuthi labo abaphiwe ulwazi bazi ukuthi iyiqiniso [iKurani] elivela eNkosini yakho, ukuze bakholwe yiyo nezinhliziyo zabo ziyithobele. Impela u Allah unguMholeli walabo abakholwayo endleleni eqondile.

Futhi labo abangakholwa bayohlala beyingabaza kuze kube mhla kufika iSikhathi bengazelele noma bafikelwe isijeziso soSuku olomile [uSuku lokwahlulela].

Bonke ubukhosi ngalolo Suku bungobuka Allah, uyokwahlulela phakathi kwabo. Ngakhoke, labo abakholwayo baphinde benze okulungileyo bayongena ezivandeni zengcebeleko.

Kuthi labo abangakholwa baphinde bathatha imibiko yeThu njengamanga, labo, yibona kanye abathola isijeziso esithunazayo.

Futhi labo abafudukela endleleni ka Allah bese bebulawa noma bazifele, u Allah uyobondla ngesondlo esihle. Impela u Allah unguMondli ongcono.

Uyobangenisa endaweni abayoyithakasela. Impela u Allah Unolwazi Unesineke.

Lokho; lowo ophindisela ngokulingene lokho ahlukunyezwe ngakho kepha bese ehlukunyezwa ngokungemthetho, u Allah uyomsiza nakanjani. Impela u Allah Umnene Ungumthetheleli.

Lokho, yingoba u Allah ufaka ubusuku emini afake imini ebusuku nokuthi impela u Allah Ungozwayo Obonayo.

Lokho; yingoba u Allah nguYena Oyiqiniso kanti lokhu abakukhonzayo ngaphandle kwaKhe kuwumbhedo, nokuthi u Allah nguYena Ophakeme Omkhulu.

Awuboni yini ukuthi u Allah wehlisa amazi emvula bese umhlaba uguquke ube luhlaza. Impela u Allah Ungonakayo Onolwazi.

Konke okusemazulwini nasemhlabeni kungokwaKhe. Belu impela u Allah Ungozimele Odunyiswayo.

Awuboni yini ukuthi u Allah unijubele konke okusemhlabeni kanjalo nomkhumbi ohamba olwandle ngomyalelo waKhe. Futhi ubambe isibhakabhaka ukuba singaweli phezu komhlaba, ngaphandleke uma ekuvumela [lokho]. Impela u Allah Unobubele Unesihe kusintu.

Futhi nguYena onipha ukuphila aphinde akuthathe aphinde anivuse. Impela umuntu akakholwa.

Isizwe nesizwe sisibekele inkambiso abahambisa ngayo. Ngakhoke mabangaqophisani nawe kuloludaba. Futhi memela eNkosini yakho; impela usekukhanyeni okuqondile.

Kepha uma bephikisana nawe, yithi: “u Allah ukwazi kahle lokho enikwenzayo”.

U Allah uyokwehlulela phakathi kwenu ngoSuku lokwahlulela kulokho eniphikisana ngakho.

Awazi yini ukuthi u Allah wazi konke okusezulwini nasemhlabeni. Impela lokho kulotshiwe [oqwembeni olulondiwe]. Impela lokho kuwubala ku Allah.

Futhi bakhonza ngaphandle kuka Allah lokho okungenabufakazi ngakho nalokho abangenalwazi ngakho. Futhi labo abaphambukile akekho oyobahlenga.

Uma befundelwa imibiko yeThu ecacile, ubona ukunyukubala ebusweni balabo abangakholwa. Kusala nje kancane ukuba babagxavule labo ababafundela imibiko yeThu. Yithi: “Kunganjani nginazise ngokubi kakhulu kunalokho na? Umlilo u Allah awuthembise labo abangakholwa, futhi saze sasibi isiphetho”.

Nina bantu, kwenziwe umzekelo ngakhoke wulaleleni. Impela labo enibakhonzayo ngaphandle kuka Allah abasoze badala ngisho impukane noma bengayihlanganela. Futhi uma impukane ibahlwitha utho abasoze bakhona ukuyiphuca kona. Akanamandla umthungathi [izikhonzwa] nothungathwayo [impukane].

Abamhloniphanga u Allah ngendlela efanele Yena. Impela u Allah Ungonamandla OnguSomandla.

U Allah uqoke izithunywa ezingelosini nasebantwini. Impela u Allah Ungozwayo Obonayo.

Ukwazi konke okungaphambi kwabo [okwendlula] nokusemuva kwabo [ikusasa]. Futhi zonke izinto ziyobuyela ku Allah.

Nina enikholwayo khothamani futhi niwe ngobuso nikhonze iNkosi yenu nenze okuhle ukuze niphumelele.

Futhi zikhandleni ku Allah, ukuzikhandla okufanele Yena. NguYena oniqokile futhi akanenzelanga ubunzima enkolweni; okuyinkolo kababa wenu u Ibhirahimu. NguYena oniqambe ukuthi ningamaMusilimu ngaphambilini [eZincwadini] nakulokhu [kwiKurani]. [Uniqokile] ukuze iSithunywa sibe ufakazi ngani, nani nibe ngofakazi ngesintu sonkana. Ngakhoke qikelelani ukwenza iswala nikhiphe nezakati nibambelele ku Allah, ngokuba nguYena uMhlengi wenu; yeka uMhlengi omuhle noMsekeli omuhle.

Impela baphumelele abakholwayo.

Labo abagxilayo kuswala yabo.

Nabaziqhelelanisayo nalokho okungenamsebenzi.

Nabaqikelelayo ukukhipha izakati.

Nabavikela izitho zabo zangasese.

Ngaphandle kubafazi babo noma amabibi abo ezigqila, ngokuba abayikusolwa.

Ngakhoke lowo oyofuna [ukwanelisa izinkanuko] ngale kwalokho; labo bayiziphula mthetho.

Nabagcina izethembiso nezivumelwano zabo.

Nabaqikelela ukwenza iswala ngesikhathi.

Labo bayizindlalifa.

Eziyohlabana ngeFiridowusi, bahlale kuyo unaphakade.

Futhi impela samdala umuntu ngobumba oluthathwe ndawo zonke.

Sabe sesimenza isidoda endaweni eyinqaba [esibelethweni sikanina].

Sabe sesenza isidoda saba ihlulu; senza ihlulu umbungu; senza umbungu waba namathambo; samboza amathambo ngenyama; samenza isidalwa esehlukile [kunalokho ebesiyikho ekuqaleni]. Ungcwele u Allah onguMdali oyingcweti kunano bonke.

Bese emuva kwalokho niyofa nakanjani.

Bese kuthi ngoSuku lokwahlulela niyovuswa.

Futhi impela sadala ngaphezu kwenu izigaba eziyisikhombisa [amazulu] futhi akukho ndalo esingayinakile.

Saphinde sehlisa amanzi emvula ngenani elibaliwe sawazinzisa emhlabeni. Futhi siyakwazi ukuphinde siwashabalalise.

Sanikhulisela ngawo [amanzi] izivande zamasundu nemivini, enithola kuzo [izivande] izithelo eziyinala niphinde nidle nakuzo.

Kanjalo nesihlahla esimila ngasentabeni iTuri esikhiqiza amafutha nesishebo kwabadlayo.

Impela ninesifundo kwimpahla efuywayo. Sinipha okuphazwayo okuphuma eziswini zayo kanti futhi ninezinsizakalo eziningi kuyo kunjalo nje niyadla kuyo.

Niphinde nigitshezwe kuyo kanye nasemkhunjini.

Sathumela uNuhu esizweni sakhe, wathi: “Bantu bakithi, khonzani u Allah ngokuba akekho omunye okufanele nimkhonze ngaphandle kwaKhe, ake nizithobe”.

Zathi izikhulu lezi ezingakholwa esizweni sakhe: “Lona umuntu nje ofana nathi, ufuna ukuzenza ngcono kini. Ukube u Allah ubefuna, ngabe ulethe izingelosi. Yilokho kwathi nhlo, asikaze sizwe ngalokho ngisho nakokhokho bethu imbala”.

Akayilutho ngaphandle nje kwendoda ewuhlanya; myekeleni nilinde okwesikhashana.

Wathi: “Nkosi yami ngisize kulokho abangiphikisa ngakho”.

Sabe sesembulela kuye ukuthi: “Yakha umkhumbi ngaphambi kwaMehlo eThu nangokwembulela kweThu. Kuyothi lapho sekufika umyalele weThu [wesijeziso] kwagobhoza amanzi eziko; layisha kuyo yonke [inhlobo] yendalo ngakubili [izinsika neduna] kanye nomndeni wakho, ngaphandle nje kwalabo kubo isinqumo esiphothuliwe ngabo. Futhi ungangikhulumisi mayelana nalabo abaphambukile ngokuba impela bayominza”.

Uma wena [Nuhu] usugibelile emkhunjini kanye nalabo abanawe, yithi: “Udumo lungo luka Allah lona osihlengile kubantu abaphambukile”.

Futhi yithi: “Nkosi yami ngihlalise endaweni ebusisekile ngokuba Wena ungumhlalisi okumpetha kwabahlalisayo.

Impela kulokho kunezibonakaliso futhi besivivinya.

Sabe sesidala esinye isizwe emuva kwabo.

Sathumela kubo iSithunywa esivela kubo, [ukuba sithi]: “Khonzani u Allah ngokuba akekho omunye okufanele nimkhonze ngaphandle kwaKhe, ake nizithobe”.

Izikhulu lezi ezingakholwa esizweni sakhe neziphika ukuhlangana kwelizayo, nesasizinjingisile empilweni yasemhlabeni, yithi: “Lona umuntu nje ofana nani, udla lokhu enikudlayo aphinde aphuze lokhu enikuphuzayo”.

Uma nje nike nalalela umuntu ofana nani impela niyoba ngabalahlekelwe.

Ingabe unithembisa ukuthi lapho senifile naphenduka umhlabathi namathambo, niyophinda nivuswe na?

Yinto engekho lokhu enithenjiswe kona.

Akulutho nje ngaphandle kwempilo yethu yasemhlabeni, siyafa siphile kepha asisoze savuswa.

Lona indoda nje eqambela u Allah amanga futhi thina angake simkholwe.

Wathi: “Nkosi yami ngisize kulokho abangiphikisa ngakho”.

Wathi [u Allah]: “Kungekudala nje bazozisola”.

Bahlaselwa umsindo ngokweqiniso sabenza badindiliza [okwezibi ezikhafulwa umfula]. Baqalekisiwe abantu abaphambikile.

Sabe sesiletha ezinye izizwe emuva kwabo.

Futhi akukho sizwe esiyophutha isikhathi saso esibekiwe noma sisigeje.

Sabe sesithumela iZithunywa zethu zilandelana. Kepha njalo nje uma iSithunywa sifika esizweni, bayasiphikisa. Ngakhoke sabalandelanisa [ngezijeziso] futhi sabenza undabuzekwayo.

Saphinda sathumela uMusa nomfowabo uHaruna nezibonakaliso zeThu nobufakazi obusobala.

KuFirawuni nezikhulu zakhe, kepha bazigqaja futhi babengabantu abaziqhakambisayo.

Bathi: “Singabakholwa kanjani abantu ababili abafana nathi, kulapho nje nesizwe sabo sikhonza thina”.

Babaphikisa bobabili; ngakhoke baba ngabanye ababhujiswayo.

Futhi sanika uMusa iNcwadi impela ukuze balandele indlela eqondile.

Futhi senza indodana kaMariyamu nonina isibonakaliso sabakhoselisa endaweni ephakeme eyisicaba futhi egeleza amanzi.

Nina Zithunywa, dlanini lokho okumsulwa futhi nenze okulungileyo; impela Minangikwazi konke enikwenzayo.

Futhi lenkolo yenu inkolo eyodwa futhi Mina ngiyiNkosi yenu, ngakhoke ngithobeleni.

Kepha udaba lwabo lwaqhekeka phakathi kwabo baba ngamaqembu; ilelo nalelo qembu lajabula ngalokho elinakho.

Bayekele kanje ekudukeni kwabo kuze kufike isikhathi [esibekiwe].

Ingabe bacabanga ukuthi lokhu esibandisela kona kumceso nezingane;

Sibaphuthumisela okuhle na? Empeleni abaqondi.

Impela labo ngenxa yokwesaba iNkosi yabo bahlala bethukile.

Nalabo abakholelwa kwimibiko yeNkosi yabo.

Nalabo abangabhanqi lutho neNkosi yabo.

Nalabo abanikela ngalokho abanikela ngakho izinhliziyo zabo zesaba ukuthi bayobuyela eNkosini yabo.

Yibo ke labo abaphuthuma okulungileyo futhi bayancintisana ngakho.

Futhi akekho umuntu esimthweza umthwalo ongaphezu kwakhe. Futhi sineNcwadi ekhuluma iqiniso. Futhi abasoze benziwa okungebulungiswa.

Empeleni izinhliziyo zabo zidukile mayelana nalokhu [iKurani] futhi banezinye izenzo ngaphandle kwalokho [ukubhangqa u Allah] abazenzayo.

Kuyothi lapho sesigasela labo abaziqhakambisayo kubo ngesijeziso; kuyoba yibo labaya sebehayiza.

Ningahayizi namhlanje ngokuba akukho sizo eniyolithola lapha kithi.

Impela nanifundelwa imibiko yaMi, kepha nina nahlehla nyovana nibaleka.

Nizigqaja ngayo [iKabha] nikhuluma umbhedo ebusuku.

Ingabe abayihlaziyanga yini inkulumo [yeKurani] kumbe bafikelwe yilokho okungakaze kufike kokhokho babo basendulo na?

Noma abasiboni kahleiSithunywa sabo yingakho nje besiphika?

Kumbe bathi siyahlanya. Empeleni ulethe iqiniso kepha iningi labo alilifuni iqiniso.

Uma iqiniso lingalandela izinkanuko zabo, amazulu nomhlaba nokuqukethe yikho bekuyonakala. Empeleni sibalethele lokho okuyobaphakamisa kepha bona bakushaya indiva ukuphakanyiswa kwabo.

Kumbe ubacela inzuzo; inzuzo yeNkosi yakho iyona engcono, belu Yiyo enguMondli obandlula bonke.

Futhi wena [Muhamadi] ubamemela endleleni eqondile.

Impela laba abangakholelwa kwelizayo baphambukile endleleni eqondile.

Noma singaba nomusa kubo siphinde sisuse ubunzima abakubo, bazobuyela bagxile banhlanhlathe empambukweni yabo.

Futhi sabahlasela ngesijeziso, kepha abazange bazithobe eNkosini yabo noma bazincengele.

Kuze kuthi mhla sibavulela umnyango onesijeziso esinzima kube yibona asebedidekile kuso.

Futhi nguYena lona onidalele ukuzwa nokubona nezinhliziyo, kepha anivamanga ukubonga.

Futhi nguYena lona onidalile emhlabeni futhi niyobuthaniselwa kuye.

NguYena futhi lona oletha ukuphila nokufa futhi ukuphambana kobusuku nemini kungokwaKhe, ake nicabange.

Kepha basho lokho okwashiwo abasendulo.

Bathi: “Kuyothi sesifile saba umhlabathi namathambo, siphinde sivuswe na?”

Kudala sathenjiswa lokhu thina kanye nokhokho bethu phambilini. Lokhu izinganekwane nje zasendulo.

Yithi: “Umhlaba nokuhlala kuwo kungokukabani uma ngempela nazi na?”

Bayothi: “Ngokuka Allah”. Yithi: “Kunganike ningalaleli na?”

Yithi: “Ngubani umnikazi wamazulu ayisikhombisa nomnikazi weSihlalo esikhulu na?”

Bayothi: “Ngu Allah”. Yithi: “Kunganike ningamthobeli na?”

Yithi: “Ngubani lona ubukhosi bazo zonke izinto buseZandleni zaKhe futhi uyavikela akavikelwa uma nazi na?”

Bayothi: “Ngu Allah”. Yithi: “Pho niyengwe kanjani?”

Impela sibalethele iqiniso futhi yibona impela abanamanga.

U Allah akaziqokelanga ngane futhi akukho esinye isikhonzwa esinaYe. Ukube bekunjalo, ngabe ileso naleso sikhonzwa besizogqoza nalokho esikudalile futhi bezizozama ukulawulana. Makangcweliswe u Allah kulokho abakushoyo.

Isazi sokungabonwa nokubonwayo, uphakeme kulokho abakubhangqayo.

Yithi: “Nkosi yami, uma ungibonisa lokho abathenjiswe kona [isijeziso]...”

Nkosi yami ungangibandakanyi nabantu abaphambukileyo.

Impela Thina siyakwazi ukukubonisa lokho esibathembise kona.

Wena [Muhamadi] phindisela ngalokho okuhle ukudlula okubi. Thina siyakwazi kahle lokhu abakushoyo.

Futhi yithi: “Nkosi yami ngizivikela ngaWe kuzilingo zoShayitani”.

Futhi ngizivikela ngaWe Nkosi yami ekutheni bafike kimi.

Kuyothi mhla kufika ukufa komunye wabo athi: “Nkosi yami ngibuyisele emuva [emhlabeni]”.

Ukuze ngenze okulungileyo kulokho engakushiya emuva. Phinde!; impela amazwi nje awashoyo [angazimisele ngawo]. Futhi ngaphambi kwakhe iBarizakhi kuze kube usuku lapho beyovuswa.

Mhla kushaywa icilongo, buyophela ubuhlobo phakathi kwabo ngalolo suku futhi abayi kubuzana.

Lowo oyoba nezisindo ezisindayo; yilabo abayophumelela.

Kepha lowo oyoba nezisindo ezilula; yilaboke abazilahlekele eJahanamu bayohlala kuyo unaphakade.

Umlilo uyoshiya ubuso babo futhi bayohlala behlinile [izindebe zishile amazinyo eqhethile] kuyo.

Ingabe anizange yini nifundelwe imibiko yami kepha nina nayiphika.

Bayothi: “Nkosi yethu, sehlulwe ukulahlekelwa kwethu [ngokulandela izinkanuko] kanjalo saba ngabantu abadukile”.

Nkosi sikhiphe kuyo [iJahanamu], uma nje sike sabuyela kuyo siyobe impela siphambukile.

Uyothi: “Sukani la, hlalani kuso futhi ningangikhulumisi”.

Impela bekuneqembu lezigqila zaMi [ezikholwayo] ezithi: “Nkosi yethu, siyakholwa; ngakhoke sithethelele usihawukele futhi Wena unomusa ukudlula bonke abanomusa.

Kepha nina nabathathisa okwenhlekisa baze banenza nakhohlwa ukukhumbula Mina naphinde nabahleka.

Impela namhlanje ngibahlomulisile ukuthi bangabaphumelele ngenxa yokubekezela kwabo.

Uyothi: “Mingaki iminyaka eniyihlale emhlabeni na?”

Bayothi: “Sihlale usuku noma ingxenye yosuku, buza ababali.”

Uyothi: “Nihlale isikhathi esincane impela, ukube nje benazi.”

Ingabe nicabanga ukuthi sinidalele ize nokuthi ngeke nisabuyela kithi na?

Uphakeme u Allah iNkosi yeqiniso; akekho okufanele akhonzwe ngaphandle kwaKhe, umnikazi weSihlalo Esihloniphekile.

Lowo obhangqa no Allah esinye isikhonzwa engenabufakazi ngaso; ukwehlulela kwaKhe kuseNkosini yakhe. Impela abangakholwa abasoze baphumelela.

Futhi yithi: “Nkosi yami thethelela uphinde uhawukele ngokuba Wena unomusa ukwedlula bonke abanomusa”.

Lena isura [isahluko] esiyambulele futhi sayiphoqelela ukuba ilandelwe sembulela futhi kuyo imibiko ecacile ukuze nilalele.

Umphingi wesimame nowesilisa babhaxabuleni ngamunye amahlandla ayikhulu, futhi ningabazweli ekugcineni inkambiso ka Allah uma ngempela nikholelwa ku Allah nasoSukwini lokugcina. Futhi isijeziso sabo kumele sithanyelwe ibandla lalabo abakholwayo.

Umphingi wesilisa ushada kuphela umphingi wesimame noma umkhonzi zithixo wesimame. Kanjalo nomphingi wesimame ushadwa kuphela umphingi wesilisa noma umkhonzi zithixo wesilisa. Kepha lokho kunqantshelwe kwabakholwayo.

Futhi labo abasola ngecala abesimame abaziphethe kahle bese bengalethi ofakazi abane; babhaxabuleni amahlandla angamashumi ayisishagalombili bese ningaphinde namukele ubufazi babo. Futhi labo bayizeqa mthetho.

Ngaphandle ke kwalabo abazisolayo bacele intethelelo emuva kwalokho baphinde benze okulungileyo; impela u Allah Ungumthetheleli Onesihawu.

Labo abesilisa abasola abafazi babo ngecala [lokungathembeki emshadweni] kepha bengenabo ofakazi ngaphandle kwabo uqobo. Ubufakazi boyedwa kubo ukuba afunge kane ngo Allah ukuthi uqinisile.

Kobesihlanu [afunge] ngokuthi isiqalekiso sika Allah sibe kuye uma eqamba amanga.

Kuyomele bakumise ukumjezisa owesimame uma efunga kane ngo Allah ukuthi [umyeni wakhe] uqamba amanga.

Kobesihlanu [afunge] ngokuthi ulaka luka Allah lube kuye [owesimame] uma [umyeni wakhe] eqinisile.

Ukube bekungesiwo umusa ka Allah kini nesihe sakhe nokuthi u Allah Uyathethelela Ukhaliphile [bekazobhubha lapho lona oqamba amanga].

Impela labo abeza namanga aluhlaza[1], iquqaba ngaphakathi kini. Ningacabangi ukuthi ayinto embi kini kepha ayinto enhle kini. Wonke umuntu kini uyothola isijeziso salokho akuzizile empambukweni. Kuthi lowo obe kunguyena obe nendima enkulu kuwo [lamanga] ngaphakathi kwenu, yena uyothola isijeziso esikhulu. ——— [1] Okusola omunye wamakhosikazi eSithunywa uMuhamadi  ngokungathembeki ngokwenza amanyala.

Ukube nje nathi lapho niwezwa, abakholwayo besilisa nesifazane bavane bacabanga okuhle ngabanye babo bese bathi: “Lana ngamanga aluhlaza”.

Kungani bengalethanga ofakazi abane na? Uma bengabalethanga ofakazi, laboke ku Allah bangabaqambi manga.

Ukube bekungewona umussa ka Allah kini nesihe saKhe emhlabeni nakwelizayo, beniyotholwa isijeziso esikhulu kulokhu enigaxele kukho.

Mhla niwathutha ngamalimi enu futhi nikhuluma ngemilomo yenu lokho ebeningenalwazi ngakho, nicabanga ukuthi kuyinto encane kulapho kuyinto enkulu ku Allah.

Ukube nje mhla niwezwa navane nathi: “Asinalo igunya lokhuphawula ngalokhu, mawungcweliswe Wena, lokhu ukuthunaza okukhulu”.

U Allah uyaxwayisa ukuba ningaphinde nenze okufanayo uma ngempela ningabakholwayo.

Futhi u Allah unicacisele imibiko. U Allah Ungowaziyo Okhaliphile.

Impela labo abathanda ukuba amanyala asabalale ngalabo abakholwayo, bayothola isijeziso esibuhlungu emhlabeni nakwelizayo. U Allah uyazi kepha nina anazi.

Ukube bekungesiwo umusa ka Allah kini nesihawu saKhe nokuthi u Allah Unobubele Unesihawu [ngabe unijezisile].

Nina enikholwayo, ningalandeli ezinyathelweni zika Shayitani; ngokuba lowo oyolandela ezinyathelweni zika Shayitani, impela ugqugquzela amanyala nempambuko. Ukube bengesiwo umusa ka Allah kini nesihe saKhe bukungasoze kube khona noyedwa kini obeyohlanzeka [ezimpambukweni zakhe]. Kepha u Allah uhlanza amthandayo futhi Ungozwayo Owaziyo.

Labo abaqotho kini nabanjingile mabangafungeli ukuyeka ukupha izihlobo nabampofu nabafuduka endleleni ka Allah. Mabaxolele bandlulise. Anifuni yini ukuba u Allah anithethelele na? Ngokuba u Allah Ungumthetheleli Onesihawu.

Impela, labo abasola ngecala labo abesimame abakholwayo abaziphethe kahle abangazibandakanyi namanyala; baqalekisiwe emhlabeni nakwelizayo, futhi bayothola isijeziso esikhulu.

Ngosuku lapho ulimi lwabo nezandla zabo kanye nemilenze yabo iyofakaza ngabo mayelana nalokho ababekwenza.

Ngalolo suku u Allah uyobanika ngokugcwele isabelo sabo seqiniso futhi bayokwazi ukuthi u Allah nguYena Oyiqiniso Elisobala.

Abesifazane ababolile bathola abesilisa ababolile, nabesilisa ababolile bayothola abesifazane ababolile. Kuthi abesifazane abahlanzekile bathole abesilisa abahlanzekile nabesilisa abahlanzekile bayothola abesifazane abahlanzekile. Labo abahlangene nalokho abakukhulumayo. Bayothola intethelelo nesondlo esihle.

Nina enikholwayo, ningangeni ezindlini okungezona ezenu ningakakhuleki futhi nibingelele abanikazi bazo. Lokho yikona okugcono kini ukuze nilalele.

Uma ningatholi muntu kuzo, ningangeni kuze kube nithola imvumo. Uma nitshelwa ukuthi buyelani emuva, buyelani emuva, ngokuba yokona okuhlanzekile kini. Futhi u Allah Uyakwazi enikwenzayo.

Aninacala uma ningena ezindlini okungasahlali muntu kuzo okunensizakalo yenu kuzo. Futhi u Allah uyakwazi konke enibeka obala nenikufihlayo.

Tshela abakholwayo besilisa ukuba babhekise phansi amehlo abo [kokunqatshelwe] bavikele nezitho zabo zangasese. Lokho yikona okuhlanzekile kubo. Impela u Allah Unolwazi ngalokho abakwenzayo.

Uphinde utshele abakholwayo besimame ukuba babhekise phansi amehlo abo [kokunqatshelwe] bavikele nezitho zabo zangasese. Futhi bangavezi ubuhle babo ngaphandle kwalokho okuzivelelayo. Futhi mabavale ngamakhimari [indwangu evala ikhanda kuya phansi] abo izifuba zabo. Futhi bangavezeli muntu ubuhle babo ngaphandle kwabayeni babo noma oyise noma abakhwe babo noma amadodana abo [abawazalayo] noma amadodana wabayeni babo noma abafowabo noma amadodana abafowabo noma amadodana wodadewabo noma abanye abafazi [abakholwayo] noma izigqila zabo noma amadoda ayizisebenzi angasenayo imizwa [ngezansi] noma izingane ezingakazi lutho ngengasese labesimame. Futhi mabangashayi phansi imilenze yabo ukuze kwaziwe lokho abakufihlile okuwubuhle babo. Celani intethelelo ku Allah nina nonke enikholwayo ukuze niphumelele.

Futhi shadisani labo abangashadile kini nalabo abaqotho kuzigqila zenu zesilisa nesifazane. Uma beswele u Allah uyobanjingisa ngomusa waKhe. U Allah wengamele konke Uyazi.

Labo abangenawo amandla okushada mabaziphathe kahle kuze kube u Allah uyamnjingisa ngomusa waKhe. Futhi labo kuzigqila zenu abafuna ukusebenzela inkululeko yabo, bavumuleni uma kunobuqotho enibaziyo ngabo. Futhi nibaphe kumcebo ka Allah lona aniphe wona. Futhi ningaphoqeleli izigqila zenu zesifazane ekubeni onondindwa, ukuze nizuze iznto zempilo yasemhlabeni, uma zona zizifunela isimilo. Lowo ozoziphoqa, impela u Allah emuva kokuziphoqa Ungumthetheleli Onesihawu [kuzo].

Impela sembulela kuwe [Muhamadi] imibiko ecacisayo nesibonelo salabo asebandlula ngaphambi kwenu kanjalo neseluleko kulabo abathobela intando ka Allah.

U Allah Uwukukhanya kwamazulu nomhlaba. Ukukhanya kwaKhe kufana nengosi enesibani kuyo; isibani esisengilazini. Ingilazi yona ngathi inkanyezi ekhazimulayo eyokhelwe ngamafutha esihlahla esibusisiwe, esingekho ngase mpumalanga noma ngase ntshonalanga. Amafutha kuthi awakhanye wona ngokwawo noma engakokhelwa ngomlilo. Ukukhanya phezu kokunye ukukhanya. U Allah uholela amthandayo ekukhanyeni kwaKhe. Futhi wenzela abantu imizekelo. Futhi u Allah wazi ngayo yonke into.

Ezindlini [emaMasjidi] u Allah ukuvumele ukuba zakhiwe zimiswe bese kukhunjulwa iGama lika Allah kuzo. Ababaza ubungcwele baKhe kuzo ekuseni nantambama..;

Amadoda angayengwa uhwebo nokuhweba ekukhumbuleni u Allah nokwenza iswala nokukhipha iZakati; besaba usuku lapho izinhliziyo namehlo kuyophenduka.

Ukuze u Allah abahlomulise ngokuhle ukudlula lokho ababekwenza aphinde abengezele ngomusa waKhe. U Allah wondla amthandayo ngokungemkhawulo.

Futhi labo abangakholwa, izenzo zabo zifana notalagu olosethafeni eliwugwadule, lowo owonyiwe acabanga ukuthi amanzi, kuthi lapho efika kulo angatholi lutho kepha athole u Allah kulo amehlulele ngokuphelele. Futhi u Allah uyashesha lapho ehlulela.

Noma zifana nobumnyama ekujuleni kolwandle olumbozwe igagasi okunegagasi elinye ngaphezu kwalo kube nefu ngaphezu kwalo. Ubumnyama phezu kobunye ubumnyama. Kuthi lapho ekhipha isandla sakhe acishe angasiboni. Futhi lowo u Allah angamnikanga ukukhanya akasoze abe nakho ukukhanya.

Awuboni ukuthi konke okusemazulwini nasemhlabeni kudumisa u Allah ngisho izinyoni ezindizayo; konke kuyayazi indlela okumthandaza ngayo [u Allah] neyokumdumisa. Futhi u Allah ukwazi konke abakwenzayo.

Ubukhosi basemazulwini nasemhlabeni kungokuka Allah futhi isiphetho siyokuba ku Allah.

Awazi ukuthi u Allah uqhuba amafu bese ewahlanganisa abe yimbumba, bese ubona imvula iphuma phakathi kwabo. Aphinde ehlise imvula ezintabeni ebandayo ahlasele ngayo amthandayo ayiqhelise kulowo amthandayo. Ukubanika kwayo kucishe kuvale amehlo.

U Allah uguqula ubusuku nemini. Impela kulokho kunesifundo kulabo abahlaziyayo.

Futhi u Allah udale zonke izidalwa ngamanzi [uketshezi lwesidoda]. Kunalezo ezihamaba ngesisu kube nalezo ezihamba ngemilenze emibili kube nalezo ezihamba ngemine. Udala akuthandayo; impela u Allah akahlulwa yilutho.

Impela sambulele imibiko ecacisayo. Futhi u Allah uholela amthandayo endleleni eqondile.

Futhi bathi siyakholelwa ku Allah nakuSithunywa futhi siyazithoba. Kepha emuva kwalokho olunye uquqaba kubo lubuyela emuva. Laboke abasibo abakholwayo.

Uma bebizelwa ku Allah neSithunywa saKhe ukuze sehlulele phakathi kwabo; uyobona ngeqembu elithile kubo lifulathela.

Kepha uma kuyibona abamangali beza kuye bezithoba.

Ingabe kunesifo ezinhlizweni noma banongabazane kumbe basaba ukuthi u Allah neSithunywa saKhe bazobacindezela ngokungebulungiswa na? Empeleni yibona kanye abangenabo ubulungiswa.

Izwi lalabo abakholwayo lapho bebizelwa ku Allah neSithunywa saKhe ukuze sehlulele phakathi kwabo, bavele bathi: “Siyezwa futhi siyazithoba”. Yibo kanye ke labo abayophumelela.

Lowo olalela u Allah neSithunywa saKhe aphinde asabe u Allah athobele intando yaKhe, yibonake labo abayophumelela.

Futhi [abazenzisi] bafunga bagomele ngo Allah ukuthi uma ubayalela nakanjani bayophuma [ukuya empini]. Yithi: “Ningafungi; ukulalela okwaziwayo [lokhu okwenu]. Impela u Allah Unolwazi ngakho konke enikwenzayo”.

Yithi: “Lalelani u Allah nilalele neSithunywa. Kepha uma nikushaya indiva; okwakhe yilokhu athweswe kona nani okwenu yilokhu enithweswe kona. Kepha uma nimlalela niyoba sendleleni eqondile. Futhi okusemahlombe eSithunywa ukwethula umlayezo ocacile.

U Allah uthembise labo abakholwayo kini nabenza okulungileyo ukuba uyobabeka emhlabeni njengoba abeka labo ababandulelayo futhi uyobamisela inkolo yabo lena abakethele yona aphinde aguqulele ukwesaba kwabo kube nokuphepha. “Uma bekhonza Mina bengangibhangqi ngalutho. Lowo oyoba ongakholwa emuva kwalokho, labo bayobe beyizi phula mthetho”.

Futhi qikelelani ukwenza iswala nikhiphe nezakati nolalele isithunywa ukuze nihawukelwe.

Ningacabangi ukuthi laba abangakholwa baphunyukile emhlabeni. Indawo yabo yokugcina umlilo, saze sasibi isiphetho.

Nina enikholwayo, labo abayizigqila zenu nalabo abangakathombi kini, mabanicele imvume [yokungena egunjini lenu] ezikhathini ezintathu. Ngaphambi kweswala yeFajari nalapho nihlubula khona izembatho zenu emini nasemuva kweswala ye Isha. Lezi izikhathi zenu ezintathu zangasese. Akucala kini nakubo emuva kwazo; ngokuba abanye benu bangena bephuma kini. U Allah uyihlalusa kanjalo imibiko, futhi u Allah Ungowaziyo Okhaliphile.

Uma abantwana benu sebefike esigabeni sokuthomba, mabacele imvumo [yokungena] njengoba labo baphambilini nabo babecela imvumo. U Allah unihlalusela kanjalo imibiko yaKhe; futhi u Allah Ungowaziyo Okhaliphile.

Futhi izalukazi zabafazi lezi ezingesenandaba nokushada; azinacala uma zihlubula izembatho zazo kepha zingavezi ubuhle bazo. Uma zizithiba yikona okungcono kuzo. Futhi u Allah Ungozwayo Owaziyo.

Akunacala kulowo oyimpumputhe nalowo oyinquge nalowo ogulayo. Futhi nani aninacala uma nidla ezindlini zenu noma ezoyihlo noma ezonyoko noma ezabafowenu noma ezodadewenu noma ezabafowabo boyihlo noma ezobabekazi benu noma ezomalume benu noma ezoninalume benu noma lezo eniphatha izihluthulelo zazo noma ezomngani wenu. Futhi aninacala uma nidla ndawonye noma ngokuhlukana. Uma ningena ezindlini, zibingeleleni nina uqobo, isibingelelo esivela ku Allah esibusisiwe esimsulwa. U Alla unihlalusela kanjalo imibiko ukuze niqonde.

Labo okuyibona abakholwayo, yilabo abakholelwa ku Allah neSthunywa saKhe futhi uma benaso ndawonye abahambi bengasicelanga imvumo. Impela labo abakucela imvumo yibona kanye labo abakholelwa ku Allah neSithunywa saKhe. Uma bekucela imvumo mayelana nezinye zezinto zabo, vumela omthandayo kubo uphinde ubacelele intethelelo. Impela u Allah Ungumthetheleli Onesihawu.

Musani ukubiza iSithunywa phakathi kwenu njengoba uma nibizana nodwa. Impela u Allah uyabazi laba ababaleka isinyelele kini. Labo abaphambana nomyalelo waso [iSithunywa] mabaqaphele bengehlelwa ukungakholwa noma behlelwe isijeziso esibuhlungu.

Bheka ngoba konke okusemazulwini nasemhlabeni kungo kuka Allah; wazi lokhu enikukho manje nangosuku abayobuyela kuYe, ukuze abazise ngalokho ababekwenza. Futhi u Allah wazi yonke into.

Uyingcwele Lona owembulela iFurikani [iKurani] kusigqila saKhe ukuze sibe umexwayisi kumhlaba wonke jikelele.

Lona ubukhosi basemazulwini nasemhlabeni bungo baKhe. Akanangane futhi akakaze abe nomlingani ebukhosini. Futhi nguYena odale yonke into wayabela ngokuyilingene.

Baqoke ngaphandle kwaKhe izikhonzwa ezingakwazi ukudala lutho; kunalokho zona zidaliwe futhi abakulawuli ukulimala noma ukuzuza kwabo uqobo futhi abakulawuli ukufa noma ukuphila noma ukuvuswa [emuva kokufa].

Laba abangakholwa bathi: “Impela lokhu [iKurani] ngamanga aluhlaza aziqambele wona balekelelwa ngabanye abantu”. Impela abanabulungiswa futhi banamanga aluhlaza.

Baphinde bathi: “Izinganekwane nje zabasendulo uzilobele zona, ubizelwa zona ekuseni nantambama”.

Yithi: “Yembulelwe nguLoyo owazi imfihlo emazulwini nasemhlabeni; impela Yena Ungumthetheleli Onesihawu”.

Futhi bathi: “Yini ngalesi Sithunywa, sidla ukudla sihambe nasezindaweni zokuhweba. Kungani kungathunyelwanga naye ingelosi ukuze kube nomunye umexwayisi naye.

Noma anikwe umcebo noma abe nesivande adla kuso. Bese labo abaphambukile bathi: “Nilandela nje indoda eloyiwe”.

Awubheke nje ukuthi bakwenzela kanjani imizekelo; base baduka abasakwazi ukuthola indlela eqondile.

Uyingcwele Lona uma ethanda angakunikeza [Muhamadi] okungcono okudlula lokho, izivande okugeleza imifula ngenzansi kwazo aphinde akwenzele izinqaba.

Kepha baphika iSikhathi [sokwahlulela]. Kulapho Thina silungiselele lowo ophika iSikhathi umlilo.

Uma ubabona beza le kude, bayowuzwa ubhavumula ububula.

Kuyothi lapho sebetshingelwe endaweni engcinyanayo phakathi kuwo beboshwe izandla nezinyawo; bayokhulekela ukuba imbubhiso.

Ningakhulekeli neyodwa imbubhiso namhlanje kepha khulekelani eziningi.

Yithi: “Yikona lokho okuhle noma isivande saphakade lesi esithenjiswe abakholwayo na? Siyoba umvuzo nesiphetho sabo”.

Bayothola konke abakulangezelelayo kuso unaphakade; isithembiso iNkosi yakho eyosigcina.

Futhi mhla ebabuthanisa bona kanye nalokho abakukhonzayo ngaphandle kuka Allah, uyothi [u Allah kuzikhonzwa]: “Ingabe yinina laba enidukise izigqila zami lezi noma zizidukele zona ngokwazo na?”

Bayothi: “Mawungcweliswe Wena, asinalo igunya lokuziqokela abahlengi ngaphandle kwaKho, kepha nguWe obenze banethezeka nokhokho babo baze bakhohlwa imiyalelo base baba ngabantu ababhubhile”.

Impela bayaniphikisa kulokho enikushoyo futhi anikwazi ukuzihlenga noma ukuzisiza. Futhi lowo kini ongeke enze ubulungiswa [ngokubhangqa u Allah], sizomzwisa isijeziso esinzima.

Futhi asikho iSithunywa esasithumela ngaphambi kwakho ebesingadli noma esingayi ezindaweni zokuhweba. Futhi senze abanye benu baba isiviviyo kwabanye, ngakhoke bekezelani.

Labo abangalangazeleli ukuhlangana naThi bathi: “Kungani kunga thunyelwangwa ingelosi kithi noma nje sibone iNkosi yeThu mathupha na?” Impela bayazazisa futhi sebendlulele kakhulu ekupheleni umthetho.

Mhla beyobona izingelosi, ngalolo suku akunakuba nezindaba ezinhle kulabo abayizephula mthetho futhi bayothi:”Kunqatshelwe akuvunyelwe”.

Futhi siyobheka izenzo zabo abazenzile bese sizenza uthuli olusakazeke yonke indawo [aziyukuba namvuzo][1]. ——— [1] Lokho kungenxa yokuthi umenzi wale zenzo akayilandelanga imibandela ebekiwe ukuze isenzo samkeleke ku Allah. Leyo mibandela ukuba umuntu (i) akholelwe ku Allah ngokuqondile, (ii) abe nenhloso emsulwa yokuthokozisa u Allah kuphela (iii) aphinde angaphambani nezimfundiso zeSithunywa uMuhamadi . Uma owodwa walemibandela ungekho, isenzo leso siyokuba ize okothuli olusakazeke yonke indawo.

Labo abayongena eJana, ngalolo suku bayobe besendaweni engcono yokuhlala nendawo enhle impela yokuphumula.

Futhi landisa ngosuku lapho isibhakabhaka siyoqhekeka kuvele amafu bese kwehliswa izingelosi kancane kancane.

Bonke ubukhosi bangempela ngalolo suku buyokuba ngobuka loyo Onomusa [u Allah]. Impela kuyoba usuku olunzima kwabangakholwa.

Futhi landisa ngosuku lapho ophambukile ayoluma khona izandla zakhe athi: “Ngaze ngafisa ukuba ngalandela iSithunywa endleleni eqondile”.

Kwaze kwaphela ngami, ngaze ngafisa ukuba angizange ngaba umngani kazibanibani.

Impela ungidukisile kumyalelo emuva kokuba usufikile kimi. Impela uShayitani uyohlala njalo emkhaphela umuntu.

Futhi iSithunywa sithi: “Nkosi yami impela abantu bami abasayinaki leKurani”.

Kanjalo, senzela wonke uMembulelwa isitha kulabo abayiziphula mthetho. Kepha iNosi yakho yanele njengoMholi noMhlengi.

Laba abangakholwa bathi: “Kungani iKurani ingembulelwanga kuye [uMuhamadi] yonke ngesikhathi esisodwa”. Siyenze kanjalo ukuze siqinise inhliziyo yakho futhi sayihlalusa kancane kancane.

Futhi njalo uma beza nomzekelo othize; Thina sizokulethela iqiniso nencazelo engcono.

Labo abayosiwa eJahanamu behudulwa ngobuso; yiboke labo abasesimeni esibi nabasendleleni edukile.

Futhi sanika uMusa iNcwadi [iTora] saphinda senza umfowabo uHaruna waba iphini lakhe.

Sase sithi kubo: “Hambani nobabili niye kulaba bantu abaphika imibiko yeThu”. Sabe sesibabhubhisa [abangakholwa].

Kanjalo [sababhubhisa] nabantu baka Nuhu, mhla bephikisa iZithunywa. Sabacwilisa sabenza baba isibonelo ebantwini. Futhi labo abaphambukile sibalungiselele isijeziso esibuhlungu.

Kanjalo nesizwe sakwa Adi noTamudi nabase Rasi [umthombo] nezinye izizwe eziphakathi kwalokho eziningi.

Bonke sabenzela imizekelo [sibacacisela] futhi bonke sababhubhisa kanzima.

Futhi babendlula emanxiweni esizwe [eSodoma] esalethelwa imvula embi. Ingabe babengawaboni na? Empeleni abakholelwa ekuvusweni [kwelizayo].

Uma bekubona, bakwenza inhlekisa [bathi], “ingabe nguye lo u Allah amthumele njengeSithunywa na?”

“Ucishe wasidukisa ngezikhonzwa zethu, ukube nje asibambelelanga kuzo”. Khona maduze lapho bebona isijeziso bayokwazi ukuthi ubani ngempela odukile.

Bheka lowo owenze izinkanuko zakhe isikhonzwa sakhe; ingabe uyokhona yini ukumhlenga na?

Kumbe ucabanga ukuthi iningi labo liyezwa noma liyaqonda. Bazifanela nje nemfuyo; empeleni bona baduke kakhulu.

Uke wabona ukuthi iNkosi yakho iwundlala kanjani umthunzi na? Uma ithanda ibingawenza ume [ungasuswa yilanganga] futhi senze ilanga laba yinkomba yokuba khona komthunzi.

Sabe sesiwusongela kithi kancane kancane.

Futhi nguYena onenzela ubusuku baba yingubo yokwembatha nobuthongo kwaba ukuphumula futhi wenza imini yaba isikhathi sokuvuka.

Futhi nguYena lona othumela imimoya njengezethuli zezindaba ezinhle ngaphambi komusa waKhe [imvula]. Sase sesehlisela amanzi emvula ahlanzekile.

Ukuze zivuselele ngaso indawo ebesifile nokuthi siphe amanzi kulokho esikudalile, imfuyo nabantu abaningi.

Futhi siyayisabalalisa [imvula] phakathi kwabo ukuze banake. Kepha iningi labo lanqaba laqoma ukungabongi.

Ukuba besithanda besizothumela kuyo yonke imizi [indawo] umexwayisi [kepha siqoke wena Muhamadi].

Ngakhoke ungabalaleli laba abangakholwa futhi ubazabalazele kanzima ngayo [iKurani].

Futhi nguYena lona ohlanganise izilwandle ezimbili, lolu lumnandi lumtoti kuthi lolu lunosawoti luyababa. Futhi wenze kwaba nesithiyo nothango oluvimbile.

Futhi nguYena lona odale ngamanzi umuntu, wamenza waba nobuhlobo ngokwegazi nangokushada. Futhi iNkosi yakho Inamandla.

Bakhonza lokho okungeke kwabasiza nokungeke kwakhona ukubalimaza ngaphandle kuka Allah. Impela ongakholwa uyohlala njalo ephikisa neNkosi yakhe.

Futhi sikuthumele ukuba ube umethuli wezindaba ezinhle nomexwayisi.

Yithi: “Anginiceli mvuzo ngayo ngaphandle kwalowo ofuna ukuthatha indlela [yokusondela] eya eNkosini yakhe”.

Thembela kulowo Ongophilayo ongafi futhi ubabaze udumo lwaKhe. Futhi Unolwazi ngezimpambuko zezigqila zaKhe.

Nguyena odale amazulu nomhlaba nokungaphakathi kwawo ezinsukwini eziyisithupha wabe esenyukela phezu kweSihlalo, lona Onomusa, ngakhoke buza ngaYe loyo Onolwazi [u Allah].

Uma kuthiwa kubo, “khothamelani Onomusa niwe ngobuso”, bathi: “Ngubani Onomusa, ufuna sikhothamele lowo esiyalelwa nguwe [Muhamadi] siwe ngobuso na?” Kwavele kwabandisela ukubalekela iqiniso.

Ungcwele lona odale izinkanyezi [nemigudu yazo] esibhakabhakeni wadala nesibani [ilanga] kuso kanye nenyanga ekhanyisayo.

Futhi nguYena owenze ubusuku nemini kwalandelana enzela lowo ofuna ukuthatha isifundo noma ofuna ukubonga.

Izigqila zika Allah yilezo ezihamba emhlabeni ngokuzithoba; kuthi lapho uma isiwula sikhuluma nabo [seyisa] bathi, “ukuthula”.

Nalabo abachitha ubusuku bekhothamile bewe ngobuso baphinde bawe [kuswala] benzela iNkosi yabo.

Nalabo abathi: “Nkosi yethu, qhelisa isijeziso seJahanamu [kwalasha] kithi ngokuba isijeziso sayo siyanamathelana impela.

Impela iyindawo embi yokuhlala nokuzinza.

Nalabo uma benikela ababi budedengu futhi ababi ngongoqo, benza nje okuphakathi nalokho.

Nalabo abakhonzi ezinye izikhonzwa bazibhangqe no Allah. Futhi abawukhiphi ngokungemthetho umphefumulo oqatshelwe ngu Allah futhi abaphingi. Lowo oyokwenza lokho uyothola isijeziso.

Isijeziso sakhe siyophindwa phindwa ngoSuku lokwahlulela ahlale kuso [isijeziso] unaphakade ehlazekile.

Ngaphandleke kwalowo ocela intethelelo ngokuzisola akholwe, enze nezenzo ezilungileyo; labo, u Allah uyoguqula izimpambuko zabo zibe izenzo ezinhle. Futhi u Allah Ungothethelelayo Onesihawu.

Futhi lowo ocela intethelelo ngokuzisola enze nezenzo ezilungileyo; impela usuke esezisola ngokweqiniso ku Allah.

Nalabo abangazibandakanyi namanga futhi uma bendlula lapho kunombedo khona, bandlula kuwo ngokuzihlonipha [bangazibandakanyi].

Nalabo uma belulekwa ngemibiko yeNkosi yabo, abaziphathisi okwezimumu nezimpumputhe [benze ngathi ebezwa noma ababoni].

Nalabo abathi: “Nkosi yethu siphe abalingani nezingane ezisithokozisayo futhi usenze sibe ngabaholi balabo abathobela Wena”.

Labo, bayohlonyuliswa ngegumbi ngenxa yokubekezela kwabo futhi bayothola kulo ukubingelelwa nokuthula.

Bayohlala kulo unaphakade; yeka indawo enhle yokuhlala nokuzinza.

Yithi: “iNkosi yami ayinandaba nani ukube bekungekho ngenxa yomkhuleko wenu. Impela niyaphika [nina eningakholwa], ngakhoke sizoninamathela [isijeziso]”.

Twa-Sin-Mim.

Lena imibiko yeNcwadi ecacisayo [iKurani].

Hleze uzikhandla kakhulu ngenxa yokuthi kabasibo abakholwayo.

Ukube siyathanda besizobehlisela isibonakaliso esivela ezulwini, lesi imiqala yabo iyohlale isithobele.

Futhi njalo uma sibalethela iseluleko esisha esivela koNomusa bavele basishaye indiva.

Impela baphika iqiniso, ngakho ziyofika kubo izindaba zalokho abahlekisa ngakho.

Ingabe ababoni yini ukuthi ziningi kanjani izinhlobo [zezitshalo] esihlumise emhlabeni na?

Impela kulokho kunesibonakaliso kepha iningi labo alikholwa.

Futhi impela iNkosi yakho inguSomandla Onesihawu.

Landisa ngamhla iNkosi yakho imemeza uMusa [yathi], “hamba uye kulabantu abaphambukile”.

Isizwe sika Firawuni. Kungani bengathobeli u Allah na?

Wathi [uMusa]: “Nkosi yami, impela ngesaba ukuthi bayothi nginamanga”.

Futhi nenhliziyo yami ithwele kanzima nolimi lwami aluqaqekile; ngakhoke thumela kuHaruna.

Futhi basase nempindiselo yegazi kimi; ngakhoke ngesaba ukuthi bangahle bangibulale.

Wathi [u Allah]: “Phinde, hambani nina nobabili nemibiko yeThu, Thina sikanye nani silalele”.

Ngakhoke iyani kuFirawuni nifike nithi: “siyiZithunywa zeNkosi yendalo yonke”.

Ukuze udedele kithi isizwe sakwa Isirayeli.

Wathi [uFirawuni]: “Asizange yini sikukhulise kusukela umncane waphinde wahlala iminyaka eminingi yempilo nathi na?”

Wase wenza lento yakho owayenza kulapho ungakhombisi ukubonga.

Wathi [uMusa]: “Ngakwenza lokho ngesikhathi lapho ngangidukile”.

Ngase nganibalekela ngenxa yokunesaba. Kepha iNkosi yami yangipha ubuhlakani [ukwembulelwa] wangenza omunye weZithunywa.

Futhi nje lomusa ongikhumbuza wona – ukuthi wenza isizwe sakwa Isirayeli izigqila.

Wathi uFirawuni: “Yini leNkosi yendalo yonke na?”

Wathi [uMusa]: “iNkosi yamazulu nomhlaba nokuphathi kwakho, uma ngempela ninesiqiniseko [ningena kungabaza]”.

Wathi [uFirawuni] kulabo abaseduze kwakhe: “Niyangizwisa bo!”

Wathi [uMusa]: “iNkosi yenu neNkosi yokhokho benu basendulo”.

Wathi: “Impela leSithunywa senu esithunyelwe kini uyahlanya”.

Wathi [uMusa]: “iNkosi yempumalanga nentshonalanga nalokho okumaphakathi kwazo, uma ngempela ninokuqonda”.

Wathi: “Uma uziqokela esinye isikhonzwa ngaphandle kwami, impela ngizokugquma ejele”.

Wathi [uMusa]: “Ake ngikulethele into ethe ukucaca”.

Wathi: “Yilethe uma ngempela uqinisile”.

Wajikijela induku yakhe gubhu yaphenduka inyoka esobala.

Wakhipha isandla sakhe gubhu saphenduka saba mhlophe kwababukayo.

Wathi [uFirawuni] kuzikhulu ezimhaqile: “Impela lona umlumbi ogogodile”.

Ufuna ukunikhipha ezweni lenu ngobulumbi bakhe; ngakhoke nithi akwenziwe njani na?

Bathi: “Awumyeke nje benomfowabo bese uthumela ababuthanisi kuzo izifunda”.

Bakulethele bonke abalumbi abagogodile.

Babuthaniswa abalumbi ngesikhathi sosuku olalunqunyiwe.

Kwase kuthiwa kubantu, “ingabe senibuthene na?”

Mhlawumbe sizolandela abalumbi uma kuyibona abanqobayo.

Kuthe lapho abalumbi befika bathi kuFirawuni: “Ingabe ukhona umvuzo esizowuthola uma kuba yithina abanqobayo”.

Wathi: “Yebo futhi niyoba izithenjwa”.

Wathi kubo uMusa: “Phonsani lokho enikuphonsayo”.

Baphonsa izintambo zabo nezinduku zabo base bathi: “Ngobukhulu buka Firawuni impela yithina esiyonqoba”.

NoMusa wabe esephonsa induku yakhe, gubhu yiyo leya isidla konke lokhu ababekhohlisa ngakho.

Abalumbi bawa phansi ngobuso bekhothama.

Bathi: “Siyakholelwa eNkosini yendalo yonke”.

INkosi kaMussa noHaruna.

Wathi [uFirawuni]: “Nikholwa nguye ngingakanivumeli mina; impela ungugosa wenu lona owanifundisa ubulumbi, nizokwazi kahle. Ngizonqamula izandla zenu nemilenze yenu ngokuphambana bese nginibethela nonke”.

Bathi [abalumbi]: “Akunakinga, ngokuba siyobuyela eNkosini yethu”.

Impela sifisa ukuthi iNkosi yethu isithethelele izimpambuko zethu ngokuba sibe ngabakoqala ukukholwa.

Sabe sesembulela kuMusa sathi: “Hamba nezigqila zami ebusuku, impela niyolandelwa”.

uFirawuni wabe esethumela ababuthanisi ezifundeni.

[wathi uFirawuni], Impela laba bawuquqaba oluwubala nje.

Futhi basidine kabi.

Futhi thina siyibutho eliphapheme.

Sabe-ke sesibakhipha ezivandeni nemithombo.

Nemicebo nesindawo ezinhle.

Sakundlulisela kanjalo kusizwe sakwa Isirayeli.

Babalandela ekuseni kuphuma ilanga.

Kuthe lapho esebonana womabili amaqembu, laba ababe noMusa bathi: “impela sesibanjiwe”.

Wathi [uMusa]: “Phinde! iNkosi yami inami izongihola”.

Sabe sesambulela kuMusa sathi, “shaya ulwandle ngenduku yakho”, lwaqhekeka, yonke ingxenye yaba ngathi intaba enkulukazi.

Sabe sesisondeza laba abanye.

Sahlenga uMusa nabo bonke labo ababe kanye naye.

Sabe seminzisa laba abanye.

Impela kulokho kunesifundo, kepha iningi labo alikholwa.

Impela iNkosi yakho inguSomandla Onesihawu.

Balandise futhi ngendaba ka Ibhirahimu.

Mhla ethi kuyise nesizwe sakhe: “Yini lokhu enikukhonzayo na?”

Bathi: “Sikhonza izithixo futhi sizinikele kuzo”.

Wathi: “Ingabe ziyanizwa lapho nikhuleka na?”

Kumbe kukhona ezinizuzisa kona noma zinilimaze ngakho na?

Bathi: “Phela safumanisa okhokho bethu benza kanjalo”.

Wathi: “Niyakubona lokhu enikukhonzayo...”

Nina nokhokho benu basendulo.

Kuyisitha sami ngaphandle kweNkosi yendalo yonke.

Lena engidalile okuyiyona engiholayo.

Lena engipha ukudla nokuphuzwayo.

Futhi uma ngigula iyona engilaphayo.

Lena eyothatha umphefumulo wami iphinde ingivuse.

Lena engifisa ukuba ingithethelele izimpambuko zami ngoSuku lokwahlulela.

Nkosi yami ngiphe ubuhlakani ungihlanganise nabaqotho.

Ungenzele izincomo ezinhle kulabo abalandelayo.

Futhi ungenze ngibe omunye wezindlalifa zeJana yentokomalo.

Uthethelele nobaba wami, impela ungodukile.

Futhi ungangihlazisi ngosuku lokuvuswa.

Ngosuku lapho umcebo nezingane zingekuba nasizo.

Ngaphandle kwaloyo ofike ku Allah nenhliziyo emsulwa.

Futhi iJana iyobe isisondezelwa labo abathobela u Allah.

Bese neJahanamu ivezelwa labo abangabadukisi.

Kuyobe sekuthiwa kubo: “Kuphi lokhu ebenikukhonzana?”

Ngaphandle kuka Allah; ingabe kuyonisiza noma kuzisize kona na?

Bayobe sebelahlelwa kuyo bona nabadukisi.

Kanye nebutho likaIbilisi bonke ndawonye.

Bayothi – kulapho bephikisana bodwa kuyo.

Simfunge u Allah, impela besisekudukeni okusobala.

Mhla sinilinganisa neNkosi yendalo yonke.

Futhi akekho osidukisile ngaphandle kweziphula mthetho.

Akekho oyosishwelezela.

Futhi akekho ongumngani osendele.

Uma nje singathola ithuba lokubuyela emuva, siyoba ngabakholwayo.

Impela kulokho kunesifundo, kepha iningi labo alikholwa.

Futhi impela iNkosi yakho inguSomandla Onesihawu.

Isizwe sika Nuhu saphika iZithunywa.

Mhla umfowabo uNuhu ethi kubo, “ake nithobele u Allah”.

Impela mina ngiyiSithunywa esithembekile kini.

Ngakhoke thobelani u Allah nilalele nami.

Futhi anginiceli mvuzo ngokuba umvuzo wami useNkosini yendalo yonke.

Ngakhoke thobelani u Allah nilalele nami.

Bathi: “Singakukholwa kanjani ube ulandelwa izichaka”.

Wathi: “Akusiwo umsebenzi wami ukwazi ngalokho abakwenzayo”.

Impela iNkosi yabo kuphela eyobahlulela ukube nje benazi.

Futhi mina ngeke ngaxosha abakholwayo.

Mina ngiyiSithunywa nje esicacisayo.

Bathi: “Uma ungaphezi we Nuhu, impela uzokhandwa ngamatshe”.

Wathi: “Nkosi yami, impela isizwe sami asingikholwa”.

Yehlulela kahle phakathi kwami nabo futhi ungihlenge mina nalabo abakholwayo abakanye nami.

Samhlenga yena kanye nalabo ababekanye naye emfuleni.

Sabe sesiminzisa emuva kwalokho labo abasala.

Impela kulokho kunesifundo, kepha iningi labo alikholwa.

Futhi impela iNkosi yakho inguSomandla Onesihawu.

Isizwe sakwa Adi asikholwanga iZithunywa.

Mhla umfowabo uHudi ethi kubo, “Kungani ningathobeli u Allah na?”

Impela mina ngiyiSithunywa esithembekile kini.

Ngakhoke thobelani u Allah nilalele nami.

Futhi anginiceli ngakho umvu ngokuba umvuzo wami useNkosini yendalo yonke kuphela.

Ingabe nakha kuyo yonke indawo ephakeme izakhiwo eziphakeme nichitha isikhathi na?

Futhi nakha izakhiwo ezinkulu okungathi nizohlala unaphakade.

Futhi uma nigasela nigasela ngobudlova.

Ngakhoke thobelani u Allah nilalele nami.

Nithobele lowo onandisele lokho enikwaziyo.

Unandisele imfuyo nezingane.

Nezivande nemithombo.

Impela nginesabela isijeziso soSuku olukhulu.

Bathi: “Kuyefana nje kithi uyeluleka noma aweluleki”.

Lokhu yindlela nje yalabo basendulo.

Futhi angeke sijeziswe.

Abamkholwanga, sababhubhisa. Impela kulokho kunesifundo, kepha iningi labo alikholwa.

Futhi impela iNkosi yakho inguSomandla Onesihawu.

Isizwe sakwa Tamudi asikholwanga iZithunywa.

Mhla umfowabo uSwalihi ethi kubo, “Kungani ningathobeli u Allah”.

Impela mina ngiyiSithunywa esithembekile kini.

Ngakhoke thobelani u Allah nilalele nami.

Futhi angiceli mvuzo ngakho ngokuba umvuzo wami useNkosini yendalo yonke.

Ingabe niyekwa kanje lana niphephile na?

Ezivandeni nemithombo.

Nezitshalo namasundu ozithelo zayo zivuthwe kahle.

Futhi nibaza ngobuchwepheshe izindlu ezintabeni.

Ngakhoke thobelani u Allah nilalele nami.

Futhi ningalaleli umyalelo walabo abayizephula mthetho.

Labo abenza ukuphambuka ezweni futhi abangalungisi.

Bathi: “Impela wena uloyiwe”.

Awuyilutho ngaphandle nje komuntu ofana nathi; ngakhoke silethele isibonakaliso uma ngempela uqinisile.

Wathi: “Nali ikameli lika Allah. Linosuku lalo lokuphuza nani ninosuku lwenu lokuphuza olunqunyiwe.

Ningalenzi okubi funa nehlelwe isijeziso sosuku olukhulu.

Balihlaba, bazisola.

Behlelwa isijeziso. Impela kulokho kunesifundo, kepha iningi labo alikholwa.

Futhi impela iNkosi yakho inguSomandla Onesihawu.

Isizwe sikaLuti asikholwanga iZithunywa.

Mhla umfowabo uLuti ethi kubo, “kungani ningathobeli u Allah na?”

Impela mina ngiyiSithunywa esithembekile kini.

Ngakhoke thobelani u Allah nilalele nami.

Futhi anginiceli mvuzo ngakho ngokuba umvuzo wami useNkosini yendalo yonke.

Ingabe nikhanuka amadoda endalweni yonke na?

Niyekele lokho u Allah anidalele kona kubafazi benu. Impela nina ningabantu abayiziphula mthetho.

Bathi: “Uma ungaphezi weLuti uzokhandwa ngamatshe”.

Wathi: “Impela mina ngiyakugxeka enikwenzayo”.

Nkosi yami ngihlenge mina nomndeni wami kulokho abakwenzayo.

Sabahlenga bonke yena nomndeni wakhe.

Ngaphandle kwesalukazi esaba kanye nabasalayo.

Sase sibhubhisa laba abanye.

Sabathela ngemvula, yaze yayimbi imvula yalabo abaxwayisiwe.

Impela kulokho kunesifundo, kepha iningi labo alikholwa.

Futh impela iNkosi yakho inguSomandla Onesihawu.

Abezivande [eMadiyana] abakholwanga iZithunywa.

Mhla uShu’ayibu ethi kubo, “kungani ningathobeli u Allah na?”

Impela ngiyiSithunywa esithembekile kini.

Ngakhoke thobelani u Allah nilalele nami.

Futhi anginiceli mvuzo ngakho ngokuba umvuzo wami useNkosini yendalo yonke.

Linganisani isikali ngokugcwele ningabi amaqili.

Nikale ngesikali esiqondile.

Futhi ningaqili abantu izinto zabo noma nenze impambuko ezweni nenkohlakalo.

Futhi thobelani lona odale nina nezizwe zasendulo.

Bathi: “Impela wena uloyiwe nje kwaphela”.

Futhi awuyilutho ngaphandle nje komuntu ofana nathi futhi sicabanga ukuthi unamanga.

Ngakoke sehlisele ingxenye yesijeziso esivela ezulwini uma ngempela uqinisile.

Wathi: “iNkosi yami ikwazi kahle lokhu enikwenzayo”.

Kepha abamukholwanga; base behlelwa isijeziso sosuku lwefu. Impela kwabe kuyisijeziso sosoku olukhulu.

Impela kulokho kunesifundo, kepha iningi labo alikholwa.

Futhi iNkosi yakho inguSomandla Onesihawu.

Impela yembulelwe [iKurani] iNkosi yendalo yonke.

Yehliswe nguRuhu [uJibhirili] othembekile.

Eyehlisela enhlizweni yakho ukuze ube ngumxwayisi.

Ngolwimi lwesi Arabhu olucacile.

Futhi impela ibaluliwe eMibhalweni yaphambilini.

Ingabe akubanga isibonakaliso esanele kubo ukuthi izazi zesizwe sakwa Isirayeli ziyayazi [iKurani] na?

Ukube sayembulela kwabanye abangewona ama Arabhu.

Bese ebafundela yona, bebengeke bayikholwa.

Sakufaka kanjalo [ukuphika iqiniso] ezinhlizweni zeziphula mthetho.

Abasoze bakholwa yiyo kuze babona isijeziso esibuhlungu.

Sizofika kubo bengazelele kulapho benganakile.

Bese bathi: “Asisanikwa nesikhasha nje”.

Ingabe bebejahe isijeziso seThu na?

Ubona kanjani uma sibajabulisa iminyaka.

Bese kufika kubo lokho abakuthenjisiwe.

Konke lokhu abanethezeka ngakho akuyikuba siza ngalutho.

Futhi asikaze sibhubhise isizwe ngaphandle sithole umexwayisi.

Njengesikhumbuzo. Futhi asibona labo abenza okungebulungiswa.

Futhi akikaze [iKurani] ilethwe ngoShayitani.

Abanalo igunya futhi abasoze bakhona.

Ngokuba bavinjelwe ukuzwa.

Ngakhoke ungakhonzi esinye isikhonzwa ngaphandle kuka Allah funa ube ngomunye wabajeziswayo.

Xwayisa umndeni oseduze.

Uzithobe kulabo abakulandelayo kwabakholwayo.

Uma bengakulaleli, yithi: “Mina angihlangene nalokho enikwenzayo”.

Thembela kuSomandla Oneshawu.

Lona okubonayo lapho usukuma [kuswala].

Nokuphenduka kwakho nabakhothamayo abawa ngobuso.

Impela Yena Ungozwayo Owaziyo.

Ake nginazise ukuthi oShayitani behlela kubani.

Behlela kuwo wonke lowo onamanga oyisonakali.

Bayazama ukulalela kepha iningi labo linamanga.

Futhi izimbongi zilandelwa ngabadukile.

Awuboni yini ukuthi bayahema kuzo zonke izigodi.

Nokuthi basho lokho abangakwenzi bona.

Ngaphandle kwalabo abakholwayo abenza okulungileyo, nabakhumbula u Allah kakhulu abaziphindiselayo uma kuno kungebulungiswa okwenziwe kubo. Futhi labo abaphambukile bazokwazi maduze nje ukuthi yisiphi isiphetho abayophelela kuso.

Twa-Sin; lena imibiko yeKurani neNcwadi ecacisayo.

Ukuze ibe umhlahla ndlela nezindaba ezinhle kulabo abakholwayo.

Labo abaqikelela ukwenza iswala bakhiphe nezakati futhi benesiqiniseko ngelizayo.

Impela labo abangakholelwa kwelizayo; sibakhangisele izenzo zabo ingakho benhlanhlatha.

Yibona labo abayothola isijeziso futhi nakwelizayo bangabalahlekelwe.

Futhi impela wena [Muhamadi] wembulelwa iKurani ivela koKhaliphile Onolwazi.

Landisa ngamhla uMusa ethi kumndeni wakhe: “Ngibone umlilo, ngizonilethela ulwazi noma nginilethele isikhuni esivuthayo ukuze nani nothe”.

Kuthe lapho efika kuwo kwamenyezwa, kwathiwa: “Ubusisiwe osemlilweni nalowo oseduze nawo futhi makangcweliswe u Allah iNkosi yendalo yonke”.

Musa, impela Mina ngingu Allah onguSomandla Okhaliphile.

Phonsa phansi induku yakho. Kuthe lapho eyibona inyakaza okwenyoka, wateta izithende wangabheki emuva. Musa ungesabi, ngokuba izithunywa azesabi Kimi.

Ngaphandle kwalowo owenza impambuko bese enza okuhle emuva kokubi; impela Mina nginguMthetheleli Onesihawu.

Faka isandla sakho ohlangothini lwakho, siyophuma simhlophe singenasifo. Esinye sezibonakaliso eziyisishagalolunye kuFirawuni nesizwe sakhe. Impela bangabantu abayiziphula mthetho.

Kuthe labo izibonakaliso zeThu zifika kubo zibakhanyisela bathi: “lobu ubulumbi obusobala”.

Baziphika ngokungekho ubulungiswa nokuzigqaja, kepha izinhliziyo zabo zazinesiqiniseko ngazo. Awubheke ukuthi saba njani isiphetho salabo abaphula umthetho.

Futhi sanika uDawudi noSulayimani ulwazi, base bathi: “Lonke udumo ngoluka Allah lona osibusisile kuneningi lezigqila zaKhe ezikholwayo”.

uSulayimani walandela uDawudi [ngobuthunywa nangolwazi nobukhosi]; wathi: “Bakwethu, thina sifundiswe ulwimi lwezinyoni futhi saphiwa kuyo yonke into. Impela lokhu umusa osobala”.

uSulayimani wanuthelwa ibutho lakhe elifaka phakathi amajini nabantu nezinyoni futhi lalinabakhuzi.

Kuthe lapho befika esigodini sezintuthwane, yathi intuthwane: “Zintuthwane ngenani ezindlini zenu ningaze ninyathelwe nguSulayimani nebutho lakhe kulapho bengaboni”.

Wamamatheka ehleka [uSulayimani] inkulumo yayo [intuthwane], wabe esethi: “Nkosi yami ngiphe amandla okubonga isibusiso saKho lesi ongibusiswe ngaso mina nabazali bami nokuthi ngenze okulungileyo okukujabulisayo bese ngomusa waKho ungihlanganise [kwelizayo] nezigqila zaKho eziqotho.

Wahlola izinyoni wabe esethi: “Kungani ngingamboni uzinengweni kumbe akekho”.

Impela ngizomjezisa ngesijeziso esinzima noma ngimnqume nomake angilethele ubufakazi obucacile.

Akupholanga maseko [watheleka uzinengweni], wathi: “Ngithole lokhu ongakakutholi, ngifika kuwe nje ngiphuma eSaba’ ngiphethe ulwazi oluqiniseki”.

Ngithole umfazi ebabusa futhi uphiwe kukho konke [ucenile] belu unesihlalo esikhulu.

Ngimthole yena nesiswe sakhe bekhothamela ilanga ngaphandle kuka Allah futhi uShayitani ubenzele zinhle izenzo zabo, ngalokho wabavimba ekubeni sendleleni eqondile ukuze bangaphinde babe sendleleni eqondile.

Ukuze bangakhothameli u Allah bawe ngobu, Lona okhipha isundu emazulwini nasemhlabeni futhi wazi konke enikufihlayo nalokho enikuvela obala.

U Allah, akekho omunye okufanele akhonzwe ngaphandle kwaKhe; iNkosi yeSihlalo Esikhulu.

Wathi [uSulayimani]: “Sizobona ukuthi uqinisile yini noma unamanga”.

Hamba nalencwadi yami ufike ubaphonsele yona bese usuka kubo, ubheke ukuthi baphuma naliphi.

Wathi [umfazi obusayo]: “Zikhulu, ngiphonsele incwadi ehloniphekile”.

Ivela kuSulayimani, yithi: “Egameni lika Allah Onomusa Onesihawu...”

Ungaziqhakambisi kimi, futhi wozani kimi seningamaMusilimu [abazinikele entandweni ka Mdali].

Wathi [umfazi obusayo]: “Nina zikhulu, ngelulekeni kulolu daba lwami, belu angikaze ngithathe isinqumo ningakangibonisi.

Zathi: “Thina sihlome ngokuphelele futhi nempi siyilwa kanzima, kepha sinqumo ngesakho, ngakhoke bona ukuthi uyalela ngani”.

Wathi: “Impela amakhosi uma engena [ehlasela] isizwe bayasonakalisa; bahlaze izikhulu zaso; into ahla eyenza”.

Mina ngizothumela kubo isipho, bese ngibona ukuthi zibuya naliphi izigijimi.

Kuthe uma sesifikile [isigijimi] kuSulayimani wathi: “Nifuna ukungandisela umcebo na? Lokhu engikunikwe ngu Allah kungcono kakhulu ukudlula lokhu aniphe kona; empeleni nin nijatshuliswa yilezipho zenu”.

Buyela emuva kubo. Impela sizogasela kubo ngebutho abangasoze balimela bese sibakhipha kuyo [iSaba’] behlazekile bedicilelekile.

Wathi [uSulayimani]: “Bandla, ngubani kini ongangilethela isihlalo sakhe ngaphambi kokuthi bafike kimi sebengama Musilimu”.

Sathi isigwebedla sejini: “Mina ngingakulethela sona ungakasukumi endaweni yakho, futhi nginamandla alokho ngithembekile”.

Lona onolwazi lweNcwadi wathi: “Mina ngingakulethele sona ungakacwayizi”. Kuthe uma esibona sihleli phambi kwakhe wathi: “Lokhu umusa weNkosi yami; ufuna ukungivivinya ukuba ngizobonga noma ngeke ngibonge. Belu lowo obongayo, uzibongela yena uqobo futhi lowo ongabongi; impela iNkosi yami Ingezimele Ephayo”.

Wathi: “Yenzani izinguquko esihlalweni sakhe, sibheke ukuthi uzokhanyelwa yini noma uyoba ngomunye walabo abangeke bakhanyelwa.

Kuthe lapho efika kwathiwa: “ingabe sinje isihlalo sakho na?” Wathi: “Ngathi yiso”. [uSulayimani wathi]:”Sanikwa ulwazi ngaphambi kwakhe futhi besi ngamaMusilimu”.

Lokhu ayekukhonza ngaphandle kuka Allah yikona okwamvimba [ekukholweni]. Impela wabe engomunye wabantu abangakholwa.

Kwathiwa kuye: “Ngena enqabeni ewumbhoshongo”. Kethu uma eyibona wacabanga ukuthi indawo enamanzi wase wakhwica kwavele imilenze yakhe. Wathi [uSulayimani]: “Lena inqaba eyakhiwe ngengilazi [okungathi inamanzi]”. Wathi: “Nkosi yami impela bengiphambukile, manje ngiyazinikela Kanye noSulayimani eNkosini yendalo yonke”.

Futhi sathumela esizweni sakwa Tamudi umfowabo uSwalihi, ukuba athi: “Khonzani u Allah”; kepha baba ngamaqembu amabili bephikisana.

Wathi [uSwalihi]: “Bantu bakithi, kungani nijahela okubi ngaphambi kokuhle na? Kungani ningaceli intethelelo ku Allah ukuze nihawukelwe na?”

Bathi: “Sikubona usilethela amashwa wena nalabo abanawe”. Wathi: “Amashwa enu aku Allah; kepha nina ningabantu abavivinywayo”.

Futhi kwakunabantu abayisishagalolunye endaweni abonakele futhi abengenzi okulungileyo.

Bathi: “Fungani ngo Allah ukuthi sizomhlasela ebusuku nomndeni wakhe, bese sithi kwabakubo asikubona ukufa komndeni wakhe futhi siqinisile”.

Bakha itulo Nathi sahlela esikuhlelayo kulapho bona bengazi.

Awubheke nje ukuthi sabanjani isiphetho setulo labo; sababhubhisa bonke bona kanye nesizwe sabo.

Naziya izindlu zabo zidilikile ngenxa yokuphambuka kwabo. Impela kulokho kunesifundo kubantu abanolwazi.

Sabahlenga labo ababekholwa futhi bethobela u Allah.

Futhi balandise ngoLuti, mhla ethi kubantu bakhe: “Nenza amanyala nibhekile na?”

Nikhanuka amadoda niyeke abafazi! Impela ningabantu abayiziwula.

Impendulo yabantu bakhe kwavana ukuthi bathi: “Baxosheni abakwa Luti endaweni yenu; impela bangabantu abazenza ngcono”.

Kepha samhlenga yena nomndeni wakhe ngaphandle komkakhe, sanquma ukuthi uyokubo omunye wababhubhayo.

Sabehlisela imvula [yamatshe]; yaze yayimbi imvula yalabo abaxwayiswa.

Yithi: “Lonke udumo ngoluka Allah, futhi ukuthula makube ezigqileni zaKhe lezi aziqokile. Ingabe ngu Allah ongcono noma lokho abakubhangqayo na?”

Kumbe lowo owadala amazulu nomhlaba wanehlisela amanzi emvula, wabe esenihlumisela izivande ezinhle, nina ebeningeke nikwazi ngisho ukuhlumisa esisodwa isihlahla sayo. Ingabe-ke kukhona yini esinye isikhonzwa esikanye no Allah na? Empeleni nina ningabantu abafanisayo.

Kumbe lowo owenze umhlaba wazinza wadala phakathi kwawo imifula, wawufakela nezikhonkwane [izintaba] futhi bafaka nesisitho phakathi kwezilwandle.Ingabe-ke kukhona yini esinye isikhonzwa esikanye no Allah na? Empeleni iningi labo alinalwazi.

Kumbe lowo ophendula lowo osebunzimeni lapho ekhuleka kuYe asuse ubunzima futhi onenze naba ngabalandeli emhlabeni [balabo abanandulelayo]. Ingabe-ke kukhona yini esinye isikhonzwa esikanye no Allah na? Kuncane enikulalelayo.

Kumbe lowo oniholayo ebumnyameni basezweni nasolwandle, lowo ophinde athumele imimoya eyethula izindaba ezinhle ngaphambi kokufika komusa waKhe [imvula]. Ingabe-ke kukhona yini esinye isikhonzwa esikanye no Allah na? Uphakeme u Allah kunalokho abakubhangqayo.

Kumbe lowo okususa phansi ukudala aphinde futhi akuvuse, lowo ophinde anondle ngokuvela ezulwini nasemhlabeni. Ingabe-ke kukhona yini esinye isikhonzwa esikanye no Allah na? Yithi: “Lethani ubufakazi benu uma ngempela niqinisile”.

Yithi: “Akekho osemazulwini nasemhlabeni owazi okungabonwayo ngaphandle kuka Allah, futhi abazi ukuthi bayovuswa nini”.

Kepha ulwazi lwabo luyophelela kwelizayo. Kepha [manje] bayalingabaza. Empeleni abaliboni [ikwelizayo].

Laba abangakholwa bathi: “Kuyothi lapho sesiyinhlabathi kanye nokhokho bethu bese siphinda sivuswa?”

Impela kade sasithenjiswa lokhu thina nokhokho bethu ngaphambi kwalokhu; impela lokhu izinganekwane zasendulo kuphela.

Yithi: “Hambani emhlabeni, bese nibheka ukuthi saba njani isiphetho seziphula mthetho”.

Ungakhathazeki ngabo futhi ungaphatheki kabi ngamatulo abawakhayo.

Futhi bathi: “Kanti siyofika nini lesi sithembiso uma ngempela niqinisile”.

Yithi: “Kungenzeka ukuthi sekuseduze lokhu enikujahile”.

Futhi iNkosi yakho inomusa kusintu impela, kepha iningi labo alibongi.

Futhi iNkosi yakho ikwazi kahle impela okufihlwe izinhliziyo zabo nalokho abakukhipha obala.

Akukho nokukodwa okungabonwayo ezulwini nasemhlabeni okungaqoshiwe eNcwadini Ecacisayo [Uqwembe Olulondiwe].

Impela leKurani ilandisela abakwa Isirayeli okuningi kwalokho abaphikisana ngakho.

Futhi iwumhlahlandlela nomusa kubakholwayo.

Impela iNKosi yakho iyokwehlulela phakathi kwabo ngomthetho waKhe. Futhi unguSomandla Owaziyo.

Ngakhoke thembela ku Allah, ngokuba useqinisweni elisobala.

Impela wena [Muhamadi] awusoze wenza abafileyo bakwazi ukuzwa futhi angeke wakwazi ukwenza isimumu sizwe isimemo lapho sefulathela sishaya indiva.

Futhi angeke uhole izimpumputhe uzikhiphe ebumnyameni bazo. Uyokhona kuphela ukwenza bakuzwe labo abakholwa yimibiko yeThu bebe bengaMamusilimu.

Uma isinqumo sesehlela kubo, siyobakhiphela isilwane emhlabeni esiyobatshela ukuthi abantu babe ngenasiqiniseko ngemibiko yeThu.

Futhi ngosuku lapho siyobabuthanisa amaqembu ngamaqembu kuzo zonke izizwe, alabo ababephika imibiko yeThu bese bayaqhutshwa.

Kuthi lapho sebefika, athi [u Allah]: “Niphike imibiko yaMi ningenalwazi ngayo na, kanti yini lokhu ebenikwenza na?”

Isinqumo [sesijeziso] siyobe sesehlela phezu kwabo ngenxa yempambuko yabo futhi abayikukhuluma.

Ababonanga yini ukuthi senze ubusuku ukuba baphumule kubo nemini ukuba babone. Impela kulokho kunezibonakaliso kubantu abakholwayo.

Futhi ngosuku lapho kuyoshaywa icilongo; bonke abasemazulwini nasemhlabeni bayokwethuka ngaphandle kwalabo abathandwa ngu Allah. Futhi bonke bayoza kuYe [u Allah] bedixilelekile.

Uyothi uma ubona izintaba ucabange ukuthi zimile kanti sesihambisa okwamafu. Lokhu ukwenza kuka Allah Lona oyingcweti kuyo yonke into. Impela Yena Unolwazi ngalokho enikwenzayo.

Lowo owenza okuhle uyothola okungcono ukudlula lokho futhi bayophepha ekwesabeni kalolo Suku.

Futhi lowo owenza okubi, ubuso babo buyontshingelwa emlilweni. Niyojeziswela lokho enikwenzile kuphela.

Mina ngiyalelwe ukuba ngikhonze iNkosi yalomuzi [waseMakha], yona lena ewenze wahlonipheka futhi yonke into ngeyaYo. Futhi ngiyalelwe ukuba ngibe owokuqala ukuba yiMusilimu.

Nokuthi ngifunde iKurani. Ngakhoke lowo olandela indlela eqondile uzenzela yena. Futhi lowo odukayo, yithi: “Mina ngingumexwayisi nje kuphela”.

Futhi yithi: “Lonke udumo ngoluka Allah, uzonibonisa izibonakaliso zaKhe nani nizozazi. Futhi akusikho ukuthi iNkosi yakho ayikwazi enikwenzayo.