Fulani Mokhtasar — Yusuf 12:1 – Tâhâ 20:135

Alif, laam, raa : nanndo ɗee Aayeeje jantanooma fii mun ka fuɗɗorde cortewol Albaqarah. Ɗee Aayeeje janngeteeɗe e ngol cortewol, ko jeyaaɗe e Ayeeje Alqur'aanaare ɓanngunde nden e ko nde yowondiri e mun.

Menen Men jippiniriinde janngeteende e ɗemngal Aarabu, belajo'o, onon Aarabu'en, on faamaay maanaaji mayre.

Menen Meɗen fillano maa an Nulaaɗo, ko ɓuri moƴƴude e fillayee, sabu goongugol ɗi e hisugol konnguɗi majji e njuɓɓudi majji, ko Men jippiniri kon ndee Alqur'aanaare e maaɗa. Hay si a laatinoke ado jippineede nde, ko a jeyaaɗo e welsindiiɓe ɓen e oo fillayee, a anndaano fii makko.

Meɗen habre an Nulaaɗo, tuma nde Yuusufu maakannoo ben makko Yaaquuba: "Ko onon yo baaba'en, mi yi'i e koyɗol koode sappo e go'o, mi yi'i kadi naange ngen e lewru ndun; mi yi'i ɗin fow no sujjana lam. Ngol koyɗol hari ko yacciningol wewlinirde Yuusufa (yo o his).

Annabi Yaaquuba maakani ɓiɗɗo makko on Yuusufa:Ko an yo ɓinngel am, wata a hoyɗitan musiɗɓe maa ɓen koyɗol maa ngol, sakko ɓe faama ngol, ɓe haasido maa, ɓe fewjane fewjoore haasidaaku maɓɓe. Pellet seytaane wonannde neɗɗanke ko gaño ɓannginɗo ngayngu.

Ko wano yiiru-ɗaa ɗin koyɗi non, Joomi maa an Yuusufa suɓoray maa, O anndine firo koyɗi, O timmina neema Annabaaku ngun e maaɗa, wano O timminira mo e baabiraaɓe maa ɓen ɗiɗo ado maaɗa: Ibraahiima e Ishaaqa. Pellet Joomi maa ko Annduɗo tagu Makko ngun, Ñeeñuɗo e yiilde mbo.

Gomɗii wonii e kabaaru Yuusufa on e musiɗɓe makko ɓen, taskuyeeji e waajuuji wonannde lanndotooɓe fii maɓɓe ɓen.

Tuma nde musiɗɓe makko ɓen wi'unoo hakkunde maɓɓe: "Pellet Ko Yuusufa e neene-gooto maun ɓuraa yiɗeede ka ben-men dii enen, enen le ko en jamaa ɗuuɗuɓe limoore, ko honno ɓe ɓurdinirta ɓe e dow meeɗen? Menen men yi'ii baaba'en e faljere ɓanngunde, tuma ɓe ɓurdinnoo ɓeya ɗiɗo e dow amen ko aldaa e sabu feeñuɗo.

Waree Yuusufa maa feroɗon mo e leydi woɗɗundi; yeeso ben mon ngon heeranoo on, ɓe yiɗa on giggol timmungol, wonton ɓaawo ɗen kuuɗe mon- warugol mo maa feragol mon- ɗon yimɓe moƴƴuɓe, si on tuubi e junuubi mon ɗin.

Gooto e musiɗɓe makko ɓen wi'i: Wata on waru Yuusufa, on wedduto mo ka niɓe woyndu yoga e seteeɓe rewooɓe ɗon ɓen hocca-mo. Ko ɗum ɓuri newaade diini warugol mo ngol, si on laatike siinuɓe e ko wi'uɗon fii makko kon.

Nde ɓe fottanno pottingol mo, ɓe wi'ani ben maɓɓe Yaaquuba: Ko an yo ben amen, ko heɓu-maa a hoolotaako men e fii Yuusufa? Menen le ko men yurmeteeɓe mo, meɗen reena mo e ko lorrota mo, ko men laaɓanooɓe mo reenooɓe mo haa o ruttora kaa maaɗa kisal. Ko haɗata maa acciditah mo e amen?

Newnan-men yaltidugol e makko janngo, o ñaama, o fija. Menen ko men reenooɓe mo e kala lorra memoowo mo.

Annabi Yaaquuba maakani ɓiɗɓe makko ɓen: Min no sunina lam nde yahdoton e makko; tawde mi muññotaako sertugol e makko, miɗo hulani mo wata saafaandu(boyeeru) ñaamu-mo ka welsindor-ɗon e makko ñaamugol e fija.

Ɓe wi'ani baaben maɓɓe: Pellet si saafaandu ñaamii Yuusufa e hoore ko men jamaa ɗuuɗuɓe, haray ontuma ko men hayruɓe ɓe moƴƴere alah e mu'un; tawde men haɗaali ndu e makko.

Annabi Yaaquuba acci ɓe yaltidi e makko. Nde ɓe yahunoo e makko ka woɗɗi, ɓe fottani bugagol mo ka niɓe woyndu, Men wahayini e Yuusufa ontunma: Ma a yeetoyoɓe ɗee kuuɗe maɓɓe hara ɓe so'aa anndude tuma yeetitoto-ɗaaɓe ɗum.

Baaba gootooɓe Yuusufa ɓen arti ka ben maɓɓe kiikiiɗe hiɓe woykinoo majjintina hodo maɓɓe o.

Ɓe wi'i: Ko an yo baaben amen, menen men yehii meɗen adodnira e dogugol bugoo ndaga, men acci Yuusufa ka comci amen e ka njooɓa amen ko aynana men; saafaandu ndun ñaami mo. A goongintaa men non, hay si tawii ko men goonguɓe e ko men humpitu maa kon.

Ɓe teŋtiniri fewjoore maɓɓe nden ƴoyre: ɓe ardi e dolokke Yuusufa on hino moddiniraa ƴiiƴam goo, ƴaaƴorgol ɗum batte ko saafaandu(boyeeru) ndun ñaami mo kon. Kono Annabi Yaaquuba gelorii fenaande nden ko tawi ko dolokke on seekaaki, o maakani ɓe: Wanah no siforiɗon non woniri. Ko woni goonga, ko wonkiiji mon ɗin cuɗinanii on fiyaaku bonɗo, huuwuɗon mo. Fiyaaku am on non min, ko muñal moƴƴal e ɗum. Ko Alla woni wallinorɗo e ko sifiɗon kon fii Yuusufa.

Seteeɓe ari, ɓe nuli ko ƴoogana ɓe ndiyam, on jippini baagal makko ngal ka woyndu, Yuusufa nanngi ɓoggol ngol. Nde ƴoogoowo on yi'unoo mo, o weltii o wi'i: Ee welo-welo am! E hino paykum! Ɓen arɓe ƴoogugol suuɗi mo e seteeɓe heddiiɓe ɓen, sikkugol ko o keyee(marsandiis) mo ɓe waawata yeeyude. Alla non no anndi ko ɓe waɗata kon Yuusufa e fii suuɗugol yeeya. huunde suuɗaaki Mo e golle maɓɓe ɗen.

Ƴoogoynooɗo on e wondiiɓe makko ɓen yeeyiroyi mo Misra coggel famɗungel: ngel woni dirhamu-woy limotoo-koy. Ɓe woni welsindoriiɓe e makko sabu hittingol no ɓe ɓoortondira e makko ka yaawi; tawde ɓe anndii wanaa o maccuɗo, ɓe hulani ko'e maɓɓe e yimɓe makko ɓen. Ɗum ko hattirde e yurmeende Alla nden e makko, fii wata ɓe neeɓidu e makko.

Gorko sooduɗo mo on Misra wi'ani ɓeyngu makko: Teddin jipporde makko nden, moƴƴo-ɗaa e makko; hino gasa ka o nafira en wallitorgol en yoga e golleeji men maa jogitoɗen mo ɓiɗɗo ne'eteeɗo. Ko wano Men daɗndiri non Yuusufa e maayde, Men yaltini mo ka woyndu, Men humindiri ɓernde gorko on e makko; ko non kadi Men hoɗniri mo Misra fii yo Men anndin mo firo koyɗi. Alla non ko fooluɗo e fiyaaku makko on: ɗum ko laatotooɗum, alah firtinoowo Mo. Kono ɓurɓe ɗuuɗuɓe e yimɓe ɓen -woni heeferɓe ɓen- anaadah ɗum.

Nde Yuusufa yottinoo sagatalaaku makko ngun, Men okki mo faamu e anndal. Ko wano ndii njoɓdi ɗon Men yoɓirta moƴƴinooɓe ɓen ka rewugol Alla.

Debbo laamɗo on ɗaɓɓiri Yuusufa e newaare fii fijirde. O soki baafe ɗen no ɓe yeewra, o wi'i: "Aru e am!" Yuusufu maaki: "Mi moolorii Alla e ko noddataa lam e mun kon. Pellet Jeyɗo lam on moƴƴinii weerde am nde ka makko, mi janfotaako mo. Si mi janfike mo, haray mi tooñii. Pellet tooñooɓe ɓen maletaake.

Gomɗii debbo on himmirii waɗugol faahisaaku ngun. Ɗum kadi ari e miijo oya si wanaano o yi'ii e Aayeeje Alla ɗen ko haɗata mo e ɗum woɗɗina mo e mun. Men hollirii mo ɗe fii no Men yiltira mo e bone, Men woɗɗindina mo e jeeno e jenfa. Pellet Yuusufa ko jeyaaɗo e jeyaaɓe amen suɓiraaɓe Nulal e Annabaaku.

Ɓe ɗiɗo kala ɓe adondiri ka baafal: Yuusufa hari ko no daɗndira hoore-mun, debbo on kan ko fii haɗugol mo yaltugol. O nanngi dolokke makko fii wata o yaltu, o seekiri mo ɓaawo. Ɓe tawi moodi makko ka baafal. Debbo on wowlirani moodi mun ƴoƴre: Lepte alanaa on faalanaaɗo ɓeyngu maa bonki si wanaa kaso maa o leptiree lepte muusuɗe.

Yuusufa maaki: Ko kanko ɗaɓɓiri lam bonki, mi jaɓanaali mo. Alla waɗi suko jeyaakun e yimɓe debbo on wowli ka tiggu, ko seedorii wiide: Si tawii dolokke Yuusufa on o yeeso seekiraa, ɗum hollii haray debbo on goongii; tawde hari o salantono mo woni, kanko gorko on hray o fenay.

Si tawii non dolokke makko on ko ɓaawo seekiraa, ɗum hollii haray gorko on goongii; tawde haray ko debbo wonunoo ɗaɓɓirde mo bone, kanko himo dogude mo, debbo on ko fenuɗo.

Nde moodi makko yi'unoo dolokke Yuusufa on ko vaawo seekiraa, o yananaa e goonga Yuusufa kan, o wi': Ngol tukkugol maa ɗoo ko jeyaaɗum e pewje mon, onon rewɓe ɓen. Pellet pewje mon ɗen ko tiiɗuɗe.

O wi'ani Yuusufa: Ko an yo Yuusufa, yejjitu fii ɗum ɗoo, wata a yeetito gooto. An debbo on, ɗaɓɓir Joomi maa haforaneede junuubi maa ɗin; tawde pellet a jeyaama e bakkondimɓe ɓen sabu ɗaɓɓirgol maa Yuusufa fii bonki.

Kabaaru debbo on saakitii e saare nden. Rewɓe goo wi'iri ŋiñere: Debbo laamɗo on ɗaɓɓirii kurkaadu makko ndun hoore-mun. Gomɗii giggol ngol ɓurtirii mo ka ɓernde. Menen dey meɗen yi'ira oo debbo sabu ngol ɗaɓɓirgol mo e yiɗugol mo oo suka kurkaadu makko, e majjere ɓanngunde.

Nde ɓeyngu laamɗo on nanunoo rewɓe ɓen ɓe ño'irii mo ŋiñugol kuuɗe makko ɗen, o nelani ɓe fii yi'ugol Yuusufa no ɓe okki-mo ngantu. O hebilani ɓe ndaɗundi e ngawluuji, o jonni gooto kala e maɓɓe e laɓi ko lesira, o wi'ani Yuusufa (yo o his): Yatlu e maɓɓe. Nde ɓe ndaarunoo mo, ɓe ŋalɗi e ŋari makko kin, ɓe hetti juuɗe ɗen hakkee ko haa- waa-mbo. Ɓe wi'i: Kaawee Alla! Oo suka wanaa ɓanndinke. Kii ŋari makko ɗoo hebilanaaka ɓanndinke. Oo wonaali si wanaa malaa'ikaajo tedduɗo jeyaaɗo tedduɓe ɓen.

Debbo laamɗo on wi'ani rewɓe ɓen ɓaawo o yi'ii ko heɓi ɓen kon : Ko oo suka felirɗon lam giggol mun. Gomɗii mi ɗaɓɓirii mo bonki o haɗitii. Si tawii o waɗaali ko mi ɗaɓɓiri mo kon, ma o naatu kaso ma o jeye kadi e hoyɓe ɓen.

Yuusufa (yo o his) maaki himo toroo Joomi makko: Joomi am, ko kammbol kaso ngol ɓurani lam e ko ɓe noddata lam e mun kon e fijirde. Si a huncaali ittuɗaa lam e pewje maɓɓe ɗen, mi ooñoto e maɓɓe, mi jeyee e majjuɓe ɓen, mi waɗa faale maɓɓe on.

Alla jaabinani mo toraare makko nden, O huncani mo pewje debbo laamɗo on e rewɓe saare nden. Pellet, Ko kanko Seniiɗo On woni Nanoowo toraare Yuusufa nden e kala toraare, Annduɗo fiyaaku makko e kala fiyaaku.

Refti nde debbo laamɗo on e yimɓe maɓɓe ɓen yi'unoo maandeeji laɓɓinɗi Yuusufa ɗin, wonnde bee o sokee -fii wata ɓe wirto- haa e dumunna.

Ɓe soki mo. Sukaaɓe ɗiɗo naatidi e makko ka kaso. Gooto e maɓɓe wi'ani yuusufa: Min mi hoyɗii miɗo siiwa 'inau fii sanngara. Ɗiɗmo on wi'i: Min mi hoyɗii miɗo roondii cobbal ka hoore-am, colli no ñaama e maggal. Humpitii men, an Yuusufa, firo koyɗi amen. Menen men yi'ii ma jeyaaɗo e moƴƴinooɓe ɓen.

Yuusufu maaki: Ñaametee ardirantah on laamɗo on maa goɗɗo goo si wanaa mi yeetoto on haqiiqa e kayfiya ɗum ado o arde on. Ngol firtugol koyɗi ko jeyaaɗum e ko Joomi am anndini lam, wanaa ndaaro maa ko nanndi e mun. Mi ɗalii diina yimɓe ɓe gomɗinaa Alla, haray kamɓe e fii laakara on ko ɓe yedduɓe.

Jokkumi diina baabiraaɓe am ɓen: Ibraahiimaa e Ishaaqa e Yaaquuba; ko kan woni diina bajjinɗingol Alla. Sellantaa men nde men kafidata e Alla goɗɗum goo. Ko Kanko woni heerorɗo gootaagu. On tawhiidi e gomɗinal ko mi woni e mun min e baabiraaɓe am ɓen, ko jeyaaɗum e ɓural Alla e dow amen nde O hawrindini men e ɗum. Jeyaaɗum kadi e ɓural Makko e dow yimɓe ɓen fow nde tawnoo O imminii Annabaaɓe e maɓɓe; kono ko ɓuri ɗuuɗude e yimɓe ɓen ɓe yettatah Alla e neemaaji Makko ɗin, ko yeddugol Mo ɓe waɗata.

Refti Yuusufa yewti sukaaɓe ɓen ɗiɗo ka kaso o maakani ɓe: E ko rewugol reweteeɗi sertuɗi ɓuri moƴƴude, kaa ko rewugol Alla Gooto Mo alaa kafidiiɗo On, On Fooluɗo tanaa Mun, Mo fooletaake?

On alaa e rewde gaanin Alla, si wanaa inɗe ɗe hikkaaki nokku, ɗe innitirɗon onon e baabiraaɓe mon reweteeɗe, ɗe alah non huunde e geɓal ka reweede, Alla jippinanaali kon ko innitirɗon ɗe hujja tinndinoowo sellugol ɗe. Ñaawoore tagu ngun fow alanaa si wanaa Alla gooto On, wanah ɗee inɗe ɗe innitirɗon onon e baabiraaɓe mon. Alla yamirii on nde bajjinɗinirton Mo dewal, O haɗi on kafidugol Mo e goɗɗum goo. Ko ɗum woni diina ñiiɓuka ka ooñaare alaa e mu'un; kono ko ɓuri ɗuuɗude e yimɓe ɓen anndaa ɗum, ko ɗum waɗi si ɓe sirkannde Alla, ɓe rewa tagaaɗi goo.

Ko onon yo wondiiɓe am ɗiɗo ka kaso! Yi'uɗo e mon on no hama inbu, o yaltay woni ka kaso, o yiltitoo e golle makko, o yarna laamɗo on. Oya yi'uɗo cobbal ngal ka hoore-mun colli no ñaama e maggal, ko wareteeɗo fetee, colli ɗin ñaama teewu hoore makko nden. Fiyaaku mo lanndiɗon fii mun on ñaawaama gasii. Ɗum ko waɗayɗum feere alaa.

Yuusufu maakani on mo o sikki daɗay e maɓɓe kamɓe ɗiɗo -onon woni yarnoowo laamɗo on-: Janto fii am ka laamɗo on, hino gasa ka o yaltina lam ka kaso. Seytaane yejjntini yarnoowo on jantagol fii Yuusufa ka laamɗo on. Yuusufa ñiiɓiti ka kaso ɓaawo ɗum, yoga e duuɓi.

Laamɗo on wi'i: Min mi yi'ii e koyɗol na'i jeeɗiɗi fayɗi, na nyaama fooƴuɗi jeeɗiɗi ɗin. Mi yi'ii kadi butaali jeeɗiɗi kecce e yooruɗe jeeɗiɗi. Ko onon yo mbatu dental, humpitee lam firo ngol koyɗol, si on laatike annduɓe firo koyɗi.

Ɓe wi'i: Koyɗi maa ɗin ko jiiɓu-jaaɓa. Kala ko wa'i non, haray alaa firo. Men wonaali non annduɓe firo koyɗi jiiɓu-jaaɓu.

On yarnoowo daɗunooɗo on e sukaaɓe ɓen ɗiɗo ka kaso annditi Annabi Yuusufa ka firo koyɗi ɓaawo dumunna, o wi'i: Min mi humpitay on firo koyɗol laamɗo on si mi lanndike annduɗo fii mun. Laamɗo on, nulee lam ka Yuusufa o firana on koyɗol ngol.

Nde on daɗuɗo hewtunoo ka Yuusufa, o wi'ani mo: Ko an yo Yuusufa, an goonguɗo! Humpitii men firo hoyɗuɗo na'i jeeɗiɗi fayɗi na nyaama fooƴuɗi jeeɗiɗi ɗin. O yi'ii kadi butaali jeeɗiɗi kecci e yooruɗe jeeɗiɗi. Belajo'o, ɓe ruttoto ka laamɗo on e yimɓe makko ɓen, belajo'o, ɓe annda firo koyɗol laamɗo on, ɓe annda kadi ɓural maa ngal e darja maa on.

Yuusufu (yo o his) maakani ɓe ka firo koyɗol: On remay duuɓi jeeɗiɗi jokkindinon e tiiɗnaare: Ko soñoton kon e hitaande kala nder ɗin duuɓi jeeɗiɗi, accon ɗum ka dukkal(wutaandu) mun fii wata fuunu, si wanaa seeɗa e ko gabbe ko hatonjinoyton fii ñaamugol.

Refti aroyay ɓaawo ɗin duuɓi jeeɗiɗi saɗtuɗi ɗi remuɗon e muuɗum, duuɓi jeeɗiɗi maapunde(yoo-, ɗi yimɓe ɓen ñaamata e majji kala ko soñanoo e ɗiya duuɓi saɗtuɗi si wanah seeɗa e kon ko maruɗon fii awdi.

Refti aroyay ɓaawo ɗin duuɓi yoor, hitaande nde toɓo jippotoo e mun, puɗi ɗin yalta, yimɓe ɓen siiwa kala ko ɓe hatonjini e muuɗum; wano inabu e nebban-leɗɗe e leɗɗe-sukkar.

Nde ɓe yottinnoo ko Yuusufu firtani koyɗol ngol kon, laamɗo on wi'ani gollooɓe mun ɓen: Yaltinee mo ka kaso addanon lam mo. Nde imminaaɗo laamɗo on arunoo ka Yuusufa, o maakani on: Rutto ka koohoojo maa on lanndoɗaa mo fiyaaku rewɓe barminnooɓe juuɗe mon ɗen? Ɗum ko fii no o feññinira o bonnah ado o yaltineede ka kaso. Pellet, Joomi am hino anndi ko ɓe huuwi kon e ɗaɓɓirgol lam bonki. Huunde suuɗaaki Mo e ɗum.

Laamɗo o wii rewɓe ɓe hol ko heɓi mon haa ɗaɓɓirɗon Yuusuf feere bonnde haa o waɗda e mon ko boni, rewɓe ɓe mbii laamɗo o Yuusuf ina woɗɗi ko O tuuma ko, min ngoondiri Alla min nganndah e Makko bonannde, ndeen tan Cuddiiɗo Laamɗo o wii jooni de goongo ɓanngi ko miin hoomtatnoo mbo, wonah kanko hoomtatnoo mi, ko goongo o haali ko o noddatii ko, te hombo hisi ko o tuuma ko.

Ɓeyngu laamɗo on wi'i: Ko fii yo Yuusufa anndu ko mi qirritanii wonnde ko mi ɗaɓɓi mo, e wonnde ko goonga makko wiide mi fenaali e hoore-makko ɓaawo makko. Tabitanii lam e ko feƴƴi kon wonnde Alla fewnatah fenoowo hodoowo.

Ɓeyngu laamɗo on jokkitii o wi'i: Mi laɓɓinaa hoore-am e faandanagol bone, mi faandoraaki ɗum kadi laɓɓingol hoore-am; sabu wonkii neɗɗanke ko heewuki yamirde bone, tawde ki ooñoray e ko welataki, yiltugol ki e ɗum saɗta, si wanaa kin ki Alla yurmaa, O daɗnda ki e yamirgol bone. Pellet Joomi am ko Haforanoowo kala tuubuɗo e jeyaaɓe Makko ɓen, Hinnotooɗo ɓe.

Nde laaɓugol Yuusufa ngol e ganndal makko feeñunoo, laamɗo on wi'ani golloowo mun ɓen: Addanee lam mo, mi heertinana mo hoore-am. Ɓe addi mo. Nde o yewtunoo mo, ganndal oya ngal e haqqille makko ɗen ɓanngani mo, o wi'ani mo: An on Yuusufa, a wonii hannde ka amen, jom-nokku e jaahu, hoolaaɗo.

Annabi Yuusufa maaki: "Halfinam reenugol ngaluuji jawle ɗen e ñaameteeji leydi Misra ndin, min ko mi reenoowo hoolniiɗo, annduɗo ko mi waɗata.

Ko wano Men neeminirnoo non e Yuusufa laɓɓingol mo ɓoortindira mo e kaso, Men neeminiri e makko ñimnugol ka leydi Misra, himo jippoo hoɗa e mayri nokku kala ka o yiɗi. Meɗen yeɗa yurmeendeAa Amen nden aduna on mo Men muuyi e jeyaaɓe Amen ɓen. Men yeebataa njoɓdi moƴƴinooɓe ɓen, ko Men timminirooɓe ndi ko aldaa e ɗuytugol.

Pellet ko mbarjaari ndi Alla hebili ndin laakara ɓuri moƴƴude diini njoɓdi aduna ndin, wonannde ɓen gomɗimɓe Alla ɓe laatii hulirooɓe Mo ɗoftagol yamirooje Makko woɗɗitoo haɗaaɗi Makko.

Baaba-gootooɓe Yuusufa ɓen ardiri Misra e ko yeeyetee, ɓe naati ka makko. O anndi ko baaba-gootooɓe makko ɓen nii, kono kamɓe ɓe annditaali mo; tawde dumunna on juutii kadi mbaadi makko ndin waylike, hari ko o cukalel fewno ko ɓe buginoo mo ka woyndu.

Tuma o jonnunooɓe ko ɓe lanndii kon e gabbe e njooɓa, ɓe humpiti mo wonnde hiɓe mari musiɗɗo baaba-gootoojo mo ɓe acci ka ben mun, o maakani ɓe: addanee lam musiɗɗo mon baaba-gooto, mi ɓeydana on ko ngelooba ronndoo. E on yi'aali wonnde miɗo timmina ɓetu ngun Mi alaa e ɗuytude, e wonnde ko mi moƴƴo weernooɓe ɓen?

Si on addanaali lam mo, haray fenaande mon nden ɓanngii wiide hiɗon mari musiɗɗo baaba-gooto. Mi ɓetitantaa on ñaametee, wata on ɓado kadi leydi am ndin.

Baaba-gootooɓe makko ɓen jaabii mo: Men ɗaɓɓiray mo ben makko, men etoo fii mun. Menen ko men gollooɓe kon ko yamir-ɗaa men ko aldaa e raɓɓindinagol.

Yuusufu maakani gollooɓe makko ɓen: Jonnitee ɓee doŋlle maɓɓe ɗen fii no ɓe annditiroya tuma ruttii ka yimɓe maɓɓe ɓe wonnde e soondanaano ɓe, ɗum waɗay ɓe yiltioo hara ontuma hiɓe wonndi e musiɗɗo maɓɓe on. Ɗum ko fii no ɓe tabintirina Yuusufa goonga maɓɓe kan, o jaɓana ɓe doŋlle maɓɓe ɗen.

Tuma nde ɓe ruttinoo ka ben maɓɓe, ɓe fillanii mo ko Yuusufa teddini ɓe kon, ɓe wi'i: Ko an yo ɓen amen, men salante ɓetu si men yahdaali e musiɗɗo amen on, immindin mo e amen. Si a immindinii men, men ɓetante. Men fodii ma reenugol mo ruttoda e makko himo hisi.

Ben maɓɓe maakani ɓe: hara mi hooloray on e fii makko, si wanaa no mi hoolornoo non e neene-gooto makko on Yuusufa oya tuma? Mi hoolino on e fii on ɗon, foduɗon lam reenugol mo, on hunnaali ahdi. Hoolaare alanaa on ka an wonnde on reenay mo, ko Alla mi hoolori; ko Kanko woni moƴƴo reenoowo on mo O yiɗi reenude, ɓurɗo moƴƴude yurmeteeɓe ɓen, wonannde mo O yiɗi yurmeede.

Nde ɓe udditunoo doŋlle maɓɓe ñaametee ɗen ɗe ɓe addori, ɓe tawi coggeeli mun ɗin ruttitaama e maɓɓe. Ɓe wi'ani ben maɓɓe: E ko men ɗaɓɓata ɓuri ngal teddungal ɗoo? Ɗum ɗoo ko coggu ñaametee amen on, laamɗo on jonnitirii men ɗum teddingol men. Men addanay yimɓe amen ɓen ñaametee, men reena musiɗɗo amen on e ko hulan-ɗaa mo kon, men ɓeydora ɓetu ngelooba tawde mba ronndannto men; ɓeydorgol ɓetu ngelooba, ko huunde newiinde ka laamɗo on.

Ben maɓɓe maakani ɓe: Mi immindintaa mo e mooɗon haa ƴettanon mi ahadi ka Alla, wonnde pellet on artiranay lam mo si wanaa hara maayde huɓindi on fow mon, hara alah heddiiɗo e mon, on ronku feere haɗugol ɗum. Ɓaawo ɓe ƴettanii mo ahdi Alla fellintinaandi e ɗum ndin, o maaki: Alla ko seediiɗo e ko wowluɗen kon, seedee Makko on yonii en.

Ben maɓɓe maakani ɓe hino wasiyoo ɓe: wata on naatiroy Misra e damal gootal hiɗon wonndi, ko yo on naatir e dame seertuɗe. Ko ɗum ɓurata hisinnde on diini goɗɗo huuɓitirta on lorra si o immanike on. Mi alaa wowlirannde on ɗum, fii duñangol on lorra mo Alla faandorii on, wanaa kadi fii pooɗangol on nafa mo Alla yiɗanaa on. Ñaawoore alaa si wanaa ñaawoore Alla nden, fiyaaku alaa si wanaa fiyaaku Makko on. Ko e Makko fawii-mi e kala fiyaaku am, ko e Makko Kanko tun, yo fawo fawotooɓe ɓen e fiyakuuji maɓɓe ɗin.

Ɓe yahdi e neene-gooto oya on. Nde ɓe naatirnoo e dame seertuɗe, wano ben maɓɓe yamirnooɓe non, ɗum wonaano hino duñana ɓe huunde e ko Alla muuyani ɓe kon. Ɗum ko annde Yaaquuba tun fii ɓiɗɓe makko ɓen o feññini, o wasiyii ɓe ɗum e hoore himo anndi ñaawoore alaa si wanaa ñaawoore Alla nden. Ko o annduɗo ko men anndini mo kon e gomɗingol hoddiraaji e jogitagol sabuuji ɗin. Kono ko ɓuri ɗuuɗude e yimɓe ɓen ɓe anndaa ɗum.

Nde ɓe baaba-gootooɓe Yuusufa ɓen naatunoo ka makko hiɓe wonndi e neene-gooto makko on, o ɓanniti neene-gooto makko on e makko, o maakini mo sirru: ko min woni neene-gooto maa on Yuusuf. wata a sunor piiji kaanuɗi ɗi musiɗɓe maa ɓen huuwaynoo, immorde lorra e ngayngu hoore-men, e ko ɓe werlii lam kon ka woyndu.

Nde Yuusufu yamirnoo gollooɓe makko rimndude ngelooba musiɗɓe makko ɓen ñaametee,o waɗi etirgal laamɗo o etiraynoo ngal ka doŋngal neene gooto makko on ɓe anndaali,fii no on heddora e takko makko.Nde ɓe fokkiti yiltitagol ka maɓɓe noddoowo ewnii ɓe:Ko onon yo joomiraaɓe ngelooba roondinba ñaametee, ko on wuyɓe .

Musiɗɓe Yuusufa ɓen fewtiti e ewniiɗo on e wonnduɓe e makko ɓen ɓe wi'i: Ko honɗum majjiri on haa tuumiron min nguyka?

Ewniiɗo on e wonndiiɓe makko ɓen wi'ani Yuusufa: Sari'yaare nde laamɗo on etirta nden majjirii men. Hino woodani kala adduɗo nde ado wiñeede, yeru doŋngal ngelooba. Ko min fawtanii mo ɗum.

Musiɗɓe Yuusufa ɓen wi'ani ɓe: Men woondirii Alla, gomɗii hiɗon anndi laaɓugol amen e woɗɗondirgol amen e ɗum, wano rentirɗon men. Hiɗon anndi kadi men ardaali ka leydi Msira fii bonnugol, men meeɗaali wonnde wuyɓe e nguurndam amen.

Ewniiɗo on e wonndiiɓe makko ɓen wi'i: Ko honɗum wonata njoɓdi wujjuɗo on e mooɗon si tawii ko on fenuɓe e ko wiiɗon kon hiɗon laaɓi e wujjugol?

Musiɗɓe Yuusufa ɓen wi'ani ɓe: Njoɓdi wujjuɗo woo e amen: wonnde kala mo ko wujjaa kon tawaa ka doŋngal mun, o jonnitay hoore-makko wujjaaɗo on fii ko maccinɗina mo. Ko wano ndin njoɓdi maccinɗingol ɗon men yoɓitirta wuyɓe ɓen.

Ɓe artiri ɓe ka Yuusufu fii wittugol doŋlle baaba-gootooɓe makko ɓen ado neene-gooto makko on fii suuɗugol feere nden. Refti o liñciti doŋngal neene-gooto makko on, o yaltini ton sariyaare laamɗo on. Ko wano Men fewjirani Yuusufa non feere waɗugol sariyaare nden ka doŋngal neene-gooto makko on, men fewjirani mo kadi nanngitirgol musiɗɓe makko ɓen ñaawoore leydi maɓɓe ndin, maccinɗingol wujjuɗo on. Si ɓe gollitirno ñaawoore leydi laamɗo on Misra e hoore wujjuɗo on, ɓe huutoray piggal e koondugol, si wanaa hara ko Alla muuyi feere goo, tawde ko O hattanɗo ɗum. Meɗen ɓanta martabaaji on mo Men muuyani e jeyaaɓe Amen ɓen, wano Men ɓantiri darja Yuusufa. Hino e dow kala jom-ganndal, ganndo goo ɓurɗo mo; hino e dow ganndal fow ngal kadi, ganndal Alla On annduɗo kala huunde.

Musiɗɓe Yuusufa ɓen wi'i: Si o wujjii, haawnaaki, tawde neene-gooto makko on wujjiino ado oo ɗoo wujjude -ɓe faandori ɗum Yuusufa (yo o his)- Yuusufa suuɗi mette mum e konngol maɓɓe ngol kon ka wonkii makko, o feññinanaali ɓe ɗum, o maaki e wonkii makko: Ko ngayngu mon ngun e kuuɗe mon bonɗe ɗen ado hannde, woni bone on tigiri e oo nokku. Ko Alla non ɓuri anndude ndee fefindaare mon yaltunde e mon.

Musiɗɓe Yuusufa ɓen wi'ani mo: Ko an yo laamɗo on, oo no mari baabiraawo nayeeje ɗoggos mo o yiɗi moƴƴa. Ƴettu gooto e amen lonto makko. Menen men yi'ii ma jeyaaɗo e moƴƴinooɓe gollodal amen e woɗɓe goo. Moƴƴan ɗum ɗon e amen.

Annabi Yuusufa maaki: Yo Alla daɗndu men tooñude daɗndiiɗo ko o waɗaa. Men nannga mo jogitaaki sariyaare laamɗo on ka doŋngal mun. Haray ontuma men wonii tooñuɓe, tawde men leɓ- tii daɗndiiɗo, men acci bonɗo on.

Nde ɓe taƴinoo e jaabawol Yuusufa ngol e ko ɗaɓɓi kon, ɓe ndeesti yimɓe ɓen fii diisondiral. Mawɗo maɓɓe on wi'i: Miɗo anndintina on wonnde ben mon ƴettoduno e mon ahadi ka Alla, wonnde on artiray ɓiɗɗo makko on si wanaa hara on huuɓitira ko on hattanaa duñugol ɗum. Annditon kadi ko welsindinoɗon e Yuusufa kon, ronkuɗon hunnude ahadi mon ndin e ben mon. Min on mi yaltataa Misra haa ben am duŋanoo lam ruttagol maa Alla ñaawana lam yahdugol e musiɗɗo am on. Ko Kanko Alla ɓuri moƴƴude e ñaawooɓe ɓen, ko goonga e nunɗal O ñaawirta.

Kotiraawo mawɗo on wi'i: Ruttee ka ben mon, wi'anon mo: Ɓiɗɗo maa on wujjii, laamɗo Misra on maccinɗinirii mo lepte nguyka makko kan. Men humpitaa ma non si wanaa ko men anndi e huunde nde men seedorii yaltineede sariyaare laamɗo on ka doŋngal ɓiɗɗo maa on. Men anndaano o wujjay, si meɗen annduno ɗum, men ahodataano e maaɗa artirgol mo.

Si a hoolaaki men, an ben amen, lanndo yimɓe Misra ɓen ɓe men wonunoo ka mun e lappol seteeɓe ɓe men ardunoo e mun ɓen, ɓe humpitete ko men humpitu maa kon. Pellet ko men goonguɓe e ko men humpitir-maa nguyka makko kan.

Ben maɓɓe Yaaquuba maakani ɓe: Wanaa non woniri. Ko woni goonga, ko wonnde wonkiiji mon ɗin cuɗanii on fewjangol mo wano fewjirannoɗon neene-gooto makko on Yuusufa aranun. Mi muññorii no labiraa, ko aldaa e wullitagol si wanaa e Alla. Hino hasii ka Alla artiranta mi ɓe, ɓe fow maɓɓe: Yuusufu e neene-gooto makko mun on e kotoo maɓɓe mawɗo on. Pellet Kanko Seniiɗo On, ko O Annduɗo fiyaaku am, Ñeeñuɗo e toppitagol fiyaaku am.

O huccitiri ɗuurnagol e maɓɓe, o maaki: Ee tiiɗugol sunaare am e fii Yuusufa! Ɓale-ɓale gita makko ɗen rawniri suno, hakkee ko o wulli mo kon. Hari ko o ɓennuɗo suno e ɓiɗaare, kono o ɓenni ɗum e yimɓe ɓen.

Musiɗɓe Yuusufa ɓen wi'ani ɓen maɓɓe: Men woondirii Alla, an ben amen, a seerataa hiɗa janntoo fii Yuusufa, haa nawna foole maa maaya tigiri.

Ben maɓɓe maakani ɓe: Mi wullitortaa annde am e sunaare am, si wanaa e Alla tun. Miɗo anndi e moƴƴere Alla nden, e ko O jaabinanta kon maapiiɗo, e ko O yoɓata kon keɓaaɗo musiiba ko on anndaa onon.

Ben maɓɓe maakani ɓe: Ko onon yo ɓiɗɓe am, yehee tefoyon fii Yuusufa e miñan-mun. Wata on taƴo e ko Alla yurmetee kon jeyaaɓe Makko ɓen. Ko fii, taƴotaako e yurmeende Alla nden si wanaa yimɓe heefereeɓe ɓen; tawde ko ɓe majjaaɓe kattal Alla mawngal ngal, e ɓural Makko suuɗiingal e jeyaaɓe Makko ɓen.

Ɓe waɗi ko ɓen maɓɓe yamiri ɓe kon, ɓe yehi ɗaɓɓitugol Yuusufa e miñan-mun. Nde ɓe naatunoo ka Yuusufa, ɓe wi'ani mo: Tammpere e baasal heɓii men. Men ardii e sil'a jaasuɗo fanɗuɗo. Etan-men ko timmi, wano etiranayno-ɗaa men aranun, sakko-ɗaa e amen ko ɓeydii kon e ɗum maa sulfiraneede si'la amen fanɗuɗo on. Pellet, Alla yoɓitiray sakko- tooɓe ɓen ko ɓuri moƴƴude e njoɓdi.

Nde o nanunoo haala maɓɓe kan, o yurmaa ɓe, o anndintinori e maɓɓe wiide ɓe: Hara on annditii ko waɗunoɗon Yuusufa e neene-gooto makko on fewndo wonunoɗon majjuɓe e battane kuuɗe mon ɗen e maɓɓe?

Ɓe ŋalɗi, ɓe wi'i: Kere ko an woni Yuusufa? Yuusufu maakani ɓe: Eyyo, ko min woni Yuusufa. Oo mo sutiɗon ɗoo takko am, ko neene-gooto am. Gomɗii Alla moƴƴorike e amen ɓoortugol e ko men naɓidi e mun, O ɓamta fii amen. Ko fii, kala hulirɗo Alla ɗoftagol yamirooje Makko ɗen, woɗɗitoo haɗaaɗi Makko ɗin, o muññii jarrabuyee, pellet, golle makko ɗen e moƴƴere jeyaa. Alla non yeebataa njoɓdi moƴƴinooɓe ɓen, ko O reenoowo ɓe ndi.

Musiɗɓe makko ɓen wi'ani mo hiɓe ngantinoo e kuuɗe maɓɓe: Men woondirii Alla, Alla ɓurnirii ma e amen yeɗugol ma jikkuuji timmuɗi. Pellet, men woniino e kon ko men waɗu-maa, ko men bonnuɓe e maaɗa tooñuɓe ma.

Yuusufu jaɓani ɓe ngaŋto, o maaki: Feloore alaa e hoore-mon hannde. On feletaake on ŋiñetaake. Yo Alla yaafano on. Ko Kanko woni Moƴƴoo Yurmeteeɗo.

Nde o humpitinoo ko heɓi ben makko kon e wumugol, o jonni ɓe dolokke makko on, o maaki: Yahdee e oo dolokke am ɗoo, bugoɗon mo ka yeeso baaben am, ɓe wattay yi'ude. Addanon lam ɓeynguure mon nden ɓe fow maɓɓe.

Nde lappol seteeɓe ɓen yaltunoo Misra, ɓe woɗɗtii saare nden, Annabi Yaaquuba maakani ɓiɗɓe makko ɓen e wonɓe ka leydi makko ɓen: Min miɗo heɓa balangol Yuusufa, sinno wanaa fii yo ɗaytinam, w'ion miɗo wowla ko mi anndaa.

Ɓiɗɓe makko wonunooɓe ɗon ɓen wi'i: Men woondirii Alla, an on a seeraali e majjere maa ɓooyunde nden e fii Yuusufa wonnde hino hasii ka yiitaa mo.

Nde humpitoowo Yaaquuba on ko welata mo arunoo, o werlii dolokke Yuusufa on ka yeeso makko, o wonti yi'oowo. O maakani ɓiɗɓe makko ɓen: E mi yeetanooki on miɗo anndi e neweende Alla nden e moƴƴere Makko nden ko on anndaa onon?

Ɓiɗɓe makko ɓen ngatinanii ben maɓɓe Yaaquuba (yo o his) ko ɓe waɗi kon Yuusufa e miñan-mun, ɓe wi'i: Ko an yo ben amen, ɗaɓɓiran-men ka Alla haforaneede junuubi amen yawtuɗi ɗin. Menen men laatinoke junubante bonnuɓe e ko men waɗi kon Yuusufa e neene-gooto makko on.

Ben maɓɓe maakani ɓe: Aray ka mi ɗaɓɓirana on Joomi am haforannede. Ko Kanko woni Haforoowo junuubi tuubooɓe ɓen e jeyaaɓe Makko ɓen, Hinnotooɗo ɓe.

Annabi Yaaquuba yaltidi e ɓeynguure makko nden ka leydi maɓɓe, ɓe sutii ka Yuusufu Misra. Nde ɓe naatunoo ka makko, o ɓattiniti mawɓe makko ɓen ɗiɗo e makko, o maakani musiɗɓe makko ɓen e ɓeynguure maɓɓe nden: Naatiree Misra muuyɗe Alla, ko on hooliiɓe, bone woo memataa on.

O toolni mawɓe makko ɓen ɗiɗo ka danki makko, ontuma ɓe hiwrori mo kamɓe e musiɗɓe makko ɓen sappo e go'o sujjugol. Ngol sujjugol wanaa dewal, ko teddungal, yahdungol e yamiroore Alla nden wano ardiri non ka koyɗol. Ko ɗum waɗi si Yuusufa maakani ben makko: Ngol hiwrorgol lam ɗoo sujjugol, ko firo koyɗol am ngol oya tuma ngol mi fillaninoo on. Gomɗii Joomi am waɗii ngol goonga, O moƴƴike kadi e am tuma O yaltinnoo lam ka kaso O itti on onon kadi ka ladde, ɓaawo nde seytaane bonni hakkunde am e musiɗɓe am ɓen. Pellet, Joomi am ko newaniiɗo toppitagol ko O muuyi kon. Pellet, ko Kanko woni Annduɗo fiyakuuji jeyaaɓe Makko ɓen, Ñeeñuɗo e toppitagol Makko ngol.

Refti yuusufa torii Joomi makko, o maaki: Joomi am, gomɗii A yeɗii lam laamagol Misra, A anndinii lam kadi firo koyɗi. An Tagirɗo kammuuli ɗin e leydi ndin e noone mo aldah e yeru gadano, Ko An woni giɗo heftuɗo denndaangal fiyakuuji am ɗin aduna e laakara. Ƴettitam tuma lajal am timmata ko mi juulɗo, waɗtidaa lam e Annabaaɓe moƴƴuɓe ɓen, immorde e baabiraaɓe am ɓen e woɗɓe goo, ka Aljanna firdawsi toowuɗo.

Ko jantaa koo e qissa Yuusufa e musiɗɓe makko ɓen, Meɗen wahayina ɗum e maaɗa, an Nulaaɗo. A anndaano ɗum, tawde a tawanooka ka musiɗɓe Yuusufa ɓen eɓɓunoo werlagol mo ka niwre woyndu, ɓe fewji pewje maɓɓe. Men anndire ɗum wahyu on.

Ko ɓuri ɗuuɗude e yimɓe ɓen, hay si a etike, an Nulaaɗo, ɓe gomɗintaa. Wata a naɓir wonkii maa kin e maɓɓe ninse.

Si ɓe haqqilno, ɓe gomɗinte no tawde a ɗaɓɓiraali ɓe an Nulaaɗo, e Qur'aanaare nden e ko noddataa- ɓe e mun kon njoɓdi. Alqur'aana wonaali si wanaa waaju yimɓe ɓen denndaangal.

Ɗuuɗii e Aayeeje tinndinooje bajjinɗingol Alla, saakitaaɗe ka kammuuli e ka leydi, hiɓe rewa e majje hara ko ɓe ɗuurniiɓe e taskagol ɗe waajitora, ɓe yeƴƴitotaako ɗe.

Ko ɓuri ɗuuɗude e yimɓe ɓen gomɗinirtaa Alla wiide ko Kanko woni Taguɗo, Arsikoowo, Wuurnoowo, Waroowo, si wanaa hara ko ɓe kafidooɓe Mo e rewugol reweteeɗi e sanamuuji, ɓe nodditoo wiide Himo jogitii ɓiɗɗo, senayee woodanii Mo!

E ɓee sirkooɓe hooli nde lepte hippooje arata ɓe ka aduna, ɗe suddira ɓe no ɓe waawirtaa duñugol ɗe maa darngal ngal ardira ɓe juhal, hara kamɓe ɓe so'aa anndude ɗum, sakko ɓe hebiloo ngal, ko ɗum haɗi ɓe gomɗingol?

An Nulaaɗo, maakan ɓen ɓe noddataa: Ko ngool woni laawol am ngol noddirta yimɓe ɓen e mun, miɗo noddira e hoore hujja ɓannguɗo, yimɓe jokkuɓe lam ɓen kadi hino noddira non, ɓen feewirɓe peewal am, ɓe jokki sunna am. Min mi jeyaaka e sirkanooɓe Alla ɓen! Ko mi jeyaa, ko e bajjinooɓe Mo ɓen Kanko Seniiɗo On njyaa mi.

Men Nulaali ado maa an Nulaaɗo, si wanaa worɓe ɓanndikooɓe ɓe wonaa malaa'ika, Meɗen wahyo e maɓɓe wano Men wahayirta e ma. Ɓen ko jeyaaɓe e yimɓe ca'e ɗen ɓe jeyaaka e yimɓe buruure, yimɓe maɓɓe ɓen fenni ɓe, Men halki ɓen. E ɓee fennooɓe ma yahaali ka leydi, ɓe taskoo ko honno battane fennooɓe adinooɓe ɓen wa'unoo, ɓe waaji- waajitora ɓen? Pellet ko ko woni kon ka saare laa- laakara e neemaaji, ɓuri moƴƴannde ɓen hulunoo- hulunooɓe Alla aduna. E on haqqiltaa wonnde ko ɗum ɓuri moƴƴude, huliron Alla ɗoftagol yamirooje Makko ɗen -ɓuri mawnude e majje woni gomɗinal- woɗɗitoɗon haɗaaɗi Makko ɗin -ɓuri mawnude a majji woni sirkangol Alla.

Ɓen Nulaaɓe ɓe Men Nulata, Men nennitanay ayɓe maɓɓe ɓen, Men hawjantaa leptugol ɓe no Men nanngira ɓe doy-doy. Haa ka leptugol ɓe ngol leela ɗon, Nulaaɓe ɓen taƴoo e fii halkugol ɓe ngol, heeferɓe ɓen fellita wonnde Nulaaɓe maɓɓe ɓen fenaniiɓe wiide ɓe leptiroyte fennugol maɓɓe ngol, gomɗimɓe ɓen kan daɗa; ballal Amen ngal arana Nulaaɓe Amen ɓen, Men daɗnda Nulaaɓe ɓen e gomɗimɓe ɓen e halkaare yanaynde e fennuɓe ɓen. Lepte Amen ɗen ruttetaake gaayi e yimɓe bomɓe ɓen tuma ɗe yanata e maɓɓe.

Gomɗii wonii e qissaaji Nulaaɓe ɓen e yimɓe maɓɓe ɓen, e qissa Yuusufa on e musiɗɓe makko ɓen, waaju ngu joomiraaɓe haqqillaaji hisuɗi ɓen waajitorta. Alqur'aana yewtunde fii mun nden wonaali yewtere fefindaande ɓakka e Alla. Ko nde woni, ko goonginnde defte jippiniraaɗe ka Alla ɗen, e fensitunde kala ko hatonjini e fensiteede immorde e ñaawooje e sari'aaji, e tinndinnde kala moƴƴere, e yurmeende wonannde yimɓe gomɗimɓe nde ɓen; ko kamɓe nafitorta nde.

Alif, Laam, Miim, Raa: Yewtere fii ɗee Aayeeje yawtiino ka fuɗɗorde cortewol Baqarah. Ɗee Aayeeje fuɗɗoraaɗe ngol cortewol e Alqur'aanaare jippinaande nden e maaɗa an Nulaaɗo, ko goonga mo sikke alaa e mu'un. Sikke woo alaa wonnde ko immorde ka Alla, kono ko ɓuri ɗuuɗude e yimɓe ɓen ɓe gomɗinirtaa nde sattere feere e townitaare.

Ko Alla woni On tagirɗo kammuuli ɗin ɓamtaaɗi ko aldaa e tugaale ɗe yi'oton. Refti O toowi O fotondiri ka dow 'Arshi fotondirgol e Makko, senaade woodanii Mo, ko aldaa e ñemmbugol maa nannditagol. O eltiri naange ngen e lewru ndun ko nafa tagu Makko ngun: kala e majji hino doga haa e lajal dumunna happaaɗo e ganndal Alla. Kanko seniiɗo On, Himo firlitoowo fiyaaku on ka kammuuli e ka leydi no O haajiri. Himo ɓannginira Aayeeje tinndinooje e kattala Makka ngal jortagol nde yananteɗon hawroygol e Joomi mon Ñalnde Darngal, hebilanoɗon ngal golle moƴƴe.

Ko Kanko seniiɗo On woni weertuɗo leydi ndin, O tagi pelle tabituɗe e mayri fii wata ndi yergu e yimɓe ɓen. O waɗi e noone kala e dimɗe ɗen, noone ɗiɗi gorel e deyel wano kulle ɗen. Himo suddira jemma on ñalorma on, o niɓɓita ɓaawo nde o jalbunoo. Wonii e ko jantaa koo, dalilaaji e ɓanngannduyeeji wonannde yimɓe miijitotooɓe taskoo ɓen e golle Alla ɗen, ko kamɓe nafitorta ɗin dalilaaji e ɓanngannduyeeji.

Hino ka leydi tummbe ɓadondirɗe, hino ton kadi gese 'inabu, e remuruuji, e tamarooje dukkinɗe e salndu wooturu, goɗɗe dukkiniri calɗi calɗi. Ɗen gese e remuruuji no yarniree ndiyam gootam. Meɗen ɓurna yoga majji dow yoga ka dakamme ekw immorde e nafooreeji, e hoore ko ɗi ɓadondiri kon fow ɗi yariraa ndiyam gootam. Wonii e ko jantaa koo, dalilaaji e ɓannganndaduyeeji, wonannde yimɓe haqqilooɓe; tawde ko kamɓe woni taskotooɓe ɗum.

Si a ŋalɗay e goɗɗum an Nulaaɗo, haray ko ɓuri jojjude e ko ŋalɗataa, ko fennugol ɓe ngol immital, e wiide hujjinora yeddugol ngal: Eyoo si men maayii men wontii mbulmbulndi e ƴi'e kiɗɗe, menen men immintinte men wuurnitee? Ɓen woni yedduɓe immital ɓaawo maayde, ko ɓen kadi yeddi Joomi maɓɓe e kattal Makko immintingol maayuɓe. Ko ɓen woni kolbiroyteeɓe jolokooje Yiite ka daaɗe maɓɓe Ñalnde Darngal, ko ɓen kadi woni yimɓe Yiite, kamɓe ko ɓe luttooɓe e magge poomaa, fii maɓɓe lannataa, lepte maɓɓe dartotaako.

Sirkooɓe ɓen hino hawjirane an Nulaaɗo, lepte ɗen, hiɓe hawjana yanugol ɗe e maɓɓe ado neemaaji ɗi Alla hoddirani ɓe ɗin timmannde ɗe. Gomɗii le lepte yeruuje majje wulike ado maɓɓe e mofte fennuuɓe ɓen, ko haɗi ɓe waajitoragol ɗum? Pellet, Joomi maa an Nulaaɗo, ko Jom-yawtangol wonannde yimɓe ɓen, e hoore ko ɓe tooñata kon. O hawjantaa leptugol ɓe fii no ɓe tuubirana Alla. Pellet, Kanko Alla ko O tiiɗuɗo leptugol wonande haɓɓitotooɓe e keeferaaku ɓen si ɓe tuubaali.

Ɓen yedduɓe Alla hino wi'irane salaare e sattere feere maɓɓe: Ko haɗno Aaya jippinee e Muhammadu immorde ka Joomi makko, wano ko jippinanoo kon e Muusaa e Iisaa? Anndu an Nulaaɗo, ko an jertinoowo hulɓina yimɓe ɓen e lepte Alla ɗen. Alanaa ma e maandeeji Alla ɗin si wanaa ko O jonnu-maa kon. Hino woodani kala yimɓe, Annabaajo fewnoowo ɓe e laawol goonga, o tinndina ɓe e maggol.

Alla no anndi kala ko deyel saawata e reedu mun, Himo anndi kadi kala ko renngaaji ɗin heɓata: ustagol, ɓeydagol, nawnaare maa cellal. Huunde kala ka Makko Seniiɗo On, ko eɓɓaa-ɗum, ɓeydotaako ɗon, ɗuytotaako e mun. .

Tawde Kanko Seniiɗo On, ko O annduɗo kala ko wirnanii so'irɗe tagu Makko ngun, Annduɗo kala ko ɗi so'irɗe maɓɓe ɗen so'ata. On Mawɗo e sifaaji Mun e inɗe Mun e golle Mun, Townitoriiɗo kala tagu Makko ngun jaati Makko e sifaaji Makko.

Himo anndi sirru e ko ɓuri ɗum. Hino fotana Mo anndugol on suuɗuɗo koongol e mooɗon, onon yimɓe ɓen, e on feññinɗo ngol. Ko wano non kadi anngol Mo on suuɗorayɗo yimɓe ɓen jemma, e on yaltintinoowo golle mun ɗen ñalorma teɗɗam.

Hino woodni Mo Kanko seniiɗo On, Malaa'ikaaɓe lontondirooɓe e neɗɗo on: woɗɓe arda jemma, ɓeya arda ñalorma. Hiɓe reenira neɗɗo on yamiroore Alla, immorde e koddoruyeeji ɗi Alla winndi yo ɓe daɗndu mo e majji, ɓe winnda haalaaji e golle makko. Pellet Alla waylataa moƴƴere yimɓe waɗta bone, haa ɓe waylira yettugol Mo. Si Alla faandanike yimɓe halakuyee, alaa yiltoowo ko O faandii kon. Alanaa on onon yimɓe ɓen, gaanin Alla, immorde e giɗo heftoowo fiyakuuji mon, on Mo ruttotɗon e mun fii duñugol alba'ujji memayɗi on.

Ko Kanko woni holliroowo on, onon ɓee yimɓe, maƴe ɗen, O hawtitana on e ɗum: hulugol maƴƴe ɗen e tamƴinagol toɓo ngon. Ko Kanko kadi fuɗɗata ɗen duule teddiniraaɗe toɓo heewngo.

Digaali ɗen no senina Joomi majje yettugol Mo hamdinoo. Mala'ikaaɓe ɓen kadi subbunhinanoo Joomi maɓɓe hulugol Mo mawnina Mo. Alla no wurta parñite sunnooje ɗen e on Mo O muuyi e tagu Makko ngun, ɗe halka mo. Heeferɓe ɓen hino yeddondira fii wootinɗingol Alla. Alla non ko saɗtuɗo nanngal e doole wonannde on yedduɗo Mo.

Ko Allaahu On tun woodani noddaandu tawhiidi, gooto kafidaa Mo e ɗum. Ɗin sanamuuji ɗi sirkooɓe ɓen noddata ko woori Alla, ɗi jaabotaako ɓe e huunde. Ko ɓe noddata ɗin kon wonaali, si wanaa sugu ɗonka fontuɗo juuɗe mun e ndiyam fii no ɗam hewtira hunnduko makko o yarira ɗon, hara non ɗam ndiyam wonaali yottotoo-ɗam hunduko makko. Ko heeferɓe ɓen noddata sanamuuji ɗin kon wonaali si wanaa e yeebaare e woɗɗitagol sawaaba; tawde ɗi waawaa pooɗannde ɓe ɓafa, maa duñugol lorra.

Ko Alla tun woni ko jebbilantore sujjugol, denndaa- ngal ko woni ka kammuuli e ka leydi, Gomɗinɗo e keefeero hino fota e ɗum; si wanaa fii gomɗinɗo on yankinoray sujjugol ngol ɗoftaare, heeferɓe ɓen yankinorana Mo karahan.ko neesu mum ɗowata mbo e jebbilanaade Alla, ko e Makko ɗowtato kala jogitii ɗowdi e tagu Makko ngun, bimmbi e kiikiiɗe.

An Nulaaɗo, maakan ɓee heeferɓe rewidooɓe e Alla goɗɗum goo: ko hommbo woni taguɗo kammuuli ɗin e leydi ndin, toppitiiɗo ɗi? Maaku an Nulaaɗo: Ko Alla woni taguɗo ɗin ɗiɗi, O toppitiiɗi. Hiɗon qirritii ɗum onon. Maakan ɓe an Nulaaɗo: E on jogitani ko'e mon heftuɓe gaain Alla, ɓe waawanaa ko'e maɓɓe pooɗude nafa, wanaa fere huncangol hoore-mun lorra? Ko honno ɗin waawiranta ɗum goɗɗo goo? Maakan ɓe an Nulaaɗo: E hara keefeero wumuɗo giiɗe fotay e gomɗinɗo yi'oowo feewuɗo? Kaa hara keefeero wonɗo e niɓe on fotay e gomɗinɗo yi'iroowo ndaygu on? Kaa ɓe waɗay Alla seniiɗo On kafidiiɓe Mo ka tagu, tagirɓe sugu tagu Makko ngun, tagu Alla nannditani ɓe e tagu kafidiiɓe maɓɓe ɓen? Maakan ɓe an Nulaaɗo: Ko Alla tun woni taguɗo kala huunde, kafidiiɗo alanaa Mo e tagu ngun, ko Kanko woni heertorɗo reweede, hannduɗo hertinaneede dewal, On Fooluɗo.

Alla waɗii misal mutugol meere nden e heddagol goonga kan, ndiyam toɓo kammu ngun, si ɗam ilinii jooli, luggi hawri, kala e yeru mun, ilol ngol ronndoo nguufo ngon dow hummba hoore ndiyam ɗam. O waɗi misal goo e yoga e ko yimɓe ɓen huncinirta oogirɗe ɗen fii ɗaɓɓugol cuɗaari majje tafa ko yimɓe ɓen cuɗora. Ko sugu ɗen mise ɗiɗi Alla ɓannginirta goonga e meere: Meere nden, ko sugu ngufo hummbay- ngo ka ndiyam ngon e sugu ko hawketee e ko haynae ko e oogirɗe ɗen, goonga kan, ko sugu ndiyam laaɓu-ɗam yaretee-ɗam, fuɗinay-ɗam dimɗe e kuɗi e kon ko heddotoo e oogirɗe ɗen si taayinaama yimɓe ɓen nafitora. Ko wano Alla waɗirii ɗee mise ɗiɗi non, O waɗiranta yimɓe ɓen mise, fii senndugol goonga e meere.

Hino woodani gomɗimɓe nootiiɓe Joomi mun e kon ko O noddi ɓe e mun fii bajjinɗingol Mo ɗoftoo Mo, mbarjaari moƴƴundi, ndin woni Aljanna. Heeferɓe saliiɓe nootagol Mo ɓen, si tawno hiɓe joginoo feere kala ko woni ka leydi kon e jawle, e cowaŋlle yeru ɗum, ɓe funsirayno ɗum soktorogl ko'e maɓɓe e lepte. Ɓen saliiɓe nootagol noddaandu Joomi maɓɓe ndun, ɓe hasboyte e bonɗi maɓɓe ɗin fow, jaaƴorde maɓɓe nden ton ko ka Jahannama. Nge bonii ndaɗɗudi e ñiiɓirde maɓɓe e ngen Yiite.

On annduɗo wonnde ko Alla jippini kon e maaɗa an Nulaaɗo, ko immorde ka Joomi maa, sikke alaa e mu'un; on gomɗinɗo nootii Alla, o fotataa wa on gunɗo keefeero mo nootaaki Alla. Anndu non ko waajitorta ɗum, ko joomiraaɓe haqqillaaji hisuɗi ɓen.

Nootiiɓe Alla ɓen, ko ɓen woni hunnooɓe ko ɓe ahodi e Alla kon maa ko ɓe ahodata e jeyaaɓe Makko ɓen kon, ɓe firtataa ahodal maɓɓe e Alla maa ahadi goɗɗo.

ko ɓen kadi woni jokkooɓe kala ko Alla yamiri jokkagol e mun immorde e enɗam, hiɓe hulira Joomi maɓɓe kulul duñayɓe ngol e ɗoftagol yamirooje Makko woɗɗitoo haɗaaɗi Makko. Hiɓe hula kadi nde ɓe Alla hasbirta ɓe kala ko ɓe faggitii e bakkaatu, tawde mo saɗtiraama hasboore, o halkoto.

Ko ɓen kadi woni muññoriiɓe ɗoftagol Alla ngol, e ko Alla hoddirani ɓe kon woni moƴƴere maa bone, ɓe salii yeddugol Mo ngol ɗaɓɓugol welayee Alla, ɓe timminiri julde nden haaniri, ɓe nafqiri jawle ɗe Men yeɗi ɓe ɗen no haaniri, ɓe suuɗiri ngol nafku- gol kulol yiingo, ɓe feññiri ɗum fii no woɗɓe ñemtinira ɓe. Hino jeyaa e kelɗere maɓɓe, duñirgol bone boniiɗo e maɓɓe on moƴƴagol e makko. Ɓe siforiiɓe ɗin sifaaji, hino woodani ɓe galle yettiniiɗi Ñalnde Darngal.

Ɗen battane moƴƴe yettiniiɗe, ko Aljannaaji ɗi ɓe ñiiɓata e muuɗum poomaa. Hino jeyaa e neemaaji maɓɓe ton, wonnde ɓe naatiday e ɓen feewuɓe e baabiraaɓe maɓɓe ɓen, e neeniraaɓe maɓɓe ɓen, e rewɓe maɓɓe ɓen, e ɓiɗɓe maɓɓe ɓen timmiirgol welo-welo hawroygol e maɓɓe. Hara ontuma, Malaa'ikaaɓe ɓen hino naatirana ɓe dame ɗen fow saɗnugol ɓe ka Aljanna.

Malaa'ikaaɓe ɓen hiwrora ɓe tuma kala ɓe naati ka maɓɓe: "Kisal wonii e mon (salâmun ‘alaykum)", e maanaa: on hisirii e bone on sabu muñal mon ngal e ɗoftagol Alla, e koddoruyeeji Makko kaaɗɗi ɗin, e ko saliɗon yeddugol Mo ngol. Battane galle mon ɗen moƴƴii".

Ɓen non firtooɓe ahadi Alla ndin ɓaawo fiɓugol ndi, ɓe taƴoo e ko Alla yamiri kon yo jokke e enɗam, ko ɓen woni woɗɗinaama e yurmeende Alla. Hino woodani ɓen, battane bonɗo, ɗeen woni Yiite!

Alla no yaññana arsike on Mo O muuyi, Himo ɓiɗtinana kadi on Mo O muuyi e jeyaaɓe Makko ɓen. Yaajireede arsike wonaa maande maloore maa giggol Alla, ɓiɗtoreede ɗum kadi wonaa maa- nde malkiseede. Yedduɓe ɓen weltorii nguurndam aduna ɓe deeƴii e ɗum, hara non nguurndam aduna ɗam wonaali ka laakara, si wanaa dakamme seeɗa lannoowo.

Ɓen yedduɓe Alla e Ayaaje Makko ɗen no wi'a: "Ko haɗno aaya jippinee e Muhammadu immorde ka Joomi makko, tinndinoowo goonga makko, men gomɗina mo?" Maakan ɓee an Nulaaɗo: "Alla kan majjiniray nunɗal Makko ngal mo O muuyi, O fewnira e Makko on tuuɓuɗo ruttorii ɓural Makko. Peewal ngal wanaa e juuɗe maɓɓe woni, sakko ɓe humindira ngal e jippagol Aaya".

Ɓen ɓe Alla fewnata, ko gomɗimɓe ɓen, ɓe ɓerɗe mun deeƴirta jantorgol Alla subbunhinagol hamdinoo, e janngugol Deftere Makko nden heɗitoo nde. Anndee ko jantagol Alla ngol tun ɓerɗe ɗen deeƴirta, ko ɗum ɗe haani deeƴirde.

Ɓee ɗoo gomɗimɓe Alla ɓe golle moƴƴe, ɓadinooje ɓe Alla, hino woodani ɓe nguuree newiiɗo laakara, e battane moƴƴe; ɗen woni Aljanna.

Ko wano ngal nulal ngal Men nulirnoo Nulaaɓe yawtunooɓe ɓen e mofte maɓɓe ɗen, Men nulir-maa an Nulaaɗo e mofte maa ɗen, fii yo a janngan ɓe Alqur'aanaare nde Men wahayini nden e maaɗa. Nde yonii dallinornde e goongugol maa, kono yimɓe maa ɓen yeddirii nde yeddugol ɓe Yurmotee- ɗo On, tawde ɓe kafidii Mo e goɗɗum goo. Maakan ɓe an Nulaaɗo: On Yurmeteeɗo Mo sirkanton, ko On woni Joomi am, Mo reweteeɗo e goonga alaa si wanaa Kanko. Ko e Makko mi fawi kala fiyaaku am, ko e Makko kadi woni tuubirde am.

Si tawno woodayno e defte Joomiiko ɗen gasaynde naɓireede pelle ɗen, maa nde seekiree leydi ndin ɓulli e canɗi yalta, maa nde nde janngee e maayɗo tun immitoo, ko ndee Alqur'aanaare jippinaande e maaɗa an Nulaaɗo wonaynoo. Tawde ko nde laaɓunde dalil, mawnunde batte si tawno ko ɓe joomiraaɓe ɓerɗe hulooje. Kono ɓe bugitii nde. Ko woni tun, ko Alla fiyaaku on fow woodani e jippingol kaawisaaji ekn. E gomɗimɓe Alla ɓen anndaali wonnde, si Alla muuyuno fewnugol yimɓe ɓen fow ko aldaa e jippingol maandeji ɗi no fewna ɓe, O waɗayno ɗum? Kono O waɗaali ɗum. Masiibo tiiɗuɗo seerataa hino heɓa yedduɓe Alla ɓen sabu kuuɗe maɓɓe keeferaaku e geddi ɗen, maa ngon masiibo jippoo takko galle maɓɓe haa fodoore Alla jippagol lepte jokkondirooje ɗen ara. Pellet Alla firtataa fodoore nde O fodi, si lajal mayre dottaande nden hewtii.

A Wonaa Nulaaɗo mo yimɓe mun adii fennude ɓe jalkita, gomɗii mofte adinooɓe ma an Nulaaɗo, fennii Nulaaɓe maɓɓe, Mi muññanii ɓen yedduɓe Nulaaɓe mun ɓen haa ɓe sikki Mi halkataa ɓe, refti Mi nanngitiri ɓe lepte ɗuuɗuɗe. E miijo maa, ko honno lepte Am ɗen wonirnoo e ɓen? Pellet ɗe wonuno lepte sattuɗe.

E ko on darorɗo reenugol arsikaaji tagu ngun fow, aynituɗo kala wonkii e ko ki faggitotoo e golle, O yoɓita ki golle makki, ko On haandi e dewal? Kaa ko ɗii sanamuuji ɗi hanndaa e reweede? Heeferɓe ɓen waɗii ɗin kafidaaɗi Alla tooñi e fenaande. Maakan ɓe an Nulaaɗo: Innanee men kafidiiɗi mon ɗi rewdoton ɗin e Alla, si on laatike goongu ɓe e ko nodditiɗon. Kaa on humpitay Alla ko O anndaa ka leydi e kafidiiɗi? Kaa on humpitay Mo woni ko feeñi tun e gonngol kono alaa woodaaka? Ko woni goo-nga, seytaane cuɗanii yedduɓe ɓen pewje maɓɓe bonɗe ɗen, ɓe yeddi Alla, ɗi palii ɓe gaayi e laawol peewal ngol. Kala non mo Alla majjini e ngol laawol peewal, haray fewnoowo mo alaa.

Hino woodani ɓe lepte ka nguurndam aduna, ɗe no yanira e maɓɓe wareede e daheede e juuɗe gomɗimɓe ɓen. Pellet ko lepte laakara haɓɓitiiɗe ɓe ɗen ɓurɗe sattande ɓe nise diini lepte aduna ɗen, tawde ko ɗe sattuɗe duumotooɗe ɗe taƴondir- taa. Alanaaɓe reenoowo ɓe e lepte Alla ɗen Ñalnde Darngal.

Sifa Aljanna mo Alla fodi hulirɓe Mo ɗoftagol yami- rooje Makko ɗen woɗɗitoo haɗaaɗi Makko ɗin, ka ka canɗi ilata senngo ley kuɓeeje e leɗɗe majji. Dimɗe makko ɗen ko duumotooɗe ɗe taƴondirtaa, asku dimɗe aduna ɗen. Ko wano non kadi ɗowdi aljanna ndin duumotoondi ndi ustotaako. Ko ɗum woni battane hulirɓe Alla ɗoftagol yamirooje Makko ɗen woɗɗitoo e haɗaade Makko ɗin, battane hee-ferbe non ko naatugol Yiite nge ɓe duumotoo e mun poomaa.

Ɓen Alyahuudaaɓe ɓe Men yeɗi Tawreeta, e ɓen Annasaaraaɓe ɓe Men yeɗi Linjiila, hiɓe weltora ko Men jippini kon e maaɗa an Nulaado, sabu ko ɗum yahdi kon e yoga kon ko jippinaa e maɓɓe. Kono hino e leƴƴi Alyahuuda e Annasaara'en yeddooɓe yoga e ko jippinaa kon e maaɗa, woni kala ko yahdaa e beleeɗe maɓɓe ɗen maa ko ɓe siforta waylaaɗum waɗtitaa. Maakan ɓe an Nulaaɗo: Anndee ko Alla yamiri lam, ko nde mi rewata Mo Kanko tun, hara mi kafidaali Mo e goɗɗum goo. Ko Kanko tun mi noddanta fii mun wanaa goɗɗum goo, ko ka Makko tun woni ruttorde am. Ko ɗum kadi Tawreeta e Linjiila addidi.

Ko wano Men jippiniri non defte adiiɗe ɗen e ɗemɗe yimbe maɓɓe, Men jippiniri Alqur'aana e maaɗa an Nulaaɗo. Ko nde konngol fensitaangol, ɓannginiraangol goonga e haala aarabu. Pellet si a jokkii mbeleeɗe yimɓe defte ɓen e momtugol ko yahdaa e mbeleeɗe maɓɓe ɗen, ɓaawo nde Alla hollu-laa ganndal Makko ngal, haray alanaa ma immorde ka Alla, reenoowo fiyaaku maa, e walloowo ma e ayɓe maa. Alanaama kadi daɗndoowo ma e lepte Makko ɗen.

Gomɗii Men nulii Nulaaɓe ado maa an Nulaado, jeyaaɓe e yimɓe. Men waɗani ɓe genndiraaɓe e ɓiɗɓe wano ɓandinke fow. Haray wanaa Malaa'ika ɓe resataa ɓe jinbntaa Men waɗunoo ɓen Nulaaɓe, an ko e ɓen Nulaaɓe ɓandinkooɓe resooɓe jibina jeya-ɗaa. Ko waɗi si sirkooɓe ɓen hino ŋalɗa e ko wa'uɗaa nii kon? Haray non, dagantaako Nulaaɗo nde o addanta hoore-makko Aayaa, si wanaa nde Alla duŋanii mo ɗum. Hino woodani kala ñaawoore Alla, mbinndoodi ka ɗum jantaa fii mun, e lajal ngal ɓeydotaako ɗuytotaako.

Alla no meha ko O muuyi mehude e moƴƴere maa bone, malal maa malkise ek. Himo tabatina ko O haaji e ɗum. Ko ka Makko Alluwal reenaangal ngal woni, ruttorgal kala huunde. Kala ko ɓanngi e ko mehaa maa tabintinaa, hino yaadi e ko wini kon e maggal.

Si Men hollii ma an Annabiijo, yogo ko Men fodi ɓe e lepte ado maayde maa nden, ɗum ko fewjoore Amen. Si taw non Men ƴettitii ma ado Men hollude ma ɗum, haray huunde fawaaki ma si wanaa yottin- gol ko Men yamir-maa yottingol kon. Wanaa an jogi yoɓitugol ɓe maa hasbugol ɓe, ɗum ko e Juuɗe Amen woni.

E ɓee heefreɓe yi'aali wonnde Meɗen ara e leydi ndin, Men ɗuytira ndi ka seraaji mari yaññugol lislaamu udditana juulɓe ɓen ton? Alla no ñaawira ko O haaji hakkunde jeyaaɓe Makko ɓen, hay e gooto wurtirtaa ñaawoore Makko nden ɗuytugol maa waylugol. Kanko seniiɗo On, ko O yacciiɗo hesboore, hiMo hasbira adiiɓe e sakkitiiɓe ñalnde wootere.

Gomɗii mofte adinooɓe ɓen hodinooma Annabaa- ɓe maɓɓe ɓen, ɓe fenni ko ɓe addi kon. Ko hoɗum ɓe waawunoo fewjirannde ɓe? Hay e huunde. Tawde non fewjoore nden tigiri, ko nde Alla fewji nden wanaa goɗɗo goo. Ko Kanko seniiɗo On kadi anndi ko wonii faggitotoo, O yoɓita ki ɗum. Ontuma, ɓe anndoyay ko haa honto ɓe faljirnoo salagol gomɗinde Alla, ɓe annda ko haa honto gomɗimɓe ɓen hawri e sawaaba, sabu ɓe ɗon heɓiray ɗum Aljanna e battane moƴƴe.

Ɓen yedduɓe hino wi'a: A Wanaa Nulaaɗo Alla, an Muhammadu. Maakan ɓe: Alla yonii seedee hakku- de am e mon, wonnde ko mi Nulaaɗo Joomi am faade e mon, ɓen jogii ɓe ganndal Defte joopiiɗe fii am ɗen kadi no seedii. Kala non mo Alla woni seedee e goonga mun, haray ko fennoowo fennata lorrataa on.

Alif, Laam, Raa: Yewtere fii sugu ɗee kalfe yawtiino ka fuɗɗorde cortewol Baqarah. Ndee Alquraanaare ko Deftere nde Men jippini e maaɗa an Nulaaɗo, fii yo a yaltinir yimɓe ɓen e keeferaaku e majjere faade gomɗinal e ganndal e peewal diina Lislaamu, ngol laawol Alla On Fooluɗo Mo fooletaake, Yettiniiɗo e kala huunde.

Ko Alla tun woni Jeyɗo kala ko woni ka kammuuli e ka leydi, ko Kanko tun kadi hanndi e reweede, O kafidetaake e guɗɗum e tagu Makko ngun. Aray ka lepte tiiɗuɗe memata ɓen yedduɓe.

Ɓen yedduɓe ɓurdinooɓe nguurndam aduna e neemaaji majjam lannayɗam e dow laakara e neemaaji mun duumotooɗi, ɓe sakko kadi yimɓe ɓen e laawol Alla ngol, ɓe ɗaɓɓana laawol ngol ooñagol e goonga fii wata gooto jokku ngol.Ɓen siforaaɓe ɗin sifaaji, ɓe wonii e majjere woɗɗiinde e sawaaba.

Men nuliraali Nulaaɗo woo, si wanaa e haala yimɓe makko ɓen, fii no ɓe faamira ko o addi kon immorde ka Alla. Men nuliraali mo doolugol yimɓe ɓen e gomɗingol Alla. Alla hino majjinira nunɗal Makko ngal on Mo O muuyi, O fewnira ɓural Makko ngal on Mo o muuyi. Ko Kanko woni Fooluɗo Mo fooletaake, Ñeeñuɗo e tagu Mun e toppitagol Mun.

Gomɗii Men nulirii Muusaa Aayeeje Amen ɗe Men semmbiniri mo e goonga makko wonnde ko nuliraaɗo Joomi makko. Men yamiri mo yaltingol yimɓe makko ɓen e majjere keeferaaku faade e gomɗinal e ganndal. Men yamiri mo kadi anndintingol ɓe ñalɗi ɗi Alla neemini e maɓɓe ɗin. Pellet, hino e ɗen ñalɗe, dalilaaji ɓannginɗi gootaagu Alla, e mawnugol koddoruyee Makko, e ko O neeminiri gomɗimɓe ɓen. Ko ɗum woni ko yonndiniiɓe ɓen nafitorta e rewugol Alla ngol suumoo e yettugol neemaaji Makko ɗin.

Janto an Nulaaɗo, tuma nde Muusaa jaɓunoo yamiroore Joomi makko nden, o maakani yimɓe makko ɓen ka ɓiɗɓe Israa'iila'en himo anndintina ɓe neemaaji Alla ɗin e maɓɓe: Ko onon yo yimɓe am, annditee neema Alla on e mooɗon, tuma O daɗndunoo on e yimɓe Fir'awna ɓen e bone maɓɓe. Hiɓe meeɗinaynoo on lepte bonɗe, tawde hiɓe hirsiraynoo ɓiɗɓe mon worɓe ɓen fii wata on jibin wurtotooɓe e laamu fir'awna ngun, ɓe heddinira rewɓe mon ɓen fii jaasingol ɓe hoyna ɓe. Wonii e ɗen kuuɗe maɓɓe ɗon, jarrabuyee mon mawɗo e muññagol ɗum. Alla warjori on ngal muñal mon e on jarrabuyee, daɗndugol on e bone yimɓe fir'awna.

Muusaa maakani ɓe: Jantee tuma Joomi anndirnoo on konngol yottiingol: Pellet si on yettii Alla e ɗin neemaaji jantaaɗi ɗi O neemini e mon, ma O ɓeydan on neema e ɓural e majji. Si on yeddii non neemaaji Makko ɗin e mooɗon on yettaali ɗi, anndon lepte Makko ɗen pellet ko saɗtayɗe e yeddooɓe neeemaaji Makko ɗin ɓe yettataa ɗi.

Muusaa maakani yimɓe makko ɓen: Ko onon yo yimɓe am, si on yeddii, onon e denndaangal wonduɓe e mon ka leydi ɓen, haray lorra ngun keeferaaku mon ko e mon yiltotoo. Tawde Alla ko Galo Hoore-mun, waɗɗinanɗo Jaati Makko yettee- de. Liimanaaku gomɗimɓe ɓen nafataa Mo, yeddugol heeferɓe ɓen kadi lorrataa Mo.

E araali on, onon ɓee heeferɓe, kumpite halkeede mofte fennunooɓe ado mon: Yimɓe Nuuhu, e Aadi'en yimɓe Huudi, e Samuuda'en yimɓe Saalih, e ɗen mofte aruɓe ɓaawo maɓɓe, ɗuuɗunooɓe ɓe gooto anndaa limoore mun si wanaa Alla? Nulaaɓe maɓɓe ɓen addanii ɓe hujjaaji ɓannguɗi, kono ɓe waɗi juuɗe maɓɓe ɗen ka kunndule maɓɓe hiɓe ŋatira kolli maɓɓe tikkangol Nulaaɓe ɓen, ɓe wi'ani Nulaaɓe maɓɓe ɓen: Menen men yeddii ko nulidaɗon e mun kon, menen, meɗen hattini sikkitagol e kon noddoton men e mun kon.

Nulaaɓe maɓɓe ɓen wi'ani ɓe ka jaabagol ɓe: E hara no fii ngootimmbaaku Alla ngun hertinnan Mo dewal ngal sikke? Ko Kanko tagi kammuuli ɗin e leydi ndin, O woodiniri ɗi no ɗi anndiraaka. Himo nodda on e gomɗingol Mo fii no O montirana on junubaaji mon yawtuɗi ɗin, O nennana on haa e lajal mon happaangal ngal ka nguurndam mon aduna. Yimɓe maɓɓe ɓen wi'ani ɓe: On wonaali si wanaa ɓanndinke yeru amen, alaa ko ɓurdirɗon amen. Ko faandiɗon ko yiltugol men e kon ko baabiraaɓe amen rewaynoo. Addanee men hujja ɓannguɗo, tinndinoowo e goongugol mon e kon ko nodditiɗon wonnde ko on nulaaɓe Alla e amen.

Nulaaɓe maɓɓe ɓen jaabori ɓe: Ko goonga, men wonaali si wanaa ɓanndinke yeru mon. Ko woni tun, ɗum hollaa hiɗen nannda e kala huunde. Alla no hertinira neeminirgol on Mo O muuyi e jeyaaɓe Makko ɓen, O suɓoo e maɓɓe Nulaaɓe e yimɓe ɓen. Menen, haananaa men nde men addanta on hujja mo ɗaɓɓoton, si wanaa e duŋayee Alla, men hattanaaka addugol ɗum, ko Alla tun woni hattanɗo e ɗum. Ko e Alla tun woni ko gomɗimɓe ɓe Mo ɓen fawatoo e fiyakuuji maɓɓe ɗin fow.

Ko haɗata men haa men heɓa ngantu, wonoowo hakkunde e amen e fawagol Mo ngol? Gomɗii le O fewnirii men e laawol ɓurngol foccaade ɓannga. Pellet men muññotoo e kon ko lorroton men e fennugol jalkita. Ko e Alla tun woni ko gomɗimɓe ɓen fawatoo e denndaangal fiyakuuji maɓɓe ɗin.

Yedduɓe ɓen e yimɓe Nulaaɓe ɓen wi'i tuma ɓe ronkunoo wenjondirgol e Nulaaɓe maɓɓe ɓen: Ma men yaltin on e saare amen, maa on yiltike e diina mon faade e diina amen. Alla wahayiniri e Nulaaɓe ɓen ñinnugol ɓe: Ma men halku tooñuɓe yeddi Alla e Nulaaɓe Makko ɓen.

Ma Men hoɗnu on, onon Nulaaɓe ɓen e jokkuɓe on, e leydi ndin, ɓaawo nde ɓe halkaa. Kon ko jantaa e halkugol heeferɓe fennooɓe ɓen, hoɗina Nulaaɓe ɓen e gomɗimɓe ɓen ka leydi ɓaawo halkeede ɓeya, ɗum ko annduɗo mawngu Am e ndeena Am e makko, o huli ko Mi kammbiranta mo lepte kon.

Nulaaɓe ɓen ɗaɓɓiri Joomi maɓɓe walleede e ayɓe maɓɓe ɓen. Ontuma sooyi kala dunndaranke ƴaggango goonga, salotooɗo jokkude goonga si feeñanii mo.

Ñalnde Darngal, on dunndarankeejo tawoyay Jahannama yesso makko, ka o waawataa laawaade. O yarniroyee e magge mbordi yimɓe Yiite ndin ilayndi e maɓɓe. Ɗum ɗonɗitataa mo, o seerataa himo leptiree ɗonka e kala noone e lepte.

Himo etoo yarugol ɗam ndiyam tuma kala, kono o eɓɓataa moɗugol ɗam hakkee ko ɗam metti ɗam wuli luuɓi. Maayde nden no ardana mo kala nokku, hakkee ko lepte ɗen sattiri mo, kono le o maayataa sakko o fowtoo. Ko e ɗum o heddotoo himo meeɗa lepte. Hara kadi lepte sattuɗe goo no habbitii mo yeeso.

Ko woni sifa golle ɗe yedduɓe ɓen gollata immorde e sadaka, e moƴƴere, e yurmegol lo'uɓe, ko wano ndoondi ndi henndu tiiɗi e mun, e ñalaande wippo- re; ndun henndu ronndora ndi ndoondi ndi henndu wutti e mbaadi sattundi, ndu saakita e kala nokku, haa batte mayri mula. Ko non golle heefer- ɓe ɓen wa'i, ko keeferaaku ngun wippotooɗe, ɓe nafitoroytaa ɗe Ñalnde Darngal. Ɗen woni golle ɗe tuuginaaki e gomɗinal, ko ɗen woni majjere woɗɗunde laawol goonga ngol.

E a anndaa an neɗɗanke, wonnde Alla tagirii kammuuli ɗin e leydi ndin goonga e wonnde tagiraali ɗin meere? Si O muuyii ittugol on onon yimɓe ɓen, O adda tagu goo ko rewa Mo ɗoftoo Mo hara wanaa onon, O waɗay ɗum, tawde ko ko welani Mo fii.

Halkugol on adda woɗɓe goo wonaali sattanɗum Alla. Ko O hattanɗo kala huunde. ronkintaa Mo.

tagu ngun yalta ka genaale maɓɓe sutoo ka Alla Ñalnde Darngal. Lo'uɓe jokkunooɓe koohooɓe ɓen wi'ana ɓen: Ko onon yo koohooɓe, menen ko men jokkunooɓe yamirooje mon, men haɗitoo e haɗaaɗi mon. Taw si on duncanay men e lepte Alla ɗen goɗɗum? Koohooɓe ɓen wi'a: Sinno Alla fewnuno men, men fewnayno on e ɗum, daɗen en fow e lepte Makko ɗen. Kono men majji, men majjinii on. Hino fotana'en nde lo'inotoɗen e ronnditagol lepte ɗen maa nde muññotoɗen, tawde en alaa daɗirde e lepte ɗen.

Ibuliisa wi'a, tuma nde yimɓe Aljanna ɓen naati, yimɓe Yiite ɓen kadi naati: Pellet Alla fodiino on fodoore goonga, O hunni ko O fodi on kon. Mi fodi on fodoore meere, mi ronki hunnude ko mi fodi on kon. Doole woo woodanaano lam aduna ko pooɗira on e keeferaaku e majjere. Kono le mi nodduno on e yeddugol, mi cuɗani on geddi ɗin; yacciɗon e jokkugol lam. Haray wata on felam e majjere heɓunde on nden; felee wonkiiji mon; ko kanji hanndi e feleede. Wanaa mi faabotooɗo on duñana on lepte ɗen; wanaa on faabotooɓe lam duñangol ɗe. Min mi yeddii ko kafidaynoɗon lam kon e Alla ka dewe. Pellet, tooñirnooɓe sirkangol Alla ɓen aduna ɓe yeddi Mo, hino woodani ɓe lepte muusuɗe habbitiiɗe ɓe Ñalnde Darngal.

Ko no seediri e tooñuɓe ɓen, woni ko gomɗimɓe golli golle moƴƴe ɓen naadirtee Aljannaaji, ɗi canɗi ilata senngo leyd kuɓeeje e leɗɗe majji. Ko ɓe duumorayɓe nder ton poomaa e duŋayee Joomi maɓɓe. Hiɓe hiwrondira hakkunde maɓɓe, Malaa'ikaaɓe ɓen hiwrooɓe, Joomi maɓɓe kadi hiwrora ɓe "Salaam" (Kisiyee).

E a yi'aali an Nulaaɗo, ko hono Alla piyiri misal konngol tawhiidi ngol: Reweteeɗo tanaa Allaahu alaa, Tuma O nanndani ngol e leggal welngal, woni duɓɓehi (tamoroowi) binndeere maggal on no irii ka leydi hino yarira ndiyam calɗi maggal laaɓuɗi, calɗi maggal on no toowita ka weeyo, no yara caawa, foofa henndu laaɓundu.

Ngal leggal welngal no okkira dimɗe maggal on tuma kala, e duŋayee Joomi maggal. Alla seniiɗo On no piyirana yimɓe ɓen mise fii no ɓe waajitora.

Ko woni kadi misal konngol sirku soɓungol, ko wano leggal soɓungal, ngal woni baali kaadandiri: Irtaangal ka leydi, ngal alaa daƴƴere ka hoore-leydi, wanaa calɗi ka weeyo, ngal maaya henndu ruuyina. Ko wano non konngol keeferaaku wa'i, ngol ƴawtinantaa joom-maggol golle moƴƴe ka Alla.

Alla no tabintinira gomɗimɓe ɓen konngol tawhiidi, gomɗinal timmungal aduna, haa ɓe maayida e gomɗinal, ɓe tabita e maggal ka lanndal genaale. O tabintina ɓe Ñalnde Darngal. Alla no majjina tooñir- ɓe sirkangol Alla ɓen yedda Mo. Himo waɗa ko O muuyi: immorde e majjinirgol nunɗal Makko ngal mo O yiɗi majjinnde, e fewnirgol ɓural Makko ngal mo O yiɗi fewnude. Alaa dooloowo Mo.

Gomɗii a tinii fiyaaku ɓen Qurayshi e yedduɓe Alla e Nulaaɗo Makko on dulliri kon, e hoore ko O nee- miniri ɓe kon hoolaare ka Haram e nulugol Muhammadu jom-kisiyee e maɓɓe. Ɓe dulliri ɗum yeddugol neemaaji Makko ɗin tuma nde ɓe fennu-noo ko nulaaɓe maɓɓe addani ɓe immorde ka Jom maɓɓe, ɓe weerni ɓen yimɓe maɓɓe jokkuɓe ɓe e keeferaaku ngun e galle halkaare.

Galle halkaare ɗen, ko Jahannama nge ɓe naatata e mun, hiɓe meeɗoya nguleeki mayre. Nge bonii ñiiɓirde maɓɓe.

Sirkooɓe ɓen waɗani Alla yerondiraaɗi fii no ɓe majjinira ɓen jokkuɓe ɓe e laawol Alla ngol, ɓaawo nde kamɓe ɓe majji e maggol. Maakan ɓe an Nulaaɗo: Dakmitoree tuuyooji mon e saakugol sikku-sakka e ɗam nguurndam aduna, ko pellet, ruttorde mon nde wortataa nden Ñande Darngal, ko ka Yiite.

An Nulaaɗo, maakan gomɗimɓe ɓen: Ko onon yo gomɗimɓe, ñinniree julde nden no timmiri, nafqon e ɗin waɗɗiiɗi e yiɗaaɗi ɗi Alla arsiki on, waɗiron ɗum gunndoo rentorgol e yiingo, feññiniron ɗum no woɗɓe ñemmbira on, ado nde arata on ñalaande nde ngyeygu alaa e mun wanaa sootorɗum e lepte Alla ɗen, wanaa kadi weldigal nafirayngal tefangol weldiiɗo mun.

Ko Alla woni fuɗɗuɗo kammuuli ɗin e leydi ndin no ɗi anndiranooka, O jippiniri ka kammu ndiyam; O yaltini e ɗam ndiyam jippinaaɗam nooneeji dimɗe, arsike wonannde on, onon yimɓe ɓen. O eltani on laaɗe ɗen, hiɗe dogira ka hoore-ndiyam e eɓɓoore Makko. O eltani on kadi canɗi ɗin, fii ka yaron, yarnon neemoraaɗi mon e remuruuji mon.

O eltani on naange ngen e lewru ndun hiɗi dogira no duumori. O eltani on kadi jemma on e ñalorma on hiɗi waylondira: Jemma on no ɗaanoron fowtoɗon, ñalorma on fii cofte mon e ligge mon.

O okki on e denndaangal ko toriɗon Mo e ko on toraaki Mo. Si on lintii neemaaji Alla ɗin, on hattantaa e moftugol ɗin; tawde hiɗi ɗuuɗi. Ko O jantanii on kon, ko seeɗa e majji. Pellet, neɗɗanke on ko heewuɗo tooñude hoore-mun, ɗuuɗuɗo yeddude neemaaji Alla ɗin.

Janto kadi an Nulaaɗo, tuma nde Ibraahiimaa maakunoo ɓaawo nde o hoɗini geɗal makko on Ismaa'ila e yumma mun Haajara ka aynde makka: Joomi am, waɗu ndii leydi Makka ndi mi hoɗini ɓeynguure am e mun, leydi hoolaare, ndi ƴiiƴam rufetaake e mun, goɗɗo tooñetaake e mun. Woɗɗindinaa lam min e ɓiɗɓe am ɓen rewugol sanamuuji.

Joomi am, ɗii sanamuuji majjinii ko ɗuuɗi e yimɓe ɓen, tawde ɓe sikkuno ɗi tefanoyay ɓe, ɓe jarriboraa ɗi, ɓe rewi ɗi ɓe acci Alla. Kala jokkuɗo lam e yimɓe ɓen ka wootinɗingol Alla ɗoftoo Mo, haray ko o jeyidaaɗo e am. Kala non yedduɗo lam, o jokkaali lam e ɗum, haray An Joomi am, ko A Haforoowo junuubi on Mo muuyuɗaa haforannde, Hinnotooɗo ɓe.

Joomi amen, min mi hoɗinii yoga e geɗalɓe am ɓen -Ismaa'iila e ɓiɗɓe makko ɓen- e ndee aynde -Makka- nde remuru alaa e mun wanaa ndiyam, takko ka Suudu Maa Hormanteeru. Joomi amen, mi hoɗnirii ɓe ɗon fii no ɓe ñinnira julde. Joomi amen, yiilu ɓerɗe yimɓe ɓen e maɓɓe e ndii leydi, arsikaaɓe dimɗe, belajo'o ɓe yettete e kon ko neeminɗaa ɓe.

Joomi amen, Pellet, An hiɗa anndi kala ko men suuɗata e ko men feññinta. Hay huunde suuɗotaa- ko Alla ka leydi wanaa ka kammu, Himo anndi fii mun. Huunde e ko hatojinten suuɗaaki Mo.

Yettoore e mantoore woodanii Alla, On jaabiiɗo lam toraare am, O yeɗi lam geɗalɓe moƴƴuɓe, e hoore nayeegu am, Ismaa'iila mo Haajara jibini, e Ishaaqa mo Saara jibini. Pellet, Joomi am ko nanoowo toraare kala toriiɗo Mo.

Joomi am, waɗan ñinniroowo julde no timmiri, waɗiraa non kadi ɓeynu am ngu. Joomi amen, jaabin toraare am nden, waɗaa nde jaɓaande ka Maa.

Joomi amen, haforanam junuubi am, haforanaa jibimɓe lam junuubi maɓɓe (O torino ɗum ado o anndude ben makko ko gaño Alla, nde ɗum feñan- noo mo, o daɗndino e makko), haforanaa gomɗim- ɓe ɓen kadi junuubi maɓɓe, ñalnde nde yimɓe ɓen daranoytoo ñaaweede yeeso Joomi maɓɓe.

Wata a sikku dey an Nulaaɗo, wonnde ko welsinda- re Alla nenniranta leptugol tooñooɓe ɓen, ɓen fen- nooɓe e falatooɓe gaay e laawol Alla ekn. Si ko woni, Himo anndi fii ɗum, huunde suuɗaaki Mo e ɗum. Anndu ko O nenniranta leptugol ɓe, ko haa Ñalnde Darngal, nden ñalaande nde gite saaforta e mun kulol ko ɗe yi'ata.

Tuma nde yimɓe ɓen immintinaa e genaale maɓɓe ɗen, ɓe yaccora ka nodduɗo On, hara hiɓe ŋalliniri ko'e maɓɓe ɗen ka weeyo, ndaarɗe maɓɓe ɗen ruttotaako e maɓɓe, ko non ɗe heddorta e kulol ko ɗe yi'ata. Hara ɓerɗe maɓɓe ɗen yeewuɗe, ɗe haqqiltaa ɗe faamataa, hakkee ɗenƴere.

An Nulaaɗo, jertiniri mofte maa ɗen lepte Alla ɗen Ñalnde Darngal, tooñirnooɓe ko'e-mun ɓen yeddu- gol Alla sirkana Mo wi'oya ontuma: Joomi amen, nennan men, nennitanaa men lepte ɗen, ruttitaa men aduna yeru dumunna hawruɗo, men gomɗine, men jokka Nulaaɓe ɓe immin-ɗaa ɓen e amen. Ɓe jaaboree feloore: E on laatanooki on woondiino ka aduna, wonnde onon on iwataa e ɗam nguurndam aduna yahon laakara, yedduɗon immital ɓaawo maayde?

Hoɗuɗon e koɗooli mofte adinooɓe ɓen tooñirɓe ko'e mun yeddugol Alla, wano yimɓe Huudi e yimɓe Saalih. Ɓanngani on kadi ko Men huuwi ɓe kon e halakuyee, Men piyirani on mise ka Deftere Alla no waajitoron, kono on waajitoraaki.

Gomɗii ɓee hoɗuɓe e koɗooli mofte adinooɓe ɓen tooñuɓe fewjii fii warugol Annabiijo Muhammadu (yo o his), ɓe bonna fii noddaandu makko ndun. Alla non no anndi fii fewjoore maɓɓe nden, huunde suuɗaaki Mo e mayre, fewjoore maɓɓe ko lo'unde; nde irtirtaa lo'ere mayre pelle maa goɗɗum goo, yeeso fewjoore Alla nden e maɓɓe.

Wata a sikku an Nulaaɗo, wonnde Alla lunndoto fodoore nde O fodiri Nulaaɓe Makko ɓen poolal e ɓannginnde diina kan. Pellet, Alla ko Fooluɗo Mo fooletaake, ma O semmbin yiɗɓe Makko ɓen, ko O Jom yottorgol no sattiri e añuɓe Mo ɓen e Nulaaɓe Makko ɓen.

Ngol yoftagol e heeferɓe ɓen, ko Ñalnde Darngal waɗata, ñalnde ndii leydi waɗtitirtee leydi goo raneeri laaɓundi, kammuuli ɗin kadi waɗtitiree goɗɗi goo. Yimɓe ɓen feeñira e genaale maɓɓe ɗen ɓalli maɓɓe e golle maɓɓe, fii no darora yeeso Heerorɗo laamu e mawngu Mun, Fooluɗo Mo fooletaake.

An Nulaaɗo, a yi'oyay ñalnde leydi ndin waɗtitiroya leydi goo, kammuli ɗin waɗtitee, yi'aa heeferɓe ɓen e sirkooɓe ɓen hino haɓɓindiraa e kolombooje, ɓe humindiree juuɗe e koyɗe maɓɓe haa ka daaɗe callale. Conci maɓɓe ɗi ɓe ɓoornotoo ɗin ko e mbollam (ɗum ko ko huɓɓata ooya) geece maɓɓe ɓaleeji ɗen suddiree yiite.

An Nulaaɗo, a yi'oyay ñalnde leydi ndin wostora leydi goo, kammuli ɗin waɗtitee, yi'aa heeferɓe ɓen e sirkooɓe ɓen hino haɓɓindiraa e kolombooje, ɓe humindiree juuɗe e koyɗe maɓɓe haa ka daaɗe callale. Conci maɓɓe ɗi ɓe ɓoornotoo ɗin ko e mbollam (ɗum ko ko huɓɓata ooya) geece maɓɓe ɓaleeje ɗen suddiree yiite.

Ɗum fow ko fii no Alla yoɓira kala wonkii ko ki golli e moƴƴere maa bone. Pellet, Alla ko yaawuɗo hasbugol golle.

Ndee Alqur'aaaare jippinaande e Muhammadu (yo o his) ko nulal Alla e yimɓe ɓen, e fii yo ɓe hulu kammbaaji mayre tiiɗuɗe, e no ɓe anndirar ewetee- ɗo e goonga alaa si wanaa Alla Gooto On, ɓe rewa Mo hara ɓe kafidaali Mo e goɗɗo goo, e no joomi- raaɓe haqqille hisuɗe ɓen waajitora nde ɓe taskoo, tawde ko kamɓe nafitorta waaju mayre.

Alif, laam, raa: yewtere fii sugu ɗee Aayeeje yawtiino ka arannde cortewol(simoore) Baqarah. Ɗee Aayeeje ko mawnuɗe fiyaaku, tinndinɗe wonnde ko ɗe jippiniaaɗe ka Alla, Aayeeje Alqur'aana ɓannginɗe tawhiidi e sari'aaji.

Heeferɓe ɓen yeloyto Ñalnde Darngal, tuma feeñanta ɓe meere keeferaaku ngu ɓe wonunoo e mun aduna, sinno ɓe laatino juulɓe.

An Nulaaɗo, accu ɓee fennooɓe ñaamira no neemoraaɗi ñaamirta, ɓe dakmitora dakamme aduna lannayɗe, ɓe sokolira juutingol caate gaa gomɗinal e golle moƴƴe. Aray ɓe annda ko ɓe wonunoo e hayrere kon, tuma ɓe darnoyaa yeeso Alla Ñalnde Darngal.

Men jippinaali halkaare e saare jeyaande e tooñunde, si wanaa hara no woodani nde lajal dot-tangal anndaangal ka Alla, ngal ɓeydotaako ngal ɗuytotaako.

Mofte woo halketaake ado lajal majje timmude, ɗe nennantaake ɗum kadi si hewtii. Haani hara tooñooɓe ɓen ɗaynitoraali ko Alla nennitirani ɓe kon.

Heeferɓe makka ɓen wi'ani Nulaaɗo Alla on (yo o his): Ko an yo nodditiiɗo jippineede e mun (Deftere nden), pellet aan e noddugol maa ko a kaangaaɗo haɗa firlito pirlitagol feetuɗo.

Ko haɗ Ma addande amen Malaykaaji ɗi ceedo wonde ko a goonɗuɗo e nelal ma he e tellagol lepte.

Alla jaaborii ƴamol maɓɓe addugol Malaa'ika ngol: Men jippinirtaa Malaa'ika si wanaa ko yahdata e ñeenñal, tuma hewti halkirgol ɓe lepte. Ɓe wonoy- tah, tuma Men addoyta Malaa'ika, hara ɓe gomɗi- naali, leelnoyteeɓe, ko woni, ɓe yacciniroyte lepte ɗen.

Ko Menen woni ko jippini ndee Alqur'aanaare e fonndo Muhammadu (jom-kisiyee) siftinore yimɓe ɓen. Menen kadi ko Men reenooɓe nde e ɓeydee- de maa ɗuyteede, maa walylee, waɗtitee.

Gomɗii Men nuliino ado maa an Nulaaɗo, Nulaaɓe goo, e leñi yeddunooɓe ko adii, ɓe fenni ɓe. Wanaa an adaa fenneede e Nulaaɓe ɓen.

Nulaaɗo woo araali e ɗen mofte heeferɓe adinooɓe, si wanaa ɓe fennay mo ɓe jalkita.

Ko wano Men naadirnoo fennugol ngol e ɓerɗe ɗen mofte, Men naadirta ɗum e ɓerɗe sirkooɓe Makka ɓen, sabu ɗuurnagol ɓe townitoo ngol.

Ɓe gomɗintaa ndee Alqur'aanaare jippinaande e Muhammadu (yo o his), gomɗii sunna Alla on e halkugol fennuɓe Nulaaɓe mun ɓen yawtiino. Yo fennooɓe ma ɓen waajito.

Ɓee fennooɓe townitiiɓe, hay goonga kan feeñirani ɓe hujjaaji ɓannguɗi, hay Men udditanno ɓe damal ka kammu, ɓe waɗti ƴawrude.

Ɓe goongintaano, ɓe wi'ayno : Anndee gite amen ɗen hippa e yi'ugol. Wurin ko men yi'aynoo ko batte mbilewu, ko men mbilaa ɓe.

Gomɗii men waɗii koode mawɗe ka kammu, ɗe yimɓe ɓen ɗoworta e ɗalle maɓɓe, ka niɓe njorndi e ka maayo. Men waɗaniri-ɗe ɓen ndaarooɓe ɗe fii yo ɓe dallinorɗe e kattal Alla ngal.

Men reeniri kammu ngun e kala seytaane riiwaaɗo e yurmeende Alla.

Si wanaa on heɗitaniiɗo majannde dental ngal, hoodere jalbunde jokkita ngii, nde sumaa ngii.

Leydi ndin, Men weerti ndi ka yimɓe ɓen daakoo, Men waɗi e mayri pelle tabituɗe fii wata ndi yergu e maɓɓe. Men fuɗini e mayri noone kala e puɗi, kon ko eɓɓaa happiraa hikma.

Men waɗani on ka leydi ton, onon yimɓe ɓen, ko wuuriron, immorde e ñaametee e njaram, fotde hiɗon e nguurndam aduna. Men waɗani ɓen ɓe on arsikataa ka yimɓe e ka kulle kadi ko ɓe wuurira.

Hunnde alaa nde yimɓe e daabeeji ɗin nafitorta, si wanaa Meɗen hattani woodingol nde ko ɓe nafitora. Men woodinaali kadi e nden huunde, si wanaa e eɓɓoore happaande yahdunde e ñenƴal e muyɗe Amen.

Men wurti keneeli ɗin hawrondirooji e duule; Men jippiniri ɗen duule toɓo, Men yarniri on ndiyam toɓo. Wonaa onon ɓee yimɓe woni ko mari ɗam ndiyam ka leydi, fii ko wona ɓulli e canɗi, ko Alla woni ko mari ɗam ton.

Ko Menen kadi woni wuurnitirooɓe maayɓe tagu- gol e waaseede, immintinoya ɓe ɓaawo maayde, Men wuurnita kadi maayɓe si laje maɓɓe timmii. Ko Menen woni heddotooɓe rona leydi ndin e ko woni e mayri.

Gomɗii Men anndii adiiɓe mon jibineede e maa-yooɓe, Men anndii kadi sakkitotooɓe e mun. Hunnde e ɗum suuɗaaki Men.

Pellet, Joomi maa an Nulaaɗo, ko Kanko mooɓoy- ta ɓe denndaangal Ñalnde Darngal, fii yo O yoɓu moƴƴinɗo on e bonnuɗo on. Kanko ko O Ñeeñuɗo e toppitagol Mo ngol, Annduɗo Mo huunde suuɗaaki ɗum.

Gomɗii Men tagirii Aadama e mbullaari yoorundi waɗayndi hito si tappaama, ndin ko ɓaleeri waylorndi sabu neeɓugol waalagol ndi.

Men tagiri baaba jinnaaji ɗin ko adii tageede Aadama (yo o his) e yiite ooyunge.

Janto an Nulaaɗo, tuma nde Joomi maa dalannoo Malaa'ika'en e Ibuliisa wonndunooɗo e maɓɓe: Min Mi tagay ɓanndinke immorde e loopal yooru- yongal, waɗayngal hito si tappaama, ɓalewal waylotoongal balangol.

Si Mi fotndindirii mo, Mi timminii tagugol mo, haray ko yo on suuyiran mo ɗoftagol yamiroore Am e hiwraade mo.

Malaa'ika'en ɗoftii yamiroore Joomi maɓɓe, ɓe sujji ɓe fow maɓɓe.

Ibuliisa kan -wonndunooɗo e Malaa'ika'en kono mo jeyaaka e maɓɓe- haɗitii sujjanngol Aadama wonndude e Malaa'ika'en.

Alla daalani Ibuliisa ɓaawo o haɗitaade sujjangol Aadama: E ko haɗu maa sujjidugol e Malaa'ika'en ɓen sujjirɓe ɗoftagol yamiroore Am?

Ibuliisa jaabori townitaare: Sellantaa lam ka mi sujjanta ɓanndinke mo Taguɗaa immorde e loopal yoorungal, ɓalewal waylotongal.

Alla daalani ibuliisa: Yaltu ka Aljanna, sabu ko a riiwaaɗo.

Pellet, kuddi e riiweede e yurmeende Am fawike e ma haa Ñalnde Darngal.

Ibuliisa wi'i: Joomi am, nennitanam hara A waraa-ni lam haa ñande tagu gun immintinoytee.

Alla daalani mo: An on, ko a jeyaaɗo e nennitanaaɓe laje mun ɓen.

Haa e ñalaande nde fow maayata nden si allaadu ndun wuttaama araunuru.

Ibuliisa wi'i: Joomi am, sabu ko majjinirɗaa mi kon, ma mi labinan ɓe geddi ɗin ka leydi, ma mi majjin ɓe fow maɓɓe e laawol focciingol ngol.

Si wanaa ɓen ɓe suɓiɗaa e jeyaaɓe Maa fii ko rewa Maa.

Alla daali: Ngol ko laawol fotondirngol, hewtinayngol ka Am.

Pellet, jeyaaɓe Am laɓɓinaaɓe ɓen, a alanaaɓe ɓen kattal, a hippataa kadi bewnugol ɓe, si wanaa ɓen jokkuɓe ma e majjuɓe ɓen.

Pellet Jahannama wonii fodoore Ibuliisa e ɓen jokkuɓe mo e majjuɓe ɓen fow.

Jahannama no mari dame jeeɗiɗi ka ɓe naatirta, damal kala e majje no heertinanaa jokkuɓe Ibuliisa ɓen ka naadiree.

Pellet, huluɓe Joomi mun ɓen, ɓe ɗoftii yamirooje Makko ɓe woɗɗitii e haɗaaɗi Makko, ɓen wonii e aljannaaji e ɓulli.

Ɓe wi'anoyte tuma ɓe naatata: Naatiree ɗi hisugol e kala ñawu, daɗooɓe e kala kulol.

Men itti kala ko woni e ɓerɗe maɓɓe immorde e konnaagu e ngayngu. Ɓe wonti musiɗɓe yiɗindirɓe, jooɗodayɓe e ndaɗɗule hiɓe ndaarindira.

Tampere heɓataa ɓe ton, ɓe wonaa kadi yaltintee ɓe ton. Ko ɓe duumotooɓe nder ton.

An Nulaaɗo, anndin jeyaaɓe Am ɓen, wonnde ko Min woni Haforanoowo tuubuɗo e maɓɓe, Hinnotooɗo ɓe.

Anndinaa ɓe wonnde lepte Am ɗen, ko ɗen woni lepte muusuɗe ɗen. Yo ɓe tuubu ɓe ruttoo e Am fii no Mi haforana ɓe, ɓe daɗa lepte Am.

Humpitaa ɓe kadi fii Malaa'ikaaɓe hoɓɓe Annabi Ibraahiima ɓen addannooɓe mo welo-welo ɓiɗɗo gorko e halkeede yimɓe Luuti ɓen.

Tuma nde ɓe naatunoo ka makko ɓe wi'i: "Salaam (Kisiyee mon)". O jaaɓori ɓe ko ɓuri ɗum moƴƴude, o ɓaɗnani ɓe ngaari juɗaandi ngam ɓe ñaama, sikkugol ko ɓe ɓanndinke. Nde ɓe ronkunoo ñaa-mude, o wi'i: Menen ko men ɗenƴii ɓe on.

Malaa'ikaaɓe imminaaɓe ɓen wi'i: wata a ɗenƴo, menen men humpitete ko welma: wonnde a heɓay ɓiɗɗo gorko ganndo.

Annabi Ibraahiima maakani ɓe - nde o ŋalɗi e ko ɓe wewliniri mo kon ɓiɗɗo - : E on wewliniray lam ɓiɗɗo e hoore ko mi nawyi kon mi ronkiti? E ko honɗum wewlinirton mi?

Malaa'ikaaɓe imminaaɓe ɓen wi'ani Ibraahiima: Men wewlinirii ma goonga mo sikke alaa e mu'un. Wata a jeye e taƴiiɓe e ko men wewlinir maa kon.

Annabi Ibraahiima maaki: Hara no woodi Hara no woodi taƴotooɗo e yurmeende Joomi mun nden, si wanaa ɓen ooñiiɓe e laawol Alla focciingol ngol?

Annabi Ibraahiima maakani ɓe: Ko woni fiiyaku adduɗo mon, onon ɓee imminaaɓe Alla?

Malaa'ikaaɓe imminaaɓe ɓen wi'i: Menen Alla nulu men halkugol tiiɗuɓe bonande, mawnuɓe worodde ɓeen woni yimɓe Luuti ɓen.

Si wanaa ɓeynguure Luuti nden e gomɗimɓe jokkuɓe mo ɓen, Men daɗnday ɓe fow maɓɓe e halkaare nden.

Si wanaa ɓeyngu makko, Men ñaawii on ɗon ko heddotooɗo e halkaare nden.

Nde Malaa'ikaaɓe imminaaɓe ɓen ardunoo ka ɓeynguure Luuti e mbaadi worɓe.

Annabi Luutu maakani ɓe: Ko on yimɓe ɓe anddaaka.

Malaa'ikaaɓe imminaaɓe ɓen wi'ani Luutu: Wata a hulu. Ko woni, men addane an Luutu, ɗen lepte ɗe ɓe yimɓe maa ɓe sikkitino e lepte halakooje ɓe.

Men addanii ma goonga ka jillaa gajaate. Pellet ko men goonguɓe e ko men humpitu maa kon.

Yahdu e ɓeynguure maa nden ka tummbere jemme, iwtiraa ɓaawo maɓɓe; hara gooto e mo'on yeƴƴitoraali ɓaawo ndaarugol ko tllii e mum en, rewon ka Alla yamiri on rewrugol ɗon.

Men anndiniri Luutu ka wahayu, on fiyaaku mo Men ñaawi: wonnde ɓee yimɓe ɗoo, ɓe ɗoofrete ka asli mum en ngam halkudebe siɓe naati ka subaka.

Yimɓe saare Saduum nden ari hiɓe wewltora hoɓɓe Luutu ɓen, tamƴinagol yanirgol e maɓɓe faahishaaku.

Annabi Luutu maakani ɓe: Ɓee ɗoo yimɓe ko hoɓɓe am, wata on wirtiram ko faalaɗon yanirde e maɓɓe.

Huliree Alla accugol nguu faahishaaku. Wata on hoyniray ɗee kuuɗe mon kaanuɗe.

Yimɓe makko ɓen wi'ani mo: E men haɗaali ma weernugol gooto e yimɓe ɓen?

Annabi Luutu maakani ɓe himo ngantinanoo hoore-makko yesso hoɓɓe ɓen: Ɓee ɗoo ko jiwɓe am jeyaaɓe e reseteeɓe mon. Resee ɓe si wonii ko ittugol tuuyu faandiɗon.

Mi woondirii nguurndam maa an Nulaaɗo, pellet yimɓe Luutu ɓen wonii e bewre tuuyu maɓɓe, hiɓe rutti-ruttinnoo(denngi-denngina).

Sowto haacaango ngon halkiri ɓe ka puɗal naange.

Men wayliti saare maɓɓe nden, Men waɗtiri dow on ley. Men saaƴini e maɓɓe kaaƴe iwruɗe e loope juɗaaɗe.

Wonii e koo ko jantaa e ko yani e yimɓe Luutu ɓen, immorde e halkaare, maandeeji wonnde ɓen taskotooɓe.

Pellet, ca'e yimɓe Luutu ɓen no e laawol tabitngol feƴƴoowo kala e seteeɓe ɓen no yi'a ɗe.

Wonii e ngol peƴƴol, tinndinandewonande goom- ɗimɓe waajitorayɓe ɓen.

Gomɗii yimɓe Su'aybu ɓen yimɓe fitaare fiiltiinde kadi ko tooñunirnooɓe yeddugol Alla fenna Nulaaɗo Makko on Su'aybu (yo o his).

Men yottorii e maɓɓe nanngirgol ɓe lepte. Pellet, ca'e yimɓe Luutu ɓen e koɗanɗe yimɓe Su'aybu ɓen, wonii e laawol ɓanngangol wonande feƴƴoowo.

Gomɗii Samuuda'en fennii, ɓen woni yimɓe aynde Hijiri nden (Hakkunde Hijaz e Saami). Ɓe fenniri Nulaaɓe ɓen fow fennugol Annabiijo maɓɓe on Saalih (yo o his).

Men addani ɓe hujjaaji e maandeeji goonginɗi mo e ko o addi kon immorde ka Joomi makko, wano ngelooba mban, kono ɓe ronki waajitorde.

Hari hiɓe taƴiraynoo pelle ɗen fii mahugol cuuɗi ka ɓe hoɗira daɗugol ko ɓe huli.

Haacaango lepte ngon nanngiri ɓe ka subaka.

Kon ko ɓe laatinoo hiɓe faggitoo immorde e jawle e koɗanɗe, fow nafaano ɓe e duñugol lepte Alla ɗen.

Men tagiraali kammuuli ɗin e leydi ndin, e ko woni hakkunde majji kon meere nde aldaa e ñeeñal. Men tagiraali ɗin fow si wanaa e goonga. Pellet, darngal ngal ko arayngal feere mun alaa. An Nulaaɗo, ɗuurno fennooɓe ma ɓen, yaaforano-ɗaa ɓe yaafagol labaangol.

Tabitii ko Joomi maa an Nulaaɗo, woni Taguɗo kala huunde, Annduɗo ɗum.

Gomɗii Men okkii ma Faatiha ngol Aayeeje jeeɗiɗi, ko ngol woni fii Alqur'aana mawnde nden.

Wata a naɓir gite maa ɗen e nooneeji ɗi Men dakmiri heeferɓe ɓen sabu ko gasooji, wata a suno e ko ɓe fennata kon, yankinano gomɗimɓe ɓen.

Maaku an Nulaaɗo: Min ko mi jertinoowo e lepte, ɓannguɗo jertinaango.

Miɗo jertinira on nde heɓata on sugu ko Alla jippinnoo e ɓen senndirɓe defete Alla ɓen pecce-pecce, ɓe gomɗina yoga ɓe yedda yoga.

Ɓen waɗuɓe Alqur'aanaare nden geɓe-geɓe, ɓe wi'i nde jilli mbilewu maa daari maa gimɗi.

Mi woondirii Joomi maa an Nulaaɗo, Ma Men lanndoyo denndaangal ɓen waɗuɓe Alqur'aana geɓe-geɓe Ñalnde Darngal.

Ma Men lanndoyo ɓe fii ko wonunoo e huuwude, immorde e keeferaaku e yaddugol ka aduna.

Feññin, an Nuaaɗo, ko Alla yamir-maa feññingol ko noddugol e Makko, wata a yeƴƴito e ko sirkooɓe ɓen wowlata huuwa.

Wata a ɗenƴo ɓe. Menen Men heediii ma e pewje jalkitooɓe jeyaaɓe e ardiiɓe heeferɓe Qurayshi ɓen.

Ɓen waɗtidooɓe e Alla reweteeɗo goo. Aray ka ɓe annda wattannde bone sirku maɓɓe on.

Gomɗii Meɗen anndi, wonnde an Nulaaɗo, fonndo maa ngon hino ɓiɗtora ko ɓe fennata maa ɓe jalkite kon.

Faɓtor(moolo) ka Joomi maa laɓɓinirgol Mo ko O haandaani, mantiraa Mo sifaaji kamal, laato-daa e rewooɓe Mo ɓen juulannoo ɓe Mo. Ko e ɗum lekki ɓiɗtagol fonndo maa woni.

Duumo-ɗaa e rewugol Joomi maa fotde hiɗa wuuri haa maayde nden tawe e ɗum.

Ko Alla ñaawi kon leptirgol onon heeferɓe ɓen ɓadike. Wata on hawjan ɗum ado hewtude. Senayee woodanii Alla e kon sirkooɓe ɓen kafidata Mo e mun.

Alla no jippindinira Malaa'ikaaɓe ɓen e wahayu on, immorde e yamiroore Makko, e on mo O muuyi e Nulaaɓe Makko ɓen, wonnde: Jertiniree yimɓe ɓen, onon ɓee Nulaaɓe, e sirkangol Alla. Reweteeɗo e goonga alaa si wanaa Min. Hulee Lam onon ɓee yimɓe, ɗoftoɗon yamirooje Am, woɗɗitoɗon haɗaaɗi Am.

Alla tagirii kammuuli ɗin e leydi ndin no ɗi anndira- nooka e hoore goonga. O tagiraali ɗi meere, ko ko dallinoree e mawngu Makko O tagiri ɗi. Senayee woodani Mo e ko ɓe kafidata Mo kon e goɗɗum goo.

O tagirii neɗɗanke iwde e toɓɓere maaniiyu hoy-nde, nde mawni tagu cagal tagu; jaka yoo kanko ko o tiiɗuɗo wennjirgol meere fii montugol goonga, ɓannginɗo wennjo mun.

Neemoraaɗi ɗin ka ngelooɗi e ka na'i e ka dammi, O tagani on ɗi no nafitoron, onon yimɓe ɓen. Nafitoron wano duñirgol leeɓi baalli ɗin e gelooɗi ɗin jaangol, e duncitogol kocce mun e guri mun. Kadi, ko e majji ñaamoton.

Hino woodani on e majji cuɗaari, tuma jaaƴinton ɗi kiikiiɗe e tuma oornoton ɗi bimmbi.

Ɗin neemoraaɗi ɗi Alla tagani o, no ronndoo donle mon tedduɗe naɓa e leydi ndi on yottotanooko si wanaa tampere wonkiiji. Pellet, Joomi mon onon ɓee yimɓe, ko Yurmeteeɗo Hinootooɗo on, tawde O eltanii on ɗii neemoraaɗi.

Alla tagani on kadi pucci, e mbam-pucci, e mbabbi ko waɗɗoɗon, ronndinon donle mon, e ko cuɗorton e yimɓe. Himo taga kadi ko on anndaa e ko O yiɗi tagugol.

Ko Alla woodani ɓanngingol laawol focciingol yottinayngol e welayee Makko ngol, woni lislaamu. Hino e laawi ɗin ɗate seytaane ooñiiɗe e goonga, ko non kala laawol selungol lislaamu on ko ooñi- ngol. Si Alla muuyuno fewnirgol on fow e gomɗinal, O waɗayno ɗum.

Ko Kanko seniiɗo On woni jippiniranɗo on ka kam- mu ndiyam, hino woodani on onon e daabeeji mon njaram e majjam, ko e majjam kadi puɗi leɗɗe ɗi neemoraaɗi mon ndurata.

Alla no fuɗinirana on ɗam ndiyam aawruuji ɗi faggorton, e nebbanteeje, e tamarooje, e inabuuje e kala dimɗe. Wonii e ɗam ndiyam e ko yaltata e majjam, hujja e kattal Alla ngal, wonannde teskato- ɓe e tagu Makko ngun, ɓe dallinora ɗum e maw-ngu mawngu Makko ngun.

Alla eltani on jemma on ka ñiiɓon fowtoɗon, ñalor- ma on ka faggitoɗon nguuree mon. O eltani on kadi naange ngen, O waɗi nge jalɓunge, O waɗi lewru ndu jalbundu. Koode ɗen ko eltiraaɗe yami- yamiroore hoddiraango Makko; ko ɗen woni ko ɗoworton ka niɓe njorndi e ka baharu, anndiron ɗe waqtuuji ekn. Wonii e ngol eltugol ɗin ɗon fow, hujjaaji ɓannguɗi e kattal Alla ngal, wonannde yimɓe gollirooɓe haqqille mun, ko ɓen tun gelotoo hikma majji.

O eltani on ko O tagi kon ka leydi, sertuɗum nooneeji, immorde e oogirɗe, e kulle, e puɗi, e aawruuji. Wonii e ko jantaa koo, hujja feññinɗo kattal Alla ngal, wonannde yimɓe waajitorayɓe ɗum, ɓe geloo wonnde Alla ko Hattanɗo, Neemi- Neeminoowo.

Ko Kanko seniiɗo On eltani on maayo ngon ka waɗɗoɗon yaltinon ko woni e maggo ñaamon teewu liƴƴi kecci ɗi yunngoton e maggo, hiɗon yaltina e maggo kadi cuɗaarindi ɓornotoɗon onon e rewɓe mon, wano jawaahiri. A yi'ay laaɗe ɗen hino feera maayo ngon, hiɗon waɗɗora ɗen laaɗe ɗaɓɓugol ɓural Alla e dañal ngeygu. Belajo'o, on yettay Alla e ko O neemini on e mun kon, heertina- non Mo dewal.

O tuti penle ka leydi ko tabintina ndi hara ndi dillidaali e mon ndi ooñoo. O ilini canɗi e mayri ka yaron, yarnon neemoraaɗi e aawruuji mon. O feeri kadi ɗate e mayri, ɗe yottoron ka faandonɗon hara on majjaali.

O waɗani on ka leydi mandeeji feeñuɗi, ɗi anndir- ton laawi ñalorma. O waɗani on koode ɗen ka kammu jortagol nde ɗoworton jemma.

E hara taguɗo ɗii piiji on e goɗɗi goo wa'ay wa mo tagataa huunde? E on waajitortaa mawngu Alla ngun, On taguɗo kala huunde, bejjinɗiniron Mo dewal, hara on kafidaali Mo e ko tagaa hay huunde?

Si on etike, onon yimɓe ɓen, limugol neemaaji Alla ɗuuɗuɗi ɗi O neemini e mon ɗin moftaɗi, on hattantaa ɗum, sabu ko ɗi ɗuuɗi kon ɗi serti. Pellet, Alla ko Haforoowo, tawde O nanngitirtaa on welsindaare e yettugol ɗi ngol, Hinnotooɗo, tawde O taƴiranaalion ɗin neemaji sabu geddi e raɓɓindinagol ka yettugol Mo.

Alla no anndi ko suuɗoton kon e golle mon, onon jeyaaɓe ɓen, e ko feññinton kon e majje. Huunde suuɗaaki Mo e ɗum. O yoɓitoyay on ɗum.

Ɗin ɗi sirkooɓe ɓen rewata gaanin Alla, ɗi tagataa hay huunde, no nde foti e fanɗude. Ɗi ɓe rewata ɗin ɓe acca Alla, ko kamɓe tigi tafata ɗi. Ko honno ɓe rewirta gaanin Alla, sanamji ɗi ɓe tafirta juuɗe maɓɓe?

Ɗum e wonnde ko kamɓe tigi tafi reweteeɗi maɓɓe ɗin, ɗin ko dariiɗi ɗi alaa nguurndam alaa ganndal. Kamɓe ɓe anndaa nde ɓe imminnoytee e rewetee- ɗi maɓɓe ɗin Ñalnde Darngal, ɓe weddidoyee e maɓɓe ka Yiite Jahannama.

Reweteeɗo mon on e goonga, ko Reweteeɗo gooto, Mo alaa kafidiiɗo, On woni Alla. Ɓen ɓen gomɗinaa ummital fii njoɓdi, ɓerɗe maɓɓe ɗen ko yedduɗe gootaaku Alla ngun, tawde ɗe hulaa. Ɗen ɓerɗe gomɗinaa hasboore wonaa lepte. Ɓen ko townitiiɓe ɓe jaɓataa goonga, ɓe qirritantaako mo.

Ko goonga Alla no anndi ko ɓee suuɗata e golle, e ko ɓe feññinta e majje. Huunde suuɗaaki Mo e ɗum, O yoɓitoyay ɓe ɗum. Pellet KankoO yiɗaa townitiiɓe e rewugol yankinanoo Mo ɓen, wurin Himo añi ɓe haɗtirde e añugol.

Si ɓen yedduɓe gootaaku taguɗo On ɓe fenni fii ummital wi'anaama: Ko honɗum Alla jippini e Muhammadu (jom-kisyee)? Ɓe wi'a: O jippinaali huunde e makko, si ko woni, ko ko o addani hoore-makko e tinndi e penaale adinooɓe.

Haa ruttorde maɓɓe nde ɓe roondoto bakkatuuji maɓɓe en ko aldah e stude,ɓe roondo kadi bakkatuuji ɓen ɓeɓe majjini Islaam majjingol. ñeemtinde,alah ko ɓuri bonde koɓe roondoto ko bakkatuuji maɓɓe e bakkatuuji rewɓe e maɓɓe.

Gomɗii heeferɓe adinooɓe ɓee ɗoo ɓen fewjaniino Nulaaɓe maɓɓe ɓen, Alla yirbiniri mahle maɓɓe ɗen ka doose majje, Kippooɗe majje ɗen yanti e hoore maɓɓe, lepte ɗen ardirani ɓe ka ɓe habbo- raa.Hiɓe habbinoo ka mahdi maɓɓe reenata ɓe, kono ɓe halkiraa ɗen tigi.

Refti Ñalnde Darngal, Alla hoyniroyay ɓe lepte, O jaasinira ɓe ɗe, O daalana ɓe: Ko honto ɗin ɗi kafidaynoɗon e am ka dewe, ɗin ɗi haɓiraynoɗon Annabaaɓe e gomɗimɓe fii mun? Joomiraaɓe gannde ɗigguɓe ɓen wi'a: Koyeera e lepte ɗen Ñalnde Darnal, yanay e heeferɓe ɓen.

Ɓen ɓe Malaa'ikaajo waroowo on e wallondirooɓe makko ɓen ƴettitata ruuhuuji maɓɓe, hara ko ɓe jillondirɓe e tooñirgol ko'e maɓɓe yeddugol Alla. Ɓe jebbiloo ko ɓe yankinaniiɓe maayde yanunde e maɓɓe nden, ɓe yedda keeferaaku e geddi ɗi ɓe wonunoo e mun, sikkugol ɗum nafay ɓe. Ɓe wi'a- nee ontuma: On fenay, pellet hari ko on heeferɓe yeddunooɓe. Pellet Alla no anndi ko huuwaynoɗon aduna, huunde suuɗaaki Mo e ɗum, O yoɓitoyay on ɗum.

Ɓe wi'anee: Naatiree dame Jahannama ɗen emmbere kuuɗe mon ɗen, ko on luttooɓe ton poomaa. Nge bonii ñaaƴorde wonande townitiiɓe gomɗingol Alla rewa Mo Kanko tun.

Wi'anee ɓen hulirɓe Joomi maɓɓe ɗoftagol yamirooje Makko ɗen woɗɗitoo e haɗaaɗi Makko ɗin: Ko honɗum Joomi mon jippini e Annabaajo mon on Muhammadu (yo o his)? Ɓe jaaboo: Ko moƴƴere mawnde Alla jippini e makko. Hino woodani ɓen moƴƴimɓe rewugol Alla ngol ɓe moƴƴini huuwondiral maɓɓe ngal e tagu Makko ngun aduna ɗoo mbarjaari labaandi: wano ballal e yaajireede arsike. Ko ko Alla marani ɓe kon e mbarjaari ka laakara ɓuri moƴƴude diini ndin ndi O yaccinani ɓe ka aduna. Saare laakara nden moƴƴanii hulirɓe Joomi mun ɗoftagol yamirooje Makko ɗen woɗɗitoo haɗaaɗi Makko ɗin.

Aljanaaji ñiiɓal e duumal ɗi ɓe naatata, canɗi no ila senngo ley kuɓeeje e leɗɗe majji. Hino woodani ɓe e ɗin Aljannaaji, kala ko wonkiiji maɓɓe tuuyetee e ñaametee e njaram ekw. Ko wano ndii njoɓdi ndi Alla yoɓitiri gmɗuɓe ɓen e mofte Muhammadu (jom-kisiyee) ɗen, O yoɓitirta gomɗuɓe e mofte adinooɓe ɓen.

Ɓen ɓe Malaa'ikaajo waroowo on e wallondirooɓe makko ɓen ƴettitata -hara ko ɓe laaɓuɓe ɓerɗe mun e keeferaaku- Malaa'ikaaɓe ɓen wi'ana ɓe: Salaamun ‘alaykum (kisiyee wonii e mon), on hisii e kala geddi. Naatiree Alajanna on sabu ko golli-raynoɗon kon ka aduna, immorde e fiɓnde sellunde e golle moƴƴe.

Hara ɓee sirkooɓe fenna hino habbitii si wanaa ɓe Malaa'ikaajo waroowo on e wallondirooɓe makko ɓen arata e maɓɓe fii hunnugol ɓe pittaali ɗin, piya geece maɓɓe e ɓabbe maɓɓe, maa yamiroore Alla gasnirgol ɓe lepte ɗen aduna ara? Ko wano ɗee kuuɗe ɓee sirkooɓe Makka ɗoo ɓeya sirkooɓe adinooɓe ɓe huuwunoo haa Alla halki ɓe. Alla tooñiraano ɓe ngol halkugol ɓe; si ko woni, ko ko'e maɓɓe ɓe wonunoo toopirde ukkoragol e ko halkirta ɓe kon yeddugol Alla.

Lepte boneeji kuuɗe maɓɓe ɗe ɓe huuwaynoo ɗen jippii e maɓɓe, lepte ɗen ɗe ɓe jalkitaynoo si ɓe waajoraama ɗe yani e maɓɓe.

Kafiduɓe Alla e goɗɗum goo ka dewe wi'i: Sinno Alla muuyiino nde men rewata Mo Kanko tun, hara men kafidaali Mo dewal ngal e goɗɗum goo, menen woo e baabiraaɓe amen adinooɓe men woo. Sinno kadi O muuyiino nde men harmintaa huunde, men harmintaano nde. Ko sugu oo hujja meerente woni heeferɓe adinooɓe ɓen wi'aynoo. taw si no fawii e Nulaaɓe ɓen si wanaa yottingol ɓanngina ko ɓe yamiraa yottinnde kon? Gomɗii le ɓe yottinii. Hujjaa woo alanaa heeferɓe ɓen ko ɓe ngantinora koddoruyee, ɓaawo nde Alla waɗani ɓe sago e suɓo, O immini Nulaaɓe Makko ɓen e maɓɓe.

Gomɗii Men imminii e kala mofte adinooɓe Nulaaɗo, mo no yamira ɓe nde ɓe rewata Alla tun, ɓe acca rewugol ko woori Mo immorde e sanamji e seytaaneeji ekw. Hari no e maɓɓe on mo Alla hawrindini e gomɗinal o jokki ko Nulaaɗo makko on addi kon, hino e maɓɓe nun kadi on yeddunoo- ɗo Alla e Nulaaɗo Makko on, Alla ronki mo hawrindinnde; majjere nden jojji e makko. Awa yiilee ka leydi, yi'anon ko'e-mon, ko honno battane fennunooɓe ɓen wa'unoo ɓaawo nde lepte e halkaare yanude e maɓɓe.

Si a tiiɗnorii mbawdi maa an Nulaaɗo, e noddugol ɓee, a rerɗirii no ɓe feewira, a memminii kala sabu fii mun; anndu pellet, Alla hawrindirtaa fewnugol on Mo o majjini, alanaa ɓen kadi gaanin Alla, hay gooto walliroowo ɓe duñangol ɓe lepte ɗen.

Ɓee fennuɓe ummital woondirii haɗtirde goondoo- je maɓɓe, hiɓe yedda e ɗum teŋtina wonnde: Alla immintintaa on maayuɗo. E hoore ɓe alaa hujja e ɗum. Ko woni goonga, Alla immintinoyay kala ko maayi, ɗum ko fodoore goonga ka Makko, kono ko ɓuri ɗuuɗude e yimɓe ɓen, ɓe anndaa Alla immin- tinay maayuɓe ɓen, ɓe yeddira ɗum ummital.

Alla immintiniroyay ɓe Ñalnde Darngal, fii yo O ɓannginan ɓe haqiiqa tawhiidi e Ummital e Anna- baaku ko ɓe luutondiraynoo e mun, e fii yo yeddu- ɓe ɓen anndu wonnde hari ko ɓe fenooɓe e ko ɓe nodditornoo kon kafidiiɗi e Alla e ko ɓe yeddi kon Ummital.

Anndee si Men faandike wuurnitude maayɓe ɓen, Men immintina ɓe, alaa ko haɗata Men e ɗum. Ko Men wi'at huunde si Men faandike nden, ko : « Kun (laato) », nde laatora feere alaa.

Ɓen ferunooɓe, ɓe acci galleeji e ɓeynguureeji maɓɓe, e jawle maɓɓe, ɓe iwi e leydi keeferaaku faade e leydi lislaamu, fii ɗaɓɓugol welayee Alla, ɓaawo nde heeferɓe ɓen lepti ɓe, ɓe ɓiɗtinani ɓe; ma Men weernu ɓen ka aduna e galle teddungal. Pellet, ko mbarjaari laakara ndin ɓuri, tawde Aljanna ko e mayri jeyaa. Si tawno ɓee luutondiray ɓe fii ferugol anndayno mbarjaari ferugol ngol, ɓe luutondirtaano fii ɗum.

Ɓee feruɓe fii laawol Alla, ko ɓen woni muññiiɓe lurra yimɓe mun e seedugol e ɓeynguureeji mun e lare mun, ɓe muññii e ɗoftagol Alla, tawi ko e joom maɓɓe tun ɓe fawotoo e kala fiyakuuji maɓɓe. Alla yeɗi ɓe ndii mbarjaari mawndi ɗoo.

Men Nulaani ado maaɗa an Nulaaɗo, si wanaa worɓe ɓanndinkooɓe, Men wahayina e maɓɓe. Men Nulaali Malaa'ikaaɓe. Ɗum ko sunna Amen woowaaɗo. Si tawiinon on yeddii ɗum, haray lanndee yimɓe Defte adinooɗe ɗen, ɓen humpitay on wonnde Nulaaɓe ɓen ko ɓandinnkooɓe wonunoo, ɓe wonaano Malaa'ika fes, si tawii on anndaa ko ɓe ɓanndinkooɓe.

Men nuliri ɓen Nulaaɓe ɓanndinkooɓe, hujjaaji ɓannguɗi, e defte jippinaaɗe. Men jippini e maaɗa an Nulaaɗo, Alqur'aana, fii yo a ɓannginan yimɓe ɓen, ko hatonjini ɓanngineede e mayre, belajo'o kamɓe ɓe golliray miijooji maɓɓe, ɓe waajitora nde.

E hara ɓen hoduɓe pewje bonɗe fii falagol e laawol Alla ngol hooli wonnde Alla munnirtaa ɓe leydi ndin wano O munnirnoo ndi Qaaruuna, maa O addirana ɓe lepte ɗen nokku mo ɓe habbitoraaki ɗe?

Maa lepte ɗen memira ɓe ka yahdu maɓɓe setewu fii faggitagol, ɓe wonaali laawotooɓe maa haɗitotooɓe.

Kaa hara ɓe hooli nde lepte Alla ɗen nanngirtaa ɓe e hoore kulol majje? Alla ko hattanɗo leptugol ɓe e kala alhaali. Annndu Joomi mon ko Yurmeteeɗo Hinnotooɗo Mo hawjataa yaggingol fii no jeyaaɓe Makko ɓen tuubira ɓe ruttoo ka Makko.

E ɓee fennooɓe ndaaraali ɓe taskoo e taguuji Alla ɗin, hiɗi yiilora ɗowɗe majji ñaamo e nano, jokka yiilagol dillannde e yahdu naange ngen ñalorma, jokka lewru ndun jemma. Ɗin no yannkinanoa Joomi majji sujjangol Mo sujuudu tigiri, hara ko ɗi hoynitiiɗi.

Ko Alla tun woni ko sujjanta denndaangal ko woni ka kammuuli e ka leydi, immorde e ruugayngel. Ko Kanko tun Malaa'ikaaɓe ɓen sujjanta, kamɓe ɓe townitantaako rewugol Alla ɗoftoo Mo.

E hoore ko ɓe duumii e rewugol Mo ɗoftoo Mo kon fow, Malaa'ikaaɓe kan hino hulira Joomi maɓɓe wonirɗo senngo dow maɓɓe Jaati Mun e doole Mun. Hiɓe golla ko Joomi maɓɓe yamiri ɓe e ɗoftagol.

Alla daalani denndaangal jeyaaɓe Makko ɓen: Wata on jogito reweteeɓe ɗiɗo. Anndee reweteeɗo e goonga On ko gooto, O alaa ɗiɗaɓo maa kafidii- ɗo. Ko Min woni ko huloton, wanaa goɗɗum goo.

Ko Kanko Alla tun woodani kala ko woni ka kammuuli e ka leydi, tagu e laamu e toppitagol. Ko Kanko tun kadi ɗoftaare e yannkinaneede e laɓɓinaneede tabitani. E ko ko woori Alla huloton? Aa'a! Ko Kanko tun huloton.

Onon ɓee yimɓe, kala ko heɓuɗon e neema diina maa aduna, ko Alla immori, wanaa e goɗɗo goo. Refti si saɗteende nawnaare maa baasal memii on, ko Ka Makko tun woni ko wullirton toraare fii yo O huncan on ɗum. Awa yeɗoowo neema on, O hunca lorra kan, ko On ɗon tun waɗɗii reweede.

Refti si toraare mon nde jaabinaama, O huncanii on lorra kan, e jaka fedde goo e mo'on, ko sirkira- nooɓe Joomi mun kafidugol Mo e goddum goo. Ko honɗum e aawasaaku nii?

Ko ɓe sirkani Alla kon waɗii ɓe yeddii neemaaji Makko ɗin emaɓɓe, wano neema huncaneede lorra on. Ko ɗum si ɓe wi'anaa: Dakmitoree neemaaji mon haa lepte Alla ɗen ara e mon, neeɓa maa yaawa.

Sirkooɓe ɓen hino waɗana sanamuuji maɓɓe ɗi anndaa huunde ɗin -tawde ɗi sottataa, ɗi nafataa ɗi lorrataa- geɓal e jawle maɓɓe ɗe Men arsiki ɓe ɗen, ɓe ɓaɗtora ɗi ɗen. Wallaahi! Onon ɓee sirkooɓe, on lannditoyte Ñalnde Darngal, fii kon ko aaƴotonoɗon e wiide sanamuuji ɗin ko reweteeɗi, e wonnde hiɗi mari geɓal e jawle mon ɗen.

Sirkooɓe ɓen hino dammba ɓiɗɓe rewɓe e Alla, ɓe sikke ɓen ko Malaa'ika, ɓe dammbira jibingol e Makko. Ɓe suɓanoo Mo ko ɓe yiɗanaa ko'e-maɓɓe. Senayee woodani Mo O laaɓii e ɗum! Ɓe waɗana ko'e-maɓɓe ko pittaali maɓɓe ɗin faaletee e ɓiɗɓe worɓe. Ko bone hommbo ɓuri oo ɗoo?

Si gooto e ɓee sirkooɓe humpitiraama jibinaneede deyel, yeeso makko ngon waylitora tiiɗugol añude ko o humpitaa kon, ɓernde makko nden ƴullitora suno. Hooti non, kanko o dammba e Alla ko o yiɗanaa hoore-makko!

Himo suuɗora majjira yimɓe makko ɓen, sabu bone mo o humpitiraa jibinaneede deyel ngel. Wonkii makko no yewta mo: E o jogitoray ngel ɓinngel deyel e hoore koyeera e wirtere kaa o uway ngel o suuɗa ka leydi? Alaa ko ɓuri kaanude e ndee ñaawoore ɓee sirkooɓe, tawde ɓe dammbanii Joomi maɓɓe ko ɓe añi kamɓe tigiri.

Hino woodani ɓen heeferɓe ɓe gomɗinaali laakara, sifa bonɗo, immorde e hatonjingol e ɓiɗɗo, e majjere e keeferaaku. Hino woodani Alla kan, sifaaji yettiniiɗi toowuɗi ɗin, immorde e mawngu, e timmal, e ngalu e anndal. Ko Kanko kadi woni Fooluɗo e laamu Mun Mo gooto foolataa, Ñeeñuɗo e tagu Mun e toppitagol Mun e sari'a Mun.

Si tawno Alla leptiranna yimɓe ɓen sabu tooñe e keeferaaku maɓɓe, O accataano neɗɗo maa kullun no ruuga ka hoore leydi. Ko woni tun, Himo nennitana ɓe haa e dumunna happaaɗo anndaado ka Makko. Si on dumunna hewtii, ɓe nennitantaake mo ɓe adintinantaake yeru yonta daɓɓo.

Hiɓe waɗana Alla seniiɗo On kon ko ɓe añani ko'e-maɓɓe e ɓiɗɓe rewɓe, ɗemɗe maɓɓe ɗen wowla fenaande wiide hiɓe mari ka Alla jipporde moƴ- ƴunde, si tawii tun ko goonga ɓe immintinoyte wano wi'iraa. Pellet, hino woodani ɓe Yiite, pellet, ko ɓe accetee ɓe nder magge, ɓe yaltataa ton poomaa.

Wallaahi! Gomɗi Men imminii Nulaaɓe e mofte adinooɓe ma an Nulaaɗo, seytaane cuɗani ɓe golle maɓɓe bonɗe ɗen, immorde e sirku e keeferaaku e geddi. Ko kanko woni walloowo ɓe aaƴaaɗo on Ñalnde Darngal, yo ɓe faabinor mo. Hino woodani ɓe lepte muusuɗe Ñalnde Darngal.

Men jippiniraali Alqur'aanaare nden e maaɗa an Nulaaɗo, si wanaa fii yo a ɓannginan yimɓe ɓen kon ko luutondiri e mun ka tawhiidi e ka ummital e ka ñaawooje sari'a. Kadi, ko fii yo ndee Alqur'aanaare wonira peewal e yurmeende gomɗimɓe Alla e Nulaaɗo Makko on, ɓe gomɗini ko nde addi kon. Ko kamɓe nafitorta nde tigiri.

Alla jippinirii ka senngo kammu toɓo, O wuurnitiri ngo leydi ndin yaltingol puɗi e mayri ɓaawo ndi laatinoo yoorundi. Wonii e jippinirgol ɗam ndiyam ka kammu, e yaltinirgol ɗam puɗi ɗin ka leydi, hujja ɓannginɗo kattal Alla ngal, wonannde yimɓe nanooɓe daalol Alla ɓe waajitora.

Anndee hino woodani on ko waajitoron onon yimɓe ɓen, ka gelooɗi, e ka na'i, e ka dammi. Tawde Men yarnira on ɓiraaɗam yaltayɗam e geece majji, jllondirɗam e ƴiiƴam ko woni hakkunde deedi majji e ɓanli majji... e hoore ɗum fow, ɓiraaɗam ɗam yaltay laaɓuɗam welɗam welayɗam yarooɓe.

Hino woodani kadi waaju e kon ko Men arsikata on immorde e dimɗe tamarooje e inabuuje ɗe moƴƴinirton siwran ko naɓata haqqil, ɗum wanaa ko moƴƴi. Hiɗon jogitora kadi ɗen dimɗe arsike moƴƴo mo nafitorton, wano tamaro yoorɗe, e zabiibu yoorɗe, e wiineeger e ɓalejam. Wonii e ko jantaa koo, hujja ɓannginɗo kattal Alla ngal e neema Makko on dow jeyaaɓe Makko ɓen, wonannde yimɓe haqqilooɓe, ko ɓen waajitorta.

Joomi maa an Nulaaɗo, lonngini ngii, O tinndini ngii wonnde: Jaggan hoore-maa cuuɗi ka pelle, e ka leɗɗe, e kon ko yimɓe ɓen mahata ɓe sañña.

Refti ñaamaa e kala ko yiɗuɗaa e dimɗe, naatiraa e ɗate e Joomi maa hollu-maa, newinaaɗe. Hino yalta e deedi ɗin ñaaki, njuumri sertundi noone (dane, boɗe, ekn), cellal no wonani yimɓe ɓen e ɗum, hiɓe ñawndira ndi nawnaaje. Wonii e ko lonngingol ngii ñaakii, e ndin njuuri yaltayndi e deedi majji, hujja ɓannginɗo kattal Alla ngal e toppitagol Mo fiyakuuji tagu Makko ngun, wonannde yimɓe miijitotooɓe, ko ɓen waajitorta.

Alla tagirii on, ko aldah e yeru gadiido, refti O hunnay on tuma laje mon timmi. Hino e mooɗon on juutoowo duuɓi haa ka o ruttotoo e jaasuɗum nguurndam, woni nayeegu, hara huunde o anndit- taa. Pellet, Alla ko Annduɗo, huunde suuɗaaki Mo e golle jeyaaɓe Makko ɓen. Ko O Hattanɗo, Mo huunde ronkitaa.

Alla seniiɗo On ɓurnii yoga mon e dow yoga e kon ko O arsiki on. O waɗi mon alɗuɓe e waasuɓe, koohoojo e maccuɗo. Ɓen ɓe Alla ɓurdini ka arsike wonaali ruttirooɓe arsike maɓɓe on e maccuɓe maɓɓe ɓen haa ɓen hawtida e maɓɓe fotugol e mayri. Ko honno ɓe jaɓirta kafidugol Alla e jeyaaɓe Makko ɓen ka tawata ɓe jaɓataa kafidude e maɓɓe geɓal fotayngal e maɓɓe? Ko honɗum e tooñe non? Ko honɗum e yeddugol neema Alla on ɓuri ɗum mawnude?

Alla waɗanii on onon yimɓe ɓen, e nanndolla mon resondirɓe ɓe woowondiron. O waɗani on ɓen resondiraaɓe mon ɓiɗɓe e taaniraaɓe. O arsiki on kadi ñaameteeji, wano teewu, gabbee e teɓateeriiji laaɓuɗi. E hara ko meere sanamu nden ɓe gomɗinta? E ko neemaaji Alla ɗuuɗuɗi ɗi ɓe hattanaa moftude ɗin ɓe yeddata ɓe ronka yettirde Alla gomɗingol Mo Kanko tun?

Ɓee sirkooɓe no rewa gaanin Alla, sanamuuji ɗi jogitaaki addangol ɓe arsike woo ka kammuuli wanaa kadi ka leydi. Ɗi alaa feere ɗum, tawde ko ɗi tafaaɗi darnaa ɗi alaa nguurndam wanaa fere ganndal.

Onon ɓee yimɓe, wata on waɗan Alla yerondiraaɗi e ɗii sanamuuji ɗi nafataa ɗi lorrataa. Alla alaa nanndolla sakko kafidon Mo e mun ka dewal. Pellet, Alla ko annduɗo sifaaji Makko mawngu e timmal ɗin, onon non on anndaa ɗum, ko ɗum naɓata on e sirkangol Mo, waɗanon Mo yeruuji e sanamuuji mon ɗin.

Alla piyirii misal ruttugol sirkooɓe ɓen: Maccuɗo jeyaaɗo, mo gayntaa haaju, mo alaa ko wintoo, e dimo mo Men okki immorde ka Amen jawdi halal, hara on waɗa ndi ko o yiɗi, himo wintora ndi gunndoo e kene no o yiɗiri. Ɓen worɓe ɗiɗo fotataa. Ko honnon non fonnanton hakkunde Alla Joomiraaɗo On waɗoowo ko yiɗi e Laamu Mun, e ɗin sanamuuji mon ɗi ɓokkaa? Yeettore woodanii Alla hannduɗo e yettoore! Si ko woni, ko ɓuri ɗuuɗude e sirkooɓe ɓen ɓe anndaa ko Alla hertori Allaagu ngun e reweede nen.

Alla piyii misal goo kadi fii ruttugol ɓe, worɓe ɗiɗo: Goɗɗo e maɓɓe ko mboboojo, o nanataa, o wowlataa, o faamataa; ronkanɗo hoore-mun ronki nafude woɗɓe goo, kanko ko o donngal e hoore fawtiiɗo mo on; nokku kala ka on imminiri mo, o addataa moƴƴere, o waɗataa ko o habboraa. Hara on ɗon fotay e on hisuɗo nanɗe e kara, ɗuuɗa nafa, yamiroowo yimɓe ɓen nunɗal, ñiiɓuɗo e wonkii mun, wonɗo e laawol feeñungol ngol jilɓaa ngol ooñaakii? Ko honno fonnirton, onon ɓee sirkooɓe, hakkunde Alla sifroɗo sifaaji mawngu e timmal, e ɗin sanamuuji mon ɗi nanataa ɗi wowlataa, ɗi pooɗataa nafa ɗi huncataa lorra?

Ko Alla tun heeranii anndugol ko wirnii ka kamuuli e ka leydi, wanaa gooto e tagu Makko ngun. Fiyaaku Darngal ngal -jeyaaɗum e wirɗiini ɗi O heerori- wonaali ka yaawugol arde mun si O faalaama ɗum, si wanaa yeru maƴaango yiitere, wurin ko ɗum ɓuri ɓaɗtaade. Pellet, Alla ko hattan- ɗo kala huunde, huunde ronkintaa Mo. Si O faandi- ke huunde, O wi'anay nde tun "Kun (laato)" nde laatoo.

Alla yaltinii on, onon ɓee yimɓe ɓen, e deedi neeniraaɓe mon ɓen, ɓaawo nde yawtuɗon dumunna soweede, ko on entoy ko anndaa hay huunde, O waɗani on nanɗe ɗe naniron, e giiɗe ɗe yi'iron, e ɓerɗe ɗe haqqiliron, jortagol nde yettoton Mo e ko O neeminiri on kon.

E ɓee sirkooɓe ndaaraali colli ɗin no eltiraa wiiru-gol non ka weeyo sabu ko Alla yeɗiri kon gabbitti e henndu newiindu? O anndini ɗi fontugol accita gabitti(bibje) ɗin? Jogitaaki ɗi haɗiɗi yanugol e ndun henndu si wanaa Alla hattanɗo On. Wonii e ngol eltugol jogitoo ɗin colli wata ɗi yanu, hujjaaji wonannde yimɓe gomɗinooɓe Alla ɓen, tawde ko kamɓe nafitorta hujjaaji ɗin ɓe waajitora.

Alla seniiɗo On waɗanii on e cuuɗi mon ɗi mahirton kaaƴe ekn ñiiɓirde e fowtorde mon. O waɗani on kadi e guri gelooɗi ɗin e na'i ɗin e dammi ɗin tillisaaji cuuroy ka ladde, wano cuuɗi saare, hoyɗi ronndagol ka setagol mon yaha nokku goo, welɗi femmpude ka jipporɗe mon. O waɗani on kadi e leeɓi baali ɗin, e leeɓi gelooɗi ɗin, e leeɓi dammi ɗin ndaɗɗudi cuuɗi mon, e conci e cuddaa- je ɗe dakmitorton haa dumunna happpaaɗo.

Alla waɗanii on e leɗɗe ɗen e mahoodiiji ɗin ko ɗowdinoɗon e nguleendi, O waɗani on e pelle ɗen dente wimmbooje e pammeeje ka suuɗoɗon ɓuuɓol e nguleendi e ayɓe. O waɗani on dolokkeeji e conci hottollo ekn fii ko daɗnditoron e nguleendi maa ɓuuɓol. O waɗani on conci daɗnditorɗi yoga mon ka hare, hara jogaaji ɗin hewtataa ɓanli mon ɗin. Ko wano Alla neeminirnoo on non ko yawti, O timminirta neemaaji Makki ɗin e dow mon, jortagol nde jebbilantoɗon Mo Kanko tun, hara on kafidaali Mo e goɗɗum goo.

Si ɓe ɗuurnike e gomɗingol goongina ko addu-ɗaa kon, haray fawaaki ma an Nulaaɗo, si wanaa yottingol ko nulaɗaa yottinnde kon no ɓanngiri. Fawaaki ma duñugol ɓe e peewal.

Sirkooɓe ɓen hino anndi neemaaji Alla ɗin e dow maɓɓe, wano nuleede Annabiijo on mo jam e kisiyee woni e mun e maɓɓe; refti ɓe yeddira neemaaji Makko ɗin ronkude yettugol ɗi e fennugol Nulaaɓe Makko ɓen. Ko ɓuri ɗuuɗude e maɓɓeko yedduɓe (dullani) neemaaji Alla ɗin.

Janto kadi an Nulaaɗo, ñalnde Alla immintinoyta e kala mofte Nulaaɗo maɓɓe on ko seeditoo e gomɗinal gomɗinooɗo maɓɓe on e keeferaaku yeddunooɗo maɓɓe on. Refti heeferɓe ɓen sakki- tantaake ngantinagol e ko ɓe wonunoo e keefeeru kon, wanaa kamaɓe woni ruttiteteeɓe aduna fii gollugol ko welata Joomi maɓɓe, tawde laakara ko galle hasboore, wanaa galle golle.

Si tawii tooñuirɓe sirku ɓen yi'ii lepte ɗen, ɓe hoynantaake ɗen, wonaa ɓe nennitanteeɓe ɗe. Ko ɓe naatirooɓe ton luttugol haa poomaa.

Si sirkooɓe ɓen yi'oyii ka laakara reweteeɗi maɓɓe ɗin ɗi ɓe rewaynoo gaain Alla, ɓe wi'a: Joomi amen, ko ɗii woni kafidaaɗi amen ɗi men rewayno gaanin Maa. Ɓe wi'ra ɗum fawugol e majji dolle boneeji maɓɓe ɗin. Kono Alla wowlina ɗin rewetee- ɗi maɓɓe, ɗi ruttira ɓe wiide: Onon ɓee sirkooɓe, ko on fenuɓe e rewugol Mo kafida e Alla ngol. Pellet, O alaa kafidiiɗo mo no rewee.

Sirkooɓe ɓen jebbillo, ɓe yankinanoo Alla tun, kon ko ɓe fefindotonoo e nodditagol wonnde sanamuuji maɓɓe ɗin tefanoyay ɓe ka Alla mutira ɓe.

Ɓen yedduɓe Alla, ɓe faddii woɗɓe goo e laawol Alla ngol, Men ɓeydiranii ɓe lepte ɗe ɓe hanndi ɗen, e hoore lepte goo, sabu ko bonni kon ɓe majjini woɗɓe goo.

Janto kadi an Nulaaɗo, ñalnde Men immintinoyta e kala mofte, Nulaaɗo seeditoytooɗo e hoore maɓɓe e ko ɓe wonunoo e keeferaaku maa gomɗinal, Nulaaɗo jeyaaɗo e maɓɓe, wowloowo haala maɓɓe. Men adda maa an Nulaaɗo, ko seeditoo e mofte ɗen fow. Men jippinii e maaɗa Alqur'aana, fii yo nde ɓanngin kala ko hatonjini e ɓanngineede, immorde e halal e haram, mbarjaari e lepte, ekn. Men jippiniri nde ko fewna yimɓe ɓen e goonga, e yurmeende kala gomɗinoowo nden o gollira nde, e welo-welo gomɗimɓe Alla ɓen e kon ko ɓe habbitii e neema ñiiɓoowo.

Tabitii Alla yamirii jeyaaɓe Makko ɓen nunɗal, nde tottata haqqeeji Alla ɗin e haqqeeji jeyaaɓe ɓen, hara kadi goɗɗo ɓurnaaka e hoore goɗɗo goo ka ñaawoore si wanaa hara ko no jojjiri. Himo yamira moƴƴingol, nde jeyaaɗo on waɗirta ko fawaaki mo kon -wano wintagol- yarlitaare e yaafanagol too- ñuɗo. Himo yamira kadi moƴƴoragol e joomiraɓe ɓadondiral ɓen ko ɓe hatonjinta e mun ko. E senngo goo, Himo haɗa kala ko kaani, wano konngol pankare maa kuuɗe jeeno. Himo haɗa kadi gaay e tooñe, e townitagol e yimɓe ɓen. Himo waajora on ko O yamiri on kon e ko O haɗi on e mun kon e ɗee Aayeeje, belajo'o, on taskoto waajitoron.

Hunnee kala ahadi ndi ahoduɗon e Alla maa ndi ahoduɗon e yimɓe ɓen, wata on firtu goondooje mon ɗen ɓaawo ɗe tentinireede woondirgol Alla, gomɗii on waɗii Alla seeditaniiɗo on e hunngol ko woonduɗon kon. Pellet, Alla ko annduɗo ko gollo- ton: huunde e mun suuɗaaki Mo, O yoɓitoyay on ɗum.

Wata on wonir e firtugol ahadiiji ɗin, njofooɓe faaɗuɓe haqqille, wano on debbo komoojo, tampunooɗo e harlugol hottollo makko kon: nde o gaynunoo harlude kon, o firti ko fow kadi o artiri no wa'unoo. O tampini hoore meere. Awa onon kadi, hiɗon jogitora goondooje mon ɗen janfondiro hak- kunde mon, fii yo mofte mon ɗen ɓuri mofte ayɓe mon ɓen doole e ɗuuɗere. Anndee Alla no jarribo- ra on huuɓnugol ahadiiji ɗin, anndugol si on laati-nay kaa on firtay ɗi? Ma Alla ɓannginanoy on Ñalnde Darngal, kon ko luutondiraynoɗon e mun aduna, O sennda hakkunde goonguɗo e meerente, goongiyanke e fenoowo.

Sinno Alla muuyuno, O waɗayno on mofte goote, nanondirayɗe e goonga. Ko woni tun, Himomajji- nira nunɗal Makko ngal huccinirgol on Mo O muuyi e gooonga e hunnugol ahadi, O fewnira ɓural mak- ko ngal on Mo O muuyi. Ma on lannditoye Ñalnde Darngal, e kon ko luutondiraynoɗon e mun aduna.

Wata on jogitor goondooje mon ɗen janfondiro hakkunde mon, jokkiron ɗum mbeleeɗe mon, firtiron ɗe no faaliraɗon, hunnon ko faalaɗon e majje. Anndee si on waɗii ɗum, koyɗe mon ɗen mortoto e laawol focciingol ngol ɓaawo nde ɗe tabitunoo e maggol, kadi, on meeɗiray lepte ɗen sabu majjugol mon e laawol Alla ngol majjinorɗon woɗɓe goo. Hino woodani on lepte cowanlle.

Wata on waɗtitir ahadi Alla ndin jawkal fanɗungel e firtugol ndi ronka hunnude ndi. Anndee ko ko woni ka Alla kon immorde e ballal, e teetateeri aduna, e ko woni ka Makko laakara kon immorde e neemaa- ji duumotooɗi, ko ɗum ɓuri moƴƴande on e dii ko waɗtirton e coggu fanɗungu fii firtugol ahadi, si tawno hiɗon anndi ɗum!

Ko marɗon kon onon ɓee yimɓe, immorde e jawle e wellitaare, e neemaaji fow ko ko lannata, ko ɗi ɗuuɗi woo non. Ko woni Alla kon kan e mbarjaari, ko ko heddoto. Ko honno ɓurnirton ko lannata e hoore ko heddotoo? Ma Men warjor ɓen muññiiɓe e hunnugol ahadiiji maɓɓe ɗin ɓe salii firtugol ɗi mbarjaari maɓɓe ndin, ko ɓuri moƴƴude e ko ɓe gollaaynoo e dewe. Men yoɓitira ɓe moƴƴere kala sappo yeru mayre, haa teemeɗɗe jeeɗiɗi, haa ɓura ɗumn cowe ɗuuɗi.

Kala golluɗo gollal moƴƴal, harondiral e sar'ia, woni gorko maa debbo, hara ko o gomɗinɗo Alla, Ma Men wuurno mo aduna, nguurndam laaɓuɗam, wonndude e weltorgol ñaawoore Alla nden, e yonndinaare, e hawrindineede e peewal. Ma Men yoɓitiroy ɓe kadi njoɓdi maɓɓe ndin laakara, ko ɓuri moƴƴude e kon ko ɓe gollaynoo aduna e golle moƴƴe.

An oo gomɗinɗo, si a faandike janngugol Alqur'aana, toro Alla nde moolat maa e sowonsi seytaane raɗaaɗo e yurmeende Alla nden.

Kanko seytaane, mbawdi alanaa mo e ɓen gomɗimɓe Alla, ɓe fawi denndaangal fiyaakuuji maɓɓe ɗin e hoore Joomi maɓɓe tun.

Anndee mbawdi makko ndin ko sowonsingol ɓen welduɓe e makko ɓe ɗoftii mo e bewre, e ɓen sirkiranooɓe Alla sabu ko o e bewre makko nden.

Si Men lontinirii ñaawoore Aaye Alqur'aana lonto Aaya goo - Ko Alla ɓuri anndude ko O lontinta kon ka Alqur'aana ñenƴal Makko, annduɗo ko O lontintaa e mayre kon - Ɓe wi'a ontuma: An Muhammadu, ko a fenoowo baka e Alla. Si ko woni, ko ɓuri ɗuuɗude e maɓɓe anndaa wonnde lontingol ngol, ko ñaawooree Alla yottoriinde ñenƴal Makko.

Maakan ɓe an Nulaaɗo: Ko jippini O Alquraana ko jibriilu (yo o his), immorde ka Alla seniiɗo On, e hoore goonga mo faljere alaa e mu'un nde waylaa- ka nde waɗtitaaka. Ɗum, ko fii no o tabintinira giomɗimɓe Alla ɓen e gomɗinal maɓɓe ngal tuma kala nde kesum jippii e mayre, goɗɗum kadi lontinaa, kadi, ko fii no nde wonira feewirde maɓɓe e goonga, e welo-welo wonannde juulɓe ɓen, sabu ko nde heɓorta kon mbarjaari teddundi.

Menen Meɗen anndi wonnde sirkooɓe ɓen hino wi'a wonnde: Muhammadu jom-kisyee on, ko neɗɗanke woni mo anndinnde Alqur'aana. Awa ɓe fenu ɗum, tawde ɗemngal ngal ɓe aaƴotoo ngal ko ajami, ndee Alqur'aanaare non, ko e ɗemngal Aarabu ɓanngungal jogingal fasinteegal toowngal nde jippori . Ko honno ɓe aaƴorta wonnde ko e ajamiyankeejo o anndiri nde?

Pellet, ɓen ɓe gomɗinaa wonnde Aayeeje Alla ɗen ko iwruɗe ka Makko, O hawrindintaa ɓen e peewal fotde hiɓe haɓɓitii e ɗum. Hino woodani ɓe lepte muusuɗe sabu ko yeddiri Alla kon ɓe fenni Aayeeje Makko ɗen.

Muhammadu (yo o his) wonaa fefindiiɗo fenaande e kon ko o addi immorde ka Joomi makko. Ko fefindotoo fenaande, ɓen ɓe goonginiraa Aayee Alla ɗen fii ɓe hulaa lepte ɓe jortaaki mbarjaari. Ɓen siforiiɓe keeferaaku, ko kamɓe woni fenooɓe ɓen, tawde ko ɗum woni ko ɓe woowi.

Kala yedduɗo Alla ɓaawo gomɗinal makko - si wanaa on waawnaaɗo e yeddugol, o wowlira konngol keeferaaku ngol hara ɓernde makko nden no deeƴiri gomɗinal hooliro ngal Iimaan. Konnon, kala on mo ɓernde mun hentanii keeferaaku ngun, on suɓii ngu e hoore gomɗinal ngal, o wowliri ɗum ɗoftaare, haray ko o murtuɗo e lislaamu. Hino defii ɓen ɗon, tikkere immorde ka Alla, hino woodani ɓe kadi lepte mawɗe.

Ngol murtugol maɓɓe e lislaamu, ko ko ɓe suɓori ko ɓe heɓata ngeenaari aduna kon fii ɓe yeddii e dow laakara. E wonnde Alla kan, O fewnirtaa yedduɓe ɓen e gomɗinal, wurin O hoynay fii maɓɓe.

Ɓen siforiiɓe ɗin sifaaji murtugol ɓaawo nde gomɗinde, ko ɓen Alla noti e ɓerɗe mun ɓe faama- taa waaju, O noti kadi e nanɗe maɓɓe ɗen ɓe nanataa ko ɓe, O noti kadi e gite maɓɓe ɗen ɓe yi'ataa maandeeji tinndinayɗi e gomɗinal ɗin. Ko ɓen woni welsindiiɓe e sabuuji maloore emalki- seede ɗin, e kon ko Alla hebilani ɓe e lepte.

Pellet, ɓe ɗon Ñalnde Darngal, ko kamɓe woni sooyuɓe sooynirimɓe ko'e-mun yeddugol ɓaawo nde gomɗinde gomɗinal naadaynooɓe ngal Aljanna si ɓe tabituno e maggal.

Refti pellet Joomi maa an Nulaaɗo, ko Haforoowo Hinnotooɗo ɓen gomɗimɓe lo'inanooɓe, ferunooɓe Makka ɓe faade Madiina ɓaawo nde sirkooɓe ɓen tampinnooɓe ɓe jarribori ɓe e diina maɓɓe kan haa ɓe wowliri konngol keeferaaku ngol e hoore ɓerɗe maɓɓe ɗen no deeƴiri gomɗinal ngal, refti ɓe tiiɗnor e laawol Alla ngol, no konngol Makko ngol ɓamtora, konngol heeferɓe ɓen yana, ɓe muññii e tampere mun. Pellet, Joomi maa ɓaawo nde tam- pere nde ɓe tampinaa, e lepte ɗe ɓe leptiraa haa ɓe wowli konngol keeferaaku ngol, ko O Haforanoowo ɓe, Hinnotooɗo ɓe, tawde ɓe ko wowliraali ngol si wanaa fii ɓe doola.

Janto an Nulaaɗo, ñalnde kala neɗɗo arata himo wennja fii hoore-makko e woɗɓe goo, hakkee ko fiyaaku on mawni, wonkii kala yoɓee njoɓdi ko ki golli kon e moƴƴere e bone. Kamɓe ɓe tooñirtaake ɗuytaneede moƴƴi maɓɓe, wanaa kadi ɓeydanee- de bonɗi maɓɓe.

Alla piyii misal hoɗo Makka ngon: Nde wonno hoolinoonde nde hulaa yimɓe mun, deeƴirnde e yimɓe seraaji mayre ɓen, arsike mayre on no ardirana nde nokku kala e neweende. Kono yimɓe mayre nden njeddi neemaaji Alla ɗin e dow maɓɓe ɓe ronki yettude Mo, Alla yoɓitiri ɓe heege e kulol tiiɗungol, feeñringol e ɓalli maɓɓe ɗin ɗenƴere e maƴaango, haa ɗum wontira ɓe wa conci maɓɓe, sabu ko ɓe laatinoo hiɓe huuwa golle keeferaaku e fennugol.

Gomɗii arii e yimɓe Makka ɓen, Nulaaɗo jeyaaɗo e maɓɓe, mo ɓe anndiri hoolaare e goongugol, on woni Muhammadu (yo o his), kono ɓe fenni mo e ko jippiniraa kon e makko immorde ka Joomi makko. Lepte Alla ɗen jipporii e maɓɓe heege e kulol, tawde ko ɓe tooñirɓe ko'e-maɓɓe yollagol e halkaare, tuma ɓe sirkannoo Alla, ɓe fenni Nulaaɗo Makko on.

Ñaamee onon jeyaaɓe ɓen, e kon ko Alla arsiki on, kala ko dagii e ñaamugol, yettiron neemaaji Alla ɗin ɗi O neemini e mon, qirritanagol ɗi Alla, yiiliron ɗi e ko welata Mo, si wonii ko Kanko tun rewoton on kafidata Mo e goɗɗum goo.

Alla harminanii on ñaamuugol kala : ko kullun maayukun jiibi, e ƴiiƴam rufaaɗam, e kose-wii ngii fow maggii, e kala ko hirsiraa ɓaɗtorgol ko woori Alla. Ko harminaa kon, ko si tawii feere goɗɗum goo no woodi, si tawii lor ñaamugol ɗi yanii e goɗɗo, o ñaamiri ko aldaa e faale ñaaugol tun ko harmi, maa yawtugol keeri laruura ɗin; haray bakkaatu fawaaki mo, tawde pellet, Alla ko Haforoowo, Himo haforana mo e kon ko o ñaami ɗon, Hinnotooɗo mo kadi, tawde O daginanii mo ñaamugol ɗum tuma o heɓi laruura.

Wata on wi'u, onon ɓee sirkooɓe, ko ɗemɗe mon sifotoo e fenugol hoore Alla : Ɗum ɗoo no dagii, ɗum ɗoo no hari, fii no fefindoron fenaande e hoore Alla, harmingol ko O harminaa, maa dagin- tingol ko O daginaa. Pellet, ɓen fefindotooɓe fenaande e hoore Alla, ɓe malirtaa ko ɗaɓɓetee, ɓe daɗetee ko huletee.

Ko dakamme seeɗaajo woodani ɓe e jokkugol mbeleeɗe maɓɓe ɗen aduna, hino woodani ɓe non Ñalnde Darngal, lepte muusuɗe.

E hoore Alyahuudaaɓe ɓen kan, Men harminno ko Men fillani maa kon (wano ka Aaya 156 nder cortewol An-'Aami ngol). Men tooñiraano ɓe harmingol ɗin, si ko woni, ko kamɓe wonunoo e tooñirde ko'e-maɓɓe faggitagol ko leptata ɓe; Men yoɓitiri ɓe bewre maɓɓe nden, Men harminiri ɗi e maɓɓe yagginirgol ɓe.

Refti pellet, Joomi maa an Nulaaɗo, wonannde ɓen huuwirɓe boneeji ɗin majjere battane majji, hay si tawii non ɓe tewi, kono ɓe tuubani Alla ɓaawo ɗen kuuɗe maɓɓe bonɗe, ɓe moƴƴini golle maɓɓe ɗe ɓe bonnunoo ɗen, pellet, Joomi maa, ɓaawo ngol tuubugol maɓɓe ɗon, ko Haforanoowo ɓe junuubi, Hinnotooɗo ɓe.

Pellet, Annabi Ibraahiima laatino moftuɗo jikkuuji moƴƴi, duuminooɗo e ɗoftaare Alla, ooñinooɗo e kala diina si wanaa diina lislaamu kan. O meeɗaali jeyeede e sirkooɓe ɓen.

O laatino yettaynooɗo neemaaji Alla ɗin e dow makko. Alla suɓorike mo Annabaaku ngun, O fewniri mo e diina lislaamu fotondirka kan.

Men okki mo ka aduna Annabaaku, e mantoore moƴƴere, e ɓiɗɗo moƴƴo. Kanko on ka laakara, ko o jeyaaɗo e moƴƴuɓe ɓe Alla marani ɓen darjaaji toowuɗi ka Aljanna.

Refti Men wahayini e maaɗa an Nulaaɗo, wonnde: Jokku diina Ibraahiima kan ka tawhiidi, e ka daɗndinagol e sirkooɓe ɓen, e ka noddangol diina Alla kan gollira sar'ai Makko on; kan diina ooñiika e kala diinaaji ɗin si wanaa diina lislaamu kan. O meeɗaali jeyeede e sirkooɓe ɓen, ko bajjinnooɗo Alla o wonunoo.

Anndee mawningol fii aseweere nden ko e Alyahuuda'en ɓen luutondirɓe e mayre waɗiranaa farilla, fii no ɓe hettorana dewal ngal nden ñalnde, ɓaawo nde ɓe majji fii jumaare nden nde ɓe yamiranoo hettanagol. Pellet, Joomi maa an Nulaaɗo, ko ñaawoyoowo hakkunde maɓɓe Ñalnde Darngal, e kon ko ɓe luutondiraynoo e mun, O yoɓita kala e ko hanndi kon.

An Nulaaɗo, noddir e diina Joomi lislaamu kan an e ɓen gomɗimɓe jokku ɓe ma, no noddirteeɗo on faamira o jebbiloo, e laaɓal-reedu jilliɗum rerɗingol e hulɓingol. Wennjiraa ɓe no ɓuri e moƴƴirde, konngol e miijo e haala-laaɓuka. Fawaaki ma fewnugol yimɓe ɓen, ko fawi maa ko yottingol e e maɓɓe. Pellet, Joomi maa, ko Kanko ɓuri anndude on majjuɗo e diina lislaamu, ko Kanko kadi ɓuri anndude feewuɓe e lislaamu ɓen. Wata a naɓir wonkii maa e maɓɓe ninse fii ɓe gomɗinaali.

Si on faandike leptugol gaño mon, haray leptiree mo yeru ko o waɗi on kon ko aldaa e ɓeydugol ɗon. Ko si on muññike non ka waawunoɗon yottaade ɗon, pellet haray ko ɗum ɓuri moƴƴannde muññiiɓe e mon ɓen.

Muñño an Nulaaɗo! E kala ko heɓata maa e lorra maɓɓe. Hawrineede ma e muñal wonaali, si wanaa ko wune ummaade e Alla. Wata a suno e ko hee- ferɓe ɓe ɗuurnoto maa. Wata a ɓiɗtor kadi ko ɓe fewjata fii maaɗa.

Pellet, Alla no wonndi e ɓen hulirɓe Mo accugol geddi, e ɓen moƴƴinirooɓe dewe ɗen e ɗoftagol ko ɓe yamiraa. Himo wonndiri e maɓɓe ballal e semmbineede.

Allaahu On Senike O Mawnii ; sabu kattal Makko ngal gooto hattanaa, ko Kanko woni Royruɗo jeyaaɗo Makko on Muhammadu (Yo Alla juulu e makko O hisna mo), O Royri mo fittaandu e ɓanndu, tawi ko o finuɗo e nder jemma. O Itti mo ka juulirde hormorde O Naɓi mo to juulirde Bayt al Maqdisi, nden nde Men Barkiniri banŋe mun dimɗe=besnaade, e demal e galleeji Annabaaɓe (yo ɓe his) ; fii yo o yi’u yoga e Aayeeje Amen tinndinɗe e kattal baawal=e Alla Seniiɗo On. Pellet, ko Kanko Alla woni Nanoowo, ko suuɗotaako Mo nanatee, Yi’oowo, suuɗotaako Mo ko yi*atee.

Men Okkii Muusaa (yo o his) Tawreeta, Men Waɗi nde fewnoore ɗowa ɓiɗɓe Israa’iila ɓen. Men Wi’ani ɓe : "Wata on jogito gaanin Am hooloraaɗo mo fawoton e mun fiyakuuji mon. Ko woni, hooloree Lam Min tun =kooloree kam miin tan".

Ko onon yo geyngol ɓen ɓe Men neeminirnoo daɗugol yoolaade ka waame wonndude e Nuuhu (yo o his). Annditee on neema, yetton Alla Toowuɗo On, rewon Mo Kanko tun, ɗoftoɗon Mo, ñentinon Nuuhu e ɗum. Pellet, kanko himo ɗuuɗunoo yettugol Alla Toowuɗo On.

Men Humpitiino ɓiɗɓe Israa’iila ɓen Men anndini ɓe ka Tawreeta wonnde : "Feere alaa ɓe waɗiray boneeji ka leydi huuwugol geddi e faaro laabi ɗiɗi. Ɓe townitoray kadi e yimɓe ɓen tooñe e bewre, ɓe yawta keeri ɗin e hoore yimɓe ɓen".

Si ɓe waɗii bonnere aranere nden, Men wurtay e maɓɓe jeyaaɓe Amen joomiraaɓe doole tiiɗuɗe nanngal, ɓe wara ɓe, ɓe riiwaɓe, ɓe yiiloo hakkunde galleeji maɓɓe ɗin ɓe bonna kala ko ɓe rewi e mun. Ɗum ko fodoore Alla non, feere alaa ko waɗaynde.

Refti Men ruttitanani on -onon ɓiɗɓi Israa’iil ɓen- laamu ngun e polgal ngal e hoore ɓen wurtanooɓe e dow mo'on, tuma tuuban ɗon Alla. Men Ɓeydi on jawle mon jattanooɗe, e ɓiɗɓe dahanooɓe, Men Waɗti on ɓurɓe ayɓe mon.

Si on moƴƴinii golle mon ɗen -onon ɓiɗɓe Israa’iila ɓen- no haaniri, njoɓdi ɗum ruttanto on, Alla ko yonndiniiɗo gaay e golle mon. Si on bonnii kuuɗe mon ɗen, battane ɗum yantay e mo’on, moƴƴugol kuuɗe mon nafataa Alla, bonugol majje kadi lorrataa Mo. Si bonnere ɗiɗaɓere nden waɗii, Men wurtay e mo’on ayɓe mon ɓen fii yo ɓe hoynu on haa ɗum feeñira ka geece mon koyeera, e fii yo ɓe naatu kadi ka Bayt al Maqdisi ɓe yirbina nde wano ɓe naatirnoo e mayre ka laawol aranol ɓe yirbini nde, e fii yo ɓe yirbin jirbingol timmungol dowlaaji ɓe ɓe fooli din.

Hinoo jortaa nde Joomi mon yurmina on -onon yo ɓiɗɓe Israa’iila- ɓaawo ɗee lepte saɗtuɗe si on tuubanii Mo, on moƴƴinii golle mon ɗen. Si on ruttike non e bonnere nden laawol tataɓol maa ko ɓuri,Men ruttoto e leptugol on. Men waɗini mon Jahannama ndaɗɗudi ɓen yedduɓe Alla,ɓe seedataa e magge.

Pellet, ndee Alqur’aanaare Tellinaande e Muhammadu (yo Alla juulu e makko O hisina mo), hinde tinndina e ɓurnngol moƴƴude e laawi ɗin, ngol woni laawol Lislaamu ngol, hinde habra kadi ɓen gomɗimɓe Alla gollooɓe golle moƴƴe ko wewlinta ɓe, wonnde no woodani ɓe baraaji mawɗi ka Alla.

Hinde habra ɓen ɓe gomɗinaa Ñalaande Darngal huunde saɗtaynde e maɓɓe, wonnde, Menen Men Hebilanii ɓe Ñalnde Darngal lepte muusuɗe.

Neɗɗo on sabu majjere makko nden, hino o toranoo hoore-mun bone e ɓiɗɗo makko maa jawdi makko tuma o tikki, wano o tororanta non hoore-makko moƴƴere. Sinno Men jaabino toraare makko bone nden o halkotono, jawdi makko ndin e ɓiɗɗo makko on kadi halkoo. Neɗɗanke on laatike ko o tagidaaɗo e heñaare ; ɗum waɗi si mo hawjira ko lorrata mo.

Men tagirii jemma on e ñalorma on Maandeeji ɗiɗi tinndinayɗi e ngootimbaaku Alla e Kattanɗe Makko tawde hiɗi seedi ka juutugol, e ka raɓɓiɗugol, maa ka wulugol e ka ɓuuɓugol. Men waɗi jemma on niɓɓuɗo fii fowtere e ɗoyngol, Men waɗi ñalorma on jalbuɗo mo yimɓe ɓen ndayginorta ɗaɓugol nguuree maɓɓe, jorto nde anndoton e lontondiral ɗin ɗiɗi limoore duuɓi, e ko hatonjinton e muuɗun ka limoore waqtuuji lebbi e ñalaaɗe e saa’iiji. Kala huunde, Men ɓannginii nde bannginndee fii yo piiji ɗin seerndude goonguɗo feeña e meerente on.

Kala neɗɗo, Men waɗɗinii golle makko ɗen ko ɗe gondooje e makko wano ŋannawol= meeda e daande, ɗe seedataa e makko haa o hasbee fii majje. Men yaltinana mo Ñalnde Darngal deftere, hara no e mayre denndaangal ko o golli foti ko moƴƴi maa ko boni, o tawa nde yeeso makko udditaande fontaa.

Men wi’ana mo nden Ñalnde : "Janngu -an oo neɗɗanke- deftere maa nden, hilno e hasbanngol hoore-maa golle maa ɗen, Ñalnde Darngal, hoore-maa yonay ko hasbe".

Mo feewii e gomɗinal, baraaji peewal makko ngal ko kanko woodani, mo majjii kadi, lepte majjere makko nden yantay e hoore-makko, fittaandu ronndotaako bakkaatu fittaandu goo. Men leptataa yimɓe haa Men ñiiɓinira hujja e hoore-maɓɓe immingol Nulaaɓe faade e maɓɓe.

Si Men faandike halkude hoɗo sabu tooñe yimɓe maggo, Men yamiray ɓen bunngirɓe neema on ɓe saloo ɗoftaade, ɓen yedduɓe yalti e ɗoftaare, konngol lepte ɓorayɗe jojja e maɓɓe, Men halka ɓe halka gasanatka.

Kaawes ko ɗuuɗiri wa ɗen mofte fennuɗi ɗe Men halki ɓaawo Nuuhu, wano Aadinkooɓe ɓen e Samuudinkooɓe ɓen! Joomi maa -an Nulaaɗo-, yonii Humpitiiɗo, Yi’oowo junuubi jeyaaɓe Makko ɓen, hay e huunde suuɗanaaki Mo e majji, aray O yoɓa ɓe ɗum.

Kala tawɗo ko o faandori golle makko moƴƴe ɗen, ko ngurndam aduna ɗam, hara o gonɗinaa fii laakara, o hittinaa fii mun, Men yaccinanay mo ka aduna ko Men Muuyi kon Menen, wanaa kanko ko o faalaa kon e neemaaji, refte Men waɗana mo Jahannama o naata e magge Ñalnde Darngal o sonnjora nguleendi magge, ko o ŋiñaaɗo ko o suɓori aduna kon o yeddi laakara, raɗaaɗo e yurmeende Alla.

Kala faandorɗo golle moƴƴe ɗen mbarjaari laakara, o gollani ɗum golle laaɓuɗe ko jillaa e yiingo maa filli-filli, hara kadi himo gomɗini huunde ko Alla wajinbini gomɗinngol kon ; ɓen siforɓe ɗin sifaaji, golle maɓɓe ɗen laatike jaɓaaɗe ka Alla, O yoɓay ɓe ɗum.

Meɗen ɓeydana gooto-kala e feddeeji ɗin ɗiɗi (bonɗo e moƴƴo on), immorde e dokkal Joomi maa ngal -an Nulaaɗo-, ko aldaa e taƴondiral. Dokkal Joomi maa ngal wonaali haɗeteengal e gooto, foti ko moƴƴo maa ko bonɗo.

Tasko -an Nulaaɗo, ko honno Men ɓurniri yoga maɓɓe e dow yoga aduna ɗoo ka arsike e darjaaji, ko laakara on ɓuri mawnude ɓural darja e neema diini ngurdam aduna ɗam, ko ton kadi ɓuri ɓurdinndinal, yo gomɗinɗo on rerɗan ɗum.

Wata a waɗidan Alla -an jeyaaɗo on- reweteeɗo goo; wontoyaa ŋiñaaɗo ka Alla,e jeyaaɓe Makko moƴƴuɓe ɓen jaarnoowo alanaama,ngona woppidaaɗo e ɗum mo maraa ballo.

Joomi maa yamirii ma an oo jeyaaɗo, O toŋi rewugol ko wonaa Kanko, O yamiri moƴƴagol e jibimɓe ɓen ɗiɗo ; tentinii non tuma ɓe yottii nayeegu : si goɗɗo e mawɓe ɓen yottike nayeegu, maa ɓe ɗi ɗoo non ɓe nawyidii fewndo maa, wata a haaɓu haa haala hollirta a seytani, wata a gufu ɓe kadi wata a saɗtinamɓe konngol, wowlan ɓe konngol teddungol newiingol.

Yankinoran ɓe ɗigganngol ɓe e yurminngol ɓe, wi'aa: "Ko An yo Jooma, yurme ɓee ɗiɗo yurminndee, sabu ko ɓe ne'i lan kon ka booboyaagal an".

Joomi mon -ko onon yo yimɓe- ko O annduɗo ko woni kon ka fonndooji mooɗon immorde e laɓɓinanngol Mo dewe ɗen e golleeji moƴƴi ɗin, e ɗigganngol jibinɓe ɓen ɗiɗo. si laatike annuyee mon e nder dewal mon ngal e huuwondiral mon moƴƴal ngal e jibinɓe on ɓen e tanaa maɓɓe, Kanko Senaade wonanii Mo O wonii surroowo wonannde ɓen ruttotooɓe faade e Makko tuubuubuyee, on mo tuubi immorde e raɓɓinɗinaare makko feƴƴunde nden e ɗoftagol Joomi makko maa jibinɓe mo ɓen ɗiɗo Alla suuɗanay mo.

Okku -an gomɗinɗo- ɓadondiraaɗo haqqee makko immorde e jokkugol enɗan e makko, okku ɓilliiɗo hatojinɗo, okku seteejo mo njooɓa mun lanni, wata a nafku jawdi maa ndin e nder goopol, maa e noone funsitugol.

Pellet naafiqiiɓe ɓen jawle maɓɓe ɗen no ka goopi, funsooɓe ɓen ka nafkugol ɓe laatike musiɗɓe seytanuuji ɗin, hiɓe ɗoftoo ɗi e huunde ko ɗi yamirta ɓe kon immorde e funsitugol e fantinngol.

Si a haɗitike gaayi okkugol ɓee ɗoo; sabu anngal woodeede ko okkaa ɓe hara ko a habbiiɗo huunde ko Alla udditanay maa immorde e arsike, wi'an ɓe konngol ɗaatungol newii ngol, yeru toranagol ɓe yaajugol arsike, fodaa ɓe dokke si Alla arsikii ma jawdi.

Wata a jogito junngo maa ngon gaayi nafkugol, wata a feƴƴintin kadi ka nafkugol, sakko wontaa felaaɗo, yimɓe ɓen fele e dow nguddan maa si a jogitike junngo maa ngon gaayi nafkungol, ko a lannirɗo ko nafketee kon sabu feƴƴintingol maa, a heɓaali huunde ko hiɗa nafka ɗun.

Pellet Joomi maa no yanñana arsike e dow on mo O muuyi, hiMo ɓittinana arsike on kadi e dow on mo O muuyi sabu ñeeñal yottiingal, pellet Kanko O wonii Humpitiiɗo Yi'oowo jeyaaɓe Makko ɓen, hay huunde suuɗnaaki Mo immorde e maɓɓe, hiMo firlita Yamaruyee Makko on e maɓɓe huunde ko O muuyi.

Wata on waru ɓiɓɓe mon ɓen kulol ɓilla saatiiɗo arude si on nafkii e dow maɓɓe, Menen Meɗen fawtii arsike maɓɓe on, Meɗen fawtii kadi arsike mon on onon, pellet warugol ɓe ngol wonii bakkaatu mawɗo; tawde ɓe alaa bakkaatu, alaa kadi sabu waɗɗinɗo warugol ɓe.

Reenee e jeeno ngon, woɗɗitoɗon kadi ko suusinta e ɗun, pellet ɗun laatike ko hattuɗun e kaanude, bonii kadi laawol sabu ko ɗun yottinta kon immorde e jillondiral dammbeeji, e lette Alla.

Wata on waru kin wonkii ki Alla reeniri ƴiiƴan mun sabu gomɗinal maa hoolaare, si wanaa hara ki jojjiɗu e wareede sabu yartodinngol, maa jeeno ɓaawo saŋaade, maa njottiigu=yobtaade, mo waraama kadi e hoore tooñe ko aldaa e sabu daginɗo warugol mo haray men waɗanii hettuɓe e fii makko immorde e ronooɓe mo ɓen wortagol e dow warɗo mo on, no woodani mo nde o ɗaɓɓata warugol mo fii yoɓtagol, no woodani mo kadi yaafagol ko aldaa e coggu, no woodani mo kadi yaafagol e ƴettugol diya. Wata o yawtu dey keerol ka Alla daginani mo ɗon liilugol warɗo on, maa warirgol mo hara wonaa fii ko o wari kon, maa warugol tanaa warɗo on, pellet o laatike ko o semmbinaaɗo wallaaɗo.

Wata on firlitor e nder jawdi ɓen ɓe baaba mun maayi immorde e cukaloy, si wonaa huunde ɓurnde moƴƴannde mo e bamtude mbo e ne'ugol mo e hiwugol mo haa o yottoo timmal hakkille makko e peewal makko, humnee ko woni kon hakkunde mon e Alla, e ko woni kon hakkunde mon e jeyaaɓe Makko ɓen immorde e ahdi ko aldaa e firtugol maa ustugol, pellet, Alla lanndoto okkuɗo ahdi ñalde darngal: hara o humnii ndi O yoɓa mo kaa o humnaali ndi O lepta mo.

Timminee ɓetu ngun si hiɗon ɓetannde woɓɓe goo wota on ustu ɗun, manndikiree manndake nunɗal ɗen, ɗen ɗe ustataa hay e huunde ɗe hayfintaa nde, ngol huuɓinngol ɓetu e manndake ɓuri on moƴƴannde ka aduna e ka laakara, ko ɗun kadi ɓuri moƴƴude battane diini anngal juurinirgol ustugol ɓetirɗe ɗen e manndikirɗe ɗen.

Wata a jukku -ko an ɓiɗɗo Aadama- huunde nde a maraa ganndal e mun, sikkeeji e kawral, pellet neɗɗanki on ko lanndeteeɗo e huunde ko o gollirnoo kon nanɗe makko ɗen e giiɗe makko ɗen e bernde makko nden immorde ko moƴƴi maa ko boni, o warjee e dow moƴƴere nden o leptee e dow bone on.

Wata yaaru ka hoore leydi mawnintinaare e ñaaƴugol, pellet si a yahii e mayri ko a townitiiɗo a taƴirtaa leydi ndin sabu yaadu maaɗa, darnde maaɗa nden yottotaako ka pelle ɗen yottii ɗon junndi e tooweendi, awa ko woni nden mawnintinaare?

Kala ɗii adaaɗi janteede ɗoo laatike bonnirgolɗi ngol ka Joomi maaɗa -ko an yo neɗɗanke- ko haɗaaɗun, Alla weltantaako waɗɗitiiɗo ɗi, ko woni O tikka nay Mo.

Nden huunde nde Men ɓanngini ɗun, immorde e yamirooje ɗen e haaɗooje ɗen e ñaawooje huunde ko Joomi maaɗa wahayini faade e maaɗa, wata a jogito -ko an yo neɗɗanke- reweteeɗo goo wonndude e Alla, sakko werleɗaa ka jahannama ñalde darngal felaaɗo, wonkii maa kin fele, yimɓe ɓen kadi fele, raɗaaɗo gaayi kala moƴƴere.

Ko onon yo nodditiiɓe wonnde Malaa'ikaaɓe ɓen ko ɓiɓɓe Alla rewɓe, e hara Joomi mon hertinan on -ko onon yo sirkooɓe- worɓe ɓen ka ɓiɓɓe, O waɗani Hoore-Makko Malaa'ikaaɓe ɓen ɓiɓɓe rewɓe? Alla Toowii e kon ko wi'oton. Pellet, onon hiɗon wowlude e dow Alla Seniiɗo On konngol hattungol kaanude nokku ka dammbuɗon=askatindon ɓiɗɗo e Makko, aaƴiɗon kadi wonnde no woodani Mo ɓiɓɓe rewɓe ɓen ka tentinnde yeddugol Mo.

Gomɗii Men ɓannginii e ndee Alqur'aanaare ñaawooje ɗen e waajuuji ɗin e mise=yeruuji ɗen, fii yo yimɓe ɓen waajitor, ɓe jokka ko nafata ɓe, ɓe ɗala ko lorrata ɓe, ko woni fiyaake on pellet, yoga e maɓɓe no jeyaa e ɓen ɓe njikkuuji mun junnitii, ko sabu ɗum, ɓe ɓeydutaako si wonaa woɗɗitagol Goonga kan e añugol ka.

Maakan -Ko an yo Nulaaɗo- ɓee sirkooɓe: Si tawiino reweteeɗi no wonndi e Alla Toowuɗo On wano ɓe wi'irta non e fifindagol=pepindago fena, awa ɗin reweteeɗi aaƴaaɗi no wonndi e Alla Jeyɗo On arsi kin ɗi ɗaɓɓayno laawol fii foolugol Mo e dow Laamu Makko ngun e ittugol Mo e maggu.

Seninngol Alla e Laɓɓingol Mo gaayi e ko sirkooɓe ɓen siforta Mo kon, O Toowii e kon ko ɓe wi'ata Mo Toowal Mawnungal.

Kammuuli ɗin no subuhinannde Alla, leydi ndin no subuhinannde Alla. No subuhinannde Alla ɓen wonuɓe to kammuuli e ka leydi immorde e tagaaɓe, alaa hay e huunde si wanaa no seninnde Mo hara no yerindiri seninngol mun ngol e Makko mantoore, kono on faltotaako noone subuhingol maɓɓe, onon on faamataa si wanaa subuhinaandu on mono subuhina ka ɗenngal mon. Pellet, Kanko [Alla] O toowii, O Wonii Munñiiɗo O hawjirtaa leptugol, ko Haforanoowo wonannde on ruttiiɗo faade ka Makko.

Si a janngii -Ko an yo Nulaaɗo- Alqur'aanaare nden, ɓe nanii ko woni kon e mayre immorde e gufooji e waajuuji Men waɗay hakkunde Maa e ɓen ɓe gomɗinaa ñalde darngal wirngallo suuɗoongo, ngo no haɗa ɓe immorde faamude Alqur'aanaare nden, nga leptugol ɓe e dow ɗuuragol maɓɓe ngol.

Men waɗi e dow ɓerɗe maɓɓe ɗen cuddu fii wata ɓe faamu Alqur'aanaare nden, Men waɗi ka noppi maɓɓe kadi teddeele fii wota ɓe nanu nde, nanɗe nafitorgol. Si a jantike Joomi maa ka nder Alqur'aanaare Kanko Tun, a jantaaki reweteeɗi maɓɓe ɗi ɓe aaƴii ɗin, ɓe yiltitoo e batte maɓɓe, ko ɓe woɗɗitiiɓe gaayi laɓɓinangol Alla ngootimbaaku.

Ko Menen Anndi laawol no hooreeɓe maɓɓe ɓen jentorta non Alqur'aanaare nden, ɓe faandaaki feewirde nde, ko woni, ɓe faandi hayfinngol wowla haalaaji puyɗi tuma janngataa. Ko Menen Anndi ko ɓe sowndindirta kon, immorde e fennugol e sakkagol=faade nde, fewndo ɓee tooñooɓe wi'anaynoo ɗimmooɓe maɓɓe ɓen ka keeferaaku: «On jakkaali -ko onon yo yimɓe- si wanaa gorko mbilɗaaɗo mo hakkille mun jiiɓii.

Tasko -ko an yo Nulaaɗo- fii yo a haawo koo ko ɓe sifimaa immorde e sifaaji ŋiñaaɗi luutondirɗi, ɓe ooñii gaayi e goonga kan, ɓe wemmbii ɓe feewataa faade e laawol goonga.

Sirkooɓe ɓen wi'i -nga yeddugol immital-: " eyoo si men maayii men wontii ƴi'e, ɓalli amen ɗin hiɗɗii, ɗi immintinte immital kesal? pellet, ɗun wanaa ko gasata."

Maakan ɓe -yo Nulaaɗo-:"Wonee -ko onon yo sirkooɓe-si tawii hiɗon hattani kaaƴe e sattugol mun,maa wonon njanɗe e doole mun,on hattantaake ɗun".

Maaɗun laatee tagu goo ɓurngu tiiɗude e majji kannji ɗiɗi, ko tawi no tiiɗi ka ɓerɗe mon. Pellet, Alla ko O ruttoowo on wano O fuddori on non, O wurnitay on wano O tagiri on non ka laawol aranol, aray bee sanndalɗiiɓe ka wi'a: "Ko hommbo artirta men e ngurndan ɓaawo mayde amen?" Maakan ɓe: "Artiray on On Taguɗo on ka laawol aranol ko aldaa e misal adiingal", aray ka ɓe dimmba ko'e maɓɓe ɗen hara ko ɓe jalnorɓe ko jaabiɗaa ɓe kon, ɓe wi'a ko ɓe woɗɗintinɓe: "Ko honnde tuma woni ngol ruttagol?!" Maakan ɓe: "no gasa ɗun ɓadike, kala ko woni arude haray woɗɗaa.

Alla artiray on ñannde O noddata on faande ka leydi mofturu, nootoɗon ko on ɗoftiiɓe yamiroore Makko nden, ko on yettuɓe Mo, hara hiɗon sikka onon on ñiiɓaano ka leydi si wanaa dummune hun fanɗukun.

Maakan -ko an yo Nulaaɗo- jeyaaɓe an gomɗinɓe ɓen: "yo ɓe wowlu konngol moƴƴol ngol tuma ɓe yewtata, ɓe woɗɗitoo konngol bonungol lancayngol ngol; sabu Seytaane huutoray ngol o golla hakkunde maɓɓe huunde ko no bonnana ɓe ngurdan maɓɓe aduna yankejan e laaharayankejan, pellet, Seytaane laatanike neɗɗanke gaño ɓannguɗo ngayngu, no fawii neɗɗanke reenagol e Seytaane.

Joomi mon -ko onon yo yimɓe- ko Annduɗo fii mon, hay huunde suuɗanaaki Mo immorde e mon, si O yiɗii yurminnde on O yurminay on, ɗun woni O hawrinndina on e gomɗinal e golle moƴƴe. Si O yiɗii kadi nde O leptata on, O leptay on ɗun woni O woppa on gaayi gomɗinal O wara on e hoore keefereeku, Men nulaali ma -ko an yo Nulaaɗo- e dow maɓɓe fawtiiɗo sakko doolaaɓe e dow gomɗinal, haɗaa ɓe e immorde e keeferaaku, moftanaa ɓe golleeji maɓɓe ɗin. Pellet, an ko a yottinanoowo Alla ko O yamirmaa yottinngol kon.

Ko Joomi maaɗa -an yo Nulaaɗo- woni Annduɗo denndaangal ɓen womɓe ka kammuuli e ka leydi, ko O Annduɗo alhaaliiji maɓɓe e ko ɓe hanndi kon. Pellet, Men ɓurnii yoga e Annabaaɓe ɓen e dow yoga sabu ɗuuɗugol jokkooɓe ɓen e Tellinngol Defte, Men okki Daawuuda Deftere, nden le ko Jabuura.

Maakan -an yo Nulaaɗo- ɓee sirkooɓe: Noddee -Ko onon yo sirkooɓe- ɓen ɓe aaƴiɗon ko reweteeɓe gaanin Alla si lorra jippike e mon, kamɓe ɓe maraa feere duncugol lorra kan e mon, ɓe maraa kadi feere egginngol lorra kan faande e tanaa mon sabu ronkere maɓɓe, on laatiiɗo ko o ronkuɗo o wonataa reweteeɗo.

Ɓen, ɓe noddoton immorde e Malaa'ikaaɓe ɓen e ko nanndi e maɓɓe, ɓen, kamɓe tigi hiɓe ɗaɓude ko ɓattina ɓe ka Alla immorde e golle moƴƴe, hiɓe foolondira ko hommbo e maɓɓe ɓurata ɓattorde Mo ɗoftaare, hiɓe jortii kadi nde O Hinnotooɓe, hiɓe huli kadi nde O leptata ɓe, pellet, lepte Joomi maa ɗen -an yo Nulaaɗo- ko haanaaɗe huleede.

Alaa e hoɗo maaɗum saare si wanaa Menen Men jippinay e mayre lepte e halakuyee ka ngurndan aduna sabu yeddugol yimɓe mayre, maaɗum Men jarribora nde lepte doolnuɗe, warngo maa tanaa ɗun sabu yeddugol yimɓe marye, ngol halkugol e warugol laatike Ñaawoore Alla winndaande ka Alluwal Reenaangal.

Men tertoraali=accaani jippinngol maandeeji so'eteeɗi, ɗin tinndinɗi e goongugol Nulaaɗo on, ɗin ɗi sirkooɓe ɓen ɗaɓɓi wano wurnitugol mayɓe e ko nannde e mun, si wanaa ɓaawa Men jippiniino ɗi e dow moftaaji arani ɗin ɓe fenni ɗi. Pellet, Men okkiino Samuuda Aaya mawɗo ɓannguɗo, on le ko ngelooba ndewa mban, ɓe yeddi mba Men yaccinani ɓe lepte, Men nulataa Aayeeje ɗen e dow sookeeje Nulaaɓe ɓen si wanaa hulɓinngol moftaaji maɓɓe ɗin; belajo'o ɓe jebbilto.

Janto -an Nulaaɗo- tuma nde men wi'anno maa: Pellet, Joomi maa huɓindike yimɓe ɓen hattande, kamɓe hiɓe e tamannde Makko, Alla ko haɗoowo ma e maɓɓe, yottin ko yamiraɗaa kon yottinngol, Men waɗiraali ko Men hollirmaa kon giiɗe hoore jemma royreede si wanaa ndaarude si yimɓe ɓen, goonginay ɗun, kaa ɓe fennay ɗun? Men waɗiraali leki jaqquumi kin jantaangal ka Alqur'aana wonnde hiki fuɗi ka ndanka yiite si wanaa jarriborɗun ɓe, si ɓe gomɗinaali ɗee Aayeeje ɗoo ɗiɗi ɓe gomntaa tanaa majje, Meɗen hulɓinira ɓe jippinngol Aayeeje ɓe ɓeydortaa hulɓinireede jippinngol Aayeeje si wanaa ɓeydagol e geddi e duumagol e majjere.

Janto -an Nulaaɗo- nde Men Daalannoo Malaa'ikaaɓe ɓen: "Sujjanee Aadama sujjannde hiwraango= wanaa sujjannde dewal, ɓe ɗoftii ɓe fow maɓɓe ɓe sujjani mo, kono Ibliisa salori sujjanngol mo mawnintinaare himo wi'a: "E hara mi sujjanay on mo taguƊaa immorde e loopal, min A tagii lan e immorde e yiite?! Min miɗo ɓuri mo teddude".

Ibliisa wi'ani Joomi makko: "A yi'ii oo tagaaɗo mo teddinirƊaa e dow am yamirgol lan yo mi sujjan mo? Si A accii lan mi wuurii haa ka sakkitorde ngurndan aduna mi ooñay ɓiɓɓe makko ɓen, mi selinay ɓe laawol Maaɗa focciingol ngol, si wanaa seeɗaaɓe ɓen ɓe reenuƊaa e maɓɓe, ɓen ko jeyaaɓe Maaɗa laɓɓinaaɓe ɓen".

Joomi makko Daalani mo: "Yahu, an e kala jokkuɗo ma e maɓɓe, pellet, ko jahannama woni njoddi maa e njoddi maɓɓe, njoddi timmundi huuɓunde e dow golleeji mon".

Ɗaynir on mo hattanaɗaa ɗaynugol e maɓɓe hito maa nodday ngo ngon e goopi, wullu e maɓɓe waɗɗiiɓe maa e seppooɓe noddooɓe fii doftagol ma, kafiidiraa e maɓɓe ka jawle maɓɓe cuɗanngol ɓe kala gollidal lunndiingal Sari'a, kafidiraa e maɓɓe kadi ka ɓiɓɓe maɓɓe e nodditagol ɓe e hoore fenaande, e jiidorgol ɓe jeeno, e rewirgol ɓe ko woori Alla tuma innugol, cuɗan ɓe fodooje penaale e yelaaji meerenteeji, Seytaane fodaali ɓe si wanaa fodooje fenaandeeje, ɗen ɗe no hoda ɓe.

Pellet, jeyaaɓe An gomɗinɓe ɓen gollirooɓe ɗoftaare An, a maraa -ko an yo Ibliisa- doole e hoore maɓɓe; sabu pellet, Alla duñay lorra maa kan gaayi maɓɓe, Alla yonii hooloraaɗo wonannde on tuugiiɗo e Makko e fiyakuuji mun ɗin.

Joomi mon -ko onon yo yimɓe- ko Kanko woni On newnatda mon dogingol laaɗe ɗen ka maayo fii yo on ɗaɓɓir arsike Makko on tono njulaaku e tanaa mun. Pellet, O wonii Yurmeteeɗo on nokku ka O newinani on ɗii laawi.

Si heɓii on -ko onon yo sirkooɓe- jarrabuyee e huunde aññiinde ka maayo haa tawa on hulii halkaaree, wirnoto ka miijo mon kon ko laatino ɗon hiɗon rewa ko woori Alla, on jantotaako si wanah Alla ɗaɓɓiron Mo faabo, tuma nde O faabii on O hisini on immorde e ko hulunoɗon kon, wontuɗon ka njorndi ɗurnoɗon e ngootimbaaku Makko e noddugol Mo Kanko tun, ruttoɗon e sanamuuji mon, neɗɗanke on laatike ko o heewuɗo yeddugol neemaaji Alla ɗin.

Kaa on hooli -ko onon yo sirkooɓe- tuma Alla danndi on ka njorndi O waɗataa haa ndi yulina on=ndi yirba e mon? Kaa on hooli O jippintaa e mon kaaƴe immorde ka kammu ɗe toɓa e mon wano O waɗirinon e yimɓe Luutu, refti on heɓataa deeno mo no reena on, wanaa ballo mo no haɗana on halkeede.

Kaa on hooli Alla artirtaa on ka maayo laawol goo, refti O nula e mon henndu sattundu, O yoola on sabu yeddugol mon neemaaji Alla ɗin, tuma nde O danndunoo on ka aranun, refti heɓantaake on ɗaɓɓoowo mo no ɗaɓɓira Men yettanagol on ko Men waɗi on kon.

Gomɗii Men teddinirii geɗalɓe Aadama ɓen hakkille e ko Maalaa'ikaaɓe ɓen sujjani kon baaba maɓɓa e ko wonaa ɗun kadi, Men eltani ɓe daabeeji e mbaɗɗateeji ko ronndoo ɓe ka njorndi e laaɗe ko ronndoo ɓe ka maayo, Men arsiki ɓe laaɓuɗi ka ñaameteeji e ka njaram e ka desal e tanaa mun. Men ɓurni ɓe e dow ko ɗuuɗi immorde e tageefooji Amen ɓural mawngal, no fawiiɓe jarnugol neema mo Alla neeminiri ɓe on.

Jaŋto -an Nulaaɗo- ñennde Men noddirta kala fedde yeesoojo mayre, on mo nde laatinoo hinde ñintina ka aduna, kala jonnitiraaɗo deftere golle mun ka ñaamo makko ɓen ɗon ɓe janngay deftere maɓɓe nden hiɓe weltii, ɓe ustantaake huunde e njoddi maɓɓe ndin, hay si no fanɗiri wa kun gaara hun wonu kun e poɗɗere tamoro.

Kala on laatiiɗo e ɗam ngurndan aduna ko o wumuɗo giiɗe ɓernde gaayi jabugol goonga e yankinanagol goonga, haray kanko ko ñalde darngal o ɓurata wumude, o feewirtaa laawol Aljanna ngol, ko ton kadi o ɓurata majjude gaayi e laawol peewal, njoddi ndin ko e noone golle ɗen.

Gomɗii sirkooɓe ɓen do'iino firlide ma -an Nulaaɗo- e kon ko Men wahayini e maaɗa immorde e Alqur'aana; fii yo a fefindo e Amen ko wonaa ɗun, ko hawrondirta kon e beleeɗe maɓɓe ɗen, si a waɗuno ko ɓe faalaa kon e ɗun ɓe suɓutonoma giɗo.

Si tawiino Men neeminiraali ma tabintingol ma e hoore goonga kan, gomɗii hari a ɓadike ooñaade e maɓɓe yoga e ooñagol, jaɓanaa ɓe ko ɓe fewjanmaa kon, sabu tiiɗugol hodo maɓɓe e saɗtugol janfaaji maɓɓe wonndude e fantude rerɗugol maa e gomɗinal maɓɓe, kono Men reenumaa e ooñagol faade e maɓɓe.

Si a ooñino e maɓɓe ko ɓe fewjanaymaa kon Men henneteno lepte sowaaɗe ka ngurndan aduna e ka laahara, refti a heɓataa ballo mo no walle e hoore Amen, o ittane lepte ɗen.

Gomɗii heeferɓe ɓen eɓɓii nde ɓe dilliniraymaa ngaynu maɓɓe ngun e maa, fii yo ɓe yaltine Makka, kono Alla haɗi ɓe e yaltinngol ma haa feruɗaa e yamaruyee Joomi maa, si ɓe yaltineno ɓe heddotanooko ɓaawo yaltinngol ma si wanaa dummunne fanɗuɗo.

Nden ñaawore anngal heddagol maɓɓe ɓaawo maa si wanaa dummunne hun fanɗu kun, ko ɗun woni Sunna Alla fii raɗinooɓe ɓen Nulaaɓe ɓen ko adimaa, ko woni ɗun, kala Nulaaɗo mo yimɓe mun yaltini ɗun hakkunde maɓɓe, Alla jippinay lepte e maɓɓe, a heɓantaa -ko an yo Nulaaɗo- Sunna Alla on waylugol, ko woni, a taway mo tabitii ko o raɗaaɗo.

Ñinnir julde nden addirgol nde e noone ɓurɗo timmude e nder waqtuuji mayre ɗin ka mortagol naange ngen ka heyre [tummbo] kammu, ɗun no mofti julde Fanaa e Alansaraa, haa ka niwre jemma, ɗun no mofte Futuroo e Geeƴe, ñinnu julde Subaha nden, juutinaa jannde e mayre, Julde Subaha nden no tawee e mayre Malaa'ikaaɓe jemma ɓen e Malaa'ikaaɓe ñalorma ɓen.

Ka jemma immo -ko an yo Nulaaɗo- juulaa yoga e makko, fii yo julde maa nden laato ɓeydaari maaɗa e ɓantugol darjaaji maaɗa, ko a tijjiiɗo nde Joomi maa immintinay maa ñalde darngal, ko a tefanoowo yimɓe ɓen e nden huunde nde ɓe woni e mun immorde e kulol ñalde darngal, laatanomaa darorde tefoore mawnde nden, nden nde aranɓe ɓen e sakkitiiɓe ɓen no yettira ɗun.

Maaku -ko an yo Nulaaɗo-: Joomi, waɗu naatirgal an gal e yaltirgal an ngal kala majje e nder ɗoftaare maa e welayee maa, waɗanan ka Maaɗa hujja feeñuɗo mo hiƊa wallira lan e hoore gaño an.

Maakan: -an Nulaaɗo- ɓee sirkooɓe: Islaamu on arii, o goonginii ko Alla fodi kon immorde e ballal Makko, sirku ngun e keefiraaku ngun yahii, pellet, meere nden ko yahaynde fuuya, nde tabitataa yeeso goonga kan.

Meɗen jippina ka Alqur'aana huunde nde kañun ko cellal wonannde ɓerɗe ɗen immorde e majjere e keefereeku e sikke, e huunde nde kañun ko cellal wonannde ɓalli si ɗi mocciraama nde, e huunde nde kañun ko hinnayee wonannde ɓen gomɗinɓe gollirooɓe nde, ndee Alqur'aanaare ɓeydataa heeferɓe ɓen si wanaa halkaare; sabu heɗagol nde no tikkina ɓe, ɓeydana ɓe fennugol e ɗurnagol e mayre.

Si Men neeminirii neɗɗanke on, neema yeru cellal e ngalu o ɗuurnoo gaayi jarnugol Alla e ɗoftagol Mo, o woɗɗitoo ngam mawnitaare. Si ñaw maa ɓilla hiɓii mo e ko nanndi e majji o laatoo sattuɗo taƴagol o taƴoo e yurmeende Alla on.

Maaku -ko an yo Nulaaɗo-: kala neɗɗo yo gollu e laawol mun ngol no yerondira e alhaali mun ka peewal e ka majjere, ko Joomi mon woni Annduɗo on ɓurɗo feewude laawol faande e goonga kan.

No lanndaadema -ko an yo Nulaaɗo- heeferɓe ɓen ka yimɓe defteko woni haqiiqa fittaandu, maakan ɓe: "Anndaa haqiiqa fittaandu si wanaa Alla, onon e tageefo ngon fow on okkaaka ganndal si wanaa seeɗa, e banŋe Ganndal Alla Senaade wonanii Mo".

Mi woondii, si Men yiɗiino ittigol nden huunde nde Men jippini e maaɗa -ko an yo Nulaaɗo- immorde e wahayu montugol mo ka ɓerɗe e ka defte Men ittayno mo, refti a heɓataa walloowo ma, o daranoo artirgol ɗun.

Kono Men naɓaali [ittaali] ɗun sabu hinnayee Joomi maa, Men acci ɗun ko maraaɗun, pellet, ɓural Joomi maa ngal e dow maa laatike mawnugol, nokku ka O waɗu maa Nulaaɗo, O timminirmaa Annabaaɓe ɓen, O tellini Alqur'aana e maa.

Maaku an Nulaaɗo: "Si yimɓe ɓen e jinnaaji ɗin fow mooɓondirii fii yo ɓe addu yeru ndee Alqur'aanaare Jippinaande e maaɗa e ɓanngungol marye, e fotugol haala mayre, e huuɓugol mayre, ɓe addataa ɗun poomaa, hay si yoga maɓɓe wonii wallooɓe yoga".

Gomɗii Men ɓannginanii yimɓe ɓen e ndee Alqur'aanaare, Men noonini e mayre immorde e kala ko taskortee e waajuuji e yamirooje e haɗooje e fillayeeji jortagol ɓe gomɗinay, yimɓe ɓurɓe ɓen salii si wanaa yeddugol e faytinkinagol ndee Alqur'aanaare.

Sirkooɓe ɓen wi'i: "Men gomɗintaa ma, haa yaltinanaa men ka leydi caangol ilayngol ngol ɓeeɓataa".

Maaɗun laatano maa ngesa ɗuuɗumba leɗɗe, ilinaa sanne e nder mabba canɗi ɗin fii yarnugol.

Maaɗun liɓaa kammu ngun e hoore amen -wano jantorɗaa non- taƴe immorde e lepte, maaɗun addaa Alla e Malaa'ikaaɓe ɓen e kene haa ɓe seedano maa sellugol ko nodditiɗaa kon.

Maaɗun laatano maa suudu cuɗiraandu kanŋe e tanaa mun, maaɗun ƴeeŋaa ka kammu, men gomɗintaa wonnde ko o Nulaaɗo hay ƴeeguɗaa ton si wanaa si a jippodii e deftere winndaande immornde ka Alla, men jannga e nder mayre wonnde an ko a Nulaaɗo Alla. Maakan ɓe -ko an yo Nulaaɗo-: "Senaade wonanii Joomi an! Hara mi wonu si wonaa ɓanndinke Nulaaɗo wano denndaangal Nulaaɓe ɓen, mi maraa addugol hay e huunde, ko honno woniranta lan nde mi addata ko fewjanɗon mi kon?!"

Haaɗaali heeferɓe ɓen gomɗinngol Alla e Nulaaɓe Makko ɓen, e gollirgol ko Nulaaɓe ɓen addi kon, si wanaa yeddugol maɓɓe nde Nulaaɗo on laatotoo e noone ɓanndike, nokku ka ɓe wi'i nga yeddugol: "Enee,hara Alla nulay e me'en Nulaaɗo immorde e ɓanndinke?!"

Maaku -an Nulaaɗo- ka jaabagol ɓe: "Wonndo laatino ka hoore leydi Malaa'ikaaɓe hoɗuɓe e mayri hiɓe yaha ko ɓe deeƴuɓe wano wonirɗon non, Men nulayno e maɓɓe Nulaaɗo Malaa'kaajo immorde e noone maɓɓe; sabu ko kanko hattantee faaminngol ɓe ko o nulidaa kon e mun, laataaki no jeyaa e ñeeñal nde Men nulata e maɓɓe Nulaaɗo immorde e noone ɓanndinke, ko nii woni fii mun on onon kadi".

Maaku -ko an yo Nulaaɗo-: "Alla yonii Seediiɗo hakkunde an e mon wonnde min ko mi Nulaaɗo e mon, e wonnde mi yottinii e mon ko mi nuliraa kon faade e mon. Pellet, Kanko ko O Huɓindiiɗo alhaaliiji jeyaaɓe Makko ɓen, hay e huunde e majji suuɗanaaki Mo, ko O Humpitiiɗo kala ko suuɗii kon e wonkiiji maɓɓe".

On mo Alla hawrinndini e peewal, ko on woni feewuɗo e goonga, on Mo o woppi O O mAjjini mo, a heɓantaa ɓe -ko an yo Nulaaɗo- welddiɓe ɓe no fewnaɓe e goonga, ɓe martina e maɓɓe lorra, ɓe pooɗana ɓe nafa, Men mooɓay ɓe ñalde darngal hara hiɓe daasiree geece maɓɓe ɗen, ɓe yi'ataa ɓe wowlataa ɓe nanataa, galle maɓɓe ɗe ɓe weereta ɗen e mun ko jahannama, tuma kala dulbuki=lewlewndu magge deeƴi Men ɓeydana ɓe huɓɓugol nge.

Ɗen lepte ɗe ɓe hawrata e mun ko njoddi maɓɓe ndin non, sabu yeddugol maɓɓe Aayeeje Amen ɗen, e wi'ugol maɓɓe woɗɗintinngol immital: "Eyoo, si men maayii men wontii ƴi'e kiɗɗe, e kuntoy saakiikoy e hara men immintinte ɓaawo ɗun tagu kesu?!"

Enee, ɓee yedduɓe immital anndaali wonnde Alla On Taguɗo kammuuli ɗin e leydi ndin e mawnugol majji kannji ɗiɗi, ko O Hattanɗo tagugol yeru mon. On hattanɗo tagugol huunde ɓurnde mawnude ko Hattanɗo tagugol ko jaasi ɗun, gomɗii Alla waɗanii ɓe ka aduna waqtu happaaɗo mo ngurndan maɓɓe ɗan hattata e muuɗun, O waɗani ɓe kadi lajal fii immital maɓɓe sikke alaa e maggal, ko wonndude e feeñugol dalilaaji immital sirkooɓe ɓen salii si wanaa yeddugol immital ngal, wonndude e ɓanngugol daliilaaji maggal.

Maakan -ko an yo Nulaaɗo- ɓee sirkooɓe: " Si on laatino jogiiɓe ngaluuji Hinnayee Joomi an on, ɗin ɗi lannataa ɗi re'ataa, ontuma on salotono nafkugol kulol wata ɗi lannu haa wonton ɓilliiɓe, no jeyaa e njikku neɗɗanke wonnde ko o nguddo si wanaa o laati gomɗinɗo, onɗon himo nafka tijjagol mbarjaari Alla.

Gomɗii Men okkiino Muusaa (yo o his) daliilaaji jeenay ɓannguɗi ko seedanoo mo, ko woni ɗin: Ko tuggordu e sookeewo (junngo) e kokke e ustagol dimɗe e waame e kanuuji e tenɗi e totiiji=paabi e ƴiiƴan. Lanndii -ko an yo Nulaaɗo- Alyahuuda en tuma nde Muusaa addannoo maamiraaɓe maɓɓe ɓen ɗen aayeeje, Fir'awna wi'ani mo: "Min dey miɗo sikki tun an Muusaa ko a gorko mbilɗaaɗo; sabu ko aduɗaa e mon geɗe tumorankooje.

Muusaa Maaki ka ruttugol mo: "Gomɗii hiɗa anndi goy -ko an yo Fir'awna- pellet, jippinaali ɗee Aayeeje si wanaa Jeyɗo On kammuuli ɗin e leydi O jippinii ɗee ko ɗe tinndinorɗe e kattanɗe Makko, e goongugol Nulaaɓe Makko, kono an a yeddii, kono min dey pellet, miɗo anndi an -Fir'awna- ko a halkiiɗo hayruɗo.

Fir'awna faandii leptirgol Muusaa (yo o his) e yimɓe makko ɓen yaltinngol ɓe Misira, Men halkiri mo e ɓen wonndunooɓe e makko yoolagol.

Men wi'ani ɓiɓɓe Israa'iila ɓen ɓaawo halkeede Fir'awna e konu makko ngun: "Hoɗee ka leydi Saami, si ñalnde darngal hewtii, Men artiray on onon fow mon ka mofturu fii hasboore nden".

Ko sabu goonga Men jippini ndee Alqur'aanaare e Muhammadu (yo Alla juulu e makko O hisina), ko Goonga jippii e mayre ko aldaa e wattitugol wonaa waylugol, Men nuliraali ma -ko an yo Nulaaɗo- si wonaa ko a wewliniroowo yimɓe hulooɓe Alla ɓen aljjanna, ko a hulɓiniroowo yimɓe keefeeru ngun e geddi ɗin yiite ngen.

Men jippini nde Janngeteende Men senndi nde, Men ɓanngini nde jorto fii yo a janngannde yimɓe ɓen e dow doy e yottinngol ka jannde; sabu ko ɗun hewtinta e faamu e taskagol, Men jippini nde yuɓɓaande sennditaa nde emmbere piiji yanooji ɗin e alhaaliiji ɗin.

Maaku -ko an yo Nulaaɗo-: "Gomɗinee nde, gomɗinal mon ɓeydataa nde hay e huunde, maaɗun wota on gomɗin nde, yeddugol mon uytataa nde hay e huunde, pellet, ɓen jannguɓe Defte kammuyankeeje adiiɗe ɗen, ɓe anndi Wahayu on e Annabaaku ngun si Alqur'aana janngaama e taweede maɓɓe, ɓe suuyiray geece maɓɓe ɗen ko ɓe sujjanooɓe Alla sabu yettugol".

Ɓe wi'a ka sujuudu maɓɓe: "Joomi amen Senike e lunndagol fodoore, ko O Fodi kon immorde Nulugol Muhammadu (yo Alla juulu e makko O hisina mo) ko laatotooɗun, pellet, Fodoore Joomi amen nden e ɗun e tanaa mun ko waɗoojum feere woo alaa".

Ɓe yanira geece maɓɓe ɗen ko ɓe sujjanooɓe Alla, ɓe wulla immorde e kullol Makko, jentagol Alqur'aana on e taskagol firooji mayre no ɓeyda ɓe yankinanagol Alla e kullol Makko.

Maakan -an Nulaaɗo- ɓen yedduɓe ma ka noddugol sabu wi'ugol ma (Ko An yo Alla, ko An yo Hinnorante): Alla e Hinnorante ko Inɗe Makko ɗiɗi, Senaade wonanii Mo noddiree Mo wonnde woo e Majje kannje ɗiɗi, maaɗun tanaa majje kannje ɗiɗi immorde e Inɗe Makko, ko Kanko woodani -Senaade wonanii Mo- Inɗe Moƴƴe ɗen, ɗee ɗiɗi ko e majje jeyaa, noddiree Mo ɗen ɗiɗi maa tanaa majje immorde e Inɗe Makko Moƴƴe ɗen, wata a fenñin Alqur'aana on ka julde maaɗa serkooɓe ɓen jento maa, wata a suuɗu nde kadi hara gomɗinɓe ɓen nanataa nde, ɗaɓɓu laawol hakindii ngol hakkunde feyakuuji ɗin ɗiɗi.

Maaku -an Nulaaɗo-: "Yettoore nden ko Alla woodani On hannduɗo e nooneeji gettooje ɗen, On Seniiɗo e gaayi ɓiɗɗo e kafidaaɗo, O maraa kafidaaɗo ka Laamu Makko, hoyre e lo'ere heɓataa Mo, O hatonnjinaa e walloowo Mo maa semmbinoowo Mo, Mawnin Mo Mawninngol ɗuuɗu ngol, wata a askinan Mo ɓiɗɗo maaɗun kafidaaɗo ka Laamu wanaa walloowo semmbinoowo.

Mantireede Sifaaji Timmal e Manngu, e Neema feeñuɗi ɗin e suuɗiiɗi ɗin ko Alla Heeranii Kanko tun, On Tellinɗo Alqur'aana e Jeyaaɗo Makko e Nulaaɗo Makko Muhammadu (yo Alla Juulu e makka O Hisna), O waɗanaali ndee Alqur'aanaare ooñagol e selugol Goonga kan.

Ko woni O waɗii nde focciinde yeddondire e lorre alaa e nder mayre; fii yo o hulɓinir yedduɓe ɓen immorde e Lepte dolnuɗe habbiiɗe ɓe ka Alla, o yeetoo gomɗinɓe ɓen, ɓen gollooɓe golleeji moƴƴuɗi ɗin ko weltinta ɓe, wonnde no woodani ɓe mbarjaari moƴƴiri, ɓadotaako nde mbarjaari goo.

Ko duumotooɓe e nder ndin mbarjaari poomaa, ndi taƴataa e maɓɓe.

O hulɓinira Alyahuuda e Annasaara e yoga serkooɓe ɓen, ɓen wi'i: "Alla jogitike ɓiɗɗo".

Latanaaki ɓee fefindotooɓe ganndal maaɗun dalil e ko ɓe nodditii kon immorde e dammbugol ɓiɗɗo e Alla. Laatanaaki baabiraaɓe maɓɓe, ɓe ɓe ñentini ɓen kadi e ɗun ganndal, no kaani haa fanti ngol konngol wonungol e yaltude e kunnduɗe maɓɓe ko aldaa e huuturo hakkil, ɓe wowlaali si wanaa konngol fenaande, ngol alaa daƴƴere, alaa ka ngol ɓaarii.

Bela jo'o an -an Nulaaɗo- a tilfay hoore-maa sabu suno e mette, si ɓe hoolaaki ndee Alqur'aanaare, wota a waɗu, fawaaki ma fewnugol ɓe, anndu ko fawimaa ko yottinngol.

Menen wadi ko woni kon ka kene leydi ndin e tageefooji ŋari mayri, fii yo Men jarbaadeɓe ko hommbo e maɓbe ɓurata moƴƴinnde golle weltinayɗe Alla, ko hommbo e maɓɓe kadi ɓurata bonude golle, fii yo Men yoɓu mokala ko o hanndi kon e mun.

Menen gomɗii Men wattay ko woni kon ka kene leydi ndin e tageefooji mbullaari yeewundi immore e puɗi, ɗun ko ɓaawo re'ugol ngurndan tageefooji wonuɗi ɗin e hoore mayri, yo ɓe tasko ɗun.

Wota a sikku -ko an yo Nulaaɗo- wonnde fillayee yimɓe fammeere nde=wimmba ngo, e alluuje maɓɓe, ɗen ɗe inɗe maɓɓe ɗen winndaa e mun no jeyaa e Aayeeje Amen hawniiɗe ɗen. Ko woni ko tanaa majje ɓuri hawnaade yeru tagugol kammuuli ɗin e leydi ndin.

Annditii an yo Nulaaɗo, tuma nde sukaaɓe gomɗinɓe ɓen moolinoo e diina mun kan ɓe fattoyii, ɓe wi'i e nder noddugol maɓɓe ngol Joomi maɓɓe: "Joomi amen, okku men Hinnayee immorde ka Maa ɗun woni haforanaa men bakkatuuji amen, danndaa men ayɓe e amen, waɗanaa men fiyaake fergu ngun iwde e keefeeru yaha e gomɗinal feewude faade e laawol Goonga e Peewal.

Refti, ɓaawo yahugol maɓɓe soroya ka fammeere Men waɗi ka dow noppi maɓɓe wirngallo gaayi nanugol hitooji, Men liɓi ɗoyngol ngol e maɓɓe duuɓi ɗuuɗuɗi.

Refti, ɓaawo ɗoyngol maɓɓe juutungol ngol, Men finndini ɓe fii yo Men anndu -Ganndal fenñinngol- ko honnde e feddeeji pooɗondirayɗi ɗin ɗiɗi, fii dummunne ñiiɓugol maɓɓe ka fammeere, ɓuri anndunde emmbere on dummunne.

Menen, Meɗen ƴellintine -ko an yo Nulaaɗo- e kumpital fii maɓɓe e Goonga ka sikke alaa e mu'un, ɓen, ko sagataaɓe gomɗinɓe Joomi mun, ɓe golliri doftaare Makko, Men ɓeydani ɓe Fewneede e Tabintineede e hoore Goonga.

Men semmbiniri ɓerɗe maɓɓe ɗen gomɗinal e tabitugol e maggal, e muñanal e dow ferugol ngenndi fii gomɗinal, fewndo ɓe darinoo yeeso lando ngeddo=keefeero on ko ɓe fenñinɓe gomɗinal maɓɓe Alla Kanko tun, ɓe wi'ani mo: " Joomi amen Mo men gomɗini men Rewi On, ko On Jeyɗo kammuli ɗin e leydi ndin, men rewataa si wonaa Kanko immorde ɗin nodditiraaɗi rewateeɗe e hoore fenaande, gomɗii haray men wi'ii -si men rewii tanaa Makko- konngol tooñungol woɗɗitiingol Goonga kan.

Refti yoga maɓɓe yeƴƴitii e yoga hiɓe wi'a: Ɓee yimɓe amen ɓe jogitike gaanin Alla reweteeɗi hiɓe rewaɗi, kamɓe ɓe maraa dalil ɓannguɗo e dewal maɓɓe ngal, alaa hay e gooto ɓurɗo tooñude ko foti e on fekkindorɗo fenaande o fawi e Alla dammbugol kafidaaɗo e Makko.

Tuma nde danndi on gaayi yimɓe mon ɓen, tertiɗon ko ɓe rewata kon gaanin Alla, on rewaali si wanaa Alla Kanko tun, fattoyagol ngol ka fammeere fii dogidugol e diina mon kan Joomi mon Seniiɗo On hiMo weftana=wertana on immorde e Yurmeende Makko nden ko hiMo reenira on ɗun immorde e ayɓe mon O hiwa on kadi, O niwinana on e fiyaake mon ko hiɗon nafitora ɗun, konko lontinanta on e ngurdanɗan hakkunde yimɓe mon.

Ɓe jaɓi ko ɓe yamiraa kon, Alla liɓi ɗoyngol e maɓɓe, O reeni ɓe e gaño maɓɓe on. A yi'ay -an sutiiɗo ɓe- naange ngen si nge ƴellitike ka fuɗirde magge hinge ooñora e fammeere maɓɓe nden ka senngo ñaamo naatungo ngon e mayre, si nge wirnike ka mutugol magge nge selirana nde ka senngo nano mayre nge hewtataa nde, kamɓe hiɓe e ɗowde duumiindi nguli naange ngen tampintaa ɓe, kamɓe hiɓe e yaajeende ka fammeere henndu ndu ɓe hatonnjini ndun e mu'un no hewtude ɓe, ɗun ko ɓe heɓi immorde e wernugol ɓe ka fammeere, e liɓugol ɗoyngol e maɓɓe, e ooñagol naange ngen e maɓɓe, e yaajugol nokkuure maɓɓe nden, e danndugol ɓe bone yimɓe maɓɓe ɓen: Ko jeyaaɗun e kaaweeji Golle Alla tinndinɗe e Kattaɗe Makko, kala mo Alla hawrinndini e Laawol Peewal ko on woni feewuɗo e goonga, on Mo o tertiiɗun e gaayi maggol O majjini mo, a heɓantaa mo walloowo mo no hawrinndina mo e Peewal, o fewna mo e maggal; sabu fewnugol ngol ko e Junngo Alla woni, wonaa e juuɗe makko kanko.

A sikkay ɓe -an ndaaroowo ɓe- ko ɓe finuɓe sabu udditagol gite maɓɓe, ko selli kon kamɓe ko ɓe ɗaaniiɓe, Meɗen waylitira ɓe e nder ɗoyngol maɓɓe ngol tumagoo ñaamo, tumagoo kadi nano, fii wata leydi ndin ñaamu ɓalli maɓɓe ɗin, rawaandu maɓɓe setodundu ndun e maɓɓe hindu focci koyɗe mayru ka damal fammeere nden, sinno a yaltitiino e maɓɓe yi'uɗaa ɓe a huccitayno e maɓɓe dogaa sabu hulugol ɓe, wonkii maa heewayno kulol maɓɓe.

Ko wano Men waɗirani ɓe nii, ko Men jantii kon immorde e hawniiɗi Kattanɗe Amen, Men finndini ɓe ɓaawo dummunne juutuɗo fii yo woɓɓe maɓɓe lanndo woɓɓe fii on dummunne mo ɓe ɓooyi ɗaanaade e mun, woɓɓe maɓɓe jaabii: "En ñiiɓii e nder ɗoygol ñallal maaɗun yoga e ñallal." Woɓɓe e maɓɓe jaabii, o mo feeñanaali ɗun dummunne ñiiɓugol maɓɓe e ɗoyngol: "Ko Joomi mon woni Annduɗo dummunne ñiiɓugol mon ko on ɗaaniiɓe, ɓe fawee e Makko ganndal ɗun jokkee ko ndaari on kon, nulee goɗɗo e mon wonndude e ɗii mbuuɗi mon kaalise ɗoo ka saare me'en woowaande, yo o ndaaru ko hommbo e yimɓe mayre ɓuri laaɓude ñaametee ɓuri laaɓude kadi wonirde, yo o molto ka naatugol saare nden e ka yaltugol nde e ka huuwondiral makko, yo o wonu ƴoƴuɗo, wata o accu gooto annda fii nokkuure mon nden; sabu ko ɗun addata kon immorde e lorra mawɗo."

Pellet, yimɓe mon ɓen si ɓe yaltitii e mon ɓe anndii nokku mon, ɓe wariray on fiɗirgol on kaaƴe, maaɗun ɓe artira on e laawol maɓɓe ɓoyliingol ngol, ngol ngol wonunoɗon e mu'un ko adii Alla Neeminirde on Peewal faade e Goonga kan, si on artii e maggol on maletaake poomaa, wanaa ka ngurndan aduna wanaa ka laahara kadi, ko woni, on hayray e aduna e laahara hayrere mawnde nden sabu ɗalugol mooɗon Diina Goonga ha kan, kan ka Alla Fewni on e mun, artugol mooɗun e ngol laawol ɓuyleengol.

Ko wano Men waɗirani ɓe nii golleeji hawniiɗi tinndinɗi ɗin e Kattan Amen immorde e ɗanningol ɓe duuɓi ɗuuɗuɗi, e finndinngol ɓe ɓaawo ɗun, Men ƴellintini yimɓe saare maɓɓe nden fii maɓɓe, fii yo yimɓe saare maɓɓe nden anndu pellet, Fodoore Alla nden fii Wallugol gomɗinɓe ɓen e Immital ngal ko Goonga, pellet Darngal ngal ko arayngal sikke alaa fii maggal. Tuma nde fiyaake yimɓe fammeere nden huncinoo ɓe maayi yi'unooɓe ɓe ɓen luutondiri fii maɓɓe: Ko honɗun ɓe waɗata e fiyaake maɓɓe on? Fedde goo e maɓɓe wi'i: "Mahee ka dammbugal fammeere maɓɓe maadi wirnayndi ɓe e hiwayndi ɓe, ko Joomi maɓɓe woni Annduɗo lhaali maɓɓe, alhaali maɓɓe on no holli wonnde no woodani ɓe keerore ka Makko. ɓe konngol mun jaɓetee ɓen tawa ɓe alaa ganndal e noddaandu sellundu ɓe wi'i: "Men jogitoto sanne e oo nokku maɓɓe Juulirde fii dewal ka teddinngol ɓe e anndintinnde nokku maɓɓe.

Aray ka wi'a woɓɓe e junpayɓe ɓen fii fillayee maɓɓe gaayi limoore maɓɓe: "Kamɓe ko ɓe tato nayaɓo maɓɓe ko rawaandu maɓɓe ndun." Woɓɓe maɓɓe kadi wi'a: "Kamɓe ko ɓe nayo njowaɓo maɓɓe ko rawaandu maɓɓe ndun, feddeeji ɗin ɗiɗi kala ko ɓe wi'i kon ko ko hawrondiri e sikke maɓɓe ko aldaa e dalil." Woɓɓe maɓɓe kadi no wi'a: "kamɓe ko ɓe njeeɗiɗo njeetataɓo maɓɓe ko rawaandu maɓɓe ndun." Maaku -an Nulaaɗo-: "Ko Joomi an woni Annduɗo limoore maɓɓe, anndaa limoore maɓɓe si wanaa seeɗaaɓe jeyaaɓe e ɓen ɓe Alla anndini limoore maɓɓe." Wata a yeddondir fii limoore maɓɓe, maa tanaa mun e alhaaliiji maɓɓe yimɓe defte ɓen maa tanaa maɓɓe, si wanaa yeddondiral feeñungal ngal luggeendi alaa e mun, ɗun woni raɓɓinɗinoraa wahayu telliiɗo on e maaɗa fii fiyaake maɓɓe on, wata a lanndo gooto e maɓɓe e fensitali fii fiyaake maɓɓe, pellet, kamɓe ɓe anndaa ɗun.

Wata a wi'an -an Nulaaɗo- huunde nde faandiɗaa huuwude ɗun janngo: Min mi waɗay ndee huunde jango; sabu an a anndaa yalli a waɗay nde, maa si heedete hakkunde maa e mayre? dun ko waaju wonanndu ka julɗo.

Si wonaa yowaa gollugol ɗun e Muyɗe Alla, ɗun woni maakaa: "Aray mi huuwa ɗun -si Alla Muuyii- janngo, janto Joomi maa ka maakugol maa: "Si Alla Muuyii -si a yejjetii maakude ɗun- Maaku: "Miɗo jortii nde Joomi an fewnatan mi ko ɓuri ɓadaade immorde e oo fiyaake Peewal e Kawrindinal.

Yimɓe fammeere nden ñiiɓi ka nder fammeere maɓɓe duuɓi teemeɗɗe tati e jeenay.

Maaku: -an Nulaaɗo- ko Alla Anndi emmbere ko ɓe woni ka fammeere maɓɓe, gomɗii O humpitii en dummunne wonugol maɓɓe ton, gooto maraa konngol ɓaawo Daalol Makko ngol Senaade wonanii Mo, ko Kanko tun woodani ko wirnii kon ka kammuuli e ko wirnii kon ka leydi Tagugol e Anndugol, kaawee ko yi'ini Mo O Senike! Kanko hiMo Sutii ka huunde, kaawee ko nanini Mo! Kanko hiMo nana kala huunde. Laatanaaki ɓe gaanin Makko giɗo mono hikkoo e fiyaake maɓɓe, O tawnaali ka Ñaawoore Makko hay e gooto, ko Kanko tun woni teelirɗo Ñaawoore nden.

Janngu -an Nulaaɗo- gollir ko Alla wahayini kon e maaɗa immorde e Alqur'aana, wattitoowo konnguɗi Makko ɗin alaa; sabu kannji ko ɗi fow ko ɗi Goonguɗi Nunɗuɗi, a heɓataa gaanin Makko O Senike fattorde=moolorde nde hiɗa fattoo=moolo e mun, wanaa moolorteeɗo mo hiɗa moolora ɗun si wonaa Kanko.

Tabintin wonkii maa kin e wonndinagol e ɓen noddooɓe Joomi maɓɓe noddaandu dewal e noddaandu toraare ka arannde ñallal e ka sakkitorde maggal, ko a laɓɓinanɗo Mo, wata a yawtin ɓe gite maaɗen, faaleɗaa jooɗodugol e yimɓe anndiraaɓe ngalu e hooreyaagal, wata a tewto on mo Men waɗi ɓernde mun nden welsindii nde e jantagol Men sabu ko men uddi nde kon, sakko o yamire haɗugol ɓilliiɓe ɓen ka mbatu maa, o ardini jokkugol ko welata kon wonkii makko e dow doftagol Joomi makko, golle makko ɗen laatii yeebiiɗe.

Maakan -an Nulaaɗo- ɓee derfuɓe=fijoobe e jantagol Alla sabu welsindaare ɓerɗe maɓɓe: "Ko mi addani on kon ko Goonga, ɗun ko immorde ka Alla wonaa immorde e an, mi jaabotaako ko nodduɗon lan kon e mun fii yo mi raɗo gomɗinɓe ɓen. Kala yiɗuɗo e mo'on gomɗinngol kaa Goonga yo o gomɗin ka, aray ka o weltoroya njoddi mun ndin, kala yiɗuɗo e mo'on yeddugol ɗun yo o yeddu, aray ka o tampiroya lepte habbiiɗe mo ɗen". Menen Men heblanii tooñirɓe ko'e mun ɓen subagol geddi=keefaraagal Yiite mawnge pette magge ɗen no hunnditi ɓe, ɓe hattantaake dogugol nge, si ɓe ɗaɓɓii faaboreede ndiyan sabu sattude ɗonka ka ɓe hawri e mun, ɓe faaboree ndiyan wa'uɗa wa nebban taynaaɗa hattuɗan wulugol, ɗan juɗa geece maɓɓe ɗen sabu sattude nguli, ɗan njaram ɗan ɓe faaboraa ɗun, bonii njaram, ɗan ittataa ɗonka, ko woni ɗan ɓeyday ka, ɗan ñifataa ngen yiite wonnge ñaamude guri maɓɓe, Yiite ngen bonii werde nde ɓe wernetee e mun, e ñiiɓirde nde ɓe ñiiɓata e mun.

Pellet, ɓen gomɗinɓe Alla ɓe golli golleeji moƴƴi ɗin, gomɗii ɓe labinii golle maɓɓe ɗen no woodani ɓe mbarjaari mawndi, Menen Men yeebataa njoddi kala moƴƴinɗo golle, ko woni Men huubinanay ɓe njoddiiji maɓɓe ɗin ko ɗi timmuɗi hara ɗi uytaaka.

Ɓen siforaaɓe gomɗinal ɓe golli golleeji moƴƴi ɗin, no woodani ɓe Aljannaaji ñiiɓal hiɓe ñiiɓa nderton poomaa, canɗi Aljanna weluɗi ɗin no ila ka ley galleeji maɓɓe. Hiɓe cuɗiree nder ton mulle=jawe kanŋe, ɓe ɓornoo conci haakiɗuɗi immorde e ɗewluɗi =hariire e tekkuɗi mun, hiɓe soɓɓindoo e danɗe cuɗiraaɗe wirngallooji=ridooji labaaɗi, mbarjaari maɓɓe ndin moƴƴii, Aljanna on moƴƴii werde e ñiiɓirde nde ɓe ñiiɓata e muuɗun.

Fiyu misal -an Nulaaɗo- fii worɓe ɗiɗo: Keefeero e gomɗinɗo, Men waɗani keefeero on e maɓɓe kamɓe ɗiɗo gese ɗiɗi, Men howiri gese ɗen ɗiɗi daƴƴi tamaro, Men fuɗini ka yannji heneere majje remuruuji.

Ngesa kala rimi ndimɗe mabba immorde e tamaro e inabu e remuru, mba uytaali hay e huunde, ko woni mba okkir ɗun no huuɓiri e no timmiri, Men ilini hakkunde majje caangol fii yarnirgol ɗe no newori.

Laatanii jeyɗo gese ɗen ɗiɗi jawle e dimɗe goo, o wi'ani wonndiiɗo makko gomɗinɗo on tawi himo yewtude mo fii yo o battin e makko ko o hoditiiɗo: "Min miɗo ɓurumaa jawle, miɗo ɓurumaa teddude banŋe e tiiɗude gorol".

Keefeero on naati ka ngesa makko himo wonndi e gomɗinɗo on fii yo o hollu mo mba, tawi himo tooñiri hoore-makko keeferaaku e hawtaare, keefeero on wi'i: "Mi sikkaa mbaa ngasa mba sutiɗaa+ndaarataa ɗoo lannay; sabu ko mi waɗani mba kon e sababuuji heddagol".

Mi sikkaa Darngal ngal waɗay, pellet, ɗa'an ko ngurndan duumiiɗan, si tawii le ngal daroyi si mi immintinaama mi artiraama ka Joomi an, mi heɓay ɓaawo immital ngal ko mi ruttoo e mun, huunde ɓurunde mbaa ngesa an. Wonugol an galo ka aduna ɗoo ɗun no holli nde mi wonoyta galo ɓaawo immital ngal.

Wonndiiɗo makko gomɗinɗo on tawi himo ruttannde mo haala kan o wi'i mo: "Enee a yeddii On Taguɗo baaba maaɗa Aadama e mbullaari, refti O Tagumaa an e maniiyu, refti O waɗumaa neɗɗanke gorko, O fonni tere maaɗen O waɗumaa timmuɗo, awa On Hattanɗo e dow ɗiiɗoo fow ko O Hattanɗo immintinngol ma".

Kono min mi wi'ataa ngool kongol maa ɗoo, anndu ko mi wi'ata: Kanko Alla Senayee wonanii Mo Joomi an Ɓurnirɗo Neemaaji Makko ɗin e amen, mi kafidataa=renndintaa Mo hay e gooto ka Dewal.

Hanno tuma nde naatuɗaa ka ngesa maaɗa wi'aa: "Ko Alla muuyi kon doole alanaa hay gooto si wanna Alla, ko Kanko woni waɗoowo ko O faalaa ko Kanko woni Dolnuɗo, si a wonii ndaara miɗo ɓurumaa ɓillaade e fanɗude ɓiɗɓe.

Min miɗo tijjii nde Alla okkinmi moƴƴore ɓurnde ngesa maa mban, e nde O nulata e ngesa maa mban lepte immorde ka kammu, ngesa maaɗa mban wonta leydi ndi puɗi alaa e mun hara teppe mortoto e mayri sabu ɓowrugol mayri.

Maaɗun ndiyan mabba ɗan ila muta ka nder leydi, hara a hattantaake yottorgol e majjan wallitorkun, si ndiyan mabba ɗan mutii hara heddagol alanaa ɗan.

Ko gomɗinɗo on tijjinoo kon halkuyee=halkaare huuɓiti dimɗe ngesa keefeero on,keefeero on wattini himo waylita newe makko ɗen ka sattude suno e nimse e dow ko o rokki kon jawle fii dankagol mba e moƴƴinngol mba, ngesa mban ko yanumba e hoore tugaale mun, ɗen ɗe calɗi inabuuje ɗen layi hoore mun,himo wi'a: "Ee jalla wonno min,mi gomɗinno Joomi an Kanko Tun, hara mi kafidaano e Makko hay e gooto e jeyaaɓe ɓen.

Laatanaaki oo keefeero jamaa wallooɓe mo immorde e lepte jippiiɗe e makko ɗen, ko kanko non wonnoo wasorde jamaa, kanko o laataaki sakkotooɗo Alla e halkugol ngesa mban.

No e nder nden darorde Ballal Alla ngal Kanko tun, ko Kanko Seniiɗo On woni Moƴƴuɗo mbarjaari wonannde yiɗɓe Makko gomɗinɓe ɓen, ko Kanko sowanta ɓe mbarjaari ndin, e Moƴƴo battane wonannde ɓe.

An Nulaaɗo, piyan ɓen hoditorɓe aduna misal, yeru ngurndan aduna e nattingol mun e yaawude lannude mun ko yeru ndiyan toɓo, ɗan Men jippini ɗun immorde ka kammu, fuɗiri sabu ɗan ndiyan puɗi leydi ndin ɗi ɓenndi, ɗin puɗi wonti heluɗi muncii, keneeli ɗin no ronndoo kuntoy majji naɓira e banŋeeji goo, leydi ndin ruttoo no ndi wonirnoo, Alla yenɗii ko O Hattanɗo e dow kala huunde, huunde ronkintaa Mo, hiMo wurna ko O yiɗi, O re'a ko O yiɗi.

Jawdi ndin e ɓiɗɓe ɓen ɗun no jeyaa e ko cuɗortee ka ngurndan aduna, jawdi alaa nafa ka laahara si wanaa si ndi golliraama e huunde weltinaynde Alla, golle ɗen e konnguɗi yarlaaɗi ɗin ka Alla ɓuri moƴƴude mbarjaari immorde e kala ko woni kon ka aduna e cuɗaaje, ko ɗin ɓuri moƴƴude e ko neɗɗanke on yelotoo ɗun; sabu cuɗaari aduna lannay mbarjaari golle ɗen e konnguɗi yarlaaɗi ɗin ka Alla ko heddotoondi.

Janto ñannde Men ittata pelle ɗen e fudirde majje, a yi'ay leydi ndin ko feeñundi sabu iwugol ko woni kon e hoore mayri immorde e pelle e leɗɗe e maadiiji, Men mooɓa denndaangal tageefooji ɗin, Men accataa hay e gooto e maɓɓe si wanaa Men immintinii mo.

Yimɓe ɓen weeɓitee ka Joomi maa ko ɓe saffeeji O hasba ɓe, wi'anee ɓe: "Gmɗii on arii ka Amen gooto gooto holɓe soliiɓe wano Men tagirnoo on non ka laawol aranol, ko woni, on aaƴino wonnde onon on immintintaake, wonnde Menen Men waɗanaano on jamaanu e nokkuure nde Men yoɓata on e mu'un golleeji mo'on ɗin".

Deftere golleeji nden wallinee, no woodi nanngiroowo deftere mun ñaamo mun ngon, no woodi kadi nanngiroowo nde nano mun ngon, a yi'ay -an neɗɗanke- heeferɓe ɓen ko huluɓe ko woni kon e mayre; sabu kamɓe hiɓe anndi ko ɓe ardini kon e nder mayre immorde e keeferaaku e geddi, ɓi wi'a: "Ee halakuyee amen e nammbara amen! ko heɓi ndee deftere nde accataa ko fanɗi wanaa ko njanɗi e golle amen si wanaa nde limii ɗun nde marii". Ɓe tawa ko ɓe golle kon ka ngurndan maɓɓe aduna immorde e geddi ko winndaaɗun tabintinaa, Joomi maaɗa tooñataa -an Nulaaɗo- hay e gooto, O leptataa hay e gooto ko aldaa e bakkaatu, O ustantaa ɗoftiiɗo on e mbarjaari ɗoftaare makko nden hay e huunde.

Janto -an Nulaaɗo- fewndo Men wi'annoo Malaa'ikaaɓe ɓen: "Sujjanee Aadama sujjannde hiwraango, ɓe fow maɓɓe ɓe sujjani mo ka ɗoftaade Yamaruyee Joomi maɓɓe si wonaa Ibliisa o laatii jeyaaɗo e jinnaaji ɗin o wonaali jeyaaɗo e Malaa'ikaaɓe ɓen, o salii o mawnintinanii sujjugol ngol, o yalti e ɗoftaari Joomi makko. Enee, on jogitoto mo -ko onon yo yimɓe- kanko e ɓiɗɓe makko ɓen yiɗɓe ɓe weldon e mun gaanin An, hara kamɓe ko ɓe añuɓe on. Ko honno jogitorton ayɓe mon ɓen yiɗɓe mon?! Kaanii bonii golle tooñooɓe ɓen ɓen waɗuɓe seytaane giɗo maɓɓe mbattude weldugol e Alla O toowii.

Ɓe'e, ɓe jogitiɗon ɗun yiɗɓe gaanin An, ɓen ko jeyaaɓe yeruuɓe mo'on, Mi hollaano ɓe Tagugol kammuuli ɗin wanaa Tagugol leydi ndin kadi fewndo Mi Tagaynooɗi, ko woni, hari ɓe wonaali woodaaɓe, Mi hollaano yoga maɓɓe kadi Tagugol yoga, ko Min woni Weddorɗo Tagugol ngol e Fewjugol ngol, Mi wonaali kadi jogitotooɗo majjinooɓe ɓen immorde seytanuuji yimɓe e jinna wallooɓe, Min Miɗo Yonndinii e wallooɓe ɓen.

Jantano ɓe -an Nulaaɗo- Ñalnde Darngal tuma nde Alla Daalanta ɓen sirkannooɓe Mo ka aduna: "Noddee kafidaaɓe An ɓen, ɓen ɓe aaƴinoɗon wonnde kamɓe ko ɓe kafidaaɓe An bela-jo'o kamɓe ɓe wallay on, ɓe nodda ɓe ɓe noototaako noddaandu maɓɓe ndun ɓe wallataaɓe, Men waɗa hakkunde rewooɓe ɓen e rewaaɓe ɓen halkorde nde ɓe kafi e mun, ɗun ko Yiite Jahannama.

Sirkooɓe ɓen yi'a Yiite ngen, ɓe yananee hattirde e yananeede wonnde kamɓe ɓe yanay e nder magge, ɓe heɓantaa nge nokkuure nde ɓe sellirta =pirlitorto e mun.

Gomɗii Men ɓannginii Men nooninii e nder ndee Alqur'aanaare Telliinde e dow Muhammadu (yo Alla juulu e makko O hisina mo) ko ɗuuɗi e nooneeji mise fii yo ɓe annditu ɓe waajitoo, kono neɗɗanke on -tentinii keefeero on- himo ɓuri kala huunde nde wennje ɗe aldaa e goonga feeñata e mun.

Heedaali hakkunde heeferɓe sanndalɗiiɓe ɓen e gomɗinngol ko Muhammadu (yo Alla juulu e makko O hisina mo) addi kon immorde e Joomi makko, heedaali hakkunde maɓɓe e ɗaɓɓugol haforaneede junubaaji=bakkatuuji maɓɓe ɗin ka Alla ustagol ɓannginngol. Gomɗii mise ɗen piyanaama ɓe ka nder Alqur'aana, hujjaaji ɓannguɗi ari e maɓɓe, anndu, ko haɗi ɓe ko ɗaɓɓugol -no tiiɗiri- yanugol lepte moftaaji feƴƴuɗi ɗin e hoore maɓɓe, e yi'ugol lepte ɗi ɓe fodaa ɗen.

Men Nuliraali ɓen ɓe Men Nuli immorde e Nulaaɓe Amen si wanaa ko ɓe weltinooɓe yimɓe gomɗinal ngal e ɗoftaare nden, e hulɓinooɓe yimɓe keefeeru ngun e geddi ɗin, alanaa ɓe wurtagol e hoore ɓerɗe ɗen fii fawugol ɗe e hoore Peewal ngal, ɓen yedduɓe Alla e Nulaaɓe ɓen no wennja wonndude e feeñanngol ɓe dalil on, fii yo ɓe ittir meere maɓɓe nden Goonga Tellinaaɗo on e Muhammadu (yo Alla juulu e makko O hisina mo) ɓe watti Alqur'aana on e ko ɓe hulɓiniraa kon samakal e jalnori=jalnirde.

Alaa hay e gooto ɓurɗo sattude tooñe ko foti e on waajuraaɗo Aayeeje Joomi makko ɗen, tawi o haajaaka ko woni kon e nder majje immorde e kammbaa lepte ɗen, o ɗuurii e waajitorgol ɗe, o yejjeti ko o ardini kon ka ngurndan makko aduna immorde e keeferaaku e geddi o tuubaali e majji, Menen Men waɗii e ɓerɗe ɓen ko muurata haɗa ɗe immorde e faamugol Alqur'aana on, e ka noppi maɓɓe kadi pahu gaayi ɗun, ɓe nanataa nde nanɗe jaɓugol, hay si a noddii ɓe e gomɗinal ɓe jaabotaako ko noddataa ɓe kon e mun poomaa fodde no ka ɓerɗe maɓɓe coddu, e ka noppi maɓɓe pahu.

Fii wata Annabiijo on (yo Alla juulu e makko O hisina mo) yollitu faade e ko fennuɓe ɓen hawjirta kon lepte ɗen, Alla Daalani mo: "Ko Joomi maaɗa -an Nulaaɗo- woni Surroowo bakkatuuji jeyaaɓe Makko tuubu6 ɓe ɓen, ko O Jom Yurmeende, nden yaajannde kala huunde, no jeyaa e Yurmeende Makko nden wonnde Kanko O nennanay yedduɓe ɓen bela-jo'o kamɓe ɓe tuubay ɓe ruttoto e Makko, sinndo Kanko O toowii, O leptayno ɓee ɗuuriiɓe O yaccinanayno ɓe lepte ɗen ka ngurdan aduna, kono Kanko ko O Munñiiɗo Yurmiteeɗo, O nennane ɓe lepte ɗen fii yo ɓe tuubu, ko woni, no woodani ɓe nokkuure e jamaanu happaaɗi ɗiɗi ɓe yoɓoyte e mayre keeferaaku maɓɓe ngun e ɗuuragol maɓɓe ngol si tawii ɓe tuubaali, ɓe heɓataa gaanin mayre fattorde nde ɓe fattoo e mun.

Ɗen ca'e yedduɗe ɓadiiɗe on, yeru ca'e yimɓe Huudu e Saalihu e su'aybu Men halkuno ɓe nde ɓe tooñirnoo ko'e-maɓɓe keefeeraaku e geddi, Men waɗani halkugol ɓe ngol waqtu happaaɗo.

Janto -an Nulaaɗo- nde Muusaa (yo o his) maakanno kurkaadu makko ndun Yuusa'u geɗal Nuun: "Mi seerataa miɗo yaha haa mi hewta fottirde maaje ɗen ɗiɗi, maaɗun mi yaha jamaanu juutungu haa mi fotta e jeyaaɗo moƴƴuɗo on, mi jannga e makko.

Ɓe yahi, nde ɓe hewtoynoo fottirde maaje ɗen ɗiɗi ɓe yejjiti linngii maɓɓe ngii, ngin ngi ɓe jogitii ɗun njooɓaari maɓɓe, Alla wurniti linngii ngii, ngii jogitii laawol ka maayo yeru wuddere, ndiyan ɗan heewataa e mun.

Tuma nde ɓe hewtoynoo nden nokkuure, Muusaa (yo o his) maakani kurkaadu makko ndun: "ɓannanii en soƴƴaari ndin, gomɗii en hawrii immorde e ndu'u yaadu men tampere sattunde.

Suka on wi'i: "A yi'ii ko waɗi kon fewndo sorunoɗen ka fetere?! Min mi yejjituno anndintinngol ma fii linngii ngin, yejjintinaali lan anndintinngol ma fii maggin si wonaa Seytaane, gomɗii linngii ngin wuuritii, laawol waɗanaa ngin ka maayo hingii yahira no hawnori.

Muusaa (yo o his) maakani kurkaadu makko ndun: "ko ɗon ko faalaɗen kon woni, ko ɗun woni maande nokkuure jeyaaɗo moƴƴo on, ɓe yiltitii hiɓe jokka batte teppe maɓɓe ɗen; fii wata ɓe majju laawol ngol haa ɓe hewtoya ka fetere, immorde ɗon haa ka naatirde linngii ngin.

Tuma nde ɓe hewtoynoo nokku ka ɓe hattii linngii ngin ɗon, ɓe tawi ɗon jeyaaɗo immorde e jeyaaɓe Amen moƴƴuɓe, (on ko Khadiru, yo o his) Men Okkii mo Hinnayee immorde e Amen, Men anndini mo immorde e Amen Ganndal yimɓe ɓen ƴellitaaki e maggal, ko ɗun oo fillayee ɗoo mofti.

Muusaa maakani mo e hoore yankinaare e newaare: "Enee a accay mi jokke fii yo a anndinan yoga e ko Alla anndin maa e Ganndal ngal kañun ko Peewal faade e Goonga kan?

Khadiru maaki: "Pellet, an a waawataa munñaande e kon ko yi'ataa ɗun immorde e ganndal an; sabu ɗun hawrondiraa ko woni kon ka maaɗa immorde e ganndal.

Ko honno munñurtaa e dow ɗun ko yi'ataa e golleeji ɗin ɗi a anndaa senngo feewungo ngon e majji; sabu an ko ñaawirtaa e majji ko emmbere ganndal maa ngal?

Muusaa maaki: "Si Alla Muuyii, a taway lan ko mi munñiiɗo e dow ko mi yi'ata kon immorde e maaɗa e golleeji, ko mi tabituɗo e doftagol ma, mi yeddataa yamaruyee maa mo yamirɗaa mi ɗun".

Khadiru maakani Muusaa: "Si a jokkay lam, wata lanndo lam fii huunde e ko yi'ataa kon miɗo waɗa haa tawa ko min woni fuɗɗotooɗo on ɓannginngol kene mayre".

Tuma nde ɓe fottanno e ɗum, ɓe yahi ka fonngo maayo haa ɓe hawri e laana, ɓe bakii e makka ɓe yoɓaali sabu teddinngol Khadiru, Khadiru tufiri laana kan ɓurugol peccal e pecce makka, Muusaa maakani mo: "A tufii laana kan, kan ka yimɓe mun baki en e nder mun ko aldaa e yoɓugol, tijjagol ka yoolay yimɓe makka ɓen?! Gomɗii a addii fiyaake mawɗo".

Khadiru maakani Muusaa: "Enee mi wi'aano: pellet, an a hattantaake muñal wonndugol e an e ko yi'ataa kon immorde e am".

Muusaa (yo o his) maakani Khadiru: "Wata a nanngitiran sabu ɗalirgol an aadi maa ndin gejji, wata a ɓittinanan sattinaa ka wonndinagol e ma'a.

Ɓe hucciti ɓaawo jippagol maɓɓe ka laana hiɓe yaha ka fonngo, ɓe yi'i suka mo hellifaaka no fijida e sukaaɓe, Khadiru wari mo, Muusaa maakani mo: "E a waru wonkii laaɓuki ki hellifaaka ki aldaa e bakkaatu woo?! Gomɗii a addii muraadu añaandu!".

Khadiru wi'ani: Mussaa (yo o his): Min hari mi wi'iino ma: "pellet, an -Muusaa- a hattantaake muñal e dow fiyaake ko mi waɗata kon".

Muusaa (yo o his) maaki: "Si mi lanndike fii huunde ɓaawo ngol laawol ɗoo haray seedu e an, haray gomɗii a hewtii e nokku mo ngantu mo accata fii wonndugol e an; sabu lunndagol an yamiroore maaɗa laabi tati.

Ɓe yahi haa ɓe hewti e yimɓe saare ɓe ɗaɓɓiri yimɓe mayre ɓen ñaametee, yimɓe saare nden salii ñamminngol ɓe, e tottugol e maɓɓe hakkee wernugol, ɓe tawi ka saare maade woñiindi ɓattii-ndi yanugol yirba, Khadiru wurti ndi haa ndi feewi, Muusaa (yo o his) maakani Khadiru: "Sinno a yiɗii ƴittugol njoddi fii moƴƴintingol ndi a ƴettayno ɗum; sabu katonnjinal me'en e ɗum ɓaawo salagol maɓɓe wernugol en.

Khadiru maakani Muusaa: "Ngool falagol ɗoo sabu anngal ƴettugol njoddi fii wurtugol maadi ndin ko ɗum woni nokku seedigal ngal hakkunde an e ma'a, aray mi humpite firo kon ko a hattananooka munñaade e dow mun e ko yi'uɗaa kon miɗo waɗa ɗum.

Si ko kan laana ka yeddirɗaa mi sabu yulugol ka; hari ka wonanii lo'uɓe hiɓe gollera ka ka maayo ɓe hattantaake hiwugol ka, mi faalaa ko mi waɗi kon e makka yo wontan ka ayyibe; fii wata halor ka lamɗo wonɗo yeeso maɓɓe on, on jaɓtoowo kala laana moƴƴuka e junngo jom makka, o ɗala kala laana wonnduka e ayiiibe.

Si ko on suka mo yeddirɗaa lam sabu warugol mo neene makko e baaba makko laatike gomɗimɓe, tawi kanko e Ganndal Alla ko o keefeeru, men huli si o hellifaama wata o ukkuɓe e yeddugol Alla e bewre sabu fantude giggol maɓɓe e makko, maaɗun sabu fantude katojinal maɓɓe e makko.

Men faalaa yo Alla lontinanɓe ɓiɗɗo ɓurɗo mo moƴƴude Diina e laaɓal immorde e bakkaatu, e ɓurɗo ɓadaade yurmeende jibinɓe ɓen ɗiɗo.

Si ko ndin maadi ndi mi moƴƴontini ɗum yedduɗaa mi e moƴƴintingol ndi, ko fii cukaloy ɗiɗo koy baaba mun maayi no ka saare nde aruɗen e mu'un, tawi jawdi no iranaa koy ka ley maadi, baaba koy cukaloy ɗiɗoy laatino neɗɗo moƴƴo, Joomi maaɗa faalaa -an Muusaa- yo ɓe mawnu ɓe hewtu duuɓi peewal, ɓe yaltina jawdi maɓɓe iraandi ndin ka ley maadi; sinno maadi ndin yanuno jooni jawdi maɓɓe ndin yaltitayno ndi weeɓitanoo yeebagol, ndee eɓɓoore ɗoo laatike Yurmeende immorde ka Joomi maa nde O Yurmaaɓe, mi waɗiraali ɗum immorde e tinnaare am, ɗum ko firo ko a hattanaaka munñaade e dow mun kon.

Sirkooɓe ɓen e Alyahuuda en no lanndaade ma -an Nulaaɗo- e ndarndagol fii kumpital jom gaLlaaɗi ɗin ɗiɗi, maaku: "Arma mi janngana on seeɗa e kumpital fii makko ko taskoron ɗum waajitoɗon".

Menen Men weeɓinanii mo ka leydi, Men Jonni mo e kala huunde nde o ɗaɓɓata laawol hewtinayngol mo e faandaare makko.

O nanngi ko Men Okki mo kon immorde e laawi fii hewtugol e ɗaɓɓaande makko, o sutori hirnaange.

O yahi ka leydi haa o hewti ka hattirde leydi ndin ka hella mutirde naange, o yi'i nge awiima kannge hinge muta e caangol wulungol wonndungol e loope ɓaleeje, o tawi ka mutirde naange ngen yimɓe heeferɓe, Men wi'ani mo e hoore suɓinngol mo: "Ko an yo jom galaaɗi ɗiɗi, ko si a leptiray ɓee warugol maa tanaa mun, maaɗun si a moƴƴoto e maɓɓe.

Jom gallaaɗi ɗin ɗiɗi wi'i: "Si tawii ko on sirkanɗo Alla o deppitii(doonii) e sirku ngun ɓaawo men noddii mo e dewal, men leptiray mo ka aduna warugol, refti o ruttoo ka Joomi makko Ñalnde Darngal O Lepta mo Lepte hulɓiniiɗe".

Si tawii ko on gomɗinɗo e maɓɓe Alla o golli ko moƴƴi no woodani mo Aljanna; njoɗdi immorde ka Joomi makko sabu gomɗinal makko ngal e golle makko moƴƴe ɗen, aray Men wi'ana mo e fiyaake Amen ko wonndi e newaare.

Refti o jokki laawol tanaa laawol makko aranol ngol ko o fewtirɗo hella funnaange.

O yahi haa nde o hewtoynoo e nokkuure nde naange ngen ƴellitotoo e mun, o tawi naange ngen no ƴellitoo e dow yimɓe Men waɗanaali ɓe gaanin naange ngen ko hiwata ɓe wano cuuɗi e ɗowdiiji leɗɗe.

Ko wano nii fiyaake jom gallaaɗi ɗin ɗiɗi, gomɗii o fiiltiima ganndal e fennsitale ko woni kon ka makko e doole e laamu.

Refti o jokki laawol tanaa laawi arani ɗin ɗiɗi ko o falorɗo hakkunde funnaange e hirnaange.

O yahi haa o hewti yolnde hakkunde pelle ɗiɗi, o tawi fewndo mayre yimɓe ɓe meeɗaa faamude haala woɓɓe goo.

Ɓe wi'i: "Ko an Julqarnayni, pellet, Yaajuuja e Maajuuja (ɓen ko moftaaji ɗiɗi mawɗi e ɓiɗɓe Aadama) hiɓe bonirde ka leydi ko ɓe woni waɗude kon immorde e warngo e tanaa mun. Taw si men waɗante jawdi fii yo a waɗu hakkunde e maɓɓe heedo?"

Julqarnayni wi'i: "Ko Joomi am arsiki lam kon e laamu e doole ɓuri moƴƴannde lam diini gaa ko jonnoton lam e jawdi, walliree lam worɓe e aalaaji mi waɗa hakkunde mo'on e maɓɓe heedo".

Addee kunte njamɗe, ɓe addi ɗum o nanngi mahirgol ɗe hakkunde pelle ɗen ɗiɗi, haa nde o feppindirirnoo hakkunde majje maadi makko ndin o wi'ani gollooɓe ɓen: "Huɓɓinee yiite e dow ɗe'e kunte, haa nde kunte njamɗe ɗen wojjunoo o wi'i: "Addee sila mi yuppa e dow mun.

Yaajuuja e Maajuuja hattantaake ƴawugol e hoore maadi ndin sabu toowugol mayri, ɓe hattantaake kadi tufugol ka ley mayri sabu yoorugol mayri.

Julqarnayni wi'i: "Ngoo heedo ko Yurmeende immornde ka Joomi am nde no heeda hakkunde Yaajuuja e Maajuuja e bonnugol ka leydi, ngo haɗa ɓe e ɗum, si waqtu mo Alla happi on fii yaltugol maɓɓe ado dargol Darngal ngal arii O wattinay ngo feppondirngo e leydi ndin, Fodoore Alla nden fii feppindirgol ngo e leydi ndin e yaltugol Yaajuuja e Maajuuja laatike ko tabituɗum lurral alaa e mu'un".

Men acca woɓɓe e tagu ngun ka sakkitoode jamaanu ngun no ukkondira jillondira e woɓɓe, alaadu ndun wuttee Men mooɓi tagu ngun kala maggu fii hasboore nden e njoɓde ndin.

Men fenñinanay Jahannama yedduɓe ɓen fenñinngol ngol aldaa e jiɓayee fii yo ɓe seedo nge gite.

Men fenñinana nge yedduɓe ɓen, ɓen laatinooɓe ko bumɓe e jantagol Alla ka aduna; sabu ko woni kon ka gite maɓɓe e wirngallo haɗayngo ɗum, ɓe laatii ɓe hattantaake nanugol Aayeeje Alla ɗen nanɗe jabugol.

Enee ɓen yedduɓe Alla sikku ɓe waɗay jeyaaɓe Am ɓen immorde e Malaa'ikaaɓe e Nulaaɓe e Seytanuuji reweteeɓe gaanin Am?! Menen Men heblanii Jahannama fii yedduɓe ɓen galle fii werde maɓɓe.

Maaku -an Nulaaɗo-: "Taw si men humpitay on -ko onon yo yimɓe- ɓurɗo mawnude yimɓe ɓen hayrere ka golle makko?

Ɓen yi'ayɓe Ñalnde Darngal wonnde golle maɓɓe ɗe ɓe wonnoo gollude ɗen ka aduna ɗe yeebike, hari kamɓe hiɓe sikka hiɓe moƴƴinnde ka golle maɓɓe,ɗum non no lunndii goonga kan.

Ɓen, ko kamɓe woni yedduɓe ɓen Aayeeje Joomi maɓɓe tinndinɗe e ngootimbaaku, ɓe yeddi kadi hawrugol e Makko, golle maɓɓe ɗen boniri sabu yeddugol maɓɓe ɗum, laatanoytaako ɓe Ñalnde Darngal geɓal ka Alla.

Ndin joɓdi maranaandi ɓe ko Jahannama; sabu yeddugol maɓɓe Alla, e jogitagol maɓɓe Aayeeje Am jippinaaɗe ɗen e Nulaaɓe Am ɓen jalnori.

Pellet, ɓen gomɗimɓe Alla ɓe golli golle moƴƴe ɗen laatanoyto ɓe ka ɓuri toowude e Aljannaaji ɗin werde sabu teddinngol ɓe.

Ko ñiiɓooɓe nder ton poomaa, ɓe ɗaɓɓataa gaayi makko waɗtitugol; sabu kanko njoɓdi ɓadotaako mo.

Maaku -an Nulaaɗo-: "Pellet, Daaluyeeji Joomi am ɗin ko ɗuuɗuɗi, sinno maayo ngon laatanino ɗi ndawa ka winndireeɗi diyam maayo ngo lannayno ko adii Daaluyeeji Makko ɗin lannude Senaande wonanii Mo, sinno en addiino kadi maaje goo, ɗen kadi lannayno".

Maaku: -an Nulaaɗo-: "Min dey, ko mi ɓanndinke yeru mo'on, no wahayinaa e am wonnde Rewetee- ɗo mon On ka Goonga ko O Rerweteeɗo gooto kafidaaɗo(denndadiijo) alaanaa Mo, ko Kanko woni Alla, kala tawɗo no huli hawroydi e Joomi mu'un yo o gollu golle hawrondirɗe e Sari'a Makko on, ko o laɓɓinanɗo ɗe Joomi makko, wata o kafidu e Dewal Joomi makko hay e gooto".

(Kaaf Haa Yaa Ayiin Saad) hari yewtanooma fii yeru majje ka fuɗɗoode Simoore Albaqara.

Ɗum ko jaŋta Yurmeende Joomi maaɗa nde O yurminiri jeyaaɗo Makko on Jakariyaa (yo o his), Meɗen fillanomaa fii taskagol nde.

Tuma nde o noddunoo Joomi mako O Senike noddaandu suuɗiindu fii yo ndu laato ɓurndu ɓadaade jaabagol

O maaki: "Ko An Jooma, min dey ƴi'e am ɗen lo'ii, puri hoore am nden ɗuuɗii, mi wonaali sooyuɗo ka toragol Ma, ko woni, tuma kala mi toriMaa A jaabinanay lam.

Min dey mi hulii ɓadondiraaɓe am ɓen fii wata ɓe ronku daranaade Diina kan ɓaawo mayde am sabu soklirdeɓe aduna, sonnaajo am on kadi laatike dimaro o jibintaa, okkan immorde ka Maaɗa ɓiɗɗo walloowo.

O rona Annabaaku ngun e am o rona ngu kadi e ɓeynguure Yaaquuba nden (yo o his),o waɗu mbo ko An yo Jooma- weltoraaɗo ka Diina makko e ka njikku makko e ganndal makko.

Alla jaabini toraare makko nden, O noddi mo: "Ko an Jakariyaa, Menen Meɗen humpitude ma ko weltinay maa, gomɗii Men jaabinii toraare maaɗa nden, Men okkii ma suka innde makko ko Yahyaa, Men waɗanaali goɗɗo goo ado makko ndee innde".

Jakariyaa maaki tawi ko o haawiiɗo kattanɗe Alla ɗen: "Ko honno jibinirantee lam ɓiɗɗo sonnaajo am on ko dimaro o jibintaa? gomɗii mi hewtirii hattirnde ngurndan ɗan sabu nayewu ngun e lo'ude ƴi'e ɗen.

Malaa'ikaajo on wi'i: "Fiyaake on kono mi wi'iri non, fii kala sonnaajo maa on jiidotaako, an kadi a hewtii hattirde ngurndan ɗan sabu nayewu ngun e lo'ere ƴi'e ɗen, kono Joomi maaɗa Daalii: Tgugol Joomi maaɗa Yahyaa immorde e neeniraawo dimaro e baabiraawo hewtuɗo hattirde ngurndan ɗan ko newiiɗum, gomɗii Mi Tagiino ma -an Jakariyaa- ko adii ɗum hari a laataaki huunde jaŋteteende, sabu hari an ko a waasaaɗo.

Jakariyaa maaki (yo o his): "Ko an yo Jooma, waɗanam maande nde miɗo deeƴira sabu mun hara hinde tinndini e gasugol ko Malaa'ikaajo on weltiniri lam kon". O Daali: "Maande maaɗa e gasugol ko weltiniraɗaa kon ko nde tawi a hattan-hattantaake wowlidude e yimɓe ɓen balɗe tati hara wanaa ñaw, ko woni, hara hiɗa wonndi e cellal e aafiya".

Jakariyaa yalti ka juulirde o acci yimɓe makko ɓen, o joopanii ɓe ko aldaa e haala: "Subuhinanee Alla Seniiɗo On ka arannde ñallal e ka sakkitoode maggal.

Yahyaa jibinanaa mo, tuma nde o hewtunoo duuɓi yewtideede Men wi'ani mo: "Ko an yo Yahyaa, jogitor Tawreeta on soobee e tinnaare, Men Okki mo ganndal e faamu e soobinaare e pellital tawi ko duuɓe suka o jogii.

Men Yurmini mo Yurmeende immrnde ka Amen, Men laɓɓini mo e junuubu, o woni kuldo Alla ɗoftiiɗo Yamaruyee Alla on, himo woɗɗitoo haɗaaɗi Makko ɗin.

O laatike ɗigganɗo yumma makko e bem makko, newaniiɗo ɓe, moƴƴotooɗo e maɓɓe, o laataaki mawnintinaniiɗo ɗoftagol Joomi makko maa ɗoftagol neene e baaba, o wonaa yedduɗo Joomi makko maa yumma makko e bem makko.

Kisiyee e hoolaare immorde ka Alla wonii e makko ñalnde o jibinaa, e ñalnde o maayata o yalta e ɗaam ngurndan ɗoo, e ñalnde o immintintee ko o wuuruɗo ɗun ko Ñalnde Darngal, e ɗii nokuuli tati ko ɗin ɓuri wulɗinnde e ko neɗɗanke rewata e mun, si o hoolike e ɗii, haray kulol fawaaki mo e nokkuuli goo.

Jaŋto -an Nulaaɗo- ka Alqur'aanaare Tellinaande e maaɗa kumpital fii Mariyama (yo o his) tuma nde o pottitinoo(deestino) yimɓe makko ɓen, o weddii e nukkuure hikkornde funnaange maɓɓe.

O jogitanii hoore-makko gaanin yimɓe makko ɓen heedo wirnayngo mo haa tawa ɓe yi'ataa himo rewa Joomi makko, Men Nuli e makko Jibrila (yo o his), o nanndintinanii mo e mbaadi neɗɗanke timmuɗo tagu, [Mariyama] huli wata taw ko faalaaɗo waɗude mo ko boni.

Tuma nde o yi'unoo mo e mbaadi neɗɗanke timmuɗo tagu himo fewti e makko, O maaki: "Min miɗo fattoo Yurmiteeɗo On immorde e maaɗa fii bone immorɗo e maaɗa wota hewtam -ko an o'o - si a laatike hiɗa hula Alla.

Jibrila (yo o his) wi'i: "Min mi laataaki ɓanndinke, anndu min ko mi Nulaaɗo Joomi maaɗa O Nulii lam e maaɗa fii yo mi okke ɓiɗɗo moƴƴo laaɓuɗo.

Mariyama maaki ko o haawiiɗo: "Ko honno woni- ranta lam ɓiɗɗo hara ɓadaaki lam genndo wanaa tanaa mun, mi laataaki kadi jeenoowo sakko mi heɓa ɓiɗɗo?!"

Jibriila wi'ani mo: "Fiyaake on ko wano mi jaŋtori non, fii kala gorko meemaali ma wanaa tanaa mun a laataaki kadi jeenoowo, kono Joomi maaɗa Senayee woananii Mo O Daalii: "Tagugol ɓiɗɗo mo alaa baaba no newii e Makko, fii yo ɓiɗɗo mo okkaɗaa on laato maande wonannde yimɓe ɓen e Kattanɗe Alla, e Yurmeende Amen e maaɗa e kala gomɗimɗo mo, Tagugol ɓiɗɗo maa on laatike Ñaawoore immornde ka Alla eɓɓaande, winndaa- nde ka Alluwal Reenaangal".

O roondii mo ɓaawo wuttugol Malaa'ikaajo on, o pottitodi=deesti e makko faade e nokkuure woɗɗitiinde yimɓe ɓen.

Ŋata on fiɗi mo, sornoyi mo e mbinnde tamarohi, Mariyama (yo o his) wi'i: "Ee hara nun mi maayuno ko adii ngal ñallal, mi wona huunde nde anndite-taake fii wota mi sikkitore bonke".

Iisaa noddi mo ka ley koyɗe makko: "Wata a suno, gomɗii Joomi maaɗa waɗii ley maaɗa ilol ndiyam ngol yaarataa e mun"

Jogito jullere tamarohi kin dimmbaa nde, nde saama ɓennduɗe ɗaati teɓaaɗe e fewndo mun.

Ñaamu e ɓennduɗe, yaraa ndiyam ɗam, weltinir wonkii kin sanfaajo(cukulel) maa on wata a suno, si a yi'ii goɗɗo e yimɓe ɓen o lanndimaa kumpital fii sanfaajo on wi'an mo: "Min dey mi waɗɗinii e wonkii am fii Joomi am deƴƴere gaayi haala, hannde mi yewtidataa gooto e yimɓe ɓen.

Mariyama ardi e ɓiɗɗo makko on ka yimɓe makko ɓen himo tammbii mo, yimɓe makko ɓen wi'ani mo e hoore añugol: "Ko an yo Mariya, gomɗii a addii fiyaake mawɗo fefindaaɗo, nokku ka arduɗaa e ɓiɗɗo ko aldaa e baaba".

Ko an yo nanndo Haaruuna ka dewal (on ko gorko moƴƴo) baaba maaɗa wonaali jeenoowo, neene maaɗa kadi wonaali jeenoowo, an ko a iwdi suudu laaɓundu anndiraandu moƴƴugol, ko honno addirtaa ɓiɗɗo mo alaa baaba.

O sappii ɓiɗɗo makko on Iisaa (yo o his) tawi himo ka wooforndu, yimɓe [Mariyama] ɓen wi'ani mo hiɓa haawoo: "Ko honno men yewtirta e boobo woofaaɗo?!"

Iisaa (yo o his) maaki: "Min dey ko mi jeyaaɗo Alla, O Okkii lam Linnjiila, O Waɗi lam Annabaajo immorde e Annabaaɓe Makko.

O Waɗi lam heewuɗo nafa wonannde jeyaaɓe ɓen nokku kala ka mi laatii, O Yamiri lam tottugol Julde nden e Jonnugol Jakka on juudde ngurndam am.

O Waɗi lam ɗigganɗo Yumma am, O Waɗaali lam mawnintinaniiɗo doftagol Joomi am, wanaa mi yeddoowo Mo.

Hoolaare e [bone] Seytaane e wallooɓe mo ɓen wonii e am ñalnde mi jibinanoo e ñalnde mi maayata e Ñalnde mi immintintee ko mi wuuruɗo Ñalnde Darngal, Seytaane foppaaki lam e nder ɗii nokkuuli tati wulɗinɗi(njeewdi.)

On siforaaɗo ɗin sifaaji ko kanko woni Iisaa geɗal Mariyama, kaa haala ɗoo ko ɗum woni konngol Goongawol ngol e mu'un, wanaa ko majjuɓe ɓen wi'ata kon, ɓen sikkitotooɓe e fiyaake makko ɓe luutondira.

Haananaa Alla nde O jogitotoo ɓiɗɗo, O Laaɓii gaayi ɗum O Senike, si O faandike huunde, pellet, yonay Mo Senayee wonanii Mo nde O Daalanta nden huunde: "Wonu", nde wona feere alaa, ko nii O woniri Kanko ko O Seniiɗo e gaayi ɓiɗɗo.

Pellet, Alla Senayee wonanii Mo ko Kanko woni Joomi am, ko Kanko kadi woni Joomi mo'on, laɓɓinanee Mo Dewal ngal Kanko Tun, ɗum ko mi jaŋtanii on ko ɗum woni Laawol Focciingol ngol yottinayngol e Welayee Alla.

luutrii luutruɓe ɓen fii fiyaake Iisaa (yo o his) ɓe luutondiri ɓe wonti feddeeji sertuɗi e hakkunde yimɓe makko, yoga maɓɓe gomɗini ɓe wi'i: "Ko o Nulaaɗo" woɗɓe goo yeddi mo wano Alyahuuda en, wano fedde goo yeewiri non e fii makko woɗɓe maɓɓe wi'i: "Ko Kanko woni Alla". Woɗɓe goo kadi wi'i: "Ko o ɓiɗɗo Alla". Alla Toowii gaayi ɗum, bone wonanii ɓen luutondirɓe e fii fiyaake makko e taweede Ñalnde Darngal Mawngal sabu ko woni e maggal e seedafuyeeji e Hasboore e Lepte.

Kaawee ko nanirta wa maɓɓe nden ñalnde kaawee ko yi'irta wa maɓɓe, ɓe nanii fewndo nanɗe nafataa ɓe, ɓe yi'ii fewndo giiɗe nafataa ɓe, kono tooñooɓe ɓen ka ngurndan aduna hiɓe e nder majjere ɓanngunde gaayi Laawol Focciingol ngol, ɓe alaa heblanaade Laakara on haa o ara e maɓɓe e juhayee hara kamɓe hiɓe e hoore tooñe maɓɓe ɗen.

Hulɓinir -an Nulaaɗo- yimɓe ɓen Ñalnde Nimse tuma nimsata bonnuɗo on e hoore bonnere makko nden, moƴƴinɗo on kadi [nimsa] anngal hibbingol makko ɗoftaare nden, tuma nde ɗeri dewal ngal taggaa, hasboore maɓɓe nden timmi, gooto kala hikkondiri e ko o ardinnoo kon, hari kamɓe ka ngurndam maɓɓe aduna ko ɓe hoditorɓe ɗam, ko ɓe welsindiiɓe fii Laakara, toode kamɓe ɓe gomɗinaano Ñalnde Darngal.

Menen, ko Menen woni heddotooɓe ɓen ɓaawo re'ugol tagoore nden, Men rona leydi ndin, Men ronira kadi ɓen wonuɓe e hoore mayri re'ugol ɓe e heddagol Amen ɓaawo maɓɓe, e Jeyal Amen e maɓɓe, e firlitorgol Amen e maɓɓe no Men Yiɗiri, ko ka Amen Menen Tun ɓe ruttoytee Ñalnde Darngal fii Hasboore e Njoɓdi.

Jaŋto -an Nulaaɗo- ka Alqur'aanaare Tellinaande e maaɗa kumpital fii Ibraahiima (yo o his), pellet, konko o laatino heewuɗo Goonga e Goonginngol Aayeeje Alla ɗen, ko o Annabaajo kadi immorde ka Alla.

Tuma nde o maakannoo baaba makko Aajara: "Ko an yo baaba; ko honɗun rewantaa gaanin Alla sanamuuru ndu nanataa noddaandu maaɗa ndun si a noddii ndu, ndu yi'ataa dewal maaɗa ngal si a rewii ndu, ndu ittantaa ma lorra, ndu pooɗantaa ma nafa.

Ko an yo baaba, min dey gomɗii arii e am immorde e Ganndal e laawol wahayu ko araali e maaɗa, jokkam mi fewne e Laawol Focciingol.

Ko an yo baaba, wata a ɗofto Seytaane rewaa mo, pellet, Seytaane laatike yedduɗo Hinnorante, nokku ka O Yamirnoo mo sujjanngol Aadama o sujjaali.

Ko an yo baaba, min dey miɗo huli wata Lepte heɓe immorde ka Hinnorante si a maayii e hoore keeferaaku maa ngun, laatoɗaa ɓadiiɗo Seytaane ka Lepte sabu weldigal maaɗa e makko.

Aajara wi'ani ɓiɗɗo makko on Ibraahiima (yo o his): "Enee, an Ibraahiima a ɗuuroto ɗii sanamuuji am ɗi mi rawata?! pellet, si a tertaaki yennugol sanamji am ɗin mi fiɗirte kaaƴe, seedu e am jamaanu juu-tungu wata a yewtam, wata a wonndu e am.

Ibraahiima (yo o his) maaki: "Kisiyee e maaɗa immorde e am, a heɓataa ko mettaymaa ko iwri e am, mi toranto ma haforaneede e peewal ka Joomi am, pellet, Kanko O Senike ko O heewuɗo Newanaade lam.

Mi seeda e mo'on mi seeda kadi e ɗin reweteeɗi mon ɗi rewoton ɗum gaanin Alla. Mi toroo Joomi am Kanko Tun mi kafidataa Mo e huunde, no gasa O salantaako lam si mi torike Mo, mi laatoo malkisaaɗo sabu toragol Mo.

Tuma nde o accidunooɓe e reweeteeɗi maɓɓe ɗi ɓe woni rewude ɗin gaanin Alla, Men lontinani mo e hattagol yimɓe makko ɓen Men Okki mo ɓiɗɗo makko on Ishaaqa, Men Okki mo taniraawo makko on Yaaquuba, Men waɗi gooto kala e maɓɓe Annabaajo.

Men Okki ɓe e Yurmeende Amen wonndude e Annabaaku ngun moƴƴere ɗuuɗunde, Men waɗani ɓe mantoore moƴƴere jokkondirnde e ɗenɗe jeyaaɓe ɓen.

Jaŋto -an Nulaaɗo- ka Alqur'aanaare Tellinaande e maaɗa kabaaru fii Muusaa (yo o his), kanko o woniino Suɓaaɗo Siiwaa, o woniino kadi Nulaaɗo Annabaajo.

Men noddi mo ka senngo ñaamo fello ngon wonnannde nokkuure Muusaa nden (yo o his), Men ɓanni mo gunndeteeɗo, nokku ka Alla nanini mo Daalol Makko ngol.

Men Okki [Muusaa] -immorde e Yurmeende Amen e Neeminngol Amen e makko- musiɗɗo makko on Haaruuna (yo o his); ka jaabinngol toraare makko nden fewndo o torinoo Joomi makko ɗum.

Jaŋto -an Nulaaɗo- ka Alqur'aanaare Tellinaande e maaɗa kumpital fii Ismaa'iila (yo o his), kanko o woniino Goonguɗo fodoore, o fodataa fodoore si wonaa o humnii ndi, o woniino kadi Nulaaɗo Annabaajo.

O laatino himo yamira yimɓe makko ɓen ñimnugol Julde nden, e tottugol Jakka on, o laatino kadi ka Joomi makko weltoraaɗo.

Jaŋto -an Nulaaɗo- ka Alqur'aanaare Tellinaande e maaɗa kumpital fii Idriisa (yo o his), pellet, kanko o laatino heewuɗo Goonga e Goonginngol Aayeeje Joomi makko ɗen, o laatino kadi Annabaajo jeyaa- ɗo e Annabaaɓe Alla ɓen.

Men ɓanti jaŋta makko on sabu ko Men Okki mo kon immorde e Annabaaku, o laatii toowuɗo darja.

Ɓen jaŋtaaɓe e nder ndee simoore, joŋi e Jakariyaa joofi e Idriisa (yo ɓe his), ko ɓen woni ɓen, ɓe Alla Neeminiri e mu'un Annabaaku ka ɓiɗɓe Aadama (yo o his), e ɓiɗɓe ɓen ɓe Me njol-nunoka laana e bibbe Ibhiima e ɓiɗɓe Yaaquuba (yo ɓe his), e ɓen ɓe Men hawrinndiniri peewal faade e Lislaamu, Men Suɓi ɓe Men waɗi ɓe Annabaaɓe, ɓe laatinoke si ɓe nanii Aayeeje Alla ɗen no janngee ɓe sujjanay Alla ko ɓe wullooɓe sabu kulol Makko.

Aroyi ɓaawo ɓee Annabaaɓe Suɓaaɓe ɗoo, [woɓɓe goo] jokkuɓe bone e majjere, ɓe yeebi Julde nden, ɓe addiraali nde no haaniri non, ɓe waɗɗitii ko wonkiiji maɓɓe ɗin lokaa kon e geddi ɗin wano jeeno, aray ɓe hawroya e bone e taƴaare ka Jahannama.

Si wonaa on tuubuɗo immorde e raɓɓinɗinaare makko e fantingol makko, o gomɗini Alla o golli golle moƴƴe, ɓen sifaaɓe ɗii sifaaji ɗoo ɓe naatoya Aljanna on, hara ɓe uytantaake hay e huunde e njoɓdi golle maɓɓe ɗen, hay sinno fanɗii.

Aljannaaji ñiiɓal, ɗin ɗi Hinnorante Fodi jeyaaɓe Makko moƴƴuɓe ɓen ka wirnii wonnde O naaday ɓe e nder majji, kamɓe ɓe yi'aali ɗi kono ɓe gomɗinii ɗi, Alla Fodii Aljanna on -fii kala ko o wirniiɗo- o aray feere woo alaa.

Ɓe nanataa nder ton haalaaji puyɗi, wonaa haalaaji bonɗi, ko woni, hiɓe nana salminaango yoga maɓɓe e dow yoga, e salminaango Malaa'ikaaɓe ɓen e dow maɓɓe, no ara e maɓɓe nder ton ko ɓe lokaa(wooɗa) kon immorde e ñaametee bimmbi e kiikiiɗe.

Oo Aljanna siforaaɗo ɗii sifaaji ko kanko woni on mo Men Roninta ɗum immorde e jeyaaɓe Amen ɓen, on doftiiɗo Yamaruyeeji ɗin o woɗɗitiiɗo haɗaaɗi ɗin.

Wi'an -an Jibriila- Muhammadu (yo Alla Juulu e makko O hisna mo): pellet, Malaa'ikaaɓe ɓen ɓe jippantaako hoore-maɓɓe, anndu ko ɓe jipporta ko e Yamaruyee Alla, ko Alla heeranii ko men jaɓɓoto kon immorde e fiyaake Laakara, e ko men acci ɗum immorde e fiyaake aduna, e kon ko woni hakkunde aduna e Laakara, Joomi maaɗa wonaali -an Nulaaɗo- yejjitoowo huunde.

Taguɗo On kammuuli ɗin e leydi ndin, e Jeyɗo ɗi On e Fewjoowo fii majji, e Taguɗo On ko woni kon hakkunde majji e Jeyɗo ɗum e Fewjoowo fii mun On, ko On Hanndi e Reweede, tabitu e Dewal Makko, laatanaaki Mo yeruujo wanaa kadi ɗimmo mo no kafida e Makko ka Dewal.

Keefeero yedduɗo immital on no wi'a; ka jalnorgol: "Eyoo, e jaka si mi maayii aroyay nde mi yaltinee ka qaburu am ko mi wuuruɗo ngurndam ɗimmal?! Pellet, ɗum ko woɗɗuɗum.

Enee, hara oo yedduɗo Immital annditaali wonnde Menen Men Tagiino mo ko adii hari o laataaki hay e huunde?! O dallinora Tagu aranu ngun e dow Tagu ɗiɗabu ngun, ko fii pellet, ko Tagu ɗiɗabu ngun ɓuri welude fii e newaade.

Mi woondirii Joomi maaɗa -an Nulaaɗo- Men yaltinoyay ɓe ka genaale maɓɓe faade ka Mofturu ko ɓe wonnduɓe e Seytanuuji maɓɓe, ɗin majju-nooɗi ɓe, refti Men soggoya ɓe faade ka dammbu-ɗe Jahannama ko ɓe hoyɓe, jicciriiɓe e koppi maɓɓe.

Refti Men foodirabe no saɗtiri e no boniri immorde e kala fedde e feddeeji majjere ɗin ɓurɗo ɓe saɗtu- de geddi, ɓen ko yeesooɓe maɓɓe ɓen.

Refti ko Menen Ɓuri Anndunde ɓen ɓurɓe foddude naatugol yiite ngen e sonnjorgol nguleendi magge e tampirgol ndi.

Alaa e mooɗun -ko onon yo yimɓe- hay e gooto si wonaa o lummbay dow [Ƴanngal] Siraate waɗa-ngal ka fonngo Jahannama, ngollummbugol laatike Ñaawoore Siinaande nde Alla Ñaawi ɗum, firtoowo Ñaawoore Makko nden alaa.

Refti ɓaawo ngol lummbugol Siraate Men Hisina ɓen hulirnooɓe Joomi mu'un ɗoftagol Yamiraaɗi Makko ɗin e woɗɗitagol haɗaaɗi Makko ɗin, Men ɗala tooñooɓe ɓen ko ɓe jicciiɓe e hoore koppi maɓɓe, ɓe hattantaake dogugol nge.

Si janngaama e dow yimɓe ɓen Aayeeje Amen Ɓannguɗe jippinaaɗe ɗen e Nulaaɓe Amen ɓen; yedduɓe ɓen wi'ana gomɗimɓe ɓen: "Ko hennde e feddeeji me'en ɗin ɓuri moƴƴude hoɗo e ñiiɓirnde, ɓuri fotude kadi mbatu e kawtital: "Ko fedde Amen nden, kaa ko fedde mo'on nden?!".

Kaawes ko ɗuuɗiri wa moftaaji ɗi Men halki ɗum ko adii ɓee heeferɓe wasorayɓe ko ɓe woni kon e mu'un immorde e toowal yi'eteengal, ɗin moftaaji no ɓuri ɓe jawle, ɓuri ɓe kadi moƴƴugol mbaadi sabu labeede conci maɓɓe, e neemagol ɓalli maɓɓe.

Maaku -an Nulaaɗo-: "On laatiiɗo no yinoo e nder majjere aray Hinnorante nennana mo haa o ɓey- doo majjere, haa si ɓe yi'ii ko ɓe wonanoo fodeede kon immorde e lepte yaccinaaɗe ɗen ka aduna, maaɗum nennaaɗe ɗen haa Ñalnde Darngal aray ɓe annda ontuma ko hommbo boni nokku ɓuri fanɗude wallooɓe, e hara ɗum ko fedde maɓɓe nden, kaa ko fedde gomɗimɓe ɓen?

E mbattiigu nennangol ɓeeɗoo haa ɓe ɓeydoo majjere, Alla no ɓeydana ɓeya feewuɓe gomɗinal e doftaare. Golle moƴƴe yottinayɗe ɗen e malal paamayankowal ngal ko ɗen ɓuri nafa ka Joomi maaɗa -an Nulaaɗo- njoɓdi, ko ɗum kadi ɓuri battane.

Enee, a yi'aali -an Nulaaɗo- on yedduɗo hujjaaji Amen ɗin, o yeddi Kammbaaji Amen ɗin, o wi'i: "Si mi maayii, mi immintinoyaama maatun mi okkee jawdi ɗuuɗundi e ɓiɗɓe".

Enee, o anndu ko wirnii kon si o wi'i ko o wi'i kon no ɓanngiri?! Kaa o ƴettodii e Joomi makko aadi fii yo O naadu mo Aljanna, O okkoya mo ton jawdi e ɓiɗɓe?!

Fiyaake on wanaa no o aaƴori non, aray Men winnda ko o woni wowlude kon e ko o woni gollude kon, Men ɓeydana mo Lepte e dow lepte makko ɗen, sabu ko o nodditii kon immorde e meere nden.

Men Rona ko o acci kon immorde e jawdi e ɓiɗɗo ɓaawo Men halkii mo, o ara e Amen Ñalnde Darngal ko o weddiiɗo hara o ɓooraama ko o wonunoo dakmitorde kon immorde e jawdi e jaahu.

Sirkooɓe ɓen jogitii hoore-maɓɓe reweteeɓe gaanin Alla; fii yo ɓen laatano ɓe sembinooɓe e wallooɓe, ɓe foolira sabu maɓɓe.

Fiyaake on wanaa no ɓe aaƴori non, ɗii reweteeɗi ɗi ɓe rewata ɗum gaanin Alla, ɗi yeddoyay Ñalnde Darngal dewal ngal sirkooɓe ɓen rewunooɗi ngal, ɗi woɗɗitoo e maɓɓe, ɗi laatanoo ɓe ayɓe.

Enee, a yi'aali -an Nulaaɗo- wonnde Menen Men nulii Seytanuuji ɗin, Men wurtiɗi e dow heeferɓe ɓen hiɗi ƴuunaɓe e waɗugol geddi ɗin e faddagol ka Diina Alla e ƴuunugol.

Wata a heñor -an Nulaaɗo- ɗaɓɓirgol Alla yaccin- gol halkugol ɓe, anndu Men limay ɓe woni nguur- ndan maɓɓe ɗam limugol, haa si haɗtii dummunne nennangol ɓe Men lepta ɓe yeru ko ɓe hanndi kon.

Jaŋto -an Nulaaɗo- Ñalnde Darngal, Ñalnde Men mooɓoyta hulirooɓe ɓen Joomi mu'un -ɗoftagol Yamiraaɗi Makko ɗin e woɗɗitagol Haɗaaɗi Makko ɗin- ka Joomi maɓɓe ko ɓe jamaa teddinaaɗo.

Men sogga heeferɓe ɓen haa ka Jahannama ko ɓe ɗonɗaaɓe.

Ɓee heeferɓe ɓe maraa tefanngol woɓɓe maɓɓe si wonaa on jogtaninooɗo Alla aadi ka aduna fii gom- ɗinngol Mo e Nulaaɓe Makko ɓen.

Alyahuuda en e Annasaaraa en e woɓɓe e sirkooɓe ɓen wi'i: " Hinnorante jogitike ɓiɗɗo".

Gomɗii on addii -ko onon wowlooɓe ɗii- huunde mawnunde.

Kammuuli ɗin no ɓadoo seekaade immorde e ngol konngol añaangol, leydi ndin no ɓadoo seekaade, pelle ɗen no do'a yanude muncoo.

Ɗum fow,ko sabu ko ɓe dammbani(askitina) kon Hinnorante ɓiɗɗo, Alla Toowii e ɗum Toowal mawngal.

Gasataa nde Hinnorante jogitotoo ɓiɗɗo Senaade wonanii Mo e ɗum.

Alaa wonɗo ka kammuuli e ka leydi immorde e Malaa'ikaaɓe ɓen e yimɓe ɓen e jinnaaji ɗin si wanaa o aroyay ka Joomi makko Ñalnde Darngal ko o yankiniiɗo.

Gomɗii O Huɓindorii ɓe Ganndal,o limibe limgol, suuɗaaki e Makko immorde e maɓɓe hay e huunde.

Gooto kala e maɓɓe aroy ka Makko Ñalnde Darngal ko o weddiiɗo hara o maraa ballo o maraa jawdi.

Pellet, ɓen gomɗimɓe Alla ɓe golli golleeji moƴƴi weltoraaɗi ɗin ka Alla, Alla waɗanay ɓe Giggol sabu Giggol Makko e maɓɓe, e waɗugol ɓe yiɗaaɓe ka jeyaaɓe Makko ɓen.

Anndu ko Men niwinani ndee Alqur'aanaare Jippinngol nde ka ɗenngal maaɗa -an Nulaaɗo- ko fii yo a weltinir nde hulooɓe ɓen , ɓen no ɗoftoo Yamiraaɗi Am ɗin, ɓe woɗɗitoo haɗaaɗi Am ɗin, hulɓiniraa nde kadi yimɓe ɓurɓe saɗtude wennje e mawnintinaare e jaɓugol Goonga.

No foti hewde e moftaaji ɗi Men halki ɗum ado yimɓe maaɗa ɓen, taw si hiɗa so'a hannde goɗɗo e ɗin moftaaji?! Taw si hiɗa nananaɓe hito suuɗii- ngo?! Ko heɓi ɓe kon no tijjaa nde heɓi tanaa maɓɓe kadi tuma Alla sakkiti.

(Taa Haa) hari yewtanooma fii yeru majje ka fuɗɗoode Simoore Albaqara.

Men Jippiniraali e maaɗa -an Nulaaɗo- Alqur'aanaare nden fii yo nde wonu sabu sonnjir- gol wonkii maaɗa suno e dow ɗuuragol yimɓe maa ɓen fii gomɗinngol ma.

Men Jippiniraali nde si wanaa yo nde laato waajorde wonannde on mo Alla hawrinndiniri kulol Makko.

Telliniinde Alla, On Taguɗo leydi ndin, O tagi kammuuli toowuɗi ɗin, ndee ko Qur'aanaare mawnde, sabu kayre ko tellinaande immorde e Mawɗo.

Hinnorante On O toowii O Ɓantike ka dow Arsik Toowal hawrondirngal e Manngu Makko Senayee wonanii Mo O Toowii.

No woodani Mo Kanko Tun O Senike ko woni kon e kammuuli ɗin e ko woni kon e leydi ndin e ko woni kon ka ley mbullaari (leydi)e tageefooji, Tagugol e Laamagol e Fewjugol.

Si a fenñinii -an Nuulaaɗo- konngol ngol, maa a suuɗii ngol pellet Kanko Senayee wonanii Mo hiMo Anndi ɗum kala mun, Kanko hiMo Anndi gunndoo on e ko suuɗii kon e gunndoo on yeru miijo wonkii, hay huunde e ɗum suuɗotaako Mo.

Alla reweteeɗo e goonga alaa tanaa Makko, no woodani Mo Kanko Tun Inɗe Yottiiɗe Timmal ngal ka Moƴƴugol.

Gomɗii arii e maaɗa -an Nulaaɗo- kumpital fii Muusaa geɗal Imraana (yo o his).

Fewndo o hayninoo yiite ka danngal makko, o wi'ani ɓeynguure makko nden: "ñiiɓee ko wonuɗon ɗoo, min mi yi'ii yiite no gasa mi addanay on im- morde e ngen yiite docatal, maaɗum mi tawa ton tinndinoo lam faande e Laawol ngol.

Tuma nde o arunoo ka [moggo] yiite Alla Seniiɗo On Noddiri mo Daalugol Makko: "Ko an yo Muusaa".

Min dey ko Min woni Joomi maaɗa ittu paɗe maa ɗen fii heblanagol wunndondirgol e Am, an hiɗa ka aynde Laɓɓinaande Tuwaa.

Min Mi Suɓike ma -an Muusaa- fii yottinngol Nulal an ngal, heɗo ko Mi woni Wahayinnde kon e maaɗa.

Pellet, ko Min woni Alla reweteeɗo e goonga alaa tanaa Am, Rewam Min Tun tottir Julde nden e noone ɓurɗo timmude fii yo a annditam e nder mayre.

Pellet, Darngal ngal ko arayngal feere alaa ngal hewtay, Miɗo ɗaɓa suuɗude ngal Tagaaɗo woo anndaa nde ngal waɗata, kono hiɓe anndira maa- ndeeji maggal sabu ko Nulaaɗo on humpitiɓe kon; fii yo yoɓe kala wonkii ko ki golli kon, si tawii ko ko moƴƴi maaɗum si ko ko bone.

Wata martine(firlitma) e goonginngol ngal e heblanorgol golle moƴƴe ɗen, on mo gomɗinaa ngal immorde e yedduɓe ɓen, o jokki ko welata wonkii makko kin immorde e harminaaɗi ɗin, o halkori sabu ɗum.

Ko woni nden huunde wonunde ka ñaamo maaɗa an Muusaa?

Muusaa (yo o his) maaki: "Ndun ko tuggordu am; miɗo tuggoo ndu ka yaadu, miɗo woppira ndu leɗɗe ɗen fii yo kaaki majje ɗin saaman dammi am ɗin, miɗo mari nafa kadi e mayru hara wanaa koo ko mi jaŋtii".

Alla Daali: "Liɓu ndu, an Muusaa".

Muusaa liɓi ndu, ndu waylii mboddi hindi yaha e yaccaade.

Alla Daalani Muusaa (yo o his): "nanngu tuggordu ndun, wota a hulu immorde e waylagol mayru mboddi, aray Men rutta ndu si nanngii ndu faade e noone mayru arano on.

Waɗu junngo maaɗa ngon ka nder jiiba maa; ngo yaltay ko ngo rawnungo hara ngo colɗaa(ngo wonddani e baras), ɗum ko maande ɗiɗaɓere maaɗa.

Men hollii ma ɗii maandeeji ɗiɗi fii yo Men holle -an Muusaa- immorde e Aayeeje Amen Mawɗe tinndinɗe ɗen e Kattanɗe Amen, e wonndema kadi an ko o Nulaaɗo immorde ka Alla.

Yahu -an Muusaa- ka Fir'awna, pellet, kanko o yawtii keerol ngol e keeferaaku ngun e sanndalɗanagol Alla.

Muusaa (yo o his) maaki: "Jooma, yaajinanam ɓernde am nden; fii yo mi waawu ronnditaade larraaji(lorooji) ɗin.

Newinanaa mi fiyaake am on.

Wawnaa lam yewtugol yewtere laaɓunde.

Fii yo ɓa faamu haala am kan si Nulal am ngal yottike e maɓɓe.

Waɗanaa mi walloowo jeyaaɗo ka ɓeynguure am o walla lam e fiyakuuji am.

Haaruuna geɗal Imraana ko musiɗɗo am.

Semmbiniraa mo keeci am.

Waɗu mo kafidaaɗo e am e nder Nulal ngal.

Fii yo men Senine Seninaali heewuɗi.

Men jaŋtoMaa jaŋta heewuɗo.

Pellet, An A Laatike Humpitiiɗo fii amen, huunde suuɗanaaki Ma e fiyaake amen.

Alla Daali: "Gomɗii Men okkii ma ko ɗaɓɓuɗaa kon an Muusaa".

Gomɗii Men Neeminiino e maaɗa e laawol goo.

Tuma nde Men lonnginnoo yumma maaɗa ko Men lonngini mo kon; kon ko Alla Reenirmaa ɗum immorde e pewje Fir'awna.

Gomɗii Men Yamirii mo fewndo Men Lonnginnoo mo: " [Men Daali] Werlo mo ka hontoore ɓaawo jibineede makko, liɓaa hontoore nden ka maayo, aray maayo ngon bogoo mo ka fonngo sabu Yamiroore Amen, ƴetta mo gaño Am e gaño makko, on le ko Fir'awna, Mi waɗi e maaɗa Giggol immorde ka Am, yimɓe ɓen yiɗumaa, e fii yo a ne'e e ndenka Am e ngaynateeri Am.

Tuma nde banndiraawo maaɗa on yaltunoo himo yaara kala ka hontoore nden yaari himo jokki nde, o wi'ani on ƴittuɗo mo: "Enee yo mi tinndin on e ne'oowo mo muynina ayna mo?" Men Neeminiri e maaɗa artirgol ma ka yumma maaɗa fii yo o weltor artugol maaɗa ka makko, hara o sunaaki fii maɗa maaɗa. Waruɗaa on qibtiyankoojo mo bantiɗaa, Men Neeminiri e maaɗa danndugol ma e lepte ɗen, Men laɓɓinmaa laawol ɓaawo laawol immorde e kala jarrabuyeeji ɗi hawrondirɗaa e mu'un, yaltuɗaa ñiiɓuɗaa duuɓi ka yimɓe Madyana, refti aruɗaa e on waqtu hettanaaɗo ma nde arataa e makko fii yewtidugol e maaɗa an Muusaa.

Mi Suɓimaa fii yo a wonu Nulaaɗo immorde e Am hiɗa yottina e yimɓe ɓen ko Mi Wahayini kon e maaɗa.

Yahu -an Muusaa- e musiɗɗo maaɗa on Haaruuna, wonndude e Aayeeje Amen tinndinɗe ɗen e Kattanɗe Alla e ngootimbaaku Makko, wata on lo'ino e noddugol faade e Am, maaɗum e annditugol Lam.

Yahee ka Fir'awna, pellet, kanko o yawtii keerol ngol e keeferaaku ngun e sanndalɗanagol Alla.

Wi'anee mo konngol newiingol, ngol aladaa e ñaadde; tijjagol o waajitoto o hula Alla o tuuba.

Muusaa e Haaruuna (yo ɓe his) maaki: "Menen dey meɗen huli wata o yaccin lepte ɗen ko adii [men] timminnde noddugol mo, maa nde o yawtata keerol ngol ka tooñirgol men warngo ngon maa tanaa ɗum.

Alla Daalani ɓe: "Wata on hulu; pellet, Min Miɗo wonndiri e mo'on ballal ngal e semminngol ngol, Miɗo Nana Miɗo Yi'a ko woni waɗude kon hakku- nde mooɗon e makko".

Aree ka makko, wi'anon mo: "Menen ko men Nulaaɓe Joomi maaɗa -an Fir'awna- accidu men e ɓiɗɓe Israa'iila ɓen, wata a leptir ɓe warugol ɓiɗɓe maɓɓe worɓe ɓen, e hersinngol rewɓe maɓɓe ɓen, gomɗii men addanii ma dalil e goongugol amen immorde ka Joomi maaɗa, hoolaare nden e Lepte Alla ɗen ko gomɗinɗo jokki Peewal Alla ngal woo ɗum woodani.

Menen gomɗii Alla Wahayinii e Amen wonndema Lepte ɗen ka aduna e ka Laakara ɗe fawike on fennuɗo Aayeeje Alla ɗen, o ɗuurii e ko Nulaaɓe ɓen addi kon.

Fir'awna tawi no yeddi ko [Muusaa] addi kon, o wi'i: "Ko hommbo woni Joomi mooɗon, on mo aaƴiɗon wonndema himo Nuli on faade e am, ko an yo Muusaa?

Muusaa maaki: "Joomi amen, ko On Okkuɗo kala huunde mbaade mayre e noone mayre hawrondi- rayɗo on e mayre, refti O Fewni tageefooji ɗin e ko O Tagani ɗi kon fii mu'un.

Fir'awna wi'i: "Ko honɗun woni alhaali moftaaji adiiɗi ɗin ɗin wonunooɗi e keeferaaku?"

Muusaa (yo o his) maakani Fir'awna: "Ganndal no ɗin moftaaji woniri no ka Joomi am, ko tabitinaaɗo ka Alluwal Reenaangal, Joomi am faljataa e Ganndal Makko ngal, O yejjitataa ko O Anndi e ɗum.

Ka Joomi am, On waɗanɗo on leydi ndin weƴƴitaa- ndi fii wuurugol e hoore mayri, O waɗani on e nder mayri laawi moƴƴuɗi fii yahugol e mayri, O jippini immorde e kammu ngun toɓo ngon, Men yaltiniri ɗam ndiyam nooneeji luutondirɗi immorde e puɗi ɗin.

Ñaamee -onon yimɓe- kon ko Men yaltinani on e laaɓuɗi ɗin, aynee neemoraaɗi mo'on ɗin, pellet, no e kon ko jaŋtaa e neemaaji ɗin, tinndinooji e dow Kattanɗe Alla e ngootimpaagu Makko fii joomiraaɓe hakkillaaji ɗin.

Ko immorde e mbullaare leydi ndin Men Tagi Baaba mo'on Aadama (yo o his), ko e nder mayri Men Artiroyta on fii wattineede si on maayii, ko e mayri Men Yaltinoyta on laawol goo fii immital ngal Ñalnde Darngal.

Gomɗii Men fenñinanii Fir'awna Aayeeje Amen ɗen jeeɗiɗi kala majje, o yi'i ɗe o fenni ɗe, o salii nootaade faade e gomɗingol Alla.

Fir'awna wi'i: "Enee a aru ka amen fii yo a yaltinir men e Misra ngun mbilaaku ngu arduɗaa e mu'un -an Muusaa- fii yo laamu Misra ngun heddano ma?"

Maa tun men addane -an Muusaa- mbilewu yeru mbilewu maaɗa ngun, waɗu hakkunde amen e maaɗa fodoore e waqtu happaaɗo e nokkuure eɓɓaande, menen men tutndataa an kadi hara a tultaali e mayre, yo nokkuure nden wonu tummbo hakkunde feddeeji ɗin ɗiɗi fotondirnde.

Muusaa (yo o his) maaki: "Fodoore nden hakkunde am e mo'on ko ñalnde julde ka yimɓe ɓen mooɓotoo weltora juldeere maɓɓe nden ka walluhaa.

Fir'awna hucciti yahugol, o mooɓiti hodooje makko e pewje makko ɗen, refti o ari e waqtu [haldaaɗo on] e nokkuure eɓɓaande nden ka fottee.

Muusaa maaki tawi himo waajaade mbileeɓe Fir'awna ɓen: "Reenee, wata on fefindo fenaande fawon e Alla sabu ko wonnɗon hodirde kon yimɓe ɓen e mbilaaku sakko O mehira(o ittira asli) mon on Lepte immorde ka Makko, gomɗii hayrii(pertii) on fefindiiɗo fenaande fawi e Alla.

Mbileeɓe ɓen pooɗondiri tuma nde ɓe nanunoo haala Muusaa (yo o his) kan, ɓe suuɗi hakkunde maɓɓe gunndoo.

Woɓɓe e mbileeɓe ɓen wi'ani woɓɓe maɓɓe e gunndoo: " Pellet Muusaa e Haaruuna ko mbileeɓe ɗiɗo, hiɓe faalaa yaltinirnde Misra mbilaaku maɓɓe ngu ɓe ardi ngun e mu'un, ɓe yaara sunna mon toowuɗo on ka gurndan, e laawol mo'on toowongol ngol.

Ñaawee fiyaake mon on, hara on luutondiraali e ɗum, refti aron kon on sappewol, ferodon ko jogiti- ɗon kon nde wootere, gomɗii hannde fooluɗo wennjiiɗo mun on woo hara o hiɓii ko ɗaɓɓaa kon.

Mbileeɓe ɓen wi'ani Muusaa (yo o his), suɓo gootel e piiji ɗiɗi: "Nde wonataa fuɗɗotoo on weddaade ko woni kon ka maaɗa e mbilewu, maaɗum menen men wona fuɗɗotooɓe ɓen ɗum.

Muusaa (yo o his) maaki: "ko woni onon willee tun wedde ko jogiɗon kon taho, ɓe willii ko woni e juuɗe maɓɓe kon, tawi ɓoggi maɓɓe e cabbi maɓɓe ɗi ɓe willii ɗin hiɗi wa'itana Muusaa sabu mbilewu maɓɓe ngun wonndema ko ɗi mbolle hiɗe dilla no yaawiri.

Muusaa suuɗi kulol ngol ka wonkii makko sabu ko ɓe huuwi(golli) kon.

Alla Daalani Muusaa (yo o his) himo deeƴinnde mo: "Wata a hulu ko hilnganamaa(mbaadidana) kon, pellet, an Muusaa a toowiray e dow maɓɓe polgal e ballal".

Liɓu sawru ndu jogorɗaa ndun ñaamo ngon, ndu wayloto mboddi ndi moɗa ko ɓe moƴƴiniri kon mbilewu ngun, ko ɓe moƴƴini kon wonaali si wonaa pewje mbilaaku, mbileejo on non foolataa nokku kala ka o woni.

Muusaa liɓi sawru makko ndun, ndu waylii mboddi, ndi moɗi ko mbileeɓe ɓen moƴƴini kon, mbileeɓe ɓen sujjani Alla sabu ko ɓe anndi kon pellet ko Muusaa jogii kon wanaa mbilewu, pellet, ɗum ko ka Alla iwri, ɓe wi'i: "Men gomɗinii Joomi Muusaa e Haaruuna, e Jooma denndaangal tageefooji ɗin.

Fir'awna mettinii o kammbani mbileeɓe ɓen fii gomɗinal maɓɓe ngal o wi'i: "Enee, on gomɗinii Muusaa ko adii mi duŋanaade on ɗum?! Pellet ko Muusaa woni hooreejo mon on anndinɗo on mbilewu ngun, -onon ɓee mbileeɓe-. Mi woondii maa mi taƴa junngo e koyngal gooto kala e mooɗon mi luutindira hakkunde cenɗe ɗen ɗiɗi, mi woondii maa mi feta ɓalli mo'on ɗin e julle tamaro ɗen haa maayon, wonon ɓe woɓɓe goo waajitorta, on annday on tuma ko hombo e amen ɓuri tiiɗude e duumaade lepte: Ko men kaa ko Joomi Muusaa On?!

Mbileeɓe ɓen wi'ani Fir'awna: "Men ɓurnataa jokkugol ma -an Fir'awna- e dow jokkugol koo ko ari e amen immorde e Aayeeje ɓannguɗe ɗen, men ɓurnataa ma e dow Alla On Taguɗo men, waɗu e amen ko waɗataa, a maraa laamu e hoore amen si wanaa e ɗam ngurnadam re'ayɗan ɗoo, laamu maaɗa ngun iway, ngu lanna.

Menen dey, men gomɗinii Joomi amen tijjagol O montanay men geddi+goopi amen feƴƴuɗi ɗin immorde e keeferaaku e tanaa mu'un, O montana men kadi bakkaatu ngun mbilewu ngu dooluɗaa men fii anndinagol ngu huutora e dartorgol ngu Muusaa, ko Alla Ɓuri Moƴƴude Njoɓdi diini kon ko foduɗaa men, ko Kanko kadi Ɓuri Duumaade Lepte diini kon ko kammbirantaa men e lepte ɗen.

Pellet, fiyaake on e ko woni kon; kala arɗo ka Joomi mu'un Ñalnde Darngal hara ko yedduɗo Mo haray no woodani mo Jahannama o naata e magge ko o ñiiɓayɗo e nder magge poomaa, o maayataa nder ton sakko o fowtoo e Lepte magge ɗen, o wuurataa kadi ngurdan welɗam.

Kala arɗo ka Joomi mu'un Ñalnde Darngal ko o gomɗinɗo Mo hara o golliino golle moƴƴe ɗen, haray ɓen sifaaɓe ɗin sifaaji mawɗi ɗon no woodani ɓe jippornde toowunde nden, e darjaaji toowuɗi ɗin.

Ɗin darjaaji ko ɗin woni Aljannaaji ñiiɓal canɗi no ila e ley kuɓeeje majji ko ɓe ñiiɓooɓe nder ton poomaa, ko ndin njoɓdi jaŋtaandi woni njoɓdi kala laaɓɗo e keeferaaku e geddi(goopi).

Gomɗii Men Wahayinii e Muusaa: ɗum woni yaadu e jeyaaɓe Am ɓen jemma iwde Misra hara gooto so'aali fii maɓɓe, waɗan ɓe laawol yoorungol ka maayo ɓaawo piyirgol maayo ngon sawru ndun, hoolo Men wata a hulu fii wata Fir'awna e mbatu mun ngun hewtito ma, wata a hulu yoolagol ka maayo.

Fir'awna e koneeli mu'un ɗin jokkiti ɓe, maayo ngon suumi mo suumi koneeli makko ɗin, ko suumi ɓe kon anndaa haqiiqa mu'un si wanaa Alla, ɓe fow maɓɓe ɓe yoolaa ɓe halkaa, Muusaa e wonndu ɓe e makko ɓen daɗi.

Fir'awna majjiniri yimɓe mu'un ɓen cuɗanngol ɓe geddi ɗin, o hodiri ɓe ɗum immorde e meere nden, o fewnaali ɓe e laawol Peewal ngal.

Men Daalani ɓiɗɓe Israa'iila ɓen ɓaawo Men danndii ɓe e Fir'awna e koneeli mu'un ɗin: "Ko onon ɓiɗɓe Israa'iila, gomɗii Men danndiino on e goño mon on, Men fodi on kadi yewtidugol e Muusaa ka senngo ñaamo aynde wonunde nden ka moggo fello Tuuri, Men jippini e mo'on ka wemmbire immorde e neemaaji ɗin, njaram welirɗam wa njumri e sonndu fanɗundu welundu teewu hindu nanndundu e Sammaani gellal.

Ñaamee immorde e dakmuɗi ɗin e kon ko Men arsiki on e ñaameteeji dagiiɗi ɗin, wata on yawtu ko Men daginani on kon yahon e ko Men harminani on kon, sakko jippoo e mooɗon Tikkere Am nden kala mo Tikkere Am nden jippii e mu'un haray gomɗii o halkike o malkisaama ka aduna e ka Laakara.

Pellet, Min ko Mi heewuɗo Yawtanngol e Yaafagol on tuubuɗo rutti ka Am o gomɗini, o golli golle moƴƴe, refti o ñiiɓi e hoore Goonga kan.

Ko hommbo hawjinmaa -an Muusaa- haa fiƴƴitiɗaa=mbirtida yimɓe maaɗa ɓen, accirɗaa ɓe ɓaawo maaɗa?

Muusaa (yo o his) maaki: "Kamɓe hiɓe ɓaawo am, ɓe hewtitoyto lam, mi adike yimɓe am ɓen ka Maaɗa fii yo A weltano lam yaccagol am ngol ka Maaɗa.

Alla Daali: "Awa Menen dey, gomɗii Men jarribike yimɓe maaɗa ɓe accirɗaa ɓen ɓaawo maaɗa rewugol Ngaari ndi, gomɗii Saamiriiyu noddii ɓe e rewugol kol, o majjiniri ɓe sabu ɗum".

Muusaa arti ka yimɓe makko ɓen ko o tikkuɗo sabu rewugol maɓɓe Ngaari ndi, suniiɗo fii maɓɓe, Muusaa (yo o his) maaki: "Ko onon yo yimɓe, enee, Alla Fodaali on Fodoore Moƴƴunde wonnde O Jippinay e mo'on Tawreeta nden, O naada on kadi Aljanna, kaa ko jamaanu ngun juutani on haa yejjituɗon? Kaa on faandor ngal kuugal mo'on ɗoo fii yo Tikkere Joomi mooɗon jippo e mo'on, Lepte Makko ɗen yana e mo'on, ko sabu ɗum lunndorɗon fodoore am fii tabitugol e ɗoftaare nden haa mi ruttoo e mooɗon?!

Yimɓe Muusaa ɓen wi'i: "Men lunndaaki fodoore maaɗa nden -an Muusaa- e yiɗi amen, ko woni ko sabu tampere, gomɗii men ronndinaama dolle tedduɗe immorde e cuɗaari yimɓe Fir'awna ɓen, men feriiɗe e nder ngayka fii seedugol e majje, ko no men feroriɗe non ka nder ngayka Saamiriiyu kadi ferori ko o jogii kon immorde e mbullaari kolce puccu Jibriila ngun (yo o his).

Saamiriiyu yaltinani ɓiɗɓe Israa'iila ɓen e ɗen cuɗaaje ɓanndu Ngaari ndi alah wonki, hondi huunira wano nagge huunirta, jarriboraaɓe ɓen golle Saamiriiyu ɗen wi'i: " Ko ko'ol woni reweteeɗo mon e reweteeɗo Muusaa on, o yejjitu o acci mo ɗoo".

Enee, hara ɓee jariboraaɓe rewugol ndi Ngaari be ndewindi sutaaki wonndema ndi wowlantaa ɓe ndi jaabotaako ɓe, ndi hattantaake duñanngol ɓe lorra wanaa tanaa ɗum kadi, wanaa addanngol ɓe kadi nafa, maaɗum tanaa mun?!

Gomɗii Haaruuna maakaniino ɓe ado ruttagol Muusaa e maɓɓe: "Tafugol ñalahol kol e aatugol makkol wonaali si wanaa ndarndorɗom on fii yo gomɗinɗo on feeñu o senndondira e keefeeru on, pellet, Joomi mo'on -onon yimɓe- ko On Jeyɗo Yurmeende nden, wanaa on mo maranaa on lorra wanaa nafa, wonaa fii non o yurmee on, jokkee lam e Rewugol Mo Kanko Tun, ɗoftoɗon yamiroore am nden kadi e ɗalugol rewugol tanaa Makko".

Jarriboraaɓe ɓen rewugol ñalahol kol wi'i: "Men seerataa ko men ñiiɓuɓe e dewal makkol haa Muusaa arta e amen".

Muusaa maakani Haaruuna musiɗɗo makko on: "Ko honɗum haɗumaa fewndo yi'unoɗaa ɓe majjii sabu rewugol ñalahol kol gaanin Alla.

Nde ɗalataa ɓe hewtitoɗaa lam?! Kaa a yeddii ko mi yamirmaa kon fewndo mi lontinmaa e hoore maɓɓe?!

Tuma nde Muusaa joginoo waare musiɗɗo makko on e hoore makko nden himo pooɗa nde e makko himo monanii mo fii golle makko ɗen, Haaruuna ɗaɓɓiri mo yaafuyee o maakani mo: "Wata jogito waare am nden maa leeɓi hoore am nden, miɗo mari ŋanto fii heddagol am hakkunde maɓɓe, hari miɗo huli fii wata ɓe seedu si mi accii ɓe kamɓe tun, ontuma maakaa; ko min senndi hakkunde maɓɓe, min toode mi aynaali wasiyee maaɗa on e fii maɓɓe".

Muusaa (yo o his) maakani Saamiriiyu: "Ko honɗum woni fiyaake maa on an Saamiriiyu? Ko honɗum duñumaa e ɗee golle maa?"

Saamiriiyu wi'ani Muusaa (yo o his): "Mi yi'ii ko ɓe yi'aali, gomɗii mi yi'ii jibriila e hoore puccu, mi ƴetti tamannde e mbullaari ka batte [kolce] maggu, mi ferii ɗum e hoore ɗen cuɗaaje taynaaɗe moƴƴinaa e mbaadi ñalahol, ɗun wonti ɓanndu ñalahol marukol hito, ko nii wonkii am cuɗirani lam e ko mi golli kon".

Muusaa (yo o his) maakani Saamiriiyu: "An yahu, pellet, no woodanmaa nde wowlata fodde hiɗa wuuri: "Mi meemataa mi meemetaake," wuuraa ko a woppaaɗo, pellet, no woodanmaa Fodoore Ñalnde Darngal a hasbete e mayre Lepteɗaa, Alla lunndataako ndee Fodoore, ndaarii ñalahol maa kol jogitinoɗaa kol reweteeɗo, ñiiɓuɗaa e rewugol kol gaanin Alla, mi huɓɓay yiite e hoore makkol haa kol taaya, refti mi yoola kol ka maayo fii wota batte makkol luttu".

Anndu Reweteeɗo mon On e Goonga -ko onon yo yimɓe- ko Kanko woni Alla On Mo Reweteeɗo e Goonga alaa tanaa Makko, O Huɓindorii kala huunde Ganndal, foltotaako Mo O Senike ganndal hay e huunde.

Yeru koo ko Men fillanimaa ɗoo -an Nulaaɗo- kumpital fii Muusaa e Fir'awna, e kumpita fii yimɓe maɓɓe ɓen Men filloranay maa kumpitti ɓen adiiɓe ma immorde e Annabaaɓe e moftaaji fii yo ɗum laato munñintinayɗum ma, gomɗii Men okkii ma ka Amen Alqur'aana no waajitora nde on waajitotooɗo.

Mo ɗurnike e ndee Alqur'aanaare Jippinaande e maaɗa hara o gomɗinaali nde, o golliraali ko woni kon e mayre; pellet, o aroyay Ñalnde Darngal ko o ronndiiɗo bakkaatu mawɗo, hara himo hanndi e Lepte muusuɗe.

Ko ɓe ñiiɓuɓe e nder ɗen Lepte e duumaade, bonii donngal ngal ɓe ronndoytoo ɗum Ñalnde Darngal.

Ñalnde Malaa'ikaajo on wuttoyta ka alaadu wuttannde ɗiɗaɓere nden fii immital ngal, Men mooɓa yedduɓe ɓen e nden Ñalnde ko mbuliiɓe sabu waylagol noone gite maɓɓe ɗen immorde e saɗtude ko ɓe hawri kon e mu'n immorde e kulaleeji Laakara.

hiɓe sowndoo wi'a: "On ñiiɓaali ka barjakhu ɓaawo mayde nden si wanaa jemmaaji sappo".

Ko Menen Ɓuri Anndude ko ɓe sowndondirta kon, hay huunde e mun foltotaako Men, tuma nde ɓurɗo ɓe timmude hakkil on wi'ata: "On ñiiɓaali ka barjakhu si wanaa ñallal gootal ɓuraa ɗum".

Hiɓe lanndaade ma -an Nulaaɗo- fii alhaali pelle ɗen Ñalnde Darngal, maakan ɓe: "Pelle ɗen Joomi am ɓorayɗe ka lasili majje O ruyna ɗe, ɗe wonta funndu=punndi.

O ɗala leydi ndin, ndin laatonoondi no ronndii ɗe hara ko ndi fotondirndi maadi alaa e hoore mayri wanaa puiɗi.

A yi'ataa ka leydi -an ndaaroowo e mayri- sabu timmugol fotondirgol mayri ka ooñii wanaa ko toowiti maa ka jolti.

Ko nden Ñalnde yimɓe ɓen jokkata hito noddoowo on ka mofturu, selugol alanaa ɓe gaayi jokkugol mo, hitooji ɗin deƴƴana Hinnorante On sabu kulol, a nanataa nden Ñalnde si wanaa hito suuɗii ngo.

E nden Ñalnde Mawnde tefoore nden nafataa immorde e kala tefoowo, si wanaa tefoowo mo Alla duŋanii yo o tefu, o weltori konngol makko ka tefoore.

Alla O Senike hiMo Anndi ko fewti kon yimɓe ɓen e fiyaake Darngal ngal, hiMo Anndi kadi ko ɓe feƴƴi kon ka aduna maɓɓe, jeyaaɓe ɓen ɓe fow maɓɓe ɓe huɓindortaa ganndal Jaati Alla Kin e Sifaaji Makko Ɗin.

Geece jeyaaɓe ɓen hoyi, ɗe yankinanii Wuuruɗo Mo maayataa On, Dariiɗo On e fiyakuuji jeyaaɓe Makko ɓen fii Fewjugol ɗi e yiilugol ɗi, gomɗii hayrii on ronndiiɗo bakkaatu sabu jolnugol makko wonkii makko kin jolirde halkaare.

On mo golli golle moƴƴe ɗen hara ko o gomɗinɗo Alla e Nulaaɗo Makko on aray o heɓa njoɗdi makko ndin hara ko timmundi, hara o hulaa tooñe ɗum woni leptireede bakkaatu mo o huuwaali ɗum, wanaa uytaneede mbarjaari golle makko moƴƴe ɗen.

Ko yeru no Men jippiniri nii fillayee feƴƴuɓe ɓen Men jippiniri ndee Alqur'aanaare e ɗenngal Aarabu ɓanngungal, Men ɓanngini e nder mayre nooneeji kammbaaji ɗin immorde e giƴugol e hulɓinngol; tijjagol ɓe hulay Alla, maaɗum Alqur'aana on fuɗɗanay ɓe waaju e tasakuyee.

Alla Toowii O Senike O Mawnii, ko O Lamɗo On Mo woodani ɗum Laamu kala huunde, On Mo Kañum ko Goonga Daalol Makko ngol ko Goonga, O Toowii e ko sirkooɓe ɓen sifotoo Mo kon, wata a heño -an Nulaaɗo- janngugol Alqur'aana ngol wonndunde e Jibriila ko adii nde timmata e maaɗa yottinngol nde, Maaku: "Joomi ɓeydanam Ganndal faade e ko Anndinɗaa lam kon".

Gomɗii Men wasiyinoke Aadama ko adii fii waasu-de ñaamugol leggal ngal, Men haɗi mo e ɗum, Men ɓannginani mo battane mu'un, o yejjiti wasiya on o ñaami leggal ngal, o munñaaki gaayi maggal, Men yi'naali mo doole pellital e dow reenugol ko Men wasiyii mo kon e mu'un.

Jaŋto -an Nulaaɗo- tuma nde Men Daalannoo Malaa'ikaaɓe ɓen: "Sujjanee Aadama sujjannde hiwraango". Ɓe sujji ɓe fow maɓɓe si wanaa Ibliisa -on wonnduɗo e maɓɓe kono o jeyaaka e maɓɓe- o salori sujjugol ngol mawnintinaare.

Men Daali: "Ko an yo Aadama, pellet, Ibliisa ko o gaño maaɗa ko o gaño sonnaajo maa on kadi, wata o yaltinire dey an e sonnaajo maa on ka Aljanna ɗoftagol mo e huunde ko o sonwosinta e mu'un, sakko an ronnditoɗaa saɗteendeeji ɗin e metteefooji ɗin".

Pellet, no woodanmaa ka Alla nde O Okkoray maa ke nder Aljanna hara a weeletaake, o holtine kadi hara a holataa.

Ɗum woni O yarne hara a ɗomɗetaake, O ɗuwe hara nguleende naange hawrataa e maaɗa.

Seytaane sonwonsini Aadama, o wi'ani mo: "Hara yo mi tinndine e leggal kala ñaamuɗo ngal o maa- yataa poomaa, ko woni, o heddoto ko o wuuruɗo luttinaaɗo, o laamoo kadi laamu jokkondirngu ngu taƴataa ngu lannataa?!"

Aadama e Hawaa ñaami leggal ngal ɓe haɗanoo ngal ñaamugol, tageeji maɓɓe ɗin feeñani ɓe ɓaawo nde ɗi laatinoo suuɗaaɗi, ɓe naati e woocugol haako leɗɗe Aljanna ɗen, ɓe suuɗira ko, tageeji maɓɓe ɗin, Aadama lunndii Yamiroore Joomi makko nden nde tawnoo o ɗotaaki Yamiroore Makko nden fii woɗɗitagol ñaamugol leggal ngal, o yawti o yahi e ko daganaaki mo.

Refti Alla Suɓii mo O Jaɓi tuubuubuyee makko on, O hawrinndini mo e Peewal ngal.

Alla Daalani Aadama e Hawaa: "Jippee ka Aljanna onon e Ibliisa, on ko o gaño mo'on, onon kadi ko on ayɓe makko, Si aroyii e mo'on immorde e Am ɓanngal fii Laawol Am ngol: kala e mo'on jokkuɗo ɓanngal Laawol Am ngol o golliri ngol hara o selaali ngol; haray o majjataa gaayi Goonga kan, o malkisiroytaake kadi Lepte ka Laakara, ko woni, Alla naaday mo Aljanna.

Kala ɗuuriiɗo e jaŋtaande Lam hara o jaɓaali ɗum, haray jaabinantaake mo, haray pellet, no woodani mo ngurndam ɓittuɗam ka aduna e ka barjakhu, Men soggoyay mo kadi faade ka Mofturu Ñalnde Darngal waasaaɗo giiɗe e dalil.

Oo ɗurniiɗo e jaŋtagol ngol wi'i: "Ko An yo Joomi, ko fii honɗum immintinirɗaa mi hannde ko mi bunɗo, gomɗii hari mi laatike ka aduna yi'oowo".

Alla O Toowii O Daala jaabagol mo: "Ko yeru ɗun golluɗaa ka aduna, gomɗii ariino e maaɗa Aayeeje Amen ɗen ɗurniɗaa e majje ɗaluɗaa ɗe, ko wano nii, pellet, an hannde a ɗalete ka nder Lepte".

Ko yeru ndii njoɓdi Men yoɓata on mutuɗi e welnuruuji harminaaɗi ɗin, o ɗurnii e gomɗinal ngal wonndude e daliilaaji ɓannguɗi ɗin ka Joomi makko. Pellet, ko Lepte Alla ɗen ka Laakara ɓuri ɗenƴinnde ko ɗen kadi ɓuri dolnude diini ngurndam ɓittuɗam ɗam ka aduna e ka Barjakhu ko ɗen kadi ɓurata duumaade.

Kaa hara ɓannganaali sirkooɓe ɓen heewugol moftaaji ɗi Men halki ɗum ado maɓɓe, hiɓe yaha e koɗooli ɗin moftaaji halkanooɗi, ɓe yi'a batteeji ko heɓiɓe kon? Pellet, ko heɓi kon ɗin moftaaji ɗuuɗuɗi immorde e halkeede e yirbineede ɗum ko tasakuyee wonannde joomiraaɓe hakkillaaji ɓen.

Hara wonaano Daalol adii ngol immorde ka Joomi maaɗa -an Nulaaɗo- Kanko o Leptataa hay e gooto ko adii O darnude hujja e hoore makko, hara wanaano lajal hoddiraangal ɓe ka Makko O yaccinanayno ɓe Lepteɗen; sabu hanndugol maɓɓe e majje.

Munño -an Nulaaɗo- e dow ko fennooɓe ma ɓen wowlata kon immorde e sifaaji meerenteeji, subuhino yettaa Joomi maaɗa ka Julde Subaka ko adii ƴellitagol naange ngen, e ka Julde Alansaraa ko adii mutugol magge, e ka Julde Futuroo e Gee- ƴe immorde e saa'iiji jemma on, e ka Julde Fanaa ka mortagol magge ɓaawo lannugol feccere arane- re nden ka ñallal e ka Julde Futuroo ɓaawo lannugol feccere ɗiɗaɓere nden e ñallal ngal; jorto fii yo a heɓu ka Alla immorde e mbarjaari ko waltortaa ɗum.

Wata a ndaaru faade e ko Men waɗani kon nooneeji ɓee fennuɓe dakamme hiɓe dakmitora mo immorde e cuɗaari ngurndan aduna fii yo Men ndarndo ɓe, anndu pellet, koo ko Men waɗaniɓe ɗum ko iwayɗum, Mbarjaari Joomi maa ndi O Fodumaa ndin a heɓay haaweltoɗaa ko ndin ɓuri moƴƴude diini ko Men dakmiti ɓe kon ka aduna immorde dakkamme iwoowo e ɓuroowo duumaade; sabu kanko o taƴataa.

Yamir -an Nulaaɗo- Ɓeynguure maa nden tottugol Julde nden, munñitoraa an kadi e dow tottugol nde, Men ɗaɓɓiraali ma arsikugol wonkii maa wanaa tanaa maaɗa kadi, Menen Meɗen Fawtii arsike maa on, battane moƴƴe ɗen ka aduna e ka Laakara wonanii joomiraaɓe kulol Alla ɓen, ɓen hulooɓe Mo ɓe ɗoftoo Yamiraaɗi Makko ɗen, ɓe woɗɗitoo kadi haɗaaɗi Makko ɗin.

Ɓee heeferɓe fennuɓe Annabiijo (yo Alla juulu e makko hisina) wi'i: "Ko haɗi Muhammadu addana men maande ka Joomi makko nde no tinndina e goongungol makko ko o Nulaaɗo?" Enee, hara araali e ɓee fennuɓe ndee Alqur'aanaare, nden tawnde ko kayre woni goonginnde Defte kammu yankeeje ɗen ado mayre?!

Sinndo Menen Men halkirno ɓee fennuɓe Annabiijo (yo Alla juulu e makko hisina) jippinngol Lepte e maɓɓe sabu geddi maɓɓe e sannalɗaaku maɓɓe ko adii Men Nulude e maɓɓe Nulaaɓe, Men jippina e maɓɓe Deftere, ɓe wi'ayno Ñalnde Darngal ko ɓe ngantiniiɓe gaayi keefeeraaku maɓɓe: "Joomi amen ko hannoo Nulaa e amen Nulaaɗo ka aduna, men gomɗinira sabu makko men jokka ko o addi kon immorde e Aayeeje ko adii hoyre nden e hersa kan jipporde e amen sabu Lepte Maa ɗen.

Maakan -an Nulaaɗo- ɓee fennuɓe: "Gooto kala e amen e onon no habbitii ko Alla yoɓata kon, onon kadi habbitee, on anndoyay -feere woo alaa- ko hommbo woni jom Laawol Focciingol ngol, ko homɓe woni feewuɓe ɓen: Ko menen kaa ko onon?