Fulani Mokhtasar — Enbiya 21:1 – Ankebut 29:69

Ɓattanike yimɓe ɓen hasboore maɓɓe nden fii golleeji maɓɓe ɗin Ñalnde Darngal, kamɓe hiɓe e nder welsindaare ko ɓe ɗurniiɓe gaayi Laakara on; sabu hilnagol(soklirde) maɓɓe aduna on [wedditoo fii Laakara on].

Arataa e maɓɓe e Alqur'aana immorde ka Joomi maɓɓe jippiinde kesun, si wanaa ɓe heɗike nde heɗagol ngol aldaa e nafa, ko woni, ko heɗagol fijindaaru hara ɓe haajaaka ko woni kon e nder mayre.

Ɓe jenntii mo hari ɓerɗe maɓɓe ɗen ko welsindiiɗe e makko, tooñooɓe ɓen suuɗiri keefeeru ngun yewtere nde ɓe gunndondirta nden e mu'un ko ɓe wi'uɓe: "Enee,taw si oo nodditiiɗo wonnde ko o Nulaaɗo o wonaa si wanaa ɓanndunke yeru mon alaa ko o senndi on e makko?! ko o addi kon ko mbilewu, kaa on jokkay mo hara hiɗon anndi ko o ɓanndunke yeru mo'on, Te ko o addi kon kadi ko mbilewu?!

Nulaaɗo on (yo Alla juulu e makko hisna) maaki: "Joomi am, hiMo Anndi ko suuɗuɗon kon ka yewtere, ko Kanko woni Annduɗo kala konngol ngol wowloowo wowli ka kammuli e ka leydi, Kanko ko O Nanoowo konnguɗi jeyaaɓe ɓen, Annduɗo golle maɓɓe ɗen, aray O Yoɓa ɓe e dow ɗum.

)Ko woni, ɓe skkki sikkin e fiyaake ko Muhammadu addi kon (yo Alla juulu e makko hisna), tuma goo ɓe wi'a: "Ko koyɗi jillondirɗi firo alanaa ɗi".Tumo goo kadi ɓe wi'a: "Wanaa non, ko woni, o fefindi ɗi, ɗi maraa lasili". Tuma goo kadi ɓe wi'a: "Kanko ko o yimoowo, awa si tawii o laatike goonguɗo e nodditagol makko ngol yo o addan men kaawa- seeji, yeru tuggordu Muusaa ndun, e Naaqawa Saalihu mban".

Gomɗinaano ado ɓee weeɓituɓe feere, saare toriinde feere fii jippineede Aayeeje ɗen ɓe okkaa nden feere wano ɓe toririinde non, ko woni ɓe fennu Aayeeje ɗen si Men halki ɓe. Mbela ɓeeɗoo kadi gomɗinay?

Men Nulaali ado maaɗa -an Nulaaɗo- si wanaa worɓe immorde e ɓanndunke Men wahayina e maɓɓe, Men Nulaali ɓe Malaa'ikaaɓe, lanndee tun yimɓe defte ɓen ado mo'on si tawii on anndaa ɗum.

Men waɗaali Nulaaɓe, ɓe Men Nuli ɓen joomiraa- ɓe ɓalli ɓe ñaamataa ñaametee on, ko woni, hiɓe ñaama wano ñaamirta tanaa maɓɓe, ɓe wonaali heddotooɓe ka aduna hara ɓe maayataa.

Refti Men Goongani Nulaaɓe Amen ɓen ko Men fodi ɓe kon, nokku ka Men danndi ɓe halkeede wonndude e ɓe Men Muuyi ɓen immorde e gomɗinɓe ɓen, Min halki yawtuɓe keerol ɓen sabu yeddugol maɓɓe Alla, e waɗɗitagol maɓɓe geddi ɗin.

Goɗii Men jippinii e mooɗon Alqur'aanaare nden no e mayre teddungal mo'on ngal e wasu mo'on ngun si on gomɗinii nde, on gollirii ko woni kon e mayre. Kaa on alaa hakkilannde ɗum, sakko yaccoɗon faade e gomɗinngol nde, e gollirngol ko woni kon e nder mayre?!

Kaawee ko heewiri wa ca'e ɗe Men halki ɗum sabu tooñirgol majje keefeeru ngun, Men Tagi ɓaawo majje yimɓe goo!

Tuma nde halkanooɓe ɓen yi'unoo Lepte mulayɗe ɗen, tawi kamɓe hiɓe yaccoo doga saare maɓɓe nden immorde e [kulol] halkeede.

Ɓe noddiroyee fii jalnorgol: "Wata on dogu dey, yiltee(nduttee) faade e ko wonunoɗon e mu'un kon immorde e neemaaji e dakammeeji mo'on, e koɗanɗe mo'on kadi; belajo'o on lannditoyte goɗɗu e fii aduna mo'on on".

Ɓee tooñooɓe qirritoyoo bakkatuuji maɓɓe ɗin ɓe wi'a: "Eeyoo, halakuyee amen e hayrere amen, pellet, menen men woniino tooñuɓe sabu yeddugol amen Alla".

Seerataa qirritagol maɓɓe bakkatuuji maɓɓe ɗin e noddugol maɓɓe e wonkiiji maɓɓe ɗin halakuyee, noddaandu maɓɓe ndu ɓe fillitotoo ndun haa Men waɗa ɓe yeru remuru soñaandu, ko ɓe maayuɓe dillugol alanaa ɓe.

Men tagiraali kammu ngun e leydi ndin e ko woni kon hakkunde majji fijindaaru e puyndan, ko woni, Men tagiriiɗi fii tinndinorɗi e Kattanɗe Amen.

Sinndo Men faalano jogitaade sonnaajo maaɗum ɓiɗɗo Men jogitotono ɗum ko woni kon ka Amen, Men wonaali non waɗooɓe ɗum sabu Senagol Amen e ɗum.

Ko woni Meɗen werloo Goonga ka Men wahayini kan faade e Nulaaɓe Amen ɓen e dow meere yimɓe geddi ɓen ka fuyna nde, tawa meere maɓɓe nden ko yahunde iwi fes, no woodani on -onon wi'uɓe ɓen hiMo jogitii sonnaajo e ɓiɗɗo- halkaare sabu ko sifiɗon Mo kon ko O hanndaa e mu'un.

Ko Kanko Tun woodani O Senike laamu kammuu- li ɗin e Laamu leydi ndin, ɓen womɓe ka Makko kadi immorde e Malaa'ikaaɓe ɓen ɓe mawnikin- taaka Dewal Makko ngal, ɓe tampirtaa ngal.

Hiɓe duumii e Subhinanagol Alla e duumaade, ɓe haaɓataa e ɗum.

Ko woni, sirkooɓe ɓen jogiti reweteeɗi gaanin Alla, ɗi wuurtintaa mayɓe ɓen, ko honno ɓe rewirta ronkuɗo gaayi ɗum?!

Si tawiino laatino ka kammuuli e ka leydi reweteeɗi ɗuuɗuɗi ɗi ɗiɗi-kala ɗi bonirayno pooɗondiral reweteeɓe ɓen ka laamu, ko selli kon no lunndii ɗum, Alla Jom Arsi kin O Senike gaayi ko sirkoɓe ɓen sifotoo Mo kon fenaande wonndema no woodani Mo kafidaaɓe.

Alla ko Kanko woni teelɗo e Laamu Makko ngun e Ñaawoore Makko nden, hay e gooto lanndotaako Mo fii ko O hoddir kon e ko O Ñaawi kon, Kanko le O lanndoyto jeyaaɓe Makko ɓen gaayi golle maɓɓe ɗen, O yoɓa ɓe e dow ɗum.

Ko woni, ɓe jogiti gaanin Alla reweteeɗi, maakan an Nulaaɗo- ɓee sirkooɓe: "Addee hujja mon on e hanndugol rewugol ɗi, awa ndee Deftere jippinaa- nde e am, e Defte jippinaaɗe ɗen e Nulaaɓe ɓen on maraa hujja e nder majje, ko woni, ɓurɓe ɓen e sirkooɓe ɓen ɓe tuugutaako si wanaa e majjere e ñemmbugol, hara kamɓe ko ɓe ɗurniiɓe e jaɓugol Goonga kan.

Men Nulaali ado maaɗa -an Nulaaɗo- Nulaaɗo woo si wanaa Men wahayinii e makko pellet, reweteeɗo alaa e Goonga si wanaa Miin Rewee Lam Min Tun, wata on kafidu(renndinee) e Am hay e huunde.

Sirkooɓe ɓen wi'i: "Alla jogitike Malaa'ikaaɓe ɓen ɓiɗɓe rewɓe." O Senike O Laaɓii e ɗen penaali ɗe ɓe wowlata Mo, ko ɓe Teddinaaɓe ka Makko, ko woni, Malaa'ikaaɓe ɓen ko Jeyaaɓe Alla, Teddinaaɓe ka Makko Ɓattinaaɓe e Makko.

Ɓe adortaa Joomi maɓɓe konngol, ɓe wowlataa ɗum haa O Yamira ɓe, kamɓe ko Yamiroore Makko nden ɓe gollata, ɓe lunndantaako Mo Yamiroore.

HiMo Anndi ko yawti kon e ko aroyta kon e golle maɓɓe ɗen, ɓe torotaako tefoore nden si wanaa e sakkitoore mo O welnaa tefoore mu'un, kamɓe hiɓe reenii immorde e kulol Makko O Senike, ɓe lunndotaako Mo e Yamiroore wanaa kadi haɗoore.

Kala wi'uɗo immorde e Malaa'ikaaɓe ɓen e noone hottagol: "Min ko mi reweteeɗo gaanin Alla". Menen Men Yoɓiray mo konngol makko ngol lepte Jahannama Ñalnde Darngal ko o luttinteeɗo e majje, ko yeru ndii njoɓdi Men yoɓata tooñirɓe ɓen keefaraagal e sirkanngol Alla.

Kaa ɓen yeddu ɓe Alla anndaali woni; wonndema kammuuli ɗin e leydi ndin woniino notondirɗi, hari heneere alaa hakkunde majji sakko toɓo jippoo e mayre, Men senndi hakkunde majji, Men waɗi ka ndiyam iwuɗaam ka kammu saaƴi ka leydi kala huunde immorde e muumi maaɗun puɗi. Kaa ɓee taskotaako ɗum, ɓe gomɗina Alla Kanko Tun?!

Men Tagi ka leydi pelle tabituɗe fii wata ndi dimbodu e ko woni kon hoore mayri, Men waɗi e mayri laawi yaajuɗi belajo'o kamɓe ɓe feeway ka jahe maɓɓe faade e faandaaje maɓɓe.

Men waɗi kammu ngun kippude reenaandi immorde yanugol ko aldaa e tugaale, e reenaangu immorde e wujjugol nanɗe, sirkirooɓe ɓen ko woni kon ka kammu immorde e Aayeeje -wano naange ngen e lewru ndun- ko ɗurniiɓe ɓe taskotaako.

Alla Kanko Tun woni Taguɗo jemma on fii ka fowtee, O Tagi ñalal ngal ka ngurdan faggitee, O Tagi naange ngen maande fii ñalorma on, lewru ndun kadi maande fii jemma on, kala majji immorde e naange ngen e lewru ndun hiɗi doga e yiilornde majji heeraniinde ɗi, ɗi selataa nde ɗi ooñataako.

Men waɗanaali hay e gooto e ɓanndunke ado maaɗa -an Nulaaɗo- luttineewo e ɗam ngurndam, e hara si lajal maa ngal timmii e ɗa'am ngurndam maayuɗaa, hara ko kamɓe woni heddotoo ɓe ɓen ɓaawo maaɗa? ɗun waɗataa.

Kala wonkii, woni ko gomɗinki maa ko yedduki ki meeɗay mayde nden ka aduna, Men jarriboo on -onon yimɓe ɓen- ka ngurndan aduna e to'e e neema e tampere, refti ɓaawo mayde mon nden ko ka Amen wanaa ka tanaa Amen rutteteɗon.

Si yi'ii ma -an Nulaaɗo- ɓee sirkooɓe, ɓe jogitortaa ma si wanaa jalkitde hiɓe raɗora jokkuɓe ɓe ɓen wi'igol maɓɓe: "Enee, ko oo woni yennude reweteeɗi mo'on ɗi wonɗon rewude ɗin?!" Hara ɓe jalnorte woni, ko ɓe yedduɓe ko Alla jippini kon e maɓɓe immorde ka Alqur'aanaare e ko O okki ɓe kon e neemaaji ko ɓe yeddu ɓe; ko kamɓe hanndi e ayiibe on sabu hawtindirgol maɓɓe kala bone.

Neɗɗo on Tagaama e heñaare, kanko himo heñora piiji ɗin ado waɗugol majji, ko sabu ɗum si sirkooɓe ɓen no heñara Lepte ɗen, aray Mi holla on -onon heñorɓe ɓen Lepte Am ɗen- ko heñornoɗon kon e ɗum, wata on ɗaɓɓu yaccinaneede ɗum.

Heeferɓe yedduɓe Immital ɓen hiɓe wi'ude e noone heñorgol: "Ko honnde tuma ko foduɗon men kon laatotoo -ko onon yo Julɓe- immorde e Immital si tawii ko on goonguɓe e kon ko nodditiɗon waɗugol mum.

Sinndo ɓee heeferɓe yedduɓe Immital annduno tuma tawi ɓe ruttataa Yiite ngen gaayi geece maɓɓe ɗen wanaa gaayi ɓabbe maɓɓe ɗen kdai, wonnde kadi walloowo alaa mo no walla ɓe duñugol Lepte ɗen gaayi maɓɓe, sinndo ɓe yananano ɗum ɓe heñortaano Lepte ɗen.

Ngee Yiite nge ɓe leptetee e mu'un nge arataa e maɓɓe e anndal maɓɓe, ko woni, nge aray e maɓɓe e juhayee, hara ɓe hattantaake yiltugol nge e maɓɓe, wanaa kamɓe woni nennanoyteeɓe haa ɓe tuuba Hinnayee on hewta ɓe.

Si tawii yimɓe maaɗa ɓen jalkitii ma, haray wanaa an ɗum fuɗɗori, gomɗii jalkitanoo ma Nulaaɓe ado maaɗa -an Nulaaɗo- O huɓindii yedduɓe ɓen, ɓen laatinooɓe no jalkita ɓe Lepte ɗen ɓen laatinooɓe no jalnora ɓe ka aduna tuma nde Nulaaɓe maɓɓe ɓen hulɓinirta ɓe.

Maakan -an Nulaaɗo- ɓee heñorayɓe Lepte: "Ko hommbo reenata on jemma e ñalorma e kon ko Hinnorante On muuyani on immorde e jippinngol Lepte ɗen e halkugol on?" ko woni, kamɓe gaayi jaŋtaade waajuuji Joomi maɓɓe ɗin e hujjaaji Makko ɗin ko ɓe ɗurniiɓe, ɓe taskotaako hay e huunde e ɗum sabu majjere e njofoyaagal.

Kaa no woodani ɓe reweteeɓe ɓe no dannda ɓe Lepte Amen ɗen? Ɓe hattantaake wallirde wonkiiji maɓɓe ɗin martinngol lorra e majji, ɓe anndantaa ɗi nafa, mo wallaali wonkii mun ko honno o wallirta tanaa makko?! wanaa kamɓe kadi woni walloyteeɓe immorde e Lepte Amen ɗen.

Ko woni Men dakmitii ɓee yedduɓe, Men dakmitiri baabiraaɓe maɓɓe ɓen sabu ko Men weeɓitani ɓe immorde e neemaaji Amen; ka ɗaynugol ɓe, haa jamaanu ngun juutani ɓe, ɓe hoditori ɗum, ɓe ñiiɓi e geddi maɓɓe. Kaa hara ɓee hoditorɓe neemaaji Amen heñorɓe Lepte Amen yi'aali wonnde Menen Meɗen ara e leydi ndin Men uytira ndi e bannŋeeji mayri doolnugol Amen yimɓe mayri, e Polgal Amen e hoore maɓɓe, sakko ɓe taskoo ɗum fii wata yanu e maɓɓe ko yani kon e tanaa maɓɓe?! Ɓee laataaki fooluɓe, ko woni, kamɓe ko ɓe foolaaɓe.

Maaku -an Nulaaɗo-: "Anndu ko mi hulɓinirta on -onon yimɓe ɓen- immorde eLepte Alla ko Wahayu mo Joomi am Wahyini e Am on, faaɗuɗo on nana- taa Goonga ka ɓe noddaa kan e mu'un nanɗe jaɓugol si ɓe hulɓiniraama Lepte Alla ɗen.

Mi woondii si meemii ɓee ɗaɓɓayɓe yaccinaneede Lepte ɗen geɓal immorde e Lepte Joomi maaɗa ɗen -an Nulaaɗo- ma ɓe wi'u ontuma: "Eeyoo, halakuyee amen e hayrere amen, menen men laatike tooñirɓe sirkanngol Alla e fennugol ko Muhammadu (yo Alla juulu e makko hisna) Addi kon ".

Men darna Manndikirɗe nunɗuɗe ɗen fii yimɓe Darngal ngal fii yo ɗe manndikire golle maɓɓe ɗen, tooñirtaake e nder nden Ñalaande hay wonkii uytaneede moƴƴi makko ɗin maaɗum ɓeydaneede bonɗe makki, hay si laatike ko peesirgal ngal no famɗiri wa yeru ko abbere khardal manndike ɗum Men adday ɗum, Men yonii hasbooɓe Meɗen hasba golle jeyaaɓe Amen ɓen.

Gomɗii Men Okkii Muusaa e Haaruuna (yo ɓe his) Tawreetaare senndaynde hakkunde Goonga kan e meere nden e hakkunde ko dagii e ko harmi, ko nde Peewal wonannde ɓen gomɗinɓe nde, ko nde waaju wonannde hulooɓe ɓen Joomi mu'un.

Ɓen hulayɓe Lepte Joomi maɓɓe On mo ɓe gomɗini ɗum fii kala ɓe yi'aali mo, hara kamɓe hiɓe huli Darngal ngal.

Ndee Alqur'aanaare Jippinaande e Muhammadu (yo Alla juulu e makko hisna) ko nde waaju wonannde on faalaaɗo waajitornde nde heewunde nafa e moƴƴere. Kaa hara onon on yedday nde wonndude ɗum? Hara on qirritaaki ko woni kon e mayre on gollirtaa nde?

Gomɗii Men Okkii Ibraahiima Hujja e dow yimɓe makko ɓen ila ka cukaaku makko hari Men woniino kadi Annduɓe mo, Men Okki mo ko o hanndi kon e mu'un e Ganndal Amen immorde e Hujja e dow yimɓe makko ɓen.

Tuma nde o maakannoo baaba makko Aajara e yimɓe makko ɓen: "Ko honɗum woni ɗii sanamuuji ɗi moƴƴinirɗon juuɗe mon ɗen, ñiiɓuɗon e rewgol ɗi?"

Yimɓe makko ɓen wi'ani mo: "Men tawii baabiraaɓe amen ɓen no rewaɗi, men rewiriɗi ñemmbugol ɓe".

Ibraahiima Maakani ɓe: "Gomɗii on wonii -onon jokkuɓe ɓen- e baabiraaɓe mo'on sincuɓe ɓen e nder majjere ɓanngunde gaayi Laawol Goongo ngol.

Yimɓe makko ɓen wi'ani mo: "Enee, ko soobee addaɗaa men, fewndo wowluɗaa ko wowluɗaa kon, kaa an ko e fijooɓe ɓen jeyaɗaa?"

Ibraahiima maaki: "Ko woni, ko soobee mi addani on wanaa samakala, Joomi mooɗon ko Kanko woni Jooma kammuuli ɗin e leydi ndin On Taguɗo ɗi ko aldaa e misal adiingal, min wonndema pellet, Joomi mo'on e Jooma kammuuli ɗin e leydi ndin miɗo jeyaa e seediiɓe ɓen, laatanaaki sanamuuji mo'on ɗin geɓal immorde e ɗum.

Ibraahiima maaki nokku ka yimɓe makko ɓen nanataa: "Mi woondii, bee tun mi fewja fii ɗii sanamuuji mo'on ko mettatata on ɓaawo yahugol mon ka juldeere mo'on accaɗi.

Ibraahiima munci sanamuuji maɓɓe ɗin haa ɗi wonti kuntoy tosokoy, o acci mawndu majji jorto nde ɓe yiltitotoo e mayru fii yo ɓe lanndo ndu ko hommbo munci ɗi.

Tuma nde ɓe ruttinoo ɓe tawi sanamuuji maɓɓe ɗin muncaama, yoga e maɓɓe lanndii yoga: "Ko hommbo munci reweteeɗi me'en ɗin? Pellet, on muncuɗo ɗi ko e tooñooɓe ɓen o jeyaa, nokku ka o hoyni ɗon ko haani mawninnde e laɓɓinnde kon".

Yoga maɓɓe wi'i: "Men naniino suka no wowlaɗi ko boni himo aybina ɗi himo wi'ee Ibraahiima, no gasa hara ko kanko munci ɗi".

Koohooɓe maɓɓe ɓen wi'i: "Addee Ibraahiima yeeso yimɓe ɓen ɓe yi'a mo; belajo'o ɓe seedoto himo qirritoo ko o huuwi kon, qirritagol makko ngol laatanoo on hujja e hoore makko".

Ɓe addi Ibraahiima (yo o his) ɓe lanndii mo: "Enee, Ibraahiima ko an golle ɗee golle kaanuɗe e sanamuuji amen ɗin?"!

Ibraahiima maaki -ko o jalnoroowo ɓe, ko o fenñinɗo ronkugol sanamuuji maɓɓe ɗin yeeso yimɓe ɓen-: "Mi waɗaali ɗum, ko woni, gollii ɗum mawndu sanamuuji ɗin, lanndee sanamuuji mo'on ɗin si ɗi laatike hiɗi wowla".

Ɓe ruttori e wonkiiji maɓɓe ɗin miijitagol e teskagol ɓanngani ɓe wonnde sanamuuji maɓɓe ɗin, ɗi nafataa ɗi lorrataa, ko kamɓe woni tooñuɓe fewndo ɓe rewunooɗi gaanin Alla.

Refti ɓe ruttii e sanndalɗaaku e geddi, ɓe wi'i: "Gomɗii hiɗa yananaa -an Ibraahiima- pellet, ɗii sanamuuji ɗi wowlataa, ko honno yamirirtaa men yo men lanndo ɗi?" Ɓe faandori ɗum hujja maɓɓe on, ɗum wonti hujja e hoore maɓɓe.

Ibraahiima maaki -ka mettinanngol ɓe-: "Enee, on reway gaanin Alla sanamuuji ɗi nafataa on hay e huunde ɗi lorrataa on hay e huunde, kannji ko ɗi ronkuɗi e riiwgol lorra kan gaayi ko'e majji, maaɗum pooɗugol nafa kan fii majji.

On kaanii, ko rewoton kon kadi ko woori Alla kaanii, ɗii sanamuuji ɗi nafataa ɗi lorrataa kadi, enee, on hakkiltaa ɗum, ɗalon rewugol ɗi?!

Tuma nde ɓe ronkunoo tiindorde mo dalil ɓe wallitori doole ɗen, ɓe wi'i: "Sunniree Ibraahiima yiite ngen; wallee sanamuuji mo'on ɗi o fusi o munci ɗin si tawii on wonii waɗayɓe ɗum lepte haɗooje".

Ɓe huɓɓini yiite ɓe werlii mo e magge, Men Daali: "ko an yo yiite, wonu ɓuuɓol e kisiyee e dow Ibraahiima, nge woniri non, o heɓaali lorra".

Yimɓe Ibraahiima (yo o his) ɓen faandanii mo pewje fii sunnugol mo, Men bonni pewje maɓɓe ɗen, Men waɗi ɓe kamɓe halkaaɓe foolaa.

Men ndanndi mo Men ndanndi kadi Luutu, Men yaltini ɓe, ɓe yahi ka leydi Saami ndin ndi Men barkiniri e mu'un; Nulugol Annabaaɓe e mayri, e sabu ko Men saakani kon tageefooji ɗin e nder mayri immorde e moƴƴereeji.

Men Okki mo Ishaaqa fewndo o torinoo Joomi makko yo O arsiku mo ɓiɗɗo, Men Okki mo Yaaquuba ka ɓeydugol, gooto-kala immorde e Ibraahiima e geɗaljo makko on Ishaaqa e Yaaquuba Men waɗi ɓe moƴƴuɓe ɗoftiiɓe Alla.

Men waɗi ɓe Almaamiiɓe, yimɓe ɓen no feewira sabu maɓɓe e moƴƴere nden, hiɓe nodda yimɓe ɓen faade e dewal Alla Kanko tun e duŋayee Makko O Toowii, Men wahayini e maɓɓe gollee moƴƴi ɗin, tottiron Julde nden e noone ɓurɗo timmude, Itton Jakka on, wonon ɗoftiiɓe Men.

E Luutu Men Okki mo serndugol ñaawoore nden hakkunde wennjiiɓe ɓen, Men Okki mo kadi Ganndal e fiyaake Diina makko, Men Hisini mo kadi immorde e lepte ɗi Men jippini ɗen e dow saare makko nden (Saduuma) nde yimɓe mu'un laatinoo no huuwa boneeji ɗin, pellet, kamɓe ɓe laatinoke yimɓe bonɓe yaltuɓe e ɗoftaare Joomi maɓɓe.

Men naadi mo e nder Yurmeende Amen tuma nde Men danndunoo mo immorde e ɗen lepte heɓunooɗe yimɓe makko, pellet, kanko ko o jeyaaɗo e moƴƴuɓe ɓen, ɓen yamitorayɓe Yamiroore Amen, ɓe haɗitora kadi haɗoore Amen nden.

Jaŋto kadi -an Nulaaɗo- fillayee fii Nuuhu; tuma nde o noddunoo Alla ko adii Ibraahiima e Luutu, Men jaabinirani mo okkugol mo ko o ɗaɓɓi kon, Men ndanndi yimɓe makko gomɗinɓe ɓen immorde e suno mawngo ngon.

Men ndanndi mo e hoɗo ɓen yimɓe fennuɓe ko Men Semmbiniri mo kon immorde e Aayeeje tinndinɗe ɗen e goongugol makko. Pellet, kamɓe ɓe laatinoke yimɓe bone e lorra, Men halkiri ɓe fow maɓɓe yooleede.

Jaŋto -an Nulaaɗo- fillayee fii Daawuuda e geɗaljo makko on Sulaymaana (yo ɓe his) tuma nde ñaawaynoo e muraadu addaandu ka maɓɓe e fiyaake wennjiiɓe ɗiɗo; no woodani goɗɗo e maɓɓe dammi ɗi saakii jemma e nder ngesa oya mban ɗi bonni mba, Men woni Seediiɓe ñaawoore Daawuuda e Sulaymaana nden, wirnaaki e Amen immorde e ñaawoore maɓɓe nden hay e huunde.

Men Faamini Sulaymaana ñaawoore nden gaanin baaba makko Daawuuda, ɓe fow, immorde e Daawuuda e Sulaymaana Men Okki mo Annabaaku ngun e Ganndal fii ñaawoje Sari'a ɗen, Men hertinanaali ɗum Sulaymaana kanko tun, Men elti wonndude e Daawuuda pelle ɗen hiɗe subuhinora subuhinaali makko ɗin, Men eltani mo kadi colli ɗin, Men woni huuwooɓe ngol faaminngol e okkugol ñeeñal e ganndal e eltugol.

Men Anndini Daawuuda gaanin Sulaymaana tafogol mekeñaaji (dollokaaji njanndi) fii yo ɗi hiwu on e hewtugol jogaaji ɗin ka ɓalli mo'on. Enee, onon -ɓee yimɓe- on jarnay oo neema mo Alla neeminiri on ɗum.

Men eltani Sulaymaana henndu ndun ko ndu saɗtundu wifugol hindu doga e yamiroore makko tuma nde o yamiri ndu faade ka leydi Saami ndi Men barkiniri e mu'un sabu ko Men Nuli kon e mayri immorde e Annabaaɓe, e moƴƴi weftaaɗi e mayri, Men laatike kala huunde ko Men annduɓe, hay e huunde suuɗotaako Men e ɗum.

Men elti immorde e Seytanuuji ɗin, ɗin ɗi no mutana mo ka maaje ɗi yaltina lu'ulu'uuje e tanaa mu'un, hiɗi golla kadi ko wonaa ɗum immorde e golle wano mahugol, Men laatike ko Men Reenuɓe limoore majji e golle majji, hay e huunde e ɗum fuutataako Men.

Jaŋtii -an Nulaaɗo- fillayee fii Ayyuuba (yo o his), tuma nde o noddunoo Joomi makko O Senike tuma nde jarrabuyee on heɓunoo mo ko o wi'uɗo: "Ko an yo Jooma, min dey mi hennaama ñaw e waaseede ɓeynguure nden, ko An woni Ɓurɗo Yurmeende yurmeteeɓe ɓen fow, martin e am ɗum ko heɓi lam".

Men jaabi toraare makko nden, Men ittini mo ko heɓi mo kon immorde e lorra, Men okkiti mo ko o hattinoo kon immorde e ɓeynguure makko e geɗal ɓe makko, Men okkiti mo wano maɓɓe wonndude e maɓɓe, kala ɗum Men waɗirii ɗum Yurmeende immorde ka Amen, e waaju wonannde kala ɗoftorɗo Alla dewal; fii yo o munñor wano Ayyuuba munñornoo non.

Jaŋtii -an Nulaaɗo- Ismaa'iila e Idriisa e Jalkifli (yo ɓe his), gooto-kala e maɓɓe ko e munñiiɓe jarrabuyee ɓen ɓe jeyaa, e hoore daranagol kon ko Alla fawi ɓe.

Men naadi ɓe e nder Yurmeende Amen, Men waɗi ɓe Annabaaɓe, Men naadi ɓe ka Aljanna, pellet, kamɓe ko ɓe jeyaaɓe e jeyaaɓe Alla moƴƴuɓe gollirɓe ɓen ɗoftaare Joomi maɓɓe nden, tawi gunndooji maɓɓe e kene maɓɓe no moƴƴi.

Jaŋto -an Nulaaɗo- fillayee fii jom linngii ngil Yuunusa (yo o his), tum nde o yahunoo ko aldaa e duŋayee(sakkitgol immorde ka Joomi makko ko o tikkanɗo yimɓe makko ɓen sabu duumagol maɓɓe e geddi ɗin, o sikki wonnde Menen Men ɓittinan-taa mo; leptirgol fii ko o yahi kon, o jarriboraa saɗtude ɓitteede e dummbeede fewndo linngil ngil moɗunoo mo, o noddi ka nder niɓe reedu linngil ngil e maayo ngon e jemma on; ko o qirritiiɗo bakkaatu makko on tuubuɗo ka Alla immorde e ɗum, o wi'i: "Reweteeɗo e goonga alaa tanaa Maaɗa, A Senike A Laaɓii, min dey mi wonii jeyaaɗo e tooñuɓe ɓen".

Men jaabinani mo, Men danndiri mo immorde e saɗteende suno ngon yaltinngol mo ka nder niɓe, e ka nder reedu linngil ngil, ko yeru no Yuunusa danndiranoo nii e ndee saɗteende makko ɗoo Men danndirta gomɗinɓe ɓen si ɓe yanii e saɗteende ɓe torike Alla.

Jaŋto -an Nulaaɗo- fillayee Jakariyaa (yo o his) tuma nde o noddunoo Joomi makko Senayee wonanii Mo o maaki: "Jooma, wata A accan ko mi teelɗo hara mi alaa ɓiɗɗo, ko An woni Ɓurɗo Moƴƴude heddotooɓe ɓen, arsikam ɓiɗɗo mo no heddoo ɓaawo am".

Men jaabinani mo toraare makko nden, Men Okki mo Yahyaa ɓiɗɗo, Men moƴƴini sonnaajo makko on, o wonti jibinoowo ɓaawo hari o laatinoke dimaro, pellet, Jakariyaa e sonna makko e geɗaljo makko on ɓe laatinoke hiɓe heñoo faade e gollugol moƴƴi ɗin, ɓe laatinoke hiɓe nodda Men hara ko ɓe rerɗuɓe ko woni kon ka Amen immorde mbarjaari ndin, hara ko ɓe huluɓe kon ko woni ka Amen immorde e lepte ɗen, ɓe woniino yankinaniiɓe Men.

Jaŋto -an Nulaaɗo- fillayee fii Mariyama (yo o his) on reenunooɗo farju makko on immorde e jeeno, Alla Nuli e makko Jibriila (yo o his), o wutti e makko o sowii Iisaa (yo o his), [Mariyama] e geɗaljo makko on Iisaa ɓe laatike Maande e dow Bawɗe Alla wonannde yimɓe ɓen, wonndema pellet, hay e huunde ronkintaa Mo nokku ka O Tagi mo ko aldaa e baaba.

Pellet, kaa Diina mo'on -onon yimɓe ɓen- ko Diina woota, ɗum le ko Ngootimpaaku ngun ko ngun woni Diina Lismaamu kan, ko Min woni Joomi mo'on, Laɓɓinanee Lam dewal ngal Min tun.

Yimɓe ɓen seedi, tawi no e maɓɓe wootinɗinɗo e sirkuɗo e geddo e gomɗinɗo, ɓee seeduɓe ɓe fow maɓɓe ko ka Amen Menen tun ɓe artiroytee Ñalnde Darngal, Men yoɓa ɓe e dow golle maɓɓe ɗen.

Kala e maɓɓe golluɗo golle moƴƴe ɗen hara himo gomɗini Alla e Nulaaɗo Makko on e Ñalaande Sakkitiinde nden yiddugol alaa fii golle makko moƴƴe ɗen, ko woni, Alla jarnay mo O sowana mo mbarjaari ndin, o tawoya ɗum ka nder defter golle makko ñalnde o immintintee, o weltora ɗum.

Gasantaa yimɓe saare nde Men halkiri ɗum sabu geddi mayre nde ɓe ruttotoo ka aduna; fii yo ɓe tuubu tuubuubuyee maɓɓe on jaɓee.

Ɓe ruttotaako poomaa haa si udditoyaama heedo Yaajuuja e Maajuuja ngon, hara kamɓe nden ñalnde e immorde kala ka towti e leydi nden hiɓe yalta hara ko ɓe heñiiɓe.

Darngal ngal ɓadorii sabu yaltugol maɓɓe, kulol maggal e caɗeele maggal ɗen feeñi, e jaka yoo gite yedduɓe ɓen no udditii sabu saɗtude kulol maggal, ɓe wi'i: "Ee halkeede amen, gomɗii men laatinoke ka aduna e fijindaaru e welsindaare gaayi heblanagol ndee Ñalaande Mawnde, ko woni men laatinoke tooñirɓe keefeeru e waɗɗitagol geddi ɗin.

Pellet, onon -ɓee sirkooɓe- e kon ko rewoton ko woori Alla immorde e sanamuuji ɗin, e ɓen weltorayɓe ko rewoton ɓe kon jeyaaɓe ka yimɓe e ka jinnaaji on wonoyay kuɓɓateeri Jahannama, onon e reweteeɓe mo'on ɓen on naatoyay e magge.

Sinndo ɓee rewaaɓe laatino reweteeɓe e Goonga ɓe naatataano ka Yiite wonndude e ɓen rewunoo- ɓe ɓe, rewuɓe woo rewaaɓe woo ɓe fow maɓɓe hiɓe ka nder Yiite, ko ɓe ñiiɓooɓe ton poomaa ɓe yaltataa e nder magge.

No woodani ɓe nder ton -sabu saɗtude muuseendiiji ko ɓe hawrondirta kon- foofaango sɗtungo, kamɓe hiɓe ka Yiite ɓe nanataa hitooji ɗin immorde e saɗtude kulol ɗenƴinayngol ngol heɓungol ɓe.

Tuma nde sirkooɓe ɓen wi'unoo: (Pellet, Iisaa e Malaa'ikaaɓe rewanooɓe ɓen ɓe naatoyay yiite ngen) Alla Daali: "Pellet, ɓen ɓe Ganndal Alla aditii e fii mu'un wonnde ko ɓe yimɓe Malal ngal wano Iisaa (yo o his) ko ɓe woɗɗinteeɓe gaayi Yiite ngen.

Yottotaako e nanɗe maɓɓe ɗen hito Jahannama, kamɓe hiɓe e nder ko wonkiiji maɓɓe ɗin wooɗaa kon immorde e neemaaji e dakammeeji ɗin ko ɓe ñiiɓuɓe, neemaaji maɓɓe ɗin taƴataa poomaa.

Kulol mawngol ngol hulɓinoytaaɓe tuma Yiite ngen rewnetee e dow yimɓe magge ɓen, Malaa'ikaaɓe ɓen jaɓɓora ɓe jarnugol hara hiɓe wi'a: "Ko ndee woni Ñalaande mo'on nde wonanoɗon fodeende nden ka aduna, hiɗon weltiniree nder ton ɗin neemaaji ɗi hawroton e mu'un".

Ñalnde Men sowoyta kammu ngun yeru sowidugol ɗerol e ko ngol wonndi kon e mu'un, Men mooɓoya tageefo ngon e mbaadi maɓɓe ndi ɓe taganoo ndin e mu'un ka laawol aranol, Men fodii ɗum fodoore nde lunndagol alaa e mu'un, pellet, Men laatike Siinooɓe ko Men fodi kon.

Gomɗii Men winndiino ka defte ɗe Men Tillini ɗum e dow Nulaaɓe ɓen ɓaawo hari Men winndii ɗum ka Allauwal Reenaangal: "Pellet, leydi ndin ronoyay ndi jeyaaɓe Alla moƴƴuɓe gollirooɓe ɓen ɗoftaare Makko nden, ɓen le ko Mofte Muhammadu (yo Alla juulu e makko hisna) ɗen".

Pellet, no e nder koo ko Men jippini immorde e waaju ngun ɓanngal wonannde yimɓe rewirooɓe Joomi mu'un ko O Sar'inani ɓe kon, ko kamɓe woni nafitorooɓe ɗum.

Men Nuliraali ma -an Muhammadu- Nulaaɗo si wanaa Yurmeende denndaangal Tageefo ngon; sabu ko siforɗaa kon immorde e rerɗugol fii fewnugol yimɓe ɓen e danndugol ɓe immorde e Lepte Alla ɗen.

Maaku -an Nulaaɗo-: "Anndu ko Wahayinaa e am immorde e Joomi am ko wonndema Reweteeɗo mon On e Goonga ko Reweteeɗo Gooto, kafidaaɗo alanaa Mo ko Kanko woni Alla, ɗoworee gomɗinngol Mo, e gollirgol ɗoftaare Makko nden".

Si ɓee ɗurnike ko adduɗaa kon, maakan ɓe -an Nulaaɗo-: "Mi anndinii on wonndema min e mo'on fiyaake on no fota ɓanngude hakkunde am e mo'on, mi wonaali annduɗo ko honnde tuma jippintee e mooɗon ko Alla fodi kon immorde e Lepte Makko ɗen.

Pellet, Alla no Anndi ko finñinto immorde e konngol ngol, hiMo Anndi kadi ko suuɗo ton kon e maggol, hay e huunde suuɗanaaki Mo e ɗum, aray O Yoɓa on e dow ɗum.

Mi anndaa, no gasa hara nennanngol on Lepte ɗen ko ndarndagol on, e ɗaynugol, e dakmitugol on haa dummunne happaaɗo e Ganndal Alla; fii yo on duumi e geddi mo'on e majjere mooɗon.

Nulaaɗo Alla on (yo Alla juulu e makko hisna) maaki ko O noddayɗo Jooma: "Jooma, senndir hakkunde amen e yimɓe amen ɓen, ɓen deppitiiɓe e geddi ɗin Ñaawoore Goongaare nden, ko Joomi amen Hinnorante On men wallitorta e dow ko wowloton immorde e geddi e fennugol ngol".

Ko onon yo yimɓe, huliree Joomi mon ɗoftagol ko O yamiri on kon, e nantagol ko O haɗi on kon e mu'un, anndo, ko wondata kon e Darngal ngal immorde dillugol leydi ndin e tanaa mu'un e kulaleeji ɗin, ɗum ko fiyaake mawɗo, no waɗɗii heblanorgol ɗum gollugol ko weltinta Alla.

Ñalnde seedoytoɗon kala muyninaykun no welsindoo e ko kun muyninaynoo kon, kala sowiikun jibina ko kun sowinoo kon immorde e saɗtude kulol ngol, a yi'ay yimɓe ɓen sabu wirnagol hakkillaaji maɓɓe hiɓe wa'i wa siwruɓe immorde e saɗtude kulol Darorde nden, ɓe wonaa siwrirɓe yarugol beere, kono Lepte Alla ɗen ko sattuɗe, ɗe waasinii ɓe hakkillaaji maɓɓe ɗin.

No e yimɓe ɓen on wennjoowo e fii Bawngal Alla e dow immintingol mayɓe ɓen ko aldaa e ganndal ngal o tuugii e mu'un, o jokka e finnde makko nden e konngol makko ngol kala sanndalɗiiɗo e dow Joomi mu'un immorde e Seytanuuji ɗin, e yeesooɓe majjere nden.

Winndaama e dow on sanndalɗiiɗo immorde e Seytanuuji yimɓe e jinna wonnde kala jokkuɗo mo o goongini mo haray kanko o majjinay mo gaayi Laawol Goongawol ngol, o sogga mo haaa ka Lepte yiite ngen sabu ko o ɗowata mo kon e muuɗum immorde e keefeeru ngun e geddi ɗin.

Ko onon yo yimɓe, si tawii sikke no ka mo'on fii Kattanɗe Amen e dow immintinngol on ɓaawo mayde nden, awa taskee e tagu mo'on ngun; gomɗii Men Tagiino baaba mooɗon Aadama e mbulaare, refti Men Tagi ɓiɗɓe makko ɓen immorde e maniiyo mo gorko on werlotoo ɗum e nder rannga suddiiɗo on, refti maniyo on wonta ƴiiƴam fenndiiɗam, refti ƴiiƴam fenndiiɗam ɗam wonta huyre teewu nanndunde e huyre ƴakkaande refti huyre nden wonta tagu timmungu ngu heddoo ka rennga haa jibinaaɗo wuuruɗo yalta, maaɗum le tagu ngu timmaa rennga on fukka ɗum; fii yo Men ɓannginan on Kattanɗe Amen e Tagugol on e alhaaliiji, Men tabintina ka renngaaji ko Men Muuyi kon immorde e cawli haa ɗi jibinee e dummunne happaaɗo ɗum ko lebbi jeenay, refti Men yaltina on ka deedi neeniraaɓe mo'on ko on boobooɓe, refti fii yo on yotto faade e timmal doole e hakkil, no e mo'on on mo no maaya ado ɗum, no e mo'on kadi on mo no wuura haa o yottoo duuɓi nayewu nokku ka doole ɗen e hakkille ɗen lo'ata, haa o wonta ɓurɗo bonude alhaali diini boobo on, hara o annditataa hay e huunde ko o anndunoo kon, a yi'ay leydi ndin ko yoorundi puɗi alaa e mayri, si Men jippinii e mayri toɓo ngon ndi udditanoo puɗi ɗin, ndi ƴura sabu ɓeydagol puɗi mayri, ndi yaltina kala noone immorde e puɗi labaaɗi ndarngo.

Ɗum ko Men jaŋtanii on -immorde e fuɗɗoode tagu mo'on e taaɓe mu'un e alhaaliiji ɓen ɓe no jibinee e mo'on- fii yo on gomɗin wonndema On Alla Taguɗo on ko Kanko woni Goonga ka sikke alaa e muuɗum, ɗum no lunndii ko rewoton kon immorde e sanamuuji mo'on, fii yo on gomɗin wonnde Kanko himo wurnita mayɓe ɓen, wonnde Kanko e dow kala huunde ko O Hattanɗo, hay e huunde ronkintaa Mo.

Fii yo on gomɗin wonnde pellet, Darngal ngal ko aroowal sikkewoo alaa fii arugol maggal, wonnde pellet, Alla immintinay maayɓe ɓen ka genaale maɓɓe fii yo O yoɓu ɓe e dow golle maɓɓe ɗen.

No e heeferɓe ɓen on mo no wennja fii Ngootimpaaku Alla ngun, ko aldaa e ganndal hewtinayngal ɓe e Goonga kan, wanaa jokkooɓe feewuɓe tinndinay ɓe ɓe e ɗum, wanaa kadi deftere jalbinnde jippinaande immorde ka Alla fewnaynde ɓe e Goonga kan.

Ko o falɗo daande makko sabu mawnintinaare fii yo o yiltu yimɓe ɓen e gomɗinal e naatugol ngol ka diina Alla, kala mo sifa mu'un wa'i nii no woodani mo koyeere ka aduna sabu lepte hawrayɗe e makko ɗen, Men mettina mo kadi ka Laakara Lepte Yiite sunnooje ɗen.

Wi'anee mo: "Ɗen Lepte ɗe meeɗɗaa ɗum ko sabu ko faggitinoɗaa kon immorde e keefeeru e geddi ɗen, Alla O Leptataa hay e gooto e tagu Makko ngun si wanaa sabu bakkaatu".

No e yimɓe ɓen powotooɗo himo rewa Alla e dow sikke, si moƴƴere heɓii mo immorde e cellal e ngalu o tamoo e dow gomɗinal makko e dewal makko Alla ngal, si jarrabuyee hiɓii mo sabu ñaw e baasal o ñakkinora diina makko kan o yartodina e makka, o hayrii aduna makko on, keeferaaku makko ngun ɓeydataa mo ngeɗo ngu winndana- nanooka mo ka aduna, o hayririi kadi Laakira mak- ko on sabu ko o hawrata kon immorde e Lepte Alla ko ɗum tigi woni hayrere ɓanngunde nden.

Himo rewa gaanin Alla sanamuuji ɗi lorrataa mo si o yeddii ɗi, ɗi nafataa mo kadi si o ɗoftike ɗi, ngal dewal sanamuuji ɗi lorrataa ɗi nafataa kadi ko ɗum woni majjere woɗɗunde nden gaayi Goonga kan.

Oo keefeero wonɗo rewude sanamuuji ɗin, himo rewa kon ko lorra mu'un heɓii ka kan ɓuri ɓadaade diini nafa mu'un haɗtaaka kan, pellet, bonii on reweteeɗo mo lorra mu'un ɓuri ɓadaade diini nafa mo'on, bonii walloowo wonannde on wallitorɗo mo, bonii wonndiiɗo kadi wonannde on wonndiniiɗo e makko.

Pellet, Alla hiMo naada ɓen gomɗinɓe Mo ɓe golli golle moƴƴe ɗen Aljannaaji canɗi ɗin no ila e ley kuɓeeji majji, pellet, Alla hiMo wada ko o faalaa kon immorde e Yurminngol on mo O Yurmini ɗum, e Leptugol on mo O Lepti ɗum, alaa dooloowo Mo O Senike.

On laatiiɗo himo sikki wonnde Alla wallataa Annabaajo makko on (yo Alla juulu e makko hisna) ka aduna e ka Laakara awa yo o fontu ɓoggol faade ka kippudi suudu makko, refti o ɗeɗɗitora ngol wenngugol hoore-makko gaayi leydi ndin, refti o ndaara taw si ɗum ittay tikkere nde o tawata nden ka wonkii makko, Alla ko O walloowo Annabaajo Makko on, sanndalɗiiɗo on jaɓi wllo o saliima.

Ko wano Men ɓannginirani on nii hujjaaji ɓannguɗi ɗin e dow Immital ngal Men Jippiniri e dow Muhammadu (yo Alla juulu e makko hisna) Alqur'aanaare nden Aayeeje ɓannguɗe, e wonndema Alla hiMo hawrinndinira e Ɓural Makko ngal on Mo o yiɗi fii Laawol e Peewal ngal.

Pellet, ɓen gomɗinɓe Alla immorde e ɗee mofte, e Alyahuuda en, e Saabi'iina en (ɓen ko fedde jokkunde woɓɓe e Annabaaɓe ɓen), e Annasaara en, e rewooɓo yiite ɓen, e rewooɓe sanamuuji ɗin -pellet, Alla Ñaawoyay hakkunde maɓɓe Ñalnde Darngal O naadoya gomɗinɓe ɓen Aljanna on, O naadoya tanaa maɓɓe yiite ngen, pellet, Alla e dow kala huunde immorde e konnguɗi jeyaaɓe ɓen e golle maɓɓe ɗen ko O Seediiɗo, suuɗutaako Mo huunde e ɗum, aray O yoɓa ɓe e dow ɗum.

Kaa a anndaa -an Nulaaɗo- wonndema Alla, no sujjannde Mo sujuudu ɗoftaare ɓen wonɓe ka kammuuli immorde e Malaa'ikaaɓe ɓen, e ɓen wonɓe ka leydi e gomɗinɓe ɓen ka yimɓe e ka jinnaaji, naange ngen kadi no sujjannde Mo, lewru ndun no sujjannde Mo, koodeɗen ka kammuuli no sujjannde Mo, e pelle ɗen e leɗɗe ɗen e daabeeji ɗin ka leydi; sujuudu ɗoftagol, no sujjannde Mo ko heewi immorde e yimɓe ɓen sujuudu ɗoftaare, ko heewi kadi no salii sujjanngol Mo ɗoftoo, jojji e hoore-maɓɓe Lepte Alla ɗen sabu yeddugol maɓɓe ngol, kala mo Alla Ñaawi hoyre e dow mu'un sabu geddi mum en ɗin laatantaako mo hay e gooto mo no teddina mo. Pellet, Alla hiMo waɗa ko O Faalaa, doolayɗo Mo alaa O Senike.

Ɓee ɗoo ko ɓe feddeeji ɗiɗi yeddondirɓe ɗiɗo fii Joomi maɓɓe ko hommbo e maɓɓe woni goonguɗo on: Fedde gomɗinal ngal, e fedde keefeeru ngun; fedde keefeeru ngun yiite ngen huuɓitoyay ɓe wano conci huuɓitirta non borniiɗo ɗi on, wancinee ka dow ko'e maɓɓe ndiyam hattuɗam e wulugol.

Ɗam taayiniree ko woni kon ka deedi maɓɓe immorde e cewɗi sabu saɗtude nguli mu'un, yottoo e guri maɓɓe ɗin ɗam tayna ɗi.

No woodani ɓe ka Yiite ɓoole njamɗe Malaykaaji ɓen no piyira ɗe ko'e maɓɓe ɗen.

Tuma kala ɓe etii yaltugol ka Yiite sabu saɗtude ko ɓe hawri kon e mu'un nder ton, immorde e saɗteende ɓe yiltitee e magge, wi'anee ɓe: "Mettee Lepte Yiite Sunnoowe ngen.

Fedde gomɗinal ngal ko kamɓe woni ɓen gomɗin- ɓe Alla ɓe golli golle moƴƴe ɗen, Alla naaday ɓe e nder Aljannaaji hara canɗi ɗin no ila e ley kuɓeeje majji e leɗɗe majji, Alla cuɗira ɓeo hollitirgol ɓe molle(jawe) kanŋe, O cuɗira ɓe kadi holtinirg lu'ulu'uuje, conci maɓɓe ɗin nder ton laatoo ko hariire nden .

Alla fewni ɓe ka ngurndan aduna faade e konnguɗi laaɓuɗi wano Seedagol wonndema reweteeɗo alaa si wanaa Alla, e Habbirgol ngol e Yettugol ngol, O fewni ɓe kadi e Laawol Yettaangol ngol.

Pellet, ɓen yedduɓe Alla, hiɓe haɗa kadi tanaa maɓɓe naatugol ngol ka Lislaamu, ɓe sakkoo yimɓe ɓen gaayi Juulirde Horminnde nden, wano sirkooɓe ɓen waɗiri non hitaande Hudaybiiyya, aray Men mettina ɓe Lepte muusuɗe ɗen, nden Juulirde nde Men waɗi qibla yimɓe ɓen ka julde maɓɓe e rewirnde immorde e dewe Hajju ngun e Umra on, no fota tek e mayre makkayankoojo hoɗuɗo on nder ton, e liigotooɗo on e mayre hara o jeyaaka e yimɓe makka ɓen, kala faandiiɗo selirgol Goonga kan e nder mayre yanugol e goɗɗum e geddi ɗin e tewaare Men mettinay mo immorde e Lepte muusuɗe.

Jaŋta -an Nulaaɗo- tuma nde Men ɓannginannoo Ibraahiima (yo o his) nokku Suudu ndun e keeri mayru ɗin ɓaawo hari ko ɗi majjaaɗi, Men wahyii e makko wata a kafidu e dewal Am ngal hay e huu- nde, ko woni rewAm Min tun, laɓɓinaa Suudu Am ndun immorde e soɓeeji so'eteeɗi ɗin e njikkuyankooji ɗin fii wanngotooɓe ndu ɓen, e juulooɓe ɓen e nder mayru.

Ewno e yimɓe ɓen ko a noddayɗo ɓe faade e hajjugol nduu Suudu ndu Men Yamirmaa mahugol ɗum; ɓe arete ko ɓe seppooɓe maaɗum waɗɗiiɓe e dow kala ngelooba horiimba sabu tampere laawol ngol, gelooɗi ɗin adday ɓe hara hiɗi ronndii ɓe immorde e kala ɗatal woɗɗungal.

Fii yo ɓe tawe e huunde artiranaynde ɓe nafa kan immorde e yawtaneede bakkatuuji ɗin, e heɓugol mbarjaari ndin, e wootiɗinngol konngol ngol e tanaa ɗum, e fii yo ɓe jaŋto Innde Alla e dow kon ko ɓe hirsata ɗum e neldaaje e ñalɗi anndaaɗi, ɗin le: Ko sappo donkin e balɗe tati batte ɗum; yettugol Alla e dow kon ko O arsiki ɓe immorde e gelooɗi ɗin e na'i ɗin e dammi ɗin, ñaamee immorde e ɗee neldaaji, ñamminon immorde e majji kala saɗtuɗo ɓillaare.

Refti yo ɓe ittu ko heddinoo kon e hoore-maɓɓe immorde e laawi hajju maɓɓe,ɓe dagina femmbu- gol ko'e maɓɓe e herñugol(hooltaade) peɗaali (cegeneeji) maɓɓe e ittugol tuundi mooɓo- ndirndi ndin e maɓɓe sabu harminngol ngol,fii yo ɓe humnu ko ɓe waɗɗini kon e dow wonkiiji maɓɓe immorde e hajju maaɗum Umra maaɗum neldaare e fii yo ɓe wanngo wanngaango waynorngo Suudu ndun ndu Alla rimɗini ɗum e wurtagol dunndere- yankooɓe ɓen e mayru.

Ɗum ko yamiraɗon -immorde e daginngol fem- mbugol hoore nden e herñugol peɗaali ɗin e ittugol tuundi ndin, e humnugol fodooji ɗen e wanngagol Suudu ndun- ko ɗum woni ko Alla waɗɗini kon e dow mo'on, mawninee ko Alla waɗɗi kon e dow mo'on, kala woɗɗitiiɗo ko Alla Yamiri mo kon woɗɗitagol ɗum e fewndo harmingol makko; hara ko mawninngol keeri Alla ɗin fii wata o yanu e majji, e hormaaji Makko ɗin kadi fii wata o dagin ɗi haray ɗum ko moƴƴere makko ka aduna e ka Laakara ka Joomi makko O Senike, daginanaama on -onon yimɓe ɓen- neemoraaɗi ɗin immorde e gelooɗi e na'i e dammi, O harminaa e dow mooɗon immorde e majji dudumba wanaa jelaamba wanaa jokkindirmba, O harminaali e majji si wanaa ko tawoton kon ka Alqur'aana immorde e harmugol jiibe e ƴiiƴam e tanaa ɗii ɗiɗi, woɗɗitee e soɓe ɗen ɗum le ko sanamuuji ɗin, woɗɗitoɗon kadi e kala konngol meere; fenugol fawa e Alla maaɗum e tagu Makko ngun.

Ɓe woɗɗitee ɗum ɓe seli kala diina si wanaa Diina Makko ka O Welaa kan, ɓe kafidaali Mo ka Dewal hay e gooto, kala kafiduɗo Alla e goɗɗum haray no wa'i wa si o iwu ka kammu o yini, ko imma sonndu jilike teewu makko e ƴi'e makko, maa henndu henndu ndun werloo mo e nokkuure woɗɗunde.

Ɗum ko Alla Yamiri immorde e Ngootimpaaku Makko e laɓɓinanngol Mo, e woɗɗitagol sanamuuji ɗin e konngol fenaande ngol. Kala mawninɗo Maandeeji Diina kan -no jeyaa e majji neldaaji ɗen e Dewe hajju ngun,- pellet, mawninngol ɗi ko jeya- ɗum e kulol ɓerɗe ɗen wonannde Joomi majje.

No woodani on nafaaji e ɗen neldaaje ɗe boroto- ɗon ɗum ka Suudu, wano waɗɗagol ngol e teefi ɗin e ɓikkoy koy e kosam ɗam, dummunne hap- paaɗo e waqtu hirsugol ɗi tuma ɓaɗagol ka Suudu Alla ndun ndu O rinɗi ɗum immorde wortagol dun- ndarankooɓe ɓen.

E kala mofte wuliiɗe Men waɗiino hajjirde fii hibbugol ƴiiƴe ɗem ɓattorɗum Alla; jorto fii yo ɓe jaŋto Innde Alla e dow ko ɓe hirsata kon immorde e ɗin ɓattorɗi tuma kirse ɗen; jarnugol Alla e dow ko O arsiki ɓe kon immorde e gelooɗi ɗin e na'i ɗin e dammi ɗin, Reweteeɗo mon On e Goonga -onon yimɓe ɓen- ko Reweteeɗo Gooto kafidaaɗo alanaa Mo, ko Kanko tun ɗoworton yankinaare e ɗoftaare, humpitu -an Nulaaɗo- yankiniiɓe laɓɓini ɓen ko weltinta ɓe.

Ɓen tawɓe si Alla jaŋtaama ɓe hulay Lepte Makko ɗen, ɓe woɗɗitoo lunndagol Yamiroore Makko nden, ɓe totta Julde nden ɓe timmina, ɓe muññoo si jarrabuyee heɓii ɓe, ɓe nafka goɗɗum e ko Alla arsiki ɓe kon e nder ɗoftagol [Yamiroore Alla nden].

Gelooɗi ɗin e na'i ɗin, ɗin neldaaɗi Suudu ndun Men waɗanii on ɗi jeyaaɗi e so'irteeɗi Diina kan e maandeeji makka ɗin, no woodani on e majji nafa diinayankoha e adunayankoha, wi'ii: (Bismillaahi) tuma boragol ɗi ɓaawo ɗi saffinii darorɗe majji hara hiɗi darii no haɓɓaa gootal e koyɗe yeesooje majji ɗen fii wata ɗi saako, siɗi fukkike ɓaawo boragol ngol e dow ɓabbe majji, ñaamee -onon nelduɓe ɓen- immorde e majji, okkoron ɓilliiɗo nanntiiɗo on e toragol, e ɓilliiɗo weeɓitotooɗo fii yo o okkore e ɗum, ko wano Men eltirani on ɗi nii fii yo on ronndin ɗi waɗɗoɗon ɗi Men eltirani on ɗi, ɗi ɗoftii haa nokku ka borotoɗon ɗi ɗon; ɓattorɗum Alla belejo'o onon on yettay Alla e dow neema eltanngol on ɗi ngol.

Hewtataa Alla tebbuuli ɗi anndoton ɗum immorde e neldaaje ɗen wanaa kadi ƴiiƴe majji ɗen, ɗum ɓantetaake ka Makko, kono ko ɓantitee ka Makko ko kulol mo'on Alla ngol e nder mu'un, ɗum woni laɓɓinanon Mo e ɗoftagol mo'on ngol fii ɓattorgol ɗum ka Makko, ko wano nii Alla eltirani on ɗi fii yo on mawnin Alla hara ko on jarnuɓe Mo e dow kon ko O hawrinndini on immorde e Goonga kan, humpitu -an Nulaaɗo- moƴƴinɓe ɓen ke Rewugol maɓɓe Joomi maɓɓe e ka huuwondiral maɓɓe e tagu Makko ngun, ko weltinta ɓe.

Pellet, Alla O duñananay ɓen gomɗinɓe Mo bone ayɓe maɓɓe ɓen, pellet, Alla yiɗaa kala janfotooɗo hoolaare Makko nden, heewuɗo yeddugola neemaaji Alla ɗin o jarnataa Alla e dow majji ko woni himo añi ɗi.

Alla duŋanike ɓen gomɗinɓe ɓe sirkooɓe ɓen woni haɓirde warngo; sabu ko yani kon e maɓɓe immor- de e tooñe ayɓe maɓɓe ɓen, pellet, Alla ko O hat- tanɗo e dow wallugol gomɗinɓe ɓen e hoore ayɓe maɓɓe ɓen ko aldaa e hare, kono Ñeeñal Makko ngal ñaawii yo gomɗinɓe ɓen jarribore haɓugol yedduɓe ɓen.

Ɓen ɓe heeferɓe ɓen yaltini ka galliiji mu'un e hoore tooñe, wanaa sabu bone mo ɓe waɗɗitii ɗum, si wanaa tun kamɓe ɓe wi'ii: "Joomi amen ko Alla, men maraa Jooma tanaa Makko". Sinndo wonaano ko Alla sar'inani kon Annabaaɓe ɓen e gomɗinɓe ɓen fii haɓugol ayɓe maɓɓe ɓen, ɓe jaggitayno e nokkuuji dewal ɗin, ɓe yirbina rewirɗi ruhbaaniyankooɓe ɓen, e rewirɗi Annasaaraa en, e rewirɗi Alyahuuda en, e Misiddaaji Juulɓe ɓen hebliranaaɗi fii Julde, Julɓe ɓen no jaŋtoo Alla e nder majji ko ɗuuɗi, ma Alla wallu ɓen wallooɓe Diina Makko kan e Annabaajo Makko on, pellet, Alla ko O Dolnuɗo e dow wallugol ɓen wallayɓe Diina Makko kan, ko O Tedduɗo hay e gooto foolataa Mo.

Ɓee fodaaɓe ballal ngal ko ɓen woni ɓen tawɓe si Men newiniranii ɓe ka leydi ballal e hoore ayɓe maɓɓe ɓen ɓe tottay Julde nden e noone ɓurɗo timmude, ɓe jonna Jakka jawli maɓɓe ɗen, ɓe yamira ko Sar'ia on yamiri kon, ɓe haɗa ko o haɗi kon. Ko Alla tun heeranii ruttorde fiyakuuji ɗin ka warjagol e ɗum e Leptugol.

Si yimɓe maaɗa ɓen fennii ma -an Nulaaɗo- haray muñño, a wonaali arano e ɓen ɓe yimɓe mun fenni immorde e Nulaaɓe ɓen, gomɗii yimɓe Nuuhu ɓen fenniino mo, Aadinkooɓe ɓen fenniino Huudu, Samuudinkooɓe ɓen kadi fenni Saalihu.

yimɓe Ibraahiima ɓen fenni mo, yimɓe Luutu ɓen kadi fenni mo.

Yimɓe Madyana ɓen fenni Su'aybu, Fir'awna e yimɓe mu'un ɓen fenni Muusaa, Mi nennani yimɓe maɓɓe ɓen Lepte ɗen fii ɗaynugol ɓe, refti Lepte ɗen nanngi ɓe, tasko ko honno Mi yagginirnoo ɓe, gomɗii Mi halkirii ɓe sabu geddi maɓɓe ɗin.

Ko heewiri wa ɗen ca'e ɗe Men halkiri ɗum -tawi ko ɗe tooñirɗe geddi majje- Lepte mulayɗe ɗen, hara galleeji majje ɗin ko yirbinaaɗi yeewuɗi immorde e hoɗuɓe e majji, ko ɗuuɗiri wa boyli yeewuɗi immorde e ƴoogooɓe majji sabu halkeede maɓɓe, ko ɗuuɗiri wa kuɓeeje toowuɗe cuɗaaɗe, ɗen ɗe ndeenaani hoɗuɓe e majje ɓen Lepte ɗen.

Kaa hara ɓee fennuɓe ko Nulaaɗo on (yo Alla juulu e makko hisna) addi kon yahaali ka leydi; fii yo ɓe yi'u batteeji ɗen ca'e halkanooɗe, ɓe miijitora hakkillaaji maɓɓe ɗin fii yo ɓe tasko, ɓe nana fillayeeji maɓɓe ɗin nanɗe jaɓugol fii yo ɓe waajito, pellet mbunɗan gite ɗen wanaa ɗan woni mbunɗan ɗan, ko woni, mbunɗan halkayɗan ɗan yeeba ko mbunɗan giiɗe ɓernde ɗan, nde tawnoo laatantaako jom majjan taskagol wanaa kadi waajitagol.

Yedduɓe ɓen ka yimɓe maaɗa no ɗaɓɓirde ma -an Nulaaɗo- yaawnaneede Lepte ɗen ka aduna e Lepte saatinaaɗe ɗen ka Laakara tuma nde ɓe hulɓiniranoo ɗe, Alla lunndataako ko O fodi ɓe kon e ɗum immorde ka Makko, no jeyaa e yaccinanoo- ɗe ɗen ko jippinoo kon e maɓɓe ñalnde Badri, pellet, ñallal gootal Lepte ka Laakara ko yeru duuɓi wuluure no limirton non duuɓi aduna ɗin sabu ko woni kon e nder maggal immorde e Lepte ɗen.

Ko ɗuuɗiri wa ɗen ca'e ɗe Mi nennani ɗum Lepte ɗen tawi kannje ko ɗe tooñirɗe geddi majje, Mi yaccinanaali ɗe ɗum ka ɗaynugol ɗe, refti Mi nan- ngiri ɗe Lepte mulayɗe, ko ka Am Min tun woni ruttorde maɓɓe Ñalnde Darngal, Mi yoɓira ɓe e dow geddi maɓɓe ɗin Lepte duumiiɗe ɗen.

Ko onon yo yimɓe, anndee min ko mi jertinoowo on miɗo yottina e mooɗon ko mi Nuliraa kon, ko mi ɓannguɗo e nder jertinngol am ngol.

Ɓen gomɗinɓe Alla ɓe golli golle maƴƴe ɗen no woodani ɓe immorde ka Joomi maɓɓe hafraenede bakkatuuji maɓɓe ɗin, no woodani ɓe kadi ka Aljanna arsike tedduɗo mo taƴaataa poomaa.

Ɓen tinniiɓe e fennugol Aayeeje Amen ɗen hiɓe eɓɓindii wonndema kamɓe ɓe ronkinay Alla ɓe laawoo Mo hara O Leptaali ɓe, ɓen ɗon woni yimɓe Jahiimaawe ngen ɓe jokkondiray e magge wano wonndiiɗo jokkondirirta e wonndiiɗo mu'un.

Men Nulaali ado maaɗa -an Nulaaɗo- Nulaaɗowoo wanaa kadi Annabaajo si wonaa nde mo jannga Deftere Alla nden Seytaane werloto e nder jannde makko kin ko o sonwosinira(jiɓa) yimɓe ɓen wonnde ɗum ko jeyaaɗum e wahayu on, Alla no bonna ko Seytaane werlii kon ka werlorde makko, O tabintina Aayeeje Makko ɗen, Alla ko O Annduɗo kala huunde, hay e huunde suuɗanaaki mo, ko O Ñeeño e Tagugol Makko ngol e Hoddirgol Makko ngol e Fewjugol Makko ngol.

Seytaane no werloo ka janki Annabaajo on fii yo Alla waɗu ko o werlii kon ndarndorɗum naafiqiiɓe ɓen, e ɓen ɓe ɓerɗe mu'un yoori immorde e sirkooɓe ɓen. Pellet, tooñooɓe ɓen jeyaaɓe e naafiqiiɓe ɓen e sirkooɓe ɓen ɓe wonii e ngayngu wonannde Alla e Nulaaɗo Makko on e woɗɗitaare gaayi Goonga kan e Peewal ngal.

Fii yo ɓen ɓe Alla okki ganndal ngal yanane won- ndema Alqur'aanaare jippinaande nden e Muhammadu (yo Alla juulu e makko hisna) ko kayre woni Goonga ka Alla wahayini kan e maaɗa -an Nulaaɗo- ɓe ɓeydoo gomɗinngol nde, ɓerɗe maɓɓe ɗen yankinanoo nde, pellet, Alla O Fewnay ɓen gomɗinɓe nde faade e Laawol Goonga fooc- ciingol ngol, ngol ngol ooñaare alaa e nder mu'un; ɗum ko njoɓdi maɓɓe e dow ko ɓe yankinanii Mo kon.

Ɓen yedduɓe Alla ɓe fenni Nulaaɗo Makko on ɓe seerataa hiɓe e nder sikke fii ko Alla Tellini kon e maaɗa immorde e Alqur'aanaare nden, ko ɓe jokkindirɓe haa Darngal ngal ara e maɓɓe e juhngo hara kamɓe hiɓe e hoore-ɗum, maaɗum ara e maɓɓe Lepte Ñalaande nde moƴƴe- re e yurmeende alaa e mu'un, nden le ko Ñalnde Darngal wonannde maɓɓe.

Laamu ngun Ñalnde Darngal -Ñalnde ko ɓee wonanoo fodeede kon immorde e Lepte ɗen arata ko Alla tun heeranii, O alaa pooɗondirteeɗo e ɗum,Kanko O Senike hiMo Ñaawa hakkunde gomɗinɓe ɓen e yeduɓe ɓen, O Ñaawana mo kala e maɓɓe ko o hanndi kon e mu'un, ɓen gomɗinɓe Alla ɓe golli golle moƴƴe ɗen no woodani ɓe mbar- jaari mawndi ɗum ko Aljannaaji Neema duumiiɗo on mo taƴataa.

E ɓen yedduɓe Alla ɓe fenni Aayeeje Amen jippinaaɗe ɗen e dow Nulaaɓe Amen ɓen, no woodani ɓe Lepte hoynooje Alla no hoynira ɓe ɗe ka Jahannama.

Ɓen accuɓe galleeji mu'un e leyɗe mu'un fii ɗaɓɓugol welayee Alla on e semmbinngol Diina Makko kan, refti ɓe waraa ka jihaadi fii Laawo Makko ngol, maaɗum ɓe maayi -ma Alla arsikoy ɓe ka Aljanna arsike moƴƴo duumiiɗo mo taƴataa, pellet, Alla O Senike ko Kanko woni Moƴƴo arsikooɓe ɓen.

Ma Alla naadoyɓe e nokkuure nde ɓe weltoroyta ɗum nden le ko Aljanna on, pellet Alla ko O Annduɗo golle maɓɓe ɗen e annuyeeji maɓɓe ɗin, Muññiiɗo nokku ka O yaccinantaa ɓe Lepte ɗen e dow ko ɓe welsindii kon e mu'un.

Ɗum ko jaŋtaa ɗoo, immorde e naadugol feruɓe ɓen ka Laawol Alla Aljanna, immorde duŋayee on fii tiindagol jaggitooɓe ɓen yeru ko ɓe jaggiti kon nokku ka tawata junuubu alaa e mum e nder ɗum, si jaggituɗo on fillitike jaggitugol makko ngol haray pellet, Alla wallay jaggitaaɗo on e hoore mu'un. Pellet Alla ko O Yaafotooɗo bakkatuuji gomɗinɓe ɓen, Surroowo ɓe.

Ngol wallugol jaggitaaɗo on e hoore-mu'un ko fii Alla ko O Hattanɗo e dow ko O Muuyi kon, no jeyaa e Kattanɗe Makko ɗen naadugol jemma on e nder ñalorma on, e ñalorma e nder jemma on; sabu ɓeydugol goɗɗo e majji e uytugol oya, pellet, Alla ko O Nanoowo konnguɗi jeyaaɓe ɓen, anndu- ɗo golle maɓɓe, suuɗanaaki Mo huunde e ɗum, aray O yoɓa ɓe e dow ɗum.

Ɗum ko jaŋtaa ɗoo immorde e naadugol Alla jemma on e nder ñalorma on, e ñalorma on e nder jemma on; sabu Alla ko Kanko woni Goonga kan, Diina Makko kan ko Goonga, Fodoore Makko nden ko Goonga, Wallugol Makko gomɗinɓe ɓen ko Goonga, kon ko sirkooɓe ɓen rewata gaanin Alla immorde e sanamuuji ko ɗum woni meere nden, nden nde dosɗe alanaa ɗum, pellet, Alla ko Kanko woni Toowuɗo On e dow tagu Makko ngun Jaati e Kattanɗe e Jaalagal, Mawɗo On Mo Manngu Mu'un Timmungu woodani.

Kaa a yi*aali -an Nulaaɗo- wonndema Alla O jippinii immorde ka kammu toɓo, leydi ndin wattini ɓaawo jippagol toɓo ngon e mayri haakiɗundi sabu ko ndi funni kon immorde e puɗi, pellet Alla ko O Newaniiɗo jeyaaɓe Makko ɓen nokku ka O jippinani ɓe toɓo ngon, O fuɗinani ɓe leydi ndin, ko O Humpitiiɗo nafaaji maɓɓe ɗin, suuɗanaaki hay e huunde e ɗum.

No woodani Mo Kanko tun Jeyal ko woni kon ka kammuuli e Jeyal ko woni kon ka leydi, pellet, Alla ko Kanko woni Galo Mo hatonnjinaa faade e tagaaɗowoo immorde e ɓe O tagi ɓen, Yettiniiɗo e kala alhaali.

Kaa a tinaali -an Nulaaɗo- wonndema Alla eltanii ma an e yimɓe ɓen ko woni kon ka leydi immorde e daabeeji e joorɗi fii nafa mo'on e haajuuji mo'on, O eltani on kadi laaɗe ɗen hiɗe doga ka maayo e Yamaruyee Makko e eltaango Makko iwde e leydi yaha e leydi, hiMo jogitii kammu ngun fii wata ngu fukko ka leydi si wanaa e duŋayee Makko, sinndo O duŋanino ngu fukka ngol e hoore mayri ngu fukkotono, pellet, Alla ko O Newaniiɗo yimɓe ɓen Yurmeteeɗo ɓe, nokku ka O eltani ɓe ɗii piiji wonndude e tooñe ɗe ɓe wonndi e muuɗum.

Alla ko Kanko wurni on nokku ka O woodini on ɓaawo hari on laatike waasaaɓe, refti O wara on si ngurnandam mo'on ɗan lannii, refti O wurnita on kadi ɓaawo maayugol mo'on fii yo O hasbu on e dow golle mo'on, O yoɓa on e ɗum. Pellet, neɗɗanke on ko o heewuɗo yeddirgol neemaaji Alla ɗin -fii kala hiɗi feeñi- sabu rewugol makko wonndude e Alla tanaa Makko.

Men waɗanii kala yimɓe diina sari'a, hiɓe gollira sari'a maɓɓe on, wata pooɗondir e maaɗa -an Nulaaɗo- sirkooɓe ɓen e yimɓe diinaaji goo fii sari'a maaɗa on, ko an ɓuri hanndude e Goonga kan diini kamɓe; sabu kamɓe ko ɓe yimɓe meere, noddu yimɓe ɓen e laɓɓinanngol Alla ngootiigu ngun, pellet, an hiɗa e Laawol Focciingol, ooñannde alaa e maggol.

Si ɓe salike accugude wennjugol ma ɓaawo feeñugol hujja on haray fawu fiyaake maɓɓe on ka Alla wowliraa kammbugol: "Ko Alla woni Annduɗo ko kon golloton immorde e golle, suuɗanaaki hay e huunde e golle mo'on ɗen, aray O yoɓa on e dow majje".

Alla Ñaaway hakkunde jeyaaɓe Makko ɓen: Gomɗinɓe maɓɓe e yedduɓe maɓɓe Ñalnde Darngal fii kon ko ɓe wonnoo luutondirnde e fii mu'un ka aduna immorde e fiyaake diina kan.

Kaa a anndaali -an Nulaaɗo- wonndema Alla no Anndi ko woni kon ka kammu, hiMo Anndi ko woni kon ka leydi, suuɗanaaki Mo hay e huunde e ko woni kon e nder majji, pellet anndal ɗum no winndaa e nder Alluwal Reenaangal ngal, pellet, anndude ɗum fow no newanii Alla.

Sirkooɓe ɓen no rewude gaanin Alla sanamuuji Alla jippinaali hujja ka Deftere Makko fii rewugol ɗi, laatanaaki ɓe kadi dilil tippuɗo e ganndal fii ɗum, anndu tuugorde maɓɓe nden e ɗum ko munnagol ñemmba ngol baabiraaɓe maɓɓe ɓen, laatanaaki tooñooɓe ɓen ballo haɗanoowo ɓe ko jippotoo kon e maɓɓe immorde e lepte Alla.

Si a janngii e taweede maɓɓe Aayeeje Amen Alqur'aana ɓannguɗe ɗen a anndiray e geece ɓen yedduɓe Alla añugol ɗe immorde e ñirɓinagol maɓɓe tuma ɓe heɗotoo ɗe, hiɓe do'a nanngungol ɓen jannganayɓe ɓe Aayeeje Amen ɗen sabu saɗtugol tikkere nden, maakan ɓe -an Nulaaɗo-: "Enee, yo mi yeeto on kon ko ɓuri tikkere mo'on nden e ñirɓinaare mo'on nden bonude? Ɗum ko ngen Yiite nge Alla fodi O naaday yedduɓe ɓen e nder magge, bonii ruttorde nde ɓe ruttotoo e mu'un".

Ko onon yo yimɓe, misal piyaama jentee ngal, taskee ngal kadi, pellet, kon ko rewoton gaanin Alla immorde e sanamuuji e tanaa ɗum, ɗi tagaali mbuubu e fanɗude mu'un sabu ronkugol majji, sinndo ɓe fow maɓɓe ɓe hawtoniriino fii tagugol ngil ɓe tagataa ngil, si coongil ngil ƴettii goɗɗum e ko woni kon e maɓɓe immorde e tiiri e ko nanndi e ɗum ɓe hattantaake hettitugol ɗum e juuɗe maggil, sabu ronkugol maɓɓe tagugol coongil ngil, e hettugol piiji maɓɓe ɗin e juuɗe maggil;ɗum no ɓanngini ronkugol maɓɓe e huunde ɓurnde ɗum, ko honno rewirton ɗi -wonndude e ronkugol majji- gaanin Alla?! Oo ɗaɓɓuɗo lo'ii ɗum le ko sanamji rewaɗi ɗin, ɗin ɗi hattantaake hettitugol ko cooƴi ɗin jatti ɗi kon, lo'ii kadi oo ɗaɓɓaaɗo, on mo kañun ko coongil ngil.

Ɓe mawniniraali Alla Goonga Mawninngol Mo nde ɓe rewunoo wonndude e Makko yoga e tagoore Makko nden, pellet, Alla ko O Dolnuɗo, no jeyaa e Doole Makko ɗen e Kattanɗe Makko ɗen Tagugol kammuuli ɗin e leydi ndin e ɓen wonuɓe e nder majji, ko O Tedduɗo hay e gooto foolataa Mo, no seedi e sanamuuji sirkooɓe ɓen kannji ko ɗi lo'uɗi hoyɗi ɗi tagaa hay e huunde.

Alla Senayee wonanii Mo O Toowi hiMo Suɓoo e Malaa'ikaaɓe ɓen Nulaaɓe, hiMo Suɓoo kadi e yimɓe ɓen Nulaaɓe ko wano nii, O Nula yoga e Malaa'ikaaɓe ɓen faade e Annabaaɓe ɓen wano Jibriila O Nulii mo faade e Nulaaɓe ɓen immorde e ɓanndinke, hiMo Nula Nulaaɓe jeyaaɓe e ɓanndinke en faade e yimɓe ɓen, pellet, Alla ko O Nanoowo ko sirkooɓe ɓen wowlata kon e Nulaaɓe Makko ɓen ko O Humpitiiɗo ɓen ɓe O Suɓii ɗum fii Nulal Makko ngal.

Himo Anndi Senayee wonanii Mo ko Nulaaɓe Makko ɓen woni kon e mu'un immorde e Malaaka en ɓen e yimɓe ɓen ado tageede maɓɓe e ɓaawo maayde maɓɓe, ko ka Alla Kanko tun fiyakuuji ɗin ruttetee Ñalnde Darngal, nokku ka O immintinoyta jeyaaɓe makko ɓen O yoɓa ɓe e dow ko ɓe ardini kon immorde e golle.

Ko onon yo ɓen gomɗinɓe Alla ɓe golli ko O sar'inani ɓe kon, ruƴƴanee sujjanon ka Julde mo'on Alla tun, gollee ko moƴƴi kon immorde e sadaka e jokkugol enɗam; jorto fii yo heɓu ko ɗaɓɓaa kon, daɗon ko hulaa kon.

Tiinnee ka Laawol Alla tinnangol laaɓanngol Jaati Makko kin, ko Kanko suɓii on O waɗi Diina mo'on kan newiika ɓitteende e saɗteende alaa e nder makka, kaa Diina newiika, ko kaa woni Diina Ben mooɗon Ibraahiima (yo o his), gomɗii Alla inniino on Julɓe ka defte adiiɗe e ka Alqur'aana, fii yo Nulaaɗo on laato seeditotooɗo e hoore-mo'on wonndema kanko o yottinii e mo'on ko o yamiraa yottinngol kon, fii yo onon kadi on laato seediiɓe e hoore moftaaji adiiɗi ɗin wonndema Nulaaɗo maɓɓe on yotinno e maɓɓe, yettiree Alla e dow ɗum tottirgol Julde nden no haaniri non, jonnon Jakka jawle mo'on ɗen, fattoɗon ka Alla, tuugoɗon e Makko e fiyakuuji mo'on ɗin, ko Kanko Senayee wonanii Mo, O moƴƴii Giɗo wonannde on welduɗo e Makko immorde e gomɗinɓe ɓen, O moƴƴii kadi ballo wonannde on wallitorɗo Mo immorde e maɓɓe, yiɗee Mo O yiɗay on, wallitoree Mo O wallay on.

Gomɗii malaama gomɗinɓe Alla gollirooɓe sari'a Makko ɓen sabu hiɓugol maɓɓe ko ɓe ɗaɓɓaynoo kon, e daɗugol ko ɓe hulunoo kon.

Ɓen koɓe e nder Julde maɓɓe ko ɓe hoykiniiɓe, hara terde maɓɓe ɗen no deeƴi e nder mayre, ɓerɗe maɗe maɓɓe ɗen no yeewi immorde e soklaaji.

E ɓen ɗurniiɓe e meere nden e puyndan ɗan e kala ko goopi immorde e konguɗi ɗin maaɗum kuuɗe ɗen.

E ɓen gollayɓe fii laɓɓinngol wonkiiji maɓɓe ɗin immorde jikkuuji bonɗi, e laɓɓinirgol jawle maɓɓe ɗen yaltinngol Jakka majje.

E ɓen ɓe kañun ko reenirɓe farjuuji maɓɓe ɗin woɗɗintingol ɗi e jeeno(jina) e luutiyaagu e bonkiiji ɗin, kamɓe ko ɓe nefooɓe ko boni laaɓuɓe.

Si wanaa e sonnaaɓe maɓɓe maaɗum ko ɓe mari kon immorde e horɓe, haray kamɓe ɓe feletaake fii dakmitorgolɓe mbalndi e tanaa mu'un.

Kala ɗaɓɓuɗo dakmitorgol ko wonaa sonnaaɓe makko ɓen maaɗum horɓe makko ɓe o jeyi ɓen, haray kanko ko o yawtuɗo keeri Alla ɗin sabu yawtugol ko O dagini kon dakmitorgol yaha e ko O harmini kon e mu'un.

E ɓen ɓe kañun koɓe reenuɓe ko Alla halfini ɓe kon, maaɗum ko jeyaaɓe Makko ɓen halfini ɓe kon, e aadiiji maɓɓe ɗin ɓe yeebataako ɗi, ko woni hiɓe humna ɗi.

E ɓen ɓe kañun koɓe reenirɓe Julɗe maɓɓe ɗen duumagol e majje, e tottugol ɗe e nder waqtuuji majje e wonndude e ruknuuji majje e waɗɗiiɗi majje e yiɗaaɗi majje.

Ɓee siforɓe ɗii sifaaji ɗoo ko kamɓe woni ronooɓe ɓen.

Ɓen ɓe no ronoya Aljanna ɓurɗo toowude on kamɓe ko ɓe ñiiɓayɓe e nder makko poomaa, neemaaji maɓɓe ɗin taƴataa nder ton.

Gomɗii Men tagii baaba ɓanndinke on Aadama immorde e loopal, ƴettaama mbullaare mu'un immorde e tamannde yaltinaande e ndiyam jillondirɗam e mbullaari leydi ndin.

Refti Men tagi geɗalɓe(genyol) makko ɓen ko ɓe jibinayɓe immorde e toɓɓere [maniiyu] nde no ñiiɓa ka rennga haa fewndo jibinngol ngol.

Men Tagi ɓaawo ɗum toɓɓere ñiiɓunde nden ka rannga heɗɗere woɗeere, refti Men waɗi nden toɓɓere woɗeere wano huyre teewu ƴakkande, Men Tagi huyre nden ƴi'e saɗtuɗe, Men ɓorni ɗen ƴi'e teewu, refti Men fuɗɗi mo Tagu goo sabu wuttugol ruuhu on e makko, e yaltinngol mo faade e ngurndan, Barkii Alla Moƴƴo Taguɗo.

Refti onon yimɓe ɓen, ɓaawo kon ko wuliɗon wuliɗon(bennudon) e mu'un immorde e ɗin ɓorɗi(jolde) aray maayon tuma huuɓugol laje mooɗon.

Refti pellet, onon ɓaawo maayugol mooɗon ko on imminoyteeɓe ka genaale mo'on Ñalnde Darngal; fii yo on hasbe e dow kon ko ardinnoɗon immorde e golle.

Gomɗii Men Tagii dow mooɗon -onon yimɓe ɓen- kammuuli jeeɗiɗi yoga e majji no dow yoga, Men laataaki welsindiiɓe fii tagu Amen ngun, Men wonaali kadi yejjituɓe ngu.

Men jippini immorde ka kammu ndiyam tuɓo ngon emmbere haaju on, wanaa ɗuuɗuɗam sakko ɗam bonna wanaa kadi fanɗuɗam sakko ɗam lella, Men waɗi ɗam ñiiɓayɗam ka leydi, yimɓe ɓen e daabeeji ɗin no nafitora ɗam, pellet, Menen ko Men Hattanɓe e dow naɓugol ɗam hara on nafitoraaki [ɗam].

Men fuɗɗani on sabu ɗamnd iyam gese immorde e tamarooje e inabuuje, no woodani on e majje dimɗe limiiɗe mbaadiiji e nooneeji, wano ƴibbeeje e rummaanaaje e poomuuje, ko e majje ñaamoton.

Men fuɗɗani on sabu majjan leɗɗe nebbannje ɗen ɗe no yalta ka fello Siinaa, hiɗe fuɗina nebban yaltiteeɗan ɗan immorde e dimɗe majje hiɗan wujee hiɗan maafiree kadi.

Pellet, no woodani on -onon yimɓe ɓen- e neemoraaɗi ɗin (gelooɗi ɗin, na'i ɗin, dammi ɗin) tasakuyee e dallinorɗum ko hiɗon tinndinora e dow kattanɗe Alla e Newanagol Mo on, Meɗen yarna on goɗɗum e ko woni kon e nder deedi ɗii neemoraaɗi kosam laaɓuɗam lewñuɗam wonande yarooɓe ɓen, no woodani on kadi e majji nafooje heewuɗe ɗe hiɗon naftora ɗum e majji; wano waɗɗagol ngol e teefi ɗin e leeɓi ɗin, hiɗon ñaama kadi immorde e tebbuuli majji.

Ko e hoore gelooɗi ɗin immorde neemoraaɗi ɗin ka njorndi, e hoore laaɗe ɗen ka maayo roonndeteɗon.

Gomɗii Men Nuliino Nuuhu (yo o his) ka yimɓe makko ɓen himo noddaɓe faade e Alla, o wi'ani ɓe: "Ko onon yo yimɓe, Rewee Alla Kanko tun, alanaa on reweteeɗo e Goonga tanaa Makko O Senike. Kaa on hulirtaa Alla ɗoftagol Yamiraaɗi Makko ɗin e woɗɗitagol haɗaaɗi Makko ɗin?!"

Koohooɓe tedduɓe ɓen e yedduɓe Alla ɓen e yimɓe makko ɓen ɓe wi'ani jokkuɓe ɓe ɓen e puyɓe maɓɓe ɓen: "Oo wonɗo nodditaade wonnde kanko ko o Nulaaɗo o wonaali si wanaa ko o ɓanndinke wano mo'on, ko o faalaa ko heynaade e hoonaade e hoore mo'on. Sinndo Alla muuyuno nulugol e meeɗen Nulaaɗo O Nulayno mo hara ko o jeyaaɗo e Malaa'ikaaɓe ɓen, O nulataa mo hara ko e yimɓe ɓen o jeyaa, Men nanaali sifa koo ko o nodditii ɗoo ka maamiraaɓe amen adiiɓe men ɓen".

Kanko o wonaali si wanaa gorko mo feetere woni e mu'un, o anndaa ko o woni e wowlude, habbee mo haa fiyaake makko on ɓanngana yimɓe ɓen.

Nuuhu (yo o his) maaki: "Joom am, wallam e hoore maɓɓe ɗum woni yoɓtanoɗaa lam e maɓɓe sabu ko ɓe finni lam kon".

Men wahayini e makko; ɗum woni moƴƴin laana kan e ndenka Amen e no Men anndinmaa hono no moƴƴinirtaa ka, si yamiroore Amen nden arii fii halkugol ɓe, ndiyam ɗam pullitori doole e nokkuure nden ka bireedi(mburu) juɗetee ɗon, naadu e nder makka immorde e kala ko wuuri gorun e deyun fii yo geyngol ngol jokkondir, naadu ɓeynguure maaɗa nden si wanaa ɓen ɓe Daalol Alla ngol aditii fii halkeede; wano sonnaajo maaɗa on e ɓiɗɗo maaɗa on, wata a noddam fii yo Mi danndu ɓen tooñirɓe geddi halkeede, pellet, kamɓe ko ɓe halkirteeɓe -feere alaa- yoolagol ka waame ndiyam.

Si a ƴawii ka laana an e ɓen wonnduɓe e maaɗa immorde e gomɗinɓe daɗuɓe ɓen, haray maaku: "Yettoore nden ko Alla woodani, On dannduɗo en immorde e yimɓe heefereeɓe ɓen O halki ɓe.

Maaku: "Joom am, jippinam ka leydi jippinngol barkinaangol, ko An woni Moƴƴo jippinoowo".

Pellet, no e nder ɗum ko jaŋtaa ɗoo immorde e danndugol Nuuhu e gomɗinɓe ɓen wonndude e makko, e halkeede yedduɓe ɓen; daliilaaji feeñuɗi e dow kattanɗe Amen fii wallugol Nulaaɓe Amen ɓen e halkungol fennuɓe ɓe ɓen, fii kala Men wonii ko Men jarriborɓe yimɓe Nuuhu ɓen Nulugol mo faade e maɓɓe fii yo ɓanngu hakkunde gomɗinɗo on e keefeero on maaɗum ɗoftiiɗo on e geddo on.

Refti Men fuɗɗi ɓaawo halkeede yimɓe Nuuhu ɓen mofte goo.

Men Nuli e maɓɓe Nulaaɗo jeyaaɗo e maɓɓe himo noddaɓe ka Alla, o maakani ɓe: "Rewee Alla Kanko tun alanaa on reweteeɗo e Goonga tanaa Makko O Senike. Enee, kaa on hulirtaa Alla woɗɗitagol haɗaaɗi Makko ɗin e jokkugol Yamiraaɗi Makko ɗin?!"

Koohooɓe tedduɓe ɓen ka yimɓe makko yedduɓe Alla, ɓe fenni Laakara on e ko woni ton kon immorde mbarjaari e Lepte, ko Men yaajinani ɓe kon immorde e neemaaji ka ngurdan aduna bewini ɓe. Ɓe wi'ani jokkuɓe ɓe ɓen e puyɓe maɓɓe ɓen- : "Oo wonaali si wanaa ɓanndunke yeru mooɗon himo ñaama ko ñaamoton kon, himo yara ko yaroton kon, o maraa ko senndi mo e mooɗon haa tawa o imminee Nulaaɗo faade e mooɗon".

Mi woondii si on ɗoftike ɓanndinke wano mo'on, pellet, ontuma haray onon ko on hayruɓe sabu waasude nafitorgol mo'on ɗoftagol mo sabu ɗalugol mooɗon sanamuuji mon ɗin, e jokkugol on mo ɓural alanaa ɗum e dow mooɗon.

Enee, oo aaƴiiɗo wonnde ko o Nulaaɗo, o fodu on wonnde si on maayii on wontii mbullaari e ƴi'e kiɗɗe wonndema onon on yaltinoyte ka genaale mooɗon hara ko on wuuruɓe?! mbela ɗum ko hakkille ?!

No woɗɗi haa fanti kon ko fodaɗon ɗum immorde e yaltinegol ka genaali mooɗon hara ko on wuuruɓe ɓaawo mayde mooɗon, e wontugol mooɗon mbullaari e ƴi'e kiɗɗe.

Ngurdam ɗam wonaali si wanaa ngurdam aduna ɗam, wanah ngurdam Laakara, wuuruɓe ɓen e amen no maay hara ɓe wuuritataa, woɓɓe goo kadi jibinee ɓe wuura, men wonaali yaltinoyteeɓe ɓaawo mayde amen nden fii hasboore Ñalnde darngal.

Oo wonɗo nodditaade wonndema ko o Nulaaɗo faade e mooɗon o wonaali si wonaa gorko fefindii-ɗo fawi e Alla sabu ngol nodditagol makko, men wonaali gomɗinooɓe mo.

Nulaaɗo on maaki: "Joomam, wallam e hoore maɓɓe ɗum woni yoɓtanoɗaa lam e maɓɓe sabu ko ɓe finni lam kon".

Alla jaabori mo Daalugol: "Ɓaawo jamaanu fanɗuɗo aray ɓee fennuɓe ko adduɗaa kon wonta nimsuɓe e dow ko ɓe wonnoo fennude kon".

Hito saɗtungo halkayngo nanngi ɓe sabu hanndu- gol maɓɓe e Lepte ɗen e sanndalɗaagu maɓɓe, ɗe wattini ɓe halkiiɓe yeru duuño ilol ngol, halakuyee wonanii yimɓe tooñooɓe ɓen.

Refti ɓaawo halkeede maɓɓe Men fuɗɗi yimɓe e moftaaji goo wano yimɓe Luutu, e yimɓe Su'aybu, e yimɓe Yuunusa.

Adintinantaake mofte woo mofte e ɗii moftaaji fennuɗi, waqtu happaaɗo on fii arugol halakuyee majje on, ɗe nennataake kadi gaayi happu ngun, noone woo no laatorani ɗe immorde e laawi ɗin.

Refti Men Nuli Nulaaɓe Amen ɓen ko ɓe jokkondi-ɓe Nulaaɗo feƴƴa Nulaaɗo goo lontoo, tuma kala ari e mofte immorde e ɗin moftaaji Nulaaɗo majje on ɓe fenna mo, Men jokkiniri yoga e maɓɓe yoga halkeede, woodeede heddanaaki ɓe si wanaa yeru ko yimɓe ɓen haalata kon fii maɓɓe, halkaare woodanii yimɓe ɓe gomɗinaali ko Nulaaɓe maɓɓe ɓen addani ɓe kon immorde ka Joomi maɓɓe.

Refti Men Nuli Muusaa e musiɗɗo makko on Haaruuna wonndude e Aayeeje Amen ɗen jeenay: (Tuggordu ndun, Junngo ngon, Kanuuji ɗin, tenɗi ɗin, Ƴiiƴam ɗam, Waameere nden, Kokke ɗen, Uytagol dimɗe ɗen), e hujja ɓannguɗo.

Men Nuli ɓe faade e Fir'awna e teddinaaɓe ɓen ka yimɓe makko ɓe mawninkinii, ɓe ɗowtaaki gomɗn- gol [Muusaa e Haaruuna], ɓe woni yimɓe townitor- ɓe e hoore yimɓe ɓen doolugol e tooñugol.

Ɓe wi'i: "E hara men gomɗinay ɓanndinkeeɓe ɗiɗo yeruuɓe amen, alaa ko ɓe senndondiri e amen, e kadi yimɓe maɓɓe ɓen (ɓiɗɓe Israa'iila ɓen) ko ɗoftiiɓe amen yankinaniiɓe [amen]?"

Ɓe fenni ɓen ɗiɗo e ko ɓe addi kon immorde ka Alla, sabu fennugol maɓɓe ngol ɓe woni halkiraaɓe yoolagol.

Gomɗii Men Okkiino Muusaa Tawreetaare nden jortagol wonnde yimɓe makko ɓen feeweray nde faade e Goonga kan, ɓe gollitira nde.

Men waɗi Iisaa ɓiɗɗo Mariyama on e yumma mak- ko Mariyama Maande tinndinnde e Kattaɗe Amen ɗen, gomɗii Men waɗii mo sowiiɗo ko aldah e baa- biraawo, Men werni ɓe kamɓe ɗiɗo fe nokkuure towtunde ka leydi, fotondirnde moƴƴunde fii ñiiɓugol e mayre, no e mayre ndiyam iloojam heyɗitay ɗam.

Ko onon yo Nulaaɓe, ñaamee laaɓuɗi ɗi Mi daginani on ñaamugol ɗin, gollon golle moƴƴe hawrondirɗe e Sari'a, pellet Min, ko Mi Annduɗo ko golloton kon immorde e golle, suuɗanaaki lam immorde e golle mo'on ɗen hay e huunde.

E pellet, Diina mooɗon kan -onon Nulaaɓe ɓen- ko Diina woota, kan le ko Lislaamu, ko Min woni jom mo'on, on maraa Jooma tanaa Am, huliree Lam ɗoftagol yimiraaɗi Am ɗin, e woɗɗitagol haɗaaɗi Am ɗin.

Jokkuɓe ɓe ɓen sennditii ɓaawo maɓɓe ka Diina, ɓe wonti feddeeji e dente, fedde kala no weltori ko nde gomɗini kon wonndema ko ɗum woni diina weltoraaka kan ka Alla, hara nde yeƴƴitotaako faade e ko woni kon ka wonnde goo.

Terto ɓe-an Nulaaɗo- e ko ɓe woni kon e muuɗum immorde e majjere e wemmbere nden haa tuma jippagol Lepte ɗen e maɓɓe.

Kaa hara ɗii feddeeji wasorayɗi ko woni kon ka majji sikku wonndema ko Men okki ɓe kon immore e jawle ɗen e ɓiɗɓe ɓen ka ngurnda aduna ɗum ko yaccinanngol ɓe moƴƴere nde ɓe hanndi e mu'un?! Fiyaake on wonah no ɓe sikkirta non, anndu Meɗen okka ɓe ɗum fuuntirgol e ɗaynugol ɓe, kono kamɓe ɓe alaa so'ude ɗum.

Kaa hara ɗii feddeeji wasorayɗi ko woni kon ka majji sikku wonndema ko Men okki ɓe kon immore e jawle ɗen e ɓiɗɓe ɓen ka ngurnda aduna ɗum ko yaccinanngol ɓe moƴƴere nde ɓe hanndi e mu'un?! Fiyaake on wonah no ɓe sikkirta non, anndu Meɗen okka ɓe ɗum hebbinorɗum e ɗaynugol ɓe, kono kamɓe ɓe alah so'ude ɗum.

Pellet, ɓen ɓe kañum wonndude e gomɗinal maɓɓe ngal e moƴƴugol maɓɓe ngol ko ɓe huluɓe Joomi maɓɓe.

E ɓen ɓe kañum ko ɓe gomɗinɓe Aayeeje Deftere Makko nden.

E ɓen ɓe kañum ko ɓe wootinɗinɓe Joomi maɓɓe ɓe sirkantah Mo hay e huunde.

E ɓen ɓe no tinnoo e golle dewal ngal, ɓe ɓattora ka Alla golle moƴƴe ɗen hara hiɓe huli fii wata Alla ronku jaɓannde ɓe nafkugol maɓɓe ngol e golle maɓɓe moƴƴe ɗen si ɓe ruttoyike ka Makko Ñalnde Darngal.

Ɓen sifaaɓe ɗii sifaaji mawɗi, hiɓe heñoo faade e golle moƴƴe ɗen, hara kamɓe ko ɓe adondirayɓe e majje, ko sabu ɗum ɓe adori tanaa maɓɓe.

Men fawaali wonkii woo si wanaa emmbere ko ki hattanaa kon gollugol, Deftere no ka Amen Men tabintinii e nder mayre gollal kala golluɗo, hinde wowla Goonga, kan ka sikke woo alah e nder mu'un, hara kamɓe ɓe tooñiroytaake uytaneede moƴƴi maɓɓe ɗin, wanaa fii non ɓeydaneede bonɗi maɓɓe ɗin.

Ko woni, ɓerɗe heeferɓe ɓen no e nder welsindaa- re immorde ndee Deftere, nden wowlaynde Goo- nga kan, e Deftere jippiinde nden e maɓɓe, no woodani ɓe kadi golle goo gaanin ɗe ɓe woni ɗen e mu'un immorde e keefeeru ko kamɓe gollata ɗe.

Haa si Men leptirii neeminaaɓe maɓɓe ɓen ka ngurdan aduna Lepte ɗen Ñalnde Darngal tawa kamɓe hiɓe towna hitooji maɓɓe ɗin ko ɓe faabnatooɓe.

Wi'anee ɓe ka taƴinngol ɓe e Yurmeende Alla nden: "Wata on haacu wata on ɗaɓɓu faabo e ndee Ñalaande, ko pellet, on marah walloowo mo no haɗana on immorde e Lepte Alla ɗen".

Gomɗii laatinoke Aayeeje Deftere Alla nden no janngetenoo e dow mooɗon ka aduna, laatiɗon hiɗon ruttoo ko on huccuɓe(runtii) e gaayi majje, si on nanii ɗe sabu añugol ɗe.

Hiɗon waɗa ɗum ko on mawnintiniiɓe e dow yimɓe ɓen sabu ko aaƴiɗon kon wonndema onon ko on yimɓe hurum on hara le on laataaki yimɓe makko; sabu yimɓe [hurum on] ko kamɓe woni hulooɓe Alla ɓen, hiɗon hiirira ɓannge [hurum on] ko boni kon immorde e konngol ngol, hara onon on laɓɓinaali mo.

Kaa hara ɓee sirkooɓe taskaaki ko Alla jippini kon ka Alqur'aana fii yo ɓe gomɗin nde, ɓe gollira ko woni kon e nder mayre, kaa aru e maɓɓe ko araali maamiraaɓe maɓɓe ɓen ado maɓɓe? Ɓe ɗurnii nde ɓe fenni nde.

Kaa hara kamɓe ɓe andaali Muhammadu (yo Alla juulu e makko hisna) on mo Alla Nuli faade e maɓɓe, hara kamɓe ko ɓe faytuɓe mo? Gomɗii ɓe anndiino mo, ɓe anndiino kadi Goongugol makko e hoolaare makko nden.

Ko woni, hiɓe wi'a: "Kanko ko o feetuɗo, gomɗii ɓe fenniino, ko woni, o addanii ɓe Goonga kan, kan ka sikke woo alaa e muuɗum wonndema ko ka immorde ka Alla, heewuɓe e maɓɓe ko añuɓe Goonga kan, ko ɓe añuɓe ka sabu añude mbo e haasidaagu wonngu ka wonkiiji maɓɓe, ej inngan- gol meere maɓɓe nden.

Sinndo Alla naɓirno fiyakuuji ɗin, O fewjiri ɗi wano wonkiiji maɓɓe ɗin weliraa non kammuuli ɗin e leydi ndin bonayno, e ɓen wonuɓe e majji sabu majjugol maɓɓe battane fiyakuuji ɗin, ko selli kon e ko boni kon immorde e fewjugol ngol.

Kaa a ɗaɓɓu -an Nulaaɗo- njoɓdi immorde e ɓee e dow ko addanɗaa ɓe kon, hara ko ɗum waɗi haa ɓe salii noddaandu ndun? Ɗum iwraali e maaɗa, ko mbarjaari Joomi maaɗa ndin e njoɓdi Makko ndin ɓuri moƴƴude diini mbarjaari ɓee e tanaa maɓɓe, ko Kanko -Seniiɗo On- woni Moƴƴo Arsikoowo.

Pellet an Nulaaɗo on, hiɗa noddude ɓee e tanaa maɓɓe faade e laawol focciingol, ngol ooñannde alah e muuɗum, ngol ko Laawol Lislaamu ngol.

E pellet, ɓen ɓe gomɗinaali Laakara on e ko woni ton kon immorde e hasboore e Lepte e mbarjaari, ko ɓe ooñiiɓe e Laawol Lislaamu ngol ɓe jokki tanaa maggol immorde e laawi ɓoyliiɗi yottinayɗi faade e Yiite ngen.

Sinndo Men Yurmino ɓe Men ittani ɓe ko heɓi ɓe kon immorde e kokke e heege ɓe duumotono e ndr majjere maɓɓe gaayi Goonga kan hara hiɓe mema waɗa yaha-yilto.

Gomɗii Men jaribiimoɓe nooneeji masiibooji, ɓe hoykinanaaki Joomi maɓɓe ɓe yankinanaaki Mo, ɓe yankinaaki ɓe noddi Mo fii yo O ittan ɓe masiibooji ɗin tuma jippagol majji.

Haa nde Men udditunoo e maɓɓe dammbugal immorde e Lepte sattuɗe ɗen, e jaka kamɓe e nder ɗum ko ɓe taƴiiɓe e kala welo-welo e moƴƴere.

Alla O Senike ko Kanko woni On taganƊo on -ko onon yo fennuɓe immital ngal- nanɗe ɗen fii yo on nanirɗe, e giiɗe ɗen fii yo on yi'irɗe, e ɓerɗe ɗen fii yo on faamirɗe, wonndude e ɗum o yettatah Mo e dow ɗii neemaaji si wonaa seeɗa.

Ko Kanko woni On taguƊo on -onon yimɓe ɓen- ka leydi, ko faade ka Makko Kanko tun Ñalnde Darngal mooɓoyte ɗon fii hasboore nden e njoɓdi ndin.

Ko Kanko tun O Senike woni wurnoowo wurnoowo alah tanaa Makko, ko Kanko tun woni waroowo, waroowo alaa tanaa Makko, ko faade ka Makko Kanko tun hoddirtee luutondiral jemma on e ñalorma on, niwre e ndaygu juutugol e raɓɓiɗugol. Enee on hakkiltaa kattanɗe Makko ɗen, e bajjirgol Makko tagugol e fewjugol ngol?!

Ko woni, ɓe wi'u yeru ko wi'unoo kon baabiraaɓe maɓɓe ɓen e maamiraaɓe maɓɓe ɓen ka keefeeru.

Ɓe wi'i e noone yeddugol woɗɗintina: "E jaka si men maayii men wontii mbullaari e ƴi'e kiɗɗe e jaka menen ko men immintinoyteeɓe fii hasboore nden hara meɗen wuuri?!".

Gomɗii men fodanooma ndee fodoore -ɗum le ko immital ɓaawo mayde nden- maamiraaɓe amen ɓen kadi fodano ɗum ko adii, men yi'aali nden fodoore ka waɗi, ɗum wonaali si wonaa meere adinooɓe ɓen e penaale maɓɓe.

Maakan -an Nulaaɗo- ɓee heeferɓe yedduɓe immital ngal: "Ko hommbo jeyi ndii leydi, e ɓen wonuɓe e hoore mayri si tawii hiɗon mari ganndal?"

Aray ɓe wi'i: "Leydi ndin e ɓen wonuɓe e mayri ko Alla woodani". Awa maakan ɓe: "Enee, on annditatah wonndema On jeyɗo leydi ndin e ɓen wonuɓe e hoore mayri ko O HattanƊo e dow wurnitugol on ɓaawo mayde mooɗon?"

Maakanɓe: "Ko hommbo woni Jooma kammuuli ɗin jeeɗiɗi? E ko hommbo woni Jooma Arsi mawki kin, kin tawki alaa ko tagaa ko ɓuriki mawnude?"

Aray ɓe wi'a: "Kammuuli ɗin jeeɗiɗi e Arsi mawki kin ko jeyal Alla." Maakan ɓe: "Enee, on hulirtah Alla doftagol yamiraaɗi Makko ɗin e woɗɗitagol haɗaaɗi Makko ɗin fii yo on hisu immorde e Lepte Makko ɗen?"

Maakan ɓe: "Ko e junngo hommbo woni laamu kala huunde, hay e huunde sortotaako e ley Laamu Makko ngun, hara Kanko hiMo faaboo on mo O muuyi immorde e jeyaaɓe Makko ɓen, alah hay e gooto haɗanoowo on mo O muuyani bone, o dunyatah Lepte ɗen e makko, si tawii laatanike on ganndal?"

Aray ɓe wi'a: "Laamu kala huunde ko e Junngo Makko woni O Senike. Awa maakan ɓe: "E ko honno hakkillaaji mo'on ɗin yaari, hiɗon rewa tanaa Makko wonndude e qirritagol mooɗon ɗum [ko jaŋtaa ɗoo]".

Fiyaake on wonaali wano ɓe nodditorta non, ko woni, Men addanii ɓe Goonga ka sikke alah e mu'un, pellelt, kamɓe ko fenuɓe e ko ɓe nodditii kon wonnde no woodani Alla kafidaaɗo e ɓiɗɗo, Alla Toowii gaayi ngol konngol maɓɓe Toowal Mawnungal.

Alla jogitaaki ɓiɗɗo wano heeferɓe ɓen aaƴori non, reweteeɗo e goonga kadi alah wonndude e Makko, sinndo wonno reweteeɗo e goonga no wonndi e Makko, reweteeɗo kala yaadayno e geɓal mu'un ngal immorde e tagu ngu o tagi ngun, yoga maɓɓe foolondirayno e yoga, ɗum bonna njuɓɓudi goodal ngal, ko selli kon, ko wonndema hay e huunde e ɗum waɗaali. Ko ɗum tinndini wonndema pellet, Reweteeɗo On e Goonga ko Gooto ko Kanko tun woni Alla, O Senike O Laaɓii gaayi e ko sirkooɓe ɓen sifotoo Mo kon, kon ko haananah Mo immorde e ɓiɗɗo e kafidaaɗo.

Annduɗo kala ko wirnii e tagu Makko ngun, e Annduɗo ko seedetee heftiree so'irɗe ɗen, hay e huunde e ɗum suuɗanaaki Mo, O Toowii Senayee wonanii Mo nde laatantoo Mo kafidaaɗo.

Maaku -Ko an yo Nulaaɗo-: "Jooma, si A hollii lam e ɓee sirkooɓe ko foduɗaaɓe kon immorde e Lepte ɗen".

Joomam, pellet, battane maɓɓe ɗen min miɗo seedii ɗum, wata A waɗtidam e maɓɓe sakko heɓa lam ko heɓi ɓe kon immorde e Lepte ɗen.

Pellet, Menen ko Men Hattanɓe nde Men waɗay maa hiɗa yi'a seedoo ko Men fodiɓe kon immorde e Lepte ɗen, Men ronkatah ɗum wanaa kadi e tanaa mu'un [Men ronkata].

Duñir -an Nulaaɗo- on wonɗo bonde e maaɗa geɓal ɓurngal moƴƴude ngal; ɗum woni yaafaade mo, muññoɗaa e dow lorra makko kan, ko Menen ɓuri Anndunde ko ɓe woni kon sifaade immorde e sirku ngun e fennugol ngol, e ko ɓe wonumaa sifaade kon immorde e huunde nde haananaa ma, wano mbilewu e feetere.

Maaku: "Jooma mi rentorii Ma immorde e hodooje Seytanuuji ɗin e sonwosiyee(sikke sikke) majji".

Mi moolorii Ma Jooma am nde ɗi tawata lam e nder huunde immorde e fiyakuuji am ɗin.

Haa si mayde nden arii goɗɗo e ɓee sirkooɓe, o yi'i ko woni kon jippaade e makko o wi'i hara ko o nimsuɗo e dow ko feƴƴi kon e ngurdam makko ɗam, e ko o welsindinoo kon e bannge Alla: "Jooma, ruttam faade ka ngurdam aduna".

No gasa min, mi gollay ko moƴƴi si mi ruttike faade e makko [ka aduna]. Ɗum waɗatah, fiyaake on wonaa no ɗaɓɓirɗaa non, ɗum ko konngol tun nii, ko kanko wowlingol, hay sinndo o ruttano faade e ngurndam aduna ɗam o humnataano ko o fodi kon, ɓee maayooɓe aray ɓe heddoo e nder heedo hakkonde aduna e Laakara haa Ñalnde Immital e caakal ngal, ɓe ruttataako immorde e ɗum faade e aduna fii yo ɓe hewtito ko feƴƴirnoo ɓe kon, ɓe moƴƴintina ko ɓe bonnunoo kan.

Si Malaa'ikaajo fawaaɗo on wuttugol ka alaadu o wuttii wuttannde ɗimmere nden noddaynde nden e Darngal ngal, haray dammbe alah hakkunde maɓɓe ɗe ɓe wasorta ɗum, sabu hilnagol maɓɓe kulol Darngal ngal, yoga maɓɓe lanndoytaako yoga sabu hilnagol maɓɓe ngol ko maapini ɓe kon.

Kala mo manndake mu'un teddiri sabu jistugol maƴƴi makko ɗin e dow bonɗi makko ɗin, haray ko ɓen woni malaaɓe ɓen sabu heɓugol maɓɓe ko ɓe ɗaɓɓi kon, e ko ɓe woɗɗintee kon immorde e koɓe huli kon.

Kala mo manndake mu'un hoyi sabu jistugol bonɗi makko ɗin e dow moƴƴi makko ɗin haray ɓen ɗon ko kamɓe woni yeebirɓe wonkiiji maɓɓe ɗin sabu gollugol ko lorrata ɗi kon, e ɗalugol ko nafata ɗi kon immorde e gomɗinal e golle moƴƴe, hara kamɓe ko ɓe ñiiɓooɓe ka Yiite Jahannama, ɓe yaltatah e magge.

Yiite ngen no sunna geece maɓɓe ɗen, hara kamɓe e nder magge, toni maɓɓe dowji ɗin e leyji ɗin tagginoke gaayi ñiiƴe maɓɓe ɗen immorde e saɗtude ñirɓinagol.

Wi'aneeɓe ka duɗɗugol ɓe: "Enee, Aayeeje Alqur'aana ɗen laatanooki no janngee e dow mo'on ka aduna, laatiɗon hiɗon fenna ɗe?!"

Ɓe wi'i: "Joomi amen, foolii men ko adii kon ka Ganndal Maaɗa immorde e malkiso amen, men woniino yimɓe majjuɓe gaayi Goonga kan."

Joomi amen, yaltin men ka Yiite, si men yiltitike faade e ko men wonnoo kon e mu'un immorde e keefeeru e majjere haray menen ko men tooñuɓe wonkiiji amen, gomɗii nganto amen ngon taƴii.

Alla Daala: "Hoɗee ka nder Yiite ko on jaasuɓe hoynaaɓe, wata on haalanam [fii yaltineede].

Pellet, laatinoke fedde e jeyaaɓe Am ɓen, ɓen gomɗinɓe Lam, hiɓe wi'a: "Joomi amen, men gomɗinii Ma haforan men bakkatuuji amen ɗin, Yurmiraa men Yurmeende Maaɗa nden, ko An Ɓuri Moƴƴude Yurmeteeɓe ɓen.

Jogitiɗon ɓee gomɗinɓe noddooɓe Joomi mu'un nokku fii jalkitugol hiɗo jalnora ɓe, jalnorɗon ɓe haa jalnorgol ɓe ngol yejjintini on jaŋtagol Alla, laatiɗon hiɗon jala ɓe jalkita.

Min, Mi yoɓirii ɓee gomɗinɓe heɓugol Aljanna on Ñalnde Darngal; fii muñal maɓɓe ngal e dow ɗoftagol Alla e dow ko ɓe laatinoo kon hiɓe hawra e mu'un sabu mo'on immorde e lorra.

O Daali: "No foti heewde ko ñiiɓuɗon ka leydi immorde e duuɓi? No foti heewde ko yeebuɗon ton immorde e waqtu."

Ɓe jaabora wi'ugol maɓɓe: "Men ñiiɓii ñallal maaɗum seeɗa e ñallal, lanndo ɓen toppitiiɓe e limugol ñalɗi e lebbi."

O Daali: "On ñiiɓaali ka aduna si wanaa jamaanu hun fanɗu kun, no newii muññagol e nder makkun e dow ɗoftaare sinndo onon on laatino hiɗon anndi emmbere ñiiɓugol mooɗon.

Kaa on sikku -onon yimɓe ɓen- wonndema ko Men Tagiri on ko fijindaaru gaanin ñeeñal, hara mbarjaari alah Lepte alah yeru muumi(jawdi) ɗin, hara onon on ruttetaake faade e Amen Ñalnde Darngal fii Hasboore nden e njoɓdi ndin?!

Alla Senike Lamɗo firlitotooɗo e nder tagu Makko ngun ko O muuyi kon, On Mo Kañum ko O Goonga Konngol Makko ngol ko Goonga, reweteeɗo e goonga alah tanaa Makko, Jooma Arsi Tedduki kin, kin ki kañum no ɓuri mawnude tageefooji ɗin, on mo laatii Jooma ko ɓuri mawnude kon e tageefooji ɗin haray ko Kanko woni Jooma majji ɗi fow majji.

On mo rewi wonndude e Alla reweteeɗo goo hara o maraa hujja jojjiɗugol makko e dewal ngal (ko ɗum woni fiyaake kala rewaaɗo tanaa Alla) anndu pellet, njoɓdi golle makko bonɗe ɗen no ka Joomi makko Senaande wonanii Mo, ko Kanko woni On yoɓirayƊo mo ɗum Leptugol mo, pellet, Kanko O malnirtaa heeferɓe ɓen heɓugol ko ɓe ɗaɓɓata kon, wanah daɗugol ko ɓe hulata kon.

Maaku -an Nulaaɗo-: "Joomam haforanam bakkatuuji am ɗin, Yurminiraa mi Yurmeende Maaɗa nden ko An woni Ɓurɗo Moƴƴude kala Yurmiiɗo jom bakkaatu, jaɓu tuubuubuyee am on."

Ndee ko Simoore Men Tellinii nde, Men wajimmbini gollirgol Ñaawooje mayre, Men Tellini e mayre Aayeeje ɓannguɗe; joortagol wonnde on waajitorta ko woni kon e nder mayre immorde e Ñaawooje ɗen koni ngollironnde.

Debbo jeenoowo e gorko jinoowo jiwo e suka piyee gooto kala e maɓɓe paatawol teemedere, wata newaare e yurmeende nanngu on haa ronkon ñimnude e maɓɓe hiddi ndin maaɗun newinanon ɓe ɗum, si tawii on laatiki hiɗon gomɗini Alla e Ñalaande Laakara nden, yo tawe ñimnugol hiddi ndin e maɓɓe jamaa gomɗinɓe ɓen fii kempinngol lollinngol fii maɓɓe, e haɗirgol kamɓe ɗiɗo tanaa maɓɓe.

Ka hulɓinngol fii jeeno Alla jaŋtii wonnde on gaadariiɗo ɗum o rerɗantaa fii resugol si wanaa debbo jinoowo wano makko maaɗum sirkoowo mo rentotaako e jina wonndude e waasude dagagol resugol mo, on debbo wowtiniiɗo jeeno o rerɗan- taa reseede si wanaa gorko jinoowo wano makko maaɗum sirkoowo mo rentotaako hurum jom galle makko, na harminaa e dow gomɗinɓe ɓen resugol debbo jinoowo on e resinngol gorko jInoowo on.

E ɓen ɓe no werloo ko pankare e sonnaaɓe nantiiɓe ɓen, (e worɓe reeniiɓe ɓen wano sonnaa-ɓe ɓen non), refti hara ɓe addaali seedeeɓe nayo e dow ko ɓe werlii kon e maɓɓe immorde e bonki haray piyee ɓe -an ñaawoowo on- paatawol cappanɗe jeetati, wata on jaɓan ɓe seedeeyaagal poomaa. Ko ɓen ɗon woni tukkude nantiiɓe ɓen, ko kamɓe woni yaltuɓe ɓen e gaayi doftaare Alla nden.

Si wanaa ɓen tuubuɓe ka Alla ɓaawo nden huunde nde ɓe waɗi , ɓe moƴƴintini golle maɓɓe, haray pellet, Alla jaɓay tuubuubuyee maɓɓe on e seedeeyaagal maɓɓe ngal, pellet, Alla ko O Surroowo wonannde on tuubuɗo immorde e jeyaaɓe Makko ɓen, ko O Yurmeteeɗo ɓe.

E ɓen worɓe tukkooɓe sonnaaɓe mu'un hara alanaa ɓe seedeeɓe tanaa wonkiiji maɓɓe ɓe no seedoo e dow sellugol ko ɓe tukkiri ko [sonnaaɓe ɓen]; ko yo gooto [kala] e maɓɓe seedo seedeeji nayi [o woondira] Alla, pellet kanko, ko o goonguɗo e ko o tukkiri kon sonnaajo makko on immorde e jina.

Refti e nder seedagol makko jowaɓol ngol o ɓeyda huɗirgol wonkii makko jojjidugol e kuddi ndin si o laatike fenuɗu e ko o tukkire kon [sonnaajo on].

Sakko [sonnaajo on] jojja sabu ɗum hiddeede hiddi jeeno ngon, o martinira e makko ngol hiddegol, nde kanko o seedotoo seedeeji nayi [o woondira] Alla: "Pellet [gorko on] ko o fenuɗo e ko o tukkiri mo kon.

Refti e nder seedagol makko jowaɓol ngol o ɓeyda huɗirgol wonkii makko kin tikkere Alla nden e dow makko si [gorko on] laatike goonguɗo e nder ko o tukkiri mo kon.

Sinndo wanaano Ɓural Alla ngal e dow mooɗon -onon yimɓe ɓen- e Yurmeende Makko nden e mooɗon, e wonndema kadi Kank ko O jaɓanoowo tuubuubuyee kala tuubuɗo immorde e jeyaaɓe Makko ɓen, ko O Ñeeño ka fewjoore Makko e ka Sari'a Makko O yaccinanayno on Lepte ɗen e dow bakkatuuji mo'on ɗin, O wirtirayno on sabu majji.

Pellet, ɓen adduɓe penaale ɗen (ɗum le ko tukkirgol bonki Yumma gomɗinɓe ɓen Aa'isa yo Alla weltor mo) ko ɓe jamaa dammbitiiɗo(askitiido) e mooɗon, -onon gomɗinɓe ɓen- wata on sikku ko ɓe fefindii kon ko bone mo'on, ko woni, ɗum ko moƴƴere sabu ko woni kon e mu'un immorde e mbarjaari e ndarndagol gomɗinɓe ɓen, e ko jokki ɗum kon e laɓɓinngol Yumma gomɗinɓe ɓen. No woodani kala tawaaɗo e tukkirgol [NeenAa'isa] bonki njoɓdi ko o faggitii kon immorde e junuubu sabu wowlugol makko ngol penaale ɗen, e on fawtiiɗo ko mawni kon e ɗum sabu fuɗɗagol makko ɗum, no woodani mo Lepte mawɗe. Ko faandaa e ɗum ko hooreejo naafiqiiɓe ɓen Abdullaahi bun Ubayyu bun Saluulu.

Ko haanunoo si worɓe gomɗinɓe ɓen e rewɓe gomɗinɓe ɓen nanii ɗee penaale mawɗe ɓe hooloo hisugol on mo ɗum fenaa on e hoore-mu'un immorde e musiɓɓe maɓɓe gomɗinɓe ɓen, ɓe wi'a: "Ɗum ko fenaande ɓanngunde nii".

Ko haanunoo ko nde fefindiiɓe ɓen e dow Yumma gomɗinɓe ɓen Aa'isa yo Alla weltor mo addaynoo seedeeɓe nayo e dow ngol fefindagol maɓɓe mawngol, ɓe seedoo e dow sellugol ko ɓe dammbi kon e makko, si tawii ɓe addaali seedeeɓe nayo e dow ɗum -te ɓe addataa ɓe poomaa- haray kamɓe ko ɓe fenooɓe ka Ñaawoore Alla.

Sinndo wonaano Ɓural Alla ngal e dow mooɗon -onon gomɗinɓe ɓen- e Yurmeende Makko nden e mooɗon nde tawnoo O yaccinantaa on Lepte ɗen, O laɓɓini ɓen tuubuɓe immorde e muuɗon; heɓayno on Lepte mawɗe sabu ko ukkiɗon kon e mu'un immorde e fenaande e fefindagol e dow Yumma gomɗinɓe ɓen.

Tuma yoga maɓɓe fillantoo nde yoga, hiɗon eggira nde kunnduɗe mooɗon wonndude e bonugol mayre; alanah on e ɗum ganndal, hiɗon sikka wonnde ɗum ko newiiɗum, hara le ɗum ko mawnuɗum ka Alla; sabu ko woni kon e mu'un immorde e fenaande e tukkugol laaɓuɗo.

Ko haanunoo tuma nanuɗon ndee fenaande, wi'on: "Sellantaa men nde men wowlata oo fiyaake kaanuɗo, Senayee wonanii Ma Joomi amen, ndee huunde nde ɓe werlii ɗum e Yumma gomɗinɓe ɓen ko fenaande mawnde".

Alla no anndintinnde on O laaɓana on fii wata on fillito yeru ndee fenaande werloɗon bonki e laaɓuɗo, si tawii on laatike gomɗinɓe Alla.

Alla no ɓannginannde on Aayeeje moftuɗe ɗen Ñaawooje Makko ɗen e Waajuuji Makko ɗin, Alla ko O Annduɗo golle mon ɗen, hay e huunde suɗanaaki e majje, aray O yoɓa on e dow majje, ko O Ñeeño ka Fewjoore Makko e ka Sari'a Makko.

Pellet, ɓen yiɗuɓe yo pankare ɗe lollu e hoore gomɗinɓe ɓen -no jeyaa e majji tukkirgol jeeno ngon- no woodani ɓe Lepte muusuɗe ka aduna sabu ñimnugol hiddi tukkugol e dow maɓɓe, no woodani ɓe kadi ka Laakara Lepte Yiite, Alla no Anndi penaale maɓɓe ɗen, e ko fiyakuuji jeyaaɓe Makko ɓen wontata, hiMo Anndi kadi nafaaji maɓɓe ɗin, onon on anndah ɗum.

Sinndo wonaano Ɓural Alla ngal e dow mooɗon -onon ɓee ukkiiɓe e penaale- e Yurmeende Makko nden e mo'on, sinndo wonaano pellet Alla ko O Newiiɗo Hinnotooɗo on, O yaccinanayno on Lepte ɗen.

Ko onon yo ɓen gomɗinɓe Alla golliri Sari'a Makko on, wata on jokku ɗate Seytaane ɗen sabu cuɗugol makko ngol meere nden, kala jokkuɗo ɗati makko ɗin pellet, o yamiray mo ko kaani kon immorde e konnguɗi e kuuɗe, e ko sari'a on añi kon, sinndo wonaano Ɓural Alla ngal e dow mooɗon -onon gomɗinɓe ɓen- hay e gooto e mo'on laaɓirtaano tuubuubuyee on poomaa hay o tuubi, kono Alla hiMo laɓɓinira on mo O Muuyi jaɓanngol mo tuubuubuyee makko on, Alla ko O Nanoowo konnguɗi mo'on ɗin, Annduɗo golle mo'on ɗen, hay e huunde e majje suuɗanaaki Mo, aray O yoɓa on e dow majje.

Wata jom ɓural en ka Diina e jom yaajeende en ka jawdi woondu fii ɗalugol okkugol ɓadondiraaɓe maɓɓe hatonnjinɓe ɓen, -sabu ɓillaare nde ɓe woni nden e mu'un, immorde e ɓen feruɓe ka Laawol Alla- sabu junuubu mo ɓe waɗɗitii ɗun, yo ɓe yaafano ɓe, ɓe yawtanaɓe. Kaa on yiɗah yo Alla yawtan on junubaaji mo'on ɗin si on yaafanike ɓe on yawtii?! Alla ko O Surroowo wonannde on tuubuɗo immorde e jeyaaɓe Makko ɓen, ko O Yurmeteeɗo ɓe, yo jeyaaɓe Makko ɓen ñentin Mo. O Aaya ko fii Abuu Bakri Asiddiiqi (yo Alla weltor mo) ngal Tellii tuma nde o woondunoo fii ɗalugol nafkugol Mistahu sabu tawtugol makko pene ɗen.

Ɓen tukkooɓe rewɓe nantiiɓe welsindiiɓe e pankare ɓen, ɓen ɓe tawata miijo bonugol aratah e maɓɓe, ɓe raɗaama e yurmeende Alla nden aduna e laakara. No woodani ɓe lepte mawnuɗe laakara.

Heɓay ɓe ɗen Lepte Ñalnde Darngal, Ñalnde seedoytoo e dow maɓɓe ɗenɗe maɓɓe ɗen ko ɓe wowlirnoo ɗe kon immorde e meere, seedoyoo e dow maɓɓe kadi juuɗe maɓɓe ɗen e koyɗe maɓɓe ɗen sabu ko ɓe laatinoo kon hiɓe golla.

E nder ngal Ñallal Alla huuɓinanay ɓe njoɓdi maɓɓe ndin e Nunɗal, ɓe annda kadi pellet, Alla Senayee wonanii Mo ko Kanko woni Goonga, kala ko iwri e Makko immorde e kumpital maaɗum fodoore maaɗum kammbaa ko Goonga ɓannguka sikke alah e makka.

Kala ko soɓi immorde ka worɓe e ka rewɓe e ka konnguɗi e ka kuuɗe na yaadi ina hawri e kala huunde soɓunde. Kala ko laaɓi kon kadi immorde e ɗum haray ko dammbondirɗum e hawrondirɗum e kala huunde laaɓunde. Ɓen worɓe laaɓuɓe e rewɓe laaɓuɓe ko ɓe martinaaɓe e ko worɓe soɓuɓe ɓen e rewɓe soɓuɓe ɓen wowlata ɓe kon. No woodani ɓe haforaneede immorde ka Alla hiMo haforira ɗum bakkatuuji maɓɓe, no woodani ɓe arsike tedduɗo ɗum le ko Aljanna on.

Ko onon yo gomɗinɓe Alla golliri Sari'a Makko on, wata on naatu e cuuɗi ɗi wonaa cuuɗi mo'on haa duŋinoɗon hoɗuɓe ɓen e majji fii naatugol tawa ɓe, salminon e maɓɓe, wi'on ka salminngol e ka duŋinagol: "Kisiyee e mooɗun, yo mi naatu?" Ko ngol duŋinagol ngol yamiraɗon ɗum ɓuri moƴƴannde on diini naatugol juha. Bela jo'o on annditay ko yamiraɗon kon ɗoftoɗon ɗum.

Si on tawaali goɗɗo e nder ɗin cuuɗi, haray wata on naatu e majji haa duŋanee on naatugol e majji immorde e ɓen jeyɓe duŋayee(sakkitoore) on. Si jeyɓe ɗi ɓen wi'anii on: (Ruttee) haray ruttee wata on naatu e majji, pellet, ko ɗum ɓuri laaɓannde on ka Alla, Alla non hiMo Anndi ko golloton hay e huunde e golle mo'on ɗen suuɗanaaki Mo, aray O yoɓa on e dow majje.

Junuubu fawaaki on si on naatii hara on duŋinaaki e cuuɗi kafaaɗi ɗi gooto hertoraa jeyal mu'um, heblanaaɗi fii ko nafa yimɓe ɓen fow; wano birooji ɗin e bitikaaji ɗin ka maakitiiji, Alla no Anndi ko feññinton immorde e golle mo'on e alhaaliiji mo'on e ko suuɗoton, hay huunde e ɗum suuɗanaaki Mo, aray O yoɓa on e dow mu'un.

Maakan -an Nulaaɗo- worɓe gomɗinɓe ɓen yo ɓe hippu giti maɓɓe ɗen gaayi ndaarude e ko daganaki ɓe immorde e sonnaaɓe e awraaji, ɓe reena farjuuji maɓɓe immorde e yanugol e ko harminaa kon, e immorde e huncugol ɗum, ngol hippugol gite gaayi e ndaarude faade e kon ko Alla harmini ɓurata laɓɓinnde on ka Alla. Pellet, Alla ko O Humpitiiɗo ko ɓe huuwata, hay e huunde e ɗum suuɗanaaki Mo, aray O Yoɓa ɓe e dow ɗum.

Maakan rewɓe gomɗinɓe ɓen yo ɓe hippu gite maɓɓe ɗen gaayi ndaarude e ko daganaaki ɓe ndaarugol kon immorde e awraaji, ɓe reenira farjuuji maɓɓe ɗin woɗɗitagol pankare ɗen e surrugol ɗi, wata ɓe feññinan cuɗaari maɓɓe ndin jananɓe ɓen si wanaa ko feeñi kon e mayri, kon ko newotaako suuɗugol ɗum wano conci ɗin, yo ɓe fawu tiggaaje maɓɓe ɗen e hoore jolɗe wontirɗe ɗen ka senngo dow conci maɓɓe fii yo ɓe suuɗu cukuli maɓɓe ɗin e geece maɓɓe ɗen e daaɗe maɓɓe ɗen, wata ɓe feññinan cuɗaari maɓɓe suuɗiindi ndin si wanaa moodiɓɓe maɓɓe ɓen, maaɗum baabiraaɓe maɓɓe ɓen, maaɗum baabiraaɓe moodiɓɓe maɓɓe ɓen, maaɗum ɓiɗɓe maɓɓe ɓen, maaɗum ɓiɗɓe moodiɓɓe maɓɓe ɓen, maaɗum musiɗɓe maɓɓe ɓen, maaɗum ɓiɗɓe musiɗɓe maɓɓe ɓen, maaɗum ɓiɗɓe banndiraaɓe maɓɓe ɓen, maaɗum sonnaaɓe maɓɓe hoolaaɓe ɓen, foti ko ɓe julɓe maa ko ɓe heeferɓe, maaɗum ɓen ɓe ɓe jeyi immorde e maccuɓe maaɗum horɓe, maaɗum worɓe jokkooɓe ñiiri ɓe maraa haaju e rewɓe, maaɗum boobooɓe ɓe humpitaaki ɓen awraaji sonnaaɓe sabu famɗugol maɓɓe, wata sonnaaɓe ɓen fiyandir koyɗe maɓɓe ɗen faadagol fii yo annde ko ɓe suuɗi kon immorde e cuuɗaari maɓɓe yeru liɓe e ko nanndi e ɗum. Tuubee ruttoɗon ka Alla no fotuɗon fodde -ko onon yo gomɗinɓe- tijjagol on heɓay ko ɗaɓɓaa kon, daɗon ko hulaa kon.

Resinee -onon gomɗinɓe ɓen- ɓen worɓe ɓe alah sonnaaɓe, e ɓen rimɓe ɓe alaa moodiɓɓe, resinee gomɗinɓe ɓen immorde e maccuɓe mooɗon ɓen e horɓe mooɗon ɓen kadi, si tawii ko ɓe waasuɓe Alla alɗiniray ɓe Ɓural Makko yaajungal ngal, Alla ko O Yaajuɗo Arsike, alɗinngol goɗɗo uytataa Arsike Makko on, ko O Annduɗo alhaaliiji jeyaaɓe Makko ɓen.

Ɓen ɓe hattanaani resugol sabu baasal maɓɓe, yo ɓe ɗaɓɓu ɓuurnaade gaa e jina ngon haa Alla alɗinira ɓe Ɓural Makko Yaajungal ngal. Ɓen maccuɓe wonuɓe ɗaɓɓude soottaadede ka koohooɓe maɓɓe ɓen e dow yoɓugol jawdi fii yo ɓe rinɗu, no fawii koohooɓe maɓɓe ɓen jaɓanngol ɓe ɗum, si ɓe anndirii ɓe hattaneede tottugol ngol e moƴƴugol ka diina, haray no fawii ɓe nde ɓe jonnata ɓe jawdi Alla ndi O jonni ɓe ndin, ɗum woni ɓe fukkana ɓe peccun e ko ɓe winndi ɓe kon fii yoɓugol ɗum. Wata on doolu horɓe mooɗon ɓen e jeeno fii ɗaɓɓugol jawdi -wano Abdullaahi bun ubayyu waɗirnoo non horɓe makko ɓen ɗiɗo fewndo ɓe ɗaɓɓunoo nantagol e woɗɗitagol e pankare ɗen- fii yo on ɗaɓɓu ko o faggitori kon farju makko on, kala dooluɗo ɓe e mooɗon fii ɗum, pellet, Alla ɓaawo doolugol ɓe ngol ko O Surroowo junuubu maɓɓe on, Yurmeteeɗo ɓe; sabu ko ɓe doolaaɓe, bakkaatu on ko fawii ko e dooluɗo ɓe on.

Gomɗii Men tippinii e mooɗon -onon yimɓe ɓen- Aayeeje ɓannguɗe jilɓuya alah e majje, Men tippini e mooɗon misal immorde e ɓen feƴƴunooɓe ado mooɗon immorde e gomɗinɓe e heeferɓe, Men tippini e mooɗon waaju ɓen hulooɓe Joomi mu'un hiɓe waajitora ngu ɗoftagol Yamraaɗi Makko ɗin e woɗɗitagol haɗaaɗi Makko ɗin.

Ko Alla woni ndaygu kammuuli ɗin e leydi ndin, e fewnoowo ɓen wonuɓe e majji. Sifa ndaygu Makko ngun ka ɓernde gomɗinɗo on, ko wano tuɗɗere e maadi ndaynginndi ndi alaa wuddere, hara pitilol no e mayri, pitilol ngol no e nder biiniiri fewtinaandi a wi'ayma ko ndi hoodere jalbunde. Ngol pitilol no huɓɓiniree nebban leggal barkinaangal, ngal le ko leggal nebbantiwal ngal. Huunde heedah ngal leggal e naange ngen, wanaa ka bimmbi wanaa ka kiikiiɗe. Nebban maggal ɗam no ɗaɓa jalbude sabu laaɓugol majjam, hay si yiite meemaali ɗam. Ko honno kan si yiite meemii ɗam? Ndaygu pitilol ngol ɓeydoo e ndaygu biiniiri ndin. Ko nii de ɓernde gomɗinɗo on wa'ata si ndaygu peewal ngal jalbii e mayre. Alla hino hawrinndina e jokkugol Alqur'aana on on mo O muuyi immorde e jeyaaɓe Makko ɓen. Alla no ɓannginira piiji ɗin nanndo majji piyirgol ɗi mise. Alla ko Annduɗo kala huunde. Huunde suuɗanaaki Mo.

Ngol pitilol no huɓɓinee e nder Juulirɗe ɗe Alla Yamiri mahugol e townugol fii majje, Innde Makko jaŋtoree e majje Noddinaandu ndun e Julde nden e jaŋtagol ngol, no juulee e nder majje fii ɗaɓɓugol welayee Alla ka arannde ñalal ngal e ka sakkitorde maggal.

Worɓe ɓe soodugol e yeeyugol maapintaa ɗum gaayi jaŋtagol Alla Senayee wonanii Mo, e tottirgol Julde nden no haaniri non, e jonnugol Jakka on henndotooɓe mo ɓen, hara hiɓe huli Ñalnde Darngal, nden Ñalaande nde waylitoytoo e muuɗum ɓerɗe ɗen hakkunde tama'u daɗugol immorde e Lepte ɗen e kulol majje, giiɗe ɗen waylitoyoo e mayre faade e nokku kala ka ɗe yaari.

Ko ɓe golliri ɗum ko fii yo Alla yoɓu ɓe e dow golle maɓɓe ɗen ko ɓuri moƴƴude ko ɓe gollunoo kon, O ɓeydana ɓe kadi immorde e Ɓural Makko ngal njoɓdi e dow mu'un. Alla no arsika on mo O Muuyi ko aldaa e hasboore e dow emmbere golle maɓɓe ɗen, ko woni hiMo okka ɓe cowe ko ɓe gollunoo kon.

Ɓen yedduɓe Alla, golle maɓɓe ɗe ɓe golli ɗen, ɗe maraa baraaji, ko yeru merere wonnde e hollaande ɗonɗaaɗo on no yi'a nde o sikka ko nde ndiyam, o yaha e mayre haa si o hewtii o daroo e hoore mayre o heɓataa ndiyam, ko wano nii yedduɗo on himo sikka wonnde golle makko ɗen ɗe nafay mo, haa si o maayii o immintinaama hara o heɓatah baraaji golle ɗen. O tawa Joomi makko yeeso makko O huuɓinana mo hasboore golle makko ɗen haa timma, Alla ko O Yaawuɗo Hasboore.

Maaɗum golle maɓɓe ɗen ko yeru niɓe e nder maayo luggungo, no dow maggo benpeƴƴe, no dow ɗen benpeƴƴe benpeƴƴe goo, no dow majje duule hiɗe suddi koode tinddinorteeɗe ɗen, niɓe fawondirɗe yoga e majje e dow yoga, si ukkiiɗo e ɗee niɓe ɗoo yaltinii junngo mu'un ngon o ɓadotaako yi'ugol ngo sabu saɗtude niɓe ɗen, ko wano nii kadi yedduɗo on, gomɗii fawondirii e hoore makko niɓe majjere e sikke e wemmbere e uddeede ɓernde makko, on mo Alla arsikaali Peewal immorde e majjere nden, e ganndal ka Deftere Makko, haray o marah peewal ngal o feewita ɗum, wanah kadi deftere nde o ndaygirta ɗum.

Kaa a anndaa -an Nulaaɗo- wonndema Alla no subuhinanoo Mo ɓen wonuɓe ka kammuuli, no subuhinanoo Mo ɓen wonuɓe ka leydi immorde e tageefooji, colliɗin kadi no subuhinanoo Mo hiɗi fonti gabitanji(bibje) majji ka weeyo? Gootel kala e ɗii tageefooji Alla hiMo Annadi Julde kala juuluɗo immorde e majji wano neɗɗanke on, e subuhinaali kala subuhiniiɗo immorde e majji wano colli ɗin, Alla ko O Annduɗo ko ɓe huuwata, suuɗanaaki Mo hay e huunde e golle maɓɓe ɗen.

Ko Alla heeranii kanko tun Laamu kammuuli ɗin e Laamu leydi ndin, ko faade ka Makko Kanko tun woni ruttorde Ñalnde Darngal fii Hasboore e njoɓdi.

Kaa a anndaa -an Nulaaɗo- wonndema Alla hiMo sogga duulere, refti O hawtindira yoga e cenkoy mayre faade e yoga, refti O waɗa nde fawondirnde O dewta yoga e mayre e dow yoga, yi'aa toɓo ngon no yalta ka nder duulere, no iwa ka kammu jippoo immorde e ɗen duule sukkuɗe nannduɗe e pelle sabu mawnugol majje, [no yalta ton kadi] kunte ndiyam fenndiiɗam wa'uɗam wa koccuuje, O hewtina ɗen marmalle on mo O Muuyi immorde jeyaaɓe Makko ɓen, O firta ɗe e on mo O Muuyi e maɓɓe, ndaygu maƴe duule ɗen no do'a naɓude giiɗe ɗen sabu saɗtude jalbugol majje.

Alla hiMo lontindira hakkunde jemma on e ñalorma on ka juutugol e ka raɓɓiɗugol, e ka yahugol e ka arugol, pellet, no e ɗum ko jaŋtaa ɗoo immorde e Aayeeje e daliilaaji joomayankooji waaju tinndinɗi e dow Kattanɗe Alla e Ngootimmbaaku Makko wonannde joomoraaɓe giiɗe ɓen.

Ko Alla Tagi kala ko woni ladude ka hoore leydi e mummunteeji ɗin immorde e toɓɓere [maniiyu], no e majji ɗin yaarooji reedu muuɗum e daasagol wano mbolle ɗen, no e majji ɗin yaarooji kayɗe ɗiɗi wano neɗɗo on e sonndu ndun, no e majji kadi ɗin yaarooji [koyɗe] nayi wano neemoraaɗi ɗin, Alla hiMo Taga ko O Muuyi ko O jaŋtii kon e ko O jaŋtaaki kon kadi, pellet, Alla ko O hattanɗo e dow kala huunde, hay e huunde ronkintah Mo.

Gomɗii Men Tellinii e dow Muhammadu (yo Alla juulu e makko hisna) Aayeeje ɓannguɗe ko jilɓi alah e majje, Alla hiMo hawrinndina on mo O Muuyi faade e Laawol focciingol, ngol ooñannde e muuɗum, ngol Laawol yottina mo ka Aljanna.

Naafiqiiɓe ɓen no wi'a: "Men gomɗinii Alla, men gomɗinii Nulaaɗo on, men ɗoftike Alla, men ɗoftike Nulaaɗo on kadi, refti fedde goo e maɓɓe huccita, hara ɓe ɗoftaaki Alla e Nulaaɗo Makko on ka yamaroore fii Jihaadi ka Laawol Alla e tanaa muuɗum ɓaawo ɓe aaƴike ɗum ko e gomɗinal Alla e Nulaaɗo Makko on e ɗoftagol ɓe kamɓe ɗiɗo, ɓen huccituɓe gaayi ɗoftagol Alla e Nulaaɗo Makko on, ɓen wonaali gomɗinɓe hay si ɓe nodditike wonndema ko ɓe gomɗinɓe.

Si ɓee naafiqiiɓe ɓen noddaama faade ka Alla, e ka Nulaaɗo on fii yo Nulaaɗo on ñaawu hakkunde maɓɓe fii koɓe wennjondiri e fii mu'un kon, tawa kamɓe ko ɓe ɗuurniiɓe gaayi ñaawoore makko nden sabu naafiqaaku maɓɓe ngun.

Si ɓe anndii hiɓe mari goonga, wonndema o ñaaway ko nafataɓe, ɓe aray ka makko ko ɓe ɗoftiiɓe yankiniiɓe.

Kaa hara wonu ka ɓerɗe ɓee ñaw duumiingu e majje, kaa ɓe sikkiti wonnde kanko ko o Nulaaɗo Alla, kaa ɓe hulu wata Alla e Nulaaɗo Makko on tooñu ɓe ka ñaawoore? Hay e huunde e koo ko jaŋtaaɗoo wonaali, ko woni, ko sabu ñaw wonngu ka wonkiiji maɓɓe sabu ɗuuragol maɓɓe gaayi ñaawoore makko nden e sanndalingol nde.

Anndu ko wonata konngol gomɗinɓe ɓen si ɓe noddaama faade ka Alla e ka Nulaaɗo on fii yo ñaawu hakkunde maɓɓe, ko nde ɓe wi'ata: "Men nanii Daaluyee Makko on, men ɗoftike Yamiroore Makko nde." Ɓen siforɓe ɗii sifaaji ko kamɓe woni malaaɓe ɓen ka aduna e ka Laakara.

Kala ɗoftiiɗo Alla o ɗoftii Nulaaɗo Makko on, o jebbilanii ñaawoore Maɓɓe nden, o huli ko goopi ɗin pooɗata kon, o rentori e Lepte Alla ɗen ɗoftagol Yamiroore Makko nden, e woɗɗitagol haɗaaɗi Makko ɗin, haray ɓen ɗon ko kamɓe tun woni maliraaɓe moƴƴere aduna on e Laakara on.

Naafiqiiɓe ɓen woondiri Alla kaddi goondooje maɓɓe tiiɗinaaɗe ɗen ɗeɓe hattani woondirgol ɗum: "Si a yamirii ɓe yaltugol yaha ka Jihaadi ma ɓe yaltu sanne". Maakan ɓe -an Nulaaɗo-: wata on woondu, penaale mooɗon ɗen ko anndaaɗe, ɗoftaare mooɗon nde aaƴiɗon nden ko anndaande. Alla ko O Humpitiiɗo ko golloton, hay e huunde e golle mo'on ɗen suuɗanaaki Mo noone woo no suuɗirɗon ɗe.

An Nulaaɗo maakan ɓee naafiqiiɓe: Ɗoftee Alla ɗoftoɗon Nulaaɗo on, ka kene e ka gunndoo, si on huccitii gaayi e ko yamirɗon kon e ɗoftagol ɓe kamɓe ɗiɗo; haray anndu ko fawii mo kanko, ko ko o fawaa kon immorde e yottinngol ngol, no fawii on onon kadi ko fawaɗon kon immorde e ɗoftagol ngol e gollirgol ko O addi kon, si on ɗoftorii mo gollugol ko o yamiri on kon gollugol e accugol ko o haɗi on kon, on feeway faande e goonga kan, fawaaki Nulaaɗo on si wanaa yottinngol ɓanngungol, fawaaki mo fawugol on e dow peewal ngal, e doolugol on e dow maggal.

Alla Fodii ɓen gomɗinɓe Mo jeyaaɓe e mooɗon ɓe golli golle moƴƴe ɗen, nde O wallata ɓe e dow ayɓe maɓɓe ɓen, o waɗa ɓe lontiiɓe ka leydi yeru no O waɗiranoo non ɓen gomɗinɓe adiiɓe ɓe lontiiɓe e mayri, O Fodi ɓe nde O waɗata diina maɓɓe ka O weltorani ɓe kan -ɗum le ko Diina Lislaamu kan- weeɓuka Tedduka, O fodi ɓe O wattitanay ɓe ɓaawo kulol maɓɓe ngol hoolaare. Yo ɓe rewam Min tun, wata ɓe sirkanam hay e huunde. Kala yedduɗo ɓaawo on neema hara ɓen ɗon ko kamɓe woni yaltuɓe ɓen gaayi ɗoftaare Alla.

Tottiree Julde nden no haaniri non, jonnon Jakka jawle mooɗon ɗen, ɗoftoron kadi Nulaaɗo on gollugol ko o yamiri on kon e accugol ko o haɗi on kon e muuɗum, jortagol on heɓay Yurmeende Alla nden.

Wata a sikku -an Nulaaɗo- ɓen yedduɓe Alla ɓe laawoto Lam si Mi faalaama jippingol Lepte ɗen e maɓɓe, jaaƴorde maɓɓe nden Ñalnde Darngal ko Jahannama. On mo Jahannama woni wattinirde mu'un pellet, haray wattabde makko nden bonii.

Ko onon yo gomɗinɓe Alla, ɓe golliri Sari'a mo O waɗani ɓe on, yo ɗaɓɓu duŋayee e mooɗon maccuɓe mooɗon ɓen e horɓe mooɗon ɓen e sukaaɓe mooɗon rimɓe ɓen, ɓen ɓe yottaaki duuɓi kellefuyee e waqtuuji tati: Ko adii Julde Subaka nden, waqtu wattitugol conci waalorɗi ɗin e conci gollirɗi ɗin, e ka waqtu jolloro tuma ɓortoto ɗon conci mooɗon fii ɗoykal njolloor, e ka ɓaawo Julde geeƴe; sabu ko on fewndo ɓortotoɗon conci mooɗon gollirɗi ɗin ɓornoɗon conci ɗaanorɗi ɗin, ɗii waqtuuji ɗoo tati ko awraaji mooɗon, wata ɓe naatu ka mooɗon e majji si wonaa ɓaawo duŋayee mooɗon. Bakkaatu fawaaki on fii naatugol maɓɓe hara ɓe cakkitinaaki, bakkaatu fawaaki ɓe ko wonaa e nder ɗiiɗoo immorde e waqtuuji. kamɓe ko ɓe heewuɓe wangagol, yoga e mooɗon kadi no liigoo ka yoga, gasataa haɗugol ɓe naatugol e kala waqtu si wanaa ɓe duŋini. Ko wano Alla ɓannginirani on nii ñaawooje duŋinagol ngol O ɓannginiranta on Aayeeje tinndinɗe e ko O Sar'inani on kon immorde e ñaawooje. Alla ko Annduɗo nafaaji jeyaaɓe Makko ɓen ko O Ñeeñuɗo e nder waɗanngol ɓe ngol ñaawooje.

Si sukaaɓe mooɗon yottike duuɓi kellefuyoo, yo ɓe ɗaɓɓu yamiroore tuma naatugol ka cuuɗi e waqtuuji ɗin fow, yeru ko jaŋtaa kon e fiyaake mawɓe ɓen ko adii, wano Alla ɓannginirani on nii ñaawooje duŋinagol ngol Alla ɓannginiranta on Aayeeje Makko ɗen, Alla ko O Annduɗo nafaaji jeyaaɓe Makko ɓen, Ñeeñuɗo e ko O Sar'inani ɓe kon.

E ɓen yummiraaɓe accuɓe fiilaade e sowaade sabu nayewu maɓɓe, ɓen ɓe tamƴinaaki e dewgal bakkaatu fawaaki ɓe si ɓe wallinii conci maɓɓe ɗin wano waanaare nden e tiggaare nden, hara ɓe feññinaali cuɗaari suuɗiinde ndin, ndi Alla yamiri ndin suuɗugol. Ko nde ɓe accata wallinngol ɗin conci ɓuri moƴƴannde ɓe diini wallinngol ɗi, ka tentinngol fii surragol e nantagol, Alla ko O Nanoowo konnguɗi mooɗon ɗin, Annduɗo golle mooɗon ɗen, hay huunde e ɗum suuɗanaaki Mo, aray O yoɓa on e dow majje.

Junuubu fawaaki on bunɗo waasaaɗo giiɗe mu'un; junuubu fawaaki kadi laƴuɗo on, junuubu fawaaki kadi nawnuɗo on; si ɓe ɗalii ko ɓe hattantaake kon daranagol ɗum immorde e ko fawii ɓe waɗugol wano Jihaadi ka Laawol Alla. Junuubu fawaaki on -onon gomɗinɓe ɓen- fii ñaamugol ka cuuɗi mooɗon, no jeyaa e majji cuuɗi ɓiɗɓe mooaon, wanaa kadi fii ñaamugol ka cuuɗi baabiraaɓe mooɗon, maaɗum neeniraaɓe mooɗon, maaɗun musiɗɓe mooɗon, maaɗum musiɗɓe mooɗon rewɓe, maaɗum bappiraaɓe mooɗon, maaɗum yaayiraaɓe mooɗon, maaɗum kawiraaɓe mooɗon, maaɗum neeniraaɓe mooɗon ka dewol, maaɗum cuuɗi ɗi halfinaɗon reenugol ɗin wano aynuɗo awru. Junuuɓu alaa e ñaamugol ka cuuɗi yiɗɓe mooɗon sabu weleede wonkii makko e ɗum, junuubu fawaaki on nde ñaamoton ko on mooɓiiɓe maaɗum ñaamiron gooto-gooto. Si on natay e cuuɗi sifa ɗii cuuɗi jaŋtaaɗi ɗoo e tanaa majji haray salminee ɓen wonuɓe e nder majji ɗum woni wi'on: "Kisiyee e mon" Si tawii goɗɗo alah e nder majji; haray salminee e dow wonkiiji mooɗon, ɗum woni wi'on: "Kisiyee e amen e jeyaaɓe Alla moƴƴuɓe ɓen". Ɗum ko hiwraango immorde ka Alla ngo O Sar'inani on barkinaango; sabu ko ngo saakata kon immorde e giggol e woowoniral hakkunde mooɗon, laaɓungo no laaɓira sabu maggo wonkii nanuɗo ngo on, ko yeru ngol ɓannginngol aditiingol ka Simoore Alla ɓannginirta Aayeeje jortagol on hakkilanay ɗe, gollitiron ko woni kon e nder majje.

Anndu gomɗinɓe goonguɓe ɓen ka gomɗinal maɓɓe, ko ɓen woni gomɗinɓe Alla ɓe gomɗini kadi Nulaaɗo Makko on, si ɓe laatike hiɓe wondi e Annabiijo on (yo Alla juulu e makko hisna) e fiyaake hawtinirɗo ɓe fii nafa Julɓe ɓen, ɓe yahatah haa ɓe ɗaɓɓira mo duŋayee fii yahugol. Pellet, ɓen ɗaɓɓirooɓe ma -an Nulaaɗo- duŋayee tuma yahugol ko ɓen ɗon gomɗini Alla, ɓe gomɗini Nulaaɗo Makko on e goonga, si ɓe ɗaɓɓirii ma duŋayee fii yoga e fiyaake hittuɗo e maɓɓe duŋano on mo yiɗuɗaa duŋanaade e maɓɓe, ɗaɓɓanaaɓe yawtaneede junubaaji ɗin. Pellet, Alla ko O Yawtoowo tububaaji kala tuubuɗo immorde jeyaaɓe makko ɓen, ko O Yurmeteeɗo ɓe.

Teddinee -onon gomɗinɓe ɓen- Nulaaɗo Alla on, si on nodday mo, wata on noddir mo innde makko nden, yeru: "Ko an Muhammadu" maaɗum innde baaba makko nden, yeru: "Ko an yo geɗal Abdullahi" Wano yoga e mooɗon waɗirta non e yoga, kono wi'ee: "Ko an yo Nulaaɗo Alla, ko an yo Annabaajo Alla" Si o noddii on kadi e muraadu kafaandu(renndaandu) wata on waɗu noddaandu makko ndun wano noddaandu yoga e mooɗon e yoga e muuraaɗi puyɗi, ko woni, yaccinee nootagol ndu. Gomɗii Alla no Anndi ɓen suuɗotooɓe yaha hara waynaaki, ɓen wonuɓe lunndaade yamaruyee Nulaaɗo on yo ɓe rento wata Alla hewtin ɓe jarrabuyeeji e masiibooji, maaɗum O hewtina ɓe Lepte muusuɗe ɗe ɓe muññotaako e hoore mu'un.

Ko non woniri, pellet, ko Alla tun woodani tagude e jeyde e fewjude ko woni kon ka kammuuli e ka leydi, hiMo Anndi -onon yimɓe ɓen- ko wonuɗon kon e mu'un immorde e alhaaliiji, hay huunde e majji suuɗanaaki Mo, Ñalnde Darngal -tuma ɓe ruttiroytee ka Makko Immital ɓaawo maayde nden- O humpita ɓe ko ɓe gollunoo kon immorde e golle ka aduna, Alla ko O Annduɗo kala huunde, hay e huunde suuɗanaaki Mo ka kammuuli wanaa ka leydi kadi.

Mawnii heewii moƴƴere On Jippinɗo Alqur'aanaare nden senndindiraynde hakkunde Goonga kan e meere nden e dow Jeyaaɗo Makko on e Nulaaɗo Makko on Muhammadu (yo Alla juulu e makko hisna); fii yo wonu Nulaaɗo faade sattafeere en ɗiɗo yimɓe ɓen e jinnaaji ɗin, ko o hulɓinayɗo ɓe immorde e Lepte Alla ɗen.

On Mo laamu kammuuli ɗin e leydi ndin woodani Kanko tun. O jogitaaki ɓiɗɗo, kafidaaɗo ka laamu Makko laatanaaki Mo. O tagii denndaangal piiji ɗin, O eɓɓindii tagugol ɗi ngol ko hawrondiri e ganndal Makko e Ñeeñal Makko hattirde e eɓɓugol. kala e ko yaadi e mun.

Sirkooɓe ɓen jogitii gaanin Alla reweteeɗi ɗi tagaa hay e huunde famɗunde maaɗum njanɗu nde kannji le ko ɗi tagaaɗi, gomɗii Alla tagiiɗi immorde e baasal, ɗi hattantaake ruttugol lorra e ko'e majji, wanaa pooɗugol nafa majji, ɗi hattantaake warugol ko wuuri, wanaa wurnitugol ko maayi, ɗi hattantaake immintinngol mayɓe ɓen ka genaale maɓɓe.

Ɓen yedduɓe Alla e Nulaaɗo Makko on wi'i:"Ndee Alqur'aanaare wonaali si wonah fenaande Muhammadu fefindii nde o dammbi e Alla e fenaa- nde, yimɓe goo walli mo fefindagol nde." Gomɗii ɓee yedduɓe fefindike konngol meerewol, Alqur'aanaare nden ko nde Daalol Alla, weeɓantah ɓanndunke wanaa jinna nde ɓe addata yeru mayre.

Ɓee fennuɓe Alqur'aanaare nden wi'i: "Alqur'aanaare nden ko nde haalaaji adinooɓe ɓen e ko ɓe winndaynoo kon immorde e meereeji, Muhammadu egginiɗi, hiɗi jannganee mo ka arannde ñallal ngal e ka sakkitorde maggal".

Ko an yo Nulaaɗo maakan ɓee fennuɓe: "Jippinii Alqur'aanaare nden Alla On Annduɗo kala huunde ka kammuuli e ka leydi, nde wonah fefindaande wano aaƴorɗon". Refti o maaki fii rerɗinngol ɓe e tuubuubuyee on: "Pellet, Alla ko O Surroowo wonannde on tuubuɗo immorde jeyaaɓe Makko ɓen, ko O Yurmeteeɗo ɓe".

Sirkooɓe fennuɓe ɓen Annabaajo on (yo Alla juulu e makko hisna) wi'i: "Ko honɗun heɓi oo wonɗo aaƴaade wonndema kanko ko o Nulaaɗo immorde ka Alla himo nafoo ñaamitee wano yimɓe goo ɓe wonaa mo ñaamirta non, himo yaha kadi ka luumooji ɗaɓɓugol nguuree? Ko hanno Alla jippona Malaa'ikaajo ko wonnda e makko goongina mo walla mo?"

Maaɗum jippinee e makko ngalu immorde ka kammu, maaɗum laatanoo mo ngesa o ñaama e dimɗe mayru, o yonndinoo e yahugol ka luumooji e ɗaɓɓugol arsike, tooñooɓe ɓen wi'i: "On jokkaali -onon gomɗinɓe ɓen- Nulaaɗo, anndu ko jokkuɗon ko gorko foolaaɗo ka hakkile muuɗum sabu mbilewu".

Ndaarii haawuɗaa ɓe -an Nulaaɗo- ko honno ɓe sifor maa sifaaji meereeji. Ɓe wi'i: "Ko a mbileejo". Ɓe wi'i kadi: "Ko a mbilɗaaɗo". Ɓe wi'i kadi: "ko a feetuɗo". Ɓe majjii e Goonga kan sabu ɗum, ɓe hattantaake naatugol e laawol Peewal ngal, ɓe hattantah kadi [heɓude] laawol fii tukkugol hoolaare maaɗa nden e goongugol maaɗa ngol.

Mawnii Alla On tawɗo si O Muuyii O waɗante ko ɓuri moƴƴude diini kon ko ɓe etanta maa ɗon, ɗum woni O waɗane ka aduna gese hara canɗi ɗin no ila senngo ley kuɓeeje majje e leɗɗe majje nafoɗaa dimɗe majje, O waɗane kuɓeeje hoɗaa e nder majje ko a neeminiiɗo.

yaltaali e maɓɓe ko yalti kon immorde e konnguɗi fii ɗaɓɓugol Goonga e wiɗtugol fii daliili, ko woni, ko waɗi kon, ko wonnde kamɓe ɓe fennii Ñalnde Darngal ng, alMen hebloranii fii ɓen fennuɓe Ñalnde Darngal nden Yiite saɗtunge huɓɓugol.

Si yiite ngen yi'ii yedduɓe ɓen hara hiɓe soggeede e magge immorde e nokkuure woɗɗunde ɓe nana nge tikkere saɗtunde, e hito ɗenƴinayngo sabu saɗtude tikkere magge nden e dow maɓɓe.

Si ɓee heeferɓe bugaama ka nder Jahannama e nokkuure faaɗunde e magge hara juuɗe maɓɓe ɗen no kolmbiraa jolokooje ka daaɗe maɓɓe, ɓe huɗira wonkiiji maɓɓe ɗin halkeede; tijjagol ɓe seeday e magge.

Wata on noddu -onon yedduɓe ɓen- hannde halakuyee gooto, noddee halakuyeeji ɗuuɗuɗi, kono on jaabantaake ko torotoɗon kon, ko woni, on heddoto ka nder Lepte muusuɗe ko on luttooɓe.

Maakan ɓe -an Nulaaɗo-: "Enee, ko ɗum ko jaŋtaa ɗoo immorde e ɗen Lepte ɗe sifanaɗon ɓuri moƴƴude, kaa ko on Aljanna luttoowo mo neemaaji muuɗum duumotoo, hara ɗi taƴatah poomaa?" Ko on woni mo Alla fodi jeyaaɓe Makko hulooɓe gomɗinɓe ɓen wonnde o laatanto ɓe mbarjaari, e ruttorde nde hiɓe ruttoo e muuɗum Ñalnde Darngal.

No woodani ɓe ka Aljanna ton ko ɓe welaa immorde e neemaaji ɗin, ɗum laatike e dow Alla Fodoore, lannditoto Mo nde jeyaaɓe Makko ɓen, fodoore Alla nden ko waɗaynde, Kanko O lunndataako fodoore.

Ñalnde Alla mooɓoyta sirkooɓe ɓen e fennuɓe ɓen, O mooɓa ko ɓe rewata kon gaanin Alla, O Daalana rewaaɓe ɓen fii duɗɗugol rewunooɓe ɓen: "Enee, ko onon majjiniri jeyaaɓe Am ɓen yamirgol ɓe yo ɓe rewu on, kaa ko kamɓe majjani hoore-maɓɓe?!"

Rewaaɓe ɓen wi'a: "A Senike Joomi amen, nde laatanto Maa kafidaaɗo, haananaa men nde men jogitotoo gaanin Maaɗa yiɗɓe ɓe men welda e maɓɓe. Ko honno men noddirta jeyaaɓe Maaɗa ɓen yo ɓe rewu men gaanin Maaɗa?! Kono, A dakmitirii ɓee sirkooɓe dakammeeji aduna, dakmintinɗaa baabiraaɓe maɓɓe ɓen ado maɓɓe ka ɗaynugol ɓe haa ɓe yejjiti jaŋta Maaɗa, ɓe rewidi e Maaɗa tanaa Maaɗa, ɓe laatii yimɓe halkiiɓe sabu malkiseede maɓɓe."

Gomɗii on fennii -onon sirkooɓe ɓen- ɓen ɓe rewuɗon ɗum gaani Alla e ko nodditiɗon kon e hoore maɓɓe, on hattantah riiwtugol Lepte ɗen e wonkiiji mooɗon wanah wallugol ɗi kadi sabu ronkere mooɗon, kala tooñirɗo e mo'on -onon gomɗinɓe ɓen- sirkangol Alla, Men meeɗinay mo Lepte mawɗe yeru ko Men meeɗini ɗe kon ɓe jaŋtaaɓe.

Men Nulaali ado maaɗa -an Nulaaɗo- immorde e Nulaaɓe ɓen si wonaa ko ɓe ɓandunke, ɓe laatinoke ñaamooɓe yahoobe kadi ka luumooji, mi laataaki arano e Nulaaɓe ɓen e ɗum, Men waɗi yoga e mooɗon -onon yimɓe ɓen- yoga jarrabuyee ka ngalu e ka baasal e ka cellal e ñaw sabu ngal luutondiral. E on muññoto e dow ko jarribora ɗon kon Alla yoɓa on e dow muñal mooɗon ngal?! Joomi maaɗa laatike ko O Yi'oowo on muññiiɗo e on mo muññaaki, e on ɗoftiiɗo Mo e on yedduɗo Mo.

Yedduɓe ɓe tijjaaki ɓen fottoygol e Amen, ɓe hulaali Lepte Amen ɗen ɓe wi'i: " Ko hanno Alla jippina e amen Malaa'ikaaɓe ɓen, ɓe yeeton men Muhammadu ko e Goonga woni, maaɗum men seedora Joomi amen gite, O yeetoo men ɗum?" Gomɗii mawnitinaare nden tiiɗii ka wonkiiji ɓee, haa ɗum haɗi ɓe gomɗinal ngal, ɓe yawtirii ɗii konnguɗi maɓɓe keerol ngol ka keeferaaku e bewre.

Ñalnde yedduɓe ɓen yi'oyta Malaa'ikaaɓe ɓen tuma ɓe maayata, e ka Barjaku kadi, e ka Immital maɓɓe, e tuma ɓe soggetee ka hasboore, e tuma ɓe naatata ka Yiite haray welo-welo alaana ɓe e ɗeen darorde ɗon. No seedi e gomɗinɓe ɓen, Malaa'ikaaɓe ɓen wi'ana ɓe: No harmi, no harminaa e dow mooɗon welo-welo ngon immorde ka Alla.

Men faandii faade e ko yedduɓe ɓen golli kon ka aduna immorde e golle dewal e moƴƴere Men wattini ngal ka bonugol maggal e anngal nafugol magal sabu yeddugol maɓɓe wano nduggu saakiingu ndaaroowo no yi'a ngu ka pooye (sim-simɗe) naange naatuɗe ka jolɗe.

Ko yimɓe Aljanna gomɗinɓe ɓen ɓuri moƴƴude darnde nden Ñalnde, ɓuri moƴƴude kadi nokku fowtere, waqtu fowtere maɓɓe nden ka aduna diini ɓee heeferɓe; ɗum ko sabu gomɗinal maɓɓe Alla ngal e golle maɓɓe moƴƴe ɗen.

Jaŋto -an Nulaaɗo- Ñalnde kammuuli ɗin seekorta duule daneeje sewɗe, Malaa'ikaaɓe ɓen jippinee ka leydi mofturu jippinngol ɗuuɗungol sabu ɗuuɗugol maɓɓe.

Laamu Goongawu tabitungu ngun, Ñalnde Darngal ko Hinnorante On ngu heeranii Senayee wonanii Mo, nden Ñalnde laatoto saɗtunde e dow yedduɓe ɓen, no seedi e gomɗinɓe ɓen haray kayre ko nde newiinde e dow maɓɓe.

Jaŋto -an Nulaaɗo- Ñalnde tooñuɗo on ŋatoyta junngo mu'un ngon immorde e saɗtude ninse sabu ɗalugol makko jokkukogol Nulaaɗo on (yo Alla juulu e makko hisna) O wi'oya: "Eeh jalla min, mi jokkuno Nulaaɗo on e ko o addi kon immorde ka Joomi makko, mi jogitii wonndude e makko Laawol daɗugol.

O wi'a ka saɗtude sunaare o toroo bone e dow wonkii makko: "Eeh bone am, jalla min, mi jogitanooki kaariijo yedduɗo on giɗo".

Gomɗii oo weldiiɗo yedduɗo majjinii lam e Alqur'aanaare nden ɓaawo nde hewtii lam e laawol Nulaaɗo on, Seytaane on laatike ko o heewuɗo jaasinngol neɗɗanke on, si saɗteende jippike e makko [seytaane] woɗɗitoo mo.

Nulaaɗo on maaka nden Ñalnde ko o wullitotooɗo alhaali yimɓe makko ɓen: "Ko An yo Jooma, pellet yimɓe am ɓe nuluɗaa mi faade e mu'un ɓe accitii ndee Alqur'aanaare ɓe ɗuureniinde".

Ko wano no hawrirɗaa nii -an Nulaaɗo- immorde e yimɓe maaɗa ɓen e lorreede e sakkeede ka Laawol maaɗa, Men waɗirani kala Annabaajo immorde e Annabaaɓe ɓen ado maaɗa gaño immorde e bonɓe ɓen ka yimɓe makko, Joomi maaɗa yonii Fewnoowo mo no fewna faade e Goonga kan, O yonii e ɗum Ballo Mo no walle e dow gaño maaɗa on.

Ɓen yedduɓe Alla wi'i: "Ko hanno jippinee e dow Nulaaɗo on ndee Alqur'aanaare laawol gootol, hara nde jippinaaka e makko ko nde senndaande? seKo wano nii Men jippinii Alqur'aanaare nden ko nde serndaande fii tabintingol ɓernde maaɗa nden -an Nulaaɗo- sabu jippagol mayre laawol ɓaawo laawol, Men jippinii nde seeɗa seeɗa fii newinngol faamugol nde e hunnjagol nde.

Sirkooɓe ɓen addantaa ma -an Nulaaɗo- misal e kon ko ɓe hottotoo ɗum si wanaa Men addante jaabawol Goongawol ngol e ɗum tabitungol, Men addane kadi huunde tawnde no ɓuri moƴƴude ɓannginngol.

Ɓen soggoyteeɓe Ñalnde Darngal ko ɓe daaseteeɓe e hoore geece maɓɓe faade ka Jahannama, ko ɓen ɗon woni bonuɓe nokkuure; sabu nokkuure maɓɓe nden ko Jahannama, ko kamɓe ɓuri woɗɗitiingol laawol gaayi Goonga kan; sabu laawol maɓɓe ngol ko laawol keefeeru e majjere.

Gomɗii Men okkii Muusaa Tawreetaare nden, Men waɗtide e makko siɗɗo makko Haaruuna Nulaaɗo fii yo o wonan mo walloowo.

Men Daalani ɓe kamɓe ɗiɗo: "Yahee ka Fir'awna e yimɓe makko ɓen, ɓen fennuɓe Aayeeje Amen ɗen". Ɓe ɗoftii Yamiroore Amen nden, yahee ka maɓɓe noddee ɓe faade e Ngootimmbaaku Alla, ɓe fenni ɓe Men halki ɓe halkugol saɗtungol.

E yimɓe Nuuhu ɓen nde ɓe fennirnoo Nulaaɓe ɓen sabu fennugol maɓɓe Nuuhu (yo o his) Men halkiri ɓe yoolagol ka maayo, Men waɗi halkeede maɓɓe nden tinndinorɗum e dow Kattanɗe Amen fii mulugol tooñuɓe ɓen, Men marani tooñuɓe ɓen Ñalnde Darngal Lepte muusuɗe.

Men halki Aadinkooɓe yimɓe Huudu ɓen, e Samuudinkooɓe yimɓe Saalihu ɓen, Men halki kadi yimɓe woyndu ndun, Men halki moftaaji ɗuuɗuɗi hakkunde ɓee ɗoo tato.

Gooto kala e ɓee halkaaɓe Men sifanino ɗum halkeede moftaaji adinooɗi ɗin e sabuuji mu'un ɗin fii yo ɓe waajito, gooto kala e maɓɓe Men halki ɗum halkugol saɗtungol sabu keeferaaku e sanndalɗaaku maɓɓe.

Gomɗii arii fennooɓe ɓen immorde e yimɓe maaɗa ɓen -ka yahugol maɓɓe Saami- faade ka saare yimɓe Luutu nden toɓinaande kaaƴe; fii leptugol nde sabu waɗugol pankare ɗen fii yo ɓe tasko. Kaa ɓe wumu e yi'ugol ndee saare hara ɓe laataaki hiɓe yi'a nde? Wanaa non, ko woni, ɓe laatike ɓe tijjanooki Immital ngal ɓe hasbetee ɓaawo mu'un.

Si ɓee fennuɓe tinndii e maaɗa -an Nulaaɗo- ɓe jalnorte ɓe wi'a e laawol jalkitugol e yeddugol: "Enee ko oo Alla Immini Nulaaɗo e amen?!"

Gomɗii hari o ɓadike firlitde en e rewugol rewteeɗi me'en ɗin, si wanaano ko muññiɗen kon e dow rewugol ɗi o martinirayno en e majji hujjaaji makko ɗin e daliilaaji makko ɗin, aray ɓe anndoya tuma ɓe yi'i Lepte ɗen ka genaale maɓɓe e Ñalnde Darngal ko hommbo ɓuri majjude laawol, e ko kamɓe, kaa ko kanko? aray ɓe anndoya kadi ko hommbo e maɓɓe ɓuri majjude.

A yi'ii -an Nulaaɗo- on waɗuɗo immorde e beleeɗe mu'un reweteeɗo o ɗoftii ɗe, e hara ko an laatotoo reenoowo e dow makko ruttaa mo faade e gomɗinal, haɗaa mo immorde e keefeeru?!

Ko woni, a sikku -an Nulaaɗo- wonndema ɓurɓe heewude e ɓen ɓe noddataa ɗum faade e Ngootimmbaaku Alla e ɗoftagol Mo hiɓe nana nanɗe jaɓugol maaɗum hiɓe hakkila Hujjaaji ɗin e Daliilaaji ɗin?! Ɓe laataaki si wonaa yeru neemoraaɗi ɗin ka nanɗe e huutorgol hakkil e faamugol, ko woni, ko kamɓe ɓuri majjude laawol diini neemoraaɗi ɗin.

Kaa a tinaali -an Nulaaɗo- faade batteeji tagu Alla ngun tuma nde O weƴƴitunoo ɗowdi ndin ka kene leydi ndin, sinndo O Muuyuno waɗugol ndi tabitu- ndi hara ndi dillataa O waɗirayno ndi non, hiMo juutina ndi O raɓɓinɗina kadi.

Refti Men tamiri ɗowdi ndin uytugol, ndi taggora seeɗa seeɗa tamannde fomɗunde emmbere ɓantagol naange ngen.

Alla ko Kanko woni On waɗanɗo on jemma on wana conci suddayɗi on, ɗi sudda kadi piiji ɗin, ko Kanko woni on waɗanɗo on ɗoyngol ngol fowtere nde fowtotoɗon e muuɗum immorde e golleeji mooɗon, ko Kanko woni On waɗanɗo on ñalorma on waqtu mo yahoton e muuɗum ka golle mon.

Ko Kanko woni On nuluɗo keni ɗin ko ɗi weltinirayɗi jippagol toɓo ngon, ngon tawngo ko immorde e Yurmeende Makko, Men jippini immorde ka kammu ndiyam toɓo ngon laaɓuɗam laɓɓinorteeɗam.

Fii yo Men wurnitir ɗam ndiyam jippinaaɗam leydi yoorundi ndi puɗi alaa e muuɗum fii fuɗinngol ndi nooneeji puɗi ɗin O saaki kecci e mayri, e fii yo Men yarnir ɗam ndiyam kon ko Men tagi neemoraaɗi e ɓanndunkeeɓe ɗuuɗuɓe.

Gomɗii Men ɓannginii, Men fensitii ka Alqur'aana Hujjaaji ɗin e Daliilaaji ɗin fii yo ɓe tasko ɗi, ɓurɓe ɗuuɗude e yimɓe ɓen ɓe salii si wanaa yeddugol Goonga kan e suuɗugol ka.

Sinndo Men Muuyuno Men Nulayno e kala saare Nulaaɗo mo no jertina ɓe o hulɓina ɓe immorde e Lepte Alla ɗen, kono Men Muuyaali ɗum, anndu Men Nulii Muhammadu (yo Alla juulu e makko hisna) Nulaaɗo faade e yimɓe ɓen fow.

Wata a ɗofto yedduɓe ɓen ko ɓe ɗaɓɓiraymaa kon immorde e moytondirgol e maɓɓe, e kon ko ɓe addata immorde pehe, haɓir ɓe e o Alqur'aan jip- pinaande e maaɗa haɓugol mawnungol sabu muññagol e dow lorra maɓɓe e ronnditagol saɗteende nden ka noddugol faade e Alla.

Alla Senayee wonanii Mo ko Kanko jillindiri ndiyam maaje ɗen ɗiɗi, O jillindir welungo ngon e majje e lamɗanwo ngon, O waɗi hakkunde majje wirngallo e heedo heedungo hingo haɗa ɗe ukkondirgol.

Ko Kanko woni On Taguɗo immorde e maniiyu gorko on e debbo on ɓanndunke, ko On taguɗo ɓanndunke fuɗɗi jogondiral ɓadondiral e jogondiral esiraangal, Joomi maaɗa laatike -an Nulaaɗo- ko O Hattanɗo hay e huunde ronkintaa Mo, no jeyaa Kattanɗe Makko Tagugol neɗɗanke on immorde e maniiyu gorko e debbo.

Keefeero on no rewa gaanin Alla sanamuuji ɗi nafataa ɓe si ɓe doftike ɗi, ɗi lorrataa ɓe si ɓe yeddii ɗi, keefeero on laatike ko o jokkuɗo Seytaane e dow ko tikkinta Alla Senayee wonanii Mo.

Men Nulaali ma -an Nulaaɗo- si wanaa ko a wewlinoowo ɓen ɗoftorɓe Alla gomɗinal e golle moƴƴe ɗen, ko a jertinoowo kadi ɓen yeddirɓe Mo keefeeru ngun e geddi ɗin.

Maaku -an Nulaaɗo-: "Mi toraaki on njoɓdi fii yottinngol Nulal ngal si wanaa on faalaaɗo e mooɗon jogitaade laawol faade e welayee Alla nafqugol haray yo o waɗu."

Wakkiolor Alla Wuuruɗo Heddotooɗo On Mo maayataa poomaa -an Nulaaɗo- e ndenndaangal fiyakuuji maaɗa ɗin, Seninaa Mo manntaa Mo Senayee wonanii Mo, O yonii e ɗum Humpitiiɗo bakkatuuji jeyaaɓe Makko ɓen hay huunde e ɗum suuɗanaaki Mo, aray o yoɓa ɓe e dow ɗum.

On Tagɗo kammuuli ɗin O Tagi kadi leydi ndin e ko e woni kon hakkunde majji e nder balɗe joogo'o, refti O Toowi O ɓamtii ka dow Arsi Toowal kawrungol e Manngu Makko, ko Kanko woni joomo njurum, lanndo -an Nulaaɗo- fii Makko ko O Humpitiiɗo, ko Kanko woni Annduɗo kala huunde hay e huunde suuɗanaaki Mo.

Si wi'anaama heeferɓe ɓen: "Sujjanee Hinnorante On" Ɓe wi'a: "Men sujjantaa Hinnorante On, ko hommbo woni Hinnorante? Men anndaa Mo men qirritaaki Mo, kaa men sujjanay On mo yamirɗaa men sujjanngol hara menen men anndaa Mo?!" Ko o yamiri ɓe kon sujjanngol Mo ɓeydi ɓe woɗɗitagol gaayi gomɗinal Alla ngal.

Mawnii On waɗuɗo ka kammu jipporɗe koode ɗen e koode yahooje ɗen kadi, O waɗi ka kammu naange hinge jalbira ndaygu, o waɗi ton lewlewal hingal jalbinira leydi ndin sabu ko ngal yiltitata kon ndaygu naange ngen.

Alla ko Kanko waɗi jemma on e ñalorma on lontonirayɗi ɗiɗi goɗɗo majji no lontoo oya, fii on faalaaɗo taskaade Aayeeje Alla ɗen o feewa, maaɗum o faalaayettugol Alla fii neemaaji Makko ɗin.

E jeyaaɓe Hinnoranti gomɗinɓe ɓen, ɓen yaaray- ɓe ka hoore leydi needi hara ko ɓe yankiniiɓe, si majjuɓe ɓen yewtii ɓe, wanaa yeru mu'un ɓe jaaborta ɓe, ko woni, ɓe wi'ay ɓe ko moƴƴi ɓe majjataa e nder ɗum e dow maɓɓe.

E ɓen waalayɓe sujjirannde Joomi muuɗum geece mu'un ɗen, e darotooɓe e hoore koyɗe muuɗum juulana Alla.

E ɓen wi'ooɓe ka noddugol maɓɓe Joomi maɓɓe: "Joomi amen, woɗɗintinan men Lepte Jahannama ɗen, pellet, Lepte Jahannama ɗen ɗe laatike ko ɗe duumiiɗe tabiti fii on mayduɗo e keefeeru".

Pellet, ɗen bonii nokkuure ñiiɓirde wonannde on ñiiɓuɗo e mayre, bonii kadi darorde wonannde on dariiɗo e mayre.

E ɓen tawɓe si ɓe okkude jawle maɓɓe ɗen okkugol ngol ɗe ngol hewtintaaɓe e funsitugol, ɓe ɓittintaa kadi e okkugol ɗe ngol on mo nafkugol ɗum fawii ɓe immorde e wonkiiji maɓɓe maaɗum tanaa majji, nafkugol maɓɓe ngol laatoo hakkunde funsitugol ngol e ɓittinngol ngol feccaaɗum ka hakkunde.

E ɓen ɓe rewataa wonndude e Alla O Senike reweteeɗo goo, ɓe warataa wonkii ki Alla harmini warugol si wanaa kon ko Alla duŋini ɗum immorde e wartagol waruɗo maaɗum yartodinɗo maaɗum jeenoowo saŋiiɗo, hara ɓe jinataa, kala waɗuɗo ɗii bakkatuuji mawɗi ɗoo, o hawroyay Ñalnde Darngal e Lepte ko o waɗɗitii kon immorde e bakkaatu.

Lepte ɗen sowanoyte mo Ñalnde Darngal, o luttinoyee e nder Lepte ɗen ko o hoyɗo jaasuɗo.

Kono mo tuubii ka Alla o gomɗinii, o gollii golle moƴƴe tinndinɗi e goongugol tuubuubuyee makko on, haray ɓen ɗon Alla waɗtitanay ɓe ko ɓe golli kon immorde e boneeji ɗin ɗi wonta moƴƴi. Alla wonii ko O Surroowo bakkatuuji kala tuubuɗo immorde e jeyaaɓe Makko ɓen, ko O Yurmeteeɗo ɓe.

Mo tuubii ka Alla, o tinndiniri goongugol tuubuubu- yee Makko on gollugol dewe ɗen e ɗalugol geddi ɗin, pellet, tuubuubuyee makko on ko tuubuubuye jaɓeteeɗo.

E ɓen ɓe tawtataa meere nden, wano nokkuuli geddi ɗin e puyɗi harminaaɗi, si hiɓe feƴƴirde ka haalaaji puyɗi e golle puyɗe jokkaa ɓe feƴƴa feƴƴugol lummboowo, hara ko ɓe teddinirɓe wonkiiji maɓɓe ɗin laɓɓinngol ɗi gaayi jillondirgol e ɗum.

E ɓen tawɓe si ɓe waajoraama Aayeeje Alla naneteeɗe e yi'eteeɗe ɗen ɓe faaɗintaa noppi maɓɓe ɗin gaayi Aayeeje naneteeɗe ɗen, ɓe wumataa gaayi Aayeeje yi'eteeɗe ɗen.

E ɓen wi'ooɓe ka toragol maɓɓe Joomi maɓɓe: "Joomi amen, okku men ka sonnaaɓe amen, e ka ɓiɗɓe amen on mo no laatoo ɓuuɓendan gite amen sabu kulol makko Alla e feewugol makko e dow Goonga kan, waɗaa men wonannde hulooɓe Alla ɓen yeesooɓe e Goonga kan men ñentinee".

Ɓenɗon siforaaɓe ɗin sifaaji ɓe yoɓoyte kuɓeeje toowuɗe ɗen ka Firdawsi ɓurɗo toowude ka Aljanna sabu muñal maɓɓe ngal e dow ɗoftagol Alla, Malaa'ikaaɓe ɓen jaɓɓoroyay ɓe ton hiwraa- ngo e salminaango, ɓe hisa nder ton immorde ayyibeeji ɗin.

Ko ɓe ñiiɓooɓe nder ton poomaa, moƴƴii nokku ñiiɓirɗo mo ɓe ñiiɓoyta e muuɗum, e nokku darorde nde ɓe daroytoo e muuɗum.

An Nulaaɗo maakan yedduɓe deppitiiɓe ɓen e dow geddi muuɗum: "Joomi am haajiraaka e mooɗon fii nafa artanayka Mo sabu ɗoftaare mooɗon nden, sinndo wanaano no tawde woodani Mo jeyaaɓe ɓe no nodda Mo noddandu dewal e toraare O haajetanooke e mooɗon". Gomɗii on fennii Nulaaɗo on e nder kon ko o addani on ɗum immorde ka Joomi mooɗon, aray nde njoɓdi fennugol ngol wona duumiiɗum e mooɗon.

(Taa, Siin, Miim) hari yewtanooma fii yeru majje ka fuɗɗoode Simoore Albaqara.

Ɗen ko Aayeeje Alqur'aanaare ɓannginde seerndunde hakkunde Goonga kan e meere nden.

Belajo'o -an Nulaaɗo- sabu rerɗugol maaɗa fii fewnugol ɓe a waray wonkii maaɗa kin sabu suno e rerɗugol fii fewnugol ɓe.

Si Men Muuyii jippinngol Maande e maɓɓe immorde ka kammu Men jippinay nde e maɓɓe, daaɗe maɓɓe ɗen ñalla yankinanaade nde hara ko ɗe hoyuɗe, kono Men Muuyaali ɗum ka ndarndagol ɓe: Mbelaɓe gomɗinay ko wirnii kon?

Arataa e ɓee sirkooɓe immorde e waaju fuɗɗaa- ngu jippineede immorde ka Hinnorante On e Hujjaaji maggu tinndinɗi ɗin fii Ngootimmbaaku Makko e Goongugol Annabaajo Makko on si wanaa ɓe ɗuuroto gaayi jentagol mo e goongin- gol mo.

Gomɗii ɓe fennii ko Nulaaɓe maɓɓe ɓen addani ɓe kon, aroyay e maɓɓe goonginal kumpital ko ɓe wonunoo jalkitude kon, Lepte ɗen jippoo e maɓɓe.

Ɓee luttay e deppitagol e dow keefeeru maɓɓe hara ɓe ndaaraali faade e leydi ndin no foti hewde ko Men fuɗini e mayri immorde e kala noone e nooneeji puɗi fotuɗi ndaarugol ɗuuɗuɗi nafoore?!

Pellet, wonii e fuɗinngol ka leydi puɗi luutondirɗi nooneeji daliili ɓannguɗo fii Hattannde On fuɗinɗo ɗi e dow wurnitugol mayɓe ɓen, ɓurɓe ɓen e maɓɓe wonaali gomɗinɓe.

Pellet, Joomi maaɗa -an Nulaaɗo- ko Kanko woni Fooluɗo goɗɗo foolataa Mo, ko O Yurmeteeɗo jeyaaɓe makko ɓen.

Jaŋto -an Nulaaɗo- tuma nde Joomi maaɗa noddunoo Muusaa ko O Yamirɗo mo yo o aru ka yimɓe tooñirɓe ɓen yeddugol maɓɓe Alla e maccinɗinngol yimɓe Muusaa ɓen.

Ɓen ko yimɓe Fir'awna ɓen, yo o yamir ɓe e hoore no newori kulol Alla e ɗoftaade Yamiraaɗi Makko ɗin e woɗɗitaade haɗaaɗi Makko ɗin.

Muusaa (yo o his) maaki: "Min dey, miɗo huli wata ɓe fennan e nder ko mi yottinta e maɓɓe kon Nulal maaɗa ngal"

Ɓernde am nden ɓittoo sabu ko ɓe fennatan mi kon, ɗemngal am ngal soko fii wowlugol, awa Nulu Jibriila (yo o his) faade e kotoo am Haaruuna fii yo o wonu walloowo lam.

No wonani ɓe e dow am bakkaatu sabu warugol qibtiyankoojo, miɗo huli wata ɓe warto lam.

Alla Daalani Muusaa (yo o his): "wanaa non, ɓe warataa ma, yaadu e kotoo maaɗa Haaruuna wonndude e Aayeeje Amen tinndinɗe ɗen e goongugol mooɗon. Pellet, Menen Meɗen wonndiri e mooɗo ballal ngal e semmbinngol ngol ko Men jentiiɓe ko wowloton kon e ko wowlante ɗon kon, hay e huunde e ɗum fuutotaako Men.

Aree ka Fir'awna, wi'anon mo: "Menen ɗoo ɗiɗo ko men Nulaaɓe e maaɗa immorde ka Jooma tageefooji ɗin fow."

Fii yo a accitu ɓiɗɓe Israa'iila ɓen ɓen, wonndude e amen.

Fir'awna wi'ani Muusaa (yo o his): "Enee, men ne'aano ma ka amen ɗoo hari ko o penuujo, ñiiɓuɗaa hakkunde duuɓi e ngurndam maaɗam, ko hommbo yamirmaa nodditagol Annabaaku?"

Golluɗaa fiyaake mawɗe tuma warunoɗaa qibtiyankoojo on fii jinngngol gorko jeyaaɗo ka yimɓe maaɗa, an ko a yeyaaɗo e yedduɓe neemaaji am ɗin e dow maaɗa.

Muusaa (yo o his) maakani Fir'awna: "Mi warii on gorko hari min ko e majjuɓe ɓen mi jeyaa ado Wahayu arude e am."

Mi doguno on ɓaawo warugol mo, mi yahi ka saare Madyana, nde mi hulunoo wata on warto lam fii makko, Joomi am okkin mi ganndal, O waɗin mi jeyaaɗo e Nulaaɓe Makko ɓen ɓe O Nulata ɗum faade e yimɓe ɓen.

Ko ne'uɗaa mi kon a maccinɗinaali lam wonndude e maccinɗinngol maaɗa ɓiɗɓe Israa'iila ɓen ɗum ko neema mo wajitirtaa mi ɗum e goonga, kono ɗum haɗataa lam e noddugol ma [ka Diina].

Fir'awna wi'ani Muusaa (yo o his): "Ko hommbo jeyi tageefooji ɗin, on mo aaƴotoɗaa wonndema an ko a Nulaaɗo makko?!"

Muusaa jaabii Fir'awna o maaki: "Jooma tageefooji ɗin ko Kanko woni Jooma kammuuli ɗin e Jooma leydi ndin, e Jooma ko woni kon hakkunde majji. Si tawii on laatike ko on yananaaɓe wonnde pellet, ko Kanko woni Jooma majji haray rewee Mo Kanko tun.

Fir'awna wi'ani ɓen wonuɓe fee makko immorde e koohooɓe ɓen ka yimɓe makko: "Enee, on jentotaako jaabawol Muusaa ngol, e ko woni kon e makko immorde e aaƴagol fenaande?!"

Muusaa maakani ɓe (yo o his): " Ko Alla woni Joomi mooɗon e Jooma baabiraaɓe mooɗon adinooɓe ɓen."

Fir'awna wi'i: "Pellet, on aaƴiiɗo wonnde ko o Nulaaɗo faade e mooɗon ko o feetuɗo, o anndaa ko honno o jaaborta, himo wowla kadi ko hakkile jaɓataa."

Muusaa maaki: "On Alla Mo mi noddata on faade e Muuɗum, ko Kanko woni Jooma funnaange e hirnaange, e Jooma ko woni kon hakkunde majji si tawii no laatanii on hakkillaaji ɗi hakkilirton ɗum".

Fir'awna wi'ani Muusaa ɓaawo ronkugol makko hujjondirgol e makko: "Mi woondii si a rewii reweteeɗo tanaa am, mami waɗi jeyaaɗo e sokaaɓe ɓen."

Muusaa (yo o his) maakani Fir'awna: "A waɗay lam jeyaaɗo sokaaɓe ɓen, hay si mi addanii ma ko ɓannginta goongugol am e ko mi addan maa kon immorde ka Alla?"

O wi'i: "Addu ko jaŋtiɗaa kon wonnde no tinndini e goongugol maaɗa si a laatike ko e goonguɓe ɓen jeyaɗaa, e nder kon ko nodditiɗaa ɗum".

Muusaa werlii tuggordu makko ndun ka leydi, e juhayee, ndu waylii biidaane ɓannguɗo wonannde yi'ooɓe ɓen.

O naadi junngo makko ngon ka jiiba makko tawi ngo wonaa ranewo, o yaltini ngo ko ngo ranewo, ndaneeri jalbeendi wanaa ndaneeri culɗugol, ndaarooɓe ɓen no seedora ngo non.

Fir'awna wi'ani koohooɓe yimɓe makko, ɓen wonu ɓe baŋŋe makko: "Pellet, oo gorko ko mbileejo annduɗo mbilewu".

Himo faandori mbilewu makko ngun yaltinngol on ka leydi mooɗon. Ko honɗum woni feere mooɗon nde haanuɗen jogaade fii makko?

Ɓe wi'ani mo: "Nennan mo nennaa kotoo makko kadi, wata yaccor leptugol ɓe, nulu ka ca'e Misra muuɓayɓe mbileeɓe ɓen".

Yoɓe addane kala mbileejo annduɗo mbilaaku ngun.

Fir'awna mooɓi mbileeɓe makko ɓen fii jippirgol e Muusaa e nder nokkuure anndaa nde e jamaanu hettaaɗo.

Yimɓe ɓen wi'anaa: "Taw si onon ko on mooɓotooɓe fii yo on yi'u fooluɗo on, e hara ko Muusaa kaa ko mbileeɓe ɓen?"

Jortagol wonnde men jokkay mbileeɓe ɓen ka diina maɓɓe, si tawii ko kamɓe fooli Muusaa.

Tuma nde mbileeɓe ɓen arunoo ka Fir'awna fii yo ɓe foolotir e Muusaa ɓe wi'ani mo: "Yalli no woodani men njoɓdi jawdi maaɗum teddungal si tawii ko menen fooli Muusaa?"

Fir'awna wi'ani ɓe: "Eyyo, njoɓdi no woodani on, haray si on foolii mo, on wonay ɓaɗtiniraaɓe ka am jonnugol on darjaaji ɓamtiiɗi".

Muusaa maakani ɓe tawi ko o hooliiɗo Ballal Alla ngal himo ɓanngina wonndema ko o jogii kon wanaa mbilew: "Liɓee ko liɓoton kon immorde e ɓokkoy mooɗon e cawoy mooɗon".

Ɓe liɓi ɓokkoy maɓɓe e cawoy maɓɓe koy, ɓe wi'i ka liɓugol koy: "Sabu manngu Fir'awna ko menen woni foolooɓe ɓen, ko Muusaa woni foolaaɗo on".

Muusaa liɓi tuggordu makko ndun, ndu waylii mboddi, tawi kayru hindu moɗa ko ɓe hulɓiniray-noo kon yimɓe ɓen immorde e mbilewu ngun.

Tuma nde mbileeɓe ɓen yi'unoo tuggordu Muusaa ndun hindu moɗa ko ɓe liɓi kon immorde e mbilewu maɓɓe ɓe suuyi ɓe sujji.

Ɓe wi'i: "Men gomɗinii Jooma tageefooji ndin fow".

Jooma Muusaa e Haaruuna (yo ɓe his).

Fir'awna añiri mbileeɓe ɓen gomɗinal maɓɓe ngal, o wi'i: "Enee, on gomɗinay mo ko adii mi duŋanaa- de on ɗum?! Pellet, ko Muusaa woni mawɗo mooɗon anndinɗo on on mbilewu ngun. Hari on fow on haldiino fii yaltinngol yimɓe [saare] Misra nden e nder mayre, kono aray ka anndon ko mi fawata on kon immorde e lepte, mami taƴu sanne koyngal mo kala e junngo makko ngun mi luutindirira hakkunde majje taƴugol koyngal ñaamal ngal wonndude e junngo nano ngon maaɗum yunnitugol, mami fetu on sanne on fow mooɗon e julle tamaro, mi accataa hay e gooto e mooɗon".

Mbileeɓe ɓen wi'ani Fir'awna: "Tanaa alaa e kon ko kammbirantaa men taƴugol e fetugol ka aduna, lepte maaɗen iway, menen ko faade ka Joomi amen men ruttotoo, aray O naadoya men ka Yurmeende Makko Duumotoonde.

Menen meɗen jortii nde Alla montanta men goopi amen feƴƴuɗi ɗi men waɗɗitii ɗum; sabu men wonii adiiɓe gomɗinnde Muusaa goongina mo.

Men Wahayini e Muusaa Yamirgol mo yo o roƴidu e ɓiɗɓe Israa'iila ɓen jemma. Pellet, Fir'awna e wonnduɓe e makko ɓen ɓe jokkitay ɓe fii yo ɓe artir ɓe.

Fir'awna nuli yoga e konunkeeɓe makko ɓen ka ca'e mooɓooɓe hiɓe mooɓa konu ngun fii yo ɓe ruttu ɓiɗɓe Israa'iila ɓen nde o anndunoo yaltugol maɓɓe Misra.

Fir'awna wi'i ka famɗinngol fiyaake ɓiɗɓe Israa'iila ɓen: "Pellet, ɓee ko ɓe fedde famɗunde".

Pellet, kamɓe hiɓe waɗude ko men tikkiranta ɓe.

Enen non ko en hebilaniiɓe ɓe, ko en finuɓe.

Men yaltini Fir'awna e yimɓe makko ɓen ka leydi Misra joomiraari gese alɗuɗe, e canɗi ilooji ndiyam.

E joomiraare ngaluuji jawdi, e koɗanɗe moƴƴe.

Ko wano Men yaltiniri nii Fir'awna e yimɓe makko ɓen e ɗii neemaaji, Men waɗani noone ɗii neemaaji ɓaawo maɓɓe ɓiɗɓe Israa'iila ɓen ka leydi Saami.

Fir'awna e yimɓe mu'un ɓen yahi e batte [teppe] ɓiɗɓe Israa'iila ɓen ka waqtu puɗal naange.

Tuma nde Fir'awna e yimɓe mu'un ɓen fewtundirnoo e Muusaa e yimɓe mu'un, nokku ka wonnoo fedde kala no yi'ude ndeya, yimɓe Muusaa ɓen wi'i: "Pellet, Fir'awna e yimɓe mu'un ɓen ɓe hewtitoto en, en alaa dartantooɗo en ɓe".

Muusaa maakani yimɓe makko ɓen: "Fiyaake ɗen wanaa no miijorton non. Pellet, Joomi am no wonndiri e am semmbinngol e wallugol, O fewnay lam O tinndina lam faade e laawol daɗugol".

Men Wahayini e Muusaa ko Men yamiray ɓe mo yo o piyir maayo ngon tuggordu makko ndun, o piyiri ngo ndu, maayo ngon seekii ngo wonti boli sappoo e ɗiɗi yeru limoore leƴƴi ɓiɗɓe Israa'iila ɓen, kala huntere e ceeki maayo ngon foti e fello mawngo ka tiiɗugol e ka tabitugol haa nokku ka ndiyam ilataa e majje.

Men ɓanni Firawna e yimɓe makko ɓen haa ɓe naati ka maayo ko ɓe sikkuɓe wonnde laawol ngol ko lummbu ngol.

Men danndi Muusaa e ɓen wonnduɓe e makko immorde e ɓiɗɓe Israa'iila ɓen, hay gooto e maɓɓe halkanooka.

Refti Men halkiri Fir'awna e yimɓe makko ɓen yooleede ka maayo.

Pellet, no e seekanagol maayo ngon Muusaa e daɗugol makko e halkeede Fir'awana e yimɓe makko ɓen ɗum ko Aaya tinndinɗo e dow goongugol Muusaa. Ɓurɓe heewude e ɓen wonndunooɓe e Fir'awna ɓe wonaano gomɗinɓe.

Anndu Joomi maaɗa -an Nulaaɗo-ko Kanko woni tedduɗo Yoɓtotooɗo ayɓe Makko ɓen, Yurmeteeɗo on tuubuɗo e maɓɓe.

Janngu e taweede maɓɓe -an Nulaaɗo- fillayee fii Ibraahiima.

Tuma nde o wi'annoo baaba makko Aajara e yimɓe mu'un ɓen: "Ko honɗum wonuɗon rewude gaanin Alla?"

Yimɓe makko ɓen wi'ani mo: "Ko sanamuuji men rewata, men ñalla ñiiɓude e rewugol ɗi, ko men jokkuɓe ɗi".

Ibraahiima maakani ɓe: "Yalli sanamuuji ɗin no nana noddaandu mo'on ndun tuma noddoton ɗi?"

Kaa hiɗi nafa on si on ɗoftike ɗi, maaɗum ɗi lorra on si on yeddii ɗi?

Ɓe wi'i: "Ɗi nanantaa men dey si men noddii ɗi, ɗi nafataa men kadi si men ɗoftike ɗi, ɗi lorrataa men kadi si men yeddiiɗi. Ko woni, tigi-tigi on, menen men tawiino baabiraaɓe amen ɓen hiɓe gollira nii, meɗen ñentinnde ɓe".

Ibraahiima maaki: "Enee, on taskike on yi'ii ko wonuɗon e rewude gaanin Alla immorde e sanamuuji ɗin".

Kon ko baabiraaɓe mooɗon aranɓe ɓen laatinoo no rewa.

Pellet, kamɓe ɓe fow maɓɓe ko ɓe ayɓe am; sabu kamɓe ko ɓe meere si wanaa Alla Jooma tageefooji ɗin fow.

On Taguɗo lam ko Kanko fewnata lam faade e moƴƴere aduna e Laakara.

On ko Kanko tun ñamminta lam si mi weelaama, O yarna lam si mi ɗonɗaama.

Si mi nawnii ko Kanko tun woni sellinayɗo lam immorde e nawnaare nden, mi alaa sellinoowo ngoo tanaa makko.

E On tawɗo ko Kanko tun warata lam si lajal am ngal timmii, O wurnita lam kadi ɓaawo mayde am nden.

Ko Kanko tun mi jortii yawtanay lam goopi am ɗin Ñalnde njoɓdi ndin.

Ibraahiima noddi Joomi makko o maaki: Joomam okkam faamugol Diina kan, wattidaa mi e moƴƴuɓe ɓen immorde e Annabaaɓe adiiɓe lam ɓen, ɗum woni naadaa mi ka Aljanna wonndude e maɓɓe".

Waɗanaa mi jaŋta labaaɗo e mantoore moƴƴere e ɗen gire aroyay ɗe ɓaawo am.

Waɗaa lam jeyaaɗo e ɓen ronooɓe galleeji Aljanna ɗin ɗi neemintoo e nder muuɗum jeyaaɓe Maaɗa gomɗinɓe ɓen, hoɗinaa lam e nder majji.

Yawtanaa baaba am; kanko o laatinoke jeyaaɗo e majjuɓe ɓen gaay Goonga kan sabu sirku ngun, Ibraahiima du'anii ben makko ko adii ɓanngannde mo wonndema kanko ko o jeyaaɗo e yimɓe Jahiimi ɓen. Tuma nde ɗum ɓanngannoo mo, o danndii mo o du'anaaki mo [hannde kadi].

Wata A wirtiroyam Lepte ɗen Ñalnde yimɓe ɓen immintinoytee fii hasboore nden.

Ñalnde nde nafataa e muuɗum jawdi ndi neɗɗo on faggitii ɗum ka aduna makko, wanaa kadi ɓiɗɓe ɓe o laatinoo himo wallitora ɗum.

Si wanaa on arduɗo ka Alla e ɓernde hisunde; hara sirku e naafiqaaku alaa e mayre, yiingo e hawtaare alaa e mayre, haray pellet, kanko o nafturay jawdi makko ndi o nafkunoo ndin ka Laawol Alla, e ɓiɗɓe makko wonuɓe du'anaade mo ɓen kadi.

Aljanna on ɓannanee hulirooɓe Joomi mu'un ɓen ɗoftagol Yamiraaɗi Makko ɗin, e woɗɗitagol haɗaaɗi Makko ɗin.

Ka Mofturu Yiite ngen feññinanee majjuɓe ɓen, ɓen majjuɓe gaay Diina Goongaha kan.

Ɓe wi'anee ka maƴinngol ɓe: Honto ko wonunoɗon rewude kon immorde e sanamuuji ɗin?

On reway ɗi gaanin Alla? Taw si ɗi walliray on haɗanngol on Lepte Alla ɗen, kaa kannji ɗi wallay ko'e-majji?

Woɓɓe e maɓɓe werlee e hoore woɓɓe ka Jahiima e ɓen majjinɓe ɓe.

E wallooɓe Ibliisa ɓen immorde e Seytanuuji ɗin fow, hay gootil e majji ittintinaaka.

Ɓen sirkooɓe wonunooɓe rewde tanaa Alla, ɓe jogitii ɓe kafidaaɓe gaanin Alla, tawi kanɓe hiɓe wennjondirde e ɓen rewnooɓe ɓe gaanin Alla, ɓe wi'i:

Men woondirii Alla gomɗii hari men laatike e nder majjere ɓanngunde gaayi Goonga kan.

Tuma nde men fotindirnoo on e Joom tageefooji ɗin fow majji, men rewiri on wano men rewirta Mo non.

Majjinaali men gaayi Laawol Goongawol ngol si wanaa ɓen bonɓe nodduɓe faade e rewugol ɓe gaanin Alla.

Laatanaaki men tefooɓe ɓe no tefanoya men ka Alla fii yo O danndu men immorde e lepte Makko ɗen.

Laatanaaki men giɗo laaɓuɗo giggol mo no hiwa men o tefanoya men.

Sinndo no woodannoo men artireede ka ngurndam aduna, men wona jeyaaɓe e gomɗinɓe Alla ɓen.

Pellet, wonii e koo ko jaŋtaa ɗoo immorde e fillayee fii Ibraahiima (yo o his), e waɗtinirde fennuɓe ɓen tasakuyee, wonannde taskotooɓe ɓen, ɓurɓe heewude e maɓɓe wonaali gomɗinɓe.

Anndu Joomi maaɗa -an Nulaaɗo- ko Kanko woni tedduɗo Yoɓtotooɗo ayɓe Makko ɓen, Yurmeteeɗo on tuubuɗo e maɓɓe.

Yimɓe Nuuhu ɓen fenni Nulaaɓe ɓen, tuma nde ɓe fennunoo Nuuhu (yo o his).

Tuma nde Saalihu musiɗɗo maɓɓe on ka dammbe (asko) wi'annoo ɓe: Enee, on hulataa Alla, acciron rewugol tanaa Makko sabu kulol Makko?!

Min dey, ko mi Nulaaɗo mooɗon, Alla Nulii lam e mooɗon, ko mi hoolaaɗo mi ɓeydataa e dow ko Alla Wahayini kon e am, mi uytataa kadi.

Huliree Alla ɗoftagol Yamiraaɗi Makko ɗin e woɗɗitagol haɗaani Makko ɗin, ɗoftee lam e ko mi yamirta on kon, e ko mi haɗata on kon e muuɗum.

Mi ɗaɓɓiraali on njoɓdi fii ko mi yottinanta Joomi am kon e mooɗon, njoɓdi am ndin fawaaki si wanaa Alla Jooma tageefooji ɗin wanaa e tanaa Makko.

Huliree Alla ɗoftagol Yamiraaɗi Makko ɗin e woɗɗitagol haɗaani Makko ɗin, ɗoftee lam e ko mi yamirta on kon, e ko mi haɗata on kon e muuɗum.

Yimɓe makko ɓen wi'ani mo: Enee, hara men gomɗinte -an Nuuhu- men jokka ko adduɗaa kon men gollira, hara le pellet, jokkuɓe ma ɓen ko e yimɓe jaasuɓe ɓen ɓe jeyaako e hoohooɓe e teddinaaɓe ɓen alaa e maɓɓe?!

Nuuhu maakani ɓe (yo o his): E ko honɗum woni ganndal am e ko ɓee gomɗinɓe wonunoo e gollude? Mi laataaki fawtaniiɗo ɓe sakko mi mofta golle maɓɓe ɗen.

Hasbugol ɓe fawaaki si wanaa Alla, On Annduɗo gunndooji maɓɓe ɗin e feeñuɗi maɓɓe ɗin wanaa ka am, sinndo hiɗon so'aynoo, on wowlataano ko wowluɗon kon.

Mi wonaali raɗotooɗo gomɗinɓe ɓen ka mbatu am, ka jaabagol ko lanndiɗon kon fii yo on gomɗin.

Min mi wonaali si wanaa jertinoowo ɓannguɗo jertinngol, miɗo rentinira on e Lepte Alla ɗen.

Yimɓe makko ɓen wi'i mo: Men woondii si a tertaaki kon ko noddataa men e muuɗum, ma a wonu sanne jeyaaɗo e yenneteeɓe ɓen e warirteeɓe ɓen fiɗeede kaaƴe.

Nuuhu noddi Joomi makko o maaki: Jooma, pellet, yimɓe am ɓen ɓe fennii lam, ɓe goonginaali lam e ko mi addi kon immorde ka maaɗa.

Ñaawu hakkunde am e maɓɓe ñaawoore halka- ynde ɓe sabu nanngitagol maɓɓe e dow meere nden, danndaa mi e ɓen gomɗinɓe wonnduɓe e am immorde e kon ko halkirtaa ɗum yedduɓe ɓen ka yimɓe am.

Men jaabinani mo du'aa makko on, Men danndi mo e ɓen gomɗinɓe wonnduɓe e makko ka nder laana hebbinaaka yimɓe e muumi.

Refti Men yooli ɓaawo maɓɓe heddiiɓe ɓen, ɓen le, ko yimɓe Nuuhu ɓen.

Pellet, wonii e ɗum ko jaŋtaa immorde e fillayee Nuuhu e yimɓɓe makko ɓen, e daɗugol Nuuhu e ɓen gomɗinɓe wonnduɓe e makko, e halkeede yedduɓe ɓen ka yimɓe makko ɗum ko tasakuyee wonannde taskotooɓe ɓen, ɓurɓe heewude ɓen e maɓɓe wonaali gomɗinɓe.

Anndu Joomi maaɗa -an Nulaaɗo- ko Kanko woni tedduɗo Yoɓtotooɗo ayɓe Makko ɓen,Yurmeteeɗo on tuubuɗo e maɓɓe.

Aadinkooɓe ɓen fenniino Nulaaɓe ɓen tuma nde ɓe fennunoo Nulaaɗo maɓɓe on Huudu (yo o his).

Tuma nde Saalihu musiɗɗo maɓɓe on ka dammbe (asko) wi'annoo ɓe: Enee, on hulataa Alla, acciron rewugol tanaa Makko sabu kulol Makko?!

Min dey, ko mi Nulaaɗo mooɗon, Alla Nulii lam e mooɗon, ko mi hoolaaɗo mi ɓeydataa e dow ko Alla Yamira lam kon yottinngol ɗum, mi uytataa ɗum kadi.

Huliree Alla ɗoftagol Yamiraaɗi Makko ɗin e woɗɗitagol haɗaani Makko ɗin, ɗoftee lam e ko mi yamiri on kon, e ko mi haɗi on kon e muuɗum.

Mi ɗaɓɓiraali on njoɓdi fii ko mi yottinanta Joomi am kon e mooɗon, njoɓdi am ndin fawaaki si wanaa Alla Jooma tageefooji ɗin wanaa e tanaa Makko.

Enee, on mahay e kala nokkuure hentiinde toowunde maadi fii maande e fijindaaru ndu alaa nafa ruttatooɗo on ka aduna mooɗon maaɗum ka Laakara mooɗon?!

Jogitoɗon caŋeeji e kuɓeeje wasi on luttinte e nder nduu adunaaru, hara on eggataa e mayru?!

Si on jaggitirii warugol maaɗum piyugol, jaggiton ko on ndunndarankooɓe ko aldaa e yurmeende.

Huliree Alla ɗoftagol Yamiraaɗi Makko ɗin e woɗɗitagol haɗaani Makko ɗin, ɗoftee lam e ko mi yamirta on kon, e ko mi haɗata on kon e muuɗum.

Hulee tikkere Alla Okkuɗo on immorde e neemaaji makko ɗi annduɗon.

O okki on neemoraaɗi, O okki on ɓiɗɓe worɓe.

O okki on gese e canɗi ilooji.

Min, miɗo hulani on -onon yimɓe am- Lepte Ñalaande mawnde nden ko Ñalnde Darngal.

Yimɓe makko ɓen wi'ani mo: Ko waajotoɗaa men kon e si a waajaaki no fotana amen ter, men gomɗintaa ma, men ruttataako gaayi ko men woni kon e muuɗum.

ɗum wonaali si wanaa diina adinooɓe ɓen e naamuuji maɓɓe e jikkuuji maɓɓe.

Men wonaali leptoyteeɓe.

Ɓe jokki yiddugol Annabaajo maɓɓe on Huudu (yo o his), Men halkiri ɓe henndu rimardu ndu sabu fennugol maɓɓe ngol. pellet, wonii e ngol halkugol hangol tasakuyee wonannde taskotooɓe ɓen, ɓurɓe heewude ɓen e maɓɓe wonaali gomɗinɓe.

Anndu Joomi maaɗa -an Nulaaɗo- ko Kanko woni tedduɗo Yoɓtotooɗo ayɓe Makko ɓen Yurmeteeɗo on tuubuɗo immorde e jeyaaɓe Makko ɓen.

Samuudinkooɓe ɓen finniino Nulaaɓe ɓen sabu fennugol maɓɓe Annabaajo maɓɓe on Saalihu (yo o his).

Tuma nde Saalihu musiɗɗo maɓɓe on ka dammbe (asko) wi'annoo ɓe: Enee, on hulataa Alla, acciron rewugol tanaa Makko sabu kulol Makko?!

Min, ko mi Nulaaɗo mooɗon, Alla Nulii lam e mooɗon, ko mi hoolaaɗo e nder ko mi yottinanta Mo kon, mi ɓeydataa e dow mu'un mi uytataa ɗum kadi.

Huliree Alla ɗoftagol Yamiraaɗi Makko ɗin e woɗɗitagol haɗaaɗi Makko ɗin, ɗoftee lam e ko mi yamiri on kon, e ko mi haɗi on kon e muuɗum.

Mi ɗaɓɓiraali on njoɓdi fii ko mi yottinanta Joomi am kon e mooɗon, njoɓdi am ndin fawaaki si wanaa Alla Jooma tageefooji ɗin wanaa e tanaa Makko.

Enee, on tamƴini nde acceteɗon e nder koo ko wonuɗon e muuɗum immorde e moƴƴereeji e neemaaji ko on hooliiɓe hara on hulaa?!

E nder gese e canɗi ilooji.

E awruuji e tamarooje dimɗe majje ɗen ko newiiɗe ɓennduɗe.

Hiɗon taƴa pelle ɗen fii yo on waɗu cuuɗi hoɗon e majji hara onon ko ŋelirɓe lesugol ɗi.

Huliree Alla ɗoftagol Yamiraaɗi Makko ɗin e woɗɗitagol haɗaani Makko ɗin, ɗoftee lam e ko mi yamiri on kon, e ko mi haɗi on kon e muuɗum.

Wata on ɗowor yamaruyee fantinirooɓe ɓen e dow wonkiiji mu'un waɗɗitagol geddi ɗin.

Ɓen bonnirooɓe ka leydi sabu ko ɓe saakata kon immorde e geddi ɗin, hara ɓe moƴƴinirtaa pittaali maɓɓe jogitagol ɗotaare Alla nden.

Yimɓe makko ɓen wi'ani mo: Anndu, an ko a jeyaaɗo e ɓen mbilɗaaɓe laawi ɗuuɗuɗi, haa mbilewu ngun fooli hakkillaaji maɓɓe ɗin, ngu naɓi ɗi.

A wonaali si wanaa ɓanndunke wano amen alaa ko senndumaa e amen haa tawa a wonay Nulaaɗo, awa addii maande tinndinaynde wonndema an ko a Nulaaɗo, si tawii ko a goonguɗo e ko nodditiɗaa kon wonndema ko a Nulaaɗo.

Saalihu maakani ɓe -nde tawnoo Alla okkii mo maande nden, ɗum le, ko ngelooba mba Alla yalti e nder fetere nden-: mbaaɗoo ko ngelooba himba yi'ee himba meemee, no woodani mba geɓal immorde e ndiyam ɗam, onon kadi no woodani on geɓal anndaangal, mba yarataa e nden ñalaande tawnde ko nde geɓal mooɗon, onon kadi wata on yaru dey e nden ñalaande tawnde ko nde geɓal mabba.

Wata on memir mba ko lorrata mba immorde e borogogol maaɗum piyugol, sakko heɓa on sabu ɗum Lepte immorde ka Alla O halkira on ɗe e nder ñalaande mawnde sabu ko woni kon e mayre immorde albalaa'uuji jippotooɗi e dow mooɗon.

Ɓe fottani boraade mba, ɓurɗo ɓe malkiseede on borii mba, ɓe wonti nimsuɓe e dow ko ɓe huuwi kon nde ɓe anndunoo pellet, feere alaa Lepte ɗen jippoto e maɓɓe, kono nimse tuma yi'ugol Lepte ɗen ɗum nafataa.

Lepte ɗe ɓe fodanoo ɗen nanngi ɓe, ɗen le; ko dillannde nden e haacaango ngon, pellet, wonii e koo ko jaŋtaaɗoo immorde e fillayee fii Saalihu e yimɓe makko ɓen tasakuyee wonannde taskotooɓe ɓen, ɓurɓe heewude e maɓɓe wonaali gomɗinooɓe

Anndu Joomi maaɗa -an Nulaaɗo- ko Kanko woni tedduɗo Yoɓtotooɗo ayɓe Makko ɓen, Yurmeteeɗo on tuubuɗo immorde e jeyaaɓe Makko ɓen.

Yimɓe Luutu ɓen fenni Nulaaɓe ɓen, sabu fennugol maɓɓe Annabaajo maɓɓe on Luutu (yo o his).

Tuma nde Luutu wi'annoo ɓe: Enee, on hulataa Alla, acciron sirkangol Mo sabu kulol Makko?!

Min, ko mi Nulaaɗo mooɗon, Alla Nulii lam e mooɗon, ko mi hoolaaɗo e nder ko mi yottinanta Mo kon, mi ɓeydataa e dow mu'un mi uytataa kadi.

Huliree Alla ɗoftagol Yamiraaɗi Makko ɗin e woɗɗitagol haɗaani Makko ɗin, ɗoftee lam e ko mi yamirta on kon, e ko mi haɗata on kon e muuɗum.

Mi ɗaɓɓiraali on njoɓdi fii ko mi yottinanta Joomi am kon e mooɗon, njoɓdi am ndin fawaaki si wanaa Alla Jooma tageefooji ɗin wanaa e tanaa Makko.

Enee, on aray worɓe ɓen immorde e yimɓe ɓen ka duburiiji maɓɓe?!

Accon arugol e kon ko Alla tagiri fii yo on huntude tuuyaaji mooɗon e mu'un immorde e farjuuji sonnaaɓe mooɗon?! Ko woni, onon ko on yawtirɓe keeri Alla ɗin ndee ɓoylaare añaande.

Yimɓe makko ɓen wi'ani mo: Men woodii si a accaali an Luutu haɗugol men e ngaal gollal e añidugol men e maggal, ma a wonu sanne an e ɓen wonnduɓe e maaɗa jayaaɓe e yaltinteeɓe ɓen ka saare amen.

Luutu maakani ɓe: Min dey, miɗo jeyaa e añuɓe ɓen konnii ɗee golle mooɗon ɗe wonuɗon e gollude ɗum.

O noddi Joomi makko, o maaki: Jooma, danndam, danndaa ɓeynguure am ndin kadi kon ko saatii heɓude ɓee immorde e Lepte ɗen sabu bonɗi ɗi ɓe gollata ɗin.

Men jaabini du'aa makko on, Men danndi mo kanko e ɓeynguure makko nden ɓe fow maɓɓe.

Si wanaa debbo makko on, on ɗon gomɗii o wonii geddo, o woni jeyaaɗo e yahuɓe halkaaɓe ɓen.

Refti ɓaawo yaltugol Luutu e ɓeynguure makko nden ka saare (Saduuma) Men halki yimɓe makko heddiiɓe ɓen ɓaawo makko ko ɓuri saɗtude halkugol.

Men saaƴini e dow maɓɓe kaaƴe immorde ka kammu yeru saaƴinngol toɓo, bonii toɓo ɓee ɓe Luutu wonunoo jertinnde, o rentina ɓe kadi immorde e Lepte Alla si ɓe jokkii ko ɓe woni kon e muuɗum immorde e waɗɗitagol bonɗi ɗin.

Pellet, wonii e koo ko jaŋtaa ɗoo immorde e Lepte jippiiɗe ɗen e yimɓe Luutu (yo o his), sabu waɗugol maɓɓe pankare ɗen, ko tasakuyee wonannde taskotooɓe ɓen, ɓurɓe heewude e maɓɓe wonaali gomɗinɓe.

Pellet, Joomi maaɗa -an Nulaaɗo- ko Kanko woni tedduɗo Yoɓtotooɗo ayɓe Makko ɓen, Yurmeteeɗo on tuubuɗo immorde e jeyaaɓe Makko ɓen.

Yimɓe saare joomiraare leɗɗe sukkuɗe nden takko madyana, ɓen fenniino Nulaaɓe ɓen, tuma nde ɓe fennunoo Annabaajo maɓɓe on Su'aybu (yo o his).

Tuma nde Su'aybu Annabaajo maɓɓe on wi'annoo ɓe: Enee, on hulataa Alla, acciron sirkangol Mo sabu kulol Makko?!

Min, ko mi Nulaaɗo mooɗon, Alla Nulii lam e mooɗon, ko mi hoolaaɗo e nder ko mi yottinanta Mo kon, mi ɓeydataa e dow ko O Yamiri lam kon yottinngol ɗum mi uytataa kadi.

Huliree Alla ɗoftagol Yamiraaɗi Makko ɗin e woɗɗitagol haɗaani Makko ɗin, ɗoftee lam e ko mi yamiri on kon, e ko mi haɗi on kon e muuɗum.

Mi ɗaɓɓiraali on njoɓdi fii ko mi yottinanta Joomi am kon e mooɗon, njoɓdi am ndin fawaaki si wanaa Alla Jooma tageefooji ɗin wanaa e tanaa Makko.

Timminanee yimɓe ɓen ɓetu ngun tuma nde yeeyoton ɓe, wata on wonu jeyaaɓe e ɓen ustooɓe ɓetu ngun si hiɓe yeeyude yimɓe ɓen.

Manndikiree si hiɗon manndikannde tanaa mooɗon manndikirɗe feewuɗe ɗen.

Wata on ustan yimɓe ɓen hakkeeji maɓɓe ɗin, wata on hebbinir bone ɗen ka leydi waɗɗitagol geddi ɗin.

Hulee On Taguɗo on, O tagi kadi moftaaji adinooɗi ɗin huliron Mo fii wata O jippin e mooɗon Lepte Makko ɗen.

Yimɓe Su'aybu ɓen wi'ani Su'aybu: Pellet, an ko a jeyaaɗo ɓen ɓe mbilewu heɓi ɗum laawi ɗuuɗuɗi haa mbilewu ngun fooli hakkille maaɗa ɗen, ngu wirni ɗe.

A wonaali si wanaa ko a ɓanndunke wano amen, alaa ko senndumaa e amen, ko honno wonirtaa Nulaaɗo? Men jikkaama si wanaa ko a fenoowo e kon ko nodditiɗaa ɗum wonndema an ko a Nulaaɗo.

Awa liɓu e hoore amen kunte immorde ka kammu si tawii a wonii goonguɗo e ko nodditiɗaa kon.

Su'aybu maakani ɓe: ko Joomi am woni Annduɗo kon ko golloton immorde e sirku e geddi, hay e huunde e golle mooɗon ɗen suuɗanaaki Mo.

Ɓe jokkindiri fennugol ngol, heɓi ɓe Lepte mawɗe nokku ka ɗowdini ɓe duulere ɓaawo ñalaande saɗtunde nguli, o saaƴini e dow maɓɓe yiite nge sunni ɓe. Pellet, ñalnde halkeede maɓɓe ɗum wonuno ñalaande mawnunde kulol.

Pellet, wonii e koo ko jaŋtaa ɗoo immorde e halkeede yimɓe Su'aybu ɓen (yo o his) tasakuyee, wonannde taskotooɓe ɓen, ɓurɓe heewude e maɓɓe wonaali gomɗinɓe.

Anndu Joomi maaɗa -an Nulaaɗo- ko Kanko woni tedduɗo Yoɓtotooɗo ayɓe Makko ɓen, Yurmeteeɗo on tuubuɗo immorde e jeyaaɓe Makko ɓen.

E pellet, ndee Alqur'aanaare tellinaande e Muhammadu (yo Alla juulu e makko hisina) ko jippinaande immorde Jooma tageefooji ɗin.

Jippinii nde Jibriila hoolaaɗo on (yo o his).

O jippinii nde ka ɓernde maaɗa -an Nulaaɗo- fii yo a wonu jeyaaɗo e ɓen Nulaaɓe jertinooɓe yimɓe ɓen, ɓe hulɓiniraɓe Lepte Alla ɗen.

O jippininde e ɗemngal Aarabu ɓanngungal.

Pellet, ndee Alqur'aanaare nde jaŋtanooma ka defte adinooɓe ɓen, gomɗii Defte kammuyankooje adinooɗe ɗen wewliniriino nde.

Kaa hara wonanaali ɓee fennuɓe ma maande e goongugol maaɗa, nde tawata annduɓe ɓen ka ɓiɗɓe Israa'iila no anndi goongugol ko jippinaa kon e maaɗa, wano Abdullaahi bun Salaami.

Sinndo Men jippinno ndee Alqur'aanaare e dow woɓɓe e ɓen ajamiyankooɓe ɓe wowlataa ɗemngal Aarabu ngal,

O janngi nde e dow maɓɓe, ɓe wonataa gomɗinɓe nde; sabu arma ɓe wi'a: Men faamataa nde, koni yo ɓe yettu Alla ɓaa O jippinii [nde] ka haala maɓɓe.

Ko wano nii, Men naadiri fennugol ngol e keefeeru ngun e nder ɓerɗe bonɓe ɓen.

Ɓe waylataa ko ɓe woni kon e muuɗum immorde keefeeru ngun, ɓe gomɗintaa haa ɓe yi'a Lepte muusuɗe ɗen.

Ɗee Lepte ara e maɓɓe e juhal, hara ɓe anndaa arugol majje haa ɗe juha ɓe.

Hara hiɓe wi'a tuma Lepte ɗen jippotoo e maɓɓe e juhal immorde e saɗtugol nimse ɗen: Taw si ko men nennanteeɓe haa men tuuba ka Alla?!

Enee, hara ko Lepte Amen ɗen ɓee heeferɓe hawjanta hara hiɓe wi'a: Men gomɗintaa ma haa liɓaa kammu ngun e hoore amen kunte, wano aaƴorɗaa non?!

Humpitam -an Nulaaɗo- si Men dakmitii ɓee heeferɓe ɗuurniiɓe e gomɗinngol ko adduɗaa kon, e neemaaji jamaanu juutungu.

Refti ari e maɓɓe ɓaawo ngun jamaanu ngu ɓe heɓi e muuɗum ɗin neemaaji, ko ɓe wonanoo fodeede kon immorde e Lepte ɗen.

Ko honɗum nafi ɓe ɗin neemaaji ɗi ɓe wonunoo e muuɗum ka aduna?! Gomɗii ɗin neemaaji taƴii, ɗum nafaali hay e huunde.

Men halkataa mofte woo si wanaa ɓaawo ngantinirgol e majje nulugol Nulaaɓe ɓen e jippinngol defte ɗen.

Waaju e anndintingol ɓe, Men wonaali tooñirɓe leptugol ɓe ɓaawo ngantinorgol e maɓɓe nulugol Nulaaɓe ɓen e jippinngol defte ɗen.

Seytanuuji ɗin jippinaali ndee Alqur'aanaare ka ɓernde Nulaaɗo on (yo Alla juulu e makko hisna).

Sellataa nde ɗi jippinta ka ɓernde makko, wurin ɗi hattanaaka ɗum.

Ɗi hattantaake ɗum, sabu kannji ko ɗi woɗɗinti- naaɗi gaayi nokku mayre on immorde ka kammu, ko honno ɗi yottorta e mayre, sakko ɗi jippina nde?!

Wata a rewu wonndude e Alla reweteeɗo goo kafidaa mo e Makko, sakko wonaa sabu ɗum jeyaaɗo e leptoyteeɓe ɓen.

Jertin -an Nulaaɗo- ɓurɗo ɓadaade refti ɓurɗo ɓadaade ka yimɓe maaɗa, fii wata heɓu ɓe Lepte Alla si ɓe heddike e dow sirku ngun.

Newinan banŋe maaɗa konngol e kuugal wonan- nde ɓen jokkuɓe ma immorde e gomɗinɓe ɓen ka yurminngol ɓe newanoo ɓe.

Si ɓe yeddii ma, hara ɓe jaabaaki ko yamirɗaaɓe kon e muuɗum immorde e Ngootimbaaku Alla e ɗoftagol Mo, haray maakan ɓe: Min dey, ko mi pottitiiɗo kon ko golloton immorde e sirku ngun e geddi ɗin.

Tuugo e fiyakuuji maaɗin fow e On Tedduɗo yoɓtotooɗo ayɓe Makko ɓen, Yurmeteeɗo ɓen ruttiiɓe e maɓɓe faade ka Makko.

On sutiiɗo ma O Senike fewndo darantoɗaa Julde nden.

Seniiɗo On no sutii waylitagol maaɗa iwa e alahaali yaha e alhaali goo e hakkude juulooɓe ɓe, suuɗanaaki Mo hay huunde e ko waɗataa kon, wanaa kadi ko tanaa maaɗa waɗata kon.

Pellet, ko Kanko woni Nanoowo ko janngataa kon immorde e Alqur'aana e jaŋta ka nder Julde maaɗa, Annduɗo On, annuyee maaɗa.

Taw si on accay mi humpita on, ko e hoore hommbo Seytanuuji ɗin jippotoo, ɗin ɗi aaƴiɗon wonndema kannji ɗi jippinii ndee Alqur'aanaare?

Seytanuuji ɗin no jippoo e dow kala heewuɗo penaale ɗuuɗuɗo bakkaatu e geddi immorde e ndureeɓe(wageebe) ɓen.

Seytanuuji ɗin no wujja nanɗe ɗen immorde ka mbatu ɓurngu toowude, ɗi werlo ɗum faade e weldiiɓe majji immorde e ndureeɓe ɓen, ɓurɓe heewude e ndureeɓe ɓen ko ɓe fenooɓe, hay si ɓe goongii e nder konngol, ɓe fenay ɓe wattida e maggol penaale teemedere.

Ɓen yimooɓe ɓe aaƴiɗon wonndema Muhammadu (yo Alla juulu e makko hisna) ko jeyaaɗo e maɓɓe, ko jokki ɓen, ko seluɓe ɓen peewal ngal e laawol focciingol ngol, hiɓe fillitoo ko ɓen wowlata kon immorde e gimi.

Kaa a tinaali -an Nulaaɗo- wonndema no jeyaa e feeñirde bewre maɓɓe nden wonnde kamɓe hiɓe wemmboo e nder kala aynde nde ɓe feƴƴi, tuma goo e mantugol, tumagoo kadi e ŋiñugol, e tanaa majji kannji ɗiɗi tumagoo kadi.

E tawde kamɓe hiɓe fena, ɓe wi'a: Men waɗii huunde kaari, hara ɓe waɗaali nde.

Si wanaa ɓen gomɗinɓe immorde e yimooɓe ɓen ɓe golli golle moƴƴe ɗen, ɓe jaŋtii Alla jaŋtagol heewungol, ɓe fooli ayɓe Alla ɓen ɓaawo ɓe tooñii ɓe wano Hassaanu geɗal Saabitu (yo Alla weltor mo). Ɓen tooñirɓe sirkanngol Alla e jaggitugol e hoore jeyaaɓe Makko ɓen, aray ka ɓe annda ko hennde e ruttorde ɓe ruttotoo faade e muuɗum, aray ɓe ruttoo faade e darorde mawnde, e hasboore sewunde.

(Taa Siin) hari yewtere fii yeru ɗee feƴƴiino ka cortewol Albaqara. Ɗee Aayeeje jippinaaɗe e dow maaɗa, ko ɗen woni Aayeeje Alqur'aanaare nden, e Deftere ɓanngunde ko jilɓi alaa e mayre, kala taskiiɗo nde o annday pellet, kayre ko nde immorde ka Alla.

Ɗee Aayeeje, ko fewnayɗe faade e Goonga kan, ko ɗe wewlinayɗe gomɗinɓe ɓen Alla e Nulaaɗo Makko on.

Ɓen ɓe no totta Julde nden no ɓuri timmirde, ɓe jonnira Jakka jawle maɓɓe ndin naɓirgol ɗe ka ɗe haani yaarude ton, hara kamɓe ko ɓe yananaaɓe ko woni kon ka Laakara immorde e Mbarjaari e Lepte.

Pellet, ɓen heeferaaɓe ɓe gomɗinaali Laakara on e ko woni kon ton immorde e Mbarjaari e Lepte, labinanaama ɓe golle maɓɓe bonɗe ɗen, ɓe duu- mii e gollugol ɗe, hara kamɓe ko ɓe wemmbiiɓe ɓe yi'ataa ko hewtinta ɓe e peewal ngal.

Ɓen sifaaɓe koo ko jaŋtaa, ko ɓen woni ɓe wooda- ni ɗum lepte bonɗe ka aduna sabu wareede e daheede, kamɓe kadi ka Laakara ɓe ɓuroyay yimɓe ɓen fow hayrere, nokku ka ɓe hayroyta wonkiiji maɓɓe e ɓeynguureeji maɓɓe ɗin Ñalnde Darngal sabu luttineede maɓɓe ka Yiite.

E pellet, an -Nulaaɗo- hiɗa lonngineede ndee Alqur'aanaare jippinaandee dow maaɗa immorde ka Ñeeño e nder tagugol Makko e fewjugol Makko e Sari'a Makko, Annduɗo hay e huunde suuɗanaaki Mo immorde e nafaaji jeyaaɓe Makko ɓen.

Jaŋto -an Nulaaɗo- fewndo Muusaa maakannoo yimɓe makko ɓen: Min dey mi yi'ii yiite, mi adda-noyay on ka nge woni ɗon kumpital immorde e Huɓɓuɗo nge On, O fewna en e laawol ngol, maaɗum le, mi addana on jolɓol yiite ƴettaangol e magge jortagol wonnde on iwloray nge immorde e jaangol ngol.

Tuma nde o yottinoo nokku ka yiite nge o hayninoo ngen woni ɗon, Alla noddi mo: Ko woni, Seninaama On wonɗo ka yiite, e ɓen wonuɓe ɓanŋe magge immorde e Malaa'ikaaɓe ɓen, e mawninngol Jooma winndere nden e Seninngol Mo e kala ko gasantaa Mo immorde e ɗin sifaaji ɗi majjuɓe ɓen sifotoo Mo.

Alla Daalani mo: Ko an yo Muusaa, ko woni, ko Min woni Alla On Tedduɗo Mo goɗɗowoo foolataa, ko Mi Ñeeño e nder Tagugol Am ngol e Hoddirgol Am ngol e Sari'a Am on.

Liɓu tuggordu maaɗa ndun, Muusaa jaɓi, nde Muusaa yi'unoo ndu hindu waylitoo dilla a wi'ayma kayru ko ndu mboddi, o hucciti fii dogugol ndu o ruttaaki. Alla Daalani mo: Wata a hulu ndu, Min Nulaaɓe ɓen hulataa ka Am mboddi wanaa tanaa mboddi kadi.

Kono, mo tooñirii wonkii muuɗum waɗɗitagol junuubu, refti o tuubi ɓaawo ɗum, haray Min ko Mi Surroowo mo, Yurmeteeɗo mo.

Naadu junngo maaɗa ngon ka wuddere dolloke maaɗa hikkiinde e ndaande nden, ngo yaltay ɓaawo ko naaduɗaa ngo kon hara hingo rawniri wa gilaasi ko aldaa e colɗo, ɗum ko tawaaɗum e Aayeeje jeenay seedotooɗe goongugol maaɗa ɗen tawdaa e junngo ngon: Ko tuggordu ndun, e kokke ɗen, e uytagol dimɗe ɗen, e waame ɗen, e kanuuji ɗin, e mbuɗuuji ɗin, e totiiji ɗin, e ƴiiƴam ɗam- faade e Fir'awna e yimɓe makko ɓen, pellet, kamɓe ɓe wonii yimɓe yaltirɓe e doftaare Alla sabu yeddugol Mo.

Tuma nde ɗee Aayeeje Amen arunoo e maɓɓe, ɗen ɗe Men semmbiniri ɗum Muusaa ko ɗe ɓannguɗe feeñuɗe, ɓe wi'i: Ndee huunde nde Muusaa ardi e muuɗum immorde e Aayeeje ko mbilewu ɓanngungu.

Ɓe yeddi ɗee Aayeeje ɓannguɗe ɓe qirritaaki ɗe, wonkiiji maɓɓe ɗin yananaa wonndema ko ɗe immorde ka Alla; sabu tooñe maɓɓe ɗen e mawnitinaare maɓɓe nden gaayi Goonga kan, tasko -an Nulaaɗo- ko honno wonirnoo battane bonnirooɓe ɓen ka leydi keeferaaku maɓɓe ngun e geddi maɓɓe ɗin, gomɗii Men halkii ɓe, Men yirbiniiɓe ɓe fow maɓɓe.

Gomɗii Men okkii Daawuuda e geɗaljo makko on Sulaymaana ganndal, no jeyaa e maggal ganndal haala colli ɗin, Daawuuda e Sulaymaana maaki ka jarnugol Alla O Teddii O Mawnii: Yettoore nden ko Alla heeranii On ɓurnirɗo men Annabaaku ngun e dow heewuɓe immorde e jeyaaɓe Makko ɓen gomɗinɓe ɓen, e eltaneede jinnaaji ɗin e Saytanuuji ɗin.

Sulaymaana roni ben makko Daawuuda Annabaaku ngun e ganndal ngal e laamu ngun, o maaki ka yewtirgol neema Alla mo O neemini e makko on e ben makko: Ko onon yo yimɓe, Alla anndinii men faamugol hitooji colli ɗin, O okki men immorde e kala huunde nde O okki ɗum Annabaaɓe ɓen e lamɓe ɓen. Pellet, ndee huunde nde Alla O Senike okki men, ko ɗum woni ɓural ɓanngungal.

Koneeli Sulaymaana ɗin mooɓanaa mo immorde e ɓanndunke e jinna e colli ɗin, kamɓe hiɓe soggee wonndunde e njuɓɓudi.

Ɓe seeraali hiɓe soggee haa nde ɓe arunoo ka aynde ñuuƴi ɗin (ɗum ko nokkuure to Saami) ñuungil goo e ñuuƴi ɗin wi'i: ko onon yo ñuuƴi, naatee ka koɗanɗe mooɗon fii wata Sulaymaana e koneeli makko ɗin halku on hara kamɓe ɓe anndaa fii mo'on, nde tawnoo si ɓe anndii fii mo'on ɓe yaaɓataa on.

Tuma nde Sulaymaana nanunoo haala maggil kan, o moosi ko o jaluɗo fii ɗum ko ngil wowli, o maaki ko o noddayɗo Joomi makko Senayee wonanii Mo: Jooma, hawrinndinam lonnginaa mi kadi no mi yettira neema Maaɗa mo neeminirɗaa lam on min e jibinɓe lam ɓen, hawrinndinaa mi kadi fii yo mi gollu golle moƴƴe ɗe weltortaa ɗum, naadaa mi kadi ka Yurmeende Maaɗa wonndude e jeyaaɓe Maaɗa moƴƴuɓe ɓen.

Sulaymaana ndarti colli ɗin o yi'aali hud-huda, o maaki: Ko heɓi lam, mi yi'aali hud-huda? Ko haɗayɗum haɗi lam yi'ugol ndu, kaa ndu wonu jeyaandu e wirniiɗi ɗin?

O maaki tuma nde ɓanngannoo mo wirnagol mayru: Maa tun mi lepta ndu lepte saɗtuɗe, maaɗum mi hirsa ndu fii leptugol ndu ko ndu wirnii kon, maaɗum le ndu addana lam hujja ɓannguɗo mo no ɓannguna nganto mayru e wirnagol ngol.

Hud-hudaaru ndun ñiiɓi ka ndu wirnii ton seeɗa nii, tuma ndu arunoo ndu wi'ani Sulaymaana (yo o his): Mi ƴellitike e dow ko a ƴellitaaki e muuɗum, mi addanii ma immorde ka yimɓe Saba'i kumpital goongawal sikke alaa e maggal.

Min dey mi tawii debbo no laamii ɓe, on debbo no okkaa kala huunde immorde e sabuuji doole laamu, himo jogii jullere laamu mawnde himo fewja e hoore mayre fiyakuuji yimɓe makko ɓen.

Mi tawii oo debbo, mi tawii yimɓe makko ɓen kadi hiɓe sujjana naange ngen gaanin Alla Seniiɗo Toowuɗo On, Seytaane labinani ɓe ko ɓe woni kon e muuɗum immorde e golle sirku ngun e geddi ɗin, o martini ɓe gaayi Laawol Goongawol ngol, kamɓe ɓe feewataa e maggol.

Seytaane labinani ɓe golle sirku ngun e geddi ɗin; fii wata ɓe sujjan Alla Kanko tun, On yaltinoowo ko O suuɗi kon ka kammu immorde e toɓo ngon, e ka leydi immorde e puɗi ɗin, hiMo Anndi golle ɗe suuɗoton ɗen, e ɗe feññinton ɗen, hay huunde e ɗum suuɗanaaki Mo.

Alla, reweteeɗo e goonga alaa tanaa Makko, Jooma Arsi Mawki kin.

Sulaymaana (yo o his) maakani hud-huda: Aray men ndaara si a goongu e koo ko nodditiɗaa ɗum, maaɗum si a wonu jeyaaɗo e fenuɓe ɓen.

Sulaymaana winndi ɓatakuru, o jonnindu hud-huda, o wi'ani hud-huda: Yahidu e nduu ɓatakuru am werloɗaa nde ka yimɓe Saba'i jonnuɓe ndu, pottitoɗaa ɓe sera nokku ka nanataa ko ɓe jaabondita kon e fiyaake mayru.

Lamɗo on jaɓi ɓatakuru ndun, o wi'i: Ko onon yo tedduɓe, min dey ɓatakuru teddundu mawnundu werlaama ka am.

Ko woni e nder nduu ɓatakuru nulaandu immorde e Sulaymaana udditiraandu sabu "Innde Alla Huuɓuɗo Yurmeende Heeriiɗo Yurmeende":

Wata on mawnintino, aree ka am hara ko on ɗoftiiɓe jebbilaniiɓe ko mi noddi on kon e muuɗum immorde e Ngootimmbaaku Alla e accitugol ko wonoɗon e mu'un kon immorde e sirkanngol Mo, nokku ka rewoton naange ngen wonndude e Makko.

Lamɗo on wi'i: Ko onon yo tedduɓe e koohooɓe, ɓannginanee lam feere feewunde nden e fiyaake am on, mi wonaali ñaawoowo fiyaake haa tawdeɗon e am, feññinon feere mooɗon nde e nder mu'un.

Tedduɓe ɓen ka yimɓe makko wi'i: Enen ko en jooma doole mawɗe, e jooma aalaaji hare dolnuɗi ka hare, feere nden ko ko fewjuɗaawoo ndaaru ko honɗum yamirtaa men haray menen ko men hattanɓe e dow siinugol ɗum.

Laamiiɗo on wi'i: Pellet, lamɓe ɓen si ɓe naatii e saare immorde e ca'e ɗen ɓe bonniray nde sabu ko ɓe jokkata kon warugol e jattugol, ɓe waɗa koohooɓe mayre e tedduɓe mayre hoyɓe ɓaawo ko ɓe wonunoo kon e muuɗum immorde e teddu- ngal e neema, ko wanonii lamɓe ɓen gollirta tuma kala ɓe fooli yimɓe saare; fii yo ɓe aawu mirin e kulol ka wonkiiji.

Awa min, mi nulay haa e jooma nduu ɓatakuru e yimɓe makko ɓen neldaari, mi ndaara ko honɗum nulaaɓe ɓen ardata e muuɗum ɓaawo jonnugol ndii neldaari.

Tuma nde nulaaɓe makko ɓen arunoo e ɓen wonnduɓe e makko immorde e wallooɓe mo hiɓe ronndii neldaari ndin faade ka Sulaymaana, Sulaymaana mettinani ɓe fii addugol neldaari ndin; o maaki: Enee, hara on ɓeydanay lam jawle fii yo on rutta lam e mo'on? Ko Alla okki lam kon immorde e Annabaaku e laamu ngun e jawdi ndin ɓuri moƴƴude kon ko O okki on, ko woni, ko onon woni ɓen farnorayɓe ko neldaɗon immorde e jawle aduna.

Sulaymaana (yo o his) maakini nulaaɗo makko on: Ruttodu ka maɓɓe e ko arduɗaa kon immorde e neldaari, ma men addan mo kanko e yimɓe makko ɓen koneeli ɗi ɓe maraa doole fii dartagol ɗum, ma men yaltin ɓe Saba'i hara ko ɓe jaasuɓe hoynaa ɓe, ɓaawo ɓe wonii e teddungal nder ton -si tawii ɓe araali ka am ko ɓe ɗoftii ɓe-.

Sulaymaana (yo o his) yewti koohooɓe laamu makko ngon o maaki: Ko onon yo mbatu, ko hommbo e mooɗon addanta lam jullere laamu makko nden ko adii ɓe arude ka am ko ɓe ɗoftii ɓe?

Murtundu goo e jinnaaji ɗin jaabii mo wi'i: Min mi addante jullere laamu makko nden ko adii a immaande e ndee jonnde maaɗa nde wonɗaa e muuɗum, e pellet, min ko mi dolnuɗo fii ronndagol nde hoolaaɗo e dow ko woni kon e mayre, mi uytataa e mayre hay e huunde.

Gorko moƴƴo ganndo wonɗo ka Sulaymaana, jogiiɗo ganndal deftere nden, no e nder mayre Innde Alla Mawnde Nden, Nden tawnde si O tororaama nde O Jaabinay, ontuma on wi'i: Min mi addante jullere laamu makko nden ko adii yiitere maaɗa nden hinƴude; ɗum woni mi toroo Alla O adda nde, o torii Alla jaabini toraare makko nden. Nde Sulaymaana yi'unoo jullere laamu oya nden ko nde ñiiɓunde ka makko o maaki: Ɗum ɗoo ko immorde e ɓural Joomi am O Senike; fii yo O ndarndo lam e hara mi jarnay neemaaji Makko ɗin, kaa mi fennay ɗi? Kala jarnuɗo Alla, haray anndu nafa jarnugol makko ngol ruttoto faade e makko [kanko jarnuɗo on] Alla ko O Galo, jarnoore jeyaaɓe ɓen ɓeydataa Mo, kala yedduɗo neema Alla on hara o jarniraali Mo neema on, pellet, Joomi am ko O Galo gaayi jarnugol makko ngol ko O Tedduɗo, no Jeyaa e Teddungal Makko ngal ɓurnugol Makko ngol hay e dow on yedduɗo neema on.

Sulaymaana (yo o his) maaki: Waylanee mo jullere laamu makko nden itton mbaadi mayre ndi nde wonunoo ndin e muuɗum ndaaren: Taw si o feeway faade e annditugol jullere makko nden, kaa hara o wonay jeyaaɗo e ɓen ɓe feewirtaa faade e annditugol piiji maɓɓe ɗin.

Tuma nde laamiiɗo Saba'i on arunoo ka Sulaymaana [ɓe] wi'ani mo fii ndarndagol mo: Enee, ko nii jullere laamu maaɗa nden wa'i? O jaabii lanndal ngal: A sikkayma ko kayre, Sulaymaana maaki: Alla okkiino men ganndal ko adii mo, sabu Kattanɗe Makko e dow sifa ɗii fiyakuuji, men woni jebbilaniiɓe Yamaruyee Alla on ɗoftiiɓe Mo.

Pottini mo e Ngootimmbaaku Alla ngun ɗum ko o laatinoo himo rewa gaanin Alla ka jokkugol yimɓe makko ɓen, e ñemmbugol ɓe. Pellet, kanko o woniino jeyaaɗo e yimɓe yedduɓe Alla, o woni yedduɗo wano maɓɓe.

[Debbo on] wi'aa: Naatu ka huɓeere tawi kayre hinde wa'i wa ko hummbi, tuma nde o yi'unoo nde o sikki ko nde ndiyam o ñori dense makko ɗen fii yo o juuwu nde, Sulaymaana (yo o his) maaki: Ndee ko huɓeere ɓowriniraande guƴe, o noddi mo ka Islaamu, o jaɓi ko o noddi mo kon e mu'un o wi'i: Jooma, min dey mi tooñirii wonkii am rewidugol Ma e tanaa Maaɗa, mi ɗoftanike Alla Jooma tageefooji ɗin fow majji, wonndude e Sulaymaana.

Gomɗii Men Nulii faade e Samuudankooɓe ɓen musiɗɗo maɓɓe ka dammbe Saalihu (yo o his) koni rewee Alla Kanko tun, e jakayoo kamɓe ɓaawo ko o noddi ɓe kon ko ɓe feddeeji ɗiɗi: Fedde gomɗinnde, e wonndegoo yeddunde hiɓe pooɗondira ko hommbo e maɓɓe mari goonga.

Saalihu (yo o his) maakani ɓe: Ko ɗaɓɓanton yaccinaneeɗe lepte ɗen ko adii yurmeende nden? Ko haɗi ɗaɓɓon haforaneede immorde ka Alla bakkatuuji tijjagol nde O Yurminta on.

Yimɓe makko ɓen wi'ani mo e hoore townitanagol goonga kan: Men ñakkinii (kiitinii)sabu maaɗa an e wonnduɓe e maaɗa ɓen jeyaaɓe e gomɗinɓe ɓen, Saalihu (yo o his) wi'i ɓe: Ñakko mooɗon ngo raɗiɗon ngon fii wata ko boni heɓu on, ko ka Alla ganndal muuɗum woni hay huunde e ɗum suuɗanaaki Mo. Ko woni, onon ko on yimɓe wonaaɓe ndarndoreede moƴƴere weeɓitanaande on nden e bone heɓayɗe on ɗen.

Hari woniino ka saare Hijuri worɓe njeenayo hiɓe bonnirde ka leydi keeferaaku e geddi, ɓe alaa moƴƴinirde ton gomɗinal e golle moƴƴe ɗen.

Woɓɓe maɓɓe wi'ani woɓɓe: Yo gooto kala e mooɗon woondir Alla ma men naatan mo ka suudu makko jemma, ma men waruɓe, refti ma men wi'an jeyɓe mo ɓen: Men tawaaka warugol Saalihu e yimɓe makko ɓen, e pellet, menen ko men goonguɓe e ko men wowli kon.

Ɓe eɓɓi hodoore suuɗiinde fii warugol Saalihu e gomɗinɓe jokkuɓe mo ɓen, Menen kadi Men fewji fewjoore fii wallugol mo e danndugol mo immorde e hodooje maɓɓe ɗen e halkugol yedduɓe ɓen ka yimɓe makko, hara kamɓe ɓe anndaa ɗum.

Tasko -an Nulaaɗo- ko honno wonirnoo battane pewje maɓɓe e hodooje maɓɓe ɗen? Menen Men mulirnoɓe Lepte ɗen immorde ka Amen ɓe halkaa haa sakkitoro maɓɓe on.

Ɗin cuuɗi maɓɓe gomɗii maadiiji majji e kippudiiji majji ɗin yirbii, ɗi heddii ko ɗi yeewuɗi immorde e yimɓe majji ɓen sabu tooñe maɓɓe ɗen, pellet, wonii e koo ko heɓi ɓe immorde e lepte sabu too- ñe maɓɓe ɗen tasakuyee wonannde yimɓe gom- ɗinɓe ɓen, ko ɓen woni taskotooɓe Aayeeje ɗen.

Men danndi ɓen gomɗinɓe Alla jeyaaɓe e yimɓe Saalihu ɓen (yo o his), ɓe woni hiɓe hulira Alla ɗoftagol yamiraaɗi Makko ɗin e woɗɗitagol haɗaaɗi Makko ɗin.

Jaŋto -an Nulaaɗo- fii Luutu nde o wi'annoo yimɓe makko ɓen ko o biskitayɗo ɓe añuɗo [golle maɓɓe ɗen]: Enee, on huuway kuuɗe kaanuɗe ɗen -ɗum le ko luutiyankoyaagal ngal- ka mbatirɗe mooɗon e kene woɓɓe e mooɗon yi'a woɓɓe?!

Eyoo, onon on aray e worɓe ɓen e laawol tuuyina- lgol accon rewɓe ɓen, on faandaakine fugol maa kadi ɓiɗɗo, ko ittugol tuuyo mummunteyaagal tun, ko woni, onon ko on yimɓe majjaaɓe ko waɗɗii on kon immorde e gomɗinal e laaɓal e woɗɗitagol gaayi geddi ɗin.

Wonanaali yimɓe makko ɓen jaabawol si wanaa wi'ugol maɓɓe: Yaltinee yimɓe Luutu ɓen ka saare mooɗon, kamɓe ko ɓe yimɓe laɓɓintooɓe gaayi tuundiiji e soɓeeji ɗin, ɓe wi'i ɗum ka jalnorgol yimɓe Luutu ɓe tawtaali ɓe e pankare ɗe ɓe woni waɗde ɗen, ko woni hiɓe añiri ɓe waɗugol pankare ɗen.

Men hisini mo Men hisini kadi yimɓe makko ɓen, si wanaa debbo makko on Men ñaawi e makko yo o wonu jeyaaɗo e heddotooɓe ɓen ka lepte fii yo o wonu jeyaaɗo e halketeeɓe ɓen.

Men saaƴini e dow maɓɓe kaaƴe immorde ka kammu, ɗum woni toɓo bonngo halkayngo ɓen hulɓiniraaɓe lepte ɗen ɓe jaabaaki.

Maaku -an Nulaaɗo-: Yettoore nden woodanii Alla e dow neemaaji Makko ɗin, e hoolaare e lepte immorde e Makko wonannde wonndiiɓe Annabiijo on (yo Alla juulu e makko hisna) gaayi Lepte Makko ɗe O leptirnoo ɗum yimɓe Luutu ɓen e yimɓe Saalihu ɓen. Enee, ko Alla Reweteeɗo On e Goonga On mo woni e Junngo Muuɗum Laamateeri kala huunde Ɓuri Moƴƴude, kaa ko ko sirkooɓe ɓen rewata kon immorde e reweteeɗi ɗi maraa nafaa walorra kadi?!

Kaa ko hommbo tagi kammuuli ɗin e leydi ndin ko aldaa e misal aditiingal, O jippinani on -onon yimɓe ɓen- immorde ka kammu ndiyam toɓo ngon, Men fuɗinirani on ngo gese moƴƴuɗi ŋari, laatanataaka on fuɗinngol leɗɗe ɗin naakooji sabu ronkugol mooɗon, ko Alla woni fuɗinƊo ɗe On. Enee, hara ko reweteeɗo goo waɗi ɗun wonndude e Alla?! Wanaa non, ko woni, kamɓe ko yimɓe seluɓe Goonga kan hiɓe fotindira Taguɗo On e tagaaɓe ɓen e hoore tooñe.

Kaa ko hommbo waɗi leydi ndin ñiiɓundi tabitundi ndi yeƴodataa e ko woni kon e mayri, O waɗi e nder mayri canɗi ilooji, O waɗani ndi pelle tabituɗe, O waɗi hakkunde maaje ɗen ɗiɗi: Lammungo ngon e welungo ngon heedo haɗayngo jillondirgol lanɗanwo ngon e welungo ngon fii wata ngo bonnu ngoya, hara ngo moƴƴataa yarugol. Enee, ko reweteeɗo goo waɗi ɗum wonndude e Alla?! Wanaa non woniri, ko woni, ɓurɓe ɗuuɗude e maɓɓe ɓen ɓe Anndaa, sinndo hiɓe anndunoo ɓe sirkantaano Alla hay e gooto e tageefooji Makko ɗin.

Kaa ko hommbo jaabinanta on mo fiyaake muuɗum ɓitti haa satti si o torike Mo, O ittata ko yanata e hoore neɗɗo on immorde e ñaw e baasal e tanaa majji, O waɗa on lontiiɓe ka leydi yoga e mooɗon lontoo yoga yirde ɓaawo yirde. Ko reweteeɗo goo woni waɗude ɗum wonndude e Alla?! Oo'ooye, fanɗii ko waajitotoɗon taskoɗon.

Kaa ko hommbo fewnirta on ka niɓe njorndi e ka niɓe maayo ɗin maandeeji ɗi O waɗani on e koode, e ko hommbo nulata keni ɗin fii yo ɗi wewlinir ɓadagol saaƴugol toɓo ngo O Yurminirta ngon jeyaaɓe Makko ɓen? Enee, ko reweteeɗo goo woni waɗude ɗum wonndude e Alla?! Alla Senike, O laaɓii gaayi e ko ɓe sirkanta Mo kon immorde e tageefooji Makko ɗin.

Kaa ko hommbo fuɗɗii tagu ngun ka rennga laawol ɓaawo laawol, refti O wurnita ngu ɓaawo O warii ngu, e ko hommbo kadi arsikata on immorde ka kammu toɓo saaƴoowo iwrungo e maggu, O arsika on kadi immorde ka leydi puɗi ɗi O fuɗinta ɗin e nder mayri! Enee, ko reweteeɗo goo woni waɗude ɗum wonndude e Alla?! Maakan -an Nulaaɗo- ɓee sirkooɓe: Addee hujja mooɗon on e dow ko wonu- ɗon kon e muuɗum immorde e sirku, si tawii on wonii goongu ɓe e ko nodditiɗon kon wonndema hiɗon e hoore goonga.

Maaku -an Nulaaɗo-: Anndaa ko wirnii kon ɓen wonuɓe ka kammuuli immorde e Malaa'ika en, wanaa ɓen wonuɓe ka leydi kadi immorde e yimɓe ɓen, kono ko Alla tun woni Annduɗo ɗum, dennda- ngal ɓen wonuɓe ka kammuuli e ɓen wonɓe ka leydi ɓe anndaa ko hennde tuma ɓe immintinoytee fii njoɓdi ndin, si wanaa Alla.

Kaa hara ganndal maɓɓe jokkondir fii Laakara on ɓe yananaa fii makko? Oo'ooye, ko woni, kamɓe hiɓe e sikke e wemmbere fii Laakara on, wurin gomɗii gite maɓɓe ɗen wumii gaayi [Laakara on].

Ɓen yedduɓe wi'i e hoore mawnitagol: Enee, si men maayii men woni mbullaari no weeɓi nde men immintinoytee hara ko men wuuruɓe?

Gomɗii men fodanooma, baabiraaɓe amen ɓen kadi fodaa ko adii wonndema men fow men immintinoyte, kono men yi'aali nden fodoore no laatii, ndee fodoore nde men fow men fodaa wonaali si wonaa pene adinooɓe ɓen ɗe ɓe winndunoo ɗen ka defte maɓɓe.

An Nulaaɗo maakan ɓen yedduɓe Immital ngal: Yahee e kala ɓaŋŋeeji leydi ndin taskoɗon ko honno wonirnoo lannoode bonɓe fennuɓe ɓen Immital ngal, gomɗii Men halkii ɓe sabu fennugol maɓɓe ngol Immital ngal.

Wata a suno sabu ɗuuragol sirkooɓe ɓen gaayi noddaandu maaɗa ndun, wata pewje maɓɓe ɗen ɓittin ɓernde maaɗa nden Alla wallete e hoore maɓɓe.

Heeferɓe yedduɓe Immital jeyaaɓe e yimɓe maaɗa ɓen no wi'ude: "Ko honnde tuma Lepte ɗe foduɗaa men ɗen an e gomɗinɓe ɓen laatotoo, si tawii ko on goonguɓe e kon ko nodditiɗon waɗugol mum.

Maakan ɓe -an Nulaaɗo-: No tijjaa nde tawata ɓadanike on yoga e ko heñorɗon kon immorde e Lepte ɗen.

Pellet, Joomi maaɗa -an Nulaaɗo- ko O Jom Ɓural e dow yimɓe ɓen nokku O accata heñorgol leptugol ɓe wonndude e keefeeru e geddi ɗi ɓe woni ɗin e mooɗun, kono ɓurɓe heewude ɓen e yimɓe ɓen ɓe jarnataa Alla e dow ko O neeminiri ɓe kon.

Pellet Joomi maaɗa hiMo Anndi ko ɓerɗe jeyaaɓe Makko ɓen miijotoo e ko ɗe feññinta kon, hay e huunde e ɗum suuɗotaako Mo, aray O yoɓa ɓe e dow ɗum.

Alaa e huunde wirniinde e gite yimɓe ɓen ka kammu, wanaa kadi wirniinde e maɓɓe ka leydi, si wanaa nden huunde wonii e nder Deftere ɓanngunde, ɗum le ko Alluwal Reenaangal ngal.

Pellet, ndee Alqur'aanaare jippinaande e Muhammadu (yo Alla juulu e makko hisna) hinde filloo e dow ɓiɗɓe Israa'iila ɓen ko ɓuri heewunde e ko ɓe luutondiri kon e fii mu'un, hinde hunca kadi ɓoylaare maɓɓe nden.

Pellet, kayre ko nde Peewal e Yurmeende wonannde gomɗinɓe gollirooɓe ɓen ko ari kon e mayre.

Pellet, Joomi maaɗa -an Nulaaɗo- O Ñaawiray hakkunde yimɓe ɓen gomɗinɓe maɓɓe e yedduɓe ɓe maɓɓe Ñalnde Darngal Ñaawoore Makko Nunɗunde nden, O Yurminoya gomɗinɓe ɓen, O Lepta yedduɓe ɓen, ko Kanko woni Tedduɗo yoɓtotooɗo On ayɓe Makko ɓen. Hay e gooto foolataa Mo, Annduɗo On Mo faydindirtaa moƴƴinɗo e bonnuɗo.

Hoolor Alla, tuugoɗaa e Makko e denndaangal fiyakuuji maaɗa ɗin, pellet, an hiɗa e hoore Goonga ɓannguka kan.

Pellet, an Nulaaɗo, a nanintaa mayɓe, ɓen ɓe ɓerɗe muuɗum maayiri sabu yeddugol Alla, a nanintaa kadi waasuɗo heɗagol ko noddataa ɓe kon faade e muuɗum si ɓe ruttike hara ko ɓe ɗuurniiɓe ma.

A wonaali fewnoowo ɓen ɓe giiɗe ɓernde mu'un wumi gaayi Goonga kan, wata a suno fii maɓɓe sakko tampinaa wonkii maaɗa kin, a nanintaa noddaandu maaɗa ndun si wonaa ɓen gomɗinɓe Aayeeje Amen ɗen hara kamɓe ko ɓe ɗoftiiɓe Yamaruyeeji Alla ɗin.

Si lepte ɗen waɗɗiike ɗe tabitii e maɓɓe sabu deppitagol maɓɓe e keeferaaku maɓɓe e geddi maɓɓe ɗin, heddike yimɓe bonɓe ɓen, Men yaltinanoya ɓe tuma ɓadagol Darngal ngal maande jeyaande e maandeeji maggal mawɗi ɗin, ɗum le ko daabewa ka leydi himba haalana ɓe ko faamata wonndema yimɓe ɓen ɓe goonginaa Aayeeje Amen jippinaaɗe ɗen e dow Annabaaɓe Amen ɓen.

Jaŋto - an Nulaaɗo- Ñalnde Men mooɓoyta e kala mofte e moftaaji ɗin fedde immorde e mawɓe maɓɓe ɓen jeyaaɓe e ɓen finnuɓe Aayeeje Amen ɗen, arano maɓɓe on yiltee haa hewta sakkitoro maɓɓe on, refti ɓe soggee haa ka hasboore.

Soggugol ɓe ngol jokkondira, haa si ɓe arii nokku hasboore maɓɓe nden, Alla Daalana ɓe ka biskitugol ɓe: Eyoo, on fennay Aayeeje Am tenndinɗe ɗen e Ngootimmbaaku Am e moftuɗe ɗen Sari'aaji Am ɗin, hara on huɓindoraali ganndal hollungal wonndema ko ɗe meere sakko newanoo on fennugol ɗe, kaa ko honɗum wonoɗon gollirde ɗe immorde e goonginngol maaɗum fennugol?!

Lepte ɗen yani e maɓɓe sabu tooñirgol maɓɓe yeddugol Alla e fennugol Aayeeje Makko ɗen, hara kamɓe ɓe wowlataa fii danndugol wonkiiji maɓɓe sabu ronkugol gaayi ɗum, e bonugol hujjaaji maɓɓe ɗin.

Enee, ɓee fennuɓe Immital ngal ndaaraali, wonnde Men waɗii jemma on fii yoɓe deeƴir e makko ɗoyngol, Men waɗi ñalorma on jalbuɗo fii yo ɓe yi'u e makko, ɓe yaha ka golle maɓɓe, pellet, wonii e nden maayde fillitiinde e Immital ngal ɓaawo ɗum maandeeji ɓannguɗi wonannde yimɓe ɓe no gomɗina.

Jaŋto -an Nulaaɗo-: Ñalnde Malaa'ikaajo halfinaaɗo wuttugol alaadu ndun o wutti wuttannde ɗiɗaɓere nden, ɗenƴoto ɓen wonuɓe ka kammuuli e ɓen wonuɓe ka leydi si wanaa ɓen ɓe Alla ittintini immorde e ɗenƴere nden; ka Ɓural Makko, gootel kala e tageefooji Alla ɗin aroyay ka Makko e nder ngal Ñallal hara ko ɓe ɗoftiiɓe hoyɓe.

Hiɗa tina pelle ɗen e ngal Ñallal, sikka hiɗe tabiti ɗe dillataa, hara le kannje ka tigi-tigi hiɗe yaha uuyeende yaadu duule ɗen, ko kuungal Alla ngal woni dillinnde ɗe, pellet, Kanko ko O Humpitiiɗo ko golloton kon, hay e huunde e golle mooɗon ɗen suuɗanaaki Mo, aray O yoɓoya on e dow majje.

Ñalnde Darngal mo ardii e gomɗinal e golle moƴƴe haray himo mari Aljanna, kamɓe ko ɓe hoolorɓe ko Alla hoolni ɓe kon immorde e ɗenƴere Ñalnde Darngal ngal.

Mo ardii kadi e keefeeru e geddi haray ko Yiite ngen woodani mo ɓe bugoroyte e nder magge geece maɓɓe ɗen, ɓe wi'anee ka biskitugol e hoynugol ɓe: Taw si on yoɓete si wanaa ko wonunoɗon gollude kon ka aduna immorde e keefeeru e geddi?

Maakan ɓe -an Nulaaɗo-: Anndu ko mi yamiraa ko yo mi Rewu Jooma saare Makka nden On harminɗo nde, ƴiiƴam rufetaake e nder mayre, hay gooto tooñetaake e mayre, mbaroodi mayre waretaake, leɗɗe mayre soppetaake, no woodani Mo O Senike kala huunde, mi yamiraama kadi yo mi wonu jeyaaɗo e ɓen jebbilaniiɓe Alla ɗoftori Mo Dewal.

Mi yamiraama kadi yo mi janngu Alqur'aanaare nden e tawnde yimɓe ɓen, mo feewirii peewal mayre ngal, o gollirii ko woni e mayre kon, haray nafa peewal makko ngal ko fii makko, mo majjii o selii ko woni kon e mayre o yeddii ɗum, o golliraali ko woni kon e nder mayre, haray maaku: Min dey, ko mi jeyaaɗo e jertinooɓe ɓen mi jertinirii on Lepte Alla ɗen, alaa e junngo am fewnugol on.

Maaku kadi -an Nulaaɗo-: Yettoore wonanii Alla e dow ɗin neemaaji Makko ɗi limotaako, aray Alla holla on Aayeeje Makko ɗen ka wonkiiji mooɗon e ka kammu e ka leydi e ka arsike mo'on, haa anndon ɗi ganndal fewnayngal on faade e yankinanagol Goonga kan, Joomi maaɗa wonaali welsindiiɗo fii kon ko golloton, ko woni Kanko ko O Ƴellitiiɗo e dow majji, hay e huunde e majji suuɗanaaki Mo, O yoɓoyay on kadi e dow majji.

(Taa, Siin, Miim) hari yewtanooma fii yeru majje ka fuɗɗoode Simoore Albaqara.

Ɗeeɗoo ko Aayeeje Alqur'aanaare ɓanngunde nden.

Menɗen janngane kumpital fii Muusaa e Fir'awna e goonga ka sikke alaa e muuɗum wonannande yimɓe gomɗinɓe ɓen; sabu ko kamɓe woni ɓen nafitorayɓe ko woni kon e kumpital ngol.

Pellet, Fir'awna bewii ka leydi Misra, o wurtike e mayri, o waɗi yimɓe mayri ɓen feddeeji o senndi hakkunde majji, himo lo'ina fedde goo e maɓɓe, ɓen ko ɓiɗɓe Israa'iila ɓen, warugol ɓiɗɓe maɓɓe worɓe ɓen e accugol rewɓe ɓen fii ko kurkee ka tentinngol hoynugol ɓe, pellet, kanko o woniino jeyaaɗo e bonnirooɓe ɓen ka leydi tooñe e bewre e mawnintinaare.

Meɗan faalaa neeminirgol ɓiɗɓe Israa'iila ɓen, ɓen ɓe Fir'awna lo'innoo ka leydi Misra; halkugol gaño maɓɓe on, e ittugol lo'ineede e maɓɓe, e waɗugol ɓe yeesooɓe ñentinteeɓe ka Goonga, Men waɗa ɓe ronooɓe leydi Saami barkinaandi ndin ɓaawo halkugol Fir'awna, wano Toowuɗo On Daaliri non: ( Men ronini ɓen yimɓe laatinooɓe no lo'inee ka funnaange leydi e ka hirnaange mayri, ndin ndi Men barkini e muuɗum...).

Men weeɓinirana ɓe ka leydi, waɗugol ɓe fewjooɓe e mayre, Men holla Fir'awna e Haamaana ɓuroowo wallude mo on ka laamu, wonndude e koneeli maɓɓe wallayɗi ɓe ɗin, ko ɓe hulaynoo wata iwugol laamu maaɓe ngun, ngu re'ora e junngo gorko jibinaaɗo ka ɓiɗɓe Israa'iila.

Men lonngini neene Muusaa on (yo o his) Men wi'i: muynin mo si a hulii Fir'awna e yimɓe makko ɓen wata ɓe waru mo, haray waɗu mo e hontoore, werloɗaa nde ka caangol Nila, wata a hulu himo yooli wata a hulu Fir'awna no waɗi mo goɗɗum, wata a suno sabu seedugol e makko, Menen Men artiray mo ka maaɗa hara himo wuuri, Men waɗay mo kadi jeyaaɗo e Nulaaɓe Alla ɓen, ɓen ɓe O Nulata faade e tagu Makko ngun.

O ɗoftii ko Men lonngini mo kon, fii waɗugol mo ka hontoore, bugoo mo ka caangol. Yimɓe Fir'awna ɓen yiiti mo, ɓe ƴetti mo, fii ko Alla Muuyi kon yo laato: wonnde Muusaa wonoyay gaño Fir'awna, Alla liɓira laamu makko ngun e junngo Muusaa, o wona addanyɗo ɓe suno. Pellet, Fir'awna e yaakoraaɗo makko on Haamaana e wallooɓe ɓen, ɓe wonuno bakondinirɓe sabu keeferaaku e bewre maɓɓe, e bonnugol ɓe ngol ka leydi.

Nde Fir'awna faalanoo warugol mo, ɓeyngu makko wi'ani mo: Kun paykun, ko tubbirde welo-welo am e an kadi. Wata a waru mo, hino gasa ka o nafiroyay en golle, maa jogitoren mo ɓiɗɗo ne'aaɗo men. Hari fewndo ontuma, ɓe anndaa wonnde laamu maɓɓe ngun laniray e juuɗe on ɗon.

Ɓernde yumma Muusaa nden wonti yeewunde, yejjiti kala fiyakuuji aduna, si wanaa fii Muusaa; tawi o accii muññaade, haa o eɓɓi feññinngol wonnde ko ɓiɗɗo makko non, hakkee ko fii on woni e makko, si wanaano Men tbintinornoo ɓernde makko nden, muññinngol, fii yo o laato e gomɗim- ɓe fawii e Joomi mun, muññiiɓe e ko O ñaawata kon.

Yumma Muusaa (yo o his) wi'ani banndiraawo makko on, ɓaawo o bugaade mo ka caangol: Jokkitu mo, anndaa ko ɓe waɗata mo; o ƴeewiri mo ka muutii, fii wata ɓe anndu fii makko on. Fewndo ontuma, hawri Fir'awna e yimɓe mun ɓen so'aa-anndude wonnde on jiwo, ko banndiraawo Muusaa, ko tefugol humpitoo fii makko tun addi mo.

Muusaa saltori e muuyaande Alla muynugol rewɓe ɓen, ko adii nde Min nduttata mbo e neene makko, nde banndiraawo makko on yi'unoo hiɓe rerɗi e muyninngol mo, o wi'ani ɓe: On accay mi tinndina on e yimɓe suudu, muyninooɓe mo dankoo mo, hara kadi ko laaɓanooɓe mo?

Men artiri Muusaa ka yumma makko, fii no ɓernde makko ɓuuɓira yi'ugol ma gite e gite, hara o sunoraaki seedugol e makko ngol, e fii yo yumma makko anndu kadi pellet, fodoore Alla nden e artirgol mo ɓiɗɗo makko on, ko goonga mo sikke alaa e mu'un. Kono ɓurɓe ɗuuɗude ɓen e maɓɓe, ɓe anndaa ndee fodoore, tawi kadi, gooto e maɓɓe anndaa ko on woni yumma makko.

Nde o yottinoo duuɓi cattal banndu, o huɓindii cemmbe makko ɗen, Men okki mo ganndal e faamu ka diina ɓiɗɓe Israa'iila, ado annabaaku makko. Ko wano Men yoɓiri nii Muusaa e ɗoftaare makko nden, Men yoɓirta moƴƴinooɓe ɓen e kala nokku e jamaanu.

Muusaa naatiri e saare nden, fewndo yimɓe ɓen fowtii ka cuuɗi mun, o tawi worɓe ɗiɗo no haɓa: goɗɗo e maɓɓe, ko jeyaaɗo e ɓiɗɓe Israa'iila'en, yimɓe Muusaa ɓen; oya on, ko jayaaɗo qibtiyankooɓe yimɓe Fir'awna'en, ayɓe Muusaa ɓen. Jeyaaɗo on e yimɓe makko ɓen ɗaɓɓiri mo ballal e hoore gaño makko qibtiyankoojo on. Muusaa fenkorii on, banto, o wariri mo nden fenkannde, hakke no nde tiiɗi. Muusaa maaki: Ɗum ɗoo, ko jeyaaɗum e cuɗateere seytaane e kodooje makko., Pellet, seytaane ko o gaño, majjinoowo kala jokkuɗo mo, ɓannginɗo ngayngu. Ko mi waɗi ɗoo kon, ko sabu majjere makko, nde o faalaa majjinirde lam.

Muusaa noddi Joomi makko, himo qirritoo ko o waɗi kon, o maaki: Joomi am, mi tooñirii hoore-am, warugol oo qibtiyankoojo; haforanam ɗin junubaaji am. Alla ɓannginani en, ko O haforani Muusaa kon. Pellet, ko Kanko woni Haforanoowo kala tuubuɗo e jeyaaɓe Makko ɓen, Hinnotooɗo ɓe.

Alla jokkitii humpitugol fii noddaandu Muusaa ndun, ka o wi'i: Joomi am, sabu ko neeminɗaa mi kon doole e ñeeñal e ganndal, mi wontataa wallitotooɗo bomɓe ɓen e bonnere maɓɓe.

Nde o wari qibtiyankeejo on, o wonti hulɗo ka saare, himo habbitii ko waɗata. Tawi ɗaɓɓirnooɗo mo ballal on hanki, e hoore gaño makko qibtiyankeejo on, hino ɗaɓɓira mo ballal, e hoore qibtiyankeejo goo kadi. Muusaa maakani mo: Pellet, ko a jom-bewre e majjere ɓanngunde.

Nde Muusaa faandinoo nanngugol qibtiyankeejo gaño makko kanko e Israa'iilankeejo on, on sikki Muusaa faala nanngude mo kanko kadi, nde o nanunoo himo maaka: "Pellet, ko a bewɗo ɓannguɗo". O wi'ani ɗon Muusaa: a faalaa warude lam, wano ittirnoɗaa wonkii non hanki? A faalaaka wonnde, si wanaa dunndarakeejo tooñoowo wara yimɓe ɓen ka leydi, a faalaaka wonude moƴƴinoo- ɓe hakkunde hoɓooɓe ɓen.

Nde kabaaru on saakinoo, gorko iwri ka ɓuri woɗɗude e saare nden, himo yaccoo, hakkee ko o aani wata Muusaa nannge, o wi'i: Ko an yo Muusaa, mbatu Fir'awna ngun, no diisondirde fii warugol ma, yaltu e leydi ndin. Ko e laaɓanooɓe ma, yurmaade wotoɓe heftoma ɓe ware ma.

Muusaa nani waaju gorko laaɓanɗo mo on, o yalti e leydi ndin, himo huli, himo habbitii ko waɗata mo. O noddi Joomi makko, o maaki: Joomi am, danɗndam e yimɓe tooñooɓe ɓen, hara ɓe hewtiraali lam bone.

Nde o fewrunoo telen Madyana, o maaki: Hino hasii ka Joomi am fewnirta lam, e laawol moƴƴol, hara mi majjataa e maggol.

Nde o hewtunoo ka ɓunndu Madyana, ndu ɓe yarnirta ɗam, o tawi jamaa yimɓe no yarna daabeeji mun, o tawi kadi rewɓe ɗiɗo, no jogitii dammi mun, habbii haa yimɓe ɓen yarna. Annabi Muusaa maakani ɓe: Ko haɗi on yarnidugol e yimɓe ɓen? Ɓe wi'i: Ko men woowti, ko martagol habboo, haa gaynaakooɓe ɓen pottoo; fii wata men jillondir e maɓɓe, baaba amen, ko mawɗo nayeejo, o hippataa yarnugol, tawi bee men yarna menen, dammi amen ɗin.

O yurmaa ɓe, o yarnani ɓe dammi maɓɓe ɗin. Refti o huccitiri ka ɗowdi, fii fowtagol, o torii Joomi makko e ko o hatonjini, o maaki: Joomi am, min ko jippinɗaa e am woo e moƴƴere, ko mi hatonjinɗo.

Nde jiwɓe ɓen hootunoo, ɓe humpiti ɗum baaba maɓɓe. O nuli kisan gooto e maɓɓe, yo noddoy mo. Jiwo on ari mum, no yahra hersa, o wi'i: Baaba am no nodde, fii yoɓugol ma njoɓdi ko yarnan-ɗaa men kon. Nde Muusaa hewtunoo ka mawɗo on, o humpiti mo fii makko, mawɗo on wallintini ɓernde makko, o wi'ani mo: wata a hulu, sabu a daɗii bone Fir'awna e yimɓe mun tooñooɓe, tawde alaa ko ɓe waawani Madyana; ɓe hewtataa ma fes.

Gooto e jiwɓe mawɗo on wi'i: Ƴettu mo ko aynane dammi, yo baaba. Tawde himo fotdiri e golle, sabu doole e nunɗal makko: si ko doole ɗen, o wallitoray huuwude ko o halfinaa, hoolaare nden kan, ko ko reenira kon ko o halfinaa.

Ben maɓɓe maakani Muusaa (yo ɓe his): Miɗo yiɗi resindirde maa gooto e jiwɓe am ɓen, nde teŋe makko ɗen wonata aynangol lam dammi, duuɓi jeetati. Si a timminii sappo, haray ko e sago maa, waɗɗaaki maa, tawde ko duuɓi jeetati woni haldigal ngal, ko ɓeydii ɗon woo, ko sago. Mi fonndaa ɓiɗtinirgol ma, ko sonnjata maa. A taway lam, si Alla jaɓii, ko mi jeyaaɗo e moƴƴinooɓe, hunnooɓe ahadi, mo firtataa.

Muusaa maaki: Ɗum wonii ko fottanɗen, en ɗiɗo. Kala happu mo mi timmini (woni duuɓi jeetati ɗin maa sappo), haray fow e mun, mi hunnii ko fawii lam kon; mi ɗaɓɓiroytaake ɓeydugol. Alla ko Fawiiɗo, Reenuɗo e ko halduɗen kon.

Nde Muusaa timminnoo ko ɓuri juutude e happuuji ɗin kon, woni duuɓi sappo ɗin, o nanngi laawol Misra ngol, iwgol Madyana kanko e ɓeynguure makko nden, o haynii yiite ka senngo fello Tuuri, ontuma o maakani ɓenyuure makko nden: wonee ɗoo, min mi haynike yiite. No gasa mi addana on e magge kumpital maa te'annde yiite ngen, ko huɓɓon, no gasa ka iwloron e jaangol ngol.

Nde Muusaa hewtunoo ka yiite nge o hayninoo, Joomi makko noddiri mo ka fonngo ñaamo aynde, e tummbere barkiniraande yewtidugol Muusaa e Alla, takko leggal, wonnde: ko an yo Muusaa! Ko Min woni Alla, Jeyɗo tageefo ngon fow.

E wiide kadi, bugo tuggordu maa ndun. O waɗiri ɗum, ɗoftagol Joomi makko. Nde o tinunoo hindu dillira, hondu folwo wa mboddi, o huccitiri dogirgol ndu kulol, o yeƴƴitaaki. Ontuma Joomi maako noddi mo: ko an yo Muusaa! Yiltito, wata a hulu ndun; tawde pellet, ko e hooliiɓe ndu ɓen e goɗɗi goo, jeyaaɗaa.

Alla daalani mo ontuma: Naadu junngo maa ñaamo ngon, ka dolokke maa on udditori ɗon, senngo daande, ngo yaltitay ranewo, hara ko wondaa e ɗamajam. Annabi Muusaa waɗi ɗum, ko yaltiri non, hingo wa'i wa bufenri(galaas). O wi'anaa kadi: baku juuɗe maa ɗen e maaɗa, fii no kulol ngol ɗuytora. O waɗi ɗum, kulol ngol iwi e makko. Ɗin ɗiɗi jantaaɗi, woni tuggordu ndun e junngo ngun, ko hujjaajji ɗiɗi, ɗi Joomi maa nulir-maa haa e Fir'awna e mbatu mu'un, tawnooɓe pellet, ɓe laatike yaltirɓe e ɗoftaare Alla nden, geddi e keeferaaku.

Muusaa torii Joomi mun, o maaki: Joomi, mi ittiino wonkii e maɓɓe, miɗo huli nde ɓe warata lam, si mi arii e yottingol nulal maa e maɓɓe.

Ko musiɗɗo am on Haaruuna, ɓuri lam laaɓude ɗemngal. Immindin-mo e am, ko wallitoo lam, goongina haala am, si Fir'awna e yimɓe mun arii fennugol lam. Miɗo huli wata ɓe fenniram, wano mofte yawtunooɓe woowirnoo fennugol Nulaaɓe mun, ado am.

Alla jaabori Muusaa daalirangol mo: Men semmbinirte an Muusaa, immindingol ma e musiɗɗo maa on, ko wallito maa, Men waɗana on ɗiɗo, hujja e cemmbe; ɓe hewtirtaa on bone maɓɓe, sabu Aayeeje Amen, ɗe Men nuliri on ɗen, e ɓen gomɗimɓe jokkuɓe on, fooluɓe.

Nde Muusaa ardunoo e maɓɓe Aayeeje Amen ɗen ɓannguɗe, ɓe wi'i: Ɗum wonaali, si wanaa fenaande nde Muusaa fefindii. Men naniraali ɗum baabiraaɓe amen adinooɓe ɓen.

Muusaa maakani Fir'awna: Ko Joomi am ɓuri anndude on hanndude e peewal, ngal o immode ka Makko, e on mo battane moƴƴe woodani laakara. Pellet, O malnataa tooñooɓe ɓen O dadndataaɓe koɓe hulata ko.

Fir'awna wi'ani dental mun ngal: Ko onon yo dental, mi anndanaa on reweteeɗo, si wanaa min. Ko an yo Haamaana, huɓɓanam yiite e loopal ngal, haa wula, mahiranaa lam huɓeere toowunde, ndaarugol no mi ƴellitora e Reweteeɗo Muusaa On; tawde miɗo sikki mo fenoowo, e ko o nodditorta Nulaaɗo Alla e am, min e yimɓe am.

Fir'awna e koneeli mun ɗin hattini e mawnintinagol, townitoora e leydi Misra ndin, ko aldaa e goonga. Ɓe yeddi ummital, ɓe sikki wonnde ɓe ruttitetaake ka Amen, Ñalnde Darngal, fii hasbeede leptee.

Men nanngi Fir'awna e koneeli makko ɗin, Men bugii ɓe ka maayo, ɓe yoolii haa ɓe halkiii e mun. An Nulaaɗo, tesko, ko honno battane tooñuɓe ɓen wa'unoo. Ko halkaare ɓe sakkitornoo.

Men waɗi ɓe ardiiɓe bewɓe e majjuɓe ɓen, hiɓe nodda e Yiite ngen, saakitugol majjere e keeferaaku. Ñalnde Darngal non, ɓe walliroytaake faabo ka Yiite, wurin ko lepte ɗen sowiranteeɓe, sabu ko ɓe sinciri bonɗi, ɓe noddi e majjere; ɓe winndiranaa bone huuwugol ɗum, e kala jokkuɗo ɓe e mun.

Men jokkintinira ɓe lepte ɗen ka aduna ɗoo, kuddi e jeesere. Ñalnde Darngal kadi, ko ɓe jeyaaɓe e woɗɗintinoyteeɓe e yurmeende Alla nden.

Gomɗii Men okkii Muusaa Deftere Tawreeta nden, ɓaawo nde Men nulunoo e mofte adinnoɓe ɓen, ɓe fenni Nulaaɓe ɓen, Men halkiri ɓe sabu ɗum. Nden Deftere, ko ndayginorde yimɓe ɓen: hino e mayre ko nafata ɓe, si ɓe gollitirii; e ko lorrata ɓe, si ɓe haɗitike e mun. Hino ton kadi ko ɗowa ɓe e moƴƴere, e yurmeende moƴƴere aduna e laakara. Belajo'o, ɓe annditay neemaaji Alla ɗin e maɓɓe, ɓe yetta Mo, ɓe gomɗina Mo.

A tawanooka, an Nulaaɗo, ka senngo hiirnaange fello, fewndo Men wahyinnoo e Muusaa, yamiroore nulugol mo e Fir'awna e yimɓe mun. A jeyanooka kadi e tawanooɓe ɗon ɓen, sakko heɓaa ko fillano-ɗaa yimɓe ɓen. Ko fillanto-ɗaa ɓe kon fow, ko wahyu immorde ka Alla.

Ko Menen woni taguɓe mofte ɓaawo Muusa, ɓe juutiraa duuɓi haa ɓe yejjiti ko ɓe ahodunoo e Alla kon. A hoɗaano ka yimɓe Madyana ɓen, hiɗa janngana ɓe Aayeeje Amen; si kon woni, ko Menen nulu maa, Men wahayini e maaɗa, kumpite Muusaa e ñiiɓugol makko Madyana, an kadi humpitu-ɗaa ɗum yimɓe ɓen.

A tawanooka ka senngo Fello Tuuri, fewndo Men noddunoo Muusaa, Men wahayini e makko, sakko humpitaa fii ɗum. Ko woni, Men nuliri yurmeende wonannde yimɓe ɓen, Men wahayini e maaɗa, kumpite mun ɗen, fii no jertiniraa yimɓe, ɓe Nulaaɗo jeertiniroowo ɓe no ɓe waajitora araali e maɓɓe, ado maaɗa, ɓe gomɗina ko addan-ɗaa ɓe kon immorde ka Alla.

Si wanaano ffi yo lepte yanir e maɓɓe, sabu geddi e keeferaaku maɓɓe, ɓe wi'ayno hiɓe hujjinora: Joomi amen, ko haɗno imminaa Nulaaɗo e Amen, Men jokka Aajeeje Maa ɗen, Men gollitira ɗe? Men jeyee e gomɗimɓe gollitirɓe yamiroore Joomi mun nden. Si wanaano fii wata ɓe wi'u ɗum, Men yaccinirayno lepte ɗen e maɓɓe; kono Men tonngir ɗe, ittugol nganto anngal imminaneede Nulaaɗo.

Nde Muhammadu addirannoo Quraysi'en nulal ngal, immorde ka Joomi makko, ɓe lamnditii alyahuuda en fii ɗum, ɓen lonngini ɓe ɗii hujjaaji wiide: ko haɗno Muhammadu okkee yeru ko Aajeeje ɗe Muusaa okkanoo ɗen, tindinɗe ko o Nulaaɗo Joomi makko, wano junngo ngon maa tuggordu ndun? An Nulaaɗo, maakan ɓee, kaa jaabagol ɓe: kere alyahuuda'en yeddaano ko Muusaa okkanoo kon ko adi? Ɓe wi'i wonnde Tawreeta e Alqur'aana, ko mbileeji ɗiɗi, wonɗi wallindirde. Ɓe wi'i kadi: Men yeddii ɗe ɗiɗi kala!

An Nulaaɗo, maakan ɓee: Addee Deftere jippinirande ka Alla, ɓurnde feewude Tawreeta e Alqur'aana. Si on addii nde, mi jokkaynde, si on laatike goonguɓe e ko aaƴotoɗon wonnde Tawreeta e Alqur'aana, ko mbilewu.

Si Qurayshi'en jaabitaako ma e addugol Deftere ɓurnde Tawreeta e Alqur'aana feewude, haray fellitu wonnde ko ɓe fenniri ɗe kon, tuugaaki e dalil; ko mbeleeɗe maɓɓe maɓɓe ɓe woni e jokkude. Alaa non ɓurɗo majjude, ɓuri on jokkirɗo mbeleeɗe mun ɗen, ko aldaa e peewal, immorde ka Alla. Pellet, Alla fewanataa yimɓe tooñirooɓe ko'e mun yeddugol Alla.

Gomɗii Men hewtinii e sirkooɓe ɓen e Alyhuudu en Konngol fillayeeji mofte adinooɓe, e lepte ɗe Men liɓunoo e maɓɓe, tuma nde ɓe fennunoo Nulaaɓe Amen ɓen, fii no ɓe waajitora ɗum, ɓe gomɗina, hara sugu mun heɓaali ɓe.

Ɓen tabitini e gomɗingol Tawreeta, ko adii jippagol Alqur'aana, ko ɓe gomɗinirɓe Alqur'aanaare nden, sabu ko ɓe tawi kumpite e joopanɗe fii mayre kon, ka Defte maɓɓe.

Si nde janngaama e dow maɓɓe, ɓe wi'a: Men gomɗinii nde. Ko nde goonga nde sikke alaa e mu'un, jippornde Joomi amen. Toode Men laatinoke jebbiliiɓe, ado mayre, sabu ko men gomniri ko Nulaaɓe ɓen addunoo ado mayre.

Ɓen siforiiɓe ɗin sifaaji, Alla jonnitiroyayɓe njoɓdi golle maɓɓe ɗen, laabi ɗiɗi, sabu muññagol maɓɓe gomɗina Deftere maɓɓe nden, e gomɗingol maɓɓe Muhammadu (SAW) fewndu o nulaa, hiɓe duñira moƴƴi golle maɓɓe ɗin, golle maɓɓe moƴƴe ɗen, e kon ko Men arsiki ɓe, hiɓe nafqa ɗum no moƴƴiri.

Si ɓee gomɗimɓe, jeyaaɓe e yimɓe Defte nanii konngol meerente, ɓe ɗuurnoo e maggol, ɓe wi'ana ɓen wowlu ɓe ngol: Ko menen njoɓdi golle amen woodani, ko onon kadi njoɓdi golle mon woodani. O hisirii e amen, hoynde e lorra. Men ɗaɓɓaa wondugol e majjuɓe ɓen, tawde ɗum ko lorra woodani men, ka diina e ka aduna amen.

Pellet, an Nulaaɗo, a fewnataa mo yiɗuɗaa, sugu Abuu Taalib e woɗɓe goo; kono Alla no fewna on Mo O muuyi fewnude. Ko Kano ɓuri anndude feewuɓe e laawol focciingol ngol.

Sirkooɓe Makka ɓen ngantinori jokkugol lislaamu on, ɓe gomɗina, wiide: Si men jokki oo lislaamu mo arduɗaa e mu'un, ayɓe amen ɓen biftoto men e leydi amen ndin. E Men hoɗiniraali ɓee sirkooɓe, e nokku horminaaɗo, harmuɗo rufugol ƴiiƴam, tooña e mu'un, mo ɓe hoolnii, ka dimɗe noone kala addetee e mu'un, arsike immorde ka Amen? Si ko woni, ko ɓuri ɗuuɗude e maɓɓe, ɓe anndaa ko Alla neemini kon e maɓɓe, sakko ɓe yettira Mo ɗum.

Ɗuuɗii ko Men halki e ca'e, yeddunooɓe neema Alla on, ɓe fantini junuubi e geddi; Men wurti lepte e maɓɓe, Men gayni fii maɓɓe. E hino non caabeeje maɓɓe ɗen, yimɓe no feƴƴa e majje, ɗe hoɗaaka ɓaawo maɓɓe, si wanaa seeɗa e ɓe feƴƴooɓe. Men laatii wonnde heddotooɓe, rona kammuuli ɗin e leydi ndin, e kala ko woni e majji.

An Nulaaɗo, Joomi maa siforaali halkoowo yimɓe ca'e, haa O ittirana ɓe nganto, immingol Nulaaɗo e tufulle maɓɓe ɗen, wano O imminir maa e Tufunnde Ca'e ɗen (woni Makka). Men siforaali kadi, halkirooɓe yimɓe ca'e, hara ɓen ko feewuɓe; ko Men halkirta ɓe, ko tawde ko ɓe tooñirɓe faggitagol geddi e keeferaaku.

Kala ko Joomi mon okki on e huunde, ɗum ko ko dakmitoron cuɗinoron e nguurndam aduna, hooti fii mun lanna. Ko ko woni ka Alla kon e mbarjaari mawndi ka laakara, ko ɗum ɓuri moƴƴude,woni kadi ko heddotoo. E on haqqiltaa e ɗum, fii no ɓurdiniron ko heddotoo kon e dow ko lannata kon?

E ko on mo Men fodani Aljanna e neemaaji mun ñiiɓuɗi ka laakara, wa'ata wa on mo Men dakmitiri jawle e cuɗaari nguurndam aduna, refti hara kanko on, Ñalnde Darngal, ko e tawneteeɓe ka Yiite Jahannama ɓen o jeyaa?

Ñalnde Joomi maaɓe noddoyta ɓe, O wi'ana ɓe: Ko honto kafidaaɗi am, ɗin ɗi rewaynoɗon accon Lam, aaƴoɗon wonnde ko ɗi kafidaaɗi am?

Ɓen ɓe Konngol lepte ngol jojjiri e mu'un noddooɓe e keefeeru wi'a: Joomi amen, ko ɓee woni ko Men majjinirnoo, wano men majjirnoo. Men daɗndinike e Maaɗa, immorde e maɓɓe. Wanaa menen woni ko ɓe rewaynoo, ko seytaane ɓe rewayno.

Ɓe wi'anee ontuma: noddee non kafidaaɗi mon ɗin, ko itta on e koyeera mon. Ɓe nodda ɗi, kono ɗi jaabotaako ɓe. Ɓe yi'a lepte ɗe hebilanaa ɗen, ɓe yeloo, sinno haa ɓe feewuno aduna.

Ñalnde Joomi maɓɓe noddoyta ɓe, O wi'a: ko honɗum jaabinoɗon Nulaaɓe Am, ɓe Mi nulunoo e mon ɓen?

Hujjaaji maɓɓe ɗin wumiɗana ɓe nde ñalnde, ɓe yejjita ɗi, ɓe lamndondirtaa kadi, hakkee ko ɓe ɗenƴori yananeede ɓe, wonnde ɓe leptete.

Si ko tuubuɗo e ɓen sirkuɓe, o gomɗini Alla e Nulaaɓe Makko ɓen, o golli golle moƴƴe, hino hasii ka o jeyee e malaaɓe ɓen.

Joomi maa, an Nulaaɗo, Himo taga ko O muuyi tagude, O suɓoo ko O muuyi, fii ko ɗoftoo Mo e Annabaaku. Wanaa sirkooɓe ɓen, woni ko suɓotoo, sakko ɓe yi'a ella e ko Alla suɓii kon. Senaade woodanii Mo! O laaɓii e kon ko ɓe kafidata e Makko!

Joomi maa no anndi ko ɓerɗe maɓɓe ɗen suuɗata, e ko ɓe feññinta; huunde e ɗum wirnanaaki Mo. O yoɓoyay ɓe ɗum.

Ko Kanko Alla woni, Mo reweteeɗo e goonga woo alaa, si wanaa Kanko. Ko Kanko tun yettoore woodani aduna e laakara. Ko Kanko kadi ñaawoore luttaynde nden woodanii. Ko Ka Makko tun, woni ruttorde mon, Ñalnde Darngal, fii hasbeede, yoɓee.

An Nulaaɗo, maakan ɓee sirkooɓe: Humpitee lam, si Alla waɗiranii on jemma on duumiiɗo, mo taƴondirtaa haa Ñalnde Darngal? Ko hommbo e reweteeɗi ɗin gaanin Alla, addanoyta on ndaygu ñalorma on? E on nanataa ɗii hujjaaji? Anndon reweteeɗo goo alaa, ko waɗata ɗum?

Maakan ɓe an Nulaaɗo: Yeetee lam, si Alla waɗiranii on ñalorma on, duumiiɗo haa Ñalnde Darngal, ko hommbo e reweteeɗi ɗin gaanin Alla, woni ko addonoyta jemma, mo deeƴoton e mu'un, fowtoɗon battane ronkere ñalorma nden? E on yi'ataa ɗii maandeeji? Anndon reweteeɗo goo alaa, ko waɗana on ɗum fow?

Hino e jeyaa e yurmeende Seniiɗo On, ko tawi kon O waɗiranii on, onon yimɓe ɓen, jemma on ñiɓɓituɗo; fii no deeƴiron e makko, ɓaawo ronkere golle ñalorma ɗen, O waɗirani on ñalorma on, ndayginɗo; fii no ɗaɓɓiron e makko arsike, e no yettiron neemaaji Alla ɗin e dow mooɗon, belajo'o, on yeddataa ɗi.

Ñalnde Joomi maaɓe noddoyta ɓe, O wi'a: Ko honto kafidaaɗi am, ɗin ɗi rewaynoɗon accon Lam, aaƴoɗon wonnde ko ɗi kafidaaɗi am woni?

Men adda e kala mofte, Annabaajo maɓɓe on, ko seeditoo e kuuɗe maɓɓe, immorde e yeddugol fenna, Men wi'ana fennuɓe ɓen e maɓɓe: Addee hujjaaji mon ɗin e ko yeddirayoɗon fennon kon. Ɗin hujjaaji majjitora ɓe, ɓe fellita wonnde goonga ka sikke alaa e mu'un kan, ko Alla woodani; ko ɓe fefindotonoo kon e kafidaaɗi Alla, fow majjitora ɓe.

Pellet, Qaaruuna ko e yimɓe Muusaa ɓen jeyanoo, kono o bewi e maɓɓe. Men okki mo ngaluuji jawle, tawayɗi soktirɗe mun, hino teddana ronndugol jamaa doolnuɗo. Nde yimɓe makko ɓen wi'annoo mo: wata a weltor townitaare, pellet, Alla yiɗaa weltorayɓe townitaare ɓen; wurin Himo tikkana ɓe, kadi, O leptiroyay ɓe ɗum.

Ɗaɓɓir jawle ɗe Alla okku-maa ɗen, mbarjaari galle laakara ɗen; winto-ɗaa e moƴƴere. Wata a yejjitu geɓal maa ngal ka ñaamndu e ka njaram e ka koltu ekn, ko aldaa e fantingol maa hollitagol. Moƴƴor e Joomi maa wonndude e jeyaaɓe Makko ɓen, wano O moƴƴorii non e maaɗa. Wata a ɗaɓɓu bonnirgol ka leydi faggitagol geddi e ronkude ɗoftaade. Anndu pellet, Alla yiɗaa bonnooɓe ka leydi ɓen; wurin Himo tikkani ɓe.

Qaaruuna wi'i: Ko mi okkiraa ɗee jawle, ko sabu ganndal e kattal am; ko ko mi hanndi mi heɓi. Kere Qaaruuna anndaa wonnde Alla halkiino mofte goo, ado makko, tawnooɓe hino ɓurnoo mo cemmbe, ɓurɓe jawle? kono ɗen cemmbe e jawle maɓɓe nafaano ɓe! Ñalnde Darngal, ɓomɓe ɓen lamnditoytaake fii junuubi maɓɓe ɗin, tawde Alla no humpitii fii majji. Ko fii wullinirgol ɓe e felugol ɓe, woni ko ɓe lamnditortee.

Qaaruuna yaltiri e cuɗaari mun, wonndude e ɗowtuɓe mo. Hiramɓe cuɗaai aduna ɓen e maɓɓe wi'i kisan: E jalla amen, hara nun men heɓayno cuɗaari aduna, sugu ndii ndi Qaaruuna okkaa. Pellet, kanko on, ko o jom-geɓal timmungal mawni.

Okkaaɓe ganndal ɓen kan ndi yi'unoo Qaaruuna e cuɗaari mun, ɓe nani ko ɓeya yelii kon, ɓe wi'i: Ee bone mon! Ko mbarjaari Alla ndin laakara, e neemaaji ɗi O marani gomɗimɓe Mo golli golle moƴƴe ɓen, ɓuri moƴƴude e ko Qaaruuna okkaa kon aduna. Kono hawrataa e wowlugol ngol konngol, gollitira ngol, si wanaa muññiiɓe ɓurdinooɓe ko woni ka Alla kon, e hoore ko woni aduna kon.

Men mutindini mo e galle makko ɗen, ka leydi, leptirgol mo bewre makko nden. O heɓaano jamaa ko faaboo mo gaanin Alla, o wonaano kadi faabotoowo hoore-mun.

Ɓen yelinooɓe nokku heɓugol jawle e cuɗaari makko hanki mun, ado o mutineede, ɓe waɗti nimsude ɓe waajitora wiide: En anndaa wonnde Alla no firtana arsike on, Mo O muuyani, O ɓiɗtinana Mo O muuyani? Si wanaa Alla moƴƴinoo e amen, O jogitorayno men haala amen, O mutinira men, no O mutiniri Qaaruuna. E jaka pellet, O malnataa yedduɓe ɓen, aduna e laakara. Sakkitorde maɓɓe, ko hayrugol e ɗin ɗiɗi.

Ɗen galle laakara, Men waɗanii neema e teddungal ɓen ɓe yiɗaa townitanagol jaɓugol goonga, ka leydi, wanaa kadi bonnugol e mayri. Battane moƴƴe ɗen, e ko jokkondiri e majje immorde e neemaaji Aljanna, e welayee Alla, fow ko fii hulooɓe Joomi mun ɓen woodani: ɗoftotooɓe Mo woɗɗitoo haɗaaɗi Makko.

Kala arduɗo e moƴƴere Ñalnde Darngal (wano julde, asakal, koorka ekn...) hino woodani mo cowalle nden moƴƴere makko, haa wano sappo yeru maun. Kala kadi arduɗo ton e bononnda (keeferaaku, e ñaamugol rubaa, e jeenugol ekn...) yo o anndu, huuwuɓe bonɗi ɓen yoɓetaake, si wanaa yeru ko ɓe huuwaynoo kon, ko aldaa e ɓeydaneede.

Pellet, jippinɗo Alqur'aana on O farli yottingol nde ngol e maaɗa, gollitira ko woni e mayre, ko ruttoowo ma udditugol Makka. An Nulaaɗo, maakan sirkooɓe ɓen: Ko Joomi am ɓuri anndude arduɗo e peewal, e wonɗo e majjere ɓanngunde.

An Nulaaɗo, a wonaano ado nulal ngal, tamƴininoo ɗo jippineede wahayu Alqur'aana on e maaɗa. Si wanaa tun ko e yurmeende Alla heɓirɗaa ɗum. Wata a wonu walloowo heeferɓe ɓen e majjere maɓɓe.

Wata ɓee sirkooɓe falo ma ko saɗti woo, gaay e Aajeeje Alla ɗen, ɓaawo jippineede e maaɗa, haa selaa fii janngugol ɗe yottina. Noddu yimɓe ɓen, faade e gomɗingol Alla, wootinɗina Mo, gollira sari'a Makko on. Wata a wonu jeyaaɗo e sirkanooɓe Alla ɓen; wonu bajjinɗinoowo Mo, rewa Mo Kanko tun.

Wata a rewdu e Alla, reweteeɗo goo. Reweteeɗo e goonga alaa, ko woori Mo. Huunde kala ko re'ayɗum, si wanaa Jaati Makko Kin. Ko Kanko tun, ñaawuugol ko O muuyi woodani; ko ka Makko kadi woni ruttorde mon, Ñalnde Darngal, fii hesbeede yoɓee.

Alif, Laam, Miim: yewtere sugu ɗee Aayeeje yawtiino ka fuɗɗorde cortewol (simoore)Al-Baqarah.

E yimɓe ɓen sikku, fii ɓe wi'ii: Men gomɗinii Alla, ɓe accirte non, hara ɓe jarribaaka, haa gomɗinal maɓɓe ngal ɓannga tigiri? Wanaa no ɓe sikkiri non.

Gomɗii, Men jarribike ɓen adinooɓe ɓe. Maa Alla feññinir ɓannginangol on, goonguɓe ɓen, e gomɗinal maɓɓe nagl, e fende fenuɓe ɓen e ɗum.

Kaa ko ronndoriiɓe bone sirku ekn mun kon sikku, wonnde ɓe laawoto Men, haa ɓe daɗa lepte Amen? Fii ñaawoore maɓɓe nden bonii; tawde ɓe laawotaako Alla, ɓe daɗataa kadi lepte Makko ɗen, si ɓe maayii e keeferaaku.

Kala jortiiɗo hawroygol e Alla Ñalnde Darngal, fii yo O warjo mo, yo o anndu pellet, caatal(lajal) ngal Alla happi ngal fii ɗum, ko hewtawl jooni. Ko Kanko woni Nanoowo haalaaji jeyaaɓe Makko ɓen, Annduɗo kuuɗe maɓɓe. Huunde laawotaako Mo e ɗum, O yoɓitoyay ɓe fow e mun.

Kala tiiɗniiɗo e dewal, o woɗɗitii e geddi, o wonii fii Alla, haray ko hoore-makko o tiiɗnanii; tawde nafa ɗum on, ko e makko artata. Alla kan, ko yondinii- ɗo e tageefo ngon fow; dewal maɓɓe ɓeydataa Mo, goopi maɓɓe kadi ɗuytataa Mo.

Ɓen gomɗimɓe non, ɓe muññii e jarrabuyee Amen on, ɓe golli golle moƴƴe, ma Men momtan ɓe junuubi maɓɓe ɗin, Men yoɓitiroya ɓe laakara, ko ɓuri moƴƴude e ko ɓe gollaynoo aduna kon.

Men yamirii neɗɗanke on, moƴƴugol e mawɓe makko ɓen ɗiɗo. Si mawɓe maa ɓen arii doolude ma, fii sirkangol Lam, huunde nde a alanaa ɗum ganndal (wano ko heɓunoo Sa'd ibn Abi Waqqaas (yo Alla wele mo, e jurol neene makko), wata a ɗofto ɓe e ɗum; tawde ɗoftagol alanaa tagaaɗo, e ka taguɗo On yeddetee. Ko Am tun, woni ruttorde mon, Ñalnde Darngal, Mi yeetitoo on, kon ko gollaynoɗon aduna, Mi yoɓita on ɗum.

Ɓen gomɗimɓe Alla, ɓe golli golle moƴƴe, ma Men waɗtiduɓe e moƴƴuɓe ɓen, Ñalnde Darngal. Men mooɓida ɓe, kadi, Men yoɓida ɓe fow nde wootere.

Hino e yimɓe ɓen, wi'oowo: Men gomɗinii Alla; hara non, si heeferɓe ɓen lorrii mo fii gomɗinal makko ngal, o waɗiray lorra maɓɓe kan, wano lepte Alla ɗen, o murta e gomɗinal. Si ballal kadi immorii ka Joomi maa, an Nulaaɗo, pellet, ɓe wi'ay: Meɗen wondunoo e mo'on, onon muumini'en. Kere wanaa Alla ɓuri anndude ko woni e ɓerɗe yimɓe ɓen? Huunde suuɗaaki Mo e ko woni e majje, foti ko keeferaaku maa gomɗinal. Ko honno ɓe yeetorta Alla, fii ko woni e ɓerɗe maɓɓe, ka tawata Himo ɓuri ɓe anndude ɗum?

Ma Alla feññin fii gomɗimɓe ɓen tigiri, ma O feññin kadi fii naafiqiiɓe yaltinayɓe gomɗinal ɓen, ɓe suuɗa keeferaaku ngun.

Heeferɓe ɓen wi'ani gomɗimɓe Alla ɓen: Jokkee diina amen kan, men fawtoto fii junuubi mon ɗin; hara ko menen ronnditotoo fii majji. Kono ɓe wonaali fawtotooɓe hay huunde e junuubi maɓɓe. Pellet, ko ɓe fenuɓe e kan haala maɓɓe.

Kono ɓee sirkooɓe noddooɓe e meere maɓɓe nden, ko maa ɓe fawtoo fii junuubi maɓɓe ɗi faggitii ɗin, e junuubi kala jokkuɗo ɓe, e hoore junuubi ɓen ɗon ɗin ustetaake. Ko maa kadi ɓe lamndoyee Ñalnde Darngal, gaay e kon ko ɓe faggitotonoo e meereeji ka aduna.

Gomɗii Men nulii Nuuhu e yimɓe makko ɓen, o ñiiɓi hakkunde maɓɓe, duuɓi teemeɗɗe jeenay e cappanɗe jowi, himo nodaa ɓe e wootinɗingol Alla. Kono ɓe fenni mo, ɓe lutti e keeferaaku; waame on nanngi ɓe, hari ko ɓe tooñirɓe yeddugol Alla, e fennugol Nulaaɗo Makko on, ɓe halkiraa yoolagol.

Men daɗndi Nuuhu yooloragol halakuyee, e gomɗimɓe wondunooɓe e makko ɓen ka laana; Men waɗi laana kan, waajitorka yimɓe ɓen.

An Nulaaɗo, janto kadi fillayee Ibraahiima on, nde o wi'annoo yimɓe makko ɓen: rewee Alla tun, huliron lepte Makko ɗen, ɗoftagol yamirooje Makko ɗen, woɗɗitoo haɗaaɗi Makko ɗin; ko ɗum ɓuri moƴƴannde on, si wonii hiɗon anndi.

Anndee ko rewoton kon, onon ɓee sirkooɓe, ko sanamuuji ɗi nafataa ɗi loraataa, hiɗon taƴa fenaande, aaƴagol wonnde hiɗi hanndi e reweede. Pellet, ɗin ɗi rewoton gaani Alla, ɗi waawaa on arsikude, sakko ɗi waɗa ɗum; awa ɗaɓɓiree arsike on ka Alla, tawde ko Kanko woni arsikoowo On, rewon Mo Kanko tun, yettiron Mo neema arsike on. Ko ka Makko tun, woni ruttorde mon, Ñalnde Darngal, fii hasbeede yoɓitee, wanaa ka sanamuuji mon.

Si onon ɓee sirkooɓe on fennii ko Muhammadu (jom kisiyee) addi kon, haray mofte adinooɓe on kadi feenniino Nuuhu e 'Adi e Samuuda e woɗɓe goo. Alaa ko fawii e Nulaaɗo on, si wanaa yottingol ɓanngina. Gomɗii le o yottinii e mo'on, ko Joomi makko nuli mo e mon kon.

E ɓee fennooɓe yi'aali no Alla fuɗɗorta non tagu ngun, refti O ruttitay ngu ɓaawo fii maggu gasude? Pellet, ɗum ko ko newanii Alla. Ko O hattanɗo, Mo huunde ronkintaa Mbo.

An Nulaaɗo, maakan ɓee fennuɓe ummital: yiilee ka leydi, taskoɗon no Alla fuɗɗori tagu ngun. Refti Alla wuurnitay yimɓe ɓen, e nguurndam goo, fii hasbeede. Pellet, Alla ko hattanɗo kala huunde. Huunde ronkintaa Mo. Wanaa wuurnitugol yimɓe ɓen, wano woniri non, O ronkaano tagugol ɓe ka arannde.

Himo leptira nunɗal Makko ngal, mo O muuyani e jeyaaɓe Makko ɓen, O yurminira ɓural Makko ngal, mo O muuyani e maɓɓe. Ko ka Makko tun, woni ruttorde mon, Ñalnde Darngal, fii hasbeede, ɓaawo immitineede e genaale mon.

On wonaali laawotooɓe Joomi mon, wanaa ɓoccittooɓe lepte Makko ɗen ka leydi, wanaa ka kammu; alanaa on kadi, gaanin Alla giɗo heftoowo fii mon, wanaa ballo duñanayɗo on lepte Makko ɗen.

Ɓen yedduɓe Aayeeje Alla ɗen, e hawroygol e Makko ngol Ñalnde Darngal, ɓen taƴike e yurmeende Am, tawde ɓe naatataa Aljanna poomaa, sabu keeferaaku maɓɓe ngun. Ɓen ɗon, hino woodani ɓe lepte muusuɗe, haɓɓitiiɗe ɓe ka laakara.

Nde Annabi Ibraahiima waajinoo yimɓe makko ɓen rewugol Alla tun, tertoo sanamu, jaabawol maɓɓe ngol wonaano, si wanaa wiide ɓe: waree mo, maa bugoɗon mo kaa yiite, no daɗndiron reweteeɗi mon ɗin. Kono Alla hisini mo e ngen yiite. Pellet, wonii ngon tottirgol e yiite, ɓaawoo bugeede e magge, tasakuyee, wonannde yimɓe gomɗimɓe, tawde ko ɓen ɗon tun waajitorta.

Annabi Ibraahiima maaki: anndee ko rewoton kon gaanin Alla, ko sanamuuji, ɗi rewirton, fii yiɗindirgol hakkunde mon, ka nguurndam aduna. Hooti non, Ñalnde Darngal, ngol giggol taƴoyay hakkunde mon, woɗɓe e mon yeddoya ɓeya, tuma lepte ɗen feeñata, ɓeya kadi huɗoya ɓeya, hara non, jaaƴorde mon on fow, ko ka Yiite, ka on alaa wallooɓe e ɗen lepte Alla, gile e sanamuuji mon ɗi rewaynoɗon ɗin, wanaa fere goɗɗum goo.

Annabi Luutu gomɗini mo. Annabi Inraahiima maaki: Min on, ko mi feroowo ka Joomi am, e leydi Saami barkinaandi ndin. Ko Kanko woni Fooluɗo Mo fooletaake, Mo hoynataa feruɗo ka Makko, Ñeeñuɗo e eɓɓoore Mun, e toppitannde Mun.

men yeɗi Ibraahiima Ishaaqa, e geɗal makko Yaaquuba, Men waɗi e geyngol makko ngol, Annabaaku e Deftere jipponriinde ka Alla. Men okki mo mbarjaari muñal makko ngal e hoore goonga ka aduna, moƴƴugol geyngol e mantoore labaande. Kanko on ka laakara, pellet, ko o yoɓoyteeɗo njoɓdi moƴƴuɓe ɓen, hara njoɓdi makko aduna ndin ɗuytetaake e ndi laakara ndin.

Janto kadi, an Nulaaɗo, Luutu, tuma nde o maakannoo yimɓe makko ɓen: "E on waɗay pankare ɗe gooto e winndere nden adaaki on e mun? Ko onon adii sincude koo ko haqqil hisuki salotoo.

E on aray yottoragol e worɓe ɓen ka duburi maɓɓe, fii ittugol tuuyo? Sakkoɗon seteeɓe ɓen ka laawi, haa ɓe acca feƴƴirde ɗon, sabu hulugol pankare mon? Huuwon e mbatirdu mon ndun piiji añiniiɗi, wano wirtere e lorrirgol feƴƴooɓe konngol e kuugal? Kono jaabawol yimɓe makko ɓen wonaano, si wanaa wiide ɓe: awa addan men lepte Alla ɗen ɗe hulɓinirtaa men, si tawii ko a jeyaaɗo e goonguɓe ɓen.

Annabi Luutu torii Joomi mun, ɓaawo yoorere hoore yimɓe makko ɓen, nde ɓe ɗaɓɓirnoo mo addangol ɓe lepte ɗen, o maaki: Joomi am, wallam e hoore yimɓe bonnirooɓe ka leydi ɓen, saakitugol keeferaaku e piiji kaanuɗi.

Tuma nde Malaa'ikaaɓe ɓe Men immini ɓen addannoo Ibraahiima welo-welo jibingol Ishaaqa e geɗal on ɗon, woni Yaaquuba, ɓe wi'ani mo: menen, ko men halkooɓe yimɓe ndee Saduum, saare Luutu nden.Tawde pellet, yimɓe mayre laatike tooñirooɓe kuuɗe pankare.

Annabai Ibraahiima maakani Malaa'ikaaɓe ɓen: kono Luutu no e nden saare, nde faalaɗon halkude. O tawaaka le e tooñuɓe ɓen. Malaa'ika'en jaabii: ko menen ɓuri anndude fii wonɓe ton. Ma men daɗndu mo halkagol, kanko e ɓeynguure makko nden, si wanaa debbo makko on, o jeyaama e heddotooɓe e hlakaare nden, men waɗtiday mo e maɓɓe.

Nde Malaa'ikaaɓe ɓen immini halkugol yimɓe Luutu ɓen hewtunoo ka Luutu, o saɗtiraa fii maɓɓe, arugol maɓɓe ngol sunini mo, sabu ko jiiɓodu ndu o anndiri yimɓe makko ɓen. Tawde Malaa'ikaaɓe ɓen ardirii mbaadi worɓe, yimɓe makko ɓen non, ko ittirayɓe tuuyu mun e worɓe tun. Kono Malaa'ika'en jaabii mo: wata a hulu, ɓe hewtirtaa ma bone, wata a suno kadi e ko men humpitirmaa halkugol ɓe ngol; men daɗndete an e ɓeynguure maa nden, si wanaa debbo maa on, o jeyaama e heddotooɓe e halkaare nden, men waɗtiday mo e maɓɓe.

Ko men jippinooɓe lepte e yimɓe ndee saare, huuwooɓe jiiɓoldu, immorde ka kammu, woni kaaƴe immorɗe "Sijjiil", sabu ko ɓe yaltunoo e ɗoftaare kon: hiɓe faggitoo pankare bonɗe, anndiranooɓe ittugol tuuyo mun e worɓe ɓen, acca ɗon rewɓe ɓen.

Gomɗii Men accii e nden saare nden Men halki, maande ɓanngunde, wonannde yimɓe haqqilooɓe ɓen. Tawde ko ɓen ɗon waajitorta maandeeji ɗin.

Men nuli kadi e Madyana, musiɗɗo maɓɓe on ka dammbe, Annabi Shu'aybu. O maaki: ko onon yo yimɓe am, rewee Alla tun, jortoron dewal mon ngal, mbarjaari Ñalaande sakkitiinde nden, wata on wonir e leydi ndin, gollugol bone saakita ɗum.

Yimɓe makko ɓen fenni mo. Dillaanngo ngon nanngi ɓe, ɓe waɗtini ka koɗooli maɓɓe, ko ɓe yanirɓe geece maɓɓe, moddirɓe loope ka geece, ɓe waawaa memminaade.

Men halki kadi Aadi'en, yimɓe Huudu ɓen, e Samuuda'en, yimɓe Saalih ɓen. Gomɗii ɓannganii on, onon yimɓe Makka ɓen, fii galleeji maɓɓe ɗin, Hegra e Ash-Shiħr (e nder diiwal Hadramawt ngal), Hajri seeditiɗon ko tinndinta e ko Men halkunooɓe kon, tawde koɗooli maɓɓe ɗin wontii caabeeji. Seytaane cuɗinan ɓe, kuuɗe maɓɓe keeferaaku ekn, o yilti ɓe e laawol focciingol ngol, tawi le, hiɓe senndidniri goonga kan e majjere nden, peewal ngal e bewre nden, tippude e ko Nulaaɓe maɓɓe anndini ɓe. Kono ɓe suɓii jokkugol mbeleeɗe ɗen, ɓe acca peewal ngal.

Men halki kadi Qaaruuna, mutindinirgol mo e suudu makko ndun, nde o bewunoo e yimɓe Muusaa ɓen. Men Halkidi kadi Fir'awna e jaagorɗo makko on Haaruuna, yoolugol ɓe ka maayo. Gomɗii le, Muusaa addaniino ɓe Aayeeje ɓannguɗe, tinndinayɗe wonnde ko e goonga o woni. Kono ɓe townitorii e leydi Misra ndin, salagol gomɗinde mo. Kono ɓe wonaano laawotooɓe lepte Amen ɗen.

Men leptiri kala jantaaɓe dow ɓen, halkugol ɓe: no e maɓɓe, yimɓe Luutu ɓen, ɓe Men wuurti kaaƴe sijjiila e maɓɓe; no e maɓɓe kadi, yimɓe Saalih e Shu'aybu ɓen, ɓe Men halkiri haacaango; no e maɓɓe, Qaaruuna, mo Men mutindini e galle mun ɗen; no e maɓɓe kadi, yimɓe Nuuhu ɓen e Fir'awna e Haamaana, ɓe halkiri yoolagol. Kono non, Alla siforaali tooñirɗo ɓe halkirgol junuubi ɗi ɓe faggitaaki; si ko woni, ko kamɓe tooñirnoo ko'e maɓɓe, faggitagol geddi, haa ɓe hanndi e lepte.

Misal sirkooɓe jogitiiɓe gaanin Alla ɓen sanamuuji reweteeɗi, jortagol nafa e tefoore majji, ko wano misal marijaawowal saccungal suudu ka daɗndira jaggitere. Ko ɓuri non lo'ude e cuuɗi ɗin, ko suudu marijaawo; tawde ndu dartotaako gaño. Ko non sanamuuji maɓɓe ɗin kadi wa'i, ko nafataa, ɗi lorrataa, ɗi tefataa. Kono ko si sirkooɓe ɓen anndayno ɗum, si ɓe aɗitoo jogitorgol sanamuuji ɗin, reweteeɗi gaanin Alla.

Pellet, Alla ko annduɗo kon ko ɓe rewata ko woori Mo. Hunnde e mun suuɗaaki Mo. Ko Kanko woni Fooluɗo Mo fooletaake, Ñeeño e tagu Mun e eɓɓoore Mun e toppitagol Mun.

Ɗee ko mise ɗe Men piyanta yimɓe ɓen, fii ko finndina ɓe holla ɓe goonga, fewna ɓe e mun. Ko woni tun, taskortaako ɗe no haaniri, si wanaa annduɓe sari'a e ñeñal Alla ngal.

Alla tagirii kammuuli ɗin e leydi ndin, e hoore goonga. Wanaa e meere maa fii fijindaaru O tagiri ɗi. Pellet, wonii e ngol tagugol ɗon, tinndinoore kattal ngal, fewtiniraande gomɗimɓe ɓen, tawde ko kamɓe dallinorta tagu Alla ngun, wiide taguɗo On no woodaa. Heeferɓe ɓen kan, ɓe yawtay e ɗen tinndinooje ka Winndere e hoore-maɓɓe tigiri, kono ɓe ronka waɗtannde yiila, e mawngu taguɗo On, e kattal Makko, Kanko seniiɗo On.

An Nulaaɗo, janngan yimɓe ɓen, kon ko Alla wahayini e maaɗa ka Alqur'aanaare, ñiiɓniraa julde nden no timmiri. Pellet, julde timmunde sartiiji nden, hinde haɗa juuluɗo nden, yanugol e geddi e ko añinii; tawde ɗum no ndaygina ɓerɗe ɗen, haɗa ɗe faggitagol geddi, ɗowa ɗe e golle moƴƴe. Faamee ko jantagol Alla ngol, ɓuri kala huunde mawnude. Alla no anndi ko golloton kon. Huunde e golle mon, suuɗaaki Mo. O yoɓitoyay on e ɗum: woni ko moƴƴere maa bone.

Onon gomɗimɓe ɓen, wata on yewtir Alyahuuda e Annasaara wennjirgol ɓe, si wanaa noone ɓurɗo moƴƴude on; on woni noddirgol ɓe waaju e hujjaaji ɓannguɗi, si wanaa hara ko ɓen tooñirɓe e maɓɓe sattere-noppi e mawnitaare, ɓe ɓannginani on hare. Ɓen ɗon, haɓee ɓe haa ɓe silma maa ɓe jonnira sagalle ɗen junngu e junngo hara ko ɓe jaasuɓe. Wi'anon Alyahuuda e Annasaara: Men gomɗinii nden Alqur'aanaare nde Alla jippini e amen, e ɗen ɗe O jippini e mooɗon immorde e Tawreeta e Linjiila. Reweteeɗo amen On e rewteeɗo mon On ko gooto Mo alaa kafidiiɗo e Reweede Mun e Jeygol Mun e timmal Mun. Menen on, ko Kanko tun men jebbilantoo.

Ko wano Men jippinirnoo Defte ɗen non e ɓen adi- adinooɓe ma, Men jippiniri Alqur'aana e maaɗa. Yoga e ɓee janngooɓe Tawreeta, wano ‘AbduLlaah ibn Salaam, hino gomɗiniri nde sabu ko nde joopa joopaa fii mun kon ka defte maɓɓe. Yeddataa Aayeeje Amen ɗen, si wanaa heeferɓe ɓen woowuɓe yeddugol goonga ko o feeñi woo.

A wonaano an Nulaaɗo, hiɗa janngaynoo deftere woo, ado Alque'aana. A wonaano kadi windiray-nooɗo huunde ñaamo maa ngon; tawde a janngaano. Sinno hiɗa janngunoo waawuɗaa winndugol, pellet, yimɓe majjuɓe ɓen sikkitotono Annabaaku maa ngun, ɓe dallinora wonnde ko e defte adinooɗe ɗen eggu-ɗaa.

Si ko woni fii Alqur'aana jippinaande nden e maaɗa, ko nde Aayeeje ɓannguɗe e ɓerɓe ɓen okkaaɓe ganndal e gomɗimɓe ɓen. Yeddataa Aayeeje Amen ɗen, si wanaa ɓen tooñirɓe ko'e-mun yeddugol Alla e sirkangol Mo.

Sirkooɓe ɓen wi'i: Hanno jippinee e Muhammadu maandeeji immorde ka Joomi makko sugu ɗen jippinooɗe e Nulaaɓe adinooɓe mo ɓen? Maakan an Nulaaɗo: Anndee maandeej ɗin, ko e Juuɗe Alla woni. Himo jippina ɗi nde O muuyi woo, wanaa min ɗum wonani. Min on, ko mi jertinoowo on e lepte Alla ɗen, ɓannguɗo jertinol.

Kere yonaaɓe ɓee lanndiiɓe maandeeji wonnde Men jippinii e maaɗa an Nulaaɗo, Alqur'aana hinde janngee e maɓɓe? Wonii e Alqur'anaa jippinaande nden e maɓɓe, yurmeende e waaju wonannde yimɓe gomɗinooɓe; ko kamɓe woni ko nafitorta ko woni e mayre. Men jippinanii ɓe ko ɓuri moƴƴude ko ɓe lanndii kon haa hewta ko jippinanoo e Nulaaɓe ɓen kon.

Maakan ɓe an Nulaaɗo: Alla yonii seedee goongugol ko mi addi kon, e wonnde on fennii ɗum. Himo anndi kon ko woni ka kammuuli e ka leydi, huunde suuɗaaki Mo e ɗin ɗiɗi. Ɓen non gomɗimɓe meere immorde e rewooɓe ko wanaa Alla ɓen, ɓe yeddi Alla hannduɗo e reweede On tun, ko ɓen woni sooyuɓe ɓen; sabu koɓe waɗtitiri keeferaaku ngun kon gomɗinal ngal.

Ɓee sirkooɓe no hawjirane an Nulaaɗo, lepte ɗe jertinir-ɗaa ɓe e mun ɗen. Si wanaa fii Alla hoddiranii leptugol ɓe ngol lajal ngal aditotaako ngal nennotaako, pellet, ɗen lepte ɗe ɓe hawri arayno e maɓɓe. Ɗe ardirayno ɓe juhal, hara ɓe habbanooki ɗe.

Hiɓe hawjirane ɗen lepte ɗe jertinir-ɗaa ɓe, hara non pellet, Jahannama mo Alla kammbirani heeferɓe ɓen, ko fiiltiinge ɓe. Ɓe hattanoytaa dokde lepte magge ɗen.

Ñalnde lepte ɗen suddiroyta ɓe senngo dow maɓɓe, ɗe wonta ndaɗɗudi maɓɓe ka ley koyɗe maɓɓe, Alla daalana ɓe: Meeɗee njoɓdi ko gollaynoɗon kon immorde e sirku e goopi.

Ko onon yo jeyaaɓe Am gomɗimɓe Lam! Feree iwon e leydi ndi on waawataa rewude lam, tawde pellet, leydi Am ndin ko yaajundi. Rewee Lam Min tun, wata on kafidam(renndinam) e goɗɗo goo!

Wata kulol maayde haɗu on ferugol. Kala wnkii meeɗay maayde. Refti ko ka Amen tun rutteteɗon Ñalnde Darngal fii hasbeede yoɓee.

Ɓen gomɗimɓe Alla ɓe golli golle moƴƴe ɓallinayɗe e Alla, ma Men hoɗnu ɓe ka Aljanna e cuuɗi ɗi canɗi ilata senngo ley kuɓeeje majji, ko ɓe duumo- tooɓe ton poomaa, ɓe maayataa ton haa pooma, kuuɓal woodantaaɓe toon Iskin moƴƴe- re njoɓdi gollirnooɓe ɗoftagol Alla ɓen.

Heskey moƴƴere njoɓdi ɓen gollirɓe ɗoftagol Alla, muññiiɓe e ɗoftagol Mo haɗitoo e yeddugol Mo, fawii ɓe e Joomi maɓɓe tun e kala fiyaaku maɓɓe.

Kala ruugayɗi ɗin, no ɗi foti e waade, ɗe gaynataa mooɓude arsike majji wanaa fii yooɓagol mo. Ko Alla arsikata O arsika on. Haray ngantoo alanaa on e ronkude ferde fii kulol heege. Ko Kanko woni Nanoowo haalaaji mon, Annduɗo annuyeeji e golle mon. Huunde suuɗaaki Mo e ɗum. Ma on yoɓitoy on e ɗum.

Pellet, si an Nulaaɗo a lanndike ɓee sirkooɓe: Ko hommbo tagi kammuuli ɗin e leydi ndin, O eltiri naange ngen e lewru waylondirgol? Ma ɓe wi'u: Ko Alla tagi ɗi. Ko honno non ɓe ferlitortee e gomɗin- gol Alla tun haa tawa ɓe reway ko nafataa lorrataa?

Alla no yaññana arsike on Mo O muuyi e jeyaaɓe Makko ɓen, O ɓillana on Mo O muuyi. O waɗira ɗum ñenƴal Makko ngal O anndi Kanko. Pellet, Alla ko Annduɗo kala huunde. Huunde suuɗaaki Mo e ko moƴƴani jeyaaɓe Makko ɓen.

Pellet, si an Nulaaɗo a lanndike ɓee sirkooɓe: Ko hommbo jippiniri ndiyam ka kammu, O wuurnitiri ɗam leydi ndin ɓaawo ndi yoorunoo? Ma ɓe wi'u: Ko Alla jippini ɗam, O wuurnitiri ɗam leydi ndin. Maakan ɓe an Nullaɗo: Yettoore woodanii Alla, On ɓannginɗo hujja e mooɗon. Si ko woni, ko ɓuri ɗuuɗude e maɓɓe haqqiltaa; tawde si ɓe hakkilay-noo, ɓe kafidataano e Alla ɗin sanamuuji ɗi nafataa ɗi lorrataa.

Ɗam nguurndam aduna e ko woni e majjam immorde e tuuyo e dakamme wonaali, si wanaa ko mbeleeɗe e fijindaaru ɓerɗe yowitiiɓe e majjam. Ɗum ko ko lannata heña. Pellet non, ko hoɗo laakara ngon woni nguurndam ɗam tigi, tawde ɗam heddotoo. Sinno ɓe annduno, ɓe ardintaano ko lannata kon yeeso ko lannataa kon.

Si ɓe waɗɗike ka laana, ɓe noddira Alla laɓɓinan- gol Mo Kanko tun noddaandu ndun, no O daɗndira ɓe e yoolagol. Tuma nde O daɗndi ɓe e ngol yoolo- gol, ɓe waɗta kafidude Mo e reweteeɗi maɓɓe ɗin.

Ɓe waɗti sirkude no ɓe yeddira ko Men okki ɓe kon e neemaaji, awa yo ɓe dakmitor ko Men okki ɓe kon e neweende aduna; ar ma ɓe annda battane bonnere maɓɓe nden tuma ɓe maayata.

E yedduɓe neemaaji Alla ɗin e dow maɓɓe tuma Alla daɗndunooɓe yoolagol ɓen yi'aali neemaaji goo? Ɗin woni: Wonnde Men waɗanii ɓe hormorde hoolniinde ka ɓe daɗndata ƴiiƴe maɓɓe e jawle maɓɓe? Ka tawata woɗɓe goo hino yoolora ka woniri, ɓen no waree dahee, rewɓe e ɓiɗɓe maɓɓe hoynee, jawle maɓɓe ciifee(bifte)? E ko reweteɗi maɓɓe meerente ɗin ɗi ɓe aaƴorta woni ko ɓe gomɗinta ɓe yedda neemaaji Alla ɗin ɓe ronka yettude Alla e majji?

Alaa ɓurɗo tooñirde wa on fefindiiɗo fenaande e hoore Alla o dammbira sirku e Makko, maa o fenna goonga ka Nulaaɗo Makko on addi kan. Sikke alaa wonnde ko Jahannama woni hoɗorde yedduɓe ɓen e nanndo maɓɓe.

Ɓen tiiɗnorɓe wonkiiji mun fii weltinirgol Men, ma Men hawrindin ɓe e peewal laawol Amen focciingol ngol.Ko pellet, Alla no wonndi e moƴƴinooɓe ɓen ballal, e peewal.