Fulani Mokhtasar — Rum 30:1 – Şûrâ 42:53

Alif, Laam, Miim: yewtere sugu ɗee Aayeeje yawtiino ka fuɗɗorde cortewol Al-Baqarah.

Faarisiyankooɓe ɓen foolii Ruumi'en.

Nde fooleede waɗii ka Saami ka ɓuri ɓadorde leydi Faarisi ndin. Ruumiyankooɓe ɓen non, ɓaawo ɓe fooleede, ɓe fooloyay kamɓe kadi.

Ngol kiitol ko waɗi, ko e dumunna mo hewtaa duuɓi tati o fawaa e duuɓi sappo. Ko Alla woodani fiyaaku on fow ado poolgal Ruumiyakooɓe ɓen ngal e ɓaawo maggal. Nden ñalnde nde Ruumiyankooɓe ɓen fooloyta Faarisiyankooɓe ɓen, gomɗimɓe ɓen weltoray.

Ɓe weltorayay ko Alla walliri Ruumiyankooɓe ɓen kon, tawde ɓen ko yimɓe Defte. Alla no walla on Mo O muuyani e jeyaaɓe Makko ɓen. Ko Kanko woni Fooluɗo Mo fooleaake, Hinnotooɗo jeyaaɓe Makko gomɗimɓe ɓen.

Ngal balla ko fodoore Alla wonunoo. Laatagol mayre ngol ɓeyday gomɗimɓe ɓen pellital e fodoore Alla nden. Kono ko ɓuri ɗuuɗude e yimɓe hino majjiraa ɗum sabu keeferaaku maɓɓe ngun.

Ɓe anndaa gomɗinal e ñaawooje sari'a. Ko ɓe anndii woo ko ko feeñi e nguurndam aduna ɗam e ko yowondiri e ɗaɓɓere nguuree maɓɓe e mahugol ngaddamaaku. Kono kamɓe e fii laakara on wonɗo hoɗo nguurndam ɗam tigi, ko ɓe ɗuurnii ɓe, ɓe tefataa fii mun.

E ɓee sirkooɓe fennooɓe miijitaaki fii no Alla tagiri wonkiiji maɓɓe O fotindiri ɗi? Alla tagiraali kammuli ɗin e leydi ndin si wanaa goona, O tagiraali ɗi fijindaaru, O waɗanii ɗi kadi lajal happaangal heddagol ka aduna. Anndee non, ko ɓuri ɗuuɗude e yimɓe ɓen, ko yedduɓe hawroygol e Joomi maɓɓe Ñalnde Darngal, ko ɗum haɗi ɓe hebloranagol nden ñalnde golle moƴƴe weltinayɗe Joomi maɓɓe.

E ɓee yiilaaki ka leydi ɓe taskoo ko honno battane mofte fennunooɓe ɓen ado maɓɓe wa'unoo? Ɓen laatino ɓurɓe doole, ɓe wuurniti leydi ndin remuruuji, ɓe wuuri e mayri ɓuri ko ɓee wuuri e mayri kon. Nulaaɓe maɓɓe ɓen addani ɓe hujjaaji ɓannginɗi gootaaku Alla ngun, kono ɓe fenni. Alla tooñiraa ɓe halkugol ɓe ngol, kono non, ko ko'e maɓɓe ɓe wonunoo e tooñirde jolnorgol jolirde halkaare sabu keefaraagu maɓɓe ngun .

Refti ko wonunoo battane ɓen bonnirnooɓe golle mun sirkangol Alla e golle bonɗe, ko bone ɓurɗo bondne; tawde ɓe fennii Aayeeje Alla ɗen, ɓe laatii e jalkitugol ɗe.

Ko Alla woni fuɗɗirɗo tagu ngun no ngu ko aldah e yeru gadiiɗo, refti O gayna fii maggu, refti O ruttita ngu; refti ko ka Makko Kanko tun rutteteɗon Ñalnde Darngal fii hasbeede yoɓee.

Ñalnde Darngal ngal dorotoo, bombe ɓen taƴoyto e yurmeende Alla, tawde hujja maɓɓe e yeddugol Alla ngol wonii bolle puyɗe.

Woodanoytaaɓe e kafidiiɗi maɓɓe ɗi ɓe rewynoo ɗin aduna, ko tefana ɓe daɗugol lepte ɗen, wurin ɗin yeddoyay kafiduɓeɗi ɓen; ɗi hoynoya ɓe ka ɓe hatonjinnoo e maɓɓe, kono ɗi hattanaa e, tawde ɓe fotay ka halkaare.

Ñalnde Darngal ngal darii, nden ñalnde yimɓe ɓen sertiroyay e njoɓdi yeru no ɓe gollirnoo aduna non: woɗɓe towniroyee ka Aljannaaji dow, woɗɓe jippiniroyee ley ka Yiite.

Si ko ɓen gomɗimɓe Alla ɓe golli golle moƴƴe weltinayɗe Mo, ɓen ɗon wonoyay e beeli Aljanna hiɓe weltiro ko ɓe neeminirtee ton e neemaaji duumotooɗi poomaa.

Si tawii non ko ɓen yedduɓe Alla ɓe fenni Aayeeje Amen jippinaaɗe e Nulaaɓe Amen ɓen, ɓe fenni kadi ummital e hasboore, ɓen ɗon ko tawnoyteeɓe e lepte ɗen ɓe lutta e majje.

Subbuhinanee Alla tuma naatanton kiikiiɗe; ɗum woni fewndo julde futuroo e geeƴe, subbunhinanoɗon Mo kadi tuma naatanton bimmbi; ɗum ko fewndo julde subaka nden.

Ko Kanko Alla tun mantoore woodani: Malaa'ika'en no yetta Mo ka kammuuli, tagu ngun kadi no yettira Mo ka leydi. Subbunhinane Mo saanga naatanton kiikiiɗe, ɗum woni fewndo ka Alansaraa, subbunhinanɗon Mo kadi saanga ñallonton, ɗum woni fewndo ka fanaa.

Himo yaltina ko wuuri e nder ko maayi; wano tagirgol neɗɗo immorde e toɓɓere maniiyu maa yaltinirgol cofun e nder woofoonde, Himo yaltina kadi ko maayi e nder ko wuuri, wano tagirgol Mo toɓɓere maniiyu nden immorde e neɗɗo maa woofoonde nden immorde e gertogal ngal. Himo wuurnitira leydi ndin jippingol toɓo fuɗina ndi ɓaawo ndi yoorude. Ko wano ndin leydi wuurnitiraa non fuɗingol ndi, yaltinirteɗon e genaale maon fii hasbeede yoɓee.

Hino jeyaa e maandeeji Alla mawɗi tinndinɗi kattal Makko ngal e gootankaaku Makko ngun: wonde O tagii mon onon ɓee yimɓe, immorde e mbum-mbuldi, fewndo O tagirnoo ben Aadama e loopal, refti jaka ko on ɓanndinke saakitorayɓe ɗuuɗal, saakitoɗon hiirnaange e fuɗnaange leydi ndin.

Hino jeyaa fahin e maandeeji Alla mawɗi tinndinay- ɗi kattal e gootaaku Makko, wonnde O taganii on, onon worɓe ɓen, immorde e noone mon, resondir- ɓe, fii yo on deeƴir e maɓɓe tawde ko on noone gooto, O waɗi hakkunde mon giggol e yurmeende. Wonii e ko jantaa koo, hujjaaji ɓannguɗi wonannde yimɓe miijitotooɓe, tawde ko kamɓe nafitorta gollitirgol haqqil.

Hino jeyaa kadi e maandeeji Alla ɗin tinndinɗi kattal e gootaaku Makko, tagugol kammuuli ɗin e leydi ndin, e luutondirgol haalaaji mon e nooneeji mon. Wonii e ko jantaa koo, hujjaaji ɓannganɗi yimɓe anndal e tasakuyee ɓen.

Hino jeyaa kadi e maandeeji Makko mawɗi tinnin- ɗi kattal e gootaaku Makko: ɗoyngol mon ngol jemma e ñalorma, fii fowtagol e ronkere golle mon. Hino jeyaa e majji fahin, ko O waɗirani on ñalorma on kon saakitagol e makko ɗaɓɓira Joomi mon arsike. Wonii e ko jantaa koo, hujjaaji ɓannguɗi, wonannde yimɓe nanooɓe nanugol taskoo e nanugol jaɓde.

Hino jeyaa kadi e maandeeji Makko mawɗit inndi- tnayɗi kattal e gootaaku Makko, hollirgol on maƴe ɗen ka kammu; O hawtitana on e ɗum, hakkunde kulol parñite ɗen e tama'u toɓo ngon. Himo jippini- ra kadi ka kammu ndiyam toɓo, O wuurnitira ɗam leydi ndin, fuɗingol puɗi e mayri, ɓaawo ndi yoorde Wonii e ko jantaa koo, hujjaaji ɓannguɗi, wonande yimɓe haqqilooɓe, ɓe dallinora ɗum ummital ɓaawo maayde, fii hasbeede yoɓee.

Hino jeyaa e maandeji Makko tindinɗi kattal e gootaaku Makko: tawde kammu ngun e leydi ndin no darorii yamiroore Makko ko aldaa e yanugol. Refti si o noddii noddaandu wutttugol Mala'ikaajo on allaandu ndu ka leydi, e jaka onon hiɗon yaltira e genaale mon ɗen hasbeede yoɓee.

Ko kanko tun woodani, laamagol e tagugol e toppital ɓen wonɓe ka kammuuli e ka leydi. Kala kon ko tagaa, ko ɗoftiiɓe Mo jebbilanii yamiroore Makko.

Ko Kanko woni fuɗɗorɗo tagugol ngol no ko aldah, e yeru gadiiɗo refti O ruttita ngu ɓaawo gaynugol fii maggu. Awa fuɗɗitagol ngol hino ɓuri fuɗɗagol ngol welde fii, fow mun, ɗin ɗiɗi kala hino newanii Alla; tawde si O faandanike huunde, O daalanay nde tun: "Laato", nde laatoo. Hino woodani Mo Kanko tedduɗo mawɗo On, sifa ɓurɗo toowude on e kala ko O sifortee e sifaaji mawngu e timmal. Ko Kanko woni Fooluɗo Mo fooletaak, Ñeeñuɗo e tagu Mun e toppitagol Mun.

O piyanii on misal, onon ɓee sirkooɓe, ƴettaangal e mon: Hara no woodani on e maccuɓe mon ɓen e ɓen jeytirɗon ñaame mon renndaaɗo e jawle mon ɗen, ɓe huloton senndodugol ɗen jewle e mon, wano hulirton senndodugol e dimo hawtiduɗo e mon jawle? Hara on jaɓanay ɗum maccuɗo mon? Pellet on jaɓataa ɗum. Awa ko Alla ɓuri hanndude nde O jaɓataa kafideede e tagu Makko (jeyaaɓe Makko ɓen) ka laamu Makko. Ko wano ngal misal piyirani mon, ngam Men ɓanngina hujjaaji e ɓanngannduyeeji sertuɗi, wonnde yimɓe haqqilɓe, tawde ko kamɓe nafitorta ɗum.

Wanaa waasde dalil woni sabu majjere maɓɓe, wanaa waaseede ɓannginannede kadi. Majjere maɓɓe nden, ko sabu jokkugol mbeleeɗe e ñemmbugol baabiraaɓe maɓɓe. Ko hommbo non fewnata mo Alla majjini? Hay gooto! Alanaa ɓe wallooɓe ko duñana ɓe lepte Alla ɗen.

Fewtiniri yeeso maa ngon, an Nulaaɗo e wondu- ɓe e maa ɓen, e diina Alla kan; acca kala diina si wanaa diina Makko kan. Ɗum ko diina lislaamu mo Alla tagiri yimɓe ɓen e mun. Waɗtitugol alaa e tagu Alla ngun. Ko ɗum woni diina focciika kan; kono ɓurɓe ɗuuɗude e yimɓe anndaa wonnde ko ɗum woni diina goonga.

Ruttoree e Makko tuubugol e junuubi mon, huliron Mo ɗoftagol yamirooje Makko woɗɗitoo haɗaaɗi Makko, ñinniron julde nden no timmiri, wata on jeye e sirkooɓe lunndiiɓe tagoodi ndin; ɓe kafida Alla e woɗɓe goo ka dewe maɓɓe,

Wata on wa'u wa ɓen sirkooɓe waylunooɓe diina mun, ɓe goomɗini yoga ɓe yeddi yoga, ɓe wonti pecce-pecce, fedde kala e maɓɓe no weltora meere wonnde ka maɓɓe nden, kala yi'a ko kañum tun woni e goonga, ɓeya kan ko e meere woni.

Si saɗteende memii sirkooɓe ɓen, immorde e ñawu maa baasal maa kokke, ɓe nodda Joomi maɓɓe tun, ruttitorgol e Makko yankinagol moolo e makko, fii no O huncirana ɓe saɗteende maɓɓe. Hooti si O yurmiraama ɓe huncangol ɓe nden saɗteende, e jaka fedde e maɓɓe hino yiltitoo e sirkangol kafida Joomi mun e goɗɗum goo ka du'agol.

Si ɓe yeddi neemaaji Alla ɗin, wano yeddugol ɓe neema huncaneede saɗteende nden, wonii ɓe dakmitorii ko ɓe jogitii e ɗam nguurndam, arma ɓe yi'iroya gite maɓɓe ɗen Ñalnde Darngal, wonnde ko e majjere ɓanngunde ɓe wonunoo e mun.

Ko naadi ɓe e sirkangol Alla ko aldaa e hujja? Menen, Men jippinaali e maɓɓe hujja Deftere, mo ɓe dallinorta e ko ɓe sirkanta Alla kon. Ɓe alaa kadi deftere yewtaynde fii sirku maɓɓe on, qirritantoonde ɓe sellugol ko ɓe yeddaynoo kon.

Si Men meeɗinirii yimɓe ɓen gootel e neemaaji Amen ɗin, wano cellal e ngalu, ɓe weltora ɗum weltaare dullere e townitaare. Si tawnii non ko bone on memirii ɓe - wano ñawu e baasal - sabu ko juuɗe maɓɓe ɗen faggitori kon geddi, ɗum haray ɓe taƴike yurmeende Alla nden, ɓe sikka ɗum ɗon iwataa e maɓɓe.

E ɓee yi'aali, wonnde Alla no yaññana arsike on mo O muuyani e jeyaaɓe Makko ɓen, fii ndaarnda- gol ɓe si ɓe yettay Mo maa si ɓe yedday? Himo ɓiɗtinana Mo kadi on Mo O muuyani e maɓɓe, fii anndugol si o muññoto maa o muññoo? Wonii e ɗum, maandeeji wonannde gomɗimɓe neweende e yurmeende Alla nden.

An juulɗo on, jonnu jom-ɓadal ngal ko o haandi ko, ka moƴƴugol e ka jokkugol enɗam, okkaa hatonjinɗo kadi ko humtanta mo haaju mum, walla-ɗaa tumarankeejo woɗɗitiiɗo leydi mun. Ko ngool okkugol e ɗeen geece ɓuri moƴƴude wonande ɓen faalaaɓe yarluyee Alla on; ko ɓen huntooɓe ɗin haajuuji kadi, woni maliroyteeɓe heɓugol Aljanna mo ɓe ɗaɓɓaynoo, ɓe hisa e lepte ɗe ɓe hulunoo.

Kala ko jonnirɗon yimɓe ɓen e jawle, fii no ɗe artira e mon ɓeydaari(riba), annde ɗe ɓeydotaako ka Alla. Kala non ko jonnirɗon e jawle mon ɗen, fii ko duncitoree haaju, hara hiɗon ɗaɓɓira ɗum yarluyee Alla, wanaa darja maa manteede, ko ɓen ɗon woni sowanoyteeɓe njoɓdi ka Alla.

Ko Alla gooto On hertori tagugol on, refti arsikugol on, refti warugol on wuurnita. Hara no e sanamuuji mon, ɗi rewoton gaanin Makko ɗin, waɗayndu goɗɗum e ɗin? Senayee woodanii Mo! O toowii e ko sirkooɓe ɓen wowlata ɓe fiɓa.

Bone on feeñirii ka njorndi e ka maaje, ɗuytagol nguurndam yimɓe ɓen e wonkiiji maɓɓe, nawnaaje e ñabbuuli; sabu ko ɓe golli e geddi. Ɗum feeñirii fii no Alla meeɗinira ɓe njoɓdi yoga e ko ɓe bonnuno e nguurndam aduna ɗam; belajo'o, ɓe ruttoray e Makko tuubugol.

An Nulaaɗo, maakan ɓee sirkooɓe: Yiilee ka leydi, taskoɗon ko honno battane mofte fennunooɓe adinooɓe on ɓen wa'unoo. Ɗum ko battane bonɗe wonunoo, tawde ko ɓuri ɗuuɗude e maɓɓe ko sirkanaynooɓe Alla, ɓe halkiraa sabu ɗum.

An Nulaaɗo, fewtinir yeeso maa ngon e diina lislaamu focciika kan, ado Ñalnde Darngal arde nde ruttoowo nde alaa. Nden ñalnde, yimɓe ɓen seedoya: fedde goo neeminiree ka Aljanna, ndeya fedde leptiroyee ka Yiite.

Kala yedduɗo Alla, lorra mun - woni luttugol ka Yiite - ko e makko yantata. Kala non golluɗo moƴƴere, nde o ɗaɓɓiri welayee Alla e mun, haray ɓen ɗon, ko ko'e-maɓɓe ɓe hebilani naatugol Aljanna, ɓe neeminora duumagol ton poomaa.

Ko fii no Alla yoɓira gomɗimɓe Mo ɓen, ɓe golli moƴƴuɗi welayɗi Joomi maɓɓe. Pellet, Kanko seniiɗo On, O yiɗaa yeddiduɓe Mo e Nulaaɓe Makko ɓen, hiɓe metta Mo sanne, O leptoyay ɓe Ñalnde Darngal.

Hino jeyaa e maandeeji Alla mawɗi, tinnɗinayɗi kattal e gootaaku Makko, wurtugol Mo keneeli wewlinirayɗi jeyaaɓe ɓen, hewtugol toɓo ngon, e fii yo O meeɗinir on, onon yimɓe ɓen, yurmeende Makko nden, heɓugol moƴƴere toɓo ngon, woni ... O waɗiri ɗum kadi, no laaɗe ɗen dogira muuyaaɗe Makko, e fii no ɗaɓɓiron e ɓural Makko ngal, ngeygu ka maaje, belajo'o, on yettay neemaaji Alla ɗin e mooɗon, O ɓeydana on.

Gomɗii Men nulii ado maa an Nulaaɗo, Nulaaɓe goo, haa e mofte maɓɓe ɗen, ɓe addani ɓe hujjaaji ɓannginɗi gonnga maɓɓe kan, kono ɓeya fenni ɓe. Men yottii ontuma e ɓen faggitiiɓe geddi, Men halkiri ɓe lepte Amen ɗen, Men daɗndi Nulaaɓe ɓen e gomɗimɓe wondunooɓe e maɓɓe ɓen. Daɗndugol gomɗime ɓen, faaboo ɓe, ko ko Men waɗɗini e Amen.

Ko Alla woni nuloowo immina keneeli ɗin, ɗi sogga duule ɗen; O saakitira ɗum ka weeyo no O muuyiri, ɗuuɗi fanɗi; O waɗta ɗum taƴe-taƴe. A yi'ay ontuma, an ndaaroowo on, toɓo ngon no yalta hakkunde mun. Si O hewtinii toɓo ngon e on Mo O muuyi e jeyaaɓe Makko ɓen, e jaka hiɓe weltora yurmeende Alla nden e maɓɓe, woni heɓugol toɓo, leydi ndin fuɗina ko ɓe haajitora kamɓe e neemoraaɗi maɓɓe.

Gomɗii ɓe laatinoke ado Alla jippinde toɓo ngon e maɓɓe, ko ɓe taƴinooɓe e ɗum.

Ndaarii an Nulaaɗo, battane toɓo ngo Alla jippiniri yurmeende e jeyaaɓe Makko ɓen, no O wuurnitirta leydi ndin noone e puɗi, ɓaawo ndii cojjii ndi yoori. Pellet, waɗuɗo ɗum On, ko wuurnitoowo maayɓe ɓen, Kanko ko O hattanɗo kala huunde, huunde ronkintaa Mo.

sI Men nulii henndu e gese maa e puɗi maɓɓe ɗin ko bonna fii mun, ɓe yi'i ɗen gese maɓɓe no soyɗa ɓaawo nde ɗe hecciɗunoo, ɓe waɗtinay ɓaawo ɗum, ko ɓe yeddooɓe neemaaji Alla yawtuɗi ɗin, e ɗuuɗugol majji.

Ko wano woniri non a nanintaa maayɓe ɓen e faaɗuɓe ɓen, woɗɗitorii ɓe ma fii wata ɓe nane few, ko wano non woniri a waawataa fewnude nanndo maɓɓe, ɗuurnɗiiɗo saliiɗo heɗitaade.

A wonaali fewnoo mo Alla majjini e laawol focciingol ngol, a nanintaa ko nafata, si wanaa on gomɗiinɗo Aayeeje Amen ɗen, tawde ko kanko nafitorta ko wowlata, ɓen, ko jebbilaniiɓe Men, yankiniiɓe.

Ko Alla woni taguɗo on, onon ɓee yimɓe, immorde e ndihal hoykal, refi O waɗi ɓaawo lo'ere mon entereyaagal nden, cemmbe sagatalaaku, refi O waɗi ɓaawo ɗen cemmbe, lo'ere nayeegu. Alla hino taga ko O yiɗi, immorde e ko lo'i maa ko dolni. Ko Kano woni Annduɗo kala huunde, huunde ronkintaa Mo. Hattanɗo Mo huunde ronkintaa.

Ñalnde Darangal ngal drotoo, bomɓe ɓen huɗoto ɓe ñiiɓaali ka genaale maɓɓe si wanaa saanga. Ko wano ɓe ferlisiraa e anndugol happu ñiiɓugol maɓɓe ngol ka genaale, ɓe wonanoo e firliteede aduna, gaayi e goonga.

Ɓen Annabaaɓe e Malaa'ikaaɓe ɓe Alla okki ganndal ɓen wi'a: Gomɗii on ñiiɓii e ko Alla winndi kon e ganndal Makko ngal, gila ñalnde tagaɗon haa ñalde ummital mon ngal yedduɗon. Kono onon on anndaano wonnde ummital ko waɗayɗum, yedduɗon ɗum.

Ñalnde Alla immintinoyta tagu ngun, fii hasbeede yoɓitee, ngantooji ɗi tooñuɓe ɓen fefindoytoo ɗin nafoytaa ɓe, wanaa kamɓe woni ko ɗaɓɓirtee weltingol Alla, sakko ɓe jaɓanee tuubugol ruttoo e Makko, tawde haray laawiki!

Gomɗii Men piyanii yimɓe ɓen e ndee Alqur'aanaare, ko toppitagol fii maɓɓe, kala misal. Ɗum, ko fii no goonga feeñirana ɓe e nder meere nden. Pellet, si a addanii ɓe, an Nulaaɗo, hujja goonga maa kan, ma ɓen yedduɓe Alla wi'u: On wonaali, si wanaa meerenteeɓe e ko adduɗon kon.

Ko wano ɓerɗe ɓee ɓe tawata si a addaniiɓe Aaya ɓe gomɗintaa, Alla notiraa e ɓenrde kala ɓe anndaa wonnde ko addan-ɗaaɓe kon, ko goonga.

Muñño an Nulaaɗo, e ko yimɓe maa ɓen fennete kon. Anndaa pellet, fodoore Alla faabo e foolde, ko laatotooɗum sikke alaa. Wata dunyma ɓe yananaaka e ummital ɓen duñe e hawjugol, ronkaa muññaade.

Alif, Laam, Miim: yewtere sugu ɗee Aayeeje yawtiino ka fuɗɗorde cortewol Al-Baqarah.

Ɗee Aayeeje jippinaaɗe ɗ maaɗa an Nulaaɗo, ko Aayeeje Deftere yewtaynde hikma.

Ko nde peewal e yurmeende wonannde moƴƴinooɓe golle ɓen, tottugol ɓe haqqeeji Joomi maɓɓe e jeyaaɓe Alla ɗin.

Ɓen ñinnirooɓe julde nden no timmiri, ɓe yaltina asakal jawle maɓɓe ɗen, hara kamɓe ko ɓe yananaaɓe fii ko woni ka laakara kon, immorde e ummital, e hasbeede, e warjeede e lepteede.

Ɓen siforiiɓe ɗin sifaaji, ko ɓen woni e peewal immorde e Joomi maɓɓe, ko ɓen kadi woni malirayɓe heɓugol ko ɓe ɗaɓɓunoo, e daɗugol ko ɓe hulunoo.

Hino woodi e yimɓe ɓen, nanndo An-Nađr ibn al-Ħârith, suɓotooɓe haalaaji mbeleeɗe ko yiilira yimɓe ɓen e diina Alla kan, ko aldaa e ganndal, O jogitora Aayeeje Alla ɗen jalnori. Ɓen siforaaɓe ɗin sifaaji, hino woodani ɓe lepte hoynooje ka laakara.

Si Aayeeje Amen ɗen janngaama e makko, o huccitira townitanagol nanugol ɗe, wa si tawii o nanaali ɗe, wa si tawii ko pahu woni e noppi makko. Weltinir-mo an Nulaaɗo, lepte muusuɗe habbtiiɗe mo.

Pellet, ɓen gomɗimɓe Alla ɓe golli moƴƴi ɗin, hino woodani ɓe Aljannaaji neema. Ɓe neeminoray e majji ko Alla maraniɓe kon ton.

Ko ɓe duumotooɓe nder ton. Alla fodiriiɓe ɗum fodoore gonnga nde sikke alaa e m'un. Ko Kanko woni Fooluɗo Mo fooletaake, Ñeeñuɗo e tagu Mun, e toppitagol Mun e sari'a Mun.

Alla seniiɗo On tagirii kammuuli ɗin toownaaɗi ko aldaa e tugaale, O waɗi pelle tabituɗe ka leydi fii wata ɗe dillin on, O saakiti e mayri kala noone e kulle. Men jippiniri ka kammu ndiyam, Men fuɗiniri leydi ndin kala noone e tutateeri yooɗuɗi, ko yimɓe e daabeeji nafitora.

Ko jantaa koo, ko tagu Alla. Hollee Lam onon sirkooɓe ɓen, ko honɗum ɗin rewton gaanin Alla tagi? Si ko woni, tooñuɓe ɓen no e majjere ɓanngunde, tawde ɓe kafidii Joomi maɓɓe e tagaaɗi ɗi tagataa hay huunde.

Gomɗii Men okkii Luqmaana faamu diina e anndangol piiji ɗin. Men wi'ani mo: Ko an yo Luqmaan, yettu ko Alla neeminir-maahawridine e ɗoftagol Mo ngol. Kala yettuɗo Joomi mun, haray nafa mun on ko e makko ruttitoo, Alla kan ko yonndiniiɗo e yettoore makko; kala non yedduɗo neemaaji Alla ɗin e dow mun, haray lorra yeddugol mo ngol, ko e makko yiltotoo, o lorotaa Alla huunde e ɗum, Alla ko Galo yonndiniiɗo e tagu Makko ngun fow, Yettiniiɗo e kala fiyaaku.

Janto an Nulaaɗo, tuma Luqmaana wi'annoo geɗal makko on, hari himo rerɗina mo e moƴƴere, o rentina mo e bone: Ko an yo ɓinngel am, wata a kafidu e Alla goɗɗum goo. Pellet, kafidugol Alla goɗɗum goo ka dewal, ko tooñe mawɗe, wonande wonkii faggitiiki on bakkaatu ɓurɗo mawnude, luttinoowo e Yiite.

Men yamirii neɗɗanke on, ɗoftagol jinnaaɓe makko ɓen e kala ko yeddugol Alla alaa e mu'un. Yumma makko saawirii mo ka reedu mun, tampere e hoore tampere. Entugol mon ngol, ko e nder duuɓi ɗiɗi. Men wi'ani mo: Yettu Alla e ko O neemini kon e maaɗa, hooti annditanaa jinnaaɓe maa ɓen e ko ɓe tampidi e ne'ugol ma toppito maa kon. Ko ka An tun woni ruttorde nden, Mi yoɓita kala e ko hanndi kon.

Si jinnaaɓe maa ɓen etike fawugol sirkangol Alla, wata a ɗofto ɓe e ɗum; tawde ɗoftagol alanaa tagaaɗo, e yeddugol taguɗo On. Wonndir e maɓɓe ka aduna ɗoo, ɗiggere, e jokkagol ɓe moƴƴoo e maɓɓe. Jokku laawol on ruttiiɗo faade e tawhiidi e ɗoftaare. Refti ko ka An tun, woni ruttorde mon on fow, Ñalnde Darngal. Mi humpitoya on ko gollaynoɗon kon aduna, Mi yoɓita on ɗum.

Ko an yo ɓinngel am, anndu bone maa moƴƴere, no nde fanɗiri woo, si nde fotii wa abbere, immorde e nenndi foññe, nde wona e nder fetere, hara ndi yi'otaako, maa nde wona e nooku woo ka kammuuli maa ka leydi, annndu pellet, Alla artiroyay nde Ñalnde Darngal, O yoɓita jeyaaɗo on e mayre. Pellet, Alla ko Newiiɗo, huunde wirnanaaki Mo. Ko O humpitiiɗo kadi fii kala huunde e nokku mayre.

Ko an yo ɓinngel am, ñiiɓnir julde nden tottirgol nde no timmiri, yamiraa moƴƴere, haɗaa ŋiñere, muñño-ɗaa e tampere ko heɓu-maa e ɗum. Pellet, ko yamira-ɗaa koo, ko jeyaaɗum e mawɗi ɗi Alla yamir-maa gollugol, a alaa ko suɓo-ɗaa e ɗum.

Wata a fal yeeso maa ngon e yimɓe ɓen townitaa- re, wata a yahru ka hoore leydi ñaaƴagol mantoo. Pellet, Alla yiɗaa kala ñaaƴoowo e yahdu mun, mantoroowo neemaaji mun, townitoo e yimɓe ɓen, hara o yettirtaa ɗi Alla.

Hakidnor e yahdu-maa ndun hakkunde yaawugol e nennorgol, joltinaa hito maa ngon, hara a towniraali ngo lorrugol. Anndu ko ɓuraa añeede e hitooji ɗin, pellet, ko luukaadu mbabba, sabu ko nba toowi hito kon.

E on yi'aali, onon ɓee yimɓe, wonnde Alla newianii on nafitorgol ko woni ka kammuuli kon, immorde e naange, e lewru e koode, O newinani on kadi ko woni ka leydi kon, immorde e daabeeji, e leɗɗe e puɗi. O timminnirani on neemaaji Makko ɓannguɗi, wano labeede maa moƴƴude mbaadi, e neemaaji suuɗiiɗi, wano haqqil e ganndal. E hoore ko ɗin neemaaji woodi kon fow, hino woodi e yimɓe ɓen, wennjiroowo fii wootinɗingol Alla, ko aldaa e tuuginagol e ganndal wahayu, immorde ka Alla, maa haqqil ndayginorki, wanaa fere Deftere ɓanngunde, jippiniraande ka Alla.

Si ɓee wennjooɓe fii wooɗindingol Alla ngol wi'anaama: "Jokkee wahayu mo Alla jippini on e Nulaaɗo Makko on", ɓe wi'ay: "Men jokkataa ɗum. Wurin ko ko men tawri baabiraaɓe amen ɓen kon, e rewugol sanamu, men jokka". E hara ɓe jokkay baabiraaɓe maɓɓe ɓen, hay si tawii seytaane woniino noddiroowo ɓen e ko rewugol sanamuuji majjinayɗi ɓe, ɗi ɗowira e lepte Yiite dulɓoowe ngen Ñalnde Darngal?

Kala fewtirɗo e Alla, o laɓɓinani Mo dewe ɗen, o moƴƴini golle makko ɗen, gomɗii haray o jogitike ko ɓuri hoolnaade e ko jortiiɗo daɗal jogitotoo, tawde o hulaa nde ɗum taƴata. Awa ko faade ka Alla tun, woni ruttorde fiyakuuji ɗin, O yoɓita gooto kala e hanndi.

Kala yedduɗo Alla, wata keeferaaku makko sunine suninean Nulaaɗo. Ko ka Amen tun, woni ruttorde maɓɓe Ñalnde Darngal, Men humpita ɓe ko huuwunoo e bonɗi ka aduna, Men yoɓita ɓe ɗum. Pellet, Alla ko Annduɗo ko woni e fondooji ɓerɗe. Huunde suuɗaaki Mo e ɗum.

Men dakmitiray ɓe ko Men okki ɓen kon e dakamme aduna, yeru seeɗa tun, refti Men jooñiroya ɓe e lepte saɗtuɗe Ñalnde Darngal, ɗen woni lepte Yiite.

Pellet, si an Nulaaɗo, a lamndike ɓee sirkooɓe: "Ko hommbo tagi kammuuli ɗin e leydi ndin?" Ma ɓe wi'u: "Ko Alla tagi ɗi!" Maakan ɓe: "Yettoore woodani Alla feeñinɗo hujja on e mon!". Kono ko ɓuri ɗuuɗude e maɓɓe, sabu majjere maɓɓe nden, ɓe anndaa hannduɗo e yettoore.

Ko Alla tun woodani tagu, e laamu e toppitagol kala ko woni ka kammuuli e ka leydi. Pellet, Alla, ko Kano woni Yondiniiɗo e tagu Makko ngun fow, Yettiniiɗo aduna e laakara.

Hay si tawii leɗɗe ko woni ka hoore leydi kon fow, settiraama karambi, maayo ngon waɗtaa ndaha, ngon ɓeydiraa maaje jeeɗiɗi, konnguɗi Alla ɗin lannataa, tawde wanaa ko lannata. Pellet, Alla ko Fooluɗo Mo gooto foolataa, Ñeeñuɗo e tagu Mun e toppitagol Mun.

Tagugol on, onon ɓee yimɓe, e immintingol on Ñalnde Darngal fii hasbeede yoɓee, wonaali, si wanaa wa tagugol fittaandu wooturu, immintinira ndu no newori. Pellet, Alla ko Nanoowo, Mo nanugol hito goo, haɗataa Mo nanude hito woo. Ko O Yi'oowo, Mo yi'ugol goɗɗum goo, haɗataa Mo yi'ude huunde woo. Ko wano non kadi woniri, tagugol maa immintingol wonkii woo, ronkinirtaa Mo fii wonkii goo.

E a yi'aali wonnde Alla no ɗuytira jemma on fii ɓeydugol ñalorma on, O ɗuytira kadi ñalorma on fii ɓeydugol jemma on, O eɓɓi dogudu naange ngen e lewru ndun, tawde gootel kala e majji no dogirde taarorde mun haa e dumunna happaaɗo? E wonnde All ko Humpitiiɗo ko golloton kon: huunde suuɗaaki Mo e golle mon, O yoɓitoyay on e ɗum.

Ngool toppitagol e eɓɓugol, hino seeditoo wonnde ko Alla tun woni Goonga. Ko O Goonga e Jaati Makko, e Sifaaji Makko e Golle Makko. E wonnde pellet, ko sirkooɓe ɓen rewata kon gaanin Alla, ɗum ko meere nde tuugaaki hay e nokku. E wonnde pellet, Alla, ko Kanko woni Toowirɗo hoore tagu Makko ngun, Jaati Makko, e Mbaadi Makko e Kattal Makko. On Mo tawata, alaa ko toowi ɓuri Mo, On Mawnuɗo ɓuri kala huunde.

E a yi'aali wonnde laaɗe ɗen hino dogira ka maayo e neweende Makko, fii yo O hollu on, onon yimɓe ɓen, yoga e dalilaaji tindinɗi kattal e neweende Makko. Wonii e ɗum, maandeeji tinndinɗi kattal Makko, woannde kala muññotooɗo e lorra heɓoowo mo, yettoowo neema.

Si tawii morlooɗe ɗen huuɓirii ɓe kala bannge, wa'ii wa pelle maa duule, ɓe nodday Alla tun, ɓe laɓɓinana Mo dewal e toraare; tuma nde O jaabinani ɓe, O daɗndi ɓe yoolagol, O naɓiri ɓe ka njorndi, tawi no e maɓɓe hakindiiɗo: mo waɗaali ko waɗɗii mo kon e yettugol neema on no haaniri, woɗɓe goo yeddi neema on few. Awa yeddataa Aayeeje Amen ɗen, - si wanaa kala heewuɗo janfa, sifa on ahodunooɗo e Alla, wonnde pellet, si O danɗndii mo, o tawete e yettooɓe Mo ɓen -, dullanoowo neemaaji Alla ɗin, mo yettataa Joomi mun e neema Makko on.

Ko onon yo yimɓe! Hulee Joomi mon, ɗoftoɗon yamirooje Makko, woɗɗitoɗon haɗaaɗi Makko. Hulon kadi lepte ñalaande, nde baaba duncanoytaa ɓiɗɗo mun, wanaa ɓiɗɗo on kadi duncanoyta ben mun hay huunde. Pellet, fodoore Alla nden yoɓitugol Ñalnde Darngal, ko nde tabitunde, feere mun alaa. Wata on jaɓu nguurdam aduna e welii-fotii majjam hoda on, wata seytaane hodir on ko Alla muññori on kon leelnugol leptude on.

Pellet, ko ka Alla tun woni anndal Darnagl: Himo anndi nde darotoo, Himo jippina toɓo nde O haaji. Himo annda kadi ko woni ka nder renngaaji, ko deyel kaa ko gorel? Ka malkisaaɗo kaa ko malaaɗo? Wonkii woo anndaa ko faggitoo janngo, immorde e moƴƴere maa bone, wonkii woo kadi anndaa ko e leydi honndi maayata, ko Alla heeranii anndugol ɗum fow. Pellet, Alla ko Annduɗo, Humpitiiɗo ɗum fow: huunde suuɗaaki Mo e ɗum.

Alif, Laam, Miim: fii ɗee kaalfe yewtanooma ka fuɗɗoode Simoore Albaqarah.

Jippagol ndee Alqur'aanaare nde Muhammadu (yo kisiyee) addi, ko jippiniraande e makko, immorde e Jeyɗo winndere nden.

Ɓee heeferɓe no wi'a: Muhammadu fefindi nde, o baki e Joomi maako. Ɗum wanaa non woniri! Si ko woni, ko nde goongaare nde sikke alaa e mu'un, jipporiinde ka Joomi maaɗa an Nulaaɗo, fii yo a jertin yimɓe, ɓe Nulaaɗo araano e mun ado maaɗa, hulɓinoroowo ɓe lepte Alla ɗen. Belajo'o, ɓe feewiray e goonga kan, ɓe jokka, ɓe gollitira ka.

Ko Alla woni taguɗo kammuuli ɗin e leydi ndin, O tagi ko woni hakkunde majji kon e nder balɗe jeegoo. Himo hattani tagugol ɗi e nder dumunna ɓurɗo fotoowo ma majaango. Refti O toowi O fotondiri ka dow "Arsi", no haandiri e mawngu Makko. Alanaa on, onon ɓee yimɓe, gaanin Alla, giɗo heftoowo fii mon, maa tefanoowo on ka Joomi mon. E on waajitotaako, rewon Alla taguɗo on, hara on rewidaali Mo e goɗɗum goo?

Alla no fewjana denndaangal fiyakuuji ɗin ka kammuuli e ka leydi, refti ɗi ƴeengira ka Makko, e nder ñalaande nde emmbere mun woni, duuɓi ujunere e ko limoton onon yimɓe ɓen aduna.

On fewjoowo fi ɗum ɗon fow, ko Annduɗo ko wirnii e ko feeñi, huunde suuɗaaki Mo e ɗin ɗiɗi, Fooluɗo yoftot e ayɓe mun, Mo gooto foolataa, Hinnotoo jeyaaɓe Makko gomɗimɓe ɓen.

On labinɗo kala huunde nde O tagi. O fuɗɗi tagudi Aadama ndin e loopal, no anndiranooka.

Refti O waɗi genyol makko on ɓaawo makko, tagiraaɗo e ndihal sortondir-kal, kal o yalti e mun.

Refti O timminiri tagu neɗɗanke on fotndindirgol mo, O wutti e makko Ruuhu Makko on, e jurol Malaa'ikaajo halfinaaɗo ɗum on. Refti O waɗani on onon yimɓe ɓen, nanɗe ko naniron, e giiɗe ɗe yi'iron, e ɓerɗe ɗe haqqiliron. Kono fanɗii ko yettoton ɗin neemaaji Alla e dow mooɗon.

Sirkooɓe fennuɓe ummital ɓen wi': E nee, si men maayii, fii amen mulii ka leydi, men wontii mbul-mbuldi, hara men wuurnitete kesun? Haqqil jaɓaa ɗum. Ko woni kamɓe on, ko ɓe yedduɓe ummital, ɓe gomɗinaa ɗum.

An Nulaaɗo, maakan ɓee sirkooɓe fennuɓe ummital: Ko hunnata on wara on, ko Malaa'ikaajo maayde on wakkilaaɗo ƴeetitugol pittaali mon. refti ko ka Amen gaa tun, woni ruttorde mon Ñalnde Darngal, fii hasbeede yoɓitee.

Aray nde bomɓe ɓen hoynoytee Ñalnde Darangal, ɓe ugginira ko'e maɓɓe sabu ko ɓe yeddirnoo ummital kon, ɓe so'a jaasere, ɓe wi': "Joomi amen, men yi'ii non ko men fennaynoo kon e ummital, men nanii goonga ka Nulaaɓe ɓen ardunoo e mun kan immorde ka Maaɗa, Men torike ma ruttu men ka nguurdam aduna, men golla golle moƴƴe, welayɗe Ma. Menen men yananaama non hannde, fii ummital e goonga ka Nulaaɓe ɓen addunoo kan". Sinno a tinuno bomɓe ɓen o on fiyaaku, a tinayno ko mawni.

Sinno Men muuyuno okkugol kala wonkii peewal makki, Men newinaynayno ki ɗum. Ko woni tun, Hikma An on e nunɗal an ngal waɗɗinii konngol immorde e An, hebbinirgol Jahannama on Ñalnde Darngal, yoora k'o'e en, yedduɓe ɓen ka jinna e ka yimɓe, tawde ɓe suɓike laawol yeddugol e majjere ngol, ɓe acci laawol gomɗinal e peewal ngol.

Ɓe felilorte wi'aneede Ñalnde Darnnal: "Meeɗiree lepte ɗen, sabu welsindagol mon ka nguurndam aduna, hawrugol e Alla Ñalnde Darngal, fii hasbu-gol on. Menen kadi Men accii mon ka lepte, Men tefaa ko sa'otoɗon e majje. Meeɗiree lepte Yiite ngen luttaynge, nge taƴondirtaa, sabu ko huuwaynoɗon kon e geddi ka aduna.

Anndee ko gomɗinta Aayeeje Amen jippinaaɗe e Nulaaɗo Amen on, ko ɓen ɓe tawata si ɓe waajoraama ɗen, ɓe suuyiray sujjangol Alla, ɓe subbunhinora yettugol Mo, kamɓe ɓe townitantaako rewugol Alla, maa sujjangol Mo.

Becce maɓɓe ɗen hino woɗɗitora danɗe maɓɓe ɗen ɗaanagol, ɓe aciita ɗe ɓe fewta e Alla, ɓe noddira ka julde maɓɓe e ko wonah juulde, kulol lepte Makko ɗen e tama'u yurmeende Makko nden. E senngo goo, hiɓe tottira jawle ɗe Men yeɗi ɓe ɗen, e fii Alla.

Wonkii woo anndaa ko Alla marani ɓe e ko wallinta ɓerɗe maɓɓe, ɗum ko njoɓdi maɓɓe immorde e Makko, e kon ko ɓe gollaynoo aduna, immorde e golle moƴƴe. Ko Alla tun yeɗata ndin njoɓdi mawndi.

Kala on laatiiɗo gomɗinɗo Alla, golliri yamaruyeeji Makko, o woɗɗitii haɗaaɗi Makko, o wa'ataa wa on yaltuɗo e ɗoftaare Alla. Ɓen ɗiɗo fotataa e njoɓdi yeeso Alla.

Si ko ɓen gomɗimɓe Alla, ɓe golli golle moƴƴe, njoɓdi maɓɓe ndi ɓe maranaa ndin, ko Aljannaani ɗi ɓe ñiiɓata e mun, ɗi Alla teddinirta ɓe. Ɗum ko njoɓdi ko ɓe gollaynoo golle moƴƴe kon aduna kon.

Si tawnii non ko ɓen yaltirɓe e ɗoftaare Alla nden yeddugol faggitoo geddi, haray femporde ɓen ɗon nden Ñalnde Darngal, ko ka Yiite. Ko ɓe luttooɓe e nder magge poomaa. Tuma kala nde ɓe faalaa yaltugol e magge, ɓe ruttitee e magge, ɓe deƴƴiniree wi'aneede: "Meeɗee lepte Yiite nge fennaynoɗon ngen aduna, fewndo Nulaaɓe mon ɓen hulɓiniraynoo on nge".

Ma Men meeɗinir ɓee heeferɓe fennooɓe yaltuɓe e ɗoftaare Joomi maɓɓe, saɗteende e jarrabuyee aduna, ado lepte mawɗe ɗe ɓe hebilanaa ɗen laakara, si ɓe tuubaali, belajo'o, ɓe yiltoto e ɗoftagol Joomi maaɓe.

Alaa ɓurɗo tooñude wano waajoraaɗo Aayeeje Alla ɗen, o salii waajitorde ɗe, o ɗuurnii ɗe o itti yiila e majje. Pellet, Menen, ko Men yoftotooɓe e bomɓe faggitotooɓe keeferaaru e geddi ɓen, ɗuurnotooɓe e Aayeeje Alla ɗen.

Gomɗii Men okkii Muusaa Tawreetaare nden. Wata an Nulaaɗo, a wonu e sikke e fii hawroygol e Muusaa jemma royreede e ƴawneede. Men waɗi Deftere jippinaande e Muusaa nden, fewnaynde ɓiɓɓe Israa'iila ɓen.

Men waɗi e ɓiɗɓe Israa'iila ɓen, ardiiɓe ko yimɓe ɓen ñemtina, ɓe ɗowiraɓe e goonga, tuma nde ɓe muññinoo e ɗoftagol yamaruyeeji Alla, e woɗiitagol haɗaaɗi Makko e lorra ko ɓe hawrata e noddangol diina kan, ɓe woni goonginirɓe pellital, Aayeeje Alla jippinaaɗe e Nulaaɗo maɓɓe on.

Pellet, Joomi maa an Nulaaɗo, ko Kanko senndoyta hakkunde maɓɓe, Ñalnde Darangal, e kon ko ɓe lurraynoo e fii mun aduna. O ɓanngina goonguɗo e meerente, O yoɓita kala e ko hanndi kon.

E ɓee wumu haa ka tawata feeñanaali ɓe no foti e ko Men halki e mofte adinooɓe? Kamɓe hiɓe jinnda e koɗoole ɗi ɓen hoɗunoo e mun e ɓe halkeede, kono ɓe waajitoraali fiyaaku ɓen on. Pellet, no e ngol peƴƴol ɗen mofte halkiranooɓe sabu keeferaaku e geddi mun, tasakuyee dallinorɗo goongugol kon ko Nulaaɓe maɓɓe addani ɓe immorde ka Alla. E ɓee fennuɓe Aayeeje Alla kan nanataa, ɓe jaɓa ɓe waajitora?

E ɓee fennuɓe ummital yi'ataa, wonnde Men nuliray ndiyam toɓo ngon ka leydi hokkundi, Men yaltinira ɗam remuru, ngu gelooɗi e na'i e be'i maɓɓe ñaamata e mun, e kamɓe tigirigi? E ɓe yi'ataa ɗum, ɓe anndaa wonnde fuɗinɗo leydi hokkundi ndin, ko hattanɗo wuurnitugol maayɓe?

Ɓee fennuɓe ummital no wi'ira hawjanjangol lepte ɗen : "Ko honnde tuma woni ndee ñaawoore nde aaƴiɗon, wonnde nde senndoyay hakkunde men Ñalnde Darngal, men fewra Yiita, sutoron Aljanna?"

Maakan ɓe an Nulaaɗo: "Nden fodoore, ko Ñalnde Darngal: ñalaande senndindirgol hakkunde jeyaaɓe ɓen. Nden ñalnde, ɓen yeddunooɓe Alla ɓen aduna, ɓe nafitoroytaa ko ɓen gomɗinoyta tuma ɓe yi'ata Darngal, wanaa kadi ɓe nennantee-ɓe, sakko ɓe tuubana Joomi maɓɓe, ɓe ruttoo e Makko".

An Nulaaɗo, ɗuurnorɓe ko ɓe haɓɓitii kon e majjere, haɓɓito-ɗaa ko yanata e maɓɓe kon, tawde kamɓe kan, ko ɓe haɓɓitiiɓe lepte ɗe hebilanaa ɗen.

Ko An yo Annabiijo! Duumor e kulol Alla -an e ɓen wonnduɓe e maaɗa- ɗoftagol yamiraaɗi Makko, woɗɗitoo e haɗaaɗi makko, hulaa Mo Kanko tun, wata a ɗofto heeferɓe ɓen e naafiqiiɓe ɓen e kon welata wonkiiiji maɓɓe. Pellet, Alla laatike Annduɗo ko heeferɓe ɓen e naafiqiiɓe ɓen fewjata kon, Ñeeñuɗo e tagu Mun e toppitagol Mun.

Jokku ko Alla wahayu mo Alla jippini on e maaɗa. Pellet, Alla laatike Humpitiiɗo ko golloton kon, huunde laawotaako Mo e ɗum, O yoɓitoyay on golle mon.

Fawu e Alla tun, fiyakuuji maa ɗin fow. Alla yonii reenoowo kala jeyaaɗo Makko fawiiɗo e Makko.

Ko wano woniri non Alla waɗaali ɓerɗe ɗiɗi e fulkuru gorko gooto, ko non woni O waɗiraali resondiraaɓe mon ɓen, neeniraaɓe mo ka harmugol. O waɗanaali on kadi e ne'eteeɓe mon ɓen, wontude ɓiɗɓe mon reedu. Tawde nanndintino ngon (Aẓ ẓihaar), woni ko gorko harminta ɓeyngu mon kon, e n'eugol ngol, fow ko jeyaaɗum e naamuuji ado islaamu, bonnitiraaɗi lislaamu. Ngol nanndintino e ne'ugol waɗtaa on tigi ɓiɗɗo mun, ko konngol ngol fillitorton kunduɗe mon, ngol alaa tuuginorde. Tawde ɓeyngu wontataa neene, n'eteeɗo kadi wontataa ɓiɗɗo ne'uɗo ɗum. Alla no daala goonga, fii yo jeyaaɓe Makko ɓen gollitir, Himo fewna kadi e laawol goonga.

Dammbiree ɓe aaƴorton wiide ɓiɗɓe mon ɓe e baabiraaɓe maɓɓe ɓen tigirigi, ko ɗum ɗon ɓuri nunɗude ka Alla. Si tawii non on anndaa baabiraaɓe maɓɓe ɓen, haray ko ɓe musiɗɓe mon ka diina e rinɗinaaɓe mon. Noddiree ɓe "musiɗɗo" maa "denɗu". Bakkaatu fawaaki on, si on arii faljude dammbirɗo ɓe e goɗɗo goo, kono non on bakkondiniray tewagol wi'a ɗum. Alla siforii Haforanoowo kala tuubuɗo e jeyaaɓe Makko ɓen, Hinnotooɗo ɓe, tawde O nanngitirtaa ɓe goopol.

Ko Annabiijo on (yo o his) ɓuri hanndude e gomɗimɓe ɓen diini ko'e maɓɓe, ɗum non ko e kala ko o noddi ɓe e mu'un, hay si tawii ko ko lurri ɗum ɓe faalanoo. Suddiiɓe makko ɓen, ko neeniraaɓe gomɗimɓe ɓen fow, hino harmani ɓe resugol gooto e ɓen, ɓaawo faatagol Annabiijo on. Awa kadi, joomiraaɓe enɗamaaji ɓen, ko ɓen ɓuri hanndude e gedal ndonu ka ñaawoore Alla, diini gomɗimɓe ɓen e feruɓe fii Alla ɓen ronindiraynoo- ɓe fewndo lislaamu layaynoo, kono nden ñaawoo- re montaa, si wanaa hara onon gomɗimɓe ɓen, on waɗan weliiɓe mon ɓe ronataa ɓen moƴƴere, immorde e wasiyee mo accanton ɓe, haray no newanii on. Nden ñaawoore wonii winndaande ka Alluwa reenaangal, hino waɗɗii gollitirgol nde.

Janto an Nulaaɗo, tuma nde Men ƴettidunoo e Annabaaɓe ɓen ahadi tentundi, wonnde ɓe reway Alla tun, ɓe kafidataa Mo e goɗɗum, e wonnde ɓe yottinay wahayu jippinaaɗo on e maɓɓe. Men ƴettidi ɗum e maaɗa an kadi, e Nuuhu, e Ibraahiima, e Muusaa e Iisaa geɗal Maryama on. Men ƴettidi e maɓɓe ahadi tentundi, e dow hunnugol ko ɓe haldidaa e mun yottingol Nule Alla ɗen kon.

Alla ƴettii ndin ahadi tentundi e Annabaaɓe ɓen, fii no O lamdora Nulaaɓe goonguɓe ɓen, e goonga maɓɓe kan, no ɗum deƴƴinira heeferɓe ɓen. Alla hebilanii yeddiduɓe Mo e Nulaaɓe Makko ɓen, lepte muusuɗe, ɗen woni Yiite Jahannama.

Ko onon yo gomɗimɓe Alla, ɓe golliri sari'a Makko on, jantee neema Alla on e dow mooɗon, tuma nde koneeli heeferɓe Madiina ɓen arunoo on fii haɓugol on, naafiqiiɓe Alyahuuda ɓen wallitii ɓe. Men wurti e maɓɓe henndu "Aş Şabaa" ngun faaboranoo ngu Annabiijo on, Men immini konuuli Malaa'ika ɗi on yi'aali. Heeferɓe ɓen dogi laawii, nde tawnoo ɓe hattanaa hay huunde. Alla siforii Reenuɗo ko golloton kon. Huunde suuɗaaki Mo e ɗum, O yoɓitoyay on golle mon ɗen.

Tuma nde heeferve ven huuɓitirnoo on ka dow aynde e ley mayre, senngo fuɗnaange e hiirnaange. Fewndo ontuma, gite ɗen ooñanii kala huunde, si wanaa ndaarugol ayɓe ɓen, ɓerɗe ɗen hewtiri ka lookoƴe, hakkee kulol. Jikkuɗon Alla ontuma, jikke luutondirɗe : tuma goo felliton ballal, tuma goo felliton taƴagol ɗum.

Ko e nden hare khandaq, woni ko gomɗimɓe ɓen njaribooraa e ko ɓe hawrunoo e mun, e ko ayɓe maɓɓe fottannoo e hoore maɓɓe, ɓe ɓiɗtoraa ɓiɗtannde saɗtunde, hakkee kulol. Ngon daarndo senndindiri hakkunde gomɗinɗo e naafiqiijo.

Nden ñalnde, naafiqiiɓe ɓen, e lo'uɓe fiɓnde ɓen ɓe ñawu sikke woni e ɓerɗe mun wi'uno: "Alla e Nulaaɗo Makko on fodaali wallugol men e ayɓe amen, hoɗna men e leydi ndin, si wanaa ɗayne ɗe tuugaaki nokku".

Janto kadi, an Nulaaɗo, tuma nde fedde goo e naafiqiiɓe ɓen wi'annoo yimɓe Madiina ɓen: "Ko onon yo yimɓe Yathrib (innde Madiina nden ado lislaamu), ñiiɓirde alanaa on "Sal’" takko Khandaq, yiltitee ka mon". Fedde goo e maɓɓe hino ɗaɓɓira Annabiijo on (yo o his) duŋayee yahugol ka mun, wiide cuuɗi maɓɓe ɗin ko huncaadɗi, kono le, wanaa ɗi huncaadɗi', wano ɓe aaƴori non. Ko ɓe faaliraa ngon nganto maɓɓe fenaande, ko dogugol ayɓe ɓen.

Hay si tawno ayɓe ɓen naatiranno ɓe Madiina e ɓannge ɗen fow, ɓen lanndii ɓe yiltitagol e keeferaaku sirakana Alla, pellet, ɓe waɗanayno ayɓe ɓen ɗum, ɓe tonngantanooko ngol murtugol yiltitoo e keeferaaku, si wanaa seeɗa.

Ɓaawo ɓe dogunoo ka hare Uhud, ɓee naafiqiiɓe ahoduno e Alla, wonnde ɓe si Alla tawnitiiɓe hare goo, pellet, ɓe haɓiday e ayɓe ɓen, ɓe dogirtaa ɓe kulol. Kono non, ɓe firtuno ɗum. Haray non, jeyaaɗo on ko lannditorteeɗo ko o ahodi e Alla kon yaama O haasba ɓe.

An Nulaaɗo, maakan ɓee: Pellet, dogugol nafataa on, si on dogir kulol wareede maa haɓideede, tawde laje ɗen ko happaaɗe. Si on aru dogude, hara laje mon timmaali, haray ɗum, on dakmitetaa- ke aduna, si wanaa seeɗa.

Maakan ɓe an Nulaaɗo: Ko hommbo woni daɗndoowo on e Alla, si O faandanike on ko añuɗon e maayde maa heɓideede, walla si O faandanike on ko jortiɗon e kisal maa moƴƴere? Alaa daɗndoowo on e ɗum. Ɓee naafiqiiɓe non, ɓe heɓantaa ko'e maɓɓe, gaanin Alla, giɗo heftoowo fii maɓɓe, wanaa ballo daɗndoowo ɓe e lepte Alla ɗen.

Alla no anndi ɓen sakkotooɓe woɗɓe goo e mon, fii no ɓen yiltora ɓaawo Nulaaɗo on ka hare, e ɓen wi'anooɓe musiɗɓe mun ɓen: Aree e amen, wata on tawtu mon ka hare, haa wareɗon, meɗen hulani on maayde. Ɓen ɗon non, ɓe arata e hare nden, ɓe tawtataa e mayre, si wanaa ko hawri, ɗum fow, ko no ɓe daɗndira ko'e maɓɓe wirtere, wanaa fii wallugol Alla e Nulaaɗo Makko on.

Ko wuddan ɓe on, onon gomɗimɓe ɓen, jawle maɓɓe ɗen, ɓe wallatah on e tottirdeɗe, ɓe tawtataa on kadi ka hare. E senngo goo, hiɓe wuddana on giggol maɓɓe, ɓe yiɗaa on fes. Si kulol ngol arii, tuma teeɗondiraa e ayɓe ɓen, a yi'ay hiɓe ndaare an Nulaaɗo, hara gite maɓɓe no yiilora wa mo kaangal maayde nanngi. Si kulol ngol iwii non e maɓɓe, wonii ɓe deeƴii, ɓe laggoranoo on ɗemɗe muusuɗe, fii tun wuddirangol on teetateeri maɓɓe ndin. Ɓen siforiiɓe ɗin sifaaji, ɓe gomɗinaali tigi, Alla bonnii fii golle maɓɓe ɗen. Ngol bonnugol ɗen golle maɓɓe, ko newaniiɗum Alla.

Ɓee hulɓe no sikka koneelii haɓidayɗi e Nulaaɗo on, wonndude e gomɗimɓe ɓen, ɓe yahataa fotde ɓe gaynaali fii gomɗimɓe ɓen. Hay si tawii non hoddira nde koneeli ɗin artata, ɓee naafiqiiɓe yelotono, sinno hara ko ka seraari Madiina ɓe wonndunoo e yimɓe ladde ɓen, hara hiɓe lanndoo fii mun: anndugol ko heɓi on ɓaawo piiridugol e ayɓe ɓen? Hay si ɓe tawtodano e mooɗon, onon gomɗimɓe ɓen, ɓe wallondirtaano e mon ka hare, si wanaa seeɗa nii. Wata fii maɓɓe aanin on, wanaa fere ɓe sunina on.

Gomɗii laatanike on e maaku Nulaaɗo Alla on, e golle makko ɗen, ñemtinal moƴƴal. Ɓe seenanike hoore-maɓɓe ka hare. E ko honno wuddiranton ko'e mon ɓaawo ɗum, yeeso maɓɓe? Ko ñemtinta Nulaaɗo Alla on, ko on jortiiɗo Ñalaande sakkatiinde nden, o hebilanii nde, o jantii innde Alla ko ɗuuɗi. Ammaa mo jortaaki ɗum on, o jantaaki Alla ko heewi pellet oon o ñemtintaa Nulaaɗo Alla on mo jam e kisiyee woni e mun on.

Nde gomɗimɓe ɓen yi'unoo koneeli arɗi haɓugol ɓe ɗin, ɓe wi'i: Ko ɗum woni ko Alla e Nulaaɗo Makko on fodunoo men, immorde e jarrabuyee e faabeede. Haray Alla e Nulaaɗo Makko on goongii e ɗum, tawde laatike. Yi'ugol ɗin koneeli ɓeydaali ɓe, si wanaa gomɗingol Alla, jebbilanoo Mo.

Hino e gomɗimɓe ɓen, worɓe hunnuɓe ko ahodi kon e Alla, ɓe hunni ahadi maɓɓe tabital e muñal ngal ka haɓugol fii Alla. Woɗɓe e maɓɓe waraama maa sahodini e laawol Alla, woɗɓe goo e maɓɓe, hino habbii sahodinde fii Alla. Ɓen gomɗimɓe meeɗaali waɗtitude ko ɓe ahodi kon e Alla, wano naafiqiiɓe ɓen firtirnoo ahadiiji maɓɓe non.

Ɗum, ko fii yo Alla yoɓir goonguɓe ɓen, ko ɓe hunniri ahadi maɓɓe ndin e Alla kon, ɓe hunni kala ahadi maɓɓe. E fii no O leptira naafiqiiɓe firtuɓe ahadiiji mun ɗin, si Mo yiɗi, wano warugol ɓe hara ɓe tuubaali e keeferaaku maɓɓe, maaɗum O jaɓana ɓe tuubuubuyee. Tawde pellet, Alla siforii Haforanoowo kala tuubuɗo e junuubi mun, Hinnotoɗo ontigi.

Alla ruttidii Qurayshi e Ghaṭafaan, e kala jokkuɓe ɓe, wonndude e tikkere maɓɓe nden e suno, tawde ɓe waawali mehugol fii gomɗimɓe ɓen. Alla non yonii gomɗimɓe ɓen ko ɓe haɓida e maɓɓe, tawde O wurtuno henndu, O jippini Malaa'ika. Alla siforii Cemmbe, Fooluɗo Mo gooto foolataa hoyfina.

Alla jippini ɓen wallindirnooɓe e maɓɓe, jeyaaɓe e Alyahuuda'en, e tataaji maɓɓe ɗi ɓe daɗnodraynoo e ayɓe maɓɓe, O weddii kulol e pittaali maɓɓe; tawi onon gomɗimɓe ɓen, hiɗon wara fedde e maɓɓe, dahon fedde goo e maɓɓe.

Alla jeytini on ɓaawo halkeede ɓe, leydi maɓɓe ndin e ko woni e mayri, immorde e remuru e leɗɗe tamaro. O jeytini on kadi galleeji maɓɓe e jawdi maɓɓe, O jeytini on leydi Khaybar ndi meeɗaano tippude e mun, kono on tippay e mayri. Ɗum ko fodoore e wewlinirɗum gomɗimɓe ɓen. Alla siforii hattanɗo kala huunde. Huunde ronkintaa Mo.

Ko an yo Annabiijo ! Maakan suddiiɓe maa ɓen, ɓaawo ɓe ɗaɓɓirde ma yaññangol ɓe nafaqe ndin, tawi non a maraa feere mun: Si wonii ko nguurndam aduna faalaɗon e cuɗaari majjam, haray aree e am, mi dakmitira on no seeraɗo dakmitirtee ado cergal ngal, mi seera on ontuma, cergal ngal lorra alaa e mu'un.

Si tawii non ko welayee Alla on e Nulaaɗo Makko on faalaɗon, e Aljanna on ka galle laakara, haray muññodee e fiyaaku mon on, tawde pellet, Alla maranii kala moƴƴinɗo muñal mun e gonndigal mon e mooɗon, nojiɓdi mawndi.

Ko onon yo suddiiɓe Annabiijo on! Kala adduɗo e mooɗon goopo ɓanngungol, o sowante lepte ɗen Ñalnde Darngal, cowalle ɗiɗi, sabu maqaamu e teddungal makko ngal, e fii laɓɓingol Annabiijo Alla on (yo o his). Ngol sowugol ɗen lepte, wonii ko newanii Alla.

Kala e mon duumiiɗo e ɗoftagol Alla e Nulaaɗo Makko on, o golli golle moƴƴe, weltinayɗe Alla, Men yoɓiray mo njoɓdi makko ndin cowalle njoɓdi rewɓe heddii ɓe ɓen, kadi, Meɗen marani mo ka laakara, njoɓdi teddundi, woni Aljanna.

Ko onon yo suddiiɓe Annabiijo Muhamadu (yo o his), ka ɓural e ka teddungal, on wa'aa wa gooto e suddiiɓe ɓen, wurin ko onon ɓurata ɗin ɗiɗi, si woni on ɗoftike yamirooje Alla ɗen on woɗɗitike haɗaaɗi Makko ɗin. Wata on yergin konngol ka yewtidugol maa newnon sawtuuji mon e worɓe njanamɓe ɓen, sakko on mo ñawu tuuyo rewɓe woni e ɓernde mun, tamƴinorta ɗum goɗɗum. Wowlee konngol woɗɗitiingol kala sikkitaare: konngol hittungol, soobinungol fotde haaju tun.

Tabitee ka cuuɗi mon, hara on yaltiraali ton si wanaa fii haaju himmuɗo. Wata on feññinir cuɗaari mon ndin, wano ɓen rewɓe ado lislaamu gerdiray-noo fii pooɗugol worɓe ɓen e maɓɓe. Ñiiɓniree julde nden no timmiri, yaltinon asakal jawle mon ɗen, ɗoftoɗon Alla e Nulaaɗo Makko on. Anndee ko Alla faandii, ko martingol on e soɓe e bone, onon suddiiɓe e rewɓe suudu Nulaaɗo Alla on, e nde O laɓɓinirta pittaali mon, jikkuuji tedduɗi, woɗɗitina ɗi e bonɗi jikkuuji, laaɓiron laaɓal timmungal e ɗum, hara tuundi woo heddotaako e mun.

Janntee ko wonaa e janngeede ka cuuɗi mon, immorde e Aayeeje Alla jippinaaɗe e Nulaaɗo Makko, e Sunna Nulaaɗo Makko laaɓuɗo on. Pellet, Alla laatike e mooɗon, onon suddiiɓe Nulaaɗo on, neeminirɗo on jeyeede e yimɓe suudu Annabiijo Makko on, Humpitinooɗo fii mon saango O suɓinoo on wonnde suddiiɓe Nulaaɗo Makko on, O suɓii on kadi wonnde neeniraaɓe denndaangal gomɗimɓe mofte makko ɗen.

Pellet, hoykinanii ɓe Alla ɓen ɗoftagol e yankinaare, e worɓe e rewɓe gomɗimɓe Alla ɓen, e worɓe e rewɓe ɗoftiiɓe Alla ɓen, e worɓe e rewɓe goongu-ɓe e gomɗinal e konngol maɓɓe, e worɓe e rewɓe muññiiɓe e ɗoftaare e haɗitagol geddi e bononnda, e worɓe e rewɓe sakkorayɓe jawle maɓɓe ɗen farilla e sunna, e worɓe e rewɓe hoorayɓe farilla e sunna ɓen, e worɓe e rewɓe reenirɓe farjuuji maɓɓe ɗin suuɗugol ko huncata kala ko Alla harmini ndaarugol kon, e woɗɗitagol pankare jeeno e ko nanndi, e worɓe e rewɓe ɗuuɗuɓe janntagol innde Alla ka ɓerɗe e ka ɗemɗe maɓɓe, kene e gunndoo: Alla maranii ɓen, haforaneede junuuɓi, O maranii kadi njoɓdi mawnundi Ñalnde Darngal, ndiin woni Aljanna.

Sellantaa gomɗinɗo gorko, wanaa kadi gomɗinɗo debbo, si tawii Alla e Nulaaɗo Makko on ñaawii huunde, nde suɓagol jaɓude maa salaade wonan- taɓe e ɗum. Kala non yedduɗo Alla e Nulaaɗo Makko on, haray o majjirii laawol focciingol ngol, majjere ɓanngunde.

Janto an Nulaaɗo, tuma nde maakannayno-ɗaa on mo Alla neeminiri neeme lislaamu, an kadi moƴƴori-ɗaa e makko rinɗingol mo -ko on woni Zayd ibn Haarithah (yo Alla wele mo), fewndo o arunoo diisinagol maa fii seerugol suddiiɗo makko on Zaynab bint Jahsh : Jogitano hoore-maa suddiiɗo maa on, wata a seeru mo. Huliraa Alla ɗoftagol yamirooje Makko ɗen, woɗɗitoo haɗaaɗi Makko ɗin. Hari an Nulaaɗo, hiɗa suuɗa e fonndo maa, kon ko Alla wahayini e maaɗa, fii resugol ma Zaynab on, kulol feloore yimɓe ɓen, kono non, Alla feññinay fewjoore Zayd nden fii seerugol Zaynab, an kadi resitaa mo. Ko Alla ɓuri jojjude nde hulataa e fii ɗum. Nde ɓernde Zayd iwunoo e suddiiɗo on haa o seeri mo, Men resinir-maa mo fii wata ɓiɗtteende heɓu gomɗimɓe ɓen, e restugol rewɓe ɓiɗɗinaaɓe maɓɓe ɓen, si ɓen seerii ɓe, edda maɓɓe timmii. Yamiroore Alla nden, ko huuweteende, alaa haɗoowo nde.

Feloore alanaa Annabiijo on Muhammadu (yo o his) e kon ko Alla daginani mo e resitugol seeraaɗo nodditiraaɗo makko on. Ko laawol Annabaaɓe adinooɓe mo ɓen o jokki ɗon, wanaa kanko woni ko fuɗɗi ɗum e Nulaaɓe ɓen. Haray ko Alla ñaawata kon, e fii timmintingol ngal dewgal e bonnitugol ɓiɗɗinagol ngol, piiji ɗi Annabiijo on alaa feere e mun, ko ñaawoore huuweteende, nde ruttitetaake.

Ɓen Annabaaɓe yottinooɓe nule Alla ɗen jippinaaɗe e maɓɓe, haa e mofte maɓɓe, ɓe hulataa hay gooto si wanaa Alla seniiɗo On. Ɓe haajaaka e ko goɗɗo wi'ata e ko ɓe waɗata e kon ko Alla daginani ɓe. Alla yonii reenoowo golle jeyaaɓe Makko ɓen, fii no O hasbira ɓe e majje, O yoɓita ɓe moƴƴere maa bone.

Muhammadu wonaali baaba hay gooto e worɓe mon, wanaa o baaba Zaydu, sakko harmana mo resitugol seeraaɗo makko. Ko o woni, ko Nulaaɗo Alla e yimɓe ɓen, e timmoode Annabaaɓe, Annabiijo woo arataa ɓaawo makko. Alla laatike Annduɗo kala huunde, huunde suuɗaako Mo e fiyakuuji jeyaaɓe Makko ɓen.

Ko onon yo ɓen gomɗimɓe Alla, ɓe golli ko O yamiri ɓe kon, jantoree Alla ɓerɗe mon, e ɗemɗe mon e terɗe mon, jantoore ɗuuɗunde.

Seniniron Mo subbunhinagol e haylilugol bimmbi e kiikiiɗe, sabu ɓure majji ɗin.

Ko Kano woni yurmeteeɗo on manta fii mon. Malaa'ikaaɓe Makko ɓen kadi du'orana on, fii no O yaltinira on e niɓe keeferaaku, faade e annoore liimanaaku. O siforii hinnotooɗo gomɗimɓe ɓen, tawde O leptataa ɓe si ɓe ɗoftike Mo ɓe gollii yamiraaɗi Makko ɗin ɓe woɗɗitii e haɗaaɗi Makko ɗin.

Hiwrondiral gomɗimɓe ɓen ñalnde ɓe hawroyte e Joomi maɓɓe, ko "kisiyee e daɗugol kala bone", Alla maranii ɓe mbarjaari teddundi, ndin woni Aljanna Makko on, njoɓdi maɓɓe e ko ɓe ɗoftii Mo kon, ɓe woɗɗitii e yeddugol Mo.

Ko an yo Annabiijo ! Men nulirii ma e yimɓe ɓen, fii yo a seedito e maɓɓe, wonnde a yottinii ko nula-ɗaa e maɓɓe kon, e fii wewlinirgol gomɗimɓe ɓen e maɓɓe, kon ko Alla marani ɓe ka Aljanna, e hulɓingol heeferɓe ɓen, kon ko Alla hebilani ɓe e lepte Makko.

Men nulirii ma fahin, noddiroowo e wootinɗingol Alla, ɗoftoroo Mo yamirooje Makko ɗen, Men nulir maa kadi ndaygu jalɓungu, ngu kala faalaaɗo peewal ndayginorta.

Humpitu gomɗimɓe Alla ɓen, gollooɓe ko O sar'inani ɓe kon, huunde welaynde ɓe, wonnde hino woodani ɓe ka Alla seniiɗo On, ɓural mawnungal: moftungal wallugol ɓe aduna, e malnugol ɓe laakara, naatugol Aljanna.

Wata a ɗofto heeferɓe ɓen e naafiqiiɓe ɓen, e kon ko ɓe nodditorta e falagol diina Alla kan, ɗuurno ɓe. Hino hasii ka ɗum waɗata ɓe gomɗina ko addan-ɗaa ɓe kon. Fawu e Alla fiyakuuji maa ɗin, wano faabeede e ayɓe maa. Sabu Alla yonii fawtotooɗo, Mo jeyaaɓe Makko ɓen fawotoo e mun aduna e laakara.

Ko onon yo ɓe gomɗimɓe Alla, ɓe golli ko O sar'inani ɓe kon, si on humanii rewɓe gomɗimɓe ɓen dewgal, refti on seerii ɓe ado on yottaade e maɓɓe, haray alanaa on e maɓɓe, edda woo, foti ko limirteeɗo laaɓal maa limirteeɗo lebbi, tawde rengaaji maɓɓe ɗin no laaɓiri waaseede yottagol e maɓɓe. Haray dakmitirii ɓe jawle mon ɗen, yeru mon on, fii jeejugol ɓe jaɓugol cergal ngal, jonnitiron ɓe mawɓe maɓɓe ɓen, ko aldaa e lorrugol ɓe.

Ko an yo Annabiijo ! Men daginanii ma suddiiɓe maa ɓe jonnu-ɗaa teŋe ɓen, e ɓen horɓe ɓe jeyu-ɗaa, ɓe Alla yeɗu-maa e dahaaɓe ɓen. Men daginanii ma kadi resugol jiwɓe bappa maa ɓen, e jiwɓe gorgilaaɓe maa ɓen, e jiwɓe kaawu maa ɓen, e jiwɓe neeniraaɓe maa; ɓen feriduɓe e maaɗa Makka haa Madiina. Men daginanan maa kadi resugol suddiiɗo gomɗinɗo, yeɗuɗo ma hoore-mun, ko aldaa e teŋe, si tawii hiɗa yiɗi resude mo. Resugol on yeɗuɗo hoore-mun non, ko heeranii ɗum Annabiijo on (yo o his), dagantaako goɗɗo goo e mofte ɗen. Gomɗii Meɗen anndi ko Men waɗɗini e gomɗimɓe ɓen kon, fii suddiiɓe maɓɓe ɓen; woni dagantaako ɓe resugol ɓuri rewɓe nayo, Meɗen anndi kadi ko Men sar'inani ɓe kon e horɓe maɓɓe ɓen; woni hino daganoo ɓe dakmitorgol ɓen, no ɓe haajiri, yeru ko ɓe yiɗi e maɓɓe. Men daginanii ma ko jantaa koo, e ko Men daginanaali woɗɓe goo, fii wata ɓiɗteende wonu e maaɗa. Alla siforii haforanoowo kala tuubuɗo e jeyaaɓe Makko ɓen, Hinnotooɗo ɓe.

Hiɗa nennintina an Nulaaɗo, on mo yiɗu-ɗaa nennitude jemma mun, e rewɓe maa ɓen, hara a waaldaali e ontigi, ɓaɗtinaa on mo yiɗu-ɗaa ɓaɗnitude e maɓɓe, e on mo ɗaɓɓu-ɗaa wondugol e ɓen ɓe nennitu-ɗaa, bakkaatu woo fawaaki ma e ɗum. Ngol suɓingol ma, yaajinane, ko ɗum ɓuri ɓadaade e ko wallinta ɓerɗe suddiiɓe maa ɓen, ɓe weltora kadi ko okku-ɗaa ɓe kon, ɓe fow maɓɓe; tawde hiɓe anndi a accaali ko waɗɗii, a ɗalaali kadi haqqee. Alla non, ko Annduɗo ko woni e ɓerɗe mon, onon worɓe ɓen, immorde e ko ɓerɗe yiilorta e yoga e rewɓe mon, gaanin yoga. Alla siforii Annduɗo golle jeyaaɓe Makko ɓen, huunde suuɗaaki Mo e majje, Muññiiɗo Mo hawjantaa yagginorgol ɓe, fii no ɓe tuubira, ɓe ruttoo e Makko.

An Nulaaɗo, rewɓe goo dagitantaako ma resugol, ɓaawo suddiiɓe maa ɓen, dagantaako ma kadi seerugol ɓe, maa seerugol woɗɓe e maɓɓe fii no resi woɗɓe goo, hay si ŋari ɓen ɓe faala-ɗaa resude haawnii ma. Ko woni tun, hino dagano maa dakmitorgol horɓe ɓe jeyru-ɗaa ñaamo maa ɓen, ko aldaa e happugol adadu limoore. Alla laatike annduɗo kala huunde, tommbiiɗo. Ndee ñaawoore hino tinndina ɓure neeniraaɓe gomɗimɓe ɓen, tawde seerugol ɓe haɗaa ma.

Ko onon yo ɓen gomɗimɓe Alla, ɓe gollitiri ko o sar'inani ɓe kon, wata on naatu dey e cuuɗi Annabiijo on, si wanaa nde cakkintina ɗon naatde noddeede e ñaametee, wata on neeɓitu ɗon kadi habbagol ɓendude ñaametee. Ko woni tun, si on noddaama e ñaametee, naatee, si on nafike, sentoɗon, hara on hedditaaki ɗon e fuɗɗitagol jewte hakkunde mon. Anndon pellet, ngol hedditagol ɗon, hino lorraynoo Annabiijo on, kono o hersa ɗaɓɓirgol on hootugol, Alla non, O ɗalataa yamirgol goonga, ko ɗum waɗi si O yamiri on hootugol, fii wata on lorrir Nulaaɗo on, hedditagol ɗon. Si on ɗaɓɓiray suddiiɓe Annabiijo on haaju, wano miran ekn, haray ɗaɓɓiree ɓe ɗum, e ɓaawo wirngallo, wata eto tintodugol e maɓɓe, sakko tiniron ɓe gite mon; Ɗum ko fii reenirgol ɓe teddungal Nulaaɗo Alla on (yo o hsi). Ko ɗum ɓuri laaɓannde ɓerɗe mon ɗen e ɓerɗe maɓɓe ɗen, hara seytaane ɓisortaa e ɓerɗe mon maa ɓerɗe maɓɓe, sowonsino e cuɗingol ŋiñere. Haananaa on, onon gomɗimɓe ɓen, nde lorriton Nulaaɗo Alla on, hedditorgol ka makko yewtere, dagantaako gooto e mon kadi, resugol suddiiɓe makko ɓen, ɓaawo faatagol makko; tawde ko ɓe neeniraaɓe gomɗimɓe ɓen, dagantaako le hay e gooto, resugol yumma mun. Anndon pellet, kon ko lorrirton mo, wano resugol suddiiɓe makko ɓen ɓaawo maayde makko, ko harmuɗum, jeyaaɗum e bakkaatu mawɗo ka Alla.

Si on feññinii huunde e golle mon ɗen, maa on suuɗanii ko'e-mon, haray pellet, hay huunde e mun suuɗaaki Alla. Alla laatike annduɗo kala huunde, huunde suuɗaaki Mo e golle mon ɗen ekw, O yoɓitoyay on golle mon ɗen, moƴƴi maa boni.

Bakkaatu fawaaki sudiiɓe ɓen, nde woɗɓe yiirata ɓe ɓaawo hijaabu, ɓe woni: Baabiraaɓe maɓɓe ɓen, e ɓiɗɓe maɓɓe ɓen, e banndiraaɓe maɓɓe ɓen, e ɓiɗɓe banndiraaɓe maɓɓe ɓen, e ɓiɗɓe ɓanndiraaɓe maɓɓe rewɓe jeydaaɓe ka dammbe e ka muynan. Bakkaatu fawaaki ɓe kadi, nde ɓe yewtidata e ɓee ɗoo, ko aldaa e hijaabu, ɓen woni: Suddiiɓe gomɗimɓe ɓen, e ɓen horɓe ɓe ɓe jeyiri ñaame maɓɓe. Haray non, onon suddiiɓe gomɗim- ɓe ɓen, hulee Alla e ko O yamiri kon e ko O haɗi kon. Anndon, Himo seedii e ko feeñata e mon kon, iwra e mon.

Pellet, Alla no mantude Nulaaɗo on ka Malaa'ikaaɓe Makko ɓen, Malaa'ikaaɓe Makko ɓen kadi, hino du'anaade mo. Ko onon yo ɓen gomɗim- ɓe Alla, ɓe golli ko O sar'inani jeyaaɓe Makko ɓen kon, juulee e Nulaaɗo On, toranoɗon mo kisiyee.

Pellet, ɓen lorrirooɓe Alla e Nulaaɗo Makko on konngol e kuugal, Alla huɗii ɓen, O woɗɗintinii ɓe e yurmeende Makko nden aduna e laakara, O hebilanii ɓe kadi ton, lepte hoynooje, njoɓdi ko ɓe faggitori kon lorrugol Nulaaɗo Makko on.

Ɓen kadi lorrooɓe gomɗimɓe worɓe ɓen e gomɗimɓe rewɓe ɓen, woni konngol maa kuugal, e hoore ko ɓe faggitanaaki, pellet, ɓen ɗon ronndike fenaande e bakkaatu ɓannguɗo.

Ko an yo Annabiijo! Maakan suddiiɓe maa ɓen, e jiwɓe maa ɓen, e genndiraaɓe gomɗimɓe ɓen, yo ɓe tuggorta wutteeji (dolekkeeji maɓɓe juuti) ɗi ɓe ɓoornotoo ɗin, fii wata terɗe maɓɓe ɗen hunco yeeso worɓe njanamɓe ɓen. Ko ɗum ɓurata ɓaɗtaade, nde ɓe annditee wonnde ko ɓe rinɗuɓe, hara gooto lorrataa ɓe, wata horɓe ɓen lorrirtee. Alla siforii Haforanoowo junuubi kala tuubuɗo e jeyaaɓe Makko ɓen, Hinnotooɗo ɓe.

Si naafiqiiɓe ɓen haɗitaaki e naafiqaaku, suuɗugol keeferaaku maɓɓe ngun, feññina lislaamu, e ɓen ɓe ñawu bonki woni e ɓerɗe mun, humondirɓe e tuuyo, e ɓen fenooɓe-fenta, fii no ɓe ukkindira gomɗimɓe ɓen, haray pellet, Men yamirte an Nulaaɗo, yaggingol ɓe, Men fooline e maɓɓe, refti hara ɓe hoɗidataa e maaɗa Madiina, si wanaa dumunna seeɗa, tawde haray ɓe halkaama maa hara ɓe raɗoraama bonnere maɓɓe nden ka leydi.

Ko ɓe riiwaa ɓe e yurmeende Alla. Kala ka ɓe tawaa, ko ɓe nanngetee ɓe, ɓe waree wareede, sabu naafiqaaku maɓɓe ngun, e saakugol ɓe bone on ka leydi.

Ɗum ko sunna Alla e dow naafiqiiɓe ɓen, tuma kala ɓe feññini naafiqaaku ngun. Laawol (sunnan) Alla ngol non, a heɓantaa ngol battiigu poomaa.

Yimɓe sirkooɓe ɓen hino lanndo maa an Nulaaɗo, lanndal ŋiñugol e fennugol, Alyahuuuda'en kadi no lanndo maa fii Darngal, ko honnde tuma? Maakan ɓee: Anndal daragol Darngal, ko ka Alla woni, mi alanaa ɗum ganndal. E ko anndin maa an Nulaaɗo, wonnde no hasii hara Darngal ngal ɓadike?

Pellet, Alla woɗɗintinii heeferɓe ɓen e yurmeende Makko, O hebilanii ɓe kadi Ñalnde Darngal, Yiite dulɓoowe, sabbitiinge ɓe.

Ko ɓe luttooɓe e lepte ngen Yiite hebilanaa ɓe nge poomaa. Ɓe heɓataa ton giɗo nafoowo ɓe, wanaa ballo duñanoowo ɓe lepte magge.

Ñalnde Darngal, geece maɓɓe ɗen waylitete ka Yiite Jahannama, ɓe wi'oya tuma ninse e hayrere tiiɗi : Ee jalla amen, e nguurndam amen aduna! Hara men ɗoftorino Alla waɗugol ko O yamirniri men, woɗɗitoo e ko O haɗi men, men ɗoftii Nulaaɗo on e ko o addi kon immorde ka Joomi makko!

Ɓe ardoya e hujjaaji meerente, ɓe wi'a: Joomi amen, menen men ɗofti hooreeɓe amen e mawɓe amen, ɓe majjini men e laawol focciingol ngol.

Joomi amen, defu ɓee hooreeɓe e mawɓe majjinɓe min laawol focciingol ngol, cowanlle ɗiɗi e ko waɗan-ɗaa men kon ka lepte, sabu ko ɓe majjinir men kon, huɗaaɓe kadi kuddi mawnudi.

Ko onon yo ɓen gomɗimɓe Alla, ɓe golliri ko O sar'inani ɓe kon, wata on lorru Nulaaɗo mon on, haa wa'on wa ɓen lorrunooɓe Muusaa, wano ko ɓe aybinirnoo mo e ɓanndu makko, kono Alla woɗɗini mo e ko ɓe wi'i kon. Ɓanngani ɓe wonnde himo hisi e ɗum, tawde Muusaa wonii tedduɗo ka Alla, ɗaɓ- ɓal makko ruttetaake, faale makko bonnitetaake.

Ko onon yo ɓen gomɗimɓe Alla, ɓe gollitiri ko O sar'inani ɓe kon, huliree Alla ɗoftagol yamirooje Makko, e woɗɗitagol haɗaaɗi Makko, wowlon konngol goonga, hawrungol e sawaaba.

Si on hulii Alla, on wowlii konngol peewngol, O moƴƴinanay on golle mon, O jaɓana on ɗe, O yawtana on junubaaji mon, hara O nanngitirtaa on ɗi. Kala ɗoftiiɗo Alla e Nulaaɗo Makko on, haray o maliraama maloore mawnde, nde sugu mun alaa, nden woni malireede welayee Alla e naatugol Aljanna.

Men weeɓitii pawe sar'ia ɗin, e kala ko reenetee, immorde e jawle e gunndooji, Men weeɓiti ɗum e dow kammuuli ɗin, e leydi ndin e pelle ɗen, kono ɗi haɗitii ronndagol ɗi, ɗi huli battane muuɗum. Neɗɗo on kan ronndiiɗi; tawde pellet, o wonii tooñoowo hoore-mun, majjaaɗo battane ronndagol ɗum.

Alla hoddirii nde neɗɗo on ronndora hoolaare nden, fii no O leptira naafiqeeɓe worɓe ɓen e naafaqeeɓe rewɓe ɓen, e sirkooɓe worɓe ɓen e sirkooɓe rewɓe ɓen, fii naafiqaaku maɓɓe e sirku maɓɓe on, e fii no Alla jaɓirana gomɗimɓe worɓe ɓen e gomɗimɓe rewɓe moƴƴimɓe ronndagol hoolaare kaliifuuji sar'ia on. Alla siforii Hafranoowo kala tuubuɗo e jeyaaɓe Makko ɓen, Hinnotooɗo ɓe.

Yettoore woodanii Alla, O jeyɗo tagugol laamoo toppitoo kala ko woni kammuuli e ka leydi. Hino woodani Mo kadi mantoore ka laakara. Ko O Ñeeño e tagugol Makko e toppitagol Makko, Humpitiiɗo fiyakuuji jeyaaɓe Makko ɓen, huunde suuɗaaki Mo e ɗum.

Himo anndi ko naatata ka leydi, immorde e ndiyam e puɗi, himo anndi kadi e yaltata e mayri, immorde e puɗi ekw. Himo anndi kadi ko jippotoo iwra ka kammu, immorde e toɓo e Malaa'ika e arsike, himo anndi kadi ko ƴawata ka kammu, immorde e Malaaika e golle jeyaaɓe Makko ɓen e pittaali maɓɓe ɗin. Ko Kanko woni Hinnotooɗo jeyaaɓe Makko gomɗimɓe ɓen, Haforanoowo junuubi kala tuubanɗo Mo.

Yedduɓe Alla ɓen wi'i: Darngal ngal arataa e amen fes. Maakan ɓe an Nulaaɗo: aa'a! Mi woondirii Alla! Pellet, Darngal ngal fennoton ngal aray on. Ko woni tun, ko Alla anndi ko honnde tuma. Kanko Seniiɗo On, ko O Annduɗo ko wirnii e fii Darngal ekw. Huunde suuɗaaki Mo e ɗum, hay ko fotata ñuungii ɓurngii fanɗude ka kammuulii e ka laydi. Huunde e ko ɓuri ɗum kadi fanɗude suuɗaaki Mo, wanaa ko ɓuri ɗum mawnude, si wanaa fow e mun hino maandinaa e deftere ɓanngunde, nden woni alluwal mahfuz ngal, ka huunde kala tagaande winndaa fii mun, haa Ñalnde Darngal.

Alla tabitinii ko O tabitini kon ka alluwal mahfuz, fii yo yoɓoy ɓen gomɗinnooɓe Alla, ɓe golli golle moƴƴe. Ɓen siforiiɓe ɗin sifaaji, hino woodani ɓe ka Alla, haforaneede junuubi, ɗi ɓe nanngitirtaake, e arsike tedduɗo, on woni Aljannaaji Makko ɗin, Ñalnde Darngal.

Ɓen tiinnoaytooɓe bonnitugol ko Alla jippini kon e Aayeeje, ɓe wi'a ɗe: mbilew, ɓe wi'a Nulaaɗo Amen on: ndure, mbile e ndaaroowo. Ɓen siforiiɓe ɗin sifaaji, hino woodni ɓe Ñalnde Darngal, ko ɓuri bonnde e lepte.

Sahaabaaɓe okkaaɓe ganndal ɓen, e kala gomɗinɗo e seeremɓe yimɓe Defte ɓen, wonnde nden nde Alla jippiniri e maaɗa wahayu, ko kayre woni goonga nde sikke alaa e mu'un, e wonnde hinde fewnira e laawol Fooluɗo Mo gooto foolataa On, Yettiniiɗo aduna e laakara.

Yedduɓe Alla ɓen kadi wi'irani yoga maɓɓe kaawasee e jalkitugol ko Nulaaɗo on addi kon: E on accay men tinndina on fii gorko, mo no humpita on, wonnde si on maayii, on muncitiraama ceeki ceeki, ko on immintinteeɓe?

Ɓe wi'i: Hara oo gorko fefindor fenaande e hoore Alla aaƴagol ummital men ɓaawo maayde? Kaa hara ko feetere woni mo defude e wiide ɗum? Oo'oo, wanaa no ɓe sikkiri non ! Si ko woni, ɓe gomɗinaaɓe ɓen laakara, ɓe wonoyay e lepte tiiɗuɗe Ñalnde Darngal, ɓe wonii e majjere woɗɗundi goonga ka aduna ɗoo.

E ɓee fennooɓe yi'aali e ummital, ko woni yeeso maɓɓe imoorde ka leydi, ɓe yi'a ko woni ɓaawo maɓɓe immorde ka kammu? Ɓe anndi si Men muuyuno munnidugol leydi ndin ley koyɗe maɓɓe, Men waɗayno ɗum, e wonnde si Men muuyuno fukkinnde e hoore maɓɓe, taƴontine immorde ka kammu, Men waɗayno ɗum kadi. Wonii e ɗum, maande pellital, wonannde kala jeyaaɗo ɗuuɗuɗo ruttagol e ɗoftaare Joomi mun, dallinoroowo ɗum e kattal Makko. Hattanɗo ɗum On, hino hattani kadi wuurnitugol on ɓaawo maayde mon, e bonnitugol ɓanlli mon.

Gomɗii Men okkii Daawuuda (yo o his), annabaaku e laamu, immorde e Amen. Men daalani pelle ɗen: Ko onon yo pelle, ruttodee e Daawuuda subbunhinaango ngon, Men daalirani non colli ɗin. Men eltani mo njamndi ndin, no newori, fii no o tafiran ndi kala ko faalaa e duncitorɗum.

Men wi'ani Daawuuda: Gollu wutteeji yaajuɗi, ko haɓanooɓe ma ɓen daɗnditora ayɓe maɓɓe, eɓɓiraa dolokkaaji njamndi ɗin no hawrira, haa hara ɗi sottataa, maa tekkiniraa ɗi haa hara ɗi ɓoornotaako. Gollon golle moƴƴe, tawde pellet, Ko Mi Reenuɗo ko golloton kon. Huunde suuɗaaki Lam e ɗum, Ma Mi yoɓitoy on njoɓdi golle mon.

Men eltani kadi Sulaymaana geɗal Daawuuda (yo ɓe his), henndu ndun: tawi hindu yaara dawol bimmbi, yeru ka yaaretee lewru, ndu kirndira kadi yeru ka yaaretee lewru. Men honcinani ɓundu njamndi sila, fii ka o tafira sila on, kala ko o yiɗi. Men waɗi e ngeɗu makko, jinnaaji golliraynooɗi yeeso makko, immorde e yamiroore Joomi makko. Kala ooñinoongii e ko Men yamiri ngii gollugol kon, Men meeɗinayno ngii e lepte Yiite dulɓoowe ngen.

Ɗin jinnaaji hino gollana Annabi Sulaymaana ko o faalaa: gila e mahugol juulirɗe e kuɓeeje, e nate, e looɗe nannditayɗe e beeli ndiyam, e payanɗe defirɗe feŋiiɗe ɗe sottirtaa teddeendi majje. Men daalani ɓe: Onon ɓeynguure Daawuuda, golliree yettugol Alla, e ko O neemini e mon kon. Tawde fanɗii e jeyaaɓe Am ɓen, yettirooɓe Lam ko Mi neemini e maɓɓe kon.

Nde Men ñaawunoo e Sulaymaana maayugol, anndinaano jinnaaji ɗin wonnde o maayii, si wanaa gannguuji leydi ɗin, hiɗi ñaamaynoo tuggordu makko ndu o soɓɓindornoo ndun. Nde o fukkunoo, feeñani jinnaaji ɗin, wonnde pellet, ɗi anndaa ko wirnii. Tawde si ɗi annduunoo ɗum, ɗi ñiiɓataano e lepte hoynaɗe fii majji, ɗen woni golle saɗtuɗe, ɗe ɗi wonunoo e gollannde Annabai Sulaymaana, sikkugol haa ontuma nun, himo wuuri, himo ayniti ɗi.

Gomɗii wonaniino gorol Saba'i ngol e koɗooli maɓɓe ɗin, maande feeñinnde kattal Alla e neema Makko on hoore-maɓɓe. Ɗum le ko gese ɗiɗi: ngesa goo no senngo ñaamo, ngoya ngon no senngo nano. Men wi'ani ɓe: Ñaamee e arsike Joomi mon, yetton Mo e ko O neemini e mon kon. Ndii leydi ko laaɓundi, Alla Oo ko Joomiraawo Haforoowo, Himo hafra junuubi kala tuubanɗo Mo.

Kono ɓe ɗuurnii e yettugol Alla ngol e gomɗingol Nulaaɗo Makko on. Men leptii ɓe waɗtitirgol neema maɓɓe on wororde. Men wurti e maɓɓe ndiyam waame, ɗam yooli gese maɓɓe ɗen. Men wostinii- ɓe gese maɓɓe ɗen ɗiɗi, gese goo ɗiɗi, marɗe dimɗe haaɗuɗe, e leɗɗe duɓɓeeje ɗe rimataa, e huunde seeɗaare e jaaɓe.

Nden waɗtitaneede neema maɓɓe, ko sabu yeddugol maɓɓe ngol ɗuurnoo e yettugol neema on. Men yagginirtaa ndee yagginannde saɗtunde, si wanaa yedduɓe neemaaji Alla ɗin, yedduɓe Mo ɓen.

Men waɗi hakkunde yimɓe Saba'i ɓen Yaman e koɗooli Saami ɗin ɗi Men barkini, koɗooli ɓaɗondirɗi. Men eɓɓiri ton yaadu ndun, ka tawata ɓe yaaray hoɗo naɓi hoɗo, ko aldaa e tammpere, haa ɓe hewtoya Saami. Men wi'ani ɓe: Yaaree ton no faaliraɗon, jemma e ñalorma, hara ko o hoolniiɓe daɗugol ayɓe e heege e ɗonka.

Ɓe dullirani neema Alla ɓaɗtinireede hakkunde maɓɓe on, ɓe wi'i: Joomi amen, woɗɗin hakkunde hoɗo amen ngon e ɗiya koɗooli, fii no men meeɗira ronkere setagol, hitte mbaɗɗuuji amen ɗin. Ɓe tooñiri ko'e maɓɓe, dullangol neema Alla on e ɗuurnagol gaay yettugol Mo e haasagol ɓe waasuɓe ɓen e maɓɓe. Menen kadi Men waɗti ɓe yewteteeɓe fii mun ɓaawo maɓɓe. Men sennditiri ɓe e leydi ndin fow, haa tawi ɓe jokkondirtaa hakkunde maɓɓe. Pellet, wonii e ko jantaa koo, e neema yimɓe Saba'i ɓen, refti ko ɓe yagginiraa kon sabu geddi e dullere maɓɓe nden, tasakuyee, wonande kala muññiiɗo e ɗoftagol Alla, haɗitoo e yeddugol Mo, yettoowo neema Alla on e mun.

Gomɗii Ibuliisa goonginii ko o jikkunoo wonnde o waaway majjinnde ɓe e goonga kan. Ɓe jokki mo ka keeferaaku e ka majjere, si wanaa fedde jeyaande e gomɗimɓe ɓen; jikke maɓɓe boni e ɓen ɗon, nde ɓe ronkunoo jokkude mo.

Ibuliisa alanaa ɓe cemmbe, ɗe o wurtirta ɓe e majjere. Ko o woni cuɗirande ɓe o hoomtaɓe e majjere ndee, ko ko Men duŋorani mo, fii no Men senndindira hakkunde on gomɗinɗo laakara e njoɓdi mun e on wonɗo e sikke fii laakara. Joomi maa non, an Nulaaɗo, e dow kala huunde, ko O reenuɗo: Himo mofti golle jeyaaɓe Makko ɓen, O yoɓitoyay ɓe e ɗum.

An Nulaaɗo, maakan ɓee sirkooɓe: Noddee ɗin ɗi aaƴiɗon wonnde ko reweteeɗi mo gaanin Alla, fii yo ɗi pooɗan on nafa maa ɗi duñana on lorra. Anndon tun, ɗin jeyaa ko fotata wa abbere jarra, ka kammuulii wanaa ka leydi. Alanaa ɗi kadi dennda- daaɗo e ɗin kammuuli e ndin leydi, kafidugol e Alla e jeygol ɗi. Alla kan, alanaa Mo hay wallondirteeɗo Ko O yondindroɗo e kafideede maa wallindireede.

Tefoore woo nafataa ka Seniiɗo On, si wanaa on Mo O duŋanii. Alla duŋantaako non tefoore, si wanaa mo O weltanii. Ɗum ko sabu Mawngu Makko ngun, hino jeyaa e maggu: wonnde si O daalii konngol ka kammu, Malaa'ikaaɓe ɓen jolitaniray gabbitanji(bibje) mun ɗin yankinangol daalol Makko ngol. Wonira non haa si ɗenƴere nden huncaama e ɓerɗe maɓɓe ɗen, ɓe lamndoo Jibiriilu: Ko honɗum Joomi mon daali? O jaaboo ɓe: Ko goonga O daali; ko Kanko woni Toowuɗo e Jaati Mun e Poolal Mun, Mawnuɗo Mo huunde kala woni ley Mun.

An Nulaaɗo, maakan ɓee sirkooɓe: Ko hombo woni arsikinoowo ka kammuuli ndiyam, e ka leydi puɗi e demal e dimɗe? Maaku: Ko Alla arsikata on e ɗin ɗiɗi. Ko si ko menen maa onon ɓee sirkooɓe, goɗɗo e men hino e peewal maa e nder majjere ɓanngunde, sikke alaa e mu'un. Awa le, sikke woo alaa wonnde ko yimɓe peewal ɓen woni gomɗimɓe ɓen, yimɓe majjere ɓen woni sirkooɓe ɓen.

Maakan ɓe an Nulaaɗo: On lamnditoytaake Ñalnde Darngal, fii junuubi amen ɗi men faggitii, menen kadi men lamndoytaake fii ko huuwoton.

Maakan ɓen: Alla renndinoyay en fow Ñalnde Darngal, refti O ñaawira hakkunde men nunɗal: O feññina goonguɗo e meerenteejo on. Ko Kanko woni Ñaawiroowo nunɗal On, Annduɗo ko ñaawata.

Maakan ɓe an Nulaaɗo: Hollee lam ɗin ɗi kafidu-ɗon e Alla ka dewal. Wanaa non woniri! Si ko woni goonga, Ko Kanko Alla woni Fooluɗo Mo gooto foolataa, Ñeeñuɗo e tagu Mun e kattal Mun e toppitagol Mun.

Men nuliraali ma an Nulaaɗo, si wanaa yimɓe ɓen fow: wewliniroowo gomɗuɓe ɓen Aljanna, e jertiniroowo heefereɓe e bomɓe ɓen Yiite. Kono ko ɓuri ɗuuɗude e yimɓe ɓen, ɓe anndaa ɗum. Tawde si ɓe anndunoo, ɓe fennataano ma.

Sirkooɓe ɓen no wi'ira hawjanngol lepte ɗe ɓe wonaa jertinireede ɗen: Ko honnde tuma woni fii ndee fodoore lepte, si on wonii ko goonguɓe e ko nodditotoɗon?

An Nulaaɗo, maakan ɓee sirkooɓe hawjan ɓe lepte: Hino woodani fodoore ñalaande happaande, nde on nennitantaake e mayre fotde saa'i gooto, on ardintinantaake nde kadi yeru ɗum. Ko nden woni Ñalnde Darngal.

Yedduɓe Alla ɓen wi'i: "Men gomɗintaa ndee Alxur'aanaare nde Muhammadu aaƴii wonnde ko jippinaande e makko, men gomɗintaa kadi Defte jippinooɗe ɗen ado mayre. Sinno a tinayno an Nulaaɗo, tuma nde tooñuɓe ɓen haɓɓaa ka Joomi maɓɓe Ñalnde Darngal fii hasbeede, hara haala kan no yiltindiree hakkunde maɓɓe, woɗɓe e maɓɓe bugo feloore nde e ɓeya. Waawanooɓe lo'inanooɓe ɓen wi'ana hooreeɓe maɓɓe lo'inunooɓe ɓen aduna: Si wanaano fii on majjinii men, men gomɗinayno Alla e Nulaaɗo Makko on.

Waawunooɓe townitaninooɓe goonga ɓen wi'ani waawanooɓe lo'inanooɓe ɓen: E ko menen haɗunoo on feewirgol ko Muhammadu addi kon? onon kay, on woniino tooñuɓe e bomɓe bonnooɓe.

Sukkunooɓe ɓen wi'ana hooreeɓe maɓɓe lo'inunu ɓe townitaniiɓe goonga ɓen: Si ko woni, on sakkor-falina- men e peewal ngal, pewje mon jemma e ñalorma ɗen, fewndo yamiraynoɗon men yeddugol Alla, rewa tagaaɓe goo gaanin Makko. Ɓe suuɗi ninse keeferaaku maɓɓe ngun aduna, nde ɓe yi'unoo lepte ɗen, ɓe yananaa wonnde ko ɓe lepteteeɓe. Men waɗi kolombooje e daaɗe yedduɓe ɓen. Ɓe yoɓitiraaka ndii njoɓdi, si wanaa sabu ko ɓe huuwaynoo kon aduna, e rewugol ko woori Alla, faggitoo geddi.

Men imminaali nulaaɗo e saare, mo no hulɓinira ɓe lepte Alla ɗen, si wanaa neeminaaɓe maɓɓe joomiraaɓe cemmbe e muyba e jawle ɓen wi'ay: Menen ko men yedduɓe ko imminiraɗon kon, onon nulaaɓe ɓen.

Muybuɓe maɓɓe ɓen haawiti hino mantoo wi'a: Ko menen ɓuri ɗuuɗude jawle e jiidi. Kadi, ko aaƴiɗon kon wonnde men leptete, ko fenaande. Men wonaali lepteteeɓe aduna, wanaa fii laakara.

An Nulaaɗo, maakan ɓee mantorɓe neema mo ɓe okkaa: Joomi am Seniiɗo On, Himo yaññana arsike on, on mo O muuyi, fii ndaarndagol si ontigi yettay Mo maa si o yedday. Himo ɓillina kadi mo O muuyani, fii jarribagol si ontigi muññoto maa o tikkiray. Kono ɓurrɓe ɗuuɗude e yimɓe ɓen, ɓe anndaa wonnde Alla ko Ñeeño: O eɓɓirtaa huunde, si wanaa ñeeñal yottiingal, heddoo ko hommbo faamata ngal e ko hommbo majjetee ngal.

Wanaa jawle mon, wanaa jiidi mon ndi mantorton, woni ko ɓaɗnata on e welayee Alla. Kala non gomɗimɓe Alla, ɓe golli golle moƴƴe, ɓe dañay njoɓdi sowaandi. Jawle ɗen, ko nafqirgol ɗe fii laawol Alla ɓadnata ɗe ka Alla, jiidi ndin kadi, ko si ɓe du'anike ontigi. Ɓen gomɗimɓe ɓe golli golle moƴƴe, hino woodani ɓe njoɓdi sowaandi, sabu ko ɓe golli moƴƴuɗi kon. Kamɓe ka kuɓeeje Aljanna toowuɗe, ko ɓe hooliiɓe, ɓe hulaa lepte e maayde e dartagol neema.

Ɓen yedduɓe tiiɗnorayɓe haɗtirde e tiiɗnagl no yiilira yimɓe ɓen e Aajeeye Amen ɗen, ɓe etoo no faandundeeji maɓɓe laatora, ɓen ko hayruɓe aduna, leptoyteeɓe laakara.

Maaku an Nulaaɗo: Pellet, Joomi am Seniiɗo On, Himo yaññana arsike on, mo O muuyani e jeyaaɓe Makko ɓen, O ɓillina mo O muuyi e maɓɓe. Kala non ko wintorɗon e huunde, fii laawol Alla, haray Alla lontinniranay on nde aduna, yeɗugol on ko ɓuri ɗum, e mbarjaari teddundi ka laakara. Ko Kanko Alla woni Moƴƴo Arsikoowo. Mo ɗaɓɓay arsike, yo O fewtu Mo Kanko.

Janto an Nulaaɗo, ñalnde Alla mooɓtindiroyta ɓe few maɓɓe, refti O daalirana Malaaikaaɓe ɓen ŋermugol fela sirkooɓe ɓen: E ko onon woni ko ɓee rewaynoo aduna, ko woori Alla?

Malaa'ikaaɓe ɓen wi'i: Senaade woodani Ma! Ko An woni giɗo heftuɗo men gaanin maɓɓe. Giggol alaa hakkunde amen e maɓɓe. Toode ɓee sirkooɓe, ko seytanuuji ɗin ɓe rewaynoo, ɓe ɗoftora ɗi wiide ko ɗi Malaa'ika, ɓe rewa ɗi gaanin Alla. Ko ɓuri ɗuuɗude e maɓɓe, ko ɗin gomɗini.

Ñalnde mooɓtondiral e hasbeede nden, rewetenooɓe ɓen waawanoytaa rewaynooɓe ɓen aduna ko woori Alla, hay nafawel, wanaa feere fii duñangol ɓe lorra. Men wi'ana ɓen tooñirɓe ko'e mun geddi e keeferaaku: Meeɗee lepte Yiite nge fennaynoɗon fii mun ngen aduna.

Si Aayeeje Amen ɓannguɗe jippinaaɗe e nulaaɗo Amen on janngaama e sirkooɓe ɓen, ɓe wi'a: Oo gorko arduɗo e ɗee Aajeeye wonaali, si wanaa faalaaɗo yiltude on e ko baabiraaɓe mon wonunoo e mun. Ɓe wi'i: Ndee Alqur’aanaare wonaali, si wanaa fenaande fefindaande bakaa e Alla. Yedduɓe Alla ɓen wi'ani Alqur’aanaare nden, ɓaawo nde arde e maɓɓe immorde ka Alla: Ndee wonaali, si wanaa mbilewu ɓanngu ngu; tawde nde sennday gorko e gennda mun, ɓiɗɗo e baaba mun.

Hara le Men meeɗaa addannde ɓe defte, ɗe ɓe janngata, tinndinooje ɓe wonnde ndee Alqur'aaaare, ko fenaande nde Muhammadu fefindii. Men meeɗaali kadi nulude e maɓɓe, nulaaɗo jertinoowo ɓe e lepte Alla ɗen, ado maaɗa an Nulaaɗo.

Mofte adinooɓe ɓen - wano Aadi'en, Samuuda'en e yimɓe Luuti ɓen - fow maɓɓe ɓe fenni. Awa yimɓe maa sirkooɓe ɓen, ɓe yottaaki sappaɓal ko ɗen mofte adinooɓe yottino e doole, e hattaade, e jawle e ɗuuɗal. Kala maɓɓe fenni Nulaaɗo mun. Ko ɓe okkaa kon e jawle e doole e ɗuuɗal, huunde e mun nafaano ɓe, lepte Am ɗen yani e maɓɓe. Taskii an Nulaaɗo, ko honno lepte Am ɗen wa'unoo e maɓɓe.

An Nulaaɗo, maakan ɓee sirkooɓe: Anndee ko waajorta on, ko jikku gooto: On woni, wiide on nde daroranton Alla, ceeron mbeleeɗe, ɗiɗo ɗiɗo maa gooto gooto, refti miijitoɗon fii wonndiiɗo mon on, e ko anndirnoɗon mon haqqil e goonga e hoolaare kon, fii no fellitiron wonnde kanko Muhammadu (yo o his), o feetaa. O wonaali, si wanaa jertinoowo on, ko woni yeeso mon, e lepte saɗtuɗe, si wonii on tuubanaali Alla e sirkugol.

An Nulaaɗo, maakan ɓee sirkooɓe fennooɓe: Mi lamndaaki on e ko mi addi kon e peewal e moƴƴere, njoddi woo, tawde ɗum ko fii mon. Njoɓdi alanaa lam si wanaa ka Alla tun. Kanko Seniiɗo On, ko O Seediiɗo e kala huunde: Himo Seedii wonnde mi yottii e mon, himo Seeditii kadi e golle mon ɗe O yoɓitoyta on njoɓdi mun.

Maakan ɓe an Nulaaɗo: Pellet, Joomi am ko werlotooɗo goonga kan e hoore meere nden, ka bonnita nde. Ko Kano woni timminɗo ganndal wirniiɗi: huunde suuɗaaki Mo ka kammuuli, wanaa ka leydi. Golle jeyaaɓe Makko ɓen suuɗaaki Mo.

An Nulaaɗo, maakan ɓee sirkooɓe fennooɓe: Goonga lislaamu kan arii, meere nde alaa batte e doole nden kadi alaa ka feeña, nde ruttortaa kadi doole.

An Nulaaɗo, maakan ɓee sirkooɓe fennooɓe: Si mi majjii goonga kan e ko mi yottinta e mon kon, haray ko min lorritorta, huunde e lorra mun hewtataa on; si mi mi hawru e mun non, ko sabu ko Joomi am wahayini e am kon, tawde pellet, ko O Nanoowo konnguɗi jeyaaɓe Makko ɓen, Ɓadiiɗo, Mo huunde haɗataa ɗum nanugol ko mi wowlata.

Sinno a tinanyno an Nulaaɗo, tuma nde ɓee fennooɓe ɗenƴorii yi'ugol lepte ɗen Ñalnde Darngal, hara laaworde woo alanaa ɓe, wanaa fii faɓtorde, ɓe nanngiree e nokku ɓadiiɗo, no newori. Sinno a tinayno ɗum, harayno a tinay huunde haawniinde.

Nde ɓe yi'unoo jaaƴorde maɓɓe nden, ɓe wi'i: Men gomɗinii Darngal ngal. E ko honno non gomɗinal wonirani ɓe ɓaawo ɓe woɗɗondirde e nokku mo gomɗinal jaɓetee e mun on? Tawde ɓe yalti e saare aduna golleteende e mun nden, faade e galle laakara tawaynde ko njoɓdi golle tun woni ton?

E ko honno ɓe heɓirta gomɗinal jaɓeteengal, ka tawta ɓe yeddiino ɗum gila aduna, hiɓe werlora sikke ɗen e nokku woɗɗiiɗo goonga: ɓe wi'a wonnde Nulaaɗo on ko mbile, ndure e yimoowo.

Ɓee fennooɓe heedee e ko ɓe tuuyetee e nguur- ndam aduna, ɓe haɗee tuubugol e keeferaaku e daɗugol Yiite e yiltagol aduna, wano nanndo maɓɓe e mofte adinooɓe gollirnoi. Tawde ɓe woniino e sikkitagol ko Nulaaɓe ɓen addunoo e fii wootinɗingol Alla e gomɗingol ummital; sikke naɓayɗe e keeferaaku.

Yettoore woodanii Alla, taguɗo kammuuli ɗin e leydi ndin, no ɗi anndiranooka, waɗuɗo e Malaa'ika'en nulaaɓe siinooɓe yamaruyeeji Makko: hino e maɓɓe yottinooɓe wahayu on e Annabaaɓe ɓen, O semmbiniri ɓe nden hoolaare nde O halfini ɓe tottugol, woɗɓe ɓen ko marɓe gabitanji ɗiɗi e ɗi tati e ɗi nayi, hiɓe wiirira ɗi hunnugol ko Alla yamiri ɓe. Kanko Alla, himo ɓeyda ko O muuyi e tagu Makko ngun, immorde e tergal maa ŋari maa hito, tawde pellet, Alla ko hattanɗo kala huunde, huunde ronkintaa Mo.

Tabitii soktirgal kala huunde, ko juuɗe Alla woni: Kala ko Alla udditani yimɓe ɓen, immorde e arsike e peewal e malal, haray alaa haɗoowo ɗum; kala kadi ko O jogitii e ɗum, hay gooto hattanaa accitugol ɓaawo O jogitaade. Ko Kanko woni Fooluɗo Mo gooto foolataa, Ñeeñuɗo e tagu Mun, e kattal Mun e toppitagol Mun.

Ko onon yo yimɓe! Annditiree ɓerɗe mon e ɗemɗe mon, neema Alla on e dow mooɗon, annditiron tere mon ɗen golle. E nee, haraa no woodi ko woori Alla, tagoowo arsikiroowo on ka kammu, jippingol toɓo, e ka leydi, fuɗingol dimɗe e remuruuji? Reweteeɗo e goonga alaa si wanaa Kanko! E ko honno yiilirteɗon e kaa goonga, haa fefindoɗon fenaande, aaƴoɗon wonnde kafidiiɓe no woodani Alla, tawde non O tagii on O arsikii on?

Si yimɓe maa ɓen fennii ma an Nulaaɗo, muñño, tawde wanaa an yimɓe mun adii fennude. Mofte adinooɓe ɓen kadi fenniino Nulaaɓe mun,wano ‘Aadi'en, Samuuda'en e yimɓe Luutu ɓen. Ko faade e Alla tun, woni ruttorde fiyakuuji ɗin fow. O bonna fii bonnooɓe ɓen, O walla Nulaaɓe gomɗimɓe Mo ɓen.

Ko onon yo yimɓe! Anndee pellet, ko Alla fodi on kon e ummital e njoɓdi Ñalnde Dargal, ko goonga mo sikke alaa e mu'un. Haray non, wata dakamme nguurndam aduna e tuuyooji mun hodu on e hebiloranagol golle moƴƴe, fii nden ñalaande. Wata seytaane hodir on cuɗinangol on meere nden e hettanagol aduna on tun.

Pellet, seytaane ko gaño duumiiɗo ngaynu wonani on. Jogitoree mon gaño mon haɓeteeɗo. Anndee ko o noddirta yedduɓe Alla jokki mo ɓen, ko fii no ɓe waɗtinira naatufol e Yiite dulɓoowe ngen Ñalnde Darngal.

Hino woodani ɓen yeddirɓe jokkugol seytaane, lepte saɗtuɗe. Ɓeya gomɗimɓe Alla ɓe golli golle moƴƴe, hino woodani ɓe haforaneede junuubi ka Alla, e njoɓdi mawnundi, woni Aljanna.

Kala mo seytaane cuɗinani golle mun bonɗe, o felliti wonnde ko ko moƴƴi, on wa'aa wa mo Alla cuɗinani goonga, o fiɓi ɗum goonga. Tawde pellet, Alla no majjina on Mo O muuyi, O fewna Mo O muuyi. Alaa karhoowo Mo e ɗum. An Nulaaɗo, wata a tampinir hoore maa, sunagol fii majjere maɓɓe. Pellet, Alla ko Annduɗo ko ɓe huuwata kon. Hunnde suuɗaaki Mo e kuuɗe maɓɓe.

Ko Alla woni imminɗo keneeli ɗin, ɗi sogga duule. Men yarnira ɗen duule ɗon, leydi yoorundi, ndi alaa puɗi. Men wuurnitira leydi ndin, ɗin puɗi ɗi Men fuɗini e mayri. Haray ko wano Men wuurnitiri ndii leydi non, Men immintiniroyta maayɓe ɓen Ñalnde Darngal.

Kala tawɗo ko teddungal aduna maa laakara on faalaa, yo o ɗaɓɓir ngal Alla; tawde ko Alla tun jogitii ngal e ɗin ɗiɗi: ko ka Makko jantoore laaɓu- nde nden ƴawata, golle moƴƴe ɗen ƴawna ɗe haa e Makko. Ɓen non fewjooɓe boneeji, wano etagol wargol Nulaaɗo on (yo o his), hino woodani ɓe lepte saɗtuɗe. Pewje ɓen ɗen, ko ɗe fii mun bonata, ɗe duncantaa ɓe faale.

Ko Alla woni taguɗo ben mon Aadama e mbullaari, refti O tagiri on e toɓɓere maniiyu, refti O waɗi on worɓe e rewɓe, resindirooɓe. Deyel saawataa e teege mun, ngel lelnataa ko heɓi kon, si wanaa e anndal Makko. Hunnde suuɗaaki Mo e ɗum. Ɓeydetaake e nguurndam goɗɗo e tagu Makko, maa ɗuytee e majjam, si wanaa ɗum fow no winndaa ka alluwal reenaangal. Pellet, ko jantaa koo, ko ko newanii Alla.

Maaje ɗen ɗiɗi fotataa: gooto ngon, ko welngo ndiyam mun, newiingo yarde, sabu welgo ɗam, ɗiɗmo ngon, ko ndiyam lamɗam, haaɗuɗam, ɗam welaa yarde. Hiɗon ñaama e kala majje ɗiɗi, teewu keccu, woni liƴƴi, hiɗon yaltina kadi e majjam, kaŋŋe e kaalise, ko wattoɗon cuɗinoron. An ndaaroowo on, hiɗa yi'a laaɗe ɗen no awja doga, yaha rata, fii no ɗaɓɓiron arsike e ɓural Alla. Belajoo, on yettay Alla e ko O neemini on e mun kon fow.

Alla no naada jemma on e nder ñalorma on, o ɓeydora juutugol, O naada ñalorma on kadi e nder jemma on, o ɓeydora juutugol. O elti kadi naange ngen e lewru ndun. Kala ɗin ɗiɗi no doga haa e lajal ngal Alla tun anndi fii mun, ngal woni Ñalnde Darangal. On waɗoowo ɗum fow, ko On woni Alla, Joomi mon: Ko Kanko tun Laamu woodani. Ɗiya sanamuuji ɗi rewoton gaanin Makko, ɗi jeytaa yeru gurel tamaroore. Ko honno rewirton ko woorin Mi?

Si on noddu reweteeɗi mon ɗin, ɗi nanataa noddaandu mon, tawde ɗi alaa wuuriraa nanugol; hay si ɗi nanoy on, ɗi waawoytaa jaabaade on. Ñalnde Darngal, ɗi yeddoyay sirku e rewugol mo ɗi ngol. Alaa habroowo mo an Nulaaɗo, wano Alla goongunɗo On.

Ko onon yo yimɓe, ko onon woni hatonjimɓe e Alla ɓen, e kala huunde. Alla kan, ko Kano woni Galo Mo hatonjinaa e mon, Yettiniiɗo aduna e laakara, e ko jeyaaɓe Makko toownata fii Makko.

Si Kanko seniiɗo On Himo yiɗi gaynugol fii mon, O waɗay ɗum, O adda ontuma tagu hesu, ko rewa Mo, hara ɓe kafidataa Mo e huunde.

Ittugol on, adda tagoore goo, wonaali saɗtan ɗum Alla Seniiɗo On.

Wonkii bakkondiŋki woo ronndataa wonkii goo, bakkaatu mun. Kala e ko faggitii. Hay si teddiraaki junuubi kin, noddii ko ronnditanooki seeɗa, ki ronndantaake ɗum, hay si tawii hara noddaaɗo on ko ɓadondiraaɗo. Anndu ko jertinirtaa an Nulaaɗo, e lepte Alla ɗen, ko hulirooɓe Joomi mun ɓen ka wirnii, ɓe timminiri julde nden no haaniri; ko ɓen nafitorta waaju maa. Kala non laɓɓiniiɗo e geddi, o ɓoorii e sirku, haray ko hoore makko o laɓɓinanii; tawde ko kanko nafitorta ɗum, wanaa Alla, Yondiniiɗo e ɗoftaare On. Ko ka Alla woni ruttorde nden Ñalnde Darngal, fii hasbeede yoɓee.

Keefeeraro e gomɗingo fotataa martaba, wano woniri bunɗo e yi'oowo fotataa.

Wanaa keeferaaku fotata e liimanaaku, wano woniri niɓe fotataa e ndaygu.

Wanaa Aljanaa fotata e Yiite ka battingol, wano woniri ɗowdi fotataa e henndu wulndu.

Gomɗimɓe ɓen fotata e heeferɓe ɓen, wano kadi wuurɓe ɓen fotataa e maayuɓe ɓen. Pellet, Alla no nanina on Mo O muuyani peewal. Wanah an Nulaaɗo, woni naninoowo heeferɓe nannduɓe e wonɓe ka genaale ɓen.

An a wonaali, si wanaa jertinoowo ɓe e lepte Alla ɗen.

Pellet, Men nulirii ma an Nulaaɗo, goonga ka sikke alaa e mu'un. Ko an wewlinoowo gomɗimɓe ɓen e ko Alla marani ɓe kon e mbarjaari mawndi, e jertiniroowo heeferɓe ɓen e ko Alla hebilani kon e lepte muusuɗe. Alaa e mofte yawtuɗe, si wanaa Nulaaɗo Alla feƴƴiini e maɓɓe, himo jertina ɓe e lepte Alla.

Si yimɓe maa ɓen fennii ma an Nulaaɗo, muñño, annditaa wanaa an adaa fenneede e Nulaaɓe ɓen. Hari adinooɓe ɓen fenniino Nulaaɓe mun, wano Aadi'en e Samuuda'en e yimɓe Luutu ɓen. Nulaaɓe maɓɓe ɓen addani ɓe immorde ka Alla, hujjaaji ɓannguɗi, tinndinɗi goongugol maɓɓe, ɓe ardani ɓe e Ɗeri, e Deftere ndayginoore, wonannde waajitorɓe taskitii.

E hoore ɗum fow, ɓe yeddi Alla e Nulaaɓe Makko ɓen, ɓe salii goonginnde ko ɓe addi kon immorde ka Alla. Ontuma Mi halki yedduɓe ɓen. Taskii an Nulaaɗo, ko honno lepte An ɗen e maɓɓe waɗtirninoo, nde Mi halkunoo ɓe.

E a tinaali, an Nulaaɗo, wonnde Alla jippinirii ndiyam ka kammu? Men fuɗinira ɗam dimɗe seertuɗe nooneeji (boɗe, haako, nete, ekn...), ɓaawo nde Men yarniri ɗam leɗɗe majje ɗen. Hino ka pelle, ɗate daneeje e boɗeeje, e ɗate goo, ɗe pete ɓaleeje.

Hino e yimɓe ɓen, e daabeeji ɗin, e neemoraaɗi ɗin (gelooɗi, na'i, e dammi), ɗi nooneeji mun kadi seerti. Anndee ko mawninta fii Alla, o hula Mo, ko annduɓe Mo ɓen; tawde ɓe anndii sifaaji e sari'aaji e hujjaajji ɓannginɗi kattal Makko. Pellet, Alla ko Fooluɗo Mo fooletake, Haforanoowo kala tuubuɗo e jeyaaɓe Makko ɓen.

Ɓen janngooɓe deftere Alla nde Men jippini e Nulaaɗo Amen on, ɓe anndinoo ko woni e mayre, ɓe ñiiɓi e julde, ɓe nafqii ko Men arsiki ɓe kon, yaltingol asakal ekw, hara ko gunndoo e kene, ɓen no jortori ɗen gollɗ maɓɓe ɗon ka Alla, njulaaku ngu sontataa.

Fii no Alla hunnirana ɓe mbarjaari golle maɓɓe ɗen, no timmiri, O ɓeyda e ɓural Makko ngal, tawde Himo hattani ɗum. Kanko On, O haforanay kala wa'uɓe non, O annditana on golle mon moƴƴe.

Kon ko Men wahayini e maaɗa an Nulaaɗo, immorde e Deftere nden, ko ɗum woni goonga mo sikke alaa e mu'un, ko ko Alla jippini, hawrondirnde e Defte adinooɗe ɗen. Pellet, Alla ko Humpitiiɗo Rentuɗo jeyaaɓe Makko ɓen. Himo wahayina e Nulaaɗo kala mofte, kon ko ɓe hatonjinta e jamaanu maɓɓe.

Refti Men okki Alqur'aanaare nden, mofte Muhammadu ɓen ɓe Men suɓii e mofte ɗen. Hino e maɓɓe tooñirɓe ko'e-mun faggitagol harmuɗi e selugol waɗɗiiɗi ɗin, hino e maɓɓe hakindinɗo e waɗugol waɗɗiiɗi ɗin e accugol harmuɗi ɗin, hino e maɓɓe kadi adondirooɓe e moƴƴereeji ɗin, duŋayee Alla; ɓe waɗa waɗɗiiɗi ɗin, ɓe tertoo harmuɗi e añaaɗi ɗin. Ko jantaa koo, ko ɗum woni ɓural mawnungal, ngal sugu mun alaa e ɓural.

Aljannaaji ñiiɓal, ɗi ɓen suɓaaɓe naatoyta e muuɗum, ɓe cuɗiroyee ton, comci lu’u-lu’u e jawe kaŋŋe; koltu maɓɓe ton, ko sooyi.

Si ɓe naatii ka Aljanna, ɓe wi'a: Yettoore woodanii Alla, On ittiranɗo en suno, sabu ko hulirnoɗen Mo naatugol Yiite kon. Pellet, Joomi men, ko Haforanoowo kala tuubuɗo e jeyaaɓe Makko ɓen, Warjotooɗo ɓe e ɗoftaare maɓɓe nden.

On weernirɗo en ɓural Makko ngal, e galle ñiiɓal, ɗe eggetaake e mun. Wanaa fiira e feere men. Tampere woo heɓataa en ton, wanaa fii ronkere.

Yedduɓe Alla ɓen kan, ko Yiite Jahannama woodani ɓen ton. Maayde ñaawetaake e maɓɓe, sakko ɓe maaya, ɓe foftoo e lepte, ɓe hoynantaake kadi lepte Jannama ɗen. Ko sugu ndii njoɓdi, woni ko Men yoɓiroyta kala dullanɗo neemaaji Joomi mun ɗin, Ñalnde Darngal.

Hara hiɓe ooloo(luuka ton nodda faaboo, ɓe wi'a: Joomi amen, yaltini men e Yiite ngen, men golla moƴƴere, seedunde e ko men huuwaynoo kon aduna, fii no men heɓira welayee Maa, men daɗa lepte Maa. Alla jaaboo ɓe: E Men wuurniraano on nguurndam, ɗam faalanooɗo waajitaade waajitoraynoo, o tuubana Alla, o golla ko moƴƴi? Nulaaɗo jertinoowo on e lepte Alla ɗen kadi ari e mon? Nganto alanaa on ɓaawo ɗum. Awa meeɗee kisan, sabu ballo alanaa tooñirɓe ko'e-mun ɓen geddi e keeferaaku.

Pellet, Alla ko Annduɗo wirniiɗi kammuuli ɗin e leydi ndin. O majjaaka huunde e majji. Ko O Annduɗo ko jeyaaɓe ɓen suuɗata e sonndooji ɓerɗe maɓɓe, woni ko moƴƴi maa ko boni.

Ko Kanko waɗi on, onon ɓee yimɓe, lontondirooɓe ka leydi, fii yo O ndaarndo golle mon. Kala yedduɗo Alla e ko Nulaaɓe ɓen addi kon, haray bakkaatu e lepte mun, ko e makko yantata. Yeddugol mo, lorrataa Joomi makko. Yeddugol heeferɓe ɓen, ɓeydataa ɓe ka Joomi maɓɓe, si wanaa tikkere mawnde. Ko wano non yeddugol maɓɓe ngol, woniri ɓeydataa ɓe si wanaa hayrere, tawde ɓe pertataana ko Alla marannoo ɓe kon ka Aljanna, si ɓe gomɗinno.

An Nulaaɗo, maakan ɓee sirkooɓe: Yeetee lam fii kafidiiɗi mon ɗi rewoton gaanin Alla ɗin, ko honɗum ɗi tagi ka leydi? Ko pelle ɗen? Kaa ko canɗi ɗin? Kaa ko ruugayɗi ɗin? Kaa hara ɗi hawtidu e Alla tagugol kammuuli ɗin? Kaa Men addan ɓe Deftere, nde hujja rewugol kafidiiɗi maɓɓe ɗin woni e mun? Huunde e ɗum woniraa non! Si ko woni, tooñooɓe ɓen alaa e fodirde ko'e maɓɓe e yoga maɓɓe, yeddugol ngol, si wanaa hodo.

Pellet, ko Alla jogitii kammuuli ɗin e leydi ndin, fii wata ɗi dirtu. Hay si ɗi dirtayno, alaano jogitotooɗo ɗi haɗaɗi dirtude, e ɓaawao Makko. O siforii wonnde Muññiiɗo Mo yaawnataa leptugol, Haforanoowo kala tuubuɗo e jeyaaɓe Makko ɓen.

Ɓee heeferɓe fennooɓe woondiri Alla, woodnoore pellital, wonnde Nulaaɗo Alla arii e maɓɓe, no jertina ɓe e lepte Alla, ko pellet, ɓe wonay ɓurɓe feewude e goonga kan, diini alyahuuda e annasaara'en ekw. Kono nde Muhammadu (jom kisiyee) Nulanoo arnoo e maɓɓe, immorde e Joomi makko, himo rentina ɓe e lepte Alla, ɗumɓeydaa-noɓe si wanaa woɗɗitagol goonga kan, humondira e meere nden. Ɓe ronki hunnude ahadi maɓɓe ndin.

Nde woondoore maɓɓe, wanaa e annuyee moƴƴo, ko e mawnintinaare ka hoore leydi tun, e ɗaynugol yimɓe ɓen. Hara non, pewje bonɗe ɗen huuɓitataa, si wanaa jom-mun'en. Hara hiɓe sabbitii si wanaa laawol Alla ngol e adinooɓe ɓen, ngol woni halku-gol ɓe? A heɓantaa laawol Alla ngol e halkugol townitiiɓe ɓen, ngosttiigu, naɓtira e woɗɓe goo, wanaa waylirɗum kadi itta e maɓɓe.

E ɓee fennooɓe Qurayshiyankooɓe yiilaaki ka leydi, ɓe taskoo ko honno battane adinooɓe ɓen wonirnoo? Ɓe annda ko battane bonɗe ɓe heɓunno, nde tawde Alla halkuno ɓe? E hoore le ɓen no ɓurnoo Qurayshi'en doole? Alla siforaali wonnde goɗɗum no laawoo Mo ka kammuuli maa ka leydi, tawde pellet, ko O Annduɗo kuuɗe ɓee fennooɓe, huunde e kuuɗe maɓɓe wirnanaaki Mo, kadi laawotaako Mo, Ko O Hattanɗo e halkugol ɓe, tuma kala O muuyi ɗum.

Si tawno Alla yaawnayno yagginirgol yimɓe ɓen, sabbo ko ɓe faggitii e geddi e bakkaatu O halkatno yimɓe leydi ndin fow nde wootere, hara ɓe heɓataano daabeeji e jawle. Kono O nennitanay ɓe haa e lajal happaanagl e anndala Makko, ngal woni Ñalande Darngal. Si ngal Ñallal hewtii, ko pellet, ɓe lamnditoyte, tawde pellet, Alla siforii Reenugol jeyaaɓe Makko ɓen, huunde suuɗaaki Mo e maɓɓe. O yoɓitoyay kala e golle mun, si ko moƴƴi o hetta, si ko boni wano non.

Yaa-Siin: yewtere sugu ɗee Aayeeje yawtiino ka fuɗɗorde cortewol Al-Baqarah.

Alla woondirii Alqur'aana, nde Aayeeje mun ñeñaa, nde sikke aliraa yeeso e ɓaawo mayre.

Pellet, an Nulaaɗo, ko a jeyaaɗo e ɓe Alla nuli e jeyaaɓe Mun ɓen, fii ko yamira bajjinɗingol Mo, rewa Mo Kanko tun.

A wonii e laawol focciingol, e sari'a ñiiɓuɗo, jipporiiɗo ka Joomi maa, On Fooluɗo Mo fooletaake, Hinnotooɗo jeyaaɓe Makko gomɗimɓe ɓen.

A wonii e laawol focciingol, e sari'a ñiiɓuɗo, jipporiiɗo ka Joomi maa, O Fooluɗo Mo fooletaake Hinnotooɗo jeyaaɓe Makko gomɗimɓe ɓen.

Alla jippiniriinde e maaɗa, fii a jertinir nden yimɓe, ɓen woni aarabeeɓe ɓe Nulaaɓe araano e mun, ko jertina ɓe: ɓen ko welsindiiɓe e gomɗinal e tawhiidi. Ko non kala mofte ɗe jertineede taƴondiri e mun wa'ata, haa ɓe hatonjina e Nulaaɓe ko jertina ɓe.

Gomɗii konngol lepte jojjirii e maɓɓe, immorde ka Alla, ɓaawo nde salii gomɗinde goonga ka Nulaaɓe maɓɓe addani kan, ɓe lutti e keeferaaku. Ɓen ɗon gomɗintaa Alla e Nulaaɗo Makko on, ɓe gollirtaa ko ɓen addi e goonga.

Hiɓe wa'i wa ɓen ɓe kolommbooje falaa e daaɗe mun, juuɗe maɓɓe ɗen renndina daade mum en les bahe mum en haa tawa ko maa ɓe mbaawna faanude ko*e mum en ka kammu. Ɓee ɗoo kadi ko kolmbiraaɓe e gomɗingol Alla, ɓe yankinantaa- ko Mo, ɓe jippintinortaako fii Makko.

Men waɗi yeeso maɓɓe heedo e goonga kan, ɓaawo kadi heedo, Men hippi gite maɓɓe ɗen e yi'ugol goonga, waɗi ɓe yi'ataa ko nafata ɓe. Ɗum le, ko tawde ɓe haɓɓitike luttugol e keeferaaku.

Hino fota e ɓee heeferɓe saliiɓe goonga, foti a hulɓin ɓe an Muhammadu, maa a hulɓinaali ɓe; ɓe gomɗintaa ko addu-ɗaa kon, immorde ka Alla.

Ko nafitorta jertinaango maa ngon tigiri, ko on jaɓuɗo Alqur'aana, o gollitiri ko woni e mayre, o huli Joomi makko ka yeewi. Awa wewlinir kala siforrɗo ɗum, wonnde Alla yaafanto ɓe junuubi maɓɓe ɗin, O yeɗa ɓe mbarjaari mawdi Ñalnde Darngal, woni naatugol Aljanna.

Ko Menen woni wuurnitooɓe maayɓe ɓen, fii hasbugol Ñalnde Darngal, Men winnda ko ɓe ardini kon aduna e golle bonɗe maa moƴƴe, e batteeji maɓɓe heddinooɗi ɓaawo maayde maɓɓe, wano sadaaki ilooji, maa bonɗi maɓɓe heddinooɗi, wano keeferaaku. Gomɗi Men moftii kala huunde, e deftere ɓanngunde, nden woni alluwal reenaangal ngal.

An Nulaaɗo, piyan ɓee fennooɓe satta-feereeɓe misal ngal ɓe waajitora, fii yimɓe saare, nde Nulaaɓe arunoo e mun.

Nde Men nulunoo e maɓɓe Nulaaɓe ɗiɗi ka arannde, fii ko nodda ɓe e wootinɗingol Alla rewa Mo, ɓe fenni ɓen ɗon ɗiɗi. Ontuma Men semmbiniri ɓen, Nulaaɗo tataɓo, ɓe wi'ani yimɓe saare nden: "Menen ɗoo tato, ko men Nulaaɓe e mo'on, fii noddugol on e wootinɗingol Alla, jokka sari'a Makko on".

Yimɓe saare nden jaabitii Nulaaɓe ɓen: On laataaki, si wanaa ko on ɓanndinke wano menen, huunde on ɓuraa men. Kadi, Jom-hinaranke on jippinaali hay wahayu e mooɗon. On wonaali, si wanaa ko nodditotooɓe fenaande.

Nulaaɓe ɓen tato jaabitii ɓe, ɓe wi'i: Joomi amen no anndi, wonnde pellet, ko men Nulaaɓe e mo'on, on yimɓe ndee saare. Ɗum yonii men hujja.

Fawaaki men non, si wanaa yottinirgol e mooɗon, no ɓanngiri. Men feere fewnugol on.

Yimɓe saare nden wi'itani Nulaaɓe ɓen: Men hiitorii on kataa. Si tawii non on haɗitaaki noddugol e tawhiidi, ma men yagginir on fiɗugol on kaaƴe haa maayon, lepte muusuɗe kadi memira on immorde e amen.

Nulaaɓe ɓen kadi wi'itani ɓe: Kiite mon ɗen, hiɗon wonndi e majji, sabu yeddugol mon Alla ngol, saloo jokkude Nulaaɓe Makko ɓen. E ko si on anndinaa- ma fii Alla, non kiitinoɗon? Tigi on, ko on yimɓe fantinooɓe e faggitagol geddi.

Gorko iwri ka ɓuri woɗɗude e saare nden, o ari himo yaccora kulol wata yimɓe makko ɓen fennu Nulaaɓe ɓen, ɓe kammbirana ɓe warugol e lorgol e maɓɓe. O wi'i: "Ko onon yo yimɓe am, kori jokkee gomɗinon ɓee Nulaaɓe.

Onon yimɓe am, jokkee ɓen ɓe ɗaɓɓirtaa on njoɓdi ko ɓe yottinirta e mon kon, ɓe woni fewnaaɓe e kon ko ɓe yottinirta e mon, immorde e wahayu Alla. Kala wa'uɗo non, haray mo hanndi e jokkeede.

Gorko on laaɓani ɓe reedu, o wi'ani ɓe kadi: E ko haɗata lam rewugol Alla taguɗo lam on? Ko haɗata on, onon kadi, rewugol taguɗo on On, Ko ka Makko woni ruttorde mon, immintineɗon fii njoɓdi?

Hara mi jogitoto tagaaɗi Alla ɗin reweteeɗi gaanin Makko? Si woni Jom-hinaranke On muuyanii lam bone, tefoore ɗin reweteeɗi duncantaa lam hay huunde, wanaa pooɗugol nafa, wanaa duñogol loraa, ɗi waawaa kadi danɗndugol lam bone mo Alla muuyani lam, si mi arii maayude e keeferaaku. .

Si wonii mi jogitike reweteeɗi gaanin Alla, haray ontuma, mi wonii e faljere feeñunde; tawde mi rewii ko handaa e reweeede, mi acci rewugol hannduɗo e reweede On.

Ko onon yo yimɓe am, min on mi gomɗinii Joomi men en denndaangal, kori nananee lam. Anndon mi tefaa e ko kammbiranton lam wareede. Kono ɗum haɗaali ɓe warugol mo! Alla naadi mo Aljanna.

O teddiniraa ɓaawo sahimbineede makko, wi'aneede: Naatu Aljanna. Nde o naati ton, o yi'i neemaaji mun, o yelorani yimɓe makko ɓen wiide: Haaniino yimɓe am ɓen fennuɓe lam wari ɓen, ɓe annda ko mi heɓi e haforaneede junuubi, e teddungol ngal Alla yeɗi lam, fii no ɓe gomɗinira, no mi gomɗiniri, ɓe warjoree no mi warjoraa.

O teddiniraa ɓaawo sahimbineede makko, wi'aneede: Naatu Aljanna. Nde o naati ton, o yi'i neemaaji mun, o yelorani yimɓe makko ɓen wiide: Haaniino yimɓe am ɓen fennuɓe lam wari ɓen, ɓe annda ko mi heɓi e haforaneede bakkatuujii, e teddungol ngal Alla yeɗi lam, fii no ɓe gomɗinira, no mi gomɗiniri, ɓe warjoree no mi warjoraa.

Men hatonjinaano e halkirgol yimɓe makko fennunooɓe ɓen wari mo, e koneeli Malaa'ika, ɗi Men jippinirta ka kammu. Tawde fii maɓɓe no hoyani Men diini ɗum. Ko Men eɓɓirnoo halakuyee maɓɓe on, ko haacaango immorde ka kammu, wanaa jippingol Malaa'ika ko lepte ɓe.

Halkeede yimɓe makko ɓen wonaano, si wanaa haacaango wooto, ngo Men wuurti e maɓɓe, tawi ɓe tallii hay gooto heddaaki, fii maɓɓe gasii. No ɓe waɗtiniri non, ko wano yiite huɓɓunoonge, nge ñifi, hara baɗte magge heddaaki.

Ee ninse jeyaaɓe fennunooɓe, ee hayrere maɓɓe Ñalnde Darngal, tuma ɓe yi'oyta lepte ɗen! Ko tawde ɓe woniino ka aduna maɓɓe, Nulaaɗo kala arunooɗo ɓe immorde ka Alla, ɓe waɗtayno mo jalnori, ɓe jalkita mo. Baɗtane maɓɓe ɗen wonti ninse Ñalnde Darngal, fii ko ɓe fantini kon e bannge Alla.

E ɓee fennooɓe jalkita Nulaaɓe yi'aali ɓe waajitora mofte adinooɓe ɓe? Ɓe annda ɓen ɗon maayiino, ɓe artataa aduna han kadi. Ɓe yahdii e kuuɗe maɓɓe. Wonnde Alla yoɓitoyay ɓe ɗum.

Mofte ɗen fow wonaali, si wanaa mooɓoyteeɓe ka Amen Ñalnde Darngal, tuma ɓe immintinaa, fii yoɓitugol ɓe golle maɓɓe.

Hujja ummital ngal no woodani fennuɓe ɓen: e leydi yoorundi hokki ndin, Men jippini toɓo e mayri, immorde ka kammu, Men fuɗini e mayri nooneeji puɗi, Men yaltini nooneeji e gabbe, e nder ɗin puɗi, fii ko yimɓe ɓen ñaama. Yo ɓe anndu non, wuurnirɗo ndin leydi ɗon non, ko hattanɗo wuurnitugol maayɓe.

Men waɗi e ndin leydi ndi Men jippini toɓo e mun, gese leɗɗe tamarooje e inabuuje. Men ɓulliti ton ɓulli ndiyam, ko ɗe yarniree.

Men waɗiri ɗen gese, fii no yimɓe ɓen ñaamira e majje, immorde e kon ko Alla neemini e maɓɓe, hara ɓe yannganaaki ɗum. E ɓee yettirtaa Alla e ɗii neemaaji ɗon, rewugol Mo Kanko tun, gomɗina kadi Nulaaɓe Makko ɓen?

Senaade woodanii Alla, O toowii. On fuɗɗuɗo nooneeji ɗin fow: gila e puɗi e leɗɗe, haa e wonkiiji yimɓe ɓen, tawde O waɗirii ɓe deyel e gorel, e kon ko ɓe anndaa fii mun, e tagu Alla ngun ka njorndi e maayo ekn.

Hujja goo wonanii yimɓe ɓen e fii wootinɗingol Alla, tawde Meɗen naɓira ndaygu ngun, naɓugol ñalorma on, adda jemma on, tuma Men sortata ñalorma on e makko, Men waɗta ɗum niwre, haa yimɓe ɓen naatii e mayre.

Maande goo hollaynde ɓe gootaagu Alla ngun, ko ngee naange dogaynge haa e ñiiɓirde nge Alla anndi eɓɓoore mun, nge haɗta ɗon. Nden, ko eɓɓoore Fooluɗo Mo fooletaake On, Annduɗo Mo huunde e fiyakuuji tagu Makko ngun wirnanaaki Mo.

Maande goo kadi tinndinnde e gootaagu Alla seniiɗo On, ko nduu lewru, ndu Men eɓɓani jipporde jemma kala. Ndu fuɗɗora toksuru, hooti ndu mawna, hooti ndu fanɗita, haa ndu waɗtinira wano baaŋal tamarohi e noone mun ka soyɗugol e ka hiɗɗugol.

Maandeeji naange ngen e lewru ndun, e jamma on e ñalorma on, ko Alla elti ɗi. Ɗi haɗtanaa yawtugol ko ɗi eɓɓanaa kon. Wanaa naange ngen woni ko waawi hewtitorgol lewru ndun, waylugol dogudu magge maa naɓugol ndaygu magge, wanaa jemaa on kadi haɗtanaa aditagol ñalorma on, ado o lannude. Ɗi fow majji non, e kala koode e ruugayɗi, ko eltanaaɗi laawi heeriiɗi.

Maande goo wonanii ɓe e fii gootaagu Alla ngun, e ko O neemini kon e jeyaaɓe Makko ɓen, wonnde Men roondike daɗunooɓe ɓen ndiyam tuufaana ɗam, e geyngol Aadama ngol, fewndo Nuuhu, ka laana hebbiniranooka taguuji Alla. Hari tagu kala e resondirayngel e mun no roondaa e ka laana.

Maande goo wonanii ɓe e fii gootaagu Alla ngun, e ko O neemini e jeyaabe Makko ɓen kon, wonnde Men taganii ɓe sugu laana Nuuhu kan, ko ɓe waɗɗoo.

Si Meɗen yiɗunoo, Men yoolayno ɓe; hara faabo woo alanaa ɓe ontuma, wanaa daɗndoowo ɓe e kon ko Men haajani ɓe.

Si wanaa hara Men yurmira ɓe daɗndugol ɓe yoolagol, Men accira ɓe fii no ɓe dakmitora haa e happu, mo ɓe yawtataa, belajo'o, ɓe waajitoray ɓe gomɗina.

Si ɓee sirkooɓe ɗuurniiɓe e gomɗingol wi'anaama: rentee e ko sutaniɗon ka laakara e caɗeele mun, rentoron e aduna feƴƴoowo, belajo'o, Alla neeminira on yurmeende Makko nden. Kono ɓe ronki waɗde ɗum, ɓe ɗuurnii fii mun.

Tuma kala nde Aaya Alla tindinɗe e wootinɗingol Alla, heertinana Mo dewal nagl, ari e ɓee sirkooɓe saɗta-feereeɓe, ɓe wonay ɗuurnii ɓe mo, salii ɓe waajitorde mo.

Si saɗta feere'en ɓee wi'anaama kadi: walliree waasuɓe ɓen e wonduɓe ɓen jawle mon ɗe Alla arsiki on ɗen. Ko ɓe jaaborta, ko wiide gomɗimɓe ɓen: kere men ñamminay on tawɗo si Alla muuyuno, O ñamminayno mo? Men lunndotaako muuyɗe Makko ɗen. Onon ɓee gomɗimɓe, on wonaali, si wanaa e faayere ɓanngunde, woɗɗitiinde goonga.

Heeferɓe yedduɓe ummital ɓen no wi'a: ko honnde tuma woni ngal ummital, si tawii onon ɓee gomɗimɓe, on laatike goonguɓe e ɗum?

Ɓee fennuɓe ummital habbaaki, si wanaa wuttaandu aranuru ndun ka allaandu, ngun juhaɓe, fewndo ka ɓe yeddondirta fii aduna, immorde sooda yeeya, e rema reena ekw.

Si ngon haacaango maƴinoyiiɓe, ɓe waawoytaa wasiyagol ontuma, wanaa fere fii ruttitoyagol ka cuuɗi e ka ɓeynguure maɓɓe; ko ɗon fii maɓɓe lannata, ka ɓe sokolooji mum en fii aduna.

Wuttee ɗiɗaɓun ka Allaandu, ɓe fow ɓe yalta e genaale maɓɓe ɗen, ɓe heñora ka Joomi maɓɓe, fii hasbeede yoɓee.

Ɓee heeferɓe yeddunooɓe ummital ninɓe, ɓe wi'a: Ee hayrere amen! Ko hommbo immini men e genaale amen? Ɓe jaabee: ko ɗum woni ko Alla fodunoo, wonnde pellet, waɗay; Nulaaɓe ɓen goonginii e ko ɓe yottiniri ɗum kon, immorde e Joomi maɓɓe.

Fii immintineede ka genaale ngol wonaano, si wanaa baɗte wuttaandu ɗiɓaɓuru ndun, tawi tagu ngun fow addaama laakara ka Amen, fii hasbeede.

Ñaawoore nden Ñalnde, ko nunɗal waɗirta, tawde onon jeyaaɓe ɓen, on tooñirtaake ɓeydaneede bonɗi maa ɗuytaneede moƴƴi, hay huunde. Ko yoɓirteɗon, ko njoɓdi kon ko gollaynoɗon aduna.

Yimɓe Aljanna ɓen Ñalnde Darngal, pellet, ɓe wonoyay e nder neema, yejjitinoowo ɓe kala huunde, hakkee neemaaji ñiiɓuɗi, ɗi ɓe yi'oyta. Ɓe neeminora ɗi weltaare.

Hiɓe dakmito kamɓe e genndiraaɓe maɓɓe ɓen, e hoore danɗe, ley ɗowɗe yaajeendi Aljanna.

Hino woodani ɓe ka Aljanna ton, noone kala e ɓiɗɓe leɗɗe laaɓuɗe: immorde e inabu, e ƴibbe, e rummaana. Hino woodani ɓe kadi, kala ko ɓe lamndotoo e muuyanteeji maa nooneeji neema. Ko ɓe lamndii woo ɗum, ɓe heɓay.

E hoore neemaaji maɓɓe ɗin fow, hino woodani ɓe kadi, konngol kisiyee, immorde e Joomiraaɗo, Hinnotooɗo ɓe. Si O salminii ɓe, ɓe wonay e on kisiyee, noone kala. Ɓe heɓa hiwraango, ɓurngo kala hiwraango darja.

Sirkooɓe ɓen wi'anee Ñalnde Darngal: sertee non e gomɗimɓe ɓen, haanaa ka ɓe jillondira e mon, tawde njoɓdi mon, no seedi e njoɓdi maɓɓe, sifaaji kadi wano non.

Mi ahodaano e mo'on, Mi haɗiri on, onon ɓiɗɓe Aadama ɓen, e konngol Nulaaɓe Am ɓen, wiide on: wata on ɗofto seytaane, faggitagol noone kala e keeferaaku maa geddi? Tawde pellet, kanko seytaane, ko o gaño mon ɓannginɗo ngayngu. Ko honno haqqilɗo ɗoftorta gaño mun ɓannginɗo ngayngu?

Mi yamiri on kadi, onon ɓiɗɓe Aadama ɓen, wonnde yo on rewan Min tun, hara on kafidaali Lam e goɗɗum. Ko rewugol Lam Min tun ngol, ɗoftoo Lam, woni laawol focciingol, ɗowayngol e welayee Am e naatugol Aljanna. Kono on waɗaali ko mi ahodunoo e mun kon, Mi yamiri on.

Gomɗii seytaane majjinii tagu ɗuuɗungu e mon. E on wonaano ɓe haqqille mun yamiraynoo ɗoftagol Joomi mun, rewa Mo Kanko tun, ɗe rentina on e ɗoftagol seytaane, tawɗo ko gaño feññinanɗo on ngayngu?

Ko ngee woni Jahannama, nge wonanoɗon fodaneede ngen aduna, sabu keeferaaku mon ngun. Hari hinge wirnaninoo on, kono hannde, e hino nge, on yi'irii nge gite mon.

Naatee e magge hannde, meeɗiron nnuleeki magge, sabu ko yeddiraynoɗon Alla kon, ka nguurndam mon aduna.

Hannde, Men notay e kunndule maɓɓe ɗen, ɓe wonta mbobooɓe, hara ɓe waawataa yeddude geddi e keeferaaku ko ɓe wonunoo e mun kon. Juuɗe maɓɓe ɗen yewta Men ko ɗe huuwi aduna, koyɗe maɓɓe ɗen kadi seeditoo e kon ko ɓe wonunoo e faggitaade e geddi.

Si Men yiɗuno, Men mehayno gite maɓɓe ɗen, hara ɓe yi'ataa, ɓe adondira e laawol ngol, fii lummbitirgol ka Aljanna. Kono ɓe woɗɗondirii e ɗum, tawde gite maɓɓe ɗen mehaama.

Si Men yiɗuno kadi, Men waylayno fii maɓɓe, Men femmpira ɓe koyɗe ɗen, hara ɓe hippataa sottude e nokku maɓɓe on: ɓe waawataa feƴƴude yeeso, wanaa fii yiltorgol ɓaawo.

Kala mo Men juutni nguurndam mun e yimɓe ɓen, Men yiltitiray mo ɓaawo. E ɓee kan haqqiltaa? ɓe annda aduna wanaa luttirde, ko saare laakara nden heddotoo?

Men anndinaali Muhammadu (jom kisiyee) gimɗi; ɗum haananaa mo, tawde o yahdaa e mun, sakko heɓon ka wi'on wonnde ko o yimoowo. Ko Men anndini mo kon wonaali, si wana jantoore e Qur'aanaare ɓanngannde taskoɗoo.

Fii yo jertinir nde, kala laatiiɗo wuuruɗo ɓernde, tawde ko on ɗon nafitorta nde. Konngol lepte ngol kadi jojja e hoore yedduɓe ɓen, tawde hujja nanngirii ɓe jippangol nde ngol, nde yottinee e maɓɓe. hujja woo heddoraaki ɓe, mo ɓe ngantinora.

E ɓe yi'aali, wonnde Men taganii ɓe neemoraaɗi, hara hiɓe jeyinoo ɗin; ɓe waɗa ɗi sottinirɗi haajuuji maɓɓe.

Men eltani ɓe ɗin neemoraaɗi, Men waɗti ɗi e sooke maɓɓe: tawi ko e goɗɗi ɗin ɓe waɗɗotoo ɓe ronndina, ɓe ñaama e tebbeeli goɗɗi ɗin.

Hino woodani ɓe ton, nafooje goo, hara wanaa waɗɗeteeɗi ɗin e ñaameteeji teew mum tun. Ɗum ko wano leeɓi baali ɗin, e leeɓi gelooɗi ɗin, e leeɓi be'i ɗin e coggeeli majji ɗin ɗi ɓe moƴƴinirta ndaɗɗudi e comci. Ɓe heɓoyay ton kadi, nooneeji njaram ka ɓe yaroyta kocce. E ɓee kan yettataa Alla neeminirɗo ɓe ɗii neemaaji ekw?

Sirkooɓe ɓen jogitorii gaanin Alla reweteeɗi maɓɓe, jortagol ɗi faaboto ɓe, ɗi daɗnda ɓe lepte Alla ɗen.

Ɗin reweteeɗi ɗi maɓɓe, ɗi hattanaa faabagol hay ko'e-majji, wanaa fii faabagol rewayɗi ɓe ɗin acca Alla. Wurin, ɗin sanamuuji ko waɗtidoyteeɗi e maɓɓe ka lepte, kala maɓɓe waɗta daɗndinoraa-de oya.

Wata wiide ɓe : wanaa a Nulaaɗo, maa wonnde ko a yimoowo, ekn fow e mun, wata sunine, an Nulaaɗo. Menen, Meɗen anndi ko ɓe suuɗata e ɗum, e ko ɓe feññinta e mun. Hunnde e mun suuɗaaki Men. Ma Men yoɓitoy ɓe ɗum.

E neɗɗanke, yedduɗo ummital ɓaawo maayde on, miijitaaki, wonnde Men tagirii mo e toɓɓere maniiyu? Refti o rewri sagaraaji haa jibinaa o mawni, refti o wonti ɗuuɗuɗo yeddondiral e wennjondiral! Kanko o yi'aali ɗum, haa o dallinora wonnde ummital waɗay?

On yedduɗo majji, o yejjiti fewndo o dallinoraynoo ƴi'e wuɗuɗe ɗen, wiide ummital gasataa; wi'ugol: ko hommbo wuurnitata ɗe? O yejjitii wonnde o tagano, hari o woodaaka.

An Muhammadu, maakan ɓe ka jaabagol ɓe: wuurnitoowo ɗee ƴi'e wuɗuɗe, ko taguɗo ɗe On ka laawol aranol. Mo tagii huunde ka arannde mayre, O ronkataa wuurnitude nde. Ko Kanko seniiɗo On woni annduɗo fii kala tagu. Hunnde e fii maggu suuɗaaki Mo.

On waɗanɗo on, onon yimɓe ɓen, yiite, iwde e leɗɗe kecce, tawa ko e majje woni ko huɓɓinirton yiite. Awa faamon, kala waawuɗo hawtude benya- ndirdi ɗiɗi (woni hecciɗugol leɗɗe ɗen, e yiite huɓɓinirteenge e majje ngen), ko haɗttanɗo wuurnitugol maayɓe.

Kere taguɗo kammuuli ɗin e leydi ndin e kala mawnuɗi wonɗi e majji, On haɗtanaa wuurnitugol maayɓe immintina ɓe? Ɗum ko pellet, Himo haɗtana ɗum. Ko Kanko woni Ɗuuɗuɗo tageefo, Taguɗo kala huunde, Annduɗo fii majji. Huunde suuɗaaki Mo e majji.

Anndon fiyaaku Alla on, si O faandnike waɗufol huunde, ko O wi'anay nde tun: laato, nde laatora no O yiɗiri non. Hino jeyaa ɗum, wiide si O faandike wuurnitugol maa warugol maa immintingol ekn, O waɗay tun.

Senaade e laaɓal, woodanii On Mo sirkooɓe ɓen askinta ronkugol e Mun! On Mo tawata, ko e juuɗe Makko laamateeri kala huunde woni, Himo waɗira ɗum no O haajiri. Ko e juuɗe Makko soktirgal huunde woni. Ko ka Makko tun, woni ruttorde mon laakara, O yoɓitoya on njoɓde golle mon.

Mi wonndirii Malaa'ikaaji sappiniraaɗi sappeejii, fii dewal majji.

Mi woondirii Mlaa'ikaaji soggirayɗi duule ɗin, haa ka Alla muuyiri jipporde majje.

Mi woondirii Malaa'ikaaji janngooji daalol Alla ɗin.

Pellet, reweteeɗo mon On, onon yimɓe ɓen, e hoore goonga, ko bajjo, Mo alaa kafidiiɗo: On woni Alla.

Jeyɗo kammuuli ɗin e leydi ndin, e kon ko woni hakkunde ɗin ɗiɗi, jeyɗo kadi puɗal e mutal naange ngen, hitaande nden fow.

Men labinirii kammu hikkii ngu aduna ngun, cuɗaari koode ɗen, nannditayndi e kaŋŋe jalɓuɗe.

Men reeniri kammu hikkii ngu aduna ngun, koode ɗen, fii daɗugol kala seytaane yatundu e ɗoftaare Alla.

Ɗin seytanooji haɗtanaaka heɗitagol matu Malaa'ika ka kammu, tuma ɓe wowlata ko Joomi maɓɓe wahayini e maɓɓe, immorde e sari'aaji; tawde ontuma, hiɗi feroree baŋ-woo baŋ.

Ɗum ko fii raɗagol wata ɗi heɗito Malaa'ika'en. E hoore ɗum, hino woodani ɗi kadi laakara, lepte muusuɗe, duumiiɗe, ɗe taƴondirtaa.

Si wanaa ndun seytaiiru biftii ndu e majji, jilannde haala, woni konngol e haala Malaa'ika'en, ko tawata fii mun hewtaali yimɓe leydi ɓen; ontuma, ndu jokkintiniree hoodere huɓɓunde, ko sunna ndu. Hino ara ka tawata ndu hewtinii ngol konngol jilaangol, e musidal mayru, haa ngol hewtoya ndaarooɓe ɓen, ado ndu fiɗireede hoodere sunnaynde nden, ɓe ɓeydita ɗon, penaale teemedere.

An Muhammad, lamndo ɓee heeferɓe yedduɓe fii ummital: si tawii ko kamɓe ɓuri saɗtude tagugol, e tiiɗugol ɓalli, e mawnugol cemmbe, diini ɓen ɓe Men tagi ka kammuuli e ka leydi, wonndude e Malaa'ika'en? Men tagirii ɓe kamɓe, loopal narnungal. Ko honno ɓe yeddirta fii ummital, e hoore ko e loopal lo'ungal narnungal ɓe tagiraa?

Si ko woni, a haawi, an Muhammad, e kattal Alla ngal, e no O toppitora fiyakuuji tagu Makko ngun, haawiɗaa kadi, ko sirkooɓe ɓen yeddata kon fii ummital. Hakkee non ko ɓe saɗtini fennugol fii maggal, hiɓe jalnora ko wowlataa fii maggal.

Si ɓee sirkooɓe waajoraama kala noone e waaju, ɓe waajitortaa mo, sakko ɓe nafitora; hakkee ko ɓe yoori ɓerɗe.

Si ɓe yi'ii maande e maandeeji Annabiijo on (yo o his), tinndinde e goonga makko kan, ɓe fantina jalkitugol e haaweede.

Ɓe wi'a: Ko Muhammadu addi koo wonaali, si wanaa mbilewu ɓanngu ngu.

yoo si men maayii, men wontii mbullaari e ƴi'e wuɗuɗe, haray men immintinoyte ɓaawo ɗum? Waawaa wonnde.

Baabiraaɓe amen, adinooɓe men kadi ɓen, immintinoyte ɓaawo maayde maɓɓe?

Maakan ɓe jaaboɗaa ɓe an Muhammad: Pellet, on immintinoyte ɓaawo nde on wontude mbullaari e ƴi'e woɗuɗe. Baabiraaɓe mon adinooɓe ɓen kadi wano non. On fow on immintiniroyte jaasere e hoyneede.

Anndee ɗum, ko wuttaandu wooturu pet ka alaandu (ɗiɗaɓuru ndun) tawaa jaka yoo, fow maɓɓe hiɓe ndaara kulaleeji Ñalnde Darngal, hiɓe habbitii ko Alla huuwata ɓe.

Sirkooɓe fennunooɓe ummital ɓen wi'oya ontuma: Ee halkaare amen ! Ko ndee woni Ñalaande njoɓdi kuuɗe ɗen, nde Alla yoɓitaya jeyaaɓe Makko ɓen, golle ɗe ɓe ardinnoo ka nguurndam maɓɓe aduna.

Ɓe wi'anee ontuma: ko ndee tigiri, woni Ñalaande ñaawugol hakkunde jeyaaɓe ɓen, nde Ñalaande nde fennaynoɗon fii mun aduna.

Malaa'ika'en wi'anee nden Ñalnde: Mooɓee sirkooɓe tooñirɓe sirku maɓɓe on, e gartooɓe maɓɓe ɓen ka sirkugol e ka fennugol, e ɗin sanamuuji ɗi ɓe rewaynoo ɓe acca Alla. Ɓe holloya ɓe laawol Yiite ngol, ɓe soggiroya ɓe ton, tawde ko ton woni jaaƴorde maɓɓe.

Malaa'ika'en wi'anee nden Ñalnde: Mooɓee sirkooɓe tooñirɓe sirku maɓɓe on, e gartooɓe maɓɓe ɓen ka sirkugol e ka fennugol, e ɗin sanamuuji ɗi ɓe rewaynoo ɓe acca Alla. Ɓe holloya ɓe laawol Yiite ngol, ɓe soggiroya ɓe ton, tawde ko ton woni jaaƴorde maɓɓe.

Darnon ɓe fii ñaaweede, ado ɓe naadeede ka Yiite. Ɓaawo ɗum, soggiron ɓe ka Yiite.

Ɓe feliroyee wi'aneede: ko heɓi on, on wallindirtaa hakkunde mon, wano wallindiraynoɗon aduna? Fewndo aaƴotoɗon wonnde sanamuuji mon ɗin walloyay on?

Ko woni kamɓe on hannde, ko ɓe doftiiii ɓe yamiroore Alla hoyɓe. Alaa ka ɓe wallindira, tawde ɓe alaa ɗum feere.

Woɗɓe e maɓɓe fewtita yoga, ɓe wona e felindirgol wennjondira, ka ɗin ɗiɗi nafataa nden ñalnde.

Jokkunooɓe ɓen wi'ana jokkanooɓe ɓen: ko onon ɓee koohooɓe, wonunoo ko ardiranaynoo men, ka baŋŋe diina e goonga; wonon e cuɗinangol men keeferaaku e sirkangol Alla e faggitagol geddi, doginon men e goonga ka Nulaaɓe Alla ɓen addunoo kan.

Jokkanooɓe ɓen kadi jaabitoo ɓeya: wanaa non woniri. Ko woni kon, ko e keeferaaku wonunoɗon, on meeɗaali wonnde gomɗimɓe, wurin, ko on yeddunooɓe wonunoo.

Doole woo men alanaano on e hoore ko jokkunoɗon men kon, haa men yolla on e keeferaaku maa sirku maa faggitagol geddi. Si ko woni, on wonuno yimɓe fantimɓe e yeddugol e majjere.

Koongol Joomi men ngol ka kammbol Makko wiide: "Mi hebbiniroyte Jahannama, e kala ɓen jokku ɓe ma" (Cortewol Saad, aaya 85), ko haanungol jojjude; ɗum holli, ko en meeɗooɓe ko Joomi men kammbiri kon, feere mun alaa.

Men nodduno on e majjere e keeferaaku, tawde non, ko men majjunoo laawol goonga ngol, wonunoo.

Jokkuɓe e jokkanooɓe nden ñalnde, fow ko hawtoyteeɓe ka lepte.

Ko wano nii Men huuwirta ɓee bomɓe, ka meeɗinirgol ɓe lepte ɗen.

Ɓee sirkooɓe si wi'ananooma aduna: Rewteeɗo alaa si wanaa Alla, fii gollitirgol ngol konngol, sela kala ko lunndii ngol, ɓe salora ɗoftagol ɗum, townitanagol goonga kan.

Ɓe hujjinora keeferaaku maɓɓe ngun, wiide: kere men accitiray reweteeɗi amen ɗin, fii yimoowo haangaaɗo? Wiide ɓe ɗum, ko Nulaaɗo Alla on ɓe faandii (yo o his).

Ko ɓe tukkiri Nulaaɗo on kon hino ñiddi. Tawde pellet, Nulaaɗo jom kisiyee on, meeɗaali wonnde haangaaɗo, wanaa yimmowo. Ko woni goonga, ko wiide ko Alqur'aanaare o ardi, noddaynde e wootinɗongol Alla, jokka Nulaaɗo Makko on. Nulaaɗo on non, o goonginii ɓeya Nulaaɓe, e ko ɓe addunoo kon, immorde ka Alla, immorde e tawhiidi, e tabintingol ummital. O lunndakki e ɗum.

Onon ɓee sirkooɓe, pellet, ko on meeɗay lepte muusuɗe ɗen, Ñalnde Darngal, sabu keeferaaku mun ngun e fennugol Nulaaɓe ɓe.

Onon ɓee sirkooɓe, on yoɓitoytaake, si wanaa yeru kon ko huuwaynoɗon aduna, e yeddugol Alla, faggitoo geddi.

Jeyaaɓe Alla gomɗimɓe, ɓen ɓe Alla laɓɓiniri fii ko rewa Mo, ɓe laɓɓinani Mo dewal ngal, ɓen ɗon daɗoyay e ɗen lepte.

Hino woodani ɓen jeyaaɓe laɓɓinaaɓe, fanndaari ndi Alla arsikata ɓe, tinndiraandi laaɓugol e labegol e duumagol mun.

Oon arsuka ko muuyanteeɗi ceertuɗi ɓurɗi laaɓude, ko ɓe nafoo, e hoore ɗum, ko ɓe teddiniraaɓe mbarjaari toowundi, e yi'ugol yeeso Alla teddungo ngon.

Ɓe heɓay ɗin fow, ka Aljannaaji neeminiiɗi, ñiiɓuɗi, tabituɗi, ɗi taƴondirtaa, sakko lanna.

hara hiɓe waalii tuugi fewntondiri e hoore danɗe.

Hara kore sanngara hino wannginee e maɓɓe, laaɓinrɗam wano ndiyam iloojam.

Ranwudam mbaadi , lewñunde na dakmitoo heen e kala yarooɓe nde.

On sanngara, nanndaa e sanngara aduna on, tawde ɗam sottintaa haqqil, wanaa muusinayɗam kadi hoore. Ko hisinayɗam ɓanndu e haqqille kala yaruɗo ɗam.

Hino woodani ɓe ka Aljanna ton: rewɓe ɓe alaa e ɗuuɗa giteyaagal worbe janbe, yooɗa giteeɓe.

Ɓen rewɓe no wa'i wa boofo soomaaɗa maraa sabu ranwude, ɗe junngo meemaali.

Yoga e yimɓe Aljanna ɓe fewtita yoga, ɓe lamndondira fii ko feƴƴi aduna.

Goɗɗo e ɓen gomɗimɓe wi'a: Min miɗo marunoo wonndiiɗo yeddaynooɗo ummital ka aduna.

Wi'anaynooɗo lam, e hoore yeddugol jalkita: kere an wonndiiɗo, hiɗa jeyaa e goongimɓe immintineede maayɓe ɓen?

Eyoo si en maayii, en wontii mbulmbulndi e ƴi'e kiɗɗe, haray ko en immintinoyteeɓe yoɓitee njoɓdi golle men ɗen aduna?

Wondinooɗo makko gomɗimɓe on, wi'ana wonndiiɓe mun ɓen ka Aljanna: on ƴeewiday e am, anndugol battane wonndinooɗo lam yeddunooɗo ummital on?

Kanko o ƴeewa, o haynoo wondinooɗo makko on, ka tummbere Dulbunge.

o wi'a: mi woondirii Alla ! An oo wondinooɗo lam, a eɓɓuno halkitirgol fii am, naatugol Yiite, sabu ko noodiraynoɗaa lam e keeferaaku, yedda fii ummital.

Si wanaa moƴƴere Alla nden e am, woni sabu mi feewiri gomɗinal, mi tawdeteno e lepteteeɓe ɓen, wano maa.

Wonaa non enen yimɓe Aljanna ɓen, en maayataa.

En maayataa, si wanaa maayde men aranere nden aduna. Wurin ko en duumotooɓe ka Aljanna, en wonaali kadi lepteteeɓe, wano yedduɓe ɓen huuwirtee.

Pellet, ko ndii njoɓdi ndi Joomi men warjori en naatugol duumoo Aljanna, daɗa Yiite ɗoo, woni maloore mawnunde nden, nde yeru mun alaa.

Ko fii sugu ndii njoɓdi mawndi ɗoo, woni ko waɗɗii nde gollooɓe gollanta. Tawde ko ndii woni ngeyngu tonatoongu.

Hara ko on neema mo Alla marani jeyaaɓe Makko laɓɓinan ɓe Mo dawal ɓen, ɓuri moƴƴude jipporde e teddungal, kaa ko leggal "Zaqquumi" huɗaangal ka Alqur'aana ngal? Tawngal ko ñaametee heeferɓe ɓen, ngal fayintaa ngal duncataa e ittugol heege!

Men waɗii ngal leggal, jarrabuyee, wonannde tooñirɓe geddi e keeferaaku ɓen. Tawde ɓe wi'uno: Yiite ñaamay leɗɗe, ɗum holli, leggal fuɗataa ka Yiite.

Laggal zaqquumi ngal, ko yaltirayngal ka kaaniri: ko ka tummbere Dulbunge, ngal yaltirta.

Dimɗe ngal leggal, hino kaaniri nannditi wa ko'e seytanuuji. Si hunnde non kaanii, ko ɗum woni nde kaanii kadi kabaaru; ɗum holli, ñaametee maggal on, ko ko ñiddi.

Kamɓe heeferɓe ɓen, pellet, ko e dimɗe ngal leggal haaɗungal, woni ko ɓe dekkirta, ɓe hebbinira deedi maɓɓe heegaaɗi.

Refti hino woodani e caggal nyaamgol leggal ngal, njaram, jillaaɗam, fatinaaɗam haa ñiddi.

Refti ruttorde maɓɓe nden, ko ka lepte Dulɓoowe: ɓe iwa e lepte, ɓe yaha e lepte.

Ɓee heeferɓe, ɓe tawu baabiraaɓe maɓɓe ɓen, majjunooɓe laawol peewal ngol; ɓe jokkitii ɗon, ko aldaa e hujja.

Ɓe woni e yaccagol jokka batteeji majjere baabiraaɓe maɓɓe ɓen ko yaawi.

Gomɗii ko ɓuri ɗuuɗde e aramɓe ɓen, majjiino, ado maɓɓe. Wanaa yimɓe maa ɓen, an Nulaaɗo, adii majjude e mofte ɗen.

Gomɗii le, Men nunulo e ɗen mofte adinooɓe, Nulaaɓe, ko jertina e lepte Alla ɗen, kono ɓe yeddi.

Ndaaru an Nulaaɗo, ko honno baɗtane ɓen jertinanooɓe salii, no wa'unoo! Ko Yitte ɓe sakkitori naatude, luttirooɓe ton, sabu salaare e fennugol ɓe Nulaaɓe maɓɓe ɓen.

Si wanaa jeyaaɓe Alla, laɓɓinaaɓe ɓen; ko ɓen ɗon daɗoyta lepte ɗen ɗe ɓeya heeferɓe yeddunoo waɗtiniroya.

Gomɗii Nuuhu nodduno Men (yo o his) fewndo yimɓe makko ɓen fennunoo mo, e hoore ko o noddi ɓe e mun kon, iskin ko Men woni moƴƴuɓe noototooɓe. Tawde Men yaccinno toraare makko nden e maɓɓe.

Men daɗndi mo, kanko e ɓeynguure makko nden, wondude e gomɗimɓe mo ɓen, lorra yimɓe makko, e yoolagol tuufaan ngol, nelangol ngol e yimɓe makko yeddunooɓe ɓen.

Men daɗndi ɓeynguure makko makko nden e gomɗimɓe mo ɓen tun. Ɓeya kan, Men yooliri ɓeya keeferaaku maɓɓe ngun.

Men heddinani mo e mofte hikkotooɗe ɗen, mantoore moƴƴere, nde ɓe mantirta mo.

Nuuhu hisii o daɗii wowleede bone, e mofte sakkitiiɗe ɗen. Wurin, mantoore e jantoore moƴƴere, heddoto fii makko.

Ko sugu ndii njoɓdi, ndi Men warjorii Annabi Nuuhu, woni ko Men warjorta moƴƴinooɓe dewe mun ɗen, ɓe rewi Alla tun.

Kanko Nuuhu, ko o jeyanooɗo e jeyaaɓe Amen gomɗimɓe, woni e ɗoftaare Alla ɓen.

Refti Men yooliri hedditiiɓe ɓen, waame mbo Men wurti e maɓɓe on. Ɓe fow maɓɓe ɓe gasi.

Awa Ibraahiima, ko jeyanooɗo e jokkuɓe diina makko, rewi laawol makko ka wootinɗingol Alla.

Janto nde o ardunoo ka Joomi makko, ɓernde hisunde e sirku, laaɓanɗo Alla e tagu Makko ngun.

Nde o maakannoo baaba makko e yimɓe mun sirkaynooɓe ɓen: Ko honɗum rewton gaanin Alla?

E ko reweteeɗi fefindaaɗi, faalaɗon rewude ko wanaa Alla?

Ko sikkuɗon, onon yimɓe am, e Joomiraawo tageefo ngon, si on hawroyii e Makko, hara on rewaano Mo? Ko sikkuɗon O gollata on ontuma?

Annabi Ibraahiima ndaariri ka koode, himo taskoo ɗaɓɓa feere, no daɗira yaltidugol e maɓɓe.

O ngantinori yaltidugol e yimɓe makko ɓen ka iidi maɓɓe, wiide: ko mi nawnuɗo.

Ɓe acci mo caggal ɗon, ɓe hucciti.

O moltii e reweteeɗi maɓɓe ɗin gaanin Alla, o jalnori ɗi maakugol: E on ñaamataa ko sirkanooɓe on ɓen moƴƴinani on kon?

Ko heɓi on, on wowlataa, on jaabotaako? Ko sugu ɗum ɗoo rewetee gaanin Alla?

Ibraahiima moltorani ɗi, piyirgol ɗi junngo makko ñaamo ngon, fii muncugol ɗi.

Rewaynooɓe ɗin sanamuuji ɓen, fewri ka makko, hiɓe yaawno.

Ibraahiima fewtitiri ɓe tabitaal, o feli ɓe, o maaki: E on reway kon ko lesirɗon juuɗe mon, accon Alla?

Ko Alla tagi on, O tagi golle mon ɗen, wano ɗin sanamuuji ɗi leston. Ko Kanko tun hanndi e Mo rewon, hara on renndidaani Mo e goɗɗum goo.

Nde ɓe ronkunoo teeɗoragol mo hujja, ɓe yahri doole, ɓe diisonsiri haa ɓe fottani ko ɓe waɗata ibraahiima; ɓe wi'i: mahanee mo maadi, hebbiniron ndi carma, huɓɓon ɗe yiite, refti buɗon mo ton.

Yimɓe Annabi Ibraahiima ɓen faandanii mo bone, no ɓe gaynira fii makko,ɓe ɓoortondira e makko, kono Men waɗi ɓe kamɓe sooyuɓe ɓen; nde Men waɗannoo mo yiite ngen ɓuuɓol e kisiyee.

Ibraahiima maaki: Min on, ko mi feroowo ka Joomi am, mi yalta e leydi yimɓe am ɓen, no mi heɓira feere rewugol Mo; aray nde O fewnata lam e ko moƴƴanta lam aduna e laakara.

Joomi am, arsikam ɓiɗɗo moƴƴo, ko wallitoo lam, semmbina lam e yimɓe am ɓen, tuma mi ferata.

Men jaabiniri toraare makko nden, humpitugol mo ko welata mo, fewndo Men wewlinirnii mo geɗaljo mawnoowo, muññoytooɗo; on woni Ismaa'iila (yo o his).

Nde Ismaa'iila mawnunoo, o yottodi e ben makko jahal, ben makko Ibraahiima hoyɗi, koyɗol Annabaaɓe ɓen non, ko wahayu. O humpiti geɗal makko wiide mo: ko an yo ɓiɗɗo am, mi yi'ii e koyɗol, wonnde miɗo hirse. Ndaaru ko yi'uɗaa e ɗum. Ismaa'iila jaabii baaba'en mun, wiide: Baaba'en, waɗee ko yamiraɗon kon fii hirsugol lam, on taway lam, si Alla jaɓii, jeyaaɗo e muñooɓe e weltorɓe ñaawoore Alla nden.

Nde ɓe jebbilaninoo yamiroore Alla nden, Ibraahiima hippiri geɗal makko, tiinde nden, fii hirsugol mo.

Men noddi Ibraahiima fewndo o hittiniraynoo waɗugol yamiroore Alla nden, ka hirsugol geɗaljo makko on, wiide: ko an yo Ibraahiima!

Pellet, a laatinirii koyɗol maa ngol, fiɓugol hirsude geɗaljo maa on. Awa ko wano Men yoɓitirt maa non firtingol ma nden huunde saɗtunde, woni ko Men yoɓitirta moƴƴinooɓe ɓen; Men ɓoora ɓe e kulaleeji e saɗteendeeji.

Pellet, ko ɗum ɗoo woni jarrabuyee ɓannguɗo on. Ibraahiima hawrii e mun.

Men soktiri Ismaa'iila, dammol mawnungol, ko hirsee, hara wanaa kanko.

Men accani Ibraahiima, mantoore labaande, e mofte sakkitiiɗe ɗen.

Alla hiwrike mo, O du'anike mo kadi kisal e kala lorra.

Ko wano Men yoɓitiri Ibraahiima e ɗoftaare makko nden, Men yoɓitirta moƴƴinooɓe ɓen.

Kanko Ibraahiima, ko o jeyanooɗo e jeyaaɓe Amen gomɗimɓe, hunnuɓe sifaaji jeyeede Alla.

Men wewlintiniri mo geɗaljo goo, wonoowo Annabaajo, e jeyaaɗo moƴƴo; on woni Ishaaqa. Ɗum ko njoɓdi ɗoftagol mo Alla ngol, ka hirsugol Ismaa'iila, ɓiɗɗo makko bajjo on nun.

Men jippini barki e makko, e dow geɗal makko Ishaaqa. Men ɗuɗɗinani ɓe neema; wano ɗuuɗireede ɓiɗɓe. Hino e geyngol maɓɓe ngol non, moƴƴinɗo ɗoftagpl Joomi mun, e tooñirɗo hoore-mun yeddugol faggitoo ɓanngina bone.

Gomɗii Men moƴƴorike e dow Muusaa, e nene gooto makko on Haaruuna, Annabaaku ngun.

Men daɗndi ɓe, kamɓe e yimɓe maɓɓe ɓiɗɓe Israa'iila ɓen, maccinireede Fir'awna, e yoolagol.

Men walli ɓe e Fir'awna e konu mun, ɓe fooli ayɓe maɓɓe ɓen.

Men okki Muusaa e neene gooto makko on Haaruuna, Deftere Tawreeta nden, immorde ka Alla, ɓanngunde, nde jilɓuya alah e mayre.

Men fewniri ɓe, e laawol focciingol ngol. Ngol woni laawol diina lislaamu kan, ɗowirayngol e welayee seniiɗo taguɗo On.

Men accani ɓe mantoore e jantoore labaande, e mofte sakkitiiɓe ɓen.

Alla hiwrorike ɓe hiwraandu teddundu, O mantii ɓe, O du'oranike ɓe hisugol e kala bone.

Ko wano Men yoɓitiri non Muusaa e Haaruuna, woni ko Men yoɓitirta moƴƴinooɓe ɗfotagol Joomi mun ɓen.

Muusaa e Haaruuna, ko jeyanooɓe e jeyaaɓe Amen gomɗimɓe Alla, golliri sari'a Makko on.

Pellet, Ilyaasa kadi, ko jeyanooɗo e Nulaaɓe Alla ɓen. Alla moƴƴorino e makko Annabaaku e Nulal.

Janto nde o maakannoo yimɓe mako ɓen o nulaa e mun ɓen, ka ɓiɗɓe Israa'iila: Ko onon yo yimɓe am, e on hulirtaa Alla ɗoftagol yamirooje Makko ɗen, wano wootinɗingol Mo, e woɗɗitagol haɗaaɗi Makko ɗin, wano sirku?

E on reway sanamuuru mon wi'eteende "Ba'ala" ndun, accon ɗon Alla, ɓurɗo moƴƴude tagu On?

Ko Alla woni Joomi mon, woni taguɗo on, O tagi baabiraaɓe mon ɓen ado ɗum. Ko On hanndi e reweede, wanaa goɗɗum goo, wano sanamuuji mon, ɗi duncataa ɗi lorrataa.

Yimɓe makko ɓen alaa waɗi, si wanaa fennugol mo. Awa ɗum wonay sabu ɓe tawnoyteebe e lepte ɗen.

Si wanaa ɓen yimɓe makko gomɗinnooɓe laɓɓini dewe mun ɓen, ɓen ɗon daɗoyay tawnoyeede e lepte ɗen.

Men accani mo mantoore e jantoore labaande, e mofte sakkitiiɓe ɓen.

Alla hiwrike mantii Ilyaasna'en.

Ko wano Men yoɓitiri non Ilyaasa'en, woni ko Men yoɓitirta jeyaaɓe Amen gomɗimɓe moƴƴinooɓe ɓen.

Kanko Ilyaasa, ko o jeyanooɗo e jeyaaɓe Amen gomɗimɓe goongini gomɗingol Joomi mun.

Pellet, Luutu kadi, ko jeyanooɗo e Nulaaɓe Alla ɓen nuliranooɓe e yimɓe mun, wewlingol e jertingol.

Janto nde Men daɗndunoo mo, kanko e ɓeynguure makko nden fow, e lepte wurtanooɗe e yimɓe makko ɓen.

Si wanaa debbo makko on, on jeyano e yimɓe makko leptaaɓe ɓen; tawde ko o yedunooɗo.

Refti Men halki fennunooɓe mo, heddii ɓe ɓen.

Onon yimɓe Makkah ɓen non, hiɗon rewa e galleeji maɓɓe, tuma setorton Saami, e dawol mon.

Hiɗon rewa e hoore-maɓɓe kadi, ka jemma. E on haqqiltaa, waajitoron ko heɓi ɓe kon, ɓaawo ɓe fennude ɓe yedda ɓe faggitoo bonunnda mo adaaka e mun?

Pellet, Yuunusa kadi, ko jeyanooɗo e Nulaaɓe Alla ɓen nuliranooɓe e yimɓe mun, wewlingol e jertingol.

Janto nde o dogunoo yimɓe makko ɓen, ko aldaa e duŋayee Joomi makko. O waɗɗoyii laana hebbiniraaka yimɓe e dolle.

Laana kan eɓɓi yoolagol, hakkee ko ka heewi. Ɓe urbinii nder ton, ndaarugol ko homɓe gasetee bugedee ka maayo, fii ɗuytugol teddeendi makka ndin; Yuunusa jeyaa e ɓen foolaaɓe ka urba, ɓe bugii mo ka maayo.

Nde ɓe buginoo mo ka maayo, linngii ngii moɗi mo, fewndo ka o felnii; tawde o yehii ka maayo, o duŋinaaki e Joomi makko.

Si wanaano tawde Yuunusa ko jeyanooɗo e jantotooɓe Alla ko ɗuuɗi, si wanaano subbunhinagol makko ngol ka nder reedu lingii ngii

O ñiiɓayno ka reedu lingii ngii, haa Ñalnde Darngal, ɗon wona yenaande makko.

Men sorti mo e reedu lingii ngii, Men werlii mo ka ladde, ko o lo'uɗo, battane ko o ɓooyi kon ka reedu maggii.

Men fuɗinani mo e e ladde yeewnde nde, leggal buudi, ka o ɗuwora o ñaama.

Men nuli mo e yimɓe makko hawraynooɓe: ujune teemedere maa ɓuri ɓe.

Ɓe gomɗini mo, ɓe goongini ko o addi kon, Alla dakmiti ɓe e nguurndam maɓɓe aduna ɗam, haa dumunna maɓɓe on timmi.

Muhammad, lamndorii ɓee sirkooɓe "ŋiñugol": E on waɗanay Alla ɓiɗɓe rewɓe ɓe añanɗon hoore-mon, heertinanon ɓiɗɓe worɓe ɓen fii mon? Ko honɗum e senndoore nii?

Ko honno ɓe aaƴorta wonnde Malaa'ika'en ko rewɓe, ɓe tawanooka tageede majji, ɓe seeditaaki ɗum?

Pellet sirkuɓe ɓe e pennugol mum en e fepindaade ɓe penaale e dow Alla ɓe ngaskina ɓiɗɗo e dow Makko, ɓe ko fenooɓe e koɓe noddittoo ko.

Pellet sirkuɓe ɓe e pennugol mum en e fepindaade ɓe penaale e dow Alla ɓe ngaskina ɓiɗɗo e dow Makko, ɓe ko fenooɓe e koɓe noddittoo ko.

Hara Allah suɓan hoore Makko, ɓiɗɓe rewɓe ɓen ɓe añanɗon hoore-mon, e dow ɓiɗɓe worɓe ɓe yiɗanɗon hoore-mon ɓen? Kallaa! wanaa non!

Ko heɓi on, onon ɓee sirkooɓe, hiɗon ñaawira ndee ñaaaworaa ooñiinde, waɗanon Alla ɓiɗɓe rewɓe, suɓaoɗon hoore-mon worɓe ɓen?

E on miijitotaako wonnde ko e meere wonɗon e mun? Tawde si on taskike, on yi'iray non bonnde fiɓnde mon nden.

Kaa hiɗon jogii hujja e dalil ɓanngirɗo Deftere maa Nulaaɗo?

Haray addee deftere mon ka hujja mon on woni ɗon, si wonii ko on goonguɓe e haala!

Sirkooɓe ɓen waɗi hakkunde Allah e Malaa'ika'en, asko dammbe, ɗum ko ko ɓe aaƴinoo wonnde Malaa'ika'en, ko ɓiɗɓe Allah rewɓe! Hara non, ɓen Malaa'ikaaɓe no anndi, pellet, Alla tawnoyay ɓen sirkooɓe, e hasboore nden.

Allah senike O laaɓii, gaay e kon sirkooɓe ɓen sifotoo, dammbude Mo ɓiɗɗo e genndiraawo, ekw immorde e ka yahdaa e Makko!

Si wanaa jeyaaɓe Allah, laɓɓinaaɓe ɓen. Ɓen ɗon sifortaa Allah, ko yahdaani e Makko.

Anndon onon ɓee sirkooɓe, e ko rewoton kon gaanin Allah.

On wonaali majjinirooɓe kon ko rewoton, woɗɓe goo e diine goonga.

Si wanaa on mo Allah winndani naatugol ka Yiite. On ɗon yeddiray saɓu ɗum, o naata nge. Onon non, e reweteeɗi mon ɗin, on alaa nden feere.

Malaa'ika'en ɓanngini jeyeede maɓɓe ka Allah, daɗndinoo e ko sirkooɓe ɓen aaƴoriɓe kon, wi'ugol: Alaa e amen, mo alanaa ɗum, darorde anndaande, fii rewugol Alla ɗoftoo Mo.

Menen Malaa'ika, ko men darnaaɓe saffinaa, fii rewugol Allah ɗoftoo Mo. Ko memen kadi woni subbunhinantooɓe Allah ɓen, sifaaji yahduɗi e Makko.

Menen Malaa'ika, ko men darnaaɓe saffinaa, fii rewugol Allah ɗoftoo Mo. Ko memen kadi woni seninooɓe Allah ko O haandaani ko sifaaji.

Sirkooɓe Makkah ɓen woniino e wi'ugol, ado nuleede Muhammadu (yo o his): Sinno hara meɗen joginoo Deftere sugu Defte arane ɗen, wano Tawreeta, ko pellet, men laɓɓinanayno Alla dewalngal. Hara non, ko e fenaande ɓe woni. Tawde Muhammadu addanii ɓe Alqur'aana, ɓe yeddi nde. Kono non, aray nde ɓe anndata, fii lepte saɗtuɗe, haɓɓiiɗe ɓe ɗen, Ñalnde Darngal.

Sirkooɓe Makkah ɓen woniino e wi'ugol, ado nuleede Muhammadu (yo o his): Sinno hara meɗen joginoo Deftere sugu Defte arane ɗen, wano Tawreeta, ko pellet, men laɓɓinanayno Alla dewalngal. Hara non, ko e fenaande ɓe woni. Tawde Muhammadu addanii ɓe Alqur'aana, ɓe yeddi nde. Kono non, aray nde ɓe anndata, fii lepte saɗtuɗe, haɓɓiiɗe ɓe ɗen, Ñalnde Darngal.

Sirkooɓe Makkah ɓen woniino e wi'ugol, ado nuleede Muhammadu (yo o his): Sinno hara meɗen joginoo Deftere sugu Defte arane ɗen, wano Tawreeta, ko pellet, men laɓɓinanayno Alla dewalngal. Hara non, ko e fenaande ɓe woni. Tawde Muhammadu addanii ɓe Alqur'aana, ɓe yeddi nde. Kono non, aray nde ɓe anndata, fii lepte saɗtuɗe, haɓɓiiɗe ɓe ɗen, Ñalnde Darngal.

Sirkooɓe Makkah ɓen woniino e wi'ugol, ado nuleede Muhammadu (yo o his): Sinno hara meɗen joginoo Deftere sugu Defte arane ɗen, wano Tawreeta, ko pellet, men laɓɓinanayno Alla dewalngal. Hara non, ko e fenaande ɓe woni. Tawde Muhammadu addanii ɓe Alqur'aana, ɓe yeddi nde. Kono non, aray nde ɓe anndata, fii lepte saɗtuɗe, haɓɓiiɗe ɓe ɗen, Ñalnde Darngal.

Gomɗii Konngol Amen ardinoke, fii Nulaaɓe Amen ɓen, wonnde ko ɓe wallirteeɓe e hoore ayɓe maɓɓe ɓen, hujja e dolle ɗe Alla neeminiri ɓe. E wonnde poolal ngal, ko fii konu Amen, haɓirayngu fii Alla ngun, no daalol Alla ngol ɓamtora.

Gomɗii Konngol Amen ardinoke, fii Nulaaɓe Amen ɓen, wonnde pellet, ko ɓe wallirteeɓe e hoore ayɓe maɓɓe ɓen, hujja e dolle ɗe Alla neeminiri ɓe. E wonnde poolal ngal, ko fii konu Amen, haɓirayngu fii Alla ngun, no daalol Alla ngol ɓamtora.

Gomɗii Konngol Amen ardinoke, fii Nulaaɓe Amen ɓen, wonnde ko ɓe wallirteeɓe e hoore ayɓe maɓɓe ɓen, hujja e dolle ɗe Alla neeminiri ɓe. E wonnde poolal ngal, ko fii konu Amen, haɓirayngu fii Alla ngun, no daalol Alla ngol ɓamtora.

An Nulaaɗo, ɗuurno ɓee sirkooɓe saɗta feereeɓe, haa e saanga nde Allah humpitu maa, arugol lepte maɓɓe ɗen.

Ndaaraa ɓe, tuma lepte ɗen jippotoo e maɓɓe, ɓe aray yi'ude, ka yi'ugol nafataa ɓe!

E hara ko lepte Alla ɗen, ɓee sirkooɓe heñorta?

Si lepte Allah ɗen jippike e maɓɓe, haray bimmbi maɓɓe on bonii !

An Nulaaɗo, ɗuurno e maɓɓe, haa Allah ñaawa fii leptugol ɓe ngol.

Ndaaraa; kamɓe kadi, ɓe aray yi'ude lepte Allah ɗen yanooje e maɓɓe.

Senayee woodanii Joomi maa, an Muhammadu, O laaɓii e kon ko sirkooɓe ɓen siforta Mo e ustiiɗi !

Kisiyee Allah e mantoore Makko, wonii e Nulaaɓe Makko tedduɓe ɓen.

Yettoore nden fow, woodanii Alla seniiɗo toowuɗo On. Ko Kanko hanndi e ɗum. Ko Kanko woni Jeyɗo winndere nden fow. Jeyɗo ɗum alaa, si wanaa Kanko.

Saad: yewtere yawtiino, fii sugu ɗee karfe taƴondirɗe, ka fuɗɗorde simoore Baqarah. E ngol cortewol ɗoo, Allah no woodanira Alqur'aana, yowondirnde e waajitorɗi yimɓe, kon ko nafata ɓe aduna e laakara. Hara wanaa ko sirkooɓe ɓen aaƴotoo, wonnde Allah no mai denndadiijo.

Ko woni kon, heeferɓe ɓen wonii e townitanagol wootinɗinnde Allah, e luutondirgol e Muhammadu (yo o his), e anygol mo.

Ɗuuɗii e mofte fennuɓe Nulaaɓe mun, ado maɓɓe, ɓe Men halki, ɓen noddi faaboo uma, nde lepte tellato, kono oon waqtu wonaana waqtu faabeede e lepte sakko faabo nafa ɓe.

Ɓe ŋalɗi, tuma ɓe yi'unoo Nulaaɗo arɗo ɓe on, ko jertina ɓe e lepte Allah ɗen, ko e maɓɓe o jeyaa. Yedduɓe ɓen nde yi'unoo hujjaaji ɓannginɗi goonga Muhammadu kan, ɓe wi'i: Oo, ko biloowo yimɓe nii, heewuɗo fenaande e ko wi'ata kon, wonnde ko o Nulaaɗo, mo Allah wahayini e mun.

Kere o waɗay reweteeɗi limtilimtiɗi e mun ɗin fow, reweteeɗo gooto tun? Pellet, ko huunde haɗtirnde haawnagol non.

Mbatu maɓɓe ngun hucciti, ɓe wi'ani yimɓe maɓɓe ɓen: Yehee, jokkon haaju mun, wata on naatu e diina Muhammadu, tabitee e reweteeɗi mon ɗin. Anndon ko Muhammadu noddi on e mun kon, wiide yo on rewu gooto tun, ko ko o eɓɓani, fii no o waawira'en, waɗten jokkude mo.

Men nanaali fii ko Muhammadu noddata men e mun kon, woni bajjinɗingol Allah ngol, e diina baabiraaɓe amen ɓen, wanaa e diina Iisaa kan. Ko men naniri mo kon wonaali, si wanaa fenaande fefindaande.

Kere ko e makko Alqur'aana jippintee hakkunde amen, o heertora ɗum e hoore amen, menen koohooɓe ɓen? Si ko woni, ɓee sirkooɓe wonii e sikkitagol wayahu mo mi jippini e maaɗa on. Fotde ɓe meeɗaali lepte Allah ɗen, kono hiɓe ɗayintora nennitaneede ɓe. Si ɓe meeɗuno lepte ɗen, ɓe haɓɓitotanooko e yeddugol sirkana Allah, sikkitoo e ko O wahayini kon e maaɗa.

Kaa ɓee sirkooɓe fennooɓe jogiti ngaluuji ɓure Joomi maa, Fooluɗo Mo fooletaake On, Okkoowo mo O muuyani yeɗude. Wano ngalu ngu O yeɗirta Annabaaku, on mo O muuyani. Tawde wanaa kamɓe ɗum wonani, sakko ɓe yeɗa mo ɓe yiɗani, maa ɓe ɗala goɗɗo goo.

Kaa ko kamɓe woodani laamagol kammuuli ɗin e leydi ndin e kon ko woni hakkunde majji? Sakko ɓe heɓa feere yeɗugol e ɗawugol! Si ko non ɓe aaƴori, haray yo ɓe ƴeenŋir kala sabu no ɓe hewtiryta ka kammuuli, fii no ɓe ñaawira ko ɓe yiɗi, woni yeɗugol maa ɗalugol. Kono ɓe hippataa ɗum!

Ɓee fennooɓe Muhammadu jom kisiyee on, ko konu hoyngu, fooliroyteengu wano ɗiya feddeeji fennunooɗi Nulaaɓe mun, ado maɓɓe.

Wanaa ɓee woni ko adii fennude. Woɗɓe adinoke ɓe e ɗum, woni Yimɓe Nuuhu ɓen, e Aadi'en e Fir'awna lettiraynooɗo yimɓe ɓen, pempe.

Samuuda'en kadi, e yimɓe Luutu ɓen, e yimɓe Shu'aybu ɓen fow kadi fenni Nulaaɓe mun ɓen. Ko ɓen woni feddeeji hawrunooɗi e fennugol yedda ko Nulaaɓe lun addannooɓe.

Alaa e ɗin feddeeji, mo fennaali Nulaaɓe ɓen. Lepte Allah ɗen jojji e maɓɓe, fii kala ɗe tonngino haa e dumunna.

Ɓee fennooɓe Muhammadu (yo o his) habbaaki, si wanaa wuttaandu ɗiɗaɓuru ndun ka alaandu, ndu alaa ruttorde. Lepte ɗen yana e maɓɓe, si ɓe ɓe tuubaali ko adii.

Ɓe woni e jalkitugol wi'a: Joomi amen, yaccinan men geɓal lepte amen ɗen aduna, ado Ñalaande Darngal.

An Nulaaɗo, muñño e ko fennooɓe ɓen wowlata maa kon; annditaa jeyaaɗo Amen on, Daawuuda, jom cemmbe dartorɗe ayɓe mun, muññoo e ɗoftagol Allah. Kanko ko o ɗuuɗunooɗo ruttoragol tuubannde Allah, e gollugol ko welata Mo.

Men elti pelle ɗen, ko subbunhinoda e Daawuuda, ka kiikiiɗe e ka weetugol.

Men elti kadi colli ɗin, ka ɗi mooɓindiraa ka weeyo, tawi ɗi fow majji, hiɗo ɗoftanii subbunhinanagol Allah.

Men semmbiniri fii laamu Makko ngun, mirin mo Men okki mo on, wonndude e waawugol foola ayɓe makko ɓen. Men yeɗi mo Annabaaku, e hawrugol e sawaaba. Men yeɗi Mo ɗemngal laaɓungal.

An Nulaaɗo, hara kabaaru wenjunooɓe ɓen ɗiɗo arii maa, tuma nde ɓe ƴawunoo ka ganngunal Annabi Daawuuda nokku dewirdo mum!

Tuma nde ɓe naatirnoo e juhal, ka Daawuuda, o ɗeƴii ɓe. Ɓe anndi o ɗenƴike, ɓe wi'ani mo: wata a hulu ! Ko men yeddondirɓe ɗiɗo; goɗɗo e amen tooñii oya. Ko yo a ñaawir nunɗal hakkunde amen, wata a tooñu, tinndinaa men e laawol focciingol ngol, woni laawol sawaaba gol.

Gooto e maɓɓe wi'iani Daawuuda: Oo gorko, ko musiɗɗo am: himo jogii baalii cappanɗe jeenay e jeenay, min miɗo jogii baalii gootii. O ɗaɓɓiri lam henndingol mo ngil, o fooli lam e yewtere.

Daawuuda ñaawiri hakkunde maɓɓe wi'angol wullitiiɗo on: Pellet, musiɗɗo maa on tooñirii ma, ɗaɓɓugol ɓeydiyude baalii maa ngii, ka baali makko. Ko ɓuri ɗuuɗude e hawtuɓe, hino tooñindira hakkunde maɓɓe, si wanaa gomɗimɓe gollooɓe moƴƴuɗi yamiraaɗi ɗin; ɓen ɗon, ko nunɗuɓe hakkunde maɓɓe, kono ɓe ɗuuɗaa. Annabi Daawuuda felliti, wonnde Men jarriborii mo ngol wennjondiro. O ɗaɓɓiri Joomi makko haforaneede, o suuyiri sujjugol, o tuubani Allah.

Men jaɓirani mo tuubuubuyee, yaafanagol mo ɗum. Pellet non, hino woodani ka Amen, ɓadal e moƴƴugol ruttorde laakara.

Ko an yo Daawuuda, Men waɗii ma lomto ka hoore leydi. Siinu fiyakuuji diina e aduna ɗin, ñaawiraa nunɗal hakkunde yimɓe ɓen. Wata a jokku mbeleeɗe, tuma ñaawataa hakkunde maɓɓe, sakko tooñataa goɗɗo e maɓɓe, sabu tawde oya on no ɓaɗi maa e jeya maa e weldigal, o majjiniri ɗum, laawol Allah focciingol ngol. Anndaa, pellet, majjooɓe ɓen e ngol Allah focciingol, hino woodani ɓe lepte saɗtuɗe, sabu ko ɓe yejjitiri kon, Ñalaande hasboore nden. Tawde si ɓe annditayno fii mayre, ɓe hula nde, ɓe jokkataano mbeleeɗe.

Men tagiraali kammu ngun e leydi ndin meere. Ɗum ko sikke yedduɓe ɓen. Bone Yiite woodanii ɓen yedduɓe, sikkuɓe ɗum, Ñalnde Darngal, si ɓe luttii e keeferaaku sikkitagol Allah ko boni !

Men waɗataa ɓen gomɗimɓe Allah ɓe jokki Nulaaɗo Makko on, ɓe golli golle moƴƴe, wano ɓen bonnirooɓe ka leydi, geddi e keeferaaku. Men waɗataa kadi hulirɓe Joomi mun ɓen, ɗoftagol yamirooje Makko, woɗɗitoo haɗaaɗi Makko, wano heeferɓe ɓen e naafiqiiɓe yooliiɓe e geddi ɓen. Fonnugol ɓe, ko ooñaare nde yahdaa e Allah toowuɗo seniiɗo On. Si ko woni, O yoɓitiray gomɗimɓe ɓen, naatugol Aljanna, O leptira yedduɓe ɓen, naatugol Yiite. Tawde ɓe fotataa ka Allah. Njoɓdi maɓɓe kadi fotataa ka Makko.

Ko Deftere heewunde barki e nafa, woni ndee Alqur'aanaare, nde Men jippini e maaɗa. Fii no yimɓe ɓen taskra miijitoo maanaaji mayre, joomiraaɓe haqqille ɓen hisuɗe ɓen, waajitora.

Men yeɗi Daawuuda, geɗal makko Sulaymaana, neema e ɓural Amen, ko ɓernde makko deeƴira. Sulaymaana moƴƴii jeyaaɗo. Ko o ɗuuɗunooɗo tuubugol ruttoo e Allah.

Janto nde o hollanoo kiikiiɗeere, pucci yooɗuɗi yaawuɗi, darorayɗi taape tati, ɓamta nayaɓal ngal. Ɓe seeraali e hollugol mo ɗum, haa naange muti.

Sulaymaana maaki: Mi ɓurnorii yiɗgol jawdi, wano ɗii pucci, e dow ko mi jantotoo Joomi am kon, haa naange ngen mutoyii, mi faɗii julde alansaraa nden.

Ruttee lam ɗii pucci. Ɓe rutti mo ɗi, o woni e sodirgol ɗi kaafa, ka taape(koyde) e ka daaɗe majji.

Gomɗii Men jarribike Sulaymaana, Men werii e jullere makko laamu nden, seytaniiru, nannditiniindu e neɗɗo, ndu ardii seeɗa e laamu makko ngun. Refti Sulaymaana hettiti laamu makko ngun, o wuurti mbo e seytaniiru ndun.

Sulaymaana maaki: Joomi am, haforanam goopi am, yeɗaa lam laamu heeranii ngu lam, ngu haananaa goɗɗo goo, ɓaawo am. Ko An Joomi, woni ɗuuɗugol mawni dokke.

Men jaabinani mo toraare nden. Men eltani mo henndu ndun, tawi ndu wifiray neweende, e yamiroore makko, e hoore doole e yaawere mayru fow, ndu naɓa mo ka o faalaa.

Men eltani mo kadi seytanuuji ɗin, ɗi woni e ley konngol makko. No e majji mahaynooɗi, goɗɗi ɗin mutaynooɗi ka maayo, ɗi yaltina kaŋŋe.

Seytanuuji goo, ko rawaniyanke, eltanaaɗi mo. Ɗin ko dummbaaɗi e jolokooje, ka ɗi waawaa memminaade.

Ɗum ko ko Men yeɗu maa, an Sulaymaana, ka jaabingol toraare maa. Okku mo yiɗanɗaa, maa ɗalaa mo faalaɗaa. A lamnditortaake goɗɗum e mun.

Pellet, Sulaymaana ka Amen, ko jeyaaɗo e ɓadnaaɓe, maranaaɓe ruttorde moƴƴunde, woni Aljanna.

Janto kadi, an Nulaaɗo, jeyaaɗo Amen on Ayyuuba, nde o torinoo Allah Joomi makko, wonnde: Seytaane memirii lam tampere lebtatnde.

Men wi'ani mo: latir tunndawal(koyngal) maa ka leydi. O waɗi ɗum, ɓunndu ɓullitanii mo ɗon: tawi goɗɗam ɗam, ko yaretee ɗam, o lootora ɗama, ko o ittira lorra e tampere memunoonde mo nden.

Men jaabinani mo toraare. Men huncani mo lorra makko kan, Men yeɗi mo ɓeynguure makko nden, Men ɓeydani mo geɗalɓe e taaniraaɓe yeru maɓɓe, yurmeende immorde e Amen, e njoɓdi muñal makko ngal, e fii no joomiraaɓe haqqille hisuɗe ɓen, waajitora, wonnde muñal, adday hoyeende e warjeede.

Nde Annabi Ayyuuba tikkannoo debbo makko on, o woondiri piyugol mo loyru teemedere. Men wi'ani mo ontuma : Ko an Ayyuuba, nanngiri sookewo maa ngon, tamannde huɗo, piyiraa mo ɗum, no hunniraa woodoore maa nden, hara a firtaa nden. O waɗi ɗum. Men tawu mo, ko o muññiiɗo e ko Men jarribori mo kon. O moƴƴii jeyaaɗo. Pellet, ko o ɗuuɗunooɗo tuubugol ruttoo ka Allah.

Janto kadi, an Nulaaɗo, jeyaaɓe Amen ɓen ɓe Men suɓii, e Nulaaɓe Amen, ɓe Men immini: Ibraahiima, e Ishaaqa e Yaaquuba. Ɓe laatino joomiraaɓe cemmbe ka ɗoftagol Allah, ɗaɓɓa welayee Makko. Ɓe woni kadi joomiraaɓe giiɗe, jaɓooɓe goonga.

Men heertinanii heertinannde, nden woni wuurnugol ɓerɗe maɓɓe ɗen, anntidugol fii galle laakara ɗen, hebilaronaɗe, golle moƴƴe, nodda yimɓe ɓen e mum.

Kadi, ɓee ka Amen, ko jeyaaɓe e suɓiraaɓe ɗoftagol dewgol Men, suɓiraaɓe tammbitagol Nulal Amen ngal, yottina e yimɓe ɓen.

Janto kadi, an Annabiijo, Ismaa'iila geɗal Ibraahiima, e Ysa'u, e Zal-Kifli, mantiraaɓe mantoore labaande, tawde hiɓe hanndi e mun. Kala e maɓɓe, ko jeyaaɓe e suɓaaɓe moƴƴuɓe ɓen ka Allah.

Ɗum ko annditirgol ɓee, mantoore labaande, ka Alqur'aana. Ko pellet, hino woodani hulirɓe Allah ɓen ɗoftagol Mo woɗɗitoo haɗaaɗi Makko ɗin, ruttorde moƴƴunde, ka galle laakara.

Nden ruttorde moƴƴunde, ko Aljannaaji ñiiɓal, ɗi ɓe naatoyta Ñalnde Darngal, hara dame majji no udditiranaaɓe, saɗnugol ɓe.

Hara ko ɓe soɓɓindiiɓe e hoore danɗe cuɗinanaaɗe ɓe, hiɓe nodda gollooɓe ton ɓen, lamndooɓe muuyanteeɗi ɗuuɗuɗi serti, e noone kala e njaram, mo ɓe yiɗi, wano sanngara ekw.

Hino woodani ɓe ton: rewɓe raɓɓinayɓe ndaarɗe mun e worɓe mun tun, fotɓe e duuɓi.

Ko ɗum woni ko fodaɗon e njoɓdi laaɓundi, onon gomɗuɓe ɓen, Ñalnde Darngal. Fii golle mon moƴƴe ɗen aduna.

Pellet, njoɓdi jantaandi fii mun ndin ɗoo, ko arsike Amen, mo Men arsikoyta gomɗuɓe ɓen, Ñalnde Darngal. Arsike duumotooɗo, mo taƴondirtaa, o lannataa.

Ko jantoo kon, ko njoɓdi gomɗuɓe ɓen. Pellet, hino woodani kadi yawtirɓe keeri Allah ɗin geddi e keeferaaku, njoɓdi sertundi; kamɓe on, ko ruttorde ɓurnde bonnde woodani ɓe Ñalnde Darngal.

Njoɓdi maɓɓe ndin, ko Jahannama, huuɓitaynge ɓe, nge tampina ɓe nguleeki e ooyeende. Hiɓe mari ton ndaɗɗuɗe, kono ɗe bonii daɗɗuɗe!

Ɗen lepte, ko ndiyam haɗtuɗam e fatugol, e mbor- di ilatndi e ɓalli yimɓe lepteteeɓe ɓen ka Yiite. Yo ɓe sulko ɗam, sabu ko njaram maɓɓe ɗam ittataa ɗonka ɗan non!

Hino woodani ɓe lepte goo, nannduɗe e majje. Ɗen ko nooneeji, ɗi ɓe leptiroytee ka laakara.

Si yimɓe Yiite ɓen naatoyii e magge, ɓe ukkondi- royii hakkunde maɓɓe e weljugol hoynindira, kala e maɓɓe wona e daɗndinagol e oya. Woɗɓe e maɓɓe wi'i: E hino fedde naatidoyay nde e mon ka Yiite. Ɓe jaaboo ɓe: Toolii alanaa ɓe, tawde ko ɓe meeɗirayɓe Yiite ngen, no men meeɗirta nge.

Fedde jokkunooɓe ɓeya ɓen wi'ana koohooɓe ɓen: ko onon ɓee koohooɓe kan, woni toolii alanaa, ko onon defi men ɗee lepte muusuɗe, sabu ko mojjinirɗon men kon, bewinɗon men. Ndee ñiiɓirde Jahannama ɗoo, nde bonii ñiiɓirde naatooɓe nge fow.

Ɓe wi'a kadi: Joomi amen, defuɗo men majjugol on, ɓaawo nde peewal ngal ari e amen, sowan mo lepte ɗen ka Yiite.

Bewɓe townitiiɓe ɓen wi'a: Ko haɗi men yi'ugol ka Yiite gaa, worɓe ɓe men limtaynoo ka aduna, jeyaaɓe e bomɓe, hannduɓe e lepte?

Hara men falju e kon men jagitornoo ɓe kon jalnori, tawa ɓe handaa e lepte, kaa hara ɓe naatu Yiite, gite amen yawti ɓe?

Pellet, ko Men jantanii on kon, e ko yedduɓe ɓen wenjorndirta hakkunde maɓɓe Ñalnde Darngal, ko goonga mo sikke alaa e mu'un.

An Muhammadu, maakan yimɓe maa yedduɓe ɓen: Anndee ko mi jertinoowo on, e lepte Allah ɗen, fii wata ɗe yanir e mon, sabu yeddugol mon fenna Nulaaɓe Makko ɓen. Anndo kadi, alaa reweteeɗo hannduɗo e dewal, si wanaa Allah Seniiɗo On. Ko Kanko woni Bajjo ka mawngu e sifaaji e ka inɗe Mun, Fooluɗo kala huunde. Mo huunde kala yankinii Ɗum.

Ko Kanko woni Jeyɗo kammuuli ɗin, e leydi ndin, e kon ko woni hakkunde majji. Fooluɗo e laamu Mun, Mo gooto foolataa. Haforoowo junuubi jeyaaɓe Makko tuubuɓe ɓen.

An Nulaaɗo, maakan ɓee fennooɓe : ndee Alqur'aanaare, ko kumpital mawngal fiyaaku.

Kono hiɗon ɗuurnii e on kabaaru mawnuɗo fiyaaku. On alaa yeƴƴitaade e makko.

Mi heɓataano ganndal, e ko feƴƴaynoo hakkunde Malaa'ika'en, fii tagugol Aadama, si wanaano Allah wahayini ɗum e am, O anndimmi.

Allah wahayiniraali e am, si wanaa tawde ko mi jertinoowo on, e lepte Makko ɗen, ɓanninano on.

Janto nde Joomi maa daalannoo Malaa'ika'en: Min ko Mi tagiroowo ɓanndinke, woni Aadama (yo o his) immorde e loopal.

Si Mi fotindirii tagu makko ngun, Mi moƴƴintinii mbaadi makko ndin, mi wuttii ruuhu Am on e makko, ko yo on sujjan mo.

Malaa'ika'en ɗoftii yamaruyee Joomi maɓɓe on, ɓe sujji ɓe denndaangal, sujuudu teddungal. Alaa mo sujjanaano Aadama e maɓɓe.

Si wanaa Ibuliisa, o mawnitinii sujjugol ngol, o woni jeyaaɗo e yedduɓe Joomi mun.

Allah daali: Ko an yo Ibuliisa, ko honɗum haɗu maa sujjangol Aadama, mo tagirmi juuɗe Am? Ko mawnintinaare haɗu maa kaa hari nun ko a jeyanooɗo e townitaniiɓe Joomi mun ɓen?

Ibuliisa wi'i: Ko min ɓuri Aadama moƴƴude. Tawde A tagirii lam immorde e yiite, A tagirii mo kanko e loopal. Sikkugol mo wonnde yiite ɓuri loope teddude.

Alla daalani ibuliisa: Yaltu ka Aljanna ton, sabu ko a huɗaaɗo Kiitaaɗa.

Pellet, raɗeede ka Aljanna fawike ma, haa Ñalaande nɓjodi kuuɗe, nden woni Ñalnde Darngal.

Ibuliisa wi'i: Nennitanam maayugol, haa ñalnde immintaa jeyaaɓe Maa ɓen.

Allah daali: A jeyaama e nennitanaaɓe ɓen.

A nennitanaama, haa e happu anndaaɗo, halkeede ma.

Ibuliisa wi'i: Mi woondirii kattal e mawngu Maa ngun ! Ma mi majjin ɓiɗɓe Aadama ɓen fow.

Si wanaa ɓen ɓe daɗndu-Ɗaa bone am, heertinir-Ɗaa ɓe e rewugol Am tun.

Allah daali: goonga kan ko e Am, ko goonga Mi wowlata, wanaa ko lunndi ɗum.

Ma Mi hebbinire Jahannama Ñande Darngal, an e ɓen jokkuɓe ma, yedduɓe ɓen e banii Aadama ɓen fow.

An Nulaaɗo, maakan sirkooɓe ɓen: Mi lamndaaki on e ko mi yottinta e mon kon, njoɓdi. Mi wonaali kadi etotooɗo sincugol ɓeyda e ko mi yamiraa kon.

Alqur'aana wonaali, si wanaa waaju, wonannde hellifaaɓe yimɓe e jinna ɓen.

Ma on anndu kabaaru ndee Alqur'aanaare, wonnde ko nde goonga, ɓaawo dummunna ɓadiiɗo, tuma nde maayoton.

Jippagol Alqur'aana, ko immorde ka Allah, Fooluɗo Mo gooto foolataa, Ñeeñuɗo e tagu Mun, e toppitagol Mun e sari'a Mun. Wanaa e goɗɗo goo, ko woori Mo, nde jippori.

Men jippinirii Deftere Alqur'aana nden e maaɗa, an Nulaaɗo, e hoore goonga. Kumpite mayre fow ko goonga, ñaawooje mayre fow kadi ko nunɗuɗe. Haray rewu Allah, wootinɗinaa mo, laɓɓinanaa Mo tawhiidi e hoore sirku.

Anndee, ko Allah woodani, diina laaɓuka e sirku kan. Ɓen non ɓe ɓeya jogitori yiɗɓe gaanin Allah, immorde e sanamuuji e bewinayɗi, ɗi ɓe rewata ɓe acca Allah, ɓe wona e ngantinorgol ɗum, wiide: Men rewiraali ɗii, si wanaa tun no ɓadinira men ka Allah, martaba, ɗi hewtina Mo haajuuji amen, ɗi tefana men ka Makko. Pellet, Allah ñaawoyay hakkunde gomɗimɓe wootimɓe Mo ɓen, e yedduɓe sirkuɓe ɓen, Ñalnde Darngal, e kon ko ɓe luutondiraynoo e mun, ka tawhiidi. Pellet, Allah fewnataa e goonga, on fenoowo dammba e Alla sirku, dullanoowo neemaaji Allah ɗin e makko.

Sinno Allah yiɗuo siforgol ɓiɗɗo, O suɓotono ko O yiɗi, e tagu Makko ngun, O waɗa on ɗon ɓiɗɗo Makko. Kono O senike O laaɓii e kon ko sirkooɓe ɓen wowolata ! Ko Kanko woni Allah Gooto On ka jaati, e ka sijaafi e ka golle Makko. Kafidiiɗo alanaa Mo e ɗin. Ko O Fooluɗo tagu Makko ngun fow.

O tagirii kammuuli ɗin e leydi ndin, ñenƴal yottiingal, ko fijindaaru alaa e mu'un, wano tooñuɓe ɓen aaƴorta. Himo suddira jemma on, ñalawma on, O suddira kadi ñalorma on, jemma on. O elti naange ngen e lewru ndun, tawi kala majji, hino doga haa e happu eɓɓaaɗo, on woni lannugol ɗam nguurndam. Haray anndee, ko Kanko woni Fooluɗo, yoftotoowo ayɓe Mun, Mo gooto foolataa, Haforoowo junuubi kala tuubuɗo e jeyaaɓe Makko ɓen.

Joomi mon, onon ɓee yimɓe, tagii on e fittaandu wooturu, ndun woni Aadama. Refti O tagi e makko, genndo makko on Hawaa. O tagani on gelooɗi e na'i e dammi e be'i, nooneeji jeetati, noone kala, gorel e deyel. Himo tagira on ka teege yumma mon en, sagara naɓi sagara, e nder niɓe reedu e rennga e jowtol. Ko On mooɗon tagoowo ɗum fow, woni Allah, Joomi mon. Ko Kanko laamu woodani. Reweteeɗo e goonga alaa, si wanaa Kanko. Ko honno ferlitoraɗon e rewugol ko tagataa, acca ɗon tagoowo On?

Si onon ɓee yimɓe, on yeddii Joomi mon, anndon tun, Allah ko yondiniiɗo e gomɗinal mon, keeferaaku mon, lorrataa Mo. Ko onon ɗum lorrata, tawde Allah kan, O siforaali yamiroowo pankere e ko añinii. Si on yettii Mo non e neemaaji Makko ɗin, on gomɗinii Mo, O weltanto on, O warjoo on e ɗum. Anndon wonii bakkondinki woo, ronndantaako wokki goo. Kala e ko faggitanii hoore mun. Refti ko ka Joomi mon tun, woni ruttorde mon, Ñalnde Darngal; O yeetitoo on, fii ko gollaynoɗon aduna, O yoɓita on, njoɓdi golle mon ɗen. Kanko seniiɗo On, pellet, ko O annduɗo ko woni e ɓerɗe jeyaaɓe Makko ɓen. Huunde e ko woni e majje, suuɗaaki Mo.

Si lorra heɓii yedduɗo, wono ñawu maa sattireede arsike maa hulugol yoolaade, o toroo nde Joomi makko hunciranta mo ɗum, ruttagol e Makko, Kanko tun. Refti non, si Allah neeminirii mo huncangol mo on lorra, o yejjita fii Allah, Mo O torotonoo On, ado ɗum. O waɗana Mo kafidiiɗi, reweteeɗi, ko wanaa Allah, no o majjinira woɗɓe goo, e laawol Allah ngol. Nulaaɗo, maakan sugu on ɗon : dakmitor yeddugol maa ngol, yeru ko o heddoriɗaa e duuɓi kon. Anndaa pellet, ko a jeyaaɗo e yimɓe duumoytooɓe ka Yiite ɓen, Ñalnde Darngal.

Kaa ko on ɗoftiiɗo Allah, feƴƴiniroowo jemma on, sujjangol Mo, darorana Mo naafe, hara himo huli lepte laakara ɗen, himo jortrii yurmeende Joomi makko nden, kaa ko yedduɗo rewoowo Allah on ka saɗteende tun, o yedda Mo ka hoyeende, o waɗana Mo kafidiiɗi? An Nulaaɗo, maaku : Hara ɓen annduɓe ko Allah farli kon e maɓɓe, hino fota e ɓen ɓe anndaa huunde e ɗum? Anndu ko taskotoo kon ko senndi ɗin feddeeji ɗiɗi, ko joomiraaɓe haqqille hisuɗe ɗen.

An Nulaaɗo, maakan jeyaaɓe Am gomɗimɓe Lam Min e Nulaaɓe Am ɓen: huliree Joomi mon, ɗoftagol yamaruyeeji Makko, e woɗɗitagol haɗaaɗi Makko. Hino woodani moƴƴimɓe golle ɓen e mon aduna, moƴƴoreede e mun aduna, walleede e cellal e jawdi, ka laakara, hara ko Aljanna. Leydi Allah ndin ko yaajundi, feree e mayri, haa e nokku ka waawoton rewude Mo woo, ka goɗɗo haɗataa on ɗum. Anndon muññiiɓe ɓen, ɓe timminirante njoɓdi maɓɓe ndin Ñalnde Darngal, ko aldaa e limaneede maa etaneede, ɗuuɗi fanɗi.

An Nulaaɗo, maaku: min mi yamiraama rewugol Allah tun, mi laɓɓinana Mo dewal ngal.

O yamirimmi kadi, wonugol arano e jebbilaniiɓe Mo ɓen, yankinaniiɓe Mo e ɗee mofte.

An Nulaaɗo, maaku: min miɗo huli, si mi yeddii Allah, mi ɗoftaaki Mo, nde lepte Ñalaande Mawnde nden heɓatammi, nden woni Ñalnde Darngal.

An Nulaaɗo, maaku : min ko Allah tun mi rewata, mi laɓɓinana Mo dewal. Wanaa goɗɗo goo, mi waɗanta ɗum.

Onon sirkooɓe ɓen non, rewee ko yiɗuɗon e sanamu, hara wanaa Kanko. Ɗum ko kammbaa ! An Nulaaɗo, maaku: ko woni hayruɓe ɓen tigiri, ko ɓen tawata ɓe hayrinii ko'e maɓɓe e ɓeynguureeji maɓɓe, ɓe ronkoya yiidoyde e maɓɓe, si ɓen naatoyii Aljanna, maa ɓe naatidoya e maɓɓe ka Yiite, tawa ɓe yiitidataa poomaa. Anndee ko ɗum tigiri, woni hayrere ɓanngunde nden, ko sikke alaa e mu'un.

Curki e kippoodi wulndi, hino woodirani ɓe senngo dow maɓɓe, e senngo ley maɓɓe. Ko ɗee lepte jantaaɗe fii mun, woni ko Allah hulɓirnirta jeyaaɓe Makko ɓen. Ko onon yo jeyaɓɓe Am, kori huliree Lam, ɗoftagol yamiraaɗi Am, woɗɗitoo haɗaaɗi Am.

Ɓen woɗɗitiiɓe e rewugol sanamuuji ɗin, e kala ko wonaa Allah, ɓe tuubi ɓe ruttii ka Allah, welo-welo Aljanna no woodani ɓe, tuma ɓe maayata, e ka genaale, e Ñalnde Darngal. An Nulaaɗo, wewlinir jeyaaɓe Am ɓen.

Ɓen nanooɓe Konngol ɓen, ɓe senndindira ko moƴƴi e ko boni e maggol, ɓe jokka ko ɓuri moƴƴude e maggol. Ko ɓen siforiiɓe ɗin sifaaji, woni ɓe Allah fewniri peewal ɓen, ko ɓen woni joomiraaɓe haqqille hisuɗe ɓen.

Kala mo konngol lepte jojjiri e mun, sabu duumagol mo e yeddugol e majjere, a alanaa on feere, an Nulaaɗo, fii no feewira. E ko an Nulaaɗo, waawata daɗndude wa'uɗo non e Yiite ngen?

Si ko ɓen hulirɓe Joomi mun, ɗoftagol yamiraaɗi Makko, woɗɗitoo haɗaaɗi Makko, hino woodani ɓe kuɓeeje toowuɗe fawondiri ka Aljanna, hara canɗi no ila senngo ley majje. Ko Allah fodi ɓe ɗum! Allah non firtataa fodoore Makko.

Hiɗon anndiri seedagol mon, wonnde Allah saaƴinirii ndiyam ka kammu, O naadi ɗam e ɓulli e canɗ; refi O yaltinira ɗam ndiyam, remuru seedudnu noone, refti O yoorna ndu, yi'aandu an seeditiiɗo on, hindu soyɗi, ɓaawo ndu wonunoo haako; refti O waɗa ɗum ko muncitaa. Pellet, wonii e ko jantaa koo, waaju, wonannde joomiraaɓe haqqille ɓen hisuɗe ɗen.

E ko on mo Allah yaññani ɓernde mun fii lislaamu, o feewi e mun, hara himo e ɓanngannduyee immorde ka Joomi makko, wa'ata wa yoora ɓenrdeejo e jantagol Allah? Ɓe fotataa fes. Tawde ko feewuɓe ɓen, daɗata, yoora ɓerɗe'en e jantagol Allah .Ɓen wonii e majjere ɓanngunde.

Allah jppinii e Nulaaɗo Makko on Muhammadu (yo o his) Alqur'aana, ɓurnde moƴƴude yewtere. O waɗi nden nanndude ka goonga, e ka moƴƴugol, e ka yuɓɓondirgol e waasde luutondirde. Fillayeeji e ñaawooje hino ɗuuɗi e mayre, kañum e fodooje e kammbaa, e sifaaji yimɓe goonga, e yimɓe meere ɓen ekn. Guri ɓen hulooɓe Joomi mun, hino riɓira sabu nanugol kammbaaji ko woni e mayre, refti guri e ɓerɗe maɓɓe deeƴira jantagol Innde Allah, tuma ɓe nani jortagol e welo-welo ko woni e mayre. Koo ko jantaa e ko Alqur'aana battinta, ko peewal Allah, ngal O fewnirta mo O muuyani, O hoyna mo Mo O muuyani. Kala non mo Allah fewnaali, haray fewnoowo mo alaa.

Kere on mo Allah fewni aduna, O naadoya mo Aljanna laakara, on fotay wa yedduɗo maayi e keeferaaku on, naatoyoowo Yiite, tonnge juuɗe e koyɗe, mo tawata waawoytaa daɗirde Yiite ngen, si wanaa tun o fewtinira nge yeeso makko ngon? Tooñuɓe ɓen feliree wi'aneede ontuma: meeɗen non hannde, kon ko wonunoɗon faggitorde geddi e keeferaaku. Ko njoɓdi mon ndin nii.

Mofte adinooɓe ɓee sirkooɓe, kadi fennuno Nulaaɓe mun, lepte ɗen ardirani ɓe juhal, fewndo ka ɓe so'aa-anndude, sakko ɓe hebiloranaɗe tuubugol.

Allah meeɗiriɓe sabu ɗum, lepte koyeera, e jaasere, e wirtere ka ngurrndam aduna. Pellet, ko lepte laakara ɗen habbitiiɗe ɓe, ɓuri mawnude e tiiɗe, si tawno hiɓe anndunoo.

Gomɗii Men piyanii yimɓe ɓen, e ndee Alqur'aanaare jippinaande e Muhammadu (yo o his) noone kala e mise moƴƴere e bone, goonga e meere, gomɗinal e keeferaaku, ekn. Ɗum fow, ko jortagol nde ɓe waajitora, ɓe huutora goonga kan, ɓe sela meere nden.

Men waɗi nde Alqur'aanaare, janngeteende e haala Aarabu, nde aldaa e ooñaare maa jiɓi-liɓi, jortagol no ɓe hulira Allah, jokkugol yamiraaɗi Makko, woɗɗitoo haɗaaɗi Makko.

Allah waɗii misal hakkunde sirkoowo e wootinɗinoowo, woni gorko mo lurruɓe hawti : si o weltinii woɗɓe ɓen, ɓeya ɓen monoo, o wona e jiɓi-liɓi. Oya gorko, ko laaɓanɗo gorko goo, kanko tun, himo anndi ko deeƴinta oya, e ko wallinta mo ɓernde. Ɓen worɓe ɗiɗo, ɓe fotataa e misal. Yettoore woodanii Allah. Kono ko ɓuri ɗuuɗude e maɓɓe, ɓe anndaa. Ko waɗi si ɓe kafida e Allah, goɗɗum goo.

Pelelt, an Nulaaɗo, ko a maayoowo, kamɓe kadi ko ɓe maayooɓe, feere mun alaa.

Refti onon ɓee yimɓe, Ñalnde Darngal, ko ka Joomi mon yeddondiroyton, e ko pooɗondiraynoɗon fii mun, goonguɗo on seerta e meerenteejo on.

Alaa ɓurɗo tooñude haa hewta on dammbuɗo e Allah, ko yahdaani e Makko, wano waɗangol Mo kafidiiɗo, maa genndo maa ɓiɗɗo. Alaa kadi ɓurɗo tooñde wa on fennuɗo wahyu on mo Nulaaɗo Allah on (yo o his) addi. E wonaa ka Yiite woni jaaƴorde yeddude Allah ɓen, ɓe yeddi ko Nulaaɗo Makko on addi kon? Pellet, ko non woniri, weerde maɓɓe, ko nder ton.

On non arduɗo e goonga, ka haala e ka kuuɗe maɓɓe, foti ko Annabaajo maa goɗɗo goo, o gomɗini ɗum, o gollitiri. Ko ɓen woni gomɗuɓe ɓen tigiri, ɗoftiiɓe yamaruyeeji Joomi mun, woɗɗitiiɓe haɗaaɗi Makko.

Hino woodani dakammeeji duumotooɗi, ka Joomi maɓɓe; ko ɗum woni njoɓdi moƴƴinooɓe golle ɓen, ka Joomi maɓɓe e jiyaaɓe.

Fii no Allah momtirana ɓe, ko ɓuri bonnde e ko ɓe gollaynoo e geddi aduna, tawde ɓe tuubii e mun, ɓe ruttike e Joomi maɓɓe. O yoɓitira ɓe njoɓdi maɓɓe ndin, ko ɓuri moƴƴude e kon ko ɓe gollunoo.

Mbela Allah siforaali yonugol jeyaaɗo Makko on Muhammadu (yo o his) ka fiyakuuji makko diina e aduna, O duñana mo ayɓe makko? Pellet, O yonay mo. Hiɓe hulɓinire, an Nulaaɗo, sabu majjere e ɗaayre maɓɓe, ɗin sanamuuji, ɗi ɓe rewata ɓe acca Allah, wiide ɗi memirte bone. Kala non mo Allah hoyni, O hawrinaani mo fewnude, haray fewnoowo on ɗon, alaa.

Kala non mo Allah hawrindini e peewal, alaa haɗtanɗo majjinde mo. Mbela Allah siforaaki wonnde Fooluɗo Mo gooto foolataa, Jom leptugol ɓen heefereɓe yedduɓe Mo? Ko non woniri, Ko O Fooluɗo, Jom lepte.

Pellet, si an Nulaaɗo, a lamndike ɓee sirkooɓe: Ko hommbo tagi kammuuli ɗin e leydi ndin? Ma ɓe wi'u: Ko Allah tagi ɗi. Awa maakan ɓe, feññinanaaɓe, ronkere reweteeɗi maɓɓe ɗin: Yeetee lam fii ɗii sanamuuji, ɗi rewoton gaanin Allah; si Allah faandanike lorra, hara ɗi waaway ittannde lam on lorra? Maa si O faandanike lam moƴƴere Makko, taw si ɗi haɗtani haɗugol lam nden moƴƴere Makko? Maakan ɓee: Allah tun yonii lam, ko e Makko mi fawi kala fiyaaku am, ko e Makko kadi tun, woni ko wakkiltoo ɓen tuuginotoo.

An Nulaaɗo, maaku: Ko onon yo yimɓe am, golliree no waalorani on, sirkangol Allah. Min ko no Joomi am yamirimmi non, mi gollirta, woni noddugol e tawhiidi, laɓɓinana Mo dewal. Aray ka anndon, battane laawol kala e me'en.

Aray nde anndon, ko hommbo lepte aduna hoynayɗe aroyta e muuɗum, lepte duumiiɗe jippoyoo e makko Ñalnde Darngal, hara ɗe taƴondirtaa, sakko ɗe lanna.

Men jippinirii Deftere Alqur'aana nden, e maaɗa an Nulaaɗo, fii yimɓe ɓen, e hoore goonga, no jertiniraaɓe. Kala feewuɗo, ko hoore makko o feewani, Allah nafitortaa peewal makko, tawde ko O yondiniiɗo e ɗum; kala kadi majjuɗo, haray lorra mun on, ko e makko yiltotoo, ɗum lorrataa Allah. A wonaali wakkilaaɗo ɓee, fii daranagol ɓe haa ɓe feewa. Ko yottingol tun, fawi maa e maɓɓe.

Allah hino ƴettita pittaali ɗin, tuma lajal majji timmata, e ɗin ɗi lajal mun timmaali, fewndo ɗoyngol majji. O jogitii ɗin ɗi O ñaawani maayde, O accita ɗiya, ɗi O ñaawani heddagol, haa e dumunna happaaɗo ka Makko. Pellet, wonii e ko sifaa koo, maandeeji, wonannde ɓe miijitotooɓe, tinndinayɗi, wonnde waɗoowo ɗum On, hino hattani wuurnitugol yimɓe ɓen, ɓaawo maayde maɓɓe, fii hasbugol ɓe, yoɓa ɓe.

Kaa ɓee sirkooɓe jogitor sanamuuji maɓɓe ɗin, tefooji, ɗi ɓe jortorii nafa, hara wanaa Allah? An Nulaaɗo, maakan ɓe: On jogitoto tefoojo, hay si tawii ɗi jeyanaa on, onon e majji, hay huunde, kadi ɗi haqqiltaa, ko wowlataa, ɗi nanataa, ɗi yi'ataa, ɗi nafataa, ɗi lorrataa?

An Nulaaɗo, maakan ɓee sirkooɓe: Tefoore nden fow, ko Allah heeranii. Gooto tefataa ka Makko, si wanaa e duŋayee(sakkitoore) Makko. O jaɓantaa kadi tefoore, si wanaa mo O welanaa. Ko Kanko tun, laamagol kammuuli ɗin e leydi ndin, woodani. Refti ko ka Makko tun, woni ruttorde mon, Ñalnde Darngal, fii hasbeede, yoɓee. O yoɓa kala mon, e golle mun.

Si fii Allah tun jantaama, ɓerɗe sirkooɓe, ɓe gomɗinaa laakara e ummital e hasboore e njoɓdi ɓen, wona e tamagol. Si fii sanamuuji ɗi ɓe rewata ɗin, gaanin Allah jantaamaa, e jaka yoo, hiɓe wewla weltoo.

An Nulaaɗo, maaku: Yaa Allah, tagirɗo kammuuli ɗin e leydi ndin, no ɗi anndiranooka, Annduɗo ko wirnii e ko feeñi, Mo huunde e ɗin suuɗaaki. Ko An tun, ñaawata hakkunde jeyaaɓe Maa ɓen, Ñalnde Darngal, e kon ko ɓe luutondiraynoo e mun ender aduna. Ɓannginaa goonguɗo e meerente, malaaɗo e malkisaaɗo.

Si tawno no woodannoo tooñirɓe sirko e geddi ɓen, kala ko woni kon ka leydi, immorde e jawle, ɓe sottorayno ɗum, lepte saɗtuɗe ɗen ɗe yi'oyta, ɓaawo ummital maɓɓe. Kono ɓe alaa feere ɗum. Hay si ɓe heɓu feere mun, ɓe jaɓanoytaake. Ontuma, feeñirana ɓe ka Allah, noone e lepte, ɗo ɓe tijjanooki.

Boneeji sirku e geddi, ɗi ɓe faggitinoo ɗin feñana ɓe, lepte ɗe ɓe jalkitaynoo ɗen huuɓita ɓe, ɗen lepte ɗe ɓe hulɓinirtenoo, ɓe wona e jalkitugol.

Si ñawu maa baasal ekn heɓii neɗɗo keefeero, o nadda Men, fii huncangol mo ɗum. Refti si Men okkii mo neema callal maa jawdi, o wona e wi'ugol: Anndee ko Allah okkiri lam ɗum, ko anndugol Mo, miɗo hanndi e mun. Kono ka goonga, ɗum ko jarrabuyee e ndaarndo; kono ɓurɓe ɗuuɗude e heeferɓe ɓen, ɓe anndaa ɗum, ɓe mantora neema Allah on e maɓɓe.

Gomɗii heeferɓe adinooɓe ɓen, wowliino ngol konngol. Kono kon ko ɓe faggitotonoo e jawle e kuɓeeje, duncanaano ɓe hay huunde.

Njoɓdi boneeji sirku e geddi, ɗi ɓe wonunoo e faggitagil ɗin, memi ɓe. Tooñirɓe ko'e mun ɓen sirku e geddi, jeyaaɓe e ɓee ɗoo ɓen, njoɓdi boneeji ɗi ɓe faggitotonoo ɗin, memiroyaɓe, wano yawtuɓe ɓen. Ɓe wonaa fuutotooɓe Allah, wanaa fii foolugol Mo!

Sirkooɓe ɓen wi'ay ko ɓe wi'i, hara ɓe anndaa wonnde Allah no yaññana arsike on, mo O muuyani, fii jarribagol ontigi, ndaara si o yettay kaa o yedday? Ko wano non kadi O ɓiɗtiniranta mo O muuyani, jarribagol fahin, ontigi, ndaara si o muññoto kaa o monanto eɓɓoore Allah nden? Pellet, wonii e ko jantaa koo, fii yaññaneede maa ɓiɗtinanee arsike, maandeeji, wallitirɗo taskagol fii Allah, wonannde yimɓe gomɗinooɓe. Tawde ko ɓen nafitorta ɗin maandeeji, wanaa yedduɓe yawtooɓe ɗen Aayeeje, hara hiɓe ɗuurnoo ɗe.

An Nulaaɗo, maakan jeyaaɓe am yawtirɓe keeri ɓen sirku e geddi: wata on taƴo e yurmeende Allah nden, e ko O haforanta on junubaaji mon. Tawde pellet, Allah ko haforoowo junuubi ɗin fow, wonannde kala tuubanɗo Mo. Ko Kanko woni Haforoowo junuubi tuubayɓe ɓen, Hinnotooɗo ɓe.

Tuubee ruttoron ka Joomi mon, golle moƴƴe, jebbilanoɗon Mo, ado lepte laakara ɗen arde e mon, hara on heɓirtaa sanamuuji ɗin wanaa yimɓe mon ɓen, faabo.

Jokkee ndee Alqur'aanaare, tawnde ko ɓurnde moƴƴude e ko Joomi mon jippinani on, haa e Nulaaɗo Makko on, gollitiron nde, woɗɗitoɗon e ko nde haɗi, ado lepte ɗen ardude on e juhal, hara on so'aa anndude, sakko hebiloron tuubugol.

Waɗee ko yamiraɗon, ado wonkii wi'oyde tuma nimse nafataa janngo: Ee nimse am, e ko mi welsindii e Allah, geddi e keeferaaku. Ki tabintina wonnde ko jeyano e jalkitaynooɓe yimɓe gomɗimɓe ɗoftii ɓen.

Maa ki ngantinora kodduruyee, ki wi'ia: Si Allah feewnuno mi, mi jeyeteno e huluɓe Mo ɓen. Mi ɗoftoo yamirooje Makko, mi woɗɗitoo haɗaaɗi Makko.

Maa ki yelora wi'ugol, nde ki yi'ata lepte ɗen: Si feere ruttagol aduna no woodannoo lam, mi tuubanayno Allah, mi jeyee e moƴƴinooɓe golle ɓen.

Ɗum gasatira no faaliraɗaa non feewirde ! Tawde Aayeeje Amen ɗen aruno e maaɗa, fennuɗaa ɗe, mawnintiniɗaa, laatiɗaa jeyaaɗo e yedduɓe Allah ɓen, yeddi Aayeeje Makko ɗen e Nulaaɓe Makko ɓen.

Ñalnde Darngal, a yi'oyay fenunooɓe e hoore Allah ɓen, ɓe dammbi sirku e ɓiɗɗo e Makko, hiɓe ɓawli geece, hakkee ko ɓe malkisaa. Wonaa ka Jahannama woni jaaƴorde mawnintinaniiɓe gomɗingol Allah e Nulaaɗo Makko on? Ko ton tigiri, woni weerde maɓɓe.

Allah hisinira huluɓe Mo ɗoftii haɗitii ɓen, e lepte, O naadaugol ɓe ka maloore Aljanna. Bone lepte memataa ɓen, wanaa kamɓe woni ko sunoytoo, fii ko feƴƴi e geɓoy aduna.

Ko Allah woni Taguɗo kala huunde, wanaa goɗɗo goɗɗum goo. Ko Kanko kadi woni Fawtiiɗo kala huunde, O Toppitoo fii mayre, O waɗira nde, no O haajiri.

Ko Kanko tun, jogitii ngaluuji moƴƴere ɗin, ka kammuuli e ka leydi. Himo yeɗa ɗi Mo O haajani, O ɗawa ɗi Mo O muuyi. Yedduɓe Aayeeje Allah ɓen non, ko ɓen woni hayruɓe ɓen. Tawde ɓe faɗii gomɗingol e nguurndam maɓɓe ɗam aduna, e hoore ɓe naatoyay ɓe heddoo ka Yiite, laakara.

An Nulaaɗo, maakan ɓee sirkooɓe jokkuɓe maa, fii rewugol sanamuuji maɓɓe ɗin: E on yamiray lam, onon ɓee majjuɓe fii Joomi mun, nde mi rewata ko woori Allah? Anndee ko Allah tun, hanndi e reweede, mi rewataa, si wanaa Kanko.

Gomɗii Allah wahayinii maaɗa, an Nulaaɗo, O wahayini kadi e Nulaaɓe adinooɓe ma ɓen: si a kafidii e Allah goɗɗum goo, ko pellet, golle maa moƴƴe ɗen bonay; jeyeɗaa e hayruɓe aduna ɓen, sabu hayruɓe diina maa, hayroyaa kadi e lepte laakara ɗen.

Ko Allah tun, si a reway, hara a kafidaali Mo e goɗɗum goo, jeyeɗaa e yettooɓe Mo neemajji ɗi O neemini e maaɗa ɗin.

Sirkooɓe ɓen mawniniraali Allah, no O haaniri mawninireede, tuma ɓe kafidunoo Mo e taguuji Makko lo'uɗi, ɓe yejjiti wonnde no jeyaa e kattane Makko ngal, tawde leydi ndin e ko woni mayri kon : immorde e pelle e leɗɗe e canɗi e boyli, fow e mun, Ñalnde Darngal, ko e tamannde Makko wonata, kammuuli ɗin jeeɗiɗi kadi, fow majji taggiree ñaamo Makko ngon. Senayee woodanii Mo ! O laaɓii O toowii kon ko sirkooɓe ɓen fiɓata wowla e Makko.

Ñalnde Malaa'ikaajo on wuttoyta ka Allaandu, kala ko woni ko kammuuli e ka leydi fow maayay, refti wuttee e mayru ɗiɗaɓol, fii ummital, tawaa ɓe fow ɓe wuurnitaama, hiɓe darii habbii ko Allah waɗata ɓe.

Leydi ndin jalbirora, tuma Jeyɗo ndi On feeñiroyta ñaawugol hakkunde jeyaaɓe ɓen. Talki golle ɗin sennditee, Annbaaɓe ɓen addee, mofte Muhammadu (jom kisiyee ɗen) ɓadine, fii seeditanagol ɓeya Annabaaɓe, e yimɓe maɓɓe ɓen. Allah ñaawira nunɗal hakkunde maɓɓe, wonaa ɓe tooñeteeɓe nden Ñalnde: goɗɗo ɓeydantaake bonɗi, o ɗuytantaake moƴƴi.

Allah yoɓita wonki kala, ko ki golli kon, woni bone maa moƴƴere. Ko Kanko Allah ɓuri anndude ko ɓe gollata kon. Huunde suuɗaaki Mo e kuuɗe maɓɓe, woni bonɗe maa moƴƴe. O yoɓitoyay ɓe ɗum, nden Ñalnde.

Malaa'ika'en soggiroya yeddunooɓe Allah ɓen, ka Jahannama, dente-dente, hoynaaɓe. Si ɓe hewtii nge, dame magge udditaneeɓe, Malaa'ika ayninaaɓe nge ɓen jaɓɓora ɓe feloore wi'ugol: Enee, Nulaaɓe jeyaaɓe e mooɗon, hewtaano on, ɓe no jannganaynoo on Aayeeje Allah, jippinaaɗe e mon ɗen, ɓe rentinira on, hawrugol e lepte saɗtuɗe Ñalnde Darngal? Ɓe qirritora wi'ugol: Ko non woniri, ko woni tun, hari Konngol lepte ngol jojjiino e yedduɓe ɓen. Menen non, ko men yeddunooɓe.

Ɓe wi'iranee hoyneede, e teƴagol yurmeende Allah e yaltugol ka Yiite ton: naatiree dame Jahannama ngen, lutton ton poomaa. Nge bonii weerde mawnintiniiɓe toownitanii goonga ɓen.

Malaa'ika'en ɗowira muumini'en, hulunooɓe Joomi mun, ɗoftinooɓe yamaruyeeji Makko, ɓe woɗɗitii e haɗaaɗi Makko, teddungal, haa ka Aljannaaji, hara ko dente-dente. Si wonii ɓe hewtii ton, dame majji udditanaama ɓe, Malaa'ikaaɓe ayninaaɓe ton ɓe wi'ana ɓe: on hisii e kala lorra, maa ko huloton. Ɓerɗe mon e golle mon laaɓii. Naatiree Alajanna on, duumagol ton poomaa.

Muumini'en si naadaama Aljanna, ɓe wi'a: Yettoore woodanii Allah, laatinanɗo men fodoore Makko, e ɗemɗe Nulaaɓe Makko ɓen, wonnde O naadoyay men Aljanna. O ronini men leydi Aljanna ndin, meɗen hoɗira e mayri, kala ka men yiɗi. Mbarjaari gollunooɓe golle moƴƴe ɓen, fii Allah, ndi moƴƴii barjaari.

Nden Ñalnde, a yi'ay Malaa'ika'en no fiiltii Arsi ki, hiɓe senina yettugol Joomi maɓɓe, e huunde ko heeferɓe wi'ata Mo, kon ko haananaa Mo. Allah ñaawira nunɗal, hakkunde tageefo ngon fow: O teddina Mo muuyanaaɓe ɓen, O lepte lepteeɓe ɓen. Ontuma wi'ee: Yettoore woodanii Allah, Jeyɗo tageefo ngon, e fii ko O ñaawiri kon yurmeende, hakkunde jeyaaɓe Makko ɓen, O heertinani yurmeende Makko nden, muumini'en, yedduɓe ɓen hanndi e lepte ɗen.

Haa, Miim: yewtere fii sugu ɗee kalfe yewtanooma ka simoore Al Baqarah.

Jippinde Quraana ummaade e Alla Tedduɗo O hay gooto foolataa Mbo gannduɗo maslahaaji jiyaaɓe Makko e dow Nelaaɗo Makko.

Haforoowo junubaaji ɗin, Jaɓanoowo kala tuubuɗo e jeyaaɓe Makko ɓen, Saɗtuɗo leptugol saliiɗo tuubannde Mo, Jom neema yaajuɗo. Reweteeɗo e goonga alaa, si wanaa Kanko tun, ko ka Makko woni ruttorde nden, Ñalnde Darngal. O yoɓa ɓe, ko ɓe hanndi kon.

Alaa ko wennjata e Aayeeje Allah ɓannginɗe tawhiidi e goonga Nulaaɓe ɓen, si wanaa yedduɓe Allah ɓen, sabu jiiɓagol haqille maɓɓe. Wata a sunor hoditoraa, ko ɓe woni dillirde jawle e neemaaji. Ko ɓe nennitiranaa, ko hebilangol ɓe fewjana ɓe.

Ado ɓee ɗoo, hari yimɓe Nuuhu ɓen fenniino Nulaaɓe mun, feddeeji ɗin ɓaawo maɓɓe kadi fenni Aadi, e Samuuda, e yimɓe Luutu ɓen, e wonndiiɓe Madyana ɓen e Fir'awna'en fow. Mofte kala e ɓen ɗon, himmiri nanngugol Nulaaɗo mun on, fii warugol mo. Ɓe wennjiri meere maɓɓe, fii bonnitirgol nde goonga kan. Kono Mi nanngi ɓe. Tesko no nanngal Am waɗtinirnoo e maɓɓe. Ɗum ko lepte saɗtuɗe wonunoo.

Ko wano Allah ñaawiri non fii halkugol ɗen mofte fennunooɓe Nulaaɓe mun, Konngol Joomi maa ngol, an Nulaaɗo, jojjiri e yedduɓe ɓen: wonnde pellet, ko ɓe yimɓe Yiite.

Malaa'ikaaɓe ronndiiɓe Arsi Joomi maa kin, an Nulaaɗo, e ɓeya wonɓe sera makki, hiɓe laɓɓina Joomi maɓɓe, e kon ko hanndaa e Makko, ɓe gomɗina Mo, ɓe ɗaɓɓira Mo, haforangol gomɗimɓe Allah ɓen, ɓe wi'a: Joomi amen, ganndal Maa ngal e yurmeende Maa nden, yaajanii kala huunde. Yawtan tuubuɓe ɓen, junuubi maɓɓe ɗin, ɓen jokkuɓe diina Maa kan, daɗndaa ɓe kadi, Yiite ngen.

Mala'ika'en wi'a kadi: Joomi amen, naadu gomɗimɓe ɓen ka Aljannaaji ñiiɓal, ɗin ɗi foduɗaa ɓe, waɗtidaaɓe e kala moƴƴinnoɗo golle, immorde e baabiraaɓe maɓɓe, e genndiraaɓe maɓɓe, e ɓiɗɓe maɓɓe. Pellet, ko An woni Fooluɗo Mo gooto foolataa, Ñeeñuɗo e eɓɓoore e toppitannde Mun.

Daɗndaa ɓe golle maɓɓe bonɗe ɗen, hara A nanngitiraali ɓe ɗen. Kala non daɗnduɗaa ɗum Ñalnde Darngal, haray A yuminii mo. Ko ɗum woni malal mawnungal ngal sugu mun alaa.

Yedduɓe e Nulaaɗo Makko on, noddoyte Ñalnde Darngal, tuma ɓe naadaa ka Yiite, ɓe tikkana ko'e maɓɓe, haa ɓe feññina ɗum, wonnde: ko tikkere Allah nden, ɓuri mawnude e dii ko tikkanɗon ko'e mon kon, tuma noddetenoɗon aduna, e fii gomɗingol Allah, yeddon Mo, kafidon Mo e reweteeɗi goo.

Yedduɓ ɓen qirritoo junuubi maɓɓe ɗin, ka qirritagol tuuba nafataa, ɓe wi'a: joomi amen, A warii men laawi ɗiɗi, tawde men woodanooko, taguɗaa Men, refti waruɗaa men ɓaawo ɗum. Wuurnituɗaa men kadi laawi ɗiɗi, ka tawnoo men woodanooka, e ka wuurnituɗaa men ɗon ummital. Haray men qirrike junuubi ɗi men faggitii ɗin. Taw si laawol no woodi, ka men yaltira e ngee Yiite, men yiltitoo aduna, fii moƴƴingol golle amen, jaɓanaa men ɗe?

Ɗen lepte ɗe leptiraɗon, ko sabu tawde si Allah tun noddanooma, hara O sirkanaaka, on yeddayno ɗum, waɗanon Mo kafidiiɗi; si tawii non O kafidaama, gomɗinon. Awa ñaawoore nden, ko Kanko tun heeranii, On Toowuɗo e Jaati Mun e Kattal Mun, Mawnuɗo e hoore kala huunde.

Ko Allah tun woni holliroowo on maandeeji Makko ɗin, ka tatteeri(jookli) e ka wonkiiji, ko ɓannginana on, Kattal e Gootaagu Makko. O jippinirana on toɓo ka kammu, fii ko arsikireɗon, immorde e puɗi e remuruuji ewk. Alaa non waajitoroowo maandeeji Allah ɗin, si wanaa tuuboowo laɓɓina, ruttoo e Makko on.

Onon ɓee gomɗimɓe, rewiree Allah, laɓɓinirangol Mo dewal e toraare, hara on kafidaali Mo e goɗɗum, hay si tawii ɗum welataa heeferɓe ɓen.

Ko Kanko hanndi heertinaneede toraare e ɗoftaare, tawde ko O Jom darjaaji toowuɗi ɓanngi e kala tagu Makko ngun, Jeyɗo Arsi mawɗo on. Himo jippinira wahayu on, e mo o muuyani e jeyaaɓe Makko ɓen, no pittaali maɓɓe wuurira, ɓe wuurniira ɗum woɗɓe goo, e fii yo jertinir yimɓe ɓen, Ñalnde Darngal, nde aramɓe e sakkitiiɓe hawroyta.

Ñalnde ɓe feeñoyta nden, hara hiɓe mooɓondiri e nokku gooto. Huunde suuɗotaako Allah, e fii maɓɓe, wanaa kamɓe, wanaa golle maɓɓe ɗen, wanaa kadi njoɓdi maɓɓe ndin.

Hannde, wonkii kala yoɓete ko feggitii e golle: woni moƴƴere maa bone. Tooñe woo alaa hannde, tawde ko Allah ñaawata, pellet, Allah ko yaawuɗo hasboore jeyaaɓe Makko ɓen, tawde Himo huɓindii fii maɓɓe.

Jertinirɓe an Nulaaɗo, Ñalaande Darngal nden, ɓadiinde, hewtunde. Tawde ko ɓadii fow, ko ko hewti. Nde ñalnde, hakkee ko ɓerɗe ɗen ngoƴata, ɗe ƴawtiray ka konondol, hara ɓe waawataa haalude, si wanaa mo Allah duŋanii e maɓɓe. Tooñirnooɓe sirku e geddi ɓen non, ɓe heɓoytaa giɗo maa musiɗɗo, wanaa kadi tefoowo jaɓanteeɗo, si ɓe aru heɓude on.

Allah no anndi ko gite ɗen janforta e ndaarɗe, e ko ɓerɗe ɗen suuɗata. Huunde e mun wirnaaki Mo.

Allah ko nunɗal ñaawirta, O tooñirtah goɗɗo ɗuytangol mo moƴƴi maa ɓeydangol mo bonɗi. Ɗin ɗi sirkooɓe ɓen rewata ko wanaa Allah, hay huunde ɗi ñaawataa, tawde ɗi jeyaa huunde. Pellet, ko Allah woni Nanoowo haala jeyaaɓe Mun, Yi'oowo annuyeeji e kuuɗe maɓɓe. O yoɓitoya ɓe ɗum.

Hara ɓee sirkooɓe yiilaaki ka leydi, ɓe taskoo no mofte fennunooɓe ado maɓɓe ɓen wa'unoo? Ko battane bonɗe wonunoo. Hara le ɓeen no ɓurnoo ɓe tiiɗude ɓe doole e batteeji accaaɗi ka leydi, wano kubeeje ɗe ɓee ronki battinorde. Kono Allah halkitirno ɓe junuubi maɓɓe ɗin, ɓe heɓaano daɗndoowo ɓe e lepte Allah ɗen.

Ko waɗi kon ɓe leptaa, ko tawde Nulaaɓe maɓɓe ɓen addanayno ɓe hujjaaji ɓannguɗi, immorde ka Allah, ɓe yedda Allah, ɓe fenna Nulaaɓe Makko ɓen. E ko ɓe doolnunoo kon fow, Allah naangiri ɓe lepte, O halki fii maɓɓe, tawde pellet, ko O Doolnuɗo, Saɗtuɗo leptugol yedduɗo Mo, fenni Nulaaɓe Makko ɓen.

Gomɗii Men nulirii Muusaa, Aayeeje Amen bannguɗe ɗen, e hujja ɓannguɗo.

Men nuli mo haa e Fir'awna, e jaagoraaɗo makko on Haamaana, e Qaaruuna. Kono ɓe wi'i: Muusaa, ko mbileejo, ɗuuɗuɗo fenaande, e wi'ugol ko o Nulaaɗo.

Nde Muusaa addannooɓe hujjaaji ɓannginɗo goonga makko kan, Fir'awna wi'i:waree ɓiɗɓe gomɗimdimɓe ɓen e makko, heddon rewɓe maɓɓe ɓen, hoynugol ɓe. Kono ko heeferɓe ɓen fewjirta ɗuytugol limoore gomɗimɓe ɓen wonaali, si wanaa mulata yaha, hara batte alanaa ɗum.

Fir'awana wi'i: Accee mi wara Muusaa, fii yaggingol mo, e no o noddira Joomi makko, fii haɗugol lam ɗum. Min mi haajaaka e ɗum. Mi hulu wata o waylu diina mon kan, maa o feññina bonnere ka leydi, woni warugol e bonnital.

Nde Fir'awna gaynunoo kammbude, Annabai Muusaa maakani mo: Mi moolorii daɗndiragol Jeyɗo lam On, jeyi on, e bone mawnintinaniiɗo goonga e gomɗinal, mo gomɗinaa Ñalnde Darngal, e hasboore e lepte ko woni ton.

Gorko goo, gomɗinɗo Allah, jeyaaɗo e yimɓe fir'awna ɓen, suuɗunooɗo yimɓe mun, gomɗinal makko ngal, saliiɗo fellitgol maɓɓe warugol Muusa ngol, o wi'i: E on waray gorko mo bonnaa, si wanaa fii o wi'i: Ko Allah woni Joomi am? Hara le o addanii on hujjaaji e ɓannganduyeeji, sembinayɗi goonga makko kan, wiide ko O nulaaɗo Joomi makko? Si tawii ko o fenuɗo, haray lorra fenaande makko nden, ko e makko yantata; si tawii non ko goonguɗo, haray yoga e ko o kammbirani on kon e lepte aduna ɗen, heɓay on. Pellet, Allah fewanataa e goonga, on tawɗo no yawti keeri Allah ɗin, fefindii fenaande, baki e Makko, Kanko e Nulaaɓe Makko ɓen.

Ko onon yo yimɓe am, laamu no woodani on hanndi, hiɗon fooli e leydi Misra ndin. Kono ko hommbo daɗndata en, e lepte Allah ɗen, si ɗe arii e men, tuma waruɗen Muusaa? Fir'awna wi'i: Ko feere am nde mi ñaawi nden, jokketee. Mi yi'ii feere warugol Muusaa, fii haɗugol bone e bonnere. Mi tinndintaa on, si wanaa sawaaba.

Gomɗinɗo on laaɓani reedu, o wi'itani yimɓe makko ɓen: min on miɗo hulani on - si tawii on arii Muusaa e hoore tooñe e jaggitere - lepte, sugu lepte yimɓe feddeeji ɓen, haɓunooɓe Nulaaɓe mun adinooɓe, Allah halki ɓe.

Wano mbowka yeddaynooɓe fenna Nulaaɓe ɓen, sugu yimɓe Nuuhu ɓen, e Aadi'en, e Samuuda'en, e arunooɓe ɓaawo maɓɓe ɓen. Allah halkirno ɓe, yeddugol maɓɓe fenna Nulaaɓe ɓen. Allah non faandanaaki jeyaaɓe ɓen, tooñe. Ko junuubi maɓɓe, O leptirta ɓe, njoɓdi hawrondindi e golle maɓɓe ɗen.

Ko onon yo yimɓe am, min miɗo hulani on, Ñalnde Darngal: nden Ñalaande, nde yimɓe ɓen noddindiroyta, sabu ɓadandiral maa jaahu, sikkugol ɓe ɗum nafay nden Ñalnde hulɓiniinde.

Ñalnde huccitiroyton, dugugol, sabu kulol Yiite ngen, hara daɗndoowo on e lepte Allah ɗen, alanaa on nden Ñalnde. Kala mo Allah hoyfii fii mun, O ɗawi mo gomɗingol, haray fewoowo mo alaa. Tawde ko Allah tun fewnata.

Gomɗii Yuusufu ardaniino on ko adii, e hujjaaji ɓannginɗi wootinɗingol Allah, kono on seeraano e sikkitagol fenna, kon ko o addani on. Haa nde o faatinoo, ɓeyduɗon sikkitagol, wi'uɗon. Allah nultataa Nulaaɗo goo, ɓaawo makko. Ko wano majjirɗon nii e goonga kan, Allah majjinirta kala yawtoowo keeri Allah ɗin, sikkitiiɗo e gootaaku Makko.

Ɓen wenjirooɓe Aayeeje Allah ɗen, fii bonnitirgol ɗe ko aldaa e hujja arɗo ɓe, kuuɗe maɓɓe ɗen mawnii tikkere mun ka Allah, e ka gomɗimɓe Mo gomɗini Nulaaɓe Makko ɓen. Ko wano Allah notiri non e ɓerɗe ɓee wenjooɓe ɗoo ɓen, O notirta e ɓernde kala mawnintinaniiɗo goonga, dundarankeejo feewnetaake e peewal maa e jam.

Fir'awna wi'ani jaagoraaɗo makko on Haaamaana: Ko an yo Haamaana, mahanam soorooru toowundu, no gasa ka mi yottoo ɗate ɗen.

Fii no mi yottora e laawi ƴawruɗi ɗin ka kammuuli, mi ƴeewa Reweteeɗo Muusaa, On mo o aaƴii wiide On ko Reweteeɗo e goonga, sabu miɗo sikki ko o fenoowo. Ko wano non Fir'awna cuɗiranaa, kuuɗe makko bonɗe ɗen, no de ɗaɓɓiraynoo Haamaana, waɗugol ɗum; o sakkaa e laawol goonga ngol, o heddii e laawol majjere ngol. Feere Fir'awna nden non - e fii feññingol meere makko nden, bonnita goonga Muusaa kan - wonaali, si wanaa e hayrere, tawde ko nimse e sooyugol ko sakkitori, e makiseede poomaa.

Gorko gomɗinɗo, jeyaaɗo e yimɓe Fir'awna ɓen, woni e laaɓangol reedu, o wi'i: Ko onon yo yimɓe am, jokkee lam, mi tinndina on, laawol sawaaba e peewal ngol.

Ko onon yo yimɓe am, anndee ɗam nguurndam aduna, ko dakamme daƴondirayɗo, wata ɗum hodu on. Anndon ko laakara on, e neemaaji makko duumotooɗi ɗin, woni galle ñiiɓal ɗen. Golliranee ɗen ɗon, ɗoftagol Allah, rentoo e soklirgol nguurndam mon aduna, yejjiton gollangol laakara.

Mo gollii ko boni, o yoɓitetaake, si wanaa yeru ɗum, o ɓeydantaake lepte e mun; kala kadi golluɗo ko moƴƴi, hara ko fii Allah, woni gorko maa debbo, hara ko gomɗinɗo Allah e Nulaaɗo Makko on, ɓen ɗon e sifaaji maɓɓe yettiniiɗi ɗin, ɓe naatoyay Aljanaa, Ñalnde Darngal, ɓe arsikoyee ton: kon ko Allah fodunooɓe e dimɗe, e neemaaji duumiiɗi, ɗi taƴondirtaa, ko aldaa e limoore.

Ko onon yo yimɓe am, ko waɗi si miɗo nodda on e daɗirgol hayrude aduna e laakara, gomɗinde Allah, golla ko moƴƴi, onon, hiɗon noddira lam naatugol Yiite, ɗaɓɓirgol lam, yeddugol Allah?

Hiɗon noddira lam e meere mon nden, jortagol no mi yeddira Allah, mi kafida Mo e goɗɗum goo, ko mi alanaa ɗum ganndal, hara non, min miɗo noddude on e gomɗingol Allah, Fooluɗo Mo gooto foolataa, Surroowo bakkaatu, Mawnuɗo haforangol jeyaaɓe Makko ɓen.

Tigi on, ko noddoton lam e mun kon, gomɗingol ɗoftoo, noddaandu goonga woo alanaa ɗum aduna, wanaa laakara, gooto kadi noototaakau ndun noddaandu. E wonnde pellet, ruttorde men nden, en fow, ko ka Allah tun, e wonnde fantimɓe geddi ɓen, ko ɓen woni yimɓe Yiite ɓen, duumotooɓe ton, Ñalnde Darngal.

Ɓe salii laaɓal makko reedu ngal, o wi'ani ɓe: aray nde anndoton, fii ko mi laaɓani on reedu kon, nimson salaare mon nden; min non, mi fawii fiyaaku am on fow, e Allah Gooto On. Pellet, huunde suuɗaaki Allah, e golle jeyaaɓe Makko ɓen.

Allah daɗndi mo, boneeji ɗi ɓe fewjunannoo mo ɗin, fii warugol mo, O huuɓitiri yimɓe Fir'awna ɓen, lepte yoolagol. Allah yooli mo kanko Fir'awna, e konu maɓɓe ngun fow.

Caggal ɓe maayii, ɓe weeɓitoyte e Yiite ngen, ka genaale maɓɓe, bimmbi e kiikiiɗe. Ñalnde Darngal darotoo (wi'oyte): Naadee jokkunooɓe Fir'awna ɓen, ka ɓuri saɗtude e lepte. Sabu ko ɓe yeddiraynoo kon, ɓe fenna ɓe falatoo e laawol Allah ngol.

Janto an Nulaaɗo, tuma jokkunooɓe ɓen yeddondiroyta e jokkanooɓe ɓen, ka nder Yiite, ɓe wi'ana ɓen jokkonooɓe towninitinooɓe: Menen, ko onon men jokkunoo aduna, e majjere, taw si on duncanay men geɓal e lepte Allah ɗen, ronnditanoɗon men ɗe?

Townitiniiɓe jokkanooɓe ɓen kadi wi'a: En fow meeɗen, jokkunooɓe e jokkanooɓe fow, hino e Yiite ngen, gooto ronnditantaako goɗɗo goo, geɓal e lepte laakara ɗen. Tawde pellet, Alah ñaawii hakkunde jeyaaɓe ɓen. O yoɓiti kala e ko hanndi e mun kon.

Wonaaɓe lepteede ɓen ka Yiite fow wi'ana Malaa'ika'en, ayninaaɓe Yiite ngen, tuma ɓe taƴii yaltugol e magge, ruttoo aduna, fii tuubugol: Toranee men Joomi mon, O hoynana men ñalaande wootere, e ɗee lepte duumiiɗe.

Ayninaaɓe Jahannama ɓen jaaboo heeferɓe ɓen: Nulaaɓe mon ɓen ardanaano on e hujjaaji ɓannguɗi? Heeferɓe ɓen wi'a: oo'owoye ! Ɓe arduno e mun few ! Malaa'ika'en jaabitoo: awa toree, onon tigiri. Menen men tefantaa keefeero. Kono toraare heeferɓe ɓen wonaali, si wanaa e meere. Tawde ɓe jaɓirantaake, sabu keeferaaku maɓɓe ngun.

Pellet, Men wallay Nulaaɓe Amen ɓen, e gomɗimɓe Allah e Nulaaɓe Mun ɓen, aduna ɗoo, ɓanngingol hujjaajii maɓɓe ɗin, foolna ɓe e ayɓe maɓɓe ɓen. Men walliroya ɓe kadi Ñalnde Darngal, naadugol ɓe Aljanna, leptira yeddondiraynooɓe e maɓɓe aduna ɓen, naatugol Yiite, ɓaawo nde Annabaaɓe e Malaa'ikaaɓe e gomɗimɓe ɓen fow seeditaade, wonnde Nule ɗen yottino e mofte ɗen.

Ñalnde nde tooñunooɓe geddi e keeferaaku ɓen nafiroytaa hoore-maɓɓe, ngatinagol, hara kuddi Allah no woodani ɓe nden ñalnde, e galle bonɗe ka laakara, ka ɓe hawroyta e lepte muusuɗe.

Gomɗii Men okkii Muusaa ganndal, ngal o fewnirta ɓiɗɓe Israa'iila ɓen, e goonga, Men waɗi Tawreetaare nden, Deftere roneteende, hakkunde ɓiɗɓe Israa'iila ɓen.

Ko nde fewnaynde e goonga, e waaju wonannde joomiraaɓe haqqille hisuɗe ɓen.

An Nulaaɗo, muñño e ko yimɓe maa fennata maa, ɓe lorre, sabu pellet, ko Allah fodu maa e ballal e semmbineede kon, ko goonga mo sikke alaa e mu'un. Insinoraa fii haforaneede junuubi maa ɗin, subbunhinoraa yettugol Joomi maa, gila irfaj, haa mir.

Pellet,wennjirooɓe e Aayeeje Allah ɗen,fii bonnitirgol ɗe ko aldaa e hujja wanaa daliil,ko fii tun faale townitagol mawnintinanoo goonga kan, kono ɓe hewtataa e ko ɓe faalaa kon.An Nulaaɗo,moolor Allah,tawde pellet,ko Kanko woni Nanoowo haalaaji jeyaaɓe Makko ɓen,Yi'oowo kuuɗemaɓɓe.Huunde e ɗin suuɗaaki Mo,O yoɓitoyay ɓe ɗum.

Pellet, ko tagugol kammuuli ɗin e leydi ndin, sabu cemmbe e yañji majji, ɓuri mawnude e dii tagugol yimɓe ɓen. Tagirɗo ɗi mawneendi majji On, ko hattanɗo wuurnitugol maayɓe, fii ñaawugol ɓe yoɓita ɓe. Kono ko ɓuri ɗuuɗude e yimɓe ɓen, ɓe anndaa, sakko ɓe waajitora ɗum, ɓe waɗa ɗum dalil, e fii ummital.

Bunɗo fotataa e yi'oowo, wanaa gomɗimɓe Allah ɓen, goongini Nulaaɓe Makko ɓen, ɓe moƴƴini golle, woni ko fotata e bonnirɗo golle mun, finnde bonnde e geddi. Kono on waajitortaa, si wanaa seeɗa. Tawde si ɗon waajitoraynoo ko yoni, on anndayno ko senndi ɓen ɗiɗo, fii no yaccoron wa'ude wa gomɗimɓe golli moƴƴuɗi yamiraaɗi ɗin, no jortoron weleyee Allah.

Pellet, Darngal, ngal Allah wuurnitata maayɓe ɓen e mun, fii ñaawugol ɓe yoɓa, ko ko arata, feere mun alaa, sikka alaa e ɗum. Kono ɓurɓe ɗuuɗude e yimɓe ɓen, ɓe gomɗinaa ɗum. Ko ɗum haɗi ɓe hebilanagol nden ñalnde

Joomi mon, onon yimɓe ɓen, daali: heertinanee Lam, Min tun, dewal e toraare, Mi jaabinana on toraare mon, Mi yawtana on, Mi yurmina on. Mawnintinantooɓe ɗum ɓen, ko pellet, Ñalnde Darngal, ɓe naatoyay Jahannama, ko ɓe hoyɓe jaasinaa.

Ko Allah woni waɗiranɗo on jemma on, niɓɓitirɗo, fii ka deeƴon fowtoɗon e mun, O waɗirani on nyalorma on, ndayginɗo, fii ka gollon e mun. Pellet, Allah ko Jom ɓural mawngal e yimɓe ɓen, tawde O timminirii neemaaji Makko ɗin e maɓɓe, no feeñiri e no wirnori. Kono ko ɓuri ɗuuɗude e yimɓe ɓen, ɓe yettataa Allah, e naamaaji Makko ɗin, dow maɓɓe.

Ko On mooɗon Allah, waɗanɗo on ɗin neemaaji, woni Taguɗo kala huunde. Wanaa goɗɗo goo. Rewteeɗo e goonga alaa, si wanaa Kanko. Ko honno ferlisoraɗon gaay e rewugol Mo, jokka rewugol ko nafataa lorrataa?

Ko wano ɓee ɗoo ferlisoraa non e gomɗingol Allah rewa Mo Kanko tun, ɓeya yeddaynooɓe Aayeeje Allah tindinayɗi fii tawhiidi on, ferlisortenoo e kala jamaanu, ɓe feewataano e goonga, ɓe hawrataano e sawaaba.

Ko Allah woni waɗanɗo on, onon yimɓe ɓen, ndii leydi, dunngal ñiiɓirgal mon, O waɗi kammu ngun, ñeñaangu dow mon, hara yanataa e mon, O mbaadini on ka renngaaji yumma mon'en - O moƴƴini mbaadiiji mon, - O arsiki on laaɓuɗi dagiiɗi. Ko On mooɗon, neeminirɗo on ɗum, woni Allah Joomi mon. Senaare heewii e Jeyɗo tageefo ngon fow. Reweteeɗo alanaa ngo, si wanaa Kanko seniiɗo On.

Ko Kanko woni wuurɗo Mo maayataa On. reweteeɗo e goonga alaa, si wanaa Kanko. Noddiree Mo dewal e toraare; faandoɗon Mo Kanko tun, hara on kafidaali Mo e taguuji Makko goo. Yettoore woodanii Allah, Jeyɗo tageefo ngon.

Maaku an Nulaaɗo: min, Allah haɗii lam rewugol, ɗin ɗi rewoton, hara wanaa Allah; sanamuuji ɗi nafataa, ɗi lorrataa. Mi haɗa ɗum, nde hujjaaji ɗin arunoo e am, fii ɓanngingol meere rewugol ɗin. Allah yamiri lam kadi, nde mi jebbilantoo Mo, Kanko tun, ka dewal. Tawde ko Kanko woni Jeyɗo tageefo ngon fow. Jeyɗo ngo alaa, si wanaa Kanko.

Ko Kanko tagiri ben mon Aadam, immorde e mbulmbulndi, refti O tagiri on ɓaawo ɗum, e toɓɓere maniiyu, refti e heɗɗere ƴiiƴam, refti ɓaawo ɗum, O yaltiniri on e deedi neeniraaɓe mon ɓen, entoy tokosoy, fii no yottoron cukaaku ngun, mawnon haa wonton nayeeɓe, - kono hara woɗɓe e mo'on, maayay ado ɗum, - haa no yottoron dumunna happaaɗo ka Allah, mo ɗuytotaako ɓeydotaako, belajo'o, ka nafitoron ɗii hujjaaji fii anndugol kattal e gootaagu Allah ngun.

Ko Kanko Allah tun, woni wuurnoowo, e waroowo. Si O haajii e fiyaaku, ko O wi'anay mo tun: "wonu", o wona.

A tinaali, an Nulaaɗo, ɓen wennjondirteeɓe e Aayeeje Allah ɗen, fennooɓe ɗe, e hoore ko ɗe feeñi kon? a ŋalɗay e maɓɓe, e ko ɓe ɗuurnotoo e goonga kon, hoore ko ka feeñi kon.

Ɓen fennuɓe Alqur'aana, e ko Men immindini kon e Nulaaɓe Amen ɓen, immorde e goonga, aray ka ɓen fennooɓe annda, battane e bone mun.

Ɓe anndoyay battane fennugol maɓɓe ngol, tuma nde kolmboyaa ka daaɗe maɓɓe, ɓe jolkiree ka koyɗe, halfinaaɓe lepte ɗen daasa ɓe.

Ɓe ndaasee e ndiyam wulɗam haa fati, refti ɓe huɓɓee Yiite ngen.

Refti ɓe feliree wi'aneede: ko honto woni reweteeɗi mon, ɗi aaƴinoɗon wonnde on sirkiraniiɗi dewal?

Ko honto ɗin sanamuuji, ɗi rewaynoɗon, hara wanaa Allah, ɗi nafataa ɗi lorrataa? Heeferɓe ɓen jaaboo: Ɗi majjitorike men. Wurin, men wonaano aduna, e rewugol ko hanndunoo e reweede. Ko wano ɓee ɗoo majjiri non, Allah majjinirta yedduɓe goonga ɓen, e kala nokku e jamaanu.

Ɓe wi'anee : ko fawi on ɗee lepte, ko sabu ko weltoraynoɗon kon, sirku on, e ko wewlaynoɗon kon fantinon.

Natiree dame Jahannama ɗen, luttugol ton poomaa. Nge bonii jaaƴorde townitaniiɓe goonga ɓen.

Muñño, an Nulaaɗo, e ko yimɓe maa lorrete ɓe fenne kon. Pellet, ko Allah fodu maa wallude kon, ko goonga, mo sikke alaa e mu'un. Ko si Men holle yoga e ko Men kammbirani ɓe kon e lepte, e nguurndam maa, wano feƴƴirnoo ka hare Badri, maa hara Men ƴettite ado mun, fow e mun, ko ka Amen tun, woni ruttorde maɓɓe, Ñalnde Darngal, Men yoɓa ɓe golle maɓɓe ɗen, Men naatnaɓe ka Yiite, ɓe lutta ton poomaa.

Gomɗii Men imminii Nulaaɓe ɗuuɗuɓe, haa e yimɓe mun, ado maa, an Nulaaɗo. Ɓen fenni ɓe, ɓe lorri ɓe. Kono ɓe muññii e ɗin fow. Hino e ɓen Nulaaɓe, ɓe Men fillani maa fii mun; hino e maɓɓe, ɓe Men fillanaaki ma fii mun. Haananaa Nulaaɗo woo, nde o addanta yimɓe makko ɓen Aaya, immorde e Joomi makko, si wanaa hara ko e duŋayee Makko. Ko heeferɓe ɓen lamndotoo mofte maɓɓe ɗen addugol Aaya, ko tooñe. Si yamiroore Allah fii ñaawugol sennda hakkunde Nulaaɓe ɓen e yimɓe maɓɓe ɓen arii, ko nunɗal ñaawirtee. Heeferɓe ɓen halkee, Nulaaɓe ɓen daɗndee; nden ñalnde, yimɓe meere ɓen sooyira yollugol ko'e maɓɓe e halkaare, sabu keeferaaku maɓɓe ngun.

Ko Allah woni waɗanɗo on gelooɗi ɗin, e na'i ɗin e dammi ɗin, ko waɗɗoron yoga e majji, ñaamon tebbeeli yoga majji.

Hino woodani on e ɗii neemoraaɗi, nafooreeji ɗuuɗuɗi, heyɗitayɗi jamaanu kala. Hiɗon heɓira ɗi, kala ko faaleteɗon e haajuuji, wano setagol ka njorndi e ka maayo.

Allah no holla on maandeeji tindinayɗi e kattal e gootaagu Makko ngun. E ko honɗum e maandeeji Allah ɗin, woni yeddoton, ɓaawo nde yananaɗon, wonnde ko ɗi maandeeji Makko?

E ɓee fennooɓe yiilaaki ka leydi, ɓe taskoo ko honno battane ɗeya mofte fennunooɓe ado maɓɓe wattinirnoo, ɓe waajitora ɗum? Gomɗii ɗen mofte no ɓurnoo ɓe jawle e cemmbe, ɓe ɓuri ɓe batteeji accaaɗi ka leydi. Kono kon ko ɓe faggotonoo e cemmbe, duncanaano ɓe goɗɗum, nde lepte Allah ɗen arunoo halkugol ɓe.

Nde Nulaaɓe maɓɓe ɓen addaannoɓe hujjaaji ɓannguɗi ɗin, ɓe fenni ɗi, ɓe welaa jogitagol ganndal ko woni ka maɓɓe kon, lunndiingal ko Nulaaɓe ɓen addani ɓe kon. Ontuma, ɓe huuɓitiraa lepte ɗe ɓe jalkitaynoo ɗen, si Nulaaɓe ɓen hulɓiniriino ɓe ɗe.

Nde ɓe yi*unoo lepte Amen ɗen, ɓe jaɓi ka jaɓugol nafataa, ɓe wi'i: Men gomɗinii Allah tun, men yeddii ɗin kafidaaɗi e sanamuuji ɗi men rewaynoo, hara wanaa Kanko.

Kono gomɗinal maɓɓe wonaAno ko nafata ɓe, fewndo ɓe haccinoo lepte Amen ɗen no jippoo e maɓɓe; ɗum ko laawol yawtunoongol e jayaaɓe Makko ɓen, wonnde gomɗinal nafataa ɓe, tuma ɓe yi'i lepte ɗen. Yedduɓe ɓen sooyiniri ko'e-maɓɓe ɗon nden ñalnde, nde ɓe halkiranoo sabu ko ɓe yeddiri kon Allah, ɓe salii tuubude ado ɓe yi'ude lepte ɗen.

Haa, Miim: Yewtere fii sugu ɗee kalfe yawtiino ka cortewol Al Baqarah.

Ndee Alqur'aanaare, ko jippornde iwri ka Allah, Yurmeteeɗo, Hinnotooɗo On.

Ko Deftere fensitiraande Aayeeje mun, no timmiri, nde waɗaa janngeteende e aarabu, wonannde yimɓe anndooɓe ɓen, tawde ko ɓen nafitorta maanaaji mayre, e peewal e goonga ko woni e mayre.

Ko nde wewlinirayɓe gomɗimɓe ɓen, ko Allah fodi ɓe kon e mbarjaari teddundi, hulɓiniraynde kadi, lepte Allah muusuɗe ɗen. Kono ɓurɓe ɗuuɗude ɓen e maɓɓe, ɗuurnii nden; watti ɓe nanataa peewal ko woni e mayre kon, sakko ɓe jaɓa.

Ɓe wi'i: Ɓerɗe amen ɗen no uddaa sokaa, ɗe haqqiltaa e ko noddataa men e mun kon, noppi amen ɗin kadi, no teddiri pahu, ɗi nanataa ɗum. Heedo hino hakkunde amen e maa, ko wowlataa kon hewtataa men. Haray wonu e golle maa; menen kadi men wona e gole amen, men jokkataa ma.

An Nulaaɗo, maakan satta feere'en ɓee: anndee ko mi neɗɗanke wano mon. Allah wahayinii e am, wonnde Reweteeɗo mon on ka goonga, ko Reweteeɗo gooto pet, woni Kanko Allah. haray ñiiɓee e ngol laawol ɗon, ɗaɓɓiron Mo haforaneede junuubi mon. Halkaare e lepte woodanii sirkooɓe rewooɓe ko wanaa Allah ɓen, e kafidoowɓe e Makko ɓen.

Ɓe jonnataa ɓen zakka jawle maɓɓe ɗen, hara kadi hiɓe yeddi fii laakara, e neemaaji mun duumotooɗi, e lepte mun muusuɗe.

Pellet, ɓen gomɗimɓe Allah e Nulaaɗo Makko on, ɓe golli moƴƴuɗi yamiraaɗi ɗin, hino woodani ɓe njoɓdi duumotoondi ndi taƴatah, woni Aljanna.

An Nulaaɗo, felu sirkooɓe ɓen, maakanaa ɓe: ko honnɗum yeddiranton taguɗo On leydi ndin nder balɗe ɗiɗi : - woni Alat e tenen, - waɗanon Mo yeradiiɓe ko rewetee, hara wanaa Kanko? Awa ko On woni Jeyɗo tageefo ngon fow.

O waɗi pelle e dow mayri, ko ndi tabitira, hara ndi dillaali. O eɓɓi nguureeji yimɓe ɓen e kulle ɗen, e mayri, nder balɗe nayi timmirɗe ɗeya balɗe ɗiɗi, woni: talaata e alarba, wonannde kala faalaaɗo lamndaade fii mun.

Refti O faandanii tagugol kammu ngun, tawi ontuma, hingu curkini, O daalidani ngu kanngu e leydi ndin: ardiree yamiroore Am, ɗoftagol, maa karhegol, hakkunde mun. Ɗi wi'idi: Men arii ko men ɗoftiiɓe. Alaa ko men faalantee hoore amen, hara wanaa e yiɗi Maa, yo Joomi amen.

Allah timminiri tagugol kammuuli ɗin, e nder balɗe ɗiɗi: woni Alkamisa e Juma; ko e ɗen balɗe ɗiɗi, woni tagugol kammuuli ɗin e leydi ndin, timmiri balɗe jeegoo. Ontuma Allah yamiri kammu kalal, fiyaaku maggu, immorde e yamaruyee ɗoftagol Mo rewa Mo. Men cuɗiniri kammu aduna ngun, koode, Men reeni ngu e ko seytanuuji ɗin wujjata heɗoo kon. Ko jantaa koo fow, ko eɓɓoore Fooluɗo Mo gooto foolataa, Annduɗo fii tagu Makko ngun.

Si ɓe salike gomɗinnde ko arduɗaa e mun kon, haray wi'u ɓe, an Nulaaɗo: mi jertinirii on lepte, sugu lepte jippinooɗe e Aadi'en yimɓe Huudu ɓen, e Samuuda'en yimɓe Saaalih, tuma ɓe fennunoo ɓen ɗiɗo.

Nde Nulaaɓe maɓɓe ɓen ardirannooɓe waaju wootu ngun, gooto kala e maɓɓe, hiɓe yamira wiide, wata ɓe rewu dey, si wanaa Allah tun. Heeferɓe ɓen e maɓɓe wi'i: si Joomi amen haajuno jippinnde Malaa'ikaaɓe Nulaaɓe e amen, O waɗayno ɗum. Awa menen on, ko men yedduɓe ko nulaɗon fii mun kon, tawde ko on yimɓe honooɓe amen.

Aadi'en yimɓe Huudu ɓen kan, e hoore ko ɓe yeddi Allah kon, ɓe mawnintinii kadi ka leydi, ko aldaa e goonga, ɓe woni e tooñugol heddii ɓe ɓen, ɓe ɗaynitorii doole maɓɓe ɗen wi'ugol: hara ko hommbe ɓuri men doole? Hakkee ko ɓe felliti e doolnugol. Allah ruttiri ngol wiide ɓe: E ɓee yi'aali ɓe seeditii, wonnde Allah taguɗo ɓe On no ɓuri ɓe tiiɗude doole? Ɓe woni e yeddugol Aayeeje Allah ɗe Nulaaɗo maɓɓe Huudu addi ɗen.

Men wurti henndu bittinndu e maɓɓe, e ñalaaɗe maɓɓe kiitaade, sabu lepte ɗen; fii no Men meeɗinira ɓe lepte hoynooje ɗe ɓen ka nguurndam aduna. Pellet, ko lepte laakara habbitiiɗe ɓe ɗen, ɓuri sattude wonnde hoynayɗe ɓe, kadi, ɓe heɓoytaa ton faabo, ko daɗnda ɓe lepte ɗen.

Samuuda'en non, yimɓe Saalih ɓen, Men fewnirno ɓe ɓannginangol ɓe laawol goonga ngol; kono ɓe suɓii majjere nden e dow peewal ngal. lepte jaasinooje ɗen nanngiri ɓe, sabu keeferaaku e jeddi ko ɓe faggitotonoo.

Men danɗni gomɗimɓe Allah e Nulaaɓe Mun ɓen, huliraynooɓe Allah ɓen, ɗoftagol yamirooje Makko ɗen, woɗɗitoo haɗaaɗi Makko ɗin. Men daɗndi ɓe ɗen lepte yanunooɗe e yimɓe maɓɓe.

Ñalnde Allah mooɓindiroyta ayɓe Makko ɓen faade ka Yiite, hara halfinaaɓe Yiite ngen hino ñoƴƴindira ɓe; tawa ɓe hattanaa laawagol ngen.

Haa si tawii ɓe hewtii ka Yiite, ɓe fuɗɗike yeddude kuuɗe maɓɓe ɗen aduna, nanɗe maɓɓe ɗen, e giiɗe maɓɓe ɗen, e guri ɓalli maɓɓe ɗin wona e seeditagol geddi e keeferaaku ko ɓe huuwaynoo kon aduna.

Heeferɓe ɓen wi'ana guri maɓɓe ɗen: ko fii honɗum seeditaniɗon e dow amen, ko men huuwaynoo aduna? guri maɓɓe ɗen jaaboo: ko Allah wowlinɗo kala huunde On, woni ko wowlini men. Ko Kanko tagunoo on, ka laawol aranol, fewndo wonuɗon aduna. Ko ka Makko tun, woni ruttorde mon laakara, fii ñaaweede yoɓee.

On wonaali hiɗon suuɗitoo, fewndo faggitotonoɗon geddi ɗin, fii wata nanɗe mon, e giiɗe mon, e guri mon seeditoyo e dow mo. Ko tawde on gomɗinaano hasboore, wanaa fii lepte maa warjeede ɓaawo maayde. Kono on sikkuno, wonnde Allah anndaa ko ɗuuɗi e ko huuwaynoɗon kon, ɗaynitiɗon.

Ko ɗen sikke mon bonɗe, wonunoo ko sikkunoɗon Joomi mon, ɗe halki on. Waɗtinirɗon sabu ɗum, jeyaaɓe e pertuɓe aduna e laakara ɓen.

Hay si ɓee ɓe tere mun seeditii e dow mun muññike, ko Yiite ngen wonata jaaƴode maɓɓe; hay si ɓe ɗaɓɓirii yarluyee Allah on huncaneede lepte ɗen, ɓe wonaa heɓayɓe ɗum, wanaa fii naatugol Aljanna.

Men heblani ɓee heeferɓe, seytanuuji ko ɓe wonda e maɓɓe, ɗin lobbinani ɓe golle maɓɓe bonɗe ɗen aduna, e fiyakuuji laakara, ɗi ɓe yejjitinaa fii mun, haɗi ɓe hebilangol ɗi. Konngol lepte ngol jojji e maɓɓe ontuma, wondude e mofte yawtunooɓe ado maɓɓe, immorde e jinna e yimɓe. Pellet, ɓen wonuno hayruɓe, tawde ɓe hayrinirii ko'e-maɓɓe e ɓeynguureeji maɓɓe fow, Ñalnde Darngal, naatoygol Yiite.

Nde heeferɓe ɓen ronkunoo teeɗora hujja on hujja goo, ɓe wasondiri wiide: wata on jentito ndee Alqur'aanaare nde Muhammadu janngata e mon, wata on jebbilano nde, ko yo on sonku tuma nde janngetee, balajo'o, on foolay mo, o acca janngugol nde nodda e mayre, ɓuttiniren e makko.

Ma Men meeɗiniroy yedduɓe Allah ɓen fennuɓe Nulaaɓe Makko ɓen, lepte saɗtuɗe Ñalne Darangal, Men yoɓira ko ɓuri bonde e ko ɓe huuwaynoo kon e sirku e geddi.

Ko ndin njoɓdi jantaandi, woni njoddi ayɓe Allah yedduɓe Mo fenni Nulaaɓe Makko ɓen: ko Yiite ngen. Hino woodani ɓe ton galle luttugol, poomaa; njoɓdi kon ko ɓe yeddiraynoo Aayeeje Allah ɗen, ɓe salii gomɗinnde ɗe, e hoore ko ɓanngunoo tiiɗi hujja kon fow.

Yeddunooɓe Allah fenni Nulaaɓe Makko ɓen wi'oya: Joomi amen, hollii men majjiinooɓe men ɓen ka jinna e ka yimɓe: Ibuliisaa fuɗɗuɗo yeddugol on nodda e mun, e banii-aadama fuɗɗuɗo rufude ƴiiƴam on, men tippa e maɓɓe e nder Yiite, haa ɓe wona e ɓurɓe joltude ɓen ka Yiite, ɓurɓe tiiɗude lepte ɓen.

Pellet, wi'uɓe ɓen: Joomi amen ko Allah, wanaa goɗɗum goo, hooti ɓe tabiti e ɗum, ɓe woɗɗitii haɗaaɗi Makko ɗin; Malaa'ika'en hino jippoo e maɓɓe tuma ɓe ƴettitetee, ɓe wi'ana ɓe: wata on hulu maayde e ko hikkori yeeso mayre, wata on sunano ko acciɗon aduna; wewliree Aljanna mo wonanoɗon e fodeede on aduna, sabu ko gomɗinirɗon kon Allah, golluɗon ko moƴƴi.

Ko menen woni yiɗɓe mon ɓen ka nguurndam aduna, tawde men semmbinayno on men reena on, ko menen kadi woni yiɗɓe mon ɓen ka laakara: ngol giggol no heddii. Hino woodani on ka Aljanna, kala ko wonkiiji mon faaletee, immorde e dakammeeji e muuyanteeji. Hino woodani on ton kadi, kala ko faaleteɗon.

Ɗum ko maraari helaandi fii hottude mon, immorde e Joomiraawo, Haforoowo junuubi kala tuubanɗo Mo e jeyaaɓe Makko ɓen, Hinnotooɗo ɓe.

Alaa ɓurɗo moƴƴude konngol, wano on nodduɗo e fii wootinɗingol Allah, o gollitiri sari'a Makko on, o golli golle moƴƴe weltinayɗe Joomi makko, o wi'i: min on, ko e jebbilaniiɓe yankinanii Allah ɓen, mi jeyaa? Wa'uɗo non fow, ko on ɓuri yimɓe ɓen moƴƴude konngol.

Golle moƴƴe ɗen e ɗoftaare weltinaynde Allah nden, fotataa e bone maa geddi tikkinayɗi Mo ɗin. Duñir ko ɓuri e moƴƴude, on boniiɗo e maaɗa; e jaka yoo, on mo ngayngu woni hakkunde maa e mun, si tawii a duñirii bone makko on moƴƴere, himo wa'ita wa giɗo saɗtuɗo giggol.

Hawrataa e on jikku yettiniiɗo, si wanaa muññotooɓe lorra e bone yimɓe ɓen; hawrataa e mun, si wanaa jom geɓal manngal. Tawde ko e ɗum moƴƴere ɗuuɗunde woni.

Si seytaane arii sowinsinirde maa bonnugol e kala, waqtu moolor Allah, yiltoɗaa e Makko. Ko Kanko woni Nanoowo ko wowlataa kon, Annduɗo fii maaɗa.

Hino jeyaa e maandeeji tindinayɗi e mawngu Makko ngun, jemma on e ñalorama on ko waylondirta kon, e naange ngen e lewru ndun. Onon ɓee yimɓe, wata sujjan naange ngen wanaa kadi lewru ndun. Sujjanee Allah tun, taguɗo ɗi On, si wonii ko Kanko rewoton.

Si ɓe townitorii ɗuurnagol, ɓe sujjanaali Allah taguɗo On, haray Malaa'ika'en wonɓe ka Allah ɓen, hiɓe subbunhinoo ɓe yetta Mo jemma e ñalorma, hara ɓe haaɓataa rewugol Mo.

Hino jeyaa e maandeeji Makko tindinɗi e mawngu e gootaagu e kattal Makko wuurnitugol, tawde a yi'ay leydi ndin no yoori, ndi alaa puɗi. Si wonii non Men jippinii ndiyam toɓo e mayri, ndi dillira aawdi mariindi e mayri ndin, ndi fontoo. Awa wuurnituɗo ndii leydi On puɗi, pellet, ko wuurnitoowo maayɓe ɓen, fii ñaaweede yoɓee, tawde pellet, ko O hattanɗo kala huunde. Wuurnitugol leydi yoorunoondi ronkintaa Mo, wanaa fii wuurnitugol maayɓe e genaale mun.

Pellet, ooñotooɓe ɓen e Aayeeje Amen Alla ɗen, ɓe yedda ɗe ɓe fenna, ɓe wayla ɗe, fii maɓɓe suuɗaaki Men; Meɗen anndi fii maɓɓe. E ko feroyteeɗo on ka Yiite ɓuri moƴƴude kaa ko aroyoowo on Ñalnde Darngal himo hoolii daɗugol lepte? Onon ɓee yiimɓe, huuwee ko yiɗuɗon e moƴƴere maa bone, Men ɓannginanii on ɗate moƴƴere e bone ɗen fow. Ko pellet, Allah no reeni ko golloton e ɗin kon. Hunnde e kuuɗe mon, suuɗaaki Mo.

Yeddunooɓe ɓen Alqur'aana tuma nde arunoo e maɓɓe, immorde e Allah, ko leptoyteeɓe Ñalnde Darngal, feere mun alaa. Pellet non, ko nde Deftere teddunde foolunde. Gooto hattanaa waylude nden, maa wattita nde.

Meere iwrantaa nde yeeso mayre, wanaa ɓaawo mayre; foti koi ɗuytugol maa ɓeydugol, waylugol maa wattitugol. Ko nde jipporiinde immorde ka Ñeeño e tagu Mun, e eɓɓoore Mun e sari'a Mun On, Yettiniiɗo e kala fiyaaku On.

A wi'aaka an Nulaaɗo, immorde e fenneede, si wanaa ko Nulaaɓe adinooɓe ma ɓen wi'anoo. Muñño, sabu pellet, Joomi maa, ko O Jom yaafuyee kala tuubanɗo Mo e jeyaaɓe Makko ɓen, e Jom lepte muusuɗe e kala haɓɓitiiɗo e junuubi, o ronki tuubude.

Si Men waɗuno ndee Alqur'aanaare e haala goo, hara wanaa aarabu, heeferɓe maɓɓe ɓen wi'ayno: ko haɗno Aayeeje mayre ɗen ɓannginiree, no men faamira? Alqur'aana wonay e haala ajami, arduɗo e mayre on wona aarabuujo? An Nulaaɗo, maakan ɓee: Alqur'aana, wonannde gomɗimɓe Allah ɓen ɓe goongini Nulaaɓe Makko ɓen, ko fewnaynde itta e majjere, e sellinaynde ñabbuuli majjere ɗin ka ɓernde e ko jokki ɗum. Ɓe gomɗimɓe ɓen kan Allah, pahu no e noppi maɓɓe ɗin, kayre hinde niɓɓitani ɓe, ɓe faamataa nde. Ɓen siforiiɓe ɗin sifaaji, hino wa'i wa noddirteeɓe e nokku woɗɗuɗo, ko honno ɓe nanirta ndun noddaandu?

Gomɗii Men okkii Muusaa Tawreetaare nden, kono luutondira e mayre: woɗɓe e maɓɓe gomɗini nde, woɗɓe ɓen yeddi nde. Si wanaa fii fodoore Allah nden, wonnde ko Ñalnde Darngal O ñaawoyta hakkunde jeyaaɓe ɓen, e ko ɓe luutondiri e mun kon, O ñaawayno hakkunde luutondirnooɓe e fii Tawreeta ɓen; O feññina goonguɗo on e meerenteejo on, O teddina goonguɗo On, O hoyna meereejo on. Heeferɓe ɓen kan, pellet, hiɓe e sikke sikkitiiɗo ndee Alqur'aanaare.

Kala golluɗo ko moƴƴi, ko kanko nafitorta ɗum, wanaa Allah nafitorta golle moƴƴe hay gooto. Kala kadi huuwuɗo ko boni, lorra mun ko e makko yantata, wanaa Allah woni ko bone geddi gooto e tagu Makko ngun, lorrata. O yoɓoyay kala e ko hanndi kon. Joomi maa an Nulaaɗo, O siforaali wonnde, tooñoowo jeyaaɓe Makko ɓen. O ɗuytanoytaaɓe moƴƴi maɓɓe, O ɓeydanoytaaɓe kadi bonɗi.

Ko faade ka Allah tun, woni ko ganndal Darngal ruttetee: ko Kanko tun anndi nde ngal darotoo, wanaa goɗɗo goo. Dimɗe yaltataa coombi mum (oomɗi mun), deyel kadi saawataa, ngel jibintaa si wanaa e ganndal Makko. Hay huunde yawtataa Mo e ɗin. Ñalnde O noddiroyta kafidaynooɓe Allah ɓen e sanamu, hara Himo felira ɓe ɗen kuuɗe maɓɓe wiide: ko honto woni ɗin ɗi kafidaynoɗon e Am woni? Sirkooɓe ɓen wi'i: Tigi-tigi on, men qirrii ma wonnde hay gooto e amen alaa seeditotooɗo ɗum ɗoo.

Ɓe majjondira e ɗin sanamuuji ɗi ɓe rawaynoo; ɓe yananee ontuma, wonnde laaworde lepte Allah ɗen alanaa ɓe, wanaa daɗinrde.

Neɗɗanke on haaɓataa toragol cellal, e jawdi, e ɓiɗɗo ekn. Si bone baasal maa ñawu ekn memii mo, ko o heewuɗo fibtaade e taƴagol e njurum Allah nden.

Si Men meeɗinirii mo cellal e ngalu e ɓuttu, ɓaawo jarrabuyee e ñawu memunooɗo mo, ko pellet o wi'ay: Ɗum ɗoo ko min woodani ! Tawde miɗo haandi e mun. Mi fellitaa si Darngal daroto. Si ɗum aru waɗde, haray pellet, hino woodani lam ka Allah, ngalu e jawdi; wano O neeminirnoo e am aduna, tawde miɗo hanndi e mun. Ma Men yeetitoyo yedduɓe Allah ɓen, geddi e keeferaaku ko ɓe huuwaynoo, ko ma Men meeɗinoy ɓe lepte saɗtuɗe muusuude.

Si Men neeminirii neɗɗanke on cellal e ɓuttu ekn, o welsindoo e jantagol Allah ɗoftoo Mo, o ɗuurnora ɗum, toownugol balaaje makko. Si ñawu non memii mo, maa baasal ekn, o wona torotooɗo Allah ko ɗuuɗi, hara himo woyto e Makko fii on bone, no O huncirana mo ɗum. Tawaa o yettataa Allah si O neeminii e makko, o muññotaako kadi e ko O jarriborta mo kon.

An Nulaaɗo, maakan ɓee sirkooɓe fennooɓe: "Yeetee lam, si wonii ndee Alqur'aanaaree ko ka Allah iwri, refti yedduɗon nde fennuɗon; ko honno fiyaaku mon waɗtinirta? Haray ko hommbo ɓuri majjude on salaniiɗo goonga, feeñirka hujja doolnuɗo?

Aray ka Men holla heeferɓe Qurayshi ɓen, maandeeji Amen ɗin ka tatteeji leydi, tuma Allah yaññanta juulɓe ɓen, Men holla ɓe ɗi e maɓɓe tigiri, ka uddital Makka, haa ɓanngana ɓe ko sikke alaa e mu'un, wonnde ndee Alqur'aanaare, ko nde goonga, mo Allah seeditii wonnde ka ka Makko nde iwri. Ko hommbo non ɓuri mawnude Allah seedee? Si ko goonga ɓe muuynoo, ɓe yonndinorayno seedee Joomi maɓɓe on.

Anndee sirkooɓe ɓen no e sikke fii hawroygol e Joomi maɓɓe, Ñalnde Darngal; ɓe gomɗinaa laakaraa, ko ɗum waɗi si ɓe hebilorantaako ngal golle moƴƴe. Anndee non, Allah no huɓindorii ganndal e kattal Makko ngal, kala huunde.

Haa, Miim : firo sugu ɗee kalfe yawtiino ka fuɗɗorde cortewol Al-baqarah.

Ain, Siin, Qaaf: firo sugu ɗee kalfe yawtiino ka fuɗɗorde cortewol Al-baqarah.

Ko sugu oo wayahu woni ko Allah wahayiniri e maa an Muhammdu, e ɓen Annabaaɓe Makko adinooɓe ma, Allah Fooluɗo e yaggingol ayɓe Mun, Ñeeñuɗo e toppitannde Mun e tagu Mun.

Ko Kanko Allah tun, woni ko jeyi kala ko woni ka kammuuli e ka leydi: tagugol e laamagol toppitoo. Ko Kanko kadi woni Toowuɗo e jaati Mun, fotde mum, poolgu e kattal Mun e toppitagol Mun, Mawnuɗo e jaati Mun.

Hino jeyaa e mawngu Allah ngun, tawde kammuuli ɗin e no ɗi foti e waade e toowude, hiɗi eɓɓa seekorgol dow leydi ndin, hara Malaa'ika'en no laɓɓinira Joomi maɓɓe, yettugol Mo, yankinanoo Mo mawnina Mo, ɓe toroo Mo haforangol wonɓe ka leydi ɓen. Awa anndee pellet, ko Allah woni Haforanoowo kala tuubuɗo e jeyaaɓe Makko ɓen, Hinnotooɗo ɓe.

Ɓen jogitiiɓe sanamuuji yiɗɓe reweteeɗi hara wanaa Allah, Allah na tommbii kuuɗe maɓɓe ɗen, O yoɓitoyay ɓe ɗe. An non Nulaaɗo, a wonaali fawaaɗo reenugol golle maɓɓe, tawde a lamnditortaake kuuɗe maɓɓe ɗen. An on, ko a yottinoowo tun.

Ko wano Men wahayinirnoo e ɓeya Annabaaɓe adinooɓe ma ɓen, Men wahayiniri e maaɗa an Nulaaɗo, janngeteende e haala aarabu, fii ko jertiniraa yimɓe Makka ɓen e aarabuuɓe wonɓe takko mayre ɓen, refti yimɓe ɓen fow. Jertinaa kadi yimɓe ɓen, fii Ñalande Darngal, ñalnde Allah mooɓoyta adinooɓe e sakkitiiɓe fow nokku gooto, fii ñaaweede yoɓee; ñalaande nde sikke alaa e mu'un. Yimɓe ɓen wonoyay pecce ɗiɗi: feccere goo, ka Aljanna; woni muumini'en, ndeya feccere, ka Yiite; woni heeferɓe ɓen.

Si Allah haajuno, O waɗayno fow e mofte goote ka lislaamu, O naada ɓe fow kadi Aljana. Kono ñenƴal Makko ngal eɓɓii nde O naadata mo O muuyi ka lislaamu, ontigi naatoya Aljanna. Tooñuɓe non ko'e-mun geddi e keeferaaku, ɓe alaa giɗo heftoowo fii maɓɓe, wanaa walloowo ɓe e lepte Allah ɗen.

Si ko woni, ɓee sirkooɓe jogiti yiɗɓe goo, ko wanaa Allah. Hara non ko Allah woni Giɗo On tigiri, wanaa goɗɗo goo nafatah maa lorra. Ko Kanko woni wuurnitoowo maayɓe ɓen, fii hasbugol ɓe yoɓa ɓe, huunde ronkintaa Mo.

Onon ɓee yimɓe, kala ko luutondirɗon e fii mun ka doose diina maa ka calɗi mun, haray ñaawoore mun nden, ko ka Allah woni: on ruttoto ka Deftere Makko maa ka Sunna Nulaaɗo Makko on (yo o his). Ko On siforɗo ɗin sifaaji, woni Joomi am; ko e Makko mi fawi fii am on fow, ko ka Makko kadi mi ruttorta tuubugol.

Ko Allah tagi kammuuli ɗin e leydi ndin, no ɗi anndiranooka. O waɗirani on e pittaali mon ɗin genndooɓe, O waɗani on e gelooɗi ɗin e na'i ɗin e dammi ɗin nooneeji, no ɗi ɗuuɗira fii mon. Himo tagira on e ko O waɗirani on genndiraaɓe kon, O wuurnira on e ko O waɗirani on e tebeeli e ɓira neemoraaɗi mon ɗin. Hay huunde e tagu tagu Makko ngun yerondiraa e Makko. Ko Kanko woni Nanoowo haala jeyaaɓe Makko ɓen, Yi'oowo kuuɗe maɓɓe ɗen; huunde e mun laawotaako Mo. Ma O yoɓitoy ɓe golle maɓɓe ɗen: ko moƴƴi e ko boni.

Ko Kanko tun heerori soktirɗe ngaluuji kammuuli ɗin e leydi ndin. Himo yaajnana arsike on mo O muuyani e jeyaaɓe Makko ɓen, fii ndaarndagol si ontigi yettay Mo kaa o yedday; ko wano non kadi O ɓillinirta mo O muuyani, jarribagol annda si ontigi muññoto kaa o tikkiray senndoore Allah nden. Pellet, ko O Annduɗo kala huunde. Hay huunde suuɗaaki Mo, e nafata jeyaaɓe Makko ɓen.

O sar'inanii on e diina kan, sugu ko O yamirnoo kon Nuuhu yottingol gollitiri, e kon ko Men wahayini e maaɗa, an Nulaaɗo. O sar'inani on kadi, sugu ko Men yamirnoo kon Ibraahiima, e Muusaa e Iisaa'en fow yo yottin gollitira, wonnde: ñiiɓinee diina kan; hara on seertaali e makka. Kono ko noddataa sirkooɓe ɓen e mun kon, yo ɓe bajjinɗin Allah, woɗɗitoo e sirku, ɗum mawnii e dow maɓɓe. Allah non, Himo suɓoo e jeyaaɓe Makko ɓen, O hawrindida ɗum ko rewa Mo ɗoftoo Mo, O fewna kala tuuboowo yiltoo e junuubi mun.

Heeferɓe ɓen e sirkuɓe ɓen seertaano, si wanaa ɓaawo nde hujja on ñiiɓirde e dow maɓɓe, nuleede Muhammadu (jom kisiyee) sabu bewre e tooñd. Si wanaano sabu fii Allah anndiino wonnde O nennanayɓe lepte ɗen haa e happu mo O anndi; woni Ñalnde Darngal, ko pellet, O ñaawayno hakkunde maɓɓe; O jippinira lepte ɗen e maɓɓe, sabu yeddugol ɓe ngol Allah, fenna Nulaaɗo Makko on. Pellet, Alyahuuda roninaaɓe Tawreeta ɓen, e Annasaara roninaaɓe Linjiila ɓen ɓaawo ɓeya, e kala arnooɓe ɓaawo sirkooɓe ɓen, fow e maɓɓe no sikkitii ndee Alqur'aanaare, nde Muhammadu ardi e mun, fennuɓe mo.

Noddan kaa diina ñiiɓuka; tabitiraa e ɗum, no Allah yamirmaa non; wata a jokku mbeleeɗe maɓɓe meerente ɗen, maakanaa ɓe tuma wennjondiral: mi gomɗinii Allah, e kala Deftere nde O jippini e Nulaaɓe Makko ɓen. O yamirii lam, yo mi ñaawir nunɗal hakkunde mon. Ko Allah Mo mi rewata on, woni Joomi am e Joomi mon on fow. Ko menen golle amen - moƴƴe maa bonɗe - woodani, ko onon kadi golle mon - moƴƴe maa bonɗe woodani. Yeddondiral woo alaa hakkunde amen e mon, ɓaawo hujja on ɓanngude. Allah mooɓoyay en fow men. Ko ka Makko woni ruttorde nden Ñalnde Darngal; O yoɓita kala e men, ko hanndi kon. Ontuma non, laaɓay ko hommbo goongi, oya feni.

Ɓen wennjirooɓe hujjaaji meerente e diina Allah jippinaaka e Muhammadu kan, ɓaawo nde yimɓe ɓen nootaade ka, hujja ɓen on, ko meere yanoowo ka Joomi maɓɓe e ka gomɗimɓe ɓen; ɓaɗte woo alanaa mo. Tikkere Allah hino fawii ɓe, sabu yeddugol ɓe ngol saloo goonga, hino woodani ɓe lepte saɗtuɗe, sabbitiiɗe ɓe Ñalnde Darngal.

Ko Allah woni jippinirɗo Alqur'aanaare nden goonga, mo sikke alaa e mu'un, O jippini kadi fii nunɗal, ko ñaawiree hakkunde yimɓe ɓen. Hino hasii hara Darngal, ngal ɓee fennata fii mun ngal, ko ko ɓadii. Hino anndaa non, wonnde kala ko arata, ko ko hewti.

Ɓe gomɗinaa ɓen Darngal, hino ɗaɓɓa yaccingol fii maggal; tawde ɓe gomɗinaa fii hasboore wanaa warjeede wanaa fii lepte. Gomɗimɓe Allah ɓen kan, ko ɓe hulu ɓe fii maggal, e hoore hiɓe felliti wonnde ko ngal goonga, mo sikke alaa e mu'un. Awa anndee wonɓe yeddondireede ɓen e fii Darngal, hara hiɓe sikkitii daragol maggal, ko pellet, ɓe wonii e nder majjere woɗɗunde goonga.

Allah ko newaniiɗo jeyaaɓe Makko ɓen. Himo yaacnana arsika mo O muuyani e maɓɓe, O ɓillina mo O muuyani, ka yurmegol mo; hay si goɗɗum goo yaltitii. Ko Kanko woni Doolnuɗo Mo gooto foolataa, Jaaliiɗo yagginoowo ayɓe Makko ɓen.

Kala tawɗo ko baraaje ndun laakara o faaliraa golle makko ɗen, Men sowanay mo mbarjaari makko ndin; moƴƴere kala, sappo yeru mun, haa hewta cowalle teemeɗɗe jeeɗiɗi, haa ɓura ɗon ko ɗuuɗi. Kala kadi tawɗo ko jayru ndun aduna tun o faalaa, Men okkay mo geɓal makko ngal, yeru makko on; hara non o alaa ka laakara ton, hay geɓal, tawde o ɓuurnii aduna e dow laakara.

Kaa hara kafidaaɗi e Alalh hino woodani ɓee sirkooɓe, sar'inanɗi ɓe e diina kan, kon ko Allah duŋaaki fi mun: harmingol ko dagii, maa dagingol ko harmi? Si wanaano fii ngola Konngol ngol Allah happunoo e mun, dumunna senndugoygol hakkunde luutondirɓe ɓen, e tawde O nennanay ɓe haa nden ñlande, O ñaawayno hakkunde maɓɓe kisan. Ko pellet, hino woodani tooñirɓe ko'e-mun ɓen sirkangol Allah yedda Mo, lepte muusuɗe, Ñalnde Darngal.

A yi'ay an Nulaaɗo, tooñirɓe ko'e-mun ɓen sirku e geddi, hiɓe huliri leptireede ko ɓe faggitii kon e bakkaatu, hara le ɗum yantay e maɓɓe, feere mun alaa, nafa woo alaa e ko ɓe hulirta ɗum. Ɓen non gomɗimɓe Allah e Nulaaɗo Makko on, ɓe golli golle moƴƴe, ɓen no seedi e ɓeya; ɓee ɗoo hino e nder naakooji Aljanna, hiɓe neeminora ton, kala ko ɓe faalaa ka Joomi maɓɓe; neemaaji ɗi taƴondirtaa haa pooma. Ko ɗum tigiri, woni ɓural mawnungal, ngal alaa nanndo.

Ko ngon welo-welo mawngo, woni ko Allah wewlinirta jeyaaɓe Makko ɓen, e junngo Nulaaɓe Makko on; ɓen jeyaaɓe gomɗimɓe Allah e Nulaaɓe Makko ɓen, ɓe golli golle moƴƴe. An Nulaaɗo, maaku: mi ɗaɓɓiraa on njoɓdi woo, e ko mi yottinta kon, si wanaa njoɓdi wootiri, ndi nafitorton onon; ndin woni: nde yiɗorton lam, fii ko mi enɗam mon. Kala faggitiiɗo moƴƴere, Men ɓeydanay mo njoɓdi e hoore mayre: moƴƴere nden, ko sappo yeru mayre. Pellet, Allah ko Haforoowo junuubi kala tuubuɗo e jeyaaɓe Makko ɓen, mantoowo golle maɓɓe moƴƴe ɗen ɗe ɓe gollirta fii Makko.

Hini jeyaa e ko sirkooɓe ɓen aaƴii, wonnde Muhammadu (yo o his) fefindi ndee Alqur'aanaare, o dammbi nde e Joomi makko. Allah ruttiiri ɓe wiide: hara a aru fefindaade fenaande woo, Ma Mi notu e ɓernde maa nde, Mi meha meere fefindaande nden, Mi heddina goonga kan. Nde tawnoo non, wanaa non woniri, ɗum tinndinii wonnde Annabiijo on (yo o his) ko wahayu Joomi makko o wonndi e mun. Pellet le, ko O Annduɗo ko woni e ɓerɗe jeyaaɓe Makko ɓen. Huunde suuɗaaki Mo e mum.

Ko Kanko Allah woni jaɓoowo tuubuubuyee jeyaaɓe Makko yedduɓe ɓen, si ɓe ruttike e Makko, O yawtana ɓe bonɗi ɗi ɓe faggitii ɗin, e hoore Himo anndi kala ko huuwoton. Huunde suuɗaaki Mo e golle mon ɗen. Ma O yoɓitoy on ɗe.

Himo jaabina toraare gomɗimɓe Allah e Nulaaɗo Mun on, ɓe golli golle moƴƴe, O ɓeydana ɓe e ko ɓe lamndaaki mo kon, ka ɓural Makko. Yedduɓe Allah e Nulaaɗo Mun ɓen non, hino woodani ɓe lepte saɗtuɗe, habbitiiɗe ɓe Ñalnde Darngal.

Si tawno Allah yaññanno jeyaaɓe Makko ɓen fow arsike, ko pellet, ɓe bewirayno tooñe ka hoore leydi; kono Himo jippinira arsike on, emmbere ko O muuyi yaññude O ɓillina. Pellet, ko O humpitiiɗo fii jeyaaɓe Makko ɓen, Reenuɗo ɓe. O okkiray ñeñƴal Makko ngal, O ɓillinira ngal kadi.

Ko Kanko woni jippinoowo ndiyam ɗam e jeyaaɓe Makko ɓen, ɓaawo ɓe taƴaade fii majjam, O saaka ɗam ndiyam, ɗam fuɗina leydi ndin. Ko Kanko kadi woni Giɗo heftuɗo fii maɓɓe, Yettiniiɗo e kala fiyaakyu.

Hino jeyaa e maandeeji tindinayɗi e kattal e gootaagu Makko ngun: tagugol kammuuli ɗin e leydi ndin, e ɗin ruugayɗi haawniiɗi, ɗi O saakiti hakkunde majji. Kanko e fii mooɓindiroygol ɓe ngol ñaawa ɓe yoɓita ɓe, nde O haaji e mun woo, ko O hattanɗo. O ronkataa fii mun, wano woniri O ronkaano tagugol ɓe ka arannde laawol.

Kala ko heɓi on, onon ɓee yimɓe, immorde e musiiba wonkiijii mon maa e jawle mon, ko sabu geddi ɗi juuɗe mon ɗen faggitii. Allah non, hino yaafoo ko ɗuuɗi e mun, hara O nanngitirtaa on ɗin.

On wonaa hattanɓe laawagol lepte Joomi ɗen, si O faandanike on ɗe; On maraa kadi yawti Mo Kanko, woni giɗo hettoowo fii mon, wanaa ballo faabotooɗo on e lepte Makko ɗen, si O faandanii mon ɗe.

Hino jeyaa e maandeeji tinndinayɗi e kattal e gootaagu Makko ngun: laaɗe dogayɗe ɗen ka maayo, toowirɗe wa pelle.

Si O haajii deeƴingol henndu naɓay ndu laaɗe ɗen, O waɗay; ndu waɗtina ontuma, tabitu ndu e hoore maayo ngon. Woni e ko jantaa koo, maandeeji ɓannginɗi kattal Allah ngal, wonannde kala muññotooɗo jarrabuyee, yettoowo neema Allah on e dow mun.

Si Mo yiɗi Kanko Allah, O yooliray ɗen laaɗe, wurtugol heenndu tiiɗundu e majje, sabu bakkaatu ko yimɓe ɓen faggitii kon. Himo yaafoo non, ko ɗuuɗi e bakkatuuji jeyaaɓe Makko ɓen.

Tuma O halkirta laaɗe ɗen henndu ndun, wennjaynooɓe e Aayeeje Allah ɗen, fii bonnitugol ɗe, hiɓe wonnde ontuma, wonnde alaa no ɓe laawora e halkaare nden.

Kala huunde nde hokkaɗon onon ɓee yimɓe, woni ko jaahu maa ɓiɗɗo, haray ko dakamme nguurndam aduna, ko ko fii mun lannata; neema duumotooɗo on, ko neema Aljanna on mo Allah marani gomɗimɓe Mo ɓen, ɓe gomɗini Nulaaɓe Makko ɓen, hara ko e Joomi maɓɓe tun, woni ɓe fawotoo e fiyaaku maɓɓe kala.

Ɓen woɗɗitotooɓe e junuubi mawɗi ɗin e pankare ɗen, si wonii ɓe tikkanii fawñoriiɗo ɓe konngol maa kuugal, hara ɓe yaaforay ontigi e ɗum, sabu moƴƴere e maslaha ko woni e mun.

Ɓen nootoriiɓe Joomi maɓɓe, huuwugol ko O yamiri ɓe, woɗɗitoo e ko O haɗi ɓe, ñiɓnir ɓe julde nden no timmiri, ɓe tawata ko diisondirayɓe hakkunde maɓɓe, e kala fiyaaku maɓɓe, wintotorayɓe fii Allah, e kon ko Men arsiki ɓe.

E ɓen tawɓe si tooñe yanii e maɓɓe, ɓe yottoray teddingol hoore maɓɓe, tuma tawi hara tooñuɗo on hanndaa e yaafeede. Nden yottannde, ko jojjunde, teŋtinii si nafa alaa e yaafagol ngol.

Kala faalaaɗo yottaade, ko hakkee makko. Ko woni tun, hara ko yeru mun, ko aldaa e ɓeydugol maa fantingol. Kala non yaafiiɗo boniiɗo e mun, o moƴƴintini hakkunde maɓɓe, haray njoɓdi makko ndin ko ka Allah woni. Pellet non, O yiɗaa tooñirooɓe yimɓe ɓen, ka wonikiiji e ka jawle e guri maɓɓe; Himo añi ɓen.

Kala non yottiiɗo, ko ɓen woni ɓe nanngitirtaake ko waɗi kon.

Ka nanngitireede lepte fawii e mun, ko tooñooɓe yimɓe ɓen, hara hiɓe huuwa geddi e leydi ndin: ɓen ɗon, lepte muusuɗe hino woodani laakara.

Muññiiɗo on kadi o yaafii tooñe ɗen, ko pellet, moƴƴere ngal muñal ɗon, yiltoto e makko wonndude e renndo ngon. Ɗum ko fiyaaku yettiniiɗo, ko jom-geɓal mawngal tun, woni ko hawrondirta e ɗum.

Kala mo Allah hoyni gaa e peewal haa O majjini ontigi e goonga kan, haray giɗo goo alanaa mo, mo no heftana mo fiyakuuji makko ɗin. A tinay tooñirnooɓe ko'e mun ɓen geddi e keeferaaku, tuma ɓe yi'i lepte ɗen Ñalnde Darngal, hiɓe yeloo wi'a: hara laawol ruttorde aduna no woodi, men tuubana Allah?

A tinay kadi an Nulaaɗo, ɓee tooñuɓe hino weeɓitee e Yiite ngen, hara ko ɓe hoynaaɓe jaasinaa, hiɓe ndaarira yimɓe ɓen, lepaarol, hakkee ko ɓe huli nge. Gomɗimɓe ɓen wi'ay ontuma: ko woni hayruɓe ɓen tigiri, ko hayrimɓe ko'e mun ɓen e ɓeynguureji mun ɗin Ñalnde Darngal, sabu ko ɓe hawri kon e lepte Allah ɗen. Awa anndee pellet, tooñirɓe ko'e mun ɓen geddi e keeferaaku, ɓe wonii e lepte duumiiɗe poomaa.

Yiɗɓe alanaa ɓe,ko wallitoo ɓe daɗugol lepte Allah ɗen,Ñalnde Darngal.Kala non mo Allah majjini e goonga kan,haray o heɓataa ko tinndina mo e maggal, haa poomaa.

Onon ɓee yimɓe, nootee Joomi mon, tinnorgol e ko O yamiri kon, woɗɗitoo e ko O haɗi kon, acca kadi caate, ado Ñalaande Darngal nden arde on, nde tawata ruttoowo alanaa nde. Nden ñalnde, fattorde woo alanaa on, yeddugol junuubi mon ɗin ko faggita ka kadi alanaa ton.

Si ɓe ɗuurnike e ko yamirɗaa ɓe kon, haray Men nuliraali ma an Nulaaɗo, aynugol kuuɗe maɓɓe: fawaaki ma, si wanaa yottingol nulal ngal e maɓɓe, ñaawoore maɓɓe nden, ko ka Allah woni. Si wonii Men meeɗinirii neɗɗanke on neema ngalu e callal ekn, o wewlira ɗum; si bone non woni memiei ɓe sanu junuubi maɓɓe ɗin, a taway ko ɓe anndiraaɓe dullangol Allah, ronka yettude neemaaji Makko ɗin, ɓe wona e tikkangol ko O hoddirani ɓe kon ñeñƴal Makko.

Ko Allah heeranii laamagol kammuuli ɗin e leydi ndin. Himo tagira worɓe e rewɓe maa ko wanaa ɗum, no O haajiri. Himo yeɗa mo O muuyani ɓiɗɓe rewɓe, O ɗala ontigi ɓiɗɓe worɓe, ko non kadi O yeɗirta mo O muuyani ɓiɗɓe worɓe, O ɗali mo ɓiɗɓe rewɓe, maa O waɗana mo O muuyani kadi ɓiɗɓe e worɓe, O waɗa mo O muuyani wonnde mo jibintaa. Pellet, Himo anndi ko fewndii e ko saatii. Ko ɗum woni timmugol ganndal e ñeñƴal Makko. Huunde wirnanaaki Mo. Wanaa goɗɗum kadi rontinta Mo.

Ko Allah heeranii laamagol kammuuli ɗin e leydi ndin. Himo tagira worɓe e rewɓe maa ko wanaa ɗum, no O haajiri. Himo yeɗa mo O muuyani ɓiɗɓe rewɓe, O ɗala ontigi ɓiɗɓe worɓe, ko non kadi O yeɗirta mo O muuyani ɓiɗɓe worɓe, O ɗali mo ɓiɗɓe rewɓe, maa O waɗana mo O muuyani kadi ɓiɗɓe e worɓe, O waɗa mo O muuyani wonnde mo jibintaa. Pellet, Himo anndi ko fewndii e ko saatii. Ko ɗum woni timmugol ganndal e ñeñƴal Makko. Huunde wirnanaaki Mo. Wanaa goɗɗum kadi rontinta Mo.

Sellantaa neɗɗanke, nde Allah yewtata, si wanaa hara ko wahayu maa ko nanndi, maa hara ko no o nanirta yewtere Makko nden, tawa o sutaaki mo, maa O immina Malaa'ikaajo e makko, wano Jibiriilu, on wahayina e neɗɗanke Nulaaɗo on, ko Allah duŋanii mo kon. Pellet, Kanko Allah, ko O Toowuɗo e Jaati e Sifaaji Makko, Ñeeñuɗo e tagu e kattal e sari'a Makko on.

Ko wano Men wahayinirnoo non e Annabaaɓe adinooɓe ma ɓen, Men wahayiniri Alqur'aana e maaɗa, an Nulaaɗo, e yamiroore Amen. A anndaano ko woni Defte jippiiɗe ɗen e ɓeya Nulaaɓe, a anndaano kadi ko woni gomɗinal; si ko woni, Men jippinin ndee Alqur'aanaare, ko nde ndayginnde, ndaygu ngu Men fewnirta mo Men muuyani e jeyaaɓe Amen ɓen. Pellet, ko a fewnoowo yimɓe ɓen, e laawol focciingol, woni diina lislaamu kan.

Laawol Allah, On jeyɗo ko woni kon ka kammuuli e ka leydi, taguɗo laamii toppitii ɗi. Anndee pellet, ko ka Allah tun, woni ko fiyakuuji ɗin ruttotoo, ka eɓɓugol topiitoo.