Arnavutça Meal — Rowad Tercüme Merkezi — Duhan 44:1 – Mürselat 77:50

Ha, mim.[1] ——— [1] Shih fusnotën përkatëse tek ajeti i parë i sures El-Bekare.

Betohem në Librin e qartë!

Ne e zbritëm atë në një natë të bekuar. Me të vërtetë, Ne jemi gjithnjë paralajmërues.

Në atë natë vendoset çdo çështje e prerë,

me urdhër prej Nesh. Vërtet, Ne jemi ata që dërgojmë (të dërguar)

si mëshirë nga Zoti yt. Njëmend, Ai është Gjithëdëgjuesi, i Gjithëdijshmi,

Zoti i qiejve e i Tokës dhe i gjithçkaje që gjendet ndërmjet tyre, sikur të besonit me bindje.

Nuk ka zot tjetër që meriton të adhurohet përveç Tij. Ai jep jetë dhe vdekje. Ai është Zoti juaj dhe Zoti i etërve tuaj të lashtë.

Në të vërtetë, ata janë në mëdyshje, duke u argëtuar.

Prandaj prite ditën kur qielli do të nxjerrë një tym të qartë,

i cili do t'i mbulojë njerëzit. Ky është një dënim i dhembshëm.

(Atëherë do të thonë): "Zoti ynë, largoje prej nesh dënimin, se përnjëmend po besojmë!"

E nga e morën tash këshillën, kur atyre u erdhi më parë një i Dërguar i qartë,

të cilit ia kthyen shpinën e thanë: "Njeri i mësuar (nga dikush tjetër) e i marrë!"?!

Ne do ta largojmë dënimin për pak kohë, por ju do të ktheheni përsëri (në mosbesim).

Ditën kur do t'i kapim me dënimin më të rëndë, Ne njëmend do të hakmerremi.

Në të vërtetë, Ne sprovuam para tyre popullin e Faraonit dhe atyre u erdhi një i dërguar fisnik,

(i cili u thoshte): "M'i lini robërit e Allahut, se pa dyshim, unë jam për ju një i dërguar besnik!

Mos u tregoni kryelartë ndaj Allahut, sepse, vërtet, unë po ju sjell një provë të qartë.

Unë i jam mbështetur Zotit tim e Zotit tuaj, që të mos më mbytni me gurë!

Nëse nuk më besoni, atëherë largohuni prej meje!"

Ai iu lut Zotit të vet: "Ky është një popull vërtet keqbërës!"

(Allahu i tha): "Udhëto natën me robërit e Mi, por do të ndiqeni.

Dhe lëre pas detin të hapur, sepse ajo ushtri do të fundoset!"

Sa e sa kopshte e burime lanë pas,

e sa ara të mbjella e vende të bukura

dhe sa begati me të cilat kënaqeshin!

Kështu ndodhi, ndërkohë Ne u lamë trashëgim një populli tjetër.

Ata nuk i vajtoi as qielli e as Toka e as që iu dha afat.

Ne i shpëtuam bijtë e Israilit nga dënimi poshtërues,

nga Faraoni, i cili ishte vërtet mendjemadh dhe i kalonte kufijtë.

Ne i zgjodhëm ata, duke e ditur, mbi të gjithë njerëzit (e asaj kohe)

dhe u dhamë atyre shenja, në të cilat pati një provë të qartë.

Në të vërtetë, këta (jobesimtarë) thonë:

"Nuk ka tjetër vdekje përveç vdekjes së parë dhe ne nuk do të ringjallemi.

Sillni pra etërit tanë, nëse po e thoni të vërtetën!"

Mos janë këta më të mirë se populli i Tubës dhe ata para tyre? Ne i shkatërruam të gjithë ata, sepse ishin keqbërës.

Ne nuk i krijuam qiejt e Tokën dhe çfarë gjendet ndërmjet tyre për t'u argëtuar.

Ne i krijuam ato me një urtësi (të madhe), por shumica e tyre nuk e dinë.

Pa dyshim, Dita e Gjykimit është koha e caktuar për të gjithë ata,

Dita kur asnjë mik s'do do të mund t'i bëjë aspak dobi mikut të vet e as do të ndihmohen,

me përjashtim të atyre që Allahu i mëshiron. Ai është i Gjithëfuqishmi, Mëshirëploti.

Vërtet, pema e Zekumit

është ushqimi i gjynahqarit të madh,

i cili është si metal i shkrirë që vlon në barqe,

sikurse uji i valë.

"Kapeni atë e tërhiqeni me forcë deri në mes të Zjarrit flakërues!

Pastaj hidhni, si dënim, ujë të valë mbi kokën e tij!

(Do t'i thuhet me shpoti:) "Shijoje, se ti je njëmend i fuqishmi, fisniku!

Ky është pra dënimi për të cilin dyshonit!"

Ndërkaq, të devotshmit do të jenë në një vend të sigurt,

mes kopshteve e burimeve,

të veshur me rroba mëndafshi të hollë e të trashë, përballë njëri-tjetrit.

Kështu do të jetë, madje Ne do t'i martojmë ata me hyri symëdha.

Aty do të kërkojnë çfarëdo lloj frute, duke qenë në siguri.

Ata nuk do të shijojnë aty vdekje tjetër, përveç vdekjes së parë, dhe Ai do t'i ruajë ata nga dënimi i Zjarrit flakërues,

si mirësi nga Zoti yt. Kjo është fitorja e madhe.

Në të vërtetë, Ne e bëmë atë (Kuranin) të lehtë në gjuhën tënde, që ata të marrin mësim.

Prandaj prit, se edhe ata po presin.

Ha, mim.[1] ——— [1] Shih fusnotën përkatëse tek ajeti i parë i sures El-Bekare.

Ky Libër është shpallur nga Allahu, i Gjithëfuqishmi, i Urti.

Vërtet, në qiej dhe në Tokë ka shenja për besimtarët.

Edhe në krijimin tuaj dhe në gjallesat që Ai ka shpërndarë ka shenja për njerëzit që binden.

Por, edhe në ndërrimin e natës dhe ditës, në shiun që Allahu zbret nga qielli për të gjallëruar tokën pasi të jetë tharë, si dhe në lëvizjen e erërave, ka shenja për njerëzit që mendojnë.

Këto janë ajetet e Allahut, të cilat po t'i lexojmë me vërtetësi. Atëherë, cilave fjalë pas fjalëve të Allahut e ajeteve të Tij do t'i besojnë ata?!

Mjerë çdo gënjeshtar e gjynahqar i madh!

Ai i dëgjon ajetet e Allahut që i lexohen e sërish ngul këmbë në mendjemadhësi, sikur të mos i kishte dëgjuar ato. Prandaj, njoftoje për një dënim të dhembshëm!

Kur mëson diçka nga ajetet Tona, tallet me to. Për këta ka një dënim poshtërues.

Para tyre është Xhehenemi dhe atyre nuk do t'u bëjë dobi aspak ajo që kanë fituar e as ata (idhujt) që kanë marrë për mbrojtës në vend të Allahut. Ata do të kenë një ndëshkim të madh.

Ky (Libër) është udhërrëfyes. Ndërkaq, ata që mohojnë ajetet e Zotit të tyre do të kenë një dënim të tmerrshëm e të dhembshëm.

Allahu është Ai që ka nënshtruar detin për ju, që anijet të lundrojnë në të me urdhrin e Tij dhe që të kërkoni mirësitë e Tij e të jeni mirënjohës.

Ai ka nënshtruar për ju gjithçka që është në qiej e në Tokë, të gjitha janë prej Tij. Me të vërtetë, në këtë ka shenja për njerëzit që mendojnë.

Thuaju atyre që besojnë le t'i falin ata që nuk shpresojnë në ditët e Allahut, sepse Ai do të shpërblejë çdo popull sipas punës që ka bërë.

Kush bën mirë, e ka për vete, e kush bën keq, i bën dëm vetes. Pastaj, te Zoti juaj do të ktheheni.

Ne u dhamë bijve të Israilit Librin, urtësinë dhe pejgamberinë, i begatuam me të mira dhe i ngritëm mbi të gjithë njerëzit (e asaj kohe).

Gjithashtu, Ne u dhamë atyre prova të qarta lidhur me çështjen (e fesë), por ata ranë në kundërshti vetëm pasi u erdhi dituria, nga zilia që kishin mes vete. S'ka dyshim se Zoti yt do të gjykojë ndërmjet tyre në Ditën e Kiametit për gjërat që kundërshtoheshin.

E Ne të vumë ty në rrugën e drejtë të fesë, prandaj, ndiqe atë e mos ndiq dëshirat e atyre që nuk dinë!

Në të vërtetë, ata nuk mund të të ndihmojnë asgjë kundrejt Allahut. S'ka dyshim se keqbërësit janë miq të njëri-tjetrit, kurse Allahu është Mbrojtësi i të devotshmëve.

Ky (Kuran) është provë e qartë për njerëzit dhe udhëzim e mëshirë për njerëzit që besojnë bindshëm.

A mos mendojnë ata që bëjnë vepra të këqija se do t'i trajtojmë njëjtë si ata që besojnë dhe bëjnë vepra të mira, në jetën e tyre dhe pas vdekjes? Sa keq që gjykojnë!

Allahu krijoi qiejt dhe Tokën me urtësi e me qëllim që çdo njeri të shpërblehet për atë që ka punuar, ndërkohë atyre nuk do t'u bëhet padrejtësi.

A e ke parë ti atë që dëshirën e vet e merr për zot, të cilin Allahu e ka shpënë në humbje, duke e ditur, dhe ia ka vulosur dëgjimin e zemrën, si dhe në sytë e tij ka vënë perde? Vallë, kush mund ta udhëzojë atë pas Allahut? A nuk po merrni mësim?

Ata thonë: "Nuk ka tjetër veç jetës së kësaj bote: vdesim e jetojmë dhe vetëm koha na shkatërron." Ata nuk kanë dijeni për këtë. Në të vërtetë, ata vetëm hamendësojnë.

Kur u lexohen atyre ajetet Tona të qarta, arsyetimi i tyre i vetëm është: "Sillni baballarët tanë, nëse po e thoni të vërtetën!"

Thuaj: "Allahu ju jep jetë, pastaj ju bën të vdisni e më pas ju tubon në Ditën e Kiametit, për të cilën nuk ka dyshim, por shumica e njerëzve nuk e dinë."

Allahut i përket sundimi i qiejve dhe i Tokës. E, kur të ndodhë Kiameti, atë Ditë do të humbasin ithtarët e së kotës.

Çdo popull do ta shohësh të gjunjëzuar. Çdo popull do të thirret te Libri i vet (e do t'i thuhet): "Sot do të shpërbleheni për ato që keni punuar.

Ky është Libri Ynë që flet të vërtetën për ju. Ne kemi urdhëruar të shkruhet gjithçka që bënit.

Sa u përket atyre që besojnë dhe bëjnë vepra të mira, ata do t'i fusë Zoti i tyre në mëshirën e Tij. Kjo është fitorja e qartë.

Ndërkaq, atyre që mohojnë do t'u thuhet: "A nuk ju lexoheshin ajetet e Mia, kurse ju tregoheshit mendjemëdhenj dhe ishit njerëz keqbërës?"

Kur u thuhej: "Premtimi i Allahut është i vërtetë dhe Kiameti do të vijë patjetër", ju thoshit: "Nuk dimë ç'është Kiameti, ne e mendojmë atë vetëm si hamendësim dhe nuk jemi të bindur."

Atyre do t'u dalin në shesh të këqijat që kanë bërë dhe do t'i përfshijë ai (dënimi) me të cilin talleshin.

Atëherë do t'u thuhet: "Sot Ne do t'ju harrojmë, ashtu siç e harruat takimin e kësaj Dite. Vendbanimi juaj është Zjarri dhe ju nuk do të keni ndihmës."

Kjo, për shkak se ju i morët ajetet e Allahut për tallje dhe ju mashtroi jeta e kësaj bote. Prandaj, atë Ditë ata nuk do të nxirren nga Zjarri e as do të kërkohet prej tyre që të pendohen.

Pra, lavdërimi i takon Allahut, Zotit të qiejve dhe Zotit të Tokës, Zotit të gjithësisë.

Atij i përket madhështia në qiej e në Tokë. Ai është i Gjithëfuqishmi, i Urti.

Ha, mim.[1] ——— [1] Shih fusnotën përkatëse tek ajeti i parë i sures El-Bekare.

Ky Libër është shpallur nga Allahu, i Gjithëfuqishmi, i Urti.

Ne i krijuam qiejt, Tokën dhe çdo gjë ndërmjet tyre vetëm me urtësi dhe për një kohë të caktuar. Por, jobesimtarët shmangen nga ajo që u paralajmërohet.

Thuaj: "Më tregoni për ata që i adhuroni në vend të Allahut! Më thoni pra, çfarë kanë krijuar ata në Tokë! Apo, mos kanë hise në krijimin e qiejve? Më sillni një libër të shpallur para këtij ose ndonjë gjurmë dijeje, nëse po e thoni të vërtetën!"

Kush është më i humbur se ai që, në vend të Allahut, u lutet atyre që nuk i përgjigjen deri në Ditën e Kiametit dhe janë të pavetëdijshëm për lutjet e tyre?!

Kur njerëzit të ringjallen, ata (idhujt) do të jenë armiq të tyre dhe do ta mohojnë adhurimin e tyre.

Kur u lexohen ajetet Tona të qarta, ata që mohojnë thonë për të vërtetën, kur u vjen: "Ky (Kurani) është vetëm një magji e kulluar."

Apo, mos thonë vallë: "Ai e trilloi atë!"? Thuaju: "Nëse unë e kam trilluar, atëherë ju nuk mund të më mbroni nga Allahu. Ai e di mirë çfarë flisni për Të. Mjafton Ai si dëshmitar mes meje e jush dhe Ai është Falësi i Madh, Mëshirëploti."

Thuaj: "Unë nuk jam i pari prej të dërguarve dhe nuk e di çfarë do të ndodhë me mua ose me ju. Unë ndjek vetëm atë që më shpallet dhe unë jam vetëm një paralajmërues i qartë."

Thuaj: "Më thoni, çka nëse ai (Kurani) është prej Allahut e ju e mohoni atë, ndërsa një dëshmitar nga bijtë e Israilit dëshmoi për vërtetësinë e tij dhe e besoi, ndërkohë që ju u treguat mendjemëdhenj?!" Me të vërtetë, Allahu nuk i udhëzon njerëzit e padrejtë."

Jobesimtarët thonë për ata që besojnë: "Po të ishte diçka e mirë, ata nuk do të na kishin paraprirë në të." Meqë nuk u udhëzuan prej tij, ata thonë: "Ky është një trillim i vjetër."

Para tij ishte Libri i Musait si udhërrëfyes e mëshirë. Ky (Kurani) është një Libër që e vërteton atë, (i shpallur) në gjuhën arabe, për të paralajmëruar ata që bëjnë padrejtësi dhe si përgëzim për punëmbarët.

Me të vërtetë, ata që thonë: "Zoti ynë është Allahu" e pastaj qëndrojnë të palëkundur në rrugën e drejtë, nuk do të kenë frikë e as do të pikëllohen.

Ata janë banorët e Xhenetit, ku do të qëndrojnë përgjithmonë, si shpërblim për atë që bënin.

Ne e kemi porositur njeriun që të sillet mirë me prindërit e vet. Nëna e tij e bart atë me mundime dhe e lind me mundime. Barra dhe të ushqyerit me gji zgjasin tridhjetë muaj. Kur arrin pjekurinë dhe mbush dyzet vjet, thotë: "Zoti im, më frymëzo që të të falënderoj për mirësitë që m'i ke dhënë mua e prindërve të mi dhe që të bëj vepra të mira me të cilat je i kënaqur, si dhe bëji të mirë pasardhësit e mi! Te Ti kthehem i penduar dhe Ty të jam dorëzuar.

Këta janë ata prej të cilëve i pranojmë veprat më të mira që kanë bërë dhe ua falim të këqijat. Ata do të jenë banorë të Xhenetit. Ky është premtimi i vërtetë që u është premtuar.

Dikush u thotë prindërve të vet: "Uf ju! A po më premtoni se do të ringjallem, ndërkohë që kanë kaluar shumë breza para meje?" Ndërkaq, ata i kërkojnë ndihmë Allahut (duke i thënë të birit): "Mjerë ti! Beso, sepse premtimi i Allahut është i vërtetë!" Por, ai thotë: "Kjo nuk është gjë tjetër veçse përralla të të parëve."

Këta janë ata lidhur me të cilët është përmbushur vendimi (për dënimin e tyre) siç ndodhi me popujt e xhinëve dhe njerëzve që ishin para tyre. Ata ishin vërtet të humbur.

Të gjithë do të ketë shkallë të caktuara, sipas asaj që kanë punuar. Allahu do t'ua japë të plotë shpërblimin për veprat e tyre e nuk do t'u bëhet padrejtësi.

Ditën kur jobesimtarët do të sillen para Zjarrit, do t'u thuhet: "Ju i shfrytëzuat të mirat tuaja në jetën e dynjasë dhe u kënaqët me to, prandaj, sot do të ndëshkoheni me dënimin poshtërues, sepse tregoheshit pa të drejtë mendjemëdhenj në Tokë dhe ishit të pabindur."

Kujto vëllanë e adëve (Hudin), kur e paralajmëroi popullin e vet në Ahkaf, – ndonëse edhe para tij e pas tij pati paralajmërues, – (duke thënë): "Mos adhuroni askënd tjetër përveç Allahut! Me të vërtetë, unë kam frikë për ju nga dënimi i një Dite të madhe."

Ata thanë: "A ke ardhur te ne për të na larguar nga zotat tanë?! Atëherë, na e sill atë me të cilën na kërcënon, nëse po e thua të vërtetën!"

Ai u tha: "Dija (për çastin e dënimit) është vetëm tek Allahu, ndërsa unë po jua përcjell atë me të cilën jam dërguar, por po e shoh që ju jeni një popull që nuk di."

Kur panë një re që po vinte drejt luginave të tyre, thanë: "Kjo është një re që do të na sjellë shi!" (Hudi iu përgjigj): "Jo, por kjo është ajo që kërkuat me ngut: një stuhi që mbart një dënim të dhembshëm,

që shkatërron çdo gjë me urdhrin e Zotit të vet." Në mëngjes u panë vetëm banesat e tyre. Kështu e ndëshkojmë popullin keqbërës.

Ne u dhamë atyre fuqi që nuk ju kemi dhënë juve. Ua dhuruam edhe të dëgjuarit, të parët dhe zemrat, por as dëgjimi, as shikimi e as zemrat nuk u sollën atyre kurrfarë dobie, sepse i mohuan ajetet e Allahut, prandaj ata i përfshiu dënimi me të cilin talleshin.

Ne kemi shkatërruar vendbanimet përreth jush dhe u kemi dërguar shenja të llojllojshme, që të mund të ktheheshin (në rrugë të drejtë).

Përse nuk u dolën në ndihmë ata që i kishin marrë si zota krahas Allahut për t'u afruar tek Ai? Përkundrazi, ata u zhdukën prej tyre. Kjo ishte pra gënjeshtra e tyre dhe ajo që trilluan.

Kujto kur dërguam te ti një grup xhinësh për të dëgjuar Kuranin, të cilët, kur arritën aty, thanë: "Heshtni (e dëgjoni me vëmendje)!" Kur përfundoi (leximi), u kthyen te populli i tyre për t'ua tërhequr vërejtjen,

duke thënë: "O populli ynë! Kemi dëgjuar një Libër që është shpallur pas Musait, i cili vërteton atë që ishte para tij dhe udhëzon drejt së vërtetës dhe drejt rrugës së drejtë.

O populli ynë! Përgjigjjuni thirrësit të Allahut dhe besojini atij, që Allahu t'ju falë gjynahet tuaja dhe t'ju shpëtojë prej një dënimi të dhembshëm!

E, ai që s'i përgjigjet thirrjes së Allahut, nuk do të mund t'i ikë Atij në Tokë dhe, pos Allahut, nuk ka mbrojtës. Të atillët janë në humbje të qartë.

A nuk e shohin ata se Allahu, i Cili krijoi qiejt dhe Tokën pa u lodhur në krijimin e tyre, ka mundësi t'i ngjallë të vdekurit?! Po, sigurisht, Ai është i Plotfuqishëm për çdo gjë.

Ditën kur jobesimtarët do të sillen para Zjarrit, do t'u thuhet: "A nuk qenka kjo e vërtetë?" Ata do të thonë: "Po, për Zotin tonë!" Ai do të thotë: "Atëherë, shijoni dënimin për shkak se mohuat!"

Pra, duro ashtu siç duruan të dërguarit e patundur dhe mos kërko përshpejtimin e dënimit për ta! Ditën kur të shohin atë që u është premtuar, do t'u duket sikur të kenë qëndruar vetëm një çast të ditës. Kjo është një kumtesë. Nuk shkatërrohet askush tjetër përveç njerëzve të pabindur!

Atyre që mohuan dhe penguan (njerëzit) nga rruga e Allahut, Ai do t'ua zhvlerësojë veprat.

Ndërkaq, atyre që besojnë, bëjnë vepra të mira dhe besojnë në atë që i është shpallur Muhamedit, – e cila është e vërteta nga Zoti i tyre, – Ai do t'ua shlyejë gjynahet dhe do t'ua përmirësojë gjendjen.

Kjo, se ata që mohojnë ndjekin të pavërtetën, kurse ata që besojnë ndjekin të vërtetën nga Zoti i tyre. Kështu Allahu ua sjell njerëzve shembujt e tyre.

Kur të ndesheni me jobesimtarët, goditini në qafë derisa t'i këputni (duke i vrarë) e pastaj lidhini fort. Më pas, ose lirojini me mirësi, ose me shpërblim, derisa të mbarojë lufta. Kështu pra, se, po të donte Allahu, do t'i mposhtte ata (pa luftë), por Ai dëshiron t'ju sprovojë me njëri-tjetrin. Atyre që vriten në rrugën e Allahut, Ai nuk do t'ua humbë kurrë veprat e tyre.

Ai do t'i udhëzojë ata dhe do t'ua përmirësojë gjendjen,

si dhe do t'i fusë në Xhenet, të cilin ua ka bërë të njohur.

O ju që besoni! Nëse e ndihmoni Allahun, Ai do t'ju ndihmojë juve dhe do t'jua forcojë këmbët.

Ndërkaq, për ata që mohojnë do të ketë shkatërrim dhe Ai do t'ua humbë veprat atyre.

Kjo, se ata e urrejnë atë që ka shpallur Allahu, prandaj Ai i asgjëson veprat e tyre.

A nuk kanë udhëtuar ata nëpër tokë për të parë se si ka qenë fundi i atyre që ishin para tyre?! Allahu i shkatërroi ata tërësisht. Jobesimtarët i pret fat i ngjashëm.

Kjo, se Allahu është Mbrojtësi i atyre që besojnë, kurse jobesimtarët nuk kanë mbrojtës.

Me të vërtetë, Allahu do t'i fusë ata që besojnë dhe bëjnë vepra të mira në Xhenete, nëpër të cilat rrjedhin lumenj. Ndërkaq, ata që mohojnë, dëfrehen e hanë ashtu siç hanë bagëtia, ndërkohë që Zjarri do të jetë vendstrehimi i tyre.

E sa e sa qytete, që ishin më të fuqishme se ai që të dëboi ty, i kemi shkatërruar, dhe nuk patën asnjë ndihmës!

A është ai që mbështetet në dëshmi të qartë nga Zoti i vet si ai të cilit i është hijeshuar puna e tij e keqe dhe ndjek dëshirat e veta?!

Xheneti, që u është premtuar të devotshmëve, është si vijon: ka lumenj me ujë të pastër, lumenj qumështi me shije të pandryshuar, lumenj vere të këndshme për ata që e pinë dhe lumenj prej mjalti të kulluar. Ata do të kenë aty çdo lloj frute dhe falje nga Zoti i tyre. A mund të jetë ky shpërblim i njëjtë me atë të atyre që do të jenë përherë në Zjarr e do t'u jepet ujë i valë që ua gris zorrët?!

Disa nga ata të dëgjojnë, por, kur largohen prej teje, u thonë atyre që u është dhënë dija: "Çfarë tha pak më parë?!" Këta janë ata të cilëve Allahu ua ka vulosur zemrat dhe të cilët ndjekin dëshirat e veta.

Ndërkaq, atyre që janë në rrugë të drejtë, Ai ua shton udhëzimin dhe u jep devotshmëri.

A presin gjë tjetër veç Kiametit që t'u vijë befas?! Tashmë kanë ardhur shenjat e tij. E çfarë do t'u vlejë marrja mësim pasi t'u ketë ardhur Kiameti?!

Pra, dije se nuk ka zot që meriton të adhurohet përveç Allahut e kërko falje për gjynahet e tua dhe për besimtarët e besimtaret! Allahu i di lëvizjet dhe vendqëndrimet tuaja.

Besimtarët thonë: "Sikur të shpallej një sure[1]?" Por, kur shpallet një sure e qartë dhe përmendet lufta në të, i sheh ata që kanë sëmundje në zemra duke të shikuar sikur të ishin në agoninë e vdekjes. Ndërkohë, më e përshtatshme për ta do të ishte ——— [1] që flet për luftën

bindja dhe fjala e mirë. Por, kur çështja të jetë vendosur, sikur t'i qëndronin besnikë Allahut, do të ishte më mirë për ta.

A pritet gjë tjetër, nëse ju ktheni shpinën, veçse të bëni çrregullime në Tokë e t'i shkëputni lidhjet farefisnore!

Këta janë ata që Allahu i ka mallkuar, ua ka shurdhuar veshët dhe ua ka verbuar sytë.

A nuk e përsiatin ata Kuranin apo në zemrat e tyre ka dryna?!

Pa dyshim, atyre që u kthyen në mosbesim pasi iu bë e qartë rruga e drejtë, shejtani ua hijeshoi punët e u dha shpresa të kota.

Kjo, për shkak se ata u thanë atyre që e urrejnë atë që ka shpallur Allahu: "Do t'ju bindemi në disa çështje." Por, Allahu i di fshehtësitë e tyre.

E, si do të jetë gjendja e tyre kur melekët t'ua marrin shpirtrat, duke i goditur në fytyrë e në kurriz?!

Kjo, se ata shkuan pas asaj që e zemëron Allahun dhe e urryen pëlqimin e Tij, prandaj Ai ua asgjësoi veprat.

Vallë, a mos kujtojnë ata që kanë sëmundje në zemra se Allahu nuk do t'i nxjerrë në pah mëritë e tyre?!

Sikur të donim, Ne do të t'i tregonim ty ata e do t'i njihje përmes shenjave të tyre, por, me siguri, do t'i njohësh ata nga mënyra e të folurit. Allahu i di veprat tuaja.

Ne do t'ju sprovojmë derisa t'i spikatim luftëtarët (e vërtetë) e të durueshmit ndër ju dhe të provojmë veprat tuaja.

Me të vërtetë, ata që mohojnë, pengojnë (njerëzit) nga rruga e Allahut dhe kundërshtojnë të Dërguarin pasi t'u bëhet e qartë rruga e drejtë, nuk i bëjnë dëm Allahut aspak. Ai do t'ua asgjësojë veprat atyre.

O ju që besoni! Bindjuni Allahut dhe bindjuni të Dërguarit e mos i prishni veprat tuaja!

Pa dyshim, ata që mohojnë dhe pengojnë (të tjerët) nga rruga e Allahut dhe pastaj vdesin duke qenë jobesimtarë, Allahu nuk do t'i falë kurrë.

Pra, mos u ligështoni e të kërkoni paqe, ndërkohë që ju jeni më të lartët dhe Allahu është me ju e nuk do t'jua pakësojë (shpërblimin për) veprat tuaja.

Jeta e kësaj bote nuk është gjë tjetër veçse lojë e dëfrim. Nëse besoni dhe ruheni, Ai do t'jua japë shpërblimet tuaja dhe nuk jua kërkon tërë pasurinë tuaj.

Po t'jua kërkonte atë me ngulm, ju do të bëheshit koprracë dhe Ai do të nxirrte në pah urrejtjen tuaj.

Ja, ju jeni ata që ftoheni të shpenzoni në rrugën e Allahut, megjithatë disa prej jush tregohen koprracë. E kush bëhet koprrac, në të vërtetë bëhet koprrac kundrejt vetvetes. Allahu është i Pasuri, ndërsa ju jeni të varfrit. Në qoftë se ju ktheni shpinën, Ai do t'ju zëvendësojë me një popull tjetër, të cilët pastaj nuk do të jenë si ju.

Me të vërtetë, Ne të dhamë ty një fitore të qartë,

që Allahu të t'i falë gabimet e kaluara dhe ato të mëvonshmet, ta plotësojë dhuntinë e Tij ndaj teje dhe të të forcojë në rrugën e drejtë,

si dhe që Allahu të të ndihmojë me një ndihmë të fuqishme.

Është Ai që zbriti qetësinë në zemrat e besimtarëve, për t'ua shtuar besimin krahas besimit që kishin. Të Allahut janë ushtritë e qiejve e të Tokës dhe Allahu është i Gjithëdijshëm, i Urtë.

(E bëri këtë) që t'i fusë besimtarët e besimtaret në kopshte të Xhenetit, nëpër të cilat rrjedhin lumenj, ku do të qëndrojnë përgjithmonë, dhe që t'ua shlyejë të këqijat e tyre. Kjo, tek Allahu, është një fitore e madhe.

Dhe që t'i ndëshkojë dyfytyrëshit e dyfytyrëshet dhe idhujtarët e idhujtaret, të cilët kanë për Allahun mendime të këqija. Mbi ta qoftë e keqja! Allahu është zemëruar në ta, i ka mallkuar dhe u ka përgatitur Xhehenemin. Eh, sa vend i keq është ai!

Të Allahut janë ushtritë e qiejve e të Tokës dhe Allahu është i Gjithëfuqishëm, i Urtë.

Me të vërtetë, Ne të dërguam ty si dëshmitar, përgëzues e paralajmërues,

që ta besoni Allahun e të Dërguarin e Tij dhe ta ndihmoni e ta nderoni atë, si dhe që ta lavdëroni Allahun në mëngjes e në mbrëmje.

Pa dyshim, ata që ta japin besën ty, në të vërtetë ia japin besën Allahut. Dora e Allahut është mbi duart e tyre. Ai që e thyen betimin, e thyen në dëm të vetes, ndërsa atij që i përmbahet besës që ia ka dhënë Allahut, Ai do t'i japë shpërblim të madh.

Beduinët që mbetën pas do të të thonë: "Na pengoi pasuria dhe familjet tona, prandaj kërko falje për ne!" Ata thonë me gjuhët e tyre atë që nuk e kanë në zemra. Thuaj: "Kush mund ta pengojë Allahun, nëse Ai dëshiron t'ju bëjë ndonjë dëm a t'ju bëjë ndonjë të mirë? Jo, por Allahu e di mirë çfarë veproni."

Në të vërtetë, ju menduat se i Dërguari dhe besimtarët nuk do të kthehen më kurrë te familjet e tyre dhe kjo gjë u zbukurua në zemrat tuaja. Ju ushqyet mendime të këqija dhe u bëtë popull i shkatërruar.

Ata që nuk e besojnë Allahun dhe të Dërguarin e Tij, le ta dinë se Ne kemi përgatitur për jobesimtarët një Zjarr flakërues.

Vetëm Allahut i takon sundimi i qiejve e i Tokës. Ai fal kë të dojë dhe ndëshkon kë të dojë. Allahu është gjithnjë Falës i Madh e Mëshirëplotë.

Ata që mbetën pas, kur të niseni për të marrë prenë e luftës, do të thonë: "Na lejoni të vijmë me ju!", duke dashur të ndryshojnë fjalën e Allahut. Thuaju: "Kurrsesi s'keni për të ardhur me ne. Kështu ka thënë Allahu që më parë." Atëherë do të thonë: "Nuk është ashtu, por ju na keni zili." Jo, por ata nuk kuptojnë, përveçse pak.

Thuaju beduinëve që mbetën pas: "Ju do të thirreni (për të luftuar) kundër një populli të fuqishëm; do t'i luftoni ose do të dorëzohen. Nëse bindeni, Allahu do t'ju japë shpërblim të mirë, por, nëse ktheni shpinën, siç e kthyet më parë, Ai do t'ju ndëshkojë me një dënim të dhembshëm."

Nuk ka gjynah për të verbrin, as për të çalin e as për të sëmurin. Atë që i bindet Allahut dhe të Dërguarit të Tij, Ai do ta fusë në kopshte të Xhenetit, nëpër të cilat rrjedhin lumenj. Ndërkaq, atë që kthen shpinën, Ai do ta ndëshkojë me një dënim të dhembshëm.

Allahu është i kënaqur me besimtarët kur ta dhanë besën nën pemë. Ai e dinte mirë ç'kishte në zemrat e tyre, prandaj zbriti mbi ta qetësinë dhe i shpërbleu me një fitore të afërt[1] ——— [1] Çlirimi i Hajberit

e me plaçkë të madhe që do të zënë. Allahu është gjithnjë i Gjithëfuqishëm, i Urtë.

Allahu ju ka premtuar shumë pre që do t'i zini. Këtë jua përshpejtoi e i pengoi duart e njerëzve prej jush, që të jetë kjo një shenjë për besimtarët dhe t'ju udhëzojë në rrugën e drejtë.

Edhe (pre e fitore) të tjera që s'i keni arritur ende, të cilat i ruan Allahu (për ju). Allahu është i Plotfuqishëm për çdo gjë.

Edhe në qoftë se ju luftojnë jobesimtarët, patjetër do të sprapsen e pastaj nuk do të gjejnë as mbrojtës e as ndihmës.

I tillë ishte ligji i Allahut edhe më parë, e kurrë nuk do të gjesh në ligjin e Allahut asnjë ndryshim.

Është Ai që pengoi duart e tyre kundrejt jush dhe duart tuaja kundrejt tyre në brendësi të Mekës, pasi ju dha fitore kundër tyre. Allahu sheh mirë gjithçka që bëni.

Janë ata që mohuan e ju penguan nga Xhamia e Shenjtë dhe penguan kurbanet që të arrinin në vendin e vet. Sikur të mos ishin disa burra besimtarë dhe disa gra besimtare, që ju nuk i dinit, të cilët mund t'i vrisnit e të binit në faj hiç pa e ditur (do t'ju lejonte të luftonit, por ju ndaloi), në mënyrë që Allahu të fusë në mëshirën e Tij kë të dojë. Sikur ata të dalloheshin, Ne do t'i kishim ndëshkuar jobesimtarët nga mesi i tyre me një dënim të dhembshëm.

Kur zemrat e atyre që mohuan i kaploi arroganca, ajo arroganca e xhahilietit, Allahu zbriti qetësinë e Tij mbi të Dërguarin e Vet dhe mbi besimtarët e i lidhi fort me fjalën e qëndrueshmërisë[2], meqë ishin më të denjë për të dhe ishin të zotët e saj. Allahu është i Gjithëdijshëm për çdo gjë. ——— [2] Fjala "la ilahe il-lallah" (askush përveç Allahut nuk meriton të adhurohet).

Njëmend, Allahu e përmbushi me të vërtetë ëndrrën e të Dërguarit të Tij se do të hyni gjithsesi në Xhaminë e Shenjtë, me vullnetin e Allahut, të sigurt, me koka të rruara e me flokë të shkurtuar, pa pasur frikë." Ai e dinte atë që ju nuk e dinit, prandaj ju dhuroi para kësaj një fitore të afërt.

Është Ai që e çoi të Dërguarin e Tij me udhëzimin dhe fenë e vërtetë, që ta bëjë mbizotëruese mbi të gjitha fetë. Mjafton Allahu si dëshmitar.

Muhamedi është i Dërguari i Allahut, kurse ata që janë me të janë të ashpër ndaj jobesimtarëve e të mëshirshëm mes vete. I sheh ata në ruku e në sexhde, duke kërkuar mirësi prej Allahut dhe kënaqësinë e Tij. Në fytyrat e tyre duken shenjat e gjurmëve të sexhdes. Ky është përshkrimi i tyre në Teurat, ndërsa në Inxhil ata përshkruhen si një farë e mbjellë që nxjerr filiza, pastaj forcohet e bëhet i trashë dhe qëndron mbi kërcellin e vet, duke i mahnitur mbjellësit. (Allahu i bëri të këtillë) që përmes tyre t'i zemërojë jobesimtarët. Atyre që besojnë dhe bëjnë vepra të mira nga mesi i tyre, Allahu u ka premtuar falje dhe shpërblim të madh.

O ju që besoni! Mos dilni para (urdhrit të) Allahut e të Dërguarit të Tij dhe kijeni frikë Allahun! Vërtet, Allahu është Gjithëdëgjues, i Gjithëdijshëm.

O ju që besoni! Mos e ngrini zërin tuaj mbi zërin e Pejgamberit dhe mos iu drejtoni atij me zë të lartë, siç i drejtoheni njëri-tjetrit, që të mos ju asgjësohen veprat tuaja pa e ndier ju fare!

Njëmend, ata që ulin zërin në prani të të Dërguarit të Allahut janë ata zemrat e të cilëve i ka kalitur Allahu për përkushtim. Për ta do të ketë falje e shpërblim të madh.

Në të vërtetë, shumica e atyre që të thërrasin prapa (mureve të) dhomave nuk kuptojnë.

Sikur të duronin derisa të dilje tek ata, do të ishte më mirë për ta. Allahu është Falës i Madh e Mëshirëplotë.

O ju që besoni! Po qe se një njeri i pandërgjegjshëm ju sjell ndonjë lajm, shqyrtojeni atë, që të mos dëmtoni ndokënd pa dije e të pendoheni pastaj për atë që keni bërë.

Dhe ta dini se mes jush është i Dërguari i Allahut. Po t'ju bindej juve në shumë çështje, do të pësonit. Por, Allahu jua bëri të dashur besimin dhe e zbukuroi atë në zemrat tuaja, ndërsa jua bëri të urryer mosbesimin, mosbindjen dhe kundërshtimin. Mu këta janë të udhëzuarit.

Kjo, si mirësi e dhunti nga Allahu. E, Allahu është i Gjithëdijshëm, i Urtë.

Nëse dy grupe besimtarësh luftojnë ndërmjet vete, pajtojini ato. Por, nëse njëri grup sulmon tjetrin, atëherë luftoni kundër sulmuesit derisa t'i kthehet gjykimit të Allahut. Po qe se kthehet, atëherë pajtojini ata me paanësi dhe jini të drejtë, se, me të vërtetë, Allahu i do të drejtët.

Me të vërtetë, besimtarët janë vëllezër, prandaj pajtojini vëllezërit tuaj dhe kijeni frikë Allahun, që të mëshiroheni!

O ju që besoni! Asnjë popull të mos tallet me ndonjë popull tjetër, se ata mund të jenë më të mirë se këta; as gratë të mos tallen me gra të tjera, se ato mund të jenë më të mira se këto. Mos përbuzni dhe mos thërrisni njëri-tjetrin me nofka (fyese). Sa i shëmtuar është emri i keq pas besimit! E, ata që nuk pendohen, mu ata janë të padrejtët.

O ju që besoni! Largojuni shumë paragjykimeve, sepse disa paragjykime janë gjynah. Mos gjurmoni dhe mos përgojoni njëri-tjetrin! A do të donte ndokush prej jush të hante mishin e vëllait të tij të vdekur? Gjithsesi se këtë do ta urrenit! Kijeni frikë Allahun! Vërtet, Allahu është Pranues i pendimit e Mëshirëplotë.

O njerëz! Ne ju krijuam prej një mashkulli e një femre dhe ju bëmë popuj e fise, që të njiheni mes vete. Pa dyshim, më fisniku prej jush tek Allahu është ai që i frikësohet më shumë Atij. Me të vërtetë, Allahu është i Gjithëdijshëm, Njohës i çdo fshehtësie.

Beduinët thanë: "Besuam." Thuaju: "Ju nuk keni besuar, por thoni: "U nënshtruam", sepse besimi nuk ka hyrë ende në zemrat tuaja. Por, nëse i bindeni Allahut dhe të Dërguarit të Tij, nuk do t'ju pakësohet asgjë prej (shpërblimit të) veprave tuaja. Me të vërtetë, Allahu është Falës i Madh e Mëshirëplotë."

Besimtarë të vërtetë janë vetëm ata që besojnë Allahun e të Dërguarin e Tij dhe pastaj nuk dyshojnë, por luftojnë me pasurinë dhe jetën e tyre në rrugën e Allahut. Pikërisht këta janë të vërtetët.

Thuaju: "Vallë, Allahut po i tregoni për fenë tuaj, ndërkohë që Allahu di gjithçka që gjendet në qiej e në Tokë?! Allahu është i Gjithëdijshëm për çdo gjë."

Ata e llogarisin se të kanë bërë nder që kanë pranuar Islamin. Thuaju: "Mos e llogaritni që më keni bërë nder duke pranuar Islamin! Përkundrazi, Allahu ju ka bërë nder juve që ju ka udhëzuar në besim, nëse jeni të çiltër."

Pa dyshim, Allahu i di fshehtësitë e qiejve e të Tokës. Allahu sheh mirë gjithçka që bëni.

Kaf.[1] Betohem në Kuranin e lavdishëm! ——— [1] Shih fusnotën përkatëse tek ajeti i parë i sures El-Bekare.

Në të vërtetë, ata çuditen që u erdhi një paralajmërues nga gjiri i tyre, prandaj jobesimtarët thonë: "Kjo është një gjë e çuditshme!"

"A mos, vallë, kur të vdesim e të bëhemi pluhur e kocka (do të ringjallemi)?! Shumë larg (mendsh) është ai kthim!"

Ne e dimë sa prej tyre i ha toka dhe te Ne është një Libër që ruan gjithçka.

Por, ata përgënjeshtruan të vërtetën kur u erdhi, prandaj janë në një gjendje të hutuar.

A nuk e shohin qiellin sipër tyre se si e kemi ndërtuar e zbukuruar, në të cilin nuk ka asnjë të çarë?!

Ndërkaq, Tokën e kemi shtrirë, kemi vendosur në të male të patundshme dhe kemi bërë që në të të mbijë çdo lloj bime e këndshme,

si mësim dhe kujtim për çdo rob që kthehet (te Zoti i vet).

Ne zbresim nga qielli ujë të begatshëm, nëpërmjet të cilit krijojmë kopshte e drithëra që korren

dhe palma të larta hurmash me tufa frutash njëra mbi tjetrën,

si furnizim për robërit, si dhe e gjallërojmë vendin e pajetë. Kështu do të jetë edhe ringjallja.

Para tyre përgënjeshtruan populli i Nuhut, banorët e Rasit dhe themudët,

edhe adët, Faraoni dhe vëllezërit e Lutit,

edhe banorët e Ejkes dhe populli i Tubës; të gjithë i përgënjeshtruan të dërguarit, prandaj u përmbush dënimi Im.

Vallë, mos u lodhëm Ne nga krijimi i parë? Jo, por ata janë në mëdyshje lidhur me krijimin e ri.

Ne e kemi krijuar njeriun dhe e dimë çfarë i pëshpërit shpirti i tij. Ne jemi më afër tij sesa damari i qafës.

Dy melekë qëndrojnë pranë tij, në të djathtë e në të majtë,

Ai nuk nxjerr asnjë fjalë pa pasur pranë vetes një mbikëqyrës të pandashëm.

Agonia e vdekjes sjell të vërtetën: "Kjo është ajo prej së cilës ikje!"

E do t'i fryhet Surit; kjo është Dita e paralajmëruar.

Çdo shpirt do të vijë me një (melek) shtytës dhe një (melek) dëshmitar.

(Jobesimtarit do t'i thuhet:) "Ti ishe i shkujdesur ndaj kësaj, prandaj ta hoqëm perden, kështu që shikimi yt sot është i mprehtë."

Ndërkohë, shoqëruesi i tij (nga melekët) do të thotë: "Kjo është ajo që kam gati."

(Atyre do t'u thuhet:) "Hidhni në Xhehenem çdo jobesimtar kryeneç,

pengues të të mirave, shkelës të kufijve e dyshues,

që krahas Allahut ka adhuruar ndonjë zot tjetër! Pra, hidheni atë në dënimin e rëndë!"

Shoqëruesi i tij do të thotë: "Zoti ynë, unë nuk e kam shtyrë atë në paudhësi, por ai vetë ishte në humbje të thellë."

Allahu do të thotë: "Mos u grindni para Meje, unë ju kam paralajmëruar qysh më parë.

Fjala Ime nuk ndryshon dhe Unë nuk jam i padrejtë ndaj robërve të Mi."

Ditën kur do t'i themi Xhehenemit: "A je mbushur?", ai do të thotë: "A ka më?"

Ndërkohë, Xheneti do t'u afrohet besimtarëve të përkushtuar, krejt afër.

(E, do t'u thuhet:) "Kjo është ajo që ju është premtuar, është për këdo që gjithnjë pendohej dhe ishte i ruajtur,

që iu druajt të Gjithëmëshirshmit pa e parë Atë dhe erdhi me zemër të kthyer (nga Ai).

Hyni në të me paqe! Kjo është Dita e Përjetësisë."

Aty do të kenë çfarë të duan e, te Ne, ka edhe më shumë.

Sa e sa breza që ishin më të fuqishëm se ata kemi shkatërruar para tyre! Ata brodhën nëpër tokë, por a gjetën shpëtim?!

Vërtet, këtu ka këshillë për atë që ka zemër dhe dëgjon, duke qenë i vëmendshëm.

Me të vërtetë, Ne krijuam qiejt e Tokën dhe gjithçka që gjendet ndërmjet tyre për gjashtë ditë, pa ndier kurrfarë lodhjeje.

Pra, duro atë që thonë ata dhe lartësoje Zotin tënd me lavdërim para lindjes së Diellit dhe para perëndimit!

Lartësoje Atë edhe gjatë natës dhe pas namazit!

Dëgjo thirrësin kur të thërrasë nga një vend i afërt,

Ditën kur do të dëgjojnë gjëmimin për ringjallje; ajo është Dita e Daljes (nga varret).

Pa dyshim, jemi Ne që japim jetë e vdekje dhe te Ne është kthimi.

Ditën kur atyre do t'u çahet toka e do të dalin me shpejtësi. Ky është një tubim i lehtë për Ne.

Ne e dimë mirë çfarë thonë ata e ti nuk do t'i detyrosh ata. Prandaj, këshillo me Kuran atë që ka frikë paralajmërimin Tim!

Betohem në erërat që çojnë pluhurin,

pastaj në retë e ngarkuara rëndë,

pastaj në ato (anije) që lundrojnë me lehtësi,

si dhe në ata (melekë) që ndajnë çështjet,

se, me të vërtetë, është e sigurt ajo që ju premtohet

dhe se gjykimi do të ndodhë patjetër!

Betohem në qiellin plot shtigje,

se njëmend ju thoni fjalë të ndryshme (lidhur me Kuranin).

Prej tij largohet ai që është shmangur.

Mallkuar qofshin gënjeshtarët,

të cilët janë të zhytur në pakujdesi!

Ata pyesin: "Kur do të jetë Dita e Gjykimit?"

Ditën kur do të digjen në Zjarr.

(do t'u thuhet:) "Shijoni dënimin tuaj. Kjo është ajo që kërkonit të shpejtohej!"

Me të vërtetë, të devotshmit do të jenë në kopshte të Xhenetit, pranë burimeve,

duke marrë atë që ua ka dhuruar Zoti i tyre, sepse, më parë ata qenë njëmend punëmbarë.

Ata flinin pak natën,

ndërkaq në agim kërkonin falje.

Në pasuritë e tyre kishte hise për lypësin e të privuarin.

Në Tokë ka shenja për të bindurit,

por, edhe në vetet tuaja. A nuk shihni?

Në qiell është rrizku juaj dhe ajo që ju premtohet.

Betohem në Zotin e qiellit e të Tokës, se kjo është e vërtetë siç është të folurit tuaj.

A e ke dëgjuar ndodhinë e mysafirëve të nderuar të Ibrahimit?

Kur hynë tek ai e i thanë: "Selam (paqe)!", ai ua ktheu: "Selam! Njerëz të panjohur!"

Pastaj, pa u vënë re, shkoi te familja e tij dhe solli një viç të majmë.

Mandej, ua afroi atyre e u tha: "A nuk po hani?"

Atëherë, ai ndjeu frikë prej tyre. Ata i thanë: "Mos ki frikë!" i dhanë myzhde për një djalë të ditur!

Atëherë, gruaja e tij bërtiti dhe rrahu fytyrën e tha: "(Si mund të lind unë duke qenë) një plakë shterpë!"

Ata thanë: "Kështu ka thënë Zoti yt. Pa dyshim, Ai është i Urti, i Gjithëdijshmi."

Ai (Ibrahimi) tha: "Për çfarë pune keni ardhur, o të dërguar?"

Ata thanë: "Ne jemi dërguar te një popull keqbërës,

për të hedhur mbi ta gurë balte të pjekur,

të shënuar te Zoti yt për ata që i kalojnë kufijtë."

Ne nxorëm prej andej besimtarët që ishin në atë vend,

por aty gjetëm vetëm një shtëpi me muslimanë.

Ne lamë aty shenjë për ata që i frikësohen dënimit të dhembshëm.

Edhe në tregimin e Musait (ka mësim), kur e dërguam te Faraoni me dëshmi të qartë.

Por ai ktheu shpinën bashkë me forcën e tij dhe tha (për Musain): "Magjistar ose i çmendur!"

Prandaj, Ne e kapëm atë e ushtrinë e tij dhe i hodhëm në det, meqë ai ishte fajtor.

Edhe tek adët (ka mësim), kur dërguam mbi ta erën shkretuese,

e cila nuk linte asgjë që prekte pa e bërë si pluhur.

Edhe te themudët (ka mësim), kur iu tha atyre: "Kënaquni për një kohë të caktuar!"

Por, ata u treguan mendjemëdhenj kundrejt urdhrit të Zotit të tyre, prandaj i goditi rrufeja teksa shikonin.

Kështu, as mundën të ngriheshin e as të mbroheshin.

Edhe popullin e Nuhut (e shkatërruam) më parë. Ai ishte njëmend popull i pabindur.

Qiellin e kemi ndërtuar me fuqinë Tonë dhe Ne e zgjerojmë atë.

E Tokën e kemi shtruar. Sa shtrues të mirë që jemi!

Dhe nga çdo gjë kemi krijuar çifte, që të merrni mësim.

(Thuaj:) "Prandaj, ikni drejt Allahut, se, me të vërtetë, unë jam dërguar nga Ai si paralajmërues i qartë për ju!

Dhe, krahas Allahut, mos adhuroni askënd tjetër, se, me të vërtetë, unë jam dërguar nga Ai si paralajmërues i qartë për ju!

Kështu, sa herë që u vente atyre që ishin para këtyre ndonjë i dërguar, thoshin: "Është magjistar", ose: "Është i çmendur!"

Vallë, a ia lanë këtë gjë amanet njëri-tjetrit?! Jo, por ata janë njerëz që kalojnë kufijtë.

Prandaj, largohu prej tyre, sepse nuk ke për t'u qortuar!

Dhe këshillo, se, pa dyshim, këshilla u bën dobi besimtarëve!

Xhinët dhe njerëzit i kam krijuar vetëm që të më adhurojnë.

Unë nuk kërkoj prej tyre kurrfarë rizku e as dëshiroj që të më ushqejnë.

Pa dyshim, Allahu është Furnizuesi i Vërtetë, Zotëruesi i fuqisë së madhe.

Gjithsesi, ata që kanë bërë padrejtësi do të kenë një hise dënimi si hisja e shokëve të tyre, prandaj të mos e kërkojnë përshpejtimin e tij.

Mjerë mohuesit në atë Ditë që u është premtuar!

Betohem në malin Tur

dhe në Librin e shkruar në rreshta,

në një pergamenë të shtrirë,

si dhe në Shtëpinë përplot vizitorë,

po ashtu në kupën e ngritur (të qiellit),

dhe në detin e mbushur,

se dënimi i Zotit tënd do të ndodhë patjetër.

Nuk ka kush që mund ta zmbrapsë.

Ditën kur qielli do të tronditet fort

dhe malet do të shkulen nga vendi e do të lëvizin.

Atë Ditë, mjerë përgënjeshtruesit,

të cilët, të zhytur në gënjeshtra, dëfreheshin!

Ditën kur do të shtyhen me forcë drejt zjarrit të Xhehenemit.

"Ky është Zjarri që e përgënjeshtronit!

Pra, a është kjo magji apo nuk po shihni?

Digjuni në të! Duroni ose mos duroni, njësoj është për ju! Ju po ndëshkoheni vetëm për atë që keni bërë."

Me të vërtetë, të devotshmit do të jenë në kopshte e begati,

të gëzuar për atë që u ka dhënë Zoti i tyre, dhe që Zoti i tyre i ka shpëtuar nga dënimi i Zjarrit flakërues.

"Hani e pini me kënaqësi, (si shpërblim) për atë që keni bërë,

të mbështetur në divane të renditura!" Ne do t'i martojmë ata me hyri symëdha.

Ata që besuan dhe që u pasuan në besim nga pasardhësit e tyre, do t'i bëjmë bashkë me pasardhësit e tyre dhe nuk do t'u pakësojmë asgjë nga veprat e tyre. Çdo njeri është peng i asaj që ka punuar.

Do t'i furnizojmë me fruta dhe mish që ua ka ëndja.

Atje do t'ia kalojnë njëri-tjetrit gotat (e verës), e nuk do të ketë fjalë të kota e as mëkatim.

Atyre do t'u shërbejnë disa djelmosha si margaritarë të fshehur.

Ata (besimtarët) do të kthehen nga njëri-tjetri, duke biseduar

e do të thonë: "Ne, më parë, teksa ishim në mesin e familjeve tona, druheshim (nga dënimi i Allahut),

por Allahu na dha mirësi e na shpëtoi nga dënimi përcëllues.

Ne, qysh më parë, i luteshim Atij. Njëmend, Ai është Bamirësi, Mëshirëploti."

Prandaj, këshillo, sepse, falë dhuntisë së Zotit tënd, ti nuk je as fallxhor e as i çmendur!

A mos thonë ata: "Ai është poet, të presim derisa ta marrë vdekja"?!

Thuaju: "Pritni, se edhe unë po pres bashkë me ju (dënimin tuaj)!"

A mos i urdhëron ata mendja e tyre për këtë apo janë njerëz që shkelin kufijtë?!

Apo mos thonë: "Ai e ka trilluar atë!"?! Jo (nuk është ashtu), por ata nuk besojnë.

Atëherë, le të sjellin një fjalë si kjo, nëse është e vërtetë ajo që thonë!

A mos janë krijuar nga asgjëja apo vetë ata janë krijuesit?!

Apo mos vallë kanë krijuar qiejt dhe Tokën? Jo, por ata nuk janë të bindur.

Apo mos i zotërojnë thesaret e Zotit tënd apo vetë ata janë sunduesit?!

Apo mos kanë shkallë (për t'u ngjitur në qiell e) për të dëgjuar? Atëherë, le të sjellë dëgjuesi i tyre ndonjë dëshmi të qartë.

Vallë, a mos qenkan të Tijat vajzat e tuajt djemtë?!

Apo mos po kërkon prej tyre shpërblim e janë rënduar nga borxhet?!

Apo mos është tek ata gajbi (e fshehta) e po e shkruajnë?!

Apo mos duan të kurdisin ndonjë kurth? Në të vërtetë, pikërisht jobesimtarët janë ata që bien në kurthe.

Apo mos kanë ndonjë zot përveç Allahut (që meriton adhurimin)? I patëmeta e i Lartësuar është Allahu mbi çdo gjë që i veshin Atij.

Edhe sikur të shihnin ndonjë copë duke rënë nga qielli, do të thoshin: "Është grumbull resh."

Prandaj, lëri ata, derisa të arrijnë Ditën në të cilën do të shkatërrohen,

Ditën kur dredhia e tyre nuk do t'u vlejë asgjë dhe nuk do të ndihmohen.

Vërtet, për ata që bëjnë padrejtësi, ka dënim edhe para këtij, por shumica e tyre nuk e dinë.

Prandaj, duro për gjykimin e Zotit tënd, sepse ti je nën Sytë Tanë! Lartësoje me lavdërim Zotin tënd kur ngrihesh,

edhe gjatë natës lartësoje Atë, si dhe pas perëndimit të yjeve!

Betohem në yllin kur bie,

se shoku juaj (Muhamedi) nuk ka humbur e as ka devijuar.

Ai nuk flet sipas dëshirës së vet,

por është vetëm shpallje që i kumtohet,

të cilën ia mësoi shumë i fuqishmi (Xhibrili),

i pashmi, që iu shfaq qartë (në formën e vet të vërtetë),

duke qenë në horizontin më të lartë.

Pastaj iu afrua dhe zbriti

aq sa ishte në largësinë e dy harqeve, ose edhe më afër.

Atëherë, i shpalli robit të Allahut atë që i shpalli.

Zemra nuk mohoi atë që pa.

Vallë, a po grindeni me të për atë që ka parë,

ndërkohë që ai (Muhamedi) e ka parë atë (Xhibrilin) edhe një herë tjetër,

te Sidretul-Muntehaja,

pranë së cilës ndodhet Xheneti i Strehimit.

Kur Sidrën e mbuloi ajo që e mbuloi,

shikimi i tij nuk u shmang, as e kaloi kufirin,

Me të vërtetë, ai pa disa nga shenjat më të mëdha të Zotit të vet.

A e shihni Latën e Uzanë,

si dhe Menatën, të tretën, të fundit?

Vallë, tuajt qenkan meshkujt e të Tijat femrat?!

Atëherë, kjo ndarje është e padrejtë.

Ata s'janë gjë tjetër veçse emra (idhujsh), të cilët ua keni vënë vetë ju dhe etërit tuaj, gjë për të cilën nuk ju ka sjellë Allahu kurrfarë dëshmie. Ata ndjekin vetëm hamendjen dhe atë që ua ka ëndja, ndonëse u ka ardhur udhëzimi prej Zotit të tyre.

A mos do të ketë njeriu atë që ai dëshiron?

Vetëm Allahut i takon bota tjetër dhe kjo botë.

Sa e sa melekë ka në qiej, ndërmjetësimi i të cilëve nuk sjell asnjë dobi, përveçse pasi të japë leje Allahu për atë që Ai dëshiron dhe me të cilin është i kënaqur!

Në të vërtetë, ata që nuk e besojnë botën tjetër, i emërtojnë melekët me emra femrash,

ndërkohë që nuk kanë dijeni për këtë. Ata ndjekin vetëm hamendjen, ndonëse hamendja nuk mund ta zëvendësojë aspak të vërtetën.

Prandaj, largohu prej atij që ia kthen shpinën Këshillës Sonë (Kuranit) dhe që dëshiron vetëm jetën e kësaj bote!

Kaq është dija e tyre. Pa dyshim, Zoti yt e di më së miri se kush është shmangur nga rruga e Tij dhe Ai e di më së miri se kush është në rrugën e drejtë –

e Allahut i përket gjithçka që është në qiej dhe gjithçka që është në Tokë, – për t’i ndëshkuar ata që kanë bërë të këqija sipas veprave të tyre dhe për t'i shpërblyer ata që kanë bërë mirë me më të mirën (Xhenetin).

Për ata që shmangen nga gjynahet e mëdha dhe punët e turpshme, me përjashtim të gjynaheve të vogla, vërtet Zoti yt është i gjerë në falje. Ai ju njeh shumë mirë, qysh kur ju krijoi prej dheut dhe qysh kur ishit embrione në barqet e nënave tuaja. Prandaj, mos e lavdëroni veten, sepse Ai e di më së miri kush është i ruajtur!

A e ke parë atë që ktheu shpinën,

që dha pak dhe e ndërpreu?

Mos vallë e ditka gajbin (të fshehtën) dhe e shikuaka atë?!

A nuk është njoftuar për atë që është në Shkrimet e Musait

dhe të Ibrahimit, i cili përmbushi detyrimet:

se askush nuk do të bartë gjynahet e tjetrit;

se njeriut i takon vetëm ajo për të cilën ka punuar;

se përpjekja e tij do të shihet

e do të shpërblehet me shpërblimin më të plotë;

se te Zoti yt është kthimi përfundimtar;

se Ai është që ju bën të qeshni dhe të qani;

se Ai jep vdekjen dhe jetën;

se Ai krijon çiftet: mashkullin dhe femrën,

prej një pikle që hidhet;

se Ai është që bën ringjalljen e fundit;

se Ai është që pasuron dhe jep me bollëk;

se Ai është Zoti i Siriusit;[1] ——— [1] Sirius: ylli më i ndritshëm në qiellin e natës, të cilin e adhuronin disa arabë në kohën paraislame.

dhe se Ai është që shkatërroi adët e parë,

edhe themudët, duke mos lënë asnjë nga ata,

si dhe popullin e Nuhut më parë. Me të vërtetë, ata ishin më mizorët dhe më të shfrenuarit.

Edhe vendbanimet e përmbysura (të popullit të Lutit) i rrëzoi.

Kështu që i mbuloi ajo që i mbuloi,

Atëherë, cilat mirësi të Zotit tënd po i vë në dyshim?

Ky (Kurani) është paralajmërues si paralajmëruesit e mëparshëm.

Çasti i Kiametit po afrohet.

Përveç Allahut, askush nuk mund ta zbulojë atë,

Vallë, nga kjo fjalë po çuditeni

dhe po qeshni e nuk po qani,

duke qenë të shkujdesur?!

Bjerini në sexhde Allahut dhe adhurojeni!

Çasti i Kiametit u afrua dhe Hëna u ça!

Por, megjithatë, kur shohin ndonjë shenjë, ata kthejnë shpinën dhe thonë: “Kjo është një magji që zhduket!”

Ata përgënjeshtruan (të vërtetën) dhe ndoqën dëshirat e veta, por çdo çështje është e caktuar.

Në të vërtetë, atyre u erdhën lajme të mjaftueshme për t'u sprapsur (nga mosbesimi),

një urtësi e përsosur, por paralajmërimet nuk u bënë dobi.

Prandaj, largohu prej tyre! Ditën kur thirrësi do t'i thërrasë për një gjë të tmerrshme,

me sy të përulur, ata do të dalin nga varret, si të ishin karkaleca të shpërndarë,

duke nxituar drejt thirrësit. Atëherë, jobesimtarët do të thonë: "Kjo është një ditë e vështirë!"

Para tyre përgënjeshtruan edhe populli i Nuhut. Ata e quajtën gënjeshtar të dërguarin Tonë, i thanë "i çmendur" dhe e kërcënuan.

Atëherë, ai e luti Zotin e vet: “Unë jam i mundur, më ndihmo!”

Atëherë, Ne i hapëm portat e qiellit me një shi të rrëmbyeshëm

dhe i shpërthyem burimet e tokës, e ujërat u takuan sipas një urdhri të paracaktuar.

Ne e mbartëm në një anije (të ndërtuar) prej dërrasash e gozhdësh,

e cila lundronte nën Sytë Tanë, si shpërblim për atë që u përgënjeshtrua.

Ne e lamë atë si shenjë, por a ka kush që merr mësim?

Ah, si ishte dënimi Im dhe paralajmërimet e Mia!

Vërtet, Ne e kemi bërë Kuranin të lehtë për të nxjerrë mësim. A ka, pra, ndonjë që merr mësim?

Edhe adët përgënjeshtruan (të vërtetën). Ah, si ishte dënimi Im dhe paralajmërimet e Mia!

Ne dërguam mbi ta një erë të ftohtë e të furishme, në një ditë mjerimi të vazhdueshëm,

e cila i nxirrte njerëzit, sikur të ishin trungje të shkulura palmash.

Ah, si ishte dënimi Im dhe paralajmërimet e Mia!

Vërtet, Ne e kemi bërë Kuranin të lehtë për të nxjerrë mësim. A ka, pra, ndonjë që merr mësim?

Edhe themudët i përgënjeshtruan paralajmërimet.

Ata thanë: “A të ndjekim, vallë, një njeri të vetëm si ne? Atëherë do të ishim në humbje e mundim.

A thua atij i është dhënë Shpallja, nga të gjithë ne?! Jo, por ai është thjesht një gënjeshtar mendjemadh!”

Nesër do ta kuptojnë ata se kush është gënjeshtari mendjemadh!

Ne po u dërgojmë një deve si sprovë për ta, prandaj vëzhgoji dhe ki durim!

Dhe njoftoji se uji është ndarë ndërmjet tyre dhe secili ka radhën e vet të caktuar për të pirë!

Por, ata thirrën shokun e tyre, i cili mori shpatën dhe e theri (devenë).

Ah, si ishte dënimi Im dhe paralajmërimet e Mia!

Ne dërguam mbi ta një gjëmim të tmerrshëm, sakaq u bënë si kashtë e thatë në ahur.

Vërtet, Ne e kemi bërë Kuranin të lehtë për të nxjerrë mësim. A ka, pra, ndonjë që merr mësim?

Edhe populli i Lutit i përgënjeshtroi paralajmërimet.

Ne lëshuam mbi ta një rrebesh gurësh, përveç familjes së Lutit, të cilët i shpëtuam në fundin e natës,

si mirësi nga ana Jonë. Kështu i shpërblejmë ata që falënderojnë.

Ai i paralajmëroi ata për ndëshkimin Tonë, por ata dyshuan në paralajmërime.

Ata u përpoqën ta bindnin që t’ua dorëzonte mysafirët e tij, por Ne ua verbuam sytë (e u thamë): “Shijoni dënimin Tim dhe pasojat e paralajmërimeve të Mia!”

Në mëngjes herët i kaploi një dënim i përhershëm.

“Shijoni dënimin Tim dhe pasojat e paralajmërimeve të Mia!”

Vërtet, Ne e kemi bërë Kuranin të lehtë për të nxjerrë mësim. A ka, pra, ndonjë që merr mësim?

Edhe njerëzve të Faraonit u erdhën paralajmërimet,

por ata i përgënjeshtruan të gjitha shenjat Tona, prandaj Ne i kapëm me dënimin e një të Gjithëfuqishmi Fuqiplotë.

Vallë, jobesimtarët tuaj qenkan më të mirë se ata (popujt që i shkatërruam më parë), apo keni ju ndonjë garanci në librat hyjnorë?

Apo thonë: “Ne jemi një grup i bashkuar që do të fitojmë”?

Grupi do të mposhtet dhe do të kthejë shpinën, duke ikur.

Në të vërtetë, Ora (e Kiametit) është caktimi i tyre, e Ora është më e rëndë dhe më e hidhur.

Njëmend, keqbërësit janë në humbje e mundim.

Ditën kur do të tërhiqen zvarrë me fytyrat e tyre në zjarr (do t'u thuhet): “Shijoni dënimin e Xhehenemit!”

Ne, çdo gjë kemi krijuar me masë të caktuar.

Urdhri Ynë është vetëm një (fjalë) – sa çel e mbyll sytë.

Në të vërtetë, Ne i kemi shkatërruar ata që ishin si ju. Pra, a ka ndonjë që merr mësim?!

Çdo gjë që kanë bërë është shkruar në libra.

Çdo gjë, – e vogël a e madhe, – është shënuar.

Të devotshmit do të jenë në kopshte të Xhenetit, pranë lumenjve,

Në një vend të nderuar, pranë një Sunduesi Fuqiplotë.

I Gjithëmëshirshmi

ia mësoi (njeriut) Kuranin,

e krijoi njeriun

dhe ia mësoi atij të shprehurit e qartë.

Dielli dhe Hëna lëvizin sipas një llogarie të caktuar.

Bimët dhe pemët përulen (para Allahut).

Qiellin e ngriti lart dhe vuri peshoren e drejtësisë,

që të mos bëni padrejtësi në peshore.

Prandaj matni me drejtësi dhe mos hani në peshë!

Edhe tokën e bëri për gjallesat.

Në të ka fruta dhe hurma të mbështjella,

si dhe drithëra me gjethe e bimë me erë të këndshme.

Pra, cilat mirësi të Zotit tuaj po i mohoni?!

Njeriun e krijoi prej baltës së pjekur porsi vorbë,

kurse xhinët i krijoi prej flakës së zjarrit pa tym.

Pra, cilat mirësi të Zotit tuaj po i mohoni?!

Ai është Zoti i dy lindjeve dhe dy perëndimeve.

Pra, cilat mirësi të Zotit tuaj po i mohoni?!

Ai i lë dy dete që të takohen,

por mes tyre ka një pengesë që s'mund ta kapërcejnë.

Pra, cilat mirësi të Zotit tuaj po i mohoni?!

Prej tyre nxirren margaritarë e merxhanë.

Pra, cilat mirësi të Zotit tuaj po i mohoni?!

Atij i përkasin anijet që lundrojnë në det, të ngritura porsi malet.

Pra, cilat mirësi të Zotit tuaj po i mohoni?!

Çdo gjë që është në Tokë do të zhduket,

e do të mbetet vetëm fytyra e Zotit tënd gjithë madhështi e nderim.

Pra, cilat mirësi të Zotit tuaj po i mohoni?!

Atij i luten krejt ata që janë në qiej e në Tokë. Çdo ditë Ai është në një çështje (të re).[1] ——— [1] Fjala “çështje” nënkupton veprimet e shumta të Allahut ndaj krijesave të Tij: Ai jep jetë dhe vdekje, furnizon, shëron, fal, ndëshkon, lartëson e poshtëron, duke vepruar çdo ditë me urtësinë dhe fuqinë e Tij të përsosur.

Pra, cilat mirësi të Zotit tuaj po i mohoni?!

Së shpejti do të merremi me ju, o ju dy të rënduar (njerëz e xhinë)!

Pra, cilat mirësi të Zotit tuaj po i mohoni?!

O shoqëri e xhinëve dhe njerëzve, nëse mund të përshkoni kufijtë e qiejve e të Tokës, atëherë përshkojini! Por, nuk do të mund t'i përshkoni, përveçse me ndonjë fuqi.

Pra, cilat mirësi të Zotit tuaj po i mohoni?!

Kundër jush do të lëshohen flakë zjarri e bakër i shkrirë dhe nuk do të mund të mbroheni.

Pra, cilat mirësi të Zotit tuaj po i mohoni?!

Kur qielli të çahet e të bëhet i kuq si trëndafili e (të shkëlqejë) si vaji!

Pra, cilat mirësi të Zotit tuaj po i mohoni?!

Atë Ditë askush nuk do të pyetet për gjynahun e tij, as njeri e as xhin.

Pra, cilat mirësi të Zotit tuaj po i mohoni?!

Keqbërësit do të njihen nga shenjat e tyre dhe do të kapen për ballukesh e për këmbësh.

Pra, cilat mirësi të Zotit tuaj po i mohoni?!

Ja, ky është Xhehenemi, të cilin e përgënjeshtronin keqbërësit!

Ata do të vërtiten mes zjarrit dhe ujit përvëlues.

Pra, cilat mirësi të Zotit tuaj po i mohoni?!

E për atë që i frikësohet paraqitjes para Zotit të vet ka dy kopshte Xheneti.

Pra, cilat mirësi të Zotit tuaj po i mohoni?!

Ato (dy kopshte) kanë degë të shumta.

Pra, cilat mirësi të Zotit tuaj po i mohoni?!

Në to ka dy burime që rrjedhin.

Pra, cilat mirësi të Zotit tuaj po i mohoni?!

Në to ka prej çdo frute nga dy lloje.

Pra, cilat mirësi të Zotit tuaj po i mohoni?!

Ata do të jenë të mbështetur në shtroja të veshura nga brenda me mëndafsh të trashë e frutat e dy kopshteve do t'i kenë krejt pranë.

Pra, cilat mirësi të Zotit tuaj po i mohoni?!

Aty do të jenë vashat e dëlira, të cilat nuk i ka prekur njeri para tyre, as xhin.

Pra, cilat mirësi të Zotit tuaj po i mohoni?!

Ato janë si xhevahirë e merxhanë.

Pra, cilat mirësi të Zotit tuaj po i mohoni?!

A mund të ketë për mirësinë shpërblim tjetër përveç mirësisë?!

Pra, cilat mirësi të Zotit tuaj po i mohoni?!

Nën ato dy kopshte janë dy kopshte të tjera.

Pra, cilat mirësi të Zotit tuaj po i mohoni?!

Shumë të gjelbra.

Pra, cilat mirësi të Zotit tuaj po i mohoni?!

Në to janë dy burime që gufojnë.

Pra, cilat mirësi të Zotit tuaj po i mohoni?!

Në to ka fruta, palma dhe shegë.

Pra, cilat mirësi të Zotit tuaj po i mohoni?!

Në to ka gra të mira e bukuroshe.

Pra, cilat mirësi të Zotit tuaj po i mohoni?!

Hyri që qëndrojnë në tenda.

Pra, cilat mirësi të Zotit tuaj po i mohoni?!

Ato nuk i ka prekur para tyre njeri e as xhin.

Pra, cilat mirësi të Zotit tuaj po i mohoni?!

Ata do të qëndrojnë të mbështetur në shtroja të gjelbra e qilima të bukur.

Pra, cilat mirësi të Zotit tuaj po i mohoni?!

Qoftë bekuar emri i Zotit tënd gjithë madhështi e nderim!

Kur të ndodhë ngjarja (e Kiametit),

s’ka kush që do ta mohojë ndodhinë e saj.

Disa do t'i poshtërojë e disa do t'i lartësojë.

Kur Toka të tronditet fort,

dhe malet të thërrmohen

e të bëhen si pluhur i shpërndarë,

ju do të ndaheni në tri grupe:

Njerëzit e së djathtës – vallë, ç'janë njerëzit e së djathtës!

Njerëzit e së majtës – vallë, ç'janë njerëzit e së majtës!

dhe prijatarët – prijatarët!

Ata janë të afruarit (tek Allahu),

në Kopshtet e Lumturisë,

një shumicë prej të hershmëve,

e një pakicë prej të mëvonshmëve,

në divane të stolisura me ar,

të mbështetur në to, përballë njëri-tjetrit.

Atyre do t'u shërbejnë djelmosha të përhershëm,

me kupa, ibrikë e gota me pije nga burimi,

prej së cilës nuk u dhemb koka e as dehen,

e me fruta që do t'i zgjedhin vetë

dhe mish shpendësh që ua ka ëndja.

Për ta ka edhe hyri symëdha,

porsi margaritarë të ruajtur mirë,

si shpërblim për atë që vepruan.

Aty nuk dëgjojnë fjalë të kota e as fjalë gjynahesh,

por vetëm fjalët: “Paqe! Paqe!”

E njerëzit e së djathtës - vallë, ç'janë njerëzit e së djathtës!

Ata do të qëndrojnë mes lotusëve pa gjemba,

dhe bananesh palë-palë,

në hije të gjera,

pranë ujit që rrjedh,

dhe frutave të shumta,

të cilat nuk sosen, as janë të ndaluara,

dhe në shtroja të ngritura.

Ne i kemi krijuar ato (gratë e Xhenetit) me një krijim të veçantë

dhe i kemi bërë të virgjra,

të dashura dhe të një moshe,

për njerëzit e së djathtës.

Një shumicë e tyre janë prej të hershmëve,

e një shumicë prej të mëvonshmëve.

Po njerëzit e së majtës - vallë, ç'janë njerëzit e së majtës!

Ata do të jenë mes erës së zjarrtë dhe ujit të valë,

në hije tymi të zi,

as të freskët, as të këndshme.

Ata, para kësaj, ishin të dhënë pas luksit,

këmbëngulnin në gjynahun e rëndë

dhe thoshin: “Vallë, kur të vdesim e të bëhemi pluhur e eshtra, atëherë do të ringjallemi?!

A edhe të parët tanë të lashtë?!"

Thuaju: "Po, të parët dhe të mbramët,

do të tubohen në një Ditë të caktuar.

E pastaj, ju, o të humbur e përgënjeshtrues,

me siguri do të hani nga pema e zekumit,

prej së cilës do të mbushni barqet.

Pastaj do të pini ujë të vluar,

do të pini si deve të etura."

Kjo është gostia e tyre në Ditën e Gjykimit.

Ne ju kemi krijuar. Atëherë, pse nuk besoni?

A e keni parë farën (e njeriut) që e hidhni?

A mos e krijoni ju apo Ne jemi Krijuesit?

Ne e kemi caktuar vdekjen tuaj dhe askush s'mund të na pengojë

për t’ju zëvendësuar me të tjerë si ju dhe për t’ju rikrijuar ashtu si nuk e dini.

Në të vërtetë, ju e dini krijimin e parë, pse atëherë nuk merrni mësim?

A e keni parë atë që mbillni?

A mos e bëni ju të mbijë apo Ne jemi që e bëjmë të mbijë?

Sikur të donim, do ta bënim byk e ju do të çuditeshit (e do të thoshit):

“Me të vërtetë jemi dëmtuar,

madje, jemi privuar plotësisht!”

A e keni parë ujin që pini?

A mos e zbritni ju nga retë apo jemi Ne që e zbresim?

Sikur të donim, do ta bënim të njelmët, andaj përse nuk jeni mirënjohës?!

A e keni parë zjarrin që ndizni?

A mos e krijuat ju drurin e tij apo Ne jemi që e krijuam?

Ne e bëmë atë kujtesë (për zjarrin e Xhehenemit) dhe dobi për udhëtarët.

Prandaj, lartëso emrin e Zotit tënd të Madhërishëm.

Betohem në vendndodhjen e yjeve,

– e ky është një betim i madh, veç sikur ta dinit, –

se, me të vërtetë, ky është një Kuran i nderuar,

në një Libër të ruajtur,

të cilin e prekin vetëm të pastrit.

Ai është shpallje prej Zotit të botëve.

Vallë, këtë fjalë (Kuranin) po e përgënjeshtroni

dhe në vend se të falënderoni për rizkun tuaj, ju po mohoni?!

E pse atëherë, kur shpirti arrin në fyt,

e ju në atë çast vetëm shikoni[1], ——— [1] njeriun që gjendet në agoninë e vdekjes.

ndërkohë që Ne jemi më afër tij sesa ju, por ju nuk shihni?

E pse pra, nëse nuk do të gjykoheni (në botën e amshuar),

nuk ia ktheni shpirtin, nëse thoni të vërtetën?

Nëse ai është nga të afruarit (tek Allahu),

do të ketë prehje, erë të këndshme dhe Xhenet plot mirësi.

E nëse është nga njerëzit e së djathtës,

atëherë (i thuhet:) "Paqe për ty" nga njerëzit e së djathtës.

Por, nëse është nga përgënjeshtruesit e humbur,

atëherë atë e pret gostitja me ujë të vluar,

dhe djegia në Zjarrin flakërues.

Pa dyshim, kjo është e vërteta e sigurt!

Prandaj, lartëso emrin e Zotit tënd të Madhërishëm.

Allahun e lartëson çdo gjë që është në qiej dhe në Tokë. Ai është i Gjithëfuqishmi, i Urti.

Atij i takon sundimi i qiejve e i Tokës. Ai jep jetë e vdekje dhe Ai është i Plotfuqishëm për çdo gjë.

Ai është i Pari dhe i Mbrami, i Dukshmi dhe i Padukshmi. Ai është i Gjithëdijshëm për çdo gjë.

Ai është që krijoi qiejt dhe Tokën për gjashtë ditë e pastaj u ngrit mbi Arsh (Fron). Ai e di çfarë hyn në tokë dhe çka del prej saj, çka zbret nga qielli dhe çka ngjitet në të. Ai është me ju kudo që të jeni. Allahu sheh mirë gjithçka që bëni.

Atij i takon sundimi i qiejve e i Tokës dhe tek Allahu kthehen të gjitha çështjet.

Ai fut natën në ditë dhe fut ditën në natë. Ai e di mirë çfarë ka në zemra.

Besoni Allahun e të Dërguarin e Tij dhe jepni nga ajo që Ai jua ka lënë në pronësi, sepse ata nga ju që besojnë dhe japin, do të kenë shpërblim të madh.

Ç’keni që nuk e besoni Allahun, ndërkohë që i Dërguari ju thërret të besoni Zotin tuaj, e Ai ka marrë besën prej jush, nëse vërtet jeni besimtarë?

Ai është që i zbriti robit të Vet ajete të qarta për t’ju nxjerrë nga errësirat në dritë. Me të vërtetë, Allahu është i Dhembshur e Mëshirëplotë ndaj jush.

Ç’keni që nuk shpenzoni në rrugën e Allahut, ndërkohë që Allahut i takon trashëgimia e qiejve dhe e Tokës? Nuk janë të barabartë ata prej jush që shpenzuan dhe luftuan para Çlirimit (të Mekës) me ata që shpenzuan e luftuan më pas; të parët kanë shkallë më të lartë. Por, të gjithëve Allahu u ka premtuar shpërblimin më të mirë. Allahu e di mirë atë që bëni.

Kush është ai që do t'i japë Allahut ndonjë hua të mirë, që Ai t'ia shtojë atë shumëfish? E për të do të ketë shpërblim bujar.

Ditën kur do t’i shohësh besimtarët e besimtaret duke u ndriçuar drita përpara dhe në të djathtë të tyre (e do t’u thuhet): "Përgëzim për ju sot janë kopshtet e Xhenetit nëpër të cilat rrjedhin lumenjtë, ku do të qëndroni përgjithmonë! Kjo është fitorja e madhe."

Atë Ditë, dyfytyrëshit e dyfytyrëshet do t'u thonë besimtarëve: “Na pritni, që të marrim pak nga drita juaj!" Por, atyre do t’u thuhet: "Kthehuni mbrapa e kërkoni dritë!" Atëherë, ndërmjet tyre do të vihet një mur, që ka një port: brenda saj është mëshira, kurse jashtë saj dënimi.

Ata do të thërrasin: "A nuk ishim edhe ne me ju?" Do t'u përgjigjen: Po, por ju e shkatërruat veten, pritët (të mundeshin besimtarët), dyshuat dhe u mashtruat nga shpresat e kota, derisa erdhi urdhri i Allahut dhe ju mashtroi kryemashtruesi (shejtani) ndaj Allahut."

Prandaj, sot nuk pranohet shkëmbesë as nga ju e as nga ata që mohuan. Vendbanimi juaj është Zjarri. Aty e keni vendin ju. Eh, sa vendbanim i keq që është ai!

A nuk ka ardhur koha për ata që besuan, që zemrat e tyre të përulen para përmendjes së Allahut dhe para së vërtetës që ka zbritur e të mos bëhen si ata që iu dha Libri më parë, të cilëve u kaloi kohë e gjatë[1] dhe iu ngurtësuan zemrat?! Shumica e tyre janë të pabindur. ——— [1] që nga shkuarja e të dërguarve të tyre

Dijeni se Allahu e gjallëron tokën pasi të jetë tharë. Ne jua kemi shpjeguar shenjat, që të kuptoni.

Njëmend, bamirësve dhe bamirëseve që i japin Allahut një hua të mirë do t'u shumëfishohet fitimi dhe do të kenë shpërblim bujar.

Ata që besojnë Allahun dhe të dërguarit e Tij, mu ata janë besnikët. E dëshmorët do të kenë te Zoti i tyre shpërblimin dhe dritën e vet. Ndërkaq, ata që nuk besuan dhe i përgënjeshtruan ajetet Tona, pikërisht ata janë banorët e Zjarrit flakërues.

Dijeni se jeta e kësaj bote është vetëm lojë, dëfrim, zbukurim, mburrje ndërmjet jush dhe garë për shtimin e pasurisë dhe fëmijëve. Ajo i ngjan një shiu, prej të cilit bima i mahnit bujqit, por më vonë ajo thahet dhe e sheh sesi zverdhet dhe më pas bëhet byk. Në botën tjetër ka dënim të ashpër, por edhe falje e kënaqësi prej Allahut. Jeta e kësaj bote nuk është gjë tjetër veçse një përjetim mashtrues.

Garoni për të fituar falje nga Zoti juaj dhe një Xhenet, gjerësia e të cilit është sa qielli dhe Toka, i përgatitur për ata që besojnë Allahun dhe të dërguarit e Tij. Kjo është mirësia e Allahut që Ai ia jep kujt të dojë e Allahu është Zotëruesi i mirësisë së madhe.

S'ka fatkeqësi që ju godet në tokë ose në veten tuaj, që të mos jetë e shënuar në një Libër[2], para se ta krijojmë atë, – e kjo për Allahun është e lehtë, – ——— [2] në Leuhi mahfudh

që të mos dëshpëroheni për atë që ju ikën dhe të mos gëzoheni tepër për atë që Ai jua jep. Allahu nuk i do ata që janë mendjemëdhenj e mburravecë,

të cilët tregohen koprracë dhe kërkojnë edhe nga njerëzit që të jenë dorështrënguar. E kush kthen shpinën, le ta dijë se Allahu është njëmend i Panevoji, i Lavdëruari.

Ne çuam të dërguarit Tanë me prova të qarta dhe bashkë me ta zbritëm edhe Librat (e shenjtë) dhe peshoren, që njerëzit të punojnë me drejtësi, si dhe e zbritëm hekurin, në të cilin ka forcë të madhe dhe përfitime për njerëzit, që Allahu të nxjerrë në shesh ata që e ndihmojnë Atë dhe të dërguarit e Tij pa e parë Atë. Me të vërtetë, Allahu është i Fortë e i Gjithëfuqishëm.

Ne e dërguam Nuhun e Ibrahimin dhe pasardhësve të tyre u dhamë pejgamberinë dhe Librin. Prej tyre pati të udhëzuar, por shumë prej tyre ishin të pabindur.

Pastaj, ne vazhduam me të dërguarit Tanë, mandej dërguam Isain, birin e Merjemes, të cilit i dhamë Inxhilin dhe në zemrat e atyre që e ndoqën atë vumë dhembshuri e mëshirë. Ndërkaq, murgërinë e shpikën vetë, – Ne nuk ua urdhëruam, – por e shpikën duke kërkuar kënaqësinë e Allahut, e megjithatë nuk e ruajtën ashtu siç duhej. Atyre që besuan nga mesi i tyre ua dhamë shpërblimin e merituar, por shumë prej tyre janë të pabindur.

O ju (ithtarë të Librit) që keni besuar, kini frikë Allahun dhe besoni të Dërguarin e Tij, që Ai t’ju dhurojë mëshirë të dyfishtë, t’ju japë dritë me të cilën do të ecni dhe t’ju falë! Allahu është Falës i Madh e Mëshirëplotë.

Pra, le ta dinë ithtarët e Librit se ata nuk kanë kurrfarë pushteti mbi mirësinë e Allahut, sepse e gjithë mirësia është në Dorën e Allahut. Ai ia jep atë kujt të dojë. Allahu është Zotëruesi i mirësisë së madhe.

Allahu ka dëgjuar fjalët e asaj që po diskutonte me ty lidhur me burrin e saj dhe që iu ankua Allahut. Allahu e dëgjoi bisedën tuaj. Vërtet, Allahu dëgjon dhe sheh çdo gjë.

Ata prej jush që bëjnë dhihar[1], le ta dinë se ato nuk bëhen nëna të tyre. Nëna të tyre janë vetëm ato që i kanë lindur. Me të vërtetë, fjalët që thonë janë të shëmtuara e të rreme. Megjithatë, Allahu është Shlyes i gjynaheve e Falës i Madh. ——— [1] Dhihar quhet shprehja: "Ti je për mua njësoj si shpina e nënës sime (ose: si nëna ime)", të cilën e përdornin arabët në kohën e xhahilietit (periudhës paraislame) me qëllim shkurorëzimi, duke ia ndaluar vetes marrëdhëniet intime me gratë e veta.

Ata që i shpallin të paligjshme për vete gratë e tyre përmes dhiharit e pastaj tërhiqen nga ajo që kanë thënë, duhet të lirojnë një rob para se të preken mes vete[2]. Kjo është këshillë për ju e Allahu di gjithçka që bëni. ——— [2] Domethënë, para se të bëjnë marrëdhënie intime.

E kush nuk ka mundësi (të lirojë një rob), duhet të agjërojë dy muaj rresht, para se të preken mes vete. E kush nuk ka mundësi as për këtë, duhet të ushqejë gjashtëdhjetë të varfër. Kjo, që të besoni Allahun dhe të Dërguarin e Tij. Këta janë kufijtë e Allahut. Ndërkaq, për jobesimtarët ka dënim të dhembshëm.

Me të vërtetë, ata që i kundërvihen Allahut dhe të Dërguarit të Tij, do të poshtërohen, ashtu siç u poshtëruan ata para tyre. Ne kemi zbritur ajete të qarta, kurse për jobesimtarët ka dënim poshtërues,

Ditën kur Allahu do t’i ringjallë të gjithë e do t’i njoftojë për atë që kanë bërë. Allahu i ka shënuar të gjitha, ndërsa ata e kishin harruar. Allahu është Dëshmitar për çdo gjë.

A nuk e di ti se Allahu di çdo gjë që është në qiej e në Tokë?! Nuk ka bisedë të fshehtë mes tri vetave e që Ai të mos jetë i katërti; as mes pesë vetave e që Ai të mos jetë i gjashti; as mes më pak a më shumë vetave, që Ai të mos jetë me ta, kudo që të jenë. Pastaj, në Ditën e Kiametit, Ai do t’i njoftojë për atë që kanë bërë. Pa dyshim, Allahu është i Gjithëdijshëm për çdo gjë.

A nuk i sheh ata të cilët, edhe pse u ndaluan nga bisedat e fshehta, kthehen tek ajo që u është ndaluar dhe pëshpëritin për gjynahe, armiqësi dhe mosbindje ndaj të Dërguarit? Kur vijnë te ti, të përshëndesin ndryshe nga mënyra me të cilën të përshëndet Allahu dhe thonë më vete: "Përse nuk na dënon Allahu për këtë që themi?" Mjafton për ta Xhehenemi, ku do të futen. Eh, sa vend i keq që është ai!

O ju që besuat! Kur të flisni fshehurazi, mos flitni për gjynahe, armiqësi e mosbindje ndaj të Dërguarit, por flitni për mirësi e devotshmëri dhe frikësojuni Allahut, tek i Cili do të tuboheni!

Në të vërtetë, bisedat e fshehta janë prej shejtanit, për t’i pikëlluar besimtarët, por ai nuk mund t’u bëjë dëm aspak, përveçse me lejen e Allahut. Prandaj, vetëm Allahut le t'i mbështeten besimtarët!

O ju që besoni! Kur ju thuhet “Bëni vend” nëpër ndeja, atëherë bëni vend, se Allahu do t’ju bëjë vend juve. E, kur ju thuhet “Ngrihuni”, atëherë ngrihuni, se Allahu do t'i ngrejë ata që besojnë nga mesi juaj dhe ata që u është dhënë dija në shkallë të lartë. Allahu di mirë gjithçka që bëni.

O ju që besoni! Kur doni të flisni veçmas me të Dërguarin, atëherë para bisedës suaj jepni lëmoshë, se kjo është më mirë dhe më pastër për ju. E nëse nuk gjeni (mundësi), atëherë Allahu është Falës i Madh e Mëshirëplotë.

A mos po frikësoheni (nga varfëria) të jepni lëmoshë para bisedës suaj veçmas (me të Dërguarin)?! Meqë nuk e bëtë këtë dhe Allahu jua fali, atëherë faleni namazin, jepeni zekatin dhe bindjuni Allahut e të Dërguarit të Tij! Allahu di mirë gjithçka që bëni.

A nuk i sheh ata që miqësohen me njerëz me të cilët Allahu është i zemëruar? Ata nuk janë as prej jush, as prej tyre, madje betohen rrejshëm me vetëdije.

Allahu ka përgatitur për ta dënim të ashpër. Sa e shëmtuar, në të vërtetë, është ajo që bëjnë.

Ata marrin betimin e tyre si mburojë dhe i pengojnë njerëzit nga rruga e Allahut. Për ta do të ketë dënim poshtërues.

As pasuria e tyre, as fëmijët e tyre nuk do t’u vlejnë asgjë para Allahut. Ata janë banorë të Zjarrit, ku do të qëndrojnë përgjithmonë.

Ditën kur Allahu do t’i ringjallë të gjithë, ata do t’i betohen Atij ashtu siç ju betohen juve, duke menduar se po mbështeten në diçka. Vini re, pikërisht ata janë gënjeshtarët!

Shejtani i pushtoi ata dhe i bëri të harrojnë përmendjen e Allahut. Ata janë pala e shejtanit. E, pa dyshim, pala e shejtanit janë humbësit.

Me të vërtetë, ata që i kundërvihen Allahut dhe të Dërguarit të Tij janë më të poshtëruarit.

Allahu e ka shkruar: "Unë dhe të dërguarit e Mi patjetër do të ngadhënjejmë." S'ka dyshim se Allahu është i Fortë e i Gjithëfuqishëm.

Nuk do të gjesh njerëz që besojnë Allahun dhe Ditën e Fundit e t'i duan ata që i kundërvihen Allahut dhe të Dërguarit të Tij, edhe sikur të jenë ata baballarët e tyre, bijtë e tyre, vëllezërit e tyre ose farefisi i tyre. Allahu ka skalitur besimin në zemrat e tyre dhe i ka forcuar me një frymë (dritë) nga ana e Tij. Ai do t’i fusë ata në kopshte të Xhenetit, nëpër të cilat rrjedhin lumenj, ku do të qëndrojnë përgjithmonë. Allahu është i kënaqur me ta dhe ata janë të kënaqur me Të. Ata janë pala e Allahut. Vini re, pala e Allahut janë fitimtarët.

Allahun e lartëson çdo gjë që është në qiej dhe në Tokë. Ai është i Gjithëfuqishmi, i Urti.

Është Ai që i nxori ata ithtarë të Librit që nuk besuan nga shtëpitë e tyre në kohën e dëbimit të parë. Ju nuk menduat se ata do të dilnin, kurse ata mendonin se kështjellat e tyre do t’i mbronin prej Allahut. Por, Allahu u erdhi prej nga nuk e prisnin dhe hodhi tmerrin në zemrat e tyre. Ata i rrënonin shtëpitë e tyre me duart e veta dhe me duart e besimtarëve. Prandaj, merrni mësim, o mendarë!

Sikur Allahu të mos ua kishte caktuar dëbimin, do t’i kishte ndëshkuar në këtë botë. Ndërkaq, në botën tjetër, ata i pret dënimi i Zjarrit.

Kjo, se ata iu kundërvunë Allahut dhe të Dërguarit të Tij. E kushdo që i kundërvihet Allahut, le ta dijë se Allahu është i rreptë në ndëshkim.

Ju nuk pretë asnjë palmë e as latë të qëndrojë mbi rrënjët e veta përveçse me lejen e Allahut, si dhe që Ai t'i poshtërojë të pabindurit.

Ndërkaq, për atë që Allahu i dha të Dërguarit të Tij si plaçkë (e marrë pa luftë) prej tyre, ju nuk u hipët kuajve e as deveve, por Allahu u jep pushtet të dërguarve të Tij mbi këdo që Ai dëshiron. Allahu është i Plotfuqishëm mbi çdo gjë.

Ajo që Allahu i dha të Dërguarit të Tij si plaçkë (pa luftë) nga jobesimtarët e vendbanimeve, i takon Allahut, të Dërguarit e farefisit të tij, jetimëve, skamnorëve dhe udhëtarit të mbetur rrugës, në mënyrë që të mos qarkullojë pasuria vetëm mes pasanikëve prej jush. Çfarë t'ju japë i Dërguari, merreni, e çfarë t’ju ndalojë, hiqni dorë prej saj! Kini frikë Allahun, se, me të vërtetë, Allahu është i rreptë në ndëshkim.

Një pjesë u takon muhaxhirëve të varfër, të cilët u dëbuan nga shtëpitë dhe pasuria e tyre, duke kërkuar mirësinë e kënaqësinë e Allahut dhe duke ndihmuar Allahun e të Dërguarin e Tij. Pikërisht ata janë besimtarët e vërtetë.

Ndërkaq, ata që banuan në Medinë më parë dhe pranuan besimin, i duan ata që mërguan tek ata dhe nuk ndiejnë zili për atë që u është dhënë atyre, madje u japin përparësi ndaj vetvetes, edhe pse vetë janë nevojtarë. E ata që ruhen nga lakmia e shpirtit, të tillët janë të shpëtuarit.

Edhe ata që erdhën pas tyre e thonë: "Zoti ynë! Falna ne dhe vëllezërit tanë që na paraprinë në besim dhe mos lejo në zemrat tona kurrfarë mërie ndaj atyre që besojnë! Zoti ynë, Ti je vërtet i Dhembshur e Mëshirëplotë."

A nuk i pe hipokritët që u thanë vëllezërve të tyre që nuk besuan nga ithtarët e Librit: "Nëse ju dëbojnë, ne patjetër do të dalim me ju dhe kurrë nuk do t'i bindemi askujt kundër jush; e, nëse ju luftojnë, ne, gjithsesi, do t’ju ndihmojmë”? Por, Allahu dëshmon se ata janë vërtet gënjeshtarë.

Nëse ata dëbohen, dyfytyrëshit nuk do të dalin me ta; e, nëse luftohen, nuk do t’u ndihmojnë. Por, edhe sikur t’u dilnin në ndihmë, do të iknin e pastaj do të mbeteshin pa përkrahje.

Ata, në zemrat e tyre, kanë më shumë frikë nga ju sesa nga Allahu. Kjo është për shkak se ata janë njerëz që nuk kuptojnë.

Ata[1] nuk ju luftojnë të gjithë së bashku, përveçse në qytete të fortifikuara ose pas mureve. Armiqësia mes tyre është e ashpër; ti i mendon të bashkuar, por zemrat e tyre janë të përçara. Kjo, se ata janë njerëz që nuk mendojnë. ——— [1] Hebrenjtë dhe hipokritët.

Ashtu si ata që qenë pak para tyre, të cilët shijuan pasojat e veprimeve të tyre. Ata i pret një dënim i dhembshëm.

Ata[2] janë si shejtani, kur i thotë njeriut: "Mos beso!" Por, kur ai mohon, i thotë: "Unë s'kam të bëj asgjë me ty. Unë i frikësohem Allahut, Zotit të botëve." ——— [2] Hipokritët.

Përfundimi i këtyre të dyve do të jetë Zjarri, ku do të qëndrojnë përgjithmonë. Ky është dënimi i zullumqarëve.

O ju që besoni, kijeni frikë Allahun dhe le të shikojë secili se çfarë ka përgatitur për të nesërmen! Frikësojuni Allahut, se me të vërtetë Allahu di mirë gjithçka që bëni!

Mos u bëni si ata që e harruan Allahun, ndërsa Ai bëri që ata të harrojnë vetveten. Pikërisht ata janë të pabindurit.

Nuk janë njësoj banorët e Zjarrit dhe banorët e Xhenetit. Banorët e Xhenetit janë fitimtarët.

Sikur t’i kishim shpallur këtë Kuran ndonjë mali, do ta shihje atë të përulur e të çarë nga frika e Allahut. Këta shembuj Ne ua sjellim njerëzve, që ata të mendojnë.

Ai është Allahu, përveç të Cilit nuk ka zot tjetër (që meriton adhurimin), Njohësi i së fshehtës e i së dukshmes. Ai është i Gjithëmëshirshmi, Mëshirëploti.

Ai është Allahu, përveç të Cilit nuk ka zot tjetër (që meriton adhurimin). Ai është Sunduesi, i Shenjti, i Dëliri nga çdo e metë, Siguridhënësi, Mbikëqyrësi, i Gjithëfuqishmi, Madhështori, i Lartësuari. I patëmeta e i Lartësuar është Allahu mbi çdo gjë që i veshin Atij.

Ai është Allahu, Krijuesi, Shpikësi, Formësuesi. Të Tijtë janë emrat më të bukur. Atë e madhëron gjithçka që gjendet në qiej e në Tokë. Ai është i Gjithëfuqishmi, i Urti.

O ju që besoni! Mos i merrni armiqtë e Mi dhe armiqtë tuaj për miq, duke u shfaqur atyre dashuri, ndërkohë që ata kanë mohuar të vërtetën që ju ka ardhur dhe kanë dëbuar të Dërguarin dhe ju, vetëm pse e besoni Allahun, Zotin tuaj. Nëse keni dalë për të luftuar në rrugën Time dhe për të kërkuar kënaqësinë Time, mos i merrni ata për miq duke u shprehur dashuri fshehurazi, sepse Unë e di mirë çfarë fshihni dhe çfarë shfaqni haptazi. E kush prej jush e bën këtë, është shmangur nga rruga e drejtë.

Nëse ju kapin, ata do të jenë armiq tuajt e do t'i zgjasin duart dhe gjuhët e tyre kundër jush me keqdashje dhe do të dëshironin që ju të bëheshit jobesimtarë.

Nuk do t’ju bëjnë dobi as të afërmit e as fëmijët tuaj. Ditën e Kiametit Allahu do të gjykojë mes jush. Allahu sheh mirë gjithçka që bëni.

Ju keni shembull të shkëlqyer tek Ibrahimi dhe tek ata që ishin me të, kur i thanë popullit të tyre: “Ne jemi larguar nga ju dhe nga ajo që adhuroni në vend të Allahut. Ne mohojmë besimin tuaj dhe midis nesh e jush është shfaqur armiqësia dhe urrejtja e përhershme, derisa ta besoni vetëm Allahun.” – Me përjashtim të fjalës së Ibrahimit, thënë babait të vet: "Unë do të kërkoj falje për ty, ndonëse nuk kam asgjë në dorë për ty tek Allahu." – "Zoti ynë, Ty të mbështetemi, te Ti pendohemi dhe te Ti është kthimi.

Zoti ynë! Mos na bëj sprovë për ata që nuk besojnë dhe na fal ne, o Zoti ynë! Vërtet, Ti je i Gjithëfuqishmi, i Urti.”

Pra, tek ata ka një shembull të shkëlqyer për ju – për këdo që ka shpresë tek Allahu e Dita e Fundit. E kush e kthen shpinën, le ta dijë se Allahu është i Panevoji, i Lavdëruari.

Mund të ndodhë që Allahu të vendosë dashuri mes jush dhe atyre me të cilët keni armiqësi.[1] Allahu është i Plotfuqishëm. Allahu është Falës i Madh e Mëshirëplotë. ——— [1] Duke i udhëzuar në Islam.

Allahu nuk ju ndalon të silleni me mirësi e me drejtësi ndaj atyre që nuk ju luftuan për shkak të fesë dhe nuk ju dëbuan prej shtëpive tuaja. Me të vërtetë, Allahu i do të drejtët.

Allahu ju ndalon vetëm që të merrni për miq ata që ju luftuan për shkak të fesë, ju dëbuan nga shtëpitë tuaja dhe ndihmuan në dëbimin tuaj. Ata që i marrin të tillët për miq, vërtet janë zullumqarë.

O ju që besoni! Kur të vijnë te ju besimtaret si muhaxhire, vërini në provë, ndonëse Allahu e di më mirë besimin e tyre! Nëse i gjykoni si besimtare, mos i ktheni më te jobesimtarët, sepse ato nuk janë të lejuara për ta e as ata nuk janë të lejuar për to. Jepuani atyre (jobesimtarëve) atë që kanë dhënë (si mehër). Nuk ka gjynah për ju të martoheni me to, pasi t’ua jepni mehrin. Mos i mbani në martesë gratë jobesimtare! Kërkoni atë që keni dhënë, e edhe ata (jobesimtarët) le të kërkojnë atë që kanë dhënë. Ky është gjykimi i Allahut, Ai gjykon mes jush. Allahu është i Gjithëdijshëm e i Urtë.

Nëse ndonjëra prej grave tuaja ikën te jobesimtarët e më pas ju merrni plaçkë lufte prej tyre, atëherë jepuni atyre (besimtarëve) që u kanë ikur gratë aq sa kanë shpenzuar (si mehër). Kijeni frikë Allahun, të Cilin e besoni!

O Pejgamber! Kur të vijnë te ti gratë besimtare për të ta dhënë besën se nuk do t’i shoqërojnë Allahut asgjë në adhurim, nuk do të vjedhin, nuk do të bëjnë kurvëri, nuk do t’i vrasin fëmijët e tyre, nuk do të sajojnë ndonjë trillim, duke u veshur bashkëshortëve ndonjë fëmijë të huaj, dhe nuk do të të kundërshtojnë ty në atë që është e drejtë, atëherë prano besën e tyre dhe lute Allahun që t’i falë ato. Vërtet, Allahu është Falës i Madh e Mëshirëplotë.

O ju që besoni! Mos i bëni miq njerëzit me të cilët Allahu është zemëruar! Ata e kanë humbur shpresën për botën tjetër, ashtu siç kanë humbur shpresën jobesimtarët për banorët e varreve.

Allahun e lartëson çdo gjë që është në qiej dhe në Tokë. Ai është i Gjithëfuqishmi, i Urti.

O ju që besoni! Përse e thoni atë që nuk e bëni?

Është shumë e urryer tek Allahu të thoni atë që nuk e bëni.

Njëmend, Allahu i do ata që luftojnë në rrugën e Tij të rreshtuar si të ishin ndërtesë e fortifikuar.

Kujto kur Musai i tha popullit të vet: "O populli im, përse më lëndoni duke e ditur se unë jam i dërguari i Allahut për ju?!" Por, kur ata u shmangën, Allahu ua shmangu zemrat (nga e vërteta). Allahu nuk e udhëzon popullin e pabindur.

Kujto edhe kur Isai, i biri i Merjemes, tha: "O bij të Israilit, unë jam i dërguari i Allahut për ju. Jam vërtetues i asaj që erdhi para meje në Teurat dhe përgëzues për ardhjen e një të Dërguari, emri i të cilit është Ahmed." Por, kur ai u erdhi me prova të qarta, ata thanë: "Kjo është një magji e qartë."

E kush është më i padrejtë se ai që trillon gënjeshtra për Allahun, ndërkohë që i bëhet thirrje për të hyrë në Islam?! Allahu nuk i udhëzon njerëzit e padrejtë.

Ata duan të shuajnë dritën e Allahut me gojën e tyre, kurse Allahu e plotëson dritën e Vet, edhe pse këtë e urrejnë jobesimtarët.

Është Ai që e çoi të Dërguarin e Tij me udhëzimin dhe fenë e vërtetë, që ta bëjë mbizotëruese mbi të gjitha fetë, edhe pse e urrejnë idhujtarët.

O ju që besoni! A t'ju tregoj për një tregti që ju shpëton nga një dënim i dhembshëm?

Të besoni Allahun e të Dërguarin e Tij dhe të luftoni në rrugën e Allahut me pasurinë dhe jetën tuaj. – Kjo është më mirë për ju, sikur ta dinit. –

Që Allahu t'jua falë gjynahet dhe t'ju fusë në kopshte të Xhenetit, nëpër të cilat rrjedhin lumenj, dhe në pallate të këndshme në Xhenetin e Adnit. Kjo është fitorja e madhe.

Ai do t'ju dhurojë edhe diçka tjetër që e dëshironi: ndihmën e Allahut dhe një çlirim të afërt. Andaj, përgëzoji besimtarët!

O ju që besoni! Bëhuni ndihmëtarë (të fesë së) Allahut, ashtu siç u tha Isai nxënësve të tij: "Cilët janë ndihmëtarët e mi në rrugën e Allahut?" Nxënësit e tij thanë: "Ne jemi ndihmëtarët e Allahut." Atëherë, një pjesë e bijve të Israilit besuan e një pjesë mohuan. Prandaj, Ne i mbështetëm ata që besuan kundrejt armikut të tyre dhe kështu u bënë ngadhënjimtarë.

Allahun lartëson çdo gjë që është në qiej dhe në Tokë. Ai është Sunduesi, i Shenjti, i Gjithëfuqishmi e i Urti.

Është Ai që u dërgoi analfabetëve një të Dërguar nga mesi i tyre, i cili ua lexon ajetet e Tij, i pastron ata e ua mëson Librin dhe Urtësinë, ndonëse më parë ishin në një humbje të qartë,

por edhe te disa të tjerëve nga ata që ende nuk u janë bashkuar. Ai është i Gjithëfuqishmi, i Urti.

Kjo është mirësia e Allahut, të cilën Ai ia jep kujt të dojë, e Allahu është Zotëruesi i mirësisë së madhe.

Ata të cilëve iu besua Teurati e më pas nuk e zbatuan i shëmbëllejnë gomarit që bart libra.[1] Sa i keq që është shembulli i njerëzve që përgënjeshtrojnë ajetet e Allahut. Allahu nuk i udhëzon njerëzit zullumqarë. ——— [1] Kjo metaforë tregon kotësinë e dijes pa vepra: si gomari që nuk përfiton nga librat që bart, ata që e morën Librin e Allahut pa e zbatuar nuk përfituan nga udhëzimi.

Thuaj: "O hebrenjë, në qoftë se pretendoni se jeni miqtë e Allahut, duke përjashtuar njerëzit e tjerë, atëherë dëshirojeni vdekjen, nëse jeni të sinqertë!"

Por, ata kurrë nuk e dëshirojnë vdekjen, për shkak të të këqijave që i kanë bërë me duart e veta. Allahu i njeh mirë keqbërësit.

Thuaju: "S'ka dyshim se vdekja prej së cilës po ikni ka për t'ju zënë. Pastaj do të ktheheni te Njohësi i së fshehtës e i së dukshmes, e Ai do t'ju njoftojë për atë që keni bërë."

O besimtarë! Kur të thirreni për namaz, ditën e xhuma, nxitoni drejt përmendjes së Allahut dhe lëreni shitblerjen! Kjo është më mirë për ju, sikur ta dinit.

E, kur të mbarojë namazi, shpërndahuni nëpër tokë, kërkoni nga mirësitë e Allahut dhe përmendeni Allahun shumë, që të gjeni shpëtim!

Ndërkaq, kur shohin ndonjë tregti ose dëfrim, rendin drejt tyre, duke të lënë ty në këmbë. Thuaju: "Ajo që është tek Allahu, është më e mirë se dëfrimi e tregtia. Allahu është Furnizuesi më i mirë."

Kur dyfytyrëshit vijnë te ti, thonë: "Ne dëshmojmë se ti je vërtet i Dërguari i Allahut." Allahu e di se ti je i Dërguari i Tij, por Allahu dëshmon se dyfytyrëshit po gënjejnë.

Ata marrin betimin e tyre si mburojë dhe i pengojnë njerëzit nga rruga e Allahut. Sa e shëmtuar është ajo që bëjnë!

Kjo, ngaqë ata besuan, pastaj mohuan, prandaj zemrat e tyre janë vulosur, kështu që nuk kuptojnë.

Kur t'i shohësh, të mahnit pamja e tyre e, nëse flasin, ua vë veshin fjalëve të tyre. Por, ata janë si trarë të mbështetur. Çdo thirrje e mendojnë kundër tyre. Ata janë armiqtë e vërtetë, prandaj ruaju prej tyre! Allahu i mallkoftë! Si po largohen (nga e vërteta)?!

Kur u thuhet atyre: "Ejani që i Dërguari i Allahut të kërkojë falje për ju", ata tundin kokat dhe i sheh sesi shmangen me mendjemadhësi.

Është krejt njësoj, u lute apo nuk u lute për faljen e tyre, Allahu nuk do t’i falë. Njëmend, Allahu nuk i udhëzon njerëzit e pabindur.

Janë pikërisht ata që thonë: "Mos u jepni atyre që janë pranë të Dërguarit të Allahut, në mënyrë që të largohen prej tij!" Ndërkohë, të Allahut janë thesaret e qiejve e të Tokës, por dyfytyrëshit nuk e kuptojnë.

Ata thonë: "Nëse kthehemi në Medinë, krenarët do t'i dëbojnë prej saj të përbuzurit." Në të vërtetë, e tërë krenaria i takon Allahut, të Dërguarit të Tij dhe besimtarëve, por dyfytyrëshit nuk e dinë këtë.

O ju që besoni! Mos lejoni që pasuria dhe fëmijët tuaj t’ju largojnë nga përmendja e Allahut! Ata që veprojnë kështu, mu ata janë të humburit.

Jepni nga të mirat që jua kemi dhënë para se t'i vijë vdekja ndonjërit e të thotë: "Zoti im, sikur të ma shtyje edhe pak afatin, që të jepja lëmoshë dhe të bëhesha i mirë!"

Por, Allahu nuk ia shtyn afatin askujt, kur t'i vijë ai. Allahu di mirë gjithçka që bëni.

Allahun lartëson çdo gjë që është në qiej dhe në Tokë. Atij i takon sundimi e lavdërimi dhe Ai është i Plotfuqishëm për çdo gjë.

Është Ai që ju ka krijuar, por, megjithatë, disa prej jush janë mohues e disa janë besimtarë. Allahu sheh gjithçka që bëni.

Ai krijoi qiejt e Tokën me urtësi, jua dha trajtën e jua bëri atë të bukur dhe tek Ai është kthimi.

Ai di çfarë gjendet në qiej e në Tokë dhe e di çfarë fshihni e çfarë shfaqni haptazi. Allahu e di mirë çfarë ka në zemra.

A nuk ju ka ardhur lajmi i atyre që nuk besuan më parë, të cilët shijuan pasojat e veprimeve të veta? Ata i pret një dënim i dhembshëm.

Kjo, ngaqë atyre u vinin të dërguarit e tyre me prova të qarta, ndërsa ata thoshin: "Vallë, njerëzit na udhëzuakan në rrugë të drejtë?!" Kështu, mohuan dhe kthyen shpinën. Ndërkohë, Allahu nuk ka nevojë (për ta). Allahu është i Panevojë e i Lavdëruar.

Jobesimtarët pretendojnë se nuk do të ringjallen. Thuaju: "Po, për Zotin tim, do të ringjalleni gjithsesi dhe pastaj do të njoftoheni për punët që keni bërë!" E kjo është e lehtë për Allahun.

Prandaj, besoni Allahun, të Dërguarin e Tij dhe Dritën (Kuranin) që e kemi zbritur! Allahu di mirë gjithçka që bëni.

Atë Ditë Ai do t’ju mbledhë për Ditën e Tubimit. Ajo është Dita e Humbjes[1]. Atij që e beson Allahun dhe bën vepra të mira, Ai do t’ia shlyejë gjynahet dhe do ta fusë në kopshte të Xhenetit, nëpër të cilat rrjedhin lumenj, ku do të qëndrojnë përgjithmonë. Kjo është fitorja e madhe. ——— [1] Është quajtur "Dita e Humbjes" sepse atë ditë do të dalë në shesh kush është fituesi i vërtetë dhe kush është humbësi: jobesimtarët humbin Xhenetin, ndërsa besimtarët fitojnë Xhenetin dhe trashëgojnë shpërblimin që jobesimtarët do ta merrnin po të kishin besuar.

Ndërkaq, ata që nuk besuan dhe përgënjeshtruan ajetet Tona do të jenë banorë të Zjarrit, ku do të qëndrojnë përgjithmonë. Eh, sa vendbanim i keq që është ai!

Çdo fatkeqësi që ju godet, ndodh me lejen e Allahut. Allahu ia udhëzon zemrën atij që e beson Atë. Allahu është i Gjithëdijshëm për çdo gjë.

Bindjuni Allahut e bindjuni të Dërguarit! Nëse ktheni shpinën, atëherë i Dërguari Ynë ka për detyrë vetëm kumtimin e qartë!

Allahu është Ai përveç të Cilit nuk ka zot që meriton të adhurohet. Vetëm Allahut le t'i mbështeten besimtarët!

O ju që besoni! Vërtet disa prej bashkëshorteve e fëmijëve tuaj janë armiq për ju, prandaj ruhuni prej tyre! Por, nëse i falni, i anashkaloni gabimet dhe ua mbuloni ato, atëherë Allahu është Falës i Madh e Mëshirëplotë.

Në të vërtetë, pasuria dhe fëmijët tuaj janë sprovë për ju. Ndërkohë, tek Allahu ka shpërblim të madh.

Prandaj, kijeni frikë Allahun sa të keni mundësi, si dhe dëgjoni, binduni dhe shpenzoni për bamirësi për të mirën tuaj. E ata që ruhen nga lakmia e shpirtit, të tillët janë të shpëtuarit.

Nëse ju i jepni Allahut ndonjë hua të mirë, Ai jua shton atë shumëfish dhe ju fal. Allahu është Mirënjohës e i Butë.

Ai është Njohësi i së fshehtës e i së dukshmes, i Gjithëfuqishmi, i Urti.

O Pejgamber! Kur t’i ndani gratë, ndajini ato gjatë kohës së lejuar për këtë[1] dhe llogariteni mirë periudhën e pritjes. Kijeni frikë Allahun, Zotin tuaj! Mos i nxirrni ato nga shtëpitë e veta e as ato të mos dalin, përveçse nëse bëjnë ndonjë paturpësi të qartë. Këta janë kufijtë e Allahut. E kush i shkel kufijtë e Allahut, i ka bërë padrejtësi vetvetes. Ti nuk e di, ndoshta Allahu sjell pas kësaj ndonjë çështje të re. ——— [1] Koha e lejuar për shkurorëzimin është pas pastrimit nga të përmuajshmet, me kusht që gjatë asaj kohe të mos kenë pasur marrëdhënie intime.

Kur t'u afrohet fundi i kohës së pritjes, ose mbajini si duhet, ose ndajini në mënyrë të hijshme dhe merrni dy dëshmitarë të drejtë nga mesi juaj dhe përmbajuni dëshmisë për hir të Allahut! Kjo këshillë vlen për çdonjërin që e beson Allahun dhe Ditën e Fundit. Atij që i frikësohet Allahut, Ai i hap rrugëdalje

dhe e furnizon prej nga nuk e pret. Atij që i mbështetet Allahut, Ai i mjafton. Allahu përmbush vendimin e Vet. Allahu ka përcaktuar masën për çdo gjë.

Nëse dyshoni për ato gra që u janë ndërprerë të përmuajshmet, koha e pritjes së tyre është tre muaj, ashtu si edhe për ato që nuk u kanë ardhur ende të përmuajshmet. Ndërkaq, afati i shtatzënave është deri në lindje. Atij që i frikësohet Allahut, Ai ia lehtëson çështjen.

Këto janë vendimet që Allahu i ka zbritur për ju. Atij që i frikësohet Allahut, Ai ia shlyen të këqijat dhe ia shton shpërblimin.

Gratë e ndara le të banojnë aty ku banoni ju[2], sipas mundësive tuaja, dhe mos u bëni dëm për t'i detyruar (të largohen). Nëse janë shtatzëna, atëherë shpenzoni për to derisa të lindin. Në qoftë se ato i ushqejnë me gji fëmijët tuaj, jepuani atyre shpërblimin dhe merruni vesh me të mirë. E, nëse nuk hasni në mirëkuptim, atëherë le t'i ushqejë me gji ndonjë grua tjetër. ——— [2] në periudhën e pritjes.

I pasuri le të shpenzojë sipas mundësive të tij, ndërsa i varfri le të shpenzojë nga ajo që i ka dhënë Allahu. Allahu nuk e ngarkon askënd përtej asaj që i ka dhënë. Pas vështirësisë, Allahu sjell lehtësimin.

Sa e sa qytete që kundërshtuan urdhrat e Allahut dhe të dërguarve të Tij i morëm në llogari të rëndë dhe i ndëshkuam me dënim të ashpër.

Ata shijuan pasojat e veprimeve të veta dhe fundi i tyre qe shkatërrim.

Allahu ka përgatitur për ta dënim të rëndë. Prandaj, kini frikë Allahun, o njerëz të mençur që keni besuar! Allahu jua dërgoi këshilluesin:

një të dërguar që jua lexon ajetet e Allahut që janë të qarta, për të nxjerrë ata që besojnë dhe bëjnë vepra të mira nga errësirat në dritë. Atë që e beson Allahun dhe bën vepra të mira, e fut në kopshte të Xhenetit, nëpër të cilat rrjedhin lumenj, ku do të jetë përgjithmonë. Allahu i ka përgatitur atij rrizk të këndshëm.

Allahu është Ai që krijoi shtatë qiej dhe po aq toka. Vendimi i Tij zbret ndërmjet tyre, që ta dini se Allahu është i Plotfuqishëm për çdo gjë dhe se Allahu ka përfshirë gjithçka me diturinë e Tij.

O Pejgamber! Përse ia ndalon vetes atë që Allahu ta ka lejuar, duke kërkuar kënaqësinë e grave të tua?! Allahu është Falës i Madh e Mëshirëplotë.

Allahu ka përcaktuar mënyrën e zgjidhjes së betimeve tuaja. Allahu është Mbrojtësi juaj. Ai është i Gjithëdijshmi, i Urti.

Kur Pejgamberi i besoi një fjalë të fshehtë njërës prej grave të veta, e ajo e tregoi, por Allahu ia bëri të ditur atij, ai i tha një pjesë asaj, ndërsa pjesën tjetër nuk ia përmendi. Kur ai ia tregoi këtë, ajo tha: "E kush ta tregoi ty?!" Ai tha: "Ma tregoi i Gjithëdijshmi, i Cili di hollësisht çdo gjë."

Nëse ju të dyja pendoheni tek Allahu, bëni gjënë e duhur, sepse zemrat tuaja tashmë kishin anuar[1]; e, nëse ju bashkoheni kundër tij, atëherë ta dini se Allahu është Mbrojtës i tij, e edhe Xhibrili dhe besimtarët e mirë, e pastaj edhe melekët e mbështesin atë. ——— [1] Zemrat e tyre u prirën nga diçka që ishte e papëlqyer për të Dërguarin e Allahut ﷺ.

Nëse ai ju lëshon, Zoti i tij mund t'ju zëvendësojë me gra më të mira se ju: muslimane, besimtare, të përkushtuara, të penduara, adhuruese, agjëruese dhe të martuara më parë e të virgjra.

O ju që besoni! Ruani veten dhe familjet tuaja nga një Zjarr, lëndë djegëse e të cilit janë njerëzit dhe gurët! Atë e mbikëqyrin melekë të ashpër e të fuqishëm, që nuk i kundërshtojnë urdhrat e Allahut dhe bëjnë gjithçka që u urdhërohet.

O ju që nuk besuat! Sot mos u shfajësoni; do të dënoheni vetëm për veprat që keni bërë.

O ju që besoni! Kthehuni tek Allahu me një pendim të sinqertë, që Zoti juaj t’jua shlyejë të këqijat tuaja dhe t’ju shpjerë në kopshte të Xhenetit, nëpër të cilat rrjedhin lumenj, Ditën kur Allahu nuk do ta turpërojë Pejgamberin dhe ata që besuan me të; drita e tyre do të shndrisë para tyre dhe në të djathtë të tyre. Ata do të thonë: "Zoti ynë, plotësoje dritën tonë dhe falna ne! Vërtet, Ti je i Plotfuqishëm për çdo gjë."

O Pejgamber! Luftoji jobesimtarët e dyfytyrëshit dhe ji i ashpër ndaj tyre! Vendstrehimi i tyre do të jetë Xhehenemi. Eh, sa vendbanim i keq që është ai!

Allahu solli si shembull për jobesimtarët gruan e Nuhut dhe gruan e Lutit. Ato ishin të martuara me dy robër Tanë të mirë, por i tradhtuan ata (duke mos besuar). Prandaj, ata nuk do t'u bëjnë kurrfarë dobie para Allahut dhe atyre të dyjave do t'u thuhet: "Hyni në Zjarr së bashku me ata që po hyjnë!"

Ndërkaq, për besimtarët, Allahu solli si shembull gruan e Faraonit, e cila tha: "Zoti im! Më ndërto pranë Teje një shtëpi në Xhenet, më shpëto nga Faraoni e veprat e tij dhe më shpëto prej popullit zullumqar!"

Edhe Merjemen, bijën e Imranit, e cila e ruajti nderin e saj. Ne frymë brenda saj shpirtin. Ajo u besoi fjalëve të Zotit të saj e Librave të Tij dhe ishte prej të përkushtuarve.

I bekuar është Ai, në Dorën e të Cilit është tërë pushteti dhe që është i Plotfuqishëm për çdo gjë.

Ai krijoi vdekjen e jetën për t'ju provuar se cili nga ju është më punëmirë. Ai është i Gjithëfuqishmi, Falësi i Madh.

Ai krijoi shtatë qiej, palë-palë. Në krijimin e të Gjithëmëshirshmit nuk mund të shohësh asnjë mangësi. Hidhe shikimin: a sheh ndonjë të çarë?

Pastaj hidhe shikimin radhazi; do të të kthehet shikimi i dështuar e i lodhur.

Në të vërtetë, Ne e zbukuruam qiellin më të afërt me yje ndriçuese dhe i bëmë gjuajtëse kundër shejtanëve, për të cilët kemi përgatitur dënimin e Zjarrit flakërues.

Ndërkaq, për ata që mohojnë Zotin e tyre është dënimi i Xhehenemit. Eh, sa vendbanim i keq që është ai!

Kur të hidhen në të, do të dëgjojnë ushtimën e tij të tmerrshme, ndërsa vlon.

Gati sa nuk shpërthen nga zemërimi. Sa herë që aty të hidhet një grup, rojtarët e saj do t’u thonë: "A nuk ju erdhi asnjë paralajmërues?!"

Ata do të thonë: "Po, na erdhi një paralajmërues, por ne e përgënjeshtruam e thamë: "Allahu nuk ka shpallur asgjë, ndërsa ju jeni në një humbje të madhe!"

Dhe do të thonë: "Sikur të kishim dëgjuar e të kishim pasur mend, nuk do të ishim ndër banorët e Zjarrit flakërues!"

Pra, ata do ta pranojnë fajin e tyre. Andaj, larg (mëshirës së Zotit) qofshin banorët e Zjarrit flakërues!

Me të vërtetë, për ata që i frikësohen Zotit të tyre pa e parë Atë, do të ketë falje dhe shpërblim të madh.

Flitni fshehtas po deshët ose haptas, s'ka dyshim se Ai di mirë çfarë ka në zemra.

E si të mos e dijë Ai që krijoi gjithçka, kur Ai është i Buti e i Gjithëdituri?!

Ai e bëri Tokën të përshtatshme për ju; prandaj ecni nëpër viset e saj dhe hani nga furnizimi i Tij. Tek Ai është kthimi.

A ndiheni të sigurt se Ai që është në qiell nuk do ta bëjë tokën t’ju përpijë, kur ajo të dridhet papritur?

Apo ndiheni të sigurt se Ai që është në qiell nuk do të lëshojë kundër jush rrebesh gurësh? Atëherë do të kuptoni ç'është paralajmërimi Im!

Edhe ata që qenë para tyre patën përgënjeshtruar. Eh, si ishte dënimi Im!

A nuk i shohin shpendët sipër tyre se si i hapin e i mbyllin krahët? Ata i mban vetëm i Gjithëmëshirshmi. Vërtet, Ai sheh çdo gjë.

E cila na qenka ajo ushtri që mund t'ju mbrojë prej të Gjithëmëshirshmit?! Në të vërtetë, jobesimtarët gjenden në mashtrim.

Kush është ai që mund t'ju furnizojë, nëse Ai jua ndalon rrizkun? Por, ata këmbëngulin në kryeneçësi e largim.

A është më i udhëzuar ai që ecën me fytyrë përtokë apo ai që ecën drejt në rrugën e drejtë?

Është Ai që ju krijoi e jua dha të dëgjuarit, shikimin dhe zemrat. Sa pak që falënderoni!

Thuaju: "Është Ai që ju shpërndau në Tokë dhe tek Ai do të tuboheni."

Ata thonë: "Kur do të përmbushet ky premtim, nëse thoni të vërtetën?"

Thuaju: "Dija për këtë është vetëm tek Allahu, kurse unë jam vetëm një paralajmërues i qartë."

Kur të shohin dënimin për së afërmi, fytyrat e atyre që nuk besuan do të zymtohen dhe do t'u thuhet: "Ja, kjo është ajo që e kërkonit me ngulm!"

Thuaju: "Pa më thoni, nëse Allahu më shkatërron mua dhe ithtarët e mi ose na mëshiron, atëherë kush mund t'i shpëtojë jobesimtarët nga dënimi i dhembshëm?!"

Thuaj: "Ai është i Gjithëmëshirshmi; Atë e besojmë dhe Atij i mbështetemi e ju do ta merrni vesh se kush është në humbje të qartë."

Thuaj: "Më tregoni: nëse uji juaj shteret, kush mund t'ju sjellë ujë që buron?!"

Nun.[1] Betohem në pendën dhe në atë që ata shkruajnë ——— [1] Shih fusnotën përkatëse tek ajeti i parë i sures El-Bekare.

se ti, falë mirësisë së Zotit tënd, nuk je i çmendur.

Me të vërtetë, për ty ka shpërblim të pandërprerë.

Dhe, vërtet, ti je në një shkallë të lartë të moralit.

Ti do të shohësh, e edhe ata do të shohin,

se cili prej jush është i sprovuar me çmenduri.

S'ka dyshim se Zoti yt e di më së miri se kush është shmangur nga rruga e Tij dhe Ai e di më së miri se cilët janë të udhëzuarit.

Prandaj, mos iu bind përgënjeshtruesve!

Ata dëshirojnë që ti të bësh lëshime, që edhe ata të bëjnë lëshime.

Mos iu bind asnjë berrejshmi të përbuzur,

që është përgojues e bartës fjalësh,

pengues i së mirës, zullumqar e gjynahqar i madh,

i vrazhdë dhe, për më tepër, kopil,

vetëm pse ka pasuri e djem!

Kur t’i lexohen ajetet Tona, thotë: “Këto janë përralla të të parëve!”

Ne do ta damkosim atë në hundë.

Ne i sprovuam ata, ashtu siç i sprovuam pronarët e kopshtit, kur u betuan se do të vilnin (frutat) herët në mëngjes

pa thënë: "Në dashtë Allahu."

Kështu, kopshtin e goditi një zjarr nga Zoti yt teksa ata flinin

dhe ai u bë shkrumb.

E në mëngjes, ata thirrën njëri-tjetrin:

"Shkoni herët te kopshti juaj, nëse doni t'i vilni frutat!"

Ata u nisën duke pëshpëritur:

“Kurrsesi mos lejoni të hyjë sot aty asnjë i varfër!”

Ata shkuan të vendosur në qëllimin e tyre.

Por, kur e panë atë, thanë: "Paskemi gabuar rrugën.

Jo, por qenkemi privuar!"

Më i maturi ndër ta tha: "A nuk ju thashë ta lartësoni Allahun?!"

Ata thanë: "I patëmeta është Zoti ynë. Ne ishim njëmend të padrejtë.

Atëherë, zunë të qortonin njëri-tjetrin.

Thanë: "Mjerë ne! Me të vërtetë i kaluam kufijtë."

"Ndoshta Zoti ynë do të na japë ndonjë kopsht më të mirë; vetëm te Zoti ynë i mbajmë shpresat."

I tillë është dënimi, por dënimi i botës tjetër është më i madh, veç sikur ta dinin!

Me të vërtetë, për të devotshmit, te Zoti i tyre, janë Kopshtet e Lumturisë.

Vallë, a t’i trajtojmë muslimanët[2] njësoj si keqbërësit?! ——— [2] të nënshtruarit ndaj Zotit.

Ç'keni që gjykoni kështu?!

Mos keni ndonjë libër që lexoni,

në të cilin gjendet ajo që dëshironi?!

Apo mos keni marrë prej Nesh ndonjë zotim që vlen deri në Ditën e Kiametit, se ju do ta keni atë që keni caktuar për vete?!

Pyeti ata se cili prej tyre ua garanton atë!

Apo mos kanë ortakë? Atëherë, le t'i sjellin ortakët e vet, nëse e thonë të vërtetën!

Ditën kur do të zbulohet Kërciri, ata do të thirren për të rënë në sexhde, por nuk do të munden.

Sytë e tyre do të jenë të përulur e do t'i mbulojë poshtërimi, pasi ata thirreshin për të rënë në sexhde sa ishin të shëndoshë.

Prandaj, më lër Mua me ata që e përgënjeshtrojnë këtë fjalë (Kuranin). Ne do t’i tërheqim ata shkallë-shkallë (drejt dënimit), në një mënyrë që as do ta kuptojnë.

Unë do t'u jap afat atyre. Me të vërtetë, kurthi Im është i fortë.

Apo mos po kërkon prej tyre shpërblim e janë rënduar nga borxhet?!

Apo mos gjendet tek ata gajbi (e fshehta) e po e shkruajnë?!

Prandaj, duro për vendimin e Zotit tënd e mos u bëj si njeriu i peshkut[3], kur u lut duke qenë i shqetësuar. ——— [3] Junusi, alejhis-selam.

Sikur të mos e kishte kapluar mirësia e Zotit të vet, do të hidhej në shkretëtirë, i qortuar.

Por, Zoti i tij e zgjodhi dhe e bëri prej të mirëve.

Jobesimtarët veç sa nuk të zhdukin me shikimet e tyre kur e dëgjojnë Këshillën (Kuranin) dhe thonë: "Ai është vërtet i çmendur!"

Por, ai (Kurani) është vetëm këshillë për botën.

E Vërteta e Pashmangshme (Kiameti)!

Ç'është e Vërteta e Pashmangshme?

E ç'të bën ty të dish se ç'është e Vërteta e Pashmangshme?

Themudët dhe adët e përgënjeshtruan Ndodhinë tronditëse (Kiametin).

Sa u përket themudëve, ata u shkatërruan nga një gjëmim i tmerrshëm,

ndërsa adët u shkatërruan nga një erë e ftohtë dhe e tërbuar,

të cilën Allahu e dërgoi kundër tyre shtatë net e tetë ditë radhazi; e mund t'i shihje njerëzit të rrëzuar si të ishin trungje hurmash të zbrazëta.

A sheh ndonjë gjurmë të tyre?

Edhe Faraoni, ata që ishin para tij dhe vendbanimet e përmbysura[1] bënë gjynahe të rënda. ——— [1] Populli i Lutit, alejhis-selam.

Ata e kundërshtuan të dërguarin e Zotit të tyre, kështu që Ai i ndëshkoi me një dënim të ashpër.

Kur vërshoi uji, Ne ju ngarkuam në anije,[2] ——— [2] Bëhet fjalë për besimtarët që i besuan Nuhut, alejhis-selam, të cilët i shpëtoi Allahu duke i ngarkuar në anije, ndërsa jobesimtarët i përmbyti.

për ta bërë atë mësim për ju dhe që ta mbajë mend çdo vesh i mprehtë.

E kur të fryhet në sur një herë të vetme,

dhe toka e malet të ngrihen e të thërrmohen me një goditje të vetme,

atëherë do të ndodhë Ngjarja e Pashmangshme (Kiameti).

Atë Ditë, qielli do të çahet dhe do të jetë i brishtë.

Melekët do të jenë në skajet e tij e Arshin e Zotit tënd, atë Ditë, do ta mbajnë tetë nga ata.

Atë Ditë, ju do të paraqiteni (para Zotit) dhe asnjë fshehtësi juaja nuk do të mbetet e fshehur.

Sa për atë që do ta marrë librin e vet me të djathtën, do të thotë: "Ja, lexojeni librin tim!

Unë isha i bindur se do të jepja llogari."

Ai do të ketë një jetë të kënaqshme,

në një kopsht të lartë Xheneti,

frutat e të cilit do t’i ketë afër.

(Atyre do t’u thuhet:) "Hani e pini me kënaqësi, (si shpërblim) për atë që keni bërë në ditët e kaluara!"

E, sa i përket atij që do ta marrë librin e vet me të majtën, do të thotë: "Ah, sikur të mos më ishte dhënë libri im

e të mos e kisha ditur se ç’është llogaria ime!

Ah, sikur ajo (vdekja) të kishte qenë fundi im!

Pasuria ime s’më bëri asnjë dobi

dhe u zhduk nga unë fuqia ime."

(Do t'u thuhet melekëve): “Kapeni atë e lidheni në pranga!

Pastaj futeni në Zjarrin flakërues!

Mandej futeni në zinxhirë shtatëdhjetë kutesh të gjatë,

sepse ai nuk e besonte Allahun e Madhërishëm

dhe nuk nxitte për të ushqyer të varfrit.

Prandaj, sot, ai nuk do të ketë këtu as mik të ngushtë

e as ushqim tjetër përveç qelbit,

që s’e ha kush pos gjynahqarëve

Betohem në gjithçka që ju shihni

dhe në gjithçka që nuk e shihni,

se ky (Kuran) është fjalë e (kumtuar prej) një të dërguari fisnik

e jo fjalë e ndonjë poeti. Sa pak që besoni!

As fjalë e ndonjë falltari. Sa pak që mendoni!

Ai është shpallje prej Zotit të botëve.

Në qoftë se ai (Muhamedi) do të na kishte veshur ndonjë fjalë,

Ne do ta kapnim atë me të djathtën[3], ——— [3] Domethënë: me forcë.

e pastaj do t’ia këputnim damarin e qafës

dhe askush prej jush s'do të mund ta mbronte.

Me të vërtetë, ky (Kuran) është këshillë për të devotshmit.

Ne e dimë mirë se ndër ju ka përgënjeshtrues.

Por, në të vërtetë, ai është dëshpërim për jobesimtarët

dhe ai është njëmend e vërteta e sigurt.

Prandaj, lartësoje emrin e Zotit tënd të Madhërishëm.

Dikush kërkoi një dënim të pashmangshëm

për jobesimtarët, të cilin s'mund ta ndalë askush.

Ai vjen nga Allahu, Zoti i lartësive.

Tek Ai ngjiten melekët dhe Shpirti (Xhibrili) në një Ditë që është sa pesëdhjetë mijë vjet.

Prandaj, bëj durim të hijshëm!

Në të vërtetë, ata e shohin atë (dënimin) larg,[1] ——— [1] Mendojnë se është e pamundur të ndodhë ai dënim.

kurse Ne e shohim afër.

Ditën kur qielli të bëhet si bakër i shkrirë,

e malet të bëhen si lesh i shprishur

dhe kur asnjë mik s'do të pyesë për mikun e vet,

edhe pse do të shohin njëri-tjetrin. Keqbërësi, do të dëshironte të lirohej nga dënimi i asaj Dite, qoftë dhe duke flijuar bijtë e tij,

gruan e tij, vëllanë e tij,

farefisin, i cili e përkrahte

dhe të gjithë ata që janë në Tokë, vetëm që vetë të shpëtonte!

Por, jo! Ai është një Zjarr flakërues,

që shkul lëkurën e kokës.

Ai thërret atë që kthen shpinën e largohet (nga besimi),

atë që grumbullon pasuri dhe e ruan.

Me të vërtetë, njeriu është krijuar i papërmbajtshëm:

kur e godet ndonjë e keqe, ankohet tepër,

e, kur i vjen ndonjë e mirë, bëhet koprrac.

Përjashtim bëjnë ata që falen,

të cilët janë të qëndrueshëm në namazin e tyre

dhe në pasuritë e tyre ka hise të caktuar

për lypësin dhe të privuarin;

që e besojnë Ditën e Gjykimit;

që frikësohen nga dënimi i Zotit të tyre,

sepse nga dënimi i Zotit nuk është i sigurt askush;

që e ruajnë nderin e tyre,

përveçse ndaj grave të veta ose ndaj atyre (robëreshave) që i kanë në pronësi, – për këtë nuk qortohen, –

por kush kërkon përtej kësaj, mu ata janë të shfrenuarit;

si dhe që u përmbahen amaneteve e marrëveshjeve të tyre,

që dëshmojnë drejt

dhe që kujdesen rregullisht për namazet e tyre.

Këta do të jenë të nderuar në kopshte të Xhenetit.

Ç’është puna e jobesimtarëve që nxitojnë kundrejt teje

djathtas e majtas, të ndarë në grupe?!

A mos shpreson secili prej tyre se do të futet në Kopshtin e Lumturisë?!

Kurrsesi! Ne i kemi krijuar ata prej asaj që e dinë vetë.

Betohem në Zotin e lindjeve dhe perëndimeve, se Ne gjithsesi jemi të plotfuqishëm

t’i zëvendësojmë ata me të tjerë më të mirë se ata, dhe askush s'mund të na pengojë.

Prandaj, lëri ata të zhyten (në gjëra të kota) e të argëtohen derisa të ballafaqohen me Ditën që u premtohet.

Ditën kur do të dalin me nxitim nga varret, sikur të ishin duke nxituar drejt idhujve,

me sy të përulur që do t’i mbulojë turpi. Kjo është Dita që u ishte premtuar atyre.

Ne e dërguam Nuhun te populli i tij (duke i thënë): "Paralajmëroje popullin tënd para se t’i vijë një dënim i dhembshëm!"

Ai tha: "O populli im! Vërtet, unë jam paralajmërues i qartë për ju:

adhurojeni Allahun, frikësojuni Atij dhe bindmuni mua,

që t'jua falë gjynahet tuaja dhe t'ju japë afat deri në një kohë të caktuar. E, kur të vijë afati i Allahut, nuk mund të shtyhet, veç sikur ta dinit!

Ai tha: "Zoti im, unë e thirra popullin tim natë e ditë,

por thirrja ime vetëm ua shtoi ikjen.

Madje, sa herë që i thirrja që Ti t’i falje, ata fusnin gishtat në veshë, mbuloheshin me rroba, ngulnin këmbë (në mosbesim) dhe silleshin me mendjemadhësi.

Pastaj, unë i thirra haptazi.

Më pas, i thirra edhe me zë të lartë, e edhe fshehurazi

e u thashë: "Kërkoni falje nga Zoti juaj, sepse Ai është shumë Falës,

që t'ju lëshojë shi me bollëk,

t'jua shtojë pasurinë e fëmijët dhe të bëjë për ju kopshte e lumenj!"

Ç'është puna juaj që nuk e madhëroni Allahun siç i takon,

ndërkohë që Ai ju ka krijuar në disa etapa?!

A nuk e shihni si i ka krijuar Allahu shtatë qiej, palë-palë

dhe në ta e ka bërë Hënën dritë, kurse Diellin kandil?

Allahu ju krijoi prej tokës,[1] ——— [1] E krijoi Ademin (paqja qoftë mbi të!), babanë e njerëzimit, prej dheu.

pastaj ju kthen në të dhe më pas ju nxjerr prej saj.

Allahu jua bëri Tokën të sheshtë,

që të mund të ecni nëpër rrugët e saj të gjera."

Nuhu tha: "Zoti im, ata më kundërshtuan dhe ndoqën ata, pasuria dhe fëmijët e të cilëve nuk u shtuan gjë tjetër atyre përveç humbjes.

Dhe kurdisën një kurth të madh

e thanë: 'Kurrsesi mos i lini zotat tuaj! Mos e lini as Vedin, as Suvain, as Jeguthin, as Jeukun e as Nesrin!'

Njëmend, ata çuan në humbje shumëkënd. Prandaj, të padrejtëve mos u shto gjë tjetër përveç humbjes!"

Për shkak të gjynaheve të tyre, ata u përmbytën e pastaj u hodhën në Zjarr dhe nuk gjetën askënd që t'i mbrojë prej Allahut.

Nuhu tha: "Zoti im, mos lër mbi tokë asnjë banor jobesimtar,

sepse, po i le, ata do t'i çojnë në humbje robërit e Tu dhe do të lindin vetëm të shfrenuar e mohues.

Zoti im! Më fal mua, prindërit e mi dhe këdo që hyn në shtëpinë time si besimtar, si dhe gjithë besimtarët e besimtaret, ndërsa zullumqarëve shtoju vetëm shkatërrim!

Thuaj: "Mua më është shpallur se disa xhinë dëgjuan me vëmendje (Kuranin) dhe thanë: "Me të vërtetë, ne dëgjuam një Kuran të mahnitshëm,

që udhëzon drejt së vërtetës, prandaj ne i besuam atij dhe kurrë më nuk do t'i shoqërojmë Zotit tonë askënd (në adhurim).

Ai, Zoti ynë i Lartmadhërishëm, nuk ka marrë grua e as fëmijë,

por mendjelehtët nga ne thoshin të pavërteta për Allahun,

ndërsa ne mendonim se as njerëzit e as xhinët nuk do të thoshin gënjeshtra për Allahun.

Madje, disa burra nga njerëzit kërkonin mbrojtje prej disa burrave xhinë e ata vetëm ua shtonin paudhësinë.

Ata mendonin, siç mendonit edhe ju, se Allahu nuk do të ringjallë askënd.

Ne mësymë qiellin, por e gjetëm përplot me rojtarë të fuqishëm e me shigjeta flakëruese.

Ndërkaq, më parë uleshim nëpër vende të caktuara të qiellit për të dëgjuar, por ai që përgjon tani, gjen një shigjetë flakëruese që i rri në pritë.

Ndërkohë, ne nuk e dimë nëse është për qëllim diçka e keqe për ata që janë në Tokë apo Zoti i tyre dëshiron t'i udhëzojë.

Ndër ne ka të mirë, por ka edhe që nuk janë të tillë; ne jemi të ndarë në rrugë të ndryshme.

Ne e kuptuam se nuk mund t’i shpëtojmë Allahut në Tokë e as mund t’i shmangemi duke ikur.

Sapo e dëgjuam udhëzimin, i besuam atij. E kush e beson Zotin e vet, nuk do të ketë frikë nga kurrfarë dëmtimi e as padrejtësie.

Ndër ne ka muslimanë (të nënshtruar ndaj Zotit), por ka edhe të padrejtë. E ata që pranuan Islamin, janë ata që e mësynë rrugën e drejtë.

Ndërkaq, të padrejtët do të jenë lëndë djegëse të Xhehenemit."

E sikur të qëndronin në rrugën e drejtë, Ne do t'u jepnim ujë me bollëk,

për t'i sprovuar me të. E kush ia kthen shpinën këshillës së Zotit të vet, Ai do ta fusë në një dënim të rëndë.

Me të vërtetë, xhamitë janë vetëm për Allahun, prandaj mos iu falni askujt krahas Allahut!

Kur robi i Allahut (Muhamedi) u ngrit t’i falej Atij, ata veç sa nuk hipën mbi njëri-tjetrin (për ta dëgjuar Kuranin).

Thuaj: "Unë i falem vetëm Zotit tim dhe nuk i shoqëroj Atij askënd (në adhurim)."

Thuaj: "Unë nuk kam në dorë t’ju sjell dëm e as dobi."

Thuaj: "Askush nuk mund të më mbrojë nga Allahu dhe kurrë nuk do të gjej ndonjë strehë askund, përveçse tek Ai."

Unë kam për detyrë vetëm të përcjell të vërtetën që më vjen nga Allahu dhe mesazhet e Tij. E kush i kundërvihet Allahut dhe të Dërguarit të Tij, për të do të jetë Zjarri i Xhehenemit, ku do të qëndrojë përgjithmonë.

Kur të shohin atë që u është premtuar, atëherë do ta marrin vesh se kush ka ndihmës më të dobët dhe numër më të vogël.

Thuaj: "Unë nuk e di a është afër ajo që ju premtohet apo Zoti im e ka lënë për më vonë."

Ai është Njohësi i së fshehtës dhe askujt nuk ia zbulon të fshehtën e Tij,

përveç ndonjë të dërguari që Ai e zgjedh.[1] Përpara dhe prapa tij Ai vë roja mbrojtëse, ——— [1] Allahu ua zbulon disa fshehtësi disa të dërguarve të Vet, për të dëshmuar vërtetësinë e tyre dhe u cakton melekë që ta ruajnë atë nga shejtanët.

që të bëhet e ditur se ata (të dërguarit) kanë kumtuar mesazhet e Zotit të tyre. Ai di gjithçka që ata kanë dhe Ai di numrin e çdo gjëje.

O i mbuluar!

Çohu të falesh natën, përveç një pjese të saj,

gjysmën e saj, ose pak më pak,

ose pak më shumë dhe lexoje Kuranin ngadalë e qartë!

Me të vërtetë, Ne do të të shpallim një fjalë me peshë të rëndë.

Njëmend, ngritja (për t'u falur) gjatë natës ndikon më fort dhe fjala në të është më e qartë.

Ndërkaq, gjatë ditës je i zënë me punë të shumta.

Përmende emrin e Zotit tënd dhe përkushtoju tërësisht Atij!

Ai është Zoti i lindjes e i perëndimit; s’ka zot që meriton të adhurohet përveç Tij, prandaj Atë merre për Mbikëqyrës.

Duro atë që thonë ata dhe largohu nga ata në mënyrë të hijshme!

E lërmë Mua (të merrem) me përgënjeshtruesit pasanikë dhe jepu pak afat atyre,

se, vërtet, Ne kemi (për ta) pranga, zjarr flakërues,

ushqim që s'kapërdihet dhe dënim të dhembshëm,

Ditën kur Toka e malet do të dridhen dhe malet do të bëhen si grumbuj rëre të rrëshqitshme.

Me të vërtetë, Ne çuam te ju një të dërguar, dëshmitar kundrejt jush, ashtu siç dërguam te Faraoni një të dërguar,

por Faraoni kundërshtoi të dërguarin, prandaj Ne e kapëm atë me një dënim të rëndë.

E, nëse mohoni, si do t’i ruheni një Dite që i bën fëmijët të thinjen?!

Atë Ditë qielli do të çahet e premtimi i Zotit do të përmbushet patjetër.

Në të vërtetë, kjo është këshillë, prandaj kush të dojë le të marrë rrugën që e çon te Zoti i vet.

Zoti yt e di se ti falesh më pak se dy të tretat e natës, gjysmën e saj ose një të tretën e saj, e edhe një pjesë e atyre që janë me ty. Allahu e cakton gjatësinë e natës dhe të ditës. Ai e di se ju nuk do të keni mundësi ta bëni[1], prandaj lëshoi mëshirë mbi ju. Pra, lexoni çka t'ju vijë më lehtë nga Kurani. Ai e di se ndër ju do të ketë të sëmurë, të tjerë që udhëtojnë në tokë duke kërkuar mirësitë e Allahut dhe të tjerë që luftojnë në rrugën e Allahut, prandaj lexoni çka t'ju vijë më lehtë nga ai. Dhe faleni namazin, jepeni zekatin dhe jepni Allahut hua të mirë! Çfarëdo të mire që bëni për veten tuaj, do ta gjeni tek Allahu, madje edhe më të mirë e me shpërblim më të madh. Kërkoni faljen e Allahut, se, pa dyshim, Allahu është Falës i Madh e Mëshirëplotë. ——— [1] Domethënë: Allahu e di se ju nuk do të mund t'i përmbaheni rregullisht namazit të natës.

O i mbështjellë!

Çohu e paralajmëro!

Zotin tënd madhëroje,

rrobat e tua pastroji,

larg idhujve qëndro,

mos jep me qëllimin që të të jepet më shumë

dhe për Zotin tënd duro,

se, kur t'i fryhet borisë,

ajo do të jetë një Ditë e vështirë,

për jobesimtarët aspak e lehtë.

Më lër Mua me atë që e krijova të vetëm

e i dhashë pasuri me bollëk

dhe fëmijë që i qëndrojnë pranë!

Ia bëra jetën të rehatshme,

e, megjithatë, ai lakmon t'ia shtoj.

Kurrsesi! Ai ishte kryeneç kundrejt ajeteve Tona,

prandaj Unë do ta mundoj atë me dënim të rëndë.

Ai mendoi e kurdisi.

Qoftë mallkuar, si kurdisi ashtu!

Sërish, qoftë mallkuar, si kurdisi ashtu!

Pastaj vështroi,

mandej u mrrol e u zymtua

e më pas ktheu shpinën e u soll me mendjemadhësi

dhe tha: "Kjo s'është gjë tjetër përveçse magji që trashëgohet!

Kjo është vetëm fjalë njeriu!"

Unë do ta hedh në një Zjarr flakërues (në Xhehenem)!

E ç'të bën ty të dish se ç'është Zjarri flakërues?!

Ai nuk lë gjë pa djegur,

ai përcëllon lëkurat.

Mbi të janë nëntëmbëdhjetë (melekë).

Ne i kemi bërë roja të Zjarrit vetëm melekët, kurse numrin e tyre e kemi bërë vetëm sprovë për jobesimtarët, si dhe që të binden ata të cilëve u është dhënë Libri e besimtarëve t’u shtohet imani. Po ashtu, që të mos kenë mëdyshje ata që u është dhënë Libri dhe besimtarët, ndërsa ata që kanë sëmundje (dyshim) në zemër dhe jobesimtarët të thonë: "Çfarë deshi të thotë Allahu me këtë shembull?" Kështu, Allahu lë në humbje kë të dojë dhe udhëzon kë të dojë. E ushtritë e Zotit tënd nuk i di askush përveç Tij. Kjo është vetëm këshillë për njerëzit.

Kurrsesi! Betohem në Hënën,

dhe në natën kur të tërhiqet,

si dhe në agimin kur zbardh,

se ai (Xhehenemi) është një nga belatë më të mëdha,

paralajmërim për njerëzit,

për këdo prej jush që dëshiron të përparojë ose të mbetet mbrapa.

Çdo njeri është peng i veprave të veta,

përveç të djathtëve,

të cilët, duke qenë në kopshte të Xhenetit, do të pyesin njëri-tjetrin

për keqbërësit:

"Çfarë ju solli në Zjarrin flakërues?"

Ata do të thonë: “Nuk ishim prej atyre që faleshin,

as i ushqenim të varfrit,

llomotisnim me ata që llomotisnin

dhe e përgënjeshtronim Ditën e Gjykimit

derisa na erdhi vdekja."

Prandaj, atyre nuk do t’u bëjë dobi ndërmjetësimi i atyre që ndërmjetësojnë.

Vallë, çfarë kanë që largohen nga kjo këshillë,

si të ishin gomarë të egër fort të trembur

që ikin prej luanit?!

Në të vërtetë, secili prej tyre dëshiron t’i sillen fletë të hapura (nga qielli).

Jo, por ata nuk i frikësohen jetës tjetër.

Në të vërtetë, ky (Kuran) është këshillë.

Kështu, kush të dojë, le të marrë mësim prej tij!

Por, ata mund të marrin mësim vetëm nëse do Allahu. Vetëm Ai është i denjë që t'i kihet frikë dhe vetëm Ai është i Denjë për të falur.

Betohem në Ditën e Kiametit!

Betohem në shpirtin qortues!

A mendon njeriu se Ne nuk do t’ia mbledhim eshtrat?!

Po, sigurisht! Madje, Ne jemi të zotë t'ia ribëjmë në mënyrë të përkryer edhe majat e gishtërinjve.

Por, njeriu dëshiron të vazhdojë të bëjë gjynahe edhe më tej

dhe pyet: "Kur do të jetë Dita e Kiametit?"

Por, kur sytë të shtangen

e Hëna të shuhet,

dhe Dielli e Hëna të bashkohen,

atë Ditë njeriu do të thotë: "Ku të iki?!"

Kurrsesi! S’ka strehim!

Atë Ditë, te Zoti yt do të jetë caku.

Njeriut, atë Ditë, do t’i bëhet me dije çfarë ka bërë dhe çfarë ka lënë pa bërë.

Por, në të vërtetë, njeriu është dëshmitar kundër vetvetes,

edhe nëse i paraqet shfajësimet e veta.

Mos u ngut ta lexosh Kuranin me gjuhën tënde![1] ——— [1] Mos u ngut ta lexosh Kuranin me gjuhën tënde para se ta mbarojë Xhibrili leximin, nga frika se po e harron.

Është detyrë Jona ta mbledhim atë (në zemrën tënde) dhe të ta mundësojmë leximin e tij.

E, kur ta lexojmë atë, ndiqe leximin e tij!

Pastaj, është detyrë Jona shpjegimi i tij.

Jo, por ju e doni jetën kalimtare

dhe e lini pas dore jetën tjetër.

Atë Ditë, disa fytyra do të shkëlqejnë,

duke e shikuar Zotin e tyre.

E disa fytyra, atë Ditë, do të jenë të zymta,

duke pritur t'i godasë një fatkeqësi që të thyen në kurriz.

Por, kur të arrijë shpirti në grykë

e të thuhet: "Kush mund ta shërojë?",

dhe ai ta kuptojë se kjo është ndarja (nga kjo jetë),

e të puqet këmba me këmbën

atë Ditë, te Zoti yt do të jetë kthimi.

Ai as besoi e as u fal,

por, përkundrazi, përgënjeshtroi dhe ktheu shpinën,

pastaj shkoi te familja e vet, duke u krekosur.

Mjerë ti, mjerë!

Edhe një herë: mjerë ti, mjerë!

A thua mendon njeriu se do të lihet pa përgjegjësi?!

A nuk ka qenë ai një pikël që hidhet,

pastaj u bë mpiksje gjaku e më pas Allahu e krijoi dhe e përsosi

dhe prej saj bëri çiftet: mashkullin dhe femrën?!

Vallë, a nuk ka fuqi ky Zot të ringjallë të vdekurit?!

A nuk ka kaluar për njeriun një periudhë e gjatë kohore kur ai nuk ishte diçka që përmendej?!

Ne e krijuam njeriun prej një lëngu të përzier, për ta sprovuar, dhe i dhamë dëgjimin e shikimin.

Ne ia treguam atij rrugën e drejtë, që ai të jetë ose mirënjohës, ose mohues.

Ne kemi përgatitur për jobesimtarët zinxhirë, pranga dhe zjarr flakërues.

Ndërkaq, të mirët do të pinë gota (vere) me pije të përzier me kamfur,

prej një burimi nga i cili pinë robërit e Allahut dhe e kthejnë rrjedhën e tij ngado që duan.

Ata i përmbushin zotimet dhe i frikësohen një Dite, e keqja e së cilës përhapet gjithandej.

Ata u japin ushqim, – ndonëse e duan atë, – të varfërve, jetimëve dhe të zënëve robër,

(duke thënë më vete): "Ne ju ushqejmë vetëm për hir të Allahut; nuk duam prej jush as shpërblim e as falënderim.

Në të vërtetë, ne i frikësohemi (dënimit) të Zotit tonë në një Ditë të ngrysur e shumë të tmerrshme."

Prandaj, Allahu do t'i ruajë ata nga e keqja e asaj Dite e do t'u dhurojë shkëlqim e gëzim

dhe, për durimin e tyre, do t'i shpërblejë me Xhenet e petka mëndafshi.

Aty do të qëndrojnë të mbështetur në kolltukë dhe nuk do të ndiejnë vapë e as acar,

nën hijet e pemëve të Xhenetit, frutat e të cilave do t'i kenë fare pranë.

Atyre do t'u shërbehet me enë argjendi dhe kupa kristali,

të tejdukshme prej argjendi dhe të përcaktuara sipas masës (së dëshiruar).

Aty do t’u jepen për të pirë gota (vere) me pije të përzier me xhenxhefil,

prej një burimi atje të quajtur Selsebil.

Atyre do t'u shërbejnë djelmosha të përhershëm, të cilët, kur i sheh, të duken si margaritarë të shpërndarë.

Ngado që të hedhësh shikimin, do të shohësh mirësi e mbretëri madhështore.

Do të jenë të veshur me rroba të gjelbra prej mëndafshi të hollë e të trashë, do të stolisen me byzylykë argjendi dhe Zoti i tyre do t’u japë të pinë pije të pastër.

(Atyre do t’u thuhet:) "Njëmend, ky është shpërblimi juaj dhe përpjekja juaj është pranuar."

Në të vërtetë, Ne ta kemi zbritur ty Kuranin pjesë-pjesë.

Prandaj, ji i durueshëm ndaj vendimit të Zotit tënd dhe mos iu bind asnjë gjynahqari ose jobesimtari prej tyre!

Përmende emrin e Zotit tënd në mëngjes e në mbrëmje

dhe gjatë një pjese të natës bëji sexhde Atij dhe madhëroje shumë gjatë natës!

Vërtet këta (jobesimtarë) e duan jetën kalimtare dhe lënë pas shpine një Ditë të rëndë.

Ne i krijuam ata dhe ua forcuam ndërtimin trupor e, nëse duam, i zëvendësojmë me të tjerë si ata.

Në të vërtetë, kjo është këshillë, prandaj kush të dojë, le të marrë rrugën që e çon te Zoti i vet.

Por, ju nuk mund të dëshironi, përveç nëse do Allahu. Pa dyshim, Allahu është i Gjithëdijshëm, i Urtë.

Ai fut në mëshirën e Vet kë të dojë, ndërsa për zullumqarët ka përgatitur një dënim të dhembshëm.

Betohem në erërat që dërgohen njëra pas tjetrës,

në ato që fryjnë furishëm,

në ato që shpërndajnë (shiun) gjithandej,

në ato[1] që ndajnë qartë (të vërtetën nga e pavërteta), ——— [1] melekët ose ajetet

dhe në ata (melekë) që përcjellin shpalljet,

si arsyetim ose paralajmërim!

Me të vërtetë, ajo që ju premtohet do të ndodhë patjetër.

Kur yjet të shuhen,

kur qielli të çahet,

kur malet të thërrmohen

dhe kur të dërguarve t’u caktohet koha (për të dëshmuar),

e për cilën ditë është shtyrë kjo?

Për Ditën e Vendimit Përfundimtar.

E ç’të bën ty të dish se ç’është Dita e Vendimit Përfundimtar?

Atë Ditë mjerë përgënjeshtruesit!

A nuk i shkatërruam të hershmit?

Pastaj do t'i shkatërrojmë edhe të mëvonshmit.

Kështu veprojmë Ne me keqbërësit.

Atë Ditë mjerë përgënjeshtruesit!

A nuk ju krijuam prej një lëngu të përbuzur,

të cilin e vumë në një vend të sigurt (në mitër),

deri në një kohë të caktuar?

Pra, Ne e përcaktuam; sa përcaktues të shkëlqyer që jemi!

Atë Ditë mjerë përgënjeshtruesit!

A nuk e bëmë Tokën vend që mban

të gjallë e të vdekur

dhe në të vendosëm male të larta e ju dhamë të pini ujë të këndshëm?

Atë Ditë mjerë përgënjeshtruesit!

"Nisuni drejt asaj që përgënjeshtronit!

Nisuni drejt një hijeje (tymi) tridegëshe,

që nuk bën hije freskuese, as ju mbron nga flaka.

Ajo hedh shkëndija të mëdha si kulla,

si të ishin deve të zeza!

Atë Ditë mjerë përgënjeshtruesit!

Kjo është Dita kur ata nuk do të mund të flasin

e as do t'u jepet leje për t'u shfajësuar.

Atë Ditë mjerë përgënjeshtruesit!

Kjo është Dita e Vendimit Përfundimtar, ku do t'ju tubojmë ju dhe të parët tuaj.

Po patët ndonjë dredhi, atëherë përdoreni kundrejt Nesh!

Atë Ditë mjerë përgënjeshtruesit!

Të devotshmit do të jenë në hije dhe mes burimesh

e frutash që ua ka ëndja.

"Hani e pini me kënaqësi, (si shpërblim) për atë që keni bërë!"

Kështu i shpërblejmë Ne punëmbarët.

Atë Ditë mjerë përgënjeshtruesit!

Hani e kënaquni për pak kohë, se ju jeni vërtet keqbërës!

Atë Ditë mjerë përgënjeshtruesit!

E kur u thuhet atyre: "Përkuluni (në namaz)", ata nuk përkulen.

Atë Ditë mjerë përgënjeshtruesit!

Atëherë, cilën fjalë pas këtij (Kurani) do ta besojnë?!