Luganda Meal — Afrika Kalkınma Vakfı — İsra' 17:1 – Neml 27:93

Yayawukana Oyo eyatambuza omuddu We ekiro okumuggya ku muzikiti ogw'emizizo (Makkah) n'agenda ku muzikiti ogusinga okuba ogw'ewala (Jerusalemu), ogwo ebitundu ebigwetoolodde bye twawa omukisa, olwo nno tumulage obumu ku bubonero Bwaffe. Mazima Yye (Katonda) Ye awulira ennyo alaba ennyo.

Era twawa Musa Ekitabo era ne tukifuula eky'okulunngamya eri abaana ba Yisirayiri (nga mbagamba) nti nga oggyeko Nze temweteerangawo mukuumi mulala yenna.

(Abange mmwe) ezzadde ly'abo be twatwala ne Nuuhu mu lyato (mubeere nga Nuuhu), mazima yye yali muddu eyeebaza.

Era twasalawo ku baana ba Yisirayiri mu Kitabo nti mugenda kwonoonera ddala mu nsi emirundi ebiri, era mugenda kwekuluntaza olwekuluntaza oluyiritivu.

Endagaano y'omulundi ogusooka Ku gyombi bw'erituuka, tugenda kubatumira abaddu Baffe ab'amaanyi amasuffu, bagenda kutuuka ku buli kanyomero ka mayumba, (nga batuusa obuzibu ku buli omu), era (eyo) n'eba nga ndagaano eteekwa okutuukirizibwa.

Oluvannyuma twabaddiza mmwe amaanyi ku bo (ne mubawangula) era ne tubawa emmaali, n'abaana era ne tubafuula mmwe nga mmwe musinga obungi.

(Ne tubagamba nti) bwe mulongoosa mulongooseza myoyo gyammwe, ate bwe mwonoona era gye mwonoonera, Endagaano y'Enkomerero bw'erijja (tulibasindikira abantu) boonoone ebyenyi byammwe (babakkakkanye) era bagenda kuyingira omuzikiti (Jerusalem) nga bwe baaguyingira omulundi ogwasooka, olwo nno bye baliba bawangudde babibetente olubetenta.

Bwe muyisa obulungi kisoboka Mukama Omulabirizi Wammwe okubasaasira, naye bwe muddamu (okwonoona) Naffe nga tuddamu (okubabonereza)ate nga Omuliro Jahannama twagufuula ekkomera ly'abo abatakkiriza.

Mazima Kulaani eno erunngamya eri ekkubo erisinga obugolokofu, era ewa Abakkiriza abo abakola emirimu emirongoofu amawulire ag'essanyu nti: mazima bo baakufuna empeera ensukkulumu.

Era nti mazima ddala abo abatakkiriza Lunaku lwa Nkomerero twabategekera ebibonerezo ebirumya ennyo.

Omuntu (olw'ebizibu ebimutuukako) yeesabira ebibi nga bwe yandyesabidde ebirungi, anti bulijjo omuntu mupapi.

Era twassaawo ekiro n'emisana, nga bubonero bubiri, olwo nno tuggyawo akabonero k'ekiro ne tussaawo akabonero k'emisana, ne kabasobozesa okulaba mulyoke musobole okumanya ebigabwa bya Mukama Omulabirizi Wammwe, era musobole okumanya omuwendo gw'emyaka n'okubala, era buli kintu twakinnyonnyola olunnyonnyola olumala.

Era buli muntu twamukakasaako emirimu gye mu nsingo ye, era ku Lunaku lw'Enkomerero tugenda kumuggyirayo ekitabo ky'alisanga nga kibikkule.

Olwo nno aliragirwa nti soma ekitabo kyo, kimala bumazi okuba nti olwaleero ggwe wennyini ggwe ogenda okwebala.

Oyo yenna alunngama alunngamira mwoyo gwe, ate abula omwoyo gwe gw'aba aleetedde obuzibu bw'okubula, tewali mwoyo mwonoonyi gugenda kwetikka kyonoono kya mwoyo mwonoonyi mulala, era tetusobola kubonereza okuggyako nga tusoose kutuma Mubaka.

Bwe tuba twagadde okuzikiriza ekitundu kyonna (olw'obujeemu bwakyo) tulagira abali mu byengera (okweyisa obulungi) naye ate ne beeyisa bubi mu kyo, olwo nno ekigambo (eky'okubonerezebwa) ne kikikakatako, olwo nno ne tukisesebbula olusesebbula.

Mirembe emeka gye twazikiriza oluvanyuma lwa Nuuhu (nga mingi!), Mukama Omulabirizi Wo amalira ddala ku bikwata ku bibonerezo by'abaddu be, okuba nti amanyidde ddala era alaba nnyo.

Oyo ayagala eby'amangu (ensi) tumwanguyiza mu yo ekyo kye tuba twagadde si buli omu wabula oyo gwe tuba tusazeewo, oluvannyuma ne tumuteerawo Omuliro Jahannama agenda kugwesogga nga avumirirwa ate nga agobaganyizibwa (mu kusaasira kwa Katonda).

Ate omuntu ayagala Enkomerero era n'akola ebyetaagisa ku yo, era nga Mukkiriza, abo nno bye bakola byebazibwa.

Buli bamu (abalungi n'ababi ku nsi) tuwa bano na bali okuva mu bigabwa bya Mukama Omulabirizi Wo. Okugaba kwa Mukama Omulabirizi Wo tekuliiko kkomo (ku muntu yenna kuno ku nsi).

Tunula olabe engeri gye twasukkulumya abamu ku balala, wabula enkomerero y'erimu amadaala agasinga obukulu era y'erimu okusinngana okusinga obulungi.

Allah tomussangako ebisinbwa ebirala, olwo nno nekikufuula avumirirwa aboolebwa.

Mukama Omulabirizi Wo yalagira okuba nga temusinza okuggyako Yye, Yekka. Era yalagira abazadde ababiri okubayisa obulungi, singa omu ku bo, oba bombi akaddiwa nga wooli, tobagambanga ekigambo eky'okubeenyinyala era tobaboggoleranga, yogera nabo ebigambo eby'ensa.

Beetowalize era wekkakkanye gyebali olw'okubasaasira. Era gamba nti: ayi Mukama Omulabirizi Wange basaasire bombi nga bwe bandera nga ndi muto.

Mukama Omulabirizi Wammwe, y'asinga okumanya ebyo ebiri mu myoyo gyammwe (byemukisa), bwe muba nga muli abalongoosa, bulijjo musonyiyi w'abo abamwemenyera.

Ow'oluganda lwo ow'okumpi muwenga ekyo ky'oteekwa okumuwa, era owe omunaku n'omutambuze, naye todiibuuda obudiibuuzi.

Mazima abadiibuuzi be bayambi ba Sitaane (mu bwonoonefu n'obujeemu). Ate bulijjo Sitaane mujeemu eri Mukama Omulabirizi We.

Naye bw'obanga tobawadde (olw'ensonga yonna), naye ate nga oyagala era nga osuubira okusaasira kwa Mukama Omulabirizi Wo olwo nno bagambe ekigambo ekigonvu.

Omukono gwo togufuulanga oguwanikiddwa ku nsingo yo (olw'obukodo), ate togwanjuluzanga n'ogumalayo (olw'okudiibuuda), n'ofuuka anenyezebwa atasigazizza.

Mazima Mukama Omulabirizi Wo ayanjululiza obugabirizi oyo gw'aba ayagadde, n'awa mu ngeri y'empola (eri omulala) anti mazima Yye bulijjo amanyidde ddala ebikwata ku baddu be era alaba.

Era temuttanga abaana bammwe olw'okutya obwavu (okubalumba), Ffe tubagabira netugabira nammwe, mazima okubatta kibi nnyo.

Era temusembereranga obwenzi, mazima bwo kikolwa kya buwemu era kkubo bbi.

Era temuttanga omuntu oyo Allah gwe yaziza okutta okuggyako nga waliwo ensonga, era oyo yenna attibwa nga alangibwa bwereere mazima twawa nnannyini ye obuyinza (okutta eyatta omuntu we) wabula mu kutta tosaanye kusukka kikomo anti mazima yye (attiddwa) ataasibwa (n'etteeka).

Temusembereranga emmaali ya mulekwa, okuggyako olw'okugikolako ekyo ekisinga obulungi, okutuusa lw'asajjakula.Era mutuukirizenga endagaano, mazima endagaano ya kubuuzibwa.

Era mutuukirizenga ebigero bye mugera era mupime n'ebipimo ebituufu, ekyo ky'ekirungi era kye kituusa ku nkomerero ennungi.

Tewessanga ku kintu ky'otalinaako kumanya, mazima okuwulira, n'okulaba, n'omutima, buli kimu kw'ebyo byonna kigenda kubuuzibwa.

Totambulanga mu nsi nga weeraga, mazima ggwe togenda kwabya ttaka era togenda kwenkana nsozi buwanvu.

Ekibi kya buli kimu ku ebyo, kitamwa eri Mukama Omulabirizi Wo.

Ebyo bye bimu ku ebyo Mukama Omulabirizi Wo by'assa gy'oli mu bigambo eby'amagezi, era tossanga ku Allah ebisinzibwa ebirala, n'okakatibwako okukasukibwa mu muliro Jahannama, ng'ovumirirwa era nga ogobaganyizibwa mu kusaasira kwa Katonda.

(Abange mmwe abatakkiriza), Mukama Omulabirizi Wammwe yasalawo mmwe abawe abaana abalenzi ate Yye ne yeewa abawala mu ba Malayika?! Mazima mmwe mwogera ekigambo ekibi ennyo.

Mazima twannyonnyola mu Kulaani eno buli kintu (eri abantu), babe nga bajjukira (beebuulirire), wabula tebongera okuggyako okwesamba (amazima).

Bagambe (ggwe Muhammadi) nti singa Katonda aliko ebisinzibwa ebirala nga bwe bagamba, olwo nno (ebisinzibwa ebyo) byandibadde byeetaaga ekkubo eribatuusa ewa (Katonda) Nnannyini Arishi.

Yayawukana n'asukkuluma kw'ebyo bye bagamba olusukkuluma olusuffu.

Eggulu omusanvu n'ensi n'ebirimu byonna bimutendereza era tewali kintu kyonna wabula nga kitendereza ebitendo bye naye temutegeera ntendereza ya byo, mazima Yye bulijjo alumirirwa Musonyiyi.

Bw'osoma Kulaani, tussa wakati wo ne wakati w'abo abatakkiriza Lunaku lwa Nkomerero ekibikka ekitalabika.

Era ne tuteeka ku mitima gyabwe ekibikka ekibagaana okubitegeera, ne tuteeka mu matu gaabwe envumbo, era bw'oyogera ku Mukama Omulabirizi Wo Yekka mu Kulaani, bakubayo amabega ne badduka.

Ffe tumanyi ennyo lwaki bawuliriza bwe bajja okukuwuliriza, era tumanyi kye babaako mu nkiiko zaabwe ez'ekyama, mu kiseera awo abeeyisa obubi we bagambira nti mazima oyo gwe mugoberera talina kyali okuggyako okubeera omusajja omuloge.

Tunula olabe engeri gye bakukubira ebifaananyi ne batuuka okubula ne batasobola kulaba kkubo (libazza eri mazima).

Era bagamba nti: bwe tulimala okubeera amagumba (amamerengufu) ne tufuuka obutundutundu obutakyayawulwa na ttaka, abaffe tulizuukizibwa nga tuli bitonde bipya?!

Gamba nti: kamube mayinja oba byuma (mujja kuzuukizibwa).

Oba mube ekitonde kyonna mu ebyo bye mulaba nga binene mu kutegeera kwammwe (era mujja kuzuukizikibwa) olwo nno bagamba nti ani alituzzaawo?Bagambe nti Oyo eyabatandikawo omulundi ogwasooka y'alibazzaawo, bajja kukunyeenyeza emitwe nga bwe bagamba nti kyo kyaddi?, bagambe nti ddala kiri kumpi.

(Kigenda kubaawo) ku Lunaku lw'alibakoowoola ne mwanukula nga mumutendereza era mugenda kulowooza nti temwamala ku nsi okuggyako akaseera katono.

Era gamba abaddu bange, babe nga boogera ebyo ebisinga okuba ebirungi. Mazima Sitaane atabula wakati waabwe anti mazima Sitaane mulabe wa muntu ow'olwatu.

Katonda wa mmwe y'asinga okubamanya, bw'ayagala abasaasira, oba bw'aba ayagadde ababonereza era tetukutumanga kuba nga ggwe okukola ku nsonga zaabwe.

Era Mukama Omulabirizi Wo y'asinga okumanya abo abali mu ggulu omusanvu n'ensi, mazima twawa Bannabbi abamu enkizo ku bannaabwe, era twawa (Nnabbi) Dawuda Zabbuli.

Bagambe nti: kale musabe abo bemulowooza nti be bakatonda abatali Yye, ate nga tebasobola kuggya ku mmwe kabi wadde (okukakyusa) okukazza ku mulala.

Abo be basaba nabo banoonya ekkubo eribatuusa ewa Mukama Omulabirizi Waabwe, (kaakati) ku bonna ani ow'okumpi? Era baagala okusaasira kwe era batya ebibonerezo bye, mazima ebibonerezo bya Mukama Omulabirizi Wo biteekwa okwewalibwa.

Tewali kitundu kyonna (ku nsi) okuggyako okuba nga tugenda kukisaanyaawo nga Olunaku lw'okuzuukira terunnatuuka oba tugenda kukibonereza ebibonerezo ebikakali. Ekyo kyawandiikibwa dda mu kitabo.

Tewali kitugaana kuweereza by'amagero, okuggyako olw'okuba nti abaasooka baabirimbisa nga bwe twaleetera abantu ba Thamuudu enngamiya nga kyamagero eky'olwatu, ne bagiyisa bubi, era tewali kituweerezesa byamagero okuggyako okutiisa (abantu bave ku bujeemu).

Era jjukira bwe twakugamba nti mazima Mukama Omulabirizi Wo yeetoolodde abantu (abo, n'olwekyo tobatya) era ebyo bye twakubikkulira ne tubikulaga tetwabifuula okuggyako nga kigezo eri abantu, era mu ngeri y'emu omuti ogwakolimirwa mu Kulaane nakyo kigezo, era tubatiisa (nga tubabuulira) ebiribaawo ku Lunaku lw'Enkomerero naye tebibongera okuggyako okubula okuyitirivu.

Era jjukira bwe twagamba Bamalayika nti muvunnamire Adamu, ne bavunnama okuggyako Ibuliisu eyagamba nti nvunnamire ntya oyo gwe watonda mu ttaka?!

Era (Sitaane) n'agamba nti: Ggwe bw'otyo bw'olabye nti oyo gw'onsukkulumizzaako singa onnindiriza (nemba mulamu) okutuuka ku Lunaku lw'Enkomerero nja kubuliza ddala ezzadde rye okuggyako abatono ennyo.

(Katonda) n'agamba nti: Kale genda (ekyo nkikuwadde) naye buli alikugoberera mu bo mazima Jahannama y'empeera yammwe eribasasulwa mu bujjuvu.

Era sikiriza n'eddoboozi ryo oyo yenna gw'oba osobodde mu bo, batabaale nga okozesa eggye ryo ery'embalaasi n'eritambuza ebigere okolagane nabo mu mmaali ne mu baana era obasuubize (buli ky'oyagala) wabula Sitaane tabalagaanyisa okuggyako ebiguumaaza.

Mazima abaddu bange tobalinaako buyinza era kimala okuba nga Mukama Omulabirizi Wo Ye Mukuumi.

Mukama Katonda Wammwe Ye Oyo abatambuliza amaato ku nnyanja musobole okunoonya ebimu ku bigabwa bye, mazima Yye ku mmwe Musaasizi nnyo.

Obuzibu bwe bubatuukako nga muli mu nnyanja olwo nno buli kye musaba nekivaawo okuggyako Yye, naye bw'abawonya ne mudda ku lukalu ate olwo ne mubivaako. Anti bulijjo omuntu mwegaanyi.

Abaffe mulina obukakafu (Katonda) okuba nti tayinza kulagira ludda lwa nsi (gye mulaze) ne lubamira, oba n'abasindikira kibuyaga, ne mutasobola kufuna mukuumi yenna?!

Oba mulina obukakafu nti (Katonda) tayinza kubazzaayo mu yo (ennyanja) omulundi omulala, olwo nno n'abasindikira omuyaga olw'ebyo bye mwawakanya ate nga temuyinza kwefunirayo muntu yenna alondoola kye tubakoze.

Mazima twawa abaana ba Adamu ekitiibwa ne tubatambuliza ku lukalu ne ku nnyanja, ne tubagabirira mu birungi, era ne tubasukkulumya olusukkulumya ku bangi mu abo be twatonda.

(Bajjukize) Olunaku lwe tulikoowoola buli bantu nga tuyita linnya lya mukulembeze waabwe (mulungi oba mubi),oyo aliweebwa ekitabo kye mu mukono gwe ogwaddyo abo nno bagenda kusoma ebitabo byabwe, era tebagenda kulyazaamanyizibwa wadde akantu akatono.

Naye oyo yenna muzibe mu bulamu buno obw'ensi ku Lunaku lw'Enkomerero agenda kuba muzibe, era nga abuze nnyo okuva ku kkubo.

Newaakubadde nga baabulako katono bakuwugule okuva ku Bubaka obwo bwe twakutumira ggwe (Nnabbi Muhammadi) obe nga ogunja ku Ffe ekintu ekirala ekitali bwo, era singa okola ekyo baalikufudde nfa-nfe waabwe.

Era singa tetwakunyweza, mazima kumpi okyamemu katono nga weekubiira gye bali.

Olwo nno (singa wabagondera) twandi kukombesezza ku bibonerezo by'okunsi, nga bikubisiddwamu era ne tukukombesa ne ku bibonerezo byokufa, nga nabyo bikubisiddwamu era tewandifunye akututasaako.

Newaakubadde nga basemberera okukunyenya bakuggye mu nsi (yo) olwo nno bagikugobemu, ekyo ne bwekituukirira nga ggwe ofulumye, tebayinza kugituulamu okuggyako ebbanga ttono.

Eyo y'enkola (Yaffe) kw'abo be twatuma olubereberye lwo mu Babaka Baffe, toyinza kusanga nkyukakyuka yonna mu nkola Yaffe.

Yimirizaawo esswala enjuba nga ekyuse okutuusa ku nzikiza y'ekiro nabwekityo Kulaani y'okumakya (esswala ya Subuhi) mazima Kulaani y'okumakya Bamalayika bagyetabako.

Ne mu kiro saala nga ogisoma (Kulaani), (ekyo) nga nnyongeza gy'oli olwo nno Mukama Omulabirizi Wo ajja kukuzuukiriza mu kifo ekiweesa ekitiibwa.

Era gamba nti: Ayi Mukama Omulabirizi Wange, nnyingiza mu mulyango ogw'amazima era onfulumize mu mulyango ogw'amazima, era ompe okuva gy'oli amaanyi aganziruukirira.

Era gamba nti amazima gazze obwonoonefu ne buvaawo, mazima obwonoonefu buba bwa kuvaawo.

Era tussa mu Kulaani ebyo ebijja nga kya kuwonya era nga kya kusaasira eri Abakkiriza. Wabula abeeyisa obubi (Kulaani) tebongera okuggyako okufaafaaganirwa.

Bwe tuwa omuntu ebyengera (mu kifo ky'okwebaza) atuvaako ne yeefaako yekka, so nga akabi bwe kamutuukako aggwaamu essuubi.

Bagambe nti buli omu akolere ku ngeri ye, Mukama Omulabirizi Wammwe y'asinga okumanya, ali ku kkubo eddunngamu.

Era bakubuuza ku mwoyo, gamba nti: omwoyo kye kimu ku bintu Mukama Omulabirizi Wange bye yeesigaliza, era temwaweebwa kumanya okuggyako okutono.

Era singa tuba twagadde tusobola okukuggyako ebyo bye twakutumira, ate toyinza kufuna olw'ebyo kuffe muwolereza.

(Era wabisigaza si lwa nsonga ndala yonna) okuggyako okusaasira okuva eri Mukama Omulabirizi Wo, anti mazima ebirungi bye ku ggwe bisuffu.

Gamba nti singa abantu n'amajinni beegatta babe nga baleeta ekitabo ekifaanana Kulaani eno, tebayinza kuleeta kigifaanana newaakubadde nga abamu babeera bayambi eri bannaabwe.

Mazima twannyonnyola abantu mu Kulaani muno buli kika kya kifaananyi, naye abantu abasinga obungi baagaana (okuggyako okusigala) mu butakkiriza.

Era ne bagamba nti tetugenda kukukkiriza okuggyako nga otufukumulidde amazzi okuva mu ttaka.

Oba obe nga olina ennimiro erimu emitende n'enzabbibu. Olwo nno n'ofukumula emigga mu nnyiriri zaayo olufukumula.

Oba otusuuleko eggulu nga bw'ogamba, nga liri mu bibajjo, oba oleete Allah ne Bamalayika tubalabe maaso ku maaso.

Oba obe n’ennyumba nga yazimbibwa mu Zaabu, oba olinnye mu ggulu era tetujja kukkiriza kulinnya kwo (mu ggulu) okutuusa nga otuleetedde ekitabo ne tukisoma. Gamba ggwe (Muhammadi) nti: Mukama Omulabirizi Wange yayawukana, nnali mbaddeko (ekintu kyonna) okuggyako okubeera Omubaka omuntu obuntu?!

Tewali kyagaana bantu kukkiriza obulunngamu bwe bwabajjira okuggyako okuba nti baagamba nti omuntu obuntu Allah gw'atumye nga Mubaka?!

Bagambe nti singa ensi yalimu Bamalayika nga batambula, nga mwe babeerera ddala, olwo nno twandibadde tubatumira Malayika okuva mu ggulu nga ye Mubaka.

Bagambe nti Allah amala okuba nga Ye Mujulizi wakati wange nammwe, anti mazima Yye bulijjo amanyidde ddala era alaba ebikwata ku baddu be.

Oyo yenna Allah gw'alunngamya, y'aba omulunngamu ate oyo gw'aba abuzizza oba toyinza kubafunira bayambi batali Yye, (Allah) era tugenda kubazuukiza ku Lunaku lw'Enkomerero nga beevunikidde ku byenyi byabwe nga bamuzibe, bakasiru, bakiggala, obuddo bwabwe buliba Muliro Jahannama, buli lwe gunaakenderanga nga tugubaseesezamu.

Eyo y'empeera yaabwe, kubanga mazima bo baawakanya Ebigambo Byaffe, era ne bagamba nti bwe tuliba enngumbagumba oba nga tufuuse ettaka, abaffe tulizuukizibwa ne tutondebwa bupya!.

Abaffe tebalaba nti mazima Allah Oyo eyatonda eggulu omusanvu n'ensi asobola okuddamu okubatonda nga bwe baali, era nti yabassaako ekkomo mu bulamu bwabwe eritaliimu kubuusabuusa, ate olwo nno abeeyisa obubi baagaana (buli kintu) okuggyako (okukalambira) ku butakkiriza.

Gamba ggwe (Muhammadi) nti singa mmwe mufuga amawanika g'okusaasira kwa Mukama Omulabirizi Wange, mwandibadde mukwatirira olw'okutya okusaasaanya, bulijjo omuntu muganiriza.

Mazima twawa Musa eby'amagero mwenda ebyeyolefu, buuza abaana ba Yisirayiri (ebyaliwo) mu kiseera we yabajjira (Abamisiri), Falaawo n'amugamba nti mazima nze Musa nkulabira ddala nga oli mulogo.

(Musa) n'agamba nti mazima omanyi ggwe Falaawo nti tewali assizza (byamagero) ebyo okuggyako Mukama Omulabirizi W'eggulu omusanvu n'ensi, abireese nga bujulizi (okulaga obutuufu bw'e bigambo byange) era mazima nze nkulabira ddala ggwe Falaawo nga ozikiridde.

Olwo nno (Falaawo) n'ayagala okubagoba mu nsi (Misiri), ne tumuzikiriza n'abo abaali naye.

Era oluvanyuma lw'ekyo twagamba abaana ba Yisirayiri nti: mutuule mu nsi (ey'e Shaami), endagaano y'Olunaku lw'Enkomerero bw'erituuka mwenna tugenda kubaleeta nga tubakungaanya.

(Kulaani eno) twagissa na mazima era yaleeta mazima era tetwakutuma okuggyako lwa kuba nga owa amawulire ag'essanyu era nga oli alabula.

Era Kulaani twagyawulamu ebitundu obe nga ogisomera abantu mu ngeri y'empolampola era twagissa olussa (olw'ebitundu tundu).

Gamba nti kamugikkirize oba temugikkiriza (kasita) mazima abo abaaweebwa okumanya nga (Kulaani) tennajja, bw'e basomerwa beeyala ku bulevu bwabwe nga bavunnama.

Era nga bagamba nti: Mukama Omulabirizi Waffe Musukkulumu, Endagaano ya Mukama Omulabirizi Waffe bulijjo etuukirizibwa.

Era beeyala ku bulevu (bwabwe) nga bakaaba, ne kibongera okugonda.

Bagambe nti: musabe Allah oba musabe Omusaasizi, erinnya lye mumusabisa likola, anti alina amannya agasinga obulungi, toleekaana nga osaba era tossa nnyo ddoboozi lyo nga osaba, wakati w'ebyo wooba onoonya enkola yo.

Era gamba nti ebitendo byonna bya Allah Oyo ateeteerawo mwana, era atabangako na muyambi mu Bufuzi Bwe, era tabangako na mutaasa mbu amuwonye okuswala olw'ebyandimulemye, era mugulumizenga olugulumiza.

Ebitendo byonna bya Allah Oyo eyassa ku Muddu We (Muhammadi) Ekitabo (Kulaani) na'takiteekamu bukyamu bwonna.

Wabula nga kyesimbu abe nga atiisa nakyo ebibonerezo ebikakali ebiva gy'ali era awe nakyo amawulire ag'essanyu Abakkiriza abo abakola emirimu emirongoofu (nga abategeeza) nti mazima balina empeera ennungi.

Baakugibeeramu olubeerera.

Era atiise abo abagamba nti Allah yeeteerawo omwana.

Kye batalinaako kumanya kwonna wadde bakadde baabwe, kibi nnyo ekigambo ekiva mu mimwa gyabwe. Bye boogera temuli Okuggyako bulimba bwereere.

Olw'okunnyolwa, olabika nga obula kwetta ku lwabwe olw'okuba tebakkiriza Bigambo bino.

Mazima Ffe twassa ku nsi ebigiriko nga bya kuginyiriza olwo nno tubagezese ani asinga okukola ebirungi.

Mazima Ffe ebigiriko tugenda kubifuula ettaka ejjereere.

Oba olowooza nti ddala abantu abaali mu mpuku, n'ekiwandiiko ekibakwatako baali baakyewunyo nnyo okusinga eby'amagero Byaffe ebirala.

Mu kiseera abavubuka bwe beewogoma mu mpuku ne bagamba nti ayi Mukama Omulabirizi Waffe tuwe okusaasira okuva Gy'oli era otwanguyize ensonga yaffe gye tuliko otuwe obulunngamu.

Netukuba ku matu gaabwe (ekibikka) nga bali mu mpuku (ne beebaka) emyaka mingi.

Oluvannyuma twabazuukusa kimanyike nti, kiri wa ku bibiina ebibiri ekisinga okwogera ekituufu ku bbanga lye baamalamu.

Mazima Ffe tukunyumiza ekyafaayo kyabwe mu butuufu, mazima bo baali bavubuka abakkiriza Mukama Omulabirizi Waabwe era ne tubongera obulunngamu.

Era twanyweza emitima gyabwe bwe baayimirira (mu buvumu) nebagamba nti Mukama Omulabirizi Waffe ye Mukama Omulabirizi W'eggulu omusanvu n'ensi, n'olwekyo tetuyinza kumulekawo ne tusaba katonda mulala yenna era bwe tukikola mazima tuba twogedde ekigambo ekibi.

Abo abantu baffe baamulekawo (Allah) ne beeteerawo bakatonda abalala, kale nno singa babaleetako obujulizi obweyolefu, naye ani eyeeyisa obubi okusinga oyo agunja ku Allah ebigambo eby'obulimba.

Bwe mwabaawukanako ne mwawukana ne ku bye basinza ebitali Allah, kale nno mugende mu mpuku Mukama Omulabirizi Wammwe ajja kubanjululiza ku kusaasira Kwe era ajja kubategekera engeri gye munaabeerawo olw'ensonga yammwe gye muliko.

Awo nno walabanga enjuba bwe yavangayo nga ekyuka okuva ku mukono ogwaddyo ogw'empuku yaabwe, ate bwe yabanga egwa nga ebaleka ku mukono ogwakkono ne baba nga beetaayiza mu bugazi bw'empuku, ekyo kamu ku bubonero bwa Allah (ku buyinza Bwe) oyo yenna Allah gw'alunngamya ye mulunngamu ate oyo gw'aba abuzizza toyinza kumufunira muyambi amulunngamya.

Era (bwe wabalabanga) nga osuubira nti tebeebasse so nga beebasse nga tubakyusa ku ddyo ne ku kkono nga n'embwa yaabwe egolodde emikono gyayo nga eri ku mulyango (gw'empuku) nga singa obakubako eriiso waalikyuse n'obadduka era wandijjudde okubatya.

Era bwe tutyo twabazuukusa babe nga beebuuzaganya wakati waabwe (ku kyabatuukako) omwogezi omu ku bo n'agamba nti wano mumazeewo bbanga ki? Ne bagamba nti tumazeewo lunaku oba kitundu kya lunaku, ne bagamba nti Mukama Omulabirizi Wammwe y'asinga okumanya ebbanga lye mumazeewo kale mutume omu ku mmwe, agende mu kibuga ne ssente zammwe zino alabe mmere ki esinga obulungi eriyo abaleetereyo ku ky'okulya, wabula atambule nga yeegendereza tewali muntu n'omu asaanidde kubamanya.

Anti mazima bo bwe banaabazuula bajja kubakuba amayinja oba si ekyo babazzeeyo mu ddiini yaabwe olwo nno temugenda kwesiima n'akatono.

Bwetutyo twasobozesa abantu okubazuula olwo nno bamanye nti mazima endagaano ya Allah ya mazima, era bamanye nti ddala essaawa (esembao) teriimu kubuusabuusa. (Era) jjukira (abatakkiriza) bwe baakaayana ku nsonga yaabwe (abamu), ne bagamba nti mubazimbeko ekizimbe, Mukama Omulabirizi Waabwe y'asinga okumanya ebibakwatako, ate abalina ekigambo ekisinga obulungi ne bagamba nti tujja kubazimbako omuzikiti.

(Abantu abamu) bajja kugamba nti baali basatu, nga embwa yaabwe yaakuna, abamu bagambe nti baali bataano nga embwa yaabwe ya mukaaga nga kujweteka ku byebatamanyi. Abalala bajja kugamba nti baali musanvu nga embwa yaabwe ya munaana. Gamba nti Mukama Omulabirizi Wange y'asinga okumanya omuwendo gwabwe, tewali abamanyi okuggyako bantu batono, n'olwekyo towakana ku bibakwatako okuggyako okuwakana okwokungulu era teweebuuzanga ku muntu yenna ku nsonga ebakwatako.

Era togambanga ku kintu kyonna, nti mazima nze nngenda kukikola enkya.

Okuggyako nga ogasseeko nti Allah bw'anaaba ayagadde, era yogera ku Mukama Omulabirizi Wo bw'oba nga weerabidde, era gamba nti nsuubira nti Mukama Omulabirizi Wange ajja kunnunngamya eri obujulizi obusinga ku buno, (eky'abavubuka b'o mu mpuku okulaga Obwannabbi bwange).

Era baatuula mu mpuku yaabwe emyaka bikumibisatu (ku mbala ey'enjuba) ate nebeeyongera mu mwenda (kumbala ey'omwezi).

Gamba nti Allah y'asinga okumanya ebbanga lye baamalamu, Yekka y'amanyi ebyekusifu by'omuggulu omusanvu n'ensi, weewuunye okulaba Kwe n'okuwulira Kwe (okuba nti byetoolodde buli kintu, n'olwekyo) tebalina mutaasa mulala nga oggyeko Yye (Allah) . Era mu kusalawo Kwe teyeegatta na muntu mulala yenna (wabula bulijjo asalawo Yekka).

Era soma ebyo ebyassibwa gy'oli nga bya mu Kitabo kya Mukama Omulabirizi Wo, tewali akyusa bigambo bye era togenda kufuna buddukiro etali wuwe.

Wenyweze nga obeera wamu n'abo abasaba Mukama Omulabirizi Waabwe enkya n'olweggulo nga baluubirira kuba ku ludda Lwe, tobaggyako amaaso (n'otunuulira babinojjo) nga ogenderera kufuna eby'okwewunda by'obulamu bwensi, era togondera oyo yenna gwe twagayaaza omutima gwe n'atatwogerako n'agoberera okwagala kwe embeera ye yonna neeba bwonoonyi.

Gamba nti gano ge mazima agavudde ewa Mukama Omulabirizi Wammwe, kale ayagala akkirize n'ayagala awakanye, Mazima Ffe abeeyisa obubi twabategekera Omuliro, olukomera lwa gwo lugenda kubeetooloola, buli lwe banaasabanga okuweebwa amazzi balinywesebwa amazzi agalinga olutabu lw'ekyuma olulyokya ebyenyi. Kiriba kyakunywa kibi era nga kifo kibi okutuulamu.

Mazima abo abakkiriza ne bakola emirimu emirongoofu mazima Ffe tetugenda butasasula mpeera y'oyo eyalongoosa emirimu.

Abo nno bagenda kufuna Ejjana ey'olubeerera nga emigga gikulukutira wansi waabwe, nga bali mu yo baliba beesigamye, nga batudde ku ntebe ensitufu, eyo nno mpeera nnungi era nga kifo kya kutuulamu ekirungi.

Era bakubire ekifaananyi ky'abasajja babiri nga omu ku bo twamuwa ennimiro bbiri ez'enzabbibu ze twassaako olukomera olw'emitende, ate wakati waazo ne tussaawo ebirime ebirala.

Ennimiro zombi zaabala bulungi, tewali katundu kataabala, era nga twassa wakati waazo emigga.

(Omu ku basajja ababiri) n'aba nga afunye amakungula (amalungi) n'agamba munne nga anyumya naye nti nze nkusinza emmaali era nga bwe nkusinza abantu.

Olwo nno n'ayingira ennimiro ye nga yeeyisizza bubi, n'agamba nti sirowooza nti bino biyinza okuggwaawo.

Era nga bwe sirowooza nti essaawa ey'enkomerero egenda kubaawo (katugambe nti kibaddewo) bwe ndizzibwa ewa Mukama Omulabirizi Wange nngenda kufuna ebisinga obulungi ku bino.

Munne n'amuddamu nti owakanyizza Oyo eyakutonda nga akuggya mu ttaka oluvannyuma n'akuggya mu mazzi agazaala oluvannyuma n'akukola nga oli muntu omujjuvu.

Naye nze ngamba nti mazima Yye Allah Ye Mukama Omulabirizi Wange era Mukama Omulabirizi Wange siyinza kumugattako musinzibwa mulala yenna.

Kale singa bwe wabadde oyingira ennimiro yo wagambye nti: ekyo kyonna Allah ky'aba ayagadde ky'ekiba, tewali maanyi okugyako nga gava wa Allah, newaakubadde nga ondaba nga nze nnina emmaali ntono n'abaana batono obutenkana ggwe.

Nnina essuubi nti Mukama omulabirizi Wange lumu alimpa ebirungi okusinga ennimiro yo ate n'asindikira eyiyo kibuyaga okuva waggulu n'ekeesa enkya nga ttaka jjereere.

Oba amazzi gaamu negafuuka gakkekwa n'oba nga tosobola kugazuula.

Awo ebibala bye byatuukwako obuzibu, ne bukya nga akuba mu bibatu bye olw'okufiirwa ebyo bye yassaamu, nga alaba ennimiro ebutamidde ku birimba byayo n'agamba nti: zinsanze nze, singa saagatta kintu ku Mukama Omulabirizi Wange.

Nga oggyeko Allah yali tayinza kufuna kibinja kimutaasa nga naye bwe yali tasobola kwetaasa.

Awo obwesige bwonna bwalina kubeera mu Allah Owaamazima Yekka, anti bulijjo Yye y'asinga empeera ennungi, era y'alina Enkomerero esinga obulungi.

Era bakubire ekifaananyi eky'obulamu obw'ensi bulinga amazzi ge tutonnyesa okuva waggulu, ebimera by'okunsi ne byetabula na go (olwo nno) ne bikula nebikungulwa nebifuuka ebisusunku nga empewo ebikunguzza. Bulijjo Allah ku buli kintu Muyinza.

Emmaali n'abaana byakwewunda bya bulamu bwa nsi, naye emirimu emirungi egisigalawo gye gisinga obulungi ewa Mukama Omulabirizi Wo, okuba nga y'alina empeera esinga obulungi n'essuubi erisinga obulungi.

Era (fumiitiriza ku) Lunaku lwe tulitambuza ensozi olwo nno oliraba ensi nga njereere era tulibakunngaanya bonna, tetugenda kulekayo n'omu yenna.

Olwo nno balyanjulwa ewa Mukama Omulabirizi Wo nga bali mu nnyiriri (Allah aligamba nti) mazima muzze Gyetuli nga bwe twabatonda ku mulundi ogwasooka naye mwalowooza nti tetwali baakubateerawo kiseera kigere.

Ekitabo kya buli omu kigenda kuleetebwa olwo nno n'olaba aboonoonyi nga batya olw'ebyo ebikirimu, baligamba nti: nga tulabye kitabo kya ngeri ki kino! Tekirekaayo katono oba kinene okuggyako nga kikikomekkereza, bagenda kusanga nga buli kye baakola mwekiri. Mukama Omulabirizi Wo tagenda kulyazaamaanya muntu yenna.

Era jjukira bwe twagamba Bamalayika nti muvunnamire Adamu ne bamuvunnamira okuggyako Ibuliisu (Sitaane) eyali ow'omu Majinni olwo nno n'ajeemera Ekiragiro kya Mukama Omulabirizi We, abaffe ate mmwe oyo gwe mufuula n'ezadde lye abataasa bammwe Nze (Allah) ne munvaako ate nga bo balabe ba mmwe, okwo nga kuwaanyisa kubi abeeyisa obubi kwe bakola.

Sibayitanga kubaawo nga eggulu omusanvu ne nsi bitondebwa wadde okutondebwa kwabwe era sibangako waakweteerawo ababuza nga be bayambi (bange).

Era (mufumiitirize) Olunaku Allah) lw'alibagamba nti muyite be mwangattako abo be mwagambanga (nti nabo bakatonda) olwo nno balibayita ne batabaanukula era ne tussa wakati waabwe ekibaawula.

Aboonoonyi baliraba Omuliro, olwo nno bagenda kumanyira ddala nti mazima bo baakugugwamu era tebagenda kugufunako buwonero bwonna.

Mazima tunnyonnyodde abantu mu Kulaani eno (nga tukozesa) buli kifaananyi, naye omuntu y'asinga ebintu byonna okuwalaaza empaka.

Tewali kyagaana bantu kukkiriza bulunngamu bwe bwabajjira, era teri kyabagaana kwegayirira Mukama Omulabirizi Waabwe, mpozzi nga baali balindirira kujjirwa ekyo ekyatuuka ku baasooka oba ebibonerezo bibajjire babirabe lwatu.

Era tetwatuma Babaka okuggyako lwa kuwa mawulire agasanyusa (eri abakozi b'obulungi), era nga bawa amawulire agatiisa (eri abakozi b’obubi), abo abaawakanya baawakana mu bukyamu nga balyoke babukozese okuggyawo amazima, Ebigambo Byange (n'ebintu ebirala) bye batiisibwa nabyo ne babifuula eby'olusaago.

Ani eyeeyisa obubi okusinga oyo ajjukizibwa Ebigambo bya Mukama Omulabirizi We n'abivaako, ne yeerabira ebyo emikono gye bye gyakulembeza (okukola), mazima Ffe twassa ku mitima gya bwe ebibikka, babe nga tebabitegeera ne mu matu gaabwe mulimu envumbo era ne bw'obayita okujja eri obulunngamu tebagenda kulunngama olubeerera bwe baba bwe batyo.

Ne Mukama Omulabirizi Wo Omusonyiyi ennyo Nnannyinni kusaasira, singa abadde waakubavunaanirawo olw'ebyo bye bakola yandibatuusizzaako ekibonerezo mu bwangu, wabula balina ekiseera ekigere (bwe kirituuka) tebagenda kufuna buddukiro babe nga bakiwona.

Ebitundu ebyo (bye muliraanye, abantu baamu) twabazikiriza bwe beeyisa obubi era okuzikirira kwabwe twakuwa ekiseera mwe kwalina okutuukira.

Jjukira Musa bwe yagamba omuweereza we nti sijja kulekera awo kutambula okutuusa lwe tunaatuuka ennyanja ebbiri we zisisinkanira oba mmala byeya (kale mbimale).

Awo nno bwe baatuuka bombi mu kifo we zisisinkanira beerabira ekyenyanja kyabwe ne kikola ekkubo lyakyo munyanja nga kireseewo omuwulukwa.

Bwe baayita ku kifo ekyo (Musa) yagamba omuweereza we nti leeta eno ekyokulya kyaffe mazima olugendo lwaffe luno tulusanzeemu obukalubo.

(Omuweerezawe) n'agamba nti ojjukira we twawummulidde ku lwazi, mazima nze nneerabidde ekyennyanja tewali kyanneerabizza kukijjukira okuggyako Sitaane, era awo we kyakoledde ekkubo mu nnyanja mu ngeri eyeewuunyisa.

(Musa) n'agamba nti ekyo kyennyini kye tubadde tunoonya, olwo nno nebadda emabega nga bwe bazze nga banoonya ekifo (ekyo).

Ne basanga omuddu mu baddu Baffe gwe twawa okusaasira okuva Gyetuli, era ne tumuyigiriza okuva gye tuli okumanya (okw'enjawulo).

Musa n'amugamba nti abaffe (onzikiriza) nkugoberere olwo nno obe nga onjigiriza ku bulunngamu bwe wayigirizibwa?.

(Khidhri) n'amuddamu nti mazima ggwe tojja kusobola kugumiikiriza nga oli nange.

Onoogumiikiriza otya ku bintu byotalinaako kumanya.

(Musa) n'agamba nti Allah bw'anaaba akkirizza ojja kunsanga nga ndi mugumiikiriza era sigenda kukujeemera mu kintu kyonna.

(Khidhri) n'agamba nti bw'oba osazeewo okungoberera, tombuuza ku kintu kyonna okutuusa lwe nnaakufunira kye nkikubuulirako.

Olwo nno nebagenda, okutuusa nga bamaze okulinnya eryato (Khidhri) n'alisssaako ekituli, (Musa) n'agamba nti olitaddeko ekituli ozikirize abantu abalirimu mazima? Okoledde ddala ekintu ekibi.

(Khidhri) n'agamba nti: saakugambye nti mazima ggwe tojja kusobola kugumiikiriza nga oli nange?!

(Musa) n'agamba nti tonvunaana olw'ekyo kye nneerabidde era tonkaluubiriza u kintu kyonna olw'ekigambo kyange (eky'okubeera naawe).

Olwo nno ne bagenda okutuusa lwe baasanga omulenzi, (Khidhri) n'amutta (Musa) n'agamba nti osse omuntu atalina musango, atalina gwasse? Mazima ekintu kyokoze kivve.

(Khidhri) n'agamba nti saakugambye nti mazima ggwe tojja kusobola kugumiikiriza nga oli nange.

(Musa) n'agamba nti ke nkubuuza ku kintu ekirala kyonna oluvannyuma lwa kino tonzikiriza kubeera naawe, mazima ofunye ensonga ekusonyiyisa ku nze.

Ne bagenda bombi okutuusa lwe baatuuka ku bantu b'omukitundu, ne basaba abantu baamu okubawa emmere naye baagaana okubafuula abagenyi baabwe, wabula (mu kitundi ekyo) baasangamu ekisenge nga kyagala kugwa (Khidhri) n'akiddaabiriza (Musa) n'agamba nti singa oyagadde waalikisabiddeko empeera (n'osasulwa).

(Khidhri) n'agamba nti: wano nze naawe we twawukanidde, (wabula) nngenda kukubuulira amakulu g'ebyo byotaasobodde kugumiikiriza.

Lyo eryato lyabadde, lya banaku nga bapakasiza ku nnyanja, nnagenderedde okulissaako akamogo, anti mu maaso eyo waabaddeyo Kabaka nga atwala buli lyato eddungi mu ngeri ya bunyazi.

Ate yye omulenzi bakadde be bombi baali Bakkiriza, ne tutya yye (omulenzi) okubatuusaako obuzibu bw'okubula n'okufiira ku butakkiriza.

Olwo nno twayagadde Mukama Omulabirizi wa bombi abawaanyisizeemu bombi ekirungi okusinga yye mu butukuvu, era asinga okuba omusaasizi.

Ate kyo ekisenge we kyabadde kya balenzi babiri bamulekwa mu kibuga (ekyo), wansi waakyo waabaddeyo eby'obugagga byabwe bombi era nga kitaabwe yali mulongoofu, olwo nno Mukama Omulabirizi Wo yayagala bombi okumala okusajjakula, olwo nno baggyeyo eby'obugagga byabwe bombi, ekyo nga kusaasira okuva eri Mukama Omulabirizi Wo, era ssaakikoze lwa kusalawo kwange (wabula) Bubaka obwavudde eri (Katonda), okwo nno kwe kunnyonnyola by'otasobodde kugumiikiriza.

Bakubuuza ebikwata ku Dhul Karinaini, bagambe nti nja kubayitiramu ku bimukwatako.

Mazima Ffe twamuwa obusobozi mu nsi, era twamuwa ku buli kintu okumanya engeri gye kikolebwamu.

Olwo nno n'agoberera enkola (eyo).

Okutuusa lwe yatuuka enjuba gy'egwa, n'agisanga nga erabika nga egwa mu luzzi olw'ettosi, era mu kitundu ekyo n'asangayo abantu, ne tumugamba nti owange Dhul Karinaini, bw'oba oyagadde osobola okubabonereza oba oyinza okubakolamu ekirungi.

(Dhul Karinaini) n'agamba nti: oyo aneeyisa obubi tujja kumubonereza, ate oluvannyuma alizzibwa ewa Mukama Omulabirizi We, n'amubonereza ebibonerezo ebikambwe.

Naye oyo akkiriza n'akola emirimu emirungi, agenda kusasulwa empeera ennungi era tugenda kumugamba ebigambo ebyangu okuva Gyetuli.

Ate oluvanyuma n'agoberera enkola eyo.

Okutuusa lwe yatuuka enjuba gy'eva n'agisanga nga eviirayo ku bantu abo be tutaawa kyakwebikka kuwona kwokya kwayo.

Bwetutyo bwe twakikola ate mazima byonna bye yalina, okumanya Kwaffe kwali kubyetoolodde.

Ate oluvannyuma n'agoberera enkola eyo.

Okutuusa lwe yatuuka wakati w'ensozi ebbiri, n'asanga wakati waazo abantu, kumpi nga tebategeera kigambo kyonna.

Ne bagamba nti: owange Dhul Karinaini mazima Yaajuuja ne Maajuuja boonoonyi mu nsi, abaffe (kkiriza) tukuteerewo empeera (tukupakase) obe nga otuteera wakati waffe nabo ekikomera.

N'agamba nti ekyo kyonna Mukama Omulabirizi Wange ky'anansobozesa kinaaba kirungi, kale munnyambe n'amaanyi nja kuteeka wakati wammwe na bo ekikomera (ekigumu).

Mundeetere ebitundutundu by'ebyuma (bye baaleeta) okutuusa lwe yajjuza ebyuma mu bbanga eriri wakati w'ensozi ebbiri, n'agamba nti mufuuwe (emivubo) okutuusa ekyuma lwe kyayengerera n'agamba nti mundeetere ekikomo ekisaanuuse, awo n'akifukirirako.

(Yaajuuja ne Maajuuja) tebasobolangako kukirinnya era nga bwe batasobolangako kukiwummulamu kituli.

(Dhul Karinaini) n'agamba nti kuno kusaasira okuva eri Mukama Omulabirizi Wange, n'olwekyo Endagaano ya Mukama Omulabirizi wange bw'erituuka, agenda kukifuula ekimerengufu, anti bulijjo Endagaano ya Mukama Omulabirizi Wange ya mazima.

Tulireka abamu ku bo ne baba nga beekuluumulira mu bannaabwe nga balinga amayengo. Era enngombe egenda kufuuyibwa olwo nno bonna tubakunngaanye.

Ku Lunaku olwo tugenda kusoosootola omuliro Jahannama eri abatakkiriza olusoosootola.

Abo amaaso gaabwe agaali mu kubikkibwa ne batosobola kunjogerako era baali tebasobola kuwulira.

Abaffe abo abaagaana okukkiriza basuubira okufuula abaddu bange abakuumi baabwe Nze ne bandekawo, mazima Ffe twateekateeka Jahannama nga bwe bugenyi bw'abatakkiriza.

Abaffe tubabuulire abasinga okufaafaaganirwa emirimu gyabwe?

Beebo okukola kwa bwe okubeera okwonoonefu mu bulamu obw'ensi, so nga ate bo balowooza nti bakola bulungi.

(Aboogerwako) Beebo abaawakanya Ebigambo bya Mukama Omulabirizi Waabwe, era ne bawakanya okumusisinkana, olwo nno emirimu gyabwe ne gifaafaagana, n'olwekyo ku Lunaku lw'Enkomerero, tetugenda kubalabamu buzito bwonna.

Bwe kityo nno empeera yaabwe Muliro Jahannama olw'ebyo bye baawakanya era ne bafuula Obubonero Bwange n'Ababaka Bange ekisekererwa.

Mazima abo abakkiriza era ne bakola emirimu emirongoofu, Ejjana eza Firidausi, bwe buliba obugenyi bwabwe.

Balizibeeramu olubeerera tebagenda kwetaaga kukyusibwa kuzibaamu.

Gamba nti singa ennyanja zaali nga ye bwino (akozesebwa mu kuwandiika) Ebigambo bya Mukama Omulabirizi Wange, ennyanja zandikalidde, nga Ebigambo bya Mukama Omulabirizi Wange tebinnaggwaayo, ne bwetwandireese ennyanja ezenkana eziriwo zibe nga ziziyamba.

Bagambe nti mazima nze ndi muntu nga mmwe, (wabula) nfuna Obubaka nga bugamba nti mazima Katonda Wammwe ali Omu, kale nno, buli yenna asuubira okusisinkana Mukama Omulabirizi We ateekwa okukola emirimu emirungi era mu kusinza n’atagatta kintu kyonna ku Mukama Omulabirizi We.

Kaaf Haa Yaa 'Ayn Swaad.

Okwogera ku kusaasira kwa Mukama Omulabirizi Wo kwe yawa omuddu We Zakariya.

Mu kiseera we yasabra Mukama Omulabirizi We okusaba okw'ekyama.

Naagamba nti ayi Mukama Omulabirizi Wange, mazima nze amagumba gannyenjebuse, n'omutwe gubunye envi, ate nga ssirekererwangako ayi Mukama Omulabirizi Wange buli lwe nkusaba.

Era mazima nze, nneekengedde ab'omusaayi gwange (bayinza okweyisa obubi) oluvannyuma lwange, ate nga ne mukyala wange mugumba awo nno nkusaba ompe okuva Gy'oli omwana.

Anaansikira, era asikire ab'olulyo lwa Yakubu, era omufuule asiimibwa ayi Mukama Omulabirizi Wange.

(N'ayanukulwa nti) owange Zakariya mazima Ffe tukuwa amawulire ag'essanyu nti ogenda kufuna omwana omulenzi, nga erinnya lye ye Yahaya (erinnya) lye tutateerangawo alituumwa olubereberye.

(Zakariya) n'agamba nti omwana omulenzi (oyo) nnaamufuna ntya, nga mukyala wange mugumba nga n’olwobukadde nfuuse mugogge!.

(Malayika) n'agamba nti (bwekityo bwe kirina okuba), Mukama Omulabirizi Wo agambye nti: ekyo ku nze kyangu era mazima nnakutonda mu kusooka nga toli kintu kyonna.

(Zakariya) n'agamba nti: Ayi Mukama Omulabirizi Wange nteeraawo akabonero (akanaalaga nti omukyala ali lubuto) n'amugamba nti bwe butayogera na bantu okumala ebiro bisatu ebijjudde (awamu n'okuba nga oli mulamu bulungi, tolina bulwadde).

Awo nno yafuluma n'asisinkana abantu be nga ava mu ssinzizo n'abalagira (nga tayogera, wabula nga akozesa bubonero) nti mutendereze (Allah) enkya n'olweggulo.

(Yahaya n'alagirwa nti) owange Yahaya Ekitabo (Tawulaati) kikwate na maanyi, era twamuwa okumanya ensonga nga akyali muto.

Era twamussaawo nga kulumirwa (bantu) okuva Gyetuli era nga butukuvu, era yali Muwulizi eri Allah.

Era nga yayisa bulungi bakadde be bombi era tabangako mwekuluntaze omujeemu.

Era emirembe gimubeereko olunaku lwe yazaalibwa, n'olunaku lwalifa, n'olunaku lwalizuukizibwa nga mulamu.

Era yogera nga osinziira mu Kitabo (Kulaani ebikwata ku) Mariamu bwe yeesamba abantu be n'adda ku ludda olw'ebuvanjuba.

N'ateekawo olutimbe baleme kumulaba awo nno twamutumira mwoyo Waffe (Jibuliiru) n'amweyoleka nga muntu ddala.

(Mariamu) n'agamba nti nsaba Mukama Katonda Omusaasizi akuntaaseeko bw'oba nga otya Katonda (ndeka tonsemberera).

(Malayika) n'amugamba nti mazima nze ndi Mubaka okuva ewa Mukama Omulabirizi Wo nkuleetedde omwana omulenzi omutukuvu.

Mariamu n'agamba nti nyinza ntya okufuna omwana nga tewali muntu yankutteko, ate nga sibangako malaaya?!

(Malayika n'agamba nti) Bwekityo bwe kirina okuba, Mukama Omulabirizi Wo agambye nti kyo ku nze kyangu. Era tube nga tumufuula akabonero eri abantu (akalaga obuyinza bwa Katonda), era nga kusaasira okuva Gyetuli, era kyali ekigambo ekyasalibwawo (edda).

(Mariamu) n'aba olubuto lwa Yisa, ne yeeyawula nalwo okuva mu bantu okulaga eri ekifo ekyesudde.

Awo nno ebisa ne bimujjira n'asibira wansi w'omutende, n'agamba nti, ndabye nze singa nnafa nga kino tekinnabaawo ne mba ekyerabiddwa ekitakyafiibwako.

(Malayika) n'amukoowoola nga asinziira wansi we nti: Tonakuwala, mazima Mukama Omulabirizi Wo atadde wansi wo akagga.

Weenyenyeze omutende gujja kukusuulira entende ezengedde, ezituuse okunoga.

Kale lya era onywe otebenkere amaaso (obeere bulungi), wonna w'olabira omuntu yenna, mugambe nti nneeyamye ku lwa Katonda Omusaasizi okusirika, sigenda leero kwogera na muntu yenna.

N'amuleeta eri abantu be nga amusitudde ne bagamba nti owange Mariam mazima okoze ekintu ekisasamaza.

Owange mwannyina wa Haaruuna, Kitaawo tabangako muntu mukozi wa kibi, era ne Maama wo tabangako Malaaya!.

(Mariamu) n'asonga ku mwana, (bali) ne bagamba nti tuyinza tutya okwogera n'omwana ali ku kaali omuwere?

(Omwana) n'agamba nti mazima nze ndi muddu wa Allah, ampadde Ekitabo (Enjiri) era n'anfuula Nnabbi.

Era n'anfuula ow'omukisa wonna we nnaabeeranga, era ankuutidde okusaala, n'okutoola Zzaka, ebbanga lye nnaamala nga ndi mulamu.

Era (ankuutidde) okuyisa obulungi Maama wange, era tanfudde eyeekuza, omwonoonefu.

Era emirembe gibeere ku nze olunaku lwe nnazaalibwa, n'olunaku lwe ndifa, n'olunaku lwe ndizuukizibwa ne mba omulamu.

Oyo ye Yisa omwana wa Mariamu, ekigambo eky'amazima ekyo (abeeyita abagoberezi be) kye babuusabuusa.

Allah tekimusaanira kweteerawo mwana, Yye musukkulumu (ku buli kintu), bw'asalawo ekintu mazima akigamba nti ba, ne kiba.

Era mazima ddala Allah Ye Mukama Omulabirizi Wange, era Omulabirizi Wammwe, kale mumusinze, eryo ly'ekkubo eggolokofu.

Wabula ebibiina by'abantu byayawukana (ku nsonga ya Yisa), n'olwekyo okubonaabona kugenda kubeera ku abo abaawakanya (ne babikkirira amazima agakwata ku Yisa) ku Lunaku olunene abantu bonna lwe balibaako.

Bagenda kuba nga bawulira nnyo era nga balaba nnyo, olunaku lwe balijja Gyetuli, naye abeeyisa obubi olwaleero (kuno ku nsi) bali mu bubuze obw'olwatu .

Batiise (ggwe Muhammadi) olunaku lw'okwejjusa mu kiseera ekigambo lwe kirisalibwawo, (abalongoofu bayingire Ejjana ate aboonoonyi bayingire Omuliro), wabula bo olwaleero bali mu bugayaavu era bo tebakkiriza.

Mazima Ffe, Ffe tulisikira ensi n'abagiriko era Gyetuli gye balizzibwa.

Era yogera nga osinziira mu Kitabo (kino Kulaani) ebikwata ku Ibraahiimu, mazima yye yali mukkiriza ow'amazima era nga Nnabbi.

Mujjukire (Ibraahiimu) bwe yagamba kitaawe nti owange taata, lwaki osinza ebitawulira, era ebitalaba, era ebitayinza kukugasa mu kintu kyonna?!

Owange taata mazima nze okumanya kunzijidde okwo okutaakujjira, n'olwekyo ngoberera, nkukulunngamye ku kkubo eggolokofu.

Owange Taata tosinzanga Sitaane, mazima Sitaane yajeemera Allah Omusaasizi.

Owange taata,mazima nze ntya ebibonerezo okuva ewa Allah Omusaasizi okukutuukako, olwo n'oba mukwano gwa Sitaane.

(Kitaawe) n'agamba nti: owange Ibraahiimu, oyagala kuva ku bye nsinza? Bw'otookikomye nja kukukuba amayinja, nviira mangu ssaagala kukulaba.

Ibraahiimu n'agamba nti emirembe gibe ku ggwe, nja kwegayirira Mukama Omulabirizi Wange akusonyiwe, mazima Yye bulijjo annumirwa.

Era nja kubaviira (mbaleke) n'ebyo bye musinza ne muva ku Allah era nja kusaba Mukama Omulabirizi Wange (Yekka), nkakasa siyinza butayanukulwa nga nsabye Mukama Omulabirizi Wange, olwo ne nzigwamu essuubi.

Bwe yabaviira n'abaleka n'ebyo bye basinza nebalekawo Allah, twamugabira Isihaaka ne Ya'akuubu era bombi ne tubafuula Bannabbi.

Era twabagabira ku kusaasira Kwaffe, ne tubateerawo okwogerwako obulungi okubafuula abaawaggulu.

Era yogera nga osinziira mu Kitabo (Kulaani) ebikwata ku Musa, mazima yye yali mulondemu, era yali Mubaka era Nnabbi.

Twamukoowoola ku ludda olwa ddyo olw'olusozi (Sinaayi), ne tumusembeza nga twogera naye.

Era ne tumuwa okuva mu kusaasira kwaffe muganda we Haaruuna nga (naye) Nnabbi.

Era yogera nga osinziira mu Kitabo (Kulaani) ebikwata ku Ismail, mazima yye yali mutuukiriza wa ndagaano, era yali Mubaka nga Nnabbi.

Yalagiranga abantu be okusaala n'okutoola Zzaka. Era bulijjo nga asiimwa ewa Mukama Omulabirizi We.

Era yogera nga osinziira mu Kitabo (Kulaani) ebikwata ku Ediriisa, mazima yye yali musuffu mu mazima ate nga Nnabbi.

Era twamusitula ne tumuwa ekifo ekyawaggulu.

Abo beebo Allah be yagabira ebyengera mu Bannabbi nga bava mu bazzukulu ba Adamu, ne mu abo be twatwala ne Nuuhu mu lyato, ne mu bazzukulu ba Ibraahiimu, ne Yisirayiri ne mu abo be twalunngamya, era ne tubalondamu. Ebigambo bya Allah Omusaasizi buli lwe byabasomerwanga bakkanga wansi nga bavunnama era nga bwe bakaaba.

Olwo nno oluvannyuma lwabwe wajjayo abaabaddira mu bigere, abataafa ku sswala, era ne bagoberera eby'obwagazi, luliba lumu bagenda kusisinkana okufaafaaganirwa n'okuzikirira.

Okuggyako oyo eyeenenya, era n'akkiriza era naakola emirimu emirongoofu, abo bagenda kuyingira Ejjanabey'okutuulamu era tebagenda kulyazaamaanyizibwa kintu kyonna.

(Baliyingira) Ejjana ez'olubeerera, ezo Allah Omusaasizi ze yalagaanyisa abaddu Be nga tebazirabyeko, mazima Endagaano Ye erina kutuukirira.

Tebagenda kuwulira mu zo (Ejjana) luyoogaano wabula (baliwulira) bigambo bya mirembe byereere baliweebwa ebigabirirwa byabwe mu yo enkya n'olweggulo.

Eyo ye Ejjana, gye tulisikiza (buli omu) mu baddu Baffe, oyo eyali atya Katonda.

Era ffe (Bamalayika) tetukka okuggyako lwa Kiragiro kya Mukama Omulabirizi Wo, bibye byonna ebiri mu maaso gaffe n'ebiri emabega waffe, n’ebyo ebiri wakati wa byombi era Mukama Omulabirizi Wo tabeerangako eyeerabira.

Allah Ye Mukama Omulabirizi W'eggulu omusanvu n'ensi, n'ebyo ebiri wakati wa byombi kale nno musinze onywerere ku kumusinza (bw'otokola ekyo) abaffe omanyiiyo amufaanana?

Omuntu agamba nti bwe ndiba nfudde ate ndiggyibwa (mu ntaana) nga ndi mulamu?!

Abaffe omuntu tajjukira nti mazima Ffe twamutonda omulundi ogwasooka nga yali tabangako kintu kyonna.

N'olwekyo ndayidde Mukama Omulabirizi Wo, ddala tugenda kubazuukiza ne Sitaane (nazo tuzizuukize), oluvanyuma tugenda kubaleetera ddala awali Omuliro Jahannama nga bafukamidde.

Oluvannyuma ddala tugenda kuggya mu buli kibiina buli yenna eyali asinga okwewaggula ku Katonda Oweekisa ekingi.

Oluvannyuma Ffe tuliba tumanyi nnyo abo abasinga okusaanira okugwesogga.

Tewali n'omu yenna ku mmwe okugyako nga wa kuguyitako, ekyo ku Mukama Omulabirizi Wo kikakafu ekyaggwa edda okusalawo.

Oluvanyuma tuliwonya abo abatya Katonda, olwo nno tuleke mu gwo abeeyisa obubi nga bafukamidde

Ebigambo Byaffe bwe bibasomerwa nga binnyonnyofu, abo abatakkiriza bagamba abo abakkiriza, nti ku bibiina ebibiri kiri wa ekirina ekifo ekirungi era ekirina enkunngaana ezisinga obulungi?!

Mirembe emeka gye twazikiriza olubereberye lwabwe, nga abo be baali basinza ebintu ebirungi n'endabika ennungi.

Bagambe nti oyo yenna abeera mu bubuze, Allah Omusaasizi amulindiriza olulindiriza, okutuusa nga balabye bye baalagaanyisibwa, ka bibe bibonerezo oba Essaawa Ey'enkomerero, olwo nno bagenda kumanya ani alina ekifo ekibi era ani alina eggye erinafu.

Ate abo abaalunngama Allah abongera bulunngamu, naye emirimu egisigalawo emirungi y'empeera esinga obulungi ewa Mukama Omulabirizi Wo, eyo nga mpeera era nga bwe buddo obusinga obulungi.

Abaffe olabye oyo alimbisa Ebigambo Byaffe, era n'agamba nti (ne ku Nkomerero) ndiweebwa emmaali n'abaana.

Abaffe yasobola okulaba ebikusike, oba yafuna ewa Allah Omusaasizi Endagaano, (atuuke okugamba nti aliba ne mmaali n'abaana ku nkomerero)?

Si bwe guli, tujja kuwandiika buli kyayogera tumulindirize ku bibonerezo olulindiriza.

Olwo nno tweddize ebyo bye yagamba, ate nga agenda kijja Gyetuli nga ali yekka nga talina kintu kyonna.

Era beeteerawo bye basinza ne baleka Allah, mbu olwo balyoke babeere abayambi baabwe .

Si bwe guli. Bajja kuwakanya eky'okubasinza era babeefuulire (babeegaane).

Tolaba nti mazima Ffe tusindika Sitaane eri abatakkiriza nga zibawaga oluwaga.

Toyanguya kubasabira kuzikirira, mazima ennaku zaabwe tuzibabalira bubalizi.

(Bategeeze) Olunaku lwe tulikunngaanya abatya Allah, net tubatwala ewa Allah Omusaasizi nga bagenyi.

Ate tusindiikirize aboonoonyi, nga tubatwala ku Muliro Jahannama nga balinga ensolo ezigenda okunywa amazzi.

Tebaliba na buyinza bwa kuwolereza, okuggyako oyo eyafuna Endagaano ewa Mukama Katonda Oweekisa ekingi.

(Abatakkiriza) baagamba nti Katonda Omusaasizi yeeteerawo omwana.

Mazima mu kwogera ekyo muleese ekintu ekibi ennyo.

Eggulu omusanvu zibulako katono okweyuza olw'ekyo, n'ensi ebula okwatikayatika n'ensozi kumpi kugwa nga zimogosemogose.

Olw'okugamba nti Mukama Katonda Omusaasizi alina omwana.

Ate nga tekigwana ku Katonda omusaasizi kweteerawo mwana.

Tewali kitonde kiri mu ggulu musanvu n'ensi okuggyako nga kigenda kujja ewa Allah Omusaasizi nga kiri mu ngeri ya buddu.

Mazima yabakomekkereza, era n'ababala olubala.

Era bonna bagenda kujja Gy'ali ku Lunaku lw'Enkomerero kinnoomu.

Mazima abo abakkiriza ne bakola emirimu emirungi, Allah ajja kubateerawo okwagalwa.

Mazima (Kulaani) twagifuula nnyangu ku lulimi lwo, obe nga osanyusa nayo abo abatya Allah, ate olabule nayo abo abayitirivu b'okugiwakanya.

(Abantu ba) mirembe emeka gye twazikiriza olubereberye lwabwe (bano abalimbisa Kulaani), abaffe olina gw'olabako mu bo, oba gw'owulizaako olukwakwayo?

Twaa-haa.

Tetwakussaako Kulaani obe nga ozitoowererwa.

Wabula twagikussaako nga kya kujjukiza eri oyo atya Allah.

(Kulaani eno) yassibwa okuva eri oyo eyatonda ensi n'eggulu eryewanise.

Allah Omusaasizi Oweekisa ekingi, yatebenkera ku Arishi.

Bibye ebyo ebiri mu ggulu omusanvu n'ebyo ebiri mu nsi, n'ebyo ebiri wakati wa byombi, n'ebyo ebiri wansi w'ettaka.

Singa olina ekigambo kyonna ky'oyatudde (k'obe nga tokyatudde) anti mazima Yye amanyi ekyama n'ekisinga okubeera ekikweke.

Allah tewali kisinzibwa kya mazima okuggyako Yye y'alina amannya agasinga obulungi.

Abaffe ekyafaayo kya Musa kyakujjira?

Awo we yalabira omuliro alyoke agambe abantu be nti mutuule wano, mazima nze nnengedde omuliro (kanngendeyo) ob'olyawo nga mbaleeterako eryanda sinakindi ne nsanga awali omuliro obulunngamu.

Musa bwe yagutuukako yakoowoolwa nti: owange ggwe Musa.

Mazima Nze, Nze Mukama Omulabirizi Wo, kale ggyamu engatto zo, anti mazima ggwe oli mu lusenyi olutukuvu oluyitibwa Tuwa.

Era Nze nkulonze, kale nno wuliriza Obubaka obukussibwako.

Mazima Nze, Nze Allah nga tewali kisinzibwa mu butuufu okuggyako Nze, kale nno nsinza, oyimirizeewo esswala obeere nga onjogerako.

Anti mazima ekiseera (ebitonde lwe birizuukizibwa) kijja kutuuka mbula kukikweka (nange mbe nga sikimanya, ate bo bakimanyira wa), olwo nno (bwe kiriba kituuse) buli mwoyo gulyoke gusasulwe ebyo bye gwatakabanira.

Kale nno oyo yenna atakikkiriza takulabankanya okukuggya ku kukolerera ekiseera ekyo, nga agoberera kwagala kwe n'ozikirira.

Owange Musa kiki ekiri mu mukono gwo ogwaddyo?

N'agamba nti ogwo muggo gwange, gunnyamba nga ntambula, era gwe nneeyambisa okukuba ebikoola embuzi zange (ziryoke zirye) era ngulinamu emigaso emirala.

(Allah) n'agamba nti: owange Musa, gusuule wansi.

N'agusuula, okugenda okulaba nga gwo musota ogudduka.

(Allah) n'agamba nti: gukwate, era totya, tujja kuguzza mu mbeera yaagwo eyaabulijjo.

Yingiza omukono gwo mu nkwawa zo, gugenda kuvaayo nga mweru nga ate tegutuukiddwako kabi, nakyo nga kyamagero kirala.

Olwo nno tulyoke tukulage ku Bubonero Bwaffe obunene.

N'amugamba nti genda eri Firaawo kubanga yye asusse obujeemu n'obuwakanyi.

(Musa) n'agamba nti: ayi Mukama Omulabirizi Wange, nnyanjululiza ekifuba kyange.

Era onnyanguyize omulimu gwange.

Era osumulule okwesiba okuli mu lulimi lwange.

Bategeere ebigambo byange.

Era onteerewo omuyambi nga ava mu b'oluganda lwange.

Nga ye Haaruuna muganda wange.

Nkusaba oggumize naye obusobozi bwange.

Era omugatte (ku nze) mu mulimu gwange.

Olwo nno tube nga tukutendereza nnyo.

Era tukwogerengako nnyo.

Mazima Ggwe bulijjo otulabira ddala.

(Allah) n'agamba nti: owange Musa, oweereddwa by'osabye.

Era mazima twakugabira ekyengera omulundi omulala (olubereberye lwa kino).

Mu kiseera we twatumira eri maama wo ekyo kye twamutumira.

(Ne tumugamba) nti musse mu ssanduuke (bw'omala) ogisse ku mazzi (g'omugga) amazzi gajja kumukasuka ku lubalama, olwo nno omulabe wange era nga mulabe we ajja kumutwala, era nnakussaako ggwe (Musa) okwagala okuva Gyendi, olyoke obeere mu kulabirirwa Kwange.

Jjukira ekiseera mwannyoko bwe yatambula (n'atuuka ku bantu bo mu maka ga Falaawo), n'agamba nti:abaffe mbalagirire omuntu anaamulabirira, olwo ne tukuzza ewa maama wo, eriiso lye liryoke litebenkere (omutima gumubeere wamu), era aleme kunakuwala, (era jjukira nti lumu) watta omuntu wabula ne tukuwonya okweraliikirira era twakugezesa n'ebigezo bingi, n'otuula emyaka egiwera mu bantu be Madiyana. Oluvannyuma owange Musa bwomaze nojja wano Allah nga bwe yakugerera.

Era nkwawudde nga oli Wange.

Genda ggwe ne mugandawo, nga mututte Obubonero Bwange, kyokka temukoowanga okunjogerako.

Mugende mwembiriri ewa Falaawo, mazima yeewaggula.

Mumugambe ebigambo ebigonvu, alyoke ajjukire era atye.

(Musa ne Haaruuna) ne bagamba nti: ayi Mukama Omulabirizi Waffe, mazima ffe tutya nti ayinza okutubonyaabonya ennyo, oba (yye) okweyongera okwewaggula.

Allah n'agamba nti: temutya, mazima Nze ndi wamu nammwe mpulira era ndaba.

Kale nno mugende g'yali mwembiriri mumugambe nti mazima ffe ffembi tuli Babaka ba Mukama Omulabirizi Wo, tuleke tugende n'abaana ba Yisirayiri era tobabonyaabonya. Mazima tukujjidde n'ekyamagero okuva ewa Mukama Omulabirizi Wo, era emirembe gibeere ku oyo agoberera obulunngamu.

Mazima ffe tuweereddwa Obubaka nti, mazima Ebibonerezo bibeera ku oyo yenna alimbisa n'ava ku kituufu.

(Oluvannyuma bombi baatuuka ewa Falaawo), n'agamba nti: owange Musa, olwo ani Mukama Omulabirizi Wammwe mwembiriri?

(Musa) n'agamba nti Mukama Waffe Y'Oyo eyawa buli kintu obutonde bwakyo, ekifaananyi n'enfaanana n'oluvannyuma n'akirunngamya ku ngeri gye kiteekwa okuwangaalamu.

(Falaawo) n'agamba nti: (bwe guba bwe gutyo) emirembe egyakulembera gyo gibalibwa gitya?

(Musa) n'agamba nti ebigifaako biri wa Mukama Omulabirizi Wange nga biri mu Kitabo (byawandiikibwa dda), Mukama Omulabirizi Wange takola kikyamu era teyeerabira.

Oyo eyabateerawo ensi nga kyaliiro, n'agibateeramu amakubo, era n'assa okuva waggulu amazzi ne tumeza nago emitindo ebiri mu bimera ebitali bimu.

(Ne tugamba nti) mulye era mulunde ebisolo byammwe. Mazima mu ekyo mulimu obubonero eri ab'amagezi.

Mu lyo (ettaka) mwe twabatonda era mu lyo mwe tubazza era mul yo mwe tulibaggya omulundi omulala.

Era mazima ddala twamulaga (Falaawo) obubonero Bwaffe bwonna n'alimbisa era n'agaana.

(Falaawo) n'agamba nti: owange Musa ekikuleese kutuggya mu nsi yaffe nga okozesa eddogo lyo.

Kale nno naffe tujja kukuleetera eddogo eriringa lyo, teeka wakati waffe naawe endagaano, gye tutajja kwawukanako ffe wadde ggwe, (tusisinkane mu) kifo ekinakkiriziganyizibwako (enjuyi zombi).

(Musa) n'agamba nti endagaano yammwe (tusisinkane) olunaku lw'okwenyiriza, era abantu balagirwanga okukungaana mu kalasamayanzi.

Olwo nno Falaawo yavaawo, n'agenda n’agattagatta enkwe ze oluvannyuma n'ajja (ku lunaku olulagaanye).

Musa n'abagamba (abalogo) nti: nga mulabye nnyo! Temujweteka ku Allah obulimba n'abasaanyaawo, n'ebibonerezo, era bulijjo afaafaaganirwa oyo agunjaawo obulimba.

(Abalogo), ekigambo kyabwe ne bakyawukanamu wakati waabwe, wabula olukiiko lwali mu kyama.

Ne bagamba nti: mazima bano bombi balogo, baagala babaggye mu nsi yammwe, olw'eddogo lyabwe bombi era baggyewo enkola yammwe ennungi.

Musse kimu mu kusalawo kwammwe, olwo nno mulumbe nga muli lunyiriri lumu, era mazima anaawangula olwaleero y'anaaba yeesiimye.

Ne bagamba nti: owange Musa ggwe (osooka) okusuula omuggo oba ffe tube abasooka okusuula.

(Musa) n'agamba nti wabula mmwe musuule, okugenda okulaba nga emiguwa gyabwe n'emiggo gyabwe, olw'eddogo lyabwe nga gimulabikira nga egitambula.

Musa n'afuna okutya mu mutima gwe.

Ne tumugamba nti: totya, mazima, ggwe ojja okuwangula.

Suula ekyo ekiri mu mukono gwo ogwaddyo (nga gwe muggo), gujja kumira ebyo bye bakoze. Anti mazima ddala bye bakoze nkwe za mulogo ate nga omulogo buli w'aba tawangula.

(Bwe yakola ekyo) abalogo bonna beeyala ne bavunnama, ne bagamba nti tukkirizza Mukama Katonda wa Haaruuna ne Musa.

(Falaawo) n'agamba nti: mumukkirizza mutya nga sinnaba kubakkiriza, (kirabika) nti mazima yye ye mukulu wammwe oyo eyabayigiriza eddogo, n'olwekyo nja kutemerako ddala emikono gyammwe n'amagulu gammwe, (nga ntema) omukono ogwa ddyo n'okugulu okwa kkono, era nja kubabamba ku ndoddo z'emitende, era mugenda kumanyira ddala ani ku fenna asinza ebibonerezo era ow'okusigalawo.

(Abalogo) ne bagamba nti: tetujja kukulembeza ggwe ku mazima ameeyolefu, agamaze okutujjira, wadde okukulembeza ggwe ku oyo eyatonda, kale ggwe, salawo ky:osalawo, mazima osobola kusalawo ku nsonga za bulamu buno obw'ensi.

Mazima ffe tukkirizza Mukama Omulabirizi Waffe, abe nga atusonyiwa ebisobyo byaffe, era atusonyiwe n'ebyo by'otuwaliriza okukola eby'eddogo, era bulijjo Allah y'asinga obulungi era Ye W'okusigalawo.

Mazima oyo yenna alijja nga mwonoonyi ewa Mukama Omulabirizi We, ddala aliyingira Muliro Jahannama, tagenda kufa nga ali omwo wadde okubeera omulamu.

Ate oyo alimujjira nga Mukkiriza, era nga yakola emirimu emirongoofu, abo bagenda kuweebwa amadaala agaawaggulu.

(Amadaala ago) Ejjana ez'olubeerera, nga emigga gikulukutira wansi waazo, baakuzituulamu obugenderevu, era eyo y'empeera y'oyo eyeetukuza.

Era mazima twatumira Musa nti, tambula ekiro n'abaddu bange (abaana ba Yisirayiri) obakubire mu nnyanja ekkubo ekkalu, totya (mulabe) kubasanga, era totya (nnyanja kubamira).

Olwo nno Falaawo yabagoberera n'eggye lye, olwo ne babikkibwa amazzi ago (Allah) ge yasalawo gababikke.

Bw'atyo Falaawo yabuza abantu be era (naye) teyalunngama.

Abange abaana ba Yisirayiri, mazima twabawonya omulabe wammwe, era twabalagaanyisa mu kifo ekiri ku ludda olwa ddyo ku lusozi, (we twayogerera ne Musa era we twamuweera Tawulaati) era twabassiza Manna ne enkwale (ekisooka mmere ekirala nva).

(Okwo ne twogera nti) mulye ku buli kirungi mu ebyo bye tubagabira naye temuyitiriza mu kwo (okulya) ne mukakatibwako obusungu Bwange, era bulijjo oyo yenna obusungu Bwange gwe bukakatako aba abuze.

Era mazima Nze ndi Musonyiyi, eri oyo eyeenenya n'akola emirimu emirongoofu, ate bulijjo n'abeera ku bulunngamu.

(Musa bwe yatuuka ku lusozi, Allah n'amugamba nti) owange Musa, kiki ekikwanguyizza n'oleka abantu bo?

N'agamba nti bo, baabo bangoberera, nze nnyanguye okujja Gy'oli Mukama Omulabirizi Wange, obe nga osiima.

(Allah) n'agamba nti, mazima twagezesezza abantu bo nga ovuddeyo, Saamiriyyu n'ababuza.

Olwo nno Musa n'adda eri abantu be, nga musunguwavu nga mwennyamivu, n'agamba nti: Bantu bange, Mukama Omulabirizi Wammwe teyabalagaanyisa endagaano ennungi, ekiseera ekiragaane kye kyabawanvuwako, oba mwayagala mutuukibweko obusungu okuva ewa Mukama Omulabirizi Wammwe, olwo nno ne muva ku ndagaano yange?

Ne bagamba nti: Endagaano yo tetwagivuddeko lwa kweyagalira kwaffe, wabula mazima ffe twatikkiddwa ebizito mu by'okwewunda by'abantu ba (Falaawo) olwo nno ne tubikasuka ( mu muliro) bw'atyo Saamiriyyunaye n'asuula.

Olwo (Saamiriyyu) n'abakoleramu ennyana erina omubiri, era nga emoola, ne bagamba nti ono ye k atonda wammwe, era katonda wa Musa wabula Musa yeerabidde, (n'agenda so nga katonda yamulese wano).

Abaffe tebaalaba nti ennyana eyo, yali tesobola kubaddamu kigambo kyonna, era nga tesobola kubatuusaako kabi wadde omugaso.

Ate nga mazima Haaruuna yali amaze okubagamba mu kusooka nti abange bantu bange, mazima mukemeddwa olw'eyo (ennyana), era mazima Mukama Omulabirizi Wammwe, ye Katonda Omusaasizi, kale nno mungoberere era mugondere ekiragiro kyange.

Ne bagamba nti, tetugenda kulekayo kugisinza, okutuusa Musa lw'anadda gyetuli.

(Musa bwe yakomawo) yagamba nti: owange Haaruuna, bwe walabye nga babuze kiki ekyakugaanye.

Okungoberera (n'obanenya nga bwe nkoze) abaffe wajeemedde ekiragiro kyange?

(Haaruuna) n'agamba nti: owange mwana wa nnyabo, tonsika kirevu, wadde omutwe gwange, mazima nze nnatidde ggwe okugamba nti, wayawukanyizza abaana ba Yisirayiri, n'otalinda kigambo kyange?

(Musa) n'agamba nti: ate ggwe Saamiriyyu, kiki ekyakukozesezza ekyo?

(Saamiruyyi) n'agamba nti: nnalabye kye bataalabye olwo nno nenjoola olubatu lw'ettaka omubaka (Jibuliiru) we yayise, ne nkolamu ennyana nze bwentyo bwe nnalabye.

(Musa) n'agamba nti: kale genda, mazima ossiddwako ekibonerezo mu bulamu obw'ensi, ekya 'temunkwatako', era mazima oweereddwa ekiseera ekigere, togenda kukyawukanako era tunula (olabe) katondawo oyo gwe wamaliddeko ebiseera nga osinza, tugenda kumwokera ddala, oluvannyuma tugenda kumumansira ddala mu mazzi olumansa.

Tewali kubuusabuusa, Omusinzibwa Wammwe ye Allah Oyo ali Omu Yekka, tewali kisinzibwa mu butuufu okuggyako Yye, okumanya Kwe kwabuna buli kintu kyonna.

Bwe kityo tukutegeeza amawulire agakwata ku byakulembera era twakuwa okuva Gyetuli ekijjukizza (Kulaani).

Omuntu ajaawukanako mazima agenda kwetikka ku Lunaku lw'Enkomerero ebibi (ayingizibwe omuliro).

Baliba mu mbeera eyo olubeerera, era omugugu gwabwe ku Lunaku lw'Enkomerero gulibeera mubi okwetikka.

Olunaku enngombe lw'erifuuyibwa, era ku lunaku olwo tugenda kukungaanya aboonoonyi nga amaaso gaabwe gatunula bbululu.

Baliyogeraganya mu bwama, nga bagamba nti: tetumaze ku nsi okugyako ennaku kkumi (zokka).

Ffe tusinga okumanya bye boogera, mu kiseera abasinga okutegeera bwe baagamba nti temwatuula ku nsi okugyako olunaku lumu lwokka.

Bakubuuza ekirituuka ku nsozi, gamba nti Mukama Omulabirizi Wange agenda kuzisaanyaawo olusaanyaawo.

Olwo nno agireke nga museetwe nga njereere.

Nga tolaba mu yo makoona wadde obutunnumba.

Olunaku olwo baligoberera omukoowooze awatali kuwalira, amaloboozi gonna ne gakkakkanira Katonda Omusaasizi, toliwulira mpozzi olukwakwayo lwokka.

Ku Lunaku olwo okuwolereza tekugenda kugasa, okuggyako oyo Katonda omusaasizi gw'aliba akkirizza era n'asiima byayogera.

(Allah) y’amanyi ebiri mu maaso gaabwe, n'ebiri emabega waabwe ate tebayinza kubimanya ne babimalayo.

Ebyenyi bigenda kugondera oyo (Allah) Omulamu Eyeeyimirizawo Yekka, mazima aliba aweebuuse oyo alyetikka okweyisa obubi.

Ate oyo akola emirimu emirongoofu ate nga Mukkiriza, talitya kulyazaamaanyizibwa, era nga era bw'atagenda kunyigirizibwa.

Mu ngeri bwetyo, Kulaani twagissa nga eri mu lulimi Luwalabu ne tunnyonnyola mu yo buli kika kya bitiisa, olwo nno babe nga batya Allah, oba ebawe okubuulirirwa.

Waawaggulu nnyo Allah Omufuzi Owaamazima, (ggwe Muhammadi) toyanguyiriza n'osoma Kulaani nga Obubaka obukuweebwa tebunnaggwaayo, era gamba nti ayi Mukama Omulabirizi Wange nnyongera okumanya.

Era mazima twakozesa Adamu endagaano olubereberye , kyokka ne yeerabira era tetwamusangamu bunywevu (obutakola ebyo ebyamugaanibwa).

Era jjukira ekiseera bwe twagamba Bamalayika nti muvunnamire Adamu ne bavunnama okuggyako Ibuliisu (Sitaane) yagaana.

Ne tugamba nti owange Adamu, mazima ono (Sitaane) mulabe wo, era mulabe wa mukyala wo, temukkirizanga n'abafulumya nga mu Jjana nemwonooneka.

Mazima olina ggwe, obutawulira njala mu yo, (Ejjjana) wadde okuyita obwereere.

Era nti mazima ggwe, togenda kuwulira nnyonta, nga oli mu yo wadde okwokebwa omusana.

Sitaane yamulabankanya, n'amugamba nti: owange Adam, nkulagirire omuti oguwa obulamu obw'olubeerera, n'obufuzi obutaggwaawo.

Olwo nno (Adamu ne Hawa) ne balya ku muti, obwereere bwabwe ne bubalabikira, ne batandika okwebikka ebikoola by'omujjana, era ne kiba nti Adamu yajeemera Mukama Omulabirizi We n'abula.

Oluvannyuma Mukama Omulabirizi We, yamusembeza n'akkiriza Okwenenya kwe era n'amulunngamya.

(Allah) n'agamba nti mwenna mugiveemu (mmwe ababiri ne Sitaane), abamu mu mmwe baliba balabe ba bannaabwe naye obulunngamu bwe buliba bubajjidde , okuva Gyendi oyo yenna aligoberera Okulunngamya kwange, tagenda kubula, wadde okubonaabona.

Ate oyo ava ku kubuulirira kwange, mazima alibeera mu bulamu obunyiga, ate ku Lunaku lw'Enkomerero tulimuzuukiza nga muzibe.

Aligamba nti: Ayi Mukama Omulabirizi Wange, lwaki onzuukizza nga ndi muzibe, nga ate mazima nnali ndaba?

(Allah) n'agamba nti: Nabwekityo, Ebigambo Byaffe byakujjira n'obyerabira, mu ngeri y'emu Olwaleero naawe weerabiddwa.

Bwetutyo bwe tusasula oyo eyayonoona n'atakkiriza Bigambo bya Mukama Omulabirizi We, ate nga lubeerera ebibonerezo by'Enkomerero, bye bisinga obukakali era bye by'olubeerera.

Abaffe tekibayigiriza, eky'okuba nti emirembe mingi gye twazikiriza olubereberye lwabwe (bano), nga batambulira mu bitundu bya bali (be twazikiriza) mazima mu ekyo mulimu eby'okuyiga eri ab'amagezi.

Era singa si kigambo ekyakulembera nga kyava ewa Mukama Omulabirizi Wo, era singa tekiri nti entuuko ya buli omu ngere olwo kyandibadde kikakafu (okubazikiriza).

Kale nno gumiikiriza ku ebyo bye boogera, era otendereze ebitendo bya Mukama Omulabirizi Wo, nga enjuba tennavaayo n'era nga tennagwa, era ne mu kiseera ky'ekiro mutendereze ne ku ssaawa ez'emisana olwo nno obeere mu basiima.

Era totunuzanga amaaso go eri ebyo bye tweyagaza na bo (abatakkiriza) mu bo mu mitendera gy'ebyokwewunda by'obulamu bw'ensi, tubagezese na byo. Era bulijjo okugabirira kwa Mukama Omulabirizi Wo kwe kusinga obulungi era kwe kw'olubeerera.

Era kubirizanga - owange ggwe Omubaka - abantu bo abaawaka okussala esswala, ate naawe oginywerereko, Ffe tetukusaba kwegabirira wadde okutugabirira, Ffe tukugabirira, Enkomerero ennungi ku nsi n'enkomerero y'abo abatya Allah nga bagondera Ebiragiro Bye ne beewala ebyeyaziyiza.

Era (abatakkiriza) bagamba nti singa atuleetera akabonero okuva ewa Mukama Omulabirizi We, naye abaffe obunnyonnyofu bw'ebyo tebwabajjira, obuli mu Bitabo ebyasooka?

Era singa twabazikiriza n'ebibonerezo olubereberye lwe, (Nnabbi Muhammadi nga tannatumwa) baandigambye nti: Ayi Mukama Omulabirizi Waffe, singa watutumira omubaka, olwo nno ne tugoberera ebigambo Byo, ne tutatuuka ku kukkakkanyizibwa ne tuswaala.

Gamba nti buli omu alindiridde, kale mulindirire, lumu mulimanya, baani abaali ku kkubo eggolokofu, era ani yalungama.

Kusemberedde abantu okubalibwa kwabwe nga bo bali mu butafaayo, era nga bo tebabiriiko.

Tewali kujjukiza kwonna kubajjira okupya okuva ewa Mukama Omulabirizi Waabwe okuggyako okuba nti bakuwuliriza nga bwe bazannya.

Emitima gyabwe nga miragajjavu, abo abalyazaamaanyi ne boogera mu kyama nga bagamba nti, abaffe ono alina ky'ali okuggyako okuba nti muntu nga mmwe, abaffe mugenda ku ddogo nga nammwe mulabira ddala?!

(Nnabbi Muhammadi) n'agamba nti: Mukama Omulabirizi Wange amanyi ekigambo ekiri mu ggulu ne mu nsi era yye y'awulira ennyo, Omumanyi ennyo.

(Wabula abatakkiriza) baagamba nti: Okwo kulogojjana mu kuloota oba yye yennyini yaabyegunjirawo, sinakindi yye mutontomi, (bw'aba ayagala tukkirize byagamba) kale atuleetere akabonero nga abaasooka bwe baatumwa.

Abaabasookawo mu bantu b'omukitundu kye twazikiriza tebakkiriza, abaffe bo be banakkiriza?!

Olubereberye lwo tetwatumanga okuggyako basajja nga tubawa Obubaka, kale mubuuze abalina okumanya bwe muba nga temumanyi.

Era tetwafuula (Bannabbi) nga mibiri egitalya mmere (okufaananako Bamalayika) era tebaali ba kubeera mu nsi lubeerera.

Oluvannyuma twabatuukiririza Endagaano (gye twabawa) ne tubawonya awamu n'abo be twayagala era ne tuzikiriza abaayonoona ekisukkiridde.

Mazima twabassiza Ekitabo (Kulaani) nga kirimu okwogera ku kitiibwa kyammwe, abaffe temutegeera?!

Ebyalo bimeka bye twazikiriza ebyali ebiryazaamaanyi olwo nno ne tuleeta abantu abalala!

Bwe baamala okumanya nti Ebibonerezo Byaffe bijja olwonno ne babidduka.

(Baagambibwa nti:) temudduka era mudde eri ebyo bye mubadde mweyagaliramu era mudde mu mayumba gammwe luliba lumu mulibuuzibwa.

Ne bagamba nti: Zitusanze mazima ffe twali balyazaamaanyi.

Okuwanjaga kwabwe okwo kwali bwekutyo okutuusa lwe twabafuula ng'ennimiro ekunguddwa n'eggwaawo.

Tetwatonda ggulu na nsi n'ebiri wakati wa byombi nga bya muzannyo.

Singa twayagala kuteekawo muzannyo, twaligutaddewo mu bano abali eno Gyetuli singa twali ba kukikola.

Wabula tukasuka amazima ku bulimba ne gabuggyawo, olwo nno bwo nebuvaawo, era mugenda kubonerezebwa olw'ebyo bye mwogera.

Bibye ebyo byonna ebiri mu ggulu ne mu nsi, n'abo abali w'ali tebeekuluntaza ku kumusinza era tebakaluubirirwa.

Batendereza (Allah) emisana n'ekiro, tebakoowa.

Oba beeteerawo ebisinzibwa ebyo ku nsi nga byo bye birizuukiza (abafu).

Singa (ensi n'eggulu) byalimu ebisinzibwa atali Katonda omu byombi byandyonoonese, (ekyo nno kikulage nti) Allah yasukkuluma Nnannyini Arishi kw'ebyo bye boogera.

Tabuuzibwa ku by'akola ate bo babuuzibwa.

Abo bateekawo ebisinzibwa atali Allah, gamba nti muleete obujulizi bwammwe (ku ekyo). Kuno kwe kubuulirira abali nange era kwe kubuulirira kw'abo abaakulembera wabula abasinga obungi mu bo (Abatakkiriza) tebamanyi mazima olwo nno bo bagakuba amabega.

Era olubereberye lwo tetwatuma Mubaka yenna okuggyako nga tumutumira Obubaka nti tewali kisinzibwa mu butuufu okuggyako Nze (Allah) kale munsinze.

Era baagamba nti: Katonda Ow'ekisa ekingi yeeteerawo omwana. Yayawukana (ku ebyo byonna) wabula (Bamalayika be bamugattako) baddu abaweebwa ekitiibwa.

Tebayinza kumukulembera na kigambo era bo bakolera ku Kiragiro Kye.

Amanyi ebyo ebiri mu maaso gaabwe n'ebyo ebiri emabega waabwe, tebagenda kuwolereza okuggyako oyo gw'aliba asiimye nabo olw'okumutya beegendereza.

Oyo yenna mu bo agamba nti mazima nze asinzibwa okuleka Ye (Allah), oyo tugenda kumusasula Omuliro Jahannama, Bwetutyo bwe tusasula abalyazaamaanyi.

Abo abatakkiriza tebakiraba nti mazima eggulu omusanvu n'ensi byali kitole ne tubyabuluzaamu era ne tuggya mu mazzi buli kintu ekiramu, abaffe tebakkiriza!

Era ne tussa mu nsi ensozi ebe nga tebayuuza era ne tussa mu yo amakubo kibayambe okumanya gye balaga.

Era ne tufuula eggulu akasolya akakuumibwa, wabula bo tebafaayo ku byamagero bya lyo.

Era (Allah) Y'Oyo eyatonda ekiro n'emisana n'enjuba n'omwezi buli kimu ku byo kiri mu bbanga nga byonna biwuga.

Era tetuwanga muntu yenna olubereberye lwo buwangaazi obw'olubeerera, olwo bw'olifa bo be b'okubeerawo olubeerera?

Buli muntu wa kukomba ku kufa era tubagezesa n'obubi n'obulungi nga kikemo era Gyetuli gye mujja okudda.

Abatakkiriza bwe bakulaba tebakufuula okuggyako eky'omuzannyo (ne bagamba) nti ono y'oyo ayogera ku bye musinza nga nabo bawakanya okwogera ku Katonda Ow'ekisa ekingi.

Omuntu yatondebwa nga ayanguyiriza, nja ku balaga Obubonero Bwange kale temunsaba kubanguyiriza bibonerezo.

Era ne bagamba nti eyo endagaano eribaawo ddi bwe muba nga mwogera mazima?!

Abo abatakkiriza singa bamanyi (ekiribaawo) mu kiseera we batalisobolera kuziyiza Muliro kutuuka ku byenyi byabwe wadde emigongo gyabwe, era nga tebagenda kutaasibwa.

Wabula biribatuukako kibwatukira ne bibakanga, tebalisobola kubizzaayo era si baakulindirizibwa.

Ababaka bangi baajeejebwa nga tonnatumwa, abo abaajeeja Ababaka mu bo baatuukibwako ebibonerezo by'okujeeja kwabwe.

Bagambe nti ani abakuuma ekiro n'emisana okubawonya ekyandibatuuseeko okuva ewa Katonda ow'ekisa ekingi wabula bo abatakkiriza beesamba okwogera ku Mukama Omulabirizi Waabwe.

Abaffe balina ebisinzibwa ebirala ebisobola okubataasa nga si Ffe (kale bye basinza) tebisobola kwetaasa era n'abyo tebisobola kutaasibwa ku Ffe.

Wabula twabawa bo ne bakitaabwe okweyagala, okutuusa obuwangaazi lwe bwabawanvuwako, abaffe tebalaba nti mazima Ffe, tuddira ensi ne tugikendeeza okuva ku nsalo zaayo abaffe bo be b'okulema?!

Bagambe nti mazima mbatiisa nga nkozesa Obubaka, wabula bakiggala tebawulira kukoowoola bwe baba balabuddwa.

So nga bwe balituukibwako akatundu ku Bibonerezo bya Mukama Omulabirizi Wo bagenda kugambira ddala nti: Zitusanze mazima ffe tubadde balyazaamaanyi.

Tulissaawo minzaane entuufu ezirikozesebwa ku Lunaku lw'Enkomerero, olwo nno tewali muntu aliryazaamaanyizibwa kintu kyonna, ne bwe kiriba kyenkana obuzito bwe mpeke ya akalo tugenda kukireeta. Kimala bumazi okuba nti Ffe tuliba ababazi.

Twawa Musa ne Haaruuna amateeka (Tawulaati) agaawula wakati w'amazima n'obulimba nga kitangaala era nga kya kubuulirira eri abatya Katonda.

Abo abatya Mukama Omulabirizi Waabwe awamu n'okuba nga tebamulaba era nga nabo beeraliikirira Olunaku lw'Enkomerero.

Eno (Kulaani) kubuulirira okw'omukisa kwe twassa, abaffe mugiwakanya?

Mazima twawa Ibraahiimu obulunngamu bwe okuva olubereberye era twali tumanyi bulungi ebimukwatako.

Jjukira bwe yagamba kitaawe n'abantu be nti: Bifaananyi ki bino, ebyo mmwe bye mumaliddeko obudde bwammwe!.

Ne bagamba nti twasanga bakadde baffe nga bye basinza.

(Ibraahiimu) n'agamba nti: Mazima mmwe ne bakadde bammwe muli mu bubuze obw'olwatu.

Ne bagamba nti: Otuleetedde mazima oba oli mu bakazannyirizi?

N'agamba nti: Wabula Mukama Omulabirizi Wammwe, Ye Mukama Omulabirizi W'eggulu (omusanvu) n'ensi oyo eyabitonda nange ku ekyo ndi omu ku bajulizi.

Era ndayira Katonda, amasanamu (ebibumbe) gammwe nja kugasalira amagezi singa munaaba mugaleseewo ne mubaako we mulaga.

(Yagatemaatema) n'agafuula bubajjo okuggyako (essanamu) erigasinga obunene, olwo nno badde gye liri (lye baba babuuza).

(Bwe badda) ne bagamba nti ani akoze kino ku bisinzibwa byaffe, mazima yye ali mu beeyisa obubi.

Nebagamba nti twawulidde omuvubuka ayitibwa Ibrahim nga agoogerako.

Ne bagamba nti: Kale mumuleete mu maaso g'abantu bamuweeko obujulizi.

(Bwe baamutuusa) ne bamugamba nti: Owaaye ye ggwe wakoze kino ku bisinzibwa byaffe owange Ibraahiimu?!

N'abagamba nti: Nedda omukulu waabwe ono ye yakikoze, kale mubabuuze bwe baba nga baatula.

Ne beetunulako ne bagamba nti: Mazima mmwe, mmwe abalyazaamaanyi abeeyisa obubi.

Ate oluvannyuma (lw'ekyo) beekyusa, (mu kifo ky'okwenenya baalemera ku buwakanyi n'obusamize bwabwe era ne bagamba nti): Mazima okimanyi bulungi nti ebibumbe ebyo tebyoogera.

(Ibraahiimu) n'agamba nti: Ate muva ku Allah Omutonzi wammwe ne musinza ebitabagasa kantu konna wadde okubatuusaako akabi.

Kivve ku mmwe, lwaki musinza ebirala ne mulekao Allah, abaffe temutegeera?!

Nebagamba nti (oba bw'atyo bw'agamba) mumwokye mutaase ebisinzibwa byammwe bwe muba nga mulina kye munaakola.

Ne tugamba nti muliro ggwe, beera bunnyogovu era mirembe ku Ibraahiimu.

Baayagala okumukolera olukwe naye twabafuula abataalufunamu.

Ne tumuwonya ne Luutu ne tubatwala mu nsi gye twawa omukisa ku lw'ebitonde.

Twamugabira Isihaaka ne Yaakuubu nga nnyongeza, bonna twabafuula balongoofu.

Era twabafuula abakulembeze nga balunngamya olw'Ekiragiro Kyaffe, era twabatumira nti (bateekwa) okukola obulungi n'okuyimirizaawo esswala n'okutoola zzaka era baali batusinza.

Ne Luutu twamuwa okusengejja ensonga n'okumanya era twamuwonya ne tumuggya mu kitundu ekyali kikola ebyonoono mazima bo baali bantu bakozi ba kibi aboonoonyi.

Era twamuyingiza mu kusaasira Kwaffe, mazima yye wa mu balongoofu.

Era (mujjukire) Nuuhu bwe yasaba olubereberye nga abantu (bamulemeredde) ne twanukula okusaba kwe ne tumuwonya wamu n’abantu be mu kabi akanene.

Ne tumutaasa ku bantu abo abaalimbisa Ebigambo Byaffe, mazima bo baali bantu ba kibi ne tubazikiriza bonna.

Era mujjukire Dawuda ne Sulayimaani mu kiseera bombi bwe baalamula omusango ogukwata ku nnimiro, embuzi z’abantu bwe zaaliiramu, era ku kulamula kwabwe twali bajulizi.

(Omusango ogwo) twawa Sulayimaani okugutegeera obulungi, naye buli omu twamuwa okugoba ensonga n’okumanya, era twagondeza Dawuda ensozi nga zitendereza, n’ebinyonyi bwe bityo, era ebyo Ffe twabikolera ddala.

Era twamuyigiriza okukola ebyambalo byammwe (eby'entalo) biryoke bibakuume ku buzibu bwammwe, abaffe mmwe mwebaza!.

Era Sulayimaani twamugondeza empewo ekunnguunta nga etambulira ku kiragiro kye n'egenda eri ensi eyo gye twawa omukisa. Era twali tumanyi buli kintu.

Ne mu zi Sitaane mwalimu ezibbira mu nnyanja ku lulwe nga zikola n'emirimu emirala egitali ogwo era Ffe twazikuumanga.

Era (jjukira) Ayyuubu bwe yakoowoola Mukama Omulabirizi we nti mazima nze ntuukiddwako obuzibu, era Ggwe Musaasizi asinga abasaasizi bonna.

Twamwanukula ne tumuggyako obuzibu obwali bumutuuseeko ne tumuwa abantu be (abaali bafudde) ne tumuwa n’abalala awamu na bali, ekyo nga kusaasira okuva Gyetuli era nga kya kubuulirira eri abasinza Allah.

Era (jjukira) Isimayiri ne Ediriisa ne Zulikifuli bonna ba mu bagumiikiriza.

Era twabayingiza mu kusaasira Kwaffe, mazima bo ba mu balongoofu.

Era (jjukira) ekyafaayo kya nnannyini (kumiribwa) kyennyanja (Yunusu) bwe yagenda nga musunguwavu n'alowooza nti tetugenda kumusobola, ate bwe yamala okubeera mu kizikiza yakoowoola nti tewali kisinzibwa mu butuufu okuggyako Ggwe, wasukkuluma (Mukama Wange) mazima nze mbadde mu beeyisa obubi.

Awo nno twayanukula okusaba kwe ne tumuwonya okweraliikirira, era bwetutyo bwe tuwonya Abakkiriza.

Era jjukira Zakariya bwe yakoowoola Mukama Omulabirizi We nti: Ayi Mukama Omulabirizi Wange, tondeka bwannamunigina (ne bwompa ezzadde nsigala ndi mukkiriza) anti Ggwe osinga abasigalawo bonna.

Awo nno twayanukula okusaba Kwe, era ne tumuwa Yahaya, ne tusobozesa mukyala we okuzaala, mazima bo bettaniranga okukola ebirungi era nga batusaba ku lw'okwagala okufuna ebirungi bye tulina ne ku lw'okutya Ebibonerezo Byaffe era baalinga batugondera.

Era (jjukira) ekyafaayo ky'omukyala for (Mariamu) oyo eyakuuma obwereere bwe olwo nno netumufuuwamu omwoyo ogwava Gyetuli ne tumufuula yye n’omwanawe nga kyakulabirako eri ebitonde byonna.

Mazima kino ekibiina kyammwe kiri ekibiina kimu nange nze Mukama Omulabirizi Wammwe kale munsinze.

(Naye abantu) baayawukana mu kigambo ky'eddiini yaabwe wakati waabwe (wabula) bonna Gyetuli gye bagenda okudda.

Oyo akola omulimu omulungi gwonna nga Mukkiriza tayinza butasasulwa olw'okutakabana kwe era mazima tumuwandiikira (emirimu gye).

Kizira ku kitundu kyonna kye twazikiriza (okudda ku nsi) mazima bo tebayinza kudda.

Okutuusa nga Yaajuuja ne Maajuuja bagguliddwa era nga nabo bagenda kufukumuka nga bava mu buli kkubo.

Endagaano ey'amazima bw'erisembera nga olwo nno oligenda okulaba nga amaaso g'abo abatakkiriza gakanuse (olw'entiisa nebagamba nti) zitusanze ekintu kino tubadde tukigayaaliridde si kyokka wabula tubadde tweyisa bubi.

Mazima mmwe n'ebyo bye musinza ne muva ku Allah muli nku za Muliro Jahannama mmwe muli ba kuguyingira.

Singa ebyo byaali bisinzibwa mu butuufu tebyaaliguyingidde (omuliro) naye bonna ba kugubeeramu bugenderevu.

Balituukibwako nga bali mu gwo okuyiriitira era tebagenda kuwulira maloboozi gonna nga bali mu gwo.

Mazima abo be twamanya edda nti bagenda kubeera balongoofu abo nno bagenda kubeera wala n’omuliro.

Tebagenda kuwulira lukwakwayo lwagwo era balibeera mu ebyo emyoyo gyabwe gye byagala obugenderevu.

Ebikangabwa ebisinga okuba eby'amaanyi tebigenda kubatiisa era Bamalayika balibaaniriza nga babayozaayoza nti luno lwe Lunaku lwammwe olwo lwe mwali mulagaanyisibwa

Olunaku lwe tulizingako eggulu nga fayiro z'ebiwandiiko bwe zizingibwako. Mu ngeri y'emu nga bwe twatandika ebitonde bwe tugenda okubizzaawo, nga ndagaano nkakafu ku Ffe anti mazima ekyo tusobolera ddala okukikola.

Mazima twawandiika mu Zabbuli oluvannyuma lw'okuwandiika ku Lubaawo olukuumibwa nti mazima ensi egenda kusikirwa abaddu Bange abalongoofu.

Mazima ebyo, (ebyogeddwako wano) kwe kubuulirira okwannamaddala eri abantu abasinza Allah.

Tetwakutuma ggwe (Nnabbi Muhammadi) okuggyako nga oli kya kusaasira eri ebitonde.

Bagambe (ggwe Nnabbi Muhammadi) nti: Mazima mpeebwa Obubaka (nga obubaka bugamba) nti: Mazima Omusinzibwa Wammwe y'asinzibwa Omu yekka mu mazima, abaffe mmwe munaasiramuka?

Kale nno bwe bamala ne baawukana ku ekyo, olwo nno gwe Bagambe nti: Mbalabula kyenkanyi era siri nze amanyi bye mulagaanyisibwa biri kumpi oba biri wala.

Mazima Yye (Allah) amanyi bye mwolesa nga mwogera era amanyi n'ebyo bye mukweka.

Era simanyi obanga (okubalindiriza n'atabakangavvulirawo) nga kikemo gye muli era nga kubaleka kweyagala okutuusa ebbanga eggere.

(Nnabbi Muhammadi) n'agamba nti ayi Mukama Omulabirizi Wange, salawo mu butuufu (wakati wange n'abo abannimbisa) era Mukama Omulabirizi Waffe Omusaasizi Ow'ekisa ekingi Gwe tusaba obuyambi ku ebyo bye mwogera.

Abange mmwe abantu, mutye Mukama Omulabirizi Wammwe, anti mazima okukankana (kw'ensi) nga Enkomerero etuuse kiriba kintu kinene nnyo.

Olunaku lw'olikulaba (okukankana) nga buli mukyala muzadde tatadde mwoyo ku mwana (gwe yazaala) n'ayonsa, ate buli aliba alina olubuto lugenda kuvaamu, era oliraba abantu nga bali nga abatamidde so nga tebatamidde (ekiribatuusa ku ekyo) lwa kuba nti mazima Ebibonerezo bya Allah biyitirivu.

Mu bantu mulimu awakana ku bikwata ku Allah nga talina kumanya kwonna, n'aba nga agoberera kyewaggula Sitaane.

(Sitaane) kyamuwandiikwako nti ddala buli amwewa mazima yye amubuza era n'aba nga amuzza eri Ebibonerezo by'Omuliro.

Abange mmwe abantu, bwe muba nga mulina okubuusabuusa ku kuzuukira (mukimanye) nti mazima ffe twabatonda nga tubajja mu ttaka (okusinziira ku jjajja wammwe Adamu nga bwe yatondebwa) oluvannyuma tubatonda mu mazzi agazaala nate oluvanyuma netubajja mu kisaayisaayi oluvanyuma ekifuuka ekinyamanyama ekituukiridde mu butonde bwakyo n'ekitatuukiridde olwo nno tube nga tubalaga (obuyinza bwaffe) olwo nno netukuumira mu nnabaana ekyo kye tuba twagadde okumala ebbanga eggere oluvanyuma tubafulumya nga muli bawere ate oluvanyuma mube nga mufuuka abakulu, ne mu mmwe mulimu abafa (nga bakyali) era mu mmwe mulimu abazzibwayo eri obuwangaazi obusinga okuba obunafu (n'akaddiwa nga takyesobola) n'aba nga takyasobola kumanya kintu kyonna oluvannyuma lw'okuba nga yali amanyi (ekirala ekiraga nti okuzuukira kulibaayo) ogenda n'olaba ensi ng'ekaze naye ke tugitonnyesaako enkuba edda buto n'etinta n'emeza buli mutindo gwa bimera ebirungi

Ekyo nno lwakuba nti mazima Allah Ye Waamazima era mazima Yye aliramusa abafu. Era nti mazima Yye Muyinza ku buli kintu.

Era mazima essaawa ey'enkomerero ejja, teriimu kubuusabuusa era mazima ddala Allah ajja kuzuukiza abali mu ntaana.

Mu bantu mulimu oyo awakanya ebikwata ku Allah nga tasinziira ku kumanya wadde okulunngamizibwa oba okuba n'ekitabo ekiraga obutangaavu.

Aweta ensingo ye abe nga aggya abantu ku Kkubo lya Allah, atuusibwako okuswazibwa mu nsi era tugenda kumukombesa ku Lunaku lw'Enkomerero ku Bibonerezo ebyokya.

Ekyo kikutuuseeko olw'ebyo emikono gyo bye gy'akola edda (ku nsi) era mazima Allah si Mulyazaamaanyi eri abaddu.

Ne mu bantu mulimu asinza Allah ng'ali ku ndeboolebo (ya Bukkiriza) n'olwekyo bw'atuukibwako ekirungi akkalira nakyo ate bw'atuukibwako okugesezebwa atalantuka n'agwira ku kyenyi kye (n'ava ku ddiini) olwo nno n'afiirwa ensi n'Enkomerero, okwo nno kwe kufaafaaganirwa okw'olwatu.

Alekawo Allah n'asinza ebyo ebitamutuusaako kabi era ebitamutuusaako mugaso,aa okwo kwe kubula okwewala.

Asaba oyo akabi ke nga ke kali okumpi okusinga omugaso gwe, mubi nnyo asuubirwa okutaasa era mubi nnyo asuubirwa okuba nga ye w'omukwano.

Mazima Allah aliyingiza Ejjana abo abaakola emirimu emirungi, nga emigga gikulukutira wansi waazo, mazima Allah akola ekyo ky'aba ayagadde.

Oyo alowooza nti Allah tagenda kutaasa Mubaka We kuno ku nsi ne ku Nkomerero kimugwanidde akasuke omuguwa waggulu ku kasolya oluvannyuma yeerippe (yeetuge) olwo nno alabe abaffe by'akola bisobola okumuwonya by'atayagala.

Era bwetutyo twagissa (Kulaani) nga bigambo ebinnyonnyola (obulungi) era mazima Allah alunngamya gw'aba ayagadde.

Mazima abo abakkiriza (Nnabbi Muhammadi) n'abakkiriza Eddiini y'Ekiyudaaya (ku mulembe gwayo) n'abatasinza masanamu (nga Nnabbi Muhammadi tannatumwa) n'abakkiririza mu ddiini y'Ekulisitaayo (ku mulembe gwayo) n'abo abasinza omuliro, n'abo abagatta ku Allah ebintu ebirala, mazima Allah agenda kusalawo wakati waabwe (ku ebyo bye baali basinza) ku Lunaku lw'Enkomerero. Anti mazima Allah ku buli kintu Mujulizi.

Abaffe tolaba nti mazima Allah bamuvunnamira abali mu ggulu omusanvu n'abo abali mu nsi n'enjuba n'omwezi n'emmunyeenye n'ensozi n'emiti n'ebisolo, nga n'abantu bangi nnyo (abamuvunnamira), era nga n'abantu bangi baakakatwako ebibonerezo (olw'o butamuvunnamira) era omuntu Allah gw'aba ataddeko okunyoomebwa kale tayinza kufuna amussaamu kitiibwa. Anti mazima Allah akola ekyo ky'aba ayagadde.

Bino ebibinja by'abantu ba mirundi ebiri baayawukana mu kutongoza Mukama Omulabirizi Waabwe, kale ne kibeera nga, abatakkiriza baatungirwa engoye nga za mu Muliro nga balifukirirwa ku mitwe gyabwe amazzi ag'olweje.

Nga amazzi ago galiviirako okusaanuuka kw'ebyo ebiri mu mbuto zaabwe n'amaliba gaabwe.

Era nga balikubwa ennyondo ezaakolebwa mu kyuma.

Buli bwe baliba baagala okufuluma mu Muliro ogwo olw'obulumi obulibatuukako mu gwo nga bazzibwa mu gwo (nga bagambibwa nti) mukombe ku bukaawu bw'Ebibonerezo by'Omuliro ogwokya ennyo.

Mazima Allah aliyingiza mu Jjana abo abakkiriza ne bakola emirimu emirongoofu nga emigga gikulukutira wansi waazo. Nga bali mu zo, balyambazibwa ebikomo ebya zaabu ne luulu nga n'engoye ze bagenda okwambala ziriba za liiri.

Era nga baalunngamizibwa (ku nsi) eri Ekigambo ekisinga obulungi (eky'okwawula Allah n'okumusuuta) era nga baalunngamizibwa eri ekkubo eritenderezebwa.

Mazima abo abatakkiriza era ne baziyiza abantu ku Kkubo lya Allah n’Omuzikiti gw'Emizizo (e makkah) gwe twateerawo abantu nga omutuuze we guli n'oweewala bonna benkana, omuntu yenna ayagala okukoleramu obukyamu tumukombya ku Bibonerezo ebirumya ennyo.

Era jjukira ekiseera bwe twalaga Ibraahiimu ekifo ky'ennyumba (Kaaba), era ne mmugamba nti: Tongattangako ekintu kyonna era tukuza emnyumba yange eri abajeetooloola n'abayimiriramu n'abakutama abavunnama (nga basaala).

Era koowoola abantu bajje okukola Hijja, bagenda kukujjira abatambuza ebigere, n'abalijjira ku nsolo enkovvu nga bava mu buli kkubo ery'ewala.

Bagende balabe ebibagasa, era batendereze Erinnya lya Allah mu nnaku ezimanyiddwa olw'ebyo bye yabagabira mu bisolo eby'awaka (ebirundibwa) kale mulye ku byo era muliise omwetaavu omwavu.

Ekyo nga kiwedde babe nga bamaliriza emikolo gyabwe era batuukirize bye beeyama era betooloole ennyumba kaasangwawo.

Ebyo (babikola lwa kuwa Allah kitiibwa) era bulijjo oyo yenna agulumiza emizizo gya Allah ekyo kye kirungi gy'ali mu maaso ga Mukama Omulabirizi We. Era mwakkirizibwa okulya (ennyama y'e) bisolo ebirundibwa, okuggyako ebyo ebibasomerwa mu ngeri y'emu mwewale amasanamu olw'obubi bwago, era mwewale ebigambo ebitemerere.

Mulina kubeera abeewa Allah Yekka nga temumugattako kintu kirala kyonna, oyo yenna agatta ku Allah ekintu ekirala aba nga awanuse waggulu ebinyonyi ne bimusikula oba empewo n'emusuula mu kifo eky'ewala ennyo.

(Ebyo eby'okukola Hijja n'okusala ebisolo Biragiro bya Allah) era bulijjo omuntu agulumiza obubonero bwa Allah mazima ekyo kibalibwa mu bikolwa by'emitima egimutya.

Mulina mu byo (ebirabo bye muwaayo mu Hijja) emigaso (nga okubyebagala n'okunywa amata gaabyo) okutuusa ebbanga eggere, oluvannyuma ekifo we zirina okusalirwa kwe kuba nga zituuka awali ennyumba kaasangwawo.

Buli bantu twabateerawo emikolo gy'okusaddaaka ebisolo balyoke babe nga boogera ku Linnya lya Allah olw'ebyo bye yabagabira mu bisolo ebirundibwa, Katonda Wammwe Katonda Omu, Yye Gwe muba mujeemulukukira, era sanyusa (ggwe Muhammadi) abo abatebenkedde (ku kusinza Allah).

(Bo) beebo, nga buli Allah lw'ayogerwako emitima gyabwe gitya era abagumiikiriza ku ebyo ebiba bibatuuseeko era abayimirizaawo esswala era abawaayo ku ebyo bye tubagabira.

Enngamiya twazibateerawo nga za mu Bubonero bwa Allah, mulina mu zo ebirungi, kale muzoogerereko Erinnya lya Allah nga muziteeseteese okuzisala (bwe muzisiba okugulu okumu ne zisigala nga ziyimiridde ku asatu) olwo nno embiriizi zaazo bwe zigwa ku ttaka mukkirizibwa okuzirya, era muliiseeko atalina n'omwetaavu, Bwetutyo twazibagondeza mube nga mwebaza.

Ennyama ya zo n'omusayi gwa zo tebituuka ku Allah naye atuukwako okumutya okuva mu mmwe, bw'atyo yazibagondeza mube nga mutendereza Allah olw'ebyo bye yabalungamyamu era sanyusa abalongoosa.

Mazima Allah alwanirira abo abakkiriza, mazima Allah tayagala oyo yenna omukumpanya omuwakanyi.

Kikkiriziddwa (okwerwanako) eri abo abalwanyisibwa mu ngeri y'okuba nti baalyazaamaanyizibwa era mazima bulijjo Allah asobolera ddala okubataasa.

(Bo) beebo abaagobwa mu mayumba gaabwe awatali nsonga ntuufu okuggyako okuba nga bagamba nti: Allah ye Mukama Omulabirizi Waffe, singa Allah tataasa bantu ng'akozesa abalala, amasinzizo ga bakabona, n'amakanisa ga Abakulisitaayo, n'amasinzizo ga Abayudaaya n'emizikiti gya Abasiraamu, omwogererwa ennyo ku Linnya lya Allah byandimenyeddwa. Allah ajja kutaasiza ddala abo abamutaasa, mazima Allah Waamaanyi Nnantakubwakumukono.

(Allah b'ataasa) beebo nga bwe tuba tubatebenkezza mu nsi bayimirizaawo esswala, ne batoola zzaka, ne balagira okuyisa obulungi, ne baziyiza okuyisa obubi era enkomerero y'ebintu byonna ya Allah.

Singa bakulimbisa mazima olubereberye lwabwe abantu ba Nuuhu, n'aba Aadi n'aba Thamuudu baalimbisa.

Nabwekityo n'abantu ba Ibraahiimu n'abantu ba Luutu.

N'abantu b'e Madiyana. Ne Musa yalimbisibwa nennindiriza abatakkiriza oluvannyuma nnabakwata, naye okubonereza Kwange kwali kutya!

Ebitundu bimeka bye twazikiriza nga biryazaamaanyi! (nga na buli kati) obusolya bwabyo buguddemu n'enzizi ezitakyakimwako mazzi n'ebizimbe ebyali bizimbiddwa obulungi.

Abaffe tebaatambulako mu nsi ne bafuna emitima egibayamba okutegeera oba amatu ge bawuliza, mazima amaaso si ge gaziba naye emitima egiri mu bifuba gye giziba.

Bakugamba obatuuseeko ebibonerezo mu bwangu naye Allah tayinza kwawukana ku Ndagaano Ye (ajja kubibatuusaako ku Lunaku lw'Enkomerero) era mazima olunaku olumu ewa Mukama Omulabirizi Wo luli nga emyaka lukumi mu mbala yammwe.

Ebitundu bimeka bye nnalindiriza so nga byo byali mu kweyisa bubi naye oluvannyuma ne mbikwata era Gyendi yokka y'eri obuddo.

Gamba (ggwe Muhammadi) ti: Abange mmwe abantu mazima nze gyemuli ndi mutiisa ow'olwatu.

Bo abakkiriza ne bakola emirimu emirongoofu balina ekisonyiwo n'okugabirirwa okw'ekitiibwa.

N'abo abeewaayo okulemesa Ebigambo Byaffe, abo be bannannyini Muliro Jahiimu.

Tetwatuma olubereberye lwo Mubaka yenna oba Nnabbi okuggyako nga bw'ayagala okusoma (Obubaka obumuweereddwa) Sitaane agezaako okusonseka ebigambo mu kusoma kwe, olwo nno Allah n'aggyawo ebyo Sitaane by'agezaako okusonsekamu awo Allah n'akakasaawo Ebigambo Bye, bulijjo Allah Mumanyi nnyo, Mugobansonga.

Allah alyoke afuule Sitaane by'agezaako okusonseka (mu Bubaka) ekikemo ku abo abalina obulwadde mu mitima gyabwe, n’abalina emitima emikakanyavu era mazima abeeyisa obubi beesambye nnyo Allah.

Bateekeddwa okutegeera abo abaaweebwa okumanya nti mazima ddala (Kulaani) ge mazima agavudde ewa Mukama Omulabirizi Wo olwo nno bagakkirize, era ku lw'ekyo emitima gyabwe gyewombeke , era mazima Allah alunngamiza ddala abo abakkiriza eri ekkubo eggolokofu.

Abatakkiriza tebagenda kulekayo kubuusabuusa ku yo, (Kulaani) okuutuusa Olunaku lwE'nkomerero lwe lulibatuukako ekibwatukira, oba ne bibatuukako ebibonerezo by'olunaku olutalibaako kulekera.

Obufuzi ku Lunaku olwo buliba bwa Allah Yekka, aliramula wakati waabwe, bo abakkiriza ne bakola emirimu emirongoofu balibeera mu Jjana ezijjudde ebyengera.

Ate abo abaawakanya ne balimbisa Ebigambo Byaffe abo balissibwako ebibonerezo ebinyoomesa.

Ate abo abaaleka amaka gaabwe ne bagenda okulafuubana mu kuweereza mu kkubo lya Allah olwo nno nebattibwa oba ne bafa, Allah agenda kubaweera ddala ebigabwa ebirungi. Era bulijjo mazima Allah Yye y'asinga abagabi bonna.

Alibayingiriza ddala obuyingiro bwe balisiima. Era mazima Allah Mumanyi nnyo Waakisa.

Ekyo bwe kityo bwe kiri. Era oyo yenna asasula ekyenkana obuvune obumutuusiddwako, ate oluvannyuma n'alumbaganwa, mazima Allah wa kumutaasiza ddala, mazima Allah alekera Musonyiyi.

Ekyo nno lwakuba nti mazima Allah ayingiza ekiro mu musana era n'ayingiza omusana mu kiro era mazima Allah awulira,alaba nnyo.

Ekyo bwekityo bwekiri lwa kuba nti ddala Allah Yye Ye Waamazima, ate bye basinza ebitali Yye bya bulimba era mazima Yye Allah Ye Waawaggulu Oweekitiibwa.

Abaffe tolaba nti mazima Allah assa okuva waggulu amazzi ensi n'efuuka ya kiragala mazima Allah alumirwa (ebitonde Bye) amanyi ebikusike.

Bibye Yekka ebyo ebiri mu ggulu omusanvu n'ebyo ebiri mu nsi era ddala Allah Yye y'atalina kye yeetaaga atenderezebwa.

Abaffe tolaba nti mazima Allah yabagondeza ebyo ebiri mu nsi, n'abagondeza n'amaato agaseeyeeyera ku nnyanja olw'Ekiragiro Kye era awanirira eggulu obutagwa ku nsi mpozzi nga ayagadde, mazima Allah Mukwatampola Musaasizi nnyo eri abantu.

Yye Y'Oyo abawa obulamu oluvannyuma n'abatta n'oluvanyuma alibawa obulamu, mazima omuntu muwakanyi (tasiima byengera).

Buli bantu twabawa emikolo (egy'okusinza) bo gye bakola n'olwekyo (abakkiriza) tebasaanye kukuwakanya ku kintu kyonna, era koowoola abantu okudda ewa Mukama Omulabirizi Wo (okusinziira ku bye twogedde) mazima ggwe oli ku bulunngamu obulambulukufu.

Bwe bakuwakanya gamba nti Allah y'asinga okumanya ebyo bye mukola.

Allah alisalawo wakati wammwe ku Lunaku lw'Enkomerero ku ebyo bye mwalinga mwawukanamu.

Abaffe tomanyi nti mazima Allah amanyi ebiri mu ggulu ne mu nsi? Mazima ekyo kiri mu buwandiike, mazima ekyo kyangu nnyo ku Allah.

Basinza ebitali Allah by'atassangako bujulizi bwonna, era bye batalinaako kumanya kwonna, bulijjo abeeyisa obubi tebaba na mutaasa.

Ebigambo Byaffe bwe bibasomerwa nga binnyonnyofu olaba mu byenyi by'abo abatakkiriza ekifaananyi ekitali kirungi, nga babulako katono babuukire abo ababasomera Ebigambo Byaffe. Bagambe nti: abaffe mbabuulire ekibi okusinga awo, gwe Muliro Allah gwe yalagaanyisa abo abatakkiriza era buddo bubi.

Abange mmwe abantu, ekifaananyi kikubiddwa kale mukiwulirize, mazima abo be musaba abatali Allah, tebasobola kutonda nsowera ne bwe baba nga beegasse ku lw'ekyo, era ensowera singa ebaggyako ekintu tebasobola kugikiggyako, abanja munafu ne gwe babanja.

Tebaawa Allah kitiibwa kimusaanira, mazima Allah Waamaanyi nnyo Nnantakubwakumukono.

Allah alonda mu Bamalayika Ababaka, bw'atyo ne mu bantu, mazima Allah awulira nnyo era alaba nnyo.

(N’olwekyo) amanyi ebiri mu maaso gaabwe n'ebiri emabega waabwe. Eri Allah ebintu byonna gye bizzibwa.

Abange mmwe abakkiriza mukutame (nga mukutte ku maviivi) era muvunname, musinze Mukama Omulabirizi Wammwe, era mukole obulungi musobole okutuuka ku buwanguzi.

Era mulafuubane nga muweereza (mu kkubo lya) Allah mu bulambulukufu bw'okulafuubana okwo, Yye (Allah) Ye yabalondamu (ku lw'Eddiini ye) era teyabateekera mu ddiini buzito bwonna, nga y'eddiini ya mukadde wammwe Ibrahimu, yye ye yabatuuma Abasiraamu olubereberye (mu bitabo ebyakulembera) ne mu (Kulaani) eno olwo nno Omubaka abeere mujulizi ku mmwe nammwe mubeere bajulizi ku bantu (abalala) kaakano nno muyimirizeewo esswala mutoole ne Zaka era mwekwase Allah, Yye Ye Mukuumi Wammwe, kale Mulungi nnyo Omukuumi (Oyo) era Mulungi nnyo Omutaasa Oyo.

Mazima Abakkiriza batuuse ku buwanguzi.

Abo abeewombeeka mu sswala zaabwe.

Era abo abatabeera mu bintu bitaliimu makulu.

Era abo abajjumbize mu kutoola Zzaka.

Era abo abakuuma obwereere bwabwe.

Okuggyako ku bakyala baabwe oba abazaana abali mu mikono gyabwe, anti bo tebanenyezebwa kw'abo.

Omuntu asukka ku abo, abo nno be babuusi b'ensalo.

Era abantu abalungi aboogeddwako waggulu, bebatuukiriza obwesigwa bwabwe n'endagaano zaabwe.

Era bo beebo abeekubiriza okutuukiriza esswala zaabwe.

Abo nno be bagenda okusikira (okuyingira Ejjana).

Abo abalisikira Firidausi (Ejjana) nga bo mu yo baakutuulamu bugenderevu.

Mazima twatonda omuntu nga tumuggya mu nsibuko ya ttaka

Oluvannyuma tumufuula amazzi agazaala ge tukuumira mu kifo ekinywevu (nnabaana).

Oluvannyuma ne tutonda mu mazzi ago ekisaayisaayi ate ekisaayisaayi ne tukitondamu ekinyamanyama ate ekinyamanyama ne tukitonderamu amagumba olwo nno amagumba ne tugambaza ennyama, ate oluvannyuma ne tumutonda nga kitonde kirala (n'afuuka omuntu nga afuuyiddwamu omwoyo) n'olwekyo Allah yasukkuluma Oyo asinga abakozi b'ebintu bonna.

Mazima mmwe oluvannyuma lw'ekyo ddala mugenda kufa.

Oluvanyuma mazima mmwe ku Lunaku lw'Enkomerero muli baakuzuukizibwa.

Era mazima twatonda waggulu wammwe eggulu omusanvu era tetubangako bagayaalirira (kulabirira) bitonde.

Era tussa okuva waggulu amazzi mu ngeri ya kigero netugabeeza mu ttaka era nga mazima Ffe tusobolera ddala okugabuzaawo.

Netubamereza nago ennimiro ez'emitende n'enzabbibu nga zirimu ebibala bingi era nga ku byo kwe mulya.

Era netumeza nago omuti (omuzaituni) ogwo ogusibuka ku lusozi Sinai, guvaamu omuzigo (abantu gwe beesiiga) era nga muwoomu eri abalyi.

Era mazima mulina mmwe mu nsolo ezirundibwa eky'okuyiga, tubanywesa mu ebyo ebiri mu mbuto zaazo era mulina muzo emigaso mingi era nga mulya ezimu kuzo.

Nga era ku zo ne ku maato kwe mutwalirwa.

Era mazima twatuma Nuuhu eri abantu be n'agamba nti: Abange bantu bange musinze Allah yekka temulinaayo kintu kirala kyonna kisaana kusinzibwa. Abaffe temutya (Katonda)!.

Abakungu abo abaakaafuwala mu bantu be ne bagamba nti: Tali ono (Nuuhu) okuggyako muntu nga mmwe, ayagala kwesukkulumya ku mmwe singa Allah yayagala (kutuma Malayika) yaalibadde atuma Bamalayika, kino tetukiwulirangako mu bakadde baffe abaasooka.

Talina kyali okuggyako okuba nti alina ekimulinnya ku mutwe kale mumuliindirize okumala ekiseera ekigere (ajja kuvaawo oba ajja kufa).

(Nuuhu) n'agamba nti ayi Mukama Omulabirizi wange ntaasa ku kunnimbisa (kwa bwe).

Awo nno twamutumira nti kola eryato nga okolera ku biragiro byaffe, era ne tumutumira nti ekigambo kyaffe bwe kinaatuuka ettanuulu n'efukumukamu amazzi olwo nno pakira mu lyo (eryato) ku buli kintu bibiribibiri ekisajja n'ekikazi era pakiramu abantu bo okuggyako omuntu oyo ekigambo gwe kyakakatako edda mu bo, era toyogera nange ku abo abeeyisa obubi, mazima bo ba kuzikirira.

Ggwe n'abo abali naawe bwe mukkalira mu lyato olwo nno gamba nti okutenderezebwa kwonna kwa Allah Oyo oyo atuwonyezza abantu abeeyisa obubi.

Era gamba nti ayi Mukama Omulabirizi wange (bwe ntuuka okuva mu lyato lino) nzisa mu kifo eky'omukisa anti ggwe osinga bonna abasalawo ebifo (eby'okubeeramu).

Mazima ekyo kijjuddemu obubonero (obulaga obuyinza bwa Katonda) newaakubadde nga ate tubagezesa.

Ekyo nga kiwedde twatandikawo oluvannyuma lwabwe omulembe omulala.

Netubatumamu Omubaka ng'ava mu bo ng'abagamba nti musinze Allah temulina kirala kyonna kye musaanye kusinza kitali Yye, abaffe temutya (Katonda)!.

Abakungu abaawakanya mu bantu be nebaalimbisa okusisinkana Olunaku lwE'nkomerero, abo be twawa okweyagala mu bulamu bw'ensi, baagamba nti: Ono talina kyali okuggyako muntu buntu nga mmwe, bye mulyako by'alya, ne bye munywa by'anywa.

Ate singa mugondera omuntu obuntu nga mmwe, mazima mmwe olwo munaaba mufaafaaganiddwa.

Mbu abalagaanyisa nti mazima mmwe singa mufa ne muba ettaka era amagumba ameereere, nti mazima mmwe mugenda kudda!.

Tekisoboka era tekisobokera ddala ekyo kye mulagaanyisibwa.

(Ekituufu kiri nti) tewali bulamu bulala bwonna okuggyako obulamu obw'ensi abamu muffe bava mu bulamu abalala ne bayingira. Era ffe tetugenda kuzuukizibwa.

Tali yye okuggyako okuba nti musajja agunja ku Katonda ebigambo eby'obulimba, era ffe tetujja kumukkiriza.

(Nuuhu) n'agamba nti ayi Mukama Omulabirizi wange ntaasa ku kunnimbisa (kwa bwe).

(Katonda) n'agamba nti mu kaseera katono nnyo bajja kuba bejjusa.

Okubwatuka ne kubatuukako era nga kye kibasaanira ne tubafuula ebisasiro. N'olwekyo babeere wala nnyo abantu abeeyisa obubi.

Ekyo nga kiwedde twatandikawo oluvannyuma lwa bwe emirembe emirala.

Tewali mulembe guyinza kukulembera kiseera kyagugererwa, era tebayinza kwagala kwongezebwayo (nebakufuna).

Oluvannyuma twatuma ababaka baffe nga bagoberegana, buli bantu bwe bajjirwanga omubaka waabwe nga bamulimbisa, olwo nno abamu ne tubakwasa ekkubo bannaabwe lye baakwata (mu kuzikirira) ne tubafuula eky'okwogerwako, kale nno babeere wala nnyo abantu abatakkiriza.

Oluvannyuma twatuma Musa ne Muganda we Haaruuna nga tubawadde eby'amagero byaffe n'obujulizi obw'enkukunala.

Bagende ewa Falaawo n'abakungu be (wabula be twatuma bwe baagenda gye bali) ne beekuza ne babeera abantu abeetwala okuba abaawaggulu.

Ne bagamba nti tukkirize abantu ababiri abafaanana nga ffe ng'ate abantu baabwe baddu baffe abatuweereza!.

Ne babalimbisa bombi olwo nno ne baba mu abo abaazikirizibwa.

Era mazima twawa Musa Ekitabo babe nga balunngama.

Twafuula Mutabani wa Mariamu ne Maama we akabonero, ne tubateeka bombi mu kifo e kisitufu e kibeerekamu nga kirimu n'amazzi agakulukuta.

Abange mmwe Ababaka mulye ku ebyo ebyakkirizibwa okuliibwa, era mukole emirimu emirungi mazima Nze mmanyidde ddala ebyo bye mukola.

Mazima ddala e kibiina kyammwe kino (eddiini yammwe) kiri ekibiina kimu Nange Nze Mukama Omulabirizi wammwe kale muntye.

Naye abantu beekutulamu wakati waabwe okuva ku kigambo kyabwe (eky'eddiini), ebibiina bingi nga buli kibinja (abantu baakyo) basanyuka n'ebyo bye balina.

Kale baleke mu bubuze bwa bwe okutuusa ekiseera (ekyabagererwa).

Abaffe balowooza bye tubawa mu mmaali n'abaana.

Tuba tubanguyiza kweyongera kufuna birungi! Wabula tebategeera.

Mazima abo abeeraliikirira okutuukiriza obuvunaanyizibwa bw'okutya Mukama Omulabirizi waabwe.

Era abo ebigambo ebyassibwa okuva ewa Mukama Omulabirizi waabwe babikkiriza.

Era abo abatagatta kintu kirala ku Mukama Omulabirizi waabwe.

Era abo abawaayo bye baba bawaddeyo (ku lwa Katonda Waabwe) nga emitima gyabwe gitidde okuba nti mazima bo bagenda kudda ewa Mukama Omulabirizi Waabwe.

Abo nno bayaayaanira okukola ebirungi era nga bo mu ekyo be bakulembera

Era tetuwaliriza muntu (kukola) okuggyako ekyo ekiri mu busobozi bwe era tulina ekitabo ekiraga mu butuufu (ebikolebwa) nabo nga tebagenda kulyazaamaanyizibwa.

Wabula emitima gyabwe (abawakanyi) giri mu kugayaalirira (Kulaane) eno, awamu n'okugatta ku Katonda ebintu ebirala, balina e mirimu emirala emibi nga Katonda abaleka ne bagikola (olwo nno ebibonerezo bya bwe byeyongere).

Okutuusa bwe tussa ebibonerezo ku beejalabi mu bo olwo nno bo nebalaajana.

Temulaajana leero, mazima mmwe temuli baakututaasibwako.

Mazima ebigambo byange byabasomerwanga naye mmwe mwalinga mukyukira ku bisinziiro bya mmwe ne mubikuba amabega.

Nga mwekuza olw'okugiwalana (Kulaane), nga mugyogerako mu ngeri embi nga mutudde ku byoto byammwe ekiro.

Abaffe tebeetegereza ekigambo (Kulaane ne balaba nti ntuufu) oba (ekibabuza kwe kuba nti) bajjiddwa ebyo ebitajjira bakadde baabwe abaakulembera.

Oba tebaamanya Mubaka waabwe n'eba nga y'ensonga lwaki bamuwakanya.

Oba bagamba nti mulalu, wabula (ekituufu kiri nti) yabajjira n'amazima, naye nga abasinga obungi mu bo batamwa amazima.

Singa amazima gaagoberera okwagala kwabwe, eggulu omusanvu n'ensi n'ebyo ebirimu byandyonoonese, wabula twabawa ekyo ekibaweesa ekitiibwa (Kulaane) naye (eky'ennaku) bo beesamba ekitiibwa kya bwe.

Oba obasaba musaala (ne kiba nga kye kibagaana okukkiriza naye nakyo tokikola), anti omusaala gwa Mukama Omulabirizi wo gwe gusinga obulungi era Yye y'asinga abagabirizi bonna.

Era mazima ggwe obakoowoola okujja eri ekkubo eggolokofu.

Era mazima abo abatakkiriza Lunaku lwa Nkomerero ddala be baava ku kkubo.

Singa twabasaasira netubaggyako obuzibu obwabatuukako bandiremedde ku bubuze bwa bwe nga babulubuuta.

Mazima twabatuusaako ebibonerezo naye tebeemenyera Mukama Omulabirizi Waabwe era tebagonda.

Okutuusa bwe tulibaggulira omulyango gw'ebibonerezo ebikakali oligenda okubalaba nga basobeddwa.

(Katonda) Ye, Oyo eyabatonderako amatu n'amaaso n'emitima (naye) mwebaza kitono.

Era Ye Oyo (eyabatonda) n'abassa mu nsi era gy'ali gye mulikungaanyirizibwa.

Era Ye Oyo awa obulamu era n'atta era ku kwe okwawukana kw'ekiro n'emisana, abaffe temutegeera!.

Wabula (ekivaako obuzibu) bagamba nga abaabasooka kye baagamba.

Bagamba nti bwe tulifa ne tufuuka enfuufu n'amagumba abaffe tugenda kuzuukizibwa.

Mazima ffe ne bakadde baffe kino kyatulagaanyisibwa dda, tekirina kye kiri okuggyako okuba enfumo z'abaasooka.

Bagambe nti: Ensi n'ebigirimu by'ani bwe muba nga mumanyi?.

Bajja kugamba nti bya Allah, bagambe nti abaffe temwebuulirira!.

Bagambe nti ani Mukama Omulabirizi w'eggulu omusanvu era Mukama Omulabirizi wa Arishi ey'ekitiibwa?.

Bajja kugamba nti bya Allah, bagambe nti abaffe temutya!.

Bagambe nti obufuzi bwa buli kintu buli mu mukono gw'ani? Ani alina obusobozi obuwa obukuumi (oyo aba yeekubidde enduulu Gy'ali, ate bw'aba yeetaaga omuntu) takugirwa, (mwanukule) bwe muba nga mumanyi.

Bajja kugamba nti (obufuzi) bwa Allah, bagambe nti mubuzibwabuzibwa mutya!.

Wabula twabaleetera amazima naye ddala bo balimba.

Allah teyeeteerangawo mwana era tewabangawo awamu na Ye katonda mulala, singa bwekyali buli katonda yandigenze ne bye yatonda era abamu baaliwambye bannaabwe. Allah yeesambidde ddala ebyo bye boogera.

(Katonda) Mumanyi w'ebyekusifu n'ebirabikako ali wala nnyo ku ebyo bye bamugattako.

Gamba nti: Ayi Mukama Omulabirizi Wange, lw'olindaga (ebibonerezo) ebyo bye balagaanyisibwa.

Ayi Mukama Omulabirizi Wange tonteekanga mu bantu abeeyisa obubi.

Era mazima Ffe ku ky'okukulaga bye tubalagaanyisa tusobolera ddala.

Ggyawo ekibi nga okozesa ekyo ekisinga obulungi, Ffe tusinga okumanya ebyo bye boogera.

Era gamba nti ayi Mukama Omulabirizi Wange nkusaba ompe obukuumi ku kubuzaabuza kwa Sitaane.

Era Mukama Omulabirizi Wange nkusaba ompe obukuumi (Sitaane) zireme kunsemberera.

(Baakubeera mu bubuze) okutuusa okufa lwe kujjira omu ku bo, n'agamba nti: Ayi Mukama Omulabirizi Wange, munzizeeyo (ku nsi).

Mbe nga nkola emirimu emirungi mu ebyo byessaakola, si bwe kiri mazima kyo kigambo bugambo yye kyayogera (naye nga tagenda kusobola kudda) ate era mu maaso gaabwe waliwo e kiseera (ekyawula wakati w'obulamu bw'ensi n'obw'oluvanyuma mwe balibeera) okutuusa ku Lunaku lwe balizuukizibwa.

Olwo nno enngombe bw'erifuuyibwa tewagenda kuba nnganda wakati waabwe ku Lunaku olwo, era tebagenda kwogeraganya.

Kale abo emirimu gyabwe emirungi bwegirizitowa (ku minzaani okusinga ebibi byabwe) abo nno be b'okwesiima.

Ate oyo ebiriwewuka ebipimwa bye abo nno be bafaafaaganirwa emyoyo gyabwe nga baakutuula lubeerera mu Muliro Jahannama.

Omuliro gulisiriiza ebyenyi byabwe, balibeera mu gwo nga banyinyibadde.

Abaffe ebigambo byange byali tebibasomerwa ate mmwe ne muba nga mubirimbisa.

Baaligamba nti ayi Mukama Omulabirizi Waffe, obwonoonefu bwaffe bwatusinza amaanyi, ne tuba abantu abaabula.

Ayi Mukama Omulabirizi Waffe, gutuggyemu (Omuliro), olwo nno bwe tuddamu okwonoona mazima tujja kuba abeeyisa obubi.

Aligamba nti: Mubeere mu gwo nga munyoomebwa era temwogera nange.

Mazima ekibiina mu baddu bange baagambanga nti: Ayi Mukama Omulabirizi Waffe tukkirizza kale tusonyiwe era otusaasire kubanga Ggwe osinga abasaasizi bonna.

Ne mubafuula ekisekererwa okutuusa lwe baabeerabiza okunjogerako era mwali mubasekerera.

Mazima nze Olwaleero mbasasudde olw'ebyo bye baagumiikiriza mazima bo be b'okwesiima.

(Katonda) aligamba nti mu nsi mwatuulamu emyaka emeka?

Baligamba nti: Twamalamu lunaku oba kitundu kya lunaku, wabula buuza ababazi.

Aligamba nti temwatuula okugyako ebbanga ttono singa mazima mmwe mwali mumanyi.

Abaffe mwalowooza nti mazima twabatonda nga tewali kigendererwa, era nti mazima mmwe temugenda kuzzibwa gye tuli.

Allah Yasukkuluma Omufuzi (era Yye) Owaamazima tewali kisinzibwa kyonna mu butuufu okugyako Yye, Mukama Omulabirizi wa Arishi ey'ekitiibwa.

Oyo yenna asinza ekintu ekirala awamu ne Allah so nga ate takirinaako bujulizi, mazima okubalibwa kwe kuli wa Mukama omulabirizi We, mazima abatakkiriza Allah n'Omubaka We tebayinza kwesiima.

Era gamba nti: Ayi Mukama Omulabirizi Wange sonyiwa osaasire. Era Ggwe osinga abasaasizi bonna.

(Eno) Essuula twagissa ne tugikakasa (okukozesa amateeka agagirimu) ne tussa mu yo ebigambo ebinnyonnyofu mube nga mujjukira.

Omwenzi omukazi n'omwenzi omusajja buli omu ku bo mumukube emiggo kikumi, temubakwatirwanga ekisa bombi, nga muli mu kutuukiriza Eddiini ya Allah, bwe muba nga mukkiriza Allah n’Olunaku lw'Enkomerero, era ekibinja mu Bakkiriza kiteekwa okubaawo nga babonerezebwa.

Omusajja omwenzi tawasa okuggyako omukazi omwenzi oba oyo agatta ebintu ebirala ku Katonda, n’omukazi omwenzi tawasibwa okuggyako omusajja omwenzi oba agatta ebintu ebirala ku Katonda, naye ekyo kyaziyizibwa ku Bakkiriza.

N’abo abatemerera abakyala ab'ensa obwenzi ate ne bataleeta bajulizi bana mubakube emiggo kinaana era lubeerera temuddangayo okukkiriza obujulizi bwabwe era abo be boonoonyi.

Okuggyako abo abeenenya oluvannyuma lw'ekyo, era nebakola emirimu emirungi. Anti mazima Allah Musonyiyi era Musaasizi nnyo.

Ate abo abawaayiriza be baafumbiriganwa nabo obwenzi ate nga tebalina bajulizi okuggyako bo bennyini, kale nno obujulizi bw'omu ku bo kwe kulayira erinnya lya Allah emirundi ena (n'ayongerako nti) mazima yye wa mu boogera amazima.

Ne ku mulundi ogw'okutaano (ayongerako nti) mazima ekikolimo kya Allah kibe ku ye bw'aba nga wa mu balimba.

Olwo nno omukyala ne bamuggyako ekibonerezo bw'alayira Erinnya lya Allah emirundi ena (n'ayongerako nti) mazima oli by'ayogera bimussa mu balimba.

Ne ku mulundi ogw'okutaano (ayongerako nti) mazima obusungu bwa Allah bumubeereko (bba) bw'aba mu boogera amazima.

Singa si bulungi bwa Allah bw'abawa n'okusaasira kwe (mwandisanze) obuzibu mu kusalawo ensonga) era mazima Allah akkiriza okwenenya era Mugobansonga.

Mazima abo abaaleeta ebigambo eby'obulimba (ne batemerera Aisha obwenzi) bamu ku mmwe, temukitwala nti kibi gye muli wabula kirungi gye muli, buli omu ku bo ateekwa okufuna empeera y'ekibi kye yakola, ate oyo eyakikulembera mu bo waakufuna ebibonerezo ebikakali.

Singa bwe mwakiwulira abakkiriza abasajja n'abakkiriza abakyala beerowooleza bulungi, era ne bagamba nti kuno kutemerera okw'olwatu.

Singa baakireetako abajulizi bana naye okuva lwe bataaleeta bajulizi olwo nno abo ewa Allah be balimba.

Singa si bulungi bwa Allah na kusaasira Kwe by'abawa ku nsi ne ku Nkomerero mwalituukiddwako ebibonerezo ebikakali olw'ebyo bye mweyingizaamu.

Mu kiseera we mwabisaasaanyiza n'e nnimi za mmwe ne mwogera n'emimwa gyammwe bye mutaalinako kumanya, mwakitwala nga ekyangu naye nga ewa Allah kinene.

Singa bwe mwakiwulira mwagamba nti tekitugwanira kwogera ku nsonga eno, wasukkuluma Mukama Katonda, kuno kutemerera okuyitirivu.

Allah ababuulirira bulijjo obutaddayo kukola kintu nga kino bwe muba nga muli Bakkiriza.

Era Allah abannyonnyola Amateeka. Era bulijjo Allah amanyi nnyo ate nga Mugobansonga.

Mazima abo abaagala ebikolwa eby'obuwemu okusaasaana mu bakkiriza, balina ebibonerezo ebirumya ennyo ku nsi ne ku nkomerero. Era Allah amanyi ate mmwe temumanyi.

Singa si bulungi bwa Allah na kusaasira Kwe by'abawa (mwandituuseeko ebizibu, naye nga bulijjo) mazima alla Waakisa Musaasizi.

Abange mmwe Abakkiriza temugobereranga amakubo ga Sitaane, oyo yenna agoberera amakubo ga Sitaane anti yye (Sitaane) alagira okukola eby'obuwemu n'ebitayagalwa, era singa si bulungi bwa Allah na kusaasira Kwe kwe by'abawa olubeerera, tewandibadde muntu atuukirira yenna mu mmwe, naye mazima Allah atukuza oyo gw'aba ayagadde, mazima Allah awulira era Mumanyi nnyo.

Abeeyisa obulungi mu ddiini era abagaziyizibwa mu byenfuna tebalayiranga obutawa ab'oluganda olw'okumpi n'abanaku n'abaasenguka olw'okuweereza mu Kkubo lya Allah. Basaana basonyiwe era balekere, abaffe (mmwe) temwagala Allah kubasonyiwa era nga bulijjo Allah Musonyiyi Musaasizi.

Mazima abo abatemerera obwenzi abakyala Abakkiriza ab'ensa abatalina musango, bakolimirwa ku nsi ne ku nkomerero era balissibwako ebibonerezo eby'amaanyi.

Ku Lunaku ennimi zaabwe n'emikono gya bwe lwe biribawaako obujulizi olw'ebyo bye baakolanga.

Ku Lunaku olwo Allah agenda kubasasula mu bujjuvu empeera yaabwe ebasaanira, era bagenda kumanya nti mazima Allah Ye Mazima Waamazima Owannamaddala.

Abakazi ab'empisa embi ba basajja ab'empisa embi, n'abasajja ab'empisa embi ba bakazi ab'empisa embi, n'abakazi abeeyisa obulungi ba basajja abeeyisa obulungi, n'abasajja abeeyisa obulungi ba bakazi abeeyisa obulungi, abo (be batemerera obwenzi) batukuvu ku ebyo (bali) bye boogera, balina ekisonyiwo n'okugabirirwa okw'ekitiibwa.

Abange mmwe abakkiriza temuyingiranga amayumba agatali mayumba gammwe okugyako nga musabye era ne mutoolera abantu baamu ssalaamu ekyo kye kirungi gye muli kibayambe mujjukire.

Bwe mutagasangamu muntu yenna temugayingiranga okutuusa nga mukkiriziddwa, bwe mugambibwanga nti muddeyo muddangayo, ekyo ky'ekisinga obutukuvu gye muli, Katonda byonna bye mukola abimanyidde ddala.

Temulina musango bwe muyingira ennyumba ezitaliimu bantu ng'ate mulimu bye mwetaaga. Bulijjo Allah amanyi bye mwolesa ne bye mukweka.

Gamba Abakkiriza bakkakkanye ku maaso gaabwe, era bakuume obwereere bwabwe, ekyo ky'ekisinga obutukuvu gye bali, mazima allah amanyidde ddala ebyo bye bakola.

Era gamba abakyala Abakkiriza bakkakkanye ku maaso gaabwe era bakuume obwereere bwabwe, era teboolesa eby'okwewunda byabwe okuggyako ebyo ebiba biteekwa okulabika, era bateekwa beebikkirire obukaaya bwa bwe (nga butuuka) ku bifuba bya bwe, era teboolesa bya kwewunda byabwe okuggyako eri babbaabwe, oba bakitaabwe, oba bataata ba babbaabwe ,oba abaana baabwe, oba abaana ba babbaabwe, oba bannyinaabwe, oba abaana ba bannyinaabwe, oba abaana ba baganda baabwe, oba abakyala nga bo, oba abo abaddu emikono gya bwe egyaddyo be gyafuna, oba abaweereza abalala abasajja abatakyalina bwetaavu eri bakyala, oba abaana abato abatalabanga ku bwereere bwa bakyala, era (abakyala Abakkiriza bwe baba batambula) tebakuba bigere byabwe sikulwa nga kituuka okumanyika ekyo kye bakwese mu by'okwewunda byabwe. Mwenna mwenenyeze allah abange mmwe Abakkiriza kibayambe okutuuka ku buwanguzi.

Mufumbize abatali bafumbo mu mmwe, nabwekityo mufumbiriganye abalongoofu mu baddu bammwe n'abazaana bammwe, bwe baba baavu Allah ajja kubagaggawaza nga aggya mu bigabwa bye, bulijjo Allah Mugazi (mu by'alina) Mumanyi nnyo.

Abo abatasobola kuwasa bateekwa okwessaamu ensa okutuusa Allah lw'anaabawa ekimala ekyetaago kyabwe nga aggya mu bigabwa Bye, ate abo abasaba okuweebwa ekiwandiiko (ekibakkiriza okunoonya sente beenunule) mu baddu bammwe abo emikono gyammwe egyaddyo be gyafuna mukibawandiikire singa mubalabamu akalungi, (mmwe abakulembeze) mubawe nga ku mmaali ya Allah eyo gye yabawa, era temuwalirizanga abazaana bammwe okukola obwamalaaya (mu kikola mutya) ng'ate bo baagala kuba na nsa! (ekibatuusa okukola ekyo) lwa kwagala kufuna bya bulamu bwa nsi, oyo yenna abawaliriza mazima Allah oluvannyuma ne lw'okubawaliriza Musonyiyi Musaasizi.

Era mazima twassa gye muli ebigambo (bya Kulaani) ebinnyonnyola, era (ne tussa) eby'okulabirako ebikwata ku abo abaaliwo olubereberye lwa mmwe era ekyo nga kya kubuulirira eri abatya Katonda.

Allah y'aleeta ekitangaala mu ggulu omusanvu n'ensi ekifaananyi ky'ekitangaala Kye kiri nga akafo akaazimbirwa mu kisenge nga ka kuteekamu ttaala (naye nga tekayitamu kitangaala kuva bweru, ettaala bw'eyaka ekitangaala kyayo kikoma ku kisenge ky'akafo ako, ekiyamba abali mu kisenge ky'akafo okufuna ekitangaala obulungi, akafo ako) nga kalimu ettaala nga ettaala eri mu kirawuli ekirawuli nga kiringa emmunyeenye etangalijja nga eteekebwamu amafuta agava mu muti omuzayituuni ogw'omukisa nga si gwe buvanjuba wadde ebugwanjuba (mu nnimiro mwe gwakulira ne guba nga gwafunanga ekitangaala ky'enjuba ebbanga erimala), amafuta gaagwo kumpi gaaka newaakubadde nga tegatuukiddwako muliro, ne kiba nga kitangaala ku kitangaala kinnaakyo (anti ekitangaala ky'ettaala kyegatta ku kitangaala ky'ekirawuli ate nno bw'ogattako amafuta amalungi ennyo ne gubula asala). Allah alunngamya eri Ekitangaala Kye oyo gw'aba ayagadde era allah akubira abantu ebifaananyi era Allah bulijjo amanyi ebifa ku buli kintu.

Mu mayumba (emizikiti) Allah ge yakkiriza gazimbibwe era n'alagira Erinnya Lye libeere nga lyogerwako mu go, (omwo nno) mwe bamutenderereza enkya n'olweggulo.

Abasajja abatalabankanyizibwa bya busuubuzi wadde okutunda ne bitabaggya ku kwogera ku Allah n'okuyimirizaawo esswala n'okutoola Zzaka nga batya olunaku emitima n'amaaso lwe birikankana.

Olwo nno Allah abasasule ebirungi by'ebyo bye baakola era abongeze mu birungi Bye, bulijjo Allah agabirira oyo gw'aba ayagadde awatali kubalirira.

Ate abo abaawakanya emirimu gyabwe girirabika nga ennyanja ey'okumusenyu (so nga tebaawo) omuyonta agirabanga amazzi bw'atuuka w'agirabye tasangawo kintu kyonna wabula mu kifo ekyo asangawo Allah n'amuwa mu bujjuvu okubalibwa kwe. Bulijjo Allah Mwangu mu kubala (kwe).

Oba (abatakkiriza emirimu gyabwe) giri nga ebizikiza ebiri mu nnyanja ey'ennyanga nga ebikkiddwa amayengo ng'ate waggulu waayo waliyo amayengo amalala ng'ate waggulu waago waliyo ebire ne biba bizikiza ebiri waggulu wa binnaabyo (omuntu singa abadde mu kifo ekyo) bw'ajjayo omukonogwe aba kumpi obutagulaba oyo yenna Allah gw'atawadde kitangaala tayinza kufuna kitangaala.

Abaffe tolaba nti mazima Allah (ebitonde) byonna ebiri mu ggulu omusanvu n'ensi bimutendereza n'ebinyonyi nga byanjuluzza ebiwaawaatiro (mu kumutendereza) buli kimu (Katonda) amanyi okusinza kwa kyo n'okutendereza kwa kyo.Anti Allah amanyidde ddala ebyo bye bakola.

Bwa Allah obufuzi bw'eggulu omusanvu n'ensi, era ewa Allah y'eri obuddo.

Abaffe tolaba nti mazima Allah atambuza ebire bw'amala na'bikunngaanya wamu oluvannyuma n'abifuula entuumu olwo n'olaba nga enkuba etonnya okuva mu byo era atonnyesa omuzira okuva waggulu mu nsozi (ez'amazzi agakutte ebitole mu bbanga) n'atuusa n'omuzira ku oyo gw'aba ayagadde ate n'aguwonya oyo gw'aba ayagadde. Ekitangaala ky'e kimyanso kya byo kibulako katono okuziba amaaso (g'abantu).

Allah akyusakyusa ekiro n'emisana, mazima mu ekyo mulimu eky'okuyiga eri abalina amaaso.

Allah yatonda buli kiramu nga akiggya mu mazzi, mu byo mulimu ekitambulira ku lubuto lwa kyo, ne mu byo mulimu ekitambulira ku magulu abiri, era mulimu ekitambulira ku ana, Katonda atonda ekyo ky'aba ayagadde. Mazima Katonda Muyinza ku buli kintu.

Mazima twassa obubonero obunnyonnyola, bulijjo Allah alunngamya gw'aba ayagadde ku kkubo eggolokofu.

(Abannanfusi) bagamba nti tukkirizza Allah n'Omubaka era ne tugonda ate ekitundu ku bo ne kyekyusa oluvanyuma lw'ekyo, era abo si Bakkiriza.

Bwe bayitibwa okudda eri Allah n'Omubaka We abe nga alamula wakati wa bwe ogenda okulaba nga ekitundu ku bo bakyawukanako.

Bwe kiba nga amazima gali ku ludda lwa bwe bajja gy'ali (Nnabbi) nga bagonvu.

(Ekibakozesa ekyo) abaffe mu mitima gyabwe mulimu obulwadde oba babuusabuusa (Obwannabbi bwe), oba batya Allah n'Omubaka We okubasaliriza, si bwekiri abo be beeyisa obubi.

Mazima ekigambo kya Abakkiriza (kyebandigambye) kyalibadde wonna we babayitira okudda eri Katonda n'Omubaka We abe nga alamula wakati waabwe bandigambye nti tuwulidde era ne tugonda era abo be b'okutuuka ku buwanguzi.

Oyo yenna agondera Allah n'Omubaka We n'atya Allah ne yeeyisa nga Allah bw'ayagala abo be bawanguzi.

Era (abannanfusi) balayira Katonda olw'okukkaatiriza ebirayiro byabwe, nti singa obalagidde (okugenda ku lutabaalo naawe) ddala bajja kugenda naawe, bagambe nti temulayira, okugonda kwa mmwe (kwe mulangirira) kumanyiddwa (nga kwa bulimba). Anti Katonda amanyidde ddala ebyo bye mukola.

Bagambe nti: Mugondere Allah era mugondere Omubaka, bwe bagaana mazima (Nnabbi) avunaanyizibwa ku ebyo ebyamutikkibwa nga nammwe bwe muvunaanyizibwa ku ebyo ebyabatikkibwa, naye bwe mumugondera mujja kulunngama, era Omubaka tabanjibwa okuggyako okutuusa Obubaka okw'olwatu.

Allah yalagaanyisa abo abakkiriza mu mmwe ne bakola emirimu emirongoofu nti ajja kubawa obuyinza mu nsi, nga bwe yawa abo abaaliwo olubereberye lwa bwe era nti ajja kubanywereza Eddiini yaabwe eyo gye yabasiimira, era oluvannyuma lw'okuwangaalira mu kutya ajja kubawaanyisizaamu emirembe, babe nga bansinza nga tebangattako kintu kirala kyonna, oyo yenna alikola ekimenya amateeka oluvannyuma lw'ekyo abo nno be boonoonyi.

Muyimirizeewo esswala era mutoole zzaka mugondere n'Omubaka mube nga musaasirwa.

Abo abaawakanya Allah n'Omubaka We tosuubira nti bayinza okulemesa (Allah) mu nsi, obuddo bwabwe Muliro era buddo bubi ddala.

Abange mmwe abakkiriza, (abaddu) bateekeddwa okubasaba okuyingira mu biseera bya mirundi esatu abo begyafuna e mikono gyammwe egya ddyo, n'abo abatannaba kuweza myaka gya bukulu mu mmwe, (bwe baba nga bayingira gye muli mu biseera ebyo, nabyo) esswala ya Subuhi nga tennatuuka, ne mu kiseera we mweyambulira engoye zammwe mu ttuntu, n'oluvanyuma lw’esswala ya Isha, (ebyo) biseera byammwe bisatu okubeera obwereere, nga oggyeko ebiseera ebyo, mmwe nabo temulina musango mwenna wamu bwe bayingira gye muli nga tebasabye, abantu abo babeetoolooleramu nga abamu musisinkana bannammwe, bw'atyo (Allah) bw'abannyonnyola ebigambo anti bulijjo Allah Mumanyi nnyo Mugobansonga.

Abato mu mmwe bwe batuuka e myaka gy'obukulu bateekwa okusaba okukkirizibwa okuyingira nga bwe basaba abo abakulembedde, bw'atyo Allah bw'abannyonnyola Ebigambo Bye, era bulijjo Allah Mumanyi nnyo Mugobansonga.

N'abannyuka eby'obufumbo mu bakyala abo abatakyalina ssuubi mu kufumbirwa, tebalina kabi obuteebikkirira naye nga tebeejaajaamya na bya kwenyiriza, era okwessaamu ensa kye kisinga obulungi gye bali, era bulijjo Allah awulira nnyo Mumanyi.

Muzibe talina kibi, n'omulema talina kibi wadde omulwadde talina kibi (nga bo) namwe temulina kibi okulya mu maka gammwe, oba mu maka ga ba kitammwe, oba mu maka ga ba nnyammwe, oba mu maka ga baganda bammwe, oba mu maka ga bannyinammwe, oba mu maka ga bakitammwe abato oba mu maka ga bassengammwe, oba mu maka ga bakkojjammwe oba mu maka ga bamaama bammwe abato, oba amaka ge mufuga ebisumuluzo byago, oba amaka ga mukwano gwammwe temulina kabi okuliira awamu oba nga mweyawuddeyawudde, bwe muyingiranga amayumba mwetoolere ‘salaamu’, ekyo nga kiramuso eky'omukisa ekirungi ekiva ewa Allah. Bw'atyo Allah bw'abannyonnyola Amateeka Ge mulyoke mutegeere.

Mazima Abakkiriza beebo abakkiriza Allah n'Omubaka We era bwe baba naye ku nsonga ebakwatako bonna tebayinza kuvaawo okuggyako nga bamaze kumusaba, mazima abo abakusaba okubakkiriza bagende, beebo abakkiriza Allah n'Omubaka We, kale bwe baba bakusabye olw'ezimu ku nsonga zaabwe wa olukusa oyo gw'oba oyagadde mu bo era osabe Allah abasonyiwe, mazima Allah Musonyiyi nnyo Musaasizi.

Temufuulanga engeri gye mukoowoola omubaka nga engeri gye mwekoowoolamu mwekka na mwekka, mazima Allah amanyi abo abeemulula mu mmwe nga bebbirira, abo abaawukana ku Kigambo Kye bateekeddwa okutya okuba nga batuukwako okugezesebwa oba ebibonerezo ebirumya ennyo.

Abange, mazima bya Allah Yekka ebiri mu ggulu omusanvu n'ensi, mazima amanyi ekyo kye mubaako era (amanyi) olunaku lwe baliddizibwa gy'ali olwonno abategeeze bye baakola era Allah amanyidde ddala ebikwata ku buli kintu.

Musukkulumu oyo eyassa Kulaani ku Muddu We eyawula wakati w'amazima n'obulimba alyoke abeere omutiisa eri ebitonde.

Oyo Nnannyini Bufuzi bw'eggulu omusanvu n'ensi ateeteerawo mwana era atalina amwegattako mu bufuzi era eyatonda buli kintu n'akikola olukola olukisaanira.

Ate (abatakkiriza) baamuvaako ne beeteerawo ebisinzibwa ebirala ebitalina kintu kyonna kye bitonda so ng'ate byo by'atondebwa, era nga tebalina buyinza kwetuusaako kabi oba ekirungi, era tebalina buyinza ku kufa wadde ku bulamu wadde ku kuzuukira.

Abaawakanya Allah n'Omubaka We baagamba nti ebigambo (bya Muhammadi) tebirina kye biri okuggyako okuba nti bulimba bweyagunjaawo, era abantu abalala ne bamuyamba ku kubuyimirizaawo, olwo nno ne baba nga baleese okweyisa obubi n'okutemerera.

Era ne bagamba nti (ebyo by'ayogera) nfumo z'abaasooka, yasaba ne zimuwandiikirwa olwo nno zimusomerwa enkya n'eggulo.

Bagambe nti (Kulaani) yagissa Oyo amanyi ebyama by'omuggulu omusanvu n'e nsi, mazima Yye (Katonda) bulijjo Musonyiyi Musaasizi.

Era baagamba nti: Ono Mubaka wa ngeri ki alya emmere n'atambula mu butale! Singa Malayika yassibwa gy'ali n'abeera mutiisa awamu naye (nga amuyambako).

Oba eby'obugagga ne bissibwa gy'ali (okuva mu ggulu) oba abe nga alina ennimiro mw'alya. Era abeeyisa obubi ne bagamba nti temulina gwe mugoberera okuggyako omusajja omuloge.

Laba engeri gye bakukubira ebifaananyi, olwo nno ne babula, n'olwekyo tebayinza kufuna kkubo libazza (ku mazima).

Musukkulumu Oyo singa aba ayagadde yaalikuteereddewo ebirungi okusinga ebyo, (nga nabyo) ge malimiro agakulukutiramu emigga era n'akuteerawo embiri.

Wabula (ekibaleetera obuzibu kwe kuba nti) baalimbisa Olunaku lw'Enkomerero, ate nga abalimbisa Olunaku lw'Enkomerero twabategekera Omuliro.

(Omuliro ogwo) bwe gulibalaba okusinziira ewala baliwulira obusungu bwa gwo n'okutokota.

Bwe balisuulibwa mu gwo, nga buli omu asuulibwa mu kifo ekifunda nga balijjiddwa, olwo nno balikaaba yaaye.

Baligambibwa nti temukaaba ‘yaaye’ mulundi gumu, mukaabe ‘yaaye’ emirundi mingi.

Bagambe nti ekyo (eky'okuyingira Omuliro) kye kirungi oba Ejjana ey'olubeerera eyo eyalagaanyisibwa abatya Katonda, egenda kubeera mpeera gye bali era nga buddo.

Muyo bagenda kufuna bye baagala era baakubeeramu obugenderevu (ekyo) ku Mukama Omulabirizi Wo ndagaano erina okukuumwa obutiribiri.

Ku Lunaku lw'alibakunngaanya n'ebyo bye basinza ne baleka Allah alibagamba nti mmwe mwabuza abaddu bange abo oba be baabulwa ekkubo?

Baligamba nti: Wasukkuluma (Mukama). Tekitugwanirangako kweteerawo bakuumi balala ne tukuvaako, wabula wabeeyagaza ne bakadde baabwe okutuusa lwe beerabira okutendereza ne baba abantu ab'okuzikirira.

(Katonda alibagamba nti) mazima babalimbisizza ku ebyo bye mwogera temusobola kweggyako bibonerezo wadde okutaasibwa, oyo yenna eyeeyisa obubi mu mmwe tumukombesa ku bibonerezo ebikambwe.

Era tetwatuma olubereberye lwo Babaka okuggyako nga mazima bo baliira ddala emmere nga batambula ne mu butale, era ne tufuula abamu ku mmwe ekikemo eri abalala, abaffe munaagumiikiriza, bulijjo Mukama Omulabirizi Wo alabira ddala.

Abo abatasuubira kutusisinkana ne bagamba nti: Singa twassibwako Bamalayika oba netulaba Mukama Omulabirizi Waffe, mazima beekuza nnyo mu myoyo gyabwe ne babula olubula oluyitirivu.

Olunaku lwe baliraba Bamalayika tewaliba mawulire ga ssanyu ku Lunaku olwo eri aboonoonyi, era (Bamalayika) baligamba nti: Kikafuuwe tekigenda kubaawo (omu ku mmwe okuyingira (Ejjana).

Awo nno tulidda ku buli mulimu (omulungi) gwe baakola ne tugufuula olufufugge olufuumuddwa.

Abantu b'o mu Jjana ku Lunaku olwo be baliba n'obutebenkero obulungi, era be baliba n'ebifo ebiwummulirwamu ebirungi.

N'olunaku eggulu lwe liriyatikamu ne liba nga lijjudde ebire, era Bamalayika ne bassibwa olussibwa.

Obufuzi obwa nnamaddala ku Lunaku olwo buliba bwa Mukama Katonda Ow'ekisa ekingi, lugenda kuba lunaku luzito nnyo ku batakkiriza Allah n'Omubaka We.

Era olunaku omulyazaamaanyi lw'aliruma engalo ze aligamba nti zinsanze, singa nnateekawo ekkubo erinnyunga ku Mubaka.

Nga ndabye nze singa ssaafuula gundi w'amukwano.

Mazima yambuza n'anzigya ku Kulaani nga emaze okuntuukako, anti bulijjo Sitaane ayabulira omuntu.

Omubaka aligamba nti: Ayi Mukama Omulabirizi Wange, mazima abantu bange Kulaani eno baagifuula kifulukwa.

Era bwe kityo buli Nnabbi twamuteerawo omulabe nga ava mu boonoonyi, era Mukama omulabiriziwo amala okuba nga Ye Mulunngamya era Omutaasa.

Abo abaawakanya Allah ne Omubaka we b'agamba nti: Singa Kulaani yamussibwako omulundi gumu, twagissa bwe tutyo (mu bitundutundu) tube nga tunyweza nayo omutima gwo era ne tugikusomera olusoma (mpola mpola).

Tebalina lwe bakuleetera kyakulabirako wabula nga tukuleetera amazima n'ennyinyonnyola esinga obulungi.

Abo abaliwalulirwa ku byenyi byabwe nga batwalibwa mu Muliro Jahannama, abo be bali mu kifo ekisinga obubi era be basinga okubula okuva ku Kkubo ettuufu.

Mazima twawa Musa Ekitabo ne tumussaako Muganda we Haaruuna nga muyambi.

Netugamba nti mwembi mugende eri abantu abaalimbisa Ebigambo Byaffe, olwo nno ne tubazikiriza oluzikiriza.

N'abantu ba Nuuhu bwe baalimbisa Ababaka twabazikiririza mu mazzi netubafuula eky'okulabirako eri abantu.Era twategekera abeeyisa obubi ebibonerezo ebirumya.

Era twazikiriza abantu ba Aadi, n'aba Thamuudu, era ne Bannannyini Luzzi, era netuzikiriza n'abantu b'emirembe emirala mingi wakati w'abo.

Buli mulembe ku egyo twabakubiranga ebifaananyi (ebyabo abaabasookawo), era buli bamu ku abo twabazikiriza oluzikirira (olw'obujeemu bwabwe).

(Abagatta ku Katonda ebintu ebirala ab'e Makka baali batambula enngendo zaabwe) mazima baatuuka mu kitundu ekyafukumulwako ebibonerezo ebibi (amayinja agaakuba ab'omulembe gwa Luutu). Abaffe baali tebakiraba (ne beebuulirira)?Wabula ekituufu baali tebasuubira kuzuukira.

Era bwe baba bakulabye tebalina ngeri gye bakulaba okuggyako okukujeeja obujeeja (nga bwe bagamba) nti: Ono y'oyo Allah gweyatuma nga Mubaka!.

Ali kumpi nnyo okutubuza nga atuggya ku bisinzibwa byaffe baffe singa tunaaba tetunyweredde ku kusinza bo, naye bajja kumanya mu kiseera webanaalabira ebibonerezo ani eyabula okuva ku Kkubo (eggolokofu).

Abaffe olaba oyo afuula okwagala kwe nga ye ekisinzibwa kye, abaffe ggwe onoobeera omweyimirize we.

Oba olowooza nti abasinga obungi mu bo bawulira ebigambo bya Katonda, oba babitegeera, tebalina kye bali ku ebyo okuggyako balinga nsolo, wabula bo baabula nebayitawo okuva ku kkubo eggolokofu.

Abaffe tolaba Mukama Omulabirizi wo engeri gy'awanvuyaamu ekisiikirize, singa yayagala yaalikirese nga kiyimiridde mu kifo kimu, ate twafuula enjuba nga y'eraga okubaawo n'okutambula kw'ekisiikirize.

Bwe tumala tukikwata ne tukiggyawo nga tukiggyawo mpola mpola.

Era Yye (Katonda) Y'Oyo eyabateerawo ekiro nga kibikka, n'abateerawo n'okwebaka nga kuwummula n'ateekawo obudde obw'emisana nga mwemusaasaanira (olw'okunoonya eky'okulya).

Era Yye Y'Oyo asindika empewo nga zisaasaanya amawulire ag'essanyu (enkuba) nga ekyo kiri wansi wa Mikono gya kusaasira kwe, era tussa okuva waggulu amazzi amayonjo.

Tube nga tuzza buggya ekitundu ekikaze era tuganywese bingi mu bye twatonda (nga) ebisolo n'abantu bangi.

Era mazima twaginnyonnyola (Kulaani) mu bo babe nga beebuulirira wabula abantu abasinga obungi ne bagaana era nebakalambirira ku buwakanyi.

Singa twayagala buli kitundu twandikitumidde omutiisa, (naye twasalawo obeere Omubaka eri bonna).

N'olwekyo togondera bawakanyi (kozesa Kulaani) obalwanyise olulwanyisa olw'amaanyi.

Era (Katonda) Y'Oyo eyagatta amazzi ag'ennyanja ebbiri (ez'enjawulo), gano mawoomu nnyo era nga ganywebwa ate nga gali ga munnyu teganywebwa, era yassa wakati wa gombi ekisenge ekyawula era ekiziyiza ekigagaana okwetabula.

Era Yye Y'Oyo eyatonda omuntu nga amuggya mu mazzi, (mu muntu oyo yennyini) n'aggyamu ab'oluganda n'abako. Bulijjo Mukama Omulabirizi Muyinza.

(Ate abantu balekawo Allah) ne basinza ebintu ebirala ebitali Allah ebyo ebitabagasa era ebitayinza kubatuusaako kabi, era bulijjo oyo atakkiriza Allah ayamba Sitaane mu kulwanyisa Katonda Omulabirizi We.

Era tetwakutuma okuggyako nga oli omusanyusa era omutiisa.

Gamba nti: (Kino kye nkola) sikibasabirako mpeera (era sirina kye njagala) okuggyako oyo asalawo okweteerawo ekkubo erimutwala eri Mukama Omulabirizi We.

Era weekwate ku Mulamu Oyo atafa, era tendereza ebitendo bye. Kimala okuba nti Yye amanyidde ddala ebyonoono by'abaddu Be.

Oyo eyatonda eggulu omusanvu n'ensi n'ebiri wakati wa byombi mu nnaku mukaaga oluvannyuma n'atereera ku Arishi (Katonda) Omusaasizi ow'ekisa ekingi (bw'oba oyagala okumumanya) buuza abakenkufu ku bimukwatako.

(Abatakkiriza Allah n'Omubaka We) bwe bagambibwa nti muvunnamire Omusaasizi Ow'ekisa ekingi (Katonda), bagamba nti Omusaasizi Ow'ekisa ekingi oyo y'ani! Tumale gavunnamira oyo gw'otulagira (nga tetumanyi) ne kibongera kwesamba (ddiini).

Musukkulumu Oyo eyateeka ku ggulu ebifo ebibeeramu emmunyeenye, era n'ateekako ettaala (enjuba eyaka) n'omwezi oguwa ekitangaala.

Era Yye Y'Oyo eyassaawo ekiro n'emisana nga bigoberegana (yabiteerawo) oyo ayagala okwebuulirira oba ayagala okwebaza.

Bo abaddu ba Katonda beebo abatambula ku nsi nga bakkakkamu. Abatategeera bwe boogera nabo (ebigambo by'ekiyaaye) bo baddamu nti mirembe.

Era beebo ku lwa Mukama Omulabirizi Waabwe abasula nga bavunnama era abayimirira (nga basaala).

Era beebo abagamba nti: Ayi Mukama Omulabirizi Waffe tuwuguleko ebibonerezo by'Omuliro Jahannama anti mazima ebibonerezo byagwo bya lubeerera.

Mazima ggwo kifo era butebenkero obubi.

(Abaddu ba Katonda) era beebo bwe baba nga bagabye tebadiibuuda era tebaganiriza, okuwaayo kwabwe kuli wakati w'ebyo byombi.

Era beebo abatasinziza ku Allah kintu kirala, era abatatta muntu oyo Allah gwe yaziza okuggyako nga waliwo ensonga entuufu ey'obusiraamu, era abatayenda, naye omuntu akola ekimu ku ebyo agenda kusisinkana (ebibonerezo) ebibi.

(Si kye kyokka wabula) ebibonerezo bijja ku mukubisizibwamu ku lunaku lw'Enkomerero era waakubituulamu obugenderevu mu ngeri enyoomesa.

Okuggyako oyo alyenenya nakkiriza naakola emirimu emirungi. Abo nno Katonda ebibi bya bwe agenda kubawaanyisizaamu ebirungi. Era bulijjo Allah Musonyiyi Musaasizi.

Omuntu yenna eyeenenya n'akola emirimu emirungi, mazima yye aba yeemenyedde Katonda olwemenya olwannamaddala.

(Abaddu ba Katonda) era beebo abatawa bujulizi ku bigambo bya bulimba, era bwe bayita mu bifo omukolerwa ebitali bya magezi bayitawo nga beewa ekitiibwa.

Era beebo bwe bajjukizibwa ebigambo bya Mukama Omulabirizi Waabwe tebabidduka okweyisa nga abatabiwulira oba abatabiraba.

Era beebo abagamba nti ayi Mukama Omulabirizi Waffe, tuwe nga oggya mu bet twafumbiriganwa nabo era nga oggya ne mu zzadde lyaffe ekitebenkeza amaaso gaffe, era otufuule abakulembeze b'abo abakutya.

Abo nno bagenda kusasulwa nga baweebwa ebifo bya waggulu olw'obugumiikiriza bwe baakola. Nga bali mu byo bagenda kuweebwa ebiramuso ne ssalaamu (eziriva mu Bamalayika).

Baakubeeramu olubeerera nga butebenkero era butuulo obulungi.

Bagambe (ggwe Muhammadi abo abawakanya Katonda) nti Katonda Wange talina kimutawaanya lwa kuba nti temumusaba, mazima mwalimbisa era mu bwangu mujja kutuukibwako ebibonerezo ebyakakata edda ku mmwe.

Twaa Siin Miim.

Ebyo bye bigambo by'ekitabo ekinnyonnyola.

Olabika nga ayagala okwetta olw'okuba bagaanye okuba Abakkiriza.

Singa twagadde twandissizza ku bo okuva mu ggulu akabonero, ensingo zaabwe nezikagondera olubeerera.

Tewali bubaka bwonna bupya kuva wa Katonda Omusaasizi ennyo wabula bo babuwakanya.

Nebaba nga mazima balimbisa, bigenda kubajjira ebigambo ebyo bye baali bajeeja

Abaffe tebatunuulira nsi ne balaba bimeka bye twameza mu yo mu buli mutindo oguvaamu emigaso.

Mazima mu ekyo ddala mulimu akabonero (akalaga obuyinza Bwaffe), wabula bangi mu bo tebakkiriza.

Era mazima Mukama Omulabirizi wo ddala Yye ye Nnantakubwakumukono Omusaasizi ennyo.

Era jjukira ekiseera Mukama Omulabirizi wo bwe yakoowoola Musa (n'amulagira) nti: Genda eri abantu abeeyisa obubi.

Abantu ba Falaawo (obagambe nti) abaffe tebatya (Katonda)!.

(Musa) n'agamba nti: Mazima nze ntya okuba nga bannimbisa.

Ekifuba kyange ne kifunda olulimi lwange ne lutayatula bulungi, n'olwekyo lagira Haaruuna (annyambeko).

Ate banvunaana omusango, ntya nti bayinza okunzita.

(Katonda) n'agamba nti: Nedda mugende n'obubonero Bwaffe mazima Ffe tuli wamu nammwe tuwulira (tugoberera buli ekigenda mu maaso).

Mugende ewa Firaawo mumugambe nti mazima ffe tutumiddwa Mukama Omulabirizi W'ebitonde byonna.

(Atugambye nti) tuwe abaana ba Isirayiri tugende nabo.

(Falaawo) n'agamba nti: Tetwakukuliza mu ffe okuva nga oli mwana muto, era nga wawangaalira mu ffe emyaka mingi ku buwangaazi bwo?

Era n'okola ekikolwa kyo ekyo kye wakola ekyakufuula okuba mu batasiima bye baakukolera.

(Musa) n'agamba nti nnakikola bwe nnali nkyali mu babuze.

Olwo nno ne mbadduka bwe nnabatya, awo Mukama Omulabirizi Wange n'angabira okumanya ensonga era n'anteeka mu Babaka.

N'ekyo ekyengera (eky'okundera n'okukulira mu mmwe) okinnangira naye nga ggwe abaana ba Isirayiri wabafuula abaddu.

Falaawo n'agamba nti: Mukama Omulabirizi w'ebitonde byonna gw'oyogerako ye ani?.

Musa n'agamba nti: Mukama Omulabirizi w'eggulu omusanvu n'ensi n'ebiri wakati wa byombi bwe muba nga mwetegereza ensonga.

(Falaawo) kwe kugamba abaali naye awo nti: Abaffe temuwulira (nga bw'abijweteka).

(Musa) n'agamba nti: Ye Mukama Omulabirizi Wammwe, era Mukama Omulabirizi Wa bakadde bammwe abaasooka.

(Falaawo) n'agamba nti: Mazima Omubaka wammwe oyo eyatumiddwa gyemuli mulalu.

(Musa) n'agamba nti (Ye) Mukama Omulabirizi w'ebuvanjuba n'ebugwanjuba n'ebyo ebiri wakati wa byombi, singa mubadde mutegeera.

(Falaawo) n'agamba nti: Mazima singa oteekawo Katonda omulala atali nze nja kukuteekera ddala mu b'okusibwa.

(Musa) n'agamba nti: Ne bwennaaba nkuleetedde ekintu ekyeyolefu (ekiraga obutuufu bw'ebyo byenngamba)?

(Falaawo) n'agamba nti: Aale kireete bw'oba nga oli mu boogera amazima.

Awo Musa n’asuula omuggo gwe, okugenda okwekanga nga gufuuse omusota ogwannamaddala.

Era n'aggyayo omukono gwe, okugenda okulaba nga mweru eri abagulaba.

(Falaawo) naagamba abo abaali batudde we yali nti: Mazima ono mulogo mukugu.

Ayagala kubaggya mu nsi yammwe nga akozesa eddogo lye, kati mugamba ki?

Ne bagamba nti mulagaanyise ne Mugandawe (ddi na wa) aw'okubasisinkana era otume mu bitundu eby'enjawulo abakunngaanya abalogo.

Bajja kukuleetera buli mulogo kakensa.

Olwo nno abalogo ne bakungaanyizibwa mu kiseera ekiragaane ku lunaku olumanyiddwa.

Abantu nebagambibwa nti: Abaffe mmwe munaakunngaana?

Sikulwa nga tunaagoberera abalogo bwe banaaba bo nga be bawangudde.

Abalogo bwe bajja baagamba Falaawo nti: Mazima tunaaweebwa empeera bwe tunaaba nga ffe tuwangudde?

(Falaawo) n'agamba nti: Weewaawo era mazima mmwe singa kinaaba bwe kityo mujja kubeera baakulusegere.

Musa n'abagamba nti: Kale mwanje kye mwanja.

Nebasuula emiguwa gyabwe n'emiggo gyabwe era ne bagamba nti: Ku lw'ekitiibwa kya Falaawo mazima ffe tujja kuwangula.

Olwo nno Musa n'asuula omuggo gwe okugenda okulaba nga gumira buli kye baali bagunjizzaawo.

Awo nno abalogo ne beeyala nga bavunnama.

Nebagamba nti: Tukkirizza Mukama Katonda Omulabirizi W'ebitonde.

Mukama Omulabirizi wa Musa ne Haaruuna.

Falaawo n'abuuza nga agamba nti: Mukkirizza by'agamba nga sinnaba kubawa lukusa, (kirabika) nti mazima yye ye mukulu wammwe eyabayigiriza eddogo, kale nno mujja kukitegeera, nja ku bakutulako emikono gyammwe n'amagulu ga mmwe nga bwe nkuggyako okugulu okwa ddyo, omukono nkuggyako gwa kkono, era ddala mwenna nja ku bakomerera ku musaalaba.

Ne bagamba nti ekyo tekiriimu buzibu, (anti) mazima ffe tujja kuba tudda eri Mukama Omulabirizi Waffe waffe.

Mazima ffe tululunkanira okuba nga Mukama Omulabirizi Waffe atusonyiwa ebyonoono byaffe bwe tuba nga ffe abakkiriza abasooka.

Era netutumira Musa nti tambula ekiro n'abaddu Bange, mazima mmwe mujja kulondoolwa.

Falaawo n'atuma mu bibuga abakunngaanya (eggye era n'agamba nti):

Mazima abo kabiina ka bantu batono.

Era mazima bo batunyiizizza.

Era nga bulijjo mazima ffe nga tukolera wamu tuli abantu abeekengera.

(Okusinziira ku nteekateeka zaabwe ne bye bakola ate) twabaggya mu malimiro n'ensulo ezikulukuta.

N'amawanika n'ebifo eby'ekitiibwa.

Bwe tutyo nno ne tubisikiza abaana ba Yisirayiri.

Olwo nno ne babawondera nga busaasaana.

Ebibinja byombi bwe byalengeragana abantu ba Musa baagamba nti mazima ffe bajja kutukwata (batutte).

(Musa) naagamba nti nedda mazima Mukama omulabirizi wange ali nange ajja kundaga eky'okukola.

Awo nno ne tutumira Musa nti kuba omuggo gwo ku nnyanja, olwo neebejjukamu, buli kibajjo ne kiba nga olusozi olunene.

Netusembeza awo abalala (Falaawo n'e ggye lye nabo ne bayingira ekkubo Musa lye yakuba ku nnyanja).

Netuwonya Musa n'abaali naye bonna.

Oluvanyuma twazikiriza abasigadde (abatakkiriza Musa).

Mazima mu ekyo ddala mulimu akabonero (akalaga obuyinza Bwaffe), wabula bangi mu bo tebakkiriza.

Era mazima Mukama Omulabirizi wo ddala Yye Ye Nnantakubwakumukono Omusaasizi ennyo.

Era basomere ekyafaayo kya Ibraahiimu.

Bwe yagamba kitaawe n'abantu be nti musinza biki?

Nebagamba nti: Tusinza masanamu ne tubeera we gali era ne tugawa ebiseera bingi mu kugasinza.

(Ibrahim) naagamba nti abaffe bwe musaba gabawulira.

Oba bibagasa oba bisobola okubatuusaako akabi.

Ne bagamba nti: Nedda, wabula twasanga bakadde baffe nga bakola bwebatyo.

N'agamba nti: Mulaba ebyo bye musinza.

Mmwe ne bakadde bammwe abaabakulembera.

Mazima byo balabe bange, okuggyako Mukama Omulabirizi w'ebitonde byonna.

Oyo eyantonda, Yye y'annunngamya.

Era Yye Y'Oyo andiisa n'annywesa.

Era bwe ndwala Yye y'amponya.

Era Y'Oyo alinzita ate alinziriza obulamu.

Era Yye Gwe ndulunkanira abe nga ansonyiwa ebyonoono byange ku Lunaku lw'okusasulwa.

Ayi Mukama Omulabirizi Wange, ngabira okumanya ensonga era onsisinkanye abalongoofu.

Era onteerewo okwogerwako obulungi mu balijja oluvannyuma.

Era onteeke mu balisikira Ejjana ey'ebyengera.

Era sonyiwa Kitange mazima yye yali mu babuze.

Era tonswazanga ku Lunaku lwe balizuukizibwa.

Olunaku emmaali n'abaana lwe bitaligasa.

Okuggyako (aliganyulwa) y'oyo alijja ewa Allah n'omutima omuyonjo.

Awo Ejjana erisembezebwa eri abatya Katonda.

N'omuliro ne gusembezebwa eri ababuze.

Era bagenda kugambibwa nti: Biri wa ebyo bye mwasinzanga?

Ne muleka Allah, abaffe bisobola okubataasa oba byo bisobola okwetaasa?

Olwo nno ne bakasukibwa mu gwo bo n'ababuze.

Na bonna abali mu ggye lya Ibuliisu.

Baligamba nga bali mu gwo nga bakaayagana nti:

Tulayira Katonda nti mazima ddala twali mu bubuze obw'olwatu.

Bwe twabenkanya (mmwe) ne Mukama Omulabirizi w'ebitonde byonna.

Era tewali yatubuza okugyako aboonoonyi.

N'olwekyo tetulina bawolereza.

Wadde ow'omukwano alumirwa.

Naye singa tubadde tulina omukisa (okudda ku nsi) ne tuba mu Bakkiriza.

Mazima mu ekyo ddala mulimu akabonero (akalaga obuyinza bwaffe), wabula bangi mu bo tebakkiriza.

Era mazima Mukama Omulabirizi Omulabirizi Wo ddala Yye Ye Nnantakubwakumukono Omusaasizi ennyo.

Abantu ba Nuuhu baalimbisa Ababaka.

Mu kiseera muganda waabwe Nuhu we yabagambira nti: Abaffe temutya (Katonda).

Mazima nze gye muli ndi Mubaka omwesigwa.

Kale mutye Allah era munngondere.

Era sikibasabirako mpeera, empeera yange teri walala okuggyako ku Mukama Omulabirizi W'ebitonde byonna.

Kale mutye Allah era munngondere.

Nebagamba nti abaffe tukukkirize nga abaawansi be bakugoberedde?

N'agamba nti: Mmanya ntya bye baali bakola.

Okubalibwa kwabwe kuli ku Mukama Omulabirizi Wange singa mubadde mumanyi.

Ate nze siri waakugoba Bakkiriza (olw'okuba baawansi).

Nze siri kirala okuggyako omutiisa ow'olwatu.

Nebagamba nti: Owange Nuuhu bw'oteekomeko ojja kubeerera ddala mu b'okukubwa amayinja.

N'agamba nti: Ayi Mukama Omulabirizi Wange, mazima abantu bange bannimbisizza.

Kale salawo wakati wange na bo olusalawo olwannamaddala, era omponye wamu ne Abakkiriza be ndi nabo.

Ne tumuwonya n'abo abaali naye mu lyato eryali lijjudde.

Oluvanyuma twazikiriza abaasigala.

Mazima mu ekyo ddala mulimu akabonero (akalaga obuyinza bwaffe), wabula bangi mu bo tebakkiriza.

Era mazima Mukama Omulabirizi Wo ddala Yye Ye Nnantakubwakumukono Omusaasizi ennyo.

Abantu ba 'Aadi baalimbisa Ababaka.

Mu kiseera muganda waabwe Huudu lwe yabagamba nti: abaffe temutya (Katonda)?!

Mazima nze gye muli ndi Mubaka omwesigwa.

Kale mutye Allah era munngondere.

Era sikibasabirako mpeera, empeera yange teri okuggyako ku Mukama Omulabirizi W'ebitonde byonna.

Abaffe muzimba ku buli katunnumba ekijjukizo nga muzannya buzannyi.

Era nemweteerawo amayumba amagundiivu nga mulinga abalibeerawo olubeerera.

Ate bwe mukwata (abalabe ba mmwe) mubakwata enkwata eya bakirimaanyi (abanyigiriza bannaabwe).

Kale mutye Katonda era mungondere.

Era mutye Oyo abagabirira ebyo bye mumanyi.

Abagabirira ebisolo ebirundibwa era n'abaana.

N'amalimiro n'emigga.

Mazima nze mbatiirira ebibonerezo by'olunaku oluzibu okubatuukako.

Nebagamba nti: Kyekimu obuuliridde oba toli mu babuulirira.

Tekiri kino (eky'okubuulirira kw'okola) okuggyako nkola y'abaasooka.

Era ffe tetuli ba kubonerezebwa.

Ne bamulimbisa olwo nno ne tubazikiriza, mazima mu ekyo mulimu eky'okuyiga naye abasinga obungi mu bo tebakkiriza.

Era mazima Mukama Omulabirizi Wo ddala Yye Ye Nnantakubwakumukono Omusaasizi ennyo.

Abantu ba Thamuudu baalimbisa ababaka.

Mu kiseera muganda waabwe Swalehe we yabagambira nti: abaffe temutya (Katonda)?!

Mazima nze gye muli ndi Mubaka omwesigwa.

Kale mutye Allah era munngondere.

Era sikibasabirako mpeera, empeera yange teri okuggyako ku Mukama Omulabirizi W'ebitonde byonna.

(Mulowooza nti) mujja kulekebwa mirembe mu bintu ebiri wano.

Baliba mu malimiro n’amazzi ag'ensulo.

N'ebimera n'emitende egiweese enkota enzito.

Era ne muwoola amayumba mu nsozi mu ngeri y'ekikugu.

Kale mutye Allah era mungondere.

Era temugondera ekigambo ky'abasukka ensalo za Katonda.

Abo aboonoona mu nsi ne batalongoosa.

Ne bagamba nti mazima ggwe oli wa mu baloge.

Ggwe toli kirala okuggyako omuntu obuntu nga ffe, kale leeta akabonero bw'oba nga oli mu boogera amazima.

N'agamba nti enngamiya yiino, erina okunywa (ku lunaku lwayo) nammwe munywe ku lunaku olumanyiddwa.

Temugituusangako akabi ebibonerezo by'Olunaku oluzito ne bibatuukako.

Wabula baagifumita (n'efa) olwo nno ne baba nga bejjusa.

Ebibonerezo ne bibatuukako mazima mu ekyo mulimu eky'okuyiga, naye abasinga obungi mu bo tebakkiriza.

Era mazima Mukama Omulabirizi Wo ddala Yye Ye Nnantakubwakumukono Omusaasizi ennyo.

Abantu ba Luutu baalimbisa Ababaka.

Mu kiseera Muganda waabwe Luutu we yabagambira nti: Abaffe temutya (Katonda)?!

Mazima nze gye muli ndi Mubaka omwesigwa.

Kale mutye Allah era munngondere.

Era sikibasabirako mpeera, empeera yange teri okugyako ku Mukama Omulabirizi W'ebitonde byonna.

Abaffe mu bitonde byonna ne mwagalamu basajja!.

Ne muleka ekyo Mukama Omulabirizi Wammwe kye yabatondera mu abo be mwafumbiriganwa nabo, wabula mmwe muli bantu abasukka ebikomo.

Nebagamba nti: Owange Luutu bw'oteekomeko ojja kubeerera ddala mu bafulumizibwa (ne bagobwa mu nsi eno).

N'agamba nti: Mazima ndi omu ku batamwa ekikolwa kya mmwe (eky'ebisiyaga).

Ayi Mukama Omulabirizi Wange, mponya n'abantu bange ebyo bye bakola.

Netumuwonya n'abantu be bonna.

Okugyako omukadde (Mukyalawe) eyali mu baasigala.

Oluvanyuma twazikiriza abaasigala.

Netubatonnyesaako enkuba, mazima yali nkuba mbi nnyo ey'abo abaalabulwa (ne bateebuulirira).

Mazima mu ekyo ddala mulimu akabonero (akalaga obuyinza Bwaffe), wabula bangi mu bo tebaali Bakkiriza.

Era mazima Mukama Omulabirizi Wo ddala Yye Ye Nnantakubwakumukono Omusaasizi ennyo.

Abantu b'o mu kitundu eky'ekibira baalimbisa Ababaka.

Mu kiseera Swaibu bwe yabagamba nti abaffe temutya (Katonda)!.

Mazima nze gye muli ndi Mubaka omwesigwa.

Kale mutye Allah era munngondere.

Era sikibasabirako mpeera, empeera yange teri walala okuggyako ku Mukama Omulabirizi W'ebitonde byonna.

Era mutuukirizenga okupima temubeera mu abo abafiiriza abalala.

Mupimisenga ebipimo ebituufu.

Temukendeerezanga abantu ebintu byabwe, era temukolanga ebibi mu nsi ne muba aboonoonyi.

Era mutye Oyo eyabatonda n'atonda n'emirembe egyasooka.

Ne bagamba nti mazima ggwe oli mu baloge.

Toli ggwe okuggyako muntu nga ffe, era tukulowooza okuba nti oli mu balimba.

Kale nno tusuuleko ekibajjo okuva waggulu bwoba nga oli mu boogera amazima.

N'agamba nti: Mukama Omulabirizi wange y'asinga okumanya ebyo bye mukola.

Wabula baamulimbisa ebibonerezo ne bibakwata ku lunaku ekire lwe kyabasiikiriza. Mazima kyo kyali kibonerezo kya lunaku oluzito.

Mazima mu ekyo ddala mulimu akabonero (akalaga obuyinza Bwaffe), wabula bangi mu bo tebakkiriza.

Era mazima Mukama Omulabirizi Wo ddala Yye Ye Nnantakubwakumukono Omusaasizi ennyo.

Era mazima yo (Kulaani) yassibwa Mukama Omulabirizi W'ebitonde byonna.

Yakka nayo Mwoyo omwesigwa (Jibuliiru).

(Yagissa) ku mutima gwo olyoke obeere mu batiisa (abantu okukola ebibi).

Nga eri mu lulimi Oluwalabu olutegeerekeka.

Era mazima yo eyogerwako mu bitabo eby'edda ebyasooka.

Abaffe tekibamala kuba bujulizi okuba nti abayivu b'abaana ba Yisirayiri bagimanyi?

Singa twagissa ku bamu mu batali Bawalabu.

Olwo nno (omu kubo) n'agibasomera tebandigikkirizza.

Bwe kityo (okugiwakanya) twakiyingiza mu mitima gy'aboonoonyi.

Tebagenda kugikkiriza okutuusa lwe baliraba ebibonerezo ebirumya.

Ebiribajjira ekibwatukira nga tebategedde.

Olwo nno bagambe nti abaffe tusobola okulindirizibwa?!

Abaffe ebibonerezo byaffe bye basaba bibatuukeko mangu.

Okiraba nti singa tubawangaazizza emyaka (egiwera).

Oluvanyuma ne bibajjira ebyo bye balagaanyisibwa.

Tebiyinza kubayamba ebyo bye baaweebwa okweyagaliramu.

Tewali kitundu kye twazikiriza okuggyako nga kimaze kufuna abatiisa (Bannabbi).

(Kyabanga bwe kityo) lwa kubabuulirira, tetubangako balyazaamaanyi.

Era Sitaane si ze zaagissa (Kulaani).

Era tekizisaanira era nga tezikisobola.

(Ku lw'ensonga nti) mazima zaaziyizibwa okuwulira ebifa mu ggulu.

(N'olwekyo) bw'oba osinza Katonda tomugattako kintu kirala (anti bwokikola) obeera wa mu balibonerezebwa.

Era tiisa ab'oluganda lwo ab'okumpi.

Era kakkanya ekiwawaatiro kyo (weewombeke) eri oyo aba akugoberedde mu bakkiriza.

Wabula bwe bakujeemera gamba nti: Mazima nze nneesambye ebyo bye mukola.

Era weekwate ku Nnantakubwakumukono Omusaasizi.

Oyo akulaba w'obeerera nga oyimiridde (mu kusaala).

Era n'alaba okwekyusakyusakwo mu bavunnama.

Mazima Yye Awulira nnyo Omumanyi.

Abaffe mbategeeze Oyo Sitaane gwe zikkako?!

Zikka ku buli musazi wa bigambo omwonoonyi.

Abo abasaasaanya bye bawulira naye nga abasinga obungi mu bo balimba.

Ate abatontomi, ababuze be babagoberera.

Abaffe tolaba nti babulubuutira mu buli lusenyi.

Era nti mazima bo boogera bye batakola.

Okugyako abo Abakkiriza ne bakola emirimu emirungi ne boogera nnyo ku Katonda era ne baba nga beerwanako oluvannyuma lw'okuyisibwa obubi, era mazima abo abeeyisa obubi bagenda kumanya buddo ki gye balidda.

Twaa Siin, bino bigambo bya Kulaani era Ekitabo ekinnyonnyofu.

Kya kulunngamya era mawulire ga ssanyu eri Abakkiriza.

Abo abayimirizaawo esswala ne batoola Zzaka era nga bo bakakasa Olunaku lw'Enkomerero.

Mazima abo abatakkiriza Lunaku lwa Nkomerero twabalabisiza bulungi emirimu gyabwe, olwo nno bo ne babulubuuta.

Abo beebo abatuusibwako ebibonerezo ebizito (ng'okuttibwa) ate nga bo ku Lunaku lw'Enkomerero be b'okufaafaaganirwa ennyo.

Era mazima ggwe (Muhammadi) oweebwa Kulaani ng'eva (ewa Katonda) mugoba nsonga amanyi ennyo.

Era jjukira (Musa) bwe yagamba ab'omu maka ge nti: Mazima nze nengedde omuliro (kanngendeyo) nja kubaleetera okuva we guli ekigambo oba mbaleetere ekitawuliro kibayambe okwota.

Naye bwe yagutuukako yakoowoolwa (naagambibwa) nti wa mukisa oyo ali mu muliro n'oyo ali emabbali waagwo, era yasukkuluma Mukama Omulabirizi W'ebitonde byonna.

Owange Musa mazima Nze Allah Nnantakubwakumukono, Mugobansonga.

Era suula omuggo gwo. Bwe yagulaba nga gwenyeenya nga gulinga akasota akatono yakyuka n'adduka era nga tayagala kudda, (Katonda kwe kumukoowoola nti) owange Musa, totya mazima Nze Ababaka tebatya mu Maaso Gange.

Okuggyako ab'alyazamaanyizza mu bantu oluvannyuma lw'okukola ekibi n'akiwaanyisaamu okirungi mazima Nze Ndi Musonyiyi nnyo Omusaasizi.

(Era Katonda n'agamba Musa nti) yingiza omukono gwo mu lugoye lwo gujja kuvaayo nga mweru, so nga si mulwadde (nga ebibiri ebyo, bumu) ku bubonero omwenda bw'otwalira Falaawo n'abantu be, mazima bo bantu aboonoonyi.

Obubonero Bwaffe bwe bwabatuukako nga bulagira ddala amazima baagamba nti: Lino ddogo eryeyolefu.

Ne babuwakanya mu bulyazamaanyi n'okwekuluntaza, so nga emyoyo gyabwe gyabukakasa, kale nno tunuulira olabe enkomerero y'a boonoonyi yali etya.

Era mazima twawa Dawuda ne Sulayimaani okumanya era ne bagamba nti atenderezebwa Allah Oyo eyatusukkulumya ku bangi mu baddu be Abakkiriza.

Awo Sulayimaani yasikira Dawuda n'agamba nti: Abange mmwe abantu tuyigiriziddwa olulimi lw'ebinyonyi era tuweereddwa ku buli kintu mazima kino bwe bulungi obweyolefu.

Sulayimaani baamukunngaanyiza eggye rye okuva mu Majinni n'abantu n'ebinyonyi nga nabo batambulira ku nteekateeka eyabaweebwa.

Okutuusa lwe baatuuka ku lusenyi lw'ensanafu, ensanafu emu kwe kugamba nti: Abange bawansanafu muyingire mu bisulo byammwe, Sulayimaani n'eggye rye tebababetenta nga nabo tebamanyi.

Mu kiseera ekyo (Sulaiman) naamwenya ng'ate aseka olw'ekigambo kyayo era n'agamba nti: Ayi Mukama Omulabirizi Wange, nnyamba mbe nga nsobola okwebaza ebyengera byo ebyo bye wangabira era n'ebyo bye wagabira bakadde bange bombi era mbe nga nkola ebirungi by'osiima era ku lw'okusaasira kwo onnyingize mu baddu bo abalongoofu.

Awo Sulaiman yatunula mu binyonyi n'agamba nti: Lwaki effulungu siriraba oba liri mu bataliiwo.

Nja ku libonereza ebibonerezo ebikakali sinakindi nja ku lisala oba si ekyo lindeetere ensonga ennambulukufu.

(Effulungu) lyamala ebbanga eritaali ddene (oluvannyuma ne lijja ewa Sulayimaani) ne ligamba nti: Ntegedde ekintu ky'obadde tomanyi era nkuleetedde okuva e Saba'a amawulire amakakafu.

Mazima nze nsanze nga omukyala y'abafuga ate nga yaweebwa buli kintu, era nga alina nnamulondo empitirivu.

Mmusanze (yye) n'abantu be nga bavunnamira enjuba ne baleka Allah, era Sitaane yabanyiririza emirimu gyabwe, olwo nno n'ebaggya ku kkubo ettuufu n'olwekyo bo tebagenda kulunngama.

Nebatavunnamira Allah Oyo aggyayo ebyekwese mu ggulu omusanvu ne mu nsi era amanyi ebyo bye mukweka ne byemwolesa.

Allah, tewali kisinzibwa mu butuufu okuggyako Yye, Mukama Omulabirizi wa Arishi (nnamulondo) ey'ekitiibwa.

(Sulayimaani) n'agamba nti: Tujja kulaba oyogedde mazima oba oli mu balimba.

Twala ebbaluwa yange eno ogibawe, bw'omala baweemu akabanga olabe ki kye banaddamu.

(Bilikiisi) bwe yafuna ebbaluwa n'agamba nti: Abange mmwe abakungu, mazima nze mpeereddwa ebbaluwa ey'ekitiibwa.

Mazima yyo eva wa Sulayimaani era esoma nti: Ku lw'Erinnya lya Allah Omusaasizi Ow'ekisa ekingi Omusaasizi Ow'ekisa eky'enjawulo.

Temunneekuluntalizaako era mujje gyendi nga mukkirizza okugondera Katonda.

(Bilikiisi) n'agamba nti: Abange mmwe abakungu, mumpe ebirowoozo ku nsonga yange eno, sisobola kusalawo nsonga okutuusa lwe mujja gyendi (ne tukyogerako).

Baagamba nti: Ffe tuli baamaanyi ddala era ffe mu kulwana tuli bayitirivu, naye bwo obuyinza buli gyoli, laba ki ky'olagira.

(Bilikiisi) n'agamba nti: Mazima abafuzi bwe bayingira mu kitundu (nga bakiwangudde buwanguzi) bakyonoona, abantu ababadde abeekitiibwa ne babafuula abakopi, era bwebatyo bwe bakola.

Era mazima nze nngenda kubaweereza ekirabo olwo nno nninde bentumye badda na ki?.

(Abaatumwa) bwe bajja ewa Sulayimaani yagamba nti: Munsendasenda n'emmaali (olwo nno mbaleke) ebyo Allah bye yampa bye birungi okusinga bye yabawa, wabula mmwe musanyuukirira nnyo olw'ebirabo byammwe.

(Sulayimaani n'agamba) nti: Ddayo gye bali (n'ebirabo byabwe) tugenda kubaleetera eggye lye batasobola kwennganga, era (ensi eyo) tujja kugibafulumyamu nga baawansi abanyoomoofu.

(Sulayimaani) n'agamba nti: Abange mmwe abakungu, ani mu mmwe andeetera nnamulondo ye nga tebannaba kunzijira nga bakkirizza Katonda?

Ejjinni ery'amaanyi ne ligamba nti: Nze nja kugikuleetera nga tonnava mu kifo kyo, era mazima nze ku ekyo ndi waamaanyi omwesigwa.

(Omulala) oyo alina okumanya (okw'enjawulo) okuva mu Kitabo kya (Katonda) n'agamba nti: Nze nja kugikuleetera nga tonnatemya, bwe yagiraba nga eteredde waali yagamba nt: Kino kya mu birungi bya Mukama Omulabirizi Wange abe nga angezesa, abaffe nneebaza oba sseebaza byengera, era bulijjo omuntu eyeebaza yeebaza ku lulwe, ate oyo ateebaza (akimanye nti) mazima Mukama Omulabirizi Wange talina kye yeetaaga, Mugabi nnyo.

(Sulayimaani) n'agamba nti: Mukyusekyuse nnamulondo ye tulabe, anaasobola okugimanya oba anaabeera mu batasobola kugimanya.

(Bilikiisi) bwe yajja yagambibwa nti: nnamulondo yo bw'eti bw'efaanana? N'agamba nti: mazima eringa yyo, (Sulayimaani n'agamba nti:) twaweebwa okumanya (Katonda) olubereberye lwe (nga omukyala ono tanajja) era tubadde Basiraamu.

Ekyamugaana (omukyala ono okubeera Omusiraamu bye) ebyo bye yali asinza n'alekawo Allah, mazima yye (Bilikiisi) yali ava mu bantu abatakkiriza.

N'agambibwa nti: Yingira olubiri (amatiribona), bwe yalutunuulira yalulaba nga amayengo g'amazzi n'abikkula ku ntumbwe ze zombiriri (olw'okutya amazzi) (Sulayimaani) n'amugamba nti mazima lwo Olubiri (oluggya lwalwo) lwakolebwa mu birawuli nga wansi w'ebirawuli waliyo amazzi, (Bilikiisi) n'agamba nti: Mukama Omulabirizi Wange, mazima nze nneeryazamaanyizza omwoyo gwange era (kaakano) nsiramuse nga ngoberera Sulayimaani ku lwa Mukama Omulabirizi W'ebitonde.

Era mazima twatuma eri abantu b'ekika kya Thamuudu muganda waabwe Swalehe nti: Musinze Allah, ekyaddirira abantu abo kwe kubaamu ebibinja bibiri ebikaayagana, (ekya bakkiriza n'abatakkiriza).

(Swaleh) n'agamba nti: Abange mmwe abantu bange, lwaki musaba Allah ekibi ng'ate temunnasaba kirungi, kale nno singa musaba Allah okubasonyiwa mube nga musaasirwa.

Ne bagamba nti: Tujja kufuna ebizibu ku lulwo ne ku lw'abo abali naawe. (Swalehe) n'agamba nti: Omugabo gwammwe mu birungi oba mu bizibu biri eri Allah, wabula mmwe muli abantu abalabankanyizibwa.

Mu kibuga kyabwe mwalimu abasajja mwenda nga boonoonyi mu nsi nga tebalongoosa.

Ne bagamba (bannaabwe) nti: Mulayire Katonda nti tujja kumuteega ekiro tumutte n'abantu be. (Bwe tunaamala okumutta) tujja kugambira ddala eri oyo yenna amulinako obuvunaanyizibwa nti: tetwabaddewo nga omuntu waabwe attibwa era mazima twogera mazima.

Ne bakola enkwe ez'okutta (Swaleh n'abantu be) naffe ne twanukula enkwe ez'okumuwonya nabo nga tebamanyi.

Kale laba enkomerero eyava mu nkwe zaabwe, mazima ffe twabazikiriza n'abantu baabwe bonna

Olwo nno amayumba gaabwe gaalekebwa ttayo olw'enneeyisa yaabwe embi, mazima mu ekyo mulimu ekyokuyiga eri abantu abamanyi.

Twawonya abo Abakkiriza ate nga baali batya Katonda.

Era (jjukira Omubaka Waffe) Luutu bwe yagamba abantu be nti: Mukola ekikolwa eky'obuwemu nga mulabira ddala?!

Mazima mmwe obwagazi bwammwe mubukola ku basajja ne mulekawo abakazi, wabula mmwe muli abantu abakola ebikolwa eby'obubuyabuya.

Okwanukula kw'abantu be kwali kugamba bugambi nti: Mugobe abagoberezi ba Luutu bave ku kyalo kyammwe, mazima bo bantu abeetwala okuba abatuukirivu.

Olwo nno ne tumuwonya n'abantu be okuggyako mukyalawe twamugerera okubeera mu b'okuzikirira.

Ne tubatonnyesaako enkuba, mazima enkuba eyo yali mbi nnyo eri abo abaalabulwa (ne bateebuulirira).

Gamba (ggwe Nnabbi- Muhammadi) nti: Okutenderezebwa okujjuvu kwa Allah era nti emirembe gibeere ku baddu be abo be yalondamu (batuuse Obubaka bwe eri abantu), abaffe Allah Omutonzi y'asinga obulungi oba ebyo bye bamugattako?!

Abaffe ani yatonda eggulu n'ensi, era n'abatonnyeseza amazzi okuva waggulu, ne tugamezesa amalimiro agalabika obulungi, tekibangako mu mikono gyammwe okumeza emiti gya go. Ate oluvannyuma lw'ekyo wabaawo watya ekisinzibwa kyonna nga kigattibwa ku Allah?! Wabula (ekibakozesa ekyo) lwa kuba nti bo bantu abenkanya Katonda n'ebintu ebirala.

Abaffe ani oyo eyassaawo ensi nga nteefu naagissaamu e migga, naagiwa ensozi (nga nkondo) n'assa wakati w'ennyanja e bbiri (ey'omunnyu ne etali) ekyayawula (ate oluvanyuma lw'ekyo) wasobola okubaawo ekisinzibwa kyonna nga kigattibwa ku Katonda! Wabula (ekibakozesa ekyo) lwakuba nti abasinga obungi mu bo tebamanyi.

Abaffe ani oyo ayanukula ali mu buzibu bw'aba amusabye, era n'aggyawo akabi, era n'abafuula abasigire mu nsi (ate oluvanyuma lw'ekyo) wasobola okubaawo ekisinzibwa kyonna nga kigattibwa ku Allah! Naye mujjukira kitono.

Abaffe ani oyo abalaga ekkubo mu bizikiza by'olukalu n'ennyanja era ani oyo asindika empewo nga zireeta essanyu (enkuba) nga liva mu mikono gy'okusaasira kwe (ate oluvannyuma lw'ekyo) wasobola okubaawo ekisinzibwa kyonna nga kigattibwa ku Allah?!, Allah Musukkulumu nnyo ku ebyo bye bamugattako.

Abaffe ani oyo atandikawo ebitonde ate nga agenda kubizzaawo (oluvanyuma lw'okufa kwabyo) era ani abagabirira (mmwe) okuva waggulu ne ku nsi (ate oluvannyuma lw'ekyo) wasobola okubaawo ekisinzibwa kyonna nga kigattibwa ku Allah?! Bagambe nti: Muleete obujulizi bwammwe bwe muba nga muli baamazima.

Bagambe nti abali mu ggulu omusanvu n'ensi tewali amanyi byekusifu okuggyako Katonda, (era n'olwekyo) tebamanyi ddi lwe balizuukizibwa.

Wabula (ekibuuzo kiri nti) okumanya kwabwe kwamalayo byonna okutuusa ku Lunaku lw'Enkomerero (olwo nno babe nga bakubuuza okuzuukira kulibaawo ddi) wabula (ekituufu kiri nti) bo ku bikwata ku Lunaku lw'Enkomerero bali mu kubuusabuusa, wabula (si ekyo kyokka) bo bamuzibe ku bikwata ku Lunaku olwo.

Abatakkiriza Allah baagamba nti: Bwe tulimala okufuuka ettaka ne bakadde baffe ate tuliggyibwayo?

Mazima ffe ne bakadde baffe okuva edda kino kizze kitulagaanyisibwa (nga tewali kibaawo, n'olwekyo) bino si kirala okuggyako nfumo z'abaakulembera.

Bagambe (ggwe Muhammadi) nti: Mutambule mu nsi mulabe ngeri ki enkomerero y'aboonoonyi bwe yali.

Tonakuwala ku lwabwe era towulira bubi olw'enkwe ze basala.

Era ne bagamba nti eyo endagaano eribaawo ddi bwe muba nga mwogera mazima?!

Bagambe nti, mwandiba nga musemberedde ebimu ku ebyo bye musaba okubatuukako mu bwangu.

Era mazima Mukama Omulabirizi Wo ajjudde ebirungi by'agabira abantu, naye abasinga obungi mu bo tebeebaza.

Era mazima Mukama Omulabirizi Wo amanyi ebyo ebifuba byabwe bye bikweka n'ebyo bye bakola mu lwatu.

Era tewali kyekusifu kyonna mu ggulu ne munsi okuggyako nga nakyo kiri mu kitabo ekiraga buli kimu.

Mazima Kulaani eno etegeeza abaana ba Yisirayiri ebisinga obungi mu bye baawukanamu.

Era mazima yyo bulunngamu na kusaasira eri Abakkiriza.

Era Mukama Omulabirizi Wo alitawulula wakati waabwe nga abalamula, era Yye Ye Nnantakubwakumukono Omumanyi ennyo.

N'olwekyo (ggwe Muhammadi) weekwate ku Allah, mazima ggwe oli ku mazima ameeyolefu.

Mazima ggwe tosobola kuwuliza bafu era nga bw'otasobola kuwuliza bakiggala kukoowoola, kasita bakyuka ne tugamezesa bakubayo amabega.

Era ggwe tosobola kulunngamya bamuzibe no'obaggya ku bubuze bwabwe, tosobola kuwuliza okuggyako abo abakkiriza ebigambo byaffe era abo be beewaayo ewa Katonda.

Ekigambo bwe kiribagwako tugenda kubaggyirayo ensolo okuva mu ttaka eyogere nabo, anti mazima abantu baali tebakakasa Bigambo Byaffe.

Era (babuulire) Olunaku lwe tulikunngaanya mu buli kibiina kya bantu akabinja mu abo abalimbisa ebigambo byaffe, nabo nno nga bayawulwa mu miteeko.

Okutuusa nga bazze (mu maaso ga Katonda) aligamba nti: Mwalimbisa ebigambo byange so ng'ate temwabimanya mu bujjuvu bwabyo, kaakati mwakoleranga kuki?.

Olwo ekigambo (eky'okubonerezebwa) ne kibakakatako (olw'ebyo bye beeyisaamu obubi ne kiba nti tebagenda kwatula.

Abaffe tebalaba nti mazima Ffe twateekawo ekiro bakiwummulirengamu, era (ne tuteekawo) obudde obw'emisana nga butangaala bakolerengamu emirimu egibayimirizaawo) mazima mu ekyo mulimu obubonero eri abantu abakkiriza.

Era (babuulire) Olunaku enngombe lw'erifuuyibwa, buli yenna ali mu ggulu omusanvu n'oyo ali mu nsi n'atya okuggyako oyo Allah gw'aliba ayagadde, na bonna bagenda kujja nga banyoomoofu.

Oliraba ensozi ze waalirowoozezza nti ziyimiridde naye nga zidduka ng'okudduka kw'ebire, okwo kwe kukola kwa Allah Oyo eyakola buli kintu mu nkola etuukiridde, mazima Yye amanyidde ddala bulungi ebyo bye mukola.

Oyo yenna alijja n'ekirungi agenda kuweebwa ekirungi ekikisingako, era abo baliwona entiisa y'Olunaku olwo.

Ate abo abalijja n'ekibi ebyenyi byabwe bigenda kuvumbikibwa mu muliro, abaffe mulisasulwa okuggyako ebyo bye mwali mukola?

Gamba (ggwe Nnabbi Muhammadi) nti: Mazima Nze nnalagirwa okuba nga nsinza Mukama Omulabirizi W'ekibuga kino (Makka) oyo eyakifuula eky'emizizo era buli kintu kyonna kikye era nnalagirwa okubeera mu beewaayo ewa Katonda.

(Era nnalagirwa) okuba nga nsoma Kulaani, kale nno oyo yenna alunngama aba alunngama ku lulwe, ate oyo abula, bagambe nti mazima nze ndi mu ababalabula.

Era gamba nti: Okutendebwa kwa Allah, ajja kubalaga obubonero Bwe mulibumanya (ate nga tebukyabagasa) Mukama Omulabirizi Wo tabangako atafaayo ku ebyo bye mukola.