Luganda Meal — Afrika Kalkınma Vakfı — Kasas 28:1 – Zuhruf 43:89

Twaa Siin Miim.

Ebyo bye bigambo by'Ekitabo ekinnyonnyola.

Tukusomera mu bwesimbu ebyafaayo bya Musa ne Falaawo (bibe bya mugaso) eri abantu Abakkiriza.

Mazima Falaawo yeekuluntaliza mu nsi, abantu baamu n'abaawulayawulamu obubinjabinja, nga abonyaabonya ekibinja mu bo nga asala (n'atta) abaana baabwe abalenzi n'alekawo abawala mu bo (mu kukola ekyo) n'abeera mu boonoonyi.

Era twagala okubunduggula ebyengera ku abo abaanyigirizibwa ku nsi era tubafuule abakulembeze era tubafuule abasikira (ebyengera bali bye baaleka).

Era tubawe obuyinza mu nsi (era nga tukozesa bo) tulage Falaawo ne Haamaana n'amagye gaabwe bombi ekyo kye baali beekeka.

Era twalagira Maama wa Musa nti muyonse, naye bw'oba nga omutiiriridde musuule mu mazzi, naye totya, era tonakuwala mazima Ffe tujja kumukuddiza era tujja kumuteeka mu Babaka.

Abantu ba Falaawo ne bamulonda (naye nga) ajja kubafuukira omulabe era ow'okubalabya ennaku. Mazima Falaawo ne Haamaana n'amagye gaabwe bombi baali basobya.

Mukyala wa Falaawo n'agamba nti: (Omwana ono) wa kusanyusa amaaso gange naawe, temumutta ayinza okutugasa oba ne tumufuula omwana, (naye) nga nabo tebamanyi (Musa ky'agenda kubeera).

Omutima gwa Maama wa Musa gwali gwagaana okutereera (nga yeeraliikirira) era yabula kata okumulaga (nga bwe yali omwanawe) singa tetwassa bunywevu ku mutima gwe (olwo nno) alyoke abe mu Bakkiriza.

(Maama wa Musa) yagamba mwannyina (wa Musa) nti mulondoole, awo nno n'amulaba nga ali wala naye nga bo tebamanyi.

Twamulemesa okukkiriza amabeere (g'omuyonsa yenna) okuva ku ntandikwa, (Mwannyina) n'abagamba nti: Abange, mbalagirire abantu b'enyumba emu abanaamubalerera era nga bajja kumubuulirira?

Olwo nno twamuzza ewa Nnyina amaasoge gabe nga gatebenkera era aleme kunakuwala, era asobole okumanya nti mazima endagaano ya Allah ya mazima wabula abasinga obungi mu bo tebamanyi.

(Musa) bwe yakula n'asajjakula twamuwa okusengeka ensonga n'okumanya. Era bwetutyo bwe tusasula abalongoosa.

(Olunaku lumu Musa) yayingira e kibuga ng'abantu baamu tebategedde n'asangamu abasajja babiri nga balwanagana, nga omu wa mu bantu be ate omulala nga wa mu balabe be (wa mu bantu ba Falaawo) ow'omu bantu be n'amusaba amutaase ku mulabe;we, awo nno Musa n'amukuba ekikonde n'amutta mbagirawo, (Musa) n'agamba nti: Kino kikolwa kya Sitaane, mazima yye mulabe era mubuza ow'olwatu.

(Musa) n'agamba nti: Ayi Mukama omulabirizi wange mazima nze nneeyisizza bubi nsaba onsonyiwe, (Katonda) n'amusonyiwa, anti mazima Yye Ye Musonyiyi Omusaasizi ennyo.

N'agamba nti: Ayi Mukama Omulabirizi Wange, okusinziira ku byengera by'ompadde sigenda kubeera muyambi wa boonoonyi.

Okuva olwo Musa yabeera mu kibuga ng'atya nga yeekengera. Yali akyali awo nga eyamusabye jjo okumutaasa ate amukubira enduulu amudduukirire, Musa n'amugamba nti: Mazima ggwe oli mulumbaganyi ow'olwatu.

Olwo nno (Musa) bwe yayagala okuvumbagira oyo omulabe waabwe bombi, n'agamba nti: owange Musa oyagala kunzita nga bwe wasse omuntu jjo, tolina ky'oyagala okuggyako okubeera nnantagambwako mu nsi era (olabika) toyagala kubeera wa mu bakozi ba bulungi.

Awo nno omusajja kwe kujja nga adduka ng'ava ekibuga gye kikoma, n'agamba nti: Owange Musa mazima abakungu bakuteesaako okukutta, kale fuluma (mu nsi eno) mazima nze ndi mu bakubuulirira.

Awo nno n'akifuluma (ekibuga) nga atidde yeekengera, n'agamba nti: Ayi Mukama Omulabirizi Wange, mponya abantu abalyazamaanyi.

Bwe yamala okwolekera oludda lw'e Madiyana yagamba nti: Nsaba Mukama Omulabirizi Wange annunngamye ku kkubo ettuufu.

Bwe yatuuka ku mazzi g'e Madiyana yasangawo ekibinja ky'abantu nga banywesa (ensolo zaabwe) era nga wabbali waliwo abakazi babiri, nga bagaana (ensolo zaabwe okunywa amazzi) n'abagamba nti: ate mmwe ogubadde gwe gwaki? Ne bagamba nti tetunywesa okutuusa abalunzi abalala lwe banaggyawo ensolo zaabwe, ate nga ne kitaffe mukadde nnyo.

N'abanyweseza, bwe yamala ne yeewogoma mu kisiikirize olwo n'agamba nti: Ayi Mukama Omulabirizi Wange, mazima nze ndi mwetaavu nnyo eri ekirungi kyonna kyoba ompadde.

(Aba ali awo) omu ku bombi (abakazi) n'ajja we yali nga yebwalabwala, n'abagamba nti: Mazima taata akuyita abe nga akusasula empeera y'okutunyweseza, (Musa) bwe yatuuka (taata w'abawala) we yali era n'amunyumiza emboozi (y'ebimufaako) yamugamba nti: Totya omaze okuwona abantu abalyazaamaanyi.

(Omuwala) omu n'agamba nti: Owange taata muwe omulimu mazima omupakasi asinga obulungi ye waamaanyi omwesigwa.

(Kitaawe w'abawala) n'agamba nti: Mazima nze njagala kukufumbiza omu ku bawala bange abo ababiri nga ojja kunkolera emyaka munaana naye bw'ojjuza ekkumi ekyo kiri gy'oli, wabula ssaagala kukukaluubiriza ojja kunsanga nga ndi mu bantu abakozi b'obulungi.

(Musa) n'agamba nti: Ekyo kiri wakati wange naawe ekimu ku biseera ebibiri kyennaaba nkoze nja kuba ssivunaanwa, era Allah Ye Mweyimirize ku byonna bye twogera.

Musa bwe yamala okutuukiriza ekiseera (kye baalagaana), yatambula n'abantu be (nga bagenda e Misiri) n'alaba omuliro ku ludda lw'olusozi, n'agamba abantu be nti: Mulindeeko wano katono, mazima nze nnina wendabye omuliro, sikulwa nga mbaleetera amawulire okuva we guli oba ne mbaleetera ekitawuliro mulyoke mwote.

Musa bwe yatuuka weguli, yakoowoolwa (nga eddoboozi) liva ku lubalama lw'ekisenyi olwaddyo mu kifo eky'omukisa nga liva mu muti (nga limugamba) nti owange ggwe Musa, mazima nze Allah Omulabirizi W'ebitonde.

Era (Katonda naamugamba nti) kasuka omuggo gwo (naye kwe kugukasuka) olwo nno bwe yagulaba nga gwenyeenya, nga gulinga omusota omwangu mu ntambula yaagwo, yakyuka nga adda emabega era n'atatunula gy'ava (Katonda kwe kumukoowoola nti) owange ggwe Musa komawo era totya anti mazima oli mu balina emirembe.

Yingiza omukono gwo mu kimeeme ky'ekyambalo kyo gujja kufuluma nga mweru ng'ate tewali kabi kagutuuseeko, ssa omukono gwo ku kifuba kyo. Obwo nno bwombiriri bwe Bubonero okuva eri Katonda Wo bw'otwalira Falaawo n'abakungu be, anti mazima okuva emabega babadde bantu boonoonyi.

(Musa) n'agamba nti: Ayi Mukama Omulabirizi Wange, mazima nze nnabattamu omuntu, n'olwekyo ntya sikulwa nga banzita.

Ate Muganda wange Haaruuna y'ansinga olulimi olwatufu, kale nno mutume wamu nange nga muyambi abe nga akkaatiriza amazima gange, anti mazima nze ntya okuba nga bajja kunnimbisa.

(Katonda) n'amugamba nti: Tujja kunyweza omukono gwo (kukuwagira) ne mugandawo, era tubawe mwembiriri obusobozi babe nga tebasobola kubatuusaako kabi. Olw'obubonero Bwaffe, mmwe mwembiriri nabuli yenna abagoberera mmwe mujja okuwangula.

Musa bwe yabajjira n'obubonero Bwaffe nga bunnyonnyofu, baagamba nti kino si kirala okuggyako okuba e ddogo ejjingirire, era tetuwuliranga ku kintu nga kino mu bakadde baffe abaasooka

Musa n'agamba nti Mukama Omulabirizi Wange y'asinga okumanya oyo azze n'obulungamu ng'abuggya Gy'ali era n'oyo aliba n'enkomerero ennungi, anti bulijjo abeeyisa obubi tebayinza kutuuka ku buwanguzi.

Ate Falaawo n'agamba nti: Aange mmwe abakungu sibamanyiddeeyo Katonda mulala atali nze, ggwe Haamaana nkumira omuliro oyokye amataffaali onzimbire omulongooti nsobole okulaba Katonda wa Musa, era mazima nze mmulowooleza ddala okuba nga ali mu balimba.

Olwo nno ne yeekuza mu nsi yye n'eggye rye, awatali nsonga yonna (kwe basinziira) ne balowooza nti mazima tebagenda kuzzibwa gyetuli.

Ne tumukwata n'eggye rye ne tubanyugunya mu nnyanja, kale tunuulira olabe enkomerero y'abeeyisa obubi bwe yali.

Ne tubafuula abakulembeze nga bakoowoola abantu okuyingira Omuliro, era nga ne ku Lunaku lw'Enkomerero tebagenda kutaasibwa.

Era twabagobereza ekikolimo mu nsi muno nga ne ku Lunaku lw'Enkomerero bo be balifuulibwa abalabika obubi.

Mazima twawa Musa ekitabo bwe twamala okuzikiriza emirembe egyasooka nga mumuli eri abantu, era nga bulunngamu era kusaasira kibayambe okwebuulirira.

Era (ggwe Muhammadi) tobangako ku ludda olw'ebugwanjuba bwe twawa Musa ekigambo (ekiragiro eky'okugenda ewa Falaawo) era tewali mu baaliwo (mu kiseera ekyo).

Naye mazima Ffe twatandikawo emirembe ebbanga ne liyitawo ddene (nga ggwe tonnatumwa) era tobangako mutuuze mu bantu b'e Madiyana n'oba nga obasomera Ebigambo Byaffe naye mazima Ffe bulijjo tubadde tutuma Ababaka.

Era tewaliiwo ku ludda lw'olusozi mu kiseera we twakoowoolera (Musa tumuwe Obubaka), wabula kwali kusaasira kwa Mukama Omulabirizi Wo (ggwe okumanya ebyaliyo), obe nga olabula abantu abatajjirwanga mutiisa yenna nga ggwe tonnajja olwo nno babe nga beebuulirira.

(Era tetwandikutumye gye bali singa) si bantu kutuukibwako buzibu olw'ebyo emmikono gyabwe bye gyakola ate ne bagamba nti ayi Mukama Omulabirizi Waffe singa watutumira Omubaka ne tugoberera Ebigambo Byo era ne tubeera mu Bakkiriza.

Naye ate amazima bwe gaamala okubajjira okuva Gyetuli baagamba nti: Singa aweereddwa nga ebyaweebwa Musa (naye) abaffe, ebyaweebwa Musa tebaabiwakanya olubereberye ne bagamba nti (ebigambo bya Musa ne Muhammadi) byombi ddogo, erimu liyamba linnaalyo era ne bagamba nti mazima ffe tuwakanya buli kyonna ekigwa mu kiti ky'ebyo.

Bagambe (ggwe Muhammadi) nti (bwe kiba bwe kityo) kale (mmwe) muleete Ekitabo okuva ewa Allah nga kya bulunngamu okusinga biri ebibiri, nja kukigoberera bwe muba nga mwogera mazima.

Bwe batakwanukula manya nti mazima bagoberera kwagala kwabwe, naye ani omubuze okusinga oyo agoberera okwagala kwe okutaliiko kulunngamya kuva wa Allah, mazima Allah talunngamya bantu abalyazamaanyi.

Mazima ekigambo tukibalambululidde kibayambe okwebuulirira.

Abo be twawa Ekitabo olubereberye lwa kino abamu (mu) bo bagikkiriza (Kulaani).

Bw'eba ebasomeddwa bagamba nti tugikkirizza, ddala yo g'emazima agava ewa Mukama Omulabirizi Waffe, mazima ddala ffe nga tennajja twali Basiraamu.

Abo bagenda kuweebwa empeera yaabwe emirundi ebiri olw'ebyo bye baagumiikiriza era n'olwokuba nti ekibi bakiggyisaawo ekirungi era nga bawaayo ku ebyo bye tubagabirira.

Era bwe bawulira eby'olubalaato babyesamba era ne bagamba nti tulina enkola yaffe nammwe mulina enkola yammwe, emirembe gibeere ku mmwe, tetwagala batategeera.

Mazima ggwe (Muhammadi) tolunngamya oyo gw'oba oyagadde naye mazima Allah alunngamya oyo gw'aba asazeewo era y'asinga okumanya abalunngamu.

Era (abatakkiriza) ne bagamba nti singa tugoberera naawe obulunngamu tujja kusikulwa mu nsi yaffe (naye) abaffe tetwabatebenkereza Haramu (Makkah) nga ejjudde emirembe nga ebibala ebya buli kika bireetebwa gyeri, nga okwo kugabirira okuva Gyetuli naye wabula abasinga obungi mu bo tebamanyi.

Bitundu bimeka bye twazikiriza ebyayonoona obulamu bwabyo (olw'okufuula obulamu obw'okweyagaliramu obweyagazi) amayumba gaabwe gaago, tegaddangayo kusulwamu oluvanyuma lwabwe okuggyako amatono era Ffe twafuuka abaagasikira.

Mukama Omulabirizi Wo tabangako wa kuzikiriza bitundu okuggyako nga atumye Omubaka mu makkati gaabyo ng'abasomera Ebigambo Byaffe era tetubangako baakuzikiriza bitundu okuggyako abantu baamu nga balyazamaanyi.

Buli kintu kye muweebwa kiri mu bya kweyagala bya bulamu bwa nsi na kwewunda kwayo. So ng'ate ebiri ewa Allah bye bisinga obulungi era bye by'okusigalawo. Abaffe temutegeera!.

Abaffe oyo gwe twalagaanyisa endagaano ennungi era nga w'akugituukako ayinza okuba nga oyo gwe twawa eby'okweyagala by'obulamu bw'ensi, ate nga yye ku Lunaku lw'Enkomerero agenda kubeera mu balireetebwa okubonerezebwa?!

Era bategeeze Olunaku (Katonda) lw'alibakoowoola n'agamba nti biriwa byemwangattangako ebyo bye mwakkiririzangamu?!

Abo abaliba bakakatiddwako ekigambo (eky'okubonerezebwa nga gubasinze) baligamba nti ayi Mukama Omulabirizi Waffe, abo bo betwabuza twababuza nga bwe twabula, tubeesammudde ne twemalira ku Ggwe, anti bo baali tebasinza ffe, (wabula baali basinza Sitaane).

Baligambibwa nti: Muyite bannammwe (be mwangattangako), balibayita nebatabanukula era baliraba ebibonerezo (ne bagamba nti) singa mazima bbo baali baalunngama.

Era (bajjukize) Olunaku (Katonda) lwalibakoowoola n'agamba nti: Kiki kye mwayanukula Ababaka?

Ku Lunaku olwo ebigambo biribakalira ku matama, nga era bo tebagenda kwewuunaganya.

Naye oyo eyeenenya, na'kkiriza n'akola emirimu emirungi, ddala oyo y'alibeera mu bawanguzi.

Mukama Omulabirizi Wo atonda ky'aba ayagadde era y'asalawo, (abantu) tebabangako na kwesalirawo, Katonda yasukkuluma era ali wala nnyo ku ebyo bye bamugattako.

Era Mukama Omulabirizi Wo amanyi ebyo ebifuba byabwe bye bikwese n'ebyo bye bassa mu lwatu.

Era Yye Allah tewali kisinzibwa kyonna mu butuufu okuggyako Yye. okutenderezebwa Kukwe, ku ntandikwa ne ku nkomerero era obuyinza bwonna Bubwe era Gy'ali gye mulizzibwa.

Bagambe nti mulaba mutya singa Allah abassaako ekiro ne kiba kyalubeerera okutuusa ku Lunaku lw'Enkomerero, ani asinzibwa atali Allah ayinza okubaleetera ekitangaala, abaffe temuwulira!.

Bagambe nti mulaba mutya singa Allah abassaako obudde bw'emisana nga bwa lubeerera okutuusa ku Lunaku lw'Enkomerero, ani asinzibwa atali Allah ayinza okubaleetera ekiro kye muwummuliramu, abaffe temulaba?!.

Ebimu ku bibalibwa mu kusaasira Kwe, kwe kuba nti yabateerawo ekiro n'emisana muwummuliremu era mube nga munoonya ebigabwa Bye era kibayambe okwebaza.

Era bategeeze Olunaku (Katonda) lw'alibakoowoola n'agamba nti biriwa bye mwangattangako ebyo byemwakkiririzangamu?

Era tuliggya mu buli kibiina omujulizi ne tugamba nti muleete abajulizi bammwe, awo nno balimanya nti ddala obutuufu bwa Allah, era bigenda kubabulako ebyo bye baagunjanga.

Mazima Kaaluuna yali wa mu bantu ba Musa n'abeewaggulako, ate nga twamuwa amawanika nga ddala ebisumuluzo byago bizitoowerera ekibinja eky'abantu abaamaanyi. Jjukira abantu be bwe baamugamba nti tosanyuukirira mazima Katonda tayagala basanyuukirira bitaliimu.

Noonya ennyumba ey'enkomerero nga okozesa ebyo Allah bye yakuwa, era teweerabiranga omugabo gwo mu nsi, kolera (abalala) obulungi nga Allah bw'akukolera obulungi, toluubiriranga okwonoona mu nsi. Mazima allah tayagala boonoonyi.

(Kaaluuna) n'agamba nti: Mazima (bye nnina) nnabiweebwa lwa kumanya kwe nnina. Abaffe teyamanya nti ddala Allah yazikiriza olubereberye lwe emirembe gy'abo abaali bamusinga amaanyi era nga baakunngaanya bingi okumusinga, era aboonoonyi tebasabibwa (kunnyonnyola bikwata ku) byonoono byabwe (anti Allah abimanyi).

(Olwo nno Kaaluuna) yafuluma (n'agenda) awali abantu be nga ali mu byambalo bye ebirungi ennyo, abo abaagala obulamu bw'ensi ne bagamba nti singa naffe tulina ng'ebyo ebyaweebwa Kaaluuna, mazima yye waamukisa munene.

Abo abaaweebwa okumanya ne bagamba nti nga mulabye empeera za Allah ze zisinga obulungi eri oyo akkiriza n'akola emirimu emirungi (kyokka ekyo) tekiweebwa okuggyako abagumiikiriza.

Olwo nno ne tulagira ettaka nerimumira n'ennyumba ye, teyalina kabinja ka bantu baamutaasa awatali Allah era teyali wa mu bayinza kwetaasa.

Abo abeegomba embeera ye olunaku lwajjo, baatuuka okugamba nti: weewaawo ddala Allah ayanjuluza ebyenfuna eri oyo gw'aba ayagadde mu baddu Be era nga bw'asobola okubifunza. Singa Allah teyatwagaliza kirungi, naffe yaaliragidde ettaka neritumira, yye abaffe tokiraba nti abatakkiriza tebayinza kutuuka ku buwanguzi?

Eyo ennyumba ey'enkomerero (Ejjana) tugiteerawo abo abatayagala kwesukkulumya mu nsi wadde okwonoona, era enkomerero ennungi y'abo abatya Katonda.

Oyo yenna akola ekirungi alisasulwa ekirungi ekikisinga, wabula oyo akola ekibi, abo abakola ebibi tebagenda kusasulwa okuggyako ebyo bye baakola.

Mazima Oyo eyakukasaako Kulaani agenda kukuddiza ddala eri obuddo obulagaanye, gamba nti Mukama Omulabirizi Wange y'asinga okumanya oyo aleese obulunngamu, era n'oyo ali mu bubuze obw'olwatu.

Era wali tosuubira Ekitabo okuba nga kikuweebwa, (ekyo tekyali) okuggyako okusaasira okuva ewa Mukama Omulabirizi Wo n'olwekyo tobeeranga omuyambi w'abo abatakkiriza.

Era tebakuggyanga ku bigambo bya Allah oluvannyuma lw'okuba nti byassibwa gy'oli, era koowoola (abantu) okujja ewa Mukama Omulabirizi Wo era tobeeranga mu bagatta ebintu ebirala ku Allah.

Era tosabanga awamu ne Allah ekisinzibwa ekirala kyonna, tewali kisinzibwa mu butuufu okuggyako Yye, buli kintu kyakuggwaawo okuggyako Yye, okusalawo kwonna Kukwe era Gy'ali gyemulizzibwa.

Alif Laam Miim.

Abaffe abantu basuubira okulekebwa babe nga bagamba nti tukkirizza nga nabo tebagezesebwa.

Mazima twagezesa abo abaabakulembera, Allah yamanyira ddala abo abeesimbu (mu Bukkiriza bwabwe) era yamanyira ddala abalimba.

Oba abo abakola ebibi basuubira nti bayinza okutulemesa (ne tutababonereza), balamula bubi.

Oyo yenna asuubira okusisinkana Allah mazima ekiseera kya Allah (okumusisinkana) kijja, era Yye ye Muwulizi ennyo Omumanyi ennyo.

Oyo yenna alafuubana (okuweereza Allah) mazima yeerafuubanira ku lulwe mazima Allah talina kye yeetaaga ku bitonde.

Ate abo abakkiriza ne bakola emirimu emirongoofu ddala tugenda kubasangulako ebibi byabwe, era tujja kubasasulira ddala ebirungi ebisinga bye baali bakola.

Era twakuutira omuntu okuyisa obulungi bakadde be bombi, naye bwe bakuwaliriza obe nga ongattako ekyo kyotalinaako kumanya kwonna tobagonderanga, gyendi y'eri obuddo bwammwe olwo nno mbategeeze ebyo bye mwakolanga.

Naye abo abakkiriza ne bakola emirimu emirungi tujja kubayingiririza ddala mu balongoofu.

Mu bantu mulimu agamba nti nzikirizza Allah naye bw'ayisibwa obubi ku lwa Allah afuula okunyigiriza kw'abantu nga Ebibonerezo bya Katonda, wabula singa okutaasa kwa Mukama Omulabirizi Wo kuba kuzze olwo nno bagambira ddala nti tubadde wamu nammwe, abaffe Allah si y'asinga okumanya ebyo ebiri mu bifuba bye bitonde!.

Allah ajja kwoleseza ddala abo abakkiriza era nga bw'ajja okwoleseza ddala Abannanfuusi (oluvannyuma lw'okubagezesa).

Abatakkiriza baagamba abo abakkiriza nti mugondere enkola yaffe olwo nno naffe twetikke ebibi byammwe so nga tebagenda kwetikka kintu kyonna mu bibi byabwe, mazima bo balimba.

Bagenda kwetikka emigugu gyabwe n'emigugu (emirala) awamu n'emigugu gyabwe, era ddala bagenda kubuuzibwa ku Lunaku lw'Enkomerero ku ebyo bye baatemereranga.

Mazima twatuma Nuuhu eri abantu be n'amala mu bo emyaka lukumi okuggyako emyaka ataano, olwo nno amataba ne gabakwata nga nabo balyazaamaanyi.

Ne tumuwonya n'abantu abaali mu lyato ne tukifuula kya kuyiga eri abantu.

Era (babuulire) ekyafaayo kya Ibraahiimu bwe yagamba abantu be nti: Musinze Allah era mumutye ekyo kye kirungi gyemuli bwe muba nga mumanyi.

Mazima musinza ebifaananyi (ebibumbe) ne muleka Allah ne mussaawo obulimba, mazima ebyo bye musinza ne muleka Allah tebisobola kubagabirira, n'olwekyo ewa Allah gye muba munoonya okugabirirwa, mumusinze era mumwebaze Gy'ali gye mulizzibwa.

Bwe munaalimbisa, mazima ebibiina bingi byalimbisa olubereberye lwammwe, ate Omubaka tavunaanyizibwa okuggyako okutuusa (Obubaka) okweyolefu.

Abaffe tebalaba engeri Allah gy'atandikamu ebitonde (ne bivaawo) oluvannyuma n'abizzaawo, mazima ekyo kyangu nnyo ku Allah.

Bagambe (ggwe Muhammadi) nti mutambule mu nsi mulabe engeri gye yatandika ebitonde ate Allah agenda kusibula olusibula olw'enkomerero, mazima Allah Muyinza ku buli kintu.

Abonereza oyo gw'aba ayagadde era n'asaasira oyo gw'aba ayagadde era gy'ali gye mugenda okuzzibwa.

Ate mmwe ku nsi ne mu ggulu temusobola kulemesa (Katonda) ate nga oggyeeko Katonda temusobola kufuna mukuumi wadde omutaasa.

Abo abawakanya Ebigambo bya Allah n'okumusisinkana abo baggwaamu essuubi ly'okusaasira kwange era abo balina Ebibonerezo ebirumya ennyo.

Okwanukula kwa abantu be kwali kugamba bugambi nti: Mumutte oba mumwokye awo nno Allah n'amuwonya omuliro, mazima mu ekyo mulimu obubonero obulaga obuyinza bwa Allah eri abantu Abakkiriza.

(Ibraahiimu) n'abagamba nti mulese Allah ne mweteerawo ebifaananyi olw'enkolagana eri wakati wammwe mu bulamu bw'ensi, oluvanyuma ku Lunaku lw'Enkomerero abamu bagenda kwegaana bannaabwe era abamu bakolimire bannaabwe, nga n'obuddo bwammwe Muliro, temuliba na bataasa (babadduukirira).

Olwo nno Luutu n'amukkiriza era n'agamba nti mazima nze nngenda kusenguka nzire ewa Mukama Omulabirizi Wange, mazima Yye Ye Nnantakubwakumukono Mugobansonga.

Oluvannyuma (Ibraahiimu) ne tumugabira Isihaaka ne Yakuubu era ne tussa mu bazzukulu be obwannabbi n'ebitabo (Taulaati, Zabuuri, Injiili ne Kulaani) era twamuwa empeera ye ku nsi era mazima yye ku Nkomerero alibeera mu balongoofu.

Era (bajjukize) Luutu bwe yagamba abantu be nti mazima mmwe mukola ekivve ekitalina muntu n'omu yakibasookako.

Mazima mmwe mudda ku basajja mu kifo ky'abakyala (ne mulya ebisiyaga) ne muteega abantu mu makubo, ne mukola ebitasaana mu bifo byammwe we mukunngaanira. Okwanukula kw'abantu be kwali kugamba nti tuleetere ebibonerezo bya Allah bw'oba nga oli mu boogera amazima.

(Luutu) n'agamba nti ayi Mukama Omulabirizi Wange ntaasa ku bantu aboonoonyi.

Ababaka Baffe (Bamalayika) bwe bajja ewa Ibraahiimu nga bamuleetedde amawulire ag'essanyu (ag'okuzaala omwana Isihaaka) baagamba nti mazima ffe (bwe tuva wano) tugenda kuzikiriza abantu b'omukitundu kiri mazima abantu baamu babadde beeyisa bubi.

(Ibraahimu) n'agamba nti mazima (mu kyalo ekyo) Luutu mw'abeera, ne bagamba nti: Ffe tusinga okumanya abaliyo, ddala tujja kumuwonya n'abantu be okuggyako mukyala we ali mu abo ab'okusigala.

Ababaka baffe bwe batuuka ewa Luutu yanakuwala ku lwabwe, era naawulira nga talina maanyi ga kubataasa, ne bamugamba nti totya era tonakuwala, mazima ffe tujja kukuwonya n'abantu bo okuggyako mukyalawo yye wa mu abo abookusigala.

Mazima ffe tugenda kussa ku bantu b'ekitundu kino ebibonerezo okuva mu ggulu olw'ebyo bye baali boonoona.

Era mazima olw'ekikolwa ekyo twaleka akabonero akeeyolefu eri abantu abategeera.

Era (jjukira) bwe twatumira abantu be Madiyana Muganda waabwe Swu'ayibu n'agamba nti: Abange abantu bange musinze Allah, era musuubire (okusasulwa ku) Lunaku lw'Enkomerero, temukola ebikyamu mu nsi ne muba aboonoonyi.

Baamulimbisa olwo nno olubwatuka olw'amaanyi ne lubatuukako ne bafuuka emirambo egiganngalamye mu mayumba gaabwe.

Era (Jjukira) ebyatuuka ku bantu b'ekika kya 'Aadi ne Thamuudu, mazima ebibakwatako bimanyiddwa gye muli okusinziira ku mayumba gaabwe nga bwe galabika kati, era Sitaane yabanyiririza emirimu gyabwe emibi, olwo nno n'ebaggya ku kkubo (ettuufu) so nga ate baali balaba (olwa Bannabbi be baali bafunye).

Era jjukira Kaaluuna ne Falaawo ne Haamaana, mazima Musa yabajjira n'obunnyonnyofu naye ne beekuluntaliza mu nsi era tebaali ba kusimattuka.

Buli omu twamuvunaana olw'ekibi kye, mu bo mulimu be twasindikira empewo ey'amayinja, ate mu bo mulimu abaatuukwako okubwatuka, era mu bo mulimu be twamiza ettaka era mu bo mulimu be twazikiririza mu mazzi naye Allah tabangako waakubalyazaamaanya wabula bennyini be beeyisa obubi.

Ekifaananyi ky'abo abeeteerawo abataasa ne baleka Allah, bali nga nnabbubi eyeezimbira ennyumba ate ng'ennyumba esinga obunafu y’ennyumba ya nnabbubi singa baali bamanyi.

Mazima Allah amanyi nti bye basaba ne bamulekawo tebiriimu kantu, era Yye Ye Nnantakubwakumukono Mugobansonga.

Era ebyo ebifaananyi tubikubira abantu naye tebabitegeera okuggyako abamanyi.

Allah yatonda eggulu omusanvu, n'ensi mu ngeri entuufu, mazima mu ekyo mulimu eky'okuyiga eri Abakkiriza.

Soma ebyo ebitumiddwa gy'oli ebiri mu Kitabo (Kulaani) era yimirizaawo esswala, mazima esswala eziyiza okukola eby'obuwemu n'empisa embi, era okutendereza Allah ky'ekisinga obukulu, era Allah amanyi bye mukola.

Era temuwakananga ne bannannyini Kitabo okuggyako nga mukozesa amakubo agasinga obulungi, okuggyako ku abo abalyazamaanyi mu bo era mugambe nti (ffe) tukkirizza ekyo ekyassibwa gyetuli n'ekyassibwa gyemuli, ng'asinzibwa waffe n'asinzibwa wammwe ali Omu, nga naffe ffenna twewaaayo Gy'ali Yye Yekka.

Era bwetutyo twassa gy'oli Ekitabo (Kulaani), abo be twawa ekitabo (nga tetunnakuwa (Kulaani) bagikkiriza ne mu abo (Abawalabu b'e Makkah), mulimu abo abagikkiriza era tewali awakanya bigambo Byaffe (ebiri mu (Kulaani) okuggyako abatakkiriza.

(Ebimu ku bya magero byo) kwe kuba nti ggwe tosomangako kitabo kyonna olubereberye nga (Kulaani) tennakuweebwa wadde okuwandiika n'omukono gwo ogwaddyo, singa si bwe kyali ddala aboonoonyi baalibuusabuusizza.

Wabula (ekituufu kiri nti) Kulaani Bigambo bya (Katonda) ebinnyonnyofu, ebiri mu bifuba by'abo abaaweebwa okumanya, tewali awakanya Bigambo Byaffe (ebiri mu Kulaani) okuggyako abalyazaamaanyi.

(Abagatta ku Katonda ebintu ebirala) baagamba nti singa (Muhammadi) aweereddwa obubonero okuva ewa Mukama Omulabirizi We, bagambe nti mazima obubonero bwa Allah, naye ate nze ndi mutiisa ow'olwatu.

Abaffe tekibamala okuba nti twakuwa Ekitabo ekibasomerwa, nga mulimu okusaasira n'okubuulirira eri abantu abakkiriza?

Bagambe nti kimala wakati wange na mmwe okubeera nga Allah ye Mujulizi (akakasa nti ndi Mubaka We), Allah y'amanyi ebiri mu ggulu omusanvu n'ensi, naye abo abakkiriza ebitali bituufu ne bawakanya Allah abo nno be b'okufaafaaganirwa.

Bakusaba (mu ngeri y'olujereegerero) obanguyize ebibonerezo, singa tewaaliwo kiseera kigere ebibonerezo byandibajjidde (awo we baalibadde babisabidde) era ddala ebibonerezo bya kubajjira kibwatukira nga tebategedde.

Bakusaba obanguyirize ebibonerezo (naye mazima tebamanyi) nti mazima Omuliro Jahannama ddala gulitaayiza abatakkiriza.

Ku Lunaku ebibonerezo lwe biribatuukako nga biva waggulu ne wansi w'ebigere byabwe, era (Katonda) abagambe nti mukombe ku bukaawu bw'ebyo bye mwali mukola.

Abange mmwe abaddu Bange Abakkiriza (bwe muba nga muli mu kunyigirizibwa) mazima ensi Yange ngazi (musenguke munsinzize awalala), era Nze Nzekka nze gwe muba musinza.

Buli mwoyo gwonna gwa gukomba ku kufa, oluvanyuma Gyetuli gye mujja okuzzibwa.

Era abo abakkiriza ne bakola emirimu emirongoofu tujja kubawa ebisenge ebyawaggulu mu Jjana nga emigga gikulukutira wansi waabyo, baakubeera mu byo olubeerera (ebyo) birungi nnyo okuba nga y'empeera y'abakola obulungi.

(Bo) beebo abagumiikiriza era nga Mukama Omulabirizi Waabwe gwe beesiga.

Bimeka ebiramu ebitambula nga tebisobola kwetikka liziki yaabyo nga Allah Yekka y'abigabirira nammwe (abantu y'abagabirira) era nga Yye Allah Ye Muwulizi Omumanyi ennyo.

Abatakkiriza bw'oba nga obabuuzizza nti ani eyatonda eggulu omusanvu n'ensi n'agonza enjuba n'omwezi? Bajja kukugambira ddala nti Allah, ate olwo bakyusibwa batya okuva ku mazima!.

Allah agaziyiza omuntu gw'aba ayagadde ebyenfuna mu baddu Be ate n'afundiza oyo gw'aba (ayagadde), mazima Allah ku buli kintu Mumanyi nnyo.

Bw'obabuuza nti ani assa amazzi okuva waggulu n'alamusa nago ensi oluvanyuma lw'okufa kwayo? ddala bajja kugamba nti Allah, gamba nti okutendebwa kwa Allah wabula abasinga obungi mu bo tebategeera.

Obulamu buno obw'ensi eno temuli kantu okuggyako eby'amasanyu n'omuzannyo naye mazima Ennyumba ey'Enkomerero bwe bulamu obwannamaddala singa baali bamanyi.

Bwe baba basaabalidde mu maato basaba Allah, nga ekyo bakikola ku lulwe Yekka, naye bw'abawonya n'abatuusa ku lukalu, olwo ate ne bamugattako ebintu ebirala.

Kale baleke baleme okusiima bye twabawa era beeyagale, lumu balimanya.

Abaffe tebalaba nti mazima Ffe twafuula ekibuga (Makka) eky'emizizo, ekitundu eky'emirembe, naye ng'abantu basikulwa mu bifo ebibeetoolodde. Abaffe ebikyamu bye bakkiriza ate ne bawakanya ebyengera bya Allah?!.

Ani omubi okusinga oyo atemerera obulimba ku Allah oba n'alimbisa amazima bwe gaba gamujjidde, abaffe mu Muliro Jahannama temuli kifo kya batakkiriza?!.

N'abo abalafuubana mu kutuweereza (nga banoonya okusiima) kwaffe, ddala tujja kubalunngamya ku Makubo Gaffe, era mazima Allah ali wamu n'abalongoosa.

Alif Laam Miim.

Abaluumi bawanguddwa.

Mu nsi ey'okumpi (eriraanye Shaami) ate nabo oluvannyuma lw'okuwangulwa kwabwe, bajja kuwangula.

Mu myaka mitono (egitasukka mwenda). Okusalawo kwa Allah olubereberye n'oluvannyuma, era ku lunaku olwo Abakkiriza bagenda kusanyuka.

Ku lw'okutaasa kwa Allah ataasa oyo gw'aba ayagadde, anti bulijjo Ye Nnantakubwakumukono Mugobansonga.

Eyo ndagaano ya Allah, Allahl tayawukana ku Ndagaano Ye, naye abantu abasinga obungi tebamanyi.

(Anti) bamanyi bya kungulu ku bikwata ku bulamu bw'ensi, era nga nabo ku bikwata ku Nkomerero tebalina kye bamanyi.

Abaffe tebafumiitiriza mu myoyo gyabwe (ne bakiraba nti) Allah teyatonda ggulu musanvu n'ensi n'ebiri wakati wa byombi, wabula mu mazima era nga birina ekiseera ekigere, naye mazima bangi mu bantu bawakanya okusisinkana Mukama Omulabirizi Waabwe.

Abaffe tebatambulangako mu nsi ne balaba enkomerero y'abo abaabasookawo bwe yali?! (Ate) nga baali babasinga amaanyi era baayiikuula ensi era ne bagizimba okusinga nga bano bwe baagizimba era Ababaka baabwe baabaleetera obunnyonnyofu, n'olwekyo Allah weyabazikiririza teyabalyazaamaanya wabula bo bennyini be be baali balyazaamaanya emyo gyabwe.

Oluvannyuma enkomerero y'abo abaakola ebivve yali nti baalimbisa Ebigambo bya Allah era baali babijeeja.

Allah y'atandika ebitonde oluvannyuma agenda kubizzaawo ate oluvanyuma Gy'ali gye mulizzibwa.

Era Olunaku Essaawa Ey'enkomerero lw'erituuka, aboonoonyi bagenda kuggwaamu essuubi.

Era tebagenda kufuna mu bannaabwe bawolereza, olwo nno balyegaana bannaabwe.

Era Olunaku Essaawa ey'Enkomerero lw'erituuka kw'olwo bagenda kwawukana.

Bo abakkiriza ne bakola emirimu emirungi, abo nno baakubeera mu bifo ebyeyagaza nga basanyusibwa.

Ate abo abaawakanya ne balimbisa Ebigambo Byaffe ne balimbisa n'ensisinkano y’Olunaku lw'Enkomerero, abo bagenda kuteekebwa mu bibonerezo.

N'olwekyo asukkulumizibwe Allah mu kiseera we mubeerera mu biseera eby'olweggulo ne we mubeerera mu biseera eby'okumakya.

Era okutenderezebwa Kukwe mu ggulu omusanvu n'ensi ne mu kiseera eky'akawungeezi ne wemubeerera mu ttuntu.

(Era Allah) aggya ekiramu mu kifu era n:aggya ekifu mu kiramu, era y'awa ensi obulamu oluvannyuma lw'okufa kwayo era bwe mutyo bwe muliggyibwa mu ntaana.

Era mu bubonero Bwe (obulaga obuyinza Bwe), kwe kuba nti yabatonda nga abaggya mu ttaka oluvannyuma ne mubeera abantu abasaasaanira ensi.

Era mu bubonerobwe kwe kuba nti yabatondera be mufumbiriganwa nabo nga abaggya mu mmwe, mube nga musobola okubeera nabo, era yassa wakati wammwe omukwano n'okusaasira , mazima ebyo mulimu obubonero eri abantu abafumiitiriza.

Era mu bubonero Bwe mwe muli: Okutonda eggulu omusanvu n'ensi n'okwawukana kw'ennimi zammwe ne langi zammwe, mazima mu ebyo mulimu obubonero eri abamanyi.

Era mu bubonero Bwe mwe muli: Okwebaka kwa mmwe ekiro n'emisana n'okunoonya kwa mmwe ebigabwa Bye, mazima ebyo birimu obubonero eri abantu abawulira.

Era mu bubonero Bwe: Kwe kuba nti abalaga ekimyanso ky'eggulu nga mukitya ate nga mululunkanira (enkuba) era assa okuva waggulu amazzi n'awa nago ettaka obulamu oluvannyuma lw'okufa kwa lyo. Mazima mu ebyo mulimu obubonero eri abantu abategeera.

Era mu bubonero Bwe mwe muli: Okuba nti eggulu n'ensi byayimirirawo ku kiragiro Kye, oluvannyuma bw'alibakoowoola olukoowoola nti muve mu ttaka, oligenda okulaba nga muvaayo.

Era bibye byonna ebiri mu ggulu omusanvu ne mu nsi byonna bigondera Yye (Yekka).

Era Yye Y'Oyo atandikawo ebitonde era nga y'alibizzaawo (oluvannyuma lw'okufa kwabyo) (naye eky'okubizzaawo) kye kisinga obwangu ku Yye, era ekifo ekisukkulumu kikye Yekka mu ggulu omusanvu n'ensi era Yye Ye Nnantakubwakumukono Mugobansonga.

(Katonda) yabakubira ekifaananyi nga kikwata ku mmwe mwennyini: Abaffe mw'ebyo bye tubagabira mulina ababeegattako mw'abo emikono gyamwe be gifuga (abaddu bammwe) ne muba nga mwenna mwenkana mwekyo ne mutuuka okubatya nga bwe mwetya mwennyini, bwetutyo bwe tunnyonnyola ebigambo eri abantu abategeera.

Wabula abo abalyazaamaanyi bagoberera kwagala kwabwe awatali kusinziira ku kumanya kwonna, ye ate ani ayinza okulunngamya oyo Allah gwe yabuza era abo tebagenda kufuna babataasa.

Kale nno yolekeza ekyenyi kyo eri Eddiini ng'oli mwesimbu. (Olw'okuba Eddiini eyo) y'enkola ya Allah gye yatonderako abantu, tewali kukyusa mu ntonda ya Allah, eyo ye Eddiini ennambulukufu, naye abantu abasinga obungi tebamanyi.

(N'olwekyo) mubeere abeemenyera Katonda era mumutye, muyimirizeewo esswala, so temubeeranga mu bagatta ku Allah ebintu ebirala.

Mu abo abaatemaatema eddiini yaabwe ne baba bubinja nga buli kabinja kacacanca n'ebyo bye kalina.

Obuzibu bwe buba butuuse ku bantu basaba Mukama Omulabirizi Waabwe nga bamwemenyera, oluvannyuma bw'abaloza ku kusaasira okuva Gy'ali ogenda okulaba nga ekitundu ku bo bagatta ebintu ebirala ku Mukama Omulabirizi Waabwe.

Ne bawakanya bye twabawa kale mweyagale kyaddaaki mujja kumanya.

Abaffe oba twabawa obujulizi nga bwogera ku ebyo bye bagatta ku Katonda (nti bituufu!).

Bwe tuba nga tulozezza abantu ku kusaasira Kwaffe ekyo kibasanyusa, naye bwe baba nga batuukiddwako ekibi kyonna olw'ebyo emikono gyabwe bye gyakola ogenda okulaba nga baggwaamu essuubi (ku kusaasira kwa) Katonda.

Abaffe tebalaba nti mazima Allah agaziyiza gw'aba ayagadde ebyenfuna ate n'abifundiza oyo gw'aba ayagadde, mazima mu ekyo mulimu (obubonero obulaga obuyinza bwa Katonda) eri abantu abakkiriza.

Kale wa ow'oluganda lwo olw'okumpi kyateekwa okuweebwa, n'omufunampola, n'omutambuze ekyo kye kirungi eri abo abaagala ebiri eri Allah era abo be b'okutuuka ku buwanguzi.

Ekyo kyonna kye muba muwaddeyo (nga muwola) mu mmaali ey'ennyongeza (Riba) nti zigende zizaalire mu mmaali y'abantu tezizaala ewa Allah, ate ekyo kye muba muwaddeyo mu Zzaka nga mwagala ebiri eri Allah abo nno be basaanira ennyongeza.

Allah Y'Oyo eyabatonda bw'amala n'abagabirira bw'amala n'abatta, oluvannyuma agenda kubawa obulamu, abaffe mu bannammwe be mugatta ku Allah waliwo akola ekintu kyonna ku ebyo ?Allah Musukkulumu era yayawukana ku ebyo bye bamugattako.

Obwonoonefu bweyolese ku lukalu ne ku nnyanja olw'ebyo emikono gy'abantu bye gikola, (Katonda) alyoke abakombese ku bukaawu bw'ebimu ku ebyo bye baakola, balyoke beekomeko.

Gamba ( ggwe Muhammadi nti) mutambule mu nsi mulabe yali etya enkomerero y'abo abaaliwo olubereberye. Abasinga obungi mu bo baali bagatta ku Allah ebintu ebirala mu kusinzibwa kwe.

Kale nno yolekeza Ekyenyi kyo eri Eddiini ennambulukufu, nga Olunaku terunnajja olutagenda kuggyibwa ku Katonda neruzzibwayo, ku Lunaku olwo abantu bagenda kubeera mu bibinja.

Omuntu awakanya, ekibi ky'okuwakanya kwe kiri ku ye, n'oyo yenna akola emirimu emirongoofu (abo) baba bateekateekera myoyo gyabwe.

(Katonda) alyoke asasule mu bigabwa Bye abo abakkiriza ne bakola emirimu emirongoofu, anti mazima Yye tayagala batakkiriza.

Era mu bubonero Bwe kwe kuba nti atambuza empewo nga zireeta amawulire ag'essanyu (enkuba), era alyoke abaloze ku kusaasira Kwe, era amaato galyoke gadduke ku lw'ekiragiro Kye, era mube nga munoonya ebigabwa bye era mulyoke mwebaze (Katonda ku lw'ebyo).

Era mazima twatuma olubereberye lwo Ababaka eri abantu baabwe ne babaleetera obunnyonnyofu (abantu ne babuwakanya) olwo ne tuzikiriza abo abaajeema, era kyali kitukakatako okutaasa Abakkiriza.

Allah y'Oyo atambuza empewo, ne zifuukuula ebire n'abyanjululiza mu bbanga nga bw'aba ayagadde, n'abifuula ebitundutundu, olwo nno n'olaba namuttikwa w'enkuba nga abivaamu, (Katonda) bw'agituusa ku abo baaba ayagadde mu baddu Be ogenda okulaba nga basanyuka.

Newaakubadde nga bw'eba tennaba kubatonnyesezebwa olubereberye lw'ekyo baali baweddemu essuubi .

Tunuulira olabe ebiva mu kusaasira kwa Allah engeri gy'awa ettaka obulamu oluvannyuma lw'okufa kwa lyo. Mazima Oyo ajja kulamusiza ddala abafu era Yye bulijjo Muyinza ku buli kintu.

Wabula singa tuba tutambuzizza empewo ne babiraba (ebirime) nga bifuuse bya kyenvu olw'okuwotoka, bandibadde olw'ekyo beegaana ebyengera bya (Katonda).

(N'olwekyo ggwe tobafaako) anti mazima ggwe tosobola kuwuliza bafu era nga bw'otasobola kuwuliza bakiggala kasita bakyuka ne bakukuba amabega.

Era toli asobola kulunngamya bamuzibe n'obaggya ku bubuze bwabwe, tosobola kuwuliza okuggyako abo abakkiriza Ebigambo Byaffe ne baba nga beewaddeyo.

Allah Y'Oyo eyabatonda okutandikira mu bunafu, ate oluvannyuma lw'obunafu yabawa amaanyi, ate oluvannyuma lw'amaanyi yassaawo obunafu n'obukadde. Atonda ky'aba ayagadde era Yye Ye Mumanyi ennyo Omuyinza.

Olunaku Enkomerero lw'eriyimirirawo aboonoonyi balirayira nti (ku nsi) tebaatuulako okuggyako akaseera akatono, bwe batyo nno bwe baali bawugulwa.

Ate abo abaaweebwa okumanya n'Obukkiriza baligamba nti: Mazima mwatuula (ku nsi) okumala ebbanga Allah lye yabawandiikira, okutuuka ku Lunaku lw'Okuzuukira, kaakano luno lwe lunaku lw'okuzuukira (lutuuse) naye mazima mwali temumanyi.

Ku lunaku olwo abo abeeyisa obubi okwetonda kwabwe tekulibagasa era tebagenda kukkirizibwa kwenenya.

Mazima tukubidde abantu mu Kulaani eno buli kika kya kifaananyi, naye singa obaleetedde akabonero konna, ddala abo abawakanya bajja kugamba nti temuli mmwe okuggyako okuba aboonoonyi.

Bw'atyo Allah bw'azibikira emitima gy'abo abatamanyi.

Kale gumiikiriza mazima endagaano ya Allah ya mazima, era tebakutiisanga abo abatakakasa kintu kyonna kikwata ku Katonda.

Alif Laam Miim.

Ebyo bigambo eby'Ekitabo ekijjudde amagezi.

Nga bulunngamu era kusaasira eri abalongoosa.

Abo abayimirizaawo esswala ne batoola Zzakka era nga bo bakakasa Olunaku lw'Enkomerero.

Abo bali ku bulunngamu okuva ewa Mukama Omulabirizi Waabwe era abo be b'okwesiima.

Mu bantu mulimu agula emboozi ezitaliimu makulu, olwo nno abeere nga abuza (abantu) n'abaggya ku Kkubo lya Allah awatali kusinziira ku kumanya kwonna, era nga Ebigambo (bya Allah) abifuula bya lusaago, abo nno balina ebibonerezo ebinyoomesa.

Ebigambo Byaffe bwe biba bimusomeddwa akyuka nga yeekuza, n'aba nga atabiwulidde amatu ge ne gaba nga agalimu envumbo, kale musanyuse n'ebibonerezo ebirumya ennyo.

Mazima abo abakkiriza ne bakola emirimu emirungi balina Ejjana ezijjudde ebyengera.

Baakuzituulamu obugenderevu, nga eyo ye Endagaano ya Allah ey'amazima, era Yye Ye Nnantakubwakumukono Mugobansonga.

Yatonda eggulu omusanvu awatali mpagi ze mulaba, ate n'assa mu nsi ensozi ennywevu ereme kubayuuzayuuza, ate n'asaasaanya mu yo, buli kika kya kiramu ekitambula, era nettussa okuva waggulu amazzi ne tumeza muyo buli mitindo (ebimera) eby'omugaso omusuffu.

Okwo kwe kutonda kwa Allah, kale mundage abo abatali Yye bye batonda. Wabula (ekituufu kiri nti) abalyazaamaanyi bali mu bubuze obweyolefu.

Era mazima twawa Luqmaan okumanya ensonga (netumugamba) nti weebaze Allah, era omuntu eyeebaza abeera yeebaza ku lulwe, ate oyo atasiima mazima Allah talina kye yeetaaga (eri kitonde kyonna) era atenderezebwa nnyo.

Era jjukira Luqmaan bwe yagamba mutabani we bwe yali amubuulirira nti: owange mwana wange togattanga ku Allah ekintu ekirala mazima okugatta ku Allah ekintu ekirala kwe kulyazaamaanya okubi ennyo.

Twakalaatira omuntu okuyisa obulungi bakadde be bombi, nnyina amusitula mu lubuto ng'ali mu bunafu obweyongera ku bunafu, era nga okumuggya ku mabeere (kubaawo) mu bbanga lya myaka ebiri, (era ne tumugamba) nti: Weebaze Nze (Katonda) era weebaze ne bakadde bo. Gy'endi yokka y'eri obuddo.

Bwe baba bakuwalirizza obe nga ongattako ekyo ky'otolinaako kumanya kwonna tobagonderanga, naye kolagana nabo mu nsi mu ngeri nnungi, era ogoberere ekkubo ly'oyo eyeemenya nadda gyendi. Ate oluvannyuma Gy'endi yeeri obuddo bwammwe olwo nno nembategeeza ebyo bye mwakolanga.

Owange Mutabani wange, mazima kyo (ekikolwa) ne bwe kiba kyenkana obuzito bw'empeke ya akalo, k'ebe nga eri mu lwazi oba mu ggulu omusanvu oba mu nsi, Allah agenda kukireeta (asasule eyakikola) mazima Allah amanyidde ddala ebitalabika, ate buli kintu akimanyidde ddala okuva ku ntobo yaakyo.

Owange Mutabani wange yimirizaawo esswala olagire (abantu) okuyisa obulungi, obakomeko ku kweyisa obubi era ogumiikirize ku ebyo ebiba bikutuuseeko. Mazima ebyo (ebikugambiddwa) bye bimu ku bigambo ebikakafu.

Tokyusizanga abantu ettama lyo olw'okwekuza (ng'obalengezza) era totambulanga mu nsi nga weewulira, mazima Allah tayagala buli yenna eyeekuluntaza omwewulize.

Pima entambula yo (tosaayirira ate tosooba) kakkanya eddoboozi ryo, mazima eddoboozi erisinga obubi mu maloboozi gonna ddoboozi lya ndogoyi.

Abaffe temulaba nti mazima Allah yabagondeza ebyo ebiri mu ggulu omusanvu n'ebyo ebiri mu nsi, era n'abawa mu bungi ebyengera Bye eby'okungulu n'ebyomunda, naye mu bantu mulimu abawalaaza empaka ku bikwata ku Allah awatali kusinziira ku kumanya kwonna wadde obulunngamu wadde Ekitabo ekibamulisiza ekkubo.

Bwe baba bagambiddwa nti mugoberere ebyo Allah bye yassa bagamba nti nedda tugoberera ebyo bye twasangako bakadde baffe, naye abaffe (balemera ku ekyo) newaakubadde Sitaane ebakoowoola kudda eri Omuliro Saeiri (bamala gagoberera).

Naye omuntu awaayo ekyenyi kye ewa Allah era nga alongoosa, mazima aba yeekutte ku muguwa omunywevu era ewa Allah y'eri enkomerero y'ebigambo.

Oyo yenna awakanya, okuwakanya kwe tekukunakuwaza Gyetuli ye eri obuddo bwabwe, olwo nno tulibategeeza bye baakolanga. Mazima Allah amanyidde ddala ebiri mu bifuba.

Tubeeyagaza kitono, oluvannyuma tulibawalabanya okubatwala eri ebibonerezo ebikakali.

Singa obadde obabuuzizza nti: Ani yatonda eggulu omusanvu n'ensi? Ddala bajja kugamba nti Allah, bagambe nti (n'olwekyo) okutenderezebwa kwonna kwa Allah. Wabula abasinga obungi mu bo tebamanyi.

Bya Allah ebyo ebiri mu ggulu omusanvu n'ensi, mazima Allah Yye y'atalina kye yeetaaga (era) atenderezebwa.

Era mazima singa emiti gyonna egiri mu nsi zaali kalaamu, nga n'ennyanja (eziriwo) ziyambibwako ennyanja musanvu oluvannyuma lwa zino, ebigambo bya Allah tebyaliweddeyo, mazima Allah Nnantakubwakumukono Mugobansonga.

Okutondebwa kwammwe n'okuzuukira kwammwe tekuli okuggyako okuba nga kulinga okutonda n'okuzuukiza omuntu omu. Mazima Allah awulira nnyo alabira ddala.

Abaffe tolaba nti mazima Allah ayingiza ekiro mu budde obw'emisana, ate n'ayingiza obudde obw'emisana mu kiro era n'agonza enjuba n'omwezi, buli kimu kitambulira mu nkulungo yaabyo okutuusa ku kiseera ekigere, era mazima Allah amanyidde ddala bye mukola.

Ekyo kiri bwe kityo, lwa kuba nti Allah Yye ye Mutuufu, ate ddala ebyo bye basaba ne baleka Allah bye bikyamu, era mazima Allah Yye Ye Waawaggulu asinga okuweebwa ekitiibwa.

Abaffe tolaba nti mazima amaato gaseeyeeyera ku nnyanja ku lw'okusaasira kwa Allah, olwo nno abe nga abalaga ku bubonero Bwe. Mazima ekyo mulimu eby'okuyiga eri buli mugumiikiriza eyeebaza.

(Abatakkiriza bwe babeera mu maato ago) amayengo bwe gababikka ne genkana ng'ensozi (olwo nno) basaba Allah, nga eddiini yonna bagikola ku lulwe Yekka, naye bw'abawonya, n'abatuusa ku lubalama, mu bo mubaamu abeegendereza (ne baba wakati w'okukola emirimu emirungi n'emibi) era tewali awakanya Bubonero Bwaffe okuggyako buli wa nkwe omuwakanyi.

Abange mmwe abantu mutye Mukama Omulabirizi Wammwe era mutye Olunaku omuzadde lw'ataligasa mwana we wadde omwana okuba nti naye aligasa mukadde we ekintu kyonna, mazima Endagaano ya Allah ya mazima, kale nno obulamu bw'ensi tebubalabankanyanga era ebirabankanya tebibaggyanga ku Allah.

Mazima Allah Yekka Ye alina okumanya ebifa ku Lunaku lw'Enkomerero, era y'atonnyesa enkuba, era y'amanyi ekyo ekiri mu nnabaana, omuntu tayinza kumanya kiki ky'anaafuna enkya, era omuntu tayinza kumanya alifiira mu nsi ki, mazima Allah amanyi nnyo ategeerera ddala buli kintu okuva ku ntobo yaakyo.

Alif Laam Miim.

Okussibwa kw'Ekitabo kino (Kulaani) tekuliimu kubuusabuusa (okuba nti) kyava ewa Mukama Omulabirizi W'ebitonde.

Oba bagamba nti (Muhammadi) yakigunjaawo, si bwe kiri, kyo ge mazima agava ewa Mukama Omulabirizi Wo, obe nga otiisa abantu abatajjirwa mutiisa oluberyeberye lwo olwo nno babe nga balunngama.

Katonda Y'Oyo eyatonda mu nnaku mukaaga eggulu omusanvu n'ensi, na byonna ebiri wakati wa byombi bwe yamala n'atebenkera ku Arishi, awatali Yye temulina mukuumi wadde omuwolereza. Abaffe temwebuulirira?.

(Katonda) atambuza ebintu byonna (nga ebiragiro) biva mu ggulu ne bijja ku nsi, oluvannyuma (ebikwata ku bikoleddwa) birinnya ne byambuka Gy'ali mu lunaku olwenkana emyaka lukumi mu egyo gye mubala.

Oyo nno Ye Mumanyi w'ebikusike n'ebirabwako, Nnantakubwakumukono Omusaasizi.

Oyo eyalungiya buli kintu kye yatonda, nga era yatandika okutonda omuntu nga amuggya mu ttaka.

Ate ezzadde lye (omuntu) n'aba nga alisibimbula mu mazzi aganyoomebwa.

Bwe yamala yamussa mu kifaananyi ekimusaanira, n'amufuuwamu ogumu ku myoyo gye (gye yatonda edda) n'abassaako amatu, n'amaaso n'emitima, naye kitono nnyo kye mwebaza.

Era (abatakkiriza) baagamba nti bwe tulimala okusaanirawo mu ttaka, abaffe walibaayo okutonda okupya (ne tuddawo), ekiboogeza ekyo si kirala wabula lwa kuba nti bawakanya okusisinkana Mukama Omulabirizi Waabwe.

Bagambe nti Malayika Walumbe oyo eyaweebwa obuyinza ku mmwe agenda kubatta, oluvannyuma eri Mukama Omulabirizi Wammwe gye mulizzibwa.

Singa olisobola okulaba aboonoonyi nga bakotese emitwe gyabwe, mu maaso ga Mukama Omulabirizi Waabwe, nga bagamba nti ayi Mukama Omulabirizi Waffe, tulabye era tuwulidde, n'olwekyo tuzzeeyo tukole emirimu emirungi mazima ffe tumaze okukakasa.

Era singa twayagala, buli mwoyo twaliguwadde obulunngamu bwa gwo, naye mazima ekigambo kyakakata okuva mu Nze nti: Omuliro Jahannama Nja kujjulizaamu ddala amajinni n'abantu bonna.

(Baligambibwa nti) kale mukombe (ku bibonerezo) olw'okwerabira kwammwe okusisinkana Olunaku lwammwe luno, mazima Ffe tubeerabidde era mukombe ku bibonerezo eby'olubeerera olw'ebyo bye mwali mukola.

Mazima abakkiriza Ebigambo Byaffe, beebo nga buli lwe baba babuuliriddwa nabyo beeyala wansi ne bavunnama era ne batendereza amatendo ga Mukama Omulabirizi Waabwe, era bulijjo bo tebeekuza.

Nga embiriizi zaabwe ziva ku buliri (ekiro) ne baba mu kusaba Mukama Omulabirizi Waabwe olw'okutya (ebibonerezo Bye) n'okululunkana (okufuna ebirungi Bye), era bulijjo bawaayo nga baggya mu ebyo bye tubagabirira.

Tewali muntu amanyi ebyo ebyabaterekerwa mu kyama mu bitebenkeza amaaso (ebyabaweebwa) nga mpeera olw'ebyo bye baali bakola.

Abaffe oyo abeera nga Mukkiriza ayinza okuba nga oyo omwonoonyi! (ekituufu kiri nti) tebenkana.

Bo abo abakkiriza ne bakola emirimu emirungi balina Ejjana ezeeyagaza okubeeramu, nga bugenyi (obulibaweebwa) olw'ebyo bye baakolanga.

Bo abo abaayonoona obuddo bwabwe Muliro, wonna we balyagaliranga okugufuluma nga bazzibwamu era nga bagambibwa nti: mukombe ku bibonerezo by'Omuliro ogwo gwe mwali mulimbisa.

Era ddala tugenda kubakombesa ku bibonerezo ebinafu (mu bulamu obw'ensi) nga tebannatuuka ku bibonerezo ebinene (ku Lunaku lw'Enkomerero), oba oli awo ne badda (eri obutuufu).

Ani mulyazaamaanyi okusinga oyo abuulirirwa ne bigambo bya Mukama Omulabirizi We ate n'abivaako! Mazima Ffe tugenda kubonereza aboonoonyi.

Era mazima twawa Musa Ekitabo (Tawulaati n'olwekyo naawe) tobeeramu kubuusabuusa mu kukifuna (Kulaani) era twakifuula bulunngamu eri abaana ba Yisirayiri.

Era twassaawo nga tuggya mu bo abakulembeze abalunngamya (abantu) nga bakolera ku Kiragiro Kyaffe, kasita bagumiikiriza era ne baba nga bakakasa obubonero Bwaffe.

Era mazima Mukama Omulabirizi Wo Yye ajja kusalawo wakati waabwe ku Lunaku lw'Enkomerero mu ebyo bye baayawukanangamu.

Abaffe tebakimanyanga mu bulambulukufu nti emirembe emeka gye twazikiriza olubereberye lwabwe, ate nga batambulira mu bitundu gye baabeeranga, mazima mu ekyo mulimu obubonero (Bwaffe). Abaffe tebawulira!.

Abaffe tebalaba nti mazima Ffe tusindika amazzi eri ettaka ekkalu ne tumeza nago ebirimwa, ebisolo byabwe kwe birya nabo bennyini, abaffe tebalaba!.

Era bagamba nti okuwangula (okwo kwe mwogerako) kulibaawo ddi bwe muba nga muli b'amazima?.

Bagambe nti olunaku lw'okuwangula (bwe lulituuka) abo abaawakanya obukkiriza bwa bwe, (bwe balyagala okukola mu kiseera ekyo) tebulibagasa, era tebagenda kulindirizibwa.

Kale nno baveeko era olindirire, mazima bo bali mu kulindirira.

Owange ggwe Nnabbi, tya Allah era togondera abatakkiriza ne bannanfuusi, mazima Allah bulijjo Mumanyi nnyo Mugobansonga.

Era goberera ebyo ebitumwa gyoli okuva ewa Mukama Omulabirizi Wo mazima Allah bulijjo amanyidde ddala bye mukola.

Era weekwate ku Allah, Allah amala okuba nga gweweekwatako.

Allah tateekanga mitima ebiri munda wa muntu, era bakyala bammwe abo be mulayira obuteegatta nabo Allah tabafuulanga bamaama bammwe, olw'okuba nti muba mugambye nti emigongo gyabwe giri nga egya bannyammwe, era abaana be mufuula abaana bammwe (nga si mmwe mu bazaala) tabafuuka baana bammwe, ebyo bigambo byammwe bye mwogera obwogezi n'emimwa gyammwe. Allah Yye ayogera mazima, era Yye y'alaga e kkubo (erisaana okukwata).

Mubateekenga ku ba kitaabwe, ekyo kye kituufu ewa Allah, bwe muba temumanyi ba kitaabwe (mu bayite baganda bammwe) anti baganda bammwe mu ddiini, era bannammwe (mu ddiini) era temulina kibi mu ekyo kye mukola mu butanwa, naye (ekibavunaanwa) ky'ekyo emitima gyammwe kye giba gikoze mu bugenderevu, era bulijjo Allah Musonyiyi nnyo Musaasizi.

Nnabbi Abakkiriza gwe basoosowaza okusinga bo bennyini, era bakyala be baba bamaama baabwe, bo ab'oluganda abamu ku bo be basinga okusaanira bannaabwe (mu by'obusika) ekyo bwekityo bwe kiri mu Kitabo kya Allah, okusinga bwe bandibadde eri Abakkiriza n'abo Abaasenguka, okuggyako nga mukoledde bannammwe eky'obuntubulamu, ebyo nno byawandiikibwa mu Kitabo.

Era jjukira bwe twakozesa Bannabbi endagaano yaabwe, ne ku ggwe ne ku Nuuhu ne ku Ibraahiimu, ne ku Musa ne ku Isa mutabani wa Mariam, era twabakozesa endagaano enzito.

Olwo nno (Katonda) alyoke abuuze (Abakkiriza) ab'amazima ku mazima gaabwe, era yategekera abatakkiriza ebibonerezo ebirumya.

Abange mmwe abakkiriza, mujjukire ebyengera bya Allah bye yabawa amagye lwe gaabalumba, ne tubasindikira kibuyaga n'amagye ge mutaalaba, era bulijjo Allah alabira ddala bye mukola.

Mujjukire bwe baabalumbira nga bayitira engulu n'emmanga wammwe, era mujjukire amaaso lwe gaakanuka era emitima ne gituuka mu malookooli, ne mulowooza ku Allah ebirowoozo ebyenjawulo.

Nga muli mu mbeera eyo, Abakkiriza baagezesebwa ne bakankanyizibwa olukankanyizibwa olw'amaanyi.

Era mujjukire abannanfuusi n'abo abaalina obulwadde mu mitima gyabwe bwe baagamba nti Allah n'omubaka We baatusuubiza bitaliiyo.

Era mujjukire ekibiina mu mmwe bwe kyagamba nti, abange mmwe abantu be Yathriba (Madiinah) temusobola kubeera wano, n'olwekyo muddeeyo (mu maka gammwe), ate ekibiina ekirala mu bo baasaba Nnabbi- okusaasira n'emirembe bimubeereko- abakkirize baleme kugenda ku lutalo, nga bagamba nti, mazima amayumba gaffe meereere, so nga tegaali meereere, baali tebalina kye baagala kyonna okuggyako okudduka.

Naye singa baali balumbiddwa okuva mu mpuyi zaakyo (ekibuga) oluvannyuma ne basabwa bave mu ddiini(era balwanyise Abasiraamu) baalikikoze era tebaalisibyemu okuggyako akaseera akatono.

Ate nga mu kusooka baali baalagaanyisa Allah nti tebagenda kukubayo mabega (kudduka mu lutalo), era bulijjo Endagaano ya Allah ebuuzibwa (okulaba oba etuukiriziddwa).

Gamba (ggwe Muhammadi) nti: Bwe muba nga mudduse kufa oba kuttibwa, okudduka tekuyinza kubagasa era ne bwe muba nga mudduse temugenda kuweebwa kweyagala okuggyako okumala akaseera katono.

Bagambe nti, ani oyo ayinza okubawonya Allah singa abadde abaagalizza akabi, oba nga abaagalizza kusaasira, tebayinza kufuna mukuumi oba omutaasa atali Allah.

Mazima Allah amanyi abalemesa mu mmwe (ababa baagala okugenda mu lutalo) n'abo abagamba baganda baabwe nti mujje gyetuli) muve ku Muhammadi, era tebaagala kugenda ku lutalo okuggyako kitono.

Bulijjo baba bakodo ku mmwe, tebaagala (kubayamba ku lutalo). Ekiseera ekya kazigizigi bwe kijja obalaba nga bakukanulira amaaso gaabwe nga gakyuka nga ag'omuntu azirise ng'agenda okufa, naye akaseera ka kazigizigi bwe kavaawo bakkakkana ku mmwe n'ennimi enjogi nga balulunkanira ebirungi, abo tebakkirizanga, olwo nno Allah asazaamu emirimu gyabwe era ekyo bulijjo kyangu nnyo ku Allah .

(Abannanfuusi olw'obutiitiizi bwabwe) batuuka okulowooza nti ab'amagye g'omukago (abalumbaganyi) tebannagenda, singa amagye gajja (omulundi omulala), abannanfuusi bandyegombye singa bo babeera mu bannamalungu ne baba nga babuuza bubuuza ebikwata ku mmwe (nga bali eyo) era singa baali mu mmwe tebandirwanye okuggyako ekitono ennyo.

Mazima mulina mmwe mu Mubaka wa Allah ekyokulabirako ekirungi eri oyo abeera nga akkiriza Allah n'Olunaku lw'Enkomerero, era n'ayogera nnyo ku Allah nga amutendereza.

Abakkiriza bwe baamala okulaba amagye g'omukago baagamba nti kino ky'ekyo Allah n'Omubaka We kye baatulagaanyisa, era Allah n'Omubaka We baayogera mazima, era (bwe baalaba) amagye g'omulabe tebaabongera okuggyako Obukkiriza n'okwewaayo eri Allah Omutonzi.

Mu Bakkiriza mulimu abasajja abaatuukiriza ekyo kye baalagaanyisa Allah obweyamo (bwe baagamba nti bwe tulisisinkana omulabe bugenda kutwefuka), kale nno mu bo mulimu eyatuukiriza obweyamo bwe nga bwe mulimu akyalindirira era tebakyusangako (ku ekyo) kukyusa kwonna.

Olwo nno Allah alyoke asasule abaatuukiriza amazima olw'amazima gaabwe, era abonereze abannanfuusi bw'aliba ayagadde, oba akkirize okwenenya kwa bwe (bwe baliba beenenyezza) mazima Allah bulijjo Musonyiyi nnyo Musaasizi.

Era Allah yazzaayo abatakkiriza n'obusungu bwabwe, tebalina kalungi ke baafuna, era Allah amalira Abakkiriza olutalo, era bulijjo Allah Waamaanyi Nnantakubwakumukono.

Era yawanula abo abaabayamba mu bannannyini Kitabo ng'abaggya mu bikomera byabwe, n'assa mu mitima gyabwe okutya ne muba nga mutta ekibinja ate ne muwamba ekibinja ekirala (mu bo).

Era naabasikiza ebibanja byabwe n'amaka gaabwe n'emmaali yaabwe n'ebitundu by'ensi ebirala bye mwali mutatuukangamu, bulijjo Allah Muyinza ku buli kintu.

Owange ggwe Nnabbi gamba bakyala bo nti: bwe muba mwagala bulamu bwa nsi na birungi byayo, kale mujje mbasibirire (mbawe ebirungi bye mwagala) era mbate oluta olulungi.

Naye bwe muba nga mwagala Allah ne Omubaka We, ne ennyumba ey'Enkomerero mazima Allah yateekerateekera abakola obulungi mu mmwe, empeera ensuffu.

Abange mmwe abakyala ba Nnabbi oyo yenna mu mmwe akola e kikolwa eky'obuwemu, bwekikakasibwa nti yakikoze, ekibonerezo ekimuweebwa kibazibwamu emirundi ebiri (olw'okuba Mukyala wa Nnabbi) era ekyo kyangu ku Allah.

N'oyo yenna mu mmwe (bakyala ba Nnabbi) agondera Allah n’Omubaka We n'akola emirimu emirungi tulimuwa empeera ye emirundi ebiri, era twamutegekera okugabirirwa okuweesa ekitiibwa.

Abange bakyala ba Nnabbi, temuli nga bakyala balala, bwe muba mutidde Katonda kale temugonzanga enjogera olwo nno n'akwatibwa amaddu oyo alina obulwadde mu mutima gwe, era (buli lwe mwogera) mwogere ebigambo eby'ensa.

Era mukkalire mu mayumba gammwe era temwejaajaamyanga enneejaajaamya ey'obutamanya obwaliwo mu kusooka era muyimirizeewo esswala ne Zzakka mugitoole, era mugondere Allah n’Omubaka We, mazima Allah ayagala okubaggyako ebibi abange mmwe abantu b'ennyumba (ya Nnabbi) era abatukuze olutukuza olwa nnamaddala.

Era mujjukirenga ebyo ebisomerwa mu mayumba gammwe mu Bigambo bya Allah n’ebigambo eby'amagezi (Hadiisi za Nnabbi), mazima bulijjo Allah akwata bulungi (abaddu) ate nga amanyi byonna ebibafaako.

Mazima abasajja Abasiraamu n’abakazi Abasiraamu, n’abasajja Abakkiriza n’abakazi Abakkiriza, n’abasajja abasinza Allah n’abakazi abasinza Allah, n’abasajja aboogera amazima n’abakazi aboogera amazima, n’abasajja abagumiikiriza n’abakazi abagumiikiriza, n’abasajja abagondera Allah, n’abakazi abagondera Allah, n’abasajja abasaddaaka n’abakazi abasaddaaka, n’abasajja abasiiba n’abakazi abasiiba, n’abasajja abakuuma obwereere bwa bwe n’abakazi bwe batyo, n’abasajja aboogera ennyo ku Allah n’abakazi bwe batyo, (abo bonna) Allah yabategekera okusonyiyibwa n'empeera ensuffu.

Tekisaana eri Omukkiriza omusajja oba Omukkiriza omukazi, Allah n’Omubaka We okumala okusalawo ekintu ate bo ne baba nga balina okwesalirawo ku nsonga yaabwe ate nga oyo yenna ajeemera Allah n’Omubaka We mazima aba abuze olubula olweyolefu.

Jjukira bwe wagamba oyo Allah gwe yawa ekyengera (n'asiramuka) naawe n'omuwa ekyengera (eky'okumuggya mu buddu) nti beera ne mukyala wo (toyawukana naye) era tya Allah , ate ggwe n'okweka mu mwoyo gwo ekyo Allah ky'anaayolesa, n'oba nga otya abantu ate nga Allah y'asinga okusaanira okuba nga otya, olwo nno Zaidi bwe yamala obwetaavu (bwe) ku ye, twamukufumbiza olw'ensonga nti waleme kubaawo kuwulira bubi mu Bakkiriza kuwasa bakaabaana baabwe (be batazaalira ddala) wabula bo be bayita obuyisi abaana baabwe. Wonna webaba bamalidde kye beetaaga ku bo, (ne baba nga tebakyabaagala ne babawa talaka) nga bulijjo ekiragiro kya Allah kiteekwa kussibwa mu nkola.

Tekisaanira Nnabbi kuwulira bubi ku ekyo Allah ky'aba amusaliddewo, eyo y'enkola ya Allah ku abo abaaliwo olubereberye. Ekigambo kya Allah bulijjo kiba kyagerwa dda ne kisalibwawo.

(Obutaba na nkenyera nga Allah amaze okusalawo y'enkola ya) abo abasaasaanya obubaka bwa Allah era ne bamutya ne baba nga tebatya kintu kyonna okuggyako Allah, bulijjo kimala okuba nga Allah y'agenda okubala.

Muhammadi tabangako kitaawe w'omu ku basajja mu mmwe wabula (yye) Mubaka wa Allah, era ow'enkomerero mu Bannabbi. Era bulijjo Allah amanyidde ddala ebifa ku buli kintu.

Abange mmwe abakkiriza mwogere ku Allah nga mumwogerako nnyo.

Era mumutendereze ku makya n’olweggulo.

Yye Y'Oyo abasaasira nga ne Bamalayika be babasabira, abe nga abaggya mu bizikiza mudde eri ekitangaala. Era bulijjo Musaasizi eri Abakkiriza.

Salaamu kye kiriba ekiramuso kyabwe (okuva ewa Katonda) Olunaku lwe balimusisinkana, era yabategekera empeera ennungi.

Owange ggwe Nabbi mazima ffe twakutuma nga oli mujulizi, era nga owa amawulire ag'essanyu, era nga owa amawulire agalabula.

Era nga okoowoola (abantu) okudda eri Allah ku lw'ekiragiro Kye era nga oli ttaala emulisa.

Era sanyusa Abakkiriza nti mazima bagenda kufuna okuva eri Allah ebirungi ebisuffu.

Era togondera abatakkiriza ne bannanfuusi era tofa ku binyiizo byabwe era weekwate bulijjo ku Allah, anti amala okuba nga ye Mukuumi.

Abange mmwe abakkiriza bwe muwasanga abakyala Abakkiriza ate nemubata nga temunnabakwatako (nga temunnatuuka gyebali), temubalinaako Eddah ze batuula (nga tebannafumbirwa basajja balala), olwo nno mubasibirire ekyo ekibasanyusa era mubaleke oluleka olulungi.

Owange ggwe Nnabbi, mazima Ffe twakukkiriza okuba ne bakyala bo abo be wawa amahare gaabwe, n'abo bonna omukono gwo ogwaddyo be gufuga nga bajjira mu ebyo Allah by'aba akuwadde mu ntalo nga (eminyago), era twakukkiriza bawala ba kitaawo omuto ne bawala ba bassenga bo, ne bawala ba kojja wo ne bawala ba bamaama bo abato (baganda ba nnyoko), abo abaasenguka naawe, nabwekityo omukyala yenna Omukkiriza bw'aba nga yeewadde Nnabbi, Nnabbi n'aba nga ayagadde okumuwasa ekyo nga kikyo wekka, so si Abakkiriza abasigadde. Mazima tumanyi ebyo bye twabalaalikako (bo) ku bikwata ku bakyala baabwe n'abo emikono gyabwe egyaddyo begifuga, olwo nno obe nga towulira buzibu. Era bulijjo Allah Musonyiyi Musaasizi.

Olindiriza oyo gw'oba oyagadde ku bo ate n'otwala oyo gw'oba oyagadde ate oyo gw'oba osazeewo mu abo b'olindirizza tolina kibi (singa oba osazeewo n'omutwala) ekyo kye kitandikirwako mu kutebenkeza amaaso gaabwe ne batanakuwala era bonna ne basiima ebyo by'oba obawadde, era Allah amanyi ebyo ebiri mu mitima gyammwe, anti bilijjo Allah Mumanyi nnyo Waakisa.

Tokkirizibwa (kuwasa) bakyala balala oluvannyuma lw'abo (b'olina) wadde okubawaanyisaamu abakyala abalala, obulungi bwabwe ne bwe bukusanyusa butya okuggyako abo omukono gwo ogwaddyo be gufuga, era bulijjo Allah Mulondoozi wa buli kintu.

Abange mmwe abakkiriza temuyingiranga ennyumba za Nnabbi okuggyako nga mukkiriziddwa okugenda okulya (ate) nga temulinda kuyiisibwa kwa mmere, bwe mumala okulya olwo nno musaasaane era temutwalirizibwanga emboozi, mazima ekyo kibadde kinyiiza Nnabbi ate nga abakwatirwa ensonyi so nga Allah takwatibwa nsonyi kwogera mazima, era (bakyala ba Nnabbi) bwe mubaako ekintu kye mubasaba mukibasabire mabega wa lutimbe, ekyo nno ky'ekisinga obutukuvu eri emitima gyammwe n'emitima gyabwe. Tekibagwanira mmwe okunyiiza Omubaka wa Allah era tekibagwanira kuwasa bakyala be oluvanyuma lwe (nga ekiragiro kino) kya lubeerera. Mazima ekikolwa ekyo kinene ewa Allah.

Ka mube nga mwolesezza ekintu kyonna oba nga mukikwese mazima Allah bulijjo amanyidde ddala ekifa ku buli kintu.

(Bakyala ba Nnabbi) tebalina kibi (obuteebikka) nga bali ne bakitaabwe, wadde abaana baabwe, wadde bannyinaabwe, wadde abaana ba bannyinaabwe, wadde abakyala nga bo, wadde emikono gyabwe egyaddyo be gifuga, bateekeddwa okutya Allah, mazima Allah bulijjo aba buli kintu kyonna we kikolerwa.

Mazima Allah ne Bamalayika Be basaasira Nnabbi, abange mmwe Abakkiriza mumusabirenga era mumulamuse olulamusa (olumuwa ekitiibwa).

Mazima abo abanyiiza Allah n’omubakawe, Allah yabakolimira ku nsi ne ku Nkomerero era yabategekera ebibonerezo ebinyoomesa.

Ate abo abanyiiza Abakkiriza abasajja n’Abakkiriza abakazi awatali kintu kye bakoze, mazima baba beetisse okutemerera n'ekibi eky'olwatu.

Owange ggwe Nnabbi gamba bakyala bo ne bawala bo ne bakyala ba Abakkiriza babe nga beebikkirira obukaaya bwabwe, ekyo kye kyanguya okuba nga bamanyika (nti baakitiibwa) olwo nno baleme kunyiizibwa. Bulijjo Allah Muyitirivu wa kusonyiwa era Muyitirivu wa Kusaasira.

Abannanfuusi n'abo abalina obulwadde mu mitima gyabwe n'abasaasaanya kalebule mu Madinah bwe banaaba tebeekomyeko tujja kukusobozesa okubakolako, n'ekinaddako tebagenda kuddayo kubeera naawe mu kyo (ekibuga) okuggyako ekiseera kitono.

Baakolimirwa, wonna we basangibwa bakwatibwa nebattibwa oluttibwa.

(Tebasaasirwa) ekyo ye nkola ya Allah ku abo abaaliwo olubereberye, ate toyinza kusanga kukyuka mu nkola ya Allah.

Abantu bakubuuza ku Lunaku lw'Enkomerero. Bagambe nti: Mazima okumanyibwa kwalwo kuli eri Allah, ye omanyi otya oba Olunaku lw'Enkomerero luli kumpi!.

Mazima Allah yakolimira abatakkiriza era n'abategekera Omuliro Sai-iru.

Baakutuula mu gwo bugenderevu, tebagenda kufuna waamukwano wadde omutaasa.

Ku lunaku ebyenyi byabwe lwe birikyusibwakyusibwa mu Muliro nga bagamba nti zitusanze singa twagondera Allah era ne tugondera Omubaka.

Era ne bagamba nti: Ayi Mukama Omulabirizi Waffe mazima ffe twagondera abakulembeze baffe n'abatutumufu mu ffe, olwo nno ne batubuza ekkubo.

Ayi Mukama Omulabirizi Waffe bawe ebibonerezo byabwe nga bibaziddwamu emirundi ebiri era obakolimire olukolimira olunene.

Abange mmwe Abakkiriza temubeera nga abo abaanyiiiza Musa (bwe baagamba nti aliko obulemu ku mubiri gwe obumugaana okunaaba naffe) wabula Allah yamutukuza ku ekyo kye baagamba era waakitiibwa ewa Allah.

Abange mmwe Abakkiriza mutye Allah era mwogere ebigambo ebituufu.

Ajja kubalongooseza emirimu gyammwe era abasonyiwe ebyonoono byammwe, era bulijjo omuntu agondera Allah n’Omubaka We aba yeesiimye olwesiima olusuffu.

Mazima Ffe twayagala obuvunaanyizibwa okubuwa eggulu omusanvu n'ensi n'ensozi naye ne bigaana okubwetikka ne bibwesamba, ye omuntu n'abwetikka (n'atatuukiriza era olw'ekyo) n'abeera eyeeyisa obubi atamanyi.

Olwo nno Allah alyoke abonereze bannanfuusi abasajja n'e bannanfuusi abakazi, n’abasajja abagatta ku Allah ebintu ebirala n’abakazi abagatta ku Allah ebintu ebirala, era abe nga asonyiwa Abakkiriza abasajja n’Abakkiriza abakazi. Era bulijjo Allah Muyitirivu wa kusonyiwa Muyitirivu wa kusaasira.

Ebitendo byonna bya Allah, Nnannyini w'ebyo, ebiri mu ggulu omusanvu n'ebyo ebiri mu nsi, era Ebitendo byonna bibye ku nkomerero era Yye Ye Mugobansonga amanyi ennyo.

Amanyi ebyo ebiyingira mu nsi n'ebigifuluma, n'ebyo ebikka okuva mu ggulu n'ebyambuka mulyo, era Yye Ye Musaasizi Omusonyiyi.

Abo abaawakanya baagamba nti Enkomerero tegenda kutujjira. Bagambe nti: Nedda ndayidde Mukama Omulabirizi Wange (Enkomerero) egenda kubajjira ddala (Mukama Omulabirizi Wange) Omumanyi W'ebyekusifu, akantu akatono ennyo tekayinza kumubulako ka kabe mu ggulu omusanvu oba mu nsi wadde akatono ennyo okusinga kw'ako wadde ekinene (tewali kintu kyonna) okuggyako nga kiri mu Kitabo ekinnyonnyofu.

(Byonna bwe biryolesebwa) olwo nno (Katonda) alyoke asasule abo abakkiriza nebakola emirimu emirongoofu. Abo balina ekisonyiwo n'okugabirirwa okulungi.

Ate abo abakola kaweefube okulwanyisa Ebigambo Byaffe, abo balina ebibonerezo ebirumya olw'ebyonoono (byabwe).

Bo abo abaaweebwa okumanya ebyassibwa gy'oli okuva ewa Mukama Omulabirizi Wo balaba nga ge mazima era nga birunngamya eri Ekkubo lya Nnantakubwakumukono Atenderezebwa.

Abo abaawakanya (mu kujereegerera) baagamba nti abaffe tubalagirire omusajja anaabategeeza bwe munaaba muyuziddwa oluyuzibwa olw'amaanyi (nga muli mu ntaana ennyama n'ebaggwa ku magumba) mbu mazima mmwe muliddayo nemutondebwa bupya.

Abaffe (okwogera bw'atyo) atemeredde bulimba ku Allah oba agudde eddalu, wabula abo abatakkiriza Nkomerero bali mu bibonerezo na bubuze obw'ewala.

Abaffe tebalaba ebyo ebiri mu maaso gaabwe n'ebyo ebiri emabega waabwe ebiri ku ggulu ne ku nsi, singa twagadde tuyinza okubamizisa ensi oba netubasuulako ekibajjo okuva waggulu, mazima mu ebyo mulimu akabonero (eky'okuyiga) eri buli muddu eyeenenya.

Mazima twawa Dawuda ebirungi okuva Gyetuli, (nga bwe twagamba nti) abange mmwe nsozi mutenderereze wamu naye nammwe ebinyonyi mukole bwe mutyo, era twamugondeza ekyuma.

(Ne tumugamba nti) kola ebyambalo by'olutalo, amakowe gakole nga genkana, era mukole emirimu emirungi mazima Nze ndabira ddala ebyo bye mukola.

Ate Sulayimaani twamugondeza empewo nga ekitundu ky'etambula okuva kumakya okutuuka mu ttuntu kyanditambuliddwa mwezi, nga n'ekitundu ky'etambula olw'eggulo kyalitambuliddwa mwezi, era twamukulukusiza ensulo z’ekikomo nga ne mu Majinni mulimu agaali wansi w'obuyinza bwe agamukolera byonna ku lw'Ekiragiro kya Mukama Omulabirizi We, nga ejjinni lyonna eribula ne liva ku Kiragiro Kyaffe tulikombesa ku bibonerezo eby'omuliro ogutuntumuka .

Nga (amajinni) gamukolera byonna by'ayagala nga ebifo ebisinzibwamu n'ebifaananyi, ebibumbe n'ensiniya ennene eziringa ebidiba, n'amaseppiki (amanene ennyo) agatava mu kifo, (ne tumugamba nti) abange abantu ba Dawuda mukole olw'okwebaza (Katonda), wabula batono abeebaza mu baddu bange.

Bwe twamutuusaako okufa tewali kyagalaga kufa kwe okuggyako ebiwuka by’omuttaka (enkuyege) ezaalya omuggo gwe gwe yatambuzanga, olwo nno bwe yagwa amajinni gaakakasa nti singa gaali gamanyi ebyekusifu tegandibadde mu bibonyoobonyo ebinyoomesa.

Mazima abantu be Saba' mu kitundu kyabwe baalinamu eky'okuyiga (baalina) ennimiro bbiri ku ddyo ne ku kkono (ne tubagamba nti) mulye mu bigabwa bya Mukama Omulabirizi Wammwe era mumwebaze, (nga kino kye yabawa) kitundu kya nsi kirungi, ne Katonda Mulabirizi Musonyiyi.

Baava ku kyabalagirwa ne tubasindikira mukoka omuyitirivu (eyawaguza zi daamu (amabibiro g'amazzi) essamba nezijjula amazzi), olwo nno nnimiro zaabwe netubawaanyisizaamu ennimiro endala bbiri ezijjudde ebyokulya ebikaawa n’emiti egitabala n’emiti gya Sidiri mitono tono.

Ekyo kye twabasasula olw'okuba baawakanya, abaffe tubonereza mu kusasula okw'ekyenkanyi mu ngeri eno okuggyako abawakanyi!?

Net tussa wakati waabwe ne wakati w’ebitundu ebyo bye twawa omukisa ebitundu ebirala nga bikwataganye (era nga bisoboka okuwummulirwamu) okubitambuliramu ne tukifuula kyangu (kale) mutambule mu byo ebiro n’emisana nga muli mirembe.

Olwo nno (mu kifo ky'okwebaza) ne bagamba nti ayi Mukama Omulabirizi Waffe, teekawo amabanga manene (okutuuka we tusobola okuwummulira) mu nngendo zaffe. Mu kukola ekyo ne baba nga beeryazaamaanya bokka, olwo nno netubafuula eky'okwogerako era netubayuzaayuza oluyuzaayuza. Mazima mu ekyo mulimu eby'okuyiga eri buli mugumiikiriza owannamaddala eyeebaza ennyo.

Mazima Ibuliisu yatuukiriza endowooza ye (nga akozesa bo), olwo nno ne bamugoberera okuggyako ekitundu ku Bakkiriza.

(Ibuliisu) tabangako na buyinza ku bo wabula (ekimufunyisa abagoberezi) lwakuba twagala tumanye oyo akkiriza Olunaku lw’Enkomerero nga tumwawula ku oyo alulinamu okubuusabuusa, bulijjo Mukama Omulabirizi Wo Mulondoozi wa buli kintu.

Bagambe (ggwe Nnabbi Muhammadi) nti: musabe abo be mugamba ne muva ku Allah, (wabula mukimanye nti) tebafuga kantu kenkana kanyikuuli mu ggulu omusanvu wadde mu nsi, era tebalina mugabo mu byombi era (Katonda) talina muyambi yenna ava mu bo wadde ava mu balala.

Era okuwolereza tekugenda kugasa (muntu yenna) mu maaso Ge okuggyako oyo gw'aliba akkirizza, okutuusa okutya bwe kuliba kuggyiddwa mu mitima gyabwe baligamba nti Mukama Omulabirizi Wammwe agambye ki? (Bamalayika) baligamba nti (ayogedde) mazima, era Yye Ye Waawaggulu Omusukkulumu.

Bagambe nti: Ani abagabirira okuva mu ggulu omusanvu n'e nsi, bagambe nti Allah. Era mazima ku ffe oba mmwe waliwo abali ku bulunngamu oba ku bubuze obw'olwatu.

Bagambe nti temugenda kubuuzibwa ku ebyo bye twayonoona nga bwe tutagenda kubuuzibwa ku bye mukola.

Bagambe nti Mukama Omulabirizi Waffe agenda kutukunngaanya oluvannyuma asalewo wakati waffe mu mazima, anti Yye Ye Mutaawuluza asinga, Omumanyi ennyo.

Bagambe nti mundage abo be munnyungako ne mubangattako, nedda tebaliiyo wabula Yye Ye Allah Nnantakubwakimukono Mugobansonga.

Era tetwakutuma okuggyako nga oli (Mubaka) awa amawulire ag'essanyu (eri Abakkiriza) era omutiisa (eri abatakkiriza) naye abantu abasinga obungi tebamanyi.

Era ne bagamba nti endagaano eyo eribaawo ddi bwe muba nga mwogera mazima!.

Bagambe nti: Mulina endagaano y’olunaku lwe mutalisobola kusaba museeseetulwe ku lwo wadde essaawa emu era nga bwe mutalisobola kusaba lubaleeterwe mangu (ne mukifuna).

Abo abaawakanya baagamba nti: tetujja kukkiriza Kulaani eno wadde ebyo ebyagikulembera naye singa olisobola okulaba ekiseera abeeyisa obubi lwe baliyimirizibwa mu maaso ga Mukama Omulabirizi Waabwe abamu ekigambo balikissa ku bannaabwe (ekyabasuula mu buzibu), abo abaali batwalibwa okuba aba wansi baligamba abo abeetwala okuba abaawaggulu nti: Singa temwali mmwe twandibadde Bakkiriza.

Abo abaatwalibwanga okuba abaawaggulu baligamba abo abaatwalibwanga okuba abaawansi nti: abaffe, ffe twabalemesa obulunngamu bwe bwali nga bubajjidde (si bwe guli) wabula mwali bantu aboonoonyi.

N'abo abaatwalibwanga okuba abaawansi baligamba abo abeetwalanga okuba abaawaggulu nti:(si bwe kiri), wabula ezo zaali nkwe ze mwakolanga ekiro n’emisana bwe mwatulagiranga tujeemere Allah ne tumussaako bakatonda abalala, olwo nno balikweka munda okwejjusa Bwe baliraba ebibonerezo era tugenda kussa enjegere mu nsingo zaabo abaalwakanya, ye ate balisasulwa okuggyako ebyo bye baakola?

Tetutumanga mu kitundu kyonna mutiisa okugyako nga abawangaala obulamu obw'okwejalabya bagamba nti: Mazima ffe tuwakanya ebyo bye mutumiddwa nabyo.

Era ne bagamba nti ffe tusinga (mmwe) emmaali n’abaana era ffe tetugenda kubonerezebwa.

Bagambe (ggwe Nnabbi Muhammadi nti): Mazima Mukama Omulabirizi Wange ayanjululiza ebyenfuna oyo gw'aba ayagadde ate n’abifundiza gw'aba ayagadde, naye abantu abasinga obungi tebamanyi.

Ermmaali yammwe n’abaana bammwe si by'ebyokubasembeza ku mwanjo Gyetuli okuggyako (ekiyamba) ye muntu akkiriza n'akola emirimu emirungi. Abo nno balifuna empeera enkubiseemu olw'ebyo bye baakola era bagenda kutuula ntende mu nnyumba ensitufu.

Ate abo abassa amaanyi mu kulemesa Ebigambo Byaffe bagenda kuleetebwa eri ebibonerezo.

Bagambe nti mazima Mukama Omulabirizi Wange ayanjuluza riziki eri oyo gw'aba ayagadde mu baddu Be ate n'agifundiza (gw'aba ayagadde), ate buli kintu kyonna kye muwaayo mazima Yye akizzaawo era bulijjo Yye y'asinga abagabirizi.

Era mujjukire Olunaku lw'alibakunngaanya bonna oluvannyuma n'agamba Bamalayika nti: Abaffe abo mmwe be baasinzanga?

Baligamba nti: Wasukkuluma, Ggwe Mukama Waffe so si bo. Wabula bo baasinzanga majinni, abasinga obungi ge bakkiririzangamu.

(Katonda aligamba nti) Kale nno olwaleero abamu ku mmwe tebagenda kuba na busobozi kugasa bannaabwe oba okubatuusaako akabi era tuligamba abo abeeyisa obubi nti mukombe ku bibonerezo by'Omuliro ogwo gwe mwali mulimbisa.

Ebigambo Byaffe ebinnyonnyofu bwe bibasomerwa bagamba nti tali ono okuggyako musajja ayagala okubaggya ku ebyo bakadde bammwe bye baali basinza, era ne bagamba nti (Kulaani gy'azze nayo) eno teri okuggyako bulimba obujingirire ate bo abaawakanya amazima bwe gaamala okubajjira baagamba nti tebiri bino okuggyako eddogo ery'olwatu.

(Boogera ebyo naye nga) tetubawanga Bitabo nti bye basoma era nga tetubatumiranga mutiisa yenna olubereberye lwo.

Era abo abaaliwo olubereberye lwabwe baalimbisa (Ababaka Baffe) ate nga (abantu b'e Makkah) tebaaweza kimukyakkumi kye twawa bali, ate olwo nno ne balimbisa Ababaka Bange, naye nnababonereza ngeri ki?.

Bagambe (ggwe Nnabbi Muhammadi) nti mbabuulirira n’ekintu kimu kyokka nakyo kwe kuba nga muyimirira ku lwa Allah babiri babiri oba kinnoomu oluvannyuma mulowoorereze (mujja kutegeera) nti munnammwe (Muhammadi) si mulalu tali yye okuggyako okuba nti mutiisa gye muli (nga abatiisa) ebibonerezo eby'amaanyi bye mwolekedde.

Bagambe nti sibasaba mpeera yonna (empeera yonna eri emu) nayo yammwe, empeera eyange teri walala okuggyako ku Allah Yekka. Era Yye ku buli kintu (abeerawo) nga kikolebwa.

Bagambe nti mazima Mukama Omulabirizi Wange akozesa amazima naggyawo obulimba amanyidde ddala ebyekusifu.

Bagambe nti amazima gazze era obulimba tebuyinza kutandika nate era si bwa kudda.

Bagambe nti: Bwemba mbuze mazima mba mbuze ku lwange naye bwennunngama kiba kivudde ku Bubaka Mukama Omulabirizi Wange bw'antumira, mazima Yye Muwulizi nnyo ali kumpi ddala.

Singa oliraba mu kiseera abatakkiriza Allah ne Omubaka We bwe balitya (ku Lunaku lw'Enkomerero) tewaliba buddukiro era balikwatibwa nga baggyibwa mu kifo eky'okumpi ddala.

Era baligamba nti tubikkiriza (ebyo Nnabbi by'agamba) naye wa gye baliggya okukkiriza nga bamaze okukuleka mu kifo eky'ewala (gye bavudde).

Mazima baabiwakanya olubereberye, era baatemerera obulimba ku bigambo ebikusike ebiri mu kifo eky'ewala.

Newasiikirizibwa wakati waabwe ne wakati w'ekyo kye baagala nga bwe kyakolebwa olubereberye (ku abo) abalinga bo mazima bo baali mu kubuusabuusa okuleeta okutankana (ne batakkiriza).

Ebitendo byonna bya Allah Omutonzi w'eggulu omusanvu n'ensi, eyafuula Bamalayika ababaka abalina ebiwawaatiro, ow'ebibiri n'ow'ebisatu n'ow'ebina, ayongera mu kutonda ekyo ky'aba ayagadde mazima Allah Muyinza ku buli kintu.

Okusaasira kw'aba agguliddewo abantu tewali ayinza kukulemesa, ate okwo kw'alemesa tewali ayinza kukuleeta atali Yye, era Yye Ye Nnantakubwakumukono Mugobansonga.

Abange mmwe abantu mujjukire ekyengera kya Allah kye yabawa, abaffe waliyo omutonzi atali Katonda abagabirira okuva waggulu ne mu nsi, tewali kisinzibwa kyonna mu butuufu okuggyako yye, olwo nno ate muwugulwa mutya!.

Bwe bakulimbisa mazima Ababaka baalimbisibwa olubereberye lwo, era nga bulijjo ewa Allah ensonga zonna gye zizzibwa.

Abange mmwe abantu mazima Endagaano ya Allah ya mazima, obulamu bw'ensi tebubagayaazanga era ebigayaaza byonna tebibaggyanga ku Allah.

Mazima Sitane mulabe wammwe kale (na mmwe) mumufuule mulabe. Anti mazima akoowoola ekibiina kye balyoke babeere mu bantu b'okuyingira Omuliro Sa-iri.

Abo abaawakanya balina ebibonerezo ebikakali ate bo abakkiriza ne bakola emirimu emirungi balina ekisonyiwo n'empeera ensuffu.

Abaffe oyo eyawundirwa omulimu gwe omubi n'agulaba nga mulungi (ayinza okufaanana oyo omulunngamu) mazima Allah abuza gw'aba ayagadde n'alunngamya gw'aba ayagadde, kale toggwaamu mwoyo ku lw'okubasaalirwa, mazima Allah amanyidde ddala ebyo bye bakola.

Allah Y'Oyo asindika empewo ne zitambuza ebire (eby'enkuba, enkuba eyo) ne tunywekereza nayo ensi enfu (enkalu) olwo nno ne tuzza nayo mu bulamu ettaka eriba lifudde nabwekityo okuzuukira (bwe kuliba).

Oyo yenna ayagala ekitiibwa, ebitiibwa byonna biri wa Allah. Gy'ali ebigambo ebirungi gye byambuka n’emirimu emirongoofu agisitula ate abo abakola enkwe okukola ebibi balina ebibonerezo ebikakali era enkwe za abo ze zigwa obutaka.

Era Allah yabatonda (mmwe) nga abaggya mu ttaka, oluvannyuma abaggya mu mazzi agazaala, oluvanyuma yabatonda nga muli bibiri bibiri (ekisajja n’ekikazi). Tewali kikazi kifuna lubuto wadde ekizaala okugyako nga amanyi, tewali kiwangaazibwa mu biwangaazibwa era tewali kikendeezebwa ku buwangaazi bwakyo okuggyako nga kiri mu kitabo (nga Katonda yakisalawo dda) mazima ekyo kyangu nnyo ku Allah.

Amazzi ag'ennyanja ebbiri tegayinza kufaanagana, nga (emu) amazzi gaayo malungi mawoomu ganyweka, nga ate endala ya mazzi ag’omunnyu lukalabule, ate nga mulya mu buli emu ku zo ebyennyanja ebibisi era muggyamu eby'okwewunda bye mwambala era olaba amaato mu zo nga gakola amakubo olwo nno musobole okunoonya mu bigabwa Bye olwo nno mubeere abeebaza.

Ayingiza ekiro mu musana era n'ayingiza omusana mu kiro era yagonza enjuba n'omwezi nga buli kimu kya kutambula okumala ebbanga eggere Oyo nno ye Allah Mukama Omulabirizi Wammwe Nnannyini buyinza bwonna ate abo be musaba abatali Yye tebalina buyinza wadde obwenkana akakuta k'empeke.

Bwe mubasaba tebawulira kusaba kwammwe ate (katugambe) nti bawulidde tebasobola kubaanukula era nga ne ku Lunaku lw'Enkomerero bagenda kwegaana engeri gye mubagatta ku Katonda, (ayagala ategeere) anti tewali ayinza kukutegeeza kufaanana nga Oyo amanyi ekintu ne munda waakyo.

Abange mmwe abantu, mmwe beetaavu eri Allah ate Yye Allah talina bwetaavu atenderezebwa ennyo.

(N'olwekyo) singa aba ayagadde asobola okubaggyawo n'aleeta ebitonde ebipya.

Era ekyo ku Allah si kinene.

Tewali mwoyo mwonoonyi gugenda kwetikka kibi kya mwoyo mwonoonyi mulala, era oguliba guzitoowereddwa bwe gulisaba okugwetikkirako tebaligwetikkirako kintu kyonna, (gwe gusaba) ne bw'aliba waaluganda olw'okumpi. Mazima olabula abo abatya Mukama Omulabirizi Waabwe, awamu n'obutamulabako era ne bayimirizaawo esswala. N'oyo yenna eyeetukuza mazima yeetukuza ku lulwe era eri Allah y'eri obuddo.

Muzibe n'oyo alaba tebenkana.

Wadde ebizikiza n'ekitangaala.

Wadde ekisiikirize tekyenkana na ppereketya wa musana.

Era abalamu n'abafu tebenkana, mazima Allah awuliza oyo gw'aba ayagadde naye ggwe (Muhammadi) tosobola kuwuliza abo abali mu ntaana.

Ggwe toli okuggyako okuba omutiisa.

Mazima ffe twakutuma mu butuufu nga oli musanyusa (eri Abakkiriza) era nga oli mutiisa (eri abatakkiriza) era tewali bantu ba mulembe gwonna okuggyako nga omutiisa yabatuukamu.

Naye bwe bakulimbisa mazima n'abo abaabakulembera baalimbisa Ababaka baabwe baabajjira n’obunnyonnyofu n'ebiwandiiko n'ebitabo ebitangaaza.

Oluvanyuma nnakwata abo abaakaafuwala kale okubonereza kwange kwali kutya.

Abaffe tolaba nti Allah assa amazzi okuva waggulu ne tumeza nago ebibala ebya langi amez'enjawulo nga ne mu nsozi mulimu amakubo ameeru n'amamyufu nga langi zaago njawukamu n'amaddugavu ttibittibi.

Mu ngeri y'emu ne mu bantu n'ensolo n’ebisolo ebirundibwa awaka langi zaabyo za njawulo, mazima ddala abatya Allah mu baddu Be be bamanyi, mazima Allah Ye Nnantakubwakumukono Omusonyiyi ennyo.

Mazima abo abasoma Ekitabo kya Allah (Kulaani) ne bayimirizaawo esswala era ne bawaayo mu kyama ne mu lwatu ku ebyo bye tubagabirira basuubira eby'obusuubuzi ebitadiba.

Alyoke abawe mu bujjuvu empeera zaabwe era abongeze mu birungi Bye anti mazima Yye, Musonyiyi nnyo Eyeebaza.

N'obubaka obwo bwe twakutumira mu Kitabo (Kulaani) go ge mazima nga kikakasa (Ebitabo) ebyo ebyakikulembera. Mazima Allah amanyidde ddala eby'omunda era Mulabi nnyo.

Oluvanyuma twasikiza Ekitabo abo be twalondoba mu baddu Baffe olwo nno ne muba mu bo eyeeyisa obubi nga bwe muli mu bo ow'omumakkati era nga mu bo mulimu assa essira mu kukola ebirungi (ebya Faradha ne Sunna) ku lw'obuyinza bwa Allah, obwo nno bwe bulungi obusuffu.

(Nga) ze Ejjana ez'emirembe ze baliyingira. Balinaanikibwa nga bali mu zo ebikomo ebya zzaabu ne luulu, era ebyambalo byabwe nga bali mu yo biriba bya liiri.

Era baligamba nti ebitendo byonna bya Allah Oyo atumazeeko ennaku, mazima Mukama Omulabirizi Waffe Musonyiyi nnyo era yeebaza.

Oyo atutadde mu nnyumba ey'olubeerera nga kugaba Kwe ennaku si yaakututuukako nga tuli mu yo, era nga tuli mu yo bwe tutagenda kutuukibwako kukoowa.

Ate abo abaawakanya balifuna Omuliro Jahannama, tebagenda kusalirwawo nti (bafe) olwo nno ne baba nga bafa era tebagenda kukendeezebwa ku bibonerezo bya gwo bwetutyo bwe tusasula buli ntasiima.

Nabo bagenda kuba nga baleekaanira mu gwo (nga bagamba nti) ayi Mukama Omulabirizi Waffe, tufulumye (otuzze ku nsi) tukole emirimu emirungi egitali egyo gye twali tukola luli, (baligambibwa nti) abaffe tetwabawangaaza ebbanga oyoajjukira ly'asobola okujjuukiriramu era omutiisa n'abajjira (kye musaba temujja kukifuna) kale mukombe ku bukaawu bw'ebibonerezo, abeeyisa obubi tebayinza kuba na mutaasa yenna.

Mazima Allah amanyi ebyekusifu by'omuggulu omusanvu n'ensi, mazima ddala Yye amanyidde ddala ebiri mu bifuba.

Ye yooyo eyabafuula (mmwe) abadda mu bigere bya bannaabwe mu nsi, oyo awakanya obuwakanyi bwe bukosa yye, era abawakanyi obuwakanyi bwabwe tebubongera ewa Mukama Omulabirizi Waabwe okuggyako okukyayibwa era abawakanyi obuwakanyi bwabwe tebubongera okuggyako okufaafaaganirwa.

Bagambe nti mulaba abo bemungattako abo bemusaba nemuleka Katonda (kale) mundage kiki kye batonda ku nsi, oba abaffe balina omugabo mu (kukolebwa) kw'eggulu omusanvu oba (si ekyo) nga twabawa ekitabo olwo nno nebaba nga balina obujulizi okuva mu kyo (obubalagira okukola shiriki oyo) nedda abeeyisa obubi abamu mu bo tebalagaanyisa bannaabwe okuggyako ebigayaaza.

Mazima Allah awaniridde ggulu omusanvu n'ensi bibe nga tebivaawo era singa bivaawo, teri mulala yenna yandibiwaniridde oluvanyuma Lwe anti mazima Yye Waakisa Musonyiyi nnyo.

(Abatakkiriza b'e Makka) baalayira Katonda mu kukakasa ebirayiro byabwe (ne bagamba nti) singa omutiisa alibajjira bagenda kubeerera ddala abasinga obulunngamu okukira (abantu bonna abaali babaddewo), awo nno omutiisa (Muhammadi) bwe yabajjira tekyabongera okuggyako okwesamba (Omubaka).

(Nga ekyo kiva) ku kwekuluntaza (kwabwe) mu nsi, n'okukolala enkwe embi, enkwe embi tezituusa kabi okuggyako ku bannannyini zo olwo abaffe balina kyebalindirira okuggyako enkola eyatuuka ku baabakulembera ate nga enkola ya Allah (mu kubonereza abajeemu) tebaamu kukyusibwa era nga enkola ya Allah toyinza kugisangamu kujjululwa.

Abaffe tebatambula mu nsi olwo nno nebalaba enkomerero ya abo abaabakulembera nga bwe yali ate nga baali baamaanyi okubasinga, kikafuuwe ekintu kyonna mu ggulu omusanvu ne mu nsi okulemesa Allah anti mazima Yye bulijjo Mumanyi nnyo Muyinza.

Singa Allah yali avunaana abantu olw'ebyo bye baba bakoze teyaalirese ku ngulu kwayo (ensi) kitambula kyonna naye abalindiriza okutuusa ekiseera ekigere olwo nno entuuko zaabwe bwe zituuka (buli muntu n'azzibwa eri ekifo ekimusaanira) anti Allah bulijjo alabira ddala ebikwata ku baddu Be.

Yaasiin.

Ndayidde Kulaani (eno) ejjudde ebigambo eby'amagezi.

Mazima ggwe (Muhammadi) oli wa mu Babaka.

(Nga oli) ku kkubo eggolokofu.

(Kulaani eno) yassibwa Nnantakubwakumukono Omusaasizi.

Obe nga otiisa abantu. bakadde baabwe abataatiisibwa olwo nno ne baba nga tebafaayo (ku bikwata ku Katonda).

Mazima kikakase ekigambo (eky'okubonerezebwa) ku basinga obungi mu bo ne baba nga tebagenda kukkiriza.

Mazima Ffe twassa mu nsingo zaabwe enkoligo nga nazo zituukira ddala ku bulevu, olwo nno ne baba nga balalambadde.

Ne tussa mu maaso gaabwe ekiziyiza netussa n'ekiziyiza (ekirala) emabega waabwe, olwo nno netubabikka nga tebayinza kulaba.

Era kyekimu ku bo obatiisizza oba tobatiisizza si baakukkiriza.

Mazima otiisa oyo agoberera okubuulirira era n'atya (Katonda) Omusaasizi ennyo awamu n'okuba nga talabika kale nno musanyuse n'amawulire g’ekisonyiwo n'empeera eyeesiimisa.

Mazima ffe tuliramusa abafu era tuwandiika ebyo bye baakulembeza ne bye baagoberezaako nga na buli kintu twakikomeka mu Kitabo e kikulu ekigenda okulaga buli kimu.

Bakubire ekifaanayi ky'abantu b'omukitundu ekimu bwe bajjirwa Ababaka.

Mu kiseera we twatumira gye bali Ababaka babiri ne babalimbisa, olwo nno ne tubongera amaanyi n’owookusatu (bonsatule) ne bagamba nti mazima ffe tutumiddwa gye muli.

(Aboomukitundu ekyo) ne bagamba nti: Mmwe temuli okuggyako (okuba) bantu bannaffe era Katonda Omusaasizi ennyo tassanga kintu kyonna temuli mmwe okuggyako okuba nga mulimba (bulimbi).

(Ababaka) ne bagamba nti Mukama Omulabirizi Waffe amanyi nti mazima ddala ffe tutumiddwa gyemuli.

Era tetuvunaanyizibwa okuggyako okutuusa Obubaka mu bunnyonnyofu.

(Aboomukitundu) nebagamba nti mazima ffe tutya okutuukibwako obuzibu ku lwammwe, bwe muteekomeko tujja kubakasuukirira amayinja era ebibonerezo ebiruma ennyo bijja kubatuukako nga biva gyetuli.

(Ababaka) ne bagamba nti okutya kwammwe okutuukibwako obuzibu mwe mukyereetedde (bwe mugaanye okuwuliriza Obubaka obubaleeteddwa) wabula mmwe muli bantu abayitirivu mu kwonoona.

Awo omusajja n'ajja nga ava ku nkomerero y’ekibuga nga ayanguwa n'agamba nti: abange bantu bange mugoberere Ababaka.

Mugoberere abo abatabasaba mpeera ate nga bo balunngamu.

Nnina ki ekinngaana okusinza Oyo eyantonda, ate nga Gy'ali gye mulizzibwa!

Ndeke Katonda nneeteerewo ebisinzibwa ebirala, so nga singa Katonda Omusaasizi ennyo anjagaliza akabi okuwolereza kwabyo tekwandingasizza kintu kyonna era tebiyinza kunziruukirira?!

(Singa nkikola) mazima nze olwo nja kuba mu bubuze obweyolefu.

Mazima nze nzikirizza Mukama Omulabirizi Wammwe, kale mumpulirize.

Naagambibwa (nga amaze okufa) nti: Yingira Ejjana, n'agamba nti: kale singa abantu bange bamanyi.

Ekyo Mukama Omulabirizi Wange kyansonyiyidde era n'anteeka mw'abo abagabulwa (olwaleero).

Era tetwassa ku bantu be oluvannyuma lwe ggye lyonna liva mu ggulu (olw'okubazikiriza) era tetwali baakulissa.

(Wabula okuzikirira kwabwe) tekwali okuggyako lwali olubwatuka lumu, okugenda okulaba nga bo bakalu

Kya nnaku nnyo, ku baddu (abantu) tewali Mubaka abajjira okuggyako nga bamujeeja.

Abaffe tebalaba emirembe emeka gyetwazikiriza olubereberye lwabwe, nga mazima ddala bo tebagenda kudda gyebali.

Tewali na gumu ku gyonna (emirembe) okuggyako nga bonna ba kuleetebwa mu Maaso Gaffe.

Ensi efudde (ekaze) kabonero gyebali, tugiwa obulamu (tutonnyesa enkuba) era netumeza mu yo empeke, okwo nno kwe balya.

Ne tuteeka mu yo amalimiro ag’entende n'emizabbibu era ne tufukula mu yo ensulo.

Babe nga balya ku bibala byayo ne ku ebyo emikono gyabwe bye gikola, abaffe tebeebaza!.

Musukkulumu Oyo eyatonda ebimera mu nsi ne mu bo bennyini (abantu) ne bye batamanyi, nga byonna biba kisajja na kikazi.

Era ekiro kabonero gyebali anti tukiggyako obudde obw'emisana ogenda okulaba nga bali mu nzikiza.

Ne njuba etambulira ku biragiro ebyagiweebwa, okwo kwe kugera kwa (Katonda) Nnantakubwakumukono Omumanyi ennyo.

Nga n'omwezi (kabonero gye bali), twagugerera ebifo (mwe gutambulira) okutuusa lwe guddayo ne guba nga ekikolokomba ekikadde.

Tekisoboka enjuba kusisinkana mwezi era n'ekiro tekigenda kukulembera misana na buli kimu ku byombi kiri mu bbanga kiwuga.

Era kabonero gye bali (abantu), mazima Ffe twatambuliza bannaabwe mu lyato erikubyeko.

Era twabatondera (ebitambulirwako) ebifaananako lyo (eryato) kwe batambulira.

Singa tuba twagadde tuyinza okubazikiriza ne batasobola kwekubira nduulu, era nga tebayinza kudduukirirwa.

(Tewali kibaawo) okuggyako okusaasira okuva Gyetuli ne ku lw'okubeeyagaza okumala ekiseera ekigere.

Bwe baba bagambiddwa nti mutye ebyo ebiri mu maaso gammwe n'ebyo ebiri emabega wammwe, olwo nno mube nga musaasirwa (beesuulirayo gwa naggamba).

Anti tewali kabonero mu bubonero bwa Mukama Omulabirizi Waabwe kaabajjira okuggyako nga baakaawukanako.

Era bwe baba bagambiddwa nti mugabe ku ebyo Allah bye yabawa abo abaagaana okukkiriza Allah bagamba abo abakkiriza nti abaffe tuliise oyo Allah gwe yandiriisizza singa yali ayagadde, temuli mmwe okuggyako okuba mu bubuze obw'olwatu.

Era ne bagamba nti eyo endagaano eribaawo ddi bwe muba nga mwogera mazima!.

Tebalinda okuggyako olubwatuka lumu olulibakwata nga nabo bali mu kukaayana.

Olwo nno tebalisobola kulaama wadde okudda eri abantu baabwe (eka).

Olwo enngombe erifuuyibwa (olufuuwa olw'okubiri) oligenda okubalaba nga bava mu ntaana zaabwe nga banguwa bagenda eri Mukama Omulabirizi Waabwe.

Balyoke bagambe (nga bakuba ebiwoobe) nti nga tuzikiridde ani atuzuukizza okuva gye tubadde twebasse (mu ntaana zaffe bagenda kwanukulwa nti) ekyo kyekyo Katonda Omusaasizi ennyo kye yalagaanyisa era Ababaka baayogera mazima.

(Okubazuukiza) tekugenda kuba okuggyako olubwatuka lumu, olwo nno bonna gye tuli gye bagenda okuleetebwa.

Olwaleero tewali muntu agenda kulyazamaanyizibwa mu kintu kyonna era temugenda kusasulwa okuggyako ebyo bye mwali mukola.

Mazima abantu b'omu Jjana ku Lunaku olwo balibeera mu kwetala olw'amasanyu gebalibeeramu.

Bo n'abo be baafumbiriganwa nabo bagenda kubeera mu bisiikirize nga beesigamye ebitanda ebiwunde.

Balina mu yo buli kika kya bibala era balifunanga buli kye baliba basabye.

(Bagenda kufuna ekyengera ekisinga ebyo) nakyo nga ye salaamu (emirembe) nga Kigambo ekiriva ewa Mukama Omulabirizi Waabwe Oweekisa eky'enjawulo.

Naye bo aboonoonyi bagenda kugambibwa nti: Abange mmwe aboonoonyi olwaleero mweyawule (ku bakkiriza).

Abange mmwe ezzadde lya Adamu, ssaabakozesa endagaano nti: Temusinzanga Sitaane olw'okuba yye mulabe wammwe omweyolefu?!.

Era (ne mbakalaatira) nti: munsinze, eryo ly'ekkubo ettuufu.

Mazima (Sitaane) yabuza mu mmwe ebitonde bingi nnyo, abaffe mwali temutegeera.

Guno nno gwe Muliro Jahannama gwe mwalagaanyisibwanga (ku nsi).

Muguyingire Olwaleero olw'ebyo bye mwawakanyanga.

Olwaleero tujja kuteeka envumbo ku mimwa gyabwe ate gyo emikono gyabwe gyogere naffe, n'amagulu gaabwe gawe obujulizi ku ebyo bye baakolanga.

Singa twayagala twandizibye amaaso gaabwe olwo nno ne baba nga banoonya okudda eri ekkubo, naye nno bandirirabye batya!.

Era singa twayagala twandikyusizza obutonde bwabwe ne babeera mu kifo awo webali, kale nno tebandisobodde kweyongerayo wadde okudda gye bavudde.

Oyo yenna gwe tuba tuwangaazizza tumuzzaayo n'aba munafu mu butonde, abaffe tebategeera!.

(Nabbi Muhammadi) tetumuyigirizanga kutontoma era tekimugwanira, bye yajja nabyo tebiri okuggyako nga bya kujjukiza era nga Kulaani ennyonnyola.

(Nabbi Muhammadi-) alyoke atiise oyo yenna omulamu era ekigambo (eky'ebibonerezo) kikakate ku batakkiriza.

Abaffe tebalaba nti mu bye twabatondera ebyakolebwa emikono gyaffe z'ensolo bo zebafuga!.

Era twabibagondeza, mulimu bye beebagala era nga mulimu bye balya.

Era balina mu byo emigaso (emirala) n'ebyokunywa, abaffe tebeebaza?!.

Ate abatakkiriza baleka Allah ne beeteerawo ebisinzibwa ebirala mbu babe nga bataasibwa.

So nga tebisobola kubataasa awamu n'okuba nti bo nabyo baliba kibinja ekirireetebwa mu Muliro.

Kale nno tebikunyiiza ebigambo byabwe mazima Ffe tumanyi ebyo bye bakweka ne bye bakola mu lwatu.

Abaffe omuntu talaba nti mazima Ffe twamutonda nga tumujja mu mazzi agazaala, ogenda okulaba nga yye mukaayanyi ddala ow'olwatu?!

N'atukubira ekifaananyi ne yeerabira obutonde bwe, nga agamba nti ani aliramusa amagumba nga gamaze okuba amamerengufu?!

Gamba nti agenda kugalamusa oyo eyagatandika omulundi ogwasooka era nga Yye amanyidde ddala ebikwata ku buli kitonde.

Oyo eyabateerawo omuliro okuva mu muti omubisi okugenda okulaba nga mmwe mukuma omuliro okuva mu gwo (omuti).

Abaffe Oyo eyatonda eggulu omusanvu n'ensi tasobola kutonda bintu (birala) biri nga byo? Weewaawo (asobolera ddala) era ddala Yye Ye Mutonzi Omumanyi ennyo.

Mazima Ekiragiro Kye bw'aba ayagadde ekintu (kibeewo) agamba bugambi nti: ba ne kiba.

N’olwekyo, Musukkulumu nnyo oyo alina obufuzi bwa buli kintu mu Mukono Gwe ate nga Gy'ali yekka gye mulizzibwa.

Ndayidde Bamalayika abasimbye ennyiriri ennambulukufu.

Olwo nno abo abagoba ebire olugoba (bigende bitonnyese enkuba).

N'abo abasoma ebigambo ebibuulirira.

Mazima gwe musinza Omutuufu ddala ali Omu.

Mukama Omulabirizi W'eggulu omusanvu n'ensi n'ebyo ebiri wakati wa byombi era Mukama Omulabirizi W'ebuvanjuba (n'e bugwanjuba).

Mazima Ffe twawunda eggulu eliriraanye ensi n'okulabika obulungi kw'emmunyeenye (ezirijjudde).

N'okulikuuma ku buli Sitaane kyewaggula.

Tezisobola kuwuliriza bitonde ebyawaggulu era zikanyuugirirwa ebitawuliro okuva ku buli luuyi.

Nga zifuumuulwa emisinde era nga zigenda kufuna ebibonerezo ebitakoma.

Okuggyako (Sitaane) eyo enyakula ekigambo ky'eba enyakudde olwo nno n'ekasuukirirwa ekitawuliro ekigyokya.

Kale nno babuuze nti bo be bazibu mu kutonda oba ebyo bye twatonda, mazima Ffe (bo) twabatonda mu budongo obukwafu.

Wabula ggwe weewuunya (ng’okungiriza) ate nga bo bajeeja bujeeja.

Era nga bwe baba babuuliriddwa tebeebuulirira.

Era bwe balaba akabonero konna (mu bubonero bwa Katonda) nga bajeeja.

Era baagamba nti: Kino sikirala okuggyako eddogo eryeyolefu.

(Ne bongerako nti) bwe tuliba tufudde ne tufuuka ettaka era ne tuba magumba ameereere abaffe tulizuukizibwa?!

Oba bakitaffe abaakulembera.

Gamba nti yye, (mulizuukizibwa) nga nammwe mukkakkanyiziddwa.

Mazima kyo (ekyo kuzuukira) luliba olufuuwa lumu mu nngombe oligenda okulaba nga bo batunula.

Era baligamba nti: Zitusanze luno lwe Lunaku lw'okusasulwa.

(Bamalayika baligamba nti) luno lwe lunaku lw'okwawula (wakati w'abalongoofu n’aboonoonyi) olwo lwe mwali mulimbisa.

(Bamalayika baliragirwa nti) mukunngaanye abo abe wamu n'ababafaanana n'ebyo bye baasinzanga.

Ne bava ku Allah olwo nno mubalage ekkubo eridda eri omuliro Jahiimu.

Era nga (temunnabatwala) mubayimirize (mu bbaliro) mazima bo balina okubuuzibwa.

(Olwo nno bagambibwe) nti: Mubadde ki lwaki temwetaasa!.

Wabula bo ku Lunaku olwaleero bagenda kukkiriza (nti tebalina bya kukola kuvvuunuka buzibu bwe balibeeramu).

Abamu ne boolekera bannaabwe nga bawaanyisiganya ebigambo.

(Abagoberezi) ne bagamba (abaabakulemberanga) nti: Mazima mmwe mwali nga mutujjira nga mutuyita ku ddyo.

(Abaagobererwa) baligamba nti nedda wabula temwali Bakkiriza.

Era tetwabalinaako buyinza bwonna wabula mwali bantu abeewagguzi.

Olwo nno Ekigambo kya Mukama Omulabirizi Waffe ne kitukakatako (ffenna) mazima ddala ffe tuteekwa kukomba (ku bibonerezo).

Twababuza era mazima ddala ffe (okugenda okubabuza) twali babuze.

Mazima bo (ab'emirundi ebiri) bagenda kwegatta mu kibonerezo.

Mazima Ffe bwe tutyo bwe tukola aboonoonyi.

Mazima bo bwe baagambibwanga nti tewali kisinzibwa kyonna okuggyako Allah- baali nga beekuza.

Nga bagamba nti mazima ffe tuyinza okuleka bakatonda baffe ku lw'omuyimbi omulalu?!

Nedda (Nnabbi Muhammadi tali nga bwe bagamba) wabula yajja na mazima era n’akakasa ababaka (abaamukulembera).

Mazima ddala mmwe muli ba kukomba ku bibonerezo ebirumya ennyo.

Era temugenda kusasulwa wabula ebyo bye mwakolanga.

Okuggyako abaddu ba Allah abalondobemu.

Abo baliweebwa ebigabirirwa ebimanyiddwa.

(Biriba) ebibala era nga bibagabulwa.

Nga bali mu Jjana ez'ebyengera.

(Baliba) ku bitanda nga buli bamu boolekedde bannaabwe.

Nga babayisaamu (mu kubagabula) eggiraasi z'ebyokunywa eziva mu nsulo ezitakalira.

(Ebyokunywa ebyo) nga byeru ebiriwoomera abanywi.

Tebigenda kubaamu kibobbya mutwe era nga tebalitamiira olw'okubinywa.

Era baliba balina abakyala ab'amaaso amakkakkamu amanene.

Abakyala abo balibanga amagi ageegenderezebwa obutayatika.

Olwo nno abamu ne boolekera bannaabwe nga bawaanyisaganya ebigambo.

Omwogezi (omu) ku bo aligamba nti mazima nze nnalina ow'omukwano.

Yalinga anngamba nti abaffe ggwe oli mu abo abakakasa.

Nti bwe tulifa netufuuka ettaka n’amagumba ameereere, abaffe tuli baakubalibwa?

Omukozi w’obulungi aligamba nti: abaffe mulaba ekiri mu Muliro.

Olwo alitunulayo n’amulaba nga ali mu makkati g’Omuliro Jahiimu.

Aligamba nti ndayidde Allah, wabula kata onzikirize.

Singa si kyengera kya Mukama Omulabirizi Wange nnaalibadde mu baleeteddwa (eri Omuliro).

Ate ffe tetukyaddayo na kufa!.

Okuggyako okufa kwaffe okwasooka era nga tetuli ba kubonerezebwa.

Mazima okwo ddala kwe kwesiima okusuffu.

(N’olwekyo) ku lw’ebintu nga bino abatakabana baalitakabanye.

Abaffe obwo bwe bugenyi obulungi oba omuti gwa Zakkuumi.

Twagussaawo nga kikemo eri abalyazamaanyi.

Mazima gwo muti guva ku ntobo ya Muliro Jahiimu.

Ebibala byagwo (okumanya bibi) bifaananako emitwe gya Sitaane.

Mazima bo bagenda kugulyako bagujjuze embuto (zaabwe).

Oluvanyuma bagenda kubongerezaako ebyokunywa ebitabuddwa mu lweje.

Oluvannyuma mazima obuddo bwabwe buli mu Muliro Jahiimu.

Mazima bo baasanga bakadde baabwe nga babuze.

N’olwekyo bo mu buwuufu bwabwe batwalibwa kantindiggwa.

Era mazima olubereberye lwabwe abasinga obungi mu baasooka baabula.

So nga ate twatuma mu bo abatiisa.

Kale tunuulira olabe enkomerero y'abaatiisibwa yali etya.

Okuggyako abaddu ba Allah abalondemu.

Mazima Nuuhu yatukoowoola Naffe nno twali abaamwanukula obulungi.

Ne tumuwonya n’abantu be akabenje akayitirivu.

Ne tufuula ab'ezzadde lye ne baba bo nga be basigaddewo.

Ne tumulekerawo okwogerwako okulungi mu balijja oluvanyuma.

Emirembe gibeere ku Nuuhu (n’okwogerwako okulungi) mu bitonde byonna.

Mazima Ffe bwetutyo bwe tusasula abakozi b’obulungi.

Mazima (Nuuhu) ali mu baddu Baffe Abakkiriza abannamaddala.

Oluvanyuma twazikiriza abasigadde (abatakkiriza Nuuhu).

Era mazima ddala Ibraahiimu yali ku nkola ye(Nuhu).

Kubanga yajja ewa Mukama Omulabirizi We n’omutima omuyonjo.

Bwe yagamba kitaawe n’abantu be nti biki bye musinza?

Ebisinzibwa ebijingirire bye mwagala ne muleka Allah?!

Olwo Mukama Omulabirizi W’ebitonde byonna, kiki kye mumulowoozaako?.

Olwo nno n'atunula olutunula mu mmunyeenye (nga enkola y'abantu be bwe yali).

N'agamba nti: Mazima nze ndi mulwadde.

Olwo ne bamuvaako ne bamulekawo.

Olwo n'akyukira eri ebisinzibwa byabwe n'alyoka abigamba nti: Lwaki temulya?.

Mwabaaki, nga temwogera!.

Olwo kwe kutandika okubatema n’omukono gwe ogwaddyo.

Olwo (abantu ba Ibraahiimu bwe baamanya ky'akoze) bajja gyali nga banguwa.

(Ibraahiimu) n'agamba nti, musinza ebyo bye mubajja?!

So nga Katonda Ye yabatonda mmwe n'ebyo bye mukola.

Ne bagamba nti: Mumuzimbire ekifo (mukikumemu omuliro) olwo nno mumukasuke mu nnabengeya w’omuliro.

Mu kukola ekyo, baagenderera okumukolera olukwe (bamutte) wabula ne tubafuula abaawansi (bwe twalemesa olukwe lwabwe).

(Awo Ibraahiimu n'asalawo okusenguka) era n'agamba nti mazima nze nngenda ewa Mukama Omulabirizi Wange ajja kunnunngamya.

Ayi Mukama Omulabirizi Wange ngabira (omwana) nga wa mu balongoofu.

Olwo ne tumusanyusa nti ajja kufuna omwana omulenzi ow'ekisa.

Omwana oyo (Ismail) bwe yatandika okutambula naye (Ibraahiimu) n'agamba nti: owange mutabani wange nkirabye lunye mu kirooto mazima nze nga nkusala kale tunula olabe, ogamba ki? (Ismail) n'agamba nti: Owange taata kola ekyo ky'olagirwa, Allah nga ayagadde ojja kunsanga nga ndi mu bagumiikiriza.

Bombi bwe baamala okwewaayo eri (Ekiragiro kya Katonda) yamugalamiza nga amuwunzise.

Ne tumukoowoola nti owange Ibraahiimu.

Mazima otuukirizza ekirooto, mazima Ffe bwetutyo bwe tusasula abalongoosa.

Mazima ekyo (ekyatuuka ku Ibraahiimu n’omwana we) ddala kwe kugezesa okw'olwatu.

Era (Ismail) twamununula n'ensolo ensuffu eyasalibwa.

Ne tumulekerawo okwogerwako okulungi mu balijja oluvannyuma.

Emirembe gibeere ku Ibraahiimu.

Bwetutyo bwe tusasula abalongoosa.

Mazima yye ali mu baddu baffe Abakkiriza abannamaddala.

Era twamusanyusa n’okumuwa Isihaaka nga Nnabbi wa mu balongoofu.

Era twamuwa omukisa net tuguwa ne Isihaaka era mu zzadde lyabwe bombi mwalimu omulongoosa n'eyeeyisa obubi ow'olwatu.

Mazima twabunduggula ebyengera ku Musa ne Haaruuna.

Ne tubawonya n’abantu baabwe bombi akabenje ak'amaanyi.

Ne tubataasa ne baba nga be bawanguzi.

Bombi ne tubawa Ekitabo ekinnyonnyofu (okumulisa ekkubo).

Era twabalunngamya mu kkubo eggolokofu.

Era bombi twabalekerawo okwogerwako okulungi mu balijja oluvannyuma.

Emirembe gibeere ku Musa ne Haaruuna.

Mazima Ffe bwetutyo bwe tusasula abakozi b’obulungi.

Mazima bombi ba mu baddu Baffe Abakkiriza (abannamaddala).

Era mazima ddala Eliyaasa wa mu Babaka.

Jjukira ekiseera bwe yagamba abantu be nti abaffe temutya (Katonda)?!

Musinza ekibumbe ne muleka (Katonda) Omutonzi asinga ababumbi bonna.

Allah Ye Mukama Omulabirizi Wammwe era Ye Mukama Omulabirizi Wa bakadde bammwe abaasooka.

Ne bamulimbisa n’olwekyo mazima bo baakuleetebwa (babitebye).

Okuggyako abaddu ba Allah abalondobemu.

Ne tumulekerawo okwogerwako okulungi mu balijja oluvannyuma.

Emirembe gibe ku bantu ba Eliyaasa.

Mazima Ffe bwetutyo bwe tusasula abakozi b’obulungi.

Mazima yye ali mu baddu baffe Abakkiriza abannamaddala.

Era mazima Luutu wa mu Babaka.

(Jjukira) bwe twamuwonya n’abantu be bonna.

Okuggyako omukadde (Mukyala we) eyali mu baasigala.

Oluvanyuma twazikiriza abaasigala.

Era mazima mmwe mubayitako (muyita ku matongo gaabwe) ku makya.

N'ekiro, abaffe temutegeera?!

Era mazima Yunusu wa mu Babaka.

Jjukira bwe yabomba n'alinnya eryato eryali eryali limaze okutikka.

(Bwe lyasemberera okusaanawo olw'okuba lyali litisse nnyo), olwo nno (Yunusu) yeetaba mu kalulu (ak'okusalawo ab'okukasukibwa mu nnyanja, akalulu kaagenda okuggwa) nga ali mu be kakutte (ne bamukasuka mu nnyanja).

Olwo nno ekyennyanja kwe kumumira nga ye y'anenyezebwa.

Singa mazima ddala teyali mu batendereza (Katonda).

Yandibadde mu lubuto lwakyo okutuusa ku Lunaku lwe balizuukizibwa.

Wabula twamukasuka ku lukalu naye nga yali mulwadde.

Twamumereza ekimera eky'ekiryo (kimusiikirize kimugobeko n'ensowera).

Era twamutuma eri abantu emitwalo kkumi n'okusingawo.

Bonna ne bakkiriza, olwo nno ne tubeeyagaza okutuuka ebbanga eggere.

Kaakano ggwe babuuze (Abakurayishi) nti Mukama Omulabirizi Wo y'azaala abawala bo ne bazaala abalenzi?!

Oba abaffe bo baaliwo nga tutonda Bamalayika nga bakazi.

Abange mazima mu kutemerera kwabwe batuuka n'okugamba nti:

Allah yazaala nga ate ddala bo balimba.

(Katonda) asalawo okutwala abawala n'aleka abalenzi!.

Mwaba ki, mulamula mutya (ebintu)?!

Abaffe temwebuulirira!.

Oba mulina obujulizi obweyolefu (nga kye kibakozesa ekyo).

Kale muleete ekiwandiiko kyammwe bwe muba ab'amazima.

(Abatakkiriza) ne bateeka oluganda wakati we (Katonda) n'amajinni, nga ate amajinni gamanyi nti mazima go gaakuleetebwa (mu maaso ga Katonda gabitebye).

Allah Musukkulumu ku bye boogera.

Okuggyako abaddu ba Allah abalondobemu.

Kale nno mazima ddala mmwe n'ebyo bye musinza.

Temusobola mmwe kufiiriza Katonda (ne mumuggyako abaddu Be).

Okuggyako oyo ow'okwesonseka Omuliro Jahiimu (oyo musobola okumubuza).

(Ba Malayika ne bagamba nti) era tewali n'omu ku ffe okuggyako nga alina ekifo ekimanyiddwa.

Era mazima ffe (bulijjo) tubeera mu nnyiriri (nga tusinza Katonda).

Era mazima ffe ddala ffe abatendereza (Katonda).

Newaakubadde nga (abawakanyi) abo ddala bagamba nti:

Ddala singa twalina okujjukizibwa nga kuva eri abaasooka.

Twandibadde abaddu ba Allah abalondobemu.

(Wabula kitalo byonna ebyo bwe byajja nga ne Nabbi Muhammad kwali) baabiwakanya, kale kyaddaaki balimanya.

Mazima Ekigambo Kyaffe kyakulembera eri abaddu Baffe abaatumwa.

Nti mazima bo ddala be b'okutaasibwa.

Era mazima amagye Gaffe ddala go ge mawanguzi.

Kale baveeko okutuusa ekiseera ekigere.

Era batunuulire kyaddaaki baliraba.

Abaffe Ebibonerezo Byaffe bye basaba bibatuukeko mangu.

Lwe birituuka mu luggya lwabwe galiba makya mabi eri abaaweebwa amawulire agabatiisa (Omuliro ne batawulira).

Era baveeko okutuusa ekiseera ekigere.

Era tunula kyaddaaki baliraba.

Mukama Omulabirizi Wo wo, Nnannyini buyinza Musukkulumu ku ebyo bye boogera.

Era emirembe gibeere ku babaka (ba Katonda).

Era buli kitendo kya Mukama Omulabirizi W'ebitonde.

Swaad. Ndayidde Kulaani ejjudde okujjukiza.

Wabula abaawakanya bali mu kwekuza na kuwalaaza mpaka.

Emirembe emeka gye twazikiriza olubereberye lwabwe, abaatuuka okukuba ebiwoobe (nga banoonya okutaasibwa), naye nga tewakyali buwonero.

Ne beewuunya okuba nga omutiisa abajjira ng'ava mu bo, era abatakkiriza ne bagamba nti ono mulogo omulimba (awedde emirimu).

Abaffe ebisinzibwa ebingi abifudde omu! Mazima ekyo kintu ekyewunyisa ennyo.

Ekibinja ky'abakungu mu bo ne kigenda (nga kikunga abantu) nti: Mugende mu maaso mugumire (mulemere) ku bisinzibwa byammwe, anti kino kintu ekigendererwa (okuleka ebisinzibwa ebirala tudde ku Allah asinzibwa Omu).

Mazima kino (eky'okubaggya ku bisinzibwa byammwe) kkobaane (Muhammadi mw'ayagalira okuyita abaggye ku nsinza yammwe), kino tetukiwulirangako mu nzikiriza (ey'abagoberezi ba Yisa) eyasembayo, kino tekiri okuggyako kiyiiye (buyiiya).

Mu ffe fenna yye (Muhammadi) y'assiddwaako obubaka! wabula (ekibaleetera obuzibu) lwa kuba bo bali mu kubuusabuusa okubuulirira kwange wabula (bakola ekyo) lwa kuba tebannakomba ku Bibonerezo Byange.

Oba (kyebava beeyisa bwe batyo) lwa kuba balina amawanika g'okusaasira kwa Mukama Omulabirizi Wo, Nnantakubwakumukono Omugabi?!

Oba bo balina obufuzi bw'eggulu omusanvu n'ensi n'ebyo ebiri wakati wa byombi, bwe kiba bwekityo, kale baleke bakozese kyonna kye basobola bafuneyo bye baagala.

Bo, ggye eriri awo lya kuwangulwa, libalibwa mu bibinja (ebyawangulwa).

Mazima olubereberye lwabwe abantu ba Nuuhu ne A-adi ne Falaawo nnannyini nkondo baalimbisa.

Ne ba Thamuudu n’abantu ba Luutu n’abantu b’omukibira, ebyonno bye bibinja (ebyogeddwaako mu Aya 11).

Tewali muntu yenna mw'abo okuggyako nga yalimbisa Ababaka, olwo nno ebibonerezo byange ne bikakata (ku bo).

Abo tebalindirira okuggyako lubwatuka lumu (oluliba olw'amaanyi) nga terwetaaga kuddibwamu mulundi mulala.

Era (abatakkiriza) baagamba nti ayi Mukama Omulabirizi Waffe twanguyirize omugabo gwaffe (ogw'ebibonerezo) nga Olunaku lw'okubalibwa terunnatuuka.

(Katonda agamba Nnabbi Muhammadi nti:) Gumiikiriza ku bye boogera ojjukire omuddu Waffe Dawuda eyalina amaanyi amasuffu (awamu n'ekyo) yali adda nnyo eri Katonda.

Mazima Ffe twagonza ensozi ne ziba nga zitenderereza wamu naye olweggulo n’obudde nga busaasaana.

Era twagonza n’ebinyonyi nga biri mu bibinja (byabyo) buli kimu ku byo nga kigondera Dawuda (nebitendereza nga bw'atendereza).

Era twanyweza obufuzi bwe era ne tumuwa okumanya ensonga n’okusalawo ekituufu ku bigambo ebiba byogeddwa.

Abaffe amawulire g’abaakaayana bwe baawalampa ekisenge (Dawuda mweyasinzizanga) gaakutuukako?

Bwe baayingira Dawuda we yali n'abeekanga ne bagamba nti: totya (ffe) tuli abakaayana ababiri nga omu kuffe asobezza munne, kale lamula wakati waffe n’amazima teweekubiira era otulage enkola entuufu.

Mazima muganda wange ono alina endiga kyendamumwenda nga ate nze nnina endiga emu, ate anngamba nti gimpe ngikulundire ate nga ansinga ebigambo.

(Dawuda) n'agamba nti: Mazima akulyazaamaanyizza bw'akusabye endiga yo agigatte ku ndigaze, ate nga bangi mu bagatta emirimu basobya bannaabwe, okuggyako abo abakkiriza ne bakola emirimu emirongoofu wabula ate abo batono, Dawuda n'amanya nti mazima tumugezesezza ne yeegayirira Mukama Omulabirizi We n'akutama ku maviivi ne yeemenya era n'adda eri Katonda.

Olwo nno ekyo ne tukimusonyiwa, era mazima alina Gyetuli ekifo eky'okumwanjo n’obuddo obulungi.

Owange Dawuda, mazima Ffe twakufuula omusigire ku nsi, lamula wakati w'abantu mu mazima era togobereranga okwagala (kwo) ne kukubuza okuva ku kkubo lya Allah, mazima abo ababula ne bava ku kkubo lya Allah, balifuna ebibonerezo ebikakali olw'ebyo ebyabeerabiza Olunaku lw'Okubalibwa.

Eggulu n'ensi n'ebyo ebiri wakati wa byombi, tetwabitonda nga bya lusaago, eyo ndowooza y'abo abaawakanya, kale nno okubonaabona kuliba ku abo abaawakanya nga bali mu Muliro. .

Oba (basuubira nti) abo abakkiriza ne bakola emirimu emirongoofu, tulibayisa nga aboonoona mu nsi, oba abatya Katonda be tuliyisa nga aboonoonyi!.

(Kulaani eno) Kitabo twakissa gy'oli nga kya mukisa babe nga beekenneenya ebigambo byakyo era ab'amagezi agakola babe nga beebuulirira.

Era Dawuda twamugabira Sulayimaani, yali muddu mulungi, (anti) mazima yye yali adda nnyo eri Katonda.

Jjukira bwe yayanjulirwa mu kiseera eky'olweggulo embalaasi ezirabika obulungi nga ziyimiridde (ate) eziwenyuka (bwe ziba zidduse).

N'agamba nti mazima nze nkulembezza okwagala ebirungi ku kutendereza Mukama Omulabirizi Wange (ne nzira mu kutunuulira embalaasi) okutuusa enjuba lw'ebuliddeyo!.

(Oluvannyuma yagamba nti) muzinkomezeewo, olwo nno n'atandika okuzisala amagulu n'ensingo (naasaddaaka ennyama yaazo).

Era mazima twagezesa Sulayimaani ne tuteeka omubiri (ogutaliimu bulamu) ku nnamulondo ye, (naye) oluvannyuma yeenenya.

N'agamba nti: Ayi Mukama Omulabirizi Wange nsonyiwa ongabire obwakabaka obutalisaanira mulala yenna oluvannyuma lwange, (anti) mazima Ggwe Mugabi.

Olwo nno ne tumugondeza empewo nga etambula ku lw'ekiragiro kye mu ngeri ya mirembe n'egenda wonna w'aba asazeewo.

Era twamugondeza Sitane (nga mu zo mwalimu) enkugu mu kuzimba n'endala nga zibbira mu nnyanja.

Era nga ne (Sitaane) endala zisibiddwa ku njegere (anti zo zaagaana okukola).

Ne tumugamba (nti) okwo kwe kugaba Kwaffe, kale gabako oba omme (nga bw'olaba) awatali kubuuzibwa.

Era mazima (Sulayimaani) alina Gyetuli ekifo kya kumwanjo n’obuddo obulungi.

Era jjukira omuddu Waffe Ayyuubu bwe yakoowoola Mukama Omulabirizi We (n'agamba nti) mazima nze Sitaane andeetedde ennaku n’obuzibu (Ayi Mukama nkusaba omponye).

(Katonda n'amugamba nti) samba ettaka n'ekigere kyo awo amazzi ne gafukula era ne bamugamba nti amazzi gano mannyogovu ga kunaaba na kunywa (ly'eddagala erikuweereddwa).

Era ne tumuwa (nga tuzzaawo) abantu be era awamu nabo (netumuwa) abalinga bo (ebyo byonna) nga kusaasira okuva Gyetuli era nga kubuulirira eri abo abalina amagezi.

Era (n'alagirwa nti) kwata ekisaaganda ky'obuti olwo nno okimukubise (mukyalawo) anti bw'otyo bwe walayira oleme umenya kirayiro kyo, mazima Ffe twamusanga (Ayyuubu) nga mugumiikiriza era nga muddu mulungi, anti mazima yye adda nnyo eri Katonda.

Era jjukira abaddu Baffe Ibraahiimu ne Isihaaka ne Y'akuubu abaalina amaanyi n’okulengera ewala.

Mazima Ffe twabaawula n'enkizo ey’okujjukira ennyumba ey’olubeerera (Enkomerero).

Era mazima bo Gyetuli ba mu baawule abalondemu.

Era jjukira Ismail ne Eliyasa-a ne Zulkifuli, na buli omu kwabo wa mu balondemu.

Kuno kujjukiza, era mazima ddala abatya Katonda bagenda kufuna obuddo obulungi.

(Obuddo obwo buliba) Jjana ez’emirembe, nga emiryango (gyazo) giriba gibagguliddwa.

Balibeera beesigamye nga bali mu zo, nga bwe batumya mu zo ebibala ebingi nga byanjawulo wamu n'eby'okunywa.

Era baliba balina abakyala abakkakkamu b'amaaso ab'emyaka egyenkana.

(Baligambibwa nti) kino (kye mutuseeko) kyekyo kye mwalagaanyisibwa okuweebwa ku Lunaku lw'okubalibwa.

Mazima ebyo kwe kugabiririra Kwaffe tekuyinza kukalira.

Ekyo kyekyo, naye mazima abeewagguzi balifuna obuddo obubi.

Nga Muliro Jahannama gwe balyesogga naye buliba buliri bubi ddala.

Kino (kye balimu bye bibonerezo ebiruma ennyo) kale balibikombako nga nabyo mazzi agookya n'amasira ag'olusaayisaayi.

Ne (ebibonerezo) ebirala ebiringa ebyo eby'engeri ez'ejawulo (nabyo biribatuukako).

(Buli aboonoonyi abapya lwe banaaleetebwanga mu muliro, nga abasookayo bagambibwa nti:) kino kibinja kyesozze omuliro awamu nammwe (olwo abalisangwamu bagambe nti) abo tebaanirizibwa (tebalina mirembe) mazima bo beesozze muliro.

(Abaagoberera) baligamba (abaasooka) nti wabula mmwe, mmwe mutaanirizibwa, mmwe mwabituleetera, bugenda kuba butuulo bubi.

Baligamba nti: Ayi Mukama Omulabirizi Waffe oyo eyatuleetera bino mwongere ebibonerezo eby'okuba mu Muliro nga bikubisiddwamu.

Era (aboonoonyi) baligamba nti lwaki tetulaba bantu be twali tubalira mu bakyamu!.

Abaffe twabafuula eky'okujeeja (so nga baali balungi) oba amaaso ge gatabalaba.

Mazima ebyo (ebyogeddwa) ddala (okwo kwe kuliba) okuyombagana kw'abantu b'omu Muliro.

Bagambe (ggwe Nnabbi Muhammadi) nti: Mazima nze ndi mutiisa era tewali kisinzibwa kyonna mu butuufu okuggyako Allah Omu Omukasi.

Mukama Omulabirizi W'eggulu omusanvu n'ensi n'ebyo ebiri wakati wa byombi, Nnantakubwakumukono, Omusonyiyi ennyo.

Bagambe nti kyo (kye mbagamba) kigambo kikulu ddala.

(Ate) mmwe kye mwawukanako.

Sibangako na kumanya kwonna ku bikwata ku bakungu abaawaggulu we baakaayanira, (Bamalayika bwe beemulugunya nga baagala Katonda b'aba asindika ku nsi mu kifo kya Adamu).

Ssaatumirwa kirala kyonna okuggyako (okuba) nti mazima ddala nze ndi mutiisa owoolwatu.

Jjukira ekiseera Mukama Omulabirizi Wo bwe yagamba Bamalayika, nti mazima nze nja kutonda omuntu nga mmuggya mu kadongo.

Bwe nnaamala okumutereeza ne mmufuuwamu omwoyo oguva gyendi, kale mukkakkane nga mumuvunnamira.

Olwo nno Bamalayika bonna nga bali wamu baavunnama.

Okuggyako Ibuliisu yeekuluntaza n'aba mu bawakanyi.

(Katonda) n'agamba nti owange Ibuliisu, kiki ekikugaanye okuvunnamira oyo gwe ntonze ne Emukono Gyange, abaffe wetwala nti oli waakitiibwa (okusinga Adamu), oba lwakuba nti bulijjo oli mu ba kiwagi ku Katonda.

(Ibuliisu) n'agamba nti: nze mmusinga, wantonda mu Muliro ate (yye) wamutonda mu kadongo.

(Katonda) n'agamba nti: kale gifulume (Ejjana) mazima ggwe ogobeddwa (era oli mukolimire).

Era mazima ekikolimo Kyange kikukakaseeko okutuusa ku Lunaku lw'okusasulwa.

(Ibuliisu) n'agamba nti: Ayi Mukama Omulabirizi Wange, nnindiriza okutuusa ku Lunaku lwe balizuukizibwa.

(Katonda) n'agamba nti: Mazima ggwe oli mu balindiriziddwa.

Okutuuka ku Lunaku olw'ekiseera ekimanyiddwa.

(Ibuliisu) n'agamba nti: Ndayira Ekitiibwa Kyo nja kubabuliza ddala bonna.

Okuggyako abaddu Bo abalondobemu mu bo.

(Katonda) n'agamba nti: Ago nno ge mazima, era nga bulijjo njogera mazima.

Ddala nngenda kujjuza Omuliro Jahannama (nga nguteekamu) ggwe n'abo bonna abakugondera mu bo.

Gamba (ggwe Muhammadi nti: Ekyokubatuusaako Obubaka) sikibasabirako mpeera, era nga bwe siri mu beetumiikiriza.

(Kulaani) yyo si kirala okuggyako okuba nti kya kubuulirira eri ebitonde.

Era ekigambo kyayo mujja kukimanyira ddala oluvannyuma lw'ekiseera kitono.

Okussa Ekitabo kino (Kulaani) kuva ewa Allah Nnantakubwakumukono, Mugobansonga.

Mazima Ffe twassa gy'oli Ekitabo mu butuufu. Kale sinza Allah nga eddiini yonna ogikola ku Lulwe Yekka.

Abange eddiini ensengejje ya Allah Yekka. Bo abamuvaako ne beeteerawo abakuumi abalala (nga bagamba nti:) Tetubasinza okuggyako lwa kutusembeza kumpi eri Allah, mazima Allah agenda kulamula wakati waabwe mw'ebyo bo bye baawukanamu, mazima Allah talunngamya muntu oyo omulimba awalaaza empaka.

Singa Allah yayagala kweteerawo mwana yaalibadde alonda ekyo ky'ayagadde mw'ebyo by'atonda, naye wabula Musukkulumu nnyo (teyeetaaga mwana) Yye Ye Allah ali Omu Omukasi.

Yatonda eggulu omusanvu n'ensi mu butuufu, abikka ekiro ku misana nga bw'abikka emisana ku kiro, era yagonza enjuba n'omwezi, buli kimu kya kutambula okumala ebbanga eggere, abange Yye Allah Ye Nnantakubwakumukono, Omusonyiyi ennyo.

Allah yabatonda nga abaggya mu muntu omu oluvannyuma n'amuggyamu mukyala we, era n'abawa mu bisolo eby'omumaka emitindo munaana, abatondera mu mbuto za bannyammwe, nga kuba kutonda luvannyuma lwa kutonda, nga muli mu bizikiza bisatu, oyo nno ye Allah Mukama Omulabirizi Wammwe, obufuzi bwonna bubwe tewali kisinzibwa mu butuufu okuggyako Yye, kale ate mukyusibwa mutya!.

Bwemuwakanya, mazima Allah talina kye yeetaaga ku mmwe era tayagaliza baddu be butakkiriza, naye bwe mwebaza (ekyo) akibasiimako, era omwoyo omwonoonyi tegugenda kwetikka bibi bya mulala, oluvannyuma obuddo bwammwe buli eri Mukama Omulabirizi Wammwe, olwo nno abamanyise ebyo bye mwakolanga (anti) mazima Yye amanyidde ddala ebiri mu bifuba.

Akabi bwe katuuka ku muntu, asaba Mukama Omulabirizi We ng'amwenenyeza, oluvannyuma bw'amuwa ekyengera kyonna okuva Gy'ali, nga yeerabira Oyo gwe yali asaba mu kusooka olwo nno n'assa ku Allah ebisinzibwa ebirala, abe nga abuza (abantu) okubaggya ku Kkubo Lye (Katonda). Gamba nti: Weeyagale katono n'obutakkiriza bwo, (anti) mazima ggwe oli wa mu bantu ba mu Muliro.

Abaffe oyo asinza mu biseera by'ekiro nga avunnama era ng'ayimirira (ng'asaala) nga atya Olunaku lw'Enkomerero ate nga asuubira okusaasira kwa Mukama Omulabirizi We, (oyo yenkana n'atakola ekyo) gamba (ggwe Nnabbi Muhammadi) nti: Abaffe abamanyi n'abatamanyi benkanankana? Mazima (abamanyi enjawulo eyo) era nga beebuulirira be ba nnannyini magezi amatuufu.

Gamba (ggwe Nnabbi Muhammadi) nti: Abange mmwe abaddu Bange Abakkiriza, mutye Mukama Omulabirizi Wammwe, abo abakola obulungi mu bulamu buno obw'okunsi balina obulungi (nga bakyali ku nsi, ne mu bulamu obw'oluvanyuma) era ensi ya Allah ngazi (muyinza okusenguka ku lw'okusinza Katonda Wammwe mu mirembe) so nga bo ababa bagumiikirizza (ne batasenguka) baliweebwa empeera yaabwe awatali kubalirira.

Gamba (ggwe Nnabbi Muhammadi nti:) mazima nze nnalagirwa okusinza Allah, nga Eddiini ngikola ku Lulwe yekka-Allah.

Era nnalagirwa mbe nga nze nsoose okuba mw'abo abasiramuse (abajeemulukuse).

Gamba ggwe (Nabbi Muhammadi) nti mazima nze ntya singa mba njeemedde Mukama Omulabirizi Wange (okutuukibwako) Ebibonerezo by'Olunaku Oluzibu.

Gamba nti: Nsinza Allah, nga eddiini yange ngikola ku Lulwe Yekka.

Kale mmwe musinze ebyo bye muba mwagadde ebitali Yye, era gamba nti mazima abantu ab'okufaafaaganirwa beebo abagenda okufaafaaganirwa emyoyo gyabwe n’abantu baabwe ku Lunaku lw'Enkomerero, okwo nno kwe kufaafaaganirwa okweyolefu.

Balina waggulu waabwe emizingo gy’omuliro ate nga ne wansi waabwe eriyo emizingo emirala. Ekyo nno Allah atiisa nakyo abaddu Be nga abagamba nti: Abange abaddu bange kale muntye.

Ate abo abeesamba okusinza ebisinzibwa eby'obulimba nebadda eri Allah balina amawulire ag'essanyu n'olwekyo sanyusa abaddu Bange.

Abo abawuliriza ebigambo ne bagoberera ebisinga obulungi mu byo, abo beebo Allah be yawa obulunngamu, era abo be bannannyini magezi amatuufu.

Abaffe oyo gwe kikakaseeko ekigambo ky'ebibonerezo (olw'okwonooneka kwe oyinza okumulunngamya!) abaffe ggwe oyinza okutaasa oyo ali mu Muliro?!.

Naye abo abatya Mukama Omulabirizi Waabwe balina ennyumba eza kalina nga waggulu waazo ate wazimbiddwayo ennyumba endala, emigga nga gikulukutira wansi waazo, (eyo) nga Ndagaano ya Allah (ate) nga Allah tayawukana ku Ndagaano.

Abaffe tolaba nti mazima Allah assa okuva waggulu amazzi n'agakulukusiza mu nsulo eziri mu ttaka, oluvannyuma n'ameza nago ebibala ebya langi ez'enjawulo, oluvannyuma ne bikala (ebibadde ebyakiragala) n'obiraba nga bifuuse bya kyenvu, oluvanyuma abifuula ebisubi ebikutusekutuse. Mazima mu ekyo mulimu okujjukiza eri abalina amagezi.

Abaffe oyo Allah gw'ayanjululiza ekifuba kye eri Obusiraamu, olwo nno yye n'aba nga ali ku kitangaala ekiva eri Mukama Omulabirizi We (afaanana n'oyo alina omutima omukakanyavu!) okubonaabona kuli kwabo abakakanyavu b’emitima gyabwe egiva ku kutendereza Allah, abo bali mu bubuze obw'olwatu.

Allaha yassa Ebigambo ebisinga obulungi (Kulaani) nga Kitabo ekirina Ebigambo ebifaanagana (naye nga tebikontana) nga kiddinngana ensonga (awatali kukooya awuliriza) gyesisiwala ku lwakyo emibiri gy'abo abatya Mukama Omulabirizi Waabwe (bwe kyogera ku bibonerezo) oluvannyuma emibiri gyabwe n'emitima gyabwe gikkakkana bwe giba giwulidde ebigambo ebyogera ku Katonda (n'Okusaasira Kwe) ekyo (Ekitabo Kulaani) kulunngamya kwa Allah, alunngamya nakyo oyo gw'aba ayagadde, ate oyo yenna Allah gw'abuza tayinza kufuna amulunngamya.

Abaffe oyo aligezaako okuwonya ekyenyi kye ku bibonerezo by'Olunaku lw'Enkomerero (ayinza okufaanana n'oyo aliwona yenna olw'emirimu gye emirungi), era abeeyisa obubi baligambibwa nti: Mukombe (ku bukaawu) bw'ebyo bye mwakolanga.

Abo abaabakulembera baalimbisa (nga nabo bwe balimbisa) olwo nno Ebibonerezo ne bibajjira okuva we baali tebasuubira.

Olwo nno Allah n'abakombesa ku buswavu mu bulamu obw'ensi ate nga Ebibonerezo by'Enkomerero bye bisinga obukakali, singa baali bamanyi.

Mazima tukubidde abantu mu Kulaani eno buli kifaananyi babe nga beebuulirira.

Kulaani (twagissa) nga eri mu luwalabu nga teriimu bukyamu bwonna babe nga batya Katonda.

Allah yakuba ekifaananyi ky'omusajja (omuddu) ng'aliko bakama be bangi abakaayana (n'atamanya ani gw'asooka okuweereza) n’omusajja omulala (omuddu) nga wa muntu omu, abaffe mu kulaba bafaanana?! Ebitendo byonna bya Allah, wabula abasinga obungi mu bo tebamanyi.

Mazima ggwe (Nnabbi Muhammadi) ojja kufa era mazima ddala nabo baakufa.

Oluvanyuma mazima mmwe (mwenna wamu) mugenda kuwozannganya ewa Mukama Omulabirizi Wammwe ku Lunaku lw'Enkomerero.

Ani mulyazaamaanyi okusinga oyo ayogera obulimba ku Allah era n'alimbisa amazima bwe gaamujjira (yeeyinula ki?) Abaffe mu Muliro Jahannama temuli nfo za bawakanyi?

Ate oyo eyaleeta amazima era n’agakkiririzaamu, abo be batya Katonda.

Balifuna bye baagala ewa Mukama Omulabirizi Waabwe eyo y'empeera y'abo abalongoosa.

Allah abe nga abasonyiwa ebibi ebyo bye baakola, era abasasule empeera yaabwe olw'ebirungi ebyo bye baali bakola.

Abaffe Allah tamalira muddu We, balyoke batuuke okukutiisatiisa n'abo abatali Yye, oyo yenna Allah gw'abuza tagenda kufuna mulunngamya.

Oyo yenna Allah gw'alunngamya tabaako amubuza, abaffe Allah si Ye Nnantakubwakumukono, asobola okubonereza abo (abeeyisa obubi mu baddu Be).

Singa obabuuza nti ani yatonda eggulu omusanvu n'ensi, ddala bajja kugamba nti Allah, bagambe nti abaffe (mmwe) mulaba nti ebyo bye musaba ne muleka Allah singa Allah aba anjagalizza akabi byo bisobola okuggyawo akabii Ke, oba singa aba anjagalizza kusaasira (kirungi) abaffe byo bisobola okuziyiza okusaasira Kwe, gamba nti Allah amala (era bulijjo) abaagala owookwesiga Yye Yekka Gwe beesiga.

Bagambe nti: abange bantu bange mukolere ku nkola yammwe, mazima nze nkola (ku nkola eyange) luliba olwo ne mumanya.

Ani ebibonerezo gwe birijjira nga bimuswaza era n'atuukwako ebibonerezo eby'olubeerera.

Mazima Ffe twassa ku ggwe Ekitabo eky'amazima nga kya bantu bonna oyo alunngama aba yeerunngamidde, ate oyo abula, ekibi ky'okubula kwe kidda gy'ali, era ggwe toli mukuumi ku bo.

Allah y'atuusa entuuko z'emyoyo bwe gituuka okuva mu mibiri gyagyo, n'ogwo oguba tegufiiridde mu tulo twagwo (guba mu mikono gye) olwo nno gw'aba asazeewo nti agwetaaga gufe n'agutwala, ate omulala n'aguleka okumala ebbanga eggere, mazima mu ekyo mulimu eby'okuyiga eri abo abafumiitiriza.

Oba (ekibayinula) kuba nti baleka Allah ne beeteerawo abawolereza! Bagambe nti: (Bwe gutyo bweguba) newaakubadde nga (abawolereza abo) tebafuga kintu kyonna era nga tebategeera.

Bagambe nti: Okuwolereza kwonna kuli mu Mikono gya Allah. obufuzi bw'eggulu omusanvu n'ensi BubweYekka oluvannyuma Gy'ali gye mulizzibwa.

Allah bw'aba nga ayogeddwako Yekka (n'atagattibwako kintu kirala) emitima gy'abo abatakkiriza Nkomerero gyenyinyimbwa, naye singa abatali Yye boogerwako ogenda okulaba nga abo (abagatta ebintu ebirala ku Allah) basanyuukirira.

Gamba nti ayi Mukama Omutonzi W'eggulu omusanvu n'ensi, Omumanyi W'ebikusike n'ebirabwako, Ggwe oliramula wakati w'abaddu Bo mw'ebyo bye baali baawukanamu.

Singa ddala ebyo ebiri mu nsi byonna n'ebirala ebiringa byo nga by'abo abalyazaamaanyi obubi bandiyagadde okwenunula nabyo okuwona obuzibu bwe bibonerezo byo lunaku lw'enkomerero n'olwokuba nti baliba bamaze okulaba okuva ewa Katonda ebyo bye baali batasuubira.

Era ne bibeeyoleka ebibi by'ebyo bye baakola era ne bibeetooloola ebyo bye baalinga bajeeja.

Omuntu bw'atuukibwako akabi olwo nno nga atusaba, oluvannyuma bwe tumugabira ekyengera kyonna okuva Gyetuli, agamba nti mazima kyampebwa lwa kumanya (kwange) wabula (si bwe kiri) kyo kikemo naye ddala abasinga obungi mu bo tebamanyi.

Mazima (ekigambo kye kimu ekyo) baakyogera abo abaabakulembera (naye) ebyo bye baakolanga tebyabagasa.

Olwo nno akabi k'ebyo bye baakola ne kabatuukako n'abo bonna abeeyisa obubi mu bano, bajja kutuukibwako akabi k'ebyo bye baakola ate era tebagenda kulemesa (Katonda ku bakola ky'aliba ayagadde).

Abaffe tebamanyi nti mazima Katonda ayanjuluza riziki eri oyo gwaba ayagadde ate oluusi naafunza, mazima mu ekyo mulimu eby'okuyiga eri abantu abakkiriza.

Bagambe nti: Abange baddu bange abo abayitiriza okwonoona ne bakosa emyoyo gyabwe nti: temuggwangamu ssuubi ku kusaasira kwa Allah, mazima Allah asonyiwa ebyonoono byonna, mazima Yye Ye Musonyiyi ennyo Omusaasizi ennyo.

Era mwemenye mudde ewa Mukama Omulabirizi Wammwe era mweweeyo Gy'ali, nga Ebibonerezo tebinnabajjira ate ne muba nga temuli ba kutaasibwa.

Era mugoberere ebirungi ebyo ebyassibwa gyemuli nga biva ewa Mukama Omulabirizi Wammwe olubereberye nga Ebibonerezo tebinnaba kubajjira ekibwatukira nga nammwe temumanyi.

Omuntu aleme kutuuka kugamba nti zinsanze ku lw'ebyo bye nnasuulirira ku bikwata ku Allah era nga ddala nnali ku nsi mu bajeeja.

Oba ogambe nti singa mazima Allah yannunngamya nnaalibadde mu batya (Katonda).

Oba gugambe we gulirabira Ebibonerezo nti ddala singa nfuna (akakisa)okuzzibwayo ne mbeera mu balongoosa.

(Omwoyo gulyanukulwa nti) nedda Ebigambo Byange byakujjira n'obirimbisa era ne weekuza n'oba mu batakkiriza.

Era ku Lunaku lw'Enkomerero abo abaayogera obulimba ku Allah oliraba ebyenyi byabwe nga biddugadde (ate lwaki tebaliba batyo!), abaffe mu Muliro Jahannama temuli nfo zaabo abeekuza?

Era Allah agenda kuwonya abo abaamutya nga abawa okwesiima kwabwe (olw'Ejjana gy'alibayingiza). Akabi (k’ebibonerezo) tekagenda kubatuukako era bo si baakunakuwala.

Allah, Ye Mutonzi wa buli kintu era Yye, Ye Mutambuza Wa buli kintu.

Era y'alina ebiyimiriddeko entambula y'eggulu omusanvu n'ensi, ate abo abaawakanya Ebigambo bya Allah, abo be b'okufaafaaganirwa.

Bagambe (ggwe Nnabbi Muhammadi) nti: Abange mmwe abatamanyi, ebitali Allah bye mundagira nsinze!.

Ate nga mazima watumirwa Obubaka n'eri abo abaakukulembera nti singa ogatta ku Katonda ebintu ebirala emirimu gyo gya kwonoonekera ddala, era ojja kubeerera ddala mu bafaafaaganiddwa.

Wabula Allah gw'oba osinza era obe mu beebaza.

(Abagatta ku Allah ebintu ebirala) Allah tebaamussa mu kifo kimusaanira, so nga ensi yonna eriba mu Kibatu Kye ku Lunaku lw'Enkomerero, nga eggulu omusanvu zizingiddwa mu Mukono Gwe ogwaddyo, Musukkulumu era wa Waawaggulu ku ebyo bye bamugattako.

Enngombe erifuuyibwa, abali mu ggulu omusanvu n'abo abali mu nsi ne bazikirira, okuggyako abo Allah b'aliba ayagadde okulekawo, oluvannyuma erifuuyibwa omulundi omulala nate, oligenda okulaba nga beesimbye (bwa ntoogo) balindirira ekiddako Allah ky'anaabakolera.

Ensi egenda kwakaayakana olw'ekitangaala kya Mukama Omulabirizi Waayo, ebitabo (by’emirimu gyabaddu) bissibwewo, Bannabbi n’abajulizi (Bamalayika abawandiika emirimu gy'abaddu) baleetebwe era balamulwe mu mazima era bo tebagenda kulyazaamaanyizibwa.

Buli mwoyo gulisasulwa mu bujjuvu ebyo bye gwakola, anti bulijjo Katonda amanyidde ddala ebyo bye bakola.

Abo abaawakanya balikunguzzibwa okutwalibwa mu Muliro Jahannama nga bali mu bibinja, olwo nno bwe baligutuukako emiryango gyagwo nga giggulwawo, era abakuumi baagwo babagambe nti: abaffe, Ababaka tebaabajjira nga bava mu mmwe!, nga babasomera Ebigambo bya Mukama Omulabirizi Wammwe era ne babatiisa okusisinkana Olunaku lwammwe luno? Baligamba nti: Weewaawo (baatujjira naye twabalimbisa) naye ekigambo ky’ebibonerezo kimaze okukakata ku batakkiriza.

Baligambibwa nti muyingire emiryango gy’omuliro Jahannama nga muli baakutuula mu gwo bugenderevu na bugenderevu, nagwo kifo kibi eri abeekuza.

Abo abatya Mukama Omulabirizi Waabwe balitwalibwa eri Ejjana nga bali mu bibinja, olwo nno bwe baligituukako n’emiryango gyayo negiggulwa, n’abakuumi baayo ne babagamba nti: Emirembe gibe ku mmwe, mwakola bulungi (nga muli ku nsi) kale muyingire, mugenda kutuulamu, bugenderevu.

Baligamba nti ebitendo byonna bya Allah Oyo atutuukiririzza Endagaano Ye, n'atusikiza ettaka (lyo mu jjana) nga tweyagalira mu Jjana wonna we twagala nga kyo kyengera kya mpeera ya bakozi.

Oliraba Bamalayika nga babugirizza amabbali ga Arish nga batendereza ebitendo bya Mukama Omulabirizi Waabwe, (ebyo byonna) abaddu baliba balamuddwa mu bwenkanya era walirangirirwa nti ebitendo byonna bya Katonda Omulabirizi W'ebitonde byonna.

Haa Miim.

Okussa ekitabo (kino Kulaani) kuva wa Katonda nantakubwa ku mukono, omumanyi ennyo.

Omusonyiyi W'ebyonoono, era akkiriza okwenenya, Nnannyini Bibonerezo ebikakali, Nnannyini kugaba, tewali kisinzibwa mu butuufu okuggyako Yye, era obuddo buli Gy'ali.

Tewali awakana ku bigambo bya Allah okuggyako abo abaawakanya, kale okwejalabattira kwabwe mu nsi tekukuyigula ttama.

Olubereberye lwabwe abantu ba Nuuhu baalimbisa, n'ebibinja ebyajja oluvannyuma lwabwe (nabyo byalimbisa), buli bantu baayagala okutuusa ku Mubaka waabwe akabi, baakozesa obukyamu mu kuwakana, bamenyewo amazima, awo nno ne mbakwata naye okubonereza kwange (olaba) kwali kutya?.

Nabwekityo, kyakakata ekigambo kya Mukama omulabirizi wo kwabo abaakafuwala nti mazima bo bantu ba mu muliro.

(Bamalayika) abo abasitudde Arishi, n'abo abagibugiriza, batendereza ebitendo bya Mukama Omulabirizi Waabwe, era bamukkiriza era basaba (Katonda) ekisonyiwo eri abo Abakkiriza (nga bagamba nti) ayi Mukama Omulabirizi W affe mu kusaasira ne mu kumanya wamalayo buli kintu kyonna, kale sonyiwa abo abeenenya ne bagoberera ekkubo lyo era obawonye Ebibonerezo by'Omuliro Jahiimu.

Ayi Mukama Omulabirizi Waffe era bayingize Ejjana ez’emirembe zewabalagaanyisa (era zewalagaanyisa) abo abaalongooka mu bakadde baabwe ne be baafumbiriganwa nabo n'zezadde lyabwe. Mazima Ggwe Nnantakubwakumukono, Mugobansonga.

Era obeesambye ebyonoono era oyo yenna gw'olyesambya ebibi ku Lunaku olwo mazima oliba omusaasidde, era okwo, kwe kwesiima okusuffu.

Mazima abo abaakafuwala balikowoolwa (nga bali mu muliro nti) mazima obusungu bwa Katonda busuffu okusinga okwesunguwalira kwa mmwe, bwe mwakowolwanga okujja eri obukkiriza (wabula ate mmwe) nemuwakanya.

Baligamba nti ayi Mukama omulabirizi Waffe watutta emirundi ebiri n'otuwa obulamu emirundi ebiri, kaakano tukkirizza ebyonoono byaffe (bitusaanidde), abaffe waliwo ekkubo lyonna eritufulumya Omuliro?.

(Baligambibwa nti) ekyo mmwe (kye mulimu) buli Allah lweyasabwanga Yekka nga muwakanya, ate buli lwe yagattibwangako ekintu ekirala olwo nga mukkiriza, kale nno okulamula (olwaleero) kwa Allah (Yekka) Owaawaggulu Oweekitiibwa.

Yye Y'Oyo abalaga obubonero Bwe era abassiza amazzi okuva waggulu nga kugabirirwa (gyemuli) naye teyeebulirira (nabyo) okuggyako oyo adda eri (Katonda) n'amwenenyeza.

Kale musabe Allah nga Edddiini mugikola ku Lulwe Yekka newaakubadde nga abatakkiriza bakitamwa.

(Katonda Oyo) Oweebitiibwa ebyawaggulu Nnannyini Arishi, assa Obubaka okusinziira ku Kiragiro Kye kw'oyo gw'aba ayagadde mu baddu Be, abe nga atiisa (abantu ebiribaawo ku) Lunaku lw'Okusisinkana.

Olunaku bo (abantu) bonna lwe balyeyoleka (mu Maaso ga Katonda) tewali kintu kyonna kyava mu bo kiryekweka Katonda, (balibuuzibwa nti) obufuzi bw'ani Olwaleero? (olwo nno ne bategezebwa nti) bwa Allah Omu Nnantalemwa.

Olwaleero buli mwoyo gugenda kusasulwa ebyo bye gwakola tewali kulyazaamaanya olwaleero, mazima Allah Mwangu wa kubala.

Batiise (ggwe Nnabbi Muhammadi) Olunaku olusembedde, ekiseera emitima lwe giribeera mu malokooli (olw'entiisa) nga banyiikaavu, abalyazaamaanyi tebagenda kuba na waamukwano, wadde muwolereza ayinza okuwulirizibwa.

(Allah) amanyi amaaso agatali meesimbu era nga bw'amanyi ebyo ebifuba bye bikweka.

Era Allah alamula mazima, bo abo abasaba ebintu ebirala ne baleka Allah, tebalina kintu kyonna kye balamula (ne kiba kyo). Mazima Allah Ye awulira ennyo alaba.

Abaffe tebatambulako mu nsi ne balala enkomerero y'abo abaabasooka nga bwe yali, bo be baali babasinga amaanyi n'ebintu bye baaleka mu nsi, Allah yabakwata olw'ebyonoono byabwe tewaaliwo abataasa ku Allah.

Ekyo (kyali bwekityo) lwakuba nti mazima bo Ababaka baabwe babajjiranga n'obunnyonnyofu ne bajeema, olwo nno Allah n'abakwata, mazima Yye Waamaanyi muyitirivu wa kubonereza.

Era Mazima twatuma Musa n'ebyamagero Byaffe n’obusobozi bw'okulambika ensonga.

Eri Falaawo ne Haamaana ne Kaaluuna ne bagamba nti (Musa) mulogo mulimba.

Bwe yabaleetera amazima okuva Gyetuli baagamba nti: Mutte abaana abalenzi abaabo abakkiriza abali naye, naye bawala baabwe mubaleke nga balamu, bulijjo enkwe za abatakkiriza zigwa butaka.

Falaawo n'agamba nti: Mundeke nzite Musa kale ayite Mukama Omulabirizi We (anti) mazima nze ntidde nti ayinza okukyusa eddiini yammwe, oba si ekyo, ayinza okuleeta mu nsi obwononefu.

Musa n'agamba nti mazima nze nsaba Mukama Omulabirizi Wange era Omulabirizi Wammwe amponye (obubi) bwa buli mwekuza atakkiriza Lunaku lwa Kubalibwa.

Omusajja Omukkiriza mu bantu ba Falaawo (naye nga) yali akweka Obukkiriza bwe, yagamba nti: mutta omusajja olwokuba agamba nti: Allah ye Mukama Omulabirizi Wange, ate nga abaleetedde obujulizi obuva ewa Mukama Omulabirizi Wammwe?! Bw'aba nga alimba okulimba kwe kuli gyali, naye bw'aba nga ayogera mazima ebimu ku by'abalagaanyisa bijja kubatuukako, mazima Allah talunngamya oyo eyegalabanja, omulimba.

Abange mmwe bantu bange olwaleero mmwe mulina obufuzi era nga mumanyiddwa mu nsi, olwo ani anaatutaasa ku bibonerezo bya Allah singa bitujjira (olw'obutakkiriza Musa by'agamba)? Falaawo n'agamba nti siraba nti mwandisazeewo okuggyako kye ndaba (ek'yokutta Musa), ate sibalagirira okuggyako ekkubo ettuufu.

Oyo eyakkiriza n'agamba nti abange bantu bange (mwegendereze) mazima nze mbatiiririra mmwe okutuukibwako nga ebyo ebyatuuka ku mirembe egyakulembera (egyekobaana okuyisa obubi Bannabbi baagyo).

Okugeza, ng'enkola y'abantu ba Nuuhu ne 'Aadi ne Thamuudu n'abo abaaliwo oluvannyuma lwabwe, era bulijjo Allah tayagaliza baddu be kuyisibwa bubi.

Abange mmwe bantu bange, mazima nze mbatiisa olunaku lw’okukoowoolagana.

Olunaku lwe mulikyuka mudduke naye nga temuliba n’abawonya yenna ku Allah, oyo yenna Allah gw'abuza tayinza kufuna mulunngamya.

Era mazima Yusufu yabajjira olubereberye n’obujulizi kyokka mwasigala muli mu kubuusabuusa mw'ebyo bye yabaleetera, okutuusa nga amaze okufa olwo nno nemugamba nti Allah tagenda kutuma Mubaka yenna luvannyuma lwe, bw'atyo nno Allah bwabuza buli oyo yenna eyegalabanja abuusabuusa.

Abo abawakana ku bikwata ku bigambo bya Allah awatali bujulizi bubajjidde (ekikolwa ekyo) kibi, kinene nnyo eri Allah, ne eri Abakkiriza, bw'atyo Allah bw'azibikira buli mutima gwa buli yeekuza, kiwagi.

Falaawo n'agamba nti owange Haamaana (Katikkiro we) nzimbira omunaala oba olyawo nnaatuka ku makubo.

Amakubo g'eggulu omusanvu olwo nno mbe nga ndaba Katonda wa Musa, wabula mazima nze mmulowooza okuba nti mulimba, bw'atyo Falaawo emirimu gye emibi gyamulabisibwa nga mirungi, olwo nno n'aggyibwa ku kkubo, era enkwe za Falaawo zaagwa butaka.

Oyo eyakkiriza yagamba nti mungoberere mbalagirire ekkubo ly'obulunngamu.

Abange bantu bange mazima obulamu bw'ensi buno bwa kiyitamulujja, era mazima Enkomerero, y’enyumba ey'olubeerera.

Oyo yenna akola omulimu omubi tasasulwa okuggyako ekigwenkana, ate oyo akola omulimu omulongoofu k'abe musajja oba mukazi (n'agukola) nga Mukkiriza, abo nno baliyingira Ejjana bagabirirwe muyo awatali kubalirira.

Abange bantu bange, lwaki mbayita okujja eri okuwona nga mmwe mumpita kudda eri Muliro?!

Mumpita mpakanye Allah era mmugatteko ebyo bye ssirinaako kumanya! Ate nga nze mbayita kudda eri Nnantakubwakumukono, Omusonyiyi ennyo.

Tewali kubuusabuusa nti ekyo kye mumpitira tekirina buyinza ku nsi wadde ku Nkomerero, ate nga mazima obuddo bwaffe buli eri Allah era nga mazima aboonoonyi abayitawo be bannannyini Muliro.

Mulijjukira bye mbagamba era ensonga yange ngikwasa Allah, mazima Allah alabira ddala ebifa ku baddu.

Allah n'amuwonya akabi k'enkwe ze baakola, ebibonorezo ebikambwe ne bikka ku bantu ba Falaawo.

Omuliro banjulwa gye guli (mu buwufu bwabwe) enkya n'eggulo, ate Olunaku lw'Enkomerero lwe lulituuka walirangirirwa nti: Muyingize abantu ba Falaawo mu bibonerezo ebisinga obukakali.

(Jjukira) ekiseera lwe balikaayanira mu Muliro, abanafu (abaakulemberwa) bwe baligamba abo abeekuza (abaali abakulembeze nti) mazima ffe twali bagoberezi bammwe, abaffe musobola okutukolera ekitundu (ky'ekibonerezo) ky'Omuliro?

Abo abeekuza baligamba nti: Mazima ffe tugulimu ffenna wamu, mazima Allah yamaze okulamula wakati w'abaddu.

Abalibeera mu Muliro baligamba abakuumi ba Jahannama nti musabe Mukama Omulabirizi Wammwe atukendeereze ku bibonerezo (waakiri) olunaku lumu.

(Abakuumi b'Omuliro) baligamba nti abaffe ababaka bammwe tebabajjira n’obujulizi obwenkukunala? Baligamba nti kituufu (baatujjira), bali bagambe nti kale musabe, wabula okusaba kwa abatakkiriza kugwa butaka.

Mazima ffe ddala tutaasa Ababaka baffe n'abo Abakkiriza mu bulamu obw'ensi ne ku Lunaku abajulizi lwe baliyimirira (okuwa obujulizi nti ddala Obubaka bwatuusibwa ku bantu).

Olunaku abeeyisa obubi okwetonda kwabwe lwe kutalibagasa, era balina ekikolimo nga bwe balina obutuulo obubi (Omuliro).

Mazima twawa Musa obulunngamu era ne tusikiza abaana ba Isirayiri Ekitabo (ekyo).

Nga bulunngamu era nga kya kujjukiza eri abo abalina amagezi.

Kale gumikiriza (ggwe Nabbi Muhammad) mazima endagaano ya Katonda ya mazima era saba ekisonyiwo olw'ekibi kyo, era tendereza ebitendo bya Mukama omulabirizi wo olweggulo ne kumakya.

Mazima abo abawalaaza empaka ku Bubonero bwa Allah awatali bujulizi bubajjidde, mu bifuba byabwe temuli okuggyako okwekuza ate nga tekuyinza kukibatuusaako (ekitiibwa) n'obulungi Allah by'agonnomola ku Nnabbi We) kale nno saba obukuumi ewa Allah (anti) mazima Yye Ye Muwulizi Omulabi ennyo.

Ddala, okutonda eggulu omusanvu n'ensi kinene okusinga okutonda abantu, naye abantu abasinga obungi tebamanyi.

Era muzibe n'oyo alaba tebenkana nga bwe batenkana abo abakkiriza ne bakola emirimu emirongoofu n'omwonoonyi (wabula) mujjukira kitono nnyo.

Mazima Olunaku lw’Enkomerero lwa kutuuka teruliimu kubuusabuusa, naye ddala abantu abasinga obungi tebakkiriza.

Mukama Omulabirizi Wammwe yagamba nti munsabe nja kubaanukula, mazima abo abeekuza ne batansinza bagenda kuyingira Omuliro Jahannama nga baswavu.

Allah Y'Oyo eyabateerawo obudde obw'ekiro muwummuliremu n'abateerawo obudde obw'emisana nga butangaala (musobole okukoleramu emirimu gyammwe). Mazima Allah akolera abantu ebirungi bingi, naye ddala abantu abasinga obungi tebeebaza.

Oyo nno ye Allah Omulabirizi Wammwe, Omutonzi wa buli kintu, tewali kisinzibwa mu butuufu okuggyako Yye ate muwugulwa mutya?

(Nga bwe mwawugulwa) bwe batyo bwe baawugulwanga abo abaalinga bawakanya Ebigambo bya Allah.

Allah Y'Oyo eyabateerawo ensi nga ntebenkevu, n'abateerawo eggulu nga kasolya, era n'abawa endabika yammwe, olwo nno n'anyiriza endabika yammwe era n'abagabirira ebintu ebirungi, oyo nno ye Allah Omulabirizi Wammwe, kale Musukkulumu Oyo Allah, Mukama, Omulabirizi W'ebitonde.

Yye Ye Mulamu, tewali kisinzibwa mu butuufu okuggyako Yye, kale mumusabe nga Eddiini yonna mugikolera Yye Yekka, (anti) ebitendo byonna bya Allah Omulabirizi W'ebitonde.

Bagambe (ggwe Nnabbi Muhammadi nti mazima nze bwe nnamala okufuna obunnyonnyofu okuva ewa Mukama Omulabirizi Wange) nnagaanibwa okusinza ebyo bye musaba ne muleka Allah, obunnyonnyofu bwe bwanzijira nga buva ewa Mukama omulabirizi Wange, era nnalagirwa okwewaayo eri Mukama Omulabirizi W'ebitonde.

(Allah) Y'oyo eyabatonda nga abaggya mu ttaka (omulundi ogwasooka nga atonda Adamu), oluvannyuma (abatonda nga) abaggya mu mazzzi agazaala, oluvannyuma abafuula ekisaayisaayi, oluvannyuma n'abafulumya nga muli baana, oluvannyuma (abalekawo) nemutuuka okubeera abajjuvu (mu mibiri ne mu kutegeera), oluvanyuma (abalekawo) ne mutuuka okubeera abakadde, ate mu mmwe mulimu afa ng'akyali (n'atamalaayo mitendera esatu egyogeddwa, (bwe kitaba ekyo abalekawo) mube nga mutuusa ekiseera ekigere (ekya buli omu) mube nga mutegeera (ebyo byonna ebibannyonnyoddwa).

Yye (Katonda) Y'Oyo awa obulamu era n'abutwala, kale nno bw'aba asazeewo ekintu akigamba nti 'Ba' ne kiba.

Abaffe tolaba abo abawalaaza empaka ku Bigambo bya Allah engeri gye bawugulwa (ne baleka amazima).

(Abo abaalimbisa Ekitabo (Kulaani) n'ebyo bye twatuma Ababaka Baffe, kyaddaaki balimanya.

(Balimanya) mu kiseera enkoligo bwe zirissibwa mu nsingo zaabwe era nga basibiddwa n'enjegere nga bawalulwa.

Okubatwala mu lweje lw'amazzi oluvanyuma balyokebwa mu Muliro.

Oluvannyuma baligambibwa nti: Biri wa bye mwagattanga (ku Katonda)?

Ne muleka Allah, baligamba nti: batubuzeeko wabula (mu butuufu) bye twasabanga olubereberye temwali kantu. Bwatyo Allah bw'abuza abatakkiriza.

Ebyo nno (eby'omuliro gwe muyingidde) lwa nsonga y'ebyo bye mwasanyukanga mu nsi mu butali butuufu, era n'engeri y’obujeemu gye mweyisangamu.

Muyingire emiryango gy’Omuliro Jahannama nga muli ba kutuula mu gwo bugenderevu, bubi nnyo obutuulo bw'abo abeekuza.

Kale gumiikiriza (ggwe Nnabbi Muhammadi) mazima Endagaano ya Allah ya mazima, kakibe nga ddala tukulaze ebimu kw'ebyo bye tubalagaanyisa oba ne tukutuusaako okufa (nga tetubikulaze mu buli ngeri) bagenda kuzzibwa Gyetuli.

Mazima twatuma Ababaka olubereberye lwo, mu bo mulimu be twakunyumizaako, ate mu bo mulimu be tutaakunyumizaako, era Nnabbi yenna yali tayinza kuleeta kyamagero okuggyako nga Allah asazeewo, kale nno Ekigambo kya Allah bwe kijja ensonga ziramulwa mu mazima, era awo aboonoonyi nga bafaafaaganirwa.

Allah Y'Oyo eyabassizaawo ensolo ez’omumaka ezimu ku zo muzeebagale era nga n'ezimu kwe mulya.

Era mulina mu zo emigaso (emirala nga ate mingi olwokuzikozesa), mutuukiriza ekyetaago kye mulina mu bifuba byammwe (ekyo kujjulula emigugu gyammwe okuva ebunaayira), era nga musitulirwa ku zo ne ku maato.

Era (bulijjo Allah) abalaga obubonero Bwe, kati bubonero ki obwa Allah bwe muwakanya?

Abaffe tebatambulako mu nsi ne balaba enkomerero y'abo abaabakulembera bwe yali (abo) abaali babasinga obungi, nga babasinga amaanyi era nga be babasinza ne bye baaleka mu nsi, naye wabula ebyo bye baakola tebyabagasa.

Anti Ababaka baabwe bwe baabajjira n’obunnyonnyofu, baasigala basanyuka n’okumanya kwe baali balina ne bibatuukako ebyo bye baali bajeeja.

Bwe baalaba obukambwe bw'ebibonerezo Byaffe ne bagamba nti: Tukkiriza Allah Yekka era ne tuwakanya ebyo byonna bye twali tumugattako.

Okukkiriza kwabwe tekwali kwa kubagasa (okwo kwe baalangirira), bwe baamala okulaba obukambwe bw'Ebibonerezo Byaffe (era nga eyo) yenkola ya Allah eyo ezze ekola mu baddu be, era (ebibonerezo bya Katonda bwe bitandika okussibwa mu nkola) abatakkiriza awo wennyini baba bamaze okufaafaaganirwa (ne bwekuba kwenenya kuba tekukyakkirizibwa).

Haa Miim.

(Kulaani) Bubaka obussibwa okuva ewa Allah omusaasizi ennyo era Omusaasizi Ow'enjawulo.

(Kyo) Kitabo, nga ebigambo byakyo byannyonnyolwa bulungi nga bisomwa, ebiri mu Luwalabu (yassibwa) eri abantu abamanyi.

(Yakka nga) ewa amawulire agessanyu eri (abakkiriza) era nga ewa amawulire agatiisa (eri abatakkiriza) naye abasinga obungi mu bo bagyesamba olwo nno bo tebawulira.

Baagamba nti emitima gyaffe giri mu kibikka, tegiyinza kuwulira ekyo ky'otuyitira, ate mu matu gaffe mulimu envumbo ate nga wakati waffe naawe waliwo ekisenge ekyawula (n'olwekyo tetuyinza kukola bifaanagana) kale kola naffe ka tukole.

Bagambe (ggwe Nnabbi Muhammadi nti) mazima nze ndi muntu nga mmwe, mpeebwa Obubaka nti mazima Omusinzibwa Wammwe, ye Musinzibwa Omu Yekka, kale mudde Gy'ali mu bwesimbu, era mumwegayirire, okubonaabona kuli eri abagatta ebintu ebirala ku Katonda.

Abo abatatoola Zzaka ate nga ddala nabo Olunaku lw'Enkomerero bo baluwakanya.

Mazima abo abakkiriza ne bakola emirimu emirongoofu balina empeera etaggwaawo.

Bagambe nti abaffe mmwe muwakanya Oyo eyatonda ensi mu nnaku bbiri ne mumuteekako ebisinzibwa ebirala, Oyo (gwe mukola ebyo) Ye Mulezi W'ebitonde.

Era yassa mu yo (ensi) ensozi nga asinziira ku ngulu kwayo, (olwo nno ne zikka wansi) era n'agissaamu omukisa era yagigereramu eby'okulya byayo (ebiriibwa ebiramu byonna ebigirimu, ebyo byonna yabimalira) mu nnaku nnya, (ekyo kye eky'okwanukula) ekituufu eri ababuuza.

Oluvanyuma yadda ku kukola eggulu nga nalyo (mu kusooka) lyali mukka mwereere, olwo nno n'aligamba n'ensi, nti: Mujje okwagala n'obutayagala, byombi nebigambo nti: Tuzze nga tugonze.

Olwo n'agamaliriza nga gali eggulu musanvu mu nnaku bbiri, n'alagira mu buli ggulu ne mussibwamu ebintu byamu era ne tuwunda eggulu eririraanye ensi n’amataala n’abakuumi, okwo nno kugera kwa Nnantakubwakumukono, Omumanyi ennyo.l

Singa bawuguka (ne batakukkiriza) bagambe nti mbatiisizza ebibonerezo ebikakali okufaanana nga ebibonerezo ebyatuuka ku bantu ba 'Aadi ne Thamuudu.

Mu kiseera ababaka bwe baabajjira nga babava mu maaso ne mabega waabwe nga bagamba nti, temusinzanga okuggyako Allah (abatakkiriza) ne bagamba nti singa Mukama Omulabirizi Waffe yayagala (kututumira) yandissizza Bamalayika, n’olwekyo mazima ffe tuwakanya ebyo bye mutumiddwa nabyo.

Bo abantu ba 'Aadi anti beekuluntaliza mu nsi mu butali butuufu, era ne bagamba nti ani atusinga amaanyi? Abaffe baali tebakiraba nti mazima Allah Oyo eyabatonda, Yye y'abasinga amaanyi. Okukola ekyo baali bawakanya obubonero bwaffe.

Twabasindikira kibuyaga owaamaanyi mu nnaku ezaali zijjudde ebizibu tulyoke tubakombese ku bibonerezo ebyobuswavu mu bulamu obw'ensi, so nga ate ebibonerezo by'enkomerero by'ebisinga okuswaza era bo tebagenda kutaasibwa.

Bo aba Thamuudu twabalaga ekkubo ly'obulunngamu naye bo nebakulembeza obwamuzibe ku bulunngamu, olwo nno okubwatuka kw'eibonerezo ebinyomesa ne kubatuukako olwebyo bye baakolanga.

Era twawonya abo abakkiriza era nga baali batya Katonda.

Ate olunaku abalabe ba Allah lwe balikunngaanyizibwa nga batwalibwa eri Omuliro awo nno nga bateereddwa mu bibinja.

Bwe baligutuukako, amatu gaabwe n’amaaso gaabwe n’amaliba gaabwe, biribawaako obujulizi kw'ebyo bye baakolanga.

Baligamba amaliba gaabwe (ate mmwe) lwaki mutuwaddeko obujulizi? Galigamba nti: Allah atwatuzza Oyo ayatuza buli kintu, era Yye Ye yabatonda omulundi ogwasooka era nga Gy'ali gye mulizzibwa.

Era (bwemwali ku nsi) temwekwekako olw'okutya amatu gammwe wadde amaliba gammwe okubawaako obujulizi, wabula mwalowooza nti mazima Allah tamanyi bingi mw'ebyo bye mukola.

Okwo nno okulowooza kwammwe, okwo kwe mwalowooza ku Mukama Omulabirizi Wammwe, kwe kwabattattana olwo nno ne mufuuka abo mu bafafaganirwa.

Ne bwe banaagumikiriza, Omuliro bwe buddo bwabwe, era ne bwe banaasaba okubaddiramu (mbu bazzibwe ku nsi bakole ebirungi) tebaliddirwamu.

Twabateerawo bannaabwe (abababuza) olwo nno ne babalabisiza bulungi (ebibi) ebiri mu maaso gaabwe n'emabega waabwe, ekigambo (ekyokubonerezebwa) ne kibakakatako, ne bayingira mu bibiina (ebibi) eby'amajinni n’abantu ebyakulembera, mazima bo baali abafaafaganirwa.

Abo abaawakanya Allah ne Omubaka we baagamba nti: Temuwuliriza Kulaani eno wabula mujizannyiremu oba olyawo ne muwangula.

Ddala tugenda kukombya abo abatakkiriza ku bibonerezo ebikakali era tugenda kubasasulira ddala ebibi ebisingayo mw'ebyo bye baalinga bakola.

Ogwo Omuliro y'empeera y'abalabe ba Allah, balina mu gwo obutuulo obw'olubeerera nga eyo y'empeera (gye balifuna) kubanga baawakanya Ebigambo Byaffe.

Abo abaawakanya Allah n'Ababaka Be baligamba nti: Ayi Mukama Omulabirizi Waffe, tulage abo abaatubuza mu majinni n’abantu tubasse wakati w'ebigere byaffe balyoke babe mu ba wansi (ddala).

Mazima abo abagamba nti Allah ye Mukama Omulabirizi Waffe oluvannyuma ne babeera beesimbu, Bamalayika bakka (nga bajja) gyebali (nga babagamba nti) temutya era temweraliikirira era musanyuke olw’Ejjana eyo gye mwalinga mulagaanyisibwa.

Ffe (Bamalayika) ffe bannammwe mu bulamu obw'ensi ne mu bulamu obw'enkomerero, era mulina okufuna nga muli mu yo, ebyo emyoyo gyammwe bye gyagala era nga bwe mulina okufuna ebyo bye musaba.

(Ebyo) nga bugenyi obuva ewa (Katonda) Omusonyiyi ennyo Omusaasizi.

Ani ow'ebigambo ebirungi okusinga oyo akoowoola (abantu) okudda eri Allah, n'akola emirimu emirongoofu era n'agamba nti mazima nze ndi mu beewaayo eri Katonda?

Ekirungi n'ekibi tebyenkana, ggyawo (ekibi) ng’okozesa ekyo ekisinga obulungi, onoogenda okulaba nga oyo gy'obadde olina wakati wo naye obulabe nga ddala yye ye w'omukwano nfa nfe.

Ekyo nno tebayinza ku kiweebwa okuggyako abo abagumiikiriza era tayinza kukiweebwa okuggyako ow'omukisa ogw'amaanyi.

Wabula singa wabaawo ekikulabankanya nga kiva mu Sitaane, oteekwa okusaba obukuumi ewa Allah, mazima Yye Ye awulira ennyo, Omumanyi.

Ne mu bubonero Bwe (obulaga obuyinza Bwe) mwe Muliro ekiro n’emisana n'enjuba n’omwezi, temuvunnamiranga enjuba wadde omwezi, muvunnamirenga Allah Oyo eyabitonda bwe muba nga Yye Yekka Gwe musinza.

(Naye bwe baneekuza (si kikulu) anti abo abali ewa Mukama Omulabirizi Wo bamutendereza ekiro n’emisana era nga bo tebakoowa.

Era mu bubonero Bwe (kwe kuba nti) mazima ggwe olaba ensi nga nkalu Bwe tugitonnyesaako amazzi yenyeenya (n'efuuka ya kiragala) era n'eyongera okumeza ebimera. Mazima Oyo agizzaamu obulamu ddala alizuukiza abafu, mazima Yye Muyinza wa buli kintu kyonna.

Mazima abo abawalaaza empaka ku Bigambo Byaffe tebatwekwese, abaffe oyo alisuulwa mu Muliro y'asinga obulungi oba oyo alijja ku Lnaku lw’Enkomerero nga ali mirembe? (Kale) mukole bye mwagala mazima Yye (Katonda) alabira ddala ebyo bye mukola.

Mazima abo abawakanya okubuulirira (Kulaani) bwe kwabajjira (kalibajjuutuka) era mazima yo (Kulaani) Kitabo kya kitiibwa.

Obukyamu tebuyinza kujijjira kuva mu maaso gaayo, wadde mabega waayo, essibwa nga eva wa Mugobansonga atenderezebwa ennyo (Katonda).

Ggwe (Muhammadi) tewali bikugambibwa okuggyako nga byagambibwa dda Ababaka abaakukulembera. Mazima Mukama Omulabirizi Wo Ye Nnannyini kusonyiwa era Ye Nnannyini Bibonerezo ebirumya.

Singa twafuula Kulaani eno nga ya lulimi olutali Luwalabu (Abawalabu) ddala baligambye nti singa ebigambo byayo byannyonnyolwa (ne tubitegeera, kati ate) eri mu lulimi olutali Luwalabu ate nga ekkira ku Muwalabu, bagambe nti yyo ku abo abakkiriza kya kulunngama era kya kuwonya, ate abo abatakkiriza amatu gaabwe galimu envumbo, olwo nno yo ku bo buzibe bwa maaso, abo bakoowoolwa okuva mu kifo ekyewala (n'olwekyo si bangu ba kuwuliza).

Mazima twawa Musa Ekitabo ne kyawukanwamu, singa si kigambo ekyakulembera nga kiva ewa Mukama Omulabirizi Wo waslisaliddwawo wakati waabwe mu bwangu, era mazima n'abo (abatakukkiriza ggwe Nnabbi Muhammadi) bali mu kubuusabuusa okujjudde okutankana mu yo (Kulaani).

Oyo akola omulimu omulongoofu akolera mwoyo gwe, ate oyo ayonoona akabi k'ekyo kadda ku gwo, ate nga Mukama Omulabirizi Wo si mulyazaamaanyi eri abaddu (Be).

Gy'ali okumanya Olunaku lw'Enkomerero gye kuzzibwa, ebibala tebiva mu bikuta byabyo, era ekikazi tekifuna lubuto wadde okuzaala wabula ku lwa kumanya Kwe, n’olunaku (Katonda) lw'alibakoowoola (n'ababuuza) nti baliwa abo be mwangattako? Baligamba nti: tukutegeeza nti tewali n'omu mu ffe ayinza kuba mujulizi (kw'ekyo ekyokuba nti olina ebikugattibwako).

Era biribabulako ebyo bye baasinzanga olubereberye, era bagenda kukakasa nti tebalina buddukiro.

Omuntu takoowa kusaba (okufuna) obulungi naye akabi bwe kamutuukako aggwaamu essuubi n'akutuka n'okusuubira.

Naye bwe tumukombya ku kusaasira okuva Gyetuli oluvannyuma lw'akabi akaba kamutuseeko, ddala agamba nti kino nkifunye lwa kukola kwange era sirowooza nti Olunaku lw'Enkomerero lulibaawo (naye) ne bwendizzibwa ewa Mukama Omulabirizi Wange, mazima nze ndiba nnina okufuna ebirungi Gy'ali, kale nno ddala tugenda kutegeeza abo abatakkiriza, ebyo bye baakola era ddala tugenda kubakombesa ku bibonerezo ebizito ennyo.

Bwe tugabira omuntu ebyengera awuguka (n'ava ku ddiini) n'adda ku bbali (nga takyayagala kubeera na bantu balala) olw'okwekuza naye akabi bwe kamutuukako (olwo adda eri Allah) era n'aba nga asaba okusaba okutakoma.

Bagambe nti mukiraba nti (Kulaani) bw'eba nga ddala yava wa Allah oluvannyuma ne mugiwakanya, ani mubuze asinga oyo ali mu kuwakana okuli ewala (n’amazima).

Tujja kubalaga obubonero Bwaffe mu bwengula ne mu bo bennyini okutuusiza ddala amazima lwe ganaabeeyoleka (ne bamanya) nti ddala yyo Kulaani) ge mazima. Abaffe tekimala okuba nga Mukama Omulabirizi Wo ddala Yye abaawo (nga kikolebwa).

Abange mazima bo bali mu kubuusabuusa okusisinkana Mukama Omulabirizi Waabwe, abange (mukimanye nti) mazima Yye yeetoolodde (mu kumanya Kwe) buli kintu.

Haa Miim.

'Ayn Siin Qaaf.

Bw'atyo Allah Nnantalemwa, Mugobansonga, akutumira Obubaka era nga bwe yatuma eri abo abaaliwo olubereberye lwo.

Bibye Yekka byonna ebiri mu ggulu omusanvu n'ebyo ebiri mu nsi, era Yye Ye Waawaggulu ennyo Oweekitiibwa.

Eggulu omusanvu zibulako katono okweyuzaamu okutandikira waggulu waazo (ku lwo kugulumiza Allah) ne Bamalayika batendereza Ebitendo bya Mukama Omulabirizi Waabwe, era basabira abo (Abakkiriza) abali mu nsi okusonyiyibwa, abange mazima Allah Yye Ye Musonyiyi ennyo Omusaasizi.

Naye abo abeteerawo ebisinzibwa ebirala ne bamuvaako, Allah Mulondoozi ku bo, era ggwe toli mukuumi ku bo.

Bwekityo twakuweereza Kulaani nga eri mu Luwalabu obe nga otiisa (nayo) maama w'ebibuga byonna (Makkah) n'abali mu bitundu ebikyetoolodde era otiise (abantu) Olunaku lw'okukungaana olutaliimu kubuusabuusa, nga ekibinja kya kuyingira Jjana ate ekibinja ekirala kya kuyingira Muliro ogubuubuuka.

Singa Allah yayagala (bonna) yandibafudde ekibiina kimu, naye ayingiza oyo gw'aba ayagadde mu kusaasira Kwe, ate abeeyisa obubi tebaliba na mukuumi wadde omutaasa.

Oba baaleka Allah ne beeteerawo abeemikwano (bakatonda abalala) so nno Allah Ye Woomukwano, era Yye y'aliramusa abafu, era Yye (bulijjo) Muyinza ku buli kintu kyonna.

Ekintu kyonna kyemuba mwawukanyeemu, okulamula kwakyo kuli eri Allah, Oyo Ye Katonda Mukama Omulabirizi Wange. Yye yekka Gwe nneesiga era Gy'ali gye nzira.

Omutandisi W'eggulu n'ensi, abateerawo nga aggya mu mmwe be mufumbiriganwa nabo, era yabateerawo mu bisolo ebirundibwa bibiri bibiri (ekisajja n'ekikazi) nga abazaalukusa mu nkola eyo, tewali kintu kimufaanana kyonna, era Yye Ye Muwulizi ennyo Omulabi ennyo.

Yekka yaalina ebisumuluzo by'amawanika g'eggulu omusanvu n'ensi, ayanjuluza ebyenfuna eri oyo gw'aba ayagadde, ate n'afunza (kw'oyo gw'aba ayagadde) mazima Yye Ye Mumanyi ennyo ku buli kintu.

Yabalaalikako mu ddiini ebyo bye yakuutira Nuuhu n'ebyo bye twassa ku ggwe n'ebyo bye twakuutira Ibraahiimu ne Musa ne Yisa ebigamba nti muyimirizeewo Eddiini era temujaawukanangamu kizitoye ku bagatta ku Allah ebintu ebirala ekyo kye mubakoowoolera, Allah alondobamu oyo gw'aba ayagadde n'adda gyali, era alunngamya okudda oyo eyeemenya.

Tebaayawukana okuggyako luvannyuma lwa kumanya okubajjira (nga ekyabatuusa kw'ekyo) bwe bukyayi obwali wakati waabwe, era singa si kigambo ekyakulembera nga kiva ewa Mukama Omulabirizi Wo (eky'obutazikiririzaawo boonoonyi) okutuusa ebbanga eggere (erya baweebwa) waalisaliddwawo wakati waabwe (mu kiseera ekyo kyennyini) era mazima abo abaasikizibwa ekitabo oluvanyuma lwabwe, mu kyo bali mu kubuusabuusa okujjudde okutankana.

N’olwekyo kale koowoola (abantu okujja eri Eddiini) era obeere mwesimbu nga bwe walagirwa, era togoberera kwagala kwabwe era gamba nti nzikiriza Ebitabo ebyo Allah bye yassa, era nnalagirwa okukola obwenkanya wakati wammwe. Allah Ye Mulabirizi Waffe era Omulabirizi Wammwe, ffe tulina emirimu gyaffe na mmwe mulina emirimu gya mmwe. Tewali nkaayana wakati waffe na mmwe (anti amazima meeyolefu), Allah alitusisinkanya (ffe na mmwe) era Gy'ali yokka y'eri obuddo.

N'abo abawakana ku bikwata ku Allah, oluvanyuma lw'okuba nti (Omubaka Muhammadi) yayanukulwa (nagobererwa), ensonga yaabwe ya butaliimu mu maaso ga Mukama Omulabirizi Waabwe, era baliko obusungu n'ebibonerezo ebikambwe.

Allah Y'oyo eyassa Ebitabo nga bya mazima n’obwenkanya. Yye omanyira kuki oba olyawo Olunaku lw’Enkomerero nga luli kumpi.

Abo abatakkiriza basaba luleetebwe mangu, ate abo abakkiriza balwelaliikirira era bamanyi nti mazima ddala lwo (okutuuka kwalwo) ge mazima, abange mazima abo abawakana ku kubaawo kw'Olunaku lw’Enkomerero ddala bali mu bubuze obwewala.

Allah alumirwa abaddu Be, agabira oyo gw'aba ayagadde era Yye Ye Waamaanyi Nnantakubwakumukono.

Oyo ayagala ebikungulwa by'obulamu obw'oluvanyuma tumwongeza mu bikungulwa bye, n'oyo ayagala ebikungulwa by'obulamu bw'ensi tubimuwaako (ebyo bye twamugerera) naye nga talina ku Nkomerero mugabo gwonna.

(Ekibabuza) oba balinayo be bagatta ku Allah nga babateerawo amateeka g’eddiini ago Allah g'atakkiriza, era singa si kigambo eky'okusalawo (okulibaawo ku Lunaku lw’Enkomerero mangu ddala) wandiramuddwa wakati waabwe. Era mazima abeeyisa obubi balina ebibonerezo ebirumya ennyo.

(Ku Lunaku olwo) oliraba abeeyisa obubi nga beeraliikirira olw'ebyo bye bakola, era nga ddala ekyo kigenda kubatuukako ate abo abakkiriza ne bakola emirimu emirongoofu balibeera mu bifo by'omu Jjana, balifuna ebyo bye baagala ewa Mukama Omulabirizi Waabwe, ekyo bwe bulungi obusuffu.

Ekyo Allah ky'asanyusa nakyo abaddu Be abo abakkiriza ne bakola emirimu emirongoofu. (Ggwe Nnabbi Muhammadi) bagambe nti (eky'okubatuusaako Obubaka) sikibasabirako mpeera wabula (kye mbaagalamu) kwe kukolagana mu ngeri y’omukwano n'abooluganda. Oyo yenna akola obulungi tubumwongezaamu obulungi obulala, mazima Allah Musonyiyi nnyo Musiimi nnyo.

Oba (ekibabuza lwakuba) bagamba nti (Muhmmadi) yajweteka ku Allah ebigambo eby'obulimba? Allah bw'aba ayagadde asobola okuzibikira omutima gwo (singa okola nga bwe bagamba), era Allah n'aggyawo ebitali bituufu n'akakasa amazima n'Ebigambo Bye, mazima Yye amanyidde ddala ebiri mu bifuba.

Era Yye Y'oyo akkiriza okwenenya kwa abaddu Be era n'asonyiwa ebibi, era amanyi ebyo bye mukola.

Era ayanukula (okusaba kw'abo) abakkiriza ne bakola emirimu emirongoofu era n'abongera ebirungi Bye, bo abatakkiriza balina ebibonerezo ebikakali.

Singa Allah yagaziyiriza ebyenfuna ku baddu be (bonna) balyonoonye mu nsi, wabula assa mu kipimo ekyo ky'aba ayagadde mazima Yye amanyidde ddala ebyomunda era alaba nnyo ebikwata ku baddu Be.

Era Ye Y'oyo atonnyesa enkuba oluvannyuma (lw'abantu) okuggwamu essuubi n’okusuubira, era abunyisa okusaasira Kwe, era Yye, Ye Mukuumi atenderezebwa ennyo.

Naakamu mu bubonero bwe (obulaga obuyinza bwe) kwe kutondebwa kwe ggulu omusanvu ne nsi. Nebyo ebirimu obulamu ebitambula bye yassa mu byombi. Era yye asobola okubakungaanya wayagalira.

Obuzibu bwonna obubatuukako kiba lwa nsonga y'ebyo emikono gyammwe bye giba gikoze ate nga alekera bingi.

Era mmwe temuli bayinza kulemesa (Katonda) ku nsi ate era nga oggyeko Allah temulina mukuumi wadde omutaasa.

Era mu bubonero bwe mwe Muliro amaato agaseeyeeyera ku nyanja nga galinga ensozi.

Bw'aba ayagadde asobola okuyimiriza empewo (amaato) ne gasigala nga gayimiridde ku ngulu kwa yo (ennyanja, nga tegatambula), mazima mw'ekyo mulimu obubonero (obulaga obuyinza bwa Katonda) eri buli mugumikiriza ennyo eyeeebaza.

Oba ayinza okugabbiza (nebazikirira) olw'ebibi bye baba bakoze, anti bulijjo alekera bingi.

Era abo abawakanya Ebigambo Byaffe, bateekwa bamanye nti tebagenda kufuna buddukiro.

Buli kintu kyonna kyemuba muweereddwa kya kweyagala kwa bulamu bwa nsi, so nga ebiri ewa Allah bye bisinga obulungi era by'ebyokusigalawo nga by'abo abakkiriza ,era nga Mukama Omulabirizi Waabwe Yekka gwe beesiga.

Era beebo abewala ebibi ebinene n'ebyobuwemu era bo bwe baba banyiize basonyiwa.

Era beebo abaayanukula Mukama Omulabirizi Waabwe ne bayimirizaawo esswala era nga bulijjo ekigambo kyabwe (kisalwawo nga kiyita mu) kuteesaganya wakati waabwe era nga bagaba kw'ebyo bye tubagabirira.

Era na'bo bwe baba batuukiddwako obulumbaganyi, bo beerwanako.

Era empeera y'ekibi eba kibi ekifaanana nga kyo, kale nno oyo alekera n'atabagana (ne mu nne) okusasulwa kwe kuli ku Allah, anti mazima Yye (Allah) tayagala bayisa bannaabwe bubi.

Omuntu eyeetaasa nga abadde ayisiddwa bubi abo tebabalinaako kkubo (lya kubavunaana).

Mazima ekkubo (ly’okuvunaana n'okubonereza) liri kw'abo abayisa obubi abantu ne boonoona mu nsi awatali nsonga, abo balina ebibonerezo ebirumya ennyo.

Naye omuntu agumiikiriza n'asonyiwa, mazima ddala ekyo kya mu bintu ebikkaatirizibwa (Omukkiriza by'ateekwa okukola)

(Awatali Allah) oyo yenna Allah gw'abuza tayinza kuba na mukuumi, oliraba abeeyisa obubi bwe baliraba ebibonerezo baligamba nti: abaffe waliwo ekkubo eriddayo (ku nsi).

Olibalaba nga baleetebwa we guli (Omuliro) nga bakkakkamu olw'onunyoomoofu nga batunula bwe babbirira eriiso, abo abakkiriza baligamba nti mazima abo abaafaafaaganirwa beebo abaasalwa bo bennyini ne baleetera n'abantu baabwe okusalwa ku Lunaku lw'Enkomerero. Mazima abeeyisa obubi balibeera mu bibonerezo eby'olubeerera.

Era tebalifuna bakuumi babataasa ku Allah Oyo yenna Allah gw'abuza tayinza kuba na kkubo (lya kulunngama).

Mwanukule Mukama Omulabirizi Wammwe nga Olunaku terunnatuuka lwe wataliba buddukiro kuwona Allah. Ku lunaku olwo temuliba na buddo, era temuliba na buwakaniro.

Bwebaba bagaanye, tetukutumanga kuba kalondoozi ku bo, tovunaanyizibwa okuggyako okutuusa (Obubaka). Era mazima ffe bwe tukombya omuntu ku kusaasira okuva Gyetuli kumusanyusa, naye bwe batuukwako obuzibu olw'ebyo emikono gyabwe bye giba gikoze (nga olwo bakyusa enjogera) anti bulijjo mazima omuntu tasiima.

Bwa Allah obufuzi bw'eggulu omusanvu n'ensi, atonda ekyo ky'aba ayagadde, agabira oyo gw'aba ayagadde abaana ab’obuwala, era na'gabira oyo gw'aba ayagadde (omulala) abalenzi.

Oba abatabika ab’obuwala n’aboobulenzi ate oluusi gw'aba ayagadde amufuula mugumba (anti) mazima Yye Ye Mumanyi ennyo Omuyinza.

Tekisaanirangako muntu Allah kwogera naye, okugyako nga amussaako Bubaka, oba n'ayogera naye nga asinziira mabega wa lutimbe (ekyawulawo) oba okutuma Omubaka (Malayika), olwo nno ku lw'okusalawo Kwe n'amutumira ky'aba ayagadde (anti) mazima Yye Waawaggulu nnyo Mugobansonga.

Nabwekityo twakutumira (ggwe Nnabbi Muhammadi) omwoyo (Kulaani; eyitibwa mwoyo wano kubanga ewa emyoyo gy’abantu obulamu) nga ekyo kisinziira ku Kiragiro Kyaffe. Wali tomanyi Ekitabo (Kulaani) kye kiki, wadde Obukkiriza, naye twagifuula ekitangaala nga tulunngamya nayo oyo gwe tuba twagadde mu baddu Baffe, era mazima ggwe ddala olunngamya (olagirira) eri ekkubo eggolokofu.

Ekkubo lya Allah Oyo Yekka Nnannyini w'ebyo ebiri mu ggulu omusanvu n'ebyo ebiri mu nsi. Abange eri Allah ebintu byonna gye bidda.

Haa Miim.

Ndayidde Ekitabo ekinnyonnyofu.

Mazima Ffe twagissa Kulaani nga eri mu Luwalabu oba olyawo ne mutegeera.

Era mazima yo eri ku nsibuko y'ebitabo (Lauh Mahfuudh) ddala yo ya waggulu nnyo ejjudde amagezi.

Abaffe tunaabaggyirako ddala okubuulirira olw'okuba muli abantu abasukka ekikomo (abatagoberera mateeka ga Katonda)?

Bannabbi baleka be twatuma mu baasooka?

Tewali Nnabbi yenna yabajjira okuggyako baamujeejanga.

Olwo nno ne tuzikiriza abaamaanyi okusinga abo (abatakkiriza b'e Makkah) era ekyatuuka ku baakulembera kimanyiddwa (abalala bandikitutte nga ekyokuyiga).

Singa obabuuza nti ani yatonda eggulu omusanvu n'ensi, ddala bajja kugamba nti yabitonda Nnantakubwakumukono Omumanyi ennyo.

Oyo eyabateerawo ensi nga nnyanjuluze n'agibateeramu amakubo mulyoke mulunngame (mutuuke gye mulaga).

Era oyo assa okuva waggulu amazzi nga ga kigero (ekyetaagisa) ne tuzza buggya nago ekitundu ekifu (olwekyeya) bwemutyo bwe mulifulumizibwa (nga muzuukira).

Era Y'Oyo eyatonda emitindo ebiri ebiri gyonna era n'abateerawo amaato n’ebisolo eby'awaka ebyo bye mwebagala.

Mube nga mutebenkera ku migongo gyabyo, oluvannyuma musiime ekyengera kya Mukama Omulabirizi Wammwe we mubituulirako, era mugambe nti, Musukkulumu Oyo eyatugondeza kino tetwandibadde bakisobola.

Era mazima ddala ffe tuli ba kudda ewa Mukama Omulabirizi Waffe.

Naye abatakkiriza bateeka ku Allah abamu ku baddube (nti nabo bakatonda), mazima omuntu muwakanyi omweyolefu.

Oba mw'ebyo by'atonda mwe yasalawo okweggyira abawala ate mmwe n'asalawo okubawa abalenzi?!

So nga omu kubo bw'aba aweereddwa amawulire nti afunye omwana (omuwala) agwa mu kiti ky'abo be bapaatiika ku Katonda ekyenyi kye kisiiba kifumye era nga naye munyiikaavu.

Abaffe oyo (omuwala,) akuzibwa nga ali mu bya kwenyiriza, era nga yye mu kunnyonnyola taba na nsonga nywevu (gwemuwa Katonda!).

Bamalayika abo, abaddu ba Allah Omusaasizi ne babafuula abakazi! abaffe baaliwo nga batondwa? Obujulizi bwabwe (bwe beepampalika okuwa) bujja kuwandiikibwa era bagenda kubuuzibwa.

Era bagamba nti singa Allah Omusaasizi ennyo yayagala tetwandibasinzizza. Ekyo tebakirinaako kumanya kwonna, tebali (mu kukola ekyo) okuggyako bateebereza buteebereza.

Abaffe twabawa ekitabo olubereberye lwa kino balyoke babe nga kye beekwatako?

Wabula baagamba nti mazima ffe twasanga bakadde baffe nga bali ku nkola, era mazima ffe tuli mu buwufu bwabwe mwe tulunngamira.

Nabwekityo tetwatuma luberyeberye lwo mu kitundu kyonna mutiisa okuggyako nga babinojjo baamu baagamba nti mazima ffe twasanga bakadde baffe nga bali ku nkola, era mazima ffe tuli ku buwufu bwabwe tugoberera.

Omubaka waabwe kwe kugamba nti (kiba bwekityo) newaakubadde nga mbaleetedde ekirunngamu okusinga ekyo kye mwasangako bakadde bammwe? Ne bagamba nti mazima ffe, tuwakanya ekyo kye mutumiddwa nakyo.

Olwo nno ne tubabonereza, kale tunuulira enkomerero y'abalimbisa bwe yali.

Jjukira Ibraahiimu bwe yagamba kitaawe n’abantu be, nti mazima nze nneegaanye ebyo bye musinza.

Okuggyako (okusinza) oyo eyantonda anti mazima Yye y'ajja okunnunngamya.

(Ibraahiimu)yakiteekawo nga kigambo eky'okusigalawo oluvannyuma lwe, balyoke babe nga badda (eri okwawula Katonda).

Wabula nnawa abo ne bakadde baabwe okweyagalira mu bulamu bwensi, okutuusiza ddala nga amazima gabajjidde (Kulaani) n’Omubaka annyonnyola (amazima ago).

Naye nno amazima bwe gaamala okubajjira ne bagamba nti lino ddogo, era mazima ffe tuliwakanya.

Era ne bagamba nti singa Kulaani eno essiddwa ku musajja oweekitiibwa ng'ava mu kimu ku bitundu ebibiri.

Abaffe bo be bagabanya okusaasira kwa Katonda Wo, (obwannabbi nga bwe baagala)? Ffe tubagabanyiza ebibabeezaawo mu bulamu bw'ensi, ne tusukkulumya abamu ku balala mu madaala, abamu balyoke bafuule bannaabwe abaweereza, wabula okusaasira kwa Katonda Wo kwe kusinga obulungi kw'ebyo byonna bye bakunngaanya.

Singa sikuba nti abantu bonna bajja kufuuka ekibiina kimu (eky'obukaafiiri), buli eyandibadde awakanya Katonda Omusaasizi ennyo twalitadde ku mayumba gaabwe obusolya nga bwa ffeeza ne ku madaala ge balinnyirako (boonoonekere ddala).

Ne ku nnyumba zaabwe twanditaddeko emiryango ne ku bitanda bye bawummulirako (na kwo twanditaddeko ffeeza).

Era (twandibawadde) ebyokwewunda nga bya zzaabu, ebyo byonna nga bya kweyagala kwa bulamu obw'ensi, so nga Enkomerero ewa Mukama Omulabirizi Wo, y'abo abatya Katonda.

(N'oyo yenna eyeesulubabba Ebigambo bya Katonda (Kulaani) tumuwendulira Sitaane olwo nno n'eba nga ye mukwano gwe.

Era mazima bo bannaabwe (ba Sitaane) ddala babaziyiza okutuuka ku kkubo (eggolokofu) ate mazima bo ne basuubira nti balunngamu.

Okutuusa (omuntu oyo eyeesulubabba) lw'alijja Gyetuli, aligamba nti nga ndabye, singa wakati wange naawe waliwo ebbanga eryenkana ne wakati w'ebuvanjuba n'ebugwanjuba, agenda kuba munywanyi mubi!.

Mazima mmwe eky'okuba nti mwegattidde mu bibonerezo tekijja kubagasa olwaleero okuva lwe mweyisa obubi mwekka.

Abaffe ggwe (Muhammadi) osobola okuwuliza kiggala oba okulaga muzibe ekkubo n'oyo ali mu bubuze obweyolefu?

Singa tukuggyawo (n'ofa nga tetunnaba kubonereza bajeemu abo) mazima abatakkiriza tuba ba kubabonereza.

Oba tulikulaga ekyo kye twa balaganyisa anti mazima ffe tusobola.

Kale weekwate kw'ekyo ekikuweebwa (Kulaani) anti mazima ggwe oli ku kkubo eggolokofu.

Era mazima yyo (Kulaani) kitiibwa gy'oli ne eri abantu bo era lumu mugenda kubuuzibwa (ku ngeri gye mwagigobereramu).

Buuza abo be twatuma olubereberye lwo mu Babaka Baffe nti, abaffe twaleka Katonda Omusaasizi ennyo ne tuteekawo bukatonda obulala obusinzibwa?!

Mazima twatuma Musa n’obubonero Bwaffe nti genda eri Falaawo n'abakungu be, olwo nno n'abagamba nti: mazima nze ndi Mubaka w'Omulabirizi W’ebitonde.

Wabula bwe yabajjira n’obubonero Bwaffe wagenda okulaba nga babusekerera.

Tetwabalaga kabonero konna okuggyako nga ko kaba kanene okusinga kannaako (wabula era tebakkiriza) ne tubatuusaako ebibonerezo oba olyawo ne beddako (okuva ku kye babaddeko).

(Bwe baalaba ebibonerezo) olwo nno ne bagamba nti owange ggwe omulogo, tusabire Mukama Omulabirizi Wo nga okozesa ebyo bye yakuwa (ebisabisibwa) mazima ffe ddala tujja kulunngama.

Bwe twabaggyako ebibonerezo amangu ago bo ne bamenya endagaano.

Falaawo n'alangirira mu bantu be n'agamba nti: abange bantu bange obufuzi bwa Misiri si bwange, nga na gino emigga gikulukutira wansi wange abaffe temulaba?!

Wabula nze nsinga ono (Musa) oyo anyomwa, era nga kumpi tasobola na kunnyonnyola (nsonga) yonna.

Singa yanaanikibwa ebikomo ebya zaabu oba Bamalayika ne bajja naye nga bamuwerekera (olwo nno) twanditegedde nti Mubaka wa Katonda.

(Falaawo) bw'atyo bwe yazannyira ku bwongo bwa abantu be, olwo nno ne bamugondera era mazima bo ne baba abantu aboonoonyi.

Bwe baamala okutunyiiza twababonereza ne tubazikiriza n’amazzi bonna.

Ne tubafuula abaayita aboogerwako era ne tubafuula eky'okulabirako eri ab'oluvanyuma.

Mutabani wa Mariamu (Yisa) bwe yakubirwako ekifaananyi, ogenda okulaba nga abantu bo kibawogganya (olw'essanyu).

Ne bagamba nti abaffe bakatonda baffe be basinga oba yye, tebaakukubira kifaananyi ekyo okuggyako lwa kuwalaaza mpaka, nedda (si ekyo kyokka kye bawakanya) bulijjo bo bantu bawakanyi.

(Yisa tali) okuggyako okuba nti muddu Waffe nga abalala, twamugabira ekyengera (obwannabbi) era ne tumufuula ekyokulabirako eri abaaana ba Yisirayiri.

Singa twayagala abamu mu mmwe twandibafudde Bamalayika nga basikiragana mu nsi.

Era mazima yye (Yisa) kabonero akaliranga okusembera kw'Olunaku lw'Enkomerero, n'olwekyo temukibuusabusaamu n'akamu era mungoberere, lino ly'ekkubo eggolokofu.

Era Sitaane tabawugula ku kkubo eggolokofu anti mazima yye ku mmwe mulabe ow'olwatu.

(Nnabbi) Isa bwe yajja n'obunnyonnyofu yagamba nti mazima mbajjidde n'ebigambo eby'amagezi era mbannyonnyole ebimu kw'ebyo bye muwakanamu kale mutye Allah era munngondere.

Mazima Allah Ye Mukama Omulabirizi Wange era Mukama Omulabirizi Wammwe, kale mumusinze lino lye kkubo eggolokofu.

Wabula ebibiina byayawukana nga biva mu bo bennyini (ku nsonga ya Yisa) kale okubonaabona okw'ebibonerezo by'Olunaku oluzito kugenda kubeera kw'abo abeeyisa obubi.

Abaffe (balina kye) balindirira okuggyako Enkomerero okuba nga ebatuukako ekibwatukira nga nabo tebamanyi.

Aboomukwano ku Lunaku olwo, abamu baliba balabe ba bannaabwe okuggyako abatya Katonda.

(Era Katonda alirangirira nti) abange baddu bange, temujja kubaako kutya olwaleero era mmwe temuli ba kunakuwala.

Abo abakkiriza ebigambo byaffe era ne baba abeewaayo Gyetuli (Abasiraamu).

Muyingire Ejjana ne bakkiriza bannammwe nga musanyusibwa.

Essowani eza zaabu n’a magiraasi biryetoolooozebwa mu bo, era (Ejjana) eribaamu buli kintu emyoyo gye kyagala, era ekiwoomera amaaso, era nga mmwe muli ba kutuula bugenderevu mu yo.

Era eyo Ejjana, eyo gye musikiziddwa olw'ebyo bye mwakolanha (ku nsi).

Mulina mu yo ebibala bingi nga ku byo kwe mulya.

Mazima aboonoonyi ba kutuula bugenderevu mu bibonerezo by'Omuliro Jahannama.

Tegugenda kukendeezebwa ku bo, era nga tebalina na ssuubi lyonna lya kuguvaamu.

Tetwabayisa bubi naye bo be baali beeyisa obubi.

(Abaliba mu Muliro) balikoowoola nti owange Maaliki (Malayika akuuma Omuliro, tusaba nti) Mukama Omulabirizi Wo atutte (tufe), alibagamba nti mazima mmwe muli ba kugubeeramu (awatali kufa oba okuguvaamu).

Mazima twabaleetera amazima naye abasinga obungi mu mmwe baatamwanga amazima.

Bwe baba nga baasalawo ekigambo (eky'okukolera Muhammadi enkwe) naffe twasalawo (okuba nti tezigenda kuyitamu).

Oba balowooza nti mazima ffe tetuwulira ebyo bye balowooza mu mitima gyabwe oba bye bakubaganyaako ebirowoozo, nedda (tetukoma ku kubimanya bumanya, wabula we babikolera) n'abatumwa baffe baba mu maaso gaabwe nga bawandiika.

Gamba nti singa Katonda omusaasizi ennyo aba alina omwana olwo nno nze mbeera omusaale mu bamusinza.

Mukama Omulabirizi W'eggulu omusanvu n'ensi (era) Omulabirizi wa Arishi, Musukkulumu nnyo kw'ebyo bye bamujwetekako.

Kale baleke balimbe era bazannye okutuusa lwe balisisinkanyizibwa Olunaku lwabwe lwe balagaanyisibwa.

Anti Yye Ye Katonda asinzibwa mu ggulu, era ye Katonda asinzibwa ne mu nsi. Era Yye Ye Mugobansonga Omumanyi ennyo.

Era yayawukana Oyo, byonna bibye ebiri mu ggulu omusanvu ne mu nsi, n'ebyo ebiri wakati wa byombi, era Yye Yekka y'alina okumanya ebikwata ku Lunaku lw'Enkomerero (ekiseera kya lwo) era Gy'ali gye mulizzibwa.

Abo be basinza ne bava ku Ye tebalisobola kuwolereza, beppo oyo aliwa obujulizi mu mazima (y'aliyogera) ate era bo ne baba nga baliba bamanyi amazima.

Singa obabuuza nti ani yabatonda? Ddala bajja kugamba nti Allah, kale ate bawugulwa batya!.

(Katonda amanyi) ekigambo kye (Muhammad kyayogera olutata nga awanjagira Katonda nti) ayi Mukama Omulabirizi wange mazima abo (be nkowoola) bantu abatakkiriza.

Kale nno baleke era ogambe nti mirembe kya ddaaki balimanya.