Luganda Meal — Afrika Kalkınma Vakfı — Duhan 44:1 – İnsan 76:31

Haa Miim.

Ndayidde Ekitabo ekinnyonnyofu.

Mazima Ffe twakissa mu kiro eky'omukisa (anti) mazima Ffe twali tulina okutiisa (abantu).

Mu kyo (ekiro) buli kigambo ekiba kisaliddwawo mwe kigerekerwa.

Nga kwo kusalawo okuva Gyetuli (anti) mazima Ffe twali tuteekwa okutuma Ababaka.

(Eky'okutuma Ababaka) kusaasira okuva ewa Mukama Omulabirizi Wo (anti) mazima Yye y'awulira ennyo amanyi ennyo.

(Yye Katonda) Ye Mukama Omulabirizi W'eggulu omusanvu n'ensi n'ebyo ebiri wakati wa byombi, bwe muba muli Bakkiriza abannamaddala.

Tewali kirina kusinzibwa okuggyako Yye, awa obulamu era y'abuggyawo. Mukama Omulabirizi Wammwe era Omulabirizi Wa bakadde bammwe abaasooka.

Wabula bo (abatakkiriza) bali mu kubuusabuusa, bazannya.

Kale lindirira olunaku eggulu lweririreeta omukka omweyolefu (ogulabwa buli omu).

Gugenda kubikka abantu, ekyo kiriba kibonerezo ekirumya ennyo.

(Baligamba nti) ayi Mukama omulabirizi waffe tugyeko ekibonerezo, mazima ffe tukkirizza.

Naye wa gye baliggya okujjukira (batuuke okwebuulirira) ate nga mazima Omubaka annyonnyola obulungi yabajjira.

Oluvannnyuma ate ne bamuvaako, era ne bagamba nti (Muhammadi) ayigirizibwa buyigirizibwa era mulalu.

Mazima Ffe tumanyi tujja kuggyawo ekibonerezo katono (wabula) mazima mmwe mujja kuddayo (mu butakkiriza bwammwe).

(Wabula bajjukize) Olunaku lwe tulikwata olukwata olwamaanyi (anti) mazima ffe tuli ba kubonereza.

Era mazima twagezesa olubereberye lwabwe abantu ba Falaawo, era nga Omubaka Oweekitiibwa yabajjira.

(N'agamba nti) munzirize abaddu ba Allah (anti) mazima nze ndi Mubaka omwesigwa.

Era (ekyokubiri) mu be nga temwekuluntaliza ku Katonda, mazima nze mbaleetedde obujulizi obw'olwatu.

Era mazima nze nsaba obukuumi ewa Mukama Omulabirizi Wange era Mukama Omulabirizi Wammwe muleme kunkuba mayinja.

Bwe munaaba temukkiriza bye nngamba kale mundeke (temuntusaako kabi).

(Wabula baamukijjanya) olwo nno n'akoowoola Mukama Omulabirizi We nti mazima abo bantu boonoonyi.

(Katonda n'amulagira nti) tambula ekiro n'abaddu bange anti mazima mmwe mujja kuwonderwa.

(Bw'omala okusomoka ggwe ne b'oli nabo) ennyanja gireke nga erimu ekkubo (anti) mazima bo, ggye lya kuzikirizibwa.

Amalimiro n'ensulo z’amazzi bimeka bye baaleka?.

N’ebimera, n’ebifo eby'ekitiibwa.

N'ebyengera ebirala bingi bye baali beeyagaliramu.

Bwekityo (bwekyali nebaggwawo) netubisikiza abantu abalala.

Eggulu n'ensi tebyabakaabira era tebaali ba kulindirizibwa (nti baweebwe akaseera beenenye).

Ddala twawonya abaana ba Yisirayiri ebibonyoobonyo ebinyoomesa.

(Bwe twabawonya) Falaawo anti mazima yye yali mwekuza era nga wa mu boonoonyi ennyo.

Okusinziira ku kumanya (Kwaffe) twabasukkulumya (abaana ba Yisirayiri) ku bitonde ebirala.

Era ne tubawa ebyamagero ebyo ebyalimu okugesezebwa okw'olwatu.

Mazima abo (abatakkiriza b'e Makkah) ddala bagamba nti.

Tewali kiriwo okuggyako okufa kwaffe okusooka, era tetuli ba kuzuukizibwa.

(Okuzuukira bwe kuba nga gyekuli) kale muleete bakadde baffe bwe muba nga mwogera mazima.

Abaffe bo be basinga obulungi oba abantu ba Tubbai (bantu be Saba-a abafuzi be Yamani) n'abo abaaliwo olubereberye lwabwe (bonna) twabazikiriza (anti) mazima bo baali bonoonyi.

Tetwatonda ggulu omusanvu n'ensi n'ebyo ebiri wakati wa byombi nga tuzannya.

Era tetwabitonda byombi wabula ku lwa nsonga, naye ddala abasinga obungi ku bo tebamanyi.

Mazima olunaku lwokusalawo bonna kye kiseera kyabwe ekyabalagaanyisibwa.

Olunaku ow'omukwano lw'ataligasa wa mukwano kintu kyonna, era bo tebagenda kudduukirirwa.

Okuggyako oyo Allah gw'alisaasira anti mazima Yye Allah Ye Nnantakubwakumukono Omusaasizi ennyo.

Mazima omuti (oguyitibwa) Zakkuumi.

Mmere y'aboonoonyi.

(Obubi bwagwo ng’omuntu agulidde) guli nga ekyuma ekisaanuuse, gulyeserera mu mbuto (z’abaligulya).

Nga okwesera kw'amazzi agakyamuse.

(Olwo nno Katonda aliragira Bamalayika nti) mumukwate (omwonoonyi) olwo nno mumuwalule mu mukasuke mu makkati g’Omuliro Jahiimu.

Oluvannyuma mufukirire waggulu ku mutwe gwe ekibonerezo eky’amazzi ageeseze (agoogeddwako).

(Balimugamba) nti: loza (ku kibonerezo anti) mazima ddala ggwe ggwe Waamaanyi Oweekitiibwa (nga bamukudaalira).

Mazima kino ky'ekyo kye mwali mutankana.

Mazima abatya Allah baliba mu kifo eky'eddembe.

Baliba mu malimiro n’amazzi ag'ensulo.

Balyambala engoye eza liiri omuwewufu n’omuzito, nga batudde batunuuliganye.

Bwekityo (bwe kiriba) era tulibafumbiza ababeezi ab’amaaso amanene.

Balisaba nga bali mu yo buli kibala nga bali mirembe.

Nga bali mu yo tebalikomba ku kufa nga ogyeko okufa okwasooka, era ali bawonya ebibonerezo ebyomuliro Jahiimu.

(Byonna) nga bigabwa ebiva ewa Mukama Omulabirizi Wo, okwo kwe kwesiima okusuffu.

Era ddala twagyanguya (Kulaani) ku lulimi lwo babe nga beebuulirira (nayo).

Kale lindirira mazima ddala bo balindiridde.

Haa Miim.

Okussa Ekitabo kino (Kulaani) kuva ewa Allah Nnantakubwakumukono, Mugobansonga.

Mazima mu (ggulu omusanvu n'ensi mulimu obubonero obwenkukunala (obulaga obuyinza bwa Katonda) eri Abakkiriza.

Era ne mu kutondebwa kwammwe, n'ebyo by'asaasaanya mu bitambulira (ku nsi) bubonero eri abantu abakakasa (okubeerawo kwa Katonda n’obuyinza Bwe).

N’okwawukana kw'ekiro n’emisana n'ebyo Allah by'assa okuva waggulu (enkuba) mu bigabwa Bye n'alamusa nabyo ensi oluvannyuma lw'okufa kwayo, n'okutambuza empewo, bubonero eri abantu abategeera.

Ebigambo bya Allah ebyo (ebiraga obubonero Bwe) tubikusomera mu butuufu, olwo bigambo ki oluvannyuma lw'okuwakanya Allah n’ebigambo Bye bye balikkiriza?!

Okubonaabona kuli ku buli omuyitirivu w’okulimba omwonoonyi.

Awulira Ebigambo bya Allah nga bimusomerwa oluvannyuma n'aakalambira nga yeekuluntaza n'aba ng'atabiwulidde, kale musanyuse nga (omuwa amawulire) g’ebibonerezo ebirumya ennyo.

Bw'amanya ekintu kyonna mu Bigambo Byaffe akifuula kya kujeeja, abo balina Ebibonerezo ebinyoomesa.

Mu maaso gaabwe Omuliro Jahannama gubalinze era bye bakola tebigenda kubagasa kintu kyonna wadde ab’emikwano be beeteerawo ne bava ku Allah era balina Ebibonerezo ebisuffu.

(Kulaani) eno, kyakulunngamya. Naye abo abawakanya Ebigambo bya Mukama Omulabirizi Waabwe balina Ebibonerezo ebimu kw'ebyo ebikambwe ebirumya ennyo.

Allah Y'Oyo eyabagondeza ennyanja, amaato gabe nga gatambulirako olw'Ekiragiro Kye, era mube nga musobola okunoonya mu bigabwa Bye, era musobole okwebaza.

Era yabagondeza ebyo ebiri mu ggulu omusanvu n'ebyo ebiri mu nsi, nga byonna biva Gy'ali. Mazima mw'ekyo mulimu obubonero (obulaga okubaayo kwa Allah n’Obuyinza Bwe) eri abantu abafumiitiriza.

Gamba abo abakkiriza basonyiwe abo abatasuubira (kusisinkana) nnaku za Allah, alyoke asasule abantu olw'ebyo bye baakolanga.

Oyo akola emirimu emirungi akolera mwoyo gwe, ate oyo ayonoona (akabi k'okwonoona kwe) kadda eri mwoyo gwe, oluvanyuma eri Mukama Omulabirizi Wammwe gye mulizzibwa.

Mazima twawa abaana ba Yisirayiri Ekitabo n’okulamula wakati w'abantu n’obwannabbi ne tubagabirira ebirungi era nebtubasukkulumya ku bantu abalala (abaaliwo ku mulembe gwabwe).

Era twabawa obunnyonnyofu bw'ekigambo (ekikwata ku kutumwa kwa Nnabbi Muhammadi) era tebaayawukana okuggyako luvannyuma lwa kumanya kubajjira (nga ekyo baakikola) olw'obukyayi obwali wakati waabwe, mazima Mukama Omulabirizi Wo agenda kulamula wakati waabwe ku Lunaku lw’Enkomerero mw'ebyo bye baayawukanangamu.

Oluvannyuma twakussa (ggwe Muhammadi) ku nkola ennambulukufu ku kigambo (ky'eddiini) kale gigoberere, naye togoberera okwagala kw'abo abatamanyi.

Anti mazima bo tebayinza kukuyamba kintu kyonna kukutaasa Allah, era mazima abeeyisa obubi abamu mu bo banywanyi ba bannaabwe, naye Allah Ye Munywanyi w'abamutya.

Eno (Kulaani) kitangala eri abantu, era bulunngamu na kusaasira eri abantu abatya Katonda abannamaddala.

Abaffe oba abo abeewerebye ebibi basuubira nti tuyinza okubafuula nga abo abakkiriza ne bakola emirimu emirongoofu nga obulamu bwabwe n’okufa kwabwe bifaanana (nedda) okulamula kwabwe kubi.

Era Allah yakola eggulu n'ensi mu butuufu, buli mwoyo gulyoke gube nga gusasulwa olw'ebyo bye gwakola era bo si bakulyazaamaanyizibwa.

Abaffe olabye oyo okwagala Kwe nga kw'afuula Katonda We, Allah n'amubuza awamu n’okuba nti (omuntu oyo) amanyi ekituufu era (Allah) n'azibikira amatu ge n'omutima gwe, era n'assa ku maaso ge ekibikka, olwo nno ate ani ayinza okumulunngamya oluvannyuma lwa Allah (okumutusa awo), abaffe temwebuulirira?!

Era (abatakkiriza) bagamba nti (obulamu) teri bulala okuggyako obulamu bwaffe obw'okunsi, tufa era ne tuba balamu, tewali kituggya mu bulamu okuggyako myaka (gya muntu) kuggwaako, naye nga tebalina kumanya kwonna ku kikwatako, tebali bo okuggyako bateebereza buteebereza.

Ebigambo Byaffe bwe bibasomerwa mu bunnyonnyofu (bwabyo), ekyekwaso kyabwe tekiba okuggyako bagamba (bw'eba nga eriyo okuzuukira kale) mukomyewo bakadde baffe (abaafa) bwe muba mwogera mazima.

Bagambe (ggwe Nabbi Muhammadi) nti Allah y'abawa obulamu oluvanyuma n'abatta ate oluvannyuma agenda kubakunngaanya nga abatwala eri Olunaku lw’Enkomerero, teruliimu kubuusabuusa naye abantu abasinga obungi tebamanyi.

Bwa Allah Yekka obufuzi bw'eggulu omusanvu n'ensi, era Bubwe olunaku Enkomerero lw'eriyimirirawo, Olunaku olwo aboonoonyi balifaafaaganirwa.

(Kw'olwo) oliraba buli kibiina nga kifukamidde (olw'okutya). Buli kibiina kiriyitibwa okugenda awali ekitabo kya kyo (ekyo ekirimu emirimu gyabwe era baligambibwa nti) olwaleero muli ba kusasulwa ebyo bye mwali mukola.

(Era baligambibwa nti) ekitabo kyaffe kino kiboogerako mu mazima (anti) mazima ffe twawandikanga buli kye mwakolanga.

Olwo nno abaakola emirimu emirongoofu Mukama omulabirizi waabwe alibayingiza mu kusaasira Kwe, okwo nno kwe kwesiima okweyolefu.

Ate abo abaagaana okukkiriza (Allah alibagamba nti) abaffe ebigambo Byange tebyabasomerwa ne mwekuluntaza ne mubeera abantu aboonoony?!

Era bwe mwagambibwanga nti ddala Endagaano ya Allah ya mazima era nti Olunaku lw'Enkomerero teluliimu kubuusabuusa, mwagambanga nti Enkomerero tetumanyi kye ki (ebigikwatako) tuwammanta biwammante, era ffe tetugirinaako bukakafu.

Awo obubi bw'ebyo bye baakola buli beeyoleka era ebibonerezo by'ebyo bye baali bajeeja biribakakatako.

Era baligambibwa nti olwaleero tubeerabidde nga bwe mwerabira okusisinkana olunaku lwa mmwe luno, Omuliro bwe buddo bwammwe era temugenda kufuna badduukirize.

Ekyo nno mmwe (ekikibatuusaako) lwakuba nti mazima mmwe Ebigambo bya Allah mwabifuula bya kujeeja era obulamu bw'ensi ne bubagayaaza, n’olwekyo olwaleero si baakugujjibwamu (Omuliro) era tebagenda kugambibwa kwetonda.

Ebitendo byonna bya Allah Mukama omulabirizi W'eggulu omusanvu, era Mukama Omulabirizi W'ensi, Mukama Omulabirizi W’ebitonde byonna.

Ebitiibwa byonna mu ggulu omusanvu ne mu nsi bibye Yekka, era Yye, Ye Nnantakubwakumukono Mugobansonga.

Haa Miim.

Okussa ekitabo kino (Kur’ani) kuva ewa Katonda nantakubwa ku mukono, mugoba nsonga.

Tetwatonda eggulu omusanvu ne nsi nebyo ebiri wakati wa byombi wabula mu butuufu (nga bwe kisaana okuba nga ddala Katonda yaabikoze), era nga byakubeerawo okumala ekiseera ekigere, wabula bo abakaafuwala besamba ebyo bye batiisibwa (bye babulirirwa) nabyo.

Bagambe nti mulaba ebyo bye musaba nemuleka Allah, kale mundage biki bye baatonda ku nsi oba balina omugabo (gw'okutonda) ebyo ebiri mu ggulu omusanvu (bwe kiba bwe kityo) kale mundeetereyo ekitabo ekyaliwo olubereberye lwa kino (Kulaani), oba ebisigala bya yirimu yonna bwe muba nga mwogera mazima!.

Ani mubuze okusinga oyo alekawo Allah n'asaba ekyo ekitasobola kumwanukula okutuusa ku lunaku lw’enkomerero! nga nabyo (bye basaba) tebirina kye bimanyi ku kusaba kwabwe.

Ng’ate abantu bwe balikunganyizibwa (be baasaba nga) bagenda kuba balabe baabwe era bagenda kwewakana okuba nti ba basinzanga.

Ebigambo byaffe bwe bibasomerwa nga binnyonnyofu, abo abawakanya amazima bwe gabajjira bagamba nti lino ddogo lyeyolefu.

Oba bagamba nti Nabbi Muhammadi ye yajigunjaawo (Kulaani)! bagambe nti bwemba najigunjaawo temulina kintu kye muyinza kumponya ku Katonda, yye yaasinga okumanya bye muwolompokamu. Ye amala okuba nga mujulizi wakati wange nammwe era yye ye musonyiyi omusaasizi ennyo.

Bagambe nti si nze nsoose mu babaka era simanyi Allah kyanantuusaako, wadde kyanantuusaako, sirina kyengoberera okugyako obubaka obumpebwa era siri nze okugyako omutiisa ow'olwatu.

Bagambe nti abaffe mulaba nti singa (Kulaani) eva wa Allah ate mmwe nemugiwakanya, naye nga omujulizi mu baana ba Israil yajulira ku kiringa yo (nti kiva wa Katonda) olwo nno yye) nakkiriza ate mmwe ne mwekuluntaza (olwo mu mbeera eyo kiba kitya), mazima bulijjo Katonda talungamya bantu beeyisa bubi.

Abo abaakafuwala nebagamba abo abakkiriza nti (Muhammadi byagamba) singa bibadde birungi (abo) tebanditusoose kugenda gyebiri, naye olwokuba tebalungama nayo, bajja kugamba nti Kulaaani kugunja okwedda.

Nga nolubereberye lwayo (waliyo) ekitabo kya Musa nga kyagobererwa nga kya kusaasira n'ekitabo kino (Kulaani kyajja nga) kikakasa (ebyakulembera) nga kiri mu lulimi luwarabu, kibe nga kirabula abo abeeyisa obubi era nga kya kusanyusa eri abalongoosa.

Mazima abo abagamba nti Mukama omulabirizi waffe katonda ye ِAllah, oluvanyuma ne babeera beesimbu (mu ddiini) tebagenda kutuukwako kutya era tebagenda kunakuwala.

Abo be ba nannyini jjana, ba kugituulamu obugenderevu nga yempeera olwebyo bye baali bakola.

Omuntu twamulagira okuyisa obulungi bakaddebe, nnyina yamwetikka (yali lubuto lwe) mu buzibu era namuzaala mu buzibu, nga olubuto lwe (n'okumuyonsa) n'okumujja ku mabeere emyezi makumi asatu, okutuusa lwatuuka okukakata kwe naaweza emyaka amakumi ana (omuntu mulamu) agamba nti ayi Mukama omulabirizi wange nsobozesa okwebaza ebyengera byo ebyo bye wangabira ,ne bye wagabira bakadde bange bombi era mbe nga nkola emirimu emirongoofu gy'osiima, era nongooseza ezzadde lyange mazima nze nenenyezza nenzira gy'oli era mazima nze ndi mu basiraamu.

Abo beebo betukkiriza okuva gye bali ebirungi ebyo bye baakola era netusonyiwa ebisobyo byabwe (era ba mu bantu) ba mu jjana (era eyo) ye ndagaano eyamazima gye baali baalaganyisibwa.

Nooyo yenna agamba bakadde be nti mutwale eri, muntiisatiisa nti nja kuzuukizibwa, so ng’ate emirembe mingi egiyiseewo oluberyeberye lwange (ani yali azuukidde), nga bakadde bombi basaba Katonda abayambe, era nga bamugamba (omwana) nti obula! (kyolina okukola) kkiriza, mazima endagaano ya Allah ya mazima. Olwo nno yye (omwana) agamba nti ebyo tebiri okugyako okuba enfumo za baakulembera.

Abo nno beebo abaakakatwako ekigambo (ekyokubonerezebwa) mu bibiina ebyayita olubereberye lwabwe nga baava mu majinni ne mu bantu mazima bo be bafafaganirwa.

Era buli omu alina amadaala okusinziira kw'ebyo bye bakola era ddala (Katonda) agenda kubawa empeera etuukana n'emirimu gyabwe era bo ssi ba kuyisibwa bubi.

Era (mulowooze) ku lunaku abo abaakafuwala lwe balyanjulwa eri omuliro (baligambwa nti) ebirungi bya mmwe mwabimalira mu bulamu bwa mmwe obwensi, ne mweyagala nabyo, kale nno olwaleero mugenda kusasulwa ebibonerezo ebinyoomesa olwengeri gye mwaali mwekuluntazaamu mu nsi awatali nsonga ne ku lwebyo bye mwali mwonoona.

Era bajjukize (ggwe Nabbi Muhammadi) muganda wa A’di (Hudu) bwe yalabula abantu be abaali mu bifo ebijjuddemu entuunu z'omusenyu (gyoli nti nsozi) era nga okulabula kungi okwayita olubereberye lwe n'oluvanyuma lwe, (nga ababaka bonna baali bagamba nti) temusinzanga okugyako Allah (era) mazima nze ntya okuba nga mutuukwako ebibonerezo by'olunaku oluzito.

Nebagamba nti abaffe otujjidde otuwugule ku bisinzibwa byaffe! (bwekiba bwe kityo), kale tutuuseeko kyotulagaanyisa bw'oba nga oli mu boogera amazima.

Naabagamba nti mazima okumanya (ddi? lwe kiribatuukako) kuli eri Katonda era (nze) mbatusaako ebyo bye natumwa nabyo, naye mazima nze mbalaba nga muli bantu abatamanyi.

Naye bwe baakiraba nga (kire) ekyetimbye (ku ggulu), nga kyolekedde ensenyi zaabwe, baagamba nti ekyo ekire ekyetimbye kigenda kutuwa nkuba, wabula nedda kyo kyekyo kye mubadde musaba kibatuukeko mangu, kale nno (kyo) mpewo (kikungunta) erimu e bibonerezo e biruma ennyo.

Ejja kuzikiriza buli kintu kyonna okusinziira ku kiragiro kya Mukama omulabirizi waayo, olwo nno nebatuuka okuba nga tewali kirabwa okugyako amayumba gaabwe, bwetutyo bwe tusasula abantu abonoonyi.

Mazima twabawa obusobozi (abantu ba Huudu) kwebyo bye tutaabawa mmwe (abe Makkah) busobozi ku byo, era nga twabawa amatu n'amaaso n'emitima kyokka amatu gaabwe tegaabagasa kintu kyonna wadde amaaso gaabwe n'emitima gyabwe okuva lwe baali nga bawakanya ebigambo bya Katonda era nebibamalawo ebyo bye bajeejanga.

Era mazima twazikiriza ebitundu ebyo ebibeetolodde, era netunyonyola ebigambo oba olyawo nebadda (nebaleka okukaafuwala).

Kale singa baabataasa abo abaaleka Allah ne beteerawo ebisinzibwa ebirala ebibasembeza ewa Katonda (ssi bwegwali) wabula baabula era (endowooza yaabwe) eyo kwali kutemerera kwabwe era nga byali ebyo bye bagunjaawo.

Jjukira (gwe Nabbi) bwe twakuleetera ekibinja kya majinni negaba nga gawuliriza Kur’ani, bwe gaatuuka weyali esomerwa ne gagamba nti muwulirize, bwe yamala okusomwa ne gakyusa okudda eri gannaago nga gagalabula (akabi akali mu kujeemera Allah).

Negagamba nti abange bannaffe, mazima ffe tuwulidde ekitabo ekyassibwa oluvanyuma lwa Musa nga kikakasa ebyo ebya kikulembera (nga ddala) kirungamya eri amazima n'eri ekkubo eggolokofu.

Abange bannaffe mwanukule omukowooze wa Allah, era mumukkirize (Allah), agya kubasonyiwa ebyonoono bya mmwe era abawonye ebibonerezo ebiruma ennyo.

Oyo yenna atayanukula mukowooze wa Katonda siwakulemesa Katonda ku nsi, era talina nga oggyeko Katonda bakuumi (basobola kumuwonya) abo, bali mu bubuze obweyolefu.

Abaffe mazima Allah, oyo eyatonda eggulu omusanvu ne nsi, era nga teyakoowa olwokubitonda tebalaba nti asoboleraddala okulamusa abafu! Wewaawo (asobolera ddala, anti) mazima yye muyinza ku buli kintu.

Ate olunaku abo abakaafuwala lwe balireetebwa eri omuliro (baligambwa nti) abaffe kino ssi kya mazima!, baligamba nti wewaawo tulayidde Mukama omulabirizi waffe, (Katonda) aligamba nti kale mukombe ku bibonerezo olwebyo bye mwali muwakanya.

N’olwekyo (gwe omubaka) gumikiriza nga ababaka abavumu bwe bagumukiriza era tobasabira bibonerezo ku batuukako mangu, naye olunaku lwe baliraba bye balaganyisibwa baliba nga abatawangaala okugyako akaseera katono mu budde obwemisana, (ebyo byonna ebibabuuliddwa) bubaka obutuusiddwa gye muli ate olwo balizikirizibwa okugyako abantu abonoonyi?.

Abo abaakafuwala nebaggya abantu ku kkubo lya Allah (Katonda) yayonoona emirimu gyabwe.

Ate abo abakkiriza nebakola emirimu emirongoofu era nebakkiriza ebyo ebyassibwa ku Muhammadi, era nga g’emazima agava ewa Mukama omulabirizi waabwe (abo Katonda) yabasangulako ebisobyo byabwe era naalongoosa embeera yaabwe.

Ekyo kiri bwekityo lwakuba nti mazima bo abaakafuwala baagoberera ebitali bituufu, ate nga abo abakkiriza baagoberera amazima agava eri Mukama omulabirizi waabwe, bulijjo Katonda bwatyo akubira abantu ebifaananyi byabwe (bagerageranye).

Olwo bwe muba nga musisinkanye abo abaakafuwala (mu lutalo) muteme ensingo, okutuusiza ddala nga mubanafuyizza, munyweze empingu (zemusiba nazo abawambe) olwo nno kiri gyemuli okubata oluvanyuma (lwo kubawamba) oba okubakkiriza okwenunula, (ekyo mukikole bwemutyo) okutuusa olutalo lweruggwa. Ekyo bwekityo bwekiri, naye singa Katonda yayagala yandibewangulidde, wabula (ekimugaana okukola ekyo) lwakwagala kugezesa abamu mu mmwe ng'akozesa abalala. Era abo abattibwa nga bali mu kulwana mu kkubo lya Katonda, (Katonda) tagenda kwonoona mirimu gyabwe.

Ajja kubalungamya era alongoose nembeera yaabwe.

Era abayingize e jjana gyeyabategeeza edda.

Abange mmwe abakkiriza singa mutaasa Katonda, ajja kubataasa, era anyweze ebigere byammwe (abagumye).

N'abo abaakafuwala okuzikirira kube ku bo, era Katonda yayonoona emirimu gyabwe.

Ekyo lwakuba nti mazima bo bakyawa ebyo Katonda byeyassa, olwo nno nayonoona emirimu gyabwe.

Abaffe tebatambula mu nsi, olwo nno ne balaba nga bweyali enkomerero yaabo abaaliwo olubereberye lwabwe, (anti) Katonda yabazikiriza. Era abo abaakafuwala ba kutuukwako ekiringa ekyo.

Ekyo nno lwakuba nti mazima Katonda ye Mukuumi wa bakkiriza era nga ddala abawakanya Allah tebalina mukuumi.

Mazima Katonda ajja kuyingiza abo abakkiriza nebakola emirimu emirongoofu e jjana. Ezikulukutira wansi waazo emigga, ate abo abaakafuwala ne beeyagalira (mu bulamu bw'okunsi) era ne balya ng'ensolo bwezirya, kale omuliro bwe buddo bwabwe.

Era ebitundu bimeka nga byo byali byamaanyi okusinga ekitundu kyo (Makkah)? ekyo ekyakugoba, abantu be bitundu ebyo twabazikiriza newataba abadduukirira.

Abaffe oyo aba ali ku bunnyonnyofu obuva ewa Mukama omulabirizi we ayinza okuba ng'oyo emirimu gye emibi egyamulabisibwa okuba nti mirungi!, era (abantu abo) nebagoberera okwagala kwabwe.

(Abaffe) endabika ye jjana eyo abatya Katonda gye balaganyisibwa, erimu emigga egy'amazzi agatayonooneka n'emigga gya mata agatakyuse mpoma yaago, n’emigga egy'omubisi oguliwoomera abanywi n'emigga gy'omubisi omusengejje, nga bali mu yo balifuna ebibala byonna, era balifuna mu yo ekisonyiwo okuva ewa Mukama omulabirizi waabwe, oyinza okugigerageranya ku oyo owokutuula mu muliro obugenderevu nga era balinywesebwa olwegye lwa mazzi, olwo nno negakutulakutula ebyenda byabwe.

Era mu bo mulimu abakuwuliriza (nga balaga nti bagonvu) okutuusa bwe bafuluma okuva wooli, bagamba abo abaweebwa okumanya nti, abadde agambaki emabegako awo?, abo beebo Katonda beyassa envumbo ku mitima gyabwe era nebagoberera okwagala kwabwe.

Ate abo abaalungama (Katonda) abongera bulungamu era naabawa okutya kwabwe (Katonda).

Abaffe balina kyebalindirira okugyako ekiseera ekyenkomerero okuba nga kibaggyira kibwatuukira ate nga ddala (obumu) ku bubonero bwakyo bumaze okujja, baligyawa okubuulirirwa kwabwe (okulibagasa ekiseera) bwe kiribagyira!.

Kale manya nti mazima tewali kisinzibwa mu butuufu okugyako Katonda era osabe ekisonyiwo olwe byonoono byo, era abakkiriza abasajja n'abakkiriza abakazi obasabire ekisonyiwo, era Katonda amanyi entambula zammwe (nga mujjulukuka okuva mu kifo ne mudda mu kirala n'okuva ku kikolwa ne mudda ku kirala) era amanyi obuddo bwa mmwe.

Abo abakkiriza bagamba nti singa essura (eragira olutalo) essibwa, naye essura neemala essibwa nga eyogera mu bulambulukufu nga n'okulwana kwogerwako mu yo, olaba abo abalina obulwadde mu mitima gyabwe nga bakutunuulira entunula ey’omuntu azirise ku lwokutya okufa. Ekyalisinze obulungi gyebali.

(Kwe) kugonda, n'ebigambo ebirungi, naye ekigambo bwe kimala okukakata, kale singa batuukiriza bye balagaanyisa Katonda kye kyalisinze obulungi gye bali.

Abaffe musuubira nti singa mukulembera (ne muba abafuzi) nti munayonoona mu nsi ne mukutula enganda zammwe.

(Abakola ebyo) abo beebo Katonda beyakolimira naabaggala amatu era naaziba amaaso gaabwe.

Abaffe tebetegereza Kulaani, oba emitima gyegiriko ekkufulu zaagyo.

Mazima abo abakyuka ne badda gyebaava (nebaleka obusiraamu) oluvanyuma lw’obulungamu okuberambikira, Sitane yeyabibalaga nti birungi era nabasuubiza ebyobulimba.

Ekyo nno, lwakuba nti mazima bo, bagamba abatayagala Katonda byeyassa, nti tujja kubagondera mu bintu ebimu. Era bulijjo Katonda amanyi ebyama byabwe.

Olwo nno baba ngeri ki Malayika bwezibatusaako entuuko zaabwe, nga zikuba ebyenyi byabwe n’obutuuliro bwabwe.

Ekyo (bwekityo bwekiriba) olwokuba nti mazima bo baagoberera ebyo ebinyiiza Katonda nebakyawa okusiima kwe, olwo nno naayonoona emirimu gyabwe.

Abaffe abo abalina obulwadde mu mitima gyabwe basuubira nti Katonda tagenda kuggyayo bukukuuzi bwabwe (bwe balina ku Nabbi Muhammadi).

Singa twagala twandibakulaze, olwo nno wandibategedde olwo bubonero bwabwe, era ojja kubategeerera ddala okusinziira ku njogera yaabwe. Era Katonda amanyi emirimu gyammwe.

Era tujja kubagezesa okutuusa lwetunategeera abalafubana mu mmwe mu kuweereza mu kkubo lya Katonda nabagumikiriza, era tujja kugezesa ebigambo bya mmwe.

Mazima abo abaakafuwala nebaziyiza abantu ku kkubo lya Katonda, nebeesimba mu mubaka oluvanyuma lwo bulungamu okubeeyoleka, (abo) tebalina kabi konna kebayinza kutuusa ku Katonda, era wa kusazaamu emirimu gyabwe.

Abange mmwe abakkiriza mugondere Katonda, era mugondere omubaka, era temwononanga emirimu gya mmwe.

Mazima abo abaakafuwala era nebalemesa abantu e ddiini ya Katonda, oluvanyuma nebafa nga bakafiiri, Katonda tagenda kubasonyiwa.

Temufotokereranga ne musaba emirembe ate nga mmwe ba waggulu, era nga Katonda ali wamu na mmwe, era nga tagenda kukendeeza mpeera ya mirimu gya mmwe.

Mazima obulamu bwe nsi muzannyo na binyumu, naye bwe mukkiriza era nemutya Katonda, ajja kubawa empeera ya mmwe, ate nga tabasabye mmali ya mmwe.

Singa agibasaba nabapeeka mujja kukodowala, olwo nno nassa mu bbanga obukukuuzi bwa mmwe.

Abaffe mmwe, mmwe beebo abakowoolwa mube nga muwaayo mu kkubo lya Katonda, olwo nno mu mmwe ne mubaamu akodowala, so nga omuntu akodowala, mazima yekodowalira yekka ng’ate Katonda yatalina kyeyetaaga ate nga mmwe muli betaavu, naye bwe munakyuka (nemuva ku ddiini) ajja kuleeta abantu abalala abatali mmwe, oluvanyuma tebagenda kuba nga mmwe.

Mazima ffe tukugguliddewo oluggulawo olweyolefu.

Katonda alyoke akusonyiwe ebyonoono byo ebyakulembera, n'ebyo ebyoluvanyuma, era ajjuze ekyengera kye kye yakuwa, era akulungamye mu kkubo eggolokofu.

Era akutaase olutaasa olwa nnamaddala.

Yye yooyo eyassa obutebenkevu mu mitima gya bakkiriza babe nga beyongera obukkiriza ku bukkiriza bwabwe (obwasooka), amagye go mu ggulu omusanvu ne nsi gonna ga Katonda, era (bulijjo) Katonda mumanyi nnyo mugoba nsonga.

Olwo nno ayingize abakkiriza abasajja n'abakkiriza abakazi e jjana, nga emigga gikulukutira wansi waazo, ba kutuula mu zo obugenderevu, era abagyeko ebisobyo bya bwe, ekyo ewa Katonda bwe buwanguzi obunene.

Era abonereze abananfusi abasajja n'abannanfusi abakazi, n'abasajja abagatta ebintu ebirala ku Katonda n'abakazi abagatta ebintu ebirala ku Katonda, abalowooza ku Katonda endowooza embi, batukwako enkyukakyuka embi, era Katonda yabasunguwalira nabakolimira era yabategekera omuliro Jahannama (era nga ggwo) buddo bubi.

Era amagye go mu ggulu omusanvu n'ensi gonna ga Katonda, era (bulijjo) Katonda nantakubwa ku mukono mugoba nsonga.

Era mazima ffe twakutuma (ggwe Nabbi Muhammadi) nga oli mujulizi era omusanyusa (olwa mawulire agessanyu gowa abakozi bo bulungi) era omutiisa (olwa mawulire ag’ebibonerezo eri abakozi be bibi).

Mulyoke mukkirize Katonda n’omubaka we, era mu muyambe era mumuwe ekitiibwa era (Katonda) mumutendereze enkya ne ggulo.

Mazima abo abalangirira obuwagizi bwabwe gyoli mazima balangirira buwagizi bwabwe eri Katonda, omukono gwa Katonda guli waggulu wa mikono gya bwe, kale nno oyo anaamenya endagaano mazima mukugimenya aba yeefiriza yekka, nooyo atuukiriza ekyo kye yaweerako Katonda obweyamu ajja kumuwa empeera ensuffu.

Ba nnamalungu abaasigala (ne batagenda Makkah naawe) bajja kugamba nti emmaali yaffe na b’omumaka gaffe bye bya tulobera okugenda n’olwekyo tusabire ekisonyiwo, boogera ne nnimi zaabwe ebyo ebitali mu mitima gyabwe, bagambe nti olwo nno ani alina obuyinza ewa Katonda ku kintu kyonna ekibakwatako singa aba abaagalizza kabi, oba nga abaagalizza eky'omugaso, wabula Katonda amanyidde ddala ensibuko y'ebyo bye mukola.

Wabula mwalowooza nti omubaka n’abakkiriza lubeerera tebaali ba kudda eri bantu ba mu maka gaabwe, era ekyo nekinyirizibwa eri emitima gya mmwe, nemulowooza endowooza embi, era nemuba abantu abaggweera mu kubula.

Oyo yenna atakkiriza Katonda n’omubaka we, (ka kumujjuutuka) anti mazima ffe twategekera abakafiiri omuliro omukume.

Obufuzi obwe ggulu omusanvu n'ensi bwa Katonda, asonyiwa gwaba ayagadde era nabonereza gwaba ayagadde era bulijjo Katonda musonyiyi nnyo musaasizi.

Abataagenda (naawe ku lutabaalo lwe Khaibara) bwe mugenda eri eminyago mube nga mugifuna bajja kugamba nti mutuleke tubagoberere, nga baagala okuba nga bakyusa ebigambo bya Katonda (okuba nga eminyago gyabo bokka ebeetaba mu lutabaalo) bagambe nti temutugoberera, bwekityo Katonda bwe yagamba oluberyeberye, olwo nno bajja kugamba nti wabula (mmwe) mutukwatirwa nsaalwa (naye nga si kyekyo) wabula baali tebategeera okugyako katono ddala.

Gamba abo abaasigala mu ba nnamalungu, nti lumu mujja kuyitibwa okugenda eri abantu abaamaanyi amayitirivu mube nga mulwanagana nabo oba basiramuke, awo nno singa muligonda (nemutuukiriza ekiragiro) Katonda ajja kubawa empeera ennungi, naye kemulimala muva kwekyo (ne mutalwana) nga bwe mwakyuka olubereberye (bwe mutaalwana) agenda kubabonereza ebibonerezo ebiruma ennyo.

Muzibe taliiko kunenyezebwa, n’omulema taliiko kunenyezebwa, wadde omulwadde naye taliiko kunenyezebwa, oyo yenna agondera Katonda n’omubaka we amuyingiza e jjana, emigga nga gikulukutira wansi waazo, ate oyo yenna akyuka (naatamugondera) agenda ku mubonereza ebibonerezo ebiruma ennyo.

Katonda yasiima abakkiriza bwe baalangirira obuwagizi bwabwe gyoli (bwe mwali) wansi wo muti olwo nno yamanya ebiri mu mitima gya bwe kwe kussa obutebenkevu ku bo, era nabasasula n'abawa obuwanguzi obwali okumpi.

N'eminyago mingi gye baafuna, era (bulijjo) Katonda ye nantakubwa ku mukono mugobansonga.

Katonda yabalagaanyisa eminyago mingi gye mulifuna, naye guno gwo naagubanguyiza era naaziyiza emikono gya bantu obutabatuukako (obutabalwanyisa) era (ebyo) bibeere kya kuyiga eri abakkiriza era abalungamye mu kkubo eggolokofu.

(Waliyo n'eminyago) emirala gye mutannasobola (kufuna) naye nga mazima Katonda agyetoolodde (gyonna agimanyi) era bulijjo Katonda muyinza ku buli kintu.

Era singa abo abakaafuwala babalwanyisa, ddala bandikubyeyo amabega (ne badduka) era nga tebayinza kufuna mukuumi wadde omudduukirize.

Eyo yenkola ya Katonda ebaddewo okuva olubereberye, era enkola ya Katonda toyinza kugisangamu kukyusibwa.

Era yye yooyo eyaziyiza emikono gyabwe ku mmwe era naziyiza emikono gya mmwe ku bo (ne mutalwanagana bwe mwasisinkana) mu makkati gomu Makkah, nga yali amaze okubawa obuwanguzi ku bo, era nga Katonda bulijjo alabira ddala ebyo bye mukola.i

Bo beebo abaakafuwala ne babaziyiza okutuuka ku muzikiti ogwe mizizo, nga n'ebirabo biremeseddwa okutuuka mu bifo byabyo, era singa si basajja abakkiriza n'abakazi abakkiriza, be mutaamanya okuba nti mwali muyinza okubatusaako obulabe (ne mubatta), ne mutuukwako akamogo (akokunenyezebwa okubatta) mu butali bugenderevu, Katonda yandibadde akkiriza ne mwambalagana nabo, (ekyo kyali bwekityo) Katonda abe nga ayingiza mu kusaasira kwe oyo gwaba ayagadde, era singa beeyawula (abakkiriza bokka na batakkiriza bokka) era twandibonerezza abo abaakafuwala mu bo ebibonerezo ebiruma.

Jjukira abo abaakafuwala bwe bassa mu mitima gyabwe effutwa, effutwa lyo mu biseera eby'obutamanya, olwonno Katonda nassa obukkakkamu ku mubaka we, ne ku bakkiriza nabanywereza ku kigambo kyo kutya Katonda era nga be baali basinga okukisaanira, era nga be baali ba nannyinikyo era bulijjo Katonda mumanyi wa buli kintu.

Mazima Katonda yatuukiririza omubaka we endooto gye yamulaga eya mazima (bwe yaloota nti) ddala mujja kuyingira omuzikiti ogwemizizo Katonda bwaliba ayagadde. (muliguyingira) nga muli mirembe, nga mumwedde emitwe gya mmwe, nga (abalala) mukendezezzaako bukendeeza nga temutya. (Yamanya kye mutaamanya), nateekawo obuwanguzi obwokumpi (nga ekyo tekinnabaawo, bwe mwakola endagaano ye Hudaibiyah).

Katonda yye, yooyo eyatuma omubaka we naleeta obulungamu n'eddiini eya amzima abe ng'alaga ekifo kyaayo ekya waggulu ku madiini gonna, kimala okuba nti Katonda yemujulizi (kw'ekyo).

Muhammadi Mubaka wa Katonda era abo abali naye bakambwe ku bawakanya Allah, basaasiragana wakati waabwe, obalaba nga bakutamye ku maviivi, ne bwebaba bavunnamye ku ttaka, nga banoonya ebigabwa bya Katonda n’okusiima (kwe) obulambe bwabwe bulabika mu byenyi byabwe olwo mukululo gwo kuvunnama, ekyo kye kifaananyi kyabwe mu Tauraati era ekifaananyi kyabwe mu njiri, balinga ekimera ekifulumya omutunsi gwakyo negukiwanirira okutuusa lwe kikakata, olwo nno ne kyetengerera ku nduli yaakyo nekiba nga kisanyusa abalimi. (Abantu abakubiddwako ekifaananyi ekyo) balyoke babe nga abakafiiri banakuwala ku lwabwe, abo abakkiriza mu bo ne bakola emirimu emirongoofu Katonda yabalagaanyisa ekisonyiwo n'empeera ensuffu.

Abange mmwe abakkiriza temwetumikirizanga mu maaso ga Allah n’omubaka we (nemwogera ku kintu nga omubaka tannakyogerako) era mutye Katonda mazima Katonda muwulizi nnyo mumanyi.

Abange mmwe abakkiriza temusitulanga amaloboozi ga mmwe okusinga ku ddoboozi lya Nabbi, era temumwatuliranga ebigambo nga abamu mu mmwe bwe batuulira bannabwe, emirimu gya mmwe gireme kwononeka nga temugenderedde.

Mazima abo abakkakkanya amaloboozi gaabwe awali omubaka wa Katonda, abo beebo Katonda beyatukuza emitima gyabwe babe nga bamutya. Balina ekisonyiwo ne mpeera ensukkulumu.

Mazima abo abakukowoolera emabega w’ebisenge abasinga obungi mu bo tebategeera.

Singa mazima bo bagumikiriza okutuusa lwofuluma n'ogenda gye bali, kyandibadde kirungi gye bali, era Katonda musonyiyi waakisa nnyo.

Abange mmwe abakkiriza singa omwononefu abaleetera amawulire muteekwa okwetegereza, mube nga temutuusa kabi ku bantu mu butamanya, olwo nno nemukeesa nga mwejjusa olwekyo kye mwakoze.

Era mumanye nti mazima omubaka wa Allah ali mu mmwe, singa abagondera mu bigambo ebisinga obungi (nga bwe mubiraba), mwandifunye obuzibu, naye ddala Katonda yabaagazisa obukkiriza nabulabisa bulungi eri emitima gya mmwe, na bakyayisa obukafiiri n’obwononefu n’obugyemu, (abo abataliimu mize egimenyeddwa waggulu) bo be balungamu.

(Ng’ebyo byonna) birungi era nga byengera ebiva ewa Katonda, era bulijjo Katonda mumanyi nnyo mugoba nsonga.

Ebibinja bibiri mu bakkiriza bwe birwanagananga muteekwa mulongoose wakati wa byombi (mu bitabaganye) ekimu bwekirumba ekirala olwo nno mulwanyise ekyo ekiba kirumbye okutuusa lwekidda eri ekigambo kya Katonda bwekiba kizze kale mutabaganye wakati wa byombi mu bwesimbu, era mukole obwenkanya mazima Katonda ayagala abakola obwenkanya.

Ddala abakkiriza ba luganda n’olwekyo mulongoose (mutabaganye) wakati wa baganda ba mmwe, era mutye Katonda mube nga musaasirwa.

Abange mmwe abakkiriza abantu (abamu) mu mmwe tebanyomanga bantu bannabwe, anti oluusi bayinza okuba nga be balungi okusinga bo, wadde abakyala okunyoma bakyala bannabwe, anti oluusi bayinza okuba nga be balungi okusinga bo, era temwerengezzanga, era temweyitanga amannya ageemize, erinnya erisinga obubi lyeryo erikakkanya omuntu oluvanyuma lwokuba nti mukkiriza. Omuntu (akola ekyo) bwatenenya, abo bo be beeyisa obubi.

Abange mmwe abakkiriza mwewale okuteebereza okusinga obungi, anti okuteebereza okumu kiba kyonoono, era temwekettanga, era abamu mu mmwe tebageyanga bannabwe, abaffe omu ku mmwe yandiyagadde okulya ennyama ya muganda we nga mufu! Ate nga mwakitamwa dda, era mutye Katonda mazima Katonda akkiriza okwenenya musaasizi nnyo.

Abange mmwe abantu mazima ffe twabatonda nga tubaggya mu musajja n’omukazi, era ne tubafuula amawanga neebika mulyoke mumanyagane, mazima abasinga ekitiibwa ewa Katonda yooyo abasinga okumutya, mazima Katonda mumanyi nnyo amanyidde ddala ebintu okuva ku nsibuko yaabyo

Ba nnamalungu baagamba nti tukkirizza, bagambe nti temunnakkiriza, wabula mugambe nti twewaddeyo eri abasiraamu (netuwona okuttibwa oba okuwambibwa) era obukkiriza tebunnayingira mu mitima gya mmwe naye singa mugondera Katonda n’omubakawe tagenda kukendeeza ku mpeera ya mirimu gyammwe kintu kyonna. Mazima Katonda musonyiyi musaasizi nnyo.

Mazima abakkiriza abannamaddala beebo abakkiriza Katonda n’omubaka we, ate nebatabuusabuusa (ebyo bye bakkiriza) era nebalafuubana mu kuweereza mu kkubo lya Katonda nga bakozesa emmaali yaabwe ne myooyo gyabwe, abonno, bo, be bakkiriza ab’amazima.

Bagambe nti mumanyisa Katonda eddiini ya mmwe ng’ate Katonda amanyi ebyo ebiri mu ggulu omusanvu n'ensi, era bulijjo Katonda amanyidde ddala ebikwata ku buli kintu.

Bakweralaasizaako nti baasiramuka, bagambe nti temundalaasizaako busiraamu bwa mmwe, wabula Katonda abenyumiririzaako okuba nti yabalungamya eri obukkiriza bwe muba nga muli ba mazima.

Mazima Katonda amanyi ebyekusifu byo mu ggulu omusanvu n'ensi, era Katonda alabira ddala ebyo bye mukola.

Kaaf, ndayidde Kulaani eyekitiibwa (mazima ggwe Muhammadi oli mubaka wa Katonda era olunaku lw’enkomerero lwa kubaawo).

Wabula bewunya okuba nti omutiisa (Nabbi Muhammadi) yabajjira nga ava mu bo olwo nno abatakkiriza nebagamba nti kino kintu kya kitalo.

(Nebagamba nti) abaffe bwetufa netufuuka ettaka (ate tuli bakuzzibwa!), bwekiba bwekityo okwo kudda okuli ewala ennyo.

(Ekyo kibalemera bwereere okukkiriza anti) mazima tumanyi ekyo ettaka kye libakendezaako (nga lirya emibiri gyabwe) era tulina eggwanika erikuuma (buli kintu).

Wabula (tebakoma kwekyo era) baalimbisa amazima bwe gabajjira olwo nno bo baali mu mbeera ey’ekigambo ekitali kinywevu, (olumu bagamba bati olulala ne bagamba kirala).

Abaffe tebatunula ku ggulu waggulu waabwe (ne balaba) nga bwe twalizimba era netulinyiriza nga teririna bituli.

Ne nsi twagiseeteeza era netugissaamu ensozi ennywevu, netumeza mu yo mu buli mutindo oguwa essanyu.

Bibe ekizibula amaaso era ekyokubuulirira buli muddu adda eri Katonda.

Era tussa amazzi okuva waggulu agoomukisa, olwo nno netumeza nago amalimiro n'empeke ebikungulwa.

N’emitende emitumbiivu egirina ebirimba ebyeberese ku binnabyo.

Nga byakulya bya baddu, era tulamusa nago (amazzi) ettaka effu eriba likaze, nabwekutyo okuzuukira bwe kuliba.

Olubereberye lwabwe (abantu be Makkah) abantu ba Nuhu baalimbisa, n’abantu ababbika Nabbi wabwe mu luzzi, n’abekika kya Thamudu.

Nabekika kya Aadi ne Firaawo ne baganda ba Luutu.

N’abantu be nsi y’ebibira, n’abantu ba Tubbai, bonna baalimbisa ababaka, olwo nno nebikakata (ebibonerezo) byange bye nalagaanyisa.

Abaffe twakoowa olwokutonda okwasooka (tube nga tweganya okubazzaawo)! nedda bo bali mu kutabulwa ku bikwata ku kutonda okupya.

Ng’ate ddala twatonda omuntu era tumanyi ekyo omwoyogwe kye gumulabankanya nakyo naye nga ffe tuli okumpi naye okusinga omusuwa (gwe) ogwobulamu.

Mu kiseera we bamugyirako ebimukwatako (ba Malayika) abakwatibwako ensonga ababiri, nga bakikola ku mukono ogwa ddyo, n’ogwa kkono nga buli omu atudde ku ludda lwe.

Olwo nno (omuntu) tayatula kigambo kyonna okugyako ng’aliko omulondoozi amubeerako buli kiseera.

Olwo nno obukambwe bwokufa nebujja mu mazima (nagambibwa nti) kino bulijjo kyobadde weewala.

Era engombe nefuuyibwa olwo lwe luliba olunaku olwalagaanyisibwa.

Buli muntu alijja nga aliko (Malayika) amugoba n’omujulizi.

(Omukozi weebibi aligambwa nti) mazima wali mu bulagajjavu ku nsonga eno, kaakano tukuggyeko ekibikka olwo nno eriiso lyo olwaleero lyogi nnyo.

Munne (Malayika eyamuberangako) aligamba nti, bino bye nnina ebimuwaako obujulizi binywevu nnyo.

(Katonda aliragira Malayika alijja amugoba n'alimuwaako obujulizi nti) mukasuke mu muliro Jahannama buli ataali mukkiriza omuwalaza we mpaka.

Eyekiikanga mu kkubo lyo bulungi, eyabukanga ebikomo (bya mateeka ga Katonda) omubusabuusa.

Oyo eyassa ku Allah ekisinzibwa ekirala ekitali Ye, kale nno mumukasuke mu bibonerezo ebikambwe.

(Sitane) munywanyiwe aligamba nti, ayi Mukama omulabirizi waffe simubuzanga, wabula (ye yennyini) yali mu bubuze obwewala.

(Katonda) aligamba nti temukayanira mu maaso gange nabawa dda okulabula (kwange nga mukyali ku nsi).

Ekigambo tekikyusibwa gyendi (kasita mala okusalawo) era nze siyinza kuba mulyazamanyi eri abaddu.

(Mutye) olunaku lwe tuligamba omuliro Jahannama nti abaffe ojjudde, negugamba nti abaffe waliyo enyongeza?.

E jjana erisembezebwa eri abo abatya Katonda, nga tekyali wala.

Nebagambibwa nti, ekyo kye mwalaganyisibwa nga kya kufunwa oyo yenna eyadda ewa Katonda, n'akuma butiribiri (amateekage).

(Yye yooyo) eyatya Katonda omusaasizi ennyo awamu nokuba nga tamulabako, era najja (olwaleero ku lunaku lw’enkomerero) n’omutima ogwemalira ku Katonda.

(Baligambibwa nti) mugiyingire (e jjana) mu mirembe, olwo lwe lunaku olulitandika obulamu obwolubeerera.

Balifuna byonna bye baagala nga bali mu yo (e jjana), era tulina ebyo kubongeza.

Era emirembe emeka gye twazikiriza olubereberye lwabwe (bano abakuwakanya ggwe Nabbi Muhammadi), nga bo baali bamaanyi okubasinga, nebetoloola ensi (nga bakola buli kye bagala), abaffe waliwo obuwonero.

Mazima mwekyo mulimu okubuulirira eri oyo alina omutima oba atega amatu era nga yenna waali (awuliriza).

Era mazima twatonda eggulu omusanvu ne nsi neebiri wakati wa byombi mu nnaku mukaaga era tetwatukwako kukoowa kwonna.

Kale gumikiriza ebyo bye bagamba, otendereze ebitendo bya Mukama omulabirizi wo nga enjuba tennavaayo, ne nga tennagwa.

Era omutendereze ekiro nabuli luvannyuma lwa kuvunnama (okusaala e sswala ezalaalikibwa).

Era wuliriza (ng’olinda) olunaku omukowooze lwalikowoola nga asinziira mu kifo kyo kumpi.

Olunaku lwe bali wulira okubwatuka okw'amazima, olwo nno lwe luliba olunaku lw'okufuluma (okuzuukira okuva mu ntaana).

Mazima ffe, ffe tuwa obulamu era netutta, era gye tuli yokka yeeri obuddo.

Ku lunaku ettaka lweriyatika neribavaako (nga bazuukira) nebajja misinde (gye tuli), okwo kwe kukungaanya era kuliba kwangu ku ffe.

Ffe tusinga okumanya bye bagamba, era ggwe toli ku bo asobola kubawaliriza, n’olwekyo buulirira nga okozesa Kulaani, oyo yenna atya ebitiisa byange.

Ndayidde empewo ezifumuula enfuufu olufumuula.

Olwo nno nendayira ebire ebyetikka enkuba olwetikka.

N'amaato agaseeyeeya mu mazzi mu bwangu.

Era ndayidde Malayika ezigabanya Riziki okusinziira ku kiragiro ekiba kiziweereddwa.

Mazima bye mulaganyisibwa bya kutuukirira.

Era ddala olunaku lwo kusasula lwa kubaawo.

Ndayidde eggulu eryakolebwa mu ngeri ennungi.

Mazima mmwe muli mu kigambo ekyawukamu (temussa kimu ku bikwata ku Kulaani).

Awugulwa ku kyo oyo eyabuzibwa (natakkiriza).

Baakolimirwa abo abalimba (aboogera ebitali bituufu ku Nabbi).

Abo abali mu nnyanga ey’okuwakanya nga babulubuuta.

Nga babuuza nti olunaku lwo kusasula luliba lwaddi?.

Lwe lunaku bo lwe balyokebwa omuliro.

(Nga bwe bagambibwa nti) mukombe ebibonerezo bya mmwe, kino ky'ekyo kye mwagambanga nti kibatuusibweko mu bwangu.

Mazima abatya Katonda balibeera mu masamba nga mulimu n'ensulo za mazzi.

Nga beeyanza ebyo Mukama omulabirizi waabwe byalibawa (anti) mazima bo olubereberye lwekyo bali balongoosa.

Bebakanga e kiseera kitono mu kiro.

Ate nga mu ttumbi babanga mu kwe gayirira.

Era nga mu maali yaabwe mulimu omugabo gwo musabi nooyo atafuna kimumala (naye nga tasaba).

Era mu nsi mulimu obubonero (obulaga okubaayo kwa Katonda n’obuyinza bwe), eri abo abakkiriza obukkiriza obwa nnamaddala.

Ne mu mmwe mwennyini (mulimu obubonero) abaffe temulaba.

Ne muggulu y'eri riziki za mmwe na byonna bye mulagaanyisibwa.

Kale ndayidde Mukama omulabirizi we ggulu n'ensi, nti ekyo bwekityo bwekiri (era nga ekyo buli muntu yenna akimanyi) nga bwe mumanyi nti mwatula.

Abaffe ebikwata ku bagenyi ba Ibrahim abekitiibwa bya kutuukako.

Bwe baayingira weyali ne bagamba nti mirembe, (naye) naagamba nti mirembe (wabula muli) bantu abatamanyiddwa.

Olwo nno nadda eri abantu be naleeta ennyana y'ente ensava (enjokye).

Nagibasembereza naagamba nti abaffe nga temuulye!.

(Bwe bataalya) yawulira nga abatiddemu, ne bagamba nti totya era nebamuwa amawulire agessanyu ag'omwana omulenzi omumanyi ennyo.

(Awo wennyini) mukyala we naatuuka nga ayogerera waggulu nakuba ekyenyi kye, era naagamba nti (nze nga ndi) mukadde omugumba (nzaala ntya!).

(Ba Malayika) ne bagamba nti bwekityo Mukama omulabirizi wo bwagambye anti mazima yye bulijjo, ye mugoba nsonga omumanyi ennyo.

Ibrahim naagamba nti, ate mmwe ababaka nsonga ki ebaleese?.

Nebagamba nti mazima ffe tutumiddwa eri abantu abonoonyi.

Tube nga tubayiwako amayinja agomu bbumba ejjokye.

Nga malambe okuva ewa Mukama omulabirizi wo, nga ga (kuzikiriza) abonoonyi abasukkiridde.

(Katonda agamba) awo nno twagyamu oyo yenna eyakirimu (ekitundu ekyo) mu bakkiriza.

Naye tetwasangamu okugyako enyumba emu eyabasiraamu.

Era twaleka mu kyo ekyo kuyiga eri abo abatya ebibonerezo ebiruma ennyo.

Era ne Musa (alimu ekyo kuyiga) bwe twamutuma ewa Firawo n’obujulizi obweyolefu.

Yagaana (okugoberera Musa) olwokwesigula abali emabega we era nagamba nti (Musa) mulogo oba mulalu.

Olwo nno netumukwatako ne ggye rye netubakasuka mu nnyanja nga naye anenyezebwa.

Ne mu Bantu ba Aadi (mulimu ekyokuyiga) bwe twabasindikira empewo engumba (etaliimu mukisa tereeta nkuba wadde okuwasisa ebibala).

Nga tereka kintu kyonna kyeyitako okugyako nga ekifuula nga ensaano.

Ne mu bantu ba Thamudu (mulimu ekyokuyiga) bwe bagambibwa nti mweyagale okumala akaseera katono.

Wabula bo basukka ekiragiro kya Mukama omulabiririzi waabwe, olwo nno okubwatuka okwamaanyi ne kubatuukako nga nabo balaba.

Tebaasobola kusituka (badduke) era tebaali ba kuwona.

N'abantu ba Nuhu nga bano tebannabaawo (nabo balimu ekyokuyiga anti nabo baazikirizibwa era nabo kya bagwanira) anti mazima bo baali bantu abonoonyi.

(N'ebirala ebirimu ekyokuyiga) ne ggulu twalizimba n'obuyinza (bwaffe) era mazima tukyaligaziya.

N'ensi twagiseteeza, ddala nga ffe abatesiteesi abasinga.

Era twatonda mu buli kintu emitindo ebiri ebiri (ekisajja ne kikazi) oba olyawo ne mujjukira.

Kale mudduke mudde eri Katonda mazima nze ndi mutiisa owolwatu gye muli okuva gyali.

N’olwekyo temussanga ku Katonda ebisinzibwa ebirala, mazima nze ndi mutiisa owolwatu gye muli okuva gyali.

Bwekityo abo ababakulembera tewali mubaka yabajjira okugyako nga bagamba nti mulogo oba mulalu.

Abaffe bakyeramira (nedda ssi bwekiri) wabula bo bantu be wagguzi.

Kale baveeko toli ggwe anenyezebwa.

Wabula bulirira anti mazima okubulirira kugasa abakkiriza.

Era ssaatonda amajinni n’abantu wabula lwakuba nti bansinze.

Sibaagalamu Riziki era ssaagala bandiise.

Mazima Allah yye yaagabirira nannyini maanyi omusobozi.

Mazima abo abalyazaamaanya balina ebyonoono nga ebyonoono bya bannaabwe n’olwekyo tebampapya (kubatuusaako bibonerezo mu bwangu).

Okubonabona kuli eri abo abawakanya olunaku lwabwe olwo lwe baalaganyisibwa (olunaku lw’enkomerero).

Ndayidde olusozi (Sinaa).

Ndayidde ekitabo ekiwandiike.

Mu mpapula ennyanjuluze.

Era ndayidde enyumba etaggwako basinza (ba Malayika bagyetoloola olubeerera).

Era ndayidde akasolya (k'eggulu) akasitufu.

Era ndayidde ennyanja ezijjudde amazzi.

Ddala ebibonerezo bya Mukama omulabirizi wo bya kutuukirira.

Tewali kigenda kubiremesa.

Ku lunaku eggulu lwe liri yuguuma oluyuguuma.

Ensozi nezitambula butambuzi.

N’olwekyo okubonabona ku lunaku olwo kuliba ku balimbisa.

Abo bo ababeera mu byolusaago nga bazannya.

Ku lunaku lwe bali sindikirizibwa olusindikirizibwa, okuyingira omuliro Jahannama.

Baligambibwa nti guno gwe muliro ogwo gwe mwali mulimbisa.

Abaffe lino ddogo oba mmwe temulaba.

Mugwesogge, wabula ka mugumikirize oba temugumikiriza byonna kyekimu gye muli mazima ddala musasulwa ebyo bye mwali mukola.

Mazima abatya Katonda baliba mu jjana n'ebyengera.

Nga beyagala olwebyo Mukama omulabirizi waabwe byalibawa, era Mukama omulabirizi waabwe nabawonya ebibonerezo ebyomuliro Jahiimu.

(Abeeyisa obulungi baligambibwa nti) mulye era munywe, nga muyozayozebwa olwebyo bye mwakola.

Baliba besigamye ku bitanda nga bisimbiddwa ennyiriri era tugenda ku bagatta na bakyala abo mu jjana.

N'abo abakkiriza, era ezzadde lyabwe neribagoberera mu bukkiriza, twakkiriza ezzadde lyabwe okubagoberera (baleme kufuna kiwubaalo obutaba nabo) era tetulikendeeza ku mirimu gyabwe kintu kyonna, era nga buli muntu (yye) gwe musingo gwebyo bye yakola.

Era (nga ogyeko ebyogeddwa waggulu) tulibongeza ebibala n'ennyama ebyo bye baliyagala.

(Nga bali mu jjana) baliyayaanira amagiraasi ge byo kunywa, naye nga ssi kujikubiramu lwogoolo wadde ebigambo ebikyafu.

Era abalenzi abaliba balabika nga luulu akuumwa ennyo baliba babetoololamu nga babaweereza.

Abamu ne boolekera bannaabwe nga bawaanyisiganya ebigambo.

Nga bagamba nti mazima ffe mukusooka twabanga mu bantu baffe nga tutya (ebibonerezo bya Katonda).

Allah natugabirira ekyengera, naatuwonya ebibonerezo byo muliro samuumu.

(Anti) mazima ffe mu bulamu bw'ensi twamusabanga (twamusinzanga), mazima yye yaayisa obulungi, omusaasizi ennyo.

Kale nno buulirira (ggwe Muhammadi) anti ggwe olwe kyengera kya Mukama omulabirizi wo, toli mulaguzi wadde mulalu (nga abamu bwe babijweteka).

Oba bagamba nti (Muhammadi) mutontomi gwetulekedde okukwata kwa walumbe.

Bagambe nti mulindirire, anti mazima nze ndi wamu na mmwe mu balindirira.

Abaffe amagezi gaabwe ge gabalagira kino oba bo bantu abaabula!.

Oba bagamba nti (Muhammadi) yajegunjirawo (Kulaani ssi bwekiri) wabula tebakkiriza.

(Bwekiba nga yajigunjaawo) kale baleete ebigambo ebigifaanana bwebaba nga boogera mazima.

Oba batondwa awatali kintu (nti tewali Katonda yabatonda!) oba bo be batonda (ebitonde byonna nga nabo mwebali).

Oba be baatonda eggulu omusanvu ne nsi, nedda wabula bo tebakkiriza.

Oba be balina amawanika ga Mukama omulabirizi wo, oba bo be balina obuyinza (ku buli kintu).

Oba balina amadaala nga gebakozesa okuwuliriza ebifa waggulu (bwekiba bwekityo) kale abawuliriza baabwe baleete obujulizi obweyolefu.

Oba (Katonda) alina abaana ba buwala ate nga mmwe mulina abo bulenzi.

Oba obasaba musaala olwo nno bo nebaba nga bakaluubirirwa kusasula.

Oba balina okumanya ebyekusifu ne baba nga bo bawandiika (ebyekusifu bye bamanyi nebaba nga tebetaaga ggwe kubategeeza).

Oba baagala kukola nkwe (bakulemese) wabula abo abakaafuwala be bakosebwa enkwe (ezo).

Oba balina ekisinzibwa ekitali Katonda (nga kye kibayinula), Katonda musukkulumu kwebyo bye bamugattako.

Olw'obutakkiriza bwabwe ne bwe balaba ekibajjo nga kigwa okuva waggulu (kibazikirize) bandigambye nti bire ebyetuumye.

Kale baleke okutuusa lwe balisisinkana olunaku lwabwe, olwo, ku lwo, lwe balizikirizibwa.

Olunaku enkwe zaabwe lwe zitalibagasa kintu kyonna, era nga bo tebalidduukirirwa.

Awamu n'ekyo mazima abo abeeyisa obubi batuusibwako ebibonerezo (ebirala kuno ku nsi) nga tebannatuuka ku biri, naye abasinga obungi ku bo tebamanyi.

Kale gumikiriza ku kusalawo kwa Mukama omulabirizi wo, anti mazima ggwe oli wansi wa kulabirira kwaffe. Era tendereza ebitendo bya Mukama omulabirizi wo, buli lwoliyimirira (okusaala).

Era n'ekiro mutendereze era omutendeze ekiseera we emmunyeenye wezibulira.

Ndayidde emunyeenye bweba nga egudde.

Munammwe (Muhammadi) tabulanga kuva ku bulungamu era tayonoonanga.

Era tayogera nga asinziira ku kwagala (kwe).

Tebiri byo (byayogera) okugyako okuba nti bubaka obuwereezebwa (gyali nga buva ewa Katonda).

Yabimuyigiriza owamaanyi amayitirivu (Malayika Jiburilu).

Jibriilu nannyini busobozi n'amanyi mubutonde bwe ajudde.

Bweyali mu bifo ebisinga okuba ebya waggulu mu bwengula.

Oluvanyuma (Jiburilu) yasembera olwo nebaba kumpi (ne Nabbi).

Olwo nno (okusembera) nekuba nga okusemberagana kw'ensonda za kasale ebbiri oba kumpi okusingako awo.

Olwo nno (Katonda) naatumira omuddu we ekyo kye yamutumira nga akozesa Jiburilu.

Emmeme (ya Nabbi Muhammadi) teyalimba kwebyo bye yalaba.

Abaffe mumuwakanya kwekyo kyalaba.

Ate nga mazima yamulaba omulundi omulala.

Mu kifo awali (omuti) Sidirat munitaha awakuumwa.

Weguli awo wewali e jjana ewummulirwamu (bo Malayika mwe bawummulira).

Mu kiseera omuti Asidira bwe gwabikkibwa ekya gubikka.

Amaaso (ga Nabbi) tegawuguka wadde okusukka ekyo (kye yali ateekwa okulaba).

Mazima yalaba mu bya magero ebya Mukama omulabirizi we ebinene.

Abaffe mulaba Latta ne Uzza.

Ne Mannaata ekibumbe ekirala ekyokusatu (bibumbe byali bisinzibwa nga Nabbi tannatumwa).

Abaffe mmwe muzaala abalenzi yye nazaala bawala! (mwe bemutayagala newakubadde abalenzi na bawala ku Katonda kyekimu).

Bwekiba bwekityo eyo ngabanya ejjudde kyekubiira.

(Bye musinza) tebirina kyebiri okugyako okuba amannya gemwetuumira mmwe ne bakadde ba mmwe, Katonda tabissangako bujulizi bwonna (era ababisinza) tebalina kye bagoberera okugyako okuteebereza nokugoberera ebyo emyoyo gyabwe bye jaagala, so nga ate obulungamu bwabajjira nga buva ewa Mukama omulabirizi waabwe.

Oba kiri nti omuntu asobola okufuna ekyo kye yeegomba (atuuke okwesalirawo okusinza ebibumbe ate naaba nga tavunaanwa).

Wabula nno enkomerero ne ntandikwa bya Katonda yekka (n’olwekyo yekka yaasalawo).

Era ba Malayika bameka abali mu ggulu omusanvu nga okuwolereza kwabwe tekugenda kugasa kintu kyonna okugyako oluvanyuma lwa Katonda okukkiriza gwaliba ayagadde era nasiima.

Mazima abo abatakkiriza nkomerero be bayita ba Malayika amannya ag’ekikazi.

Era nga tebakirinaako kumanya kwonna, tebagoberera okugyako okuteebereza ate nga ddala okuteebereza tekulina kye kugasa awali amazima.

N’olwekyo va kwoyo ayawukana nokubulirira kwaffe, naatayagala okugyako obulamu bw'ensi.

Ekyo kye kikomo kyabwe mu kumanya mazima Mukama omulabirizi wo yaasinga okumanya oyo abula naava ku kkubo lye era yaasinga okumanya oyo alungama.

Bya Allah yekka ebyo ebiri mu ggulu omusanvu n'ebyo ebiri mu nsi (era yye ye nannyini mateeka kwe bikolera) olwo nno alisasula abo abayonoona olwebyo bye bakola era nga alisasula obulungi abo abalongoosa.

Abo abeesamba ebyonoono ebinene ne byo buwemu okugyako ebitonotono, (anti) mazima Mukama omulabirizi wo mugazi wa kusonyiwa ye yaasinga okumanya ebikwata ku mmwe, okuva lwe yabatandikawo nga abagya mu ttaka ne mu kiseera we mwaberera mu mbuto za ba Maama ba mmwe, n’olwekyo temwetukuza anti yye yaasinga okumanya ani asinga okumutya.

Abaffe olabye oyo akyuka (naava ku mazima).

Era nawaayo katono bwamala ate nammira ddala.

Abaffe (ekimukozesa ekyo) lwakuba nti alina okumanya ebyekusifu, olwo nno naaba nga abiraba.

Oba tabuulirwanga ebyo ebiri mu bitabo bya Musa.

Ne Ibrahim oyo eyatuukiriza (bwe yalaganyisa Katonda).

(Ebyo ebigamba nti) tewali mwoyo gulyetikka kibi kya mulala.

Era nti omunu tagenda kufuna okugyako ekyo kye yakolerera.

Era nti mazima okukola kwe kya ddaaki kulirabwa.

Oluvanyuma alikusasulwamu empeera esinga okuba enzijuvu.

Era nti mazima ewa Mukama omulabirizi wo yeeri enkomerero (ya buli kimu).

Era nti mazima yye yaasesa era yaakaabya.

Era nti mazima yye yatta era yaawa obulamu.

Era nti mazima yatonda emitindo ebiri omusajja n'omukazi.

Abagya mu mazzi agazaala bwe gafulumizibwa (negateekebwa mu kifo ekituufu).

Era nti mazima kuli ku ye yekka okusibusa okulala (okuzuukiza).

Era nti mazima yye ya gaggawaza era naayavuwaza.

Era nti mazima yye ye Mukama omulabirizi we munyeenye eyitibwa Shiiraa (abakafiiri gye basinzanga).

Era nti mazima yye yazikiriza abe kibiina kya A'adi abasooka.

Na be kibiina kya Thamudu era nga teyalekawo (wadde omu).

Na bantu ba Nuhu mu kusooka anti mazima bo be baali basinga okweyisa obubi n'okubula.

Era ye yae yazikiriza abantu ba be kitundu ekyavuunikibwa (Sodoma ne gomora).

Olwo nno ne kikibuutikira ekya kibuutikira.

Kale olwo kiriwa ku byengera bya Mukama omulabiri wo kyobuusabuusa!.

Ono (omubaka Muhammadi) mutiisa ali mu luse lwa batiisa abaakulembera.

Enkomerero esembedde.

Tewali ayinza kugizzaayo bweriba ezze mpozzi Katonda.

Abaffe ebigambo bino bye mujereegerera.

Nemuba nga museka nemutakaaba.

Nga nammwe muzannya buzannyi.

Kale muvunname ku lwa Allah era mumusinze (ekyo kye kisinga ebya mmwe bye mulimu).

Enkomerero esembedde n'omwezi ne gubejjukamu.

Bwe balaba ekya magero bakyawukanamu ne bagamba nti lino ddogo eritakoma.

Olwo nno ne balimbisa era ne bagoberera okwagala kwabwe, so nga buli kigambo kirina engeri gye kirina okubaamu (nungi oba mbi).

Ate nga ddala gaabatuukako amawulire ago agaalimu okukanga (okwandibamaze ne batya Katonda).

(Kulaani eno) ejjudde amagezi etuukira ddala wala omuntu, (ekyekitalo) okutiisa kwokka tekumala (kwetagisaako okulungamya kwa Katonda).

Kale baveeko (olindirire) olunaku omukowooze lwalikowoola (abantu) kugenda eri ekintu ekitayagalwa.

Amaaso gaabwe nga gatunudde wansi, baliva mu kabburi nga balinga ensenene ezisasaanye.

Balisaayirira okugenda eri omukowooze nga abakafiiri bwe bagamba nti, luno lunaku luzito.

Oluberyeberye lwabwe, abantu ba Nuhu balimbisa, olwo nno nebalimbisa omuddu waffe ne bagamba mbu muguwaddalu ate naatiisibwatiisibwa.

Kyeyava asaba Mukama omulabirizi we nti mazima nze nnemereddwa n’olwekyo nziruukirira.

Olwo nno netuggulawo emiryango gya waggulu ne tumuwa amazzi agafukumuka.

Era ettaka netulifukumulamu ensulo amazzi (ag’emirundi ebiri) ne gasisinkana okusinziira ku kiragiro ekyagerwa edda.

Netumusitulira na bonna abali naye mu lyato eryakolwa mu mbaawo ne misumaali.

Nga liddukira (ku mazzi ago) ku lwa buyinza bwaffe, ekyo nga kusasula eri oyo eyali awakanyizibwa.

Mazima (ekyafaayo ekyo) twakireka nga kya kuyiga, abaffe waliwo eyeebuliridde?.

(Nebalaba nti) ebibonerezo byange n’okutiisa byali bitya!.

Mazima Kulaani twagifuula nyangu ebeere nga ebuulirira, abaffe waliyo eyebuuliridde.

Abeekika kya Aadi baalimbisa naye ebibonerezo byange n’okutiisa byali bitya.

Mazima ffe twabasindikira kikungunta omukambwe, mu lunaku olwe kikwa ekitaasalako olunaku lwonna.

Eyasikulanga abantu (okuva ku ttaka) nga bagwa nga ebikonge by'emitende ebisiguddwa.

kale mwetegereze ebibonerezo byange n’okutiisa byali bitya!.

Mazima Kulaani twagifuula nyangu ebeere nga ebuulirira, abaffe waliyo eyebuuliridde.

Abeekika kya Thamudu baalimbisa okutiisa kwa (Nabbi waabwe Swaleh).

Olwo nno ne bagamba nti abaffe omuntu obuntu omu mu ffe, gwetuba tugoberera (netumala tukikola) olwo nno mazima ffe tujja kuba mu bubuze na bugwi bwa ddalu.

Mu ffe fenna ye yaweereddwa obubaka! Nedda ssi bwekiri yye mulimba alina kyalubirira.

Enkya bajja kumanya ani mulimba omwerazi.

(Anti) mazima ffe tujja kuweereza engamiya nga kikemo gye bali, olwo nno batunuulire nkaliriza era oguminkirize (ku nneeyisa yaabwe embi).

Era bategeeze nti (okuva engamiya lwezze) ddala amazzi ga kugabanyizibwa wakati waabwe nayo, nga buli luwalo lutuukirizibwa, (nyinirwo yaalina okufuna amazzi keebe ngamiya oba bantu).

Olwo nno baakowoola mu nnaabwe neyeesowolayo naafumita (engamiya).

kale mwetegereze ebibonerezo byange n’okulabula byali bitya!.

(Anti) mazima twabasindikira olubwatuka lumu, olwo nno ne baba nga ebisubi ebirinyiriddwa (omuzimbi w'ekiraalo nga aby'etooloza ekiraalo nga agenderera okukuuma ebisolo bye).

Mazima Kulaani twagifuula nyangu ebeere nga ebuulirira, abaffe waliyo eyebuuliridde.

Abantu ba Luutu baalimbisa obubaka.

Mazima ffe twabasindikira kibuyaga owa mayinja (eyabasanyaawo bonna) okugyako abantu b’o mu maka ga Luutu, twabawonya mu ttumbi.

Ekyo kyengera okuva gye tuli bwe tutyo nno, bwe tusasula oyo eyeebaza.

Mazima (Luutu) yabeekesa okukwata kwaffe wabula nebabuusabuusa okulabula (kwe).

Mazima baagezaako okumusendasenda abawe abagenyi be (babasiyage) olwo nno netuziba amaaso gaabwe, ne bakomba ku bibonerezo byange n'okulabula kwange.

Era mazima ebibonerezo ebitasalako bya bazinda mu matulutulu.

Kale nno mukombe ku bibonerezo byange n’okulabula kwange.

Mazima Kulaani twagifuula nyangu ebeere nga ebuulirira, abaffe waliyo eyebuuliridde.

Mazima okulabula kwajjira abantu ba Firawo.

Baalimbisa ebigambo byaffe byonna, olwo nno netubakwata enkwata ya Nantakubwa ku mukono, nannyini buyinza.

Abakafiiri ba mmwe be balungi okusinga abo! oba (ekibayinula) mulina akalagaane ku butavunaanwa nga kawandiikibwa mu bitabo ebitukuvu ebyasooka.

Oba (ekibayinula lwakuba) bagamba nti ffe tuli bangi nga twegasse tusobola okwetaasa.

(Zibasanze) ekibiina (ekyo) kijja kuwangulwa era bakubeyo amabega (badduke).

(Byonna bye baliko temuli) wabula olunaku lw’enkomerero ye ndagaano yaabwe era olunaku lw’enkomerero lwelusinga obukalubo n’obukaawu.

Mazima abonoonyi bali mu bubuze na bugwi bwa ddalu.

(Bandibadde bajjukira) olunaku lwe baliwalulwa ku byenyi byabwe mu muliro (nga bwe bagambibwa nti) mukombe ku bulumi bw’omuliro Sakara.

Mazima ffe buli kintu twakitonda mu ngeri nga bwe kisaana okuba.

(Ate mu kukola ebintu byonna) ekiragiro kyaffe tekiri okugyako kimu nga kiringa lutemya lwa liiso.

Era ddala twazikiriza abafaanana nga mmwe, abaffe waliyo eyebuuliridde.

Na buli kintu kyonna kye baakola kiri mu kitabo.

Era buli kitono n'ekinene kyawandiikibwa.

Mazima abatya Katonda balibeera mu jjana n’emigga (egiriba gikulukutira wansi waazo).

Mu kifo ekya mazima ew’omufuzi nannyini buyinza.

Omusaasizi nannyini kusaasira okugazi.

Yayigiriza (omuntu) Kulaani.

Yatonda omuntu.

Yamuyigiriza okunnyonnyola.

Enjuba n’omwezi bitambulira ku nteekateeka (eyabiweebwa).

Ebiddo n’emiti (bivunnama nga bisinza Katonda).

Era eggulu yalisitula era nassaawo obwenkanya.

Mube nga temusukka ebipimo (mu kutuukiriza obwenkanya).

Era muyimirizeewo ebipimo mu bwenkanya era temukendezanga minzane.

N'ensi yagiteerawo ebitonde.

Nga erimu ebibala n’emitende egirina ebirimba.

N'ebimera ebye mpeke eziri mu bikuta n’ebimera ebya kawoowo.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Yatonda omuntu mu bumba eggumu eriringa ejjokye.

Ate naatonda amajinni mu bitawuliro by’omuliro.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Mukama omulabirizi w’o buvanjuba bwombi, era Mukama omulabirizi w'obugwanjuba bwombi.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Yagatta enyanja ebbiri (ez’amazzi agenjawulo aganyweka na gatanyweka) zesisinkana.

Wakati wa zombi waliwo ekyawula, tezigenda kwetabula.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Ate nga mu zombi mwe muva Luulu ne Marijaani (amayinja ag’omuwendo).

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Era gatambula ku lwo buyinza bwe amaato agakolwa ku lwo kutambulira ku nyanja nga galinga ensozi.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Buli kyonna ekigiriko (ensi) kya kuggwawo.

Olwo nno wasigalewo obwennyini bwa Mukama omulabirizi wo, nannyini kugulumizibwa era nannyini kitiibwa.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Bimusaba ebyo ebiri mu ggulu omusanvu n'ensi (naye nga) buli lunaku aba ku ngeri ndala (mu kugera kwe).

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Tujja kubateerawo ekiseera mwe tulibalira buli omu abange mmwe ebitonde ebizito ebibiri (amajinni n’abantu)

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Abange mmwe ab'oluse lwa majinni n’oluse lwa bantu, bwe muba musobola okuyita mu bitundu bye ggulu omusanvu n'ensi (mube nga mudduka ku Katonda) kale muyitemu (naye) temuyinza kuyitamu okugyako nga mulina obusobozi.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Musindikirwa mwe ab'emirundi ebiri (amajinni n’abantu) ebitawuliro byo'muliro, n’ekikomo ekisaanuuse (naye temusobola kwetaasa).

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Olwo nno eggulu bwe liribajjuka nerirabika nga ekimuli ekimyufu (olwamaanyi g’omuliro) neriba nga omuzigo omusanuuse.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Ku lunaku olwo ekibi omuntu (kye yakola) tekigenda kubuuzibwa muntu mulala oba ejinni.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Abonoonyi balimanyibwa olw'obubonero bwabwe, olwo nno nebakwatibwa ku nviiri z’o mu buwompo n’ebigere (nebamenyebwamu nebakasukwa mu muliro).

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Baligamba nti guno gwe muliro Jahannama abonoonyi gwe baali balimbisa.

Bagenda kwetoloolera wakati waagwo ne wakati w'olwegye oluyitirivu lwokwokya.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Era oyo eyatya okuyimirira mu maaso gq Mukama omulabirizi we alina e jjana bbiri.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Ezirimu amatabi agalanda.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Mu zombi (e jjana) mulimu ensulo bbiri ezikulukuta.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Mu zombi mulimu ku buli kika kya kibala emitindo ebiri ebiri.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

(Abalibeeramu) baliba bagalamidde ku byaliiro, nga munda mwabyo mulimu Liiri omuzito, nga ne nimiro za jjana zombi ebibala byamwo bireebeeta (byangu bya kulaba era byangu bya kunoga).

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Mu zo (e jjana) mulimu abakyala abamaaso amakkakkamu (embeerera) nga tebakwatwangako muntu yenna wadde ejinni oluberyeberye lwabwe (abo abaliba babaweereddwa mu jjana).

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

(Olwo bulungi bwabwe) baliba nga Yaakut ne Marijaan (amayinja ag’omuwendo).

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Abaffe empeera y’okukola obulungi (eyinza okuba ekintu ekirala kyonna) okugyako okusasulwa obulungi.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Nga oggyeko ezo ebbiri baakufuna ate e jjana endala bbiri.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Eza kiragala omukwafu.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Mu zombi mulimu ensulo bbiri ezifukumuka amazzi.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Mu zombi mulimu ebibala n’emitende ne nkoma mawanga.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Muzonna awamu zirimu abakyala abalungi be mpisa era abalungi mu ndabika.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Ba nalulungi abatafulumafuluma mu weema.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Nga tebakwatwangako muntu yenna wadde ejinni oluberyeberye lwabwe, (abo abaliba babaweereddwa mu jjana).²

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Baliba besigamye ku mitto egiriko ebibikka ebya kiragala ne byaliiro ebirungi ennyo.

Kaakano kiriwa kye mulimbisa ku byengera bya Mukama omulabirizi wa mmwe (mmwe ab’emirundi ebiri abantu na majinni).

Sukkulumu erinnya lya Mukama omulabirizi wo nannyini kugulumizibwa n’okuweebwa ekitiibwa.

Ekiseera ekitaliimu kubuusabuusa bwe kirituuka.

Okutuuka kwakyo tekuliimu kubuusabuusa.

Kirikakkanya (abeeyisa obubi era) kirisitula (abeeyisa obulungi).

Ensi bwe rikankanyizibwa olukankana.

N'ensozi nezimerengulwa olumerengulwa.

Olwo nno nezifuuka enfuufu efumuuka.

Era mmwe nemuba emitendera esatu.

Olwo nno newabaawo ogwa ba nannyini mukono ogwa ddyo, yye omanyi okubeera ku mukono ogwaddyo kye kitegeeza?.

Era newabaawo n’ogwa ba nannyini mukono ogwa kkono, yye omanyi okubeera ku mukono ogwa kkono kye kitegeeza?.

Newabaawo n’ogwabo abaakulembera, abalikulembera mu buli kimu.

Abo be bo kusembezebwa (ewa Katonda).

Nga bali mu jjana ez'ebyengera.

Bangi mu bibiina ebyasooka.

Nabatono mu kibiina kya bantu abenkomerero (abekibiina kya Nabbi Muhammadi).

(Balibeera) ku bitanda ebyakolebwa mu zzaabu n'amayinja amalala agomuwendo.

Baliba bagalamidde ku byo nga boolekaganye (nga banyumya).

Abaweereza abalenzi, abolubeerera baliba babayitamu.

Nga balina ebikopo, amabinika ne giraasi ebijjudde omubisi oguva mu nsulo.

Tebagenda kulumwa mutwe olwagwo era tebagenda kutamiira.

N’ebibala (ebye njawulo) mwebyo bye baliba nga basazeewo.

Ne nnyama y’ebinyonyi eyo gye baliyagala.

N'abakyala abalungi abamaaso agatemagana.

Nga balinga Luulu akuumibwa obutiribiri.

(Ebyo byonna) nga mpeera yeebyo bye baali bakola (ebirungi ku nsi).

Tebagenda kuwulira mu yo luyogaano wadde ebigambo ebyesittaza.

Okugyako okugamba nti mirembe, mirembe.

Abantu bo ku mukono ogwa ddyo, abaffe omanyi abantu bo ku mukono ogwa ddyo baliba batya?.

Balituula (mu bittuluze) by'emiti gya Sidiri atemeddwako amaggwa.

N'ensuku ezirimu amatooke agaliko ebiwagu ebiberekaganye.

N'ebisikirize ebigazi.

N'amazzi agakulukuta awatali kusalako.

N'ebibala ebingi.

Ebitaggwawo ate ebitatekebwako kkomo.

N'ebyaliiro ebisuffu ebya waggulu.

Mazima ffe twatonda abakyala bo mu jjana olutonda.

Olwo nno twabatonda nga mbeerera.

Nga bulijjo baganzi eri ba bbaabwe nga tebakakiddwa.

Nga bo ba bantu abalibeera ku mukono ogwa ddyo.

Bangi mu bibiina ebyasooka.

Era bangi mu kibiina kya bantu ab'enkomerero (ab’ekibiina kya Nabbi Muhammadi).

Ate abantu bo ku mukono ogwa kkono, abaffe omanyi abantu bo ku mukono ogwa kkono baliba batya?.

Balibeera mu kibuyaga ayokya n’amazzi ageeseze.

Nga nebisikirize mwe balyewogoma, biriba bya mu mukka omuddugavu ogwokya.

Biriba tebinnyogoga era nga tebisanyusa.

Anti mazima bo oluberyeberye lwa kino baali baamalibwawo ebyo kwe jalabya.

Era baalemeranga ku kibi ekinene (bwe baalayiranga nti tewali kuzuukira).

Era baagamba nga nti bwetufa netufuuka ettaka, era netusigala ngumba magumba gumba abaffe tulizuukizibwa!.

Oba ba kitaffe abaakulembera.

Bagambe ggwe (Nabbi Muhammadi) nti mazima abasooka n'aboluvanyuma.

Ddala ba kukunganyizibwa ku lunaku olwasalibwawo olumanyiddwa.

Oluvanyuma mazima mmwe, abange mmwe ababuze abalimbisa.

Ddala mugenda kulya ku muti gwa zakkumu.

Mulijjuza nagwo embuto (gujjuze embuto zammwe).

Olwo nno munywereko amazzi ageeseze.

Mugenda kunywa ng'ennywa ye ngamiya erina ennyonta.

Obwo bwe buliba obugenyi bwabwe ku lunaku lwo kusasula.

Ffe twabatonda, kale singa mukkiriza (okusinziira kwekyo).

Abaffe mulaba amazzi (agazaala) ge muteeka mu nnabaana.

Abaffe mmwe mugatonda oba ffe batonzi!.

Ffe twagera netussa wakati wa mmwe okufa, (netubakakasaako okufa) era tetuli ffe ba kulemesebwa.

Okuba nga tuwaanyisa abalinga mmwe (mu mmwe) olwo nno mmwe, netubakolamu ebirala bye mutamanyi.

Ate nga ddala mwamanya entandikwa eyasooka (engeri Katonda gye yabatondamu) kale singa mwebulirira.

Abaffe mulaba ebyo bye mulima.

Abaffe mmwe mubimeza oba ffe tumeza!.

Singa twagala tusobola okubifuula ebikaze nemusigala nga mwewunaganya.

(Nga mugamba nti) mazima ffe tetufunye ate nga tubanjibwa.

(Si kye kyokka) wabula ffe tummiddwa.

Abaffe mulaba amazzi ago gemunywa.

Mwe mugassa okuva mu bire oba ffe tugassa.

Singa twagadde twaligafudde olukalabule kale singa mwebaza (Katonda olwo kugafuula amalungi).

Abaffe mulaba omuliro ogwo gwe mukuma.

Abaffe mmwe mwatonda omuti mwe mugukuma, oba ffe twagutandika.

Ffe twagufuula kya kujjukiza, era nga gwa mugaso eri abatambuze (abataba na byoto bibakumira muliro).

Kale tendereza erinnya lya Mukama omulabirizi wo owekitiibwa.

Allah yalayira ebifo by'emunyenye..

Era mazima kwo ddala kulayira kunene singa mubadde mumanyi.

Okuba nti ddala yo Kulaani yakitiibwa.

Eri mu kitabo ekikuumibwa obutiribiri (ku Lawuhu al mahfudhu)

Takikwatako okugyako abaatukuzibwa (ba malayika abatalina bukyafu bwa mibiri oba obwe nzikiriza).

Essibwa okuva ewa Mukama omulabirizi w’ebitonde.

Abaffe ebigambo bino (ebya Kulaani) mmwe bye mugayaalirira.

Ne mufuula mukifo ky'okwebaza Allah ebyengera byeyabagabirira nga mwe muli n'okussa kulaan, kulimbisa!

Singa omwoyo wegutuukira mu ddokooli (musala amagezi nemugutaasa).

Ate nga mmwe mu kiseera ekyo mubaawo nga mutunula.

Era ffe tuba okumpi naye okusinga mmwe, naye temulaba.

Kale singa mwali temufugibwa (Katonda).

Muyinza okugamba nti mwandiguzizzaamu mu mubiri, bwe muba mwogera mazima.

Naye (omufu) bwaba mu bo kumpi (ne Katonda).

Aliba mu kwesiima na mirembe na jjana eye byengera.

Ate bwaba mu bantu bo ku mukono ogwa ddyo.

(Aliyozebwayozebwa nti) emirembe gibeere ku ggwe, olw;okuba oli mu bantu bo ku mukono ogwa ddyo.

Wabula bwabeera nga ali mu balimbisa ababuze.

(Oyo nno) obugenyi (bwe) bwalwegye lwa mazzi.

Nakwesogga muliro Jahiimu.

Mazima ebyo ge mazima agannamaddala.

Kale tendereza erinnya lya Mukama omulabirizi wo owekitiibwa.

Byonna ebiri mu ggulu omusanvu ne nsi bitendereza Katonda, era yye ye nnantakubwa ku mukono mugoba nsonga.

Bubwe yekka obufuzi bwe ggulu omusanvu n'ensi, awa obulamu era natta, era yemuyinza ku buli kintu.

Yye ye yasooka era ow'enkomerero, era yye yaali waggulu wa buli kintu, era yaa wansi, nga wansii we tewali kintu kirala, era yye amanyi ebifa ku buli kintu.

Yye yooyo eyatonda eggulu omusanvu n'ensi mu nnaku omukaaga, oluvanyuma n'atumbiira waggulu wa Namulondo okubeera waggulu n'okutumbiira okumusaanira omugulumivu Allah, amanyi ebikka ku nsi nebigifuluma n'ebyo ebikka okuva mu ggulu nebiryambukamu, era yye aba wamu na mmwe wonna wemuba, era Katonda alabira ddala ebyo bye mukola.

Bubwe yekka obufuzi bwe ggulu omusanvu n'ensi era eri Katonda ebintu byonna gye bizzibwa.

Abuliza ekiro mu musana, era naabuliza omusana mu kiro, era yye amanyidde ddala ebiri mu bifuba.

Mukkirize Allah n’omubaka we, era mugabe kwebyo bya yabafuula abasigire mu byo, abo nno abakkiriza mu mmwe era ne bagaba, balina empeera ensuffu.

Ye kiki ekibagaana obutakkiriza Allah ng’ate omubaka abakowoola mube nga mukkiriza Mukama omulabirizi wa mmwe, ate nga yabakozesa endagaano (kwekyo), bwe muba abakkiriza (nga mukyali ku ndagaano gyeyabakozesa).

Yye yooyo assa ku mudduwe (Muhammadi) ebigambo ebinnyonnyofu, abe nga abagya mu bizikiza mudde eri ekitangaala, era mazima Katonda mukwata mpola ku mmwe, musaasizi nnyo.

Mutya bwe mutayinza kuwaayo mu kkubo lya Katonda ng’ate obusika bwe ggulu omusanvu n'ensi bwa Katonda, oyo eyawaayo mu mmwe nga obuwanguzi (bwe Makkah) tebunnabaawo, era nalwana (tayinza) kwenkana ne yakikola oluvanyuma) bali (abasoose) be be ddaala erya waggulu okusingaabo abaawaayo oluvanyuma era ne balwana. Naye nga bonna Allah yabalagaanyisa (okubasasula) ebirungi, Allah amanyidde ddala ebyo bye mukola.

Ani oyo awola Allah oluwola olulungi, olwo nno alumubalizeemu, era nga alina empeera eweesa ekitiibwa.

Olunaku lwoliraba abakkiriza abasajja n'abakkiriza abakazi, nga ekitangaala kyabwe kibali mu maaso gaabwe, ne ku mikono gyabwe egya ddyo nga ba Malayika babagamba nti ekyessanyu kya mmwe olwaleero ze jjana nga gikulukutira wansi waazo emigg, muli ba kuzibeeramu obugenderevu, ekyo kyo kwe kwesiima okusukkulumu.

(Fumitiriza) olunaku abananfusi abasajja na bannanfusi abakazi lwe baligamba abo abakkiriza, nti mutulinde tulabise ku kitangaala kya mmwe, walirangirirwa nti mudde emabega wa mmwe (gye muvudde) munoonye ekitangaala, olwo nno waliteekwa wakati waabwe ekikomera nga kiriko omulyango, nga munda waakyo (ku ludda eribeera abakkiriza) waliyo okusaasira, ate nga ebweru waakyo (ku ludda eribeera abannanfuusi) ebibonerezo gyebiriba bisibuka.

Balibakowoola (nga bagamba nti mutumma ekitangaala) abaffe tetwali na mmwe, baligamba nti wewaawo, naye mazima mmwe, mwesuula mu bikemo, ne mulindiriza, ne mubuusabuusa ,essuubi ekyavaamu neribagayaaza okutuusa ekigambo kya Katonda lwekyajja era ebigayaaza nebibajja ku Katonda.

Kale nno olwaleero temuli ba kuggibwako nunuzi, wadde okugiggya kwabo abakaafuwala (mwenna) obuddo bwa mmwe muliro, ggwo gwe gubagyamu, naye nga buddo bubi.

Abaffe ekiseera tekituuse eri abo abakkiriza okuba nga emitima gyabwe gigonda ku lwokwogera ku Allah, ne ku lwebyo ebyamazima ebisse, baleme kuba nga abo abaweebwa ekitabo (Tauraati ne Injili) oluberyeberye, olwo nno ekiseera ekyayitawo ku bo (wakati waabwe ne ba Nabbi) nekiwanvuwa, emitima gyabwe negikakanyala, era bangi mu bo bonoonyi.

Mukimanye nti mazima Allah alamusa e Nsi n'okugimeza ng'ebadde ekaze, mazima tubannyonnyodde ebigambo (byaffe) mube nga mutegeera.

Mazima abasajja abasaddaaka, na bakyala abasaddaaka, era ne bawola Katonda oluwola olulungi, (bye bawaayo) Katonda abibakubisizaamu, era balina empeera eyekitiibwa.

Era abo abakkiriza Allah n'ababaka be, abo bbo be bakkiriza abannamaddala, na balafuubana mu kuweereza mu kkubo lya Katonda, balina empeera yaabwe n'ekitangaala kyabwe ewa Mukama omulabirizi waabwe, ate abo abakafuwala ne balimbisa ebigambo byaffe, abo be ba nannyini muliro.

Mumanye nti mazima obulamu bw'ensi muzannyo na binyumo, nakwewunda nakwewaana wakati wa mmwe, nakulaga bungi bwa mmaali na baana, (wabula ebyo tebisaana kubuza muntu) anti bifaananako enkuba (emeza ebirime) ebimera byabyo nebisanyusa abalimi, oluvanyuma nebikula, olwo nno noobiraba nga byengedde, oluvanyuma nebifuuka ebisusunku naye mu bulamu obwenkomerero waliyo ebibonerezo ebikakali. (nga era bwe waliyo) ekisonyiwo n’okusiima ebiva ewa Allah. Obulamu bw'ensi tebulina kye buli okugyako okuba okweyagala okugayaaza obugayaaza.

Muvuganye nga mudda eri ekisonyiwo ekiva ewa Mukama omulabirizi wa mmwe (era nga mudda), eri e jjana obugazi bwayo bwenkana obugazi bwe ggulu ne nsi nga yategekerwa abo abakkiriza Katonda nababaka be. Ebyo bigabwa bya Katonda, abiwa oyo gwaba ayagadde, era Katonda ye nnyini bigabwa ebisuffu.

Tewali kabi kabaawo mu nsi, wadde okutuuka ku mmwe okugyako nga kaali mu kitabo nga tetunnaba ku katuusaawo, ddala ekyo kyangu nnyo ku Katonda.

Kiri bwekityo, mulyoke muleme kusalirwa kwekyo ekiba kibasubye, era muleme kusanyuukirira olwekyo kyaba abawadde, Katonda bulijjo tayagala mwerazi omwewulize.

(Abantu abo) beebo abakodowala ne bakalaatira n’abantu obukodo, oyo yenna akyuka (naava ku biragiro bya Katonda) mazima Katonda yye yaatali mwetaavu, atenderezebwa.

Ddala twatuma ababaka baffe nga baleeta obunnyonnyofu netubassaako ekitabo (nga kirimu amateeka) era netubalagira okukozesa Minzaani, abantu babe nga bayimirizaawo obwenkanya, era netussa (wo) ekyuma nga kirimu amaanyi amasuffu n’emigaso (nfaafa) eri abantu, olwo nno Allah alyoke amanye oyo amutaasa era nataasa ababaka be, awamu n’okuba nti (Katonda) talabwa. Mazima Allah wa maanyi, nantakubwa ku mukono.

Mazima twatuma Nuhu ne Ibrahim netussa muzadde lyabwe bombi obwa Nabbi n’ekitabo, olwo nno mu bo mulimu omulungamu naye abasinga obungi mu bo bonoonyi.

Oluvanyuma twagobereza ku buufu bwabwe ba Nabbi baffe, kwabo twagoberezaako Isa mutabani wa Mariam, netumuwa ne Injil, era twassa mu mitima gyabo abamugoberera okulumiriganwa n'okusaasira, era bakolera ku bu sosodooti bwe baagunjaawo, tetububawandiikangako (wabula bo ba bwegunjirawo) mbu nga banoonya okusiima kwa Katonda, olwo nno ate tebabukolerako nga bwekyali kyetaagisa okubukolerako, kale netuwa abo abakkiriza mu bo empeera yaabwe, era abasinga obungi mu bo bonoonyi.

Abange mmwe abakkiriza mutye Allah era mukkirize n’omubaka we, ajja kubawa okusaasira kwe emirundi ebiri, era abateerewo ekitangaala nga kwe mutambulira, era abasonyiwe, bulijjo Allah musonyiyi nnyo, musaasizi.

(Ebyo byonna lwakuba nti) abaweebwa ekitabo babe nga bamanya nti tebalina kintu kyonna ku bigabwa bya Katonda kye balinako buyinza, era bamanye nti ebigabwa byonna biri mu mukono gwa Allah, abiwa gwaba ayagadde, bulijjo Allah ye nanyini bigabwa ebisuffu.

Ddala Katonda awulidde ebigambo byo mukyala ey'emulugunyizza gyoli ku bba era n'awaaba eri Katonda era Katonda abadde awulira ebigambo bye mubadde muwanyisiganya anti Katonda bulijjo awulira era alaba.

Abo bonna mu mmwe abagamba bakyala baabwe nti emigongo gyabwe giringa egya ba nnyabwe (abo be bakigamba) tebabangako ba maama baabwe. Ba maama baabwe beebo ababazaala. (mu kwogera batyo) mazima bbo boogera ekigambo ekibi. Mu kiseera kye kimu nga kigunje. Wabula mazima ddala Katonda alekera era asonyiwa.

Abo bonna abazira bakazi baabwe olw'okulayira nti kubo balinga bannyaabwe ate oluvanyuma nebaddayo eri ekyo kye baali balayiridde (oyo akikola) ateekwa okuta omuddu nga tannaba kuddayo kulabagana namukyalawe. Ekyo nno kyemuteekwa okukola, anti Allah amanyi nnyo byonna byemukola.

Oyo aba tasobodde kuta muddu nga tannalabagana na mukyalawe ateekwa okusiiba emyezi ebiri nga gigoberegana, wabula oyo aba tasobodde ateekwa okuliisa ba masikiini nkaaga. Ekyo kibafuule abakkiriza Allah n'omubakawe, ago mateeka ga Allah era bulijjo abawakanya amateeka g'a Allah, n'abawakanya eddiini ya Allah bagenda kutuukibwako ebibonerezo ebiruma.

Mazima abo abawakanya Allah n'omubakawe baswavu nga abaabasooka bwe baaswazibwa, ate nga twassa amateeka agannyonnyola (Haraamu ne Halaal) naye abo abagawakanya bajja kutuukibwako ebibonerezo ebigenda okubanyoomesa.

Olunaku Allah lwalibazuukiza bonna n'ababuulira ebyo byebaakola, Allah yabikunganya n'abikomekkereza. So ng'ate bbo baabyerabira. Bulijjo Allah mujulizi ku buli kintu.

Abaffe tomanyi nti mazima Allah amanyi ebyo ebiri mu ggulu omusanvu n'ebyo ebiri mu nsi, nga tewali kafubo konna kakabe k'abasatu okugyako nga yye waakuna n'okumanyakwe, wadde ak'abataano okugyako nga yye w'amukaaga wadde abatono abatenkana basatu oba abali waggulu w'omukaaga okugyako Allah aba nabo awo wonna webali, oluvanyuma Allah ku lunaku lw’enkomerero agenda kubategeeza ebyo byonna byebaali bakola. Anti Allah amanyi buli kintu kyonna.

Abaffe tolaba abo abagaanibwa okukola obufubo (obwenkwe) oluvanyuma ne baddamu ekyo kyenyini ekyabagaanibwa, nga bogeraganya wakati waabwe mu nkukutu olw'okukola ebikyamu n'obulabe n'okujeemera omubaka. Era nga bwe baba bazze gyoli bakulamusa n'ekiramuso ekitali ekyo Katonda kyeyakutekerawo, nga bwe bagamba mu mitima gyaabwe nti lwaki Katonda tatubonereza olwebyo byetwogera. Omuliro Jahannama gwebagenda okuyingira gubamala. Nayo nno nkomerero mbi.

Abange mmwe abakkiriza bwe mubanga muteesa mu kyama temuteesanga okukola ekibi kyonna oba obulabe oba okujeemera omubaka. Muteesenga byakukola bulungi nakutya Allah. Era mutye Katonda anti gyali gyemugenda okukunganyirizibwa.

Mazima okuteeseganya mu kyama mu ngeri embi n'okukola obulabe kikolwa kya Sitaane (nga nekigendererwa kye) kunyiiza bakkiriza. Ekyo tekiyinza kubaleetera kabi konna, okugyako nga Katonda akkirizza era abakkiriza bateekwa kwesiga Katonda yekka.

Abange mmwe abakkiriza bwe muba mugambiddwa nti mwefunze mu ntuula (ne banammwe bafune ebifo) mukikole. Allah ajja ku basobozesa okugaziwa, ate bwe muba mugambiddwa okusituka (okuva mu kifo olwensonga yonna) musituke, anti Katonda asitula amadaala mu mmwe abakkiriza n'abo abaweebwa okumanya. Bulijjo Katonda mumanyi nnyo webyo byonna byemukola.

Abange mmwe abakkiriza bwemwagalanga okwogera n'omubaka musookenga ku saddaka, nga temunayogera naye. Ekyo kye kirungi gye muli era kyekisinga era kibatukuliza ddala. Naye bwe muba temulina kyemusadaka mazima Katonda musonyiyi waakisa.

Abaffe muzitowereddwa okuwaayo saddaka nga temunnaba kwogera ne Nabbi. Kale bwekibanga kibalemye oba nga ne Katonda abasonyiye, kale nno muyimirizeewo e sswala mutoole e zzaka mugondere Allah n'omubakawe. Mazima Allah amanyidde ddala nnyo ebyo byemukola.

Abaffe tewamanya abo abakwanagana n'abantu Katonda beyasunguwalira, abantu abo mu butuufu si ba mu mmwe wadde si ba mu bali (Bebakwanagana nabo) nebatuuka n'okulayira ku bulimba nga ate ddala bamanyi (ekituufu).

Katonda yabategekera ebibonerezo ebikambwe, anti mazima byonna byebaakolanga bibi.

(Okulayira kwabwe nti basiramu) baakifuula ekyokuwona, olwo nno nebaziyiza abantu okukola emirimu gya Katonda, bagenda kutuukibwako ebibonerezo ebinyoomesa.

Emaali yaabwe n'abaana baabwe tebigenda kubagasa naakamu mumaaso g'a Allah. Abo be bantu bo mumuliro ab'okugubeeramu obugenderevu.

Olunaku Allah lwalibazuukiza bonna nebamulayirira nga bwebaabalayirira mmwe ku nsi nga balowooza nti kyebakoze kyakubagasa. Abange, abo nno beebalimba bennyini.

Sitaane yabeefunza okutuusa lweyabeerabiza okwogera ku Allah. Abo nno be bagoberezi ba Sitaane. Mukimanye nti mazima ab'ekibiina kya Sitaane be b'okufafaganirwa.

Mazima abo abawakanya Katonda n'omubakawe ba mu bantu abanyoomebwa.

(Allah) yakakasa dda nti nze Katonda n'ababaka bange tuli baakuwangula anti Katonda wamaanyi. Nnantakubwa ku mukono.

Tewali bantu bonna abakkiriza Allah n'olunaku lw’enkomerero baalibadde batiitiibya abo abawakanya Allah n'omubakawe, kababe ba kitaabwe, oba baana baabwe, oba baganda baabwe, oba nga baaluganda lwabwe olwokumpi. Abo nno (abatakola ekyo) Allah yatebenkeza obukkiriza mu mitima gyabwe, naabawagira naamanyi agava gyali era nga agenda kubayingiza e jjana egikulukutira wansi waazo emigga, nga bakubeera mu zo olubeerera. Katonda yabasiima nga nabo bwebaamusiima. Kisaana kimanyike nti mazima abo b'ebantu ba Katonda abokwesiimira ddala.

Ebiri mu ggulu ne mu nsi byonna bitendereza Katonda nantakubwa ku mukono, assa buli kintu mu ssa lyakyo.

Y'eyafulumya abo abaakafuwala mu bayudaaya (Ab'ekiika kya ba Banu Nadhiri) mu ngeri y'okubawangangusa okuva mu mayumba gaabwe olufuluma olwasooka. Temulowoozangako mmwe abakkiriza nti (ba Banu Nadhiri) bayinza okugobwa ate bo (ba Banu Nadhiri) baalowooza nti ebigo byabwe bijja kulemesa Katonda okubatuusaako ekyo kyayagala. Katonda nakibatuusaako mu kiseera webaali batakisuubirira. Era Katonda nateeka mu mitima gyabwe okutya okwensusso nga bo bennyini be bemenyera amayumba gaabwe n'emikono gyabwe, n'emikono gya bakkiriza negikola ekyo. Kale nno abategeera mumwe mugyemu ekyokuyiga.

Singa tekyali nti Katonda yabawandiikako okubawangangusa yaalibadde ababonereza kuno ku nsi, ate nga ne ku nkomerero abategekedde ebibonerezo byomuliro.

Ekyo nno lwansonga yaakuba nti baawakanya Katonda n'omubakawe. Ate nga oyo yenna awakanya Katonda, amanye nti mazima Katonda muyitirivu waakubonereza.

Emiti gye ntende gyonna gyemwatema oba jemwaleka nga giyimiridde nga bwegyali, ebyo byonna byakolebwa lwa kiragiro kya Katonda, era alyoke aswaze abo abonoonyi.

Eyo emmaali Katonda gyeyasobozesa omubakawe okusuuza abalabe. (ba Banu Nadhiri) temwebagala nfaransi wadde engamiya okugenda gyebali. Wabula Katonda asobozesa ababakabe okuwangula oyo yenna gwaba ayagadde okuwangulwa, mazima Katonda asobola buli kintu kyonna.

Emmaali eyo yonna Katonda gyeyasobozesa omubakawe okusuuza okuva mu byalo (bya ba Banu Nadhiri ng'olutalo luggweredde mu kutegeeragana) eba y'a Katonda, n'omubakawe, n'aboluganda lwa Nabbi olwokumpi, ne ba mulekwa, ne ba masikiini, n'abatambuze naabo abafunye ebizibu mu ngendo zaabwe. Emmaali eyo ereme kuba nga abeegasa nayo bagagga bokka mu mmwe. Ebyo byonna omubaka byaba abaleetedde mubitwale. Ate ebyo byonna byaba abaziyizza mubireke mutye Katonda anti Katonda muyitirivu w'akubonereza.

Na bwe kityo abaavu abaasenguka okuva e (Makkah) ne bagobwa mu mayumba gaabwe ne balesebwa e mmaali yaabwe nga banoonya obulungi n'okusiima kwa Katonda era nga baali bataasa ddiini y'a Katonda n'omubakawe (balinako omugabo). Abo nno b'ebakkiriza abamazima.

Abatuuze b'e Madina abaasooka okukkiriza obusiramu (ba Answar) baagala abo abaasengukira gyebali (ba Muhajiruuna), era tebalina nsaalwa yonna kwebyo ebyaweebwa bannabwe (ba Muhajiruna) era nga beeresa newakubadde nga balina obwetaavu bo bennyini. Omuntu awona omulugube, abo nno b'ebokwesiimira ddala.

Naabo abajja oluvanyuma lwabwe babasabira nga bagamba nti ayi Katonda tusonyiwe ne baganda baffe abaatukulembera mu bukkiriza, era tossa mu mitima gyaffe nsaalwa yonna eri abo abakkiriza. Ayi Katonda waffe gwe musaasizi oweekisa ekingi.

Abaffe tolaba (ggwe Nabbi Muhammadi) abananfuusi abagamba bannabwe abaakafuwala mu bayudaaya nti singa munaaba mugobeddwa naffe tujja kugenda nammwe. Era tetulikkiriza kigambo kyamuntu yenna ku bikwata ku mmwe. Era bwemulirwanyisibwa tugenda kubataasa. Ne Katonda akakasa nti mazima ddala baali balimba.

Wabula singa (abayudaaya) bagobwa, abananfuusi tebagenda nabo. Ate ne bwebaba balwanyisiddwa tebabataasa. So nga ne bwebaba bagezezzaako okubataasa babaddukako, n'oluvanyuma nebatafuna kutaasibwa kwonna.

(Abakkiriza), mwe mutiibwa mu mitima gyabwe okusinga bwe batya Katonda. Ekyo nno lwakuba nti bbo kibiina ky'abantu abatategeera.

(Abayudaaya n'abananfunsi) tebayinza kubalwanyisa nga bali wamu okugyako nga bali mu byalo ebiriko ebigo, oba nga bali mabega w'abisenge. Obulabe wakati waabwe bokka buyitirivu obalowooza okuba nti bali wamu, so nga emitima gyaabwe myawukamu. Ekyo nno lwakuba nti bo kibiina kyabantu abatategeera.

(Ba Banu Nadhiri) bafaanana naabo abaabakulembera e mabegako katono (Abakafiiri be Makkah abaawangulwa obubi ennyo ku lutalo lwe Badri) baaloza ku bukaawu bwe bikolwa byabwe (ku nsi) ate nga balinayo ebibonerezo ebiruma ennyo (ku nkomerero).

(Abananfuusi mu kusendasenda abayudaaya) balinga Sitaane bwe gamba omuntu nti kaafuwala. Wabula bwakaafuwala Sitaane emugamba nti nze siri naawe, mazima nze ntya Katonda omulezi w'ebitonde.

Enkomerero y'a bombi neeba nga ddala baakubeera mu muliro olubeerera, eyo nno y'empeera y'a beeyisa obubi.

Abange mmwe abakkiriza mutye Allah, era omuntu atunule mu byategekedde olunaku lw'enkya. Bulijjo muteekwa okutya Allah, anti mazima Allah amanyidde ddala buli kye mukola.

Temubeera nga abo abaava ku Allah, ekyavaako okuba nga Allah abeerabiza bye baali bateekwa okwekolera, abo nno be bonoonyi.

Abantu bo mu muliro tebenkana na bantu ba mu jjana, abo abaliyingira e jjana be bokwesiima.

Singa twassa Kulaani eno ku nsozi wandizirabye nga zigonze, era nga zimerenguse olw'okutya Allah. Ebifaananyi ng'ebyo tubikubira abantu bibasoboseze okufumitiriza (bategeere Allah).

Yye Allah, yooyo tewali kisinzibwa kyonna mu butuufu okugyako ye yekka, amanyi ebitalabwa n'ebirabwa. Yye yemusaasizi, oweekisa ekibuna kuno ku nsi, aliba n'ekisa ekyenjawulo ku lunaku lw'enkomerero.

Yye Katonda, yooyo tewali kisinzibwa kyonna okugyako yye, omufuzi wa buli kintu, atuukiridde mu buli kimu, kiwamirembe, akakasa obukkiriza bwa baddube, kalondoozi wa buli kintu, nantakubwa ku mukono, kkirimaanyi, kabwejungira. Katonda wanjawulo nnyo kwe byo bye bamugattako.

Yye Allah, yooyo omutonzi, eyatandikawo ebitonde mu kubitonda nga talina kyalabirako, eyafaananya buli kintu nga bwa kyagala, alina amannya amalungi, buli ekiri mu ggulu n'ensi kimutendereza. Era yye Katonda, ye nantakubwa ku mukono, mugoba nsonga.

Abange mmwe abakkiriza temufuulanga abalabe bange era abalabe ba mmwe mikwano gyammwe egy'omunda, so nga baawakanya amazima agaabajjira okuva ewa Katonda ne bagobaganya omubaka awamu nammwe (okuva mu Makkah), olwokuba nti mukkiriza Katonda omulezi wa mmwe. Bwe muba mufulumye olw'okulwana mu kkubo lyange era nga munoonya okusiima kwange, (temukukutanga ne mubabuulira ebyama byammwe) nga mukolagana nabo mu ngeri y'ekyama ate nga nange manyi ebyo bye mukisa ne byemwolesa. Oyo yenna akikola mu mmwe aba avudde ku kkubo ettuufu.

Bwe babagwikiriza awantu wonna boolesa obulabe gye muli ne babagalulira emikono gyabwe (mu kubalwanyisa), era ne baboolekeza ennimi zaabwe (mu kubavuma) mu ngeri embi. Era nga beegomba nti singa muwakanya Allah n'omubakawe.

Enganda zammwe wadde abaana ba mmwe tebagenda kubagasa ku lunaku lw'enkomerero. Katonda agenda kulamula wakati wa mmwe, anti Katonda alabira ddala ebyo bye mukola.

Mazima mulina ekyokulabirako ekirungi ekya Nabbi Ibrahimu n'abakkiriza abaali naye, mu kiseera we baagambira bannaabwe nti mazima ffe tubesammudde n'ebyo bye musinza ebitali Katonda (ali omu). Tubawakanyizza era waliwo wakati waffe nammwe obulabe n'obukyayi obw'olubeerera, mpozzi nga mukkirizza Katonda ali omu. Okugyako ekigambo kya Ibrahim kye yagamba kitaawe oluberyeberye nti nja kwegayirira ddala Katonda akusonyiwe, era sirina kintu kyonna kyenyinza kukugasa ewa Katonda. Ayi Katonda waffe ggwe wekka gwetwesiga. Era tukwenenyerezza. Era gyoli gyetujja okudda.

Ayi Mukama Katonda waffe totufuula kikemo eri abo abaagaana okukkiriza era tusonyiwe ayi mukama waffe, anti mazima ggwe nantakubwa ku mukono, assa buli kintu mussa lyakyo.

Mazima mulina ekyokulabirako ekirungi ku bo (Nabbi Ibrahim n'abakkiriza abaali naye) ekyo kiri eri buli asuubira okufuna e mpeera okuva ewa Katonda ku lunaku lw'enkomerero. Naye oyo yenna anaaba akyuse (naava ku kukkiriza Katonda n'olunaku lw'enkomerero), mazima ddala Katonda yye talina kye yetaaga okuva eri bitondebye, atenderezebwa bulijjo.

Wabula Katonda asobola okussa wakati wa mmwe ne be muwalaggana nabo e nkolagana ennungi. Anti Katonda muyinza, era Katonda musonyiyi omusaasizi.

Katonda tabagaana ku kolagana naabo ababa tebabalwanyisizza olw'eddiini, era abatabagobaganya mu nsi yammwe mutuuke okuba nga temubayisa bulungi n'okubakolera obwenkanya, anti mazima Katonda ayagala abenkanya.

Mazima ddala Katonda abagaana okukolagana naabo abaabalwanyisa olw'eddiini, ne babagobaganya okuva mu nsi yammwe, ne bakola kinene nnyo mu kubagobaganya. Oyo yenna akolagana nabo, abo nno be balyazamanyi.

Abange mmwe abakkiriza singa abakyala abakkiriza babajjira nga basenguse mubagezesenga. Yye Allah obukkiriza bwabwe aba abumanyi, bwe mukakasa nti bakkiriza temubaddizanga abakafiiri, abakyala bano tebali Halali ku bakafiiri abo nga n'abakafiiri abo bwe batali halali ku bakyala abo, wabula bo abasajja (Abakafiiri) mubaddize bye baawaayo mu kubawasa, olwo nno tekiba kibi bwe mubawasa nga mubawadde amahare gaabwe. Temwesiba ku kuwoowa okwekikafiiri kwe mwakola nabo. Mubasabe babaddize byemwawaayo nga nabo bwe basobola okusaba bye bawaayo. Ebyo nno kwe kulamula kwa Katonda kwabalamuza. Anti Allaj mumanyi nnyo ateeka buli kintu mussa lyakyo.

Singa omukyala w'omu ku mmwe ava mu busiramu nadda mu bukafiiri kemulwanagana nabo ne mumala mufunayo eminyago muteekwa okusasula abo abaddukwako bakyala baabwe ekigero kyekyo kye bawaayo nga babawasa. Bulijjo muteekwa okuba nga mutya Katonda oyo gwemukkiriza.

Owange ggwe Nabbi abakkiriza abakyala bwebajja gyoli nga bakuba ekirayiro mu maasogo, nti tebagenda kugatta ku Katonda kintu kyonna, era nga tebagenda kubba, wadde okwenda oba okutta abaana baabwe, era tebajja kusiba ba bbaabwe baana bebazadde mu bwenzi, nga era bwe batagenda kukujeemera mu kukola ekirungi kyonna, naawe nno bawe obukakafu era wegayirire Katonda abasonyiwe, anti mazima ddala Katonda musonyiyi nnyo omusaasizi.

Abange mmwe abakkiriza temukwanagana n'abantu Katonda beyasunguwalira. Anti bo tebalina ssuubi ku lunaku lw'enkomerero, nga abakafiiri bwebatalina ssuubi ku bikwata ku bantu abali emagombe.

Ebiri mu ggulu ne mu nsi byonna bitendereza Katonda nantakubwa ku mukono, assa buli kintu mu ssa lyakyo.

Abange mmwe abakkiriza lwaki mwogera ebyo bye mutakola.

Kisunguwalirwa nnyo ewa Katonda okwogera bye mutakola.

Mazima Katonda ayagala abo abalwana mu kkubolye, nga basimbye ennyiriri, ne baba nga ekizimbe, nga e bitundu byakyo bikwatagana bulungi.

Mu ngeri y'emu bajjukize ekyafaayo kya Musa bwe yagamba abantube nti, lwaki munnyiiza ng'ate mumanyidde ddala nti mazima nze ndi Mubaka wa Katonda gweyabatumira. Bwe baabula, Katonda kwekubuza emitima gyabwe, anti Katonda talungamya bantu bajeemu.

Era bajjukize e kyafaayo kya Isa mutabani wa Mariam bwe yagamba abaana ba Israel nti mazima nze ndi Mubaka wa Katonda gye muli, nga nkakasa Taurat eyankulembera era nga mpa amawulire ag'essanyu ag'omubaka alijja oluvanyuma lwange, nga erinyalye ye Ahmad. Wabula omubaka (Muhammadi) oyo bwe yabajjira n'obubonero obunnyonnyofu, ate bo ne bagamba nti lino ddogo eryeyolefu.

Ani eyeeyisa obubi okusinga oyo atemerera Katonda ebyobulimba, so nga bulijjo ayitibwa okujja eri obusiramu. Katonda talungamya bantu abeeyisa obubi.

(Mu kukola ekyo) baagala kuzikiza kitangaala kya Katonda n'emimwa gyabwe. Sso nga Katonda waakujjuza e kitangaalakye newakubadde nga abakafiiri tebakyagala.

Katonda yooyo eyatuma omubakawe ng'amuwadde obulungamu n'eddiini entuufu. Bulyoke bukye enkya nga yeddiini ewangudde newakubadde nga abagatta ku Katonda ebintu ebirala tebakyagala.

Abange mmwe abakkiriza mwandyagadde mbalagirire ebyettunzi ebiribawonya ebibonerezo ebiruma.

(Nabyo) muteekwa okukkiriza Katonda n'omubakawe, ne mulafuubana mu kuweereza mu kkubo lya Katonda, nga muwaayo emmaali yammwe, nga nammwe mwennyini mwenyigiramu. Ekyo nno kye kirungi gye muli singa mubadde mumanyi.

(Anti bwe mukola ebyo) Katonda ajja kubasonyiwa ebyonoono byammwe, abayingize e jjana ezikulukutiramu emigga era mugenda kufuna obutuulo obulungi mu jjana ez'olubeerera, okwo nno kwe kwesiima okusuffu.

Era mufune n'ekirala nga nakyo mukyagala, nakyo kwe kutaasa kwa Katonda n'obuwanguzi obwamangu. Era sanyusa abakkiriza (nti byonna bagenda kubifuna).

Abange mmwe abakkiriza musituke mutaase e ddiini y'a Katonda. Kibe nga Issa mutabani wa Mariam bwe yagamba abagoberezibe abenjawulo nti, baani abanannyamba ku mulimu gwa Katonda. Abagoberezibe abenjawulo kwe kuddamu nti ffe twewaddeyo okutaasa e ddiini ya Katonda. Ekyavaako ogutundu ku baana ba Israel okukkiriza, n'ekitundu ekirala okukaafuwala. Naffe ne tutaasa abo abakkiriza ku mulabe waabwe, ne bukya enkya nga be bali waggulu.

Ebiri mu ggulu ne mu nsi byonna bitenda Allah omufuzi wa buli kintu, omutukuvu mu buli kimu, nantakubwa ku mukono, assa buli kintu mussa lyakyo.

Yye yooyo eyatuma eri abo abataamanya kusoma na kuwandiika omubaka (Muhammadi) nga ava mu bo ng'abasomera e bigambo bya Katonda era nga abatukuza (okubajja mu bukafiiri) era nga abayigiriza ekitabo (Kulaani) n'ebiva mu Hadith so nga oluberyeberye (nga Nabbi tannatumwa) baali mu bubuze obw'olwatu.

Era yamutuma n'eri abalala nga ba mu bo, naye nga balijja luvannyuma lwabwe (nabo be basiramu abalala bonna abakkiriza Nabbi Muhammad abataamulabako okutuusiza ddala ku lunaku lw'enkomerero) era yye Katonda, ye nantakubwa ku mukono, assa buli kintu mussa lyakyo.

Ebyo bye birungi bya Katonda byawa oyo gwaba ayagadde. Mazima Katonda ye nannyini birungi ebisukkulumu.

Ekifaananyi kyabo abaaweebwa Taurat ne batagikozesa, balinga endogoyi ey'etikka ebitabo (nga tesobola kwe gasa nabiri mu bitabo ebyo), kibi nnyo ekifaananyi ekyo, ekyabo abalimbisa ebigambo bya Katonda. Bulijjo Katonda talungamya bantu beeyisa bubi.

Bagambe (ggwe Nabbi Muhammadi) nti abange mmwe abayudaaya bwe muba nga mweyita abaagalwa ba Katonda (mwe mwekka) so ssi abantu abalala, kale nno mwegombe okufa bwe muba nga muli ba mazima.

Tebagenda kwe gombera ddala kufa, olwebyo byebaakola. Bulijjo Katonda amanyi nnyo abeeyisa obubi.

Bagambe (ggwe Nabbi Muhammad) nti mazima okwo okufa kwe mudduka kwakubatuukako, oluvanyuma muzzibwe eri omumanyi w'ebitalabikako n'ebirabika. Ate nno olwo alyoke abategeeze ebyo byonna bye mwali mukola.

Abange mmwe abakkiriza, bwe baaziinanga olw'esswala (ye jjuma) ku lunaku lw'okutaano, mwanguwenga okugenda eri okwogera ku Katonda, ate muyimirize emirimu. Ekyo kye kirungi gye muli singa mubadde mumanyi.

E sswala bweggwa, olwo nno mugende mu nsi munoonye ebigabwa bya Katonda, mwogere nnyo ku Katonda mulyoke mwesiime.

Bwe balaba ebyo busuubuzi, oba ebya masanyu, banguwa okugenda gyebiri ne bakuleka nga oyimiridde. Bagambe nti ebya Katonda bye birungi okusinga ebya masanyu n'obusuubuzi, ate nga Katonda yaasinga abagabi bonna.

Abannanfuusi bwe bajja gy'oli (Ggwe Nabbi Muhammadi (ﷺ)) bagamba nti tukkiriza nti mazima ddala ggwe oli Mubaka wa Katonda. Ne Katonda akimanyidde ddala nti mazima gwe oli Mubakawe, ate era Katonda akakasa nti mazima abannanfuusi balimba nnyo.

Ekyo kulayira kwabwe (nti basiramu) bakifuula ekyokulwanyisa ekibawonya, olwonno ne balyoka baziyiza abantu okuyingira mu ddiini y'a Katonda. Mazima bibi nnyo ebyo bye baali bakola.

Ekyo kiri bwe bityo lwa kuba baalangirira obukkiriza n'ennimi za bwe, so nga munda bakafiiri. Olwo nno e mitima gyabwe negiteekebwako envumbo ne babeera nga tebategeera.

Bwo batunulako, e mibiri gyabwe gikusanyusa, bwe boogera toyinza butatwala kigambo kyabwe, balinga ebiti ebyesigamiziddwa ku kisenge nga tebiyinza kwetengerera, buli lwonna lwe bawulira akakuba bagamba nti bubakeeredde, abo be balabe, n'olwekyo beegendereze, Katonda yabakolimira, ggwe ate bandivudde batya ku mazima.

Singa baba bagambiddwa nti mujje eri omubaka wa Allah abasabire e kisonyiwo, banyeenya e mitwe n'obalabira ddala nga bajeemye era nga beekuluntazza.

Okubasabira e kisonyiwo n'obutabasabira byonna bifaanana, Katonda tagenda kubasonyiwa, anti Katonda talungamya bantu boononyi.

Be bamu be bo abagamba nti temuwaayo kintu kyonna eri abo abali awamu n'omubaka wa Katonda okutuusa lwe banamwabulira. So nga amawanika g'omuggulu n'ensi gonna ga Allah. Naye mazima abannanfuusi tebategeera.

Baatuuka n'okugamba nti bwe tunadda e Madina (okuva mu lutalo lwa ba Bani Al Mus-twalik) abasinga okuba ab'ekitiibwa bajja kugoba mu (Madinah) abanyoomebwa. So nga e kitiibwa n'obuwanguzi bya Katonda n'omubakawe n'abakkiriza naye mazima abananfusi tebamanyi.

Abange mmwe abakkiriza, ebyo bugagga byamwe n'abaana bamwe tebibawugulanga ne bibajja ku kwogera ku Katonda, oyo yenna akikola, abo nno be bokufaafaaganirwa.

Era mugabe kwe byo bye twabawa walumbe nga tannatuuka ku omu ku mmwe, naatuuka okulaajana nga agamba nti, ayi mukama omulezi wange singa ondeseewo akabanga ne nsadaakako era ne mbeera mu balongoofu.

Sso nga Katonda tagenda kulindiriza mwoyo gwonna entuuko yaagwo bweriba nga etuuse, Katonda bulijjo muyitirivu w'akumanya ebyo byonna bye mukola.

Ebiri mu ggulu ne mu nsi byonna bitenda Katonda, obufuzi bwonna n'amatendo gonna bibye, anti ye muyinza wa buli kintu.

Yye yooyo eyabatonda nga mu mmwe mulimu abawakanya Allah n'abakkiriza. Lubeerera Katonda alaba bye mukola.

Yatonda eggulu n'ensi lwa nsonga. Ekifaananyi kye yabatonderako kye kisingira ddala okuba ekirungi. Era gyali gye mugenda okudda.

Amanyi ebiri mu ggulu ne mu nsi, era nga bwa manyi bye mukweka ne bye mwolesa. Anti Katonda amanyi ebiri mu bifuba.

Abaffe amawulire gaabo abaawakanya Allah oluberyeberye lwa mmwe tegaabatuukako, ekyabaviirako okuba nga bakomba ku bukaawu bwo bukafiri bwabwe. Era bagenda kutuukwakwo e bibonerezo ebiruma.

Olwe'nsonga nti ababaka baabwe baabaleeteranga obubaka obujjudde obunnyonnyofu, bo ne bagamba nti omuntu obuntu yajja atulungamye! ekyo ne kibakaafuwaza, ne baba nga tebakyayagala kuwulira kikwata ku bubaka, ne Katonda naaba nga takyabeetaaga. Anti Katonda bulijjo talina kye yataaga, era nga bulijjo atenderezebwa.

Abatakkiriza Katonda beerimba nga bagamba nti tebagenda kuzuukizibwa. Bagambe ggwe (Nabbi Muhammadi nti ssi bwekiri. Ndayira Katonda omulezi wange ddala mujja kuzuukizibwa, oluvanyuma mujja kutegeezebwa ddala ebyo bye mwakola, nekyo nno kyangu nnyo ku Katonda.

Kale nno mukkirize Katonda n'omubakawe n'ekitangaala (Kur'ani) kye twassa, ne Katonda bulijjo mumanyi nnyo weebyo bye mukola.

Mujjukire olunaku Katonda lwa libakunganya ku lunaku lw'enkomerero, olwo lwe lunaku oluliraga okufaafaganirwa (eri abakafiiri), oyo yenna akkiriza Katonda naakola e mirimu emirungi, Katonda amusangulako ebibibye, era agenda kumuyingiza e jjana ezikulukutiramu e migga, nga baakuzibeeramu lubeerera. Okwo nno kwe kwesiima okuyitirivu.

Naye ate abo abaakafuwala ne balimbisa n'ebigambo byaffe, abo nno b'ebantu bo mu muliro, ba kubeera mu gwo olubeerera, eyo nkomerero mbi.

Tewali buzibu bwonna butuuka ku muntu okugyako nga Katonda akkirizza, oyo yenna akkiriza Katonda, Katonda alungamya omutimagwe. Mazima bulijjo Katonda mumanyi nnyo wa buli kintu.

Mugondere Katonda era mugondere omubakawe. Naye bwe munaayawukana kwe kyo, ye omubaka waffe (tanenyezebwa) obuvunaanyizibwabwe, kwe kutuusa obubaka mu bujjuvu.

Allah ye yekka asinzibwa mu butuufu, tewali kisinzibwa mu butuufu okujjako Ye, abakkiriza bateekwa kwesiga Katonda yekka.

Abange mmwe abakkiriza mazima mu bakyala bammwe n'abaana ba mmwe mulimu abalabe, n'olwekyo mubeegendereze. Naye bwe mubaddiramu ne mubalekera, ne mubasonyiwa, mazima Katonda muyitirivu waakusonyiwa asaasira ennyo.

Mazima e byobugagga bya mmwe n'abaana ba mmwe kikemo, ng'ate ewa Allah we wali empeera ensukkulumu.

Kale nno mutye Allah nga bwe muba musobodde, muwulire era mugonde, mu ngeri yeemu mugabe ku lwa Katonda, ekyo nno kye kirungi gye muli. Oyo yenna awonyezebwa omulugube gwo mwoyogwe, abo nno be b'okuganyulwa.

Singa muwola Katonda oluwola olulungi, alubabalizaamu era n'abasonyiwa ebyonoono bya mmwe, bulijjo Katonda asiima era wa kisa.

(Katonda oyo) amanyi ebitalabwako n'ebirabwa, nantalemwa, akola buli kintu nga mukenkufu mu nsonga yonna.

Owange ggwe Nabbi, bwe muba nga muta abakyala ne mubawa ttalaka , mubate nga bali ku mbeera eyobutukuvu (Nga tebali mu Haidhi oba nga tebali munnaku zaabwe ezabuli mwezi), mubalenga n'obwegendereza ebbanga lya Idda (Idda kye kiseera omukyala ateereddwa kyamala nga tannaba kuddira bbaawe eyamuwa ttalaka). Era mutye Katonda omulezi wa mmwe, temwetantalanga okubaggya mu mayumba gaabwe (mwe babadde bawangaalira nga bali mu bufumbo bwa bwe), so nga nabo tebavanga mu mayumba ago okugyako nga bakoze ebikolobero eby'olwatu. Ezo z'ensalo z'amateeka ga Allah. Oyo yenna abuuka ensalo z'amateeka ga Katonda, aba y'eryazaamanyizza, tomanya oba olyawo Allah naaleetawo embeera endala oluvanyuma lw'ekyo.

Kale nno bwe baba nga basemberedde okumalako ebbanga lya Idda yaabwe mubaddirengamu, mu ngeri ennungi, oba mwawukane nabo mu ngeri ennungi (ebbanga lya Idda bwe riba liweddeko). Mubeerewo n'abajulizi babiri abeesimbu mu bantu ba mmwe, muwenga obujulizi mu bwe simbu kulwa Katonda, ebyo nno bibuulirirwa nabyo oyo yenna akkiriza Katonda n'olunaku lw'enkomerero. Bulijjo oyo yenna atya Katonda amuteerawo obwangu ng'afunye emitwaana.

Era naamugabirira mu ngeri gyatasuubira, era oyo yenna eyeesiga Allah, Allah amumala, anti Allah ekigambokye kye kyenkomeredde, mazima Allah yategeka ekigero kya buli kintu.

Abo bonna mu bakyala ba mmwe abatakyagenda mu nsonga za Heidh, bw emutankananga ebbanga lya Idda yaabwe, balindenga emyezi esatu. Wabula abo abatanayingira mu nsonga za Haidh Idda yaabwe emyezi esatu. Naye abo abali embuto ebbanga lyabwe kumala kuzaala. Oyo yenna atya Katonda amuteerawo obwangu mu buli kintu.

Ekyo kiragiro kya Allah kye yassa gye muli, oyo yenna atya Katonda amusangulako ebibibye ate naamwongeza empeera.

(Abakyala abaweereddwa ttalaka) mu basuzenga mu mayumba mwe musula okusinziira ku busobozi bwa mmwe, temubatulugunyanga, nga ekigendererwa kubanyigiriza (balemererwe), naye bwe babanga bali mbuto mubalabirirenga okutuusa lwe bazaala. Ate (bwe babanga bazadde) nebabayonseza abaana, mubasasulenga. Era mukkiriziganye mu ngeri ennungi, naye bwe mubanga mulemaganye olwo nno munoonye omulala anaayonsa.

Omusajja alina okulabirira omukyala okusinziira ku busobozibwe, nooyo Katonda gwe yawa ebyenfuna ebinafu naye alabirira omukyala okusinziira nga Katonda bwe yamuwa, Katonda tawaliriza muntu yenna okusukka kwe byo bye yamuwa. Katonda ajja kuteekawo obwangu oluvanyuma lwo buzito.

Ebitundu bimeka nga abantu baayo bajeemera Katonda omulezi waabwe n'ababaka beyabatumiranga, ne tubibala olubala oluyitirivu era ne tubibonereza olubonereza olukambwe.

(Ebitundu ebyo) ne bikomba ku bukaawu bw'obujeemu bw'abyo, n'eba nga enkomerero y'obujeemu bwabwe kufaafaganirwa.

Allah yabategekera ebibonerezo ebikambwe, kale nno mutye Katonda abange mmwe abalina amagezi agategeera, abange mmwe abakkiriza. Anti Katonda yassa gye muli obubaka obujjukiza (Kulaani).

Omubaka nga abasomera ebigambo bya Katonda ebinnyonnyola, nga ekigendererwa kwe kugya mu bizikiza abakkiriza ne bakola e mirimu e mirungi n'abazza mu kitangaala. Oyo yenna akkiriza Katonda n'akola e mirimu e mirungi, Katonda agenda kumuyingiza mu jjana, nga e migga gikulukutira muzo, baakubeera muzo olubeerera. (Omuntu ow'engeri eyo) Katonda yamutebenkereza enfuna (mu bulamu obwo luvannyuma).

Allah yooyo eyatonda eggulu omusanvu n'ensi naazitonda omuwendo gwe gumu, kikka ekiragiro ky'okugera kwe, n'eky'amateekaage wakati we ggulu n'ensi mulyoke mumanye nti, mazima Allah musobozi ku buli kintu, era mazima Katonda mumanyi wa buli kintu.

Owange ggwe Nabbi lwaki oziza ebyo Katonda bye yakukkiriza, nga onoonya okusiimisa bakyalabo. Bulijjo Katonda muyitirivu wa kusonyiwa era muyitirivu wa kusaasira.

Allah yabateerawo engeri gye muva mu birayiro byemuba mukoze, anti bulijjo aba nammwe, ate nga yye muyitirivu wa kumanya, buli kyakola akikola lwa nsonga.

Era jjukira Nabbi bwe yabuulira omu ku bakyalabe (Hafuswa) ekyama, omukyala oyo bwe yamala okwogera ekyama ekyo, ate Katonda n'akitegeeza Nabbi. Nabbi n'amubuulirako ebimu ebirala n'abireka. Nabbi olwa kibuulira omukyala oyo (omukyala n'amubuuza) nti ani yakikugambye (Nabbi n'amuddamu nti) eyakintegeezezza ye muyitirivu w'okumanya omukenkufu (Katonda).

Singa munaaba mwenenyezza mwembiriri (Hafuswa ne Aisha) ewa Katonda (kye kirungi gye muli), anti emitima gya mmwe gyawaganyadde. Naye bwe munamwekalakaasizaako, (mumanye nti) mazima Katonda ali ku luddalwe, ne Jiburilu, n'abakkiriza abalongoofu, ne ba Malayika bonna oluvanyuma lw'ekyo ba kumuyambako.

Singa anaba abatadde, Katonda omuleziwe, ajja kumuwaanyisizaamu abakyala abalala abasinga ku mmwe, nga basiramu nnyo, bakkirizza, nga bagonvu nnyo, nga beenenya era nga basinza nnyo Katonda, abatambulira mu kumutya, kababe nga baafumbirwako oba nga tebafumbirwangako.

Abange mmwe abakkiriza mwewonye muwonye n'abantu ba mmwe omuliro, nga gukumirwa ku bantu na mayinja, gukuumibwa ba Malayika abakambwe abaamanyi ennyo, tebajeemera Allah mu kyonna kyaba abalagidde, ate nga bakola ekyo kyonna kye baba balagiddwa.

(Ku lunaku lw'enkomerero abawakanya Allah n'omubaka we baligambibwa nti) Abange mmwe abawakanyi temwetonda olwaleero, mazima mugenda kusasulwa ebyo bye mwakola.

Abange mmwe abakkiriza mwenenyeze Allah olwenenya olwa namaddala. Omulezi wa mmwe Katonda kikakafu ajja ku basangulako ebyonoono bya mmwe era abayingize ejjana ezikulukutirwamu e migga. Olunaku Allah lwataliweebuula Nabbi na bakkiriza abali naye. Ekitangaala kyabwe nga kibeetoolodde mu maaso ne ku ddyo waabwe, nga bagamba nti ayi omulezi waffe tulekerewo e kitangaala kyaffe era otusonyiwe (ebyonoono byaffe) anti mazima ggwe oli musobozi ku buli kintu.

Owange Omubaka, lwanyisa Abatakkiriza n'abannaanfuusi era bakambuwalire, obuddo bwabwe muliro Jahannama, bubi obuddo.

Katonda yakubira abatakkiriza Allah n'omubakawe ekifananyi kya muka Nuhu ne muka Luutu. Baali bakyala b'a baddu ababiri mu baddu baffe abalongoofu, naye nno ne babakumpanya (n'obutakkiriza Katonda). Nabbi Nuhu ne Luutu tebaalina kye baagasa bakyala baabwe ewa Katonda. Ne bagambwa (Abakyala bombi) nti muyingire omuliro awamu naabo abaguyingira.

Era Katonda yakubira abakkiriza e kifaananyi kya muka Firawo mu kiseera weyasabira (Katonda) nti: Ayi omulezi wange nzimbirayo enyumba gy'oli mu jjana era omponye Firawo n'ebikolwabye, omponye n'abantu abeeyisa obubi.

Era Katonda yakuba e kifananyi kya Mariyamu muwala wa Imran oyo eyeekuuma kale netufuuwa mu ye omwoyo ogwava gye tuli era Mariam nakkiriza ebigambo bya Katondawe n'ebitabobye, n'abeera nga ali mu basinza Katonda abagonvu.

Mukama Katonda nanyini buyinza bwonna musukkulumu, era nga muyinza w'abuli kintu.

Oyo eyatonda okufa n'obulamu, olwokubageseza alabe ani asinga okukola obulunji. Era ye nantakubwa ku mukono omusonyiyi.

Oyo eyatonda eggulu omusanvu nga myaliro, toyinza kulaba mu kutonda kw'omusaasizi kamogo konna w'etegereze abaffe olabamu obukyamu bwonna.

Era zzaayo amaaso emirundi nemirundi eriiso lijja ku kuddira nga likooye era nga tolina kyofunyeeyo.

Mazima eggulu eriri okumpi n'ensi twalinyiriza nemunyeeye ezaaka, era nga bitawuliro ebigoba Sitani era Sitani ezo twazitegekera ebibonerezo byomuliro saeer.

Ate bbo abaawakanya omulezi waabwe twabategekera ebibonerezo by'omuliro Jahannama era buliba buddo bubi.

Bwe baligusuulwamu bagenda kuguwulira nga gutokota era nga gufuuwa.

Nga gubula okweyuzaamu, era buli lwegunasuulibwangamu ekibinja abakuumi bagwo banababuuzanga nti: temwajjirwa muntu yenna abatiisa (muliro guno)?

Baliddamu nti weewawo omutiisa yatujjira naye netumulimbisa era netumugamba nti Allah tassanga bubaka bwonna, ebyo byemulimu bubuze obuyitirivu.

Era baligamba nti singa twali tuwulira oba nga tutegeera (ebyatugambwanga) tetwandibadde bamu kwabo abayingira omuliro.

Nebeekakasaako ekyonoono kyabwe okufaafaganirwa kuli ku bantu bo mumuliro.

Mazima abo abatya omulezi wabwe awamu n'okuba nga talabika, bagenda kufuna ekisonyiwo n'empeera ennene.

Kyekimu mukwese ebigambo byamwe oba mubyatudde mazima yye amanyi ebiri mu bifuba

Abaffe eyatonda ayinza obutamanya nga ate ye muyitirivu w'okumanya era nga mukugu nnyo!.

Yye yooyo eyabafuulira ensi enyangu, kale mutambule mu bitundu byayo mulye mu bigabwabye (riziki ze) era jali jemugenda okudda.

Musuubidde okuwona oyo ali waggulu ensi n'etabamira singa eba etabanguse.

Oba musuubidde okuwona oyo ali waggulu n'atabasindikira muyaga, wabula mujja kumanya okulabula kwange nga bwekwali okukulu.

Abo abaaliwo oluberyeberye lwabwe baalimbisa, naye tewamanya kyennabatusaako.

Abaffe tebalaba ebinyonyi ebibuukira waggulu wabwe nga byanjuluza ebiwawaatiro era ngabwebiwumbako, tewali kibikuumira mu bbanga okujjako Katonda omusaasizi, mazima ye alaba buli kintu.

Oba ani oyo asobola okubalwanirira n'abataasa atali Katonda omusaasizi, abawakanyi tebalina kyebaliko okujjako mawaggali.

Ye abaffe ani oyo ayinza okubagabirira singa Katonda abajjako okugabirira kwe. Wabula baagwa mu kateebe k'okuwalaza empaka n'okwewaggula.

Ye abaffe oyo atambula akotese kyenyikye y'abeera kubulungamu oba oyo atambula nga yeegolodde ngali ku kubo eggolokofu?!

Bagambe nti Katonda y'eyabatandikawo n'abassako amatu n'amaaso n'abawa n'emitima wabula mwebaza kitono.

Bagambe nti Katonda yoyo eyabassa munsi era nga mugenda kuzuukizibwa mudde jali.

Era bagamba nti eyo endagaano eribaawo ddi bwe muba nga mwogera mazima!.

Bagambe nti okumanya okujjuvu okukwata ku nsonga eyo kuli wa Allah, naye nze ndi mutiisa owolwatu.

Bwe baliraba ebibonerezo nga bisembedde, ebyenyi byabo abagaana omukkiriza Allah nomubaka we bigenda kwekaba, awo balyoke bategezebwe nti ekyo nno kye mwagambanga nti kirituukaddi.

Bagambe nti, mulaba mutya singa Allah anzikiriza n'abo abali nange oba n'atusaasira anti obuyinza bwonna buli jali, naye ani alitaasa abatakkiriza Allah n'omubaka we ku bibonerezo ebiruma.

Bagambe nti yye Katonda omusaasizi gwetukkiriza era yekka gwetwesiga wabula lumu mulimanya ani ali mu bubuze obweyolefu.

Bagambe nti mulaba mutya singa amazzi gammwe bukya nga gakalidde ani ayinza okubawa amazzi agakulukuta amayonjo.

Nuuni, yemu kunyukuta ezikola walifu empalabu. Ndayidde ekalamu nebyebajiwandiisa.

Mazima Gwe Muhammad ekyengera kyobwa Nabbi omulezi wo kyeyakuwa tekiyinza ku kufuula mulalu.

Era ddala mazima olina empeera etakutukawo.

Era mazima ddala gwe oli kumpisa enene mubuluunji.

Ojja kulaba nga nabo bwebagenda okulaba.

Ani kumwenna eyatukwako ekizibu kyeddalu.

Mazima omulezi wo amanyidde ddala ani eyabula okuva ku kubolye era nga bwamanyidde ddala abalungamu.

Kale nno togondera abo abalimbisa.

Bandyagadde nti singa obagondera nabo nebakugondera.

Era togeza n'ogondera buli alayiralayira ataliimu nsa.

Omugeyi atambuza olugambo.

Omukodo, omulumbaganyi omwononefu.

Mubi nnyo ate awamu n'ekyo mwana w'abwenzi.

Tomugondera olwokuba alina emmali n'abaana.

Omuntu oyo bwasomerwa ebigambo byaffe agamba nti nfumo z'abantu abedda.

Kulunaku lw’enkomerero tugenda kussa kunyindo ye akabonero akamulamba nga tanayingizibwa muliro.

Mazima ffe twagezesa abantu be Makkah bwetwabaleetera enjala nga bwetwagezesa abantu ab'alina enimiro yaabwe abalayira nti baali bagenda kukungula kumakya nnyo, olwo nno baleme kugabirako bantu balala.

Wabula beerabira okugamba nti Insh'allah.

Katonda n'ajisindikira nabbambula w'omuliro ogwa jizikiriza ekiro nga beebase.

Okugenda okukya ngankalu ng'eriinga enkungule.

Nebatandika okwekowoola kubudde bwokumakya.

Nga bagamba nti muzuukuke mugende mu nimiro yammwe bwe muba ddala nga munakungula nga bwemwagambye.

Baatambula nga bogera bwama.

Nga bwebagamba nti tebagenda kukkiriza Masikiini yenna kuyingira mu samba yaabwe.

Baatambula kumakya okwo nga bakakasa nti bagenda kutuukiriza kyebaali basazeewo eggulo limu.

Bwebaalaba ennimiro yaabwe b'agamba nti tuli babuze.

Si kye kyokka wabula ffe tummiddwa okukungula ebibala.

Eyali abasingako eddiini n'obuntu bulamu nabagamba nti ssabagambye nti obutawaako banaku buba bulyazamanyi bwennyini, era kati kyetuteekwa okukola kwekutendereza Katonda kuba tetunamanya yatusonyiye oba nedda.

Olwo nno nebagamba nti yayawukana omulezi waffe mazima twabadde balyazamaanya.

Awonno baatandika okuwaanyisiganya ebigambo nga abamu banenya bannabwe.

Nebagamba nti mazima ffe tubadde bajeemu.

Tusaba Katonda waffe emmali yaffe etokomose atuwanyisizeemu ebirunji, mazima ddala ew'omulezi waffe yokka jetusaba obuyambi.

Bwebityo nno ebibonerezo bwebiba naye wabula ebibonerezo by'olunaku lw’enkomerero byebisinga obukakali singa baba ddala nga bamanyi.

Mazima abatya Katonda balina ejjana ez'ebyengera ewa Katonda waabwe

Gwe ate abakkiriza twalibayisizza nga abonoonyi?!

Mwabaaki mulamula mutya ebintu!.

Simanyi mulinayo ekitabo mwemubisoma.

Era nga mukitabo ekyo mulimu nti mwe mulyesalirawo kyemwagala ku lunaku lw'enkomerero.

Oba mulina endagano jetwabawa nga etuukira ddala ku lunaku lw'enkomerero ngebawa ebbeetu okwesalirawo nga bwemulaba.

Babuuze ani eyesowolayo abe nga akulembera endowooza eyo.

Oba balinayo (ababeesiguza) nga babayita babeezi ba Katonda, kale nno bajjanga nabo bwebaba nga bogera mazima.

Ku lunaku olulibeera olw'okubikkula ku ntumbwe. Balikowoolwa okuvunnamira Katonda naye nga tebasobola.

Nga amaaso gaabwe makakkamu olw'obuswavu, nga bajjudde okunyomebwa so nga ate baakowolwa okuvunnamira Katonda nga bakyali balamu ne batakikola.

Kale ndeka noyo alimbisa ebigambo bino tujja kubatwaliriza mpola mpola nga tebamanyi.

Era mbalindiriza, mazima entegeka zange nnywevu.

Oba obasaba omusaala nebaba nga bakaluubirirwa okusasula.

Oba balina okumanya ebyekusifu ne baba nga bo bawandiika ebyekusifu bye bamanyi nebaba nga tebetaaga ggwe kubategeeza.

Kale nno beera mugumikiriza ku kusalawo kwa kw'omulezi wo, tobeera nga ow'ekyennyanja (Nabbi Yunus) eyatuuka okukowoola (Katondawe okumutaasa) nga ajjudde obunyiikaavu.

Singa teyafuna kyengera ekyava ew'omulezi we (ekyokukiriza okwenenyakwe) yandikasukiddwa mu nsi enkalu (etariiko bulamu) era nga anenyezebwa.

Wabula omulezi we yamulekera obwa nabbi era namuteeka mu bantu abalongofu.

Abatakkiriza Allah n'omubaka we basemberera ddala okukuzikiriza n'amaaso gaabwe amabi (olw'ekkonda eriri ku myoyo jabwe) bwe bawulira qur'an era ne bagamba nti mazima yye (Nabbi) mulalu.

So ng'ate (qur'an) teri okujjako kya kujjukiza eri ebitonde.

Olunaku olwokwolesa amazima (olunaku lw’enkomerero).

Olunaku lwokwolesa amazima kyeki.

Naye omanyi olunaku olwokwolesa amazima kyeki.

Abantu ba Thamud n'aba A'adi baalimbisa olunaku olwentiisa.

Naye abantu ba Thamud bazikirizibwa nakubwatuka okwamanyi.

Ate ba A'adi nebazikirizibwa nakibuyaga owamanyi ennyo eyalimu obunyogovu.

Jeyabamazaamu ebiro musanvu nenaku munaana awatali kuyimiriramu, walaba abantu nga bagudde eri nga balinga enduli zemitende ezikutuddwako amasanso.

Gwe mu kulaba waliwo eyawona.

Farawo, n'abamukulembera, n'abo abali kubyalo bya Luutu nebajja nokwonoona.

Nebajeemera omubaka womulezi wabwe gwe yabatumira. kye yava abakwata olukwata oluyitirivu.

Aba Nuhu amazzi bwegaabooga okubawonya twabasaabaliza mulyato.

Olwo nno tulyoke tukibafuulire mwe ekyokwebuulirira era gakitegeere amatu agategeera.

Naye engombe bwerifuyibwa olufuuwa olusooka.

Era ensi nensozi nebirisitulwa nebimementulwa omulundi gumu.

Olwo nno olunaku lw’enkomerero luliba lutuuse.

Eggulu ligenda kweyasaamu, nga ku lunaku olwo ligenda kuba ligoonvu ngasi kyamanyi ngabweriri kati

Nga ba Malayika bali kumabbali galyo, nga waggulu waabwe kulunaku olwo ba Malayika munaana beebalisitula Arishi y'omulezi wo.

Kulunaku olwo mugenda kuleetebwa mubalibwe tewali kintu kyonna kyemukola kigenda kwekweka.

Naye oyo alikwasibwa ekitabo kye mu mukono gwe ogwaddyo agenda kugamba nti abange mujje musome ekitabo kyange.

Mazima nali nkakasa nti ngenda kubalibwa.

Oyo nno agenda kubeera mu bulamu obwesiimisa.

Mu jjana ey'a waggulu.

Ebibala byayo nga birengejjera kumpi.

Kale mulye era munywe muyogeyoge olwebyo byemwakulembeza mu nnaku ezaayita.

Naye oyo alikwasibwa ekitabo kye mu mukono gwe ogwa kkono aligamba nti zinsanze singa siwereddwa kitabo kyange.

Era nessimanya kubalibwa kwange.

Waakiri singa bwennafa kyekyamala nessizuukira.

Ebyobugagga byange tebingasizza.

Sikyalina byakuwoza.

Mu kiseera ekyo Katonda agenda kulagira nti mumukwate mumulijje.

Bwemumala mumukasuke mu muliro.

Bwemumala mumuyiseemu olujegere oluwanvu bwalwo obwenkana emikono nsanvu.

Anti yali takkiriza Allah owekitiibwa.

Era nga takubiriza kuliisa banaku.

N'olwekyo olwaleero wano talinawo nfanfe we

Era talina kulunaku olwo kyakulya okujjako amasira.

Ebintu ebitayinza kulibwa okujjako abonoonyi.

Ndayira ebyo byemulaba.

Nebyo byemutalaba

Mazima qur'an bigambo bya Katonda byeyassa ku mubaka (Nabbi Muhammad) ow'ekitiibwa.

Era yo ssi bigambo bya mutontomi. Ngamukkiriza kitono!.

Era sibigambo bya mulaguzi. naye mufumitiriza kitono (nemutasobola ku byawula?!).

Yassibwa okuva ew'omulabirizi w’ebitonde.

Singa yetantala (Muhammad) natwogeza ebigambo byetutaamutuma.

Twalimukutteko n'amanyi.

Oluvanyuma netumukutula omusuwa gw'obulamu.

Era tewali mumwe ayinza kutulemesa kutuukiriza ekyo.

Mazima yyo qur'an kyakwebuulirira eri abatya Katonda.

Era mazima ddala tumanyi nti mu mmwe mulimu abalimbisa (qur'an).

Era mazima okujirimbisa (qur'an) kugenda kubeera kwejjusa kunene eri abawakanyi.

Era mazima yo qur'an ge mazima aga namaddala.

Kale tendereza erinnya lya Mukama omulabirizi wo owekitiibwa.

"Mu ngeri y'okunyomerera" omu kubawakanya Allah" yasaba oba ebibonerezo bijja bijje, so nga ate ddala byakujja.

Bituuke kubawakanya Allah nomubaka we nga tewali agenda kubigaana kubatuukako.

Nga biva eri Allah nnyini madaala agalinya muggulu.

Ba Malayika nga ne Jiburilu mwomutwalidde mwebayita nga bolekera eri Katonda, ekibatwalira olunaku lumu lwokka naye nga ate lwenkanankana emyaka emitwalo etaano (ej'okunsi).

Kale nno gumikiriza olugumikiriza olulunji.

Mazima bbo balaba ebibonerezo nga biri wala.

Ate nga ffe tulaba nga biri kumpi.

Ku lunaku eggulu lwelirikulukuta nga omuzigo omusanuuse.

Ate ensozi neziba nga pamba asunsuddwa.

Era tewali wamukwano agenda kubuuza bikwata ku nga nfe we.

Bajja kulaba nga omwonoonyi olwokwagala okuwona ebibonerezo byolunaku olwo, aliyagala okwenunula nga awaayo abaanabe.

Nemukyalawe ne mugandawe.

N'ekika kye ekimukuuma.

Nabantu bonna abali munsi, nga ekyo akikola awone ebibonerezo bya Allah.

Tekigenda kuba nga bwayagala, mazima ayolekedde omuliro ogubumbujja.

Ogusiriiriza ddala eddiba.

Gugenda kukowoola buli eyakubayo amabega nakyuka okuva ku mazima.

Era nga yakungaanyanga emmali najitereka "natajjaamu mugabo gujitukuza".

Mazima omuntu yatondebwa nga wamulugube.

Nga bwatuukibwako akabi ayitirira okutya.

Ate bwaba afunye akalungi ayitirira obukodo.

Okujjako abo abayimirizaawo esswala.

Abo nga okusaala kwabwe kwalubeerera.

Era abo mu by'obugagga byabwe mulimu omugabo ogumanyiddwa.

Ogw'abasabilizi n'abo abatalina naye nga bessaamu ensa ne batasaba.

Era bebo abakakasa okubeerawo kw'olunaku lw'enkomerero.

Era abo abatya ebibonerezo by'omulezi waabwe.

mazima ebibonerezo by'omulezi wabwe sibyangu byakuwonwa.

Era abo abakuuma obwerere bwabwe.

Okujjako ku bakyala babwe oba abazaana abali mu mikono jabwe, anti bo tebanenyezebwa kwabo.

Omuntu asukka kw'abo, abo nno be babuusi bensalo.

Era abantu abalungi abogeddwako waggulu, bebatuukiriza obwesigwa bwabwe nendagaano zaabwe.

Era abo abeesimbu mu bujulizi bwabwe.

Era abo abasaala esswala zaabwe mu bujjuvu.

Abo nno balibeera mu Jjana nga bagulumizibwa.

Lwaki abatakkiriza Allah bajja joolinga banguwa "so nga ate bakulimbisa".

Nga bali ku mukono gwo ogwa ddyo ne ku mukono ogwa kkono mu bibinja.

Buli omu kubo asuubira okuyingizibwa ejjana eyebyengera.

Nedda sibwekiri, mazima ffe twabakola nga tubajja mwebyo byebamanyi.

Ndayira omutonzi era omulezi nannyini buvanjuba nobugwanjuba, mazima ffe tusobolera ddala.

Mazima ffe tusobola okubawanyisaamu abalunji ababasinga era tetuli ffe baakulemesebwa.

Kale baleke balimbe era bazannye okutuusa lwe balisisinkanyizibwa olunaku lwabwe lwe balaganyisibwa.

Olunaku lwebalifuluma mu ntaana zaabwe nga baduma nga balinga abagenda eri bendera ebatereddwawo.

Nga amaaso gabwe makakkamu, obuswavu nga bubabuutikidde, olwo lwe lunaku lwe balaganyisibwa.

Mazima ffe twatuma Nuhu eri abantu be. Nti tiisa abantubo ebibonerezo abiruma ennyo nga tebinabajjira.

Naabagamba nti abange bantu nange mazima nze ndi mutiisa owolwatu.

Nti musinze Allah era mu mutye nange mungondere.

Olwo nno ajja kubasonyiwa ebyonoono byammwe (bye mwakola nga temunnaba kukkiriza mubaka era alyoke abawonye okuzikirira n'ebibonerezo ebibamalawo olumu). Abalindirize abatuuse ku ntuuko ze yabagerera. Mazima entuuko za Allah bweziba zituuse tezirindirizibwa singa mumanyi.

Awamu nekyo tebakkiriza, Nuhu n'agamba nti ayi omulezi wange nkowodde abantu bange ekiro n'emisana.

Wabula okukowoola kwange tekubongedde okujjako okunnesamba.

Mazima buli lwembadde mbakowoola badde eri okusonyiwa kwo bassa ennwe zaabwe mu matu gaabwe, ne beebikka engoye zaabwe, ne bakalambira era ne beekuluntaza olw'ekuluntaza.

Ate era mazima mbakowodde mulwatu.

Era oluvanyuma njogedde nabo mu lujjudde nga bwenjogedde nabo kinnomu.

Nembagamba nti mwegayirire omulezi wammwe kubanga mazima yye bulijjo musonyiyi.

Olwonno ajja kubatonnyeseza enkuba ey'omuddiringanwa.

Era abawe mu buunji emmaali n'abaana, abawe n'amasamba abateeremu n'emigga.

Naye lwaki Allah temumuwa kitiibwa.

Sso nga yabatonda ngabayisa mumitendera ejenjawulo.

Abaffe temulaba engeri Allah jeyakolamu eggulu omusanvu nga myaliiro.

Nassaamu omwezi nga kitangaala nassamu n'enjuba ng'eyaka.

Allah yabatandika ng'abajja muttaka nemujja nga mukula nga ebimera bwe bikula.

Oluvanyuma abazza mu ttaka nga era bwagenda okubazuukiza alibajjemu bulambalamba (nga temuyise mu mitendera nga ebimera).

Era Allah yabateerawo ensi nga esoboka okuwangalirwako.

Mube nga musobola okutambulira muyo nga mukwata amakubo ge muba mwagadde.

Nuhu kwekugamba nti, ayi mukama wange mazima ddala abantu abo banjemedde nebasalawo okugoberera oyo yenna emmaali ye n'abaana be bebitayongera okujjako okufafaganirwa.

Nebakola ekwe sinziggu (bwebagezaako okutta Nuhu).

Era nebagamba nti temugeza nemuva ku ba Katonda ba mmwe naddala Wadda ne Suwa'a ne Yaguutha ne Yauuqa ne Nasira.

Nabwekityo baabuza abantu banji (Nange -Muhammad okusaasira kubeere kuyye- kyenva nkusaba nti) mukama Katonda abantu abeyisa obubi tobongera okujjako okubula.

Olwobwonoonyi bwabwe baazikiziribwa nebayingizibwa n'amataba era nebayingirizibwa omuliro era tebaafuna abataasa yenna.

Nuhu kwekugamba nti, ayi omulezi wange toleka kunsi yenna atakukkirizza n'omubaka wo

Mazima Dala gwe bw'onabalekawo bajja kubuza abaddu bo era buli gwebanazaala ajja kuba mwononefu omuwakanyi.

Ayi Mukama Katonda omulezi wange nsonyiwa ne bakadde bange na buli yenna anaayingira mu nju yange nga mukkiriza, era nkusaba osonyiwe abakkiriza abasajja n'abakkiriza abakyaala, wabula bo abeeyisa obubi tobongera okujjako okuzikirira.

Bagambe ggwe Nabbi Muhammad nti nafuna obubaka nga waliwo amajinni agamu agaawuliriza nga nsoma qur'an negagamba nti mazima qur'an tujiwulidde nga yewuunyisa.

Elungamya oyo ajiwuliriza okudda eri obulungamu era naffe tujikkirizza, era tetugenda kuddayo kugatta kumulezi wadde kintu kirala.

Era mazima ekitiibwa kya Mukama Katonda omulezi waffe kisukkulumu, tayinza kuba nti yeteerawo omukyala wadde omwana.

Era mazima ddala ababuyabuya muffe baayogera nga ku Allah ebigambo ebitemerera.

Era mazima ddala ffe twalowoozanga nti abantu na majjini baali tebayinza kwogera ku Allah byabulimba.

Era mazima Waliwo abantu abamu abaasabanga obuyambi okuva eri amajinni ekyagongera okuwaganyala.

Era mazima ddala amajinni gaalowooza nga bwemwalowooza nti Katonda talizuukiza muntu yenna.

Era mazima ffe tubadde tugezaako okugenda ku ggulu netulisanga nga lijjudde abakuumi abakambwe nebitawuliro.

Era mazima ffe waliwo enfo zetwatulangamu netuwuliriza ebifaayo, naye kati agezaako okuwuliriza asanga ebitawuliro nga bimuteeze.

Wabula tetumanyi mu kukola ekyo kwali kulumya bitonde ebiri ku nsi oba Mukama Katonda omulezi wabyo yabyagaliza bulungamu.

Mazima nemuffe mulimu abalongoofu n'abatali era tuli ebibiina ebyenjawulo.

Era ffe tuli bakakafu nti tetuyinza kulemesa Allah kunsi era nga bwetutayinza kumulemesa ne tumuddukako.

Era mazima ddala bwe twawulira obulungamu twabukkiriza, era oyo yenna akkiriza Mukama Katonda omulezi we tayinza kutya butasasulwa oba okunyigirizibwa.

Mazima ddala muffe mulimu abasiramu nga bwemulimu abaabula. Oyo yenna asiramuka, abonno bebaba banoonya amazima mu bwegendereza.

Wabula bo abaabula bebagenda okubeera enku z'omuliro Jahannama.

Naye singa abantu banywerera ku kkubo ettuufu twalibawadde enkuba mu bunji.

Tulyoke tubageseze ngeri ki jebebazaamu ebyengera, oyo yenna eyeesamba ebigambo bya Katonda omulezi we agenda kumubonereza n'ebibonerezo ebikambwe.

Mazima ddala emizikiti jakusinzizamu Allah yekka, kale nno temugatta ku Katonda ekintu kyonna.

Era mazima ddala omuddu wa Allah (Nabbi Muhammad) bweyayimirira nga asaala amajinni gaasembera negamwetoloola kumpi kumwetuumako nga gali mu bibinja.

Bagambe (Gwe Nabbi Muhammad) nti mazima nze nsinza era nkowoola mulezi wange ate si mugattako kintu kirala kyonna.

bagambe nti tekiri mu mikono jange okubajjirawo obuzibu obuba bubatuuseeko nga bwe kitali mu busobozi bwange okubafunira obulungamu.

Era bagambe nti mazima nze tewali muntu yenna ayinza kumponya bibonerezo bya Allah singa mba mujeemedde. Era sisobola kufuna buddukiro watali wawe.

Nekiba nga ekisigadde kubatuusako bubaka obuva eri Allah, naye abo bonna abajeemera Allah n'omubakawe baakuyingira omuliro Jahannama, era nga b'akugubeeramu olubeerera.

Okutuusizza ddala bwe balibanga balabye ebyo ebyabalagaanyisibwa olwo nno lwe bajja okukakasa nti ani alina omutaasa omunafu nejje ettono.

Bagambe ggwe Nabbi Muhammad nti mazima nze simanyi oba ebibonerezo byemulaganyisibwa biri kumpi oba byakujja oluvanyuma lwebbanga eggwanvu.

Ye yekka, Katonda yaamanyi ebitamanyiddwa ng'ate talina yenna gwabikkulira byaamabye.

Okujjako oyo gwaba alonze okubeera omubaka (kale nno oyo amubikkulira ebimu ku byamabye) era amuteerawo obukuumi bwa Malayika nga bamwetolodde, Sitani obutasobola kumutuukako.

Nabbi alyoke amanye nti mazima ba Nabbi baatuukiriza obubaka bwa Katonda omulezi waabwe (nga naye bwa butuukiriza) era bamanye nti amanyi ebyo byonna bye bakola ng'era bwamanyi buli kintu kyonna.

Owange ggwe eyeebikkirira (olwokutya okwakutuukako bwewafuna obubaka okuva ku Malayika Jiburilu omulundi ogwasoka).

Yimilira ekilo osaale mpozzi lekayo akaseera katono.

Oyinza okusaala ekitundu kye kiro oba okukendezaako katono.

Oba oyinza okwongerako era soma qur'an olusoma.

Mazima ffe tujja kukutikka ekigambo ekizito.

Mazima dala eswala enzuukukire y'esinga okubuulirira omuntu (olw'okwerekereza otulo) era nga nebisomerwamu byebisinga okusomwa munsoma ennambulukufu.

Mazima olina mubiseela byemisana ebyokukola binji tebiyinza okulemesa okusoma qur'an.

Era tendereza erinnya lya Mukama Katonda omuleziwo, e kiseera kyonna.

Omulezi era nannyini buvanjuba n'obugwanjuba tewali kirala kyonna kisaanye kusinzibwa okujjako yye, kale nno gwoba wesigamako.

Era ogumikirize kw'ebyo bye boogera era obaveeko mu ngeri enungi.

Era ndekera abalimbisa, abagagga fugge, era obalindirize akaseera katono.

Mazima tulina empingu n'omuliro Jahiim.

N'ebyokulya ebitamirika n'ebibonerezo ebiruma.

Olunaku ensi n'ensozi lwebirinyeenya era ensozi ne zifuuka entuumo z'omusenyu ogufuumuka.

mazima ffe twabatumira omubaka nga yajja okubawaako obujulizi okufaananako nga bwe twatumira Farawo omubaka.

Wabula Faraawo yajeemera omubaka, kyetwava tumukwata olukwata olwamanyi.

Kakati bwe mujeema muliwona mutya olunaku olulifuula abaana abato abakadde.

Ate nga eggulu ligenda kuyulikamu olwebiribaawo ku lunaku olwo, nga ate Katonda kyalagaanyisa kiteekwa okutuukirira.

(Bwekiba nga bwekityo bwekiri), mazima ddala qur'an mujitwale nga kyakwebuulirira. N'olwekyo ayagala okuwona ateekeddwa okukwata ekkubo erimuzza eri Katonda omulezi we.

Mazima Katonda wo akimanyi nti oyimirira ekiro ng'osaala emirundi egimu kumpi bibiri byakusatu byekiro, oluusi kimu kyakubiri nga n'olumu kimu kyakusatu era nga naabamu ku bakkiriza abali naawe bwebatyo bwe bakola nga ate Katonda yaawa ebiragiro ebikola ekiro n'emisana, era nga amanyi nti temuyinza kumalayo kiro kyonna nga mukola ngamusiinza kye yava abawa ekisonyiwo, kale nno musome kyemuba musobodde mu qur'an nga musaala ekiro anti amanyi nti mu mmwe mulimu abalwadde nga n'abalala bagenda kubeera mu safari nga batambudde mu nsi olwokunoonya ebigabilirwa bya Allah nga nabandi bagenda kubeera mu ntabaalo z'okuweereza mu kkubo lya Katonda n'olwekyo musome ekyo kye muba musobodde mu qur'an nga musaala esswala ya tahajjudi(eyomuttumbi) era muyimirizeewo esswala eza faradha (ezetteeka) mutoole ne zzaka mu ngeri y'emu muwole Katonda oluwola olulunji nga muwaayo saddaaka. Akalungi konna kemweterekera nemukawaayo kulwa Allah mugenda ku kasanga mu maaso ge. Okukola ekyo kirunji era kyekirimu empeera ennene era musabe Katonda ekisonyiwo mazima yye musonyiyi oweekisa.

Owange ggwe eyeebikiridde (olwokutya Malayika Jiburilu lwe yakuleetera obubaka okuva eri Katonda).

Golokoka otiise abantu ebibonerezo bya Katonda.

Ne Mukama Katondawo yekka gwoba ogulumiza.

N'engoyezo zitukuze.

Amasanamu geewalire ddala.

Tokoleranga abantu obulungi ng'ogenderera kufunamu kuno kunsi.

Beeranga mugumikiriza osobole okufuna okusiima kw'omuleziwo.

Engombe bwerifuuyibwa (kulunaku lwokuzuukira).

Olunaku olwo lugenda kuba lunaku luzito.

Terugenda kuba lwangu eri abatakkiriza Allah n'ababaka be.

Owange ggwe Nabbi Muhammad ndeka nooyo gwe nnetondera.

Nemuwa ebyobugagga ebiyitirivu.

Nemuwa nabaana abatutumufu.

Ne mugaziyiriza olugaziya (ebyenfuna obukulembeze n'ekitiibwa).

Oluvanyuma alulunkanira okumwongera okusingako awo.

Nedda sijja kumwongera kuba yawakanya ebigambo byaffe (qur'an).

Nja kumussaako ebibonerezo ebizito.

Anti mazima yye (Al Walid bin Mugiira) yalowooza era naasalawo okuvvoola qur'an.

Nakolimirwa okusinziira ku ngeri jeyasalawo.

Oluvanyuma era yakolimirwa ku ngeri jeyasalawo.

Oluvanyuma yakirowozaako.

Olwo nno ne yeekaba najja emitaafu.

Ne kyaddirira ebituufu yabivaako neyekuluntaza.

Olwo nno n'alangirira nti ebigambo Muhammad byazze nabyo temuli wabula ddogo erijjibwa ku balogo abasooka.

Era byayogera tebisukka kuba bigambo bya muntu!

(Katonda naagamba nti:) nja kumuyingiza omuliro Saqar.

Naye omanyi Saqar kyeki.

Gwo muliro ogutagenda kulekawo kintu wadde okukitaliza.

Gwokera ddala negusiriiza eddiba lyomuntu.

Gukuumibwa ba Malayika kkumi na mwenda.

Ate omulimu gwokukuuma omuliro tetwaguwa okujjako ba Malayika, era omuwendo gwabwe tetwaguteekawo okujjako nga kikemo eri abatakkiriza Katonda, so nga abo abaweebwa ekitabo ekyo kibongera kukakasa (ebyo bye balina), ate bo abakkiriza (abagoberezi ba Nabbi Muhammad) kyongera kunyweza bukkiriza bwabwe, era ab'aweebwa ekitabo n'abakkiriza babe nga tebasigalamu kakunkuna, wabula nga (abanafunsi) abalina obulwadde mu mitima jabwe n'abatakkiriza bagamba nti Katonda kiki kyagenderera mu kifananyi kino, bwatyo nno Katonda abuza nalungamya oyo gwaba ayagadde, ate tewali amanyi jje lya Mukama Katondawo okujjako yye, ebyo byonna ebyogeddwa tewali kibigendererwamu okujjako okubuulirira omuntu.

Nedda (tekiri ng'abantu abamu bwe balowooza), mazima ndayidde omwezi.

Ne ndayira n'ekiro mu kiseera we kiggwerako.

Ne ndayira n'amakya ngabusasaana.

Mazima ggwo (omuliro Saqar) kye kimu ku binene.

Ebyandibadde bibuulirira omuntu.

Eri oyo aba ayagadde mu mmwe okudda eri Katondawe oba okumwesamba.

Buli muntu agenda kubeera musingo gwa mirimuje.

Okujjako abo abalibeera ku mukono ogwaddyo.

Bagenda kubeera mu jjana nga babuuza.

Ku bonoonyi.

Nga babagamba nti ki ekibayingizza omuliro saqar.

Baligamba nti tetwalinga mu basaaze.

Era tetwaliisanga banaku.

Twabeeranga nabakubi bambekuulo.

Era twali tulimbisa olunaku lw'enkomerero.

Okutuusa okufa lw'ekwatutuukako.

Kale tebagenda kuganyulwa mu kuwolereza kwa bawolereza.

Kakano kiki ekibaddusa okuva ku kubuulirira kwa (qur'an kuno).

Nga balinga entulege ezigobeddwa.

Ezidduka empologoma.

Wabula buli omu mubo ayagala aweebwe ebiwandiiko ebibikuddwa.

Nedda ekituufu kiri nti bbo tebakkiriza nkomerero.

Mazima ddala yo (qur'an) kyakubuulirira.

Oyo aba ayagadde yeebulirira nayo.

Wabula tebayinza kwebuulirira okujjako nga Allah ayagadde, kuba yye ye nanyini kutiibwa era ye nanyini kusonyiwa.

Tewali kingaana kulayira lunaku lwakuzuukira.

Era nga bwewatali kingaana kulayira omwoyo ogwejjusa.

Abaffe omuntu alowooza nti tetugenda kusobola kuzzaawo magumbage.

Nedda tukisobolera ddala nga bwetulisobola okuzzaawo ennwe zaabwe.

Wabula omuntu emirundi egisinga ayagala nnyo okuwangaalira mu kwonoona.

Ngabuuza (mu ngeri ey'okujerega n'okuwakanya) nti olunaku lwokuzuukira lulibaawo ddi.

Ddala lugenga kubaawo nga n'amaaso g'abantu galiralambala olwokutya.

Ekitangala kyomwezi kigenda kuggwawo.

Enjuba n'omwezi birigattibwa (nga tewakyasobola kubaawo kiro namisana).

Ku lunaku olwo omuntu agenda kugamba nti nzirukirewa!.

Kyekyo ddala, tewagenda kubaawo muntu weyekweka.

Obuddo ku lunaku olwo bujja kuba eri mulezi wo.

Ku lunaku olwo omuntu agenda kutegeezebwa ebyo byonna byeyakulembeza nebyeyasembyaayo.

Wabula ate ddala omuntu ye yennyini amanyi bye yakola ne byataakola (newakubadde nga aligezaako okwogera kino nakiri ngayeetonda).

Newakubadde nga aligezaako okwogera kino nakiri ngayetonda.

Bwoba osoma qur'an toyanguyiriza nga olowooza nti kyekinakuyamba okujinyweeza.

Anti okujikungaanya kuli kuffe nga era bwekiri kuffe okujinywereza ku lulimi lwo ngojisoma.

Kale nno bwetumala okujikusomera (nga tujiyisa ku Jiburilu) goberera ensoma yaayo.

Oluvanyuma mazima dala okujinnyonnyola kuli kuffe.

(Ebyo ebyogeddwa waggulu bimala omuntu okwebuulirira nabyo) wabula ebyembi mwe mwagala ebyokufuna byensi ebyamangu.

Nemuleka ebyolunaku lw’enkomerero.

Ebyenyi bya bantu abamu ku lunaku olwo bigenda kuba nga bitemagana.

Bigenda kutunula kumulezi waabyo.

Ate nga ebyenyi bya bantu abalala bigenda kuba binyikaavu.

Nga bimanyidde ddala nti bigenda kutuukibwako akabi akanene akamenya nenkizi.

Naye omwoyo bwegutuuka mu ddokooli (mukiseera kyokufa).

Abantu webagambira nti ani alina eddagala eriyinza okumuwonya.

Wabula yye ngamaze okukakasa nti agenda kufa.

Entumbwe ne yeegatta ku ntumbwe.

Eri omulezi wo nga jaali mukutwalibwa akaseera ako.

Naye nga omufu teyasaddaaka wadde okusaala.

Wabula yalimbisa ebigambo bya Allah nabyesamba.

Olwo nno naatambula nadda eri abantu be nga yeeraga.

(Aligambibwa nti ekyo) ekikutuuseeko kikugwanidde era ddala kikugwanidde (owange ggwe omwonoonyi).

Ate era kikugwanidde ng'ate era ddala kikugwanidde.

Omuntu alowooza nti ayinza okulekwa neyeeyisa nga bwayagala.

Tajjukira nti yasooka kuba tondo lyamazzi agazaala agateekebwa mu nabaana.

Oluvanyuma naafuuka ekisayisayi, olwo Katonda naamutonda namussaako byonna ebimufuula omuntu.

Natuula okutonda okwo kwamitendera ebiri, omusajja n'omukazi.

Abaffe oyo eyakola omuntu mu ngeri eyo tasobola kulamusa bafu?!.

Omuntu tajjukira nti waayitawo ekiseera kinene nga tayogerwako (nga tannatondebwa).

Mazima ffe twatonda omuntu nga ava mu kwetabula kwamazzi (ag'omusajja n'omukazi) ngatumugezesebwa mu bulamu bwe. Kyetwava tumuwa okuwulira n'okulaba.

Mazima ddala twamulaga ekkubo, kiri jali yeebaze asiinze Katonda omu oba ajeeme awakanye.

Mazima ddala abatakkiriza Allah n'ababaka be twabategekera enjegere n'amakoligo n'omuliro ogutuntumuka.

Mazima abakozi bobulungi bagenda kunywa ekyokunywa nga kitabuddwa mu kaafuura.

Olwo nno luliba luzzi abaddu b'a Katonda abeeyisa obulunji kwebagendanga okunywa, lugenda kukulukuta nga buli muntu lumutuukako waali.

(Bagenda kutuuka kwebyo kubanga) kuno kunsi baatuukiriza nga naziri zaabwe (okweyama), era nga batya olunaku olwo obuzibu bwalwo obugenda okubuutikira ensi n'eggulu.

Era baliisa abanaku ne bamulekwa nabasibe emmere awamu n'okuba nti bo bennyini bajetaaga.

Nga bagamba nti mazima tubaliisa lwa Allah tetubaagalamu mpeera wadde okwebaza.

(Ekitukozesa bino lwakuba nti) mazima ddala ffe tutya engeri jetulisisinkanamu omulezi waffe ku lunaku ebyenyi (bya bantu) lwe birijjula emitaafu nga byekabye.

N'olwekyo nno Allah wakubawonya obuzibu bw'olunaku olwo era abawe okutangalijja kwe byenyi awamu n'essanyu.

Era wakubasasula olwobugumikiriza, nga abayingiza e jjana omuli ebyambalo bya Siliki (awamu nokuba nti kunsi abasajja baaziyizibwa okumwambala).

Balituula mu ntebe ez'omuwendo nga besigamye, tebagenda kutukwako kwokya kwanjuba wadde obutiti.

Era nga mulimu emiti ejiribakolera ebisiikirize, era nga nebibala byamu bigenda kuba byangu byakunoga.

Baligabulirwa ku sowane eza feeza era bakunywera ku jiraasi ezitemagana.

Ziritemegana anti ziriba zaakolebwa mu feeza, ziriba zimala bumazi okubeeramu ekyokunywa ekimalawo obwetaavu bwoyo anywa.

Era bagenda kuweebwa eby'okunywa ebiri mu jiraasi nga bitabuddwamu entangawuzi.

Eyo nno egenda kuba nsulo mu jjana eyitibwa "Salsabiila".

Bagenda kuweerezebwanga abaweereza abolubeerera, nga bwobatunulako bwoti olaba lu'ulu'u asasanyiziddwa.

Buli wonotunulanga mu jjana ng'olaba ebyengera ebisuffu n'obwanannyini obutaliiko komo.

Baliba bambadde engoye eza Siliki omuweweevu owakiragala ne Siliki omuzito, era bagenda kuba bawundiddwa nebikomo ebya feeza, era omulezi waabwe agenda kubawa ebyokunywa ebitukuvu.

Baligambwa nti Mazima ebyo byonna yempeera yammwe, era okutegana kwa mwe kusiimiddwa.

Mazima ffe twakussaako qur'an okussa owange gwe Nabbi Muhammad.

Kale nno beera mugumikiriza ku kugera kw'omulezi wo, togezaako okugondera omwonoonyi oba omuwakanyi yenna.

Era yogeranga kulinnya lya ly'omulezi wo kumakya n'olweggulo.

Ne mukiro muvunamire ng'osaala era omutendereze mu ttumbi ebbanga gwanvu.

Mazima abatakkiriza basinga kwagala biruji byansi ebyamangu, ne basuulayo gwannaggamba ku bikwata ku lunaku lw'enkomerero oluzito.

Ffe twabatonda ne tugumya ebiyungo byabwe, era nga bwetuba twagadde tuyinza okubazikiriza ne tuleeta abantu abalala.

Mazima obubaka bwa qur'an buno kya kwebulirira era nga kyakujjukiza, n'olwekyo aba ayagadde asanye y'eteerewo ekkubo erimutuusa eri omulezi we.

Era temusobola kwagala ekintu kyonna okujjako nga Allah ayagadde, mazima Allah lubeerera amanyi, assa buli kintu mussa lyakyo.

Ayingiza oyo gwaba ayagadde mu kusaasirakwe, ate bbo abalyazamanyi yabategekera ebibonerezo ebiruma.