Magindanao Meal — Rowad Tercüme Merkezi — İsra' 17:1 – Neml 27:93

Mahasuti su napalakaw (Allah) kanu ulipen nin (Muhammad) sa magabi, ganat sa Masjidil Haram taman lu sa Masjidil Aqsa a pinambarakat nami su embala-bala lun, ka ipabpagilay nami sa lekanin (Muhammad) su manga tanda nami, saben-sabenal sekanin a Allah i pakakineg a pakailay.

Endu inenggay nami kani Musa su kitab endu binaluy nami a tutulu kanu tupu nu Israel sa da kanu mamaluli sa salakaw sa Allah i saligan nu.

Mawli a taw nu a pinapapageda kanu Nuh, ka sekanin na ulipen nu Allah a barasukur.

Endu pinakatawan nami bun kanu manga tupu nu Israel kanu kitab a Taurat i maminasa kanu sya sa lupa sa makaduwa, endu ebpapulu kanu sa masla a kabpapulu.

Na amayka mawma den su isa kanu duwa, na pambuwaten nami sa lekanu i ulipen nami a mapasang endu mabagel i kambunuwa nin, na dalidipenin su langun u pamageletan u dalpa, endu pasad into a di ebplis na manggula.

Mawli na imbalingan nami sa lekanu su kapeges kanilan, endu pagkadakelen nami sa lekanu su manga tamuk endu manga wata, endu binaluy nami sekanu i madakel i bilanganin nin.

(Edtalu ka) amayka ebpiya-piya kanu na ginawa nu bun i migkapiya, endu amayka migkawag kanu (mindupang) na ginawa nu bun (i masiksa), na amayka nawma su pasad (kaduwa a kandupang) na egkenem su manga biyas nu sa lidu na ginawa, endu ludepan nilan su Masjidil Aqsa sa mana bun su nawna a kinaludep nilan, endu maminasa sa sangat a kapaminasa.

(Inipayag u Allah kanu Taurat) sa basi ikalimu kanu bun u Kadenan nu, endu amayka edsaluman kanu na edsalumanan nami bun sekanu, endu binaluy nami su jahannam kanu manga kafir i ikam nilan.

Saben-sabenal su Qur’an na pedtutulu sa lalan a pinakamatidtu, endu papegkalilini kanu manga mu'min, a silan i penggalebek sa manga mapya, na benal a kanilan su balas a mapya a masla.

Endu saben-sabenal su di bangimbenal sa gay a mawli na pidtatalenganan nami sa kanilan su siksa a mapasang.

Endu in-du’a nu taw sa mawag (su galipungetanin) sa mana bun su kapamagayasin sa kand’ua nin sa kanu makapiya kanu ginawa nin, su manusya na masasaw (di matigkel a bukasu).

Endu binaluy nami su magabi endu malamag a duwa a tanda (a kapegkagaga) na pinunas nami su sigay nu magabi (sa ulan-ulan) endu binaluy nami su sigay nu malamag sa pakapailay, ka endu mapangilay su limu nu Allah ebpun sa Kadenan nu, endu katawan su bilangan nu manga lagun endu su bilangan u manga ulan-ulan (manga gay) endu langun u enggaga- isa na inipayag nami san sa (Qur’an) sa mapayag.

Endu uman i manusya na nambalig nin su kitab (sinulatan) kanu galebekin kanu tengu nin, sa palyun nami sa lekanin (bukatan sa kasangulan nin) sa mabaratemu nin sa mapayag.

(Edtalun sa lekanin): batya ka i kitab nengka sa natabuwan, saguna a gay sa igkila-kila sa leka.

Su tinumuntul sa (Islam) na ginawa nin bun i nakatuntul, su midtadingan na ya nin bun tinading su ginawa nin, endu di mandusa na isa i dusa na ped in, endu di kami sumiksa endu mapa-surga taman a di kami pan makapambuwat sa sinugu.

Endu amayka egkahandan nami i binasan nami i dalpa na pagkadakelen nami su mapya i katamanan nin, ka lumyu silan sa inugut (semupak) na wagib bu lawa su siksa kanilan nabinasa bu lawa silan.

Endu di bu pila-pila i bininasa nami kanu nangawna (a manga taw) sa ulyan ni Nuh, endu su Kadenan nengka i pedtyakap kanu manga kadusan nu manga ulipenin, a mataw (su Allah) a pakailay.

Su myug sa limu sa sagugunay na enggaganan nami (menggay) sa kanu kalilinyan in sa endaw bu i kyug ami kanu pegkyugan nami bu menem, mawli na binaluy nami sa lekanin su jahannam a kaludepan nin a mawag gayd sa nakatangka sa limu nu Allah.

Su ya nin menem kyugan su akhirat endu pinamikalanin sa galebek (a mapya) na sekanin na mu'min, na silan i manga taw a langun a galebekanin na pidsukuran.

Uman isa kanu duwa (mu'min-kafir) na pembagelen nami kanu rizki nin a ebpun sa Kadenan nengka, ka dala kanu rizki nu Kadenan nengka i ma-haram kanu pedsupak.

Ilay ka (Muhammad) u panun i kinapandadalabya nami kanu sabad kanu ped in (sya sa dunya) endu lu sa akhirat i masla a pangkatan (pahala), endu masla a kandadalabya (di kena mana bu sya sa dunya).

Da ka mumbal sa isa a kadenan a lyu sa Allah, ka maka-ayan ka sa kalusak i mabpalas nengka.

Endu inibpalyugat u Kadenan nengka i da kanu sumimba ya tabiya na su Allah, endu kabpiyapiya sa duwa-mimbata, na amayka masawt na katuwa silan duwa na san sa leka atawa sakataw kanilan na di ka bu mangagkag silan endu di ka silan edtegasi, endu ya ka edtalu (kambityala) kanilan na kadtalu a mananaw.

Endu imbaba nengka kanilan su ula-ula (su palangay) sabap kanu limu, endu edtalu ka: Kadenan ku, ikalimu nengka silan sa mana su kinakalimu nilan sa laki (kinatyakap nilan) sa manawt aku pan.

Su Kadenan nu i mataw sa kanu dalem nu ginawa nu, amayka sekanu ka manga mapya kanu (edtidtu kanu) na sekanin a Allah na bangampun kanu manga taw a baratawbat.

Endu inggay nengka kanu manga pagali nengka su kawagibin, endu su miskinan, endu su natanaw (di pakawli sa dalpa) na da ka (menem) magudal (mapalyu sa tamok a supak sa Islam).

Saben-sabenal na su taw a magudal na manga pagali nu manga Shaytan, na su Shaytan na supak sa Kadenan nin (di makatadem sa limu).

Endu amayka di nengka ka-enggan silan (a manga pagali) kanu limu ebpun kanu Kadenan engka na pagangapa ka, sa edtalu ka kanilan i su kadtalu a mapya.

Endu di ka kemegkem su lima nengka sa ibetad nengka sa tengu nengka (sabap sa kasingit) endu di ka menem pembelat sa dala den masama lun, ka maka-ayan ka (makagkaya ka) sa tilan ka na taw sa pangimbulatan ka.

Saben-sabenal su Kadenan nengka na belatenin i rizki nin kanu kagkahanda nin endu simpitanin, ka sekanin a Allah kanu manga ulipenin na katawanin na gailay nin.

Endu di nu pembunu su manga wata nu sa gilek sa kamiskin ka sekami i pe-rizki kanilan endu sekanu, su kabununu kanilan na kadusan a masla (sa Allah).

Endu di nu semikeni su kadzina (di enggulan su ukit a makadzina) ka su (kadzina) na sangat a maledsik, endu mawag a benal a ukit (a kadtiwalay).

Endu di nu pembunu su ngyawa a hinaram nu Allah ya tabiya na haqq, (su pinamakay na Islam a kabunu) ka su taw a binunu sa dinupang (pidtibaban sa dala kawagibin) na binaluy nami kanu wali nin (lukesin-pagalinin) i bagel sa kakwa (katuntut in) sa kawagib, na di nin pasagaden i galebekin (di padsublan su kasuli) ka sekanin na nanget i pedtabangan nu Allah.

Endu di nu semupegi su tamuk nu yateem (binasan atawa kwan sa di kena kawagib) ya tabiya na muna pan i kapiya nin (sa pagkadakelen) taman sa makasampay sa balig, endu tuman nu i pasadu a mapya, kagina su pasad na ibagidsa (salta na siksa amayka di matuman).

Endu patidtu nu i kapagasadu amayka nagasad kanu, endu edtimbang kanu sa bantang a matidtu, ka entu ba i mapya, endu mapya i mawli nin.

Da ka bagamung sa dala leka lun ataw na (dala sabut engka lun) ka su tangila endu su mata na langun a namba na pangingidsan (salta sa naraka).

Endu da ka belakaw kanu lupa sa kasandagan ka seka na di nengka malesu su lupa sa kadsangkad, endu di nengka kalepengan su palaw sa kapulu.

Langun a entuba a nalabit na mawag a benal lu sa Kadenan nengka a inisapalin a nabensiyan nin.

Langun a entu na kaped kanu ini-wahi nu Kadenan nengka sa leka a kadtalu a nanga-atul endu da ka mamaluli salta sa Allah a isa a kadenan ka makasumek ka lu sa naraka a masla i tila nin sa nakatangka sa limu nu Allah.

Ngintu ya bu tinantu nu Kadenan nu sa lekanu (a makagkapiya) na su manga wata a manga mama, endu kanu Allah menem i manga malaikat a babay? Sekanu a manga kafir na saben-sabenal a namba a kadtalu na masla gayd (lu sa Allah i kasiksan nin).

Endu saben-sabenal a pidtinatad nami san sa Qur’an banan su manga ibaratan (upaman) ka endu kanu (su di bangimbenal) ma-indaw, na dala pakauman kanilan (a inugut) a di kena (nalunsanan) i kinatangka nilan (kanu Qur’an).

Edtalu ka (Muhammad): u mana bu ka duwa kataw i Kadenan sa mana su kadtalu nilan na magagawa silan sa Arsh, endu sapalan na isa i kapedin.

Mahasuti su Allah kanu langun u pedtalu nilan, lepas sekanin, mapulu su Allah sa kapulwa kasla.

Pedtasbih sa lekanin (Allah) su manga langit endu lupa endu su dalemin, endu dala kanu enggaga-isa a di kena pedtasbih sa pugi sa Kadenan nilan, ugayd na di nu kasabutan i tasbih nilan, su Allah na matigkel a bangampun.

Endu amayka binatya nengka su Qur’an, na binaluy nami kanu pageletan nengka sa kanu manga taw a di bangimbenal sa gay a mawli i pagelet a pakadalinding sa leka sa di ka nilan mailay.

Endu binaluy nami i dapeng kanu manga atay nilan a di nilan kasabut lun, endu sya sa tangila nilan su kabisu, endu amayka linabit nenka su Kadenan nengka san sa Qur’an sa isa nin bu (di malabit i barahala nilan) na tumaligkud silan endu mawa silan. (di silan tumalima).

(Tig nu Allah): Sekami na katawan nami su bakikinegen nilan amayka bakikineg silan sa leka (Muhammad), endu silan na bamagedunga silan sa ya nilan pedtalun (manga kafir): dala sa bagunutan nu banan tabiya na mama a nasugat a pakayd.

Ilay ka (Muhammad) i kapamelagid nilan sa leka sa embalang-balangan a upaman, na natading silan, di nilan magaga i makatuntul silan sa sa lalan (a bantang)

Endu ya nilan kadtalu na u nagubal su tulan tanu (naldak) na libubuk su badan tanu, na ditanu den makambwat sa mabagu tanu pamun.

Edtalu ka (Muhammad) apiya watu kanu pan atawa putaw kanu (makambwat kanu).

Atawa muna pan sa putaw a masla den sa ginawa nu, na ya nilan den edtalun: kanu i kawma na namba (Muhammad) endu entayn i mapambalingan sa lekami? Edtalu ka: su minaluy sa lekanu paganay, na iteku nilan sa leka su ulu nilan sa ungat (bagungat) bu, endu edtalun nilan: kanu i namba? Edtalu ka kanilan: basi masupeg (mangagan) di kena den mawatan i kawma nin.

Gay a katawag sa lekanu na makasumpat kanu sa pugi sa Allah, endu ma-antap i paydu bu ged i kinadtangen nu sa kubur (ataw sya sa dunya).

Edtalu ka kanu manga ulipen ku i ya nilan edtalun na mapya, ka saben-sabenal su Shaytan na pembinasa kanu pamageletan nilan, ka su Shaytan na satru (kuntra) nu manusya a mapayag.

Su Kadenan nu i mataw sa lekanu sa yanin kyug i ikalimu kanu nin atawa siksan kanu nin, endu di kena ya nami kinasugu sa leka sa kanilan i pedtyakap ka.

Endu su Kadenan nengka i mataw kanu dalem nu manga langit endu su lupa, endu saben- sabenal a pinandadalabya nami su ped kanu manga nabi kanu kaped lun, endu inenggay nami kanu Daud su Zabur.

Edtalu ka (Muhammad) i tawagen nilan su pedsimban nilan a salakaw sa Allah, na di nin kamilikan sa makapa-awa nin su pakagkayd sa lekanu, endu di nin magaga mapasibay su pakagkayd sa lekanu.

Silan a manga taw a pedsimba (sa barahala) na pedtuntut sa Kadenan nilan sa titayan a makasupeg silan (Allah) endu baginagkay silan sa limu nu Kadenan nin, endu kagilekan sa siksa nin, ka benal su siksa nu Kadenan nengka na ingatan.

Endu da dalpa a di kena sekami bun i pembinasa lun sa unan a (di pan gauma) i gay a mawli, atawa sekami bun i sumiksa kanu taw nin sa siksa a mapasang, langun a entuba na lu sa Lawh Al-Mahfudh nakasulat.

Endu da nakasapal sa lekami sa papaytan nami silan sa siksa, ya tabiya na kinapandalbut u nangawna kanilan, endu inenggay nami kanu (taw) nu Thamud su unta a babay a kailay sa mapayag na pindupangan nilan (sinumbali), endu da kapedsugu nami kanu manga siksa kanu dupang, ya tabiya na ipapegkagilek.

Endu pidtalu nami sa leka: su Kadenan nengka na langkap kanu manga taw, endu dala nami baluya su gangailay a inipailay nami sa leka (kanu mi'raj) ya tabiya na fitnah (ipembatalu) kanu manga taw, endu su kayu a namulkan san sa Qur’an (zaqqum), endu papegkagilekan nami silan, na dala nakawman kanilan (kapaginugut) ya tabiya na kinandupang a masla.

Endu labit ka kanilan su kinadtalu nami kanu malaikat sa sugyudi nu si Adam, na sinumugyud silan ya tabiya na si Iblis, ka ya nin pidtalu: enduken ka paka-sugyud aku sa yanin asal na lupa?

Tig nu Iblis: ipailay nengka sa laki Kadenan ku i namba pinakapulu nengka anan sa laki ka amayka pakalendun nengka i umur ku taman sa gay a mawli na tadingeng ku i manga mawli a taw nin, ya tabiya na paydu bu kanilan (i di ku matading).

(Tig nu Allah): lu ka den ka entayn i munut sa leka na saben-sabenal su naraka jahannam i balas nu a balas a dala kulangin.

Endu enggat ka i magaga nengka kanilan kanu suwara nengka (manga sengal/music, langun a supak sa Allah), endu tawag ka silan kanu (tantara) a pakukuda nengka endu su pelalakaw (a pembunu kanu manga mu'min) endu amungi ka silan kanu manga tamuk ilan (pantiyali a haram) endu su manga wata nilan (ka bagusal kanu babay sa haram) endu pagakali ka den silan, ka da kapadulatan nu Shaytan ya tabiya na su sya bu i atay nin sa dunya.

(Tig nu Allah): saben-sabenal su ulipen ku na da lalan nengka kanilan (Shaytan) a mabagel sa katading nengka kanilan, Ka su kadenan nengka i pedtuldu kanilan.

Su Kadenan nu i pabpagiseg sa lekanu kanu bageda nu sya sa lagat ka mapangilay nu su limu nin, ka sekanin a Allah na malimu gayd sa lekanu.

Endu amayka kagilekan kanu sa kakagem sya sa lagat, na natading su pedsimban nu ya tabiya na su Allah, guna kanu nin belepasa (kanu kapegkageled) ini-lu kanu sa kapuluwan, na sinemakutu kanu menem, endu ya ka-aden nu manusya na madakel i kakafirin.

Pakagedam kanu sa kalilintad sa da kanu makageled sa lagat, na da kanu malepas sya tampal sa kapuluwan (lupa), atawa ka masugat kanu na sambel (sa apiya da kanu bun makageled sa lagat), mawli na dala bun maparuli nu a tumuldu sa lekanu a salakaw sa Allah.

Atawa da kanu bun malepas u pambalinganen kanu nin sa makaisa, na patibpuan kanu nin sa sambel a mabagel sa ibayug kanu nin sa pageleden kanu nin kanu kapegkafir nu, mawli na dala mapaluli nu a makasapal sa lekami (manga taw a semuli sa lekami).

Endu saben-sabenal a inipulu nami su tupu nu Adam, pinapageda nami silan sa kapuluwan endu lagat, endu rinizkiyan nami silan sa manga mapya, endu inilabi nami silan kanu madakel a binaluy nami sa sampulna a kinalabi.

Su gay a tawagen nami i uman isa kanu inunutan nin, na su (taw) a inenggay nami sa lekanin su kitab nin tampal sa kawanan nin na silan na batyan nilan su kitab nilan sa mapya, endu di silan madsalimbut sa apiya paydu.

Endu su taw a pisek sya sa dunya (di nin mailay su limu nu Allah) na sekanin lu sa akhirat na pisek bun sa lalan.

Endu saben-sabenal a sinupegan nilan i ka- fitnah sa leka (Muhammad) kanu ini-wahi nami sa leka (Qur’an) ka endu kami nengka kadtebuan sa salakaw kanu wahi, na u nakwa kanilan bu na seka i kalilinyan nilan a tagapeda nilan.

Endu u di kena nami bu seka tinigel na saben- sabenal a paydu bu ged i dala nengka kasalig kanilan.

U nanggula nengka bu su atulan nilan na matakep i siksa nengka sa dunya, endu siksa nengka sa gay a mawli, mawli na dala mapaluli nengka a tumabang sa leka.

Endu sinupegan (panginggileken) ka nilan, ka endu ka nilan makapalyu sa kanu lupa (Makkah), ugayd na kyug nu Allah i kinaganat nengka, endu dala bun kawgeti silan sa ulyan a kinaganat engka. (nabunu silan sa Bad'r).

Mamba i ukit nu Allah kanu sinugu nin a nawna sa leka (Muhammad) endu dala mapaluli nengka kanu ukit nami a makasibay.

Itindeg nengka su sambayang sa kapulid a senang taman sa kasedep na senang (dhuhur, as'r, maghrib, isha) endu (batya ka) su Qur’an kanu faj'r (sambayang a sub'h) ka su Qur’an sya kanu faj'r (kadsambayang sa sub'h) na pedsaksiyan nu manga malaikat.

Endu su ped kanu magabi na tahajjud ka ka sunnat sa leka, ka di ebplis na pambuwaten ka nu Kadenan nengka sa mapulu a pangkatan (lu sa surga).

Endu edtalu ka: Kadenan ku paludep aku sa beludepan a benal (sa Madinah) endu palyu aku sa belyuwan a benal (Makkah) endu enggi aku ebpun sa leka sa tindeg a bagel a makatabang sa laki.

Endu edtalu ka: nakawma su bantang na mailang (mapunas) su baatil, ka su baatil na andang a mapunas.

Endu ipedtulun nami ebpun kanu Qur’an i makauli (makagamut) sa dalu, endu limu kanu manga mu'min, endu dala makawman kanu manga tading a salakaw sa kalugyan.

Endu amayka inikalimu nami su manusya (a di bangimbenal) na tumaligkud atawa tumangkili sa kadsukur sa Allah amayka dinumalu atawa nakamutu na tinebpekan.

Edtalu ka: uman isa na enggalebeken nin endaw i nalayamanin, na su Kadenan nu i mataw kanu naka-tuntul sa lalan.

Endu su ibagidsa nilan sa leka su ngyawa, edtalu ka: su ngyawa na su Allah i mataw lun, endu da kanu enggay sa kataw, ya tabiya na paydu gayd.

Endu amayka nagkahanda nami i iyawa nami su kataw a wahi nami sa leka (su Qur’an) na dala maparuli nengka a kasaligan nengka lun sa kambalinganin.

Ya tabya na limu ebpun sa Kadenan nengka, saben-sabenal su kalimu nin sa leka na sangat i kasla nin.

Edtalu ka kanilan sa apya embulig su manusya endu su jin sa mapambuat silan sa pagidsan nu Qur’an na di nilan magaga i pagidsanin, apiya pan su sabad kanilan na midtatabanga den silan.

Endu saben-sabenal a pidtinatad nami san sa Qur’an kanu manga taw i langun a ibaratan, na menda bun su kadakelan kanilan (di tumalima) ya tabiya na kagkafir bu.

Endu pidtalu nilan: di nami pangimbenalen seka (Muhammad) taman a di nengka makapambuat sa lekami kanu lupa i manga buwal na ig.

Atawa ka ma-aden sa leka i pamulan a kayu kulma endu teneb, endu pambuat ka i manga lawas a ig kanu pamageletan nu pamulan nengka.

Atawa palundusi kami sa langit, atawa ka pambuat ka su Kadenan nengka endu su manga malaikat sa manga mapayag.

Atawa ka ma-aden sa leka i walay a dala pagidsanin sa kapiya atawa pusug ka sa langit, na di nami bun pangimbenalen i nakapusug ka sa langit, taman a di nengka makapatulun i kitab a batyan nami, edtalu ka (O Muhammad): mahasuti su Kadenan ku, ka dala sa laki (inan) ya tabiya na manusya aku bu a sinugu.

Endu dala nakasapal kanu manga taw sa kapangimbenal kanu kinauma nu tutulu kanilan ya tabiya na pidtalu nilan na napambuat besen su Allah sa manusya a sinugu (ibagumpak a kadtalu)?

Edtalu ka kanilan u mana bu ka malaikat bu i taw na lupa a lumalakaw sa tumatana, na ya nami bun patulunen kanilan ebpun sa langit na malaikat bun i sugun nami.

Edtalu ka su Allah i saksi kanu pageletan nu, ka sekanin (Allah) na katawanin su manga ulipenin a pakailay kanilan.

Endu su taw a tinutulu nu Allah na entuba i nakatuntul, endu su tadingenin na dala mapaluli nengka kanilan a tumuganul a salakaw sa Allah, endu buligen nami silan sa gay a mawli sa ibaguna i biyas nilan sa naraka sa pisek a maw a bisu, kandalepan nilan i naraka uman mapandeng (su apuy) na umanan menem sa kayaw.

Entu ba i balas nilan kagina migkafir silan kanu manga ayatan nami, pidtalu nilan: u nalupet su tulan tanu endu libubuk (tanu) na makambuat tanu pamun sa bagu mawatan a manggula intu.

Ngintu da nilan mailay su Allah na binaluy nin su manga langit endu su lupa, a magaga nin mumbal i pagidsan nilan, endu binaluy nu Allah kanilan i tadtab a da kabplis nin na mawma (gay a mawli) na minenda su baradusa (da palityala) ya tabiya na sinemupak silan.

Edtalu ka (Muhammad): u mana bu ka kagkyug- kyugan su gunsi nu limu nu Kadenan ku na kamalan nu (kapedta nu) sabap sa gilek sa kambaranggya ka su manusya na masingit.

Endu saben-sabenal a inenggay nami kanu Musa i siyaw ka biyas a manga tanda a manga mapayag, na idsa nengka kanu tupu nu Israel su kutika a nakawma kanilan si Musa na ya pidtalu ni Fir’awn: saki Musa na bagantapen ko seka sa nasugat kana si'hr (pakayd).

Tig nu Musa: natawan nengka i dala nangaden kanu siyaw kabiyas ya tabiya na su Kadenan nu manga langit endu su lupa sa manga tanda a kapeg-kagaga nu Allah? Endu bagantapen ku seka (Fir’awn) sa nalugi ka a nabinasa ka.

Endu nagkahanda (ni Fir’awn) i pawanin silan sa lupa (na Mis’r) na pinageled nami sekanin endu su manga pedin sa langun.

Endu pidtalu nami kanu tupu nu Israel kanu ulyanin i endalpa kanu sya sa lupa sa (Mis’r), na amayka makawma su pasad a gay a mawli na pambwaten nami sekanu a midsisimbul.

Endu initulun nami su bantang (Qur’an) endu sabap sa bantang na inibaba nami, endu dala kinasugu nami sa leka (Muhammad) ya tabiya na mapakalilini endu mapakagilek.

Endu su Qur’an na pinayagan nami (sa mapya-mawag / halal-haram) ka endu nengka mabatya kanu manga taw sa malanat, endu pinatulun nami sa paydu-paydu.

Edtalu ka: pangimbenal kanu atawa di, na di kakulangan su manga taw a natawan nilan su Qur’an sa kanu nawna pan, na amayka batyan kanilan na makambaba silan sa kasugyud sa Allah.

Endu ya nilan edtalun na mahasuti su Kadenan nami, na saben-sabenal kanu pasad nu Kadenan nami na manggula.

Endu imbaba nilan su biyas ilan a bagulyang, endu kadsisinggumanan silan sa gilek sa Allah.

Edtalu ka: tawag nu su Allah, atawa Al-Rahman, apiya ngin den i ngalanin a itawagu lun na lekanin su manga ngala a mapya, endu di ka gayd mapaka-tanug i kan-du’a nengka, endu di ka menem ped-sulen na ya ka enggula na pageletan na matanug endu di kena matanug.

Endu edtalu ka i langun a pugi endu pedsukuran na lekanin a Allah, da makambata endu da tagapedanin kanu kapegkagaga nin (kadatu nin), endu dala sa lekanin i wali (pedtabang endu pedsaligan), endu pakasla ka sekanin sa sampulna a kapapegkasla.

Su langun a pugi na kanu Allah a napatulun kanu ulipenin sa kanu Qur’an, endu dala nin baluya kanu dalemin i midsusungkanga (bigkug).

Matidtu sa ipakagilekin su siksa a mapasang ebpun sa Allah, endu pakalilininin su manga mu'min a silan na penggalebek sa manga mapya, na kanilan su balas a mapya (sa gay a mawli).

Dayun sa dayun (taman sa taman) silan sa surga a dala kalyu nilan.

Endu pakagilekanin su (manga taw) a midtalu sa namaruli su Allah sa wata (mana su Yahudi endu Nasrani).

Dala kanilan i sabut (kanu pedtalu nilan), endu (labi pan) su manga lukes nilan a masla gayd i pidtalu nilan a belyu sa ngali nilan, dala kanu entu a kadtalu ya tabiya na kalebutan.

Di ka (Muhammad) pembinasa i ginawa nengka sa di nilan kapangimbenal sa kanu nan a bangimbenalen (Qur’an).

Saben-sabenal sa lekami na binaluy nami kanu lupa i namangetu a mapya i palasin, ka endu nami gabatalu u entayn i mapya i galebekin.

Endu saben-sabenal sa lekami na binaluy nami i (nalabit antu a namangetu) sa manga lupet a nagangu sa di den mamangetu.

Ga-antap engka su manga taw nu takub endu su sinulatan sa kanilan, na kuyug kanu manga tanda nami a makagayp.

(Labit ka Muhammad) su kinaludep u manga nguda sa takub, endu pidtalu nilan: Kadenan nami enggay kami ebpun sa leka sa limu, endu pagkapiya ka sa lekami su galebek ami sa tutulu.

Endu sinapengan nami su manga tangila nilan sa pinatulug nami silan kanu dalem nu takub sa lagu- lagunan.

Mawli na pinagedam nami silan ka endu nami katawan kanu duwa a di bagayun u entayn i nakatanud sa kainawget nilan sa takub.

Sekami na panudtulen nami sa leka (Muhammad) su tudtulan kanilan a benal, saben-sabenal na silan a manganguda na nangimbenal kanu Kadenan nilan endu inumanan nami silan sa tutulu.

Endu binagel nami su pusung nilan sa kadtalu sa bantang kanu dapan nu datu nilan, sa ya nilan pidtalu: ya nami Kadenan na su Kadenan nu langit endu lupa, di kami semimba sa kadenan a salakaw sa lekanin, ka saben-sabenal a nakasagad i ka-kafir nami amayka salakaw sa Allah i simban nami.

Silan a manga taw nami a minumbal sa salakaw sa Allah a manga kadenan, na entuba ka pambwaten nilan i tindeg a matalima sa tidtu, na dala den muna i kadupangin kanu taw edtetebwanin su Allah sa kalbutan.

Endu su waktu a kapedtangka nilan kanu manga taw endu su pedsimban nilan a salakaw sa Allah na pidtalu nu ped kanilan: ludep kanu sa takub ka pakawladen nu Kadenan nu sa lekanu su limu nin, endu adilen in sa lekanu kanu katamanan nu i madtagapeda nu a mapya.

Endu mailay nengka su senang a semebang sa di nin masumpit su takub sa tampal sa kawanan, amay menem ka semedep na lipusen nin menem i tampal sa biwang, na silan na lu silan sa ludep (a takub), entuba na kaped kanu manga tanda a kapegkagaga nu Allah, su entayn i tinutulu nu Allah na entuba i natutulu (sa mapya), su entayn i tinadingin menem na dala maparuli nin a tumabang a manutulu sa lekanin.

Endu antapen nengka silan sa penggedam, na silan na bamedtulug, endu pegkeliden nami silan sa kawanan-biwang, su asu nilan na dinemabpa bun tampal kanu bengawan u takub, a gailay nengka silan na makapalaguy ka sa mangagan endu mapenu ka na gilek (tabang nu Allah kanilan).

Endu pinambwat nami silan ka endu silan maka-pamagidsaya, ya tig nu isa: ngin i kinawget tanu sya? Ya tig nu isa: naka-sagay tanu atawa seged bu sa gay, ya nilan nadtalu na: su Kadenan nu i mataw sa kinawget tanu sya (sa takub), sugu nu i sakataw sa lekanu lu sa galimudan (padiyan) ka nya su kulta nu sa mangilay sa mapya a pegken sa itenin sya i rizki a lu ba makabpun, endu ebpiya-piya (su pedsugun) endu kalimu-limu na (di mapakilala sa apiya sa kataw).

Saben-sabenal silan na amayka makilala kanu nilan na rajamen (pamalantayn) kanu nilan, atawa pambalinganen kanu nilan sa agama nilan na di kanu den makauntung sa taman sa taman.

Endu pinambwat nami silan ka endu nilan katawan su pasad u Allah na matuman, endu su kabangkit sa dunya na mawma sa di ebplis, na mimbida-bida su manga mu'min endu su manga kafir, na ya pidtalu nu manga kafir: embalayan su takub (sa walay), su Kadenan bu i mataw kanilan, ya menem pidtalu nu manga mu'min na: embalayan sa masjid su ubay na bengawan u takub (sa kadsambayangan).

(Su kaped a manga taw) na ya nilan lun kadtalu na telu kataw (su manga wata) ika-pat su asu, su ped na lima kataw silan ika-nem su asu nilan, entu na antapan nilan sa gayb, su ped na pitu kataw ika-walu su asu nilan, edtalu ka (Muhammad): su Allah i mataw sa bilangan nilan dala mataw kanilan, ya tabiya na paydu bu, da ka pebpalawa pantag sa taw na takub, ya tabiya a kabpalawa na amayka aden nakatulun a tindeg a mapayag, endu di ka bagidsa kanu manga Yahudi endu Nasrani su manga taw sa takub.

Endu di ka pedtalu su enggaga-isa nya na namag bu i kanggalebek ko lun.

Ya tabiya (edtalu ka): kahanda nu Allah, endu tademi ka su Kadenan nengka amayka nalimpangan nengka, endu edtalu ka i kalu-kalu tutulun aku nu Kadenan ko (kanu taw nu takub).

Endu natangen silan kanu takub sa ya nin kinawget na naka-telu gatus lagun endu siyaw.

Edtalu ka: su Allah i mataw sa kinawget nilan, ka lekanin a Allah su gayb kanu pitu lapis a langit endu lupa, sekanin i pakailay endu pakakineg, dala kanu taw nu langit endu lupa a salakaw sa Allah i tumabang, endu dala kaped nu Allah kanu hukuman nin apiya sakataw.

Endu batya ka (Muhammad) su ini-wahi sa leka a kitab (Qur’an) ebpun sa Kadenan nengka a di kasambiyan, endu dala maparuli nengka a salakaw sa Allah a ka-andigan na ginawa nengka.

Endu tigkel ka (Muhammad) salta kanu manga taw a ped-simba kanu kadenan nilan sa mapita malulem, ya nilan kahanda na su Allah, endu di ka mapasagadi silan sa kalabiyan silan u parahayasan sa dunya, endu di ka paginuguti su limpang i atay nin sa Qur’an nami, endu ya nin unutan na kyug a ginawa nin, sa yanin galebek na kabinasan.

Endu edtalu ka su bantang na ebpun sa Kadenan nu, su pegkyug (sa bantang) na mangimbenal, su di mangimbenal na eg-kafir den, ka inipagadil nami kanu manga kafir su naraka, sa langkap kanilan sa embala-bala, endu amayka mapadtabang silan na tabangan bun sa ig a mayaw, sa mana bun lana a pedsebu-sebu sa pakatutung kanu manga biyas, na ngin den i kawagin a ga-inum, endu ngin den i kawagin a gambekenan.

Saben-sabenal su manga taw menem a manga mu'min a minggalebek sa manga mapya na di nami dadagen su balas nu entayn imapya i galebekin.

Silan na kanilan i manga surga a jannatu ad'n a belagilay sa kababan nilan i pulangi a bagigimuan silan sa manga imu a bulawan, endu balegkas nilan na gadung a (sundus) pegkinggat, endu (istabraq) a pedsandang silan sa surga kanu manga kantil (mapulu a bamagagayanan) a ngin den a kapiya na balas, endu mapya a gambekenan.

Enggi ka silan sa ibaratan a duwa kataw a mama (mu'min-kafir) binaluy nami kanu isa kanilan i pamulan a duwa a manga anggur, endu nakabalibet i kayu kulma, endu bilnaluy nami i manga pamulan kanu pageletan u duwa antu.

Su duwa antu a pamulan na bagunga tanan, endu dala kulanga a unga nin, endu pina-ukit ami kanu pamageletan i lawas a ig.

Endu aden pan manga unga a ped, na pidtalunin kanu manga tagapeda nin sa bagandaganin: saki ba i madakel i tamukin, endu saki bun i mapulu i manga tagapeda nin sa leka.

Endu linemudep kanu pamulanin, endu sekanin na pidsalimbut in i ginawa nin, pidtalu nin: di ku ma-antap i madala i nya a manga tamuk.

Endu di ku ga-antap i makawma i mawli, endu amayka makalu aku kanu Kadenan ku (sa gay a mawli) na makaparuli aku sa muna pan i kapiya nin a kauliyan ku.

Pidtalu nu tagapeda nin sa pedsawal nin su bityala: pigkafiran engka su minaluy sa leka ebpun sa lupa (apu tanu a Adam) mawli na mani' (pinadsimbul a ig na mama-babay) mawli na pinabpalas ka nin sa mama.

Ugayd saki, na su Allah i Kadenan ku endu di ku sakutun su Kadenan ku sa apya paydu.

Entuba ka kinaludep nengka kanu pamulan nengka na ya nengka pidtalu na: kahanda nu Allah sa dala bagel ya tabiya na sabap kanu Allah, sa apya nya nengka kapegkailay sa laki i da ku maka-atu sa leka sa tamuk endu manga wata.

Na basi enggan aku nu Kadenan ku sa muna pan i kapiya nin ebpun sa pamulan nengka, atawa tabiya bu ka mawma na apuy (kilat) ebpun sa langit na mabaluy i lupa anan sa dala metu lun (namba i kadtalu nu manga mu'min)

Atawa ka tabiya pasenepen nu Allah su ig in, na di nengka magaga u endaw nengka pangilayn.

Endu nabalibet den ba na nakabinasa lun, na ya nin naggula na nakadsendit sa dala kataganin (a sendit) sabap sa madakel i nambaranggya nin na nalundus langun u pamulan sa dala nakwa nin, endu nadtalu nin: ya ku tumu i da ku den mun makasakutu kanu kadenan ku (dala katagan a langun a galebekan endu tamuk ka mabinasa sabap sa sakutu)

Endu dala den sa lekanin i lumpukan na kadakelin a tumabang sa lekanin a salakaw sa Allah, endu di makadtabang sa lekanin i ginawa nin.

Su gay a mawli na lekanin a Allah i kyug kanu bantang, na entuba i mapya a balas, endu mapya a gadtamanan.

Endu i-upama nengka kanilan su kabpaguyag sa dunya na mana bun ig a initulun nami ebpun sa langit, na makadsimbul kanu bamangetu sa lupa na nabaluy su bamangetu sa nakuku a pakabayug a sambel, su Allah kanu langun nu enggaga-isa na kagaga nin.

Su tamuk endu su manga wata na parahayasan bu sa dunya, ya mapya gayd na matidtu a galebek (kapalityala sa Allah) ka entuba i mapya kanu Kadenan nengka endu mapya a banganganayn.

Endu su gay a pabayugen nami su palaw na mailay nengka su lupa a datal, endu limuden nami silan sa dala isama nami kanilan apiya sakataw bu.

Endu makadatang silan kanu Kadenan nengka sa mid-sap, (tig nu Allah): saben-sabenal a nakawma kanu sa mana bun su paganay a kinabaluy nami sa lekanu a migkadaw kanu sa sakataw-sakataw, ugayd na yanu egkatagu sa ginawa nu na di nami baluyn sa lekanu i pasad a kambwat nu sa kubur.

Endu makabetad su kitab (uman isa) na mailay nengka su manga baradusa a tanan kangagilekan sa katamanan nilan, endu ya nilan madtalu: nabinasa tanu ka ngin den i mayaba a kitab, ka dala initagakin a manawt a kadusan endu dala masla ya tabiya na binilang bun, endu naparuli nilan sa mapayag su pinggalebek nilan, endu di edtalimbul su Kadenan nengka apiya sakataw.

Endu (labit ka Muhammad) i kinadtalu nami kanu malaikat: sugyudi nu si Adam, na sinumugyud silan (malaikat) ya tabiya na si iblis antu ba i lukes u jin a linemyu sa inugut sa Kadenan in, na ngintu ka pembaluyn nu endu su muli-a-taw nin a paginugutan nu a salakaw sa laki (Allah) inunta na silan na satru kanu nilan? Ngin den i kawagin su manga kafir a midsambi.

Dala ku pedsaksiyan nu silan sa kinabaluy kanu manga langit endu su lupa, endu su kinabaluy sa ginawa nilan, endu dala ku baluya su manga shaytan a pedtabang sa kinapangaden ku.

Endu su gay a edtalun u Allah: tawag nu su inipadtagapeda nu sa laki a kadenan nu sa kadtalu nu, na tinawag nilan na dala makasumpat sa kanilan, endu binaluy nami sa pageletan u manga barahala endu su sinumimba lun i bawgan a luba silan gaulug.

Endu mailay nu manga kafir su naraka na matagu den sa ginawa nilan i namba i kabetadan nilan, endu dala den matun ilan a bengawan a kalipus nilan.

Endu saben-sabenal a pidtinatad nami san sa Qur’an, kanu manga taw i manga ibaratan/upaman, ugayd na su manusya na madakel gayd i kapalawanin.

Endu da nakasapal kanu manga kafir sa kapangimbenal kanu kinawma kanilan na tutulu (Qur’an) endu makapa-ampun silan kanu Allah ya tabiya na makawma kanilan su mana su nanggula nu nangawna kanilan, atawa makawma pan kanilan su siksa a pedsangula kanilan (mana su nanggula sa Bad'r).

Endu dala sa kapedsugu nami kanu manga sinugu ya tabiya na papegkalilini endu papegkagilek kanu manga kafir, endu ibpalawa nu manga kafir sa baatil i tindegin ka u ya nilan kyug na makena nilan sa baatil su haqq, endu binaluy nilan bu su manga ayatan ku endu su ibanginggilek kanilan a bagungaten nilan bu.

Endu dala muna i kadupangin sa taw a labiten sa lekanin su manga ayatan nu Allah na dala nin ipamamantag endu nalimpangan nin i nawna kadupanganin, (tig nu Allah): binaluy nami kanu manga atay nilan i manga dapeng sa di nilan kasabutan su Qur’an endu lu sa tangila nilan sa mawgat i kakineg ilan lun, amayka enggaten nengka silan lu sa tutulu na di a benal silan edtinidtwan.

Endu su kadenan nengka i bangampun a kigkuwan sa limu, u mana bu ka siksa nin sya sa dunya na pidtagadanin den (pamagayasan nin) silan sa siksa, ugayd na aden bun pasad kanilan sa dala maparuli nilan a kanggampanan a salakaw sa Allah.

Endu su entuba a manga dalpa a bininasa nami (timpu nu Aad, Thamud) guna silan pegkafir, endu binaluy nami sa kinabinasa kanilan i pasad (amayka endupang na mabinasa silan).

Endu (labit ka Muhammad) su kinadtalu nu Musa kanu panunugunin a (mama): di aku menda lumakaw taman a di ku mawma i gadtimwan nu duwa a lagat (lagat sa Rum endu Farish) atawa ka apiya lagunan i kalakaw ku.

Guna nilan masampay su natimwan u duwa a lagat na nalimpangan nilan su lutu nilan (seda a nalutu) na ya den linumanguy sa kanu lagat.

Guna nilan malipus duwa, tig nu Musa kanu panunugunin a wata a mama: isya nengka i lutuwan ta anan, ka saben-sabenal a nadsumbak ta sa kabpelalakaw ta anya i lugat.

Tig nu wata: apa ka pan, su kinatelen ta lu kanu lakungan na nalimpangan ku su seda, endu da napalimpang lun sa laki ya tabiya na Shaytan sa madtalu ku pan, endu su seda antu na aden naumbalin a lalanin sya sa lagat a makagayp.

Tig nu Musa: indanun ka namba i kalinyan ku na nalimpangan, na pimbalinganan nilan su naganatan nilan.

Na naparuli nilan i isa kanu manga ulipen ku (si Khaidar) a inenggan nami sa limu ebpun sa lekami, endu pinamandu nami ebpun sa lekami sa ilmu a kataw.

Ya pidtalu nu Musa (kani Khaidar): ngintu unutan ku seka sa apiya endaw ka mangay ka endu aku nengka mapamandu sa kanu natawan nengka a nakatidtu?

Tig nu Khaidar: seka (Musa) benal a di ka makagaga salta sa laki sa kadsabar.

Panun i kadsabar nengka (Musa) kanu dala nengka katawi i tudtulan lun?

Tig nu Musa: maparuli aku nengka insha Allah sa makadsabar aku, endu di ku seka sungkangen sa galebek.

Tig nu Khaidar: u bagunut ka salaki na da ka mangingidsa sa apya ngin a mailay nengka taman sa embityalan (edtalun ku) bun sa leka i bandingan lun.

Na ginumanat silan taman sa nakapageda silan sa awang (sa inibedtas silan), linesu nu Khaidar su awang, tig nu Musa: nginan ka linesu nengka ka endu pakageledi taw anan? Saben-sabenal masla i kawagan a galebek engka anan.

Tig nu Khaidar: kena ku pidtalu i di ka makagaga edsabar?

Tig nu Musa: pasagadi aku ka nalimpangan ku, endu di ako mapakalegeni.

Na ginumanat menem silan, taman sa aden nabalak nilan a wata, binunu ni Khaidar, tig u Musa nginan ka minimatay ka sa di kena minunu? Ungkir a benal i galebek nengka.

Tig nu Khaidar: kena ba pidtalu ku sa leka i di ka ba makagaga edsabar salta sa laki?

Tig nu Musa: amayka idsan ku pan seka sa ulyan a nya ba na pitas aku den, ka aden tindeg nengka a kapitas engka sa laki.

Na ginumanat menem silan taman sa nawma nilan i taw na dalpa, bangeni silan sa pegken na dala tinumalima sa kapakan kanilan, na aden nailay ni Khaidar a pakasandang a walay sa gaudtang na pinatidtu ni Khaidar, tig nu Musa: u namba ka napasukay ka sa namba a galebek (sa kinapatidtu sa walay)

Tig nu Khaidar: nya den ba su pasad a kabpitas ta, panudtulen ku muna sa leka su dala nengka kadsabari a galebek ku sa dinaway aku nengka.

Su awang a linesu ku na kana manga miskinan a sya i galebek ilan sa lagat na kyug ku na aden madtila nu awang ka aden kawman nilan a datu a pegkwa sa awang sa peges amayka dala tila na awang.

Endu wata menem antu a binunu ku na duwa a lukesin na mu'min na bangandamen ku i matunda nin silan sa kandupang endu kagkafir amayka egkasla.

Na ya nami kyug na sambiyan u Kadenan nilan (i wata antu a mama) sa mapya (a makasambi) endu malimu sa duwa a lukesin.

Endu su walay antu a gatunggad na kana duwa kataw a wata a yatim kanu dalpa, na entu sa kababan na walay antu na ginadung kanilan a tamuk na ama nilan a salih (mapya a taw), na ya kyug nu Kadenan nengka na egkasla pan silan entu pan a pagemawnin kanilan su ginadung, limu intu ebpun kanu Kadenan nengka, di kena ku kyug a ginawa i kinanggalebek ku lun, namba i tudtulan nu da nengka magaga edsabar.

Endu ibagidsa nu manga Yahudi sa leka (Muhammad) si Zulqarnain, edtalu ka: panudtulen ku bun sa lekanu i tudtulanun.

(Tig nu Allah): benal a pinandayan namin sa lekanin (Zulqarnain) su lupa, endu inenggan nami sekanin sa langun a lalan a kasampay nin sa kahanda nin.

Na tinuntulin su sabapan (a kasampay sa kahanda).

Taman sa nakawma sa tampal sa pedsedepan u senang, naparuli nin i pedsedepan (u senang), na ya nin kailay lun na aden lupa nin (a malumiket), endu naparuli nin i manga taw (ilham sa lekanin sa tig nu Allah): O Zulqarnain! Myug ka sumiksa atawa byagen silan ka endu nengka ma-ulipen silan.

Tig nu Zulqarnain: su eg-kafir na di ebplis i kasiksa nami lun, mawli na makambalingan kanu Kadenan nilan na siksan nin sa siksa a mapasang a naraka.

Endu su nangimbenal endu minggalebek sa galebek a mapya na lekanin i balas a surga, endu edtalun nami sa lekanin kanu suguwan nami i kalemuan sekanin.

Na tinuntulin menem su sabapan (sa kasampay sa kahanda).

Taman sa nakawma menem sekanin (Zulqarnain) sa tampal sa sebangan a manga taw a dala pakadalung kanilan kanu senang ka dala gabun dala pamulan a kasilungan.

Mamba i kinanggay nami sa lekanin (Zulqarnain) sa kataw.

Na tinuntulin menem su sabapan (sa kasampay sa kahanda).

Taman sa nawma nin i lalan kanu pageletan a duwa timan a palaw, a natun nin lu ba i manga taw a malegen pedsabutan i kadtalu nin.

Pidtalu nilan: Hay Zulqarnain! Saben-sabenal kanu Ya'juj endu su Ma'juj na paminasa silan kanu dalpa (bangimatay) na ngintu myug ka bun sa sukayan nami seka sa mapelen nengka i belyuwan nilan anan?

Tig nu Zulqarnain: su inenggay nu Kadenan ku sa laki na ya pan mapya (kanu ipedsukay nu) ugayd na tabangi aku nu sa bagel ka ibetad ko sa pageletanu i makapelen kanilan.

Enggay aku nu sa manga tebped a putaw, taman sa guna makapagidsan sa kalambeg (napenu na putaw) sun pageletan nu duwa a palaw na tig ni (Zulqarnain): iyup nu (bagyupen), taman sa migkaliga su putaw na apuy, tig in menem: i sya nu su galang a tinunag, inudud lun.

(Si Ya'juj endu si Ma'juj) na dala nilan magaga sa makalyu silan endu di nilan kagaga i pamesuan nilan sabap sa kategasin.

Tig nu Zulqarnain: namba na limu ebpun sa Kadenan ku, na amayka makawma su pasad u Kadenan ku (kagubal sa dunya) na belupeten nin, endu benal su pasad u Kadenan ku.

Endu lu nami den ba tinagak silan a midsisimbul silan sa pegkadakel, amayka yupen su sanggakala na buligen nami silan tanan.

Endu (namba a gay) na isupeg nami su naraka jahannam kanu langun u manga kafir.

Silan a manga taw na di nilan edtulikan su Qur’an, endu di nilan magaga i kapanuliman sa panduwan.

Ya kataw nu manga kafir ka di ku i-siksa kanilan i binaluy nilan su ulipen ko a pedsimban nilan (mana su Eisa/su malaikat) a salakaw salaki, inidtatalama nami kanu manga kafir su naraka jahannam a katumpan nilan.

Edtalu ka (Muhammad): ngintu edtalun nami sa lekanu su nangalugi sa galebek?

Su manga taw a nabatal (nabinasa) i galebekin sya sa kabpaguyag sa dunya (pegkakalilini bu sa supak) na ya bun gatagu sa ginawa nilan na silan na manga mapya gayd i galebekin.

Silan ba su manga kafir, supak kanu manga ayatan nu Kadenan nilan, endu di bangimbenal sa ka-adap sa Allah na nagugul i manga galebek nilan, na dala patindegen nami sa gay a mawli kanilan a timbangan a mapya.

Entu ba i balas nu manga kafir na naraka jahannam sabap sa kinagkafir nilan, endu binaluy nilan su manga ayat ku endu su manga sinugu ku sa pinagungat nilan bu.

Saben-sabenal su manga mu'min menem a minggalebek silan sa manga mapya na kanilan menem su jannatul firdaws a katumpan nilan sa gay a mawli.

Sa dala den kanilan i kalyu, endu di silan myug maalat (mugaling) sa apiya endaw (ya tabiya na kahanada nu Allah).

Edtalu ka kanilan (Muhammad): apiya langun a lagat ka umbalen a dawat ka isulat su kadtalu nu Kadenan ku na maibped su lagat sa di pan maibped su kadtalu nu Allah, apiya tundugan pan samaytu ba i kadakelin (apiya mumbal sa lagat a satiman).

Edtalu ka (Muhammad) i saki na manusya aku a pagidsan nu bun, ipe-wahi sa laki i Kadenan nu na isa bu, na su taw a magingarap sa ma-adapin su Kadenan nin sa mapya na enggalebek sa mapya a galebek, endu di nin isakutu su kasimba nin sa Kadenan nin.

Kaaf-Ha-‘Ain-Saad (su Allah i mataw kanu ma'na nin).

Nya ba i labitan kanu limu nu Kadenan engka sa kanu ulipenin a si Zakariya.

Su waktu a min-du’a kanu Kadenan nin sa kinandu’a a masulen.

Ya nin pidtalu: pedtyakap sa laki (Allah) saben-sabenal na saki na minggepuk/migkalubay su tulan ku endu migkadakel kanu ulu ku i maputi a buk, endu da aku maaden sabap kanu kabangeni sa leka a pedtiyakap sa laki (Allah) sa egkalidu (su ginawa).

Endu saben-sabenal kagilekan aku sa dadagen nu pakatundug sa laki su agama, endu su kaluma ku na bayas (di pembata) na enggay aku ebpun sa leka a Kadenan sa wata.

Sa makawaris sa laki, endu makawaris kanu Ya'kub sa kataw endu kanabi (di kena kakawasan) endu baluy ka, Kadenan ku, a kasuwatan (nu Allah).

(Tig nu Allah): O Zakariya! Benal a sekami na papegkalilinin nami seka (enggan nami seka) sa wata a ya nin ngala na si Yahya a dala sangay nin a nawna pan sa lekanin.

Tig nu Zakariya: Kadenan ku panun i ka-aden a wata sa kaluma ku na bayas, na saki menem na naka sampay sa katuwa?

Pidtalu nu malaikat: manggula den inan pidtalu nu Kadenan nengka na ya pan malemu kanu Allah, ka binaluy ka nin paganay sa dala, namba i tanda nu kapegkagaga nu Allah endu kaisa-isa nin.

Tig nu Zakariya: Kadenan ku umbali aku sa tanda (sa magingay su kaluma ku), tig nu Allah: ya nin tanda na di ka miyug edtalu kanu manga taw sa taman sa telu gay (ya tabiya na ka-tasbih).

Na liniyuwan in su manga taw ebpun sa pedsambayanganin, inigulinganin i edsambayang kanu den sa mapita-malulem.

(Tig nu Allah): O Yahya! Kamali ka su kitab (Taurat) sa mabagel endu inenggay nami sa lekanin i kataw (ungangen) sa wata pan.

(Endu binaluy) a limu sekanin (kanu manga taw) ebpun sa lekami (Allah) endu suti sekanin endu na-aden sa magilek sa Allah.

Endu ebpiya-piya sa duwa a mimbata lun, endu dala ma-aden sa tamegesen a darwaka a supak sa Kadenan nin.

Sagyahatra sekanin sa kanu gay a kinambata lun (malilintad) endu su gay a kapatay nin, endu su kambuwatin (kanu kinapatay nin) sa bibyag.

Endu labit ka (Muhammad) san sa kitab (Qur’an) si Maryam kanu kutika a tinumangka (tinagakin) su kadakelin sa lu mibpawang sa gabetadan a tampal sa sebangan.

Na nangaden sa makadalindingin sa ginawa nin (linemambung), sinugu nami (tig nu Allah) lu sa lekanin su Jibril a mibpalas sa manguda a mama a mapya i palasin.

Tig nu Maryam: benal a lumindung aku sa Allah sa leka amayka seka na magilek sa Allah.

Tig nu Jibril: saki na sinugu aku nu Kadenan nengka ka endu ku ka-enggan seka sa wata a mapya.

Tig nu Maryam: panun i ka-aden a wata sa laki sa dala aku makembil na mama endu di kena aku darwaka?

Tig nu Jibril: manggula den inan, ugayd na pidtalu nu Kadenan nengka i nampamba i malemu sa lekanin, endu baluyn nami a tanda kanu manga taw endu limu ebpun sa lekami, endu di ebplis na manggula bun.

Na migkagingay (su Maryam) na tinemangka sekanin sa mawatan kanu manga kadakelin.

Na ginedamin su tyanin lu kanu lawas u kayu kulma (taman sa nakambata), ya nin nadtalu: niya ba ka minatay aku sa da pan i niya manggula, na dala den mabanding (malabit) sa laki sa kalipatanan den.

Na tinawag nu Jibril sa tampal sa baba: di ka pelidu i ginawa nengka, ka saben-sabenal a binaluy nu Kadenan nengka san sa kababan nengka i ig a pelagilay a ka-inuman.

Endu kuyung ka i lawas a kayu kulma anan ka mangalubpug su unga nin na mapya a pegken.

Kan ka lun endu inum ka kanu ig endu pakagalaw ka sa beneng, na amayka aden mailay nengka apiya sakataw a manusya na (edtalu ka): midsamaya aku sa Allah sa kabpuwasa sa di ka edtalu-talu, na di aku a benal embityala saguna sa manusya.

Na initin su wata nin lu kanu manga kadakelin, ya pidtalu nu manga taw: O Maryam! Nayt engka anan a wata na di kena paydu inan a kayayan.

Seka (Maryam) na suled kun na suled kani Harun, si ama nengka na di kena mawag (a mama) endu si ina nengka (na endaw ka den anan miniling).

Na inigulinganin su wata nin, ya nilan nadtalu na: panun i kambityala nami sa wata a pebpuyut pamun?

Tig nu wata (su Eisa): benal a saki na ulipen aku nu Allah inenggan aku nin sa kitab, endu binaluy aku nín a nabi.

Endu pinambarakat aku nin apiya endaw aku makendaw, endu inidtutuma nin sa laki i kadsambayang endu kadzakat taman sa bibyag aku pan.

Endu kabpiya-piya sa kani ina ku, endu da ku nin baluya a tamegesen sa mawag.

Endu sagyahatra (kalilintad) sya sa laki kanu kinambata sa laki endu su gay a kapatay ku, endu gay a kambuwat ku a bibyag aku.

Namba si Eisa a wata ni Maryam a midtalu sa bantang a penduwa-duwa kanu (kaped na pedtalu sa wata nu Allah).

Dala sa Allah i mumbal sa wata nin, mahasuti sekanin, amayka aden kahanda nin na ya nin bu edtalun na pangaden ka na ma-aden (sapelek mata bu i kangagan nin).

Endu su Allah i Kadenan ku a Kadenan nu bun, na simba nu sekanin, ka namba i lalan a matidtu a dala lun i kabigkug.

Na mimbida-bida su manga taw (kanu Eisa) na sa bawgan sa naraka i kanu manga kafir kanu gay a kadalpa (kawma nilan) kanu gay a masla (kabangkit sa dunya-kabulig sa mahsar).

Magayp silan kanu kakineg nilan kailay nilan kanu gay a makatingguma silan sa lekami, ugayd na silan a baradusa na saguna na natading silan sa mapayag.

Endu pakagileki ka silan (Muhammad) kanu gay a ka-anteng-anteng a napasad (ibagangapa) i siksa nilan, na silan a (kafir) na dala sa ginawa nilan i (masiksa) endu silan na di bangimbenal.

(Tig nu Allah) benal a sekami i mawaris kanu lupa endu su dalemin, endu syabun makambalingan sa lekami.

Endu labit ka (Muhammad) san sa kitab (Qur’an) si Ibrahim ka sekanin na benal (bantang) endu nabi sekanin.

Pidtalu nin kani ama nin: Hay ama ku! Nginan ka pedsimban engka i di pakakineg endu di pakailay endu dala pakangguna nin sa leka apiya paydu?

Hay ama ku! Saben-sabenal a aden nakawma sa laki a kataw a dala makawma sa leka, na unuti aku ka tutulun ku seka sa lalan a matidtu a bantang.

Hay ama ku! Da ka pedsimba sa Shaytan ka su Shaytan na sinangka nin su Allah.

Hay ama ku! Benal a kagilekan aku sa malumpak kanu siksa ebpun sa Allah, na makuyug ka sa madtagapeda nu Shaytan lu sa naraka.

Tig nu ama ni Ibrahim: nginan gabensiyan nengka i Kadenan ku Ibrahim? Amayka di ka menda (tumelen) na rajamen ku seka, pasagadi aku, tangkay aku sa mawatan.

Tig nu Ibrahim: su sagyahatra nanget sa leka ipangeni ko seka sa ampun kanu Kadenan ku, ka su Kadenan ku na taliman nin i pangeni ku.

Endu ganatan ku sekanu endu su manga barahala a pedsimban nu a salakaw sa Allah, endu ya ku pangenyan su Kadenan ku, ka basi di aku bun makabpayan ka pangenin ku sa Kadenan ku sa di nin taliman.

Na guna nin ganati silan endu su pedsimban nilan a salakaw sa Allah na inenggay nami sa lekanin si Ishaq endu su Ya'kub endu uman isa kanilan na binaluy nami a nabi.

Endu inenggan nami silan ebpun kanu liyu (sa tamuk endu wata), endu binaluy nami kanilan i labitan (badtugan) kanilan a mapulu.

Endu labit ka (Muhammad) san sa kitab (Qur’an) su Musa ka sekanin na ikhlas endu sinugu sekanin endu nabi.

Endu tinawag nami sekanin sa tampal sa kawanan nin kanu palaw, endu pinasupeg nami sekanin sa nakineg in su kadtalu nu Allah.

Endu inenggay nami ebpun sa lekami su limu (su suled in a si Harun) a nabi a pakadtabangay nin.

Endu labit ka (Muhammad) san sa kitab (Qur’an) su Ismail, ka sekanin na benal i pasadin, endu sekanin na sinugu a nabi.

Endu pedsugun nin su kaluma nin sa kadsambayang endu kadzakat, ya kaaden na gasuwatan u Kadenan nin.

Labit ka (Muhammad) san sa kitab anan (Qur’an) su Idris, ka sekanin na benal gayd i kadtalu nin a nabi.

Endu inipulu nami kanu gambetadan a mapulu.

Silan a manga taw a inikalimu nu Allah silan ebpun sa manga nabi a manga mawli a taw ni Adam, endu su pinapageda nami kanu awang nu Nuh endu su manga mawli a taw ni Ibrahim endu su Ismail endu su tinutulu nami endu pinamili nami, amayka batyan kanilan su tanda nu malim (Allah) na mangalimbaban silan a sinemugyud endu bagulyang.

Na makambwat kanu ulyan nilan i manga taw a dinadag nilan su sambayang, endu ya nilan inunutan na kyug a ginawa nilan, na di ebplis na ya nilan maparuli su bawgan sa naraka.

Ya tabiya su midtawbat endu nangimbenal endu minggalebek sa manga mapya, na makaludep silan kanu surga, endu di silan madsalimbut sa apiya paydu.

Manga surga a jannatu ad'n (gatakenan) a pibpasad u Allah kanu manga ulipen nin sa gayb, ka su Allah na matuman a benal i pasadin.

Dala makineg nilan sa surga a mawag a kadtalu ya tabiya na mapya, endu kanilan i rizki nilan sa magabi-mapita.

Entuba i surga a pawarisan nami kanu manga ulipen nami a magilek sa Allah.

Endu di kami (malaikat) makatulun ya tabiya na suguwan nu Kadenan nengka bu (Muhammad), lekanin a Allah su gasangulan (a gay a mawli) endu su gataligkudanan (su dunya) endu su pageletan nu duwa, dala kanu Kadenan nengka i limpang (malipat).

Kadenan nu pitu lapis a langit endu su lupa endu su pageletan nin, na simba nu sekanin endu edsabar kanu sa simba sa Allah, dala natawan nengka a sangay nu Allah.

Endu edtalun nu manusya (kafir): u matay aku na makambwat aku pamun a bibyag?

Ngintu di katademan nu manga manusya (kafir) i binaluy nami sekanin sa unan a dala pan mabaluy na dala (bun) sekanin?

Na idsapa ku kanu Kadenan nengka (Muhammad) na buligen nami silan kanu mga shaytan mawli na pandalpan nami silan kanu ligid na naraka a namakalumpeni silan.

Mawli na pamadsenggayan i uman isa tumpuk, ka endaw i kategas a isa sa Allah na lu bumba bagunut i kapasang a siksa nin,

Mawli na katawan nami bun kanilan i wagib lagangen (baganagen) sa naraka endu su ilaleg, endu su ped a kasiksan.

Endu dala isa sa lekanu a di makaludep sa naraka, ka entu na hukuman nu Kadenan nengka a di ebplis na kawkitan.

Mawli na lepasen nami su nagilekan sa Allah, endu itagak nami lu sa naraka su manga baradusa sa lusak, endu mababa i kayanan nilan.

Amayka batyan kanilan (kafir) su ayatan nami a mapayag, na ya edtalun nu manga kafir (a kawasa) kanu silan a manga mu'min (a miskinan): endaw kanu kafir atawa mu'min i mapya i kabetadanin endu mapya i kabuliganin?

Di bu pili-pila i madakel i bininasa nami kanu manga taw a nangawna a silan pan i madakel i tamuk in endu mapya i palas a kailay lun.

Edtalu ka (Muhammad): su entayn e natadin kanilan na lugkan, umanan nu Allah su umulin, endu pedsinggumananin sa limu a mapayag, kena ka ipedsiksa lun taman sa mailay nilan su inibpasad kanilan (mabunu atawa mabyag silan) atawa ka siksa sa naraka, na katawan nilan den bantu u entayn i mawag i kabetadanin, endu malubay i manga tantara nin (sundalu nin).

Endu edsinggumanan nu Allah su nangatutulu sa tutulu, endu su inugut sa Allah na gasama kanu egkuwanun i sangat i kapiyanin, kanu Kadenan nengka i balasin endu kabpawangan.

Nailay nengka (Muhammad) su taw a sinupakin su manga ayatan nami, endu pidtalu nin i kanggan aku pamun sa tamuk endu wata.

Ngintu nailay nin i gayb atawa ka ngintu aden pasad nilan sa Allah a minggungala sa Rahman?

Kena ka di ebplis na isulat nami i pedtalu nin endu umanan nami sekanin sa siksa.

Endu sekami bun i mawaris kanu pidtalu nin a (tamuk endu wata) endu (tig nu Allah): makawma bun sa lekami na isa nin bu.

Minumbal silan sa kadenan a salakaw sa Allah, ka endu kanu maka-safaat kanilan.

Di kena, ibpalawa bu na manga barahala sa kinasimba nilan (sa barahala) endu mabaluy a semupak kanilan sa gay a mawli.

Da nengka mailay (Muhammad) i sinugu nami su manga shaytan lu kanu manga kafir sa mapagkawalaw kanilan sa mawag.

Na di ka semasawi su kasiksa kanilan ka pembilangen nami bun su gay nilan atawa kapengginawa nilan taman kanu ajal nilan.

Su gay a buligen nami su manga magilek sa Allah lu sa Rahman sa migkuda iganat sa kalyu nin sa kubur.

Isedseg nami su manga baradusa lu sa naraka a bamelakaw a egkawaw gayd.

Dala den makadtabang (kanilan) ya tabiya na su tinumalima sa pasad ebpun sa Allah.

Endu pidtalu nu manga kafir i aden wata nu Allah.

Saben-sabenal a ungkir a masla a nadtalu.

(Sabap kanu kadtalu nilan) na paydu bu i di kapegkalupet nu manga langit sa namba a kadtalu nilan, endu su lupa na gabukakal, endu su manga palaw a galundus a egkagubal.

Sa kinadtalu nilan sa aden wata nu Allah.

Dala egkapatut nin sa Allah i makaaden sa wata.

Ka dala kanu dalem nu langit endu su lupa a di kena ulipen nu Allah.

Saben-sabenal tinanudan nu Allah endu binilangin silan sa kina-bilang.

Endu uman isa na makawma sa Allah sa dala kaped nin (dala makadtabang lun).

Benal su manga mu'min a minggalebek sa manga mapya na pembaluyn nu Allah silan sa kagkakalimwa.

Ya tidtu na pinakalmuwan nami (su Qur’an) ka basa nengka, ka endu kapakalilinyan nengka kanu manga magilek, endu kapakagilekan nengka su manga taw a di mataw sa haqq, bantang.

Endu madakel i bininasa nami a manga taw a nawna kanilan na dala isa bu a maparuli nengka kanilan ataw a makineg kanilan a suara apiya paydu.

Ta-Ha (su Allah i mataw kanu ma'na nin).

Di kena ya nami kinapatulun sa leka (Muhammad) kanu Qur’an i kawgatan ka sa subla.

Ugayd na indawan kanu magilek (sa Allah).

Nakatulun ebpun (sa Allah) a minaluy sa lupa endu su pitu lapis a langit, a mapulu sekanin.

Su pinakamalimu (a Allah) na lu sa Arsh sa migkahanda.

Lekanin a (Allah) su dalem nu pitu lapis a langit endu lupa endu su pageletan nin, endu su kababan nu lupa.

U pakatanugen nengka (Muhammad) i kadtalu na sekanin a Allah na katawan nin su masulen endu su kapegkedu na atay.

Su Allah-da kadenan a wagib a simban ya tabiya na sekanin a manga mapya i ngala nin.

Benal a nakawma sa leka (Muhammad) su tudtulan kani Musa.

Kanu kinailay nin sa apuy, a pidtalu nin kani kaluma nin: sya kanu pan muna ka aden nasandeng ku a apuy ka basi makakwa aku lu ba sa madsulu tanu, atawa ka basi aden maparuli ku a makatutulu sa laki sa lalan (natadin silan).

Guna nin mawma (su apuy) na tinawag sekanin sa: O Musa!

Saben-sabenal a saki su Kadenan nengka na iyawa nengka i talumpa nengka anan ka seka na nya ka sa bawgan a Tuwa a suti.

Endu pinamili ku seka na panuliman ka su ipe-wahi sa leka.

Benal a saki su Allah, a dala wagib a pedsimban ya tabiya na saki na simba aku endu itindeg nengka su sambayang sa tadem nengka ka sa laki.

Saben-sabenal na su gay a mawli na makawma, kahanda ku i di ku ipayag kanu taw i kawma nin ka endu kabalasan su isa kanu penggalebeken nin.

Endu da ka semibay kanu pangimbenal sabap sa kanu di bangimbenal endu ya nin pedtuntulen na kyug na ginawa nin (ka mabinasa ka).

(Tig nu Allah): ngin inan sa kawanan nengka Musa?

Tig nu Musa: nya na tungkat ku a kadtigelan ku sa kabpelakaw ku endu ibanapes ku sa lawn na kayu a pegken nu kambing ku endu aden ped a kahanda ku lun.

Tig nu Allah: pitasi ka Musa.

Pinitasan ni (Musa) na mimbaluy a nipay a belansag.

Tig nu Allah: kwa ka anan (Musa) da ka pegkagilek ka pauliten nami kanu andang a palasin.

Endu iludep nengka i kawanan a lima nengka sa takilidan a biwang ka lemyu sa maputi a mapya i palasin, isa menem intu a tanda sa benal ka.

Ka endu nami makapailay sa leka su manga tanda nami a manga masla.

Angay ka kani Fir’awn ka sinemagad i galebek nin (a kadarwakan)

Tig nu Musa: Kadenan ku pagkalinawag ka sa laki su laleb ku.

Endu pakalemu ka sa laki i galebekan ku.

Endu iyawa nengka su kapuntel na dila ku.

Ka endu nilan kasabutan i kadtalu ku.

Endu baluy ka a makatabang su isa kanu pagali ku.

Si Harun a suled ku

Ibagel engka sa laki.

Endu pa amung ka kanu galebekan ku.

Ka endu kami maka-tasbih sa leka sa madakel.

Endu katademan nami seka sa madakel.

Ka seka a Kadenan nami i pakailay sa lekami.

Tig nu Allah: nakwa nengka den Musa su pangenin nengka.

Endu saben-sabenal a inenggan nami seka sa limu a nawna (dala nengka pangenya).

Su kutika a inilham nami kani ina nengka su inilham lun.

Sa ibetad ka nin kanu kun, endu idtug ka nin sa lagat, ka isedseg nu lagat su kun kanu kilid sa makwa nu satru ku (si Fir’awn) a satru nengka, su kun, endu binetadan ku seka sa makakalimu ka na makailay sa leka endu natuldu ka (sabap) kanu parihala ku.

Su kabpelalakaw nu suled nengka sa pidtalu nin: tutulun ku sekanu sa makatuldu sa wata anan? Na inambalingan nami seka (Musa) kani ina nengka ka endu makatana sekanin endu di malidu i ginawa nin, endu nakapatay ka pan sa sakataw na linepas nami şeka kanu lidu na ginawa nengka endu madakel pan i inibatalu nami sa leka na natangen ka pan sa Madian, mawli na nakawma ka sabap kanu bagi nu Kadenan nengka Musa.

Endu pinamili ku seka kanu ginawa ku.

Angay ka endu su suled nengka, pananggit nu su tanda ku endu di nu minda i tadem nu sa laki (ka tasbih).

Angay kanu duwa lu sa kani (Fir’awn), ka sekanin na nakasagad i galebekin (kadupangin).

Na edtalu kanu sa kadtalu a malanat ka basi makatadem atawa ma-indaw atawa kagilekan.

Tig nilan: Kadenan nami, kagilekan kami sa pakapasangan kami nin atawa imamasla kami nin bu.

Tig nu Allah: da kanu egkagilek ka salta aku sa lekanu, pakakineg aku endu pakailay.

Lu kanu den, edtalu nu duwa sa lekanin i duwa kanu na sinugu kanu na Kadenan nengka, na paunut ka sa lekami su tupu nu Israel endu di ka pedsiksa silan endu saben-sabenal a aden napananggit nami a manga tanda ebpun kanu Kadenan nengka endu su kalilintad na kanu taw a minunut sa tutulu.

Ka benal a naka-wahi sa lekami su siksa na makwa na taw a napandalbut endu dala talima (kanu Allah)

Tig nu Fir’awn: entayn i Kadenan nu banan nu Musa?

Tig nu Musa: Kadenan nami na su minenggay kanu enggaga-isa a binaluy nin a tinutulu nin.

Tig nu Fir’awn: na panun den su manga taw a nangawna?

Tig nu Musa: su Allah i mataw kanilan san sa kitab ka dili malimban endu di nin lipatanan.

Su Allah i minaluy sa lekanu kanu lupa sa nabelat, endu pinakalemwan nin sa lekanu su lalan a bagukitan nu endu pinatulun nin ebpun sa langit su ig endu pinatu’ nami sabap kanu ig su embalang-balangan sa madakel i embibidayanin nin.

Kan kanu endu tuganul nu su manga binatang nu, nakadalem lu ba su manga tanda nu Allah kanu manga taw a aden akal nin.

Nakebpun kanu sa lupa, makambalingan kanu bun sa lupa, endu pambuwaten nami bun sekanu ebpaluman kanu kabangkit sa dunya.

Saben-sabenal a pinailay nami si Fir’awn sa manga tanda nami, na pinandalebutin endu dala talima.

Ya nin pidtalu na: ya nu kyug na matagak nami i dalpa nami sa sih'r (pakayd engka) anan O Musa?

Na pambuwatan nami seka (Musa) sa sih'r na umbal ka sa pasad a enggulan tanu (u endaw tanu) edtalabuka sa di tanu kapasangan tanan.

Tig nu Musa: gay a kangabulig nu, endu gay a mabulig su manga taw sa mapita-pita.

Ginumanat si Fir’awn ka binuligin su manga mataw sa sih'r (pakayd), mawli na mimbalingan (kanu Musa).

Tig nu Musa (kanu manga taw): duwan-duwan nu, da kanu pedtetebu sa Allah sa kalebutan ka binasan kanu nin sa siksa endu saben-sabenal a makalusak su pedtetebu kanu Allah.

Na mibpapalawa silan endu magumpung silan endu namagedunga silan.

Pidtalu nilan: duwa kataw anan na mategel sa sih'r na kyug nilan na pa-awan kanu nilan kanu dalpa nu kanu pakayd (kataw) nilan duwa ka silan i magagaw kanu bagayanan nu, endu silan i mamaday i kyugin kanu madakel a taw.

Na bulig nu den i lekitanu a manga pakayd sa edsap kanu (edtutundug kanu) ka saben-sabenal a badtugan saguna su tumalaw ka ya mapulu.

Tigilan: O Musa! Seka i mawna embutawan sa kategelan atawa sekami i mawna embutawan?

Tig nu Musa: butawan kanu den, su manga tali nilan endu su manga ped na ya kailay lun na mana manga nipay a belansag, ugayd na di kena benal ka salimpang bu.

Kinumedu i paydu a andam kanu ginawa ni Musa.

(Tig nu Allah) pidtalu nami (kani Musa): da ka pegkagilek ka seka bun i makapulu.

Endu pitasi ka inan sa lima nengka sa panakaben nin su langun nu pinambuwat nilan ka entu na kapandayan (inumbal) na sih'r endu di maka-untung su bara-sih'r sa apiya ngin pan i kataw nilan (sa sih'r).

Nakambaba su manga sih'r a namakasugyud, pidtalu nilan i nangimbenal kami kanu Kadenan nu Harun endu su Musa.

Tig nu Fir’awn: babaya kanu den nangimbenal (kani Musa) sa daku pan isugu sa lekanu (i mangimbenal kanu), namandu banan sa lekanu sa sih'r (a si Musa) i dupang, panebpedan ku sekanu sa lima endu ay a edsatiman, endu bitinen ku sekanu san sa manga kayu kulma endu nu katawan u entayn i mapasang i siksa nin endu masama (saki atawa su Kadenan ni Musa?).

Tig nilan (kani Fir’awn): di nami ilabi seka kanu nakawma sa lekami a manga tanda a mapayag a kanu Allah a minaluy sa lekami, na enggula ka den i kyug nengka a penggulan nengka sya sa dunya (aden bun siksa nengka sa gay a mawli).

Benal a nangimbenal kami sa kadenan nami ka endu nin ma-ampun sa lekami su manga kadusan nami endu (ipa-ampun) nami su inipeges nengka sa lekami a sih'r endu su Allah i mapya endu ya bu gasama.

Benal sa su taw a kawmanin sa Kadenan nin na baradusa sekanin na lekanin su jahannam sa di matay na di bun madtalu a bibyag.

Endu su makawma sa lekanin (a Allah) a mu'min a minggalebek sa mapya na silan i aden pangkatanin a mapulu sa surga.

Surga a jannatu ad'n a belagilay sa kababanin i manga pulangi sa dayun sa dayun (taman sa ataman) silan kanu surga, entuba na kanu entayn i midsuti sa kadusan.

Endu saben-sabenal a ini-wahi nami kanu Musa i ilalakaw nengka su manga ulipen ku sa magabi, na betay ka (sa tungkat) su lagat a kaukitan nilan sa egkamala, di ka kagilekan sa magaws kanu (ni Fir’awn) endu di ka maled.

Sineled silan ni Fir’awn kanu manga tantara nin (sundalu nin) na naled silan kanu lagat namakageled silan.

Endu natadingan nu Fir’awn su manga tantara nin endu dala makatuntul.

Sekanu a manga tupu nu Israel na saben-sabenal a linepas nami sekanu kanu satru nu endu pibpasadan nami sekanu siya kanu pipi nu palaw sa kawanan endu initulun nami su pegken nu alman endu salwah (pegken a manga mapya sa dalem 40 lagun sa di nilan kalugatan).

Kan kanu kanu mapya a inirizki n nami sa lekanu endu da kanu endarwaka ka makawma sa lekanu su lipunget ku, su taw a nawman nu lipunget ku na entuba i taw a nakalundang.

Endu saki na mangampun aku kanu midtawbat a nangimbenal endu minggalebek sa mapya, mawli na midtidtu.

(Tig nu Allah): nginan ka bamagayas ka sa gaunanan nengka pan su manga taw nengka O Musa?

Tig nu Musa: tundugen aku nilan bu endu namagayas aku sa leka Kadenan ku ka endu aku nengka gasuwatan.

Tig nu Allah: benal i binatalu nami su taw nengka sa ulyan na kinaganat nengka ka tinading silan ni Samiri (isa a mama a namandu sa sakutu).

Minuli si Musa kanu taw nin sa galipunget a galidu i ginawa nin, tig in kanu taw nin: O manga taw ku! Di kena ba pibpasadan kanu nu Kadenan nu sa pasad a mapya? Ngintu nawget su pasad? Atawa ka ya nu kyugan na makawma sa lekanu su lipunget ebpun sa Kadenan nu ka da nu tumana su pasad nu sa laki?

Tig nilan: di kena bun sa da nami tumana su pasad sa kyug nami ugayd na pina-it kami sa tamuk a palahayasan u manga taw (ni Fir’awn) inibetad nami sa apuy na tinaguwan sa lupa ni Samiri.

Endu pinagemaw ni (Samiri) i sapi a aden uni nin na ya nin pidtalu na nya ba i kadenan nu endu kadenan nu Musa a natagakin.

Di nilan gailay i di makasumpat sa kadtalu (amayka imbityalay nilan) endu di makagkayd kanilan endu di makambarapantag.

Endu saben-sabenal a pidtalu bun ni Harun kanilan sa da pan makawma (si Musa): sekanu a manga taw na nafitnah kanu ka ya nu man Kadenan su Rahman, unuti aku nu endu paginuguti aku nu.

Ya nilan pidtalu: di nami telenan semimba (su sapi) sa taman a di pan makawli si Musa.

Tig nu Musa kani Harun: ngin i nakasapal sa leka sa kinailay nengka sa kanilan sa natading a dala nengka silan sapali?

Di aku nengka baginugutan? Endu pedsangkan nengka i suguwan ku?

Tig nu Harun: Hay wata ni ina! Di ka pegkakangi su sumpa ku endu su buk ku ka benal a saki na nagilekan aku sa madtalu nengka i pinabpipitas ku su tupu nu Israel na di nengka ipamamantag su kadtalu ku sa nailay ku.

Tig nu Musa: ngin i gatagu sa ginawa nengka O Samiri?

Tig in: aden natawan ku a da nilan katawi, kinumuwa aku sa kanu lupa a nadampuwan nu kuda ni (Jibril) initagu ku kanu sapi na entuba i suguwan nu ginawa ku sa laki.

Tig nu Musa: awa ka sya endu taman a di ka matay na edtalu ka i di aku nu pedsupegi endu aden pun pasad a kasiksa sa leka a di nengka malipus endu ilay ka su kadenan nengka saguna a sinimba nengka ka tutungen nami mawli na idtug nami sa makabayug a sambel sa lagat.

Ka yanu bun man Kadenan su Allah a dala wagib a pedsimban ya tabiya na sekanin a langkap su kataw nin kanu enggaga-isa.

Mamba i kapanudtulan nami sa leka (Muhammad) kanu tudtulan nu nangawna endu inenggay nami ebpun sa lekami su Qur’an.

Su di tumalima kanu (Qur’an) na kawgatan sa gay a mawli kanu kadusan nin a kasiksan nin.

Sa di den silan makalyu sa naraka endu sangati kawagin sa gay a mawli i gapananggit nilan.

Su gay a kayup kanu sanggakala endu buligen nami su manga baradusa sa migkabilu su mata nilan.

Na di silan madkadtalu sa matanug (sabap kanu kapasangang nu ganggula) ya nilan ipagedunga: paydu gayd i gay tanu (lu sa dunya) ka naka-sapulu gay bu.

Tig nu Allah: katawan nami i kadtalu nilan na madtalu nu maungangen kanilan su bantang sa naka sagay kanu bu sa dunya.

Endu ibagidsa nilan u panun su manga palaw, na edtalu ka kanilan i pabayugen nu Allah sa ulyana kalupet nin.

Itagak nu Allah sa nadatal a mamagidsan.

Da mailay nengka a mababa endu mapulu.

Entuba a gay na ya nilan talukunan (unutan) su bananawag sa di nilan magaga i di nilan kaunutan endu dala den suara ka lubu tanan sa Allah na dala makineg nengka ya tabiya na uni na sangkad.

Namba a gay na dala makadtabang ya tabiya na su sinugu nu Allah endu nasuwatan i kadtalu nin.

Katawan nu Allah i kasangulan nilan (sa gay a mawli) endu su nataligkudan nilan (sya sa dunya) endu da nilan kalangkapi na kataw.

Endu nakambaba su manga biyas lu sa Allah endu nalugi den su nananggit sa sakutu sa Allah.

Endu su minggalebek sa mapya a mu'min na sekanin na di magilek sa kawmanan i kawagan atawa (di mangandam) sa kakulangan i kapiyan nin.

Endu pinatulun nami sa leka (Muhammad) su Qur’an sa basa na Arab endu pidtinatad nami su makagilek ka malemu kanilan i kagilekan silan atawa ka makapagumbaya silan.

Mahasuti su Allah a datu a tidtu endu di ka bamagayasi su Qur’an sa di pan gapasad i kape- wahi lun sa leka endu ya ka edtalu na Kadenan ku umani aku sa kataw.

Endu saben-sabenal a mibpasad kami sa kani Adam kanu nawna na nalipatanan nin endu dala nami maparuli sa lekanin i katigkel.

Endu pidtalu nami kanu manga malaikat i sugyudi nu si Adam na sinumugyud silan ya tabiya na su Iblis ka minenda.

Na pidtalu nami kani Adam i namba na satru nengka endu si kaluma nengka, na da kanu enggula sa makapalyu kanu nin sa surga ka malugat ka sa kapaguyag.

Ka di ka magutem sya sa surga endu dika mabusukul.

Endu di ka gemedam sa kawaw endu di ka kasenangan.

Na sinasat a shaytan, ka yanin pidtalu: Hay Adam! Tutulun ku sekanu sa kayu a makan sa di ka makalyu sa surga endu kadatu a da kadtamanin?

Kinuman silan kanu (unga) na kayu na nasawan su aurat nu uman isa kanilan endu uman isa na nakakwa sa lawn a kayu a pakasapeng nin sa aurat nin endu nasupak nu Adam su kadenan nin sa nakasulak.

Mawli na pinamili nu Kadenan nin endu tinawbat nin endu tinutulu nin.

Tig nu Allah: embaba kanu langun (lu sa lupa) sa ya nu enggulan su di kapamagayun na makawma bun su tutulu ku (sa lekanu) su taw a tumuntul kanu tutulu na di matading endu di makaduwan-duwan sa gay a mawli.

Endu su di tumalima kanu Qur’an ku, na aden kauyagan nin a masimpit (atawa siksa sa kubur) endu buligen nami silan sa gay a mawli a napisek.

Ya nin madtalu: Kadenan ku nginya ka pisek aku na saben-sabenal a di kena aku pisek?

Tig nu Allah: kagina nakawma sa leka su manga tanda nami (Qur’an) na tinagak nengka na tagaken ka mambu san sa naraka.

Endu mamba i kabalas nami kanu mushrik endu dala pangimbenal kanu ayatan nu Kadenan nin endu su siksa sa gay a mawli i mapasang a di gapinda.

Ngintu ka di pan makatutulu kanilan su bininasa nami a madakel a manga taw a nangawna pan kanilan na belalakaw bun silan kanu manga dalpa a nangabinasa, na entuba na manga tanda nu Allah kanu manga taw a aden akalin.

U di kena bu nawna den su kadtalu ebpun kanu Kadenan nengka na wagib den i binasan silan endu siksan silan.

Na tigkel ka (Muhammad) kanu kadtalu nilan endu tasbih ka sa pugi nengka kanu Kadenan nengka sa di pan makasebang su senang endu di pan pedsedep, endu ped kanu magabi na tasbih ka kanu malamag ka kasuwatan ka (nu Kadenan).

Endu di ka pedtuliki (pedsekeli) su nakakwa sa embalangan na mapya sya sa dunya ka ipembatalu nami kanilan, su rizki (su pahala) kanu Kadenan negka na ya labi i kapiya nin endu ya gasama.

Endu sugu ka su pamilya nengka sa kadsambayang endu edsabari ka, ka di kena kami pegkuwa sa rizki nengka ka, sekami i pe-rizki sa leka, endu su surga na sya sa gilek sa Allah.

Endu pidtalu nilan u nya ba ka enggan tanu nin sa ayat ebpun sa Kadenan nin, na nakawma bun kanilan su mapayag lu kanu manga kitab a nawna. (mana su Taurat endu Injil).

Endu u siniksa nami menem silan sa siksa sa dapan makawma (su Qur’an) na ya nilan menem edtalun na: Kadenan nami u nya ba ka aden sinugu nengka sa lekami a sinugu ka unutan nami su ayatan nengka sa di kami pan makalusak (sa gay a mawli) endu di kami pan paka-naraka.

Edtalu ka (Muhammad) uman isa sa lekitanu na magangapa na pagangapa kanu den mun ka di sumala na katawan nu bun u entayn i nakabantang sa lalan a matidtu endu nakatuntul.

Pedsiken den kanu manga taw su gay a mawli na silan na dala gatagu sa ginawa nilan sa ingat nilan, pedtaligkudan nilan.

Guna makawma kanilan su Qur’an ebpun kanu Allah na pakikinegen nilan sa bagungaten nilan endu silan na endadalemet bu.

Untengaw i manga atay nilan endu mamagedunga silan kanu manga kafir: dala bun inan (si Muhammad) ka manusya a pagidsan tanu bun, nginan unutan nu i sih'r a katawan nu bun i sih'r?

Tig nu (Muhammad): Katawan nu Kadenan ku su kadtalu siya sa langit endu siya sa lupa endu sekanin a pakakineg a mataw.

Ugayda pidtalu nilan: (namba Qur’an anan) na nakadsisimbul a taginepen atawa inidtebu nin atawa bayuk, i-sya nin i tandanin sa mana su nangawna a sinugu.

Dala bun kanu nangawna a manga taw kanu dalpa a nakailay sa tanda a bininasa nami ka di bun silan mangimbenal.

Endu dala sinugu nami a nawna sa leka (Muhammad) ya tabiya na manga mama a pe- wahiyan nami silan, idsay nu su taw a mataw kanu di nu katawan.

Endu dala nami baluya silan (su sinugu) sa pagelin lawas a di keman sa pegken endu dala kanilan i di matay silan.

Mawli na tinuman nami kanilan su pasad (tyuba) na linepas nami silan endu su nagkahanda nami, na bininasa nami menem su napandalebut.

Saben-sabenal a pinatulun nami sa lekanu (Qur’ an) sa nakadalem lun su makagkapiya sa lekanu na ngintu ka di kanu magungangen?

Endu madakel i dalpa a bininasa nami su dupang endu mawli na pinambuwat nami i manga taw a salakaw kanilan.

Guna nilan madsagipa su tiyuba nami (sa pakawma den) na balalaguy silan.

(Tig nu malaikat): da kanu balalaguy, edsalumani nu bun su kananam nu sa (mapya) endu su pegkalebenan nu ka basi kaidsan kanu.

Ya nilan nadtalu: nabinasa tanu sabap sa kafir tanu.

Di den gapinda lu ba a kadtalu nilan taman sa binaluy nami silan sa mana den pinagagani a minatay.

Di kena ya nami kinabinaluy sa langit endu lupa i dala katagan nin ugayda tanda a kapegkagaga nu Allah.

U pigkahanda nami i kadsimpang sa kaluma atawa manga wata na ya nami binaluy na sya bun sa lekami u pinggalebek nami, ugayd na da nami enggalebeka.

Ugayd na tabangan nami su bantang kanu baatil na mapunas (su baatil) na ma-iling su baatil, endu lekanu a manga kafir i naraka (sabap) kanu kadtalu nu (aden kaluma/wata nu Allah).

Endu kanu Allah su dalem nu manga langit endu su lupa endu su malaikat na di silan pemamasla sa simba nilan sa Allah endu di silan gasemu na di galugat.

Di gapinda i tasbih nilan sa magabi-malamag.

Atawa minumbal bun silan sa manga kadenan sya sa lupa a manga watu manga kayu a di maka pambibyag sa minatay?

U naduwa timan bu i kadenan atawa aden bu manga kadenan a salakaw sa Allah na nabinasa su dunya, mahasuti su Allah a Kadenan nu Ar'sh kanu langun nu kadtalu nu manga mushrik.

Di kaidsan (su Allah) sa galebekin, silan (a inaden) i kaidsan kanu manga galebek nilan.

Kena ba minumbal silan sa salakaw sa Allah a manga kadenan? Edtalu ka (Muhammad) kanilan: pambuwat nu i tindeg nu ka nan su Qur’an a tindeg nami endu su nangawna sa laki, ugayda ya madakel kanilan i di mataw sa haqq, na pembalawagan nilan su haqq.

Endu dala sinugu nami a nawna sa leka (Muhammad) a sinugu ya tabiya na ipe-wahi nami sa lekanin i dala kadenan a wagib a pedsimban ya tabiya na Saki, na simba Aku nu sa pakaisa-isa nu bu a Kadenan.

Endu pidatlu nilan: namaluli su Allah sa wata, mahasuti su Allah, su manga malaikat na manga ulipen nin a manga mapulu.

Endu di silan (malaikat) ka-unanan a kadtalu endu silan na endaw i suguwan kanilan na penggalebeken nilan.

Katawan nu Allah su galebek nilan endu su da nilan pan manggalebek endu di silan makasafaat ya tabya na su sinugutan nin endu silan na su gilek nilan sa Allah na di gadala kanilan i geda-geda.

Entayn i makadtalu kanilan sa saki na kadenan aku a salakaw sa Allah na balasan nami sa naraka jahannam, mamba i kabalas kanu manga taw a salimbuten.

Ngintu di gailay nu manga kafir (da nilan katawi) su manga langit endu su lupa sa paganay na dala makabpitas na pinabpitas nami? Endu binaluy nami ebpun sa ig sa nawyag i langun na enggaga-isa, na di silan mangimbenal.

Endu binaluy nami sya sa lupa i manga palaw a pakatigel kanilan sa di kanggagalebek nu lupa endu binaluy nami i ka-ukitan na manga lalan ka malemu lemu kanilan i maka-tuntul silan kanu kahanda nilan.

Endu binaluy nami (Allah) su langit a naka-atep sa di makabetad sa lupa endu silan (a kafir) na su manga tanda nami na di nilan pedsulimanen.

Endu sekanin (Allah) i minaluy sa magabi endu malamag, endu senang endu ulan ulan, uman isa na bagukit sa lalanin.

Dala binaluy nami a manusya a nawna sa leka (Muhammad) a di matay na matay ka bun na silan pan i di matay?!

Langun na barangyawa na makananam sa kapatay endu pembatalun nami sekanu sa mapasang endu mapya (sya sa dunya) endu siya kanu bun makambalingan sa laki.

Amayka nailay ka (Muhammad) nu manga kafir na dala pakaydan nilan sa leka ya tabiya na pagumpaken ka nilan sa ya nilan edtalun na: namba besen i mama anan a pedtakudi sa kadenan nu? endu silan na kanu kalabit kanu Allah na gafir (nalipatanan) silan.

Binaluy su manusiya sa masasaw na ipailay ku sa lekanu su manga tanda ku na da kanu pedsasaw.

Endu pedtalun nilan: na kanu i kawma na pasad a siksa amayka benal kanu a manga sinugu?

U katawan nu manga kafir bu su kutika a di kalapisan su beneng nilan kanu naraka endu su manga bigkugung nilan endu di silan katabangan na di nilan madtalu.

Ugayd na makawma kanilan sa matekaw a maka bengang kanilan na di nilan magaga temulak endu dala kanilan i makakisu i waktu nin.

Saben-sabenal a pinagumpak nilan bun su manga sinugu a nauna sa leka na nakadadsang kanu manga taw a bangungat su siksa nu kabpagungat nilan kanu manga sinugu nu Allah.

Edtalu ka (Muhammad) kanilan u entayn i tumuldu sa lekanu kanu magabi endu malamag amayka makatulun su siksa nu Allah? Dala kanilan i tadem kanu Allah.

Atawa su manga kadenan nilan i makatabang kanilan a salakaw sa lekami, di magaga nu manga barahala i katabang nilan sa ginawa nilan endu dala makatuldu kanilan a makabpun sa lekami.

Ugayd na inikalimu nami silan endu su manga lukes nilan taman sa migkalendu su umur nilan na di nilan gailay i pegkulangan nami su dulunan nu manga lupa (a pegkamalan nilan) na silan pan basi i paka-atu (pakagaga)?

Edtalu ka (Muhammad): ya ku ibangindaw na wahi, endu di makakineg su bisu sa enggaten amayka enggaten silan.

Amayka nakawma sa kanilan i paydu gayd kanu siksa nu Kadenan nengka na ya nilan edtalun: nabinasa tanu sa kinag-kafir tanu.

Endu ibetad nami su timbangan a bantang sa gay a mawli na dala madsalimbut apiya sakataw apiya paydu apiya ngin den i kanawtin apiya mana bu lagas a manawt na makambuwat nami bun ka mapya i kadtimbang nami.

Saben-sabenal a inenggay nami kani Musa endu si Harun su kitab (Taurat) endu tutulu endu indawan kanu manga magilek sa Allah.

Silan a manga taw na kagilekan sa kadenan nilan sa gayb endu silan na su gay a mawli na pangandamen nilan.

Endu namba a indawan a barakat, initulun nami, na ngintu ka sekanu bun i mungkir lun?

Endu inenggay nami kani Ibrahim su tutulu sa dapan mabalig endu katawan nami i nakadayt sa lekanin.

Endu pidtalu nu Ibrahim kani ama nin endu su manga taw nin: ngin i nyaba manga barahala a niya a pedtakenan nu (pedsimbanu)?

Tig nilan: nailingan nami kanu manga kalukesan nami a pedsimban nilan.

Tig nu Ibrahim; saben-sabenal a sekanu endu su manga lukes nu na natading silan sa mapayag.

Tig nilan: aden na-it nengka a bantang (a agama), atawa ka pendalemet ka bu?

Tig nu Ibrahim: Kadenan nu na su Kadenan nu manga langit endu su lupa, entuba i minaluy lun, endu kuyug aku kanu midsaksi.

Endu idsapa ku sa Allah na pamakaydanan ku i manga barahala nu anan sa ulyan a kataligkud nu sa kawli nu.

Ya pinakaydan nu Ibrahim kanu manga barahala na linupetin ya tabiya na su masla nin (i da nin lupeta) ka endu nilan mailay (inipasalay nin i piku kanu masela a barahala).

Ya nilan nadtalu: entayn i namakayd sa manga kadenan nami a nya? Entuba a taw (linemupet lun) na nakasagad i kadupang nin.

Tig nu madakel: nakineg nami i baguwata a baguway-way lun sa yanin kun ngala na bedtun sa Ibrahim.

Tig nilan: pa-sya nu ka endu mailay nu manga taw ka endu silan makadsaksi sa sekanin ba i namakayd kanu manga kadenan.

Tig nilan: seka ba i namakayd sa manga kadenan nami a nya O Ibrahim?

Tig nu Ibrahim: namba i namungkayd na masla nilan anan idsay nu banan amayka makadtalu.

Ya nilan nambalinganan su ginawa nilan ya nilan nadtalu na sekanu bun i manga dupang.

Mawli na sinemangul silan sa kabpalawa, tig nilan: saben-sabenal a natawan nengka bun (Ibrahim) i di makadtalu i kadenan nami.

Tig nu Ibrahim: na enduken ka pedsimban nu i salakaw sa Allah a da kataganin sa lekanu, di kanu nin kagkaydan?

Ngin den a kaledsik i lekanu, endu pedsimban nu anan a salakaw sa Allah, di kanu pakapagitung?

Tig nilan: tutung nu (si Ibrahim) endu tabangi nu su manga kadenan nu amayka enggalebeken nu i katabang nu lun.

(Tig nu Allah): pidtalu nami kanu apuy egkatenggaw ka endu lepas ka si Ibrahim.

Pegkyugan nilan pembinasa na binaluy nami silan i nangalugi.

Linepas nami (si Ibrahim) endu si Lut lu kanu dalpa a barakat kanu dunya.

Endu inenggay nami sa lekanin si Ishaq endu si Ya'kub a buwang nu pinangeni nin endu silan na binaluy nami a manga salih.

Endu binaluy nami silan a kanga-unutan a tumutulu kanu kasuguwan nami endu su wahi nami kanilan sa kanggalebek sa mapya endu katunay sa sambayang endu kanggay sa zakat endu sekami i pedsimban nilan.

Su Lut na inenggan nami sa hukuman endu kataw, endu linepas nami kanu dalpa sa entuba a dalpa na penggalebek i taw nin sa maledsik, silan a manga taw na sagad i kaledsikin, benal a manga taw a nakalyu silan sa inugut sa Allah.

Pinaludep nami (si Lut) kanu limu nami ka sekanin na kuyug kanu manga taw a salih.

Endu su Nuh, tinawag in su Kadenan nin kanu nawna a timpu na tinalima nami sekanin endu su pamilya nin kanu lidu na ginawa nilan a masla.

Tinabangan nami sekanin kanu manga taw a napandalebut kanu manga ayatan nami ka mawag intu a manga taw, na pinageled nami silan langun. (kanu degan a masla).

Labit ka si Daud endu si Sulayman, kinakukum nilan kanu pamulan endu su kambing sa tinadtab nu kambing su pamulan endu kadsaksiyan nami su kukuman nilan duwa.

Pinasabutan nami si Sulayman (sa kukuman) endu uman isa kanilan na inenggan nami sa kukuman endu kataw, endu pinandayan nami kanu Daud su palaw a bagamung pedtasbih, maytu bun su papanuk, sekami (Allah) i minggalebek sa entuba.

Pinakatawan nami kanu Daud i kaumbal sa balegkas sa kambunuwa (kelong) sa maka-alaw sa pedang, na wagib i kadsukur sa Allah.

Kanu Sulayman i sambel a mabagel sa balalaguy sa susuwanin lu kanu lupa a pinambarakat nin (lu sa Sham) endu sekami (Allah) kanu langun nu enggaga-isa na katawan nami.

Endu ped kanu shaytan i papedseneben nin sa lagat, endu aden pan salakaw a galebekan endu pedtuldun nami silan.

Endu su Ayyub kanu kinandu’a nin, Kadenan ku nasugat aku na pakagkayd endu seka i muna a malimu kanu langun nu malimu.

Tinalima nami sa lekanin sa inawa nami sa lekanin su pakagkayd endu inuyag nami sa lekanin su manga wata nin endu aden pan mapya a limu ebpun sa lekami endu indawan kanu barasimba.

Endu su Ismail endu si Idris endu si Dhulkifl, uman isa kanilan na kuyug kanu manga salih.

Pinaludep nami silan kanu limu nami ka silan na manga taw a salih.

Labit ka su Yunus sa kinaganat nin sa galipungetan nin su manga taw nin sa inantap nin i di nami makena sekanin, na nakandu’a kanu dalem a malibuteng (kalibutengan nu lagat, kalibutengan nu magabi, endu siya kanu tiyan na seda) sa: benal a dala Kadenan a pedsimban ya tabiya na seka (Allah), mahasuti a Kadenan, nakuyug aku kanu manga taw a dhaalim.

Na tinalima nami sa lekanin endu linepas nami sekanin kanu lidu na ginawa nin endu mamba i kalepas nami kanu manga mu'min.

Endu si Zakariya a mindu’a sa Kadenan nin: Kadenan ku di aku pedtagak sa isa ku bu sa dala wata ku endu seka i mapya gayd a makawaris.

Tinalima nami sa lekanin endu inenggay nami sa lekanin si Yahya endu pinagkapiya nami sa lekanin su kaluma nin ka silan na bamagayasan nilan i manga mapya endu pedsimban kami nilan sa lilini endu andam (sa siksa) endu silan na manga magilek (sa Allah).

Endu su silan a babay a suti lawas nin (Maryam) na iniyupan nami ebpun sa bagel nami endu binaluy nami sekanin endu su wata nin a tanda siya sa dunya.

Su niya ba a agama nu a Islam na satiman bu, endu saki bu i Kadenan nu na paka-isa aku nu bu a simban nu.

Mimbida-bida (Yahudi endu Nasrani) a di mamagayun na uman isa kanilan na siya bun makawli sa laki.

Na entayn i enggalebek kanu manga mapya a mu'min, sekanin na dala makasapal kanu balasin endu sekami (Allah) kanu manga galebekin na ipedsulat nami sa lekanin.

Endu iniharam kanu manga taw a bininasa nami sabap sa kadupang nilan i makambalingan pan silan siya sa dunya.

Taman sa amayka inuka (kabukatan) su kalyu nu Ya'juj endu si Ma'juj na mamagayas silan kanu manga bukulud.

Nakasupeg su pasad a haqq, na langun u tudtul na mapayag den kanu manga mata nu kafir su sinupak nilan, (ya nilan bu madtalu) na nabinasa tanu, ka benal a dala sabut tanu sa niya ba kena ka sekitanu na manga kafir tanu.

Sekanu (manga panakutu) endu su manga kadenan nu a salakaw sa Allah na ibpelaleg sa naraka, sekanu i pakadalem kanu naraka.

Umana bu ka tidtu a manga kadenan na di silan makaludep (sa naraka) endu langun nilan na da kalyu nin sa naraka.

Silan sa naraka na belenggak, da makineg nilan (sa katanug na sebu nu apuy).

Benal a silan a manga taw a nawna den sa lekami kapiya nilan na mawatan silan sa naraka.

Di nilan makineg i suwara nu naraka endu silan na endaw i kalinyan nu ginawa nilan na gakuwa nilan, tatap silan sa surga.

Di malidu i ginawa nilan kanu makatekaw a masla (kagubal sa dunya) endu bagalawn silan nu manga malaikat sa ya nilan edtalun na: nya den ba su gay a pinagadilan nu (sa makwa nu siya sa surga).

Su gay a lulunen nami su langit sa mana su kalulun sa kaltas sa mana su paganay a kinabaluy nami lun i kambalingan nami lun, pasad sa lekami sa enggalebeken nami.

Saben-sabenal a inisulat nami lu kanu manga kitab a nawna (Zabur, Taurat, Injil, endu Qur’an) sa uliyan na lu sa (Lawh Al-Mahfudh), su lupa na ya bun makawaris lun na su manga ulipen ku a salih.

Benal su Qur’an na natabuan gayd a makapa- surga kanu bamedsimba sa Allah.

Da kinasugu nami sa leka (Muhammad) a di kena limu kanu dunya.

Edtalu ka (Muhammad): iniwahi sa laki i Kadenan nu na Kadenan a satimanin bu (Allah) na ngintu sinangkupan nu i namba?

Na amayka menda silan (di nilan taliman) na edtalu ka kanilan (Muhammad): mamagidsan i kambunuwa, ka lekanu na sakalebu sa laki endu di ku katawan u masupeg atawa mawatan pan su siksa sa lekanu.

Su Allah i mataw sa mapayag a kadtalu, endu katawanin pan su ibagena nu.

Di ku katawan, basi tyuba sa lekanu endu gagalu a kapenanam-nanam (sa dunya).

Edtalu ka (Muhammad): Kadenan ku kukum ka (su pagelatan nami) sa haqq, endu Kadenan nami a malimu na papedtabang kami kanu kadtalu nilan (sa aden kaluma endu wata nu Allah) sa papendalebuten aku nilan.

Sekanu a manga taw na ikagilek nu su Kadenan nu, su kalinug a ipenggubal (sa dunya) na masla (timbang a siksa).

U mailay nu bu na kalimpangan nu babay a pedsusuwan i papedsusu nin, endu makambata su magingay sa di kena waktu, endu ya nengka mailay kanu manga taw na galangut (sabap sa gilekin) na di kena silan galangut ugayd na siksa nu Allah a sangat i kapasangin (di nilan gagenggen).

Kaped kanu manusya nabpalawa kanu Allah sa dala sabutin endu yanin unutan i shaytan a natading.

Pinadtanan den (kanu shaytan) sa entayn i munut lun na tadingen nin, endu lu nin tutulun sa siksa a pegkalaw-kalaw.

Sekanu a manga taw, amayka penduwa-duwa kanu sa kambuwat nu na benal a binaluy nami sekanu ebpun sa lupa, mawli na nutfah (midsimbul a ig na mama-babay), mawli na lugu a aden sapu nin, a napasad i gapa nin endu aden bun da mapasad (galudos), ipebpayag nami sa lekanu endu papedtangenen nami kanu (ludep nu tyan) su mag-kahanda nami taman sa timpu nin a napasad, mawli na palyun nami sekanu a wata a manawt, mawli na masampay nu su kabagel nu (kanguda) endu aden bun pebpatay (sa mangagan) endu aden bun pakagaws sa taman (sa matwa) sa mababa gayd i kailay lun ka mimbalingan sa wata endu dala den katawanin apiya paydu (bungaw), endu mailay nengka su lupa sa mamala, na amayka pinatulunan nami sa ulan na enggagalebek endu egkapulu endu patun nin i embalangan na mapya i palas nin.

Kagina su Allah na sekanin i haqq (bantang) endu sekanin i banguyag sa namamatay endu kagaga nin i langun na enggaga-isa.

Benal a su gay a mawli na di ebplis na makawma, endu benal su Allah na pambuwaten nin su (manga taw) sa kubur.

Endu ped kanu taw na ebpalawa sa Allah sa dala kataw nin endu dala tutulu endu dala kitabin a masigay.

Lemengi sa bala sa kasandag ka endu gatading sa agama, lekanin sya sa dunya i kayaya endu pananamen nami sekanin sa gay a mawli kanu siksa a pakatutung.

Sabap sa galebekan nu lima nengka, endu benal su Allah na di edsalimbut kanu manga ulipen nin.

Endu ped kanu manga taw a pedsimba sa Allah sa penduwa-duwa na amayka nasugat a mapya na makatana su atay nin endu amayka nasugat na batalu na enda nin su agama, na nalapis sa dunya endu lu sa akhirat na entuba i kinalapis a mapayag.

Pedsimba sa salakaw sa Allah a di makagkayd sa lekanin endu di bun makangguna sa lekanin, entuba i gatading sa mawatan.

Pedsimbanin i ya masupeg i kabinasan nin sa pakangguna nin, mawag a benal a pedtabang endu ngin den i kawag nin a tagapeda.

Benal su Allah na paludepen nin su manga mu'min a minggalebek sa manga mapya sa manga surga a belagilay sa kababan nin i manga pulangi, su Allah na enggalebekenin i kahanda nin.

Entayn i taw a antapen nin i di tabangan nu Allah su sinugu nin (Muhammad) sya sa dunya endu akhirat na pekeIenin i ginawa nin sa tali kanu atep nu walay nin ka ebpatay, na ilaynin u ngintu su galebek nin antu na maawa nin su di nin kalilinyan a tabang (kanu Muhammad).

Endu mamba i kinapatulun nami sa manga ayat a manga mapayag endu su Allah na tutulunin endaw i magkahanda nin.

Benal su manga mu'min endu su manga Yahudi endu su manga Nasrani endu su Sabit endu su Majusi endu su manga mushrik na su Allah i kumukum kanilan sa gay a mawli, su Allah na langun nu enggaga-isa na kadsaksyan nin.

Ngintu da nengka katawi su Allah na pedsugyudan nu dalem nu manga langit endu su lupa endu senang endu ulan-ulan endu su manga bitun endu su manga palaw endu su manga kayu endu su mamelanap-lanap, endu su kadakelan kanu manga taw? Endu madakel bun menem (kanu manga taw) i nawagib sa lekanin su siksa, endu su taw a ilusak nu Allah na dala makapulu lun, endu su Allah na penggalebekenin i kahanda nin.

Su duwa a di magayun (mu'min-kafir) na lu silan egkukum sa Allah, su kafir i ginapa i balegkasin ebpun sa naraka sa pembubuwan su ulu nin sa midtaman i kayaw nin a ig sa naraka.

Pakatunag sa dalem na tyan nilan endu upis nilan.

Aden pan kanilan i manga putaw a ipembetay (dinidisan).

Uman silan miyug lemyu sa naraka endu lidu na ginawa nilan na imbalingan bun silan (na edtalun menem kanilan): nanami nu su siksa a pakatutung.

Saben-sabenal su Allah na paludepen nin su manga mu'min a minggalebek sa manga mapya sa surga a belagilay sa kababanin i manga pulangi, na aden pamun kanilan i manga pagigimuwan a manga bulusu a bulawan endu muntya, endu ya nilan balegkas na sutra.

Endu natutulu silan sa mapya a kadtalu (laa ilaaha illa Allah) endu tinutulu silan kanu lalan a mapya (agama Islam).

Benal su manga kafir na ipedsapal nilan i kaunut sa lalan sa Allah (Islam), endu su Masjidil Haram na binaluy nami kanu manga taw sa mamagidsan, (haj-umrah) su pedtakena endu su belagkut, endu su (manga taw) pegkahanda kanu dalem nin sa mawag na pananamen nami sekanin sa siksa a masakit.

Endu initutulu nami kanu Ibrahim su nabetadan nu baytullah, (tig nu Allah): di ka pedsakutu sa apiya paydu, endu suti ka su walay ku kanu bamed-tawaf endu su bamedtindeg endu su peruku-pedsugyud.

Pakatawika (Ibrahim) sa manga taw su kagkagi, makawma silan sa belalakaw endu pegkuda sa unta a malubay, embala-bala a mawatan i gasunguwan nin.

Ka endu nilan kadsaksyan su makambarapantag kanilan (sa gay a mawli), endu katademan nilan i ngalan nu Allah kanu paydu a gay (kanu kasumbali nilan) sa kanu inirizki nu Allah kanilan ebpun kanu manga binatang a pangangayamen a pedsumbalin (Qurban-Hadyi), na kan kanu lun endu pakan nu su gapasangan gayd sa kabpaguyag.

Mawli na ituman nilan su langun u (manaasikul haj) endu ituman nilan i manga samaya nilan, endu tumawaf silan sa (Ka'bah) a danden a walay.

Su taw a pakasla nin su agama nu Allah na entuba i makagkapiya sa lekanin lu sa Kadenan in, endu inihalal sa lekanu su manga binatang, ya tabiya na su hinaram, na edsanggilay nu su maledsik ebpun kanu manga barahala, endu edsanggilay nu su kadtalu a kalebutan (atawa sakutu).

Bantang i kasangkup sa Allah, di semakutu sa lekanin, endu su taw a semakutu sa Allah na mana bun tinumibpu ebpun sa langit a bamagagawan na papanuk, atawa ka mana bun nasugat na sambel a nakabayug sa mawatan.

Su taw a pakasela nin su manga (galebekanin) a simba sa ebpiya-piyananin na tanda nu gilek sa Allah ebpun sa manga atay.

Aden kangataganin sa lekanu (i pinanumbali) taman kanu timpu a paydu, mawli na su tidtu a kataganin na lu sa walay a danden (baytullah).

Uman isa tumpuk kanu nangawna na aden pedsumbaliyanin, ka endu nilan katademan su ngalan nu Allah kanu inirizki nin kanilan a manga binatang a pangangayamen, su Kadenan nu na Kadenan a isa bu na sekanin i sangkupi nu, endu pakalilini ka (Muhammad) su manga taw a bangalimbaban sa Allah.

Amayka linabit su Allah na egkelep i atay nilan sa gilek nilan, endu matigkel silan sa makasugat kanilan a mapasang (batalu), endu pedtindeg silan sa sambayang, endu su ped kanu rizki kanilan na pem-baranggyan nilan.

Binaluy nami sa lekanu su unta a tanda nu agama nu Allah, aden pakagkapiya nin sa lekanu, na labit u i ngala nu Allah sa kasumbali lun, amayka minatay den sa da den galebekin na entupan ka pagitung nu i kakan nu lun, endu pakan nu su da pegkenin a di bangeni, endu su da bun pegkenin a bangeni, mamba i kinapandaya nami lun sa lekanu, ka endu kanu makadsukur sa Allah.

Di pakasampay sa Allah su lugu endu su sapu nin ugayd na ya pakasampay na su gilek ebpun sa lekanu, mamba i kinapandaya nami Iun sa lekanu, ka endu kanu makatakbir sa Allah kanu initutulu nin sa lekanu, endu pakalilini ka (Muhammad) su manga taw a ebpiya-piya.

Benal su Allah na pangalawanin sa makagkayd su manga mu'min, su Allah na di nin kyugan su di kasaligan.

Inisugut kanu manga mu'min i embunuwa silan, kagina dinupang silan, endu su Allah i tumabang kanilan a pakagaga.

Su silan a binugaw sa dalpa nilan sa dala kawagibin, ya tabiya (a kinabugaw) na kapedtalu nilan sa ya nami kadenan su Allah, endu di kena bu su kalbihan nu Allah kanu manga taw a mu'min kanu manga kafir na nagubal su pedsimban nu ulama nu manga Yahudi, endu su pedsimban nu manga Nasrani, endu su manga masjid a pedtademan sa Allah sa madakel, endu idsabek nu Allah su taw a idsabekin su agama nu Allah, su Allah i mabagel a mapulu.

Silan a manga taw na amayka nakadtakena silan kanu lupa na itunay nilan su sambayang endu zakat endu isugu nilan su mapya endu isapal nilan su mawag, endu lu bun sa Allah i kambalinganan nu manga taw endu langun nu galebek.

Amayka pandalebuten ka nilan na pinandalebut nilan bun su nangawna kanilan su kawm nu Nuh endu su Aad endu su Thamud.

Endu su kawm nu Ibrahim endu kawm nu Lut.

Endu su manga tagapeda nu Madian, endu pinadalebut bun su Musa, na pinadtaday ku su kafir, mawli na bininasa ku silan, na di ebplis i katumpalak ku kanilan.

Madakel i manga dalpa a bininasa nami sa entuba na dupang i taw nin, na nalundus i manga walay nilan, endu su kalut a nailatan, endu maligay a mabagel sa namamatay kigkuwan lun.

Ngintu ka di silan lumalakaw kanu lupa ka endu kataguwan silan a pusung a magungangen, atawa manga tangila a ipanuliman, ka di man gapisek su manga mata nu, ugayda ya gapisek na su manga pusung sya sa laleb.

Endu pedtagadan kanilan sa makawma den kanilan i siksa, na di man ebplis i pasad u Allah, endu benal a sagay lu sa Kadenan nengka na timbang a sangibu lagun sya sa dunya.

Endu madakel a dalpa a pinadtaday ku, a benal a dupang i taw nin, mawli na bininasa ku, endu sya bun silan sa laki makadsunud.

Edtalu ka kanilan (Muhammad): sekanu a manga taw! Benal a saki na ya bu laki na kapapedtidtu a mapayag.

Su manga mu'min endu minggalebek sa manga mapya na kanilan su ampun endu rizki a mapulu. (surga)

Su manga taw menem a ya nilan galebek na pebpelnen (su Qur’an) a di nilan pagalagan su namangunut kanu nabi na silan i manga taw kigkuwan sa apuy sa naraka.

Endu dala sinugu nami a nawna sa leka (Muhammad), endu dala nabi ya tabiya na aden binatya nin a ayat, na simbulan nu shaytan su binatya nin, na batalen nu Allah su inamung nu shaytan, mawli na atul nu Allah su manga ayatin, su Allah i mataw sa mapayag-masulen.

Ka mabaluy su binatya nu shaytan a fitnah kanu nakadalem kanu manga atay nilan i dalu, endu manga tegas i manga atay nilan, endu su manga salimbuten na mawatan i katalima nilan sa haqq.

Endu katawan u manga taw a aden ilmu nin su Qur’an na haqq ebpun kanu Kadenan nengka na pangimbenalen nilan endu makatana su manga atay nilan, endu su Allah i tumutulu kanu manga mu'min kanu lalan a matidtu (Islam).

Endu di gapinda kanu manga kafir i kanduwa- duwa kanu Qur’an taman sa makawma kanilan sa matekaw su kabangkit sa dunya (atawa kapatay) atawa makawma kanilan i siksa kanu gay a da den kapiya nin kanilan.

Su kadatu kanu gay a mawli na kanu Allah, kukumen nin silan, na su manga mu'min a minggalebek sa manga mapya na lu silan kanu dalem u surga a na’eem.

Su manga kafir menem endu napandalbut sa manga ayatan nami na kanilan menem i siksa a makalusak kanilan.

Endu su manga taw a nalalaguy sabap sa agama nilan mawli na nabunu silan atawa minatay silan, na pe-rizkiyan nu Allah silan sa mapya a rizki, endu su Allah i mapya gayd a pe-rizki.

Paludepen nu Allah silan sa kaludepan a kasuwatan nilan, endu su Allah i mataw sa mapayag-masulen.

Kagina su taw a mu'min a sinemuli sa mana bun su kinapakaydun, mawli na pindupangan sekanin, na tabangan u Allah ka su Allah na malasam a bangampun.

Su Allah na ibeludepin su magabi kanu malamag, endu iludepin su malamag kanu umagabi, endu su Allah na pakakineg a pakailay.

Saben-sabenal kanu Allah na bantang endu su pedsimban nilan a salakaw sa Allah a barahala na batal, endu benal su Allah i mapulu a masla.

Di nengka gailay i papedtulun nu Allah ebpun sa langit i ig, na mabaluy su lupa sa pegkagadung, su Allah na magungaya kanu ulipenin a mataw kanilan.

Lekanin a (Allah) su dalem na pitu lapis a langit endu lupa, endu su Allah i kawasa a pebpugin.

Di nengka gailay i pinandayan nu Allah sa lekanu su lupa endu su bagedan a balalaguy sa lagat sa kahanda nin, endu pedsegedanin su manga langit sa di makabetad sa lupa ya tabiya na kahandanin, su Allah na malasam a malimu kanu manga taw.

Sekanin a (Allah) i minuyag sa lekanu, mawli na imatayan kanu nin, entupan a uyagen kanu nin, benal su manusya na madakel i kakafirin.

Binaluy nami kanu uman isa i agama nin a penggalebekenin, na da ka magukag (Muhammad) kanu salimpang nilan, endu pangenggat ka kanu agama nu Kadenan nengka, ka seka i natutulu sa matidtu.

Amayka ibpalawa kanilan, na edtalu ka (Muhammad): su Allah i mataw sa langun a penggalebekenu.

Su Allah i kumukum sa lekanu sa gay a mawli kanu langun a di nu bamagayunan.

Ngintu di nengka katawan na su Allah na katawanin i dalem a pitu lapis a langit endu lupa? Langun a entuba na nakadalem kanu kitab (Lawh Al-Mahfudh) endu benal a malemu gayd kanu Allah.

Endu pedsimban nilan i salakaw sa Allah, sa dala nakatulun kanilan ebpun sa Allah a tindeg lun, endu dala kanilan a kataw endu dala kanu salimbuten i makadtabang kanilan.

Endu amayka batyan kanilan su manga ayatan nami a manga mapayag na mailay nengka kanu manga biyas ilan a manga kafir i kalibedteng, paydu gayd i di nilan kabetay kanu manga taw a pembatya kanilan kanu manga ayatan nami, na edtalun ku sa lekanu i mawag luba? Su apuy sa naraka, inibpasad u Allah kanu manga kafir a ngin den i kawagin a kabpawangan.

Sekanu a manga taw aden nakambwat a upaman na panuliman nu, su pedsimban nu a salakaw sa Allah a manga watu, manga kayu, na di a benal makaumbal sa apiya langaw bu i upamanin, apiya mimbulig silan, na amayka aden initangag a langaw kanu inideket kanu barahala, na apiya paydu na di magaga nu barahala mapaulit, magidsan a dala kagaga nin su pedsimba endu su pedsimban.

Da nilan pakasela su Allah a wagib a papegkaslan, saben-sabenal su Allah i mabagel a mapulu.

Su Allah i bamili kanu malaikat sa manga sinugu, endu sya kanu manga taw, su Allah i pakakineg a pakailay.

Katawan nu Allah su nanggalebek nilan den, endu su manggalebek nilan a mawli, endu lu sa Allah i langun a galebek a kambalinganan.

Sekanu a manga mu'min ruku' kanu endu sugyud kanu, endu simba nu su Kadenan nu, endu enggalebek nu i mapya, ka malemu sa lekanu i makauntung kanu.

Endu en-jihad kanu sa Allah sa benal a jihad, ka sekanin i namili sa lekanu (sa mamayapat sa Islam), endu da nin baluya sa lekanu su agama sa makapasang sa lekanu, agama nu ama nu a si Ibrahim a minedtu sa lekanu sa manga Muslim, sa unan a da pan makatulun su Qur’an, endu samba sa kitab anan su Rasul (Muhammad) a makadsaksi sa lekanu, na makadsaksi kanu bun kanu manga taw, na itindegu su sambayang endu inggay nu su zakat, endu kamali nu su agama nu Allah (Islam) ka sekanin i pedtuganul sa lekanu, na ngin den a kapiya na pedtuldu endu mapya gayd a tumabang.

Saben-sabenal a nakauntung su manga mu'min.

Silan kanu kapedsambayang nilan na gilek silan sa Allah.

Endu silan na di nilan amungan i da kataganin.

Endu ibagenggay nilan su zakat ilan.

Endu pedtuldun nilan su sangulan nilan.

Ya tabiya na kaluma nilan, atawa su kamilikan nilan a di silan matila.

Na entayn i mangilay sa subla pan sa nya ba na entuba su manga taw a matibaba.

Endu pedtuldun nilan su salig sa kanilan endu su pasad ilan.

Endu pedtuganulen nilan i langun nu manga sambayangilan.

Na silan i pakawaris.

Kanu surga a firdaws sa di den silan makaliyu.

Endu saben-sabenal a binaluy nami si Adam a yanin tupu na lupa.

Mawli na binaluy nami su muli-a-taw sa nutfah (midsimbul a ig nu mama-babay) sya kanu tiyan nu babay.

Mawli na pinambaluy nami su nutfah sa lugu, pinambaluy nami su lugu sa mana kemel, pinambaluy sa tulan, na binawsan nami sa sapu, mawli na iniyupan nami (atawa tinaguwan sa ngyawa), mahasuti su Allah a mapya gayd i kapamaluy nin.

Mawli na sekanu na matay kanu bun.

Mawli na sekanu na (makawma) kanu sa gay a mawli sa makambuat sa kubur.

Endu saben-sabenal a binaluy nami kanu pulu nu i pitu lapis a langit, endu dala sa lekami i makadtalipenda nami su langun u binaluy.

Endu pinatulun nami ebpun sa langit su ig sa na-ukul bu, na pinadtakena (pinasenep) nami sa lupa, endu magaga nami i mailang su langun a ig sa dunya.

Na pinambuwat nami sa lekanu kanu ig i manga pamulanu, kayu kulma endu inab, aden lekanu a manga unga na kayu a madakel, endu entuba i pegken nu.

Endu kayu a lu bagetu’ kanu palaw a (Sina'i) sa entuba a kayu na aden lana nin, kaped lun na pegkenu (namba su zaitun).

Endu aden kanu manga binatang i manga indawan, banginumen su gatasin endu madakel i papedtagan lun, endu pegken nu pan su (kaped kanu) binatang.

Endu bagedan nu sya sa kapuluwan (pegkudan nu), sya menem sa ig su kapal.

Endu sinugu nami su Nuh lu kanu manga taw nin, ya nin pidtalu: simba nu su Allah, ka da kadenan nu a salakaw sa lekanin, na ngintu ka di nu ikagilek?

Ya pidtalu nu manga ganga-unutan nu manga kafir kanu manga taw nin: da inan (si Nuh) ka manusya a pagidsan tanu bun, ya nin kyugan na kalabiyan kanu nin, u pegkyug su Allah (sa matutulu tanu) na yanin patulunen i malaikat, ka dala nami makineg inan sa kalukesan nami.

Benal a mama inan (su Nuh) a buneg, angati nu ka matay bun.

Tig nu Nuh: Kadenan ku, tabangi aku sabap sa papendalebuten aku nilan.

Ini-wahi nami sa lekanin: umbal ka sa awang sa parihala nami endu suguwan nami, na amayka mawma su kahanda nami na edsebu su pugun (bagaluganan) na papageda ka i embiyasan sa enggaga-duwa (babay-mama), endu su kaluma nengka ya tabiya na su na-ukul den sa maka amung mabinasa, endu di aku imbityala pantag kanu manga kafir ka makageled silan tanan.

Amayka nakapageda kanu den sa awang endu su manga tagapeda nengka na edtalu ka: langun a pugi na kanu Allah ka linepas kami nin kanu manga salimbuten.

Endu edtalu ka: Kadenan ku, pambeken aku sa katumpan a barakat, endu seka i mapya gayd a mapagkaleben.

Benal a nadalem lu ba su tanda a kapegkagaga nu Allah, endu nabatalu su Nuh endu su manga taw nin.

Mawli na pinambuwat ami sa ulyan nilan i manga taw a nauli kanilan (tupu nilan).

Na sinugu nami kanilan i sinugu ebpun bun kanilan (ya nin pedtalun): paka-isa nu su Allah a simban ka dala kadenan nu a salakaw sa lekanin, na ngintu di nu ikagilek?

Endu pidtalu nu manga kasaligan kanu kawmin a kafir endu napandalebut sa kabaratemu sa Allah sa gay a mawli endu inenggan nami sa limu sya sa dunya: dala bun inan ka manusya a pagidsan tanu nu, ya nilan bun pegken na pegken tanu endu ya nilan bun baginumen na su baginumen tanu.

Amayka paginugutan nu i manusya a pagidsan nu bun na sekanu den i manga taw a nangalugi.

Inibpasad in sa lekanu i amayka minatay kanu den endu libubuk kanu den endu nangalupet den su tulan nu na makambuwat pamun?

Mawatan-mawatan a manggula i langun a pedtalunin i namba a mama.

Da galebek ka baguyag tanu bu sya sa dunya, matay tanu endu embibyag tanu, endu da den kambuwat tanu ebpaluman (dala den siksa, atawa gay a mawli).

Namba sekanin na mama a pedtebuwanin su Allah sa kalebut, endu da sa lekitanu i kapangimbenal sa lekanin.

Ya nin nadtalu; Kadenan ku tabangi aku kagina pinandalbut aku nilan.

Tig nu Allah: paydu bu a timpu i nasama kanilan ka makadsendit silan langun.

Na sinayab silan na kilat, minatay silan, na binaluy nami silan sa mana utan a nagangu sa mawatan den kanu limu nu Allah su manga taw a salimbuten.

Mawli na pinambuwat nami sa ulyan nilan i manga taw a nakasukeli.

Di makawna kanu taw su ajal nin, endu di bun makadtatangguli.

Mawli na sinugu nami su manga sinugu sa namakadtutundug, uman makawma kanu manga taw su sinugu na pandalbuten nu nawman nilan, endu midtutundug bun i kinabinasa kanilan, binaluy nami silan a bityala a mawag (tarsilan), mawatan su limu kanu manga taw a di bangimbenal.

Mawli na sinugu nami si Musa endu su suledin a si Harun kanu manga ayatan nami endu tindeg a mapayag.

Lu kani Fir’awn endu su kadakelin, na mimamasla silan, na silan i manga taw a mibpapulu.

Ya nilan pidtalu na di tanu mangimbenal sa pagidsan tanu bun, su taw nilan na namba su bangulipenen tanu.

Pinandalbut nilan, na nabinasa silan.

Saben-sabenal a inenggay nami kani Musa su kitab ka basi matutulu silan.

Endu binaluy nami su wata a mama ni Maryam (Eisa) endu si ina nin a tanda, endu tinuganul nami silan lu kanu mapulu a lupa sa aden buwalin.

Sekanu a manga sinugu kan kanu kanu mapya, endu enggalebek kanu sa mapya, ka benal a katawan ku i galebek nu.

Endu nya ba i agama nu na satiman bu, na saki bu i Kadenan nu, na ikagilek aku nu.

Na nakabpipitas silan sa madakel i lumpukan nilan, uman isa kanu pegkamalanin na entuba i kalilinyanin.

Pasagadi ka silan kanu kapendusa nilan, ka makawma bun kanilan su kapatay.

(Ngintu) bagantapen nilan i kabagenggay nami kanilan sa tamuk endu wata?

Na bamagayasan nami silan sa mapaya, na di nilan egkagedam (na kanarakan nilan).

Benal a ya mapya a taw na su di gapinda kanu ginawa nin i gilekin sa Allah.

Endu silan a nangimbenal kanu manga ayatan u Kadenan nilan.

Endu di silan pedsakutu sa Kadenan nilan.

Endu inggay nilan pamun su inenggay kanilan a tamuk atawa sadaqah, endu atay nilan na magilek, endu lu silan pembalingan sa Allah.

Entuba i bamagayas sa mapya endu silan i nawna (enggula) sa mapya.

Endu da inibpaliyugat nami ya tabiya na su magaga nu, endu sya sa lekami su kitab a pedtalu sa bantang, endu di silan madsalimbut.

Ugayd na su atay nilan na tading sya sa nya ba (Qur’ an) endu aden pan manga galebek ilan a kaped a penggalebeken nilan a kasiksan.

Taman sa bininasa nami su gangaunutan nilan (lu sa Bad'r) uman isa kanilan na mimbukasu.

Da kanu pembukasu kanu nya a gay, ka sekanu na di kanu katabangan.

Ka saben-sabenal a pembatyan sa lekanu su manga ayatan ku na sekanu na semunud kanu a semalilit kanu.

Pemamasla kanu, namagumpung (sa mawag) kanu magabi sa tagaken nilan (su Qur’an).

Ngintu ka di nilan pangangasipen (su Qur’an) aden nakawma kanilan a dala makawma kanu kalukesan nilan a nangawna?

Atawa da nilan katawi su sinugu (Muhammad) ka bagungkiren nilan?

Atawa ya nilan pedtalun na buneg? Kena! Ka nakawma kanilan su bantang (ugayd) na ya madakel kanilan i mabensi sa bantang.

Amayka su bantang ka edtatanggunut kanu kyug u ginawa nilan na mabinasa su manga langit endu su lupa endu su pageletan nilan, tembu inenggay nami kanilan su Qur’an, (ugayd) na tinaligkudan nilan.

Di kena ka pegkuwa kanilan sa buwis, ka su buwis nu Kadenan nengka na ya pan labi i kapiya nin, endu sekanin i mapya a pe-rizki.

Endu seka (Muhammad) na bagenggaten nengka silan lu sa matidtu a lalan.

Endu benal su manga taw a di bangimbenal sa gay a mawli, na sinemibay sa kanu lalan a matidtu. (agama Islam)

Amayka inikalimu nami silan endu iyawa nami su pakagkayd kanilan na mananalusan silan sa kadupangan nilan.

Endu saben-sabenal a bininasa nami silan sa siksa, na dabun silan embaba kanu Kadenan nilan, endu dala silan pangumpaya sa Allah.

Taman sa amayka bukatan nami su bengawan nu naraka nilan a sangat i kapasangin, na natebped kanilan su inam sa mapya.

Sekanin a Allah i minumbal sa lekanu sa kakineg endu kailay endu atay, na paydu gayd i kadsukur nu (sa Allah).

Endu sekanin (Allah) i minaluy sa lekanu sya sa lupa, endu lu kanu bun tanan mabulig sa lekanin.

Endu sekanin (Allah) i bangimatay endu banguyag, endu lekanin su kambidayan nu magabi endu malamag, na ngintu ka di kanu bagungangen?

Kena! Ka ya nilan kadtalu na mana bun su nadtalu nu nangawna.

Tig nilan: u matay tanu na nabaluy tanu a libubuk a nangalupet su manga tulan tanu na (ngintu) makambuwat tanu pon?

Saben-sabenal a inibpasad sa lekami endu su kalukesan nami i namba sa dapan makawma (si Muhammad) na (da) inan ya tabiya na kalbutan a nangawna a manga taw.

Edtalu ka kanilan (Muhammad): entayn i kigkuwan sa lupa endu su dalemin amayka katawan nu?

Ya nilan edtalun na: kanu Allah, na edtalu ka kanilan i ngintu ka di kanu ma-indaw?

Edtalu ka kanilan: entayn i Kadenan nu manga langit a pitu lapis endu entayn i Kadenan nu Arsh a masla?

Ya nilan edtalun na: kanu Allah, na edtalu ka kanilan: ngintu ka di silan kagilekan?

Edtalu ka kanilan: entayn i pakamilik kanu masulen u enggaga-isa na sekanin i pedtuldu? Di kena ba sekanin i pedtuldu lun amayka katawan nu?

Ya nilan edtalun na: kanu Allah, edtalu ka kanilan: ngintu ka pedsibay kanu?

Kena! Ka initingguma nami kanilan su bantang, endu silan i manga malbut.

Dala wata nu Allah endu dala kapedin a kadenan, u naduwa timan bu i kadenan na uman isa na tyakapanin i binaluy nin, endu ebpapuluwan a isa i kaped in, mahasuti su Allah kanu pedtalun nu manga mushrik.

Katawan nu Allah su gayb endu su mapayag, mahasuti su Allah kanu ipedsakutu nilan a manga mushrik.

Edtalu ka (Muhammad): Kadenan ku u ipailay nengka sa laki su kasiksan nilan.

Kadenan ku di aku lumagit kanu manga salimbuten.

Endu benal a sekami na magaga nami mapailay sa leka i siksa nilan.

Ya nengka isuli kanu mawag a pakaydan nilan sa leka na mapya sa taman a magaga nengka, ka katawan nami su langun u kapendalbut ilan.

Endu edtalu ka (Muhammad): Kadenan ku lumindung aku sa leka kanu sasat nu shaytan.

Endu lumindung aku sa leka kadenan ku kanu dalpa nu shaytan.

Taman sa amayka nawma na kapatay su isa sa kanilan (manga kafir), na tig nilan: pambalingan aku pan Kadenan ku.

Ka basi manggalebek ku i mapya a dinadag ku, dala kambalinganin, namba a kadtalu na da kataganin kanu midtalu, endu aden dalinding sa di nilan kambalingan sa dunya (namba su barzakh) taman sa kambuwat ilan sa kubur (kagkukum).

Na amayka yupen su sanggakala na dala den su kapamagandagay sa bangsa, endu di silan makapamidsaya.

Su taw a ya mawgat sa timbangan su mapya nin na silan a manga taw i namakauntung.

Su taw a ya mawgat sa timbangan su marat na entuba i manga taw a linugi nilan i ginawa nilan, a di silan makaliyu sa naraka.

Ka galupang nu apuy i manga biyas nilan, endu silan i mawag a benal i mabpalas nilan.

Di kena ba pembatyan bun sa lekanu su manga ayatan ku na sekanu na papendalbuten nu su manga ayatan ku?

Ya nilan madtalu na: Kadenan nami tinalaw kami nu makabinasa sa lekami, na sekami i manga taw a nangatading.

Kadenan nami paliyu kami sa naraka, ka amayka ebpaluman kami na sekami i manga dupang.

Tig nu Allah: san kanu den ba egkaleben, da kanu mangeni-magingalap.

Su kaped kanu manga ulipen ku na ya nilan edtalun na: Kadenan nami nangimbenal kami na ampun ka sa lekami (su dusa) endu ikalimu kami nengka endu seka i labi a mapya a malimu.

Ya nu pinakaydan kanilan na bagungaten nu, taman sa tinagak nu su Qur’an endu pedtatawan nu silan.

Benal a saki na saguna na binalasan ku silan kanu kinadsabar nilan, ka silan i manga taw a namakauntung a nambadtug sa mapya.

(Tig nu Allah): ngin i kinawget nu sa lupa kanu tilenduwan na lagun?

Tig nilan: nakasampay kami bu sa dunya sa sagay bu atawa seged bu sa gay, idsa nu kanu pedtuldu sa manga galebek (malaikat).

(Tig nu Allah): da kanu matangen sa dunya ya tabiya na paidu bu gayd umana bu ka katawanu (ya mawget i ka naraka).

Ya nu ga-antap na kinabaluy sa lekanu na dala hikmah (sabapin), endu di kanu makambalingan sa lekami?

Mahasuti su Allah a datu a bantang, da Kadenan a pedsimban a wagib ya tabiya na sekanin a Kadenan nu Ar'sh a masla.

Endu su taw a semimba pamun sa salakaw sa Allah a dala tindegin, na benal su balasin na lu bun kanu Kadenanin, endu benal su manga kafir na da silan makauntung.

Endu edtalu ka (Muhammad): Kadenan ku ampun ka, ka malimu ka, seka i mapya a malimu.

Initulun nami i nya a surah, endu ini-fardu nami, endu initulun nami sya ba i manga ayatan a manga mapayag, ka malemu sa lekanu i ma-indaw kanu.

Su babay endu mama a midzina na betay nu i uman isa sa magatus a lebpad, da kanu lumasam kanu agama nu Allah (sa di nu ikukum) amayka bangimbenal kanu sa Allah endu gay a mawli, endu pedsaksiyan su kabetay kanilan kanu lumpun kanu manga mu'min.

Su midzina a mama na ya ipagkaluma lun na babay a midzina bun atawa babay a mushrik, su babay a midzina na ya menem ipagkaluma lun na midzina a mama atawa mama a mushrik, ka haram kanu manga mu'min.

Su manga taw a pedsenditan (pedtetebuwan) nilan su manga babay a mapya sa dala saksi nilan a pat kataw na betay nu silan sa walu pulu a betay (su pedtetebu) endu di nu tumalima i saksi nilan sa apiya ngin pan, ka silan na nakalyu kanu limu nu agama silan.

Ya tabiya na su midtawbat sa ulyan nantu endu nagumbaya silan, su Allah na bangampun a malimu.

Su manga taw a pedsenditan nilan i kaluma nilan sa midzina a dala saksi nilan a lyu sa ginawa nilan na makadsapa su mama sa makapat a sapa nin sa Allah (kasangulan nu bangukum) sa benal sekanin kanu pedtalu nin.

Ya ikalima a sapa nin (nadtalu nin) i nanget den sa lekanin su mulka nu Allah amayka pendalbut bu sekanin.

Endu alawan nu babay su siksa sa lekanin (amayka di gabenalan) sa edsapa menem sekanin sa makapat, sa di kena benal endu malbut su kaluma nin.

Endu ikalima a sapa nin (edtalun u babay) i nanget sa lekanin su lipunget u Allah amayka benal su kaluma nin.

U di kena bu su kalbihan nu Allah sa lekanu endu su limu nin (na tinyuba kanu) endu su Allah na banawbat, endu katawanin su binaluy nin.

Benal na su manga taw menem a tagapeda nu bun silan, sa kalbutan bu i bityala nilan, na di nu bagantapa i makagkayd sa lekanu, uman isa na kadusan i nakwa nin (kanu ipedtetebu) endu su minukakal sa entuba a bityala (Abdullah bin Ubayya) na lekanin i siksa a masla.

Entuba ka kinakineg u lun ka yabu initagu sa ginawa na babay-mama a mu'min i mapya (di silan malityala) endu ya nilan pidtalu na: bityala inan a kalbutan a mapayag.

Entuba ka pinambuwat ilan i pat kataw a manga saksi, na amayka di silan makapambuwat sa pat kataw a saksi, na silan lu sa Allah i manga taw a malebut.

U di kena bu su kalbihan nu Allah endu su limu nin sa lekanu sa dunya-akhirat na nasugat kanu den a siksa a masla (sa kanu bityala nu)

Kagina banabeten nu i kalbutan, na pedtalu nu kanu manga ngali nu i dala sabutin lun (namba su kinadtetebu kanu Aisha a kaluma nu Rasulullah) endu ya nu kataw na malemu, na lu sa Allah na sangat i kasla nin.

Entuba ka kinakineg nu lun ka ya nu pidtalu na di tanu embityalan inan, mahasuti su Allah, ka nan a bityala na kalbutan a sangat i kasla nin.

Bangindawn kanu nu Allah sa di nu a benal kab-palumanan amayka benal kanu a manga mu'min.

Endu ipebpayag u Allah sa lekanu su manga ayatanin, su Allah i mataw sa mapayag-masulen.

Su manga taw a myug sa makapayapat su maledsik a bityala kanu manga mu'min na kanilan i siksa a masakit sya sa dunya endu lu sa akhirat, su Allah i mataw kanu di nu katawan.

U di kena bu su kalbihan nu Allah sa lekanu endu su limu nin (na tiyuban kanu) endu su Allah na malasam a malimu.

Sekanu a manga mu'min di nu pedtuntula su manga sangkad u manga shaytan, su temuntul kanu manga sangkad u manga shaytan na yanin ipedsugu na manga maledsik endu su ka-ungkir, u di kena bu su kalbihan u Allah sa lekanu endu su limu nin (na tyuban kanu den) na dala masuti sa lekanu apiya sakataw bu, ugayd na su Allah i pedsuti kanu magkahanda nin endu pakakineg sekanin a mataw.

Endu di edsapa su aden tamukin endu su makalag i gatamananin sa di nin enggan i pagali nin, endu su manga miskinan endu su manga muhajireen sa lalan sa Allah, endu ampunen silan endu tigkelan silan, ngintu dinu kalilinyan i ampunen kanu nu Allah? Endu su Allah i bangampun a malimu.

Su manga taw a edtebwan nilan su manga babay sa dala kyug ilan sa kadzina a manga mu'min, na su pedtetebu na namulkan sa dunya akhirat, endu kanilan i siksa a masla.

Su gay a edsaksyan nu manga dila nilan endu manga lima nilan silan, endu su manga ay nilan kanu penggalebeken ilan (sa dunya).

Entupan a balasan silan nu Allah kanu balas a makadayt kanilan, endu katawan ilan su Allah na benal a mapayag (su langun u kadtalu nin).

Su babay a maledsik na kanu mama a maledsik, su manga mama a maledsik na kanu manga babay a maledsik, su mapya a babay na kanu manga mapya a manga mama, endu su manga mapya a mama na kanu manga mapya a manga babay, na lepas silan kanu manga pedtalu nilan (a pakabinasa), kanilan su ampun endu rizki a mapulu a mapya.

Sekanu a manga mu'min na da kanu lemudep kanu manga walay a di kena nu manga walay, taman sa di kanu makapagetaw endu di nu masalam su taw nin, ka entuba i makagkapiya sa lekanu, ka endu malemu sa lekanu i ma-indaw kanu.

Amayka dala taw nin su manga walay na da kanu lemudep, taman sa di kanu sugutan, amayka ya pidtalu i uli kanu na uli kanu, ka entu ba i makasuti sa lekanu, endu su Allah na katawanin i langun a penggalebekenu.

Dala bun dusa nu sa kaludep u kanu walay a di kena pegkalebenan, sa lu ba natagu i manga kasangkapanu endu su Allah i mataw kanu ipebpayagu endu ibagenanu.

Edtalu ka (Muhammad) kanu manga mu'min a manga mama i piyampiyanan nilan i kadtulik endu tuldun nilan su manga sangulan nilan, ka namba i makasuti kanilan, su Allah na katawanin i langun a penggulan nilan.

Edtalu ka (Muhammad) kanu manga mu'min a manga babay i piyampiyanan nilan i kadtulik ilan, endu tyakapan nilan i manga sangulan nilan endu di nilan ipayag i pagigimuan nilan, ya tabiya na biyas endu duwa a lima, endu di nilan ipayag su manga imu nilan, ya tabiya na kaluma nilan, atawa lukes nilan, atawa manga lukes nu kaluma nilan, atawa manga wata nilan, atawa manga wata nu kaluma nilan, atawa manga suled nilan, atawa manga wata nu suled nilan a manga mama, atawa manga wata nu suled nilan a manga babay, atawa ka silan a manga babay, atawa su kamilikan nilan, atawa ka su manga wata a bagunut kanilan a dala pan kyugin sa babay a manga mama, atawa ka su manga manot a manga wata a dala pan nadsulimanin kanu awrat nu manga babay, endu di silan embagel sa kasangkad ilan kanu manga ay nilan ka katawan su uni nu pagigimuan nilan (singkil) endu edtawbat kanu tanan sekanu a manga mu'min ka malemu-lemu sa lekanu i makauntung kanu sa dunya-akhirat.

Pagkaluma nu su da kaluma nin sa lekanu, endu su manga salih kanu manga mama a pedsugun nu atawa manga babay, ka upama ka faqir silan na pagkakawasan bun u Allah kanu limu nin, endu su Allah na makalag i limu nin a mataw.

Endu tumigkel menem su taw a da pan ibangaluma nin, taman sa enggan bun silan nu Allah sa kalbihanin, endu su manga ulipen a bangeni silan sa kasulatan (sa makandaludaya silan) na suguti nu silan amayka aden natawan nu kanilan a kapiyanan, endu engginu silan kanu tamuk nu Allah a inenggay nin sa lekanu, endu di nu pedtegela su manga ulipenu sa kadzina ka ya nilan kyugan na di kadzina (suti silan) pegkyug kanu sa kabimbanan sa kabpaguyag sa dunya? Su (taw) a pegesenin su ulipenin (sa kagkyuga atawa papamayadan) na su Allah, sa ulyan na kinapeges lun, na ampunenin ikalimu nin (su babay a pineges).

Saben-sabenal a initulun nami sa lekanu su manga ayat a mapayag, endu upaman kanu manga taw a nangaypus a nauna sa lekanu, endu indawan kanu manga taw a magilek sa Allah.

Su Allah i papedsigay kanu pitu lapis a langit endu lupa, ya upama nu sigay nin na tungkup a nakadalem lun i palitan, su palitan na nakadalem lun su katya, su katya antu na mana bun bitun a pegkinggat a belalegan sa kayu a barakat (kayu a zaitun) sa di kena sebangan a di kena sedepan, nya sama kanu lalanin i makalayau sa apiya dapan makembil na apuy, ka sigay a nanget kanu sigay, itutulu nu Allah su sigay nin kanu magkahanda nin, endu ibagenggay nu Allah su manga upaman kanu manga taw, katawan nu Allah i langun a enggaga-isa.

Su manga masjid na inisugut nu Allah i pakaslan endu pakapiyan i kambalay lun, belabitan sa ngala nin a pedsambayangan sa mapita-malulem-

Nu manga mama a di silan gasimpang nu kapendagang, endu kabpasay sa tadem sa Allah endu kadsambayang-kadzakat, kagilekan silan kanu gay a kumegkel su manga atay endu gapansi su manga kailay (mata).

Endu kabalasan sila nu Allah sa mapya pan kanu pinggalebek ilan, endu bagumananin silan kanu kalbihan, su Allah i pe-rizki sa magkahanda nin sa di magkila-kila.

Su manga kafir menem na su galebek ilan na mana ig a gasandeng sya sa malinawag, ga-antap u pakainum sa ig (i makainum) taman sa u nawmanin na dala besen ig in, endu ya nin naparuli na siksa sa lekanin lu sa Allah, ka nawna sa dunya i balasin, endu su Allah na mangagan i kukuman in.

Atawa ka mana su manga malibuteng sa lagat sa midtatalapis i bagel sa pulu nin, su bagel a kaduwa na lu sa pulu nin i dadtem a malibuteng a midtatalapis, u palyun nu bangilay su lima nin na di nin mailay sa kalibuténg in, su taw a dala den enggay nu Allah sa sigay na dala katuntulin sa lalan a matidtu.

Ngintu di nu katawan i pedtasbih sa Allah su dalem nu manga langit endu su lupa endu su papanuk? Pembelatenin i papakin, uman isa na natawan nu Allah i tasbih nin endu sambayangin, endu su Allah i mataw sa langun nu penggalebeken nilan.

Endu kanu Allah su dalem u pitu lapis a langit endu lupa, endu lu bun sa Allah i kadsunudan.

Ngintu di nu gailay i kapedseseng nu Allah kanu gabun? Mawli na pinadtimu nin, mawli na baluynin a migkakapal, na lu den ba su ulan a belyu kanu pamageletan, endu papedtulunen nin ebpun sa langit i manga watu a ilu atawa kilat, na masugat in su kahanda nu Allah endu makasibay (di masugat) kanu pigkahanda nin, paydu gayd kanu katinangin (su kilat) na maling den su kailay.

Papegkelid-keliden nu Allah su magabi endu malamag, nakadalem lu ba su tanda a kapegkagaga nu Allah kanu manga taw a aden pusungin.

Su Allah i minaluy kanu langun nu malanap-lanap ebpun sa ig na kaped na ya nin ibelalakaw na tiyanin, aden bun ya nin ibelalakaw na ay nin a duwa, endu aden bun belalakaw sa pat timan a ay nin, pembaluyn nu Allah kanu langun u enggaga-isa na gagaga nin.

Saben-sabenal a initulun nami su manga ayat a mapayag, endu su Allah i pedtutulu sa magkahanda nin sa lalan a matidtu.

Endu pedtalun nu manga munafiq: nangimbenal kami sa Allah endu su sinugu, endu pinaginugutan nami, mawli na su ped kanilan i menda sa ulyan antu, na di kena benal a mu'min su minenda kanilan.

Amayka tawagen silan kanu kukuman nu Allah endu su nabi nin ka endu makukum silan na su kaped kanilan na menda.

Amayka lu kanilan su haqq, na ebpawangan ka nilan sa mamagayas a benal silan.

Nakadalem kanu atay nilan i dalu, ugayd na penduwa-duwa silan, endu kagilekan silan sa edsalimbuten nu Allah silan endu su sinugu nin, ugayd na ya benal na silan i manga salimbulen.

Benal su manga mu'min na ya nilan kadtalu amayka enggaten silan sa kukuman nu Allah endu su sinugu nin, ka endu makukum silan na tig nilan: nakineg nami endu naginugut kami, endu silan i namakauntung.

Endu su taw a maginugut sa Allah endu su sinugu nin endu pangandamen nin su Allah endu ikagilekin na silan i nabadtugan sa mapya.

Endu midsapa silan sa Allah kanu pangimbenal nilan a di kena benal, amayka sinugu nengka silan sa kan-jihad na munut silan, edtalu ka (Muhammad): da kanu pedsapa, ka su inugut kanu rasul i (labi) mapya kanu kadsapa a di kena benal, su Allah na katawanin i langun a galebekan nu.

Edtalu ka (Muhammad) i: paginuguti nu su Allah, endu paginuguti nu su sinugu nin, amayka menda silan na ya bu wagib sa lekanin su kapedsampay, ya menem wagib sa lekanu na kapaginugut, endu amayka paginugutanu na matutulu kanu, endu dala kanu sinugu ya tabya na kapapedsampay sa mapayag.

Inibpasad u Allah kanu manga mu'min sa lekanu endu minggalebek sa manga mapya i pasambin silan a kumamal sya sa lupa sa mana bun kinapasambi nin kanu manga mu'min a nangawna sa kanilan, endu pandaya nin kanilan su agama nilan, entuba i nasuwatanin kanilan, endu sambyanin su gilek ilan sa makatana silan, simban aku nilan endu di aku nilan sakutun sa apiya paydu, na su egkafir sa ulyan na entuba na silan i manga taw a nakalyu kanu agama.

Itindeg nu su sambayang, endu inggay nu su zakat, endu paginuguti nu su sinugu, ka malemu-lemu sa lekanu i makakalimu kanu.

Di ka mantap su manga kafir sa kapalaguyan kami nilan sya sa lupa, endu ya nilan kadtakenan su naraka a mawag gayd a kabpawangan.

Sekanu a manga mu'min- (isugu nu sa) magetaw sa kaludepin su banunugun nu endu su manga wata a dala pan sabutin sa pidtalu a babay sya kanu timpu a telu, (ika-isa) na di pan makadsambayang sa subbuh, (ika-duwa) na amayka ulyan na dhuhur sabap sa migkawas-kawas kanu ka pedtelen kanu, (ika-telu) na ulyan a sambayang na isya, da bun kadusan nu u lumudep silan sa di magetaw amayka salakaw sa namba a manga waktu, ka banunugun nu silan, mamba i kapebpayag u Allah sa lekanu kanu manga ayatanin, endu su Allah i mataw sa langun a binaluy nin.

Endu amayka mabalig den su manga wata nu (babay-mama) na magetaw den silan sa mana bun su kapagetaw nu di kena taw na walay, mamba i kapebpayag u Allah sa lekanu kanu manga ayatanin, endu su Allah i mataw sa langun a binaluy nin.

Su manga babay a di pembata atawa di gahaid a da den kyugin sa kagkaluma na dala dusa nilan sa luwasen nilan su balegkas sa di kena bun peb-payangasen, endu di silan edsugud-sugud sa mapayag su bagigimuwan nilan, endu su di nilan kaluwas na muna i kapiya nin, endu su Allah i pakakineg endu mataw.

Dala dusa nu pisek endu su tyulud (sadil) endu su pendalu endu taman sa ginawa nu i keman sya kanu manga walay nu atawa walay nu manga lukes u atawa walay nu manga lukes u a manga babay, atawa manga walay na suled nu a mama, atawa manga suled u a manga babay, atawa ka manga walay nu manga bapa sa ama atawa babo sa ama, atawa bapa nu sa ina atawa manga babo nu sa ina, atawa ka su pedsaliganu sa gunsi atawa su pakat nu, dala bun dusa nu sa keman kanu langun atawa mad-tumpuk kanu, amayka lemudep kanu sa walay nu na edsasalama kanu sa kanu ginawa nu ebpun sa Allah a barakat a mapya, mamba i kapebpayag nu Allah sa lekanu kanu manga ayatanin ka malemu-lemu sa lekanu i makapagungangen kanu.

Ya tidtu a mu'min na mangimbenal sa Allah endu su sinugu nin, endu amayka san silan sa leka (Muhammad) kanu galebek a masla (pembibityala) na di silan gumanat sa taman sa di silan maka- pagetaw salka, na silan i benal a bangimbenal sa Allah endu su sinugu nin, na amayka nagetaw silan sa leka (Muhammad) kanu pegkahandan nilan na suguti ka su entayni pegkyugan nengka kanilan, endu ipangeni nengka silan sa ampun, ka su Allah na bangampun a malimu.

Di nu pedtawaga su rasul (Muhammad) kanu pamageletanu sa mana su kadtatawagay nu, saben-sabenal a katawan bun nu Allah silan a baningen belyu sa masgid sa sakataw-sakataw, na mingat su manga taw a ibida nilan i kanilan kanu suguwan u rasul, ka masugat silan a fitnah atawa masugat silan a siksa a masakit.

Saben-sabenal a kanu Allah i dalem u pitu lapis a langit endu su lupa, endu saben-sabenal a katawanin i nakadalem kanu atay (kamunafiq-bangimbenal) endu su gay a kawli nilan sa Allah na inggay nin kanilan su balas u manga galebek ilan, su Allah na kanu langun u enggaga-isa na katawanin.

Mahasuti su Allah a pinatulun nin su Qur’an kanu ulipen nin (Muhammad) ka endu nin makapangenggat kanu manga inaden sya sa dunya.

Lekanin su pitu ka lapis a langit endu su lupa endu dala wata nin, endu dala kaped nin kanu kadatu nin endu binaluy nin su langun na enggaga-isa sa inukul nin tanan.

Silan a minumbal sa kadenan a salakaw sa Allah na dala gabaluy nin (su barahala) apiya paydu a silan pan i bagumabalen na dala magaga nilan sa ginawa nilan a makagkayd endu dala magaga nilan a ka-imatay endu kawyag endu dala magaga nilan a kapambuwat sa taw.

Endu pidtalu nu manga kafir: dala inan (Qur’an) ya tabiya na kalbutan bu ni (Muhammad), inidtebu nin endu tinabangan sekanin a ped a taw, saben- sabenal a silan i migkafir a mindalbut.

Endu pidtalu nilan: namba (Qur’an) na kalbutan nu nangawna a inisulat nin na pambatyan sa lekanin sa mapita-malulem.

Edtalu ka (Muhammad) sa kanilan: su (Qur’an) na pinatulu nu Allah a katawanin i masulen kanu manga langit endu su lupa, su Allah na mangampun a malimu.

Endu pidtalu nilan: ngin i man a sinugu ka ya nin pegken na su ped bun a pegken tanu endu belalakaw sya sa padyan? U namba ka initulun sa lekanin i malaikat a mabaluy a makatabang sa lekanin.

Ataw ka namba ka inenggan sa ginadung (kakawasan) ataw ka pamulan sa lu ba kumwa sa kanen nin, endu pidtalu nu manga kafir kanu manga bamaginugut: dala inan a mama (Muhammad) a bagunutan nu anan ya tabya na nasugat na sih’r.

Ilay ka (Muhammad) su upaman nilan sa leka ka natading silan, na di nilan magaga i makatuntul silan sa agama.

Mahasuti su Allah, u ya nin kyug i baluyan kanin sa muna pan i kapya nin a surga a belagilay sa kababan i manga ig ataw ka baluyan kanin sa maligay na magaga nin.

Ugayd na pinandalbut nilan su gay a mawli, endu pinagadilan ami kanu di bangimbenal sa gay a mawli i naraka a pagkaleg.

Amayka mailay nilan sa mawatan pan na makineg nilan i bula-bula nin a lipunget i gabales nin endu swara a mapasang.

Amayka iyulug den silan kanu bengawan nin a masimpit sa pinawik su lima nilan kanu tengu nilan, mananawag sa nabinasa tanu.

Edtalun nu Allah: da kanu banawag sa nabinasa kanu sa maka-isa bu, ugayd na ya nu edtalu na nabina-binasa kami den.

Edtalu ka (Muhammad) ka nilan: ngintu entuba i mapya (na siksa antu) ataw ka su surga a tatap? Entuba i inibpasad kanu magilek sa Allah na su surga i kanilan a balas endu kawliyan.

Kanilan kanu surga endaw a kalilinyan nilan, sa da kaliyu nilan, na aden kanu kadenan nengka i pasad a mapanuntul.

Endu su gay a buligen silan nu Allah endu su pedsimban nilan a salakaw sa Allah (barahala) na edtalun nu Allah sa kanilan: ngintu sekanu i tinumading kanu manga ulipen ku a namba ataw ka silan bun i midtadingan sa lalan (Islam).

Ya nilan edtalun: mahasuti ka, ka di dayt sa lekami i mumbal kami sa salakaw sa leka a manga kadenan, ugayd na inikalimu nengka silan sa mapya a katamanan nilan endu su manga lukes nilan, taman sa nalimpangan nilan su Qur’an na silan i manga taw a nangabinasa.

Na pinandalbut kanu pedsimban nu (barahala) kanu pedtalun nu, na dala magaga nu a katulak nu sa siksa endu makasapal sa kanaraka nu, entayn sa lekanu i egkafir na pananamen nami sa siksa a masla.

Endu dala sinugu nami a nawna sa leka (Muhammad) a manga sinugu ya tabya na pegkan bun silan endu belalakaw bun sa padiyan endu binaluy nami su sabad sa lekanu sa mafitnah nin su kaped nin, ngintu makadsabar kanu? Endu su Kadenan nengka na pedtulik.

Endu pidtalu nu manga taw a di gatagu sa ginawa nilan su ka-adap nin sa lekami: U nya ba ka ya pinatulun sa lekami i malaikat ataw ka ya nami mailay su Kadenan nami, na saben-sabenal a mimamasla su ginawa nilan endu mibpapulu silan sa masla a kinabpapulu.

Gay a mailay nilan i malaikat (edtalun nu malaikat): da mapya kanu manga kafir endu lumindung silan kanu manga malaikat.

(Tig nu Allah): ini-una nami su galebek nilan sa dunya, na binaluy nami sa gay a mawli na matag nilan mailay na dala besen (balas nin).

Su taw sa surga kanu gay a kaludep nilan na mapya gayd a kadtakenan nilan endu mapya gayd i papedsalidepan nilan.

Endu su gay a malundus i uman i langit (na mangawlug) i dadtem a maputi endu tumulun su manga malaikat magubal den su dunya.

Su kadatu sa entuba a gay a bantang na kanu Allah endu entuba a gay na sangat i kapasangin kanu manga kafir.

Endu su gay a mabut nu kafir su duwa a lima nin sa ya nin madtalu: kanugunin (ka entuba) ka ya ku den mun napaginugutan na su rasul.

Duwan-duwan ku den ya ku tumu i da ku mabpakat si kwana.

Saben-sabenal a tinadin aku nin kanu Qur’an sa ulyan na kinawma nin sa laki endu su shaytan na ibalusak nin su manusya.

Endu ya kadtalu nu sinugu: Kadenan ku, su manga taw ku na tinagak nilan su Qur’an sa dala pinatagan nilan lun kanu panduwanin.

Endu mamba i kinabaluy nami kanu uman i nabi na aden satru nin kanu manga baradusa, endu natabwan kanu kadenan nengka i tumutulu endu tumabang.

Endu pidtalu nu manga kafir: u namba ka naka-isa bu nakatulun sa lekanin su Qur’an, (tig nu Allah): mamba i kadtakena nin kanu atay nengka (Muhammad) na paydu-paydu i kinabatya nami lun sa leka.

Endu da pambuwaten nilan a manga upaman a di kena lawanan nami sa bantang endu ya pan labi i kapya na kapayag nin.

Entuba i manga taw a bagulugen sa patuy lu sa naraka endu silan i mawag i kandalpanin endu tading sa lalan sya sa dunya.

Endu saben-sabenal a inenggay nami kanu Musa su kitab (Taurat) endu binaluy nami su suled nin a si Harun a pedtabang sa lekanin.

Na pidtalu nami: angay kanu (duwa) sa manga taw a pinandalbut nilan su manga ayatan nami, na bininasa nami silan guna su da silan pangimbenal.

Endu su manga taw nu Nuh guna nilan pandalbuta su manga sinugu na pina-geled ami silan endu binaluy nami a tanda kanu manga taw, endu inipagadila nami kanu manga kafir su siksa a sangat i kasakit nin.

(Endu labit ka Muhammad) su taw nu Aad endu su Thamud endu su taw nu Shu’aib endu madakel i manga taw sa pageletan nilan (bininasa ka dala pangimbenal).

Uman isa na pinambuwatan nami sa upaman, na langun nilan na bininasa nami silan sa ulyan na kinawma na sinugu a da nilan pangimbenala.

Endu saben-sabenal a nawma nilan su dalpa (ni Lut) a nasugat na ulan a makabinasa (watu endu apuy) na ngintu ka di silan ma-indaw sa kinailay nilan kanu dalpa a nabalikwat? Kagina dala sa kanilan i kabangimbenal sa mawyag pan i taw a minatay den.

U nailay sa kanilan (Muhammad) na pagumpaken ka kanilan bu, ya nilan kadtalu: namba besen i pinambuwat nu Allah a sinugu?

Pabpagendan nin sa lekitanu su manga kadenan tanu? U di kena bu minanged kanu pamusungan tanu (na kadenan tanu), na di ebplis na katawan nilan kanu kailay nilan sa siksa nilan na natading silan sa lalan.

Su taw a ya nin sinimba su kyug na ginawa nin, na di nengka (Muhammad) magaga sa matutulu nengka.

Ataw ka ma-antap nengka i madakel i banuliman sa kanilan ataw ka bagungangen? Na di kena! Ka mana bun silan manga binatang endu muna pan silan sa binatang i kinatading nin.

Ngintu di nengka gailay su galebek nu Allah u panun i kapegka-aden nu alung-alung? Na u ya nin kahanda i makatelen na entuba i manggula, mawli na binaluy nami su senang a tanda nu alung-alung.

Mawli na pegkwan nami so alung-alung sa paydu-paydu.

Sekanin (a Allah) i minaluy sa lekanu sa kanu magabi a dalinding nu endu su kapedtulug nu a ibangintelen nu endu su malamag a imbukakalu.

Endu sekanin i pedsugu sa sambel a lilini nu manga taw kanu limu nu Allah endu pinatulun nami ebpun sa langit su ig a suti maka-suti.

Ibaguyag nami kanu dalpa a minatay endu ipabpaginum nami kanu binaluy nami a manga binatang endu manga manusya a madakel.

Endu saben-sabenal na pinapayapat nami kanu pamageletan nilan ka endu silan ma-indaw, na ya madakel sa taw na minenda (da talima) ya tabya na kinagkafir.

U pigkahanda nami bu na uman i dalpa na aden rasul nin.

Na di ka baginuguti su manga kafir endu in-jihad engka silan sa masla (su Qur’an).

Endu sekanin (Allah) i napendulug sa tabang (a ig) endu lagat, su isa a tabang na baginumen, su isa na matimus, aden pageletan nilan a pagalet endu makasapal sa di nilan kadsimbul.

Endu sekanin (Allah) i minaluy sa lekanu ebpun sa ig (ig nu babay-mama) endu binaluy nin i katupuwan nin endu kanggyagyamung nu, endu ya ka-aden nu Kadenan nengka na pakagaga.

Endu (silan) a pedsimban nilan i salakaw sa Allah a di pakangguna sa kanilan endu di bun makagkayd sa kanilan, su manga kafir na su kadenan nin a (barahala) na pedtabangan nu shaytan kanu inugut nin (sa makasupak).

Endu dala sinugu nami a di kena papegkalilini ataw ka papegkagilek.

Edtalu ka sa kanilan i di aku papedsukay sa kapedsampay ku (kanu Islam) ya tabya na su taw a pambaranggyan nin i tamuk nin sa lalan sa Allah (ka di ku sapalan).

Endu salig ka kanu Allah a di matay endu tasbih ka sa pugi sa lekanin (Allah), su Allah i mataw sa kadusan nu manga ulipen nin.

Sekanin (Allah) i minaluy kanu manga langit endu su lupa, endu su pageletan nin sa nem gay, mawli na lu migkahanda kanu Arsh, na sekanin i minggungala sa Rahman, na idsa nengka (Muhammad) sa lekanin ka sekanin i mataw kanu langun.

Amayka pidtalu sa kanilan i sugyud kanu sa kanu Rahman, na ya nilan kadtalu: ngin i Rahman? Sumugyud kami sa suguwan nengka (Muhammad)? (di kami a benal sumugyud), naisegan i kinatangka nilan (sa Islam).

Mahasuti su Allah a binaluy nin sya sa langit i manga lalan nu bitun, endu binaluy nin i senang endu ulan-ulan a pedsigay.

Endu binaluy nin su magabi endu malamag a pedsukelya kanu taw a myug makatadem ataw ka myug sa kadsukur.

Endu su ulipen nu Allah na belakaw silan kanu lupa sa dala kasandag nin endu amayka imbityala nu manga jahil na mapya i kasumpat nin.

Endu silan na kanu magabi nilan na sumugyud endu tumindeg ka banunuwat sa Allah.

Endu ya nilan kadtalu na: Kadenan ami iyawa nengka sa lekami i siksa nu jahannam ka su siksa nin na ya nin ka aden na di gapinda sa taman sa taman.

Endu ngin den i kawag nin a kabetadan a kadtangenan.

Endu silan (mu'min) na amayka mimbaranggya sa Allah na da makasagad endu di kena menem da gaws, endaw i nasasangan.

Endu di silan mangeni sa salakaw sa Allah ka dala kaduwa nin su Allah a pedsimban nilan endu di silan mimatay kanu nyawa a hinaram nu Allah, ya tabya na haqq endu di silan edzina, ka su taw a enggulan nin intuba na madsemak nin i dusa a kanaraka nin.

Endu takepen sa lekanin i siksa sa gay a mawli endu tatap sa naraka sa nakalusak.

Ya tabya na su midtawbat, nangimbenal a minggalebek sa mapya, ka sambyan nu Allah su kawagan nin sa mapya, ka su Allah na sangat a bangampun a malimu.

Su taw a midtawbat endu minggalebek sa mapya na lu sa Allah edtawbat sa tidtu a kadtawbat.

Endu di silan edsaksi sa kalbutan endu amayka nasagadan nilan i mawag (a kambityala) na mapya i kasagad nilan.

Endu amayka linabit sa kanilan su manga ayatan nu kadenan nilan na di silan embisu-ebpisekan.

Endu kadtalu nilan: Kadenan ami enggi kami sya kanu manga kaluma nami sa manga mawli-a-taw a kalilinyan nu manga mata nami, endu baluy ka a kaunutan nu manga magilek sa Allah.

Silan i pembalasan sa pangkatan a mapulu (surga) sabap sa kinadsabar nilan endu mabaratamu nilan i mapya kadtalu.

Dala sa kanilan i kalyu sa surga, mapya gayd a kabetadan a kadtangenan i kanilan.

Edtalu ka (Muhammad) sa kanilan: da idan nu Kadenan ku sa lekanu u di kena bu su kapendu’a nu, ka pinandalbut nu su sinugu nin endu su Qur’an, na di ebplis na matatap su siksa.

Ta-Seen-Meem (su Allah i mataw kanu ma'na nin).

Nya su manga ayatan nu Qur’an a mapayag (pebpayag sa haqq endu baatil).

Ikalimu nengka (Muhammad) su ginawa nengka sa patana ka, kagina di silan bangimbenal.

U nagkahanda nami i patulunan nami silan ebpun sa langit sa manga tanda na di mapinda sa kanilan i kadukum nilan kanu lig nilan sa kasangkup (sa Allah).

Endu da pakawma sa kanilan a Qur’an a pakatundug a di kena ya nilan enggulan na taligkudan nilan (di nilan palityayan).

Saben-sabenal a pinandalbut nilan i sinugu, na makawma bun sa kanilan su lalaw nu kabpagungat nilan.

Di nilan gadsuliman su lupa na madakel i pinatu’ nami lun a embalangan a manga mapya?

Nakadalem lu ba su tanda (a kapegkagaga nu Allah) endu dala bun kanu kadakelan sa kanilan i kapangimbenal.

Endu su Kadenan nengka na sekanin i mapulu a malimu.

Endu labit ka (Muhammad) sa kanilan su kinatawag nu Allah kanu Musa sa angay kanu sa kanu manga taw a salimbuten.

Kawm nu Fir’awn sa namba ka magilek bu silan (sa Allah).

Tig nu Musa: Kadenan ku, bangandam aku sa pandalbuten aku nilan.

Endu magaget i laleb ku endu di mapantas i dila ku, na paunuti aku kani Harun.

Endu aden pan dusa ku sa kanilan na bangandam aku sa bunun aku nilan.

Tig nu Allah: Di! Lu kanu den duwa, pananggit nu su manga ayatan nami, ka salta kami sa lekanu duwa, gakineg nami bun sekanu.

Lu kanu sa kani Fir’awn, ka edtalu nu sa lekanin i sinugu kanu nu Allah a Kadenan nu alameen.

(Edtalu nu): pawnut ka sa lekami (Fir’awn) su tupu nu Israel.

Tig nu Fir’awn: di kena tinyakapan nami seka (Musa) sa manawt ka pan endu nawget ka sa lekami. (nakatelu pulu lagun).

Endu pinggalebek nengka i pinggula nengka (a kina-imatay sa taw) seka na kuyug ka kanu manga kafir.

Tig nu Musa: U enggulan ku sa ulyan na nya ba (kinasabut ku) na kuyug aku sa manga tadin.

Pinalaguyan ku sekanu guna aku kagileki sa lekanu, na inenggan aku nu Kadenan ku sa kukuman endu binaluy aku nin kanu manga sinugu.

Endu limu nu Allah sa laki (sa da aku nengka ma- ulipen) sa kanu kabpangulipen nengka kanu manga tupu nu Israel.

Tig nu Fir’awn: entayn i Kadenan nu sa dunya?

Tig nu Musa: su Kadenan u manga langit endu lupa endu su pagelatan nin, amayka mangimbenal kanu.

Tig nu Fir’awn kanu nakalibet sa lekanin: nginan gakineg nu bun?

Tig nu Musa: Kadenan nu a Kadenan nu manga lukes nu a nangawna.

Tig nu Fir’awn: sinugu ba nya a sinugu san sa lekanu na saben-sabenal a buneg.

Tig nu Musa: Kadenan nu sebangan endu sedepan endu su pageletanin amayka magungangen kanu (magitung kanu).

Tig nu Fir’awn: amayka mumbal ka pan sa Kadenan a salakaw sa laki na lu ka makabpawang sa nangabilanggu antu.

Tig nu Musa: apya aden bun tindeg ku a mapayag?

Tig nu Fir’awn: pambuwat ka amayka benal ka.

Na pinitasan ni (Musa) su tungkat nin, na mimbaluy a nipay a mapayag.

Endu pinalyu nin su lima nin a mapya gayd i kaputinin kanu pakailay lun.

Tig nu Fir’awn kanu nakabalibet lun: mategel sa sih’r (pakayd) a mataw.

Kyug nin na matagak ku i dalpa nu sa namba sih’r nin anan, na ngin ba i lekanu a enggulan?

Tig nilan: di sasawan silan endu pasuguwi ka su langun na taw nu dalpa sa langun nilan.

Ka endu silan makanggay sa mataw gayd sa sih’r.

Linimud su manga matagel sa sih’r kanu waktu a napasadan.

Endu pidtalu kanu manga taw: nginan nangabulig kanu den?

Ka endu ya tanu bun kaunutan su manga pasi-sih’r amayka tumaban silan.

Guna makawma su manga mategel sa sih’r na pidtalu nilan kani Fir’awn: aden balas a makwa nami (premyu) amayka sekami i tumaban?

Tig nu Fir’awn: uway, ka makasupeg kanu den sa laki.

Pidtalu nu Musa sa kanilan: butawani nu den i langun na pembutawanan nu.

Binukawanan nilan i manga tali endu ped a kasangkapan nilan a tanan makagilek i palas nin endu pidtalu nilan: sabap sa kapulu ni Fir’awn a kadenan na sekitanu den i tumaban.

Binutawanan nu Musa su tungkat nin, na yanin pinggula na belinun nin su langun nu pinambuwat nilan a kalbutan.

Na nakadempas su manga taw na sih’r sa nakasugyud silan.

Ya nilan pidtalu (sa bagulyang silan): nangimbenal kami kanu Kadenan nu dunya.

A Kadenan nu Musa endu si Harun.

Tig nu Fir’awn: nangimbenal kanu kani Musa sa da ku pan makasugut sa lekanu? Su kaunutan nu bun a namandu sa lekanu sa sih’r i dupang, na di ebplis na katawan nu i tebpeden ku i manga lima nu endu su manga ay nu sa pambidayan ku, endu bitinen ku sekanu langun.

Tig nilan: di makagkayd, ka lu kami den mumpil kanu Kadenan nami.

Ka bagapasen nami i ampunen nin su manga dusa nami, ka sekami i nawna a mangimbenal kanu nya ba a timpu.

Endu ini-wahi nami kanu Musa i paawa ka sa magabi i manga ulipen ku, ka sekanu na tundugen kanu nilan.

Pinasuguwan nu Fir’awn su taw nu dalpa sa binulig nin silan.

Na silan na pidtalu nilan i paydu bu i nasama kanilan.

Endu silan na ya nilan galebek na pakasakit sa ginawa tanu.

Endu saben-sabenal i sekitanu na mangingat tanu tanan.

Pinalyu nami silan (taw nu Fir’awn) kanu manga surga nilan endu su manga buwal.

Endu tamuk a ginadung, endu bamagagayanan a mapya.

Mamba i kinapawaris nami lun kanu manga tupu nu Israel.

Sineled nilan (su Musa) endu su manga bamaginugut (sa kapedsebang na senang).

Guna silan makapamagilaya na ya nadtalu nu manga tagapeda nu Musa: magaws tanu den.

Tig nu Musa: di ka salta sa laki su Kadenan ku a tutulun aku nin.

Ini-wahi nami kani Musa: ibetay nengka i tungkat nengka sa lagat, nagupakan (sa sapulu endu duwa) uman isa na mana kasla na palaw i pageletan nin. (lu ba silan minukit sa dala silan mawasa).

Endu pinasupeg nami (su Fir’awn) endu su manga tagapeda nin.

Endu linepas nami su Musa endu su manga minunut sa lekanin langun.

Mawli na pinagaled nami (su Fir’awn) endu su kadakel nin.

Lu ba su tanda na kapegkagaga nu Allah, endu dala bun kanu kadakelan nilan i nangimbenal.

Endu su Kadenan nengka na sekanin i mapulu a malimu.

Endu labit ka (Muhammad) kanilan su tudtulan kani Ibrahim.

Pidtalu nin kani ama nin endu su manga taw nin: ngen i namba pedsimban nu anan?

Tig nilan: pedsimban nami na barahala a pedtakenan nami sa kapedsimba lun.

Tig nu Ibrahim: makineg kanu nin bun amayka tawagen nu?

Ataw ka pegkapya kanu nin bun ataw ka kagkaydan kanu nin bun?

Tig nilan: nya den ba i nabaratemu nami kanu manga lukes a galebekan nilan.

Tig nu Ibrahim: sekanu endu langun a pedsimban nu banan.

Sekanu endu su manga lukes nu a nawna.

Na silan na satru ku, ya tabya (di kena ku satru) na su Kadenan nu dunya.

Entuba i minaluy sa laki, endu tutulun aku nin.

Endu sekanin i papegkan-pabpaginum sa laki.

Endu upama ka pedsakit aku na sekanin i papegkapya sa laki.

Endu sekanin i bagimatay sa laki endu baguyag sa laki.

Endu bagapasen ku i ampunen nin su dusa ku kanu gay a mawli.

Kadenan ku enggay aku sa kukuman endu ikuyug aku nengka kanu manga taw a mapya.

Endu baluy ka sa laki i dila a benal (sa bandingan a mapya) kanu pakasambi.

Endu baluy aku sa makawaris kanu surga a na’eem.

Endu ampun ka kani ama (su dusa) ka sekanin i kuyug kanu nangatadin.

Endu di aku mapabpayan kanu gay a kambuwat (gay a mawli).

Gay a di makambarapantag su tamuk endu su wata.

Ya tabya na ya nin kawma sa kanu kadenan nin na su pamusungan a sinumangkup.

Endu isiken su surga kanu manga magilek sa Allah.

Endu ipayag su naraka kanu manga kafir.

Endu edtalun kanilan endu su pedsimban nu lu sa dunya (barahala)-

A salakaw sa Allah: ngintu katabangan kanu nin ataw ka katabangan nilan i ginawa nilan?

Na ulugen silan kanu naraka endu su manga kafir manga iblis.

Endu su manga minunut kani iblis langun.

Na pedtalu silan sa bamagukag (sa dalem na naraka).

(Ya nilan madtalu): ibet sa Allah na natading tanu sa mapayag.

Kagina magidsan i inugut nami sa lekanu (a barahala) sa mana den inugut nami sa Allah.

Endu dala nakatading sa lekami ya tabya na su manga baradusa.

Na dala den makasafa-at sa lekami.

Endu dala pakat a edtabang sa lekami.

Na u makambalingan kami bu na makuyug tanu kanu manga bamaginugut.

Nadalem lu ba su tanda a kapegkagaga nu Allah, na dala bun kanu kadakel nilan i mangimbenal.

Endu su Kadenan nengka na sekanin i mapulu a malimu.

Pinambudtud nu taw nu Nuh su manga sinugu.

Pidtalu kanilan nu suled nilan a si Nuh sa upama ka namba ka magilek kanu sa Allah.

Ka saki na sinugu aku sa lekanu a kasaligan.

Ikagilek nu su Allah endu paginuguti aku nu.

Endu di aku pegkwa sa lekanu sa sukay, ya tabya na lu sa Allah a Kadenan nu dunya.

Ikagilek nu su Allah endu paginuguti aku nu.

Tig nilan: di kami maginugut sa leka, ka ya bu naginugut na su manga baba a taw i gatamananin.

Tig nu Nuh: dala sabut ku kanilan sa kanu penggalebeken nilan.

Su Allah a Kadenan ku i mataw u mana bu ka kagedam nu.

Endu di ku bugawn su manga bamaginugut.

Ka da sa laki ya tabya na kapabpagingat a mapayag.

Tig nilan: upama di ka menda Nuh sa namba a galebek na makuyug ka kanu manga taw a berajamen.

Tig nu Nuh: Kadenan ku pinandalbut aku nu manga taw ku.

Bukati ka i bengawan kanu pageletan nami endu lepas aku endu su bagunut sa laki a manga bamaginugut.

Linepas nami sekanin endu su ped nin sya kanu awang a napenu.

Mawli na pinageled ami su nasama (di bangimbenal).

Lu ba nakadalem su tanda a kapegkagaga nu Allah, na dala bun kanu kadakelan nilan i nangimbenal.

Endu su Kadenan nengka na sekanin i mapulu a malimu.

Pinandalbut nu A'ad su manga sinugu.

Pidtalu nu suled nilan a si Hud: upama ka namba ka kagilekan kanu sa Allah.

Ka saki (Hud) sinugu aku sa lekanu a kasaligan.

Ikagilek nu su Allah endu paginuguti aku nu.

Endu di aku pegkwa sa sukay, ka dala sukay ku ya tabya na lu kanu Kadenan nu langun na dunya.

Endu pembalayan nu bu i manga kabetadan a mapulu sa tanda pendadalemetan nu.

Endu bangumbal kanu sa manga kapandayan (manga bunggalu) ka ya nu kataw na matatap kanu lu ba (di matay).

Endu amayka mametay kanu, na mametay kanu sa dala den lasam nu.

Ikagilek nu su Allah endu paginuguti aku nu.

Endu ikagilek nu su minagel sa lekanu (Allah) kanu nangatawan nu.

Binagel kanu nin sa manga binatang endu manga wata a mama.

Endu manga pamulan endu manga buwal.

Ikagilek ku sa lekanu su siksan nu gay a masla. (gay a mawli).

Tig nilan: magidsan bun sa lekami i mangindaw ka ataw ka di ka den mangindaw.

Ka dala sa nan (indawan nengka) ya tabya na inidtabu nu manga nawna.

Endu dala sa lekami i masiksa kami.

Pinandalbut nilan na bininasa nami silan, lu ba su manga tanda nu (Allah), na dala bun kanu kadakel nilan i mangimbenal.

Endu su Kadenan nengka na sekanin i mapulu a malimu.

Pinandalbut ni Thamud su manga sinugu.

Pidtalu nu Salih a suled nilan: upama ka namba ka magilek kanu sa Allah.

Ka saki na sinugu aku sa lekanu a kasaligan.

Ikagilek nu su Allah endu paginuguti aku nu.

Endu dala pegkwan ku sa lekanu a sukay, ya tabya na lu sa Allah a Kadenan nu dunya.

Natagu sa ginawa nu i sya kanu ba lalayun sa da makagkayd sa lekanu?

Sya kanu manga pamulan endu buwal.

Endu su manga pamulan endu kayu kulma a malemek i paganayan a unga nin.

Endu bameswan nu endu bagukilan nu su manga palaw a gabaluy a walay.

Ikagilek nu su Allah endu paginuguti aku nu.

Di nu baginuguti i suguwan nu baminasa.

A silan i baminasa sya kanu dalpa sa embalangan a kadarwakan endu di nilan papeg-kapyan su dalpa (sa inugut sa Allah).

Tig nilan dala alaga nengka, kagina nasugat kana sih’r.

Da sa leka, ya tabya na manusya ka, a pagidsan nami bun, na pambuwat ka i manga tanda nengka amayka benal ka.

Tig nu Salih: nya su unta, a natentu i lekanin a kainum, na natentu bun manem i lekanu.

Na di nu bu mamakaydan (mapakasakiti) ka masugat kanu na siksa kanu gay a masla.

Na sinumbali nilan (su unta), na nakadsendit ba lawa silan.

Bininasa nami silan sa siksa, nakadalem lu ba su tanda nu Allah, na dala bun sa kadakel nilan i nangimbenal.

Endu su Kadenan nengka na sekanin i mapulu a malimu.

Pinandalbut nu taw nu Lut su manga sinugu.

Pidtalu nu suled nilan a si Lut kanilan: upama ka namba ka kagilekan kanu sa Allah.

Ka saki na sinugu aku sa lekanu a kasaligan.

Ikagilek nu su Allah endu paginuguti aku nu.

Endu dala pegkwan ku sa lekanu a sukay ku, ya tabya a sukay ku na lu sa Allah a Kadenan nu dunya.

Ya nu pegkaluman na mama kanu manga taw.

Ipedtagak nu su manga kaluma nu a binaluy nu Allah sa lekanu? Sekanu na pengganat sa halal peb- pawang sa haram.

Nya nilan pidtalu: upama ka di ka menda Lut sa pedtalun nengka anan na makuyug ka kanu manga taw a binugaw nami (pinaawa).

Tig nu Lut: saki na kuyug aku sa gabensi kanu galebek nu.

Kadenan ku lepas aku endu su kadakel ku kanu galebekan nilan.

Na linepas nami sekanin endu su kadakel nin langun.

Ya tabya na su kaluma nu Lut ka nakamung mabinasa.

Mawli na bininasa nami su langun nu di kena bamaginugut.

Endu pinawlanan nami silan sa ulan a watu a apuy, na ngin den i kawag nin a ulan kanu nasugat nin.

Lu ba su tanda nu Allah, endu dala bun kanu kadakel nilan i mangimbenal.

Endu su kadenan nengka na sekanin i mapulu a malimu.

Pinandalbut nu manga tagapeda nu Aikah (pegkalben sa bangayuwan) su manga sinugu.

Pidtalu nu Shu'aib sa kanilan: upama ka namba ka magilek kanu bu sa Allah.

Ka saki na sinugu aku sa lekanu a kasaligan.

Ikagilek nu su Allah endu paginuguti aku nu.

Endu di kena aku pegkwa sa lekanu sa sukay ku ya tabya na lu sa Allah a Kadenan nu dunya.

Talutup nu i kapagasad nu (kadtimbang) da kanu lumugi sa manga taw.

Endu timbang kanu sa bantang a matidtu.

Di nu kumulangi su manga taw sa kawagib nilan endu da kanu pendupang kanu dalpa ka mabinasa kanu.

Endu ikagilek nu su minaluy sa lekanu (Allah) endu su nangawna sa lekanu.

Ya nilan pidtalu na: seka na kuyug ka kanu nasugata sih’r (pakayd).

Endu seka na manusya ka a pagidsan nami endu dala ga-antap nami sa leka a di kena kuyug ka kanu manga malbut.

Na paulugi kami sa siksa ebpun sa langit amayka benal ka.

Tig nu Shu'aib: su Kadenan ku i mataw sa galebekan nu.

Pinandalbut nilan, bininasa nami silan sa siksa a gabun i kailay lun, kena ka siksa kanu gay a masla.

Nakadalem lu ba su tanda nu Allah, na dala bun kanu kadakel nilan i nangimbenal.

Endu su Kadenan nengka na sekanin i mapulu a malimu.

Endu su Qur’an na initulu nu Kadenan nu langun nu Alam (dunya).

Initulu nu Jibril a sinaligan nu Allah.

Kanu atay nengka ka endu ka makuyug kanu manga sinugu.

Sa basa na Arab a mapayag.

Endu nalabit bun su Qur’an kanu nangawna (Taurat, Zabur, Injil).

Na ngintu ka di pan mabaluy a tanda kanu manga kafir su ulama nu tupu nu Israel (Abdullah bin Salam) a nag-Islam, sa nasabutan nin su Qur’an a benal sa da pan pag-Islam.

Umana bu ka initulun nami su Qur’an kanu taw a di kena Arab.

Na batyan nin sa kanilan, na di nilan bun pangimbenalen.

Mamba i kinapaludep nami sa kapandalbut kanu manga pamusungan nu baradusa.

Di silan mangimbenal taman sa di nilan mailay i siksa a masakit.

Na makawma sa kanilan sa matekaw sa di nilan madsagipa.

Na ya nilan madtalu: ngintu sekami na egkapangangapan pan (ka endu kami makadtawbat)?

Na ngintu ka pidtagadan nilan su siksa?

Upama ka pakalendun nami i kagkakalilini nilan sa lagunan.

Na mawli na makawma bun sa kanilan su kapatay a kasiksa sa kanilan.

Na da bun katagan nin sa kanilan su kalendu na umur a kalilinyan nilan.

Endu da bininasa nami a dalpa ya tabya na aden bun sinugu lun.

A bangindaw sa kanilan, ka di kena kami dupang.

Endu di kena shaytan i napatulun (kanu Qur’an)

Endu da kadayt nin endu da kagaga nilan.

Ka apya su kapakikineg nilan paganay (sa Qur’an) napalen saguna.

Na da ka mapakaduwa sa Kadenan nengka, ka mabaluy ka sa makuyug kanu manga taw a pedsiksan.

Endu pa-ingat ka su kadakel nengka a masupeg sa leka.

Endu ibaba nengka i ginawa nengka kanu manga taw a minunut sa leka a mgabamaginugut.

Na amayka sangkan ka nilan na edtalu ka sa kanilan i lepas ka kanu kanilan a manga galebekan.

Endu salig ka kanu mapulu a malimu.

A gailay ka nin sa katindeg engka sa sambayang.

Endu su kapedsugyud nengka.

Ka sekanin i pakakineg endu mataw.

Ngintu itutulu ku sa lekanu (a manga taw) su pedtalun nu shaytan?

Ya pedtalun nu shaytan a su malbut a baradusa.

Ipedtapenay nu shaytan i nakinegan a kalbutan.

Su pababayuk nu manga kafir na bagunutan nu manga dupang.

Nailay nengka silan sa apya endaw i bityala na nakasagad i sa kanilan?

Endu pedtalun nilan i di nilan panggalebeken.

Ya tabya na su manga bamaginugut a minggalebek sa manga mapya, endu tinademan nilan su Allah sa madakel, endu tinumalaw silan kanu ulyan na kina dupang sa kanilan, ka di ebplis na katawan nu mindupang u ngin i palas na kambalyunga nilan.

Ta-Seen (su Allah i labi mataw kanu ma’na nin), nya ba a manga ayatan nu Qur’an, endu kitab a mapayag (minayag sa halal-haram, bantang- baatil).

Tutulu endu papata nu manga bamaginugut.

A pedtindeg sa sambayang endu pedzakat silan endu di gapinda sa ginawa nilan su gay a mawli.

Su manga taw a di bangimbenal sa gay a mawli na mapya gayd i kailay nilan sa galebek nilan a malat, na manteng-anteng silan sa kawagan nin sa Allah.

Silan a manga taw na kanilan su kalatan nu kasiksa, endu silan na lu sa gay a mawli i manga nangalugi.

Endu saben-sabenal seka (Muhammad) na makawma sa leka su Qur’an ebpun saAllah a mawngangen a mataw.

Labit ka (Muhammad) su kinadtalu nu Musa kani kaluma nin sa: aden nasandeng ku a apuy, kumwa aku lu sa tudtulan ataw ka itan ku sekanu sa but na apuy a makapagegung ataw ka madsulu tanu.

Guna nin mawma na tinawag sekanin (nu Allah): mimbarakat i nya sa apuy anya endu su makalibet lun, mahasuti su Allah a Kadenan nu dunya.

Hay Musa! saben-sabenal na Saki su Allah a mapulu a mawngangen.

Pitasi ka su balala nengka, ya kinailay ni (Musa) na mana bun nipay, tinaligkudan nin sa da nin embalingani, (tig nu Allah): Hay Musa! Da ka pegkagilek, ka di kagilekan sa hadapan ku su manga sinugu ku.

Na tabya na su dinupang nin i ginawa nin, mawli na midtawbat, ka saki na bangampun aku a malimu.

Iludep ngka i lima nengka kanu banggala nengka ka lumyu i maputi a dala simbul nin a ped kanu siyaw a tanda, ipailay kani Fir’awn endu su manga taw nin, kagina silan a manga taw na nakalyu i galebek nin.

Guna makawma kanilan su manga ayatan nami a mapayag na ya nilan pidtalu na sih'r (pakayd) a mapayag.

Endu pedsangkan nilan sa katawan nilan ebpun sa Allah, ugayd na midtakena kanu ginawa nilan i ka-kafir kamamasla, kabpapulu, ilay ka (Muhammad) su ulyan na kapaminasa (ka binasan bun silan).

Endu saben-sabenal a inenggay nami kanu Daud endu su Sulayman i kataw na ya nilan pidtalu: su pugi na kanu Allah a inilabi kami nin kanu madakel a manga ulipen nin a manga bamaginugut.

Nawarisan nu Sulayman si Daud endu pidtalu nin: Hay sekanu a manga taw! Pinakatawan sa lekami i kadtalu na papanuk, endu inenggay sa lekami i langun na enggaga-isa sa namba na limu a mapayag.

Endu nabulig kanu Sulayman su manga bagel nin a jin endu manusya, endu manga papanuk, pembulig i kapapengganat nin.

Taman sa nawma nilan i bawgan a manga pila (kuliga), pidtalu nu kaunutan nilan: sekanu a manga kuliga, ludep kanu sa manga pesu nu ka endu di kanu malupet ni Sulayman endu su manga kadakel nin ka di nilan magedam.

Nakadtatawa su Sulayman sa kadtalu nu pila, endu tig nin: Kadenan ku ilhami aku sa kadsukur sa limu nengka sa laki endu su lukes ku, endu manggalebek ku i mapya a kasuwatan nengka, endu paludep aku kanu manga ulipen nengka a manga salihin (mapya).

Bangilayn nin su papanuk, (tig nu Sulayman): nginya ka di ku mailay su manunutuk? Tabya bun ka da unut.

Siksan ku sa mapasang ataw ka sumbalin ku ataw ka aden (mapananggit nin) a tindeg nin a mapayag

Dala ged mawget na nakawma na ya nin (manunutuk) pidtalu na: aden nailay ku a dala nengka mailay, nakabpun aku sa Saba' na aden tudtulan ku a benal.

Aden babay a pindatuwan nin su taw na dalpa a inenggan sa langun taman (kawasa a babay) aden pan arash in a masla.

Nailay ku silan langun sa ya nilan pedsugyudan na senang a salakaw sa Allah, sa sasat a shaytan sa galebekan nilan sa di silan makatuntul sa lalan nu (Allah) na silan na di silan gatutulu.

Di pan pedsugyud sa Allah a pabpagetu’ sa pinamula sya sa lupa, sabap kanu ulan ebpun sa langit, endu katawan nin pan su ipedsulen nu endu su ipebpayag nu.

Dala kadenan a padsimban ya tabya na su Allah kigkwan sa Ar'sh a masla.

Tig nu Sulayman: amaden upama ka benal ka ataw ka pembudtud ka (manunutuk).

It ka i sulat ku anya ka ulug ka lu sa kanilan, mawli na tangka ka, endu ilay ka u ngin i enggulan nilan.

Tig nu bai kanu kangasaligan nin: inulugan aku sa sulat a mapulu.

Saben-sabenal na ebpun kanu Sulayman a nya ba i uni nin: Bismillahir Rahmanir Raheem (Ibpun ku matya su ingalan nu Allah a malimu a sangat i kalimu nin).

Da kanu ebpapulu sa laki, pag-Islam kanu sa laki.

Sekanu a madakel edtalun nu u ngin i enggulan ku, ka di ku sekanu itagak sa apya ngin a galebek mana bun su natawan nu.

Tig nu madakel: mabagel tanu endu mapasang tanu, na san sa leka i kataw u ngin i suguwan nengka.

Tig nu bai: su manga datu a kaludepan nilan i dalpa na binasan nilan, endu baluyn ilan su mapulu nu dalpa a makababa na mamba i pakaydan nilan kanu manga taw.

Ugayd na papaytan ku i namba sa hadiyah a mapulu i alaga nin ka endu tanu ma-amad u nginan datu ataw ka nabi.

Guna makawma kani Sulayman na tig in: bagenggan aku sa tamuk? Na nya pan mapya i inenggay nu Allah sa laki sa inenggay nin anan sa lekanu ugayd na sekanu na kalinyan nu gayd i hadiyah nu anan.

Embalingan ka sa kanilan ka itan ku silan sa manga mama a mategel embunuwa sa dala ka-atu nilan endu palyun nami silan kanu dalpa nilan sa lusak silan sa endaw i kyug sa kanilan.

Tig nu Sulayman kanu kadakel nin: entayn i kumwa sa arash nin sa di pan silan pakapag-Islam?

Ya pidtalu nu mapulu na jin: saki i kumwa lun sa di ka pan makatindeg sa bagayanan nengka ka mabagel aku a kasaligan.

Ya manem pidtalu nu aden ilmu nin sa kitab: saki i kumwa lun sa yanin kangagan na sapelek mata, guna nin mailay a nakadtakena kanu hadapan nin na yanin pidtalu na nya ba na ebpun sa limu nu Allah, pembatalun aku nin u makadsukur aku ataw ka egkafir aku, ka su taw a masukur na kana ginawa nin, su taw menem a egkafir na su Kadenan ku na kawasa a malimu a mapulu.

Tig nu Sulayman: panalin nu i arash nin anan ka endu tanu katawan u makilala nin bun ataw ka di nin den makilala.

Guna makawma su bai na inidsan nin: nya ba su arash nengka? Tigin: mana su nya ba, tig nu: Sulayman nawna pan i kataw tanu sa lekanin endu sekitanu pan i nawna mag-islam sa lekanin.

Endu sinapalan nin kanu pedsimban nin a salakaw sa Allah, ka su bai antu na kuyug kanu manga taw a kafir.

Pidtalu sa lekanin (su bai): san ka ukit sa titayan, guna nin mailay na yanin talima na lawas na ig, nasawan nin i lisen nin, tig nu Sulayman: titayan a matilak sa mana den katya, pidtalu nu bai: Kadenan ku nadupang ku i ginawa ku na mag-Islam aku sa kaped ni Sulayman kanu Kadenan nu dunya.

Endu sinugu nami lu kani Thamud si Salih, sa simba nu su Allah, na naduwa bad su taw nin a di bagayun.

Tig nu Salih: nginan ka yanu kadtagadan i malat kanu mapya? U namba ka mapa-ampun kanu sa Allah na malemu-lemu sa lekanu i makakalimu kanu.

Tig nu manga kafir: senditan nami seka endu su bagunut sa leka (u ngin i manggula nami) tig nu Salih: lu sa Allah idtempu nu, ka sekanu a manga taw a ga- fitnah.

Aden kanu dalpa i siyaw kataw a baminasa kanu dalpa endu da ungaya nin a makagkapya.

Nya nilan pidtalu: edsasapay tanu sa u magabi na bunun nilan si Salih endu su kaluma nin, mawli na edtalun nilan (kanu manga taw): di nilan katawan (entayn i minunu) endu sekami na benal i kadtalu nami.

Pindulatan nilan (si Salih) na su Allah i pendulat sa di nilan gagedam.

Ilay ka su ulyan na itungan nilan a malat, bininasa nami silan endu su manga taw nilan langun (a manga kafir).

Entuba su manga dalpa nilan a dala den taw nin sabap sa kadupang nilan, lu ba su tanda nu Allah (a kapegkagaga) ka endu nilan katawan.

Endu linepas nami su manga bamaginugut endu magilek silan sa Allah.

Endu su Lut, pidtalu nin kanu taw nin: maledsik i galebek nu, na sekanu na kailay nu bun.

Ya nu pegkaluman (a manga mama) na mama bun sa kyug na ginawa, di kena den su manga babay, sekanu a manga taw na manga jahil.

Da pidtalu nu manga taw nin ya tabya: pa-awa nu su manga kadakel ni Lut sya sa dalpa nu a nya ka silan a manga taw a barasuti gayd.

Na linepas nami su Lut endu su kadakel nin ya tabya na su kaluma nin ka inamung nami kanu manga taw a nabinasa,

Pinaulanan nami silan sa ulan a manga watu a ngin den i kawag in a ulan kanu manga taw a darwaka.

Edtalu ka (Muhammad): su pugi na kanu Allah endu su sagyahatra na kanu manga ulipenin a pinamili nin, na ngintu su Allah i mapya ataw ka su barahala nilan?

Sekanin (Allah) na binaluy nin su manga langit endu lupa endu pinatulun nin sa lekanu ebpun salangit i ig, na pinatu’ nami sabap kanu ig i manga pamulan a manga mapya i palas nin, di nu magaga i patun nu su manga kayu nin, na ngintu aden tagapeda nu Allah? Kena! Ka silan a manga taw na pedsibay.

Su Allah i minaluy kanu lupa a pedtakenan endu binaluy nin kanu lupa i manga ig endu binaluy nin i manga palaw a tigel endu binaluy nin i pageletan nu lagat endu tabang (sa di makadsimbul), dala kaped nu Allah ugayd na madakel sa kanilani di mataw.

Sekanin i pedtalima kanu du’a nu nakasendud endu iyawa nin su mawag endu binaluy kanu nin a pamakadsukelya sya sa lupa, na dala man kaduwanu Allah, paydu gayd (kanu manga taw) i tumalima sa indawan sa lekanu.

Endu sekanin (Allah) i pedtutulu sa lekanu kanu malibuteng sa kapuluwan endu lagat endu sekanin (Allah) i pedsugu sa sambel sa mapya i manggiginawa nu a gawna sa ulan, dala a benal kaduwa nu Allah, mahasuti su Allah kanu ipedsakutu nilan.

Endu inebpunan nin su binaluy nin, mawli na pauliten nin sa ulyan na kapatay endu sekanin i pe-rizki sa lekanu ebpun sa langit endu lupa, dala kaduwa nu Allah, pambwat nu i tindeg nu amayka benal kanu.

Edtalu ka (Muhammad): da mataw sa gayb kanu manga langit endu lupa ya tabya na su Allah endu di nilan magedam u kanu i kambwat nilan.

Ugayd na dala magaws nu kataw nilan su akhirat, endu silan na penduwa-duwa kanu gay a mawli endu silan na timbang a pisek silan.

Endu pidtalu nu manga kafir: u nabaluy tanu a libubuk endu su manga lukes tanu na makambuwat tanu pamun?

Edtalu bun i namba sa lekami endu lu kanu kalukesan a nawna pan (sa lekitanu), ugayd na nan na inisulat bu a kalbutan.

Edtalu ka (Muhammad) sa kanilan: lakaw kanu sya sa lupa ka endu nu madsuliman u ngin i ulyanan nu manga taw a baradusa.

Endu di ka belidu i ginawa nengka sa kanilan endu di ka kabukulan (kagkaydan) kanu itungan nilan sa leka a mawag (tabangan nami seka).

Endu pedtalun nilan: kanu i kawma nin i namba (siksa endu gay a mawli) amayka benal kanu?

Edtalu ka sa kanilan: masupeg den sa lekanu su kaped kanu siksa a pedtagadan nu.

Endu su Kadenan nengka na egkuwan sa limu kanu manga manusya, ugayd na ya madakel sa kanilan i di masukur.

Endu katawan u Kadenan nengka su bagedtik kanu laleb nilan endu su ipebpayag nilan.

Endu da masulen kanu dalem nu langit endu su lupa a di kena nakasulat bun kanu kitab (Lawh Al- Mahfuz) sa mapayag.

Namba Qur’an na napanudtul nin kanu manga tupu nu Israel su madakel a di nilan bamagayunan.

Endu (Qur’an) na tutulu endu limu kanu mga bamaginugut.

Su Kadenan nengka i kumukum sa kanilan kanu hukuman nin endu sekanin (Allah) i mapulu a mataw.

Na salig ka sa Allah, nakadtimpawa ka sa bantang a mapya.

Di nengka makapapakikineg i (timbang) minatay endu su bisu kanu enggatan nengka amayka minawa (silan) na tinumaligkud.

Endu di nengka matutulu su pisek kanu kinatading nin, nya nengka makapapakikineg na su bangimbenal kanu manga ayatan nami a pedsangkup silan (sa Allah).

Endu amayka makawma i siksa sa kanilan na palyun nami sa kanilan i binatang ebpun sa lupa sa imbityala nin silan, sa namba a manga taw na dala papedtagan nilan kanu manga ayatan nu Allah.

Endu su gay a buligen nami kanu uman i ummat i manga tagapeda nin a napandalbut kanu ayatan nami, entuba su kangaunutan a darwaka.

Taman sa u nakawma silan (kanu Allah) na edtalun nu Kadenan: pinandalbut nu su ayatan nami a da nu sabuti na sinangkan nu, na ngin i pinakaydan nu kanu manga suguwan ku?

Nakabetad sa kanilan su naraka sabap sa kadupang nilan, na silan na di den silan makadtalu.

Ngintu da nilan katawi i binaluy nami su magabi sa kanilan a ibangintelenan nilan endu su malamag a kailay nilan, nadalem samba su manga tanda a kapegkagaga nu Allah kanu manga taw a bamaginugut.

Endu su gay a kayup kanu sanggakala na katekawan (makalesing) su dalam na langit endu lupa ya tabya na su kahanda nu Allah endu uman isa na makambwat a lusak silan.

Endu antapen nengka su palaw na belenek, di kena (belenek) ka pakabayug a sambel, atulan nu Allah a mibpya-pya kanu enggaga-isa, su Allah na katawan nin i langun na penggulan nu.

Su taw a mapya i napananggit nin, na muna pan i kapya na balas a makwa nin endu di silan katekawan (makalesing) kanu kayup kanu sanggakala.

Endu su taw a ya nin napananggit na malat na ipedsumek silan kanu naraka, dala pembalasan ya tabya endaw i pinggalebek nu (sa dunya).

(Edtalu ka Muhammad): saki na sinugu aku sa simban ku i Kadenan u nya ba a dalpa (Makkah) a pinagadatan nin endu lekanin (Allah) i langun a enggaga-isa endu sinugu aku sa saki i muna semangkup sa Allah.

Endu batyan ku sa lekanu su Qur’an, na su taw a naginuntulan na ginawa nin (i pibpyapyanan nin), su midtadingan menem na edtalu ka (Muhammad) sa kanilan: saki na kuyug aku kanu manga sinugu.

Endu edtalu ka (Muhammad): Alhamdulillah, ka ipailay nami sa lekanu su manga ayat in, na katawan nu (i namba), dala sa Kadenan nengka i limpang sa galebekan nu.