Magindanao Meal — Rowad Tercüme Merkezi — Kasas 28:1 – Zuhruf 43:89

Ta-Seen-Meem (su Allah i labi a mataw kanu ma’na nin).

Nya ba a manga ayatan nu Qur’an a mapayag.

Pembatyan nami sa leka (Muhammad) su tudtulan kanu Musa endu su Fir’awn sa benal, kanu manga taw a manga bamaginugut.

Si Fir’awn na mibpapulu sya sa lupa endu binaluy nin su manga taw nin sa lumpuk-lumpuk, papegkapasangan nin su isa tumpuk, banumbalin nin i manga wata a mama, ya nin baguyagen na manga babay, sekanin (Fir’awn) i isa kanu baminasa.

Endu ya nami kyug na makakalimu nami su papegkapasangan sya sa lupa endu baluyn nami silan a kaunutan sa mapya endu silan i makawaris kanu dalpa.

Endu padtakenan nami silan kanu dalpa endu ipailay nami kani Fir’awn endu si Haman endu su manga tantara nilan su bangabungan nilan (si Musa).

Inilham nami kanu ina ni Musa: pasusu ka (si Musa), amayka kagilekan ka na idtug nengka sa lagat, na da ka magilek endu di ka lumidu i ginawa nengka ka imbalingan nami bun sa leka endu baluyn nami ebpun kanu manga sinugu.

Nasabet nu kadakel nu Fir’awn (su Musa) sa mabaluy a satru nilan endu makalidu sa ginawa nilan, si Fir’awn endu si Haman endu su manga tantara nilan na nalimban silan.

Endu pidtalu nu kaluma ni Fir’awn: kalimu-limu kanu bun a di nu bagimatayi (si Musa), ka basi makangguna sa lekita ataw ka embabatan ta den, na silan na di nilan kagedam (sa namba i makabinasa sa kanilan).

Endu nangalingasa su ina nu Musa, paydusama na madtalu nin i wata nin, u di kena bu tinegkes nami su pusung nin ka endu makuyug kanu manga taw a bangimbenal.

Endu pidtalu nin (ina ni Musa) kanu suled nu Musa a babay: pangilay ka (su Musa), na nasandeng nin (su Musa) sa mawatan sa di katawan (u manga taw) i suled nu Musa.

Endu da nami pakalilini kanu (Musa) i makasusu kanu manga babay, pidtalu nu suled nin (a babay): tutulun ku sekanu sa babay a basi nin susuwan sa tuldun nin sa lekanu sa mapya endu pagungayan nin sa lekanu (entuba su ina nu Musa).

Imbalingan nami (si Musa) kani ina nin, ka endu mapya i ginawa nin endu di malidu i ginawa nin endu nin katawan i pasad nu Allah na benal, ugayd na ya madakel sa kanilan i di manga mataw.

Guna makasampay (umul nin) sa lagun a kanakan a mapya i kapagitung nin na inenggay nami sa lekanin su ungangen endu kataw sa kukuman, ka mamba i kapembalas nami kanu manga taw a manga mapya.

Endu linudepan nin su dalpa sa waktu a ibangintana (napulid i senang) nawma nin i bagukag, su sakataw na tagapeda nin (sa agama), su sakataw na satru nin, napatabang su tagapeda nin sa lekanin kanu satru nin, na tinabangan nu (Musa) su tagapeda nin sa binetay nu Musa na minatay, ya nin nadtalu na: nya ba na kuyug sa galebekan na shaytan a satru a pedtading a mapayag.

(Si Musa) na pidtalu nin: Kadenan ku nadupang ku i ginawa ku, ampun ka sa laki, inampun sa lekanin nu (Allah) ka su Allah na mangampun a malimu.

Pidtalu nin pan: Kadenan ku kagina ka inikalimu aku nengka na di aku den makatabang kanu manga baradusa.

Napitan sekanin (Musa) lu kanu dalpa sa bangandam endu bagangata u ngin i ulyan na kinapatay, na ngin pan ka su napatabang kagay na papedtabang den menem, pidtalu nu Musa sa lekanin: darwaka ka sa mapayag.

Guna su pegkyugan nin pembetay su satru nin, na ya nin pidtalu: O Musa, kyugan aku nengka den mimatay sa mana su kina-imatay nengka kagay? Da kahanda nengka (Musa) ya tabya na mameges ka sya sa lupa endu di kena ka besen papegkapya.

Endu nakawma i mama a nakebpun sa tedtab nu inged a bamagayas, tig in kani Musa: namagumpung i manga taw sa kabunu nilan sa leka, na awa ka den, ka bagungayan ku seka.

Minawa (si Musa) sa bangandam sa bamamati, tig in: Kadenan ku lepas aku kanu manga taw a dhalimeen.

Guna su maytu na lu den sinumangul sa Madian, pidtalu nin: basi itutulu nu Allah sa laki i bantang a lalan.

Guna makawma sa kalut na ig sa Madian na nawman nin i manga taw a pabpaginum sa kambing endu aden duwa kataw a manga babay a pedsegseg sa kambing, tig nu Musa: ngin i galebek nu sya? Tig nu manga babay: di nami pakapainum i kambing nami taman sa di pan makapasad i manga taw anan endu si ama nami na matwa den.

Pinainum nin sa kanilan, mawli na lu mibpawang sa masilung sa pidtalu nin: Kadenan ku gagutem aku, na sya aku patumpa (pabpawang) sa aden makan ku lun.

Nakawma su isa kanu manga babay sa gamamala, sa ya nin pidtalu: lu ka kun tig ni ama, ka pembalasan kanin sa kina pa-inumin engka kanu kambing nami, guna makawma endu napanudtul nin su nanggula nin, tig nu matwa (namba su Shu’aib a nabi): da ka magilek, ka nalepas ka den kanu manga taw a darwaka.

Tig nu isa kanu manga babay: ama, sukay ka (sa enggalebek) sa katuganul sa kambing ka mapya a pedsukayan ka mabagel endu kasaligan.

Tig nu ama nilan (Shu’aib): kyugan ku a magkaluma nengka i sakataw sa manga wata ku a nya, sa (yanin sarat) tuganul ka i kambing anan sa walu lagun, amayka menem ka pengganapen nengka sa sapulu lagun na san den sa leka, endu di ku kyugan i kapasangan ka, endu mabaratemu aku nengka bun, u myug su Allah, sa mapya aku a taw.

Tig nu Musa: nya ba i pageletan ta, apya endaw i magaga ku sa duwa anan na da tuntuten ku endu su Allah i mataw kanu bityala ta.

Guna masampay nu Musa su pasad na belalakaw silan kani kaluma nin, na aden nasandeng in kanu palaw a apuy, tig in kanu kaluma nin: sya kanu dumpan, ka aden nailay ku a apuy, bawangan ku ka basi aden tudtul ataw ka kumwa aku sa apuy a madsulu tanu ataw ka ipagegung.

Guna nin mawma (su apuy) na tinawag su (Musa) kanu tampal sa kawanan nin lu kanu tampat a barakat a kayu: Hay Musa! Saki su Allah a Kadenan nu dunya.

Endu butawani ka i tungkat engka anan, guna nin mailay a penggagalebek sa mana den nipay, tinangka nin sa tinumaligkud sa di den lumengi, (pidtalu sa lekanin): Hay Musa! Da ka kagilek, ka da manggula nengka.

Iludep engka i lima nengka kanu uyut engka ka lumyu a maputi pagilayn sa dala simbul nin, endu kegkem ka i lima nengka (ka mawa su gilek engka) ka duwa timan anan na tindeg nu ebpun kanu Kadenan nengka (na ipailay nu) kani Fir’awn endu su kadakel nin, ka silan a manga taw na manga faasiq. (nakalyu sa suguwan nu Allah)

Tig nu Musa: Kadenan ku aden binunu ku kanilan na basi bunun aku nilan bun.

Na suled ku a nya a si Harun na ya mapantas i dila nin sa laki, na sekami duwa i mangay (kanu Fir’awn) makatabang sa laki sa makabagel sa laki, bangandam aku sa pandalbuten aku nilan.

Tig nu Allah: bagelen nami seka kanu suled nengka endu baluyn nami sa lekanu i tindeg sa di kanu nilan mawma sa malat sabap kanu manga tanda nami, endu sekanu duwa endu su bagunut sa lekanu i makatalaw sa kanilan.

Guna makawma sa kanilan su Musa sa (nakadtapik) sa manga tanda a mapayag, na ya nilan pidtalu na: nan a sih’r a inidtebu endu da nami makineg kanu manga kalukesan nami a nangawna.

Tig nu Musa: su Allah i labi a mataw sa kanu nakapananggit sa kanu tutulu ebpun sa Allah endu katawan u Allah entayn i mapya i ulyanan nin sa gay a mawli, ka di den makauntung su manga darwaka.

Tig nu Fir’awn kanu kadakel nin: da natawan ku a kadenan nu a salakaw sa laki, seka Haman na adum ka sa lupa, ka umbali aku sa maligay a mapulu (malambeg) ka basi ku mailay i Kadenan ni Musa, sabap sa bagantapen ku i pendalbut sekanin.

Endu mimamasla sekanin endu su manga tantara nin sya sa lupa sa dala kawagib nin endu ya nilan kataw na di silan makambalingan sa lekami.

Bininasa nami (si Fir’awn) endu su manga tantara nin, pinageled nami kanu lagat, ilay ka (Muhammad) u ngin i nanggula nu manga taw a baradusa.

Endu binaluy nami silan a kawnutan na mangenggat lu sa naraka, endu lu sa gay a mawli na dala tabang sa kanilan.

Endu tinundugan ami silan sya sa dunya sa mulka endu lu sa gay a mawli na silan i nakatangka sa kanu mapya.

Endu inenggay nami kani Musa su kitab (Taurat) sa ulyan na kinabinasa nu manga taw a nangawna sa makapasigay sa pusung endu tutulu endu limu, ka malemu-lemu sa kanilan i ma-indaw silan.

Endu da ka matabu (Muhammad) sa palaw sa kanu waktu a kinawahi nami kani Musa endu da ka makadsaksi kanu langun antu.

Ugayd na napambuwat kami sa manga taw sa ulyan nu (Musa) a manga lendu i umur nin, endu di kena ka kaped sa taw na Madian, ka pembatyan nengka su manga ayatan nami, ugayd na sekami i sinumugu kanu manga sinugu.

Endu da ka lu sa takilidan na palaw kanu kinatawag nami (kanu Musa) ugayd na limu ebpun sa Kadenan nengka (kinasugu sa leka) ka endu nengka kapakagilekan su manga taw kanu nakawma sa kanilan a nawna sa leka, ka basi makatadem silan.

(Umana bu ka da nami seka sugwa) na amayka masugat silan na tyuba sabap kanu kawagan nu galebek nilan, na ya nilan edtalun na: upama nya ba ka aden sinugu nengka sya sa lekami a rasul na unutan nami su ayatan nengka, na mabaluy kami a manga bamaginugut.

Guna makawma sa kanilan su bantang (su sinugu endu su Qur’an) na ya nilan kadtalu: upama ka namba ka inenggan si (Muhammad) sa mana su inenggay kanu Musa, enduken di kena nilan sinupak bun su inenggay kanu (Musa) a nawna? Ya nilan pidtalu na: sih’r a midtabanga (su Taurat endu Qur’an), endu pidtalu nilan: sekami na langun u pidtalu nu na supaken nami.

Edtalu ka sa kanilan: pambuwat nu i kitab nu ebpun sa Allah a muna pan (sa Qur’an) i katutulu nin ka unutan ku amayka benal kanu.

Amayka di ka nilan taliman na ya nilan bagunutan na su hawa-nafsu nilan, na da nakalawan i kinatading nin kanu taw a ya nin bagunutan su hawa-nafsu nin sa dala tutulu ebpun saAllah, su Allah na di nin tutulun su manga taw a darwaka.

Endu saben-sabenal a pinayag nami sa kanilan su kadtalu (Qur’an) ka basi makatadem silan (kanu Allah).

Su manga taw a ineggan nami sa kitab a nawna sa (Qur’an) na nangimbenal silan.

Endu amayka batyan sa kanilan (su Qur’an) na ya nilan madtalu: nangimbenal kami sa benal ebpun kanu Kadenan nami, da pan makatulun na sinumangkup kami den.

Silan antu a manga taw na duwa takep i balas nin kanu kinadsabar nilan endu bagalawn nilan su mawag sa mapya endu su ped kanu inirizki nami sa kanilan na pembaranggyan nilan sa Allah.

Endu amayka nakineg nilan i da katagan nin na taligkudan nilan, endu ya nilan kadtalu: lekami den i lekami, lekanu den i lekanu, sagyahatra sa lekanu, di nami kyugan i ka-jahilan.

Di nengka matutulu su kalilinyan nengka ugayd na su Allah i tumutulu kanu kagkahanda nin ka sekanin i mataw kanu natutulu.

Endu pidtalu nilan: amayka munut kami sa leka kanu tutulu na pawang kami kanu dalpa nami, (tig nu Allah): binaluy nami sa lekanu su (Makkah) a tumatana kanu, a bananggitan sa embalangan a unga na kayu, a rizki ebpun sa lekami (Allah) ugayd na ya madakel sa kanilan na di mataw.

Endu madakel den i bininasa nami a dalpa a madakel i rizki nin, entuba su manga dalpa nilan, na dala den kandalpay sa ulyan nilan ya tabya na paydu bu (a manga taw), endu sekami (Allah) i mawaris kanu dalpa.

Endu da kanu Kadenan nengka i binasan nin i dalpa sa di pan makambuwat i masla nin a sinugu, sa batyan sa kanilan i ayatan ami, endu dala sa lekami i binasan nami i dalpa ya tabya na dupang i taw nin.

Endu apya ngin i inenggay sa lekanu na igkakalilini nu bu sa kabpaguyag sa dunya endu kapalasan, su lu sa Allah na ya mapya endu ya gasama, na ngintu ka di kanu magungangen?

Entayn i pibpasadan ami sa pasad a mapya (surga) na mawma nin, sa mana bun su (pasad ami) kanu inenggan nami sa kalilinyan nin (a uyag-uyag) sa dunya, mawli na lu sa gay a mawli na kuyug kanu pedsiksan (su manga taw a nabimban sa dunya).

Endu su gay a katawag nu (Allah) sa kanilan endu (katawag) kanu manga barahala nu sa ya nu pedtalun na tagapeda ku (Allah).

Pidtalu nu manga kangaunutan sa katadingan a pakanaraka (amayka siksan den): Kadenan nami silan ba nan a pinasibay nami na di kena tinegel (sa sumibay silan) sa mana su kinasibay nami, mibpukas kami sa kanilan sa leka (Allah) di kena kami papedsimba sa kanilan.

Edtalun sa kanilan: tawag nu su barahala nu, tinawag nilan na da silan (barahala) makasawal endu nailay nilan su siksa, na u natutulu silan (sya sa dunya na di silan masiksa).

Endu su gay a tawagen silan sa edtalun sa kanilan: ngin i initalima nu kanu manga sinugu?

(Namba a gay) na napelen sa kanilan i kadtalu a makalepas sa kanilan, kanu namba a gay na di silan mamakapagidsaya.

Su midtawbat endu nangimbenal endu minggalebek sa mapya na di ebplis na makuyug kanu manga taw a nakauntung.

Endu su Kadenan nengka i bamaluy sa kahanda nin endu kyugan nin, endu dala sa kanilan (a manga kafir) i kapamili, mahasuti su Allah kanu manga ipedsakutu nilan.

Endu su Kadenan nengka na katawan nin i kumedu kanu manga laleb nilan endu su ipebpayag nilan.

Endu sekanin su Allah a dala kadenan a salakaw sa lekanin endu lekanin su pugi sa dunya-akhirat endu lekanin i kukuman endu lu bun makambalingan sa lekanin (Allah).

Edtalu ka sa kanilan: u baluyn nu Alllah sa lekanu su magabi sa dayun sa dayun taman sa gay a mawli na entayni kadenan a salakaw sa Allah a makapambuwat sa malinawag? Na di nu gakineg?

Na edtalu ka u baluyn nu Allah sa lekanu su malamag sa da den magabi taman sa gay a mawli na entayn i kadenan a salakaw sa Allah a mapambuwat sa lekanu sa magabi a makatelen kanu? Na ngintu di nu gailay so manga tanda nu Allah?

Endu limu nin sa lekanu su magabi endu malamag, a makatelen kanu (sa magabi) endu makapangilay kanu sa limu nin (sa malamag) ka makadsukur kanu (sa Allah).

Endu su gay a tawagen silan nu (Allah): endaw su manga barahala nu a pedtalun nu (lu sa dunya) a makadtabang sa lekanu (sya sa akhirat)?

Endu pinambuwat nami kanu uman i ummat i saksi nilan (su manga nabi nilan) na edtalun nami: sya nu su tindeg nu, na natawan nilan su Allah i (tindeg) a bantang endu natading sa kanilan su langun nu ipedtebu nilan (kanu Allah).

Saben-sabenal si Qarun na kaped kanu taw nu Musa na migkafir sa kanilan, endu inenggan nami sa manga ginadung a tamuk, su manga gunsi na manga tamuk nin na kawgatan i manga taw a madakel a mabagel, pidtalu nu manga taw nin: sa da ka (Qarun) kagalaw (pemamasla sa kadakel na tamuk) ka di kasuwatan nu Allah su kagalaw (a kamamasla).

Endu ituntul nengka ka su inenggyan nu Allah sa leka (a tamuk) sa balas sa akhirat endu di ka lumimpangi su umun nengka sa dunya endu ebpya-pya ka, sabap sa pibpya-pyanan ka nu Allah endu da ka penggula sa makabinasa sya sa lupa, ka su Allah na di nin kasuwatan i kabinasan.

Ya pidtalu nu (Qarun): tamuk ku a nya na sabap bun sa kataw ku (i kinakwa ku lun), ngintu di nin katawan i saben-sabenal su Allah na bininasa nin su nawna pan sa lekanin a manga taw a muna pan sa lekanin i kabagel nin? Endu ya pan madakel sa lekanin i bilangan nin? Endu di bagidsan nu Allah kanu kadusan nin (amayka tyuban den silan).

Linumyu (si Qarun) kanu manga taw nin sa masla i pibpalas nin (midsandag), ya nadtalu nu (manga taw) a aden kyug nin sa dunya: nya ba ka aden bu lekitanu a mamba sa kani Qarun, ka sekanin a taw (Qarun) na sangat i kapya na bagi nin a masla.

Ya nadtalu nu aden ilmu nin: da kanu pegkuman, ka su balas nu Allah kanu nangimbenal endu minggalebek sa mapya na muna pan i kapya nin, na dala makakwa lun u di kena (manga taw) a midsabar.

Na tinampulan nami (si Qarun) endu su walay nin sa lupa, na da sa lekanin i kadakel a makatabang sa lekanin a salakaw sa Allah, endu da den makuyug sa edtabangan.

Nabaluy menem su pedsekel (kani Qarun) kanu gay a nawna sa nadtalu nilan: benal su Allah a kalagen nin (pakawladen nin) sa rizki su magkahanda nin kanu manga ulipen nin endu kasimpitan su magkahanda nin, u di kena bu inikalimu tanu nu Allah na makaamung tanu (kani Qarun) endu di den maka-untung su manga kafir (lu sa gay a mawli).

Su surga sa gay a mawli na baluyn nami a kanu manga taw a da sa ginawa nilan i kabpapulu endu da sa kanilan i makabinasa, ya bun mapya i mawli nin su manga gilek sa Allah.

Su taw a mapya i napananggit nin (sa gay a mawli) na sawalu bu na ya pan mapya i balas in (sa kanu na-it nin) endu su malat menem i na-it nin na dala balas nu manga taw a minggalebek sa malat ya tabya na malat bun.

(Su Allah) na initulun nin sa leka (Muhammad) su Qur’an, na pambalinganen ka nin bun (sa Makkah), edtalu ka: su Kadenan ku i mataw sa naka-it sa tutulu endu su taw a natadin sa mapayag.

Di kena nengka napangingarap i makatulun sa leka (Muhammad) su kitab (Qur’an) ya tabya na limu ebpun sa Kadenan nengka, na da ka enggula sa tumabang ka sa kanu manga kafir.

Endu da ka mapasapal (sa kapayapat) kanu manga ayatan nu Allah sa ulyan na kinatulun nin sa leka, endu pangenggat ka lu sa Allah, endu da ka bu enggula sa makuyug ka kanu manga mushrik.

Endu da ka sumimba sa aden pan kaped nu Allah, ka da Kadenan ya tabya na Sekanin, langun nu enggaga-isa na gadala ya tabya na su Allah, lekanin i kukuman endu lu bun pakambalingan sa lekanin.

Alif-Laam-Meem (su Allah i mataw kanu ma'na nin).

Antapan nu taw i da den manggula nin (sya sa dunya) amayka nangimbenal den sa di den mafitna.

Na saben-sabenal a binatalu nami su nawna sa kanilan, sabap sa endu katawan i benal (a bangimbenal) endu katawan su malbut.

Ga-antap nu manga taw a panggalebek sa manga malat i makapalaguy silan sa lekami, na ngin den a kawagan nin a antapan.

Su taw a bagingarap sa kabaratemu sa Allah na su ajal (lumpakan) na makawma endu sekanin (Allah) i pakakineg endu mataw.

Endu su taw a minjihad na ginawa nin i pinjihadanin, su Allah na kawasa kanu langun na dunya.

Endu su manga taw a nangimbenal endu minggalebek sa manga mapya na punasen nami su kawagan nilan endu balasan nami silan sa ya pan mapya kanu galebekan ilan (a mapya sya sa dunya).

Inibpalyugat nami kanu manusya i kabpya-pya sa duwa a lukes, endu u pegesen kanu nilan sa kasakutu sa laki sa da sa leka su ilmu lun, na di ka pagunuti, ka sya kanu bun makawli sa laki (Allah) na balasan ku sekanu kanu manga galebekan nu.

Endu su manga taw a manga bamaginugut a minggalebek sa mapya na paludepen nami silan kanu manga taw a manga mapya.

Endu kaped kanu manga taw i nadtalu nilan: nangimbenal aku sa Allah, na amayka pakapasangan silan (nu manga kafir) sa kanu inugut nilan sa Allah na baluyn nilan su fitna nu manga taw (a kafir) sa mana siksa nu Allah (apya ngin i suguwan na maginugut sabap kanu katalaw), na amayka nakawma i tabang nu Allah na tig nilan: sekitanu bun, su Allah na katawan nin su dalem nu pamusunugan nu taw na dunya.

Endu katawan nu Allah su bangimbenal endu su manga munafiq.

Endu pidtalu nu manga kafir kanu manga mu'min: unuti nu i lekami a lalan ka pangakun nami i kadusan nu, na dala sa kanilan (manga kafir) i mapangaku nilan i kadusan nu manga bamaginugut apya paydu kagina silan na midtadtab i kalbut nilan.

Endu manggumaked nilan i kadusan nilan endu su kadusan nilan sa kapendalbut nilan endu makaidsa sa kanilan sa gay a mawli su ipedtebu nilan (salta su siksa).

Endu saben-sabenal a sinugu nami si Nuh lu kanu manga taw nin sa nakadtangen kanilan su (Nuh) sa naka-siyaw gatus endu lima pulu lagun, na tinyuba nami su taw nin sa kadalem kagina silan a manga kafir.

Linepas nami sekanin (Nuh) endu su manga tagapeda nin lu kanu awang endu binaluy nami a tanda (na kapegkagaga) nu Allah kanu taw na dunya.

Endu su Ibrahim, pidtalu nin kanu manga taw nin: simba nu su Allah endu ikagilek nu ka entuba i mapya endu makagkapya sa lekanu amayka katawan nu.

Ya nu pedsimban na salakaw sa Allah a manga barahala endu bangumbal kanu sa kalbutan, pedsimban nu ba nan a salakaw sa Allah na dala kamilikan nin (magaga nin) sa lekanu a rizki, lu kanu pangeni sa Allah sa rizki endu simba nu endu edsukuri nu ka lu kanu bun makambalingan sa lekanin.

Amayka pandalbuten ka nilan na pinandalbut bun su nawna sa lekanu endu dala kanu sinugu ya tabya na kapedsampay bu sa mapayag (kanu manga taw).

Ngintu da nu katawi u panun i kabpagebpun nu Allah sa kabpamaluy nin, mawli na pauliten nin sa ulyan na kapatay, malemu gayd (intu) sa kanu Allah.

Edtalu ka sa kanilan (Muhammad): lakaw kanu sa lupa ka edsuliman nu i kabpagebpun nu Allah kanu binaluy nin, su Allah bun i pabpagiseg endu papembatun sa ulyan na kapatay, ka kagaga nin i langun na enggaga-isa.

Siksan nin i magkahanda nin endu ikalimu nin i magkahanda nin endu lu bun sa lekanin i kadsunudan.

Endu da sa Allah i makalipus kanu sya sa lupa endu sya sa langit endu dala sa lekanu i salakaw sa Allah a makatuganul endu makadtabang (sa lekanu).

Endu su pigkafiran nin su manga ayatan nu Allah endu su kabaratemu sa lekanin (Allah) na entuba na natebped i nanam in sa limu ku (Allah) endu sa kanilan i siksa a sangat i kasakit nin.

Na da inisumpat nu manga taw ni (Ibrahim) ya tabya na: bunu nu ataw ka tutung nu, na linepas nu Allah (si Ibrahim) ebpun kanu apuy, na nakadalem lu ba su tanda a kapegkagaga nu Allah kanu manga taw a nangimbenal.

Endu pidtalu ni (Ibrahim): minumbal kanu sa salakaw sa Allah a barahala a kapegkalimu nu i kapedsimba nu lun sa kabpaguyag sa dunya, mawli na lu sa gay a mawli na ebpapalawa kanu endu ipinta nu isa su ped nin, na ya bun tanan kadtakenan na apuy endu dala makadtabang sa lekanu.

Ya nangimbenal sa lekanin (Ibrahim) na su Lut endu pidtalu nin (Ibrahim) na lu aku den lemumping sa kanu Kadenan ku, ka sekanin i mapulu a mataw.

Endu pinamawli a taw nami (kanu Ibrahim) si Ishaq endu si Ya'kub, endu binaluy nami kanu mawli a taw nin i ka-nabi endu su kitab (Taurat-Injil) endu inenggay nami sa lekanin i balas nin sa dunya endu sekanin lu sa gay a mawli na kuyug kanu manga saalihin.

Endu su Lut na pidtalu nin kanu manga taw nin: sekanu na ya nu bu penggulan na maledsik, da minggula lun apya isa bu kanu manga taw a nangawna sa lekanu.

Nginan ka ya pegkaluman nu mama na mama bun endu bagayan kanu sa pedsagad a pegkaluman nu endu aden pan kadupangan nu lu kanu gabuligan nu, na ya bu pidtalu nu taw nin: pasya ka sa lekami siksa nu Kadenan nengka a pedtalun nengka amayka benal ka.

Tig nu (Lut): kadenan ku tabangi aku kanu manga taw a baminasa.

Guna makawma kani Ibrahim su manga sinugu (malaikat) sa makapya sa ginawa, na tig nilan: pembinasan nami i manga taw na nya ba a dalpa kagina su taw nin na manga dupang.

Tig nu (Ibrahim): si Lut! Tig nu sinugu (malaikat): katawan ami i taw na dalpa, lepasen nami sekanin endu su tagapeda nin ya tabya na su kaluma nin ka makamung mabinasa.

Guna makawma su sinugu (malaikat) kani Lut a palas na manga mama a manga mapya, nalidu i ginawa nin (Lut) na dala mundula sukat nin, pidtalu nu manga sinugu (malaikat): da ka kagilek endu di ka pakalidu i ginawa nengka ka lepasen nami seka endu su tagapeda nengka ya tabya na si kaluma nengka ka makamung mabinasa.

Ipedtulun nami kanu taw nu nya a dalpa i siksa ebpun sa langit sabap sa kinalyu nilan sa kumpasan.

Endu saben-sabenal a tinagak nami kanu dalpa i tanda a mapayag sa kinabinasan nu dalpa kanu manga taw ka endu mapamikir.

Endu nakawma kanu Madian su suled nilan a si Shu'aib sa yanin pidtalu: simba nu su Allah endu pagingarap nu su gay a mawli endu da kanu penggula sya sa lupa sa baminasa kanu.

Na pinandalbut nu taw nin, tinyuba silan sa linug a nabaluy silan kanu dalpa nilan sa nagaw.

Endu (bininasa nami) si Aad endu si Thamud endu napayag bun sa lekanu a manga taw su dalpa nilan (su nabpalas nin), endu sinasat na shaytan kanu manga galebek nilan, sinapalan nin silan kanu agama endu lalan a benal endu silan a manga taw na mawngangen (ugayd na ya migkasla na kamamasla).

Endu su Qarun endu su Fir’awn endu su Haman endu saben-sabenal a nakawma sa kanilan su Musa sa manga mapayag a tanda na pimamaselan nilan sya kanu dalpa, na dala silan malepas kanu siksa nu Allah.

Uman isa na tinyuba nami sa kanu kadusan in, aden sa kanilan i pinasuguwan nami sa ulan a watu, aden bun sa kanilan i tinyuba sa kilat endu aden bun kanilan i tinampulan nami sa lupa endu aden bun kanilan i pinageled ami, di kena su Allah i salimbuten, su ginawa nu bun i salimbuten.

Ini-upama su silan a bamaluy sa salakaw sa Allah a pedsaligan sa mana upama na lawa-lawa a bagumbal sa walay nin na saben-sabenal su walay na lawa-lawa na namba i malubay a benal u mana bu ka gatawan nilan.

Saben-sabenal su Allah na katawan nin su bangenyan nilan a salakaw sa lekanin (Allah) endu sekanin (Allah) i mapulu a mataw.

Nya ba a manga upaman na sunggilingan kanu manga taw, dala makadsuliman kanu namba (upaman) ya tabya na su migkataw.

Binaluy nu Allah su manga langit endu su lupa sa haqq, saben-sabenal a nakadalem kanu namba i tanda (kapegkagaga) sya kanu manga bamamaginugut.

Batya ka (Muhammad) su ini-wahi nami sa leka a kitab (Qur’an) endu edsambayang ka, su sambayang i makasapal sa maledsik a galebek endu su manga supak, endu ya masla i tadem nu Allah endu katawan nin i galebekan nu.

Di nu ibpalawa su aden kitab nin (Yahudi-Nasrani) ya tabya na ukit a mapya ya tabya na su pedsangka, endu edtalu nu: pinangimbenal nami su nakatulun sa lekami endu su initulun sa lekanu, endu Kadenan nami na Kadenan nu bun a isatiman bu, endu lu kami sinemangkup sa lekanin a Allah.

Endu mamba i kinapatulun kanu nawna (kitab) sa kinapatulun nami sa leka sa kitab (Qur’an), su inenggan ami sa kitab na bangimbenalen nilan, endu su kaped kanu manga Arab i bangimbenal endu dala sumangka sa manga ayatan nami a salakaw kanu manga kafir.

Endu da gabatya nengka (Muhammad) a kitab sa da pan makatulun sa leka su Qur’an, endu da pakasulat a lima nengka a kawanan, ka labi den i kanduwa-duwa nu manga taw a di pedtalima sa Qur’an.

Ugayd na su Qur’an na manga ayatan a mapayag sya kanu manga atay nu aden ilmu nin endu da sumangka kanu manga ayat ami ya tabya su manga salimbuten.

Endu pidtalu nilan: u namba ka nakatulun sa lekanin (Muhammad) i manga tanda a benal, edtalu ka sa kanilan i manga tanda na lu sa Allah, saki na pedsampay bu a mapayag.

Ngintu di pan kasaligan a tanda i initulun nami sa leka su Qur’an a pembatyan sa kanilan? Nakadalem samba su limu endu indawan ataw ka tadem kanu manga taw a bamaginugut.

Edtalu ka (Muhammad): su Allah bu i saksi tanu, katawan nin i dalem nu pitu lapis a langit endu lupa, endu su manga taw a ya nilan pinangimbenal na batil endu pigkafiran nilan su Allah na silan i manga taw a nangalugi.

Endu pinangeni nilan sa leka i enggaganan i siksa nilan, na u di kena bu aden ukul nin a napasad na makawma den sa kanilan endu di ebplis man i kawma nin sa kanilan sa makatekaw sa di nilan magedam.

Endu papedtagadan nilan sa leka su siksa, na saben- sabenal na jahannam na langkap den kanu manga kafir.

Su gay a madsagup nilan su siksa ebpun sa pulu nilan endu ebpun kanu kababan nu ay nilan endu edtalun nu pembantay: nanami nu su lalaw nu penggalebeken nu (lu sa dunya).

Sekanu a manga ulipen ku a nangimbenal, su lupa ku na mawlad, saki nu i simba.

Uman isa na makananam sa kapatay, entupan a makambalingan kanu sa laki.

Su manga bamaginugut a minggalebek sa manga mapya na pandaludayan nami silan sa manga bilik sa surga a pelagilay sa kababan na manga ig, dala sa kanilan i kalyu sa surga, ngin den a kapya na balas kanu minggalebek sa mapya sya sa dunya.

Silan a midsabar endu su Allah i sinaligan nilan.

Endu madakel a melanap-lanap i dala kagaga nin a rizki nin, su Allah i pe-rizki lun endu sekanu, ka sekanin i pakakineg a mataw.

Amayka idsan nengka silan entayn i minaluy sa langit endu lupa endu pagkyug-kyug kanu senang endu ulan-ulan? Na ya nilan madtalu: su Allah, na ngintu ka di nilan pakaisan su Allah?

Su Allah i papegkakalag sa rizki nu kagkahanda nin kanu manga ulipen nin endu pedsimpitan nin, su Allah kanu langun na enggaga-isa na katawan nin.

Amayka idsan nengka silan entayn i napatulun sa ig ebpun sa langit a nakawyag kanu lupa a minatay? Ya nilan edtalun: su Allah, pugi ka su Allah, ka ya madakel sa kanilan i di mawngangen.

Dala sa uyag sa dunya ya tabya na kadsimpang endu kandadalemet endu su dalpa sa akhirat entuba i tidtu a kapaguyag u mana bu ka katawan nilan.

Amayka nageda silan sa kapal na ikhlas i kapangeni nilan na amayka nalepas silan sya sa kapuluwan na sumakutu menem silan sa Allah.

Endu egkafiran nilan su inenggay nami sa kanilan a limu, endu kagkakalilini bu i kanilan, na di sumala na katawan nilan bun i ulyanan nin.

Ngintu da nilan mailay i binaluy nami su haram (Masjidil Haram) a tumatana sa pembibinasaya su manga taw kanu embala-bala sa kanilan, na ya nilan bangimbenalen su batil, endu su limu nu Allah i peg-kafiran nilan.

Endu da muna i kadupang in su taw a pandalbutan nin su Allah ataw ka pandalbutan nin su haqq (Islam) a nakawma sa lekanin, ngintu di kena su jahannam i kadtakenan nu manga kafir?

Endu su manga taw a minjihad sa lalan sa lekami na di ebplis na tutulun nami silan sa kanu lalan a makasampay sa lekami endu su Allah na salta kanu manga taw a manga mapya.

Alif-Laam-Meem (su Allah bu i mataw ku tidtu a ma’na nin).

Tinaban su (taw nu) Rum.

Siya ku ubay nu kalupan (nu manga Arab) sa silan sa ulyan nu kinataban kanilan na di sumala na silan menem i talawn (tabanan).

Siya ku dalem u pila lagun, sa lekanin a Allah su kasuguwan ku unan u niya endu ku ulyan u niya, sa gay ba entu na mangagalaw su manga bamaginugut.

Sabap kanu tabang nu Allah, ka ibpedsabek nin i entayn i magkahanda nin, endu sekanin i mapulu a malimu.

Su pasad nu Allah, sa dili ebplis na matuman, ugayd na ya madakel kanu manga taw na di nilan katawan.

Ya nilan bu katawan su mapayag a kawyag sa dunya endu silan sa kanu akhirat na dala labut nilan lun.

Ngintu ka di nilan mapamikir i ginawa nilan sa dala kinabaluy nu Allah kanu manga langit endu lupa endu pageletan nin a di kena haqq endu aden kadtamanan nin, endu ya madakel kanu manga taw sa kanu kabaratemu nilan kanu Kadenan nilan na kafir silan.

Namba ka lumakaw silan sya kanu lupa ka endu nilan mailay su ulyan nu manga taw a nawna sa ka nilan a silan pan i muna i kabagel nin, endu napamulan nilan su lupa, endu nakapabpalas nilan su dalpa sa manga mapayag, na dala sa Allah i dupangen nin silan ugayd silan i sabapan a kinatyuba sa kanilan.

Mawli na ya ulyanan nu napandalbut kanu manga ayat nu Allah endu bagumpaken (papendalbuten) nin su ayat na mawag sa langun a mawag (su naraka).

Su Allah i minebpun sa kinabaluy sa manusya mawli na paulitan nin menem mawli na makambalingan tanu sa lekanin.

Sa gay a kabangkit sa dunya na di den makadtalu su manga baradusan.

Endu da den sa kanilan su manga barahala nilan sa makadtabang kanilan endu sungkangan nilan su barahala nilan.

Endu gay a temindeg su kutika (harikyamat) na gay ba entu na mamakabpipitas silan.

Su manga bamamaginugut endu minggalebek sa mapya na lu silan sa surga pegkalilini.

Su manga kafir menem endu su pinandalbut nilan su manga ayatan nami endu su kaadap sa laki (Allah) sa gay a mawli na lu silan sa siksa papegkapasangan.

Mahasuti su Allah amayka naluleman (sambayang sa maghrib) endu mahasuti sekanin amayka napitan (sambayang sa subbuh).

Endu pebpugin nu langit endu lupa sya kanu sambayang a Isha endu Dhuhur (taman sa Asar).

Pabpelyun nu (Allah) su bibyag ebpun sa minatay, endu su minatay ebpun sa bibyag, endu baguyagen nin su lupa sa ulyan na kinapatay nin, na mamba i kambuwat nu (sa kubur).

Endu kaped kanu manga tanda a kapegkagaga nu Allah na su kinabaluy sa lekanu ebpun sa lupa, mawli na manusya kanu a pakabpayapat kanu sa lupa.

Endu kaped a tanda nin na binaluy nin i manga kaluma nu ebpun kanu ginawa nu a makandalayama kanu endu binaluy nin i kandalasamaya endu kagkalimwa nu, nakadalem lu ba su manga tanda a bagel nu Allah kanu manga taw, ka endu silan maka-pamikir.

Endu kaped kanu manga tanda nin i kinabaluy nin sa langit endu lupa endu su kinambida-bida nu kadtalu nu endu su palas nu, lu ba su manga tanda nu bagel nin kanu manga taw a mataw.

Endu kaped kanu manga tanda nin na su katulug nu sa magabi endu malamag endu su kapangilay nu kanu limu nin sa malamag, lu ba su manga ayatan nin kanu manga taw a makikineg.

Endu kaped kanu manga tanda nin ipabpagilay i kilat a pakagilek, endu pakapainem sa ulan endu papedtulun nin su ulan ebpun sa langit a pakawyag kanu lupa sa ulyan na kinapatay nin.

Endu kaped kanu manga tanda nin i nakatindeg (nambalay) su langit endu lupa sa kahanda nin, mawli na amayka yupen su ipenggubal sa dunya na makambuwat kanu tanan.

Endu lekanin su dalem nu manga langit endu su lupa, langun na baginugut tanan sa Allah.

Sekanin (Allah) i minebpun sa kinabaluy sa lekanu, mawli na pauliten nin sa ulyan na kapatay sa ya pan malemu, endu lekanin su upaman a mapulu sa langit endu lupa, endu sekanin i mapulu a mataw.

Inenggan kanu sa upaman ebpun sa ginawa nu, ngintu su manga ulipen nu na aden tumpuk nin sa lekanu kanu rizki nu sa makapagidsan kanu? Ikagilek silan (sa kulangan nilan su tamuk nu) sa mana bun su gilek sa ginawa nu (u mabinasa kanu), di nu kyugan intuba? Na ngintu ka umbalan nu sa tumpuk nin su Allah? Mamba i kapedtinatad nami kanu manga ayatan kanu manga taw, ka endu silan makapagungagen.

Ugayd na ya inunutan nu manga kafir su kyug na ginawa nilan sa dala kataw nin, na dala makatutulu kanu tinading nu Allah endu dala makatutulu kanu tabang sa lekanilan kanu siksa.

Patidtu ka (Muhammad) i biyas nengka kanu agama sa ikhlas, ka namba i binaluyan nu Allah kanu langun nu manga taw sa dunya sa dili kasambiyan i kinapamaluy nu Allah, na ya madakel kanu manga taw na di nilan katawan.

Sangkup kanu sa Allah endu ikagilek nu sekanin endu edsambayang kanu endu da kanu enggula sa sumakutu kanu.

Kuyug kanu manga mushrik su mimbida-bida sa pedsimban, aden lumpukan nu uman isa na kapiya i ginawa nin kanu lekanin a pegkamalan.

Endu amayka nakagedam su manusya sa makagkayd na mangeni sa kadenan nin sa sinumangkup silan, mawli na u nakananam sa limu nu Allah na su kaped na sakutu nin su kadenan nin.

Supaken nilan su inenggay nami a limu, na egkakalini kanu den mun ka dala ebplis na katawan nu bu i lalaw nu.

Dala initulun nami a tindeg nilan a makadtalu sa kanu inumbal nilan a sakutu sa Allah.

Endu amayka pinananam nami su manusya sa limu na nagalaw sa kapamamasela, amayka nasugat a mapasang sabap kanu kadupang nin na midtinebpekan kanu limu nu Allah.

Ngintu da nilan mailay su Allah i papegkawlad sa rizki kanu magkahanda nin endu papedsimpitan nin (su kahanda nin), langun na entuba na manga tanda kanu manga taw a bangimbenal.

Enggay ka su pagali nengka kanu lekanin endu su miskinan endu su taw a di pakawli sa ginanatan nin ka namba i labi a mapya kanu bamegkyug sa balas sa Allah, endu silan i nakauntung.

Endu nganin a initalingguma nu a kapagisega ka endu kanu mamakadtubu siya kanu manga tamuk nu manga taw, na di mangengetu’ intu kanu Allah endu nganin a initalingguma nu a zakat sa galiniyan nu su beneng nu Allah na entu ba silan su tidtu a ebpamakatakep.

Su Allah su nangaden sa lekanu, entu pan ka rinizkiyan kanu nin, entu pan ka pagimatayan kanu nin, entu pan ka paguyagen kanu nin, na ngintu aden ebpun kanu manga ibpamedsakutu nu i lumpukan a pakanggula sa ku entu ba sa enggaga-isa? Mahasuti sekanin (Allah) endu timibambaw sekanin ebpun kanu nganin a ibpamedsakutu nilan.

Napayag su kapaminasa sya sa kapulwan endu lagat sabap kanu pinggalebek nu manga taw a darwaka, pananamen silan sa siksa ka endu silan makambalingan (makadtawbat) kanu Allah.

Edtalu ka (Muhammad): lakaw kanu siya sa lupa, ka pamedtuliki nu u panun i nabaluy a pibputawan nu manga nawna (kanu niya ba), sandeng nu kadadakelan sa kanilan na bamedsakutu.

Patidtu ka (Muhammad) i biyas nengka kanu agama a matidtu sa kanu unan a di pan makawma su gay a dala bagalawan nu ebpun sa Allah a makabpalak su manga taw.

Na entayn i migkafir na dusa nin den ni kakafir nin endu entayn menem i minggalebek sa makagkapya na nanget bun kanu manga ginawa nilan sa endedempas den silan.

Ka endu nin kapamalasan su namangimbenal endu namenggalebek sa manga makagkapya ebpun kanu kalbihan nin sa saben-sabenal i sekanin na dili nin kaliliniyan su manga kafir.

Endu ped kanu manga tanda nin i kapembutawan nin kanu manga sambel sa manga ebpamapata (pebpanukaw sa aden ulan) ka endu nin makapananam sa lekanu i limu nin, endu mabaluy a makapalalaguy su lansa sabap kanu kasuguwan nin, ka endu nu gapangilay i ped kanu kalbihan nin, sa kalu-kalu kanu makadsukur.

Endu saben-sabenal a sinugu nami a nawna sa leka manga sinugu lu kanu manga taw nilan, nakawma silan sa manga tanda mapayag i na-it nilan na bininasa nami su manga darwaka, endu haqq sa lekami i katabang nami kanu manga bamamaginugut.

Su Allah i pedsugu sa sambel a pembukakal sa dadtem sa makapayapat (kanu dunya) sa apiya ngin i kahanda nin, endu baluynin a gadtanggit nin su ulan a pembuwat kanu pamageletan nin, amayka nakaulan kanu nagkahanda nin kanu manga ulipen nin na sangat i kapya na ginawa nilan kanu ulan a nakasugat sa lekanilan.

Endu amayka saben-sabenal a silan a dala pan kaulani silan na tinebped nilan su inam sa ulan.

Na edtuliki ka kun ba (Muhammad) su manga padsa nu inilimu nu Allah u panun i kabpaguyag nin kanu lupa sa uliyan nu kinapatay (kinagkiteb) nin, sabenal benal i entu ba na talanged a paguyag kanu namamatay, sa sekanin ku uman i enggaga-isa na pakagaga.

Endu amayka sinugu nami i sambel a nakagkabinaning kanu pamulan nilan na nabaluy menem silan sa egkafiran nilan su limu nu Allah.

Di nengka (Muhammad) makapakikineg i timbang a minatay endu su bisu kanu enggatan (da’wah) amayka tinumaligkud silan sa minawa.

Endu di nengka matutulu su pisek kanu kinatadin nin, ya bu manuliman na su namangimbenal kanu manga ayatan nami a silan na manga Muslim.

Su Allah i minaluy sa lekanu sa malubay kanu, mawli kanu kalubay nu na binaluy nin i bagel, mawli menem kanu bagel na galubay menem endu kabayungut (kadkatuwa), endu baluyn nu Allah i magkahanda nin, endu sekanin na mataw a pakagaga.

Endu su gay a kabangkit sa dunya na edsapa su manga kafir sa mangagan bu i taw san sa kubur, ka isa ka oras i mawget, na mamba i kandalbut nilan (dili nilan balityalan su Islam).

Endu pidtalu nu manga aden ilmu nin endu inugut nin (sa Allah): natangen kanu san sa kanu kadtalu nu kitab taman sa kabangkit na nya ba i gay a kabangkit sa dunya, ugayd na sekanu ba i taw a dili manga mataw.

Gay a kabangkit sa dunya na dili makangguna kanu manga kafir su manga dawa nilan, endu dala sa kanilan i kambalingan (sya sa dunya).

Endu saben-sabenal a pinambuwat nami kanu manga manusya san sa Qur’an i langun na upaman, endu apya pan ma-it nengka sa kanilan i tanda (a benal ka endu su Qur’an) na ya bun edtalun u manga kafir: dala sa lekanu a manga taw a pedtalu sa rasul ya tabya: sekanu i manga taw kigkuwan sa batil.

Manamba i katutup nu Allah kanu manga pusung nu manga taw a di manga mataw.

Edsabar ka (Muhammad) ka su pasad nu Allah na benal a matuman, endu da ka enggula sa gapegkag ka sabap sa kanu di nilan kapangimbenal (sa kabangkit endu su kambuwat sa kubur).

Alif-Laam-Meem (su Allah i labi a mataw kanu ma’na nin).

Su nya ba a manga ayatan kanu Qur’an a nangatul sa mapya.

Tutulu endu limu kanu manga taw a manga mapya.

Silan na pedtunay sa sambayang endu zakat nilan endu silan na di gapinda sa ginawa nilan i gay a mawli.

Silan i nakakwa sa tutulu ebpun sa Kadenan nilan endu silan i manga taw a namakauntung.

Endu kaped kanu manga taw na yanin tumu i bityala a dala katagan nin ka endu makatading sa taw kanu agama nu Allah sa dala kataw nin, endu bagungaten nin su aden kataganin na sa lekanilan i siksa a dili magenggen.

Amayka batyan sa lekanin i manga ayatan nami na mawa (silan) a pemamasla, mana nin bun da makineg ka mana den sinangalan i tangila nin, na panudtul ka sa lekanin su siksa a masakit.

Su manga taw a nangimbenal endu minggalebek sa manga mapya na kanilan su manga surga a na’eem.

Tatap silan sa surga, benal su pasad nu Allah endu sekanin i mapulu.

Binaluy nin (Allah) su manga langit sa dala egkailay a palaws nin endu inibetad nin sa lupa su manga palaw a pedtikel sa dalpa nu, endu pinambuwat nin i langun na melanap-lanap, endu pinatulun nami i ulan ebpun sa langit endu pinatulun nami kanu ulan i embalangan a mapya.

Namba su binaluy nu Allah, ipailay nu sa laki u ngin i nabaluy nu barahala nu, ugayd na su manga kafir na natading silan sa mapayag.

Endu saben-sabenal a inenggay nami kani Luqman i kataw: edsukur ka (Luqman) sa Allah, san den sa taw a edsukur su lekanin a balas nu sukur nin, su taw menem a egkafir na su Allah na kawasa a pebpugin.

Endu labit ka (Muhammad i nanggula) nu bityala a pidtalu ni Luqman kanu wata nin sa sekanin na pangindawn nin: O wata ku! Di ka pedsakutu su Allah, ka saben-sabenal su kasakutu na tidtu a kadupangan a masela.

Inibpalyugat nami kanu manusya i kabpiya-pya nin kanu duwa a lukes nin, nawgatan si ina nin sa kagingay nin, kinambata nin lun, duwa lagun na menda sumusu, edsukuri aku nu endu su duwa a lukes nengka, sya kanu makambalingan sa laki.

Amayka pegesen ka nilan sa sumakutu ka sa laki sa dala ilmu nu lun na di ka baginuguti silan, idtagapeda nengka silan sa mapya sa dunya endu ya ka tuntul su lalan nu midtawbat sa laki ka sya kanu bun makambalingan sa laki, inggay ku sa lekanu su balas nu manga galebek nu (lu sa dunya).

(Tig ni Luqman): Hay wata ku! Apiya ngin den i kanawt a kadusan a itagu nengka sa lakungan sa didalem atawaka sya kanu langit atawaka sya sa lupa na italingguma bun nu Allah sa gay a mawli, su Allah na matuntul nin endu katawan nin mapambuwat.

Hay wata ku! Itindeg nengka su sambayang endu isugu nengka su mapya endu isapal nengka su mawag endu edsabar ka kanu makasugat sa leka, ka entuba i mapya sa langun a pakarajan.

Endu da ka ebpapulu (memamasela) kanu manga taw, endu da ka lumakaw kanu lupa sa kamamasela, su Allah na dili nin kaliniyan i langun na kadsandag (kapagambug).

Lakaw ka sa kasasangan, endu kempen ka i suwara nengka (dili gayd pakatanugen) ka ya den mawag a suwara na suwara na himar.

Ngintu da nu mailay i pinandaya nu Allah sa lekanu su dalem na manga langit endu su lupa endu linipung (inenggan) kanu nin sa limu nin a mapayag-masulen, endu kaped kanu manga taw i ebpalawa sa Allah sa dala sabut nin endu dala tutulu nin endu dala pen kitab nin a mapayag a pedtindagan nin.

Amayka pidtalu sa kanilan i unut kanu sa kanu initulun nu Allah (Qur’an) ya nilan kadtalu: su nalayaman nami kanu manga kalukesan i unutan nami apya pan shaytan i bagenggat sa kanilan sa siksa a pegkalaw-kalaw.

Endu entayn i isangkup nin i biyas nin sa Allah endu sekanin na mapya (a taw) na nakamalan nin su tali a malanut a makasampay sa Allah endu lu bun sa Allah makambalingan su langun na pakaragyan (kanggula).

Endu entayn i migkafir na di ka lumidu i ginawa nengka (Muhammad) sa kinagkafir in ka sya bun silan makabpawang (makambalingan) sa laki, balasan nami kanu galebek nilan, su Allah na katawan nin i dalem nu manga pamusungan nu.

Pakalilinin silan sa paydu, mawli na idasek (ibensek) nami silan kanu siksa a mapasang.

Amayka idsa sa kanilan u entayn i minumbal sa langit endu lupa, na ya nilan isumpat na su Allah, na pugi ka (Muhammad) su Kadenan nengka, ka ya madakel sa lekanilan na dili manga mataw.

Kanu Allah su dalem nu manga langit endu lupa, sekanin (Allah) i kawasa a pebpugin.

Upama bu ka su dalem nu lupa a manga kayu ka umbalen a pinsil, su lagat menem i dawat na takepen sa makapitu su lagat sa dunya na dili bun maibped su manga ilmu nu Allah ka sekanin i mapulu a mataw.

Da sa kinabaluy sa lekanu endu su kambuwat nu ya tabya na mana isa ka napas (malemu geyd sa Allah), su Allah na pakakineg a pakailay.

Da nengka mailay i paludepen nu Allah su magabi kanu malamag endu su malamag kanu magabi, endu pinandaya nin su senang endu su ulan-ulan, uman isa na bagukit sa lalan nin taman kanu timpu nin, endu su Allah na katawan nin i langun na galebek nu.

Kagina saben-sabenal na namba su Allah a haqq (benal), su langun na pedsimban nilan a salakaw kanu (Allah) na baatil endu sekanin a Allah i mapulu a mataw.

Nailay nengka su kapal (lansa) a balalaguy kanu lagat sa limu nu Allah, ipabpagilay nin sa lekanu su ped kanu manga tanda nin, nakadalem lu ba su manga tanda nu Allah kanu masabar a barasukur.

Amayka nataguban a bagel silan a mana den palaw na mangeni silan sa Allah sa ikhlas sa lekanin su agama, guna silan makatepad sa kapuluwan na aden bun sa lkanilan i nagalang-alang (di kena mu’min, di kena menem kafir) endu dala sumupak kanu ayatan nami ya tabiya na tagakalen a supak (kafir).

Hay sekanu anan a manga taw! Ikagilek nu su Allah endu ikagilek nu su gay a mawli a di kabalasan nu ama su wata nin endu di kadtabangan nu wata su ama nin sa apya paydu, saben-sabenal su pasad nu Allah na benal a matuman, na da kanu bu edsimpang sa kabpaguyag sa dunya endu da kanu bu (edsimpang kanu shaytan) sa lalan sa Allah.

Lu sa Allah su kataw sa kabangkit sa dunya, endu ipedtulun nin su ulan, endu katawan nin su natagu kanu rahim (kagingay) nu babay, endu di katawan u isa u ngin i mapantyali nin sa mapita endu di nin katawan u endaw a lupa i patayan nin, saben-sabenal su Allah na katawan nin i mapayag masulen.

Alif-Laam-Meem (su Allah bu i mataw sa kanu tidtu a ma’na nin).

Initulun su kitab a da enduwa-duwa kanu dalem nin, nakabpun kanu Kadenan nu sa dunya.

(Su manga kafir) na pedtalun nilan: inidtebu ni (Muhammad), Kena! Ugayd na haqq (bantang) ebpun kanu Kadenan nengka, ka endu nengka kapakagilekan su manga taw a dala nakawma sa kanilan a sinugu a nawna sa leka (Muhammad), ka basi matutulu pamun silan.

Su Allah i minaluy kanu pitu lapis a langit endu lupa endu su pageletan nin sa nakanem gay, mawli na lu menem migkahanda sa kanu Arsh, na da sa lekanu i salakaw sa lekanin (Allah) a tagapeda endu makadtabang, na ngintu ka di kanu ma-indaw (makakuwa sa tuma)?

Pedtuldun su langun na nanggula ebpun sa langit sya sa lupa mawli na ipebpulu sa lekanin (sa gay a kagkukum) su sagay (sa akhirat) na timbang a sangibu lagun kanu lekanu a pembalinganen (sya sa dunya).

Sekanin su Allah na katawan nin i mapayag endu masulen a mapulu a malimu.

Sekanin (Allah) na pibpyapiyananin i binaluy nin, sa nabpunan a kinabaluy nin sa manusya na lupa.

Mawli na binaluy nin su muli a taw nin sa lugu a nakebpun sa ig a malubay.

Mawli na binaluy nin (su Adam) endu pinambibyag nin ka tinagwan sa niyawa endu inumbalan kanu nin sa kakineg endu kailay endu manga pusung, na paydu gayd i kadsukur nu.

Endu pidtalu nu manga (kafir): u naledak tanu san sa lupa na ngintu mabagu pamun su palas tanu? Ugayd na silan kanu kalumbak nilan sa laki na makafir silan.

Edtalu ka sa kanilan (Muhammad): imatayan kanu ni malakal mawt, entu ba i sinaligan sa lekanu, mawli na lu kanu bun makambalingan kanu Kadenan nu.

Upama mailay nengka bu Muhammad su manga baradusa na idteku-teku nilan su ulu nilan kanu kadenan nilan, madtalu nilan: Kadenan nami nailay nami endu nakineg nami saguna su benal, pambalingan kami (sa dunya) ka enggalebek kami sa mapya na mangimbenal kami den.

U ya nami pigkahanda na inenggan nami i uman isa sa tutulu nin, ugayd na benal su kadtalu ku a penun ku su naraka sa jin endu manusya sa langun.

Nanami nu su naraka a linipatanan nu su gay nu banya, na tinagak nami sekanu, endu nanami nu su siksa a tatap sabap kanu penggalebeken nu.

Ya bu mangimbenal kanu manga ayatan nami na su manga taw a amayka patademen silan na sumugyud endu tumasbih sa pugi nilan kanu Kadenan nilan, endu di silan mamasela.

Egkelid sabala su manga takilidan nilan kanu bagiganan nilan, pangeniyan nilan su Kadenan nilan sa gilek endu apas, endu su ped a inirizki sa kanilan na penggastun nilan.

Na di gatawan a isa i kapya na inisulen sa kanilan a manga kaluma sa surga, balas intu kanu galebek nilan (a mapya).

Di makapagidsan su bamaginugut endu faasiq (nakalyu sa atulan nu Islam).

Su manga bamaginugut a minggalebek sa manga mapya na kanilan su jannatul ma’wah a ibpagana (inipagadil) kanilan kanu kapiya na galebek nilan.

Su manga faasiq na ya nilan kadtakenan na su naraka, uman silan miyug lumyu sa naraka na imbalingan bun silan kanu naraka endu edtalun sa kanilan: nanami nu su siksa a apuy a namba su pinandalbut nu.

Endu patekawan nami i siksa sya sa dunya unan u siksa a masla sa gay a mawli ka endu silan makambalingan (makapagumbaya).

Endu entayn e makalawan sa kadupang (kadalwaka) kanu taw a patademen kanu ayatan nu Kadenan nin na mawli na taligkudan nin (tig nu Allah): saben-sabenal sekami na su manga baradusa na suliyan nami.

Endu inenggay nami kanu Musa su kitab (Taurat) na da ka enduwa-duwa kanu kabaratemu sa Allah, endu binaluy nami su kitab a tutulu kanu tupu nu Israel.

Endu binaluy nami sa kanilan i kawnutan a tumutulu sabap sa kasuguwan nami kanu kinadsabar nilan, endu bangimbenalen nilan su manga ayatan nami.

Saben-sabenal su Allah i kumukum sa kanilan sa gay a mawli kanu langun nu di nilan bamagayunan.

Endu da den ba makatutulu sa kanilan i pila bu i bininasa nami a nangawna sa kanilan a manga maginged sa bamendadalakaw bun silan siya kanu manga pegkalebenan nilan, sa saben-sabenal na natagu sa entuba i manga tanda, na di ba silan pamakakineg.

Di nilan gailay i pabpagulanan nami su lupa a mamala, pabpagetun nami su pamulan a pegkanen ilan endu manga binatang nilan? Na di silan pakaymaman?

Endu edtalun nilan i kanu i namba kapegkukum amayka benal kanu?

Edtalu ka sa kanilan i gay a kawma nu siksa sa kanilan na dili makangguna kanu kafir su kapangimbenal nilan.

Pasagadi ka silan endu angapa ka, ka silan na bangangapa bun sa pidtalu a siksa a benal.

Hay seka a nabi (Muhammad)! Ikagilek nengka su Allah, endu di ka bagunuti su manga kafir endu su manga munafiq, saben-sabenal su Allah na mataw sa mapayag a maungangen.

Endu ya ka unuti su wahi sa leka ebpun sa kadenan nengka, su Allah na katawanin i langun a galebek nu.

Salig ka sa Allah ka mapya gayd a pedsaligan.

Da baluya nu Allah sa isa kataw a mama i duwa timan i atay nin sya sa dalem na pusung, endu dala baluya nu Allah su manga kaluma nu a ibpelagid nu kani ina nu sa benal a ina nu, endu su pembabatan nu na (apya ngin) na di kena nu bun wata, ka entu na kadtalu nu bu sa ngali nu, su Allah na edtalu sa haqq (bantang) endu pedtutulu sa lalan a matidtu.

Tawag nu silan sa ama nilan (ipapagapilidu bun si ama nin) ka entu ba i bantang sa Allah, u di nu katawan i ama nilan na pagali nu bun silan sa agama endu manga pakiwatan nu bun silan, endu da dusa nu kanu limban nu ugayd na endusa kanu sa pedtibaban nu manga pusung nu, su Allah na bangampun a malimu.

Su manga nabi na ya wagib a lamigan nu manga bamaginugut kanu ginawa nilan, endu su manga kaluma nilan na ina nu manga bamaginugut, endu su edsusuled na makendulunga (makambibidaya) sya kanu kawaris sya sa kitab nu Allah kanu manga mu’min endu su muhajer, ya tabya na manutuma kanu sa kanu di pakawaris ka namba i nakasulat kanu kitab (Lawh Al-Mahfuz) (nya ba ayat na mansukh kagina ya pakawaris kanu nawna a timpu na su nag-Islam endu su mimbakwit ebpun sa Makkah).

Endu minumbal kami sa pasad kanu manga nabi, endu su Nuh endu su Ibrahim endu Musa endu su Eisa a wata ni Maryam endu kinumwa kami lu sa kanilan sa pasad a mawgat.

Ka endu kaidsan su benal kanu kinambenal nin endu inidtatalanga nu Allah kanu manga kafir i siksa a masakit.

Hay sekanu a manga bamaginugut! Tademi nu su limu nu Allah sa lekanu, kanu kutika a nawma kanu na manga tantara a satru (ahzab) na pinasugat nami sa sambel endu manga malaikat a dala nu mailay, su Allah na gailay nin i langun na galebek nu.

Nakawma sa lekanu ebpun sa tampal sa pulu endu tampal sa kababan, endu nailay nu i nabalibet kanu na manga tantara (kuntra), endu di kanu gayd makaginawa, endu ga-antap nu su Allah sa embalang-balang a antapan.

Lu ba binatalu su manga bamaginugut endu nasugat a linug silan a sangat i kapasang nin.

Endu nadtalu nu manga munafiq endu su aden dalu nu pusung nin: da pasad nu Allah endu su sinugu nin ya tabya na makadulat.

Endu pidtalu nu ped kanu manga munafiq: sekanu a taw (sa Madinah), da kadtangenan nu sya sa pembunuwan, uli kanu sa walay nu, endu bagetaw su ped kanilan kanu nabi sa pidtalu nilan: muli kami ka su walay nami na napayangas (dala natabun lun), tig nu Allah: di kena napayangas, ka ya nilan kyug na malalaguy silan.

Umana bu ka naludepan (su Madinah) a nabalibet, mawli na enggatan silan sa kasakutu sa Allah na malegan i katalima nilan, endu di silan ebpatana ya tabya na paydu gayd.

Endu saben-sabenal a mibpasad silan sa Allah sa dapan manggula i namba, sa dili silan malalaguy ka tabangan nilan su manga bamaginugut, na di ebplis na idsa sa kanilan su pasad nilan salta su naraka.

Edtalu ka i dala katagan nin sa lekanu su kapalalaguy amayka nalalaguy kanu sa kapatay atawka kabunu, ka paydu bu gayd i kagkakalini nu sa dunya.

Edtalu ka u entayn i marihala sa kanilan amayka ipauma nu Allah silan sa mawag atawaka ipauma kanu nin sa mapya? Na dala bun matun nilan a salakaw sa Allah a marihala sa kanilan atawaka tumabang sa kanilan.

Katawan nu Allah su mapawk sa lekanu, endu su pidtalu kanu manga pagali nin sa sya kanu, endu di silan mamung sa kambunuwa ya tabya na paydu.

Ka pedsingit sa lekanu na amayka makawma i makagilek na mailay nengka i edtulik ka sa kanilan sa di den mapisek i mata nilan sa mana su pebpaya sa kapatay, amayka dala den su makagilek na mawag i dila nilan sa lekanu, ka pangaluyan kanu nilan (mamanula) kanu manga tamuk, silan a manga taw na dala pangimbenal, ginugul nu Allah su manga galebek nilan, na paydu bu gayd intu sa Allah.

Bangantapen nilan pamun i dapan makawa su manga satru (kuntra), endu amayka makawma su manga kuntra ya nilan kyug na lu silan sa dalem na mawatan, ipangingidsa nilan bu i tudtulan sa lekanu, upama menem ka matabu silan na dili silan mamung embunuwa ya tabya na paydu bu.

Saben-sabenal na aden sa lekanu su rasul (Muhammad) a bagunutan sa mapya kanu taw a bangingarap sa Allah endu gay a mawli, endu madakel i katadem nin sa Allah.

Guna mailay nu manga bamaginugut su manga kuntra na pidtalu nilan: nya ba su inibpasad tanu sa Allah endu sa rasul endu benal su Allah endu su rasul, nawmanan silan sa pangimbenal endu kinasangkup.

Kaped kanu manga bamaginugut i manga mama a benal su inibpasad nilan sa Allah, aden bun sa kanilan i na-shahid, aden bun bangangapa sa manggula nin, dala nilan sambi su pasad nilan apya pan paydu.

Ka endu kabalasan nu Allah su manga benal kanu kabenal nilan endu siksan nin su manga munafiq amayka entuba i kyug nin, atawaka tawbaten nin silan, su Allah na bangampun a malimu.

Pinambalingan nu Allah su manga kafir sabap kanu lipunget nilan, dala nakwa nilan a mapya, endu inalaw nu Allah su manga bamaginugut sa kambunuwa, su Allah na mabagel a mapulu.

Endu pinawa nu Allah su manga taw na kitab (tupu nu Qurayzah a Yahudi) kanu kuta nilan, endu binetadan nu Allah sa kukuk (gilek) su manga pusung nilan, su kaped na pinamunu nu.

Endu pinawarisan nu Allah sa lekanu su lupa nilan (dalpa nilan) manga tamuk nilan, endu lupa a dala nu pan kadampwi, su Allah kanu engaga-isa na kagaga nin.

Hay seka anan a nabi! Edtalu ka kanu manga kaluma nengka i amayka pegkyug kanu sa kawyag sa dunya endu su kapalasan nin na sya kanu ka pakalilini ku sa lekanu, endu butawanan ku sekanu sa kabutawan a matilak (ibpitas ku sekanu sa mapya).

Amayka menem ka ya nu bun kyugan su Allah endu su sinugu nin endu su gay a mawli na su Allah na pidtatalangenan nin sa mapya endu balas a mapya.

Sekanu a manga kaluma nu rasul (Muhammad) entayn i endupang sa lekanu sa mapayag na takep sa lekanin su siksa a makaduwa takep, na paydu bu gayd intu sa Allah.

Endu entayn sa lekanu i maginugut sa Allah endu su sinugu nin a penggalebek sa mapya na duwa takep i balas nin endu pinagadilan nami sa rizki a mapulu (sa surga).

Sekanu a manga kaluma nu nabi, di kena kanu pagidsan nu manga babay, amayka nagilekan kanu (sa Allah) na da kanu edtalu sa kadsaldan (kanu manga mama) ka makainggit kanu sa kadtalu a bantang.

San kanu edtangen kanu manga walay nu endu da kanu sumugud sa kasugud a jahil, endu itunay nu su sambayang endu inggay nu su zakat nu endu paginugut kanu sa Allah endu su sinugu nin ka ya kyug nu Allah na punasen in sa lekanu su manga kadusan nu sekanu a mga ahlil bayt, endu sutin kanu nin sa talutup.

Endu ya nu tademi na su pembatyan sa walay nu a manga ayat nu Allah endu su sunnat, su Allah na pedtulik a mataw sa mapayag-masulen.

Saben-sabenal na su manga mama a Muslim, endu su manga babay a Muslim, endu su manga mama a bamaginugut, endu su manga babay a bamaginugut, endu su manga mama a ebpamaginuntulan, endu su manga babay a ebpamaginuntulan, endu su manga mama a pabebenala, endu su manga babay a pabebenala, endu su manga mama a mangatigkel, endu su manga babay a mangatigkel, endu su manga mama a mangalintana, endu su manga babay a mangalintana, endu su manga mama a pamanadeka, endu su manga babay a pamanadeka, endu su manga mama a talipwasa, endu su manga babay a talipwasa, endu su manga mama a bamedtiyakapan nilan su manga sangulan nilan, endu su manga babay a bamedtiyakap, endu su manga mama a bamelabit kanu Allah sa madaket, endu su manga babay a bamelabit, na inadil nu Allah sa kanilan i ampun endu balas a masela.

Da sa kanu bamaginugut a mama atawaka babay i amayka kimukum su Allah atawaka su rasul nin sa hukuman na ebpalaw silan atawaka mamili silan sa kyugan nilan, su taw a sangkan nin (supaken in) su Allah endu su rasul nin na saben-sabenal a natadin sa mapayag.

Endu su kinadtalu nengka (Muhammad) sa isa a taw (Zaid ibn Harith) a inikalimu nu Allah endu inikalimu nengka bun, sa kamali ka su kaluma nengka (Zainab) endu ikagilek nengka su Allah na ibagena nengka bun kanu ginawa nengka su mapayag sa Allah, bangandamen nengka i manga taw (kanu edtalun nilan sa leka), su Allah i wagib a bangandamen, guna maypus si Zaid kanu babay su kahanda nin (napupus su iddah) na inipagkaluma nami sa leka (si Zainab) ka endu di maaden kanu manga bamaginugut a makapasang kanu manga kaluma nu pedsugun nilan amayka masampay nilan i kahanda nilan, su hukuman nu Allah na ya bun kawkitan.

Da kanu nabi i kadusan kanu inihalal sa lekanin, ka hukuman nu Allah inan kanu manga nangawna den, endu su hukuman nu Allah na naukul sa ya bun matuntul.

Su manga taw a ipedsampay nilan su agama nu Allah endu ipegkagilek nilan na da ikagilek nilan a salakaw sa Allah, endu su Allah i nasasangan a magitung kanu manga ulipen.

Da maaden su Muhammad a ama nu isa a mama sa lekanu ugayd na sinugu nu Allah, endu sekanin i pamupusan a manga nabi, endu su Allah kanu langun u enggaga-isa na katawan nin.

Sekanu a manga bamaginugut, tademi nu su Allah sa katadem a madakel.

Endu tasbih kanu sa lekanin sa magabi-mapita.

Sekanin a (Allah) i egkalimu sa lekanu endu su manga malaikat nin i pabpagampun sa lekanu ka endu matatap sa lekanu su kinalyu nu sa kalibutengan na sya kanu nakagemaw sa maliwanag, su Allah na malimu kanu manga bamaginugut.

Salamen silan (nu malaikat) kanu gay a mabaratemu nilan su kadenan nilan endu pinagadilan silan sa balas a mapulu.

Hay seka a nabi (Muhammad)! Sinugu nami seka a makadsaksi endu mapakalini endu mapakagilek.

Endu pangenggat ka sa Agama nu Allah sa kahanda nin endu (timbang) a palitan ka a sigay.

Endu panudtul ka kanu manga bamaginugut i aden sa kanilan ebpun sa Allah i kalbihan atawaka limu a masela.

Endu di ka paginugunuti su manga kafir endu su manga munafiq endu pasagadi ka i kalat (kawag) nilan endu salig ka sa Allah ka sekanin i pedtiyakap sa binaluy nin endu bagitung sa kanilan.

Hay sekanu a bamaginugut! Amayka nagkaluma nu su bamaginugut a manga babay, mawli na binelag nu sa da nu pan silan magkudi na da sa lekanu ikapag-iddah nilan a pananagadan nu sa kanilan sa di pan mapupus, na enggay nu silan endu belag nu silan sa kambelag a matilak (mapya).

Hay seka a Nabi (Muhammad)! Saben- sabenal i sekami na inihalal nami sa leka su manga kaluma nengka a nakatalingguma nengka su manga sunggudan nilan, endu su nganin a nagkibilan nu kawanan nengka ebpun kanu pinabiyag nu Allah sa leka, endu su manga babay a wata ni bapa nengka siya kani ama nengka, endu su manga wata a babay nu manga babu nengka siya kani ama nengka, endu su manga wata a babay nu manga bapa nengka kani ina nengka, endu su manga wata a babay nu pakinan nengka a namembabakwit a tagapeda nengka, endu su babay a bamaginugut a inidtawakim nin su ginawa nin sa nanget saleka, u kiniyugan nu nabi i kagkaluma nin lun sa pagelin bu saleka salakaw kanu manga bamaginugut, ka natawan nami den i nganin a inibpaliyugat nami sa kanilan (a manga mu’min) pantag kanu manga kaluma nilan endu kanu nagkibilan nu manga kawanan nilan, ka endu di mabaluy sa leka i kadusan, sa andang den na su Allah i balaampun a pinakamalimu.

Inggawli nengka sa gilil i pegkyugan nengka endu dulug ka i pegkyugan nengka, endu su kaluma nengka kanu pinasagadan nengka na da dusa nengka lun, endu masuwat silan sabap kanu ininggay nengka sa kanilan, endu su Allah na katawan nin i dalem nu pusung nu endu su Allah na mataw a matigkel.

Di den mahalal sa leka i kawmanan pan (siyaw kataw a kaluma) endu su kadsambi nengka sa balegan su kaped apya nagayp ka sa kapya na palas nin ya tabya na su kamilikan nengka, su Allah na langun nu enggaga-isa na pedtuldun nin.

Hay sekanu anan a bamamaginugut! Di nu beludepi su manga walay nu nabi ya tabya na inenggat kanu nin sa kapegkan, na di nu den pedtuliki su dalem nu walay nin, ugayd na amayka inenggat kanu na ludep kanu, u nakakan kanu den na lyu kanu den, di kena embibityala kanu pan, kagina makalingasa intu kanu nabi na mamamala sa lekanu, su Allah a di kayan sa kawagib, endu amayka idsan nu su manga kaluma nin na lu kanu egkaleben sa lyu na lending, ka entuba i makasuti kanu manga pusung nu endu su manga pusung nilan, endu da sa lekanu i sekaten nu su rasul endu di a benal mapakay i kagkaluma nu kanu manga kaluma nin sa ulyan (kapatay nin) ka masla gayd a kanarakan nu lu sa Allah.

Amayka aden ipebpayag nu atawaka ipedsulen nu na su Allah na langun na enggaga-isa na katawan nin.

Da dusa nu manga kaluma nu nabi amayka lundangan nilan su manga lukes nilan endu wata nilan endu suled nilan a babay endu su manga babay endu su ulipen nilan, endu ikagilek nu su Allah, su Allah na kadsaksyan nin i langun na enggaga-isa.

Saben-sabenal su Allah endu su malaikat na pedsalawatan nilan su rasul, na sekanu a manga bamaginugut na salawati nu su rasul endu lepas a malilintad.

Saben-sabenal su manga taw a pedsangkan nilan su Allah endu su sinugu nin na namulkan silan sya sa dunya endu sa akhirat, endu pidtatalangenan silan sa siksa a dili gangganan na badan nilan.

Endu su manga taw a pedtebwan nilan su bamaginugut a mama-babay sa di gatumanan silan na pinangaku nilan su dusa nu kapedtetebu nilan, endu siksa a mapasang.

Hay seka anan a nabi! Edtalu ka kanu manga kaluma nengka endu manga wata nengka endu su manga babay a manga bamaginugut i endalung silan kanu manga tendung nilan ka entuba i masiken a kakilala sa kanilan, na dili silan matekaw malingasa ka su Allah na bangampun a malimu.

Amayka di menda su manga munafiq endu su aden dalu na pusung nin endu su bangimbenal sa dila bu lu sa Madinah na pama-mamisan nilan sa leka, mawli na di ka nilan makapagubay (sa Madina) ya tabya na paydu bu.

Namulkan silan apiya endaw silan na kwan silan endu bunun silan sa kabunu a dili bagulaman.

Namba i kukuman nu Allah kanu manga taw a nangawna endu di nengka maparuli sa hukuman nu Allah i kasambyan.

Ibagidsa nu manga taw sa lekau kanu i gay a mawli? Edtalu ka sa kanilan: sekanin (Allah) i mataw lun, endu dili nengka gatawan na basi masupeg bun su kawma nu gay a mawli.

Saben-sabenal su Allah na namulkan nin su manga kafir endu pinagadilan silan sa apuy a pagkelaw-kalaw.

Da kalyu nilan sa naraka na dala pan matun nilan a tumuganul sa kanilan endu tumabang sa kanilan.

Su gay a tutungen su manga biyas nilan sa naraka, na madtalu nilan u nya ba ka napaginugutan tanu su Allah endu su rasul.

Endu madtalu nilan: Kadenan nami, pinaginugutan nami su kaunutan nami endu su masela nami na tinading kami nilan sa lalan.

Kadenan nami takep ka i siksa nilan endu mulkay ka silan sa mulka a masela.

Hay sekanu anan a bamaginugut! Da kanu bagiling kanu manga taw a pedtakebuten nilan su Musa, na pinakiyas nu Allah kanu pedtalun nilan lun, ka sekanin (Musa) na masela i alaga nin.

Hay sekanu anan a bamaginugut! Ikagilek nu su Allah endu edtalu kanu sa kadtalu a bantang-matidtu.

Pagkapyan nin (Allah) sa lekanu su manga galebek nu endu ampunen i manga dusa nu, su taw a maginugut sa Allah endu su rasul na saben-sabenal a nabadtug sa badtugan a masela.

Saben-sabenal na iniadu nami su salig kanu manga langit endu su lupa endu su palaw na dala silan talima endu nagilekan silan, na ya nangaku a saligan i manusya kagina dupang endu di mataw.

Siksan nu Allah su babay-mama a munafiq endu su babay-mama a mushrik, endu tawbaten nin su manga bamaginugut a babay-mama, ka su Allah na bangampun endu malimu.

Su langun nu pugi na kanu Allah a kigkuwan sa pitu lapis a langit endu su lupa, endu lekanin su pugi sa akhirat endu sekanin i mataw kanu galebek nu binaluy nin.

Katawan nin i peludep kanu lupa endu belyu lun, endu su pedtulun ebpun sa langit endu su pebpapulu endu sekanin a malimu a bangampun.

Endu pidtalu nu manga kafir: di makawma sa lekitanu i gay mawli, edtalu ka: ibet sa Allah na makawma sa lekanu, katawan nu Allah su gayb, di galyub sa lekanin sa apya bu mana tepung sya sa langit endu lupa endu da manot a di kena natagu bun sa kitab a mapayag.

Ka endu nin kabalasan su manga bamaginugut a minggalebek sa manga mapya silan, na kanilan su ampun endu rizki a mapulu.

Endu su manga taw a bamikalan nilan su Qur’an sa dili makatalus, na aden sa kanilan i mawag sa langun a siksa a masakit.

Endu mailay nu manga taw a inenggan sa kataw su initulun sa leka (Muhammad) ebpun sa Kadenan nengka a benal a bantang a tumutulu sa lalan a mapulu a mapya.

Endu pidtalu nu manga kafir kanu tagapeda nin: ngintu itutulu nami sa lekanu i mama a manudtul sa lekanu sa amayka naledak kanu den na makambuwat kanu pamun (nya ba a bityala na ibelumpak nilan kanu rasul)?

Pidtebwan nilan su Allah sa kalbutan, atawaka aden kabuneg nin, di kena ka langun na di bangimbenal sa gay a mawli na lu sa siksa endu tadingan a mawatan.

Ngintu di nilan kadsuliman i sangulan-taligkudan nilan ebpun sa langit endu lupa, amayka ya nami kahanda i tampulan nami sa lupa atawaka dadsangan nami ebpun sa langit na nakadalem lu ba su tanda a kapegkagaga nu Allah kanu manga ulipen nin a bara-tawbat sa Kadenan nin.

Endu saben-sabenal a inenggay nami kanu Daud ebpun sa lekami i limu, seka a palaw na amung ka sa lekanin tumasbih endu su papanuk, endu pinagkalemek nami sa lekanin su putaw.

Umbal ka sa sangkapan sa kambunuwa endu ukul ka i di mawget a di lambasen, endu enggalebek kanu sa manga mapya, ka saki na egkailay ku i manga galebekan nu.

Endu kanu Sulayman i sambel, gumanat sa mapita taman sa maudtu na timbang sawlan, na mapulid i senang taman sa kasedep na timbang a sawlan i kawatan nin, endu pina-igis ami i galang, endu su kaped a jin i penggalebek sa hadapan nin sa kahanda nu Kadenan nin, na entayn i sumibay kanu kasuguwan nami na pananamen nami sa siksa (apuy) a pegkalaw-kalaw.

Pebpulungan nilan i kyug nin (Sulayman) a manga walay a mapulu endu manga tinataw endu pegkanan a masla a mangawlad endu manga kuden a pedtakena ka aden ayanan nin, sekanu a kadakel nu Daud na sukur kanu sa Allah, endu paydu a manga ulipen ku i barasukur.

Na guna nami tangkeda su kapatay (ni Sulayman) na da nakatutulu sa kanilan kanu kinapatay nin u di kena isa a lemanap-lanap kanu lupa sa pegkanen nin su tungkat nin, na guna den makabudsud (si Sulayman) na napayag kanu manga jin i saben-sabenal i umana bu ka andang a kangatawan nilan su nakasulen na di den silan mataglay (matangen) sya kanu siksa a kayayan.

Tidtu gayd a nabaluy kanu (tupu nu) Saba siya kanu pegkalebenan nilan (manga walay) i isa a tanda, duwa a kasapadan, (salumpuk) lun na tampal sa kawanan (nu manga walay nilan) endu (salumpuk na tampal) sa biwang, (Pidtalu nu nabi nilan): pangankan nu i rizki nu pedtiyakap sa lekanu endu pamedsukur kanu lun (ka nan) i dalpa malemu endu su pedtiyakap (sa lekanu) na bala-ampun.

Na dala silan edsukur, sinugu nami lu sa kanilan i degan a mininasa kanu pamulan nilan endu sinambiyan nami sa duwa bun a pamulan a bagunga bun ugayd na dili makan ka suwagen endu paydu a sid’r a dala bun katagan na lawn nin endu unga nin.

Entuba inibalas nami sa kanilan sabap kanu kinagkafir nilan endu da ibalas kanu maytu ba ya tabya na kagkafir.

Endu binaluy nami kanu pageletan nilan endu pageletan nu dalpa sa pinambarakat nami i dalpa sa di kapasangan su belalakaw sa apya di den embalutu sa ig atawaka pegken na lakaw kanu sa malamag endu magabi sa dala baya-baya nu.

Ya nilan pidtalu: Kadenan nami pakawatan ka i lakawan nami, endu migkafir silan na binaluy nami silan a mambibityala nu mawli kanilan (indawan) endu pinabpipitas nami silan kanu manga dalpa, na nakadalem lu ba su manga tanda nu Allah kanu masabar a barasukur.

Endu tidtu gayd a natuman ni Iblis sa kanilan su antapan nin, na pinamaginugutan nilan sekanin, ya tabya na lumpukan nu manga bamaginugut.

Endu dala kanu Iblis i magaga nin sa kanilan ya tabya na endu nami katawan su bangimbenal sa gay a mawli sa kanu entayn i penduwa-duwa, endu su Kadenan nengka na pedtuldun nin i langun na enggaga-isa.

Edtalu ka (Muhammad) i tawagen nilan su barahala nilan a salakaw sa Allah a dala magaga nin apya mana bu tepung kanu pitu lapis a langit endu lupa i tumpuk nilan endu da sa Allah i pakatabang sa lekanin.

Endu da katagan nin i shafa’at sa lekanin ya tabya na entayn i sugutan nin, taman sa amayka madala den i gilek kanu pusung nilan a ya madtalu (nu malaikat): ngin inamba i pidtalu nu Kadenan nu sa lekanu? Ya nin madtalu na bantang ka sekanin (Allah) i mapulu a masla.

Edtalu ka Muhammad sa kanilan: entayn i pe-rizki sa lekanu ebpun sa langit endu lupa? Edtalu ka: su Allah! Endu sekami atawaka sekanu i natutulu atawaka natadin sa mapayag.

Edtalu ka (Muhammad): di kanu kaidsan sa kadusan nami endu di kami mambu kaidsan kanu penggalebeken nu.

Edtalu ka (Muhammad): su Kadenan tanu i mulig sa lekitanu, mawli na kukumen tanu nin sa bantang, ka sekanin a Allah i bangukum a mataw.

Edtalu ka sa kanilan: ipailay nu sa laki su (a barahala) ipedsakutu nu sa Allah, di kena! Sekanin su Allah (isa-isanin) bu i mapulu a mataw.

Endu da kinasugu nami sa leka a di kena sya sa langun na taw sa pakalilini endu papegkagilek, ugayd na ya madakel kanu manga taw na di manga mataw.

Endu ya pedtalun nu manga kafir sa Makkah: kanu i namba a pasad a siksa sa lekami amayka ya nu kaaden i manga bantang manga benal kanu.

Edtalu ka (Muhammad) sa kanilan: aden bun pasad sa lekanu a gay amayka nawma na di makasundul endu di makasunud (maketeng).

Endu pidtalu nu manga kafir: di kami mangimbenal sa Qur’an anan endu su nawna lun, u mailay nengka (Muhammad) su manga kafir kanu gay a katindeg nilan lu sa Allah na edtibpwan nu isa su kaped, ya edtalun nu manga malubay kanu nangawnutan nilan (sa dunya): u di kena bu sekanu a nangawnutan nami na kuyug kami den kanu manga bamaginugut (di kami maka naraka).

Ya manem edtalun nu nangawnutan kanu namangunut sa kanilan: enduken sekami besen i nakasapal sa lekanu kanu tutulu sa uliyan a kinawma nin sa lekanu? Sekanu bun i manga darwaka.

Ya menem edtalun nu manga malubay kanu kangawnutan nilan: pinagakalan kami nu sa magabi sa malamag ka ipedsugu nu sa lekami i kagkafir nami sa Allah endu umbalan nami sa kaped nin a kadenan, endu ipagna nilan i kinadsendit guna nilan mailay i siksa, endu binaluy nami su lantay-lantay kanu manga lig nu manga kafir, ka dala ibalas sa kanilan ya tabya na lalaw nu galebek nilan.

Endu da sinugu nami kanu dalpa a sinugu ya tabya na pidtalu nu manga dupang: sekami na pigkafiran nami su sinugu sa leka.

Endu pidtalu nilan pan i sekitanu pan i madakel i tamuk nin, endu dala sa lekami i masiksa kami.

Edtalu ka (Muhammad) sa kanilan: su Allah i papegkadakel sa rizki nu pegkyugan nin endu papegkasimpit, ugayd na ya madakel kanu manga taw na di nilan katawan.

Endu dala kanu manga tamuk nu manga taw i mapasupeg sa lekanu sya sa lekami ya tabya na su manga nangimbenal endu minggalebek sa manga mapya, entu ba (manga taw) na kanilan su balas a takep sabap sa galebekan nilan endu nadalem silan kanu bilik nilan na tumatana.

Endu su manga taw a bamikalan nilan su ayatan nami (Qur’an) sa di matalima nu manga taw na silan na manga taw na kagugul silan sa naraka.

Edtalu ka (Muhammad) sa kanilan: saben-sabenal su Kadenan ku i papegkawlad sa rizki nu pegkyugan nin kanu manga ulipen nin, endu sekanin i papegkasimpit, endu langun na pinggastu nu na sambyan nu Allah endu sekanin i mapya gayd a pe-rizki.

Endu su manga gay na buligen silan tanan na idsan nu Allah su manga malaikat: nginan a manga taw a sinimba aku nilan (lu sa dunya)?

Ya kadtalu nu manga malaikat: mahasuti ka, seka i Kadenan nami, di kena silan, silan a manga taw na pedsimba sa jin, na madakel sa kanilan i bangimbenalen nilan.

Na dala magaga na isa a kagkapya na kaped nin atawaka kabinasan nin lun, endu edtalun nami kanu manga kafir: nanami nu su naraka a papendalbuten nu.

Endu amayka batyan sa kanilan su manga ayatan nami a mapayag, na ya nilan kadtalu na dala inan a mama ka pegkyugan kanu nin pedsapal kanu nalayaman nu manga lukes nu a pedsimban, endu pidtalu nilan: dala sanan a kadtalu a di kena kalbutan a inidtebu, endu pidtalu nu manga kafir kanu bantang (manga ayatan a mapayag) guna makawma sa kanilan: dala inan ya tabya na sih’r a mapayag.

Endu inenggay nami (su kitab) sa kanilan a bangagyan nilan na sinangka nilan bun, endu su sinugu nami sa kanilan a nawna saleka na pinandalbut nilan bun.

Endu pinandalbut nilan pan su nawna sa kanilan endu dala nilan masampay i paydu kanu paydu a ininggay nami kanu nawna sa kanilan (a bagel/kalendu na umur) na pinandalbut nilan su manga sinugu ku, na ngin den i kapasang nin a siksa a sa kanilan (kabinasa kanilan).

Edtalu ka (Muhammad) sa kanilan: satiman bu i ipangindaw ku sa lekanu ka tindeg kanu sa kasangulan nu Allah sa enggaga-duwa atawaka edsakataw, mawli na mapamikir nu i da kabuneg nu (Muhammad) ugayd na sekanin na papegkagileken kanu nin kanu siksa a sangat i kapasang nin.

Edtalu ka sa kanilan i di kena aku pegkwa sa lekanu sa sukay ka lu bu i sukay ku sa Allah, ka sekanin i pakailay kanu enggaga-isa.

Edtalu ka sa kanilan: su Allah i bagenggay sa bantang kanu manga nabi nin a mataw sa gayb.

Edtalu ka: nakawma su bantang endu mapunas su baatil sa di makambalingan.

Edtalu ka: u natadin aku na ginawa ku bun i natadin, u nakatuntul aku menem kanu ini-wahi sa laki nu Kadenan ku na sekanin (Allah) i pakakineg a masupeg.

Endu upama ka mailay nengka bu su katekaw sa kanilan sa kanu kambuwat a dala palaguyan nin endu kwan silan kanu kubur nilan a masupeg.

Endu madtalu nilan: mangimbenal tanu (Muhammad/Qur’an), na da katagan nin sa kanilan intu (kabangimbenal) ka naypus den (lu den silan sa gay a mawli).

Endu saben-sabenal a sinupak nilan sya sa dunya endu pedsenditan nilan (sa buneg atawa ka sih’r) inunta na mawatan intu.

Endu nadalungan den silan kanu pegkyugan nilan a iman sa mana bun su pinakaydan kanu pagidsan nilan a nangawna, kagina silan na da mapinda sa kanilan i kapenduwa-duwa sa gay a mawli.

Su langun nu pugi na kanu Allah a minumbal kanu manga langit endu su lupa sa binaluy nin su malaikat a sinugu nin, aden manga papak nin a duwa timan, aden bun telu timan, aden bun pat timan, umanan nin sa palas i pegkyugan nin, sekanin (Allah) na kagaga nin i langun na enggaga-isa.

Su binukatan nu Allah kanu limu nin sya kanu manga taw na dala makasegad lun (maka-ungen lun), endu su segedan nu Allah na dala makapabpitas lun a di kena sekanin, ka sekanin (Allah) a mapulu a mataw sa endadayt.

Hay sekanu anan a manga taw tademi nu su limu nu Allah sa lekanu, ngintu aden minaluy a salakaw sa Allah a peridzki sa lekanu ebpun sa langit endu lupa? Da kadenan a salakaw sa lekanin na panun i kapapendalbut nu?

Endu amayka pandalbuten ka nilan na pinandalbut bun su manga sinugu a nawna sa leka endu lu bun makambalingan sa (Allah) i langun na ula-ula nu manga galebek.

Hay sekanu anan a bamaginugut na saben-sabenal na su pasad nu Allah na benal a matuman, na da kanu mapasimpang sa kapaguyag sa dunya, endu da kanu mapasimpang lu sa Allah kanu manga shaytan.

Kagina saben-sabenal su shaytan na satru nu (kuntra nu) na baluy nu a satru nu, bangenggat (su shaytan) sa tagapeda nin ka endu silan makalu sa naraka a pegkalaw-kalaw.

Silan a manga kafir na kanilan su siksa a masakit, endu su silan menem a manga bamaginugut endu minggalebek sa manga mapya na kanilan su ampun endu balas a masla.

Su taw a pinakapiya na shaytan i galebek nin na ya nin kailay lun na mapya, su Allah na tadingen nin i magkahanda nin endu tutulun nin i magkahanda nin, na di ka belidu i ginawa nengka (Muhammad) sa di silan bangimbenal ka su Allah i mataw kanu pebpulungan nilan.

Endu su Allah na sinugu nin i sambel a gabukakal nin i dadtem, na lu nami pinaulan kanu dalpa a minatay, na inuyag nami kanu ulan su lupa sa ulyan a kinapatay nin, maytu bun ba i kapambuwat (sa kanilan) sa kubur.

Entayn i taw a pegkyug sa kapulu na kanu Allah i langun na kapulu, lu sa Allah na pakapulu su langun na ula-ula a mapya, endu su galebek a mapya na pedtaliman nin, endu su manga taw menem a pagitung silan sa manga malat (a makagkayd kanu rasul atawaka su manga bamaginugut) na kanilan i siksa a mapasang endu su atulan nilan i mabinasa.

Su Allah i minaluy sa lekanu ebpun sa lupa, mawli na binaluy kanu nin a edtatagapeda endu da kagingay nu manga babay endu su kambata nin a di katawan nu Allah endu dala pegkalendu i umur nin atawaka mababa a di kena lu bun sa kitab (Lawh Al-Mahfudh).

Endu di magidsan su ig (tabang) ka mapya i katalus nin sa tiyan amayka inumen, endu su lagat na matimus na di gayd malamed, na apya endaw kanu duwa (ig) na pegkwan nu i seda nin endu gakwa nu lu ba i manga muntya a pagigimwan nu endu su kapal (barku) a bagaluyan ka endu nu makwa su limu nu Allah, endu malemu sa lekanu i makadsukur kanu.

Paludepen su magabi sya kanu malamag, endu paludepen su malamag sya kanu magabi endu endaw i kyug nin kanu senang endu ulan-ulan, uman isa na bagukit kanu lalan nin taman sa kagubal sa dunya, entu ba i Kadenan nu a kigkwan sa kadatu, su pedsimban nu a salakaw na dala kamilikan nin apya paydu.

Upama tawagen nu na di kanu nin makineg, upama ka makineg kanu nilan na di kanu nilan matalima, na lu sa gay a mawli na ebpalawa su barahala kanu kinasakutu nu, na dala isa a makapanudtul kanu manggula a di kena mataw lun.

Hay sekanu anan a manga manusya! Sekanu i faqeer lu sa Allah, endu su Allah na sekanin i kawasa a pebpugin.

Amayka ya kyug nu Allah i dalang kanu nin na pambuwaten nin i bagu a binaluy nin.

Na dala kalegen nin intu sa Allah.

Endu di mandusa na isa i dusa na kaped nin, u mapatabang su isa sa kapananggit sa kadusan nin na di bun manggula ka sekanin bun i makait lun apya suled pan, na ya papegkagilekan na su magilek sa kanu Kadenan nin sa gayb endu pedsambayang silan endu pedzakat silan, endu su taw a edsuti na ginawa nin bun i nasuti, endu lu makawli sa Allah.

Endu di makapagidsan su di makailay kanu makailay.

Endu su malibuteng silan kanu maliwanag.

Endu su masilung kanu mayaw.

Endu di makapagidsan su manga namamatay endu su manga bibyag, na saben-sabenal su Allah i mapapakikineg kanu kyugin endu seka (Muhammad) na di nengka makapapakineg su manga kafir a timbang a minatay.

Da sa leka (Muhammad) ya tabya na pakapagilek.

Saben-sabenal a sinugu nami seka sa bantang, mapakalilini endu mapakagilek endu dala manga taw a di kena nawma na sinugu.

Amayka pandalbuten ka nilan na napandalbut bun su nawna sa kanilan (kalukesan nilan) guna nakawma sa kanilan su manga sinugu a mapayag i napananggit nin a manga sulat endu kitab a maliwanag.

Mawli na bininasa ku su manga kafir, na panun i mabpalas nilan kanu siksa ku sa kanilan (sa gay a mawli)?

Natawan nengka (Muhammad) i saben-sabenal su Allah na pinatulu nin ebpun sa langit su ulan na pinambuwat nami i manga unga a mimbida-bida i palas nin endu nan sa manga palaw anan i manga lalan a maputi endu maliga embida-bida i manga palas nin endu manga lakungan a maytem.

Endu su manusya endu su melanap-lanap endu su manga binatang na saka maytu bun a embida-bida i manga palas nin, na saben-sabenal a ya bu magilek sa Allah kanu manga ulipen nin na su manga ulama, su Allah na mapulu a bangampun.

Saben-sabenal na su manga taw a pembatyan nilan su kitab nu Allah endu ipedtindeg nilan su sambayang endu pembaranggyan (penggastun) nilan su ped kanu rizki nu Allah kanilan sa mapayag-masulen, na bagapas silan sa balas a mapya a dala kadtamanan nin.

Na inggay nu Kadenan i balas nilan endu umanan nin silan kanu limu nin, su Allah na bangampun a masukur.

Endu su ini-wahi nami sa leka (Muhammad) a kitab na entu ba i bantang a nagayun kanu manga kitab a nawna, na saben-sabenal su Allah na katawan nin su masulen-mapayag kanu manga ulipen nin.

Mawli na pinawarisan nami su kitab kanu manga ulipen nami a manga mapya, na aden bun sa kanilan i dinupang nin i ginawa nin, na aden bun sa kanilan i paydu i kadupang nin, aden bun sa kanilan i dala kadupang nin sabap sa kahanda nu Allah, entu ba i badtugan a masla.

Su jannatul ad’n i kaludepan nilan a bagimu silan sa manga bulusu a bulawan endu manga muntya, endu ya nilan manga balegkas na manga sutra sa dalem na surga.

Endu madtalu nilan: su pugi na kanu Allah, inawa nin su lidu na ginawa tanu, su kadenan tanu na bangampun a malimu.

Pinaludep tanu nin sa dalpa a tatap (surga) ebpun sa limu nin, na di tanu kalugat (lawas endu itungan endu dala kapasang sa lekitanu.

Su manga kafir menem na kanilan i naraka jahannam a di bun pakapatay kanilan ka minatay den silan endu di kapegkagan silan kanu naraka ka mamba i kabalas nami sa langun na manga kafir.

Belalis silan sa: Kadenan nami palyu kami pan ka endu kami makanggalebek sa mapya di kena su galebekan a paganay, pinagkalendu nami su umur sa makapagungangen su magungangen endu nakawma pan sa lekanu su rasul na dala nu talima na nanami nu su siksa ka dala kanu darwaka i makadtabang sa kanilan.

Saben-sabenal su Allah na katawan nin su gayb kanu dalem nu manga langit endu lupa na katawan nin pan su dalem nu pusung nu.

Sekanin (Allah) i minaluy sa mamakadsukelya kanu sa lupa, su migkafir na lekanin su siksa endu di kadsinggumanan su manga kafir kanu ka-kafir nin lu sa Allah ya tabya na lipunget, endu dala makadsinggumanan sa kanilan sa gay a mawli ya tabya na kalugiyan.

Edtalu ka (Muhammad): su manga barahala nu a pedsimban nu a salakaw sa Allah na ngin ba i binaluy nin sya sa lupa? Langit atawaka ngintu aden kitab nilan ebpun sa lekami a tindeg nilan? Na da den kanilan a salakaw pan sa kapedsimpang (kagkalilini a supak).

Saben-sabenal su Allah i pedseged kanu manga langit endu lupa sa dili kageba na amayka nageba na dala makaseged (makagaga) lun a salakaw sa Allah, saben-sabenal sekanin i matigkel a bangampun kanu pedtawbat.

Endu silan (manga kafir) na midsapa silan sa mabagel sa amayka makawma sa kanilan i sinugu (rasul) na silan ba i mawna a matutulu, guna makawma sa kanilan su sinugu na dala nakawman nya tabya na dala nilan katalima.

Mimamasela silan sya sa lupa endu pagitung (pagakal) silan silan sa malat, na dala bun ebpawangan nu mawag a salakaw kanu kigkuwan lun, na da kapangangapan nilan nya tabya na mana su pinakayd nu Allah kanu nangawna, na dala matun nengka kanu hukuman nu Allah a kasambiyan atawaka makasibay.

Ngintu ka di silan lemakaw kanu lupa ka endu nilan madsuliman i nambetad nu manga taw a nawna sa kanilan sa muna pan i kangabagel nilan (kanu taw sa Makkah) na dala bun kanu Allah i aden pan makalyu kanu kahanda nin apya paydu kanu dalem nu manga langit endu lupa, su Allah na mataw a pakagaga.

Upama bu ka siksan nu Allah su manga taw sya sa dunya sabap kanu kadupang nilan na dala masama sya sa lupa a melanap-lanap, ugayd na ipabpaguman nin sa kanilan su ajal nilan, na su Allah na kailay nin su manga ulipen nin.

Ya-Seen (su Allah i mataw kanu ma’na nin).

Saki (Allah) idsapa ku su Qur’an a naatul sa mapya.

Saben-sabenal a seka (Muhammad) na kuyug ka kanu manga sinugu.

Nanget a pedtuntul sa lalan a matidtu.

Initulun ebpun kanu mapulu a malimu (Allah).

Endu nengka kapakagilekan su manga taw kanu inipakagilek kanu manga kalukesan nilan, ka silan na dala labut nilan (sa iman sa Allah).

Saben-sabenal na ya madakel sa kanilan i nawagib su siksa, kagina di silan bangimbenal (sa Allah endu nabi).

Saben-sabenal a binaluy nami kanu manga tengu nilan i lantay-lantay taman kanu bakelengan nilan sa dili silan makatulug.

Endu binaluy nami kanu kasangulan nilan i pelen (makatanggub) endu taligkudan nilan i pelen na dinapengan nami silan sa dili den silan makailay.

Endu magidsan bun i pakagilekan nengka silan atawaka di na dili bun silan mangimbenal.

Na ya bu pambarapantag kanu indawan na su minunut (sa Qur’an) endu nagilekan sa Allah sa gayb, na pakalilini ka silan kanu ampun endu balas a mapulu.

Saben-sabenal na uyagen nami su namamatay endu isulat nami su manga galebek nilan a nawna endu su pinambuwat nilan a manga kukuman pagidsan i mapya-mawag, langun na tinuganul nami lu sa kitab a mapayag.

Endu pambuwat ka sa kanilan i upaman kanu taw nu dalpa a nakawma sa kanilan i sinugu nu Allah.

Kutika kinasugu nami sa duwa kataw lu sa kanilan na pinandalbut nilan, na binagel nami sa ikatelu, pidtalu nilan i sinugu kami san sa lekanu.

Pidtalu nilan (su manga sinugu): sekanu na manusya kanu bun a magidsan tanu bun, endu dala den initutulu nu Allah a apya ngin a di kena papendalbuten nu.

Pidtalu nilan: su Kadenan nami i mataw na saben-sabenal a sekami na sinugu kami sa lekanu.

Endu ya bu man wagib sa lekami na kapapedsampay.

Pidtalu nu mga taw: edtempuwan nami sekanu, amayka di kanu menda na rajamen nami sekanu, endu aden mananam nu sa lekami a siksa a masakit (kadtalu nu manga darwaka kanu manga sinugu).

Pidtalu nu manga sinugu: su kapanendit nu na san bun sa lekanu sa kabpangindaw sa lekanu, ka sekanu a manga taw na nakasagad i kadarwaka nin.

Endu nakawma ebpun sa mawatan kanu dalpa i mama bamagayas, ya nin pidtalu: hay sekanu a manga taw! Unuti nu su manga sinugu.

Pamaginuguti nu i entayn i di kanu nin bangingidsan (pangeniyan) sa sukay sa silan na pamakatuntul.

Endu da sa laki i di ku simban su minaluy sa laki, endu lu kanu bun makambalingan sa lekanin.

Ngintu ka mamaluy kanu pan sa kadenan a salakaw sa Allah, na u ya nin kyug sa laki i makagkayd na di makabarapantag salaki i safa’at nilan sa apya paydu.

Upama ka maytu ba na saki den i natading sa mapayag.

Saben-sabenal i saki na nangimbenal aku kanu pedtiyakap sa lekanu na pamakikineg aku nu.

Ya pidtalu sa lekanin: ludep ka sa surga, ya nin nadtalu na nya ba ka su manga taw ku a katawan nilan bu.

Sabap sa inampun aku nu Kadenan ku, endu binaluy aku nin sa nakuyug aku sa kanu manga taw a ipebpulu.

Endu dala initulun nami kanu manga taw nin sa ulyan a kinapatay nin a malaikat ebpun sa langit endu di nami den itulun.

Ugayd na siksa i makawma sa kanilan, isa timan bu a tekik i nakasugat sa kanilan, na da nasama sa kanilan.

Duwan-duwan nin su manga ulipen a da makawma sa kanilan a sinugu a di kena bagungatan nilan bu.

Ngintu da nilan mailay i madakel i bininasa nami a nawna sa kanilan sa dala den silan makambalingan (sa dunya).

Endu langun na nangawna endu su gangawli na kabulig sa hadapan nu Allah.

Endu tanda sa kanilan su lupa a minatay (dala bagetu lun) a inuyag nami, endu pinambuwat nami i manga lagas, su kaped na pegken nu.

Endu binaluy nami kanu lupa i manga pamulan kayu-kulma endu inab, endu pinambwat nami sya sa lupa i manga buwal.

Ka endu silan makakan sa unga nin, endu su unga nu galebekan nu lima nilan, na ngintu di silan makadsukur?

Mahasuti su Allah a binaluy nin i embalangan a pabpagetun u lupa endu su bagatu kanu lawas nilan (babay-mama) endu madakel pan i di nilan katawan.

Endu tanda pan sa kanilan su magabi endu su malamag a padsukelya (u nakawma su magabi) na nalibutangan silan.

Endu su senang na sya bagukit kanu tampat nin, entu na atulan nu Allah a mapulu a mataw.

Endu su ulan-ulan na binaluy nami a tanda (kapila na sebang) sabap kanu kabpagiseg nin na gabpalin-palin (i buntal nin) makailing sa tenduk a gapeku sa nagangu atawaka mana langgaman.

Dala kanu senang i sumenang kanu magabi na dala bun kanu ulan-ulan, endu dala kanu magabi i egkagabi sa malamag, maytu bun ba su malamag, uman isa na bagukit sa kanu lalan nin.

Endu tanda sa kanilan i pinageda nami su mawli a taw nilan kanu awang (awang nu Nuh).

Endu binaluy nami bun sa kanilan sya sa kapuluwan i bagedan nilan.

Upama pigkahanda nami bu i pageleden nami silan sa lagat na dala makatabang sa kanilan endu dala sa kanilan i makalipus silan.

Ya tabya na su limu ebpun sa Allah ka endu kanu malilini pamun taman sa ajal nu.

Endu amayka pidtalu sa kanilan: ikagilek nu su dusa nu saguna endu su dusa nu a naypus ka malemu-lemu sa lekanu i ikalimu kanu (amayka maituba i enggulan nu).

Endu dala pakatalingguma sa kanilan a gugudan a ped kanu manga gugudan nu pedtiyakap sa kanilan u di kena nangabaluy silan lun a namedtangkili.

Endu amayka pidtalu sa kanilan: embaranggya (enggastu) nu su kaped kanu inirizki nu Allah sa lekanu, na ya edtalun nu manga kafir kanu manga bamaginugut: enduken ka papegkanen nami na u pegkyug su Kadenan nu na sekanin den mun i mapakan lun, sekanu a taw (pedsugu sa kapakan) na natading kanu sa mapayag.

Endu kadtalu nilan pan: kanu i kawma na namba a pasad amayka benal kanu?

Da kapangangapan nilan ya tabya na kayup a paganay ka nu sanggakala a ipedtekaw sa kanilan sa penggusyawa silan.

Na di nilan magaga i kapanutuma sa apya ngin, endu di silan makawli sa walay nilan.

Endu su mawli den a kayup kanu sanggakala na langun nilan na makambuwat kanu kubur nilan, ka lu silan mamagayas kanu hadapan nu Allah.

Ya nilan madtalu: entayn i napagedam sa lekitanu? Nya den basu inibpasad nu Allah a kambuwat sa ulyan na kapatay, benal bun su langun na sinugu.

Isa timan bu a suwara a nakawma sa kanilan na langun nilan na naibped silan, nabulig kanu pegkukuman.

Saguna a gay na dili madsalimbut i uman isa sa apya paydu, endu dala makwa nu a balas ya tabya na lalaw nu galebek nu.

Saben-sabenal su manga taw sa surga na magayp silan sa kagalaw na ginawa nilan.

Silan endu su manga kaluma nilan na sya sa masilung a pedsandig kanu manga kantil (katri).

Patut kanilan siya ku entu i manga unga na kasapadan endu patut pan kanilan i nganin a ibamedsinganin nilan.

Kadtalu a mapya i makineg nilan ebpun kanu Kadenan a malimu.

Nakasenggay menem kanu namba a gay i manga darwaka (lu sa naraka).

Inibpasad ku sa lekanu a tupu nu Adam i di nu pedsimba su shaytan ka saben-sabenal a satru (kuntra) kanu nin a mapayag.

Endu saki nu i simba ka nan ba i lalan a matidtu (su kasimba sa Allah).

Endu saben-sabenal a natadin na shaytan i kadakelan sa lekanu, na ngintu ka di kanu makapagugangen?

Nya su naraka jahannam a inidtalanga sa lekanu.

Ludep kanu saguna a gay, sabap kanu kapegkafir nu.

Saguna a gay na di nami padtalun su ngali nu, ya embityala sa lekami na su manga lima nilan, a pedsaksi menem su manga ay nilan kanu langun na galebek nilan (sa dunya).

Endu u mana bu ka nagkahanda nami i piseken nami i manga mata nilan na tumuntul silan sa lalan na panun i kailay nilan.

Endu upama mana bu ka pigkahanda nami i sambiyan nami silan sa palas lu kanu kambetadan nilan na di silan makagaga miseg atawaka sumunud (embalingan).

Endu su pagkalendun nami i umur nin na egkulang su bagel-palas nin, na ngintu ka di kanu makapamikir sa kaungagenan.

Endu da nami mapamandu sa bayuk (su Muhammad) endu di nin dayt ya tabya na indawan su Qur’an a mapayag.

Endu nin mapangindaw su manga taw a bibyag endu madsama nu manga kafir su siksa.

Di nilan gailay i binaluy nami sa kanilan kanu bagel nami su manga binatang a silan i pakamilik lun.

Endu pinandayan sa kanilan, aden pegkudan nilan endu su kaped menem na pegkanen nilan.

Endu aden pan kangatagan nin sa kanilan, endu paginumen, na ngintu ka dili pakadsukur?

Endu minumbal silan sa manga kadenan a salakaw sa Allah ka basi makadtabang sa kanilan.

Na di makagaga tumabang sa kanilan (su barahala) ka silan endu su barahala nilan na ebpalawa silan sa hadapan nu Allah.

Na di ka lumidu i ginawa nengka sa kadtalu nilan ka katawan nami su ibagena nilan endu su ipebpayag nilan.

Ngintu di katawan nu manusya i binaluy nami sekanin ebpun sa manni, na sekanin na mapayag gayd i kategas nin.

Endu minenggay sa upaman sa nalimpangan nin su punan nin, ya nin kadtalu na entayn i makawyag sa tulan a nalupet?

Edtalu ka (Muhammad): baguyagen nu minaluy lun paganay, endu su Allah na langun nu binaluy nin na katawan nin.

Na sekanin (Allah) na binaluyan kanu nin ebpun kanu mailaw a kayu sa apuy entu ba i ipedsulu nu.

Su Allah i minaluy sa pitu lapis a manga langit endu lupa sa kagaga nin i mamaluy pamun sa pagidsan nin, su Allah i bamaluy a mataw.

Saben-sabenal su Allah na amayka aden pegkahanda nin na ya nin bu edtalun na pangaden ka na maaden.

Mahasuti su Allah, a sya kanu lima nin i kabpamilik kanu enggaga-isa endu lu bun sa lekanin pembalingan atau ka paguli.

Saki (Allah) idsapa ku (su malaikat) a ya nin bu galebek na simba sa Allah.

Endu idsapa ku su (malaikat) a pedsedseg sa sambel.

Endu (idsapa ku) su pembatya kanu kitab.

Na saben-sabenal na Kadenan nu na isa bu.

Na Kadenan nu manga langit endu lupa endu su pageletan nin endu Kadenan nu pedsebangan.

Saben-sabenal a pibpalasan nami su langit u dunya sa palas nu manga bitun a pegkingdat.

Endu ipebparahala sa shaytan a darwaka.

Di den silan makapakikineg lu sa pulu endu pembalantayn silan sa embala-bala.

Binugaw silan, endu aden siksa nilan a tatap.

Ya tabya na su bamagayas a banayab, na gatundugan na apuy ebpun kanu bitun sa gatutung.

Idsay ka silan (Muhammad) u silan i mabagel a binaluy atawaka su binaluy nami (langit-lupa)? Na binaluy nami su manusya ebpun sa lupa a malumiket.

Nagayp ka (Muhammad) sa kapagungat nilan sa leka.

Endu amayka patademen silan na di silan tumadem.

Upama aden nailay nilan a ayat na pinagumpak nilan.

Endu ya nilan edtalun: namba na sih’r a mapayag.

Enduken upama matay tanu na nabaluy tanu a libubuk endu su manga tulan tanu na makambuwat tanu pan?

Endu su manga kalukesan tanu a nangawna?

Edtalu ka (Muhammad): uway makambuwat kanu, sekanu na makalusak kanu.

Ka makaisa bu a kayup (kanu sanggakala) na mailay nu i katamanan nu.

Endu ya nilan madtalu na: nabinasa tanu, nya su gay a kabalas.

Nya ba su gay a kagkukum a pinandalbut nu (manga kafir).

(Edtalun kanu manga malaikat): bulig nu su manga kafir endu su manga kaluma nilan endu su pedsimban nilan (a barahala)-

A salakaw sa Allah, itutulu sa kanilan i lalan lu sa naraka jahannam.

Endu pabpalen nu silan ka madakel i bagidsa sa kanilan.

Na nginan ka di kanu pedtatabangay.

Saguna a gay na sinumangkup silan sa dala katagan nin.

Endu edsasangula silan sa naraka sa idsan nu isa su kaped in.

Edtalun nu manga lubay i sekanu a manga mabagel u di kena sekanu na di kami makanaraka, ugayd na inidsapa nu lu sa dunya i benal kanu.

Tig nu manga mabagel: di bun ugayd na da kanu bun pangimbenal.

Na dala saguna bagel nami a makatabang sa lekanu, endu sekanu na dupang kanu bun tanan.

Wagib su siksa sa lekitanu saguna, ka nanaman tanu langun.

Sekami bu i sabap, ugayd na natadin tanu bun tanan.

Silan kanu gay a mawli na pinadsimbul silan kanu siksa.

Saben-sabenal i sekami na maytu ba i kapakayd nami ku manga balasala (baradusa).

Silan na amayka pidtalu sa kanilan i dala kadenan a wagib a simban ya tabya na su Allah na mimamasela silan.

Endu kadtalu nilan pan: enduken ka pedtagaken tanu su manga kadenan tanu sabap bu sa pababayuk a buneg?

Inunta na bantang i napananggit nin (Muhammad) endu pinangimbenal a nawna a manga sinugu.

Sekanu na nanami nu su siksa a sangat i kasakit in.

Endu dala ibalas sa lekanu a salakaw kanu lalaw nu galebek nu.

Ya salakaw na su manga ulipen nu Allah a pinamagel nin.

Silan na aden rizki nilan a natawan sa mapayag.

Manga unga na kayu, endu silan na pedsasangulay.

Sa dalem na surga a na’eem.

Lu kanu manga kantil (katri) silan pedsasangulay.

Pembalibaten silan sa basu a baginuman a mapya i nanam in.

Na maputi palnan a kapyanan su baginemun.

Dala magedam nilan a malat endu dala sa kanilan i kalangut.

Endu aden pan sa kanilan i manga babay a ya nin bu mailay na su kaluma nin.

Na pakalagid sa kaputyan na leman a nabawsan.

Endu edsasangula silan ka mamagidsaya silan sa dalem na surga.

Ya edtalun nu isa sa kanilan: aden tagapeda ku lu sa dunya.

Ya nin edtalun sa laki: pangimbenal ka sa gay a mawli?

Amayka matay tanu endu libubuk tanu endu nalupet su manga tulan tanu na makambuwat tanu pamun?

Pidtalu nilan: ngintu nailay nu bun saguna?

Guna nin bagilaya na lu nin nailay sa naraka jahannam.

Na ya nin madtalu na ibet sa Allah na paydu sama na makailing aku sa leka sa lusak.

Endu upama ka di kena bu su limu nu Allah na naka-amung aku den sa naraka.

Na dala den kapatay tanu.

Ya tabya na su nawna a kinapatay tanu lu sa dunya na ngin pan i siksa tanu.

Saben-sabenal a namba i kinabadtug a masla.

Su namba a upaman na wagib i enggalebek su manga taw.

Na ngintu entu ba i mapya atawaka su kayu a zakkum?

Saben-sabenal a binaluy nami i namba a kayu a fitna kanu manga kafir.

Entu a kayu na lu minetu sa naraka jahannam.

Manga panga nin na mana den su ulu nu manga shaytan.

Saben-sabenal na pegkan silan kanu (zakkum) a di nilan ma-uta a di malamed.

Mawli na aden pan baginumen nilan a sangat i kayaw nin.

Mawli na saben-sabenal a baguliyan nilan na lu sa naraka jahannam.

Kagina silan na nabalatemu nilan su manga lukes nilan sa manga tading.

Silan na ya nilan bamagayasan pedtuntul na su ukit nu kalukesan.

Endu saben-sabenal a madakel i natading a nawna pan sa kanilan.

Endu saben-sabenal a sinugu nami lu sa kanilan i papegkagilek.

Ilayka (Muhammad) upama ngin i ulyan na nanggula nu manga taw a dala pangimbenal.

Ya tabya na su manga ulipen nu Allah a ikhlas.

Endu saben-sabenal a tinawag nu Nuh (su Allah) na mapya gayd a tinumalima.

Endu linepas nami (su Nuh) endu su kadakel nin kanu batalu a masela.

Endu binaluy nami su mawli a taw nin sa silan i manga nasama.

Endu inisama nami sa lekanin i badtugan a mapya.

Mahasuti nanget kanu Nuh kanu dalem nu dunya.

Saben-sabenal a maytu ba i kabalas nami kanu manga mapya a taw.

Sekanin na kuyug kanu manga ulipen a nangimbenal.

Mawli na pinageled nami su madakel (a kafir).

Endu saben-sabenal a aden bun kanu manga tagapeda nin i sya menem kanu Ibrahim.

Kanu kinasangul nin Kanu kadenan nin sa pusung a sagyahatra.

Aden gay a pidtalu nin kani ama nin endu su manga taw nin: ngin i pedsimban nu?

Kalbutan a manga kadenan a salakaw sa Allah i kalilinyan nu.

Ngin i kalangan nu kanu Kadenan nu dunya.

Minilay su (Ibrahim) kanu manga bitun.

Ya nin bu lawa nadtalu na saben-sabenal a saki na dili gapya i ginawa ku.

Na tinagak nu manga taw nin sa namangawa silan.

(Su Ibrahim) na linumu kanu manga kadenan nilan (barahala) ya nin pidtalu: di kanu pegkan?

Nginan ka di kanu pedtalu? (manga barahala).

Na entu pan ba a pinametay nin sa kawanan.

Pidsangul nilan sekanin sa pamagayas silan.

Ya nin pidtalu (si Ibrahim): nginan ka pedsimban nu i sekanu bun i bagumbal lun.

Endu su Allah i minaluy sa lekanu endu su penggalebeken nu.

Ya nilan pidtalu: tambaki nu sa kayu sa tutudan ka idtug sekanin (Ibrahim) sa apuy.

Bagitungan sa mabinasa, na binaluy nami sa silan i nabinasa.

Endu pidtalu nu (Ibrahim): saben-sabenal a saki na sangulan ku su Kadenan ku, ka tutulun aku nin.

Kadenan ku enggi aku sa kanu manga mapya.

Pinagkalilinyan nami (kanu Ibrahim) i wata a matigkel (Ismail).

Guna su pakatabang den sa galebekan (Ismail) kani ama nin (Ibrahim) pidtalu nu Ibrahim: Hay wata ku! Nailay ku sa kapedtulug ku i sumbalin ku seka na ngin i leka? Tig nu Ismail: Hay ama! Enggalebek ka i suguwan sa leka, ka maparuli aku nengka bun amayka myug su Allah lu kanu manga taw a barasabar.

Guna su sinumangkup silan duwa na inibetad nin su putaw sa bakelengan nin.

Na tinawag nami: Hay Ibrahim! Sugati ka den.

Ka saben-sabenal natuman nengka den su taginepen nengka, sekami (Allah) na maytu ba i kabalas nami kanu manga mapya a manga taw.

Ka nan a nanggula na batalu a mapayag.

Endu sinambyan nami su (Ismail) sa kibas (kambing) a masla.

Endu tinagak nami a badtugan a mapya sa lekanin sya kanu gangawli.

Su sagyahatra na nanget den kanu Ibrahim.

Sa maytu ba i kabpamalas nami kanu manga mapya manga taw.

Ka sekanin na kuyug kanu manga ulipen a nangimbenal.

Endu pinakalilinyan nami sa lekanin su Ishaq a nabi a kuyug kanu manga mapya.

Endu pinambarakat nami sa lekanin endu su Ishaq endu manga muli a taw nilan na aden bamaginugut endu aden bun kafir sa mapayag.

Endu saben-sabenal a linanun (inikalimu) nami su Musa endu su Harun.

Endu linepas nami silan duwa endu su manga taw nilan kanu tiyuba a masla.

Endu tinabangan nami silan, na silan i tinemalaw.

Endu inenggan nami silan duwa sa kitab a mapayag.

Endu tinutulu nami silan duwa sa lalan a matidtu.

Endu inisama nami sa kanilan duwa i mapya a badtugan kanu gangawli sa kanilan.

Su sagyahatra na nanget kanu Musa endu kani Harun.

Benal a mamba i kabalas nami kanu manga mapya a manga taw.

Benal na silan duwa na kuyug kanu manga ulipen a nangimbenal.

Endu su Ilyas na kuyug kanu manga sinugu.

Kutika a pidtalu nin kanu taw nin: namba ka magilek kanu bu sa Allah.

Ngintu ka ya nu pedsimban i barahala, na ipedtagak nu su mapya gayd i kapamaluy nin.

Su Allah i kadenan nu a kadenan bun nu manga lukes nu a nangawna.

Pinandalbut nilan, na silan ba i taw sa naraka.

Ya tabya na su manga ulipen nu Allah a manga ikhlas.

Endu inisama nami i mapya a bandingan (badtugan) sa lekanin kanu gangawli a manga taw.

Su sagyahatra na nanget kanu Ilyas.

Benal a mamba i kabalas nami kanu manga mapya a manga taw.

Saben-sabenal na sekanin na kuyug kanu manga ulipen nami a nangimbenal.

Endu su Lut na kuyug bun kanu manga sinugu.

Na linepas nami sekanin endu su kadakel nin langun.

Ya tabya na su kaluma nin a nakuyug kanu manga taw a nabinasa.

Mawli na bininasa nami su langun nu liyu sa kanilan.

Endu sekanu na pedsagadan nu bun su dalpa nilan sa mapita-

Endu magabi na ngintu ka di nu kapamandapat (mapamikir) a pikiran?

Endu saben-sabenal su Yunus na kuyug bun kanu manga sinugu.

Su kutika a minawa sa lu mibpawang kanu bagedan sa napenu na lulan.

Na sekanin (Yunus) i nambuwatan nu ilayan sa sekanin i pageleden sa lagat.

Endu nilinu nu seda, saleta aden pedtalya sa lekanin.

Upama ka di kena bu mategel tumasbih.

Na matangen kanu tiyan nu seda taman sa kabangkit sa dunya.

Pinagemaw nami sekanin sya sa tadtab nu lagat sa malubay sekanin.

Endu pinatu’ nami sa lekanin i kayu a kasilungan nin a makagayp.

Endu sinugu nami sekanin lu kanu labi magatus ngibu a manga taw atawaka subra pan.

Na nangimbenal silan na inenggan nami silan sa kalilini a taman bu kanu ajal nilan.

Idsa nengka (Muhammad) kanu manga kafir u kanu Kadenan nengka su manga babay na kanilan su manga mama.

Atawaka kinabaluy nami kanu manga malaikat na ngintu nadsaksyan nilan i manga babay su malaikat?

Saben-sabenal na ya nilan bun madtalu na kalbut nilan.

Na pinambata nilan su Allah na silan na sangat i kalbut nin.

Sa ya kun pinamili nu Allah na su manga babay kanu manga mama.

Da sa lekanu i kapangukum sa da nu mailay.

Ngintu di kanu den ma-indaw egkatulanged?

Atawaka aden tindeg nu a mapayag (kanu pedtalun nu)?

Pambuwat nu i kitab nu amayka benal kanu.

Endu inumbalan nu manga mushrik sa kabpagalya nilan kanu jin, na saben-sabenal a katawan nu jin su mushrik na pedsiksan sa naraka.

Mahasuti su Allah kanu langun na kadtalu nilan a supak.

Ya tabya na su manga ulipen nu Allah a manga ikhlas.

Na saben-sabenal sekanu endu su pedsimban nu (barahala).

Da sa lekanu i mabinasa nu apya isa-kataw bu.

Ya tabya na su manga taw a pakaludep sa naraka a jaheem.

Endu da isa sa lekitanu a di kena aden simban nin a natawan nin.

Endu sekitanu na pedsaf tanu sa sambayang.

Endu sekitanu na pedtasbih tanu.

Endu saben-sabenal na ya nilan pan kadtalu na,

Upama mana bu ka aden sa lekitanu i kitab ebpun kanu nangawna,

Na mabaluy tanu a ulipen nu Allah a manga ikhlas.

Na sinupak nilan bun, na di ebplis na katawan nilan.

Endu saben-sabenal a nawna den i Kalima nami kanu manga ulipen nami a manga sinugu.

Na saben-sabenal a silan (manga sinugu) na silan i pedtabangan.

Endu su sundalu nami (bamaginugut) na silan i tumaban.

Pasagadi ka silan a manga kafir sa taman a di pan gabunu silan.

Endu ilayka su siksa sa kanilan, ka di ebplis na mailay nilan bun.

Ngintu ka pedtagadan nilan su siksa nami sa kanilan.

Na amayka nakatulun kanu lama-lama nilan na mawag den i katamanan nu mapita nu manga taw a pinakagilekan a da kagileki.

Pasagadi ka silan sa taman a di ka pan gasugu sa kabunu sa kanilan.

Endu ilay ka su siksa ka di ebplis na mailay nilan bun.

Mahasuti su Allah a Kadenan nengka a Kadenan a mapulu kanu langun nu kadtalu nilan a kadusan a masela.

Endu su sagyahatra na nanget kanu manga sinugu.

Endu pugi nu su Allah a Kadenan nu langun na dunya.

Saad (su Allah i mataw kanu ma’na nin), Saki (Allah) idsapa ku su Qur’an sa napayag lun i langun taman.

Ugayd na su manga kafir na natagu kanu kabpapulu bu endu kapagukag (kanu manga nabi).

Madakel den i bininasa nami a nawna pan sa kanilan a manga taw sa nakapanawag silan kanu kinawma na tyuba sa kanilan sa dala den waktu a kapalaguy.

Endu nagayp silan sa nakawma sa kanilan i sinugu a bansa nilan bun, endu pidtalu nu manga kafir: pasi-sih’r a kalbutan.

Ngintu ka pembaluyn nin su manga kadenan sa isa bu ka su Allah bu, na saben-sabenal sa galebek ni (Muhammad) na isa kanu di matalima.

Endu ginumanat su kadakel nilan sa pidtalu nilan: lu kanu den endu edsabar kanu sa kanu mga kadenan nu, ka pidtalu nu (Muhammad) na isa kanu di matalima.

Ka da tanu makineg inan kanu kaped a agama, na dala bun inan ya tabya na kadalbutan bu.

Ngintu nakatulun i Qur’an sa lekanin na di kena sekanin i masla a taw? Pulingan bu i penduwa-duwa silan kagina dala nilan pan kananami su siksa ku (Allah) sa kanilan.

Atawaka ngintu lu kanilan su gunsi nu limu nu Kadenan nengka a sekanin (Allah) i mapulu a bangenyan?

Atawaka kanilan a gamilikan su manga langit endu su lupa endu su pageletan nin? Na mamusug silan sa panikan (u benal i pedtalun ilan).

Sundalu a malubay, na makandedsa kanu lumpukan nilan.

Napandalbut bun su nawna sa kanilan su taw nu Nuh endu su Aad endu su Fir’awn na aden buladtek nin (kayu a ipambadas).

Endu su Thamud, endu su taw nu Lut endu su manga tagapeda nu Aikah (manga taw sa Madyan), silan na midtatagapeda.

Da kanu uman isa a di kena napandalbut sa sinugu, na wagib su siksa (sa kanilan).

Endu da kapagangapan nilan a salakaw kanu kayup a makaisa kanu kabangkit sa dunya sa dala kadsunudan nun.

Endu pidtalu nilan: Kadenan nami i sya nengka den sa lekami su kitab a sinulatan sa galebek nami sa di pan gawma i gay a mawli.

Edsabar ka (Muhammad) kanu kadtalu nilan, ya ka tademi su ulipen nami a si Daud ka sekanin na mabagel i simba nin, ka ya nin bu galebek na kasuwatan nu Allah.

Saben-sabenal a pinandayan nami sa lekanin su manga palaw, a bagamung pedtasbih sa lekanin sa magabi-malamag.

Endu su papanuk a pembuligbulig sa bagamung (kanu Daud) uman isa na bangeni sa kasuwatan (nu Allah).

Endu binagel nami su kadatu nin endu inenggan nami sekanin sa ka-nabi endu kapya na kadatu.

Endu nakawma sa leka (Muhammad) su tudtulan kanu duwa kataw a di bagayun sa linudepan nilan (Daud) kanu pedsambayangan nin sa makagayp.

Kinaludep nilan kanu Daud na natekawan sa kanilan, ya nilan pidtalu: da ka kagilek ka di kami bagayun, pendupangan na isa su kaped nin, na kukum kami sa bantang endu da ka lumamig, endu tutulu kami sa bantang a lalan.

Saben-sabenal a nan i suled ku anan na aden unta nin a syaw-pulu endu syaw, na aden laki a sawalu, (pidtalu nin): ipatuganul nengka salaki i leka anan, na dala aku makagaga sa kadtalu, nakwa nin su laki a sawalu bu.

Tig nu Daud: saben-sabenal a dinupang ka na kaped nengka anan sa kinwa nin su leka a sawalu ka namba i kadakelan sa pedtumpuk na dupangen nin su ped nin, ya tabya su manga bamaginugut endu minggalebek sa manga mapya, na paydu bu i maytu ba (tinidtwanan), endu natawan nu Daud i binatalu sekanin, na nangeni sa ampun sa Allah endu linundangan nin i karuku-kasugyud endu midtawbat.

Na inampun nami sa lekanin, endu makasupag pan sa lekami endu mapya pan kawliyan nin.

Hay seka Daud! Binaluy nami seka a khalifa (datu) sya sa lupa na kukum ka su manga taw sa bantang, endu di ka baginugunuti i nafsu-hawa nengka, ka tadingen ka nin sa lalan sa Allah, ka su manga taw a gatading kanu agama nu Allah na kanilan i siksa a mapasang, kagina nalimpangan nilan i gay a mawli.

Endu di kena nami binaluy su manga langit endu su lupa endu su pageletan nin sa batil, entuba i antapan nu manga kafir, na su bawgan sa naraka na kanu kafir a pegkalaw-kalaw.

Atawaka binaluy nami su manga bamaginugut a minggalebek sa manga mapya sa mana su manga taw a pakabinasa kanu dalpa, atawaka baluyan nami su manga taw a magilek sa Allah sa mana su manga darwaka.

Kitab a initulun nami sa lekanin (Muhammad) a barakat ka endu nilan mapanuliman su manga ayat nin, endu ma-indaw su manga taw a aden akal nin.

Endu inenggay nami kani Daud si Sulayman a ngin den a kapya na ulipen ka mategel a benal semangul sa Kadenan nin.

Su kutika na ini-adu sa lekanin sa ulyan na dhuhur i manga kuda a manga mapya gayd a pegkudan.

Pidtalu ni (Sulayman): namba i kalinyan ku sabap sa jihad sa Allah, taman sa dala makadsambayang sa asar taman sa sinumedep su senang.

(Tig nu Sulayman): imbalingan nu sa laki su kuda, ka tinebpedan su lisen endu lig (na kuda, sabap sa nasimpang sa simba sa Allah).

Endu saben-sabenal a binatalu nami su Sulayman sa aden initapes nami kanu bagagayananin a lawas (a shaytan), mawli na midtawbat (su Sulayman).

Pidtalu nin (Sulayman): Kadenan ku ampun ka sa laki endu enggi aku sa kadatu a di dayt u mawli sa laki, ka seka (Allah) i Kadenan a bangenggay.

Na pinandayan nami sa lekanin su sambel a balalaguy sa kyug nin, sa mananaw sa apya endaw i kyug nin.

Endu su manga shaytan i pembalay endu su kaped na pedseneb sa lagat.

Endu su kaped na pinamawik sya sa lantay-lantay.

(Pidtalu nu Allah kanu Sulayman): namba i inenggay nami na enggay ka su pegkyugan nengka atawaka di ka menggay na di bun idsa sa leka.

Endu aden lekanin sya sa lekami a kapyanan a kawliyan nin.

Endu labit ka (Muhammad) su ulipen nami si Ayub, a tinawag nin su kadenan nin: saki na nasugat aku na shaytan sa makagkayd endu siksa.

(Pidtalu nu Allah sa lekanin): ibagkuway nengka su ay nengka, ka nan i pebpaygwan a matenggaw endu baginemen.

Endu inenggay nami su kaluma nin endu su manga wata nin a limu ebpun sa lekami, endu indawan kanu aden akal nin.

Endu kwa ka su sakumpungan (salumpuk) ka ibetay nengka kanu kaluma nengka, endu di ka kasapalan kagina masabar (Ayub), ngin den i kapya nin a ulipen, ka sekanin na di gapinda sa kalumping nin sa Kadenan nin.

Endu labit ka su ulipen nami a su Ibrahim endu su Ishaq endu su Ya’kub a mabagel i simba nilan endu matindu i kailay nilan.

Sekami na pinapa-ikhlas nami silan sa tadem sa gay a mawli.

Endu silan na kuyug silan kanu manga pinamili a manga mapya.

Endu labit ka su Ismail endu su Alyasa endu su Zul-kif’l, endu uman isa sa kanilan na ebpun sa mapya.

Namba i tademan a mapya, endu saben-sabenal su magilek sa Allah na mapya i kadsunudan (kambalinganan) nin.

Surga a tatap, binukan sa kanilan i manga pintuwan nin.

Pedsandeng silan, endu apya ngin i kyugan nilan a manga unga na kayu na madakel endu baginemen na aden sa kanilan.

Endu aden pan manga kaluma nilan a manga laga, a kaluma nin bu i kyugan nin.

Namba su pedsinganin nu sya sa gay a mawli.

Saben-sabenal a namba rizki nami na dala kadtamanan nin.

Namba i kanu bamaginugut, endu saben-sabenal su manga darwaka na kanilan i sangat i kawag nin a kadtamanan.

Su naraka jahannam i kaludepan nilan, na ngin den i kawag nin a kadtakenan.

Namba i kanilan, na nanami nu pan i mayaw endu manga dana a madu gayd.

Endu aden pan kaped a siksa a mimbyas-byas.

Nanden su tumpuk a kaped nu beludep (tig nu kaunutan nilan) dala kapya nu manga taw a minunut sa lekami, makaludep tanan sa naraka.

Madtalu nu namangunut: sekanu i dala kapya nin, ka sekanu ba i namegkafir sa lekami, na ngin den i kawag nin i kambetadan tanu.

Ya nilan madtalu: kadenan nami takep ka su siksa kanu nadsabapan a kinaludep nami sa naraka.

Endu madtalu nilan: nginya ka di nami mailay su manga mama a inibilang nami sa mawag a manga taw (entu ba su manga bamaginugut).

Bagungaten nami bu lu sa dunya, ngintu naawa sa kanilan su kailay ka dili nilan gailay.

Saben-sabenal na namba na di ebplis na manggula i kapamagukag nu manga taw sa naraka.

Edtalu ka (Muhammad) sa kanilan: saki na papegkagilekan ku sekanu (sa naraka) endu da kadenan a wagib a simban ya tabya su Allah a pakapegas.

A Kadenan nu manga langit endu lupa endu su pageletan nin a mapulu a bangampun.

Edtalu ka sa kanilan (su Qur’an) na masla a bandingan (tudtulan).

Na sekanu na pembalawagan nu su Qur’an.

Na da sa laki i kasabutan ku i kapebpalawa nilan (malaikat).

Da ipewahi sa laki ya tabya na saben-sabenal a saki na manginggilek aku sa mapayag.

(Labit ka) su kutika a kinadtalu nu Kadenan nengka kanu manga malaikat sa saben-sabenal a saki (Allah) na bamaluy aku sa manusya ebpun sa lupa.

Na amayka napasad ku endu na yupan ku den sa nyawa na embaba kanu sa lekanin a sugyud.

Na sinumugyud su malaikat sa langun nilan.

Ya tabya na su Iblis ka mimamasela, na nakuyug kanu manga kafir.

Tig nu Allah: Iblis ngin i nakasapal sa leka sa kasugyud kanu binaluy ku kanu lima ku, mimamasela ka atawaka mibpapulu ka.

Pidtalu nu Iblis: saki pan i mapya sa lekanin, ka ya ku asal na apuy, si Adam na binaluy sa lupa.

Tig nu Allah: liyu ka sa surga ka seka na perajamen ka.

Endu saben-sabenal a nanget sa leka su mulka ku taman sa gay a mawli.

Pidtalu nu Iblis: Kadenan ku pakalendu ka i umur ku taman sa kagubal sa dunya.

Tig nu Allah: kuyug ka kanu malendu i umur nin.

Taman bu kanu waktu a mapayag.

Pidtalu nu Iblis: sabap kanu kapulu nengka na tadingen ku silan tanan.

Ya tabiya na su ulipen nengka a manga ikhlas.

Tig nu Allah: su bantang na edtalun ku su bantang.

Penun ku su naraka jahannam sa leka endu su langun nu minunut sa leka sa langun nilan.

Edtalu ka (Muhammad) sa kanilan: di kena aku pegkwa sa lekanu sa sukay, endu di kena aku penggedteb sa laki bu a kadtalu.

Saben-sabenal a dala kanu Qur’an ya tabya na indawan kanu taw nu dunya.

Endu di ebplis na katawan nu bu su kabenal nu tudtulan sa di mawget.

Pinatulun su kitab ebpun sa Allah a mapulu a mataw.

Pinatulun nami sa leka su kitab sa bantang, na simba ka su Allah sa ikhlas sa lekanin su agama.

Saben-sabenal a lekanin i agama a pagelin, su manga minumbal sa salakaw sa Allah a pedsimban nin na ya nilan tindeg na entuba i papedsupeg sa kanilan sa Allah, na su Allah i kumukum sa kanilan kanu pembida-bidan nilan, saben-sabenal su Allah na di nin tutulun su kafir a malbut.

Upama ka pigkahandan nu Allah i mumbal sa wata na sekanin bu i mamili kanu pegkyugan nin kanu pamaluy nin, mahasuti su Allah a isa bu a pakapeges.

Binaluy nin su manga langit endu su lupa sa bantang, paludepen nin su magabi kanu malamag endu su malamag sya kanu magabi endu endaw i kyug nin kanu senang endu su ulan-ulan, uman isa na bagukit sa lalan nin taman sa gay a mawli, sekanin (Allah) i mapulu a bangampun.

Binaluy kanu nin ebpun sa nafas a sawalu (Adam) a lu bun ba binaluy i tagapeda nin (Hawa) endu pinatulun nin sa lekanu kanu binatang i walu ka biyas edtatagapeda, pimbaluyan kanu nin sya kanu manga tyan nu manga ina nu sa kinabaluy a nadtatagitu kanu telu lapis a malibuteng, entu ba su Allah a Kadenan nu a lekanin i kadatu, dala kadenan a salakaw sa lekanin, na ngintu ka papedsibayn nu i simba sa lekanin?

Amayka egkafir kanu na su Allah i kawasa sa lekanu, endu di nin kasuwatan sa manga ulipen i kafir, ya nin kasuwatan sa lekanu su kadsukur nu, endu di mandusa na isa su dusa na kaped nin, mawli na lu kanu bun kanu Kadenan nu makambalingan, balasan kanu nin kanu galebekan nu, ka sekanin (Allah) na katawan nin su dalem na pamusungan nu.

Amayka nawma na mawag su manusya na nangeni sa Kadenan nin a midtawbat, mawli na amayka inenggan sa limu ebpun sa Allah na tinagak nin su kandu’a a pembaba sa Allah a nawna a galebek nin, endu minumbal sa kaped nu Allah a pakatading sa agama, edtalu ka (Muhammad): ayadi ka den i kakafir nengka sa paydu bu sya sa dunya, ka seka na taw ka na naraka.

Di kapagidsan sekanin a barasimba kanu magabi na pedsugyud atawaka pedtindeg kanu simba nin a kagilekan sa gay a mawli endu pagingarapen nin su limu nu Allah (kanu taw a dala simba nin), edtalu ka: di makapagidsan su mataw endu di mataw, na ya bu ma-indaw (mapamandu) na su aden akal nin.

Edtalu ka (Muhammad): Hay sekanu a mga ulipen ku a palityaya! Ikagilek nu su Kadenan nu, su manga taw a minggalebek sa mapya na sya sa dunya na pembalasan nu Allah sa mapya, su lupa nu Allah na mawlad, saben-sabenal na su manga matigkel bu i makatalima sa mapya a balas a di den magkwinta.

Edtalu ka (Muhammad): saben-sabenal a saki na sinugu aku sa simban ku su Allah sa ikhlas sa lekanin su agama.

Endu sinugu aku sa saki ba i mawna a sumangkup.

Edtalu ka: saki na kagilekan aku amayka supaken ku su Kadenan ku sa siksa kanu gay a masla.

Edtalu ka: su Allah i simban ku sa ikhlas sa lekanin su agama.

Simba nu den i pegkyugan nu a salakaw sa Allah, edtalu ka: su nangalapis na linapis nilan i ginawa nilan endu kaluma nilan sa gay a mawli, entu ba i tidtu a galapis sa mapayag.

Lu sa pulu nilan i midtatalapis a apuy endu kababan nilan na apuy a midtatalapis, entuba su ipenggilek nu Allah kanu manga ulipen nin, na ikagilek nu.

Endu silan na pedsanggilan nilan a makasimba silan sa salakaw sa Allah, na kanilan su lilini sa surga.

Entu ba su manga taw a manuliman sa kadtalu sa unutan nilan i mapya lun, entu ba a manga taw na tinutulu nu Allah, endu silan i manga taw a aden akal nin.

Su taw a wagib a maka-naraka na di nengka magaga mapalyu sa siksa sa naraka.

Ugayd na su manga taw a nagilekan kanu Kadenan nilan na pulu-kababan nilan i mapya i palas nin a pakapya pan sa ginawa, a pelagilay sa kababan na ig a pasad nu Allah, na su Allah na di demiyang-diyang sa pasad.

Dala nengka mailay i saben-sabenal su Allah na pinatulu nin ebpun sa langit i ulan sa pinatutulu nin sya kanu kabetadan a bagetwan kanu lupa, mawli na pabpagetun nin i pamulan a madakel i embalangan nin, mawli na baluyn nin a nakuku, nakadalem lu ba su indawan kanu manga taw a aden akal nin.

Su taw a pinagkakalag nu Allah su laleb nin sa agama Islam na gatuntul nin i sigay ebpun sa Kadenan nin, na su bawgan sa naraka na kanu mategas i pusung nin sa tadem sa Allah, endu silan i natading sa mapayag.

Su Allah i napatulun sa mapya gayd a kadtalu (Qur’an), kitab a mamakandalagida, sa mangalimbuwat i lanitan nilan, endu su manga atay nilan na mangalemek sa tadem sa Allah, entuba i tutulu nu Allah a itutulun nin kanu pegkahanda nin, na su tadingen nu Allah na dala makatutulu lun.

Su manga taw a ipedsumek i biyas nin sa naraka lu sa gay a mawli, endu edtalun kanu manga kafir: nanami nu su lalaw nu (lu sa dunya) a manga supak.

Napandalbut bun su nangawna sa kanilan, nawma silan a siksa sa dili nilan kagedam.

Pinatepengan nu Allah sa kanilan i kayayan sa dunya, na su siksa sa akhirat na muna pan i kapasang nin u mana bu ka gatawan nilan.

Endu saben-sabenal a pinambuwat nami kanu manusya san sa Qur’an i langun na manga upaman ka basi malemu i ma-indaw silan.

A Qur’an a basa Arab a dala midsungkanga lun, ka endu silan kagilekan (sa Allah).

Aden upaman nu Allah a sakataw a mama a madakel i di bamagayun sa lekanin, endu mama a sakataw a dala pidsubekatan nin, na di silan makapagidsan, pugi nu su Allah, ugayd na ya madakel sa kanilan na di mataw.

Seka (Muhammad) na minatay ka na maytu bun silan na namamatay bun silan.

Mawli na sa gay a mawli na lu kanu Kadenan nu na mamagukag kanu.

Da nakalawan i kadupang nin kanu taw a pinandalbutin su Allah endu su sinugu nin kanu kinawma nin sa lekanin, na saben-sabenal su naraka jahannam i kadtakenan nu manga kafir.

Endu su nakapananggit sa bantang a pinangimbenal nu manga bamaginugut, entuba i manga taw a magilek sa Allah.

Sa kanilan i apya ngin na kahanda nilan kanu Kadenan nilan, entu ba i ipembalas kanu manga taw a manga mapya.

Pebpunasen nu Allah su manga mawag a nanggalebek nilan, endu pembalasan silan sa ya pan mapya kanu pinggalebekan nilan.

Di kena ba sekanin a Allah na nasasangan kanu ulipen nin (Muhammad)? Endu pakagilekan kanilan sa kanu pedsimban nilan a salakaw kanu Allah, na su taw a tadingen nu Allah na da den sa lekanin i makatutulu lun.

Endu entayn i tutulun nu Allah na dala isa bu makagaga tumading lun, di kena ba su Allah i pedsuli sa entayn i kuntra kanu manga tagapeda nin mana su manga mu'min?

Endu amayka idsan silan u entayn i minaluy kanu manga langit endu lupa ya nilan edtalun: su Allah, edtalu ka sa kanilan na su pedsimban nu a salakaw sa Allah u ya kahanda nu Allah sa laki i makagkayd na ngintu ma-awa nu kadenan nu a barahala su makagkayd? Atawaka u ya nin kahanda sa laki i limu nin, na ngintu kasagadan nu barahala su limu nin? edtalu ka: su Allah i timuldu sa laki a pedsaligan u bamedsalig.

Edtalu ka: Hay sekanu a manga taw! Enggalebek nu den i kyugan nu, ka saki na penggalebeken ku bun, ka di sumala na katawan bu.

Upama entayn i mawma na siksa a makapandaya sa lekanin, endu matumapela ku siksa a di kagetas sa di gapinda.

Initulun nami sa leka su kitab kanu manga taw a haqq, na su taw a mapatutulu na kanu ginawa nin bun, su edtadingan na ginawa nin bun, da sa leka (Muhammad) kanilan i matuganul nengka silan.

Su Allah i pegkwa sa kanu manga ngyawa kanu kapebpatay nin, endu su da pen matay sya kanu kapedtulug in, na segedan nin sa na-atul nin sekanin sa kapatay, endu pitasan nin menem su kaped taman sa kanu timpu a talanged, saben-sabenal na sya kanu entuba i di ebplis na manga tanda kanu lumpukan a bamimikir.

Minumbal silan sa salakaw sa Allah a makadtabang, edtalu ka sa kanilan: namba na dala kagaga nin apya paydu endu dala pamikiran nilan.

Edtalu ka sa kanilan: kanu Allah i kashafa’at na langun, lekanin i langun nu manga langit endu lupa, mawli na lu kanu bun makambalingan sa lekanin.

Endu amayka linabit su Allah a isa nin bu na nabensi i pusung nu manga taw a di bangimbenal sa gay a mawli, amayka ya linabit i salakaw sa Allah na sangat i kalilini nilan.

Edtalu ka Muhammad: su Allah i minumbal kanu manga langit endu lupa, katawan nin i masulen endu mapayag, seka a Kadenan i kumukum kanu manga ulipen nengka kanu langun nu pimbibidayan nilan.

Endu umana bu ka su dupang na lekanin su lupa langun, apya pamun ka ipangawn nilan sa kawagan a naraka a siksa lu sa gay a mawli, na ipayag bun sa kanilan su siksa ebpun sa Allah a dala matagu sa ginawa nilan i matala nilan.

Endu napayag den sa kanilan su kawagan nilan endu nadsumek nilan su bagungaten nilan sya pan sa dunya.

Amayka nawma na mawag su manusya na mangeni sa lekami, mawli na amayka inenggan sa limu ebpun sa lekami na yanin kadtalu na sabap i nya sa kataw ku, ugayd na dili nin katawan i batalu intu, ugayd na ya madakel sa kanilan na dili nilan gatawan.

Saben-sabenal a namba na pidtalu bun a nangawna sa kanilan, na da pakangguna nin sa kanilan su langun nu pantiyaliyan nilan.

Nasugat silan nu kawagan nu manga galebek nilan, endu su manga dupang sa kanilan na masugat bun silan na kawagan nu manga galebekan nilan endu dili silan makalipus.

Di nilan gatawan su Allah na pagkalagen nin sa rizki su pegkyugan nin endu pedsimpitan nin (su pegkyugan nin), na nakadalem lu ba i manga tanda kanu manga taw a bangimbenal.

Edtalu ka kanu manga ulipen ku a nakasagad i kadarwakan nin sa ginawa nin i da kanu pedtinibpekan kanu limu nu Allah ka su Allah na bangampun a malimu.

Edtawbat kanu sa Kadenan nu endu sangkup kanu sa lekanin sa di kanu pan kawman nu siksa, mawli na di kanu den kadtabangan.

Endu unuti nu i mapya gayd a initulun sa lekanu ebpun kanu Kadenan nu sa di pan makawma sa makatekaw su siksa sa sekanu na di nu penggedamen atawaka di nu kadsagipa.

Na madtalu nu isa i nabinasa aku sa kadusan ku sa Allah, nakuyug aku kanu manga taw a ya nilan galebek sa dunya na kabpagumpak kanu rasul.

Atawaka madtalu nu isa u nya ba ka tinutulu aku nu Allah na makuyug aku kanu manga taw a magilek.

Atawaka madtalu nin kanu kailay nin sa siksa i nya ba ka makambalingan aku na makuyug aku kanu manga taw a manga mapya.

Kena ka nakawma bun sa leka su ayat ku (Allah) na pinadalbut nengka endu mimamasela ka na nakuyug ka kanu manga kafir.

Endu su gay a mawli na mailay nengka (Muhammad) su napandalbut kanu Allah i maitem i manga byas nilan, na saben-sabenal su naraka jahannam i kadtakenan nu pemamasela.

Endu lepasen nu Allah su manga taw a magilek sa Allah i badtugan nilan, endu di silan makembil na malat, endu da lidu na ginawa nilan.

Su Allah i minaluy sa langun, endu sekanin i pedtuldu lun.

Lekanin a Allah su bengawan nu langit endu lupa, su manga kafir na simupak kanu ayatan nu Allah, na nalugi silan.

Edtalu ka (Muhammad): ngintu ka salakaw sa Allah ipedsugu nu sa laki a simban? Sekanu na manga jahil kanu.

Endu saben-sabenal ini-wahi sa leka endu su nawna sa leka i amayka sumakutu ka na nagugul (nabinasa) su galebek nengka, endu makuyug ka kanu manga taw a nangalugi.

Di, ka su Allah i simba ka, endu edsukuri ka.

Endu dala nilan alagay su Allah kanu kapegkagaga nin, na su lupa langun na sakemilin bu sa gay a mawli, su langit menem na linulun tampal sa kawanan nin, mahasuti sekanin a Allah kanu langun nu sakutu nilan.

Endu yupen su sanggakala na makalendab su dalem nu langit endu su dalem nu lupa, ya tabya entayn i magkahanda nu Allah, mawli na edsalumanan magyup, na langun na makatindeg a mailay nilan i katamanan.

Endu sumigay su lupa sa sigay nu Kadenan nin endu ibetad su kitab, endu italingguma su manga nabi endu su manga saksi, endu makukum silan sa bantang endu dili silan madsalimbut.

Endu ininggay sa uman isa su balas nu galebek nin, endu su Allah pan i labi a mataw kanu penggalebeken nilan.

Endu isedseg su manga kafir lu sa naraka jahannam sa langun nilan, endaw i kawma nilan na bukan su manga pintu nin, idsan nu pedtameng sa naraka: ngintu da makawma sa lekanu su manga sinugu a bangsa nu bun na batyan nilan sa lekanu su manga ayat nu Kadenan nu, endu pakagilekan kanu nilan sa nya ba a gay nu, ya nilan madtalu: nakawma sa lekami, ugayd na benal su siksa kanu manga kafir.

Edtalun sa kanilan: ludep kanu sa naraka sa dala kalyu nu, na ngin den i kawag nin a kadtakenan nu mimamasela.

Isedseg menem su inikagilek nin su Kadenan nilan lu sa surga sa langun, taman sa amayka nawma nilan den (surga) na mabuka su manga pintuwanin na ya edtalun na pedtameng: sagyahatra kanu, migkapya kanu, ludep kanu sa surga sa dala kalyu nu.

Endu madtalu nilan: pugin tanu su Allah, ka tinuman nin su pasad nin endu pinawarisan nin sa lekitanu su lupa, apya endaw tanu sa surga a pegkyugan tanu, mapya gayd a balas nu minggalebek sa mapya sya sa dunya.

Endu mailay nengka (Muhammad) su manga malaikat na nakalibet kanu Arsh a pedtasbih sa pugi nilan kanu kadenan nilan, kinukum silan sa bantang endu madtalu nilan tanan i alhamdulillahi rabbil alamin.

Ha-Meem (su Allah i mataw kanu ma’na nin).

Initulun su kitab ebpun sa Allah a mapulu a mataw.

Bangampun sa dusa, pedtalima sa tawbat, a mapasang i siksa nin, kigkwan sa limu, dala kadenan ya tabya na sekanin, endu lu sa lekanin i kauliyan.

Dala ebpalawa sa ayat nu Allah, ya tabya na su manga supak (kafir) na da ka bu mapasimpang kanu kapendaludaya nilan kanu dalpa.

Nawna pan sa kanilan a napandalbut su taw nu Nuh, endu su mimbalang-balang pen i nawli sa kanilan, endu pegkyugan na uman isa i bunun nin su nabi nin, endu mibpalawa silan sa batil ka endu nilan makababa su haqq, na bininasa ku silan, na panun su siksa ku sa gay a mawli?

Maytu ba i kadedsan nu kadtalu nu Kadenan nengka lu kanu manga taw a manga kafir, silan ba a kigkuwan sa naraka.

(Su manga malaikat) a pebpusay sa Arash endu su manga malaikat sa embala-bala a bamedtasbih sa pugi nilan sa Kadenan nilan, endu bangimbenal silan endu ibangeni nilan sa ampun su manga bamaginugut, ya nilan kadtalu na: Kadenan nami mawlad gayd i limu nengka endu kataw nengka, na ampun ka su midtawbat endu tinuntul nin su agama nengka, endu lending ka silan kanu naraka jahannam.

Kadenan nami paludep ka silan sa surga a pibpasad nengka sa kanilan, endu su mapya kanu manga lukes nilan, kaluma nilan, mawli a taw nilan, ka seka i mapulu a mataw sa endadayta.

Endu dalindingi ka silan kanu manga mawag ka su dinalindingan nengka kanu entu a gay na inikalimu nengka endu badtugan a masla.

Saben-sabenal su manga kafir na pedtawagen silan sa muna pan sa lipunget nu Allah sa lekanu kanu lipunget kanu ginawa nu, bagenggaten kanu sa kapangimbenal na pegkafir kanu.

Ya nilan madtalu: Kadenan nami inimatayan kami nengka sa nakaduwa, endu inuyag kami nengka sa nakaduwa, na nangimbenal kami den kanu kadusan nami, na ngin nya aden bun lalan a makambalingan kami (sa dunya).

Nya edtalun sa kanilan: sekanu na amayka pakaisa-isan su Allah na egkafir kanu, amayka sakutun su Allah na mangimbenal kanu.

Sekanin (Allah) na ipabpagilay nin sa lekanu su manga ayatan nin, endu papedtulunen nin ebpun sa langit i rizki sabap kanu ulan.

Simban nu su Allah sa ikhlas sa lekanin su agama sa apya di kasuwatan nu manga kafir.

Mapulu i pangkatan nin, kigwan sa Arsh, pedsugun nin su Jibril ebpun kanu suguwan nin kanu magkahanda nin lu kanu ulipen, ka endu nin makapanginggilek su gay a kadtalabuka.

Su gay a mapayag silan (hadapan nu Allah) sa da makapagena nilan sa Allah apya paydu, na entayn i kigkwan sa kadatu sa (namba) a gay, kanu Allah a isa nin bu a pakapeges.

Su gay a balasan su uman isa kanu galebek nin, na dala kadtalimbuta saguna a gay, su Allah na mangagan i kakukum nin.

Endu pakagileki ka silan kanu gay a mawli, su manga atay na mamusug sa bakelengan nin sa di silan makadtalu da kanu manga dupang i malimu endu tumabang a kaunutan.

Katawan nu Allah su kadupang nu pipilek endu su dalem nu pusung.

Endu su Allah i kumukum sa haqq, su pedsimba sa salakaw sa Allah na dala kakukum nin sa apya paydu, saben-sabenal su Allah na pakakineg a pakailay.

Entu ba ka belalakaw silan kanu dalpa ka mailay nilan u panun i nanggula nu manga taw a nawna sa kanilan sa ya pan muna i kabagel nin endu napambuwat kanu dalpa sa manga tanda, bininasa nu Allah silan sabap kanu kadusan nilan, na da nakabpagelet kanu kyug nu Allah a kabinasa nilan.

Namba na pakawma bun sa kanilan su manga sinugu sa kanilan sa nakait sa manga mapayag na pigkafiran nilan, na bininasa nu Allah silan ka sekanin (Allah) i mabagel a mapasang i siksa nin.

Endu saben-sabenal a sinugu nami su Musa kanu manga ayatan nami endu manga tindeg a mapayag.

Lu kanu Fir’awn endu su Haman endu su Qarun, ya nilan pidtalu na sih’r a malbut (su Musa).

Guna makawma sa kanilan su bantang na ya pidtalu (ni Fir’awn): imatayan i mga wata a mama nu minunut sa kanilan (Musa), ya bu isama na babay, dala kanu alyugan nu manga kafir ya tabya na katadingan.

Endu pidtalu ni Fir’awn: padtaday aku nu ka bunun ku su Musa ka mangeni sa Kadenan nin, ka kagilekan aku sa sambiyan nin su agama nu atawaka ya nin ipayag sa dalpa na makagkayd.

Endu pidtalu nu Musa: lumindung aku sa Kadenan ku a Kadenan nu bun kanu taw a pemamasela a di bangimbenal sa gay a mawli.

Ya pidtalu nu isa a mama a baginugut ebpun kanu kadakel nu Fir’awn a inipagena nin su iman nin: enduken ka pembunun nu i mama a ya nin bu pedtalun na Kadenan ku su Allah a nakait pan sa lekanu sa mapayag (a tanda) ebpun kanu Kadenan nu, amayka malbut sekanin na lekanin bun i kalbut nin, amayka benal sekanin na masugat kanu na sabad kanu pasad nin sa lekanu, ka su Allah na di nin tutulun su baminasa a malbut.

Hay sekanu a manga pagali ku, lekanu i kadatu a mapayag saguna a gay sya sa lupa, entayn i makatabang sa lekitanu amayka makawma su tiyuba nu Allah sa lekitanu, ya pidtalu nu Fir’awn: da ungaya ku sa lekanu, ya tabya ungaya ku bun sa ginawa ku, endu ya ku ipedtutulu sa lekanu na lalan a mapya a makagkapya.

Endu midtalu su isa kanu bamaginugut: manga pagali ku, kagilekan aku masugat kanu na mana su nakasugat kanu madakel a nawna.

Mana su taw ni Nuh endu si Aad endu su Thamud, endu su nawli sa kanilan, endu su Allah na di dumupang kanu manga ulipen nin.

Endu hay sekanu a manga taw ku! Ikagilek ku sa lekanu su gay a kadtatawaga.

Su gay a kabpapalaguyan nu sa da den makadalinding sa lekanu sa siksa nu Allah, endu su tadingen nu Allah na da makatutulu lun.

Endu saben-sabenal a nakawma bun sa lekanu su Yusuf ku nawna sa mapayag a mga tanda na di kanu bun gapinda sa kapenduwa-duwa kanu nakawma sa lekanu taman sa guna matay (si Yusuf) na ya nu pidtalu na di den mapambuwat su Allah sa sinugu, namba i tadingen nu Allah su taw a nakasagad i kawag a palangay nin na penduwa-duwa.

Su manga taw a pebpalawa sa kanu manga ayatan nu Allah sa da tindeg nin a nakawma sa kanilan na masla a kadusan lu sa Allah endu kanu manga bamaginugut, namba i pedtutupan nu Allah i pusung nu pemamasla a bameges.

Endu pidtalu nu Fir’awn: Hay Hamaan! Embalay aku sa maligay a masla a mapulu ka basi ku masampay i manga panikan.

Panikan a ibagangay sa langit ka endu ku mailay i Kadenan ni Musa ka bagantapen ku a pendalbut, namba i pakalilini kanu Fir’awn- su manga kawagan nu galebek nin sa napelen (sekanin) kanu lalan a pakatidtu, endu dala alyugan nu Fir’awn a di kena pakabinasa lun.

Endu pidtalu nu sakataw a baginugut: hay sekanu a kadakel ku! Unuti aku nu ka tutulun ku sekanu sa lalan a pakatidtu.

Hay sekanu a manga pagali ku, saben-sabenal su kabpaguyag sa dunya na pegkakalinyan bu, su akhirat i dalpa a dayun sa dayun.

Su taw a enggalebek sa mawag na di balasan u di kena pagidsan nin bun, endu su taw a enggalebek sa mapya babay-mama na silan ba i makaludep sa surga sa pe-rizkiyan silan lu sa dalem na surga sa di den bagitungen.

Endu hay sekanu a manga pagali ku! Bagenggaten ku sekanu sa kalepas sa (siksa) na bagenggaten aku nu sa kanaraka.

Bagenggaten aku nu sa egkafir aku sa Allah endu sakutun ku sekanin sa da sa laki i kataw, na saki na bagenggaten ku sekanu kanu mapulu a bangampun.

Di ebplis na bagenggatan nu banan sa laki na dala katagan nin sya sa dunya endu lu sa akhirat, endu lu tanu bun tanan pakambalingan sa Allah, endu su manga darwaka na silan i kigwan sa naraka.

Katademan nu bun i pedtalun ku ba nya sa lekanu, na lu aku den kumamping (sumalig) sa Allah, ka su Allah i pakailay kanu manga ulipen nin.

Na dinalindingan nu Allah (su entu a paginugut) kanu mawag a alyugan, endu nakadadsang kanu kadakel nu Fir’awn su mawag a siksa.

Su naraka i pebpagyaw sa kanilan sa mapita-malulem, endu su gay a mawli na paludepen silan a kadakel nu Fir’awn sa mapasang a siksa.

Endu ebpapalawa silan lu sa naraka, ya edtalun nu manga lubay kanu mimamasela: sekami na bagunut kami bu sa lekanu, na ngintu saguna na kadtabangan kami nu sa kanu siksa sa naraka?

Ya madtalu nu mimamasela (naunutan): langun tanu na sya tanu den sa naraka, ka su Allah na saben-sabenal a kinukum nin su ulipen.

Endu edtalun nilan kanu pedtameng sa naraka: pangeni nu pan sa Kadenan i pakapegkagen kami nin pan sa siksa sa apya sagay bu.

Edtalun sa kanilan: da makawma sa lekanu i manga sinugu a nakapananggit sa manga mapayag? Ya nilan madtalu: nakawma sa lekami, ya madtalu nu pedtameng: tawag nu silan, na dala du’a nilan (kafir) a di kena katadingan.

Di ebplis i kadtabang nami kanu manga sinugu nami endu su manga bamaginugut sya sa dunya endu lu sa gay a mawli kanu hadapan nu manga saksi.

Gay a di makangguna kanu kafir su mga dawa nilan, sa kanilan su mulka endu kawagan nu kandalpan.

Endu saben-sabenal a inenggay nami kanu Musa su tutulu, endu pinawarisan nami kanu tupu nu Israel su kitab.

A tutulu endu indawan kanu aden manga ungangen nin.

Edsabar ka (Muhammad) ka su pasad nu Kadenan nengka na benal, pa-ampun ka kanu kadusan nengka, endu tasbih ka sa pugi nengka kanu Kadenan nengka sa mapita-malulem.

Su pebpalawa kanu manga ayatan nu Allah a da tindeg nin a nakawma sa lekanin na nakadalem sa pusung nilan i kamamasela a di nilan bun masampay, lindung ka sa Allah ka sekanin i pakikineg a pakailay.

Kinabaluy sa manga langit endu lupa na ya malgen sa kinabaluy sa manusya, ugayd na ya madakel sa kanu manusya na di nilan katawan.

Endu di makapagidsan su pisek endu su pakailay, endu su manga bamaginugut a minggalebek sa manga mapya endu su taw a malat, paydu i katademan nu a indawan.

Su gay a mawli na dili ebplis na makawma, ugayd na ya madakel kanu manga taw na di bangimbenal.

Endu pidtalu nu Kadenan nu: pangeni kanu sa laki ka enggan ku sekanu, su pemamasela sa endu Aku (Allah) nin di masimba na di ebplis i kaludep nilan sa naraka a lusak.

Su Allah i minaluy kanu magabi a ibangintelenen nu endu su malamag a ibagilay nu, su Allah i kigkuwan sa limu kanu manusya ugayd na ya madakel kanu manga taw a di makadsukur.

Entu ba su Allah a Kadenan nu a minaluy kanu engaga-isa, dala kadenan ya tabya na su Allah, na panun i kapapendalbut nu?

Mamba i kandalbut nu manga taw a pedsupak kanu manga ayatan nu Allah.

Su Allah i minaluy sa lekanu kanu lupa a kadtakenan nu endu su langit a naka-atep, endu pinabpalas kanu nin, pinagkapya nin i palas nu inenggan kanu nin sa mapya a rizki, na entu ba su Allah a Kadenan nu, mahasuti su Allah a Kadenan nu dunya.

Sekanin (Allah) i bibyag, da kadenan a salakaw sa lekanin, pangeni kanu sa lekanin sa ikhlas sa lekanin su agama, pugi nu su Allah ka sekanin i Ladenan nu dunya.

Edtalu ka (Muhammad) sa kanilan: sinapalan aku sa simban ku i pedsimban nu a salakaw sa Allah sa ulyan na kinawma sa laki nu manga mapayag ebpun sa Kadenan ku, endu sinugu aku nin sa semangkup aku kanu Kadenan nu dunya.

Sekanin (Allah) i minaluy sa lekanu ebpun sa lupa, entupan na mani na entupan a lugu, mawli na palyun kanu den sa wata, mawli na masampay nu su bagel u, mawli na migkatuwa kanu, aden bun matay sa dala egkatuwa, endu masampay nu su ajal nu a napasadan, ka endu kanu egkawngangen.

Sekanin (Allah) i baguyag endu bangimatay, amayka aden kahanda nin na ya nin bu edtalun na pangaden ka na maaden.

Dala nengka mailay su pebpalawa kanu ayatan nu Allah, na panun i kapedsibay nu akal nilan?

Entu ba su papendalbut kanu kitab, endu su inisugu nami kanu manga sinugu nami, na di ebplis na katawan nilan bu.

Su lantay-lantay na kanu tengu nilan, endu su manga sangkali a apuy i inipawik sa kanilan.

Aden antu na guyuden silan kanu mayaw endu lu kanu pegkaleg a apuy.

Mawli na edtalun sa kanilan: endaw su ipedsakutu nu a pedsimban nu.

Pedsimban nu a salakaw sa Allah, ya nilan madtalu: natading sa lekami, endu dala nami silan masimba apya paydu, mamba i kapedtading nu Allah kanu manga kafir a di bangimbenal.

(Edtalun sa kanilan): nan den ba su ipegkalilinyan nu lu sa dunya sa dala kawagib nin, endu kagalaw kanu sa tapik su kamamasela na ginawa.

Ludep kanu sa bengawan sa naraka jahannam sa di kanu makalyu, na ngin den i kawag nin a kandalpan i kanu manga mimamasla.

Edsabar ka (Muhammad) ka su pasad nu Kadenan nengka na benal, ipailay nami sa leka su kaped a siksa nilan, atawaka kapatay nengka bu i kailay nengka lun, ka sya bun tanan silan makambalingan sa lekami.

Endu saben-sabenal a sinugu nami su manga sinugu a nawna sa leka, aden bun sa kanilan i pinanudtul nami sa leka, aden bun da nami panudtula, da sinugu i makapambuwat sa ayat ya tabya na kahanda nu Allah, na amayka mawma su kahanda nin (Allah) na kumukum sa bantang, na lu den ba nalugi su baatil i galebek nin.

Su Allah i minaluy sa lekanu kanu manga binatang a kapagedan nu su kaped, endu pegkanen nu bun su ped.

Endu aden pan katagan nin sa lekanu, endu masampay nu su kahanda nu kanu laleb nu, endu pananggiten kanu sya sa kapuluwan endu sya sa lagat.

Endu ipabpagilay nin sa lekanu su tanda nin, na di nu magaga mungkir.

Ngintu ka di silan lumakaw kanu lupa ka endu nilan mailay i nawli a tyuba kanu manga taw a nawna sa kanilan? A silan pan i madakel i bilangan nin endu silan pan i mabagel endu madakel i manga tanda nilan sya sa lupa, na dala makangguna sa kanilan su manga galebek nilan.

Guna makawma sa kanilan su manga sinugu a nakapananggit sa manga mapayag na nagalaw silan kanu ilmu nilan, di kena ka nakadadsang sa kanilan su siksa a lalaw nu kab-pagungat nilan.

Guna nilan mailay su tyuba nami ya nilan pidtalu: nangimbenal kami sa Allah a isa bu, endu sinangka nami den su ipedsakutu nami.

Na dala makangguna sa kanilan su iman (palityala) nilan sa kinailay nilan kanu siksa, su lalan nu Allah na nawna den kanu manga ulipen, endu nalugi su manga kafir.

Ha-Meem (su Allah i mataw kanu ma’na nin).

Nakatulun ebpun sa malimu a mangampun.

Kitab a inipayag su manga ayat nin a manga hukuman na Qur’an sa basa na Arab kanu manga taw, ka endu nilan katawan.

Papegkalilini a mapakagilek, madakel i minenda ka dili nilan gapanuliman.

Endu pidtalu nilan: nadapengan i pusung nami sa kanu enggatan nu, endu napelen i tangila nami endu aden pakadalung kanu pageletan tanu, na enggalebek ka den ka enggalebek kami den.

Edtalu ka (Muhammad) sa kanilan: saki na manusya aku a pagidsan nu, ipewahi sa laki i satiman bu i Kadenan, na lu kanu edtidtu sa lekanin (Allah) endu pa-ampun kanu sa lekanin, ka su bawgan sa naraka i kana manga mushrik.

Entu a manga taw na di silan menggay sa zakat, endu dala sa ginawa nilan su akhirat ka sinupak nilan.

Saben-sabenal na su manga bamaginugut endu minggalebek sa manga mapya na aden sa kanilan i balas a dala pinda nin.

Edtalu ka (Muhammad): ngintu ka pegkafir kanu sa minaluy sa lupa sa nakaduwa gay, bagumbalan nu sa tagapeda nin, na sekanin i Kadenan nu dunya.

Endu binaluy nin i manga palaw kanu untul nin (lupa) endu pinambarakat nin su lupa endu inukul nin su manga kawyagan sa nakapat gay, sa kanu pegkyug bagidsa kanu entu ba.

Mawli na migkahanda lu sa langit a bel, pidtalu nin kanu langit endu su lupa: paginugut kanu sa palnan a kyug endu tegel, ya nilan nadtalu: inugut nami na palnan a kyug a lilini.

Binaluy nin su pitu lapis a langit sa nakaduwa gay, endu iniwahi nin kanu uman i langit i kumpasan nin, endu pibpalasan nami su dunya kanu manga palitan a bitun i pedtuldu lun, entu ba na atulan nu mapulu a mataw.

Amayka menda silan na edtalu ka: nadtalu ku sa lekanu su kilat a mana su kilat a nakasugat kanu Aad endu Thamud.

Sa kinawma nu manga sinugu sa kanilan na magidsan u entuba a timpu endu su nawna sa kanilan sa da kanu sumimba ya tabya na su Allah, ya nilan pidtalu: upama ka malaikat bu i sinugu na mapya, na kagina ka manusya kanu bun na magidsan tanu bun, na supaken nami su langun na sugu sa lekanu.

Si Aad na mimamasela sya sa lupa sa kawagib nin endu pidtalu nin upama: entayn i makalawan sa lekitanu sa bagel? Dala nilan mailay su Allah i minaluy sa kanilan a muna pan i kabagel nin sa kanilan? Na pigkafiran nilan su manga ayatan nu Allah.

Pinasugatan nami silan sa sambel a sangat i kabagel nin kanu gay a midtundug-tundug, papedtepengan nami sa kanilan i siksa sa dunya a kayaya endu siksa sa akhirat na muna pan, endu dala makadtabang sa kanilan.

Endu si Thamud na tinutulu nami na ya nilan nalilinyan su kapisek kanu tutulu, na sinayab silan na kilat a siksa a makapelusak sabap kanu galebek nilan a kadupangan a pakabinasa.

Endu linepas nami su manga bamaginugut a magilek sa (Allah).

Endu su gay a limuden su manga satru (kuntra) nu Allah lu sa naraka, na silan na bagulinanen nu manga malaikat.

Taman sa amayka nakawma silan na edsaksyan silan nu tangila nilan endu su mata nilan endu su lanitan nilan kanu galebek nilan.

Ya madtalu kanu lanitan nilan na: nginan ka pedsaksiyan kami nu? Ya nilan madtalu: pinadtalu kami nu Allah a napedtalu kanu enggaga-isa endu sekanin i minaluy sa lekanu, paganay na lu kanu bun sa lekanin.

Endu dala nu den muna ipagena su kadupangan nu sa lekanin (Allah) na edsaksiyan kanu na tangila nu endu su mata nu endu su upis nu saguna, ka sekanu na inantap nu i di katawan nu Allah su madakel a galebek nu (sa dunya).

Endu entu ba su antapan nu Kadenan nu a nakalusak kanu sa naka-awa sa alaga nu, nabaluy kanu sa nalugi-lugi kanu.

Apya pan edsabar silan na su naraka bun i dalpa nilan, endu amayka dumawa silan na di den silan makadawa.

Endu pinadtagapeda nami silan sa shaytan a papegkapya sa galebek nilan, magidsan i nawna endu nawli a galebek nilan na mapya i kailay nilan lun, natuman sa kanilan su nadtalu (a siksa) kanu nangawna sa kanilan a jin endu manusya sa silan a manga taw na nangalugi.

Endu pidtalu nu manga kafir: di nu banuliman su Qur’an anan, endu panikut u, ka basi sekanu i tumalaw.

Pananamen nami su manga kafir sa siksa a mapasang, endu balasan nami silan sa muna pan i kawag nin kanu galebek nilan.

Entu ba i balas nu satru (kuntra) nu Allah na naraka, aden pan sa kanilan i dalpa nilan a tatap i balas nin (a siksa) kanu kapedsupak nilan kanu manga ayatan nami.

Endu pidtalu nu manga kafir: Kadenan nami ipailay nengka su timading sa lekami ka i sya nami sa kababan na palu nami ka endu mababa pan silan sa lekami.

Saben-sabenal su silan a midtalu sa: Kadenan nami su Allah, mawli na matidtu, na belutadan nu malaikat (edtalun nilan kanu pebpatay) sa yanin pedtalun: da ka kagilek endu di ka belidu i ginawa nengka, endu pakalilini kanu kanu surga a inibpasad sa lekanin.

Sekami bu i tumiyakap sa kanilan sa uyag-uyag sa dunya endu lu sa akhirat, endu aden sa lekanu i makapiya kanu ginawa nu endu aden sa lekanu i langun na bangenin nu.

Nakabpun kanu bangampun a malimu (Allah).

Endu entayn pan i pinakamapya i kadtalu ebpun kanu entayn i nangambiyat lu kanu Allah endu minggalebek sekanin sa makagkapiya endu pidtalu nin i saben-sabenal na saki na kaped kanu manga Muslim.

Endu di makandalepenga (makapagidsan) su mapya endu su malat, na itulak nengka (Muhammad) sa mapya (su malat) ka sya kanu let nengka endu let nin i kadsatuwan na (mabaluy i entu) sa mana sekanin tagagas (tabangay) a dabpig.

Sa dala egkabalatemuwan kanu entu a ya tabiya ku namedtigkel endu dala egkabalatemwan lun upama di kena sa bagi a tagena.

Na upama matulitul ka ganat kanu shaytan a tulitel na lindung ka kanu Allah ka saben-sabenal entu na sekanin su pakakineg a pinakamataw.

Endu kaped kanu manga tanda nin (Allah) su magabi endu su malamag endu su senang endu su ulan-ulan, endu da kanu bamedsugyud kanu senang endu da kanu bun (bamedsugyud) kanu ulan-ulan, ka pamedsugyud kanu kanu Allah a minaden (sa senang endu ulan-ulan) ka andang na sekanin bu i pedsimban nu.

Na upama mimamasela silan na su kanu pedtyagal sa leka (Muhammad) na pamedtasbih bun silan sa magabi endu malamag sa di silan mangasemu.

Endu kaped kanu manga tanda nin na su kapedsima nengka kanu lupa sa luntana na sa initulun nami lun sa ig na mimbukakal endu mindabuk, na saben-sabenal i su minuyag lun na tangel a makauyag kanu namamatay sa saben-sabenal a sekanin sa uman i enggaga-isa na pakagaga.

Saben-sabenal su manga taw a pedsupaken nilan su manga ayatan nami na da makapagena sa lekami, na ngintu ya mapya su bagulugan sa naraka kanu taw a tematana sa gay a mawli? Enggalebek nu i pegkyugan nu ka su Allah na kailay nin.

Su silan a sinangka nilan su Qur’an sa ulyan na kinawma nin sa kanilan, entu a kitab na mapulu.

Di tumalima sa baatil sa unan sa ulyan, ka nakatulun ebpun sa Allah a mataw mapandadayta a pebpugin.

Da edtalun sa leka (Muhammad) ya tabiya na mana bun su pidtalu kanu manga sinugu a nawna sa leka, na su Allah na kigkuwan sa ampun endu kigkuwan sa siksa a masakit.

Upama bu ka binaluy nami sa di kena basa Arab su Qur’an na ya nilan menem edtalun: upama nya ba ka su kaped a ayat na di kena Arab su kaped menem na Arab, edtalu ka sa kanilan: su Qur’an na tutulu endu gamut, na su bangimbenal na napelen i tangila nin, endu silan na pisek entu ba a manga taw na mawatan silan kanu kapanawag sa kanilan.

Endu saben-sabenal a inenggay nami kanu Musa i kitab, na mimbida-bida silan, upama di kena bu napasad muna su kalima ebpun kanu Kadenan nengka na mapasad den kumukum su pageletan nilan, ka silan na tidtu a panduwa-duwa.

Su taw enggalebek sa mapya na kanu ginawa nin bun, su taw menem a enggalebek sa malat na maytu bun, ka su Allah na di dumupang kanu manga ulipen nin.

Lu bun sa lekanin a Allah ibagendud i kataw sa kutika (harikyamat), sa da pakaliyu a manga unga na kayu ebpun kanu tangitang nin, endu da pegkagingay a babay, endu da embatan nin i di kena sya bun kanu kataw nin, sa gay a tawagen nin silan: endaw den su manga ibapanakutu nu salaki? Na ya nilan madtalu: pinayag nami den seka sa da sa lekami i saksi.

Endu natading den kanilan su andang a ebpamangambiyatan nilan kanu nawna endu natalanged nilan i dala den katilisan nilan.

Di egkasemuwan nu manusya i kabpangeni sa mapya, na upama nasembil sekanin na mawag na kalukutan endu tebpekan.

Endu saben-sabenal a upama pinananam nami bu sekanin sa limu a ganat sa lekami ebpun kanu ulyan nu mamakagkayd a nakasembil lun na saben-sabenal a edtalun nin: nyaba na laki, sa dili ku entapan su kutika (harikyamat) sa tumindeg endu saben-sabenal a upama pinauli aku menem lu ku pedtiyagal sa laki na saben-sabenal i aden sa laki sya sa lekanin i tangel a mapya, na saben-sabenal ipananam nami sa kanilan i siksa a patas.

Amayka pinangalimuwan nami su manusya na tumagkili endu initangka nin su manga takilidan nin endu amayka nasembil sekanin nu mawag na kigkuwan den sa embiyatan a layab.

Edtalu ka (Muhammad): nadsima nu ba i saben-sabenal i entu na andang a ebpun kanu Allah ulyan nin na pinagkapiran nu i entu, na entayn pan i pinakatading ebpun kanu entayn na sekanin sya sa kapapedsalipag a mawatan.

Na di sumala na ipadsima nami bun sa kanilan su manga tanda nami sya kanu manga kawang-kawangan endu sya kanu manga ginawa nilan taman sa mapayag sa kanilan i saben-sabenal i entuba su bantang (Qur’an), endu dala sa leka (Muhammad) i andang entu ku umani enggaga-isa i saksi.

Saben-sabenal su silan antu na penduwa-duwa silan sa kambalatemuwa nilan kanu Kadenan ilan, su Allah na nalangkumin su enggaga-isa.

Ha-Meem (su Allah i mataw kanu ma’na nin).

Ayn-Sin-Qaf (su Allah i mataw kanu ma’na nin).

Namba ipewahi sa leka (Muhammad) endu su nangawna sa lekanu nu Allah, a mapulu a mataw.

Lekanin a Allah su manga langit endu su lupa endu sekanin i mapulu a masla.

Paydu bu i di kapegkalupit nu langit sa gilek sa Allah, su manga malaikat na pedtasbih sa pugi nilan kanu Kadenan nilan endu ibangeni nilan sa ampun sa Allah su taw nu lupa, sekanin a Allah i bangampun a malimu.

Su manga kafir na simimba sa salakaw sa Allah na sekanin bu i mataw lun, da sa leka (Muhammad) i tuganulen nengka silan.

Endu namba i kinawahi nami sa leka (Muhammad) sa kanu Qur’an sa basa na Arab, ka endu nengka kapakagilekan su taw sa Makkah endu su embala-bala lun, endu su gay a kabulig a dala ka-ebplis nin, su kaped a taw na lu sa surga, su kaped na lu sa pegkalaw-kalaw a apuy.

Upama ka ya bu pigkahanda nu Allah i satiman bu i agama nu manga taw na magaga nin, ugayd na paludepen nin kanu limu nin su pegkyugan nin, su manga dupang na dala tumuganul sa kanilan, endu dala tumabang sa kanilan.

Ugayd na minumbal silan sa salakaw sa Allah a tumuganul sa kanilan, su Allah i pedtuganul ka sekanin a Allah i bangimatay a banguyag, endu sekanin i endaw i kyug nin na kagaga nin.

Apya ngin ipembibidayan nu na lu bu sa Allah kukumen ka sekanin a Allah i pedsaligan ku endu sekanin a Allah i bagulyan ku.

Sekanin a Allah i minaluy sa manga langit endu lupa, endu binaluy kanu nin sa duwa kabyas, endu su manga binatang a duwa kabyas, sa pegkadakel kanu, dala pagidsan nu Allah, ka sekanin a Allah na pakakineg a pakailay.

Lekanin a Allah su gunsi nu manga langit endu su lupa, kalagan nin sa rizki su pegkyugan nin, pakasimpitan nin su pegkyugan nin, sekanin a Allah i mataw sa langun na enggaga-isa.

Inipayag nin sa lekanu su agama a pidtutuma nin kani Nuh, endu namba ini-wahi nami sa leka (Muhammad) sa pidtutuma nami bun kanu Ibrahim endu su Musa endu su Eisa, sa patindeg nu su agama na da kanu embida-bida, mawgat kanu manga mushrik i bagenggatan nu sa kanilan a kapaka-isa isa kanu Allah, su Allah i mataw kanu kabpag-isa sa lekanin endu tutulun nin su pabpag-isa sa Allah su taw a taliman nin su inugut kanu Allah.

Da embida-bida silan ya tabya na ulyan na kinawma na ilmu sa kanilan, sabap intu sa dengki, upama di kena bu nawna i kitab ebpun kanu Kadenan nengka sa lu ba su akhirat, na su manga kafir na nabinasa den sya sa dunya, su manga nakawaris sa kitab (Yahudi endu Nasrani) a nawna sa kanilan, na penduwa-duwa silan.

Su kapaka-isa-isa i pangenggat nengka, endu edtidtu ka sa suguwan sa leka, di ka munuti i kyug na ginawa nengka, ya ka edtalu: nangimbenal aku sa initulun sa laki a kitab, endu sinugu aku sa embantangan aku kanu pamageletan, su Allah i Kadenan ku a Kadenan nu, lekami den i lekami na lekanu den i lekanu, dala ukag tanu, su Allah i lumimud sa lekitanu, endu lu sa lekanin i kadsunudan.

Endu su manga taw a pebpalwa bun sa agama nu Allah sa ulyanan (a kinaludep nilan sa Islam) endu tindeg nilan na batil lu sa Allah, na nanget sa kanilan su lipunget, endu kanilan su siksa a sangat i kapasang nin.

Su Allah i napatulun kanu kitab (Qur’an) a haqq endu timbangan, endu di nengka katawan (Muhammad) na tabya bun ka masupeg den i gay a mawli.

Pedtagadan nu manga taw a di bangimbenal (sa gay a mawli) su manga bamaginugut na kagilekan a benal silan endu katawan nilan i bantang, su manga taw menem a penduwa-duwa kanu gay a mawli na silan i natadin sa mawatan.

Su Allah i pedtyakap kanu manga ulipen nin, pe-rizkiyan nin su kagkahanda nin, sekanin i mabagel a mapulu.

Su taw a yanin kahanda kanu galebek nin na akhirat, na umanan nami sa balas, su taw menem a ya nin kahanda na dunya na enggan nami sa paydu, ugayd na dala den umun nin lu sa akhirat.

Aden manga shaytan upama manga kafir a minumbal sa kanilan sa agama, a dala a benal isugut nu Allah? Upama di kena bu aden gay a kagkukum na nabinasa den silan, endu su manga kafir na kanilan i siksa a malipedes.

Mailay nengka su manga darwaka a penggilek kanu lalaw nu galebek nilan, a di ebplis na makabetad sa kanilan, su manga bamaginugut a minggalebek sa mapya, na silan i pegkakalini kanu manga surga a aden sa kanilan endaw i pegkyugan nilan, entu ba i badtugan a masla.

Entu ba su pegkalilinyan nu Allah kanu manga ulipen nin a bamaginugut endu minggalebek sa mapya, edtalu ka (Muhammad) kanilan: di kena aku pegkwa sa lekanu sa sukay, ugayd na kagkalimwa nu edsuled, endu su taw a enggalebek sa mapya na umanan pan su kapya nin, benal su Allah na bangampun a barasukur.

Ya nilan kadtalu: initebu kanu Allah (i kadtalu ni Muhammad) a kalbutan, na upama pigkahanda nu Allah na tumbukan nin su pusung nengka sa kadsabar endu punasen nu Allah su batil sa yanin papamadayan na bantang, na namba i manggula, endu padtakenan nin su Allah na katawan nin i natagu kanu pusung nilan.

Sekanin a Allah i pedtalima sa tawbat nu manga ulipen, endu pasagadan nin su manga malat endu katawan nin i manga galebekan nu.

Endu taliman nu Allah su manga bamaginugut a manga mapya i galebek nin, endu umanan nin silan kanu limu nin, su manga kafir menem na kanilan i siksa a sangat i kapasang nin.

Umana bu ka pinandayan nu Allah sa rizki su manga ulipen nin na sumagad i galebek nin sya sa lupa, ugayd na ipedtulun nin su naukul a kahanda nin a makagkapya sa manusya, ka sekanin na katawan nin sa mapayag-masulen su ulipen nin.

Sekanin a Allah i pabpagulan sa ulyan a tinabpekan silan, endu ipebpayapat nin su limu nin, ka sekanin a Allah i pedtuganul a pebpugin.

Endu ped kanu manga tanda nu Allah su kinabaluy sa langit endu lupa, endu su pinambwat nin a melanap-lanap, na sekanin a Allah amayka ya nin kahanda i mabulig tanan na kagaga nin.

Endu su makasugat sa lekanu a tyuba na lalaw nu kadarwakan, endu bagampunen nu Allah i madakel a kadusan.

Endu dala kapagaluyan nu sya sa lupa, endu dala salakaw sa Allah a kasaligan endu makadtabang.

Endu ped kanu manga tanda nin a Allah su manga kapal (barku) sa lagat na mana den palaw.

Upama ya nin kahanda i patalenen nin su sambel na makatana kanu liyawaw nu lagat, langun a namba na tanda sa kanu Allah sya kanu manga taw a barasabar a barasukur.

Atawaka ya nin kahanda i keggemen nin sabap kanu kadusan (na magaga nin), ugayd na mangampun su Allah sa madakel.

Endu katawan nin (Allah) i dala kapalaguyan nu sa siksa sabap sa pebpalawa kanu ayatan nu Allah.

Langun na inenggay sa lekanu na pegkalilinyan bu sa dunya, langun nu na lu sa Allah i labi kapya nin, endu ya nilan pedsaligan na su Allah.

Silan a manga taw na pedsanggila sa manga kadusan, endu su manga maledsik a palangay, endu amayka nalipunget silan na ampunen nilan su nalipungetan.

Endu tinalima nilan su Kadenan nilan, endu initunay nilan su sambayang, endu kapagumpung i galebek nilan, endu kaped kanu rizki nilan na ipambaranggya (penggastun) nilan sa kasuwatan silan nu Allah.

Endu silan a manga taw na amayka dinupang silan na sumuli silan sa lalan a kasuli (bantang a kasuli).

Endu su satiman a mawag na satiman bun a mawag, ugayd na amayka ampunen na lu sa Allah i balas a masla, su Allah na di nin balasan sa mapya su kadupangan katalimbul.

Endu su nakasuli den sa kinadupang sa lekanin, na dala den ped a pakaydan kanu dinumupang.

Saben-sabenal a ya den lalan a pakaydan lun na su manga taw a pindupanganin su manga taw, endu penggalebek sya sa dalpa sa dala kawagib nin, sa kanilan su siksa a sangat i kasakit nin.

Endu su taw a midsabar endu inampun nin (dala den suli) entuba i labi i kapya nin.

Endu su tadingen nin i ginawa nin sa Allah na dala tumaganul sa lekanin a salakaw sa Allah, su manga taw a dupang na upama mailay nilan su siksa nilan na ya nilan madtalu: nginya a den bun lalan a kambalingan sa dunya?

Endu mailay nengka silan kanu kawlug sa kanilan, na kagilekan gayd silan, nakalusak silan, edsilap-silapan nilan su apuy, edtalun nu manga bamaginugut i silan a manga taw a nangalugi nilan i ginawa nilan endu kadakel nilan sa gay a mawli, saben-sabenal na kanu manga dupang i siksa sa dala kadtamanan nin.

Endu da kasaligan a tumabang sa kanilan a salakaw sa Allah, endu su taw a tadingen nu Allah na dala lalan a katutulu sa lekanin.

Talima nu su kapakaisa-isa sa Allah, sa unan a di pan makawma su gay a mawli a dala makatulak lun (sa lekanu), dala sa lekanu i kalumpingan kanu kawma nin, endu dala makadsabek sa lekanu.

Amayka menda silan na kapapedsampay bu i leka, di kena nengka pedtuldun silan, ya bu leka na kapedsampay, endu amayka pananamen nami su manusya sa limu ebpun sa lekami na malilini gayd, amayka nasugat a mapasang sabap sa kadarwakan nin bun na egkafir menem su manusya.

Kanu Allah su kapegkamilik kanu manga langit endu lupa, baluynin i kahanda nin, engganin sa babay (a wata) atawaka mama (a wata) su kagkahanda nin.

Atawaka padtagapedan nin i babay-mama (a mga wata), endu baluy nin menem i bayas, ka sekanin (Allah) i mataw a pakagaga.

Endu dala sa manusya i embityala nu Allah ya tabya na wahi atawaka sya sa aden pan dalinding nin atawaka sumugu sa rasul a luba makawkit su wahi sa endaw i kahanda nin, ka sekanin (Allah) i mapulu a mataw.

Endu maytu ba ikiniwahi nami sa leka (Muhammad) kani Jibril sa kasuguwan nami, di nengka gatawan i kitab endu iman, ugayd na binaluy nami a sigay, ipedtutulu nami kanu magkahanda nami kanu manga ulipen nami, na seka na matutulu nengka su lalan a matidtu.

Lalan nu Allah kigkuwan sa manga langit endu lupa, na saben-sabenal a lubun sa Allah i kadsunudan nu langun nu pakarajan nin.

Ha-Meem (su Allah i mataw kanu ma’na nin).

Idsapa ku (Allah) su kitab (Qur’an) a mapayag.

Saben-sabenal a binaluy nami sa basa Arab, ka malemu-lemu i katagwan silan na akal.

Endu su Qur’an na lu sa Lawh Al-Mahfudh a mapulu a mindadayt.

Ya nu kalilinyan na padtadayn kanu sa di kanu pangindawn, di kanu sugun, dikanu sapalan, kagina ka pendarwaka kanu.

Madakel i sinugu nami a manga nabi a nangawna sa leka (Muhammad).

Endu da nabi a di kena pagungaten u kawm nin.

Bininasa nami su muna i kabagel nin kanu manga taw na naypus den su upaman u manga taw a darwaka, na maytu bun ba i kabinasa kanu mawli.

Endu amayka idsan nengka silan (Muhammad) u entayn i minaluy sa kanu manga langit endu lupa, ya nilan edtalun: su Allah a mapulu a mataw.

Na binaluy nin sa lekanu su lupa sa nabelat endu binaluy nin sa lekanu i manga lalan ka endu malemu sa lekanu i katuntul nu.

Endu sekanin a (Allah) i napatulun ebpun sa langit su ulan sa nakaukul endu pinapayapat nin kanu dalpa a minatay, maytu bun ba i kalyu nu sa kubur.

Endu sekanin (Allah) i minaluy kanu manga embalangan, endu binaluy nin sa lekanu su bagedan sa lagat endu su manga binatang a bagedan nu.

Upama ka makadtakena kanu sa kanu bigkugung nin na madtalu nu i mahasuti su Allah a pinandaya nin sa lekami i nya ba ka da kagaga nami lun upama di kena bu su Allah.

Endu sekami na lu kami bun embalingan sa Allah.

Endu binaluy nu manga mushrik su kaped kanu ulipen nu Allah a wata nin su malaikat, saben-sabenal su manusya na kafir sa mapayag.

Pidtalu nu ya kanu Allah na manga babay, lekanu i manga mama.

Amayka madtalu sa kanilan (a manga mama) i mimbata su kaluma nilan sa (wata) a babay na migkalibedteng i byas nin, napenu na lidu na ginawa.

Di mapakay sa Allah su bagumbalan nin sa palas na entu ba i lekanin, endu di makagaga i babay sa kapambuwat sa hujjah sa mana su mama.

Endu binaluy nilan su manga malaikat a babay inunta na ulipen nu Allah, ngintu nailay nilan i kinabaluy kanu malaikat? Isulat nu su kadtalu nilan, endu idsan silan salta su siksa.

Kadtalu nilan pan: upama di kena bu kyug nu Allah a di tanu masimba i barahala, na dala den mun kataw nilan a salakaw sa kandalbut.

Atawaka aden kitab nilan a nawna sa Qur’an a silan i pegkamal lun.

Ya nilan madtalu na nailingan nami kanu manga kalukesan nami na pedtuntulen nami silan.

Endu mamba ka dala sinugu nami a nawna sa leka sya kanu dalpa a bangindaw a di kena ya pidtalu nu manga dupang: nya na bagunutan nami su manga lukes nami kanu agama nilan na bagunutan nami silan sa nya ba a kamal.

Pidatlu nu sinugu: apya ya pan mapya i nait ku kanu manga agama nu kalukesan nu? Ya nilan kadtalu: pegkapiran nami i langun a nait nu.

Sinulyan nami silan, na ilayka i manggula nu papendalbut.

Endu pidtalu nu Ibrahim kani ama nin endu su taw nin: saki (Ibrahim) na lepas aku sa kanu pedsimban nu.

Ya tabya na su minaluy sa laki, ka sekanin i timutulu sa laki.

Endu binaluy nin su kapaka-isa kanu manga mawli a taw nin sa mawli sa lekanin, ka basi kambalinganan (nu kafir sa Makkah su agama nu Ibrahim).

Ugayd na pinandaya ku silan, taman sa nakawma sa kanilan su haqq endu su sinugu a mapayag.

Guna makawma su haqq na ya nilan kadtalu: namba na sih’r, endu sekami na egkapiran nami i namba a sinugu.

Endu pidtalu nilan pan: upama ka sya nakatulun su Qur’an sa duwa kataw a mama (isa sa Makkah, isa sa Taif) na mapya gayd (di kena san kani Muhammad).

Ngintu silan i pembad kanu limu nu Kadenan nengka? Sekami (Allah) na pimbad nami su kawyag nilan sya sa dunya, endu inupulu nami sa pangkatan su ped sa kanilan na sandagen nu isa su ped nin, su limu nu Kadenan nengka (Muhammad) na ya labi i kapya nin kanu pagigimuwan nilan.

Endu upama di kena bu matimu su taw sa ka-kafir sa Allah, na baluyn nami kanu migkafir sa Allah i pila ka atep a walay nin, endu su panikan nin sa lu ba silan mamanik.

Endu aden kanu manga walay nilan i manga bengawan endu manga kantil a pilak a sandangan nilan.

Endu su manga palas, langun nu entu ba na pegkalilinyan bu sa kawyag sa dunya, endu su akhirat na ya pan mapya kanu manga taw a magilek sa Allah.

Endu su taw a embalawagan nin su Qur’an na padtagapedan nami sa shaytan a namba i pakat nin.

Endu saben-sabenal na su shaytan i timading sa lekanin kanu tutulu, endu ga-antap nilan i silan i gatutulu.

Taman sa amayka nakawma su gay a mawli na ya nin madtalu na, nya ba makatangka aku sa leka, sa mana su katawan nu sebangan-sedepan, ngin den a kawag a tagapeda.

Endu dala katagan nin su sendit saguna a gay kanu kinasakutu nu, sekanu endu su shaytan na simbul kanu san sa siksa.

Di nengka matutulu su bisu endu su pisek, endu su taw a mapayag den i kinatading nin.

Endu imatayan nami seka (Muhammad) ka endu nengka mailay i kasuli nami sa kanilan.

Atawaka ipailay nami sa leka sya sa dunya su inibpasad sa kanilan a siksa na magaga nami.

Kamali ka su iniwahi nami sa leka, ka saben-sabenal na seka na nan ka sa lalan a matidtu.

Endu saben-sabenal a panduwan sa leka endu su manga taw nengka, na di ebplis na kaidsan kanu bun.

Endu idsa nengka kanu nawna sa leka a sinugu nami, upama ngintu inumbalan nami silan sa salakaw sa Allah (barahala) a simban nilan.

Endu pina-it nami su Musa kanu manga ayatan nami lu kanu Fir’awn endu su manga kasaligan nin, pidtalu (nu Musa): saben-sabenal a saki na sinugu aku nu kadenan nu dunya.

Guna makawma sa kanilan su manga ayatan nami na kena ka pidtatawanan nilan bu su Musa (endu su manga ayatan).

Endu dala inipailay nami sa kanilan a tanda a di kena masla pan kanu ped nin (kanu nawna lun) endu tinyuba nami silan sa siksa ka basi magumbaya silan.

Pidtalu nilan: seka (Musa) na mategel sa sih’r pangeni ka sa Kadenan nengka i pambuwaten nin i pasadin sa leka ka matutulu kami.

Guna nami ibagawa sa kanilan su siksa a nakasugat sa kanilan na binaluba nilan menem su pasad nilan (a semimba sa laki).

Endu pinapanawag nu Fir’awn kanu manga taw nin: ngintu di kena ba saki i pendatu sa Mis’r? Endu nya su manga ig a pelagilay kanu kababan ku, ngintu di nu gailay?

Endu gailay nu saki i mapya (kani Musa) ka malubay sekanin, na dipan gayd makabales edtalu.

Upama ka mamba ka mimbalegkas sa bulawan atawaka mimakuta sa bulawan atawaka ka namba ka aden makawma a malaikat amayka benal a makadsaksi sa lekanin.

Pinamagisu nin su taw nin, na pinaginugutan nilan kagina silan a manga taw na faasiq silan tanan.

Guna nilan pedtalsaka su ikalipunget nami na sinuliyan nami silan, a manga taw na Faasiq silan tanan.

Binaluy nami a indawan kanu nangawna, endu upaman kanu gangawli.

Endu guna makambuwat su wata nu Maryam (su Eisa) a upaman na su manga taw nengka na pedtatawa bu silan.

Endu pidtalu nilan: ngintu ya mapya su manga kadenan tanu atawaka sekanin (Eisa)? Da pembuwatan nilan a di kena kabpalawa sa leka kagina silan i tagukagen.

Da sa lekanin (Eisa) ya tabya na ulipen a inikalimu nami endu binaluy nami sekanin a upaman kanu tupu nu Israel.

Endu upama pigkahanda nami bu sa ya nami baluyn a taw na dalpa a nya i malaikat a sambi nu, na simban aku nilan na binasan kanu nilan.

Endu saben-sabenal (si Eisa) i tanda nu kabangkit sa dunya, na da kanu penduwa-duwa endu unuti aku nu ka nan su lalan a matidtu.

Endu da kanu enggula sa kasapalan kanu nu shaytan, ka saben-sabenal su shaytan na satru (kuntra) nu a mapayag.

Guna makawma su Eisa a nakapananggit sa mapayag, ya nin pidtalu: saben-sabenal a nakawma aku sa lekanu sa nabi aku, endu ipayag ku su ped a pimbibidayan nu, endu ikagilek nu su Allah endu paginugunuti aku nu.

Saben-sabenal su Allah i Kadenan ku a Kadenan nu bun, na simba nu sekanin, namba i lalan a matitdu.

Na mimbida-bida su lumpukan nu manga taw, su bawgan sa naraka i makwa nu manga kafir a siksa nu gay a mawli a masakit.

Da pagangatan nilan ya tabya na gay a mawli sa makatekaw kanilan sa di nilan madsagipa.

Su edtatagapeda kanu entu ba a gay na mamagukag (midtatagapeda sa malat) ya tabya na su magilek sa Allah.

Hay sekanu anan a manga ulipen ku da gilek nu saguna a gay endu da sa lekanu i malidu i ginawa nu (di kanu masiksa).

Silan a manga taw a nangimbenal kanu ayatan nami na Muslim silan.

Ludep kanu sa surga taman kanu manga kaluma nu sa malilini kanu.

Gabalibet silan a manga tagayan a bulawan endu kendi, endu lu sa dalem na surga su kalilinyan nu ginawa endu su (kalilinyan nu) mata, endu sekanu na di kanu den makalyu sa surga.

Endu entu ba su surga a pinawarisan sa lekanu a manga bamaginugut sabap kanu galebek nu a nasuwatan nu Allah.

Aden manga unga na kayu a madakel a mimbalang-balang a pegken nu.

Saben-sabenal kanu manga dupang na lu silan sa naraka, tatap den silan sa naraka.

Di kapegkagan silan sa siksa endu silan na dili den makadtalu.

Endu di kena nami silan dinupang, ugayd na silan i mindupang.

Endu tumawag silan kanu Malik (malaikat a pedtuldu sa naraka): pangeni ka i imatayan kami den u Kadenan nengka, tigin: san kanu den ba ka dili kanu den makalyu.

Saben-sabenal a initalingguma nami sa lekanu su haqq, ugayd na ya madakel sa lekanu na kabensyan nu su haqq.

Atawaka tinegkes nilan (ibagena nilan) i kapakayd nilan (kanu Muhammad) na aden bun papegkaydan sa kanilan.

Atawaka ya nilan antap na di nami gakineg su masulen nilan endu su kapagedunga nilan, kena ka su manga sinugu nami na ipedsulat nilan i galebekan nilan.

Edtalu ka (Muhammad): amayka aden wata nu Allah (sa mana kadtalu nilan) na saki i semimba lun.

Mahasuti su Kadenan nu manga langit endu su lupa a Kadenan nu Arsh sa kanu langun na pedtalun nu manga mushrik.

Pasagadi ka silan kanu baatil a kalilinyan nilan endu kandadalemet bu, taman sa mawma nilan bun i gay nilan a nakabpasad sa kanilan (siksa).

Endu sekanin i Kadenan lu sa langit endu sya sa lupa, endu sekanin i mataw sa masulen endu mapayag.

Endu mahasuti su Allah kigkuwan kanu manga langit endu lupa endu su pageletan nu langit-lupa endu sekanin i mataw sa kawma na gay a mawli, endu lu bun sa lekanin i kadsunudan.

Endu da kamilikan nu pedsimban nilan a salakaw sa Allah makashafa’at ya tabya na su midsaksi sa bantang, endu katawan nilan bun.

Endu idsan nengka silan upama entayn i minaluy sa kanilan, na ya nilan bun edtalun: su Allah, na ngintu ka pendalbut pan silan.

Endu inimbuku nin sa Allah i saben-sabenal na nya a manga taw na dili mangimbenal,

Tigkeli ka silan, endu ya ka edtalu na kalilintad (ka mawma nilan bun i gay a mawli) na katawan nilan bun.